མཆོད་ཕྲེང་རྒྱས་པར་སྤྲོ་ན།
སྐབས་འདིར་མཆོད་ཕྲེང་རྒྱས་པར་སྤྲོ་ན། འདོད་པའི་ཁམས་ཀྱི་ལོངས་སྤྱོད་རྣམ་ལྔ་དང་། །འཁོར་ལོ་སྒྱུར་བའི་དཔལ་འབྱོར་རིན་ཆེན་བདུན། །དོན་ཀུན་གྲུབ་པས་བྱིན་བརླབས་རྫས་བརྒྱད་རྣམས། །རབ་འབྱམས་ནམ་མཁའི་འཁོར་ལོར་བཀངས་ཏེ་འབུལ། །ལྷ་ཡི་ཤིང་དང་དཔག་བསམ་བུམ་པ་བཟང་། །འཆི་མེད་བདུད་རྩི་པད་རྫིང་འདོད་འཇོའི་བ། །རྟ་ཡི་རྒྱལ་པོ་ཀླུ་དབང་གཙུག་གི་ནོར། །དཔལ་མོ་མ་རྨོས་འབྲས་དང་སྐྱེས་མོའི་ཚལ། །ཨུ་དུམ་གླིང་མཆོག་འདོད་བྱུང་སྤྲིན་ལྷུང་བཟེད། །ནོར་བུ་རལ་གྲི་གྲུབ་པའི་རིལ་བུ་དང་། །རྐང་མགྱོགས་མིག་སྨན་བཅུད་ལེན་དབང་བྱེད་རྫས། །རྡོ་རྗེ་རྩེ་བརྒྱ་དོན་ཡོད་ནོར་བུའི་ཞགས། །ཕུན་ཚོགས་དུང་དཀར་ཉི་ཟླ་ས་འོག་གཏེར། །ལྷ་མིན་ནོར་མཆོག་རྡོ་རྗེ་ལྕགས་ཀྱུ་སྟེ། །གྲུབ་པའི་རྫས་ཀྱི་མཁའ་དབྱིངས་བཀངས་ཏེ་འབུལ། །དཀྱིལ་འཁོར་མཆོད་པའི་ལྷ་མོ་བཅུ་དྲུག་དང་། །དཀར་མོ་ཆོམ་རྐུན་རོ་ལངས་གྷསྨ་རེ། །
པུསྐ་རི་ཁྲོད་གདོལ་པ་གཡུང་མོ་སྟེ། །གསང་མཆོག་མཆོད་འབུལ་རྡོ་རྗེའི་ལྷ་མོ་བརྒྱད། །ཁང་བཟང་དྲ་ཕྱེད་འཕན་གདུགས་རྔ་ཡབ་གོས། །དབུ་རྒྱན་སྙན་ཆ་མགུལ་དང་ཕྱག་ཞབས་རྒྱན། །སོར་གདུབ་འོག་པག་སེ་མོ་དོ་དར་དཔྱངས། །ལྷ་ཡི་ནོར་བུས་ཕྱོགས་རྣམས་བཀངས་ཏེ་འབུལ། །དཔལ་མགོན་རོལ་པའི་ཞིང་ཁམས་ཕོ་བྲང་བརྗིད། །ཐོད་པ་རྐམ་རློན་དབུ་རྒྱན་དོ་ཤལ་སྦྲུལ། །སྟག་ཤམ་འཇོལ་བེར་གྲི་གུག་ཐོད་ཁྲག་བེང་། །གཡང་གཞིའི་བླ་བྲེ་སྐྲ་ཡི་རྔ་ཡབ་གདུགས། །རྒྱལ་མཚན་བ་དན་གསལ་ཤིང་ལ་སྐྱོན་རོ། །ཕྱག་རྒྱ་དྲུག་དང་གོ་མཚོན་སྲོག་ཆགས་རིགས། །གཅན་གཟན་ཚོགས་དང་ཁྱད་པར་དགྱེས་བསྐྱེད་ཕུལ། །ཕྱི་ནང་གསང་རྟེན་མཆོད་པའི་རྫས་དམ་པ། །རབ་འབྱམས་རྒྱ་མཚོའི་མཐའ་ཀླས་བཀངས་ཏེ་འབུལ། ཨོཾ་ཤྲཱི་བཛྲ་མ་ཧཱ་ཀཱ་ལ་དེ་ཝཱི་ས་པ་རི་ཝཱ་ར་མ་ཧཱ་བི་ཤྭ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ། སྐབས་གསུམ་གྲོང་གིས་མཚན་པའི་
ལྷུན་པོ་དང་། །ལུས་ཅན་ཡོ་བྱད་རྫོགས་པའི་གླིང་རྣམས་དང་། །རིན་ཆེན་ས་འཛིན་རྣམས་དང་བདུད་རྩིའི་མཚོ། །དག་བྱེད་མུ་ཁྱུད་ཕྱོགས་རྣམས་བཀང་སྟེ་འབུལ། །ཨོཾ་ཤྲཱི་བཛྲ་མ་ཧཱ་ཀཱ་ལ་དེ་ཝཱི་ས་པ་རི་ཝཱ་ར་རཏྣ་མཎྜལ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ།