བདུད་རྩི་སྒྲོན་མ་གསལ་བ་བདུད་རྩི་ཡོན་ཏན་སྐོར། སློབ་དཔོན་རྡོ་རྗེ་ཟླ་བ།

བདུད་རྩི་སྒྲོན་མ་གསལ་བ་བཞུགས་སོ། །བདུད་རྩི་ཡོན་ཏན་སྐོར། བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །བདུད་རྩི་ཕྱེ་མ་བསྒྲུབ་པའི་རིམ་པ་དག་གིས་ནི། །འགྲོ་བའི་རྟོག་བཟློག་ཡང་དག་ལྷ་ལ་གཟུད་བྱའི་ཕྱིར། །ལུང་དང་མན་ངག་རིག་པ་དག་གིས་ཐག་བཅད་དོ། །ལྟ་སྤྱོད་འབྲེལ་བར་བརྩེ་ཕྱིར་བདག་གིས་ཅི་ནུས་བརྩམ། ༈ །བདག་ཉིད་བཀྲིད་དྲང་ཆོས་དོན་རྒྱུ་འབྲས་ལུང་མ་རྨོངས། །རྣ་བརྒྱུད་ལུང་དང་མངོན་དུ་ཕྱུང་བའི་ལུང་གིས་ངོས་ཟིན་པ། །རྟོག་སྤྱོད་མན་ངག་དག་གིས་གདེངས་ལྡན་ལྟ་བ་ཅན། །ཡངས་ཤིང་རྒྱུད་བརླབས་ཞི་བའི་ཏིང་འཛིན་ཡོན་ཏན་བརྒྱད་ལྡན་པ། །དབང་ཡང་ཕྱི་ནང་གསང་བའི་རིམ་བཞིན་ཐོབ་པ་ལ། །ཕྱི་ནང་སྨན་གྱི་རིམ་པ་ཀུན་ལ་མཁས་པས་བསྒྲུབ། ༈ །རིག་མ་སྤྱི་དང་ཁྱད་པར་ཡོན་ཏན་ལྡན་ཞིང་དགོངས་རྒྱུད་ཅན། །ཚུལ་བཞི་ལྡན་ཞིང་མཚན་བཟང་སུམ་ཅུ་རྫོགས་པར་ཡོད། །སྲིད་ཞུར་བཅས་ཤིང་ཕྱི་ནང་རླུང་དཀར་གསེར་ལྡན་ཞིང་། །བརྟུལ་ཞུགས་ཆེ་ཞིང་རྟོག་པས་མ་བཅིང་བློ་གྲོས་བཟང་། །སློབ་མ་དཔའ་གཏུམ་གཙང་སྦྲ་ཆེ་ཞིང་སྐྱོན་དྲུག་སྤངས་པ་དང་། །དད་པས་མི་འཕངས་གཙོར་འཛིན་མི་ཕྱེད་དགུ་དང་ལྡན། །ནང་མི་མཐུན་དང་ཁ་ཟས་དཀའ་ཐུབ་མི་མཐུན་ཕྲག་དོག་སྤངས། །འདི་འདྲ་བུ་སྟེ་དེ་དག་པཉྩ་ཡན་ཆད་གཟུང་། །མི་མཐུན་དབང་མེད་ནན་གྱིས་འཇུག་ན་ཐབས་ཀྱིས་དབྱེ་བར་བྱ། །ཡུལ་ཡང་ཤར་ནི་རི་བོ་དྲང་སྲོང་བསྒྲུབ་པ་སྟེ། །ལྷོ་ན་དུར་ཁྲོད་ཡོད་ཅིང་ཕྲ་མེན་སྦྱོར་གནས་ནུབ་ན་ནི། །སྨན་གྱི་ལྷ་མོ་གནས་ཏེ་རྩི་སྨན་སྐྱེ་བའི་ས། །ཤིང་དང་ནགས་ཀྱི་ལྷ་གནས་བྱང་ན་ཙན་དན་ནགས། །གནས་དེར་རི་བོ་ནགས་འདབ་ཆུ་ངོགས་བྲག་ཕུག་སྟོང་། །དགའ་ཞིང་ཡིད་འོང་བདག་དབང་བར་ཆད་མེད་པའི་གནས་མཆོག་རྩལ། །དེ་ནི་མཆོད་སྦྱིན་རྒྱ་ཆེར་བྱས་ཏེ་སྣང་དང་མི་སྣང་ས་བདག་ལ། །རིན་བརྩལ་བདེན་པ་བགོ་ལ་བདག་གིར་རབ་བྱས་ཏེ། །ཁྲུ་གང་ས་སྟེགས་དབུས་སུ་གྲུ་གསུམ་མཐིང་ནག་ཁ་ཁྱེར་ཅན། །དབུས་སུ་མཆོག་གི་ཕུར་པ་བདུད་རྩི་ཀུན་དྷ་ལིར་བསྒོམ་གདབ། །གཟུང་ནས་མཚོན་ཆའི་ཆར་སོགས་དག་གིས་མཚམས་གཅད་དེ། །བརྐོ་དུས་ལྟོ་ཕྱེ་གནས་པའི་མཚན་ཉིད་ཤེས་བྱ་བརྐོ། །གཞལ་མེད་བྱིན་རླབས་མནས་སྒོར་ཤར་བསྟན་གྲུ་བཞིར་བྱའོ། །ཕྱི་རོལ་ཕྱོགས་མཚམས་དག་ཏུ་རྒྱལ་ཆེན་བཞི་དང་ཕྱོགས་སྐྱོང་བཅུ། །མཆོད་རྟེན་བཞིའམ་བཅུ་བཞིར་སོ་སོའི་སྔགས་བཅས་བརྩིག །སྤྱན་དྲངས་མཆོད་དེ་བྱིན་རླབས་གནས་ཀྱི་སོ་སོར་བཞག །ཞེ་སྡང་རྡོ་རྗེའི་ཏིང་འཛིན་བསྒོམས་ཏེ་ཕྱོགས་དང་མཚམས་དག་དུ། །ཁྲོ་བོ་བཅུ་ལ་སོགས་པའི་སྔགས་དང་ཕྱག་རྒྱ་ཡིས། །ཏིང་འཛིན་འོག་ཕྱོགས་ས་གཞིར་རྡོ་རྗེར་བྱིན་རླབས་ནས། །སྟེང་ཡང་བླ་བྲེར་བྱ་སྟེ་ཕྱོགས་མཚམས་རྭ་བས་བསྐོར་ཏེ་སྦྱང་། །དེར་ནི་འཚོ་བའི་ཟས་ལ་སོགས་པའི་ཡོ་བྱད་རྣམས། །ལྷན་དུ་བསོགས་ལ་གསུམ་དུ་བྱས་ཏེ་གཅིག་གིས་དང་པོའི་མཆོད་སྦྱིན་བྱ། །བར་དུ་བསྒྲུབ་པའི་རྫས་ལ་ཐ་མར་ཆོས་སྟོན་བཟང་བར་བྱ། །དེ་ཀུན་ཚོགས་ཀྱི་དབུས་སུ་བཞག་སྟེ་རིགས་ཀྱི་ལྷར་བརྟགས་ལ། །བཟང་པོའི་དུས་ནི་ཡར་གྱི་བརྒྱད་དང་སྔ་དྲོའི་དུས། །ཁང་བཟང་བདུད་རྩི་ལྔ་ཡིས་ཞལ་ཞལ་ལེགས་པར་བྱ། །སྒོ་ནས་འདམ་གང་ས་རུ་གྲུ་གསུམ་མཁའ་ཀློང་དུ། །སྟྭམ་པ་ན་ཡི་ལས་ཀྱིས་རིམ་པས་ཐོད་པ་རུ། །དམ་ཚིག་ལ་སྡང་ཕུར་པས་གདབ་ཅིང་མནན། །བཀྲ་ཤིས་བྱ་ཕྱིར་བཀྲ་ཤིས་སྨོན་ལམ་གདབ་པར་བྱ། །སྒོ་སྲུང་མིག་གིས་རྟེན་བྱས་དྲག་ཏུ་བསྒོ་བྱས་ཏེ། །དང་པོ་མཆོད་སྦྱིན་དུས་སུ་དཀོན་མཆོག་འཕགས་པ་ལ། །མཆོད་སྦྱིན་བཟང་པོས་ཅི་ནུས་གུས་པས་མཆོད་བྱ་སྟེ། །སྡིག་བཤགས་བསྐང་གསོ་ཉེས་འགལ་བཟོད་གསོལ་གདབ་པར་བྱའོ། །ཡོན་ཏན་མགྲོན་མཆོག་མགོན་པོ་རྣམས་ལ་གཏོར་མ་རྒྱ་ཆེར་བཏང་། །འབྱུང་པོ་ཕལ་ལ་རྨེ་གཏོར་སྦྱིན་ལ་བསྐྲད་པར་བྱ། །སྙིང་རྗེའི་གནས་སུ་སྦྱིན་གཏོར་རྒྱ་ཆེ་བཏང་བྱ་ཞིང་། །ཟབ་པའི་མདོ་གདོན་སྲོག་སྦྱིན་རྒྱས་པར་བྱ། །དེ་ནས་གསང་ཕྱིར་ནན་ཏན་གྱིས་ནི་ནང་གི་མཚམས་བཅད་དེ། །དུར་ཁྲོད་བདག་པོ་མ་ཏྲཾ་གཟུགས་ལ་དགུག་ཅིང་གསད། །མནན་བྱས་ལྷོ་ཕྱོགས་མགོ་བསྟན་དུར་ཁྲོད་བརྒྱད་སྲུངས་ཏེ། །ཡིད་འོངས་ས་སྟེགས་ལུས་གང་ལེགས་བྱས་སོར་བཞིའི་འཕང་། །གྲུ་བཞི་མཉམ་བྱ་དྲི་ཆེན་དྲི་ཆུའི་རྐྱང་ནུལ་བྱ། །དེ་འོག་དྲི་སྣ་ལྔ་དང་ཁྲག་སྦྱར་ལེགས་བྱུགས་ལ། །རིག་མས་བ་སུ་ཏ་ལ་སོགས་པའི་ཐིག་བཀལ་གཡོག་བྱས་ཏེ། །གནས་ལྔ་མཁའ་གསང་ཡུམ་ཁྲོར་མེ་རིར་བརླབས། །ཕྱི་ཡི་ཆས་གོས་རྒྱན་ཀླུབས་དྲི་ཡིས་ལེགས་བྱུགས་ལ། །དཔལ་མཆོག་རྡོ་རྗེ་སེམས་དཔར་སྦྱོར་བའི་ཕྱག་རྒྱ་ཡིས། །མཁའ་དབྱིངས་རྡོ་རྗེ་པདྨོར་ཧཱུྃ་དང་ཨ་ལས་ཏེ། །རྡོ་རྗེ་རྩེ་ལ་ༀ་དང་པདྨར་ཧྲཱིཿདབུས་ཕཊ། །གསང་བའི་སེམས་ཀྱིས་བྷ་གར་ཐིག་གདབ་འཕྲོ་འདུ་བྱའོ། །དེ་བཞིན་མཎྜལ་བརྒྱད་དམ་ལྔ་པའམ་བཅུ་དྲུག་ཆ་ལ་སོགས། །གང་འདོད་མཎྜལ་ཅི་རིགས་གནམ་སའི་ཐིག །ཆོ་ག་ཇི་བཞིན་བྱིན་རླབས་ཐིག་གདབ་མཚོན་རྣམས་ཀྱང་། །ཡེ་ཤེས་ལྔར་བྱས་རིམ་གྱིས་མ་ནོར་དགྱེ་བར་བྱའོ། །གཟུགས་བརྙན་ཐིག་ནི་གང་ཡང་ཕྱོགས་བཅུར་ཀུན་ལ་ཡང་། །བཞི་བཞི་དག་དུ་ཆ་ནི་མཉམ་པོར་དབྱེ་བྱས་ཏེ། །རྩ་བ་དབུས་ཆ་གཉིས་ཏེ་མཐའ་གཉིས་དོར་བ་བགོ། །རྒྱན་དང་བཅས་བྱས་དབུས་བརྒྱད་ཆ་ལ་སྒོ་འགྲམ་དང་། །ཡ་ཕུབ་ལ་སོགས་སྒོ་ཁྱུད་ངེས་ལ་མཚོན་སྣ་ལྔ་བསྐོར་བྱ། །ཁྱམས་ཀྱི་ཆ་ལ་ལོངས་སྤྱོད་འགྲམ་གྱི་ཆར། །རིན་ཆེན་ཕ་གུ་ལོགས་རྒྱན་ཆ་གཉིས་དང་དྲ་བ་ཕྱེད། །ལོགས་རྒྱབ་ཆ་གཞན་རྟ་བ་ཆ་ལྔ་པོ་ལ་ཡ་ཕུབ་བཏེགས། །ཏ་ར་ཎ་བཞི་རྒྱན་གྱིས་རྣམ་མཛེས་རྟ་བབས་འདོད། །ཆོས་ཀྱི་འཁོར་ལོ་རྩེ་ཕྲན་གདུགས་མཛེས་རི་དྭགས་ཅན། །བ་དན་འཕན་དང་རྡོ་རྗེ་རིན་ཆེན་རྒྱལ་མཚན་བཅས་པར་བྱ། །མེ་འོད་རྡོ་རྗེ་པདྨོའི་ཕྲེང་བས་བརྗིད་པར་བསྐོར། །རྩ་བའི་དཀྱིལ་འཁོར་རང་གཞུང་ཅི་རིགས་མཛེས་པར་བྱ། །ཕྱག་རྒྱའི་ཐིག་ལེ་སྙིང་པོའི་རྫས་རྣམས་དགོད། ། ཁྲོལ་བུ ་ཕྱེ་མར་བྱ་སྟེ་ཁྲོ་བོར་གནས་བསྒྱུར་ནས། །ལོངས་སྤྱོད་ཁྲོ་བོའི་ལོངས་སྤྱོད་དུ་བསྒྱུར་ཏེ། །ཕ་གུ་ཐོད་ཕྲེང་དྲ་བ་ཐོད་སྐམ་ཡིན། །དྲྭ་བ་ཕྱེད་པ་དག་ནི་ཐོད་ཚལ་ཀ་བ་ཞིང་། །རྟ་བབས་ཆུ་སྲིན་ཞིང་གི་ཡན་ལག་སྦྲུལ་གྱིས་བརྒྱན། །སྤྲིན་ནག་གྲིབ་སོས་བརྒྱན་པའི་འཁོར་ལོ་ཞིང་གིས་གདུགས ། །རི་དྭགས་ཆུ་སྲིན་ཞིང་ཕྲན་བ་དན་ཞིང་ཆེན་འཕན། །རྐང་ཆེན་རྡོ་རྗེ་རིན་ཆེན་ཤུན་གྱི་རྒྱལ་མཚན་བསྒྲེངས། །མེ་འོད་རྡོ་རྗེ་བྲག་རིས་གཏམས་ཤིང་རབ་བརྗིད་པར ། །དེ་ལྟར་ལེགས་བྲིས་ཕྱོགས་བཞིན་མཎྜལ་བཟང་པོ་བཞི། །བདུད་རྩིས་ལེགས་བྱུགས་ལས་བཞི་སོ་སོའི་དབྱིབས། །སྒྲུབ་རྫས་ཤར་དུ་དུར་ཁྲོད་མེ་མར་ལྔ་བརྒྱད་ལྷོར། །ནུབ་དུ་ཡབ་ཡུམ་བྱང་རྒྱུ་རྒྱུ་མཆོག་ཅི་འབྱོར་བཞག །དབུས་སུ་བྲམ་ཟེའི་མགོའམ་ཚངས་པའི་སྐུད་པ་ཅན། །རྟའི་སྙིང་པོར་བྲིས་ཏེ་རུ་སྦལ་མགོ་དང་བཅས་པའོ། །ཕྱོགས་མཚམས་རིགས་སུ་གྱུར་པའི་ཁམས་ཕོར་མཐུན་པ་ཡི། །དར་གྱིས་དགབ་པའི་སོ་སོའི་མགུལ་ཆིངས་བྱས་པ་དགོད ། །དར་གྱིས་བསྐོར་ཏེ་གྲྭ་བཞིར་མདའ་དང་དར་སྣ་རལ་གྲི་བཞི། །ཕུར་པ་བརྒྱད་དང་དུར་ཁྲོད་རྫས་ཀྱིས་བསྐོར་བར་བྱ། །ཕྱོགས་བཞིར་བདེ་བའི་སྟན་ལ་ལས་བཞིའི་འདུག་སྟངས་གནས། །མདུན་དུ་ཨརྒ་དཔའ་བོ་བཟེད་ཕོར་གཏོར་མ་དགྲམ། །རྩ་བ་ལྔ་སོགས་ཇི་སྙེད་སྨན་གྱི་བྱེ་བྲག་ཀུན། །དབུས་སུ་སྣོད་དུ་ཚང་བར་བསགས་ཏེ་བསྒོམ་བྱ་བ། །ཆོས་རྣམས་ཐམས་ཅད་རང་སེམས་སྣང་སྟེ་གུད་ན་མེད། །སེམས་ཉིད་གདོད་ནས་མ་སྐྱེས་སྨྲ་བསམ་འདས། །དེ་ཉིད་མ་རྟོགས་འཁྲུལ་འཁོར་འགྲོ་དང་ལྡན་པ་ལ། །མཁའ་ལྟར་ཁྱབ་པའི་སྙིང་རྗེ་མི་རྟོགས་ངང་ལས་རང་བྱུང་བའོ། །ཐབས་ཀྱི་རང་བཞིན་ཐིག་ལེ་བྱང་ཆུབ་སེམས་ཉིད་ནི། །རྒྱུ་མཆོག་ཨ་དཀར་དམ་པ་ཟླ་དཀྱིལ་འོད་ཀྱིས་བསྐོར། །ཨཱཿལི་ཀཱ་ལི་མཚན་དང་དཔེ་བྱད་ཚོགས་ཀྱིས་བརྒྱན། །རཾ་འབྱུང་མེ་ནི་གྲུ་གསུམ་འབར་བས་དངོས་བསྲེག་ཡཾ། །ཟླ་གམ་དམར་པོ་རྒྱན་ལྡན་སྟེང་དུ་ཁམས་ལས་ཆུ། །མདོག་དཀར་ཟླུམ་པོ་བུམ་པས་མཚན་པ་མ་མ་ཀི། །སུ་ལས་ས་གཞིའི་རྡོ་རྗེས་མཚན་པའི་གྲུ་བཞིའོ། །རི་རབ་སྟེང་དུ་གཞལ་ཡས་གསལ་བ་བྷྲཱུྃ་ལས་སྟེ། །དེ་རུ་ཨ་མ་ལས་ནི་ཉི་ཟླའི་དཀྱིལ་སྟེང་པཾ་ལས་པདྨ་ཁ་སྟོང་དང་། །ལྡན་པའི་དབུས་སུ་དཔའ་བོ་འབྲུ་ལྔའི་འཕྲོ་འདུ་ལས། །རྡོ་རྗེ་ལ་སོགས་ཐུགས་མཚན་འཕྲོ་ཞིང་འདུ། །དེ་ལས་རིགས་ལྔའི་སྐུ་ལྔ་སོ་སོར་གསལ་བར་བསྒོམ། །གཟུགས་སོགས་ཕུང་པོ་ལྔ་ལ་ཐིམ་པས་སྐུ་ལྔར་གྱུར། །འབྱུང་བ་ལྔ་པོ་ཡུམ་ལྔ་རྣམ་ཤེས་བརྒྱད། །ས་སྙིང་ལ་སོགས་ཡུལ་བརྒྱད་སྒེགས་སོགས་རེག་སོགས་དང་། །ཁྲོ་བོ་རྟག་སོགས་ཁྲོ་མོ་ཡིད་ཆོས་ཀུན་བཟང་གཟུངས། །བྱིན་རླབས་སྤྲུལ་སྐུ་ལ་སོགས་རང་བཞིན་དཀྱིལ་འཁོར་རྫོགས། །བདག་ཉིད་ཆེན་པོ་དེ་ཡི་སྐུ་གསུང་ཐུགས་བརླབས་པ། །ཀླད་པ་མགྲིན་འོག་ཟླ་དཀྱིལ་ཡི་གེས་མཚན་བྱས་ཏེ། །ང་རྒྱལ་བྱ་ཞིང་མགྲིན་འོག་ཡེ་ཤེས་སྐུ་མཆོག་ལེགས་གསལ་བྱ། །ཡེ་ཤེས་ལྔ་ཡི་དབུ་བརྒྱན་བཀོད་ལ་ང་རྒྱལ་བྱའོ། །ཡབ་ཡུམ་ཀུན་གྱིས་མཐུན་པ་བསྒོམ་བྱ་དེ་འོག་ཏུ། །ཡེ་ཤེས་དཀྱིལ་འཁོར་སྤྱན་དྲངས་བསྟོད་པའི་བར་དག་བྱའོ། །སྨན་གྱི་སྲུང་མ་གཙང་མ་ཀུན་ཐོག་བདེ་བྱ་སྟེ། །མཉམ་པའི་ཚིག་གིས་རྟོག་བྲལ་དམ་ཚིག་ལྡན་བྱས་ནས། །དམ་པ་རིགས་བརྒྱའི་བསྙེན་པས་དེ་ཉིད་དག་པར་སྦྱངས། །ༀ་ཨཱཿཧཱུྃ་སརྦ་པཉྩ་ཨ་མྲྀ་ཏ་ར་ས་ཡ་ན་ཏ་ན་ཛ་ཡ་གུ་ཧྱ་སིདྡྷི་ཧཱུྃ་ཧྲཱི་ཋ། དེས་ནི་ལྷ་ཚོགས་མང་པོ་རང་བཞིན་ཉིད་དུ་གྱུར་པར་བརྟག །སྟོང་དུ་ཚངས་ནས་མཆོད་བྱས་ཏིང་འཛིན་བསལ་བར་བྱའོ། །དེ་ནས་སྣོད་ལྔར་དངོས་གཞི་ལྔ་སོགས་རིགས་ཕྱེད་ལ། །དེ་ཉིད་རིགས་ལྔའི་བསྙེན་པས་ཡེ་ཤེས་ལྔ་ནི་དག་པར་བྱ། །དབུས་སུ་དཀར་དམར་སེམས་དང་ག་བུར་ཤ་རི་རམ། །ཅུ་གང་དག་དང་ཐལ་དཀར་རྡོ་རྗེ་བཞག་པར་བྱའོ། །ཤར་དུ་དྲི་ཆེན་དག་དང་ཛ་ཏི་ཨ་རུ་ར། །ཨ་ག་རུ་དང་དུ་རུ་ཀ་བཞག་གོ། །ལྷོར་ནི་མཾ་ས་སྣ་ཚོགས་སྙིང་དང་མཁལ་མ་ཞོ་ཤ་དང་། །གླ་གོར་ཞོ་ཤ་ཙི་ཏྲ་ཀ་དང་ཀ་ཀོ་ལ་བཞག་གོ། །ནུབ་ཏུ་རཀྟའི་ཚོགས་དང་ཙན་དན་སྨུག་པོ་དང་། །ལི་ཤི་ཀུ་རུ་དང་སྟར་བུ་རྒུན་འབྲུམ་སོགས། །བྱང་དུ་དྲི་ཆུ་སྣ་ཚོགས་འོ་མ་ཆུ་དང་ནི། །ཅོང་ཞུན་བྲག་ཞུན་གུར་གུམ་ལྕེ་དཔོག་དཀར་པོ་བཞག །རྩ་བ་ཇི་སྙེད་དབུས་ཏེ་ལོ་མ་ཤར། །ལྷོ་རུ་འབྲས་བུ་སྣ་ཚོགས་ནུབ་ཏུ་མེ་ཏོག་ཀུན། །ཡུ་བ་བྱང་སྟེ་འབྲས་བུ་ལྔ་བསྒྲལ་རྐང་དང་རུས་པའི་བཅུད། །གླད་པ་དབུས་སུ་ནང་གི་དྲི་ཆེན་སྣ་ཚོགས་ཤར། །དབང་པོ་ལྔ་དང་མཾ་སའི་བཅུད་ཀུན་ལྷོ་རུ་སྟེ། །ནུབ་དུ་ཁྲག་དང་རྩ་རྣམས་བྱང་དུ་ཆུ་རྣམས་སོ། །དེ་ལ་སོགས་པའི་ཕྱི་ནང་ཇི་སྙེད་འབྱོར་པའི་སྨན། །དབྱིབས་དང་ཁ་དོག་རོ་རྣམས་ཀྱིས་ནི་རིགས་ལྔར་དབྱེ། །སོ་སོའི་སྣོད་དག་འོག་ཏུ་ཡཾ་ལས་རླུང་གི་དཀྱིལ་འཁོར་ནི། །སྔོན་པོ་གཞུ་འདྲ་རྒྱལ་མཚན་ཕྱར་ཏེ་རཾ་ལས་མེ། །དམར་ནག་གྲུ་གསུམ་སྟེང་དུ་ཨ་ལས་བྷན་དྷའི་ནང་དུ་སོ་སོ་ཡི ། །སྨན་གྱི་སྟེང་དུ་ཨ་མ་ལས་ནི་ཉི་ཟླ་སོ་སོའི་སྟེང་ཉིད་དུ། །ཧཱུྃ་ཨཱྃ་སྭཱ་ཨཱྃ་ཧཱ་དེ་མདོག་ལྔ་པའོ། །འཕྲོས་པས་འགྲོ་བ་ལྔ་ཡི་སྡིག་བཅོམ་དུག་ལྔའི་སྒྲིབ་སྦྱང་སྟེ། །བདུད་རྩི་ལྔ་ཡི་བཅུད་བསྡུས་ཐིམ་པས་ཐུགས་མཚན་ལྔར། །དེ་བཞིན་འཕྲོ་འདུས་སྐུ་ལྔ་གཟུགས་དང་བཅས་པ་ལ། །སྦྱོར་བྱས་བྱང་སེམས་མེ་ལོང་གིས་བླངས་དབུས་ཀྱང་བླངས། །རིགས་ཀྱི་དབྱངས་ཚིག་བརྒྱ་རྩ་བརྒྱད་ཀྱི་སྔགས་ཀྱིས་བཏབ་པ་ཡིས། །སྐུ་ལྔ་སོ་སོའི་འོད་དུ་ཞུ་སྟེ་ལས་སུ་རུང་བ་དང་། །ཆང་དང་རིན་ཆེན་འོ་མ་ཆུ་རྣམས་སྣ་ཚོགས་ཀྱང་། །རང་རང་སོ་སོའི་སྔགས་ཀྱིས་གདུལ་སྦྱངས་བྱས་ཏེ་བཞག །དེ་འོག་རྣམ་ལྔ་ཐུགས་སུ་བསྡུས་ཏེ་སྦྱངས་པ་ནི། །གསང་ཆེན་རིགས་གཅིག་རྡོ་རྗེ་སེམས་དཔའ་ཉིད་དུ་བསྒོམ། །ༀ་སརྦ་པཉྩ་ཨ་མྲྀ་ཏ་བཛྲ་པ་ཙི་ཏ་ས་མ་ཡ་ཧཱུྃ། །དེས་ནི་སེམས་དཔའ་ཞུ་བའི་ངོ་བོ་ཉིད་དུ་བྱའོ། །རྣལ་འབྱོར་ཀུན་གྱིས་ངོས་ངོས་ནས་ནི་སྨན་ཉིད་ཀྱི། །ཆེ་བའི་ཡོན་ཏན་རྒྱས་པར་བརྗོད་ཅིང་ལེགས་བསྟོད་དེ། །སྨན་ཉིད་ཡུམ་གྱིས་བླངས་ཏེ་གཙོ་མ་བསྐུལ་ཞིང་དབུལ། །གཙོ་སོགས་འཇིགས་བྱེད་སྒོམ་ཞིང་ཆ་ལུགས་ཇི་བཞིན་བསྒྱུར། །དཔལ་གྱི་ལོངས་སྤྱོད་གླུ་གར་བྱ་ཞིང་གནས་བསྒྱུར་ཏེ། །གིང་ཡང་ཆས་སུ་བཅུག་སྟེ་མཆོག་གི་གཡང་གཞི་ཡི། །སྟེང་དུ་ཚར་མ་བཏིང་སྟེ་གུ་གུལ་དྷེ་གུས་བྱུག །རཀྟའི་ཚོམ་བུ་རེ་ལ་ཏ་ཀྲིཏ་རེ་རེ་བསྒོམས། །དེ་སྟེང་གཏན་གཏུན་མཁའ་དང་དབྱིངས་བསྒོམ་བདུད་རྩི་འཁྱིལ། །རྩིབས་བརྒྱད་ཟླ་གམ་དམར་པོའི་སྟེང་དུ་སྨན་སྤུངས་སྟེ། །ཇི་བཞིན་སྦྱོར་བའི་སེམས་ནི་སྨན་ལ་བསྟིམ་ཞིང་སྦྱངས། །ཞིང་ཡང་བཀུག་སྟེ་བྲོད་བསྐྱེད་ལམ་དགག་ངན་སོང་སྦྱངས། །གནས་ལྔའི་སྐུ་ཡི་ཐུགས་ཀ་ནས་ནི་འོད་སྤྲོས་ཏེ། །སྨན་ལ་བསྟིམ་ཏེ་འགྲོ་བའི་དོན་བྱས་འོད་དུ་ཞུ། །བསྒྲལ་ཏེ་རྫས་ཀྱང་སྨན་གྱི་ཕྲད་དུ་སྦྱར་བྱས་ཏེ། །དེ་སེམས་ཡུམ་གྱི་མཁའ་ལ་ཡར་བསྡུས་སངས་རྒྱས་བྱ། །མ་མོའི་བརྙེན་པས་ཀྱང་ནི་སྦྱངས་ཏེ་ལས་སུ་རུང་བ་དང་། །གང་གི་མཚན་མ་ཐམས་ཅད་དབྱིངས་སུ་སྦྱང་བའི་ཕྱིར། །གཙོ་བོ་ནས་ནི་རིམ་བཞིན་ཞིབ་ཏུ་དབབ་པ་ཡི། །ཕྱག་རྒྱས་གདབ་ཅིང་ཧ་ན་ཧ་ནའི་སྔགས་བརྒྱ་རྩ་བརྒྱད་དུ་བཟླས་ཏེ་ཤར་དུའོ། །ལྷོ་ཡི་མཎྜལ་སྟེང་བཙག་ཧ་ལའི་སྔགས། །ནུབ་ཏུ་མུ་ས་ལ་ཡིས་བསྲེ་ཞིང་ཆང་ལ་སོགས་པས་སྦྱར། །བྱང་དུ་ལེགས་པར་སྦོལ་ཞིང་དབུས་སུ་བཞུགས་སུ་གསོལ། །བདུག་དང་གར་དང་གླུ་བྲོ་བསྟོད་པ་བྱ། །རྡོ་རྗེའི་འགྲོས་བསྐོར་ཡོན་ཏན་བརྗོད་ལ་ཞི་བའི་བཟླས་པ་བྱ། །འབྲུ་ལྔ་བསྟིམ་ཞིང་འཇུ་འདུལ་རབ་ཏུ་བྱས་པ་དང་། །ལས་གཞི་རྫོགས་པའི་ཧོམ་བྱས་མེ་ཡི་ཕུད་ཀྱང་སྨན་གྱི་ནང་དུ་བླུགས། །རིག་མ་བརྒྱན་གྱིས་བརྒྱན་པས་ཀྲུགས་ནས་སྣོད་གསལ་ཏེ། །ཁ་ཕོར་སྦྱར་ལ་དར་གྱིས་བཅིངས་ཏེ་རྒྱ་གྲམ་རྒྱས་བཏབ་ལ། །ལེགས་པར་གཞལ་ཏེ་ཟླ་གམ་དབུས་སུ་དར་གྱི་ཁང་པ་ནི། །སྣ་གསུམ་རིག་པར་ཕུལ་ཏེ་གཟུང་ཐག་པན་ཙ་ཡིས། །བླ་མ་ལྔ་ལ་ཕུལ་ཏེ་རྩེ་གཅིག་སྒོམ་པའི་རིམ། །དེ་བཞིན་ཉིད་དང་ཀུན་སྣང་རྒྱུ་ལས་འབྱུང་བ་རིམ་རྩིགས་བསྐྱེད། །དུར་ཁྲོད་གཞལ་ཡས་འབར་སྣང་འཁོར་ལོ་གདན་དང་རྒྱན། །བདག་ཉིད་དཔལ་ཆེན་གཙོ་གཟུངས་གཉིས་མེད་སྦྱོར་བའི་སེམས། །ཁྲོ་བོ་འཆོལ་བར་འཐོན་ཏེ་ཕྱོགས་བཅུར་བདུད་བཏུལ་དུས། །ཕྱོགས་བཅུར་ཁྲོ་བཅུར་གྱུར་ཏེ་ཕྱོགས་མཚམས་བརྒྱད་དུ་འཁོད། །ཕོ་བྲང་ནང་དུ་ཀླུ་བདག་ཧྲཱི་ལས་གསང