ཕུར་ཟློག་ཤིན་ཏུ་བསྡུས་པ་ཕྲིན་ལས་མཚོན་ཆ།
གསང་ཐིག་སྐོར་གསུམ་ལས། རྡོ་རྗེ་གཞོན་ནུ་ལ་བརྟེན་པའི་ཕུར་ཟློག་ཤིན་ཏུ་བསྡུས་པ་ཁྱེར་བདེ་ཞིང་མཁོ་ཆེ་བ་ཕྲིན་ལས་མཚོན་ཆ་ཞེས་བྱ་བ་བཞུགས་སོ། །
བྱང་ཆུབ་སྒྲུབ་ལ་བར་ཆད་ཆེས་མང་ཞིང་། །དེ་དག་འདུལ་བའི་གཉེན་པོར་ཆེད་བསྔགས་པ། །དཔལ་ཆེན་རྡོ་རྗེ་ཕུར་པའི་དཀྱིིལ་འཁོར་དང་། །ཐ་མི་དད་པ་བླ་མ་ཆེ་ལ་བཏུད། །འདིར་མན་ངག་གི་ལུགས་སུ་གཏོགས་པའི་གསང་ཐིག་ཕུར་པ་བདག་བསྐྱེད་ཕྱག་རྒྱ་གཅིག་པ་དང་། མདུན་བསྐྱེད་གཙོ་འཁོར་ཡོངས་རྫོགས་སྐད་ཅིག་དྲན་རྫོགས་ཀྱིས་བསྐྱེད་དེ་འགལ་རྐྱེན་བར་ཆད་ཟློག་པའི་ཕྲིན་བཅོལ་ཙམ་བྱེད་ཚུལ་སྤྲོས་མེད་ལ་དགའ་བ་རྣམས་ཀྱི་ལས་སྦྱོར་སྟབས་བདེ་འདིར་འཇུག་པ་ལ་གསུམ། སྦྱོར། དངོས། རྗེས་སོ། །དང་པོ་ནི། གང་དུ་བྱ་བའི་གཞི་དེར་སྨན་རཀ་གཏོར་གསུམ་ཉེར་སྤྱོད་ཚོགས་གཏོར་འབུལ་སོགས་སྤྱི་མཐུན་དང་། ལྕགས་སྣོད་དུ་འབྲུ་ནག་དུག་དང་ཁྲག་གིས་
སྦྲུས་པའི་གཏོར་མ་ཟུར་གསུམ་ཐོག་མདིལ་གྱི་དབྱིབས་ཅན། མདུན་དུ་ཁྲག་ཀོང་། འཁོར་རང་འདྲ་ཉེར་གཅིག །དེ་རྒྱབ་བཅུ། དེ་རྒྱབ་ཉི་ཤུ། དེ་རྒྱབ་བཞི། དེ་རྒྱབ་བཅུ་གཉིས། དེ་རྒྱབ་ཉེར་བརྒྱད། དེ་རྒྱབ་ཉེར་གཅིག །བར་མཚམས་རྣམས་སུ་ཁྲག་དཀྱུས་ཐེབས་ཀྱུ་སོགས་གྲངས་མང་མཚེ་ཡུངས་གཙང་དུག་དང་། ཤ་དུམ་བ་སུ་ཏ་སོགས་ཀྱིས་བརྒྱན། རྩེར་དར་གདུགས་མཐིང་ནག་གཙོ་བོའི་སྐུ་ཙག་གིས་སྤྲས་པ་བཙུག །མཐར་སྨན་རཀ་དྲག་མཆོད་སོགས་འབྱོར་ན་བཤམས། ཤིན་ཏུ་བསྡུ་ན་གཙོ་བོའི་གཏོར་མ་ཁྲག་ཀོང་གཅིག་དང་། མཚེ་ཡུངས་རྩང་སོགས་ཁྲག་གིས་སྤགས་པ་གཏོར་ཐེབས་ལྟ་བུར་བསྐུལ་གཏོར་གྱི་ཚུལ་དུ་བཅས་ལ་གང་བདེར་བཞག །རྒྱས་ན་ཟློག་གཏོར་གྱི་
ཟུར་དུ། མདའ། རྡོ། ཁྲག །གཏོར་ཟོར། ཀོང་ཟོར། ཉའོ། སྒྲོལ་གྲི། གསེར་སྐྱེམས་སྣོད་ཙམ་དང་། འཛོམ་ན་བསྒྲལ་ཆས་སོགས་གང་དགོས་འདུ་བྱའོ། །གཉིས་པ་ནི། ཁོ་བོའི་བྲིས་པའི་ལས་བྱང་ཕྲིན་ལས་ཤིང་རྟ་ཞེས་པའི་བསྙེན་མཚམས་གཏོར་འབུལ་དང་ཚོགས་བཏགས་པའམ། མི་ནུས་ཀྱང་གཏེར་གཞུང་བདག་བསྐྱེད་གཏོར་འབུལ་བཅས་གྲུབ་མཚམས། ཚོགས་མཆོད་ཕྲིན་ལས་བཅུད་ཐིག་ལྟར་ཐ་མའི་བར་བཏང་། གཏོར་འབུལ་རྗེེ་གཏེར་ཆེན་བླ་མས་མཛད་པ་དེ་བྱུང་ན་ལེགས། དེ་ནས་སྙིང་པོ་འབྲུ་བཅུ་གཉིས་པའི་མཐར། བྷྱོ་རཾ་ཕཊ་ཛཿ ཞེས་བརྗོད་པའི་རྐྱེན་གྱིས་དངས་པའི་མཚོ་ལ་ཉི་ཟླ་གཟའ་སྐར་གྱི་གཟུགས་བརྙན་ཤར་བ་མུན་རུམ་དུ་གློགས་འཁྱུགས་པའི་གོ་སྐབས་བཞིན། ལྟར་སྐད་ཅིག་གིས་མདུན་གྱི་ཟོར་གཏོར་གྱི་ནམ་མཁར་དཔལ་ཆེན་པོ་རྡོ་རྗེ་གཞོན་ནུ་ཡབ་ཡུམ། སྲས་མཆོག་ཉེར་གཅིག་ཁྲོ་བོ་བཅུ་ཡབ་ཡུམ། ཟ་གསོད་ཉི་ཤུ། སྒོ་སྐྱོང་ཕུར་སྲུང་རིག་འཛིན་དང་བཅས་པ་སྤྲིན་ཕུང་ལྡང་བ་ལྟར་ཁྲོས་འཁྲུགས་རྔམས་དྲག་ཤིན་ཏུ་མི་བསྲུན་པའི་ཉམས་དང་ལྡན་པ་དམག་དཔུང་གོ་གསར་བྱས་པ་བཞིན་སྙིང་རྗེའི་ཡུལ་
ལ་ཐུགས་རྗེས་ཉེ་བར་དགོངས་ཏེ་བཞུགས་པར་གསལ་བར་བསྐྱེད་ལ་སྤུ་གྲིའི་དྲག་སྔགས་དང་། མ་ཤེས་ཀྱང་། ཨོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱན་བཾ་ཧཱུྃ་ཕཊ༔ སརྦ་ཀརྨ་ཡཀྵ་བྷྱོ་ཛཿ ཞེས་བཏགས་པ་ཅུང་ཟད་བཟླ། དེ་ནས་ཐུགས་དམ་བསྐུལ་བ་ནི། གཏོར་མར་སྨན་རཀ་བྲན་ཅིང་དར་ནག་གཡབ། རྔ་བོན་ཐབས་སུ་བརྡུང་ཞིང་། ཧཱུྃ། མཐིང་ནག་གྲུ་གསུམ་འབར་བའི་དཀྱིལ་འཁོར་ན། །མ་ཧཱ་དེ་ཝ་ལྷ་ཆེན་ཁྲི་སྟེང་ནས། །སྣང་སྲིད་ཕུར་བུས་འདེབས་པའི་ལྷ་ཚོགས་ནི། །བཅོམ་ལྡན་དཔལ་ཆེན་རྡོ་རྗེ་གཞོན་ནུའི་སྐུ། །གཉིས་མེད་ཡུམ་མཆོག་འཁོར་ལོ་རྒྱས་འདེབས་མ། ཐུགས་ཀྱི་སྲས་མཆོག་རིགས་བཞི་ཀཱི་ལ་ཡ། །འཇིགས་བྱེད་ཁྲོ་བོ་ཕ་བཅུ་མ་བཅུ་དང་། །ཟ་བྱེད་གསོད་བྱེད་ཁྲ་ཐབས་ཉི་ཤུ་དང་། །སྒོ་བཞི་སྲུང་བའི་ཕྲ་མན་སྒོ་མ་བཞི། །ས་བདག་ཆེན་མོ་བསྭེ་ཡི་ལྷ་མོ་བཞི། །བདག་ཉིད་ཆེན་མོ་དཔལ་གྱི་མཆེད་སྡེ་བཞི། །ཕྱག་བརྙན་ཆེན་མོ་ཤྭ་ན་མཆེད་སྡེ་བཞི། །བསྭེ་ཡི་སྐྱེས་བུ་བཞི་དང་ལྕགས་ཀྱི་
