ལྷ་སྨན་བཀྲ་ཤིས་ཚེ་རིང་མ་མཆེད་ལྔའི་བསྐང་བ།
ལྷ་སྨན་བཀྲ་ཤིས་ཚེ་རིང་མ་མཆེད་ལྔའི་བསྐང་བ་བཞུགས་སོ། །
སྭ་སྟི་ཛ་ཡནྟུ། འདིར་ལྷ་སྨན་བཀྲ་ཤིས་ཚེ་རིང་མ་མཆེད་ལྔའི་མཆོད་གཏོར་དང་སྦྲེལ་བའི་བསྐང་བ་བགྱིད་པར་སྤྲོ་ན། བསྐང་རྫས་གཏོར་མ་ལ་སོགས་འདུ་བྱས་ནས། ཨོཾ་ཨཱཿབིགྷྣནྟ་ཀྲི་ཏ་ཧཱུྃ་ཕཊ་ཀྱིས་བསང་། ཨོཾ་སྭ་བྷཱ་ཝས་སྦྱངས། སྟོང་པའི་ངང་ལས་ཨཱཿལས་ཡེ་ཤེས་ཀྱི་ཀ་པཱ་ལའི་ནང་དུ་ཤ་ལྔ་བདུད་རྩི་ལྔ་ཞུ་ཞིང་ཡེ་ཤེས་ཀྱི་བདུད་རྩི་དང་འདྲེས་པར་གྱུར་པའི་གཏོར་མ་བདུད་རྩིའི་རྒྱ་མཚོ་ཆེན་པོ་དང་། གཞན་ཡང་ཉེར་སྤྱོད་བདུན་དང་འདོད་ཡོན་ལྔ་བཀྲ་ཤིས་པའི་རྫས་རྣམས་དང་བརྟེན་རྫས་བསྒྲུབ་རྫས་མཆོད་རྫས་བསམ་
གྱིས་མི་ཁྱབ་པ་ཟག་མེད་བདེ་བ་ཆེན་པོའི་ཡེ་ཤེས་ཀྱི་རང་བཞིན་ནམ་མཁའི་དབྱིངས་ཐམས་ཅད་གང་བར་གྱུར། །ཨོཾ་ཨཱཿཧཱུྃ་གསུམ། ཨོཾ་བཛྲ་སྥ་ར་ཎ་ཁཾ་གསུམ། ཨོཾ་བཛྲ་ཨཱརྒྷཾ་སོགས་ནས། ཤབྡ་ཨཱཿཧཱུྃ་གི་བར་བརྗོད་པས་བྱིན་གྱིས་བརླབས། ཧཱུྃ། མཁའ་དབྱིངས་བདེ་བ་ཆེན་པོའི་ཀློང་། །འགྱུར་མེད་རང་རིག་འོད་གསལ་མདངས། །བདུད་རྩི་རཱ་ས་ཡ་ནའི་དངོས། །མཆོད་སྤྲིན་རྒྱ་མཚོ་དཀྲིགས་པ་འདིས། །བདེ་ཆེན་ཞིང་མགོན་རྒྱལ་ཀུན་དངོས། །ཚེ་མཐའ་ཡས་པའི་ཐུགས་དམ་བསྐང་། །
གྲུབ་པ་ཡོངས་ཀྱི་འཁོར་ལོས་བསྒྱུར། །འཆི་མེད་པདྨའི་ཐུགས་དམ་བསྐང་། །རྒྱལ་བས་ལུང་བསྟན་སྤྱོད་པ་འཆང་། །ཀ་ཧྣ་པ་ཡི་ཐུགས༴ །བདེ་ཆེན་མཆོག་གི་དངོས་གྲུབ་བརྙེས། །བཞད་པ་རྡོ་རྗེའི་ཐུགས་དམ་བསྐང་། །ཤེས་རབ་བདག་ཉིད་ཡུམ་ཆེན་གཙོ། །རྡོ་རྗེ་བཙུན་མོའི་ཐུགས་དམ་བསྐང་། །གང་སྤྲུལ་རྡོ་རྗེ་ཁྲོ་མོ་ནི། །ཉི་ཟླ་ཐོད་ཕྲེང་ཐུགས་དམ་བསྐང་། །ལེགས་ལྡན་ཚོགས་ཀྱི་བདག་པོའི་ཡུམ། །དབང་མོ་ཆེ་ཡི་ཐུགས་དམ་བསྐང་། །བཀྲ་ཤིས་ཚེ་ཡི་དབང་ཕྱུག་མ། །རྡོ་རྗེ་མི་འགྱུར་དཔལ་གྱི་ཡུམ། །སངས་རྒྱས་མཁའ་འགྲོའི་ངོ་བོ་ཉིད། །ལྷ་སྨན་རྒྱལ་མོའི་ཐུགས་དམ་བསྐང་། །སྣང་གསལ་ཀུན་ཤེས་དབང་ཕྱུག་མ། །རྡོ་རྗེ་ཁྲོས་མ་བདེ་ཆེན་ཡུམ། །རྡོ་རྗེ་མཁའ་འགྲོའི་ངོ་བོ་ཉིད། །མཐིང་གི་ཞལ་བཟང་ཐུགས་དམ་བསྐང་། །དགོས་འདོད་ནོར་གྱི་དབང་ཕྱུག་མ། །རྡོ་རྗེ་བཞད་མ་འདོད་སྦྱིན་ཡུམ། །རིན་ཆེན་མཁའ་འགྲོའི་ངོ་བོ་ཉིད། །མི་གཡོ་