་བའི་ཡུམ་བཞིར་བཅས། །སྟེང་དུ་ཧཱུྃ་དང་འོག་ཏུ་པདྨོ་འཁྱིལ། །རླུང་དང་མེ་ཡང་དེ་བཞིན་སྣོད་ནི་གཞལ་མེད་ཁང་། །རྒྱལ་པོའི་སྟེང་དུ་བཞི་ནི་དབུ་གསུམ་ཕྱག་དྲུག་ཞབས་བཞིས་བརྫིས། །བཞི་སྟེང་བཛྲ་ཧེ་རུ་ཀ་ནི་དབུ་གསུམ་ཞབས་བཞིས་མནན། །སྟེང་ནས་མཁའ་མཉམ་དབུ་དགུ་ཕྱག་བཅོ་བརྒྱད། །ཞབས་ནི་བརྒྱད་ཀྱིས་དབུ་གཉིས་མནན་པའི་མཁར། །དབུས་ཀྱི་དབུ་ནི་སྤྱན་ཕྱེད་ནུབ་པར་རྡུབ་པ་ཡི། །དེ་སྟེང་འཆི་མེད་རྡོ་རྗེ་གཅིག་པུར་ལྡན། །བཅུ་ཕྲག་བཞི་དང་གཉིས་ཀྱིས་ཕྱག་དང་ཞབས་བརྒྱད་གཏམས། །བྷ་གར་རྡོ་རྗེ་སྦྱོར་ཞིང་དབུ་བརྒྱད་ཞབས་ཀྱིས་སྦྱོར ། །ཉི་མའི་སྟེང་ནས་ས་ནུ་ཡབ་ཡུམ་རྟག་སྦྱོར་བ། །བཅུ་གཉིས་དབུ་མའི་ལྗགས་ལ་ཐུགས་ཀ་ཡི། །ཉི་དཀྱིལ་རྡོ་རྗེའི་བུམ་པར་ཨ་ལས་དགུ་པས་བསྐོར། །བདག་ཉིད་ཀྱང་ནི་དེ་འདྲར་བྱས་ཏེ་སྔགས་ཀྱི་བརྡེག །ཏིང་འཛིན་མེ་ལ་བཟླས་བརྗོད་རླུང་གིས་བསྐྱོད་པས་ནི། །ཡེ་ཤེས་བདུད་རྩི་དཀར་པོ་དྲི་མེད་ལྟར། །ཡེ་ཤེས་ལས་ནི་འཆི་མེད་མཁའ་མཉམ་སྐུ་གདུང་རིགས་བརྒྱད་དང་། །གཉིས་ལས་ཀླུ་བདག་དངོས་གཞི་ལ་ཞུ་སྟེ། །བར་སྐབས་མཛད་པ་བཅུ་གཉིས་འཕྲོ་འདུས་གཞན་དོན་སྒྲུབ། །དགུ་པ་གཅིག་ལ་དེ་འདྲའི་སྦྱོར་བས་ལེ་ལོ་སྤངས། །བར་ཆད་མེད་པའི་འབྱུང་འཇུག་སྟོབས་ཀྱིས་འོད་ལ་སོགས། །དེ་དག་མ་བྱུང་བར་དུ་བསོགས་ཤིང་ཏིང་འཛིན་གསལ། །སྦྱངས་དང་མཚམས་དང་བསལ་དང་བསྒྲུབ་རྫས་ཡོ་བྱད་བསགས། །ཐང་གཅིག་ཞལ་གཅིག་ཞག་བདུན་ཉི་ཤུ་གཅིག་གིས་རིམ་བཏང་ལ། །ཡ་མཚན་མི་བསྐྱེད་ཐེ་ཚོམ་མེད་ན་ངེས་པར་འགྲུབ། །སྟོང་སྟོང་ཚང་ཞིང་ཚོགས་མཆོད་བྱ་བར་རབ་ཏུ་གཅེས། །ཏིང་འཛིན་གསལ་ཞིང་བར་ཆོད་ཉམས་ལེན་ལྔ་ཡང་བཟློག །བདུད་རྩི་འཁྱིལ་པས་བར་ཆོད་རྟག་ཏུ་བཟློས་པ་གཅེས། །རང་རིག་སྤྱན་དྲངས་མཆོད་སོགས་བྱས་ནས་བཟླས་པ་ལ་ཡང་འཇུག །རྟགས་བྱུང་ན་ནི་སྤྱིལ་བའི་སྦྱོར་བ་རབ་ཏུ་གཅེས། །ༀ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཀུཎྜ་ལི་ཧཱུྃ་ཧྲཱིཿཋ། བརྒྱ་རྩ་བརྒྱད་ཀྱིས་མཁའ་ལ་བསྐྱིལ་ནས་ནི། །སྨན་ཉིད་ལ་ནི་དབབ་པའི་སྦྱོར་བས་དབབ་བྱས་སྟེ། །ༀ་མེ་པྲ་བེ་ཤ་ཡ་ཕེབས་ཕེབས་ཧཱུྃ་ཧྲཱིཿཋ། དངོས་གྲུབ་དག་ཀྱང་གསོལ་བ་བཏབ་ཏེ་གནང་བ་དང་། །སྤྱད་ཕྱིར་འཕགས་པ་མཆོད་ནས་བདག་ཉིད་དངོས་གྲུབ་བླངས། །སློབ་མའི་ཚོགས་ལ་དབང་ཡང་རིམ་པ་བཞིན་དུ་སྦྱིན། །ཕྱོགས་བཅུའི་འཕགས་པའི་གནས་དང་ཉེ་བའི་ལྷ། །ཡི་དམ་ལྷ་དང་སློབ་དཔོན་རིག་འཛིན་མཆོད་བྱས་ཏེ། །རེ་དོགས་སྤངས་པའི་སེམས་ཀྱིས་གུ་ཧྱ་ལག་པའི་ཕྱག་རྒྱ་ཡིས། །ཨ་ཧོ་སུ་ཀ་དྷརྨ་ཀ་ཡ་ན་ཨ་མྲྀ་ཏ་སིངྔྷི་ཧཱུྃ་ཧྲཱིཿཋ། ལྕེ་དབུས་ཉི་མ་རྡོ་རྗེའི་དབུས་སུ་ཧཱུྃ་བསྒོམས་ཏེ། །ལུས་དང་དབང་པོ་ཡན་ལག་ཀུན་ཀྱང་ཐིག་ལེར་བྱའོ། །སློབ་མའི་སྤྱིར་བཞག་ཚིགས་བཅད་དབྱངས་ཀྱིས་དབང་བསྐུར་རོ། །དཀྱིལ་འཁོར་དུ་ཡང་རིག་པའི་མེ་ཏོག་དོར་ནས་སློབ་མ་གཞུག །གཏོར་མ་ཚོ་གསུམ་བཅད་ལ་དང་པོས་སྦྱིན་སྲེག་བར་མས་མཁའ་འགྲོ་བསྐྱང་ལ་ཐ་མ་གཏེར་དུ་སྦ། །སྨན་ཡང་གསུམ་དུ་བཅད་དེ་དང་པོ་འཕགས་པ་ལ། །དེ་ནས་བདག་སྤྱད་རྣལ་འབྱོར་ཡོངས་ལ་ཆ་གཅིག་བགོ། །ལྷའི་ཅི་རིགས་ཡོངས་སྤྲོ་འཛིན་ཆགས་སྤོངས་པས་སྤྱད། །སོ་སོའི་ཡི་དམ་མཆོད་དེ་ཡུམ་རྣམས་ཀུན་གྱིས་མར་མེ་ཡི། །སྨོན་ལམ་བཏབ་ལ་གཤེགས་གསོལ་དཀྱིལ་འཁོར་བསྡུ། །ལྕགས་གསུམ་གའུ འམ་སྲོག་དང་རྩ་བའི་སྣོད། །ཅི་རིགས་ལེགས་པར་བླུགས་ནས་གཞལ་ཡས་ལྷར་བསྒོམས་ཏེ། །སྤྱི་གཙུག་བཅིངས་ན་བདེ་གཤེགས་བཀུར་བར་བཤད། །མགུལ་དུ་བཅང་པས་སྲས་དགོངས་ལུས་ལ་ནི། །ཡུན་དགོངས་དུས་སུ་མཆོད་བྱས་ཡི་དམ་བསྒོམ་པ་དང་། །བཟླས་པའི་དངོས་གྲུབ་ཡོན་ཏན་བསམ་གྱིས་མི་ཁྱབ་གྲངས་ལས་འདས། །སྐད་ཅིག་ཙམ་དུ་འགྲོ་བའི་དོན་བྱས་ཡོན་ཏན་ཡང་། །ཉན་ཐོས་རང་རྒྱལ་བྱང་སེམས་རྣམས་ཀྱིས་བསྐལ་པར་བྱས་པས་ལྷག །མཇུག་ཏུ་དྲག་པོའི་ལས་ཀྱིས་དགྲ་བགེགས་ཞི་བྱས་ནས། །མཚམས་ལྷོད་མགོན་པོ་རྣམས་ལ་གཏང་རག་ཆེན་པོ་བཏང་། །ཞག་གཅིག་གནས་སྲུང་ཞག་གསུམ་ཕྱག་བཙལ་མ་རུངས་འགྱུར། །ཟིན་ནས་དགེ་རྩ་སེམས་ཅན་ཀུན་གྱི་དོན་དུ་བསྔོ། །དེ་ལྟར་གསང་སྔགས་སྤྱོད་སྒོ་ཇི་སྙེད་རང་སྣང་སྟེ། །སེམས་ལས་མ་གཏོག་པ་ཡི་ཆོས་ནི་འགའ་ཙམ་ཡོད་མ་ཡིན། །སེམས་ཉིད་གདོད་ནས་མ་སྐྱེས་ནམ་མཁའ་འདྲ་སྟེ་ཡེ་ནས་སྟོང་། །སྟོང་ཉིད་སྟོང་པའི་དངོས་བྲལ་སྤྲོས་མེད་སྨྲ་བསམ་ཡུལ་ལས་འདས། །དེ་ཉིད་མ་རྟོགས་འཁྲུལ་འཁོར་ཉིད་ཀྱང་ཡེ་ཤེས་ཆེན་པོའི་ངང་། །དེས་ན་གང་ལའང་རང་བཞིན་ཅི་ཡང་མེད་ཅེས་བྱའོ། །འདི་བརྩམས་གཞུང་དང་འགལ་བ་བཟོད་པར་གསོལ། །དགེ་བའི་རྩ་བ་གང་ལགས་དེ་ཉིད་འགྲོ་བའི་དོན་དུ་བསྔོ། །བདུད་རྩི་སྒྲོན་མ་གསལ་བ་ཞེས་བྱ་བའི་སྒྲུབ་ཐབས་ཞིབ་མོ་སློབ་དཔོན་ཆེན་པོ་རྡོ་རྗེ་ཟླ་བས་མཛད་པ་རྫོགས་སོ །། །།