མ་མོའི་འཁྲུངས་སྐོང་བདུད་རྩིའི་བུམ་པ།
ཡི་དམ་དགོངས་འདུས་རྟ་མཆོག་རོལ་པའི་བཀའ་སྲུང་གསང་བ་ཀུན་འདུས་ལས༔ མ་མོའི་འཁྲུགས་སྐོང་བདུད་རྩིའི་བུམ་པ་ཞེས་བྱ་བ་བཞུགས་སོ། །
བཅོམ་ལྡན་འདས་ཧེ་རུ་ཀ་ཐམས་ཅད་ཀྱི་བདག་པོ་ལ་ཕྱག་འཚལ་ལོ༔ ཡི་དམ་དགོངས་འདུས་རྟ་ཆོག་རོལ་པ་ལས༔ མ་མོའི་འཁྲུགས་སྐོང་བདུད་རྩིའི་བུམ་པ་བསྟན་པ་ནི༔ མ་འོངས་སེམས་ཅན་ཐམས་ཅད་ཉོན་མོངས་རག་པས་མི་དགེ་སྤྱོད་པའི་སྟབས་མ་མོ་འཁྲུགས་ཏེ༔ དུས་མ་འོངས་པའི་ཚེ་ལས་བྱ་བ་བཟང་ངན་ཐམས་ཅད་མ་མོ་ཁོ་ནས་བྱེད་དེ་མ་མོ་ཞེས་པ་ནི་འཇིག་རྟེན་སྲིད་པ་ཐམས་ཅད་ཀྱི་མ་ཡིན་པས༔ བུའི་བྱད་བཟང་ན་མ་དགའ༔ བུའི་བྱད་ངན་ན་མ་སྡུག༔ མ་སྡུག་པས་བུ་ལ་ཤུགས་ཀྱིས་གདུང་བ་ལྟར༔ སེམས་ཅན་ཐམས་ཅད་མི་དགེ་བ་སྟོབས་ཆེ་བས་མ་མོ་ཐམས་ཅད་འཁྲུགས་ནས་ནད་མུག་འཁྲུགས་བ་ཐམས་ཅད་འབྱུང་བས་དེ་
ལ་འཁྲུགས་སྐོང་བྱ་བ་ནི༔ བདུད་རྩི་ཨ་མྲྀ་ཏ་བཅུད་ལྡན་སྨན་སྣ་བཅས་ཀ་པཱ་ལ་གང་བཅས་བཤམས་ཤིང་སྨན་ཀྱང་གཏོར་ལ་འདི་སྐད་དོ༔ ཧཱུྃ་བྷྱོ༔ མ་འོངས་རྩུབ་འགྱུར་རབ་ཏུ་འཁྲུགས༔ སྙིགས་མ་ལྔ་བརྒྱའི་དུས་བྱུང་ཚེ༔ བཀའ་བཞིན་མི་བྱེད་བཀའ་འཆལ་དཀྲུགས༔ གསང་སྔགས་མི་གསང་ནོར་ལ་འཚོང་༔ བོན་དུ་གྱེར་ཞིང་གྲོང་བསྙེན་བྱེད༔ མངོན་དུ་གྱེར་ཞིང་མངོན་སྤྱོད་བྱེད༔ དོན་མ་རྟོགས་ཤིང་ཟོ་ཆོ་བྱེད༔ ནང་འཐབ་བྱེད་ཅིང་འདུལ་ཁྲིམས་ཉམས། སློབ་དཔོན་ཕ་མའི་བཀའ་ཡང་བཅག༔ སྐྱེ་བོ་རང་ཁ་
སྡིག་སྤྱོད་བྱེད༔ དེ་ཚེ་སྲིད་པའི་མ་མོ་འཁྲུགས༔ འཁྲུགས་པའི་མ་མོའི་ཐུགས་དམ་བསྐང་༔ བསྐང་ངོ་བསྐལ་པར་ཐུགས་དམ་བསྐང་༔ གཞན་ཡང་མ་མོ་འཁྲུགས་པའི་རྒྱུ༔ མཆོད་པ་ལོ་ཟླར་འདས་པ་དང་༔ ཁས་བླངས་དགེ་བ་ཆགས་པ་དང་༔ ཡོ་བྱད་དམ་རྫས་མ་ཚང་དང་༔ བཟླས་བརྗོད་བར་ཆད་བྱས་པ་དང་༔ ཕུད་ཉམས་ལྷག་མའི་གཏོར་མ་དང་། ཐེ་ཚོམ་ཡིད་གཉིས་ཤོར་བ་ནི༔ སྲིད་པའི་མ་མོ་འཁྲུགས་པའི་རྒྱུ༔ འཁྲུགས་པའི་མ་མོ་བསྐང་བར་བྱ༔ བསྐང་ངོ་བསྐལ་པར་ཐུགས་དམ་བསྐང་༔ གཞན་ཡང་དམ་ཚིགས་ཉམས་པའི་རྒྱུ༔ སྐུ་ཡི་ཕྱག་རྒྱ་རིང་དུ་སྤངས༔ རྡོ་རྗེ་སློབ་དཔོན་སྐུ་ལ་བརྙས༔ རྡོ་རྗེ་སྤུན་ལ་དམ་ཚིག་མེད༔ སྐུ་ཡི་དམ་ཚིགས་ཉམས་གྱུར་པ༔ ཡེ་ཤེས་སྐུ་ལྔའི་ཐུགས་དམ་བསྐང་༔ གཞན་ཡང་དམ་ཚིགས་ཉམས་པའི་རྒྱུ༔ གསུང་གི་ཕྱག་རྒྱ་རྒྱུན་བཅད་པས༔ གསུང་གི་དམ་ཚིགས་ཉམས་གྱུར་པ༔ རྣམ་གྲོལ་གསུང་གི་ཐུགས་དམ་བསྐང་༔
ཏ་ན་ག་ནས་ཕྲིན་ལས་ཉམས༔ ཐུགས་ཀྱི་དམ་ཚིགས་ཉམས་པ་བསྐང་༔ ཉི་ཤུ་རྩ་བརྒྱད་གྲངས་ཆགས་པ༔ ཡན་ལག་དམ་ཚིགས་ཉམས་པ་བསྐང་༔ བསྐང་ངོ་བསྐལ་པར་ཐུགས་དམ་བསྐང་༔ གཙོ་མོ་སྐུ་ཡི་དམ་ཉམས་ན༔ མཐོ་རིས་ཐར་པའི་ལམ་ཡང་ཆད༔ གསུང་གི་དམ་ཚིགས་ཉམས་པ་ན༔ བསྒྲུབས་ཀྱང་དངོས་གྲུབ་མི་ཐོབ་ཅིང་༔ སྡགས་བཟླས་ནུས་པ་མེད་པར་འགྱུར༔ ཐུགས་ཀྱི་དམ་ཙིག་ཉམས་པ་ན༔ མཁའ་འགྲོ་འཁྲུགས་ཤིང་མི་དགེ་འབྱུང་༔ ཚེ་འཕོས་རྡོ་རྗེའི་དམྱལ་བར་འགྲོ༔ དེ་དག་ཐམས་ཅད་མཐོལ་བཤགས་ནས༔ བསྐང་ངོ་བསྐལ་པར་ཐུགས་དམ་བསྐང་༔ མ་མོའི་སྐུ་ཡི་དམ་ཚིགས་ཉམས་པ་ན༔ རྒྱལ་པོའི་ཆད་པ་སྦྲུལ་དུག་འབྱུང་༔ མེ་དང་ཆུ་རླུང་བར་ཆད་འབྱུང༔ ཉམས་པ་བཤགས་སོ་ཐུགས་དམ་བསྐང་༔ གསུང་གི་དམ་ཚིགས་ཉམས་པ་ན༔ བསྒྲུབ་ལ་གཡེལ་ཅིང་ནུས་མཐུ་ཆུང་༔ བསྒྲུབ་ཏུ་མི་སྟེར་བར་ཆད་འབྱུང་༔
