འཕགས་མ་སྒྲོལ་དཀར་གྱི་ཆོ་ག་དངོས་གྲུབ་ཀུན་སྩོལ།
འཕགས་མ་སྒྲོལ་དཀར་གྱི་ཆོ་ག་དངོས་གྲུབ་ཀུན་སྩོལ་ཞེས་བྱ་བ་བཞུགས་སོ། །
ན་མ་ཨཱརྻ་ཏཱ་རཱ་ཡཻ། དཔལ་ལྡན་ཡིད་བཞིན་འཁོར་ལོའི་མཐུ་སྟོབས་ཀྱིས། །འཆི་བདག་ནུས་པ་འཕྲལ་དུ་འཇོམས་པ་དང་། །འདོད་དོན་གེགས་འཕགས་མ་སྒྲོལ་མ་ཕྱག་འཚལ་ལོ། །མེད་སྩོལ་བ་ལ་བཏུད་དེ། །དེ་ཡི་སྒྲུབ་ཐབས་དངོས་གྲུབ་ཀུན་སྩོལ་བྲི། །དེ་ལ་འདིར་སློབ་དཔོན་ངག་གི་དབང་ཕྱུག་གྲགས་པས། ཆོས་སྤྱོད་དབང་བོ་ཐུལ་པ་ནི། །འཁོར་བ་རུ་ནི་ཇི་སྲིད་འཚོ། །དེ་སྲིད་བསོད་ནམས་ལ་སོགས་ཚོགས་། །བྱང་ཆུབ་སྒྲུབ་བྱེད་རབ་ཏུ་སྐྱེ། །འཁོར་བར་སྲོག་ལས་གཅེས་པ་ནི། །ཅི་ཡང་ཡོད་པ་མ་མཐོང་སྟེ། །དེ་བས་མྱུར་དུ་ཐབས་མང་པོས། །འཆི་བ་སླུ་བ་ཀུན་ཏུ་སྤྱད། །གང་
ཕྱིར་རིགས་པར་ཐབས་སྦྱར་བས། །དེ་ཀ་ཅུང་ཟད་ཡོད་མ་ཡིན། །ཞེས་གསུངས་པ་ལྟར་ཚེ་སྲིང་བའི་ཐབས་མཆོག་ཏུ་ཟབ་པ་ཉམས་སུ་བླང་བར་རིགས་ཤིང་། དེ་ཁོ་ནར་མ་ཟད་དངོས་གྲུབ་མཐའ་དག་ཡིད་བཞིན་ཏུ་འབྱུང་བ་བགེགས་ཀྱི་བར་དུ་གཅོད་པས་ཀྱང་མི་བརྫི་བ། འཕགས་མ་ཡིད་བཞིན་འཁོར་ལོ་འདི་ཉིད་བསྒོམས་པས་ལས་ཐམས་ཅད་འགྲུབ་སྟེ། ཚངས་དབང་ཁྱབ་འཇུག་གཉིས་ཟླ་དང་། །དྲག་པོ་ཕྱོགས་སྐྱོང་འདོད་ལྷས་ཀྱང་། །བ་སྦུའི་རྩེ་མོའང་གཅོད་མི་ནུས། །འཆི་བདག་ལས་རྒྱལ་སྒྲོལ་མ་བཞིན། །སྐྲ་དཀར་གཉེར་མ་སྐལ་ངན་ནད། །དབུལ་བ་ལ་སོགས་ཉམས་པར་བྱེད། །སེང་གེ་ལ་སོགས་འཇིགས་ཆེན་བརྒྱད། །སྡུག་བསྔལ་ཚོགས་རྣམས་སེལ་བར་བྱེད། །སློང་བ་མེད་པར་བཟའ་བཏུང་
གོས། །ཁང་བཟང་རིན་ཆེན་ཚོགས་ཀྱང་འདུ། །རལ་གྲི་མིག་སྨན་རྐང་མགྱོགས་དང་། །བུམ་པ་བཟང་པོ་སོགས་ཀྱང་འགྲུབ། །སྙན་ངག་དང་ནི་རྩོད་ལ་མཁས། །བློ་རྣོ་ཤེས་རབ་དྲི་མ་མེད། །གཞན་ཡང་ཅི་འདོད་དངོས་གྲུབ་ནི། །འཁོར་ལོ་འདི་ལས་འབྱུང་བར་འགྱུར། །ཞེས་བཤད་པ་རྣམས་དུས་ཇི་སྲིད་ཀྱིས་འགྲུབ་ཅེ་ན། ཆེད་དུ་ཟླ་བ་དྲུག་གི་བར། །སྒྲོལ་མའི་ཐུགས་ཀྱི་འཁོར་ལོ་ནི། བསྒོམས་པས་དངོས་གྲུབ་ཐམས་ཅད་ཐོབ། །འཆི་བའི་སྐྱོན་ཀྱིས་མི་གོས་སོ། །ཞེས་འབྱུང་ལ། སྒྲུབ་ཐབས་དེ་གང་ལས་བརྒྱུད་པ་ཡང་། །ངག་གི་དབང་ཕྱུག་གིས་བྱས་པའི། །འཆི་བ་སླུ་བ་ཀུན་བཏུས་ལས། །སྒྲོལ་མ་དཀར་མོ་ཕྱུངས་པ་འདི། །བསྒོམས་པས་འཇིགས་པ་སྤོང་བར་བྱེད། །ཅེས་བཤད་པའི། པཎྜི་ཏ་ཆེན་པོ་དེ་བཅོམ་ལྡན་འདས་མ་ཉིད་ཀྱིས་མངོན་སུམ་དུ་རྗེས་སུ་བཟུང་བས་ཕྱི་ནང་གི་གཞུང་ལུགས་དུ་མ་ཐུགས་སུ་ཆུད་ནས་འཆི་བ་བསླུ་བའི་བསྟན་བཅོས་རྒྱས་པ་མཛད་ཅིང་། དེ་ལས་བརྒྱུད་པ་སྒྲུབ་ཐབས་ཀྱི་སྙིང་པོར་གྱུར་པ་འདི་ལ། གཞུང་དང་བླ་མའི་མན་ངག་ལ་བརྟེན་ནས་རང་དོན་ཚེ་སྒྲུབ་ཀྱི་རིམ་པ་ནི། མདུན་བསྐྱེད་མཆོད་པ་དང་བུམ་པ་སྒྲུབ་པ། གཞན་དོན་རྗེས་གནང་སྦྱིན་པ། བསྙེན་པའི་ཁ་སྐོང་སྦྱིན་སྲེག་སོགས་ལས་རབ་འབྱམས། དང་པོ་ནི། སྒྲུབ་པ་པོས་དབེན་ཞིང་ཡིད་དུ་འོང་པའི་གནས་སུ་མཐུན་པའི་རྐྱེན་ཚོགས་པར་བྱས་ལ། ར་བ་བཞི་གང་རུང་ལྟ་བུའི་ཟླ་བ་དཀར་ཕྱོགས་ཀྱི་
ཚེས་བརྒྱད་ཀྱི་སྔ་དྲོ་ནས་བརྩམས་ཏེ། ས་གཞི་བྱི་དོར་དང་། གནས་ཁང་བརྒྱན། བཅོམ་ལྡན་འདས་མའི་སྐུ་བཞུགས་སུ་གསོལ་བའི་སྤྱན་སྔར། མཆོད་རྫས་བཟང་པོ་ཁ་ན་མ་ཐོ་བའི་སྐྱོན་དང་བྲལ་བའི་གཏོར་མ་དཀར་གསུམ་མངར་གསུམ་དང་ལྡན་པ་རིན་པོ་ཆེའི་སྣོད་དུ་བཤམ། ཁྲུས་བྱས་གཙང་སྦྲ་དང་ལྡན་པས་སྟན་བདེ་བ་ལ་སེམས་དཔའི་སྐྱིལ་མོ་ཀྲུང་གིས་འཁོད་པའི་མདུན་ཏུ། ཆུ་གཉིས་ཉེར་སྤྱོད་རྡོ་རྗེ་དྲིལ་བུ་བཞག་ལ། ཐོག་མར་སྔོན་འགྲོའི་གཏོར་མ་བྱ་བ་ནི་དཀར་གཏོར་ཞིག་བཤམས་ཏེ། ཨོཾ་ཨཱཿཔདྨནྟ་ཀྲྀ་ཏ་ཧཱུྃ་ཕཊ་ཀྱིས་བསང་། ཨོཾ་སྭ་བྷཱ་ཝ་ཤུདྷཿསརྦ་དྷརྨཱཿསྭཱ་བྷཱ་ཝ་ཤུདྡྷོ྅་ཧཱཾ། སྟོང་པ་ཉིད་དུ་གྱུར། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཨོཾ་ཞུ་བ་ལས་བྱུང་བའི་ལྷ་རྫས་ཀྱི་གཏོར་མ་འདོད་པའི་ཡོན་ཏན་ལྔ་དང་ལྡན་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། རྡོར་ཐལ་གྱེན་དུ་ཕྱེ་བར། ནམཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མྃ་ག་ག་ན་ཁཾ་གྲྀ་ཧྞེ་དཾ་བ་ལྱཱ་དི་སྭཱ་ཧཱ། ཞེས་གསུམ། ཨོཾ་ཨཱ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུ་ཏྤ་ནྣ་ཏྭཱ་ཏ་ཨོཾ་ཨཱཿཧཱུྃ་ཕཊ་སྭཱ་ཧཱ། ཞེས་
གསུམ། གང་ཡང་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ན། །སྔགས་སྤྱོད་དོན་ཏུ་གཏོར་མ་འདི། །འབུལ་གྱིས་ཡང་དག་བཞེས་སུ་གསོལ། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ལ། །ཞེས་པ་ནས། ཡིད་ལ་འདོད་པ་ཀུན་འགྲུབ་མཛོད། །ཀྱིས་ཕྲིན་ལས་བཅོལ། ཨོཾ་སུམྦྷ་ནི་སུམྦྷ་ཧཱུྃ་ཧཱུྃ་ཕཊ། གྲྀ་ཧྞ་གྲྀ་ཧྞ་ཧཱུྃ་ཧཱུྃ་ཕཊ། ཨོཾ་གྲྀ་ཧྞ་པ་ཡ་གྲྀ་ཧྣ་པ་ཡ་ཧཱུྃ་ཧཱུྃ་ཕཊ། ཨོཾ་ཨཱ་ན་ཡ་ཧོཿབྷ་ག་ཝཱ་ནཱ་བི་ཧྱཱ་རཱ་ཛ་ཧཱུྃ་ཧཱུྃ་ཕཊ། ཅེས་གཏོར་མ་དོར་ཏེ་དཀར་ཕྱོགས་པ་ལ་གྲོགས་བཅོལ། ཡི་དམ་ཁྲོ་བོ་དང་སྒྲོལ་མའི་ང་རྒྱལ་གྱིས་རྡོ་རྗེའི་ཚ་ཚ་འཁྲོས་ནས་བགེགས་བསྐྲད་པར་བསམ། སྲུང་འཁོར་བསྒོམ་པ་ནི། ཏཱཾ་ཡིག་གི་འོད་ཟེར་ལས་བྱུང་བའི་རྡོ་རྗེའི་ས་གཞི། ར་བ་དྲྭ་བ་གུར་བླ་རེ་མེ་རི་དང་བཅས་པའི་སྲུང་འཁོར་ཡེ་ཤེས་ཀྱི་རང་བཞིན་བདུད་བཞི་སོགས་ཀྱིས་མི་ཤིགས་པ་ཀུན་ནས་བརྟན་པར་གྱུར། ཨོཾ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ། ཨོཾ་བཛྲ་ཏེ་ཛྭ་བཛྲ་ཨཱ་པ་ན་ཧཱུྃ་ཕཊ། ཅེས་བསྲུང་ཞིང་བརྟན་པར་བྱ། འདིའི་
སྔགས་སྔ་མ་སྤྱི་འགྲོ་དང་ཕྱི་མ་ལས་སྣ་ཚོགས་ཀྱི་རྒྱུད་ལས་གསུངས། ཀུ་རུ་ཀུལླེའི་རྒྱུད་ལས་སྔགས་རྒྱ་མང་པོས་སྲུང་པ་བྱེད་པར་བཤད། མཆོད་པ་བྱིན་རླབས་ནི། བསངས་སྦྱངས། སྟོང་བའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་ཆོས་ཀྱི་དབྱིངས་དང་མཉམ་པ་རྣམས་ཀྱི་ནང་དུ་ཧཱུྃ་ལས་ཁམས་གསུམ་གྱི་རྫས་ལས་ཁྱད་པར་དུ་འཕགས་ཤིང་མཆོག་ཏུ་མི་འགྱུར་བའི་མཆོད་ཡོན། ཞབས་བསིལ། མེ་ཏོག བདུག་སྤོས། མར་མེ། དྲི་ཆབ། ཞལ་ཟས། རོལ་མོ། འདོད་པའི་ཡོན་ཏན་ལྔ་དང་། རིན་ཆེན་སྣ་བདུན་དང་། མཆོད་པའི་ལྷ་མོ་ལ་སོགས་པ་མཆོད་རྫས་དངས་ཤིང་ཐོགས་པ་མེད་པ་འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་ལས་ཀྱང་ཆེས་ཆེར་ལྷག་པ་རབ་འབྱམས་ནམ་མཁའི་མཐར་ཁྱབ་པར་རྒྱས་པར་འགེངས་ཤིང་དུས་འཁོར་བ་ཇི་སྲིད་མ་སྟོང་གི་བར་དུ་རྒྱུན་མི་ཆད་པར་འབྱུང་བའི་རང་བཞིན་ཏུ་གྱུར། ཅེས་སོ་སོའི་ཕྱག་རྒྱ་དང་བཅས་བས། ཨོཾ་བཛྲ་
ཨརྒྷཾ་ཨཱཿཧཱུྃ། ཨོཾ་བཛྲ་པཱདྱཾ་ཨཱཿཧཱུྃ། ཨོཾ་བཛྲ་པུཥྤེ་ཨཱཿཧཱུྃ། ཨོཾབཛྲ་དྷཱུ་པཾ་ཨཱཿཧཱུྃ། ཨོཾ་བཛྲ་གནྡྷཾ་ཨཱཿཧཱུྃ། ཨོཾ་བཛྲ་ནེ་ཝི་དྱ་ཨཱཿཧཱུྃ། ཨོཾ་བཛྲ་ཤབྡ་ཨཱཿཧཱུྃ ཞེས་དང་། རྡོ་རྗེ་ཐལ་མོ་སྦུབས་སྟོང་དུ་སྦྱར་བའི་སོར་མོ་དབུས་མ་གསུམ་རྩེ་སྤྲད་མཐེ་བོང་དང་མཐེའུ་ཆུང་སོ་སོར་གཤིབས་ཏེ་ཁབ་ལྟར་སྦྲེང་བ་ནམ་མཁའ་་མཛོད་ཀྱི་ཕྱག་རྒྱ་སྨིན་མཚམས་སུ་བསྐོར་ཞིང་། ཨོཾ་སརྦ་བིད་པཱུ་ར་པཱུ་ར་སུ་ར་སུ་ར་ཨཱ་ཝརྟ་ཡ་ཨཱ་ཝརྟ་ཡ་ཧོཿཨོཾ་བཛྲ་སྥ་ར་ཎ་ཁཾ། ཞེས་པས་འཕེལ་ཞིང་མི་ཟད་པར་བྱ། སྐྱབས་འགྲོ་ནི། སངས་རྒྱས་མ་ལུས་ཀུན་གྱི་དངོས། །བཅོམ་ལྡན་འདས་མའི་ཞབས་པད་ལ། །བདག་དང་མཁའ་མཉམ་འགྲོ་ཚོགས་ཀུན། །བྱང་ཆུབ་བར་དུ་སྐྱབས་སུ་མཆི། །དམ་ཆོས་མ་ལུས་ཀུན་གྱི་དངོས། །བཅོམ་ལྡན་འདས་མའི་ཞབས་པད་ལ། །བདག་དང་མཁའ་མཉམ་འགྲོ་ཚོགས་ཀུན། །བྱང་ཆུབ་བར་དུ་སྐྱབས་སུ་མཆི། །འཕགས་ཚོགས་མ་ལུས་ཀུན་གྱི་དངོས། །བཅོམ་ལྡན་འདས་མའི་ཞབས་པད་ལ། །བདག་དང་མཁའ་མཉམ་འགྲོ་ཚོགས་ཀུན། །བྱང་ཆུབ་བར་
