འཕགས་པ་གཞི་ཐམས་ཅད་ཡོད་པར་སྨྲ་བའི་དགེ་ཚུལ་གྱི་ཚིག་ལེའུར་བྱས་པ།

འཕགས་པ་གཞི་ཐམས་ཅད་ཡོད་པར་སྨྲ་བའི་དགེ་ཚུལ་གྱི་ཚིག་ལེའུར་བྱས་པ། རྒྱ་གར་སྐད་དུ། ཨཱརྻ་མཱུ་ལ་སརྦ་ཨསྟི་བཱ་དི་ཤྲ་མ་ཎེ་ར་ཀཱ་རི་ཀཱ། བོད་སྐད་དུ། འཕགས་པ་གཞི་ཐམས་ཅད་ཡོད་པར་སྨྲ་བའི་དགེ་ཚུལ་གྱི་ཚིག་ལེའུར་བྱས་པ། ཐམས་ཅད་མཁྱེན་པ་ལ་ཕྱག་འཚལ་ལོ། །གཞུང་འདི་ལ་སྤྱི་དོན་བརྒྱད། བསྟོད་ཅིང་ཕྱག་འཚལ་བ། མགོན་པོ་ཐམས་ཅད་མཁྱེན་དང་ཆོས། །འཕགས་པའི་ཚོགས་ལ་ཕྱག་འཚལ་ཏེ། །དགེ་ཚུལ་གྱི་ནི་ཆོ་ག་རྣམས། །མདོ་ཙམ་ངེས་པར་བཤད་པར་བྱ། །བསླབ་པ་ཉམས་སུ་བླང་བར་བསྟན། ཤཱཀྱ་སེང་གེའི་བསྟན་པ་ལ། །དད་པས་རབ་ཏུ་བྱུང་ནས་ནི། །བརྟུལ་ཞུགས་བརྟན་པས་རབ་བསྒྲིམས་ཏེ། །བདག་གི་ལུས་བཞིན་བསླབ་པ་བསྲུང་། །སྔ་དྲོའི་དུས་ན་ལས་གང་བྱ་བསྟན། ནམ་གྱི་ཆ་སྨད་མལ་ནས་ལངས། །ནམ་ལངས་བར་དུ་ཁ་ཏོན་བྱ། །གདོང་དང་སོ་ཡི་དྲི་བཀྲུས་ནས། །རྫོགས་སངས་རྒྱས་ལ་གུས་ཕྱག་འཚལ། །བླ་མ་གནས་པའི་སྒོ་གླེགས་ལ། །ལག་པས་དལ་གྱིས་བརྡུང་བར་བྱ། །ནང་ཞུགས་གུས་པས་བླ་མ་ལ། །ཁམས་བདེ་མི་བདེ་ལ་སོགས་འདྲི། །འདི་དག་བྱ་ཞེས་དྲིས་ནས་ནི། །དཀྱིལ་འཁོར་ལ་སོགས་རྣམ་བྱའི་ཕྱིར། །ཉ་ཕྱིས་ལ་སོགས་ཆུ་བརྟག་སྟེ། །སྟེང་དང་བར་གཏིང་རིམ་བཞིན་ནོ། །ཉ་ཕྱིས་ལ་སོགས་མེད་ན་ཡང་། །ཁྱོར་བའམ་འདབ་མས་བུམ་པ་དགང་། །ཆུ་ཡི་སྐྱེ་བོ་ཆེ་ཆུང་རྣམས། །ཡུན་ནི་རིང་བར་ནན་ཏན་བརྟག །སྙིང་རྗེ་ཅན་གྱིས་ཁུ་བ་རྣམས། །རབ་ཏུ་བརྟགས་ཏེ་སྤྱད་པར་བྱ། །སྲོག་ཆགས་ཡོད་ན་ལེགས་པར་བཙག །སྲོག་ཆགས་རྣམས་ལ་གནོད་མི་བྱ། །རྩྭ་དང་ལྕི་བ་ཤིང་ལ་སོགས། །དགོས་པ་ཐམས་ཅད་གང་ཡང་རུང་། །དེ་དག་སྲོག་ཆགས་མེད་པར་བྱ། །སྡོམ་པས་སྲོག་ཆགས་བསད་པ་སྲུངས། །སྟན་ཆུ་ས་དང་སོ་ཤིང་དང་། །འདག་པའི་ཆལ་ཡང་སྟ་གོན་བྱ། །ལྷུང་བཟེད་བཀྲུ་བ་སོགས་པ་དང་། །བླ་མའི་དགོས་པ་ཐམས་ཅད་བྱ། །དེ་ནས་དུས་རིག་ཕྱག་བྱས་ཏེ། །དེ་བཞིན་གུས་པས་ཐལ་སྦྱར་ནས། །འཚལ་མ་འཚལ་ཞེས་བླ་མ་ལ། །བརྟུལ་ཞུགས་ཅན་གྱིས་དེ་ལྟར་ཞུ། །ལག་པ་བཀྲུས་ནས་ཚུལ་བཞིན་དུ། །དེ་ནས་མི་སྨྲ་ཚོད་རིག་པས། །བྲུ་བའི་ནད་ལས་བཟློག་པའི་ཕྱིར། །བཟའོ་སྙམ་པའི་སེམས་ཀྱིས་བཟའ། །ཟོས་ཤིང་དེ་བཞིན་འཐུང་བ་དང་། །རུང་བའི་ཆུ་ནི་དེ་འོག་ཏུ། །སྦྱིན་པ་ཡང་དག་སྤེལ་བྱའི་ཕྱིར། །སྦྱིན་པའི་ཚིགས་བཅད་གཉིས་ཤིག་བརྗོད། །ཟས་ཀྱི་བྱ་བ་བྱས་པའི་འོག་ཏུ་ལས་གང་བྱ་བ་བསྟན་པ། མན་ངག་ཡོད་ན་བསམ་གཏན་བྱ། །རབ་ཏུ་འབད་དེ་བཀླག་པར་བྱ། །སྡོམ་དང་ཆོ་ག་མཁས་པ་དང་། །སྒྲུབ་པ་དག་ལ་བརྩོན་པར་བྱ། །ཕས་ཕམ་གྱི་གནས་བསྟན། བརྟུལ་ཞུགས་གནས་སེམས་མ་ཉམས་པས། །ཆེད་དུ་བསམས་ཏེ་མ་ནོར་བར། །མི་གཞན་བདག་གམ་གཞན་རྣམས་ཀྱིས། །བསད་ན་བརྟུལ་ཞུགས་ཉམས་པར་འགྱུར། །ཚུལ་ཁྲིམས་ལྡན་ནམ་ཚུལ་ཁྲིིམས་འཆལ། །དེ་བཞིན་ནད་ཀྱིས་བཏབ་པ་ལ། །གང་ཐོས་སྡུག་བསྔལ་ཉམས་ཐག་སྟེ། །ངེས་འཆིའི་ཆོས་གཏམ་དེ་མི་བྱ། །སྨན་དང་སྔགས་དང་རིག་པ་དང་། །འཆི་བའི་ཕྱོགས་སུ་བཏང་བ་དང་། །མི་གཞན་ཐབས་རྣམས་སྣ་ཚོགས་ཀྱིས། །བསད་ན་བརྟུལ་ཞུགས་ཉམས་པར་འགྱུར། །དུད་འགྲོ་དང་ནི་སེམས་དམྱལ་དང་། །ཡི་དྭགས་འོན་ཏེ་ལྷ་ཡང་རུང་། །བསད་ན་ངན་འགྲོར་ལྟུང་བ་ཡི། །སྡིག་པ་སྦོམ་པོ་ཐོབ་པར་འགྱུར། །བརྟུལ་ཞུགས་ཅན་གྱིས་བསད་སྙམ་སྟེ། །ལུས་དང་ང ག་གིས་བཤམས་པ་ལས། །སྐྱེ་བོ་གསོན་ཡང་དེ་ལ་ནི། །ཁ་ན་མ་ཐོ་རྣམ་གསུམ་འགྱུར། །རྡོ་དབྱུག་ཁུ་ཚུར་འཚོགས་པ་དང་། །དེ་ལས་གཞན་པའི་གནོད་པ་དང་། །བ་ལང་ལ་སོགས་གནོད་མི་བྱ། །རྟ་ལ་སོགས་པ་མི་ཞོན་ནོ། །དགེ་ཚུལ་བདག་གམ་གཞན་རྣམས་ཀྱིས། །རྐུ་སེམས་མཐུ་དང་འཇབ་བུ་ཡིས། །འཁྲུལ་པ་མེད་པར་མི་གཞན་གྱི། །གནས་ནས་མ་ཤ་ལྔ་ཙམ་མམ། །རང་གི་ཡུལ་ནས་བྱུང་བ་གང་། །ཀཱཪྵཱ་པ་