དཔལ་ལྡན་ཀརྨ་པའི་གདན་ས་བདེ་མཆོག་ཐུགས་ཀྱི་འཁོར་ལོ་མཚུར་མདོ་བོ་ལུང་གི་ཕྱག་རྒྱུན་ལས་འབྱུང་བའི་མགྲོན་ཐབས་ཀྱི་སྲུང་མ་གདན་ས་གོང་འོག་གཙོ་བོར་གྱུར་པའི་ཡུལ་གཞིའི་བདག་པོ་རྣམས་ཀྱི་བསང་མཆོད་ཕྱོགས་གཅིག་ཏུ་བཀོད་པ་བསམ་འཕེལ་ནོར་བུའི་ཕྲེང་བ།
དཔལ་ལྡན་ཀརྨ་པའི་གདན་ས་བདེ་མཆོག་ཐུགས་ཀྱི་འཁོར་ལོ་མཚུར་མདོ་བོ་ལུང་གི་ཕྱག་རྒྱུན་ལས་འབྱུང་བའི་མགྲོན་ཐབས་ཀྱི་སྲུང་མ་གདན་ས་གོང་འོག་གཙོ་བོར་གྱུར་པའི་ཡུལ་གཞིའི་བདག་པོ་རྣམས་ཀྱི་བསང་མཆོད་ཕྱོགས་གཅིག་ཏུ་བཀོད་པ་བསམ་འཕེལ་ནོར་བུའི་ཕྲེང་བ་ཞེས་བྱ་བ་བཞུགས་སོ། །
གུ་རུ་ཀརྨ་ཀ་བཛྲ་སཏྭ་ཡེ། སྒྲུབ་བརྒྱུད་མཚན་སྙན་དགའ་ཚལ་ལྗོན་ཕྲེང་གི །གཙོ་བོར་མངོན་འཕགས་དཔག་བསམ་དབང་པོ་ནི། ཀརྨའི་བཀའ་རྒྱུད་བསྟན་པའི་གཉེར་འཛིན་པའི། མགྲོན་རིགས་རྣམས་ཀྱི་བསང་མཆོད་འདི་ན་སྤེལ། དེ་ལ་ཐོག་མར་གདན་ས་གོང་འོག་བར་གསུམ་དཔལ་སྤུངས་སོགས་ཆོས་འཁོར་སྒྲུབ་གནས་རྣམས་ཀྱི་སྲུང་མ་གཞི་བདག་གི་བསང་མཆོད་དགོས་འདོད་རེ་སྐོང་རྗེ་བཅུ་བཞི་པས་བསྩལ་བ་ལ་ཅུང་ཟད་ཁ་བསྐང་བ་ནི། ན་མོ་པདྨ་སམྦྷ་ཝ་ཀརྨ་ཀ་ན་མོ། གང་ཞིག་གང་གི་ཕུན་ཚོགས་དྲན་ཙམ་གྱིས། སྐད་ཅིག་སྲིད་པའི་གདུང་བ་མཐར་བྱེད་པ། སྐྱབས་གྱུར་རིན་ཆེན་གསུམ་གྱི་ཞབས་པད་མོར། །རྣམ་ཀུན་དད་དང་སྤྲོ་བས་ལན་བརྒྱར་འདུད། འདིར་སྒྲུབ་པ་
མཆོག་གི་བསྟི་གནས་རྡོ་རྗེ་གདན་མཆོག་གཉིས་པ་འོག་མིན་མཚུར་ཕུ་དང་། ཀརྨ་ཀཾ་པོ་སོགས་སྒྲུབ་གནས་ཆེན་པོ་རྣམས་སྲུང་ཞིང་སྐྱོངས་བའི་དཀར་པོའི་ཕྱོགས་ཀྱི་གཞི་བདག་མཐུ་ཆེན་ལ་བསང་མཆོད་བརྔན་གྱི་མཆོད་སྤྲིན་སྤྲོ་བར་འདོད་པ་དག་གིས། གཙང་མའི་གནས་སུ་གཏོར་མཆོད་གཙང་ཞིང་རྒྱ་ཆེ་བ། འབྲུ་སྨན། དར་ཟབ། ཕྱེ་མར། སྐྱེམས་ཕུད། བཟང་ཤིང་སྣ་ཚོགས་ཀྱི་བསང་དུ་སྡོགས་ཅི་འབྱོར་པའི་མཆོད་རྫས་འདུ་བགྱིས་ལ། དེ་དག་བྱིན་གྱིས་བརླབས་པ་ནི། ཨོཾ་ཨཱཿཧཱུྃ་ཧྲཱིཿ གདོད་ནས་དག་པ་སྤྲོས་བྲལ་ཆོས་དབྱིངས་དང་། །རང་རིག་རང་བྱུང་པདྨ་ཧེ་རུ་ཀར། །གསལ་བའི་ཐུགས་ལས་འོད་འཕྲོས་རྫས་ལ་
ཕོག །མ་དག་དྲི་སྦྱངས་དག་པ་ཡེ་ཤེས་ཀྱི། །བདུད་རྩིའི་རང་བཞིན་དཔེ་མེད་བརྗོད་བྲལ་གྱུར། ཨོཾ་ཨ་ཀཱ་རོ་སོགས་ལན་གསུམ་བརྗོད། དེ་ནས་རོལ་མོ་སྣ་ཚོགས་ལྡིར་ཞིང་སྙན་པའི་དབྱངས་ཀྱིས་འདི་སྐད་དོ།། ཀྱཻ། ཛམ་གླིང་བྱང་ཕྱོགས་བསིལ་ལྡན་རྡུལ་དཀར་གྱིས། །ཕྲེང་བས་ཡོངས་བསྐོར་བྷོ་ཊའི་ལྗོངས་ཀྱི་དབུས། །སྟོད་ལུང་མཚུར་ཕུ་ཞེས་གྲགས་འོག་མིན་ཞིང་། །ཡ་མཚན་ས་འདིར་མངོན་སུམ་འཕོས་པ་བཞིན། །འཇིག་རྟེན་སྒྲོན་མེ་དམ་པ་མཆོག་རྣམས་ཀྱི། །མཆོག་དངོས་གྲུབ་པའི་བསྟི་གནས་བླ་ན་མེད། །མ་སླད་སྣང་ངོར་རྒྱལ་བ་རྒྱ་མཚོའི་ཚོགས། །དཔའ་བོ་ཌཱ་ཀི་རྟག་འདུ་དགྱེས་རོལ་ཞིང་། །ཡིད་ཅན་ཀུན་གྱི་མིག་དབང་སྤྱོད་ཡུལ་དུ། །འཇིག་རྟེན་ལ་གྲགས་ས་ཡི་དཔྱད་ཀུན་ལྡན། །སྲ་མཛེས་བྲག་དང་གཡའ་སྤང་ལྷུན་ཆགས་པའི། །ས་འཛིན་རབ་མཐོར་ནགས་ཚལ་མེ་ཏོག་ཕྲེང་། །དབྱར་སྐྱེས་གཞོན་ནུས་ཁེབས་པའི་ནེའུ་སིང་ངོས། །འདུ་བ་རྣམ་བཞིའི་བྲོ་ནད་གདུང་སེལ་
ཞིང་། །བདེ་སྟེར་སྨན་མཆོག་མ་ཚང་མེད་པ་བཞིན། །རབ་གྲགས་ཤུག་དང་སྒྲར་བཅས་གྱ་གྱུར་དུ། །འབབས་པའི་སྐལ་ལྡན་ཤིང་རྟའི་བགྲོད་པ་རྣམས། །ལེ་ལོའི་གཉིད་ལས་སློང་བའི་ཆོས་ཀྱི་སྒྲ། །སྒྲུབ་པོར་ཆེད་དུ་འབོད་བཞིན་ལྷུང་ལྷུང་སྒྲོགས། །སྣ་ཚོགས་རི་དྭགས་བག་ཕེབས་བདེར་གནས་ཤིང་། །སྤུ་སྡུག་མཛེས་པའི་བྱ་རྣམས་སྙན་པར་སྒྲོགས། །ཆོས་བཞིན་སྤྱོད་པའི་མཐུན་རྐྱེན་ཕུན་ཚོགས་ཞིང་། །ངོ་མཚར་སྒྲུབ་གནས་ཡོངས་ཀྱི་མཆོག་གྱུར་དེར། །རྟག་ཏུ་འདུ་ཞིང་དགྱེས་རོལ་བླ་མ་དང་། །ཡི་དམ་དཔའ་བོ་ཌཱ་ཀི་ཆོས་སྐྱོང་ཚོགས། །བླ་མེད་མཆོད་སྤྲིན་རྒྱ་མཚོས་མཉེས་གྱུར་ཅིག །ཁྱད་པར་གསུང་གི་དབང་ཕྱུག་སྙིང་རྗེའི་ལྷ། །རྒྱལ་བ་རྒྱ་མཚོའི་ཡེ་ཤེས་འདུས་པའི་སྐུ། །འཕགས་མཆོག་སྤྱན་རས་གཟིགས་ཀྱི་དཀྱིལ་འཁོར་པ། །ཞི་དང་ཁྲོ་གར་སྣ་ཚོགས་ནོར་བུ་བཞིན། །གདུལ་བྱའི་དོན་དུ་རོལ་པར་ཤར་བ་ནི། །འགྲོ་རྣམས་གཏན་
གྱི་དབུལ་བ་སེལ་བའི་ཕྱིར། །ཕྱི་ལྟར་སྙིང་རྗེའི་མཛོད་འཛིན་ཛམ་ལྷ་དཀར། །ནང་ལྟར་ཁམས་གསུམ་འགུགས་བྱེད་མདུང་དམར་ཅན། །གསང་བ་ཧེ་རུ་ཀ་དཔལ་རྟ་མཆོག་རྒྱལ། །ཡང་གསང་ཐུགས་རྗེ་གསང་བའི་མཎྜལ། །མཆོག་གསང་དྲྭ་བ་སྡོམ་པའི་དཀྱིལ་འཁོར་པ། །སངས་རྒྱས་བྱང་སེམས་དཔའ་བོ་ཧེ་རུ་ཀ །རིག་འཛིན་མཁའ་འགྲོ་དམ་ཅན་འདུས་པ་ཡི། །འཁོར་ལོ་ཆེན་པོར་རོལ་པའི་ལྷ་ཚོགས་རྣམས། །བླ་མེད་ཀུན་བཟང་མཆོད་སྤྲིན་རྒྱ་མཚོས་མཆོད། །དབུས་རི་བྱམས་པ་ཆེན་པོའི་ལྟེ་བ་ལ། །མ་ཕམ་རྒྱལ་བ་བྱང་སེམས་ཉན་ཐོས་འཁོར། །ཐེག་ཆེན་ཆོས་ཀྱི་འཁོར་ལོའི་གནྡྷོ་དང་། །གསང་བ་ཡེ་ཤེས་ཌཱ་ཀིའི་དཀྱིལ་འཁོར་སོགས། །རབ་འབྱམས་རྒྱལ་བའི་ཚོམ་བུ་མཐའ་ཡས་རྣམས། །དག་མཉམ་ཡང་པ་ཆེན་པོའི་མཆོད་པ་བཞེས། །ཁྱད་པར་མ་རུངས་ལོག་འདྲེན་འཛོམས་པའི་གཉེན། །མ་ཧཱ་ཀཱ་ལ་རྡོ་རྗེ་བེར་ནག་ཅན། །འདོད་ཁམས་དབང་
ཕྱུག་ལྷ་མོ་རེ་མ་ཏི། །དགྲ་ལྷ་ཆེན་པོ་རྡོ་རྗེ་ལེགས་པ་སོགས། །ཆོས་སྐྱོང་རྒྱ་མཚོའི་ཚོགས་རྣམས་ཐམས་ཅད་བསང་། །ཀླུ་རྒྱལ་ཆེན་པོ་ཐོད་དཀར་ཟླ་བའི་སྲས། །རྡོ་རྗེ་རྒྱལ་ཞེས་མཚན་དུ་རབ་གྲགས་པ། །སྐུ་མདོག་མིག་སྨན་ཉིད་དང་འགྲན་བཟོད་ཅིང་། །ཞི་འཛུམ་ཐལ་སྦྱར་ཚུལ་གྱིས་ནོར་བུ་འཛིན། །སྣ་ཚོགས་རཏྣའི་རྒྱན་དང་ལྷབ་ལྷུབ་གོས། །དུ་མས་རབ་བརྒྱན་སྐུ་སྨད་ལྟོ་འགྲོ་ཡི། །གཟུགས་སུ་བྱས་ནས་གཉིས་འཐུང་དཀར་པོའི་སྟེང་། །རབ་ཏུ་བརྗིད་ཅིང་འགྱིང་བག་ལྡན་པར་གནས། །དྲག་པོར་ཁྲོས་པ་ནག་པོ་དུག་གི་གདོང་། །རབ་ཏུ་དམར་བའི་སྡང་མིག་ཆེར་བགྲད་ཅིང་། །ནག་པོ་བརྩེགས་པའི་ཁ་རླངས་སྟོང་གསུམ་ཁྱབ། །རྡོ་རྗེ་འབར་བ་ལྟོ་འགྲོའི་ཞགས་པ་དང་། །ནད་རྐྱལ་གཡས་གཡོན་ཕྱག་གིས་རབ་འཛིན་ཅིང་། །ཉམས་པའི་ཚོགས་རྣམས་མིང་ཙམ་མེད་པར་བྱེད། །སྟོབས་ལྡན་དེ་སྲས་བཙུན་མོ་བློན་འབངས་བྲན། །ཀུན་ཀྱང་དཔག་
མེད་མཁའ་མཉམ་མཆོད་པས་མཆོད། །མ་རུངས་འཇོམས་མཛོད་དྲག་རྩལ་ཤུག་ལྡན་པ། །གྱང་ལྷ་བཙན་པོ་མདོག་དམར་ཁྲོས་པའི་ཞལ། །ཁྲབ་རྨོག་དར་མདུང་ཕུབ་དང་རལ་གྲི་སོགས། །དཔའ་བའི་ཆོས་ལྡན་མྱུར་མགྱོགས་ཅང་ཤེས་ལ། །རཏྣའི་སྒ་སྲབ་རྒྱན་གྱིས་མཛེས་པའི་སྟེང་། །གཏུམ་རྔམས་དྲག་རྩལ་ལྡན་པར་འགྱིང་བཞིན་གནས། །སྤྲུལ་དང་ཡང་སྤྲུལ་འཁོར་ཚོགས་བྱེ་བ་བརྒྱར། །འདོད་ཡོན་མཁོ་རྒུའི་ཚོགས་ཀྱིས་མཉེས་མཆོད་འབུལ། །ཁྱད་པར་གཉན་ཆེན་རྒྱ་ལྷ་གང་བ་བཟང་། །རབ་དཀར་ཀཻ་ལ་ཤ་ཡི་ལྷུན་པོ་ལ། །ཉི་འོད་འབུམ་གྱིས་འཁྱུད་ལྟར་གཟི་འབར་ཞིང་། །ཞི་མ་ཁྲོ་འཛུམ་སྒེག་ཅིང་དཔའ་བའི་ཉམས། །གནག་སྣུམ་དབུ་སྐྲ་ལྕང་ལོས་མཛེས་པའི་སྟེང་། །ཞྭ་དཀར་འཕྲུ་ལྡན་ནོར་བུའི་ཏོག་གིས་སྤྲས། །སྐུ་ལ་དར་ལྗང་ན་བཟའ་གསོལ་བའི་སྟེང་། །དར་དཀར་བེར་ཆེན་ལྷབ་ལྷུབ་ཚུལ་གྱིས་མཛེས། །གཡས་གཡོན་ཕྱག་ན་དར་མདུང་དཀར་
པོ་དང་། །དགོས་འདོད་རིན་ཆེན་གཏེར་གྱི་བུམ་པ་འཛིན། །ཅང་ཤེས་ངང་པ་གསེར་གཡུ་ནོར་བུའི་རིགས། །དུ་མའི་རྒྱན་དང་སྒ་སྲབ་གྱིས་མཛེས་སྟེང་། །དཔའ་བརྗིད་རྔམས་པའི་ཚུལ་གྱིས་འགྱིང་བཞིན་གནས། །བཙུན་མོ་སྲས་དང་ཕྱི་ནང་བློན་པོའི་ཚོགས། །ཉམས་འགྱུར་དཔག་མེད་སྒྱུ་མ་སྨིག་སྒྱུ་བཞིན། །གཉན་ཆེན་དྲག་པོར་ཁྲོས་པའི་སྐུར་བཞེངས་ཚེ། །སྐུ་མདོག་པདྨ་རཱ་ག་ལྟར་སྨུག་ཅིང་། །ཁྲོ་གཉེར་སྡང་མིག་རབ་བགྲད་ཁྲོས་པའི་ཞལ། །མཐིང་ནག་བེར་གསོལ་ཕྱག་གཡས་རལ་གྲི་དང་། །གཡོན་པས་བདུད་ཞགས་འཛིན་ཅིང་འཁོར་གསུམ་བསྐོར། །རྟ་ནག་ཤུགས་ལྡན་རླུང་གཤོག་ལྡན་ལ་ཆིབས། །མཐུ་ལྡན་གཉན་ཆེན་འཁོར་དང་བཅས་རྣམས་ལ། །དངོས་འབྱོར་ཡིད་སྤྲུལ་དཔག་མེད་མཆོད་པའི་སྤྲིན། །རིན་ཆེན་འབྲུ་སྨན་དར་ཟབ་གོ་མཚོན་དང་། །ཕྱེ་མར་སྐྱེམས་ཕུད་བཟང་ཤིང་སྣ་ཚོགས་པའི། །དྲི་ཞིམ་བདུག་སྤོས་སྤྱན་
གཟིགས་དཀོར་ཆས་སོགས། །དཔག་མེད་བློས་བླངས་ནམ་མཁའ་མཉམ་པས་མཆོད། །གཞན་ཡང་འོག་མིན་ཀརྨའི་གནྡྷོ་ལའི། །ཆོས་འཁོར་སྐྱོང་ཞིང་སྲུང་བའི་གཞི་བདག་གཙོ། །དཔལ་ལྡན་ཤེས་རབ་འཁོར་དང་བཅས་རྣམས་དང་། །ཀཾ་པོ་གནས་ནང་ཡུལ་སྐྱོང་དགེ་བསྙེན་ཆེ། །རྡོ་རྗེ་དཔལ་བརྩེགས་སྤྲུལ་འཁོར་བཅས་པ་སོགས། །སྒྲུབ་གནས་ཆེ་རྣམས་སྲུང་ཞིང་སྐྱོང་མཛད་པའི། །གཞི་བདག་ཚོགས་རྣམས་མཆོད་སྤྲིན་རྒྱ་མཚོས་མཆོད། །ཡོན་ཏན་འཁོར་ལོ་དེ་ཝི་ཀོ་ཊ་ཆེར། །དགྱེས་རྒུར་རོལ་པའི་རྩ་གསུམ་རྒྱ་མཚོ་དང་། །ཡུལ་སྐྱོང་ལྷ་གཉན་དབུ་ཆེ་བྲག་དཀར་དང་། །ཟོ་དོར་རྩེ་རྒྱལ་ཞེ་ད་ལ་སོགས་པའི། །ཐུབ་བསྟན་ཆོས་འཁོར་གླིང་སྐྱོང་གཙོར་གྱུར་པའི། །དུས་གསུམ་ཀུན་མཁྱེན་ཡབ་སྲས་བརྒྱུད་བཅས་པའི། །གདན་ས་དབུས་གཙང་མདོ་ཁམས་རྒྱ་འཇང་སོགས། །སྤུ་ཀཱོ་རྨ་ཡི་ཡུལ་དང་རྒྱལ་མོ་རོང་། །མོན་འབྲུག་འབྲས་ལྗོངས་མངའ་རིས་བྱང་
ཁམས་ཡུལ། །གང་དུ་ཆགས་པའི་ཡུལ་གཞི་གནས་ཀྱི་བདག །སྡེ་རིས་དཔུང་དང་གཉེན་སྡེ་བཅས་པ་རྣམས། །འབོད་པའི་གནས་འདིར་བྱོན་ལ་དགྱེས་པར་བཞུགས། །བསང་ངོ་གསོལ་ལོ་མཆོད་དོ་མངའ་གསོལ་ལོ། །མཆོད་ཡུལ་ཚོགས་རྣམས་རབ་ཏུ་མཉེས་གྱུར་ནས། །རྒྱལ་བསྟན་རིན་ཆེན་ཕྱོགས་བརྒྱར་འཕེལ་བ་དང་། །ཁྱད་པར་བསྟན་པའི་སྙིང་པོ་སྒྲུབ་བརྒྱུད་ཀྱི། །རིང་ལུགས་དྲི་མེད་ས་ཆེན་ཡོངས་ཁྱབ་ཅིང་། །བསྟན་པ་འཛིན་པའི་སྐྱེས་བུ་མཆོག་རྣམས་ཀྱི། །སྐུ་ཚེ་འཆི་མེད་རྡོ་རྗེ་ལྟར་བརྟན་ཅིང་། །འཇིག་རྟེན་ཀུན་ཏུ་བདེ་ལེགས་ཕུན་ཚོགས་མཛོད། །ཁྱད་པར་འོག་མིན་ས་ལ་སྤྱོད་པའི་ཞིང་། །དཔལ་གྱི་སྟོད་ལུང་མཚུར་ཕུའི་ཆོས་གྲ་ཡིས། །གཙོར་བྱས་གདན་ས་ཆོས་འཁོར་སྒྲུབ་པའི་སྡེ། །ས་སྟེང་ལྷ་མིའི་མཆོད་སྡོང་ཆེ་རྣམས་ཀྱི། །ཆོས་སྲིད་མངའ་ཐང་དགུང་དུ་རེགས་པ་དང་། །དགེ་འདུན་སྡེ་རྒྱས་ཐོས་བསམ་སྒོམ་སྒྲུབ་འཕེལ། །
