གཏོར་མ་འབུལ་བ་ཆོ་ག་ཕྲིན་ལས་མྱུར་འགྲུབ།
རྡོ་རྗེ་ཕུར་པའི་ལྷ་ཚོགས་རྣམས་ལ་གཏོར་མ་འབུལ་བ་ཆོ་ག་ཕྲིན་ལས་མྱུར་འགྲུབ་བཞུགས་སོ། །
བླ་མ་རྡོ་རྗེ་གཞོན་ནུ་ལ་ཕྱག་འཚལ་ལོ། །འདིར་རྡོ་རྗེ་ཕུར་པའི་ལྷ་ཚོགས་ལ་གཏོར་མ་འབུལ་བའི་ཆོ་ག་བཤད་པ་ལས། དང་པོ་ཡིད་དང་མཐུན་པའི་གནས་སུ་སྐུ་རྟེན་བཤམས་པའི་མདུན། སྟེགས་བུ་ཁེབ་ལྡན་གྱི་ཁར། རིན་པོ་ཆེའི་སྣོད་དུ། འབྲུ་ཕྱེ་ཁྲག་དང་མར་ཁུས་སྦྲུས་པ། དཔལ་གཏོར་སྟོད་ཟུར་གསུམ་ལ། འཁོར་རང་འདྲ་བཅུ། བར་མཚམས་སུ་འཐེབ་ཀྱུ་སུམ་བརྩེགས་སྤེལ་བའི་མུ་རན་ནག་པོ་དཀར་ཐིག་གིས་སྤྲས་པ། ཕུར་སྲུང་ལ་དམར་གཏོར་ཟུར་གསུམ་རཀ་ལམ་ནག་པོ་དཀར་ཐིག་གིས་སྤྲས་པ་ལ་འཁོར་རང་འདྲ་བཅུ་གཉིས། ཐེབ་ཀྱུ་གཉིས་བརྩེག་གིས་བརྒྱན་པ། གཉིས་ཀར་རྒྱན་མེ་རི་དར་གདུགས་ཤའི་བརྒྱན་ཅིང་ཟས་སྣ་མཐར་སྤུངས། གཏོར་མ་
གཉིས་གོང་འོག་ཏུ་བཤམས་པའི་གཡས་སུ་ཆོས་སྨན་ཆང་དང་སྦྱར་བ། གཡོན་དུ་རཀྟ་སོ་ལྔ་ཁྲག་དང་སྦྱར་བ་མདུན་དུ་ཉེར་སྤྱོད་སོགས་ཕྲེང་ཚར་དུ་བཤམས། རང་གི་མདུན་དུ་ནང་མཆོད་ཌཱ་རུ་དྲིལ་བུ་འཐོར་ནས་སོགས་འདུ་བྱ། བརྒྱུད་འདེབས་སྔོན་འགྲོ་བས་བདག་གི་རྣལ་འབྱོར་ནི། རང་གི་སྙིང་གའི་ཧཱུྃ་ལས་འོད་ཟེར་འཕྲོས་པས་བླ་མ་དཔལ་ཆེན་རྡོ་རྗེ་གཞོན་ནུའི་དཀྱིལ་འཁོར་མདུན་གྱི་ནམ་མཁར་བཛྲ་ས་མ་ཛཿས་ཚོགས་ཞིང་སྤྱན་དྲངས། བླ་མ་དཀོན་མཆོག་གསུམ་རྣམས་དང་༔ ཧེ་རུ་ཀ་དང་མཁའ་འགྲོ་མ༔ སྐྱབས་ཡུལ་རྒྱ་མཚོ་ཁྱེད་རྣམས་ལ༔ བྱང་ཆུབ་བར་དུ་
སྐྱབས་སུ་མཆི༔ སེམས་ཅན་ཀུན་གྱི་དོན་གྱི་ཕྱིར༔ རྫོགས་པའི་སངས་རྒྱས་ཐོབ་འདོད་ན༔ བར་དུ་གཅོད་པའི་བདུད་འདུལ་ཕྱིར༔ དཔལ་ཆེན་གོ་འཕང་ཐོབ་པར་བྱ༔ རྡོ་རྗེ་སློབ་དཔོན་སོགས་པོར་བསྔོ༔ སེམས་ཅན་བདེ་དང་ལྡན་གྱུར་ཅིག༔ སྡུག་བསྔལ་ཀུན་དང་བྲལ་བར་ཤོག༔ བདེ་དང་རྟག་ཏུ་མི་འབྲལ་ཞིང་༔ ཆོས་ཀུན་མཉམ་ཉིད་རྟོགས་པར་ཤོག༔ ཛཿཧཱུྃ་བཾ་ཧོ༔ ཚོགས་ཞིང་རྣམས་རང་ལ་ཐིམ་པར་གྱུར་པར་བསམ་ལ་མཆོད་པ་བྱིན་བརླབ་ནི། རྃ་ཡྃ་ཁྃ༔ རང་གི་ཐུགས་ཀ་ནས་རྃ་ཡྃ་ཁྃ་འཕྲོས། མ་དག་པའི་དངོས་པོ་ཐམས་ཅད་བསྲེགས་གཏོར་བཀྲུས་ནས་སྟོང་པར་གྱུར། ཨོཾ་བཛྲ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུྃ་ཕཊ། ཨོཾ་སྭ་བྷཱ་ཝ་སོགས་ཀྱིས་སྦྱངས། སྟོང་པའི་ངང་ལས་གནས་ཁང་ཐར་པ་ཆེན་པོའི་གཞལ་ཡས་ཕུན་སུམ་ཚོགས་པའི་ནང་དུ་ཨ་ལས་བྷནྡྷ་འབར་བའི་སྣོད་ཀྱི་ནང་དུ་ཧཱུྃ་ཡིག་ལས་བྱུང་བའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ།
