རྡོ་རྗེ་གྲོ་ལོད་ཀྱི་རྫོགས་ཆེན་ཨ་ཏིའི་ཁྲིད་ཡིག་རིག་འཛིན་དགོངས་གསལ་གྱི་སྔོན་འགྲོའི་ཁྲིད་རིམ།
ཡེ་གསང་ཐུགས་གཏེར་གྲོ་ལོད་ཀྱི། །རྫོགས་ཆེན་ཨ་ཏི་ཁྱབ་གདལ་ཆེའི། །ཁྲིད་ཡིག་རིག་འཛིན་དགོངས་གསལ་གྱི། །སྔོན་འགྲོའི་ཁྲིད་རིམ་དང་པོ་བཞུགས། །ཨི་ཐི། ས་མ་ཡ།
ན་མོ་གུ་རུ་བུདྡྷ་རཏྣཱ་ཡ། །མཆོག་གསུམ་སྐུ་གསུམ་རྩ་གསུམ་ཞི་ཁྲོའི་ལྷ། །ཀུན་འདུས་ཀུན་ཁྱབ་བླ་མ་པད་འབྱུང་གི །རྒྱལ་ཚབ་ནུས་ལྡན་ཉེར་གཅིག་ཡོངས་ཀྱི་གཙོ། །མི་འགྱུར་རྡོ་རྗེའི་མཚན་འཆང་ལ་ཕྱག་འཚལ། །ཐེག་དགུའི་ཡོངས་རྩེ་རྡོ་རྗེ་གྲོ་ལོད་ཆོས། །ཚེ་གཅིག་སངས་རྒྱས་མྱུར་འགྲུབ་རྫོགས་པ་ཆེ། །ཀུན་གྱི་སྙིང་ཐིག་ཐེག་དགུ་ཟབ་དགུའི་བཅུད། །ཆིག་དྲིལ་ཁྲིད་ཡིག་རིག་འཛིན་དགོངས་གསལ་དབྱེ། །དྲུག་ལྡན་བརྒྱུད་པའི་བླ་མས་བྱིན་གྱིས་རློབས། །ཡི་
དམ་དཀྱིལ་འཁོར་ལྷ་ཡིས་དངོས་གྲུབ་སྩོལ། །གནས་གསུམ་མཁའ་འགྲོའི་ཚོགས་ཀྱིས་བཀའ་རྒྱ་དཀྲོལ། །གཏེར་སྲུང་དམ་ཅན་རྒྱ་མཚོས་ཕྲིན་ལས་སྤེལ། །ཞེས་མཆོད་པར་བརྗོད་དེ་ལས་སུ་བྱ་བ་ནི། ཟབ་ཆོས་འདི་ཉིད་ཀྱི་གཞུང་ལས། སྔོན་ཚེ་དུས་གསུམ་སངས་རྒྱས་དུས༔ ཆོས་སྒོ་བརྒྱད་ཁྲི་བཞི་སྟོང་ཡང་༔ ཉོན་མོངས་དུག་ལྔའི་གཉེན་པོར་གསུངས༔ ཞེས་པ་ལྟར་འོ་སྐོལ་གྱི་སྟོན་པ་ཤཱཀྱ་ཐུབ་པ་འདིས། དང་པོ་བྱང་ཆུབ་མཆོག་ཏུ་ཐུགས་བསྐྱེད། བར་དུ་
བསྐལ་པ་གྲངས་མེད་གསུམ་དུ་ཚོགས་བསགས། མཐར་མངོན་པར་རྫོགས་པར་སངས་རྒྱས་ནས། དུག་གསུམ་གྱི་གཉེན་པོར་ཆོས་ཕུང་བརྒྱད་ཁྲི་བཞི་སྟོང་གསུངས་པའི་ཚུལ་ཡང་། ཀུན་བྱེད་རྒྱལ་པོའི་རྒྱུད་ལས། ཉོན་མོངས་འདོད་ཆགས་འདུལ་བའི་གཉེན་པོ་ནི། །འདུལ་བའི་སྡེ་སྣོད་ཉི་ཁྲི་ཆིག་སྟོང་གསུངས། །ཉོན་མོངས་ཞེ་སྡང་འདུལ་བའི་གཉེན་པོ་ནི། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས། །ཉོན་མོངས་གཏི་མུག་འདུལ་བའི་གཉེན་པོ་ནི། །མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས། །ཉོན་མོངས་ཆ་མཉམ་འདུལ་བའི་གཉེན་པོ་ནི། །སྡེ་སྣོད་བཞི་པ་ཉི་ཁྲི་ཆིག་སྟོང་གསུངས། ཞེས་གསུངས་པ་ལྟར་ལས། ཕྱི་མ་ལ་ཡང་འདི་ཉིད་ལས༔ ཆ་སྙོམས་རྒྱུད་སྡེ་བཞི་པོ་ཡང་༔ རྫོགས་ལྡན་ཟུང་དང་རྩོད་ལྡན་དུས༔ བླ་མེད་གསང་སྔགས་རྗེས་སུ་གནང་༔ ལས་ཅན་རྣམས་ཀྱིས་ཤེས་པར་གྱིས༔ ཞེས་དང་། ཐམས་ཅད་འདུས་པའི་རྒྱུད་ལས། རྫོགས་
ལྡན་དང་པོར་བྱ་བའི་རྒྱུད༔ སུམ་ལྡན་གཉིས་པར་སྤྱོད་པའི་རྒྱུད༔ གཉིས་ལྡན་གསུམ་པར་རྣལ་འབྱོར་རྒྱུད༔ རྩོད་ལྡན་གསང་བ་བླ་ན་མེད༔ དུས་བཞི་ལ་ནི་གཟིགས་ནས་གསུངས༔ རྒྱུད་ནི་རྣམ་པ་བཞི་རུ་བཤད༔ ཅེས་དང་། ཁྱད་པར་བཀའ་རྫོགས་པ་ཆེན་པོ་ཨ་ཏི་ཁྱབ་བརྡལ་གྱི་རྒྱུད་འདི་ནི། ཇི་སྐད་དུ་ཡང་། ཁྱད་པར་ཨ་ཏི་ཁྱབ་བརྡལ་རྒྱུད༔ རིགས་ཀུན་བདག་པོས་ཞུས་པའི་ངོར༔ བཅོམ་ལྡན་རྒྱལ་བ་ཤཱཀྱ་ཐུབ༔ ཀུན་ཏུ་བཟང་པོར་སྤྲུལ་ནས་གསུངས༔ གནས་ནི་འོག་མིན་ཆོས་ཀྱི་དབྱིངས༔ འཁོར་ནི་རིག་འཛིན་ཕོ་མོས་བསྐོར༔ དུས་ནི་ཆོས་འཁོར་བསྐོར་བའི་དུས༔ ཆོས་ནི་རྩོད་ལྡན་སྙིགས་མའི་དོན༔ ཚེ་གཅིག་འཇའ་ལུས་འགྲུབ་པའི་གནད༔ ཅེས་གསུངས་པ་ལྟར། ཚེ་གཅིག་འཇའ་ལུས་འགྲུབ་པའི་ཟབ་ཆོས་རྡོ་རྗེ་གྲོ་ལོད་ཆོས་སྐོར་འདི་སློབ་དཔོན་པདྨ་འབྱུང་གནས་ཀྱིས་ལྷ་སྲས་མུ་ཁྲི་བཙན་པོའི་ཆོས་སྐལ་དུ་གནང་སྟེ། ད་ལྟ་
སྤེལ་བའི་གནས་མེད། མ་འོངས་ཕྱི་རབས་སེམས་ཅན་གྱི་དོན་དུ་གཏེར་དུ་སྦོས་ཤིག་གསུངས་ནས་གཏེར་དུ་སྦས་པ་ཡིན་ཏེ། མ་འོངས་དུས་ཀྱི་ཐ་མ་ནི༔ སུམ་ཅུའི་ཁ་རལ་བྱུང་བའི་ཚེ༔ ལྷ་སྲས་མུ་ཁྲིའི་ཆོས་སྐལ་དུ༔ གནམ་ལྕགས་འབར་བའི་སྦུ་གུར་བཞུགས༔ རྡོ་རྗེ་འབར་བའི་མཚོ་ལ་སྦས༔ སྙིང་གི་ཐུགས་སྲས་དེ་ཉིད་ཀྱི༔ བར་ཆད་སེལ་བའི་མཚོན་ཆར་ཤོག༔ ཅེས་གསུངས་ཏེ་གཏེར་དུ་སྦས། གཏེར་སྨྱོན་ཉིད་ཀྱིས་གདན་དྲངས་པའི་ཡེ་གསང་ཐུགས་གཏེར་རྡོ་རྗེ་གྲོ་ལོད་ཀྱི་རྫོགས་ཆེན་ཨ་ཏི་ཁྱབ་གདལ་གྱི་སྔོན་འགྲོའི་ངག་འདོན་ཐར་ལམ་རབ་གསལ་གྱི་དོན་ཉམས་སུ་ལེན་པ་ལ། སྔོན་འགྲོ། དངོས་གཞི། རྗེས་གསུམ་ལས། སྔོན་འགྲོ་ལའང་། ཐུན་མོང་དང་ཁྱད་པར་གཉིས་ལས། དང་པོ་སྣོད་ལྡན་གྱི་གང་ཟག་ནི། དད་པ་དང་མོས་གུས་ཤིན་ཏུ་ཆེ་བ། ཤེས་རབ་ཟབ་ཅིང་རྒྱ་ཆེ་བ། བྱམས་སྙིང་རྗེ་བྱང་ཆུབ་ཀྱི་སེམས་དང་ལྡན་པ། བརྩོན་འགྲུས་
ལ་ཐང་ལྷོད་མེད་པ། མཆེད་ལྕམ་ལ་བརྩེ་གདུང་ཆེ་བ། རང་རྒྱུད་འཇམ་ཞིང་དུལ་བ། འདོད་པ་ཆུང་ཞིང་ཆོག་ཤེས་པ། སེམས་རྒྱུད་རི་བོ་ལྟར་བརྟན་པ། ཐོས་པ་སྐར་ཚོགས་ལྟར་བཀྲ་བ། བླ་མ་གཙུག་གི་ནོར་བུ་ལྟར་བསྐུར་བ། དམ་ཚིག་ཤེལ་ལྟར་དག་པ། ཆོས་བརྒྱད་དུག་ལྟར་སྤང་བ། ཆགས་སྡང་ངང་གིས་ཆུང་བ། སྙིང་པོའི་དོན་ལ་མོས་པ་ལ་ཆོས་འདི་གདམས་པར་བྱའོ། །དེ་ལ་དང་པོ། ཐོག་མེད་ལས་ཀྱི་སྡུག་བསྔལ་བསམ་པའི་ཁྲིད་ལ། ཀྱེ་མ་ཀྱི་ཧུད་ཅེས་རིགས་དྲུག་གི་སེམས་ཅན་ལ་སྙིང་རྗེ་ཆེན་པོས་ཀུན་ནས་བསླངས་ཏེ། འོ་སྐོལ་སེམས་ཅན་ཐམས་ཅད་རྒྱུ་སངས་རྒྱས་ཀྱི་སྙིང་པོ་ཅན་ཡིན་ནའང་། སྔོན་ཚེ་འཁོར་བ་ཐོག་མ་མེད་པ་ནས་མ་རིག་པ་སོགས་རྟེན་འབྲེལ་བཅུ་གཉིས་ཀྱི་འཁོར་ལོ་རྒྱུན་ཆད་མེད་པར་འཁོར་ཡུག་ཏུ་འཁོར་བའི་དབང་གིས་འཁོར་བ་སྡུག་བསྔལ་གྱི་རྒྱ་མཚོ་ཆེན་པོར་འཁྱམས་པ་ནི། དབུལ་པོའི་ཁྱིམ་གྱི་ས་འོག་གི་
གཏེར་ཡོད་པ་མ་ཤེས་ཤིང་དབུལ་ཞིང་ཕོངས་པས་སྡུག་བསྔལ་བ་ལྟར། ཆགས་སྡང་དབང་གིས་ལས་ངན་པའི་བག་ཆགས་བསགས། ཨ་འཐས་རེ་དོགས་ཀྱི་རྒྱ་རུ་ཚུད་དེ། སེམས་ཉིད་འོད་གསལ་ཆོས་ཀྱི་སྐུ་བསྒྲིབས་ཏེ། ལས་དང་ཉོན་མོངས་སྡུག་བསྔལ་བསམ་གྱིས་མི་ཁྱབ་པས་མནར་བའི་འགྲོ་བ་རིགས་དྲུག་གི་གནས་སུ། རྣམ་སྨིན་མི་ཁོམ་བརྒྱད་ཀྱི་གཟུགས་སུ་ལུས་ངན་སྣ་ཚོགས་བླངས་པའི་གཟུགས་ཀྱི་ཤ་རུས་བསགས་ན་འཇིག་རྟེན་གྱི་ཁམས་དང་མཉམ་པ་དང་། རྣག་ཁྲག་བསགས་ན་འོག་གཞི་མཐའི་རྒྱ་མཚོ་ཙམ་མོ། །ཞེས་རང་གི་རྒྱུད་ཐོག་ཏུ་བསམ་ཞིང་ཡང་ཡང་བསྒོམ། དེ་དག་ལ་ངེས་ཤེས་བསྐྱེད་པའི་ཕྱིར་ངག་ཏུ། བསམ་བརྗོད་བྲལ་བའི་སེམས་ཉིད་འདི༔ རྒྱུ་ནི་སངས་རྒྱས་ཡིན་ན་ཡང་༔ ལས་ཉོན་འཁྲུལ་པས་འཁོར་བར་ཁྲིད༔ རིགས་དྲུག་འཁོར་བའི་འཁོར་ལོ་བསྐོར༔ ལས་ངན་བག་ཆགས་ངང་གིས་འཕེལ༔ ཨ་འཐས་རེ་དོགས་རྒྱ་རུ་
ཚུད༔ འབྲས་བུ་ད་རུང་འཁོར་བར་འཁྱམས༔ ལུས་ངན་ཕུང་པོ་གྲངས་མེད་བླངས༔ རྣམ་སྨིན་མི་ཁོམ་གཟུགས་བརྒྱད་བླངས༔ ད་དུང་རང་སེམས་ཞལ་མ་མཐོང་༔ གཉུག་མའི་རང་སེམས་རྡོ་དང་འདྲ༔ ལས་ཉོན་མུན་པས་མ་སྒྲིབས་སམ༔ བསམ་ཞིང་སྙིང་རྩ་འཁྲུགས་པར་གདའ༔ ཞེས་ཡང་ཡང་བསམ་མོ། །དེ་དག་གི་སྐབས་སུ་དམྱལ་བར་སྐྱེས་ནས་ཐོ་ལུམ་ཟོས་པ་དང་ཁྲོ་ཆུ་འཐུང་བ་ཡང་གྲངས་མེད། ཡི་དྭགས་སུ་སྐྱེས་ནས་སྣབ་ལུད་རྣག་ཁྲག་ཟོས་པའང་ཚད་མེད། དུད་འགྲོར་སྐྱེས་ནས་འབུ་སྲིན་སྲོག་ཆགས་ཟོས་པ་དང་རང་ཤ་རང་གིས་ཟོས་པའང་མཐའ་མེད། སེམས་ཅན་རེ་རེས་ཕ་མ་བྱས་ནས་དྲིན་གྱིས་བསྐྱང་བའང་བསམ་གྱིས་མི་ཁྱབ་སྟེ། མདོ་ལས། །སེམས་ཅན་རེ་རེ་ཐམས་ཅད་ཀྱིས། །ཡང་དང་ཡང་དུ་ཕ་བྱས་ཤིང་། །རྟ་དང་གླང་པོ་ཕོག་པ་ཡང་། །འཇིག་རྟེན་ཁམས་སུ་ཤོང་མི་འགྱུར། །སེམས་ཅན་རེ་རེ་ཐམས་ཅད་
