སློབ་དཔོན་ཆེན་པོ་རྡོ་རྗེ་གདན་པ་ཇོ་བོ་པུཎྱེ་ཤྲིས་མཛད་པའི་དགེ་བསྙེན་སྡོམ་པའི་རྣམ་པར་བཞག་པ་ཚིགས་སུ་བཅད་པ་བརྒྱད་པ་འཆད་པ། མི་ཕམ་འཇམ་དབྱངས་རྣམ་རྒྱལ།

ༀ་སྭ་སྟི། སློབ་དཔོན་ཆེན་པོ་རྡོ་རྗེ་གདན་པ་ཇོ་བོ་པུཎྱེ་ཤྲིས་མཛད་པའི་དགེ་བསྙེན་སྡོམ་པའི་རྣམ་པར་བཞག་པ་ཚིགས་སུ་བཅད་པ་བརྒྱད་པ་འདི་འཆད་པ་ལ་བཞི། མཚན་གྱི་དོན། འགྱུར་གྱི་ཕྱག །གཞུང་གི་དོན། མཇུག་གི་དོན་ཏོ། །དང་པོ་ནི། རྒྱ་གར་སྐད་དུ། ཨུ་པ་སཱི་ཀ་དགེ་བསྙེན་གྱི་ས མྦ་སྡོམ་པ་ཨཱཥྚཀ་བརྒྱད་པ། བོད་སྐད་དུ། དགེ་བསྙེན་གྱི་སྡོམ་པ་བརྒྱད་པ། གཉིས་པ་ནི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །གསུམ་པ་ལ་བཞི། དང་པོ་མ་ཐོབ་པ་ཐོབ་པར་བྱེད་པ་བླང་བའི་ཚུལ། འཕྲོས་དོན་དང་བཅས་པ་ནི། བླང་ཡུལ་ནི་སྡོམ་གནས་བླ་མ་སྡོམ་པ་སྟེར་བ་ལ་མཁས་པ་ལས། སྡོམ་པ་ཐམས་ཅད་ཀྱི་སྒོ་དཀོན་མཆོག་གསུམ་ལ་སྐྱབས་འགྲོ་བླངས་ནས་ནི། དུས་ནི་སྲོག་གི་མཐའ་སྟེ་ཇི་སྲིད་འཚོ་ཡི་བར་དུ་འདུ་ཤེས་མ་འཁྲུལ་བས་ཆེད་དུ་བསམ་སྟེ། གསོད་པ་དང་དངོས་སམ་ལྐོག་ཏུ་གཞན་ཡོ་བྱད་འཕྲོག་པ་དང་། བགྲོད་བྱ་ཡན་ལག་ཡུལ་དུས་མིན་པར་འདོད་པས་ལོག་པར་སྤྱོད་དང་ངག་གི་བརྫུན་གྱི་ཚིག་སྨྲ་བ་དང་། མྱོས་བྱེད་ཆང་གི་བཏུང་བ་དག་ལས་ལྡོག་པར་བྱེད་པའི་བསླབ་པའི་ཡན་ལག་ལྔ་པོ་ཚང་པ་ཡོངས་རྫོགས་དགེ་བསྙེན་གྱི་སྡོམ་པ་དག་གསོལ་གདབ་ནས་སྐྱབས་འགྲོ་བསླབ་པ་ཁས་ལེན་ཏེ་ཆོ་ག་བཞིན་དུ་བླང་བར་བྱས་ཟིན་ནས། དེ་ཡང་ངག་གི་བརྫུན་གྱི་ཚིག་ལས་ལྡོག་པ་ཡིས་མཚོན་ནས། ངག་དེ་ཡི་སྐྱོན་ནི་གཞན་ཕྲ་མ་ཚིག་རྩུབ། ངག་རྐྱལ་ལས་ཀྱང་། ལྡོག་པར་བྱས་པ་ཤེས་པར་བྱས་ཏེ་སྐབས་འདིར་ལྡོག་པར་བཤད་པས་རྫུན་ཁོ་ན་སྨྲོས་པ་ནི། རྫུན་ཞེས་པ་དེ་ཡང་ཤིན་ཏུ་སྨད་པའི་ཕྱིར་དེ་གཙོ་བོར་བཟུང་ངོ་། །གང་ཕྱིར་དེ་ལྟར་ལུས་དག་གི་མི་དགེ་བ་བདུན་ལས། ཡང་དག་པར་ལྡོག་པ་ན་ཆགས་སྡང་རྨོངས་མེད་ཡིད་ཀྱིས་དགེ་བའི་ལས་ཡིན་ནོ། །ཡིད་དགེ་བ་དང་ལྡན་པ་དེ་ཕྱིར་དགེ་སེམས་དེའི་འགལ་ཟླ་བརྣབ་སེམས་གནོད་པའི་སེམས་དང་། ཐམས་ཅད་ཀྱི་སྒོ་ནས་ལས་འབྲས་ཡིད་ཆེས་པས་ལོག་པར་ལྟ་བ་ལས་ལྡོག་པ་རྣམས་ཀྱང་དོན་གྱིས་གྲུབ་པ་ཡིན་ནོ། །དེ་ལྟ་ན་མི་དགེ་བ་བཅུ་དང་ཆང་དང་བཅུ་གཅིག་སྤོང་བར་འགྱུར་ན་དགེ་བསྙེན་གྱི་བསླབ་གཞི་ཡན་ལག་ལྔར་ཅིའི་ཕྱིར་བསྟན་ནམ་སྙམ་ན་ཡན་ལག་ལྔ་ཡི་སྡོམ་པ་ཙམ་དུ་བཅོམ་ལྡན་འདས་ཀྱིས་བཤད་པ་ཉིད། ཉུང་བས་བློ་ཆུང་བ་རྣམས་བསླབ་པ་ལ་མི་སྐྲག་པར་སྡོམ་པར་ལ་གཞུག་པ་རུ་ནི་འདོད་པས་སོ། །དེ་ཡང་དོན་གྱི་མི་དགེ་བ་གཞན་ལས་ཀྱང་རིམ་པས་ལྡོག་པར་དགོངས་སོ། །གཉིས་པ་བར་དུ་མི་ཉམས་པར་བསྲུང་བའི་ཐབས་ལྟུང་བའི་དངོས་གཞི་བསྟན་པ་ནི། ལྟོ་ན་གནས་པའམ་བཙས་ཟིན་པའི་མི་སྲོག་གི་འཚོ་བ་བསྟུང་སྟེ་གསོད་པ་དང་མིའི་བདག་བཟུང་གི་དངོས་པོ་རྐུ། ཞིང་དེ་ཡང་མ་ཤ་ཀ་ལྔ་ཙམ་གྱི་རིན་ཐང་ཡོངས་སུ་རྫོགས་དང་གཞན་གྱི་བུད་མེད་སྟོབས་ཀྱིས་སམ་དེ་འདོད་པས་ཁས་ལེན་པ་བདག་གིར་བྱེད་ཅིང་འཁྲིག་པ་དང་མི་ཆོས་བླ་མའི་བརྫུན་ཚིག་སྨྲ་བ་སྟེ་གང་རུང་བྱུང་ན། སྡོམ་པ་རྩ་བ་ནས་ཉམས་པའི་རྒྱུ་རྣམས་སོ། །གསུམ་པ་ཉམས་ན་ཕྱིར་བཅོས་པ་ནི། དེ་ལྟ་བུ་བྱུང་ན་སྡོམ་པ་སླར་ཡང་བླངས་བར་བྱ་སྟེ་དེ་ཡང་སུ་ལས་ལེན་ན་སྔར་བཤད་པ་དེ་འདྲའི་གང་ཟག་ཉིད་ལས་བླང་གི་བྱང་སེམས་ཀྱི་སྡོམ་པ་བཞིན་དུ་རང་གི་བླང་ནས་མི་ཐོབས་