བེར་ཅན་དྲག་སྲེག་སྐབས་ཉེར་འཁོ།
བེར་ཅན་དྲག་སྲེག་སྐབས་ཉེར་འཁོའི་བཞེས་འབོད་ལས་འགྲིགས་ལས་བྱུང་བ་ནི། ཤྲི་མ་ཧཱ་ཀཱ་ལ། ཤྲི་མ་ཧཱ་ཀཱ་ལི། བདུད་འདུལ་གྱི་དབང་ཕྱུག །རིག་འཛིན་གྱི་སྲོག་ཤིང་། རྣལ་འབྱོར་གྱི་དགྲ་ལྷ། དམ་ཉམས་ཀྱི་སྲོག་གཅོད། དམ་པ་ཡེ་ཤེས་ཀྱི་ཆོས་སྐྱོང་བའི་སྲུང་མ། སྲིན་པོ་ལང་ཀ་པུ་རིའི་གྲོང་ཁྱེར་བརླག་པར་བྱེད་པ། ལྷ་མ་ཡིན་གྱི་བུ་མོ་ནམ་མཁའི་གློག་མ་སྤྲིན་འདུལ་བར་ཞལ་གྱིས་བཞེས་པ། མྱུར་མགྱོགས་ཀྱི་དཔའ་བོ་སྟག་ལ་ཞོན་ནས་སྣང་སྲིད་ཀྱི་ལྷ་འདྲེ་ཐམས་ཅད་དབང་དུ་སྡུད་པ། རེས་འགའ་རྟ་ནག་པོ་རྟིང་དཀར་ལ་ཆིབས་ནས་བདུད་ཀྱི་སྡེ་དཔོན་མཛད་པ། ཕྱག་གཡས་ན་ཙནྡན་གྱི་བེང་བསྣམས་པ་ལས་བདུད་དང་སྲིན་པོའི་དམག་ཉིས་ཁྲི་ཆིག་སྟོང་འགྱེད་པ། གཡོན་ན་ལྕགས་ཀྱི་པར་བུ་བསྣམས་ནས་ལོག་པར་ལྟ་བ་ཐམས་ཅད་སྒྲོལ་ཞིང་གསོད་པ། བྱང་ཕྱོགས་ཀྱི་གནོད་སྦྱིན་བརྒྱད་ལྕགས་ཀྱི་བྱ་ཁྲར་སྤྲུལ་ནས་ཀླད་ལ་ལྡིང་བ། ལྷོ་ཕྱོགས་ཀྱི་གཤིན་རྗེ་
བརྒྱད་སྟག་གཟིག་དོམ་དྲེད་དུ་སྤྲུལ་ནས་སྔུན་ན་རོལ་པ། དཔལ་ལྷ་མོ་རང་བྱུང་གི་རྒྱལ་མོ་བདུད་ཀྱི་ཡུམ། གཤིན་རྗེའི་ལྕམ། འདོད་པ་ཁམས་ཀྱི་དབང་ཕྱུག་མ། དུས་བཞིའི་ལྷ་མོ་དབུ་ལ་འཆར་བ། ཕྲ་མེན་བཅུ་དྲུག་ལ་རྫོགས་པ། རེས་འགའ་རྫུ་འཕྲུལ་དྲེའུའི་སྟེང་ན་བཙན་སྐྱིལ་གྱིས་རོལ་པ། ཕྱག་གཡས་ན་གནམ་ལྕགས་ཀྱི་རལ་གྲི་བསྣམས་ནས་སྐྱེ་འགྲོ་ཐམས་ཅད་ཀྱི་སྲོག་གཅོད་པར་བྱེད་པ། གཡོན་ཁ་ཊྭཱཾ་རྩེ་དྲུག་པ་བསྣམས་ནས་དྲེག་པ་ཕོ་མོ་ཐམས་ཅད་དབང་དུ་སྡུད་པ། རེ་མ་ཏི། རེ་མ་ཛ། རེ་མ་ཛུ། དབུགས་ལེན་གྱི་ཤན་པ་ཡབ་ཡུམ་བཅུ་དྲུག །ཕྱོགས་སྐྱོང་བའི་མགོན་པོ་བཅུ། དྲེག་པའི་གཙོ་བོ་བདུན་ཅུ་རྩ་གཉིས། མྱུར་མགྱོགས་ཀྱི་དྲེགས་པ་རྒྱ་གསུམ། མ་བདུན། སྲིང་བཞི། འབར་མ་དགུ། དུས་ཀྱི་ལྷ་མོ་བཞི། དམག་གི་རྒྱལ་མོ་བཞི། དབང་ཕྱུག་ཉེར་བརྒྱད། རྡོ་རྗེ་བརྟན་མ་བཅུ་གཉིས། གཞན་ཡང་སྤྲུལ་པ་ཡང་སྤྲུལ་ཉིང་སྤྲུལ་གྱི་ཚོགས།