སྐྱེས་བུ་བཞི། །དུང་གི་སྐྱེས་བུ་བཞི་སོགས་ཕུར་སྲུང་ཚོགས། །ཕྲིན་ལས་ཕུར་པའི་ལྷ་ཚོགས་ཐུགས་དམ་ཅན། །མི་མངོན་དབྱིངས་ནས་གནས་འདིར་སྐུར་བཞེངས་ལ། །དམ་ཚིག་དཀྱིལ་འཁོར་འདི་ལ་བརྟན་པར་བཞུགས། །གཉིས་སུ་མེད་པའི་ཕྱག་བགྱི་བཞེས་ནས་ཀྱང་། །དམ་རྫས་བདུད་རྩིའི་མཆོད་པ་འདི་བཞེས་ལ། །ཐུགས་དམ་རྒྱུད་བསྐུལ་བསྟོད་དོ་ཕྲིན་ལས་མཛོད། །དབང་དང་བྱིན་རླབས་དངོས་གྲུབ་སྩལ་དུ་གསོལ། །ཐུགས་དམ་ཐུགས་རྗེས་དགྲ་བགེགས་མྱུར་དུ་སྒྲོལ། །ཞེས་ཐུགས་དམ་བསྐུལ་ཞིང་གཟི་བྱིན་བསྐྱེད། ཕུད་རྫས་གསུམ་དང་ལྡན་པ་འབྲུ་གསུམ་གྱིས་བྱིན་བརླབས་ལ། འདོད་ཡོན་ཟག་པ་མེད་པ་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོར་གྱུར། ཧཱུྃ༔ རིག་འཛིན་རྩ་བརྒྱུད་བླ་མ་དམ་པ་དང་༔ འདུས་མདོ་སྒྱུ་འཕྲུལ་སྒྲུབ་སྡེ་ཆེན་པོ་བརྒྱད༔ ཁྱད་པར་རྡོ་རྗེ་ཕུར་པའི་ལྷ་ཚོགས་རྣམས༔ གསེར་སྐྱེམས་འདི་བཞེས་རྣལ་འབྱོར་མཐུ་དཔུང་བསྐྱེད༔ མ་མགོན་ལྕམ་དྲལ་ཕུར་
པའི་སྲུང་མའི་ཚོགས༔ དྲེག་ཆེན་སུམ་ཅུ་སྔགས་བདག་བཅོ་བརྒྱད་དང་༔ ཕྱི་ནང་གསང་བ་གབ་སྦས་སྡེ་བརྒྱད་རྣམས༔ གསེར་སྐྱེམས་འདི་བཞེས༴ སྔགས་འཆང་བདག་གི་རིགས་དང་བརྒྱུད་ཀྱི་སྲུང་༔ ཡུལ་རིས་གནས་ཀྱི་ལྷ་སྲུང་དཀོར་གྱི་བདག༔ ལོ་ཟླ་ཞག་དུས་ཚེས་ལ་དབང་བ་རྣམས༔ གསེར་སྐྱེམས་འདི་བཞེས་རྣལ་འབྱོར་མཐུ་དཔུང་བསྐྱེད༔ ཅེས་གསེར་སྐྱེམས་འབུལ། མཁྱེན་པར་གསོལ་བ་ནི། ཧཱུྃ་བྷྱོཿ དུས་གསུམ་རྒྱལ་བའི་གདུང་འཚོབས་བླ་མ་རྗེ༔ དཔལ་ཆེན་རྡོ་རྗེ་གཞོན་ནུ་ཡབ་དང་ཡུམ༔ ཁྲོ་བཅུ་ཡབ་ཡུམ་ཟ་བྱེད་གསོད་བྱེད་དང་༔ སྲས་མཆོག་ཉེར་གཅིག་ཁྲོ་མོ་སྒོ་མ་བཞི༔ ཤྭ་ན་བདག་ཉིད་ས་བདག་སྐྱེས་བུའི་ཚོགས༔ ཕུར་པའི་སྲུང་མ་དམ་ཅན་རྒྱ་མཚོར་བཅས༔ དཔང་གྱུར་སྤྱན་གྱུར་ཅན་རྣམས་དགོངས་སུ་གསོལ༔ བདག་ནི་མ་ཉེས་དམ་ཉམས་དགྲ་ཡིས་ཉེས༔ ཉེས་བྱས་འདི་ལ་ཆད་པའི་ལས་མཛོད་ཅིག༔ ཅེས་དང་ནུས་ན། ཧཱུྃ༔ བདག་ནི་
རྣལ་འབྱོར་སྒྲུབ་པ་པོ༔ རྡོ་རྗེ་ཐེག་པའི་བསྟན་པ་ལ༔ མི་ཕྱེད་དད་པས་རབ་ཞུགས་ཏེ༔ སྒྲུབ་པ་སྙིང་པོར་ལེན་པ་དང་༔ ཀློག་དང་སྤང་བའི་སྡེ་བཙུགས་ཤིང་༔ ཐོས་བསམ་བསྟན་པ་བཙུག་པ་ལ༔ དགྲ་དང་བགེགས་ཀྱི་བར་ཆད་བྱུང་༔ མ་གཡེལ་དྲག་པོའི་ལས་མཛོད་ཅིག༔ ད་དུས་བསྐལ་པ་སྙིགས་མ་ལ༔ རྣལ་འབྱོར་མགོན་སྐྱབས་མ་མཆིས་པས༔ ལྷ་དང་སྲུང་མ་གྲོགས་ལ་བྱོན༔ བདེན་རྫུན་གཉིས་ཀྱི་དཔང་པོ་མཛོད༔ བདག་ནི་མ་ཉེས་མ་ལེན་ནོ༔ མ་ཡོ་མ་བཅོས་གཟུ་དང་དབང་༔ དམ་ཉམས་དགྲ་བོ་སྡིག་ཅན་གྱིས༔ ལྷ་དང་སློབ་དཔོན་བརྙས་པ་དང་༔ རྡོ་རྗེ་མཆེད་ལ་འཁུ་བ་དང་༔ སྲུང་མ་རྣམས་ལ་མཐུ་མེད་ཟེར༔ སངས་རྒྱས་བསྟན་པ་བཤིག་པ་དང་༔ སེམས་ཅན་ཡོངས་ལ་འཚེ་བ་དང་༔ ཆེས་འཁོར་སྲིས་ལ་རྔམས་པ་དང་༔ དགེ་འདུན་སྡེ་ལ་འཚེ་བ་དང་༔ བསྟན་པའི་གཞི་ལ་ཕྲག་དོག་བྱས༔ མི་དགེ་བཅུ་ནི་དང་ལེན་པའི༔ དམ་ཉམས་སྡིག་ཅན་
དགྲ་བོ་འདི༔ མྱུར་དུ་བསྒྲལ་བར་མ་བྱས་ན༔ སྙིང་པོའི་སྒྲུབ་པ་བཤོལ་ལ་ཐུག༔ སངས་རྒྱས་བསྟན་པ་འཇིག་ལ་ཉེ༔ ད་ནི་ལྷ་དང་སྲུང་མ་རྣམས༔ མངོན་སྤྱོད་དྲག་པོའི་ལས་ལ་བསྐུལ༔ མ་གཡེལ་དྲག་པོའི་ལས་མཛོད་ཅིག༔ འགུགས་པ་ནི། ལྷ་རྣམས་ཀྱི་ཐུགས་ཀ་ནས་འོད་ཟེར་ཛཿཧཱུྃ་བྃ་ཧོཿའཕྲོས་པས་ཕུར་སྐྱོང་དམ་ཅན་སྲུང་མར་ཕོག་པས་ཐམས་ཅད་ལས་ལ་རྔམས་པར་གྱུར། ཧོམ་བསྐྱེད་པ་ནི། རང་གི་མདུན་དུ་བྲུབ་ཁུང་བང་རིམ་དགུ་པ། ཁ་ཁྱེར་དོག་ཅིང་གཏིང་ཟབ་པ། འོག་གཞི་གསེར་གྱི་ས་གཞི་ལ་ཐུག་པ། མཚོན་ཆ་སྣ་ཚོགས་ཀྱིས་ཆར་འབེབས་པའི་ཕྱི་རོལ་དུ་ཕུར་སྲུང་དམ་ཅན་ལས་ལ་རྔམས་པ། དེའི་ནང་དུ་ནྲྀ་ཏྲི་ལས་གནོད་བྱེད་དགྲ་བགེགས་ནག་ལ་ཧོམ་པ། རྐང་ལག་ལྕགས་སྒྲོག་གིས་བསྡམས་པ། བུ་ག་དགུ་ནས་ཁྲག་འཛག་པ། ཁ་ངུ་བ། མིག་ཤི་མིག །འོ་དོད་ལྷང་ལྷང་འབོད་པ་ཞིག་ཏུ་གྱུར། ན་མོ། སངས་རྒྱས་ཀྱི་བཀའ་བདེན་
པ་དང་། ཆོས་ཀྱི་བཀའ༴ དགེ་འདུན་གྱི་བཀའ༴ གསང་སྔགས་རིག་སྔགས་སྙིང་པོ། ཕྱག་རྒྱ། ཏིང་ངེ་འཛིན་གྱི་བདེན་པ་དང་། ཆོས་ཉིད་གདོད་ནས་དག་ཅིང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། བླ་མ་བསྟན་གཉིས་སྐོར་གསུམ། ཡི་དམ་ཞི་ཁྲོ་རབ་འབྱམས། བདེ་གཤེགས་སྒྲུབ་པ་བཀའ་བརྒྱད། དཔལ་ཆེན་པོ་རྡོ་རྗེ་གཞོན་ནུའི་དཀྱིལ་འཁོར་གསུམ་གྱི་ལྷ་ཚོགས་སྤྲུལ་པ་ཕྱག་བརྙན་བཀའ་སྡོད་དང་བཅས་པ་དང་། ལེགས་ལྡན་མ་ཧཱ་ཀཱ་ལ་ཚོགས་ཀྱི་བདག་པོ་ཡབ་ཡུམ་སྲས་འཁོར་ཕུར་པའི་སྲུང་མ་དམ་ཅན་རྒྱ་མཚོའི་ཚོགས་དང་བཅས་པའི་བཀའ་བདེན་པ་དང་། བདེན་པ་ཆེན་པོའི་མཐུ་ལ་བརྟེན་ནས། འཕྲལ་གྱི་ཚེ་སྲོག་ལ་བར་དུ་གཅོད་པ། ཡུན་གྱི་བྱང་ཆུབ་བསྒྲུབ་པ་ལ་བར་དུ་གཅོད་པ། བསྟན་པ་དང་སེམས་ཅན་ཉེས་མེད་ལ་གནོད་ཅིང་འཚེ་བ། མི་འདོད་པ་གློ་བུར་དུ་བྱེད་པའི་བདུད་དང་དམ་སྲི་དྲེགས་ཚོགས་དགྲ་བགེགས་ཐམས་
ཅད་མཚན་མ་རྫས་ཀྱི་རྟེན་འདི་ལ་ད་ལྟ་ཉིད་དུ་ཁུག་ཅིག །ཨོཾ་བཛྲ་ཀཱི་ལི་ཀཱི་ལ་ཡ་དགྲ་བགེགས་གནོད་བྱེད་ཛཿཧཱུྃ་བྃ་ཧོཿ ཤྲཱི་གྷྲཾ་ཨ་པ་ན་ཡ་ཧཱུྃ་ཕཊ༔ ཅེས་དགུས་གཞུག་དྲག་ཏུ་བྱས་ནས། བསྒྲལ་ཆས་ཡོད་ན་དང་མེད་ཀྱང་ཕུར་པ་ཞིག་ཐོགས་ལ། ཧཱུྃ་ཛཿ དམ་ཚིག་ཆེན་པོའི་དུས་ལ་བབ༔ སྤྲུལ་པ་ཆེན་བོའི་དུས་ལ་བབ༔ ཕྱག་བརྙན་ཆེན་མོའི་དུས་ལ་བབ༔ ཤྭ་ན་མུ་ཁའི་དུས༴ བདག་ཉིད་ཆེན་མོའི་དུས༴ ས་བདག་ཆེན་མོའི་དུས༴ ཁྱོད་ཀྱི་ཕྲིན་ལས་དུས༴ མཐུ་རྩལ་ཕྱུང་བའི་དུས་ལ་བབ༔ ཅེས་ཕོ་ཉ་བསྐུལ། ཧཱུྃ༔ བྱང་ཆུབ་མཆོག་ཏུ་སེམས་བསྐྱེད་ཅིང་༔ དུས་གསུམ་རྒྱལ་བའི་གདུང་འཚོབ་པའི༔ རིག་འཛིན་རྣལ་འབྱོར་བདག་ཅག་ལ༔ གནོད་ཅིང་གདུག་པའི་དགྲ་དང་བགེགས༔ བདུད་དང་བར་དུ་གཅོད་པ་རྣམས༔ ཁྲོ་བོ་ཆེན་པོའི་བྱིན་བརླབས་ཀྱིས༔ ཡུད་ཙམ་གྱིས་ནི་འདིར་བཀུགས་ནས༔ མངོན་སྤྱོད་ཚུལ་བཞིན་བསྒྲལ་བ་དང་༔ ལུས་ངག་རྡུལ་དུ་བཤིགས་ནས་ཀྱང་༔ སྡུག་
བསྔལ་ཉམས་སུ་མྱོང་བར་མཛོད༔ དངོས་གྲུབ་བར་ཆད་བྱེད་པའི་བགེགས༔ གདུག་ཅིང་སྡང་སེམས་ལྡན་པ་རྣམས༔ ཟུངས་ཤིག་རྒྱོབ་ཅིག་རྣམ་པར་ཆིངས༔ གཏུབས་ཤིག་གྲོགས་དང་བྲལ་བར་གྱིས༔ རེངས་པར་ཁུག་ལ་སྨྱོར་ཆུག་ཅིག༔ ཕོབས་ཤིག་རྣམ་པར་གཟིར་བར་གྱིས༔ ང་ཡི་དབང་དུ་གྱུར་ནས་ཀྱང་༔ བསྒོ་བའི་བཀའ་ལ་ཉན་པར་བྱོས༔ བྲན་དང་བཀའ་ཉན་ཕོ་ཉའི་ཚོགས༔ ཁྱོད་ཀྱི་དམ་ཚིག་དུས་ལ་བབ༔ སྔོན་ཆད་ཁས་བླངས་དམ་བཅས་བཞིན༔ མངོན་སྤྱོད་ཕྲིན་ལས་འགྲུབ་པར་མཛོད༔ རྡོ་རྗེ་གསང་བའི་བཀའ་ལས་ནི༔ སྡིག་ཅན་གང་ཞིག་འདའ་བྱེད་པ༔ སྟོབས་ཆེན་ཁྲོ་བོ་ཆེན་པོ་ཡིས༔ ཀླད་པ་ཚལ་བ་བརྒྱ་རུ་ཁོས༔ ཉོན་ཅིག་བགེགས་དང་ལོག་འདྲེན་ཚོགས༔ ང་ཡི་བཀའ་ལས་འདའ་མ་བྱེད༔ གདུག་ཅིང་སྡང་སེམས་ལྡན་པ་ཡི༔ ལྷ་འམ་འོན་ཏེ་བདུད་ཀྱང་རུང་༔ ང་ལ་བར་ཆད་བྱེད་པའི་བགེགས༔ མཐུ་དང་རྫུ་འཕྲུལ་མེད་པར་
