རྡོ་རྗེ་གྲོ་ལོད་ཀྱི་རྫོགས་རིམ་ཨ་ཏིའི་ཁྲིད་ཡིག་རིག་འཛིན་དགོངས་གསལ་གྱི་དངོས་གཞིའི་ཁྲིད་རིམ།
ཡེ་གསང་ཐུགས་གཏེར་གྲོ་ལོད་ཀྱི། །རྫོགས་རིམ་ཨ་ཏི་ཁྱབ་གདལ་ཆེའི། ཁྲིད་ཡིག་རིག་འཛིན་དགོངས་གསལ་གྱི། །དངོས་གཞིའི་ཁྲིད་རིམ་གཉིས་པ་བཞུགས། །ཀམྦྷི་ར་ཨི་ཐི། །
ན་མོ་གུ་རུ་པདྨཱ་ཀ་ར་བཛྲ་དྷཱ་ར་རཱ་ཛ་ཡ། །ཟབ་གསང་ཐེག་པའི་ཡང་རྩེ་རྫོགས་པ་ཆེའོ། །ཟབ་རྒྱས་ཁྲིད་ཡིག་རིག་འཛིན་དགོངས་གསལ་གྱེས། །ཟབ་དོན་སྙིང་པོའི་དོན་ཁྲིད་འདི་ན་དབྱེ། །ཟབ་ལམ་ཉམས་སུ་ལེན་རྣམས་དགའ་བས་ལོངས། །སངས་རྒྱས་གཉིས་པའི་ཐུགས་ཐིག་ལུང་གི་མཛོད། །དཔྱད་གསུམ་རྣམ་དག་རིགས་པའི་འཁྲུལ་འཁོར་དང་། །མན་ངག་འཕྲུལ་གྱི་ལྡེའུ་མིག་ལ་བརྟེན་ནས། །སྔ་འོས་གསལ་བཀོད་འགལ་ན་རྩ་གསུམ་ལྟར། །སྙིང་ནས་
འགྱོད་པས་བཤགས་སོ་དགེ་ལེགས་སྩོལ། ཞེས་ཚིག་རྐང་དགུའི་གྲངས་ལྡན་གྱིས་དངོས་པོ་ངེས་པར་བསྟན་ནས། །གཉིས་པ་དངོས་གཞི་རྫོགས་རིམ་སྒོམ་པ་ལ་ལྔ། སེམས་ཉིད་འོད་གསལ་སྟོང་པ་ཉིད་མ་རྟོགས་པའི་སྐྱོན་གཅིག །སེམས་གནས་པའི་ཐབས་ཞི་གནས། གནས་པ་བརྟན་པའི་ཐབས་ལྷག་མཐོང་། ས་ལམ་བགྲོད་པའི་ཚུལ། བརྟན་པ་མཐར་ཕྱིན་པ་རྣམས་སོ། །དེ་ལ་དང་པོ་སེམས་ཉིད་འོད་གསལ་ཆོས་ཀྱི་སྐུ་མ་རྟོགས་པའི་སྐྱོན་ནི། །ཀུན་བཟང་
གཞུང་ལས། ཆོས་རྣམས་ཀུན་གྱི་ངོ་བོ་ཉིད༔ ཚུལ་བཞིན་རང་ཞལ་མ་མཐོང་བས༔ ཐར་མེད་འཁོར་བ་རང་གིས་བསྒྲུབ༔ ད་ནི་དེ་ལས་སྒྲོལ་བར་བྱ༔ ཞེས་དང་། གཅེར་མཐོང་རང་གྲོལ་ལས། འཁོར་འདས་ཡོངས་ལ་ཁྱབ་པའི་སེམས་གཅིག་པུ༔ ཡེ་ནས་སངས་རྒྱས་ཡིན་ཀྱང་ངོ་མ་ཤེས༔ གསལ་རིག་རྒྱུན་ཆད་མེད་ཀྱང་ཞལ་མ་མཇལ༔ འགགས་མེད་ཅིར་ཡང་འཆར་ཏེ་ངོས་མ་ཟིན༔ ཅེས་གསུངས་པ་ལྟར་རང་ཉིད་ལ་སངས་རྒྱས་ཀྱི་སྙིང་པོ་ཡོད་ཀྱང་བླ་མ་དམ་པ་དང་མ་མཇལ། ལམ་ཟབ་མོ་ཉམས་སུ་མ་བླངས་པས་རང་ངོ་རང་གིས་མ་ཤེས་པས་འགྲོ་བ་རིགས་དྲུག་ཏུ་འཁྱམས་ཤིང་སྡུག་བསྔལ་བར་གྱུར་པ་ཡིན་ཏེ། དེ་ཉིད་ལས། དེ་དག་སོ་སོའི་སྐྱེ་བོ་ཐ་མལ་པས༔ མ་རྟོག་རང་ངོ་རང་གི་མ་ཤེས་པས༔ ཁམས་གསུམ་རྒྱུད་དྲུག་འཁྱམས་ཤིང་སྡུག་བསྔལ་མྱོང་༔ དེ་ཡང་རང་སེམས་འདི་ཉིད་མ་རྟོགས་སྐྱོན༔ ཅེས་གསུངས་པས་ཉེས་སྐྱོན་དེ་རྣམས་
ཀྱང་རང་སེམས་འཁྲུལ་པའི་དབང་གིས་བྱུང་བ་སྟེ། མ་འཁྲུལ་སྐྱེ་མེད་སངས་རྒྱས་ཐུགས༔ འཁྲུལ་པས་ལས་ངན་འཁོར་བའི་སེམས༔ ཅེས་དང་། དེ་ཡང་སེམས་འཁྲུལ་པའི་ཆ་ལས་སེམས་ཅན་དང་། མ་འཁྲུལ་པའི་ཆ་ལས་སངས་རྒྱས་ཡིན་པ་སྟེ། ཀུན་བཟང་དག་པའི་སྣང་ཆ་ལས་མཐོ་རིས་གནས་གསུམ་ལྷ་མིའི་གཟུགས་སུ་ཤར༔ ཀུན་བཟང་མ་དག་སྣང་ཆ་ངན་སོང་གསུམ་སོགས་ལོག་བའི་ལམ་དུ་གོལ༔ མ་འཁྲུལ་རང་སེམས་གཉུག་མ་ཡེ་ནས་རྒྱུ་ཡི་སངས་རྒྱས་ཉིད༔ འཁྲུལ་སྣང་བག་ཆགས་རྐྱེན་གྱིས་ཨ་འཐས་རེ་དོགས་འཁྲུལ་པ་སེམས་ཅན་རྒྱུ༔ སངས་རྒྱས་སེམས་ཅན་དབྱེ་བ་མེད་ཀྱང་འཁྲུལ་དང་མ་འཁྲུལ་དབྱེ་བས་གསལ༔ ཅེས་གསུངས་པས་འཁྲུལ་སྣང་ཡེ་ཤེས་སུ་འཆར་བར་བྱེད་པའི་ཐབས་ལ་ལམ་ཟབ་མོ་སྒོམ་དགོས། ལམ་ཟབ་མོ་སྒོམ་པ་ལ་སྔོན་དུ་འཁོར་བ་ལ་འབྲེལ་ཐག་གཅོད་དགོས་ཏེ། ཐོད་རྒལ་ལས། ཕ་མ་བུ་ཚ་
སྤུན་གྲོགས་འཁྲི་བ་བཅད༔ ཡུལ་ཕྱོགས་ཞིང་མཁར་སྤངས་ཏེ་རྟེན་མེད་བྱ༔ ཉེ་འབྲེལ་སྲིད་སྡེ་སྤངས་ཏེ་ཆགས་སེམས་བཅད༔ དགྲ་འདྲེ་གནོད་བྱེད་རྣམས་སྤངས་བྱམས་པ་བསྒོམ༔ ངོ་སྲུང་ཁེ་གྲགས་མཐུན་འཇུག་འབྲེལ་བ་བཅད༔ ནོར་རྫས་ལོངས་སྤྱོད་ཟང་ཟིང་འདུ་འཛི་སྤངས༔ དེ་ནས་རྩེ་གཅིག་ཟབ་མོའི་སེམས་ལ་ལྟོས༔ ཅེས་གསུངས་པ་ལྟར་བྱ་དགོས་ཤིང་། རྒྱུད་ལས། དྲང་པོར་འདུག་ལ་ལྷུན་གྲུབ་ལྟོས༔ ཅེས་གསུངས་པ་ལྟར་ལུས་དྲང་པོར་འདུག་པ་ནི། རྐང་པ་སྐྱིལ་ཀྲུང་། ལག་པ་མཉམ་བཞག །སྒལ་ཚིག་དྲང་པོར་བསྲང་། མགྲིན་པ་ཡིད་ཙམ་དགུག །ལུས་མདུན་རྒྱབ་གཡས་གཡོན་དུ་མི་གཡོ་བ་སང་ངེ་འདུག །ངག་དྲང་པོར་འདུག་པ་ནི། སྨྲ་བ་བཅད་དེ་རླུང་རང་སོར་བཞག །སེམས་དྲང་པོར་འདུག་པ་ནི། ངན་རྟོག་ཐམས་ཅད་སྤངས་ལ་མི་མནོ་མི་བསམ། མི་རྟོག །རང་བྱུང་། རང་དྭངས་བུན་ནེའི་ངང་ནས་སེམས་གར་གནས་ཅི་འདྲ་
འདུག་ལྟ་བ་མ་གཏོགས། འཇིག་རྟེན་གྱི་བྱ་བཞག་སྔ་ཕྱིའི་འདུན་མ་ལེགས་ཉེས་ཐམས་ཅད་སྤངས་ཤིང་སྒོམ་པ་ལ་ཐམས་ཅད་རྫོགས་ཏེ། རྒྱུད་ལས། །ཐམས་ཅད་ཡང་དག་རྫོགས་པ་ཆེན་པོ་ཡིན༔ ཕྲིན་ལས་དཀྱིལ་འཁོར་དབང་དང་དམ་ཚིག་རྫོགས༔ ལྷ་བསྐྱེད་སྤྱན་དྲངས་ཛབ྄་དང་གཏོར་མ་རྫོགས༔ བསྡུ་གཤེགས་སྨོན་ལམ་རྒྱས་འདེབས་ཐམས་ཅད་རྫོགས༔ ལྟ་སྒོམ་སྤྱོད་འབྲས་སྐུ་དང་ཡེ་ཤེས་རྫོགས༔ ས་ལམ་ཡེ་ཤེས་ཕྲ་རག་ཐམས་ཅད་རྫོགས༔ རྒྱུད་ལུང་མན་ངག་སེམས་དང་ཚུལ་ཁྲིམས་རྫོགས༔ ལམ་ལྔ་ས་བཅུ་ཕ་རོལ་ཕྱིན་བཅུ་རྫོགས༔ ཅེས་གསུངས་པས་འདུས་བྱས་ཀྱི་ཆོས་སྤྱོད་ཐམས་ཅད་ལས་བསམ་གཏན་བསྒོམ་པ་ཕན་ཡོན་ཆེ་བར་གསུངས་སོ། །གཉིས་པ་ཞི་གནས་ཀྱི་ཏིང་ངེ་འཛིན་སྒོམ་པར་བྱེད་པ་ལ་མཚན་བཅས་དང་མཚན་མེད་གཉིས་ལས། དང་པོ་ནི་རང་གི་མདུན་དུ་ཐིག་ལེ་སྔོན་པོའི་དཀྱིལ་དུ་ཨ་དཀར་པོར་