ཀྱིས། །ཡང་དང་ཡང་དུ་མ་བྱས་ཤིང་། །ནུ་ཞོ་འཐུང་བ་གང་ཡིན་པ། །རྒྱ་མཚོ་ཆེན་པོ་བཞི་ལས་མང་། །ཞེས་གསུངས་པ་ལྟར་སྔོན་ཆད་མ་བྱས་པ་དང་། མ་མྱོང་བའི་བདེ་སྡུག་གང་ཡང་མེད། ད་དུང་ལས་སྒྲིབ་མ་བྱང་གི་བར་དུ་འཁོར་བ་མཐའ་མེད་མུ་མེད་པར་འཁྱམས་དགོས་པ་འདི་ཨ་རེ་སྡུག །ཞེ་རེ་འཇིགས། ཡི་རེ་ཆད། བསམ་རེ་སྐྱོ། ཡ་རེ་ང་། ད་ནི་དུས་ད་ལྟ་ཉིད་ནས་འཁོར་བ་ནས་ཐར་པའི་ཆོས་ཤིག་བྱ་བསམ་པའི་བློས། སྔོན་གྱི་ཚེ་རབས་འདི་ལ་བསམ་ཙ་ན། །སྡིག་སྤྱོད་ལུས་ངན་བླངས་པ་མ་གཏོགས་པ། །ཆོས་སྤྱོད་མི་ལུས་ཐོབ་པ་མི་འདུག་པས། །ད་རེས་ཐར་ལམ་བསྙགས་ན་མི་ལེགས་སམ། །དོན་བསམ་བཞིན་ངག་ཏུའང་བརྗོད། དེ་ལྟར་དམིགས་འདོན་ཟུང་དུ་འཇུག་པའི་སྔོན་འགྲོའི་དམིགས་རྐང་དང་པོ་འདོན། གཉིས་པ་དལ་འབྱོར་རྙེད་པར་དཀའ་བའི་ཁྲིད་ལ། དེ་ལྟར་འཁོར་བ་ཐོག་མ་མེད་པ་ནས་ད་ལྟའི་བར་དུ་འཁོར་བར་དེ་
ཙམ་འཁྱམས། སྡུག་བསྔལ་དེ་ཙམ་ཞིག་མྱོང་དགོས་བྱུང་འདུག །དེས་ན་ད་རེས་ཀྱི་ལུས་འདི་ལ་བརྟེན་ནས་འཁོར་བ་སྡུག་བསྔལ་གྱི་རྒྱ་མཚོ་འདི་ལས་བརྒལ་བར་མ་ནུས་ཤིང་། མི་ཁོམས་པའི་གནས་བརྒྱད་དུ་སྐྱེས་ན་ཇི་ལྟར་བྱ། མདོ་ལས། །དམྱལ་བ་ཡི་དྭགས་དུད་འགྲོ་དང་། །ཀླ་ཀློ་ཚེ་རིང་ལྷ་དང་ནི། །ལོག་ལྟ་སངས་རྒྱས་ཀྱིས་སྟོང་པ། །ལྐུགས་པ་འདི་དག་མི་ཁོམས་བརྒྱད། །ཅེས་གསུངས་པ་ལྟར། དམྱལ་བ་ནི་ཞེ་སྡང་གིས་ཚ་གྲང་སྡུག་བསྔལ་གྱིས་མི་ཁོམས། ཡི་དྭགས་ནི་སེར་སྣའི་དབང་གིས་བཀྲེས་ཤིང་སྐོམ་པས་མི་ཁོམས། དུད་འགྲོ་ནི་གཏི་མུག་དབང་གིས་གླེན་ཞིང་ལྐུགས་ལ་གཅིག་ལ་གཅིག་ཟ་ཞིང་འཚོ་བས་མི་ཁོམས། ས་མཐའ་ཀློ་མོན་ནི་དགེ་སྡིག་མི་ཤེས་པས་མི་ཁོམས། ལྷ་ཚེ་རིང་པོ་ནི་ཤེས་པ་ཡུལ་ལ་འཇུག་པ་རྒྱུན་ཆད་པའི་སྙོམས་འཇུག་གིས་མི་ཁོམས། མུ་སྟེགས་ལོག་ལྟ་ཅན་ནི་དཀོན་མཆོག་དང་ལས་འབྲས་ལ་
བདེན་པར་མི་བརྩི་ནས་མི་ཁོམས། སངས་རྒྱས་མ་བྱོན་པའི་མུན་གླིང་ནི་དཀོན་མཆོག་གསུམ་གྱི་སྒྲ་ཙམ་མི་ཐོས་པས་མི་ཁོམས། ལྐུགས་པ་དང་དམུས་ལོང་ནི་དབང་པོ་སྐྱོན་ཞུགས་པས་མི་ཁོམས་པས་ཆོས་སྒྲུབ་པའི་ཁོམས་སྐབས་མེད་པའི་གནས་དེ་དག་ཏུ་མ་སྐྱེས་པས་དལ་བརྒྱད་དེ། མི་ཁོམ་བརྒྱད་སྤངས་དེ་ཡིས་དལ་བ་རྟག་ཏུ་རྙེད། །ཅེས་སོ། མདོ་ལས། མིར་གྱུར་ཡུལ་དབུས་སྐྱེས་པ་དང་། །དབང་པོ་ཚང་ཞིང་ཆོས་ལ་དད། །དེ་བཞིན་ལས་མཐའ་མ་ལོག་པའོ། །ཞེས་རང་འབྱོར་ལྔ་དང་། །སངས་རྒྱས་བྱོན་དང་དེས་ཆོས་གསུངས། །བསྟན་པ་གནས་དང་དེའི་རྗེས་འཇུག །གཞན་ཕྱིར་སྙིང་ནས་བརྩེ་བའོ། །ཞེས་གཞན་འབྱོར་ལྔ་ཚང་བའི་དུས་སུ་སྐྱེས་པ་བདག་ནི་ལས་དང་སྐལ་པ་བཟང་། རེ་དགའ་རེ་སྐྱིད་བསམ། གུ་རུ་པདྨའི་ཞལ་ནས། དཀའ་བ་དེ་ཙམ་སྔོན་བསགས་ཀྱིས་ཐོབ་ཀྱང་འོན་ལོང་ཞ་ལྐུགས་དབང་པོ་མ་ཚང་ན་ཆོས་སྤྱོད་དཀའ། མཐའ་
འཁོབ་ཀླ་ཀློ་མི་ཁོམས་པའི་གནས་སུ་སྐྱེས་ན་ཆོས་བྱ་བའི་སྐལ་པ་མེད། མུ་སྟེགས་ལོག་ལྟ་རིགས་ཆད་དུ་སྐྱེས་ན་སངས་རྒྱས་ཀྱི་བསྟན་པ་ལ་མི་འཇུག །དེས་ན་ད་ལྟ་འོ་སྐོལ་ལྷོ་ཛམ་བུ་གླིང་དུ་སྐྱེས། སངས་རྒྱས་ཀྱི་བསྟན་པ་ཡོད་པའི་དུས་འདིར་མི་ལུས་ཐོབ་དབང་པོ་ཚང་། བླ་མ་དམ་པ་དང་མཇལ། ཅི་བྱེད་རང་དབང་ཡོད་པའི་དུས་འདིར་དམ་པའི་ཆོས་ཤིག་མི་བྱེད་ན། མི་ལུས་རིན་ཆེན་ཆུད་གསན་པ་ཡིན་ནོ། །ཡར་མར་ས་མཚམས་ད་རེས་ཡིན་པ་ལ། མི་ཚེ་སྟོང་ཟད་བྱེད་པ་ཚོ་སྙིང་རེ་བརྩེ་བ་ཤ་སྟག་ཏུ་འདུག་གོ །ཞེས་གསུངས་སོ། །དེ་ཡང་དཔེའི་སྒོ་ནས་རྙེད་པར་དཀའ་བ། གྲངས་ཀྱི་སྒོ་ནས་རྙེད་པར་དཀའ་བ། རྒྱུའི་སྒོ་ནས་རྙེད་པར་དཀའ་བར་གསུངས་ཏེ། དང་པོ་ནི། འཇིག་རྟེན་ན་ཨུ་དུམྺ་རའི་མེ་ཏོག་དཀོན་པ་ལྟར་མི་ལུས་ཐོབ་པར་དཀའ། རྒྱ་མཚོའི་གཉའ་ཤིང་གི་བུ་གར་རུ་སྦལ་མགྲིན་པ་ཚུད་དཀའ་བ་ལྟར་མི་ལུས་ཐོབ་དཀའ།
གྱང་ལོགས་ལ་སྲན་མ་གཏོར་བས་གཅིག་ཙམ་ཆགས་པར་དཀའ་ན། དེ་ལས་ཀྱང་མི་ལུས་ཐོབ་པ་དཀའ་བ་སྟེ། མ་ཧཱ་གུ་རུ་པདྨས། དལ་འབྱོར་གྱི་མི་ལུས་ཐོབ་པ་ཤིན་ཏུ་དཀའ། ཇི་ལྟར་དཀའ་ན་ཞལ་བའི་ལོགས་ན་སྲན་མ་གཏོར་བ་མི་ཆགས་པ་དང་། རྒྱ་མཚོར་གཉའ་ཤིང་འཕྱོ་བའི་བུ་གར་རུ་སྦལ་གྱི་མགྲིན་པ་ཚུད་པའམ། ཁབ་གྱེན་དུ་བསླང་བའི་མིག་ཏུ་ཡུངས་དཀར་འཕངས་པ་མི་ཚུད་པ་ལྟར་མི་ལུས་ཤིན་ཏུ་རྙེད་དཀའ་འོ། །གཉིས་པ་ནི། དེ་དཀའ་བའི་དཔེ། རིགས་དྲུག་སེམས་ཅན་འབྲུའི་ཕུང་པོ་སྤུངས་པ་འདྲ། དམྱལ་བ་ཡི་དྭགས་དུད་འགྲོ་གསུམ་ནས་ཕུང་གི་རྨིང་དང་འདྲ། ལྷ་མ་ཡིན་རྐེད་པ་དང་འདྲ། ལྷ་དང་མི་གཉིས་རྩེ་མོ་དང་འདྲ། རིགས་དྲུག་གཞན་གྱི་ལུས་མཐོང་ན་མི་ལུས་ཐོབ་པ་མི་སྲིད་པ་ཙམ་ཡིན། དུད་འགྲོ་ཁ་འཐོར་གྱི་ལུས་མཐོང་ན་སྲིད་མཐའ་ཙམ་ཡིན། རིགས་དྲུག་སེམས་ཅན་ལ་ཚོད་རྩིས་ཐོང་དང་གསུངས། གསུམ་པ་ནི།
དལ་འབྱོར་ཐོབ་པའི་རྒྱུ་ཚུལ་ཁྲིམས་རྣམ་པར་དག་པ་སྲུང་དགོས་པས། ད་ལྟ་སྲོག་གཅོད་ཀྱི་སྡོམ་པ་ཙམ་བསྲུང་བར་དཀའ་ན་མི་ལུས་ཇི་ལྟར་ཐོབ། གཞན་ཡང་སྔོན་བྱོན་སངས་རྒྱས་བྱང་སེམས་སྐྱེས་ཆེན་གྲུབ་ཐོབ་ཐམས་ཅད་ཀྱང་མི་ལུས་རིན་པོ་ཆེ་འདི་ལ་བརྟེན་ནས་དམ་ཆོས་ཚུལ་བཞིན་བསྒྲུབས་པས་སངས་རྒྱས་པར་ཡིན་ནོ། །དེ་ལྟར་དྲན་པས་དམིགས་རྐང་གཉིས་པ་འདོན། དེ་ལྟར་དལ་འབྱོར་ཐོབ་ཀྱང་རྟག་ཏུ་འཆི་བའི་ཆོས་ཅན་ཡིན་པས་འཆི་བ་མི་རྟག་པ་མ་བསྒོམ་ན། དལ་འབྱོར་ཐོབ་ཀྱང་དུད་འགྲོ་དང་མཚུངས་པས་མི་རྟག་པ་བསྒོམ་པ་ནི་ཆོས་ཐམས་ཅད་ཀྱི་རྩ་བ་ཡིན་ཏེ། མི་རྟག་པ་བསྒོམ་པས་གཉེན་ལ་ཞེན་ཆགས་ཆུང་། དགྲ་ལ་སྡང་སེམས་བྲལ། བརྩོན་འགྲུས་ཀྱི་ལྕག་ཏུ་འགྱུར། དགོས་མེད་རྒྱུད་ལ་སྐྱེས། ཆོས་ལ་དཀའ་སྤྱད་བཟོད། ཇི་སྐད་དུ་ཡང་། །ངེས་པར་འཆི་བ་བསམ་ལ་རྟག་འཛིན་སྤངས། །ནམ་འཆི་ཆ་མེད་བསམ་
ལ་རྟག་འཛིན་བློ་སྣ་བསྐུང་། །ཆོས་མིན་ཕན་མེད་བསམ་ལ་དམ་ཆོས་སྒྲུབས། །ཅེས་གསུངས་པ་ལྟར། གཅིག་ཀྱང་མ་ཤི་བར་ལུས་པ་མེད་པས་བདག་ཀྱང་ངེས་པར་འཆི། ལུས་འདི་ལ་མི་འཆི་བའི་སྲ་བརྟན་མེད་ཅིང་འདུས་བྱས་ཡིན་པས་འཆི། ཚེ་ཉིན་ཞག་སྐད་ཅིག་རེ་ལའང་ཟད་པ་མ་གཏོགས་བསྣོན་པ་མེད་པས་འཆི། ཚེ་ལ་ནམ་འཆིའི་ངེས་པ་མེད་པས་ནམ་འཆི་ཆ་མེད་དུ་འཆི། འཆི་བའི་རྐྱེན་མང་བས་འཆི་རྐྱེན་གང་གིས་བྱེད་ཆ་མེད་དུ་འཆི། གསོན་པའི་རྐྱེན་ཉུང་བས་དེ་རིང་ཙམ་ཡང་མི་འཆི་བའི་གདེང་མེད་པས་འཆི། ངེས་པར་འཆི་བའི་དུས་ལ་བབ་ན་ཟས་ནོར་མང་བས་འཆི་བ་མི་བསླུ་སྟེ་འཆི། གཉེན་འབྲེལ་མང་ཡང་འཆི་བ་མི་བསླུ་སྟེ་འཆི། རང་ལུས་གཅེས་འཛིན་ཟས་གོས་ཀྱིས་བསྐྱང་པ་འདིས་ཀྱང་འཆི་བ་མི་བསླུ་སྟེ་འཆི། དེ་ལྟར་ཡང་གཞུང་ཉིད་ལས། །འཁོར་བའི་འཁོར་ལོར་འཁྱམས་པའི་རིགས་དྲུག་སེམས་ཅན་རྣམས༔ སྒྱུ་ལུས་མི་རྟག་