ཉམས་པ་བཤགས་སོ་ཐུགས༴ ཐུགས་ཀྱི་དམ་ཚིགས་ཉམས་གྱུར་ན༔ ན་ཚ་སྡུག་བསྔལ་སྣ་ཚོགས་དར༔ ཉམས་ལེན་མི་འོང་བར་ཆད་རྒོད༔ ཉམས་པ་བཤགས་སོ༴ ཁོལ་མོ་སྐུ་ཡི་དམ་ཚིག་ཉམས་གྱུར་ན༔ འཁོར་ལ་རིམས་ནད་སྨྱོ་འབོག་འོང་༔ དགྲ་རྣམས་ཚེ་དང་ལོངས་སྤྱོད་རྒྱས༔ ཉམས་པ་བཤགས་སོ༴ གསུང་གི་དམ་ཚིག་ཉམས་པ་ན༔ བུ་དང་ཆུང་མ་འཆི་བར་འགྱུར༔ སྙིང་ཡང་མི་དགའ་ཡང་ཡེང་མང་༔ ནོར་དང་ལོངས་སྤྱོད་ཟད་པར་འགྱུར༔ ཉམས་པ་བཤགས་སོ༴ ཐུགས་ཀྱི་དམ་ཚིག་ཉམས་པ་ན༔ རང་གི་ཚེ་ལ་བར་ཆད་འོང་༔ ཚད་ནད་རྒྱུ་གཟེར་འབྲུམ་ཡམས་འབྱུང་༔ ཉམས་པ་བཤགས་སོ༴ བསྐང་ངོ་བསྐལ་པར་ཐུགས་དམ་བསྐང་༔ མ་མོ་སྤྱི་ཡི་དམ་ཚིག་ཉམས་པ་ན༔ རྟག་པར་བསྒྲུབས་ཀྱང་འགྲུབ་དུས་མེད༔ ནང་དགྲ་ཁ་མཆུ་མི་འབྲལ་འཁྲུགས༔ དེ་ཡང་བསྐང་ལ་བཤགས་པར་བྱ༔ བསྐང་ངོ་བསྐལ་པར་ཐུགས་དམ་བསྐང་༔ དམ་ཚིག་
བསྲུངས་པའི་ཡོན་ཏན་དུ༔ གཙོ་མོ་སྐུ་ཡི་དམ་ཚིག་མ་ཉམས་ན༔ བླ་མེད་བྱང་ཆུབ་གོ་འཕང་ཐོབ༔ གསུང་གི་དམ་ཚིག་མ་ཉམས་ན༔ རྡོ་རྗེའི་ངག་ལ་དབང་ཐོབ་འགྱུར༔ ཐུགས་ཀྱི་དམ་ཚིག་མ་ཉམས་ན༔ ཕྲིན་ལས་རྣམ་བཞི་མྱུར་དུ་འགྲུབ༔ མཁའ་འགྲོ་ཐམས་ཅད་མངོན་དུ་འོང་༔ མཐུ་དང་རྫུ་འཕྲུལ་བསམ་མི་ཁྱབ༔ བསྐང་ངོ་བསྐལ་པར་ཐུགས་དམ་བསྐང་༔ ལྷ་མོ་སྐུ་ཡི་དམ་ཚིག་མ་ཉམས་ན༔ ལྷ་སྲིན་རྒྱལ་པོས་ཕྱག་བྱས་ནས༔ འདོད་པ་ཁམས་ཀྱི་རྒྱལ་སྲིད་ཐོབ༔ གསུང་གི་དམ་ཚིག་མ་ཉམས་ན༔ སྡགས་བཟླས་མཁའ་འགྲོ་དངོས་སུ་འོང་༔ བར་ཆད་མེད་པར་དངོས་གྲུབ་སྟེར༔ མིག་རྣོ་རྐང་མགྱོགས་དངོས་གྲུབ་ཐོབ༔ ཉམས་པ་བཤགས་སོ་ཐུགས་དམ་བསྐང་༔ ཐུགས་ཀྱི་དམ་ཚིག་མ་ཉམས་ན༔ བདུད་དང་དགྲ་ཡིས་མི་ཚུགས་ཤིང་༔ རྟག་ཏུ་རིམས་ནད་མི་འབྱུང་བདེ༔ དགྲ་བགེགས་མ་ལུས་རང་སར་ཡལ༔ ལྷ་དང་མི་ཡིས་བཀུར་
བར་འགྱུར༔ ཚེ་རིང་ནོར་དང་ལྡན་པར་འགྱུར༔ བསྐང་ངོ་བསྐལ་པར་ཐུགས་དམ་བསྐང་༔ ཧཱུྃ༔ ཁོལ་མོ་སྐུ་ཡི་དམ་ཚིག་མ་ཉམས་ན༔ འཁོར་ནི་བཀྲ་ཤིས་དར་ཞིང་རྒྱས་པ་དང་༔ དགྲ་དང་བགེགས་རྣམས་ཕུང་བར་བྱེད༔ གསུང་གི་དམ་ཚིག་མ་ཉམས་ན༔ བུ་དང་ཆུང་མ་དར་བ་དང་༔ ནོར་དང་ལོངས་སྤྱོད་རྒྱས་པར་འགྱུར༔ ཐུགས་ཀྱི་དམ་ཚིགས་མ་ཉམས་ན༔ ཚེ་རིང་གྲགས་པ་ཐོབ་པར་འགྱུར༔ ལུས་ལ་ནད་ཀྱིས་མི་ཐེབ་བོ༔ སེམས་ལ་སྡུག་བསྔལ་རྐྱེན་དང་བྲལ༔ མཐུ་རྩལ་མངའ་ཐང་ཐོབ་པར་འགྱུར༔ བསྐང་ངོ་བསྐལ་པར་ཐུགས་དམ་བསྐང་༔ ཧཱུྃ༔ མ་མོ་སྤྱི་ཡི་དམ་ཚིག་མ་ཉམས་ན༔ གཙོ་མོ་ཡུམ་ཆེན་མ་དྲུག་དང་༔ དཔལ་ལྡན་ལྷ་མོ་དཔོན་གཡོག་ཀུན༔ རྟག་ཏུ་བདག་དང་མི་འབྲལ་ཞིང་༔ ཅི་ལྟར་འདོད་པའི་དོན་རྣམས་འགྲུབ༔ གང་ལྟར་བཅོལ་བའི་ལས་ཀུན་འགྲུབ༔ བསྐང་ངོ་བསྐལ་པར་ཐུགས་དམ་བསྐང་༔ ཧཱུྃ་བྷྱོཿ མ་མོ་འཁྲུགས་པའི་སྤྱོད་
པ་ནི༔ ཡུག་ས་མ་ལ་སྤྱོད་པ་དང་༔ སྦྲུམ་མ་མི་དགའ་བཅུག་པ་དང་༔ ཕ་མེད་བུ་ཚ་སྤངས་པ་དང་༔ བོང་བུ་བཙོག་བརྡུངས་བྱས་པ་དང་༔ ཁྱི་སྤྱང་དག་ལ་དགྲ་བྱས་པ༔ རལ་གྲི་དམ་ལ་མ་དགའ་དང་༔ རྨ་བྱ་རིང་དུ་སྤངས་པ་དང་༔ ཁུ་བ་དཀར་དམར་མ་བསྟེན་སྤངས༔ མ་ལ་དད་པ་ལོག་པ་དང་༔ ནེའུ་ལེའི་རྐྱལ་པ་བཀྲལ་བ་དང་༔ ཤིང་ལོ་རླུང་ཁྱེར་མ་བཟུང་བ༔ རྡོ་སོལ་ཆུ་ལ་བསྐྱུར་བ་དང་༔ འཚུབས་མ་མཐོང་ནས་མ་མོས་པ༔ དགྱེས་མཆོད་མ་བྱས་རཀྟ་སྤངས༔ ཡོངས་སུ་མ་སྨིན་སེམས་ཅན་ལ༔ ལྷ་ཡི་ཁ་དོག་མཚན་ཉིད་བསྟན༔ སྙིང་པོ་མ་བཟླས་གྱེར་བ་དང་༔ ཕྱག་རྒྱ་གཞན་ལ་བསྟན་པ་དང་༔ རྟག་ཏུ་དམ་ཚིགས་བཤད་པ་དང་༔ མཚན་ལྟས་གཞན་ལ་བཤད་པ་དང་༔ དུས་ཀྱི་མཆོད་པ་ཆགས་པ་དང་༔ གྲངས་ཀྱི་བསྙེན་པ་མ་ཐེམས་པར༔ སངས་རྒྱས་སྐུ་གཟུགས་མ་བྲིས་ཤིང་༔ མ་མོ་ཆོས་སྐྱོང་སྐུ་མ་བྲིས༔ བྲམ་ཟེ་མཆོག་སྲིད་སྤངས་པ་