བྲིས་པ་ལ་མིག་གཏད་དེ་སྒོམ་པ་ལ་དམིགས་སྐོར་གཅིག །ཨ་ཨ་ཨཿ ཡང་དག་དོན་ནི་སྐྱེ་འཆི་བྲལ༔ རང་རིག་བཟོ་མེད་ངོ་བོ་སྟོང་༔ གང་ཤར་རིག་རྩལ་མཁའ་ལྟར་དག༔ དམིགས་མེད་བློ་འདས་བརྗོད་དུ་མེད༔ དྷརྨ་དྷཱ་ཏུ་ཛྙཱ་ན་གརྦྷ་ཨ་ཨ་ཨཿ ཅེས་ངག་ཏུ་བརྗོད་ཅིང་དོན་ལ་སེམས་གཏད་ཅིང་སྒོམ་པ་དམིགས་སྐོར་གཅིག །དེ་དག་གི་དོན་ནི་ཏིང་ངེ་འཛིན་གྱི་རྒྱལ་པོའི་མདོ་ལས། གསེར་གྱི་ཁ་དོག་ལྟ་བུའི་སྐུ་ལུས་ཀྱི། །འཇིག་རྟེན་མགོན་པོ་ཀུན་ཏུ་མཛེས་པ་སྟེ། །དམིགས་པ་དེ་ལ་གང་གིས་སེམས་འཇུག་པ། །བྱང་ཆུབ་སེམས་དེ་མཉམ་པར་བཞག་ཅེས་བྱ། །ཅེས་གསུངས་པ་ལྟར་རོ། །གཏེར་གཞུང་ལས། མིག་གིས་འདུ་བྱེད་ཟིམ་བུར་བལྟས་པས་ཉི་ཟླའི་ཟེར་ལ་བསྟན༔ འོད་ལྔའི་ཐིག་ལེ་སྣ་ཚོགས་འཆར་བ་རིག་པའི་རང་མདངས་སོ༔ འོད་སྐུད་ལྕགས་ཐག་ཕྲལ་འཁྱུད་པ་རིག་པའི་འགྱུ་བར་བལྟ༔ འོད་ཁྱིམ་སྣ་ལྔ་ངོས་བཟུང་མེད་པར་ཁྱབ་པར་གནས་
པ་རིག་པ་གནས་པའོ༔ ཅེས་གསུངས་པས། ཉིན་མོ་ཉི་མའི་ཟེར་ལ་བལྟ་བའི་དུས་ནི། ཉི་མ་ཤར་མ་ཐག་ནས་སྔ་དྲོ་རྣམས་དང་། ཕྱི་དྲོའི་དུས་སུ་མིག་གིས་ཟིམ་བུར་བལྟས་པའི་ཚེ། འོད་ཁ་དོག་སྣ་ལྔའི་ཐིག་ལེ་ཐིག་ཕྲན་འཆར་བ་ནི་རིག་པ་དངོས་ཀྱི་རང་མདངས་ཡིན་ཅིང་། འོད་ཀྱི་སྐུད་པ་ལྕགས་ཐག་སྦྲེལ་བ་ལྟ་བུ་ཕྲལ་འཁྱུག་པ་རྣམས་ནི་རིག་པ་འགྱུ་བའི་རྩལ་དུ་སྣང་ལ། དེ་གའི་རང་མདངས་བསྐྱང་པས་ཐམས་ཅད་ཅུང་ཟད་ཙམ་ལས་མེད་པར་འོད་ཁྱིམ་སྣ་ལྔ་ཤིན་ཏུ་ཕྲ་བའི་འོད་ངོས་བཟུང་མེད་པས་ཐམས་ཅད་ཁྱབ་ཅིང་མ་བལྟས་ཀྱང་མིག་ལམ་དུ་ཁྲ་ཤིག་ཤིག་གནས་པ་ནི་རིག་པ་གནས་པ་ངོ་བོ་སྟེ། དེ་ཡང་ཕྱིའི་ཡུལ་དུ་ཉི་ཟླའི་མདངས་ལ་སྣང་ཡུལ་སྤྱོད་པའོ༔ ནང་གི་ཚོར་བ་བག་ཆགས་ཡུལ་ལས་སྣ་ཚོགས་འཆར་བའོ༔ ཕྱི་ཡི་འོད་ཀྱི་ཐབས་ལ་བསྟེན་ནས་ནང་གི་དྲན་རིག་གཏན་ལ་འབེབས་པའོ༔ རང་སེམས་དྲན་རིག་བརྗོད་མེད་པོ་
ཡང་དེ་ལྟར་བཞུགས་པའོ༔ ཚེ་འདིར་རྩལ་སྦྱངས་བར་དོའི་འཇིགས་སྐྲགས་གྲོགས་སུ་འགྱུར་བའོ༔ འཇའ་ཟེར་འཇིགས་སྐྲག་རང་ངོ་ཤེས་ཏེ་ཞི་ཁྲོའི་ལྷ་ཚོགས་མཇལ་བའོ༔ ཡུལ་སྣང་ཚོགས་དྲུག་སྣང་བ་རང་སར་དག་ཅིང་ཡེ་ཤེས་ལུས་སུ་ཐོབ་པའོ༔ རྒྱལ་བ་རབ་འབྱམས་ཞིང་བཀོད་སྨོན་ལམ་མཛད་ཕྲིན་རང་གིས་ཐོབ་པར་འགྱུར༔ ཞེས་གསུངས་པའི་དོན་རྫོགས་ཆེན་སྤྱིའི་ཐོད་རྒལ་ཉི་ཁྲིད་དང་ཁྱད་པར་མེད་པས་བརྩོན་འགྲུས་དྲག་པོས་འབད་ཅིང་ཉམས་སུ་ལེན་པ་དང་། རྒྱུན་དུ་གོམས་ཤིང་འདྲིས་པར་བྱས་ན་ཕན་ཡོན་དེ་རྣམས་ཐོབ་པར་ངེས་སོ། །ཁྲིད་ཚུལ་འདི་ཉིད་ཀྱི་མཚན་བཅས་ཀྱི་ཞི་གནས་སྒོམ་པའི་ཐབས་མི་འགྱུར་རྡོ་རྗེའི་དངོས་སློབ་གདོང་ཀུན་དགའ་རྡོ་རྗེའི་ཞལ་ལུང་ལྟར་བཀོད་པའོ།། ༈ །གཉིས་པ་མཚན་མེད་ཀྱི་མཉམ་བཞག་ལ་དམིགས་པའི་རྟེན་གང་ཡང་མེད་པར་མིག་ལྟ་སྟངས་དང་བཅས་ཏེ་ཕྱེ་བཙུམ་རན་པར་ཐད་ཀར་བལྟ་བ་
སྟེ། མུ་སྟེགས་ཚངས་པས་གྱེན་ལ་བལྟ། །ཉན་ཐོས་ཞི་བས་ཐུར་ལ་བལྟ། །རྡོ་རྗེའི་མིག་ནི་ཐད་ཀར་བལྟ། ཞེས་པ་ལྟར་སྐད་ཅིག་ཀྱང་མ་ཡེངས་ཧྲིག་གེ་ཕྲི་ལེ་སྒྲིམ་ནས་སྒོམ་དགོས་ཏེ། གཅེར་མཐོང་ལས། །སྒོམ་དུ་མེད་དེ་ཅི་ཡང་མི་བསྒོམ་ལ༔ ཡེངས་སུ་མེད་དེ་ཡེངས་མེད་དྲན་པ་བསྟན༔ སྒོམ་མེད་ཡེངས་མེད་ངང་ལ་གཅེར་གྱིས་ཞོག༔ ཅེས་གསུངས་པ་ལྟར་བཞག་ཅིང་། ༈ །ཡང་ངལ་བསོ་བ་ལྟར་ཀློང་ནས་སྒོམ། ༈ །ཡང་ཧུར་རེ་སྒྲིམ་ནས་བསྒོམ་པ་རེས་འཇོག་སུ་བྱ་དགོས། གྲུབ་ཆེན་ནག་པོ་སྤྱོད་པས། ཀློད་ཅིང་ཀློད་ཅིང་སྒྲིམ་པ་ནི། །རང་སེམས་ལམ་དུ་འཇུག་པའི་གནད། །སྒྲིམ་ཞིང་སྒྲིམ་ཞིང་ཀློད་པ་ནི། །རང་ངོ་རང་གི་ཤེས་པའི་གནད། །ཀློད་རུང་སྒྲིམ་རུང་གང་དགར་བཞག །རོ་སྙོམས་ཁྱབ་གདལ་ཆེན་པོའི་གནད། །གནད་གསུམ་ཡང་སྙིང་འདི་མེད་ན། །ཚིག་སྙན་བཤད་པས་བསླུ་བར་ངེས། ཅེས་གསུངས་པ་ལྟར་ལྷོད་ཀྱིས་
ཀློད། ཤིག་གིས་བཤིག་ནས་བསྒོམ་ཞིང་མཉམ་པར་བཞག་པས་སེམས་བྱིང་རྨུག་འཕྲོ་རྒོད་རྣམས་འབྱུང་སྟེ། དེ་ཡང་དབྱིངས་བའི་སྐབས་སུ་ཤེས་པ་གང་དུ་ཡང་མི་འཕྲོ་བ་མུན་ནེ་ཐོམ་མེ་གཡོ་འགུལ་མེད་པ་འདྲ་བ། དེའི་དུས་སུ་བྱིང་བ་དེའི་ངང་ལ་བཞག་པས་སྐབས་ཞིག་ན་རྐྱེན་བཟང་ངན་ཞིག་གིས་བྱས་ཏེ་འཕྲོ་བར་འགྱུར། འཕྲོ་མཁན་གྱི་ཤེས་པ་རང་ངོ་རང་ཤེས་སུ་འཕྲོ་བཅུག་པས་བྱིང་བའི་སྐྱོན་དག་སྟེ་བག་མེད་ཁ་ཡན་དུ་མ་བཏང་བར་བལྟའོ། ༈ །རྨུག་པ་ནི་མ་རིག་པ་གླན་པའི་རང་བཞིན་གྱིས་རྨུག་པ་དང་། རྒྱུད་ཞི་གནས་ཀྱིས་གླན་ཏེ་གནས་ལུགས་མི་རྟོག་པའི་ངང་དུ་འབྱམ་པ་གཉིས་ཡོད། དང་པོ་ནི། ཕྱག་སྐོར་སོགས་སྒྲིབ་སྦྱོང་དང་གསོལ་འདེབས་བྱ་བས་སངས། ཕྱི་མ་ནི་ངོ་རང་ཐོག་ཏུ་བཞག་པས་གོང་བཞིན་གྲོལ་བར་འགྱུར་རོ། །འཕྲོ་བ་ནི་སེམས་མི་གནས་པའི་འགྱུ་བ་སྣ་ཚོགས་མར་མེ་རླུང་གིས་གཡོ་བ་ལྟ་བུར། རྒོད་པ་ནི་འདོད་
