འཇམ་དཔལ་རྒྱུད་ལུགས་ཀྱི་སྒྲུབ་ཆེན་སྐབས་ཀྱི་སྟོང་ཐུན་ཉེར་མཁོ། ཆོས་ཀྱི་བློ་གྲོས།
འཇམ་དཔལ་རྒྱུད་ལུགས་ཀྱི་སྒྲུབ་ཆེན་སྐབས་ཀྱི་སྟོང་ཐུན་ཉེར་མཁོ་བཞུགས་སོ། །མངའ་གསོལ་སྐབས། འོ་ད་ལམ་འཕགས་པ་འཇམ་དཔལ་ཡེ་ཤེས་སེམས་དཔའི་དཀྱིལ་འཁོར་ཆེན་པོར་ཚོམ་བུ་ཚོགས་ཀྱི་སྒྲུབ་པའི་དགའ་སྟོན་ཆེན་པོ་ཉམས་སུ་མྱོང་བ་འདི་ཡང་ཕུན་སུམ་ཚོགས་པ་ལྔ་ཡི་རང་བཞིན་དང་ལྡན་པ་སྟེ། ཇི་སྐད་དུ། དང་པོ་ཕུན་སུམ་ཚོགས་ལྡན་ཏེ། །ཚད་ཕྱིན་རབ་འབྱམས་སློབ་དཔོན་གྱིས། །སྣོད་དང་ལྡན་པའི་འཁོར་བསྡུས་ནས། །གཞུང་དང་མཐུན་པའི་གནས་དག་ཏུ། །ས་ཆོག་རྫོགས་བྱས་གནས་ཁང་ལྡན། །དགྱེས་པ་ཚང་བའི་ཡོ་བྱད་རྫོགས། །དུས་ཆ་བཞི་ཡི་དང་པོ་ལ། །ཉ་ི ཟླ་གཟའ་སྐར་ཚེས་གྲངས་བརྟགས། ཞེས་ཕུན་སུམ་ཚོགས་པ་ལྔ་དང་ལྡན་པ་སྟེ། དེ་ཡང་ཆོས་ཀྱི་སྐུ་སྤྲོས་པ་ཐམས་ཅད་དང་བྲལ་བ་ནམ་མཁའ་ལྟ་བུའི་དེ་བཞིན་ཉིད་ཤིན་ཏུ་རྣམ་པར་དག་པ་གཟོད་མ་ནས་འོད་གསལ་བ་སྐུ་དང་ཡེ་ཤེས་ཡོན་ཏན་ཐམས་ཅད་ལྷུན་གྱིས་གྲུབ་པའི་བདག་ཉིད་བརྟན་གཡོ་ཀུན་ཁྱབ་འཇམ་དཔལ་ཡེ་ཤེས་སེམས་དཔལ། ཐོག་མ་དང་ཐ་མ་མེད་ཅིང་སྐྱེ་འཆིའི་མཚན་མ་ལས་རིང་དུ་འདས་པ་སྟེ། ཕལ་པོ་ཆེ་ལས། སྲིད་དང་ཞི་ལས་རྣམ་གྲོལ་ཞིང། །ཡོན་ཏན་རྒྱ་མཚོ་གཉིས་སུ་མེད། །སྤྲོས་པ་ཀུན་ལས་རབ་འདས་པའི། །བཅོམ་ལྡན་འདས་ནི་མཁའ་རབ་ཞི། །ཞེས་གསུངས་པ་ལྟར། མགོན་པོ་འཇམ་པའི་དབྱངས་དེ་ཉིད་ནི་འདས་པ་དང ། ད་ལྟ་བ་དང། མ་འོངས་པའི་སངས་རྒྱས་གཤེགས་ཤིང་བཞུགས་པ་ཐམས་ཅད་བསྐྱེད་པས་ན་རྒྱལ་བ་ཐམས་ཅད་ཀྱི་ཡབ་ཏུ་གྱུར་པ་སྟེ། རྨད་བྱུང་རྒྱལ་པོའི་རྒྱུད་ལས། །ཐོག་མ་ཀུན་གྱི་སྔོན་རོལ་དུ། །རང་སྣང་གཞི་ལ་མཐར་ཕྱིན་ཏེ། །སྔར་སངས་སྔ་ནས་རྒྱས་པའི་ཕྱིར། །ཐོག་མའི་ཀུན་ཏུ་བཟང་པོ་ནི། འཁོར་འདས་ཀུན་གྱི་སྟོན་པར་ཤར། །ཅེས་འབྱུང་བ་ལྟར་སྐུ་གསུམ་གྱི་ཞིང་ཁམས་ཚད་མེད་པའི་སྤྲིན་ཆེན་རྣམ་པར་བཀོད་དེ། །དེ་རྣམས་སུ་གདུལ་བྱ་དང་འདུལ་བྱེད་ཀྱི་སྟོན་པ་བསམ་ལས་འདས་པས་སངས་རྒྱས་དང་བྱང་སེམས། སློབ་པ་དང་མི་སློབ་པ་དང་།ཉན་ཐོས་དང་རང་རྒྱལ་བ། ལྷ་དང་བཅས་པའི་འཇིག་རྟེན་གྱི་ཁམས་རྒྱ་མཚོར་སྐུ་ཡི་སྣང་བ་ངེས་པ་དང་མ་ངེས་པའི་རྣམ་པར་རོལ་པའི་སྒྱུ་འཕྲུལ་མཐའ་ཡས་པ་དང་། གསུང་གིས་ཀྱང་སྒྲ་ཚིག་རང་མཚན་ལས་འདས་པའི་ཆོས་ཀྱི་སྒྲ་དབྱངས་ཇི་སྙེད་གདུལ་བྱའི་བློ་ཡི་རིམ་པ་དང་མཚུངས་པར་སྔ་ཕྱི་རེས་འཇོག་མ་ཡིན་པར་དུས་གཅིག་ཆར་དུ་རང་རང་གི་སྒྲ་སྐད་དུ་སྣང་བ་དང་། ཐུགས་ནི་ཡེ་ཤེས་ཆེན་པོ་རྒྱ་མཚོ་དང་། ནམ་མཁའ་ལྟར་ཟབ་ཅིང་རྒྱ་ཆེ་བ་ལས་གཡོ་བ་མ་མཆིས་ཀྱང་། སྔོན་གྱི་སྨོན་ལམ་གྱི་ཆོ་འཕྲུལ་ཆེན་པོ་དང་སྣང་བའི་རྩལ་ལས་མཁྱེན་བརྩེ་ནུས་པའི་ཡེ་ཤེས་ཀྱི་འཇུག་པ་སྐད་ཅིག་རེར་ཡང་སེམས་ཅན་རྒྱ་མཚོ་སྨིན་པ་དང་། ཡོངས་སུ་གྲོལ་བར་བྱེད་པ་སྟེ་མདོར་ན་དེ་བཞིན་གཤེགས་པའཇམ་དཔལ་ཀྱི་སྐུ་ཡི་བ་སྤུའི་ཁུང་བུ་རེ་རེ་ཡང་ཞིང་བསམ་ཀྱིས་མི་ཁྱབ་པའི་རྒྱན་གྱིས་བརྒྱན་པའི་ལོངས་སྤྱོད་རྫོགས་པ་ཆེན་པོའི་བདག་ཉིད་དུ་བཞུགས་པ་སྟེ། དཀོན་མཆོག་བརྩེགས་པ་ལས། །ནམ་མཁའ་ཇི་སྙེད་ཁྱབ་གྱུར་པ། །སྐུ་ཡིས་ཀྱང་ནི་དེ་སྙེད་ཁྱབ། སྐུ་ཡིས་ཇི་སྙེད་ཁྱབ་གྱུར་པ། འོད་ཀྱིས་ཀྱང་ནི་དེ་སྙེད་ཁྱབ། འོད་ཀྱིས་ཇི་སྙེད་ཁྱབ་གྱུར་པ། །གསུང་གིས་ཀྱང་ནི་དེ་སྙེད་ཁྱབ། །གསུང་གིས་ཇི་སྙེད་ཁྱབ་གྱུར་པ། །ཐུགས་ཀྱིས་ཀྱང་ནི་དེ་སྙེད་ཁྱབ། །ཅེས་དང་། སྡོང་པོ་བཀོད་པའི་མདོ་ལས། སྤུ་ཡི་རྩེ་མོ་གཅིག་ལ་ཡང་། །ཞིང་རྣམས་བྱེ་བ་བསམ་མི་ཁྱབ། །སྣ་ཚོགས་དབྱིབས་ཀྱང་ཐ་དད་དེ། །དེ་དག་འདྲེས་པར་གྱུར་པ་མེད། །ཅེས་གསུངས་པ་ལྟར་སྐུ་གསུང་ཐུགས་ཡོན་ཏན་མི་ཟད་པ་རྒྱན་གྱི་འཁོར་ལོའི་ཡོནཏན་ཐམས་ཅད་ཡོངས་སུ་རྫོགས་ཤིང་སྒྲིབ་གསུམ་ལས་རྣམ་པར་གྲོལ་བ་དྲི་མ་མེད་པའི་སྐུ་པདྨ་ལྟར་དག་ཅིང་གཙང་བ་དེ་བཞིན་གཤེགས་པ་ཐམས་ཅད་དང་སྤྱོད་ཡུལ་རོ་གཅིག་ཏུ་མཉམ་པ་སྐུ་གསུམ་དབྱེར་མི་ཕྱེད་པའི་བདག་ཉིད་ཆེན་པོ་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ཀྱི་བླ་མར་གྱུར་པ་འཇམ་དཔལ་སྨྲ་བའི་སེང་གེ། ཕས་ཀྱི་རྒོལ་བ་ཐམས་ཀྱིས་ཀུན་ཏུ་ཚུགས་པ་མེད་ཅིང་། གསང་བ་གསུམ་གྱི་གཟི་བརྗིད་ཀྱི་འོད་ཟེར་བྱེ་བ་འབུམ་གྱི་ཕྲེང་བས་མཛེས་ཤིང་བལྟ་ན་སྡུག་པ་འཁོར་གྱི་དཀྱིལ་འཁོར་ཐམས་ཅད་ཟིལ་གྱིས་གནོན་པ། ཐབས་ལ་མཁས་པའི་ཕྲིན་ལས་ཀྱི་མཐུ་དཔག་ཏུ་མེད་པར་རྒྱལ་བ་རྣམས་ཀྱིས་འགྲན་དུ་མི་བཟོད་ཅིང་དཀྱིལ་འཁོར་རབ་འབྱམས་ཀྱི་སྤྲོ་བསྡུའི་བདག་པོ་ཁྱབ་བདག་འཇམ་དཔལ་རྡོ་རྗེ་ཉིད་རིགས་བརྒྱའི་སྒྱུ་འཕྲུལ་དྲྭ་བ་ཆེན་པོ་དཀྱིལ་འཁོར་གཅིག་ཏུ་བསྡུས་པ་གསང་ཆེནརིགས་གཅིག་ཏུ་སྒྲུབ་པའི་ཐབས་ཚུལ་ངོ་མཚར་རྨད་དུ་བྱུང་བ་སྟེ། དེ་ཡང་གནས་ཕུན་སུམ་ཚོགས་པ་བསྐལ་པ་བཟང་པོའི་སངས་རྒྱས་སྟོང་རྩ་གང་དུ་མངོན་པར་བྱང་ཆུབ་པའི་གནས་རི་རབ་ལྷུན་པོའི་ལྷོ་ཕྱོགས་ཛམ་བུའི་དཔལ་དང་ལྡན་པའི་ཞིང་གི་བྱང་ཕྱོགས་ཁ་བ་ཅན་ཞེས་པའི་ནང་གསེས་སྙིང་རྗེའི་གཏེར་ཆེན་ལྷ་མཆོག་གངསརིའི་མདངས་ལྡན་གྱིས་ཕྱག་མཚན་དུ་བཞེས་པའི་ཡུལ་དབུས་ལྷ་ལྡན་གྲུ་འཛིན་གྱི་ཉིན་བྱེད་དབང་པོ་འཆར་བའི་ཤར་ཕྱོགས་དྭངས་བསིལ་གྱི་རི་བོ་རྩེ་མོ་ལྔ་པ་ཞེས་ལྷ་དང་དྲང་སྲོང་གྲུབ་པའི་ཚོགས་ཀྱིས་བསྟེན་པ་བློ་གཏེར་རྡོ་རྗེ་རྣོན་པོའི་ཡེ་ཤེས་ཀྱི་སྐུ་ཡི་ཆ་ཤས་གཅིག་ནི་གནས་དེ་ན་རྟག་ཏུ་དགྱེས་ཤིང་རོལ་པ་གང་གི་སྐུ་ཡི་འོད་ཟེར་དམར་སེར་ལི་ཁྲིའི་རྡུལ་བརྩེགས་ཀྱི་ཕུང་པོ་དང་། །དེའི་ཐོད་ནས་སྣང་བྱེད་བདག་པོ་འཆར་ཁའི་མདངས་དང་འགྲོགས་ཏེ་ནུབ་ཕྱོགས་བདེ་ལྡན་བོད་དང་བོད་ཆེན་ལྗོངས་སུ་རྟག་ཏུ་ཁྱབ་པའི་ཐུགས་རྗེས་འཚ་ོབ་ལས་མི་རྣམས་དགེ་བཅུར་སྤྱོད་ཅིང་རང་བཞིན་བཟང་བ་ཅན་དུ་གནས་པའི་བོད་ཆེན་ས་ཡི་ཐིག་ལེ་རིགས་གསུམ་སྤྲུལ་པའི་ཞིང་ཁམས་འཕགས་པ་འཇམ་དཔལ་ཉིད་མི་ཡི་ཤ་ཚུགས་སུ་སྣང་བ་བདེ་གཤེགས་སྤོབས་པ་མཐའ་ཡས་དགྱེས་པའི་གྲུབ་རི་གཉིས་པ་འོག་མིན་ཀ༔ཐོག་རྡོ་རྗེ་གདན་ཞེས་གཙུག་ལག་གི་གཞུང་ནས་བསྟན་པའི་ས་ཡི་དཔྱད་མ་ཚང་བ་མེད་པ་སྟེ། སྒྱུ་འཕྲུལ་ལས་རིམ་ལས། །ཟུར་བརྒྱད་ལ་སོགས་རྩེ་མང་དང་། །ཆུ་བོ་བཞིན་ཏུ་མ་ཕོ་ཞིང་། །མཉམ་ཞིང་ཡིད་འོང་ཁ་ཡ་ིཆུ། །ཉི་མ་ཤིན་ཏུ་གནས་པ་ནི། །ནམ་མཁའ་ིམཚན་ཉིད་ཤེས་པར་བྱ། །མཐོ་དང་འདུད་པ་ནུབ་བྱང་ཡིན། །ཤར་ལྷོ་གཞོལ་ཞིང་འཇམ་པ་ལ། །ཐ་ོསྒྲོ་གྲོག་མོད་ཆུ་སྣ་ཚོགས། །དལ་དབང་སྒྲ་ཡི་མཚམས་བརྟག་བྱ། །ལྷུན་སྡུག་རི་བོ་ནགས་ཚལ་ལྡན། །རབ་ཏུ་འཇམ་ཞིང་སྣུམ་བག་ཅན། །ཆུ་བོ་དབང་གི་ཕྱོགས་ཡིན་ཏེ། །ཅུང་ཟད་ཀྱིས་ནི་རླུང་ཉུང་ཞིང་། །མེ་ཏོག་ཤིང་ཚལ་བྱ་སྐད་བརྟག །ལོ་རྒྱུས་ཤེས་པའང་མཆོག་ཏུ་གསུངས། །བདག་ཉིད་བརྟགས་ཤིང་ཉམས་དགའ་དང་། །བསམ་གཏན་དགྲ་ལས་རིང་གྱུར་པ། །རང་ཁྱིམ་ལ་སོགས་དེ་བཞིན་ཏེ། ནན་ཏན་ནུས་མཐུ་ལྡན་ཕྱིར་ཡིན། །ཞེས་པ་ལྟར། མཚན་ཉིད་ཐམས་ཅད་ཡོངས་སུ་ཚང་བ་ལགས། ནམ་ཞིག་སྒྲུབ་པའི་དུསཀྱ་ིཁྱད་པར་ལ། །རྒྱས་པ་ལས། །དུས་ནི་ཡར་ངོའི་བརྒྱད་ལ་བརྩམས་། །ཤིན་ཏུ་སྐར་མ་རྒྱལ་རྣམས་ལ། །བྱང་ཆུབ་སྤྱོད་པ་ཆེར་སྤྱོད་པས། །གསུང་མཆོག་དངོས་གྲུབ་ཐོབ་བྱའི་ཕྱིར། །གཟའ་སྐར་ཤེས་པའང་བླང་བར་བྱ། །ཞེས་གསུངས་པ་ལྟར་རྟ་བདུན་དབང་པོ་ཁྱུ་མཆོག་གི་ཁྱིམ་དུ་བསྐྱེད་ཅིང་རྒྱུ་སྐར་གྱི་ལྷ་མོ་ས་གས་ཉ་བའི་ཟླ་བ། བདག་ཅག་གི་སྟོན་པ་ཉིད་སྐུ་བལྟམས་པ་དང་མངོན་པར་བྱང་ཆུབ་པ་དང་། ཡོངས་སུ་མྱ་ངན་ལས་འདས་པ་སྟེ་རྒྱལ་བའི་དུས་ཆེན་གསུམ་འཛོམ་དང་ཁྱད་པར་འཇམ་དཔལ་དབྱངས་ཉིད་སྙིགས་མ་རྩོད་པ་རྒྱས་པའི་དུས་སུ་ལྟ་བ་ངན་པའི་ཚང་ཚིང་སེལ་བར་བྱེད་པ་ལ་བསམ་བཞིན་བྱོན་པ་ཀུན་མཁྱེན་མི་ཕམ་ཕྱོགས་ལས་རྣམ་པར་རྒྱལ་བའི་རྒྱ་མཚོ་ཞེས་མཚན་གྱ་ིསྙན་པ་ཕྱོགས་བཅུར་རྒྱ ས་པ་དེ་ཉིད་འཇམ་དཔལ་ཡེ་ཤེས་སེམས་དཔའི་ཐུགས་ཀློང་དུ་ཐིམ་པའི་དམར་ཕྱོགས་ཀྱི་དུས་དང་ཚེས་བཟང་པོར་རྗེས་དྲན་གྱི་མཆོད་པ་སྟེ། སྡོམ་འབྱུང་ལས། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་པ་ཡང་དག་བརྩམས་། །དེ་མཉེས་པས་ནི་ཀུན་མཁྱེན་གྱི། །ཡེ་ཤེས་མཆོག་ནི་ཐོབ་པར་འགྱུར། །ཞེས་དང་གསང་འདུས་ལས། །ཕྱོགས་བཅུའི་སངས་རྒྱས་ཐམས་ཅད་བས། །བླ་མའི་བ་སྤུ་ཁུང་གཅིག་མཆོག། །ཞེས་སོགས་བསོད་ནམས་ཚད་མེད་པའི་འཇུག་ངོགས་དམ་པར་གྱུར་པའོ། །སྟོན་པ་ཕུན་སུམ་ཚོགས་པ་ནི། །གསལ་བཀྲ་ལས། །སྤྱི་དང་འདྲེན་པ་དམ་ཚིག་དང། །ཉམས་ཆགས་སྐོང་དང་ཤེས་རྒྱུད་གྲོལ། །མན་ངག་ལུང་གི་སློབ་དཔོན་རྣམས། །ཞེས་པ་ལྟར་ཀུན་གྱིས་དམ་པར་བཀུར་ཞིང་བཀའ་དྲིན་ཐོབ་པ་སྤྱི་ཡི་བླ་མ་ཆོས་སྒོར་འདྲེན་པའི་སློབ་དཔོན་ཤེས་རྒྱུད་གྲོལ་བ། མན་ངག་སྟོན་ཅིང་ལུང་འབོག་པ། ཉམས་ཆགས་སྐོང་བའི་བླ་མ། དམ་ཚིག་དབང་གི་སློབ་དཔོན་སྟེ། དེ་ཡང་དབང་བསྐུར་བའི་སློབ་དཔོན་ནི། ཇི་སྐདདུ། །མཁས་ཤིང་བྱ་བ་བྲལ་བ་དང་། །ཆོས་ཉིད་དོན་ལ་ཚད་ཕེབས་དང་། །འདོད་པའི་དོན་ལ་རྨོངས་པ་མེད། །གསང་སྔགས་བླ་མའི་མཚན་ཉིད་དོ། །ཞེས་པ་ལྟར་གྱི་མཚན་ཉིད་དང་ལྡན་པའི་སྟོན་པ་རྡོ་རྗེ་རྒྱལ་པོ་ཉིད་དགོངས་པ་ཆོས་ཉིད་ལས་མི་གཡོ་བཞིན་དུ་ཐུགས་རྗེའི་ཕྲིན་ལས་ཚད་མེད་པས་གང་འདུལ་འགྲོ་བའི་དོན་སྒྲུབ་པ་ལ་ཐོགས་པ་མི་མངའ་ཞིང་མཁྱེན་བརྩེ་ནུས་པའི་ཡོན་ཏན་བསམ་གྱིས་མི་ཁྱབ་པའི་བདག་ཉིད་དུ་བཞུགས་པའོ། །འཁོར་ཕུན་སུམ་ཚོགས་པ་ཡང་དད་པ་དང་བརྩོན་འགྲུས་ལན་ཞིང་ཤེས་རབ་དང་དབང་པོ་གསལ་བ་མཁས་ཤིང་ཡིད་གཞུངས་པ། སྙིང་རྗེ་ཆེ་བ། ཕྱི་སོར་ཐར་གྱི་ངུར་སྨྲིག་གི་རྒྱལ་མཚན་བརྟན་པ། ནང་དུ་གཞན་ཕན་བྱང་ཆུབ་སེམས་ཀྱི་བདུད་རྩིས་གཏམས་པ། གསང་བ་ཟབ་མོའི་དབང་ཐོབ་ཅིང་བསྐྱེད་རྫོགས་ཀྱི་དོན་ལ་གནས་ཤིང་སྡོམ་པ་དང་དམ་ཚིག་ལ་བརྩོན་པ་སྒྲུབ་པའི་མན་ངག་ལ་མཁས་པ་དབང་ཐོབ་པའི་རྡོ་རྗེ་སློབ་དཔོན་ལ་གུས་པ་དང་ལྡན་ཞིང་བསྙེན་བཀུར་ལ་བརྩོན་པ་སྟེ། ཇི་སྐད་དུ། དད་དང་སྙིང་རྗེས་སེམས་རབ་དུལ། །སྔགས་ཀྱི་ལམ་མཆོག་དོན་གཉེར་པ། །ཞེས་འབྱུང་བ་ལྟར་གྱིས་མཚན་ཉིད་དང་ལྡན་པའི་འདུས་པ་རྒྱ་མཚོའི་ཚོགས་རྡོ་རྗེ་རིག་པ་འཛིན་པ་ཤ་སྟག་གིས་ཡོངས་སུ་བསྐོར་བ་ལགས། །བསྒྲུབ་པར་བྱ་བའི་ཆོས་ཀྱི་རིམ་པ་ཕུན་སུམ་ཚོགས་པ་ཡང་། །ཐེག་པ་ཐམས་ཅད་ཀྱི་རྩེ་རྒྱལ། ལུང་ཐམས་ཅད་ཀྱི་སྤྱི་འགྲེལ། བསྟན་ཐམས་ཅད་ཀྱི་ཉིང་ཁུ། །རིག་འཛིན་གྲུབ་ཐོབ་རྣམས་ཀྱི་དགོངས་པའི་ཞེ་ཕུག །ཡེ་ཤེས་ཀྱི་ཌཱ་ཀི་མ་རྣམས་ཀྱི་སྙིང་ཁྲག་འཇམ་དཔལ་རྫོགས་པ་ཆེན་པོ། །མཚན་ཡང་དག་པར་བརྗོད་པའི་རྒྱུད་ཀྱི་བསྟན་དོན། །མ་ཧཱ་ཀུ་རུ་པདྨ་འབྱུང་གནས་ཀྱི་ཐུགས་ཀྱི་ཉིང་ཁུ་ཚེ་གཅིག་ལ་འཕོ་ཆེན་རྡོ་རྗེའི་སྐུ་བརྙེས་པར་བྱེད་པའི་ཉམས་ལེན་བྱིན་རླབས་ཀྱི་དྲོད་ཚད་མ་ཉམས་ཤིང་ཌཱ་ཱཀཱའི་ཞལ་རླངས་དང་ལྡན་པ་ཉིད་རིག་འཛིན་བརྒྱུད་པའི་ཕྱག་བཞེས་ཀྱིས་བརྒྱན་ཏེ་སྤྲོས་བཅས་དང་འབྲེལ་བ་ཚོམ་བུ་ཚོགས་སུ་སྒྲུབ་པའི་ཡོ་བྱད་ཀྱང་། དགྲ་བཟློག་གི་མཚོན་ཆ། ནད་སེལ་གྱི་སྨན། འཚོ་བ་ཡོ་བྱད་མཐའ་གཉིས་སུ་མ་ལྷུང་བ། དངོས་གྲུབ་ཀྱི་རྫས་ཚང་ཞིང་ཉམས་པ་མེད་པ། དམ་ཚིག་གི་རྫས་ཚང་ཤིང་བརྟེན་དུ་ཡོད་པ་དངོས་གྲུབ་སྒྲུབ་པའི་རྟེན་སྐོངས་མཆོད་པའི་ཡོ་བྱད་སོགས་མ་ཚང་བ་མེད་པས་སྒྲུབ་པའི་ལས་རིམ་ཀྱང་དང་པོར་ས་ཡི་ཆོ་ག་དང་། ནུབ་གཉིས་པ་སྟ་གོན་གྱི་རིམ་པ་རྣམས་སྔོན་དུ་ལེགས་པར་གྲུབ་ནས་རྒྱན་བཀྲམ་ནས་སྒྲུབ་པ་པོ་གནས་སུ་བཀོད་པ་སྐབས་སུ་བབས་པ་སྟེ། དེ་ཡང་དཀྱིལ་འཁོར་གྱི་བདག་པོ་སངས་རྒྱས་ཀྱི་གདུང་འཚོབ། །སྟོན་པ་རྡོ་རྗེ་རྒྱལ་པོ་དང་། ཕྲིན་ལས་རྣམ་བཞིར་དབང་འབྱོར་དམ་ཆོས་ཆར་འབེབས་རྡོ་རྗེ་རྒྱལ་ཚབ། ཡབ་ཀྱི་དགྱེས་སྐྱེད་རྡོ་རྗེ་ཡུམ་ཆེན། ཕྲིན་ལས་གཞུང་སྲོང་རྡོ་རྗེ་ཀརྨ་བར་ཆད་འདུལ་བའི་རྡོ་རྗེ་མཚམས་པ། དྲོད་ཚད་འཛིན་པའི་རྡོ་རྗེ་སྤྱན་པ། བགེགས་བསྐྲད་པའི་རྡོ་རྗེ་གིང་ཆེན། དུས་ཚོད་འཛིན་པ་རྡོ་རྗེ་དུས་མཚམས། གཡོ་བསྐོལ་གྱི་ལས་ལ་མཁས་པའི་རྡོ་རྗེ་ཕྱག་ཚང་། དམ་ཚིག་ཆེ་ཞིང་བརྩེ་གདུང་ཆེ་བའི་རྡོ་རྗེ་བྱན་པོ། གཙང་སྦྲ་ཆེ་ཞིང་རྟག་ཏུ་བཀའ་སྒྲུབ་རྡོ་རྗེ་རྡུལ་ཕྱག་པ་རྣམས་རང་རང་གི་ལྟ་དགོངས་ཏིང་ངེ་འཛིན་དང་ལས་དེ་དང་དེ་སྒྲུབ་པ་ལ་གཞོལ་བའི་ཐུགས་ཀྱི་འདུན་པ་རྩེ་གཅིག་པས་ཚིག་འདི་རྣམས་ཀྱིས་རྗེས་ཟློས་མཛད་པར་ཞུ། ༈ མ་ཏྲཾ་བསྒྲལ་ཆོག་སྐབས་ལ། འོ། ད་ལ ལ་སྔོན་བྱུང་གི་སྟོན་པའི་རྣམ་ཐར་རྗེས་འཇུག་ཉམས་ལེན་གྱི་ཚུལ་དུ་མ་ཏྲཾ་བསྒྲལ་བའི་ཆོ་ག་བགྱི་པ་ལ། དགོངས་འདུས་ལས། ཤིན་ཏུ་གདུག་ཅིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་ཕྱག་རྒྱ་ལས། །ཁྲོ་བོར་དེ་བཞིན་གཤེགས་ཀུན་མཛད། ཅེས་པ་ལྟར་ཆོས་ཉིད་ཞི་བའི་ངང་ལས་སྙིང་རྗེ་ངང་གིས་ཁྲོས་པས་གདུལ་བྱ་གདུག་པ་ཅན་འདུལ་བ་སྟེ། །དེ་ཡང་སྔོན་བསྐལ་པ་ཀུན་དགའ་ཞེས་བྱ་བར་གསང་སྔགས་ཀྱི་ལྟ་སྤྱོད་ལས་ལོག་པར་གོལ་པའི་རུ་དྲ་ཐར་པ་ནག་པོ་འཇིག་རྟེན་དུ་བྱུང་བ་སྔོན་གྱི་སྨོན་ལམ་དྲག་པོ་དང་གསང་སྔགས་སྤྱད་ཉེས་པའི་མཐུ་བཙན་པོས་སྟོབས་དང་ལྡན་པར་གྱུར་ཏེ་གཟུགས་ཁམས་མན་ཆད་དབང་དུ་བསྡུས་པ་ན་གསང་བའི་བདག་པོ་དཔལ་ཆེན་པོར་སྤྲུལ་ཏེ་བཏུལ་ཞིང་ཁོག་པ་གཞལ་ཡས་ཁང་དུ་བྱིན་གྱིས་བརླབས། ཡན་ལག་དོན་ཁྲོལ་རྣམས་དུར་ཁྲོད་བརྒྱད་དུ་བཀོད་པར་མཛད་པ་དང་། ཡང་འཇལ་དཔལ་ཉིད་ཁྲོ་བོ་ཐམས་ཅད་ཀྱི་རྗེ་བཙུན་གཤིན་རྗེ་གཤེད་པོའི་སྐུར་བསྟན་ནས་ལྷོ་ཕྱོགས་ས་འོག་རིམ་དགུའི་ཐོད་པ་ལྕགས་ཀྱི་གྲོང་ཁྱེར་ན་གནས་པའི་གཤིན་རྗེའི་ཚོགས་འཁོར་དང་བཅས་པ་བཏུལ་བ་དང་དེ་དག་ཀྱང་བསྟན་པར་སྲུང་བར་བསྐོས་ཤིང་འཁོར་རྣམས་བྲན་དང་འབངས་དུ་བཀོལ། ཆས་རྣམས་ཧེ་རུ་ཀ་ཆེན་པོས་རྒྱལ་བྱེད་དཔའ་རྟགས་ཀྱིས་ཚུལ་དུ་བཞེས་པ་དང་མཐུན་པར་དེང་འདིར་སྒྲུབ་པ་པོ་རྣམས་ཀྱིས་ཀྱང་གསང་བར་མཆོག་གི་གཞལ་མེད་ཁང་ཆེན་པོར་གདོད་ནས་གྲུབ་པ་ལ་སླར་ཡང་བྱིན་གྱིས་རླབས་ཤིང་སྒྲུབ་པའི་གཞི་བཀོད་པ་ལ་དགོངས་པ་མི་འགྱུར་བའི་གཟེར་དང་། ཡི་དམ་ལྷ་ཡི་ང་རྒྱལ་བརྟན་པོས་མ་ཏྲཾ་བསྒྲལ་བའི་ལས་རིམ་ལ་འཇུག་པར་ཞུ། ༈ ཆས་ཀྱི་མངའ་གསོལ་སྐབས། ད་ལམ་སྒྲུབ་པ་པོ་རྣམས་ཡེ་ནས་རང་བཞིན་རྣམ་པར་དག་པ་ལྷ་ཡི་དཀྱིལ་འཁོར་སྟེ། །བདེ་མཆོག་ལས། །འགྲོ་བ་འདི་དག་རང་བཞིན་གྱིས། །གྲུབ་པའི་དཀྱིལ་འཁོར་གཉིས་མེད་པའོ། །ཞེས་དང་། གསང་སྙིང་ལས། །རྡོ་རྗེ་ཕུར་པའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ཞེས་པ་ལྟར། གདོད་ནས་རང་བཞིན་ལྷུན་གྲུབ་ཏུ་གནས་པ་དེ་ཉིད་མངོན་དུ་བྱེད་པའི་ཏིང་ངེ་འཛིན་གྱིས་མ་དག་པའི་སྣང་བ་ཐམས་ཅད་ཡེ་ཤེས་ཀྱི་འཁོར་ལོ་སྡོམ་པ་ནི་གསང་སྔགས་ཀྱི་ལམ་གྱི་སྲོག་ཏུ་གྱུར་པ་སྟེ། དེ་དང་མཐུན་པའི་ལྷ་ཡི་རྣམ་པ་དང་། །མོས་པ་ལམ་བྱེད་ཀྱི་ཚུལ་དུ་རྒྱན་དང་ཆས་གོས་ཀྱིས་མངའ་གསོལ་བ་ལ། ངོ་ཚ་དང་ཁྲེལ་ཡོད་ཀྱི་རྟགས་སུ་སྟོད་གཡོགས་སྨད་གཡོགས། ནང་གི་དེ་ཉིད་བསྒྲོད་པས་ས་ཡི་རྩེ་མོར་སོན་པའི་རྟགས་སུ་གཙུག་ཏོར་ནོར་བུའི་ཏོག་ཅན། ཚོགས་བརྒྱད་གནས་སུ་དག་པའི་བརྡར་རིན་པོ་ཆེའི་རྒྱན་བརྒྱད་དང་། ཕ་རོལ་ཕྱིན་དྲུག་རྫོགས་པའི་རྟགས་སུ་རུས་རྒྱན་དྲུག༑ ཡེ་ཤེས་ལྔ་མཚོན་པའི་རྡོ་རྗེ་རྩེ་ལྔ། ཉོན་མོངས་དུག་གསུམ་འཇོམས་པའི་ཁ་ཊཱཾ། བདེ་བ་ཆེན་པོ་མཚོན་པའི་རྟགས་ཐོད་པ་བདུད་རྩིས་བཀང་བ། མི་ཤེས་འཇོམས་པའི་རལ་གྲི་ཤེས་བྱ་རབ་འབྱམས་མཁྱེན་པའི་རྟགས་སུ་གླེགས་བམ༑ ཐབས་ཤེས་མཚོན་པའི་མདའ་གཞུ། མི་འཇིགས་པ་མཚོན་པའི་སེང་ཁྲི། འཁོར་བའི་ཉེས་པས་མ་གོས་པའི་རྟགས་གདན་པདྨ། ཁམས་དཀར་དམར་དག་པའི་རྟགས་ཉི་ཟླ། ། འོད་དང་གཟི་བརྗིད་སྲེད་མེད་ཀྱི་བུས་ཀྱང་མི་ཕིགས་པའི་གོ་ཆ་སྲ་བའི་གོས་དང་གསུང་ཡི་གེའི་འཁོར་ལོར་འགྱུར་ཞིང་ཆོས་ཐམས་ཅད་གཞོམ་མེད་རྡོ་རྗེ་ན་དའི་རང་སྒྲར་ཤར་བའི་རྟགས་ཨཀྵ་ལྔ་བཅུ་སྐྱེ་འཆི་བགྲེས་རྒུད་སྤངས་པའི་རྟགས་ཚེ་ཡི་བུམ་པ་རྣམས་ཀྱིས་མངའ་གསོལ་བས་མཚན་དང་དཔེ་བྱད་ཀྱི་དཔལ་འབར་བ། འཇམ་དཔལ་ཡེ་ཤེས་སེམས་དཔའི་ངོ་བོར་གྱུར་པའི་ཐུགས་མོས་དང་བཅས་རྗེས་ཟློས་གནང་བར་ཞུ། ༈ །མར་མེའི་སྨོན་ལམ་སྐབས། འོ་ད་ལམ་ཕུན་སུམ་ཚོགས་པ་ལྔ་ཡིས་སྒྲུབ་པའི་གཞི་བཟུང་། བསྙེན་སྒྲུབ་ཡན་ལག་བཞི་ཡིས་ཁོག་ཕུབ། མཐའ་རྒྱས་དངོས་གྲུབ་བླངས་ཤིང་རྗེས་ཀྱི་བྱ་བ་རྣམས་ལེགས་བྱས་དགེ་ཚོགས་རྣམས་བླ་ན་མེད་པའི་བྱང་ཆུབ་ཏུ་བསྔོ་ཞིང་སྟོན་པ་རྡོ་རྗེ་རྒྱལ་པོའི་ཞབས་དྲུང་དུ། བདག་གཞན་དཀྱིལ་འཁོར་འདིར་འཚོགས་པ་ཐམས་ཅད་རྡོ་རྗེའི་རིགས་གཅིག་ཏུ་བྱས་ཏེ་ཚོམ་བུ་གཅིག་ཏུ་འཚོགས་ཤིང་མི་འབྲལབའི་ཕྱིར་མར་མེའི་སྨོན་ལམ་གདབ་པ་སྐབས་སུ་བབ་པ་ཡིན། དེ་ཡང་སྒྲུབ་པ་ཟབ་མོ་འདི་ནི་འཕགས་པ་འཇམ་དཔལ་གྱི་རྒྱུད་ལེའུ་ཁྲི་དྲུག་སྟོང་པ་ལས་ཟུར་དུ་བཀོལ་བ་བསྟོད་པ་གླུ་བླངས་ཀྱི་ལེའུ་ཞེས་ཀྱང་གྲགས། དོན་དམ་པའི་མཚན་ཡང་དག་པར་བརྗོད་པ་འདི་ནི་བསྟན་པ་ཐམས་ཅད་ལ་ཁྱབ་ཅིང་རྡོ་རྗེ་འཛིན་པའི་ཡེ་ཤེས་ཀྱི་སྐུ་མངོན་སུམ་དུ་བྱེ་པ། ཁྱད་པར་དུ་གཉིས་མེད་ཨ་ཏི་ཡོ་གའི་རྒྱུད་ཀྱི་རྒྱལ་པོ་ཆེན་པོ་ལ་འཕགས་ཡུལ་དུ་སློབ་དཔོན་སྒེག་པའི་རྡོ་རྗེ་སངས་རྒྱས་ཡེ་ཤེས་ཞབས། རིགས་ལྡན་འཇམ་དཔལ་གྲགས་པ་རྣམས་ཀྱིས་རྒྱུད་འགྲེལ་སྒྲུབ་ཐབས་རྒྱ་ཆེར་བཀྲལ་བ་ལས། ཁྱད་པར་འཕགས་པ། སློབ་དཔོན་དགའ་རབ་རྡོ་རྗེ། པཎ་ཆེན་དྲི་མེད་བཤེས་གཉེན། ཨོ་རྒྱན་པདྨ་འབྱུང་གནས་རྣམས་ཀྱིས་རྫོགས་པ་ཆེན་པོ་ལྟར་བཀྲལ་ཞིང་རྒྱུད་སྒྲུབ་ཐབས་སུ་བསྡེབས་པར་མཛད་པ་སྟེ། དེ་ཡང་གདོད་མའི་དབྱིངས་སུ་རང་རིག་ཡེ་ནས་སངས་རྒྱས་པ་འཇམ་དཔལ་ཀུན་ཏུ་བཟང་པོ་ཉིད་རང་གདངས་འཇམ་དཔལ་རིགས་ལྔའི་རྣམ་པར་བཞེངས་པའི་བྱིན་རླབས་དགོངས་པའི་ཆུ་བོ་རིག་འཛིན་དགའ་རབ་རྡོ་རྗེ་ལ་སོགས་སྤྲུལ་པའི་སྐུ་མཆོག་རྣམས་ལ་བརྡའ་ཙམ་གྱིས་བརྒྱུད་པ་ལས། འདིར་ནི་སློབ་དཔོན་ཆེན་པོ་འཇམ་དཔལ་གཤེས་གཉེན་ཞེས་འཇམ་དཔལ་དབྱངས་ཀྱི་ཡེ་ཤེས་ཀྱི་སྐུས་དངོས་སུ་རྗེས་སུ་བཟུང་བའི་རིག་འཛིན་ཆེན་པོ་དེས་སློབ་དཔོན་སྒེག་པའི་རྡོ་རྗེ་དང་ཤྲཱིི་སིང་ཧ་གཉིས་ལ་བཤད་སྒྲུབ་ཀྱི་བཀའ་སྲོལ་འབྱེད་པའི་ཚུལ་དུ་གཏད་པས་ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་ཤིང་རིག་འཛིན་ཤྲཱི་སིང་ཧས། །སྤྲུལ་པའི་སྐུ་པདྨ་འབྱུང་གནས། པཎ་ཆེན་བི་མ་མི་ཏྲ། ལོ་ཆེན་བེ་རོ་ཙཱ་ན་གསུམ་ལ་གནང་བ་ལས། བི་མ་ལས་སྙིང་པོ་བཅུད་དྲིལ་གནས་བརྟན་ལྡང་མ་ལྷུན་རྒྱལ་དང་། རྒྱལ་སྲས་རྡོ་རྗེ་གླིང་པོའི་གཏེར་བྱོན་ཀྱང་ཡོད་ལ་བོད་ཡུལ་འདིར་དཀྱིལ་འཁོར་གྱི་གཙོ་བོ་འཇམ་དཔལ་དབྱངས་ཉིད་ཀྱི་ཡེ་ཤེས་སྒྱུ་འཕྲུལ་དྲཱ་བའི་སྣང་ཆ་རིག་འཛིན་རྒྱལ་པོར་ཤར་བ་དཔལ་ལྡན་སངས་རྒྱས་པདྨ་སྐྱེས་ཞེས་བྱ་བ་འཇམ་དཔལ་དབྱངས་བློ་ལྡན་མཆོག་སྲེད་ཉིད་ཀྱིས་གནུབས་ཆེན་སངས་རྒྱས་ཡེ་ཤེས་ལ་སོགས་པའི་རྗེ་འབངས་གྲུབ་པའི་ཚོགས་རྣམས་ལ་འཇམ་དཔལ་ཞི་ཁྲོའི་ཆོས་སྐོར་ཟབ་ཅིང་རྒྱ་ཆེ་བ་མང་དུ་སྤེལ་བ་མཛད་པ་ནི་ཕྱི་མའི་དུས་ན་སྤྲུལ་པའི་གཏེར་སྟོན་ཆེན་པོ་རྣམས་ཀྱིས་རིམ་བཞིན་གཏེར་ནས་གདནདྲངས་བའི་ཆོས་བཀའ་མང་དུ་མཆིས་པ་ལས་མཆོག་ཏུ་གྱུར་པ་འདི་ནི་སློབ་དཔོན་ཆེན་པོ་པདྨ་འབྱུང་གནས་ཀྱིས་ཆོས་རྒྱལ་ཁྲི་སྲོང་ལྡེའུ་བཙན་དང་མཚན་ལྡན་ཡུམ་ཤེལ་བཟའ་སྒྲོན་གཉིས་གདུལ་ཡུལ་དུ་གཟིགས་ནས་འཇམ་དཔལ་རྒྱུད་ཀྱི་རྒྱལ་པོ་འདི་ཉིད་ལ་བཤད་ཐབས་གསུམ་དུ་མཛད། །དེ་ཡང་བཀའ་ཡི་འགྲེལ་པ་ལ་བརྟེན་ནས་རྒྱ་ཆེ་བ་སྤྱི་ཏི་ལྟར་བཤད། རྒྱུད་ལ་བརྟེན་ནས་ཡང་འགྲེལ་མཛད། དེ་དག་ཀྱང་གང་ཟག་དབང་པོའི་རིམ་པ་གསུམ་གྱི་དཀྲི་ཚུལ་དུ་སྙིང་པོར་བསྡུས་ཏེ་གནང་བ་བཙད་པོས། སྤ་གྲོ་རྩལ་གྱི་བྲག་སྤྲུལ་ཉི་མ་རིས་སུ་ཟླ་བ་གཅིག་གི་ཐུགས་དམ་གྱིས་རྒྱུད་གྲོལ། ཇོ་མོས་སྟག་ཚང་དཔལ་ཕུག་ཏུ་ལོ་བདུན་ཡེ་ཤེས་ཀྱི་སྐུ་ལ་ཐིག་ལེ་སྦྱངས་པས་འཕོ་བ་ཆེན་པོའི་སྐུ་བརྙེས་ནས་པདྨ་འོད་ཀྱི་ཕོ་བྲང་དུ་གུ་རུའི་དྲུང་དུ་ཕེབས་གདམས་པའི་བླ་དཔེ་རྣམས་མ་འོངས་པའི་དོན་དུ་རྒྱུད་ཡང་སྙིང་ངོ་སྤྲོད་བཏགས་གྲོལ་སོགས་འཁོ་ཡི་གཤིན་རྗེ་གཤེད་དམར་པོའི་ཐུགས་ཀ་དང་ཡོངས་སུ་ཚང་བ་དཔལ་ཕུག་རྡོ་བ་གཡུ་ཕྲ་ཅན་གཉིས་སུ་གུ་རུ་རིན་པོ་ཆེས་གཏེར་དུ་སྦས་པས་རིམ་བཞིན་མངའ་བདག་གི་སྐྱེ་བ་བཅོ་ལྔ་པ་གུ་རུ་ཆོས་ཀྱི་དབང་ཕྱུག་དང་མཚན་ལྡན་ཤེལ་བཟའི་རྣམ་འཕྲུལ་སར་བན་སྟོན་པ་ཕྱོགས་མེད་གཉིས་ཀྱིས་གཏེར་ནས་གདན་དྲང་པའི་འཇམ་དཔལ་རྫོགས་པ་ཆེན་པོའི་ཆོས་བཀའ་དེ་ཉིད་དང་། གཞན་ཡང་ལྷ་སྲས་ཀྱི་སྐྱེ་མཐའ་གཏེར་སྟོན་ཆེན་པོ་སངས་རྒྱས་གླིང་པའི་གཏེར་ནས་གདན་དྲངས་འཇམ་དཔལ་ཟབ་རྒྱ་ཅན་གྱི་སྐོར་སོགས་བརྒྱུད་པའི་བཀའ་སྲོད་ཇི་སྙེད་ཅིག་འདུས་པ་ལགས། །དེ་ལྟར་བཀའ་གཏེར་གཉིས་ལྡན་སྒྲུབ་པ་ཟབ་མོ་འདི་ལ། གང་སྒྲུབ་པ་ཏིང་ངེ་འཛིན་གྱི་ཡན་ལག་ཆོས་ཐམས་ཅད་འཇམ་དཔལ་གྱི་དཀྱིལ་འཁོར་དུ་བསྒྲུབས་པས་ལོངས་སྤྱད་པར་བྱ་བའི་ཡུལ་དང་སྤྱོད་བྱེད་བདག་ཉིད་ལྷར་ཤར་བས་སྔགས་དང་ཕྱག་རྒྱ་ཏིང་ངེ་འཛིན་རྣམས་མ་འཁྲུལ་བ་དང་། ཇི་ལྟར་སྒྲུབ་པ་མཐུན་པའི་ཡན་ལག སྒྲུབ་གནས་མཚན་ཉིད་ཚང་ཞིང་ཉེར་མཁོའི་ཡོ་བྱད་ཚང་བ། སྒྲུབ་པའི་གྲོགས་སུ་འགྱུར་བའི། རྟེན་དང་དམ་རྫས་སོགས་མཐུན་རྐྱེན་མ་ཚང་བ་མེད་པ་དང་། གང་གིས་སྒྲུབ་པའི་བློ་གཞན་རྐྱེན་གྱིས་མི་འཕྲོགས་ཤིང་དམ་བཅའ་བརྟན་པོས་ལེ་ལོ་དང་སྒྱིད་ལུགས་སོགས་ཀྱིས་ཞུམ་པའི་སེམས་འདོར་ཞིང་ཐེ་ཚོམ་དང་ཡིད་གཉིས་མེད་པའི་ངེས་པའི་ཤེས་པ་གཏིང་ཚུགས་པར་སྐྱེ་བ་དང་། སྒྲུབ་པའི་དུས་ཀྱི་ཡན་ལག་སྒྱུ་འཕྲུལ་རྩ་རྒྱུད་ལས། །ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གི། །དབང་བསྒྱུར་རིགས་ཀྱི་དམ་པ་འགྲུབ། །ཞེས་གསུངས་པ་ལྟར། མོས་བསྒོམ་གྱི་དབང་དུ་བྱས་ནས་བདུན་ཕྲག་གཅིག་ཏུ་རིག་འཛིན་བརྒྱུད་པའི་ཕྱག་བཞེས་ལས་འབྱུང་བ་ལྟར་སྦྱོར་དངོས་རྗེས་གསུམ་ཚང་བར་བསྒྲུབས་པས་གྲུབ་པའི་འབྲས་བུ་ནི། །གསང་སྙིང་ལས། དེ་ཚེ་བཅུ་དྲུག་ཚུན་ཆད་ཀྱིས། །སྐུ་ལྔ་ལྷུན་གྱིས་རྫོགས་པ་ནི། ། ཡེ་ཤེས་ཐིག་ལེ་ཉིད་སྣང་བ། །བསམ་གྱིས་མི་ཁྱབ་མཐའ་ཡས་མཆོག །ཕྱོགས་བཅུའི་དུས་བཞི་མངོན་རྫོགས་པའི། །ཞིང་ཁམས་རྣམ་དག་བསམ་ཡས་དང་། །རྒྱ་དང་བྲལ་བའི་གཞལ་ཡས་ཁང་། །འཁོར་ལོ་རྒྱན་དང་རོལ་མོའི་ཚོགས༑ །དཀྱིལ་འཁོར་མ་ལུས་བསམ་ཡས་ཀུན། །མཐོང་ནས་ཉེ་བར་མཉེས་པ་དང་། །རྒྱ་ཆེན་གསུང་ལ་དོན་ཕྱུང་པའང་། ། མཐུན་པའི་ཡེ་ཤེས་རང་སྣང་བའོ། །ཞེས་དང་། ལེ་ལོ་སྒྱིད་སྙོམས་མེད་པ་ཡིས། །ཐེ་ཚོམ་མེད་པར་བསྒྲུབས་བྱས་ན། །དཀྱིལ་འཁོར་ཐམས་ཅད་འགྲུབ་པར་འགྱུར། །རྡོ་རྗེ་གསང་མཆོག་དམ་པ་འཐོབ། །ཞེས་གསུངས་པ་ལྟར་ཕ་རོལ་ཕྱིན་དྲུག་རྫོགས། །ས་དང་ལམ་གྱི་རིམ་པ་རྣམས་བསྒྲོད་ནས་མཐར་འབྲས་ཡེ་ཤེས་བླ་མའི་ས་ཐོབ་པ་དང་། གནས་སྐབས་སུའང་ཚོགས་སྒྲུབ་བྱས་པའི་ཕན་ཡོན་ཀྱང་། ས་ལ་འཛུལ་ཞིང་རི་བྲག་ལ་ཐོགས་མེད་དུ་འགྲོ་བ་དང་། །ལྷ་ཀླུ་ལྷ་མ་ཡིན་སོགས་དབང་དུ་འདུས། ། ནམ་མཁའ་ལ་བྱ་བཞིན་བགྲོད། །ངག་གི་དབྱངས་སྙན་པ་དང་། །ཚིག་བཙན་ཞིང་ནུས་པ་དང་ལྡན་པར་འགྱུར་བ་དང་། །རྒས་སྲ་ཞིང་སྟོབས་དང་ལྡན་པ། འགྲོ་བ་ཐམས་ཅད་ཀྱི་ཡིད་དུ་འོང་བ། རང་ལུས་འདོད་རྒུར་བསྒྱུར་བ། །རང་གཞན་གྱི་གནོད་པ་ཞི་ཞིང་ཕྲིན་ལས་རབ་འབྱམས་ལ་རང་དབང་འབྱོར་པ་སོགས་ཕན་ཡོན་ཆེན་པོ་དང་ལྡན་ཞིང་། སྤྱིར་སངས་རྒྱས་གང་གའི་ཀླུང་གི་མཚན་བསྐལ་པ་མང་པོར་བརྗོད་པ་ལས་རྗེ་བཙུན་འཇམ་པའི་དབྱངས་ཀྱི་མཚན་ཙམ་བརྗོད་པ་ཕན་ཡོན་ཆེ་ཞིང་། སངས་རྒྱས་ཐམས་ཅད་ཀྱི་སྐུ་རྡོ་རྗེའི་ངོ་བོ། །གསུང་སྨྲ་བའི་དབང་ཕྱུག