བློ་བཟང་ཐུགས་དམ་བསྐང་། །ཁམས་གསུམ་དབང་སྡུད་དབང་ཕྱུག་མ། །རྡོ་རྗེ་དཔལ་མོ་ལོངས་སྤྱོད་ཡུམ། །པདྨ་མཁའ་འགྲོའི་ངོ་བོ་ཉིད། །ཅོད་པཎ་མགྲིན་བཟང་ཐུགས་དམ་བསྐང་། །དྲག་པོའི་ལས་ཀྱི་དབང་ཕྱུག་མ། །རྡོ་རྗེ་གར་མཁན་ཕྲིན་ལས་ཡུམ། །ལས་ཀྱི་མཁའ་འགྲོའི་ངོ་བོ་ཉིད། །གཏད་དཀར་འགྲོ་བཟང་ཐུགས་དམ་བསྐང་། །ཡབ་གཅིག་ལྷོ་ལྷ་དེ་ཝ་དང་། །ཡུམ་མཆོག་འབྲོག་ཡུལ་སྨན་མོ་དང་། །ཇོ་བོ་སྒ་རུ་ལ་སོགས་པ། །མིང་པོ་བདུན་གྱི་ཐུགས་དམ་བསྐང་། །བདུད་མོ་བཞི་དང་གནོད་སྦྱིན་བཞི། །སྨན་མོ་བཞི་སྟེ་གངས་ཅན་ལྗོངས། །སྐྱོང་ཞིང་རྒྱལ་བསྟན་སྤེལ་མཛད་པའི། །བརྟན་མ་བཅུ་གཉིས་ཐུགས་དམ་བསྐང་། །གཞན་ཡང་འཁོར་དུ་གཏོགས་པ་ཡི། །མ་མོ་སྨན་མོ་འབུམ་སྡེ་དང་། །ལྷ་སྲིན་དྲེགས་པ་ཡང་འཁོར་བཅས། །མ་ལུས་འཁོར་བཅས་ཐུགས་དམ་བསྐང་། །རྟག་ཏུ་བསྟེན་ཅིང་བསྒྲུབ་པའི་ཕྱིར། །གངས་རིའི་
གཟུགས་དང་དར་དཀར་གུར། །མདའ་དར་རིན་ཆེན་པར་བུ་སོགས། །བསྟན་པའི་རྫས་ཀྱིས་ཐུགས་དམ་བསྐང་། །མཆོད་ཅིང་དགྱེས་པ་བསྐྱེད་པའི་ཕྱིར། །དམ་རྫས་གཏོར་མ་འབྲང་རྒྱས་སྨན། །གསེར་སྐྱེམས་ཉེར་སྤྱོད་འདོད་ཡོན་སོགས། །མཆོད་པའི་རྫས་ཀྱིས་ཐུགས་དམ་བསྐང་། །དམ་ཚིག་གཉན་པོ་བསྲེ་བའི་ཕྱིར། །ལྷ་སྔགས་ཏིང་འཛིན་འཕྲོ་འདུ་དང་། །འཕོ་མེད་དགའ་བཞིའི་རོལ་པ་དང་། །མི་ཤིགས་ཕྱག་རྒྱས་ཐུགས་དམ་བསྐང་། །འཕྲིན་ལས་མྱུར་དུ་བསྒྲུབ་པའི་ཕྱིར། །དུས་སུ་མཆོད་བསྟོད་བསྐུལ་བ་དང་། །བཟླས་པ་སྔགས་ཀྱི་འཁྲུལ་འཁོར་སོགས། །ལས་བཞིའི་ལས་ཀྱིས་ཐུགས་དམ་བསྐང་། །མི་འབྲལ་འགྲོགས་ཤིང་བཀྲ་ཤིས་ཕྱིར། །དམ་ཚིག་སྲོག་བཞིན་བསྲུང་བ་དང་། །ཕྱག་རྒྱ་ཆེ་དབྱིངས་བདེ་ཆེན་དང་། །དབྱེར་མེད་རྟོགས་པས་ཐུགས་དམ་བསྐང་། །བདག་ཅག་མ་རིག་དབང་གྱུར་པས། །ལྟ་སྒོམ་སྤྱོད་པ་དམན་པ་དང་། །
བག་མེད་བརྩོན་པ་གཡེལ་བ་དང་། །མཆོད་གཏོར་དུས་ལས་འགྱངས་བ་དང་། །དངོས་དམན་གཙང་སྦྲ་ཆུང་བ་སོགས། །རྩ་བ་ཡན་ལག་དམ་ཚིག་ལ། །ནོངས་པར་གྱུར་པ་གང་ལགས་པ། །སྙིང་ནས་བཤགས་སོ་དག་ཚངས་སྩོལ། །ཆོས་ཀུན་གདོད་ནས་དག་པ་ལ། །འཁྲུལ་མཚན་མཐའ་དག་མི་དམིགས་ཕྱིར། །བསྐང་དང་བཤགས་བྱ་མ་མཆིས་ཀྱང་། །རྟེན་འབྲེལ་སྒྱུ་མ་ལྟ་བུ་ཡི། །བསྐངས་ཤིང་བཤགས་པའི་རོལ་པ་འདིས། །རྩ་བ་གསུམ་དང་ཁྱད་པར་དུ། །སྨན་བཙུན་ལྷ་ཚོགས་དགྱེས་གྱུར་ནས། །དངོས་གྲུབ་མ་ལུས་སྩལ་དུ་གསོལ། །ཁྱད་པར་བདག་ཅག་འཁོར་བཅས་ལ། །དུས་དང་དུས་མིན་འཆི་བ་ལས། །རྣམ་རྒྱལ་བདུད་རྩིའི་བཅུད་ལེན་མཆོག །འཆི་མེད་ཚེ་ཡི་དངོས་གྲུབ་སྩོལ། །སྲིད་སྲུང་རིགས་རྒྱུད་སྤེལ་བ་དང་། །སྣང་གསལ་པྲ་ཡི་དངོས་གྲུབ་དང་། །རྨ་གཡང་ཟས་ཀྱི་དངོས་གྲུབ་དང་། །བང་མཛོད་ནོར་གྱི་དངོས་གྲུབ་
དང་། །རྐང་བཞི་ཕྱུགས་ཀྱི་དངོས་གྲུབ་དང་། །གཞན་ཡང་ཕྱི་ནང་གསང་བ་ཡི། །དངོས་གྲུབ་རྒྱ་མཚོའི་སྤྲིན་ཕུང་གིས། །བདག་ཡིད་འདོད་པ་འཇོ་བར་མཛོད། །ནད་གདོན་བར་ཆད་ཞི་བ་དང་། །ཚེ་བསོད་དཔལ་འབྱོར་མངའ་ཐང་རྒྱས། ཁམས་གསུམ་སྲིད་བཅུད་དབང་དུ་བསྡུས། །སྡང་དགྲ་གདོན་བགེགས་ཚར་ཆོད་ཅིག །སྒྲུབ་བརྒྱུད་མཆོག་གི་རིང་ལུགས་འདི། །ནུབ་མེད་ཕྱོགས་བཅུར་རྒྱས་པའི་གཟིས། །དྲེགས་ལྡན་མཐའ་དག་གཟིལ་གནོན་པའི། །རྣམ་རྒྱལ་རྒྱལ་མཚན་སྒྲེང་བར་མཛོད། །དངོས་བརྒྱུད་བསམ་སྦྱོར་མི་བསྲུན་པའི། །བསྟན་དགྲ་དམ་སྲིའི་དཔུང་བཅས་རྣམས། ཁ་ཕུང་རྗེས་མེད་རྡུལ་དུ་རློག །རྦོད་གཏོང་རང་གཤེད་རང་ལ་ཕོབས། །ངེས་དོན་བསྟན་པའི་སྙིང་པོ་འདི། །གང་དུ་གནས་པའི་རྒྱལ་ཁམས་སུ། །ནད་འཁྲུགས་མུ་གེའི་མིང་མེད་ཅིང་། །བདེ་སྐྱིད་ལོ་ལེགས་བཀྲ་ཤིས་མཛོད། །མདོར་ན་བསྟན་འགྲོར་སྨན་བགྱིད་
པའི། །བདག་ཅག་རྣམས་ཀྱི་རང་གཞན་དོན། །མཐའ་དག་གེགས་མེད་མྱུར་འགྲུབ་པའི། །བཀྲ་ཤིས་མཆོག་གི་བདེ་ལེགས་སྩོལ། །ཞེས་བརྗོད་དོ། །དེ་ལྟར་ལྷ་སྨན་རྒྱལ་མོ་ལྔའི་བསྐང་གསོལ་དང་འབྲེལ་བའི་བསྐང་བ་ཉུང་ངུར་བསྡུས་པ་འདི་ནི་ཧ་ཡ་གྲཱྀ་ཝ་ནཱ་ཐས་བསྐུལ་བའི་ངོར་བསྟན་པའི་ཉིན་བྱེད་ཀྱིས་ས་ག་ཟླ་བའི་དཀར་ཕྱོགས་བཟང་པོ་གཉིས་པའི་སྔ་དྲོའི་ཆར་ཐུབ་བསྟན་ཆོས་འཁོར་དུ་སྦྱར་བ་དགེ་ལེགས་འཕེལ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།