དགྲ་ཆོས་བསྡུས་པ་དགྲ་བགེགས་ཚར་གཅོད།
དགྲ་ཆོས་བསྡུས་པ་དགྲ་བགེགས་ཚར་གཅོད་ཅེས་བྱ་བ་བཞུགས་སོ། །
ན་མོ་ཤྲཱི་མ་ཧཱ་ཀཱ་ལ་ཡེ། དགྲ་ཆོས་བསྡུས་པ་ནི། དམར་གཏོར་གཅིག་ལ་གཏོར་ཆུང་བཅུ་ཡིས་བསྐོར། དཀར་གཏོར་གཅིག་ལ་ཡག་ལུག་བྱ་རའི་གཟུགས་ཀྱིས་བསྐོར། སྤྲོ་ན། གྲི་ཡས་ལ་བཙན་བྱུག་པ་དང་། ཤིང་ནག་ལ་སྔ་མོང་དྲེལ་ཕག་གི་གཟུགས་བྱས་ནས་བོར་ན་དགྲ་བྲུབ་དུ་འགྲོ་བ་ཡིན། ཆོས་སྐྱོང་གི་སྤྱན་འདྲེན་མཆོད་བསྟོད་དང་། དགུག་གཞུག་བྱས་ལ། ཧཱུྃ མ་གཡེལ་མ་གཡེལ་སྲུང་མའི་ཚོགས། །མ་གཡེལ་དྲག་པོ་དགྲ་ལ་རྒྱུག །བསྟན་པ་གཉན་ལ་དགྲ་བྱུང་ན། །ལྷ་དང་སྲུང་མའི་དམག་ཚོགས་འདུས། །སངས་རྒྱས་ཆོས་ཀྱི་སྐུ་དགྲ་ལ། །དྲག་ཤུལ་ཅན་གྱི་
དམག་ཚོགས་འདུས། །ལས་གཤིན་ཀིང་ཀང་དམར་ནག་ཆོས། །དོང་བདག་མུན་གླིང་སྐྱེས་བུ་ཆོས། །མ་མགོན་ཕྱོགས་བཅུའི་མགོན་པོ་ཆོས། །མགོན་པོ་བྱ་རོག་འཁོར་བཅས་ཆོས། །བྱིན་རླབས་མྱུར་མཛད་མགོན་པ་ཆོས། །དཔལ་ལྡན་ལྷ་མོ་དཔོན་གཡོག་ཆོས། །བདུད་མགོན་སྲོག་བདུད་ནག་པོ་ཆོས། །སྲིན་མགོན་གཉན་མགོན་ཡབ་ཡུམ་ཆོས། །སྡགས་སྲུང་ཚེ་རིང་མཆེད་ལྔ་ཆོས། །ཞིང་སྐྱོང་སེང་གདོང་ཡབ་ཡུམ་ཆོས། །དུར་ཁྲོད་བདག་པོ་ཡབ་ཡུམ་ཆོས། །
གདུག་པ་བསེ་ཡི་སྐྱེས་བུ་ཆོས། །གཙང་བཙན་མཆེད་འཁོར་བཅས་པ་ཆོས། །གཡུ་སྒྲོན་སྨན་མོ་འབུམ་ཚོགས་ཆོས། །སྔགས་བདག་ཀླུ་ཆེན་བརྒྱད་པོ་ཆོས། །མཁར་ནག་ཀླུ་བདུད་ཀླུ་བཙན་ཆོས། །དྲེགས་པའི་སྡེ་དཔོན་སུམ་ཅུ་ཆོས། །སྔགས་བདག་དྲེག་ཆེན་བཅོ་བརྒྱད་ཆོས། །དྲག་ཤུལ་ཅན་གྱི་དམག་ཚོགས་ཆོས། །འདོད་ཁམས་ལྷ་དང་སྲུང་མ་ཆོས། །མཐུ་ཆེན་དབང་པོ་བརྒྱ་བྱིན་ཆོས། །རྩལ་མཁན་ཚོགས་བདག་གླང་སྣ་ཆོས། །མདའ་མཁན་བྱི་ནུ་རཱ་ཙ་ཆོས། །འཐབ་མཁན་མ་ཧཱ་ཀཱ་ལ་ཆོས། །སྟོབས་ཆེན་ལེགས་ལྡན་ནག་པོ་ཆོས། །མཐུ་ཆེན་སྔགས་བདག་ནག་པོ་ཆོས། །འཛེག་མཁན་བྲག་ལྷ་མགོན་པོ་ཆོས། །ལམ་མཁན་ཨརྱ་རེ་མན་ཆོས། །སོ་མཁན་དཔལ་རབ་འཆང་མགོན་ཆོས། །ཡང་ཟོར་ཧ་ནུ་མན་དྷ་ཆོས། །སྒྱོགས་མཁན་ཁྱབ་འཇུག་ནག་པོ་ཆོས། །རྒྱལ་མཁན་བྷ་ལེ་སྨུག་པོ་ཆོས། །མདའ་ར་ཉེ་དབང་སོ་གཉིས་ཆོས། །གཅོད་མཁན་ལྷ་སྲིན་