བསྟན་ལ་རི་མོར་བགྱི་བའི་ལྷག་བསམ་བློ། །རྣམ་པར་དཀར་བའི་ལས་འཛིན་ཡོན་བདག་སོགས། །ཀུན་ཀྱང་ཚེ་བསོད་དཔལ་འབྱོར་རྒྱས་པ་དང་། །ཅི་བསམ་དོན་ཆེན་བདེ་བླག་ཉིད་འགྲུབ་མཛོད། །བསྟན་དང་བསྟན་འཛིན་བརྒྱུད་པར་བཅས་རྣམས་ལ། །བསམ་ངན་སྦྱོར་རྩུབ་མུན་ལྟར་གནག་པའི་བློས། །སྔ་དགྲ་ལག་བསྔར་ཕྱི་དགྲ་ཡིད་ལ་སེམས། །ད་དགྲ་ཐད་དུ་བཙུག་པའི་དགྲ་བོ་རྣམས། །སྐད་ཅིག་ཡུད་ཙམ་ཉིད་ལ་སྲོག་རྩ་ཆོད། །མིང་གི་ལྷག་མའི་ཆ་ཙམ་མེད་པར་མཛོད། །འཇིག་རྟེན་སྤྱི་དང་ཁྱད་པར་ཡུལ་ཕྱོགས་འདིར། །ནད་མཚོན་མུ་གེའི་སྒྲ་ཙམ་མི་གྲགས་ཅིང་། །བདེ་སྐྱིད་སྐབས་གསུམ་གནས་ལ་ཅོར་འདྲི་བའི། །ཕུན་ཚོགས་ཡར་ཟླའི་ཆ་ཤས་རབ་གང་ནས། །བཀྲ་ཤིས་སྣང་བ་དཀར་པོས་ཁྱབ་གྱུར་ཅིག །གསོལ་ལོ། མཆོད་དོ། བསང་ངོ་། བརྔན་ནོ། ཀྱཻ། །བསླུ་བ་མེད་པའི་སྐྱབས་གནས་རིན་པོ་ཆེ་རྣམ་པ་གསུམ། ཡི་དམ་རྒྱུད་སྡེ་
བཞིའི་ལྷ་ཚོགས། དཔལ་མ་ཧཱ་ཀཱ་ལ་རྡོ་རྗེ་བེར་ནག་ཅན་སོགས་བསྟན་སྲུང་རྒྱ་མཚོའི་ཚོགས་དང་། ཡུལ་སྐྱོང་གཉན་ཆེན་རྒྱ་ལྷ་གང་བ་བཟང་པོ། དགེ་བསྙེན་དཔལ་ལྡན་ཤེས་རབ། ཀཾ་པོ་རྡོ་རྗེ་དཔལ་བརྩེགས། དབུ་ཆེན་རྡོ་རྗེ་བྲག་དཀར་སོགས། འཁོར་ལོ་གསུམ་གྱི་དཀྱིལ་འཁོར་ཆེན་པོ་གདན་ས་གོང་འོག་བར་གསུམ་དང་། ཡོན་ཏན་འཁོར་ལོ་དེ་ཝཱི་ཀོ་ཊ་དཔལ་ཀུན་སྤུངས་པའི་ཆོས་གྲ་གཙོར་གྱུར་པའི་དཔལ་ལྡན་དུས་གསུམ་མཁྱེན་པའི་རྒྱུད་འཛིན་གྱི། ཆོས་འཁོར་རི་ཁྲོད་རྣམས་དང་། ལྷག་པར་འོག་མིན་སྐུ་གསུང་ཐུགས་ཡོན་ཏན་ཕྲིན་ལས་ཀྱིས་བྱིན་གྱི་བརླབས་པའི་གནས་མཆོག་འབྲས་འབྲུག་བལ་ཡུལ་བཅས་ཀྱིས་གདན་ས་གོང་འོག་བར་གསུམ་གྱི་བསྲུང་མཐུ་བོ་ཆེ་རྣམས་དང་གཞི་བདག་ས་བདག་རྣམས་གསོལ་ལོ་མཆོད་དོ། །གཞན་ཡང་སྒྲུབ་གནས་བྱིན་རླབས་ཅན་རྣམས་བསྲུང་ཞིང་སྐྱོང་བར་བྱེད་པའི་གཞི་བདག་མཐུ་བོ་ཆེ་རྣམས་
གསོལ་ལོ། །མཆོད་དོ། གསོལ་ཞིང་མཆོད་པ་ལ་བརྟེན་ནས། སངས་རྒྱས་ཀྱི་བསྟན་པ་སྲུངས། དཔལ་ལྡན་བླ་མའི་སྐུ་ཚེ་བསྲིང་། དགེ་འདུན་གྱི་སྡེ་སྐྱོངས། བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ཐམས་ཅད་གཞི་བྱེས་ལམ་གསུམ་གར་འགྲོ་གར་སྡོད་ཀྱང་ལེགས་དང་སྤྲོད། ཉེས་དང་བསྣོལ། བསམ་དོན་ཐམས་ཅད་ཡིད་བཞིན་དུ་འབད་མེད་ཉིད་དུ་འགྲུབ་པའི་ཕྲིན་ལས་དང་། སྟོངས་གྲོགས་རྒྱ་ཆེན་པོ་མཛོད་ཅིག །ཅེས་བརྗོད་ལ་གཏོར་མ་གསེར་སྐྱེམས་ནམ་མཁར་མཆོད་དོ། །ཅེས་པ་འདིའང་ལྕམ་སྲིང་ཆོས་མཛད་མ་དྷརྨ་ཏཱ་རས་བསྐུལ་བའི་ངོར། ཀརྨ་པ་བཅུ་བཞི་པས་སྨིན་ཟླའི་ཡར་ཚེས་བདུན་ཟླ་བ་གྲོ་བཞིན་འགྲུབ་སྦྱོར་དང་ལྡན་པའི་སྔ་དྲོའི་ཆར་བྲིས་པ་སརྦ་མངྒ་ལཾ། །བྱང་ཆུབ་སེམས་དཔའ་ཉི་མའི་སྙིང་པོ་ཉིད་འགྲོ་བ་སྤྱི་དང་། ཁྱད་པར་རྔོག་ཆགས་རྣམས་ཀྱི་དཔལ་མགོན་དུ་བཞེངས་ཤིང་། རྒྱལ་བའི་བསྟན་པ་བསྲུང་བའི་ཕྲིན་ལས་ཀྱི་གཉེར་ཁ་འཛིན་པ་འཕགས་པ་རེ་མནྟའི་བསང་མཆོད་ནི། ཀྱཻ། སྙིང་པོ་བྱང་ཆུབ་ཤིང་དྲུང་ན། །བཅོམ་ལྡན་ཤཱཀྱ་ཐུབ་པ་ལ། །ཅང་ཤེས་ཉི་མའི་
སྙིང་པོ་དང་། །བྱང་ཆུབ་སེམས་དཔའ་བརྒྱད་ཀྱིས་བསྐོར། །མཆོད་དོ་རྟ་ལྷའི་རྒྱལ་པོ་མཆོད། །བསང་ངོ་རྟ་ལྷའི་རྒྱལ་པོ་བསང་། །མེ་དཔུང་འབར་བའི་གཞལ་ཡས་ན། །རྟ་མགྲིན་པདྨ་ཧེ་རུ་ཀ །སྐུ་མདོག་དམར་ལ་མེ་འོད་འཕྲོ། །ཞལ་གཅིག་ཕྱག་གཉིས་ཞབས་གཉིས་བགྲད། །རྡོ་རྗེ་དབྱུག་ཐོ་ལྕག་སྒྲོག་བསྣམས། །ཞལ་གདངས་ལྗགས་འདྲིལ་མཆེ་བ་གཙིགས། །ཁྲོ་གཉེར་སྤྱན་གསུམ་འཕྲོ་ཞིང་གཟིགས། །སྤྱི་གཙུག་རྟ་ཞལ་རྟ་སྐད་འཚེར། །མཆོད་དོ་རྟ་ལྷའི་རྒྱལ་པོ་མཆོད། །བསང་ངོ་རྟ་ལྷའི་རྒྱལ་པོ་བསང་། །རྟ་ལྷའི་རྒྱལ་པོ་རེ་མཱནྟ། །ཆིབས་སུ་སྔོན་པོ་ཉྭ་ནག་ཆིབས། །སྐུ་ལ་གསེར་ཁྲབ་སེར་པོ་གསོལ། །ལྕག་ཁྲ་ཟུང་རེ་ཕྲག་ལ་ལྡིང་། །སྟག་གཉིས་སྔོན་འཕྱོ་སེང་གཉིས་རྒྱབ། །སྤྱི་གཙུག་ཁྱུང་ཆེན་ཟུང་རེ་ལྡིང་། །མདའ་གཞུ་མདུང་དང་རལ་གྲི་དང་། །བ་དན་རྡོ་རྗེ་རྩེ་ལྔ་དང་། །སྣ་ཚོགས་མཚོན་བསྣམས་འཁོར་ལྔ་བརྒྱ། །མཆོད་དོ་རྟ་ལྷའི་
རྒྱལ་པོ་མཆོད། །བསང་ངོ་རྟ་ལྷའི་རྒྱལ་པོ་བསང་། །དཔལ་ལྡན་མགོན་པོ་ནག་པོ་ནི། །ཆིབས་སུ་བྲ་ནག་རྟིང་དཀར་ཆིབས། །རྟ་དང་མི་ཡི་སྐར་ངན་སེལ། །མཆོད་དོ་རྟ་ལྷའི་རྒྱལ་པོ་མཆོད། །བསང་ངོ་རྟ་ལྷའི་རྒྱལ་པོ་བསང་། །རྟ་ནད་དྲག་པོ་འདུལ་མཛད་པ། །བྱང་སེམས་གང་བ་བཟང་པོ་ལ། །མཆོད་དོ་རྟ་ལྷའི་རྒྱལ་པོ་མཆོད། །བསང་ངོ་རྟ་ལྷའི་རྒྱལ་པོ་བསང་། །རྒྱལ་ཆེན་མགོན་པོ་རྣམ་ཐོས་སྲས། །བྱང་ཆུབ་གསེར་འདྲ་སེངྒེ་ཞོན། །མི་འཇིགས་སྐྱོབ་ཕྱིར་ནེའུ་ལེ་འཛིན། །རྟ་ནོར་འཕེལ་མཛད་གནོད་སྦྱིན་འཁོར། །མཆོད་དོ་རྟ་ལྷའི་རྒྱལ་པོ་མཆོད། །བསང་ངོ་རྟ་ལྷའི་རྒྱལ་པོ་བསང་། །མགོན་པོ་མི་དཀར་རྟ་དམར་ཆིབས། །དར་དཀར་གོས་གསོལ་ཅོད་པན་དམར། །མཆོད་དོ་རྟ་ལྷའི་རྒྱལ་པོ་མཆོད། །བསང་ངོ་རྟ་ལྷའི་རྒྱལ་པོ་བསང་། །ནོར་ལྷ་རྟ་བདག་ཀུ་བེ་ར། །བསྭེ་ཡི་གོ་གསོལ་རྟ་སྔོན་ཆིབས། །ཕྱག་ན་རལ་གྲི་བ་དན་བསྣམས། །འཁོར་དུ་ལྷ་ཆེན་བརྒྱད་
ཀྱིས་བསྐོར། །མཆོད་དོ་རྟ་ལྷའི་རྒྱལ་པོ་མཆོད། །བསང་ངོ་རྟ་ལྷའི་རྒྱལ་པོ་བསང་། །ལྷ་སྲུང་གཉན་པོ་ཁྱེད་རྣམས་ཀྱིས། །རྔོ་དང་འབྲས་དང་མཚེར་ལངས་དང་། །གློ་དང་ལྷེད་དང་འཐིང་གྲུམ་སོགས། །རྟ་ནད་ཐམས་ཅད་ཞི་བར་མཛོད། །དགྲ་ཇག་གཅན་གཟན་གནོད་པ་ཟློག །གདོན་བགེགས་སྲི་ལ་མ་སྐུར་ཅིག །རྟ་ཕོ་བཟང་པོ་རྩལ་བསྐྱེད་ལ། །ཡོ་མ་རྣམས་ཀྱི་ཁྱུ་སྤེལ་ཅིག །རྟེའུའི་རྫི་བོ་ཁྱོད་ཀྱིས་མཛོད། །རྟ་ཡི་ཚེ་སྲོག་བརྟན་པར་མཛོད། །ཨོཾ་ཀུ་བེ་ར་ཡ་སྭཱ་ཧཱ། ཞེས་རྟ་གཟུངས་སྡེ་ལྔ་ནས་བཏུས་ཏེ་ཀརྨ་ཨ་ར་གས་སྤེལ་བའོ། དྲང་སྲོང་གཟའི་བསང་མཆོད་ནི། རཾ་ཡཾ་ཁཾ་གིས་བསང་། སྭ་བྷཱ་ཝས་སྦྱང་། ཨོཾ་ཨཱཿཧཱུྃ་ཧ་ཧོཿཧྲཱིཿས་བྱིན་གྱིས་བརླབས་ཤིང་སྤེལ་ལ། ཀྱཻ། ཞི་དབྱིངས་བདེ་བ་ཆེན་པོ་ལས། །རང་བྱུང་ལྷུན་གྲུབ་རིག་པར་བཞེངས། །གཞན་སྣང་ཡེ་ཤེས་ལས་འཇིག་རྟེན། །རྣམ་འགྱུར་སྣ་ཚོགས་ཆུ་ཟླའི་གར། །སྲིད་ཞི་ཡོངས་ལ་དབང་བསྒྱུར་ཞིང་། །ལེགས་ཉེས་སྟངས་འཛིན་མཐུ་རྩལ་ཅན། །
དྲག་པོ་འཁོར་བཅས་འདིར་གཤེགས་ཤིག །བཤམས་པའི་གདན་ལ་ཞུགས་ནས་ཀྱང་། །དམ་ཚིག་གཉན་པོ་རྗེས་དགོངས་ལ། །ཐུགས་དམ་བསྐང་བའི་མཆོད་སྤྲིན་བཞེས། །ལས་བཞི་རོལ་པའི་ཉེར་སྤྱོད་བདུན། །རོལ་མོའི་སྒྲ་དང་མཐུན་རྫས་ཚོགས། །སྤྱན་གཟིགས་དཀོར་ནོར་ལོངས་སྤྱོད་རྒྱན། །གསེར་སྐྱེམས་ཇ་ཕུད་གཡུ་སྔོན་བསང་། །ཕོ་བྲང་སྐྱེད་ཚལ་གླུ་གར་སོགས། །ནམ་མཁའི་མཛོད་དུ་སྤེལ་བ་འདིས། །ཐུགས་ཀྱི་དབང་ཕྱུག་རིག་སྔགས་རྒྱལ། །ཕྱག་ན་རྡོ་རྗེ་མངའ་གསོལ་ལོ། །ཡེ་ཤེས་གཟའ་མཆོག་མངའ་གསོལ་ལོ། །ལས་ཀྱི་གཟའ་བདུད་མངའ་གསོལ་ལོ། །ལྗང་སྔོན་དྲག་པོ་མངའ་གསོལ་ལོ། །དྲང་སྲོང་དཀར་སེར་མངའ་གསོལ་ལོ། །བདུད་པོ་རོག་ཏི་མངའ་གསོལ་ལོ། །བི་ཏྲི་པ་ཏྲ་མངའ་གསོལ་ལོ། །ཧ་ལིང་ཀ་ཡ་མངའ་གསོལ་ལོ། །དུ་བ་མཇུག་རིང་མངའ་གསོལ་ལོ། །ཁྱབ་འཇུག་ཆེན་པོ་མངའ་གསོལ་ལོ། །གཟའ་བདུད་སྒྲ་གཅན་མངའ་
གསོལ་ལོ། །དགྱེས་སྡེ་མཆེད་བཞི་མངའ་གསོལ་ལོ། །སྤྲུལ་པའི་གཟའ་བརྒྱད་མངའ་གསོལ་ལོ། །རྒྱུ་སྐར་ཉེར་བརྒྱད་མངའ་གསོལ་ལོ། །ལྷ་སྲིན་སྡེ་བརྒྱད་མངའ་གསོལ་ལོ། །ཡང་འཁོར་དམག་ཚོགས་མངའ་གསོལ་ལོ། །གསོལ་ཞིང་མཆོད་པ་ལ་བརྟེན་ནས། །བདག་ཅག་ཡོན་མཆོད་འཁོར་བཅས་ལ། །བུ་དང་སྤུན་ཟླར་དགོངས་ནས་ཀྱང་། །ཞི་ཞིང་མཉེས་པའི་འཛུམ་མདངས་ཕྱུངས། །གདུག་རྩུབ་ཁ་རླངས་དུག་ཟེར་སྡུས། །ཚེ་བསྲིངས་དཔལ་དང་གཟི་བྱིན་བསྐྱེད། །དཔལ་འབྱོར་སྙན་གྲགས་མངའ་ཐང་སྤེལ། །ཁྱད་པར་རྒྱལ་བའི་བསྟན་པ་སྲུངས། །དེ་འཛིན་སྐྱེས་བུའི་སྐུ་ཚེ་སྲིངས། །རྒྱལ་ཁམས་ཐམས་ཅད་བདེ་བར་མཛོད། །ཀོ་ལོང་ཐན་ལྟས་རྩུབ་རིམས་དུག །ཐམས་ཅད་སྡང་བའི་དགྲ་ལ་ཕོབས། །བྱུར་ཁ་བྱད་ཟོར་བགེགས་ལ་སྒྱུར། །དམ་ཚིག་གཉན་པོ་རྗེས་དགོངས་ལ། །བསམ་པ་སྒྲུབ་ལ་རེ་བ་སྐོངས། །རྣལ་འབྱོར་
བཅོལ་བའི་ཕྲིན་ལས་མཛོད། །ཅེས་བརྗོད་གཏོར་མ་དང་གསེར་སྐྱེམས་གཙང་སར་འབུལ་ལོ། །རྨ་རྒྱལ་སྦོམ་རའི་གཡང་བསང་ནི། ན་མོ་གུ་རུ་པདྨ་ཀཱ་ར་ཡེ། །ལྷ་ཆེན་རྡོ་རྗེ་བདུད་འཇོམས་ལས། །གཡང་གི་དངོས་གྲུབ་ཞུ་བ་ལ། །བསང་རྫས་མཆོད་པ་ཅི་འབྱོར་ལྟར། །བྱིན་གྱིས་བརླབ་ལ་འདི་སྐད་དོ།། ཀྱཻ། ཕ་གི་ཉི་མ་ཤར་གྱི་ཕྱོགས། །གངས་དཀར་གཉན་པོ་གུང་ལ་རེག །ཤེལ་གུར་དཀར་པོའི་ལྡིང་ཁང་ན། །རྟ་མཆོག་ངང་པ་རྒྱན་ལྡན་སྟེང་། །ལྷ་ཆེན་རྨ་རྒྱལ་སྦོམ་ར་ནི། །སྐུ་མདོག་སེར་པོ་གསེར་གྱི་མདོག །གསེར་ཁྲབ་གསེར་རྨོག་སྐུ་ལ་གསོལ། །དེ་སྟེང་ཟབ་ཆེན་དཀར་པོའི་བེར། །བརྗིད་ཅིང་རིན་ཆེན་དུ་མས་བརྒྱན། །ཕྱག་གཡས་མདུང་དར་སྦ་ལྕག་ཕྱར། །གཡོན་པས་གཏེར་བུམ་ནོར་བུ་འཛིན། །ནེའུ་ལེའི་རྐྱལ་པ་མཆན་དུ་བཅུག །རྡོ་རྗེ་དྲག་མོ་རྒྱལ་དང་ནི། །གཉན་ཆེན་སྡེ་བཞི་རི་དབང་དགུ། །སྡེ་བརྒྱད་ལྷ་ཀླུ་དཔག་མེད་བཅས། །དད་དང་དམ་ཚིག་དབང་གིས་ནི། །འདིར་གཤེགས་པད་ཟླའི་གདན་ལ་བཞུགས། །བདུད་རྩི་ཅན་
ཤིང་བསང་དུད་དང་། །ཉེར་སྤྱོད་བདུན་དང་བཀྲ་ཤིས་ཀྱི། །རྫས་རྟག་འདོད་པའི་ཡོན་ཏན་ལྔ། །རྒྱལ་སྲིད་རིན་ཆེན་སྣ་བདུན་དང་། །དར་ཟབ་རིན་ཆེན་འབྲུ་ཡི་མཛོད། །རྣོ་མཚོན་རྟ་ནོར་ཕྱུགས་ཀྱི་ཁྱུ། །དཀར་མདར་ཕྱེ་མར་ཆང་ཕུད་དང་། །སྤྱན་གཟིགས་མཆོད་སྤྲིན་རྒྱ་མཚོ་འབུལ། །དམ་རྫས་གཏོར་མ་རྒྱན་དང་ལྡན། །ཨོཾ་ཨཱཿཧཱུྃ་གིས་བྱིན་བརླབ་པས། །ཁ་དོག་དྲི་རོ་ཕུན་ཚོགས་པ། །ལྷ་ཆེན་འཁོར་བཅས་དགྱེས་པར་གསོལ། །ཨོཾ་བཛྲ་ཀུ་མ་རི་ཕུ་ཏྲི་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི།། ཀྱཻ། ཕྱི་ལྟར་ལྷ་ཡི་དགེ་བསྙེན་སྟེ། །བོད་ཁམས་གཞི་བདག་སྐྱོང་བའི་གཙོ། །ནང་ལྟར་ཡུལ་སྐྱོང་དྲི་ཟའི་རྗེ། །གསང་བ་རྒྱལ་པོ་རྣམ་ཐོས་སྲས། །འཁོར་དང་བཅས་ལ་བསྟོད་པར་བགྱི། །བདག་དང་བསྲུང་བྱར་གྱུར་པ་ལ། །འགལ་རྐྱེན་སོལ་ལ་མཐུན་རྐྱེན་སྤེལ། །ཅི་འདོད་དངོས་གྲུབ་ཆར་ལྟར་ཕོབ། །ཕྱོགས་དུས་རྒྱལ་བ་སྲས་བཅས་དང་། །བླ་མ་ཡི་
