དཔལ་ཧེ་རུ་ཀའི་ཐུགས་ཀྱི་རྒྱུད་གལ་པོ།
དཔལ་ཧེ་རུ་ཀའི་ཐུགས་ཀྱི་རྒྱུད་གལ་པོ་ཞེས་བྱ་བ་བཞུགས་སོ། །རྒྱ་གར་སྐད་དུ། ཤྲཱི་ཧེ་རུ་ཀ་ཙིཏྟ་ཏནྟྲ་ཀལྤ་ནཱ་མ། བོད་སྐད་དུ། དཔལ་ཧེ་རུ་ཀའི་ཐུགས་ཀྱི་རྒྱུད་གལ་པོ་ཞེས་བྱ་བ། དཔལ་འཇིགས་བྱེད་ཆེན་པོ་ཁྲག་འཐུང་ཧེ་རུ་ཀ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་ཐུགས་རྡོ་རྗེ་བཙུན་མོའི་བྷ་ག་ལ་བཞུགས་སོ། །དེའི་ཚེ་བརྗོད་ཀྱིས་མི་ལང་བའི་ཡང་བརྗོད་ཀྱིས་མི་ལང་བའི་འཁོར་ལ་འདི་ལྟ་སྟེ། ལྔ་དང་གསུམ་དང་བརྒྱད་གཉིས་དང་། །བཞི་དང་གཅིག་དང་བཞི་བཅུ་གཅིག །མཁའ་དང་འདེགས་དང་འབར་དང་གསལ། །རིན་ཆེན་མཆོག་ཕྲན་ཡོན་ཏན་བརྒྱན། །ཤྲཱི་ནི་གཉིས་མེད་སྟོན་པའི་དོན། །ཧེ་ནི་དགྱེས་པའི་གད་མོ་སྟེ། །རུ་ནི་ཆགས་པ་ཆེན་པོའི་དོན། །ཀ་ནི་ཡེ་ཤེས་ཕྲིན་ལས་བཞི། །ཡེ་ཤེས་ལྔ་ཡི་རང་བཞིན་སྐུ། །ལུས་ཀྱི་རྣམ་ཤེས་གཟུགས་སྐུ་རྣམ་སྣང་མཛད། །གཏི་མུག་རྣམ་དག་ཡང་དག་བཅོམ་ལྡན་འདས། །ཀུན་གཞིའི་རྣམ་ཤེས་མི་བསྐྱོད་རྡོ་རྗེ་སེམས། །ཞེ་སྡང་རབ་གྲུབ་བཅོམ་ལྡན་འདས་ཀྱི་སྐུ། །ཉོན་མོངས་རྣམ་ཤེས་ཚོར་བ་རིན་ཆེན་འབྱུང་། །ང་རྒྱལ་རང་གྲུབ་གཅིག་པུ་བཅོམ་ལྡན་འདས། །ཡིད་ཀྱི་རྣམ་ཤེས་འདུ་ཤེས་སྣང་མཐའ་ཡས། །འདོད་ཆགས་རང་བྱུང་སངས་རྒྱས་བཅོམ་ལྡན་འདས། །སྒོ་ལྔའི་རྣམ་ཤེས་འདུ་བྱེད་དོན་ཡོད་གྲུབ། །ཕྲག་དོག་རང་བྱུང་རྣལ་འབྱོར་བཅོམ་ལྡན་འདས། །ཀུན་གཞིའི་རྣམ་ཤེས་རང་བྱུང་དཔལ་ཆེན་ཉིད། །དུག་ལྔ་རང་བྱུང་ཀུན་འདུས་བཅོམ་ལྡན་འདས། །རྣལ་འབྱོར་ཟབ་མོའི་ངང་དུ་སྐུ་གསུམ་རྫོགས། །ཡང་དག་གྲུབ་པ་ཆོས་སྐུ་གཅིག་ཉིད་ནི། །ཡེ་ནས་དག་པ་ཆོས་ཀྱི་སྐུ། །ལྷུན་གྱིས་གནས་པའི་ལོངས་སྤྱོད་རྫོགས། །འཇོམས་བྱེད་ཅེས་བྱའི་དམ་ཚིག་ནི། །བདག་ཉིད་ལྷ་ཡི་དཀྱིལ་འཁོར་དུ། །ཕུང་པོ་ལྔ་ཉིད་རྫོགས་སངས་རྒྱས། །ཉོན་མོངས་པ་ནི་གནས་སུ་དག །སྐྱེ་འཇིག་མེད་པའི་གནས་ལ་བཞུགས། །མཁའ་འགྲོ་སྒྱུ་མ་བདེ་མཆོག་བདེ། །ཚམ་རྔམས་དྲག་པོས་ལྷ་ཆེན་འདར་ཞིང་བརྫིས། །བརྟུལ་ཞུགས་རོལ་པས་རྡོས་བཅས་ཕུང་པོ་བཤིག །རྣམ་ཤེས་མི་འཆི་རྒྱལ་བའི་གནས་སུ་སྟོབས། །ཉོན་མོངས་མི་སྤང་ཤ་རུས་ཁྲག་ལ་རོལ། །སངས་རྒྱས་བདེ་ཆེན་ཀུན་འདུས་དཔལ་གྱི་སྐུ། །སྤོས་མོད་དཀར་སེར་ཆོམ་རྐུན་རྨོངས་བྱེད་མ། །མཐིང་དང་ལྗང་སོགས་ཆགས་པས་ཁྲོ་བར་བྱེད། །རྡོ་རྗེ་མཁའ་ལ་འགྲོ་བའི་ཚོགས་རྣམས་དང་། །དཔལ་གྱི་བཀའ་ཉན་ལྷག་མར་དབང་བ་བདུན། །འདུས་པའི་འཁོར་ཚོགས་ཡེ་ཤེས་ཨཱ་ར་ལི། །གཞི་ལམ་འབྲས་བུར་བཅས་པའི་ཆོས། །རྣམ་པ་གསུམ་གྱི་དོན་བཤད་དོ། །ཧེ་རུ་ཀ་ཐུགས་ཀྱི་གལ་པོ་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས། དེ་བཞིན་གཤེགས་པ་ནམ་མཁའི་དབྱིངས་དང་མཉམ་པའི་དེ་བཞིན་གཤེགས་པའི་བཙུན་མོའི་བྷ་ག་ལ་དམ་ཚིག་ཆེན་པོའི་དཀྱིལ་འཁོར་གྲུ་བཞིར་བྱིན་གྱིས་བརླབས་པའི་ཏིང་ངེ་འཛིན་ལ་སྙོམས་པར་ཞུགས་ནས་རིག་པའི་སྐྱེས་བུ་ཆེན་པོའི་གཟུགས། དེ་བཞིན་གཤེགས་པ་ཐམས་ཅད་ཀྱི་བདག་པོ་འདི་བྱིན་གྱིས་བརླབས་སོ། །བྱིན་གྱིས་བརླབས་མ་ཐག་ཏུ་བྱང་ཆུབ་སེམས་ཀྱི་རྡོ་རྗེ་དེ་བཞིན་གཤེགས་པ་ཞལ་གསུམ་པ་ལྟ་བུར་གྱུར་ཏེ། དེ་ལ་དེ་བཞིན་གཤེགས་པ་ཐམས་ཅད་ཀྱིས་གཟིགས་པར་གྱུར་ཏོ། །དེའི་ཚེ་ནམ་མཁའི་དབྱིངས་ན་བཞུགས་པའི་སེམས་ཅན་ཇི་སྙེད་པ་དེ་དག །བྱང་ཆུབ་ཀྱི་སེམས་རྡོ་རྗེའི་བྱིན་གྱིས་རླབས་ཀྱིས་བདེ་བ་དང་ཡིད་བདེ་བ་ཐོབ་སྟེ། དེ་ནས་བཅོམ་ལྡན་འདས་མི་བསྐྱོད་པ་ལ་སོགས་པ་ཐམས་ཅད་ངོ་མཚར་ཆེ་སྟེ། ཕྱི་ནང་གསང་བའི་དབང་ལ་ངམ་ཞིང་བསྟོད་དོ། །དེ་ནས་དེ་བཞིན་གཤེགས་པ་ཐམས་ཅད་འདུས་ཏེ། བྱང་ཆུབ་སེམས་དཔའ་དོན་ཐམས་ཅད་རབ་ཏུ་གྲུབ་པ་ཞེས་བྱ་བ། བྱང་ཆུབ་ཀྱི་སྙིང་པོར་ཞུགས་པ་གང་ན་བ་དེར་གཤེགས་ཏེ། བྱང་ཆུབ་སེམས་དཔའ་དེ་ལ་ཆེད་དུ་ལོངས་སྤྱོད་རྫོགས་པའི་སྐུར་བསྟན་ནས། འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་གང་གི་ཕྱིན་ཡིན། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་དེ་ཉིད་རྟོགས་པར་བྱ་བའི་ཕྱིར་དབང་གི་ཚུལ་འདི་དག་གོ། །རང་བཞིན་ལྷུན་གྲུབ་ཡེ་དཀྱིལ་དུ། །སློབ་མ་རབ་གཞུག་དབང་བསྐུར་ཏེ། །བྱ་བྲལ་ཡེ་རྫོགས་མན་ངག་བསྟན། །ཏིང་འཛིན་བརྟན་པའི་དཀྱིལ་འཁོར་དུ། །སློབ་མ་འབྲིང་གཞུག་དབང་བསྐུར་ཏེ། །བསྐྱེད་རྫོགས་བསྒྲུབ་པའི་མན་ངག་བསྟན། །གཟུགས་བརྙན་བསྙེན་བསྒྲུབ་དཀྱིལ་འཁོར་དུ། །ཐ་མའི་སློབ་གཞུག་དབང་བསྐུར་ཏེ། །རིམ་གྱིས་བསླབ་སྦྱང་མན་ངག་བསྟན། །རྡོ་རྗེའི་ཚུལ་དུ་དབང་དག་སྦྱིན། །ལྷ་མོ་དག་དང་གར་བྱེད་ཅིང་། །དེར་ནི་རབ་དགྱེས་བདག་པོ་ཁྲིད། །ཕོ་བྲང་དག་བྱེད་རབ་དགྱེས་ཆེ། །རབ་དགྱེས་བདག་པོ་དེ་ཐོབ་ལྡན། །སེང་གེའི་བདེན་རབ་འཇོམས་བྱེད་ཅིང་། །གཞི་དང་གཞི་ཡི་མཆོག་ཉིད་ཀྱིས། །རྡོ་རྗེ་པདྨར་ལྡན་བྱས་ཏེ། །དབྱིངས་ཀྱི་བདེ་ཆེན་དེ་ལས་སོ། །གཡོན་ཕྱོགས་གནས་ལ་ཚུལ་བཞིན་དུ། །ཇི་ལྟར་འདོད་པ་བཞིན་དུ་སྦྱར། །དཀྱིལ་འཁོར་ཟླ་གམ་ཞེས་གསུངས་ཏེ། །མཆོག་ཉིད་ཡིད་ཀྱི་དཀྱིལ་འཁོར་རོ། །གཞལ་ཡས་ཁང་ཆེན་ཡེ་ཤེས་ཏེ། །འཁོར་འདས་མཉམ་པ་གྲུ་བཞི་ཞེས། །སྒོ་བཞི་དྲན་པ་ཉེར་གཞག་བཞི། །རྣམ་ཐར་བརྒྱད་དང་རྟ་བབས་སོ། །རིན་ཆེན་སྒོ་སྟེགས་ཐུགས་རྗེའི་ངང་། །ཡང་དག་སྤོང་བཞི་ཏཱ་ར་ཎ། །དྲན་པ་ཉེར་གཞག་སྒོ་ཁྱུད་དང་། །རྫུ་འཕྲུལ་རྐང་བཞིའི་སྒོ་ཁྱམས་དང་། །ཕྲེང་བ་བྱང་ཆུབ་ཡན་ལག་བདུན། །འཕགས་ལམ་བརྒྱད་ཀྱི་ཀ་བས་མཛེས། །ལམ་གྱི་ཡེ་ཤེས་རྔ་ཡབ་དང་། །ཉོན་མོངས་འཆིང་འཇོམས་མུ་ཏིག་ཕྲེང་། །དྲིལ་བུ་བ་དན་རླུང་བསྐྱོད་པ། །ཤེས་རབ་ཆོས་ཀྱི་སྒྲ་སྒྲོགས་དང་། །ཆེ་བའི་ཡོན་ཏན་འདུས་པའི་རྟགས། །བདུད་བཞི་འཇོམས་པའི་རྒྱལ་མཚན་དང་། །ཐོད་ཕྲེང་སྐུ་གསུམ་ཐོབ་པའི་རྟགས། །གཞལ་ཡས་ཁང་མཆོག་དམ་པ་དེར། །ཕན་དང་ནུས་མཐུའི་དབང་ཡང་སྦྱིན། །དབུ་རྒྱན་ཅོད་པན་ཕྲེང་བ་དང་། །གོ་ཆ་རྒྱལ་མཚན་ཕྱག་རྒྱ་དང་། །གདུགས་དང་བུམ་པ་བཟའ་བཏུང་དང་། །སྙིང་པོ་ལྔ་དང་ནུས་པ་ལྔ། །གསང་བའི་དབང་གསུམ་བྱིན་བྱས་ལ། །དབང་བསྐུར་མན་ངག་སྙིང་པོར་སྦྱིན། །ས་ལམ་རིམ་གྱིས་རབ་ཏུ་བགྲོད། །བླ་མེད་མི་སྤང་བྱ་མ་བཀུར། །སྔགས་དང་ཕྱག་རྒྱ་རྒྱུན་མི་གཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་ནི་རྩ་བ་ལྔ་རྣམས་ཏེ། །བསྒྲུབ་དང་སྲུང་བའི་དམ་ཚིག་མཆོག །གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ་། །དཀར་རྩི་དམར་རྩི་ཤ་ཆེན་དང་། །དག་པའི་སྣོད་ཆུ་མི་འདོར་རོ། །ཡན་ལག་བཅུ་ཡི་དམ་ཚིག་སྟེ། །ཡེ་ནས་དག་མཉམ་རྟོགས་པས་སྤྱད། །དམ་ཚིག་ཉམས་པའི་དཀྱིལ་འཁོར་དུ། །དབང་བསྐུར་དངོས་གྲུབ་འབྱུང་མི་འགྱུར། །རྩ་བའི་དམ་ཚིག་ལྔ་ཉིད་ལས། །གཅིག་ལ་གཉིས་དང་བཅུ་ཕྲག་གསུམ། །ཧེ་རུ་ཀ་གལ་པོ་ཞེས་བྱ་བའི་རྒྱུད་ལས། དབང་དང་དམ་ཚིག་བསྟན་པ་ཞེས་བྱ་བའི་ལེའུ་སྟེ་གཉིས་པའོ།། །།དེ་ནས་ཡང་དག་བཤད་བྱ་བ། །མདོ་བསྡུས་བ་སྟེ་རྒྱས་པར་མིན། །གྲུབ་པ་དང་ནི་རབ་ཏུ་བསྒྲུབ། །སྒྲུབ་པའི་འབྲས་བུ་བླང་བར་བྱ། །ཞི་བའི་དགོན་གནས་ལྷ་ཡི་གནས། །རི་བོ་ཆེན་པོ་འདུས་པའི་རྩེར། །གངས་དཀར་ཤེལ་གྱིས་གཏམས་པའི་འདབས། །སེང་ཆེན་ཁྲོས་པའི་གནས་དང་ནི། །ཙནྡན་ནགས་དང་མེ་ཏོག་ཚལ། །ཡིད་འོང་དབེན་པར་རབ་ཏུ་བཤད། །ཁྲོ་བོའི་དགོན་གནས་སྲིན་པོའི་གནས། །རི་བོ་ཆེན་པོ་བཙན་པོའི་ངོས། །བྲག་དམར་གཏམས་པའི་དཀྱིིལ་ངོས་ལ། །སྟག་དྲེད་འཐབ་པའི་གནས་སུ་བྱ། །མ་མོའི་དགོན་གནས་དུར་ཁྲོད་དང་། །ཤིན་ཏུ་དབེན་པའི་ས་ཕྱོགས་ན། །གསར་རྙིང་དབུགས་བྲལ་མ་བདུན་ཁྱིམ། །རྡོ་རྗེ་རིགས་ཀྱི་དགོན་གནས་ནི། །དུར་ཁྲོད་དང་ནི་ལྷ་རྟེན་དང་། །མ་མོའི་ཁྱིམ་དང་ཡིད་དུ་འོང་། །དེར་ནི་ས་ཡི་ཆོ་ག་དང་། །ཕྱི་ནང་ལས་ཀྱི་རིམ་པ་བརྩམ། །གནས་སུ་ཕྱིན་ལ་མཚམས་གསུམ་བཅད། །མ་དག་བཤགས་པའི་བྱ་བ་དང་། །བྷ་ལན་སྐུ་ཡི་སྦྱོར་བ་ཡིས། །བསྒྲལ་ཞིང་མནན་པའི་ལས་ཀྱང་བརྩམ། །དབེན་པའི་གནས་སུ་བླ་མ་ལ། །དམ་ཚིག་དབང་གིས་བརྟུལ་ཞུགས་ནོད། །ཐིག་ལེ་ཟླ་གམ་གཅིག་པ་རུ། །དམིགས་རྟེན་མངོན་པར་བཞག་ནས་སུ། །སེམས་ཉིད་གནས་པའི་བྱ་བའི་ཕྱིར། །ཐབས་ཀྱི་ངོ་བོ་ཐམས་ཅད་དམ། །དེ་བཞིན་སྲོག་དང་རྩ་ལས་བྱུང་། །རང་གི་ལྷ་ཡི་ཆ་བྱད་དུ། །སྒྲུབ་པའི་ཕྱག་རྒྱ་རབ་ཏུ་བྱ། །ཆར་སྤྲིན་མདོག་འདྲ་དཔའ་བོའི་གཟུགས། །ཤིན་ཏུ་གཏུམ་པོ་འཁོར་དང་བཅས། །ཡང་ན་གཙོ་བོ་གཅིག་པུ་བྲི། །སློབ་དཔོན་དང་ནི་སློབ་བུ་དང་། །གནས་དང་ཡོ་བྱད་ལྡན་གྱུར་ནས། །སྒྲུབ་པའི་ལས་ལ་གཞུག་པར་བྱ། །བསླང་དང་བརྟག་དང་སྦྱང་བ་དང་། །བགེགས་བསྐྲད་ས་བཟུང་དཔང་པོ་གཞག །འཇིག་རྟེན་ས་བདག་ལྷ་ཀླུ་ལ། །ས་རིན་གཞལ་ཏེ་ས་བསླང་སྦྱང་། །རྣམ་པར་རྟོག་པ་བགེགས་ཡིན་ཏེ། །བགེགས་ནི་རང་གི་སེམས་ལས་བྱུང་། །སེམས་ལ་རང་བཞིན་མེད་ཤེས་ན། །གཞན་ན་བགེགས་ཞེས་བྱ་བ་མེད། །ཤེས་རབ་ཀྱིས་ནི་རྣམ་བཤད་བྱ། །ཅོད་པན་བདེ་གཤེགས་ལྔར་བསྒོམ་ན། །སངས་རྒྱས་ཀྱིས་ཀྱང་གནོད་མི་ནུས། །བཏབ་པ་ཙམ་གྱིས་བགེགས་འཕེན་བྱེད། །ཞེ་སྡང་རྡོ་རྗེའི་ཏིང་འཛིན་གྱི། །གནས་བསྲུང་བ་ནི་རབ་ཏུ་བྱ། །གཡས་ཀྱི་སྤྱན་ཟུར་བཟློག་པ་ལས། །ཉི་མའི་དཀྱིལ་འཁོར་བསམ་པར་བྱ། །གུ་ལང་དབང་ཆེན་ཉེ་དབང་དང་། །ཨུ་མ་གཤིན་རྗེ་ཚངས་པར་བཅས། །ཐམས་ཅད་མ་ལུས་སྲེག་པར་བྱེད། །ཟླ་བས་གསོ་བར་བྱེད་པ་དང་། །ཀ་ཏ་ར་ལི་འབར་སྤྲོ་ཞིང་། །མཚོན་ཆ་འབར་བའི་ས་བོན་གྱིས། །ཐམས་ཅད་མ་ལུས་བསལ་བར་བྱ། །སངས་རྒྱས་ཀུན་གྱི་ཏིང་ངེ་འཛིན། །སྟོང་པ་ཉིད་ཅེས་རྒྱལ་པས་གསུངས། །དེ་བས་རྣམ་པ་ཐམས་ཅད་དུ། །ཐམས་ཅད་ཚུལ་བཞིན་བྱིན་གྱིས་བརླབས། །ཕོ་བྲང་ལྷ་དང་དམིགས་པའི་ཡུལ། །རྡོ་རྗེ་ཐོད་པའི་སྦྱོར་བ་དང་། །ཆགས་པ་ཆེན་པོའི་ཡུལ་དུ་བྱ། །དུར་ཁྲོད་གནས་ཀྱི་ས་བླངས་ལ། །སྟེགས་བུ་འདོམ་གང་གྲུ་བཞི་པ། །སྟེང་དུ་ཁྲུ་གང་པ་ཡི་ཚད། །བ་བྱུང་སྣ་ལྔས་སྐྱང་ནུལ་བྱ། །རང་བྱུང་ལྔ་ཡི་ཁྱད་པར་ལས། །ས་བོན་ཡེ་ཤེས་ལྔ་རུ་རྫོགས། །དཀྱིལ་འཁོར་ཟླ་གམ་སྒོ་གཅིག་པ། །ཤར་དུ་བསྟན་པ་བྱས་ནས་སུ། །ཁ་དོག་སྡུག་གུའི་ཚོན་གྱིས་བྲི། །ཆོས་ཀུན་རྩ་བ་སེམས་ཡིན་ཏེ། །སེམས་ཀྱི་རྩ་བ་གསུམ་དུ་ཤར། །དེ་ཉིད་གཞལ་ཡས་གཉིས་དང་ལྷ། །མི་རྩོལ་བདེ་བར་རབ་འབད་པས། །སྙིང་རྗེ་ཆེན་པོས་འགྲོ་དོན་མཛད། །ཐམས་ཅད་འབྱུང་བའི་རྒྱུ་ལས་ནི། །འབྱུང་བ་ལྔ་ཡི་ཕྲ་བཀོད་པས། །ཡུམ་ལྔ་རྣམ་དག་མཁའ་དབྱིངས་ཏེ། །མ་བཅོས་ལྷུན་གྲུབ་ཡུམ་གྱི་མཁའ། །རྒྱལ་བའི་བཞུགས་གནས་རྣམ་པར་དག །བཞི་པོ་རྩ་བ་ཡན་ལག་དང་། ། རིགས་དང་སྐུ་མདོག་ཕྱག་མཚན་དང་། །ཡི་གེ་སྙིང་པོ་ཕྱག་རྒྱལ་ལྡན། །གོ་རིམ་གདན་དང་རྒྱན་ལུགས་དང་། །བཞུགས་ཐབས་ཚུལ་དང་བཅུ་བཞི་ཡིས། །ཞི་བའི་ལས་རྣམས་བསྐྱེད་པར་བྱ། །མི་སྐྱོད་མཐིང་ག་དཀར་དམར་ཞལ། །རྡོ་རྗེ་འཁོར་ལོ་རིན་ཆེན་གཡས། །དྲིལ་བུ་པདྨ་རལ་གྲི་གཡོན། །དབྱིངས་ཕྱུགས་གཡས་བྷན་གཡོན་དྲིལ་སྔོ། །དཀྱིལ་འཁོར་ལྔ་དང་ལྡན་པར་སྒོམ། །སྤྱན་དྲང་མཆོད་བསྟོད་ལ་སོགས་པ། །ཇི་ལྟར་རིམ་པ་བཞིན་དུ་བྱ། །སྤྲོས་མེད་བར་མར་རབ་ཏུ་ཁྲོས། །བློ་ཡི་རིམ་པས་བསྒོམ་པར་བྱ། །ཚོམ་བུ་ལྔ་ཡི་མཎྜལ་ལ། །མཁའ་འགྲོ་མ་ཡི་འཁོར་གྱིས་བསྐོར། །དང་པོར་སྟོང་ཉིད་རྣམ་བསམ་སྟེ། །ལུས་ཅན་ཀུན་གྱི་དྲི་མ་བཀྲུ། །གྲུ་གསུམ་མཐིང་ནག་ནམ་མཁའ་ལ། །འདེགས་བྱེད་རླུང་ནག་རྒྱ་གྲམ་གཏམས། །རཀྟའི་རྒྱ་མཚོ་རྦ་ཀློང་འཁྱིལ། །ཀེང་རུས་རི་རབ་བརྩེགས་པའི་སྟེང་། །དུར་ཁྲོད་མེ་རི་སྨུག་ནག་འབར། །ཟླ་གམ་དབང་ཆེན་མཎྜལ་ལ། །དུར་ཁྲོད་ཡོན་ཏན་ཚོགས་ཀྱིས་བརྒྱན། །ཕྱི་དང་ནང་མེད་རབ་ཏུ་གསལ། །ཡེ་ཤེས་གཞལ་ཡས་ནམ་མཁའི་རྒྱ། །བྷྲཱུཾཾ་བི་ཤྭ་བི་ཤུདྡྷེ་ཛྙཱ་ན་ཙཀྲ་མཎྜ་ལ་བྷྲཱུཾ། དཔལ་སྟོབས་ཉི་ཟླ་པདྨའི་གདན། །རྡོ་རྗེ་དབྱིངས་ལས་དཔལ་གྱི་སྐུར་བསྒྱུར་བ། །དྭངས་པའི་མཚོ་ལ་རླབས་ཆེན་འཁྲུགས་པ་བཞིན། །ཞི་བའི་སྐུ་ལས་ཁྲོ་བོའི་ཕྱག་རྒྱར་བསྟན། །གཅིག་དགུ་ཉི་ཤུ་གཉིས་དང་ལྔ་བཅུ་བརྒྱད། །འབར་བའི་རྒྱལ་པོ་ཅིར་ཡང་སྟོན་པར་མཛད། །བསྒྲུབ་དང་གསང་སྔགས་སྤྱོད་པ་དང་། །གྲུབ་པ་དང་ནི་གནས་བདག་དང་། །བཟླས་པའི་སྒྲ་ཡང་ཕྱག་རྒྱར་རྟོགས། །ཏིང་འཛིན་ལྟ་སྟངས་ཆོ་འཕྲུལ་བརྟག །དབུས་སུ་རྒྱལ་རིགས་དུམ་བུ་གཅིག །ཕྱོགས་བཞིར་བྲམ་ཟེ་རྒྱལ་རིགས་དང་། །རྗེའུ་རིགས་དམངས་རིགས་བཞི་ལ་བྱ། །མཚམས་བཞིར་ཁྲུས་ཀྱི་མཁན་པོ་དང་། །རྗེ་རིགས་བཙོ་བླག་མཁན་རྣམས་དལ། །མི་ཡི་ཁྲག་ལ་སྣག་ཚ་བྱ། །མཆོག་གི་རྐང་གི་སྨྱུག་གུ་ཡིས། །ལྷ་དགུ་སོ་སོའི་སྙིང་པོ་བྲི། །རབ་ཏུ་མཚན་གསོལ་བཞུགས་སུ་གསོལ། །ཟླ་གམ་དཀྱིལ་འཁོར་ཡུམ་གྱི་མཁའ། །བྷནྡྷ་བདེ་གཤེགས་སྐུ་ཡི་སྐུ། །ཡིག་འབྲུ་བདེ་གཤེགས་གསུང་གི་གསུང་། །མར་མེ་བདེ་གཤེགས་ཐུགས་ཀྱི་ཐུགས། །ཧེ་རུ་ཀ་གལ་པོ་ཞེས་བྱ་བའི་རྒྱུད་ལས། ལྷ་རྣམས་འབྱུང་བ་བསྟན་པའི་ལེའུ་སྟེ་གསུམ་པའོ།། །།དེ་ནས་ཡང་ཁྲག་འཐུང་ཆེན་པོ་དེ་ཉིད་ཀྱིས་སྔགས་བསྡུས་པ་འདི་ལྟ་བུ་གསུངས་སོ། །ༀ་རུ་ལུ་རུ་ལུ་ཧཱུྃ་བྷྱོ་ཧཱུཾ། བཛྲ་ག་རཱི་ཧ། བཛྲ་ཙཽ་རཱི་ཧ། བཛྲ་པྲ་མོ་ཧེ་ཧ། བཛྲ་བཻ་ཏཱ་ལཱི་ཧ། བཛྲ་པུཀྐ་སཱི་ཧ། བཛྲ་གྷསྨ་རཱི་ཧ། བཛྲ་སྨ་ཤ་ནཱི་ཧ། བཛྲ་ཙནྡྷ་ལཱི་ཧ། བཛྲ་སེང་ཧ་མུ་ཁ་ཧེ། བཛྲ་བྱཱ་གྷྲྀ་མུ་ཁ་ཧེ། བཛྲ་ཤྲྀ་གཱ་ལ་མུ་ཁ་ཧེ། བཛྲ་ཤྭ་ན་མུ་ཁ་ཧེ། བཛྲ་གྲྀདྡྷ་མུ་ཁ་ཧེ། བཛྲ་ཀངྐ་མུ་ཁ་ཧེ། བཛྲ་ཀཱ་ཀ་མུ་ཁ་ཧེ། བཛྲ་ཨུ་ལཱུ་ཀ་མུ་ཁ་ཧེ། བཛྲ་ཨཱཪྱ་ཏེ་ཛ་ཏེ་ང་ཛཿཕཊ། བཛྲ་ཨ་མུ་ཁ་ཧཱུཾ་ཕཊ། བཛྲ་ལོ་ཀ་བཾ་ཕཊ། བཛྲ་བྷསྨི་པ་ལ་ཡ་བ་ཏུ་ཧོཿཕཊ། བདག་ཉིད་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་བདག །ཁྲོ་རྒྱལ་ཡེ་ནས་ཡིན་པའི་ཕྱིར། །ཕྱག་རྒྱ་ཆེན་པོར་མངོན་རྫོགས་ཤིང་། །སྐུ་གསུང་ཐུགས་སུ་རང་དབང་བསྐུར། །ཡེ་ཤེས་ཐུགས་ཀྱི་དཀྱིལ་འཁོར་གསལ། །ༀ་ཨཱཿཧཱུཾ། ཨཱོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། དེ་ནས་བཅོམ་ལྡན་འདས་ཡེ་ཤེས་ལྔ་དང་ལྡན་པའི་སྔགས་འདི་གསུངས་སོ། །ༀ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་མ་ཧཱ་ཨཱ་དཪྴ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་མ་ཧཱ་ས་མ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་མ་ཧཱ་པྲ་ཏྱ་བེཀྵ་ཎ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་མ་ཧཱ་ཀྲྀ་ཏྱ་ཨ་ནུཥྛ་ཛྙཱ་ན་བཛྲ་སྭཱ་བྷཱ་ཝ་ཨཏྨ་ཀོ྅་ཧཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཤྲཱི་ཧེ་རུ་ཀ་མ་ཧཱ་ཀ་རུ་ཎི་ཀ་ཨི་དཾ་ས་མ་ཡ་ཛཿ བ་ལིངྟ་གྲྀཧྞ་ཧོ་ཁཱ་ཧི་ཁཱ་ཧི། པི་པ་ཧོཿ ཨ་ལ་ལ་ཧོཿ ཨ་མྲྀ་ཏ་ཁཱ་ཧི། མཁའ་འགྲོའི་མིང་དང་གཏོར་སྔགས་སྦྱར། །རྡོ་རྗེ་ཐོད་ཆེན་ཤ་ཆེན་དང་། །གླང་ཆེན་མི་དང་ཤུགས་ཆེན་ཤ །ཁྱི་ཤ་བདུད་རྩི་ལྔ་ལ་སོགས། །མེ་རླུང་སྦྱོར་བ་ལྡན་པ་ཡིས། །རྒྱལ་བའི་དཀྱིལ་འཁོར་ཚོགས་ལ་འབུལ། །དཔལ་ཧེ་རུ་ཀ་གལ་པོ་ཞེས་བྱ་བའི་རྒྱུད་ལས། ཡི་གེའི་ཕྲེང་བ་འབྱུང་བ་ཞེས་བྱ་བའི་ལེའུ་སྟེ་བཞི་པའོ།། །།དེ་ནས་རྣམ་པར་དག་པ་བཤད་པར་བྱ་སྟེ། རྣམ་ཤེས་གཟུགས་ཚོར་འདུ་ཤེས་དང་། །འདུ་བྱེད་ལ་སོགས་འཛིན་ལྔ་འཇོམས། །ནམ་མཁའ་ས་ཆུ་མེ་རླུང་འཇོམས། །མིག་དང་རྣ་བ་སྣ་ལྕེ་རྣམས། །དེ་དབང་ཡིད་འཛིན་རྣམ་བཞི་འཇོམས། །གཟུང་འཛིན་སྒྲ་དྲི་རོར་འཛིན་དང་། །འདས་དང་ད་ལྟར་མ་འོངས་འབྱུང་། །འབྱུང་བར་མ་ངེས་འཇོམས་པར་བྱེད། །ང་རྒྱལ་ཕྲག་དོག་འདོད་ཆགས་དང་། །སེར་སྣ་གཏི་མུག་ཞེ་སྡང་འཇོམས། །ཡིད་ཀྱི་རྣམ་ཤེས་འདུས་བྱས་དང་། །གསང་དབང་གསང་བའི་རྣམ་ཤེས་དང་། །གསང་ཡུལ་གསུམ་འདུས་རྟོག་པ་བཅོམ། །རྟག་ཆད་བདག་དང་མཚན་མར་འཛིན། །རྣམ་དག་བཞི་བཅུ་རྩ་གཉིས་བཤད། །བཅུ་ལྡན་ཡེ་ཤེས་དཔལ་དགུའོ། །གཉིས་ལྡན་ཟག་མེད་ཡུམ་གྱི་སྐུ། །རྣམ་ཤེས་བརྒྱད་དག་མཁའ་འགྲོ་བརྒྱད། །རྣམ་པར་ཤེས་བརྒྱད་སིང་ཧའི་སྐུ། །རྟག་ཆད་མུ་བཞི་སྒོ་མ་བཞི། །སྣོད་བཅུད་ལྷ་དང་གཞལ་ཡས་ཁང་། །ཕུང་པོ་ལྔ་ལ་སོགས་པའི་ཆོས། །དེ་ནི་སྤང་བར་བྱ་བ་མིན། །ཐེག་པ་གསུམ་ནི་སྤང་བ་མིན། །ཀ་ཏ་ལི་བཞིན་ཡོངས་སུ་བཟུང་། །དཔལ་ཧེ་རུ་ཀ་གལ་པོ་ཞེས་བྱ་བ་ལས། རྣམ་པར་དག་པ་བསྟན་པའི་ལེའུ་སྟེ་ལྔ་པའོ།། །།དེ་ནས་དེ་ཁོ་ན་ཉིད་ཀྱི་ལེའུ་བཤད་པར་བྱ་སྟེ། སྟོང་དང་སྟོང་མིན་ཧེ་རུ་ཀ །ངོ་བོ་གཟུགས་མེད་སྒྲ་སོགས་བྲལ། །མྱོང་དང་སྣོམ་དང་བྱེད་པ་པོ། །ཀུན་ནས་ཡོད་པ་མ་ཡིན་ཏེ། །ངང་གིས་རྣམ་པར་དག་པ་ལས། །ལྷ་དང་ལྷ་མོར་གང་སྣང་ཡང་། །ཡོད་པ་མ་ཡིན་རང་བཞིན་བྲལ། །ཁྱོད་ཀྱིས་སྲོག་ཆགས་གསད་པར་བྱ། །མ་བྱིན་པར་ཡང་བླང་བར་བྱ། །འདོད་པ་ལོག་པར་གཡེམས་པར་བྱ། །རྫུན་གྱི་ཚིག་ཀྱང་སྨྲ་བར་བྱ། །དེ་དག་རྩ་བ་ཡིན་ཤེས་ན། །ཚེ་འདི་ཉིད་ལ་མྱ་ངན་འདའ། །དཔལ་ཧེ་རུ་ཀ་གལ་པོ་ལས། །དེ་ཁོ་ན་ཉིད་ཀྱི་ལེའུ་སྟེ་དྲུག་པའོ།། །།དེ་ནས་ཡང་དག་བཤད་བྱ་བ། །རྣམ་པར་གྲོལ་བ་མཚོན་པའི་ཕྱིར། །དཔལ་ཆེན་ཁྲག་འཐུང་ཕྱག་རྒྱ་ནི། །ཞལ་གསུམ་ཕྱག་དྲུག་ཞབས་བཞི་བགྲད། །གཡས་དཀར་གཡོན་དམར་དབུས་མཐིང་ཞལ། །རྡོ་རྗེ་ཁ་ཊྭཱཾ་རྡེའུ་ཆུང་གཡས། །དུང་དམར་རྒྱུ་ཞགས་ཁྱུང་ཁྲ་གཡོན། །ཤེས་རབ་དབྱིངས་མའི་ཕྱག་རྒྱ་ནི། །ཞལ་གཅིག་ཕྱག་གཉིས་སྐུ་མདོག་མཐིང་། །གཡས་པ་ཤེས་རབ་ཐབས་ལ་བརྟེན། །གཡོན་པ་དུང་དམར་གཙོ་ལ་སྟོབ། །ཀྲོ་དྷཱི་ཤྭ་རཱི་དབྱིངས་ཀྱི་རྒྱ། །ག་རཱི་བྷན་དམར་བྱིས་དབྱུག་སྔོ། །ཙཽ་རཱི་མདའ་གཞུ་འགེངས་མ་སེར། །པྲ་མོ་ཆུ་སྲིན་རྒྱུ་མཚན་དམར། །བེ་ཏཱ་བྱི་ཟ་རྡོར་འཕྱར་ནག །པུཀྐ་དམར་སེར་བྱིས་རྒྱུ་འདྲེན། །གྷསྨ་དུང་དམར་ཁྲག་འཐུང་ལྗང་། །སྨ་ཤ་མཐིང་ནག་བྱིས་སྙིང་ཟ། །ཙནྡྷ་སེར་སྐྱ་མཆོག་ལུས་འདྲལ། །སིང་ཧ་ཁ་རོ་བསྣོལ་སེར་སེང་། །བྱཱ་གྷྲྀ་གནན་བལྟ་བསྣོལ་དམར་སྟག །སྲི་ལ་ནག་མོ་བྱིས་ལྡག་ཝ། །ཤྭ་ན་ཤ་འདྲད་མཐིང་ག་སྤྱང་། །གྲྀཌྡྷ་ཀྲིད་དམར་རྒྱུ་འདྲེན་རྒོད། །ཀང་ཀ་ཞིང་ཕྲག་སྣར་མགོ་དམར། །ཀཱ་ཀ་ཁ་རོ་བྷན་གྲི་ནག །ཨུ་ལཱུ་མཐིང་ཚོགས་འུག་པའི་མགོ། །རྟ་མདོང་དཀར་མོ་ལྕགས་ཀྱུས་འདྲེན །ཕག་གདོང་ནག་མོ་ཞགས་པས་ཆིངས། །ཉི་ཟླ་དམར་མོ་ལྕགས་སྒྲོག་སྡོམ། །ཐལ་བྱེད་མཐིང་ནག་དྲིལ་འཁྲོལ་དགྱེས། །ཞེས་སོ། །དཔལ་ཧེ་རུ་ཀ་གལ་པོའི་རྒྱུད་ལས། ལྷ་རྣམས་ཀྱི་སྐུ་མདོག་དང་ཕྱག་མཚན་བསྟན་པའི་ལེའུ་བདུན་པའོ།། །།དེ་ནས་ཡང་དག་བཤད་བྱ་བ། །སྔ་མ་ལས་ནི་གནས་འགྱུར་ཏེ། །ཁྲག་འཐུང་དཀྱིལ་འཁོར་གསལ་བྱས་ནས། །ཕུང་པོ་རྡོས་བཅས་བེམ་པོ་དེ། །ཕྱོགས་བཞིས་བྲོ་བཞིས་སྦྱང་བར་བྱ། །ཡེ་ཤེས་ལྷ་དང་མཁའ་འགྲོ་མ། །ཐུགས་དམ་བསྐང་ཞིང་ཐུགས་དམ་བསྐུལ། །འབྲུ་ལྔ་བཀོད་ལ་ལམ་ལྔ་དགག །ཁྲུས་བྱ་ཟླ་གམ་ནུབ་ཏུ་བཞག །དེ་ལ་ལྷ་རྣམས་དགོད་པ་ནི། །རིགས་ལྔ་ཡབ་ཡུམ་བསམ་པར་བྱ། །མདུན་རྒྱབ་གཉིས་སུ་བསྒོམ་པ་ནི། །ཨཱ་ལི་ཀཱ་ལི་བསམ་པར་བྱ། །རྣམ་ཤེས་དབང་པོ་ཡུལ་དུས་ལ། །སེམས་དཔའ་ཡབ་ཡུམ་བསྒོམ་པར་བྱ། །སྤྱི་བོ་རྒྱབ་དང་ལྕེ་ཡི་སྟེང་། །རྐང་མཐིལ་ཡན་ཆད་ཐུབ་པ་དྲུག །ལྟེ་བ་མཇུག་ཏོ་མཁལ་ཁུང་གཉིས། །སྒོ་བ་ཡབ་ཡུམ་བསྒོམ་པར་བྱ། །རྣམ་སྨིན་ཟག་བཅས་ཕུང་པོ་ལ། །ཕྱག་རྒྱའི་དཀྱིལ་འཁོར་གསལ་བཀོད་ནས། །འོད་ཟེར་འཕྲོ་འདུས་སྦྱངས་བྱས་ན། །གཉིས་དོན་མཐར་ཕྱིན་ཕྱག་རྒྱ་སྒྲོལ། །ཆོ་ག་ལྔ་དང་ཡན་ལག་ལྔས། །གང་མོས་བསྐྱེད་ཅིང་རབ་བསྒོམས་ལ། །རང་བཞིན་དཀྱིལ་འཁོར་སྤྱན་དྲངས་བསྟིམ། །ཕྱག་འཚལ་མཆོད་དེ་གནས་པ་དང་། །བཟླས་བརྗོད་བསྙེན་པའི་འཕྲོ་འདུ་ཡིས། །ཡང་ནས་ཡང་དུ་སྦྱང་བར་བྱ། །ཡང་ན་ཁྲག་འཐུང་ཆེན་པོའི་སྐུ། །བདག་ཉིད་རབ་ཏུ་གསལ་བསྒོམ་སྟེ། །རོ་ཡི་བཤའ་ཐབས་རྒྱབ་ནས་བཤའ། །ཁྲག་འཐུང་ལྷ་ཚོགས་རྫས་སུ་སྟེ། །གློ་སྙིང་དཔལ་ཆེན་ཡབ་ཡུམ་གྱི། །མིག་དང་རྣ་བ་སྣ་དང་ལྕེ། །རིགས་བཞི་ཁྲག་འཐུང་ཡབ་ཡུམ་རྫས། །བུམ་པ་བདུད་རྩི་རྣམ་པ་ལྔ། །དཔུང་པ་གཡས་གཡོན་བཞག་ཤ་དང་། །རྒྱུ་མ་མཆིན་པ་མགོ་ཤ་རྣམས། །རྩ་བའི་ལྷ་དགུའི་རྫས་སུ་བཞག །གོ་རོ་ཙ་ན་གཞུང་པ་དང་། །རྐང་དང་ཚིལ་བུ་ཤ་དང་ཁྲག །སྲོག་རྩ་མཁྲིས་པ་བརྒྱད་རྣམས་ནི། །མུ་ཁ་ཕྲ་མིན་བརྒྱད་ཀྱི་རྫས། །ཡན་ལག་རྣམ་ཐར་བཞི་རྣམས་ནི། །ཡེ་ཤེས་སྒོ་མ་བཞི་ཡི་རྫས། །སྒལ་ཚིགས་ཕྲུགས་རེ་བསྡེ་བ་ནི། །དབང་མོ་ཉི་ཤུ་བརྒྱད་ཀྱི་རྫས། །ན་སག་ཆེ་ཕྲ་བསྡེབ་པ་ནི། །རང་བྱུང་ཁྲོ་བོ་བཅུ་ཡི་རྫས། །ཤ་ཁྲག་རུས་པ་རྐང་དང་ཚིལ། །མཁའ་ལ་འགྲོ་བ་ཀུན་གྱི་རྫས། །མཚན་དང་ལྡན་པའི་བྷནྡྷ་དེ། །དཔལ་ཆེན་བཞུགས་པའི་རྟེན་ཡང་ཡིན། །དེ་ཡི་ནང་དུ་བླུག་པ་ཡང་། །གོ་རོ་ཙ་ན་དྲི་ཆེན་དང་། །སྙིང་དང་སྲོག་པ་རྩ་ཡི་ཁྲག །མཱཾ་ས་མཁྲིས་པ་དྲི་ཆུ་དང་། །སོ་དང་དབང་པོ་རྣམ་ལྔ་དང་། །དེ་རྣམས་ཆ་ནི་མཉམ་པ་དག །བྷནྡྷར་བླུག་པ་དངོས་གྲུབ་རྫས། །བརླ་རྐང་གཉིས་དང་རྗེ་ངར་རྐང་། །དུང་ཆེན་འབུད་པའི་གླིང་བུ་བྱ། །དཔུང་པའི་རྐང་མགོ་གཉིས་པོ་ལ། །རཀྟ་སྦྲེང་བའི་གཟར་བུ་བྱ། །ཤ་སྒོར་དངོས་གྲུབ་གསོལ་བྱང་དང་། །རྡོ་རྗེ་དང་ནི་དྲིལ་བུ་དང་། །བདུད་རྩིའི་བུམ་པ་དངོས་གྲུབ་རྫས། །དེ་བཞིན་དབང་གི་བུམ་པ་བཞག །ཏིང་འཛིན་ཡེ་ཤེས་གསལ་བའི་ཕྱིར། །དམིགས་པའི་རྟེན་ཡང་མངོན་པར་བྲི། །འདོད་ཆགས་ཡེ་ཤེས་གསལ་བའི་ཕྱིར། །རིགས་ཀྱི་ཡུམ་ཡང་མངོན་པར་གཟུང་། །ཡུམ་རྣམས་ཀུན་གྱི་མཚན་མ་ནི། །དམར་སེར་མཉམ་པའི་ཕྱག་རྒྱ་ཅན། །སྤྱན་འཕངས་དམའ་ལ་གཟི་བརྗིད་ལྡན། །འཁོར་ལོའི་ཕྱག་རྒྱ་ཨུཏྤལ་ཞབས། །དཔུང་མགོ་མཐོ་ལ་རིང་བ་ནི། །དེ་བཞིན་རིགས་ཀྱི་གཟུངས་མར་ཤིས། །དཀར་གསལ་དུང་མདོག་སྒེག་མོའི་གཟུགས། །ཤ་རུས་འཁྱིལ་བ་རྡོ་རྗེའི་དབྱིབས། །མདངས་ཅན་ཡིད་འཕྲོག་ཨུཏྤལ་ཞབས། །དུང་ཅན་མ་ཡི་རིགས་མཆོག་སྟེ། །རྡོ་རྗེའི་རིགས་ཀྱི་གཟུངས་མར་ཤིས། །ཨུཏྤལ་སྔོན་པོའི་ཁ་དོག་འདྲ། །གསལ་འཚེར་ལྷུན་སྡུག་གཟི་བྱིན་འཕྲོ། །ཤེས་རབ་དང་ནི་བློ་སྟོབས་ཆེ། །མི་ཟད་བློ་གྲོས་སེམས་ལ་འཆར། །རིན་ཆེན་རིགས་ཀྱི་གཟུངས་མར་ཤིས། །དཀར་ལ་དམར་ཆགས་པདྨའི་མདོག །ཆགས་པ་ཆེ་ཤེས་ཡིད་གཞུངས་པ། །མཆུ་ནི་པདྨ་ཁ་བྱེ་འདྲ། །མིག་རྩ་དམར་ཞིང་དམངས་འཕྲོག་པ། །པདྨ་རིགས་ཀྱི་གཟུངས་མར་ཤིས། །དམར་ལྗང་འཁྲུག་པའི་ངོ་བོ་ལ། །ཁྲོ་བཙོན་ལས་རབ་དོན་ལ་བརྩོན། །ཤ་རྒྱུས་མཆུ་ཞེང་གབ་པར་འདུག །ལག་པར་རྡོ་རྗེ་རྒྱ་གྲམ་འཆང་། །ལས་ཀྱི་རིགས་ཀྱི་གཟུངས་མར་ཤེས། །གཞན་ཡང་གང་དག་ཁ་ཅིག་ཏུ། །རི་མོ་གཅིག་པ་དེ་བཞིན་བྱ། །དུར་ཁྲོད་བླངས་པའི་རས་ཆེན་ལ། །ཚོན་རྩི་སྤྱིན་མེ་རབ་ཏུ་བཟང་། །སྒྲུབ་པོ་དམ་ཚིག་ལྡན་པ་དང་། །འབྲི་མཁན་དག་ཀྱང་དམ་ཚིག་ཅན། །ལྷ་དགུ་དམིགས་པའི་རྟེན་ཡང་བྲི། །དེ་བཞིན་སྒྲུབ་པ་པོ་ཡང་བྲི། །རབ་ཏུ་གནས་པ་རབ་བྱས་ཏེ། །རི་ཡི་རྩའམ་ཆུ་འབྲམ་མམ། །གླིང་ངམ་རང་དགའི་གནས་དག་ཏུ། །དེ་ལ་བསྙེན་བཀུར་བྱེད་པ་ལ། །མྱུར་དུ་དངོས་གྲུབ་སྟེར་ལ་བརྩོན། །སྒྲུབ་དང་འབྲི་མཁན་མ་ཡིན་པར། །ལྷག་མ་ཀུན་ལ་བསྟན་པ་མིན། །སྒྲུབ་པ་དག་ལ་འབད་པའི་ཚེ། །སྐྱེས་བུ་རྟོགས་པའི་བློ་གྲོས་ཅན། །དད་པའི་སེམས་དང་ལྡན་པ་ཡིས། །སྲོག་ལུས་མན་ཆད་རྫས་རྣམས་ནི། །སེར་སྣ་མེད་པའི་སེམས་ཀྱིས་དབུལ། །རྒྱལ་སྲིད་དང་ནི་རང་གི་ལུས། །བུ་དང་ཆུང་མ་ནོར་གྱི་དབྱིག །རབ་ཏུ་གཅེས་དང་ཡིད་འཐད་དབུལ། །ཀུན་ཏུ་སྣ་ཚོགས་བླ་མ་ལ། །ཡོན་གྱི་མཆོག་ནི་རབ་ཏུ་དབུལ། །གང་ན་ཡོངས་སུ་གཏོང་དཀའ་བ། །དེ་ནི་མཆོག་ཏུ་བཤད་པ་ཡིན། །བླ་མའི་རྫས་ནི་སྲོག་ཇི་བཞིན། །གཞི་འཛིན་སྣུམ་འདྲ་དམ་ཚིག་རིན་པོ་ཆེ། །མ་རིག་ཐ་རྒོད་ཀོ་ཁེངས་ལྟ་བུ་བཏུལ། །ཡང་དག་དོན་རྟོགས་སེམས་དང་ཆོས་སུ་འདྲེས། །ལུས་དང་སྲོག་ལ་བབས་ཀྱང་དམ་ཚིག་མཆོག་མི་གཏོང་། །རྣལ་འབྱོར་དབང་ཕྱུག་ཡོན་ཏན་བརྒྱད་དང་ལྡན། །བླ་མ་མཆོག་ཉིད་ཡིན་པར་ངས་བཤད་དོ། །དག་པའི་ཡེ་ཤེས་ཧེ་རུ་ཀ །གཉིས་མེད་དོན་ལ་རབ་བརྩོན་པ། །དབྱངས་དྲུག་བླངས་པས་དོན་དྲུག་གྲུབ། །སྔགས་ཀྱི་ཡི་གེའི་སྒྲ་སྒྲོགས་པ། །དེས་ནི་དཀྱིལ་འཁོར་ལྷ་རྣམས་བསྐྱེད། །ཟབ་ཅིང་འབྲུག་སྒྲ་ལྟར་སྒྲོགས་པས། །གཏུམ་པོ་གདུག་པའང་ལྷན་ནེར་འགྱུར། །མཁུར་བ་དབུགས་ཀྱི་རླུང་འབྱིན་པས། །ཁྲོ་བོ་ཁྲོ་མོའི་སྤྲུལ་པ་འགྱེད། །རྡོ་རྗེ་སྲིན་པོ་ངུར་སྐད་ཀྱིས། །གདུག་པ་ཐམས་ཅད་སྤ་ཡང་བཀོང་། །འཁུན་ཞིང་གདུང་པའི་སྒྲ་འབྱིན་པས། །གདུག་པ་ཐམས་ཅད་རྡུལ་དུ་རློག །ཚངས་པ་དབྱངས་ཀྱི་འདྲེན་ཚུལ་གྱིས། །ཐམས་ཅད་མ་ལུས་དབང་དུ་སྡུད། །ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། སྟོང་ཚོ་གསུམ་གྱི་གྲངས་དག་ནི། །རྣལ་འབྱོར་ཉིན་ཞག་གང་བཟླ་པ། །ཞག་ནི་སུམ་ཅུ་ཕྲག་དྲུག་གིས། །རིག་འཛིན་ཐོབ་པར་གདོན་མི་ཟ། །རྣལ་འབྱོར་པ་དེ་འཆི་བའི་ཚེ། །འཇིག་རྟེན་པ་དག་ཤི་ཞེས་བརྗོད། །རྡོ་རྗེ་མཁའ་འགྲོ་མ་རྣམས་ཀྱིས། །ལེགས་ཞེས་རབ་ཏུ་བརྗོད་ནས་ཀྱང་། །རིག་འཛིན་ས་ལ་ངེས་པར་འཁོད། །དཔལ་ཧེ་རུ་ཀ་གལ་པོ་ཞེས་བྱ་བའི་རྒྱུད་ལས། སྣ་ཚོགས་རྣམ་པར་སྤྱོད་པ་ཞེས་བྱ་བའི་ལེའུ་སྟེ་བརྒྱད་པའོ།། །།དེ་ནས་ཡང་དག་བཤད་བྱ་བ། །ཐིག་ལེ་གཅིག་པའི་དཀྱིལ་འཁོར་དུ། །རྡོ་རྗེ་བདུད་རྩི་སྒྲུབ་པ་བཤད། །ཕུན་སུམ་ཚོགས་པ་བཞིར་ལྡན་ནས། །དེ་ནས་དཀྱིལ་འཁོར་བྲི་བར་བྱ། །ཞི་ཁྲོ་སྤེལ་མའི་དཀྱིལ་འཁོར་བྲི། །ཤར་དུ་ཞི་བའི་དཀྱིལ་འཁོར་དུ། །མཆོད་པ་ལྔ་དང་གཏོར་མ་བཤམ། །ལྷོ་རུ་རྒྱས་པའི་དཀྱིལ་འཁོར་དུ། །མར་མེ་དགུ་དང་གསོལ་བྱང་བཞག །ནུབ་ཏུ་དབང་གི་དཀྱིལ་འཁོར་དུ། །རྡོ་རྗེའི་ཚེ་དང་དངོས་གྲུབ་རྫས། །བྱང་དུ་དྲག་པོའི་དཀྱིལ་འཁོར་དུ། །བསྒྲལ་བའི་རྫས་མཆོག་བཞག་པར་བྱ། །དབུས་ཀྱི་བྷནྡྷ་སྲུབས་མེད་དུ། །རྩ་བ་བརྒྱད་དང་ལོ་མ་སྟོང་། །མིན་པ་གསུམ་དང་ཡིན་པ་ལྔ། །སྐྱོབ་དང་ཡན་ལག་ཉི་ཤུ་བདུན། །ཁ་ཆེར་སྐྱེས་དང་ཙནྡན་དྲི། །གཉིས་འཐུང་ལ་སོགས་ཤ་སྣ་སྟོང་། །འབྲུ་དང་རིན་ཆེན་བཅུད་ལ་སོགས། །གང་ཡང་སྨན་ཆེན་མིན་པ་ནི། །རབ་ཏུ་བསྒྲིམས་ཏེ་བསྒྲུབ་པར་བྱ། །བར་ཆོད་ཉུལ་ལེ་དུས་སུ་བཟློག །དུས་ནི་ཡར་གྱི་བརྒྱད་ལ་འཇུག །སྤྱན་དྲངས་རྟོག་པ་ཟློག་པ་དང་། །སྨན་ཉིད་ཞི་ཁྲོའི་ལྷར་བསམས་ཏེ། །སྨན་འཛབ་ལྷ་འཛབ་སྤེལ་ཏེ་བགྲང་། །ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ༀ་ཨཱཿཧཱུཾ་སརྦ་པཉྩ་ཨ་མྲྀ་ཏ་ཧཱུཾ་ཧྲཱིཿཐཱཿ ༀ་མ་ཧཱ་སུ་ཁ་ཛྙཱ་ན་བོ་དྷི་ཙིཏྟ་དྷརྨ་དྷཱ་ཏུ་ཨཱཿ ༀ་ཨཱཿཧཱུཾ་བཛྲ་ཨ་མྲྀ་ཏ་ཧཱུཾ་ཧྲཱིཿཐཱ། སྨན་ཉིད་ལྷ་རུ་རབ་སྦྱངས་ནས། །གྲོགས་པོ་དཔལ་ལ་སེམས་སྟོབས་ཆེ། །ཁྲོ་བོའི་ཚུལ་ཅན་གིང་ཆེན་ནི། །ཧཱུཾ་གི་སྒྲ་དང་ལྡན་པ་དེ། །ཆས་བརྒྱད་ཁྲི་བཅུ་ལུས་ལ་འགོད། །མངའ་གསོལ་བཏོན་ལ་བཏག་བཙག་བྱ། །ཡེ་ཤེས་འོད་ཀྱི་སྣང་བ་དྲིལ། །དཔལ་ཆེན་སྐུར་བསྒོམ་དབང་ཡང་བསྐུར། །དཀྱིལ་འཁོར་ཆེན་པོར་རབ་བསྐོར་ཞིང་། །རུ་ལུའི་བྲོ་དང་བྲབ་དང་བདུག །དབུས་སུ་གཞུག་ལ་སློབ་དཔོན་གྱིས། །བཞི་རྒྱུད་ལྡན་པའི་དགོངས་པ་བྱ། །ཚོགས་ཆེན་མཆོད་པ་རྒྱུན་མི་གཅད། །གཙང་སྦྲ་གསུམ་ལ་གནས་པར་བྱ། །ཚོགས་ཆེན་གཅིག་གི་བསོད་ནམས་ནི། །སྐྱེ་ལ་ཉན་ཐོས་བརྒྱར་བསགས་པས། །བཅུ་དྲུག་ཆར་ཡང་མི་ཕོད་ན། །མཐར་ཐུག་པ་ནི་ཚོགས་འཁོར་ལོ། །ཀཱ་ཡ་ཝཱ་ཀ་ཙིཏྟ། ཧཱུཾ་ཧཱུཾ་ཧཱུཾ། ཧཱུཾ་ཧཱུཾ་ཧཱུཾ། ཧཱུཾ་ཧཱུཾ་ཧཱུཾ། རྡོ་རྗེ་ཉི་མ་ནུབ་ནས་ནི། །དངོས་གྲུབ་ཆེན་པོ་བླང་བར་བྱ། །སྨན་ཆེན་འདི་ཡི་བསོད་ནམས་ནི། །ལྷ་གཉན་དམ་སྐོང་ཕྲིན་ལས་འགྲུབ། །རིག་འཛིན་བཞི་དང་སྒྲུབ་པ་བརྒྱད། །ཧེ་རུ་ཀ་ཡི་གསུངས་བཞིན་དུ། །འགྲུབ་པར་འགྱུར་ཏེ་གདོན་མི་ཟ། །གལ་ཏེ་འདི་ལ་གཟུགས་ཡོད་ན། །འཇིག་རྟེན་སྲོག་ཆགས་ཐམས་ཅད་ཀྱིས། །བརྗོད་པར་ནུས་པ་མ་ཡིན་ནོ། །རྡོ་རྗེ་བདུད་རྩི་སྨན་ཆེན་ཏེ། །གསུམ་དུ་བགོས་ལ་སྤྱད་པར་བྱ། །མདོར་ན་མང་པོ་སྨོས་ཅི་དགོས། །བདེ་གཤེགས་ཐམས་ཅད་མཆོད་པ་བས། །འདི་ཉིད་བསྒྲུབ་པའི་ཁྱད་པར་ནི། །ལྷག་པ་བས་ཀྱང་ཆེས་ལྷག་གོ། །འདི་མ་ཡིན་པའི་བསོད་ནམས་ནི། །གཞན་ན་ནམ་ཡང་ཡོད་མ་ཡིན། །དེ་བས་བསྒྲུབ་པ་འབད་པར་བྱ། །དཔལ་ཧེ་རུ་ཀའི་རྒྱུད་ལས། རྡོ་རྗེ་བདུད་རྩི་བསྒྲུབ་པའི་ལེའུ་སྟེ་དགུ་པའོ།། །།དེ་ནས་ཁྲག་འཐུང་ཆེན་པོ་དེས། དེ་སྐད་ཅེས་བཀའ་སྩལ་ནས། ལྷ་དང་། སྲིན་པོ་དང་། གིང་དང་། ལང་ཀ་དང་། མ་བདུན་དང་། སྲིང་མོ་བཞི་དང་། འབར་མའི་ཚོགས་ཐམས་ཅད་ཡི་རངས་ཏེ། དགྱེས་པའི་གད་མོ་བསྒྲགས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཁྲག་འཐུང་རྩ་བའི་རྒྱུད་ཐུགས་ཀྱི་གལ་པོ་ཞེས་བྱ་བ་རྫོགས་སོ། །ཨུ་རྒྱན་གྱི་མཁན་པོ་ཆེན་པོ་པདྨ་སམ་བྷ་ཝ་དང་། ལོ་ཙཱ་བ་དགེ་སློང་ནམ་མཁའི་སྙིང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །ནུབ་ཕྱོགས་ཨུ་རྒྱན་གྱི་གནས་ནས་སློབ་དཔོན་ཧཱུཾ་ཀ་རས་བཏོན་པའོ། །རྒྱུད་འདིའི་བཀའི་སྲུང་མ་ནི་མཁའ་འགྲོ་མ་གཙུག་གི་རྒྱན་གཅིག་མ་དང་སྲོག་གི་ཉུལ་ལེ་མ་བཞི་ལ་གཏད་དེ། །བཀའི་དུས་ཚིགས་དང་ཉི་ཚོད་ལས་འདས་ན་མཁའ་འགྲོ་མ་རྣམས་ཀྱིས་ཆད་པ་ཆོད་ཅིག །བཀའ་རྒྱ་གསུམ་མོ། །ཨཐྎ།།