ཡེ་གསང་ཐུགས་གཏེར་ལས་རིགས་ལྔའི་མངོན་རྟོགས་ཟིན་བྲིས།
ཡེ་གསང་ཐུགས་ཀྱི་གཏེར་ཁ་ལས། རིགས་ལྔའི་མངོན་རྟོགས་ཟིན་བྲིས་བཞུགས་སོ། །
བླ་མ་རྒྱལ་བ་རིགས་ལྔ་ལ་ཕྱག་འཚལ་ལོ། །ཕྱི་སྒྲུབ་ཀུན་བཟང་གི་བསྙེན་པ་གྲུབ་ནས། ཀུན་ཏུ་བཟང་པོ་སྐད་ཅིག་གིས་གནས་འགྱུར་ཏེ། རིགས་ལྔའི་མངོན་རྟོགས་སྒོམ་བཟླས་ལ་འཇུག་པ་ཡིན། །བསྐྱེད་རིམ་སྒོམ་ཚུལ་ལའང་། སློབ་དཔོན་རྣམ་གསུམ་འབུམ་ཏིག་ལས། བློ་ཡང་རབ་གཅིག་གིས་ལྷ་སྐུ་སྐད་ཅིག་དྲན་རྫོགས་སུ་བསྐྱེད་དེ། རྣམ་པར་རྟོག་པ་སློབ་དཔོན་པདྨ། བི་མ་ལ་མི་ཏྲ། ཤཱི་ལ་མཉྫུ། མཆན། གཞན་གྱི་བར་མ་མཆོད་པས་བཟང་སྟེ། ཡེ་ཤེས་ཀྱི་ཚོགས་ཡིན་ནོ། །ཞེས་
གསུངས་པ་ཨ་ཏི་ཡོ་གའི་དགོངས་པ་དང་། བློ་རབ་གཅིག་གིས་སྟོང་པ་དང་སྙིང་རྗེའི་ངང་ནས། རྩ་སྔགས་བརྗོད་པས་ལྷར་ལྡང་སྟེ། རྟོག་པ་ཉུང་བས་བསོད་ནམས་དང་ཡེ་ཤེས་གཉིས་ཀ་ཡོད་དོ་ཞེས་པ་ཨ་ནུ་ཡོ་གའི་དགོངས་པ་དང་། བློ་འབྲིང་གཅིག་གིས་ཆོ་ག་གསུམ་གྱིས་ལྷར་ལྡང་སྟེ། ཞེས་གསུངས་པ་མ་ཧཱ་ཡོ་གའི་དགོངས་པ་སྟེ། སྒོམ་ཚུལ་གསུམ་ལས། འདིར་ནི་དབང་པོ་ཡང་རབ་མན་ངག་ཨ་ཏི་ཡོ་གའི་དགོངས་པ་ལྟར་སྐད་ཅིག་དྲན་རྫོགས་སུ་སྒོམ་
པའོ། །དེ་ལའང་ཡུལ་སྣང་བདེན་མེད་དུ་ཤེས་པ་སྒྱུ་མའི་བསྐྱེད་རིམ། ལྷུན་གྲུབ་སྣང་སྟོང་དུ་ཤར་བ་ཟབ་མོའི་བསྐྱེད་རིམ། ལྷ་སྐུ་ཞལ་ཕྱག་དང་བཅས་པ་སྤྲུལ་སྐུའི་བསྐྱེད་རིམ་གསུམ་དུ་གསུངས་ཏེ་སྔ་མ་ནི། སྣང་བ་ལ་སྟོང་པས་རྒྱས་ཐེབ་པ་དང་། བར་པ་ནི་སྟོང་པ་ལ་སྣང་བས་རྒྱས་ཐེབ་པའོ། །དོན་ཉམས་ལེན་དུ་དྲིལ་ཚེ་རང་རིག་སྟོང་པའི་གསལ་མདངས་འགག་མེད་ཀྱི་རྩལ་དེ། རྣམ་པར་སྣང་མཛད་ལ་སོགས་པའི་རིགས་ལྔའི་སྐུར་སྣང་ལ་རང་བཞིན་མེད་པར་ཤར་བ་ཉིད་ཡེངས་མེད་འཛིན་མེད་ཀྱི་དྲན་པས་བཟུང་སྟེ། སྣང་གྲགས་རིགས་གསུམ་ལྷ་སྔགས་ཆོས་སྐུར་འཆར་བ་ལ་བསླབ་པའོ།། ༈ །།ཐོག་མའི་འབྲུ་གསུམ་ཡང་རྒྱུད་མ་ཧཱ་ཡོ་ག་ལྟར་ན། ཨོཾ་དེ་བཞིན་ཉིད་ཀྱི་ཏིང་ངེ་འཛིན་སྟོང་པ་ཆེན་པོ། ཨཱཿཀུན་སྣང་གི་ཏིང་ངེ་འཛིན་སྙིང་རྗེ་སྒྱུ་མ། ཧཱུྃ་རྒྱུའི་ཏིང་ངེ་འཛིན་ཕྱག་རྒྱའི་རྣལ་འབྱོར་བསྟན་པ་ཡིན་ཀྱང་། འདིར་ནི་སྣང་བ་ལྷ། གྲགས་པ་སྔགས།
དྲན་རྟོགས་ཐུགས་སུ་ཤེས་པར་བྱ་བའི་ཕྱིར་འབྲུ་གསུམ་སྔོན་དུ་འགྲོ་བས། རྣམ་སྣང་ལ་སེང་གེ་སོགས་རིགས་ལྔ་སོ་སོའི་ཁྲི་འཇོག་དང་པདྨ་ཉི་ཟླ་སྒོམ་པ་སྟེ། ཐུགས་མི་འཇིགས་པ་བཞིས་བདུད་བཞི་འདུལ་བའི་བརྡར་སེང་གེ། སྐུ་སྟོབས་བཅུས་མི་དགེ་བཅུ་འདུལ་བའི་བརྡར་གླང་ཆེན། ཡོན་ཏན་རྫུ་འཕྲུལ་གྱི་རྐང་པ་བཞིས་ཆགས་པ་མེད་པར་སྒྲོལ་བའི་བརྡར་རྟ་མཆོག །གསུང་དབང་བཅུ་མཐར་ཕྱིན་རྒྱལ་བའི་གསུང་གིས་སེམས་ཅན་རྣམས་དབང་དུ་བྱེད་པའི་བརྡར་རྨ་བྱ། རྨ་བྱས་དུག་དབང་དུ་བྱེད་པ་ལྟར་འདིར་ཡང་ཉོན་མོངས་པའི་དུག་ཡེ་ཤེས་སུ་བསྒྱུར་བར་བྱེད་པའི་དོན། ཕྲིན་ལས་བཞིས་ཐོགས་པ་མེད་པར་སྒྲོལ་བའི་བརྡར་མཁའ་ལྡིང་གི་ཁྲིའོ། འདི་རྣམས་ཀྱང་རང་བཞིན་གྱི་དུད་འགྲོ་ཕལ་པ་མ་ཡིན་ཏེ། བྱང་ཆུབ་སེམས་དཔའ་རྣམས་བརྡ་དོན་དེ་ལྡན་གྱི་གཟུགས་སུ་སྤྲུལ་ནས་བཅོམ་ལྡན་འདས་རིགས་ལྔའི་གདན་འདེགས་པའོ།།
༈ །།རིགས་ལྔ་སོ་སོར་སེང་གེ་སོགས་ཁྲི་འཇོག་ཕྱོགས་རེར་གཉིས་གཉིས་ཏེ་བརྒྱད་ཀྱི་འདེགས་དགོས་ཏེ་སྐུ་གསུང་ཐུགས་དབང་ཕྱུག་གི་ཡོན་ཏན་བརྒྱད་དང་ལྡན་པའི་བརྡའོ། ཞིང་ཁམས་ཐམས་ཅད་སྐུ་ལ་རྫོགས༔ སྐུ་ཡི་ཞིང་ཁམས་ཡོངས་ལ་ཁྱབ༔ ཅེས་པ་ནི། བདེ་གཤེགས་རྒྱལ་བ་རྒྱ་མཚོའི་ཞིང་སྐུའི་བཀོད་པ་ཐམས་ཅད་སྐུའི་བ་སྤུའི་ཉག་མ་རེ་རེ་ལ་རྫོགས་པ་དང་། ཡེ་ཤེས་ཀྱི་སྐུ་ཆོས་ཀྱི་དབྱིངས་ཀྱི་མཐའ་གཏུག་པའི་ཞིང་ཁམས་གང་དུའང་ཐོགས་པ་མེད་པར་བཞུགས་པ་དང་ཞིང་ཁམས་རབ་འབྱམས་ཀྱི་གདུལ་བྱ་ལ་ཁྱབ་པར་སྤྲུལ་པའོ། །རིགས་ལྔ་ཐམས་ཅད་ལ་ལོངས་སྤྱོད་རྫོགས་པའི་རྒྱན་བཅུ་གསུམ་དང་ལྡན་པ་སྟེ། རིན་པོ་ཆེའི་རྒྱན་བརྒྱད། དར་གྱི་ཆས་གོས་ལྔའོ། །དང་པོ་ནི་དབུ་རྒྱན། ༡ སྙན་རྒྱན། ༢ མགུལ་རྒྱན། ༣ དོ་ཤལ། ༤ སེ་མོ་དོ། ༥ དཔུང་པ་དང་མཁྲིག་མར་རིན་པོ་ཆེའི་གདུ་གུ། ༦ ཞབས་ཀྱི་ལོང་བུའི་གནས་སུ་གདུ་གུ།
༧ ནོར་མགྲིན་པ་མཛེས་བྱེད་ནུ་མའི་བར་སླེབས། ལྟེ་བའི་འོག་ཏུ་སླེབས། མཆན། བུའི་ཕྲ་དང་ལྡན་པའི་གསེར་གྱི་སྐ་རག་ལ་རིན་པོ་ཆེའི་དྲྭ་བ་དང་དྲྭ་བ་བྱེད་པ་འཕྱང་བའོ།། ༈ །།གཉིས་པ་ནི། དར་དཀར་པོ་སོགས་རང་མདོག་དར་གྱི་སྟོད་གཡོག ༡ །སྣ་ཚོགས་དར་གྱི་ཤམས་ཐབས། ༢ ས་རི་ཁྲ་བོ་དང་ལྡན་པའི་དར་འཕྱང་། ༣ སྣ་ཚོགས་དར་གྱི་ཟི་ལྡིར་ཞེས་དར་གྱི་འཕེན་ཆུང་མང་པོ་དབུའི་ལྟག་པར་རྒྱབ་དར་གྱིས་ཚུལ་དུ་བཏགས་པ། དར་གྱི་ཅོད་པན་སྙན་གཡས་གཡོན་ནས་འཕྱང་བའོ། འགའ་ཞིག་གིས་དར་གྱི་ཅོད་པན་དང་ཟི་ལྡིང་ཕྱོགས་གཅིག་ཏུ་བགྲངས་ནས་དར་ལྗང་གུའི་སྐུ་རེག་བརྩི་བ་དང་། འགའ་ཞིག་གིས་དར་མཐིང་ཀའི་འོག་དཔག་ཞེས་སྣ་ཚོགས་དར་གྱི་ཤམས་ཐབས་སམ་ཚིག་གུའི་སྨད་དཀྲིས་སུ་གྲགས་པའི་སྟེང་དེར་སྨད་ཤམ་ཐུང་དུ་སྔོན་པོ་རིན་པོ་ཆེའི་དྲྭ་བ་དྲྭ་ཕྱེད་དེ་རྣམས་མཛེས་པར་བཀྲ་བའི་གདན་ལྟ་བུར་འོང་བ་ཞིག་ཡོད་པ་དེ་བགྲངས་ནས་
བརྒྱད་དུ་བཞེད་པའང་ཡོད། གྲངས་གང་འདྲེན་ཀྱང་རྒྱན་དེ་ཐམས་ཅད་ཚང་དགོས་སོ། །རིགས་ལྔ་ཐམས་ཅད་ལ་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀའི་ཆ་སྨད་དུ་ཧཱུྃ་མཐིང་ག །ཐུགས་དབུས་སུ་རང་རང་ཕྱག་མཚན་ས་བོན་སྔགས་འཁོར་བསྒོམ་པ་སྟེ། རྣམ་པར་སྣང་མཛད་ཀྱི་ཐུགས་ཀར་པདྨ་དཀར་པོ་འདབ་མ་བརྒྱད་པའི་ལྟེ་བར་ཉི་མ། དམར་སེར་ཟླ་བ་དཀར་པོ་ཉ་གང་བ་གཉིས་མེ་ལོང་ཉིས་བརྩེགས་སུ་བཞག་པ་ལྟ་བུ། དེའི་སྟེང་དུ་ཞི་བའི་འཁོར་ལོ་དཀར་པོ་རྩིབས་བརྒྱད་པ་གདན་ཐབས་སུ་གསལ་བའི་ལྟེ་བར་ཨོཾ་ཡིག་འ་ཆུང་ཟླ་ཚེས་ཐིག་ལེ་དང་བཅས་པའི་མཐར་ཨོཾ་ཨཱཿཧཱུྃ་བྷ་ག་ཝཱ་ན་བཻ་རོ་ཙ་ན་ཨཱོཾ༔ ཞེས་པའི་སྔགས་ཕྲེང་དཀར་གསལ་ཞལ་ངོ་ཕྱི་ལ་བསྟན་ནས་གཡོན་དུ་བཀོད་པ་གཡས་སུ་འཁོར་དགོས། མི་བསྐྱོད་པའི་ཐུགས་ཀར་པདྨ་སྔོན་པོ་འདབ་བརྒྱད་དང་རྡོ་རྗེ་སྔོན་པོ་རྩེ་ལྔའི་ལྟེ་བར་ཧཱུྃ། རིན་འབྱུང་ལ་པདྨ་སེར་
པོ་འདབ་བརྒྱད། རིན་པོ་ཆེ་སེར་པོ་ཟུར་བརྒྱད་འོད་ཟེར་རིང་དུ་འཕྲོ་བའི་ལྟེ་བར་ཏྲཾ་སེར་པོ་སྣང་མཐའ་ལ་པདྨ་དམར་པོ་འདབ་མ་བརྒྱད། པདྨ་དམར་པོ་འདབ་མ་བཅུ་དྲུག་པའི་ཟེའུ་འབྲུ་ལ་ཧྲཱིཿདམར་པོ། དོན་གྲུབ་ལ་པདྨ་ལྗང་གུ་འདབ་བརྒྱད། རྒྱ་གྲམ་ལྗང་གུའི་ཤར་སྔོ། ལྷོ་སེར། ནུབ་དམར། བྱང་ལྗང་། ལོ་འདབ་དང་བཅས་པ་མཆན། དབུས་དཀར་བ། གསར་མ་ལྟར་ན་འཇིགས་པ་ཉི་ཤུ་དག་པའི་བརྡར་རྭ་ཉི་ཤུ་པ་སྟེ་ཕྱོགས་རེར་རྭ་ལྔ་རེ། རྙིང་མ་ལྟར་ན་རྟེན་འབྲེལ་བཅུ་གཉིས་དག་པའི་བརྡར་རྭ་བཅུ་གཉིས་པ། ཕྱོགས་རེར་རྭ་གསུམ་རེ་དང་ལྡན་པའི་ལྟེ་བར་ཨཱཿཡིག་ལྗང་གུ་རིང་ཆ་རྣམ་བཅད་དང་བཅས་པ་སྒོམ། གཞན་གདན་ཉི་ཟླ་གཉིས་བརྩེགས་དང་རང་མདོག་གི་སྔགས་ཕྲེང་བཀོད་ཚུལ་འཁོར་ཚུལ་རྣམ་སྣང་དང་འདྲའོ། །བཟླས་པའི་སྔགས་ཕྲེང་གཡས་སུ་འཁོར་བའི་རང་སྒྲ་རྣམ་སྣང་སྐབས་སུ་པི་ཝང་གི་སྐད་ལྟར་ཕྲ་ཞིང་སྙན་པ། མི་བསྐྱོད་པ་ལ་