སྟོན་དུས་མེ་ཏོག་འདྲ་སྟེ་ནམ་ཡལ་མེད༔ ཚེ་འདི་མི་རྟག་ཉི་མའི་གྲིབ་སོ་འདྲ་སྟེ་ཡད་མ་ཡུད༔ ནོར་རྫས་མི་རྟག་རྩ་ཁའི་ཟིལ་པ་འདྲ་སྟེ་སེར་སྣའི་བསོག་འཇོག་སྤངས༔ འཁོར་གཡོག་ཟླ་གྲོགས་གཉེན་འདུན་ཚོང་འདུས་མགྲོན་པོ་འདྲ་སྟེ་སོ་སོར་བྱེར༔ གློ་བུར་བར་ཆད་རླུང་ལྟར་ལྡང་བས་སེམས་ཉིད་མར་མེ་ནམ་ཁྱེར་མེད༔ འདུས་བྱས་ལས་ལ་ཟིན་དུས་མེད་དེ་སྒྱུ་མའི་གྲོང་ཁྱེར་རྫུས༔ ཟིན་མེད་བྱ་བས་རང་མགོ་བསྐོར་བས་འཁོར་བར་ཡང་ཡང་འཁྱམས༔ འཁོར་བའི་འཁོར་ལོ་ཟད་དུས་མེད་པས་ཉི་ཟེར་རྡུལ་ལྟར་འཚུབས༔ ཕྱི་མའི་ལས་ལུས་ཇི་ལྟར་ལེན་ཡང་ཞེ་རེ་འཇིགས༔ སྐྱབས་གནས་དཔུང་གཉེན་བར་དོར་མེད་པའི་སྐབས་དེར་སྡུག་བསྔལ་གཙེས༔ ལས་ཉོན་སྡིག་སྒྲིབ་ཡེ་ནས་བསགས་པ་འདི་ཡང་དག་རེ་དཀའ༔ ཉོན་མོངས་དུག་ལྔ་གཉེན་པོས་མ་ཟིན་པ་ཡན་འདིས་ནི་རང་རེ་ཕུང་༔ རློམ་སེམས་སེར་སྣ་རེ་ལྟོས་ཨ་འཐས་ཞེན་
ཆགས་འདིས༔ ཅི་བྱ་གཏོལ་མེད་གཅེར་བུ་སེར་བས་བདས་འདྲ་ཞིག༔ ནམ་ཞིག་མི་རྟག་འཆི་བའི་དུས་འདིར་འོང་སྲིད་དོ༔ ཚེ་འདིའི་བསོག་འཇོག་ཚོང་མགྲོན་ཇག་པས་བཅོམ་འདྲ་ཞིག༔ ནམ་ཞིག༴ ཕྱི་མའི་སོ་ནམ་རྒྱ་མཚོ་དུས་ཀྱིས་སྐེམ་འདྲ་ཞིག༔ ནམ་ཞིག༴ ཕྱི་མའི་ས་ལམ་ལམ་མཁན་མེད་པའི་རྐང་མགྱོགས་བཞིན༔ འཇིགས་རུང་སྲིན་པོའི་ཡུལ་དུ་འཁྱམས་འདྲའི་སྡུག་བསྔལ་ཞིག༔ ནམ་ཞིག༴ དགེ་སྡིག་འབྲས་བུ་གང་ཐོབ་མེད་པའི་བཏང་སྙོམས་ལས༔ ས་བོན་མེས་ཚིག་མྱུ་གུ་འདྲ་བའི་དུས་ཚོད་གཅིག༔ ནམ་ཞིག༴ ཚེ་འདིར་དོན་མེད་སྡིག་པའི་ལས་བསགས་ཆོས་ལ་སྨད༔ འཆི་ཁའི་སྐྱབས་གནས་ཆོས་ལས་མེད་པས་བསམ་རེ་ཕྱི༔ དཔེར་ན་ནམ་མཁར་བྱ་འཕུར་བྱ་གྲིབ་ཁྱི་ཡིས་དེད་འདྲ་ཞིག༔ ནམ་ཞིག༴ ཚེ་འདིར་ལུས་ལ་རྟག་པར་འཛིན་ཅིང་གཅེས་པར་བཟུང་༔ མི་རྟག་མངོན་འཆར་བར་དོར་ཡིད་ལུས་གཅེར་བུར་རྒྱུག༔ གཏད་མེད་ལྟོས་
བྲལ་བྱ་སྤུ་རླུང་གིས་གཏོར་འདྲ་ཞིག༔ ནམ་ཞིག༴ ཚེ་འདིར་གཡོ་སྒྱུས་རྣམ་གཡེང་དགེ་བའི་ལས་ལ་ལོག་པར་བལྟ༔ ཕྱི་མའི་འབྲས་བུ་སྲིན་བུའི་ཁ་ཆུས་རང་ཉིད་འཆིང་འདྲ་ཞིག༔ ནམ་ཞིག་མི་རྟག་འཆི་བའི་འདི་ཕྱིའི་མཚམས་དེར་འོང་ངེས་སོ༔ ཚེ་འདིར་གསང་སྔགས་ཁྱད་གསོད་དགེ་བའི་ལས་ལ་སྨོད༔ ནམ་ཞིག་མི་རྟག་བྱུང་དུས་དབང་བཞི་ལེན་པར་སེམས༔ ཐུགས་རྗེའི་ལྕགས་ཀྱུ་མྱུར་ཡང་འཛིན་པར་མི་ནུས་པས༔ དཔེར་ན་སྲུབ་མེད་རྡོ་བ་རྒྱ་མཚོའི་ཀློང་དཀྱིལ་ནས༔ ཉ་བའི་ལྕགས་ཀྱུས་རྡོ་བ་མ་བླངས་ལྟར༔ དམ་ཚིག་མ་བསྲུངས་འདྲེན་པར་ཡོད་དོ་ཨང་༔ ཕྱི་རབས་རྗེས་འཇུག་ཐུགས་ལ་དེ་ལྟར་ཞོག༔ དོན་བསམ་ཞིང་ངག་ཏུའང་བརྗོད་ལ་རང་རྒྱུད་དང་འདྲེས་ངེས་བྱ། དེ་ཡང་སྙིགས་མ་ལྔ་བདོ་བའི་དུས་འདིར་འཆི་རྐྱེན་ཤིན་ཏུ་མང་ཞིང་ལྷག་པར་ལྷ་སྲིན་སྡེ་བརྒྱད་ཟིང་ལང་ཤིང་རྒྱ་ནད་རྒྱུག་འགྱེལ་ལ་སོགས་པའི་ནད་སྣ་ཚོགས་དང་།
རྒྱལ་འགོང་དམ་སྲི་ལ་སོགས་པའི་འདྲེ་སྲིན་གདུག་པ་ཅན་རྣམས་ཀྱིས་སྐྱེ་འགྲོའི་ཚེ་སྲོག་མྱུར་དུ་གཅོད་པར་བྱེད་པ་ཤིན་ཏུ་མང་བས་ནམ་འཆི་ཆ་མེད་དོ། །དེ་ཡང་གཏེར་གཞུང་ལས། མ་འོངས་སུམ་ཅུ་ཁ་རལ་དུས༔ ཕྱི་སྣོད་འཇིག་རྟེན་ཞིང་ཁམས་སུ༔ འདྲེ་སྲིན་འབྱུང་པོ་འུར་རྒྱུག་བྱེད༔ ནང་བཅུད་སྐྱེ་འགྲོ་ཐམས་ཅད་ཀྱི༔ ལུས་སྲོག་དུས་མིན་ངེས་མེད་འཇིག༔ འབྱུང་བཞིའི་ནད་ཀྱིས་ངེས་པར་འཇིག༔ འབྱུང་བཞིའི་ནད་ཀྱིས་འགྲོ་ཀུན་གཟིར༔ དབང་མེད་བར་དོར་དུས་མིན་འཁྱམས༔ ཅེས་དང་། དེ་ལྟར་ཡང་། སྒྱུ་ལུས་མི་རྟག་འཆི་བའི་རོ༔ ཕྱི་སྣོད་མི་རྟག་དུས་བཞི་འགྱུར༔ ནང་བཅུད་མི་རྟག་སྐྱེ་འགྲོའི་གཟུགས༔ ནད་མཚོན་དམག་འཁྲུག་དུས་མིན་འཇིགས༔ ཚེ་ཚད་མི་རྟག་སུམ་ཅུ་རལ༔ ལྷ་སྲིན་འབྱུང་པོ་སྐར་ལྟར་འཁྲུགས༔ སད་སེར་མི་ནད་ཕྱུགས་ནད་འཚུབས༔ གཙུག་ལག་དགེ་འདུན་སྡེ་རྣམས་འཇིགས༔ མཆོག་གསུམ་བླ་མ་འོ་རེ་བརྒྱལ༔ བོད་
ཁམས་མི་ལ་བདེ་བ་མེད༔ ཅེས་སོ། །དེ་ལྟར་ཐམས་ཅད་མི་རྟག་པས་བདག་ཀྱང་མི་རྟག་པར་བསམ་ཤིང་དམ་པའི་ཆོས་ལ་བརྩོན་འགྲུས་དྲག་པོ་ད་ལྟ་ཉིད་ནས་སྒྲུབ་དགོས་ཏེ། མདོ་ལས། རྟག་ཏུ་བརྩོན་འགྲུས་གང་བརྩམས་པ། །དེ་ལ་བྱང་ཆུབ་ཡོད་མི་དཀའ། །ཅེས་དང་། གང་ལ་བརྩོན་འགྲུས་ཡོད་པ་དེ་ན་བྱང་ཆུབ་ཡོད་དེ། ཞེས་གསུངས་པས། དམ་པའི་ཆོས་ལ་ལེ་ལོ་དང་ཕྱི་བཤོལ་གྱི་དབང་དུ་མ་སོང་བར། བརྩོན་འགྲུས་མགོ་ལ་མེ་ཤོར་བ་གསོད་པ་ལྟར་མྱུར་དུ་སྒྲུབ་དགོས། ནམ་འཆི་ཆ་མེད་འདི་ལ་བསམས་ནས། མི་ཚེ་ཆོས་ལ་དྲིལ་བ་མ་གཏོགས་པར། །ཚེ་འདིའི་བྱ་བ་སྒྲུབ་ལོང་མི་འདུག་པས། །འཆི་བ་མི་རྟག་བསྒོམ་ན་མི་ལེགས་སམ། །ཞེས་ཡིད་ལ་བསམ་ཞིང་དམིགས་རྐང་གསུམ་པ་འདོན། །བཞི་པ་ལས་རྒྱུ་འབྲས་བསྒོམ་པ་གལ་ཆེ་སྟེ། གུ་རུ་པདྨའི་ཞལ་ནས། ཚེ་འདི་ཕྱིའི་སྐྱིད་སྡུག་ལེགས་ཉེས་ཐམས་ཅད་སྔོན་གྱི་ལས་ལས་གྲུབ་
པས། ལས་འབྲས་བསླུ་བ་མེད་པ་ལ་ཡིད་ཆེས་པ་གལ་ཆེ། རྒྱུ་སྡིག་པ་བྱས་པས་འབྲས་བུ་སྡུག་བསྔལ། རྒྱུ་དགེ་བའི་ལས་ལ་འབྲས་བུ་བདེ་བ་འབྱུང་བར་ཡར་སངས་རྒྱས་བསླུ་བ་མེད་པའི་ས་དང་། མར་ངན་སོང་དུ་ལྟུང་བ་ཡང་རྒྱུ་འབྲས་བསླུ་མེད་ཀྱི་རྟེན་འབྲེལ་ལས་བྱུང་བ་ཡིན་ནོ། །ཞེས་གསུངས་པས། དེ་ལ་སྡིག་པ་མི་དགེ་བ་ནི། སྲོག་གཅོད་པ། མ་བྱིན་པ་ལེན་པ། འདོད་པས་ལོག་པར་གཡེམ་པ། རྫུན། ཕྲ་མ། ཚིག་རྩུབ། ངག་འཆལ། བརྣབ་སེམས། གནོད་སེམས། ལོག་ལྟ་བཅས་རྣམ་པ་བཅུའོ། །མི་དགེ་བ་དེ་དག་རེ་རེ་ལ་ཡང་། རྣམ་སྨིན་གྱི་འབྲས་བུ། རྒྱུ་མཐུན་གྱི་འབྲས་བུ། བདག་པོའི་འབྲས་བུ་དང་གསུམ་ལས། མི་དགེ་བ་དེ་དག་ཞེ་སྡང་གིས་ཀུན་ནས་བསླངས་ཏེ་ཡུལ་མཆོག་ལ་བརྟེན་ནས་ཆེན་པོར་སྤྱད་པས་དམྱལ་བར་སྐྱེ། འདོད་ཆགས་ཀྱིས་ཀུན་ནས་བསླངས་ཏེ་ཡུལ་འབྲིང་པོ་ལ་བརྟེན་ནས་བར་མར་སྤྱད་པས་ཡི་དྭགས་སུ་སྐྱེ།
གཏི་མུག་གིས་ཀུན་ནས་བསླངས་ཏེ་ཡུལ་མཐའ་མ་ལ་བརྟེན་ནས་སྡིག་པ་ཆུང་ངུར་སྤྱད་པས་དུད་འགྲོར་སྐྱེ་སྟེ། རིན་ཆེན་ཕྲེང་བ་ལས། ཀུན་གྱིས་སྡིག་བསགས་ངན་འགྲོའོ། །རྒྱུ་མཐུན་གྱི་འབྲས་བུ་ལ་གཉིས་ཏེ། མྱོང་བ་རྒྱུ་མཐུན་ནི། གལ་ཏེ་མི་ལུས་ཐོབ་པར་སྨིན་པར་འགྱུར་ཏེ། ལུང་སྔ་མ་ལས། །གསོད་པ་ཡིས་ནི་ཚེ་ཐུང་འགྱུར། །བརྐུ་བ་ཡིས་ནི་ལོངས་སྤྱོད་ཕོངས། །བྱི་ཕོར་བྱས་པས་དགྲ་ཟླ་བཅས། །རྫུན་དུ་སྨྲ་བས་སྐུར་པ་མང་། །ཕྲ་མ་ཡིས་ནི་བཤེས་དང་དབྱེ། །ཚིག་རྩུབ་པོས་ནི་མི་སྙན་ཐོས། །ངག་འཁྱལ་ཡིས་ནི་ཚིག་མི་བཙུན། །བརྣབ་སེམས་ཡིད་ལ་རེ་བ་འཇོམས། །གནོད་སེམས་འཇིགས་པ་སྦྱིན་པར་བྱེད། །ལོག་པར་བལྟ་བས་ལྟ་ངན་འཛེགས། །ཅེས་དང་། བྱེད་པ་རྒྱུ་མཐུན་ནི་སྔར་མི་དགེ་བ་གང་དང་གང་ལ་གོམས་པ་དེ་ད་དུང་བྱེད་སྙིང་འདོད་པར་འགྱུར་རོ། །དབང་གི་འབྲས་བུ་ནི། །སྲོག་གཅོད་ས་ཕྱོགས་གཟི་མདངས་ཆུང་། །
མ་བྱིན་ལེན་གྱིས་སད་སེར་ལྡང་། །འདོད་ལོག་གིས་ནི་རྡུལ་འཁྲིགས་པ། །རྫུན་གྱིས་མི་གཙང་དྲི་ང་བ། །ཕྲ་མས་ས་ཕྱོགས་མཐོ་དམན་ཅན། །ཚིབ་རྩུབ་ཀྱིས་ནི་ཚྭ་སྒོ་ཅན། །ངག་འཁྱལ་གྱིས་ནི་དུས་འགྱུར་ལྡོག །བརྣབ་སེམས་ཀྱིས་ནི་འབྲས་བུ་ཕྲ། །གནོད་སེམས་འབྲས་བུ་རོ་ཁ་བ། །ལོག་ལྟས་ཆུང་རྒྱུའམ་མེད་པའོ། །ཞེས་དང་། སྤྱོད་འཇུག་ལས། །མི་དགེ་བ་ལས་སྡུག་བསྔལ་འབྱུང་། །འདི་ལས་ཇི་ལྟར་ངེས་ཐར་ཞེས། །ཉིན་མཚན་ཀུན་ཏུ་བདག་གིས་ནི། །འདི་ཉིད་འབའ་ཞིག་བསམ་པར་རིགས། །ཅེས་གསུངས་པ་ལྟར་ཡང་ཡང་བསམ་དགོས་སོ། །དེ་ལས་ལྡོག་པ་དགེ་བ་བཅུ་ཡིན་ཏེ། རྣམ་སྨིན་གྱི་འབྲས་བུས་མཐོ་རིས་གསུམ་དུ་སྐྱེ། རྒྱུ་མཐུན་གྱི་འབྲས་བུ་ནི། སྲོག་གཅོད་སྤངས་པས་ཚེ་རིང་། །མ་བྱིན་ལེན་སྤངས་ལོངས་སྤྱོད་ཆེ། །འདོད་ལོག་སྤངས་པས་དགྲ་ཟླ་མེད། །རྫུན་ཚིག་སྤངས་པས་སྐུར་འདེབས་བྲལ། །ཕྲ་མ་སྤངས་པས་བཤེས་དང་