ཞལ་ཟས། རོལ་མོ་ལ་སོགས་པ་འདོད་ཡོན་གྱི་རྣམ་པ་མ་ཚང་བ་མེད་པ་འཕགས་པ་ཀུན་ཏུ་བཟང་པོའི་མཆོད་པའི་སྤྲིན་གྱི་ཕུང་པོ་ལྟ་བུར་ནམ་མཁའི་མཐའ་ཀླས་པ་གང་བར་གྱུར་བསམ་ལ། ཨོཾ་བཛྲ་ཨརྒྷཾ་ཨཱཿཧཱུྃ། པ་དྱཾ་སོགས་ནས་ཤབྡའི་བར་སོ་སོའི་ཕྱག་རྒྱས་བྱིན་བརླབས། བདུད་རྩི་ལ། རྃ་ཡྃ་ཁྃ། སྟོང་པའི་ངང་ལས་ཡྃ་ལས་རླུང་གི་དཀྱིལ་འཁོར་ཟླ་གམ་རྃ་ལས་མེ་ཡི་དཀྱིལ་འཁོར་གྲུ་གསུམ་ཀཾ་ལས་ཐོད་སྒྱེད་གསུམ་གྱི་སྟེང་དུ་བྷྲུྃ་ལས་ཀ་པཱ་ལ་ཕྱི་དཀར་ལ་ནང་དམར་བའི་དབུས་སུ་ཤུ་ལས་བྱང་སེམས་དཀར་པོ། ཤར་དུ་བི་ལས་དྲི་ཆེ་སེར་པོ། ལྷོར་མ་ལས་ཤ་ཆེན་སྔོན་པོ། ནུབ་ཏུ་རཀྟ་དམར་པོ། བྱང་དུ་མུ་ལས་དྲི་ཆུ་ལྗང་གུ། སླར་ཡང་དབུས་སུ་ན་ལས་མིའི་ཤ །ཤར་དུ་གོ་ལས་བ་ལང་གི་ཤ །ལྷོ་རུ་ཀུ་ལས་ཁྱིའི་ཤ །ནུབ་དུ་ད་ལས་གླང་པོ་ཆེའི་ཤ །བྱང་ཤར་དུ་ཧ་ལས་རྟའི་ཤ་རྣམས་སྤུངས། ཡྃ་ལས་རླུང་གཡོས་རྃ་ལས་མེ་སྦར་རྫས་རྣམས་ཞུ་མ་དག་པ་ཕྱིར་ལུད།
ཨོཾ་ཨཱཿཧཱུྃ་གིས་འོད་ཟེར་གྱིས་ཡེ་ཤེས་བདུད་རྩི་བཀུག་འོད་དུ་ཞུ་བ་ལས་དམ་ཚིག་གི་རྫས་དང་འདྲེས་པ་ལས་འོད་ཟེར་དཀར་བའི་མདོག་ཆགས་པ་རླངས་པ་འོད་ཟེར་ལྔ་འཕྲོས་པའི་ཟེག་མ་ལ་འདོད་ཡོན་ལྔའི་མཆོད་སྤྲིན་བཟའ་བཅའ་གཏོར་མ་རཀྟ་བྱང་སེམས་དམར་པོའི་རང་བཞིན་ནམ་མཁའི་ཁམས་གང་བས་དམ་རྫས་སྨན་རཀ་གཏོར་གསུམ་ངོ་བོ་ཡེ་ཤེས་བདུད་རྩིའི་ཁ་དོག་དྲི་རོ་ཕུན་སུམ་ཚོགས་པར་གྱུར༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱཿ ཨོཾ་ཨཱཿཧཱུྃ་མ་ཧཱ་རཀྟ་ཛྭ་ལ་མཎྜལ་ཧཱུྃ་ཧྲཱིཿཋཱཿ ཨོཾ་ཨཱཿཧཱུྃ་མ་ཧཱ་བ་ལིཾ་ཏ་ཏེ་ཛྭ་བ་ལ་ཏེ་ཧཱུྃ་ཧྲཱིཿཋཱཿ ཨོཾ་ཨཱཿཧཱུྃ་མ་ཧཱ་ཀཱ་མ་ལ་གུ་ཎ་པཱུ་ཛ་ཧཱུྃ་ཧྲཱིཿཋཱཿ ལན་གསུམ་བརྗོད་པས་བྱིན་གྱིས་རླབས༔ ཧཱུྃ༔ རྡོ་རྗེ་ཁྲོས་པས་ཞེ་སྡང་གཅོད༔ མཚོན་ཆེན་སྔོན་པོ་འབར་བ་ནི༔ ནམ་མཁའི་དཀྱིལ་ནས་ཐིགས་པ་ཤར༔ ཧཱུྃ་གི་འོད་ཟེར་ཕྱོགས་བཅུར་འཕྲོས༔ སྣང་སྲིད་ཕུར་བུའི་ཞིང་ཁམས་གྱུར༔ མཐིང་ནག་ཨེ་ཡེ་ཀློང་དཀྱིལ་དུ༔ བྲག་ཆེན་པད་ཉི་ལྷ་