འབྲུག་གི་སྒྲ་ལྟར་རྔམ་ཞིང་ལྡིར་བ། རིན་འབྱུང་ལ་འབྱུང་བ་རླུང་མེ་ཆུའི་སྒྲ་ལྟར་འུ་རུ་རུ་སྒྲོགས་པ། སྣང་མཐའ་ལ་རྔ་བོ་ཆེའི་སྒྲ་ལྟར་ལྡིར་ཞིང་གཡོ་བ། དོན་གྲུབ་ལ་དུང་དཀར་དམར་གྱི་སྒྲ་ལྟར་བརྗེད་ཅིང་གསལ་བའི་སྔགས་སྒྲས། རིགས་ལྔ་སོ་སོའི་གཙོས་པའི་ཕྱོགས་བཅུའི་ཞིང་ཁམས་རབ་འབྱམས་མཐའ་ཡས་པ་ནས་རྩ་གསུམ་རྒྱལ་བ་རབ་འབྱམས་ཐམས་ཅད་རིགས་ལྔ་སོ་སོའི་རྣམ་པར་སྤྱན་དྲངས་ནས་རང་ཉིད་ལ་མཚོ་ལ་ཁ་བ་བབས་པ་ལྟར་སིབ་སིབ་ཐིམ་པར་དམིགས་ནས་བསྙེན་པ་བྱ། སྔགས་དོན་ནི་ཐོག་མའི་འབྲུ་གསུམ་སྐུ་གསུམ་དབྱེར་མེད་རིགས་ལྔ་ཀུན་ལ་འདྲ་བར་གྱི་མཚན་སྔགས་བྷ་ག་ཝཱན་བཅོམ་ལྡན་འདས། བཻ་རོ་ཙ་ན་རྣམ་པར་སྣང་མཛད། ཨོཾ་ཡིག་རྒྱུ་མ་ནོར་བ་རྩ་བའི་སྔགས་ཏེ་ཐུགས་སྲོག་ནས་དྲངས་ཏེ་ཐུགས་རྒྱུད་བསྐུལ་བའོ། །དེ་བཞིན་དུ་ཨཱཀྵོ་བྷྱ་བཛྲ་མི་བསྐྱོད་རྡོ་རྗེ། ཧཱུྃ་ཐུགས་རྒྱུད་བསྐུལ་བ་རཏྣ་སཾ་བྷ་ཝ་རིན་ཆེན་འབྱུང་
གནས། ཏྲཱྃ་ཐུགས་རྒྱུད་བསྐུལ་བ། ཨ་མི་ཏ་བྷ་འོད་དཔག་མེད། ཧྲཱིཿཐུགས་རྒྱུད་བསྐུལ་བ། ཨ་ཡུ་སིདྡྷི་ཛཿཚེ་ཡི་དངོས་གྲུབ་སྩོལ་ཅིག་ཅེས་ཤམ་བུ་དང་བཅས་སོ། ཨ་མོ་གྷ་སིདྡྷི་དོན་ཡོད་གྲུབ་པ། ཨཱཿཐུགས་རྒྱུད་བསྐུལ་བའོ། །གཙོ་བོ་གོ་འཕོ་བ་དང་རང་ཉིད་རིགས་ལྔ་གང་འདོད་དུ་སྤྲུལ་བསྒྱུར་འབྱེད་པའི་ཏིང་ངེ་འཛིན་ལ་རྩལ་སྦྱངས་པའི་ཕྱིར་བདག་བསྐྱེད་རིགས་ལྔ་གནས་འགྱུར་དུ་སྒོམ་དགོས། ཟིན་བྲིས་ལ་ལར་རིགས་ལྔ་སོ་སོར་བསྐྱེད་བཟླས་གསུངས་ཀྱང་རིགས་ལྔ་ཚོམ་བུར་སྒོམ་མི་དགོས་པ་ཤེས་པར་བྱ་བ་གནད་གདམས་སོ། །ཀུན་བཟང་ལ་བསྙེན་གྲངས་གསལ་བར་མ་གསུངས་ཀྱང་། རིགས་ལྔ་ལ་འབྲུ་གསུམ་གསུངས་བས་ཀུན་བཟང་ལའང་དེ་ལྟར་དགོས་པ་མངོན། རིགས་ལྔ་སོ་སོར་གནད་གསུམ་གསུངས་པ་སྒོ་གསུམ་ལྷ་སྔགས་ཡེ་ཤེས་ཀྱི་ཁྱེར་སོ་གསུམ་ལྡན་དོན་བསྐྱེད་རྫོགས་ཟུང་འཇུག་དབྱེར་མེད་དུ་ཤེས་དགོས་ཏེ། དེའང་