མཐུན། །ཚིག་རྩུབ་སྤངས་པས་སྙན་པ་ཐོས། །ངག་འཁྱལ་སྤངས་པས་ཚིག་བཙུན། །བརྣབ་སེམས་སྤངས་པས་རེ་བ་འགྲུབ། །གནོད་སེམས་འཇིགས་མེད་བདེ་དང་ལྡན། །ལོག་ལྟ་སྤངས་པས་ལྟ་བཟང་ཐོབ། །དབང་འབྲས་ཀྱང་། །ས་ཕྱོགས་གཟི་ཆེ་ལོ་ཏོག་འཕེལ། །རྡུལ་མེད་དྲི་ང་མཐོ་དམན་མེད། །ཚྭ་སྒོ་མེད་ཅིང་དུས་ཚིག་སྙོམས། །འབྲས་བུ་ཆེ་ཞིང་མངར་བ་དང་། །མང་པོར་ཡོད་པར་སྐྱེ་བའོ། །ཞེས་གསུངས་ལྟར་རོ། །དེ་ཡང་དགེ་བས་བདེ་བ་དང་། སྡིག་པས་སྡུག་བསྔལ། འདྲེས་མས་བདེ་སྡུག་འདྲེས་མར་མྱོང་བས་འཕེན་རྫོགས་ཀྱི་ལས་སོ་སོར་མྱོང་ཚུལ་ཤེས་པར་བྱ་དགོས་སོ། །དགེ་སྡིག་གང་ཡིན་ཀྱང་། སྐྱེ་བ་ཕྱི་མ་མྱོང་འགྱུར་གྱི་ལས་དང་། ལན་གྲངས་གཞན་ལ་མྱོང་འགྱུར་དང་། གཉེན་པོས་ཟིན་ན་མྱོང་བ་མ་ངེས་པ་སོགས་ཞིབ་ཏུ་ཡིད་ལ་ངེས་པར་བྱའོ། །ལས་འབྲས་བསླུ་མེད་འདི་ལ་བསམ་ཙ་ན། །སྡིག་སྤངས་
དགེ་སྒྲུབ་བྱེད་པ་མ་གཏོགས་པ། །དགེ་སྡིག་འཆོལ་བར་སྤྱོད་ན་མི་རུང་བས། །ལས་འབྲས་ཞིབ་ཀྱིས་བརྩི་ན་མི་ལེགས་སམ། །ཞེས་དོན་ལ་བསམ་གཞིག་བྱ་ཞིང་དམིགས་རྐང་བཞི་པ་འདོན་བསྒོམ་བྱ། །ལྔ་པ་འཁོར་བའི་ཉེས་དམིགས་ནི། གུ་རུ་པདྨའི་ཞལ་ནས། དོན་མེད་ལས་ལ་སྡུག་རྒུར་མ་བྱེད་པར། །འདི་ཕྱི་གཉིས་ཀར་བདེ་སྐྱིད་ཆོས་མཛོད་ཅིག །སྡིག་པ་མི་དགེས་ངན་སོང་གསུམ་དུ་སྐྱེ། །དགེ་བ་བྱས་པས་མཐོ་རིས་གསུམ་དུ་སྐྱེ། །སངས་རྒྱས་མ་ཐོབ་བདེ་བ་གང་ནའང་མེད། །ཅེས་གསུངས་པ་ལྟར། སངས་རྒྱས་མ་ཐོབ་ཀྱི་བར་དུ་རིགས་དྲུག་གི་གནས་གར་སྐྱེས་གར་གནས་ཀྱང་མཐར་ཐུག་གི་བདེ་བ་མེད་དེ། དམྱལ་བ་ཡི་དྭགས་དུད་འགྲོ་དང་། །མི་དང་ལྷ་མིན་ལྷ་རྣམས་ཏེ། །རིགས་དྲུག་ཁམས་གསུམ་འཁོར་བའི་གནས། །གང་དུ་སྐྱེས་ཀྱང་སྡུག་བསྔལ་ཉིད། །ཅེས་གསུངས་པ་ལྟར་དང་། དེའི་ནང་ནས་ཀྱང་ངན་སོང་གསུམ་གྱི་སྡུག་བསྔལ་
བཟོད་བརླག་མེད་ཅིང་། ཁྱད་པར་དམྱལ་བའི་སྡུག་བསྔལ་བསམ་གྱིས་མི་ཁྱབ་སྟེ། ཚ་དམྱལ་བ་རྣམས་ནི་གཤིན་རྗེའི་སྐྱེས་བུ་འཇིགས་སུ་རུང་བ་རྣམས་ཀྱིས་དམྱལ་བའི་སེམས་ཅན་དེ་དག་ལྕགས་བསྲེགས་ཀྱི་ས་གཞིར་འདེད་ཅིང་བསྒྱེལ་ནས་རབ་ཏུ་འབར་བའི་མཚོན་ཆ་སྣ་ཚོགས་ཀྱིས་ལུས་དུམ་བུ་བརྒྱ་སྟོང་མང་པོར་གཏུབ་པ་དང་། བསྐལ་པ་དུས་མཐའི་མེ་དཔུང་འབར་བ་ལྟ་བུས་བཙོ་ཞིང་བསྲེགས་པ་ལ་སོགས་པའི་སྡུག་བསྔལ་རྒྱུན་ཆད་མེད་པར་མྱོང་བ་དང་། གྲང་དམྱལ་རྣམས་ནི་གནས་གངས་རིའི་ཁྲོད་འཁྱགས་པའི་ཐང་ཆེན་པོའི་སྟེང་ཁ་བ་བུ་ཡུག་གི་རེག་བྱ་ཤིན་ཏུ་གྲང་བས་གདུང་བ་སྣང་བའི་ཁྱད་པར་སྐར་མའི་འོད་ཙམ་ཡང་མེད། དྲོ་བའི་རྐྱེན་ཁང་ཁྱིམ་ཉི་མ་གོས་སོགས་ལྟ་ཞོག །ས་གཞི་ལ་གཤོང་བུ་ཙམ་ཡང་མེད་པར་གྲང་བའི་སྟོབས་ཀྱིས་ཆུ་བུར་ཅན་དང་། ཆུ་བུར་རྡོལ་བ་ཅན་སོགས་ལུས་ཚལ་པ་བརྒྱ་སྟོང་དུ་མར་གས་
པ་སོགས་ལས་ངན་མ་ཟད་བར་དུ་སྡུག་བསྔལ་མྱོང་དགོས་ཏེ། མཆོག་གཏེར་པདྨ་གར་དབང་ཆོས་སྤྱོད་ལམ་རིམ་ལས། དམྱལ་བ་ཚ་གྲང་སྡུག་བསྔལ་བཟོད་བླག་བྲལ། །ཚེ་ཚད་དག་ཀྱང་བསྐལ་པ་དུ་མ་སྟེ། །ད་ལྟ་ལུས་འདི་མེ་འོབ་ནང་དུ་བཙུད། །གཤེད་མ་བརྒྱ་ཡིས་མཐའ་ནས་བསྐོར་གྱུར་ཀྱང་། །དམྱལ་བའི་སྡུག་བསྔལ་ཕྲ་འུ་མཚོན་དུ་མེད། །དེ་འདྲའི་སྡུག་བསྔལ་བཟོད་ཐུབ་གདེང་ཡོད་དམ། །ཅེས་གསུངས་པ་ལྟར་རོ། །ཡི་དྭགས་ནི་ཕྱིའི་སྒྲིབ་པ་ཅན་དང་། ནང་གི་སྒྲིབ་པ་ཅན ་དང་། ཟས་སྐོམ་གྱི་སྒྲིབ་པ་ཅན་རྣམས་ལའང་བཀྲེས་ཤིང་སྐོམ་པའི་སྡུག་བསྔལ་བཟོད་བརླག་མེད་དེ། ལུང་སྔ་མ་ལས། ཡི་དྭགས་བཀྲེས་སྐོམ་སྡུག་བསྔལ་བསམ་མི་ཁྱབ། །བསྐལ་པ་དུ་མར་ཟས་སྐོམ་ཅུང་ཟད་ཀྱང་། །རྙེད་པར་མི་འགྱུར་ཆུ་ཐིགས་ཙམ་མི་མཐོང་། །ཉམ་ཐག་སྨྲེ་སྔགས་བསྐལ་པ་སྟོང་དུ་འབོད། །ཉིན་གཅིག་བཟའ་བཏུང་གང་ཡང་མ་རྙེད་ན། །སྡུག་བསྔལ་
ཅི་འདྲ་དེ་ཡིས་མཚོན་ནུས་མིན། །ཅེས་སོ། །དུད་འགྲོ་རྣམས་ནི་གླེན་ཅིང་གཏི་མུག་པའི་དབང་གིས་ཆེ་བ་རྣམས་ཀྱིས་ཆུང་ངུ་མང་པོ་དུས་རེ་ལ་ཟ་བ་དང་། ཆུང་ངུ་རྣམས་ཀྱིས་ཆེན་པོའི་ལུས་ལ་མཆུ་བཙུགས་ནས་རྒྱུན་དུ་ཟ་བ་དང་། མུན་གླིང་དུ་སྐྱེས་པ་རྣམས་རང་ལུས་མི་མཐོང་བས་ཉིང་ཤ་ཉིད་ཀྱིས་ཟ་བ་དང་། དུད་འགྲོ་ཁ་འཐོར་གྱི་སྡུག་བསྔལ་ཀྱང་བསམ་གྱིས་མི་ཁྱབ་སྟེ། སྔ་མ་ལས། བྱོལ་སོང་བླུན་རྨོངས་གཅིག་གིས་གཅིག་ལ་ཟ། །མུན་གླིང་གནས་དང་དབང་མེད་བཀོལ་སྤྱོད་ཀྱི། །སྡུག་བསྔལ་བཟོད་མེད་གཤེད་མས་རྟག་ཏུ་བཀོལ། །ལྷ་རྣམས་ནི་འཆི་འཕོ་འོག་ཏུ་ལྟུང་བའི་སྡུག་བསྔལ། རིང་བའི་འཆི་ལྟས། ཉེ་བའི་འཆི་ལྟས། དམྱལ་བའི་སྡུག་བསྔལ་ལས་བཅུ་དྲུག་གི་ཆར་མི་ཕོད་པ་ཡོད་དོ། །སྔ་མ་ལས། ལྷ་ཡི་བདེ་སྐྱིད་མདང་གི་རྨི་ལམ་བཞིན། །ཚེ་ཚད་རྫོགས་ནས་མི་ཡི་འཆི་འཕོ་ནི། །བརྒྱད་འགྱུར་ཙམ་གྱི་སྡུག་བསྔལ་དུས་དེར་
མྱོང་། །ལྷ་ལས་འཕོས་ནས་ངན་སོང་གསུམ་དུ་ལྷུང་། །ཅེས་སོ། །ལྷ་མ་ཡིན་ལ་ཕྲག་དོག་གི་དབང་གིས་ལྷ་རྣམས་ལ་འཐབ་ཅིང་རྩོད་པའི་སྡུག་བསྔལ་དཔག་ཏུ་མེད་དེ། སྔ་མ་ལས། ལྷ་མིན་ལྷ་ལ་འཁྲུག་ཅིང་རྟག་ཏུ་ཕམ། །ནང་དུ་བཟའ་མི་དུམ་ཞིང་རྟག་ཏུ་འཁྲུག །ཡང་ཤི་ཡང་སོས་སྡུག་བསྔལ་བཟོད་བླག་མེད། །ཅེས་སོ། །འོ་སྐོལ་མི་རྣམས་ལ་ཡང་། ད་ལྟ་རང་རེ་རྣམས་ཀྱིས་ཉམས་སུ་མྱོང་བ་ལྟར་སྐྱེ་རྒ་ན་འཆིའི་སྡུག་བསྔལ་དང་། དགྲ་སྡང་བ་དང་འཕྲད་དམ་འཕྲད་ཀྱིས་དོགས་པའི་སྡུག་བསྔལ། གཉེན་བྱམས་པ་དང་བྲལ་ལམ་བྲལ་གྱིས་དོགས་པའི་སྡུག་བསྔལ། ཡོད་པ་རྣམས་འཚོ་སྐྱོང་བསྲུང་མི་ཐུབ་པའི་སྡུག་བསྔལ། མེད་པ་རྣམས་བཙལ་གྱིས་མི་རྙེད་པ་བཀྲེས་ཤིང་ཕོངས་པའི་སྡུག་བསྔལ། ཆེན་པོ་རྣམས་ལ་སེམས་ཀྱི་སྡུག་བསྔལ། དམན་པ་རྣམས་ལ་ལུས་ཀྱི་སྡུག་བསྔལ་སོགས། འགྱུར་བའི་སྡུག་བསྔལ་སོགས་ལ་མིག་གིས་བལྟས་ལ་
སེམས་ཀྱིས་དཔྱད་ན་གསལ་ལོ། །ཡང་སྔ་མ་ལས། མི་ཡི་ཡུལ་ན་སྐྱེ་རྒ་ན་འཆི་ཡི། །སྡུག་བསྔལ་བསམ་གྱིས་མི་ཁྱབ་བཞི་དང་ལྡན། །བསགས་པའི་ནོར་འཛད་སྐྱེས་པའི་ཐ་མ་འཆི། །དར་བའི་མཐའ་གུད་སྐྱིད་པའི་ཐ་མ་སྡུག །ཟས་ནོར་མི་རྙེད་བྲེལ་ཕོངས་ཡ་རེ་ང་། །སྡུག་བསྔལ་ངང་དུ་མི་ཚེ་དོན་མེད་ཟད། །ཅེས་སོ། །དེ་ཡང་གཞུང་ལས། །རང་གཞན་སེམས་ཅན་ཐམས་ཅད་ཀུན། །ཟིན་མེད་ཚེ་འདིའི་འདུན་གྲོས་གཡེངས། །མི་ཚེ་སྟོང་ཟད་སྙོམས་ལས་ཅན། །རིགས་དྲུག་འཁོར་ལོར་མི་འཇིགས་སམ། །ཅེས་རིགས་དྲུག་འཁོར་བའི་སྡུག་བསྔལ་གྱི་འཁོར་ལོ་དེ་རྣམས་ལ་ངེས་འབྱུང་དང་སྐྱོ་ཤས་དྲག་པོ་བསྐྱེད་ཅིང་། འཁོར་བ་ནས་ད་རེས་ཅི་ཐར་གྱི་ཐབས་ལ་འབད་པར་བྱ་དགོས་ཏེ། ཡབ་སྲས་མཇལ་བའི་མདོ་ལས། འཁོར་བའི་སྐྱོན་རྣམས་མཐོང་བ་ན། །སྐྱོ་བའི་སེམས་ནི་རབ་ཏུ་བསྐྱེད། །ཁམས་གསུམ་བཙོན་རར་འཇིགས་པས་ན། །
བརྩོན་པའི་སེམས་ཀྱིས་སྤངས་པར་བྱེད། །ཅེས་གསུངས་པ་ལྟར་འཁོར་བ་སྡུག་བསྔལ་གྱི་རྒྱ་མཚོ་ཐར་པའི་དུས་མེད་ལས་ཀྱི་བཙོན་དོང་འདི་ལས་མྱུར་དུ་ཐར་པའི་ཐབས་ལ་འབད་པར་གྱིས་ཤིག །འཁོར་བའི་སྡུག་བསྔལ་འདི་ལ་བསམ་ཙ་ན། །གང་དུ་སྐྱེས་ཀྱང་སྡུག་བསྔལ་མ་གཏོགས་པར། །བདེ་བ་སྐད་ཅིག་ཙམ་ཡང་མི་འདུག་པས། །གཏན་བདེའི་ཐར་པ་བསྒྲུབས་ན་མི་ལེགས་སམ། །འཁོར་བ་མཐའ་མེད་འདི་ལ་བསམ་ཙ་ན། །ད་དུང་འཁོར་བར་འཁྱམ་པ་མ་གཏོགས་པར། །གནས་ངན་ལེན་འདི་ཆོད་དུས་མི་འདུག་པས། །གཉེན་པོ་བཙན་ཆོད་བསྒོམ་ན་མི་ལེགས་སམ། །ཞེས་རང་རྒྱུད་ལ་གཞིག་འགྲེལ་ཡང་ཡང་བྱའོ། །དམིགས་རྐང་ལྔ་པ་འདོན་བསྒོམ་བྱ། །དྲུག་པ་ཐར་པའི་ཕན་ཡོན་ནི། དེ་ལྟར་འཁོར་བ་ལས་གྲོལ་ན་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པའི་བདེ་བ་བསམ་གྱིས་མི་ཁྱབ་སྟེ། སྒྲིབ་གཉིས་ཀྱི་མུན་པ་སངས་པས་
འཁོར་བའི་མཐའ་ལ་མི་གནས། ཚོགས་གཉིས་ཀྱི་དཔལ་འབྱོར་རྒྱས་པས་དོན་གཉིས་ལྷུན་གྱིས་གྲུབ། བདག་གཞན་གཉིས་མེད་དུ་རྟོགས་པས་དགྲ་གཉེན་གྱི་སྣང་བ་མེད། འཁོར་བ་རིས་མེད་དུ་རྟོགས་པས་སྤང་བླང་གི་ཚུལ་ཁྲིམས་གཙང་། ཅིར་སྣང་རང་སེམས་སུ་རྟོགས་པས་སྣང་བ་ཆོས་སྐུར་ཤར། འགྲོ་ཀུན་ཕ་མར་ཤེས་པས་བྱང་ཆུབ་ཀྱི་སེམས་དང་ལྡན། སྣང་སྟོང་དབྱེར་མེད་དུ་རྟོགས་པས་ཆགས་སྡང་དང་ཕྱོགས་རིས་དག །བྱ་བྲལ་བརྗོད་མེད་དུ་ཤེས་པས་འཁོར་འདས་ཀྱི་མཚང་ཞིག །རང་ངོ་རང་གྲོལ་དུ་རྟོགས་པས་བདེ་ཆེན་གྱི་བཙན་ས་ཟིན་པ་སྟེ་རྣམ་གྲོལ་གཏན་གྱི་བདེ་བ་བསམ་གྱིས་མི་ཁྱབ་བོ། །དེ་ཡང་གཏེར་གཞུང་ལས། །དེ་ཡང་གསང་སྔགས་དམ་ཚིག་གནད་དུ་བསྣུན་པའི་ཕྱིར༔ རྒྱལ་བ་རབ་འབྱམས་གསང་སྔགས་ཆོས་ལ་བརྟེན་ནས་སངས་རྒྱས་སོ༔ བར་དུ་བཅོམ་ལྡན་རྒྱལ་བ་ཤཱཀ་ཐུབ་སྤྱན་སྔ་རུ༔ ཉ་པ་ལྔ་བརྒྱས་སྔོན་
བྱས་ལས་ལ་སྐྱོ་བ་སྐྱེས༔ སངས་རྒྱས་དཔང་བཙུག་སྔར་བྱས་སྡིག་སྒྲིབ་བཤགས་ཤིང་སྦྱོངས༔ ཅེས་མཐོང་བའི་ཆོས་ལ་ཡོངས་སུ་གྲགས་པ་ལྟར་དགྲ་བཅོམ་པའི་གོ་འཕང་མངོན་དུ་མཛད་ནས་སླར་དག་པའི་ཞིང་ནས་བགྲོད་པ་གཅིག་པའི་གསང་སྔགས་རྡོ་རྗེ་ཐེག་པས་སྨིན་པར་མཛད་པ་ལ་དགོངས་ནས། ཉ་པ་ལྔ་བརྒྱ་ཉ་དང་བཅས་རྣམས་དག་པའི་ཞིང་ཁམས་སུ༔ ཚེ་གཅིག་སངས་རྒྱས་མངོན་གྱུར་ལུས་མ་བཞག་པར་གཤེགས༔ ཅེས་དང་། ཕྱི་མའི་དོན་ཀྱང་སྔ་མ་ལྟར་ཐ་སྙད་དུ་མས། ཉན་ཐོས་ཀྱི་མི་ཤེས་པའི་རྒྱུ་བཞི་ལས་ཆོས་ཟབ་ཅིང་ཕྲ་བ་མི་ཤེས་པ་ལྟར་ཞལ་ཚོན་གཅོད་དཀའ་བས་སངས་རྒྱས་གཉིས་པའི་གསུང་ལ་ཐེ་ཚོམ་པར་མི་འཚལ་བླངས་དགོས་ཏེ། ཡང་གཅིག་བཅོམ་ལྡན་རྒྱལ་བ་ཤཱཀ་ཐུབ་སྤྱན་སྔ་རུ༔ དགའ་བོ་སོར་ཕྲེང་སློབ་དཔོན་བཀའ་ལས་མ་འདས་ཤིང་༔ མངོན་སྤྱོད་ལས་ལ་རབ་བསྐུལ་སྒྲོལ་བའི་ལས་བཟད་ཚེ༔ སངས་
རྒྱས་ཞལ་མཐོང་གསང་སྔགས་ཟབ་མོའི་ཆོས་རྣམས་ཐོས༔ དགའ་བོ་སོར་ཕྲེང་སྔར་བྱས་སྡིག་སྒྲིབ་སྦྱོང་ཞིང་བཤགས༔ སངས་རྒྱས་དཔང་བཙུག་ཡང་དག་དོན་ལ་རྩེ་གཅིག་བསྒྲིམ༔ དགའ་བོ་སོར་ཕྲེང་མཚམས་མེད་ལས་ཀྱིས་མ་བསྒྲིབས་ཏེ༔ དགའ་བོ་ཚེ་གཅིག་སངས་རྒྱས་ས་ཐོབ་ཕ་རོལ་ཕྱིན༔ འབྲེལ་ཐོགས་ཐམས་ཅད་ཡང་དག་སངས་རྒྱས་ས་ལ་བཀོད༔ ལུས་མ་བཞག་པར་དག་པའི་ཞིང་དུ་གཤེགས་པའོ༔ གསང་སྔགས་དམ་ཚིག་གནད་དུ་བསྣུན་ན་དེ་ལྟར་རོ༔ ཞེས་གསུངས་པ་ལྟར་མདོ་སྔགས་ཟུང་འབྲེལ་གྱི་ལམ་ཟབ་མོ་ཉམས་སུ་ལེན་པ་ལ་འབད་པར་འཚལ་ལོ། །དམིགས་ཐུན་དྲུག་པ་འདོན་ཞིང་བློ་སྦྱང་བར་བྱའོ། །སྨྲས་པ། ཐར་པའི་ཕན་ཡོན་འདི་ལ་བསམ་ཙ་ན། །བདེ་ནས་བདེ་བར་འགྲོ་བར་མ་གཏོགས་པ། །སྡུག་བསྔལ་མིང་ཙམ་གྲགས་པར་མི་འདུག་པས། །དེའི་རྒྱུ་དམ་ཆོས་བསྒྲུབས་ན་མི་ལེགས་སམ། ༈ །སྤྱི་དོན་
གཉིས་པ་ཁྱད་པར་གྱི་སྔོན་འགྲོ་ལ་གཉིས་ལས། དང་པོ་བསྟན་པའི་འཇུག་སྒོ་སྔོན་འགྲོའི་རྩ་བ་སྐྱབས་སུ་འགྲོ་བའི་ཁྲིད་ནི། གཞུང་ལས། ཀྱེ་མ་སྐལ་ལྡན་རིགས་ཀྱི་བུ༔ ངན་སོང་འཇིགས་སྐྲག་འཁོར་བ་འདི༔ མི་རྟག་སྒྱུ་མར་མི་ཤེས་སམ༔ ཤེས་བཞིན་སངས་རྒྱས་དཔུང་དུ་ཚོགས༔ བསླུ་མེད་དཀོན་མཆོག་སྐྱབས་སུ་ཚོལ༔ ཞེས་གསུངས་པས་སྐྱབས་སུ་འགྲོ་བ་གལ་ཆེ་ཏེ། དེ་ལ་སྐྱབས་འགྲོའི་རྒྱུ་ནི། རང་གཞན་སེམས་ཅན་ཐམས་ཅད་འཁོར་བ་སྤྱི་དང་། བྱེ་བྲག་ཏུ་ངན་སོང་གསུམ་གྱི་སྡུག་བསྔལ་དང་། ཚེ་འདིར་ཡང་མི་མཐུན་པའི་ཕྱོགས་ཐམས་ཅད་ལས་སྐྱབས་སུ་འགྲོ་བའོ། །དེ་ལ་དང་པོ་སྐྱབས་སུ་འགྲོ་བའི་ཡུལ་ནི། ཕྱི་ལྟར་ན་སངས་རྒྱས་ཆོས་དང་དགེ་འདུན་གསུམ། ནང་ལྟར་ན་བླ་མ་ཡི་དམ་མཁའ་འགྲོ་གསུམ། གསང་བ་ལྟར་ན་ཆོས་སྐུ་ལོངས་སྐུ་སྤྲུལ་སྐུ་གསུམ། དོན་དམ་པ་ན་ངོ་བོ་རང་བཞིན་ཐུགས་རྗེ་གསུམ། མདོ་ལས། སངས་རྒྱས་
ཆོས་དང་དགེ་འདུན་གསུམ། །ཐར་པ་འདོད་པ་རྣམས་ཀྱི་སྐྱབས། །ཅེས་སོ། །དཀོན་མཆོག་གསུམ་མ་གཏོགས་གང་གིས་ཀྱང་སྐྱོབ་མི་ནུས་ཏེ། ཇི་སྐད་དུ་ཡང་། རང་ཡང་འཁོར་བའི་བཙོན་རར་དམ་བཅིངས་པའི། །འཇིག་རྟེན་ལྷ་ཡིས་སུ་ཞིག་སྐྱོབ་པར་ནུས། །ཅེས་དང་། མདོ་ལས། འཇིགས་པས་སྐྲག་པའི་མི་རྣམས་ནི། །ཕལ་ཆེར་རི་དང་ནགས་ཚལ་དང་། །ལྗོན་ཤིང་དག་ལ་སྐྱབས་འགྲོ་སྟེ། །སྐྱབས་དེ་གཙོ་བོ་མ་ཡིན་ནོ། །སྐྱབས་དེ་ལ་ནི་བསྟེན་པ་ནི། །འཇིགས་པ་ཀུན་ལས་ཐར་མི་འགྱུར། །གང་ཞིག་སངས་རྒྱས་ཆོས་དང་ནི། །དགེ་འདུན་དག་ལ་སྐྱབས་འགྲོ་བ། །སྡུག་བསྔལ་སྡུག་བསྔལ་ཀུན་འབྱུང་དང་། །སྡུག་བསྔལ་ཡང་དག་འགོག་པ་དང་། །བདེ་ཞིང་མྱ་ངན་འདས་བྱས་ནས། །སྡུག་བསྔལ་ཀུན་ལས་གྲོལ་བར་འགྱུར། །ཅེས་གསུངས་པ་ལྟར་རོ། །གཉིས་པ་སྐྱབས་སུ་འགྲོ་བའི་ཚུལ་ནི། བླ་མ་དཀོན་མཆོག་ལ་བློ་ལིངས་ཀྱིས་
བཀལ་ནས་རང་གིས་སྐྱབས་འགྲོ་བྱེད་པ་བཞིན། སེམས་ཅན་ཐམས་ཅད་ཀྱིས་སྐྱབས་འགྲོ་བྱེད་པར་བསམ་ལ་སྐྱབས་ཡུལ་མདུན་གྱི་ནམ་མཁའ་དམིགས་ལ། ན་མོ་བདག་གཞན་མར་གྱུར་སོགས་ནས། དྲིན་ཆེན་རྩ་བའི་བླ་མ་ལ་སྐྱབས་སུ་མཆིའོ་བར་བརྒྱ་སྟོང་གང་ནུས་དང་། ཨོཾ་ཨཱཿཧཱུྃ་ཆོས་སྐུ་ལོངས་སྐུ་སྤྲུལ་སྐུ་སོགས་དྲག་རྩལ་གཞུང་གི་སྐྱབས་འགྲོ་དང་སྦྲགས་ལ་ཕྱག་འབུམ་ཐེར་གྱི་གྲངས་བསགས་སམ། གཞུང་ལྟར་རྩེ་གཅིག་གསོལ་བ་འདེབས། ཡན་ལག་བདུན་པ་སོགས་བྱ། དེ་ལྟར་སྐྱབས་སུ་སོང་བའི་ཕན་ཡོན་ནི། མདོ་ལས། སྐྱབས་སོང་བསོད་ནམས་གཟུགས་མཆིས་ན། །སྟོང་གསུམ་འདི་ཡང་སྣོད་དུ་ཆུང་། །རྒྱ་མཚོ་ཆེན་པོ་ཆུ་ཡི་གཏེར། །ཕུལ་གྱིས་གཞལ་པར་ག་ལ་ནུས། །ཅེས་སོ། །བསླབ་བྱ་ནི། གུ་རུ་རྡོ་རྗེ་གྲོ་ལོད་ཀྱི་ཟབ་གནད་ཐེམ་ཡིག་ཤོག་དྲིལ་ལས། སྐྱབས་ཀྱི་དམ་པ་དཀོན་མཆོག་གསུམ་ལ་སྐྱབས་སུ་སོང་ནས་དམ་ཚིག་ཏུ་
བོན་དང་མུ་སྟེགས་ཕྱི་རོལ་དྲེགས་བྱེད་ལ་ཕྱག་མི་བཙལ་ཏེ་སྐྱབས་སུ་མ་བཙལ་ཞིག །དཔུང་གཉེན་གྱི་མཆོག་ཏུ་གྱུར་པ་བླ་མ་ཡི་དམ་མཁའ་འགྲོ་ཁོང་པའི་སྙིང་ལྟར་འཆང་ཞིག །བྲན་གཡོག་མཆོག་ཏུ་གྱུར་པ་ཆོས་སྐྱོང་དམ་ཅན་རྒྱ་མཚོ་རྣོ་བའི་མཚོན་དུ་འཆང་ཞིག །རྩ་བའི་དམ་ཚིག་སེམས་ཅན་ཐམས་ཅད་ལ་བྱམས་སྙིང་རྗེ་བྱང་ཆུབ་ཀྱི་སེམས་རིན་པོ་ཆེ་ཆུ་བོའི་རྒྱུན་ལྟར་སྒོམས་ཤིག །གཞི་ཡི་དམ་ཚིག་སྐྱབས་འགྲོ་དང་བཟླས་བརྗོད་ལ་བརྩོན་ཅིག །ལམ་གྱི་དམ་ཚིག་བསྐྱེད་རྫོགས་ལ་རང་དབང་ཐོབ་པར་བྱོས་ཤིག །འབྲས་བུའི་དམ་ཚིག་ལུས་མེད་པའི་ཏིང་ངེ་འཛིན་གྱི་ངང་དུ་རང་རིག་རིག་རྩལ་གྱི་སྤྲུལ་སྒྱུར་ནམ་མཁའི་ཀློང་དུ་སྒྱུར་ཅིག །ཡན་ལག་གི་དམ་ཚིག་ཏུ་སེམས་ཅན་ཐམས་ཅད་ལ་ཉེ་བར་འཚེ་བ། སྲོག་གཅོད་པ། མ་བྱིན་པ་ལེན་པ། རྫུན་སྨྲ་བ། གཞན་གྱི་རིག་མ་བརྐུ་བ། དཀོན་མཆོག་ལ་སྐུར་པ་གདབ་པ། མྱོས་པར་འགྱུར་བ།
