བཅོམ་ལྡན་འདས་རྡོ་རྗེ་བེར་ཅན་ལྕམ་དྲལ་གྱི་རྣོ་མྱུར་དྲག་པོའི་ལས་མཐའ་བསྲེག་པ་ཧོཾ་ཀྱི་མན་ངག་རྡོ་རྗེའི་མེ་འོབས་བསྟན་དགྲ་ཚར་གཅོད་ཕྲིན་ལས་ལྷུན་གྲུབ།
བཅོམ་ལྡན་འདས་རྡོ་རྗེ་བེར་ཅན་ལྕམ་དྲལ་གྱི་རྣོ་མྱུར་དྲག་པོའི་ལས་མཐའ་བསྲེག་པ་ཧོཾ་ཀྱི་མན་ངག་རྡོ་རྗེའི་མེ་འོབས་བསྟན་དགྲ་ཚར་གཅོད་ཕྲིན་ལས་ལྷུན་གྲུབ་ཅེས་བྱ་བ་བཞུགས་སོ། །
ཤྲི་མ་ཧཱ་ཀཱ་ལ་ཨུཏྟ་རེ་བྷྱཿ ཕྲིན་ལས་དྲག་གཏུམ་བསྐལ་པའི་མེས། །བསྟན་ལ་སྡང་བ་མཐར་བྱེད་པ། །ཟ་བྱེད་རྡོ་རྗེ་སྲིན་པོ་ཆེ། །བཻ་ཏ་ལིར་བཅས་དཀྱིལ་འཁོར་ལྷར། །བསྟོད་ནས་དྲག་པོའི་ཕྲིན་ལས་ཀྱི། །མཐའ་སྡུད་བསྲེག་པ་ཧོཾ་གྱི་གཟོར། །རྒྱུད་དང་མན་ངག་བཅུད་ཕྱུངས་པའི། །ལག་ལེན་རྣམ་གསལ་འདིར་འགོད་བྱ། །འདིར་སྒྲུབ་བརྒྱུད་ཀརྨ་ཀཾ་ཚང་གི་བསྟན་སྲུང་རྡོ་རྗེ་ནག་པོ་ཆེན་པོ་ལྕམ་དྲལ་གྱི་མངོན་སྤྱོད་ཕྲིན་ལས་ཀྱི་རྣོ་སོ་བསྲེག་པ་ཧོམ་གྱི་ལག་ལེན་མདོ་ཙམ་བརྗོད་པར་བྱ་སྟེ། །དེ་ཡང་ནག་པོ་ཆེན་པོའི་རྒྱུད། །དུར་ཁྲོད་ཆེན་པོའི་སྦྱིན་སྲེག་གི་ལེའུར། །སྦྱིན་སྲེག་ལས་རྣམས་ཀུན་གྱི་མཆོག །ཁྱད་པར་དུ་ནི་བསད་པ་ཡི། །སྦྱིན་སྲེག་འདིར་ནི་ཤེས་པར་གྱིས། །ཞེས་
དང་། དེ་ཉིད་ལས། །སྦྱིན་སྲེག་ཆོ་གའི་རིམ་པ་ནི། །ཁྱད་པར་བདུན་དུ་ཤེས་པར་གྱིས། །བདག་དང་གནས་དང་མཆོད་གཏོར་དང་། །ཐབ་དང་ལྷ་དང་རྫས་དང་དུས། །རྣམ་པ་བདུན་དུ་རབ་ཏུ་བཤད། །ཅེས་ཆོ་གའི་སྡོམས་སུ་བསྟན་པ་ཉིད། ཁྱེར་བདེ་བའི་ཕྱིར་འཁྲུགས་པ་བསྡེབས་ནས་བཀོད་པ་ལ་གཉིས། སྦྱོར་བ་དང་། དངོས་གཞིའོ། །དང་པོ་ལ། བདག །གནས། དུས། ཐབ་ཁུང་། མཆོད་པ། སྲེག་རྫས་བཅས་དང་། ལྷ་སྟེ་བདུན་དུ་བསྟན་པའི་དང་པོ་ནི། རིན་པོ་ཆེ་ཀརྨ་པའི་བརྒྱུད་པ་འཛིན་པ། དབང་ཐོབ་ཅིང་དམ་ཚིག་ལ་གནས་པའི་རྣལ་འབྱོར་པ་བདག་ཉིད་དཔལ་ནག་པོ་ཆེན་པོའི་ཕྱི་ནང་གསང་བའི་དཀྱིལ་འཁོར་གྱི་རིམ་པའི་བསྙེན་སྒྲུབ་ཡན་ལག་བཞི་ལྡན་གྱི་སྦྱོར་
བས་རབ་དྲོད་ཚད་ཀྱི་ངེས་བརྙེད་ཅིང་བརྟན་པ་ཐོབ་པའམ། ཐ་མའང་དུས་དང་གྲངས་ཀྱི་བསྙེན་པ་རྫོགས་པ་ཞིག་ནི་ངེས་པར་དགོས་ཏེ་རྒྱུད་ལས། དེ་ཉིད་ནག་པོའི་མཚན་མ་རྙེད། །དེ་ནས་སྦྱིན་བསྲེག་བརྩམ་པར་བྱ། །ཞེས་གསུངས་པ་དང་། ཁྱད་པར་གྲུབ་ཆེན་ཀརྨ་པས། ཆོས་སྐྱོང་འདི་ཀརྨ་པའི་དུས་གསུམ་གྱི་ཆོས་སྐྱོང་ཡིན་པ་བརྒྱུད་འཛིན་བུ་སློབ་རྣམས་ཀྱིས་ཤེས་པར་མཛོད། །བརྒྱུད་པ་འཛིན་ཅིང་དུས་གསུམ་མཁྱེན་པའི་གདན་ས་སྐྱོང་བ་རྣམས་ཀྱིས་མ་སྒྲུབ་ཀྱང་ཕྲིན་ལས་དང་སྟོང་གྲོགས་བྱེད་ལ། བརྒྱུད་པ་མི་འཛིན་ཅིང་དུས་གསུམ་མཁྱེན་པའི་གདན་ས་དང་བསྟན་པ་མི་སྐྱོང་བ་རྣམས་ཀྱིས་བསྒྲུབ་ཀྱང་། དངོས་གྲུབ་དང་ཕྲིན་ལས་མི་འགྲུབ་ཅིང་བར་ཆད་སྣ་ཚོགས་འབྱུང་བར་འགྱུར་རོ་ཞེས་གསུང་པ་ལྟར་ཤེས་པར་བྱའོ། །གཉིས་པ་ནི། བརྒྱུད་དེ་ཉིད་ལས། གནས་ནི་དུར་ཁྲོད་ཆེན་པོ་ཡི། །རོ་སྲེག་མེ་ཐབ་ཁང་སྟོང་ངམ། །རྡོ་རྗེའི་བྲག་ལ་སོགས་པ་ཡི། །འཇིགས་པའི་གནས་སུ་སྦྱིན་སྲེག་བྱ། །ཞེས་འབྱུང་བ་ལྟར་རམ། སྒྲུབ་པ་དང་འབྲེལ་བའི་སྐབས་དཀྱིལ་འཁོར་གྱི་ལྷོའམ་ལྷོ་ནུབ་ཀྱི་ཕྱོགས་སུ་ཁེལ་བ་བྱུང་ན་ལེགས་ཤིང་། གཞན་ཅི་བདེར་བྱར་རུང་ངོ། །གསུམ་པ་ནི། རྒྱུད་ལས། མར་ངོའི་ཚེས་གཅིག་ལ་སོགས་པ། །མར་ངོའི་ཕྱོགས་ནི་ཐམས་ཅད་ལ། །སྦྱིན་སྲེག་ཆོ་ག་བརྩམ་པར་བྱ། །ཉི་མ་ཕྱེད་དང་ནམ་གྱི་གུང་། །བསད་པའི་
དུས་ནི་ཡིན་པར་བཤད། །ཞེས་པ་ལྟར་དང་། གཞན་ཡང་བསྙེན་སྒྲུབ་ཀྱི་ཁ་སྐོང་ཤིང་ངར་འདོགས་པ་དང་མངོན་སྤྱོད་དྲག་པོའི་ལས་ཀྱི་རྗེས་སྡུད་རྣམས་སུ་བྱའོ། །བཞི་པ་ནི། རྒྱུད་ལས། དུར་ཁྲོད་ས་དང་ཆུ་འགྲམ་ས། །མེ་ཐབ་ས་ལ་ཐབ་ཁུང་བྱ། །ཞེས་གསུངས་པ་བཞིན་ཐབ་ཁུང་བྱ་བའི་སྔོན་དུ་འགྲོ་བ་ས་སློང་བ་ནི། སྒྲུབ་པ་དང་འབྲེལ་ཞིང་དཀྱིལ་འཁོར་གྱི་ཁང་པའི་ཉེ་ལོགས་ལྟ་བུར་ཡིན་ན་མ་བྱས་ཀྱང་རུང་ལ། བསྲེག་རྐྱང་དུས། དཀྱིལ་འཁོར་དང་འབྲེལ་ཡང་དུར་ཁྲོད་ལྟ་བུ་ཐག་རིང་དུ་བྱེད་པ་དང་། སྤྲོས་པ་ལ་དགའ་ན་གང་དུ་བྱ་བའི་གཞི་དེར། བདག་ཉིད་ལྷའི་རྣལ་འབྱོར་རམ། ཐུན་མཚམས་ཀྱི་ལྷ་ཡི་ང་རྒྱལ་དང་ལྡན་པས། མཆོད་གཏོར། གསེར་སྐྱེམས་བཅས་བཤམས་ནས་བདག་གིས་བྱས་པའི་ས་ཆོག་རྡོ་རྗེའི་ཕྲེང་བ་ནས་འབྱུང་བའི་ས་ལྷའི་སྐབས་བཞིན་ས་སློང་བྱས་མཐར། གནང་བ་བྱིན་ཏེ་རང་གནས་སུ་གཤེགས་པར་མོས། དེ་ནས་རྡོ་རྗེ་དང་བཅས་པའི་ལག་གཡས་ས་ལ་བཞག་སྟེ། ཨོཾ་མ་ཧཱ་ཀཱ་ལ་ཡ་ཧཱུྃ་ཕཊ་སྭཱ་ཧཱ། ཞེས་བརྒྱ་རྩ་བརྒྱད་དང་། ཨོཾ་ཨཱཿཧཱུྃ་ཨོཾ་ཧ་ན་ཧ་ན་ཀྲོ་ངྷ་ཧཱུྃ་ཕཊ། ཅེས་ཆོས་ཐམས་ཅད་གདོད་ནས་རང་བཞིན་གྱི་སྟོང་པ་ཉིད་དུ་རྣམ་པར་དག་པའི་མོས་པས་སྦྱང་བ་ཙམ་བྱས་པས་འགྲུབ་ལ། གང་ལྟར་ཡང་ཐབ་ཁུང་དངོས་ནི། དེང་སང་གི་ཕྱག་ལེན་
ལྟར་བྲི་ཐབ་བྱ་སྟེ། །དེ་ཡང་ཐབ་ཀྱི་སྟེགས་བུའི་རྒྱུ་གོང་དུ་བཤད་པ་དེ་དག་གམ། སྤྱི་ཙམ་དུ། ཚོན་གྱི་ཁ་དོག་ནག་པོར་བསྒྱུར་བའི་སྟེགས་བུ་རྒྱར་མདའ་གང་བ། དཔངས་སུ་མཐོ་གང་པ་གྲུ་གསུམ་རྩེ་མོ་མདུན་དུ་བསྟན་པ་ལ། རྡུལ་ཚོན་གྱིས་གྲུ་གསུམ་ངོས་ལ་ཁྲུ་གང་པ། ཁ་ཁྱེར་གསུམ་རིམ། དབུས་སུ་དྲག་པོའི་མཚོན་འཁོར་རྩིབས་བརྒྱད། དེའི་ལྟེ་བར་ཨེ་མཐིང་ནག་ལ་གྲི་གུག་ཟླ་བ་ཕྱེད་པ་ལྟ་བུས་མཚན་པ། གྲུ་གསུམ་ཕྱི་ནང་ཚང་མའི་རྩེ་མོ་བསྟན་ཕྱོགས་སྟེགས་བུ་དང་མཚུངས་པ། ཁ་ཁྱེར་གསུམ་ལ་ནང་ནས་རིམ་བཞིན་གྲི་གུག །ཐོད་སྐམ། མེ་རི་དང་བཅས་པ་རྣམས་ལ། ཐོད་སྐམ་དང་མེ་རི་མ་གཏོགས་གཞན་རྣམས་ཁ་དོག་ནག་པོ་དང་མཐིང་ཀ་ཤ་སྟག་ལ་ཅུང་ཟད་མི་འདྲེས་པའི་མདངས་བསྒྱུར་བས་བྱ་བ་ཡིན་ཏེ། རྒྱུད་ལས། ཐབ་ནི་མཐིང་ནག་ཨེ་ཡི་དབྱིབས། །རྒྱ་ལ་ཁྲུ་གང་ཟབས་སུ་ཕྱེད། །སུམ་རིམ་དཔང་ལ་སོར་གསུམ་སྟེ། །མེ་འོད་གྲི་གུག་ཐོད་པས་བརྒྱན། །དབུས་སུ་གྲི་གུག་ནག་པོ་བྲི། །ཞེས་བཤད་དོ། །ཐབ་དེར་དུར་ཚེར་སྐྱེར་པ། སྟར་བུ་ལ་སོགས་པའི་ཤིང་གྲུ་གསུམ་གྱི་དབྱིབས་གཤགས་པས་ཟུར་གསུམ་དུ་བརྩེགས་ཤིང་ནང་དུ་མེ་ཚང་ལེགས་པར་བཅལ། མེ་ཡོལ་ཀྱང་ཁ་དོག་ནག་པོར་བསྒྱུར་ཞིང་བྲག་རི་གཟིང་བ་དང་བམ་ཡིག་འབྲིའོ། །ལྔ་པ་ནི་རྒྱུད་ལས། མེ་ཏོག་སྤོས་དང་མར་མེ་དྲི། །ཤ་ཆེན་ལྷ་བཤོས་བསྲེག་
པའི་རྫས། །ཁྱད་པར་གྱི་ནི་མཆོད་པར་བྱ། །ཅེས་གསུངས་པས། སློབ་དཔོན་གྱི་གཡས་ཕྱོགས་སུ་སྟེགས་ཀྱི་ཁར་ཞིང་དང་གཅན་གཟན་གྱི་ལྤགས་པའམ་དར་ནག་བཀབ་པར། དབུས་སུ་ཁྱད་པར་གྱི་གཏོར་མ་ཤ་ལྔ་བདུད་རྩི་ལྔ། བཙན་དུག །སྦྲང་རྩི། རྒུན་འབྲུམ་ནག་པོ། སེ་འབྲུ། ཉ་ཤ །ཚ་བ་གསུམ། ཁྲག་ཆེན། མི་རུས་རྣམས་བསྲེག་པའི་བ་ལིང་དང་། གཡས་གཡོན་དུ་སོ་སོའི་རྫས་ལྡན་གྱི་སྨན་རཀ །གཞན་ཡང་དུག་ཁྲག་གི་ཨཱརྒྷཾ། དུག་དང་དབང་ལྔའི་མེ་ཏོག །མན་ངག་གི་སྤོས། ཞུན་ཆེན་གྱི་མར་མེ། ཁྲག་ཞག་ཐལ་བ་བདུད་རྩི་ལྔ་རྣམས་ཀྱི་དྲི་ཆབ་ཤ་ཆེན་གྱི་ཞལ་ཟས་སོགས་དྲག་པོའི་ཉེར་མཆོད་ཕྲེང་ཚར་དང་། དེ་ལས་དམའ་བར་མེ་ལྷའི་གཏོར་མ་དང་། དྲག་པོའི་ཉེར་མཆོད་བཅས་པའང་བཤམ་མོ། །དྲུག་པ་ནི། སློབ་དཔོན་གྱི་གཡོན་དུ་དགང་གཟར་བླུགས་གཟར་ཀྱང་། རྒྱུད་ལས། རྫས་ནི་མི་རྐང་ལས་བྱུང་བའི། །ཆོ་གས་དགར་གཟང་བླུག་གཟར་བྱ། །ཞེས་པ་ལྟར་རམ། སྤྱི་ཁྱབ་ལྕགས་ལས་བྱས་པའི་དགང་གཟར་བླུག་གཟར་གྲུ་གསུམ་རལ་གྲིའམ་རྡོ་རྗེས་མཚན་པ་དང་། ཚིལ་ཞུན་ནམ་མར་ནག་བཅས་འདུ་བྱ། གཞན་ཡང་མེ་ལྷའི་གདན་ཀུ་ཤ་རྒྱ་གྲམ་དུ་བཅིངས་པ་དང་། རླུང་གཡབ་བྱ་རོག་གི་གཤོག་པའམ་རས་ནག་ལ་རཾ་ཡིག་བྲིས་པ། ཐོད་པ་ལ་སོགས་པའི་སྣོད་དུ་ཁྲག་གི་མཆོད་ཡོན་དང་། བསང་གཏོར།