དང་༔ དམ་ཚིག་ཕྱག་རྒྱ་མ་བསྟེན་དང་༔ བྱ་ནག་ལུག་ནག་གཡག་ནག་དང་༔ ཁྱི་ནག་ཕྱར་དར་མ་བསྟེན་དང་༔ མཆེད་དང་ལྕམ་དྲལ་ཞེ་བཅད་པ༔ མི་དགེ་ཆོས་སྤངས་ལས་བྱས་པས༔ མ་མོ་དཔོན་གཡོག་འཁྲུགས་པར་འགྱུར༔ འཁྲུགས་པའི་མ་མོ་བསྐང་བར་བྱ༔ བསྐང་ངོ་བསྐལ་པར་ཐུགས་དམ་བསྐང་༔ བྷྱོཿ གཞན་ཡང་མ་མོ་འཁྲུགས་པའི་རྒྱུ༔ མ་ཉེས་བགེགས་ཆེན་དམ་ལ་བཏགས་པ་དང་༔ ས་བདག་ཀླུ་གཉན་རྒྱུད་དཀྲུགས་དང་༔ དམ་བཅའ་ཉམས་ཤིང་སྤངས་པ་དང་༔ ལྷ་འདྲེ་ཀུན་ལ་དོ་བདོ་བས༔ འཇིག་རྟེན་མ་མོ་འཁྲུགས་པར་འགྱུར༔ འཁྲུགས་པའི་མ་མོ་བསྐང་ཞིང་བཤགས༔ གཞན་ཡང་མ་མོ་འཁྲུགས་པའི་རྒྱུ༔ བཀའ་དྲིན་ཅན་གྱི་སློབ་དཔོན་ལ༔ ལུས་ངག་ཡིད་ཀྱིད་ཞབས་ཏོག་མེད༔ སྒྱུ་མའི་ནོར་གྱིས་མ་མཉེས་པས༔ རིན་ཆེན་གདམས་ངག་ནོད་གྱུར་ཀྱང་༔ དངོས་གྲུབ་ཐོབ་པའི་རྒྱུ་ཡང་མེད༔ རང་ཉིད་ཤེས་རབ་ཆུང་བ་ཡིས༔ དོན་
རྣམས་ལོག་པར་དཀྲུགས་གྱུར་ན༔ སྲིད་པའི་མ་མོ་འཁྲུགས་པར་འགྱུར༔ འཁྲུགས་པའི་མ་མོ་བསྐང་ཞིང་བཤགས༔ བྷྱོཿ གཞན་ཡང་མ་མོ་འཁྲུགས་པའི་རྐྱེན༔ མ་མོའི་རྟགས་མཚན་ཕུལ་བའི་ཚེ༔ མ་མོ་གནད་ལ་བོར་བ་དང་༔ མི་མཐུན་འཁོར་ལོའི་བཅས་བྱས་དང་༔ སྔགས་བཟློག་དཀྲུགས་བཅུན་གནད་འབེབས་བྱས༔ བསྙེམས་རྟོག་བྱེད་ཅིང་ལས་ཀྱི་གཟིར༔ སེམས་འཁྲུགས་ང་རོ་མི་སྙན་པས༔ དམ་དུ་བརྡར་ཅིང་གཡབ་མོ་བརྡབ༔ དེ་ཚེ་སྲིད་པའི་མ་མོ་འཁྲུགས༔ མ་མོ་འཁྲུགས་པས་འཇིག་རྟེན་ཏུ༔ མི་མཐུན་སྣ་ཚོགས་འབྱུང་བར་འགྱུར༔ འཁྲུགས་པའི་མ་མོ་བསྐང་ཞིང་བཤགས༔ བྷྱོཿ མ་མོ་ནང་འཐབས་མཚོན་གྱི་ཆར་པ་འབེབས༔ གཅན་གཟན་འཁྲུགས་ཤིང་འཐབས་པ་དང་༔ བྱ་ནག་ནང་འཐབས་ཐོག་དང་སེར་བ་འབེབས༔ མེ་ཡིས་ལུས་ཚིག་ཆུ་ཡིས་བྱིང་༔ བུད་མེད་སྨྲ་བ་མང་པོ་བྱེད༔ ངོ་འཛུམ་གནག་ཅིང་ཁ་དོག་ངན༔ ངུ་འབོད་བྱེད་
ཅིང་ཐལ་མོ་རྡེབ༔ གོས་ནག་མི་སྡུག་མཚན་མ་སྟོན༔ དགྲ་བྱུང་ཟེར་ཅིང་ཕུ་མདར་རྒྱུག༔ གཅིག་ལ་གཅིག་ཀྱང་བརྒོལ་བར་འགྱུར༔ བདག་གཞན་ཐམས་ཅད་ནང་འཐབས་བྱེད༔ འཁོར་ཀྱང་མི་མཐུན་ནང་དམེ་བྱེད༔ བདག་ཀྱང་མི་དགའ་སེམས་ཡིད་འཕྱོ༔ ཡིད་ལ་མི་འདོད་སྣ་ཚོགས་འབྱུང་༔ བཟའ་འཁྲུགས་བྱེད་ཅིང་ནང་འཐབས་བྱེད༔ སྐར་མདའ་ལྷུང་དང་ས་གཡོས་དང་༔ རི་ཉིལ་བྲག་རལ་རྡིབ་ཞོམ་འབྱུང་༔ ཁྲག་གི་ཆར་པ་དམར་པོ་དང་༔ ལྷོ་འུར་སེར་པོ་དམར་པོ་དང་༔ སྔོན་པོ་སྐྱ་འུར་འཁྲིགས་པ་དང་༔ ཁྲག་ཆར་ཐལ་ཆར་ཡང་ཡང་འབེབས༔ དུས་མིན་ཁ་ཆར་དྲག་པོ་འབེབས༔ ཐོག་དང་སེར་དྲག་རླུང་དམར་འཚུབས༔ འཚུབས་མ་དམར་ནག་རི་ལུང་ཁེངས༔ མི་ལ་སྲོག་ཆགས་སྣ་ཚོགས་ལྡང་༔ གཤིན་རྗེ་ཨ་ཝ་གླང་མགོ་ཡང་༔ ས་རིམ་དགུ་ཡི་འོག་ནས་ལྡངས༔ ནད་ཡམས་སྣ་ཚོགས་ཕྱུར་གྱི་བཏང་༔ མ་མོའི་ནད་རྐྱལ་ཁ་ཕྱེས་ནས༔ འགོ་
ཡམས་རིམས་ནད་སྣ་ཚོགས་དང་༔ གདོན་དང་མི་མཐུན་མང་བར་བྱེད༔ འཁྲུགས་པའི་མ་མོ་བསྐང་བར་བྱ༔ བསྐང་ངོ་བསྐལ་པར་ཐུགས་དམ་བསྐང་༔ ༈ གཞན་ཡང་མ་མོ་འཁྲུགས་པའི་རྟགས༔ ཚད་ནད་འབྲུམ་ནད་སྣ་ཚོགས་དང་༔ རིམས་ནད་སྣ་ཚོགས་འབྱུང་བར་བྱེད༔ གློ་བུར་ན་ཚ་སྣ་ཚོགས་དང་༔ ཕྱུགས་ནད་སྣ་ཚོགས་གོད་ཁ་འབྱུང་༔ དེ་ཡང་མ་མོ་འཁྲུགས་པའི་རྟགས༔ བསྐང་ངོ་བསྐལ་པར་ཐུགས་དམ་བསྐང་༔ ཧཱུྃ་བྷྱོཿ གཞན་ཡང་མ་མོ་འཁྲུགས་པའི་རྟགས༔ ཉམས་དང་རྨི་ལམ་ཐམས་ཅད་དུ༔ ཁྲོ་ཞིང་མི་སྡུག་སྣ་ཚོགས་སྟོན༔ རྒྱབ་ཀྱིས་ཕྱོགས་ཤིང་ཚུར་ལ་སྡང་༔ འཁང་ར་བྱེད་ཅིང་གྲིབ་མ་བརྡུངས༔ ཆེ་ཚུལ་རྐུབ་དང་བྷ་ག་སྟོན༔ དེ་ཡང་མ་མོ་འཁྲུགས་པའི༴ འཁྲུགས་པའི་མ་མོ་བསྐང་༴ གཞན་ཡང་མ་མོ་འཁྲུགས་པའི་ལྟས༔ རལ་གྲི་ཆག་ཅིང་བོང་བུ་འཐེང་༔ དུང་སྐད་འགག་ཤིང་རྨ་བྱ་ནོག༔ ཟླ་བ་བརྒལ་ཞིང་ཉི་མ་ཐལ༔