བག་མེད་པ། ལོག་པར་ལྟ་བ་ལ་སོགས་པའི་མི་དགེ་བ་ཐམས་ཅད་སྤོངས་ཤིག །སྲུངས་ཤིག །ལེགས་པའི་ལམ་འདི་འཆང་ཞིག །ཅེས་གསུངས་པ་ལྟར་རོ།། ༈ །།གཉིས་པ་ཐེག་མཆོག་ཆོས་ཀྱི་སྙིང་པོ་བྱང་ཆུབ་མཆོག་ཏུ་སེམས་བསྐྱེད་པའི་ཁྲིད་ནི། གཞུང་ལས། རིགས་དྲུག་འཁོར་བའི་སེམས་ཅན་རྣམས༔ སངས་རྒྱས་ཐོབ་ཕྱིར་སེམས་བསྐྱེད་དོ༔ ཅེས་གསུངས་ལྟར། སེམས་བསྐྱེད་པའི་ཡུལ་ནི་འགྲོ་བ་རིགས་དྲུག་གི་སེམས་ཅན་སྤྱི་དང་། བྱེ་བྲག་ཏུ་ངན་སོང་གསུམ་གྱི་སེམས་ཅན་རྣམས། རང་གི་ཚེ་རབས་དུ་མར་ཕ་མ་བྱས་ཤིང་ཚད་མེད་པའི་དྲིན་གྱིས་བསྐྱངས་པ་རྣམས་ད་ལྟ་ལ་ལ་ནི་ངན་སོང་གསུམ་ལ་སོགས་པའི་སྡུག་བསྔལ་དངོས་ལ་སྤྱོད། ལ་ལ་ནི་སྡུག་བསྔལ་གྱི་རྒྱུ་མི་དགེ་བ་སྟོབས་པོ་ཆེ་ལ་སྤྱོད་པ་འདི་རྣམས་སྙིང་རེ་རྗེ། འདི་རྣམས་ཀྱི་སྡུག་བསྔལ་སྐྱོབ་པའི་ཕྱིར་དུ་རང་ཉིད་རྫོགས་པའི་སངས་རྒྱས་ཀྱི་གོ་འཕང་མྱུར་དུ་ཐོབ་པར་བྱ། དེའི་
ཆེད་དུ་ལམ་ཟབ་མོ་འདི་ཉམས་སུ་བླངས་ནས་སེམས་ཅན་འཁོར་བ་སྡུག་བསྔལ་གྱི་རྒྱ་མཚོ་ལས་བསྒྲལ་ནས་གཏན་བདེ་བླ་ན་མེད་པའི་བྱང་ཆུབ་ལ་བཀོད་སྙམ་པའི་སྙིང་རྗེ་དང་། རྟག་ཏུ་སྡུག་བསྔལ་གཏན་ནས་མེད་པའི་བདེ་བ་དང་ལྡན་ན་ཅི་མ་རུང་སྙམ་པའི་དགའ་བ་དང་། བདག་གཞན་ཉེ་རིང་ཐམས་ཅད་ལ་ཆགས་སྡང་དང་བྲལ་ནས་རྟོག་མེད་རང་གྲོལ་ཡེ་སངས་རྒྱས་པའི་ཆོས་སྐུ་ལ་རྟག་ཏུ་གནས་ན་ཅི་མ་རུང་སྙམ་པའི་བཏང་སྙོམས་ཆེན་པོའི་ངང་ནས་སེམས་ཅན་ཐམས་ཅད་དང་། ཁྱད་པར་ངན་འགྲོ་ལ་སྙིང་རྗེ་ཆེན་པོས་ཀུན་ནས་ཁྱབ་པའི་ངང་ནས། །ན་མོ་སྐྱབས་གནས་དཀོན་མཆོག་གསུམ་པོ་དགོངས་སུ་གསོལ༔ སོགས་ནས། ཀ་དག་ཀློང་དུ་སངས་རྒྱས་སེམས་བསྐྱེད་དོ༔ ཞེས་པའི་བར་རྒྱུད་ལ་འདྲེས་ངེས་འདོན་བསྒོམ་བྱའོ། །དེ་ལྟར་སེམས་བསྐྱེད་པའི་བསླབ་བྱ་ནི། སྨོན་པའི་བསླབ་བྱ་ཚད་མེད་པ་བཞི་ལ་བློ་སྦྱང་བ་དང་། འཇུག་
པའི་བསླབ་བྱ་ཕ་རོལ་ཕྱིན་པ་དྲུག་ལ་སློབ་པ་དང་། དཀར་པོའི་ཆོས་བཞི་སྒྲུབ་ཅིང་ནག་པོའི་ཆོས་བཞི་སྤང་བ་ལ་འབད་པར་བྱའོ། །སེམས་བསྐྱེད་པའི་ཕན་ཡོན་ནི། གསང་བ་བསམ་གྱིས་མི་ཁྱབ་པའི་མདོ་ལས། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཇི་སྙེད་པ། །དེ་ཙམ་ལས་ཀྱང་ལྷག་པར་འགྱུར། །ཅེས་དང་། བྱམས་སྨོན་ལས། །ངན་འགྲོ་ཐམས་ཅད་ལྡོག་བྱེད་ཅིང་། །མཐོ་རིས་ལམ་ནི་རབ་སྟོན་ལ། །རྒ་ཤི་མེད་པར་འདྲེན་བགྱིད་པ། །བྱང་ཆུབ་སེམས་ལ་ཕྱག་འཚལ་ལོ། །ཞེས་གསུངས་པས་མཚོན། བྱང་ཆུབ་ཀྱི་སེམས་རིན་པོ་ཆེ་ལ་བློ་སྦྱོང་ཞིང་སྤྱོད་འཇུག་ལས་གསུངས་པ་ལྟར་ཕན་ཡོན་རྣམས་ཡང་ཡང་རྗེས་སུ་དྲན་པར་བྱའོ།། ༈ །།གསུམ་པ་སྡིག་སྒྲིབ་དག་པར་བྱེད་པ་རྡོ་རྗེ་སེམས་དཔའི་བསྒོམ་བཟླས་ནི། མེ་ཏོག་བཀོད་པའི་རྒྱུད་ལས། །བླ་མ་རྡོ་རྗེ་སེམས་དཔའ་བསྒོམ། །
རང་བྱུང་ཡི་གེ་བརྒྱ་ཡི་མཐུས། །སྒྲིབ་གཉིས་བག་ཆགས་བྱང་བར་འགྱུར། །ཞེས་དང་། རང་བྱུང་ཐིག་ལེ་ཡི་གེ་བརྒྱ། །སངས་རྒྱས་ཀུན་གྱི་ས་བོན་ཏེ། །ཉམས་ཆག་ཐམས་ཅད་འཇོམས་པར་བྱེད། །ཅེས་གསུངས་པ་ལྟར་དམ་ཚིག་ཉམས་ཆག་ཉེས་ལྟུང་བྱུང་ན་དག་ཅིང་སྦྱོང་བར་བྱེད་པའི་ལྷ་ཡིན་ཏེ། རྒྱུད་ལས། འདས་པར་བྱ་བ་མ་ཡིན་ཞིང་། །འདས་ན་ཚིག་ཕྱིར་དམ་ཚིག་གོ །ཞེས་གསུངས་སོ། དེ་ལ་གདམས་པ་འདིའི་ལུགས་ཀྱི་བསྲུང་བྱ་འདི་རྣམས་ཡིན་ཏེ། ཇི་སྐད་དུ་ཡང་། ཕྱིའི་དམ་ཚིག་འགྲོ་ལ་ཉེར་འཚེའི་བསམ་སྦྱོར་སྤངས་ཏེ་གཞན་ཕན་བྱང་ཆུབ་སྒྲུབ༔ ནང་གི་དམ་ཚིག་ལྷ་སྔགས་ཏིང་འཛིན་བརྩོན་འགྲུས་ལྕག་གིས་འབེབས༔ གསང་བའི་དམ་ཚིག་ཞེ་འདོད་འཛིན་པ་ཡལ་བར་དོར་ཞིང་ཟབ་མོའི་ཆོས་ལ་འབུངས༔ ཕྱི་ལྟར་རིགས་དྲུག་སེམས་ཅན་སངས་རྒྱས་ཐོབ་ཕྱིར་སྨོན་ལམ་སེམས་བསྐྱེད་བརྩོན༔ ནང་ལྟར་འབྲེལ་ཐོག་སེམས་ཅན་
སངས་རྒྱས་ཐོབ་ཕྱིར་ལྷ་སྔགས་ཏིང་འཛིན་བརྟེན༔ གསང་ལྟར་རང་རིག་ཡེ་ཤེས་བརྙེས་ཏེ་བཅུ་དྲུག་བླ་མའི་ས་ཐོབ་ཤོག༔ ཅེས་ཡན་ལག་བདུན་པ་སྦྱར། མ་སྦྱར་ཀྱང་ཆད་པའི་སྐྱོན་མེད། མོས་གུས་གདུང་བས་གསོལ་དགོས་པའི་རྒྱུ་མཚན་ནི། མཚོ་སྐྱེས་མ་ཧཱ་གུ་རུའི་ཞལ་ནས། གང་ཞིག་ལས་ཅན་སྐྱེས་བུ་དད་པ་ཅན། །བདག་ལ་གདུང་བའི་སེམས་ཀྱིས་གསོལ་བ་འདེབས། །རྒྱུ་འབྲས་རྟེན་འབྲེལ་སྨོན་ལམ་ཁྱད་པར་གྱིས། །སངས་རྒྱས་གཞན་ལས་བདག་ཉིད་ཐུགས་རྗེ་མྱུར། །ཅེས་དང་། མ་འོངས་པདྨའི་རྗེས་འཇུག་གདུལ་བྱ་རྣམས། །སློབ་དཔོན་དྲན་ཅིང་གསོལ་བཏབ་བར་ཆད་སེལ། །བསྟན་པ་འཇིག་པའི་དམག་གི་ཚོགས་ལྡང་ཡང་། །གསོལ་བ་ཕུར་ཚུགས་བཏབ་པས་ངེས་པར་བཟློག །གཞན་ཡང་རྐྱེན་ངན་ཆེ་ཆུང་གང་བྱུང་ཡང་། །པདྨ་ང་ལ་གསོལ་བཏབ་ངེས་པར་སེལ། །འཇིགས་བརྒྱད་ཞི་དང་འབྱོར་དྲུག་ལེགས་ཚོགས་རྒྱས། །དབང་སྡུད་
ཚང་དབང་འདོད་ཀྱང་ང་དྲན་འགྲུབ། འཆི་ཁའི་མཚམས་སྦྱོར་དུས་ཆེན་ལ་བབ་ཚེ། །ཁོ་བོའི་མཚན་ནི་ལན་གསུམ་བཀླག་པས་ན། །བར་དོ་སྐད་ཅིག་དེ་ལ་གྲོལ་བར་འགྱུར། །ཅེས་སོགས་གསུངས་པ་ལྟར་ཚེ་གཅིག་ལ་སངས་རྒྱས་པར་བྱེད་པ་ལ་གསང་སྔགས་གསར་རྙིང་ཐམས་ཅད་ནས། བླ་མ་ལ་གསོལ་བ་གདབ་པ་གཙོ་ཆེ་བར་བཤད་པས། དཔེར་ན་ཡིད་བཞིན་ནོར་བུ་ལ་གསོལ་བ་བཏབ་ན་དགོས་འདོད་ཐམས་ཅད་འབྱུང་ཞིང་། མ་བཏབ་ན་མི་འབྱུང་བ་དང་མཚུངས་པས། བླ་མ་ལ་གསོལ་བ་མ་བཏབ་ན་བྱིན་རླབས་མི་འཇུག་ཅིང་རང་རྒྱུད་ལ་ཡོན་ཏན་གང་ཡང་མི་སྐྱེ་བས། དེས་ན་རྣམ་གྲོལ་གཏན་བདེ་བསྒྲུབ་ཕྱིར་རང་སེམས་དཔང་དུ་བཙུག །ཕྱི་ཡི་དམ་ཚིག་རྒྱལ་བའི་བཀའ་ཉན་རང་སེམས་དཔང་དུ་བཙུགས༔ ནང་གི་དམ་ཚིག་རིགས་དྲུག་སྡུག་བསྔལ་རང་ཞལ་བལྟ་ཞིང་སྡིག་སྤང་དགེ་བ་སྒྲུབ༔ གསང་བའི་དམ་ཚིག་དཀོན་མཆོག་
གསུམ་ལ་སྐྱབས་སུ་འགྲོ་ཞིང་ཕྱི་རོལ་ལྷ་རྣམས་དོར༔ ཕྱི་ལྟར་དམ་ཚིག་ཁྲུས་དང་གཙང་སྦྲ་དཀྱིལ་འཁོར་མཆོད་གཏོར་ལྷག་བསམ་ལས་ལ་འབུངས༔ ནང་ལྟར་དམ་ཚིག་བསྐྱེད་རྫོགས་ཟབ་མོའི་དོན་ལ་ནན་ཏན་བསྐྱེད༔ གསང་ལྟར་དམ་ཚིག་ལྷ་དང་བླ་མ་དབྱེར་མེད་སྒྲུབ༔ ཕྱི་ཡི་དམ་ཚིག་ཁ་ན་མ་ཐོའི་ངག་འཁྱལ་སྐུར་འདེབས་སྤངས༔ ནང་གི་དམ་ཚིག་རྩ་རླུང་ཐིག་གསུམ་དབྱེར་མེད་བསྲེ་བ་གནད༔ གསང་བའི་དམ་ཚིག་ང་བདག་འཛིན་པ་དབྱིངས་སུ་གཏོར་བར་བྱ༔ ཕྱི་ཡི་དམ་ཚིག་རྒྱལ་བ་རབ་འབྱམས་སྐྱབས་སུ་བཙལ་ཞིང་དཔང་དུ་བཙུགས༔ ནང་ལྟར་དམ་ཚིག་རྒྱལ་བ་རབ་འབྱམས་ལུས་ལྟར་བསྒོམ་ཞིང་བླང་དོར་བྲལ༔ གསང་ལྟར་དམ་ཚིག་རྒྱལ་བ་རབ་འབྱམས་དངོས་འབྱོར་ཡིད་སྤྲུལ་མཆོད་སྤྲིན་རྒྱ་མཚོས་མཆོད༔ ཕྱི་ཡི་དམ་ཚིག་རྒྱལ་བ་རབ་འབྱམས་སྣང་སྲིད་འཁོར་འདས་གང་བར་བསྐྱེད༔ ནང་གི་དམ་ཚིག་རིགས་དྲུག་འཁོར་བའི་འགྲོ་