ཆགས་ཀྱིས་ཆར་གཏོགས་པ་སེམས་རྣམ་པར་མ་ཞི་བ་ཆགས་སྲེད་ཀྱིས་རྟོག་པས་མར་མེ་རླུང་གིས་བསད་པ་ལྟ་བུའོ། འཕྲོ་རྒོད་གཉིས་དགག་ཏུ་མི་གཏུབ། རྗེས་སུ་མི་འབྲང་བར་རང་སར་བཞག་པས་རང་ཞི་རང་ས་ལ་རྟོག་མེད་དུ་འགྲོའོ། །དེ་དག་ལ་བརྟེན་ནས་ཇི་ལྟར་གནས་ན། ༈ །ཉམས་དང་པོ་རི་གཟར་གྱིས་འབབ་ཆུ་ལྟ་བུར་མྱུར་དུ་འགྱུར་ཞིང་མི་བརྟན་པ། རྣམ་རྟོག་བུར་ལོང་གི་དུས་ཏེ། སེམས་ཅུང་ཟད་ཟིན་པས་རྣམ་རྟོག་གི་འཕྲོ་འདུ་རིག་པ་ཡིན་པས་སྐྱོན་དུ་མི་བལྟའོ། ༈ །ཉམས་གཉིས་པ་ལྷོ་སྤྲིན་འཚུབས་པ་ལྟ་བུ་ལོང་མ་ལིང་། བན་མ་བུན་མར་གྱུར་པ་ནི། རྟོགས་པ་རེས་གནས། རེས་འཕྲོ་བ་འབྱུང་སྟེ། གནས་པ་ཡོན་ཏན་དུ་མི་བལྟ། འཕྲོ་བ་སྐྱོན་དུ་མི་བལྟ་བར་སེམས་རྩེ་གཅིག་ཏུ་བསྐྱང་བར་ཇེ་བརྟན་དུ་འགྱུར་རོ། ༈ །ཉམས་གསུམ་པ་ཆུ་ཀླུང་དལ་གྱིས་འབབ་བ་ལྟ་བུ་ནི། རེས་འགའ་བདེ་མེ་རེ་གནས་པ། རེས་འགའ་
འཕྲོ་རྒོད་ཅུང་ཟད་འབྱུང་བའོ། ༈ །བཞི་པ་རྦ་རླབས་དང་བྲལ་རྒྱ་མཚོ་ལྟ་བུའི་ཉམས་ནི། ཉིན་མཚན་འཁོར་ཡུག་ཏུ་མེ་རི་གནས་པ་དང་། རྣམ་རྟོག་ཡེ་མི་འགྱུ་བ་ལྟ་བུ་འབྱུང་། འདི་ལ་སྐྱོན་ཅན་དང་སྐྱོན་མེད་གཉིས་ཡོད་དེ། མུན་ནེ། ཐོམ་མེ། ལྡོབ་བེ་བ་དེ་ལ་རིག་པ་གཟེངས་བསྟོད། ཧུར་ཕྱུང་། ངར་འདོན། མོས་གུས་ཀྱི་གསོལ་འདེབས་ཡང་ཡང་བྱ། ༈ །སྐྱོན་མེད་པ་ནི། འགྱུ་བ་གཞི་ཐོག་ནས་མི་གཡོ་བ། གནས་པ་འགྱུ་ཐོག་ཏུ་བརྟན་པ། རིག་པ་རང་ངོ་རང་ཤེས་འཕྲོད་དེ། ཀ་དག་གཞིའི་འོད་གསལ་རང་ངོ་འཕྲོད་པར་ཉེ་ཞིང་ངོ་སྤྲོད་མཁན་ཉམས་རྟོགས་ཅན་གལ་ཆེ་བ་ཡིན་ནོ། །མདོར་ན་གནས་པ་དང་འགྱུ་བ་དང་རིག་པས་བསྡུས་པའི་རྟོག་ཚོགས་ཐམས་ཅད་རང་ཞི་རང་ཡལ་དུ་རང་སར་གནས་པའི་ཞི་གནས་ལ་བརྟན་པ་ཐོབ་དགོས་ཏེ། སྤྱོད་འཇུག་ལས། ཞི་གནས་རབ་ཏུ་གནས་པའི་ལྷག་མཐོང་གིས། །ཉོན་མོངས་རྣམ་པར་འཇོམས་
པར་ཤེས་བྱས་ནས། །ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་པ་མངོན་དགའ་འགྲུབ། ཅེས་གསུངས་པ་ལྟར་རོ། ༈ །གསུམ་པ་ལྷག་མཐོང་ངོ་སྤྲོད་པ་ནི། དེ་ལྟར་སེམས་རང་ལུགས་སུ་བཞག་པ་གནས་པའི་ངང་ནས་རྣམ་རྟོག་ཕྲ་རག་ཐམས་ཅད་རང་ཐོག་ཏུ་ཞི་ནས་སེམས་རང་སོར་གནས་པ་ནི་ཞི་གནས་ཀྱི་ངོ་བོ་ཡིན་ལ། གནས་པ་དེའི་དུས་ན་རྣམ་རྟོག་གི་འགྱུ་བ་ཆད་པས་ངན་རྟོག་དང་བྲལ། སྒོམ་བྱེད་ཀྱི་འཛིན་པ་མེད་པས་བཟང་རྟོག་བྲལ། སེམས་རང་རིག་ཡུལ་མེད་དུ་གསལ་བས་ལུང་མ་བསྟན་དང་བྲལ་བ། ངོས་བཟུང་མེད་པའི་ཤེས་པ་གསལ་སྟོང་ནམ་མཁའ་དྭངས་པའི་དཀྱིལ་ལྟ་བུ་དེ་རྟོག་མེད་དུ་ངེས་ཤེས་སྐྱེས་ཏེ་གནས་ལུགས་ཀྱི་རང་ཞལ་མཇལ་བ་ལྷག་མཐོང་གི་ངོ་བོ་ཡིན་ནོ། །ཞར་བྱུང་གི་ཞི་ལྷག་ཟུང་འཇུག་ཏུ་ངོ་སྤྲད་པ་ནི། ཉོན་མོངས་པའི་རྟོག་ཚོགས་ཐམས་ཅད་རང་སར་ཞི་ནས་
སེམས་མ་བཅོས་རང་ལུགས་སུ་གནས་པ་ཞི་གནས། དེའི་ངོ་བོ་གཞི་མེད་རྩ་བྲལ་སྟོང་ཉིད་སྤྲོས་པའི་མཐའ་ཐམས་ཅད་དང་བྲལ་བར་རྟོགས་པ་ལྷག་མཐོང་དེ་གཉིས་ཚིག་ལ་ཐ་དད་བྱུང་ཡང་དོན་ལ་འདུ་འབྲལ་མེད་པས་ཞི་ལྷག་ཟུང་འཇུག །དེ་ཡང་རྣམ་རྟོག་ཐོལ་གྱིས་སྐྱེས་ཚེ་དེ་ཉིད་ལ་བལྟས་པས་ལྷན་ནེར་གནས་པ་ཞི་གནས་གནས་ལུགས་ཀ་དག་གི་ངོ་བོ་མཐོང་བ་ལྷག་མཐོང་ཡིན་ཏེ། སེམས་རང་བབས་སུ་གནས་པ་ཞི་གནས་རྣམ་རྟོག་གི་ངོ་བོ་རྩད་བཅད་པས་སྟོང་པ་ཆོས་སྐུ་གསལ་བ་ལོངས་སྐུ་སྣ་ཚོགས་སྣང་བ་སྤྲུལ་སྐུ། དེ་གསུམ་དབྱེར་མེད་ངོ་བོ་ཉིད་སྐུ། བླང་དོར་མེད་པར་ཤེས་པ་ལྷག་མཐོང་། གནས་པ་ཁོ་ན་དང་རང་ངོ་སྐྱོང་པ་གཉིས་རེས་མོས་བྱས་པས་ཞི་ལྷག་ཟུང་འཇུག་གི་ཉམས་མྱོང་སྐྱེ་བ་མན་ངག་གོ། དེ་དག་གི་སྐབས་སུ་བདེ་གསལ་མི་རྟོག་པའི་ཉམས་ལ་ཞེན་ན་ཁམས་གསུམ་དུ་གོལ་བས་ཞེན་མེད་འཛིན་མེད་ཀྱི་ཉམས་སུ་ལེན་པ་གལ་
ཆེ་བས་ན། ཨོ་རྒྱན་རིན་པོ་ཆེས། སྒོམ་ལ་མ་ཞེན་ཡང་ནས་ཡང་དུ་ཤིག །ཅེས་གསུངས་པ་ལྟར་རོ། །དེ་དག་ནི་ཐེག་པ་ཐུན་མོང་གི་ཉམས་ལེན་ཡིན་ལ།། ༈ །།གདམས་པ་འདི་ཉིད་ཀྱི་ཟབ་ལམ་ཁྱད་པར་དུ་འཕགས་པའི་ཉམས་ལེན་ནི། རང་རིག་མ་ཡེངས་ཡེངས་མེད་ཡེ་སྟོང་རིག་རྩལ་གང་ཤར་ཤར་གྲོལ་རང་ཞལ་གཅེར་གྱིས་བལྟ་བའོ། །ཞེས་གསུངས་པས། ལྷག་མཐོང་ཆོས་ཉིད་མངོན་སུམ་དུ་མཐོང་བས་རང་རིག་ཀ་དག་གི་ངོ་བོ་དེ་ལ་སྐད་ཅིག་ཙམ་ཡང་མ་ཡེངས་པར་བརྩོན་འགྲུས་དྲག་པོ་ཡེངས་མེད་ཆུ་བོའི་རྒྱུན་ལྟར་བསྒོམ་པའི་སྟོབས་ཀྱིས་ཚུལ་མིན་ཡིད་བྱེད་ཀྱི་རྟོག་དཔྱོད་གཉིས་འཛིན་འཁྲུལ་པའི་སྣང་བ་ཐམས་ཅད་ཇེ་ནུབ་ལ་འགྲོ་ཞིང་། རང་རིག་པའི་རྩལ་མ་འགགས་པ་གང་ཤར་སྣང་བ་འཛིན་མེད་ཤར་གྲོལ་དུས་མཉམ་དུ་རང་རིག་གིས་རང་ཞལ་གཅེར་གྱིས་མངོན་སུམ་དུ་མཐོང་བ་སྟེ། འདས་རྗེས་ལས། ཆོས་ཉིད་
མངོན་སུམ་སྣང་བ་ཡིས། །ཡིད་དཔྱོད་འཛིན་པའི་སྣང་བ་ནུབ། ཅེས་སོ། །ཀུན་བྱེད་རྒྱལ་པོ་བཙོན་དུ་མི་བཟུང་འཁོར་འདས་ཁྱབ་པར་བརྟན་པར་བལྟ་བའོ༔ ཞེས་པས་རང་སེམས་ཀུན་ཏུ་བཟང་པོ་སོ་མ་དར་དང་ལྡན་པའི་རིག་པ་འཁོར་འདས་བདེ་སྡུག་ཀུན་བྱེད་པའི་ཀུན་བྱེད་རྒྱལ་པོ་འདི་ཉིད་བདེ་གསལ་མི་རྟོག་པ་ལ་སོགས་པ་ཉམས་སྣང་ཡེ་ཤེས་ཀྱི་རྩལ་གོང་ནས་གོང་དུ་འཕེལ་བའི་ངོ་བོ་རང་བཞིན་ཐུགས་རྗེ་གསུམ་གྱི་ངང་ལས་རིག་པ་བཙོན་དུ་བཟུང་བའི་ཉམས་ལེན་སྡུག་བཙིར་ཨ་འཐས་ཀྱི་འཆིང་བ་དང་བྲལ་བའི་སྣང་སྲིད་རྫོགས་པ་ཆེན་པོ་འཁོར་འདས་ཀུན་ལ་ཁྱབ་པའི་ཏིང་ངེ་འཛིན་ལ་བརྟན་པ་ཐོབ་ཅིང་རང་རྩལ་ཡེ་ཤེས་ཀྱི་སྣང་བ་རྒྱས་པའི་རང་ཞལ་མཇལ་བ་ཡིན་ཏེ། ཉམས་སྣང་གོང་འཕེལ་སྣང་བ་ཡིས། །བར་དོའི་ཡེ་ཤེས་སྣང་བ་རྒྱས། །ཅེས་སོ། །བལྟ་བྱ་ལྟ་བྱེད་མཁན་པོ་ཡེ་ནས་མ་རྙེད་ཡེ་ནས་མ་མཐོང་དྲན་རིག་ཚོར་བ་ནམ་མཁའི་