དམ་མཁའ་འགྲོ་ཡི། །ཐུགས་རྗེ་བྱིན་རླབས་དངོས་གྲུབ་གཡང་། །ཁུ་ཡེ་ཕྱྭ་དང་གཡང་དུ་ལེན། །སྲིད་པའི་རྩེ་མོ་མན་ཆད་ནས། །མནར་མེད་ཡན་གྱི་ཁམས་གསུམ་གྱི། །འབྱུང་ལྔ་སྣོད་བཅུད་དཔལ་དང་གཡང་། །ཁུ་ཡེ་ཕྱྭ་དང་གཡང་དུ་ལེན། །ལྷ་གནས་མི་ཡུལ་གདེངས་ཅན་གྱི། །རྨ་གཡང་ཟས་དང་རྐང་བཞི་འཕེལ། །མི་འཕེལ་རྟ་ཧྲག་བང་མཛོད་འབྲུ། །ཁུ་ཡེ་ཕྱྭ་དང་གཡང་དུ་ལེན། །མདོར་ན་སྲིད་དང་ཞི་བ་ཡི། །ཕུན་སུམ་ཚོགས་པའི་དཔལ་འབྱོར་པ། །ས་ལམ་ཡོན་ཏན་བདེ་སྐྱིད་གཡང་། །ཁུ་ཡེ་ཕྱྭ་དང་གཡང་དུ་ལེན། །ཞེས་བརྗོད་རྟེན་ཡོད་ན་རྟེན་ལ་བསྟིམ། མེད་ན་རང་བཞིན་གྱི་གནས་སུ་གཤེགས་པར་བསམ་མོ། །དེ་ལྟར་སྦོམ་རའི་རྒྱུན་བསང་གཡང་སྐྱབས་དང་འབྲེལ་བ་འདིའང་ཚེ་རིང་བཀྲ་ཤིས་ནས་བསྐུལ་བ་ལྟར། རྡོ་རྗེ་དྲག་པོ་ཕྲིན་ལས་འདུས་པ་རྩལ་གྱིས་འཕྲལ་དུ་སྤེལ་བ་དགེ །བྲག་བཙན་བསང་མཆོད་ནི། རཾ་ཡཾ་ཁཾ་གི་བསང་། སྭ་བྷཱ་ཝས་སྦྱངས། ཨོཾ་ཨཱཿཧཱུྃ་ཧ་ཧོཿཧྲཱིཿས་བརླབས་ཤིང་སྤེལ་ལ། བྷྱོ། དབང་ཆེན་ཁྲག་འཐུང་བཀའ་ཡི་དཀྱིལ་འཁོར་དུ། །
གཏུམ་དྲག་མེ་རླུང་ཐོག་སེར་འཁྲུགས་པའི་ཀློང་། །ཁྲག་གི་རྒྱ་མཚོ་འཕྱོ་བའི་གཞལ་ཡས་ནས། །ལས་ཀྱི་མཐའ་སྡུད་འཆི་བདག་མུན་པའི་སྐྱེས། །རྡོ་རྗེ་བྲག་བཙན་རྡོ་རྗེ་དབང་དྲག་རྩལ། །སྲིན་མགོན་ནག་པོ་སྤྲིན་འཛིན་ཀླུ་བཙན་ནག །དོང་བདག་ཤན་པ་དགའ་ཚལ་བདུད་ཀྱི་མགོན། །ལྗོན་ལུང་བྲག་བཙན་ཞིང་སྐྱོང་དགྲ་འདུལ་ཆེ། །སྒྲོ་བྲག་ལྷ་བཙན་རི་བཀྲ་མཆེད་གསུམ་སོགས། །སྣ་ཚོགས་མཚན་དང་སྣ་ཚོགས་སྐུར་སྣང་བ། །རིགས་ཆོས་མཛའ་སྡེའི་སྲུང་མ་མཐུ་རྩལ་ཅན། །ཡབ་ཡུམ་སྲས་བཅས་དགྱེས་པའི་མཆོད་སྤྲིན་ནི། །དཀར་དམར་སྐྱེམས་ཕུད་ཤ་ཁྲག་བ་ལིཾ་ཏ། །འབོད་བརྟེན་སྒྲུབ་རྫས་རྒྱལ་སྲིད་བཀྲ་ཤིས་རྫས། །ལྷ་ཀླུ་མི་ཡི་དཔལ་འབྱོར་ལོངས་སྤྱོད་དང་། །འདབ་ཆགས་སྡེར་ཆགས་རྐང་བཞི་རྐང་མང་སོགས། །མཚར་རྒུའི་དཀོར་ཆ་སྤྱན་གཟིགས་འབྱུང་བའི་གཏེར། །བདུད་རྩི་བསང་གི་མཆོད་སྤྲིན་བསམ་མི་ཁྱབ། །དགྲ་བགེགས་
བསྒྲལ་བསད་བཅོམ་པའི་མངོན་སྤྱོད་ལས། །དཔའ་བོ་རྣམ་པར་རོལ་པའི་དགའ་སྟོན་དང་། །ཤ་ཁྲག་ནང་ཁྲོལ་སྲོག་དབུགས་བླ་ཚེ་དྲོད། །ཀླད་རྐང་ཁུ་ཁྲག་ཞག་ཚིལ་དྲག་པོའི་རྫས། །འབུལ་ལོ་དགྱེས་བཞེས་རྒྱལ་བའི་བསྟན་པ་སྲུངས། །བསྟན་འཛིན་ཚེ་སྲིངས་སྒྲུབ་མཆོག་འདོད་འབྲས་སྤེལ། །སྡང་བྱེད་དགྲ་དང་གནོད་པའི་བགེགས་དཔུང་ཆོམས། །གང་བཅོལ་ལས་ཀྱི་འབྲས་བུ་མཆིས་པར་མཛོད། །གསོལ་ལོ་མཆོད་དོ། །དཔལ་ལྡན་བཀའི་སྲུང་མ་དམ་ཅན་ཆེན་པོ་སྲོག་བདུད་མུན་པའི་སྐྱེས་བུ། འཆི་བདག་ནག་པོ། རྡོ་རྗེ་བྲག་བཙན་ཡབ་ཡུམ་འཁོར་དང་བཅས་པ་གསོལ་ལོ་མཆོད་དོ། །གསོལ་ཞིང་མཆོད་པ་ལ་བརྟེན་ནས་རྒྱལ་བའི་བསྟན་པ་དང་། དེ་འཛིན་གྱི་ཕྲིན་ལས་སྤེལ། རྣལ་འབྱོར་གྱི་བར་ཆད་སོལ། ཡོན་བདག་གི་མཐུན་རྐྱེན་སྒྲུབ། ནད་དང་གནོད་པ་བཙའ་སད་སེར་གསུམ་ཟློག །འཇིག་རྟེན་ཐམས་ཅད་བདེ་ལེགས་ཀྱི་སྣང་བས་དུས་
རྟགས་ཏུ་ཁྱབ་པར་མཛོད་ཅིག །ཅེས་ཕྲིན་ལས་བཅོལ་ལོ། །དེ་ནས་གཉན་ཆེན་ཐང་ལྷའི་གསོལ་མཆོད་ནི། །གཏོར་མ་བྲན། དྲི་ཟའི་རྒྱལ་པོ་ཟུར་ཕུད་ལྔ་ལྡན་པ། །གངས་ཅན་ལྗོངས་སུ་གཉན་ཆེན་ཐང་ལྷར་གྲགས། །མཐུ་སྟོབས་དང་ལྡན་མི་སྐྱེའི་བཟོད་ཐོབ་པ། །བསྟན་པ་བསྲུང་ཕྱིར་གནས་འདིར་གཤེགས་སུ་གསོལ། །སློབ་དཔོན་ཆེན་པོ་པདྨ་འབྱུང་གནས་དྲུང་། །ཇི་ལྟར་ཁས་བླངས་དམ་བཅའ་ཕུལ་བ་ལྟར། །སྒྲུབ་པའི་དཔུང་གཉེན་དམ་པ་མཛད་སླད་དུ། །བརྩེ་བས་དགོངས་ཏེ་གནས་འདིར་གཤེགས་སུ་གསོལ། །གངས་དཀར་རིན་ཆེན་སྤུངས་པའི་གཞལ་ཡས་ཁང་། །ཁྲི་མཆོག་པདྨ་བརྩེགས་པའི་གདན་སྟེང་ནས། །རྡོ་རྗེ་དབྱིངས་ཕྱུག་འབར་བ་འཁོར་དང་བཅས། །མཆོད་ཚོགས་གཏོར་མ་འབུལ་གྱི་མྱུར་དུ་བྱོན། །ཞེས་པས་སྤྱན་དྲངས། ལྷ་ཆེན་ཐང་ལྷ་གཉན་པོ་དུང་གི་མདོག་ཅན། སྐུ་ལ་དར་དཀར་གྱི་རལ་ག་གསོལ་བ། གཡས་སྦ་ལྕག་དཀར་པོ་གཡུའི་ལྕག་འབྲས་
ཅན་བསྣམས་པ། གཡོན་ལྷའི་བ་དན་དཀར་པོ་ཕྱར་བ། རིན་པོ་ཆེ་སྣ་ཚོགས་ཀྱི་ཟེ་པྲོག་གི་དབུ་རྒྱན་སྙན་ཆ་དོ་ཤལ་སྐ་རགས་ཀྱིས་སྤྲས་པ། ཆིབས་སུ་རྟ་ཕོ་ངང་ཞུར་གཡུའི་རྔ་རྡོག་ཅན། ཤེལ་སྒ། གཡུ་མཐུར། ནོར་བུ་དུ་མས་ཐག་ཆས་བྱས་པ། རྫུ་འཕྲུལ་གྱི་ཤུགས་དང་ལྡན་པ་ཆིབས་པ་ལ། བཙུན་མོ། སྲས་པོ། བློན་ཆེན་རྣམས་ཀྱིས་ཐོག་དྲངས་ལྷ་དམག་འབུམ་གྱི་ཚོགས། །རུ་མཚོན་ཕྱར་བ། རྒྱན་ཆ་འབར་བ། མཐུ་དང་གཟི་བརྗིད་ཆེ་བ། སྤྲིན་ཕུང་གཏིབས་པ་ལྟར་བསྐོར་བ་མདུན་དུ་བཞུགས་པར་གྱུར། །ཨོཾ་བཛྲ་སྥ་ར་ཎ་ཁཾ། །ལན་གསུམ། ནམ་མཁའ་གང་བའི་མཆོད་རྫས། ས་གཞི་གང་བའི་སྤྱན་གཟིགས། རོ་བརྒྱ་ལྡན་པའི་གཏོར་མ། གསེར་སྐྱེམས། དཀར་ཕུད་གཙང་མ། རྟ་ཕྱུག་རྐང་འགྲོས་དུ་མ་དང་བཅས་པ། མཐུན་པའི་ཡོ་བྱད་ལྷ་ཆེན་འཁོར་བཅས་དགྱེས་པ་སྐྱོད་པ་རྣམས་འབུལ་ལོ། །དངོས་སུ་འབྱོར་དང་ཡིད་ཀྱིས་དམིགས། །ལྷ་རྫས་མེ་ཏོག་བར་
སྣང་གང་། །སིཧླ་ག་བུར་ཙནྡན་སོགས། །སྤོས་ཀྱི་དུད་པའི་ན་བུན་འཁྲིགས། །སྣང་གསལ་ཏིང་ལོ་མར་མེ་འབར། །དྲི་ཞིམ་བྱུག་པ་ངད་བཟང་དང་། །རྣམ་པ་མང་པོའི་ཞལ་ཟས་སྐྱེམས། །རོལ་མོའི་སྒྲ་དང་བཅས་པས་མཆོད། །ཅེས་དང་། ནོར་སྣ་གོས་དར་རི་ལྟར་དཔང་རེ་མཐོ། །སྨན་དང་འབྲུ་སྣ་གོ་མཚོན་བཀོད་རེ་བཟང་། །བདུད་རྩིའི་བཏུང་བ་མཚོ་ལྟར་རྒྱ་རེ་ཆེ། །རྟ་ཕྱུགས་གནག་ལུག་ཁྱུ་ཆེན་མེ་རེ་རེ། །དེ་ལ་སོགས་པའི་མཆོད་གཏོར་ཚོགས་རྣམས་ནི། །མ་ཚང་མེད་པར་བཤམས་ཏེ་འབུལ་ལགས་ན། །ཐང་ལྷ་འཁོར་དང་བཅས་པས་མཆོད་པ་བཞེས། །བདག་ཅག་དཔོན་སློབ་འཁོར་དང་བཅས་པ་ཡི། །ཚེ་དང་དཔལ་དང་འབྱོར་པ་མཐུ་སྟོབས་སྤེལ། །ནད་དང་དགྲ་བགེགས་བསམ་ངན་སྦྱོར་རྩུབ་ཟློག །འཁོར་རྣམས་སྲུངས་སྐྱོབ་མཐུན་པའི་གྲོགས་རྣམས་ལ། །གཡེལ་བ་མེད་པར་མགོན་དང་སྐྱབས་མཛོད་ཅིག །སྐལ་བཟང་སངས་རྒྱས་བརྒྱ་ཕྲག་
བཅུ། །མངོན་པར་བྱང་ཆུབ་བརྙེས་པའི་གནས། །རྡོ་རྗེ་གདན་གྱི་བྱང་གི་ཕྱོགས། །ཁ་བ་ཅན་ལྗོངས་དབུས་ཀྱི་ས། །དེ་ན་ཐང་ལྷའི་གངས་རི་རྣམས། །ཤེལ་གྱི་མཆོད་སྡོང་བསྒྲིགས་པ་འདྲ། །མཐོ་ལ་བརྗིད་ཅིང་འོད་ཀྱང་འཕྲོ། །རྫ་དང་བྲག་རི་མང་པོ་ཡང་། །བཀྲ་ཤིས་རི་མོ་དུ་མར་འཆར། །གཡུ་དང་གསེར་གྱི་ཐང་ཆེན་ལ། །སྨན་དང་མེ་ཏོག་ཅི་ཡང་སྐྱེས། །མི་རྣམས་ཀྱིས་ནི་དེ་ལྟར་མཐོང་། །ཁྱོད་ཀྱིས་གཞལ་ཡས་ཁང་དང་གྲོང་། །རིས་མཐུན་དགའ་བའི་བཀོད་པ་ཅན། །འདོད་ཁམས་ལྷ་ཡི་རིན་ཆེན་དང་། །ཀླུ་ཡི་ནོར་བུའི་ཚོགས་ལས་གྲུབ། །རྟ་བབས་ར་བ་སྒོ་ཁང་དང་། །ལྕོག་ལ་སོགས་པ་བསམ་མི་ཁྱབ། །འདོད་པའི་ཡོན་ཏན་དུ་མར་ལྡན། །གནས་མཆོག་དེ་ན་བཞུགས་པ་ནི། །བོད་ཀྱི་རྒྱལ་བློན་མགུར་གྱི་ལྷ། །བཅུ་གསུམ་ནང་ནས་སྟོབས་པོ་ཆེ། །འོད་དེ་གུང་རྒྱལ་གཉན་པོ་དང་། །གཡུ་བྱ་གཤོག་གཅིག་ཡབ་དང་ཡུམ། །ལྷ་ཀླུའི་རིགས་སུ་གྱུར་པར་
གྲགས། །དེ་ལ་པདྨ་སམྦྷ་ཝས། །སངས་རྒྱས་བསྟན་པ་བསྲུང་བ་དང་། །འབངས་རྣམས་བདེ་སྐྱིད་ལྡན་པ་ཡི། །བཀའ་བསྒོས་དམ་ལ་བཞག་པར་མཛད། །འཇིག་རྟེན་མགོན་པོ་ལ་སོགས་པ། །དྭགས་པོ་བཀའ་རྒྱུད་བླ་མ་རྣམས། །ཁྱོད་ནི་དྲི་ཟ་རྣམས་ཀྱི་རྒྱལ། །ཟུར་ཕུད་ལྔ་པ་ཞེས་བྱ་བ། །ལྷ་དབང་འཆི་ལྟས་འབྱུང་བའི་ཚེ། །བཅོམ་ལྡན་ཏིང་ངེ་འཛིན་ལ་ནི། །ལུས་འཕགས་བྲག་ཕུག་བཞུགས་པ་དེ། །ཁྱོད་ཀྱིས་བཞེས་སུ་གསོལ་ཞེས་བསྒྲོས། །དེ་དུས་སིལ་སྙན་ལྔ་བརྒྱ་དང་། །པི་ཝཾ་གླུ་དབྱངས་རྒྱ་ཆེན་གྱིས། །བསྟོད་པས་བཅོམ་ལྡན་འདས་བཞེངས་ཏེ། །བརྒྱ་བྱིན་སླར་ཡང་ཚེ་ཐོབ་ཅིང་། །ཆོས་བསྟན་ཁྱོད་ནི་མི་སྐྱེ་བའི། །ཆོས་ལ་བཟོད་པ་ཐོབ་པ་དང་། །དབང་པོས་རང་གི་སྲས་མོ་མཆོག །བྱ་དགའི་ཆེད་དུ་བྱིན་པ་ནི། །མཚོ་སྨན་ཕྱུག་མོ་གནམ་མཚོར་གྲགས། །དེ་སྐད་བསྔགས་པ་བརྗོད་མཛད་པས། །བྱང་སེམས་འཕགས་པར་ཡིད་ཆེས་
ཏེ། །དགེ་འདུན་དཀོན་མཆོག་ཁྱོད་ལ་བསྟོད། །ཀྱཻ། ལྷ་ཁྱོད་ཀྱི་སྐུ་མདོག་ཆ་ལུགས་དབྱིབས། །མཐའ་གཅིག་ཏུ་མ་ངེས་སྣ་ཚོགས་སུ་སྟོན། །གཡས་ཆིབས་ལྕག་གིས་དགྲ་ཡི་གཉའ་བ་གཅོག །གཡོན་བ་དན་གྱིས་བསྟན་པ་དར་རྒྱས་སྤེལ། །ཁྱོད་སྲིའུ་གསོ་བའི་ལྷ། །ཆུང་སྲི་གཉའ་ནས་བཟུངས། །ཁྱོད་ནད་པ་གསོ་བའི་ལྷ། །ནད་འདྲེ་ཡུལ་ནས་ཕུད། །ཁྱོད་དགྲ་བོ་འདུལ་བའི་ལྷ། །དགྲ་བགེགས་ཀྱི་སྙིང་ནས་དྲོངས། །ཁྱོད་ཕྱུགས་ལུག་སྐྱོང་བའི་ལྷ། །རྐང་ཕྲན་མཐའ་ནས་སྐྱོང་། །གཏོར་མ་སྤྱན་གཟིགས་བཞེས། །བཅོལ་བའི་ཕྲིན་ལས་མཛོད། །ལྷ་ཆེན་ཐང་ལྷ་གཉན་པོ་ལ་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །ཀྱཻ། གཡས་ཀྱི་མདའ་ར་བ། །ཟར་མ་སྐྱེས་བུ་དྲུག །མི་ལྕགས་རྟ་ཡང་ལྕགས། །ལྕགས་ཀྱི་རྨོག་ཞུ་གསོལ། མཚོན་ཆ་ངར་མ་ཐོགས། །དཔའ་བོའི་མདའ་ཆར་འབེབས། །ན་ཆུང་གཞོན་གྱི་དཔལ། །གཏོར་མ་སྤྱན་
གཟིགས་བཞེས། །བཅོལ་བའི་ཕྲིན་ལས་མཛོད། །གཡས་ཀྱི་མདའ་ར་བ་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆ་འོ་ལྷ་རྒྱལ་ལོ། །ཀྱཻ། གཡོན་གྱི་མདུང་འཛིན་པ། །སྤྲིད་ལ་སྨུག་པོ་ནི། །མི་སྨུག་རྟ་ཡང་སྨུག །སྨུག་པོ་བསྭེ་མདུང་ཅན། །བསྭེ་ཡི་རྨོག་ཞུ་གསོལ། །དར་མ་སྐྱེས་པའི་དཔལ། །གཏོར་མ་སྤྱན་གཟིགས་བཞེས། །བཅོལ་བའི་ཕྲིན་ལས་མཛོད། །གཡོན་གྱི་མདུང་འཛིན་པ་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། ཀྱཻ། སྔོན་གྱི་ཤུལ་མཚོན་པ། །གཞལ་གཡག་དཀར་པོ་ནི། །དམག་གི་དཔུང་ཚོགས་ཧྲག །རྟ་ནག་ཞུར་པོ་ཆིབས། །རྨིག་བཞི་ཚུལ་པ་དཀར། །རྒན་པོ་རྣམས་ཀྱི་དཔལ། །གཏོར་མ་སྤྱན་གཟིགས་བཞེས། །བཅོལ་བའི་ཕྲིན་ལས་མཛོད། །སྔོན་གྱི་ཤུལ་མཚོན་པ་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །ཀྱཻ། སླད་ཀྱི་རྗེས་འབྲང་བ། །ནམ་ར་གཡའ་
དམར་ནི། །ལྷ་ཡི་གུར་ཆེན་ཕུབ། །གངས་དཀར་གཉན་སྡེས་བསྐོར། །ལས་སུ་དགྲ་བགེགས་འདུལ། །བྱིས་པ་ཡོངས་ཀྱི་དཔལ། །གཏོར་མ་སྤྱན་གཟིགས་བཞེས། །བཅོལ་བའི་ཕྲིན་ལས་མཛོད། །སླད་ཀྱི་རྗེས་འབྲང་བ་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །ཀྱཻ། སྐུ་ཡི་གཅུང་པོ་བ། །ཐང་འབྲིང་དུར་པོ་ནི། །མཚལ་བུ་རྟིང་དཀར་ཆིབས། །རུ་དར་རྩེ་བརྒྱད་འཕྱར། །ལྷ་རྣམས་མཐུན་པའི་གྲོགས། །མི་ཆེན་ཚོགས་པའི་དཔལ། །གཏོར་མ་སྤྱན་གཟིགས་བཞེས། །བཅོལ་བའི་ཕྲིན་ལས་མཛོད། །སྐུ་ཡི་གཅུང་པོ་བ་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །ཀྱཻ། ཁབས་ཀྱི་སྔ་ཤོས་མ། །ལྷ་མོ་མཚོ་དར་ནི། །དཀར་མོ་གཡུ་ཆས་ཅན། །མོ་བཙུན་འཁོར་གྱིས་བསྐོར། །གཏོར་མ་སྤྱན་གཟིགས་བཞེས། །བཅོལ་བའི་ཕྲིན་ལས་མཛོད། །ཁབས་ཀྱི་སྔ་ཤོས་མ་གསོལ་ལོ་མཆོད་དོ། །མངའ་གསོལ་ལོ། །ཀི་
བསྭོ་ཆའོ་ལྷ་རྒྱལ་ལོ། །ཀྱཻ། ཁབས་ཀྱི་ཕྱི་ཤོས་མ། །གནམ་མཚོ་ཕྱུག་མོ་ནི། །ལྷ་ཡི་གུར་ཆེན་ཕུབ། །གངས་དཀར་གཉན་སྡེས་བསྐོར། །ལས་སུ་དགྲ་བགེགས་འདུལ། །གཏོར་མ་སྤྱན་གཟིགས་བཞེས། །བཅོལ་བའི་ཕྲིན་ལས་མཛོད། །ཁབས་ཀྱི་ཕྱི་ཤོས་མ་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །ཀྱཻ། སྐུ་ཡི་རིགས་འཁྲུངས་སྲས། །ཐང་སྲས་འཕྱོར་བ་ནི། །དཀར་པོ་ཤེལ་སྒོང་ཆིབས། །འཁོར་མང་དབུས་ན་འགྱིངས། །བཀའ་ཡི་བྱ་ར་བ། །ཆོས་མཛད་ཀུན་གྱི་དཔལ། །གཏོར་མ་སྤྱན་གཟིགས་བཞེས། །བཅོལ་བའི་ཕྲིན་ལས་མཛོད། །སྐུ་ཡི་རིགས་འཁྲུངས་སྲས་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །ཀྱཻ། སྐུ་ཡི་ཞང་པོ་བ། །འབྲོང་གཉན་ཐང་པོ་ནི། །རྟ་དཀར་གཡུ་རྔོག་ཆིབས། །དམག་ཚོགས་མང་པོ་ལྡན། །རང་ཕྱོགས་རྒྱལ་བར་བྱེད། །ཕས་རྒོལ་འཇོམས་པའི་ལྷ། །གཏོར་མ་སྤྱན་
གཟིགས་བཞེས། །བཅོལ་བའི་ཕྲིན་ལས་མཛོད། །སྐུ་ཡི་ཞང་པོ་བ་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །ཀྱཻ། ཕྱི་ཡི་བློན་པོ་བ། །སྤོམ་ཆེན་ཡོར་བ་ནི། །དཀར་པོ་ཕུན་དམར་ཆིབས། །དཔུང་གི་འཁོར་དང་བཅས། །རང་ཕྱོགས་སྲུང་བ་དང་། །གཞན་ཕྱོགས་འཇོམས་པར་ནུས། །གཏོར་མ་སྤྱན་གཟིགས་བཞེས། །བཅོལ་བའི་ཕྲིན་ལས་མཛོད། །ཕྱི་ཡི་བློན་པོ་བ་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །ཀྱཻ། ནང་གི་བློན་པོ་བ། །མགུལ་རིང་ཕྲག་ཐག་ནི། །སྔོན་པོ་གཡུ་རྔོག་ཆིབས། །དཔུང་གི་ཚོགས་དང་བཅས། །རང་ཕྱོགས་སྲུང་བ་དང་། །གཞན་ཕྱོགས་འཇོམས་པར་ནུས། །གཏོར་མ་སྤྱན་གཟིགས་བཞེས། །བཅོལ་བའི་ཕྲིན་ལས་མཛོད། །ནང་གི་བློན་པོ་བ་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །ཀྱཻ། གཡས་ཀྱི་སྒོ་དཔོན་པ། །རྩམ་ཆེན་ལྷ་སྒོ་ནི། །དཀར་པོ་བསྭེ་ཁྲབ་
གསོལ། །གང་བ་བཟང་པོར་གྲགས། །རང་ཕྱོགས་བསྲུང་བ་དང་། །གཞན་ཕྱོགས་འཇོམས་པར་ནུས། །གཏོར་མ་སྤྱན་གཟིགས་བཞེས། །བཅོལ་བའི་ཕྲིན་ལས་མཛོད། །གཡས་ཀྱི་སྒོ་དཔོན་པ་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །ཀྱཻ། གཡོན་གྱི་སྒོ་དཔོན་པ། །བལ་ཡུལ་གསེར་ལྡིང་ནི། །སྨུག་པོ་བསྲེ་ཁྲབ་གསོལ། །ལྷ་འཁོར་མང་པོ་བཅས། །རང་ཕྱོགས་བསྲུང་བ་དང་། །གཞན་ཕྱོགས་འཇོམས་པར་ནུས། །གཏོར་མ་སྤྱན་གཟིགས་བཞེས། །བཅོལ་བའི་ཕྲིན་ལས་མཛོད། །གཡོན་གྱི་སྒོ་དཔོན་པ་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །ཀྱཻ། ལྷ་ཡི་ལྕམ་སྲིང་མ། །འབྲི་ལམ་གངས་བཟང་ནི། །དཀར་མོ་འོད་དུ་འབར། །གོས་དང་རྒྱན་གྱིས་ཀླུབས། །མོ་བཙུན་འཁོར་གྱིས་བསྐོར། །རང་ཕྱོགས་བསྲུང་བ་དང་། །གཞན་ཕྱོགས་འཇོམས་པར་ནུས། །གཏོར་མ་སྤྱན་གཟིགས་བཞེས། །
བཅོལ་བའི་ཕྲིན་ལས་མཛོད། །ལྷ་ཡི་ལྕམ་སྲིང་མ་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །ཀྱཻ། འཕྲུལ་ལྡན་རྟ་ཁྱུའི་རྫི། །གྱང་ལྷ་བཙན་པོ་ནི། །གོ་ཆ་དམག་ཆས་ཅན། །འཁོར་གྱི་དཔུང་དང་བཅས། །མྱུར་འགྱོགས་རྟ་ལ་ཞོན། །ཕོ་ཉ་ཡང་རྩལ་ཆེ། །གཏོར་མ་སྤྱན་གཟིགས་བཞེས། །བཅོལ་བའི་ཕྲིན་ལས་མཛོད། །འཕྲུལ་ལྡན་རྟ་ཁྱུའི་རྫི་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །ཀྱཻ། ལུག་རྫི་གཡང་གི་ལྷ། །ཁུ་ཁྱིམ་ཞལ་དཀར་ནི། །གོ་ཆ་རུ་མཚོན་འཕྱོར། །འཁོར་གྱི་དཔུང་དང་བཅས། །འགྲོས་བཟང་ལུག་ལ་ཞོན། །འཕེལ་ཆེ་སྐྱོང་ལ་མཁས། །གཏོར་མ་སྐྱེམས་ཕུད་བཞེས། །བཅོལ་བའི་ཕྲིན་ལས་མཛོད། །ལུག་རྫི་གཡང་གི་ལྷ་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །ཀྱཻ། ཁ་དོག་སྣ་ཚོགས་ཀྱི། །ར་སྐྱེས་ཁྱུ་འཚོ་བ། །འཁྱོར་པ་རྩ་གསུམ་ནི། །གོ་ཆ་མདུང་དར་བཀྲ། །
འཁོར་གྱི་དཔུང་དང་བཅས། །ཤུགས་ཆེན་ར་ལ་ཞོན། །གཏོར་མ་སྐྱེམས་ཕུད་བཞེས། །བཅོལ་བའི་ཕྲིན་ལས་མཛོད། །ར་སྐྱེས་ཁྱུ་འཚོ་བ་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །ཀྱཻ། འདོད་འཇོའི་འོ་མཚོ་འཁྱིལ། །འབྲི་ཁྱུའི་མཚོ་རྫི་བ། །ལག་སོར་ཕྱུག་མོ་ནི། །གོ་ཆ་འོད་འཕྲོ་ཞིང་། །མཚོན་ཆ་རབ་ཏུ་རྣོ། །འཁོར་གྱི་དཔུང་དང་བཅས། །གཏོར་མ་སྤྱན་གཟིགས་བཞེས། །བཅོལ་བའི་ཕྲིན་ལས་མཛོད། །ལག་སོར་ཕྱུག་མོ་བ་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །ཀྱཻ། གཏུམ་པོའི་ནོར་སྐྱོང་ཚོགས། །ལས་ལ་འགྱེད་པ་དང་། །སྲུང་བའི་བྱ་ར་བ། །གཡའ་དམར་སྟག་ལག་ནི། །གོ་ཆ་མཚོན་དང་ལྡན། །གྱད་ཀྱི་སྟོབས་ཀྱི་གནས། །གཏོར་མ་སྤྱན་གཟིགས་བཞེས། །བཅོལ་བའི་ཕྲིན་ལས་མཛོད། །གཡའ་དམར་སྟག་ལག་གསོལ་ལོ་མཆོད་དོ། །མངའ་གསོལ་ལོ། །ཀི་བསྭོ་ཆའོ་ལྷ་རྒྱལ་ལོ། །
ཀྱཻ། ཤར་གྱི་ལ་བདུན་ལ་གནས་པའི་གཞི་བདག་ཚོགས། ལྷའི་ལུང་བདུན་ལ་གནས་པའི་གཞི་བདག་ཚོགས། ནུབ་ཀྱི་རི་བདུན་ལ་གནས་པའི་གཞི་བདག་ཚོགས། བྱང་གི་མཚོ་བདུན་ལ་གནས་པའི་གཞི་བདག་ཚོགས། ཐང་ལྷའི་བཀའ་ཉན་ལེགས་པའི་སྟངས་འཛིན་ཅིང་། །ཉེས་བྱེད་ཆམས་ལ་འབེབས་པའི་མཐུ་ལྡན་པ། །ལྷ་སྲིན་ཀླུ་སོགས་སྡེ་བརྒྱད་དམག་ཚོགས་འབུམ། །འཁོར་དང་ཡང་འཁོར་བསམ་གྱིས་མི་ཁྱབ་པ། །ས་དང་བར་སྣང་མ་ལུས་ཁྱབ་པ་རྣམས། །སོ་སོའི་མཆོད་གཏོར་མཐུན་རྫས་རིམ་པར་ལོངས། །ཞི་རྒྱས་དབང་དང་དྲག་པོའི་ཕྲིན་ལས་རྣམས། །སྐབས་སུ་གང་བབས་ཡིད་བཞིན་བསྒྲུབ་པར་མཛོད། །ཅེས་གཙོ་འཁོར་རེ་རེའི་བསྐུལ་གྱི་མཐར་དཀར་ཕུད་དང་། གསེར་སྐྱེམས་འཐོར། མཆོད་གཏོར་ཕལ་ཆེར་ལྷ་ཐོའི་སྟེང་དུ་སྤུངས། ཞེས་པ་འདིའང་ཞྭ་དམར་ཅོད་པན་འཛིན་པ་བཞི་པས་མཛད་པའོ། །འཛམ་གླིང་བོད་ཀྱི་དགྲ་བླ་གེ་སར་ནོར་བུ་དགྲ་འདུལ་གྱི་བསང་མཆོད་བདུད་རྩིའི་ཆར་རྒྱུན་ཞེས་བྱ་བ་ནི། སྭ་སྟི། རྒྱལ་བའི་སྤྱི་གཟུགས་
པདྨ་འབྱུང་གནས་ལ། །སྒོ་གསུམ་གུས་པའི་བློ་ཡིས་རབ་བཏུད་ནས། །འདི་ན་ཛམ(འཛམ)་གླིང་སྐྱེས་བུ་མཆོད་པ་དང་། །བསང་གི་རིམ་པ་འདོད་རྒུའི་ཆར་འབེབས་འབྲི། །འདིར་ཛམ་གླིང་སྐྱེས་བུའི་བསང་མཆོད་བྱེད་པར་སྤྲོ་ན། མཆོད་རྫས་དཀར་གསུམ་འབྲུ་སྨན་དར་ཟབ་སྨན་སྣ་ཕྱེ་མར་ཆང་ཕུད་སོགས་ཅི་འབྱོར་བཤམས་ཤིང་། གོ་མཚོན། མདའ་དར། མདུང་དར་སོགས་མ་ཚང་བ་མེད་པར་ལེགས་པ་འཛོམ་པར་བྱ་ཞིང་། རིན་པོ་ཆེ་གང་རུང་གི་སྣོད་དུ་དཀར་གཏོར་ཟླུམ་པོ་གཡག་ལུག་ར་གསུམ་སོགས་ཀྱིས་བསྐོར་བ་བཤམས་ལ། རང་ཉིད་ཡི་དམ་གང་རུང་གི་བདག་བསྐྱེད་སྔོན་དུ་འགྲོ་བས། ཨོཾ་བཛྲ་ཨ་མྲྀ་ཏ་དང་། ཨོཾ་སྭ་བྷཱ་ཝས་བསང་སྦྱང་། སྟོང་པའི་ངང་ལས་བྷྲཱུཾ་ལས་རིན་པོ་ཆེའི་སྣོད་དུ་གཏོར་མཆོད་འདོད་པའི་ཡོན་ཏན་ལྔ་དང་ལྡན་པ་ནམ་མཁའ་དང་མཉམ་པར་གྱུར། །ན་མཿསརྦ་ཏ་ཐཱ་ག་ཏེ་བྷྱོ་སོགས་ཀྱིས་བརླབ་ཅིང་སྤེལ། རང་ཉིད་སྐད་ཅིག་གི་ཡི་དམ་ལྷར་གསལ་བའི་མདུན་དུ། དགྲ་བླ་ཆེན་པོ་སེང་ཆེན་ནོར་བུ་དགྲ་འདུལ་སྐུ་མདོག་དཀར་ལ་འཛུམ་མདངས་ཆགས་པའི་བཞིན་རས་ཅན། དབུ་ལ་རྨོག་ཆེན་རྒྱལ་བའི་ཐོད་དཀར་དར་འཕྲུ་ཨང་
སེས་སྤྲས་པ་གསོལ་ཞིང་། གནམ་ལྕགས་ཕ་ལམ་ལྟ་བུའི་ཁྲབ་ནག་ཟིལ་པའི་ཐོག་སྡུག་དང་། དགྲ་ལྷའི་ཚེ་མདུད། ཚེ་གོས་སོགས་ཀྱིས་ཀླུབས་པ། ཕྱག་གཡས་རིན་པོ་ཆེའི་ཕྱག་ལྕག་བསམ་པའི་དོན་འགྲུབ་ཕྱར་ཞིང་། གཡོན་པས་མདུང་དམར་ཁམས་གསུམ་དགྲ་འདུལ་སྲིད་རྩེར་བསྒྲེང་བ། ལྷ་རྟ་རྐྱང་རྒོད་འཕེལ་པོ་རླུང་ལྟར་འཕྱོ་བ་ལ་རྟ་གཟར་སྨེ་བ་དགུ་ལིང་དང་། གསེར་སྒ་ཉི་མ་རང་ཤར། གསེར་སྲབ། གཡུ་མཐུར་ནོར་བུ་དུ་མའི་རྒྱན་གྱིས་སྤྲས་པ་ལ་ཆིབས་པ། འཁོར་དུ་ཕུ་ནུ་སུམ་ཅུའི་དམག་ཚོགས་རྣམས་དང་། མོ་སྨན་སུམ་བཅུ་ལ་སོགས་པས་བསྐོར་བ། ཝེར་མ་དགྲ་ལྷའི་དམག་དཔུང་ཉི་ཟེར་གྱི་རྡུལ་ལྟར་འཚུབས་ཤིང་། བྱ་ཁྲ་བྱ་རོག་ལ་སོགས་པ་འཕུར་ཞིང་འཇུམ་པ་དང་། སྟག་གཟིག་གཅན་གཟན་གྱི་ཚོགས་ངར་སྒྲ་སྒྲོག་པ། གཞན་ཡང་ལྷ་དམག །ཀླུ་དམག །གཉན་དམག །བཙན་དམག །བདུད་དམག་ལ་སོགས་པ་འཁོར་ཚོགས་བསམ་གྱིས་མི་
ཁྱབ་པས་བསྐོར་བ་གསལ་ཞིང་། རང་ཡི་དམ་དུ་གསལ་བའི་སྙིང་གའི་འོད་ཟེར་གྱིས་རང་བཞིན་གྱི་གནས་ནས། དགྲ་བླ་ཆེན་པོ་སེང་ཆེན་ནོར་བུ་དགྲ་འདུལ་འཁོར་དང་བཅས་པ་སྐད་ཅིག་གིས་གནས་འདིར་སྤྱན་དྲངས་པར་གྱུར། །དེ་ནས་རོལ་མོ་དབྱངས་དང་བཅས་པས་འདི་སྐད་དོ།། ཀྱཻ། ཛམ་གླིང་ལྷོ་ཕྱོགས་ཁ་བ་ཅན། །གདོང་དམར་བོད་ཡུལ་ཤར་གྱི་ཕྱོགས། །གསེར་ལྡན་ཆུ་བོའི་གཡས་ཕྱོགས་ན། །མཐོང་བ་ཀུན་སྨོན་ཞེས་གྲགས་པའི། །ངོ་མཚར་ཡུལ་ལྗོངས་ཉམས་དགའ་བ། །དེ་ན་ཛམ་གླིང་བོད་ཀྱི་ལྷ། །རྒྱ་བོད་ཡོངས་ཀྱི་དགྲ་ལྷ་ཆེ། །སེང་ཆེན་ནོར་བུ་དགྲ་འདུལ་ནི། །སྐུ་མདོག་དཀར་སྨུག་མཛེས་པའི་གཟུགས། །དབུ་རྨོག་རྒྱལ་བའི་ཐོད་དཀར་ལ། །དར་འཕྲུ་རྒོད་སྒྲོ་རླུང་ལྟར་འཚུབས། །མི་ཤིགས་རྡོ་རྗེའི་གོ་ཁྲབ་ནི། །ཟིལ་པའི་ཐོག་རྡུག་སྐུ་ལ་གསོལ། །ཕྱག་གཡས་ཡིད་བཞིན་ནོར་བུ་ཡི། །ཕྱག་ལྕག་བསམ་པའི་དོན་འགྲུབ་ཕྱར། །གཡོན་པར་
ཁམས་གསུམ་དགྲ་འདུལ་གྱི། །མདུང་དར་སྲིད་པའི་རྩེ་མོར་སྒྲེངས། །གཡས་ཀྱི་སྟག་གདོང་ཁྲ་བོའི་ནང་། །ཨ་གར་དུང་གི་ལེབ་ཆེན་སོགས། །མདའ་མོ་རྐན་སྒྲ་ཐགས་སེ་ཐག །གཡོན་གྱི་གཞུ་ཤུབ་ཐིག་ལེའི་ནང་། །གཞུ་མོ་རྭ་རྒོད་འཁྱིལ་པ་མཛེས། །གནམ་ལྕགས་རལ་གྲི་རྣོ་ངར་ཅན། །བཏབ་པ་ལན་མེད་ཤུབ་ནས་དཔག །ལྷ་རྟ་རྡོ་རྗེ་རྐྱང་སྐྱེད་ལ། །གསེར་སྒ་གཡུ་མཐུར་ལ་སོགས་པ། །རྒྱན་གྱིས་སྤྲས་པ་དག་ལ་ཆིབས། །དགྲ་ལྷའི་ཚོགས་རྣམས་སྤྲིན་ལྟར་གཏིབས། །ཝེར་མའི་དམག་དཔུང་རླུང་ལྟར་འཚུབས། །གནས་འདིར་མཆོད་ཕྱིར་སྤྱན་འདྲེན་ན། །སྐད་ཅིག་ཉིད་ལ་འདིར་བྱོན་ཅིག །སྟེང་ཕྱོགས་ལྷ་དང་བར་ཕྱོགས་གཉན། །འོག་ཕྱོགས་ཀླུ་ཡི་དམག་དཔུང་དང་། །གེར་མཛོ་གཉན་པོ་ལ་སོགས་པ། །གནས་འདིར་སྤྱན་འདྲེན་གཤེགས་སུ་གསོལ། །ནག་ཕྱོགས་བདུད་སྡེའི་དཔུང་འཇོམས་ཞིང་། །སྡང་དགྲ་བརླག་པའི་གཤེད་མ་ཆེ། །ཕུ་ནུ་
སུམ་བཅུའི་དམག་དཔུང་རྣམས། །གནས་འདིར་སྤྱན་འདྲེན་གཤེགས་སུ་གསོལ། །མཁའ་འགྲོ་ཡོངས་ཀྱི་དབང་མོ་ཆེ། །ནེ་ནེ་གནམ་སྨན་དཀར་མོ་དང་། །མོ་སྨན་སུམ་ཅུ་ལ་སོགས་པ། །གནས་འདིར་སྤྱན་འདྲེན་གཤེགས་སུ་གསོལ། །གཞན་ཡང་དགྲ་ལྷ་ཡོངས་ཀྱི་གཙོ། །རྡོ་རྗེ་ལེགས་པ་ལ་སོགས་པ། །བོད་ཀྱི་གཞི་བདག་ཐམས་ཅད་ཀུན། །གནས་འདིར་སྤྱན་འདྲེན་གཤེགས་སུ་གསོལ། །འདིར་གཤེགས་དགྱེས་པའི་གདན་ལ་བཞུགས། །ཉེར་སྤྱོད་ཕྱི་ནང་མཆོད་རྫས་སོགས། །བསམ་གྱིས་མི་ཁྱབ་འབུལ་ལགས་ན། །དགྱེས་བཞེས་བཅོལ་བའི་ཕྲིན་ལས་མཛོད། །ཀྱཻ། ཁྱེད་རྣམས་མཆོད་པའི་དམ་རྫས་ནི། །མཛེས་པའི་གཟུགས་དང་སྙན་པའི་སྒྲ། །རྩི་སྨན་འབྲུ་སྣ་དར་ཟབ་གོས། །དྲི་ཞིམ་སྤོས་ཀྱི་དུད་པ་དང་། །ཕྱེ་མར་ཟས་ཕུད་སྐྱེམས་ཀྱིས་མཆོད། །སྲ་བའི་གོ་དང་རྣོ་བའི་མཚོན། །རྟ་ནོར་རྐང་བཞིའི་ཚོགས་རྣམས་དང་། །སྟག་གཟིག་
གཅན་གཟན་བྱ་རོག་སོགས། །སྲིད་ན་ཡོད་དགུའི་ཚོགས་རྣམས་འབུལ། །གཞན་ཡང་བསང་ཞིང་མཆོད་པའི་རྫས། །ཀུན་བཟང་སྨོན་ལམ་ལྷ་བུ་ཡི། །ཛམ་གླིང་དགྲ་ལྷའི་དམག་ཚོགས་མཆོད། །ཐུགས་དམ་གཉན་པོ་སྐོང་གྱུར་ཅིག །ཀྱཻ། སེང་ཆེན་ནོར་བུ་དགྲ་འདུལ་ནི། །མཛེས་པའི་མི་ཕོ་གཟི་མདངས་ཅན། །ཁྲབ་རྨོག་དཔའ་བའི་ཆས་ལྡན་ཞིང་། །དགྲ་ལྷའི་ཚེ་མདུད་སྤུངས་སེ་སྤུངས། །ལྷ་རྟ་རྐྱང་རྒོད་འཕེལ་པོ་ནི། །མགྱོགས་པའི་བང་འགྲོས་རླུང་ལྟར་འཕྱོ། །ཝེར་མའི་ཚོགས་རྣམས་སྤྲིན་ལྟར་གཏིབས། །ཕུ་ནུ་སུམ་ཅུའི་དམག་དཔུང་དང་། །གཞན་ཡང་གདོང་འབྲུ་ལྒ་སོགས་ཀྱི། །དགྲ་ལྷའི་ཚོགས་རྣམས་ཐམས་ཅད་ལ། །དངོས་འབྱོར་ཡིད་སྤྲུལ་མཆོད་རྫས་དང་། །བསང་མཆོད་གསེར་སྐྱེམས་དམ་པ་འབུལ། །མ་ཚང་མེད་པའི་མཆོད་པ་འདི། །དགྱེས་བཞེས་ཐུགས་དམ་གཉན་བསྐང་སྟེ། །བཅོལ་བའི་ཕྲིན་ལས་སྒྲུབ་པར་མཛོད། །ཀྱཻ། རྨོག་དཀར་
དར་འཕྲུས་བརྒྱན་པ་དང་། །སྲ་ཞིང་བཙན་པ་རྡོ་རྗེའི་ཁྲབ། །ལྷ་མདའ་དར་དཀར་བརྒྱན་པ་འདི། །ཛམ་གླིང་དགྲ་ལྷའི་རྟེན་དུ་འཛུག །རྣོ་ངར་ཕུན་སུམ་ཚོགས་པའི་གྲི། །རབ་ཏུ་འབིག་བྱེད་མདུང་དར་དང་། །གནམ་ལྕགས་འཕྲུལ་གྱི་ཐོག་མདའ་འདི། །ཛམ་གླིང་དགྲ་ལྷའི་རྟེན་དུ་འཛུག །འཇའ་རིས་ཕུབ་ཆུང་དགྲ་སྟ་དང་། །བདུད་ཞགས་དགྲ་ཟོར་ཆུ་གྲི་སོགས། །མཚོན་ཆའི་རིགས་གྱུར་ཐམས་ཅད་ཀུན། །ཛམ་གླིང་དགྲ་ལྷའི་རྟེན་དུ་འཛུག །ཅང་ཤེས་རླུང་གི་འཁོར་ལོ་ཅན། །སྤུ་ཞོལ་རབ་བརྗིད་གཡག་ཆེན་དང་། །ར་སྐྱེས་གཡང་དཀར་ལ་སོགས་པ། །ཛམ་གླིང་དགྲ་ལྷའི་རྟེན་དུ་འཛུག །རྟེན་རྫས་རྣམས་ལ་རྟག་བཞུགས་ལ། །མགོན་སྐྱབས་རྒྱབ་རྟེན་དཔུང་རོགས་མཛོད། །ཕ་རོལ་དམག་དང་ཇག་རྐུན་སོགས། །ཐམས་ཅད་གཞོམས་པའི་ཕྲིན་ལས་མཛོད།། ཀྱཻ། ལྷ་ལམ་ཡངས་པོར་སྣང་བྱེད་སྒྲོན་མེ་ཟུང་། །འོད་ཟེར་སྟོང་གི་ཕྲེང་བ་ཆེར་སྤྲོས་
པས། །སྨག་རུམ་རིང་དུ་བསྲིང་བ་ཇི་བཞིན་དུ། །ཛམ་གླིང་དགྲ་ལྷའི་དབུ་འཕང་དགུང་དུ་བསྟོད། །འདོད་རྒུའི་ཆར་འབེབས་དཔག་བསམ་ལྗོན་ཤིང་ལ། །ལོ་འདབ་ཆེར་རྒྱས་འབྲས་བཟང་རབ་སྨིན་ནས། །སྐྱེ་རྒུ་རྣམས་ལ་ལོངས་སྤྱོད་སྟེར་བ་བཞིན། །ཛམ་གླིང་དགྲ་ལྷའི་དབུ་འཕང་དགུང་དུ་བསྟོད། །གཏིང་བྲལ་ཆུ་སྲིན་འབྱུང་གནས་ཡངས་པ་ལས། །དགོས་འདོད་ནོར་བུའི་ཚོགས་རྣམས་ཡོངས་སྤེལ་བས། །འགྲོ་བ་དབུལ་བའི་དགྲ་ལས་རྒྱལ་བ་ལྟར། །ཛམ་གླིང་དགྲ་ལྷའི་དབུ་འཕང་དགུང་དུ་བསྟོད། །བསིལ་བ་ལྡན་པ་གངས་ཀྱི་ལྷུན་པོ་ལ། །རབ་བརྗིད་གདོང་ལྔའི་དབང་པོ་འགྱིང་ནས་སུ། །ལོག་རྟོག་རི་དྭགས་ཟིལ་གྱིས་གནོན་པ་ལྟར། །ཛམ་གླིང་དགྲ་ལྷའི་དབུ་འཕང་དགུང་དུ་བསྟོད། །ཕྱོགས་ལས་རྣམ་པར་རྒྱལ་བའི་རྒྱལ་མཚན་རྩེར། །ཡིད་བཞིན་ནོར་བུས་སྤྲས་པ་སྲིད་རྩེའི་བླར། །མངོན་པར་འཕགས་པའི་དགེ་ལེགས་དམ་པ་འདི། །ཛམ་གླིང་
དགྲ་ལྷའི་ངོ་སོ་དགུང་དུ་བསྟོད། །དེ་ནས་གཏོར་མ་འབུལ་བ་ནི། ཀྱཻ། དཔལ་གྱི་གཏོར་མ་བརྗིད་ལྡན་འདི། །རི་རབ་ལྟ་བུར་དཔང་མཐོ་ཞིང་། །སྣང་བྱེད་ཟུང་ལྟར་བཀྲག་མདངས་ལྡན། །རྒྱ་ཆེན་ལྷུན་སྡུག་མཆོད་གཏོར་འདིས། །ཛམ་གླིང་དགྲ་ལྷའི་དམག་ཚོགས་རྣམས། །ཐུགས་དམ་གཉན་པོ་དགྱེས་བསྐང་སྟེ། །དཀོན་མཆོག་གསུམ་གྱི་དབུ་འཕང་བསྟོད། །སངས་རྒྱས་བསྟན་དང་ཁྱད་པར་དུ། །བསྒྲུབ་བརྒྱུད་བསྟན་པ་རིན་ཆེན་འདི། །རྒྱ་མཚོའི་གོས་ཅན་མཐར་ཁྱབ་ཅིང་། །བསྟན་འཛིན་སྐྱེས་བུ་དམ་པ་རྣམས། །སྐུ་ཚེ་བརྟན་ཅིང་མཛད་ཕྲིན་རྒྱས། །དགེ་འདུན་འདུས་པའི་སྡེ་རྣམས་དར། །ཁྲིམས་གཙང་ཐོས་བསམ་སྒོམ་པ་འཕེལ། །བདག་ཅག་ཡོན་མཆོད་འཁོར་བཅས་རྣམས། །ཚེ་བསོད་དཔལ་དང་འབྱོར་བ་རྒྱས། །དགྲ་ཇག་ཆོམ་རྐུན་འཇིགས་ལས་སྐྱོབས། །མི་རྣམས་དཔའ་ཞིང་རྟ་རྣམས་མགྱོགས། །ཕ་རོལ་དགྲ་ཡི་གཡུལ་ངོ་ལས། །རྣམ་པར་རྒྱལ་
ཞིང་བསམ་དོན་འགྲུབ། །སྙིང་པོའི་བསྟན་དང་དམ་ཆོས་ལ། །ལོག་པར་འཁུ་བའི་བདུད་སྡེའི་དཔུང་། །སྐད་ཅིག་ཕྱེ་མར་བརླག་པར་མཛོད། །དམ་ཉམས་ཆོས་མིན་སྤྱོད་བྱེད་ཅིང་། །དམ་སྲི་འགོང་པོས་རྒྱུད་བརླམ་པའི། །བསྟན་བཤིགས་རྣམས་ཀྱི་བླ་ཚེ་བསྐུམ། །རྒྱལ་ཁམས་ཀུན་ཏུ་ལོ་ལེགས་ཤིང་། །མཐའ་དམག་དུས་འཁྲུགས་ཐམས་ཅད་བཟློག །ཆར་ཆུ་དུས་འབབ་འབྲས་བཟང་སྨིན། །བཙའ་སད་སེར་གསུམ་ལ་སོགས་པ། །ཐམས་ཅད་ཀུན་ཞི་བདེ་སྐྱིད་ལྡན། །རྐང་བཞིའི་ཕྱུགས་རྣམས་གོད་ལས་གྲོལ། །རྫོགས་ལྡན་ལང་ཚོ་གསར་དུ་ངོམས། །བདེ་ལེགས་ཕུན་སུམ་ཚོགས་གྱུར་ཅིག །ཅེས་གཏོར་མ་གསེར་སྐྱེམས་ནམ་མཁར་མཆོད། དེ་ནས་གཡང་ལེན་བྱ་བ་ནི། ཀྱཻ། བཀའ་བརྒྱུད་བླ་མའི་བྱིན་བརླབས་དེ། །ཁུ་ཡེ་ཕྱྭ་དང་གཡང་དུ་ལེན། །ཡི་དམ་ལྷ་ཡི་དངོས་གྲུབ་དེ། །ཁུ་ཡེ་ཕྱྭ་དང་གཡང་དུ་ལེན། །ཆོས་སྐྱོང་སྲུང་མའི་དྲག་རྩལ་དེ། །ཁུ་ཡེ་ཕྱྭ་དང་གཡང་དུ་ལེན། །
ནོར་སྦྱིན་ལྷ་ཡི་ནོར་གཡང་དེ། །ཁུ་ཡེ་ཕྱྭ་དང་གཡང་དུ་ལེན། །གླིང་བཞིའི་བདེ་སྐྱིད་ཟས་ནོར་ཀུན། །ཁུ་ཡེ་ཕྱྭ་དང་གཡང་དུ་ལེན། །བདག་ཅག་ཡོན་མཆོད་འཁོར་བཅས་རྣམས། །ཚེ་རིང་ནད་མེད་ལོངས་སྤྱོད་འཕེལ། །སྙན་གྲགས་ནམ་མཁའི་མཐར་ཁྱབ་ཅིང་། །བཀྲ་ཤིས་བདེ་ལེགས་ཉིད་གྱུར་ཅིག །དེ་ལྟར་ཛམ་གླིང་རྒྱལ་པོའི་བསང་མཆོད་དགྲ་ལྷའི་དཔང་བསྟོད་དང་བཅས་པ་འདིའང་སྒྲུབ་བརྒྱུད་བསྟན་པའི་ཉི་མ་ཆགས་མེད་མཆོག་སྤྲུལ་རིན་པོ་ཆེའི་གསུང་གི་བསྐུལ་བ་དང་། རང་ཉིད་ཀྱི་དབོན་མགྲོན་གཉེར་ཀརྨ་ཆོས་འཕགས་ནས་ཀྱང་འདི་ལྟར་བགྱི་དགོས་ཞེས་བསྐུལ་བར་བསྟེན། ཀརྨ་པ་བཅུ་བཞི་པས་ཛམ་གླིང་སྐྱེས་བུ་འཁྲུངས་པའི་ཡུལ། ཚབ་ཚ་ཆོས་འཁོར་རྣམ་རྒྱལ་གླིང་གི་ཉེ་ཆར་བྲིས་པ་བཀྲ་ཤིས། འཁྲུངས་ལྷའི་བསང་གསོལ་ནི། ཨོཾ་སྭ་སྟི། །འཇིག་རྟེན་རྣམ་པར་འདྲེན་མཆོག །རྒྱལ་དབང་སྐྱེས་རབ་རིམ་པར་བྱོན་པའི་ཡབ་མེས་ཀྱི་སྐུ་ལྷ་རྣམས་དགྱེས་པ་བསྐྱེད་པའི་མཆོད་སྤྲིན་མདོར་བསྡུས་སྤྲོ་ན། རིན་ཆེན་སྣོད་དུ་གཏོར་མཆོད་གསེར་སྐྱེམས་དྲི་བཟང་ཤིང་གི་སྤོས་དུད་སོགས་མཁོ་བའི་ཡོ་བྱད་འདུ་བྱས་ལ། ཆོས་སྐྱོང་གཞན་རྣམས་ཀྱི་བསང་མཆོད་དང་འབྲེལ་བའམ། འདི་ཉིད་སྒེར་དུ་སྤྲོ་
ནའང་ཆོག་ལ། གང་ལྟར་ཡང་བདག་ཉིད་གུ་རུ་པདྨ་སྣང་སྲིད་ཟིལ་གནོན་གྱི་ང་རྒྱལ་དང་ལྡན་པས། མཆོད་རྫས་རྣམས་རཾ་ཡཾ་ཁཾ་གིས་བསང་། སྭ་བྷཱ་ཝས་སྦྱངས། སྟོང་ལས་རིན་ཆེན་སྣོད་ཡངས་པར། །མཁོ་རྒུ་འཇོ་བའི་འདོད་ཡོན་གྱི། །གཏོར་མཆོད་སྤྱན་གཟིགས་ནམ་མཁའི་མཛོད། །སོ་སོར་དགྱེས་པ་བསྐྱེད་ནུས་གྱུར། །ཨོཾ་བཛྲ་སྥ་ར་ཎ་ཁཾ་གིས་བརླབ། རྔ་རོལ་དབྱངས་དང་བཅས་པས་གྱེར་སྒོམ་ལྷན་ཅིག་པར། ཀྱཻ། ཡེ་གྲོལ་ཀ་དག་གདོད་མའི་ཀློང་ཡངས་ནས། །སྐུ་གསུམ་བརྒྱུད་པ་དྲུག་ལྡན་རྩ་བརྒྱུད་ཀྱི། །དཔལ་ལྡན་བླ་མ་རྒྱལ་བ་སྲས་དང་བཅས། །དད་གུས་མོས་པས་སྤྱན་འདྲེན་གནས་འདིར་གཤེགས། །ཞི་ཆགས་སྒྱུ་འཕྲུལ་ཉམས་བརྒྱའི་འཇོ་སྒེག་ལས། །དངོས་གྲུབ་མཆོག་སྩོལ་ཐེག་དགུའི་ཡི་དམ་ལྷ། །དཔའ་བོ་རྣལ་འབྱོར་མ་སྲིང་མཁའ་འགྲོའི་ཚོགས། །དམ་ཚིག་གཙང་མའི་གནས་འདིར་སྤྱན་འདྲེན་གཤེགས། །རྒྱལ་བའི་བསྟན་སྲུང་རྣལ་འབྱོར་སྲོག་གི་ལྷ། །མ་ཧཱ་ཀཱ་ལ་ལྕམ་དྲལ་བཀའ་འཁོར་བཅས། །དབང་ཕྱུག་