དུ་སྐྱབས་སུ་མཆི། །ཞེས་སྐྱབས་འགྲོ་ལན་ཅི་རིགས་སོང་རྗེས་སུ། འགྲོ་ཀུན་སྡུག་བསྔལ་ལས་བསྒྲལ་ཞིང་། །བདེ་བ་མཆོག་ལ་རབ་བཀོད་དེ། །བླ་མེད་བྱང་ཆུབ་ལ་བཞག་ཕྱིར། །སྒོ་གསུམ་དགེ་ལ་བཀོལ་བར་བྱ། །རང་ཉིད་སྐད་ཅིག་གིས་པད་དཀར་ཟླ་བའི་གདན་ལ་འཕགས་མ་སྒྲོལ་མར་གསལ་བའི་ཐུགས་ཀར་ཟླ་བའི་དཀྱིལ་གྱི་དབུས་སུ་ཏཱཾ་དཀར་པོ་འོད་དཀར་པོ་འབར་བ་ལས་འོད་ཟེར་ཕྱོགས་བཅུའི་འཇིག་རྟེན་གྱི་ཁམས་ཁྱབ་པར་འཕྲོས་པས། བཅོམ་ལྡན་འདས་མ་སངས་རྒྱས་དང་བྱང་ཆུབ་སེམས་དཔའི་ཚོགས་དཔག་ཏུ་མེད་པས་བསྐོར་བ་མདུན་གྱི་ནམ་མཁར་སྤྱན་དྲངས། ཨོཾ་ཨཱརྻ་ཏཱ་རཱ་ས་པ་རི་ཝ་ར་ཨརྒྷཾ་པྲ་ཏཱིཙྪ་སཱ་ཧཱ། པདྱཾ། པུཥྤེ། དྷུ་པེ། ཨཱ་ལོ་ཀེ །གནྡྷེ། ནེ་ཝིདྱ། ཤབྡ༴ བཅོམ་ལྡན་འདས་མ་ཁྱོད་ལ་ཕྱག་འཚལ་ནས། །མཆོད་པ་རྣམ་པ་དུ་མ་རབ་མཆོད་དེ། །ཉེས་གསུམ་མཐར་བྱེད་ཁྱོད་ཀྱི་སྤྱན་སྔ་འདིར། །སྡིག་པ་མཐའ་དག་བཤགས་ཤིང་
བསྡམ་པར་བགྱི། །འགྲོ་བའི་དགེ་ལེགས་ཀུན་ལ་དགའ་བསྐྱེད་དེ། །སྲིད་ཞི་ཀུན་ཏུ་བཅོམ་ལྡན་འདས་མ་ཁྱེད། །རབ་བདེ་བླ་མེད་ཆོས་ཀྱི་འཁོར་ལོ་མཆོག །རྟག་པར་བསྐོར་བས་མཐར་དག་ཚིམས་པར་གསོལ། །ནམ་ཡང་ཁྱེད་ཚུལ་ནུབ་མེད་བཀའ་དྲིན་དང་། །དགེ་ཀུན་ཁྱོད་ཉིད་ཁོ་ནའི་རྒྱུར་གསོལ་ཞིང་། །དགེ་ལེགས་སྙིང་པོའི་དཔལ་འབྲས་ཁྱོད་དང་བདག །རྣམ་པ་ཀུན་ཏུ་མི་ཕྱེད་ཉིད་གྱུར་ཅིག །ཅེས་དང་། གནས་སྐྱེ་བ་མེད་པའི་ཆོས་དབྱིངས་ནས། །ཡུམ་རྗེ་བཙུན་འཕགས་མ་སྒྲོལ་མ་བཞུགས། །ཁྱེད་སེམས་ཅན་ཀུན་ལ་བདེ་སྟེར་མས། །བདག་འཇིགས་པ་ཀུན་ལས་བསྐྱབ་ཏུ་གསོལ། །རང་ཆོས་སྐུ་ཡིན་པར་མ་ཤེས་པར། །སེམས་ཉོན་མོངས་དབང་དུ་གྱུར་པ་ཡིས། །མར་འཁོར་བར་འཁྱམས་པའི་སྡུག་བསྔལ་ལས། །ཡུམ་ཡང་དག་ལྷ་མོས་བསྐྱབ་ཏུ་གསོལ། །ཆོས་སྙིང་ནས་རྒྱུད་ལ་མ་སྐྱེས་ཏེ། །ཚིག་ཐ་སྙད་རྗེས་སུ་འབྲངས་པ་ལས། །
མཐར་གྲུབ་མཐའ་ངན་པས་བསླུས་པ་རྣམས། །ཡུམ་སྤྲོས་བྲལ་ལྷ་མོས་བསྐྱབ་ཏུ་གསོལ། །རྟོགས་པར་དཀའ་བ་རང་གི་སེམས། །མཐོང་ནས་གོམས་བར་མི་བྱེད་པར། །བྱ་བ་ངན་པས་གཡེང་བ་རྣམས། །ཡུམ་དྲན་པའི་ལྷ་མོས་བསྐྱབ་ཏུ་གསོལ། །དེ་ཉིད་ཀྱི་དོན་ལ་བསམ་བྱས་ཀྱང་། །རྒྱུ་འབྲས་ཀྱི་རྟེན་འབྲེལ་མི་ཤེས་པས། །ཤེས་བྱའི་གནས་ལ་རྨོངས་པ་རྣམས། །ཡུམ་ཀུན་མཁྱེན་ལྷ་མོས༴ སེམས་རང་བྱུང་ཡེ་ཤེས་གཉིིས་མེད་ལ། །གཉིས་འཛིན་འཁྲུལ་པའི་བག་ཆགས་ཀྱིས། །ཇི་ལྟར་བྱས་ཀྱང་བཅིངས་པ་རྣམས། །ཡུམ་གཉིས་མེད་ལྷ་མོས༴ སེམས་མཐའ་བྲལ་གཉུག་མའིི་མཚན་འཛིན་ཅན། །ཐབས་མཆོག་བདེ་དང་དབྱེར་མེད་ཀྱང་། །ད་དུང་དུ་སློབ་པའི་གང་ཟག་རྣམས། །ཡུམ་རྫོགས་སངས་རྒྱས་མས་བསྐྱབ་ཏུ་གསོལ། །འདིར་དཔེ་ལ་ལར་རྗེ་རང་བྱུང་བས་མཛད་ཟེར། སྤྲ་ོན་གཉིས་ཀ་དང་བསྡུ་ན་གང་རུང་གཅིག་གི་ཆོག དེ་ནས་འདོད་དོན་གསོལ་བ། བླ་མ་ཡིད་
བཞིན་འཁོར་ལོ་ཡིས། །དཔལ་ལྡན་བླ་མའི་ཞབས་བརྟན་ཅིང་། །བཞེད་དོན་འགྲུབ་པར་མཛད་དུ་གསོལ། །བདག་སོགས་སེམས་ཅན་ཐམས་ཅད་ཀུན། །འཇིགས་ཆེན་བརྒྱད་དང་བཅུ་དྲུག་སོགས། །ཕྱི་ནང་འཇིགས་པ་ཀུན་ལས་སྐྱོབས། །སྡུག་བསྔལ་སྲིད་བའི་མཚོ་ལས་སྒྲོལ། །ཚེ་ཡི་བར་ཆད་མ་ལུས་སོལ། །དུས་དང་དུས་མིན་འཆི་ལས་སྐྱོབས། །འཆི་མེད་ཚེ་ཡི་དངོས་གྲུབ་སྩོལ། །ཉི་ཟླ་ལྟ་བུར་གསལ་བར་མཛོད། །ཆུ་བོའི་རྒྱུན་ལྟར་རིང་བར་མཛོད། །མཚོ་ལྟར་འགྲིབ་པ་མེད་པར་མཛོད། །རི་བོ་ལྟ་བུར་བརྟན་པར་མཛོད། །ནམ་མཁའ་ལྟ་བུར་ཡངས་པར་མཛོད། །རྡོ་རྗེ་ལྟ་བུར་རྟག་བརྟན་ཞིང་། །ཚེ་དང་ཡེ་ཤེས་དངོས་གྲུབ་སྩོལ། །ཅེས་འདོད་དོན་གསོལ། ཚོགས་ཞིང་རྣམས་རང་གི་སྙིང་གའི་ས་བོན་ལ་ཐིམ་པར་གྱུར། །སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྔུག་བསྔལ་གྱི་རྒྱུ་དང་བྲལ་བར༴ སྡུག་
བསྔལ་མེད་བའི་བདེ་བ་དམ་པ་དང་མི་འབྲལ་བར༴ ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ལ་གནས་པར་གྱུར་ཅིག །ཨོཾ་ཤཱུནྱ་ཏཱ་ཛྙཱ་ན་བཛྲ་སཱ་བྷཱ་ཝ་ཨཏྨ་ཀོ་྅ཧཾ། ཆོས་ཐམས་ཅད་རང་བཞིན་མེད་པའི་སྟོང་པ་ཉིད་དུ་གྱུར། སྟོང་པའི་ངང་ལས་པཾ་ལས་པདྨ་དཀར་པོ་འདབ་མ་མཆོག་ཏུ་ཡངས་པའི་སྟེང་དུ་ཨ་ལས་ཟླ་བའི་དཀྱིལ་འཁོར་ཉ་གང་བའི་གདན་ལ་ཏཱཾ་དཀར་པོ་གནས་པ། དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་ཐམས་ཅད་ཀྱི་དུས་མ་ཡིན་པར་འཆི་བ་ལ་སོགས་པའི་འཇིགས་པ་བསལ། འོད་ཟེར་ཚུར་འདུས་ཡོངས་སུ་གྱུར་པ་ལས། རང་ཉིད་ཚེ་དཔལ་བསོད་ནམས་མཐའ་དག་འཕེལ་བར་བྱེད་པའི་བཅོམ་ལྡན་འདས་མ་སྟོན་ཟླའི་འོད་དང་མཚུངས་པའི་སྐུ་མདོག་དཀར་མོ་སྤྱན་དཀྱུས་རིང་ཞིང་འཛུམ་པའི་བཞིན་རས་ཡིད་དུ་འོང་བ། དབུ་སྐྲ་མཐོན་མཐིང་ཐོར་ཚུགས་སུ་བཅིངས་པའི་ལྷག་མ་གཡས་
གཡོན་ཏུ་འཕྱངས་བ། ལོ་བཅུ་དྲུག་ལོན་པའི་ལང་ཚོ་ནུ་འབུར་ཟུང་གིས་མཛེས་ཤིང་གཞོན་ཤ་ཅན་སྒེག་པའི་ཉམས་དང་ལྡན་པ། ཕྱག་གཡས་མཆོག་སྦྱིན་གྱི་ཕྱག་རྒྱ་དང་། གཡོན་པའི་མཐེབ་སྲིན་སྦྱར་བས་ཨུཏྤལ་དཀར་པོ་ཡལ་འདབ་རྒྱས་པ་ཐུགས་ཀར་བསྣམས་པ། ལྷ་རྫས་ཀྱི་དར་གྱི་ཤམ་ཐབས་དང་། རིན་པོ་ཆེ་སྣ་ཚོགས་པའི་དབུ་རྒྱན། སྙན་ཆ། མགུལ་རྒྱན། ཕྱག་གདུབ། ཞབས་གདུབ། དཔུང་རྒྱན། དོ་ཤལ། འོག་པག་གིས་སྤྲས་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ཟླ་བའི་རྒྱབ་ཡོལ་མངའ་བའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀའི་ཆ་སྨད་ཧཱུྃ། ཐུགས་ཀའི་དབུས་སུ་ཟླ་བ་ལ་ཏཱྃ། དེ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་པ་སངས་རྒྱས་བྱང་སེམས་ཀྱིས་བསྐོར་བ་མདུན་གྱི་ནམ་མཁར་སྤྱན་དྲངས། མཆོད་པས་མཆོད། ལྷ་དང་ལྷ་མིན་ཅོད་པན་གྱིས། །ཞབས་ཀྱི་པདྨོ་ལ་བཏུད་དེ། །ཕོངས་པ་ཀུན་ལས་སྒྲོལ་མཛད་
མ། །སྒྲོལ་མ་ཡུམ་ལ་ཕྱག་འཚལ་ལོ། །ཞེས་བསྟོད། ཛཿཧཱུྃ་བཾ་ཧོཿཡེ་ཤེས་པ་དང་དམ་ཚིག་པ་དབྱེར་མེད་དུ་གྱུར། སླར་ཡང་ཐུགས་ཀའིི་ས་བོན་གྱི་འོད་ཀྱིས་དབང་གི་ལྷ་རིགས་ལྔ་སྤྱན་དྲངས། ཨོཾ་པཉྩ་ཀུ་ལ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཱཾ། ཞེས་གསོལ་བ་བཏབ་པས་བདུད་རྩིའི་བུམ་པས་དབང་བསྐུར། དྲ་ིམ་དག །ཐོར་ཚུགས་ཀྱི་རྩེ་མོར་རིགས་ཀྱི་བདག་པོ་འོད་དཔག་མེད་མཆོག་གི་སྤྲུལ་སྐུའི་ཆ་བྱད་ཅན་གྱིས་རྒྱས་བཏབ་པར་གྱུར། བཅོམ་ལྡན་འདས་མའི་ཐུགས་ཀའི་དབུས་སུ་འཁོར་ལོ་དཀར་པོ་རྩིབས་བརྒྱད་པ་ལྟེ་བ་མུ་ཁྱུད་དང་བཅས་པ་འོད་དཀར་པོ་འཕྲོ་བའི་ལྟེ་བར་ཏཱཾ་ཡིག་གི་མཐར་ཨོཾ་ཧཱའིི་བར་དུ་རང་དང་བསྒྲུབ་བྱའིི་མིང་གི་ཡི་གེ །རྩིབས་རྣམས་ལ་མདུན་ནས་གཡས་བསྐོར་དུ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཡིག་འབྲུ་རྣམས་རབ་དུ་དཀར་ཞིང་འོད་ཀྱི་སྣང་བ་བསམ་གྱིས་མི་ཁྱབ་པས་ཕྱོགས་བཅུའི་ཞིང་གང་བས། སངས་
རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་རླབས། ལྷ་དང་མིའི་འགྲོ་བ་རྣམས་ཀྱི་ཚེ་དང་བསོད་ནམས། བརྟན་པ་སྣོད་ཀྱི་འཇིག་རྟེན་གྱི་རྩི་སྨན་རིན་པོ་ཆེ་ལ་སོགས་པའི་ནུས་པ་མཐའ་དག་འོད་ཟེར་གྱི་རྣམ་པར་བསྡུས་ནས། འཁོར་ལོ་དང་ཡིག་འབྲུ་ལ་ཐིམ་པས་འཆི་བ་མེད་པའི་ཚེ་ལ་དབང་བའི་རིག་པ་འཛིན་པའི་དངོས་གྲུབ་ཐོབ་པར་གྱུར། ཅེས་དམིགས་པ་ནི་གཞུང་གི་དངོས་བསྟན་དང་རྗེས་སུ་མཐུན་པ་ཡིན་ལ། མན་ངག་གི་ཡི་གེ་རྙིང་པ་ལ་ཡང་། འཁོར་ལོའི་མུ་ཁྱུད་གསུམ་གྱི་ནང་མ་ལ་ཨཱ་ལི་བཅུ་དྲུག་གཡོན་བསྐོར། བར་མ་ལ་ཀཱ་ལི་སོ་བཞི་གཡས་བསྐོར། ཕྱི་མ་ལ་ཡེདྷརྨཱ་གཡས་སུ་བསྐོར་བའི་ཡིག་འབྲུ་རྣམས་དཀར་པོ་ལས། འོད་ཟེར་དཀར་སེར་དམར་མཐིང་ལྗང་གུ་མཆིན་ཁ་དྲུག་རིམ་གྱིས་སྤྲོས་པས་ལུས་གང་། ཕྱི་རོལ་དུ་བར་ཐག་འདོམས་རེ་ཙམ་ན་འོད་ཀྱི་གུར་ཁྱིམ་གྱིི་རྣམ་པ་དྲུག་ཏུ་གྱུར་བའི་བར་མཚམས་ཐམས་ཅད་ཨུཏྤལ་སྔོན་པོ་གསར་དུ་ཁ་བྱེ་མ་ཐག་
པས་གང་བ། འོད་ཀྱི་ཁ་དོག་གི་དབྱེ་བས་ཞི་རྒྱས་དབང་དྲག་ལས་ཐམས་ཅད་པ་དེ་བརྟན་བྱེད་ཀྱི་ནུས་ལྡན་ཏུ་བསྒོམ། ཞེས་འབྱུང་ངོ་། །དེ་ལྟ་བུའི་དམིགས་པ་ལ་རྩེ་གཅིག་ཏུ་ཡུན་བསྲིངས་པས་ངལ་ན། འདིའི་སྒྲུབ་ཐབས་རྣམས་སུ། །ཡི་གེ་བཅུ་པའི་སྔགས་འདི་ནི། །མི་སྐྱོའི་ཡིད་ཀྱིས་བཟླ་བྱ་སྟེ། །ཨོཾ་གྱི་ཡི་གེ་དང་པོར་སྦྱིན། །ཕྱིས་ནི་ཏཱ་རེ་རབ་ཏུ་སྤྱར། །ཏུཏྟཱ་རེ་དང་ཏུ་རེ་ཕྱིས། །སྭཱ་ཧཱ་མཐའ་རུ་ལས་ཀུན་བྱེད། །ཅེས་དང་། འཆི་སླུ་ལས། དང་པོ་རྣམ་པར་སྣང་མཛད་བརྗོད། །དེ་འོག་ཏཱ་རེ་ལན་གཉིས་བརྗོད། །ཏུཏྟཱ་རེ་གཉིས་ཏཱ་རེ་གཉིས། །སྭཱ་ཧཱའི་མཐར་ཅན་འཆི་བ་བསླུ། །སྒྲོལ་མ་འབྱུང་བའི་རྒྱུད་ལས་གསུངས། །ཞེས་གསུངས་པས་ཡི་གེ་བཅུ་པ་ཁོ་ན་དང་། བཅུ་བདུན་པ་བཟླ་པའི་སྔགས་ཡིན་ནའང་། བླ་མའི་མན་ངག་ལས། ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཨཱ་ཡུཿཔུཎྱཛྙཱ་ན་པུཥྟི་ཀུ་རུ་སྭཱཧཱ། ཞེས་བཤད་པ་དང་། ཐུན་དུ་བཅད་ལ་བརྒྱ་སྟོང་ཁྲི་འབུམ་གང་འགྲུབ་བཟླའོ། །ཚུལ་དེས་ཟླ་བ་དྲུག་གམ་ཞག་གཉེར་གཅིག་སམ། ཞག་བདུན་ལ་སོགས་པར་བསྙེན་པ་བྱས་པའི་མཚན་མ་ནི། བླ་མ་གོང་མ་དག་རྨི་ལམ་དུ་སཱཙྪ་མཆོད་རྟེན་གྲངས་ངེས་པ་ཅན་ནམ་ངེས་མེད་གང་བྱུང་ཡང་འཆ་ིབ་ཟློག་པར་བཞེད་ལ། འཆི་སླུ་ལས། སྔགས་ནི་ཡེ་གེར་འབུམ་པ་རུ། །
སྒྲོལ་མའི་སྤྱན་སྔར་བཟླས་ནས་སུ། །ཞེས་འབྱུང་བ་ཡི་གེ་རེ་རེའི་གྲངས་དང་མཉམ་པའི་འབུམ་ཕྲག་ཏུ་ངེས་པས་ས་ཡ་ཕྲག་གཅིག་གྲངས་ཀྱི་བསྙེན་པའོ། །སྤྱན་སྔ་བ་ནི་འདིར་བསྙེན་པ་འབུམ་ཚོག་གཅིག་་སྐྱལ་ན་བར་ཆད་ཀྱིས་མི་ཚུགས་སོ་གསུངས། གཉིས་པ་མདུན་བསྐྱེད་མཆོད་ཅིང་བུམ་པ་བསྒྲུབ་པ་ནི། གནས་ཡིད་དང་མཐུན་བར་བླ་བྲེས་ཡོལ་བ་ལ་སོགས་པའི་བཀོད་པ་ཁྱད་པར་དང་ལྡན་པ། མཎྜལ་གླིང་དགུའི་དབུས་དང་གྲྭ--་བཞིར་སྣ་ཚོགས་པདྨ། ཕྱོགས་བཞིར་རི་རབ་གླིང་བཞི་གླིང་ཕྲན་དང་བཅས་པ་བྲིས་པའི་དཀྱིལ་འཁོར་ལ་ལྡིང་ཁྲིའི་སྟེང་དུ་བཅོམ་ལྡན་འདས་མའི་སྐུ་རྒྱན་དང་ན་བཟའི་བཀོད་པས་བརྒྱན་བར་བཞུགས་ཤིང་། མཚམས་ཀྱི་པདྨ་ལ་མཆོད་པ་ལྔ་ཚར་བཞི་བཤམ། རི་རབ་ཀྱི་སྟེང་དུ་མེ་ཏོག་གི་སྣོད་སྟེགས་དང་ལྡན་པ། དེ་རྣམས་ཀྱི་བརདུ་་རྒྱལ་སྲིད་རིན་མོ་ཆེ་བདུན། བཀྲ་ཤིས་པའི་རྟགས་བརྒྱད་ཀྱང་བྲི། སྔར་ལྟར་མཆོད་གཏོར་འདུ་བྱས་ཏེ། བདག་བསྐྱེད་བཟླ་པའི་བར་བྱ། ཨོཾ་ཨཱཿཔདྨཱནྟ་ཀྲྀཏ་ཀྱིས་བསང་། ཤཱུནྱ་ཏཱས་སྦྱངས། སྟོང་པའི་ངང་ལས་མདུན་ཏུ་སྐད་ཅིག་གིས་ཞིང་ཁམས་ཕོ་བྲང་བཀོད་པ་ཚད་མེད་པའི་དབུས་པད་ཟླ་ལ་ཚེ་དཔལ་བསོད་ནམས་རབ་ཏུ་འཕེལ་བར་བྱེད་པའི་བཅོམ་ལྡན་འདས་མ་རབ་དཀར་
དུང་དང་མུ་ཏིག་གི་ཆུན་པོ་ལྟ་བུའི་མདོག་ཅན། མཆོག་སྦྱིན་དང་སྐྱབས་སྦྱིན་ཕྱག་གིས་ཨུཏྤལ་རབ་ཏུ་རྒྱས་པ་འཛིན་ཅིང་། རྒྱན་རྣམས་ཀུན་གྱིས་རབ་ཏུ་བརྒྱན་པ་མཚན་དཔེ་བྱེ་བའི་དཔལ་གྱིས་རྣམ་པར་མཛེས་མ། རྒྱལ་བ་རྒྱལ་སྲས་རྒྱ་མཚོའི། ཚོགས་ཀྱི་དབུས་ན་འགྱིང་བའི་ཚུལ་གྱིས་པད་ཟླའི་གདན་ལ་བཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀའི་ཧཱུྃ་དང་ཏཱཾཿཡིག་ལས་འོད་འཕྲོས་རང་བཞིན་གྱི་གནས་ནས་ཡེ་ཤེས་པ་སྤྱན་དྲངས། བཛྲ་ས་མཱ་ཛཿ ཨོཾ་ཐུགས་རྗེ་རྨད་བྱུང་བཅོམ་ལྡན་འདས། །འཇིག་རྟེན་དབང་མོའི་སྲས་མོ་མཆོག །མ་ལུས་རྒྱལ་བ་ཀུན་གྱི་ཡུམ། །འཕགས་མ་སྒྲོལ་མ་འདིར་གཤེགས་གསོལ། །སྒྱུ་འཕྲུལ་འཛིན་མ་ཁྱོད་ཀྱི་སྐུ། །ཆོས་དང་དེ་བཞིན་ལོངས་སྤྱོད་རྫོགས། །སྲིད་ཞི་ཀུན་ཏུ་རྣམ་སྤྲུལ་མ། །དེང་འདིར་སྤྱན་འདྲེན་གཤེགས་སུ་གསོལ། །རྡོ་རྗེ་སེམས་མ་བདེ་ཆེན་ཡུམ། །དོན་དམ་ཕྱག་རྒྱ་ཆེན་མོའི་སྐུ། །གདོད་
ནས་དྲི་བྲལ་གསང་ཆེན་མ། །གཉིས་མེད་རོ་མཉམ་གཤེགས་སུ་གསོལ། །འགྲོ་འོང་མེད་ཀྱང་འགྲོ་འོང་ལྟར། །སྟོན་མཛད་ཕྲིན་ལས་རྒྱ་མཚོའི་གཏེར། །དོན་གཉིས་མཐའ་དག་སྒྲུབ་མཛད་མ། །ཐུགས་རྗེ་ཆེ་མངའ་འདིར་གཤེགས་གསོལ། །ཨོཾ་གུ་རུ་ཨཱརྻ་ཏཱ་རཱ་ས་པ་རི་ཝཱ་ར་བཛྲ་ས་མ་ཛཿ ཉེར་སྤྱོད་ཀྱིས་མཆོད། སླང་ཡང་ཐུགས་ཀའི་ས་བོན་ནས། རྒྱས་བཏབ་པར་གྱུར། ལེགས་སོ་བཅོམ་ལྡན་འདས་མ་ཁྱོད། །བརྩེ་བས་འདིར་ནི་གཤེགས་པ་ལས། །བདག་ཅག་སྐལ་དང་ལྡན་མཛད་དེ། །བྱང་ཆུབ་སྙིང་པོར་རབ་བརྟན་གྱུར། །ལྷ་ཀླུ་ལྷ་མིན་སོགས་དབང་པོ། །བྱེ་བའི་གཙུགས་གིས་རབ་བཏུད་པའི། །གདན་ཁྲི་མཆོག་ཏུ་མཛེས་པ་འདིར། །དགྱིས་ལྡན་རྟག་པར་བཞུགས་སུ་གསོལ། །ཨོཾ་གུ་རུ་ཨཱརྻ་ཏཱ་རཱ་པདྨ་ཀ་མ་ལཱ་ཡ་སྟྭཾ། བསངས། བྷྲཱུྃ་ལས་མཆོད་པའི་སྤྲིན་རྒྱ་མཚོ་བསམ་གྱིས་མི་ཁྱབ་པ་ཨོཾ་བཛྲ་སྥར་ཎ་ཁཾ། །ཨོཾ་སྐུ་གསུམ་རྒྱལ་བ་མ་ལུས་ཀུན་གྱི་ཡུམ། །ཁམས་
གསུམ་འགྲོ་བ་ཀུན་གྱི་གཉེན་གཅིག་མ། །དུས་གསུམ་བླ་མ་མཆོག་གི་ངོ་བོ་ཉིད། །རིགས་གསུམ་འཕགས་མའི་ཞབས་ལ་ཕྱག་འཚལ་ལོ། །ལྷ་དང་ལྷ་མིན་ཅོད་པན་གྱི། །ཞེས་པ་ནས། སྒྲོལ་མ་ཡུལ་ལ་ཕྱག་འཚལ་བསྟོད། །ཞེས་བསྟོད་དོ། །ཕྱི་ནང་གསང་བ་དེ་ཁོ་ནའི། །མཆོད་ཡོན་མཆོད་པ་རྒྱ་མཚོའི་སྤྲིན། །ཆོས་དབྱིངས་ཀུན་ཏུ་རྒྱས་འགེངས་པས། །བླ་མ་བཅོམ་ལྡན་འདས་མ་མཆོད། །ཨོཾ་གུ་རུ་ཨཱཪྱ་ཏཱ་རཱ་ཨརྒྷཾ་པྲ་ཏཱི་ཙྪ་པཱུ་ཛ་མེགྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། མེ་ཏོག པུཥྦེ། བདུག་སྤོས། དྷཱུ་པེ། སྣང་གསལ། དཱི་པེ། དྲི་ཆབ། གནྡྟེ། ཞལ་ཟས། ནཻ་ཝི་དྱ། སིལ་སྙན། ཤབྡ། གཟུགས་མཆོག རཱུ་པ། སྒྲ་སྙན། ཤབྡ། དྲིམཆོག གནྡྷེ། རོ་མཆོག ར་ས། རེག་མཆོག སྤ་ཤེ །སྣ་ཚོགས། བིཤྭ། ཨོཾ་བཛྲ་བྷུ་མི་ཨཱཿཧཱུྃ། རྡོ་རྗེའི་ས་གཞི། ཨོཾ་བཛྲ་རེ་ཁེ་ཨཱཿཧཱུྃ རྡོ་རྗེའི་འཁོར་ཡུག ཨོཾ་བུདྡྷ་བཛྲ་ཨཱཿཧཱུྃ། རྣམ་སྣང་གི་ཞིང་གི་རང་བཞིན་རྡོ་རྗེའི་རི་རབ། ཨོཾ་བཛྲ་
བཛྲ་ཨཱཿཧཱུྃ། མི་བསྐྱོད་པའི་ཞིང་གི་རང་བཞིན་རྡོ་རྗེའི་ལུས་འཕགས། ཨོཾ་རཏྣ་བཛྲ་ཨཱཿཧཱུྃ། རིན་འབྱུང་གི་ཞིང་གི་རང་བཞིན་རྡོ་རྗེའི་འཛམ་བུ་གླིང་། ཨོཾ་པདྨ་བཛྲ་ཨཱཿཧཱུྃ། སྣང་མཐའི་ཞིང་གི་རང་བཞིན་རྡོ་རྗེ་བ་ལང་སྤྱོད། །ཨོཾ་ཀརྨ་བཛྲ་ཨཱཿཧཱུྃ། དོན་གྲུབ་ཀྱི་ཞིང་གི་རང་བཞིན་རྡོ་རྗེའི་སྒྲ་མི་སྙན། དེ་དག་རེ་རེ་ཞིང་ཡང་བྱེ་བ་དུང་ཕྱུར་བསམ་གྱིས་མི་ཁྱབ་པ་མཆོད་རྫས་དུ་མས་ཡོངས་སུ་གང་བས་དུས་རྟག་ཏུ་མཆོད་པར་དམིགས་ལ། ཞིང་ཁམས་རྣམ་དག་རྡོ་རྗེའི་ས་གཞི་ལ། །རྡོ་རྗེའི་རི་རབ་ལ་སོགས་མཆོད་པའི་སྤྲིན། །རབ་འབྱམས་བསམ་ཡས་རྡོ་རྗེའི་རྒྱན་ཕྲེང་འབར། །རྡོ་རྗེའི་མཎྜལ་བླ་མེད་བཀོད་པ་འདི། །རྡོ་རྗེ་སྒྲོལ་མ་སངས་རྒྱས་ཀུན་ཡུམ་ལ། །མཆོག་ཏུ་དད་པས་ཀུན་ཏུ་བདག་འབུལ་ལོ། །ཨོཾ་གུ་རུ་ཨཱརྻ་ཏ་རཱ་སརྦ་ཏ་ཐ་ག་ཏ་མཎྜལ་པཱུ་ཛ་མེ་གྷ་ཞེས་སོགས་སམ། མཎྜལ་ཆོག་གཞན་གྱིས་ཀྱང་རུང་སྟེ། ལན་བཞིར་ཕྱོགས་སོ་སོའི་མཎྜལ་ཕུལ་བ། བདག་དང་འགྲོ་ལ་རྟག་ཏུ་བདེ་