སྡེ་བརྒྱད་ཆོས། །བརྟུལ་ཞུགས་གླང་ཆེན་སྨྱོན་པ་ཆོས། །འཕྲང་སྲུང་སྟག་གཡག་རྔམས་པ་ཆོས། །རེ་འབྱམས་བྱ་རྒྱལ་ཁྱུང་ཆེན་ཆོས། །ཁྲོ་གཏུམ་གཡུ་འབྲུག་སྔོན་མོ་ཆོས། །ནམ་མཁའ་ལྡིང་དང་སེངྒེ་ཆོས། །ཉིན་གྱི་དྲོ་གསལ་ཉི་མ་ཆོས། །མཚན་གྱི་སྒྲོན་གསལ་ཟླ་བ་ཆོས། །ཕྱི་དཔུང་ལྷ་ཀླུ་གཉན་དམག་ཆོས། །སྣ་ཁྲིད་རྡོ་རྗེ་ལེགས་པ་ཆོས། །དཔའ་བོ་པེ་དཀར་རྒྱལ་པོ་ཆོས། །གསོད་མཁན་སྲོག་བདག་སྐྱེས་བུ་ཆོས། །བཤའ་མཁན་གྲི་ཆུང་ཤེ་ལེ་ཆོས། །ཤ་ཟ་ཕྲ་མེན་ཁྲ་སྤྱང་ཆོས། ཁྲག་འཐུང་འབར་བ་དྲེད་མགོ་ཆོས། །མགྱོགས་བྱེད་སྐྱ་ངམ་སྤུན་གསུམ་ཆོས། །ཟ་བྱེད་མགོན་པོ་སྡེ་ལྡ་ཆོས། །རྒྱུག་བྱེད་མོན་པ་ནག་པོ་ཆོས། །མཐུ་ཆེན་འཇིག་རྟེན་སྲུང་མ་རྣམས། གོ་ཁྲབ་གྱོན་ལ་སྣོ་མཚོན་བརྡོར། །མགྱོགས་པ་ཞོན་ལ་རིང་པར་རྒྱུག །ཞེ་སྡང་ཕྱུངས་ལ་ང་རྒྱལ་བསྐྱེད། །གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་
མཛོད། །རྒྱ་གར་ཡུལ་གྱི་མཁའ་འགྲོ་མ། །བོད་ཀྱི་ཡུལ་གྱི་བརྟན་སྐྱོང་མ། །སྟོང་གསུམ་དམག་དཔོན་བྱེད་མཁན་མོ། བརྟན་མ་དམག་གི་རྒྱལ་མོ་ནི། །བསྟན་སྐྱོང་ཡ་མའི་ཚོགས་དང་བཅས། །གོ་ཁྲབ་གྱོན་ལ་རྣོ་མཚོན་བརྡོར། །མགྱོགས་པ་ཞོན་ལ་རིང་པར་རྒྱུག །ཞེ་སྡང་ཕྱུངས་ལ་ང་རྒྱལ་བསྐྱེད། །གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མེད་པར་མཛོད། །སངས་རྒྱས་ཆོས་ལ་ཕྱོགས་པའི་ལྷ། །མཆོད་ན་མགོན་སྐྱབས་བྱེད་པའི་ལྷ། །མངགས་ན་དགྲ་ལ་རྒྱུག་པའི་ལྷ། །བོད་ཀྱི་མགུར་ལྷ་བཅུ་གསུམ་དང་། །དགེ་བསྙེན་ཉི་ཤུ་རྩ་གཅིག་དང་། །བོད་ཀྱི་ཐང་ལྷ་ཡར་ཞུར་དང་། །གཉན་ཆེན་རྨ་རྒྱལ་སྤོམ་ར་ནི། །འཁོར་དུ་གཉན་དམག་བསམ་མི་ཁྱབ། །ཀུན་ཀྱང་མི་དཀར་རྟ་དཀར་ཅན། །གོ་ཆ་སྲ་ལ་མཚོན་ཆ་རྣོ། །བ་དན་དཀར་པོ་གནམ་ལ་གཡུགས། །ཀུ་བསྭོ་ཆ་སྒྲ་དི་རི་རི། །ཀུན་ཀྱང་མཐུ་ཆེན་དྲག་རྩལ་ཅན། །དྲག་པོའི་བྷྱོ་སྒྲ་དི་རི་