ཆེན་སྟེང་༔ ཧཱུྃ་ཡིག་ཡོངས་སུ་གྱུར་པ་ལས༔ རྡོ་རྗེ་མཐིང་ནག་ཧཱུྃ་གིས་མཚན༔ འོད་ཟེར་མཆོག་ཏུ་འབར་བ་ལས༔ ངང་ཉིད་རྡོ་རྗེ་ཆོས་དབྱིངས་ལས༔ འབར་བའི་ཁྲོ་བོ་མི་བཟད་པ༔ མཐིང་ནག་ཞལ་གསུམ་ཕྱག་དྲུག་པ༔ གཡས་དཀར་གཡོན་དམར་དབུས་མཐིང་ཞལ༔ དྲག་པོའི་སྤྱན་དགུ་ཕྱོགས་བཅུར་བགྲད༔ ཞལ་གདངས་ལྗགས་འདྲིལ་མཆེ་གཙིགས་ཤིང་༔ ཨཱ་རལླི་ཡི་སྒྲ་ཆེན་སྒྲོག༔ སྨ་ར་སྨིན་མ་མེ་ལྟར་འབར༔ དབུ་སྐྲ་གྱེན་འཁྱིལ་སྐྲ་གསེབ་ཏུ༔ རྡོ་རྗེ་ཕྱེད་པས་མཚན་པ་ཡི༔ ལྟེ་བར་བླ་མ་མི་བསྐྱོད་པ༔ གཡས་པ་དང་པོས་རྩེ་དགུ་དང་༔ བར་པས་རྩེ་ལྔ་ཕྱོགས་བཅུར་གཟིར༔ གཡོན་པ་དང་པོས་མེ་ཕུང་དང་༔ བར་པས་ཁ་ཊྲཱཾ་རྩེ་གསུམ་འཛིན༔ ཐ་མས་རི་རབ་ཕུར་བུ་བསྒྲིལ༔ རྡོ་རྗེ་རིན་ཆེན་གཤོག་པ་གདེངས༔ གླང་ཆེན་ཞིང་ལྤགས་སྟོད་དུ་གསོལ༔ སྟག་གི་པགས་པའི་ཤམ་ཐབས་མཛད༔ ཐོད་ཕྲེང་ཚར་གསུམ་དོ་ཤལ་དང་༔ ཐོད་སྐམ་
རྣམས་ཀྱིས་དབུ་བརྒྱན་ཅིང་༔ རིན་པོ་ཆེ་ཡི་རྩེ་ཕྲན་དང་༔ སྦྲུལ་རིགས་ལྔ་ཡི་ཆུན་པོས་བརྒྱན༔ ཁྲག་ཞག་ཐལ་བ་རྣམས་ཀྱིས་བྱུགས༔ རུས་པའི་རྒྱན་དྲུག་ལ་སོགས་པའི༔ དཔལ་གྱི་ཆས་བཅུ་སྐུ་ལ་རྫོགས༔ ཞབས་བཞི་རོལ་པའི་སྟབས་ཀྱིས་འགྱིང་༔ དེ་ཡི་པང་དུ་སྦྱོོར་བའི་ཡུམ༔ འཁོར་ལོ་རྒྱས་འདེབས་མཐིང་ནག་འབར༔ གཡས་པས་ཨུཏྤལ་ཡབ་མགུལ་འཁྱུད༔ གཡོན་པས་ཐོད་ཁྲག་ཡབ་ལ་སྟོབ༔ ལང་ཚོ་རྒྱས་པའི་འགྱུར་བག་ཅན༔ ཕྱག་རྒྱ་ལྔ་ཡི་རྒྱན་འཆང་ཞིང་༔ གཡོན་བསྐུམ་ཡབ་ཀྱི་སྐེད་ལ་འཁྲིལ༔ གཡས་བརྐྱང་བདེ་བ་ཆེན་པོར་སྦྱོར༔ སྤྱི་བོར་ཨོཾ་ཧཱུྃ་ཏྲཱྃ་ཧྲཱིཿཨཱཿ ཡེ་ཤེས་ལྔ་ཡི་བདག་ཉིད་ཅན༔ གནས་གསུམ་ཨོཾ་ཨཱཿཧཱུྃ་གིས་མཚན༔ སྐུ་གསུང་ཐུགས་སུ་བྱིན་གྱིས་བརླབ༔ ཡབ་ཀྱི་གསང་གནས་ཧཱུྃ་ཡིག་ལས༔ རྡོ་རྗེའི་ལྟེ་བར་ཧཱུྃ་གིས་མཚན༔ ཡུམ་གྱི་མཁའ་གསང་པཱྃ་ཡིག་ལས༔ པདྨ་ཉི་མ་ཨཱྃ་གིས་མཚན༔ བདེ་བ་ཆེན་པོའི་དབྱིངས་སུ་རོལ༔ བ་
སྤུ་རྡོ་རྗེ་ཕྱེད་པ་དང་༔ སྣ་ཚོགས་རྡོ་རྗེའི་གོ་ཁྲབ་གསོལ༔ ཕུར་བུའི་ཚྭ་ཚྭ་སྐར་ལྟར་འཁྲུགས༔ ཐུགས་ཀར་འོག་ཀྱི་གུར་ཁྱིམ་དབུས༔ པདྨ་ཉི་ཟླའི་གདན་སྟེང་དུ༔ ཡེ་ཤེས་སེམས་དཔའ་རྡོ་རྗེ་སེམས༔ དཀར་གསལ་རྡོ་རྗེ་དྲིལ་བུ་འཛིན༔ སྙེམས་མ་གྲི་ཐོད་འཛིན་དང་འཁྲིལ༔ སྐྱིལ་ཀྲུང་བཞུགས་པའི་སྲོག་གི་གོར༔ རིན་ཆེན་ཆ་བརྒྱད་ཉི་ཟླའི་སྟེང་༔ རྡོ་རྗེ་སྔོན་པོའི་ལྟེ་བ་ལ༔ ཉི་མའི་སྟེང་དུ་ཧཱུྃ་མཐིང་ག༔ མཐའ་བསྐོར་འབྲུ་དགུ་རང་སྒྲར་བཅས༔ ཐུགས་སྲོག་ལས་ནི་འོད་འཕྲོས་པས༔ སྒོམ་འདྲའི་ཡེ་ཤེས་སྤྱན་དྲངས་གྱུར༔ ཨོཾ་བཛྲ་ཀཱི་ལི་ཀཱི་ལ་ཡ་ངྷརྨ་པཱ་ལ་ས་པ་རི་ཝཱ་ར་བཛྲ་ས་མ་ཛཿས་སྤྱན་དྲངས་ནས་བཞུགས་པར་བསམ་ལ། ཨོཾ་བཛྲ་ཨརྒྷཾ་སོགས་ཤབྡ་པྲ་ཏཱིཙྪ་ཧོ༔ མ་ཧཱ་པཉྩ་ཨ་མྲྀ་ཏ་ཁ་རྃ་ཁཱ་ཧཱི༔ མ་ཧཱ་རཀྟ་ཁ་རྃ་ཁ་ཧི༔ མ་ཧཱ་བྷ་ལིཾ་ཏ་ཁ་རྃ་ཁ་ཧི༔ ཧཱུྃ༔ ཐབས་ཀྱིས་སྤྱོད་པའི་འགྲོ་དོན་ཏུ༔ བྱམས་དང་སྙིང་རྗེས་གང་འདུལ་བ༔ སངས་རྒྱས་ཕྲིན་ལས་རྗོགས་མཛད་པའི༔
ཕུར་པ་ཕྲིན་ལས་ལྷ་ལ་ཕྱག་འཚལ་བསྟོད༔ ཛཿཧཱུྃ་བྃ་ཧོཿགཉིས་སུ་མེད་པར་གྱུར༔ བཟླས་པ་བྱ་བ་ནི། ཐུགས་སྲོག་སྔགས་ལས་འོད་འཕྲོས་པས༔ ཕྱོགས་བཅུའི་རྒྱལ་བ་ཐམས་ཅད་ཀྱིས༔ སྐུ་གསུང་ཐུགས་ལ་མཉེས་མཆོད་ཕུལ༔ སྐུ་གསུང་ཐུགས་ཀྱི་བྱིན་རླབས་རྣམས༔ ཨོཾ་དཀར་ཨཱཿདམར་ཧཱུྃ་མཐིང་ནི༔ དཔག་ཏུ་མེད་པ་སྤྱན་དྲངས་ཏེ༔ རང་གི་གནས་གསུམ་ཐིམ་པ་ཡིས༔ དབང་དང་བྱིན་རླབས་དངོས་གྲུབ་ཐོབ༔ བདེ་གཤེགས་བླ་མ་མཉེས་པར་བྱས༔ མཆེད་དང་ལྕམ་དྲལ་ཉམས་ཆགས་བསྐང་༔ མཁའ་འགྲོ་ཆོས་སྐྱོང་མཁོན་པ་སྦྱངས༔ དྲེགས་པ་ཐམས་ཅད་ལས་ལ་བཙུད༔ བདུད་དང་དམ་སྲི་ཐལ་བར་བརླག༔ འགྲོ་བའི་སྒོ་གསུམ་སྒྲིབ་པ་སྦྱངས༔ སྣང་བ་ཐམས་ཅད་ལྷ་ཡི་སྐུ༔ གྲགས་པ་ཐམས་ཅད་སྔགས་ཀྱི་སྒྲ༔ དྲན་རྟོག་ཡེ་ཤེས་རོལ་པར་བསྒོམ༔ ཅེས་གསལ་བཏབ་ལ། ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བྃ་ཧཱུྃ་ཕཊ༔ ཞེས་ཅི་ནུས་བཟླས་མཐར། ཐུགས་ཀ་ནས་
འོད་ཟེར་འཕྲོས། སྣང་སྲིད་འོད་ཞུ་རང་ལ་ཐིམ། རང་ཉིད་འོད་དུ་ཞུ་ནས་ཐུགས་ཀའི་ཧཱུྃ་ལ་ཐིམ། དེ་འོད་གསལ་གྱི་ངང་དུ་ཐིམ་པར་གྱུར་པར་བསྒོམ་ལ་མཉམ་པར་བཞག །སླར་ཡང་བདག་ཉིད་རྡོ་རྗེ་གཞོན་ནུའི་སྐུར་གྱུར་པ་ལ་གནས་གསུམ་ཨོཾ་ཨཱཿཧཱུྃ་གིས་མཚན་པར་བསམ། དེ་ནས་ཐུན་མཚམས་སུ་གཏོར་མ་འབུལ་བ་ནི། རྗེས་སུ་མཐུན་པའི་གཏོར་ཆོག་དངོས་ནི། རྃ་ཡྃ་ཁྃ་གིས་གཏོར་མ་བསྲེགས་གཏོར་བཀྲུས༔ སྟོང་པའི་ངང་ལས་རླུང་མེ་ཐོད་སྒྱེད་སྟེང་༔ བྷྲཱུྃ་ལས་བྷཉྫ་ཡངས་ཤིང་རྒྱ་ཆེའི་ནང་༔ གོ་ཀུ་ད་ཧ་ན་ལས་ཤ་ལྔ་དང་༔ བི་མུ་མར་ཤུ་ལས་བདུད་རྩི་ལྔ༔ ཁ་ཆོད་ཉི་མ་ཟླ་བ་རྡོ་རྗེས་མཚན༔ མེ་རླུང་སྦྱོར་བས་བདུད་རྩི་ཞུ་ཞིང་ཁོལ༔ རླངས་པས་འཁོར་འདས་དྭངས་མ་བཅུད་རྣམས་འདུས༔ རིགས་ལྔ་ཡབ་ཡུམ་སྐུར་གྱུར་བདེ་ཆེན་སྦྱོར༔ ཁ་ཆོད་བཅས་པ་བྱང་ཆུབ་སེམས་སུ་ཞུ༔ དམ་ཚིག་ཡེ་ཤེས་བདུད་རྩིར་གཉིས་མེད་འདྲེས༔ འདོད་ཡོན་མཆོད་སྤྲིན་ནམ་མཁའ་གང་བར་
