ལྷ་མགྲོན་བསྡུས་པ།
རེ་མནྟའི་གཏོར་འབུལ་ནི། དཀར་གཏོར་གཙང་མ་བྲན་ལ། ཨོཾ་ཨ་ཀ་རོ་མུ་ཁཾ་སརྦ་དྷརྨཱ་ནཾ་ཨ་དྱ་ནུཏྤན་ན་ཏྭཱ་ཏ་ཨོཾ་ཨཱཿཧཱུྃ་ཕཊ་སྭཱ་ཧཱ། གྱིས་བྱིན་བརླབས་ནས། ཧཱུྃ། རྡོ་རྗེ་ཁྲོ་བོ་རེ་མནྟ། །གུར་གུམ་གཞོན་ནུའི་མདོག་འདྲ་ཞིང་། །ཁྲོ་འཛུམ་བཞད་ཅིང་སྒེག་པའི་གཟུགས། །དབུ་ལ་དངུལ་གྱི་རྨོག་ཞུ་ལ། །བྱ་ཕོད་དཀར་པོས་རྒྱན་པ་གསོལ། །དམར་ལྗང་དར་བེར་འབར་བའི་སྟེང་། །བསེ་ཁྲབ་མི་ཞུབ་རྟ་ཞུབ་མནབ། །ཕྱག་གཡས་རྡོ་རྗེ་རྩེ་ལྔ་འཕྱར། །གཡོན་པས་གཏེར་གྱི་ནེའུ་ལེ་འཛིན། །མདུང་དར་དམར་པོ་གྲུ་ན་བཅུག །ཆིབས་སུ་རྟ་སྔོན་ཆུ་རིས་ཆིབས། །སྔོན་པོ་སྒབ་སེར་རོལ་དུ་ཁྲིད། །སྤྱི་བོའི་གཙུག་ན་ཁྱུང་ཆེན་ལྡིང་། །ཕྲག་གོང་ལྕགས་ཀྱི་བྱ་ཁྲ་འཇུམ། །སེང་ཆེན་གཉིས་ནི་ཕྱི་ནས་འགྱིང་། །རྒྱ་སྟག་གཉིས་ནི་མདུན་ནས་འགྲོ། །རང་འདྲ་ལྔ་བརྒྱའི་འཁོར་དང་བཅས། །འདིར་གཤེགས་རྒྱན་པའི་གཏོར་མ་བཞེས། །རྔོག་ཆགས་འཕེལ་ཞིང་རྒྱས་པ་དང་། །ཚེ་སྲོག་
བརྟན་པའི་ཕྲིན་ལས་མཛོད། ཧཱུྃ། དཔལ་རབ་འཆང་བའི་མགོན་པོ་ནི། །ཀུནྡའི་མདོག་ཅན་ཁྲོ་ཞིང་བཞད། །དར་ནག་བེར་གསོལ་གཡུ་འབྲུག་ཆིབས། །ཕྱག་ན་འཁོར་ལོ་ཞགས་པ་བསྣམས། །འདིར་གཤེགས་རྒྱན་པའི་གཏོར་མ་བཞེས། །རྟ་ནད་ཞི་བའི་ཕྲིན་ལས་མཛོད། །ཧཱུྃ། དཔལ་ལྡན་ཨཱརྱ་རེ་མནྟ། །བཙོ་མ་གསེར་གྱི་ཁ་དོག་འཆང་། །གཞོན་ནུ་ཉི་མའི་སྲས་པོ་ནི། །པདྨ་རཱ་གའི་ཁ་དོག་ཅན། །འདིར་གཤེགས་བརྒྱན་པའི་གཏོར་མ་བཞེས། །རྟ་གཡང་དངོས་གྲུབ་སྩལ་དུ་གསོལ། །ཧཱུྃ། མ་ཧཱ་ཀྲོ་དྷ་རེ་མནྟ། །སྤྲུལ་པ་ཁྱུང་གིས་ནམ་མཁའ་གང་། །ལྕགས་ཀྱི་བྱ་ཁྲས་བར་སྣང་གང་། །སྟག་དང་སེང་གེས་ས་གཞི་གང་། །འདིར་གཤེགས་བརྒྱན་པའི་གཏོར་མ་བཞེས། །རྟ་ལ་གནོད་བྱེད་རྡུལ་དུ་རློག །ཧཱུྃ། སྲིད་གསུམ་དབང་བསྒྱུར་གང་བ་བཟང་། །སེམས་དཔའ་རྡོ་རྗེ་རྣམ་ཐོས་སྲས། །ནོར་ལྷ་བྱེ་བ་འབུམ་དང་བཅས། །འདིར་གཤེགས་བརྒྱན་པའི་
གཏོར་མ་བཞེས། །རྔོག་ཆགས་སྲུང་ཞིང་བསྐྱབ་པ་དང་། །འཕེལ་ཞིང་རྒྱས་པའི་ཕྲིན་ལས་མཛོད། །ཧཱུྃ། ལྷ་ཆེན་མ་ཧཱ་ཀཱ་ལ་ནི། །རྟ་ནག་རྟིང་དཀར་ཆིབས་སུ་ཆིབས། །ཉི་ཟླ་སྐར་ཆེན་འོད་ཟེར་འཕྲོ། །སྟོང་གསུམ་གླིང་བཞི་ཡུད་ཀྱིས་ཉུལ། །འདིར་གཤེགས་བརྒྱན་པའི་གཏོར་མ་བཞེས། །རྟ་འདྲེ་རྟིལ་སྲི་ཚར་གཅོད་ཅིག །ཧཱུྃ། གནོད་སྦྱིན་རྟ་བདག་ཀུ་བེ་ར། །རང་འདྲའི་སྤྲུལ་པ་འབུམ་དང་བཅས། །རལ་གྲི་ཕྱར་ཞིང་གནོད་བྱེད་འདུལ། །འདིར་གཤེགས་བརྒྱན་པའི་གཏོར་མ་བཞེས། །གཞི་བྱེས་ལམ་གསུམ་གར་འདུག་ཀྱང་། །རྟ་ཡི་རྫིའུ་མ་གཡེལ་ཅིག །བཅོལ་བའི་ཕྲིན་ལས་འགྲུབ་པར་མཛོད། །ཅེས་གཏོར་མ་གཙང་སར་ཕུལ། ཆོ་ག་རྒྱས་པ་མ་ལྕོགས་ན་གཏོར་འབུལ་ཁོ་ནས་ཆོག །ཅེས་པ་རྟ་གཟུངས་ཆོ་གའི་ཁ་སྐོང་དུ་རིག་སྔགས་འཛིན་པ་རཱ་ག་ཨ་སྱས་བྲིས་པའོ། །འདི་བྲིས་ཉེས་པ་རྟ་ལྷའི་ཚོགས་ལ་བཤགས་ཤིང་དགེ་བས་བཀྲ་ཤིས་བདེ་ལེགས་འབྱུང་གྱུར་ཅིག ༈ གཟའི་མཆོད་གཏོར་ཉུང་ངུ་ནི། ཧཱུྃ། གཟའ་
མཆོག་ཆེན་པོ་འཁོར་བཅས་ལ། །དམར་གཏོར་བཤོས་བུ་དགུ་བསྐོར་དང་། །དགྲ་བོའི་ཤ་ཁྲག་རུས་པ་དང་། །མེ་ཏོག་སྟོང་དང་ཆུ་སྣ་སྟོང་། །སྨན་སྣ་སྟོང་དང་ཤ་སྣ་སྟོང་། །སྙིང་སྣ་སྟོང་དང་ཁྲག་སྣ་སྟོང་། །གསུར་ཆེན་རོལ་མོ་སྣ་ཚོགས་ཀྱིས། །དྲང་སྲོང་འཁོར་བཅས་ཐུགས་དམ་བསྐང་། །དུག་གི་ཟོར་ཁ་དགྲ་ལ་བསྒྱུར། །གདུག་པའི་ཁ་རླངས་དགྲ་ལ་བསྒྱུར། །བདག་ཅག་དཔོན་སློབ་མི་ཕྱུག་བཅས། །ཁྱོད་ཀྱི་བུ་སྤུན་ཚ་བོ་བཞིན། །རྟག་ཏུ་བསྲུངས་སྐྱོབས་མ་གཡེལ་ཅིག །ཨོཾ་ཀེ་ཏ་ཀེ་ཏ་རཱ་ཧུ་ལ་སྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་བཛྲ་ཨརྒྷཾ་པཱདྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝིདྱ་ཤབྡ་པྲ་ཏཱི་ཙྪ་ཡེ་སྭཱ་ཧཱ། ཅེས་མཆོད། བསྟོད་པ་ནི། ཧཱུྃ། དྲང་སྲོང་ཆེན་པོ་གཟའ་མཆོག་རཱ་ཧུ་ལ། །སྐུ་མདོག་དུད་ཁ་དབུ་དགུ་སྤྱན་སྟོང་འབར། །ཕྱག་བཞི་རལ་གྲི་མདའ་གཞུ་ཆུ་སྲིན་ཞགས། །བསྐལ་པའི་མེ་འབར་ཁྱོད་ལ་ཕྱག་འཚལ་བསྟོད། །དཔའ་བོ་ཁྱོད་ཀྱི་སྲིང་མོ་གདོང་མོ་བཞི། །
གཟའ་བརྒྱད་སྡེ་བརྒྱད་རྒྱུ་སྐར་ཉི་ཤུ་བརྒྱད། །ཁྱི་དང་ལྕེ་སྤྱང་བདུད་བྱ་ལ་སོགས་པ། །ཕོ་ཉ་ལས་བྱེད་ཚོགས་ལ་ཕྱག་འཚལ་བསྟོད། །དམ་རྫས་རྒྱན་པའི་གཏོར་མ་འདི་བཞེས་ལ། །སྡང་བའི་དགྲ་ལ་ཆོ་འཕྲུལ་མྱུར་དུ་ཕོབས། །འཁོར་བཅས་སྡང་བྱེད་དགྲ་བོའི་སྟེང་དུ་བྷྱོ། ཅེས་བརྗོད་ལ་རང་གནས་སུ་སོང་བར་བསམ། ཨ་རཱ་གས་སོ། ༈ ན་མོ་པདྨ་ཀ་ར་ཤྲཱི་བཛྲ་ཀུ་མ་རཱ་ཡ། ལྷ་ཆེན་རྨ་རྒྱལ་སྤོམ་རའི་གསོལ་ཁ་རྒྱུན་ཁྱེར་བྱ་བར་མཆོད་གཏོར་གསེར་སྐྱེམས་བཤམས་ལ། ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ་བརྗོད་པས་བྱིན་བརླབས་ཏེ། ཀྱཻ། ཤར་ཕྱོགས་རྨ་གཡང་འདོད་དགུ་འབྱུང་བའི་ཡུལ། །གངས་དཀར་རིན་ཆེན་སྣ་ཚོགས་ཕོ་བྲང་ནས། །གཉན་པོ་ལྷ་ཆེན་རྨ་རྒྱལ་སྤོམ་ར་ནི། །སྐུ་མདོག་དཀར་པོ་དུང་ཁྲབ་དུང་རྨོག་གསོལ། །དར་བེར་བརྗིད་ལྡན་མདུང་དར་གཏེར་བུམ་འཛིན། །ནོར་བུའི་རྒྱན་སྤྲས་རྟ་མཆོག་ངང་པ་ཆིབས། །ཡབ་ཡུམ་སྲས་བློན་རུ་འདྲེན་མཆེད་འཁོར་བཅས། །འདིར་གཤེགས་གདན་བཞུགས་པདྨའི་དམ་
ཚིག་དགོངས། །ཉེར་སྤྱོད་ལྔ་དང་འདོད་ཡོན་རྣམ་པ་ལྔ། །རྒྱལ་སྲིད་སྣ་བདུན་བཀྲ་ཤིས་རྫས་རྟགས་བརྒྱད། །སྤྱན་གཟིགས་དཀོར་ནོར་རཏྣ་འབྲུ་སྨན་དང་། །བརྒྱན་པའི་གཏོར་མ་བདུད་རྩིའི་གསེར་སྐྱེམས་བཞེས། །ཨོཾ་ཨཱཿབཛྲ་ཀུ་ལི་མིལ་མན་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། བཛྲ་ཀུ་མ་རི་ཕུ་ཏྲི་ས་པཱ་རི་ཝཱ་ར་ཨརྒྷཾ་པཱདྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝིདྱ་ཤབྡ་པྲ་ཏཱིཙྪ་སྭཱ་ཧཱ། སརྦ་པཉྩ་ཨ་མྲྀ་ཏ་ཁཱ་ཧི། སྲིད་པ་ཆགས་པའི་མགུལ་ལྷའི་གཙོ་བོ་སྟེ། །ས་བརྒྱད་དབང་ཕྱུག་དཀར་ཕྱོགས་འབྱུང་པོའི་གཙོ། །རྨ་གཡང་ཀུན་གྱི་མངའ་བདག་རྫུ་འཕྲུལ་ཅན། །རྨ་རྒྱལ་སྤོམ་ར་འཁོར་དང་བཅས་ལ་བསྟོད། །བསྟན་པ་སྲུངས་ལ་འགྲོ་བའི་བདེ་སྐྱིད་སྤེལ། །བདག་སོགས་མི་མཐུན་འགལ་རྐྱེན་ཀུན་ལས་སྲུངས། །ཁམས་གསུམ་སྐྱེ་འགྲོ་དབང་དུ་འདུ་བ་དང་། །ཟས་ནོར་དཔལ་འབྱོར་རྒྱས་པའི་ཕྲིན་ལས་མཛོད། །རྟེན་ལ་བསྟིམ་པའམ། གཙྪས་རང་གནས་སུ་གཤེགས། དེ་ལྟར་སྤོམ་
ར་འཁོར་བཅས་ཀྱི་མཆོད་གཏོར་འབུལ་ཐབས་འདི་ཡང་། རིག་འཛིན་ཀློང་གསལ་སྙིང་པོའི་རྣམ་རོལ་མཆོག་སྤྲུལ་དབང་གི་རྡོ་རྗེའི་ཐུགས་བཞེད་ལྟར་རྡོ་རྗེ་དྲག་པོས་དཔལ་སྤུངས་སུ་སྦྱར་བ་ཛ་ཡ་ཛ་ཡ་སུ་ཛ་ཡ། ༈ བྲག་བཙན་གྱི་གསོལ་མཆོད་བསྡུས་པ་ནི། ཧཱུྃ་ཡ་བྷྱོ། བདག་ཉིད་དཔལ་ཆེན་སྤྱན་སྔ་རུ། །སྔོན་གྱི་དམ་ཚིག་དབང་གིས་ནི། །བཙན་རྒོད་རི་བཀྲའི་གནས་མཆོག་ནས། །རྡོ་རྗེ་དབང་དྲག་འབར་བ་རྩལ། །སྤྲུལ་འཁོར་བཅས་པ་གནས་འདིར་གཤེགས། །ཕྱི་ནང་མཆོད་ཚོགས་བསང་གསུར་དུད། །བཤུག་གླུ་རྔ་རོལ་ལ་སོགས་དང་། །ཁྱད་པར་སྡང་དགྲའི་ཤ་ཁྲག་རུས། །རྐང་ཀླད་ངོ་བོ་གཏོར་མ་འདི། །འབུལ་ལོ་དགྱེས་བཞེས་རོལ་ཅིག་རོལ། །བདག་ཅག་དམ་ལྡན་སྒྲུབ་པ་པོའི། །ཞི་རྒྱས་དབང་དྲག་ཕྲིན་ལས་ཀུན། །ཐོགས་པ་མེད་པར་འགྲུབ་པར་མཛོད། །སྐྱ་རྒྱལ་འབྲོང་བུ་གཉན་པོ་སོགས། །འགོ་བའི་ལྷ་སྲུང་རྣམས་ལ་ཡང་། །མཆོད་ཚོགས་རྒྱ་མཚོས་ལེགས་མཆོད་དོ། །བསྟོད་དོ་བརྔན་ནོ་མངའ་གསོལ་
ལོ། །ཀཾ་ཚང་བསྟན་དང་བསྟན་འཛིན་སྤེལ། །མི་ནུབ་བསྟན་པའི་རྒྱལ་མཚན་ཕྱོར། །བཀྲ་ཤིས་བདེ་ལེགས་རྒྱས་པར་མཛོད། །ཡ་མ་ར་ཛ་ཙ་མུན་ཏྲི་ཁྲག་རྒལ་མུན་ཙེ་ས་མ་ཡ་ཛཿཛཿ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། རཀྟ་པི་པ་ཏོ་སརྦ་ཤ་ཏྲཱུྃ་མཱ་ར་ཡ་ཙིཏྟ་ཁཱ་ཧི། ཅེས་པའང་ཀཿཐོག་རིག་འཛིན་ཆེན་པོ་རྡོ་རྗེ་ཚེ་དབང་ནོར་བུ་གཏེར་བཞེད་རྩལ་གྱིས་མཛད་པའོ། ༈ དམ་ཅན་འབར་བ་རྩལ་གྱི་རྒྱུན་ཁྱེར་བཞུགས་སོ།། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱ་ཏ་ཨོཾ་ཨཱཿཧཱུྃ་ཕཊ་སྭཱ་ཧཱ། བྱིན་གྱིས་བརླབས། ཨོཾ། དྲི་ཟའི་རྒྱལ་པོ་ས་བརྒྱད་གནས་པའི་མཆོག །སྟོང་གསུམ་གཞི་བདག་ཀུན་གྱི་རྗེ་བོར་གྱུར། །འཁོར་གཡོག་དང་བཅས་བརྒྱ་བྱིན་སྲས་མོ་ནི། །མཚོ་སྨན་བཅས་པ་འདིར་གཤེགས་གཏོར་མ་བཞེས། །བདག་གི་བསམ་པ་ཐམས་ཅད་བསྒྲུབ་པ་དང་། །བསྟན་པ་འཕེལ་ཞིང་འདོད་དགུ་རྒྱ་ཆེར་ལྡན། །གདུག་འདྲེའི་ནད་དང་གནོད་པ་ཞི་བ་དང་། །ཐམས་ཅད་བདེ་དགར་སྤྱོད་པའི་བཀྲ་ཤིས་སྩོལ། །ཨོཾ་ཨཱཿམ་
ནུ་ཥེ་གནྡྷརྦྷ་རཱ་ཛ་ས་པ་རི་ཝཱ་ར་ཨི་དམ་བཱ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ། ཨོཾ་བཛྲ་ཐང་ཀ་ར་མུན་ཉི་ཁུ་ཤ་ལི་ཨ་མྲྀ་ཏ་ཁཱ་ཧི་ཁཱ་ཧི། བཛྲ་འབར་བ་རྩལ་ཨརྒྷཾ་པཱདྱཾ་པཱུཥྤེ་དྷཱུ་པེ་ཨཱ་ལོ་ཀེ་གནྡྷེ་ནེ་ཝེདྱ་ཤབྡ་པྲ་ཏཱིཙྪ་ཨཱཿཧཱུྃ། ཞེས་གཏོར་མ་བསྔོའོ།། ཧཱུྃ། ཡང་ཅིག་བཞེངས་ཤིག་ནག་པོ་ཏི་པ་རཱ་ཙ་ཁྱོད། །བྱང་ཕྱོགས་རྒྱུད་དུ་ཆེ་བའི་སྐུར་སྟོན་པ། །གཉན་ཆེན་ཐང་ལྷ་ཞེས་སུ་མཚན་ཡང་གསོལ། །དམ་རྫས་རྒྱན་པའི་གཏོར་མ་འདི་བཞེས་ལ། །བདག་ཅག་རིག་འཛིན་འཁོར་དང་བཅས་པ་ཡིས། །མི་མཐུན་རྐྱེན་སོལ་མཐུན་རྐྱེན་བསམ་པ་སྒྲུབས། །སྤྲུལ་པ་དུང་གཡག་དུང་གི་བྱ་ཁྲ་དང་། །ལྕགས་སྡིག་མགོ་དགུའི་ཚུལ་དུ་འདིར་བྱོན་ལ། །གནོད་བྱེད་རྒྱལ་འགོང་སྨྱོ་འདྲེ་རྡུལ་དུ་རློག །དམ་བཅའ་དམ་ལས་མ་འདའ་ས་མ་ཡ། ཨོཾ་ཨཱཿཧཱུྃ་ཧྲཱིཿ བཛྲ་འབར་བ་རྩལ་བིགྷྣན་རཱ་ཛ་མཱ་ར་ཡ་ཕཊ། ཅེས་པའང་གཏེར་རྙིང་ལས་འབྱུང་བ་ཆགས་མེད་ཨ་རཱ་གའི་གསུང་རྒྱུན་ངོ་མའོ། ༈ །གེ་སར་སྐྱེས་བུའི་མཆོད་ཕྲིན་ནི།
ནམ་མཁའ་མཐིང་གི་གུར་ཁང་ནས། །འཇའ་འོད་འཐིབས་པའི་ཀློང་དཀྱིལ་ནས། །འཛམ་གླིང་ཡོངས་ཀྱི་དགྲ་ལྷ་ཆེ། །པདྨའི་ཕྲིན་ལས་སྤྲུལ་པ་སྟེ། །ཁྲི་སྲོང་ལྡེའུ་བཙན་རྫུ་འཕྲུལ་གར། །ནག་ཕྱོགས་བདུད་སྡེ་བརླག་པ་དང་། །བསྟན་དགྲའི་གཤེད་མ་རྫུ་འཕྲུལ་ཅན། །སེང་ཆེན་ནོར་བུ་དགྲ་འདུལ་ནི། །མི་སྨུག་གཡུ་ཡིས་སྨིན་མ་ཅན། །སྐུ་ལ་ཟིལ་པའི