རི། །རྣལ་འབྱོར་དམ་ཚིག་ཅན་གྱི་གཉེན། །སྐྱེ་བོ་དགྲ་བླ་ཅན་གྱི་གཉེན། །རྨང་པོ་རྩ་དཀར་བཀྲོལ་བའི་གཉེན། །འཐབ་མོ་གཡུལ་ལས་རྒྱལ་བའི་གཉེན། །སངས་རྒྱས་ཆོས་ལ་ཕྱོགས་པའི་གཉེན། །ཆོ་ལ་དགའ་ཞིང་དར་ལ་འདུ། །ཀི་ལ་དགའ་ཞིང་བསྭོ་ལ་དགྱེས། །གོ་ཁྲབ་གྱོན་ལ་སོགས་ཚིག་ལྔ་འགྲེའོ།། མ་གཡེལ་ཡུལ་ལྷའི་དམག་ཚོགས་རྣམས། །མྱུར་བར་སྡང་བའི་དགྲ་ལ་ཆོས། །སྐུ་རྒྱལ་བཙན་གྱི་དམག་ཚོགས་ཆོས། །སྨོན་སྐྱེས་གང་ཞུར་མཆེད་གསུམ་ཆོས། །སྤྲག་བཙན་ལྷ་དམག་འབུམ་སྡེ་ཆོས། །དམག་དཔོན་དབྱི་རྒྱལ་རིན་ཆེན་ཆོས། །གཏུམ་དྲག་གྱང་བཙན་འཁོར་བཅས་ཆོས། །ཀླུ་རྒྱལ་པོ་ཏོ་འཁོར་བཅས་ཆོས། །ཛོ་རྒྱལ་གོ་རྒྱལ་ཡབ་ཡུམ་ཆོས། །སྐྱེས་བུ་ངོམ་རྒྱལ་འཁོར་བཅས་ཆོས། །གཏམ་རྒྱལ་དབྱི་དོ་དགེ་བསྙེན་ཆོས། །གོ་ཁྲབ་སོགས་འགྲེའོ།། འཇིག་རྟེན་སྲུང་མའི་དམག་ཚོགས་ལ། །དཀར་གསུམ་བརྒྱན་པའི་གཏོར་མ་དང་། །ཁྱུང་
དང་སེངྒེ་གཡུ་འབྲུག་དང་། །གྱི་ལིང་ཤང་ཤང་རྨ་བྱ་དང་། །སྟག་གཟིགས་གུང་དབྱི་དཀར་པོ་དང་། །གཡག་ལུག་བྱ་རའི་གཟུགས་འགྲོས་འདི། །སྔགས་དང་ཕྱག་རྒྱས་བྱིན་བརླབས་ནས། བསམ་གཏན་ལྷ་ཡི་དཀོར་བས་ལྷག །ལྷ་སྲུང་གཉན་པོའི་སྐུ་ལ་འབུལ། །གཞན་ཡང་དངོས་དང་ཡིད་ལས་སྤྲུལ། །བཀྲ་ཤིས་རྫས་སྟག་རིན་ཆེན་བདུན། །སྲ་བའི་གོ་དང་རྣོ་བའི་མཚོན། །མདའ་དར་ཕུད་རྒོད་གཙང་མ་འབུལ། །ལྷ་དང་སྲུང་མའི་དམག་ཚོགས་རྣམས། །རེམ་ཅིག་སྡང་བའི་དགྲ་ལ་རྒྱུག །སྡང་བའི་དགྲ་ལ་ཞེ་སྡང་བསྐྱེད། །ཧོར་སོག་དགྲ་རྐུན་ལས་ངན་གྱིས། །སྲུང་མ་གཉན་པོ་མ་བརྩིས་ན། ཁྱོད་ཀྱི་ཀོ་ལོང་དམ་པོ་མཛོད། །བསྐལ་པ་དུས་ཀྱིས་སྙིགས་མ་ལ། །ཡེ་ཤེས་ལྷ་ནི་སྒྲུབ་ཐག་རིང་། ཁྱོད་ནི་འཇིག་རྟེན་མྱུར་མགྱོགས་ལྷ། །སྣང་སྲིད་ལྷ་འདྲེ་དམག་ལ་འདུས། །རྒྱལ་ཆེན་སྡེ་བཞིས་དམག་དཔོན་གྱིས། །ཕྱོགས་སྐྱོང་བཅུ་ཡིས་སོ་མཚམས་སྲུངས། །རཱ་