བྱོས༔ རྡུངས་ཤིག་རྡོ་རྗེ་འབར་བའི་གཏུན༔ བཀའ་ལས་འདའ་བྱེད་སྡིག་ཅན་འདི༔ རྡོ་རྗེ་མེ་དཔལ་སྙིང་བསྲེག་ནས༔ ལུས་ངག་རྡུལ་ཕྲན་བཞིན་དུ་རློག༔ ཁྲོ་མོ་འབར་བའི་གཏུན་ཁུང་དུ༔ རྡོ་རྗེ་ཐོ་བས་བརྡུང་བྱས་ནས༔ ལྷ་ཡང་རུང་སྟེ་བསྒྲལ་བར་བྱ༔ བཅོལ་བའི་ཕྲིན་ལས་འགྲུབ་པར་མཛོད༔ སྤུ་གྲིའི་སྔགས་བཟླ་བཞིན་པས་བརྡེག་ཅིང་ཐུན་གྱིས་བྲབ། ལིང་རོར་བདུད་རྩི་བྲན་ཅིང་གཏོར་མར་ཕྱེད་ཆ་ཕུལ་ཏེ། ཧཱུྃ༔ དཔལ་ཆེན་ཕུར་བུའི་ལྷ་ཚོགས་རྣམས༔ རི་རབ་རྩམ་གྱི་སྐུར་བཞེངས་ལ༔ གནམ་ས་ཙམ་གྱི་ཞལ་ཕྱེས་ཤིག༔ གངས་རི་ཙམ་གྱི་མཆེ་བ་གཙིགས༔ གློག་དམར་ཙམ་གྱི་ལྗགས་བརྐྱངས་ལ༔ དགྲ་བགེགས་དམ་ཉམས་བསྒྲལ་བ་ཡི༔ ཤ་ཕྲག་ཕུང་པོ་ནང་རོལ་བཅས༔ དབང་པོ་དོན་སྙིང་རུས་པ་རྣམས༔ ཡེ་ཤེས་བདུད་རྩིར་བྱིན་བརླབས་ནས༔ དཔལ་ཆེན་འཁོར་དང་བཅས་པ་ཡི༔ ཞལ་དུ་བསྟབ་བོ་ཁ་རཾ་ཁཱ་ཧི༔ མགུལ་དུ་བསྒྲིམ་མོ་ཨཱ་ར་ལི༔ བཛྲ་ཡཀྴ་ཀྲོ་དྷ་ཁ་ཁ་ཁཱ་
ཧི༔ མ་ཧཱ་མཱཾ་ས་ལ་ཁཱ་ཧི༔ མ་ཧཱ་རཀྟ་ལ་ཁཱ་ཧི༔ མ་ཧཱ་ཙིཏྟ་ལ་ཁཱ་ཧི༔ མ་ཧཱ་གོ་རོ་ཙ་ན་ཁ་ཁཱ་ཧི༔ མ་ཧཱ་ཀིཾ་ནི་རི་ཏི་ཁ་རཾ་ཁཱ་ཧི༔ ཡང་བཅོལ་བསྐུལ་ཁྱུག་ཙམ་བྱེད་ན་ཕུར་པ་བསྒྲིལ་ཞིང་། སླར་ཡང་བཀའ་ལ་མི་ཉན་པ་ཐམས་ཅད་འདི་ལྟ་བུས་སྦྱོར་བས་བསྒྲལ་བར་བྱ་བ་གདོན་མི་ཟའོ། ཧཱུྃ༔ ཉོན་ཅིག་བགེགས་དང་ལོག་འདྲེན་ཚོགས༔ ང་ཡི་བཀའ་ལས་འདའ་མ་བྱེད༔ རྡོ་རྗེ་གསང་བའི་བཀའ་ལས་ནི༔ སྡིག་ཅན་གང་ཞིག་འདའ་བྱེད་པ༔ སྟོབས་ཆེན་ཁྲོ་བོ་ཆེན་པོ་ཡིས༔ ཀླད་པ་ཚལ་པ་བརྒྱར་ཁོས་ལ༔ ང་ཡི་བཀའ་ལས་འདའ་མ་བྱེད༔ ཨོཾ་བཛྲ་ཀཱི་ལི་ཀཱི་ལ་ཡ་ཧ་ཧ་ཧ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ༔ འདིར་ཚོགས་ལ་རོལ་ཞིང་ལྷག་མ་བཏང་། ཟློག་སྒྱུར་གྱི་ཕྲིན་ལས་བཅོལ་བ་ནི། ཁྲག་སྐྱེམས་ལིང་རོ་ཟོར་གཏོར་དུ་བསྟབ་ལ། ཧཱུྃ༔ རྡོ་རྗེ་གཞོན་ནུ་ཁྲོ་བོའི་རྒྱལ། །རིགས་གྱི་ཁྲོ་བོ་དབང་སྡུས་ལ། །དགྲ་བགེགས་གཟུགས་ཕུང་རྣམ་ཤེས་རོལ། །ཕྱོགས་བཅུའི་གནོད་པ་མ་ལུས་ཟློག །ཡུམ་ཆེན་འཁོར་ལོ་རྒྱས་འདེབས་མ། །དགྲ་
བགེགས་བཀྲག་དང་མདངས་ལ་རོལ། །ཟློག་ཅིག་བསྒྱུར་བའི་ཕྲིན་ལས་མཛོད། །སྲས་མཆོག་བུདྡྷ་ཀཱི་ལ་ཡ། ཤར་ཕྱོགས་དགྲ་བགེགས་ཞི་བས་ཟློག །སྲས་མཆོག་རཏྣ་ཀཱི་ལ་ཡ། ལྷོ་ཕྱོགས་དགྲ་བགེགས་རྒྱས་པས་ཟློག །སྲས་མཆོག་པདྨ་ཀཱི་ལ་ཡ། །ནུབ་ཕྱོགས་དགྲ་བགེགས་དབང་གིས་ཟློག །སྲས་མཆོག་ཀརྨ་ཀཱི་ལ་ཡ། །བྱང་ཕྱོགས་དགྲ་བགེགས་དྲག་པོས་ཟློག །རྣམ་པར་རྒྱལ་བས་དགྲ་ཤ་ཟོ། །དྲི་ཟའི་དམག་ཚོགས་དགྲ་ལ་བསྒྱུར། །དབྱུག་པ་སྔོན་པོས་དགྲ་ཤ་རོལ། དྲང་སྲོང་དམག་ཚོགས་དགྲ་ལ་བསྒྱུར། །གཤིན་རྗེ་གཤེད་པོས་དགྲ་ཤ་རོལ། །ཡི་དྭགས་དམག་ཚོགས་དགྲ་ལ༴ མི་གཡོ་མགོན་པོས་དགྲ་ཤ་རོལ། །སྲིན་པོའི་དམག་ཚོགས་དགྲ་ལ༴ །རྟ་མགྲིན་རྒྱལ་པོས་དགྲ་ཤ་རོལ། །ཀླུ་ཡི་དམག་ཚོགས་དགྲ་ལ༴ འདོད་པའི་རྒྱལ་པོས་དགྲ་ཤ་རོལ། །རླུང་ལྷའི་དམག་ཚོགས་དགྲ་ལ༴ བདུད་རྩི་འཁྱིལ་པས་དགྲ་ཤ་རོལ། །གནོད་