དུག་ཆུའི་ཞལ་བསིལ་བཅས་བཤམས་དང་། སོ་རྩི། སློབ་དཔོན་གྱི་གཡོན་དུ་བྱིན་གྱིས་བརླབས་པའི་ནང་མཆོད་ཌཱ་མ་རུ་དང་རྡོར་དྲིལ་སྲས་མཆོག་གི་ཕུར་བུ་གྲི་གུག་མེ་ཏོག་གམ་འབུན་པ། །གཞན་ཡང་མེ་རུའམ། ཏིང་ལོ་གདོལ་བཤན་གྱི་ལག་ནས་བྱུང་བའི་མེ། མེ་གཞི་ལ་བྱེད་ཁྲག་ཆུ་ཕོན་ཆེ་བ། གདབ་ལས་རྒྱས་བསྡུས་གང་ཡིན་གྱི་ཆས་སོགས་ཉེར་མཁོ་རྣམས་ཚོགས་པར་བྱའོ། །རྩ་བའི་ས་བཅད་བདུན་པ། སློབ་དཔོན་ཉིད་སྙིང་རྗེ་ཆེན་པོས་ཀུན་དཀྲིས་པའི་ཞེ་སྡང་གི་སེམས་དྲག་གཏུམ་གྱི་ཉམས་དང་ལྡན་པས། ཞྭ་བེར་ནག་པོ་དང་། ཐོད་པའམ་རཀྴའི་ཕྲེང་བ་གྱོན་ལ། གདོང་ལ་རོ་སོལ་ལམ་དུག་ཁྲག་བྱུགས་ནས། བམ་ཆེན་ནམ་ཞིང་གི་པགས་པ་དངོས་སམ་དེར་དམིགས་པའི་གདན་ལ། གདོང་མེ་དཀྱིལ་གྱི་མདུན་དུ་ཕྱོགས་པས། རྐང་པ་གཡོན་པུས་བསླང་གི་གཡས་སྐྱིལ་ཀྲུང་བྱས་པའི་མཐིལ་མནན་པའི་སྟབས་ཀྱིས་འཁོད་པར་བྱ་སྟེ། རྒྱུད་ལས། དེ་ལ་བདག་ཉིད་རྣལ་འབྱོར་པས། །རོ་ཡི་གདན་ལ་འདུག་ནས་ནི། །མིག་གིས་ཟུར་གསུམ་མི་བཟད་པ། །བྱས་ནས་སོས་ནི་སོ་འཆའ་ཞིང་། །ཞེས་སོ། །དངོས་གཞི་ལྷའི་ཆོ་ག་སྦྱིན་སྲེག་དངོས་ལ་ལྔ། སྔོན་དུ་བྱ་བ། མེ་ལྷ་མཆོད་པ། དཀྱིལ་འཁོར་པ་མཆོད་པ་མེ་ལྷར་གཏང་རག་འབུལ་ཞིང་གཤེགས་སུ་གསོལ་བ། རྗེས་རིམ་རྣམས་ལས། དང་པོ་ལའང་བཞིར་བཤད་པའི་ཐོག་མ་
བདག་གི་རྣལ་འབྱོར་ནི། བསྙེན་སྒྲུབ། སྒྲུབ་མཆོད་སོགས་དང་འབྲེལ་བ་ཡིན་ན་སྔོན་དུ་སོང་ཟིན་ཅིང་། དེ་དག་དང་མི་འབྲེལ་བའི་སྦྱིན་སྲེག་སྒེར་ཐུབ་བྱེད་པ་ཡིན་ན་མགོན་པོ་མཚལ་གསེར་གྱི་གཞུང་གང་མོས་སྲུང་འཁོར་ནས་བསྟོད་པའི་བར་བཟླས་པ་བཅས་གྲུབ་པར་བྱ་བའམ། དེ་ཙམ་མི་ལྕོགས་ན་བརྒྱུད་འདེབས་སྐྱབས་སེམས་སྲུང་འཁོར་བདུད་རྩི་བྱིན་རླབས་བཅས་སྔོན་དུ་འགྲོ་བས་བདག་གིས་བྱས་པའི་ས་ཆོག་རྡོར་ཕྲེང་ནས་འབྱུང་བའི་བདག་བསྒོམ་བཟླས་པ་བསྡུ་སྡང་གི་བར་བགྱིས་པས་ཀྱང་འགྲུབ་བོ། །གཉིས་པ་རྡོར་དྲིལ་བཟུང་བ་ནི། བདག་ཉིད་ཀྱི་ལག་པ་གཡས་གཡོན་ཉི་ཟླའི་དཀྱིལ་འཁོར་ཨ་དང་ཧཱུྃ་གིས་མཚན་པ་དེ་ཡོངས་སུ་གྱུར་པ་ལས་ལག་པ་གཉིས་རྡོ་རྗེའི་རང་བཞིན་དུ་གྱུར་པར་མོས་ལ་པད་སྐོར་སྔོན་དུ་འགྲོ་བས། ཨོཾ་མ་ཧཱ་བཛྲ་ཧཱུྃ་ཞེས་རྡོ་རྗེ་བླངས་ཤིང་གསོར། ཨོཾ་བཛྲ་གྷནྜེ་ཨཱཿ ཞེས་དྲིལ་བུ་དཀྲོག་ཞིང་། མཐར་སྙིང་གར་འཁྱུད་རྒྱ་བཅས་དམ་ཚིག་གསུམ་དྲན་པར་བྱ་ཞིང་འདི་ནས་བཟུང་ཆོ་ག་མ་གྲོལ་བར། ལུས་ལྷ། ངག་སྨྲ་བཅད། ཡིད་ཏིང་ངེ་འཛིན། ལག་པ་རྡོར་དྲིལ་དང་མི་འབྲལ་བ་རྣམས་བྱའོ། །གསུམ་པ་རྫས་བརླབས་པ་ནི། །མཆོད་རྫས་དང་བསྲེག་རྫས་རྣམས་ལ་བྱིན་གྱི་བརླབས་པའི་བདུད་རྩི་འཐོར་ཞིང་།
དཾཥྚོད་ཀྱིས་བསང་། སྭ་བྷཱ་ཝས་སྦྱང་། སྟོང་པ་ཉིད་དུ་གྱུར། །སྟོང་པའི་ངང་ལས་ཨ་ལས་ཐོད་པར་ཧཱུྃ་ཡིག་ནག་པོ་ལས། སྨན་གཏོར་རཀྟ་ཉེར་སྤྱོད་མཆོད་སྤྲིན་དང་། །ནྲྀ་དང་ཏྲི་ལས་དགྲ་བགེགས་ཤ་ཁྲག་རུས། །ཕུང་ཁམས་སྐྱེ་མཆེད་སྲོག་དབུགས་དྲོད་མདངས་བཅས། །ངོ་བོ་ཟག་མེད་རྡོ་རྗེའི་དམ་ཚིག་རྫས། །དཀྱིལ་འཁོར་པ་རྣམས་དགྱེས་སྐོང་མཆོག་ཏུ་གྱུར། །ཨོཾ་བཛྲ་ཨཱརྒྷཾ་ཨཱཿཧཱུྃ། དེ་བཞིན་དུ། པུཥྤེ་ནས། ཤབྟའི་བར་དང་། མ་ཧཱ་མཱཾ་ས་ཨོཾ་ཨཱཿཧཱུྃ། དེ་བཞིན་སྦྱར་བའི། རཀྟ། ཙིཏྟ། བ་སུ་ཏ། མཉྩ་མེ་ཙི། གོ་རོ་ཙ་ན་ཨ་མྲི་ཏ། སུ་ར་ཏ། བ་ལིངྟ། ཀི་ནི་རི་ཏིའི་སྔགས་རྣམས་ཀྱིས་བྱིན་གྱིས་བརླབ་བོ། །བཞི་པ་མེ་སྦར་བ་ནི། རྒྱུད་ལས། རིགས་ངན་བཤན་པ་ལས་བྱུང་བའི། །སྦྱིན་སྲེག་མེ་ནི་ཡིན་པར་བཤད། །ཅེས་པ་བཞིན་གོང་གི་མེས་ཏིང་ལོའམ་དཔལ་འབར་སྦར་བདུད་རྩིས་བྲན་ལ། དཾཥྚོད་ཀྱིས་བསང་། ཨོཾ་བཛྲ་མ་ཧཱ་ཀཱ་ལ། ཨ་མུ་ཀ་མཱ་ཡ་ཛྭ་ལ་རཾ་ཞེས་མེ་ཐབ་ཀྱི་ལྷོ་ནས་མེ་གཞུག་ལ་སྦར། རླུང་གཡབ་ཀྱིས་གཡབ། ཧཱུྃ་ཧཱུྃཧཱུྃ། ཧཱུྃ་ཧཱུྃ་ཧཱུྃ། ཧཱུྃ་ཞེས་ཞུན་ཆེན་གྱིས་མེ་གསོ། འདི་ནས་
བཟུང་མ་གྲོལ་བར་མེ་ཐབ་ལ་ལས་རྡོར་དང་། སློབ་དཔོན་མ་གཏོགས་གཞན་གྱིས་མི་རེག་ཅིང་། མེ་ཚང་དཀྲུགས་པ་སོགས་མི་བྱའོ། །གཉིས་པ་མེ་ལྷ་མཆོད་པ་ལ། དེའི་མངོན་རྟོགས་དུར་ཁྲོད་ཆེན་པོའི་རྒྱུད་ལས། ཐབ་ཀྱི་ནང་དུ་སོགས་ནས་རྐང་པ་དྲུག་རྒྱུད་ཚིག་ཉིད་ལ་མཚམས་སྦྱོར་ཕྲན་བུ་བཅས་འགོད་པ་ལ། བསྐྱེད་པ། སྤྱན་དྲངས་བསྟིམ་པ། གདན་འབུལ། མཆོད་བསྟོད། རྫས་དབུལ་བ་སྟེ་ལྔ་ལས། དང་པོ་ནི་མེ་ཐབས་བདུད་རྩི་གཡོན་བསྐོར་དུ་འཐོར་ཞིང་། ཨོཾ་དཾཥྚོད་ཀྱིས་བསང་། སྭ་བྷཱ་ཝས་སྦྱང་། ཆོས་རྣམས་ཐམས་ཅད་སྟོང་པ་ལས། །ཧཱུྃ་གི་ཡི་གེ་ལས་བྱུང་བའི། །དྲག་པོའི་ཐབ་ཁུང་ཟུར་གསུམ་པ། །ཁ་ཁྱེར་གསུམ་ལྡན་ཆོས་དབྱིངས་ཁྱབ། །འབར་བའི་མེ་ལྕེ་རབ་འཁྲུག་པའི། །ཐབ་ཀྱི་ནང་དུ་པད་ཉིར་ཧཱུྃ། །རཾ་ལས་མེ་ལྷ་བསྐྱེད་པར་བྱ། །ཞལ་གཅིག་པ་ལ་ཕྱག་གཉིས་པ། །ཕྱག་གཉིས་མེ་ཏོག་བགྲངས་ཕྲེང་འཛིན། །མདོག་དམར་སྤྱན་བགྲད་ཞལ་གདངས་པ། །ཁྲོ་གཉེར་མཆེ་བ་གཙིགས་པའོ། །ར་སྐྱེས་ལ་གནས་གནས་གསུམ་དུ། །ཡིག་གསུམ་མཚན་ལས་འོད་ཟེར་འཕྲོས། །