ལེགས་ཀྱི། །གཞལ་ཡས་འབྱོར་པ་ཟད་མེད་སྩལ་དུ་གསོལ། །རྗེ་བཙུན་བཅོམ་ལྡན་འདས་མ་ཐུགས་རྗེ་ཅན། །ཞེས་པ་ནས། ཡང་ངོའི་ཟླ་ལྟར་འཕེལ་ཞིང་རྒྱས་པར་མཛོད། །ཞེས་གསོལ་བ་བཏབ། རྗེ་བཙུན་འཕགས་མ་སྒྲོལ་མ་དང་། །ཞེས་པ་ནས། འདྲེན་པའི་དཔལ་དུ་བདག་གྱུར་ཅིག །ཅེས་ཡན་ལག་བདུན་པ་ཕུལ། དེ་ནས་གཏོར་མ་ལ་ཆུ་གཙང་བྲན་ཏེ། པདྨཱནྟ་ཀྲྀ་ཏ་ཀྱིས་བསང་། ཤུནྱ་ཏཱས་སྦྱང། སྟོང་པའི་ངང་ལས་ཨོཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུྃ་འོད་དུ་ཞུ་བ་ལས་བྱུང་བའི་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པའི་བདུད་རྩིའི་རྒྱ་མཚོར་གྱུར། ཨོཾ་ཨཱཿཧཱུྃ། ཨོཾ་ཨཱརྻ་ཏཱ་རཱ་ས་པ་རི་བཱ་ར་ཨིདཾ་བ་ལི་ཾཏ་ཁ་ཁ་ཁཱ་ཧི། ལན་གསུམ་གྱིས་ཕུལ་ལ། བཅོམ་ལྡན་འདས་མ་སྤྱིར་སེམས་ཅན་ཐམས་ཅད་ལ་ཕན་བདེ་མཐའ་ཡས་པ་འབྱུང་བར་བྱིན་གྱིས་བརླབ་ཏུ་གསོལ། ཁྱད་པར་དུ་བདག་ཅག་གི་དཔལ་ལྡན་བླ་མ་དམ་པ་མཚུངས་མེད་རྗེ་བཙུན་མཆོག་གི་སྤྲུལ་པའི་སྐུ་
རིན་པོ་ཆེ་ཡབ་སྲས་དག་གི་སྐུ་ཚེ་དང་ཕྲིན་ལས་ཆེས་ཆེར་དར་ཞིང་རྒྱས་པ་དང་། དེ་དག་ལ་བར་དུ་གཅོད་པའི་ཕྱོགས་ཐམས་ཅད་ཞི་བར་བྱིན་གྱིས་བརླབ་ཏུ་གསོལ། དེ་དག་གི་དཔལ་འབྱོར་བྱིན་རླབས་ལ་བརྟེན་ནས་བདག་ཅག་གི་ཡང་བསམ་དོན་མཐར་དག་ཡིད་བཞིན་ཏུ་འགྲུབ་པར། འཇིག་རྟེན་སྤྱི་ཁྱབ་ཏུ་ཉེ་བར་འཚེ་བ་ནད་དང་མུ་གེ་འཁྲུགས་པ་ཆེན་པོ་མཚོན་གྱི་བསྐལ་པ་སོགས་མི་འབྱུང་བར། མདོར་ན་འཇིགས་པ་ཆེན་པོ་བརྒྱད་དང་བཅུ་དྲུག་ལས་ཐར་བར། བདག་གཞན་རོ་མཉམ་བྱང་ཆུབ་ཀྱི་སེམས་རིན་པོ་ཆེ་དང་མི་འབྲལ་བར། ཟུང་འཇུག་ལྷན་སྐྱེས་ཕྱག་རྒྱ་ཆེན་པོ་དེ་ཉིད་དུ་མངོན་དུ་བྱེད་པར། ཡན་ལག་བདུན་ལྡན་རྡོ་རྗེ་འཆང་ཚེ་གཅིག་མངོན་ཏུ་བྱེད་པར། དེ་ལྟ་མ་ཡིན་ནའང་བདག་སྐྱེ་བ་ནས་སྐྱེ་བ་ཐམས་ཅད་དུ་བཅོམ་ལྡན་འདས་མ་ཉིད་ལྷག་པའི་ལྷ་དང་ཡི་དམ་གྱི་ལྷ་དང་རྗེས་སུ་བཟུང་བའི་ལྷར་བྱིན་གྱིས་བརླབ་ཏུ་གསོལ། ཅེས་གསོལ་
བདབ་བོ། ཨོཾ་རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །ཕྱག་འཚལ་སྒྲོལ་མ་ནས། རབ་མཆོག་ཉིད་མའི་བར་གྱི་ཕྱག་འཚལ་ཉེར་གཅིག་ལན་གསུམ་གྱི་ཐ་མ་ལ། རྩ་བའི་སྔགས་ཀྱི་བསྟོད་པ་ནས་ཕན་ཡོན་དང་། ཨོཾ་རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །འཁོར་བ་ལས་སྒྲོལ་ཏཱ་རེ་མ། །ཏུ་ཏྟཱ་རེ་ཡིས་འཇིགས་བརྒྱད་སྒྲོལ། །ཏུ་རེས་ན་བ་རྣམས་ལས་སྒྲོལ། །སྒྲོལ་མ་ཡུམ་ལ་ཕྱག་འཚལ་བསྟོད། །པདྨ་དཀར་པོའི་དབུས་གནས་པ། །ཟླ་བའི་གཟུགས་གྱི་གདན་སྟེང་དུ། །རྡོ་རྗེའི་སྐྱིལ་ཀྲུང་བཅས་མཛད་མ། །མཆོག་སྦྱིན་མ་ལ་ཕྱག་འཚལ་བསྟོད། །སྟོན་ཀའི་ཟླ་བའི་མདངས་འདྲ་ཞིང་། །ཟླ་བ་ལ་ནི་རྒྱབ་རྟེན་མ། །རྒྱན་རྣམས་ཐམས་ཅད་ཡོངས་སུ་རྫོགས། །ཨུཏྤལ་བསྣམས་ལ༴ བཅུ་དྲུག་ལོ་ལོན་ལུས་དང་ལྡན། །རྫོགས་སངས་རྒྱས་ཀུན་དེ་ཡི་སྲས། །འདོད་སྦྱིན་སྐུ་ནི་འཆང་བའི་ཡུལ། །འཕགས་མ་སྒྲོལ་མ་ལ་ཕྱག་འཚལ། །འཁོར་ལོ་དཀར་པོ་འོད་ཟེར་
དཀར། །རྩིབས་བརྒྱད་ལ་ནི་ཡི་གེ་བརྒྱད། །ཡོངས་སུ་བསྐོར་པའི་རྣམ་པ་ཅན། །འཁོར་ལོ་ཅན་ལ་ཕྱག་འཚལ་ལོ། །ཞེས་པ་ནི་ངག་དབང་གྲགས་པའི་རྒྱ་གཞུང་ངོ་། །ཞིང་ཁམས་ཐམས་ཅད་ཡོངས་སུ་དག་པ་ལ། །རིན་ཆེན་མེ་ཏོག་མང་པོ་གཅལ་དུ་བསྐྲམ། །དུས་གསུམ་སངས་རྒྱས་ཐམས་ཅད་བསྐྱེད་པའི་ཡུམ། །ཡུམ་གྱུར་སྒྲོལ་མ་ཁྱོད་ལ་ཕྱག་འཚལ་ལོ། །ཚིགས་བཅད་འདི་སྒྲོལ་མས་སྣ་ཚོགས་འབྱུང་བའི་རྒྱུད་ལས་གསུངས་སོ། །འཕགས་མ་སྒྲོལ་མ་སྒྲོལ་མཛད་ཡུམ། །ཡིད་བཞིནན་འཁོར་ལོ་ཚེ་འཕེལ་མ། །ལྷ་མོ་ཁྱོད་ལ་གསོལ་བ་ནི། །བདག་གིི་ཚེ་ཡི་བར་ཆད་དང་། །ནད་དང་སྡུག་བསྔལ་ཐམས་ཅད་ལས། །ནུས་ལྡན་ཁྱོད་ཀྱིས་བསྐྱབ་ཏུ་གསོལ། །མཆོག་དང་ཐུན་མོང་དངོས་གྲུབ་ཀུན། །མ་ལུས་བདག་ལ་གནང་བར་མཛོད། །འཕགས་མ་ཁྱོད་ལ་དད་བྱེད་པ། །དེ་ལ་རྟག་ཏུ་བུ་བཞིན་དགོངས། །བདག་ཀྱང་ཁྱོད་ལ་གསོལ་འདེབས་ཀྱིས། །ཐུགས་རྗེའི་ལྕགསས་ཀྱུས་བཟུང་དུ་གསོལ། །
ལྷ་མོའི་སྐུ་མདོག་ཟླ་འདྲའི་མདོག །སྒེག་ཅིང་དུལ་བའི་ཆ་བྱད་ཅན། །གཟུགས་བཟང་རིན་ཆེན་རྒྱན་གྱིས་སྤྲས། །མཛེས་པའི་དར་གྱི་སྨད་གཡོག་ཅན། །པདྨ་ཟླ་བའི་གདན་དབུས་སུ། །ཞབས་གཉིས་རྡོ་རྗེ་སྐྱིལ་ཀྲུང་བཞུགས། །ཞལ་གཅིག་ཕྱག་གཉིས་འཛུམ་བག་ཅན། །དུས་གསུམ་སངས་རྒྱས་སྐྱེད་པའི་ཡུམ། །ལྷ་མོ་ཁྱོད་ལ་རྟག་ཏུ་འདུད། །ཁྱོད་ལ་བག་ཙམ་བསྟོད་པ་འདིས། །བདག་ཅག་བྱང་ཆུབ་སྒྲུབ་པ་ལ། །དུས་འདི་ནས་བཟུང་བྱང་ཆུབ་བར། །མི་མཐུན་ཕྱོགས་རྣམས་ཞི་གྱུར་ཅིག །མཐུན་རྐྱེན་ཕུན་སུམ་ཚོགས་པར་ཤོག །འདོད་གསོལ་འདི་ཚར་གསུམ་བདུན་ཉེར་གཅིག་སོགས་ཅི་མངས་བརྗོད་པར་བྱའོ། །ཨོཾ་དགེ་བ་མ་ནི་གཟི་བརྗིད་ཆེ། །འཇིག་རྟེན་གསོ་བྱེད་སྙན་པ་ཆེ། །མཚོ་ལྡན་མ་དང་སྤྱན་ཡངས་མ། །ཤེས་རབ་དཔལ་དང་བློ་འཕེལ་མ། །བརྟེན་སྦྱིན་གསོ་སྦྱིན་མ་སྭཱ་ཧཱ། །ཨོཾ་ཡིག་འདོད་པའི་གཟུགས་ཆེན་མ། །སེམས་ཅན་ཀུན་ལ་ཕན་བརྩོན་མ། །གཡུལ་
ལས་སྒྲོལ་བྱེད་རྒྱལ་བ་མོ། །ལྷ་མོ་ཤེས་རབ་ཕར་ཕྱིན་མ། །འཕགས་མ་སྒྲོལ་མ་ཡིད་འོང་མ། །གང་མ་རྔ་ཆེན་དུང་ཅན་མ། །རིག་པའི་རྒྱལ་མོ་ཚིག་སྙན་མ། །ཟླ་བའི་གདོང་ཅན་དཀར་མོ་ཆེ། །མི་ཕམ་མ་དང་གོས་སེར་མ། །སྒྱུ་མ་ཆེན་མོ་དཀར་ཆེན་མོ། །སྟོབས་ཆེན་ཕ་རོལ་གནོན་པ་མོ། །དྲག་མོ་ཆེན་མོ་གཏུམ་ཆེན་མོ། །སྡང་བའི་སེམས་ཅན་རླག་བྱེད་མ། །རབ་ཏུ་ཞི་མ་ཞི་གཟུགས་མ། །རྣམ་པར་རྒྱལ་མ་འབར་འོད་མ། །གློགས་གིས་ཕྲེང་མ་རྒྱལ་མཚན་མ། །རལ་གྲི་འཁོར་ལོ་གཞུ་ཐོགས་མཚོན། །སྨུག་བྱེད་རིང་བྱེད་ནག་མོ་དང་། །དུས་མཚན་མ་དང་མཚན་སྤྱོད་མ། །སྲུང་བྱེད་རྨོངས་བྱེད་ཞི་བ་མོ། །ཞུ་མ་དགེ་མ་སུ་སྒྲོལ་མ། །ཚངས་རིག་མ་དང་རིག་བྱེད་ཡུམ། །གསང་ལེན་མ་དང་ཕུག་གནས་མ། །བཀྲ་ཤིས་བདེ་བྱེད་ཞི་བྱེད་མ། །སྐྱེས་པ་རིག་བྱེད་ཡིད་མགྱོགས་མ། །ཐོད་པ་ཅན་མ་ཤུགས་ཆེན་མ། །མཚམས་མ་བདེན་མ་གཞན་ལས་རྒྱལ། །དེད་
དཔོན་ཆེན་མོ་སྙིང་རྗེས་འཇུག །ཉམས་ལ་ལམ་ནི་རབ་སྟོན་མ། །མཆོག་སྟེར་འཆོས་བྱེད་སྟོན་པ་མོ། །བུད་མེད་གཟུགས་ལ་དཔག་མེད་གནོན། །གྲུབ་མ་རི་ཁྲོད་རྣལ་འབྱོར་མ། །གདོལ་མ་ངེས་མ་བདུད་རྩི་མ། །ནོར་ཆེན་བསོད་ནམས་སྐལ་ཆེན་མ། །སྐལ་བཟང་མ་དང་གྲོགས་སྟོན་མ། །གཤིན་རྗེ་སྐྲག་བྱེད་འཇིགས་བྱེད་མ། །དྲག་ཤུལ་དྲག་ཤུལ་དཀར་ཐུབ་ཆེ། །འགྲོ་ལ་གཅིག་ཏུ་ཕན་བརྩོན་མ། །སྐྱོབ་མ་གུས་ལ་གཉེན་གཤིན་མ། །ཞི་མ་ཕྲ་མོ་ངག་དབང་ཕྱུག །རྟག་མ་ཀུན་གྱི་མར་གྱུར་མ། །དོན་ཀུན་སྒྲུབ་བྱེད་བཟང་པོ་མ། །སྦས་མ་མ་མ་ནོར་སྦྱིན་མ། །འཇིགས་མེད་གཽཏ་མཱ་རབ་བཤད། །དཔལ་ལྡན་འཇིག་རྟེན་དབང་སྲས་མོ། །ཡོན་ཏན་མཐའ་ཡས་སྒྲོལ་མའི་མཚན། །བསམ་པ་ཐམས་ཅད་རྫོགས་བྱེད་པའོ། །ཨོཾ་ཏཱ་རེ་ཀྲྀ་པཱ་ལ་བ་ན། མཻ་ཏྲྱ་ཏྨ་ཀེ་ཤྲ་པཎཱི་ཡེ་སྭཱ་ཧཱ། ཅེས་མཚན་བརྒྱད་ཀྱི་བསྟོད་པ་སྤྱན་རས་གཟིགས་ཀྱིས་གསུངས་པའོ། །སེང་གེ་གླང་ཆེན་