རླུང་རྒྱུ་ལྟར༔ སྣ་ཚོགས་སྣང་བ་རིག་པའི་རང་མདངས་སྣང་བའི་ཡུལ་དུ་བག་ཆགས་ལས་ནི་གྲུབ་པའོ༔ ཞེས་པས་བལྟ་བར་བྱ་བའི་ཡུལ། ལྟ་བར་བྱེད་པའི་མཁན་པོ་བལྟས་ཀྱང་མ་རྙེད་ཡེ་ནས་མ་མཐོང་སྤྲིན་ཐག་ཆད་པའི་ནམ་མཁའ་ལྟར་དྲན་རིག་ཚོར་བ་སྐྱེ་མེད་ཀ་དག་ཟང་ཐལ། འགགས་མེད་ནམ་མཁའི་རླུང་རྒྱུ་བ་ལྟ་བུའི་ངང་ལ་སྣ་ཚོགས་སྣང་བ་འོད་དང་འོད་ཟེར། ཐིག་ལེ་ཐིག་ཕྲན་སྐུ་དང་ཡེ་ཤེས་ཐམས་ཅད་རིག་པའི་རང་མདངས་ཚད་བཟུང་མེད་པར་ཤར་ཞིང་། སྣང་བའི་ཡུལ་དུ་སྣང་བ་རྣམས་ཀྱང་ཀུན་གཞིའི་བག་ཆགས་ཙམ་དུ་ཟད་ཅིང་། དེ་ཚེ་སྒོམ་དུ་མེད་པའི་དོན་དང་། བལྟར་མེད་པའི་ཡེ་ཤེས་ཀྱི་ཐོག་ཏུ་ཕེབ་པ་ཞེས་གསུངས་ཏེ། རིག་པ་ཚད་ཕེབ་སྣང་བ་ཡིས། །ལོངས་སྤྱོད་རྫོགས་པའི་སྐུ་ངོས་ཟིན། །ཅེས་སོ། །སྲིད་རྩེ་མན་ཆད་ན་རག་ཡན་ཆད་སྟོང་པར་སྦྱོང་ཞིང་སྐད་ཅིག་ཉིད་ལ་གཅེར་གྱིས་བལྟ་བའོ། །རང་སེམས་
རིག་རྩལ་ཧུར་བྱུང་ངར་བསྐྱེད་གཅེར་གྱིས་བལྟས་ཤིང་མ་ཡེངས་ངང་དུ་དེ་ལ་གནས་ན་རྟོགས་པ་འཆར་བའོ༔ ཞེས་གསུངས་པས་སྲིད་རྩེ་ནས་ན་རག་ཡན་ཆད་ཐམས་ཅད་མིང་ཙམ་བཏགས་པ་ཙམ་ལས་དོན་ལ་གྲུབ་པ་རྡུལ་ཙམ་མེད་པའི་ངང་ལ་ངོ་བོ་རང་བཞིན་ཐུགས་རྗེ་གསུམ་གྱི་ཡེ་ཤེས་ཀྱིས་སྦྱངས་ཤིང་རང་ཞལ་གཅེར་གྱིས་ཧུར་ཕྱུང་དར་བསྐྱེད་བལྟས་པས་སྤྲོས་སྣང་བག་ཆགས་ཀྱི་རང་བཞིན་ལུས་དང་བཅས་པ་དག་སྟེ། ཆོས་ཅན་གྱི་ཉམས་སྣང་ཟད། ཆོས་ཉིད་ཀྱི་རྟོག་པ་དག་པའི་ངང་ནས་སྒོམ་མེད་ཡེངས་མེད་སྐྱེ་མེད། ཀ་དག་བྱར་མེད། བློ་འདས་བརྗོད་མེད། འཁྲུལ་པ་གྲུབ་མཐའ། ལུས་སེམས་ཀྱིས་སྤྲོས་པ། གཟུང་འཛིན་གྱིས་ཞེན་པ་ཐམས་ཅད་ཟད་ཅིང་མྱང་འདས་ཀུན་བཟང་གིས་དགོངས་པ་ཀློང་དུ་གྱུར་པ་དག་སྟེ། ཆོས་ཉིད་དག་པའི་སྣང་བ་ཡིས། །རྫོགས་ཆེན་བྱ་བྲལ་འབྲས་བུ་ཐོབ། །དེ་ལྟར་གཞི་ལམ་མཐར་ཕྱིན་པས། །མྱང་འདས་
གཞན་ནས་བཙལ་དུ་མེད། །ཅེས་སོ། །དེ་དག་ཀྱང་ལས་དང་སྐལ་བར་ལྡན་པའི་སྤྱོད་ཡུལ་ཁོ་ན་སྟེ། བསྟན་པ་བུ་གཅིག་གིས་རྒྱུད་ལས། འདི་ནི་ཀུན་གྱིས་སྤྱོད་ཡུལ་མིན༔ སྐལ་བ་ཅན་གྱིས་སྤྱོད་ཡུལ་ལོ༔ ཅེས་གསུངས་པ་ལྟར་རོ།། ༈ །།བཞི་པ་དེ་ལྟ་བུའི་ཟབ་ཆོས་ཉམས་སུ་བླངས་པས་ས་ལམ་བགྲོད་པའི་ཚུལ་ལ་གཉིས་ཏེ་ཐུན་མོང་དང་ཐུན་མིན་ནོ། །དང་པོ་ནི། ཡེ་ཤེས་གསང་བ་སྒྲོལ་མ་རིན་པོ་ཆེའི་མན་ངག་གིས་རྒྱུད་ལས། མཁའ་སྤྱོད་གནས་སུ་འོང་འདོད་ན། །དང་པོ་ཐོས་པའི་ཤེས་རབ་ཀྱིས། །ཕྱི་ནང་ཆོས་ལ་སྒྲོ་འདོགས་ཆོད། །བར་དུ་བསམ་པའི་ཤེས་རབ་ཀྱིས། །དོན་དེ་རྒྱུད་ལ་གོམ་པར་སྦྱངས། །ཐ་མ་སྒོམ་པའི་ཤེས་རབ་ཀྱིས། །བདག་ཏུ་འཛིན་པའི་ཉོན་མོངས་གཞིག །ཚོགས་ལམ་བླ་མ་མཚན་ལྡན་ལ། །མཉེས་པ་གསུམ་གྱིས་མཆོད་པ་ཕུལ། །སྦྱོར་ལམ་བླ་མའི་མན་ངག་གིས། །ཞི་གནས་ལྷག་མཐོང་རྒྱུད་ལ་སྦྱོར། །
མཐོང་ལམ་སྤྱན་ལྔ་དག་པ་ཡིས། །རང་སེམས་སྐྱེ་མེད་མཐོང་བར་གྱིས། །སྒོམ་ལམ་ཏིང་འཛིན་རྣམ་གསུམ་གྱིས། །གཉུག་མ་ཡིད་ལ་གོམ་པར་གྱིས། །མཐར་ཕྱིན་ཉེས་པ་གཉིས་ཟད་པས། །ཆོས་རྣམས་ཟད་སར་སྐྱོལ་བར་གྱིས། ཅེས་གཞིའི་ཉེས་པ་སྤངས་བྱ་མ་རིག་པ། ལམ་གྱིས་ཉེས་པ་སྐྱོན་གཉེན་པོའི་རྩོལ་བ་གཉིས། མཆན། གསུངས་པ་ལྟར་རོ། །ཐུན་མོང་མ་ཡིན་པ་ཡེ་གསང་ཐུགས་གཏེར་འདི་ཉིད་ཀྱིས་སྤངས་ཐོབ་གཉིས་མེད་གཞི་འབྲས་དབྱེར་མེད་པའི་ལམ་བགྲོད་ཚུལ་སྤྱིར་བསྟན་པ་དང་། བྱེ་བྲག་རྒྱས་པར་དབྱེ་བའོ། །དང་པོ་ནི། བཅོམ་ལྡན་ཀུན་བཟང་ཡབ་ཡུམ་ཆོས་དབྱིངས་ཡེ་ཤེས་ལྔ་ཡི་ཀློང་༔ ཞེས་པ་རང་སེམས་ཨ་ཏི་བླ་མེད་ཡེ་སྟོང་ཁྱབ་གདལ་གཞི་གདོད་མའི་སེམས་ཉིད་ཀུན་ཏུ་བཟང་པོའི་སྣང་བའི་ཆ་ཡབ་ཀུན་ཏུ་བཟང་པོའོ། །སྟོང་ཆ་ཀུན་ཏུ་བཟང་མོ། །དེ་བཞིན་དུ་གསལ་བ་ཡབ་ཀུན་བཟང་། །སྟོང་པ་ཡུམ་ཀུན་ཏུ་བཟང་མོ། །བདེ་བ་ཡབ། སྟོང་པ་ཡུམ་གྱི་
རང་བཞིན་ཟུང་འཇུག་ཆོས་དབྱིངས་ཡེ་ཤེས་ལྔ་ཡི་ཀློང་ལས་མི་འདའ་བ་ནི་གཞིའི་ཀུན་བཟང་འཁོར་འདས་ཀུན་ཁྱབ་བོ། །སྣང་བ་སྣ་ཚོགས་རྟེན་ཅིང་འབྲེལ་འབྱུང་ཡེ་ཤེས་རོལ་པར་ཤར༔ ལམ་སྣང་བཞིའི་སྣ་ཚོགས་སྣང་བ་རྟེན་ཅིང་འབྲེལ་འབྱུང་ཡེ་ཤེས་ལྔའི་རྣམ་པར་རོལ་པ་ཤར་བ་ནི་ལམ་གྱིས་ཀུན་བཟང་ཐབས་ཤེས་ཟུང་འབྲེལ་ལོ། །མ་དག་རྟོག་ཚོགས་ཡེ་ནས་མ་སྤངས་རང་གྲོལ་འཛིན་མེད་རྣམ་པར་དག༔ ཅེས་པ་ཉོན་མོངས་པ་དུག་གསུམ་དུག་ལྔ་མ་དག་པའི་རྟོག་ཚོགས་ཡེ་ནས་མ་ཡེངས་དུག་ལྔ་ཡེ་ཤེས་ལྔ་ཡི་ངོ་བོ་རང་སར་གྲོལ་བས་འཛིན་མེད་མ་སྤངས་གནས་དག་གམ་རྣམ་པར་དག་པ་ནི་འབྲས་བུའི་ཀུན་བཟང་ཁ་སྦྱོར་ཡན་ལག་བདུན་ལྡན་ནོ། །གཞི་ལམ་འབྲས་བུ་གཉིས་འཛིན་རེ་དོག་མེད་པར་མཐའ་རུ་ཕྱིན༔ ཞེས་པ་གཞི་ལམ་འབྲས་གསུམ་དབྱེར་མེད་པའི་དོན་མངོན་དུ་གྱུར་པ་ནི་གཉིས་འཛིན་རེ་དོག་དང་བྲལ་བའི་