དཔལ་ལྡན་དུད་པའི་སོལ་བ་མ། །འཁོར་བཅས་མཆོད་པའི་གནས་འདིར་སྤྱན་འདྲེན་གཤེགས། །ཁྱད་པར་འཇིག་རྟེན་དབང་ཕྱུག་སྤྱན་རས་གཟིགས། །རྒྱལ་བ་རྣམས་ཀྱི་ཕྲིན་ལས་གཅིག་བསྡུས་མགོན། །བསྟན་པ་མཆོག་དང་འགྲོ་བའི་དཔལ་མགོན་དུ། །བསམ་བཞིན་མཆོག་གི་སྤྲུལ་པའི་ཟློས་གར་གྱི། །རོལ་པའི་སྐྱེས་རབས་རིམ་པར་བྱོན་པ་ཡི། །སྐུ་ལྷ་རིགས་ཆོས་དམ་ཚིག་གིས་འབྲེལ་བའི། །ཡེ་ཤེས་ལས་དང་འཇིག་རྟེན་ཚུལ་སྟོན་པའི། །བརྒྱུད་གསུམ་ཆོས་སྐྱོང་ཡུལ་གཞིའི་གནས་ཀྱི་བདག །སྲིད་པ་རྒྱུད་ལས་གྲོལ་བའི་ལྷ་རབ་དང་། །མིའུ་གདུང་དྲུག་ཕ་ཚུན་དགྲ་བླའི་ཚོགས། །འགོ་བའི་ལྷ་ལྔ་སྐྱོབ་པའི་ལྷ་དགུ་དང་། །ལས་ལས་གྲུབ་པའི་འབྱུང་པོ་མཐུ་བོ་ཆེ། །རྒྱལ་བློན་བྲན་གཡོག་ཡང་འཁོལ་གཉེན་སྡེར་བཅས། །འབོད་པའི་གནས་འདིར་བྱོན་ལ་དགྱེས་མཆོད་བཞེས། །ཕྲིན་ལས་རྒྱ་མཚོ་མ་ལུས་བསྒྲུབ་ཏུ་གསོལ། །དབང་ཆེན་གསུང་
སྤྲུལ་ཐེག་མཆོག་རྡོ་རྗེ་ཡི། །མགུལ་ལྷ་དགྲ་སྡེ་འཇོམས་པའི་མཐུ་རྩལ་ཅན། །སྦྲག་བཙན་དབྱི་རྒྱལ་དཔལ་ལྡན་ཤེས་རབ་དང་། །རྡོ་རྗེ་སྨན་དཔལ་གཙང་སྨེ་ནག་ཕྱི་སོགས། །རྣལ་འབྱོར་མཆོད་པའི་གནས་འདིར་སྤྱན་འདྲེན་གཤེགས། །དཔལ་ལྡན་མཁའ་ཁྱབ་རྟག་པའི་རྡོ་རྗེ་ཆེའི། །རྒྱུད་བསྲུང་མ་ཅིག་རྡོ་རྗེ་རབ་བརྟན་མ། །སྐུ་ལྷ་ཧ་བོ་གངས་བཟང་སྲས་བློན་འཁོར། །ཤེལ་གིང་དཀར་པོ་ཙིའུ་དམར་པོར་བཅས། །མཆོད་པའི་གནས་འདིར་དགྱེས་པར་གཤེགས་སུ་གསོལ། །སླད་མར་ཁ་འགེངས་དགོས་རིགས་འདིར་འཛུག རང་བྱུང་ལྷན་སྐྱེས་རིག་པའི་རྡོ་རྗེ་ཡི། །མགུར་ལྷ་གནས་མཆོག་རྩེ་མཐོ་པདྨ་རི། །ཡུལ་སྐྱོངས་དགེ་བསྙེན་པདྨ་མཆོག་རབ་རྩལ། །མདུན་འཁོར་དཔལ་གྱི་བཀོད་ལྡན་སེང་གེ་གྲགས། །གནས་བདག་ཞོ་རོ་བོན་ཆུང་འཁོར་དང་བཅས། །མ་གཟའ་དམ་ཅན་གནོད་སྦྱིན་འཁོལ་པོ་དང་། །ཁྱད་པར་ལྷ་བཙན་རྡོ་རྗེ་ཐོགས་རྒོད་བཅས། །མཆོད་པའི་
གནས་འདིར་དགྱེས་པར་གཤེགས་སུ་གསོལ། །ཨོ་རྒྱན་འགྲོ་འདུལ་འཕྲིན་ལས་རྡོ་རྗེ་ཡི། །རྣལ་འབྱོར་དགྲ་ལྷ་རྡོ་རྗེ་འབར་བ་རྩལ། །བདུད་འདུལ་དམ་ཅན་ཡེ་བརྫུ་ཆེད་སྡེ་སྔ། །མཐུ་ལྡན་འཁོར་ཚོགས་སུམ་རྒྱ་དྲུག་ཅུ་དང་། །གདོང་སྨུག་སྤུན་དགུ་བཀའ་སྡོད་ཕོ་ཉ་ཞི། །ཀླུ་རྒྱལ་རྡོ་རྗེ་གུར་དང་ངལ་སོས་པོ། །གངས་དཀར་མཆེ་བརྒྱེད་འཇོག་རྩན་ལྷ་བྲག་དཀར། །ཞི་བ་རྒྱལ་མཚན་འཁོར་བཅས་གཤེགས་སུ་གསོལ། །སོ་སོར་མཐུན་པའི་གཞལ་མེད་ཁང་བཟང་དང་། རིན་ཆེན་ཁྲི་གདན་བཀོད་ལེགས་མཛེས་པའི་དབུས། །དགྱེས་པའི་ཞལ་འཛུམ་ཟླ་བ་ཚེས་པ་བཞིན། །རྣལ་འབྱོར་ཕྲིན་ལས་སྒྲུབ་ཕྱིར་བཞུགས་སུ་གསོལ། །མཆོད་པ་ནི། ཀྱཻ། ཡིད་འོང་དྭངས་བསིལ་མཆོད་ཡོན་ཡན་ལག་བརྒྱད། །ག་བུར་དྲི་བསུང་བཟང་འཕྲོའི་བདུག་པའི་སྤྲིན། །སྣ་ཚོགས་བཀོད་མཛེས་འདབ་བརྒྱའི་མཚར་སྡུག་བཀྲ། །མེ་ཤེལ་ཆུ་ཤེལ་མདངས་གསལ་མར་མེའི་
ཕྲེང་། །གུར་གུམ་ཙན་དན་དང་སྦྱར་དྲི་ཡི་ཆབ། །བདའ་དགུའི་ཞལ་ཟས་ལྗགས་ཀྱི་བདུད་རྩིར་བྱེད། །ཆ་ལང་རྔ་ཤང་རོལ་མོའི་སྙན་འཇེབ་བཅས། །ཁྱད་པར་རྨད་བྱུང་རྩ་བརྒྱད་ཡན་ལག་སྟོང་། །འབྲུ་བཅུད་ཉིད་ཁུར་སྦྱར་བའི་གསེར་གཡུའི་སྐྱེམས། །རིན་ཆེན་སྣོད་བཟང་དུ་མ་གཏམས་པའི་མཚོར། །ནད་བརྒྱ་སེལ་བའི་ལྦུ་ཕྲེང་གཡོ་བས་མཆོད། །སྣང་བ་སྣོད་ཀྱི་འཇིག་རྟེན་གཏོར་གཞོང་དུ། །སྲིད་གསུམ་བཀོད་པའི་གཏེར་ཆེན་རྔམས་བརྗིད་ལྡན། །བཟའ་བཅའི་བྱེ་བྲག་ཤ་སྣ་སྙིང་སྣ་དང་། །ལ་ཕུག་སྒོག་ཙོང་ཤིང་ཏོག་སྣ་ཚོགས་སྤུངས། །བཅུད་ལྡན་དཀར་དམར་ཐབས་ཤེས་རོལ་པའི་རྫས། །མྱང་བས་ཟག་མེད་བདེ་སྐྱེད་འབྱོར་དགུའི་དཔྱིད། །ཆགས་མེད་ཆགས་བྲལ་ཁམས་གསུམ་ཆགས་པའི་ཁྲག །དམར་གྱི་ཨཱརྒྷཾ་མཉེས་པའི་རྫས་སུ་འབུལ། །མཚར་སྡུག་འཇོ་སྒེག་ཉམས་འགྱུར་བྱེ་བ་ཡིས། །སྲིད་གསུམ་ཡི་ག་འགུགས་པའི་ལུས་ཕྲ་མ། །རིན་
ཆེན་དར་ཟབ་རྒྱན་མཛེས་སྒྱུ་རྩལ་མཁན། །མགྲིན་པའི་དབྱངས་བདུན་སྙན་འགྱུར་ལྡན་པ་དང་། །དཔའ་བའི་གོ་ལྡན་གསེར་གྱི་ཡ་ལད་ཅན། །རལ་གྲི་མདའ་གཞུ་དགྲ་སྟྭ་མདུང་རིང་སོགས། །དཔའ་རྟགས་སྣ་དགུས་དགྲ་དཔུང་འཇོམས་བྱེད་པའི། །དཔའ་བོ་འབུམ་ཕྲག་བསྭོ་སྒྲ་སྒྲོགས་པས་མཆོད། །སྣ་ཚོགས་སྤུ་སྡུག་ལྡན་པའི་ཅང་ཤེས་ཁྱུ། །རིན་ཆེན་སྒ་སྲབ་བརྒྱན་པ་ཁྲི་ཕྲག་དང་། །ཐེག་ཆེན་དྲེའུ་རྟ་ནོར་བུའི་ཐག་ཆས་ཅན། །སྲིད་གསུམ་སྐད་ཅིག་ཉུལ་བའི་ཤུག་ལྡན་འབུམ། །མར་རྒད་རུ་རྣོན་ཟུང་གིས་མཛེས་པ་ལ། །ཆུ་འཛིན་སྟུག་པོ་སྤུངས་འདྲའི་ཞོལ་ལྡན་པ། །གནམ་ལྕགས་རྨིག་བཞིས་ས་གསུམ་གཡོ་བྱེད་པའི། །འབྲོང་གཡག་བྱེ་བ་འབུམ་ནི་ངུར་སྒྲ་ལྡིར། །ཤེལ་དུམ་རྒྱུ་བ་དང་འདྲའི་གཡང་དཀར་ཁྱུ། །གཡས་སུ་འཁྱིལ་བའི་གཡུ་ཡི་རྭ་ལྡན་པའི། །ཤུགས་རྩལ་སྟོབས་ལྡན་རྭ་སྐྱེས་སྣ་ཚོགས་དང་། །ནོར་སྲུང་གཏུམ་པོའི་ཚོགས་ཀྱང་ངར་
སྐད་སྒྲོག །གཞན་ཡང་ལྷ་ཀླུ་མི་ཡི་ནོར་བུའི་རིགས། །དབང་གཞུ་ཐགས་སུ་བྲན་འདྲའི་གོས་བཟང་དང་། །རིན་ཆེན་སྣ་ཚོགས་རྒྱན་ཕྲེང་ཚར་དུ་དངར། །མཁོ་རྒུའི་འདོད་འཇོ་གཏེར་གྱི་བུམ་པ་བཟང་། །སྲིད་ན་མཚར་རྒུའི་བདོགས་པ་མ་ཚང་མེད། །ནམ་མཁའ་མཛོད་བཞིན་ཡུལ་འདིས་སྐུ་ལྷ་རྣམས། །དགྱེས་པའི་དཔལ་བསྐྱེད་སྔར་མཛད་ལེགས་པའི་སྐྱེས། །ཕྱི་བཅོལ་ཕྲིན་ལས་སྒྲུབ་པའི་རྟེན་དུ་འབུལ། །ཨོཾ་ཤྲཱི་མཱ་ན་གུ་རུ་དེ་ཝ་ཌཱ་ཀི་ནི་མ་ཧཱ་ཀཱ་ལ་ཀཱ་ལི་མ་ཧཱ་དེ་ཝ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། །ཞེས་ལན་བདུན་ནམ། །གསུམ་བརྗོད། སླར་ཡང་མངའ་གསོལ་ཞིང་ཕྲིན་ལས་བཅོལ་བ་ནི། ཀྱཻ། སྲིད་པ་གསུམ་ན་ཆེ་བའི་ལྷ་ཀླུ་མིའི། །དབང་པོ་སྟོང་གི་ནོར་བུའི་དོ་ཀེར་གྱིས། །ཞབས་མཐིལ་པདྨའི་འདབ་བརྒྱ་གཙང་བྱས་པ། །རྩ་གསུམ་རྒྱལ་བའི་དབུ་འཕང་དགུང་དུ་བསྟོད། །དད་གསུམ་བློ་གྲོས་འཛིན་མར་བྱང་ཆུབ་ཀྱི། །དཔག་བསམ་ཆེར་རྒྱས་སོ་བདུན་ཡལ་གས་ཕྱུག །
འབྲས་སྨིན་བྱེ་བའི་མེ་ཏོག་བཞད་པའི་རྩེར། །ས་ལམ་འབྲས་བཟང་སྨིན་འདིས་མངའ་གསོལ་ལོ། །རྒྱལ་བའི་བཀའ་ཉན་སངས་རྒྱས་བསྟན་པ་བསྲུངས། །ལུང་རྟོག་མཛོད་སྒོ་བྱེ་བའི་གཉེར་ཁ་འཛིན། །ཆོས་སྤྱོད་རྣལ་འབྱོར་སྲོག་ལྷ་དམ་ཚིག་ཅན། །བཀའ་འཁོར་རྒྱ་མཚོའི་དབུ་འཕང་སྲིད་རྩེར་བསྟོད། །འགྱུར་མེད་དམ་ཚིག་གཙང་མའི་ས་གཞིའི་དབུས། །ཚད་མེད་བང་རིམ་བཞི་ལྡན་སྐུ་བཞི་ཡི། །རིན་ཆེན་ལྷུན་པོ་ཐབས་ཤེས་ཉི་ཟླའི་རྒྱན། །སྲིད་ཞིའི་ཡོན་ཏན་མཛད་མེད་དཀོར་ཆས་བརྗིད། །དངོས་འབྱོར་ཡིད་སྤྲུལ་འདོད་ཡོན་རྒྱ་མཚོ་ཡིས། །དཀོན་མཆོག་རྩ་གསུམ་རྒྱ་མཚོ་མངའ་གསོལ་ལོ། །དཔལ་ཆེན་ནག་པོ་ལྕམ་དྲལ་མངའ་གསོལ་ལོ། །མ་སྲིང་མཁའ་འགྲོའི་དབང་མོ་མངའ་གསོལ་ལོ། །དཔལ་ལྡན་བླ་མའི་ཆོ་རིགས་རྒྱུད་བསྲུང་བའི། །སྲིད་པ་རྒྱུད་ཀྱི་ལྷ་རྣམས་མངའ་གསོལ་ལོ། །དྲེགས་པ་སྡེ་བརྒྱད་ཐམས་ཅད་མངའ་གསོལ་ལོ། །
འབྱུང་པོ་མཐུ་ཆེན་ཚོགས་རྣམས་མངའ་གསོལ་ལོ། །ཕ་ལྷ་མ་ལྷ་སྲོག་ལྷ་མངའ་གསོལ་ལོ། །ཞང་ལྷ་མགྲོན་ལྷ་ལམ་ལྷ་མངའ་གསོལ་ལོ། །ཕན་ཚུན་དགྲ་ལྷ་ཝེར་མ་མངའ་གསོལ་ལོ། །མཆོད་འོས་མགྲོན་ཀུན་མཉེས་ཤིང་ཚིམས་གྱུར་ཅིག །དེ་ལྟར་མཆོད་ཅིང་བསྟོད་ནས་འདོད་པའི་དོན། །ལས་སུ་བཅོལ་བའི་ཐ་ཚིག་འདི་དགོངས་ཤིག །ངེས་གསང་བསྟན་པ་སྤྱི་དང་སྒྲུབ་བརྒྱུད་བསྟན། །བསྟན་འཛིན་སྐྱེས་བུ་ཀུན་དང་ཁྱད་པར་དུ། །རྒྱལ་དབང་ཀརྨ་པ་ཡི་སྐུ་ཚེ་དང་། །མཛད་ཕྲིན་ཆོས་སྲིད་དབྱར་གྱི་དཔལ་འབྱོར་འཕེལ། །འགལ་རྐྱེན་བར་ཆད་མི་མཐུན་ཕྱོགས་ཀུན་ཞི། །ལོངས་སྤྱོད་མངའ་ཐང་དགེ་འདུན་འདུས་པ་རྒྱས། །ཀུན་ཀྱང་ཐོས་བསམ་སྒོམས་པས་རྒྱུད་ཕྱུགས་ཤིང་། །འགྲོ་ཁམས་བདེ་སྐྱིད་སྣང་བ་རྫོགས་ལྡན་བཞིན། །མི་ཉམས་སྲིད་མཐའི་བར་དུ་རྒྱས་པར་མཛོད། །བསྟན་པའི་སྦྱིན་བདག་རྒྱལ་རིགས་བློན་འབངས་བྲན། །ཁྱེའུ་ཕོ་མོ་འབྲུ་ནོར་
རྟ་ཕྱུགས་སོགས། །ཆོས་མཐུན་ལེགས་བྱས་དགའ་སྟོན་འཕེལ་བའི་ཕྱིར། །མོས་པ་རྣམ་བཞི་དབང་དུ་འདུ་བར་མཛོད། །བྱད་ཕུར་རྦོད་གཏོང་མི་དང་མི་མིན་དཔུང་། །བསམ་ངན་སྦྱོར་རྩུབ་བསྟན་ལ་གནོད་ཅིང་འཚེ། །ཕྲིན་ལས་སྤེལ་བའི་བར་ཆད་བདུད་བགེགས་རྣམས། །མངོན་སྤྱོད་རོལ་པས་མྱུར་དུ་ཚར་ཆོད་ཅིག །གཞན་ཡང་ཡུལ་གྱི་དགེ་བཅུ་རབ་རྒྱས་ཤིང་། །མི་ནོར་ཕྱུགས་འཕེལ་ས་བཅུད་དཔལ་འབྱོར་བསྐྱེད། །བཀྲ་ཤིས་སྣང་བ་གོང་ནས་གོང་དུ་འཕེལ། །བསམ་དོན་ཅི་མཆིས་བདེ་བླག་མྱུར་འགྲུབ་མཛོད། །མཆོད་གཏོར་དམན་དང་ཆགས་ཉམས་འགལ་འཁྲུལ་སོགས། །ཕོག་ཐུག་འཁོན་གྲིབ་མ་ཤེས་རྨོངས་དབང་གིས། །ནོངས་གྱུར་མཐའ་དག་ཀུན་བཟང་ཀློང་དུ་བཤགས། །བདག་ནི་རིག་འཛིན་པདྨའི་གདུང་འཚོབ་སྟེ། །ཁྱེད་རྣམས་དེ་ཡི་བསྟན་པའི་གཉེར་ཁ་བ། །གནས་མགྲོན་གཉིས་ཀྱིས་ཆད་ཐོ་མ་བོར་བར། །གང་བཅོལ་རྟག་
ཏུ་སྒྲུབ་པའི་གྲོགས་མཛོད་ཅིག །ཅེས་མཆོད་གཏོར་དང་གསེར་སྐྱེམས་འབུལ། །གཙྪས་མགྲོན་གཤེགས། །ཞེས་པའང་རླངས་ལྷ་གཟིགས་རས་པའི་གདུང་བརྒྱུད་མ་ཆད་པ་ལས། །རྒྱས་དབང་མཆོག་ཉིད་བལྟམས་པའི་ཆོ་རིག(རིགས)་ཀྱི་ལྷ་ལྷ་རྣམས་དགྱེས་པ་བསྐྱེད་པའི་མཆོད་ཆོག་འདི་བཞིན། རྒྱལ་དབང་མཆོག་གི་བཀའ་གནང་ནས། རིག་འཛིན་གྱི་བཙུན་པ་ཀརྨ་ཆོས་དབང་ཀུན་ཏུ་བཟང་པོས་སྐྱེད་ཚལ་བསམ་འགྲུབ་ཆོས་གླིང་གི་དགྱེས་སྤྲོའི་གཟིམ་གུར་དུ། ཤིང་བྱ་སྣྲོན་ཟླའི་གྲལ་ཚེས་ཉེར་དྲུག་དགེ་བར་སྟབས་འཕྲལ་དུ་བྲིས་པ་ཞེས་བྱ་བ་ལ། སྔོན་དང་ད་ལྟར་གྱི་འཁྲུངས་ལྷ་རྣམས་ཕྱོགས་སུ་བསྡུས། མ་འོངས་པ་རྣམས་ཅུང་ཟད་ཀྱི་སབ་ཁ་རེ་བགྱིས་པས་མཐུས་པར་བྱས་ཏེ། ཡི་གེ་དང་། འདོན་བྱ་མང་བའི་ངལ་བ་དང་། སྲུང་མ་སྤོང་ལེན་གྱི་ལས་བསག་མ་དགོས་པའི་ཆེད། སྐྱེས་རབས་བཅོ་ལྔ་པར་འབོད་པས། རྗེ་དཔོན་དམ་པས་མཛད་པ་ལ་ཕྲི་བསྣན་ཕྲན་བུ་བགྱིས་པ་དགེ་ལེགས་འཕེལ་བར་གྱུར་ཅིག །བཙན་རྒོད་དྲག་པོ་ཕྱྭ་རྒྱལ་མེ་ཏྲིའི་བསང་མཆོད་ནི། རྫས་རྣམས་རཾ་ཡཾ་ཁཾ་དང་། སྭ་བྷ་ཝ། ཨོཾ་ཨཱཿཧཱུྃ་ཧ་ཧོ་ཧྲཱིཿརྣམས་ཀྱིས་བསང་སྦྱང་བརླབ་སྤེལ་བྱས་ལ། ཀྱཻ། ཀ་དག་བདེ་ཆེན་ཀློང་ཡངས་ལ། །འཁྲུལ་པའི་མཚན་མ་མ་མཆིས་ཀྱང་། །རྒྱུད་ལྔའི་འགྲོ་བ་བསྒྲལ་