མེ་སྦྲུལ་ཆོམ་རྐུན་དང་། །ལྕགས་སྒྲོགས་རྒྱ་མཚོོ་ཤ་ཟའི་འཇིགས་པ་རྣམས། །ཞི་མཛད་ཟླ་བའི་འོད་ལྟར་མཛེས་པའི་སྐུ། །བཅོམ་ལྡན་སྒྲོལ་མ་ཁྱོད་ལ་ཕྱག་འཚལ་ལོ། །ཁྱོད་ཀྱི་ཞབས་ཀྱི་པདྨ་གཉིས་ལ་ནི། །ཡན་ལག་མཆོག་གིས་རབ་ཏུ་གཏུགས་གྱུར་ན། །མངོན་འདོད་བདེ་བའི་འབྲས་བུ་སྨོན་མཛད་མ། །བཅོམ་ལྡན་སྒྲོལ་མ་ཁྱོད་ལ་ཕྱག༴ འདབ་མ་བརྒྱ་ལྡན་ཡངས་པའི་སྙིང་པོ་ནི། །གསེར་ཞུན་ཉི་མ་འཆར་ཀའི་མདོག་འདྲ་ཞིང་། །རྡུལ་བྲལ་སྟོན་ཀའི་ཟླ་ལྟར་དྲི་མེད་མ། །བཅོམ་ལྡན་སྒྲོལ་མ་ཁྱོད་ལ་ཕྱག༴ དྲང་སྲོང་གཙོ་དང་གྲུབ་པ་ལྟོ་འཕྱེ་ཆེ། །གཤིན་རྗེ་སྲིན་པོ་གནོད་སྦྱིན་ལྷ་མིན་དང་། །ལྷ་ཚོགས་རྣམས་ཀྱིས་ཞབས་ལ་ཕྱག་བྱས་པའི། །བཅོམ་ལྡན་སྒྲོལ་མ་ཁྱོད་ལ་ཕྱག༴ གླིང་དང་ནགས་ཚལ་སྟུག་པོ་རི་ཁྲོད་དང་། །ཕུག་དང་ཆུ་ཀླུང་རི་བོའི་རྩེ་རྣམས་སུ། །དུས་རྣམས་ཀུན་ཏུ་བཞུགས་པར་གྱུར་པ་ཡི། །བཅོམ་ལྡན་སྒྲོལ་མ་ཁྱོད་ལ་ཕྱག༴ སེང་གེ་
སྟག་དང་གླང་པོ་མཚོ་ཆེན་དང་། །མེ་དང་འཆིང་བ་རྐུན་པོ་སྦྲུལ་གདུགས་གི །གནོད་པ་ཐམས་ཅད་རབ་ཏུ་འཇོམས་མཛད་མ། །བཅོམ་ལྡན་འདས༴ ཏཱ་རེ་ཏུཏྟཱ་རེ་དང་ཏུ་རེ་ཡིས། །གཡུལ་གྱི་མཚོན་ཆ་ཟློག་མཛད་ཕན་པར་དགོངས། །འཇིགས་དང་རྨི་ལམ་ངན་པ་འཇོམས་མཛད་མ། །བཅོམ་ལྡན༴ ཐུགས་རྗེས་ནོན་པའི་ཐབས་ཀྱིས་གང་དང་གང་། །སེམས་ཅན་གཟིགས་གྱུར་དེ་ཡི་དཔལ་འཕེལ་གྱུར། །སྒྲོལ་མས་མི་བསླུའི་འབྲས་བུ་མྱུར་ཐོབ་མཛད། །བཅོམ་ལྡན་སྒྲོལ་མ་ཁྱོད་ལ་ཕྱག་འཚལ་ལོ། །སངས་རྒྱས་བཅོམ་ལྡན་འདས་ཀྱིས་སྒྲོལ་མ་ལ་བསྟོད་པ་ཚིགས་བཅད་བརྒྱད་པའོ། །མདུན་བསྐྱེད་ཀྱི་ཐུགས་ཀའི་སྔགས་ཕྲེང་གི་འོད་ཟེར་སྣོད་བཅུད་ཐམས་ཅད་ལ་ཕོགས་པས་ཚེ་དང་དཔལ་འབྱོར་མཐའ་དག་རྒྱས་པར་གྱུར། ཅེས་དམིགས་པ་དང་ལྷན་ཅིག་བཟླས་པ་བྱ། བུམ་སྒྲུབ་ནི། གསེར་དངུལ་ལ་སོགས་པའི་བུམ་པ་བཀྲུས་ཤིང་སྤོས་ཀྱིས་བདུག་ལ་ཆུ་སྲོག་ཆགས་མེད་པ་དྲི་བཟང་དང་སྦྱར་བས་དགང་བུམ་རྫས་བཅུག་པའི་སྟེང་དུ་དུང་
ཆུས་གཟུངས་ཐག་སོགས་བཤམ་གོང་བཞིན་བསངས་སྦྱང་། སྟོང་པའི་ངང་ལས་པཾ་ལས་སྣ་ཚོགས་པདྨ་དང་ཨ་ལས་ཟླ་བའི་གདན་ལ། བྷཱུཾ་ལས་རིན་པོ་ཆེའི་བུམ་པ་ལྟོ་བ་ཡངས་པ་མགྲིན་པ་རིང་བ། མཆུ་འཕྱང་བ་ལ་སོགས་པའི་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ། པཾ་ལས་པདྨ་དཀར་པོ་འདབ་མ་མཆོག་ཏུ་ཡངས་པའི་སྟེང་དུ། ཞེས་པ་ནས།་ རྒྱས་བཏབ་པ་གྱུར། སྔགས་ཀྱིས་མཆོད། གློག་དང་འདྲ་བའི་སྤྱན་མངའ་མ། །དཔལ་མོ་ཏཱ་རེ་ཏུ་ཏྟཱ་རེ། །སངས་རྒྱས་ཞལ་གྱི་པདྨ་ཡི། །གེ་སར་ལས་བྱུང་ཁྱོད་ལ་འདུད། །སྟོན་ཀའི་ཟླ་བ་རྒྱས་པ་ཡི། །དཀྱིལ་འཁོར་དང་མཚུངས་ཞལ་མངའ་མ། །མཆོག་སྦྱིན་ཕྱག་རྒྱས་ཨུཏྤ་ལ། །བསྣོམས་མ་ཁྱོད་ལ་ཕྱག་འཚལ་ལོ། །འཁོར་བའི་གཟེབ་ལས་ཏུཏྟཱ་རེ། །སཱ་ཧཱས་ཉོན་མོངས་ཞི་བར་མཛད། །ཨོཾ་གྱི་ངོ་བོ་ཉིད་ཀྱིས་ནི། །ཚངས་པའི་སྒོ་མགྱེད་མ་ལ་འདུད། །འཇིགས་པ་ཆེན་པོ་བརྒྱད་རྣམས་ལས། །འཇིག་རྟེན་ཐམས་ཅད་སྐྱོབ་པར་
མཛད། །ཀུན་གྱི་མར་གྱུར་བཅོམ་ལྡན་འདས། །སྒྲོལ་མ་ཡུམ་ལ་ཕྱག་འཚལ་ལོ། །བཅོམ་ལྡན་འདས་མའི་ཐུགས་ཀའི་ཡིད་བཞིན་འཁོར་ལོ་གསལ་བའི་འོད་ཀྱིས་བརྟན་གཡོ་མ་ལུས་པའི་ཚེ་དང་དཔའ་འབྱོར་བསྡུས་ཏེ་ཐིམ་པར་གྱུར། བཟླས་པ་ཅི་རིགས་གྲུབ་ནས་མཆོད་ཡོན་ཕུལ་ལ། བཅོམ་ལྡན་འདས་མའི་ཐུགས་ཀའི་འཁོར་ལོ་དང་བཅས་པ་བདུད་རྩིའི་རང་བཞིན་དུ་ཞུ་བ་བུམ་པའི་ཆུ་དང་དབྱེར་མི་ཕྱེད་པར་གྱུར། ཞེས་སྒོམ་པ་གཞུང་གི་བསྟན་དོན་དང་མཐུན་ལ། བླ་མ་སྔ་མ་དག །སྔགས་ཕྲེང་གཟུངས་ཐག་ལ་འཁྲིལ་ཏེ་སོང་། བུམ་པའི་ནང་གི་ལྷའི་ཐུགས་ཀར་ཐིམ་བས་འཁོར་ལོ་སྔགས་དང་བཅས་པ་ལ་བདུད་རྩིབ་བས་བུམ་ཆུ་དང་འདྲེས་བར་བསྒོམ་ཞེས་བཞེད་དེ། བུམ་ཆུ་དེས་ནད་པ་ལ་སོགས་པ་ལ་ཁྲུས་ཀྱང་སྤྲོ་ན་བྱའོ། །སྤྲོས་པ་མི་བྱེད་ན་བུམ་བ་གཙོ་བོའི་དུང་ཆོས་ཀྱི་ཆུ་ལྷག་ཅུང་ཟད། གཅིག་བཞག་ལ་ཁྲུས་བྱས་པས་ཆོག་མོད། བདག་འཇུག་གམ་དབང་བསྐུར་དང་འབྲེལ་བ་ན། སྤྲོས་པ་ལ་དགའ་བ་དང་རྣམ་གྲངས་ཙམ་དུས་ལས་བུམ་བསྐྱེད། ཆོ་ག་བྱེད་པར་སྤྲོ་ན། འདིར་པདྨའི་རིགས་ཀྱི་ལྷའི་ཁྲོ་བོར་འོས་པས་ལས་བུམ་རང་ཨོཾ་བཛྲ་
ཀྲོདྷའི་སྔགས་ཀྱིས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་ལས་བུམ་གྱི་དབུས་སུ་པདྨ་ཉི་མ་བདུད་བཞིའི་གདན་ལ་ཧྲཱིཿདམར་པོ་ཡོངས་སུ་གྱུར་པ་ལས་ཁྲོ་བོའི་རྒྱལ་པོ་རྟ་མགྲིན་སྐུ་མདོག་དམར་པོ་ཞལ་གཅིག་ཕྱག་གཉིས་གཡས་དབྱུག་ཏོ་འཕྱར་ཞིང་གཡོན་སྡིགས་མཛུབ་མཛད་པ། སྤྱི་གཙུག་ཏུ་དབུ་སྐྲ་དམར་སེར་གྱེན་དུ་འབར་བའི་གསེབ་ན་རྟ་མགོ་ལྗང་ཞུར་དྲག་པོའི་རྟ་སྐད་རབ་ཏུ་སྒྲོགས་པས་ཁམས་གསུམ་དབང་དུ་སྡུད་པ་སྦྲུལ་དང་ཐོད་སྐམ་སྟག་ལྤགས་སོགས་ཁྲོ་བོའི་ཆས་ཐམས་ཅད་ཀྱིས་དབུ་དང་སྐུ་དང་ཡན་ལག་བརྒྱན་པ། གཤིན་རྗེའི་རྒྱལ་པོའི་ཆ་བྱད་ཅན། གང་གིས་ཀྱང་འཚེ་བར་མི་ནུས་པ་ཐུང་ཞིང་སྦོམ་ལ་གསུས་པ་འཕྱང་བ་ཞབས་དོར་སྟབས་ཀྱིས་གནས་པ་འོད་དང་གཟི་བརྗིད་མཚུངས་པ་མེད་པར་བཞུགས་པའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ་ཧྲཱིཿའི་མཐའ་སྐོར་དུ་སྔགས་ཕྲེང་འཁོར་བས་གནོད་བྱེད་ཐམས་ཅད་ཚར་བཅད་དེ་
སླར་སྔགས་འཕྲེང་ལས་བདུད་རྩི་བབས་པས་བུམ་ཆུ་དང་འདྲེས་པ་ཁ་དོག་ནུས་པ་ཕུན་སུམ་ཚོགས་པར་གྱུར། ཅེས། ཨོཾ་བཛྲ་ཀྲོ་དྷ་ཧ་ཡ་གྲཱྀ་ཝ་ལུ་ཧུ་ལུ་ཧུ་ལུ་ཧཱུྃ་ཕཊ། ཅེས་བཟླས། ཨོཾ་བཛྲ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་པ་ནས། ཤབྟ་པྲ་ཏཱི་ཙྪ་སྭཱ་ཧཱ། ཞེས་པའི་བར་གྱིས་མཆོད། ཧྲཱིཿལས་སྐྱེས་པའི་རྟ་མཆོག་སྐུ། །ཉི་མའི་འོད་མཚུངས་ཉོན་མོངས་བསྲེག །བདུད་བཞི་མ་ལུས་འཇོམས་མཛད་པའི། །དཔའ་བོ་རྟ་མགྲིན་ལ་ཕྱག་འཚལ། །ཞེས་པས་བསྟོད། ཁྲོ་བོའི་རྒྱལ་པོ་རྟ་མགྲིན་གྱིས་བགེགས་དང་བར་ཆད་ཟློག་པའི་ཕྲིན་ལས་མཛོད། ཅེས་ཕྲིན་ལས་བཅོལ། གསུམ་པ་གཞན་དོན་རྗེས་སུ་གནང་བ་སྦྱིན་པ་ནི། ཚེས་བརྒྱད་ལ་སོགས་པའི་དུས་དགེ་བ་གཟའ་སྐར་སྦྱོར་བྱེད་བཟང་པོའི་ཚེ་སྐུ་གཟུགས་བཤམ། མཆོད་པའི་བཀོད་པ་ལ་སོགས་པ་གནས་བརྒྱན་བ་བྱུང་དྲི་བཟང་གི་ཆུ་བྱུག་པའི་མཎྜལ་ལ་རྡུལ་མཚོན་གྱི་ས་པདྨ་འདབ་བརྒྱད་དཀར་པོ་ལྟེ་བར་ལྗང་སེར་མུ་ཁྱུད་གོང་རས་ཇི་ལྟར་མཛེས་པའི་དབུས་སུ་ཏཱྃ་ཡིག་གམ་མེ་ཏོག་དཀར་པོའི་ཚམ་བུ་བཀོད། མཐར་མཆོད་གཏོར་གྱིས་བསྐོར། བུམ་པ་ལ་སོགས་པ་ཉེ་བར་མཁོ་
བ་ཚོགས་པར་བྱས་ལ། བདག་བསྐྱེད་བཟླས་པ། མདུན་བསྐྱེད་མཆོད་གཏོར། བུམ་བཟླས་ཡོངས་སུ་རྫོགས་ནས། སློབ་མ་རྣམས་ལས་སྔགས་བཟླས་པའི་དུང་གི་ཆུས་ཁྲུས་བྱས། མཎྜལ་ཕུལ་ནས། སེམས་ཅན་ཐམས་ཅད་ཀྱི་དོན་ཏུ་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། གནས་སྐབས་སུ་ཚེའི་དངོས་གྲུབ་ཀྱི་ཆེད་དུ་རྗེ་བཙུན་མའི་རྗེས་སུ་གནང་བ་ཞུ་སྙམ་པའི་འདུན་པ་དང་ལྡན་པས་ཉོན་ཅིག །དེ་ཡང་བླ་མ་བརྒྱུད་པའི་རིམ་པ་ནི། སྒྲོལ་མ། གསེར་གླིང་པ། ཇོ་བོ་ཡབ་སྲས། སྤྱན་སྔ་བ། སྒྲེ་པ་སྟེ་བཀའ་བབ་གཅིག །སྒྲོལ་མ། ངག་དབང་གྲགས་པ། རྡོ་རྗེ་གདན་པ། བ་རི་ལོ་ཙཱ་བ། སླེ་ནག་པ། སྒྲེ་པ་སྟེ་བཀའ་བབ་གཅིག །ཇོ་བོ། རྣལ་འབྱོར་པ། སྙུག་རུམ་པ་སྟེ་བཀའ་བབ་གཅིག་དེ་གསུམ་རྗེ་སྒམ་པོ་པ་ལ་འདུས། སྒམ་པོ་པ་ཕྱིན་ནས་དོན་བརྒྱུད་དང་མཐུན་པ་ཡིན་ལ། གཞན་ཡང་པཎ་ཆེན་ཤཱཀྱ་ཤྲཱི་ནས་བརྒྱུད་པ་དང་། ས་སྐྱ་བླ་མ་དམ་པ་ནས་བརྒྱུད་པ་དང་། ཀརྨ་པཀྴི་ནས་བརྒྱུད་པ་སོགས་