ཎ་བཞི་ཆ་བརྐུས། །དེ་བརྐུས་ཚུལ་ཁྲིམས་ཞིག་པར་འགྱུར། །སྦྱོར་བའི་ཚེ་ན་ཉེས་བྱས་སོ། །རྡོག་གུའི་རྩ་བ་འབྲས་བུའི་ཤིང་། །སྡོང་པོ་ལོ་མ་ཤུན་པ་ཆུ། །མེ་ཏོག་ཆུ་སྐྱེས་ཐང་སྐྱེས་དང་། །ཞིང་དང་ལོ་ཏོག་ས་གཞི་དང་། །གྲུ་དང་ཤིང་དང་ཤོ་གམ་དང་། །དེ་བཞིན་གྲུ་ཡི་བཙས་རྣམས་དང་། །སྲོག་ཆགས་རྐང་པ་མེད་པ་དང་། །རྐང་གཉིས་རྐང་མང་རྐུ་བ་དང་། །བརྟུལ་ཞུགས་ཅན་གྱིས་མི་ཡི་ནོར། །དབྱིག་ལ་སོགས་པ་གང་ཡང་རུང་། །རྐུ་བའི་སེམས་ཀྱིས་གང་བརྐུས་ཀྱང་། །རིན་ཐང་ཚང་ན་སྡོམ་པ་ཞིག །ལྷུང་བཟེད་ལ་སོགས་རྐུན་ཁྱེར་ན། །ཆོས་བཤད་ནས་ནི་བསྒྲུབ་པར་བྱ། །ཡང་ན་རི་བའི་རིན་གྱིས་བླུ། །དེ་ལྟར་མ་བྱས་ཉེས་བྱས་སོ། །སྡོམ་ཅན་ཉེས་པ་མེད་སེམས་ཀྱིས། །ཉམས་པ་མེད་པའི་སྒོ་གསུམ་དུ། །ཆགས་པས་ནོར་བུ་ནང་དུ་འདས། །དགའ་བ་ཚོར་ན་བརྟུལ་ཞུགས་ཉམས། །སྐྱེས་པ་བུད་མེད་མ་ནིང་གི། །ཚན་ཀར་བོར་ཏེ་མནན་པ་ལས། །གང་གི་བདེ་བའི་རོ་མྱོང་བ། །དེ་ཡང་སྡོམ་པ་ཞིག་པར་འགྱུར། །ཡན་ལག་སྐྱེས་ནས་བདེ་འདོད་པས། །གདུག་པ་སྦྲུལ་གྱི་ཁར་བཅུག་སླ། །ལུས་ལ་སྡོམ་པ་མི་གཞིག་ཅེས། །རྫོགས་སངས་རྒྱས་ཀྱིས་བཀའ་སྩལ་ཏོ། །གལ་ཏེ་སྦྲུལ་གྱིས་བསད་གྱུར་ཀྱང་། །ཚུལ་ཁྲིམས་གནས་ལ་དེ་ཕན་ཏེ། །ཚུལ་ཁྲིམས་ཉམས་པ་སྡུག་བསྔལ་ཡིན། །མྱ་ངན་འདས་ལའང་སྒྲིབ་པར་འགྱུར། །ལྷ་དག་མཐོང་ཞེས་དེ་ཡི་སྒྲ། །ཐོས་པར་གྱུར་དང་ཀུན་སྨྲ་དང་། །གང་ན་བདག་འདུག་ལྷ་འོང་ཞིང་། །བདག་ཀྱང་དེ་ཡི་དྲུང་འགྲོ་དང་། །དེ་བཞིན་དྲི་ཟ་གྲུལ་བུམ་ཀླུ། །གནོད་སྦྱིན་ལྟོ་འཕྱེ་ཆེན་པོ་དང་། །ཤ་ཟ་ཡི་དྭགས་མིའམ་ཅི། །མཐོང་ངོ་ཞེས་ལ་སོགས་སྨྲས་དང་། །བསམ་གཏན་མངོན་ཤེས་ཚད་མེད་དང་། །རྒྱུན་ཞུགས་ལ་སོགས་འབྲས་བུ་དང་། །ལམ་ལ་རབ་ཏུ་ཞུགས་པའང་རུང་། །བདག་གིས་ཐོབ་ཅེས་སྨྲས་ནས་ནི། །དོན་རིག་པ་ལ་རྫུན་པའི་ཚིག །ཁྱད་པར་ཐོབ་པའི་བདག་ཉིད་ཅན། །མ་ཉམས་ང་རྒྱལ་མེད་བཞིན་དུ། །སྨྲས་ན་བརྟུལ་ཞུགས་ཉམས་པར་འགྱུར། །ཁྱད་པར་ཐོབ་པ་མ་གཏོགས་པར། །དེ་ལས་གཞན་པའི་རྫུན་ཚིག་རྣམས། །དེ་དག་ཐམས་ཅད་སྡིག་མང་འགྱུར། །དེས་ནི་འོག་མར་ལྟུང་བར་འགྱུར། །ཇི་ལྟར་མཛའ་བོ་འབྱེད་འགྱུར་བ། །ཕྲ་མའི་ཚིག་རྣམས་སྨྲ་མི་བྱ། །ཐུན་ཚགས་སུ་ནི་སྨྲ་བ་དང་། །ཚིག་རྩུབ་སྨྲ་བར་མི་བྱའོ། ། ངན་དུ་ཟེར་ལ་ངན་མི་བརྗོད། །གཤེ་བ་ལ་ཡང་སླར་མི་གཤེ། །མཚང་བྲུ་བ་ལ་སླར་མི་བྲུ། །བརྡེག་པ་ལ་ཡང་སླར་མི་བརྡེག །བློ་ལྡན་བསླབ་པ་འདོད་པ་ཡིས། །བསྒྲིམས་ཏེ་ངག་གི་སྐྱོན་རྣམས་སྤང་། །དེ་ལྟར་འགྱུར་བར་རིག་ནས་ནི། །ངག་རྣམས་ཤིན་ཏུ་བསྡམ་པར་བྱ། །བསླབ་པ་ཕྲ་མོའི་གནས་བསྟན་ནོ། ། འབྲུ་བཏགས་ཕབ་དང་སྦྱར་བ་ཡི། །བཏུང་བའི་བྱེ་བྲག་འབྲུ་ཡི་ཆང་། །སྡོང་བུ་མེ་ཏོག་འབྲས་བུ་ལས། །སྦྱར་བའི་ཁུ་བ་བཙོས་པའི་ཆང་། །དེས་ནི་མྱོས་པར་འགྱུར་རིག་ནས། །སྡོམ་ཅན་ཕན་འདོད་མི་བཏུང་ངོ་། །དེ་འཐུངས་ན་ནི་དྲན་ཉམས་ཤིང་། །བརྟུལ་ཞུགས་ལྡན་པ་བག་མེད་འགྱུར། །བག་མེད་པ་ལས་བརྟུལ་ཞུགས་ཉམས། །དེ་བས་སྟོན་པའི་བཀའ་དྲན་བྱ། །མྱོས་འགྱུར་ཉེས་པ་འཕེལ་འགྱུར་བ། །རྩྭ་མཆོག་གིས་ཀྱང་མི་བཏུང་ངོ་། །གླུ་གར་དང་ནི་སིལ་སྙན་རྣམས། །སྡོམ་ལ་གནས་པས་མི་བྱའོ། །ལུས་ལ་སྤོས་ཀྱིས་མི་བྱུག་གོ། །ཙནྡན་ལ་སོགས་མི་བསྐུའོ། །ཡུང་དང་གུར་གུམ་ལ་སོགས་པ། །ཁ་དོག་རྣམས་སུ་བྲི་མི་བྱ། ། མེ་ཏོག་མགོ་རྒྱན་ཕྲེང་བ་དག །བརྟུལ་ཞུགས་ཅན་གྱིས་གདགས་མི་བྱ། །གསེར་ལ་སོགས་པའི་རྒྱན་རྣམས་ཀྱིས། །བདག་ལ་བརྒྱན་པར་མི་བྱའོ། །དུད་པ་ལ་སོགས་མིག་སྨན་རྣམས། །མིག་མི་ན་བར་མི་བྱུག་གོ། །ཤིང་ཁྲི་ཁྲུ་གང་མཐོ་བ་དང་། །བ་སོ་ལ་སོགས་བརྒྱན་པའི་ཁྲི། །དམའ་ཡང་ཉལ་ཁྲི་བཟང་པོ་ལ། །ཉལ་བ་ལ་སོགས་མི་བྱའོ། །གླུ་གར་ལ་སོགས་བསྟན་པ་དང་། །གང་ལ་དྲེགས་པ་སྐྱེ་འགྱུར་བ། །དྲེགས་པའི་ཡན་ལག་སྤངས་ནས་ནི། །བརྟུལ་ཞུགས་གནས་ཞེས་བརྗོད་པ་ཡིན། །ཉི་མ་ཕྱེད་མཚམས་མན་ཆད་ནས། །སྐྱ་རེངས་མ་ཤར་བར་དུ་ནི། །དེ་ནི་རྒྱལ་བས་དུས་མིན་གསུངས། །སྡོམ་ཅན་གྱིས་ནི་དེར་མི་བཟའ། །སྐྱ་རེངས་ཤར་ནས་ཕྱེད་ཀྱི་བར། །དེ་ཡི་སྐབས་སུ་ཟོས་པ་ནི། །དེ་ནི་བདག་ཤེས་སྡོམ་པ་སྟེ། །བཟའ་བའི་དུས་སུ་ཟོས་པ་ཡིན། །དུས་མིན་དུས་སུ་འདུ་ཤེས་པ། །ནམ་ཡང་བཟའ་བར་མི་བྱའོ། །སྨན་པས་ཉོན་མོངས་བསྒོས་ན་ནི། །ནད་པས་ཉེས་པར་མི་འགྱུར་རོ། །ས་ལེ་སྦྲམ་ནི་གསེར་ཡིན་ཏེ། །དངུལ་ཞེས་བྱ་བ་དངུལ་ཉིད་དོ། །སྤྱིན་བདག་རྣམས་ནི་དེ་བྱིན་ན། །བརྟུལ་ཞུགས་ཅན་གྱིས་མི་བླང་ངོ། །བདག་གིས་རུང་བ་མ་ཡིན་འདིས། །རུང་བའི་དངོས་པོ་བཙལ་སྙམ་དུ། །ད་ལྟར་མངོན་པར་བསམས་ནས་ནི། །དེ་ནས་གཞན་ཞིག་ལེན་དུ་གཞུག །དཀོན་མཆོག་གསུམ་གྱི་ཆེད་ཀ་དང་། །ཚངས་པ་མཚུངས་པར་སྤྱོད་རྣམས་ཀྱིས། །གསེར་དང་དངུལ་ལ་རེག་གྱུར་ཀྱང་། །ཉེས་པར་བགྱུར་བ་མ་ཡིན་ནོ། །འདོད་པས་བར་དུ་གཅོད་བྱེད་ཅེས། །རྫོགས་སངས་རྒྱས་ཀྱིས་གསུངས་པ་དེ། །བར་དུ་གཅོད་པར་མི་འགྱུར་ཞེས། །དགེ་ཚུལ་གཏི་མུག་མ་སྨྲ་ཞིག །དེ་སྐད་སྨྲ་ན་དགེ་འདུན་གྱི། །ལོངས་སྤྱོད་ཀུན་དང་ཕྲལ་ནས་ནི། །གཙུག་ལག་ཁང་ནས་བསྐྲད་པར་བྱ། །དེ་ནས་རོ་དང་འདྲ་བར་འགྱུར། །འཕྱར་དང་རྟ་གང་བྱེད་ལ་སོགས། །འཆི་བར་བསམས་ཏེ་མི་བྱའོ། །གླལ་ཚེ་ལག་པ་སོགས་པ་ཡིས། །ཁ་དགབ་པར་ཡང་ནན་ཏན་བྱ། །རྒན་ལ་སྦྲིད་བྱུང་ཕྱག་བྱ་སྟེ། །གཞོན་ལ་ནད་མེད་གྱུར་ཅེས་བརྗོད། །ཁྱིམ་པ་སྦྲིད་པ་བྱུང་བ་ལ། །ཡུན་རིང་འཚོ་ཞེས་བརྗོད་པར་བྱ། །བླ་མ་གནས་པའི་མདུན་དག་ཏུ། །སྣབས་དང་མཆིལ་མ་མི་འདོར་ཞིང་། །སོ་ཤིང་བཅའ་བར་མི་བྱའོ། །དེ་བཞིན་སྟན་ལ་མི་འདུག་གོ། །མདུན་དུ་གཅག་པར་མི་བྱའོ། །ཁྱེད་རེངས་སུ་ཡང་མི་དབྱུང་ངོ་། །རྒན་ལ་སོགས་པའི་སྡོམ་ཅན་ལ། །གུས་བཅས་ཞེ་སར་བཅས་པར་བྱ། །ལག་པ་དག་པར་བསྙལ་ནས་ནི། །བུམ་པ་ལ་སོགས་རྡུལ་མེད་བྱ། །ཆུ་ཡང་ཡོངས་སུ་བཙགས་ནས་སུ། །བརྟགས་ནས་རུང་བ་བླང་བར་བྱ། །གནས་མ་བཅས་པར་གནས་མི་བྱ། །ཕྱི་དྲོ་ཕན་ཆད་ཀྱི་བྱ་བ་བསྟན་ནོ། །དགེ་འདུན་མལ་ཆ་ལ་སོགས་པར། །དྲན་པ་མེད་པར་འདུག་མི་བྱ། །དྲན་དང་ལྡན་ན་ཉེས་མེད་དོ། །སོ་བྲུ་བ་དང་ཆུ་བཏུང་དང་། །གཤང་གཅི་བྱེད་དུ་འགྲོ་བ་དང་། །མཚམས་ནང་སྟོན་ལ་ཕྱག་བྱ་བ། །དེ་དག་མ་ཞུས་ཉེས་མེད་དོ། །བརྟུལ་ཞུགས་ཅན་གྱིས་བྱ་བ་གཞན། །དེ་དག་ཐམས་ཅད་མ་ལུས་པ། །གལ་ཏེ་བླ་མར་མ་ཞུས་པར། །བྱས་ན་དེ་ལ་ཉེས་བྱས་སོ། །མཆོད་རྟེན་ལ་སོགས་ཕྱག་བྱས་ཏེ། །མི་ཉལ་བྱས་ནས་དེ་འོག་ཏུ། །བླ་མའི་རྐང་བཀྲུས་བླ་མ་ལ། །བརྟུལ་ཞུགས་ཅན་གྱིས་ཀུན་ཞུས་ཏེ། །རྐང་པ་གཉིས་ཀ་བཀྲུས་ནས་ནི། །ནམ་གྱི་ཆ་སྟོད་ཆ་སྨད་ལ། །བསྒྲིམས་ཏེ་མི་ཉལ་བ་བྱས་ཏེ། །དེས་ནི་བདེན་པར་སྨྲ་བར་བྱ། །ལྡང་དང་སྣང་བའི་འདུ་ཤེས་ཀྱིས། །སེང་གེ་ཉལ་ཐབས་བཞིན་དུ་བྱ། །དྲན་དང་ལྡན་ཞིང་དགེ་རྒྱུད་དང་། །དེ་བཞིན་མྱུར་དུ་སད་ནས་ནི། །ཇི་སྐད་བསྟན་པ་བཞིན་དུ་བྱ། །འདིས་འབྲས་བུ་བསྟན་ནོ། །ཇི་ལྟར་ཉོན་མོངས་མྱུར་ཟད་དང་། །བྱང་ཆུབ་དམ་པ་ཐོབ་འགྱུར་པ། །དེ་ལྟར་བསྒྲིམས་དང་ལྡན་པར་བྱ། །ཐམས་ཅད་ཡོད་པར་སྨྲ་བའི་དགེ་ཚུལ་གྱི་ཚིག་ལེའུར་བྱས་པ་སློབ་དཔོན་ཀླུ་སྒྲུབ་ཀྱིས་མཛད་པ་རྫོགས་སོ། །རྒྱ་གར་གྱི་མཁན་པོ་མུ་ནི་བརྨ་དང་། ཞུ་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །འདིའི་འགྲེལ་པ་ཀ་མ་ལ་ཤཱི་ལས་མཛད་པ་དང་། ཡང་མཛད་པ་པོ་མི་གསལ་བ་བཅས་གཉིས་སྣང་ངོ་། །ཚུལ་ཁྲིམས་རྒྱ་མཚོས་སྤར་དུ་བསྒྲུབས་པའོ།། །།དཔེ་འདིའང་སྤར་རྙིང་རྩ་ཆེན་མཁན་ཚུལ་ཁྲིམས་མཐར་ཕྱིན་གྱི་ཕྱག་དཔེ་ལས་ཁོ་བོ་བྱང་ཆུབ་རྒྱ་མཚོས་རྙེད་དེ་གསར་དུ་འཛུད་པའོ། །