མགོན་པོའི་སྲུང་འཁོར།
མགོན་པོའི་སྲུང་འཁོར་བཞུགས་སོ། །
སྭ་བྷཱ་ཝས་སྦྱངས། སྟོང་པའི་ངང་ལས་ཡི་གེ་བུཾ། །ནག་པོ་འོད་དུ་ཞུ་བ་ལས། །ནང་ནི་རྡོ་རྗེའི་གཞལ་མེད་ཁང་། །ཕྱི་རོལ་འཁོར་ལོ་རྩིབས་བཅུ་པ། །དེ་དབུས་པདྨ་ཉི་མ་དང་། །རོ་ཡི་སྟེང་དུ་རང་གི་སེམས། །ཧཱུྃ་ཡིག་མཐིང་ནག་འབར་བར་གྱུར། །དེ་ལས་འོད་ཟེར་ཕྱོགས་བཅུར་འཕྲོས། །གདུག་པ་ཅན་རྣམས་ཚར་བཅད་ཅིང་། །དྲེགས་བྱེད་རྣམས་ཀྱི་ནུས་པ་བསྡུས། །དེ་ནས་ཧཱུྃ་ཡིག་ཡོངས་གྱུར་པས། །བདག་ཉིད་ཡེ་ཤེས་མགོན་པོ་ནི། །སྐུ་མདོག་ནག་ལ་དམར་བའི་
མདངས། །སྐུ་ལ་དར་ནག་འཇོལ་བེར་གསོལ། །ཞལ་གཅིག་པ་ལ་ཕྱག་གཉིས་པ། །སྤྱན་གསུམ་མཆེ་བ་རྣམ་པར་གཙིགས། །ལྗགས་དམར་འདྲིལ་ཞིང་བསྐྱོད་པ་ལས། །འབྲུག་གི་སྒྲ་ལྟར་ཧ་ཧ་སྒྲོག །དབུ་སྐྲ་ཁམ་ནག་གྱེན་དུ་བརྫེས། །དེ་ལ་ཐོད་སྐམ་ལྔ་ཡིས་སྤྲས། །ཕྱག་གཉིས་ཀྱིས་ནི་ཙནྡན་གྱི། །བེང་ཆེན་གསོར་བའི་སྟབས་ཀྱིས་བསྣམས། །ཐོད་རློན་ལྔ་བཅུའི་དོ་ཤལ་དང་། །སྣ་ཚོགས་རིན་ཆེན་རྒྱན་གྱིས་བཀླུབས། །ཞབས་གཉིས་བརྐྱང་བསྐུམ་འདོར་སྟབས་
སུ། །འགྱིང་བའི་ཚུལ་གྱིས་གར་བྱེད་པས། །སྲིད་པ་གསུམ་ཡང་འདར་ཞིང་གཡོ། །སྐུ་ཡིས་ཁམས་གསུམ་ཁྱབ་པར་བཞུགས། །རྩིབས་བཅུར་ཧཱུྃ་ལས་མགོན་པོ་ནི། །སྲས་མཆོག་ནག་པོ་ཆེན་པོ་བཅུ། །ཞལ་གཅིག་ཕྱག་གཉིས་གྲི་ཐོད་འཛིན། །དར་ནག་འཇོལ་བེར་གསོལ་བའོ། །གཞན་ཡང་སྲིད་གསུམ་དྲེགས་པའི་ཚོགས། །བྱེ་བ་དུང་ཕྱུར་དུ་མས་བསྐོར། །གཙོ་བོའི་ཐུགས་ཀར་པད་ཉིའི་སྟེང་། །མཐིང་ནག་ཧཱུྃ་གི་འོད་ཟེར་གྱིས། །རང་འདྲའི་ཡེ་ཤེས་སེམས་དཔའ་ནི། །འཁོར་བཅས་སྤྱན་དྲངས་རང་ལ་ཐིམ། །དེ་ནས་ཐུགས་ཀའི་ཧཱུྃ་གི་མཐར། །སྔགས་ཀྱིས་གཡས་སུ་བསྐོར་བར་གྱུར། །ཨོཾ་ཤྲཱི་མ་ཧཱ་ཀཱ་ལ་དུ་བེཾ་ནི་ཛཿ ཨོཾ་མ་ཧཱ་ཀཱ་ལ་ཀཱ་ལཱ་ཡ་གུ་ཎ་ཧྲྀ་ད་རཀྵ་དུ་བེཾ་ཛཿ ཨོཾ་མ་ཧཱ་ཀཱ་ལཱ་རཱུ་པ་གུ་ཎ་ཤྲཱི་ནི་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཞེས་བསྙེན་པ་མང་དུ་བྱ། རང་གི་ཐུགས་ཀར་ཆོས་འབྱུང་གི །དབུས་སུ་རང་སེམས་ཡི་དམ་ལྷ། །གཡས་གཡོན་མདུན་རྒྱབ་མཚམས་རྣམས་སུ། །