བཀའ་བབ་དྲུག་གཅིག་ཏུ་འདུས་པ་ཡིན་པར་གདའ། དེ་ལ་དགེ་བཤེས་སླེ་ནག་པའི་ཞལ་ནས། འདི་ཟློ་ཤེས་ན་མགོ་སུག་བྲལ་ཡང་གལ་མེད། ཤ་དུམ་བུར་སོང་ཡང་མི་ལྟོ་གསུངས་ཤིང་། རྗེ་སྒམ་པོ་པ་ལ་སྐུ་ཚེ་ལོ་གསུམ་ལས་མེད་པའི་མཁའ་འགྲོའི་ལུང་བསྟན་བྱུང་བ་ལ། །དགེ་བའི་བཤེས་གཉེན་སྒྲེ་བས་རོ་ཁུང་བྲུས་ཀྱང་འདིས་མི་ཟློག་པ་མེད་གསུངས་ནས་སྒྲུབ་ཐབས་འདི་གནང་བས་སྐུ་ཚེ་མཐར་ཕྱིན། དེས་ན་བརྒྱུད་པ་དང་ཕན་ཡོན་དེ་ལྟ་བུ་དང་ལྡན་པའི་བཅོམ་ལྡན་འདས་མའི་རྗེས་སུ་གནང་བ་ཞུ་སྙམ་པའི་བསམ་པས་གསོལ་བ་འདེབས་པའི་རྗེས་ཟློས་གྱིས་ཤིག །གང་གི་དྲིན་གྱི་བདེ་ཆེན་ཉིད། ཅེས་སོགས་ལན་གསུམ། འཁོར་བ་ལས་སྒྲོལ་ཏཱ་རེ་མ། ཅེས་སོགས་ལན་གསུམ། དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་མ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་
བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་གཞུག་ཏུ་གསོལ། །ཅེས་གསོལ་བ་གདབ། རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་དང་ལྡན་པས་ཉོན། །བརྗེད་ངས་བློ་ལ་འོད་དཔག་མེད་སོགས་ཀྱི། །བདེ་བར་གཤེགས་པ་རྣམས་ཀྱིས་བྱིན་མི་རློབ། །ཅེས་པས་སེམས་མ་ཡེངས་པའི་སྒོ་ནས་ཉོན་ཅིག །བུ་ཚུར་ཐེག་པ་ཆེན་པོ་པ། །ཁྱོད་ནི་ཚུལ་ཆེན་སྣོད་ཡིན་ཏེ། །གསང་སྔགས་སྤྱོད་ཚུལ་ཆོ་ག་འདི། །ཁྱོད་ལ་རབ་ཏུ་བཤད་པར་བྱ། །རྫོགས་པའི་སངས་རྒྱས་གང་བཞུགས་དང་། །གང་དག་འདས་དང་མ་བྱོན་པ། །དེ་དག་ཀུན་གྱིས་གསང་སྔགས་ཀྱི། །ཆོ་ག་ཟབ་མོ་འདི་མཁྱེན་པས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཉམ་མེད་བརྙེས། །སྐྱོབས་པ་སངས་རྒྱས་དཔལ་ཆེན་པོས། །བདུད་སྡེ་ཤིན་ཏུ་མི་བཟད་པའི། །དཔུང་ཆེན་དག་ཀྱང་དེ་
ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡི་བློ་གྲོས་འདི་གྱིས་ཤིག །ཅེས་གནང་བ་སྦྱིན་པར་མོས་ལ། མདུན་གྱི་ནམ་མཁའ་འཕགས་མ་ཡིད་བཞིན་འཁོར་ལོ་ལ་སངས་རྒྱས་དང་བྱང་ཆུབ་སེམས་དཔའ་དཔག་ཏུ་མེད་པས་བསྐོར་ནས་བཞུགས་པའི་སྤྱན་སྔར་ཡན་ཡག་བདུན་པ་འབུལ་སྙམ་པ་གྱིས་ལ་རྗེས་ཟློས་བགྱིད་འཚལ། བཅོམ་ལྡན་འདས་མ་ཁྱོད་ལ་ཕྱག་འཚལ་ནས། ཞེས་སོགས་ལན་གསུམ། མགོན་པོ་སངས་རྒྱས་རྣམས་དང་ནི། །སྲས་བཅས་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །དུས་འདི་ནས་ནི་བཟུང་ནས་སུ། །ཇི་སྲིད་བྱང་ཆུབ་སྙིང་པོའི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་
གསུམ། །སོ་སོར་བརྟན་པོར་གཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བརྟན་པོར་གཟུང་། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་གཟུང་བར་བགྱི། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ཏུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ནི་མ་ལུས་གཟུང་། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི་ །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་བགྱིས་ནས། །སེམས་ཅན་
ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་གཟུང་། མ་བསྒྲལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་སྒྲོལ། །དབུགས་མ་ཕྱིན་པ་དབུགས་དབྱུང་ཞིང་། །འགྲོ་ཀུན་མྱ་ངན་འདས་ལ་འགོད། །ཅེས་ལན་གསུམ་གྱིས་སྡོམ་གཟུང་། སྙིང་གར་ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་ཉ་གང་བ། །དེའི་སྟེང་དུ་དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ་གསལ་བར་གྱུར། ཨོཾ་ཡོ་ག་ཙིཏྟ་ཨུཏྤཱ་ད་ཡཱ་མི། རྡོ་རྗེ་སྙིག་གར་བཞག་ཨོཾ་སུ་ར་ཏེ་ས་མ་ཡ་སྟྭཾ་ཧོཿསིདྡྷི་བཛྲ་ཡ་ཐཱ་སུ་ཁཾ། སློབ་མ་སྐད་ཅིག་གིས་བཅོམ་ལྡན་འདས་མའི་སྐུར་གསལ་བའི་དཔྲལ་བར་ཨོཾ་ལས་འཁོར་ལོ་དཀར་པོ། ཨོཾ་ཀྱིས་མཚན་པ། མགྲིན་པར་ཨཱཿལས་པདྨ་དམར་པོ་ཨཱཿས་མཚན་པ། སྙིང་གར་ཧཱུྃ་ལས་རྡོ་རྗེ་སྔོན་པོ་ཧཱུྃ་གིས་མཚན་པར་གྱུར། ཨོཾ་ཨཱཿཧཱུྃ། རྡོ་རྗེ་སྤྱི་བོར་བཞག་ལ། དེང་ཁྱོད་འཕགས་མ་སྒྲོལ་མའི་རིགས་སུ་ཞུགས་ཀྱིས། དེ་བས་ན་ངས་ཁྱོད་
ལ་རྡོ་རྗེའི་ཡེ་ཤེས་བསྐྱོད་པར་བྱ་སྟེ། ཡེ་ཤེས་གང་གིས་ཁྱོད་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་འཐོབ་པར་འགྱུར་ན་དངོས་གྲུབ་གཞན་ལྟ་སྨོས་ཀྱང་ཅི་དགོས། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ། མ་དད་པ་རྣམས་ལ་ཡང་མ་ཡིན་ནོ། །གལ་ཏེ་སྨྲས་ན་བུ་ཁྱོད་དམ་ཚིག་ཉམས་པར་གྱུར་ཏ་རེ། རྡོ་རྗེ་སྙིང་གར་བཞག །འཕགས་མ་སྒྲོལ་མ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་གྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །རྡོ་རྗེ་སྤྱི་བོར་བཞག །དེང་ནས་བརྩམས་ཏེ་ཁྱོད་ཀྱི་རྗེ་བཙུན་སྒྲོལ་མ་ང་ཡིན་གྱིས། །ངས་འདི་གྱིས་ཤིག་ཅེས་བསྒོ་བ་དེ་ཁྱོད་ཀྱིས་བྱ་དགོས་སོ། །ཁྱོད་ཀྱིས་ང་ལ་བརྙས་པར་ཡང་མ་བྱེད་ཅིག །ཁྱོད་ཡ་ང་བ་མ་སྤངས་པར་ཚེའི་དུས་བྱས་ནས་སེམས་ཅན་དམྱལ་བ་ཆེན་པོར་ལྟུང་བར་འགྱུར་ཏ་རེ། འདིའི་རྗེས་ཟློས། དཀོན་མཆོག་གསུམ་ལ་བདག་སྐྱབས་མཆི། །
སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །བྱང་ཆུབ་སེམས་སུ་འདི་བགྱིད་དེ། །བདག་དང་གཞན་དོན་རབ་བསྒྲུབ་ཕྱིར། །བདག་གིས་བྱང་ཆུབ་སེམས་མཆོག་བསྐྱེད། །ཨེ་མའོ་སེམས་ཅན་ཀུན་མགྲོན་གཉེར། །བྱང་ཆུབ་སྤྱོད་མཆོག་མཛད་བཞིན་སྤྱད། །འགྲོ་ལ་ཕན་ཕྱིར་སངས་རྒྱས་ཤོག །ཅེས་ལན་གསུམ་བྱ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེས་བདག་གི་དུས་དང་དུས་མ་ཡིན་པར་འཆི་བ་ཐམས་ཅད་བསལ་ནས། རྗེ་བཙུན་མའི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས་ཀྱི་བྱིན་གྱིས་བརླབ་ཏུ་གསོལ། ཞེས་ལན་གསུམ་གསོལ་གདབ། སློབ་དཔོན་གྱི་ཐུགས་ཀའི་ཡིག་འབྲུ་ལས་འོད་འཕྲོས། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་རྒྱུད་བསྐུལ་བས། དེ་
རྣམས་ཀྱི་ཐུགས་གཉིས་སུ་མེད་པའི་ཡེ་ཤེས་འཁོར་ལོ་དང་ཡིག་འབྲུའི་རྣམ་པར་བྱོན། སློབ་དཔོན་གྱི་ཐུགས་ཀར་ཐིམ། སློབ་དཔོན་གྱི་ཐུགས་ཀའི་འཁོར་ལོའི་ཡིག་འབྲུ་ལས་དེ་འདྲ་བ་དཔག་ཏུ་མེད་པ་བྱུང་སྟེ། སློབ་མའི་སྙིང་གའི་འཁོར་ལོ་ལ་ཐིམ་པས་རྗེ་བཙུན་མ་དང་སངས་རྒྱས་བྱང་སེམས་ཐམས་ཅད་ཀྱི། བྱིན་རླབས་ཞུགས། ཡིག་འབྲུའི་འོད་ཀྱིས་ལུས་ཐམས་ཅད་གང་བས་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་དང་ནད་གདོན་དུས་མ་ཡིན་པར་འཆི་བ་ལ་སོགས་པའི་བར་གཅོད་ཐམས་ཅད་བསལ། འཆི་བ་མེད་པའི་ཚེའི་དངོས་གྲུབ་ཐོབ་པའི་མོས་པ་རྩེ་གཅིག་ཏུ་གྱིས་ཤིག །བདུག་པ་དང་རོལ་མོ་བྱ། ཨོཾ་ཏཱ་རེ་ཏུཏྟཱརེ་ཏུ་རེ་བཛྲ་ཨཱ་ཝེ་ཤ་ཡ་ཨཱཿ རྡོ་རྗེ་སྦྱི་བོར་བཞག་སྟེ། ཏིཥྛ་བཛྲ། བླ་མ་རྗེ་བཙུན་མའི་ཐུགས་ཀ་ནས་འོད་ཟེར་འཕྲོས་པས་འཕགས་མ་སྒྲོལ་མ་ལ་སངས་རྒྱས་བྱང་སེམས་ཀྱིས་བསྐོར་བ་ནམ་མཁའ་ཁྱབ་པར་སྤྱན་དྲངས། བྱང་ཆུབ་རྡོ་
རྗེས་སངས་རྒྱས་ལ། །མཆོག་ཆེན་ཇི་ལྟར་སྩལ་བ་ལྟར། །བདག་ཀྱང་སྐྱོབ་པའི་དོན་སླད་དུ། །ནམ་མཁའི་རྡོ་རྗེ་དེང་བདག་སྩོལ། །ཞེས་གསོལ་བ་བཏབ་པས་དབང་ལྷ་རྣམས་ཀྱིས་རིན་པོ་ཆེའི་བུམ་པ་བདུད་རྩིའི་གང་བ་བསྣམས་པས། ཇི་ལྟར་བལྟམས་པ་ཙམ་གྱི་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཀ་ལ་ཤ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་བུམ་པ་སྦྱི་བོར་བཞག་པ་བུམ་དབང་། ཀ་ལ་ཤའི་གནས་སུ། གུ་ཧྱེ་བཅུག་སྟེ་མགྲིན་པར་བཞག་པ་གསང་དབང་། པྲཛྙཱ་ཛྙཱ་ན་སྙིང་གར་བཞག་པ་ཤེས་རབ་ཡེ་ཤེས། ཙ་ཏུར་ཞེས་ལྟེ་བར་བཞག་པ་བཞི་པའི་དབང་ངོ་། །དེ་ལྟར་གནས་བཞིར་མངོན་པར་དབང་བསྐུར། །སྒྲིབ་པ་བཞི་དག །སྐུ་གསུང་ཐུགས་ཡེ་ཤེས་བདུད་རྩིས་གནས་བཞི་གང་། དགའ་བ་བཞིའི་ཡེ་ཤེས་སྐྱེས། ལམ་བཞི་བསྒོམ་པ་ལ་དབང་ཞིང་སྐུ་བཞིའི་ས་བོན་མངོན་དུ་བྱས་ཏེ། བདུད་རྩི་སྤྱིར་