སོ། །ཕས་ཕམ་ལས་གཞན་དག་བྱུང་ན་ལྟུང་བ་ཤེས་ནས་མཐོང་སྡོམ་གྱི་ཆོ་ག་ཇི་ལྟ་བར་ནི་བཤགས། དེ་ཡང་བཤགས་ཡུལ་སྡོམ་ལྡན་མཁས་པ་ལ་གང་ཡང་རུང་བ་ཡན་ལག་མ་ཚང་བ་རྣམས་ཡང་བ་ལ་ཡིད་ཀྱིས་ཕྱིན་ཆད་མི་བགྱིད་པར་ཡང་དག་པར་བསྡོམ། བཞི་པ་བསྲུང་ཚུལ་ཕན་ཡོན་དང་བཅས་པ་མཇུག་བསྡུ་བ་ནི། བཤད་མ་ཐག་པ་འདི་ལྟར་སྤང་བྱ་ལས་ལྡོག་པ་སྡོམ་པའི་ཚུལ་ཁྲིམས་ལ་ཡང་དག་པར་གནས་ནས་ཐོས་བསམ་སོགས་ཀྱི་སྦྱིན་སོགས་ཀྱི་དངོས་པོར་འཇུག་པ་ལ་ཡང་རང་ནུས་སམ་སྟོབས་ཇི་ལྟར་ཡོད་པས། གུས་པར་བྱས་ཏེ་དེ་ལྟ་ན་ཚུལ་ཁྲིམས་གཉིས་པོ་དེ་ལ་ཞུགས་པའམ་དེའི་སྦྱོར་བས། གནས་སྐབས་དང་མཐར་ཐུག་གི་ཕན་བདེའི་འབྲས་བུ་སྣ་ཚོགས་པ་དེས་ནི་སྟེར་བ་དེ་ཕྱིར་ཚུལ་ཁྲིམས་འདི་ལ་འབད་དེ་རང་ཉམས་སུ་ཇི་ལྟར་ནུས་པ་བརྩོན་པའམ་སྦྱར་བ་བྱའོ། །ཐར་པ་ཕར་ཞོག་བདེ་འགྲོ་ཡང་ནི་འདོད་པ་ཡིས་ཀྱང་ཚུལ་ཁྲིམས་འདི་ལ་འབད་དེ་སྦྱར་བར་བྱ་དགོས་ཏེ། རྒྱུ་མཚན་དཔེར་ན། ཁྲེ་ཡི་མྱུ་གུའི་རྒྱུ་ལས་ནི། འབྲས་ས་ལུའི་འབྲས་བུ་འགྱུར་བ་ཡུལ་དུས་གང་དུ་མི་མཐོབ་བ་དེ་བཞིན་དུ་ཚུལ་ལྡན་ལ་ངན་འགྲོ་དང་ཚུལ་འཆལ་ལ་བདེ་འགྲོ་ཡང་དེ་དང་འདྲའོ་ཞེས་དོན་གྱིས་གོའོ། །བཞི་བ་མཇུག་གི་དོན་ནི། དགེ་བསྙེན་གྱི་སྡོམ་པ་ཚིགས་སུ་བཅད་པ་བརྒྱད་པ། ཞེས་པ་སློབ་དཔོན་ཆེན་པོ་པུཎྱེ་ཤྲཱིས་མཛད་པ་རྫོགས་སོ། །རྒྱ་གར་གྱི་མཁན་པོ་དེ་ཉིད་དང་། ལོ་ཙཱ་བ་དགེ་སློང་དར་མ་གྲགས་ཀྱིས་བསྒྱུར་བའོ། །འདིའི་འགྲེལ་པའང་འདི་ཉིད་ཀྱིས་མཛད་པ་ཡོད། ཞེས་མཆན་འགྲེལ་ཉུང་ངུ་རྒྱ་གཞུང་རང་འགྲེལ་གྱི་དགོངས་པ་ཁོ་ནར་མ་ནོར་བ། མཁན་པྲཛྷཱ་ཀཱི་རྟིའི་གསུངས་ངོར་མི་ཕམ་རྣམ་པར་རྒྱལ་བས་བྲིས་པ་དགེ།།