སྦྱིན་དམག་ཚོགས་དགྲ་ལ༴ ཁམས་གསུམ་རྣམ་རྒྱལ་དགྲ་ཤ་རོལ། །དབང་ལྡན་དམག་ཚོགས་དགྲ་ལ༴ ཧཱུྃ་ཆེན་སྔོ་སྐྱ་དགྲ་ཤ་རོལ། །ཚངས་པའི་དམག་ཚོགས་དགྲ་ལ༴ སྟོབས་ཆེན་རྒྱལ་པོས་དགྲ་ཤ་རོལ། །ས་བདག་དམག་ཚོགས་དགྲ་ལ་བསྒྱུར། །རྡོ་རྗེ་སྙེམས་མས་དགྲ་ཁྲག་རོལ། །ཤར་ཕྱོགས་དགྲ་བགེགས་ཟློག་ཅིང་བསྒྱུར། །རྡོ་རྗེ་སྡེར་མོས་དགྲ་ཁྲག་རོལ། །ཤར་ལྷོའི་དགྲ་བགེགས་ཟློག་ཅིང་༴ དུར་ཁྲོད་བདག་མོས་དགྲ་ཁྲག་རོལ། །ལྷོ་ཕྱོགས་དགྲ་བགེགས་ཟློག་ཅིང་༴ རྡོ་རྗེ་གཏུན་ཁུང་དགྲ་ཁྲག་རོལ། །ལྷོ་ནུབ་དགྲ་བགེགས་ཟློག་ཅིང་༴ རྡོ་རྗེ་གཏུམ་མོས་དགྲ་ཁྲག་རོལ། །ནུབ་ཕྱོགས་དགྲ་བགེགས་ཟློག་ཅིང་༴ རྡོ་རྗེ་མདའ་སྙེམས་དགྲ་ཁྲག་རོལ། །ནུབ་བྱང་དགྲ་བགེགས་ཟློག་ཅིང་༴ རྡོ་རྗེ་རླུང་འབྱིན་དགྲ་ཁྲག་རོལ། །བྱང་ཕྱོགས་དགྲ་བགེགས་ཟློག་ཅིང་༴ རྡོ་རྗེ་གསོད་མས་དགྲ་ཁྲག་རོལ། །བྱང་ཤར་དགྲ་བགེགས་ཟློག་ཅིང་༴ རྡོ་རྗེ་སྒྲ་འབྱིན་
དགྲ་ཁྲག་རོལ། །སྟེང་ཕྱོགས་དགྲ་བགེགས་ཟློག་ཅིང་༴ རྡོ་རྗེ་བཏུལ་བྱེད་དགྲ་ཁྲག་རོལ། །འོག་ཕྱོགས་དགྲ་བགེགས་ཟློག་ཅིང་བསྒྱུར། །ཕྲ་མན་སྟག་གི་མགོ་བོ་ཅན། །ཏི་ར་ཐོགས་ནས་ཟ་ཞིང་རྒྱུག །མཚོན་ཆ་ཐོགས་ནས་ལས་བྱེད་པ། །ཕྲིན་ལས་ཤར་གྱི་དགྲ་བགེགས་ཟློག །ཕྲ་མན་གཡག་གི་མགོ་བོ་ཅན། །རྒྱུ་མ་ཐོགས་ནས་ཟ་ཞིང་༴ མཚོན་ཆ་ཐོགས་ནས་ལས༴ ཕྲིན་ལས་ཤར་ལྷོའི་དགྲ་བགེགས༴ ཕྲ་མན་ཤ་བའི་མགོ་བོ་ཅན། །ཞིང་ཆེན་ཐོགས་ནས་ཟ་ཞིང་༴ མཚོན་ཆ་ཐོགས་ནས་ལས༴ ཕྲིན་ལས་ལྷོ་ཡི་དགྲ་བགེགས༴ ཕྲ་མན་གཟིག་གི་མགོ་བོ་ཅན། །ཙིཏྟ་ཐོགས་ནས་ཟ་ཞིང་༴ མཚོན་ཆ་ཐོགས་ནས༴ ཕྲིན་ལས་ལྷོ་ནུབ་དགྲ་བགེགས༴ ཕྲ་མས་བྱི་ལའི་མགོ་བོ་ཅན། །ཀླད་ཁྲག་ཐོགས་ནས༴ །མཚོན་ཆ་ཐོགས་ནས༴ ཕྲིན་ལས་ནུབ་ཀྱི་དགྲ་བགེགས༴ ཕྲ་མན་སྦྱང་ཀིའི་མགོ་པོ་ཅན། །ཤ་ཆེན་ཐོགས་ནས༴ མཚོན་ཆ་ཐོགས་ནས་
ལས༴ ཕྲིན་ལས་ནུབ་བྱང་དགྲ་བགེགས༴ ཕྲ་མན་སེངྒེའི་མགོ༴ ཞིང་ཆེན་ཐོགས་ནས༴ མཚོན་ཆ་ཐོགས་ནས་ལས༴ ཕྲིན་ལས་བྱང་གི་དགྲ་བགེགས༴ ཕྲ་མན་དོམ་གྱི་མགོ་བོ༴ རྐང་གཟུགས་ཐོགས་ནས༴ མཚོན་ཆ་ཐོགས༴ ཕྲིན་ལས་བྱང་ཤར་དགྲ་བགེགས༴ ཕྲ་མན་ཕག་གི་མགོ༴ ལག་ན་གཟུགས་ཐོགས་ཟ༴ མཚོན་ཆ་ཐོགས་ནས་ལས༴ ཕྲིན་ལས་སྟེང་གི་དགྲ་བགེགས༴ ཕྲ་མན་དྲེད་ཀྱི་མགོ་བོ་ཅན། །ལྷ་གཟུགས་ཐོགས་ནས་ཟ༴ མཚོན་ཆ་ཐོགས་ནས་ལས་བྱེད་པ། །ཕྲིན་ལས་འོག་ཕྱོགས་དགྲ་བགེགས་ཟློག །བྱ་རྒོད་མགོ་ཅན་མགྱོགས་པའི་གཟུགས། །ཤར་ཕྱོགས་དགྲ་བགེགས་བསྒྱུར་ཞིང་ཟློག །བྱ་རོག་མགོ་ཅན་རིག་པ་ཅན། །ཤར་ལྷོའི་དགྲ་བགེགས་བསྒྱུར་ཞིང་༴ འུག་པའི་མགོ་ཅན་ཤེས་རབ་ཅན། །ལྷོ་ཡི་དགྲ་བགེགས་བསྒྱུར༴ ཁྭ་ཏའི་མགོ་ཅན་སྒྲིབ་ཤིང་ཅན། །ལྷོ་ནུབ་དགྲ་བགེགས་བསྒྱུར༴ པུ་ཤུད་མགོ་ཅན་མིག་རྩ་དམར། །ནུབ་
ཀྱི་དགྲ་བགེགས་བསྒྱུར༴ མགྱོགས་པ་ཁྲ་ཡི་མགོ་བོ་ཅན། །ནུབ་བྱང་དགྲ་བགེགས་བསྒྱུར༴ ཕ་ཝཾ་མགོ་ཅན་ཐབས་ལ་མཁས། །བྱང་གི་དགྲ་བགེགས་བསྒྱུར༴ གསོད་བྱེད་སྲེ་མོང་མགོ་བོ་ཅན། །བྱང་ཤར་དགྲ་བགེགས་བསྒྱུར༴ རྨིག་བུའི་མགོ་ཅན་ས་ལམ་སྤྱོད། །སྟེང་ཕྱོགས་དགྲ་བགེགས་བསྒྱུར༴ སྒྲོལ་བྱེད་བྱི་ལའི་མགོ་བོ་ཅན། །འོག་ཕྱོགས་དགྲ་བགེགས་བསྒྱུར་ཞིང་ཟློག །ཤར་གྱི་སྒོ་བ་པུ་ཤུད་མགོ །ཤར་ཕྱོགས་དགྲ་བགེགས་གནོད་པ་ཟློག །ལྷོ་ཡི་སྒོ་བ་སྐྱ་གའི་མགོ །ལྷོ་ཕྱོགས་དགྲ་བགེགས་གནོད་པ་ཟློག །ནུབ་ཀྱི་སྒོ་བ་སྲིན་བྱའི་མགོ །ནུབ་ཕྱོགས་དགྲ་བགེགས་གནོད་པ་ཟློག །བྱང་གི་སྒོ་བ་ཁྲ་ཡི་མགོ །བྱང་ཕྱོགས་དགྲ་བགེགས་གནོད་པ་ཟློག །བཀའ་ཡི་བསྟན་པ་སྲུང་བྱེད་པ། །ཤྭ་ན་མུ་ཁ་ཆེན་མོ་བཞི། །བདག་ཉིད་ཆེན་མོ་མཆེད་སྔ་བཞི། །ས་བདག་ཆེན་མོ་མཆེད་སྡེ་བཞི། །སྐྱེས་བུ་ཕོ་ཉ་བཅུ་གཉིས་རྣམས། །དགྲ་བགེགས་
