བསྙེན་ཟིན།
ན་མོ་གུ་རུ་ཨཱཀྴ་ར་བཛྲ་ཡ། གྲོ་ལོད་རྩ་གསུམ་གྱི་དབང་རྒྱས་པ་སྐུ་མཆོག་ལུགས་སམས། བསྡུས་པ་ཆོས་དབང་ལུང་ལེགས་པར་ཐོབ་ཅིང་དམ་ཚིག་ལ་གནས་པས་བསྙེན་པའི་གཏོང་ཚུལ་ནི་སྒྲུབ་རྟེན་རྩ་གསུམ་གོང་གཏོར་ཚད་ལྡན་དུ་བཅའ་ཞིང་། ཐོག་མར་བླ་མ་སྒྲུབ་པ་ལ་བགེགས་གཏོར་སྦྱིན་ཅིང་གནས་བདག་ལ་དཀར་གཏོར་ཕུལ། དྲག་པོ་རྩལ་གྱིས་དབུ་ནས་བཟུང་། བཟླས་པའི་བར་སྤྱན་འདྲེན་སྔགས་བརྒྱ་ཕྲག་ལ་སྤྱན་འདྲེན་དམིགས་པ་དང་། དངོས་གཞི་བཟླས་དམིགས་བཅས་བཟླས་པ་གང་འགྲོ་ཐུན་མཐར་དབྱངས་གསལ་རྟེན་སྙིང་ཡིག་བརྒྱ་སྦྲེལ་བ་ལན་གསུམ་བརྗོད་ནས་ཚེ་སྒྲུབ་ཤོག་ཕྲན་མཐར་ཐུན་བསྡུ། མཐར་བསྔོ་སྨོན་སོགས་བྱ་ཞིང་སྤྱོད་ལམ་ལ་འཇུག་པ་སྟེ་ཐུན་བཞིར་བྱེད་བའི་སྔ་ཐུན་དང་པོའོ། །ཐུན་གཉིས་པའང་དེ་དང་འདྲ། ཐུན་གསུམ་པར་ཐུན་མཐར་གྲོ་ལོད་ཏྲཀྴད་གཉིས་ཀྱི་ལས་བྱང་དང་། རང་གི་ཆོས་སྲུང་
གཞན་གྱི་གཏོར་ཆོག་དགོས་རིགས་རྣམས་བྱ། ཕྱི་ཐུན་བཞི་པར་སྔ་ཐུན་ཇི་ལྟ་བ་འཇོག །ཐུན་རྗེས་མ་རྣམས་དང་ཉིན་གཞན་དུ་མཚམས་སྲུང་། ཧཱུྃ༔ བཀའ་བརྒྱུད་བླ་མའི་བྱིན་རླབས་དང་སོགས་ནས་འདོན་པ་ལས་དཀར་བགེགས་བཏང་མི་དགོས། དེ་ལྟ་བུ་ཡུན་གང་གཅོག་དང་བསྙེན་ཚད་གཞུང་གསལ་ཐོད་ཕྲེང་རྩལ་འབུམ་ཕྲག་གསུམ་ཡིན། །བཞི་འགྱུར་གྲུབ་ན་འབུམ་ཕྲག་བཅུ་གཉིས་སོ། །བླ་སྒྲུབ་མཚམས་སུ་སྒྲུབ་པ་གྲོལ་དགོས་ཆེ། །གྲོལ་ཉིན་ཡར་ངོའི་གཟའ་སྐར་ལེགས་པར་སྔ་ཐུན་རྫོགས་པ་དང་། གྲོ་ལོད་དང་ཏྲག་ཤད་ཀྱི་ལས་བྱང་གཏོང་། རྗེས་ཀྱི་རིམ་པ་དབང་དང་དངོས་གྲུབ་ལེན་པ་ནི། ཨོཾ་ཨཱཿཧཱུྃ༔ བླ་མ་རིག་འཛིན་ལྷ་ཚོགས་ཀྱི། སོགས་དབང་ལེན་ཅིང་གཏོར་མ་གནས་གསུམ་དུ་འཇོག །ཨོཾ་ཨཱཿཧཱུྃ༔ རྒྱལ་བ་རབ་འབྱམས་ཐམས་ཅད་ཀྱི༔ སྐུ་ཡི་བྱིན་བརླབས་དངོས་གྲུབ་ཐོབ༔ སོགས་ཀྱི་བདུད་རྩི་དང་ཚེ་རྫས་ལ་རོལ་ཞིང་དངོས་གྲུབ་
