ཕྲིན་ལས་མགོན་པོ་ཏྲཀྴད་ཀྱི་ལོ་རྒྱུས་ངེས་ཤེས་འདྲེན་བྱེད་ལུང་གི་བང་མཛོད།
ཕྲིན་ལས་མགོན་པོ་ཏྲཀྴད་ཀྱི་ལོ་རྒྱུས་ངེས་ཤེས་འདྲེན་བྱེད་ལུང་གི་བང་མཛོད་ཅེས་བྱ་བ་བཞུགས་སོ། །
དཔལ་ནག་པོ་ཆེན་པོ་ལ་ཕྱག་འཚལ་ལོ། །དེ་ཡང་ཐར་པ་དང་ཐམས་ཅད་མཁྱེན་པའི་གོ་འཕང་སྒྲུབ་པའི་གང་ཟག་གིས་ས་ལམ་གྱི་བར་ཆད་སེལ་བར་བྱེད་པ་ལ་ཡེ་ཤེས་ཀྱི་ཆོས་སྐྱོང་ཞིག་མེད་ཐབས་མེད་ལ། རྒྱ་བོད་གཉིས་ཀར་བྱོན་པའི་མཁས་གྲུབ་ཐམས་ཅད་ཀྱིས་བཀའ་སྲུང་གི་གཙོ་བོ་ནི་ཡེ་ཤེས་ཀྱི་མགོན་པོ་སྡེ་ལྔ་གང་རུང་ཞིག་ལ་ཐུགས་རྩིས་ཆེ་བར་མཛད་ཅིང་དེ་ལ་ཡང་རྒྱུད་ལུང་མན་ངག་གསུམ་ལ་བརྟེན་དགོས་པའི་ཕྱིར་ན། མགོན་པོ་མངོན་པར་འབྱུང་
བའི་རྒྱུད་ལས། མགོན་པོ་ཕྱག་གཉིས་པ་དང་། ཕྱག་བཞི་པ་དང་། ཕྱག་བརྒྱད་པ་དང་། ཕྱག་བཅུ་པ་དང་། ཕྱག་བཅུ་གཉིས་པ་དང་། ཕྱག་བཅུ་བཞི་པ་དང་། ཕྱག་བཅུ་དྲུག་པ་སོགས་གསུངས་ཤིང་། ལས་ཀྱི་མགོན་པོའི་སྔགས་ནི། ཨོཾ་དཾ་ཥྚོར་ཀ་ཊ་བྷཻ་ར་བཱ་ཡ་སཾ་སཾ་སཾ་རུ་རུ་རུ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཕྱག་བཅུ་གཉིས་པའི་སྔགས་ཏེ་ལས་ཐམས་ཅད་བྱེད་པ་དང་། སངས་རྒྱས་ཐམས་ཅད་ཀྱི་ཕྱག་བྱེད་པ་དང་། འཇིག་རྟེན་གསུམ་འགྲུབ་པ་དང་། །གང་འདོད་བྱེད་པར་
འགྱུར་རོ། །ཞེས་འབྱུང་བ་ལས། ལས་མགོན་ཏྲཀྴད་ཀྱི་སྲོག་སྔགས་དངོས་སུ་མཐོང་ཡང་ངེས་པར་ཕྲིན་ལས་ཀྱི་སྔགས་དེ་ཉིད་ཀྱིས་བསྟན་པ་དང་། དེང་སང་བཀའ་འགྱུར་དུ་བཞུགས་པ་མགོན་པོ་མངོན་འབྱུང་ངམ། དཔལ་ནག་པོ་ཆེན་པོ་ཞེས་ལེའུ་ལྔ་བཅུ་པ། པཎྜི་ཏ་ས་མནྟ་ཤྲཱི་དང་། ཞུ་ཆེན་གྱིས་ལོ་ཙཱ་བྷ་དྲ་དགེ་སློང་ཆོས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །ཞེས་པ་མགོན་པོའི་སྤྱི་རྒྱུད་དུ་བཞེད་པ་ཐམས་ཅད་དགོངས་པ་མཐུན་ལ། མགོན་པོ་ཞལ་གསུམ་ཕྱག་དྲུག །ལྷ་མོ་བཞིས་བསྐོར་བ་མངོན་སུམ་དུ་གསུངས་ནས་ཞེས་ཕྱིས་འབྱུང་འགའ་ཞིག་གིས་ཕྱག་དྲུག་པའི་སྒེར་རྒྱུད་དུ་ཞལ་ཚོན་གཅོད་པར་སྣང་ཡང་། མགོན་པོ་ཕྱག་གཉིས་པ་དངོས་སུ་གསལ་ཞིང་། ལས་ཀྱི་སྔགས་དང་ལྷ་ཆེན་དཔལ་འབར་གྱི་སྔགས་སོགས་ཟུར་མ་ཉམས་པར་བཞུགས་པས་ན། མགོན་པོ་བེར་ནག་ཅན་གྱིས་སྒེར་རྒྱུད་དུ་བཟུང་བ་ཤིན་ཏུ་འཐད་ཆེ་བར་སྣང་ངོ་། །
མགོན་པོ་གསང་བ་དངོས་གྲུབ་འབྱུང་བའི་ལེའུ་ཉེར་ལྔ་ལས་ནི་མགོན་པོ་ཕྱག་བཞི་པ་གཙོ་བོར་བསྟན་ཅིང་བིང་དང་ཕྱག་དྲུག་པའང་བསྟན་པར་བཤད་ཤིང་། མགོན་པོ་དུར་ཁྲོད་བདག་པོའི་རྒྱུད་ཅེས་པ་ནི། ཀུན་མཁྱེན་བུ་སྟོན་གྱིས་རྒྱུད་རྣམ་དག་མ་ངེས་ཅིང་བརྫུས་མ་ཡིན་པར་གསུངས་པས་ཡིད་བརྟན་མི་ནུས་སོ། །སྤྱིར་ནག་པོ་ཆེན་པོ་སྟེ། མ་ཧཱ་ཀཱ་ལའི་སྒྲ་དོན་བཤད་པ་ནི། མངོན་འབྱུང་གི་རྒྱུད་ལས། བཅོམ་ལྡན་འདས་ཀྱིས་བཀའ་སྩལ་པ། མ་ཞེས་པ་སེམས་དཔའི་སྙིང་རྗེ་དང་། མ་ཧཱ་ཤེས་རབ་དང་སྦྱོར་བ་སྟེ་ཤེས་རབ་ཉིད་དོ། ཀཱ་ལ་ནི་ཚོགས་པ་ལས་དུས་ཏེ་ཐབས་དང་ཤེས་རབ་ཀྱིས་སྙིང་རྗེ་ཆེན་པོ་ལ་སྦྱོར་བ་ཞེས་པའོ། ཨོཾ་ཤྲཱི་ཀྵིཾ་གྲཱིཧྣ་བ་ལིང་ཧཱུྃ་ཕཊ། སོགས་ཀྱིས་གཏོར་སྔགས་བཟླས་ཤིང་མགོན་པོ་ལ་གཏོར་མ་བྱིན་ན། ཞག་ཉི་ཤུ་རྩ་གཅིག་ན་དགེ་བའི་མཚན་མ་འབྱུང་བ་དང་། ཟླ་བ་གཅིག་ན་དངོས་གྲུབ་སྟེར་ཏེ། ལོ་གཅིག་ན་གང་