རི་རབ་ལྷུན་པོའི་ཤར་ལྷོ་ནས། །མེ་ལྷ་འཁོར་བཅས་སྤྱན་དྲངས་གྱུར། །གཉིས་པ་ནི། རྒྱུད་ལས། རང་བཞིན་མེ་དང་ཡེ་ཤེས་མེ། །ཕྱག་རྒྱ་བཞི་ཡི་སྦྱོར་བས་བསྟིམ། །ཞེས་པ་ལྟར་དྲངས་ཞིང་བསྟིམ་པ་ནི། ལག་གཡས་མི་འཇིགས་པའི་རྒྱ་དང་བཅས་པའི་མཐེ་བོང་རྣ་བའི་དྲུང་དུ་གཡོབ་ཅིང་། ཧཱུྃ། ཚུར་གཤེགས་ཚུར་གཤེགས་འབྱུང་པོ་ཆེ། །རང་བཞིན་གནས་ནས་སྐུ་བསྐྱོད་ལ། །འབར་བའི་དཀྱིལ་འཁོར་འདིར་བཞུགས་ནས། །རང་གི་དམ་ཚིག་ཚུལ་བཞིན་མཛོད། །ཨོཾ་ཨཱགྣེ་དེ་བ་ས་པ་རི་ཝཱ་ར་ཨེ་ཧྱ་ཧི་ཛཿཧཱུྃ་བྃ་ཧོཿ གསུམ་པ་ནི། ཀུ་ཤ་རྒྱ་གྲམ་དུ་ཕུལ་བ་ལ། ཨོཾ་ཨགྣེ་དེ་བ་ས་མ་ཡ་ཨཱ་བེ་ཤ་ཡ་ཏིཥྛ་ལྷན། ཞེས་བརྗོད། བཞི་པ་ནི། མཆོད་ཡོན་ལ་སོགས་པའི་ཉེར་མཆོད་རྣམས་འབུལ་ཞིང་། ཨོཾ་ཨཱགྣེ་དེ་བ་ས་པཱ་རི་ཝཱ་ར་ཨཱརྒྷཾ་པྲ་ཏཱིཙྪ་སྭཱ་ཧཱ། དེ་བཞིན། པུཥྤེ་ནས། ཤབྡའི་བར་བརྗོད། བསྟོད་པ་ནི། ཧཱུྃ། ཚངས་པ་འཇིག་རྟེན་མགོན་གྱི་སྲས། །བདུད་དང་དགྲ་བགེགས་བརླག་མཛད་ཅིང་། །ཇི་ལྟར་འདོད་པའི་དོན་བསྒྲུབ་པ། །གཟི་བརྗིད་རྒྱལ་པོར་ཕྱག་འཚལ་བསྟོད། །ཅེས་པས་བསྟོད་དོ། །
ལྔ་པ་ནི། རྒྱུད་ལས། གཉིས་མེད་གྱུར་པའི་ལྕེ་ལ་ཧཱུྃ། །བསམ་ནས་ལིངྒ་བསྲེག་རྫས་རྣམས། །ཡན་བདུན་རབ་ཏུ་ཁྲོས་པས་ཕུལ། །ཅེས་གསུངས་པས། །ཐོག་མར་བྱོན་ཟན་ནམ་བྱོན་སྐྱེམས་འབུལ་བ་ནི། མེ་ལྷའི་ལྗགས་རྡོ་རྗེ་རྩེ་གསུམ་པ་ཧཱུྃ་ཡིག་དམར་པོས་མཚན་པ་དང་། དགང་བླུག་གི་ཁ་ལ་ཡང་ཧཱུྃ་ཡིག་མཐིང་གས་མཚན་པ་ལས་འོད་ཟེར་གྱི་སྦུ་གུར་གྱུར་པའི་བདུད་རྩི་དྲངས་ཤིང་གསོལ་བས་མཉེས་པར་མོས་ལ། ལག་གཉིས་མཐེ་བོང་དང་མཐེའུ་ཆུང་རྩེ་སྤྲད་པའི་ཁུ་ཚུར་གྱི་གཡས་པས་དགང་གཟར་གཡོན་པས་བླུག་གཟར་ཐོགས་པ་པུས་མོ་ལས་ནང་དུ་མི་འདའ་བར། ཨོཾ་ཨགྣེ་ཡེ་སྭཱ་ཧཱ། སྔགས་ལན་བདུན་གྱིས་དགང་གཟར་བཀང་ནས་གཟར་བུ་གཉིས་ཀ་སྦྱར་བ་གཡོན་དུ་བསྐོར་ཞིང་། ཨོཾ་ཨཱགྣེ་ཡེ་སརྦ་ཤ་ཏྲུཾ་བིགྷྣཱན་མཱ་ར་ཡ་ཛྭ་ལ་རཾ་ཁཱ་ཧི། །ཞེས་པས་ཕུལ། དེ་ནས། ཨོཾ་བཛྲ་ཀྲོ་ངྷ་ཨཱགྣེ་ཡེ། ཧཱུྃ་མ་མ་སརྦ་ཤ་ཏྲུཾ་ཨ་མུ་ཀཾ། ད་ཧ་ད་ཧ། པ་ཙ་པ་ཙ། ཨ་མུ་ཀ་མཱ་ར་ཡ་ཕཊ། །ཅེས་པ་ལན་བདུན་རེ། ཡམ་ཤིང་། ཞུན་ཆེན། ལིང་ཆེན། མཆོད་རྫས། དྲག་རྫས། གསོད་རྫས། སྨྱོས་རྫས་བཅས་འབུལ་ཞིང་། སྐབས་སུ་མར་ནག་གི་ཁུ་བ་དང་ཞུན་ཆེན་གྱིས་
མེ་གསོ་བའང་བྱའོ། །མཐར། ཧཱུྃ། ཨཱགྣེ་རཱ་ཛ་འཁོར་བཅས་ཀྱིས། །བསྟན་ལ་སྡང་བའི་དགྲ་དང་བགེགས། །དམ་སྲི་རྒྱལ་འགོང་རྒྱབ་བརྟེན་བཅས། །རྔམ་པར་བཞེས་ལ་རྡུལ་དུ་རློག །སྔོན་གྱི་དམ་ཚིག་དྲན་གྱིས་ལ། །བདག་གི་ལས་འདི་འགྲུབ་པར་མཛོད། །ཅེས་འདོད་དོན་གསོལ། སེ་གོལ་དང་བཅས། ཨོཾ་བཛྲ་ཛྭ་ལ་རཾ། བརྗོད་པས། མེ་ལྷ་འབར་བའི་རྣམ་པར་གྱུར། བར་བལྟའོ། །གསུམ་པ་དཀྱིལ་འཁོར་པ་མཆོད་པ་ལ་བདུན། རྟེན་བསྐྱེད་ཅིང་སྤྱན་དྲངས་པ། མཆོད་ཅིང་བསྟོད་པ། དམིགས་བྱ་བཀུག་ཅིང་བསྒྲལ་བ། རྫས་འབུལ་བ། ལས་བཅོལ་བ། གཏང་རག་འབུལ་ཞིང་བཟོད་པར་གསོལ་བ། གཤེགས་སུ་གསོལ་བ་རྣམས་སོ། །དང་པོ་ནི། རྒྱུད་ལས། དེ་ནས་འབར་བའི་ངོ་བོར་བརྟགས། །མེ་ཡི་གཞལ་ཡས་ཁང་དུ་བསམ། །དཔལ་ལྡན་ནག་པོ་ཆེན་པོ་ནི། །ཆོ་ག་ལྔའམ་གསུམ་གྱིས་བསྐྱེད། །བདག་དང་དམ་ཚིག་ཐུགས་ཀ་ཡི། །འོད་ཟེར་ཕྱག་རྒྱ་བཞི་དང་ལྡན། །དཔལ་ལྡན་ནག་པོ་ཆེན་པོ་ཡི། །དེ་ཡི་ཆོ་གས་བཀུག་ལ་བསྟིམ། །ཞེས་འབྱུང་བས། རྒྱས་པར་སྤྲོ་ན། ཀུན་མཁྱེན་ཆོས་འབྱུང་གི་མགོན་ཕྲེང་ནས་འབྱུང་བ་ལྟར་ཆོ་ག་གསུམ་བསྐྱེད་དང་། ཤིན་ཏུ་རྒྱས་པར་སྤྲོ་ན་སྡང་བ་རྣམས་
