དྲི་མེད་རྣམ་གཉིས་ཀྱི་གཟུངས་ལ་བརྟེན་ཏེ་མཆོད་རྟེན་བཞེངས་པ་ལ་ཉེ་བར་མཁོ་བའི་ཆོ་ག་བཀླག་པས་གྲུབ་པ། ལོ་ཆེན་དྷརྨཱ་ཤྲཱི།

དྲི་མེད་རྣམ་གཉིས་ཀྱི་གཟུངས་ལ་བརྟེན་ཏེ་མཆོད་རྟེན་བཞེངས་པ་ལ་ཉེ་བར་མཁོ་བའི་ཆོ་ག་བཀླག་པས་གྲུབ་པ་ཞེས་བྱ་བ་བཞུགས་སོ། །ན་མཿསརྦ་བུདྡྷ་བོ་དྷི་ས་ཏྭ་བྷྱཿ འདིར་དྲི་མེད་རྣམ་གཉིས་ཀྱི་གཟུངས་ལ་བརྟེན་ཏེ་མཆོད་རྟེན་བཞེངས་པའི་སྒོ་ནས་བདག་གཞན་གྱི་ཕན་བདེ་སྒྲུབ་པའི་ལས་རིམ་ཅུང་ཟད་གཅིག་བྲི་བར་བྱ་སྟེ། དེེ་ལ་རེ་ཞིག་སྔོན་དུ་འོད་ཟེར་དྲི་མེད་ཀྱི་བསྙེན་པའི་ཆོ་ག་ནི། དེའི་དཀྱིལ་འཁོར་དང་དབང་དང་། རྗེས་སུ་གནང་བ་ནོད་ཅིང་། དམ་ཚིག་སྡོམ་པ་ལ་གནས་པའི་སྔགས་པས། དབེན་ཞིང་ཡིད་དུ་འོང་བའི་གནས་སུ་ཕྱག་བདར་སོགས་བྱས་ལ། རྟེན་དང་༼མཎྜལ་གྲུ་བཞི་པ་བའི་ལྕི་བས་བྱུགས་ལ་དྲིས་ཆག་ཆག་བཏབ་པའི་གྲྭ་བཞིར་དྲི་ཆུའི་སྣོད་རེ་བཞག་པའམ་མ་འབྱོར་ན་མཆོད་རྟེན་ནམ་བྲིས་སྐུ་ལ་བརྟེན་ནོ། །མཆན།༽ མཆོད་པ་བཤམས་ནས་ནངས་པར་དེ་བཞིན་གཤེགས་པའི་དམ་རྒྱ་མགོ་ལ་བཞག་སྟེ་༼ཐལ་མོ་བཀན་པ་ལས་མཛུབ་མོ་གཉིས་ཅུང་ཟད་བཀུམ། མཆན།༽ ༀ་སརྦ་ཏ་ཐཱ་ག་ཏ་ཨུདྦྷ་བ་ཡེ་སྭཱ་ཧཱ། ཞེས་བརྗོད། དེ་ནས། ཕྱོགས་བཅུའི་དེ་བཞིན་གཤེགས་པ་མཁའ་ཁྱབ་ཏུ་བཞུགས་པ་ལ་དམིགས་ཏེ། ༀ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་བཛྲ་པྲ་ཎ་མེ་ན་སརྦ་ཏ་ཐཱ་ག་ཏ་བཛྲ་བནྡྷ་ནཾ་ཀ་རོ་མི། ཞེས་པས་ཕྱག་དང་། བྱང་ཆུབ་སྙིང་པོར་མཆིས་ཀྱི་བར། །ཕྱོགས་བཅུར་བཞུགས་པའི་སངས་རྒྱས་དང་། །བྱང་ཆུབ་སེམས་དཔའ་ཐམས་ཅད་ལ། །དུས་ཀུན་དུ་ནི་བདག་འབུལ་ན། །བརྩེ་བས་བཞེས་ནས་དངོས་གྲུབ་སྩོལ། །ཞེས་པས་བདག་འབུལ་ལོ། །དེ་ནས་ཁྲོ་བོ་མནོལ་བ་མེད་པའི་སྔགས་རྒྱས་བདག་བསྲུང་བ་ནི། དེའི་ཕྱག་རྒྱ་བཅིངས་ལ། ༼ལག་གཉིས་སོར་མོ་ཕན་ཚུན་བསྣོལ་ཏེ་སྡོམ་པའི་ཚུལ་དུ་ཁུ་ཚུར་བཅང་ལ། མཐེའུ་ཆུང་གཉིས་བཤིབས་ཏེ་བསྒྲེང་ཞིང་མཛུབ་རྩེ་སྦྱར་བའི་གློར་མཐེའུ་ཆུང་གཉིས་བཙུགས་པའོ། །མཆན།༽ སྔགས་ནི། ༀ་བཛྲ་ཀྲོ་དྷ་མ་ཧཱ་བྷ་ལ་ཧ་ན་ད་ཧ་པ་ཙ་བིདྷཱནྶ་ཡ། ཨུ་ཙུཥྨ་ཀྲོ་དྷ་ཧཱུྃ་ཕཊ། ཅེས་པས། བདག་ཉིད་བསྲུང་བར་གྱུར། རང་གི་སྙིང་གར་ཟླ་བ་ལ། །སྣང་མཛད་ངོ་བོ་ཡི་གེ་མ། །མགྲིན་པར་དཔག་མེད་ངོ་བོ་མཾ། །མགོ་བོ་ལ་ཡང་མི་བསྐྱོད་པའི། །ངོ་བོ་ཡི་གེ་ཧ་ཞེས་བྱ། །འབར་བའི་ཕྲེང་བ་འཁྲིགས་པར་གྱུར། །ༀ་སྭ་བྷཱ་ཝ་ཤུདྡྷཿསརྦ་དྷརྨཿསྭ་བྷཱ་ཝ་ཤུདྡྷོ྅ཧཾ། ཆོས་རྣམས་ཐམས་ཅད་རང་བཞིན་གྱིས་རྣམ་པར་དག་པར་གྱུར། དེ་ཡང་གཤང་གཅི་འདོར་བ་དང་ཟན་ཟ་བ་ལ་སོགས་པའི་ཚེ་ཁྲོ་བོ་མནོལ་བ་མེད་པའི་སྔགས་རྒྱས་བསྲུང་བར་བཤད་པ་ལྟར། འདིར་ཡང་གནས་ཁང་ནས་ཕྱི་རོལ་དུ་འགྲོ་བ་བསྲུང་ནས་མཚོ་ལ་སོགས་པར་སོང་སྟེ་དཀྱིལ་ཆོག་ལས་འབྱུང་བ་ལྟར་ཁྲུས་རྒྱས་པར་བྱ་བའམ། དེ་ཙམ་མི་ནུས་ན་སྒྲུབ་ཁང་གི་ཕྱི་རོལ་དུ། ༀ་ཨ་མྲྀ་ཏེ་ཧཱུྃ་ཕཊ། ཅེས་བཟླས་པའི་ཆབ་བུམ་གྱིས་ཅི་དགར་ཁྲུས་བྱ་ཞིང་། ༀ་ཨ་མྲྀ་ཏེ་ཧཱུྃ་ཕཊ། ཅེས་བཟླས་བཞིན་པར་རང་གི་མགོ་བོར་ཆུ་སྙིམ་པ་གསུམ་བླུགས་ཏེ། བདག་ཉིད་ལ་དབང་བསྐུར་བས། རང་གི་ལྷ་ཉིད་སྤྱན་དྲངས་ཏེ་སྤྱི་བོར་པདྨའི་གདན་ལ་བཞུགས་པར་གྱུར། དེ་ནས། ཁ་སྣ་མིག་རྣ་ཁ་ལག་མགོ། ལྟེ་བ་རྣམས་སུ་གསུམ་རེ་རེག །ཅེས་པ་ལྟར་ཉེ་རེག་བྱས་ཏེ། སོ་ཤིང་དོར་ནས་སྒྲུབ་ཁང་དུ་ཞུགས་ལ། ལྷ་རྣམས་མངོན་སུམ་བཞུགས་པར་དམིགས་ཏེ། ༀ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་བཛྲ་པྲ་ཎ་མེ་ན་སརྦ་ཏ་ཐཱ་ག་ཏ་བཛྲ་བནྡྷ་ནཾ་ཀ་རོ་མི། ཞེས་པས་ཕྱག་འཚལ་ནས། སྟན་ལ་འདུག་སྟེ། དམ་ཚིག་ལ་འཇུག་པའི་སྔགས། ༀ་བི་ར་ཛ། བི་ར་ཛ། མ་ཧཱ་ཱབཛྲི། པ་ཏ་པ་ཏ། པཱ་ར་ཏེ་པཱ་ར་ཏེ། ཏྲ་ཡི་ཏྲ་ཡི། བི་དྷ་མ་ནི། སམ་བྷཉྫ་ནི། ཏ་ར་མ་ཏི། སིདྡྷ་ཨ་ཀྲོ་ཏཾ་སྭཱ་ཧཱ། ཞེས་བཟླ། དེ་ནས་དྲི་ཆུའི་དུང་ཞལ་འཐོར་ཡབ་དང་བཅས་པས་བསངས་ཆུ་ལས་སྔགས་གཉིས་ཀྱིས་བྱིན་གྱིས་བརླབ་པ་ནི། དེ་བཞིན་གཤེགས་པའི་རིགས་ཀྱི་ལས་ཐམས་ཅད་པའི་སྔགས། ༀ་ཏྲཾ་བནྡྷ་སྭཱ་ཧཱ། ཞེས་དང་། བདུད་རྩི་ཐབས་སྦྱོར་གྱི་སྔགས། ན་མོ་རཏྣ་ཏྲ་ཡཱ་ཡ། ན་མཥྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོདྷ་ཡ། ཏདྱཐཱ། ༀ་ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུྃ་ཕཊ། ཅེས་པས་བྱིན་གྱིས་བརླབས་ཏེ་ལས་སྔགས་གཉིས་བརྗོད་བཞིན་པར་རང་ལ་བསང་ཆུ་གཏོར་བས། བདག་ཉིད་ཀྱི་བགེགས་བསལ་བར་གྱུར། ཡང་མཆོད་པ་རྣམས་ལ་བསང་ཆུ་གཏོར་ཞིང་ལས་སྔགས་གཉིས་དང་རིགས་ཀྱི་སྙིང་པོ། ཛི་ནི་ཛིཀ྄ །ཅེས་བརྗོད་པས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ༀ་ལས་རིན་པོ་ཆེའི་སྣོད་དུ་ༀ་ཡིག་ཞུ་བ་ལས་བྱུང་བའི་མཆོད་རྫས་རྣམས་ཀུན་ཏུ་བཟང་པོའི་སྤྲིན་ཕུང་ལྟར་བཟང་ཞིང་རྒྱ་ཆེ་བ་ནམ་མཁའི་མཐའ་ཀླས་པར་གྱུར། ཕྱག་རྒྱ་བཅིངས་ལ། ༼ཐལ་མོ་ཁོང་སྟོང་སྙིང་ཁ་ནས་རིམ་པར་བསྐོར་ཞིང་བཏེགས་ཏེ་དཔྲལ་བར་སེ་གོལ་གཏོགས་ནས་བཀྲོལ། མཆན།༽ ༀ་སརྦ་བིདྤཱུ་ར་པཱུ་ར་སུ་ར་སུ་ར་ཨཱ་ཝ་རྟ་ཡ་ཨཱ་ཝ་རྟ་ཡ་ཧོཿ ༀ་བཛྲ་སྥ་ར་ཎ་ཁཾ། གཟི་བྱིན་བསྐྱེད་པའི་ཕྱག་རྒྱ་༼ལག་གཡོན་པའི་སྲིན་ལག་མཐེ་བོས་མནན་ལ་མཛུབ་མོ་དང་མཐེ་ཆུང་གདུབ་བུའི་ཚུལ་དུ་བྱས་ཏེ་སོར་མོ་དབུས་མའི་ཚིགས་གསུམ་པར་ཟུག་ཅིང་གཡས་པའི་སོར་མོ་དབུས་མ་གསུམ་རྡོ་རྗེའི་ཚུལ་དུ་བྱས་པས་གཡོན་པའི་གུང་མོ་བཟུང་བའོ། །མཆན།༽ མེ་ཏོག་ལ་སོགས་པའི་མཆོད་རྫས་ཀྱི་ཁར་བཞག་སྟེ། ༀ་ཏེ་ཛཿཏེ་ཛཿས་ན་སིདྡྷི་སཱ་ཱདྷ་ཡ་ཧཱུྃ་ཕཊ། ཞེས་པས་བྱིན་བསྐྱེད་ནས། ན་མོ་རཏྣ་ཏྲ་ཡཱ་ཡ། སོགས་བདུད་རྩི་ཐབས་སྦྱོར་གྱི་སྔགས་དང་། ཛི་ན་ཛིཀ྄ །ཅེས་བརྗོད་པས་བརྟན་པར་བྱའོ། །དེ་ནས་སྐྱབས་སེམས་ནི། སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །བདག་དང་གཞན་དོན་བསྒྲུབ་སླད་དུ། །བདག་གིས་བྱང་ཆུབ་སེམས་བསྐྱེད་དོ། །ཕྱོགས་བཅུ་དག་ན་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་གསོན། །བདག་གིས་རྫོགས་པའི་སངས་རྒྱས་ཕྱིར། །དེང་ནས་བྱང་ཆུབ་སེམས་བསྐྱེད་དོ། །ཞེས་ལན་གསུམ། དེ་ནས་སྲུང་འཁོར་ནི། ༀ་ཀཱི་ལི་ཀཱི་ལ་བཛྲི་བཛྲི་བྷུ་ར་བྷནྡྷ་ཧཱུྃ་ཕཊ། ཅེས་པས་བསང་ཆུ་ལ་བདུན་བཟླས་ཏེ། སྔགས་དེ་ཉིད་ཀྱིས་བསང་གཏོར་བྱས་པས་གནས་སྦྱངས། ཕུར་བུའི་ཕྱག་རྒྱ་༼ལག་གཉིས་ཀྱི་གུང་སྲིན་ཕན་ཚུན་གདུ་བུ་ལྟར་བྱས་ཏེ་སོ་སོའི་རྩ་བར་རྩེ་མོ་སྦྱར་ལ་མཐེ་ཆུང་དང་མཛུབ་མོ་གཉིས་གཤིབས་ཏེ་སྒྲེང་། མཐེ་བོང་ཕུར་བུའི་ཚུལ་དུ་ས་ལ་བཙུགས་པའོ། །མཆན།༽ བཅིངས་ལ། ༀ་ཀཱི་ལི་ཀཱི་ལ་བཛྲི་བཛྲི་བྷུ་ར་བྷནྡྷ་ཧཱུྃ་ཕཊ། ཅེས་དང་། ས་འོག་གི་གདོན་རྣམས་ལ་ཕུར་བུ་བཏབ་པས་བཅིངས་པར་གྱུར། ༀ་སུ་སིངྔྷིའི་ཀཱ་ར་ཛ་ལ་ཏ། ཨ་ནནྟ་མུ་ཏྲ་ཡེ། ཛྭ་ལ་ཛྭ་ལ། བྷནྡྷ་བྷནྡྷ། ཧ་ན་ཧ་ན་ཧཱུྃ་ཕཊ། ༀ་ཛྭ་ལ་ཧཱུཾ། ཞེས་སྤོས་ཀྱིས་བདུག་པས། སྟེང་གི་ལྷ་རྣམས་བཅིངས་པར་གྱུར། ཛི་ན་ཛིཀ྄ །ཅེས་བསང་ཆུ་གཏོར་ལ། བྷྲཱུྂ་ཞེས་བརྗོད་པས། ཕྱོགས་ཀྱི་བགེགས་ཐམས་ཅད་བཅིངས་པར་གྱུར། དེ་ནས་ར་བའི་ཕྱག་རྒྱ་༼ཕུར་བུའི་ཕྱག་རྒྱ་ཉིད་ལས་མཐེ་བོང་ཁ་ཕྱེ་ནས་གྱེན་དུ་སྒྲེང་བ། མཆན།༽ བཅིངས་ལ། ན་མོ་རཏྣ་ཏྲ་ཡཱ་ཡ། ན་མཥྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཏདྱ་ཐཱ། ༀ་ས་ར་ས་ར། བཛྲ་པྲ་ཀ་ར་ཧཱུྃ་ཕཊ། ཕྱོགས་ཐམས་ཅད་རྡོ་རྗེའི་ར་བས་བར་མཚམས་མེད་པར་བཅིངས་པར་གྱུར། ར་བའི་ཕྱག་རྒྱ་༼ར་བའི་ཕྱག་རྒྱ་ཉིད་ཁ་ཐུར་དུ་བསྟན་ཏེ་བསྐོར་བ། མཆན།༽ བཅས་ལ། ན་མོ་རཏྣ་ཏྲ་ཡཱ་ཡ། ན་མཥྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཏདྱ་ཐཱ། ༀ་བི་སྥུ་ར་རཀྵ་བཛྲ་པཱ་ཎི་ཧཱུྃ་ཕཊ། རྡོ་རྗེ་ར་བའི་སྟེང་དུ་རྡོ་རྗེའི་གུར་ཕུབ་པར་གྱུར། དེ་ནས་བདུད་རྩི་ཐབས་སྦྱོར་གྱི་ཕྱག་རྒྱ་༼མཐེ་བོས་མཐེའུ་ཆུང་གི་སེན་མོ་མནན་ལ་སོར་མོ་ལྷག་མ་རྣམས་རྡོ་རྗེ་ལྟར་བྱས་པས་ལག་གཉིས་བསྣོལ་ཏེ་དཔུང་མགོར་བཞག་ནས་ཡ་སོས་མ་མཆུ་མནན་ཅིང་ཁྲོ་བོའི་ལྟ་བས་བལྟ་བའོ། །མཆན།༽ བཅས་ལ། ན་མོ་རཏྣ་ཏྲ་ཡཱ་ཡ། ན་མཥྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷ་ཡ། ཏདྱ་ཐཱ། ༀ་ཧུ་ལུ་ཧུ་ལུ། ཏིཥྛ་ཏིཥྛ། བྷནྡྷ་བྷནྡྷ། ཧ་ན་ཧ་ན་། ཨ་མྲྀ་ཏེ་ཧཱུྃ་ཕཊ། ཅེས་དང་། ཕུར་བུའི་ཕྱག་རྒྱ་བཅས་ཏེ། ༀ་ཀཱི་ལི་ཀཱི་ལ་བཛྲི་བཛྲི་བྷུ་ར་བནྡྷ་ཧཱུྃ་ཕཊ། ཅེས་བརྗོད་པས། བརྟན་པར་བྱིན་གྱིས་བརླབས་པར་གྱུར། མཚམས་གཅོད་ཀྱི་ཕྱག་རྒྱ་༼ཁུ་ཚུར་བཅངས་ལ་མཐེ་བོས་སོར་མོ་རྣམས་མནན་ལ་མཛུབ་མོ་བསྡིགས་ཚུལ་གྱི་དབུས་ནས་ཇེ་ཆེ་ལན་གསུམ་བསྐོར་ལ། མཆན།༽ བཅས་ལ། ན་མསྶ་མནྟ་བཛྲ་ཎཱཾ། ༀ་ཏ་ར་ཏ་ར། ཏུ་རུ་ཏུ་རུ། མ་ཌ་མ་ཌ། བྷནྡྷ་བྷནྡྷ། སརྦ་ཏྲ་ཨ་པྲ་ཏི་ཧ་ཏ། ས་སི་མེ་ས་མ་བྷནྡྷ། ཀུ་རུ་ཀུ་རུ། ཏ་ར་ཏ་ར། ས་མནྟ་བཛྲེ། ཀུ་རུ་ཨ་མ་ལེ། ཀཱ་རུ་ཎ། མ་ཡེ་ཏུ་ཏ་ཡེ། རུ་ཏ་ཡེ། བ་ར་བ་ར། ཀ་ར་ཀ་ར། སུ་མི་ས་མནྟ། བི་དྷཱནྶ་ཡ་ཛྭ་ལ་ཡ་སྭཱ་ཧཱ། ར་བའི་ཕྱོགས་ཐམས་ཅད་མེད་དཔུང་འབར་བས་ཁྱབ་སྟེ་མཚམས་བཅིངས་པར་གྱུར། དེ་ནས་བསང་ཆུ་ལག་པའི་མཐིལ་དུ་བླུག་ནས་རང་གི་སྤྱི་བོར་བསང་གཏོར་བྱས་ཏེ། ཛི་ན་ཛིཀ྄ །ཅེས་བརྗོད་པས། བདག་ཉིད་སྦྱངས་པར་གྱུར། རང་གི་སྟན་བདུད་རྩི་ཐབས་སྦྱོར་གྱི་སྔགས་རྒྱས་བསང་གཏོར་བྱས་ལ། ཀུ་ཤའི་སྟན་ལ་རྡོ་རྗེ་སྐྱིལ་ཀྲུང་གིས་འཁོད་པར་གྱུར། དུར་ཁྲོད་ཀྱི་མགལ་དུམ་ལས་བྱས་པའི་ལས་ཀྱི་རྡོ་རྗེ་རྩེ་གསུམ་པ་ཙནྡན་དམར་པོས་བསྐུས་པའམ་མེད་ན་རང་གི་ལག་གི་རྡོ་རྗེ་ལ། ༀ་དྷུ་ན་བཛྲ་ཧཱ། ཞེས་བསྔགས་ལ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདས། །བདག་གི་མཆོད་ཡོན་འདི་བཞེས་ལ། །མཆོད་པས་བདག་ལ་དགྱེས་པར་མཛོད། །ལྕགས་ཀྱུའི་ཕྱག་རྒྱ་༼བཅས་ལ་གཡས་པའི་གུང་མོའི་རྒྱབ་ཏུ་མཛུབ་མོ་སྦྱར་བ། མཆན།༽ ༀ་སུ་སིདྡྷ་ཀ་ར་ཨེ་ཧྱེ་ཧི། ཞེས་པས། ཁྲོ་བོ་ལེགས་པར་གྲུབ་བྱེད་སྤྱན་དྲངས་ལ། མཆོད་ཡོན་གྱི་ཕྱག་རྒྱ་བཅས་ལ། ༼མཐེའུ་ཆུང་དང་སྲིན་ལག་གི་ཚིག་གཉིས་མཐེ་བོང་གིས་མནན་ཏེ་གུང་མོ་བརྐྱང་བ་རྩེ་སྤྲད་པའི་ཚིག་གསུམ་པ་མཛུབ་མོས་མནན་པའོ། །མཆན།༽ ༀ་བཛྲ་ཨརྒྷཾ་པྲ་ཏཱིཙྪ་སྭཱ་ཧཱ། ཞེས་པས་མཆོད་ཡོན་དབུལ། དྲི་མཆོག་གི་ཕྱག་རྒྱ་བཅས་ལ། ༼གཡས་སྐྱབས་སྦྱིན་གྱི་མཁྲིག་མ་གཡོན་པས་བཟུང་བའོ། །མཆན།༽ ༀ་ཨཱ་ཧ་ར་ཨཱ་ཧ་ར་སརྦ་བིདྱ་དྷཱ་ར་པཱུ་ཛི་ཏེ་སྭཱ་ཧཱ། ཞེས་པས་དྲི་དང་། དེ་བཞིན་དུ་རང་རང་གི་ཕྱག་རྒྱ་བཅས་ལ། ཨཱ་ཧ་རའི་སྔགས་ཁོ་ནས། མེ་ཏོག །༼ཐལ་མོ་སྦྱར་ཏེ་མཛུབ་རྩེ་གཉིས་སྤྲད་པ་མཐེ་བོས་མནན་ལ། མཆན།༽ བདུག་སྤོས། ༼གུང་སྲིན་མཐེའུ་ཆུང་གསུམ་གཅིག་ལ་གཅིག་བརྟེན་ཅིང་མཛུབ་རྩེ་གཉིས་སྤྲད་པ་མཐེ་བོས་མནན་པའོ། །མཆན།༽ ལྷ་བཤོས་རྣམས་དང་། ༼ཐལ་མོ་ཁ་ཕྱེ་ལ་མཛུབ་མོ་གཉིས་དང་མཐེའུ་ཆུང་གཉིས་ཅུང་ཟད་བཀུག་པ། མཆན། རང་རྒྱ་དང་། གཡོན་ཁུ་ཚུར་སྟེང་དུ་གཡས་པའི་གུང་མོ་དང་མཐེ་བོང་རྩེ་སྤྲད། མཆན།༽ ཨཱ་ལོ་ཀ་ཡ་ཨཱ་ལོ་ཀ་ཡ་བིདྱ་དྷ་ར་པཱུ་ཛི་ཏེ་སྭཱ་ཧཱས་མར་མེ་རྣམས་འབུལ། ༀ་དྷུ་ན་བཛྲ་ཧཱ། ཞེས་ལན་བདུན་བཟླས་ཏེ། བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་བཞུགས་ཏེ་བདག་གིས་ལས་ཐམས་ཅད་གྲུབ་པར་མཛད་དུ་གསོལ། ཞེས་ཞུས་ཏེ་ལས་ཀྱི་རྡོ་རྗེ་དེས་མཆོད་པ་སོགས་ཀྱི་ཚེ་ལག་གཡོན་པས་བཟུང་ངོ་། །སྲུང་སྐུད་དམར་པོ་ལ་མདུད་པ་གསུམ་བོར་བའི་དབུས་སུ་བོ་དྷི་ཙི་རྡོག་གཅིག་བརྒྱུས་པ་ལ། ༀ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ནི་སརྦ་ཨརྠ་ས་དྷཱ་ནི་སྭཱ་ཧཱ། བཟླས་ཏེ་ལག་གཡས་པའི་མཁྲིག་མར་གདགས། ཛི་ན་ཛིཀ྄ །བཟླསཔ་འི་ཀུ་ཤ་སྲིན་ལག་གཡས་པར་གདགས། ༀ་བནྡྷ་སྭཱ་ཧཱས། རས་ཀྱི་ཟེའུ་ཁ་བཅིངས་པར་འགྱུར། དེ་དག་ནི་རྣལ་འབྱོར་ལ་འཇུག་པའི་བྱ་བའོ། །དེ་ནས་རྣལ་འབྱོར་དངོས་གཞི་ནི་ལུས་དྲང་པོར་བསྲང་། མགྲིན་པ་ཅུང་རྒུ། མིག་ཟམ་ཟིམ་དུ་སྣ་རྩེར་གཏད། སོ་ཡས་མས་ཅུང་ཟད་རེག །ལྕེ་རྐན་ལ་ཕྱོགས། དབུགས་དལ་བུར་དབྱུང་ཞིང་སེམས་རྩེ་གཅིག་པའི་གནད་དང་ལྡན་པས་འདི་ལྟར་བསྒོམ་པར་བྱ་སྟེ། བདག་གིས་བསྒྲལ་དཀའི་སྲིད་མཚོ་ལས། །མ་ལུས་འགྲོ་ཀུན་བསྒྲལ་བའི་ཕྱིར། །བླ་མེད་བྱང་ཆུབ་མཆོག་སེམས་བསྐྱེད། །འདི་ལྟར་སྣང་བའི་ཆོས་རྣམས་ཀུན། །ཐམས་ཅད་སེམས་ཙམ་དེའི་རང་བཞིན། །མི་དམིགས་ནམ་མཁའི་དཀྱིལ་ལྟ་བུ། །དེ་ལས་རང་སེམས་རྣལ་མ་ནི། །ཟླ་བའི་དཀྱིལ་འཁོར་ཉ་གང་བའི། །དེ་ཡི་ངང་ལས་རང་གི་སྔགས། །ༀ་མུ་ནི་མུ་ནེ་མ་ཧཱ་མུ་ནེ་ཡེ་སྭཱ་ཧཱ། ཞེས་པའི་རང་སྒྲ་གྲགས་པར་གྱུར། དེ་ལས་སྔགས་རྣམས་ཡི་གེ་ཡི། །རྣམ་པར་མཁའ་ལ་གནས་པ་དེ། །ཟླ་དཀྱིལ་སྟེང་དུ་ལེགས་བཀོད་པའི། །འོད་ཀྱིས་འཕགས་མཆོད་འགྲོ་དོན་བྱས། །ཚུར་འདུས་རང་སེམས་ཟླ་དཀྱིལ་ལ། །ཞུགས་ནས་རོ་གཅིག་གྱུར་པ་ལས། །སེང་ཁྲི་པད་ཟླའི་གདན་སྟེང་དུ། །དེ་ཉིད་བཅོམ་ལྡན་ཤཱཀྱ་ཐུབ། །བཙོ་མའི་གསེར་མདོག་མཚན་དཔེས་བརྒྱན། །ཆོས་ཀྱི་འཁོར་ལོའི་ཕྱག་རྒྱ་ཅན། །རྡོ་རྗེ་སྐྱིལ་མོ་ཀྲུང་གིས་བཞུགས། །དེ་ལྟར་བསྒོམ་ནས་སྔགས་རྒྱས་བྱིན་གྱིས་བརླབ་པ་ནི། གཙུག་ཏོར་གྱི་ཕྱག་རྒྱ་མགོར་བཞག་སྟེ།༼སོར་མོ་བརྐྱང་བའི་རྩེ་ཕན་ཚུན་སྤྲད་དེ་སྟོང་པར་བྱས་ལ། མཆན།༽ ༀ་ༀ་བཛྲ་དྷཱ་སྭཱ་ཧཱ། མཛོད་སྤུའི་ཕྱག་རྒྱ་༼སོར་མོ་ཕན་ཚུན་སྦྱར་ལ་ལག་གཉིས་བཀན་པའི་མཛུབ་རྩེ་སྦྱར་བ་ལྡོག་ནས་མཐུར་བསྟན། མཆན།༽ དཔྲལ་བར་བཞག་སྟེ། ན་མཿསརྦ་ཏ་ཐཱ་ག་ཏེ་བྷྱཿ ཨརྷ་ཏེ་བྷྱཿ སམྱཀྶཾ་བུདྡྷེ་བྷྱཿ ཧེ་ཧེ། བྷནྡྷ་བྷནྡྷ། ཏིཥྛ་ཏིཥྛ། དྷ་ར་ཡ་དྷ་ར་ཡ། ནི་རུནྡྷ་ནི་རུནྡྷ། ཨུཏ྄྅྅྅ཎ་མ་ཎི་སྭཱ་ཧཱ། ནོར་བུའི་ཕྱག་རྒྱ་བཅས་ལ། ༼ཐལ་མོ་ལས་གུང་མོ་རྡོ་རྗེའི་རྩེ་ལྟར་བྱས་ལ། མཆན།༽ ༀ་ཏེ་ཛ་ཛྭ་ལ་སརྦ་ཨརྠ་སཱ་དྷཱ་ཀ་སིདྡྷྱ་ཙིནྡྷ་མ་ཎི་རཏྣ་ཧཱུྃ། མཁར་གསིལ་གྱི་ཕྱག་རྒྱ་བཅས་ཏེ། ༼ཁུ་ཚུར་སྐྱིལ་ཀྲུང་གཡས་གཡོན་དུ་འཛིན་པ་ལྟར་བྱས་ལ། མཆན།༽ ༀ་དྷུ་ན་ཛི་ཏ་ར་ཎི་ཧཱུྃ། རྣམ་རྒྱལ་གྱི་ཕྱག་རྒྱ་དང་། ༼ཐལ་མོ་སྦྱར་བ་ཕན་ཚུན་དུ་མངོན་པར་ཕྱོགས་པ། མཆན།༽ ༀ་རཀྵ་རཀྵ་མཾ་སརྦ་བུདྡྷ་ཨ་དྷིཥྛི་ཏཱ་ད་མ་ཙི་བ་ར་སྭཱ་ཧཱ། ལྷུང་བཟེད་ཀྱི་ཕྱག་རྒྱ་དང་། ༼ལག་པ་ཐལ་སྦྱར་བཟེད་པ་ལྟར་བྱས་ལ། མཆན།༽ ༀ་ལོ་ཀ་པཱ་ལ་ཨ་དྷིཥྛ་ཏཱམྦ་ར་ཡ་དྷ་ར་ཡ། མ་ཧཱ་ནུ་བ་ནུ་དྷ་པཱ་ཏྲ་སྭཱ་ཧཱ། ཆོས་གོས་ཀྱི་ཕྱག་རྒྱ་དང་། ༼གཡས་མཐེ་བོང་བཏེགས་པའི་ཁུ་ཚུར་དང་གཡོན་ཆོས་གོས་འཛིན་པའོ། །མཆན།༽ ༀ་རཀྵ་ར ཀྵ་སོགས་སྔར་ལྟར། ཚེམས་མཆེ་བའི་རྒྱ་དང་། ༼སོར་མོ་ཕན་ཚུན་སྡོམ་པ་ལས་གཡོན་པའི་མཐེ་བོང་བཏེགས་པ། མཆན།༽ ན་མསྶ་མནྟ་བཛྲ་ཎཾ་ཏིཥྛ་ཧེ་ཏྲ་ཊ་ཏྲ་ཊ། མ་ཊ་མ་ཊ། ཛྭ་ལ་ནཱཾ་ཁི་ཁ་རེ། མི་འཇིགས་པའི་རྒྱ་དང་། ༼གཡས་མི་འཇིགས་པའི་རྒྱ་དང་གཡོན་ཆོས་གོས་འཛིན་པ། མཆན།༽ ན་མཿསརྦ་ཏ་ཐཱ་ག་ཏེ་བྷྱཿ སརྦ་མུ་ཁེ་བྷྱ། སརྦ་ཐཱ་ཨ་བི་ཤ་ར་ད་བཛྲ་མརྒ་ནིཪྡཪྴ་ཀ་སྭཱ་ཧཱ། བྱམས་པའི་ཕྱག་རྒྱ་དང་། ན་མཿསརྦ་ཏ་ཐཱ་ག་ཏེ་བྷྱཿ སརྦ་མུ་ཁེ་བྷྱཿ སརྦ་ཐཱ་མཻཏྱུ་ར་ག་ཏ། སརྦ་ས་ཏྭ་ཧི་ཏཾ་ཀཱ་ར་སྭཱ་ཧཱ། ཆོས་ཀྱི་འཁོར་ལོའི་ཕྱག་རྒྱ་དང་། ༼སོར་མོ་ཕན་ཚུན་བསྡུས་ནས་ཁུ་ཚུར་བྱས་པ་གུང་མོ་སྒྲེང་བའི་ཚིག་གསུམ་པར་མཛུབ་རྩེ་བཀུག་ནས་སྦྱར་བ། མཆན།༽ ༀ་ཚིནྡྷ་ཚིནྡྷ་ཧ་ན་ཧ་ན། ཙཀྲ་དཱིཔྟ་ཧཱུྃ། གནས་པའི་ཕྱག་རྒྱ་སྐེད་པར་བཞག །༼གཡས་པའི་སོར་མོ་གསུམ་རྡོ་རྗེ་ལྟར་བྱས་ལ། མཆན།༽ པས་ཀྱང་བརླབ། དེ་ནས། ༀ་སརྦ་ཏ་ཐཱ་ག་ཏ་ཨུདྦྷ་ཝ་ཡ་སྭཱ་ཧཱ། ཞེས་དེ་བཞིན་གཤེགས་རིགས་ཀྱི་སྔགས་དང་ཕྱག་རྒྱས། ༼ཐལ་མོ་བཀན་པ་ལས་མཛུབ་རྩེ་གཉིས་ཅུང་ཟད་བཀུག་པ། མཆན།༽ སྙིང་མགྲིན་སྨིན་མཚམས་དཔུང་མགོ་གཉིས་ཏེ་ལྔར་གཏུགས། དེ་ལྟར་སྐུའི་ཆ་ཤས་རྣམས་སུ་སྔགས་རྒྱས་རེག་པས་དེ་དང་དེར་ལྡན་པས་བྱིན་གྱིས་བརླབས་པར་གྱུར། དེ་ནས་ཕྱག་རྒྱ་བཅས་ཏེ། ༼ཐལ་མོ་བཀན་པ་ལས་མཐེའུ་ཆུང་གཉིས་བསྣོལ་བའི་བར་དུ་སྲིན་ལག་གཉིས་བཀུག་ནས་གུང་མོ་གཤིབས་ཏེ་བསྒྲེང་བའི་ཚིགས་གསུམ་པར་མཛུབ་རྩེ་བཀུག་ལ་མཐེ་བོང་གཉིས་སྦྱར་བ་དེ་ཉིད་ལས་མཛུབ་རྩེ་གཉིས་བཀྱེད་དེ་རྡོ་རྗེའི་ཚུལ་དུ་བྱས་པ། མཆན།༽ ༀ་བཛྲ་ཨགྣེ་པྲ་དཱི་པ་ཏ་ཡེ་སྭཱ་ཧཱ། རྡོ་རྗེའི་གོ་ཆ་གྱོན་པར་གྱུར། ཡང་གོ་ཆའི་ཕྱག་རྒྱ་དང་། ན་མོ་རཏྣ་ཏྲ་ཡཱ་ཡ། ༀ་ཧཱུྃ་ཝ་ཀཱི་ལི་ཧཱུྃ་ཕཊ། ཅེས་པའི་སྔགས་རྒྱས་མགོ་དང་དཔུང་པ་གཉིས་སྙིང་མགྲིན་རྣམས་སུ་རེག་པས། གོ་གྱོན་པར་གྱུར། འདི་ལྟར་གནས་སྐབས་ཐམས་ཅད་དུ། །ཡེངས་པ་མེད་པའི་ཏིང་འཛིན་གྱིས། །ལྷ་ཡི་འདུ་ཤེས་འབྲལ་མི་བྱ། །འདི་ནི་མཚན་མའི་ལྷ་རུ་གྲགས། །དེ་དག་ནི་བདག་བསྐྱེད་ཀྱི་རྣལ་འབྱོར་རོ། །དེ་ནས་མདུན་གྱི་ལྷ་སྤྱན་དྲངས་པའི་རྣལ་འབྱོར་ནི། རྟེན་ལ་དམིགས་ཏེ། མདུན་དུ་རིན་ཆེན་དུ་མ་ལས། །ལེགས་གྲུབ་གསེར་ཕྱེ་བརྡལ་བའི་གཞི། །ༀ་ཙ་ལ་བཱི་ར་ཧཱུྃ་སྭཱ་ཧཱ། དེ་སྟེང་སྐྱོན་བྲལ་འོ་མའི་མཚོ། །པདྨ་ཨུཏྤལ་ཆུ་བྱས་བརྒྱན། །ༀ་བི་མ་ལ་དྷཱ་ཧཱ་ཧཱུྃ། དེ་དབུས་རིན་ཆེན་རི་རབ་སྟེང་། །སྣ་ཚོགས་པདྨ་ལ་གནས་པའི། །མཚན་ཉིད་ཀུན་རྫོགས་གཞལ་མེད་ཁང་། །གྲུ་བཞི་སྒོ་ལྡན་རྟ་བབས་མཛེས། །སྟེང་ཐོག་ཕྱུར་བུ་མཆོད་རྟེན་དབྱིབས། །ཕྱི་རོལ་རྡོ་རྗེ་ཕྲེང་བས་བསྐོར། །ལྟེ་བར་པདྨའི་སྡོང་པོ་ནི། །རིན་ཆེན་སྣ་ཚོགས་འདབ་མ་དང་། །གསེར་དང་སྦུར་ལོང་ཟེའུ་འབྲུས་མཛེས། །དེ་ལས་འཁོར་གྱི་གནས་སུ་འོང་། །གདན་གྱི་པདྨ་དེ་ཉིད་གྱུར། །དེ་ནས་ན་མཿསརྦ་ཏ་ཐཱ་ག་ཏ་ནཱཾ་སརྦ་ཐཱ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱའི་སྔགས་རྒྱས་༼ཐལ་མོ་ཕན་ཚུན་བསྣོལ་ཏེ་མཐེ་བོང་གཡས་པས་གཡོན་པ་མནན། མཆན།༽ སྟེང་ནས་བླ་བྲེ་ལ་སོགས་པས་བརྒྱན་པར་གྱུར། ལྷ་སྤྱན་དྲངས་པའི་ཕྱིར་ཟངས་སོགས་ཀྱི་སྣོད་དུ། ཁྱད་པར་གྱི་རྫས་༼ནས་འོ་མ་མེ་ཏོག་དཀར་པོ་ཏིལ་ཀུ་ཤ་འབྲས་ཡོས་དྲི་བཟང་། མཆན།༽ དང་ཆུ་གཙང་སྦྱར་བའི་མཆོད་ཡོན་བཟེད་ཞལ་དང་བཅས་པ་བཤམས་ནས། སྤོས་ཀྱིས་བདུག་སྟེ། ༀ་ཏྲཾ་བནྡྷ་སྭཱ་ཧཱ། ཞེས་བདུན་གྱིས་བསྔགས། ལྷའི་སྐུ་གཟུགས་ལ་ཁ་བལྟས་ཏེ་སྤྱན་དྲངས་པའི་ཕྱག་རྒྱས་༼སོར་མོ་ཕན་ཚུན་བསྣོལ་ནས་ཐལ་མོ་བཀན་ལ་མཛུབ་མོ་གཉིས་གཤིབས་ཏེ་བསྒྲེང་མཐེ་བོང་གཉིས་གཡོབ་པ། མཆན།༽ མཆོད་ཡོན་བླངས་ལ་སྦྲེང་ཞིང་། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདིར། །བདག་གི་མཆོད་ཡོན་འདི་བཞེས་ལ། །མཆོད་པས་བདག་ལ་དགྱེས་པར་མཛོད། །ༀ་ཛི་ན་ཛིཀ྄་ཨརྒྷཾ་པྲ་ཏཱིཙྪ་སྭཱ་ཧཱ། ཞེས་སྤྱན་དྲངས་ནས་མཆོད་ཡོན་སྤྱི་བོའི་ཐད་དུ་དབུལ་ལོ། །རྡོ་རྗེའི་འདུག་སྟངས་ཀྱི་ཕྱག་རྒྱ་༼ཐལ་མོ་སྦྱར་བ་ཁ་ཕྱེ་བ་ལས་སོར་མོ་གསུམ་རྡོ་རྗེ་ལྟར་བྱས་ལ། མཆན།༽ བཅས་ལ། ༀ་བཛྲ་ཨཱ་ས་ན་ཧཱུཾ་ཕཊ། ཅེས་གདན་ཕུལ་བས། གཞལ་ཡས་ཁང་དབུས་པད་ཟླ་ལ། །ཤཱཀ་ཐུབ་གསེར་མདོག་ཆོས་འཁོར་ཕྱག །སོགས། གཡས་ལོགས་པདྨར་སྤྱན་རས་གཟིགས། །དུང་མདོག་རྔ་ཡབ་པད་དཀར་འཛིན། །གཡོན་ལོགས་པདྨར་གསང་བདག་སྔོ། །རྔ་ཡབ་ཨུཏྤལ་རྡོ་རྗེས་མཚན། །གསུམ་ཀ་ནུབ་ཏུ་ཞལ་གཟིགས་པའི། །དེ་དག་མདུན་ཕྱོགས་ཤར་བསྟན་གྱི། །མཁའ་ལྡིང་གདན་ལ་ཁྱབ་འཇུག་ནག །ལག་བཞི་གཡས་གཉིས་འཁོར་ལོ་དུང་། །གཡོན་གཉིས་བེ་ཅོན་རལ་གྲི་ཐོགས། །དེ་ཡི་གཡོན་ཕྱོགས་དྲག་པོ་དཀར། །མགྲིན་སྔོན་གཡས་པ་མདུང་རྩེ་གསུམ། །གཡོན་པ་རལ་གྲི་ཁྱུ་མཆོག་ཞོན། །དེ་ཡི་གཡོན་དུ་ཚོགས་བདག་སྔོ། །གཡས་པ་རྡོ་རྗེ་གཡོན་སྡིགས་མཛུབ། །མདུན་ཕྱིར་སྒུར་ཞིང་དགྱེས་པའི་ཚུལ། །དེ་ནས་དམ་ལ་བཞག་པ་ནི། ཤངྐ་རེ་ས་མ་ཡ་སྭཱ་ཧཱའི་སྔགས་རྒྱས་གཙོ་བོ་དང་། ༼ལག་གཡས་པའི་མཐེ་བོས་མཐེའུ་ཆུང་གི་སེན་མོ་མནན་སོར་མོ་ལྷག་མ་རྣམས་རྡོ་རྗེ་ལྟར་བྱས་ལ། མཆན།༽ འཁོར་རྣམས་ཐུན་མོང་དུ། ཛི་ན་ཛིཀ྄་གི་སྔགས་རྒྱས་དམ་ལ་བཞག་གོ། །༼ལག་གཉིས་ཕན་ཚུན་ཁུ་ཚུར་བཅིངས་ནས་མཐེ་བོང་བསྟན། མཆན།༽ དེ་ནས་དམ་ཚིག་ཆེན་པོའི་ཕྱག་རྒྱ་བཅིངས་ཏེ་བསྐོར་བས། ༼སོར་མོ་ཕན་ཚུན་སྦྱར་ཏེ་ཁུ་ཚུར་བཅིངས་ལ་གུང་མོ་གཤིབས་པའི་ཕྱི་རོལ་དུ་མཛུབ་མོ་རྡོ་རྗེ་ལྟར་བྱས་ནས་མཐེ་བོང་གཉིས་གློར་སྦྱར་བ། མཆན།༽ སྔར་གནས་པ་དང་ཕྱིར་འབྲང་པའི་བགེགས་ལ་སོགས་པ་ཐམས་ཅད་སྲུང་བར་གྱུར། དེ་ནས་ཚོགས་བསགས་པའི་ཕྱིར་སྔར་བྱིན་གྱིས་བརླབས་པའི་མཆོད་པ་རྣམས་དབུལ་ཏེ། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་ནི། །རྒྱལ་བ་སྲས་དང་བཅས་ལ་འབུལ། །ༀ་ཛི་ན་ཛིཀ྄་ཨརྒྷཾ་པྲ་ཏཱིཙྪ་སྭཱ་ཧཱའི་སྔགས་རྒྱས་མཆོད་ཡོན་དང་། ཇི་ལྟར་བལྟམས་པ་ཙམ་གྱིས་ནི། །ཞེས་པའི་མཐར། ༀ་སརྦ་དེ་ཝ་ཏ་ཨ་ཙིནྟ་ཨ་མྲྀ་ཏ་སྭཱ་ཧཱའི་སྔགས་ཀྱི་དྲི་ཆུས་ཁྲུས་གསོལ། གོས་རྒྱན་རྣམས། དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །གོས་བཟང་སྲབ་ལ་འཇམ་པ་སྣ་ཚོགས་དང་། །རྒྱན་མཆོག་བརྒྱ་ཕྲག་དག་ཀྱང་དབུལ་བར་བགྱི། །ཞེས་པས་དབུལ། དེ་ནས་ཉེར་སྤྱོད་རྣམས། རབ་འབྱམས་རྒྱ་མཚོ་དཔག་མེད་ན། །ཞེས་པའི་མཆོད་ཡོན་གྱི་དོད་དུ། དྲི་མཆོག་དང་། མེ་ཏོག །བདུག་སྤོས། ཞལ་ཟས་ཇི་སྙེད་ཡོད་པ་དང་། །ཞེས་སྦྱར་ལ། སོ་སོའི་ཕྱག་རྒྱ་བཅས་ཏེ། ༀ་ཨཱ་ཧ་ར་ཨཱ་ཧ་ར་སརྦ་བིདྱཱ་དྷཱ་ར་པཱུ་ཛི་ཏེ་སྭཱ་ཧཱའི་སྔགས་ཁོ་ན་དྲི་མཆོག་སོགས་བཞི་པོ་འབུལ། ཡང་སྣང་གསལ་ཇི་སྙེད་ཞེས་བསྒྱུར་ཏེ། ཨཱ་ལོ་ཀ་ཡ་ཨཱ་ལོ་ཀ་ཡ་བིདྱཱ་དྷཱ་ར་པཱུ་ཛི་ཏེ་སྭཱ་ཧཱའི་སྔགས་རྒྱས་མར་མེ། དེ་ལས་གཞན་ཡང་སོགས་ཀྱི་མཐར་རོལ་མོ་དཀྲོལ་བཞིན་དུ། ༀ་བཛྲ་ཤཔྡ་པྲ་ཏཱིཙྪ་སྭཱ་ཧཱས་མཆོད། དེ་ནས་བསྟོད་པ་ནི། མགོན་པོ་ཐུགས་རྗེ་ཆེ་ལྡན་པ། །ཞེས་སོགས་ཀྱིས་བསྟོད་པའི་མཐར། བསྟོད་པར་འོས་པ་ཐམས་ཅད་ལ། །ཞེས་སོགས། ན་མཿསརྦ་བུདྡྷ་བི་དྷི་སཏྭ་ནཱཾ། སརྦ་ཏྲ་སཾ་ཀུ་རུ་མི་ཏ་ཨ་བྷི་ཛྙཱ་ར་ཤི་ནི་ན་མོ་སྟུ་ཏེ་སྭཱ་ཧཱ། ཞེས་བཟླས། དེ་ནས་ཐལ་མོ་སྦྱར་ཏེ། སྲས་བཅས་སངས་རྒྱས་ཐམས་ཅད་ཀུན། །དེང་འདིར་བདག་ལ་དགོངས་སུ་གསོལ། །ཐོག་མ་མེད་ནས་ད་ལྟའི་བར། །མི་དགེ་བཅུ་དང་མཚམས་མེད་ལྔ། །སེམས་ནི་ཉོན་མོངས་དབང་གྱུར་པས། །སྡིག་པ་ཐམས་ཅད་བཤགས་པར་བགྱི། །སངས་རྒྱས་ཆོས་དང་དགེ་འདུན་ལ། །རྟག་པར་བདག་ནི་སྐྱབས་སུ་མཆི། །ཆོས་ཀྱི་འཁོར་ལོ་བསྐོར་བ་དང་། །མྱ་ངན་མི་འདར་གསོལ་བ་འདེབས། །བདག་གཞན་གཉིས་མེད་རབ་སྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །ཅེས་ལན་གསུམ། དེ་ནས་བཟླས་པ་བྱ་བ་ནི། སངས་རྒྱས་བྱང་ཆུབ་སེམས་དཔའ་དང་། །རྡོ་རྗེ་འཛིན་པ་ཐམས་ཅད་ལ། །ཕྱག་འཚལ་འགྲོ་ལ་ཕན་མཛད་པའི། །བཞུགས་ནས་བྱིན་གྱིས་བརླབ་ཏུ་གསོལ། །སྭཱ་ཧཱ། ཞེས་བརྗོད་ནས། བོ་དྷི་ཙིཏྟའི་ཕྲེང་བ་བླངས་ལ་སྙིམ་པར་བཅུག་སྟེ། ན་མོ་རཏྣ་ཏྲ་ཡཱ་ཡ། ༀ་ཨརྦྷུ་ཏེ་བི་ཛ་ཡ་སིདྡྷི་སིདྡྷི་རྠེ་སྭཱ་ཧཱ། ཞེས་བཟླས་པས་ཕྲེང་བ་བསྒྲུབ། ཡང་། ༀ་རུ་ཙི་ར་མ་ཎི་པྲ་བ་རྟ་ན་ཡེ་སྭཱ་ཧཱ། ཞེས་བདུན་བཟླས་ལ། བདག་དང་མདུན་གྱི་ལྷ་གསལ་བའི། །གཉིས་ཀའི་སྙིང་གར་ཟླ་དཀྱིལ་ལ། །བཟླ་བྱའི་སྔགས་ཀྱི་ཡི་གེ་རྣམས། །བཀོད་དེ་མངོན་སུམ་ལྟ་བུར་གྱུར། །ཞེས་བསམ་སྟེ། ཕྲེང་བ་བཟུང་བའི་རྒྱས་༼གུང་མོ་མཐེའུ་ཆུང་བརྐྱང་མཛུབ་མོ་གུང་མོའི་རྒྱབ་ཏུ་བཀུག །སྲིན་ལག་དང་མཐེ་བོང་གིས་ཕྲེང་བ་བགྲང་། མཆན།༽ སྙིང་ཁར་བཟུང་ནས། ༀ་མུ་ནེ་མུ་ནེ་མ་ཧཱ་མུ་ནེ་ཤཱཀྱ་མུ་ནེ་སྭཱ་ཧཱ། ཞེས་སྙིང་པོ་དང་། ཕྲེང་བ་འཛིན་པའི་རྒྱ་༼ཐལ་མོ་སྦྱར་བ་ལས་མཛུབ་མོ་གཉིས་བཀུག་སྟེ་མཐེ་བོང་གཉིས་དང་སྦྱར་བ་གཙུག་ཏོར་གྱི་རྒྱས་ཕྲེང་བ་བགྲང་ཞིང་། མཆན།༽ བསྒྱུར་ཏེ། གཟུངས་རིང་བཟླ་བ་ནི། ན་མཿསཔྟཱ་ནཱཾ། སམྱཀྶཾ་བུདྡྷ་ཀོ་ཊཱི་ནཱཾ། པ་རི་ཤུདྡྷེ་མ་ན་སི། ཨ་བྷྱ་ཙི་ཏ་པྲ་ཏིཥྛ་ཏ་ནཱཾ། ན་མོ་བྷ་ག་ཝ་ཏེ། ཨ་མྲྀ་ཏ་ཨཱ་ཡུཪྵ་སྱ། ཏ་ཐཱ་ག་ཏ་སྱ། ༀ་སརྦ་ཏ་ཐཱ་ག་ཏ་ཤུདྡྷེ། ཨཱ་ཡུར་བི་ཤོ་དྷ་ནི། སཾ་ཧ་ར་སཾ་ཧ་ར། སརྦ་ཏ་ཐཱ་ག་ཏ་བིརྻ་བ་ལེ་ན་པྲ་ཏི་སཾ་ཧ་ར་ཨཱ་ཡུཿ སཱ་ར་སཱ་ར། སརྦ་ཏ་ཐཱ་ག་ཏ་ས་མ་ཡ། བོ་དྷི་བོ་དྷི། བུདྡྷྱ་བུདྡྷྱ། བོ་དྷ་ཡ་བོ་དྷ་ཡ། མ་མ་སརྦ་པཱ་པཾ་ཨཱ་ཝ་ར་ཎ་བི་ཤུདྡྷེ། བི་ག་ཏ་མ་ལཾ། ཚ་ར་སུ་བུདྡྷེ་བུདྡྷེ། ཧུ་རུ་ཧུ་རུ་སྭཱ་ཧཱ། ཞེས་དང་། སྙིང་པོ་ནི། ༀ་སརྦ་ཏ་ཐཱ་ག་ཏ་མ་ལ་བི་ཤོ་དྷ་ནི། རུ་དྷ་བ་ལེ་པྲ་ཏི་སཾསྐཱ་ར། ཏ་ཐཱ་ག་ཏ་དྷ་ཏུ་དྷ་རེ། དྷ་ར་དྷ་ར། སནྡྷ་ར་སནྡྷ་ར། སརྦ་ཏ་ཐཱ་ག་ཏ་ཨ་དྷིཥྛ་ན་ཨ་དྷིཥྛི་ཏེ་སྭཱ་ཧཱ། ཞེས་པ་རྣམས་སྒྲ་དང་བཅས། ཤུབ་བུ་དང་། ཡིད་བཟླས་སོགས་རིམ་པ་བཞིན་བྱས་ཏེ་ཇི་སྲིད་མི་སྐྱོའི་བར་བཟླས་ལ། ཐུན་འཇོག་ཁར་། ལྷ་ལ་དང་བའི་མིག་བལྟ་ཞིང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་བྱས་ནས། དེ་ནས་བུམ་པའི་ཕྱག་རྒྱ་བཅས་ལ་༼གཡས་གཡོན་སྲིན་རྒྱབ་གུང་མོ་བཞག །གཡས་གཡོན་མཛུབ་མོས་གུང་སྲིན་དཀྲི། །མཐེའུ་ཆུང་གཉིས་པོ་གཤིབས་ཏེ་བསྒྲེངས། །མཐེ་བོང་མཛུབ་ཚིག་གསུམ་པར་བཞག །མཆན།༽ བདག་གི་བཟླས་བརྗོད་ཀྱི་དགེ་བའི་རྩ་བ་འདི་མཆོག་ཐུན་མོང་གི་དངོས་གྲུབ་ཀྱི་དོན་དུ་བཅོམ་ལྡན་འདས་ལ་འབུལ་ལོ། །མགོན་པོ་ཁྱོད་ཀྱི་མཆོག་ཐུན་མོང་གི་དངོས་གྲུབ་སྩལ་དུ་གསོལ། ཞེས་དགེ་བ་ཕུལ་ཏེ་ཕྲེང་བའང་གཙོ་བོའི་དྲུང་དུ་ཕུལ་ལ་གཏང་རག་གི་མཆོད་བསྟོད་བྱས་ཏེ། མ་རྙེད་ཡོངས་སུ་མ་ཚང་དང་། །སོགས་ཀྱིས་བཟོད་པར་གསོལ། ༀ་ཛི་ན་ཛིཀ྄་ཨརྒྷཾ་པྲ་ཏཱིཙྪ་སྭཱ་ཧཱའི་སྔགས་རྒྱས་༼མཆོད་ཡོན་ཕུལ་ལ་གཤེགས་སུ་གསོལ་བའི་ཕྱག་རྒྱ་སྤྱན་འདྲེན་པའི་ཕྱག་རྒྱ་ལས་མཐེ་བོང་གཉིས་ཕྱིར་བསྐྱེད་པ། མཆན། ༽བཅས་ཏེ། ཁྱེད་ཀྱིས་སེམས་ཅན་དོན་ཀུན་མཛད། །སོགས་ཀྱི་མཐར། ༀ་ཛི་ན་ཛིཀ྄་གཙྪ། ཞེས་རྒྱ་གྱེན་དུ་དཀྲོལ་བས། སྤྱན་དྲངས་པའི་ལྷ་གཞལ་ཡས་ཁང་དང་བཅས་པ། སྔགས་ཀྱིས་སྤྲུལ་པའི་ལྷ་དམ་ཚིག་པ་རྣམས་རིམ་གྱིས་བདག་ལ་ཐིམ། བདག་གི་ལྷའི་སྐུ་གཟུགས་ཟླ་བའི་སྟེང་གི་ཡི་གེ་ལ་ཐིམ། དེ་ཟླ་བ་ལ། དེ་རྣམ་སྨིན་གྱི་ལུས་ལ་ཐིམ་པར་གྱུར། ༀ་ཧུ་ལུ་ཧུ་ལུ་ཙཎྜ་ལི་མ་ཏཾ་གི་སྭཱ་ཧཱ། ཞེས་པའི་སྔགས་རྒྱས། ༼ལག་གཡོན་བཀན་པའི་སྟེང་དུ་གཡས་པའི་ཐལ་མོ་བཞག་སྟེ་སོར་མོ་བསྣོལ་བའི་རྩེ་དྲུང་བར་སྦྱར་ཏེ་ཐད་ཀར་བཞག་པ་གཡོན་ཕྱོགས་ནས་བསྐོར་ཞིང་། མཆན།༽ ར་བ་དང་དྲྭ་བ་སོགས་ཕྱོགས་མཚམས་བཅིངས་པ་རྣམས་བཀྲོལ་བར་གྱུར། དེ་ནས་གླེགས་བམ་བཀླག་པ་སོགས་སྤྱོད་ལམ་གྱི་རྣལ་འབྱོར་སྤྱི་ལྟར་བྱའོ། །བསྙེན་པའི་ཆོ་ག་བཤད་གྲུབ་བོ། ༈ །ན་མོ་གུ་རུ་བུདྡྷ་བོ་དྷི་ས་ཏྭ་བྷྱཿ དེ་ལྟར་བསྙེན་པ་སྔོན་དུ་སོང་ནས། མཆོད་རྟེན་གྱི་རྨང་གཞི་འདིང་བའི་འོད་ཟེར་དྲི་མེད་ཀྱི་སྒོ་ནས་སའི་ཆོ་ག་བྱ་བ་ནི། རྟེན་སྤྱན་དྲངས་པའི་མདུན་དུ་མཆོད་པ་བཤམ། སློབ་དཔོན་གྱི་མདུན་དུའང་མཆོད་པ་བཞི་དང་། བསང་ཆུ་འཐོར་ཡབ་དང་བཅས་པ། བ་བྱུང་། དྲི་བཟང་། རྡོ་དྲིལ་ལ་སོགས་པ་བཤམས་ལ། སྔ་དྲོ་ཐོག་མར་གསོ་སྦྱོང་བླང་བ་ནི། པུས་མོ་བཙུགས་ཤིང་ཐལ་མོ་སྦྱར་ཏེ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྟ་ཅང་ཤེས་ལྟ་བུ། གླང་པོ་ཆེན་པོ། བྱ་བ་བྱས་ཤིང་བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པ་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་བཀའ། ལེགས་པར་རྣམ་པར་གྲོལ་བའི་ཐུགས་ལེགས་པར་རྣམ་པར་གྲོལ་བའི་ཤེས་རབ་ཅན་དེ་དག་གིས། སེམས་ཅན་ཐམས་ཅད་ཀྱི་དོན་གྱི་ཕྱིར་དང་། ཕན་པར་བྱ་བའི་ཕྱིར་དང་། གྲོལ་བར་བྱ་བའི་ཕྱིར་དང་། ནད་མེད་པར་བྱ་བའི་ཕྱིར་དང་། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱ་བའི་ཕྱིར་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱ་བའི་ཕྱིར་དུ་གསོ་སྦྱོར་ངེས་པར་མཛད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་སངས་ཉི་མ་མ་ཤར་གྱི་བར་དུ་གསོ་སྦྱོང་ངེས་པར་བླང་བར་བྱའོ། །དེང་ནས་སྲོག་གཅོད་མི་བྱ་ཞིང་། །གཞན་གྱི་ནོར་ཡང་བླང་མི་བྱ། །འཁྲིག་པའི་ཆོས་ཀྱང་མི་སྤྱོད་ཅིང་། །རྫུན་གྱི་ཚིག་ཀྱང་མི་སྨྲའོ། །སྐྱོན་ནི་མང་པོ་ཉེར་བརྟེན་པའི། །ཆང་ནི་ཡོངས་སུ་སྤང་བར་བྱ། །ཁྲི་སྟན་ཆེ་མཐོ་མི་བྱ་ཞིང་། །དེ་བཞིན་དུས་མ་ཡིན་པའི་ཟས། །དྲི་དང་ཕྲེང་བ་དང་ནི་རྒྱན། །གར་དང་གླུ་སོགས་སྤང་བར་བྱ། །ཇི་ལྟར་དགྲ་བཅོམ་རྟག་ཏུ་ནི། །སྲོག་གཅོད་ལ་སོགས་མི་བྱེད་པ། །དེ་ལྟར་སྲོག་གཅོད་ལ་སོགས་སྤང་། །བླ་མེད་བྱང་ཆུབ་ཐོབ་པར་ཤོག །སྡུག་བསྔལ་མང་འཁྲུགས་སེམས་ཅན་རྣམས། །སྲིད་པའི་མཚོ་ལས་སྒྲོལ་བར་ཤོག །ཅེས་ལན་གསུམ་དང་། ༀ་ཨ་མོ་གྷ་ཤཱི་ལ། སམྦྷ་ར་སམྦྷ་ར། བྷ་ར་བྷ་ར། མ་ཧཱ་ཤུདྡྷ་སཏྭ་པདྨ་བི་བྷུ་ཥི་ཏ་བྷུ་ཛ། དྷ་ར་དྷ་ར། ས་མནྟ། ཨ་བ་ལོ་ཀི་ཧཱུྃ་ཕཊ་སྭཱ་ཧཱ། ཞེས་ཉེར་གཅིག་བཟླ། དེ་ནས་གཞི་བགེགས་ལ་གཏོར་མ་བཏང་ལ་ས་ཆོག་གི་བདག་གནས་བསྲུང་བའི་ཕྱིར། ཁྲོ་བོ་མནོལ་བ་མེད་པའི་སྔགས་རྒྱས་བདག་བསྲུང་བ་ནས། ཛི་ན་ཛིཀ྄ །ཅེས་བརྗོད་པས། བདག་ཉིད་སྦྱང་བར་གྱུར། ཞེས་པའི་བར་བསྙེན་པའི་སྐབས་ལྟར་བླང་ལ། དེ་ནས། ༀ་ཏྲཾ་བནྡྷ་སྭཱ་ཧཱ། ཞེས་པའི་སྔགས་བཟླ་ཞིང་ས་གཞི་ཁྲུ་དོ་ཙམ་བརྐོས་ལ། རྡོ་བ། སོལ་བ། རུས་པ། སྐྲ་ཤད། སྲོགས་ཆགས་ལ་སོགས་པའི་སྐྱོན་རྣམས་བསལ་ལ། དྲི་བཟང་གིས་སྦྲུས་པའི་ལས་མཐུན་གྱིས་ས་དགང་བ་ལ་སྔགས་བཟླས་པའི་སྤོས་ཆུས་གདབ་ཅིང་འཐས་པར་བཅག་སྟེ་ངོས་མཉམ་ནས་བའི་གཅི་བ་ས་ལ་མ་ལྷུང་བ་གཅིན་དང་འདྲེས་པས་བྱང་ཤར་ནས་ཁྱབ་པར་བྱུག །དེའི་དབུས་སུ་ཁུང་བུ་བརྐོས་ཏེ། ༀ་ཏྲཾ་བནྡྷ་སྭཱ་ཧཱ་དང་། ན་མོ་རཏྣ་ཏྲ་ཡཱ་ཡ། ན་མཥྩཎྜ་བཛྲ་པཱ་ཎ་ཡ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷ་ཡ། ཏདྱ་ཐཱ། ༀ་ཧུ་ལུ་ཧུ་ལུ། ཏིཥྛ་ཏིཥྛ། བྷནྡྷ་བྷནྡྷ། ཧ་ན་ཧ་ན། ཨ་མྲྀ་ཏེ་ཧཱུྃ་ཕཊ། ཅེས་པའི་སྔགས་གཉིས་བཟླ་ཞིང་འབྲུ་སྨན་རིན་པོ་ཆེ་ལ་སོགས་པའི་གཏེར་བཅུག་སྟེ་མཉམ་ནས། ༀ་ཀཱི་ལི་ཀཱི་ལ་བཛྲི་བཛྲི་བྷུ་ར་བནྡྷ་ཧཱུྃ་ཕཊ། ཅེས་པའི་སྔགས་བཟླ་ཞིང་ལག་པ་གཡོན་པས་ས་ལ་རེག །གཡས་པས་བ་བྱུང་ལྔ་ལ་སྔགས་དེ་ཉིད་བཟླས་པའི་བསང་གཏོར་བྱ་ཞིང་། ཁྱད་པར། ༀ་ཛ་ཡོཥྞི་ཥ། ཛྭ་ལ་ཛྭ་ལ། བནྡྷ་བནྡྷ། ད་མ་ད་མ། ཧཱུྃ་ཧཱུྃ་ཧཱུྃ། ཧོ་ཧ་ན་ཧཱུྃ། ཞེས་བཟླས་ཏེ་སྔར་ལྟར་བསང་གཏོར་བྱ། དེ་ནས་རང་ཉིད་སའི་དབུས་སུ་འདུག་སྟེ། རང་གི་སྟན་བདུད་རྩི་ཐབས་སྦྱོར་གྱིས་བསང་གཏོར་བྱས་ལ། ཞེས་བསྙེན་པའི་སྐབས་ཀྱིི་སྔར་གྱི་འཕྲོ་ནས་བླང་ལ། ཇི་སྲིད་བཟླས་པའི་བར་དཀྱུས་ལྟར་བྱས་ཏེ། ལས་སྔགས་གཉིས་ཀྱིས་བསང་གཏོར་བྱ། དེ་ནས་སེང་ལྡེང་གི་ཕུར་བུ་སོར་བརྒྱད་པ་ལ། ༀ་ཏྲཾ་བནྡྷ་སྭཱ་ཧཱ། ཞེས་བརྒྱ་རྩ་བརྒྱད་བཟླས་ཏེ། ཕྱོགས་བཞི་མཚམས་བརྒྱད་དུ། ན་མཿས་མནྟ་བཛྲ་ཨ་ཀོ་ཊ་ཡ་ས་མེ་མ་ཧཱ་ཙནྟྲ་ལི་ཕཊ་ཕཊ་ཕཊ། སརྦ་ཏྲ་རཀྵ་ན་ཏྲ་ཊ། མ་ཊ་མ་ཊ་ཕཊ། ཅེས་བཟླ་ཞིང་རྡོ་རྗེའི་ཐོ་བས་བརྡུངས་ལ། རྡོ་རྗེ་གཏུམ་པོས་བགེགས་རྣམས་ཀྱི་སྤྱི་བོ་ནས་ཕུག་སྟེ་གསེར་གྱི་ས་གཞི་ལ་སྦྲགས་པར་གྱུར། དེ་ནས་གཏང་རག་བཟོད་གསོལ་གཤེགས་གསོལ་ལ་སོགས་མཇུག་ཆོག་རྣམས་བསྙེན་པའི་སྐབས་ལྟར་བྱའོ། །དེ་དག་ནི་རྨིང་འདིང་བ་ལ་མེད་དུ་མི་རུང་བའི་ས་ཆོག་བསྡུས་པ་ཙམ་སྟེ། རྒྱས་པར་དཀྱིལ་ཆོག་ལས་ཤེས་པར་བྱ་ཞིང་། མཆོད་རྟེན་ཐིག་གདབ་པ་དང་རྨང་འདིང་རྟེན་འབྲེལ་སོགས་གཞན་ལས་ཤེས་པར་འགྱུར་རོ། །དེ་ནས་རྨང་འདིང་སྟེ་ཇི་སྲིད་བང་རིམ་རྫོགས་པའི་བར་མཐོང་བརྒྱུད་ཀྱི་མན་ངག་ལྟར་སྨད་ཆའི་གཟུངས་རྣམས་མ་ནོར་བར་ཕུལ། དེ་ནས་བུམ་རྟེན་ནང་དུ་གཙུག་ཏོར་དྲི་མེད་ཀྱི་དཀྱིལ་འཁོར་བཞེངས་ཏེ། དེའང་བང་རིམ་བཞིའི་སྟེང་ཐོག་ལ་དྲི་བཟང་ལ་སོགས་པས་སྦྲུས་པའི་ས་འཇམ་པོའི་ཞལ་བ་ལེགས་པར་བྱས་པའི་གཞི་སྙོམས་པར་བྱས། སློབ་དཔོན་ཤར་དུ་འཁོད་པའི་མདུན་དུ་ཆུ་གཉིས་སྔོན་འགྲོའི་ཉེར་སྤྱོད་དང་། རྡོར་དྲིལ་སོགས་འདུ་བྱས་ཏེ། མཆོད་པ་རྣམས་ཨ་མྲྀ་ཏས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ༀ་ལས་རིན་པོ་ཆེའི་སྣོད་དུ་ༀ་ཡིག་ཞུ་བ་ལས་བྱུང་བའི་མཆོད་རྫས་རྣམས་ཀུན་ཏུ་བཟང་པོའི་སྤྲིན་ཕུང་ལྟར་བཟང་ཞིང་རྒྱ་ཆ ེ་བ་ནམ་མཁའི་མཐའ་ཀླས་པར་གྱུར། ༀ་སརྦ་བིདྤཱུ་ར་པཱུ་ར་སུ་རུ་སུ་ར་ཨ་བརྟ་ཡ་ཨ་བརྟ་ཡ་ཧོཿ ༀ་བཛྲ་སྥ་ར་ཎ་ཁཾ། ཞེས་པའི་སྔགས་རྒྱ་དང་། ༀ་བཛྲ་ཨརྒྷཾ་ཨཱཿཧཱུྃ། དེ་བཞིན་དུ། པཱདྱཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་ཝི་དྱ། ཤཔྡ་ཨཱཿཧཱུྃ། ཞེས་སོ་སོའི་ཕྱག་རྒྱ་དང་བཅས་པས་བྱིན་གྱིས་བརླབ། དེ་ནས། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་བར་དུ་བདག་ནི་སྐྱབས་སུ་མཆི། །བདག་གིས་བསྙེན་སྒྲུབ་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་དང་། ཁྱད་པར། རང་རྣམ་སྣང་དུ་གསལ་བའི་ཐུགས་ཀའི་ༀ་གྱི་འོད་ཟེར་གྱིས་གཙུག་ཏོར་དྲི་མ་མེད་པའི་ལྷ་ཚོགས་བླ་མ་གཙོ་བོའི་རིགས་བདག་ཏུ་བཞུགས་པ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མདུན་གྱི་ནམ་མཁར་བཛྲ་ས་མཱ་ཛཿའི་སྔགས་རྒྱས་སྤྱན་དྲངས་ཏེ། ཐལ་མོ་སྦྱར་ནས། ན་མོ་གུ་རུ་བུདྡྷ་བོ་དྷི་སཏྭ་བྷྱཿ ཞེས་པས་ཕྱག་བྱ། ཆུ་གཉིས་ཉེར་སྤྱོད་དང་བཅས་པས་མཆོད་ནས། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་གཉིས་རབ་བསྒྲུབ་ཕྱིར། །བྱང་ཆུབ་མཆོག་ཏུ་སེམས་བསྐྱེད་དོ། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གསུམ། དེ་ནས་གསོ་སྦྱོང་བླང་བ་ནི། ཕྱོགས་བཅུ་ན་བཞུགས་པའི་སོགས་ནས། སྲིད་པའི་མཚོ་ལས་སྒྲོལ་བར་ཤོག །ཅེས་པའི་བར་ལན་གསུམ་དང་། ༀ་ཨ་མོ་གྷ་ཤཱི་ལ། སམྦྷ་ར་སམྦྷ་ར། བྷ་ར་བྷ་ར། མ་ཧཱ་ཤུདྡྷ་སཏྭ་པདྨ་བི་བྷུ་ཥི་ཏ་བྷུ་ཛ། དྷ་ར་དྷ་ར། ས་མནྟ། ཨ་བ་ལོ་ཀི་ཏེ་ཧཱུཾ་ཕཊ་སྭཱ་ཧཱ། ཞེས་པ་ཉེར་གཅིག་བཟླས་མཐར། བསྡུ་རྒྱ་ཕྱིར་བསྟན་གཤེགས་པའི་ཕྱག་རྒྱ་བཅས་ཏེ། ༀ་བཛྲ་མུཿས་ཚོགས་ཞིང་རྣམས་རང་གནས་སུ་གཤེགས་པར་གྱུར། དེ་ནས། སེམས་ཅན་ཐམས་ཅད་བདེ་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །ༀ་སྭ་བྷ་ཝ ས་སྦྱང་། ཆོས་ཀུན་སྟོང་པའི་ངང་ཉིད་ལས། །པཾ་ལས་པདྨ་ཨ་ཡིག་ལས། །ཟླ་བའི་སྟེང་དུ་ༀ་དཀར་པོ། །དེ་ལས་འོད་འཕྲོས་དོན་གཉིས་བྱས། །ཚུར་འདུས་ཡོངས་སུ་གྱུར་པ་ལས། །རང་ཉིད་རྣམ་པར་སྣང་མཛད་ནི། །སྐུ་མདོག་དཀར་པོ་ཞལ་བཞི་པ། །ཕྱག་བརྒྱད་བྱང་ཆུབ་ཕྱག་རྒྱ་ཅན། །རིན་ཆེན་སྣ་ཚོགས་རྒྱན་གྱིས་བརྒྱན། །རྡོ་རྗེའི་སྐྱིལ་མོ་ཀྲུང་གིས་བཞུགས། །མདུན་དུ་སྦས་ཡུམ་རྡོ་རྗེ་དཀར། །ཉི་མ་རྣམ་སྣང་དམར་པོ་ཉི། །ཟླ་བ་རྣམ་སྣང་དཀར་པོ་ཟླ། །དེ་གཉིས་གཡས་གཡོན་བཞེངས་ཏེ་བཞུགས། །གནས་གསུམ་ༀ་ཨཱཿཧཱུྃ་གིས་མཚན། །ཧཱུྃ་ལས་འོད་འཕྲོས་རང་འདྲ་བའི། །ཡེ་ཤེས་སེམས་དཔའ་སྤྱན་དྲངས་གྱུར། །ༀ་བཛྲ་ས་མཱ་ཛཿ ཛཿཧཱུྃ་བྂ་ཧོཿ དམ་ཚིག་གཉིས་མེད་རོ་གཅིག་གྱུར། །སླར་ཡང་ཐུགས་ཀའི་འོད་ཟེར་གྱིས། །དབང་ལྷ་རིགས་ལྔ་འཁོར་དང་བཅས། །ༀ་བཛྲ་ས་མཱ་ཛཿ དེ་བཞིན་གཤེགས་པ་ཐམས་ཅད་ཀྱིས། །བདག་ལ་མངོན་པར་དབང་བསྐུར་སྩོལ། །ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ། ཞེས་གསུངས་མངོན་པར་དབང་བསྐུར་བས། སྐུ་གང་དྲི་མ་མ་ལུས་དག །ལྷག་མའི་ཆུ་ལུད་རིན་པོ་ཆེའི། །ཅོད་པན་རྒྱ་ཡིས་བཏབ་པར་གྱུར། །ༀ་སརྦ་ཏ་ཐཱ་ག་ཏ་ཨུཥྞི་ཥ་བི་མ་ལེ་ས་པ་རི་ཝཱ་ར་ཨརྒྷཾ་སོགས་ཀྱིས་མཆོད། སྣང་སྟོང་རྡོ་རྗེ་ནམ་མཁའི་དབྱིངས། །ཆོས་དབྱིངས་ཡེ་ཤེས་རྡོ་རྗེའི་སྐུ། །བྱང་ཆུབ་མཆོག་གི་ཕྱག་རྒྱ་ཅན། །ཕྱག་འཚལ་རྣམ་པར་སྣང་མཛད་ལའོ། །ཞེས་བསྟོད། བཟླས་པ་ནི། རང་གི་ཐུགས་ཀར་ཟླ་བ་ལ་ༀ་ཡིག་སྔགས་ཕྲེང་གིས་བསྐོར་བར་མོས་ལ། ན་མཿསརྦ་ཏ་ཐཱ་ག་ཏ་ནཱཾ། ༀ་མ་ཧཱ་ཙིནྟ་མ་ཎི་ཛྭ་ལ་ན་ས་ག་ར་གམྦྷི་ར། ཨཱ་ཀཪྵ་ཡ་ཨཀཪྵ་ཡ། ཨཱ་ཡུནྡྷ་ར་ཨཱ་ཡུནྡྷ་ར། སནྡྷ་ར་སནྡྷ་ར། ཀྵ་ཎ་ཀྵ་ཎ། ཀྵི་ཎི་ཀྵི་ཎི། ཀྵུ་ཎུ་ཀྵུ་ཎུ། སརྦ་ཏ་ཐཱ་ག་ཏ་མ་ཧཱ་ས་མཱ་ཡེ། ཏིཥྛ་ཏིཥྛ། མ་ཧཱ་བྷུ་བ་ན། སཱ་ག་ར། སཾ་ཤོ་དྷ་ཡ། མཱཾ་སརྦ་པ་ཏྭཱཾཤྩ། བྷ་ག་ཝ་ཏི། སརྦ་པཱ་པཾ་བི་མ་ལེ། ཛ་ཡ་ཛ་ཡ། ཛ་ཡ་ལ་བྷེ། སྥུ་ཊ་སྥུ་ཊ། སྥོ་ཊ་ཡ་སྥོ་ཊ་ཡ། བི་ག་ཏ་ཨཱ་བ་ར་ཎི། བྷ་ཡ་ཧ་ར་ཎི། ཧཱུྃ་ཧཱུྃ་ཧཱུྃ། མྲྀ་ཏྱུ་དཎྜ་དྷ་རེ། ཨ་བྷ་ཡ་པྲ་དེ། ཨུཥྞཱིཥ་བྱ་བ་ལོ་ཀི་ཏེ། ས་མནྟ་མུ་ཁེ། ས་མནྟ་བྱ་བ་ལོ་ཀི་ཏེ། མ་ཧཱ་མཱ་ཡེ། མ་ཧཱ་པཱ་ཤ་དྷ་རེ། ཨ་མོ་གྷ་བི་མ་ལེ། ཨཱ་ཀཪྵ་ཡ་ཨ་ཀཪྵ་ཡ། ཨ་ཀཌྜྷ་ཡ་ཨ་ཀཌྜྷ་ཡ། བྷ་ར་བྷ་ར། སཾ་བྷ་ར་སཾ་བྷ་ར། ཨིནྡྷྲ་ཡ་བི་ཤོ་དྷ་ནི་བྷུ་ཥི་ཏ་བྷུ་ཛ། མ་ཧཱ་མུ་དྲ་བི་ལོ་ཀི་ཏེ། ཛ་ཡ་ཛ་ཡ། སིདྡྷེ་སིདྡྷེ། བུདྡྷེ་བུདྡྷེ། བོ་དྷ་ནི་བོ་དྷ་ནི། སཾ་བྷོ་དྷ་ནི་སཾ་བྷོ་དྷ་ནི། ཤྭ་དྷ་ནི་ཤྭ་དྷ་ནི། སཾ་ཤོ་དྷ་ནི་སཾ་ཤོ་དྷ་ནི། བི་ཤོ་དྷ་ནི་བི་ཤོདྷ་ནི། ཧ་ར་ཧ་ར། མ་མ་སརྦ་པཱ་པཾ། སརྦ་ཏ་ཐཱ་ག་ཏ་ཀུ་ལ་བྷུ་ཛེ། ས་མ་ཡ་ཏིཥྛེ་པྲ་ས་རནྟུ། མ་མ་པུཎྱཻ་བི་ན་ཤྱནྟུ་པཱ་པཾ། སརྦ་ཀི ལྤ་ཥ་ཧ་རེ། མ་ཎི་བི་ཤུདྡྷེ། ཤོ་དྷ་ཡ་བི་མ་ལེ། བི་ཀ་སི་ཏ་པདྨེ། ཀ་བཱ་ཙིཏྟ་བྷུ་ཛེ། ཥཌཔཱ་྅྅྅ར་མི་ཏཱ་པ་རི་པཱུ་ར་ཎི། སརྦ་ཏ་ཐཱ་ག་ཏོཥྞི་ཥ་བི་ལོ་ཀི་ཏེ་སྭཱ་ཧཱ། སརྦ་ཏ་ཐཱ་ག་ཏ་གུ་ཧྱ་ཨ་དྷིཥྛ་ན་ཨ་དྷིཥྛི་ཏེ་སྭཱ་ཧཱ། ཨཱ་ཡུ་རྡ་དེ་སྭཱ་ཧཱ། པུཎྱཻ་ད་དེ་སྭཱ་ཧཱ། པུཎྱ་བི་ལོ་ཀི་ཏེ་སྭཱ་ཧཱ། པུཎྱ་ཨ་ཝ་ལོ་ཀི་ཏེ་སྭཱ་ཧཱ། མྲྀ་ཏྱུ་དཎྜེ་སྭཱ་ཧཱ། ཡ་མ་དཎྜེ་སྭཱ་ཧཱ། ཡ་མ་དཱུ་ཏེ་སྭཱ་ཧཱ། སཾ་ཧ་ར་ཎི་སྭཱ་ཧཱ། སཾ་བྷ་ར་ཎི་སྭཱ་ཧཱ། སནྡྷ་ར་ཎི་སྭཱ་ཧཱ། པྲ་ཏི་ས་ར་ཎི་སྭཱ་ཧཱ། ཨོ་ཛོ་ཝ་ཏི་སྭཱ་ཧཱ། ཏེ་ཛོ་བ་ཏེ་སྭཱ་ཧཱ། ཛ་ཡ་བ་ཏི་སྭཱ་ཧཱ། སརྦ་ཏ་ཐཱ་ག་ཏ་མུ་དྲ་ཨ་དྷིཥྛ་ན་ཨ་དྷིཥྛི་ཏེ་སྭཱ་ཧཱ། ཞེས་པ་ལན་གསུམ་དང་། ༀ་ན་མསྟྲཻ་ཡ་དྷྭི་ཀཱ་ནཱཾ། སརྦ་ཏ་ཐཱ་ག་ཏ་ཧྲི་ད་ཡ་གརྦྷེ་ཛྭ་ལ་ཛྭ་ལ། དྷརྨ་དྷ་ཏུ་གརྦྷེ་སཾ་བྷ་ར་མ་མ་ཨ་ཡུཿ སཾ་ཤོ་དྷ་ཡ་སཾ་ཤོ་དྷ་ཡ། མ་མ་སརྦ་པཱ་པཾ། སརྦ་ཐཱ་ག་ཏ་ས་མནྟོཥྞི་ཥ་བི་མ་ལེ་བི་ཤུདྡྷེ་ཧཱུྃ་ཧཱུྃ་ཧཱུྃ་ཧཱུྃ། ཨྂ་བྂ་སྂ་ཛ་སྭཱ་ཧཱ། ཅི་ནུས་སུ་བཟླ་བ་ནི་བདག་གི་རྣལ་འབྱོར་རོ། །དེ་ནས་ཐོག་མར་སྐྱ་ཐིག་འདེབས་པ་ནི། ཚངས་ཟུར་བཏབ་སྟེ། ལྟེ་བ་ནས་ངོས་རེར་ཆ་བཅུ་གཉིས་རེ་བགོས་པ་ལ། རྟ་བབ་སྣམ་བུ་བཅུ་གཅིག་མ། ཕྱི་རོལ་པད་ར། རྡོ་ར། འོད་ཕྲེང་། མཆོད་སྣམ་རྣམས་དང་། ལྟེ་བར་ལིང་ཚེ་དགུ་པ་སྟེ་གཞན་རྣམས་སྤྱི་ལྟར་བཏབ་ནས་ཐིག་ཚོན་ལྔ་ཕྱོགས་མ་འཁྲུལ་བར་བཀོད་ལ། བྱིན་གྱིས་བརླབ་པ་ནི། ཨ་མྲྀ་ཏས་སྦྱང་། སྟོང་པའི་ངང་ལས་ༀ་ཨཱྂ་བྂ་པྂ་ཛ་རྣམས་ཡོངས་སུ་གྱུར་པ་ལས་དེ་བཞིན་གཤེགས་པ་རིགས་ལྔའི་སྐུར་གྱུར་པའི་གནས་གསུམ་དུ་ༀ་ཨཱཿཧཱུྃ་གི་འོད་ཟེར་གྱིས་རང་འདྲའི་ཡེ་ཤེས་པ་བཛྲ་ས་མཱ་ཛཿ ཛཿཧཱུྃ་བྂ་ཧོཿས་བསྟིམས་ནས། ཞུ་བ་ལས་ཐིག་ཚོན་དུ་གྱུར། དེ་ནས་ཐིག་སྐུད་བརྐྱངས་ནས། ༀ་ཨ་ནྱོ་ནྱ་ཨ་ནུ་ག་ཏེ། སརྦ་དྷརྨཱ་པ་རསྶ་ར་ཨ་ནུ་ས་བིཥྚ། སརྦ་དྷརྨ། ཨདྱནྟ། ཨ་ནུ་པྲ་བིཥྚ། སརྦ་དྷརྨཱ་ཧཱུྃ། ཞེས་གསུམ་བཟླས་པས་བསྒྲིལ་ཏེ་བརྡོགས་ནས་སྣོད་དུ་བཞག །ཚོན་རྣམས། ༀ་བཛྲ་ཙི་ཏྲ་ས་མ་ཡ་ཧཱུྃ། ཞེས་པའི་སྔགས་རྒྱས་མཉེ། དེ་ནས། ༀ་བཛྲ་ས་མ་ཡ་སཱུ་ཏྲ་མ་ཏི་ཀྲ་མ་ཧཱུྃ། ཞེས་པས་གནམ་སའི་ཐིག་ཆེན་བརྒྱད་སྤྱི་ལྟར་བཏབ་ལ། ཐིག་སྐུད་ཀྱི་ཡེ་ཤེས་པ་བཛྲ་མུཿས་གཤེགས། དཀྱིལ་འཁོར་གྱི་ནུབ་ནས་དབུས་སུ་རྡོ་རྗེའི་ཤུགས་ཀྱིས་འཇུག་པས་ཞུགས་པར་གྱུར། ཀྲོ་དྷ་དྲིཥྚ་ཧྲཱིཿ ཞེས་པས་སྒོ་བཞིར་ནང་གི་རྩ་ཐིག་དབྱི། ཤར་ནས་རྡོ་རྗེའི་ཤུགས་ཀྱི་གོམ་པས་ཕྱིར་ཐོན་པར་མོས་ལ། ཆུ་ཚོན་གྱི་དཀྱིལ་འཁོར་དབུས་དཀར། ཤར་སྔོ། ལྷོ་སེར། ནུབ་དམར། བྱང་ལྗང་། རྩིག་པ་ནང་ནས་དཀར་ལྗང་དམར་སེར་སྔོ། ཁྱམས་ལྗང་། གཞན་སྤྱི་དང་མཐུན། ལྷ་གནས་རྣམས་སུ་ལྷའི་གཟུགས་རྫོགས་པའམ་ཕྱག་མཚན་ཙམ་འགོད། བྲིས་ཟིན་པ་དང་། ཚོན་ལྷག་གི་ཡེ་ཤེས་པ་བཛྲ་མུཿས་གཤེགས། དེ་ནས་དཀྱིལ་འཁོར་གྱི་རྒྱན་དང་མཆོད་པ་རྣམས་བཤམ་ལ། སྒྲུབ་པ་པོ་རྣམས་ཁྲུས་བྱས་ཏེ་སྟན་ལ་འཁོད་ནས། བདག་བསྐྱེད་བཟླས་པའི་བར་སྔར་ལྟར་བྱས་ལ། མདུན་གྱི་དཀྱིལ་འཁོར་ཨ་མྲྀ་ཏས་བསང་། སྭ་བྷཱ་ཝ ས་སྦྱང་། ཆོས་ཀུན་སྟོང་པའི་ངང་ཉིད་ལས། །སྣ་ཚོགས་རྡོ་རྗེའི་ས་གཞི་དང་། །རྡོ་རྗེའི་ར་བ་གུར་བླ་བྲེ། །ཡེ་ཤེས་མེ་དཔུང་འབར་བའི་ནང་། །སྣ་ཚོགས་པདྨའི་ལྟེ་བ་ལ། །རིན་ཆེན་ལས་གྲུབ་གཞལ་ཡས་ཁང་། །གྲུ་བཞི་སྒོ་བཞི་རྟ་བབ་ཅན། །ལྟེ་བ་ལིང་ཚེ་དགུ་དང་ལྡན། །ཕྱི་ནང་མཚན་ཉིད་ཀུན་ཏུ་རྫོགས། །ལྷ་གནས་རྣམས་སུ་པདྨའི་གདན། །དབུས་སུ་བཅོམ་ལྡན་རྣམ་སྣང་མཛད། །དུང་མདོག་ཞལ་བཞི་ཕྱག་བརྒྱད་དོ། །བྱང་ཆུབ་མཆོག་གི་ཕྱག་རྒྱ་ཅན། །མདུན་དུ་སྦས་ཡུམ་རྡོ་རྗེ་དཀར། །ཉི་མ་རྣམ་སྣང་དམར་པོ་ཉི། །ཟླ་བ་རྣམ་སྣང་དཀར་པོ་ཟླ། །དེ་གཉིས་གཡས་གཡོན་བཞེངས་ཏེ་བཞུགས། །ཤར་གྱི་ལིང་ཚེར་མི་བསྐྱོད་སྔོ། །གཡས་པ་ས་གནོན་རྡོ་རྗེའི་ཕྱག །ལྷོ་རུ་རིན་ཆེན་འབྱུང་ལྡན་སེར། །ཕྱག་གཡས་མཆོག་སྦྱིན་རིན་ཆེན་མཚན། །ནུབ་ཏུ་འོད་དཔག་མེད་དམར་པོ། །ཏིང་འཛིན་ཕྱག་རྒྱ་པདྨ་འཛིན། །བྱང་དུ་དོན་ཡོད་གྲུབ་པ་ལྗང་། །ཕྱག་གཡས་སྐྱབས་སྦྱིན་རྒྱ་གྲམ་མཚན། །གསུམ་ཀའི་ཕྱག་གཡོན་མཉམ་གཞག་གོ། །མཚམས་ཀྱི་ལིང་ཚེ་བཞི་པོ་ཡི། །ཤར་ལྷོར་སྤྱན་མ་སྐུ་མདོག་དཀར། །ཕྱག་གཡས་འཁོར་ལོ་གཡོན་པ་སྤྱན། །ལྷོ་ནུབ་མཱ་མ་ཀཱི་སྔོན་མོ། །གཡས་པ་རིན་ཆེན་གཡོན་རྡོ་རྗེ། །ནུབ་བྱང་ན་བཟའ་དཀར་མོ་དམར། །གཡས་གཡོན་ཕྱག་ན་པདྨ་བསྣམས། །བྱང་ཤར་དམ་ཚིག་སྒྲོལ་མ་ལྗང་། །གཡས་པ་རྒྱ་གྲམ་གཡོན་ཨུཏྤལ། །ཤར་ལྷོ་མཚམས་སུ་གཟུགས་རྡོ་རྗེ། །དཀར་མོ་འཁོར་ལོ་མེ་ལོང་འཛིན། །ལྷོ་ནུབ་སྒྲ་དབྱངས་རྡོ་རྗེ་སེར། །གཡས་གཡོན་རིན་ཆེན་པི་ཝང་བསྣམས། །ནུབ་བྱང་དྲི་མཆོག་རྡོ་རྗེ་དམར། །གཡས་པ་པདྨ་གཡོན་དུང་ཆོས། །བྱང་ཤར་རོ་མ་རྡོ་རྗེ་ལྗང་། །སྣ་ཚོགས་རྡོ་རྗེ་རོ་ཡི་སྣོད། །ཤར་ཕྱོགས་སྣམ་བུར་བྱང་སེམས་གཉིས། །དུང་མདོག་གཡས་པ་འཁོར་ལོ་འཛིན། །ལྷོ་ཕྱོགས་སྣམ་བུར་བྱང་སེམས་གཉིས། །སེར་པོ་ཕྱག་གཡས་རིན་པོ་ཆེ། །ནུབ་ཕྱོགས་སྣམ་བུར་བྱང་སེམས་གཉིས། །དམར་པོ་ཕྱག་གཡས་པདྨ་འཆང་། །བྱང་ཕྱོགས་སྣམ་བུར་བྱང་སེམས་གཉིས། །ལྗང་ཁུ་སྣ་ཚོགས་རྡོ་རྗེ་གཡས། །བཞི་ཀ་ཕྱག་གཡོན་དཀུ་ལ་བརྟེན། །ཤར་སྒོར་རྡོ་རྗེ་ལྕགས་ཀྱུ་དཀར། །གཡས་པ་ལྕགས་ཀྱུ་གཡོན་སྡིགས་མཛུབ། །ལྷོ་སྒོར་རྡོ་རྗེ་ཞགས་པ་སེར། །གཡས་གཡོན་ཞགས་པ་སྡིགས་མཛུབ་ཅན། །ནུབ་སྒོར་རྡོ་རྗེ་ལྕགས་སྒྲོག་དམར། །གཡས་པ་ལྕགས་སྒྲོག་གཡོན་སྡིགས་མཛུབ། །བྱང་སྒོར་རྡོ་རྗེ་འབེབས་པ་ལྗང་། །གཡས་པ་དྲིལ་བུ་གཡོན་སྡིགས་མཛུབ། །གཤེགས་པ་ལྔ་པོ་རྡོར་སྐྱིལ་དང་། །ཞི་བ་གཞན་རྣམས་སེམས་དཔའི་སྐྱིལ། །སྣ་ཚོགས་རིན་ཆེན་རྒྱན་གྱིས་བརྒྱན། །སྒོ་བ་རྣམ་བཞི་འཇིགས་གཟུགས་ཅན། །ཞབས་གཉིས་གཡོན་བརྐྱང་འདོར་སྟབས་ཅན། །སྦྲུལ་དང་རིན་པོ་ཆེ་ཡིས་བརྒྱན། །ཀུན་གྱི་གནས་གསུམ་ༀ་ཨཱཿཧཱུྃ། །ཧཱུྃ་ལས་འོད་འཕྲོས་རང་འདྲ་བའི། །ཡེ་ཤེས་སེམས་དཔའ་སྤྱན་དྲངས་གྱུར། །ༀ་བཛྲ་ས་མཱ་ཛཿ རྡོར་དྲིལ་སྤོས་བཅས་འཛིན་པས། མ་ལུས་སེམས་ཅན་གྱི་མགོན་གྱུར་ཅིང་། །སོགས་ནས། བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །མཆོད་ཡོན་སྦྲེང་བཞིན་དུ། བཅོས་ལྡན་འདིར་ནི་བྱོན་པ་ལེགས། །སོགས་ནས། ཐུགས་ལ་དགོངས་ཤིང་གནང་བར་མཛོད། །དེ་ནས་ༀ་སརྦ་ཏ་ཐཱ་ག་ཏ་ཨུཥྞི་ཥ་བི་མ་ལེ་ས་པ་རི་ཝཱ་ར་ཨརྒྷཾ་སོགས་ཆུ་གཉིས་ཉེར་སྤྱོད་དང་བཅས་པས་མཆོད། ཛཿཧཱུྃ་བྂ་ཧོཿ དམ་ཡེ་གཉིས་མེད་རོ་གཅིག་གྱུར། །སླར་ཡང་ཐུགས་ཀའི་འོད་ཟེར་གྱིས། །དབང་ལྷ་རིགས་ལྔ་འཁོར་དང་བཅས། །ༀ་བཛྲ་ས་མཱ་ཛཿ དེ་བཞིན་གཤེགས་པ་ཐམས་ཅད་ཀྱིས། །བདག་ལ་མངོན་པར་དབང་བསྐུར་སྩོལ། །ༀ་སརྦ་ཏ་ཐཱ་ག་ཏ་ཨབྷིཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། ཞེས་གསུངས་མངོན་པར་དབང་བསྐུར་བས། སྐུ་གང་དྲི་མ་མ་ལུས་དག །ལྷག་མའི་ཆུ་བོ་ཡར་ལུད་པས། །བདེ་གཤེགས་རྣམས་ལ་རིན་པོ་ཆེའི། །ཅོད་པན་གྱིས་བརྒྱན་གཞན་རྣམས་ལ། །རིགས་ལྔའི་རྒྱ་ཡིས་བཏབ་པར་གྱུར། །དེ་ནས་མཆོད་པ་གསར་དུ་བཤམས་པའམ། ཁ་གསོས་ལ། སྔར་བཞིན་བསང་སྦྱང་བྱིན་གྱིས་བརླབས་ཏེ། རབ་འབྱམས་རྒྱ་མཚོ་དཔག་མེད་ན། །མཆོད་ཡོན་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་འདི། །རྒྱལ་བ་སྲས་དང་བཅས་ལ་འབུལ། །ༀ་སརྦ་ཏ་ཐཱ་ག་ཏ་ཨུཥྞི་ཥ་བི་བ་ལེ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་ཏྲ་སྥ་ར་ཎ་ས་མ་ཡེ་ཧཱུྃ། དེ་བཞིན་དུ་མཆོད་ཡོན་གྱི་གནས་སུ། ཞབས་བསིལ། མེ་ཏོག །བདུག་སྤོས། སྣང་གསལ། དྲི་ཆབ། ཞལ་ཟས། རོལ་མོ་རྣམས་དང་། ཨརྒྷཾ་གྱི་གནས་སུ། པཱདྱཾ་ནས་ཤཔྡའི་བར་སྦྱར་བས་འབུལ། དེ་ནས་པད་སྐོར་སྔོན་འགྲོས་སོ་སོའི་རྒྱ་བཅིངས་ལ། ༀ་བཛྲ་ལཱ་སྱ་ཧཱུྃ། ༀ་བཛྲ་མཱ་ལེ་ཏྲཾ། ༀ་བཛྲ་གཱིརྟི་ཧྲཱིཿ ༀ་བཛྲ་ནྲྀ་ཏྱེ་ཨཱཿ ༀ་བཛྲ་དྷཱུ་པེ་ཧཱུྃ། ༀ་བཛྲ་པུཥྤེ་ཏྲྂ། ༀ་བཛྲ་ཨཱ་ལོ་ཀེ་ཧྲཱིཿ ༀ་བཛྲ་གནྡྷེ་ཨཱཿ ཞིང་འདི་རིན་ཆེན་སྣ་བདུན་གྱིས། །མཁས་པ་དག་གིས་ཡོངས་བཀང་སྟེ། །དངོས་གྲུབ་འདོད་པ་སྦྱིན་པའི་ཕྱིར། །ཉིན་རེ་ཤེས་རབ་ཅན་གྱིས་འབུལ། །ༀ་སརྦ་ཏ་ཐཱ་ཏ་ཨུཥྞི་ཥ་བི་མ་ལེ་ས་པ་རི་ཝཱ་ར་པཉྩ་མ་ཧཱ་ར་ཎ་པཱུ་ཛ་མེ་གྷ་སོགས་ནས། ཞིང་འདི་འདོད་ཡོན་སྣ་ལྔ་ཡིས། །སོགས་ཀྱི་མཐར། ༀ་སརྦ་ཏ་ཐཱ་ག་ཏ་ཨུཥྞི་ཥ་བི་མ་ལེ་ས་པ་རི་ཝཱ་ར་པཉྩ་ཀ་མ་གུ་ཎ་པཱུ་ཛ་མེ་གྷ༴ ལྷ་ཡི་དབང་པོ་ལྷ་མིན་གཡུལ་རྒྱལ་ནས། །བཀྲ་ཤིས་ལྷ་མོ་བརྒྱད་ཀྱིས་མཆོད་པ་ལྟར། །རྒྱལ་བ་རྣམས་དང་དཀྱིལ་འཁོར་ལྷ་ཚོགས་ལ། །བཀྲ་ཤིས་རྫས་བརྒྱད་དག་གིས་མཆོད་པར་བགྱི། །ༀ་སརྦ་སོགས་ཀྱི་མཐར། ཨཥྚ་མངྒ་ལ་དྲ་བྱ་པཱུ་ཛ་མེ་གྷ་སོགས། དཔྲལ་བར་ཐལ་མོ་ཁོང་སྟོང་སྦྱར་ཏེ། ༀ་སརྦ་བིདྤཱུ་ར་པཱུ་ར་སུ་ར་སུ་ར་ཨ་བརྟ་ཡ་ཨ་བརྟ་ཡ་ཧོཿ ཞེས་སོགས་མཆོད་སྤྲིན་དཔག་མེད་དུ་སྤྲོས་ནས་མཆོད་དེ། ༀ་བཛྲ་སྥ་ར་ཎ་ཁཾ། ཞེས་རྒྱ་བཀྲོལ་ཏེ་སེ་གོལ་བྱའོ། །དེ་ནས་བསྟོད་པ་ནི། དྲིལ་སྟབས་དང་སྦྱར་ཏེ། སྣང་སྟོང་རྡོ་རྗེ་ནམ་མཁའི་དབྱིངས། །ཆོས་དབྱིངས་ཡེ་ཤེས་རྡོ་རྗེའི་སྐུ། །བྱང་ཆུབ་མཆོག་གི་ཕྱག་རྒྱ་འཛིན། ཕྱག་འཚལ་རྣམ་པར་སྣང་མཛད་ལའོ། །གཟུགས་འཛིན་རྡོ་རྗེ་བརྟན་པའི་བདག །མེ་ལོང་ཡེ་ཤེས་རྡོ་རྗེའི་སྐུ། །རྡོ་རྗེ་བདུད་འདུལ་ཕྱག་རྒྱ་འཛིན། །ཕྱག་འཚལ་རྡོ་རྗེ་མི་བསྐྱོད་ལའོ། །རྡོ་རྗེ་རིན་ཆེན་འབར་བའི་མེ། །མཉམ་ཉིད་ཡེ་ཤེས་ངོ་བོ་ཉིད། །རྡོ་རྗེ་མཆོག་སྦྱིན་ཕྱག་རྒྱ་འཛིན། །ཕྱག་འཚལ་རིན་ཆེན་འབྱུང་ལྡན་ལའོ། །མཐའ་ཡས་རྡོ་རྗེ་ཆུ་ཡི་ཁམས། །ཀུན་རྟོག་ཡེ་ཤེས་ངོ་བོ་ཉིད། །རྡོ་རྗེ་ཏིང་འཛིན་ཕྱག་རྒྱ་འཛིན། །ཕྱག་འཚལ་སྣང་བ་མཐའ་ཡས་ལའོ། །དངོས་གྲུབ་རྡོ་རྗེ་བསྐྱོད་པའི་རླུང་། །བྱ་གྲུབ་ཡེ་ཤེས་ངོ་བོ་ཉིད། །རྡོ་རྗེ་སྐྱབས་སྦྱིན་ཕྱག་རྒྱ་འཛིན། །ཕྱག་འཚལ་དོན་ཡོད་གྲུབ་པ་ལའོ། །སྟོང་པ་ཉིད་ཀྱི་རྡོ་རྗེ་ལས། །རྡོ་རྗེའི་རིགས་རྣམས་ཀུན་གྱི་ཡུམ། །རྡོ་རྗེ་སེམས་མཆོག་རྣམ་པར་དག །ཕྱག་འཚལ་རྡོ་རྗེ་སྤྱན་མ་ལའོ། །མཚན་མ་མེད་པའི་རྡོ་རྗེ་ལས། །རིན་ཆེན་རིགས་རྣམས་ཀུན་གྱི་ཡུམ། །རྡོ་རྗེ་རིན་ཆེན་དབང་བསྐུར་མཆོག །ཕྱག་འཚལ་རྡོ་རྗེ་དབང་ཉིད་ལའོ། །སྨོན་པ་མེད་པའི་རྡོ་རྗེ་ལས། །པདྨའི་རིགས་རྣམས་བསྐྱེད་མཛད་པ། །རྡོ་རྗེ་པདྨ་གསང་བའི་མཆོག །ཕྱག་འཚལ་རྡོ་རྗེ་དཀར་མོ་ལའོ། །རྡོ་རྗེ་མངོན་དུ་མི་ཕྱེད་ལས། །ལས་ཀྱི་རིགས་རྣམས་བསྐྱོད་མཛད་མ། །རྡོ་རྗེ་མཆོག་ལ་རབ་ཏུ་བརྩོན། །ཕྱག་འཚལ་རྡོ་རྗེ་སྒྲོལ་མ་ལའོ། །ཕྱག་བྱར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་ཀྱིས། །ལུས་བཏུད་པ་ཡི་རྣམ་ཀུན་ཏུ། །མཆོག་ཏུ་དད་པས་ཕྱག་འཚལ་བསྟོད། །འདི་སྟེ་སངས་རྒྱས་ཐམས་ཅད་ཀྱི། །གང་དག་ཡོན་ཏན་རྒྱས་པ་སྟེ། །ལན་གཅིག་ཙམ་ཞིག་བརྗོད་པས་ཀྱང་། །གསང་སྔགས་ཐམས་ཅད་འགྲུབ་པར་འགྱུར། །དེ་ནས་ཆ་གསུམ་གཏོར་མ་ལྟར་ནང་དུ་ཕྱོགས་སྐྱོང་། གདོན་སྤྱི། གཞི་བདག་རྣམས་དང་། ཕྱི་རོལ་དུ་བགེགས་གཏོར་བཏང་། ཉེ་རེག་བྱས་ཏེ་ནང་དུ་ཞུགས། སྤོས་ཀྱིས་བདུག །རོལ་མོ་དཀྲོལ་ལ་ཡིག་བརྒྱ་བཟླ་བཞིན་དུ་དཀྱིལ་འཁོར་ལན་གསུམ་བསྐོར་ཏེ། ཤར་སྒོ་ནས། རྨི་ལམ་འཇིགས་དང་སྡིག་པ་ཐམས་ཅད་ཞི་བྱེད་པ། །ཚེ་དང་འབྱོར་པ་སྟོབས་དང་བདེ་བ་རྣམས་འཕེལ་བ། །ཁྱེད་ཀྱིས་བཀྲ་ཤིས་ཐམས་ཅད་འགྲུབ་པར་བྱེད་འདི་དག །རབ་ཏུ་བརྗོད་ཀྱི་དེ་ཕྱིར་མི་རྣམས་བསྒྲིམས་ཏེ་ཉོན། །རྣམ་པར་སྣང་མཛད་ཡེ་ཤེས་དམ་པ་མཚོ་ཆེན་ལྡན། །ཟླ་བ་ཉ་འདྲའི་སྐུ་མངའ་སྲིད་པ་མཐར་ཕྱིན་པ། །དགོངས་པ་མཐའ་དག་རྫོགས་པའི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེ་རིང་ཞི་བྱེད་ལེགས་གྱུར་ཅིག །མི་འཁྲུགས་རྒྱལ་པོ་སྲིད་དང་གཏི་མུག་རྣམ་སྦྱོང་བ། །མགོན་པོ་ཡོན་ཏན་ཐམས་ཅད་རྫོགས་པའི་བཀྲ་ཤིས་གང་ཡིན་པ། །དགེ་བ་མཉམ་མེད་རྫོགས་པའི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེ་རིང་ཞི་བྱེད་ལེགས་གྱུར་ཅིག །སངས་རྒྱས་ཡོན་ཏན་ཀུན་གྱི་རྒྱན་གྱིས་བརྒྱན་མཛད་ཅིང་། །ཡང་དག་སྦྱིན་མཛད་འགྲོ་བའི་དོན་ལ་མི་བསླུ་བ། །རིན་ཆེན་འབྱུང་ལྡན་ཞེས་བྱའི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེ་རིང་ཞི་བྱེད་ལེགས་གྱུར་ཅིག །བསམ་གཏན་ཏིང་འཛིན་དམ་པ་ཕ་རོལ་ཕྱིན་པའི་གནས། །ཡེ་ཤེས་པདྨའི་སྟེང་ཞུགས་དཔག་མེད་ཚེ་ལྡན་པ། །ཚེ་གྲངས་མེད་པའི་བྱིན་གྱིས་བརླབས་པའི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེ་རིང་ཞི་བྱེད་ལེགས་གྱུར་ཅིག །སེམས་ཅན་རྣམས་ཀྱི་དོན་ལ་ཐུགས་ནི་རབ་ཏུ་དགོངས་མཛད་པ། །འགྲོ་བ་མཐའ་དག་འཆིང་བས་བཅིངས་ལས་གྲོལ་མཛད་པ། །ཐུབ་མཆོག་དོན་ཡོད་གྲུབ་པའི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེ་རིང་ཞི་བྱེད་ལེགས་གྱུར་ཅིག །ཆེ་བའི་ཆེ་མཆོག་སྟོན་མཆོག་བླ་ན་མེད། །སོགས་གསུམ་དང་། འབྱུང་པོ་གང་དག་འདིར་ནི་ལྷགས་གྱུར་ཏམ། །སོགས་དང་། འདིར་ནི་རྒྱལ་བ་དགྲ་རྒྱལ་སོགས་བརྗོད་ཅིང་རོལ་མོ་དཀྲོལ། དེ་བཞིན་དུ་ལྷོ་དང་། ནུབ་དང་། བྱང་སྒོ་རྣམས་ནས་ཀྱང་། རྨི་ལམ་འཇིགས་དང་སོགས་བཀྲ་ཤིས་སྔར་ལྟར་བརྗོད་དོ། །དེ་ནས་ཤར་སྒོ་ནས་ཐལ་མོ་སྦྱར་ཏེ། ༀ། བདེ་གཤེགས་རྡོ་རྗེའི་རིགས་དང་རིན་ཆེན་དང་། །པདྨ་སྣ་ཚོགས་རིགས་ཀྱི་རྒྱལ་བ་དང་། །གསང་སྔགས་འདི་ཡིས་བྱིན་བརླབས་ཀྱིས། །ཟག་མེད་ཡེ་ཤེས་སྣང་བའི་རྒྱན། །ནམ་མཁའི་མཐའ་དང་མཉམ་པ་སྟེ། །མྱུར་བ་ཉིད་དུ་སྐྱེ་བར་ཤོག །མིག་དང་རྣ་བའི་མངོན་ཤེས་དང་། །གཞན་གྱིསེམས་དོན་ཤེས་པ་དང་། །སྔ་ཕྱིའི་སྐྱེ་གནས་ཤེས་པ་དང་། །རྫུ་འཕྲུལ་དུ་མས་བསྒྱུར་བ་ཡང་། ད་ལྟ་ཉིད་དུ་ཐོབ་པར་ཤོག །ཆུ་སྟེང་འགྲོ་དང་རིག་མྱུར་ཕྱིན། །མིག་སྨན་བུམ་པ་གཏེར་དང་ནི། །རལ་གྲི་བཟུང་ནས་མཁའ་ལ་འགྲོ། །མི་སྣང་ལུས་བསྒྱུར་ཐོབ་པར་ཤོག །ས་འོག་འགྲོ་དང་གཏེར་མཐོང་དང་། །བཅུད་རྣམས་རྙེད་དང་རིང་འཚོ་དང་། །གཞན་ལུས་དང་པོར་བསྒྱུར་བ་དང་། །མདོག་བཟང་ན་རྒ་མེད་ཐོབ་ཤོག །ཞི་རྒྱས་དབང་དང་མངོན་སྤྱོད་ཀྱི། །འགྲོ་དོན་སྣ་ཚོགས་ཅི་འདོད་པ། །རང་རང་སྐལ་བ་ཅི་བཞིན་དུ། །ཐོགས་པ་མེད་པར་སྤྱོད་པར་ཤོག །སྐྱེ་ཞིང་སྐྱེ་བ་དང་ནི་ཚེ་རབས་སུ། །རིགས་བཟང་བློ་གསལ་ང་རྒྱལ་མེད་པ་དང་། །སྙིང་རྗེ་ཆེ་ཞིང་བླ་མ་ལ་གུས་ལྡན། །དཔལ་ལྡན་རྡོ་རྗེ་ཐེག་ལ་ངེས་གནས་ཤོག །རྒྱལ་བའི་བསྟན་པ་དར་ཞིང་རྒྱས་པ་དང་། །བསྟན་འཛིན་རྣམས་ཀྱི་བཞེད་པའི་དོན་ཀུན་འགྲུབ། །མ་ལུས་སྐྱེ་རྒུའི་འགལ་རྐྱེན་ཀུན་ཞི་ནས། །ཕུན་ཚོགས་མཐའ་དག་ཡིད་བཞིན་འབྱོར་གྱུར་ཅིག །དེ་ནས་གཏང་རག་གི་མཆོད་པ་ཁ་གསོས་ཏེ། བསང་སྦྱང་བྱིན་གྱིས་བརླབས་ནས། ༀ་སརྦ་ཏ་ཐཱ་ག་ཏ་ཨུཥྞི་ཥ་བི་མ་ལེ་ས་པ་རི་ཝཱ་ར་ཨརྒྷཾ་སོགས་ཆུ་གཉིས་ཉེར་སྤྱོད་ལྔས་མཆོད། བསྟོད་པར་འོས་པ་ཐམས་ཅད་ལ། །ཞེས་སོགས་ཀྱིས་བསྟོད་ནས། བླ་མ་དང་བཅོམ་ལྡན་འདས་གཙུག་ཏོར་དྲི་མ་མེད་པའི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའི་ཚོགས་དང་བཅས་པ་ཐམས་ཅད་བདག་ཅག་རྣམས་ལ་དགོངས་སུ་གསོལ། ཁྱེད་རྣམས་ལ་མཁྱེན་པའི་ཡེ་ཤེས། །བརྩེ་བའི་ཐུགས་རྗེ། མཛད་པའི་ཕྲིན་ལས་བསམ་གྱིས་མི་ཁྱབ་པ་མངའ་བ་ལགས་པས། སྤྱིར་རྒྱལ་བའི་བསྟན་པ་སྤྱི་དང་ཁྱད་པར་སྔ་འགྱུར་རྡོ་རྗེ་ཐེག་པའི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པ་དང་། བསྟན་འཛིན་སྐྱེས་བུ་རྣམས་སྐུ་ཚེ་བརྟན་ཅིང་ཐུགས་ཀྱི་བཞེད་པའི་དོན་ཀུན་འབད་མེད་དུ་འགྲུབ་པ་དང་། བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་ནད་གདོན་འགལ་རྐྱེན་མི་མཐུན་པའི་ཕྱོགས་ཐམས་ཅད་ཞི་ཞིང་། མཐུན་རྐྱེན་ཆོས་དང་མཐུན་པའི་བསམ་པ་ཡིད་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ། ཁྱད་པར་དུ་ཡང་བདག་ཅག་དཔོན་སློབ་འཁོར་དང་བཅས་པས་ཐོག་དྲངས་སེམས་ཅན་ཐམས་ཅད་གནས་སྐབས་མི་མཐུན་པའི་ཕྱོགས་ཐམས་ཅད་ཞི་ནས། འོག་མིན་གྱི་སྲིད་པའི་མཐར་ཐུག་པའི་འཇིག་རྟེན་པའི་དངོས་གྲུབ་མཐའ་དག་འགྲུབ་པ་དང་། མཐར་ཐུག་སྒྲིབ་གཉིས་བག་ཆགས་དང་བཅས་པ་མ་ལུས་པ་ཞི་བའི་ཕྱག་རྒྱ་ཆེན་པོ་མཆོག་གི་དངོས་གྲུབ་ཚེ་འདི་ཉིད་ལ་ཐོབ་པར་བྱིན་གྱིས་བརླབ་ཏུ་གསོལ། །དེ་ནས་རྡོ་རྗེ་སེམས་དཔའི་ཡིག་བརྒྱ་ལན་བདུན་བཟླས་ཏེ། མ་འབྱོར་བ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་སྩལ་པ། །དེ་ཀུན་མགོན་པོས་བཟོད་པར་གསོལ། །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་འདིར་ནི་མྱུར་དུ་འཚང་རྒྱ་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང་། །སྡུག་བསྔལ་གྱིས་གཟིར་སེམས་ཅན་སྒྲོལ་བར་ཤོག །དེ་ནས་བརྟན་བཞུགས་ནི། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་འབུལ་ན། །དེ་སྲིད་བཅོམ་ལྡན་འཁོར་དང་བཅས། །དཀྱིལ་འཁོར་འདི་ལ་བརྟན་པར་བཞུགས། །ༀ་སུ་པྲ་ཏིཥྛ་བཛྲ་ཡེ་སྭཱ་ཧཱ། དེ་ནས་བཛྲ་མུཿས་བདག་བསྐྱེད་ཀྱི་ཡེ་ཤེས་པ་གཤེགས། དམ་ཚིག་པ་བསྡུ། བསྔོ་སྨོན་ཤིས་བརྗོད་ཀྱིས་མཐའ་བརྒྱན་པར་བྱའོ། །གཙུག་ཏོར་དྲི་མེད་ཀྱི་དཀྱིལ་འཁོར་མཆོད་རྟེན་གྱི་ནང་དུ་བཞུགས་པའི་ཆོ་གའོ། ༈ །ན་མོ་མུ་རཥྩ་རཏྣ་ཏྲ་ཡཱ་ཡ། འདིར་འོད་ཟེར་དྲི་མེད་ཀྱི་དཀྱིལ་འཁོར་མཆོད་རྟེན་དུ་བཞུགས་ནས་སྲོག་ཤིང་འཛུགས་པའི་ཆོ་ག་བྱ་བར་འདོད་ན། མཆོད་རྟེན་ཆུང་ངུ་བུམ་ནང་དུ་དཀྱིལ་འཁོར་མི་ཤོང་བའི་བུམ་པར་བཞུགས་པར་མི་སྤྲོ་ན། མཆོད་རྟེན་གྱི་ཉེ་ལོགས་སུ་འོད་ཟེར་དྲི་མེད་ཀྱི་དཀྱིལ་འཁོར་བཞེངས་ཤིང་སྲོག་ཤིང་བརྟན་པའི་ཆོ་ག་བྱ་བར་རུང་གསུངས། འདིར་བུམ་ནང་དུ་བཞུགས་པའི་ཕྱོགས་ལ། དེའི་བཞུགས་ཚུལ་ནི། སྔར་བུམ་རྟེན་དུ་གཙུག་ཏོར་དྲི་མེད་ཀྱི་དཀྱིལ་འཁོར་བཞུགས་སུ་གསོལ་བ་དེ་ཉིད་ལ་དར་རམ་རས་གཙང་མས་ཞལ་ཁེབས་བཀབ་ལ། རྡོ་ལེབ་བཟང་པོ་སྲོག་ཤིང་གི་ལྗིད་ཐེག་པའི་ཐོག་བཀབ་ལ་རྐྱང་ནུལ་དགོས་ནའང་བྱས་ཏེ། བུམ་རྩིག་ཅུང་ཟད་རྩིགས་ལ། དེའི་ནང་དུ་འོད་ཟེར་དྲི་མེད་ཀྱི་དཀྱིལ་འཁོར་བཞེངས་ནས་སྲོག་ཤིང་བརྟན་པའི་ཆོ་ག་བྱ་སྟེ། ཉེ་བར་དགོས་པའི་ཡོ་བྱེད་རྣམས་འདུ་བྱས་ལ། སྔ་དྲོ་ཐོག་མར་གསོ་སྦྱོང་བླངས་ཏེ། ཕྱོགས་བཅུ་ན་བཞུགས་པའི་སོགས་ནས། སྲིད་པའི་མཚོ་ལས་སྒྲོལ་བར་ཤོག །ཅེས་པའི་བར་ལན་གསུམ་དང་། ༀ་ཨ་མོ་གྷ་ཤཱི་ལའི་སྔགས་ཉེར་གཅིག་བཟླས། དེ་ནས་ཁྲོ་བོ་མནོལ་བ་མེད་པའི་སྔགས་རྒྱས་བདག་བསྲུང་བ་ནས། རས་ཀྱི་ཟེའུ་ཁ་བཅིངས་པར་གྱུར། ཅེས་པའི་བར་བསྙེན་པའི་སྐབས་ལྟར་བྱས་ལ། དེ་ནས་རྣལ་འབྱོར་དངོས་གཞི་ནི། ལུས་ངག་གི་གནད་དང་ལྡན་པས་འདི་ལྟར་བསྒོམ་སྟེ། བདག་གིས་བསྒྲལ་དཀའི་སྲིད་མཚོ་ལས། །མ་ལུས་འགྲོ་ཀུན་བསྒྲལ་བའི་ཕྱིར། །བླ་མེད་བྱང་ཆུབ་མཆོག་སེམས་བསྐྱེད། །འདི་ལྟར་སྣང་བའི་ཆོས་རྣམས་ཀུན། །ཐམས་ཅད་སེམས་ཙམ་དེའི་རང་བཞིན། །མི་དམིགས་ནམ་མཁའི་དཀྱིལ་ལྟ་བུ། །དེ་ལས་རང་སེམས་རྣམ་པ་ནི། །ཟླ་བའི་དཀྱིལ་འཁོར་ཉ་གང་བ། །དེ་ཡི་ངང་ལས་རང་གི་སྔགས། །ན་མོ་བྷ་ག་ཝ་ཏེ། ན་བ་ན་བ་ཊཱི་ནཱཾ། སམྱཀྶཾ་བུདྡྷ་ཀོ་ཊི་ནི་ཡུ་ཏ་ཤ་ཏ་ས་ཧ་སྲ་ཎཱཾ། ན་མཿསརྦ་ནཱི་ཝ་ར་ཎ་བི་སྐམྦྷི་ནི་བོ་དྷི་ས་ཏྭ་ཡ། ༀ་ཏུ་རུ་ཏུ་རུ་མ་མ་སརྦ་ཨཱ་བ་ར་ཎ་བི་ཤྭ་དྷ་ནི། སརྦ་ཏ་ཐཱ་ག་ཏ་ཨཱ་ཡུཪྦ་ལཱ་ནི། བི་པུ་ལ་ནིརྨ་ལེ། སརྦ་སིདྡྷི་ན་མ་སྐྲྀ་ཏྭ། བ་ར་བ་ར། སརྦ་ས་ཏྭ་ཨ་ཝ་ལོ་ཀི་ནི། ༀ་སརྦ་ནི་པཱ་ར་ཎ། བི་སྐམྦི་ནི། མ་མ་སརྦ་པཱ་པཾ་བི་ཤྭ་དྷ་ནི་ཀུ་རུ་སྭཱ་ཧཱ། ཞེས་པའི་རང་སྒྲ་གྲགས་པར་གྱུར། །དེ་ལས་སྔགས་རྣམས་ཡི་གེ་ཡི། །རྣམ་པར་མཁའ་ལ་གནས་པ་དེ། །ཟླ་དཀྱིལ་སྟེང་དུ་ལེགས་བཀོད་པའི། །འོད་ཀྱིས་འཕགས་མཆོད་འགྲོ་དོན་བྱས། །ཚུར་འདུས་རང་སེམས་ཟླ་དཀྱིལ་ལ། །ཞུགས་ནས་རོ་གཅིག་གྱུར་པ་ལས། །རང་ཉིད་སྒྲིབ་པ་རྣམ་སེལ་སྐུ། །གསེར་མདོག་ཐོར་ཚུགས་ཅོད་པན་ཅན། །ཕྱག་ན་ཡིད་བཞིན་ནོར་བུ་བསྣམས། །སེམས་དཔའི་སྐྱིལ་མོ་ཀྲུང་གིས་བཞུགས། །དེ་ནས་སྔགས་རྒྱས་བྱིན་གྱིས་བརླབ་པ་ནི། ༀ་སརྦ་ཏ་ཐཱ་ག་ཏ་ཨུདྦྷ་ཝ་ཡེ་སྭཱ་ཧཱ། ཞེས་དེ་བཞིན་གཤེགས་པའི་རིགས་ཀྱི་སྔགས་རྒྱས་སྙིང་ག །མགྲིན་པ། སྨིན་མཚམས། དཔུང་མགོ་གཉིས་ཏེ་གནས་ལྔར་གཏུགས་ཤིང་བྱིན་གྱིས་བརླབས། ༀ་བཛྲ་ཨགྣེ་པྲ་དཱི་པ་ཏ་ཡེ་སྭཱ་ཧཱ། སྔགས་རྒྱས། རྡོ་རྗེའི་གོ་ཆ་གྱོན་པར་གྱུར། ན་མོ་རཏྣ་ཏྲ་ཡཱ་ཡ། ༀ་ཧཱུྃ་ཝ་ཀཱི་ལི་ཧཱུྃ་ཕཊ། ཅེས་པའི་སྔགས་རྒྱས་མགོ་དང་། དཔུང་པ་གཉིས། སྙིང་མགྲིན་རྣམས་སུ་རེག་པས། གོ་གྱོན་པར་གྱུར། འདི་ལྟར་གནས་སྐབས་ཐམས་ཅད་དུ། །ཡེངས་པ་མེད་པའི་ཏིང་འཛིན་གྱིས། །ལྷ་ཡི་འདུ་ཤེས་འབྲལ་མི་བྱ། །འདི་ནི་མཚན་མའི་ལྷ་རུ་གྲགས། །དེ་དག་ནི་བདག་བསྐྱེད་པའོ། །དེ་ནས་མདུན་གྱི་ལྷ་སྤྱན་དྲངས་པ་ནི། མདུན་དུ་རིན་ཆེན་དུ་མ་ལས། །ལེགས་གྲུབ་གསེར་བྱེ་བརྡལ་བའི་གཞི། །ཨཱོཾ་ཙ་ལ་བཱི་ར་ཧཱུྃ་སྭཱ་ཧཱ། དེ་སྟེང་སྐྱོན་བྲལ་འོ་མའི་མཚོ། །པདྨ་ཨུཏྤལ་ཆུ་བྱས་བརྒྱན། །ༀ་བི་མ་ལ་དྷ་ཧཱ་ཧཱུྃ། དེ་དབུས་རིན་ཆེན་རི་རབ་སྟེང་། །སྣ་ཚོགས་པདྨ་ལ་གནས་པའི། །མཚན་ཉིད་ཀུན་རྫོགས་གཞལ་ཡས་ཁང་། །གྲུ་བཞི་སྒོ་ལྡན་རྟ་བབ་མཛེས། །སྟེང་ཐོག་ཕྱུར་བུ་མཆོད་རྟེན་དབྱིབས། །ཕྱི་རོལ་རྡོ་རྗེའི་ཕྲེང་བས་བསྐོར། །ལྟེ་བར་པདྨའི་སྡོང་པོ་ནི། །གསེར་དང་སྦུར་ལེན་ཟེའུ་འབྲུ་ཅན། །སྙིང་པོའི་ཐོག་ལྔ་དངུལ་རེས་བསྐོར། །དེ་ལས་པདྨའི་དྲྭ་བ་གཞན། །བརྒྱ་སྟོང་ཇི་སྙེད་བྱུང་བར་གྱུར། །ན་མ་ས རྦ་ཏ་ཐཱ་ག་ཏ་ནཱཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱའི་སྔགས་རྒྱས། བླ་བྲེ་ལ་སོགས་པས་བརྒྱན་པར་གྱུར། །དེ་ནས་མཆོད་ཡོན་སྤོས་ཀྱིས་བདུག་སྟེ། ༀ་ཏྲཾ་བནྡྷ་སྭཱ་ཧཱ། ཞེས་བཟླས་ནས། སྤྱན་དྲངས་པའི་ཕྱག་རྒྱས་མཆོད་ཡོན་བླངས་ལ་སྦྲེང་བཞིན་དུ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདིར། །བདག་གི་མཆོད་ཡོན་འདི་བཞེས་ལ། །མཆོད་པས་བདག་ལ་དགྱེས་པར་མཛོད། །ༀ་སརྦ་ནི་བ་ར་ཎ་བི་སྐཾ་བྷི་ནི་ཨེ་ཧྱེ་ཧི་ཨརྒྷཾ་པྲ་ཏཱིཙྪ་སྭཱ་ཧཱ། ཞེས་པས། བྱང་ཆུབ་སེམས་དཔའ་སྒྲིབ་པ་རྣམ་སེལ་བསྒོམ་པ་དང་འདྲ་བའི་ཡེ་ཤེས་པ་མདུན་དུ་བྱོན་པར་མོས་ཏེ། མཆོད་ཡོན་སྤྱི་བོའི་ཐད་ནས་དབུལ་ལོ། །ༀ་བཛྲ་ཨཱ་ས་ནི་ཧཱུྃ་ཕཊ། ཅེས་པའི་སྔགས་རྒྱས་གདན་ཕུལ་ནས། མདུན་དུ་གདན་ལ་བཞུགས་པར་གྱུར། དེ་ནས་དམ་ལ་བཞག་པ་ནི། ཤངྐ་རི་ས་པཱ་རི་སྭཱ་ཧཱ། ཞེས་སྔགས་རྒྱས་དང་། སྒྲིབ་སེལ་རང་གི་རྒྱ་༼ ཐལ་མོ་བརྐྱང་བ་སྦྱར་ནས་ཅུང་ཟད་རྩེ་མོ་བསྐུམ་པར་བྱས། མཆན།༽ བསྟན་ཏེ། ན་མོ་བྷ་ག་ཝ་ཏེ། ན་བ་ན་བ་སོགས་སྒྲིབ་སེལ་གྱི་གཟུངས་བརྗོད། དེ་ནས། དམ་ཚིག་ཆེན་པོའི་ཕྱག་རྒྱས་ཐམས་ཅད་ལ་བསྲུང་བ་ཆེན་པོ་བྱས་པར་གྱུར། དེ་ནས་མཆོད་པ་ནི། ༀ་སརྦ་ནི་བ་ར་ཎ་བི་སྐཾ་བྷི་ནི་ཨརྒྷཾ་པྲ་ཏཱིཙྪ་སྭཱ་ཧཱས་མཆོད་ཡོན་དབུལ། ཇི་ལྟར་བལྟམས་པ་སོགས་ཀྱི་མཇུག་ཏུ། ༀ་སརྦ་དེ་བ་ཏཱ་ཨ་ཙིནྟི་ཨ་མྲྀ་ཏ་སྭཱ་ཧཱ། བཏགས་པས་ཁྲུས་གསོལ་ལོ། །དེ་ནས་དེ་ལ་ཁ་དོག་ཅེས་པ་ནས། རྒྱན་མཆོག་བརྒྱ་ཕྲག་དག་ཀྱང་དབུལ་བར་བགྱི། །ཞེས་གོས་རྒྱན་དབུལ། རབ་འབྱམས་རྒྱ་མཚོ་དཔག་མེད་ན། །དྲི་མཆོག །མེ་ཏོག །བདུག་སྤོས། ཞལ་ཟས་ཇི་སྙེད་ཡོད་པ་དང་། །ཞེས་པ་སྦྱར་ལ། ཨཱ་ཧ་རའི་སྔགས་ཁོ་ན་དང་། རང་རང་གི་ཕྱག་རྒྱས་ཕུལ། དེ་བཞིན་དུ། སྣང་གསལ་ཇི་སྙེད་ཅེས་དང་། ཨཱ་ལོ་ཀ་ཡ་ཨཱ་ལོ་ཀ་ཡའི་སྔགས་ཀྱིས་མར་མེ། དེ་ལས་གཞན་ཡང་སོགས་ཀྱི་མཐར། ༀ་བཛྲ་ཤཔྡ་པྲ་ཏཱིཙྪ་སྭཱ་ཧཱས་རོལ་མོ་འབུལ། མགོན་པོ་ཐུགས་རྗེ་སོགས་དཀོན་མཆོག་གསུམ་གྱི་བསྟོད་པའི་མཐར། བསྟོད་པར་འོས་པ་སོགས་དང་། ན་མཿསརྦ་བོ་དྷི་ས་ཏྭ་ནཱཾ། སརྦ་ཏྲ་སཾ་ཀུ་རུ་མི་ཏ་ཨ་བྷི་ཛྙཱ་ར་ཤི་ནི་ན་མཿསྟུ་ཏེ་སྭཱ་ཧཱས་བསྟོད། དེ་ནས་ཐལ་མོ་སྦྱར་ཏེ། སྲས་བཅས་སངས་རྒྱས་ཐམས་ཅད་ཀུན། །དེ་རིང་བདག་ལ་དགོངས་སུ་གསོལ། །ཐོག་མ་མེད་ནས་ད་ལྟའི་བར། །མི་དགེ་བཅུ་དང་མཚམས་མེད་ལྔ། །སེམས་ནི་ཉོན་མོངས་དབང་གྱུར་པའི། །སྡིག་པ་ཐམས་ཅད་བཤགས་པར་བགྱི། །སངས་རྒྱས་ཆོས་དང་དགེ་འདུན་ལ། །རྟག་པར བདག་ནི་སྐྱབས་སུ་མཆི། །ཆོས་ཀྱི་འཁོར་ལོ་བསྐོར་བ་དང་། །མྱ་ངན་མི་འདའ་གསོལ་བ་འདེབས། །རང་གཞན་དོན་གཉིས་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །ཅེས་ལན་གསུམ། དེ་ནས་བཟླས་པ་ནི། སངས་རྒྱས་བྱང་ཆུབ་སེམས་དཔའ་དང་། །རྡོ་རྗེ་འཛིན་པ་ཐམས་ཅད་ལ། །ཕྱག་འཚལ་འགྲོ་ལ་ཕན་མཛད་པའི། །བཞུགས་ནས་བྱིན་གྱིས་བརླབ་ཏུ་གསོལ། །སྭཱ་ཧཱ། ཞེས་བརྗོད་ནས། ཕྲེང་བ་ལ། ན་མོ་རཏྣ་ཏྲ་ཡཱ་ཡ། ༀ་ཨརྦྷུ་ཏེ་བི་ཛ་ཡ་སིདྡྷི་སི དྡྷིརྠེ་སྭཱ་ཧཱ། ཞེས་དང་། ༀ་རུ་ཙི་ར་མ་ཎི་པྲ་བརྟན་ཡེ་སྭཱ་ཧཱ། ཞེས་བཟླས་པས་བྱིན་གྱིས་བརླབ་ནས། བདག་དང་མདུན་གྱི་ལྷ་གསལ་བའི། །གཉིས་ཀའི་སྙིང་གར་ཟླ་དཀྱིལ་ལ། །བཟླ་བྱའི་སྔགས་ཀྱི་ཡི་གེ་རྣམས། །མངོན་སུམ་ལྟ་བུར་གསལ་བར་གྱུར། །ཞེས་པའི་དོན་བསམ་སྟེ་ཕྲེང་བ་བགྲང་བཞིན་དུ། སྒྲིབ་སེལ་གྱི་གཟུངས་ཅི་ནུས་བཟླས། མཇུག་ཏུ་ལྷ་ལ་དང་བས་མིག་བལྟ་ཞིང་། ན་མོ་བུདྡྷ་བོ་དྷི་སཏྭ་བྷྱཿ ཞེས་ཕྱག་བྱས་ནས། བུམ་པའི་ཕྱག་རྒྱ་བཅས་ཏེ། བདག་གི་བཟླས་བརྗོད་ཀྱི་དགེ་བའི་རྩ་བ་འདི་མཆོག་དང་ཐུན་མོང་གི་དངོས་གྲུབ་ཀྱི་དོན་དུ་བཅོམ་ལྡན་འདས་ལ་འབུལ་ལོ། །མགོན་པོ་ཁྱེད་ཀྱིས་མཆོག་ཐུན་མོང་གི་དངོས་གྲུབ་སྩལ་དུ་གསོལ། །ཞེས་ཞུས་ཏེ། གཏང་རག་གི་མཆོད་བསྟོད་བྱས་ནས། མ་རྙེད་སོགས་ཀྱིས་བཟོད་གསོལ། ༀ་སརྦ་ནི་བ་ར་ཎ་བི་སྐཾ་བྷི་ནི་ཨརྒྷཾ་སོགས་ཀྱིས་མཆོད་ཡོན་ཕུལ། ཁྱེད་ཀྱིས་སེམས་ཅན་དོན་སོགས་ཀྱི་མཐར། ༀ་སརྦ་ནི་བ་ར་ཎ་བིསྐཾ་བྷི་ནི་གཙྪ། ཞེས་པའི་སྔགས་རྒྱས། སྤྱན་དྲངས་པའི་ལྷ་གཞལ་ཡས་ཁང་དང་བཅས་པ་གཤེགས་པར་གྱུར། ༀ་ཧུ་ལུ་ཧུ་ལུ་ཙཥྚ་ལི་མ་ཏཾ་གི་སྭཱ་ཧཱ། ཞེས་པའི་སྔགས་རྒྱས། ཕྱོགས་བཅིངས་པ་རྣམས་དཀྲོལ་བར་གྱུར། །དེ་ནས་བདག་ལྷར་གསལ་བ་མ་བསྡུས་པར་ལྷའི་ང་རྒྱལ་ལ་གནས་པས་སྟ་གོན་ནི། དཀྱིལ་འཁོར་གྱི་གཞི་བྱི་དོར་བྱས་ལ་བྷྲཱུྂ་ཞེས་བ་བྱུང་གིས་བྱུགས་ཏེ། ལས་སྔགས་གཉིས་ཀྱིས་བསང་གཏོར་བྱས་ལ། སྐྱ་ཐིག་གདབ་པ་ནི། ཚངས་ཟུར་བཏབ། ལྟེ་བ་ནས་ངོས་རེར་ཆ་བཅུ་གཉིས་བགོས་ལ། གཞན་སྤྱི་དང་འདྲ་བ་ལས་སྒོ་གཅིག་ནུབ་ཏུ་བལྟ་བ་ལ་རྟ་བབ་སྣམ་ཕྲན་བཅུ་གཅིག་མ། ཕྱི་རོལ་ཆ་ཆེན་གཉིས་ཀྱི་ནང་མ་ཕྱེད་དུ་གཏུབ་སྟེ་པད་རྡོར་མེའི་ར་བ་རྣམས་ཐིག་བཏབ་ལ། ལྷ་གནས་རྣམས་སུ་སློབ་དཔོན་གྱིས་ལྷ་སོ་སོའི་སྙིང་པོ་དང་སྔགས་བཟླ་བཞིན་པར། དྲིའི་ཐིག་ལེ་འདས་པ་བཞི་ལ་གྲུ་བཞི་དང་། གཞན་རྣམས་ལ་ཟླུམ་པོ་རེ་བྱ། དེ་རྣམས་ཀྱི་སྟེང་དུ་ལས་རྡོར་གྱིས་ཚོམ་བུ་རེ་དགོད། མདུན་བསྐྱེད་སྐབས་ལྟར་གྱི་མཆོད་པ་བཤམ། རང་ཉིད་ཀུ་ཤའི་སྟན་ལ་ཁ་ཤར་དུ་ཕྱོགས་པས་འདུག་ལ། སོ་སོའི་སྔགས་བདུན་བརྗོད་པས་ལྷ་བསྒོམ་སྟེ། ན་མཿསཔྟ་ནཱཾ། སམྱཀྶཾ་བུདྡྷ་ཀོ་ཊཱི་ནཱཾ། པ་རི་ཤུདྡྷེ་མ་ན་སི། ཨ་བྷྱ་ཙི་ཏ་པྲ་ཏིཥྛ་ཏ་ནཱཾ། ན་མོ་བྷ་ག་ཝ་ཏེ། ཨ་མྲྀ་ཏ་ཨཱ་ཡུཪྵ་སྱ། ཏ་ཐཱ་ག་ཏ་སྱ། ༀ་སརྦ་ཏ་ཏཱ་ག་ཏ་ཤུདྡྷེ་ཨ་ཡུར་བི་ཤོ་དྷ་ནེ། སཾ་ཧ་ར་སཾ་ཧ་ར། སརྦ་ཏ་ཐཱ་ཏ་བིརྻ་བ་ལེ་ན་པྲ་ཏི་སཾ་ཧ་ར་ཨཱ་ཡུཿ སཱ་ར་སཱ་ར། སརྦ་ཏ་ཐཱ་ག་ཏ་ས་མ་ཡ། བོ་དྷི་བོ་དྷི། བུདྡྷྱེ་བུདྡྷྱེ། བོ་དྷ་ཡ་བོདྷ་ཡ། མ་མ་སརྦ་པཱ་པཾ་ཨཱ་བ་ར་ཎ་བི་ཤུདྡྷེ། བེ་ག་ཏ་མ་ལཾ། ཚ་ར་སུ་བུདྡྷེ་བུདྡྷེ། ཧུ་རུ་ཧུ་རུ་སྭཱ་ཧཱ། ཛི་ན་ཛིཀ྄ །ཅེས་པ་ཐུབ་དབང་གིའོ། །ན་མོ་བྷ་ག་ཝ་ཏེ། ན་བ་ན་བ་ཊཱི་ནཱཾ། སམྱཀྶཾ་བུདྡྷ་ཀོ་ཊི་ནི་ཡུ་ཏ་ཤ་ཏ་ས་ཧ་སྲ་ཎཱཾ། ན་མཿསརྦ་ནཱི་ཝ་ར་ཎ་བི་སྐམྦྷི་ནི་བོ་དྷི་སཏྭ་ཡ། ༀ་ཏུ་རུ་ཏུ་རུ་མ་མ་སརྦ་ཨཱ་བ་ར་ཎ་བི་ཤྭ་དྷ་ནི། སརྦ་ཏ་ཐཱ་ག་ཏ་ཨཱ་ཡུཪྦ་ལཱ་ནི། བི་པུ་ལ་ནིརྨ་ལེ། སརྦ་སིདྡྷི་ན་མ་སྐྲྀ་ཏྭཱ། བ་ར་བ་ར། སརྦ་སཏྭ་ཨ་ཝ་ལོ་ཀི་ནི། ༀ་སརྦ་ནི་པཱ་ར་ཎ། བིསྐམྦི་ནི། མ་མ་སརྦ་པཱ་པཾ་བི་ཤོ་དྷ་ནི་ཀུ་རུ་སྭཱ་ཧཱ། ཞེས་སྒྲིབ་སེལ་གྱིའོ། །ༀ་ཛི་ཛི་ཛི་ནཾ་ག་ཏི་ཡ་ཏི་དེ་ནི་སྭཱ་ཧཱ། ཨ་རོ་ལིཀ྄ །སྤྱན་རས་གཟིགས་ཀྱིའོ། །ན་མོ་རཏྣ་ཏྲ་ཡཱ་ཡ་སྱ། ན་མཥྩཎྜ་བཛྲ་པཱ་ཎི་སྱ། མ་ཧཱ་ཡཀྵ་སེ་ན་པ་ཏ་སྱ། ན་མཥྩཎྜ་པྲ་མརྡྡྷ་ནཱ་ཡ་སྭཱ་ཧཱ། ཧི་རི་མི་རི་ཏི་རི་ཎི་སྭཱ་ཧཱ། བཛྲ་དྷྲྀཀ྄ །ཕྱག་རྡོར་གྱིའོ། །ན་མོ་བཛྲ་པཱ་ཎི་སྱ། ༀ་ལོ་ལ་ཙཀྲཱ་ཡ་སྭཱ་ཧཱ། ཁྱབ་འཇུག་གིའོ། །ༀ་པ་ཤུ་པ་ཏི་ནཱི་ལ་ཀཎྛ་ཨུ་མ་བྲཱི་ཡ་སྭཱ་ཧཱ། དྲག་པོའོ། །ན་མོ་བཛྲ་པཱ་ཎི་སྱ། ༀ་བྷྲ་མ་ར་ཏི་ནི་སྭཱ་ཧཱ། ཞེས་རང་རང་གི་སྔགས་ཚན་བདུན་རེ་བརྗོད་པའི་མོད་ལ་ལྷ་སོ་སོ་ཡིད་ཀྱིས་བསྒོམ་སྟེགས་ལ་གདབ་པ་ནི། ནང་གི་དཀྱིལ་འཁོར་ཤར་ཕྱོགས་ཆའི། །དབུས་སུ་གདན་སེར་གྲུ་བཞི་པ། །དེ་སྟེང་སེང་ཁྲི་པད་ཟླ་ལ། །བཅོམ་ལྡན་རྒྱལ་བ་ཤཱཀྱ་ཐུབ། །བཙོ་མ་གསེར་མདོག་མཚན་དཔེས་བརྒྱན། །ཆོས་ཀྱི་འཁོར་ལོའི་ཕྱག་རྒྱ་ཅན། །རྡོ་རྗེའི་སྐྱིལ་མོ་ཀྲུང་གིས་བཞུགས། །བཅོམ་ལྡན་འདས་ཀྱི་གཡོན་ཕྱོགས་སུ། །སྒྲིབ་སེལ་གསེར་མདོག་ཐོར་ཚུགས་ཅན། །ཕྱག་ན་ཡིད་བཞིན་ནོར་བུ་བསྣམས། །གཡས་ཕྱོགས་སྤྱན་རས་གཟིགས་དབང་དཀར། །གཡས་པ་མཆོག་སྦྱིན་གཡོན་པདྨ། །སྒྲིབ་སེལ་གཡོན་ཕྱོགས་གསང་བདག་སྔོ། །གཡས་པས་རྔ་ཡབ་གཡོན་རྡོ་རྗེ། །གསུམ་ཀ་སྟན་ཁྲི་ཟླུམ་པོའི་སྟེང་། །པད་ཟླའི་གདན་ལ་སེམས་སྐྱིལ་ཅན། །དེ་དག་མདུན་ཕྱོགས་ནུབ་ཀྱི་ཆར། །གདན་གྱི་དཀྱིལ་འཁོར་ཟླུམ་པོའི་སྟེང་། །མཁའ་ལྡིང་གདན་ལ་ཁྱབ་འཇུག་ནག །ལག་བཞི་གཡས་གཉིས་འཁོར་ལོ་དུང་། །གཡོན་གཉིས་བེ་ཅོན་རལ་གྲི་ཐོགས། །དེ་ཡི་གཡོན་དུ་དྲག་པོ་དཀར། །མགྲིན་སྔོན་ལག་གཡས་མདུང་རྩེ་གསུམ། །གཡོན་ན་རལ་གྲི་ཁྱུ་མཆོག་ཞོན། །དེ་ཡི་མདུན་དུ་ཚོགས་བདག་སྔོ། །གཡས་པ་རྡོ་རྗེ་གཡོན་སྡིགས་མཛུབ། །མདུན་ཕྱིར་རྒུ་ཞིང་དགྱེ་བའི་ཚུལ། །དེ་ནས་སྣམ་བུ་ལ་བཀོད་པ་དང་ཕྱི་ནས་བཤམས་པའི་མཆོད་རྫས་རྣམས་ལ་བསང་ཆུ་གཏོར་ཞིང་། ལས་སྔགས་གཉིས་དང་། ཛི་ན་ཛིཀ྄ །ཅེས་བརྗོད་པས་བགེགས་བསལ། སྭ་བྷཱ་ཝས་སྦྱང་ལ། སྟོང་པའི་ངང་ལས་ༀ་ལས་རིན་པོ་ཆེའི་སྣོད་དུ་ༀ་ཡིག་ཞུ་བ་ལས་བྱུང་བའི་མཆོད་རྫས་རྣམས་ཀུན་ཏུ་བཟང་པོའི་སྤྲིན་ཕུང་བཟང་ཞིང་རྒྱ་ཆེ་བ་ནམ་མཁའི་མཐའ་ཀླས་པར་གྱུར། ༀ་སརྦ་བིདྤཱུ་ར་པཱུ་ར་སུ་ར་སུ་ར་ཨཱ་བརྟ་ཡ་ཨ་བརྟ་ཡ་ཧོཿ ༀ་བཛྲ་སྥ་ར་ཎ་ཁཾ། ཞེས་པའི་སྔགས་རྒྱ་དང་། ༀ་ཏེ་ཛཿཏེ་ཛཿས་ན་སིདྡྷི་སཱ་དྷ་ཡ་ཧཱུྃ་ཕཊ་ཀྱི་སྔགས་རྒྱས། མཆོད་རྫས་རྣམས་ཀྱི་གཟི་བྱིན་བསྐྱེད་པར་གྱུར། །བདུད་རྩི་ཐབས་སྦྱོར་གྱི་སྔགས་དང་། ཛི་ན་ཛིཀ྄་གིས་བརྟན་པར་བྱའོ། །དེ་ནས་སྤྱན་དྲངས་པའི་ཕྱག་རྒྱས་མཆོད་ཡོན་སྦྲེང་བཞིན་དུ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདིར། །བདག་གི་མཆོད་ཡོན་འདི་བཞེས་ལ། །མཆོད་པས་བདག་ལ་དགྱེས་པར་མཛད། །བྷྲཱུྂ་ༀ་མུ་ནེ་མུ་ནེ་མ་ཧཱ་མུ་ནེ་ཤཱཀྱ་མུ་ནེ་ཡེ་ཨེ་ཧྱེ་ཧི་ཨརྒྷཾ་པྲ་ཏཱིཙྪ་སྭཱ་ཧཱ། ལས་རྡོར་གྱི་སྤྱི་བོའི་ཐད་ནས་ཤར་གྱི་བཟེད་ཞལ་དུ་ཕུལ་ཏེ། བྷྲཱུྂ། ༀ་སརྦ་ནཱི་པ་ར་ཎ་བིསྐམྦྷི་ནི་ཨེ་ཧྱེ་ཧི་ཨརྒྷཾ་པྲ་ཏཱིཙྪ་སྭཱ་ཧཱས་སྤྱི་བོའི་ཐད་ནས་ཤར་དུ། ༀ་ཨ་མི་ཏོདྦྷ་ཝ་ཨུདྦྷ་ཝ་ཧཱུྃ་ཕཊ། ༀ་ཛི་ཛི་ཛི་ནཾ་ག་ཏི་ཡ་ཏི་དེ་ནི་ཨེ་ཧྱེ་ཧི་ཨརྒྷཾ་པྲ་ཏཱིཙྪ་སྭཱ་ཧཱས་སྙིང་གའི་ཐད་ནས་བྱང་དུ། ན་མོ་རཏྣ་ཏྲ་ཡཱ་ཡ། ན་མཥྩཎྜ་བཛྲ་པཱ་ཎ་ཡ། མ་ཧཱ་ཡཀྵ་སེ་ན་པ་ཏ་ཡེ། ༀ་སུམྦྷ་ནི་སོགས་རིག་པའི་རྒྱལ་པོ་ཧཱུྃ་བཞིའི་མཐར། ན་མོ་རཏྣ་ཏྲ་ཡཱ་ཡ་སྱ། ན་མཥྩཎྜ་བཛྲ་པཱ་ཎི་སྱ། མ་ཧཱ་ཡཀྵ་སེ་ནཱ་པ་ཏ་སྱ། ན་མཥྩཎྜ་པྲ་མརྡྷ་ན་ཡ་སྭཱ་ཧཱ། ཧི་རི་མི་རི་ཏི་རི་ནི་ཨེ་ཧྱེ་ཧི་ཨརྒྷཾ་པྲ་ཏཱིཙྪ་སྭཱ་ཧཱས་ལྟེ་བའི་ཐད་ནས་ལྷོར། ཧཱུྃ་བཞི་པ་དང་། ན་མོ་བཛྲ་པཱ་ཎི་སྱ། ༀ་ལོ་ལ་ཙཀྲཱ་ཡ་ཨེ་ཧྱེ་ཧི་ཨརྒྷཾ་པྲ་ཏཱིཙྪ་སྭཱ་ཧཱས་ནུབ་ཏུ། ཧཱུྃ་བཞི་པ་དང་། དང་། ༀ་པ་ཤུ་པ་ཏི་ནཱི་ལ་ཀཎྛ་ཨུ་མ་བྲཱི་ཡ་ཨེ་ཧྱེ་ཧི་ཨརྒྷཾ་པྲ་ཏིཙྪ་སྭཱ་ཧཱས་ནུབ་ཏུ། ཧཱུྃ་བཞི་པ་དང་། ན་མོ་བཛྲ་པཱ་ཎི་སྱ། ༀ་བྷྲ་མ་ར་ཏི་ནི་ཨེ་ཧྱེ་ཧི་ཨརྒྷཾ་པྲ་ཏཱིཙྪ་སྭཱ་ཧཱས་ནུབ་ཀྱི་སྟེགས་བུར་དབུལ་ལོ། །དེ་ནས། བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་ནས་ཀྱང་། །འདི་ཉིད་དུ་ནི་བཞུགས་སུ་གསོལ། །ༀ་ག་ག་ན་ས་མ་ཡེ་ཧཱུྃ། ཡང་རྐང་པའི་མཆོད་ཡོན་གྱི་དོད་དུ། བདག་གི་ཞབས་བསིལ་ཞེས་བསྒྱུར་ཏེ། ༀ་ག་ག་ན་ས་མ་ཡེ་ཧཱུྃ། ཞབས་བསིལ་བར་བསམ། དེ་ནས། ༀ་བཛྲ་ཨ་ས་ན་ཧཱུྃ་ཕཊ། ཅེས་རྡོ་རྗེའི་འདུག་སྟངས་ཀྱི་སྔགས་རྒྱ་དང་། ༀ་ཀ་མ་ལ་ཡེ་སྭཱ་ཧཱ། ཞེས་པདྨའི་འདུག་སྟངས་ཀྱིི་སྔགས་རྒྱ་དང་ཐལ་མོ་སྦྱར་བ་ཁ་བྱེ་བ། མཆན། ༀ་བཛྲ་ཀ་ཧཱུཾ་ཕཊ། ཅེས་དཔའ་བོའི་འདུག་སྟངས་ཀྱི་སྔགས་རྒྱས། པདྨའི་ཕྱག་རྒྱ་དེ་ཉིད་ལས་སོར་མོ་དབུས་མ་གཉིས་གཅིག་ཏུ་སྦྱར་བ། མཆན། གདན་ཕུལ་ལ། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་འབུལ་ན། །དེ་སྲིད་བཅོམ་ལྡན་བཞུགས་སུ་གསོལ། །དེ་ནས། ༀ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་བཛྲ་པྲ་ཎ་མེ་ན་སརྦ་ཏ་ཐཱ་ཏ་ག་བཛྲ་བནྡྷ་ནཾ་ཀ་རོ་མི། ཞེས་པས་ཕྱག་བྱ། ཇི་ལྟར་བལྟམས་པ་ཙམ་གྱིས་ནི། །སོགས་ཀྱི་མཇུག་ཏུ། ༀ་སརྦ་དཱེ་བ་ཏཱ་ཨཱ་ཙིནྟི་ཨ་མྲྀ་ཏ་སྭཱ་ཧཱ། བཏགས་པས་ཁྲུས་གསོལ། དེ་ནས་དེ་ལ་ཁ་དོག་སོགས་ཀྱིས་གོས་རྒྱན། རབ་འབྱམས་རྒྱ་མཚོ་དཔག་མེད་ན། །དྲི་ཆབ༴ མེ་ཏོག༴ བདུག་སྤོས༴ ཞལ་ཟས་ཇི་སྙེད་ཡོད་པ་དང་། །ཞེས་སྦྱར་ལ། ༀ་སརྦ་ཏ་ཐཱ་ག་ཏ་ས་པ་རི་ཝཱ་རའི་མཐར།'ཨཱ་ཧ་རའི་སྔགས་དང་རང་རང་གི་ཕྱག་རྒྱས་འབུལ། རབ་འབྱམས་རྒྱ་མཚོ་དཔག་མེད་ན། །ཁུར་བ་ཤིང་ཐོག་སྲན་ཚོད་དང་། །འོ་ཐུག་ཇི་སྙེད་ཡོད་པ་དང་། །ཞེས་པའི་མཐར། ཨཱ་ཧ་རའི་སྔགས་དང་ཞལ་ཟས་ཀྱི་རྒྱས་འབུལ། སྣང་གསལ་ཇི་སྙེད་སོགས་དང་། ཨཱ་ལོ་ཀཱ་ཡའི་སྔགས་རྒྱས་མར་མེ། དེ་ལས་གཞན་ཡང་སོགས་དང་། ༀ་བཛྲ་ཤཔྡ་པྲ་ཏཱིཙྪ་སྭཱ་ཧཱས་རོལ་མོ་དབུལ། འདིར་མདོར་བསྡུས་པ་ཙམ་སྟེ། རྒྱས་པར་གཙོ་བོ་ལ་ཚར་གསུམ། འཁོར་འདས་པ་གསུམ་ལ་གཉིས་རེ། འཇིག་རྟེན་པ་གསུམ་ལ་ཚར་རེ་རེ་འབུལ་ཚུལ་འབྱུང་སྟེ་སྤྲོ་ན་དཀྱིལ་ཆོག་ཏུ་བལྟ་བར་བྱའོ། །དེ་ནས་དཀྱིལ་འཁོར་གྱི་ནང་དུ་བཤམས་པའི་གཏོར་མ་རྣམས། བིཥྞུ། རུ་དྲ། ག་ཎ་རྣམས་ཀྱི་མཐར་ནམ་མཁའ་མཛོད་ཀྱི་སྔགས་བཏགས་པ་གསུམ་གསུམ་གྱིས་འབུལ། དེ་ནས་ཕྱི་རོལ་དུ་ཆ་གསུམ་གཏོར་མ་བཏང་། ཉེ་རེག་བྱས་ནས་ནང་དུ་ཞུགས། སྤོས་ཀྱིས་བདུག །གདན་ལ་བཞུགས་ཏེ། ༀ་ཨརྒྷཾ་པྲ་ཏཱིཙྪ་སྭཱ་ཧཱས་མཆོད་ཡོན། ཨཱ་ཧ་རའི་སྔགས་རྒྱས་སྤོས་དང་ལྷ་བཤོས་ཕུལ། ལྷ་ཡི་གཙོ་བོ་རྣམས་ལ་ནི། །རས་ནི་ཟུང་རེ་ཟུང་རེ་དབུལ། །སེམས་དཔའ་ཆེན་པོ་ཕལ་རྣམས་ལ། །ཡ་རེ་ཡང་ནི་དབུལ་བར་བགྱི། །ༀ་བཛྲ་ཝསྟྲ་ཡེ་སྭཱ་ཧཱས་གོས་ཕུལ། དེ་ནས་བཟླས་པ་ནི། ན་མཿསཔྟ་ནཱཾ། ཞེས་པ་ནས། ཧུ་རུ་ཧུ་རུ་སྭཱ་ཧཱའི་བར་གཟུངས་རིང་དང་། ༀ་སརྦ་ཏ་ཐཱ་ག་ཏ་མ་ལ་བི་ཤྭ་དྷ་ནི། རུ་དྷ་བ་ལེ་པྲ་ཏི་སཾསྐཱ་ཱར། ཏ་ཐཱ་ག་ཏ་དྷཱ་ཏུ་དྷ་ར། དྷ་ར་དྷ་ར། སནྡྷ་ར་སནྡྷ་ར། སརྦ་ཏ་ཐཱ་ག་ཏ་ཨ་དྷིཥྛ་ན་ཨ་དྷིཥྛི་ཏེ་སྭཱ་ཧཱ། ཞེས་སྙིང་པོ་སྟེ་གཙོ་བོ་ལ་སྔགས་གཉིས་བརྒྱ་རྩ་རེ། འཁོར་འདས་པ་གསུམ་དང་། འཇིག་རྟེན་པ་གསུམ་ལ་སོ་སོའི་སྔགས་བདུན་ཙམ་རེ། ཛི་ན་ཛིཀ྄ །ཨ་རོ་ལིཀ྄ །བཛྲ་དྷྲིཀ྄ །གསུམ་བརྒྱ་རྩ་རེ་བཟླའོ། །དེ་ནས་མེ་ཏོག་སོགས་བཞིས་མཆོད། ཞྭ་གྱོན་རྡོར་དྲིལ་སྤོས་དང་བཅས་པས། ཤཱཀྱ་སེང་གེ་བཅོམ་ལྡན་འདས། །རིགས་སྔགས་རྒྱལ་ལ་ཕྱག་འཚལ་ལོ། །སྦྱིན་བདག་རྣམས་ལ་བརྩེ་བ་དང་། །ཁྱེད་རྣམས་ལའང་མཆོད་པའི་ཕྱིར། །ནངས་པར་དཀྱིལ་འཁོར་བྲི་བར་འཚལ། །བདག་དང་སྦྱིན་བདག་བཅས་པ་ལ། །ཐུགས་བརྩེ་བར་ནི་དགོངས་ནས་སུ། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབ་པར་མཛོད་དུ་གསོལ། །ཞེས་ལ ན་གསུམ། དེ་ནས་བསྟོད་པ་ནི། མགོན་པོ་ཐུགས་རྗེ་སོགས་གསུམ་གྱི་མཇུག་ཏུ། སངས་རྒྱས་ཀུན་གྱིས་རབ་ཏུ་བསྔགས། །ཡོན་ཏན་དམ་པ་ཀུན་བསགས་པ། །སྤྱན་རས་གཟིགས་ཞེས་མཚན་གསོལ་བའི། །རྟག་པར་བརྩེ་ལ་ཕྱག་འཚལ་ལོ། །སྟོབས་པོ་ཆེ་ལ་དྲགས་ཤུལ་ལྡན། །རིགས་སྔགས་རྒྱལ་པོ་དགེ་བ་ཅན། །གདུལ་དཀའ་པོ་དག་འདུལ་བ་པོ། །རྡོ་རྗེ་འཛིན་ལ་ཕྱག་འཚལ་ལོ། །ལྷ་ཡི་དབང་པོ་ཉེ་དབང་པོ། །སྟོབས་ལྡན་ས་གསུམ་དབང་བྱེད་ཀྱང་། །འཇུག་པ་བཅུ་ཡི་རྣམ་པར་རོལ། །ལྷ་ཆེན་སྲེད་མེད་བུ་ལ་བསྟོད། །མཐུ་ཆེན་སྲིད་པ་ཀུན་གྱིས་གཙོ། །སྔོན་སངས་རྒྱས་ཀྱང་འཇིག་རྟེན་འདིར། །ཐབས་མཁས་མུ་སྟེགས་མཐུ་ཡིས་འདུལ། །ལྷ་ཆེན་དྲག་པོ་ཁྱོད་ལ་བསྟོད། །ཞི་ཞིང་རྣམ་པར་སྒེག་པའི་ལུས། །ཡིད་བཞིན་རིན་ཆེན་རྒྱན་འཆང་ཞིང་། །བདེ་གཤེགས་བསྟན་ལ་དད་ཅིང་གུས། །ཚོགས་ཞེས་གྲགས་པ་ཁྱོད་ལ་བསྟོད། །བསྟོད་པར་འོས་པ་སོགས་དང་། ན་མཿསརྦ་བུདྡྷ་བོ་དྷི་སཏྭ་ནཱཾ། སརྦ་ཏྲ་སཾ་ཀུ་རུ་མི་ཏ་ཨ་བྷི་ཛྙཱ་ར་ཤི་ནི་ན་མཿསྟུ་ཏེ་སྭཱ་ཧཱ། དེ་ནས་གཤེགས་སུ་གསོལ་བའི་རྒྱ་བཅིངས་ཏེ། ཛི་ན་ཛིཀ྄་གཙྪ། སརྦ་ནཱི་བ་ར་ཎ་བིསྐམྦྷི་ནི་གཙྪ། ཨ་རོ་ལིཀྲ་གཙྪ། བཛྲ་དྷྲིཀ྄་གཙྪ། བིཥྞུ། རུ་དྲ། ག་ཎ་རེ་རེའི་མཐར་གཙྪ། སོ་སོའི་མཐར། ཨརྒྷཾ་པྲ་ཏཱིཙྪ་སྭཱ་ཧཱ། སྤྱན་དྲངས་པའི་ལྷ་གཞལ་ཡས་ཁང་དང་བཅས་པ་གཤེགས། སྔགས་ཀྱིས་སྤྲུལ་པའི་ལྷ་དམ་ཚིག་པ་རྣམས་བདག་ལ་རིམ་གྱིས་ཐིམ། བདག་གི་ལྷའི་སྐུ་གཟུགས་ཟླ་བའི་སྟེང་གི་ཡི་གེ་ལ་ཐིམ། དེ་ཟླ་བ་ལ། དེ་རྣམ་སྨིན་གྱི་ལུས་ལ་ཐིམ་པར་གྱུར། ཅེས་བདག་བསྐྱེད་བསྡུས་ཏེ་བཀྲ་ཤིས་བརྗོད། དེའི་ཕྱིར་ཉིན་ཉི་མ་ཤར་བ་དང་། ཁྲུས་ནས་བཟླས་པའི་བར་བྱས་ཏེ་ཐིག་སྐུད་དཀར། དམར། སེར། ལྗང་། ནག་པོ་ལྔ་ལས་སྔགས་གཉིས་ཀྱིས་བསང་གཏོར་བྱས་ལ། ལས་སྔགས་གཉིས་དང་། བྷྲཱུྂ་བཟླས་པས་དང་པོ་སོ་སོར་སྒྲིལ། དེ་ནས་གཅིག་ཏུ་བསྒྲིལ་ལས་སྔགས་བརྒྱ་བཟླས་ཏེ། མེ་ཏོག་སོགས་ཀྱིས་མཆོད། མདུན་གྱི་ནམ་མཁར་དཀོན་མཆོག་གསུམ་དད་དཀྱིལ་འཁོར་གྱི་ལྷ་ཐམས་ཅད་བསམ་ནས། མེ་ཏོག་སོགས་ཀྱིས་མཆོད། སློབ་དཔོན་ལྷོར་གནས་པའི་ཐིག་སྐུད་བཟུང་ནས་བྱང་དུ་གནས་པའི་གྲོགས་ལ་ཐིག་སྣ་གཏད། དེ་ནས་གཡས་སྐོར་གྱིས། ཤར་དང་ལྷོར་གནས་ཚངས་ཐིག་གཉིས། །མེར་གནས་ཤར་ལྷོའི་རྩ་ཐིག་གཉིས། །རླུང་གནས་ནུབ་བྱང་རྩ་ཐིག་གཉིས། །མེ་དང་བདེན་བྲལ་གནས་ཟུར་ཐིག །གཉིས་གདབ་སློབ་དཔོན་འདུག་ཕྱོགས་ཏེ། །སློབ་མ་དེ་ལས་ལྡོག་པའོ། །དེའང་དང་པོར་ནམ་མཁའ་དང་། དེ་ནས་ས་ལ་གདབ། དེ་ནས་ཤེས་རབ་སྙིང་པོ་བཟླས་པ་དེར། དཀྱིལ་འཁོར་གྱི་ལྷ་ཚོགས་ཐམས་ཅད་ནམ་མཁར་བསམ་ནས། ཡིད་ཀྱི་ནུས་པས་ཡན་ལག་བདུན་པ་བྱས་ནས་དཀྱིལ་འཁོར་བྲིས་ཏེ། ཚོན་རྣམས་ལས་སྔགས་གཉིས་བསང་། ཏེ་ཛའི་སྔགས་རྒྱས་གཟི་བྱིན་བསྐྱེད། ལས་སྔགས་བརྒྱ་བཟླས། དེ་ནས་ལྷ་གནས་ཀྱི་ས་གཞི་ལ་བ་བྱུང་ལྔ་དང་དྲིས་བཀུ། ཧཱུྃ་ཞེས་ཚོན་ལ་དྲི་ཆུའི་བསང་གཏོར་བྱས་ལ། ཕྱོགས་ཚོན་དབུས་དཀར། ཤར་དམར། ལྷོ་སེར། ནུབ་ལྗང་། བྱང་ནག །རྩིག་པ་ནང་ནས་དཀར་དམར་སེར་ལྗང་ནག་པོ། གཞན་རྣམས་སྤྱི་དང་མཐུན། སྒོ་གཅིག་ནུབ་ཏུ་བསྟན། གཙོ་བོའི་གནས་སུ་གདན་སེར་པོ་གྲུ་བཞི་པ་ལ་གནས་པའི་པད་ཟླར་འཁོར་ལོ་རྩིབས་བརྒྱད་པ་འོད་འཕྲེང་དང་བཅས། འདས་པའི་འཁོར་གསུམ་སོ་སོའི་གནས་སུ་གདན་ཁྲི་ཟླུམ་པོ་དང་པད་ཟླར། སྒྲིབ་སེལ་ལ་ནོར་བུ། ཕྱག་རྡོར་ལ་རྡོ་རྗེ་སྔོན་པོ། སྤྱན་རས་གཟིགས་ལ་པདྨ། འཇིག་རྟེན་པའི་འཁོར་གསུམ་ལ་གདན་ཟླུམ་པོ་རེའི་སྟེང་དུ། ཕྱག་རྡོར་གྱི་མདུན་དུ་ཁྱབ་འཇུག་གི་དུང་ནག་པོ། །འཁོར་ལོའི་ཐད་དུ་དྲག་པོ་རྩེ་གསུམ། དེའི་གཡོན་དུ་ཚོགས་བདག་གི་གཡུང་དྲུང་གྲུ་བཞི་གཡས་བསྐོར་རེ། མཚན་མ་གསུམ་པོ་མགོ་ནུབ་བསྟན་ནོ། །དེ་ནས་སྲོག་ཤིང་ཚད་ལྡན་འདུ་བྱས་ལ། དེའི་བྱ་སྤྱོད་ཀྱི་གཟུངས་དཀྲི་བའི་ཐད་ཀར། ཕྱོགས་བཞིར་གཟུངས་ཁུང་བྲུས་ལ། སྲོང་ཤིང་གི་སྔགས། ༀ་སརྦ་ཏ་ཐཱ་ག་ཏ་བི་པུ་ལ་ཡཥྚི་མ་ཎི་ཀན་ཀ་རཱ་ཛ་ཏ་བི་བུ་ཥི་ཏ་ཨཥྚི། དྷུ་རུ་དྷུ་རུ། ས་མནྟེ་བི་ལོ་ཀི་ཏེ། ས་ར་ས་ར་མ་མ་སརྦ་པཱ་པཾ་བི་ཤྭ་དྷ་ནི། སཾ་བྷ་དྷ་ནེ་པྲ་པ་ར་ཨཥྚི་པ་རི་མ་ཎི་དུཥྚ་ཧུ་རུ་ཙེ་ར་མ་ལ་བི་ཤུདྡྷེ་ཧཱུྃ་ཧཱུྃ་སྭཱ་ཧཱ། ཞེས་པ་དགུ་བཅུ་རྩ་དགུ་དང་། ན་མོ་བྷ་ག་བ་ཏེ། ན་བ་ན་བ་སོགས་སྒྲིབ་སེལ་གྱི་གཟུངས་དགུ་བཅུ་རྩ་དགུ་རེ་བྲིས་ཏེ་ཕྱོགས་རེར་གཞུག །སྲོག་ཤིང་གི་རྩེ་མོ་བྲུས་པའི་ནང་དུ། འོད་ཟེར་དྲི་མེད་ཀྱི་གཟུངས་རིལ་པོ་དང་། གཙུག་ཏོར་རྣམ་རྒྱལ་གྱི་གཟུངས། རིང་བསྲེལ་སོགས་བྱིན་རྟེན་གཞུག །སྲོག་ཤིང་གི་རྩ་བ་བྲུས་པར་འོད་ཟེར་དྲི་མེད་ཀྱི་སྙིང་པོ་དང་རྟེན་འབྲེལ་སྙིང་པོ་གཞུག །གཞན་ཡང་གཟུངས་རྣམས་ནས་ཇི་ལྟར་འོས་པར་སོ་སོའི་གོ་རིམ་བཞིན་མ་ནོར་བ་དཀྲིས་ཏེ། སྲོག་ཤིང་ལ་སྤྱང་ཁྲུས་རབ་གནས་བྱས་ཏེ་དཀྱིལ་འཁོར་གྱི་དབུས་སུ་བཙུགས་ལ་ཡ་ཡོ་མི་ལོང་བར་བྱས། དཀྱིལ་འཁོར་གྱི་སྣམ་བུའི་གྲྭ་བཞིར་དུང་ཞལ་རེ་རེ། ཤར་གྱི་སྣམ་བུའི་ཁར་སྤོས་སྣོད་གསུམ། ལྷོའི་སྣམ་བུར་དྲིའི་དུང་ཞལ། མེ་ཏོག་དང་། འབྲས་ཀྱིས་བཀང་པའི་སྣོད། ནུབ་ཀྱི་སྣམ་བུར་ཏིལ་ནག་དང་མ་ཤ་དང་འབྲས་བསྲེས་ནས་བཙོས་པའི་ཐུག་པ་དང་། ཟས་དཀར་གསུམ་རྣམས་བུམ་པར་བླུགས་པ། ཤིང་ཐོག་སྣ་ཚོགས་ཀྱི་འབྲས་བུ་དགུ་བཅུ་རྩ་དགུ་རྣམས་བཀོད། བྱང་གི་སྣམ་བུར་ཁ་ཟས་སྣ་ཚོགས་ཀྱི་གཏོར་མ་དང་། དྲི་ཆུས་བཀང་བའི་བུམ་པ་མགུལ་ཆིངས་ཁ་རྒྱན་དང་བཅས་པ། སྤོས་དང་། མེ་ཏོག་རྣམས་བཞག །ནུབ་བྱང་གི་གྲྭར་དྲིའི་དུང་ཆོས་ཀྱི་རྒྱབ་ཏུ་ཤིང་ཟླ་གམ་ལ་ཚོགས་བདག་གླང་ཞལ་དགྲ་སྟྭ་དང་ལ་ཕུག་འཛིན་པ་བྲིས་པའི་སྤྱི་བོའི་སྟེང་དུ་མར་མེ་བཞག །དཀྱིལ་འཁོར་གྱི་མཐར་དྲི་དང་སྣུམ་བསྲེས་པས་བྱུགས། ཕྱོགས་རེར་མཆོད་པ་ཚར་རེའམ། མ་འབྱོར་ན་ནུབ་ནས་བརྩམ་སྟེ། མཆོད་ཡོན། དྲི་ཆབ། མེ་ཏོག །སྤོས། ཞལ་ཟས། ཁུར་བ་སྣ་ཚོགས། ཤིང་ཐོག་སྣ་ཚོགས། སྲན་ཚོད། འོ་མའི་ཐུག་པ། མར་མེ་རྣམས་དང་། ཕྱོགས་རེར་སྤོས། མར་མེ། ཞལ་ཟས་རྣམས་རེ་རེ། ཕྱོགས་བཞི་མཆོད་ཡོན་གྱི་སྟེགས་བུ་ལ་རྫས་བདུན་དང་ལྡན་པའི་མཆོད་ཡོན་བཟེད་ཞལ་དང་བཅས་པ། ཕྱོགས་མཚམས་བརྒྱད་དུ་ཏོག་རྨ་བྱའི་མདོངས་ཀྱིས་བྱས་པའི་རྒྱན་མཚན་ཤར་དཀར། མེར་ལེ་བརྒན། ལྷོར་ནག །སྲིན་དུད་ཁ། ཆུར་དམར། རླུང་དུ་ཁྲ་བོ། བྱང་སེར། བྱང་ཤར་དུ་ལྗང་སེར་རྣམས་དང་། བཀྲ་ཤིས་པའི་རྫས་བརྒྱད་རྣམས་ཀྱིས་བརྒྱན། ཕྱི་ནས་རས་ཀྱིས་ཟླུམ་པོར་བསྐོར། དེ་ནས་ཁྲུས་དང་། ཉེ་རེག་བྱས་ནས། རིགས་ཀྱི་ལྷ་ལ་ཕྱག་བྱ། གཙོ་བོའི་སྙིང་པོ་ཅུང་ཟད་བཟླས་ནས་མཚན་མ་བརྟག །ངན་ན་སྦྱིན་སྲེག་བྱ། སྔར་བསྙེན་པའི་རྗེས་སུ་བཤད་པར་ལྟར། བདག་མདུན་ར་དྲྭ་ཕྱོགས་བཅིངས་པ་དང་བཅས་པ་རྣམས་བསྡུས་ལ་བཀྲ་ཤིས་བྱའོ། །དེ་ནས་སྒྲུབ་མཆོད་དངོས་གཞི་ནི། ནངས་པར་སྔ་བར་ཁྲུས་བྱས། གསོ་སྦྱོང་བླངས་ཏེ། ཁྲོ་བོ་མནོལ་བ་མེད་པའི་སྔགས་རྒྱས་བདག་བསྲུང་བ་ནས། རས་ཀྱི་ཟེའུ་ཁ་བཅིངས་པའི་བར་བསྙེན་པ་ལྟར་དང་། དེ་ནས་རྣལ་འབྱོར་དངོས་གཞི་ནི། བདག་གིས་བསྒྲལ་དཀའི་སྲིད་མཚོ་ལས། །ཞེས་པ་ནས་སྒྲིབ་སེལ་གྱི་བདག་བསྐྱེད་མདུན་བསྐྱེད་ཀྱི། བླ་བྲེ་ལ་སོགས་པས་བརྒྱན་པར་གྱུར། །ཅེས་པའི་བར་སྔར་ལྟར་བྱས་ལ། དེ་ནས་ལྷ་སོ་སོའི་སྔགས་འདི་ཚར་བདུན་མི་བརྗོད་པར་ཚར་རེ་རེ་བརྗོད་པས་ལྷ་བསྒོམ་པ་ནས་ཇི་སྲིད་བཟླས་པའི་བར་ལྷ་སྟ་གོན་བཞིན་བྱ། དེ་ནས་ལྷ་རང་རང་གི་སྔགས་ལན་གསུམ་གསུམ་བཟླ་ཞིང་སོ་སོའི་ཕྱག་རྒྱ་འཆིང་སྟེ། ལག་གཉིས་ཕན་ཚུན་ཁུ་ཚུར་བཅངས་ནས་མཐེ་བོང་གཉིས་བརྟན་པས་གཙོ་བོའི་འོ། །ཐལ་མོ་བརྐྱང་བ་སྦྱར་ནས་ཅུང་ཟད་རྩེ་བསྐུམ་པ་སྒྲིབ་སེལ། གཙོ་བོའི་རྒྱ་ལས་མཐེ་བོང་གཡས་གཅིག་པུ་བརྟན་པ་སྤྱན་རས་གཟིགས། ལག་གཉིས་སོ་སོར་ཕན་ཚུན་བསྔམས་པ་ལས་གུང་མོ་གཉིས་སྦྱར་ཏེ་བརྐྱང་བ་ཕྱག་རྡོར། ཐལ་མོ་ཁོང་སྟོང་ལས་མཐེ་བོང་གཉིས་བཏུད་ནས་ཅུང་ཟད་བསྟོད་པ་ཁྱབ་འཇུག །གཡས་པའི་མཐེ་བོས་མཐེའུ་ཆུང་མནན་ནས་སོར་མ་ལྷག་གསུམ་བརྐྱང་པའི་རྩེ་མཐུར་དུ་བསྟན་པ་དྲག་པོ། ལག་གཉིས་བཀན་ཏེ་མཛུབ་སྲིན་བསྣོལ་བར་དཀྲིས་ལ། མཐེ་བོང་གཉིས་ལག་པའི་ནང་དུ་བཀུག་ནས་སོར་མོ་ལྷག་མ་རྣམས་ཀྱང་ལག་སྟེང་དུ་བཀུག་པ་ཚོགས་བདག་གིའོ། །དེ་ནས་རིགས་གསུམ་གྱི་སྔགས། ཛི་ན་ཛིཀ྄ །ཨ་རོ་ལིཀ྄ །བཛྲ་དྷྲིཀ྄ །གསུམ་ཕྱག་རྒྱ་རིམ་པར་ཐལ་མོ་བཀན་པ་ལས་མཛུབ་མོ་རྩེ་བཀུག་པ་དང་། ཐལ་མོ་སྦྱར་བ་པདྨ་བ་ཕྱེ་བའི་ཚུལ་དང་། ཐལ་མོ་ལྡོག་སྟེ་སྦྱར་བ་མཐེ་བོང་དང་མཐེ་ཆུང་གཉིས་སྦྱར་བའོ། །ཨཱ་ཧ་ར་སོགས་སྤོས་ཀྱི་ཕྱག་རྒྱ་སྤོས་ཕུལ་ལ། དེ་ནས། མགོན་པོ་ཐུགས་རྗེ་སོགས་ཀྱི་མཐར། སངས་རྒྱས་ཀུན་གྱིས་རབ་ཏུ་བསྔགས། །ཡོན་ཏན་དམ་པ་ཀུན་བསགས་པ། །སྤྱན་རས་གཟིགས་ཞེས་མཚན་གསོལ་བའི། །རྟག་པར་བརྩེ་ལ་ཕྱག་འཚལ་ལོ། །སྟོབས་པོ་ཆེ་ལ་དྲག་ཤུལ་ལྡན། །རིགས་སྔགས་རྒྱལ་པོ་དགེ་བ་ཅན། །གདུལ་དཀའ་པོ་དག་འདུལ་བ་པོ། །རྡོ་རྗེ་འཛིན་ལ་ཕྱག་འཚལ་ལོ། །ལྷ་ཡི་དབང་པོ་ཉེ་དབང་པོ། །སྟོབས་ལྡན་ས་གསུམ་དབང་བྱེད་ཅིང་། །འཇུག་པ་བཅུ་ཡི་རྣམ་པར་རོལ། །ལྷ་ཆེན་སྲེད་མེད་བུ་ལ་བསྟོད། །མཐུ་ཆེན་སྲིད་པ་ཀུན་གྱི་གཙོ། །སྔོན་སངས་རྒྱས་ཀྱང་འཇིག་རྟེན་འདིར། །ཐབས་མཁས་མུ་སྟེགས་མཐུ་ཡིས་འདུལ། །ལྷ་ཆེན་དྲག་པོ་ཁྱོད་ལ་བསྟོད། །ཞི་ཞིང་རྣམ་པར་སྒེག་པའི་ལུས། །ཡིད་བཞིན་རིན་ཆེན་རྒྱན་འཆང་ཞིང་། །བདེ་གཤེགས་བསྟན་ལ་དད་ཅིང་གུས། །ཚོགས་ཞེས་གྲགས་པ་ཁྱོད་ལ་བསྟོད། །བསྟོད་པར་འོས་པ་ཐམས་ཅད་ལ། །སོགས་དང་། ན་མཿསརྦ་བུདྡྷ་བོདྷི་སཏྭ་ནཱཾ། སརྦ་ཏྲ་སཾ་ཀུ་རུ་མི་ཏ་ཨ་བྷི་ཛྙཱ་ར་ཤི་ནི་ན་མོཿསྟུ་ཏེ་སྭཱ་ཧཱ། དེ་ནས་ཐལ་མོ་སྦྱར་ཏེ། སྲས་བཅས་སངས་རྒྱས་ཐམས་ཅད་ཀུན། །དེང་འདིར་བདག་ལ་དགོངས་སུ་གསོལ། །ཐོག་མ་མེད་ནས་ད་ལྟའི་བར། །མི་དགེ་བཅུ་དང་མཚམས་མེད་ལྔ། །སེམས་ནི་ཉོན་མོངས་དབང་གྱུར་པའི། །སྡིག་པ་ཐམས་ཅད་བཤགས་པར་བགྱི། །སངས་རྒྱས་ཆོས་དང་དགེ་འདུན་ལ། །རྟག་པར་བདག་ནི་སྐྱབས་སུ་མཆི། །ཆོས་ཀྱི་འཁོར་ལོ་བསྐོར་བ་དང་། །མྱ་ངན་མི་འདའ་གསོལ་བ་འདེབས། །རང་གཞན་དོན་གཉིས་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །སེམས་ཅན་བདེ་དང་ལྡན་གྱུར་ཅིག །སྡུག་བསྔལ་ཀུན་དང་བྲལ་གྱུར་ཅིག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །ལན་གསུམ་བརྗོད་ནས། གླེགས་བམ་བཀླག་པར་བྱ་སྟེ། དཀྱིལ་འཁོར་སྒྲུབ་མཆོད་ཚར་རོ། །དེ་ནས་མཆོད་རྟེན་གྱི་ཕྱོགས་བཞིར་སྟེགས་བུའི་སྟེང་དུ་མཆོད་པ་བཤམ། དེའི་མདུན་དུ་སྟེགས་ལ་དཀར་གཏོར་ཟླུམ་པོ་བརྒྱད་དམ་བསྡུ་ན་གཅིག་བཤམ་ལ། ཆབ་གཙང་མས་བྲན། ཕྱག་མཆོད་གཏོར་བསྔོ་བཟླས་པ་གསོལ་གདབ་རྣམས་མཆོད་རྟེན་གྱི་ཕྱོགས་བཞི་ནས་ཚར་རེ་རེ་བྱ་བར་གསུངས་པས། ཐོག་མར་དཔོན་སློབ་ཐམས་ཅད་ཤར་ནས་མཆོད་རྟེན་ལ་ཞལ་ཕྱོགས་པ་བཞེངས་ཏེ། ཕྱོགས་བཅུའི་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཆེན་པོ་བརྒྱད་དང་། གནོད་སྦྱིན་གྱི་སྡེ་དཔོན་ཆེན་པོ་རྣམས་དང་། རྒྱལ་ཆེན་སྡེ་བཞི་དང་། ཚངས་པ། དབང་ཕྱུག །ཁྱབ་འཇུག་རྣམས་མངོན་སུམ་དུ་བྱོན་པར་གྱུར། ཞེས་བརྗོད་ཅིང་དམིགས་ནས། ཕྱག་འཚལ་བཞིན་དུ་འདི་སྐད་བརྗོད་དོ། །བཅོམ་ལྡན་འདས་མི་འཁྲུགས་པ་ལ་སོགས་ཤར་ཕྱོགས་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ལ་ཕྱག་འཚལ་ལོ། །སྐྱབས་སུ་མཆིའོ། །བཅོམ་ལྡན་འདས་རིན་ཆེན་ཏོག་ལ་སོགས་པ་ལྷོ་ཕྱོགས་ཀྱི་དེ་བཞིན་གཤེགས་པ༴ སོགས་འགྲེས་ཤེས་པར་བྱས་ཏེ། འོད་དཔག་མེད་ལ་སོགས་ཏེ་ནུབ་ཕྱོགས་ཀྱི་དེ་བཞིན་གཤེགས་པ༴ རྔ་སྒྲ་ལ་སོགས་ཏེ་བྱང་ཕྱོགས་ཀྱི་དེ་བཞིན་གཤེགས་པ༴ ཏིང་ངེ་འཛིན་གླང་པོ་དམ་པའི་དཔལ་ལ་སོགས་པ་བྱང་ཤར་གྱི་དེ་བཞིན་གཤེགས་པ༴ པདྨོ་དམ་པའི་དཔལ་ལ་སོགས་པ་ཤར་ལྷོའི་དེ་བཞིན་གཤེགས་པ༴ ཉི་མའི་དཀྱིལ་འཁོར་སྣང་བ་དམ་པའི་དཔལ་ལ་སོགས་པ་ལྷོ་ནུབ་ཀྱི་དེ་བཞིན་གཤེགས་པ༴ གདུགས་དམ་པ་ལ་སོགས་པ་ནུབ་བྱང་གི་དེ་བཞིན་གཤེགས་པ། རྣམ་པར་སྣང་མཛད་ལ་སོགས་པ་འོག་ཕྱོགས་ཀྱི་དེ་བཞིན་གཤེགས་པ༴ ཡེ་ཤེས་ཀྱི་འོད་ཟེར་ལ་སོགས་པ་སྟེང་ཕྱོགས་ཀྱི་དེ་བཞིན་གཤེགས་པ༴ དེ་ལྟར་བདག་ཅག་གི་སྟོན་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་གདུལ་བྱའི་དབང་གིས་འཛམ་བུའི་གླིང་འདིར་མྱ་ངན་ལས་འདའ་བའི་ཚུལ་བསྟན་ཀྱང་། འཇིག་རྟེན་གྱི་ཁམས་གཞས་ནས་དེ་བཞིན་གཤེགས་པའི་རྣམ་པར་རོལ་པ་སྣ་ཚོགས་ཀྱིས་འགྲོ་བའི་དོན་མཛད་ཅིང་བཞུགས་པ་ཐམས་ཅད་ལ་ཕྱག་འཚལ་ལོ། །སྐྱབས་སུ་མཆིའོ། །གཞན་ཡང་ཕྱོགས་བཅུའི་ཞིང་མཐའ་ཡས་མུ་མེད་པ་ན་དུས་གསུམ་དུ་གཤེགས་ཤིང་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་དང་། དེ་དག་གི་མཆོད་རྟེན་དང་། རིང་བསྲེལ། གསུང་རབ་དམ་པའི་ཆོས་ཐམས་ཅད་ལ༴ འཕགས་པ་བྱམས་པ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་ལ་ཕྱག༴ དེ་དག་ལ་སོགས་ཏེ་བྱང་ཆུབ་སེམས་དཔའི་ཚོགས་ཆེན་པོ་ཐམས་ཅད་ལ༴ གནོད་སྦྱིན་གྱི་སྡེ་དཔོན་དབང་པོ་ནོར་བུ་བཟང་པོ་ལ་སོགས་པ་གནོད་སྦྱིན་གྱི་སྡེ་དཔོན་ཆེན་པོ་བརྒྱད་འཁོར་དང་བཅས་པ་ལ༴ རྒྱལ་པོ་ཆེན་པོ་ཡུལ་འཁོར་སྲུང་དང་། འཕགས་སྐྱེས་པོ་དང་། མིག་མི་བཟང་དང་། རྣམ་ཐོས་ཀྱི་བུ་རྣམས་འཁོར་དང་བཅས་པ་ལ༴ ཚངས་པ་དང་། དབང་ཕྱུག་དང་། སྲེད་མེད་ཀྱི་བུ་ལ་སོགས་པ་རྣམས་ལ་ཕྱག་འཚལ་ལོ། །སྐྱབས་སུ་མཆིའོ། །ཞེས་ཕྱག་དངོས་སུ་བྱ། དེ་ནས་སྟན་ལ་འདུག་སྟེ། མཆོད་ཡོན་སྔོན་དུ་འགྲོ་བའི་ཉེར་སྤྱོད་རོལ་མོར་བྱས་པས་མཆོད། གཏོར་མ་རྣམས་བྱིན་གྱིས་རླབས་ཏེ། མ་ཧཱ་ཡཀྵ་སེ་ན་པ་ཏ་ཞེས་པས་མནོད་སྦྱིན་དང་། ༀ་དྷྲཱི་ཊ་རཥྚ་ཡེ་སྭཱ་ཧཱ། ༀ་བེ་རུ་དྷཱ་ཀ་ཡེ༴ ༀ་བེ་རུ་པཀྵ་ཡེ༴ ༀ་བཻ་ཤྲཱ་ཱམ་ཎ་ཡེ་སྭཱ་ཧཱ། ཞེས་རྒྱལ་པོ་ཆེན་པོ་སྡེ་བཞི། བྲ་ཧྨ་ཎ་ཡ་ཚངས་པ། ཨཱི་ཤྭ་ར་དབང་ཕྱུག །བིཥྞུ་པ་སྲེད་མེད་ཀྱི་བུ་སྡེ། སྔགས་རེ་རེའི་མཐར། ས་པ་རི་ཝཱ་ར་ན་མཿསརྦ་ཏ་ཐཱ་ག་ཏ་བྷྱོ་བི་ཤྭ་སོགས་བཏགས་པ་གསུམ་གསུམ་གྱིས་ཕུལ། ཚངས་དང་དབང་པོ་ཁྱབ་འཇུག་གནོད་སྦྱིན་བརྒྱད། །རྒྱལ་ཆེན་བཞི་སོགས་གཙང་རིས་མགོན་པོ་སྟེ། །བསྟན་པ་བསྲུང་བར་ཞལ་བཞེས་འཕགས་པའི་ཚོགས། །དཀར་ཕྱོགས་སྐྱོང་བ་རྣམས་ལ་ཕྱག་འཚལ་བསྟོད། །ཅེས་བསྟོད་པས། དེ་ནས། ༀ་བི་པུ་ལ། བི་མ་ལེ། པྲ་བ་རེ་ཛི་ན་བ་རེ། ས་ར་ས་ར། སརྦ་ཏ་ཐཱ་ག་ཏ་དྷཱ་ཏུ་གརྦྷེ། ཨ་དྷིཥྛི་ཏེ་སྭཱ་ཧཱ། ཨཱ་ཡ་ཏ་ཏོ་བ་ནི་སྭཱ་ཧཱ། སརྦ་དེ་ཝ་ནི་བ་ཧ་ཡ་བི་བུདྡྷ་ཨ་དྷིཥྛ་ན་ས་མ་ཡེ་སྭཱ་ཧཱ། ཞེས་པ་ལན་ཉི་ཤུ་རྩ་བརྒྱད་བཟླས། དེ་ནས་པུས་བཙུགས་ལ་ཐལ་མོ་སྦྱར་ཏེ། བདུག་སྤོས་འཛིན་པས། སྟོན་པ་བཅོམ་ལྡན་འདས་ཤཱཀྱ་ཐུབ་པ་དང་། ཕྱོགས་བཅུའི་སངས་རྒྱས་བཅོས་ལྡན་འདས་བྱེ་བ་ཕྲག་དགུ་བཅུ་རྩ་དགུ་འཁོར་དང་བཅས་པ་ཐམས་ཅད་དང་། བྱང་ཆུབ་སེམས་དཔའ་ཉེ་བའི་སྲས་བརྒྱད་དང་། ཁྱད་པར་དུ་དཔལ་གསང་བའི་བདག་པོ་ཕྱག་ན་རྡོ་རྗེ་དང་། གནོད་སྦྱིན་གྱི་སྡེ་དཔོན་ཆེན་པོ་བརྒྱད་དང་། རྒྱལ་པོ་ཆེན་པོ་སྡེ་བཞི་དང་། ཚངས་པ་དང་། དབང་ཕྱུག་ཆེན་པོ་དང་། སྲེད་མེད་ཀྱི་བུ་ལ་སོགས་པ་འཁོར་དང་བཅས་པ་ཐམས་ཅད་བདག་ལ་དགོངས་སུ་གསོལ། བདག་ཅག་གིས་འཕགས་པ་འོད་ཟེར་དྲི་མ་མེད་པ་རྣམ་པར་དག་པ་འོད་ཀྱི་གཟུངས་ལས་བྱུང་བའི་ཆོ་ག་བཞིན་འཕགས་པ་གདན་འཛོམ་པར་མཛད་པའི་དཀྱིལ་འཁོར་བཞེངས་སུ་གསོལ་ཏེ། འཕགས་པ་རྣམས་སྤྱན་དྲངས་ནས་མཆོད་ཅིང་གསོལ་བ་བཏབ་པ་དང་། མཆོད་རྟེན་གྱི་སྲོག་ཤིང་བཙུགས་པའི་དགེ་བའི་རྩ་བ་འདིས། འཕགས་པ་ཐམས་ཅད་ཀྱིས་མཆོད་རྟེན་འདི་ཆོས་ཀྱི་སྐུར་བྱིན་གྱིས་བརླབས་ཏེ། རིང་བསྲེལ་དང་ལྡན་པར་མཛད་ནས་མཆོད་རྟེན་ལ་མཆོད་པ་དང་། རིམ་གྲོ་བྱེད་ཅིང་སྲོག་ཤིང་བརྟན་པར་མཛད་དུ་གསོལ། ཆྒཻམོ་ལ་སོགས་པའི་སེམས་ཅན་ཐམས་ཅད་ཀྱི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་ནས་ཚེ་རིང་ཞིང་ནད་མེད་པ་དང་། བར་ཆད་ཀྱི་བགེགས་ཐམས་ཅད་དང་བྲལ་བ་དང་། མཐར་བླ་ན་མེད་པའི་བྱང་ཆུབ་མྱུར་དུ་ཐོབ་པར་བྱིན་གྱིས་བརླབ་ཏུ་གསོལ། སྔོན་བཅོམ་ལྡན་འདས་ཀྱིས་གསང་བའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས། དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་གང་ལ་ལ་ཞིག་གིས་བསོད་ནམས་ཀྱི་འབྲས་བུ་ཆེན་པོ་ཐོབ་ཅིང་། ཡོན་ཏན་ཐོབ་པར་འདོད་པས། གསང་སྔགས་རྒྱལ་པོའི་ཆོ་ག་སྔར་བསྟན་པ་བཞིན་དུ་བྱ་སྟེ། དགུ་བཅུ་རྩ་དགུར་ཡི་གེར་བྲིས་ལ། སངས་རྒྱས་ཀྱི་མཆོད་རྟེན་གྱི་མདུན་དུ་དཀྱིལ་འཁོར་གྲུ་བཞིར་བྱས་ལ་བའི་ལྕི་བས་བྱུགས་ཏེ། གྲྭ་བཞིར་དྲིའི་ཆུ་ཕོར་བུ་གང་བ་རེ་རེ་བཞག །བདུག་སྤོས་ཀྱི་སྣོད་འཐུལ་བ་ཡང་བཞག་ནས། སྣོད་ཆེན་པོའི་ནང་དུ་མེ་ཏོག་དང་། དྲིའི་ཆུ་དང་། འབྲས་སྐམ་པོ་རྣམས་བླུགས་ཏེ། དཀྱིལ་འཁོར་གྱི་སྟེང་དུ་བཞག་པ་དང་། ཡང་ཏིལ་ནག་པོ་དང་། སྲན་མ་མ་ཤ་དང་། འབྲས་རྣམས་བསྲེས་ཏེ་བཙོས་པའི་འབྲས་ཐུག་ཀྲཱི་ས་ར་ཞེས་བྱ་བ་དང་། ཟས་དཀར་གསུམ་དང་། འདི་རྣམས་བུམ་པའི་ནང་དུ་བླུགས་པ་དང་། ཡང་ཤིང་ཐོག་སྣ་ཚོགས་པ་འབྲས་བུ་དགུ་བཅུ་རྩ་དགུ་དང་། ཁ་ཟས་མིང་གིས་སྨྲོས་པ་འདི་རྣམས་དང་། སྤོས་དང་མེ་ཏོག་ལ་སོགས་པ་དཀྱིལ་འཁོར་གྱི་སྟེང་དུ་བཀྲམ་ལ་གསང་སྔགས་ཀྱི་ཡི་གེ་མཆོད་རྟེན་གྱི་སྲོག་ཤིང་གི་ནང་དུ་བཅུག་ནས། མཆོད་རྟེན་གྱི་ཕྱོགས་བཅུའི་དེ་བཞིན་གཤེགས་པ་ཐམས་ཅད་མངོན་སུམ་དུ་དམིགས་ཏེ་ཕྱག་བྱས་ལ་སེམས་རྩེ་གཅིག་པས་གསང་སྔགས་འདི་དག་འདོན་པར་བྱའོ། །འདི་ལྟ་སྟེ། ༀ་བི་པུ་ལ་བི་མ་ལེ། པྲ་བ་རེ་ཛི་ན་བ་རེ། ས་ར་ས་ར། སརྦ་ཏ་ཐཱ་ག་ཏ་དྷཱ་ཏུ་གརྦྷེ། ཨ་དྷིཥྛི་ཏེ་སྭཱ་ཧཱ། ཨཱ་ཡ་ཏ་ཏོ་བ་ནི་སྭཱ་ཧཱ། སརྦ་དེ་ཝ་ཎི་བ་ཧ་ཡ་བི་བུདྡྷ་ཨ་དྷིཥྛ་ན་ས་མ་ཡེ་སྭཱ་ཧཱ། བདུག་སྤོས་འཐུལ་བ་རྒྱུན་མི་ཆད་པར་བྱ་ཞིང་། གསང་སྔགས་ལན་ཉི་ཤུ་རྩ་བརྒྱད་བཏོན་ལ། བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་དང་། གནོད་སྦྱིན་གྱི་སྡེ་དཔོན་ཆེན་པོ་བརྒྱད་དང་། གསང་བའི་བདག་པོ་དང་། རྒྱལ་པོ་ཆེན་པོ་བཞི་དང་། ཚངས་པ་དང་། དབང་ཕྱུག་ཆེན་པོ་དང་། སྲེད་མེད་ཀྱི་བུ་རྣམས་དེའི་མོད་ལ་མཆོད་རྟེན་དེ་ལ་མཆོད་པ་དང་། རིམ་གྲོ་བྱེད་པ་དེ་དང་སྲོག་ཤིང་བརྟན་པར་བྱེད་དོ། །དེ་བས་གོང་དུ་ཡང་སངས་རྒྱས་བྱེ་བ་འབུམ་ཕྲག་དགུ་ཅུ་རྩ་དགུ་དང་། གངྒཱའི་ཀླུང་གི་བྱེ་མ་སྙེད་ཀྱང་གནས་དེར་གཤེགས་ཏེ། མཆོད་རྟེན་དེ་ལ་མཆོད་པ་དང་། ཆོས་ཀྱི་སྐུར་བྱིན་གྱིས་རློབ་ཅིང་རིང་བསྲེལ་དང་ལྡན་པར་མཛད་དོ། །དེ་ལྟར་སེམས་ཐག་པ་ནས་ཆོ་ག་ཚུལ་བཞིན་དུ་བྱས་ན་ཡོན་ཏན་དེ་དག་དང་། གཞན་ཡང་མཆོད་རྟེན་ཡིད་བཞིན་གྱི་ནོར་བུ་རིན་པོ་ཆེ་ལས་བྱས་པའི་བསོད་ནམས་ཐོབ་པར་འགྱུར། རིན་པོ་ཆེའི་རྣམ་པ་བྱེ་བ་ཕྲག་ཁྲིག་བརྒྱ་སྟོང་དུ་མ་ལས་མཆོད་རྟེན་བྱས་པ་དང་འདྲ་བར་འགྱུར་ཏེ། དགེ་བའི་རྩ་བ་རྒྱ་ཆེན་པོ་དང་ལྡན་ཞིང་ལུས་རྣམ་པར་དག་ལ་ཚེ་རིང་ནད་མེད་པ་དང་། བགེགས་ཐམས་ཅད་ཀྱིས་མི་ཚུགས་པར་འགྱུར་རོ། །གང་གཞན་ལ་ལ་ཞིག་གིས་མཆོད་རྟེན་འདི་མཐོང་ངམ། མཆོད་རྟེན་དེའི་དྲིལ་བུའི་སྒྲ་ཐོས་ནའང་ལས་ཀྱི་སྒྲིབ་པ་དང་། སྡིག་པ་ཐམས་ཅད་བྱང་བར་གྱུར་ཏེ། མཚམས་མེད་པ་ལྔ་བྱས་པ་ཡང་བྱང་ནས་འཆི་བའི་དུས་བྱས་པའི་འོག་ཏུ་བདེ་བ་ཅན་གྱི་འཇིག་རྟེན་དུ་སྐྱེའོ། །གང་ལ་ལ་ཞིག་གིས་མཆོད་རྟེན་དེའི་མིང་ཙམ་ཐོས་པ་ཡང་འཆི་བའི་དུས་བྱས་ནས་བླ་ན་མེད་པའི་བྱང་ཆུབ་ཀྱི་ལམ་ཐོབ་པར་འགྱུར། ཐ་ན་བྱ་དང་རི་དྭགས་ལ་སོགས་པ་སེམས་ཅན་གང་གིས་མཐོང་བ་དེ་ཡང་ཚེ་འཕོས་ནས་དུད་འགྲོའི་སྐྱེ་གནས་སྤངས་ཏེ་བསོད་ནམས་དང་ལྡན་པའི་ལུས་ཐོབ་པར་འགྱུར་རོ། །ཞེས་བཀའ་སྩལ་བའི་ཕན་ཡོན་ཐམས་ཅད་ཆྒཻ་མོ་ལ་སོགས་པའི་སེམས་ཅན་ཐམས་ཅད་ལ་འཕྲལ་དུ་འགྲུབ་པར་ཅི་གནང་། དེ་བཞིན་གཤེགས་པས་བཀའ་ཡང་དག་པ་ཚད་མར་གྱུར་པས་ཇི་ལྟར་བཀའ་སྩལ་པ་བཞིན་དུ་བདེན་པ་མངོན་སུམ་དུ་བསྟན་པ་ཅི་གནང་། ཞེས་ལན་གསུམ་དུ་གསོལ་བ་གདབ་བོ། །དེ་བཞིན་མཆོད་རྟེན་གྱི་ཕྱོགས་བཞི་ཀ་ནས་ཚར་རེ་བྱས་ལ། མཇུག་ཏུ་ཤར་ཕྱོགས་ནས་བཀྲ་ཤིས་དང་སྨོན་ལམ་རྒྱས་པར་གདབ་བོ། །དེ་ནས་དཀྱིལ་འཁོར་གྱི་མཇུག་ཆོག་ནི། མཆོད་པ་ཁ་གསོས་ཏེ། བསང་སྦྱང་བྱིན་གྱིས་བརླབས་ནས་མཆོད་ཡོན་དང་། ཉེར་སྤྱོད་ནས་སོ་སོའི་སྔགས་རྒྱས་མཆོད་ནས། བླ་མ་དང་འཕགས་པ་འོད་ཟེར་དྲི་མ་མེད་པའི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཁྱེད་རྣམས་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས་བསམ་གྱིས་མི་ཁྱབ་པ་མངའ་བ་ལགས་པས། སྤྱིར་རྒྱལ་བའི་བསྟན་པ་སྤྱི་དང་། ཁྱད་པར་སྔ་འགྱུར་རྡོ་རྗེ་ཐེག་པའི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པ་དང་། བསྟན་འཛིན་གྱི་སྐྱེས་བུ་རྣམས་ཀྱི་སྐུ་ཚེ་བརྟན་ཅིང་ཐུགས་ཀྱི་བཞེད་པའི་དོན་ཀུན་འབད་མེད་དུ་འགྲུབ་པ་དང་། བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་ནད་གདོན་སོགས་འགལ་རྐྱེན་མི་མཐུན་པའི་ཕྱོགས་ཐམས་ཅད་ཞི་ཞིང་། མཐུན་རྐྱེན་ཆོས་དང་མཐུན་པའི་བསམ་པ་ཡིད་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ། ཁྱད་པར་དུ་ཡང་བདག་ཅག་དཔོན་སློབ་ཡོན་མཆོད་འཁོར་དང་བཅས་པས་ཐོག་དྲངས་སེམས་ཅན་ཐམས་ཅད་ཀྱི་གནས་སྐབས་སུ་མི་མཐུན་པའི་ཕྱོགས་ཐམས་ཅད་ཞི་ནས་འོག་མིན་གྱི་སྲིད་པའི་མཐར་ཐུག་པའི་འཇིག་རྟེན་གྱི་དངོས་གྲུབ་མཐའ་དག་འགྲུབ་པ་དང་། མཐར་ཐུག་སྒྲིབ་གཉིས་བག་ཆགས་དང་བཅས་པ་མ་ལུས་པ་ཞི་ཞིང་ཕྱག་རྒྱ་ཆེན་པོ་མཆོག་གི་དངོས་གྲུབ་ཚེ་འདི་ཉིད་ལ་ཐོབ་པར་བྱིན་གྱིས་བརླབ་ཏུ་གསོལ། དེ་ནས་རྡོ་རྗེ་སེམས་དཔའི་ཡིག་བརྒྱ་བདུན་བཟླས་ཏེ། མ་རྙེད་ཡོངས་སུ་སོགས་ཀྱིས་བཟོད་པར་གསོལ། དེ་ནས། བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་འདི་ནི་མྱུར་དུ་འཚང་རྒྱ་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང་། །སྡུག་བསྔལ་གྱིས་གཟིར་སེམས་ཅན་སྒྲོལ་བར་ཤོག །ཅེས་བསྔོ། དེ་ནས། ཇི་སྲིད་ས་ཆུ་སོགས་དང་། འདིར་ནི་གཟུགས་དང་སོགས་ཀྱི་མཐར། སུ་པྲ་ཏིཥྛས་བརྟན་བཞུགས་ཕུལ། བདག་གི་ལྷའི་སྐུ་གཟུགས་ཟླ་བའི་སྟེང་གི་ཡི་གེ་ལ་ཐིམ། དེ་ཟླ་བ་ལ། དེ་རྣམ་སྨིན་གྱི་ལུས་ལ་ཐིམ་པར་གྱུར། ༀ་ཧུ་ལུ་ཧུ་ལུ་ཙཎྜ་ལི་མ་ཏཾ་གི་སྭཱ་ཧཱ། ཕྱོགས་མཚམས་བཅིངས་པ་རྣམས་དཀྲོལ་བར་གྱུར། ༀ་བཛྲ་ཨགྣེ་པྲ་དཱི་པ་ཏ་ཡེ་སྭཱ་ཧཱའི་སྔགས་རྒྱས། རྡོ་རྗེའི་གོ་ཆ་གྱོན་པར་གྱུར། ན་མོ་རཏྣ་ཏྲ་ཡཱ་ཡ། ༀ་ཧཱུྃ་ཝ་ཀི་ལི་ཧཱུྃ་ཕཊ་ཀྱི་སྔགས་རྒྱས། བདག་ཉིད་བསྲུང་བར་གྱུར་བར་བསམ་ལ། བཀྲ་ཤིས་རྒྱས་པར་བརྗོད་ཅིང་། ཤེར་སྙིང་ཚར་གཅིག་འདོན་པར་བྱའོ། །དེ་ནས་དཀྱིལ་འཁོར་དེ་ལ་ཞལ་ཁེབས་བཀབ་ནས་བུམ་པའི་འཕྲོ་བརྩིག་གོ། །དེ་དག་གི་འོད་ཟེར་དྲི་མེད་ཀྱི་དཀྱིལ་འཁོར་མཆོད་རྟེན་དུ་བཞུགས་ཤིང་འཛུགས་པའི་ཆོ་གའོ།། ༈ ན་མ་ཤྲཱི་གུ་ར་ཝེ། ན་མཿསརྦ་བུདྡྷ་བོ་དྷི་སཏྭ་བྷྱཿ འདིར་འོད་ཟེར་དྲི་མེད་ཀྱི་གཟུངས་སོགས་བཀླག་ཅིང་མཆོད་རྟེན་དགུ་བཅུ་རྩ་དགུའམ་བརྒྱ་རྩ་བརྒྱད་གདབ་པའི་ཆོ་ག་ནི། དེར་གཏོགས་པ་ཐམས་ཅད་ཁྲུས་བྱས། ཉོན་མོངས་པའི་སྐྱོན་ལས་སེམས་བསྡོམས་ཤིང་གནོད་འཚེའི་ལས་ངན་ལས་མགོ་མཇུག་ཀུན་ཏུ་སེམས་བསྲུང་། དཀོན་མཆོག་གསུམ་གྱི་ཡོན་ཏན་གྱི་མཐུའི་ཁྱད་པར་དང་མདོ་སྡེའི་ཕན་ཡོན་ལ་ཡིད་ཆེས་དང་། སེམས་ཅན་ཐམས་ཅད་ལ་བྱམས་སྙིང་རྗེ་བསྐྱེད་དེ། ཁྱིམ་པ་ཡིན་ན་བསྙེན་གནས་ཀྱི་ཁྲིམས་བཟུང་། རབ་ཏུ་བྱུང་བ་ཡིན་ནའང་ཐེག་པ་ཆེན་པོའི་གསོ་སྦྱོང་བླངས་ན་མི་འགལ་ཞིང་ལེགས་པ་ཡིན་ནོ། །དེ་དག་གི་མགོ་མཇུག་ཀུན་ཏུ་གཅེས་པའི་སྤྱོད་པའོ། །དེ་ནས་སཙྪ་གདབ་པ་ལ་འདེབས་པ་པོ་བདག་ཉིད་བསྐྱེད་ཆོག་ཇི་ལྟར་རིག་པས་རང་གི་ལྷར་བསྒོམ་ནས། ཡོ་བྱད་རྣམས་བཤམ་ཏེ། ༀ་བཛྲ་ཡཀྵ་ཧཱུྃ། ཞེས་རྡོ་རྗེ་གནོད་སྦྱིན་གྱི་སྔགས་རྒྱས་ཆུ་ལ་ལན་བདུན་བསྔགས་ཏེ། འཇིམ་པ་དང་ཡོ་བྱད་ཐམས་ཅད་ལ་གཏོར་བས་ཐམས་ཅད་གཙང་བར་བསངས་ཤིང་བགེགས་ལ་སོགས་པས་མི་ཚུགས་པར་བསམ། དེ་ནས། ༀ་ཤུདྡྷ་ན་དུ་ཤྭ་དྷཱ་ཡ་སྭཱ་ཧཱ། ཞེས་བཟླས་པས། ཐམས་ཅད་དག་པར་གྱུར། དེ་ནས་། པད་ཟླའི་སྟེང་དུ་འཇིམ་པ་རྣམས་བྷྲཱུྂ་ལས་རིན་པོ་ཆེའི་ཕུང་པོར་བསམ་ལ། རང་ཡི་དམ་དུ་གསལ་བའི་ཐུགས་ཀའི་འོད་ཟེར་གྱིས། བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་རྒྱུད་བསྐུལ་བས་དེའི་ཐུགས་ཀ་ནས་འོད་ཟེར་དཔག་མེད་བྱུང་། དེས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་ཤིང་འཇིམ་པ་ལ་ཕོག་པས། དེ་བཞིན་གཤེགས་པའི་ཡེ་ཤེས་ཀྱི་རང་བཞིན་དུ་གྱུར་པར་མོས་ཏེ། ལག་གཉིས་ཀྱི་མཐེ་བོང་གི་མཐེའུ་ཆུང་མནན་པ་ཁ་སྤྲད་ནས་འཇིམ་པ་ལ་རེག་སྟེ། ན་མོ་བྷ་ག་ཝ་ཏེ་བཻ་རོ་ཙ་ན་པྲ་བྷ་རཱ་ཛ་ཡ། ཏ་ཐཱ་ག་ཏ་ཡ། ཨ རྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ༀ་སུཀྵྨེ་སུཀྵྨེ། ས་མེ་ས་མ་ཡེ། ཤཱནྟེ་དཱནྟེ། ཨ་ས་མ་རོ་པེ། ཨ་ན་ལམྦྷེ། ཏ་རམྦྷེ། ཨ་ཤོ་བ་ཏི་མ་ཧཱ་ཏེ་ཛ། ནི་ར་ཀུ་ལེ། ནིརྦཱ་ཎེ། སརྦ་བུདྡྷ་ཨ་དྷིཥྛཱ་ན་ཨ་དྷི་ཥྛི་ཏེ་སྭཱ་ཧཱ། ཞེས་ཉེར་གཅིག་བཟླ། དེ་ནས། ན་མཿས་མནྟ་བུདྡྷ་ནཱཾ། ༀ་བཛྲ་ཨཱ་ཡུ་ུཥེ་སྭཱ་ཧཱ། ཞེས་པས་འཇིམ་པ་བཅད་དེ། ༀ་བཛྲ་ཨུདྦྷ་ཝ་ཡ་སྭཱ་ཧཱས་འབི་འབི་བྱ། ༀ་ཨ་ར་ཛེ་བི་ར་ཛེ་སྭཱ་ཧཱས་སྣུམ་བཀུ། ༀ་བཛྲ་དྷཱ་ཏུ་གརྦྷེ་སྭཱ་ཧཱ། ཞེས་དང་། ༀ་དྷརྨ་དྷཱ་ཏུ་གརྦྷེ་སྭཱ་ཧཱས་རྒྱར་བཅུག །ༀ་བཛྲ་མུངྒ་ར་ཨཱ་ཀོ་ཊ་ཡ་ཨཱ་ཀོ་ཊ་ཡ་ཧཱུྃ་ཕཊ། ཅེས་པས་བརྡུང་། ༀ་དྷརྨཱ་ར་ཏེ་སྭཱ་ཧཱས་ཕྱུང་། ༀ་སུ་པྲ་ཏིཥྛ་བཛྲ་ཡ་སྭཱ་ཧཱས་དཀྱིལ་འཁོར་དུ་བཞུགས་སུ་གསོལ། དེ་ལྟར་བྱས་ན་མཆོད་རྟེན་གཅིག་བཏབ་པས་བྱེ་བ་སྙེད་བཏབ་པར་འགྱུར་རོ། །དེ་ལྟར་མཆོད་རྟེན་འདེབས་པ་ན། གཞན་དག་དེའི་ཟླ་ལ་མཆོད་སྦྱིན་བྱ་བ་དང་། འཕགས་པ་རྣམས་ཀྱི་ཐུགས་དམ་བསྐུལ་བའི་དོན་དུ་ཤེར་ཕྱིར་གྱི་མདོ། གསེར་འོད་དམ་པ། གཙུག་ཏོར་རིན་པོ་ཆེ། དྲི་མེད་རྣམ་གཉིས་ཀྱི་གཟུངས་ཀྱི་མདོ་རྣམས་བཟླས། དེ་ཙམ་མ་ལྕོགས་ན། ཤེར་སྙིང་དང་། དྲི་མེད་རྣམ་གཉིས་ཀྱི་རྩ་གཟུངས་ཚར་གང་ལྕོགས་བཏོན་པའི་རྗེས་སུ་དེ་གཉིས་སྙིང་པོ་བཟླས་པ་ཙམ་བྱ། བུམ་ནང་དུ་འབྲུ་སྨན་དང་རིན་པོ་ཆེའི་རྫས་ཚད་ལྡན་ཚུལ་བཞིན་བཤམས་ལ། དྲི་མེད་རྣམ་གཉིས་ཀྱི་སྙིང་པོའི་ཛཔ྄་གྲ་གཅིག་ཀྱང་བཞག །དེ་ལྟར་མཆོད་རྟེན་སྔ་དྲོ་ཐེབས་པར་བྱས་ནས། ཆོས་བཀླགས་པ་རྫོགས་པ་དང་། གནས་བསྲུང་བའི་གྲོགས་གཅིག་བཞག་སྟེ། བར་དེར་ཅུང་ཞིག་གྱེས་ནས། སྔ་དྲོའི་ཆ་ལས་དགེ་འདུན་སྤྱིར་ཚོགས་པ་ལ་མཆོད་སྟོན་ལ་སོགས་པ་བྱའོ། །དེ་དག་ནི་མཆོད་རྟེན་གདབ་པའི་བྱ་བའོ། །དེ་ནས་དཀྱིལ་འཁོར་རྒྱས་འབྲིང་བསྡུས་གསུམ་གསུངས་པ་ལ། འདིར་བསྡུས་པའི་དབང་དུ་བྱས་ཏེ། མཎྜལ་ཆེ་ཆུང་ཇི་ཙམ་རིགས་པ་ལ་བའི་རྣམ་ལྔ་དང་དྲིས་ཆག་ཆག་གདབ་ནས་རེའུ་མིག་ཆེན་པོ་བརྒྱད་དབྱེ། མཆོད་རྟེན་བརྒྱ་རྩ་བརྒྱད་ལྟར་ན། དེ་དག་གི་ཕྱིའི་ཕྱོགས་བཞི་དབུས་ཀྱི་ཆ་རེའུ་མིག་གཉིས་རེ་བསྣན་པ་བྱའོ། །དེ་དག་ནི་དཀྱིལ་འཁོར་བྲི་བའི་བྱ་བའོ། །དེ་ནས་ལུགས་མ་ལ་སོགས་པའི་མཆོད་རྟེན་དེ་བཞིན་གཤེགས་པའི་རིང་བསྲེལ་ཅན་གཅིག་དཀྱིལ་འཁོར་གྱི་དབུས་ཀྱི་རེའུ་མིག་ལ་བཞག །དེ་ལྷག་རེ་མིག་གོ་དགུ་ལ། སྣམ་བུ་དང་པོ་གཉིས་པ་གསུམ་པ་སོགས་རིམ་བཞིན་རེའུ་མིག་རྣམས་སུ་དྲིས་བྱུགས་པ་ལ་པདྨའི་གདན་མང་པོ་དཀྲམ། འཕགས་པ་གདན་འཛོམས་པའི་གདན་ཁྲི་ཡང་བཤམ་མོ། །གཟུངས་ཆབ་བུམ་པ་བཞི་ཡོད་ན་ཕྱོགས་བཞི་དང་། གཅིག་ལས་མེད་ན་སློབ་དཔོན་གྱི་མདུན་དུ་བཀོད། ངོས་བཞིའི་ཕྱི་རོལ་སོགས་གང་འོས་སུ་བཤམས་དང་མཆོད་པ་རྒྱས་པར་བཤམ། གྲྭ་བཞིར་ཨ་ཀ་རུ་དང་དུ་རུ་ཀ་དང་གུ་གུལ་གྱི་དུད་པ་འཐུལ་བའི་སྤོས་ཕོར་བཞི། སྒོ་བཞི་མཆོད་ཡོན་བཞི། སྟེང་དུ་བླ་བྲེ། འཕན་དང་། བ་དན་དམར་པོ་བརྒྱ་རྩ་བརྒྱད་དང་དཀྲམ། བུམ་པའི་ཁར་བྱེ་མ་དང་ཡུངས་ཀར་བཞག་ཅིང་བཟླས་ན ས་དུར་ཁྲོད་དང་ཕྱོགས་ཀུན་ཏུ་གཏོར་རོ། །དེ་དག་ནི་ཡོ་བྱད་བཤམས་པ་སྟེ། ཆོ་ག་ལ་འཇུག་པའི་བྱ་བ་ཚར་རོ། །དེ་ནས་དངོས་གཞིའི་ཆོ་ག་ནི། དགེ་འདུན་རྣམས་འདུས་པའི་ཐོག་མ་ཁོ་ནར་ཕྱོགས་བཅུའི་འཕགས་པ་ཐམས་ཅད་མངོན་སུམ་ལྟ་བུར་དམིགས་ཏེ་ཕྱག་བྱས་ནས་ཐམས་ཅད་གདན་ལ་འཁོད་དེ། སེམས་བསྐྱེད་བསྒོམ་པ་ནི། ཆོས་ཐམས་ཅད་དམིགས་སུ་མེད་པའི་སྟོང་པ་ཉིད་ཀྱི་ཏིང་ངེ་འཛིན་ཅི་ནུས་བསྒོམ། དེ་ལས་ལངས་ནས། ཆོས་ཐམས་ཅད་དོན་དམ་པར་དེ་ལྟ་བུ་ཡིན་པ་ལ། འཕགས་པ་རྣམས་ཀྱིས་དེ་ཁོ་ན་ཉིད་ཐུགས་སུ་ཆུད་པས་སྐུ་གསུང་ཐུགས་ནམ་མཁའ་དང་འདྲ་བར་གྱུར་ཏེ་སྒྲིབ་པ་མི་མངའ་ཞིང་། མཐུ་དང་བྱིན་རླབས་བསམ་གྱིས་མི་ཁྱབ་པའི་གོ་འཕང་བརྙེས་པར་ཡང་རུང་ནས། ཀྱེ་མ་སེམས་ཅན་འདི་དག་ནི། ཆོས་ཀྱི་དེ་ཁོ་ན་ཉིད་མ་རྟོགས་ཏེ། རྨོངས་པའི་ཉོན་མོངས་པ་དང་སྡུག་བསྔལ་མང་པོས་གཟིར་ཞིང་ཉམ་ཐག་པའི་གནས་སུ་ལྟུང་བར་འགྱུར། སེམས་ཅན་ཐམས་ཅད་ཀྱང་འཁོར་བ་ཐོག་མ་མེད་པ་ནས་འགྲོ་བ་བརྒྱུད་མ་རྣམས་སུ་བདག་གི་གཉེན་བཤེས་དམ་པ་དྲིན་གྱི་ཞིང་དུ་མ་གྱུར་པ་འགའ་ཡང་མེད་ཅིང་། བདག་གིས་ཀྱང་དང་པོ་བྱང་ཆུབ་མཆོག་ཏུ་སེམས་བསྐྱེད་དེ་འགྲོ་བ་མང་པོའི་དོན་དཔག་ཏུ་མེད་པར་བསྒྲུབ་པར་དམ་བཅས་པའི་ཚེ། སེམས་ཅན་ཐམས་ཅད་བདག་གིས་བླངས་ཟིན་པས། འདི་ལྟ་བུ་ལ་བྱང་ཆུབ་སེམས་དཔའ་རྣམས་ཀྱིས་ཡལ་བར་འདོར་བ་ནི་ཤིན་ཏུ་མི་རིགས་ན། དེ་དག་ཇི་ལྟར་སྡུག་བསྔལ་ལས་ནི་འདོན། བདེ་བ་ལ་ནི་འགོད་པར་བྱའོ། །དེ་ལྟ་ནའང་བདག་ནི་དུས་ངན་པའི་སེམས་ཅན་སྤྱོད་པ་དང་མཐུ་དམན་པ་ཡིན་པས། བདག་ཉིད་གཅིག་པུའི་འཕྲལ་དུ་རླབས་པོ་ཆེ་འདི་ལྟ་བུ་མི་ནུས་ཀྱིས། སྟོན་པ་བདེ་བར་གཤེགས་པས་སྔོན་བྲམ་ཟེ་ཆེན་པོ་སེར་སྐྱའི་ཟླ་བ་དང་། ལྷའི་བུ་ནོར་བུ་དྲི་མ་མེད་པ་ལ་རྗེས་སུ་ཐུགས་བརྩེ་བས་གསུངས་པ། འཕགས་པ་འོད་ཟེར་དྲི་མེད་རྣམ་པར་དག་པའི་འོད་ཅེས་བྱ་བའི་གཟུངས་དང་། ཀུན་ནས་སྒོར་འཇུག་པའི་འོད་ཟེར་གཙུག་ཏོར་དྲི་མ་མེད་པར་སྣང་བ། དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་སྙིང་པོ་ལ་རྣམ་པར་བལྟ་བའི་གཟུངས་ལ་བརྟེན་ཏེ་ཕྱོགས་བཅུའི་དེ་བཞིན་གཤེགས་པ་སྲས་དང་བཅས་པ་དང་། དམ་པའི་ཆོས་སྐྱོང་བ་ཐམས་ཅད་གདན་འཛོམ་པར་སྤྱན་དྲངས་ལ། མཐུ་བསྟན་པ་དང་དཔུང་གཉེན་དུ་གསོལ་ཏེ། ད་ལྟ་ནི་འཕགས་པའི་མཐུ་དང་བྱིན་རླབས་ཀྱིས་འགྲོ་བ་ཐམས་ཅད་ལ་ཕན་པ་བསྒྲུབ་པར་བྱས་ལ། ཕྱིས་ནི་བདག་ཉིད་གཅིག་པུའི་གཞན་ལ་ལྟོས་པ་མེད་པར་ཐབས་མཁས་པའི་སྒོ་སྣ་ཚོགས་ནས། སེམས་ཅན་ཐམས་ཅད་ལ་ཕན་པ་དང་བདེ་བ་བླ་ན་མེད་པ་ཡང་དག་པར་བསྒྲུབ་པར་བྱའོ། །སྙམ་དུ་བྱམས་སྙིང་རྗེ་བྱང་ཆུབ་ཀྱི་སེམས་དྲག་ཏུ་བསྐྱེད་དོ། །དེ་ནས་ས་གཞི་བྱིན་གྱིས་བརླབ་པ་ནི། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས། དེང་འཕགས་པ་འོད་ཟེར་དྲི་མ་མེད་པ་རྣམ་པར་དག་པའི་འོད་ཅེས་བྱ་བའི་གཟུངས་ཀྱི་མདོ་ལས་བྱུང་བའི་ཆོ་ག་བཞིན་དེ་བཞིན་གཤེགས་པའི་ཆོས་ཀྱི་སྐུ་ཡི་མཆོད་རྟེན་དགུ་བཅུ་རྩ་དགུ་གདབ་པའི་གནས་འདིར། ཕྱོགས་བཅུའི་དེ་བཞིན་གཤེགས་པ་སྲས་དང་བཅས་པ་དང་། འཕགས་པ་ཆོས་སྐྱོང་བ་ཐམས་ཅད་གདན་འཛོམ་པའི་ཕོ་བྲང་གི་དཀྱིལ་འཁོར་དང་། མཆོད་པའི་ཚོགས་སྦྱར་བ་འདི་རྣམས། ཇི་ལྟར་སངས་རྒྱས་དང་བྱང་ཆུབ་སེམས་དཔའ་དེ་དག་གི་སྔོན་གྱི་སྨོན་ལམ་ཁྱད་པར་ཅན་གྱིས་བསྒྲུབ་པའི་སངས་རྒྱས་ཀྱི་ཞིང་ཡོངས་སུ་དག་པ་དང་། བཅོམ་ལྡན་འདས་འོད་དཔག་མེད་ཀྱི་ཞིང་གི་བཀོད་པའི་ཡོན་ཏན་ལྟ་བུ་དང་ལྡན་པར་གྱུར་ཏེ། ཕུན་སུམ་ཚོགས་པའི་རྒྱན་ཐམས་ཅད་ཀྱིས་བརྒྱན་པའི་ས་གཞི་ལ། བཀོད་པ་ཐམས་ཅད་ལས་འཕགས་པ་དེ་བཞིན་གཤེགས་པའི་བཀོད་པ་ལས་རྟེན་པའི་རིན་པོ་ཆེའི་གཞལ་མེད་ཁང་ཆེན་པོར་གྱུར་པའི་དབུས་སུ་པདྨ་དང་སེང་ཁྲི་རིན་པོ་ཆེའི་སྟན་ལ་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྐུའི་མཆོད་རྟེན་རིན་པོ་ཆེ་སྣ་ཚོགས་ལས་གྲུབ་པ་ཆེ་བའི་ཡོན་ཏན་ཐམས་ཅད་ཀྱིས་བརྒྱན་པའི་བདག་ཉིད་གྲངས་མེད་པ་ཞིག་རོམ་མེ་དཀྲིགས་པར་གྱུར་པའི་མཐའ་འཁོར་བར་གཞལ་མེད་ཁང་ཆེན་པོའི་ནང་དུ་འཕགས་པ་རྣམས་གདན་འཛོམ་པའི་གདན་ཁྲི་སོ་སོའི་སྨོན་ལམ་ཁྱད་པར་ཅན་གྱི་མངའ་ཐང་དང་འཚམས་པར་གྲུབ་པ་མཛེས་པ་ཤ་སྟག་འབྱུང་བར་གྱུར་ཅིག །ཅེས་ལན་གསུམ་གྱིས་གནས་བྱིན་གྱིས་བརླབ། ཕྱི་ནང་ཀུན་ཏུ་ཡང་ཆ་རིས་དང་འཚམས་པར་ལྷ་དང་མིའི་ཡོ་བྱད་དམ་པ། ཞལ་ཟས། ན་བཟའ་དང་། རྒྱན་དང་རོལ་མོ་ལ་སོགས་པ་ཕུལ་དུ་ཕྱིན་པ་སྣ་ཚོགས་དང་། ཕུང་པོ་གསུམ་པའི་མདོ་དང་བཟང་པོ་སྤྱོད་པའི་སྨོན་ལམ་ལས་བྱུང་བའི་མཆོད་པའི་སྤྲིན་རྒྱ་མཚོ་ཐམས་ཅད་ཀྱི་བཀང་ཞིང་རྒྱན་ཀླུབས་པ་དང་ལྡན་པར་གྱུར་ཅིག །འཕགས་པ་ཐམས་ཅད་གདན་འཛོམ་ནས། དེ་བཞིན་དུ་བྱིན་གྱིས་རླབས་ཤིང་བཞེས་ཏེ་ལོངས་སྤྱོད་པར་གྱུར་ཅིག །ཅེས་ལན་གསུམ་གྱིས་མཆོད་པ་བརླབ། ཡང་། དཀོན་མཆོག་གསུམ་གྱི་བདེན་པ་དང་ཞེས་པ་ནས། བསམ་གྱིས་མི་ཁྱབ་པའི་སྟོབས་ཀྱིས་དེ་བཞིན་དུ་གྱུར་ཅིག །ཅེས་ལན་གསུམ་གྱིས་ཐུན་མོང་དུ་བྱིན་གྱིས་བརླབ་བོ། །དེ་ནས་འཕགས་པ་རྣམས་སྤྱན་དྲངས་ཏེ། པུས་མོ་བཙུགས་ཏེ། ཐལ་མོ་སྦྱར་ནས་འདུན་པ་རྩེ་གཅིག་པས། བཅོམ་ལྡན་འདས་དཔལ་རྒྱལ་བ་ཤཱཀྱ་ཐུབ་པ་ལ་སོགས་པ་ཕྱོགས་བཅུ་ན་དུས་གསུམ་དུ་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱང་ཆུབ་སེམས་དཔའི་ཚོགས་དང་བཅས་པ་ཐམས་ཅད་དགོངས་སུ་གསོལ། ཐུགས་རྗེ་ཆེན་པོ་དང་། བྱིན་རླབས་བསམ་གྱིས་མི་ཁྱབ་པ་མངའ་ཞིང་། འགྲོ་བའི་དོན་དུ་སྨོན་ལམ་ཁྱད་པར་ཅན་མཛད་པ་ལས་གླེང་སྟེ། བདག་སོགས་འགྲོ་བ་མང་པོ་སྐྱོབ་པའི་སླད་དུ་མགོན་སྐྱབས་སུ་གསོལ་ནས་སྤྱན་འདྲེན་ཅིང་མཆིས་ན། མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་གཤེགས་ཤིང་གདན་འཛོམ་པ་ཆེན་པོ་མཛད་དེ། བྱིན་གྱིས་རླབས་བར་ཅི་གནང་། དེ་བཞིན་གཤེགས་པ་དང་། བྱང་ཆུབ་སེམས་དཔའ་དང་། འཕགས་པ་རང་རྒྱལ་དང་། འཕགས་པ་ཉན་ཐོས་ཆེན་པོ་སྐུ་གདུང་རིང་བསྲེལ་དང་། སྐུ་གདུང་གི་མཆོད་རྟེན་དང་། ཆོས་ཀྱི་སྐུའི་མཆོད་རྟེན་གཟུགས་ཀྱི་ཚུལ་དུ་རྣམ་པར་བཞག་པ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་། མ་འདྲེས་པའི་དྲན་པ་ཉེ་བར་བཞག་པ་གསུམ་དང་། བསྲུང་བ་མེད་པ་གསུམ་དང་། བསྙེལ་བ་མི་མངའ་བའི་ཆོས་ཉིད། མི་འཇིགས་པ་བཞི་དང་། སྟོབས་བཅུ་དང་། མ་འདྲེས་པའི་ཆོས་བཅོ་བརྒྱད་དང་། ཐུགས་རྗེ་ཆེན་པོ་དང་། ཡེ་ཤེས་ལ་སོགས་པ་ཡོན་ཏན་བསགས་པའི་མཆོད་རྟེན་དང་། ཆོས་ཀྱི་དབྱིངས་དང་། རིག་སྔགས་དང་། གསང་སྔགས་དང་། སྙིང་པོ་དང་། ཕྱག་རྒྱ་དང་། འཕགས་པའི་བྱིན་གྱིས་བརླབས་པ་ལུམྦིའི་ཚལ་དུ་སྐུ་བལྟམས་པའི་མཆོད་རྟེན་ལ་སོགས་ཏེ། ཕྱོགས་བཅུ་ཐམས་ཅད་ན་མཆོད་རྟེན་ཁྱད་པར་ཅན་འཁོར་དང་བཅས་པ་ཇི་སྙེད་བཞུགས་པ་ཐམས་ཅད། ཆོས་ཀྱི་དབྱིངས་དང་རིགས་ཐམས་ཅད་ནས་བཞུགས་པའི་འཕགས་པ་ཐམས་ཅད་མཉེས་པར་བགྱི་བ་དང་། བདག་སོགས་སེམས་ཅན་ཐམས་ཅད་ཀྱི་བསོད་ནམས་སྤེལ་བའི་སླད་དུ། དེང་དཀོན་མཆོག་གསུམ་དང་མཆོད་རྟེན་ཁྱད་པར་ཅན་འཁོར་དང་བཅས་པ་སྤྱན་དྲངས་པའི་གནས། མཆོད་པར་འོས་པའི་བདེ་བ་སྦྱར་བ་ཐམས་ཅད་ཀྱིས་བསྟབས་ཤིང་སྤྱན་འདྲེན་གྱིས། མཐུ་སྟོབས་བསམ་གྱིས་མི་ཁྱབ་པ་དང་ལྡན་པ་རྣམས་ཀྱིས་རྣམ་པར་འཕྲུལ་པ་མཛད་དེ། ཆོས་ཀྱི་དབྱིངས་ཀུན་ཏུ་འགྲོ་བའི་ཚུལ་གྱིས་གཤེགས་ཤིང་བཞེངས་པར་གསོལ་ལོ། །ཞེས་གཙོ་བོར་གྱུར་པ་སྤྱན་དྲངས། དེ་ནས་འཁོར་དུ་གཏོགས་པ་སྤྱན་དྲངས་པ་ནི། ལྷའི་འཇིག་རྟེན་མཐོ་རིས་ན་འཕགས་པ་གང་ཡང་དག་པའི་ཤེས་རབ་ཀྱིས། ཆོས་ཐམས་ཅད་ཀྱི་དེ་ཁོ་ན་ཉིད་རྟོགས་ཤིང་གཟིགས་པ་དང་ལྡན་པས་ཉོན་མོངས་པའི་སྒྲིབ་པ་བསལ་བ་དང་། བསམ་གཏན་དང་། རྣམ་པར་ཐར་པ་དང་། སྙོམས་པར་འཇུག་པ་དང་། གཟུངས་དང་། ཏིང་ངེ་འཛིན་ལ་དབང་དུ་གྱུར་པ། ཐབས་ལ་མཁས་པའི་སྤྱོད་པ་དང་ལྡན་པའི་ལྷའི་དབང་པོའི་ཆ་ལུགས་ཀྱིས། ལྷ་མང་པོ་དག་ལ་དགེ་བའི་བཤེགས་གཉེན་མཛད་ཅིང་བཞུགས་པ་དང་། ལྷ་མང་པོ་གཞན་དག་ཀྱང་དེ་བཞིན་དུ་བརྟེན་པ་རྟོགས་ཏེ་འཕགས་པའི་ལམ་ལ་གནས་ཤིང་། ཀུན་ནས་ཉོན་མོངས་པའི་འཆིང་བ་ཡང་དག་པའི་ཤེས་རབ་ཀྱིས་བསལ་བ། དྲན་པ་གསལ་ཞིང་ཏིང་ངེ་འཛིན་ཐོབ་པ་དེ་དག་གིས། བླ་ན་མེད་པའི་དཀོན་མཆོག་གསུམ་ལ་སྔོན་བསྙེན་བཀུར་མཛད་ཅིང་དགེ་བའི་རྩ་བ་རྒྱ་ཆེར་བསྐྱེད་པ། འཇིག་རྟེན་ན་ལྷ་དང་མི་རྣམས་ཀྱི་ཆོས་དཀར་པོའི་ཕྱོགས་རྟག་ཏུ་རྒྱ་ཆེར་སྤེལ་ཞིང་བསྲུང་བ། སེམས་ཅན་རྣམས་ཀྱི་མི་མཐུན་པའི་ཕྱོགས་ཀྱི་མཚན་མ་ངན་པ་ཐམས་ཅད་རབ་ཏུ་ཞི་བར་མཛད་པ་དང་། སྔོན་གདན་འཛོམ་པ་ཆེན་པོའི་སྟོན་པ་བཅོམ་ལྡན་འདས་ཀྱིས། ང་མྱ་ངན་ལས་འདས་པའི་འོག་ཏུ། དམ་པའི་ཆོས་དང་། འཁོར་རྣམ་པ་བཞི་དང་། རྒྱལ་པོ་བློན་པོ་ལ་སོགས་པ་ཆོས་དང་ལྡན་ཞིང་ཆོས་ལ་སྤྱོད་པ་དགེ་བ་སྲུངས་ཤིག །ཅེས་བཀའ་གཏད་ཅིང་། སོ་སོ་ནས་ཀྱང་ལྷའི་ངག་བརྟགས་པས། ཞལ་གྱིས་བཞེས་པའི་ཐུགས་དམ་མངའ་བའི་འཕགས་པ་ཆོས་སྐྱོང་བའི་ལྷ་མིའི་མགོན་མཛད་པ་ཐམས་ཅད་དང་། གཞན་ཡང་མཆོད་པའི་གནས་དང་། དྲིན་བསྲབ་པའི་གནས་དང་སྙིང་རྗེའི་གནས་སུ་གྱུར་པའི་སྦྱིན་གནས་ཇི་སྙེད་པ་ཐམས་ཅད་ཆོས་ཀྱི་དབྱིངས་དང་། རིགས་ཐམས་ཅད་བཞུགས་པའི་འཕགས་པ་ཐམས་ཅད་མཉེས་པར་བགྱི་བ་དང་། བདག་སོགས་སེམས་ཅན་ཐམས་ཅད་ཀྱི་བསོད་ནམས་ཀྱི་སླད་དུ། དེང་དཀོན་མཆོག་གསུམ་དང་མཆོད་རྟེན་ཁྱད་པར་ཅན་འཁོར་དང་བཅས་པ་སྤྱན་དྲངས་པའི་གནས་འདིར་གཤེགས་སུ་གསོལ། །ཞེས་དང་། མཆོད་རྟེན་མཆོད་གནས་དཔལ་ལྡན་པ། །སྐུ་གདུང་ཆོས་སྐུ་ཆོས་དབྱིངས་དང་། །རིག་སྔགས་གསང་སྔགས་སྙིང་པོ་དང་། །ཕྱག་རྒྱ་བྱིན་བརླབས་གཤེགས་སུ་གསོལ། །གཤེགས་འབྱོན་སྐྱེ་འབྲི་མེད་པའི་སྐུ། །ཇི་ལྟར་སྨོན་བཞིན་ཡོད་པ་དག །དཀྱིལ་འཁོར་འཆར་བའི་ཚུལ་བཞིན་དུ། །འཇིག་རྟེན་བསྐྱབ་ཕྱིར་གཤེགས་སུ་གསོལ། །སངས་རྒྱས་ཆོས་དང་དགེ་འདུན་དང་། །མཆོད་རྟེན་ཁྱད་པར་འཁོར་གཏོགས་པ། །འོག་མིན་གནས་དང་ལྷ་ཚོགས་དང་། །བསམ་ཏན་བཞི་དང་འདོད་ཁམས་དྲུག །སྡེ་བརྒྱད་ཚོགས་དང་འབྱུང་པོ་ཀུན། །དམ་ཚིག་ཅན་དང་ཐུགས་དམ་ཅན། །ཚངས་པ་བརྒྱ་བྱིན་རྒྱལ་ཆེན་བཞི། །ཕྱོགས་སྐྱོང་གཟའ་དང་རྒྱུ་སྐར་དང་། །དཀོན་མཆོག་མཐོང་ཐོས་སྐྱབས་བརྟེན་པ། །ཕྱག་བགྱི་ཐལ་མོ་སྦྱར་འོས་ཤིང་། །མགོས་གཏུགས་མཆོད་དང་ཀུན་སྦྱིན་དང་། །རབ་ཏུ་སྦྱིན་འོས་ཀུན་གཤེགས་ཤིག །ཅེས་སྤྱན་དྲང་ངོ་། །དེ་ནས་བསུ་ཕྱག་ནི། དེ་ལྟར་སྤྱན་དྲངས་པའི་འཕགས་པའི་ཚོགས་ཕྱོགས་བཅུ་ནས་གཤེགས་ཏེ་འཁོར་དང་བཅས་པ་གདན་ལ་བཞུགས་པར་བསམ་སྟེ། དེ་ལ་སྔོན་དུ་ཕྱོགས་པས་འགྲེངས་ནས་ཕྱག་ལན་བདུན་འཚལ་ཏེ། ཡེ་ཤེས་ཚོགས་ཀྱིས་བསྐྱེད་པའི་སྐུ། །མིང་དང་གཟུགས་ལས་རྣམ་པར་གྲོལ། །རྟོགས་དང་སྤྲོས་ལས་རབ་འདས་ཀྱང་། །བསྙེལ་བ་མི་མངའ་རང་བཞིན་ཅན། །དངོས་དང་དངོས་མེད་མཐའ་ཡས་དབེན། །བསམ་བརྗོད་ཡུལ་ལས་ཤིན་ཏུ་འདས། །ཡེ་ཤེས་རྣམས་ཀྱི་གནས་གྱུར་པ། །རྣམ་དག་སྐུ་ལ་ཕྱག་འཚལ་ལོ། །བསོད་ནམས་ཚོགས་ཀྱིས་བསྐྱེད་པའི་སྐུ། །དབང་ཕྱུག་ཆེན་པོའི་གནས་མཆོག་ན། །ཆོས་ལ་མངའ་མཛད་ལོངས་སྤྱོད་པས། །བྱང་ཆུབ་སེམས་དཔའ་ཡོངས་ཀྱི་མགོན། །གཙང་མའི་གནས་ནས་མ་གཡོས་པ། །གདུལ་བྱའི་བསམ་པ་ཇི་བཞིན་དུ། །འཇིག་རྟེན་ཁམས་ནི་མཐའ་ཡས་པར། །སྤྲུལ་མང་འགྱེད་ལ་ཕྱག་འཚལ་བསྟོད། །སྐད་ཅིག་ཐང་ཅིག་ཡུད་ཙམ་ལ། །དགའ་ལྡན་མཆོག་ནས་བབས་པ་དང་། །འཇིག་རྟེན་སྒྱུ་རྩལ་ཕུལ་བྱུང་ཞིང་། །བདུད་བཅོམ་བྱང་ཆུབ་འཚང་རྒྱ་སྟེ། །འཁོར་ལོ་བསྐོར་ནས་འདས་པའི་བར། །ཆོ་འཕྲུལ་གཅིག་ཆར་སོ་སོར་སྟོན། །ཆོ་འཕྲུལ་ངོ་མཚར་རྨད་བྱུང་བ། །ལྷ་ཡི་ལྷ་ལ་ཕྱག་འཚལ་བསྟོད། །སྟོན་པ་མཆོག་བཞུགས་གཞལ་མེད་ཁང་། །དབྱིབས་ལེགས་རྣམ་པར་ཕྱེ་བས་མཛེས། །ཁ་དོག་སྣ་ཚོགས་སྤེལ་ལེགས་སུ། །རིན་ཆེན་འབར་བ་མང་པོས་བརྒྱན། །ཡིད་འོང་ཉམས་དགའ་ལྷ་ཡ ི་གནས། །རྒྱན་བཀོད་དཀྱིལ་ན་མཛེས་པ་ལ། །འཕགས་པ་མཆོད་པའི་རྟེན་བགྱིས་ཏེ། །སྟོན་པ་འཁོར་དང་བཅས་ལ་བསྟོད། །ཅེས་སོ། །དེ་ནས་བསུ་བའི་མཆོད་པ་ནི། མཆོད་པའི་སྤྲིན་གྱི་གཟུངས། ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝ་ཏེ་བཛྲ་སཱ་ར་པྲ་མརྡྷ་ནི་ཏ་ཐཱ་ག་ཏ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ༀ་བཛྲེ་བཛྲེ་མ་ཧཱ་བཛྲེ་མ་ཧཱ་ཏེ་ཛོ་བཛྲེ། མ་ཧཱ་ཱབིདྱ་བཛྲེ། མ་ཧཱ་བོ་དྷི་ཙིཏྟ་མནྟ་ཨུ་པ་སཾ་པྲ་མ་ཎ་ཡ་སྭཱ་ཧཱ། ཞེས་བཟླ་ཞིང་། མཆོད་པ་དྲི་མེད་ཡོངས་དག་པ། །རྣམ་མང་རྒྱ་ཆེ་ཐམས་ཅད་དང་། །སོ་སོའི་མངའ་ཐང་རྒྱ་ཆེན་དུ། །འོས་པའི་བདེ་བར་སྦྱར་བ་འབུལ། །ཞེས་པས་མཆོད་པ་བཟང་ཞིང་རྒྱ་ཆེ་བར་དམིགས་ཏེ་ཕུལ་ལོ། །དེ་ནས་བཞུགས་སུ་གསོལ་བ་ནི། སྐུ་གདུང་ཆོས་སྐུ་བྱང་ཆུབ་ཕྱོགས། །མ་འདྲེས་བསྲུང་མེད་བསྙེལ་མི་མངའ། །མི་འཇིགས་སྟོབས་དང་སངས་རྒྱས་ཆོས། །རྡོ་རྗེ་ཡེ་ཤེས་ཚོགས་བསགས་པ། །ཆོས་དབྱིངས་རིག་སྔགས་གསང་སྔགས་དང་། །སྙིང་པོ་ཕྱག་རྒྱའི་བྱིན་རླབས་ཀྱིས། །མཆོད་རྟེན་ཁྱད་པར་ཇི་སྙེད་དང་། །དཔལ་ལྡན་བསོད་ནམས་ཞིང་མཆོག་ཀུན། །ཆོས་དོན་དག་པའི་དཀྱིལ་འཁོར་འདིར། །རིན་ཆེན་སྟེང་དང་ཁྲི་འཕང་དང་། །གཙང་དྭངས་ལྷ་རྫས་པདྨ་ལ། །མི་གནས་ཚུལ་གྱིས་གདན་ལ་བཞུགས། །ཞེས་པས་གཙོ་བོ་དང་། ཆོས་དོན་ཀུན་གྱི་དཀྱིལ་འཁོར་དུ། །དཔལ་ལྡན་དག་པའི་གདན་བཤམས་པར། །ཏིང་འཛིན་མི་གཡོ་མཉམ་བཞག་ཅིང་། །དགེ་བའི་དགོངས་པས་གདན་ལ་བཞུགས། །གཙང་དྭངས་གདན་ཁྲི་ཡངས་པ་ལ། །ཐོགས་མེད་དོག་པ་མེད་པའི་སྐུ། །མཉམ་ཉིད་ཚུལ་གྱིས་བདེར་བཞུགས་ཤིང་། །བདེ་བར་བསྐྱང་བ་བཞེས་སུ་གསོལ། །བཛྲ་ཨཱ་ས་ན་ཏིཥྛནྟུ། ཞེས་འཁོར་རྣམས་བཞུགས་སུ་གསོལ། དེ་ནས་ཁྲུས་གསོལ་བ་ལས། དང་པོ་ཕྱོགས་བཞིའི་བུམ་པས་བཀྲུ་བ་ནི། རྣམ་དག་སྐྱོན་བྲལ་བྱང་ཆུབ་སེམས་ཀྱི་དབྱིངས། །རྣམ་རྟོག་སྐྱོན་བྲལ་ཡོན་ཏན་ཚོགས་ཀྱི་གཏེར། །ཀུན་གྱིས་ཕྱག་བྱས་མཆོད་ཅིང་བསྟོད་པའི་གནས། །བདུད་བཞིའི་དཔུང་རྣམས་མ་ལུས་ཚར་བཅད་ཕྱིར། །ཆོས་དབྱིངས་དག་པའི་སྐུ་ལ་ཁྲུས་ཆབ་གསོལ། །ཉོན་མོངས་འཁྲུལ་པའི་རྟོག་པ་དག་གྱུར་ཅིག །ཇི་ལྟར་མེ་ལོང་གཟུགས་བརྙན་སྣང་གྱུར་ཀྱང་། །ཆོས་དབྱིངས་དག་པའི་སྐུ་ལ་བསྐྱོད་པ་མེད། །རིན་ཆེན་ལྔ་ལས་གྲུབ་པའི་མཆོད་རྟེན་དང་། །སའམ་ཆུའམ་འོན་ཏེ་བར་སྣང་ལ། སེམས་ཅན་དོན་དུ་རིན་ཆེན་སྐུར་བསྟན་པ། །མཆོད་རྟེན་དམིགས་པར་བཅས་ཏེ་སྐུ་ཁྲུས་གསོལ། །ཁམས་གསུམ་གནས་པའི་བག་ཆགས་དག་གྱུར་ཅིག །གཞི་རྨིང་དགེ་བཅུ་རྣམ་དག་པདྨ་འཇམ། །དྲན་པ་ཉེར་བཞག་རྨིང་གཞི་ཁྲི་འཕང་བསྟོད། །ཐེག་པ་རྣམས་ཀྱི་བང་རིམ་བརྩེགས་པ་སྟེ། །ཆོས་དབྱིངས་སྤྲོས་མེད་བུམ་པ་ཟླུམ་པོ་ལ། །སྨོན་ལམ་ཆེན་པོའི་སྲོག་ཤིང་དགེ་བ་བཙུགས། །དགེ་བའི་ལོངས་སྤྱོད་ནམ་མཁའི་གདུགས་ཀྱིས་བཀབ། །བྱང་ཆུབ་སེམས་ཀྱི་ཟླ་ཚེས་རྣམ་པར་དག །དགེ་སྟེ་བཅུ་གསུམ་འཁོར་ལོའི་ཕྲེང་བས་བརྒྱན། །སྣང་དབྱིངས་ཆོས་ཀྱི་སྐུ་ལ་སྐུ་ཁྲུས་གསོལ། །ཤར་ཕྱོགས་བྱམས་པ་བརྩེགས་པའི་ཆོས་སྐུ་ལ། །བྱམས་པའི་སེམས་ཀྱི་སྐུ་ཁྲུས་འདི་གསོལ་བས། །ཞེ་སྡང་གདུག་པའི་ཚོགས་རྣམས་ཀུན་བསལ་ནས། །རྟག་ཏུ་བྱམས་པའི་ཏིང་འཛིན་ཐོབ་གྱུར་ཅིག །ལྷོ་ཕྱོགས་རིན་ཆེན་བརྩེགས་པའི་ཆོས་སྐུ་ལ། །ང་རྒྱལ་གདུག་པའི་ཚོགས་རྣམས་བསལ་བའི་ཕྱིར། །བྱང་ཆུབ་སེམས་ཀྱི་ཆུ་བོས་སྐུ་ཁྲུས་གསོལ། །ཁམས་གསུམ་འཁོར་བའི་ང་རྒྱལ་སྐྱོན་བྲལ་ནས། །རྟག་ཏུ་འདོད་པའི་ཡོན་ཏན་ཐོབ་གྱུར་ཅིག །ནུབ་ཕྱོགས་པདྨ་དག་པ་ཆོས་ཀྱི་དབྱིངས། །འདོད་ཆགས་སྐྱོན་བྲལ་པདྨའི་ཁྲི་འཕང་བརྩེགས། །ཁམས་གསུམ་སེམས་ཅན་བག་ཆགས་སྦྱོང་བའི་ཕྱིར། །ཆོས་ཀྱི་སྐུ་ལ་ཡེ་ཤེས་སྐུ་ཁྲུས་གསོལ། །སེམས་ཅན་འཁོར་བའི་བག་ཆགས་དག་གྱུར་ཅིག །བྱང་ཕྱོགས་རྣམ་དག་ལས་ཀྱི་ཞིང་རབ་ནས། །འདོད་སྲེད་སྤངས་པའི་ཡོན་ཏན་རྫོགས་པར་སྟོན། །རིན་ཆེན་ཨིནྡྲ་ལྟ་བུའི་མཆོད་རྟེན་ལ། །ལས་ཀྱི་སྒྲིབ་པ་སྦྱངས་ཕྱིར་སྐུ་ཁྲུས་གསོལ། །སེམས་ཅན་རྣམས་ཀྱི་འདོད་པ་འགྲུབ་གྱུར་ཅིག །ཆོས་སྐུ་རྣམ་དག་འཁོར་བའི་སྐྱོན་བྲལ་ནས། །ལེགས་པའི་ཡོན་ཏན་ཕུན་སུམ་ཚོགས་པར་ཤོག །དེ་ནས་ཆུ་རྣམ་པ་ལྔས་བཀྲུ་ཞིང་། སྐུ་མཆོག་རྣམ་དག་ལྟ་བས་མི་ངོམས་ལ། །ངོ་མཚར་སྐྱོན་བྲལ་མཁའ་དབྱིངས་ཉི་གསལ་འདྲ། །ཆོས་ཀྱི་སྐུ་ལ་དྲི་མ་མི་མངའ་ཡང་། །སྲི་ཞུ་བཀུར་སྟི་རིམ་གྲོའི་ཚུལ་ཙམ་དུ། །ཆུ་གཙང་སྨན་སྤོས་འོ་མ་འདག་ཆལ་ཆུས། །གུས་པས་ཡིད་ཀྱིས་སྐུ་ཁྲུས་འདི་གསོལ་བས། །འགྲོ་བའི་ལུས་སེམས་སྡུག་བསྔལ་ནད་བསལ་ཏེ། །ཉེས་པའི་སྐྱོན་བྲལ་འགྲོ་བ་ཡིད་འོང་བའི། །དམ་པའི་སྐུ་མཆོག་བདག་གིས་ཐོབ་པར་ཤོག །ཅེས་སྨོན་ལམ་རེ་རེའི་མཐར། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུྃ། ཞེས་བཏགས་ཏེ་བཀྲུའོ། །དེ་ནས་རས་ཁ་ཚར་མ་ཉམས་པས་ཕྱི་ཞིང་། བདེ་གཤེགས་སྐུ་གཟུགས་དཔེ་དང་མཚན་མངའ་ཡང་། །འགྲོ་བའི་དོན་དུ་གཟུགས་སྐུ་ཅིར་ཡང་གདའ། །རིན་ཆེན་དབྱིག་ལྟར་ཉེས་པའི་སྐྱོན་བྲལ་ཡང་། །འཇིག་རྟེན་སྲི་ཞུ་གུས་པའི་ཚུལ་ཙམ་དུ། །སྡིག་མེད་རྒྱལ་བ་རྣམས་ཀྱིས་རབ་བསྔགས་པའི། །རས་མཆོག་འདི་ཡིས་རྒྱལ་བའི་སྐུ་ཕྱིས་པས། །ཉོན་མོངས་དུག་གསུམ་སྒྲིབ་པ་ཀུན་བྱང་ནས། །སྐུ་གསུམ་ངང་དུ་བདག་ཅག་འགྱུར་བར་ཤོག །ༀ་སརྦ་ཏ་ཐཱ་ག་ཏ་ཀཱ་ཡ་བིཤྭ་དྷ་ནེ་སྭཱ་ཧཱ། ཞེས་ཕྱིའོ། །དེ་དག་ནི་ཚོགས་ཞིང་ཉེ་བར་བསྡུས་ཏེ་དགོད་པའི་བྱ་བའོ། །དེ་ནས་ཆོས་སྤྱོད་ཀྱི་ཡན་ལག་བཅུས་ཚོགས་བསགས་པའི་རིམ་པ་ལ་འཇུག་སྟེ། དེ་ལ་དང་པོ་ཕྱག་འཚལ་ནི། ཇི་སྙེད་སུ་དག་སོགས་ཤློ་ཀ་བཞིའི་མཐར། ཕྱག་བྱར་འོས་པ་ཞེས་སོགས་ཤློཀ་གཅིག་གིས་སྤྱི་ཕྱག་བྱ། དེ་ནས་མཆོད་རྟེན་སྤྱི་ཕྱག་ནི། ཤེས་རབ་ཆེན་པོས་བདག་མེད་ཐུགས་ཆུད་དེ། །ཡེ་ཤེས་ཆེན་པོའི་ཚོགས་ལས་བྱུང་བ་ཡི། །བདེ་བར་གཤེགས་པའི་ཆོས་སྐུ་སྤྲོས་མེད་པ། །སོ་སོ་རང་རིག་དེ་ལ་ཕྱག་འཚལ་བསྟོད། །འགྲོ་བའི་དོན་དུ་དགའ་བ་རྣམས་མཛད་དེ། །བསོད་ནམས་ཆེན་པོའི་ཚོགས་ལས་བྱུང་བ་ཡི། །བདེ་བར་གཤེགས་པའི་གཟུགས་སྐུར་གང་སྣང་བ། །ཡོན་ཏན་མཐའ་དག་རྫོགས་ལ་ཕྱག་འཚལ་བསྟོད། །བསྐལ་པ་གྲངས་མེད་འདས་པའི་སྔོན་རོལ་ནས། །སེམས་ཅན་དོན་དུ་བྱང་ཆུབ་སེམས་བསྐྱེད་དེ། །སྤྱོད་པས་གཞན་གྱི་དོན་ལ་རབ་བརྩོན་པ། །བླ་མེད་འབྲས་སུ་བརྙེས་ལ་ཕྱག་འཚལ་བསྟོད། །ཐབས་ཀྱི་སྤྱོད་པས་མཛད་པ་མཐར་ཕྱིན་ཅིང་། །ཆོས་ཀྱི་འཁོར་ལོ་རྒྱ་ཆེན་ཡོངས་བསྐོར་ནས། །མྱ་ངན་འདས་པའི་ཚུལ་ནི་རབ་བསྟན་པ། །སྐུ་གདུང་བཞག་པ་དག་ལ་ཕྱག་འཚལ་བསྟོད། །སྐུ་གདུང་ཕྲ་མོར་བསིལ་བའི་རིང་བསྲེལ་སྣོད། །རྒྱུ་དང་འབྲས་བུར་བཅས་པ་ཆོས་ཀྱི་ཚུལ། །སེམས་ཅན་རྣམས་ཀྱི་མཆོད་པར་བྱ་བའི་རྟེན། །གཟུགས་བརྙན་ཉིད་ཀྱི་སྐུ་ལ་ཕྱག་འཚལ་བསྟོད། །སྔོན་གྱི་སྨོན་ལམ་ཆེན་པོ་རྒྱུན་མངའ་བས། །བྱང་ཆུབ་ཕྱོགས་ཆོས་སུམ་ཅུ་རྩ་བདུན་ཏེ། །བང་རིམ་བུམ་པ་སྲོག་ཤིང་ཚུལ་བསྟན་པ། །རྒྱུ་ཡི་ཆོས་སུ་བཞག་ལ་ཕྱག་འཚལ་བསྟོད། །དེ་བཞིན་གཤེགས་པའི་སྟོབས་བཅུ་མ་འདྲེས་ཆོས། །ཐུགས་རྗེ་ཆེན་པོའི་ཚད་མེད་རབ་མངའ་བ། །འཁོར་ལོ་ཆར་ཁེབས་ལྟ་བུའི་ཚུལ་བསྟན་པ། །འབྲས་བུའི་ཆོས་སུ་བཞག་ལ་ཕྱག་འཚལ་བསྟོད། །མི་འཇིགས་བསྲུང་བ་མེད་དང་བདུད་ལས་རྒྱལ། །ཚངས་པའི་དབྱངས་ལྡན་མངོན་པར་མཁྱེན་མངའ་བ། །རྡོ་རིང་ཐེམ་སྐས་རྒྱལ་མཚན་དྲིལ་བུ་ཏོག །ཆོས་སྐུའི་རྟེན་དུ་བཞག་ལ་ཕྱག་འཚལ་བསྟོད། །ཆོས་ཀྱི་གྲགས་པ་ཡེ་ཤེས་བཞི་ལ་སོགས། །ཡོན་ཏན་ངོ་མཚར་ཅན་གྱི་ཚོགས་རྫོགས་ཤིང་། །གང་གིས་ཆོས་ཀྱི་རྒྱལ་པོར་མཚན་གསོལ་བ། །བདག་ཉིད་ཆེན་པོ་དག་ལ་ཕྱག་འཚལ་བསྟོད། །རང་བཞིན་རྣམ་དག་ཆོས་དབྱིངས་དེ་བཞིན་ཉིད། །སྤྲོས་པའི་དྲི་མས་མ་གོས་དཀར་བ་ལ། །རིན་ཆེན་སྤྲས་པས་མཚན་མ་རྫོགས་པའི་སྐུ། །འགྲོ་དོན་ལེགས་པར་མཛད་ལ་ཕྱག་འཚལ་བསྟོད། །དེ་བཞིན་སྐུ་གདུང་དབྱིབས་བཅས་ཆོས་སྐུ་དག །གང་གིས་མཐོང་ཐོས་དྲན་ནམ་རེག་ཀྱང་རུང་། །མཐོ་རིས་དཔལ་དང་ཐར་མཆོག་བདེ་ཐོབ་པ། །ཡོན་ཏན་སྣ་ཚོགས་མངའ་ལ་ཕྱག་འཚལ་བསྟོད། །དེ་ནས་དཀོན་མཆོག་གསུམ་གྱི་ཕྱག་ནི། སྟོན་པ་བཅོམ་ལྡན་འདས་ཤཱཀྱ་ཐུབ་པ་ལ་སོགས་པ་ཕྱོགས་བཅུ་དུས་གསུམ་དུ་གཤེགས་ཤིང་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པ་རྫོགས་པའི་སངས་རྒྱས་རིག་པ་དང་། ཞབས་སུ་ལྡན་པ། དེ་བཞིན་གཤེགས་པ། འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་དཀོན་མཆོག་བླ་ན་མེད་པ་ཐམས་ཅད་ལ་གུས་པར་ཕྱག་འཚལ་ལོ། །སྐྱབས་སུ་མཆིའོ། །སྟོན་པ་བཅོམ་ལྡན་འདས་དེ་དག་གི་ཐུགས་ཀྱི་སྲས་ས་ཆེན་པོ་ལ་རབ་ཏུ་བཞུགས་པའི་བྱང་ཆུབ་སེམས་དཔའ་ཆེན་པོ་ཐམས་ཅད་དང་། སྟོན་པ་བདེ་བར་གཤེགས་པ་དེ་དག་གི་གསུང་གི་སྲས་འཕགས་པ་རང་རྒྱལ་དང་འཕགས་པ་ཉན་ཐོས་ཀྱི་དགེ་འདུན་ཏེ། ཚོགས་ཀྱི་མཆོག་བླ་ན་མེད་པར་ཐམས་ཅད་ལ་གུས་པར་ཕྱག་འཚལ་ལོ། །སྐྱབས་སུ་མཆིའོ། །ཕྱོགས་བཅུ་ན་མཆོད་རྟེན་རིང་བསྲེལ་དང་སྐུ་གདུང་དང་བཅས་པ་ཐམས་ཅད་ལ་གུས་པར་ཕྱག་འཚལ་ལོ། །སྐྱབས་སུ་མཆིའོ། །འཕགས་པ་དམ་པའི་ཆོས་སྐྱོང་བ་འཇིག་རྟེན་དང་འཇིག་རྟེན་ལས་འདས་པའི་ཚུལ་དུ་བཞུགས་པ་ཐམས་ཅད་ལ་གུས་པར་ཕྱག་འཚལ་ལོ། །སྐྱབས་སུ་མཆིའོ། །ཞེས་པས་ཕྱག་བྱའོ། །གཉིས་པ་མཆོད་པ་ནི། བདེ་གཤེགས་རྣམས་ཀྱི་ལོངས་སྤྱོད་ཀྱིས། །ཀུན་བཟང་མཆོད་པས་རོལ་མཛད་ཀྱང་། །འགྲོ་བའི་མུན་པ་བསལ་སླད་དུ། །བཀུར་སྟི་རིམ་གྲོའི་ཚུལ་ཙམ་དུ། །བླ་མེད་མཆོད་པ་རྣམ་ལྔ་འདི། །འགྲོ་བའི་དོན་དུ་འབུལ་ལགས་ན། །མཆོད་པའི་སྤྲིན་གྱིས་ཁྱབ་གྱུར་ནས། །བསོད་ནམས་གཏེར་ཆེན་ཐོབ་པར་ཤོག །ཅེས་པས་ཉེར་སྤྱོད་ལྔ་འབུལ། བདེ་གཤེགས་སྐུ་མཆོག་མཚན་དང་དཔེ་བྱད་ལྡན། །བྱང་ཆུབ་མཆོག་གི་རྒྱན་གྱིིས་མཛེས་ལགས་ཀྱང་། རིན་ཆེན་དོ་ཤལ་སེ་མོ་དོ་ལ་སོགས། །རྒྱན་གྱི་ཁྱད་པར་མང་པོ་དབུལ་བར་བགྱི། །ཞེས་པས་རྒྱན་དང་། དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །གོས་བཟང་སྲབ་ལ་འཇམ་པ་སྣ་ཚོགས་དང་། །རྒྱན་མཆོག་བརྒྱ་ཕྲག་དག་ཀྱང་དབུལ་བར་བགྱི། །ཞེས་པས་ན་བཟའ་འབུལ། ཐེག་མཆོག་བླ་བྲེ་གདུགས་དང་བ་དན་སྒྲེང་། །བདུད་བཅོམ་རྒྱལ་མཚན་ལྷབ་ལྷུབ་དར་འཕན་དང་། །གར་དང་རོལ་མོ་མཆོད་པའི་སྒྲ་དབྱངས་ཀྱིས། །རྒྱལ་བའི་དཀྱིལ་འཁོར་མཛེས་པར་བརྒྱན་པར་ཤོག །ཅེས་རོལ་མོའི་ཁྱད་པར་དུ་མས་མཆོད། དེ་ནས་ནམ་མཁའ་མཛོད་ཀྱི་སྔགས་རྒྱས་བྱིན་གྱིས་བརླབས་པའི་ཞལ་ཟས། རྒྱལ་བའི་བདུད་བཅོམ་བྱང་ཆུབ་སངས་རྒྱས་ཏེ། །རྒྱལ་བ་སྐུ་ལ་སྦྲེབས་སྐྱེམས་མི་མངའ་ཡང་། །བདག་ཅག་བསོད་ནམས་ཞིང་དུ་འགྱུར་སླད་དུ། །བཤོས་དང་ཞལ་ཟས་སྦྱར་བ་འདི་འབུལ་བས། །དུས་གསུམ་དགེ་བའི་ལོ་ཏོག་འཕེལ་རྒྱས་ནས། །བདེ་བ་ཅན་དུ་པདྨ་ལས་སྐྱེས་ཏེ། །ཏིང་འཛིན་ཆོས་དང་ཟས་ལ་སྤྱོད་པར་ཤོག །ནམ་མཁའ་མཛོད་ཀྱི་སྔགས་བརྗོད་དེ་འབུལ། དེ་ནས་ལྔ་ཚན་ལྔ་འབུལ་བ་ནི། བདེ་གཤེགས་མགོན་པོ་དཔག་བསམ་འཁོར་དང་བཅས། །བསོད་ནམས་ཡེ་ཤེས་སྐུ་ལྔ་མཐར་ཕྱིན་པ། །ཆོས་ཀྱི་ལོངས་སྤྱོད་བཀུར་སྟིའི་ཚུལ་ཙམ་དུ། །འབྲུ་ལྔ་སྤོས་ལྔ་སྨན་ལྔ་རིན་ཆེན་ལྔ། །སྙིང་པོ་ལྔ་བཅས་རྒྱལ་བས་རབ་བསྔགས་པ། །བདག་གཞན་དོན་གྱི་སྙིང་པོར་འདི་ཕུལ་བས། །འགྲོ་ལ་ཕན་ཕྱིར་ཚུལ་ཁྲིམས་མཆོག་ལྡན་ཏེ། །རིན་ཆེན་གཏེར་ལྟར་ཀུན་ལ་ཕན་འདོགས་ཤོག །ཅེས་འབུལ། དེ་ནས་རྟེན་འབྲེལ་སྙིང་པོས་བྱིན་གྱིས་བརླས་པའི་ཡུངས་ཀར་འཐོར་ཞིང་། བདེ་གཤེགས་ཀུན་བཟང་མངོན་པར་སངས་རྒྱས་ཏེ། །རྡོ་རྗེ་གདན་ལ་མངོན་པར་བཞུགས་པ་ན། །དཔལ་ལྡན་རྡོ་རྗེ་འཛིན་གྱིས་གུས་བཅས་པས། །སྔགས་གྲུབ་རྒྱལ་པོས་ཡུངས་ཀར་ཕུལ་བ་ལྟར། །དེང་འདིར་སྟོན་པས་བདུད་བཞི་ཚར་བཅད་ནས། །སྐྱེ་རྒ་ན་འཆི་འཁོར་བའི་སྡུག་བསྔལ་ལས། །བདག་དང་མཐའ་ཡས་འགྲོ་བ་ཀུན་བསྒྲལ་ནས། །རྡོ་རྗེ་གདན་ལ་མངོན་པར་འཚང་རྒྱ་ཤོག །དེ་ནས་སྤྱན་དབྱེ་བའི་སྨོན་ལམ་གསོལ་བ་ནི། ཕྱོགས་བཅུ་ུདུས་གསུམ་གྱི་འཕགས་པ་དཀོན་མཆོག་སུམ་ལ་ཕྱག་འཚལ་ལོ། །བདག་ཅག་གིས་དེ་བཞིན་གཤེགས་པའི་ཆོས་ཀྱི་སྐུའི་གཟུགས་བརྙན་བཞེངས་སུ་གསོལ་ཏེ། མཆོད་པར་འོས་པའི་བདེ་བར་སྦྱར་བ་ཐམས་ཅད་ཀྱིས་མཆོད་ཅིང་བཀུར་བས། བདག་དང་མ ཐས་ཡས་པའི་སེམས་ཅན་ཐམས་ཅད་ཀྱི་སྡིག་སྒྲིབ་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་ཏེ། དེ་དང་དེ་དག་ཕུལ་བ་ལས་ཐོབ་པའི་ཡོན་ཏན་ཁྱད་པར་ཐམས་ཅད་མ་ལུས་པར་ཐོབ་པར་གྱུར་ཅིག །རྟེན་འདི་ཡང་འཇིག་རྟེན་ཇི་སྲིད་ཀྱི་བར་དུ་མཆོད་པ འི་རྟེན་དུ་བཞུགས་ནས་ཕྱོགས་དུས་ཐམས་ཅད་བཀྲ་ཤིས་ཤིང་བྱིན་ཆེ་བར་གྱུར་ཅིག །འཕགས་པ་སྐུ་གདུང་རིན་ཆེན་རིང་བསྲེལ་སྣོད། །རྙིང་བཅོས་བྱི་དོར་བྱས་ཤིང་མཆོད་པ་དང་། །གསར་བརྩིགས་མཆོད་ཅིང་ཁྲུས་ཆབ་གསོལ་བ་དང་། །བསྟོད་ཅིང་བསྐོར་དང་གུས་པར་བགྱིས་པ་དང་། །སྨོན་ལམ་བཟང་པོ་སེམས་ཡིད་དང་བཏབ་པའི། །བྱིན་རླབས་ཡོན་ཏན་ཁྱད་པར་ཆེན་པོའི་མཐུས། །བདག་ཅག་ཡོན་མཆོད་འཁོར་བཅས་ཐམས་ཅད་དང་། །དད་མོས་གྲོགས་བྱེད་རྗེས་སུ་ཡི་རང་རྣམས། །སྨོན་ལམ་མཐུ་སྟོབས་ཁྱད་པར་ཆེན་པོ་ཡིས། །དང་བའི་ཡིད་ཀྱིས་མཆོད་རྟེན་འདི་བརྩིགས་པས། །དེང་ནས་བདག་ཅག་སྡིག་སྒྲིབ་བྱང་གྱུར་ཏེ། །བླ་མེད་བྱང་ཆུབ་བདག་ཅག་མྱུར་ཐོབ་ཤོག ། དེ་ནས་བཀྲ་ཤིས་ཀྱི་རྫས་ཕུལ་ཏེ་མངའ་དབུལ་བའི་མཆོད་པ་ནི། བདེ་གཤེགས་ཀུན་བཟང་མཐོང་བས་བཀྲ་ཤིས་ལྟར། །རྒྱལ་བ་འཁོར་བཅས་དེང་འདིར་བཀྲ་ཤིས་ཤོག །ངན་སྡིག་ལོག་པའི་ཚོགས་རྣམས་བཅོམ་གྱུར་ནས། །རྒྱས་སྲས་ཏིང་འཛིན་ཚོགས་རྣམས་འཕེལ་དར་ཞིང་། །ཞལ་མཐོང་ཙམ་གྱིས་བདེ་བའི་མཆོག་བརྙེས་ནས། །ཉི་ལྟར་ཞལ་དྲོ་ཟླ་ལྟར་འོད་གསལ་ཞིང་། །བདག་དང་འགྲོ་བས་ཞལ་དྲོ་བྱིན་ཆེ་ནས། །བསྐལ་པའི་མཐར་ཐུག་བར་དུ་བཞུགས་སུ་གསོལ། །དེ་ནས་མཆོད་ཡུལ་བཟུང་བ་ནི། ཡེ་ཤེས་ཚོགས་རྫོགས་སྐུ་གསུམ་ལྷུན་གྱིས་གྲུབ། །བཞི་བཅོམ་དྲུག་ལྡན་མི་གནས་མྱ་ངན་འདས། །ཐུགས་རྗེས་སྤྲུལ་པས་འགྲོ་བའི་འདམ་སྐེམས་པ། །ཕྱོགས་བཅུའི་སངས་རྒྱས་རྣམས་ལ་མཆོད་པ་འབུལ། །དྲི་མེད་བདུད་རྩིས་འཁོར་བའི་ནད་རྣམས་འཇོམས། །དོན་དམ་དམིགས་མེད་བདེ་གཤེགས་འབྱུང་བའི་རྒྱུ། །ཡེ་ཤེས་ཉི་མས་མ་རིག་མུན་འཇོམས་པ། །འཕགས་པའི་ལམ་གྱུར་ཆོས་ལ་མཆོད་པར་འབུལ། །བྱམས་དང་སྙིང་རྗེ་དགའ་དང་བཏང་སྙོམས་ཚུལ། །བདེ་གཤེགས་རིན་ཆེན་པདྨ་ལས་ཀྱི་རྟགས། །རིན་ཆེན་བཞི་ལས་མངོན་དུ་གྱུར་པའི་སྐུ། །རིགས་བཞིའི་མཆོད་རྟེན་རྣམས་ལ་མཆོད་པར་འབུལ། །ལྷོ་ཕྱོགས་འཛམ་གླིང་རིན་ཆེན་ལ་སོགས་ན། །བཞུགས་པའི་ཕྱོགས་བཞིའི་མཆོད་རྟེན་རྣམ་བཞི་སོགས། །བྱང་ཆུབ་ཕྱོགས་ཆོས་སུམ་ཅུ་རྩ་བདུན་དང་། །རྒྱལ་བའི་མ་འདྲེས་ཡོན་ཏན་ཀུན་བསགས་པའི། །ཆོས་ཀྱི་སྐུ་ཡི་མཆོད་རྟེན་ཁྱད་པར་ཅན། །ཕྱོགས་བཅུ་ཀུན་ན་བཞུགས་ལ་མཆོད་པར་འབུལ། །དད་བརྩོན་ཤུགས་ཀྱིས་ལུས་ངག་སེམས་བཏུད་དེ། །བརྩོན་འགྲུས་དྲག་པོས་རིན་ཆེན་སྣ་ལྔ་དང་། །འབྱུང་བ་ལྔ་ལས་གྲུབ་པའི་མཆོད་རྟེན་དང་། །སྐུ་གདུང་རིང་བསྲེལ་རྣམས་ལ་མཆོད་པར་འབུལ། །རྒྱལ་བའི་ཐུགས་སྲས་བྱང་སེམས་འཕགས་པ་དང་། །གསུང་གི་སྲས་གྱུར་ཉན་རང་འཕགས་པ་དང་། །འཕགས་པའི་དགེ་འདུན་རྣམས་དང་དམ་པའི་ཆོས། །སྐྱོང་མཛད་སྲུང་མའི་ཚོགས་ལ་མཆོད་པར་འབུལ། །རྡོ་རིང་ཐེམ་སྐས་ཆུ་སྲིན་རྒྱལ་མཚན་དང་། །གདུགས་དང་བ་དན་དར་གྱི་ཅོད་པན་དང་། །པདྨ་ཉི་ཟླ་སིལ་སྙན་ལྷ་རྫས་ཀྱིས། །ཚངས་པའི་དབྱངས་ལྡན་དམིགས་པ་དག་པར་མཆོད། །ཏིང་འཛིན་སྔགས་དང་ཕྱག་རྒྱའི་མཐུས་བསྒྱུར་བ། །ཡོན་ཆབ་བདུག་པ་མར་མེ་དྲི་ཆབ་དང་། །མེ་ཏོག་དམ་པ་བཤོས་གཙང་མཉེས་པའི་མཆོག །མཆོད་ཡོན་རྣམ་ལྔའི་ཚོགས་ཀྱིས་མཉེས་པར་བགྱི། །དངོས་སུ་འབྱོར་དང་ཡིད་ཀྱིས་སྤྲུལ་པ་ཡི། །འཇིག་རྟེན་འདས་དང་འཇིག་རྟེན་གྲུབ་པའི་རྫས། །ཀུན་བཟང་རྣམ་དག་མཆོད་པའི་སྤྲིན་ཕུང་གིས། །ནམ་མཁའ་གང་བར་དམིགས་ཏེ་མཆོད་པར་བགྱི། །སྲིད་གསུམ་འཁོར་བའི་འདམ་ལས་དྲངས་པ་དང་། །འགྲོ་དོན་མཛད་པའི་ཐུགས་དམ་བསྐང་སླད་དུ། །ཡེ་ཤེས་ཉི་མས་མཚན་མའི་སྐྱོན་སྤངས་ཏེ། །བྱམས་པའི་ཐུགས་རྗེས་མཆོད་པ་བཞེས་སུ་གསོལ། །རྒྱལ་བའི་རིང་བསྲེལ་མཆོད་འོས་བླ་མེད་རྣམས། །སྤྱན་དྲངས་ཕྱག་བགྱིས་བསྟོད་དང་བཀུར་བའི་མཐུས། །སྔོན་བསགས་ལས་ཀྱི་སྒྲིབ་པ་ཀུན་བྱང་ནས། །འགྲོ་དྲུག་ཚོགས་རྫོགས་མངོན་པར་འཚང་རྒྱ་ཤོག །དེ་ནས་བྱེ་བྲག་མཆོད་རྟེན་གྱི་མཆོད་པ་ནི། ཕྱོགས་ཕྱོགས་ནས་མཆོད་ཡོན་བཟེད་ཞལ་དུ་སྦྲེང་བཞིན་དུ། མཆོད་རྟེན་སྐུ་ཡི་ཆ་ལུགས་ནི། ། འོག་གི་རྨིང་བཏིང་ཡེ་ཤེས་བཞི། །གྱེན་དུ་ཁྲི་འཕང་རྣམ་ཐར་གསུམ། །ཆགས་མེད་པདྨའི་གདན་སྟེངས་སུ། །བུམ་པ་ཟླུམ་པོ་ཆོས་ཀྱི་རྗེ། །གསེར་གྱི་བྲེ་ཕུལ་འོད་ཟེར་འཕྲོ། །སྲོག་ཤིང་དྲང་སྲོང་བླ་ན་མེད། །འཁོར་ལོ་བཅུ་གསུམ་ཡེ་ཤེས་བརྒྱད། །འབར་བ་རྡོ་རྗེ་ཡེ་ཤེས་ལྔ། །བཀྲ་ཤིས་དཔལ་ཚོགས་གཞལ་ཡས་འདིར། །བླ་མེད་མཆོད་པའི་རྒྱུན་བཤམས་ནས། །ཆུ་བོ་གངྒཱའི་རྒྱུན་བཞིན་དུ། །ཨརྒྷའི་རྒྱུན་ཡང་མི་ཆད་དེ། །སྐུ་ཡི་མཆོད་རྟེན་ཐམས་ཅད་ལ། །བཀྲ་ཤིས་མཆོད་པ་འདི་འབུལ་ན། །ཐུགས་རྗེས་དགོངས་ཏེ་བཞེས་སུ་གསོལ། །མཆོད་རྟེན་གསུང་གི་ཡན་ལག་ནི། །མན་ངག་སྔགས་ཀྱི་སྙིང་པོར་བརྗོད། །བཟླས་བརྗོད་གསུང་རབ་བཅུ་གཉིས་བརྗོད། །དོན་དམ་སྒྲ་སྐད་ཡུལ་ལས་འདས། །བཀྲ་ཤིས་དཔལ་ཚོགས་གཞལ་ཡས་འདིར། །བླ་མེད་མཆོད་པའི་རྒྱུན་བཤམས་ནས། །ཆུ་བོ་གངྒཱའི་རྒྱུན་བཞིན་དུ། །ཨརྒྷའི་རྒྱུན་ཡང་མི་ཆད་དེ། །གསུང་གི་མཆོད་རྟེན་ཐམས་ཅད་ལ། །བཀྲ་ཤིས་མཆོད་པ་འདི་འབུལ་ན། །ཐུགས་རྗེས་དགོངས་ཏེ་བཞེས་སུ་གསོལ། །མཆོད་རྟེན་ཐུགས་ཀྱི་མཚན་ཉིད་ནི། །དཔེ་མེད་བསམ་ཡས་ནམ་མཁའ་ཆེ། །ཏིང་འཛིན་འདི་ལས་ཅིར་ཡང་གསལ། །ཡེ་ཤེས་ཉིད་ལས་སྣ་ཚོགས་རྟོགས། །ཤེས་རབ་ཉིད་ལས་མཁྱེན་པར་རྫོགས། །ཐམས་ཅད་ཀུན་མཁྱེན་ལྷུན་གྱིས་གྲུབ། །དོན་དམ་སེམས་རྟོག་ཡུལ་ལས་འདས། །བཀྲ་ཤིས་དཔལ་ཚོགས་གཞལ་ཡས་འདིར། །བླ་མེད་མཆོད་པའི་རྒྱུན་བཤམས་ནས། །ཆུ་བོ་གངྒཱའི་རྒྱུན་བཞིན་དུ། །ཨརྒྷའི་རྒྱུན་ཡང་མི་ཆད་དེ། །ཐུགས་ཀྱི་མཆོད་རྟེན་ཐམས་ཅད་ལ། །བཀྲ་ཤིས་མཆོད་པ་འདི་འབུལ་ན། །ཐུགས་རྗེས་དགོངས་ཏེ་བཞེས་སུ་གསོལ། །བླ་མེད་མཆོད་རྟེན་ཡོ་བྱད་ནི། །རིན་ཆེན་འབར་བའི་སྲིད་རྩེ་ན། །ཙི་ཏྲ་མ་ཎི་ཡེ་ཤེས་བཞི། །བཀྲ་ཤིས་དཔལ་ཚོགས་གཞལ་ཡས་འདིར། །བླ་མེད་མཆོད་པའི་རྒྱུན་བཤམས་ནས། །ཆུ་བོ་གངྒཱའི་རྒྱུན་བཞིན་དུ། །ཨརྒྷའི་རྒྱུན་ཡང་མི་ཆད་དེ། །བླ་མེད་མཆོད་པ་འདི་འབུལ་ན། །ཐུགས་རྗེས་དགོངས་ཏེ་བཞེས་སུ་གསོལ། །ཡིད་ཀྱི་མཆོད་རྟེན་མཚན་ཉིད་ནི། །ནམ་མཁའི་དབྱིངས་དང་རྒྱ་མཚོའི་མཇིང་། །བྱང་ཆུབ་སེམས་ཀྱི་མཆོད་རྟེན་སྤྱི། །སྣང་ཞིང་སྟོང་ལ་སྟོང་ཞིང་གསལ། །ཡིད་ཀྱི་མཆོད་རྟེན་ཐམས་ཅད་ལ། །ཆུ་བོ་གངྒཱའི་རྒྱུན་བཞིན་དུ། །ཨརྒྷའི་རྒྱུན་ཡང་མི་ཆད་དེ། །བཀྲ་ཤིས་མཆོད་པ་འདི་འབུལ་ན། །ཐུགས་རྗེས་དགོངས་ཏེ་བཞེས་སུ་གསོལ། །རང་བཞིན་མཆོད་རྟེན་ཡེ་ཤེས་སྐུ། །ཐུགས་རྗེའི་བྱིན་རླབས་རྨད་པོ་ཆེ། །མཚན་མའི་སྡུག་བསྔལ་ཡོངས་བསལ་ནས། །སེམས་ཅན་རྣམས་ལ་བྱམས་ཐུགས་ལྡན། །བཀྲ་ཤིས་དཔལ་ཚོགས་གཞལ་ཡས་འདིར། །ཆུ་བོ་གངྒཱའི་རྒྱུན་བཞིན་དུ། །ཨརྒྷའི་རྒྱུན་ཡང་མི་ཆད་དེ། །རང་བཞིན་མཆོད་རྟེན་ཐམས་ཅད་ལ། །བླ་མེད་མཆོད་པའི་འདི་འབུལ་ན། །ཐུགས་རྗེས་དགོངས་ཏེ་བཞེས་སུ་གསོལ། །རང་བཞིན་མཆོད་རྟེན་ཏིང་འཛིན་སྐུ། །བྱམས་ཤིང་སྙོམས་པ་ཀུན་གྱི་མགོན། །ཐུགས་རྗེ་ཆེན་པོ་སྐྱོ་དུབ་མེད། །ནུབ་བྱང་རྒྱལ་པོ་མིག་ནད་སེལ། །དཔལ་ཚོགས་བཀྲ་ཤིས་གཞལ་ཡས་འདིར། །ཆུ་བོ་གངྒཱའི་རྒྱུན་བཞིན་དུ། །ཨརྒྷའི་རྒྱུན་ཡང་མི་ཆད་དེ། །སྤྲུལ་པའི་མཆོད་རྟེན་ཐམས་ཅད་ལ། །བླ་མེད་མཆོད་པའི་འདི་འབུལ་ན། །ཐུགས་རྗེས་དགོངས་ཏེ་བཞེས་སུ་གསོལ། །གཟུགས་བརྙན་མཆོད་རྟེན་ཤེས་རབ་སྐུ། །བདུད་ཀྱི་སྡེ་དང་གཤིན་རྗེའི་འཁོར། །སྲིན་པོའི་ཚོགས་དང་ལྷ་མ་ཡིན། །གནོད་སྦྱིན་མ་རུངས་ཐམས་ཅད་ཀྱིས། །གཟི་བྱིན་མདངས་སྟོབས་འཇོམས་མཛད་ཅིང་། །གནོད་སྦྱིན་མང་པོའི་རྒྱུ་སྲང་གཅོད། །གཟུགས་བརྙན་མཆོད་རྟེན་བཞུགས་རྒུ་ལ། །བཀྲ་ཤིས་དཔལ་ཚོགས་གཞལ་ཡས་འདིར། །ཆུ་བོ་གངྒཱའི་རྒྱུན་བཞིན་དུ། །ཨརྒྷའི་རྒྱུན་ཡང་མི་ཆད་དེ། །བླ་མེད་མཆོད་པ་འདི་འབུལ་ན། །ཐུགས་རྗེས་དགོངས་ཏེ་བཞེས་སུ་གསོལ། །དེ་ནས་བསྟོད་པ་ནི། རང་འབྱུང་འདྲེན་པ་དཔའ་བོ་ལྷ་ཡི་ལྷ། །བཅོམ་ལྡན་ཤཱཀ་ཐུབ་སྐུ་གདུང་རིང་བསྲེལ་སྣོད། །འཇིག་རྟེན་གསུམ་གྱི་མཆོད་གནས་མཆོག་བཞུགས་པ། །བང་རིམ་རི་རབ་ལྟ་བུའི་ཁྲི་འཕང་ལ། །བུམ་རྟེན་པདྨ་བུམ་བཟང་སྙིང་པོ་ནི། །ཚོགས་གཉིས་རྫོགས་པའི་འབྲས་བུ་ཡིད་བཞིན་སྐུ། །ཕྱག་འཚལ་མཆོད་པས་བརྒྱ་བྱིན་ལུས་ཐོབ་ཅིང་། །མཐར་གྱི་ཆོས་ཀྱི་རྒྱལ་པོའི་སྐུ་ཐོབ་པ། །ཡོན་ཏན་ཚོགས་ཀྱི་སྐུ་གདུང་མཐུ་ཆེན་བཞུགས། །བུམ་པ་དབྱིབས་ལེགས་སྲོག་ཤིང་དྲང་བརྟན་ལ། །འཁོར་ལོ་གདུགས་ཕྲེང་རིམ་པས་བགེབས་པའི་སྟེང་། །འོད་སྟོང་ཉི་དབྱིབས་ཆར་ཁེབས་གདུགས་བྲེས་ཏེ། །ཟླ་བ་དྲིལ་བུ་ཅོད་པན་འཇིག་རྟེན་སྐྱོང་། །ཕྲེང་བ་ཐེམ་སྐས་བ་དན་ཅོད་པན་ཕྲེང་། །རྒྱན་ལ་རྒྱན་བཀོད་འཇིག་རྟེན་གསུམ་གྱིས་བརྒྱན། །ཆོས་བཟང་རྣམ་སྣང་རྣམ་པ་ཐམས་ཅད་ཞལ། །གཟུགས་ཀྱི་ཁྱད་པར་ལྟ་བས་མི་ངོམས་ཁྱོད། །ཡེ་ཤེས་ཚོགས་རྫོགས་ཆོས་ཀྱི་སྐུ་ལགས་ཏེ། །རྣམ་རྟོག་བྲལ་བས་ཡོན་ཏན་ཀུན་གྱི་གཞི། །དྲན་པ་ཉེར་བཞག་རྨིང་གི་ཁྲི་འཕང་བརྟེན། །བརྩོན་འགྲུས་ཡང་དག་ཁྲི་འཕང་གཉིས་པ་ལེགས། །རྫུ་འཕྲུལ་རྐང་བཞི་ཁྲི་འཕང་གསུམ་པ་དགེ། །དབང་པོ་ལྔ་ཡི་ཁྲི་འཕང་བཞི་པ་བཟང་། །བུམ་པ་བྱང་ཆུབ་ཡན་ལག་བུམ་རྟེན་སྟོབས། །བྲེ་ལེགས་འཕགས་པའི་ལམ་གྱི་ཡན་ལག་བརྒྱད། །སྲོག་ཤིང་ཤེས་བཅུ་སྟོབས་བཅུ་གདུགས་ཕྲེང་བཅུ། །གདུགས་ཕྲེང་མ་འདྲེས་དྲན་པ་ཉེར་བཞག་གསུམ། །ཐུགས་རྗེས་འཕགས་པའི་ཆོས་ཀྱི་ཆར་ཁེབས་ལྡིང་། །བླ་མེད་གོ་འཕང་གདུགས་ཀྱི་གནམ་འཕང་མཐོ། །འཇིག་རྟེན་མུན་སེལ་ཡེ་ཤེས་ཟླ་བ་གསལ། །ཚངས་པའི་གསུང་གི་དྲིལ་བུ་སྒྲ་སྙན་འཁྲོལ། །རྫོགས་པའི་བྱང་ཆུབ་དར་གྱི་ཅོད་པན་འཕུར། །བདེན་བཞི་ཕན་ཐོགས་འཇིག་རྟེན་སྐྱོང་བཞི་བཙུན། །ཚུལ་ཁྲིམས་ཕུང་པོ་མེ་ཏོག་ཕྲེང་བ་བཟང་། །སྐྱོན་བྲལ་སྲུང་བའི་ངོས་ཀྱི་ཐེམ་སྐས་མཛེས། །ཆོས་ཀྱི་འཁོར་ལོ་བསྐོར་བའི་བ་དན་དཔའ། །བདུད་བཞི་འཇོམས་པའི་ཆུ་སྲིན་རྒྱལ་མཚན་གྲགས། །མི་འཇིགས་བཞི་ཡི་རྡོ་རིང་སེང་གེ་བརྗིད། །འདི་འདྲའི་དམ་ཆོས་ངོ་མཚར་རྨད་རྣམས་ཀྱིས། །ཐབས་མཁས་ཐུགས་རྗེའི་མཆོད་རྟེན་ཚུལ་དུ་སྤྲུལ། །ནམ་མཁའི་ཁམས་ལ་ཚོན་བཀྱེ་ཇི་བཞིན་དུ། །ཡོན་ཏན་ཁྱད་པར་ཁ་དོག་དབྱིབས་སུ་བསྒྱུར། །དཔལ་གནས་རིན་ཆེན་འབྱུང་གནས་ཆེན་པོ་བ། །དུས་གསུམ་རྒྱལ་བའི་མཆོད་རྟེན་སྐུ་གདུང་ཚུལ། །དཔལ་འབྱུང་ཀ་ཎིཥྐ་དང་རབ་བྱུང་ཚུལ། །བསོད་ནམས་ཕུང་པོས་ཡུལ་ཁམས་བྱིན་ཆགས་ཤིང་། །སངས་རྒྱས་སྤྲུལ་པ་འཕྲིན་ལས་རྫོགས་པར་མཛད། །ས་བཅུའི་རྒྱལ་ཚབ་བྱམས་པའི་གཙུག་གི་རྒྱན། །དཀོན་མཆོག་གསུམ་གྱིི་བདག་ཉིད་ཆེན་པོ་ལ། །རི་ཀླུང་ནགས་ཚལ་ཆུ་ཀླུང་མཁར་གནས་པའི། །ལྷ་ཚོགས་དད་པའི་གནམ་ས་ཀུན་ནས་དཀྲིགས། །སྡོམ་བརྩོན་རྒྱལ་སྲས་འཁོར་བཞི་ཁྱིམ་བདག་དང་། །དབུས་མཐའི་རྒྱལ་ཁམས་མི་ཚོགས་ཀུན་འདུས་ནས། །མེ་ཏོག་ཕྲེང་བ་སྤེལ་ལེགས་མཛེས་པ་དང་། །ཙནྡན་དྲི་བཤོས་མར་མེ་རོལ་མོར་བཅས། །བཀྲ་ཤིས་གླུ་དབྱངས་བསྟོད་པའི་རྣམ་པ་དང་། །གདུགས་དང་རྒྱལ་མཚན་བ་དན་ལྷབ་ལྷུབ་བརྒྱན། །ལུས་ངག་ཡིད་གསུམ་དད་པས་བསྟོད་པར་བགྱི། །དེ་ནས་འཇིག་རྟེན་སྐྱོང་བའི་མཆོད་བསྟོད་ནི། རྒྱལ་ཆེན་བཞི་ལ་བསང་སྦྱང་བྱིན་བརླབ་སྤྱི་ལྟར་བྱས་པའི་གཏོར་མ། ༀ་དྷྲྀཥྚ་རཱཥྚ་ཡ་སྭཱ་ཧཱ། ༀ་བེ་རུ་དྷ་ཀ་ཡ་སྭཱ་ཧཱ། ༀ་བེ་རཱུ་པཀྵ་ཡ་སྭཱ་ཧཱ། ༀ་བེ་ཤྲ་མ་ཎ་ཡ་སྭཱ་ཧཱ་རྣམས་ཀྱི་མཐར། ཨ་ཀཱ་རོ་བཏགས་པས་ཕུལ་ལ། ཤར་ཕྱོགས་ན་ནི་ཡུལ་འཁོར་སྲུང་། །ལྷོ་ཕྱོགས་ན་ནི་འཕགས་སྐྱེས་པོ། །ནུབ་ཕྱོགས་ན་ནི་སྤྱན་མི་བཟང་། །བྱང་ཕྱོགས་ན་ནི་ཀུ་བེ་ར། །རྒྱལ་པོ་ཆེན་པོ་འདི་བཞི་དག །འཇིག་རྟེན་སྐྱོང་བ་གྲགས་ལྡན་པ། །ཕྱོགས་བཞི་དག་ནི་སྐྱོང་བར་བྱེད། །སྡེ་བོ་ཆེ་ལ་སྟོབས་པོ་ཆེ། །ཕ་རོལ་དགྲ་རྣམས་རབ་ཏུ་འཇོམས། །གཞན་གྱིས་མི་ཐུབ་ཐུལ་བར་དཀའ། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་ལྡན་ཞིང་གྲགས་དང་ལྡན། །རྫུ་འཕྲུལ་ཆེ་ཞིང་ལྷ་མིན་དང་། །ལྷ་ཡི་གཡུལ་ཡང་མྱོང་བར་བྱེད། །བདག་ཉིད་ཆེན་པོ་དེ་དག་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །རྒྱལ་བའི་སྤྱན་སྔར་ཞལ་བཞེས་ལྟར། །བསྟན་དང་བསྟན་འཛིན་བུ་བཞིན་སྐྱོངས། །མཆོད་རྟེན་གཙུག་ལག་ཁང་རྣམས་དང་། །སྐྱེ་རྒུ་མ་ལུས་བདེ་བར་སྲུངས། །འཇིག་རྟེན་བདེ་ཞིང་ལོ་ལེགས་དང་། །ཞེས་སོགས་བརྗོད། དེ་ནས་ཕྱོགས་སྐྱོང་བཅུ་ལ་བྱིན་གྱིས་བརླབས་པའི་གཏོར་མ། ༀ་ད་ཤ་དི་ཀ་ལོ་ཀ་པཱ་ལ་ས་པ་རི་ཝཱ་ར་ཨ་ཀཱ་རོ་སོགས་ཀྱིས་ཕུལ་ལ། དབང་པ ོ་རྡོ་རྗེ་འཆང་བའི་ལྷ། །སོགས་ཤྭ་ལོ་ཀ་བཅུའི་མཐར། ཕྱོགས་བཅུ་སྐྱོང་བ་ཁྱེད་རྣམས་ཀྱིས། །རྒྱལ་བའི་སྤྱན་སྔར་ཞལ་བཞེས་ལྟར། །བསྟན་དང་བསྟན་འཛིན་བུ་བཞིན་སྐྱོངས། །མཆོད་རྟེན་གཙུག་ལག་ཁང་རྣམས་དང་། །སྐྱེ་རྒུ་མ་ལུས་བདེ་བར་སྲུངས། །འཇིག་རྟེན་བདེ་ཞིང་ལོ་ལེགས་དང་། །སོགས་བརྗོད། དེ་ནས་འཁོར་དུ་གཏོགས་པའི་འབྱུང་པོ་དམ་ཚིག་ཅན་རྣམས་ལ། ༀ་དཱེ་བ་ནཱ་ག་ཡཀྵ་སོགས་ཀྱི་མཐར། ཨཱ་ཀཱ་རོ་བཏགས་ལ་གཏོར་མ་བསྔོས་ཏེ། འཁོར་དུ་གཏོགས་པའི་སྡེ་བརྒྱད་པོ། །ལྷ་དང་ཀླུ་དང་གནོད་སྦྱིན་དང་། །དྲི་ཟ་ལྷ་མིན་ནམ་མཁའ་ལྡིང་། །མི་འམ་ཅི་དང་ལྟོ་འཕྱེ་ཆེ། །རིགས་ནས་རིགས་ཀྱི་གཙོ་མཛད་པ། །མཆོད་འོས་གྱུར་པ་ཐམས་ཅད་ལ། །རིམ་གྲོ་གུས་པ་མཆོག་བསྐྱེད་ནས། །མཆོད་པ་འབུལ་ཞིང་ཕྱག་ཀྱང་འཚལ། །མི་དང་མི་མིན་འབྱུང་པོའི་ཚོགས། །ས་བཅུ་བར་སྣང་གནས་བཅས་པའི། །བྱང་སེམས་ལྡན་པ་ཐམས་ཅད་ལ། །མཆོད་པ་འབུལ་ཞིང་ཕྱག་ཀྱང་འཚལ། །འབྱུང་པོ་གང་དག་འདིར་ནི་ལྷགས་གྱུར་ཏམ། །སོགས་དང་། འདིར་ནི་རྒྱལ་བ་དགྲ་རྒྱལ་བདེན་གང་གི། །སོགས་ཤློ་ཀ་གཅིག་བརྗོད་དོ། །གསུམ་པ་སྡིག་པ་བཤགས་པ་ནི། ཁམས་གསུམ་འགྲོ་བ་སྐྱེས་གནས་བཞི། །འཁོར་བའི་རྒྱུད་དུ་གཏོགས་ཀུན་དང་། །རིགས་མཐུན་སྐྱེས་པ་བདག་ཅག་གིས། །དུག་གསུམ་དབང་གི་སྒོ་གསུམ་ནས། །ལས་དང་ཉོན་མོངས་སྐྱེ་བའི་རྒྱུ། །མཚམས་མེད་ལྔ་དང་ཉེ་བ་ལྔ། །མི་དགེ་བཅུ་དང་ལོག་པ་བཞི། །སྒྲིབ་པ་རྣམས་དང་ཀུན་སྦྱོར་དང་། །དེ་ཡི་རྒྱུ་དང་འབྲས་བུ་དང་། །ཡུན་རིང་འཁོར་ཞིང་མི་ཁོམ་བརྒྱད། །མཐོ་རིས་ཐར་པའི་ལམ་འགོག་ཅིང་། །བདག་དང་གཞན་ལ་ཡོངས་གདུང་བའི། །ཁ་ན་མ་ཐོ་ཅི་བགྱིས་པ། །ཆོས་དབྱིངས་ཕྱོགས་བཅུ་དུས་གསུམ་དང་། །རིགས་རྣམས་ཀུན་ལ་རབ་བཞུགས་པའི། །རྒྱལ་བ་སྲས་དང་བཅས་རྣམས་ལ། །མ་ལུས་བཤགས་ཤིང་སྡོམ་པར་བགྱི། །བཞི་པ་རྗེས་སུ་ཡི་རང་བ་ནི། ཕྱོགས་བཅུའི་སངས་རྒྱས་སྲས་བཅས་དང་། །རང་རྒྱལ་ཉན་ཐོས་ཐམས་ཅད་དང་། །འགྲོ་ཀུན་བསོད་ནམས་ཡེ་ཤེས་ཀྱི། །རྒྱུ་དང་འབྲས་བུ་ཐམས་ཅད་དང་། །སྐྱོན་རྣམས་སྤོང་ཞིང་ཡོན་ཏན་ཐོབ། །ཆགས་བྲལ་མཉམ་བཞག་པ་དང་ནི། །དེ་ཡི་འབྲས་བུ་ཁྱད་པར་དང་། །དགེ་བའི་བཤེས་དང་དམ་ཆོས་འཛིན། །བྱང་ཆུབ་སེམས་མཆོག་བསྐྱེད་བྱེད་ཅིང་། ། བདག་གཞན་སྨིན་པར་བྱེད་པ་དང་། །ལམ་དང་འབྲས་བུ་ཐོབ་པ་དང་། །བླ་མེད་གོ་འཕང་མཆོག་ཐོབ་པ། །དེ་དག་ཀུན་ལ་ཡི་རང་ཞིང་། །བསམ་དང་སྦྱོར་བ་དག་པ་ཡིས། །འགྲོ་བ་ཀུན་ལ་བདེ་སླད་དུ། །འཁོར་གསུམ་དག་པའི་ཚུལ་གྱིས་བསྒྲུབ། །ལྔ་པ་ཆོས་འཁོར་བསྐོར་བར་བསྐུལ་བ་ནི། ཕྱོགས་བཅུའི་འཇིག་རྟེན་སྣང་མཛད་པ། །བདེ་གཤེགས་སངས་རྒྱས་བཅོམ་ལྡན་འདས། །རིགས་འཁྲུངས་ལུང་བསྟན་དབང་བསྐུར་བ། །བྱང་ཆུབ་རིམ་པར་སངས་རྒྱས་པ། །དམ་ཆོས་བཙུན་པར་མཛད་པ་དང་། །གདུལ་བྱའི་དོན་ལ་བཞེས་པ་དང་། །རྒྱ་ཆེ་ཟབ་པ་རྟོགས་དཀའ་བས། །བསྐུལ་བའི་དོན་ལ་བཞེས་རྣམས་ལ། །ཆོས་ཀྱི་སྣང་བ་རྒྱས་པ་དང་། །འགྲོ་བ་ཀུན་ལ་བདེ་བ་དང་། །རྒྱ་ཆེ་ཟབ་པར་བསྟན་པ་དང་། །སྔོན་གྱི་ཐུགས་དམ་བསྐང་བའི་ཕྱིར། །ཚངས་པ་འདྲ་བར་ཚུལ་བསྒྱུར་ཏེ། །རིམ་གྲོ་གུས་པ་མཆོག་བསྐྱེད་ཅིང་། །ཐལ་མོ་སྦྱར་བས་རབ་བཏུད་དེ། །ཆོས་ཀྱི་འཁོར་ལོ་བསྐོར་བར་བསྐུལ། །དྲུག་པ་མྱ་ངན་ལས་མི་འདའ་བར་གསོལ་བ་འདེབས་པ་ནི། ཕྱོགས་བཅུའི་འཇིག་རྟེན་རབ་འབྱམས་ན། །བདེ་གཤེགས་བདུད་བཞི་ངེས་བཅོམ་ཞིང་། །རྫོགས་སངས་རྒྱས་ནས་འཁོར་ལོ་བསྐོར། །འགྲོ་དོན་སངས་རྒྱས་མཛད་པ་མཛད། །འགྲོ་བ་གཞན་དག་འདུལ་བ་དང་། །འདུ་བྱེད་མི་རྟག་བསྟན་པ་དང་། །གདུལ་བྱ་བརྩོན་པ་བསྐྱེད་སླད་དུ། །མྱ་ངན་མདའ་སྟོན་བཞེད་རྣམས་ལ། །ཐལ་མོ་སྦྱར་བ་རབ་བཏུད་དེ། །འགྲོ་བ་ཀུན་ལ་ཕན་པ་དང་། །བདེ་བ་བསྐྱེད་པར་བྱ་བ་དང་། །ཆོས་ཚུལ་ཡུན་རིང་སྤེལ་བའི་ཕྱིར། །ཆོས་དབྱིངས་བརྟན་པའི་ལུས་བཞིན་དུ། །མྱ་ངན་མི་འདའ་གཡུང་དྲུང་སྐུ། །སྟུག་པོ་བཀོད་པའི་བདག་ཉིད་རྣམས། །བསྐལ་པའི་མཐར་ཡང་བཞུགས་པར་གསོལ། །བདུན་པ་སྐྱབས་སུ་འགྲོ་བ་ནི། བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །བརྒྱད་པ་སེམས་བསྐྱེད་པ་ལ་སོགས་པ་ནི། རྫོགས་སངས་རྒྱས་དང་རྒྱལ་བའི་སྲས། །དཔང་གྱུར་སྤྱན་གྱུར་ཚད་མར་གྱུར། །འགྲོ་དོན་མཛད་པར་དབང་གྱུར་པ། །བྱང་ཆུབ་བློ་མངའ་དགོངས་སུ་གསོལ། །ཇི་ལྟར་སྔོན་གྱི་རྒྱལ་བ་དང་། །རྒྱལ་སྲས་དཔའ་བོ་དེ་དག་གིས། །འགྲོ་ལ་ཕན་དང་བདེ་སླད་དུ། །བྱང་ཆུབ་སྙིང་པོར་བཞུགས་སུ་གསོལ། །དངོས་པོ་ཀུན་དང་བྲལ་བ་དང་། །ཕུང་པོ་ཁམས་དང་སྐྱེ་མཆེད་དང་། །གཟུང་དང་འཛིན་པ་རྣམ་སྤངས་པ། །བདག་མེད་ཆོས་ཀྱི་བདག་ཉིད་ཀྱིས། །རང་སེམས་གདོད་ནས་མ་སྐྱེས་པ། །སྟོང་ཉིད་རང་བཞིན་ཐུགས་བསྐྱེད་ལྟར། །བདག་དང་རིགས་མཐུན་གཞན་གྱིས་ཀྱང་། །བླ་མེད་བྱང་ཆུབ་སེམས་བསྐྱེད་བགྱི། །ཞེས་ལན་གསུམ་དང་། དཀོན་མཆོག་གསུམ་གྱི་བྱིན་རླབས་དང་། །འཕགས་པ་ཀུན་གྱི་ཐུགས་རྗེ་དང་། །ཆོས་ཉིད་དག་པའི་མཐུ་དང་ནི། །བསམ་དང་སྦྱོར་བ་དག་པ་ཡིས། །ཁམས་གསུམ་རྒྱུད་ལྔ་གནས་བཞི་ན། །གཟུགས་ཅན་གཟུགས་མེད་མ་ཡིན་དང་། །འདུ་ཤེས་མེད་དང་ཡོན་མིན་དང་། །སེམས་ཅན་རིགས་རྣམས་ཇི་སྙེད་པས། །སོ་སོའི་སྐྱེ་བོར་གཏོགས་པའི་ས། །སྡུག་བསྔལ་ཐམས་ཅད་མྱུར་སྤངས་ཏེ། །འཕགས་ལམ་བདེ་བ་མྱ་ངན་འདས། །ངེས་པར་ལེགས་པ་རྟོགས་གྱུར་ཅིག །འཕགས་ལམ་བརྙེས་པ་ཐམས་ཅད་ཀྱིས། །གོང་མའི་ཡོན་ཏན་མཆོག་ཐོབ་ཅིང་། །བླ་མེད་རྫོགས་པའི་བྱང་ཆུབ་ཀྱིས། །བདེ་བ་དག་ལ་གཞོན་གྱུར་ཅིག །ཅེས་ཤིས་པ་བརྗོད། འདས་པ་དང་ནི་མ་འོངས་པ། །ད་ལྟའི་དུས་དང་ཕྱོགས་བཅུ་ཡི། །འཇིག་རྟེན་ཁམས་ན་གང་བཞུགས་པའི། །རྒྱལ་བ་སྲས་དང་བཅས་རྣམས་ཀྱིས། །བསོད་ནམས་དང་ནི་ཡེ་ཤེས་ཚོགས། །དེ་ཡི་རྒྱུ་དང་འབྲས་བུ་ཡི། །སྦྱོར་བ་དང་ནི་དངོས་སུ་འཇུག །སེམས་ཅན་ཀུན་ལ་སྟོབ་མཁྱེན་ལྟར། །བདག་དང་སེམས་ཅན་ཀུན་གྱིས་ཀྱང་། །རང་གི་བསོད་ནམས་མ་ལུས་པ། །རྫོགས་སངས་རྒྱས་བདེ་མ་ཐོབ་བར། །སེམས་ཅན་རྣམས་ལ་བསྟབ་བར་བགྱི། །སྦྱོར་བ་དང་ནི་མཐོང་བ་དང་། །སྒོམ་དང་མི་སློབ་ལམ་བརྙེས་པའི། །འཕགས་པའི་ཚོགས་རྣམས་ཀུན་ལ འང་། །དེ་དག་རབ་ཏུ་བསྟབ་པར་བགྱི། །ཞེས་བསོད་ནམས་སྟོབ། བླ་མའི་བླ་མ་དཀོན་མཆོག་དང་། །མཆོད་རྟེན་ཁྱད་པར་འཁོར་བཅས་ལ། །ཕྱག་འཚལ་མཆོད་ཅིང་བཤགས་པ་དང་། །ཡི་རང་བསྐུལ་ཞིང་གསོལ་བ་དང་། །སྐྱབས་གསོལ་ལུས་ཕུལ་སེམས་བསྐྱེད་དང་། །ཤིས་པ་བརྗོད་ཅིང་སྟོབ་པ་དང་། །གཞན་ཡང་དགེ་བ་ཅི་བསགས་པ། །དེས་ནི་སེམས་ཅན་ཐམས་ཅད་དང་། །འཕགས་པའི་སྐྱེ་བའི་ཚོགས་ཀུན་གྱིས། །ཡེ་ཤེས་པ་ཡི་ལམ་གྱི་མཆོག །འཇུག་དང་གནས་དང་འཕར་བ་དང་། །སྤྱོད་པ་ཉིད་ཀྱི་ཡུལ་རྣམས་ནི། །གོ་རིམ་བཞིན་དུ་རབ་རྟོགས་ཏེ། །སྐུ་གསུམ་མཁྱེན་བཞིའི་ཚོགས་རྫོགས་ཤིང་། །བླ་མེད་སངས་རྒྱས་འགྲུབ་པར་སྨོན། །ཞེས་བསྔོའོ། །དགུ་པ་སྔགས་བཟླ་ཞིང་བསྐོར་བ་བྱ་བ་ནི། ན་མོ་ན་བ་ན་བ་ཏཱི་ནཱཾ། ཏ་ཐཱ་ག་ཏ་གངྒཱ་ནཾ་དི། བཱ་ལུ་ཀཱ་ནཾ། ཀོ་ཊི་ནི་ཡུ་ཏ་ཤ་ཏ་ས་ཧ་སྲཱ་ཎཱཾ། ༀ་བོ་བོ་རི། ཙ་རི་ཎི་ཙ་རི། མོ་རི་གོ་རི་ཙ་ལ་པཱ་རི་སྭཱ་ཧཱ། ཞེས་པའི་སྔགས་དགུ་བཅུ་རྩ་དགུ་འདོན་ཞིང་བསྐོར་བ་བདུན་བྱའོ། །བཅུ་པ་སྐབས་དོན་ལ་གནང་བ་ཞུ་བ་ནི། འཕགས་པའི་ཚོགས་རྣམས་ཐམས་ཅད་བདག་ལ་དགོངས་སུ་གསོལ། བདག་ཅག་གིས་འཕགས་པ་འོད་ཟེར་དྲི་མ་མེད་པ་རྣམ་པར་དག་པའི་འོད་ཀྱི་གཟུངས་ནས་བྱུང་བའི་ཆོ་ག་བཞིན་འཕགས་པ་རྣམས་གདན་འཛོམ་པའི་ཕོ་བྲང་གི་དཀྱིལ་འཁོར་བཞེངས་ནས། འཕགས་པ་རྣམས་སྤྱན་དྲངས་ཏེ་མཆོད་ཅིང་བསྟོད་ནས་བཟླས་བརྗོད་བགྱིས་པ་དང་། གསང་སྔགས་ཡི་གེར་བྲིས་ནས་མཆོད་རྟེན་དང་མཆོད་རྟེན་གྱི་འཕང་ལོར་བཅུག་པའི་མཆོད་རྟེན་དགུ་བཅུ་རྩ་དགུ་བགྱིས་ཏེ། མཆོད་ཅིང་བསྟོད་ནས་བསྐོར་བ་བྱས་ཤིང་གཟུངས་བཀླགས་པའི་མཐུས། བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ལ་སོགས་ཏེ་སེམས་ཅན་ཐམས་ཅད་ཀྱི་སྡིག་སྒྲིབ་བྱང་ཞིང་། གནོད་པ་དང་སྡུག་བསྔལ་ཐམས་ཅད་ཞི་ནས། ཕན་པ་དང་བདེ་བ་བླ་ན་མེད་པའི་བྱང་ཆུབ་ཐོབ་པའི་དངོས་གྲུབ་སྩོལ་བ་ཅི་གནང་། སྔོན་བཅོམ་ལྡན་འདས་ཀྱིས་གསང་བའི་བདག་པོ་དང་། སྒྲིབ་པ་རྣམ་པར་སེལ་བ་དང་། འཇིག་རྟེན་སྐྱོང་བའི་ལྷ་རྣམས་ལ་བཀའ་སྩལ་ཞིང་། སོ་སོ་ནས་ཀྱང་ཇི་སྐད་གསོལ་བ་ལས་བྱུང་བའི་ཕན་ཡོན་ཐམས་ཅད་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་ལ་སོགས་ཏེ་སེམས་ཅན་གྱི་འཕྲལ་དུ་ཐོབ་པར་བྱིན་གྱིས་རླབས་པར་ཅི་གནང་། དེ་བཞིན་གཤེགས་པའི་བཀའ་ཡང་དག་པ་ཚད་མར་གྱུར་པས་ཇི་ལྟར་བཀའ་སྩལ་པ་བཞིན་དུ་བདེན་པ་མངོན་སུམ་དུ་བསྟན་པ་ཅི་གནང་། ཞེས་ལན་གསུམ། ཡང་མཆོད་རྟེན་བརྒྱ་རྩ་བརྒྱད་བཏབ་པ་དང་མཐུན་པར་འདི་སྐད་ཅེས། འཕགས་པའི་ཚོགས་ཐམས་ཅད་དགོངས་སུ་གསོལ་ལོ། །བདག་ཅག་རྣམས་དུས་གསུམ་གྱི་རྒྱལ་བ་སྲས་དང་བཅས་པའི་རྗེས་སུ་འཇུག་ཅིང་སློབ་སྟེ། སྲིད་པའི་མཚོ་ལས་འགྲོ་བ་རྣམས་བླ་ན་མེད་པའི་བདེ་བ་ལ་འགོད་པར་དམ་བཅས་ནས་དེང་འདིར་མཆོད་པའི་ཚོགས་མཆོག་གིས་བརྒྱན་པའི་ཕོ་བྲང་གི་དཀྱིལ་འཁོར་བཤམས་ཏེ། འཕགས་པ་རྣམས་གདན་འཛོམ་པར་སྤྱན་དྲངས་ནས། ཀུན་ནས་སྒོར་འཇུག་པའི་འོད་ཟེར་གཙུག་ཏོར་དྲི་མ་མེད་པར་སྣང་བ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་དང་དམ་ཚིག་ལ་རྣམ་པར་བལྟ་བ་ཞེས་བྱ་བའི་གཟུངས་བཀླག་ཅིང་། དེ་བཞིན་གཤེགས་པའི་ཆོས་ཀྱི་སྐུའི་མཆོད་རྟེན་བརྒྱ་རྩ་བརྒྱད་ཚུལ་བཞིན་དུ་བཏབ་ཅིང་མཆོད། ཐེག་པ་ཆེན་པོའི་མདོ་སྡེ་དང་གཟུངས་ཟབ་ཅིང་རྒྱ་ཆེ་བ་བཀླག་ཅིང་མཆོད་དེ་གདན་འཛོམ་པ་ཆེན་པོའི་གླེང་གཞིར་གསོལ་ནས་བདག་ཅག་དཔོན་སློབ་ཡོན་མཆོད་ལ་སོགས་ཏེ་འགྲོ་བ་མང་པོའི་མགོན་སྐྱབས་དང་དཔུང་གཉེན་དུ་གསོལ་ཞིང་མཆིས་ན། འཕགས་པ་རྣམས་ཀྱི་སྨོན་ལམ་ཁྱད་པར་ཅན་དང་། ཐུགས་དམ་བཟང་པོའི་དབང་དུ་མཛད་ནས་སེམས་ཅན་སྐྱབས་སུ་གསོལ་བ་རྣམས་ལ་ཐུགས་བརྩེ་བར་དགོངས་ཏེ་བདག་ཅག་རྣམས་ཀྱིས་ཐེག་པ་ཆེན་པོའི་མདོ་སྡེ་དང་གཟུངས་ཟབ་ཅིང་རྒྱ་ཆེ་བ་རྣམས་བཀླག་ཅིང་། དེ་བཞིན་གཤེགས་པའི་ཆོས་སྐུའི་མཆོད་རྟེན་བགྱིས་པའི་ཆོ་ག་གཟུགས་བརྙན་ཙམ་ཞིག་བགྱིས་པ་འདིར་གླེང་གཞིར་མཛད་ནས། མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་གདན་འཛོམ་པ་ཆེན་པོ་མཛད་དེ་མཆོད་པ་བཞེས་ཤིང་། ཇི་ལྟར་སྔོན་ཆོ་ག་གང་། ཚུལ་གང་གིས་བྱིན་གྱིས་བརླབས་ཏེ་མཛད་པ་བཞིན་དུ། དེང་ཡང་ཆོ་ག་ཡོངས་སུ་རྫོགས་པར་མཛད་དེ་བྱིན་གྱིས་བརླབས་ཤིང་ཆོས་ཀྱི་དེ་ཁོ་ན་ཉིད་གཏན་ལ་དབབ་པ་ལ་སོགས་ཏེ་ཐབས་མཁས་པའི་སྒོ་སྣ་ཚོགས་ནས། འཕགས་པ་ཐམས་ཅད་ཀྱི་རྣམ་པར་ཐར་པའི་སྒོ་ཡོངས་སུ་རྫོགས་པར་འགྱུར་བ་དང་། བདག་སོགས་སེམས་ཅན་ཐམས་ཅད་སྡུག་བསྔལ་དང་གནོད་པ་ཐམས་ཅད་རྒྱུ་དང་བཅས་པ་བྱང་ཞིང་ཞི་བ་དང་། ཕན་པ་དང་བདེ་བ་བླ་ན་མེད་པ་འཕྲལ་དུ་ཐོབ་པར་འགྱུར་བར་བྱིན་གྱིས་བརླབ་ཅིང་། ཇི་ལྟར་འཚལ་བ་ཡིད་བཞིན་དུ་འགྲུབ་པའི་དངོས་གྲུབ་དམ་པ་སྩལ་བར་ཅི་གནང་། སྔོན་ལྷའི་བུ་ནོར་བུའི་སྙིང་པོ་དྲི་མ་མེད་པ་ལ་རྗེས་སུ་ཐུགས་བརྩེ་བས། བཅོམ་ལྡན་འདས་ཉིད་ཀྱིས་དཔལ་གྱི་མགུར་ནས་ཕན་ཡོན་ཇི་ལྟར་གསུངས་པ་དེ་ཐམས་ཅད་བདག་ཅག་དཔོན་སློབ་ཡོན་མཆོད་འཁོར་དང་བཅས་པས་ཐོག་དྲངས་སེམས་ཅན་ཐམས་ཅད་ཀྱིས་འཕྲལ་དུ་ཐོབ་ཅིང་མངོན་དུ་འགྱུར་བར་བྱིན་གྱིས་བརླབ་པར་ཅི་གནང་། གཟུངས་འདི་ཉིད་ཕྱག་མཚན་དུ་བཞེས་པ་ལ་སོགས་ཏེ་འཕགས་པ་ཆོས་སྐྱོང་བ་ཐམས་ཅད་ཀྱིས་ཀྱང་སྟོན་པས་བཀའ་གཏད་ཅིང་སོ་སོ་ནས་ཞལ་གྱིས་བཞེས་པ་ལྟར་ཇི་སྐད་གསུངས་པའི་ཕན་ཡོན་ཐམས་ཅད་བདག་སོགས་སེམས་ཅན་ཐམས་ཅད་ཀྱིས་འཕྲལ་དུ་ཐོབ་པར་བྱིན་གྱིས་བརླབ་པར་ཅི་གནང་། ཅི་ནས་ཀྱང་དཀོན་མཆོག་གསུམ་གྱི་སྐུ་མི་ངས་པ་དང་། བསྟན་པ་འཛིན་པ་དང་བདག་ཅག་རྣམས་ཀྱི་ངག་མི་སུན། འཇིག་རྟེན་གྱིས་སྨད་པར་མི་འགྱུར་བའི་ཚུལ་དུ་མཐུ་དང་ཕན་ཡོན་མངོན་དུ་བསྟན་པར་ཅི་གནང་། ཞེས་བརྗོད། དངོས་གཞིའི་ཆོ་ག་ཚར་རོ། །དེ་ནས་མཇུག་གི་བྱ་བའི་རིམ་པ་ནི། མཆོད་པ་དྲི་མེད་ཡོངས་དག་པ། །རྣམ་མང་རྒྱ་ཆེ་ཐམས་ཅད་དང་། །སོ་སོའི་མངའ་ཐང་རྒྱ་ཆེན་དུ། །འོས་པར་བདེ་བར་སྦྱར་བ་འབུལ། ། ཞེས་པས་མཆོད་ནས། དེའི་འོག་ཏུ་ཇི་ལྟར་གསོལ་བ་བཞིན་དུ་འཕགས་པ་རྣམས་ཀྱིས་ཕྲིན་ལས་མཛད་ཅིང་འགྲོ་དོན་དུ་འགྱུར་བར་བདེན་པ་བདར་ཞིང་ཡིད་ཀྱིས་བསྔོ་བ་ནི། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་མཐུ་དང་བྱིན་གྱིས་བརླབས་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་དང་། འཕགས་པའི་སྐུ་གསུང་ཐུགས་ཀྱི་སྤྱོད་པ་མ་དག་པ་མི་མངའ་བ་རྣམས་ཀྱི་ཐུགས་དམ་ངེས་པའི་བདེན་པས། རིགས་སྔགས་རྒྱལ་པོ་ཡིད་བཞིན་གྱིས་ནོར་བུ་རིན་པོ་ཆེའི་ཚུལ་བཞིན་དུ་ཆོས་སྐུའི་མཆོད་རྟེན་བཏབ་སྟེ། མཆོད་སྤྲིན་རྒྱ་མཚོས་བརྒྱན་ཅིང་ཕོ་བྲང་གི་དཀྱིལ་འཁོར་བཤམས་པ་འདིར་ཕྱོགས་བཅུའི་རྒྱལ་བ་སྲས་དང་བཅས་པ་དང་། ཆོས་སྐྱོང་བ་ཐམས་ཅད་གདན་འཛོམ་པ་ཆེན་པོར་མཛད་དེ་མཆོད་པ་བཞེས་ཤིང་། ཀུན་ནས་སྒོར་འཇུག་པའི་འོད་ཟེར་གཙུག་ཏོར་དྲི་མ་མེད་པར་སྣང་བའི་གཟུངས་དང་། ཆོས་ཀྱི་སྐུའི་མཆོད་རྟེན་རྣམས་ཚུལ་བཞིན་དུ་བྱིན་གྱིས་བརླབས་པར་མཛད་དེ། མདོ་སྡེ་དང་གཟུངས་ཟབ་ཅིང་རྒྱ་ཆེ་བ་རྣམས་སོ་སོའི་ཆོ་ག་ཡོངས་སུ་རྫོགས་པར་བསྐངས་ཏེ། བདག་སོགས་འགྲོ་བ་མང་པོའི་དོན་དཔག་ཏུ་མེད་པ་མཛད་པར་གྱུར་ཅིག །ཆོས་སྐུའི་མཆོད་རྟེན་ལ་ཡིད་བཞིན་གྱི་ནོར་བུ་རིན་པོ་ཆེ་རིག་པའི་རྒྱལ་པོའི་ཡིག་འབྲུ་གསེར་གྱི་མདོག་ཅན་དང་ཕྲེང་བར་གནས་པ་དང་། འཕགས་པ་རྣམས་ཀྱི་སྐུ་གསུང་ཐུགས་ལས་འོད་ཟེར་འཕྲོས་པས་འཇིག་རྟེན་ཐམས་ཅད་དུ་ཁྱབ་ཅིང་འཕགས་པ་རྣམས་ཀྱི་སྐུ་ལ་བབས་པས་ནི་སྒྲིབ་པ་གཉིས་ལས་གྲོལ་ཞིང་རྣམ་པར་ཐར་པ་གོང་ནས་གོང་དུ་འཕེལ་ཏེ་འགྲོ་དོན་སྤྱོད་པའི་མཐུ་དཔག་མེད་ཐོབ་ཅིང་། སེམས་ཅན་ཐམས་ཅད་ཀྱི་དོན་ལ་བསྐུལ་བར་གྱུར་ཅིག །འགྲོ་བ་ལྔའི་སེམས་ཅན་གྱི་ལུས་ལ་ཕོག་པས་སོ་སོའི་སྡུག་བསྔལ་དང་སྒྲིབ་པ་ཐམས་ཅད་བྲལ་ཞིང་བདེ་བ་དང་ལྡན་པར་གྱུར་ལ། འོད་ཟེར་གྱི་ཕུང་པོའི་ནང་ནས་འཕགས་པ་གདན་འཛོམ་པ་མཐོང་ནས་སྐྱབས་སུ་འགྲོ་ཞིང་བྱང་ཆུབ་ཏུ་སེམས་བསྐྱེད་ནས་ངན་འགྲོ་ལས་ཐར་ཏེ་འཕགས་པའི་ལམ་ལ་འཇུག་པར་གྱུར་ཅིག །བདག་ཅག་རྣམས་ལ་ཁྱབ་པས་འགྲོ་དོན་དཔག་མེད་སྒྲུབ་ནུས་པའི་མཐུ་ཐོབ་སྟེ། དེ་བཞིན་གཤེགས་པ་དག་དང་སྐུ་གསུང་ཐུགས་མཚུངས་པར་གྱུར་ཅིག །ཡང་འོད་ཟེར་དེ་དག་གཅིག་ཏུ་འདུས་ནས་བུམ་པའི་གཟུངས་ཆབ་ལ་ཁྱབ་སྟེ་རེག་པ་ཙམ་གྱིས་གནོད་པ་དང་། བཀྲ་མི་ཤིས་པ་དང་། མི་བདེ་བ་ཐམས་ཅད་ཞི་བར་བྱེད་པ། དཔལ་དང་བདེ་ལེགས་བསྐྱེད་པར་བྱེད་པའི་བདུད་རྩིའི་དག་བྱེད་དུ་གྱུར་ཅིག །བསྒྲུབ་བྱའི་ལུས་དང་། འཁོར་དང་། ཡོ་བྱད་ཐམས་ཅད་ལ་ཁྱབ་སྟེ། ནད་དང་གནོད་པ་སོགས་བསལ་ཞིང་ཞི་ནས། ལུས་སེམས་སྐྱོན་ཐམས་ཅད་དང་བྲལ་ཏེ་རྡོ་རྗེ་ལྟ་བུར་མཁྲེགས་ཤིང་བརྟན་པ་དང་། ཆོས་ཀྱི་སྣོད་དུ་གྱུར་ཅིག །གཞན་ཡང་ཆོས་ཀྱི་དེ་ཁོ་ན་ཉིད་གཏན་ལ་དབབ་པ་ལ་སོགས་པ་ཐབས་མཁས་པའི་སྒོ་སྣ་ཚོགས་པས་འཕགས་པ་ཐམས་ཅད་འགྲོ་བ་མ་ལུས་པའི་དོན་རྫོགས་པར་མཛད་པར་གྱུར་ཅིག །བདག་ཅག་རྣམས་ཀྱིས་སེམས་ཀྱིས་དམིགས་པ་ལ་འགའ་བསྐྱེད་པ་དང་། གཟུངས་ཀྱི་ཚིག་འབྲུ་འགའ་བརྗོད་པ་ཡང་འཕགས་པ་རྣམས་ཀྱི་ཏིང་ངེ་འཛིན་གྱི་སྒོ་སྣ་ཚོགས་དང་། ཚིག་འབྲུ་མཐའ་ཡས་པ་རྟོགས་ཤིང་རྣམ་པར་དག་པར་བྱིན་གྱིས་བརླབ་པར་གྱུར་ཅིག །ཅེས་ལན་གསུམ། ཡང་། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་མཐུ་དང་བྱིན་གྱིས་བརླབས་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་དང་། འཕགས་པ་རྣམས་ཀྱི་ཐུགས་དམ་ངེས་པའི་བདེན་པས་དེ་བཞིན་དུ་གྱུར་ཅིག །ཅེས་ལན་གསུམ། དེ་ནས་གཟུངས་རྣམ་གཉིས་དང་མདོ་སྡེ་ཕར་ཕྱིན་ཅི་རིགས་པར་བཟླས་ལ་བཀླག །དེའི་རྗེས་སུ། འཕགས་པ་རྣམས་ཀྱི་གནང་ཞིང་ཕྲིན་ལས་མཛད་པར་ངེས་ཤེས་བསྐྱེད་དེ་ཇི་ལྟར་བསྔོས་པ་བཞིན་མངོན་དུ་གྱུར་པར་དམིགས་ཤིང་བསམ། དེ་ནས་འོད་ཟེར་འཕྲོས་པས་བསྒྲུབ་བྱ་དང་གཟུངས་ཆབ་ཁྱབ་པར་དམིགས་བཞིན་པས་གཟུངས་རྣམ་གཉིས་ཀྱི་མདོ་བཀླག་ཅིང་གཟུངས་རྣམ་གཉིས་བརྒྱ་རྩ་བཟླས་ནས་བསྒྲུབ་བྱ་རྣམས་རྟེན་ལ་ཕྱོགས་པར་བཞག །རྨ་བྱའི་སྒྲོ་ལྔས་བྱ་བ། ཕྱོགས་བཞི་ནས་ཕྱག་མཆོད་སེམས་བསྐྱེད་སྨོན་ལམ་བྱེད་དུ་བཅུག་རྗེས་ཁར་གཟུངས་ཆབ་སྩལ་ལོ། །དེ་ནས་གཟུངས་ཆབ་ཕྱོགས་ཀུན་ཏུ་འཐོར་ཞིང་། འབྱུང་པོ་གང་དག་འདིར་ནི་ལྷགས་གྱུར་ཏམ། ཞེས་སོགས་བརྗོད། དེ་ནས། ན་མོ་ན་བ་ན་བ་ཏཱ་ནཱཾ། ཏ་ཐཱ་ག་ཏ་གངྒཱ་ནཾ་དི། བཱ་ལུ་ཀཱ་ནཾ། ཀོ་ཊི་ནི་ཡུ་ཏ་ཤ་ཏ་ས་ཧ་སྲཱ་ཎཱཾ། ༀ་བོ་བོ་རི། ཙ་རི་ཎི་ཙ་རི། མོ་རི་གོ་རི་ཙ་ལ་པཱ་རི་སྭཱ་ཧཱ། ཞེས་དང་། ན་མོ་བྷ་ག་ཝ་ཏེ་རཏྣ་ཀེ་ཏུ་ར་ཛ་ཡ། ཏ་ཐཱ་ག་ཏ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ༀ་རཏྣེ་རཏྣེ་མ་ཧཱ་རཏྣེ་རཏྣ་བི་ཛ་ཡ་སྭཱ་ཧཱ། ཞེས་བཟླ་ཞིང་རོལ་མོར་བཅས་པས་བསྐོར་བ་བརྒྱ་རྩ་བརྒྱད་བསྐོར་རོ། །དེ་ནས་བཟོད་པར་གསོལ་བ་ནི། འཕགས་པ་གདན་འཛོམ་པ་ཆེན་པོ་དགོངས་སུ་གསོལ། དེང་འདིར་འཕགས་པ་རྣམས་སྤྱན་དྲངས་ཏེ་བདག་སོགས་འགྲོ་བ་རྣམས་ཀྱི་དོན་མཛད་པར་གསོལ་བའི་སྐབས་འདིར། བདག་ཅག་དུས་ངན་པའི་སེམས་ཅན་སྤྱོད་པ་དམན་ཞིང་མ་དག་པས་འགལ་འཁྲུལ་ནོངས་པར་གྱུར་པ་ཅི་མཆིས་པ་ཐམས་ཅད་མཐོལ་བཤགས་བཟོད་པར་གསོལ་ན་ཐུགས་བརྩེ་བར་དགོངས་ཏེ་བཟོད་པར་བཞེས་ནས་འཕྲལ་དང་ཡུན་དུ་སྒྲིབ་པར་མི་འགྱུར་བར་བྱིན་གྱིས་བརླབ་པར་ཅི་གནང་། དེ་ནས་སླར་གཤེགས་སུ་གསོལ་བ་ནི། འཕགས་པ་རྣམས་ཀྱིས་བདག་སོགས་འགྲོ་བ་ཉམ་ཐག་པ་རྣམས་ཀྱི་དོན་མཛད་ཅིང་བཀའ་དྲིན་སྩལ་ཏོ། །ད་རུང་བདག་ཅག་ལ་ཐུགས་བརྩེ་བས་ཡང་ནས་ཡང་དུ་གདན་འཛོམས་པར་མཛད་པར་དགོངས་ཤིང་། སོ་སོའི་སངས་རྒྱས་ཀྱི་ཞིང་རྣམས་སུ་འགྲོ་བ་མང་པོའི་དོན་ལ་གཤེགས་པར་སྩལ་བར་ཅི་གནང་། དེ་ནས་བསྔོ་བ་ནི། འཕགས་པའི་སྐུ་གདུང་རིན་ཆེན་རིང་བསྲེལ་སྣོད། །རྙིང་བཅོས་བྱི་དོར་བགྱིས་ཤིང་མཆོད་པ་དང་། །གསར་བརྩིགས་མཆོད་ཅིང་ཁྲུས་ཆབ་གསོལ་བ་དང་། །བསྟོད་དང་བསྐོར་དང་གུས་པ་བགྱིས་པ་དང་། །སྨོན་ལམ་ཟབ་མོ་སེམས་ཡིད་དང་བཏབ་པས། །བྱིན་རླབས་ཡོན་ཏན་ཁྱད་པར་ཆེན་པོའི་མཐུས། །བདག་ཅག་ཡོན་བདག་འཁོར་དང་བཅས་པ་དང་། །དད་མོས་གྲོགས་བྱེད་རྗེས་སུ་ཡི་རང་རྣམས། །སྨོན་ལམ་མཐུ་སྟོབས་ཁྱད་པར་ཆེན་པོ་ཡིས། །དང་བའི་ཡིད་ཀྱི་མཆོད་རྟེན་འདི་བརྩིགས་པས། །དེང་ནས་བདག་ཅག་སྡིག་སྒྲིབ་བྱང་གྱུར་ཏེ། །བླ་མེད་བྱང་ཆུབ་བདག་ཅག་མྱུར་ཐོབ་ཤོག །ཅེས་བརྗོད། དེ་ནས་ཕྱོགས་དུས་ཐམས་ཅད་དུ་དགེ་ཞིང་ཞི་བའི་ཆེད་དུ་བཀྲ་ཤིས་པའི་ཚིགས་སུ་བཅད་པ་དུ་མ་བརྗོད་ཅིང་། རོལ་མོའི་སྒྲ་བསྒྲག །མེ་ཏོག་གི་ཆར་དབབ་བོ། ། མཆོད་རྟེན་དགུ་བཅུ་རྩ་དགུའམ་བརྒྱ་རྩ་བརྒྱད་གདབ་པའི་ཆོ་ག་ཅུང་ཟད་ཚིགས་སྣ་བསྡུས་ནས་ལག་ཏུ་བླངས་བདེ་བར་བརྗོད་པ་སྟེ། རྒྱས་པར་སྤྲོ་ན་གང་ལས་བཏུས་པའི་གཞི་མཁན་པོ་ཞི་བ་འཚོའི་གཞུང་ཉིད་དུ་བལྟ་བར་བྱའོ། །ཞེས་པ་འདིའང་འོག་མིན་ཨོ་རྒྱན་སྨིན་གྲོལ་གླིང་དུ་བཀྲ་ཤིས་པའི་སྒོ་འཕར་མང་པོ་ཅན་གྱི་མཆོད་རྟེན་ཆེན་པོ་མངོན་པར་འདུ་མཛད་པའི་དགོངས་པ་དང་འབྲེལ་བར་བན་ཆུང་དྷརྨཱ་ཤྲིས་ཟིན་ཐུན་བཀླག་ཅོག་མར་བྲིས་པའི་ཡི་གེ་པ་ནི་ཟེམ་གྱི་བནྡྷེ་ཨོ་རྒྱན་དཔལ་འབྱོར་རོ། །ཨེ་མ། པདྨ་ལུང་བསྟན་བོང་འབངས་བསྟན་འགྲོ་ཡི། །ཉེར་འཚོ་མཐོང་བས་རྣམ་གྲོལ་ཆོས་ཀྱི་སྐུའི། །རྟེན་མཆོག་འདི་ཉིད་རྗེ་ཡི་ཐུགས་དམ་དུ། །བཞེངས་པར་མཛད་ཚེ་གང་གིས་བཀའ་ལུང་བཞིན། །དྲི་མེད་རྣམ་གཉིས་ཆོ་ག་བཀླག་ཆོག་མར། །དྷརྨཱ་ཤྲིས་ལྷག་བསམ་དག་པས་བྲིས། །དགེ་འདིས་རྗེ་བཙུན་བླ་མའི་ཞབས་བརྟན་ཅིང་། །མཐའ་ཡས་འགྲོ་ཀུན་རྣམ་པར་གྲོལ་གྱུར་ཅིག །དགེའོ།། །།