ཐུགས་ཡེ་ཤེས་སེམས་དཔའ་སྟེ། མདོར་ན་དེ་བཞིན་གཤེགས་པ་ཐམས་ཅན་ཀྱི་ཡེ་ཤེས་ཀྱི་སྐུ་གཅིག་ཏུ་གྱུར་པ་ཉིད། སྔོན་འདས་པའི་དུས་བདེ་གཤེགས་ཀླུ་ཡི་རིག་མོག །ད་ལྟ་བྱང་ཕྱོགས་ཀྱི་འཇིག་རྟེན་གྱི་ཁམས་ན་མོས་པ་རབ་དགའི་རྒྱལ་པོ། །མ་འོང་པ་ན་རྡུལ་བྲལ་ཡང་དག་བསགས་ཀྱི་ཞིང་ཁམས་སུ་མགོན་པོ་ཀུན་ཏུ་གཟིགས་སོགས་སངས་རྒྱས་དང་། བྱང་ཆུབ་སེམས་དཔའ་སོགས་མཚན་དང་སྐུ་ཡི་རྣམ་འགྱུར་མཐའ་ཡས་པ་ཉིད། བླ་མེད་རྡོ་རྗེ་ཐེག་པའི་ཉེ་ལམ་གྱིས་སྒྲུབ་པས་སངས་རྒྱས་བྱང་སེམས་ཇི་སྙེད་ཅིག་སྐད་ཅིག་ཅིག་གིས་སྒྲུབ་པར་འགྱུར་བ་དང་། སྤོབས་པའི་གཏེར་ཆེན་པོ་བརྒྱད་གྲོལ་ཞིང་། །ཤེས་བྱ་ཐམས་ཅད་ལ་ཆགས་ཐོགས་མེད་པའི་ཤེས་རབ། མི་བརྗེད་པའི་གཟུངས། མངོན་པར་ཤེས་པ་དྲུག །རྒྱུན་གྱི་ཏིང་ངེ་འཛིན། རྡོ་རྗེ་ལྟ་བུའི་ཚེ། གཡུང་དྲུང་ལྟ་བུའི་ལུས། འགྱུར་བ་མེད་པའི་སྐུ་མཆོག་མྱུར་དུ་ཐོབ་པའི་ས་བོན་ཐེབས་པ་ལ་དགའ་སྤྲོ་རྒྱ་ཆེན་པོ་བསྐྱེད་ནས། །སྣང་གསལ་གྱི་མར་མེ་དྲི་མ་མེད་པ་འོད་གསལ་བའི་བརྡའ་འདིས། དོན་རང་བྱུང་གི་ཡེ་ཤེས་མཚོན་པར་བྱེད་ཅིང་། དེ་ཡང་རྟེན་ལུས་ཀྱི་ཀོང་བུར་རྩ་རླུང་ཐིག་ལེའི་ཞུན་མར་ལ་ལམ་བསྐྱེད་རྫོགས་ཀྱི་སྡོང་བུ་གཙུགས་པས། དབྱིབས་སྔགས་ཆོས་གསུམ། ཡེཤེས་ཕྱག་རྒྱའི་སྒྲོན་མེ་སྦར་བ་དང་། རྟེན་ཨ་བ་དྷུ་ཏིའི་ཀོང་བུར། ཁམས་དཀར་དམར་རླུང་དང་བཅས་པའི་ཞུན་མར་ལ༑ གཏུམ་མོ་ཨ་ཐུང་གི་སྡོང་་བུ་བཙུགས་པས་ལྷན་སྐྱེས་ཡེ་ཤེས་ཀྱི་སྒྲོན་མེ་སྦར་བ་དང་། རྟེན་ཀུན་གཞི་ཀློང་ཆེན་ཡངས་པའི་ཀོང་བུར། །བྱང་ཆུབ་སེམས་ཀྱི་ཞུན་མར་ལ་རིག་པ་ཡེ་ཤེས་ཀྱི་སྡོང་བུ་བཙུགས་པས་སྣང་བ་བཞིའི་སྒྲོན་མེ་སྦར་བས་སྲིད་གསུམ་གྱི་མ་རིག་པ་ཐམས་ཅད་འཇོམས་ནས་ཡེ་ཤེས་འོད་གསལ་གྱི་སྣང་བ་འབྱམས་ཀླས་པ་མཐའ་དང་མུ་མེད་པར་ཤར་བ་དང་། གལ་ཏེ་ཚེ་འདིར་མ་གྲོལ་ན་བར་དོ་ཆོས་ཉིད་ཀྱི་སྒྲོན་མའི་འོད་ལ་ངོ་ཤེས་རྩལ་རྫོགས་བརྟན་པ་ཐོབ་ནས་གྲོལ་བ་དང་། སྲིད་པ་བར་དོར་འཕྱན་ན་ཡང་དཔལ་མགོན་རྩ་བའི་བླ་མའི་ཐུགས་རྗེའི་སྒྲོན་མེ་འོད་ཀྱི་སྣང་བས་གོ་ཕྱེས་ནས་ཐར་བའི་བཤུལ་ལམ་སྙེགས་ཏེ་རང་བཞིན་སྤྲུལ་པའི་ཞིང་དུ་འཚང་རྒྱ་བར་འགྱུར་བའི་དགོས་ཆེད་སོགས་ཕན་ཡོན་མཐའ་ཀླས་པ་དང་། འཇམ་དཔལ་གྱི་རྒྱུད་ལས། ཤེས་རབ་ཡེ་ཤེས་མེ་བོ་ཆེ། །འོད་ཆེན་རྣམ་པར་སྣང་བར་བྱེད། །ཡེ་ཤེས་སྣང་བ་ལམ་མེ་བ། །འགྲོ་བའི་མར་མེ་ཡེ་ཤེས་སྒྲོན། །ཅེས་པ་ལྟར་གཞི་ལམ་འབྲས་གསུམ་ཐམས་ཅད་སྣང་གསལ་མར་མེ་འདི་ཡིས་མཚོན་པར་བྱེད་ཅིང་མར་མེ་གཅིག་ལ་བལྟས་བའི་རྡོ་རྗེ་མཆེད་ལྕམ་རྣམས་ས་མཆོག་འོད་གསལ་རྡོ་རྗེ་རྩེ་མོར་མངོན་བྱང་ཆུབ་ཀྱི་བར་དུ་མི་འབྲལ་བར་འགྲོགས་ཤིང་སྟོན་འཁོར་དགོངས་པ་དབྱེར་མེད་པའི་ཐུགས་འདུན་དང་བཅས་ཏེ་མར་མེའི་སྨོན་ལམ་གྱི་རྗེས་ཟློས་གསུང་བར་ཞུ། ཅེས་པའི་སྟོང་ཐུན་འདི་ཡང་ཀཿཐོག་རྒྱུད་སྡེ་ལྷ་ཁང་དུ་སྒྲུབ་མཆོད་ལ་ཉེ་མཁོ་བས་མཁན་པོ་བསོད་ནམས་ནས་གསུང་བསྐུལ་བཞིན་ཆོས་ཀྱི་བློ་གྲོས་པས་བྲིས་པའོ།། །།