བསྲེག་བཞིན་མངོན་བྱང་ལྔ་དང་། བསྡུས་པར་མོས་ན། ས་བོན་ལས་བསྐྱེད་པ་མགོན་པོ་མཚལ་མ་དང་། ཤིན་ཏུ་བསྡུ་ན། དྲན་རྫོགས་སུ་ཀློང་བསྐྱེད་ཁཾ་ཡིག་མ་བཅས་སྐབས་སྦྱར་གྱིས་གྱེར་བསྒོམ་བྱ་ཞིང་། །སྤྱན་འདྲེན་སྐབས་སྒྲུབ་པ་རས་བྲིས་དང་། རྡུལ་ཚོན་སོགས་དང་འབྲེལ་ཚེ་ཚོམ་བུ་སྤྱན་འདྲེན། སྤྲོ་ན་སྤྱི་ལྟར་བྱ་ཞིང་འདིར་ནི་སྤྲོས་པ་བསྐྱུངས་པའི་དབང་གིས་མ་བཀོད། གང་ལྟར་ཡང་རྒྱས་སྐབས་ཆོ་ག་སོ་སོའི་སྤྱན་འདྲེན་གྱི་མཐར་རམ། ཤིན་ཏུ་བསྡུས་པར་འདི་གས་འཐུས་པར་བྱས་ཀྱང་ཆོག་ཅིང་རྒྱུད་ནས་གསུངས་པའི་སྤྱན་འདྲེན་ནི། ཧཱུྃ། སྲིད་གསུམ་འཇིགས་པར་བྱེད་པ་ཡི། །དཔལ་ལྡན་ནག་པོ་ཆེན་པོ་ཡིས། །དུས་གསུམ་རྒྱལ་བ་ཐམས་ཅད་ཀྱི། །བསྟན་པ་སྲུང་བར་ཁས་བླངས་པའི། །དམ་ཚིག་ཆེན་པོའི་སྟོབས་ཀྱིས་ནི། །འབར་བ་ཆེན་པོའི་དཀྱིལ་འཁོར་དུ། །དྲག་པོའི་སྟོབས་ཀྱིས་གཤེགས་སུ་གསོལ། །མེ་ཡི་དཀྱིལ་འཁོར་འདིར་བཞུགས་ལ། །གདུག་པའི་དགྲ་བགེགས་བསྒྲལ་དུ་གསོལ། །ཞེས་དང་། སྤྱན་འདྲེན་སྔགས་བརྗོད་པས་སྤྱན་དྲངས་པར་ཡིད་ཀྱིས་མཚོན་ཅིང་། ཛཿཧཱུྃ་བཾ་ཧོཿགཉིས་སུ་མེད་པར་གྱུར། ཅེས་པས་བསྟིམ།
དམ་ལ་བཞག །དབང་བསྐུར་རྒྱས་གདབ། །ཕྱག་འཚལ་བཅས་གཞུང་གང་ཡིན་པ་ལྟར་བྱའོ། །གཉིས་པ་ནི། རྒྱུད་ལས། མཆོད་པའི་ཁྱད་པར་ཀུན་ཀྱང་འབུལ། །ཞེས་དང་། དེ་ནས་བདུད་རྩི་རཀྟ་ནི་ས། །དཔལ་ལྡན་ནག་པོའི་ཞལ་དུ་འབུལ། །མཆོད་དང་གཏོར་མའི་རིམ་པ་རྣམས། །ཅེས་འབྱུང་བ་བཞིན། མཆོད་པའི་སྐབས་སུ་དྲག་མཆོད་རྣམས་དབུལ། སླར་སྤྲོ་ན་གཏོར་མ་བྱིན་རླབས་དང་། བསྡུ་ན་གོང་དུ་རྫས་བྱིན་རླབས་ཀྱིས་འཐུས་པར་བྱས་ཏེ་གང་ལྟར་ཡང་། ཧཱུྃ། ལྷ་ཆེན་དཔལ་འབར་འཁོར་བཅས་ལ། །སོགས་ཀྱིས་བླུགས་གཟར་གྱིས་སྨན་རཀ་དང་། དགང་གཟར་དུ་བ་ལིང་ཞུན་ཆེན་གྱི་རྒྱུ་དང་བཅས་པས་ཕུལ་ཞིང་སྔགས་རིང་ཀྱང་བརྗོད་མཐར། གཞུང་སོ་སོའི་བསྟོད་པ་དང་ཤིན་ཏུ་བསྡུ་སྐབས། ཧཱུྃ། ཌཱ་ཀི་བྱེ་བ་འབུམ་གྱི་སོགས་དང་། བཅོམ་ལྡན་འདས་ཀྱི་སྤྱན་སྔ་རུ། །སོགས་དང་། བསྟོད་པར་འོས་པ་བཅས་ཤྭ་ལོ་ཀ་གསུམ་གྱིས་འཐུས་པར་བྱེད། དེ་ནས་བྱོན་ཟན་ནི། ལྷ་རྣམས་ཀྱི་ལྗགས་དང་། དགང་བླུགས་ཁ་ལ་ཧཱུྃ་ཡིག་གསལ་བའི་འོད་ཀྱིས་སྦུ་གུས་དྲངས་ཏེ་གསོལ་བས་དགྱེས་པར་གྱུར་པར་མོས་ལ། ཨོཾ་མ་ཧཱ་ལ་ཀཱ་ལི་ས་པཱ་རི་ཝཱ་ར། །ཨོཾ་ཨཱགྣེ་ཡེ་སྭཱ་ཧཱ། ཞེས་སྔགས་ཕྱི་མ་ལན་
བདུན་གྱིས་ཞུན་ཆེན་འབུལ་ལོ། །གསུམ་པ་ནི། རྒྱུད་ལས་བསྒྲུབ་བྱ་བཀུག་ནས་དེ་ལ་བསྟིམ། སྔགས་ཀྱི་དབྱེ་བའི་ཆོ་ག་བྱ། །མགོ་ནས་རྐང་པའི་མཐིལ་གྱི་བར། །བསད་སྔགས་ཚེར་མ་འབུམ་ཕྲག་བརྡེག །དེ་ནས་ནག་པོ་ཆེན་པོ་ཡི། །གྲི་གུག་རབ་གནས་བྱས་པ་ཡིས། །མགོ་ནས་ཞབས་སུ་ཏིལ་གྱི་ཚད། །གཏུབས་ནས་ནག་པོའི་སྦྱིན་སྲེག་བྱ། །ཞེས་གསུངས་པས། མདུན་དུ་བཞུགས་པའི་ལྷ་ཚོགས་རྣམས་ཤིན་ཏུ་ཁྲོས་འཁྲུགས་རྔམ་པའི་རང་བཞིན་བསྐལ་མེའི་གཟི་བརྗིད་འབར་བ་དྲག་པོའི་ལས་ལ་དགྱེས་ཤིང་རིངས་བའི་ངར་དང་ལྡན་པར་གྱུར་པར་དམིགས་ནས་སྤྲོས་པ་རྒྱས་སྐབས་གདབ་ལས་རྒྱས་འབྲིང་བསྡུས་པ་རྣམས་གང་མོས་དང་། ཤིན་ཏུ་བསྡུ་ན་མདུན་དུ་རྩ་རྫས་ཀྱི་ལིང་ག་ཆེ་བ་ཤོག་ལིང་ཡོད་ན་དེ་དང་བཅས་ལྕགས་སྣོད་ཧོམ་དུ་བཅུག་པ་དང་། ཐོ་བ་དང་། ལྕགས་ཀྱུ་སོགས་རྒྱ་བཞི་རླུང་གཡབ། དུར་རྡོ། སྒྲོ་གཉིས། ཐུན་རྭ་གྲི་གུག་བཅས་འདུ་བྱས་ལ། མདུན་དུ་ལྕགས་ཀྱི་ཁང་སྒྲོམ་ཡ་ང་བའི་ནང་དུ་དགྲ་བགེགས་དམ་སྲི་རྣམས་དངོས་སུ་གསལ་བ་མྱ་ངན་གྱི་འོ་དོད་ལྷང་ལྷང་འབོད་པར་གྱུར། བདག་མདུན་གྱི་ཐུགས་ཀ་ནས་ཡཿལས་གཤིན་རྗེ་
དང་ཧཱུྃ་དང་མ་ལས་མགོན་པོ་དང་མ་མོ། དུཿལས་བདུད་ཀྱི་དམ་ཚོགས་དཔག་ཏུ་མེད་པ་སྤྲོས་ཏེ་དམིགས་བྱ་རྣམས་བཀུག་ནས་གཟུགས་ལ་བསྟིམ་པར་གྱུར་པར་མོས་ལ་འགུགས་པ་རྒྱས་པའི་མཐར། གཟུགས་བརྙན་ལིངྒ་འདི་ལ་ཁུག་ཅིག །ཅེས་སྦྱར་བ་དང་། བསྡུས་པ་བཅས་ལན་གསུམ་འགུགས་སྔགས་བཅས་མཐར་གདབ་ལས་བསྡུས་པ་ནས་འབྱུང་བའི། ཧཱུྃ། ཆོས་སྐྱོང་སྲུང་མ་དམ་ཅན་ཚོགས། །སོགས་བརྗོད་བཞིན། ཐོ་བ་སོགས་མཚོན་ཆ་རྣམས་ཕྱག་ལེན་ལྟར་བརྡེག །སྲུང་སྐྱོབས་བྱེད་པའི་ལྷ་དང་ཕྲོལ། །དེའི་སྐབས་སྒྲོ་གཉིས་ཀྱི་ལྷ་དབྱེ་བྱ་ཞིང་། ནད་ཀྱི་བདག་མོ་སོགས་ནས། ཀིང་ཀང་ཕོབ། ཐུན་པས་བརྡེགས། རྣམ་ཤེས་ཚངས་པའི་དབྱིངས་སུ་སྤོར། །ཞེས་པའི་མཐར། ཕཊ། སྒྲ་བཅས་རྣམ་ཤེས་སྤར་ཞིང་མཐར། ཧེར་ནི། །ཤ་ས་ན། ཧུ་ར་རྦད་སྔགས་རྣམས་ལན་གསུམ་རེ་དང་། རྒྱུད་ནས་གསུངས་པའི་སྔགས། ཨོཾ་མ་ཧཱ་ཀཱ་ལ་ཡ། ཨ་མུ་ཀ་ཏ་པ་ཏ་པ་ཧཱུྃ། ཞེས་པ་བཟླ་ཞིང་། ཧཱུྃ། བསྟན་པའི་བཀའ་སྲུང་མཐུ་བོ་ཆེ། །མགོན་པོ་ལྕམ་དྲལ་འཁོར་དང་བཅས། །སྔོན་གྱི་དམ་