ཤ་ཁྲག་འདི་རོལ་ལ། །དཔལ་གྱི་བཀའ་བཞིན་དགྲ་བགེགས་ཟློག །ཕུར་པ་ཕྲིན་ལས་ལྷ་ཚོགས་རྣམས། །ཤ་ཁྲག་མཆོད་གཏོར་འདི་བཞེས་ལ། །དགྲ་བགེགས་གནོད་པའི་སྦྱོར་བ་ཟློག །མ་ཧཱ་མཱཾ་ས་ལ་ཁཱ་ཧི། །མ་ཧཱ་རཀྟ་ལ་ཁཱ་ཧི། །མ་ཏཱ་ཙིཏྟ་ལ༴ མ་ཧཱ་གོ་རོ་ཙ་ན་ལ༴ མ་ཧཱ་བ་སུ་ཏ་ལ༴ མ་ཧཱ་ཀིཾ་ནི་རི་ཏི་ལ་ཁཱ་ཧི། དེ་ཙམ་མི་ནུས་ན། དཀྱུས་སུ་འདི་ཙམ་གྱིས་སྤྲོས་པ་མཚོན་པར་འགྱུར་ཏེ། ཧཱུྃ༔ སྣང་སྲིད་འཁོར་ལོའི་རྩིབས་སྟེང་ན༔ དཔལ་ཆེན་རྡོ་རྗེ་གཞོན་ནུ་ནི༔ ཞལ་གསུམ་ཕྱག་དྲུག་མཐིང་ནག་འབར༔ དུར་ཁྲོད་ཆས་ཅན་མཚོན་ཆ་འཕེན༔ འཁོར་ལོ་རྒྱས་འདེབས་ཡུམ་དང་སྦྱོར༔ བསྐལ་པའི་མེ་དཔུང་ཀློང་ན་བཞུགས༔ ཁྲོ་བོ་རྣམས་ཀྱི་དབུས་ནས་འགྱིངས༔ ཁྲོ་བཅུ་ཡབ་ཡུམ་ཟ་གསོད་དང་༔ སྒོ་བ་བཞི་དང་སྲུང་མའི་ཚོགས༔ འཁོར་དང་ཕོ་ཉ་ལས་ལ་འགྱེད༔ དམ་རྫས་མཆོད་པ་འདི་བཞེས་ལ༔ ཀུན་ཀྱང་ཐུགས་དམ་གནད་ནས་བསྐུལ༔ ཁྱོད་ལ་ཕྲིན་ལས་བཅོལ་བ་ནི༔
རྣལ་འབྱོར་བདག་ཅག་འཁོར་བཅས་ལ༔ རྐྱེན་དང་བར་དུ་གཅོད་པ་དང་༔ རྦོད་གཏོང་དྲག་པོའི་གནོད་པ་དང་༔ ཆག་ཆེན་གང་འབྱུང་ཐམས་ཅད་ཟློག༔ ཚར་གྲངས་བསགས་ན་འདི་ཡན་གྱི་ཚིག་རྐང་བཅུ་བདུན་ཉིད་བྱ་ཞིང་། ཟློག་བྱང་ནི། ལྷ་ཆེན་དམོད་པ་གཏོར་མས་ཟློག༔ ཀླུ་ཡི་མཛེ་གཏད་གཏོར་མས༴ བཙན་གྱི་གྲི་འཐབ་གཏོར༴ རྒྱལ་པོའི་སྨྱོ་འབོག༴ བདུད་ཀྱི་ཞགས་པ༴ གཤིན་རྗེའི་ཁྲམ་ཁ་གཏོར༴ མ་མོའི་ནད་རྐྱལ་གཏོར༴ གཟའ་ཡི་གཟེར་ཐབས་གཏོར༴ ཐེའུ་རང་སྲིད་རྐུན་གཏོར༴ གནོད་སྦྱིན་གདུག་པ་གཏོར༴ མེ་ལྷའི་ཧོམ་སྦྱོར་གཏོར༴ སྲིན་པོའི་ཟ་ཁ་གཏོར༴ རླུང་ལྷའི་འཁོར་ལོ་གཏོར༴ དབང་ལྡན་བར་ཆད་གཏོར༴ ཕུར་པའི་དབལ་ཟོར་གཏོར༴ གཤིན་རྗེའི་མཆོད་རྟེན་གཏོར༴ མགོན་པོའི་སྦར་བུ་གཏོར༴ མ་མོའི་མདོས་སྦྱོར་གཏོར༴ གཙུག་ཏོར་ཕྱིར་ཟློག་གཏོར༴ ནག་པོའི་གཏོ་སྦྱོར་གཏོར༴ རྟ་ཡི་ཆུ་བསྐོལ་གཏོར༴ བོན་པོའི་ཛོ་དམར་གཏོར༴ སྡེ་
བརྒྱད་ཀིང་ཀང་གཏོར༴ དམ་སྲིའི་ཆོ་འཕྲུལ་གཏོར༴ སྲོག་ལ་བར་གཅོད་གཏོར༴ ཚེ་ལ་འཇབ་པ་གཏོར༴ བླ་ལ་རྐུ་བ་གཏོར༴ རྗེ་ཡི་བཀའ་ཆད་གཏོར༴ བློན་གྱི་ངན་གཡོ་གཏོར༴ འབངས་ཀྱི་མི་ཁ་གཏོར༴ མཐའ་དམག་དབུས་འཐིབ་གཏོར༴ དུས་ངན་ལྟས་འབྱུང་གཏོར༴ ནད་ཡམ་འཁྲུགས་རྩོད་གཏོར༴ བཙའ་སད་སེར་གསུམ་གཏོར༴ ནོར་གྱི་གོད་ཁ་གཏོར༴ འགོང་པོའི་བསེ་རག་གཏོར༴ ཕ་ཚན་རྒྱབ་འདྲེ་གཏོར༴ མ་ཚན་བྱུར་འདྲེ་གཏོར༴ བྱིས་པའི་ཆུང་སྲི་གཏོར༴ དུར་སྲིའི་ཤི་ཁ་གཏོར༴ ཀག་དང་སྲི་ངན་གཏོར༴ འབྱུང་བའི་དགྲ་གཤེད་གཏོར༴ གློ་བུར་ཡེ་འདྲོག་གཏོར༴ ལུས་ལ་ན་ཚ་གཏོར༴ སེམས་ལ་སྡུག་བསྔལ་གཏོར༴ མ་ཉེས་ཁ་ཡོག་གཏོར༴ བྲན་གྱི་དམོད་མཆུ་གཏོར༴ སྤྱི་ཆགས་དགོས་ཆགས་གཏོར༴ གཡས་ནས་ཕོ་བརྒྱས་མདའ་འཕན་ཟློག༔ གཡོན་ནས་མོ་བརྒྱས་དུག་གཡོས་ཟློག༔ མདུན་ན་རྩང་བཞིན་འཛུག་པ༴ ངོས་ལ་
སྤྲེལ་ལྟར་འཛེགས་པ༴ རྒྱབ་ནས་ཁྱི་བཞིན་འབྲང་བ༴ ལྐོག་ནས་འབུ་བཞིན་གཡེངས་བ༴ ཟས་ཀྱི་དུག་སྦྱོར་བྱེད་པ༴ གཡས་ཀྱི་ཕོ་བདུད་གཡས་སུ་ཟློག༔ གཡོན་གྱི་མོ་བདུད་གཡོན་དུ་ཟློག༔ སྤྱི་བདུད་དལ་ཁ་མཁའ་ལ་སྒྱུར༔ བཟློག་གོ་དམར་ཆེན་གཏོར་མས་ཟློག༔ བསྒྱུར་རོ་ལྟས་ངན་དགྲ་ལ་སྒྱུར༔ སྔགས་ཟློག་བྱེད་ན། ཨོཾ་བཛྲ་ཀཱི་ལི་ཀཱི་ལ་ཡཧཱུྃ་ཧཱུྃ་ཧཱུྃ༔ བདུད་པྲ་མཱ་ར་ཡ་རྦད་ནན༔ ཁ་ལ་ཛ་མ་ལི་རྦད་ནན༔ རཱ་ཙ་དུ་ལིང་ཤག་རྦད་ནན༔ ཤིག་ཤིག་དུམ་དུམ་རྦད་ནན༔ ཚལ་པ་ཚལ་པ་རྦད་ནན༔ ཁྲོཾ་ཁྲོཾ་བྷྱོ་རྦད་ནན༔ རྨུག་རྨུག་རྦད་ནན༔ ཏིར་ཏིར་རྦད་ནན༔ ཚལ་དུ་ཚལ་དུ་རྦད་ནན༔ ཞེས་རྦད་དགུའི་སྔགས་ཀྱང་བཟླ་བ་ཕྱག་བཞེས་སོ། །དེ་ནས་རྒྱུན་གྱི་ལས་སྦྱོར་ཙམ་ལ་འདིས་མཐར་བསྐུལ་ཐུང་ཙམ་གྱིས་གཏོར་མ་དགྲ་ཕྱོགས་སུ་འཕང་། གཏོར་རྒྱག་བྱེད་ན་གཏོར་མ་ལ་མེ་སྒྲོན་བཙུག་སྟེ་རྡོ་རྗེ་འདེགས་པའི་རྒྱས། སྙིང་པོའི་མཐར་བྷྲཱུྃ་ཛྙཱ་ན་མཎྜལ་བེ་ག་ཀྲ་མ་ཡཾ༔ ཞེས་བརྗོད་པས་གཏོར་མའི་ཡེ་ཤེས་པ་ནམ་མཁར་གཤེགས།