མེ་ཡིས་ཚིག་དང་ཆུ་ཡིས་འཇིག༔ ཡུལ་གྲོང་གསལ་ཅིང་གཟི་འོད་འབར༔ དེ་ཡང་མ་མོ་འཁྲུགས་པའི་རྟགས༔ འཁྲུགས་པའི་མ་མོ་བསྐང་བར་བྱ༔ གཞན་ཡང་མ་མོ་འཁྲུགས་པའི་རྟགས༔ བྱ་ནག་མང་པོ་འདུས་གྱུར་ཀྱང་༔ གཏོར་མ་མི་ཟ་ཕར་ལ་འབྲོས༔ ཐིབ་ཐིབ་ནོན་དང་ཐལ་ཐལ་སྨྲ༔ རིང་རྒྱུག་བྱེད་ཅིང་འབོད་འབྲོས་བྱེད༔ བུད་མེད་མང་པོ་ངུ་བ་དང་༔ བཀྲ་མི་ཤིས་པའི་ཚིག་བརྗོད་དགྱེ༔ ལུས་ངན་མཚན་མ་ངོམ་པ་དང་༔ གོས་ཀྱིས་དོག་ངན་པ་དང་༔ འཚུབས་མ་འཐུར་དུ་འཁྱིལ་བ་དང་༔ རྐེད་དུ་ཆག་དང་རལ་པ་དང་༔ མཐུར་དུ་རྒྱུག་ཅིང་མུན་པ་ནག༔ དེ་ཡང་མ་མོ་འཁྲུགས་པའི༴ འཁྲུགས་པའི་མ་མོ་བསྐང་བར་བྱ༔ གཞན་ཡང་མ་མོ་འཁྲུགས་པའི་རྟགས༔ རྔུལ་ཞིང་ངོ་ནག་ཆོ་ངེ་འདེབས༔ མཚོན་ཕྱུང་དགྲར་རྒོལ་ངུ་ཞིང་གནོད༔ འཇིག་རྟེན་བུད་མེད་མང་པོས་ནི༔ ངུ་འབོད་ཐལ་མོ་རྡེབ་ཅིང་བྲོས༔ ངོ་ནག་བྱེད་ཅིང་རྒྱང་དེར་ཡིབ༔ མ་ལྟར་
བསྟེན་པའི་ཉམས་རྟགས་ཡིན༔ ཉམས་པ་བསྐང་ལ་མཐོལ་ལོ་བཤགས༔ ཁྲེལ་འཛིམ་མེད་ཅིང་ཉལ་མལ་སྤོ༔ ངོ་ནག་འཐབ་མོ་བྱེད་ཅིང་འོང་༔ སྲིང་ལྟར་བསྟེན་པའི་ཉམས་རྟགས་ཡིན༔ ཉམས་པ་བསྐང་ལ་མཐོལ་ལོ་བཤགས༔ འཐབས་མོ་འཚང་འབྲུ་གསང་ཞིང་བྱེད༔ མི་གཏམ་ཕར་ལ་བྱོལ་ཞིང་འགྲོ༔ མཛའ་ལྟར་བསྟེན་པའི་ཉམས་རྟགས་ཡིན༔ ཉམས་པ་བསྐང་ལ་མཐོལ་ལོ་བཤགས༔ མཁའ་འགྲོ་སྐོང་བས་མཉེས་གྱུར་ཅིག༔ མཆུ་འབུག་བྱེད་ཅིང་ལྐོག་ན་ལབ༔ ལྟོོ་འཁོང་བྱེད་ཅིང་ངོ་འཛུམ་ནག༔ འཐབས་མོས་བཏབ་བོ་ཞེས་ཀྱང་སྒྲོག༔ བྲན་ལྟར་བསྟེན་པའི་ཉམས་རྟགས་ཡིན༔ ཉམས་པ་བསྐང་ལ་མཐོལ་ལོ་བཤགས༔ བྷྱོཿ གཞན་ཡང་མ་མོ་འཁྲུགས་པའི་རྟགས༔ བོང་བུ་འཐེང་ཞིང་འཆོང་བ་དང་༔ བསད་དང་བཅད་དང་རྒོལ་བ་མཐོང་༔ རླུང་ནག་འཚུབས་མ་འཐུར་དུ་འཁྱིལ༔ ཚུར་ལ་མི་འོང་ཕར་ལ་འགྲོ༔ གཅན་གཟན་
འཕར་སྤྱང་མང་པོ་ནི༔ ཤ་ཟ་འདོད་ཕྱིར་ཕར་ལ་རྒྱུག༔ ཕུ་རུང་གཡུག་ཅིང་དོན་མེད་ཀྱི༔ ན་ཚ་འོང་ཟེར་ཕར་ལ་འགྲོ༔ བུད་མེད་སྨད་དང་བྷ་ག་ལ༔ ལག་པས་བཟུང་ཞིང་སྦྱོར་དགོས་ཟེར༔ ཕར་ཕར་འབྲོས་ཞིང་ཁྲོས་ཞིང་དགྱེ༔ དེ་ཡང་མ་མོ་འཁྲུགས་པའི་རྟགས༔ འཁྲུགས་པ་བསྐང་ཞིང་ཉམས་པ་བཤགས༔ བྷྱོོཿ གཞན་ཡང་མ་མོ་འཁྲུགས་པའི་རྟགས༔ བུད་མེད་འཆི་དང་ངུ་བ་དང་༔ བོང་བུ་ཤིའམ་ཆག་པ་དང་༔ རལ་གྲི་ཆག་གམ་ནེའུ་ལེ་འཆི༔ མེ་རླུང་ལྕགས་སྒྲོག་ཤིང་ཆ་ཆག༔ སྨྱོ་དང་ན་དང་ཤི་དང་རྒལ༔ ངུ་དང་མཁུན་དང་སྐྱུག་པ་དང་༔ བརྒྱལ་དང་འབོག་དང་གླལ་བ་དང་༔ སྣ་ཁྲག་ལུག་དང་རྨ་བཀྲ་བྱུང་༔ སྦྱངས་ཤིང་བརྐྱལ་དང་རྒྱུ་ལོང་སྦོས༔ སྙིང་ན་ཚད་པ་གློ་བུར་འབྱུང་༔ འཆི་བ་རྒོད་ཅིང་མི་བདེ་མང་༔ བྱིང་རྨུག་འཐིབས་ནད་བྱུང་བ་ན༔ ཐམས་ཅད་མ་མོ་འཁྲུགས་པའི་རྟགས༔ འཁྲུགས་པ་བསྐང་ལ་ཉམས་པ༴ དགྲ་གཟུགས་མདུན་དུ་བཞག་
བྱས་ནས༔ མི་ཁྲག་རྟ་ཁྲག་ལ་སོགས་ཕྱར༔ ལྷ་གཉན་ལ་སོགས་དཔང་དུ་བཙུག༔ གནམ་ལ་འོ་དོད་བོས་ནས་ནི༔ ཉིན་མཚན་ལས་སྦྱར་དྲིལ་གྱུར་ཀྱང་༔ དམིགས་བྱ་མི་འཆི་ཡར་ལ་འཕེལ༔ ཡི་ཆད་དམ་བཅའ་ཞེ་ལོག་འབྱུང་༔ དེ་ཡང་མ་མོ་འཁྲགས་པའི་རྟགས༔ འཁྲུགས་པ་བསྐང་ལ་ཉམས་པ༴ གཞན་ཡང་བར་ཆད་ཞུགས་པའི་རྟགས༔ གྲོང་ལ་འཇིགས་ཤིང་ཁྱིམས་ནས་འགྲོ་སྙིང་འདོད༔ གཉིད་ཡལ་སྙིང་མི་དགའ་ཞིང་འགྲོ་བར་འདོད༔ གླལ་ཞིང་ངུ་འདོད་ཁྲོ་ཞིང་ཚིག་པ་ཟ༔ དེ་ཡང་མ་མོ་འཁྲུགས་པའི༴ འཁྲུགས་པ་བསྐང་ལ་ཉམས་པ༴ ཧཱུྃ། གཏོར་ཚོགས་དུས་ལས་གཡེལ་བའི་ཚེ༔ མོ་མཚན་དང་ནི་སྔོན་གྱི་དབང་རྟགས་སྟོན༔ དུད་པ་འཁྲིགས་ནས་བུད་མེད་གླལ་བ་མཐོང་༔ དེ་ཡང་མ་མོ་འཁྲུགས་པའི༴ འཁྲུགས་པ་བསྐང་ལ་ཉམས་པ༴ ཧཱུྃ། བུད་མེད་ངུ་བ་མཐོང་ན་ཉམས་མྱོང་ཉིད་ལ་གནོད༔ བུད་མེད་མང་པོ་ཁྲོམ་དུ་འདུས་
པའི་གསེབ༔ མིག་ནི་བཙུགས་ན་ཏིང་འཛིན་གཡེལ་བའི་རྟགས༔ ཐལ་མོ་རྡེབ་ན་དམ་རྫས་མ་ཚང་རྟགས༔ ལྕེ་རྩེ་སྟོན་ན་སྙིང་པོ་མ་ཚང་རྟགས༔ སོ་སྒྲ་ཀྲིག་ན་འཐབས་མོ་འོང་བའི་རྟགས༔ ཁྲོས་པ་མཐོང་ན་བར་ཆད་འོང་བའི་རྟགས༔ གདོང་ལ་མཆི་རིས་བཀྲ་ན་བར་ཆད་འོང་བའི་རྟགས༔ དེ་ཡང་མ་མོ་འཁྲུགས་པའི༴ འཁྲུགས་པ་བསྐང་ལ་ཉམས་པ༴ མེ་ལེང་ཐོགས་ན་བསྐྱེད་རིམ་མ་གསལ་རྟགས༔ གླིང་བུ་འབུད་ན་གཏོར་མ་འདོད་པའི་རྟགས༔ ཕྲེང་བ་འདྲེན་ན་སྦྱིན་སྲེག་རན་པའི་རྟགས༔ སྙིང་སྦྲམ་ཐོགས་ན་རང་ལ་ཆགས་པའི་རྟགས༔ གཡབ་དར་ཐོགས་ན་གཞན་ལ་ཆགས་པའི་རྟགས༔ མེ་ལོང་ཐོགས་ན་ཆུང་མར་ཆགས་པའི་རྟགས༔ སྟངས་སྟབས་བྱེད་ན་སློབ་མར་ཆགས་པའི་རྟགས༔ དེ་ཚེ་མ་མོ་བསྐང་བར་བྱ༔ བསྐང་ངོ་བསྐལ་པར་ཐུགས་དམ་བསྐང་༔ ཤ་ཁྲག་རྨིས་ན་ནད་རིམས་འོང་བའི་རྟགས༔ ཚྭ་སྒོག་གཡེར་གསུམ་ཇ་དང་སྣོད་སྟོང་རྣམས༔
མི་ཁ་ཁ་མཆུ་བྱུར་ལྟས་ངན་པའི་རྟགས༔ གོས་ལ་མེས་ཚིག་བྱི་བས་ཟོས་པ་ན༔ སློབ་མ་ཉམས་ཞིང་སྙན་གྲགས་ཡལ་བའི་རྟགས༔ དེ་ཚེ་མ་མོ་བསྐང་བར་བྱ༔ བསྐང་ངོ་བསྐལ་པར་ཐུགས་དམ་བསྐང་༔ ཧཱུྃ་བྷྱོ༔ མ་མོ་མཁའ་འགྲོ་དབང་དུ་མ་འདུས་ན༔ མི་སྡུག་གཟུགས་སྟོན་འདྲེ་མོར་སྤྲུལ༔ གཅན་གཟན་དགྲ་ཞིང་མ་མོས་ཕྱག་རྒྱུགས་སོ༔ རིམས་ནད་མི་ཁ་དགྲ་དང་ཁ་མཆུ་འབྱུང་༔ ཕྱི་ནང་ཀུན་འཁྲུགས་མི་བདེ་སྣ་ཚོགས་འོང་༔ དེ་ཚེ་མ་མོ་བསྐང་བར་བྱ༔ བསྐང་ངོ་བསྐལ་པར་ཐུགས་དམ་བསྐང་༔ སྒྲུབ་པ་ལྟེམ་རྐྱང་རྟགས་སུ་རྒྱང་གླུ་ལེན༔ བར་ཆད་ཡོད་པའི་རྟགས་སུ་འབག་འབུག་ཟློ༔ ནད་ངོ་ཡོད་པའི་རྟགས་སུ་ཡོལ་བ་བྱེད༔ གྲིབ་གདོན་ཆགས་སྒོའི་རྟགས་སུ་སྦྲ་གུར་འབུབ༔ དེ་ཚེ་མ་མོ་བསྐང་བར་བྱ༔ བསྐང་ངོ་བསྐལ་པར་ཐུགས་དམ་བསྐང་༔ མ་མོ་བཞད་ན་དགྲ་བགེགས་སྒྲོལ་བའི་རྟགས༔ སྦྱོར་བ་བྱེད་ན་དངོས་གྲུབ་མྱུར་བའི་
རྟགས༔ བྲོ་གར་བྱེད་ན་བསམ་པ་འགྲུབ་པའི་རྟགས༔ འཛུམ་པར་བྱེད་ན་རང་ཉིད་ཚེ་རིང་རྟགས༔ ཤ་བ་ཞོན་ན་ནོར་རྣམས་འཕེལ་བའི་རྟགས༔ ལྕི་ཤིང་བསྡུས་ན་ཟང་ཟིང་ལོངས་སྤྱོད་རྟགས༔ ཐོད་པ་ཐོགས་ན་རྟོགས་པ་སྐྱེད་པའི་རྟགས༔ སྔགས་བཟླས་བྱུང་ན་ནུས་པ་འབྱུང་བའི་རྟགས༔ དེ་ཚེ་མ་མོ་བསྐང་བར་བྱ༔ བསྐང་ངོ་བསྐལ་པར་ཐུགས་དམ་བསྐང་༔ ཧཱུྃ། སྔགས་དང་ཏིང་འཛིན་ནུས་པ་སྐྱེད་ཙ་ན༔ རྡོ་རྗེ་རྩ་ཡི་དབུས་ཀྱི་ནམ་མཁའ་ལ༔ བྱང་ཆུབ་སེམས་ཀྱི་དགའ་བ་རང་སར་སྐྱེས༔ དེ་ནི་མཁའ་འགྲོ་རང་ལ་ཤར་བའི་རྟགས༔ བུད་མེད་དཀར་མོ་རལ་ཅན་བཞད་བྱུང་ན༔ གསང་བ་ཡེ་ཤེས་དངོས་གྲུབ་ཐོབ་པའི་རྟགས༔ ནག་མོ་རལ་པ་ཅན་དུ་བྱུང་བ་ན༔ འདོད་ཁམས་དབང་འདུས་མཆོག་ཐུན་དངོས་གྲུབ་རྟགས༔ དམར་མོ་རལ་ཅན་ཁམས་གསུམ་དབང་འདུས་ཤིང་༔ གསང་བ་ཡེ་ཤེས་དམར་མོ་གྲུབ་པའི་རྟགས༔ སེར་མོ་ཐོད་ཕྲེང་ཅན་དུ་བྱུང་བ་
ན༔ ཚེ་དང་བསོད་ནམས་ལོངས་སྤྱོད་རྒྱས་པའི་རྟགས༔ མ་བྱུང་མ་མོས་མ་ལྟར་བརྩེ་བའི་རྟགས༔ དེ་ཚེ་མ་མོ་བསྐང་བར་བྱ༔ བསྐང་ངོ་བསྐལ་པར་ཐུགས་དམ་བསྐང་༔ རྫས་རྣམས་ལུད་དང་མུན་པ་ནག༔ མེ་ཏོག་ཆར་འབེབས་འབྲུག་སྒྲ་རླུང་དམར་དང་༔ བུད་མེད་གཟུགས་དང་འཇའ་ཚོན་སྟོན༔ ཉི་ཟླ་ཤར་དང་སྤྲིན་དཀར་ལྡིང་༔ དེ་ཚེ་མ་མོ་བསྐང་བར་བྱ༔ བསྐང་ངོ་བསྐལ་པར་ཐུགས་དམ་བསྐང་༔ སྣོད་སྟོང་ཐོགས་པར་རྨིས་ན་དོན་མི་འགྲུབ༔ བྱི་རུ་དམར་པོ་ཞིང་རྨོས་མི་ཁ་འབར༔ དར་རས་རྣམ་ལྔ་གྱོན་ན་ནད་དུ་འོང་༔ མངོན་སུམ་བྱུང་དང་སྣང་བ་རྨི་ལམ་འབྱུང་༔ བར་ཆད་བཟློག་ནས་དངོས་གྲུབ་བླང་ཆེད་དུ༔ ཡང་ནས་ཡང་དུ་ཐུགས་དམ་བསྐང་བར་བྱ༔ ཧཱུྃ། ད་ནི་མ་མོ་བསྟེན་པའི་རྫས༔ དང་པོ་འབོད་པའི་རྫས་ལྔ་ནི༔ གཡབ་དར་ཧསྟ་མི་ཚིལ་དང་༔ ཅོག་ཞུན་བདུག་སྤོས་རྫས་ཀྱིས་ཐུགས་དམ་བསྐང་༔ མ་མོ་མཆོད་ཅིང་སྐོང་བའི་