བཅའ་དྲན་མཛོད་ལ། །བསྟན་པའི་དགྲ་བོ་དམ་སྲི་བགེགས། །ཕོ་མོ་བྲན་གཡོག་བྱད་མའི་ཚོགས། །ལྷ་དང་སྲུང་མ་ཡུལ་མཁར་བཅས། །འབར་བའི་ཞལ་དུ་ལྷག་མེད་བཞེས། །ཁ་ཕུང་རྗེས་མེད་གྱིས་ལ་ཤོག །དམ་ཚིག་ཆེན་པོའི་དུས་ལ་བབས། །བཅོལ་བའི་ལས་ལ་རྩལ་མ་ཞན། །བདག་གི་ལས་འདི་མྱུར་དུ་སྒྲུབས། །རྟགས་དང་མཚན་མ་མྱུར་དུ་སྟོན། །དམ་ལས་མ་འདའ་ས་མ་ཡ། །ཞེས་གནད་ནས་བསྐུལ་མཐར། རྒྱུད་ལས། །རྩ་བའི་སྙིང་པོ་སྔགས་ལ་ནི། །བསད་པའི་ཡི་གེ་གཞུག་པར་བྱ། །བསམ་གཏན་སྔགས་དང་ལྡན་གྱུར་པས། །སྦྱིན་སྲེག་ནག་པོའི་ཞལ་དུ་འབུལ། །ཞེས་དང་། ཞལ་ནས་སྣ་ཚོགས་མེ་ཡི་འོད། །དྲག་པོའི་དབྱིབས་སུ་འབར་བར་བསམ། །ཞེས་འབྱུང་བ་ལྟར། ལྷ་ཚོགས་དྲག་ཏུ་ཁྲོས་འཁྲུགས་རྔམ་པའི་ཞལ་གནམ་སའི་ནང་ནས་བསྐལ་པའི་མེ་ལྕེ་འུར་འུར་འབར་བར་བསྲེག་རྫས་རྣམས་ངོ་བོ་བདུད་རྩི་ལ་རྣམ་པ་དགྲ་བགེགས་དམ་སྲིའི་ཤ་ཁྲག་དོན་སྙིང་སྲོག་དབུགས། ཡུལ་མཁར་བྱད་མ་རྦོད་གཏོང་། རྦད་
འདྲེ་དང་བཅས་པ་རྣམས། །ཐུལ་ཐུལ་བསྲེགས་ཅིང་དགྱེས་པའི་བཞད་སྒྲ་དང་བཅས་གསོལ་བར་དམིགས་ནས། རྒྱུད་ནས་འབྱུང་བའི་སྲེག་སྔགས། ཨོཾ་བཛྲ་མ་ཧཱ་ཀཱ་ལ་ཀཱ་ལི་དེ་ཝཱི་ས་པཱ་རི་ཝཱ་རེ་བྷྱཿ ཧཱུྃ་མ་མ་སརྦ་ཤ་ཏྲུམ་ཨ་མུ་ཀཾ། ད་ཧ་ད་ཧ། པ་ཙ་པ་ཙ། ཨ་མུ་ཀ་མཱ་ར་ཡ་ཕཊ། ཅེས་བརྒྱ་རྩ་བརྒྱད་དམ་ཉེར་གཅིག་རེ་བཟླ་བཞིན། ཡམ་ཤིང་། ཞུན་ཆེན། རྩ་བའི་རྫས། མཆོད་རྫས། དྲག་རྫས། གསོད་རྫས། མྱོས་རྫས་བཅས་གྲངས་ངེས་པ་སྔགས་དང་རྫས་ལྷག་ཆད་དུ་མ་གྱུར་པར་འབུལ་ཞིང་། སྤྲོ་ན་ཚན་པར་རེའི་མཐར་རོལ་མོ་བྱ་ཞིང་། སོ་སོའི་དབུར་གོང་གི་བཅོལ་བསྐུལ་ཀྱང་བྱའོ། །དེ་ལྟར་དྲུག་པོ་རྫོགས་ནས། བདུན་པ་ནི། རྒྱུད་ལས། བདག་གི་ཐུགས་ཀའི་བོན་ལས། །འོད་ཟེར་ནག་པོའི་གཟུགས་སུ་སྤྲོ། །དེ་ཡིས་བསྒྲུབ་བྱ་བཀུག་བྱས་ནས། །རྐང་པ་གཉིས་ནས་བཟུང་ནས་ནི། །དུག་གཏོར་དུ་ནི་སྤྲུག་བྱས་ཏེ། །གཞན་ཡང་ནག་པོའི་ཞལ་དུ་འབུལ། །ཞེས་པར་ལྟར་མན་ངག་གསང་བའི་རྫས་ལིང་ཆུང་རྣམས་དང་། །དམར་གཏོར་ལྔ་ལ་དམིགས་པའི་བཀུག་གཞུག་སྐབས་རྒྱས་པའི་མཐར། དམར་གྱི་གཏོར་མ་གཟུགས་ལིངྒ་དང་བཅས་པ་འདི་རྣམས་ལ་ཁུག་ཅིག །ཅེས་སྦྱར་བ་དང་། བསྡུས་པ་
བཅས་ལན་གསུམ་བྱ་ཞིང་། རཱུ་པ་དགྲ་བགེགས་དམ་སྲི་བྱད་མ་ལྷ་དང་བཅས་པ་དངོས་སུ་གསལ་བ་ལྷ་ཚོགས་རྣམས་ཀྱི་ཞལ་དུ་བསྟབ་པས། མེ་ལྕེ་འཁྲུགས་པའི་ཞལ་གྱི་ཧོམ་ཁུང་དུ་དམིགས་བྱ་རྣམས་རྐང་མཐིལ་སྐྱ་ལྷག་གེར་སོང་བར་དམིགས་ལ། ཨོཾ་ཏྲཀ་རཀྵ་དུནྟིཾ་མ་བྷྱོ་སོགས། སྤྱི་ཙམ་ལ་ཤར། ལྷོ་ནུབ་བྱང་། དབུས་བཅས་ནས་དབུལ་བ་ཡིན་ཀྱང་གབ་པའི་མན་ངག་གིས་གལ་ཆེར་འབུལ་བའི་ལུགས་ལྟར། ཧཱུྃ། བྱང་ཕྱོགས་བསྲེག་ཁང་འབར་བའི་ཀློང་དཀྱིལ་ནས། །མ་ཏྲཾ་རུ་ཏྲ་བརྫིས་པའི་གདན་སྟེང་དུ། །མ་མོ་མཁའ་འགྲོ་ཤ་ཟ་བྱེ་བའི་དབུས། །དཔལ་ཆེན་ནག་པོ་ལྕམ་དྲལ་ཞལ་ཕྱེས་ཤིག །མཁའ་འགྲོ་ཀུན་གྱི་གཙོ་བོ་ཞལ་ཕྱེས་ཤིག །དམ་ཅན་ཆོས་སྐྱོང་སྲུང་མ་ཞལ་ཕྱེས་ཤིག །རྣལ་འབྱོར་ཀུན་གྱི་དགྲ་བླ་ཞལ་ཕྱེས་ཤིག །དམ་ཉམས་ཀུན་གྱི་སྲོག་གཅོད་ཞལ་ཕྱེས་ཤིག །སངས་རྒྱས་བསྟན་ལ་སྡང་བའི་དམ་ཉམས་དགྲ་བོ་འདིའི། །ཤ་ཁྲག་རུས་གསུམ་སྲོགས་དབུགས་དྲོད་དང་བཅས། །ཉེ་དུ་ཉེ་འབྲེལ་སྲུང་སྐྱོབས་ལྷ་དང་བཅས། །འཁོར་འབངས་རིག་