དམ་ཚིག་པ་རྣམས་ཁྲོས་འཁྲུག་རྣམས་པས་ལས་ལ་ཆས་པར་བསམ། གཏོར་མར་དམིགས་བྱ་འགུགས་བསྟིམ་བྱ་ཞིང་རཀྟ་ཕྱར་ལ། ཧཱུྃ་བྷྱོ་ཛཿ མ་བཅོས་སྤྲོས་མེད་དེ་བཞིན་ཉིད་དབྱིངས་ལས༔ བདེ་ཆེན་ལྷུན་གྲུབ་འབར་བའི་སྐུར་བཞེངས་པ༔ བཅོམ་ལྡན་དཔལ་ཆེན་རྡོ་རྗེ་གཞོན་ནུ་དང་༔ ཡུམ་མཆོག་སྒྲོལ་མ་འཁོར་ལོ་རྒྱས་འདེབས་མ༔ རྡོ་རྗེ་ཕུར་བུའི་རིག་པ་འཛིན་རྣམས་དང་༔ ཁྲོ་བཅུ་ཡབ་ཡུམ་ཟ་བྱེད་གསོད་བྱེད་ཚོགས༔ སྲས་མཆོག་ཉེར་གཅིག་ཁྲོ་མོ་སྒོ་མ་བཞི༔ ཤྭ་ན་བདག་ཉིད་ས་བདག་སྐྱེས་བུའི་ཚོགས༔ ཕུར་པའི་སྲུང་མ་དམ་ཅན་རྒྱ་མཚོར་བཅས༔ མི་མངོན་དབྱིངས་ནས་གནས་འདིར་སྐུར་བཞེངས་ལ༔ དམ་རྫས་ཕྱི་ནང་གསང་བའི་མཆོད་པ་དང་༔ བདུད་རྩི་རཀྟ་གཏོར་མ་འདི་བཞེས་ལ༔ ཐུགས་དམ་གནད་ནས་བསྐུལ་ལོ་མ་གཡེལ་ཅིག༔ ད་རེས་སྡང་བའི་དགྲ་ལ་རྟགས་ཕྱུངས་ཤིག༔ ད་རེས་གནོད་པའི་བགེགས་ལ་ལས་མཛོད་ཅིག༔ ཅེས་བསྐུལ། ཡེ་ཤེས་འཇིག་རྟེན་
གི་སྲུང་མ་ལ་ཆད་ཐོ་བསྒྲགས་པ་ནི། ཧཱུྃ༔ སྔོན་ཚེ་དུར་ཁྲོད་ཆེན་པོ་རུ༔ དཔལ་ཆེན་རྡོ་རྗེ་གཞོན་ནུ་དང་༔ བར་དུ་ཡང་ལེ་ཤོད་ཀྱི་གནས༔ རྒྱ་གར་སློབ་དཔོན་རྣམ་གསུམ་དང་༔ ཐ་མ་ཡང་རྫོངས་དབེན་གནས་སུ༔ པདྨ་ཐོད་ཕྲེང་མཚོ་རྒྱལ་གྱི༔ སྤྱན་སྔར་ཁས་བླངས་དམ་བཅས་པའི༔ ཕུར་པའི་བཀའ་སྲུང་དམ་ཅན་རྣམས༔ དམར་གྱི་གཏོར་མ་འདི་བཞེས་ལ༔ སྔོན་གྱི་ཁས་བླངས་དམ་བཅས་བཞིན༔ ཕྲིན་ལས་རྣམ་བཞི་འགྲུབ་པར་མཛོད༔ གཏོར་མ་ཕྱིར་དཔག་ལ། ཧཱུྃ༔ དམར་ཆེན་གཏོར་མ་ཕུར་བུའི་ཚོགས༔ དགྲ་དང་བགེགས་ལ་རྦད་པའི་ཚེ༔ ཐོག་སེར་འབེབས་པའི་ཆོ་འདྲ་ཞིང༔ སྟོང་གསུམ་ཐམས་ཅད་ལྡེགས་ཤིང་འཁྱོམ༔ སྐར་མདའ་འབེབས་པའི་ཆོ་འདྲ་ཞིང་༔ རི་རབ་ཐམས་ཅད་གཡོ་ཞིང་འགུལ༔ སེང་ཆེན་འགྱིང་བའི་ཆོ་འདྲ་ཞིང་༔ ངར་སྐད་དྲག་པོས་སྟོང་གསུམ་འཁྲུགས༔ བདུད་དམག་ཆས་པའི་ཆོ་འདྲ་ཞིང་༔ རུ་དར་ནག་པོ་ཟངས་སེ་ཟང་༔ རྡོ་རྗེ་
གཞོན་ནུས་དམག་དཔོན་མཛོད༔ སྒོ་མ་བཞི་ཡི་དམག་སྣ་དྲོངས༔ ཕྱོགས་བཅུའི་ཁྲོ་བོས་མཐའ་ནས་སྡུས༔ ཕུར་སྲུང་རྣམས་ཀྱིས་རུ་དར་ཕྱོར༔ ཕ་རོལ་བདུད་ཀྱི་དམག་དཔུང་ལ༔ གཡུ་ངོ་ཆེན་པོ་དེར་སྤྲོད་ཅིག༔ མཐུ་དང་རྩལ་གྱི་ནུས་པ་ཕྱུངས༔ ཐུགས་དམ་མ་གཡེལ་དགྲ་ལ་ཡ༔ དྲག་སྔགས་བཟླ་ཞིང་རུ་མཚོན་གྱིས་སྣ་དྲངས་ལ་གིང་དང་བཅས་ཆས། གཏོར་ཚུག་བྱེད་ན། གསེར་སྐྱེམས། གཟུ་དཔང་། ཟློག་སྒྱུར་ཕྱི་མ་དང་། འོག་གི་ཕུར་སྒྲིལ་བཅས་བྱ། འཕང་བའི་སར་བྱིན་པ་དང་། གསེར་སྐྱེམས་འཚམས། ཕུར་པ་བསྒྲིལ་ཞིང་། ཧཱུྃ༔ ང་ནི་རྡོ་རྗེ་གཞོན་ནུ་སྟེ༔ ང་ཡི་བཀའ་ལས་མདའ་མ་བྱེད༔ ལྷ་གཤེགས་གངས་དཀར་རྩེ་ལ་གཤེགས༔ དཀར་ལ་དེ་ནི་ཡེ་རེ་རེ༔ ལྷ་རྣམས་ཀུན་གྱི་གྲོགས་མཛོད་ཅིག༔ ཀླུ་གཤེགས་རྒྱ་མཚོའི་གཏིང་དུ་གཤེགས༔ སྔོ་ལ་དེ་ནི་ཐིབས་སེ་ཐིབ༔ ཀླུ་རྣམས་ཀུན་གྱིས་གྲོགས་མཛོད་ཅིག༔ བཙན་གཤེགས་བྲག་དམར་ལོགས་ལ་གཤེགས༔ དམར་ལ་དེ་ནི་སྤྲིངས་སེ་སྤྲིང་༔ བཙན་རྣམས་ཀུན་གྱིས་གྲོགས་