རྫས༔ ཐོད་པ་ལྟག་སྤྲོད་སྐུ་མཁར་དང་༔ བྱ་ནག་ཤེལ་ནག་ཤོན་དང་ནི༔ མཆོད་ལྔ་སྤྱན་གཟིགས་དུ་མས་བསྐང་༔ མ་མོ་སྐོོང་བའི་རྫས་མཆོག་ནི༔ ཀེའུ་རིའི་ཤ་དང་དེ་མོའི་ཤ༔ གྲི་ཤ་དབང་པོ་རྣམ་ལྔ་དང་༔ འཆི་ཁའི་མཚལ་ཏིག་མི་སྙིང་དང་༔ ཤ་ཁྲག་ཚོགས་ཀྱི་བདུད་རྩི་དང་༔ གུར་གུམ་མངལ་ཁྲག་ཨ་མྲྀ་ཏ༔ ཛ་གད་ཤེལ་དང་བྱང་ཆུབ་སེམས་༔ མ་མོ་རྣམས་ཀྱི་དམ་ཚིག་བསྐང་༔ མུ་མཐར་ཁྱབ་པའི་ཐུགས་དམ་བསྐང་༔ མ་ལྟར་འཁྲུགས་པ་བསྐང་བ་ནི༔ ན་ཆུང་མཚལ་དང་མི་དབང་ཤ༔ རཀྟ་བདུད་རྩི་ཤ་མེད་དང་༔ དབུགས་མེད་སྲོག་མེད་ཁྲག་མེད་དང་༔ རུས་མེད་རྣམས་ཀྱིས་ཐུགས་དམ་བསྐང་༔ བྷྱོཿ སྲིང་ལྟར་འཁྲུགས་པ་བསྐང་བ་ནི༔ ཁྭ་ཏའི་ཤ་དང་ཞེས་ཀྱི་ཤ༔ དཀར་མངར་ཟས་ཀྱི་རྣམ་པར་དང་༔ ཤིང་ཏོག་མེ་ཏོག་རྣམས་ཀྱིིས་བསྐང་༔ བྲན་ལྟར་འཁྲུགས་པ་བསྐང་བ་ནི༔ དྲེའུའི་ཤ་དང་སྤྱང་མོའི་ཤ༔ རྟ་ནག་ཤ་དང་རཀྟ་ཁྲག༔ དེ་དག་
ཡོངས་ཀྱིས་ཐུགས་དམ་བསྐང་༔ མཛའ་ལྟར་འཁྲུགས་པ་བསྐང་བ་ནི༔ ངང་པ་དང་ནི་སོ་བྱ་དང་༔ བྱ་ནག་དང་ནི་ལུགས་ནག་དང་༔ ཨ་མྲྀ་ཏ་ཡིས་ཐུགས་དམ་བསྐང་༔ རྗེ་མོ་འཁྲུགས་པར་བསྐང་བ་ནི༔ རཀྟ་སྨན་དང་ཀླད་པ་དང་༔ དམ་བརྡར་འབོད་ཅིང་ཟིལ་གྱིས་གནོན༔ བདུད་རྩི་དྲངས་ཤིང་གསོལ་བ་བཏབ༔ གནད་དུ་དབབ་པས་ཐུགས་དམ་བསྐང་༔ ཧཱུྃ། གཞན་ཡང་ཐུགས་དམ་བསྐང་བ་ནི༔ དྲི་ཆུས་ཕྱག་རྒྱ་ཉམས་པ་བསྐང་༔ ཁ་ཊྭཱྃ་ཏྲི་ཤུལ་ལུས་བཟླས་བསྐང་༔ འབྲུ་ཟན་ངར་མིའི་རྒྱལ་པོ་དང་༔ བྱ་རིགས་སྣ་དགུའི་གཟུགས་ཀྱིས་བསྐང་༔ གོམ་པའི་སྟངས་སྟབས་གར་གྱིས་བསྐང་༔ བྷནྷ་རཀྟས་བཀང་བ་དང་༔ བདུད་རྩི་སྨན་དང་བཅས་པས་བསྐང་༔ སྦྱིན་སྲེག་ལས་བཞིས་ཐུགས་དམ་བསྐང་༔ ཤ་ཆེན་སྙིང་དང་དམ་རྫས་དང་༔ གླང་པོ་ཆེ་ཡི་སྣ་ཆུ་དང་༔ བྱ་རོག་ཤ་དང་དེ་མོའི་ཤ༔ དེ་མོའི་སྒོ་ང་ལ་སོགས་པའི༔ སྒོ་ངའི་ཚོགས་ཀྱི་ཐུགས་
དམ་བསྐང་༔ བྷྱོཿ ཞིང་ཆེན་ཁོག་པ་དུར་ཁྲོད་དང་༔ ཤ་ཁྲག་རྣམ་པ་སྣ་ཚོགས་ཀྱིས༔ འཇིག་རྟེན་འདས་དང་མ་འདས་པའི༔ མ་མོ་མཁའ་འགྲོའི་ཐུགས་དམ་བསྐང་༔ རས་ཀྱིས་མི་མགོ་བཏུམས་པ་ལ༔ སྨན་མོ་རྣམས་ཀྱི་མིང་བྲིས་ནས༔ བོང་བུ་ཞོན་ནས་སྡགས་ཀྱིས་དགུག༔ འབྲུ་ཟན་ཤ་ཆེན་ཨ་མྲྀ་ཏ༔ ཤ་ཁྲག་སྙིང་དང་དང་མགོ་བཅས་ཀྱིས༔ མ་མོ་མཁའ་འགྲོའི་ཐུགས་དམ་བསྐང་༔ རིན་ཆེན་རྣམ་པ་སྣ་ཚོགས་དང་༔ སྣ་ཚོགས་སྦྱར་བའི་བདུག་སྤོས་དང་༔ ན་ཆུང་སྙིང་དང་རྫས་ཀྱིས་བསྐང་༔ བྷྱོཿ ཙིཏྟ་རྩ་སྦུག་མ་ཉམས་པ༔ བུམ་ནང་སྦུ་གུར་མ་ཉམས་ན༔ ན་ཆུང་བྱུང་བའི་མཚལ་དང་ནི༔ བྱང་སེམས་སྦྱར་བའི་སྲོག་འཁོར་གཞུག༔ བྷནྷ་མཚན་ལྡན་ནང་དུ་ནི༔ སྨན་དང་མཚལ་ཆེན་རཀྟས་བསྐང་༔ རིན་ཆེན་སྣ་ཚོགས་རྫས་བཅས་ཀྱིས༔ མ་མོ་མཁའ་འགྲོའི་ཐུགས་དམ་བསྐང་༔ བྷྱོཿ གླང་ཆེན་ཀླད་དང་མི་དབང་ཤ༔ ནེའུ་ལེ་དང་རྨ་བྱ་དང་༔ བུ་མོ་གཙང་