ཀུན་རྒྱལ་བ་རབ་འབྱམས་སྐུ་རུ་བསྐྱེད༔ གསང་བའི་དམ་ཚིག་ཡེ་སྦྱོར་ཡེ་སྒྲོལ་ཡེ་སྟོང་ཡེ་གནས་ཡེ་ཤེས་ལྔ་ཡི་ཀློང་དུ་བཞག༔ ཡང་གསང་དམ་ཚིག་རྩ་བའི་བླ་མ་སངས་རྒྱས་ཀུན་འདུས་འགྱུར་མེད་རྡོ་རྗེའི་སྐུ་རུ་བསྒོམ༔ ཡེ་གསང་དམ་ཚིག་མཆེད་དང་ལྕམ་དྲལ་ཡི་དམ་ལྷ་རུ་བསྒོམ༔ ཐུགས་གསང་དམ་ཚིག་དུག་ལྔ་དུག་གསུམ་རང་ཞལ་བལྟ་ཞིང་སྐུ་ལྔ་སྐུ་གསུམ་ངོ་བོར་སྦྱོང་༔ སྦས་གསང་དམ་ཚིག་རང་ཉིད་ལྷར་བསྐྱེད་ལས་ཀྱི་ཌཱ་ཀི་མཁའ་འགྲོ་བསྒོམ༔ དེ་ལའང་ཚིག་རྩུབ་ངག་འཁྱལ་སྤངས་ཏེ་ལྷ་རུ་ཤེས་པར་བྱ༔ ཞེས་གསུངས་པ་རྣམས་མ་ཉམས་པ་བསྲུངས་ན་ཚེ་གཅིག་ལ་སངས་རྒྱས་འགྲུབ་པར་འགྱུར་གྱི། གལ་ཏེ་ཉམས་ཆགས་དང་ལྟུང་བ་བྱུང་ན་བསྒོམ་བཟླས་འདིས་སོར་ཆུད་པར་འགྱུར་བ་ཡིན་པས། བརྩོན་པ་གལ་ཆེ་བ་ནི། ཨོཾ་ཨཱཿཧཱུྃ། རང་ཉིད་ཐ་མལ་གནས་པའི་སྤྱི་གཙུག་ཏུ། སོགས་ནས། སྡིག་སྒྲིབ་དག་པའི་རྟགས་མ་བྱུང་གི་
བར་འབད་པ་ནི་གནད་དམ་པའོ། །ཞེས་པའི་བར་སྔོན་འགྲོ་གཞུང་ལྟར་ཉམས་སུ་བླང་ངོ་། །སྡིག་སྒྲིབ་དག་པའི་རྟགས་སུ། ལུས་བདེ་བ། སྙིང་དགའ་བ། ཁམས་དྭངས། ཉམས་སྣང་སྣ་ཚོགས་འཆར། རྨི་ལམ་དུ་ཁྲུས་བྱས་པ། ལུས་ལ་རྣག་ཁྲག་འབུ་སྲིན་ཐོན་པ། ལུས་ཤེལ་ལྟར་དག་པ། འོད་འབར་བ། ཉི་ཟླ་ཤར་བ། བདུད་རྩི་འཐུང་བ། གོས་དཀར་པོ་གྱོན་པ། དར་དཀར་པོ་ཕྱར་བ། དུང་འབུད་པ། གྱེན་ལ་འགྲོ་བ། མེ་ཏོག་གི་ཚལ་དུ་ཕྱིན་པ། སྐུ་གསུང་ཐུགས་རྟེན་རྙེད་པ་སོགས་འབྱུང་ངོ་། ༈ །བཞི་པ་ཚོགས་གཉིས་རྫོགས་པ་མཎྜལ་གྱི་ཁྲིད་ལ། གསང་འདུས་རྩ་རྒྱུད་ལས། ཞིང་འདིར་རིན་ཆེན་སྣ་བདུན་གྱིས། །མཁས་པ་དག་གིས་ཡོངས་བཀང་སྟེ། །དངོས་གྲུབ་འདོད་པ་སྦྱིན་པའི་ཕྱིར། །ཤེས་རབ་ཅན་གྱིས་ཉིན་བཞིན་འབུལ། །ཞེས་གསུངས་པ་ལྟར། གནས་ལུགས་ཟབ་མོ་སྟོང་པ་ཉིད་ཀྱི་དོན་རྟོགས་པར་བྱེད་པ་ལ་སྔོན་དུ་མཆོད་པ་འབུལ་
བ་སོགས། བསོད་ནམས་ཀྱི་ཚོགས་རྒྱ་ཆེན་པོ་རྫོགས་དགོས་པར་གསུངས་ཏེ། མདོ་ལས། ཇི་སྲིད་དགེ་བའི་རྩ་བ་ཡོངས་སུ་མ་རྫོགས་བར། །དེ་སྲིད་སྟོང་ཉིད་དམ་པ་དེ་ནི་ཐོབ་མི་སྲིད། །ཅེས་གསུངས་པས་མཎྜལ་འབུལ་བ་གལ་ཆེ་བ་སྟེ། བཀོད་པ་ཆེན་པོ་ལས། རྣམ་དག་སེམས་ལྡན་མཎྜལ་ནི། །ཕུལ་བའི་བསོད་ནམས་གཞལ་དུ་མེད། །ཅེས་གསུངས་པ་ལྟར་རོ། །དེ་ཡང་ཕྱིའི་མཎྜལ་རྒྱ་མཚོ་རི་རབ་ཉི་ཟླ་ལྷ་མིའི་དཔལ་འབྱོར་ལོངས་སྤྱོད་ཐམས་ཅད་བློས་བླངས་ཏེ་འབུལ་བ་དང་། ནང་གི་མཎྜལ་རང་གི་ལུས་ལོངས་སྤྱོད་དངོས་སུ་འབྱོར་རམ་ཡིད་ཀྱིས་སྤྲུལ་ནས་ཅི་ནུས་སུ་འབུལ་བ་དང་། གསང་བའི་མཎྜལ་རང་རིག་རང་གསལ་ཆོས་དབྱིངས་སེམས་ཉིད་ཀྱི་ནོར་བུ་དགོས་འདོད་ཀུན་འབྱུང་དུ་འབུལ་བ་སྟེ། གྲོ་ལོད་གཞུང་ལས། སྲིད་གསུམ་གནས་ཡུལ་མཎྜལ་ལ༔ རིགས་དྲུག་འཁོར་བའི་འཁོར་ལོས་བརྒྱན༔ སྙིང་རྗེ་ཆེན་པོས་བརྩེར་དགོངས་
ལ༔ ཡེ་སྟོང་ངང་དུ་བཞེས་སུ་གསོལ༔ ཞེས་གསུངས་པས་མཚོན། ཕྱི་ནང་གསང་བའི་མཎྜལ་ཐམས་ཅད་གཅིག་ཏུ་བསྡུས་ནས་བླ་མ་སྐུ་གསུམ་གྱི་ཞིང་ཁམས་འབུལ་སྙམ་པས། ཨོཾ་ཨཱཿཧཱུྃ༔ རིན་ཆེན་ལས་གྲུབ་རི་རབ་ལྷུན་པོ་དང་༔ སོགས་ནས། བླ་མེད་རྫོགས་པའི་སངས་རྒྱས་ཐོབ་པར་ཤོག༔ བར་གཞུང་ལྟར་ཉམས་སུ་ལེན་ནོ། །ཕན་ཡོན་ནི། མཎྜལ་ཕུལ་བས་ཚོགས་གཉིས་རྫོགས། །མཎྜལ་ཕུལ་བས་སྡིག་སྒྲིབ་བྱང་། །མཎྜལ་ཕུལ་བས་ཕྱིན་དྲུག་རྫོགས། །མཎྜལ་ཕུལ་བས་སྐུ་གཉིས་ཐོབ། །ཅེས་གསུངས་པ་ལྟར་རོ།། ༈ །།ལྔ་པ་རྒྱུད་ལ་བྱིན་རླབས་འཇུག་པར་བྱེད་པ་བླ་མའི་རྣལ་འབྱོར་གྱི་ཁྲིད་ལ། དགོངས་འདུས་ལས། བསྐལ་བ་འབུམ་གྱི་སངས་རྒྱས་རྣམས། །བླ་མ་མཉེས་པར་བྱེད་ལས་ཤིས། །ཅི་ཕྱིར་བསྐལ་པའི་སངས་རྒྱས་རྣམས། །བླ་མ་དག་ལ་བསྟེན་ནས་འབྱུང་། །ཞེས་གསུངས་པ་ལྟར་གསང་སྔགས་ལམ་གྱི་རྩ་བ་བླ་མ་རྡོ་རྗེ་སློབ་དཔོན་
ཚུལ་བཞིན་བསྟེན་པ་དང་། བླ་མའི་རྣལ་འབྱོར་བསྒོམ་པ་ནི་ཤིན་ཏུ་གལ་ཆེ་བ་སྟེ། ཇི་སྐད་དུ་ཡང་། ལྷ་སྐུ་འབུམ་ཕྲག་བསྒོམ་པ་ལས། །བླ་མའི་རྣལ་འབྱོར་བསྒོམ་པ་ཟབ། །ཅེས་གསུངས་པ་ལྟར་རོ། །དེ་ཡང་བླ་མ་དཀོན་མཆོག་ཀུན་འདུས་ཡིན་ཏེ། གསང་འདུས་ལས། །བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མ་དཔལ་ལྡན་ཧེ་རུ་ཀཿ ཀུན་བྱེད་རྒྱལ་པོ་བླ་མ་ཡིན། །ཅེས་སོ། །མདོ་རྒྱུད་མན་ངག་ཐམས་ཅད་ནས་བླ་མ་ཁོ་ན་བསྒོམ་པ་གཙོ་ཆེ་བར་གསུངས་ཤིང་། བླ་མ་མ་བསྟེན་པར་འཁོར་བའི་རྒྱ་མཚོ་ལས་བསྒྲལ་མི་ནུས་ཏེ། སྐྱ་བ་འཛིན་པ་མེད་པ་ཡི། །གྲུ་ཡིས་ཕ་རོལ་སྒྲོལ་མི་ནུས། །ཡོན་ཏན་ཐམས་ཅད་རབ་ལྡན་ཀྱང་། །བླ་མ་མེད་ན་སྲིད་མཐའ་ཡིན། །ཅེས་དང་། མཚན་དང་དཔེ་བྱད་ལྡན་པའི་སྐུ། །བསྐལ་པ་སྟོང་དུ་བསྒོམ་པ་བས། །བླ་མ་དྲན་པ་བསོད་ནམས་ཆེ། །ཞེས་གསུངས་པ་ལྟར། བླ་མ་ཡང་
རང་གི་རྩ་བའི་བླ་མ་སངས་རྒྱས་ཀུན་འདུས་ཀྱི་ངོ་བོ་པདྨ་འབྱུང་གནས་དང་དབྱེར་མེད་དུ་བསྒོམ་དགོས་ཏེ། གུ་རུ་ཉིད་ཀྱི་ཞལ་ནས༔ ཁྱད་པར་བྱིན་རླབས་དངོས་གྲུབ་མྱུར་འདོད་ན༔ པདྨ་ང་བསྒོམ་མཆོད་དང་སུས་སྒྲུབ་པ༔ ཇི་ལྟར་ཡིད་བཞིན་ནོར་བུ་རིན་ཆེན་ལས༔ དགོས་འདོད་ཐམས་ཅད་ངང་གིས་འབྱུང་བ་བཞིན༔ རྒྱལ་བ་རྒྱ་མཚོས་བྱིན་རླབས་བུ་བཞིན་སྐྱོང་༔ དམ་ཅན་མཁའ་འགྲོས་དངོས་གྲུབ་ཆར་བཞིན་འབེབས༔ སྣང་སྲིད་ལྷ་འདྲེས་ཅི་བསྒོའི་ལས་རྣམས་སྒྲུབ༔ ཕྲིན་ལས་ལྷུན་གྲུབ་མཐའ་ཡས་སེམས་ཅན་སྒྲོལ༔ དེ་དག་ཐམས་ཅད་བདག་ཉིད་བསྟེན་ལས་འབྱུང་༔ ཞེས་ཞལ་གྱིས་བཞེས་པ་ལྟར་ཡིན་པས། དེའི་དོན་ཡང་། དུས་གསུམ་རྒྱལ་བའི་དཀྱིལ་འཁོར་རབ་འབྱམས་རྣམས༔ སོ་སོར་མ་ཡིན་པད་འབྱུང་སྐུ་ལ་རྫོགས༔ བརྡ་དོན་རྟགས་ཀྱི་སྐུ་མདོག་ཕྱག་མཚན་ཡང་༔ གང་ལ་གང་འདུལ་དེ་ལ་དེ་སྟོན་པ༔ ཅེས་གསུངས་པ་ལྟར་ཡིན་
ནོ། །ཇི་ལྟར་བསྒོམ་པའི་ཚུལ་ནི། ཕྱི་ལྟར་ཁྲོམ་ཚོགས་སུ་བསྒོམ་པ། ནང་ལྟར་ཐོ་བརྩེགས་སུ་བསྒོམ་པ། གསང་བ་ལྟར་ཀུན་འདུས་ནོར་བུའི་ལུགས་སུ་བསྒོམ་པ་གསུམ་ལས་འདིར་ཕྱི་མ་ཀུན་འདུས་ནོར་བུ་ལུགས་སུ་བསྒོམ་པ་སྟེ། ཨ་ཏི་བཀོད་པའི་རྒྱུད་ལས། །དྲིན་དང་ལྡན་པའི་བླ་མ་དེ། །སྙིང་གི་དཀྱིལ་ལམ་སྤྱི་བོའི་གཙུག །ཡན་ལག་མཐིལ་དུ་གང་བསྒོམ་པ། །སངས་རྒྱས་སྟོང་གི་ཡོན་ཏན་ཡང་། །གང་ཟག་དེ་ཡིས་འཛིན་པར་འགྱུར། །ཅེས་སོ། །གསོལ་འདེབས་བསྒོམ་ཚུལ་ནི། མདུན་གྱི་ནམ་མཁར་པདྨ་ཉི་མ་ཟླ་བའི་གདན་གྱི་སྟེང་དུ་སོགས་ནས། བསྟོད་པར་འོས་པའི་ཚོགས་ལ་ཕྱག་འཚལ་བསྟོད། །ཅེས་པའི་མཐར། རྒྱས་པར་སྤྲོ་ན་མཆོད་པ་འབུལ་བ་ནི། སྲིད་གསུམ་ལྷ་མིའི་དཔལ་འབྱོར་བཀོད་པའི་ཚོགས། །བདག་པོས་བཟུང་དང་མ་བཟུང་ཡོ་བྱད་དང་། །དངོས་འབྱོར་ཡིད་སྤྲུལ་མཆོད་སྤྲིན་མཐའ་ཀླས་པ། །ལུས་དང་ལོངས་
སྤྱོད་བཅས་ཏེ་མཆོད་པ་འབུལ། །སྡིག་པ་བཤགས་པ་ནི། མ་རིག་འཁྲུལ་པའི་དབང་གིས་ཐོག་མེད་ནས། །བསགས་པའི་དུག་གསུམ་དམ་ཚིག་སྡོམ་འགལ་སོགས། །སྡིག་སྒྲིབ་ཉེས་ལྟུང་མ་ལུས་མཐོལ་ཞིང་བཤགས། །ཐམས་ཅད་བྱང་ཞིང་དག་པར་བྱིན་གྱིས་རློབས། །རྗེས་སུ་ཡི་རང་བསྒོམ་པ་ནི། དུས་གསུམ་རྒྱལ་བ་རྒྱལ་སྲས་མཛད་པ་དང་། །ཁྱད་པར་བླ་མའི་རྣམ་ཐར་མཛད་ཕྲིན་སོགས། །སྲིད་ཞིའི་ཚོགས་གཉིས་དགེ་ཚོགས་ཐམས་ཅད་ལ། །རབ་ཏུ་དགའ་བས་རྗེས་སུ་ཡི་རང་ངོ་། །ཆོས་འཁོར་བསྐོར་བར་བསྐུལ་བ་ནི། བདག་སོགས་འགྲོ་ལ་ཟབ་ཆོས་བདུད་རྩིའི་ཆར། །རྒྱུན་མི་ཆད་པས་སྐལ་ལྡན་སྨིན་པ་དང་། །ཆོས་མིན་ཆག་ཆོས་མཐའ་དམག་དུས་འཁྲུག་སོགས། །ཞི་མཛད་ཆོས་ཀྱི་འཁོར་ལོ་བསྐོར་དུ་གསོལ། །མྱ་ངན་ལ་མི་འདའ་བར་བཞུགས་སུ་གསོལ་བ་ནི། གདུལ་བྱར་གྱུར་པའི་སྙིགས་དུས་འགྲོ་བ་དང་། །སྲིད་པའི་མུན་པར་