ཚེ་མཐར་ཕྱིན་པ་ཡིན་ནོ་ཞེས་བསྟན་པའོ། ༈ །གཉིས་པ་བྱེ་བྲག་རྒྱས་པར་དབྱེ་བ་ནི། གཞི་ཡི་ཀུན་བཟང་དུག་གསུམ་ངོ་བོ་བདེ་གསལ་མི་རྟོག་པ༔ ལམ་གྱི་ཀུན་བཟང་དུག་ལྔའི་ངོ་བོར་ཡེ་ཤེས་ལྔ་ཡི་རྒྱུ༔ འབྲས་བུའི་ཀུན་བཟང་ཕུང་པོ་ལྔ་དག་རྒྱལ་བ་རིགས་ལྔའོ༔ ཕྱི་ཡི་ཀུན་བཟང་ཚོགས་དྲུག་སྣང་བ་གང་ཤར་རང་གྲོལ་ལོ༔ ནང་གི་ཀུན་བཟང་རྟེན་འབྲེལ་བཅུ་གཉིས་ཉམས་སུ་མྱོང་ཞིང་སྟོང་པར་སྦྱངས་ཏེ་ཧྲུལ་པོར་བཤིག་པའོ༔ གསང་བའི་ཀུན་བཟང་རིགས་དྲུག་སྡུག་བསྔལ་མིག་གིས་བལྟ་ཞིང་ཐར་ལམ་བགྲོད་པའོ༔ ཀུན་བཟང་རྟག་པར་འཛིན་པ་ངོ་བོས་སྟོང་སྟེ་ནམ་མཁའ་ལྟར་སྦྱོང་ངོ་༔ ཀུན་བཟང་མི་རྟག་བརྡ་ཆོས་དུས་བཞི་ཁམས་ལྔའི་ངོ་བོ་བསྟན་ཏེ་གསལ་བར་འཆར་བའོ༔ ཀུན་བཟང་བདེན་མེད་སྒྱུ་མའི་གྲོང་ཁྱེར་སྨྲིག་རྒྱུ་ལྟ་བུའོ༔ ཀུན་བཟང་རྫུན་མེད་སྒྱུ་འཕྲུལ་ཀློང་ལས་སྲིད་གསུམ་ཤར་གྲོལ་ལོ༔ མ་རིག་ཉོན་མོངས་གཉེན་པོས་ཟིན་
བཞིན་ཡེ་ཤེས་ལྔ་ཡི་ཀློང་༔ དྲན་རིག་གསལ་བའི་རང་མདངས་སྐུ་གསུམ་ས་ལེར་གནས༔ ཡེ་མེད་ཀུན་བཟང་སྦུབ་ཏུ་མེད་དེ་རང་ཆས་སུ་བཞུགས་པའོ༔ ཡེ་སྟོང་ཀུན་བཟང་བསྟན་དུ་མེད་དེ་ནམ་མཁའ་གནས་པའོ༔ ཀུན་བཟང་ཡོད་པ་མ་ཡིན་ངོ་བོས་སྟོང་སྟེ་ནམ་མཁའ་ལ་ནི་རླུང་རྒྱུ་ལྟར༔ ཀུན་བཟང་མེད་པ་མ་ཡིན་རྒྱ་མཚོའི་ཀློང་དུ་སྟོང་གཟུགས་སྣ་ཚོགས་ཤར༔ ཀུན་བཟང་བདེན་པའི་སྟོབས་ནི་ཡེ་ཤེས་ལུས་ཐོབ་ཕ་རོལ་ཕྱིན༔ ཞེས་ཚིག་རྗེས་དོན་གྱིས་གཞོལ་བཞིན་སྙན་པར་བརྗོད་ལ་ལམ་འདི་ལྟ་བུ་ལ་ཞུགས་པ་བསྐལ་པ་བཟང་ངོ་སྙམ་པའི་སྤྲོ་བ་བསྐྱེད་དོ། །དེ་དག་གི་ཉམས་སུ་ལེན་བྱ་ཐམས་ཅད་མདོར་བསྡུ་ན། གུ་རུ་པདྨའི་ཞལ་ནས། ཆོས་ཐམས་ཅད་ལྟ་སྒོམ་སྤྱོད་གསུམ་ལ་འདུས་ཏེ༔ ཁས་ལེན་དང་བྲལ་བ་ལྟ་བའི་མཐར་ཐུག༔ ཡིད་ལ་མི་བྱེད་པ་སྒོམ་པའི་ཡང་རྩེ༔ བླང་དོར་དང་བྲལ་བ་སྤྱོད་པའི་རྒྱལ་པོ༔ ངོས་ལྐོག་མེད་པ་དམ་ཚིག་
གི་སྙིང་པོ༔ ལྟ་སྒོམ་སྤྱོད་འབྲས་ཐ་དད་དུ་མི་འཛིན་པ་འབྲས་བུའི་མཆོག་ཡིན༔ གསུངས་ཤིང་། དེ་ཡང་གཅེར་མཐོང་ལས། ད་ལྟའི་རིག་པ་དངོས་མེད་གསལ་བ་འདི༔ འདི་ཀ་ལྟ་བ་ཀུན་གྱིས་ཡང་རྩེ་ཡིན༔ དམིགས་མེད་ཁྱབ་གདལ་བློ་ལས་འདས་པ་འདི༔ འདི་ཀ་སྒོམ་པ་ཀུན་གྱི་ཡང་རྩེ་ཡིན༔ མ་བཅོས་འཛིན་མེད་ལྷུག་པར་འཇོག་པ་འདི༔ འདི་ཀ་སྤྱོད་པ་ཀུན་གྱི་ཡང་རྩེ་ཡིན༔ མ་བཙལ་ཡེ་ནས་ལྷུན་གྱིས་གྲུབ་པ་འདི༔ འདི་ཀ་འབྲས་བུ་ཀུན་གྱི་ཡང་རྩེ་ཡིན༔ ཞེས་གསུངས་པ་ལྟར་རོ། །དེ་ལྟ་བུའི་དོན་རྩེ་གཅིག་ཏུ་ཉམས་སུ་ལེན་དགོས་པ་ཡིན་ཏེ། སྡོང་པོ་བཀོད་པ་ལས། ཡང་དག་སངས་རྒྱས་བསྟན་པ་འདི། །ཐོས་པ་ཙམ་གྱིས་མི་གྲོལ་ལོ། །དཔེར་ན་ལ་ལ་ཆུ་ཀླུང་གིས། །སྟོབས་མེད་ནན་གྱིས་ཁྱེར་བ་རྣམས། །སྐམ་ནས་འཆི་བར་འགྱུར་བ་བཞིན། །མ་སྒོམ་ཆོས་ཀྱང་དེ་དང་འདྲ། །ཞེས་གསུངས་པ་བཞིན་ནོ། །དེང་སང་ཉམས་སུ་ལེན་ཞེས་ཚོད་མ་ལ་
ཚྭ་བྲོ་བ་བལྟ་བ་ཙམ་གྱིས་མི་འོང་། །ཉམས་ལེན་ལ་བརྟན་པ་ཐོབ་དགོས་པ་ཡིན་ཏེ། བརྟན་པ་མ་ཐོབ་བར་དུ་ཐུན་ཚོད་སྒོམ། །ཐུན་གྲངས་ཁམས་དང་དབང་པོའི་ཉམས་དང་སྦྱར། །བརྟན་པ་ཐོབ་ནས་ཐུན་གྲངས་ངེས་མེད་པས། མ་ཡེངས་དྲན་ཤེས་བརྟན་ལ་སྙིང་རུས་བསྐྱེད། ཅེས་སོ། རྫོགས་རིམ་སྒོམ་པའི་ཕན་ཡོན་ནི་གང་ཟག་དབང་པོ་རབ་འབྲིང་ཐ་མའི་བརྩོན་འགྲུས་ཀྱིས་བྱེ་བྲག་གིས་ཐོབ་པ་སྟེ། དྲག་པོ་རྩལ་གྱིས་ཡིག་ཆུང་ལས། རྫོགས་རིམ་བསྒོམ་པའི་ཕན་ཡོན་ནི༔ རབ་ནི་ལུས་སྣང་སེམས་གསུམ་འདྲེས༔ འབྱུང་བ་བཞི་ལ་རང་དབང་བསྒྱུར༔ པདྨ་བདག་དང་དགོངས་པ་མཉམ༔ འབྲིང་གིས་ཆོས་ཉིད་བདེན་པ་མཐོང་༔ སྐྱེ་འཆི་གཉིས་པ་རང་དབང་ཐོབ༔ ཐ་མའང་རང་སེམས་རང་ངོ་འཕྲོད༔ བར་དོའི་འཇིག་སྐྲག་དེ་ལ་མེད༔ བསྐྱེད་རྫོགས་གཉིས་ཀ་དབང་ཐོབ་ན༔ ཚེ་གཅིག་འཇའ་ལུས་ཆོས་སྐུ་འགྲུབ༔ ཕུང་པོ་མེད་པར་
མངོན་སངས་རྒྱས༔ ཞེས་སོགས་གསུངས་པ་ལྟར་སྔོན་བྱོན་རིག་འཛིན་གྲུབ་ཐོབ་གོང་མ་རྣམས་ཀྱིས་བསྐྱེད་རྫོགས་རིམ་པ་གཉིས་ལ་བརྟེན་ནས་མཆོག་གི་དངོས་གྲུབ་མངོན་དུ་མཛད་པ་ཡིན་པས་ཡིད་ཆེས་ཀྱི་དད་པ་བརྟེན་པོས་ཉམས་ལེན་རང་རྒྱུད་ལ་སྦྱོར་བ་གལ་ཆེའོ། །ཡང་འགའ་ཞིག་སྒྱིད་ལུགས་ཏེ་བདག་ལྟ་བུའི་བྱང་ཆུབ་ཐོབ་པར་མི་ནུས་སྙམ་ན་ནུས་ཏེ། རྒྱལ་སྲས་ཆེན་པོ་ཞི་བ་ལྷས། ཇི་སྲིད་སྦྲང་བུ་ཤ་སྤྲང་དང་། །དེ་བཞིན་སྲིན་བུར་གང་གྱུར་པ། །དེས་ཀྱང་བརྩོན་པའི་སྟོབས་བསྐྱེད་ན། །བྱང་ཆུབ་ཐོབ་དཀའ་བླ་མེད་ཐོབ། །བདག་ལྟ་རིགས་ཀྱི་མིར་སྐྱེས་ཤིང་། །ཕན་དང་གནོད་པ་ངོ་ཤེས་པས། །བྱང་ཆུབ་སྤྱོད་པ་མ་བཏང་ན། །བདག་གིས་བྱང་ཆུབ་ཅིས་མི་ཐོབ། །ཅེས་གསུངས་པ་ལྟར་དྭངས་འདོད་ཡིད་ཆེས་མི་ལྡོག་པའི་དད་པ་བཞི་དང་ལྡན་པའི་བརྩོན་འགྲུས་དྲག་པོ་འབད་པར་བྱའོ།། ༈ །།ལྔ་པ་བརྟན་པ་མཐར་ཕྱིན་པའི་ཐབས་