བརྒྱུད་མཛའ་བཤེས་ཡུལ་འཁོར་བཅས། །སྲུང་འཛིན་རིགས་སྔགས་ཡོ་བྱད་རྫས་དང་བཅས། །ས་གཞི་ནོར་ཕྱུགས་སྐྱེད་ཚལ་གྲོགས་བཤེས་བཅས། །བྱད་མ་རྦོད་གཏོང་འདུན་གྲོགས་སྲིད་དང་བཅས། །བསོད་ནམས་ལོངས་སྤྱོད་ཁ་རྗེ་དབང་ཐང་བཅས། །ཁྱོད་ཀྱི་ཞལ་དུ་བསྟབ་པོ་ཁ་རཾ་ཁཱ་ཧི། །ཁྱོད་ཀྱི་མགུལ་དུ་བསྒྲིམས་ཤིག་ཨ་རལླི། །ཁྱོད་ཀྱི་ཕྱག་ཏུ་གཏད་དོ་མ་ཤོར་ཅིག །ཁྱོད་ཀྱི་ཞབས་སུ་མནན་ནོ་སྟཾ་བྷ་ཡ། །ཁྱོད་ཀྱི་ཞལ་དུ་བསྲེག་གོ་ཛྭ་ལ་རཾ། །མཐར་རྦད་སྔགས་དང་བཅས་གཏོར་མ་མེ་ཐབ་ཏུ་འབུལ། དེ་བཞིན་དུ། ནུབ། ལྷོ། ཤར་རྣམས་སོ་སོར་ཁ་བསྒྱུར། དབུས་ཕྱོགས་ནས། ཛྭ་ལ་རཾ། བར་གྱིས་འབུལ་ཞིང་རྦད་སྔགས་ཀྱང་བཟླའོ། །ལྔ་པ་ནི། དེ་ནས་སླར་ཡང་། འདས་བྱོན་མ་དང་། གང་ཞིག་བླ་མ་ཙམ་གྱི་འདོད་དོན་ཕྲིན་ལས་བཅོལ། དྲུག་པ་ནི། སླར་ཡང་། ཨོཾ་མ་ཧཱ་ཀཱ་ལ་ཀཱ་ལི་ས་པ་རི་ཝཱ་ར། ཨོཾ་ཨཱགྣེ་ཡེ་སྭཱ་ཧཱ། ཞེས་པའི་སྔགས་ཕྱི་མ་ཉིད་ལན་བདུན་གྱིས་ཞུན་ཆེན་དང་། ལས་སྔགས། དཾ་ཥྚོད་ཀྱིས་མཆོད་ཡོན་དང་། ཨོཾ་ཤྲི་བཛྲ་མ་ཧཱ་ཀཱ་ལ་དེ་ཝཱི་ས་པ་
རི་ཝཱ་ར་ཨཱཉྩ་མ་ན་མ་པྲཏིཙྪ་ཨཱཿཧཱུྃ་སྭཱ་ཧཱ། །དེ་བཞིན་སྦྱར་བའི། པྲོཀྵ་ནམ་བཅས་ཀྱི་ཞབས་བསིལ་དང་། བསངས་གཏོར་བཅས་འབུལ། སྔགས་ཐོག་མཐའ་གོང་བཞིན་སྦྱར་ལ། ཏམ་བུ་ལ་ཡེ་ཞེས་སོ་རྩི་ཕུལ། སླར་ཡང་། ཨོཾ་ཁྲག་གི་རྒྱ་མཚོ་སོགས་ཀྱིས་མཆོད་པའི་ལྷག་མ་རྣམས་ཕུལ། ཌཱ་ཀི་བྱེ་བ་སོགས་ཀྱིས་བསྟོད། སྤྲོ་ན། དོན་དམ་མ་དང་། བསྡུ་ན། མ་འབྱོར་པ་དང་སོགས། མན་ངག་གི་ཡིག་བརྒྱ་གཟུངས་དང་བཅས་པས་བཟོད་པར་གསོལ། མ་འོངས་པ་ན་སོགས་དང་། བདག་ནི་མངོན་པར་སོགས་ཀྱིས་སྨོན་ལམ་གདབ། བདུན་པ་ནི། ཨོཾ། ཁྱོད་ཀྱིས་སེམས་ཅན་སོགས་ཀྱིས་ཡེ་ཤེས་པ་གཤེགས་ཤིང་། སྔར་ཚོམ་བུ་སྤྱན་དྲངས་པ་ཡོད་ན་ཕྱག་ལེན་སྤྱི་ལྟར་གྱིས་སྒྲུབ་ཁང་དུ་སྤྱན་འདྲེན་པ་ཡང་བྱ། ཨོཾ་ཨཱཿཧཱུྃ་གིས་དམ་ཚིག་གི་དཀྱིལ་འཁོར་རང་ལ་བསྡུའོ། །རྩ་བའི་བཞི་པ། །མེ་ལྟར་གཏང་རག་འབུལ་བ་ལ་ལྔ་ལས། ཨོཾ་དཾཥྚོད་ཀྱིས་བསང་ཞིང་། ཞུན་ཆེན་བླུགས་གཟར་གྱིས་གཅུས་པས་མེ་གསོལ་ཏེ། ཨོཾ་ཛྭ་ལ་ཛྭ་ལ་ཧཱུྃ། ཞེས་བརྗོད་པས་མེ་ལྷ་འབར་བའི་རྣམ་པ་ལས་བཞེངས་ཏེ་གཟི་བརྗིད་འབར་ཞིང་རྔམ་པའི་ཚུལ་དུ་བཞུགས་པར་གྱུར་པར་མོས། གཉིས་པ་ནི། བསྲེག་
བླུགས་བྱོན་ཟན་ལྟར། ཨོཾ་ཨཱགྣེ་ཡེ་སྭཱ་ཧཱ། ལན་བདུན་གྱིས་ཞུན་མར་དང་། ཨོཾ་པུཥྤེ་ནས། ཤབྡའི་བར། པྲ་ཏིཙྪ་བཏགས་པས་མཆོད་པ་རྣམས་ཕུལ། ཨོཾ་བཛྲ་ཨཱརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་སྦྱར་བའི། ཨཱཉྩ་མ་ན་མ། པྲོཀྵ་ནམ་བཅས་ཀྱི་མཆོད་ཡོན། ཞབས་བསིལ། བསངས་གཏོར་དང་བཅས་ཕུལ། ཨོཾ་བཛྲ་ཏམ་བུ་ལ་ཡེ་སྭཱ་ཧཱ། །ཞེས་སོ་རྩི་ཡང་དབུལ་ཞིང་། དེ་ནས། ཨོཾ་བཛྲ་ཀྲོ་ངྷ་ཨཱགྣེ་ཡེ། ཧཱུྃ་མ་མ་སརྦ་ཤ་ཏྲུམ་ཨ་མུ་ཀཾ། ད་ཧ་ད་ཧ། པ་ཙ་པ་ཙ། ཨ་མུ་ཀ་མཱ་ར་ཡ་ཕཊ། ཅེས་པས་ལིང་ཆུང་། ཡམ་ཤིང་། ཞུན་ཆེན་དང་། མཆོད་རྫས། དྲག་རྫས། གསོད་རྫས། མྱོས་རྫས་རྣམས་ལན་གསུམ་རེ་འབུལ། གསུམ་པ་ནི། གཏོར་མ་འབྲུ་གསུམ་གྱིས་རླབས། ཨོཾ་ཨཱགྣེ་ཡེ་ས་པཱ་རི་ཝཱ་ཨི་དམ་བ་ལིངྟ་ཁཱ་ཧི། ལན་གསུམ་གྱིས་གཏོར་མ་བསྔོས་ལ། ཧཱུྃ། དྲང་སྲོང་རྒྱལ་པོ་འཁོར་བཅས་རྣམས། །མཆོད་ཅིང་བསྟོད་དེ་དགྱེས་གྱུར་ཅིག །མཆོད་གཏོར་དགྱེས་རྫས་འདི་བཞེས་ལ། །གདུག་ཅིག་སྡང་བའི་དགྲ་བགེགས་སྒྲོལ། །ཡིད་ལ་འདོད་པ་ཀུན་འགྲུབ་མཛོད། །ཅེས་པས་གཏོར་མ་ཞུན་མར་གྱིས་སྔགས་ནས་ཐབ་ཏུ་འབུལ་ལོ། །བཞི་པ་ནི། ཡི་གེ་
བརྒྱ་པས་ནོངས་པ་བཤགས་ཤིང་ལྷག་ཆད་བསྐང་བར་བྱ། ལྔ་པ་ནི། བདག་གི་དོན་དང་གཞན་གྱི་དོན། །བྱིན་ཟ་ཁྱོད་ཀྱིས་བསྒྲུབས་གྱིས་གཤེགས། །ཇི་བཞིན་དུས་སུ་སླར་བྱོན་ལ། །བདག་གི་དོན་རྣམས་མ་ལུས་སྒྲུབས། །ཞེས་གསོལ་ཞིང་སྤྱན་འདྲེན་པའི་ཕྱག་རྒྱ་དེ་ཉིད་རྣ་བའི་དྲུང་ནས་ཕྱིར་བསྐྱེད་དེ། ཨོཾ་མུཿ ཞེས་གཤེགས་སུ་གསོལ་ཞིང་དམ་ཚིག་པ་རང་ལ་བསྡུའོ། །རྩ་བའི་ལྔ་པ་རྗེས་ཀྱི་བྱ་བ་ནི། སྒྲུབ་མཆོད་དང་འབྲེལ་བའམ་མ་འབྲེལ་བ་གང་ལྟར་ཡང་། དགེ་བ་འདི་ཡིས་སོགས་དང་། དཀྱིལ་འཁོར་གཞལ་ཡས་བཅས་ཀྱིས་མཐའ་བསྡུ་ཞིང་། དགེ་ལེགས་རྒྱ་ཆེར་སྤེལ་ལོ། །དེ་ནས་མེ་རོ་དེ་ཉིད་ནས་ལི་ཡུལ་འཁོར་ཁང་ཁྱིམ་མི་ནོར་མགོན་སྐྱབས་དང་བཅས་པ་མངོན་སུམ་དུ་གསལ་བར་གྱུར་བ་ལ། སླར་ཡང་འགུགས་པ་ལན་གསུམ་གྱིས་བླ་སྲོག་བགུག་གཞུག་བྱས་ནས་བསྟིམ་པ་དྲག་ཏུ་བྱ། མེ་རོ་དགྲ་ཡུལ་དུ་གསལ་བར་སྲུང་མའི་དམག་གིས་བཀངས་ཏེ་ཆུས་མེ་བསད་པ་ལྟར་། དགྲ་བོ་མི་ནོར་བྱད་མ་དང་བཅས་པའི་སྲོག་ཅོད་དབུགས་བླངས་ཤ་ཁྲག་ཟོས་རྟེན་མཁར་བཤིགས་ས་གཞི་རླུང་ལ་ཕྱར་ཏེ་ལྷག་མ་རྗེས་ཤུལ་ཡང་མ་བཞག་པར་བརླག་པའི་དམིགས་པ་བྱ། མཐར་བསྒྲལ་བྱ་སྒྲོལ་བྱེད་མ་དམིགས་པ་དོན་གྱི་དགོངས་པས་