ཤ་ལ་དགའ་བ། ཁྲག་ལ་རྔམ་པ། རུས་ལ་དགྱེས་པ། འཇིགས་པའི་ཆ་ལུགས་དང་ལྡན་པ། དྲག་པོའི་ང་རོ་དང་ལྡན་པ། གདུག་པའི་ཞེ་སྡང་དང་ལྡན་པ། རྣོ་བའི་མཚོན་ཆ་དང་ལྡན་པ། མྱུར་མགྱོགས་ཀྱི་རྫུ་འཕྲུལ་དང་ལྡན་པ་རྣམས་ཀྱིས། ཀྱེ་སངས་རྒྱས་ཀྱི་བསྟན་པ་བཤིག་པ། དཀོན་མཆོག་གི་དབུ་འཕངས་སྨད་པ། བླ་མའི་སྐུ་ལ་བསྡོས་པ། རིག་འཛིན་གྱི་བརྒྱུད་པ་གཅོད་པ། དགེ་འདུན་གྱི་སྡེ་བཤིག་པ། དབེན་རི་གཉེན་པོ་བཅོམ་པ། མཚམས་མེད་ལྔ་ལ་སྤྱོད་པ། མི་དགེ་བཅུ་ལ་རྔམ་པ། དམ་ཉམས་པ་ཡིད་ལ་བརྣག་པའི་དགྲ་བོ་ཉེ་དུ་ཉེ་འབྲེལ་རིགས་བརྒྱུད་དང་བཅས་པ་འདི་བཞེས་ཤིག །ཀྱེ། དམ་ཉམས་པ་ཡིད་ལ་བརྣག་པའི་དགྲ་བོ་ཉེ་དུ་གཉེན་འབྲེལ་རིགས་བརྒྱུད་དང་བཅས་པ་འདི་དཔལ་མགོན་ཆེན་པོའི་ཞལ་དུ་བསྟབ་བོ་ཁ་རཾ་ཁཱ་ཧི། དཔལ་ལྷ་མོའི་ཞལ་དུ་བསྟབ་བོ་ཁ་རཾ་ཁཱ་ཧི། དབུགས་ལེན་བཅུ་དྲུག་གི་ཞལ་དུ་བསྟབ་བོ་ཁ་
རཾ་ཁཱ་ཧི། ཕྱོགས་བཅུའི་མགོན་པོའི་ཞལ་དུ་བསྟབ་བོ་ཁ་རཾ་ཁཱ་ཧི། དྲེགས་པ་ཕོ་མོའི་ཞལ་དུ་བསྟབ་བོ་ཁ་རཾ་ཁཱ་ཧི། སྲུང་མ་རྒྱ་མཚོའི་ཞལ་དུ་བསྟབ་བོ་ཁ་རཾ་ཁཱ་ཧི། ཀྱེ། དམ་ཉམས་པ་ཡིད་ལ་བརྣག་པའི་དགྲ་བོ་ཉེ་དུ་གཉེན་འབྲེལ་རིགས་བརྒྱུད་དང་བཅས་པ་འདིའི། ཕ་ཚན་སྐྱ་ལིང་གྱིས་ཤིག །མ་ཚན་ཞང་སྐོས་ཀྱིས་ཤིག །ཕོ་རྒྱུད་རྩད་ནས་ཆོད་ཅིག །མོ་རྒྱུད་མངལ་ནས་སྐོམས་ཤིག །ཟུང་འགྲོགས་ཡ་བྲལ་གྱིས་ཤིག །བརྟེན་མཁར་རྨིངས་ན་སྒྱེལ་ཅིག །སྙིང་ཁྲག་དྲོན་མོ་འཐུང་ཞིག །ཀྱེ། དམ་ཉམས་པ་ཡིད་ལ་བརྣག་པའི་དགྲ་བོ་འདིའི་ཤ་ཟོ། ཁྲག་འཐུང་། རུས་མུར། དཔལ་ཕྲོགས། སྲོག་ཆོད། དབུགས་ལོངས། གཟུགས་ཤིག །སེམས་སྦོར། ལྷག་མ་རྗེས་ཤུལ་ཙམ་ཡང་མ་བཞག་ཅིག །ཀྱེ། དཔལ་མ་ཧཱ་ཀཱ་ལ་ལྕམ་དྲལ་བྲན་གཡོག་འཁོར་དང་བཅས་པ་རྣམས་ལ། དམ་ཉམས་པ་ཡིད་ལ་བརྣག་པའི་དགྲ་བོ་འདི་ཟས་སྐལ་དུ་གཏད་དོ། བཏུང་
སྐལ་དུ་གཏད་དོ། དགྲ་སྐལ་དུ་གཏད་དོ། གསད་སྐལ་དུ་གཏད་དོ། འདིའི་ཉེ་དུ་ཟས་སྐལ་དུ་གཏད་དོ། བཏུང་སྐལ་དུ་གཏད་དོ། དགྲ་སྐལ་དུ་གཏད་དོ། བསད་སྐལ་དུ་གཏད་དོ། ཀྱེ། དམ་ཉམས་པ་ཡིད་ལ་བརྣག་པའི་དགྲ་བོ་འདི་ལ། རྣོ་བ་མཚོན་གྱི་ཆར་ཕོབ་ཅིག །བསྲེག་པ་མེའི་ཆར་ཕོབ་ཅིག །གསོད་པ་དུག་གི་ཆར་ཕོབ་ཅིག །བཤིགས་པ་སྔགས་ཀྱི་ཆར་ཕོབ་ཅིག །འཇིག་པ་ཐོག་གི་ཆར་ཕོབ་ཅིག །ཀྱེ། དམ་ཉམས་པ་ཡིད་ལ་བརྣག་པའི་དགྲ་བོ་འདི་ལ། ལྷའི་རྩུབ་རིམས་ཐོང་ཞིག །ལྷ་མིན་གྱི་དུག་གཟེར་ཐོང་ཞིག །གཟའ་ཆེན་གྱི་གཟེར་འདེབས་ཐོང་ཞིག །གཤིན་རྗེའི་འཁྲུལ་འཁོར་ཐོང་ཞིག །བདུད་དམག་གི་ཁྲམ་ཁ་ཐོང་ཞིག །མ་མོའི་ཐུན་ཟོར་ཐོང་ཞིག །ཀླུ་ཆེན་གྱི་འཆིང་བ་ཐོང་ཞིག །བཙན་གྱི་རྒྱུ་སྲང་ཐོང་ཞིག །རྒྱལ་པོའི་སྨྱོ་འབོག་ཐོང་ཞིག །མཁའ་འགྲོའི་ཁྲག་ནད་ཐོང་ཞིག །འབྱུང་པོའི་རིམས་ནད་ཐོང་ཞིག །ཐེའུ་
རང་གི་སྲིས་ཀུན་ཐོང་ཞིག །བལ་མོའི་དུག་མཚོན་ཐོང་ཞིག །གློ་བུར་ཡེ་འགྲོགས་ཐོང་ཞིག །མདོར་ན་མི་འདོད་པ་ཐམས་ཅད་ཐོང་ཞིག །ཀྱེ། དམ་ཉམས་པ་ཡིད་ལ་བརྣག་པའི་དགྲ་བོ་འདི་ལ། བརྟེན་པའི་མཁར་ཡོད་ན་རྡོ་རྗེའི་མཚོན་གྱིས་ཤིག་ཅིག །བསྲུང་བའི་གོ་ཡོད་ན་ཕོ་ཉའི་ལག་གིས་ཤུས་ཤིག །བརྡེག་པའི་མཚོན་ཡོད་ན་རང་གཤེད་རང་ལ་ཕོབ་ཅིག །འགོ་བའི་ལྷ་ཡོད་ན་གནོད་པའི་བདུད་དུ་ཕོབ་ཅིག །མཐུན་པའི་གཉེན་ཡོད་ན་སྡང་བའི་དགྲར་སྒྱུར་ཅིག །བསགས་པའི་ནོར་ཡོད་ན་བརླག་པའི་གཞིར་སྒྱུར་ཅིག །བསྒྲུབས་པའི་སྔགས་ཡོད་ན་གནོད་བྱེད་རང་ལ་སྡིགས་ཤིག །སྐྱོབས་པའི་མགོན་ཡོད་ན་ཕུང་བའི་འདྲེར་སྒྱུར་ཅིག །ཀྱེ། སྡིག་པོ་ཆེ་རྨད་དུ་བྱུང་བ་འདི་ལ་ལིངས་ཐོབ། ཚེ་ཕྱི་མ་ལ་དུས་མ་འདེབས། ནམ་མཁའ་སྟོང་པ་ལ་ཚད་མ་འཛུགས། ས་གྲོ་བོ་ལ་རྗེས་མ་བཀྲམ། གསོད་པ་དོན་དུ་གཉེར་བའི་ལས་གྱིས་ཤིག །སྡང་བའི་དགྲ་བོ་
ལས་ངན་འདི། ལོ་དང་ཟླ་བར་མ་འགྱངས་ཤིག །ཞག་དང་ཟ་མར་མ་བཞག་ཅིག །ཚེ་ཡི་འདུ་བྱེད་ངན་པ་སྟུངས་ཤིག །གཟུགས་ཀྱི་ཕུང་པོ་ངན་པ་ཤིག །གཞུངས་པ་དཀར་ལ་རྟ་ལྟར་རྒྱུག་ཅིག །སྲོག་རྩ་དམར་ལ་ཕུར་ལྟར་ཐོབ་ཅིག །ནང་ཁྲོལ་དམར་པོ་ཁྱེར་ལ་ཤོག །དགྲ་བོའི་འཁོར་སྤྲུགས་ཚང་ཤིག་ཅིག །དགྲ་བོའི་མི་མཁར་རྩེ་ནས་སྒྱེལ་ཞིག །ས་མཁར་སྐྱ་བོ་རྨིང་ནས་སྐྱེལ་ཞིག །ལྷག་མ་ཙམ་ཡང་མེད་པར་མཛོད་ཅིག །ཅེས་དམོད་བཅོལ་བྱའོ། །མངྒ་ལཾ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།