ནི། སྙིགས་མ་ལྔ་བདོ་བའི་དུས་འདིར། དམ་ཆོས་སྒྲུབ་པའི་མཐུན་རྐྱེན་ཉུང་། འགལ་རྐྱེན་བར་ཆད་མང་ཞིང་རྐྱེན་ངན་སྣ་ཚོགས་སུ་འཛིན་པས་ལུས་ཀྱི་ན་ཚ། སེམས་ལ་སྡུག་བསྔལ་སྣ་ཚོགས་ཅི་བྱུང་ཡང་དེ་ཉིད་ལ་སྐྱོན་དུ་མི་བལྟ་ཡོན་ཏན་དུ་མི་བལྟ་ཞིང་། །བདེ་སྐྱིད་དཔལ་འབྱོར་ལྡན་ཀྱང་། སྐྱིད་སྡུག་རོ་སྙོམས་སུ་ཤེས་པས་དམ་པའི་ཆོས་ལས་མི་འདའ་མི་སྤངས་སྒྲུབ་པ་ལ་འབད་དགོས་ཏེ། ན་ཚ་སྡིག་སྒྲིབ་ཀྱི་ཕྱགས་མ་ཡིན། །རྐྱེན་ངན་ཆོས་ཀྱི་བསྐུལ་མ་ཡིན། །གདོན་བགེགས་ལམ་གྱི་བོགས་འདོན་ཡིན། །སེམས་དཔའ་གདེང་བསྐྱེད་པ་མན་ངག་ཡིན། ཞེས་དང་། དཔལ་མགོན་ཀླུ་སྒྲུབ་ཀྱིས། འདུན་དང་ཞེ་སྡང་འཇིག་པ་དང་། །རྨོངས་པ་གང་ཞིག་ཆོས་མི་འདའ། །འདི་ནི་དད་པ་ཅན་ཞེས་བྱ། །ངེས་པར་ལེགས་པའི་སྣོད་མཆོག་ཡིན། །ཞེས་གསུངས་པ་ལྟར་ཉམས་ལེན་ལ་ཐང་ལྷོད་མེད་པ་དང་དམ་བཅས་པ་ལས་ནམ་ཡང་མི་
འདའོ། །དུས་དང་རྣམ་པ་ཀུན་ཏུ་ཉོན་མོངས་དུག་ལྔ། འཇིག་རྟེན་ཆོས་བརྒྱད། འདོད་ཡོན་ལོངས་སྤྱོད་བདེ་སྡུག་གི་སྣང་བ་དགྲ་གཉེན་གྱི་ཆགས་སྡང་སོགས་རྣམ་རྟོག་སྣ་ཚོགས་ཅི་སྐྱེས་ཀྱང་རྗེས་སུ་མི་འབྲང་། མི་དགའ། མི་ཞེ་ན། ཉམས་མྱོང་གི་འཆར་སྒོ་ཅི་བྱུང་ཡང་རོ་མི་མྱོང་། ང་རྒྱལ་དང་ཆགས་ཞེན་མེད་པར་བདེན་མེད་དུ་བཞག །ཞེན་མེད་དུ་བཞག །འཛིན་མེད་དུ་བཞག །རྒྱ་ང་སྐྱུར་དུ་བཞག །རེ་མེད་དོག་མེད་དུ་བཞག །རྟོག་མེད་བསམ་མེད་དུ་བཞག་གོ། ༈ །།རྣམ་རྟོག་བཟང་ངན་གྱིས་རྗེས་སུ་འབྲང་ན་འཁོར་བ་ཡིན་ཏེ། ཀླུ་སྒྲུབ་རྗེས། འཁོར་བ་རྣམ་པར་རྟོག་ལས་བྱུང་། །རྣམ་པར་རྟོག་པ་སེམས་ལས་བྱུང་། ཞེས་དང་། རྒྱུད་ལས། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་ཡིན། ཅེས་དང་། ལྗོན་ཤིང་ལས་ཀྱང་། རྣམ་རྟོག་ལས་བྱུང་འཁོར་བ་ཞེས་བྱ་བ། །འགའ་ཡང་ཡོད་མིན་དེ་ཕྱིར་རྣམ་རྟོག་དང་། །བྲལ་བར་
གྱུར་ལ་མྱ་ངན་འདས་ཞེས་བྱ། ཞེས་དང་། །འཁོར་བར་སྐྱེ་བའི་རྒྱུ་ནི་ལས་ཉོན་ཏེ། ཞེས་དང་། འདོད་ཆགས་ཞེ་སྡང་གཏི་མུག་གསུམ། །དེས་བསྐྱེད་ལས་ནི་མི་དགེ་བའོ། །ཞེས་གསུངས་པ་ལྟར་དུག་གསུམ་གྱིས་བསྐྱེད་པ་ལ། །ལས་མི་དགེ་བ་བཅུ། རྩ་ཉོན་དྲུག །ཉེ་ཉོན་ཉི་ཤུ་ལ་སོགས་ཉོན་མོངས་པའི་རྟོག་ཚོགས་རྣམས་འབྱུང་བར་འགྱུར་རོ། །མི་དགེ་བ་དེ་དག་ལམ་དུ་བསླང་ནུས་ན་ཡེ་ཤེས་ཡིན་ཏེ། ཡེ་ཤེས་རྣམ་པར་རྟོག་པ་ཡི། །དབང་དུ་གྱུར་ན་གྲོལ་བ་མེད། །རྣམ་པར་རྟོག་པ་ཡེ་ཤེས་ཀྱིས། །དབང་དུ་གྱུར་ན་འཁོར་བ་མེད། ཅེས་གསུངས་ཏེ། དེ་ལམ་དུ་བསླང་བ་ནི། དང་པོ་རང་གི་རྒྱུད་ལ་འདོད་ཆགས་ཐོལ་གྱིས་སྐྱེས་པའི་ཚེ་དེ་མ་ཐག་ཏུ་ངོས་བཟུང་ནས་ངོ་བོ་ལ་བལྟ། རྩ་བ་གཅོད། དྲུང་ཕྱུང་ནས་རྗེས་སུ་མི་འབྲང་པར་རྦད་དེ་བཅད་ལ། ཕྱ་ལེ་བཞག་པས་ཉམས་མྱོང་བ་བདེ་བ། རང་བཞིན་སྟོང་པར་འཆར། དེ་བཞིན་དུ་ཞེ་སྡང་སྐྱེས་
ཚེ་བལྟས་པས་ཉམས་མྱོང་གསལ་བ། རང་བཞིན་སྟོང་པ། གཏི་མུག་འཆར་ཚེ་བལྟས་པས་ཉམས་མྱོང་མི་རྟོག་པ། རང་བཞིན་སྟོང་པར་འཆར་སྟེ། སྙན་བརྒྱུད་ཟངས་སྦུབ་མ་ལས། ཞེ་སྡང་གི་ངོ་བོ་གསལ་བའི་རང་མདངས་ལ་གཅེར་གྱིས་བལྟས་ཤིང་། དེའི་ངང་ལ་མ་ཡེངས་པར་ཀློད་ལ་བཞག་པའོ༔ གཏི་མུག་གི་ངོ་བོ་གང་ཤར་གྱི་སྣང་བའི་ཡུལ་ལ༔ བག་ཆགས་སུ་ཞེན་པ་དེའི་ངོ་བོ་ལ་མ་ཡེངས་པར་རང་སེམས་དྲན་རྫི་དང་མ་བྲལ་བར༔ ཤར་གྲོལ་གྱིས་ངང་དུ་ཀློད་ལ་བཞག་པའོ༔ འདོད་ཆགས་ཀྱི་ངོ་བོ་ཞེན་འདོད་ཀྱིས་ཀུན་ནས་སློང་བའི་ནོར་རྫས་དང་ཡོ་བྱད༔ གཉེན་འདུན་དང་ཟླ་གྲོགས་ལ་སེམས་ཨ་འཐས་སུ་སོང་ཞིང་༔ རེ་དོག་གིས་རློམ་པའི་བློ་ཐམས་ཅད༔ དམིགས་གཏད་དང་མཚན་འཛིན་མེད་པར༔ རང་གྲོལ་འཛིན་མེད་གང་ཤར་ངོས་ཟིན་པའི་ངང་དུ་ཤར་གྲོལ་དུས་མཉམ་དུ་བཞག་པར་བྱའོ༔ འཁོར་འདས་ཀུན་ལ་ཁྱབ་པའི་ཡེ་ཤེས་
ནི༔ སངས་རྒྱས་ཀྱི་མ་སྒྲུབ༔ སེམས་ཅན་གྱིས་མ་སླང་༔ མངོན་དུ་གྱུར་པའི་རང་རིག་ཡེ་ཤེས་འདི་ཁོ་ནའོ༔ ཞེས་པའི་དོན་ཉམས་སུ་བླངས་པས། འདོད་ཆགས་བདེ་སྟོང་། ཞེ་སྡང་གསལ་སྟོང་། གཏི་མུག་རིག་སྟོང་མི་རྟོག་པའི་ཏིང་ངེ་འཛིན་རྒྱུད་ལ་སྐྱེ་ཞིང་སྐུ་གསུམ་རང་ཞལ་མཐོང་བ་སྟེ། གཅེར་མཐོང་ལས། ཅིར་ཡང་མ་གྲུབ་སྟོང་པ་ཆོས་ཀྱི་སྐུ༔ སྟོང་པའི་རང་མདངས་གསལ་བ་ལོངས་སྐུ་ཡིན༔ འགགས་མེད་ཅིར་ཡང་འཆར་བ་སྤྲུལ་པའི་སྐུ༔ ཞེས་སོ། །དེ་བཞིན་དུ་ཕྱི་རོལ་གྱིས་ཡུལ་གཟུགས་སྒྲ་དྲི་རོ་རེག་བྱ་སོགས་ཆགས་ཤིང་སྡང་བའི་ཡུལ་དུ་གྱུར་པ་ཐམས་ཅད་རང་གི་སེམས་ཉིད་གཅིག་པུའི་སྣང་བ་ཡིན་པས། དོན་ལ་གྲུབ་པ་རྡུལ་ཙམ་མེད། བདེན་མེད་སྒྱུ་མ། དངོས་མེད་རྨི་ལམ་ལྟ་བུ་ཡིན་སྙམ་ངེས་པ་རྙེད་དགོས། དེ་ལྟ་བུའི་གནད་དོན་རྒྱུད་ལ་མ་སྐྱེས་ན། གནས་སྐབས་སུ་སྒོམ་ཉམས་དང་། ཆོས་སྣང་ཕྲན་བུ་རེ་ཡོད་ཀྱང་། དེ་བྱིང་ནས་
རྐྱེན་ཅུང་ཟད་རེས་བློ་སྣ་ལྡོག་ནས་ཐ་མལ་པར་འགྱུར་ཉན་ཆེ་བས། དེས་ན་ཅིར་སྣང་ཐམས་ཅད་རང་སེམས་སུ་ཤེས་པ། སྣང་ཐོག་ཏུ་སྟོང་པར་གོ། སྟོང་ཐོག་སྣང་བར་གོ། སྣང་སྟོང་དབྱེར་མེད་དུ་རྟོགས་པའི་ངང་ལས་སྣང་བ་མི་དགག །སེམས་ཉིད་མི་སྒྲུབ། སངས་རྒྱས་མི་བཙལ། སྣང་སེམས་དབྱེར་མེད་ཡིན་པ་ལ་ཡིན་བཞིན་བཞག་དགོས་ཏེ། གསང་རྒྱུད་ལས། སྣང་བ་བཀག་པས་མི་ཁོག༔ འོ་ན་ཁེགས་ས་མ་ཡ༔ སྣང་བ་དངོས་པོ་ཡིན་པས་ཡུལ་སེམས་དབྱེ་བསལ་མེད༔ སེམས་ཉིད་བལྟས་པས་མི་མཐོང་འོ་ན་ལྟོས་དང་ཡ། སྟོང་པ་རང་མདངས་གསལ་དག་གཉིས་མེད་ཡིན༔ སངས་རྒྱས་བཙལ་བས་མི་རྙེད་འོ་ན་ཚོལ་དང་ཡ༔ རང་སེམས་ཡིན་པས་ལོགས་ནས་རྙེད་མི་སྲིད༔ ཅེས་དང་། གཅེར་མཐོང་ལས། དཔེར་ན་སྣང་སྲིད་འཁོར་འདས་སྣང་བ་ཀུན༔ རང་གི་སེམས་ཉིད་གཅིག་གི་མཐོང་སྣང་ཡིན༔ གང་ཚེ་རང་གི་སེམས་ཉིད་འགྱུར་ཙ་ན༔ ཕྱི་