འདོད་པ་སྟེར་རོ་ཞེས་རྒྱུད་ལས་འབྱུང་ངོ་། །རྒྱ་གར་དུའང་གྲུབ་པའི་སློབ་དཔོན་ཆེན་པོ་ཀླུ་སྒྲུབ་ཞབས་དང་། ཤཱ་བ་རི་པ་སོགས་ཀྱིས་མགོན་པོའི་རིགས་ལ་ཡུམ་ཡོད་མེད་ཀྱིས་རྒྱན་ཅན་རྒྱན་མེད་སོགས་སུ་ཐ་སྙད་མཛད་ཅིང་སྒྲུབ་སྐོར་དང་གདམས་ངག་མང་དུ་འབྱུང་བ་ནི་མགོན་པོ་སྤྱི་བཏང་གི་ལོ་རྒྱུས་སོ། །བྱེ་བྲག་ཏུ་ཕྲིན་ལས་ཀྱི་མགོན་པོ་ཏྲཀྴད་སྲོག་བདུད་ནག་པོ་ལ་ཇོ་བོ་ལུགས། ཏྲཀྴད་སེང་ཞོན་དང་། ཏྲཀྴད་ཤྭ་ན་མུ་ཁ་དང་། ཏྲཀྴད་རྐང་ཐང་དང་། ཏྲཀྴད་འབྲང་ཞལ་ཅན་དང་། ཏྲཀྴད་ཞལ་གཉིས་པ་གཉོས་ལོ་ཙཱ་བའི་ལུགས་སོགས་ཀྱི་སྒྲུབ་སྐོར་མང་དུ་འབྱུང་བ་དང་། ཆོས་རྒྱལ་རིན་ཆེན་གླིང་པ་ནས་བརྒྱུད་པའི་མདོས་སོགས་དང་། བོ་དོང་ལུགས་དང་། བཀའ་གདམས་ལུགས་སོགས་མང་དུ་འབྱུང་བ་འདི་རྣམས་མགོན་པོའི་རྒྱུད་ཁྲག་མཚོ་ཁོལ་མ་ལས། གདོང་བཞི་པའི་མགོན་པོ་ནི་སེང་གེ་ལ་གནས་སོ། །བིང་འཛིན་པ་ནི་གདོང་དམར་གྱི་
བྲག་ལ་བརྟེན་པའོ། །བིང་འཛིན་པ་བར་མ་ནི་རྒྱ་ནག་རི་བོ་རྩེ་ལྔ་ལའོ། ཏྲཀྴད་ནི་རྡོ་རྗེ་བསེ་གདོང་སྟེ། རྒྱ་ནག་གྷེའུ་དེ་ཤ་ལ་གནས་ལ། གཞན་དུ་སངས་རྒྱས་ཀྱི་བསྟན་པ་གར་གནས་པ་དེར་རོ། །བདུད་རྒྱལ་ནག་པོ་བཀྲག་མེད་ཅེས་བྱ་བ་བདུད་ཡུལ་ཁ་རག་མགོ་དགུའི་གླིང་དུ་གནས་པར་བཤད་དོ། །ཞེས་གསུངས་པའི་ངོས་འཛིན་དུ་མཁས་གྲུབ་སྔ་མ་རྣམས་ཀྱིས་གདོང་དམར་གྱིས་བྲག་ནི་སྐྱི་ཤོད་ཀྱི་མགོན་པོ་གདོང་དུ་ངོས་འཛིན་པ་དང་། བིང་འཛིན་པ་ནི་བྲག་ལྷ་མགོན་པོ་ཡིན་པར་བཞེད་ཅིང་། ཀུན་མཁྱེན་རང་བྱུང་ཞབས་ཀྱིས་ཞལ་སློབ་རྒྱ་སྟོན་ཀུན་མཁྱེན་ཆོས་ཀྱི་བཟང་པོས་བྲག་ལྷ་མགོན་པོ་འདི་བཀའ་སྲུང་གི་ནང་ནས་ཐུགས་རྩིས་ཆེ་བར་མཛད། བིང་འཛིན་པ་བར་མ་འདི་མགོན་པོ་ཨ་གྷོར་ཡིན་ཅིང་། བོད་སྐད་དུ་མགོན་པོ་རྟ་མེད་པ་ཞེས་ཏྲཀྴད་རྐང་ཐང་ཡིན་པ་དང་། དབུས་ཀྱི་དུམ་བུ་རིལ་གནས་པར་བཀའ་གདམས་