འཁྱམས་པའི་སེམས་ཅན་རྣམས། །མ་ལུས་ཡང་དག་ལམ་ལ་བཀོད་པའི་ཕྱིར། །སྤྲུལ་པའི་ཉི་མ་ནུབ་མེད་རྟག་འཆར་གསོལ། །བསྔོ་བ་སྨོན་ལམ་ནི། བདག་སོགས་ཚེ་འདིའི་སྣང་བ་ནུབ་མ་ཐག །རང་སྣང་འོད་གསལ་ཟངས་མདོག་དཔལ་རི་དེར། །གུ་རུའི་ཐུགས་རྗེའི་ལྕགས་ཀྱུས་མྱུར་བཟུང་ནས། །ངན་འགྲོའི་འཇིགས་བྲལ་རིག་འཛིན་སར་འགོད་ཤོག །གསོལ་བ་འདེབས་པ་གནད་ཆེ་བར་གསུངས་པས། ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱིས་མགྲིན་གཅིག་ཏུ་གསོལ་བ་འདེབས་པར་བསམས་ལ་གདུང་ཤུགས་དྲག་པོས། རྗེ་དུས་གསུམ་སངས་རྒྱས་ཀུན་གྱི་ངོ་བོ་སོགས་གཞུང་ལྟར་གསོལ་འདེབས། བསྙེན་པ་གང་འགྲུབ་དང་། བླ་མ་ཀུན་འདུས་ཀྱི་ངོ་བོ་སོགས། སངས་རྒྱས་མྱུར་དུ་ཐོབ་པར་བྱིན་གྱིས་རློབས་ཤིག །ཅེས་ཐུགས་རྒྱུད་བསྐུལ་ཞིང་། དབང་བཞི་ལེན་པ་བསྡུ་ན་ཚིག་བདུན་གསོལ་འདེབས་ལྟར་
དང་། རྒྱས་ན་བླ་མའི་ལས་བྱང་ལེ་བརྒྱད་ལས་བྱུང་བ་འདི་ཡང་ཐུན་སྐབས་གང་འོས་སུ་བྱ་བ་ནི། ཧཱུྃ། བདེ་མཆོག་བདེ་སྤྱོད་ནམ་མཁའི་དཀྱིལ་ཡངས་ནི༔ རྒྱལ་བའི་དཀྱིལ་འཁོར་སྲས་བཅས་ཐུགས་དམ་ཅན༔ མ་ཧཱ་གུ་རུ་པདྨ་ཐོད་ཕྲེང་གི༔ སྐུ་གསུང་ཐུགས་དང་མཉམ་སྦྱོར་དངོས་གྲུབ་མཆོག༔ ཕྲིན་ལས་རྣམ་བཞི་ལྷུན་གྱིས་གྲུབ་པའི་དབང་༔ བུམ་པ་བཟང་པོ་དཔག་བསམ་ནོར་བུའི་ཚུལ༔ ད་ལྟ་ཉིད་དུ་བདག་ལ་སྩལ་དུ་གསོལ༔ འགྱུར་མེད་སྐུ་ཡི་དངོས་གྲུབ་སྩལ་དུ་གསོལ༔ འགགས་མེད་གསུང་གི་དངོས་གྲུབ་སྩལ་དུ་གསོལ༔ འཁྲུལ་མེད་ཐུགས་ཀྱི་དངོས༴ ཡོན་ཏན་རེ་སྐོང་དངོས༴ ཕྲིན་ལས་འགྲོ་འདུལ་དངོས༴ འཆི་མེད་ཚེ་ཡི་དངོས༴ འཛད་མེད་ལོངས་སྤྱོད་དངོས༴ ཐུན་མོང་ཡིད་བཞིན་དངོས་གྲུབ༴ བླ་མེད་མཆོག་གི་དངོས་གྲུབ་སྩལ་དུ་གསོལ༔ བདག་གིས་སྒོ་གསུམ་བརྩོན་འགྲུས་ཆེར་བསྐྱེད་ཀྱང་༔ ངོ་བོ་ཀ་དག་རང་ཞལ་མ་མཐོང་བས༔ མ་ཧཱ་
གུ་རུའི་ཐུགས་རྗེའི་བྱིན་རླབས་ཀྱིས༔ རང་རིག་སྐྱེ་མེད་འོད་གསལ་ཆོས་ཀྱི་སྐུ༔ ད་ལྟ་ཉིད་དུ་མཐོང་བར་བྱིན་གྱིས་རློབས༔ ད་ལྟ་ཉིད་དུ་རྟོགས་པར་བྱིན་གྱིས་རློབས༔ སྤྲོ་ན་བྱའོ། །གསོལ་འདེབས་དབང་ལེན་གནད་ཤིན་ཏུ་ཆེ་བ་སྟེ། །གུ་རུའི་གསུང་ལས། དད་འདུན་མོས་གུས་མ་ཞན་གསོལ་བ་ཐོབ༔ མ་དག་སྣང་བ་དོར་ལ་གསོལ་བ་ཐོབ༔ ཅེས་གསུངས་པས་མཚོན། དད་འདུན་མོས་གུས་རྒྱུད་ལ་སྐྱེ་བའི་ངང་ནས་གསོལ་བ་བཏབ་ན། སངས་རྒྱས་གཞན་ལས་ཐུགས་རྗེ་བྱིན་རླབས་ནུས་རྩལ་ལྷག་པར་ཆེ་བ་ཉིད། མཆོག་གསུམ་ཞི་ཁྲོ་རབ་འབྱམས་ཀྱི་ལྷ་ཚོགས་ཐམས་ཅད་དང་རྗེ་འབངས་ཉེར་ལྔ་ལ་སོགས་པ་འདི་དག་ཐམས་ཅད་ཀྱང་གུ་རུ་རིན་པོ་ཆེ་ཉིད་ཀྱི་རྣམ་རོལ་ཡིན་པར་གསུངས་ཏེ། བདེ་གཞུང་ལས། བདེ་བ་ཅན་དུ་ཚེ་དཔག་མེད༔ པོ་ཏ་ལ་རུ་སྤྱན་རས་གཟིགས༔ རྡོ་རྗེ་གདན་དུ་བསྟན་པའི་གཙོ༔ དྷ་ན་ཀོ་ཥར་པདྨ་འབྱུང་༔
འཆི་མེད་རྡོ་རྗེ་དྲག་པོ་རྩལ༔ མ་རུངས་ཚར་གཅོད་རྟ་མཆོག་དཔལ༔ དྲེགས་པ་འཇོམས་མཛད་མེ་ཕྲེང་ཅན༔ སྐུ་ལྔ་མཚན་བརྒྱད་རིགས་དྲུག་དང་༔ རྗེ་འབངས་སྤྲུལ་དང་ཡང་སྤྲུལ་རྣམས༔ གང་ལ་གང་འདུལ་སྐུར་བསྟན་ཅིང་༔ རིགས་དྲུག་འཁོར་བ་དོང་ནས་སྤྲུག༔ ཅེས་གསུངས་པ་ལྟར་རོ། །དབང་དང་དངོས་གྲུབ་ལེན་པ་རྒྱས་བསྡུས་གང་རུང་གི་མཐར། མཆོག་གཏེར་ཆོས་སྤྱོད་ལམ་རིམ་ལས། སྤྱི་བོའི་བླ་མའི་སྤྱི་མགྲིན་སྙིང་ལྟེ་ནས༔ ཨོཾ་ཨཱཿཧཱུྃ་ཧྲཱིཿལས་ནི་ཡེ་ཤེས་ཀྱི༔ འོད་ཟེར་དཀར་དམར་མཐིང་སེར་འཕྲོས་པ་ཡིས༔ བདག་གི་གནས་བཞིར་ཐིམ་པས་སྒྲིབ་བཞི་དག༔ བུམ་གསང་ཤེས་རབ་བཞི་པའི་དབང་རྣམས་ཐོབ༔ བླ་མ་འོད་ཞུ་རང་ལ་གཉིས་མེད་བསྟིམ༔ བདག་དང་བླ་མའི་ཐུགས་གཉིས་དབྱེར་མེད་བསྲེ༔ མ་བཅོས་ཀ་དག་ངང་ལ་མཉམ་པར་བཞག༔ ཅེས་མ་བཅོས་ཀ་དག་གདོད་མའི་གནས་ལུགས་ཀུན་བཟང་པདྨ་འབྱུང་གནས་ཀྱི་རང་
ཞལ་བལྟའོ། །མཐར། དེང་ནས་བཟུང་སྟེ་ཚེ་རབས་ཐམས་ཅད་དུ༔ སོགས་ཀྱི་སྨོན་ལམ་གདབ་པར་བྱའོ། །སྔོན་འགྲོ་བསགས་སྐབས་དམིགས་ཐུན་སྔ་མ་རྣམས་ཤར་བསྒོམ་བྱ་ཞིང་། དེ་གང་ལ་བབ་པ་ནན་ཏན་གྱིས་བསྒོམ་ཞིང་གྲངས་བཟུང་། ཕྱི་མ་རྣམས་ཁྱུག་ཙམ་རེ་ཐུན་རྗེས་མར་གཏོང་བ་སོགས་སྤྱི་དང་འདྲའོ། །དེ་ལྟར་ཐུན་མོང་མ་ཡིན་པའི་སྔོན་འགྲོ་ལེགས་པར་གྲུབ་ནས། དངོས་གཞི་ལ་བསྐྱེད་རྫོགས་རིམ་པ་གཉིས་ལས། ཆོས་སྐུའི་བསྐྱེད་རིམ་ཀུན་བཟང་ལས་བྱང་བསྒོམ་པ། ལོངས་སྐུའི་བསྐྱེད་རིམ་རིགས་ལྔ་ལས་བྱང་ལྟར་དང་། སྤྲུལ་སྐུའི་བསྐྱེད་རིམ་ཡེ་ཤེས་གསང་བ་དྲག་རྩལ་ཡབ་བཀའ། དྲག་སྒྲུབ་རྩ་བའི་ལས་བྱང་ཡུམ་བཀའ་གསང་སྒྲུབ་མནྡཱ་ར་བ། དྲག་སྒྲུབ་སེང་གདོང་དྲག་མོ་ཐོག་འབེབས་མ་བཅས་དང་། སྙན་བརྒྱུད་ལུས་དཀྱིལ་ཀུན་དྲིལ་ཟངས་སྦུབ་མ་རྣམས་ཀྱི་བསྐྱེད་རིམ་ལ་བརྟེན་ནས་བརྟན་པ་ཐོབ་པར་
བྱའོ། །དེ་རྣམས་ཀྱི་ལྷ་ཁྲིད་རྣམ་བཤད་སོ་སོར་བྲིས་ཡོད་པ་ལྟར་ཉམས་སུ་ལེན་པར་ཞུ། དེ་ཡང་རྟེན་བསྐྱེད་རིམ་མེད་ན། བརྟེན་པ་རྫོགས་རིམ་མེད། ཁྲིད་རྒྱུན་ལྟ་བུའི་ཚེ་བསྐྱེད་རིམ་ལྷ་ཁྲིད་ལ་ཏིང་འཛིན་རྣམ་གསུམ་ནས་བཟུང་། བདག་བསྐྱེད་རྫོགས་པར་གསལ་འདེབས་ཤིང་། རས་བྲིས་སོགས་ཡོད་ན་མི་ཤེས་པར་བསྟེན་ཏེ་བསླབ། དེ་ལྟ་བུ་མ་གྲུབ་ཚེ། འོ་ཁྱེད་རྣམས་ཐ་མལ་གྱི་སྒྱུ་ལུས་གདོས་བཅས་ཀྱི་ཤ་ཁྲག །བདག་འཛིན་གྱི་ཕུང་པོ། མི་གཙང་བའི་སྙིགས་མ། མ་དག་པའི་སྣང་སེམས་དོར་ལ། ལྷ་སྐུ་སྣང་ལ་རང་བཞིན་མེད་པ། སྣང་བཞིན་དུ་སྟོང་། སྟོང་བཞིན་དུ་གསལ་བ། སྣང་སྟོང་དབྱེར་མེད་མེ་ལོང་གི་གཟུགས་བརྙན་ལྟར་བཀྲ་བ། །ཆུ་ནང་གི་ཟླ་བ་ལྟར་གསལ་བ། ནམ་མཁའི་འཇའ་ཚོན་ལྟར་སྣང་ལ་མ་གྲུབ་པ། རྒྱ་མཚོ་ལྟར་ཟབ་པ། ཟླ་བ་ལྟར་གསལ་བ། ཉི་མ་ལྟར་འཚེར་བ། ཟབ་གསལ་དབྱེར་མེད་འཇའ་ལུས་སྣང་སྟོང་ཆོས་ཀྱི་སྐུར་
སྒོམས་ཤིག །དེ་ལྟར་བསྒོམས་པའི་ཕན་ཡོན་ནི། གཞུང་ལས། བསྐྱེད་རིམ་བསྒོམས་པའི་ཕན་ཡོན་ནི༔ རབ་ནི་རང་རིག་ལྷ་རུ་འགྱུར༔ འབྲིང་ནི་འཁོར་ལོས་བསྒྱུར་རྒྱལ་ཐོབ༔ ཐ་མས་བར་དོར་གྲོལ་བ་ཐོབ༔ ཡི་དམ་དེ་ཡི་འཁོར་དུ་སྐྱེ༔ བསྐྱེད་རྫོགས་ཟུང་འཇུག་བསྒོམ་པར་བྱ༔ ཅེས་སོགས་གསུངས་པ་ལྟར་ཡིན་ནོ། །ཡེ་གསང་ཐུགས་གཏེར་གྲོ་ལོད་ཀྱི་སྔོན་འགྲོའི་ཁྲིད་རིམ་དང་པོ་འདི་ནི། གངས་རིའི་ཕྲེང་བས་བསྐོར་བའི་ལྗོངས་འདིར་མངོན་པར་མཐོ་ཞིང་ཡོངས་སུ་གྲགས་པའི་གནས་སྤྱི་འབྱམས་ཉི་ཟླ་ཕུག་རང་བྱུང་གི་གཞལ་མེད་ཁང་དུ་གཏེར་སློབ་མཁན་པོ་ཀརྨ་རཏྣས་ནམ་སྙིང་ཚེ་སྒྲུབ་ཀྱི་ཐུན་བར་དུ་བྲིས་ཤིང་། ལུས་པ་རོ་སྙོམས་སྡོམ་བུར་རྒྱུ་སྐབས་ཅུང་ཟད་རེ་བྲིས་ཤིང་། ཡོངས་སུ་རྫོགས་པ་རབ་ཚེས་མེ་སྤྲེལ་གྲོ་ཞུན་ཟླ་བའི་དཀར་ཕྱོགས་ཀྱི་རྒྱལ་བ་དང་པོར་ཆུ་དམར་རྦ་རློང་འཁྲུགས་པའི་ཕུའི་སྒར་ཆུང་དུ་གྲུབ་པ་དགེ་ལེགས་
འཕེལ། ཤྲཱིཿཤྲཱིཿཤྲཱིཿ སརྦ་མངྒ་ལཾ། དགེའོ། །བྷ་ཝནྟུ། དགེའོ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།