བོར་འཁྱིལ་བ་ལས་རིགས་ཐམས་ཅད་ཀྱི་བདག་པོ་འོད་དཔག་མེད་ཀྱིས་དབུ་བརྒྱན་པ་ལ། བླ་མས་མཆོད་པར་མོས་ཏེ། ཨོཾ་བཛྲ་པུཥྦེ། དྷུ་པེ། ཨཱ་ལོ་ཀེ །གནྡྷེ། ནཻ་ཝིདྱ། ཤབྡ་ཨཱཿཧཱུྃ། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨ་རྒྱས་པ་འདབ་འདྲའི་སྦྱན་མངའ་བ། །འདི་ནི་འཇིག་རྟེན་དགེ་བའི་བཀྲ་ཤིས་དང་པོའོ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །དེ་ལྟར་བུམ་པའི་ཆུས་དབང་བསྐུར་བས། ལྷའི་རྣལ་འབྱོར་བསྒོམས་པ་ལ་དབང་ཞིང་། ལུས་ཀྱི་སྒྲིབ་པ་སྦྱངས། སྐུ་ཡི་བྱིན་རླབས་ཞུགས། འབྲས་བུ་གཟུགས་ཀྱི་སྐུ་ཐོབ་པར་འགྱུར་བ་སྐུ་ཡི་རྗེས་གནང་ངོ་། །དཔོན་སློབ་གཉིས་ཀ་རྗེ་བཙུན་མར་གསལ་བའི་སློབ་དཔོན་གྱི་ཞལ་ནས་སྔགས་རྣམས་མུ་ཏིག་གི་ཕྲེང་བ་ལྟ་བུ་ཐོན། ཁྱེད་རང་གི་ཞལ་དུ་ཞུགས་ཐུགས་ཀར་ཐིམ་པས་རྗེ་བཙུན་མའི་གསུང་གི་བྱིན་
རླབས་དང་དངོས་གྲུབ་མ་ལུས་པ་ཐོབ། ངག་སྔགས་ཀྱིས་མཐུ་དང་ལྡན་པར་མོས་ལ། ཡི་གེ་བཅུ་པ་བརྒྱ་རྩ་བརྒྱད་བཟླས་པའི་མཐར། བཅོམ་ལྡན་བདག་ལ་སྩལ་ལགས་ཀྱི། །བདག་ལ་འགོ་བར་མཛད་དུ་གསོལ། །ཞེས་གསོལ་བ་ལན་གསུམ་བཏབ། བླ་མས་མགོ་བོར་མེ་ཏོག་བཞག་སྟེ། བཅོམ་ལྡན་འདི་ལ་སྩལ་ལགས་ཀྱི། །འདི་ལ་འགོ་བར་མཛད་དུ་གསོལ། །སྔགས་ཀྱི་དངོས་གྲུབ་སྩལ་དུ་གསོལ། །བརྟུལ་ཞུགས་བརྟན་པར་མཛད་དུ་གསོལ། །རྗེ་བཙུན་སྒྲོལ་མའི་བྱིན་རླབས་ཀྱིས། །མཁའ་སྤྱོད་གནས་སུ་དྲང་དུ་གསོལ། །དེ་ཡིས་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་དགུ་རྣམས་ལ་ཞི་བྱེད་པ། །འདི་ནི་འཇིག་རྟེན་དགེ་བའི་བཀྲ་ཤིས་གཉིས་པའོ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །དེ་ལྟར་སྔགས་ཀྱི་རིག་པ་བྱིན་པས་སྔགས་ཀྱི་བཟླས་པ་ལ་དབང་། ངག་གི་
སྒྲིབ་པ་དག་སྟེ་གསུང་གི་བྱིན་རླབས་ཞུགས། འབྲས་བུ་སེམས་ཅན་ཐམས་ཅད་ཀྱི་སྐད་དུ་ཆོས་སྟོན་པ་གསུང་དབྱངས་ཡན་ལག་དྲུག་ཅུ་ཐོབ་པར་འགྱུར་བ་གསུང་གི་རྗེས་གནང་ངོ་། །མཎྜལ་གྱི་དབུས་ཀྱི་རྗེ་བཙུན་མའི་སྐུ་ལས་མར་མེ་གཅིག་ལས་གཉིས་མཆེད་ཀྱི་ཚུལ་དུ་བྱོན། སྤྱི་བོའི་གཙུགས་ཏུ་ཞུགས། སྒོ་གསུམ་ལ་དབྱེར་མེད་དུ་ཐིམ་པས་སྒྱུ་མ་དང་ཆུ་ཟླ་ལྟར་བདེན་རྫུན་དང་བྲལ་ཞིང་རང་བཞིན་གྱིས་འོད་གསལ་བ་གདོད་མ་ནས་དག་པ་བཅོས་མ་མ་ཡིན་པའི་ཆོས་ཉིད་མངོན་དུ་བྱས་པ་མོས་ལ། སྦྱི་བོར་མེ་ཏོག་བཞག་སྟེ་ཡི་གེ་བཅུ་པའི་མཐར། བཛྲ་ས་མ་ཡ་སྟྭྃ། དགེ་འདུན་དམ་པ་ཆོས་ལྡན་ཐོས་པའི་བཀྲ་ཤིས་ཕྱུག །ལྷ་དང་མི་དང་ལྷ་མ་ཡིན་གྱིས་མཆོད་པའི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་གཞི། །འདི་ནི་འཇིག་རྟེན་དགེ་བའི་བཀྲ་ཤིས་གསུམ་པའོ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །དེ་ལྟར་ལྷ་སྐུ་ཕྱག་རྒྱ་ཆེན་པོ་
གསལ་སྟོང་འཛིན་མེད་འོད་གསལ་བར་རྟོགས་པས་ཟུང་འཇུག་གི་རྣལ་འབྱོར་བསྒོམ་པ་ལ་དབང་། ཡིད་ཀྱི་སྡིག་སྒྲིབ་བག་ཉལ་དང་བཅས་པ་དག །ཐུགས་ཀྱི་བྱིན་རླབས་ཞུགས། འབྲས་བུ་ཆོས་སྐུ་ལྷུན་གྱིས་གྲུབ་པ་མངོན་དུ་བྱས་པ་ཐུགས་ཀྱི་རྗེས་གནང་ངོ་། །བླ་མ་དང་བཅོམ་ལྡན་འདས་མ་ཐ་མི་དད་པའི་དཔྲལ་བ་ལས་ཞི་བའི་འོད་ཟེར་དཀར་པོ། ལྟེ་བ་ལས་རྒྱས་པའི་འོད་ཟེར་སེར་པོ། །མགྲིན་པ་ལས་དབང་གི་འོད་ཟེར་དམར་པོ། ཐུགས་ཀ་ནས་དྲག་པོའི་འོད་ཟེར་སྔོན་པོ་རྣམས་རིམ་པར་འཕྲོས། རང་གི་འཁོར་ལོའི་ཡིག་འབྲུ་དང་བཅས་པ་ལ་ཐིམ། དེ་ལས་ཞི་རྒྱས་དབང་དྲག་འོད་ཟེར་དཀར་སེར་དམར་སྔོ་རྣམས་རིམ་པར་འཕྲོས། ལུས་གང་། སླར་ཕྱིར་འཕྲོས། སྣོད་བཅུད་ཐམས་ཅད་ལ་ཕོག་པས་བདག་གཞན་སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་ཐམས་ཅད་ཞི། ཚེ་དང་བསོད་ནམས་ཡེ་ཤེས་རྒྱས། འཇིག་རྟེན་དང་འཇིག་
རྟེན་ལས་འདས་པའི་དངོས་གྲུབ་ཐམས་ཅད་དབང་དུ་གྱུར། བདུད་བཞི་དང་མ་རུང་པ་ཐམས་ཅད་ཚར་བཅད། སླར་སངས་རྒྱས་བྱང་སེམས་མ་ལུས་པའི་ཞི་རྒྱས་དབང་དྲག་གི་ཕྲིན་ལས་ཐམས་ཅད་འོད་ཟེར་དཀར་སེར་དམར་སྔོའི་རྣམ་པར་སྤྱན་དྲངས། ཐུགས་ཀའི་འཁོར་ལོ་ཡིག་འབྲུ་ལ་ཐིམ། འོད་ལྷག་མ་རྣམས་སྐུའི་ཕྱི་ནས་འདོམ་རེའི་སར་རིམ་པར་འཁོར་བས་དཀར་སེར་དམར་སྔོའི་འོད་སོ་སོའི་གུར་ཁང་སྲ་ཞིང་བརྟན་པ་བར་ཐམས་ཅད་ཨུཏྤལ་གཞོན་ནུས་གང་བར་གྱུར་ཏེ། །སངས་རྒྱས་ཐམས་ཅད་ཀྱི་ཞི་རྒྱས་དབང་དྲག་གི་ཕྲིན་ལས་ཡོངས་སུ་རྫོགས་པའི་བདག་ཉིད་ངའོ་སྙམ་དུ་མོས་ལ་དབང་བསྐུར་བ་དག་སློབ་མ་བསྡུ-་བ་སོགས་ལས་རབ་འབྱམས་སྒྲུབ་པར་གྱིས་ཤིག །དེ་ལྟར་ཕྲིན་ལས་བཞིའི་རྗེས་སུ་གནང་བ་ཐོབ་པས་ལས་རབ་འབྱམས་སྒྲུབ་པ་ལ་དབང་ཞིང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཕྲིན་ལས་ལ་དབང་བྱེད་
པ་པོར་གྱུར་ཏོ། །དེང་ཕྱིན་ཆད་སྙིང་པོ་ཡི་གེ་བཅུ་པ་སྤེལ་ཚིག་དང་བཅས་པ་ཆག་མེད་དུ་བཟླ་པའི་ཡི་དམ་ལོངས་ཞིག །ཅེས་བསྒོ་པ་ལྟར་ཉིན་རེ་ལ་འདི་ཙམ་འདྲེན་པའི་དམ་བཅའ་བྱས་ལ། གཙོ་བོས་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱི། །ཞེས་ལན་གསུམ། སླང་ཡང་མཎྜལ་ཕུལ་ཏེ། དེང་ནས་བརྩམས་ཏེ་བདག་བྲན་དུ། །ཁྱོད་ལ་བདག་ནི་འབུལ་ལགས་ན། །ཁྱོད་ཀྱི་སློབ་མར་བཟུང་བ་དང་། །ཆ་ཡིས་ཀྱང་ནི་སྤྱད་དུ་གསོལ། །ཞེས་བརྗོད་ཕྱག་དང་ཡོན་ཕུལ། གཏང་རག་གི་མཆོད་བསྟོད་བྱའོ། །ཟུང་འཇུག་གི་རྣལ་འབྱོར་མཚན་བཅས་འཁོར་ལོའི་གུར་ཁང་བསྒོམ་པར་སྤྲོ་ན། ཐུགས་ཀའི་ཏྭྃ་ལས་འོད་ཟེར་འཕྲོས་པས་རྒྱུ་བ་དང་མི་རྒྱུ་བའི་སྣོད་བཅུད་ཐམས་ཅད་འོད་དུ་ཞུ་སྟེ། བདག་ཉིད་ལ་ཐིམ། བདག་ཉིད་ཀྱང་འོད་དུ་ཞུ་སྟེ་འཁོར་ལོ་ཡིག་འབྲུ་དང་བཅས་པ་ལ་ཐིམ། དེ་ཡང་ཏྭྃ་ཡིག་ལ་ཐིམ་སྟེ་ནཱ་ད་ཙམ་དུ་ཡང་མི་དམིགས་པ་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་འོད་གསལ་བའོ། །
ཨརྻ་ཏཱ་རེ་྅ཧཾ། སྐད་ཅིག་གིས་ཆུ་ལ་ཆུ་བུར་ཤར་བ་ལྟར་བདག་ཉིད་རྗེ་བཙུན་མ་དངོས་སུ་གྱུར་པའི་ཐུགས་ཀར་ཏྭྃ་ཡིག་འོད་དུ་ཞུ་བ་ལས་ངོ་བོ་རྗེ་བཙུན་མ་ལ་རྣམ་པ་འཁོར་ལོ་དཀར་པོ་རྩིབ་བརྒྱད་མུ་ཁྱུད་ཡི་གེ་ཐམས་ཅད་དང་བཅས་པ་གཅིག་ཅར་དུ་གསལ་བར་གྱུར། ཐུགས་ཀའི་འཁོར་ལོ་ཡིག་འབྲུ་ལས་འོད་ཟེར་དཀར་པོ་འཕྲོས། ལུས་གང་། བ་སྤུའི་སྒོ་ནས་ཕྱིར་འཕྲོས་པས་འོད་ཟེར་ལས་གྲུབ་པའི་འཁོར་ལོའི་གུར་ཁང་ཕྱོགས་མཚམས་སུ་རྩིབས་བརྒྱད། སྟེང་འོག་གཉིས་ཏེ་བཅུ་དང་ལྡན་པ་མུ་ཁྱུད་དང་བཅས་པ་ལྟེར་བ་ཟླུམ་པོའི་དབུས་སུ་བདག་ཉིད་རྗེ་བཙུན་མར་བཞུགས་པའི་གཡས་གཡོན་ནས་སྟེང་འོག་ཏུ་ཨོཾ་ཧཱ། རྩིབས་བརྒྱད་ཀྱི་རྩ་བར་ཡི་གེ་བརྒྱད་དང་བཅས་པའི་འཁོར་ལོའི་གུར་ཁང་གཡས་སུ་དྲག་ཏུ་འཁོར་ཞིང་སྲ་བ་བརྟན་པ་སྲུབ་མེད་པ་བསྐལ་པའི་རླུང་གི་སེར་བུས་ཀྱང་མི་ཐར་བ། །ནང་ཐམས་ཅད་ཨུཏྤལ་སྔོན་པོ་ཁ་བྱེ་མ་ཁད་