དགོན་སོགས་ཀྱི་བཞེད། རྒྱ་ནག་གྷེའུ་དེ་ཤ་ནི་རི་བོ་རྩེ་ལྔ་ཡིན་པར་མཁས་གྲུབ་ཐམས་ཅད་ཞལ་མཐུན། བདུད་རྒྱལ་ནག་པོ་བཀྲག་མེད་ནི་ཞིང་སྐྱོང་སེང་གེའི་གདོང་ཅན་ཡིན་པར་འབྲུག་པ་པདྨ་དཀར་པོས་གསུངས། ངེས་པའི་དོན་དུ། བདུད་ཀྱི་མགོན་པོ་ཏྲཀྴད་དང་། ཕྲིན་ལས་ཀྱི་མགོན་པོ་དང་། སྲོག་བདུད་ནག་པོ་བཀྲག་མེད་དང་། ཞིང་སྐྱོང་སིདྷ་མུ་ཁ་དང་། ཕུར་སྲུང་ཤྭ་ན་མུ་ཁ་དང་། ལས་མགོན་དུག་གི་སྤུ་གྲི་དང་། ལེགས་ལྡན་ལས་ལ་ཆས་པ་སོགས་ངོ་བོ་གཅིག་པ་ཁོ་ན་སྟེ་ཐུབ་དཀའ་ཞེས་པ་བོད་ཡུལ་གྱི་ཞིང་སྐྱོང་ཆེན་པོ་སྟེ། བདུད་ཡུལ་ཁར་གཅེས་པའང་། བོད་ཡུལ་བདུད་ཀྱིས་བཟུང་བའི་དུས་སུ་བོད་ཡུལ་འདི་ལ་བདུད་ཡུལ་ཁ་རག་མགོ་དགུར་གྲགས་པ་དེ་ཉིད་སྤྱན་རས་གཟིགས་དབང་དྲག་པོར་ཁྲོས་པས་དམ་ལ་བཞག་པ་དང་། མགོན་པོ་རྣམས་ཀྱི་ངོ་བོ་སྤྱན་རས་གཟིགས་གང་ལ་གང་འདུལ་དུ་སྤྲུལ་པ་སྟོན་འཁོར་ཐ་མི་དད་བའི་ཚུལ་
ཡང་། ཇོ་ནང་ཏྲཀྴད་ཞལ་གཉིས་གཞུང་ལས། སྤྱན་རས་གཟིགས་དབང་ཐུགས་ཀྱི་ཕྲིན་ལས་རྣམ་འཕྲུལ་ཞི་བས་གདུལ་བར་མི་བསྐྱོད་ཞིང་། དྲག་པོའི་སྟོབས་ཀྱི་གདུག་པ་ཚར་གཅོད་པ་འཇིགས་པའི་གཟུགས་ཅན་ཞེས་པ་དང་། ལྷ་ཆེན་ཐུགས་ཀྱི་ཕོ་ཉ་མཐུ་བོ་ཆེ། །ཁྱེད་ཀྱི་རྣམ་འཕྲུལ་ཕྱོགས་བཅུ་མ་ལུས་ཁྱབ། །ཡབ་གཅིག་རྟག་ཏུ་འདོད་རྒྱལ་ཁང་བཟང་ནས། །ཕལ་ཆེར་ཨུ་ཙ་ལ་ཡི་དུར་ཁྲོད་ན། །རེས་འགའ་བསིལ་བའི་ཚལ་ན་སྲིན་པོའི་གཟུགས། །ད་ལྟ་ཙཱ་རི་ཏྲ་ཡི་ཕོ་བྲང་ན། །ཁྱོད་ཀྱི་རྟེན་ས་རྩུབས་མོའི་དུར་ཁྲོད་ནས། །རྣལ་འབྱོར་དམ་ཚིག་ལྡན་པའི་རྗེས་འབྲང་ཞིང་། །གོང་གིས་བཅོལ་བའི་ལས་རྣམས་འགྲུབ་མཛད་པ། །དྲག་པོ་དབང་ཕྱུག་གཟི་ལྡན་ཞེས་དང་། དེ་ཉིད་ཀྱི་བསྟོད་པ་ལས་ཀྱང་། །ལྷ་ཆེན་དཔལ་འབར་མཐུ་སྟོབས་བསམ་མི་ཁྱབ། །ཐུགས་རྗེའི་བདག་ཉིད་འགྲོ་བའི་གཉེན་གཅིག་པུ། །རྒྱལ་བའི་ཡེ་ཤེས་མཁྱེན་པ་ཐུགས་