ཧུ་ལ་ཡི་ཤན་པ་གྱིས། །རྡོ་རྗེ་ལེགས་པས་སྣ་ཁྲིད་གྱིས། །མ་མོའི་ཚོགས་ཀྱིས་དལ་ཁ་ཕོབས། །གཤིན་རྗེེའི་ཚོགས་ཀྱིས་ཁྲམ་ལ་ཐོབ། །ནམ་མཁའི་ཁམས་ནས་ལྷ་དམག་དྲོངས་། །བར་སྣང་ཁམས་ནས་གཉན་དམག་དྲོངས། །ས་གཞིའི་ཁམས་ནས་ཀླུ་དམག་དྲོངས། །རྒྱལ་པོ་ཉི་མའི་ཟེར་ལ་རྒྱུག །བདུད་དམག་ནམ་གྱི་གུང་ལ་རྒྱུག །གཙན་དམག་སྐྱ་རིངས་ཟེར་ལ་རྒྱུག །གནམ་ས་རི་ཀླུང་བར་སྣང་ཁེངས། །ལྷ་སྲིན་སྡེ་བརྒྱད་དམག་ལ་རྒྱུག །མྱུར་བ་མྱུར་བར་རིངས་སོ་རིང་། །གོ་ཁྲབ་གྱོན་ལ་སོགས་འགྲེའོ།། དགྲ་མཁར་བཤིག་ལ་དགྲ་གཞུ་གཏིབ། །དཔའ་བོ་སོད་ལ་མགྱོག་པ་སྒྱེལ། །གོ་ཁྲབ་བཤུས་ལ་སྣོ་མཚོན་འཕྲོག །དཔུང་པ་ཆོག་ལ་རྒྱུད་པ་ཆིངས། །སྡང་བའི་དགྲ་བོ་གནོད་བྱེད་ཀྱི། །དམག་དང་ཇག་རྐུན་བཤོམས་པའི་ཚེ། །སྲུང་མ་རྣམས་ཀྱིས་བཤོལ་ཐོབ་ཅིག །སྲུང་མ་རྣམས་ཀྱིས་དམག་སྣ་བསྒྱུར། །ཕོ་ཉ་རྣམས་ཀྱིས་དམག་དཔུང་ཟློག །
ལས་མཁན་རྣམས་ཀྱིས་དགྲ་བོ་སོད། །དྲེགས་བྱེད་ཚོགས་ཀྱིས་དགྲ་སྙིང་ཕྱུངས། །ལྷ་སྲིན་ཚོགས་ཀྱིས་བླ་ཚེ་ཟོ། །དགྲ་ཤ་ཟོ་ལ་དགྲ་ཁྲག་འཐུང་། །བཙོ་བསྲེག་མི་ཁོམ་རློན་པ་ཟོ། །དགྲ་ཇག་རྐུ་འཕྲོག་བཤོམ་པ་དང་། ཁ་མཆུ་གྱོད་ཚོལ་བྱེད་པ་དང་། །དཀོན་མཆོག་གསུམ་གྱི་སྤྱི་དགྲ་དང་། །ཀཾ་ཚང་བསྟན་པ་བཤིག་པ་དང་། །རྣལ་འབྱོར་བདག་གི་སྒོས་དགྲ་རྣམས། །ལོ་དང་ཟླ་བར་མ་འགྱངས་ཤིང་། །ཞག་དང་ཟ་མར་མ་བཞག་པར། །ད་ལྟ་ཉིད་དུ་རྡུལ་དུ་རློག །དགྲ་བོ་རང་གཤེད་རང་གིས་གྱིས། །དགྲ་བོ་རང་མཚོན་རང་ལ་རྒྱོབ། །བདག་ལ་སྡང་བའི་དགྲ་བོ་འདི། །བསྐལ་པའི་མུན་པའི་གཏིང་དུ་ནོན། །རི་རབ་ཆེན་པོས་སྟེང་ནས་ནས་ནོན། །རྒྱ་མཚོ་ཆེན་པོས་སྟེང་ནས་ནོན། །གྲུབ་བོ་མནན་ནོ་མ་ལྡང་ཅིག །བཀུག་པ་ཡིན་ནོ་མ་བཏང་ཅིག །བཅད་པ་ཡིན་ནོ་མ་སྐྱེས་ཤིག །དམ་ཉམས་དགྲ་བོ་མ་ཤོར་ཅིག །ཐལ་བའི་རྡུལ་དུ་བརླག་པར་མཛོད།