མཛོད་ཅིག༔ མཐོ་བ་རྣམས་ཀྱིས་ཞབས་སྐུམས་ཤིག༔ དམའ་བ་རྣམས་ཀྱིས་དབུ་ཁུག་ཅིག༔ བར་པ་རྣམས་ཀྱིས་སྐུ་བཟུར་ཅིག༔ ཟོར་གྱི་གདོང་ལ་མ་བཞུགས་པར༔ སོ་སོ་རང་རང་གནས་སུ་གཤེགས༔ ཞེས་དྲག་ཏུ་བསྐུལ་ཞིང་ཟོར་ལམ་བསལ། གཟུ་དཔང་དང་ཟོར་ཐབས་སྐབས་དང་པོར་ཡོད་ན་དགུགས་གཞུག་ཀྱང་བྱ། ཟོར་བསྐུལ་བ་ནི། ཧཱུྃ༔ ནམ་མཁའ་ཡངས་པའི་དཀྱིལ་འཁོར་ནས༔ དྲེགས་པ་ཐམས་ཅད་བདག་ལ་དགོངས༔ ང་ནི་དུས་གསུམ་བཞུགས་པ་ཡི༔ སངས་རྒྱས་ཡིན་ཏེ་ཡེ་ཤེས་སྐུ༔ དཔལ་ཆེན་རྡོ་རྗེ་གཞོན་ནུ་ཡིན༔ སྣང་སྲིད་ཀུན་གྱི་བདག་པོ་སྟེ༔ ང་ཡི་བཀའ་ལ་ཐམས་ཅད་ཉོན༔ དེ་རིང་གྲོགས་དང་ལས་ལ་བྱོན༔ ཛཿ སྟོང་གསུམ་ལྕགས་རིའི་བསྐོར་བ་ནས༔ བདུད་རྒྱལ་དམག་ཚོགས་དགྲ་ལ་བྷྱོཿ སྟོང་གསུམ་ཟངས་རིའི་བསྐོར་བ་ནས༔ བཙན་གྱི་དམག་ཚོགས་དགྲ་ལ་བྷྱོ༔ སྟོང་གསུམ་གངས་རིའི་བསྐོར་བ་ནས༔ གིང་ཆེན་དམག་ཚོགས་དགྲ་ལ་བྷྱོ༔ སྟོང་
གསུམ་ཁྲག་མཚོ་འཁྲུགས་པ་ནས༔ མ་མོའི་དམག་ཚོགས་དགྲ་ལ་བྷྱོ༔ སྟོང་གསུམ་རབ་འཇིགས་དུར་ཁྲོད་ནས༔ ཡང་སྤྲུལ་ཕོ་ཉ་དགྲ་ལ་བྷྱོ༔ བྷྱོ་བྷྱོ༔ ཉམས་པའི་དགྲ་བགེགས་དཔུང་བཅས་ལ༔ བདུད་དམག་རྣམས་ཀྱིས་ཀོང་ཟོར་རྒྱོབ༔ བཙན་དམག་རྣམས་ཀྱིས་མདའ་ཟོར་རྒྱོབ༔ གིང་ཆེན་རྣམས་ཀྱིས་རྡོ་ཟོར་རྒྱོབ༔ མ་མོ་རྣམས་ཀྱིས་ཁྲག་ཟོར་རྒྱོབ༔ ཕོ་ཉ་རྣམས་ཀིས་གཏོར་ཟོར་རྒྱོབ༔ ལུས་ངག་ཐལ་བའི་རྡུལ་དུ་རློག༔ མིང་ཙམ་མེད་པར་ཚར་ཆོད་ཅིག༔ ཅེས་བརྗོད་ཅིང་ཟོར་རྣམས་རིམ་བཞིན་བསྒྲིར། གཏོར་མ་ཐོགས་ལ། དམ་ཚིག་པ་རང་ལ་བསྟིམ་ཞིང་ཟོར་གཏོར་ནད་མཚོན་དུག་གི་ཐོག་ཟེར་དུ་གྱུར་པར་མོས་ལ། ཧཱུྃ༔ གཏུམ་ཆེན་ལས་ཀྱི་ཕོ་ཉའི་ཚོགས༔ རྔམས་པའི་སྐུར་བཞེངས་དགྲ་བགེགས་ཟློག༔ གཏོར་ཟོར་འབར་བའི་མཚོན་ཆ་ཡིས༔ ཕས་ཀྱི་མི་མཐུན་གནོད་པའི་རྐྱེན༔ ཐམས་ཅད་མ་ལུས་ཟློག་ཏུ་གསོལ༔ དྲག་སྔགས་བཟླ་ཞིང་གཏོར་མ་མེར་བསྲེག དམོད་མོ་ཐལ་བརྡེབ་ཅི་ཤེས་བྱ། སྲུང་འཁོར་བསྒོམ་ཞིང་ཡར་ལོག །
སྒོ་དྲུང་དུ་བཤལ་ཆུས་བརྟན་མ་མཆོད་པ་ནི། བྷྱོཿ ཁྱད་པར་པདྨ་ཐོད་ཕྲེང་གིས༔ སྤྱན་སྔར་དབང་བསྐུར་དམ་མནོས་པའི༔ བདུད་མོ་བཞི་དང་གནོད་སྦྱིན་བཞི༔ སྨན་མོ་བཞི་སོགས་བརྟན་མའི་ཚོགས༔ འདིར་གཤེགས་བདུད་རྩིའི་བཤའ་ཆུ་བཞེས༔ ཕུར་བུ་སྒྲུབ་པའི་རྣལ་འབྱོར་གྱིས༔ ཆོས་བཞིན་སྒྲུབ་པའི་སྡོང་གྲོགས་མཛོད༔ མ་མ་ཧྲིཾ་ཧྲིཾ་བ་ལིཾ་ཏ་ཁཱ་ཧི༔ གཏོར་གཞོང་ཁ་སྤུབ་ཅིང་རྡོ་རྗེས་རྒྱས་བཏབ་ལ། ཧཱུྃ༔ སྲིད་པ་ཕུར་བུའི་དཀྱིལ་འཁོར་དུ༔ སྐུ་གསུང་ཐུགས་ཀྱི་བྲོ་བརྡུང་བས༔ དུག་གསུམ་དགྲ་བགེགས་བརླག་པར་མཛོད༔ ཐམས་ཅད་ཆོས་ཀྱི་དབྱིངས་སུ་ཐིམ༔ ཨོཾ་ལཾ་ཧཱུྃ་ལཾ་སྟྭཾ་བྷ་ཡ་ནན༔ ཞེས་ལས་མཇུག་བྲོས་བསྡུས་ལ་ཤིས་བརྗོད་ཀྱང་བྱ། ནང་དུ་ལོག་ལ་ཕྲིན་ལས་ཀྱི་རྗེས་རིམ་རྣམས་མཐར་དབྱུང་ངོ་། །ལམ་དུ་ཞུགས་པའི་རྣལ་འབྱོར་ནི། །སྤྲོས་མེད་དག་ལ་ཉེར་མཁོ་བའི། །རྒྱུན་གྱི་ལས་སྦྱོར་གསལ་བར་བཀོད། །དགེ་བས་ཡིད་སྲུབ་མཐར་བྱེད་ཤོག །ཅེས་པའང་གཏེར་སྟོན་ཚང་སྤྱི་སྒེར་གྱི་སྲུང་རིམ་དང་། འཇམ་མགོན་ཀོང་སྤྲུལ་རིན་པོ་ཆེའི་ཞལ་སྔ་ནས་ཀྱང་དགུ་གསུམ་ཕུར་པའི་གཏོར་
ཟློག་དགོས་ཞེས་བཀའ་རྟགས་ལ་བབ་པ་ཉིད། རང་གཞན་འཇུག་པ་བདེ་ཕྱིར། ཀུན་བཟང་འགྱུར་མེད་ཚེ་དབང་གྲགས་པས་རང་ལོ་བཅུ་དགུ་པར། དམར་ཕྱོགས་ཀྱི་རྒྱལ་བ་གསུམ་པར་གང་ཤར་མགྱོགས་པར་བྲིས་པ་དོན་དང་ལྡན་པར་གྱུར་ཅིག། །།མསྟུ་ཤུབྷཾ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།