རྩ་གསུམ་སྲུང་མ་ཡུལ་གཞིའི་བདག་པོ་རྣམས་ཀྱི་རྟེན་གནས་གསས་མཁར་བསྟོད་པ་དང་། རྡོ་རྗེའི་ཆོས་སྐྱོང་རྣམས་ལ་ཕྱི་རྟེན་རིགས་འབུལ་བའི་ཆོ་ག་དགྱེས་སྐོང་ནོར་བུའི་དྲ་བ་རྣམ་པར་སྤེལ་བའི་སྤྲིན་ཕྲེང་།
རྩ་གསུམ་སྲུང་མ་ཡུལ་གཞིའི་བདག་པོ་རྣམས་ཀྱི་རྟེན་གནས་གསས་མཁར་བསྟོད་པ་དང་། རྡོ་རྗེའི་ཆོས་སྐྱོང་རྣམས་ལ་ཕྱི་རྟེན་རིགས་འབུལ་བའི་ཆོ་ག་དགྱེས་སྐོང་ནོར་བུའི་དྲ་བ་རྣམ་པར་སྤེལ་བའི་སྤྲིན་ཕྲེང་ཞེས་བྱ་བ་བཞུགས་སོ། །
གུ་རུ་རཏྣ་ཏྲི་མཱུ་ལ་དེ་ཝ་རཀྟ་ཡེ་ན་མོ། །མཁའ་ཁྱབ་ཡེ་ཤེས་སྒྱུ་མའི་གར། །འདས་དང་མ་འདས་འཁོར་ལོ་རྣམས། །དགྱེས་བསྐྱེད་གསས་མཁར་བསྟོད་པ་དང་། །ཕྱི་རྟེན་བཙན་པའི་ཆོ་ག་སྤེལ། །དེ་ལ་ཐོག་མར་ཁྱིམ་གྱི་རྩེ་དང་། ཡུལ་གྱི་ལྟེ་བ། རིའི་སྙིང་པོ་རྣམས་ལ། རྩ་གསུམ་སྲུང་མ་ཡུལ་གཞིའི་བདག་པོ་ཐམས་ཅད་ཀྱི་རྟེན་གནས། གསས་མཁར་དུ་གྲགས་པ་ཉིད་དུས་དུས་སུ་གསོ་ཞིང་བསྟོད་པའི་ཆོ་ག་ལ། གསས་མཁར་བསྟོད་པའི་རིམ་པ་དགྲ་ལྷ་དགྱེས་པའི་རིན་པོ་ཆེའི་དོ་ཤལ་ཞེས་བྱ་བ་ནི། །ན་མོ་གུ་ར་ཝེ། །རྡོ་རྗེ་སློབ་དཔོན་པདྨ་འབྱུང་གནས་ལ་ཕྱག་འཚལ་ལོ། །དེ་ཡང་གསས་མཁར་བསྟོད་པའི་རིམ་པ་ལ། དང་པོ་གོ་ཆ་སྲ་མཁྲེག་སྙིང་པོ་ལས་གྲུབ་པའི་གསས་མཁར་མཐོ་
བརྗིད་དབྱིབས་ལེགས་ཕྱོགས་བཞི་དབུས་དང་ལྔར་བྱ། དེ་ནས་ཤིང་སྣ་དར་ཚོན་མདའ་དར་རང་མདོག་དང་མཚུངས་པར་དམུ་ཐག་བསྐྱང་། གཏར་སྐུ་རྡོ་དཀར་པོ། གཟུགས་འགྲོས་སོགས་དར་ཆེན་བཀྱགས། ཕྱེ་མར་རྣམ་ལྔ། གཏོར་མ་སོགས་མཁོ་རྒུ་ཚང་བར་བྱས་ལ། བདེ་བའི་སྟན་ལ་འདུག་སྟེ་འདི་སྐད་དོ།། ཀྱཻ། དེ་རིང་བཀྲ་ཤིས་ཉི་མ་འདིར། །བཀྲ་ཤིས་ཚེས་གྲངས་ཡར་ངོར་ཕྱོགས། །བཀྲ་ཤིས་གཟའ་སྐར་བཟང་པོ་འཛོམས། །བཀྲ་ཤིས་དགེ་བའི་ཡུལ་ཕྱོགས་འདིར། །རྡོ་རྗེ་སློབ་དཔོན་འཁོར་བཅས་ཀྱི། །གསས་མཁར་གཉན་པོ་དཔང་བསྟོད་དོ། །སྲ་བརྟན་
གཞོམ་མེད་རྡོ་རྗེའི་མཐུ། །མངོན་གྱུར་རི་བོའི་སྤོ་ལ་བརྟེན། །རྒྱུ་ནི་ས་ཟླའི་སྙིང་པོར་གྲུབ། །བཙོ་མདངས་གཟི་འོད་འབར་བ་ལ། །དབང་སྔོན་བྱ་འདབ་མར་རྒད་ཀྱི། །རྒྱ་ཕུབ་ནོར་བུའི་ཏོག་གིས་མཛེས། །ཕྱོགས་བཞི་གཡུ་ཡི་སྒོ་བར་བྱེ། །ནང་དུ་གསེར་གདུང་བཞི་བྲེས་པར། །པདྨ་རཱ་གའི་ཀ་བ་བཙུག །མན་ཤེལ་སྦུག་དང་ཀ་ན་ཀའི། །དྲྭ་བ་མུ་ཏིག་ཀའི་ཕྲེང་བ། །རབ་བཀྲ་དར་དཔྱངས་ལྷབ་ལྷུབ་གཡོ། །སྟེང་དུ་ཟ་འོག་བླ་བྲེ་བྲེས། །རཏྣ་ཀ་ཡི་ཁྲི་འཕང་སྟེང་། །རྩ་བརྒྱུད་བླ་མ་རྒྱ་མཚོ་དང་། །གསང་སྔགས་གསར་སྙིང་རྒྱུད་སྡེ་བཞིའི། །དཀྱིལ་འཁོར་ལྷ་དང་ཌཱ་ཀིའི་ཚོགས། །ཆོས་སྐྱོང་སྣང་སྲིད་ཡུལ་གྱི་བདག །གཞན་ཡང་སྲུང་སྐྱོབས་འགོ་བའི་ལྷ། །ཐམས་ཅད་རྟེན་འདིར་བརྟན་བར་བཞུགས། །ཀྱཻ། ཤར་ཕྱོགས་ཤེལ་དང་ཀརྐེ་ཏའི། །རང་བཞིན་ལས་གྲུབ་གསས་མཁར་ནི། །མཐོ་བརྗིད་རྩེ་ལ་ལྗོན་ཤིང་བཀྲ། །སྒྲོ་སྨྱུག་ལྕགས་ཀྱི་མདེའུ་ཅན། །དར་སྣས་
བརྒྱན་པ་མཛེས་པར་བཙུག །དུང་གི་མུ་ཐག་ཚེ་ལྷས་སྐྱོབས། །དེ་རིང་གསས་མཁར་འདི་བསྟོད་པས། །དབང་ཕྱོགས་ས་བདག་ཀླུ་གཉན་དང་། །ཡུལ་ལྷ་གཞི་བདག་ཐམས་ཅད་དང་། །མཚུན་དང་དགྲ་ལྷ་དགྱེས་བསྐྱེད་ཅིང་། །སྐུ་མཁར་འདི་ལ་བརྟན་པར་བཞུགས། །ཞི་བའི་ཕྲིན་ལས་མཛད་དུ་གསོལ། །ཀྱཻ། ལྷོ་ཕྱོགས་གཡུ་དང་ཨིནྡྲ་ནིའི། །རང་བཞིན་ལས་གྲུབ་གསས་མཁར་ནི། །མཐོ་བརྗིད་རྩེ་ལ་ལྗོན་ཤིང་བཀྲ། །སྒྲོ་སྨྱུག་ལྕགས་ཀྱི་མདེའུ་ཅན། །དར་སྣ་རིན་ཆེན་རྒྱན་ལྡན་བཙུག །མཐིང་གི་དམུ་ཐག་ནོར་ལྷས་སྐྱོབས། །དེ་རིང་གསས་མཁར་འདི་བསྟོད་པས། །ལྷོ་ཕྱོགས་ས་བདག་ཀླུ་གཉན་དང་། །ཡུལ་ལྷ་ནོར་ལྷ་ཐམས་ཅད་དང་། །མཚུན་དང་དགྲ་ལྷ་དགྱེས་བསྐྱེད་ཅིང་། །སྐུ་མཁར་འདི་ལ་རྟག་བཞུགས་ནས། །རྒྱས་པའི་ཕྲིན་ལས་མཛད་དུ་གསོལ། །ཀྱཻ། ནུབ་ཕྱོགས་ཟངས་དང་པདྨ་རཱའི། །རང་བཞིན་ལས་གྲུབ་གསས་མཁར་ནི། །