རྒྱས་བཏབ་པའི་དོན་གྱི་བསྒྲལ་ཐབས་ཆེན་པོའི་རང་ངོ་ལ་མཉམ་པར་བཞག་ལ། བྱམས་པ་ཆེན་པོས་བསྒྲལ་བའི་ལས། །འདི་ནི་བྱང་ཆུབ་མཆོག་གི་རྒྱུ། །བསྒྲལ་བར་བྱ་མ་དམིགས་པས། །བསྒྲལ་དང་སྒྲོལ་བྱེད་དབྱིངས་སུ་ཞི། །ཞེས་བརྗོད་ཅིང་ལམ་དུ་ཁྱེར་རོ། །འདིར་སྨྲས་པ། ཆོས་ཀྱི་དབྱིངས་ཉིད་རྟག་ཏུ་ཞི་གྱུར་ཀྱང་། །གདུལ་དཀའ་འདུལ་ཕྱིར་ཁྱབ་བདག་བཅོམ་ལྡན་འདས། །དྲག་གཏུམ་སྐུར་བཞེངས་རྡོ་རྗེ་བེར་ནག་ཅན། །ལྕམ་དྲལ་བྱང་ཆུབ་བར་དུ་སྙིང་དབུས་བསྙེན། །གང་གི་ལས་མཐའ་བསྟན་པ་སྲུང་བའི་མཚོན། །རྒྱུད་དོན་མན་ངག་རྣོ་ངར་གྱིས་སྦར་པའི། །གདེངས་མཆོག་རྡོ་རྗེའི་ཆར་གྱིས་མ་རུངས་སྡེ། །ཕྱེ་མར་མཛད་པའི་ངོ་མཚར་མིག་ལ་བྱིན། །དེང་སང་སྒྲུབ་བརྒྱུད་ཀཾ་ཚང་རིང་ལུགས་འདི། །དགུན་གྱི་མེ་ཏོག་ལྟ་བུར་ཉམ་ཆུང་ཞིང་། །བསྟན་པའི་བཅོས་ཀྱི་བསྟན་སྲུང་མན་ངག་བཅུད། །རི་མོ་བྲིས་པའི་མེ་ལྕེ་བཞིན་དུ་གྱུར། །དེ་ཕྱིར་རྣོ་མྱུར་དྲག་པོའི་ལས་ཀྱི་མཐའ། །བསྐལ་པའི་མེ་ལྕེས་སྡིག་ཅན་སྲེག་བྱེད་པའི། །མན་ངག་རྡོ་རྗེའི་མེ་འོབས་འདི་སྤྲོས་པས། །བསྟན་ལ་སྡང་བས་ཞུགས་པའི་དགྲ་སྡེ་རྣམས། །ཚར་གཅོད་རྗེས་འཛིན་ཕྲིན་ལས་ལྷུན་གྲུབ་ཤོག །འདི་ལྟར་བགྱིས་ལ་བདག་བློ་དམན་གྱུར་པས། །ཆོ་ག་ཉམས་དང་མན་ངག་ཕྱུངས་པ་ལས། །
ནོངས་པ་མཆིས་གང་བླ་མ་མཁའ་འགྲོ་མ། །བསྟན་སྲུང་དབང་པོའི་ཚོགས་ཀྱིས་བཟོད་པར་མཛོད། །དེ་ལྟར་ཡང་སྤྱིར་མགོན་པོ་བེར་ནག་ཅན་ལྕམ་དྲལ་གྱི་ཆོ་ག་དང་འབྲེལ་བའི་སྦྱིན་སྲེག་གི་སྐོར་རྗེ་མི་བསྐྱོད་ཞབས་ཀྱིས་སྩལ་བའི་གཏོར་མ་མེ་ཐབ་ཏུ་འབུལ་བའི་ཆོ་ག་དང་། རྗེ་དེ་ཉིད་ཀྱིས་མཛད་པའི་རྒྱུད་སྡེ་སྤྱིའི་སྦྱིན་སྲེག་སྒྲིབ་གཉིས་སྲེག་བྱེད་ཉིད། སླར་ཡང་ལས་བཞི་སོ་སོ་དང་། དྲག་པོའི་སྐབས་མགོན་པོའི་གདབ་ལས་དང་སྦྲེལ་མར་མཛད་པ་ལས་བཞི་ལྷུན་གྲུབ། དེ་ཉིད་སླར་ཡང་། རྗེ་དགུ་པས་གསལ་བར་མཛད་དེ། མགོན་པོ་སྒེར་ཐུབ་ཀྱི་ལུགས་སུ་མཛད་པ་མ་རུངས་ཚར་གཅོད་དང་། གཞན་ཡང་ཧོམ་མཆོད་ཀྱི་ཡིག་སྣ་ཐོར་བུ་མང་དུ་བཞུགས་ཀྱངཧ་ཅང་རྒྱས་པ་དང་བསྡུས་དྲག་པ་སོགས་ཀྱིས་རེ་བ་རྫོགས་པ་ཞིག་མ་མཆིས་ཤིང་། དེ་བས་ཕལ་མོ་ཆེ་ལ་ལ་སྤྱི་བཏང་ལྟར་དང་། ལ་ལར་མན་ངག་འཐོར་ཐབས་སུ་སོང་བས་རང་རྐང་ཚུགས་པ་ཞིག་མི་འདུག་པར་བརྟེན། སངས་རྒྱས་ཀརྨ་པའི་བསྟན་པ་རྟགས་ཙམ་འཛིན་པ་ལ་ཐུག་པའི་དུས་འདིར། མན་ངག་སྤེལ་བའི་དགོས་པ་བསྐྱུངས་པར་འོས་མོད། འོན་ཀྱང་ཚུལ་བཞིན་སྒྲུབ་ནུས་པའི་གང་ཟག་འདྲ་སྲིད་ན་དེ་རྣམས་ཀྱི་ངལ་གསོའི་འབབ་སྟེགས་དང་བསྟན་པ་བསྲུང་བའི་མཚོན་ཆར་དམིགས་ཏེ་རྒྱུད་ཀྱི་དགོངས་པ་ཉིད། མན་ངག་གི་ངེས་པས་ཕྱེ་བ་ནག་པོ་ཆེན་པོའི་ཆོ་ག་དང་
འབྲེལ་བའི་དྲག་པོའི་བསྲེག་པ་ཧོམ་གྱི་གཟེར་ཁ་རང་རྐང་ཐུབ་ཅིར་ཁུངས་བཙུན་པ་ལ། རྡོ་རྗེ་འཛིན་པ་ཆེན་པོ་རྣམས་ཀྱི་ཕྱག་ལེན་གྱིས་ཟུར་བརྒྱན་ཏེ། དུས་མཐའི་བསྟན་འཛིན་དུ་རློམས་པ། སངས་རྒྱས་ཀརྨ་པའི་མཚན་གྱི་ཅོད་པན་ཅན་འམ་མཁའི་ཁྱབ་རྡོ་རྗེས་ལྷག་བསམ་དག་པས་སྦྱར་བ་འདིས་ཀྱང་ཚར་གཅོད་རྗེས་འཛིན་གྱི་ཕྲིན་ལས་ལྷུན་ཀྱིས་གྲུབ་ནས་སྒྲུབ་བརྒྱུད་སྙིང་པོའི་བསྟན་བ་སྲུང་བའི་ཆ་རྐྱེན་དུ་གྱུར་ཅིག །འདིར་མན་ངག་གི་ཡིག་ཆུང་རྣམས་གསང་བར་བསྒྲགས་པར་མི་འོས་པས་སྤར་དུ་མ་བཀོད་ཀྱང་ལས་འདིས་བསྟན་འཛིན་པ་རྣམས་ཀྱིས། མན་ངག་གི་བེའུ་བུམ་བྲིས་པོད་དུ་ཡོད་པའང་མཁྱེན་པར་མཛོད་ཅིག། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།