སེམས་ཉིད་འགག་མེད་ཀྱི་འཆར་སྒོ་ཐམས་ཅད་ཐབས་བསྐྱེད་པའི་རིམ་པ། ངོ་བོ་སྟོང་ཉིད་ཀྱི་གནས་ལུགས་ཐམས་ཅད་ཤེས་རབ་རྫོགས་པའི་རིམ་པ། དེ་གཉིས་ཉི་མ་དང་འོད་ཟེར་ལྟར་ཐ་དད་མེད་པར་ཟུང་འཇུག་གི་རྣལ་འབྱོར་ཏེ། སྣང་བ་ལ་ཕར་བལྟས་པས་བསྐྱེད་རིམ་དུ་ལྷུན་གྱིས་གྲུབ། སེམས་ཉིད་ལ་ཚུར་བལྟས་པས་རྫོགས་རིམ་དུ་ལྷུན་གྱིས་གྲུབ། སྣང་བ་དང་སེམས་གཉིས་གསེར་དང་གསེར་གྱི་སེར་པོ། གཡུ་དང་གཡུའི་སྔོན་པོ། བར་སྣང་དང་འཇའ་ཚོན་ལྟར་རོ་མཉམ་པས་ལྷུན་གྱིས་གྲུབ་ལ། ལས་དང་པོ་པ་གོ་རྟོགས་དམན་པས་ཀྱང་། རང་སེམས་ལྷར་གསལ་བ་བསྐྱེད་པའི་རིམ་པ། ལྷ་རང་སེམས་སུ་ཤེས་པ་རྫོགས་པའི་རིམ་པ། དེ་གཉིས་དབྱེར་མེད་དུ་རྟོགས་པ་ཟུང་འཇུག་གི་རྣལ་འབྱོར་ལ་བརྩོན་པར་བྱའོ། །ཞལ་གདམས་ལམ་ཁྱེར་རྫོགས་རིམ་བསྲེ་འཕོའི་རིམ་པ་ནི། དེ་ཡང་སྣང་བ་སྒྱུ་མར་ཤེས་ན་རྨི་ལམ་སྒྱུ་མར་ཤེས། རྨི་ལམ་སྒྱུ་
མར་ཤེས་ན་བར་དོ་སྒྱུ་མ་ཤེས། བར་དོ་སྒྱུ་མར་ཤེས་ན་འོད་གསལ་ངོས་ཟིན། འོད་གསལ་ངོས་ཟིན་ན་ཟུང་འཇུག་གི་སྐུར་གྲོལ་བ་ནི། རྗེ་ནཱ་རོ་པཎ་ཆེན་གྱི་སྒྱུ་མ་སུམ་བརྒྱུད་ཀྱི་གདམས་ངག་དང་གནད་གཅིག་གོ། རྒྱས་པར་སྤྲོ་ན་རས་ཆུང་པ་བཛྲ་ཀཱི་རྟིའི་བསྲེ་འཕོ་དགུ་སྐོར་གྱི་གདམས་ངག་སྙན་བརྒྱུད་ལྟར་རོ། །འོ་ན་ནཱ་རོ་ཆོས་དྲུག་ཡོད་དམ་ཞེ་ན་ཡོད་དེ། མ་རྒྱུད་ལུང་ཨ་ནུ་ཡོ་ག་སྤྱིའི་རྫོགས་རིམ་གཏེར་ཆེན་མཆོག་གྱུར་གླིང་པའི་ཡང་དག་གི་ཆོས་དྲུག་རྣམས་རྒྱས་བསྡུས་ཙམ་ལས་ཨུ་པ་དེ་ཤ་ཨེ་ཀ་ཉིད་དོ། ཨྠྀི། སརྦ་དཱ་ཀ་ལྱཱ་ཎི་བྷ་ཝ་ཏུ། དགེའོ། དགེའོ། དགེའོ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།