སུ་ཆུད། །ལེགས་ལྡན་ནག་པོ་ཆེ་ལ་ཕྱག་འཚལ་བསྟོད། ཅེས་དང་། །མགོན་ཁྱོད་དྲན་པས་སྲིད་པའི་གདུང་བ་སེལ། །བསྙེན་ཅིང་སྒྲུབ་པས་ཚེ་དང་བསོད་ནམས་རྒྱས། །མཐར་ཐུག་མཆོག་གི་དངོས་གྲུབ་སྟེར་བ་དང་། །ཐུགས་རྗེའི་དབང་ཕྱུག་ཁྱོད་ལ་གུས་པས་བསྟོད། ཅེས་གསུངས་པ་ལྟར། དཔལ་མགོན་ལེགས་ལྡན་ནག་པོ་མགོན་པོ་འབུམ་གྱི་ཡབ་ཉིད་ཕྲིན་ལས་ཀྱི་རོལ་པ་སྲས་ཀྱི་ཚུལ་དུ་སྣང་བ་སྲོག་བདུད་དུག་གི་སྤུ་གྲི་རྟ་ནག་ཅན་འདི་ནི། སངས་རྒྱས་ཀྱི་བསྟན་པ་དངོས་གང་དུ་གནས་པ་དེར་བསྟན་པ་སྐྱོང་བའི་ཕྲིན་ལས་པ་ཡིན་པ་ནི་ཡོངས་སུ་གྲགས་པ་སྟེ། སྔར་བཀའ་གདམས་པའི་དགེ་བའི་བཤེས་གཉེན་ཆེན་པོ་མཚོ་སྣ་བ་ཤེས་རབ་བཟང་པོ་ལ་མགོན་པོ་ཏྲཀྴད་ཀྱི་རང་གཟུགས་བསྟན། དགེ་བའི་བཤེས་གཉེན་ཆེན་པོ་ཁྱོད་ཀྱིས་དམ་ཆོས་འདུལ་བ་ལུང་སྡེ་བཞིའི་དགོངས་དོན་ལ་འགྲེལ་པ་ཞིག་མཛད་པར་ཞུ་ཞིང་། ངའི་བཀའ་སྲུང་བར་ཞལ་
གྱིས་བཞེས་པས་མཚོ་སྣ་བ་ཆེན་པོས་འདུལ་ཊིཀ྄་ཉི་མའི་འོད་ཟེར་མཛད། ཀརྨ་པ་མི་བསྐྱོད་རྡོ་རྗེས་དེ་ཉིད་རྩ་བར་བཟུང་ནས་འདུལ་ཊིཀ྄་འཛམ་གླིང་གསལ་མཛད་ཉི་མའི་འོད་ཟེར་དཀྱིལ་འཁོར་མཛད་ཅིང་། བོད་གངས་ཅན་གྱིས་འདུལ་བ་འཛིན་པ་རྣམས་ཀྱིས་བསྟན་སྲུང་གཅིག་པུར་གྱུར་པ་དང་། གུ་རུ་རྡོ་རྗེ་གྲོ་ལོད་ཀྱི་བཀའ་སྲུང་བདུད་མགོན་ཕྱག་མཚན་བཞི་པ་འདི་ནི། གུ་རུ་པདྨའི་ཐུགས་ཐིག །གཏེར་ཁ་གཞན་ལ་མེད་པའི་ཁྱད་ཆོས། བཀའ་རྒྱུད་བསྟན་པའི་གོ་ཆ། ཀཾ་ཚང་བསྟན་པའི་སྲོག་རྩ་ལྟ་བུ་སྟེ། ཡོངས་དགེ་ཉིད་ཀྱི་གཏེར་ཁ་ལས། །འདི་ནི་དགྲ་གཤེད་དུག་གི་སྤུ་གྲི་སྟེ༔ གཏེར་ཁ་གཞན་དུ་འདི་ཉིད་མང་དུ་མེད༔ སྲིད་གསུམ་འཁོར་འདས་བདག་པོ་ཏྲཀྴད་བདུད༔ པདྨའི་རིག་རྩལ་སྟོབས་ལས་གྲུབ་པའོ༔ ཙིཏྟ་བཛྲ་ས་མ་ཡ༔ ཐུགས་རྒྱ་བརྡ་ཐིམ༔ ཅེས་ཐུགས་ཀྱི་རྡོ་རྗེའི་ཡལ་གམ་ལས་མ་འདའ་ཞེས་གསང་བའི་རྒྱས་ཡང་ནས་
ཡང་དུ་བཏབ་པ་ཉིད་དོ། །ཆོས་རྗེ་ཀརྨ་པ་རོལ་པའི་རྡོ་རྗེ་ལ། གཏེར་སྟོན་སངས་རྒྱས་གླིང་པས་ཕུར་པ་གདེང་ཆོག་དང་། ཐུན་ཕོག་འགྱེལ་གཏེར་ནས་བཞེས་ཏེ་ཕུལ་བ་ཡང་མ་བཞེས་པས། ཨོ་རྒྱན་རིན་པོ་ཆེས་ཀརྨ་པ་ལ་ལུང་བསྟན་ནས་གསུངས་པ། ང་རང་ཨོ་རྒྱན་པདྨ་སྔགས་པ་ཞེ་ནག །ཁྱེད་ཀརྨ་པ་དགེ་སློང་བྱང་སེམས་ཅན། མ་འོངས་པ་ན་ཁྱོད་ཀྱི་བསྟན་པ་ཕྱིའི་རྒྱ་མ་རལ་ཀྱང་ནང་གི་ཟུང་མི་ཐུབ་པའི་དུས་གཅིག་འོང་། དེ་དུས་ཁྱེད་ལ་མཁོ་བར་བསམ་སྟེ་སྦས་པ་ཡིན་ཀྱང་ཉར་ཚག་མ་བྱས་པས་ད་ནི་བསྟན་པ་ཁྱེད་རང་གིས་འཚོ་ཐུབ་པར་གྱིས་ཞེས་གསུངས་པ་ནི། སོག་དམག་གིས་ཀར་བསྟན་ལ་ཐོ་ཚོམ་པའི་དུས་ཡིན་ཅིང་། སླར་ཡང་གུ་རུ་པདྨའི་ཐུགས་རྗེའི་རྣམ་རོལ་དུ་གཏེར་ཆེན་མི་འགྱུར་རྡོ་རྗེ་ཆེད་དུ་མངག་པ་ནི་མངོན་སུམ་དུ་མས་གྲུབ་ལ། གཏེར་ཆེན་མི་འགྱུར་རྡོ་རྗེ་ཉིད་ཀྱི་གྲོ་ལོད་ཤོག་སེར་ཕབ་ཅིང་། དུས་གནད་དང་ས་གནད་ཀྱིས་
འོག་མིན་ཀརྨའི་གདན་སར་ཀཾ་ཚང་གི་བསྟན་པའི་སྐུ་རིམ་དུ་ལས་ཟོར་ཐོག་མར་བཅའ་དགོས་པ་ཨོ་རྒྱན་པདྨའི་བཀའ་ཡིན་པས་དམ་ཕྱི་བར་དགོས་གསུངས་ནས། དགོང་མོ་ཉི་མ་དམར་ཐག་གི་དུས་སུ་ལས་མགོན་གྱི་རྦད་བསྐུལ་ཏྲཀྴད་ལ་ཞལ་ཆེམས་ཕུལ(ར)་པ་གསུངས་ཤིང་རྡོ་རྗེའི་ཟོར་ཕྱོགས་མཚམས་ཐམས་ཅད་དུ་འཕེན་མཛད་ཅིང་། ལས་ཟོར་གྲུབ་ནས་ད་ནི་ཨོ་རྒྱན་པདྨའི་བཀའ་གྲུབ་པ་ཡིན། ཀཾ་ཚང་གི་བསྟན་པ་ལ་ཕན་ཐོག་པར་འབྱུང་ཞེས་གསུངས་པ་ལྟར། ཀརྨ་བཀའ་བརྒྱུད་ཀྱི་བསྟན་པའི་མེ་རོ་གསོ་བ་ལ་གྲུབ་པའི་དབང་ཕྱུག་པདྨ་ཀ་རས་ཆེ་ཐང་དུ་བསྔགས་པ་ཟབ་གཏེར་གྱི་སྙིང་ཁྲག་ལྟ་བུ་ཕྲིན་ལས་ཀྱི་མགོན་པོ་འདི་ཉིད་ཡིན། དེའི་དབང་བསྐུར་བའི་ཚུལ་ཡང་། བླ་མ་མགོན་པོ་དབྱེར་མེད་དུ་སྒྲུབ་པ་ཡིན་ཅིང་། བླ་མ་ཀུན་བཟང་གི་དབང་ནི་རྩ་གསུམ་ཀུན་འདུས་ཀྱི་དབང་གིས་ལྡེའུ་མིག་ཡིན་པས་རིག་འཛིན་མི་འགྱུར་རྡོ་
རྗེ་དྲག་པོ་ནུས་ལྡན་རྩལ་གྱིས་ཕྱག་བཞེས་མ་ཉམས་པ་སྐུ་མཆོག་ལུགས་སུ་ལུང་རིག་མན་ངག་ཚད་མ་གསུམ་དང་ལྡན་པ་ཡིད་ཆེས་ཤིང་ཁུང་བཙུན་པ། བྱིན་རླབས་ཀྱི་ཚན་ཁ་མ་ཉམས་པ་ཕྲིན་ལས་ཐམས་ཅད་ཀྱི་རྩ་བ་བཀའ་སྲུང་ལས་མགོན་ཏྲཀྴད་ཀྱི་འཇུག་སྒོ་དབང་བསྐུར་བ་ཉིད་སྐབས་སུ་བབ་པ་ཡིན་ནོ། །ས་མ་ཡ༔ གཏེར་ཆེན་མི་འགྱུར་རྡོ་རྗེ་ཉིད་ཀྱི་ཞལ་སྔ་ནས། གཏེར་སློབ་སྐུ་མཆོག་ལ་དབང་གི་ལྡེའུ་མིག་གབ་སྤྲད་ཅིང་། ཕྱག་བཞེས་སུ་བསྟར་བ་ནུས་ལྡན་ཡོར་སྟོད་སྔགས་འཆང་ནས་བརྒྱུད་པའི་དབང་བསྐུར་རྣམས་ཆོས་བདག་དཔོན་བརྒྱུད་ཀྱི་བླ་མ་དམ་པ་ཀརྨ་རི་དབང་རྒྱལ་པོ་ལ། འདུལ་བ་འཛིན་པ་རང་རེས་ཞུས་པའི་སྐབས་སུ་ལོ་རྒྱུས་འདི་ལྟར་བྲིས་ཤིག་ཅེས་ལྷ་རྫས་རབ་དཀར་སྲིད་དུ་རིང་བ་དང་། དཀར་འཇམ་ཤོག་གུའི་གླེགས་བུ་མང་ཚན་བཅས་བཀའ་ལུང་སྤྱི་བོར་ཕེབ་པ་ལྡོག་མ་ཕོད་ནས་ལོ་རྒྱུས་སུ་རློམས་པ་མཁན་མིང་ཀརྨ་རཏྣས་
རང་གི་སུག་ལས་སུ་བསྟར་བ་ཀཾ་ཚང་དོན་བརྒྱུད་བསྟན་པའི་སྒྲོན་མེར་གྱུར་ཅིག །ཨོཾ་དུ་ཡ་ག་ཛཿམ་ཧཱ་ཀཱ་ལ་ཏྲཀྴད་ཧཱུྃ་ཕཊ༔ ས་མ་ཡ་རཀྴ༔ ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།