བསྲུང་བྱ་མཐའ་དག་གནས་པར་གྱུར། །ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ཨོཾ་ཤྲཱི་མ་ཧཱ་ཀཱ་ལ་དུ་བེཾ་ནི་ཛཿ ཨོཾ་མ་ཧཱ་ཀཱ་ལཱ་ཀཱ་ལཱ་ཡ་གུ་ཎ་ཧྲྀ་ད་རཀྵ་དུ་བེཾ་ཛཿ ཨོཾ་མ་ཧཱ་ཀཱ་ལ་རཱུ་པ་གུ་ཎ་ཤྲཱི་ནི་ཧཱུྃ་ཧཱུྃ་ཕཊ་ཕཊ་སྭཱ་ཧཱ། མ་མ་ཀཱ་ཝ་ཙི་རཀྵ་རཀྵ། ལྷ་ཚོགས་རྣམས་ལས་བསྐལ་པའི་མེ། །དྲག་ཏུ་འཚུབ་ཅིང་འབར་བ་ཡིས། །གནོད་བྱེད་མ་ལུས་རབ་བསྲེགས་ཤིང་། །བསྒྲལ་སྟེ་ཞལ་དུ་བསྟབས་པར་གྱུར། །ཨོཾ་ཙཎྜ་མ་ཧཱ་ཀཱ་ལ་ཧ་ན་ཧ་ན་བཛྲི་ཎཱི་ཡེ་གནོད་བྱེད་མཱ་ར་ཡ་ཧཱུྃ་ཕཊ། ཨོཾ་ཙཎྜ་མ་ཧཱ་ཀཱ་ལ་བཛྲ་དཾཥྚི་ཎཱི་ཡེ་གནོད་བྱེད་ཀཱ་ཝ་ཙི་སྟཾ་བྷ་ཡ་ནན་ཧཱུྃ་ཧཱུྃ་ཕཊ་ཕཊ། ཨོཾ་ཙཎྜ་མ་ཧཱ་ཀཱ་ལ་གནོད་བྱེད་ཨི་དཾ་བ་ལིཾ་ཁ་ཁ་ཁཱ་ཧི་ཁཱ་ཧི། །ཞེས་ཉེར་གཅིག་རེ་བཟླའོ། །ཞེས་པ་དཔལ་ཡེ་ཤེས་ཀྱི་མགོན་པོའི་སྲུང་འཁོར་གྱི་མན་ངག་དཀོན་མཆོག་འབངས་ཀྱིས་སྦྱར་བའོ།། ༈ རང་ཉིད་དྲང་སྲོང་ལོག་ཏྲི་པཱ་ལ་ཁྲོས། །སྐུ་མདོག་སྨུག་ནག་ཞལ་གཅིག་ཕྱག་བཞི་པ། །དང་པོའི་ཕྱག་གཉིས་ཉི་མ་ཟླ་བ་དང་། །འོག་མས་ཐོ་བ་དང་
ནི་མེ་ཞགས་བསྣམས། །ཁྲོ་བོའི་ཆས་ལྡན་མེ་དབུས་འདོར་སྟབས་བཞུགས། །ལྗགས་ནི་རྡོ་རྗེ་རྩེ་དགུ་འབར་བ་ལས། །ཕཊ་ཡིག་གྲངས་མེད་ཐོག་ལྟར་འཕྲོས་པ་ཡིས། །གནོད་བྱེད་གཞོབས་སུ་བསྲེགས་ཅིང་རྣམ་པར་གཏོར། །ཨོཾ་ལོག་ཏྲི་པཱ་ལ་ནན། ས་ག་པ་ཤ་ནན། ན་ག་དུ་དུ་ནན། །མ་མཾ་མ་མཾ། ཙིར་ཙ་ར་ཙིར་ཙ་ར། བཾ་རུ་ལུ་བཾ་རུ་ལུ། རྦད་ཊ་ཀོ་ཤ་ཡ། རྦད་ཊ་ཀོ་ཤ་ཡ། ཧོ་ར་ཧོ་ར། ཙི་དུ་སོད་ཙི་དུ་སྲོད། ཤིག་ལྷུ་རུ་གཏུབ། ཧ་ལ་པ་ཏི་ནན། འཁོར་བ་དུལ། བདག་གི་གནོད་བྱེད་བྱད་མ་ཀཱ་བ་ཙི་རླག་རླག །རྗེས་ལ་རྩ་ཕྱག་གཉིས་ཀྱི་ཉི་ཟླའི་བར། །དགྲ་བགེགས་བྱད་མ་རྡུལ་དུ་བརླག་གྱུར་ནས། །རྗེས་མེད་སོང་སྒོམ་ཐལ་མོ་ལན་དགུར་བརྡབ། །དེ་ནས་དམིགས་མེད་ངང་དུ་དར་ཅིག་བཞག །དེ་ནས། དྲང་སྲོང་བདེན་པས་དམོད་པ་ཡིས། །དགྲ་བགེགས་བྱད་མ་ཐམས་ཅད་ཀྱི། །ལུས་ངག་ཐལ་བའི་རྡུལ་དུ་རློག །རྣམ་ཤེས་ཆོས་ཀྱི་དབྱིངས་སུ་སྒྲོལ། །ཁྱོད་ཀྱི་རིགས་སྔགས་བཟླས་པའི་མཐུས། །གནོད་བྱེད་མ་
ལུས་ཞི་བ་དང་། །ཅི་བསམ་ཡིད་བཞིན་འགྲུབ་པ་དང་། །བཤད་སྒྲུབ་བསྟན་པ་རྒྱས་པར་མཛོད། །ཞེས་སི་ཏུ་བསྟན་པའི་ཉིན་བྱེད་ཀྱིས་སྩལ་བའོ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།