རུ་འགྱུར་བས་དེ་མི་མཐོང་སྣང་འབྱུང་༔ ཞེས་དང་། མ་རྟོག་པ་ལ་འཁྲུལ་པར་སྣང་༔ རྟོགས་པ་རྣམས་ལ་ཆོས་སྐུར་སྣང་༔ ཞེས་གསུངས་པ་བཞིན་ཤེས་པར་བྱའོ། །དེ་ཡང་རང་བཞིན་རྫོགས་པ་ཆེན་པོ་ལས་ཤར་གྲོལ། གཅེར་གྲོལ། རང་གྲོལ། ཡངས་གྲོལ་རྣམས་གསུངས་ཏེ། ཤར་གྲོལ་དུ་སྣང་ཞེན་གྱིས་རྣམ་རྟོག་དག་པ། གཏེར་གྲོལ་དུ་གཉིས་འཛིན་གྱིས་རྣམ་རྟོག་དག་པ། རང་གྲོལ་དུ་ཀུན་རྟོག་གི་བདག་འཛིན་དག་པ། ཡོངས་གྲོལ་དུ་འཁྲུལ་མེད་ཀྱི་གདེངས་དང་ལྡན་པ་གཅིག་དགོས་ཤིང་། དང་པོ་འཁྲུལ་པས་མ་གོས་པ། ད་ལྟ་འཁྲུལ་པ་ལ་མི་གནས་པ། ཐ་མར་འཁྲུལ་མི་སྲིད་པ། རིག་པ་རང་ཡལ་གྱི་སངས་རྒྱས། འཁྱལ་པ་སྨྲ་མེད་ཀྱི་རྒྱ་ཡན། སྲིད་གསུམ་ཀ་དག་གི་ཆོས་སྐུ། ལྟ་བ་གྲོང་ཁྱེར་རྒྱུན་གཅོད། སྒོམ་པ་རི་བོ་ཅོག་བཞག །སྤྱོད་པ་ཁམས་གསུམ་ཡོངས་གྲོལ་ཏེ་རྫོགས་ཆེན་ཨ་ཏིའི་ཁྱད་ཆོས་སོ། །དེ་ལྟར་མ་རྟོགས་པའི་
སྙིགས་དུས་ཀྱི་ཆོས་པར་རློམ་ཤིང་བཟང་པོར་ཁས་ལེན་པ་ལྟ་བ་ནམ་མཁའ་ལྟར་མཐོ་ཟེར་ཞིང་ཁ་ལྟའི་རྦད་ཁམ་ཆེན་པོ་སྒྲོགས་ཤིང་བཟང་པོའི་དྲིལ་བསྒྲགས་པ། སྤྱོད་པ་འཇིག་རྟེན་ཕལ་པ་བས་ཀྱང་རྩིངས་ཞིང་རྒྱུ་འབྲས་མི་བརྩི་བའི་སྟོང་སྐད་ཧད་པོར་སོང་བ། བླ་མ་དཀོན་མཆོག་ལ་དད་གུས་དག་སྣང་། རིགས་དྲུག་སེམས་ཅན་ལ་ཕན་སེམས་མེད་པར། ཕྱི་བྱ་བྲལ་དང་འཁྲུལ་ཞིག་ལྟར་བཟང་ཞིང་། ནང་ཆགས་སྡང་གི་ཆོས་བརྒྱད་མེ་ལྟར་འབར་བའི་ཆོས་པ་རྟོགས་ལྡན་སྒོམ་ཆེན་བཟང་པོ་ཡིན་ཟེར་བ་རྣམས་ཀྱང་། མུ་སྟེགས་པའི་ལྟ་སྤྱོད་དང་མཚུངས་ཉན་ཆེ་བས་བག་ཡོད་པར་དགོས་ཏེ། གུ་རུ་པདྨའི་ཞལ་ནས། ཕྱི་རབ་སྒོམ་ཆེན་ཡིན་པར་ཁས་འཆེ་རྣམས༔ ལྟ་བ་འཕང་མཐོ་སྤྱོད་པ་རྩིངས་གྱུར་ན༔ མུ་སྟེགས་རྒྱང་འཕེན་ལྟ་བར་གོལ་བར་མཆི༔ སྟོང་པ་ཟེར་ནས་མེད་པར་བཟུང་གྱུར་ན༔ མུ་སྟེགས་ཆད་པའི་ལྟ་བར་གོལ་བར་མཆི༔ སྒོམ་ཡོད་
སེམས་ལ་རྟག་པར་བཟུང་གྱུར་ན༔ མུ་སྟེགས་གྲངས་ཅན་པ་རུ་གོལ་བར་མཆི༔ མི་རྟོག་གླན་སྒོམ་ཤེས་པ་བཙོན་བཟུང་ན༔ ཉན་ཐོས་འགོག་པའི་ལམ་དུ་གོལ་བར་མཆིས༔ ཐམས་ཅད་ཡིན་ཞེས་བབས་ཅོལ་སྤྱོད་གྱུར་ན༔ འབྲས་བུ་ངན་སོང་གསུམ་དུ་གོལ་བར་མཆི༔ རང་སེམས་མ་གཏོགས་སྒོམ་ལ་བྱེད་རྫུས་བཏབ༔ འཆི་ཁར་འགྱོད་དེ་ལོག་པར་གོལ་བར་མཆི༔ ཅེས་གསུངས་པ་བཞིན་ནོ། །ཡང་ལྟ་བ་ཚིག་ཞེ་ན། སྒོམ་པ་ཡིད་བྱེད། སྤྱོད་པ་ཐོ་ཅོ། འབྲས་བུ་རེ་སྨོན། དམ་ཚིག་མངོན་ལྐོག །མ་གྲོལ་གྲོལ་རྫུན། མ་རྟོགས་རྟོགས་རྫུན། མ་གྲུབ་གྲུབ་རྟགས། མ་མཐོང་ལྷ་མཐོང་། མ་བབས་ལྷ་བབས། མ་རིག་འདྲེ་རིག །མི་ཤེས་མངོན་ཤེས། མ་ཞིག་འཁྲུལ་ཞིག །མ་བཏང་བྱ་བཏང་། མ་སྒོམ་སྒོམ་ཆེན་བྱེད་པ་རྣམས་ཀྱིས་ཡེ་གསང་ཐུགས་གཏེར་སྙིང་པོའི་དོན་འདི་མ་རྟོག་ཤིང་གྲོལ་བར་མི་འགྱུར་ཏེ། མ་ཧཱ་གུ་རུའི་ཞལ་ནས། ལྟ་བ་ཁ་
ལྟ་ཚིག་ལ་ཞེན༔ སྒོམ་པ་སྟོང་ལྟ་ཧད་པོར་བསྒོམ༔ སྤྱོད་པ་ཐེ་ཚོམ་བབ་ཆོལ་སྤྱོད༔ དམ་ཚིག་མངོན་ལྐོག་གྲོགས་པོ་བསླུ༔ བསམ་པ་ཆོས་མིན་མང་པོ་འཆར༔ ཉམས་ལེན་མི་བརྩོན་གཡེང་བ་ཆེ༔ ཆོས་དང་ཆོས་གྲོགས་བླ་མར་སྨད་༔ གཉེན་འབྲེལ་ཡུལ་ལ་ཆགས་ཞེན་ཆེ༔ ཆོས་བརྒྱད་ཆགས་སྡང་མེ་ལྟར་འབར༔ ཕྱི་མ་སྒྲུབ་ཟེར་ཚེ་འདིར་སྲིད༔ སྐལ་མེད་གང་ཟག་དེ་འདྲས་ནི༔ སྙིང་པོའི་དོན་འདི་རྟོགས་མི་འགྱུར༔ ཞེས་སོ། །མདོ་ལས། འཇིག་རྟེན་པ་དག་སྟོང་ཉིད་སྒོམ་ན་ཡང་། །དེ་ཡི་དངོས་པོར་འཛིན་པ་འཇིགས་མི་ནུས། །དེ་ཡི་ཕྱིར་ཡང་ཉོན་མོངས་རྣམ་པར་སྡང་། །ལྷག་སྤྱོད་ཀྱིས་ནི་ཏིང་འཛིན་སྒོམ་པ་བཞིན། །ཞེས་པའང་དྲན་པར་བྱའོ། །ཟབ་དོན་རྩེ་གཅིག་ཉམས་སུ་ལེན་པ་ལ་དང་པོ་དལ་འབྱོར་རྙེད་དཀའ་སྒོམ་པའི་ཚེ། དལ་འབྱོར་ལ་སྙིང་པོ་ལེན་འདོད་ཀྱི་བསམ་པ་ཚོང་པ་རིན་ཆེན་གླིང་དུ་འགྲོ་བ་ལྟ་བུ། །འཆི་བ་མི་རྟག་པ་སྒོམ་པའི་ཚེ།
ཚེ་འདིའི་བྱ་བ་ལ་བློ་མི་འཇུག་པ་གཅན་གཟན་མདུན་དུ་རྩ་སྤུངས་པ་ལྟ་བུ། ལས་འབྲས་སྒོམ་པའི་ཚེ་དམ་ཆོས་འཆི་མེད་སྨན་ལྟར་བསྟེན་ཅིང་། སྡིག་པ་མི་དགེ་བ་བཙན་དུག་སྤང་བ་ལྟ་བུ། འཁོར་བའི་ཉེས་དམིགས་སྒོམ་པའི་ཚེ་འཁོར་བ་མེ་འོབ་ལྟར་མཐོང་ཞིང་ཐར་པ་དོན་གཉེར་བ་ལ་སྐོམ་པས་ཆུ་བསྙེགས་པ་ལྟ་བུ། སྐྱབས་འགྲོའི་ཚེ་སེམས་ཅན་ཐམས་ཅད་སྒྲོལ་བར་འདོད་པ་གྲུ་ལྟ་བུའི་སེམས་བསྐྱེད་ཀྱིས་ཚེ་སེམས་ཅན་འཁོར་བ་ལས་འདྲེན་ཕྱིར་བྱམས་དང་སྙིང་རྗེ་བུ་གཅིག་པའི་མ་ལྟ་བུ། རྡོར་སེམས་བསྒོམ་བཟླས་ཀྱི་ཚེ་སྙིང་པོ་ལ་རྒྱུན་ཆད་མེད་པ་དྲང་སྲོང་གི་རིགས་སྔགས་བཟླས་པ་ལྟ་བུ། མཎྜལ་འབུལ་བའི་ཚེ་ལུས་ལོངས་སྤྱོད་ལ་ལྟོས་པ་མེད་པ་རྒྱལ་བུ་དོན་གྲུབ་ལྟ་བུ། བླ་མའི་རྣལ་འབྱོར་སྒོམ་པའི་ཚེ་དད་གུས་འགྱུར་བ་མེད་པ་གཞོན་ནུ་ནོར་བཟང་ལྟ་བུ། བསྐྱེད་རིམ་སྒོམ་པའི་ཚེ་ཐ་མལ་གྱི་སྣང་ཞེན་བྲལ་ཞིང་སྣང་བ་ལྷ་སྐུར་ཤར་བ། །