བླངས་མཐར་མཆོད་པ་ཁ་གསོ་ཞིང་། སྐུ་གསུམ་བླ་མ་མཁའ་འགྲོ་ལ༔ སྣང་སྲིད་ཡོངས་དང་། སྐུ་གསུམ་བླ་མ་མཁའ་འགྲོ་ལ༔ གཟུགས་སྒྲ་སོགས་ཀྱི་མཆོད། ཆོས་དབྱིངས་སྐྱེ་མེད་སོགས་ཀྱིས་བསྟོད། ཧོཿ སྐུ་གསུམ་བླ་མ་མཁའ་འགྲོའི་ཚོགས༔ བདག་ལ་གསན་ཅིང་སོགས་ཀྱི་མཐར་ཡིག་བརྒྱས་ནོངས་པ་བཤགས། བསྡུ་རིམ་དང་ཀུན་བཟང་གི་བཀྲ་ཤིས་བྱའོ།། ༈ །།དེ་ནས་ཡི་དམ་གྲོ་ལོད་ཀྱི་བསྙེན་སྒྲུབ་ནི། སྔོན་བཞིན་བླ་མའི་ལས་བྱང་བཟླས་པ་ཤོག་ཕྲན་དང་བཅས་རྫོགས་ནས། གཞུང་དུ། བླ་མ་འོད་ཞུ་ཡི་དམ་བསྒོམ། ཞེས་གསུངས་པ་ལྟར། ཧཱུྃ་ཧཱུྃ་ཧཱུྃ། གདོས་བཅས་ལུས་སྣང་ཞེས་པ་ནས་བསྟོད་པ་རྫོགས་མཐར། ཐོག་མར་སྤྱན་འདྲེན་གོང་འོག་སྔགས་གང་མང་། དེ་ནས་ཨ་རྩིག་ཤམ་མེད་ལ་གྲངས་བཟུང་། ཐུན་མཐར་ཤམ་བུ་ཅུང་ཟད་རེ་བཏགས། ཐུན་མཐར་དབྱངས་གསལ་རྟེན་སྙིང་ཡིག་བརྒྱ་བརྗོད་ཐུན་མཚམས་སུ་གཏོར་
མ་གཉིས་བཤམས་ལ། མཚན་ལྡན་དུམ་བུ་གཅིག་པའི་ནང་༔ བ་ལིང་ཟུར་གསུམ་ཡེ་ཤེས་བདུད་རྩིར་གྱུར༔ ཨོཾ་ཨཱཿཧཱུྃ་ཧ་ཧོ་ཧྲཱིཿཞེས་པས་བྱིན་གྱིས་བརླབས། མཆོད་པ་བྱིན་བརླབ་ཀྱི་གོང་དུ་གཏོར་འབུལ་བཤམས་ཤིང་བྱིན་བརླབས་ཀྱི་དམིགས་པས་ཁྱབ་ཡོད་ན་དེ་གས་ཆོག །མེད་ན་རང་གར་གཏོར་མ་འབུལ་བ་སྙིང་པོ་མེད་དེ། ཡང་ན་གཏོར་མ་བདུད་རྩི་དང་། ཡང་ན་དགྲ་བགེགས་ཀྱི་ཤ་ཁྲག་བདུད་རྩིར་བྱིན་གྱིས་བརླབས་ནས་འབུལ་དགོས་པའི་ཕྱིར་རོ། །མཐར་གཏོར་མ་གསེར་སྐྱེམས་བཅས་འབུལ། ཁྲོ་རྒྱལ་འབར་བ་སོགས་ཀྱི་བཟློག་དམིགས་བྱ། བསྔོ་སྨོན་བྱས་ཏེ་སྤྱོད་ལམ་ལ་འཇུག་ཐུན་བཞིར་བྱེད་པའི་སྔ་ཐུན་དང་པོའོ། །ཐུན་གཉིས་པ་སོགས་ཕྱི་མ་རྣམས་ལ་མཆོད་གཏོར་གསོ་ཞིང་དྲག་པོ་རྩལ་གྱི་མཚམས་སྲུང་ནས་འདོན་པའང་། སྐྱབས་སེམས་བྱིན་དབབ་མཆོད་རྫས་བྱིན་རླབས་སོགས་ནས། གྲོ་ལོད་བསྐྱེད་རིམ་གདོས་བཅས་ལུས་
སྣང་བོར་ནས་སོགས། བཟླས་དམིགས་གསལ་བས་བཟླས་པ་དང་གཏོར་འབུལ་བྱ་བ་སོགས་སྔར་ལྟར་རོ། །ཐུན་གསུམ་པ་སྔར་ལྟར་ལ། ཐུན་མཐར་ཏྲཀྴད་ལས་བྱང་བསྐང་བ་དང་། གཞན་གཏོར་ཆོག་དགོས་རིགས་རྣམས་བྱ། ཐུན་བཞི་པར་གཏོར་འབུལ་མཐར་བསྔོ་སྨོན་བྱས་ལ་འཇོག །གྲངས་བསྙེན་ཨ་རྩིག་འབུམ་ཕྲག་གསུམ། ཤམ་བུ་ཅན་འབུམ་ཕྲག་གཅིག་གོ། ༈ །།དེ་ནས་ཆོས་སྐྱོང་སྒྲུབ་པ་ལ་བླ་མ་ཡི་དམ་གྱི་ལས་བྱང་བཟླས་པ་ཅུང་ཟད་རེ་བྱས་ནས། ཨོཾ་ཨཱཿཧཱུྃ༔ པདྨ་ཉི་ཟླའི་གདན་སྟེང་དུ༔ སོགས་གསང་བདག་བདག་བསྐྱེད་དང་། མདུན་བསྐྱེད་གཞུང་བཞིན་བསྟོད་པ་མཐར་སྤྱན་འདྲེན་གྱི་སྔགས་ཅི་མང་དང་། རྩ་སྔགས་སྤྱི་དྲིལ་བསྒྲག་མ་ལ་གྲངས་བཟུང་། ཐུན་མཐར་དབྱངས་གསལ་རྟེན་སྙིང་ཡིག་བརྒྱ་བརྗོད། གཏོར་མ་བཤམས་ལ་འཁོར་འདས་རང་གྲོལ་གྱི་གཏོར་འབུལ་དང་བསྔོ་སྨོན་གྱི་སྤྱོད་ལམ་ལ་འཇུག་
སྟེ་སྔ་ཐུན་དང་པོའོ། །ཐུན་ལྷག་མ་རྣམས་ལ་དྲག་པོ་རྩལ་གྱི་སྐྱབས་སེམས་བྱིན་དབབ་མཆོད་པ་བྱིན་རླབས་གྲུབ་ནས། གསང་བདག་བསྒོམ་བཟླས་སོགས་ནས་སྔར་ལྟར་རོ། །དེ་ལྟར་ཞག་རེར་ཐུན་བཞི་བྱ་ཞིང་། བསྙེན་ཚད་འབུམ་ཕྲག་བཞི། གཞན་རྣམས་གང་འོས་དང་སྒྲུབ་ཞག་མང་པོར་སོང་ནས་རྦད་སྔགས་ཀྱང་མང་ཙམ་བཟླ། གྲངས་བསྙེན་རྟགས་མཚན་རྫོགས་ནས་ལས་སྦྱོར་རྒྱས་པ་གཏོར་ཟློག་བྱ། །བསྡུས་པ་དགོངས་ཐུན་སྐབས་ཐུན་གཏོར་དང་ལིང་ག་བྲན་ལ། དགུག་གཞུག །ན་མོ་དཀོན་མཆོག་གསུམ་དང་སོགས་བཟློག་གཞུང་གི་ལྷ་དབྱེ། ཕུར་གདབ་གནས་སྦར་བཅས་བསྒྲལ་ཞིང་། ལིང་རོ་ཤ་ཁྲག་གཏོར་མ་བླུག་ལ་ཟློག་གཞུང་གི་བྱིན་བརླབ༔ དམ་ཉམས་ལས་ངན་རུ་ཏྲ་ཡི༔ སོགས། ཡེ་ཤེས་བདུད་རྩིར་གྱུར། ཅེས་དང་སྤྲོ་ན་ལམ་སེལ་དཀར་གཏོར་བཏང་། ཧཱུྃ༔ མ་ཧཱ་ཀཱ་ལ་མཐུ་བོ་ཆེ༔ སོགས་རྦད་བསྐུལ་གྱིས་གཏོར་མ་ཕྱི་རོལ་ཏུ་
སྒྲ་གཅན་ཐེབ་ཕྱོགས་སུ་ཟོར་དུ་འཕེན་ཅིང་རྦད་སྔགས་བཟླ། ཡང་ན་ཞལ་ཆེམས་ལས་འགྱེད་གྱིས་གཏོར་མ་འཕང་ཀྱང་ཆོག །ལས་སྦྱོར་གྱི་ཞག་གྲངས་ནི་གོང་གི་སྒྲུབ་ཞག་མང་ཉུང་དང་གལ་ཆེ་ཆུང་ལ་དཔག་གོ། །སྒྲུབ་པ་གྲོལ་དུས་ཀྱི་དངོས་གྲུབ་གོང་བཤད་བླ་སྒྲུབ་སྐབས་ལྟར་བྱའོ། གསར་མ་ལྟར་ན་ཐུན་མཐར་བསྡུ་རིམ་མ་བྱས་ན་རྟག་མཐའ་གོལ་བའི་སྐྱོན་ཡོད་པར་བཞེད། རྙིང་མ་ལྟར་ན་མ་བསྡུས་ཀྱང་མི་འགལ་བར་ཆགས་མེད་ཞབས་ཀྱིས་གསར་རྙིང་སྤྱིའི་ཞལ་ཤེས་ཟིན་བྲིས་སུ་གསལ་བ་ལྟར་འདིར་ཡང་། ཡིག་རྙིང་ཟིན་བྲིས་སུ་བསྡུ་རིམ་མི་འདུག་པས་དེ་ལྟར་བཀོད་པ་ཡིན། འོན་ཀྱང་ལུས་སྣང་ལྷ་སྐུ་སོགས་ཀྱི་བསྡུ་རིམ་བྱས་ཀྱང་རུང་ངོ་། །གཏེར་སྟོན་གྱི་གསུང་རྒྱུན་སྔོན་དུ་ཏྲཀྴད་བསྒྲུབ་ན་བར་ཆད་མི་འབྱུང་བའི་དགོས་པ་ཡོད། དེ་ནས་བླ་མ་ཡི་དམ་སྒྲུབ་པ་ཡིན་གསུང་ཀྱང་། རྩ་གསུམ་གྱི་གོ་རིམ་སྤྱིར་བཏང་། བླ་མ་ཡི་དམ་གྱི་གོང་
ནོན་སྔོན་དུ་འགྲོ་བའི་སྲུང་མ་ལ་འཇུག་པའི་ལུགས་ཡོངས་གྲགས་ལྟར་རོ། ༈ །ལར་གཏེར་ཆེན་ཞལ་རྒྱུན་བློ་གྲོས་བཟང་པོ་ལ་གནང་བ་ཞི་འགྲིགས་དྲག་འགྲིགས་ཞེས་འདོན་ལུགས་གཅིག་དང་། ༈ །ཀརྨ་འགྱུར་མེད་ལ་གསུངས་པའི་ལུགས་སྲོལ་དང་། ༈ །གདོང་ཀུན་དགའ་རྡོ་རྗེ་ལ་གནང་བ་དང་། སྡོམ་རེ་མདོའི་སྔགས་འཆང་རྣམས་ལ་གསུངས་པ་དང་། ༈ །ཨ་ལོ་བླ་མ་ཀུན་མཁྱེན་ནས་བརྒྱུད་པ་སོགས་མི་འདྲ་བ་མང་ཡང་། ཐམས་ཅད་རིག་འཛིན་མི་འགྱུར་རྡོ་རྗེའི་ཞལ་ཁྲིད་རྣམ་དག་ཡིན་པས་ཐམས་ཅད་ཚད་མར་བཟུང་དགོས། ༈ རང་ལུགས་འོག་མིན་ཀརྨའི་གདན་སར་ཆོས་བདག་སྤྲུལ་སྐུ་ཀརྨ་འགྱུར་མེད་ལ་གསུངས་པས་ཕྱག་པ་ཞེས་ཞལ་ཁྲིད་མན་ངག་རྣམས་གཙོ་བོར་བཟུང་དགོས་སོ། །ཅེས་པ་འདིའང་ཡེ་ཤེས་དཔལ་བཟང་གི་ཟིན་བྲིས་རྙིང་མ་ལ་ཇི་ལྟར་འབྱུང་བ་ལྟར། རང་བཟོ་མེད་པར་མི་བརྗེད་ཐོ་གཏེར་སློབ་
མཁན་པོ་ཀརྨ་རཏྣས་གོ་བདེ་སྙིང་པོར་བྲིས་པ་རྩ་གསུམ་གྱི་བྱིན་རླབས་སེམས་ལ་འཇུག་པར་གྱུར་ཅིག། ༈ །འདོན་ལུགས་རྒྱས་པ་གདོང་བླ་མ་ཨ་ནནྟ་བཛྲ་ལ་གདམས་པ་ཞི་འགྲིགས་ལ། དྲག་པོ་རྩལ་ཡོངས་རྫོགས། ཚེ་སྒྲུབ་ཤོག་ཕྲན། མན་རབ། བསྙེན་པ་གང་འགྲུབ་དང་སྔགས་ཕྲེང་གསལ་དང་སོགས་ཚད་མ་ཀུན་བཟང་གི་བསྟོད་པའི་མཐར་བོ་དྷི་ཙིཏྟ་བཟླ། རིགས་ལྔ་སོ་སོའི་ལས་བྱང་། བསྙེན་པ་ཅི་འགྲུབ་དྲག་འགྲིག་ལ། གུར་དྲག་རྡོ་རྗེ་ཕ་ལམ་སྐྱབས་སེམས་བཟུང་ཡོངས་རྫོགས། རྟ་མགྲིན་རྡོ་རྗེ་མེ་འབར། ཛཾ་སེར་ནག །གྲོ་ལོད་ཚེ་སྒྲུབ། །གྲོ་ལོད་གསང་སྒྲུབ། སེང་གདོང་ལས་བྱང་བསྐུལ། ལས་བྱང་གཏོར་འབུལ་ཚད་མ། ལེགས་ལྡན། ཕྱག་བཞི་པ། མ་ནིང་། རེ་ཏི། ཏྲཀྴད་གོང་ནོན་ནས་བཟུང་བཟླས་པ། གཟའ་ཞིང་སྐྱོང་རྣམས་གཞུང་བསྲངས་ནས་བམ་ཚོགས་དང་ཏྲཀྴད་ཀྱི་བསྐང་བ་གསུངས་ནས་སྲིད་གསུམ་གཏིང་
བཟློག་ལ་འཇུག་པ་ཡིན་འདུག །ཅེས་པའང་མཁན་རཏྣས་མི་བརྗེད་ཐོ་བྲིས་པའོ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།