མཐོ་བརྗིད་རྩེ་ལ་ལྗོན་ཤིང་བཀྲ། །སྒྲོ་སྨྱུག་ལྕགས་ཀྱི་མདེའུ་ཅན། །དར་སྣས་མཛེས་པར་རྒྱན་པ་བཙུག །མཚལ་ཀྱི་དམུ་ཐག་མ་ལྷས་སྐྱོབས། །དེ་རིང་གསས་མཁར་འདི་བསྟོད་པས། །ནུབ་ཕྱོགས་ས་བདག་ཀླུ་གཉན་དང་། །ཡུལ་ལྷ་ཟོ་དོར་ཐམས་ཅད་དང་། །མཚུན་དང་དགྲ་ལྷ་དགྱེས་བསྐྱེད་ཅིང་། །སྐུ་མཁར་འདི་ལ་རྟག་བཞུགས་ནས། །ཁམས་གསུམ་དབང་སྡུད་ཕྲིན་ལས་མཛོད། །ཀྱཻ། བྱང་ཕྱོགས་ལྕགས་དང་བཻ་ཌཱུརྱའི། །རང་བཞིན་ལས་གྲུབ་གསས་མཁར་ནི། །མཐོ་བརྗིད་རྩེ་ལ་ལྗོན་ཤིང་བཀྲ། །སྒྲོ་སྨྱུག་ལྕགས་ཀྱི་མདེའུ་ཅན། །དར་ནག་མགུལ་དུ་བཅིངས་པ་བཙུག །གཡུ་ཡི་དམུ་ཐག་དགྲ་ལྷས་སྐྱོབས། །དེ་རིང་གསས་མཁར་འདི་བསྟོད་པས། །བྱང་ཕྱོགས་ས་བདག་ཀླུ་གཉན་དང་། །ཡུལ་ལྷ་ཟོ་དོར་ཐམས་ཅད་དང་། །མཚུན་དང་དགྲ་ལྷ་དགྱེས་བསྐྱེད་ཅིང་། །སྐུ་མཁར་འདི་ལ་རྟག་བཞུགས་ནས། །དྲག་པོས་དགྲ་བགེགས་བརླག་པར་
མཛོད། །ཀྱཻ། ཚེ་ལ་དབང་བའི་རིག་འཛིན་གྱིས། །ཚེ་བསོད་མཐོ་བའི་གསས་མཁར་བརྩེགས། །ཚེ་རིང་དབང་ཕྱོགས་རྒྱལ་ཁབ་ཀྱིས། །ཚེ་ལྡན་ན་ཆུང་ལག་འཕྲུལ་ལས། །གྲུབ་པའི་དར་དཀར་དམུ་ཐག་འཐེན། །འཇུ་ཐག་དཀར་པོ་ཡར་ལ་འཐེན། །ཚེ་སྲོག་སྲ་ཞིང་རིང་བ་དང་། །བཙན་འཕེལ་ལོངས་སྤྱོད་འཛོམས་པ་ཡི། །དམུ་ཐག་དཀར་པོ་ཡར་ལ་འཐེན། །བླ་མ་ཡི་དམ་མཁའ་འགྲོ་དང་། །ཆོས་སྐྱོང་དགྲ་ལྷའི་མགོན་སྐྱོབས་ཀྱི། །ལྷ་ཡི་དམུ་ཐག་ཡར་ལ་འཐེན། །ཁ་འཛིན་ལུས་དང་གྲིབ་མ་བཞིན། །གཞི་བྱེས་ལམ་གསུམ་འགྲོགས་པ་དང་། །མི་འདོད་འབྲས་ཞི་བདེ་སྐྱིད་རྒྱས། །ཁམས་གསུམ་ཀུན་འདུས་མངོན་སྤྱོད་ཀྱིས། །ནག་པོའི་ཕྱོགས་རྣམས་ཚར་ཆོད་ཅིག །ཀྱཻ། དེང་འདིར་ཚེ་རིང་གཏོར་སྐུ་བཙུག །རིན་ཆེན་བརྩེགས་པའི་གསས་མཁར་ལ། །དགྲ་ལྷའི་རྒྱལ་པོའི་རྟེན་འཛུག་པ། །ས་ལ་སྤོས་ཀྱི་འཁྲི་ཤིང་དང་། །སྣ་ཚོགས་མཚོན་གྱི་རེ་
ཁ་བཀྲ། །དཔའ་སྟོབས་བརྟུལ་ཕོད་བརྗིད་པའི་ལུས། །སྲ་འཐས་རྡོ་རྗེའི་གོ་ཁྲབ་ཅན། །མདུང་དམར་རུ་མཚོན་མཐིང་འོད་གྲི། །འཆིངས་ལེན་ཞགས་པ་ལག་ཏུ་ཐོགས། །ཕུབ་ཆེན་སྟག་དོང་གཟིག་ཤུབ་བཀྲ། །མགྱོགས་པ་ཤུགས་ལྡན་རྟ་ལ་གནས། །སྡེར་ཆག་རྒྱལ་པོ་གཡུ་རལ་ཅན། །ལུས་གྲིམ་རྩལ་ལྡན་ཤ་ར་བྷ། །རྒྱ་སྟག་འཛུམ་དྲུག་འཁྱིལ་བ་དང་། །དོམ་ནག་སྙིང་དཀར་ཐིག་ལེའི་ལུས། །ཁྱི་ནག་དྲེད་མོང་མི་ཟན་དང་། །སྤྱང་སྔོན་གཅན་གཟན་གཏུམ་དགུ་དང་། །ཅང་ཤེས་རྟ་དང་འགྱིང་བའི་གཡག །ཐིག་ཆེན་དྲེའུ་དང་ཙ་ར་ལུག །མ་ཧེ་བཞོན་ཕྱུག་བགྲངས་ཡས་པ། །འདབ་ཆགས་དཀར་མིག་བུ་དང་ནི། །དཔྱིད་ཀྱི་ཕོ་ཉ་ཚེ་རིང་བྱ། །ནེའུ་ཙོ་གར་མཁན་མདོངས་མཐའ་ཅན། །བཞད་དང་དུར་པ་ཀ་དམ་པ། །གསེར་མིག་བྱ་གག་ཙ་ཀོ་ར། །མགྲིན་པའི་རྫ་རྔ་ལ་སོགས་པའི། །མཁའ་འགྲོ་དབྱངས་ཅན་སྤུ་སྡུག་ཁྱུ། །རི་སྐྱེས་ཀྲྀ་ཎ་ས་ར་དང་། །རྭ་གཅིག་པ་
དང་ཤ་བ་རྐྱང་། །འབྲོང་རྒོད་གཉན་དང་མཆེ་ཅན་དང་། །གཞན་ཡང་ནག་དང་བས་མཐའ་ལ། །ཡོངས་གནས་རི་དྭགས་ཐམས་ཅད་ཚོགས། །དེ་རིང་དགྲ་ལྷའི་རྟེན་དུ་འབུལ། །བཅོལ་བའི་ཕྲིན་ལས་མཛད་དུ་གསོལ། །ཀྱཻ། རིན་ཆེན་དངུལ་དཀར་ཕུད་སྐྱོགས་ནང་། །འཆི་མེད་བཏུང་བ་བདུད་རྩིའི་བཅུད། །ཡེ་ཤེས་ལས་སྤྲུལ་ཨ་མྲྀ་ཏ། །དགྲ་ལྷ་དགྱེས་པའི་ཞལ་དུ་འབུལ། །འདབ་སྟོང་བཞད་དང་དྲི་བསུང་ཅན། །མལླི་ཀ་ཡི་ཕྲེང་བ་བྲེས། །ངད་བཟང་སྣ་ཚོགས་སྤོས་ཀྱི་རིགས། །བསྲེགས་པའི་དུད་པ་ཁྱབ་ཅིང་འཐུལ། །སྣང་གསལ་སྒྲོན་མེའི་གཟི་འོད་ཀྱིས། །ཕྱོགས་ཀྱི་འཁོར་ལོའི་དཔལ་དུ་འབར། །ཧ་རི་ཙན་དན་དྲི་ཆབ་ཀྱིས། །ཟག་མེད་ཐུགས་ལ་སིམ་པར་བསྐྱེད། །ཕུན་ཚོགས་དཀར་མངར་རོ་བརྒྱའི་ཟས། །མི་ཟད་ནམ་མཁའི་མཛོད་དུ་འབུལ། །སྙན་པའི་དབྱངས་དང་རོལ་མོའི་སྒྲས། །སྙན་གྱི་དབང་པོ་ཚིམ་པར་བྱས། །གཞན་ཡང་ལྷ་
མིའི་འབྱོར་བའི་ནོར། །དེ་རིང་དགྲ་ལྷའི་རྟེན་དུ་འབུལ། །སྐུ་མཁར་འདི་ལ་རྟག་པར་བཞུགས། །ལས་རྣམས་ཐོགས་མེད་ཉིད་དུ་སྒྲུབས། །ཧཱུྃ། རིག་འཛིན་པདྨ་ཐོད་ཕྲེང་བཀས། །ཟིལ་མནན་དམ་ལ་ཕབ་པ་ཡི། །བསྟན་སྲུང་ཡུལ་ལྷ་ཁྱེད་རྣམས་ལ། །བསྟོད་དོ་དམ་ལྡན་དགྲ་ལྷ་མཛོད། །ལས་བཞིའི་མཐུ་ལ་མངའ་བརྙེས་པའི། །མགོན་སྐྱབས་བྱེད་པ་ཐམས་ཅད་དང་། །ཁྱད་པར་ལེགས་ལྡན་ཕྱག་བཞི་པ། །འདོད་ཁམས་དབང་ཕྱུག་དུད་སོལ་མ། །ཐུགས་གསུང་སྐུ་ཡི་འཁོར་ལོའི་ལྷ། །སྦོམ་ར་སྤྲག་ཇག་ཡུལ་ལྷ་དང་། །ནོར་ལྷ་ཆེན་པོ་མཆེད་བརྒྱད་དང་། །དཔའ་བྱེད་དགྲ་ལྷ་དར་མ་དང་། །འཕེལ་བྱེད་དགྲ་ལྷ་བུ་རྫི་དང་། །ཕྱུག་བྱེད་དགྲ་ལྷ་རྨ་གཡང་ཏེ། །སྐུ་གསུང་ཐུགས་ཀྱི་དགྲ་ལྷ་རྣམས། །གསས་མཁར་འདིར་བཞུགས་མངའ་གསོལ་ལོ། །བཞུགས་ནས་སངས་རྒྱས་བསྟན་སྲུང་ལ། །དེ་འཛིན་ཞབས་བརྟན་བཞེད་པ་སྒྲུབས། །དམ་པའི་ཆོས་ཀྱི་རྒྱལ་
མཚན་ཚུགས། །ནག་པོའི་ཕྱོགས་རྣམས་གཞོམ་པ་དང་། །ཡུལ་འདིར་བཀྲ་ཤིས་དགེ་བའི་ཆར། །རྟག་འབབ་ལོངས་སྤྱོད་མི་ཟད་པའི། །དབྱར་མཚོ་བཞིན་དུ་འཕེལ་ཞིང་རྒྱས། །བདག་ཅག་རྒྱུ་སྦྱོར་འཁོར་བཅས་ལ། །མི་མཐུན་ལས་རྒྱལ་ཚེ་དབང་སྟོབས། །མི་འཕེན་རྟ་ཧྲག་འཛོམས་པ་དང་། །ཆོས་བཞིན་སྨོན་པའི་དོན་རྣམས་ཀུན། །འགྲུབ་ལ་བུམ་པ་བཟང་པོ་ལས། །ལྷག་པའི་མཐུ་ལྡན་ཁྱེད་རྣམས་ཀྱིས། །བཅོལ་བའི་ཕྲིན་ལས་དེ་དག་ཀུན། །འབད་མེད་ལྷུན་གྱིས་གྲུབ་པར་མཛོད། །བཀྲ་ཤིས་སྨོན་ལམ་གྱིས་མཐའ་བརྒྱན་པར་བྱའོ། །དེ་ལྟར་གསས་མཁར་བསྟོད་པའི་རིམ་པ་གོ་བདེ་ཉུང་ལ་འཐུས་པ་འདིའང་སློབ་དཔོན་པདྨས་མཛད་པའི་གསས་མཁར་ཁ་བསྟོད་ལ་གཞི་བྱས་ཏེ། །མདོ་སྟོད་ཀྱི་སའི་ཆར་སྐྱེས་པའི་བནྡེ་མི་ཕམ་རྒྱ་མཚོའི་སྡེས་ལྷག་པའི་བསམ་པས། འཛི་བཀྲ་ཤིས་ཆོས་འཁོར་གླིང་དུ་མགྱོག་པར་བྲིས་སོ། །དེ་ནས་དཔལ་མགོན་ལྕམ་དྲལ་གཙོ་བོར་གྱུར་བའི་སྲུང་མ་རྣམས་ལ། ཕྱི་རྟེན་སྤྱན་གཟིགས་རིགས་དམིགས་བསལ་སྤྲོས་བཅས་ཀྱིས་འབུལ་བར་འདོད་པས། འོག་གི་ཚིག་རིས་དང་
མཐུན་པའི་སྲོག་ཆགས་རྣམས་གསར་དུ་འཛུག་ན། འཁོན་སེལ་ཅན་གྱི་ལག་ནས་བྱུང་བ་དང་། རྒན་པོ། ནད་པ་སོགས་སྐྱོན་ཅན་མ་ཡིན་པ། ཁ་དོག་དང་། མཚན་མ་སོགས་སྲུང་མ་སོ་སོར་མཐུན་པ་རྣམས་ལ་བགེགས་ཕྲལ་ཞིང་། བསང་ཁྲུས་ཀྱི་ཆོ་ག་ནན་ཏན་ཏུ(དུ)་བསྒྲུབ་ནས། དར་ཚོན་སོགས་སོ་སོར་འོས་པའི་རྒྱན་གྱིས་བསྟར་བ་འདུ་བྱ། འདོན་ཆ་བྱིན་བརླབས་ནས་བཟུང་། འབུལ་ཚིག་བཅས་རྟེན་འབུལ་རྒྱུ་གང་ཡིན་དང་མཐུན་པའི་འདོར་ལེན་རིག་པས་འཕྲུལ་དགོས་ཤིང་། ཕྱི་རྟེན་སོགས་རྙིང་པ་སླར་ཡང་ཁ་གསོ་བ་ཡིན་ནའང་། བསང་ཁྲུས་རྒྱན་གྱིས་བསྟར་བ་སོགས་བྱ། གང་ལྟར་ཡང་། དང་པོ་བྱིན་གྱིས་བརླབ་པ་ནི། བདུད་རྩི་གཏོར་ཞིང་། བསང་སྦྱང་། སྟོང་པའི་ངང་ལས་ཙཾ་ལ་སོགས་པ་སོ་སོའི་མིང་ཡིག་དང་པོ་ཐིག་ལེས་བརྒྱན་པ་ལས་བྱུང་བའི་རྒྱལ་སྲིད་རིན་ཆེན་སྣ་བདུན། །ཨིཾ་ལས་རྟ་ནག །ཙཾ་ལས་གཡག་ནག་དང་ར་སྐྱེས། ཀཾ་ལས་གོ་ཁྲབ། ཤིཾ་ལས་རྨོག །ཤཾ་ལས་མཚོན་ཆ། ཀུཾ་ལས་མདུང་། ཨཾ་ལས་རུ་མཚོན། མེཾ་ལས་ལུག་ནག །ཤཾ་ལས་ཁྱི་ནག །ནེཾ་ལས་དར་ལྷབ་ལྷུབ། བཾ་ལས་བ་དན་སྣ་ཚོགས་པའི་སྤྱན་གཟིགས་བཟང་ཞིང་རྒྱ་ཆེ་བ་གྲངས་
མེད་པ། ནམ་མཁའ་གང་བ་རྣམས་སུ་གྱུར། །ཨོཾ་བཛྲ་སྥ་ར་ཎ་ཁཾ། ལན་གསུམ་བརྗོད་གཉིས་པ་འབུལ་ཞིང་ཕྲིན་ལས་བཅོལ་བའི་སྔགས་ཚིག་ནི། རྟ་ཕོ་བཙན་ན། དཔལ་ཆེན་མ་ཧཱ་ཀཱ་ལ་ལྕམ་དྲལ་ལ། །ཕྱི་ནང་གསང་བས་བསྡུས་པའི་མཆོད་པ་དང་། །ཁྱད་པར་མི་འབྲལ་འགྲོགས་པའི་རྟེན་རྫས་སུ། །རྒྱལ་སྲིད་མཛེས་བྱེད་རིན་ཆེན་སྣ་བདུན་ལས། །ཡོན་ཏན་ཕུལ་དུ་གྱུར་པའི་ཅང་ཤེས་རྟ། །ལྟ་ན་སྡུག་པའི་བྱད་དང་གློག་ཕྲེང་གི །སྒྱུ་རྩལ་རང་གིར་བྱས་པའི་ཡན་ལག་ཅན། །གྲུང་པོར་འདུག་པའི་མིག་གཉིས་ཙན་དན་ཆུས། །ཨུཏྤལ་སྔོན་པོར་བྲན་བཞིན་གསར་པའི་དཔལ། །རྔ་རྔོག་མཆོག་ཏུ་བཟང་སྟེ་གདེང་ལྔ་པ། །འགྱིང་ཞིང་ཆས་པ་ལྟ་བུར་རྣམ་པར་བརྗིད། །རླུང་གིས་དལ་བུར་བསྐྱོད་པའི་སྤུ་སྡུག་ནི། །རྩེ་མོ་སྣ་ཚོགས་འོད་དང་འགྲོགས་པའི་གྲ། །ཡ་མཚན་ལྟད་མོ་སྦྱིན་དེས་ཆེན་པོ་ཡི། །མདུན་ས་མཛེས་པར་བྱེད་པ་ས་སྲུང་བཞིན། །གླང་པོ་བཟུང་བ་ལྟ་བུའི་དཔུང་པ་གཉིས། །
དར་སྣ་སྟག་གཟིག་རྒྱན་གྱིས་སྤྲས་པ་ཡི། །མྱུར་མགྱོག་རླུང་གི་ཤུགས་དང་ལྡན་པ་འདི། །ལྷ་ཡི་རྟེན་དུ་འཛུག་གོ་དགྱེས་རྒུར་བཞེས། །ཁྱེད་ཀྱི་ཐུགས་དམ་གཉན་པོ་འདིས་བསྐང་ངོ་། །སྐུ་གསུང་ཐུགས་ཀྱི་དམ་ཚིག་ཉམས་པ་དང་། །དམ་རྫས་མ་ཚང་མཆོད་གཏོར་གཡེལ་བ་དང་། །ཉེས་པར་གྱུར་པ་ཐམས་ཅད་འདིས་འཆགས་སོ། །འཁོར་དང་བཅས་པས་ཚངས་པར་སྩལ་ནས་ཀྱང་། །བདག་ཅག་དགྲ་ཡི་གཡུལ་ལས་རྒྱལ་བ་དང་། །ཚེ་དང་དཔལ་དང་མངའ་ཐང་སྤེལ་བ་དང་། །བསམ་པ་ཆོས་བཞིན་འགྲུབ་པར་མཛད་དུ་གསོལ། །ཞེས་དང་། དམ་ཅན་ལ་བཙན་ན། དམ་ཅན་སྐྱེས་བུ་ཆེན་པོ་འཁོར་བཅས་ལ། །ཞེས་དང་། ཞིང་སྐྱོང་ལ། ཞིང་སྐྱོང་ཀུན་དགའ་གཞོན་ནུ་འཁོར་བཅས་ལ། །ཞེས་དང་། ཐང་ལྷ་ལ། གཉན་ཆེན་ཐང་ལྷ་གཉན་པོ་འཁོར་བཅས་ལ། །ཞེས་དང་། བདུད་ཀྱི་མགོན་པོ་ལ། བདུད་ཀྱི་མགོན་པོ་ཆེན་པོ་འཁོར་བཅས་ལ། །ཞེས་དང་། བཙན་གྱི་མགོན་པོ་ལ། བཙན་གྱི་མགོན་པོ་ཆེན་པོ་
འཁོར་བཅས་ལ། །ཞེས་དང་། ཀླུའི་མགོན་པོ་ལ། ཀླུ་ཡི་མགོན་པོ་ཆེན་པོ་འཁོར་བཅས་ལ། །ཞེས་སོགས་སྦྱར་རོ། དེ་ནས་གཏོར་མ་མགོ་བོར་བཞག་ནས་སྤྱན་འདྲེན་གྱི་སྔགས་དང་། བསྟན་སྲུང་མ་ཧཱ་ཀཱ་ལ་ལྕམ་དྲལ་ཁྱེད་རྣམས་ལ། །རྟེན་རྫས་འདི་འཛུགས་པ་ལགས་པས། སྐུ་གསུང་ཐུགས་ཀྱི་བྱིན་གྱིས་རློབས་ཤིག །སྲུངས་ཤིག །སྐྱོབས་ཤིག །བདག་གིར་མཛོད་ཅིག །ཅེས་བརྗོད། །མར་གྱི་ཞུར་འཐེན། ནས་འཐོར། ལྷ་གཞན་རྣམས་ཀྱང་སོ་སོའི་སྔགས་ཀྱི་མཇུག་ཏུ། དམ་ཅན་སྐྱེས་བུ་ཆེན་པོ་འཁོར་དང་བཅས་པ་ཁྱེད་རྣམས་ལ་སོགས་པ་བསྒྱུར་བ་སྦྱར། སྔགས་ཟུར་གསལ་མེད་པ་ལ་བོད་སྐད་བཀའ་སྒོ་འདི་གས། གཏོར་མ་མགོ་ཐོག་ཏུ་བཞག་པ་སོགས་བྱའོ། །འབྲི་གཡག་བཙན་ན། དཔལ་ཆེན་མ་ཧཱ་ཀཱ་ལ་ལྕམ་དྲལ་ལ། །ཕྱི་ནང་གསང་བས་བསྡུས་པའི་མཆོད་པ་དང་། །ཁྱད་པར་མི་འབྲལ་འགྲོགས་པའི་རྟེན་རྫས་སུ། །རྩེ་མོ་རྣམ་པར་འབིག་པའི་རུ་རྣོན་ཟུང་། །ཨིནྡྲ་ནཱི་ལས་བྱུགས་བཞིན་སྔོ་བསང་དང་། །ཆར་སྤྲིན་འཁྲུགས་པ་དང་མཚུངས་སྤུ་ཞོལ་གྱི། །ཕག་
ནས་ལྕགས་རྨིག་ལྡན་པའི་ཡན་ལག་གིས། །བཟང་པོའི་སྟོབས་ཀྱིས་གོམས་པ་འདོར་བཞིན་དུ། །རབ་ཏུ་འགྱིང་དང་ལྷན་ཅིག་དུད་པ་ལ། །འགྲན་བཟོད་རྔ་ཆས་གྱེན་དུ་གཟིང་པ་ཡིས། །གནག་ཕྱུག་ཁྱུ་མཆོག་རྒྱན་གྱིས་སྤྲས་པ་འདི། །ཁྱེད་ཀྱི་རྟེན་དུ་འཛུག་གོ་དགྱེས་རྒུར་བཞེས། །སོགས་སྔར་ལྟར་འདི་གྱིད(བགྱིས)་ཀུན་ལ་སྦྱོར་བ་འགྲོའོ། །ལུག་བཙན་ན། ལྷ་རྫས་ཀ་ཤི་ཀ་ཡི་རེག་བྱ་ལ། །ངེས་པར་དོ་ཟླ་བྱེད་པའི་སྤུ་ཚོགས་འཐུག །བརྡུང་བྱེད་ཐོ་བའི་སྟོབས་འཆང་ཐོད་པ་ལས། །ལེགས་པར་སྐྱེས་པའི་ཐབས་དང་ཤེས་རབ་རྭ། །དཔལ་མོའི་ལག་པ་མཛེས་བྱེད་གདུབ་སྐོར་ལ། །འཁུ་བ་བཞིན་དུ་རྣམ་པར་འཁྱིལ་དེ་དང་། །དགའ་བས་མཁུན་པའི་སྒྲ་ལྡན་བག་ཕེབས་པའི། །གཡང་མོ་ཀུན་གྱི་ཁྱུ་མཆོག་རྒྱན་སྤྲས་འདི། །ཁྱེད་ཀྱི་རྟེན་དུ་འཛུག་གོ་དགྱེས་རྒུར་བཞེས། །སོགས་འགྲེའོ། །ར་བཙན་ནི། གསེར་གྱི་པདྨོ་ཨཱནྡ་རྙིལ་གྱིས་སྤྲས། །བརྒྱན་པ་དང་མཚུངས་མཛེས་པའི་ལྟ་བྱེད་དང་། །
གྱེན་དུ་བསྒྲེངས་ཏེ་བསྣུན་པའི་རྭ་གཉིས་པོ། །འཁྲི་ཤིང་གཞོན་ནུ་ལྟར་མཉེན་སུམ་འཁྱོག་ཅན། །གྲྭ་རྒོད་རྒྱས་པའི་སྤུ་ཞོལ་རྒྱང་རིང་ནས། །དྲག་པོའི་སེར་བ་འབབ་དང་མཚུངས་པའི་དབྱིབས། །ཐོགས་མེད་རྩལ་གྱིས་འགྲོ་བའི་ཤུགས་ཆེན་པོ། ར་སྐྱེས་གཙོ་བོ་རྒྱན་གྱིས་སྤྲས་པ་འདི། །ཁྱོད་ཀྱི་རྟེན་དུ་འཛུག་གོ་སོགས་འགྲེའོ། །ཁྱི་ནག་བཙན་ན། ཟླ་བ་ཕྱེད་པ་ཐུན་མཚམས་འོད་ཟེར་དང་། །འགྲོགས་པ་ལྟ་བུའི་མཆེ་བ་རཀྟ་ཡིས། །བྱུག་པའི་བར་ན་གློག་ཕྲེང་དང་མཚུངས་ལྕེ། །རྣམ་པར་བསྐྱེད་དེས་དགྲ་རྣམས་འཇིག་བྱེད་ལ། །དྲག་པོའི་ང་རོ་འབྱིན་དང་ཞེ་སྡང་གི །སྡེར་མོ་གནམ་ལྕགས་ངར་ལས་བཏུས་པའི་རྣོས། །ས་རྣམས་རློག་བྱེད་དོམ་བུ་མིག་སྨན་མདོག །ནོར་སྐྱོང་གཏུམ་པོ་རྒྱན་གྱིས་སྤྲས་པ་འདི། །ཁྱེད་ཀྱི་རྟེན་དུ་འཛུག་གོ་སོགས་འགྲེའོ། །ཞེས་དབོན་པོ་ཀརྨ་ཆོས་སྲིད་ཀྱིས་བསྐུལ་བ་དོན་ཡོད་པར་བྱ་ཕྱིར་ཤཱཀྱའི་དགེ་སློང་དྷརྨ་ཤྭ་རས་བྲིས་པའོ། །སྲིད་པའི་དཔལ་འབྱོར་ཕུལ་རྣམས་ཀྱིས། ལྷ་རྣམས་
དགྱེས་བྱེད་སྤྲིན་གཏིབས་པ། བཀྲ་ཤིས་དོན་ཀུན་གྲུབ་པའི་ཆར། ནོར་བུའི་སྙིང་པོ་དགེ་གྱུར་ཅིག །ཅེས་པའང་སྒར་བསང་ཆེན་མོའི་ཆ་ལག་ཏུ་འདུ་བ་གྱིད་པ་པོ་ནི་ཀརྨ་པའི་མཚན་འཛིན་མཁའ་ཁྱབ་རྡོ་རྗེའོ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།