༈ མ་གཡེལ་སྲུང་མ་མཐུ་ཙལ་ཅན། །བདག་ཅག་དཔོན་སློབ་འཁོར་བཅས་རྣམས། །ཕྱོགས་བཞི་མཚམས་བརྒྱད་གར་འགྲོ་ཡང་། །སྔོན་ནས་བསུས་ལ་རྒྱབ་ནས་སྐྱོལ། །གཞི་བྱེས་ལམ་གསུམ་གར་འདུག་ཀྱང་། །འཇིག་པ་བརྒྱད་ལས་སྐྱོབས་པར་མཛོད། །མཐོ་ལ་བབ་ན་ལམ་སྒྲོལ་མཛོད། །དམའ་ལ་བབ་ན་ལམ་སོལ་ཅིག །ཆུ་ལ་འགྲོ་ན་ཆུ་སྒྲོལ་ཞིག །ཉམས་ངའི་གནས་སུ་མཛོ་རྟ་བརྟེན། །མཐོ་སར་གུང་ནས་བྱ་ར་མཛོད། །དམའ་ས་ཐང་ནས་འཚོ་རྫི་མཛོད། །བདག་གི་མགྲོན་པོའི་ལམ་སྣ་དྲོངས། །ཚོང་པ་རྒྱབ་ཀྱི་ཤུལ་ཡར་ཁྱོགས། ཁལ་ཁུལ་མ་ཡོ་བདེ་བར་བསྲོང་། །བདག་གི་མི་རྟའི་ཁ་འཛིན་མཛོད། །ཤུལ་རིང་ལམ་དུ་ཞུགས་པའི་ཚེ། །ཆད་ཅིང་ངལ་དུབ་མ་བཏང་ཞིག །ན་ཞིང་ཚ་བ་མ་བཏང་ཞིག །བདག་ཅག་འཁོར་བཅས་གར་འགྲོ་ཡང་། །ཉིན་ལ་བབ་ན་འཚོ་རྫི་མཛོད། །ནུབ་ལ་བབ་ན་མེལ་ཚེ་མཛོད། །ཕྱི་རྐུན་ནང་ལ་མ་བཏང་
ཞིག །ནང་རྐུན་བྲན་ལ་མ་འགྱེད་ཅིག །སློབ་དཔོན་ཐུགས་ཡིད་མ་དཀྲུག་ཅིག །བྲང་མི་ནང་མཁོན་མ་བཏང་ཞིག །གྲོ་ལ་མནོག་པོ་མ་བཏང་ཅིག །ནང་མི་ཐུགས་འགལ་མ་བཏང་ཅིག །ཡེ་འདྲོག་གློ་བུར་མ་བཏང་ཅིག །བདག་ཅག་འཁོར་བཅས་གར་འགྲོ་ཡང་། །ཡག་དང་སྤྲོད་ལ་ཉེས་དང་བསྣོལ། །མི་ཕྱུག་ནང་ནོར་གྲོགས་དང་སྤྲོད། ཁ་ནི་ཟས་འདོད་ཟས་དང་སྤྲོད། །ལག་པ་ནོར་འདོད་ནོར་དང་སྤྲོད། །རྒྱན་གོས་འདོད་པ་གོས་དང་སྤྲོད། །ཕ་རོལ་རྣམས་ཀྱི་ཆངས་པ་ཕྲོལ། །གནས་པོ་རྣམས་ཀྱི་ཡིད་སེམས་སླུས། །གནས་མོ་རྣམ་ཀྱི་སྙིང་ལག་སྒུལ། །ཅི་འདོད་ནོར་གྱི་དངོས་གྲུབ་སྩོལ། །ལེགས་ལྡན་མགོན་པོས་ཚོང་དཔོན་མཛོད། །དཔལ་རབ་འཆང་གིས་ལམ་ལྷ་མཛོད། །ཉི་མའི་སྲས་པོས་སོ་པ་གྱིས། །པརྞ་ཤ་ཝ་རི་ཡིས་ནོར་རྣམས་སྐྱོང་། །ཨཱརྻ་རེ་མནྟ་ཡིས་རྟ་རྣམས་འཚོས། །བྲག་ལྷ་མགོན་པོས་མགྲོན་ལམ་ཕྱེས། །ཨཱརྻ་ཛམྦྷ་ལ་ཡིས་ནོར་ལྷ་
མཛོད། །རྣམ་ཐོས་སྲས་ཀྱིས་གསེར་དངུལ་བསྡུས། །སྲུང་མ་རྣམས་ཀྱིས་དགྲ་སྡང་ཐུལ། །འཇིགས་པ་བརྒྱད་ལས་ཐུགས་རྗེའི་སྐྱོབས། །ཡུལ་ལྷ་གཉན་གྱིས་མཐུ་རོག་མཛོད། །ལྷ་ཀླུ་རྣམས་ཀྱིས་རྒྱབ་བསྟེན་མཛོད། །རྡོ་རྗེ་ལེགས་པ་ཚོང་ལ་མཁས། །ཕ་རོལ་རྣམས་ཀྱི་ཆངས་པ་ཁྲོལ། །མི་ནས་ཆོད་ལ་རང་ལ་བྱིན། །མ་གཡེལ་སྲུང་མ་མགྲོན་གྱི་ལྷ། །རེམ་གཅིག་འདོད་པའི་དོན་རྣམས་སྒྲུབས། །ལམ་དགྲ་བྱེས་ཀྱི་འགོང་པོ་ཡི། །རྒྱུས་པ་ཆིངས་ལ་རྡུལ་དུ་རློག །བཅོལ་བའི་ཕྲིན་ལས་འགྲུབ་པར་མཛོད། །དམིགས་པ་ནི། རང་ཡི་དམ་དུ་བསྒོམ། མདུན་དུ་ཆོས་སྐྱོང་དང་ལྷ་ཀླུ་གཉན་དམག་རང་རང་གི་འཁོར་ཚོགས་དམག་དཔུང་། ལ་ལ་ལྷ་དམག་འབུམ། ལ་ལ་ཀླུ་དམག་འབུམ། བཙན་དམག་འབུམ། གཤིན་རྗེ། མ་མོ། ཕྱོགས་སྐྱོང་གི་དམག་འབུམ་དང་བཅས་ནས། དགྲ་བོའི་ཤ་ཟོས་ནས་རྡུལ་དུ་བརླག་པར་བསམ། ཚར་དགུ་སོགས་བྱ་ཞིང་། ཐལ་མོ་དང་། བྷྱོ་གདབ། གཟའ་དར་བ་དང་སྤྱད་ལ་དགྲ་ཕྱོགས་སུ་བཏང་། འདི་ནི་བྱད་ཀ་བཟློག་པ། དགྲ་སྣ་བསྒྱུར་བ། ཇག་རྐུན་བཅིང་
པ། མོ་ངན་མཚེར་རྩུབ་བསྒྱུར་བ་ལ་དགོས་སོ། །འདི་ནི་རང་ལ་དགྲ་བྱུང་ངམ། བྱུང་དོགས་པའམ། ནོར་ཁྱེར་རམ། གཞན་དང་འགྲས་ན་བྱའོ། །ཇག་ལ་འགྲོའམ། གཞན་ལ་ནོར་ཤོར་རམ། དགྲ་བྲུབ་བྱེད་དམ། དགྲ་ལ་མཐུ་བྱེད་དམ། ཚོང་དང་མགྲོན་ལ་འགྲོ་ན་འདི་བྱའོ། །འབུལ་དུས་ཆོས་སྐྱོང་སྲུང་མ་ལྷ་འདྲེའི་དམག་དང་བཅས་པ་རྣམས་ཇི་ལྟ་བ་བཞིན་དུ། དགྲ་བགེགས་ཀྱི་ཐོག་ཏུ་སོང་ནས། ཐལ་བ་རྡུལ་དུ་བརླག་པར་བསམ། ཞེས་ལ་འདི་ནི་ལེགས་ལྡན་གྱི་ཆ་རབ་དགྲ་ཆོས་གོང་འོག་གཉིས་དང་། རྟ་ནག་དགྲ་ཆོས། ཕྱག་བཞི་པ་ཉིད་ཀྱིས་སྒ་ལོ་ལ་གསུངས་པའི་དགྲ་ཆོས་དང་། མ་ནིང་དགྲ་ཆོས་དང་། ཞིང་སྐྱོང་དམག་བསྐུལ་དང་། དམ་ཅན་དགྲ་ཆོས། གསོལ་ཀ་ཚན་མ་དང་། ཚེ་རིང་མའི་དགྲ་ཆོས་རྣམས་ཀྱིས་དོན་བསྡུས་པ་འདི་ནི། ཀརྨ་ཨ་རཱ་གས་སྦྱར་བ་ཉེས་པ་གང་མཆིས་སྲུང་མ་རྣམས་ལ་བཤགས་ཤིང་། དགེ་བས་དགྲ་ཇག་ཆོམ་རྐུན་གྱི་གནོད་པ་ཞི་ཞིང་། དཀོན་མཆོག་དབུ་འཕང་དགུང་ལ་རེག་པའི་རྒྱུར་རྒྱུར་ཅིག ། ༈ དེ་ནས་དཔལ་མགོན་པོ་ལེགས་ལྡན་གྱི་ཟློག་པ་ནི། ཧཱུྃ། མགོན་པོ་མ་ཧཱ་ཀཱ་ལ་མཐུ་ཆེན་ནག་པོ་ནི། །དྲག་པོར་མཚན་གསོལ་ལེགས་ལྡན་ནག་པོ་སྟེ། །ལྷ་མིན་གྲོང་ཁྱེར་སུམ་བརྩེགས་འཇིག་པར་བྱེད། །སྲིན་པོའི་གྲོང་ཁྱེར་
བདུན་འབུམ་གཏན་ནས་བརླག །ལྷ་ཡི་དམག་དཔོན་གཡུལ་ལས་རྣམ་པར་རྒྱལ། ཁྱོད་ཀྱི་ཐུགས་དམ་གཉན་པོ་བསྐུལ་བའི་ཚེ། །དཀར་པོ་ལྷ་དམག་བྱེ་བ་དུང་ཕྱུར་བཅས། །ཉོན་མོངས་ལྷ་མིན་དམག་ཚོགས་བཟློག་པར་བྱེད། །ཕྱོགས་ལས་རྣམ་རྒྱལ་ལྷ་ཡི་སྡེ་དཔོན་ཁྱོད། །ནག་པོའི་རྩ་ལག་འཇོམས་པའི་སྟོབས་དང་ལྡན། །བདུད་དང་འཆི་བདག་བཟློག་པའི་མཐུ་བོ་ཆེ། །ལྷ་མིན་དམག་སྣ་ཟློག་པའི་རྫུ་འཕྲུལ་ཅན། །དོ་ནུབ་ཟློག་སྒྱུར་བྱེད་པའི་དུས་ལ་བབ། །དོ་ནུབ་སྲིད་པའི་ཁྲམ་ཁ་དགྲ་ལ་སྒྱུར། །དོ་ནུབ་ལྷ་ཡི་དམག་སྣ་དགྲ་ལ་སྒྱུར། །དོ་ནུབ་རྦོད་གཏོང་ཟློག་པའི་དུས་ལ་བབ། །ཡེ་ཤེས་ལྷ་ཡི་བཀའ་འཆད་ཉི་ལྟར་ཤར། །དེ་ཡང་བཟློག་པའི་ཕྲིན་ལས་མཛོད། །དྲང་སྲོང་དམོད་པ་ཐོག་ལྟར་འཕེན། །དེ་ཡང་བཟློག་པའི་ཕྲིན་ལས་མཛོད། །གཤིན་རྗེའི་འཕྲུལ་འཁོར་བྲག་ལྟར་རློམ། །དེ་ཡང་༴ སྲིན་པོའི་གདུག་རྩུབ་མུན་ལྟར་འཐིབས། །དེ་ཡང་༴
ཀླུ་ཡི་དགུ་རླབས་སྤྲིན་ལྟར་གཡོ། །དེ་ཡང་༴ རླུང་ལྷའི་སྦྱོར་བ་འཚུབ་མ་འཁྲུགས། །དེ་ཡང་༴ གནོད་སྦྱིན་གདུག་པ་རླུང་ལྟར་འཕྱོ། །དེ་ཡང་༴ འབྱུང་པོའི་དལ་ཁ་ཆུ་ལྟར་ཁོལ། །དེ་ཡང་༴ གཟའ་ཡི་ཀིང་ཀང་མེ་ལྟར་འབར། །དེ་ཡང་༴ མ་མོའི་དལ་ཡམས་མཚོ་ལྟར་རླབས། །དེ་ཡང་༴ མཁའ་འགྲོའི་ཆོ་འཕྲུལ་གློག་ལྟར་འཁྱུག །དེ་ཡང་༴ གནོད་སྦྱིན་མ་མོས་སྡང་མིག་བྱེད། །དེ་ཡང་༴ བདུད་མོས་ཁྲག་གི་ཁ་ཁྲུ་གཏོར། །དེ་ཡང་༴ གཤིན་རྗེ་མ་མོས་ལྕེ་དམར་རྐྱོང་། །དེ་ཡང་༴ སྲིན་མོ་ཁྲོས་པས་མཆེ་བ་གཙིགས། །དེ་ཡང་༴ མོན་མོས་བརྡ་གར་བརྡ་འབོད་བྱེད། །དེ་ཡང་༴ མ་མོའི་ངན་སྔགས་སྒྱོགས་ལྟར་འཕེན། །དེ་ཡང་༴ ཀླུ་མོའི་ཁ་རླངས་ཟེར་ལྟར་འཕྲོ། །དེ་ཡང་༴ འདྲེ་མོས་འཇབ་ཅིང་ལག་པ་རྐྱོང་། །དེ་ཡང་༴ ལྷ་མིན་གནོད་པ་སྐར་ལྟར་འཁྲུག །དེ་ཡང་བཟློག་པའི་ཕྲིན་ལས་མཛོད། །ཞང་བློན་ཚོན་གྱི་གྲུ་གུ་རྐྱོང་། །དེ་ཡང་༴ མོན་པ་
ནག་པོས་སྤུ་གྲི་རྡོར། །དེ་ཡང་༴ དམུ་ཡི་རྡོ་ཟོར་ཆར་ལྟར་འབེབ། །དེ་ཡང་༴ མཁའ་ལྡིང་གནོད་པ་གློག་ལྟར་འགྱུ། །དེ་ཡང་༴ གྲུལ་བུམ་གནོད་པ་གངས་ལྟར་ཞིག །དེ་ཡང་༴ དྲི་ཟའི་སྤྲུལ་པ་འཇའ་ལྟར་འཁྱིལ། །དེ་ཡང་༴ མིའམ་སྤྲུལ་པ་ཟླ་ལྟར་ཤར། །དེ་ཡང་༴ ལྟོ་འཕྱེའི་ཆོ་འཕྲུལ་ས་ལྟར་གཡོ། །དེ་ཡང་༴ བདུད་ཀྱི་ཁྲམ་ཁ་རི་ལྟར་རྙིལ། །དེ་ཡང་༴ ལྟས་ངན་སྤྲུལ་པ་མགོ་བརྙན་རྒྱུ། །དེ་ཡང་༴ རྒྱལ་པོའི་ཆོ་འཕྲུལ་འོད་ལྟར་ཤར། །དེ་ཡང་༴ ས་བདག་གདུག་པ་ཕྱི་ལྟར་འཛུལ། །དེ་ཡང་བཟློག་པའི་ཕྲིན་ལས་མཛོད། །ཐམས་ཅད་དགྲ་བགེགས་སྟེང་དུ་ཟློག །བནྡེ་བྱད་མའི་སྙིང་ལ་བྷྱོ། །བོན་པོ་བྱད་མའི་སྙིང་ལ་བྷྱོ། བྱད་མ་བཟློག་པའི་ཕྲིན་ལས་མཛོད། །དགྲ་བགེགས་བརླག་པའི་ཕྲིན་ལས་མཛོད། །བཅོལ་བའི་ཕྲིན་ལས་འགྲུབ་པར་མཛོད། །ཅེས་ཐན་དང་འཕྲད་པའམ། བྱད་ཀ་བཟློག་པའམ། དམག་སྣ་ཆེན་པོ་བཟློག་པའམ། མ་མོ་འཁྲུག་པའམ། ལྟས་ངན་མི་བཟད་
པ་དྲག་པོ་བྱུང་བ་ཐམས་ཅད་ལ་བཟློག་པ་འདི་བསྒྲགས་ཏེ། ལན་བདུན་ནམ། ལྔ་འམ། གསུམ་ལ་སོགས་པ་དྲག་ཏུ་གྱེར་བར་བྱའོ། །གནམ་ལྕགས་ཀྱི་ཐོག་ཡིན་ཟེར་ཡང་འདིས་བཟློག་པར་ཐེ་ཚོ་མི་འཚལ། སློབ་དཔོན་པདྨས་མཛད་པའོ།། །།དགེའོ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།