གྱུར༔ ཨོཾ་ཨཱཿཧཱུྃ་ཧོཿས་རྒྱས་གདབ། རང་གི་ཐུགས་ཀའི་ཧཱུྃ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས་རང་བཞིན་གྱི་གནས་ནས་དཔལ་ཆེན་རྡོ་རྗེ་གཞོན་ནུ་རིག་འཛིན་སྲུང་བ་དང་བཅས་པ་སྤྱན་དྲངས་བཛྲ་ས་མ་ཛཿ ཧཱུྃ༔ ཆོས་ཀྱི་དབྱིངས་ཀྱི་ཕོ་བྲང་ནས༔ བཅོམ་ལྡན་རྡོ་རྗེ་གཞོན་ནུ་དང་༔ སྲུང་མ་དམ་ཅན་འཁོར་དང་བཅས༔ སྲིད་པའི་ཕུར་བུ་བསྒྲུབ་པ་དང་༔ དབང་དང་དངོས་གྲུབ་སྩོལ་བའི་ཕྱིར༔ ཡེ་ཤེས་ཁྲོ་བོ་གཤེགས་སུ་གསོལ༔ ཡེ་ཤེས་ཁྲོ་བོ་གཤེགས་ནས་ཀྱང་༔ རྟགས་དང་མཚན་མ་བསྟན་པ་དང་༔ ཀཱི་ལ་ཡ་ཡི་དངོས་གྲུབ་སྩོལ༔ བཛྲ་ས་མཱ་ཛཿ མདུན་གྱི་ནམ་མཁར་བཞུགས་པར་བསམ། ཧཱུྃ༔ བླ་མེད་མཆོག་གི་མཆོད་པ་དམ་པ་ནི༔ ཡེ་ཤེས་ལྔ་ཡི་འོད་ཟེར་རྣམ་པར་འཕྲོ༔ འདོད་པའི་ཡོན་ཏན་ལྔ་ཡིས་རབ་བརྒྱན་ཏེ༔ ཐུགས་དམ་བཞིན་དུ་ཅི་བདེར་བཞེས་སུ་གསོལ༔ ཨོཾ་ཤྲཱི་བཛྲ་ཀུ་མཱ་ར་དྷརྨ་པཱ་ལ་ས་པ་རི་ཝཱ་ར་པཱུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་དྱ་ཤབྡ་པྲ་ཏཱིཙྪ་ཡེ་སྭཱ་ཧཱ༔ མ་ཧཱ་
པཉྩ་ཨ་མྲྀ་ཏ་ཁ་རྃ་ཁཱ་ཧཱི༔ མ་ཧཱ་རཀྟ་ཁ་རྃ་ཁ་ཧི༔ རྡོ་རྗེ་ཐལ་མོ་གྱེན་དུ་ཕྱོགས་ལ། ཨོཾ་མ་ཧཱ་གུ་རུ་མཎྜལ་ས་པ་རི་ཝཱ་ར་ཨི་དཾ་བ་ལིཾ་ཏ་གྲྀཧྞཱནྟུ་མ་མ་སརྦ་སིདྡྷི་མེ་པྲ་ཡཙྪ༔ དཔལ་གདོད་མའི་མགོན་པོ་ཀུན་ཏུ་བཟང་པོ་ཡབ་ཡུམ། རྡོ་རྗེ་སེམས་དཔའ། ལག་ན་རྡོ་རྗེ། མཁའ་འགྲོ་མ་ལས་ཀྱི་དབང་མོ། དགའ་རབ་རྡོ་རྗེ། འཇམ་དཔལ་བཤེས་གཉེན། ཤྲཱི་སིང་ཧ། བྲམ་ཟེ་པྲ་བྷ་ཧསྟི། གུ་རུ་པདྨ་འབྱུང་གནས། སློབ་དཔོན་ཧཱུྃ་ཆེན་ཀཱ་ར། བི་མ་ལ་མི་ཏྲ། དྷ་ན་སཾ་ཀྲྀ་ཏ། བལ་པོ་ཤཱི་ལ་མཉྫུ། མཁར་ཆེན་ཡེ་ཤེས་མཚོ་རྒྱལ། དཔལ་གྱི་ཡེ་ཤེས། གཉགས་ཆེན་ཛྙཱ་ན་ཀུ་མ་ར། གཉན་ཆེན་དཔལ་དབྱངས། ཤུད་བུ་དཔལ་སེང་། སངས་རྒྱས་ཡེ་ཤེས། མཁོན་ཀླུ་དབང་། ཆོས་རྒྱལ་ཡབ་སྲས་ལ་སོགས་པ་ཕུར་བུ་བསྒྲུབ་པའི་རིག་འཛིན་རྣམས་ཀྱིས་དམ་རྫས་གཏོར་མའི་མཆོད་པ་འདི་བཞེས་ལ་སྐུ་གསུང་ཐུགས་ཀྱི་བདག་རྒྱུད་བྱིན་གྱིས་རློབས་པར་མཛད་དུ་གསོལ།
ཨོཾ་བཛྲ་ཀཱི་ལི་ཀཱི་ལ་ཡ་ས་པ་རི་ཝཱ་ར་ཨི་དཾ་བ་ལིཾ་ཏ་གྲྀཧྞཱནྟུ་མ་མ་སརྦ་སིདྡྷི་མེ་པྲ་ཡཙྪ༔ དཔལ་ཆེན་རྡོ་རྗེ་གཞོན་ནུ། ཡུམ་མཆོག་འཁོར་ལོ་རྒྱས་འདེབས་མ། སྲས་མཆོག་ཉི་ཤུ་རྩ་གཅིག །ཁྲོ་བཅུ་ཡབ་ཡུམ་ཁྲ་ཐབས་སྒོ་མ་དང་བཅས་པ། དཀྱིལ་འཁོར་གསུམ་གྱི་ལྷ་ཚོགས་རྣམས་ཀྱིས་དམ་རྫས་གཏོར་མའི་མཆོད་པ་འདི་བཞེས་ལ་མཆོག་དང་ཐུན་མོང་གི་དངོས་གྲུབ་ཐམས་ཅད་མྱུར་བ་ཉིད་དུ་སྩལ་བར་མཛད་དུ་གསོལ། །ཨོཾ་བཛྲ་ཀཱི་ལི་ཡ་དྷརྨ་པཱ་ལ་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། དཔལ་ཤྭ་ན་ཆེན་མོ་ཡབ་ཡུམ་སྤྲུལ་པ་ཕྱག་བརྙན་བཀའ་སྡོད་ཤྭ་ན་མ་བཞི། བདག་ཉིད་མ་བཞི། ས་བདག་མ་བཞི། སྲིང་མོ་བཞི། སྐྱེས་བུ་བཅུ་གཉིས་རྒྱལ་བློན་སྤྲུལ་པ་ཡང་སྤྲུལ་ལྷ་མོ་འབྱུང་པོ་བྱ་གཅན་སོགས་ཕུར་པའི་བཀའ་སྲུང་རྣམས་ཀྱིས་དམ་རྫས་གཏོར་མའི་མཆོད་པ་འདི་བཞེས་ལ། བདག་ཅག་དཔོན་སློབ་འཁོར་དང་བཅས་པ་སྲུང་བ་དང་། སྐྱོབ་པ་དང་། སྦ་
བ་དང་། ཕྲིན་ལས་རྣམ་པ་བཞིའི་ལས་མྱུར་དུ་འགྲུབ་པ་དང་། སྡང་བའི་དགྲ་སོད། གནོད་པའི་བགེགས་ཐུལ། བར་ཆད་ཀྱི་རྐྱེན་སོལ་ལ་ཅི་བཅོལ་བའི་ཕྲིན་ལས་རབ་འབྱམས་ཐོག་པ་མེད་པར་མཛད་དུ་གསོལ། ཞེས་དང་། ཧཱུྃ༔ ཐབས་ཀྱིས་སྤྱོད་པའི་འགྲོ་དོན་ཏུ༔ བྱམས་དང་སྙིང་རྗེས་གང་འདུལ་བ༔ སངས་རྒྱས་ཕྲིན་ལས་རྗོགས་མཛད་པའི༔ ཕུར་པ་ཕྲིན་ལས་ལྷ་ལ་ཕྱག་འཚལ་བསྟོད༔ བསྟོད་ཅིང་ཕྲིན་ལས་བཅོལ་བ་ནི། ཧཱུྃ༔ མ་བཅོས་སྤྲོས་མེད་དེ་བཞིན་ཉིད་དབྱིངས་ལས༔ བདེ་ཆེན་ལྷུན་གྲུབ་འབར་བའི་སྐུར་བཞེངས་པ༔ བཅོམ་ལྡན་དཔལ་ཆེན་རྡོ་རྗེ་གཞོན་ནུ་དང་༔ ཡུམ་མཆོག་སྒྲོལ་མ་འཁོར་ལོ་རྒྱས་འདེབས་མ༔ རྡོ་རྗེ་ཕུར་བུའི་རིག་པ་འཛིན་རྣམས་དང་༔ ཁྲོ་བཅུ་ཡབ་ཡུམ་ཟ་བྱེད་གསོད་བྱེད་ཚོགས༔ སྲས་མཆོག་ཉེར་གཅིག་ཁྲོ་མོ་སྒོ་མ་བཞི༔ ཤྭ་ན་བདག་ཉིད་ས་བདག་སྐྱེས་བུའི་ཚོགས༔ ཕུར་པའི་སྲུང་མ་དམ་ཅན་རྒྱ་མཚོར་བཅས༔ མི་
མངོན་དབྱིངས་ནས་གནས་འདིར་སྐུར་བཞེངས་ལ༔ དམ་རྫས་ཕྱི་ནང་གསང་བའི་མཆོད་པ་དང་༔ བདུད་རྩི་རཀྟ་གཏོར་མའི་མཆོད་པ་བཞེས༔ བདག་ཅག་དཔོན་སློབ་ཡོན་མཆོད་འཁོར་བཅས་རྣམས༔ སྒོ་གསུམ་ལོངས་སྤྱོད་བཅས་པ་སྲུང་བ་དང་༔ སྐུ་གསུང་ཐུགས་ཀྱི་དངོས་གྲུབ་རྩལ་དུ་གསོལ༔ ནད་གདོན་བར་ཆད་ཐམས་ཅད་ཞི་བ་དང་༔ ཚེ་བསོད་དཔལ་འབྱོར་ཐམས་ཅད་རྒྱས་པ་དང་༔ ཁམས་གསུམ་སྲིད་གསུམ་དབང་དུ་སྡུད་པ་དང་༔ དགྲ་བགེགས་ཐལ་བར་བརླག་པའི་ཕྲིན་ལས་མཛོད༔ བྱད་ཁ་ཕུར་ཁ་ཐམས་ཅད་བཟློག་ཏུ་གསོལ༔ བཀྲ་ཤིས་བདེ་ལེགས་འབྱུང་བར་མཛད་དུ་གསོལ༔ ཞེས་མངའ་གསོལ་བ་ནི། ཧཱུྃ༔ ཆོས་ཀྱི་སྐུ་ལས་མ་འགག་ལོངས་སྤྱོད་རྫོགས། །སྤྲུལ་པའི་སྐུར་སྣང་དགོངས་བརྡ་སྙན་བརྒྱུད་ཀྱི། །རྡོ་རྗེ་ཕུར་པའི་རིག་འཛིན་རྩལ་འཆང་རྣམས། །སངས་རྒྱས་ཀུན་གྱི་རྒྱལ་པོར་མངའ་གསོལ་ལོ། །རྒྱལ་ཀུན་ཕྲིན་ལས་རོལ་པའི་ཧེ་རུ་ཀ །