རྫོགས་རིམ་གྱིས་སེམས་མི་གནས་པ་གནས་པར་བྱེད་པའི་ཚེ་སྙིང་རུས་དང་ལྡན་པ། གནས་པ་བརྟེན་པར་བྱེད་པའི་ཚེ་ལྟ་སྒོམ་ལ་གདར་ཤ་ཆོད་པ། བརྟན་པ་མཐར་ཕྱིན་པར་བྱེད་སྐབས་ཉམས་ལེན་ལ་བརྟན་པ་ཐོབ་ཅིང་ཆོས་ཉིད་ཟད་སར་འཁྱོལ་བ་གལ་ཆེ་བ་ཡིན། བདག་ཅག་གི་འདྲེན་མཆོག་མཁན་རྡོ་རྗེ་འཆང་ཟླ་བ་བཟང་པོའི་ཞལ་ནས། བསྐྱེད་རིམ་ལྷ་སྐུར་གསལ་ཡང་རྟག་འཛིན་སྤངས། །རྫོགས་རིམ་འོད་གསལ་སྟོང་ཡང་ཆད་འཛིན་སྤངས། །དེ་ཉིད་ཟུང་འཇུག་རིམ་གཉིས་རྣལ་འབྱོར་ཟེར། །ལྟ་བ་མཁའ་འདྲ་གྲུབ་མཐའ་མ་བསྒྱུར་གཅེས། །སྒོམ་པ་མ་བཅོས་བུམ་ནང་མར་མེ་འདྲ། །སྤྱོད་པ་ཞེན་མེད་གང་ཤར་ལམ་ཁྱེར་ཏེ། །འབྲས་བུ་སྐུ་བཞིའི་རྒྱལ་སར་གཤེགས་པ་ཡིན། །མཐའ་བརྒྱད་འཛིན་པ་བྱུང་ན་ལྟ་བའི་གེགས། །ཡེངས་འཁྲུལ་རྐྱེན་གྱིས་བསྒྱུར་ན་སྒོམ་པའི་གེགས། །རྒྱུ་འབྲས་སྤངས་བླངས་འཆོལ་ན་སྤྱོད་པའི་གེགས། །རེ་དོགས་ཞེན་
པས་འཆིང་ན་འབྲས་བུའི་གེགས། །རང་རྒྱུད་ཆོས་དང་མ་འདྲེས་ཆོས་ཀྱི་གེགས། །རྒྱལ་བའི་བཀའ་དང་མི་མཐུན་ཐར་པའི་གེགས། །ཉམས་དང་རྨི་ལམ་རང་སྣང་བྲིད་པའི་གེགས། །བསྙེན་བཀུར་སྲི་ཞུ་ཆོས་བརྒྱད་འཕེལ་བའི་གེགས། །བྱ་བ་མང་ན་དགེ་སྦྱོར་སྒྲིབ་པའི་གེགས། །དེ་སོགས་གེགས་ཀྱི་རིམ་པ་མང་ན་ཡང་། །རྩ་བ་རང་སེམས་གཅིག་པུའི་ཆོ་འཕྲུལ་ཏེ། །གང་ཤར་རང་ཐོག་བཞག་པས་གྲོལ་བ་ཡིན། །མཉམ་བཞག་དུས་ཀྱི་ཞི་གནས་འཐོམ་པོ་ལ། །གནས་མཁན་རྩ་བ་བཅད་པ་བོགས་འདོན་ཡིན། །རྗེས་ཐོབ་ལྷག་མཐོང་རིག་པའི་གསལ་ཆ་ལ། །བྱུང་གནས་འགྲོ་གསུམ་བརྟགས་པ་བོགས་འདོན་ཡིན། །བདེ་གསལ་མི་རྟོག་ཉམས་ཀྱི་ཤུན་པ་ལ། །བཟང་ངན་སེམས་སུ་ཐག་བཅད་བོགས་འདོན་ཡིན། །ཞེས་སོགས་གསུངས་པ་ལྟར་བླ་མའི་མན་ངག་ཟབ་མོ་ལ་བརྟེན་པའི་གེགས་སེལ་དང་བོག་འདོན་དང་བཅས་ཏེ་རྩེ་གཅིག་ཏུ་
ཉམས་སུ་ལེན་པ་ཞུའོ། །རྫོགས་ཆེན་ཨ་ཏི་ཁྱབ་གདལ་ཆེའི། །དངོས་གཞིའི་ཁྲིད་རིམ་གཉིས་པ་འདི། །རང་གིས་ཡིད་ལ་གོམས་ཕྱིར་དང་། །མོས་ལྡན་རང་འདྲར་ཕན་སེམས་ཀྱིས། །གསེར་འཕྱོང་མེ་མོ་བྱ་ཡི་ལོར། །ཟབ་བདུན་ཕུར་པའི་སྒྲུབ་ཆེན་སྐབས། །གཏེར་སློབ་མཁན་པོ་རཏྣ་ཡིས། །འོག་མིན་ཀརྨའི་གདན་ས་ཆེར། །མི་འགྱུར་རྡོ་རྗེའི་འདྲ་ཞལ་མདུན། །གསོལ་འདེབས་སྨོན་ལམ་དང་བཅས་བྲིས། །ཟབ་དོན་བསྟན་པ་དར་ཞིང་རྒྱས། །འགྲོ་ལ་ཕན་བདེའི་དཔལ་འབར་ཤོག །ཨ་ཏི་མ་ཧཱ་སིནྡྷ་ཝརྡྷནྷུ་ཨེ་མ་ཧོཿ གཤིས་སྐྱེ་མེད་ནམ་མཁའ་ཡངས་པ་ལ། །གདངས་འགགས་མེད་རྫོགས་ལྡན་སྤྲིན་ཕུང་འཁྲིགས། །རྩལ་སྣ་ཚོགས་ནོར་བུའི་གྲུ་ཆར་གཡོ། །ཕ་བཀའ་བརྒྱུད་བླ་མ་བཀའ་དྲིན་ཅན། །བདག་མོས་ལྡན་བློ་གྲོས་ཞིང་ས་ལ། །ལམ་རིམ་གཉིས་ཀྱི་མྱུ་གུ་ལེགས་འཁྲུངས་ནས། །གཞི་ཆོས་སྐུའི་འབྲས་བུ་མངོན་དུ་གྱུར། །བློ་ཨ་འཐས་ཀྱི་
མདུད་པ་རང་སར་གྲོལ། །སྒྲིབ་གཉིས་ཀྱི་བག་ཆགས་རང་སར་དག །སེམས་རྣམ་རྟོག་གི་རྦ་རླབས་རང་སར་ཞི། །ཡིད་བྱེད་བྲལ་བའི་ངང་ལ་གནས། །གཏད་མེད་ཀྱི་ངོ་བོ་ལྟག་གེར་མཐོང་། །ཟུང་འཇུག་སྤྲོས་པའི་མཐའ་དང་བྲལ། །འཁོར་འདས་རོ་གཅིག་ཕྱག་རྒྱ་ཆེ། །སྒོམ་མེད་ཆོས་སྐུའི་རྒྱལ་ས་ཟིན། །མན་ངག་གནད་ཀྱི་གསང་ལམ་གྱིས། །ཚེ་འདི་ལ་གྲོལ་བར་བྱིན་གྱིས་རློབས། །གཞི་བདེན་གཉིས་ཟུང་འཇུག་གི་བླ་མ་ལ། །ལམ་ཚོགས་གཉིས་ལྡན་པས་གསོལ་བ་འདེབས། །འབྲས་བུ་སྐུ་གསུམ་འགྲུབ་པར་བྱིན་གྱིས་རློབས་ཤིག །བླ་མ་མཁྱེན་ནོ། བླ་མ༴ དྭགས་པོ་ལྷ་རྗེ༴ ཟླ་འོད་གཞོན་ནུ༴ སྙི་སྒོམ་ཆོས་རྗེ༴ ཟླ་བ་བཟང་པོ༴ རང་སེམས་རྟོགས་པར་བྱིན་གྱིས་རློབས་ཤིག །གཞི་ལྟ་བ་གཏན་ལ་ཕེབ་པར་བྱིན༴ ལམ་ཡེངས་མེད་དྲན་པ་བརྟན་པར་བྱིན༴ འབྲས་བུ་ཡེ་གནས་རང་ངོ་ཤེས་པར་བྱིན༴ བླ་མ་མཁྱེན་ནོ། །གཏེར་ཆེན་ཆོས་རྗེ་
མཁྱེན༴ མཚོ་སྐྱེས་བླ་མ༴ སངས་རྒྱས་གླིང་པ༴ མཆོག་གྱུར་གླིང་པ༴ ཀ་དག་གདོད་མའི་གནས་ལུགས་རྟོགས་པར་བྱིན༴ ལྷུན་གྲུབ་འོད་གསལ་མཐའ་རུ་ཕྱིན་པར་བྱིན༴ སེམས་སྡེའི་གསལ་སྣང་མངོན་དུ་གྱུར་པར༴ ཀློང་སྡེའི་སྟོང་ཆེན་དབྱིངས་སུ་དག་པར༴ མན་ངག་ཟུང་འཇུག་རང་ངོ་འཕྲོད་པར༴ རྟོགས་པས་བདག་གྲོལ་བར་བྱིན༴ ཐུགས་རྗེས་གཞན་གྲོལ་བར་བྱིན༴ བདག་གཞན་དོན་གཉིས་ལྷུན་གྱིས་གྲུབ་པར་བྱིན་གྱིས་རློབས་ཤིག །ཅེས་རྩེ་གཅིག་ཏུ་གསོལ་བ་བཏབ་ལ། དེ་བཞིན་ཉིད་ཀྱི་ངང་ལ་མཉམ་པར་བཞག་པས། གཤིས་སྐྱེ་མེད་དུ་ཤིག་གེ །གདངས་འགགས་མེད་དུ་འབོལ་ལེ། །རྩལ་མོས་གུས་སུ་ལམ་མེར་འོང་བ་དེ་ཀ་མོས་གུས་ཕྱག་རྒྱ་ཆེན་པོ་ཡིན་ལོ་བརྒྱ་ལགས། ཧ་ཧ་ཧ། ངོ་བོ་ལ་ལྟོས་དེ་ག་རང་ཡིན་བླ་མ་རང་གི་སེམས་ཡིན། ཅེས་པ་འདི་ལྟར་བཀའ་དྲིན་མཚུངས་མེད་བླ་མ་རྣམ་གཉིས་ལ་གསོལ་འདེབས་གདུང་དབྱངས་
ཡིད་ཆེས་ཀྱི་དད་པ་འདྲེས་ནུས་པ་ཞིག་དགོས་ཞེས་བླ་མ་ཕྱག་རྒྱ་སྤྲུལ་སྐུ་ཀརྨ་དམ་ཆོས་བློ་གྲོས་བཟང་པོས་བསྐུལ་ངོར། ཅི་དྲན། གང་དྲན། མཁན་མིང་རཏྣས་བྲིས་ཏེ་ཕུལ་བ་བླ་མའི་བྱིན་རླབས་སེམས་ལ་འཇུག་པར་གྱུར་ཅིག །ཛ་ཡ། སརྦ་དཱ་ཀ་ལྱཱ་ཎི་བྷ་ཝ་ཏུ། དགེའོ། དགེའོ། དགེའོ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།