བའི་ཕྱིར། །ཐུགས་རྗེ་ཆེན་པོའི་ཕྲིན་ལས་རྩལ། །སྐུ་གསུམ་རྒྱལ་བའི་བསྟན་པ་བྱོན། །དུག་ལྔ་བརྟས་པའི་ལོག་ལྟ་ཅན། །མུ་སྟེགས་བསྟན་དགྲའི་གཤེད་མ་ལ། །ཡེ་ཤེས་ལས་དང་འཇིག་རྟེན་གྱི། །སྤྲུལ་པའི་སྡེ་བརྒྱད་ཚོམ་བུར་ཤར། །རིག་པ་ལས་གྲུབ་ཡེ་ཤེས་དབྱིངས། །མ་རིག་ཕྲག་དོག་འདུལ་བའི་ཕྱིར། །འཇིག་རྟེན་སྲིད་པ་བཙན་གྱི་རྗེ། །བཙན་ཡུལ་ཟང་ཐང་དམར་པོ་ནས། །ཕྱ་རྒྱལ་མཻ་ཏྲི་དྲག་པོ་རྩལ། །འཁོར་བཅས་འབོད་པའི་གནས་འདིར་གཤེགས། །བཤམས་པའི་གདན་ལ་བཞུགས་ནས་ཀྱང་། །བཀྲམ་པའི་སྤྱན་གཟིགས་རྣམས་ལ་གཟིགས། །བསྔོས་པའི་མཐུན་རྫས་བསང་མཆོད་བཞེས། །དགྲ་བགེགས་བསྒྲལ་བའི་ཉེར་སྤྱོད་དང་། །དྲག་པོ་རྐང་གླིང་རོལ་མོའི་སྒྲ། །འདོད་ཡོན་ལྔ་དང་རིན་ཆེན་བདུན། །ཤ་ཁྲག་བ་ལིཾ་རཀྟའི་མཚོ། །དཔའ་བོའི་ངར་ཆུ་མྱོས་བྱེད་ཆང་། །ཇ་ཆང་ཤ་སྣ་ནང་ཁྲོལ་སྙིང་། །མཆོད་པའི་བྱེ་བྲག་མཐའ་ཡས་དང་། །
ཕོ་བྲང་གོ་མཚོན་རྟ་དམར་ཁྱི། །གཡག་ལུག་རྭ་སྐྱེས་རི་དྭགས་བྱ། །གཏུམ་པོ་གཅན་གཟན་ལ་སོགས་པ། །ཐུགས་དང་མཐུན་པའི་དམ་རྫས་རྣམས། །དངོས་སུ་བཤམས་དང་ཡིད་ལས་བྱུང་། །ཏིང་འཛིན་སྔགས་རྒྱས་སྤེལ་བ་འདིས། །ཤུ་བ་སྲོག་ལེན་བཙན་གྱི་རྗེ། །ཡམ་ཤུད་དམར་པོ་མངའ་གསོལ་ལོ། །རྡོ་རྗེ་དྲག་པོ་མངའ་གསོལ་ལོ། །གཏེར་སྲུང་ཆེན་མོ་མངའ་གསོལ་ལོ། །ཤེལ་གིང་སྨུག་ནག་མངའ་གསོལ་ལོ། །གནོད་སྦྱིན་ཆེན་པོ་མངའ་གསོལ་ལོ། །འབར་བ་སྤུན་བདུན་མངའ་གསོལ་ལོ། །ཕྱྭ་རྒྱལ་མེ་ཏྲི་མངའ་གསོལ་ལོ། །དགྱེས་ཡུམ་ཀླུ་མོ་མངའ་གསོལ་ལོ། །བདུད་བཙན་ཀླུ་བཙན་ལྷ་བཙན་སོགས། །སྡེ་བརྒྱད་བཙན་རྗེ་མངའ་གསོལ་ལོ། །བཙན་དམག་འབུམ་སྡེ་མངའ་གསོལ་ལོ། །ཡང་འཁོར་བསམ་འདས་མངའ་གསོལ་ལོ། །གསོལ་ཞིང་མཆོད་པ་ལ་བརྟེན་ནས། །དགྱེས་ཤིང་མཉེས་པའི་འཛུམ་མདངས་སྟོན། །དྲག་རྩལ་རྔམས་པའི་སྟོབས་རྩལ་
ཕྱུངས། །ཐུབ་བསྟན་སྤྱི་དང་ཁྱད་པར་དུ། །པདྨ་འབྱུང་གནས་ཀརྨ་པའི། །བསྟན་པའི་དབུ་འཕང་དགུང་དུ་བསྟོད། །བསྟན་འཛིན་མཆོག་དང་དགེ་འདུན་སྡེ། །སློབ་བརྒྱུད་ཡོན་བདག་བཅས་པ་རྣམས། །མེལ་ཚེ་སྲུང་སྐྱོང་བྱ་ར་མཛོད། །ལེགས་པའི་ཚོགས་རྣམས་འདུ་བ་དང་། །མི་འདོད་ཉེར་འཚེ་མེད་པར་མཛོད། །བསྟན་དགྲ་གཟུགས་ཅན་གཟུགས་མེད་སྡེ། །གང་དུ་འདུག་ཀྱང་མྱུར་དུ་རྒྱུག །སྲོག་ཆོད་དབུགས་ལོངས་སྙིང་ཁྲག་འཐུང་། །བསད་རྟགས་དོན་སྙིང་ཁྱེར་ལ་ཤོག །ལས་ལ་མ་གཡེལ་དྲག་པོ་བཙན། །པདྨ་ཐོད་ཕྲེང་ཀརྨ་ཀའི། །དམ་ཚིག་གཉན་པོ་དྲན་མཛོད་ལ། །རྣལ་འབྱོར་བཅོལ་བའི་ཕྲིན་ལས་སྒྲུབས། །ཞེས་བརྗོད་གཏོར་མ་གསེར་སྐྱེམས་འབུལ། །བཀའ་སྲུང་ཀྱང་རྗེའི་བསང་མཆོད་ནི། གཏོར་མ་སོགས་བཤམས་ལ་བདུད་རྩིས་ཆབ་བྲན་ཏེ་འདི་སྐད་དོ། །ཨོཾ་བཛྲ་ཡཀྵ་ཧཱུྃ་གིས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་ཨོཾ་ལས་མཆོད་པའི་སྤྲིན་བསམ་གྱིས་མི་ཁྱབ་པ་
མཆོད་པའི་རྫས། །བསྟེན་པའི་རྫས། །བསྐང་བའི་རྫས། གསོལ་ཞིང་མཆོད་པའི་རྫས། གསང་བའི་རྫས་ལ་སོགས་པ། ས་དང་བར་སྣང་ཁྱབ་པ་ནམ་མཁའ་དང་མཉམ་པ་རྣམས་སུ་གྱུར། །ཨོཾ་བཛྲ་སྥ་ར་ཎ་ཁཾ་གིས་བྱིན་གྱིས་བརླབ། ཨོཾ། ཀླུ་ཡི་དགེ་བསྙེན་ཆེན་པོ་རྡོ་རྗེ་རྒྱལ། །དེ་ཡི་ཡུམ་ཆེན་གཟི་ལྡན་ཀླུ་ཡི་ལྕམ། །ཀླུ་བཙན་མིང་སྲིད་བར་བློན་ཆེན་པོ་སོགས། །ས་བདག་ཀླུ་གཉན་འཁོར་བཅས་གནས་འདིར་གཤེགས། །ཁྱད་པར་གནས་འདིའི་སྲུང་མ་བཙན་རྒོད་ཆེ། །གྱང་རྗེ་བཙན་པོ་ཡབ་ཡུམ་སྲས་འཁོར་སོགས། །མཐུ་སྟོབས་དྲག་རྩལ་ལྡན་པའི་སྲུང་མ་རྣམས། །གནས་འདིར་སྤྱན་འདྲེན་མཆོད་ཕྱིར་གཤེགས་སུ་གསོལ། །ཁྱེད་རྣམས་མཆོད་ཅིང་བསྟེན་པའི་དངོས་པོ་ནི། །ཉེར་སྤྱོད་ཚོགས་དང་གཟུགས་སྒྲ་དྲི་རོ་དང་། །རེག་བྱ་ཁྱད་འཕགས་ཇི་སྙེད་མཆིས་པ་ཀུན། །དངོས་བཤམས་ཡིད་སྤྲུལ་མཆོད་སྤྲིན་རྒྱ་མཚོ་འབུལ། །འཁོར་ལོ་ནོར་བུ་བཙུན་མོ་བློན་པོ་དང་། །
གླང་ཆེན་རྟ་དམར་རྟིང་དཀར་རྒྱན་སྤྲས་པ། །མ་ཧེ་ནོར་ལུག་གཅན་གཟན་རི་དྭགས་དང་། །འདབ་ཆགས་དམག་མི་བློན་འབངས་བྲན་སོགས་འབུལ། །ལྕགས་བསེའི་གོ་ཁྲབ་རྨོག་བཅས་མདའ་མདུང་དང་། །དཔའ་བོའི་རལ་གྲི་ཕུབ་དང་བ་དན་ཚོགས། །ལྷ་དང་ལྷ་མིན་གཡུལ་དུ་བཤམས་པ་ལྟར། །དཔུང་ཚོགས་ཡན་ལག་བཞི་ལྡན་བཀོད་པ་འབུལ། །སྨྱུག་རྒོད་ཚིག་གསུམ་དར་གྱིས་བརྒྱན་པ་དང་། །ཐོད་པའི་སྐུ་མཁར་ཤ་རུས་ཟུར་བརྒྱན་པ། །འདོད་ཡོན་མཁོ་རྒུའི་ཚོགས་ཀྱིས་ཡོངས་བསྐོར་བ། །བཞུགས་གནས་ཕོ་བྲང་རྒྱན་ལྡན་བཀོད་པ་འབུལ། །ཁྱད་པར་འཆི་མེད་ཟས་ཀྱི་བཅུད་གཅིག་པོ། །འབྲུ་བཅུད་སྨན་དང་རཀྟ་ཛ་གད་དང་། །ཤ་སྣ་སྙིང་སྣ་ཁྲག་སྣ་མྱོས་བྱེད་ཚོགས། །ཕྱི་ནང་གསང་བའི་མཆོད་པ་དུ་མ་འབུལ། །ཤ་ཁྲག་དམར་གྱིས་བརྒྱན་པའི་གཏོར་མ་དང་། །དགྲ་བགེགས་བསྒྲལ་བའི་ཤ་ཁྲག་ནང་ཁྲོལ་བཅས། །དཀར་གསུམ་
མངར་གསུམ་ཀླུ་སྨན་རྩི་བཅུད་སོགས། །རང་རང་ལ་འོས་མཆོད་རྫས་དུ་མ་འབུལ། །ཤིང་སྣ་དགུ་དང་སྨན་སྣ་ལ་སོགས་པའི། །དྲི་བཟང་བསང་དུད་ལྷོ་སྤྲིན་ལྟ་བུ་དང་། །ཕྱེ་མར་ཟས་ཕུད་སྐྱེམས་དང་གཟུགས་འགྲོས་བཅས། །མི་གཙང་ཉམས་གྲིབ་བསང་ཕྱིར་མཆོད་པ་འབུལ། །ཨོཾ་བཛྲ་ཨཱརྒྷཾ། པཱདྱཾ་ནས། ཤཔྟ་ཨཱཿཧཱུྃ་བར་དང་། ཨོཾ་རཱུ་པ་ ཤཔྟ་གྷནྡྷེ་ར་ས་སྤཪྴེ་པྲ་ཏཱིཙྪ་སྭཱ་ཧཱས་མཆོད། ཨོཾ་ནཱ་ག་རཱ་ཛ་བཛྲ་རཱ་ཛ་ཤུ་ལ་ཏྲི་ཛཿ ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་བསྔོས་ནས། ཧཱུྃ། ལྷ་ཆེན་འཁོར་བཅས་བསང་ཞིང་མཆོད་པའི་དགེས། །བདག་ཅག་ཡུལ་མི་ཁྱིམ་མཚེས་མཆོད་ཡོན་ཀུན། །ཉམས་ཆག་སྡིག་སྒྲིབ་ནད་གདོན་ཀུན་བསང་ནས། །བསམ་དོན་མ་ལུས་འགྲུབ་པའི་སྟོང་གྲོགས་མཛོད། །དགེ་འདུན་སྡེ་རྒྱས་ཐོས་བསམ་བསྒོམ་པ་འཕེལ། །མི་ལ་ནད་མེད་ཕྱུགས་ལ་གོད་ཁ་མེད། །ཆར་ཆུ་དུས་འབབས་ལོ་འབྲས་རྟག་ཏུ་ལེགས། །བསྟན་པ་དར་ཞིང་
རྒྱས་པའི་བཀྲ་ཤིས་ཤོག །བདག་སོགས་མ་རིག་དབང་གྱུར་ནོངས་པའི་ཚོགས། །གཙང་སྦྲ་ཆུང་དང་ཕུད་ཉམས་མཆོད་གཏོར་གཡེལ། །ས་བརྐོ་རྡོ་སློག་ཕོག་ཐུག་གྱུར་སྲིད་ནའང་། །བྱམས་པའི་སེམས་ཀྱིས་བཟོད་པར་མཛད་དུ་གསོལ། །དགེ་འདུན་གཙུག་ལག་ཁང་སོགས་འཕེལ་རྒྱས་ཆེད། །སླར་ཡང་བྱ་བ་ཅི་དང་ཅི་བགྱིས་ལ། །རུ་ང་ཕྲག་དོག་གནོད་འཚེ་ཀུན་སྤོངས་ཤིང་། །མྱུར་དུ་གང་བརྩམས་འགྲུབ་པའི་སྟོང་གྲོགས་མཛོད། །གནས་འདིའི་རྟེན་དང་རྟེན་པར་བཅས་རྣམས་ཀྱི། །སྲུང་མ་གནས་བདག་ལས་མཁན་ཁྱོད་ཀྱིས་མཛོད། །བསྟན་ལ་ཕན་པའི་སྟོང་གྲོགས་བྱེད་རྣམས་སྲུངས། །གནོད་པར་བྱེད་རྣམས་ཐལ་བར་རློག་པར་མཛོད། །སྤྱིར་དུ་ཀརྨ་ཀཾ་ཚང་བསྟན་པ་སྲུངས། །སྒོས་སུ་གདན་ས་མཚུར་ཕུའི་སྲུང་མ་མཛོད། །དཔལ་ལྡན་བླ་མའི་སྐུ་ཚེ་བསྲིང་བ་དང་། །རྣལ་འབྱོར་བདག་ཅག་བུ་བཞིན་སྐྱོང་བར་མཛོད། །དཔལ་ལྡན་དུས་
གསུམ་མཁྱེན་པ་ནས་བཟུང་སྟེ། །རྒྱལ་དབང་རིག་པའི་རྡོ་རྗེ་ཡན་ཆད་ཀྱི། །བཀའ་དང་དམ་ལ་བཞག་པ་དྲན་མཛོད་ལ། །ཅི་བཅོལ་ཕྲིན་ལས་རྣམ་བཞི་སྒྲུབ་པར་མཛོད། །ཁྱེད་རྣམས་མཆོད་ཅིང་ཕྲིན་ལས་བསྐུལ་བའི་མཐུས། །གནས་འདིའི་ཡུལ་དགོན་རྟེན་དང་བརྟེན་པར་བཅས། །འགལ་རྐྱེན་ཀུན་ཞི་མཐུན་རྐྱེན་ཕུན་སུམ་ཚོགས། །བསྟན་པ་དར་ཞིང་རྒྱས་པའི་བཀྲ་ཤིས་ཤོག །ཅེས་གཏོར་མ་གཙང་སར་འབུལ་ཞིང་འདོད་དོན་གསོལ་ལོ། །ཞེས་པའང་བཛྲ་ཤྭ་རས་མཛད་པའོ། །རྫིང་བཙན་གྱི་བསང་མཆོད་ནི། །མཆོད་གཏོར་ཡི་གེ་གསུམ་དང་། ཆོས་ཉིད་རྣམ་དག་སྔགས་དང་། འབྲུ་གསུམ་ལ་ཧ་ཧོ་ཧྲཱིཿབཏགས་པ་རྣམས་ཀྱིས་བསང་སྦྱང་བརླབ་སྤེལ་བྱས་ལ། ཀྱཻ། རང་བྱུང་བདེ་བ་ཆེན་པོ་ལ། །མཚན་མའི་རྟོག་པ་མ་མཆིས་ཀྱང་། །འཛིན་སེམས་ཡུལ་ལ་ཞུགས་པ་ལས། །རྟོག་པའི་དྲ་བ་མཐའ་ཡས་ཤར། །དེ་ལས་སྲིད་པ་ལས་ཀྱི་བཙན། །དྲག་པོ་མཆེད་དང་དགྱེས་སྡེ་མོ། །བློན་པོ་མངགས་གཞུག་བྲན་དང་འབངས། །དྲག་ཤུལ་ཅན་གྱི་དཔུང་ཚོགས་
རྣམས། །འདིར་གཤེགས་གདན་བཞུགས་བསང་མཆོད་བཞེས། །ཁྱེད་རྣམས་དགྱེས་སྐོང་མཆོད་པ་ནི། །ཉེར་སྤྱོད་འདོད་ཡོན་དགེ་ལེགས་རྫས། །དཔག་མེད་ཕྱོགས་ཀྱི་འཁོར་ལོ་བཀང་། །ལྷ་ཀླུ་མི་ཡི་འབྱོར་པའི་ཕུལ། །མ་ལུས་ནམ་མཁའི་མཛོད་དུ་སྤུངས། །མཐུན་རྫས་འབོད་བརྟེན་བསྐང་བ་དང་། །རྦད་བསད་ལས་ཀྱི་སྦྱོར་བ་ཡི། །ཡོ་བྱད་མ་ཚང་མེད་སྤྲུལ་པས། །དགེ་བསྙེན་ཆེན་པོ་མངའ་གསོལ་ལོ། །དམར་པོ་བཙན་རྒྱལ་མངའ་གསོལ་ལོ། །རྡོ་རྗེ་རྫིང་བཙན་མངའ་གསོལ་ལོ། །མཐུ་ཆེན་གྲིབ་བཙན་མངའ་གསོལ་ལོ། །རྫོང་དམར་བཙན་རྒོད་མངའ་གསོལ་ལོ། །དགྱེས་སྡེ་བློན་པོ་མངའ་གསོལ་ལོ། །ཡང་འཁོར་དམག་ཚོགས་མངའ་གསོལ་ལོ། །གསོལ་ཞིང་མཆོད་པའི་ངོ་སོ་བསྐྱེད། །དགའ་དང་མགུ་བའི་མདངས་ཕྱུངས་ཤིག །རིག་འཛིན་བརྒྱུད་པའི་སྤྱན་སྔ་རུ། །རང་དམ་བཅས་པ་དྲན་གྱིས་ལ། །བསྟན་དང་བསྟན་འཛིན་ཕྲིན་ལས་
སྒྲུབས། །བདག་དང་ཡོན་བདག་ཁ་འཛིན་མཛོད། །སྡང་བའི་དགྲ་ལ་དཔའ་རྟགས་ཕྱུངས། །གནོད་པའི་བགེགས་དཔུང་ཕྱིར་ལ་ཟློག །བྱད་ཕུར་རྦོད་གཏོང་རང་གཤེད་ཕོབས། །རྒྱལ་ཁམས་བདེ་ཞིང་དགེ་བཅུར་སྤྱོད། །འབྲུ་ནོར་ལེགས་པའི་འབྱོར་པ་སྤེལ། །ཅི་བསམ་སྒྲུབ་ལ་རེ་བ་སྐོང་། །རྣལ་འབྱོར་བཅོལ་བའི་ཕྲིན་ལས་མཛོད། །ཅེས་གྱེར་ཞིང་གཏོར་མ་གསེར་སྐྱེམས་ནམ་མཁར་འཐོར། །བདེ་ཆེན་བརྟན་མའི་གསོལ་མཆོད་ནི། །ཨོཾ་ཨ་ཀཱ་རོ་ལན་གསུམ་གྱིས་བརླབ། ཀྱཻ། སྨན་བཙུན་བརྟན་མ་ཆེན་མོ་ནི། །སྐུ་མདོག་དཀར་མོ་ཕྱག་གཉིས་ཀྱི། །མདའ་དར་བུམ་པ་རིན་ཆེན་འཛིན། །ན་བཟའ་དཀར་བཀླུབས་བརྒྱན་གྱིས་སྤྲས། །སྨུག་ཆུང་ཡིད་འོང་མཆོག་ལ་ཆིབས། །འདིར་བྱོན་དམ་རྫས་མཆོད་གཏོར་བཞེས། །སངས་རྒྱས་བསྟན་པ་བསྲུང་བ་དང་། །ཁྱད་པར་གནས་འདིའི་སྲུང་མར་ནི། །རྡོ་རྗེ་བཀའ་ཡི་དམ་བོར་བས། །དུས་ཀུན་སྲུང་སྐྱོབ་བགྱིད་པ་དང་། །འདིར་གནས་ཆོས་བྱེད་