པས་ཀུན་ནས་གང་བར་གྱུར། སླར་ཡང་ཐུགས་ཀའི་འཁོར་ལོ་ཡིག་འབྲུ་ལས་འོད་ཟེར་དཀར་པོ་ཟླ་བའི་ཟེར་ལྟ་བུ་འཕྲོས། ལུས་ཐམས་ཅད་གང་། དུས་དང་དུས་མ་ཡིན་པའི་འཆི་བའི་འཇིགས་པ་ཐམས་ཅད་བསལ། སླར་ཕྱི་རོལ་དུ་འཕྲོས། སྣོད་ཐམས་ཅད་བདེ་བ་ཅན་ལྟ་བུར་བྱས། སེམས་ཅན་ཐམས་ཅད་སྒྲོལ་མའི་གོ་འཕང་ལ་བཀོད། སངས་རྒྱས་ཐམས་ཅད་ཀྱི་སྐུ་གསུང་ཐུགས་གཉིས་སུ་མེད་པའི་ཡེ་ཤེས་འོད་ཟེར་དཀར་པོར་བསྡུས་ཏེ་སྤྱན་དྲངས། སྐུ་གང་། ཐུགས་ཀའི་འཁོར་ལོ་ཡིག་འབྲུ་དང་བཅས་པ་ལ་ཐིམ། གཟི་བརྗིད་འོད་དུ་འབར་འོད་ལྷག་མ་གུར་ཁང་གི་ཕྱིར་རོལ་འདོམ་གང་གི་སར་ཟླུམ་པོར་འཁོར་བས་འོད་ཟེར་དཀར་པོའི་གུར་ཁང་སྲ་བ་བརྟན་པ་སྲུབས་མེད་པ་བསྐལ་པའི་རླུང་གི་སེར་བུར་ཀྱང་མི་ཐར་བ། ནང་ཐམས་ཅད་ཨུཏྤལ་སྔོན་པོ་ཁ་བྱེ་མ་ཁད་པས་ཀུན་ནས་གང་བར་གྱུར། དེ་བཞིན་དུ་འོད་ཐམས་ཅད་རིགས་འགྲེ་ཞིང་།
བསྒྲིགས་འདོན་ཀྱི་ཚེ། སླར་ཡང་སོགས་ནས། འོད་ཟེར་སེར་པོ་གསེར་གཙོ་མ་ལྟ་བུ་དང། དམར་པོ་མེ་ལྕེ་འབར་བ་ལྟ་བུ་དང་། སྔོན་པོ་བཻཌཱུརྻ་ཞུན་མ་ལྟ་བུ་དང་། ལྕགས་ཁ་ཐོ་རངས་ཀྱི་ནམ་མཁའ་ལྟ་བུ་དང་ལྗང་ཁུ་མར་གད་ཀྱི་སྙིང་པོ་ལྟ་བུ་དང་། མཆིན་ཁ་ཨིནྡྲ་ནཱི་ལ་ལྟ་བུ་རྣམས་རིམ་པར་འཕྲོས། ལུས་ཐམས་ཅད་གང་། སོགས་ནས། གཉིས་སུ་མེད་པའི་ཡེ་ཤེས་འོད་ཟེར་ཁ་དོག་སེར་པོར་བསྡུས་ཏེ། ཞེས་སོགས། གུར་ཁང་སྔ་མ་སྔ་མའི་ཕྱི་རོལ་སོ་སོར་འདོམ་གང་གི་སར་ཟླུམ་པོར་འཁོར་བས་འོད་སོ་སོར་གུར་ཁང་སྲ་བ། ཞེས་སོགས་ནས། ཀུན་ནས་གང་བར་གྱུར། ཅེས་པའི་བར་ཅིག་ཅར་བརྗོད་ཅིང་གསལ་གདབ། དེ་ཐམས་ཅད་ཀྱང་སྒྱུ་མ་དང་ཆུ་ཟླ་དང་མིག་ཡོར་དང་མེ་ལོང་གི་གཟུགས་བརྙན་ལྟར་བདེན་རྫུན་དང་བྲལ་བ་སྣང་ལ་རང་བཞིན་མེད་པ་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་དོ། །མཚན་མེད་ཞི་ལྷ་གཟུང་འདུག་ནི། སྣོད་ཐམས་ཅད་སྲུང་འཁོར་བསྡུ། དེ་གུར་ཁང་མཆིན་ཁ་ལ་
ཐིམ་པ་སོགས་ཕྱི་ནས་རིམ་པར་བསྡུས་ཏེ་མཐར་ཏྭྃ་ཡིག་ལ། ཏྭྃ་ཡིག་ཟླ་ཚེས་ལ། དེ་ཀླད་ཀོར་ལ། དེ་རིམ་གྱིས་ཡལ་ཏེ་ནཱ་ད། དེ་ཡང་མི་དམིགས་པར་ཡལ་ཏེ་མཉམ་པར་བཞག་གོ །རྗེས་ཀྱི་ཆ་ོག་ནི། ཨོཾ་ཨཱརྻ་ཏཱ་རེ་ས་པ་རི་ཝཱ་ཨརྒྷཾ་སོགས་ཀྱིས་མཆོད། འཁོར་བ་ལས་སྒྲོལ་ཏཱ་རེ་མ། ཞེས་སོགས་ཀྱིས་བསྟོད། ཨོཾ་བཛྲ་ཏཱ་རེ་ས་མ་ཡ། ཞེས་པ་ནས། ས་ཏྭཱ་ཨཱཿ ཞེས་པའི་ཡི་གེ་བརྒྱ་པ་ལན་གསུམ་གྱིས་ལྷག་ཆད་ཁ་བསྐང་། སྙིང་གར་ཐལ་མོ་སྦྱར་ཏེ། མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །ཉེས་པ་བགྱིས་དང་བགྱིད་སྩལ་པ། །དེ་ཀུན་མགོན་པོས་བཟོད་པར་མཛོད། །ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཞིང་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །ཡེ་ཤེས་པ་འཁོར་བཅས་བཛྲ་མུཿ དམ་ཚིག་པ་རང་གི་སྙིང་གར་ཐིམ་པར་གྱུར། གང་གི་ཞབས་པད་རབ་མཛེས་པར། །ལྷར་བཅས་སྲིད་
དང་ཞི་ཀུན་གྱི། །ཕྱག་བགྱིས་ཐལ་སྦྱར་རབ་བཏུད་པ། །དེ་ཡིས་རྟག་པར་བཀྲ་ཤིས་ཤོག །རྒྱལ་མཆོག་ཚེ་དཔག་མེད་པའི་ཡུམ། །འཆི་མེད་ངེས་པ་སྟེར་བ་མོ། །རིག་པ་འཛིན་མ་བཅོམ་ལྡན་འདས། །ཡིད་བཞིན་འཁོར་ལོའི་བཀྲ་ཤིས་ཤོག །འགྲོ་བ་ཀུན་ལ་བྱམས་པའི་ཡུམ། །བགེགས་ལ་གཅིག་ཏུ་དཔའ་ཞིང་གཏུམ། །འཛུམ་རླབས་ཡིད་དུ་འོང་བའི་ཞལ། །རབ་མཛེས་གསལ་མཛད་བཀྲ་ཤིས་ཤོག །ཀུན་སྤྱོད་ཀུན་གྱི་རང་བཞིན་མ། །མ་ལུས་དགེ་ལེགས་ཀུན་གྱི་བདག །མཐོང་ཐོས་དྲན་རེག་ཚིམས་བྱེད་མ། །མཚན་དཔེ་རབ་མཆོག་བཀྲ་ཤིས་ཤོག །གང་ལ་རྒྱལ་ཀུན་གུས་བཏུད་དེ། །ཕྱག་འཚལ་ཐལ་སྦྱར་རབ་བསྟོད་པ། །ལྷ་རྣམས་ཀྱི་ནི་ལྷར་གྱུར་མ། །བཅོམ་ལྡན་སྒྲོལ་མའི་བཀྲ་ཤིས་ཤོག །བདག་དང་སྐྱེ་དགུ་ཐམས་ཅད་རྣམས། །འཇིགས་པ་ཀུན་ལས་རབ་སྒྲོལ་ཞིག །ཕན་དང་བདེ་བ་རབ་འཕེལ་མས། །འདོད་དོན་ཀུན་འགྲུབ་བཀྲ་ཤིས་
ཤོག །འདི་དང་ཕ་རོལ་ཐམས་ཅད་དུ། །དྲན་པ་ཙམ་གྱི་བདེ་བྱེད་པ། །བཅོམ་ལྡན་འདས་མ་ཁྱོད་ཀྱི་ཞབས། །རྟག་པར་རབ་མཆོད་བཀྲ་ཤིས་ཤོག །ཁྱོད་ཀྱིས་རབ་མཆོག་དབང་པོའི་དབང་། །དད་བརྩོན་དྲན་འཛིན་ཤེས་རྣམས་ཀྱིས། །རབ་རྒྱས་ལྷུན་པོ་ལྟར་བརྟན་པའི། །མི་ཟད་རབ་སྦྱོར་བཀྲ་ཤིས་ཤོག །བདེན་མཆོག་སྐྱབས་གསུམ་བདེན་དེ་བཞིན། །བདེན་ལྡན་ཇི་སྙེད་ཀུན་བདེན་པས། །ཤིས་པ་བརྗེད་པ་འདི་དག་གིས། །རྣམ་པ་ཀུན་ཏུ་བཀྲ་ཤིས་ཤོག །ཚངས་དང་ལྷ་དབང་སོགས་དང་། ཉིན་མོ་བདེ་ལེགས་སོགས་ཤིས་པ་བརྗོད། ཕན་བདེ་ཡར་ངོའི་ཟླ་ལྟར་རྒྱས་མཛད་མ། །རྒྱལ་ཡུམ་སྒྲོལ་མ་ཁྱོད་ལ་གསོལ་བ་ནི། །འགྲོ་བའི་མིག་གཅིག་རྒྱལ་བ་ཀརྨ་པ། །ཨོ་རྒྱན་ཕྲིན་ལས་རྡོ་རྗེའི་སྐུ་ཚེ་དང་། །ཕྲིན་ལས་རྣམ་པར་དཀར་བ་ཇི་སྙེད་ནི། །བདག་ཅག་གདུལ་བྱའི་མོས་བློ་ཇི་བཞིན་དུ། །འཛམ་གླིང་འཛམ་གླིང་ཆེན་པོ་ཀུན་ཁྱབ་པར། །སྲིད་པ་
ཇི་སྲིད་འཕེལ་བར་བྱིན་གྱིས་རློབས། །དཔལ་ལྡན་བླ་མའི་ཆོས་ཀྱི་གདུང་འཛིན་པ། །མཁན་སློབ་གནས་བརྟན་འདུས་པའི་ཚོགས་དང་བཅས། །སྐྱེ་དགུའི་གཉེན་དུ་གྱུར་པ་མཐའ་དག་ཀྱང་། །སྐུ་ཚེ་ཕྲིན་ལས་འཕེལ་བར་བྱིན་གྱིས་རློབས། ཞེས་དང་། སྤྲོ་ན། ཁྱད་པར་རིང་ལུགས་འདི་ཡི་འདུས་པའི་ཚོགས། །རྟག་པར་མཐུན་ཞིང་ལུགས་གཉིས་འབྱོར་པར་ལྡན། །ལུང་དང་རྟོགས་པའི་ཡོན་ཏན་གོང་འཕེལ་ཞིང་། །སྲིད་པ་ཇི་སྲིད་གནས་པར་བྱིན་གྱིས་རློབས། །ས་སྟེང་གནས་པའི་སྐྱེ་དགུའི་ཚོགས་རྣམས་ཀུན། །ནད་འཁྲུགས་མུ་གེ་ཕྱི་ནང་གནོད་པ་ཞི། །བདེ་སྐྱིད་དཔལ་ལ་རྟག་ཏུ་སྤྱོད་བྱེད་ཅིང་། །ཐར་པའི་གླིང་དུ་བགྲོད་པར་བྱིན་གྱིས་རློབས། །ཀུན་ཀྱང་བྱམས་པའི་སེམས་ཀྱིས་རྒྱུད་སྦྱངས་ཤིང་། །ཐུབ་བསྟན་མི་ཉམས་དར་ཞིང་གསལ་བ་དང་། །ཀཾ་ཚང་བསྟན་པ་ལྷག་པར་གོང་འཕེལ་ཞིང་། །ཕྲིན་ལས་རྒྱུན་ཆད་མེད་པར་བྱིན་གྱི་རློབས། །སྒྲུབ་པ་པོ་
རྣམས་གང་དུ་གནས་པའི་སར། །ཕྱི་ནང་འགལ་རྐྱེན་ནམ་ཡང་མི་འབྱུང་ཞིང་། །བཀྲ་ཤིས་བདེ་ལེགས་ཚོགས་རྣམས་འབར་བཞིན་ཏུ། །སྲིད་ཞིའི་དཔལ་དུ་འགྱུར་བར་བྱིན་གྱིས་རློབས། །དུས་འདི་ནས་བཟུང་བྱང་ཆུབ་སྙིང་པོའི་བར། །བཅོམ་ལྡན་འདས་མ་ཁྱོད་དང་མི་འབྲལ་ཞིང་། །ཐུགས་རྗེས་ལེགས་བཟུང་དུས་ཀུན་བྱིན་རློབ་ཅིང་། །དངོས་གྲུབ་མ་ལུས་སྩོལ་བར་བྱིན་གྱི་རློབས། །ཡོན་ཏན་མཐའ་ཡས་བཅོམ་ལྡན་འདས་མ་ལ། །མཆོད་བསྟོད་གསོལ་བ་བཏབ་པའི་དགེ་བའི་མཐུས། །འགྲོ་ཀུན་འཁོར་བའི་ས་ལས་རབ་འཕགས་ཏེ། །བླ་མེད་བྱང་ཆུབ་ཆེན་པོ་མྱུར་ཐོབ་ཤོག །ཅེས་བཀྲ་ཤིས་དང་འདོད་དོན་གསོལ་བ་གདབ་བོ། །འདི་ནི་ཀརྨ་བསྟན་པའི་རྒྱལ་མཚན་གྱི་བསྐུལ་བ་དོན་ཡོད་པར་བྱ་བའི་ཕྱིར། ཞྭ་དམར་ཅོད་པན་འཛིན་པ་ལྔ་པའི་མཚན་གྱི་ཆ་ཤས་ཅན་དཀོན་མཆོག་འབངས་ཀྱིས་བླ་མ་གོང་མ་དག་གིས་མཛད་པའི་སྒྲུབ་ཐབས་ལས་བསྡེབས་ཏེ་ལྷའི་ཞོལ་དུ་སྦྱར་བའོ། ལས་ཚོགས་ཀྱི་ཡི་གེ་ནི་ལོགས་ཤིག་ལས་ལྟོས་ཤིག །དེ་ལྟར་ཞྭ་
དམར་ལྔ་པས་མཛད་པར་རྗེ་ཀརྨ་པ་དགུ་པའི་གསུང་ལྟར་ཁ་འགེངས་ཅུང་ཟད་བགྱིད་པ་པོ་ནི་ཀརྨ་པ་བཅུ་བཞི་པའི་མཚན་འཛིན་ཐེག་པ་མཆོག་གི་རྡོ་རྗེས་སོ། །རྒྱལ་བ་ཐམས་ཅད་བསྐྱེད་པའི་ཡུམ་ཆེན་མོ། །སྒྲུབ་ལ་འཆི་མེད་གཏེར་བའི་རྗེ་བཙུན་མའི། །དཀྱིལ་ཆོག་དངོས་གྲུབ་རོལ་མཚོའི་ཆོས་སྦྱིན་འདི། །བསྟན་པའི་སྲོལ་འབྱེད་ཀརྨའི་ཆོས་སྒར་དུ། །རྒྱལ་བའི་དབང་བོའི་ཕྲིན་ལས་ལས་འཁྲུངས་ཀྱིས། །བསྟན་འཛིན་སྐྱེས་ཀུན་སྐུ་ཚེ་ཡུན་བརྟན་ཞིང་། །སྐྱེ་དགུ་དུས་མིན་འཇིགས་ལས་གཡུལ་རྒྱལ་ནས། །རྣམ་དཀར་བྱ་བས་དུས་ཀུན་ཡོངས་འདས་ཞིང་། །མཐར་ཐུགས་འཕགས་མའི་གོ་འཕང་མྱུར་ཐོབ་ཤོག །སརྦདཱ་མདྒལཾ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།