མར་སྦྱར་བ་ཡི༔ བྱང་ཆུབ་སེམས་ཀྱིས་ཐུགས་དམ་བསྐང་༔ བྱ་མོ་དམར་མོའི་སྙིང་དང་ནི༔ རྒྱལ་མཚན་གཡབ་དར་དམར་པོ་དང་༔ སྨན་དང་གཏོར་མས་ཐུགས་དམ་བསྐང་༔ ཤིང་འབྲས་མེ་ཏོག་སྣ་ཚོགས་དང་༔ འབྲུ་སྣ་སྨན་སྣ་དར་སྣ་དང་༔ རིན་ཆེན་སྣ་ཚོགས་ཤ་ཁྲག་དང་༔ རྗོ་སོལ་རཾ་ལོས་རྫས་ཀྱིས་ཐུགས་དམ་བསྐང་༔ ཧཱུྃ་བྷྱོཿ ཡང་ཅིང་ཐུགས་དམ་བསྐང་བ་ནི༔ སྲོག་མེད་མ་ནི་སྲོག་གི་ཐུགས་དམ་བསྐང་༔ དབུགས་མེད་མ་ནི་དབུགས་ཀྱིས་ཐུགས༴ ཤ་མེད་མ་ནི་ཤ་ཡིས་ཐུགས༴ ཁྲག་མེད་མ་ནི་ཁྲག་གིས་ཐུགས༴ རུས་མེད་མ་ནི་རུས་པས་ཐུགས༴ དྲོད་མེད་མ་ནི་དྲོད་ཀྱིས་ཐུགས་དམ་བསྐང་༔ ཧཱུྃ། གཞན་ཡང་ཐུགས་དམ་བསྐང་བ་ནི༔ བྱ་ནག་ལུག་ནག་གཡག་ནག་དང་༔ ལྕང་ཁྲའི་དབུགས་ཀྱིས་ཐུགས༴ མི་དབང་བྱ་ལུག་སྙིང་གི་ཐུགས༴ མི་རུས་ཀེང་རུས་དཀར་པོ་ནི༔ རྒྱུས་པས་འབྲེལ་བས་ཐུགས༴ པདྨའི་ཁྲག་སྣ་སྣ་ཚོགས་དང་༔ ན་
ཆུང་མངལ་ཁྲག་མྱུར་ཁྲག་དང་༔ མི་དབང་སྙིང་ཁྲག་དག་གི༴ བྷྱོཿ ཡང་ཅིག་ཐུགས་དམ་བསྐང་བ་ནི༔ བདག་གི་སྤྱི་བོའི་ཁྲག་དང་ནི༔ ཁྱི་དང་བྱ་ཡི་སྙིང་ཁྲག་དང་༔ ཁྲག་སྣ་མང་པོས་ཐུགས༴ སྙིང་སྣ་ཤ་སྣ་རུས་སྣ་དང་༔ ཤེལ་ནག་སྤྱི་དཀར་མོ་ཡི་རིགས༔ མིད་པ་རྐང་དང་རྐང་མར་བཅས༔ བ་དང་རྟ་དང་ཀུ་ཀུ་གླང་༔ གླད་པའི་རྩ་ཆེན་འུག་པའི་ཁྲག༔ སྲིན་ལག་ཁྲག་དང་གསང་བའི་ཁྲག༔ དེ་དག་ཀུན་གྱི་ཐུགས༴ བྷྱོཿ འབྲུ་སྣ་བྱ་ཁྱི་གཡག་ལུག་ར༔ ཤ་ཁྲག་གཏོར་མ་མང་པོ་ཡིས༔ བསྐང་ངོ་བསྐལ་པར་ཐུགས་དམ་བསྐང་༔ བྷྱོོ་གདབ་པ་ནི་ཐལ་མོ་བརྡབ་ཅིང་གཡབ་དར་གཡབ་ལ་དུལ་མོས་བརྡབ༔ དེ་ལྟར་ཐུགས་དམ་བསྐང་གྱུར་ནས༔ རྡོ་རྗེ་རྒྱལ་པོ་རྒྱལ་ཐེབས་དང་༔ ལས་ཀྱི་ཀརྨ་གྲོགས་མཆེད་དང་༔ བདག་ཅག་འདིར་འདུས་ཐམས་ཅད་དང་༔ རྒྱུ་སྦྱོར་ཡོན་བདག་འཁོར་བཅས་ཀྱི༔ རྐྱེན་དང་བར་ཆད་བཟློག་ཏུ་གསོལ༔ འདུ་བ་རྣམ་བཞི་བཟློག་ཏུ་གསོལ༔ བད་ཀན་
དམར་སྨུག་དགྲ་ལ་ཟློག༔ འཁྲིས་པ་ཤ་ཡ་དགྲ་ལ་ཟློག༔ རླུང་གང་འཕྱོ་བ་དགྲ་ལ་ཟློག༔ རིགས་འགྲེའོ། ཁྲག་དང་འདུས་པ་དགྲ་ལ༴ སྨྱོ་འབོག་ཉེར་ལྔ་དགྲ་ལ༴ སྨྱོ་འབོག་བརྒྱལ་ནད་དགྲ་ལ༴ འགྱུར་བུ་འདར་བུ་དགྲ་ལ༴ མཛེ་རིགས་བཅོ་བརྒྱད་དགྲ་ལ༴ མཛེ་ནད་འབྲུམ་ནད་དགྲ་ལ༴ ལྷོག་པ་འབྲས་ཆེན་དགྲ་ལ༴ དྲེག་དང་གྲུམ་བུ་དགྲ་ལ༴ སྐེམ་དང་གཡེམ་པ་དགྲ་ལ༴ ཤུ་བ་རྒྱ་ཐོར་དགྲ་ལ༴ རླུང་སྐམ་འབྲས་ཆེན་དགྲ་ལ༴ ཕོལ་མིག་སྐེམ་ནད་དགྲ་ལ༴ ཚག་དང་རྐང་ནད་དགྲ་ལ༴ རིམས་ནད་རྣམ་ལྔ་དགྲ་ལ༴ ཀླད་གཟེར་བལ་ནད་དགྲ་ལ༴ རྒྱུ་གཟེར་བལ་ཚད་དགྲ་ལ༴ གློ་སྙིང་རིམས་གཟེར་དགྲ་ལ༴ མཚོན་གྲུག་སྣ་བདུན་དགྲ་ལ༴ མདའ་གྲིི་མདུང་གྲི་དགྲ་ལ༴ ཁ་ཊྭཱྃ་ཏྲི་ཤཱུལ་དགྲ་ལ༴ སྒྱོག་འགུལ་རྡོ་དབྱུག་དགྲ་ལ༴ མཚོན་འཁྲུགས་བསྐལ་པ་དགྲ་ལ༴ དུས་འཁྲུགས་མཐའ་དམག་དགྲ་ལ༴ རྒྱ་འདྲེ་འགོང་པོ་དགྲ་ལ༴ གློ་བུར་ཉི་ཁྲི་དགྲ་ལ༴
ཡེ་འབྲོག་སུམ་བརྒྱ་དགྲ་ལ༴ དུས་མིན་འཆི་བ་དགྲ་ལ༴ ནད་རིགས་བཞི་བརྒྱ་དགྲ་ལ༴ གདོན་རིགས་སྟོང་ཕྲག་དགྲ་ལ༴ མི་མཐུན་རྐྱེན་ཚོགས་དགྲ་ལ་ཟློག༔ དེ་ནས་བྷྱོ་གདབ་པ་ནི༔ བྷྱོཿ ཆགས་ཆེ་ཉམས་ང་དགྲ་ལ་བྷྱོཿ འགྲེའོ། ལོ་སྐག་ཟླ་སྐག་དགྲ་ལ༴ ཟ་མའི་བདུན་ཟུར༴ རྦོད་གཏོང་རྦད་འདྲེ༴ འབྱུང་བའི་གཙུག་ལ་རྩུབ་པ་དགྲ་ལ༴ བརྟག་པའི་རྟེན་འབྲེལ་ངན་པ་དགྲ༴ རྨི་ལྟས་མཚན་མ་ངན་པ་དགྲ་ལ༴ ཡས་ཀྱི་བདུད་དུ་གཡོས་པ་དགྲ་ལ༴ མས་ཀྱི་སྲི་རུ་ལངས་པ་དགྲ་ལ༴ བར་གྱི་རྩུབ་འགྱུར་ངན་པ་དགྲ་ལ༴ ཕ་ཚན་ནང་གི་རྒྱབ་འདྲེ་དགྲ་ལ༴ དར་ཚན་ནང་གི་སྟོང་འདྲེ་དགྲ་ལ༴ མ་ཚན་ནང་གི་སྣ་འདྲེ༴ མ་བུའི་བྱུར་འདྲེེ༴ ཕ་བུའི་ལྟོགས་འདྲེ༴ ལྟག་པའི་བདུད་བབ༴ དཔྲལ་བའི་གཤེད་འཁོར༴ ཕོ་བདུད་དལ་ཁ༴ མོ་བདུད་ཡམས་ཁ༴ སྤྱི་བདུད་དལ་ཁ༴ སྔགས་པའི་སྔགས་ཟོར༴ བོན་པོའི་བྱད་ཟོར༴ ཕུར་པའི་དབལ་ཟོར་དགྲ་ལ༴ དྲང་སྲོང་དམོད་
ཟོར་དགྲ་ལ༴ རང་གཤེད་རང་འཁོར་དགྲ་ལ༴ རླུང་གི་འཁོར་ལོ་དགྲ་ལ༴ སེལ་གྱི་ཕུང་ཤིག་དགྲ་ལ༴ ལྟས་ངན་ཆོ་འཕྲུལ་དགྲ་ལ༴ མི་མཐུན་ཕྱོགས་རྣམས་དགྲ་ལ༴ ལྟས་ངན་བརྒྱད་ཅུ༴ གཞན་གྱིི་བྱད་གཏད་དགྲ་ལ་བྷྱོཿ བཟློག་གོ་ཆགས་ཆེ་དགྲ་ལ་ཟློག༔ བསྒྱུར་རོ་ལྟས་ངན་དགྲ་ལ་སྒྱུར༔ གཟློག་བསྒྱུར་བཅོལ་བའི་ཕྲིན་ལས་མཛོད༔ སྔགས་ཟློག་མཁའ་འགྲོའི་དམོད་པ་ནི༔ ཨོཾ་ཧ་ཧ་མོ་ཧེ་ཧྲི་ཏ་ཡ༔ པ་རི་ཧ་རི་ཡ༔ ཁ་ལིང་ཏ་ཡ༔ མཱ་ར་ན་ཧཱུྃ་ཧཱུྃ་ཕཊ་ཕཊ༔ ས་མ་ཡ་ཟློག་ཟློག༔ ཨལ་པྲ་མོ་ཧ་བྷྱོཿ ཨ་ཏི་པྲ་མོ་ཧ་བྷྱོ༔ ཨ་ཏི་པྲ་མོ་ཟློག༔ ཟོར་ཁ་ཟློག༔ བྱད་ཁ་ཟློག༔ དམོོད་མོ་ཟློག༔ རྦོད་གཏོང་ཟོག༔ རྦད་འདྲེ་ཟློག༔ ཐམས་ཅད་དགྲ་བགེགས་ཀྱི་སྟེང་དུ་བྷྱོ་ཟློག༔ ཅེས། དེ་ནས་སྨན་ཕུད་ཕུལ༔ སྤུང་མདའ་གཡབ་ལ་ཆད་དོན་སྨོན་ལམ་བཏབ་པ་ནི༔ ཧོ༔ བདག་རྣམས་འབྱོར་འཁོར་བཅས་ཀྱི༔ ཚེ་ལ་བར་ཆད་མ་བྱེད་ཅིག༔ སྲོག་ལ་ཧུར་ཐུམ་མ་བྱེད་ཅིག༔ དབུས་ཀྱི་གཙོ་མོ་མ་གཡེལ་
ཅིག༔ ཕྱི་ཡི་བརྟེན་མ་མ་གཡེལ་ཅིག༔ འཁོར་གྱི་མཁའ་འགྲོ་མ་འཁྲུགས་ཤིག༔ ནང་གི་རྗེ་མོ་མ་སྡུག་ཅིག༔ ཕྱི་ཡི་མ་ཡམས་མ་འཁུ་ཅིག༔ མ་མོ་ཆེན་མོ་འཁོར་བཅས་ཀྱིས༔ བདག་གིས་བསྟེན་པའི་མ་སྲིང་མཛོད༔ སྙིང་དུ་ཉེ་བའི་མཛའ་མོ་མཛོད༔ བསམ་པ་འགྲུབ་པའི་བྲན་མོ་མཛོད༔ བཅོལ་བའི་འཕྲིན་ལས་འགྲུབ་པར་མཛོད༔ གནོད་པར་བྱེད་པའི་དམ་སྲི་དང་༔ དམིགས་པར་བྱེད་པའི་དགྲ་བགེགས་རྣམས༔ ལོ་ཟླར་མ་བཞག་ཟ་མར་སྒྲོལ༔ ད་ལྟ་ཉིད་དུ་རྡུལ་དུ་རློག༔ བདག་ཅག་བསམ་པའི་དོན་ཀུན་སྒྲུབས༔ ཉམས་པ་ཅི་མཆིས་བསྐང་དུ་གསོལ༔ འགལ་འཁྲུལ་ཐམས་ཅད་བཟོད་པར་གསོལ༔ འཁྲུལ་པ་ཐམས་ཅད་བཤགས་པར་བགྱི༔ སྔོན་ཚེ་སློབ་དཔོན་ཆེན་པོ་ཡིས༔ མ་མོ་འཁྲུགས་མདོས་འདི་མཛད་པས༔ མངའ་བདག་ཆབ་འབངས་བདེ་བ་དང་༔ རྒྱལ་ཁམས་བདེ་ཞིང་ལོ་ལེགས་པ༔ ཡིད་ལ་བསམ་པ་ཐམས་ཅད་འགྲུབ༔ དེ་ཕྱིར་འཁྲུགས་སྐོང་འདི་ཉིད་ནི༔ གལ་ཆེ་དོན་ཆེ་གནད་ཟབ་བོ༔ དེ་ཕྱིར་མ་འོངས་ཐ་མའི་དུས༔ མ་མོ་མཁའ་འགྲོ་
གང་དང་ཅི༔ རང་རང་ཆོ་གའི་གཞུང་ལ་སྦྱར༔ དེ་དང་དེ་ཡི་ཉམས་འཁྲུགས་བསལ༔ འཇིགས་བརྒྱད་ཞི་དང་འབྱོར་དྲུག་སྤེལ༔ དབང་སྡུད་དགྲ་བགེགས་བསྒྲལ་བའི་ལས༔ ཡུལ་འཛིན་དགྲ་ཟློག་ལེ་གུ་གསོ༔ བྱེས་བགྲོད་དོན་ཆེན་གར་བྱེད་ཀྱང་༔ འཁྲུགས་སྐོང་འདི་བྱས་མྱུར་དུ་འགྲུབ༔ དེ་ཕྱིར་འཇིག་རྟེན་འཇིག་རྟེན་འདས༔ ཆེ་ཧྲག་བྱ་བ་ཐམས་ཅད་དུ༔ འཁྲུགས་པའི་སྐོང་བ་བྱ་བ་མཆོག༔ ཁྱད་པར་ནད་ལ་བཅོས་པ་དང་༔ རིམས་ནད་མི་ཕྱུག་ཡམས་ནད་དང་༔ ལས་ཀུན་འདི་བྱས་འགྲུབ་པར་འགྱུར༔ དེ་ཕྱིར་བདག་འདྲ་པདྨ་ཡིས༔ སྲིད་པའི་མ་མོའི་རྫོང་ལུང་དང་༔ མཚོ་བཞི་རྡོ་རྗེ་མཁའ་འགྲོའི་རྒྱུད༔ མ་མོ་སྤྱོད་ཡི་རྒྱུད་ལུང་གི༔ སྙིང་པོ་གསང་བའི་བཅུད་དྲིལ་ནས༔ འདིར་བཤད་གཏེར་དུ་གདམས་པར་བྱ༔ ལས་འཕྲོ་ཅན་དང་འཕྲད་པར་ཤོག༔ སཱ་མཱ་ཡཱ༔ རྒྱ་རྒྱ་རྒྱ་༔ གུཧྱེ༔ ཙིཏྟ༔ མ་མ༔ གཏད་རྒྱ༔ ཨོཾ་སྭ་སྟི། སྟག་གཤམ་གཏེར་བྱོན་འཁྲུགས་སྐོང་འདི། །བྱང་འབྲོག་གཡག་མཐར་མཚོ་སྤྱི་ནས། །མི་ཕྱུགས་ནད་ཡམས་ཞི་ཆེད་དུ། །འོག་མིན་མཚུར་མཆོད་བླ་བྲང་དུ། །སྤར་དུ་བཞེངས་དགེས་མཁའ་མཉམ་འགྲོའི། །ཡམས་རིམ་འཚེ་བ་ཞི་བ་དང་། །ཚེ་བསོད་དཔལ་འབྱོར་མངའ་ཐང་རྒྱས། །སྣང་སྲིད་འཁོར་འདས་དབང་བསྡུས་ཤིང་། སྡུག་བསྔལ་དགྲ་དཔུང་བརླག་གྱུར་ཅིག །སརྦམངྒ་ལཾ།། ༈ །།མཁོ་རྒུའི་ལོངས་སྤྱོད་
འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།