སྐྱེས་བུ་རྣམས། །མཐུན་རྐྱེན་སྒྲུབ་ཅིང་འགལ་རྐྱེན་སོལ། །དངོས་གྲུབ་མ་ལུས་སྩལ་ཏུ་གསོལ། །བརྟན་མ་འཁོར་དང་བཅས་རྣམས་ཀྱིས། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་སོགས་ཀྱིས་ཕྲིན་ལས་བཅོལ། །ཞེས་པའང་རྒྱལ་ཚབ་ལྔ་པས་མཛད་པའོ། །དེ་ལྟར་ཡུལ་གཞིའི་གནས་བདག་རྣམས། །བསང་མཆོད་བརྔན་པའི་ཡོན་ཏན་གྱིས། །སྙིགས་ལྔའི་རྒུད་པ་རིང་བཅིལ་ཏེ། །མཐུན་ཕྱོགས་ལྔ་རྣམས་ཆེར་རྒྱས་ཤོག །ཅེས་པའང་འོག་མིན་མཚུར་མདོའི་ཆོས་གྲྭ་ཆེན་པོའི་རྒྱུན་བསང་ཕྱག་ལེན་དུ་བསྟར་བདེ་བའི་ཆེད། དྲང་སྲོང་ཆེན་པོ་རྡོ་རྗེ་དྲག་བཙན། ཕྱྭ་རྒྱལ་མཻ་ཏྲི། ལྡིང་བཙན་རྣམས་ཀྱི་མཆོད་ཕྲིན་གསར་དུ་སྤེལ་ནས། །ལྷ་མགྲོན་རྣམས་གོ་རིམ་བཞིན། ཕྱོགས་གཅིག་ཏུ་བསྡེབས་པ་པོ་ནི་བླངས་ཀྱི་བནྡེ་རང་བྱུང་རྡོ་རྗེའམ། །མིང་གཞན་མཁའ་ཁྱབ་རྡོ་རྗེས་སོ། །ཨོཾ་སྭ་བྷ་ཝས་སྦྱངས། སྟོང་པའི་ངང་ལས་བསང་རྫས་འདོད་པའི་ཡོན་ཏན་ལྔ་དང་ལྡན་པ་ཟད་མི་ཤེས་པའི་གཏེར་དུ་གྱུར། ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་སོགས། ཀྱཻ། གནས་ཀྱི་མཆོག་གྱུར་རྩེ་མཐོ་པདྨ་རི། །ཕྱི་ལྟར་གྲུ་འཛིན་
ཞིང་གི་བཀོད་པ་རྫོགས། །ནང་ན་རྩ་གསུམ་རྒྱལ་བའི་དཀྱིལ་འཁོར་གྲུབ། །དེ་ན་བཞུགས་པའི་སངས་རྒྱས་བྱང་སེམས་དང་། །ཁྱད་པར་རྗེ་བཙུན་སྒྲོལ་མ་སྤྲུལ་འཁོར་བཅས། །བླ་མ་ཡི་དམ་མཁའ་འགྲོ་ཆོས་སྐྱོང་བསང་། །ཡུལ་སྐྱོང་དགེ་བསྙེན་པདྨ་མཆོག་རབ་རྩལ། །བཙུན་མོ་སྲས་དང་བློན་འཁོར་གྲངས་མེད་བསང་། །མདུན་འཁོད་དཔལ་གྱི་བཀའ་སྡོད་སེངྒེ་བྲག །གནས་པའི་རྩ་གསུམ་རྒྱལ་བ་རབ་འབྱམས་དང་། །ཁྱད་པར་གནས་བརྟན་ཆེན་པོ་འཁོར་བཅས་བསང་། །གནས་བདག་ཞོལ་རོལ་བོན་ཆུང་འཁོར་བཅས་དང་། །མ་གཟའ་དམ་ཅན་གནོད་སྦྱིན་ཁོལ་པོ་ཁ། །ཁྱད་པར་ལྷ་བཙན་རྡོ་རྗེ་ཐོག་རྒོད་བཅས། །ཕྱོགས་དེར་གནས་པའི་ལྷ་ཀླུ་གཞི་བདག་བསང་། །འདན་ལུང་ཉིན་སྲིབ་གནས་གཞི་གཏེར་གྱི་བདག །སྤྲུལ་པ་ཡང་སྤྲུལ་སྲས་བློན་བཙུན་མོ་བཅས། །འདིར་གཤེགས་འདོད་ཡོན་ལྔ་ལྡན་བསང་མཆོད་བཞེས། །ཀུན་ཏུ་བཟང་པོའི་རྣམ་
འཕྲུལ་ལས་བྱུང་བའི། །ཕྱི་ནང་གསང་བའི་མཆོད་པའི་སྤྲིན་ཆེན་པོ། །རང་རང་ཡིད་ལ་གང་དགོས་འདོད་དགུའི་ཆར། །ཟག་མེད་བདེ་བས་ནམ་ཡང་ཚིམ་གྱུར་ཅིག །སྔོན་ཚེ་པདྨ་ཐོད་ཕྲེང་སྤྱན་སྔ་རུ། །ཁས་བླངས་བཞིན་དུ་སངས་རྒྱས་བསྟན་པ་བསྲུང་། །དཔལ་ལྡན་བླ་མའི་ཞབས་པད་བརྟན་པ་དང་། །ཆར་ཆུ་དུས་འབབས་ལོ་ཕྱུགས་རྟག་ཏུ་ལེགས། །རྒྱལ་ཁམས་མཐའ་དབུས་བདེ་བའི་ཕྲིན་ལས་མཛོད།། །།ཅེས་རྒྱལ་མཆོག་བཅུ་དྲུག་པ་རང་བྱུང་ཡེ་ཤེས་རིག་པའི་རྡོ་རྗེའི་ཤར་མར་གསུང་པ་ཇི་བཞིན་བཀོད་པའི་བྱིན་རླབས་ཅན་ནོ།། །།ཨོཾ་སྭ་སྟི། འབྲས་ལྗོངས་སྦས་གནས་སྤྱི་དང་བྱེ་བྲག་འོག་མིན་ཀརྨའི་གདན་ས་ངེས་དོན་བཤད་སྒྲུབ་ཆོས་འཁོར་སྒང་གི་གནས་སྲུང་རྣམས་ཀྱི་བསང་མཆོད་བྱིན་རླབས་སྤྲིན་ཕུང་། བརྔན་གཏོར་རི་རབ་བང་རིམ་བཞི་པ་ཉི་ཟླས་མཚན་པའི་ཁ་ཁྱེར་གྱི་སྟེང་། མཛོད་ལྔ་ལ། དཀར་ཟླུམ་ལྔ། བང་རིམ་དང་པོ་བཙན་རྒོད་རྡོ་རྗེ་གྲགས་རྒྱལ། བདུད་བཙན་ར་ཐོད་ཅན། ལྷ་བཙན་དགེ་བསྙེན་རབ་འབར་བཅས་ལ་དམར་གཏོར་རྩེ་རྒྱན་གསུམ། བང་རིམ་གཉིས་པ་བདུད་རྒྱལ་ཐོག་རྒོད་ཁྲག་འཐུང་ལ། དམར་གཏོར་
མེ་རིའི་རྒྱན་ཅན་བང་རིམ་གཞན་གཉིས་ལ་རྟ་ནོར་སོགས་གཟུགས་འགྲོས་སྣ་ཚོགས་པས་སྐོར། དར་སྣ་སྨན་སྣ་ཤིང་རྩི་སོགས་ཀྱིས་བརྒྱན། ཕྱེ་མར་གསེར་སྐྱེམས་ཀྱང་བཤམ་ལ། རང་ཡི་དམ་དུ་གསལ་བས། སྔགས་དྲུག་ཕྱག་དྲུག་གི་བྱིན་གྱིས་བརླབ། སྟོང་པའི་ངང་ལས་ཧཱུྃ་མཐིང་ག་ཡོངས་སུ་གྱུར་པ་ལས། རང་ཉིད་བླ་མ་ཡེ་ཤེས་མགོན་པོ་དབྱེར་མེད་ཀྱི་སྐུར་གྱུར་པའི་གནས་གསུམ་འབྲུ་གསུམ་དང་ཁྱད་པར་ཐུགས་ཀའི་ཧཱུྃ་ལས་འོད་ཟེར་འཕྲོས་པས་ཕྱོགས་བཅུའི་གནས་ནས་ཡེ་ཤེས་སེམས་དཔའི་ཚོགས་དཔག་ཏུ་མེད་པ་མདུན་གྱི་ནམ་མཁར་སྤྱན་དྲངས། སྣང་སྲིད་ཟིལ་གནོན་གུ་རུ་པདྨ་ཐོད་ཕྲེང་རྩལ་དུ་གསལ་བའི་སྐུ་ཡི་གནས་ཐམས་ཅད་ནས་འོད་ཟེར་གྱི་ཚོགས་དཔག་ཏུ་མེད་པ་བྱུང་བ་བླ་མ་ཡེ་ཤེས་མགོན་པོའི་ཐུགས་ཀའི་ཧཱུྃ་ལ་ཐ་མ་དེ་ལས་འོད་ཟེར་གྱི་ཚོགས་སྤྲོས་ཤིང་སྦས་པའི་གནས་འདིར་འཁོད་པའི་གཞི་བདག་གཉུག་གནས་གློ་བུར་དུ་ལྷགས་པ་རྣམས་དང་། ཁྱད་པར་འོག་མིན་ཕྲིན་ལས་ཀྱི་གནས་སུ་བྱིན་གྱིས་བརླབས་པའི་
ཞིང་མཆོག་དཔལ་ཀརྨ་པའི་གདན་ས་བཤད་སྒྲུབ་ཆོས་འཁོར་སྒང་གི་ཡུལ་གནས་གཞི་བདག་གི་ཚོགས་རྣམས་མདུན་དུ་སྐད་ཅིག་གིས་ལྷགས་པར་གྱུར། ཧཱུྃ། ཡུལ་ཕྱོགས་པདྨ་འོད་ཀྱི་གཞལ་ཡས་སུ། །སྐུ་གསུམ་བདག་ཉིད་སྣང་སྲིད་ཟིལ་གནོན་རྩལ། །ཡེ་རྫོགས་ཀློང་ཡངས་གཞིར་བཞེངས་མཆོད་པའི་ཚོགས། །མཐའ་ཡས་སྤྲོས་མེད་བློ་འདས་ཡིད་ཀྱིས་སྤྲུལ། །ཟག་མེད་བདེ་བ་ཆེན་པོ་དགྱེས་དགུའི་སྤྲིན། །མཁའ་མཉམ་འགྲོ་ཀུན་སྒྲིབ་གཉིས་བསལ་བའི་ཕྱིར། །ཚོགས་གཉིས་དག་ཕྱིར་ཡིད་སྤྲུལ་མཆོད་པ་བཞེས། །གྲུབ་བརྒྱའི་མཆོག་གྱུར་བཞད་པ་རྡོ་རྗེའི་གནས། །རྫོང་དྲུག་ཚེ་རིང་མཆེད་ལྔ་རྒྱུ་བའི་ཞིང་། །བརྟན་མ་བཅུ་གཉིས་མགུར་ལྷ་བཅུ་གསུམ་དང་། །དགེ་བསྙེན་ཉེར་གཅིག་སྒྲུབ་པའི་གནས་རྣམས་དང་། །རྒྱ་དང་ལི་ཡུལ་འཕགས་བོད་གཏེར་གནས་སྐྱོང་། །སྲིད་པ་ཆགས་པའི་གཞི་ཡི་བདག་པོ་དང་། །མཛོད་ལྔ་སྟག་རྩེ་ལ་
སོགས་སྦས་གནས་འདིར། །དབུས་ཀྱི་བཀྲ་ཤིས་ལྡིང་དང་ཕུག་ཆེན་བཞི། །སྒོ་བཞི་འཕྲང་བཞི་འགག་བཞིའི་གནས་སྲུང་དང་། །སྒྲུབ་སྡེ་བརྒྱད་ཀྱི་བླ་མཚོ་བརྒྱད་ལ་སོགས། །གངས་བྲག་རི་མཚོ་ནགས་ཀྱི་ཚལ་རྣམས་ལ། །འཁོད་པའི་གཞི་བདག་གཉུག་གནས་གློ་བུར་ཚོགས། གསང་མཆོད་དགྱེས་པར་བཞེས་ལ་འདོད་དོན་སྒྲུབས། །གནོད་འཚེ་གདུག་རྩུབ་ཞི་ཞིང་ཆོས་ལ་སྤྱོད། །ཆོས་རྒྱལ་སྡེ་འབངས་ཕུན་ཚོགས་འདོད་དགུར་བརྩོན། །ནད་མུག་འཁྲུག་རྩོད་རྩ་སད་སེར་གསུམ་སོགས། །རབ་ཏུ་ཞི་ནས་དཔལ་དང་ལྡན་པར་སྐྱོངས། ཧཱུྃ། འཇམ་དབྱངས་ཕྱག་རྡོར་སྤྱན་རས་གཟིགས་ཀྱི་གནས། །འོག་མིན་ཕྲིན་ལས་གདན་ས་སྐྱོང་བའི་ལྷ། །བཙན་རྒོད་རྡོ་རྗེ་གྲགས་རྒྱལ་འཁོར་ཚོགས་དང་། །བདུད་བཙན་ར་མགོ་ར་ཐོད་ཅན་ཚོགས་བཅས། །མཁོ་དགུ་བཞེས་ལ་འདོད་དགུ་སྒྲུབས་པར་མཛོད། ལྷ་བཙན་དགེ་བསྙེན་རབ་འབར་འདིར་འབོད་བྱོན། །སྐུ་
མདོག་པདྨ་ར་གའི་མདངས་མཚུངས་ཤིང་། །ལག་གཡས་དབྱུག་ཏོ་གཡོན་པས་འགྱིངས་རྔམ་གྱི། །གནས་འདིར་སྲུང་བའི་བྱ་ར་མ་གཡེལ་མཛོད། །ཁྱད་པར་དམ་ཚིག་བཤད་སྒྲུབ་ཆོས་འཁོར་སྐྱོངས། །མཁོ་དགུའི་འདོད་པའི་མཆོད་པ་འདི་བཞེས་ལ། །ཐ་ཚིག་གཉན་པོ་འདའ་མེད་བྱ་ར་མཛོད། །བདུད་རྒྱལ་ཐོ་རྒོད་ཁྲག་འཐུང་རོལ་པ་གང་། །མདོག་སྨུག་རལ་སྣུམ་གདུག་པའི་གཟི་འབར་ཞིང་། །ལག་གཡས་རལ་གྲི་གཡོན་པས་སྦྲུལ་ཞགས་ཅན། །སྔོན་གྱི་བཀའ་བསྒོ་དམ་ཚིག་མ་གཡེལ་བར། །བཤད་སྒྲུབ་བརྒྱུད་འཛིན་བུ་སློབ་ཚོགས་སྐྱོངས་ནས། །ཁྱོད་ལ་འདོད་པའི་ཤ་ཁྲག་དམར་རྗེན་སོགས། །འདོད་ཡོན་ལྔ་ཡིས་ཚིམ་པར་བགྱིད་བྱེད་པས། །བདག་གིས་བཅོལ་བའི་ལས་ཀུན་དུས་དྲུག་ལ། །གཡེལ་བ་མེད་པར་ཁྱོད་ཀྱིས་སྡོང་གྲོགས་གྱིས། ཧཱུྃ། ཡུལ་འདིའི་གཞི་བདག་གཉུག་མར་གནས་པའི་ཚོགས། །བསང་ངོ་འདོད་ཡོན་ནམ་མཁའ་
མཛོད་ཀྱི་སྤྲིན། །ཤ་ཆང་འབྲུ་རིགས་གང་བཟང་རྟ་ནོར་དང་། །ཁང་ཁྱིམ་ལ་སོགས་ཟད་མེད་ཕུན་ཚོགས་གཏེར། །དགྱེས་པར་རོལ་ལ་རྒྱལ་བསྟན་འདི་ཉིད་ཀྱི། །བསྟན་འཛིན་སྐྱེས་ཆེན་མཛད་ཕྲིན་འཕེལ་བ་དང་། །དགེ་འདུན་ཐུགས་མཐུན་ཆོས་སྤྱོད་བཅུ་ལ་གཞོལ། །སྐྱེ་བོ་ཚོགས་རྣམས་འཕྲལ་ཡུན་འཇིགས་ལས་སྐྱོབས། །ཁྱེད་རྣམས་བཅོལ་བའི་ལས་འདི་མ་གཡེལ་བར། དུས་སུ་མཆོད་པའི་དགའ་སྟོན་ཅི་ཡང་སྦྱིན། །གལ་ཏེ་ཆོས་མཐུན་བྱ་བ་བཤོལ་གྱུར་ན། །བདག་ཉིད་ཁྲག་འཐུང་དྲག་པོའི་རོལ་པར་བཞེངས། །ཁམས་གསུམ་ཟིལ་གྱིས་གནོན་པའི་རང་རྟགས་ཀྱིས། །ལུས་ངག་ཡིད་གསུམ་འདའ་དཀའི་རྒྱ་ཡིས་འདེབས། །དགེ་ལ་སྤྱོད་ཅིང་བྱམས་པའི་སེམས་ལྡན་ནས། །ཇི་ལྟར་བཅོལ་བའི་ཕྲིན་ལས་མ་གཡེལ་བར། །རང་གི་གནས་སམ་དམིགས་པའི་རྟེན་ལ་བཞུགས། །དུས་ཀྱི་མཆོད་སྦྱིན་རོལ་ཕྱིར་སླར་ཡང་བྱོན། །ཀུན་ཀྱང་དགེ་བཅུའི་
ལས་ལམ་གོང་དུ་འཕེལ། །ཕུན་ཚོགས་ཤིས་པའི་མཚན་མ་འབར་གྱུར་ཅིག །ཅེས་པ་འདིའང་རུམ་བཏེག་དཔལ་ཀརྨ་པའི་ཆོས་སྒར་བཤད་སྒྲུབ་ཆོས་འཁོར་སྒང་དུ་གནས་ཆེན་བྱིན་འབེབས་དང་འབྲེལ་བོད་སྐྱོང་བརྟན་མ་བཅུ་གཉིས་སོགས་གངས་ལྗོངས་ཡུལ་གནས་གཞི་བདག་རྣམས་གཅིག་ཏུ་གནས་འཆའ་བའི་རྟེན་བཀོལ་གསར་དུ་སྒྲུབས་སྐབས་སྔ་འགྱུར་བསྟན་པའི་གསལ་བྱེད་མཁྱེན་སྤྲུལ་རིན་པོ་ཆེ་འཇིགས་མེད་མཁྱེན་བརྩེའི་འོད་ཟེར་ནས་གསུངས་བསྐུལ་གནང་བ་ལྟར། ཀརྨ་པ་རིག་པའི་རྡོ་རྗེས་ས་ཟླའི་ཡར་ཚེས་དགེ་བའི་ཉིན་སྦྱར་བའོ། །སླར་སྨྲས་པ། འདི་བཞིན་སྒྲུབ་པའི་གང་ཟག་སུ་མཆིས་ཀུན། དར་ཆེན་བཙུག་དང་དར་མཐིང་སྒྲོན་པ་སོགས། རྟེན་གནས་འདིའི་མདུན་གསོལ་མཆོད་འདི་འབུལ་ཚེ། ཚེ་ཡི་འགལ་རྐྱེན་ཞི་དང་རླུང་རྟ་བསྐྱེད། ལེགས་པའི་དཔལ་ཀུན་ཡར་ཟླ་འཕེལ་བར་འགྱུར། རྒྱལ་འགོང་དམ་སྲིའི་གནོད་འཚེ་གདུག་པའི་ཚོགས། གློ་བུར་བ་དང་ཡིད་སེམས་འཁྲུགས་པ་སོགས། གདུག་རྩུབ་ཞི་ཞིང་བྱམས་པའི་སེམས་དང་ལྡན། གནོད་པའི་ཚོགས་རྣམས་འཇོམ་པར་གདོན་མི་ཟ། སརྦ་མངྒ་ལཾ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་
སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།