་ཐོག་རྡུག་བརྗིད། །དབུ་ལ་དངུལ་གྱི་རྨོག་ཞུ་གསོལ། །སྒྲོ་དར་བྱ་འུར་ཚུབས་སེ་ཚུབ། །དགྲ་ལྷའི་ཚེ་མདུད་སྤུངས་སེ་སྤུང་། །སྟག་གདོང་གཡས་ལ་གཟིག་ཤུབ་གཡོན། །བཏབ་པ་ལན་མེད་སྐེད་ལ་བསྐོར། །སྦ་ལྕག་ཕྱར་ཞིང་མདུང་དར་འཛིན། །རྐྱང་རྒོད་འཕེལ་པོ་ཆིབས་སུ་ཆིབས། །དགྲ་བླ་ཝེར་མའི་ཚོགས་དང་བཅས། །འདིར་གཤེགས་མཆོད་སྤྲིན་དམ་པ་བཞེས། །ནག་ཕྱོགས་བདུད་སྡེའི་བརྫུ་བ་ཡི། །གཟུགས་ཅན་གཟུགས་མེད་དགྲ་བགེགས་རྣམས། །མྱུར་དུ་ཚར་གཅོད་ཕྲིན་ལས་མཛོད། །ཅེས་
པའང་འཛི་སྒར་རྡོ་རྗེ་དྲག་པོས་མཛད་པའོ། ༈ བྲག་བཙན་དབྱི་རྒྱལ་དཔལ་ལྡན་ཤེས་རབ་དང་། །རྡོ་རྗེ་སྨན་དཔལ་གཙང་སྨེ་ནག་ཕྱི་སོགས། །ལྷ་ཆེན་གནོད་སྦྱིན་གང་བ་བཟང་པོ་རྩལ། །རིགས་བཞི་འཁོར་ཚོགས་ལྷ་ཡི་དམག་རྒྱལ་སོགས། །ཡུལ་གཞི་གནས་བདག་རྣམས་ལ་གཏོར་མཆོད་འབུལ། །དགྱེས་བཞེས་རྣམ་བཞིའི་ཕྲིན་ལས་སྒྲུབ་པར་མཛོད། །ཅེས་པའང་རྗེ་བཅུ་བཞི་པས་མཛད་པའོ།། ༈ ཧཱུྃ། རྫུ་འཕྲུལ་སྟོབས་ལྡན་བཙན་གྱི་རྗེ། །ཕྱྭ་རྒྱལ་མེ་ཏྲི་འཁོར་དང་བཅས། །དངོས་འབྱོར་ཡིད་སྤྲུལ་མཆོད་སྤྲིན་ཚོགས། །ཤ་ཁྲག་དམར་གྱི་གཏོར་མ་དང་། །མཁོ་དགུའི་ལོངས་སྤྱོད་དཔག་མེད་པ། །འབུལ་ལོ་དགྱེས་བཞེས་སྙིང་པོའི་བསྟན། །ནུབ་མེད་ཕྱོགས་བརྒྱར་འཕེལ་བ་དང་། །དེ་འཛིན་མཆོག་རྣམས་ཞབས་བརྟན་ཅིང་། །བདག་སོགས་ཚེ་དང་དཔལ་འབྱོར་རྒྱས། །ཕྱི་ནང་ཉེར་འཚེ་ཀུན་ཞི་ཞིང་། །གནོད་བྱེད་དགྲ་རྐུན་ཐལ་བར་རློག །ཅི་བཅོལ་ཕྲིན་ལས་མ་
ལུས་པ། །ཐོགས་མེད་མྱུར་དུ་འགྲུབ་པར་མཛོད། །ཅེས་ཀརྨ་ཀ་བཅུ་བཞི་པས་བྲིས་པ་ཛ་ཡནྟུ། གྱང་རྗེ་བཙན་པོ་འཁོར་བཅས་སོགས། །ཡུལ་ལྷ་གཉེན་པོ་ཐམས་ཅད་ལ། །མཆོད་སྤྲིན་རྒྱ་མཚོས་ལེགས་མཆོད་ན། །བདག་ཅག་དཔོན་སློབ་འཁོར་བཅས་ཀྱི། །ཕྲིན་ལས་རྣམ་བཞི་འགྲུབ་པར་མཛོད། །འདིའང་རྒྱལ་མཆོག་བཅུ་བཞི་པས་བསྩལ་བའོ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།