འབར་བའི་སྐུར་བཞེངས་དཔལ་ཆེན་ཁྲོ་བོའི་རྒྱལ། །བཅོམ་ལྡན་རྡོ་རྗེ་གཞོན་ནུ་ཡབ་ཡུམ་དང་། །རང་རིག་བདེ་སྟོང་ངོ་བོར་མངའ་གསོལ་ལོ། །ཐབས་དང་ཤེས་རབ་མཉམ་སྦྱོར་བྱང་ཆུབ་སེམས། །ཐབས་ཀྱི་འདུལ་བའི་སྐལ་དང་མི་ལྡན་རྣམས། །ཤུགས་ཀྱིས་བསྒྲལ་མཛད་སྲས་མཆོག་ཉི་ཤུ་རྣམས། །བདུད་དཔུང་ཚར་གཅོད་མཛད་ལ་མངའ༴ ཡེ་ཤེས་དབང་སོགས་ཁྲོ་རྒྱལ་ཆེན་པོ་བཅུ། །ཕ་རོལ་ཕྱིན་མ་རྡོ་རྗེ་ཁྲོ་མོ་དང་། །དབྱིངས་ཡེ་གཉིས་མེད་རོལ་རྩལ་ཁྲ་ཐབས་ཚོགས། །ཕྱོགས་བཅུར་སྲུང་བའི་རྒྱལ་པོར་མངའ༴ སྣང་སྲིད་ཡེ་དག་རྟོག་པའི་དཀྱིལ་འཁོར་ལ། །མ་རྟོགས་གཉིས་འཛིན་མཐའ་བཞིའི་བདུད་བརྟུལ་ཏེ། །ཕོ་བྲང་སྒོ་བཞི་སྲུང་བའི་གདོང་ཅན་བཞི། །འགུགས་འཆིང་སྡོམ་མྱོས་མཛད་ལ༴ ཆོས་ཀྱི་དབྱིངས་ནས་འབར་བའི་སྐུ་བཞེངས་པ། །སྲིད་པ་གསུམ་གྱིས་བདུད་དང་རུ་ཏྲའི་གཤེད། །རྡོ་རྗེ་ཤྭ་ན་ཆེན་མོ་ཡབ་དང་ཡུམ། །བསྟན་
སྲུང་ཀུན་གྱི་གཙོ་མོར༴ ཡབ་ཡུམ་གཉིས་ཀྱི་བཀའ་ལས་མི་འདའ་བའི། །ཤྭ་ན་བདག་ཉིད་ས་བདག་སྐྱེས་བུའི་ཚོགས། །ལྷ་མོ་འབྱུང་པོ་ཕོ་ཉ་བྱ་གཅན་རྣམས། །མཐུ་རྩལ་ཐོག་པ་མེད་ལ༴ རིག་འཛིན་ལྷག་པའི་ལྷ་དང་སྲུང་མར་བཅས། །དེང་ནས་བཟུང་ཏེ་བྱང་ཆུབ་སྙིང་པོའི་བར། །མི་འབྲལ་ཡི་དམ་ལྷ་རུ་འགྱུར་བ་དང་། །བྱང་ཆུབ་སྒྲུབ་ལ་བར་དུ་གཅོད་པའི་བགེགས། །མི་དང་མི་མིན་ཐམས་ཅད་ཚར་ཆོད་ཅིག །ཕ་རོལ་གནག་སེམས་ལོག་པའི་བསམ་སྦྱོར་དང་། །ནད་གདོན་བར་ཆད་སྡིག་སྒྲིབ་ཞི་བར་མཛོད། །ཐོས་བསམ་སྒོམ་ལ་ཉམས་རྟོགས་ཤེས་རབ་སྩོལ། །དཔལ་འབྱོར་འཁོར་སློབ་འགྲོ་དོན་སྤེལ་བ་དང་། །ཆོས་བཞིན་དུ་ཡུན་རིང་འཚོ་བའི་ཚེ། །བསོད་ནམས་སྙན་གྲགས་མངའ་ཐང་རྒྱས་པར་མཛོད། །དེ་ནས་བསྐང་བ་བྱ་བ་ནི། ཧཱུྃ༔ སྣང་སྲིད་ཕུར་བུས་གདབ་པའི་ཕྱིར། །རྡོ་རྗེ་གཞོན་ནུའི་ཐུགས་དམ་བསྐང་། །ཁམས་གསུམ་འཁོར་བ་རྒྱས་འདེབས་
ཕྱིར། །འཁོར་ལོ་རྒྱས་འདེབས་ཐུགས༴ མི་དགེ་བཅུ་པོ་ཚར་གཅོད་ཕྱིར། །ཁྲོ་རྒྱལ་བཅུ་ཡི་ཐུགས༴ དགེ་བཅུ་དང་དུ་བླངས་བའི་ཕྱིར། །ཁྲོ་མོ་བཅུ་ཡི་ཐུགས༴ ཕྱོགས་བཅུར་སྤྲུལ་པ་འགྱེད་པའི་ཕྱིར། །ཁྲ་ཐབས་ཉི་ཤུའི་ཐུགས༴ གདུགས་པའི་དགྲ་བགེགས་ཚར་གཅོད་ཕྱིར། །སྲས་མཆོག་ཉེར་གཅིག༴ ཞི་རྒྱས་དབང་དྲག་ལས་སྒྲུབ་ཕྱིར། །ཕྲིན་ལས་བཞི་ཡིས༴ སློབ་དཔོན་སྐུ་དགྲ་འདུལ་བའི་ཕྱིར། །ཤྭ་ན་མཆེད་བཞིའི༴ བསྟན་པའི་སྤྱི་དགྲ་འདུལ་བའི་ཕྱིར། །རེ་ཏི་མཆེད་བཞིའི༴ རྣལ་འབྱོར་དགོས་དགྲ་འདུལ་བའི་ཕྱིར། །བསྭེ་མོ་བཞི་ཡི༴ མྱུར་མགྱོགས་དྲག་པོའི་ཚར་གཅོད་ཕྱིར། །བསྭེ་ལྕགས་དུང་གསུམ༴ འགུགས་འདྲེན་འཆིང་སྡོམ་མྱོས་པའི་ཕྱིར། སྒོ་མ་བཞི་ཡི༴ རུ་ཏྲ་སྡེ་གསུམ་འདུལ་བའི་ཕྱིར། །གིང་ཆེན་བཅོ་བརྒྱད༴ ཕྱོགས་བཅུར་དམག་དཔོན་གཡབ་པའི་ཕྱིར། །མ་བདུན་སྲིང་བཞིའི་ཐུགས༴ ཕྲིན་ལས་རྒྱ་མཚོ་སྒྲུབ་པའི་ཕྱིར། །
དབང་ཕྱུག་ཉེར་བརྒྱད་ཐུགས་དམ་བསྐང་། །ཞེས་དང་། བསྐང་ངོ་བསྐལ་པའི་ཐུགས་དམ་བསྐང་། །དཀྱིལ་འཁོར་ལྷ་ཚོགས་ཐུགས༴ བདུད་རྩི་སྨན་གྱིས༴ བ་ལིཾ་གཏོར་མས༴ ཏཀྟ་དམར་གྱིས༴ ཞལ་ཟས་ཚོགས་ཀྱིས༴ དཀྱིལ་འཁོར་ཞལ་གྱིས༴ ཛ་གད་ཕུད་ཀྱི༴ ཞུན་མར་འོད་ཀྱི༴ སྲོག་དབུགས་མདང་ཀྱིས༴ བསུར་ཆེན་དྲི་ཡིས༴ རོལ་མོ་སྒྲ་ཡིས༴ བསྐང་གྱུར་དབང་དང་དངོས་གྲུབ་སྩོལ། །གཡར་དམ་ཉམས་ཆག་སོར་སྩོལ་ཅིག །དེ་ནས་བཟློག་པ་བྱ་བ་ནི། ཧཱུྃ༔ དེ་ལྟར་བསྐང་བས་བསྐང་གསོལ་ནས། །འདི་ལྟར་བཟློག་པའི་ཕྲིན་ལས་མཛོད། །རྣལ་འབྱོར་བདག་ཅག་འཁོར་བཅས་ལ། །ཡས་ཀྱི་བདུད་དུ་གཡོས་པ་བཟློག །མས་གྱི་སྲི་ལང་ཕྱིར་ལ་བཟློག །ཉེ་བའི་བྱོལ་པོ་ཕྱིར་ལ༴ ཡུལ་སའི་འགྲམ་ཆགས་ཕྱིར་ལ༴ ཕ་ཚན་རྒྱ་འདྲེ་ཕྱིར་ལ༴ གཤེད་རྗེའི་འཁྲུལ་འཁོར་ཕྱིར་ལ༴ མ་མོའི་ཁྲག་ཟོར་ཕྱིར་ལ༴ བདུད་ཀྱི་ཁྲམ་ཁ་ཕྱིར༴ བཙན་གྱི་རྐྱལ་ཁ་ཕྱིར་ལ༴ ས་
བདག་གདུག་བྱེད༴ རྒྱལ་པོའི་སྨྱོ་འདྲེ༴ གཟའ་ཡི་ཀིང་ཀང་ཕྱིར་ལ༴ མུ་སྟེགས་ངན་སྔགས༴ ཐེའུ་རང་སྲི་རྐུན༴ ནད་ཁ་རིམས་ཁ༴ སྔགས་པའི་ཕུར་ཁ་བྷྱོ་ཞིང་ཟློག །བོན་གྱི་བོན་ཟོར་བྷྱོ་ཞིང་ཟློག །སུམ་པའི་གླང་ཟོར་བྷྱོ༴ མེ་ཉག་བང་སོ༴ ལོ་སྐག་ཟླ་སྐག་བྷྱོ་ཞིང་ཟློག །ལྟས་ངན་མཚན་ངན༴ ཕོ་བརྒྱས་མདའ་ལྟར་མཚོན་ཁ་ཟློག །མོ་བརྒྱས་དུག་གཡོས་བྷྱོ་ཞིང་ཟློག །མི་ནག་སྐྱེས་བོའི་ཡ་ག་ཟློག །བྲན་གཡོག་ངན་པའི་དམོད་མཆུ་ཟློག །དགྲ་ལ་བྷྱོ་ཟློག་བསྒྲལ་དུ་གསོལ། །བགེགས་ལ་བྷྱོ་ཟློག་རྡུལ་དུ་བརློག །གསང་ཐིག་ཕུར་པའི་ཆ་རྐྱེན་དུ་ཉེར་མཁོའི་དབང་གི་མཆོག་གྱུར་གླིང་པས་སྤེལ་བ་དགེ་ལེགས་འཕེལ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་
དགེ་ལེགས་འཕེལ།། །།སརྦ་མངྒ་ལཾ།། །།