ཁ་ཐུན་རྡོ་རྗེའི་ལས་བྱང་ཡིད་བཞིན་ནོར་བུ།

ཁ་ཐུན་རྡོ་རྗེའི་ལས་བྱང་ཡིད་བཞིན་ནོར་བུ་བཞུགས་སོ། །བཅོམ་ལྡན་འདས་ཁྲོ་བོའི་རྒྱལ་པོ་གཤིན་རྗེའི་གཤེད་ལ་ཕྱག་འཚལ་ལོ། །ཁ་ཐུན་རྡོ་རྗེའི་ལས་བྱང་ལ། །སྔོན་འགྲོ་དངོས་གཞི་རྗེས་གསུམ་ལས། །སྔོན་འགྲོ་སྐྱབས་འགྲོ་སེམས་བསྐྱེད་ལ། །ཐོག་མར་སྐྱབས་འགྲོ་བྱ་བ་ནི། །ན་མོ། བརྒྱུད་པའི་རྩ་བ་བླ་མ་རྗེ། །དངོས་གྲུབ་འབྱུང་བའི་ཡི་དམ་ལྷ། །ལེགས་བྱིན་རློབ་པའི་མཁའ་འགྲོ་མ། །རྩ་བ་གསུམ་ལ་སྐྱབས་སུ་མཆི། །སེམས་བསྐྱེད་ནི། ཁམས་གསུམ་འཁོར་བའི་སེམས་ཅན་རྣམས། །སྡུག་བསྔལ་འདམ་ལས་དྲང་བའི་བློས། །བསྐྱེད་དང་རྫོགས་པའི་རིམ་པ་ལ། །བདག་གིས་ཇི་སྲིད་གནས་པར་བགྱི། །དེ་ནས་གཞི་བདག་ལ་གཏོར་མ་བྱིན་ལ། བདེན་པ་བདར། དེ་ནས་བགེགས་ལ་བཀའ་བསྒོ་བ་ནི། རང་ཐ་མལ་པའི་སྙིང་གར་རྃ་ལས་ཉི་མའི་དཀྱིལ་འཁོར། དེའི་སྟེང་དུ་ཧཱུྃ་མཐིང་ནག །དེ་ལ་དམིགས་ནས་ངག་ཏུ། ༀ་མཉྫུ་ཤྲཱི་ཨ་ཀྲོ་ཏེ་ཀ་ཡ་མཱནྟ་ཀ་ཧཱུྃ་ཕཊ། ཅེས་པས་བདག་ཉིད་ལས་ཀྱི་ཧེ་རུ་ཀ་ཞལ་གཅིག་ཕྱག་གཉིས་པ། གཡས་བེ་ཅོན། གཡོན་སྡིགས་མཛུབ་དང་རྒྱུ་ཞགས་ཅན། དུར་ཁྲོད་ཀྱི་ཆས་བརྒྱད་ཀྱིས་བརྒྱན་པ། བ་སྤུའི་བུ་ག་ཐམས་ཅད་ཀྱང་ཡེ་ཤེས་ཀྱི་ཁྲོ་ཆུང་ཚོན་གང་བས་གཏམས་པར་བསྒོམས་ལ། བགེགས་ལ་བཀའ་བསྒོ་བ་ནི། ཧཱུྃ། གསང་སྔགས་དོན་ལ་མི་མོས་ཤིང་། །ཐེག་པ་མཆོག་ལ་མི་དད་པ། །འདི་ན་འདུག་པའི་གནས་མེད་ཀྱི། །སོ་སོ་རང་རང་གནས་སུ་དེངས། །ཧཱུྃ། ཉི་མའི་དཀྱིལ་འཁོར་ལ་གནས་པའི། །ཁྲོ་བོའི་མིང་ནི་གཤིན་རྗེའི་གཤེད། །དེ་མཐོང་ནས་ནི་ཁྲོ་བོ་གཞན། །ཐམས་ཅད་ཀུན་གྱི་ལག་ཆ་འཆོར། །ང་ནི་ཁྲོ་བོའི་རྒྱལ་པོའི་རྒྱལ་པོ་སྟེ། །ཐུགས་ལས་བྱུང་བའི་ཁྲོ་བོ་ཡིས། །ཕྱོགས་བཅུའི་འཇིག་རྟེན་ཁམས་བཀང་ནས། །བགེགས་རྣམས་མ་ལུས་ཚར་བཅད་དོ། །ༀ་ཤྲཱི་པ་ར་ཡཀྵ་གུ་ཧྱ་བཛྲ་ཊ་ཀི་ནི་ཀཱ་ལ་རཱུ་པ་ནྲྀ་མཱ་ར་ན་ཧཱུྃ་ཧཱུྃ་ཕཊ། སྐབས་འདིར་སྤྲོས་པ་ལ་དགའ་ན། ཧཱུྃ། ཉི་མའི་དཀྱིལ་འཁོར་ལ་གནས་པའི། །ཡ་མཱནྟ་ཀའི་དཀྱིལ་འཁོར་འདིར། །འོག་ནས་ཁྲག་གི་རྒྱ་མཚོ་འཁྲུགས། །སྟེང་ནས་རྡོ་རྗེའི་ཐོག་ཆེན་འབེབས། །ཕྱོགས་ནས་བསྐལ་པའི་མེ་དཔུང་འབར། །མཚམས་ནས་རྡོ་རྗེའི་ཚྭ་ཚྭ་འཕྲོ། །ཡ་མཱནྟ་ཀའི་དཀྱིལ་འཁོར་འདིར། །འདི་ན་འདུག་པའི་གནས་མེད་ཀྱི། །འདི་རུ་མ་འདུག་གཞན་དུ་དེངས། །ༀ་ཨ་ཀྲོ་ཏེ་ཀ་ཀཱ་ལ་རཱུ་པ་རུ་ལུ་ཧཱུྃ་ཛཿ ཆྒཻ་མོ་མཱ་ར་ཡ་ནན། ༀ་ཧྲཱིཿཥྚི་བི་ཀྲི་ཏཱ་ན་ན་མཱ་ར་ཡ་ཙཀྲ་ཨ་པ་ན་ཡ་ཧཱུྃ་ཧཱུྃ་ཕཊ་ཕཊ། ཅེས་པས་བདག་གི་བ་སྤུའི་བུ་གའི་ཁྲོ་བོ་དང་། ཤངས་ཀྱི་རླུང་སྒྲོམ་ནས་ཁྲོ་བོའི་སྤྲུལ་པ་སྔ་མ་ལྟ་བུ་གྲངས་མེད་པ་ཕྱོགས་བཅུར་འཕྲོས་པས། དེ་དག་ན་གནས་པའི་བགེགས་ཕྱོགས་བཅུར་བསྐྲད་ཅིང་རྡུལ་དུ་བརླག་པར་བསྒོམ་མོ། །དེ་ནས་གསུམ་པ་རྒྱས་གདབ་པའི་མཚམས་ནི། འོག་མིན་ཆོས་རྒྱལ་ལྷ་ཡི་ཕོ་བྲང་དུ། །ཏིང་འཛིན་མཆོག་ལ་དེང་འདིར་བདག་འཇུག་གིས། །བླ་མེད་མཆོག་གི་གོ་འཕང་མ་ཐོབ་པར། །ལྷ་སྲིན་སྡེ་བརྒྱད་འབྱུང་པོའི་དཔོན་སྣ་རྣམས། །མཚམས་འདི་ཚུན་ཆད་སུ་ཡང་མ་འདའ་ཞིག །བི་ཤྭ་ཀྲོ་ཏ་ཛྭ་ལ་མཎྜ་ལ་ཧཱུྃ། ཞེས་པས་ཕྱི་སྣོད་ཀྱི་འཇིག་རྟེན་གཤིན་རྗེའི་གཞལ་ཡས་ཁང་ནང་བཅུད་ཀྱི་སེམས་ཅན་གཤིན་རྗེའི་གཤེད་ཡབ་ཡུམ་དུ་བསྒོམ་མོ། །བཞི་པ་དེ་ནས་བེ་ཅོན་གྱི་མཚམས་ནི། ངག་ཏུ། ༀ་སུམྦྷ་ནི་སུམྦྷ་ཧཱུྃ། གྲྀཧྞ་གྲྀ་ཧྞ་ཧཱུྃ། གྲྀ་ཧྞ་པ་ཡ་གྲྀ་ཧྞ་པ་ཡ་ཧཱུྃ། ཨཱ་ན་ཡ་ཧོཿ བྷ་ག་ཝཱན་བིདྱཱ་རཱ་ཛ་ཡ་ཧཱུྃ་ཕཊ། ཅེས་པས་རང་གི་བ་སྤུའི་བུ་ག་ནས་ཁྲོ་བོ་སྔ་མ་ལྟ་བུ་གྲངས་མེད་པ་ཕྱོགས་བཅུར་སྤྲོས་པས། ཐུན་མོང་དུ་བདེ་བར་གཤེགས་པ་ཐམས་ཅད་ཀྱི་ཐུགས་དམ་གྱི་རྒྱུད་བསྐུལ། སེམས་ཅན་གྱི་རྒྱུད་སྦྱངས། ཁྱད་པར་དུ་གདུག་པ་ཅན་ཚར་བཅད་ནས། སཾ་ཧ་ར་ཎ་ཧཱུྃ། ཞེས་པས་ཁྲོ་བོ་དེ་དག་བདག་གི་བ་སྤུའི་ཁྲོ་བོ་ལ་ཐིམ། མཚོན་ཆ་བེ་ཅོན་རྣམས་བདག་གི་མདུན་ན་འོད་ལྷག་གེར་འདུག་པར་བསྒོམ་ལ། ཧཱུྃ། ང་ཡི་དཀྱིལ་འཁོར་བརྟན་བྱའི་ཕྱིར། །ཁྲོ་རྒྱལ་བྱིན་རླབས་ལས་བྱུང་བའི། །མཚོན་ཆའི་རྒྱལ་པོ་བེ་ཅོན་འབར། །དཀྱིལ་འཁོར་རིམ་པ་ཚུལ་བཞིན་བསྲུང། །སྟེང་ཡང་བེ་ཅོན་བླ་བྲེ་ལ། །འོག་ཀྱང་བེ་ཅོན་ས་གཞིའི་འོག །ཕྱོགས་མཚམས་བེ་ཅོན་འབར་བས་གཏམས། །བེ་ཅོན་མཚམས་ལས་བགེགས་མ་འདའ། །ན་མཿསརྦ་ཏ་ཐཱ་ག་ཏ་ཀྲོ་དྷ་བི་ཛ་ཡ་ཧཱུྃ་ཕཊ། ཅེས་བརྗོད་པས་བེ་ཅོན་རྣམས་ཕྱོགས་བཅུར་འཕྲོས་ཤིང་འཁྲིགས་པས་བེ་ཅོན་གྱི་གུར་དང་བླ་བྲེ་དང་ས་གཞིར་གྱུར་ཏེ་བགེགས་དང་ལོག་འདྲེན་ལྟ་ཅི་སྨོས་ཏེ་སྲིད་པའི་རླུང་གིས་ཀྱང་མི་ཐར་བར་བསྒོམ་མོ། །དེ་ནས་རྒྱས་པར་བྱེད་ན་སྐབས་འདིར་མཚོན་ཆ་རོལ་བའི་མཚམས་ནི། ཧཱུྃ། ང་ཡི་དཀྱིལ་འཁོར་བརྟན་བྱའི་ཕྱིར། །ཁྲོ་རྒྱལ་བྱིན་རླབས་ལས་བྱུང་བའི། །མཚོན་ཆའི་རྒྱལ་པོ་རྡོ་རྗེ་འབར། །དཀྱིལ་འཁོར་རིམ་པ་ཚུལ་བཞིན་བསྲུང་། །སྟེང་ཡང་རྡོ་རྗེའི་བླ་བྲེ་ལ། །འོག་ཀྱང་རྡོ་རྗེའི་ས་གཞིའི་འོག །ཕྱོགས་མཚམས་རྡོ་རྗེ་འབར་བས་གཏམས། །རྡོ་རྗེའི་མཚམས་ལས་བགེགས་མ་འདའ། །ཧཱུྃ་བཛྲ་ཛྭ་ལ་ཨ་ན་ལརྐ་ཧཱུྃ། ཧཱུྃ། ང་ཡི་དཀྱིལ་འཁོར་བརྟན་བྱའི་ཕྱིར། །ཁྲོ་རྒྱལ་བྱིན་རླབས་ལས་བྱུང་བའི། །མཚོན་ཆའི་རྒྱལ་པོ་འཁོར་ལོ་འབར། །དཀྱིལ་འཁོར་རིམ་པ་ཚུལ་བཞིིན་བསྲུང་། །སྟེང་ཡང་འཁོར་ལོའི་བླ་བྲེ་ལ། །འོག་ཀྱང་འཁོར་ལོའི་ས་གཞིའི་འོག །ཕྱོགས་མཚམས་འཁོར་ལོ་འབར་བས་གཏམས། འཁོར་ལོའི་མཚམས་ལས་བགེགས་མ་འདའ། །ༀ་ཙཀྲ་ཛྭ་ལ་ཨ་ན་ལརྐ་ཧཱུྃ། ཧཱུྃ། ང་ཡི་དཀྱིལ་འཁོར་བརྟན་བྱའི་ཕྱིར། །ཁྲོ་རྒྱལ་བྱིན་རླབས་ལས་བྱུང་བའི། །མཚོན་ཆའི་རྒྱལ་པོ་དབྱུག་ཏོ་འབར། །དཀྱིལ་འཁོར་རིམ་པ་ཚུལ་བཞིན་བསྲུང་། །སྟེང་ཡང་དབྱུག་ཏོའི་བླ་བྲེ་ལ། །འོག་ཀྱང་དབྱུག་ཏོའི་ས་གཞིའི་འོག །ཕྱོགས་མཚམས་དབྱུག་ཏོ་འབར་བས་གཏམས། །དབྱུག་ཏོའི་མཚམས་ལས་བགེགས་མ་འདའ། །ཏྲཱྃ་རཏྣ་ཛྭ་ལ་ཨ་ན་ལརྐ་ཧཱུྃ། ཧཱུྃ། ང་ཡི་དཀྱིལ་འཁོར་བརྟན་བྱའི་ཕྱིར། །ཁྲོ་རྒྱལ་བྱིན་རླབས་ལས་བྱུང་བའི། །མཚོན་ཆའི་རྒྱལ་པོ་དགྲ་སྟྭ་འབར། །དཀྱིལ་འཁོར་རིམ་པ་ཚུལ་བཞིན་བསྲུང་། །སྟེང་ཡང་དགྲ་སྟྭའི་བླ་བྲེ་ལ། །འོག་ཀྱང་དགྲ་སྟྭའི་ས་གཞིའི་འོག །ཕྱོགས་མཚམས་དགྲ་སྟྭ་འབར་བས་གཏམས། །དགྲ་སྟྭའི་མཚམས་ལས་བགེགས་མ་འདའ། །ཧྲཱིཿཔདྨ་ཛྭ་ལ་ཨ་ན་ལརྐ་ཧཱུྃ། ཧཱུྃ། ང་ཡི་དཀྱིལ་འཁོར་བརྟན་བྱའི་ཕྱིར། །ཁྲོ་རྒྱལ་བྱིན་རླབས་ལས་བྱུང་བའི། །མཚོན་ཆའི་རྒྱལ་པོ་རལ་གྲི་འབར། །དཀྱིལ་འཁོར་རིམ་པ་ཚུལ་བཞིན་བསྲུང་། །སྟེང་ཡང་རལ་གྲིའི་བླ་བྲེ་ལ། །འོག་ཀྱང་རལ་གྲིའི་ས་གཞིའི་འོག །ཕྱོགས་མཚམས་རལ་གྲིའི་འབར་བས་གཏམས། །རལ་གྲིའི་མཚམས་ལས་བགེགས་མ་འདའ། །ཧཱ་ཀརྨ་ཛྭ་ལ་ཨ་ན་ལརྐ་ཧཱུྃ། ཞེས་པས་མཚོན་ཆའི་མཚམས་གསལ་གདབ་ཅིང་བསྒོམ་མོ། །དེ་ནས་མེའི་མཚམས་ནི། མདུན་དུ་མ་ལས་ཉི་མའི་དཀྱིལ་འཁོར་གྱི་སྟེང་དུ་རྃ་གཅིག་བསམ། ངག་ཏུ། ཕཊ་རྃ། ཡྃ་རྃ། ཧེ་རྃ། ཏྲག་རྃ། ཁྃ་རྃ། ཛྭ་ལ་རྃ། རྃ་རྃ། ཞེས་པས། མདུན་གྱི་རྃ་ལས་མེ་དཔུང་འབར་བས་འོག་མེའི་ས་གཞི། ལོགས་མེའི་ར་བ་དང་དྲྭ་བ། སྟེང་མེའི་གུར་དང་བླ་བྲེ། བསྐལ་པའི་མེ་རི་ཆེན་པོ་ཙག་ཙག་ཆོམ་ཆོམ། འུར་འུར་གྱི་སྒྲ་དང་བཅས་པ་བསྒོམ་མོ། །ཚིག་བསྡུས་པ་ལྟར་ན། ཧཱུྃ། ཕྱོགས་མཚམས་ཀུན་ཏུ་རྡོ་རྗེའི་མེ། །རྣམ་པར་འཕྲོ་བ་རྣམས་བསམ་སྟེ། །མ་རུང་པ་དག་ཚིག་བསམ་ནས། །བགེགས་རྣམས་མ་ལུས་བརླག་པར་འགྱུར། །བཛྲ་ཛྭ་ལ་རྃ་ཞེས་བརྗོད་པས་ཕྱི་རོལ་རྡོ་རྗེའི་མེ་ཡི་འོད་ཀྱིས་འཁྲིགས་པར་བསྒོམ་མོ། །རྒྱས་པ་ལྟར་ན། ཧཱུྃ། རྡོ་རྗེ་རི་རབ་ལྷུན་པོ་འབར་བའི་རྩིབས་བརྒྱད་ན། །འབར་བའི་ལྷ་བརྒྱད་བསྣོལ་བའི་གདན་སྟེང་ན། །ཤིན་ཏུ་མི་བཟད་གཏུམ་ཆེན་ཧ་ལའི་སྐུ། །གཤིན་རྗེ་མ་ཏྲྃ་རོ་ཡི་དབྱུག་པ་ཕྱར། །གང་ལ་ཅིས་འདུལ་ཙིཏྟ་ཕྲེང་བས་བརྒྱན། །ཕྲ་མེན་དགུ་ཁྲི་མ་ཡི་འཁོར་གྱིས་བསྐོར། །བསྐལ་པའི་མེ་རི་སྨུག་ནག་འབར་བས་རབ་ཏུ་གཏམས། །མེ་ཡི་འཁོར་ལོར་རབ་ཏུ་འབར་བ་ལ། །རྡོ་རྗེ་རྒྱ་གྲམ་འབར་བའི་མེ་གཏོར་བས། །སྟེང་གི་མེ་ལྕེ་འབར་བ་འོག་ཏུ་འཕྲོས། །འོག་གི་མེ་ལྕེ་འབར་བ་སྟེང་དུ་འཕྲོས། །མེ་རི་དགོན་པ་དག་གི་ཕྱོགས་མཚམས་ནས། །དུར་ཁྲོད་མཚན་མའི་མེ་ནི་སྨུག་ཅིང་ནག །ཞེ་སྡང་འཇོམས་པའི་མེ་ནི་མཐིང་ནག་འབར། །གཏི་མུག་འཇོམས་པའི་མེ་ནི་སྨུག་ནག་འབར། །ང་རྒྱལ་འཇོམས་པའི་མེ་ནི་སེར་ནག་འབར། །འདོད་ཆགས་འཇོམས་པའི་མེ་ནི་དམར་ནག་འབར། །ཕྲག་དོག་འཇོམས་པའི་མེ་ནི་ལྗང་ནག་འབར། །དབང་དྲག་བདུག་རྩུབ་མེ་ནི་ཁམས་ནག་འབར། །དུར་ཁྲོད་མེ་ཡི་མཚམས་ལས་གང་འདའ་བ། །རྡུལ་ཆ་ཕྲ་མོ་བཞིན་དུ་བརླག་པར་མཛོད། །ཕཊ་རྃ་ལ་སོགས་པ་བརྗོད་པས་མེས་འཁྲིགས་པར་བསྒོམ་སྟེ་མཚམས་བཅད་པའོ། །དེ་ནས་ཡེ་ཤེས་ཀྱི་དཀྱིལ་འཁོར་དུ་འཇུག་པ་ལ་དབང་བའི་ཕྱིར། རྒྱུ་བསོད་ནམས་ཀྱི་ཚོགས་བསགས་ཤིང་སྨན་པའི་དབང་བླང་བ་ནི། བཛྲ་ས་མ་ཡ་ཛཿ ཞེས་ལན་གསུམ་བརྗོད་པས། བཅོམ་ལྡན་འདས་འཇམ་དཔལ་ཞི་ཁྲོའི་ལྷ་ཚོགས་འཁོར་དང་བཅས་པ་ཆོས་སྐུ་མཚན་མ་མེད་པ་ལས་འགྲོ་བའི་དོན་དུ་གཟུགས་ཀྱི་སྐུར་བཞེངས་ཏེ། རང་ཉིད་ཀྱི་མདུན་གྱི་ནམ་མཁའ་ལ་པདྨའི་ཉི་ཟླའི་གདན་ལ་བཞུགས་པར་བསམ་ལ། བརྡ་སྒོ་དབྱེ་བ་ནི། ཧཱུྃ། ཁམས་གསུམ་འཁོར་བ་རབ་སྟོང་ནས། །ཐམས་ཅད་དུར་ཁྲོད་བདག་ཉིད་དེ། །སྟོང་གསུམ་སྟོང་གི་འཇིག་རྟེན་ན། །ཕྱོགས་བཅུ་སྟོང་གི་འཇིག་རྟེན་ན། །ཡེ་ཤེས་ལྔ་ཡི་རང་བཞིན་ལས། །ཕྱོགས་བཅུ་སྟོང་གི་སྒོ་ཕྱེས་ཤིག །བཛྲ་ཛྙཱ་ན་པྲ་བེ་ཤ་ཡ་ཕཊ། བརྡ་ཕྱག་འཚལ་བ་ནི་འདི་སྐད་དོ། །ཧོཿ ཐམས་ཅད་ངོ་བོ་མཉམ་ཉིད་སྐུ། །བདེ་ཆེན་གར་དབང་སྐུ་གསུང་ཐུགས། །མི་ཟད་རྒྱན་གྱི་འཁོར་ལོ་དང་། །གཤིན་རྗེ་གཤེད་པོའི་ལྷ་ཚོགས་ལ། །བརྡ་དང་གར་གྱིས་མཚོན་ནས་ཀྱང་། །སྒོ་གསུམ་གུས་པས་ཕྱག་འཚལ་ལོ། །གུ་ཧྱ་མཎྜ་ལ་ཨ་ཏི་པཱུ་ཧོཿ པྲ་ཏཱིཙྪ་ཧོཿ བདུན་རྣམ་དག་ནི། ཧཱུྃ། སློབ་དཔོན་གྱིས། འཇམ་དཔལ་རྡོ་རྗེ་ནམ་མཁའ་དྲི་མེད་དུའང་གསུངས། ལ་སོགས་པའི། །དང་པོ་ཕྱག་འཚལ་བ། ཡབ་ཡུམ་སྲས་དང་བཅས་པ་ལ། །ལུས་ངག་ཡིད་གསུམ་གུས་ལྡན་པས། །ཀུན་ནས་དང་བས་ཕྱག་འཚལ་ལོ། །སངས་རྒྱས་ཞིང་དུ་གང་བསྔགས་གཉིས་པ་མཆོད་པ་འབུལ་བ། པའི། །འཇིག་རྟེན་དག་ན་མཆོག་གྱུར་པའི། །རིན་ཆེན་མེ་ཏོག་བདུག་སྤོས་སོགས། །ཀུན་ནས་སྤྲུལ་ཏེ་མཆོད་པར་བྱ། །བདག་གིས་སྔོན་ཆད་བྱས་གསུམ་པ་སྡིག་པ་བཤགས་པ། པའི་སྡིག །ཀུན་ནས་བསགས་པར་གྱུར་པ་རྣམས། །རང་བཞིན་མེད་ཀྱང་ཡོད་ཚུལ་གྱིས། །རྒྱལ་བ་རྣམས་ཀྱི་སྤྱན་སྔར་བཤགས། །མགོན་པོ་ཀུན་གྱི་བཞི་པ་རྗེས་སུ་ཡི་རང་བ། བསོད་ནམས་དང་། །དམན་པའི་དགེ་བ་ཐམས་ཅད་ལ། །དེ་བཞིན་མཐུན་པའི་ལྷག་སེམས་ཀྱིས། །དང་བས་རྗེས་སུ་ཡི་རང་ངོ་། །བདེ་གཤེགས་བྱང་ཆུབ་ལྔ་པ་ཆོས་ཀྱི་འཁོར་ལོ་བསྐོར་བར་བསྐུལ་བ། མཆོག་བརྙེས་ནས། །འགྲོ་བ་ཐུགས་རྗེས་འདུལ་སླད་དུ། །ཆོས་ཀྱི་འཁོར་ལོ་བསྐོར་བ་ལ། །ཚངས་པ་བཞིན་དུ་གསོལ་བ་འདེབས། །མྱ་ངན་འདའ་དྲུག་པ་མྱ་ངན་མི་འདའ་བར་གསོལ་བ་འདེབས། བཞེད་དེ་དག་ལ། །འགྲོ་ཀུན་ཡུན་དུ་བདེ་བའི་ཕྱིར། །ཇི་སྲིད་འཁོར་བ་དེ་སྲིད་བར། །མྱ་ངན་མི་འདའ་བཞུགས་སུ་གསོལ། །ཇི་སྲིད་འཁོར་བ་བདུན་པ་བསྔོ་བ། མ་ཟད་བར། །བདག་གི་དགེ་བའང་དེ་སྲིད་དུ། །ཀུན་ནས་ཟད་པར་མི་འགྱུར་བར། །སེམས་ཅན་ཡོངས་སུ་སྨིན་པར་ཤོག །བདག་ཀྱང་བརྒྱད་པ་ལུས་འབུལ་བ། དུས་འདི་ཕན་ཆད་ནས། །བྱང་ཆུབ་སྙིང་པོའི་བར་དུ་ནི། །མགོན་པོའི་འབངས་སུ་འབུལ་ལགས་ཀྱི། །ཐུགས་རྗེས་ཡོངས་སུ་བཟུང་བར་མཛོད། །དུས་འདི་ནས་ནི་བཟུང་ནས་ནི། །མགོན་པོ་ཁྱོད་ཀྱི་བཀའ་བཞིན་དུ། །སེམས་ཅན་དོན་ཀུན་བསྒྲུབ་ལགས་ཀྱི། །བྱིན་གྱིས་རློབས་པར་མཛད་དུ་གསོལ། །སྡོམ་པ་བཟུང་བ་ན། ཇི་ལྟར་དུས་གསུམ་མགོན་པོ་རྣམས། །ཞེས་པ་ནས། སེམས་ཅན་མྱ་ངན་འདས་ལ་དགོད། །ཅེས་པའི་བར་སྤྱི་དང་མཐུན། ཁྱད་པར་དུ། བླ་མས་གསུངས་པའི་སྡོམ་པ་ཀུན། །འཁོར་བར་སྐྱོ་བའི་ཡིད་བཞག་ནས། །ངེས་པར་ལེགས་པའི་དོན་དུ་ཡང་། །དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་ཀུན་ཏུ་བཤགས། །དགེ་བ་ཀུན་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་དེ། །སེམས་ཅན་མ་བསྒྲལ་དཔག་མེད་རྣམས། །མྱ་ངན་འདས་ལ་འགོད་པར་བྱ། །ལུས་དང་ངག་དང་ཡིད་ཀྱི་ལས། །ཉེས་པའི་ལས་ཀུན་བསྡམ་པར་བྱ། །བག་མེད་ཆང་ཡང་སྤང་བར་བྱ། །ཐེག་པ་དམན་ལ་ཞུགས་མི་བྱ། །ལྷ་དང་ལྷ་མོ་གསང་བ་སོགས། །བླ་མར་བརྙས་པར་མི་བྱའོ། །ཕྱག་རྒྱ་བཞོན་པ་མཚོན་ཆ་དང་། །མཚན་མ་འགོང་བར་མི་བྱའོ། །རིག་པ་འཛིན་པའི་སྡོམ་པ་ཀུན། །ཚུལ་ཆེན་གསང་བསྔགས་ལས་གསུངས་པ། །མི་དགེ་བཅུ་སྤོང་ལ་སོགས་པ། །ཀུན་ནས་མ་ལུས་བཟུང་བར་བགྱི། །ལས་དང་བཀའ་སྩལ་མ་ལུས་བགྱི། །ཞེས་སྡོམ་པ་བཟུང་བར་བྱའོ། །དེ་ནས་ཡི་དམ་གྱི་ལྷ་དང་མི་འབྲལ་བར་དམ་བཅའ་བ་ནི། ཧཱུྃ། ནམ་མཁའི་མཐའ་དང་མཉམ་པའི་དཀྱིལ་འཁོར་ནས། །བཅོམ་ལྡན་འཇམ་དཔལ་གཤིན་རྗེ་ཡབ་ཡུམ་དང་། །རྒྱལ་བ་སྲས་བཅས་སྲུང་མ་ཐུགས་དམ་ཅན། །ཐུགས་རྗེ་བརྩེ་བས་བདག་ལ་དགོངས་སུ་གསོལ། །བདག་ནི་མཐོ་རིས་ལོངས་སྤྱོད་རྒྱལ་སྲིད་དམ། །འདོད་པའི་ལོངས་སྤྱོད་བསྒྲུབ་པ་མ་ལགས་ཏེ། །འགྲོ་ལ་སྙིང་བརྩེ་ཁོ་ན་དོན་བརྩོན་པས། །ཡེ་ཤེས་སྒྲིབ་མེད་ཁྱེད་ཀྱིས་ས་ལེར་མཁྱེན། །བདག་ལུས་དུམ་བུ་སྟོང་དུ་གཏུབ་གྱུར་ཀྱང་། །ཡི་དམ་ལྷ་ཁྱོད་མི་སྤོང་བསྒྲུབ་པར་བྱ། །བསྐལ་པ་ཐོག་མ་མེད་པའི་སྔོན་རོལ་ནས། །རྩེ་གཅིག་དད་པའི་སེམས་ཀྱིས་བསྒྲུབས་པའི་ལྷ། །འཕགས་པའི་རྒྱལ་པོ་ཁྲོ་རྒྱལ་གཤིན་རྗེའི་གཤེད། །གསང་བའི་ཡུམ་མཆོག་བཛྲ་བེ་ཏ་ལི། །བསྐལ་པར་བསྒྲུབས་ཀྱང་ཁྱེད་ཀྱི་ཞལ་མ་མཐོང་། །ཞལ་བཟང་རྔམས་པ་བདག་ལ་བསྟན་དུ་གསོལ། །བདུད་དང་སྲིན་པོ་དྲེགས་པ་གློ་བུར་ནད། །སྒྱུ་མའི་ལུས་ལ་བར་དུ་གཅོད་གྱུར་ན། །རིག་འཛིན་ཚེ་ཡི་དངོས་གྲུབ་སྩལ་དུ་གསོལ། །རྡོ་རྗེ་གཤིན་རྗེ་བདག་གིས་བཟུང་བར་བགྱི། །རཱ་ག་ཡ་ཧོ། །རཱ་ག་ཡ་མི། བེ་ཏ་ལི་བྃ། རཀྟ་ཨ་ལ་ལ་ཧོཿ ས་མ་ཧོཿ ས་མ་ཡ་སྟྭཾ། བྱིན་དབབ་པ་ནི། ཧཱུྃ། ཡ་མའི་ཚོགས་ཀྱི་དུས་ལ་བབ། །ཁྲོ་བོའི་རྒྱལ་པོའི་དུས་ལ་བབ། །མ་མོ་མཁའ་འགྲོའི་དུས་ལ་བབ། །བྱིན་གྱིས་རློབས་པའི་དུས་ལ་བབ། །དབང་བསྐུར་རྒྱལ་པོའི་དུས་ལ་བབ། །དངོས་གྲུབ་སྩོལ་བའི་དུས་ལ་བབ། །དགྲ་བགེགས་འགུགས་པའི་དུས་ལ་བབ། །ཅེས་རྔ་བརྡུང་ཞིང་དྲིལ་བུ་གསིལ། ལུས་ངག་ཡིད་གསུམ་གྱི་སྡིག་སྒྲིབ་དག །ལྷ་ཚོགས་རྣམས་འོད་དུ་ཞུ། བདག་ལ་ཐིམ། བླ་མས་དབང་བསྐུར། ཡི་དམ་གྱིས་བྱིན་གྱིས་རློབས། སྲུང་མ་རྣམས་བཀའ་ཉན་ཅིང་གསུང་སྡོད། དེས་བདག་ནུས་པ་དང་ལྡན་ནོ། །བདག་གི་ལུས་ངག་ཡིད་གསུམ་དང་བཅོམ་ལྡན་འདས་འཇམ་དཔལ་གཤིན་རྗེའི་གཤེད་ཀྱི་སྐུ་གསུང་ཐུགས་དབྱེར་མེད་དུ་འདྲེས་པར་བསམ། ཧཱུྃ། ཡ་མཱནྟ་ཀ་འཇམ་དཔལ་གཤིན་རྗེའི་གཤེད། །ཡབ་ཡུམ་སྲས་བཅས་ཕོ་ཉ་གཡོག་འཁོར་བཅས། །གཡང་གཞི་ཐོད་པས་བརྒྱན་པའི་འཇིགས་ཚོགས་ཅན། །དཀྱིལ་དང་འཁོར་དུ་བཅས་པ་དགོངས་སུ་གསོལ། །སྲིད་གསུམ་དབྱིངས་ནས་བསྐྱེད་པའི་ཡུམ་ཆེན་ནི། །ཕྱི་ཡི་མ་བདུན་ནམ་གྲུ་ཆེན་མོ་དང་། །ཁ་ཁ་རེ་མ་ཏཱི་ཡི་ཚོགས་རྣམས་དང་། །རྦོད་གཏོང་ལེན་པར་བྱེད་པའི་མ་མོ་དང་། །མ་ལྟར་བྱམས་ཤིང་སྲིང་ལྟར་གདུང་ལ་སོགས། །དམ་རྫས་སྔགས་སོགས་བདུད་རྩིའི་བཅུད་ཕྱུང་སྟེ། །སྲོག་གི་སྙིང་པོས་གནས་འདིར་སྤྱན་འདྲེན་ན། །མངོན་སུམ་འདི་རུ་ལྷ་ཚོགས་བཞུགས་སུ་གསོལ། །བདག་ནི་རྡོ་རྗེ་རང་བྱུང་ཆེན་པོ་སྟེ། །མི་དམིགས་ཚངས་པའི་དངོས་གྲུབ་སྩལ་ལགས་ན། །བཀའ་དང་གཞུང་ལས་འགལ་བ་མཐོལ་ལོ་བཤགས། །མཐོལ་ལོ་བཤགས་སོ་ཡེ་ཤེས་ལྷ་ཡི་ལྷ། །གནོང་ངོ་འགྱོད་དོ་མ་སྲིང་རྒྱ་མཚོའི་ཚོགས། །མཐོལ་བཤགས་ཕུལ་ན་ཚངས་པར་སྩལ་དུ་གསོལ། །ཡི་གེ་བརྒྱ་བ་ལན་གསུམ་བརྗོད། སྨན་རཀ་གཏོར་མ་གསུམ་བྱིན་གྱིས་བརླབ་པ་རྒྱས་པ་གཞན་དུ་གསལ། ཕྱི་ནང་གསང་གསུམ་གྱི་མཆོད་པ་བྱིན་གྱིས་བརླབ་ཅིང་འབུལ་བ་དང་། སྨན་རཀ་གཏོར་མ་བྱིན་གྱིས་བརླབས་ཚར་ནས། ཚོགས་རྟེན་བསྡུ་བ་ནི། བཅོམ་ལྡན་འདས་ཡ་མཱནྟ་ཀའི་ལྷ་ཚོགས་ཐམས་ཅད་ཀྱིས་བདག་གི་ལུས་ངག་ཡིད་གསུམ་སྨིན་པར་མཛད་དུ་གསོལ། གྲོལ་བར་མཛད་དུ་གསོལ། བྱིན་གྱིས་རླབས་པར་མཛད་དུ་གསོལ། །ཞེས་བརྗོད་པས། ཡ་མཱནྟ་ཀའི་སྐུ་གསུང་ཐུགས་ལས་ཡི་གེ་ༀ་ཨཱཿཧཱུྃ་གསུམ་བྱུང་སྟེ། བདག་གི་ལུས་ངག་ཡིད་གསུམ་ལ་ཐིམ་པས་ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་དག་ནས། ཡ་མཱནྟ་ཀའི་སྐུ་གསུང་ཐུགས་དང་བདག་གི་ལུས་ངག་ཡིད་གསུམ་དབྱེར་མེད་དུ་གྱུར་ཏེ། ལྷ་ཚོགས་ཐམས་ཅད་བདག་ལ་ཐིམ་པར་བསམ་མོ། ༈ །འཇམ་དཔལ་གཤིན་རྗེའི་གཤེད་པོ། སྦྱོར་བའི་ཡུམ་ཡཀྴ་བཻ་ཏ་ལི། སྒྲོལ་བའི་ཡུམ་ཨེ་ཀ་ཛཱ་ཊི། སྲས་མཆོག་ཡ་མ་རཱ་ཛ། སྲས་མོ་ཁྲམ་ཐོགས་ཀྱི་བདག་མོ་བདུད་མོ་རེ་མ་ཏཱི། ལས་ཀྱི་འཆི་བདག་ཡབ་ཡུམ། ཡབ་ཀྱི་སྤྲུལ་པ་གཤེད་པོ་བཞི། ཡུམ་གྱི་སྤྲུལ་པ་གཤེད་མོ་བཞི། མཐར་བྱེད་ཀྱི་གཤིན་རྗེ་བརྒྱད། ཕྱོགས་སྐྱོང་གི་གཤིན་རྗེ་བཅུ། ཁྲམ་ཐོགས་ཀྱི་བདུད་པོ་བཅུ་གཉིས། གྲི་ཐོགས་ཀྱི་གིང་ཆེན་པོ་བཅོ་བརྒྱད། མདངས་ལེན་གྱི་མ་མོ་སྟོང་རྩ་བརྒྱད། རྩིས་བྱེད་ཀྱི་གིང་ཆེན་པོ་བཞི། འཁོར་གྱི་ཤ་ཟ་ཀིང་ཀང་། དམ་ཅན་སྲུང་མའི་ཚོགས་ཐམས་ཅད་ལ་འབུལ་ལོ། །ཞེས་པའི་འདི་གཏོར་བསྔོས་བྱེད་དུས་བརྗོད་པར་བྱའོ། །ཕྱི་ནང་གསང་གསུམ་གྱི་མཆོད་པ་བྱིན་གྱིས་བརླབས་ཏེ་འབུལ་བ་ནི། ཧཱུྃ། རྡོ་རྗེའི་གཤིན་རྗེའི་ལྷ་ཚོགས་མཆོད་པའི་ཕྱིར། །ཕྱི་ནང་གསང་བའི་མཆོད་པའི་དྲི་མ་རྣམས། །ཡེ་ཤེས་མེ་ཆུ་རླུང་གི་སྦྱོར་བ་ཡིས། །བསྲེགས་དང་བཀྲུ་དང་སྦྱངས་པས་དག་གྱུར་ཅིག །རྃ་ཡྃ་ཁྃ། ཧཱུྃ། པུཥྤེ་དྷཱུ་པེ་ཨཱ་ལོ་ཀེ་དང་ནི། གནྡྷེ་ལ་སོགས་ཕྱི་ཡི་མཆོད་པ་རྣམས། །ཨཱོྂ་ཨཱཿཧཱུྃ་དང་ཧཱུྃ་གྱི་སྦྱོར་བ་ཡིས། །ལྷ་རྣམས་མཉེས་བྱེད་མཆོད་པར་བྱིན་གྱིས་རློབས། །ཨཱོཾ་དང་ཨཱཿཨརྒྷཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝི་དྱ་ཤཔྡ་པཱུ་ཛ་ཨཱཿཧཱུྃ། ཧཱུྃ། ཐབས་ཤེས་གཉིས་མེད་ལྷ་ཡི་ཏིང་འཛིན་གྱིས། །གསང་བའིི་སྣོད་མཆོག་བྷནྡྷའི་གཞལ་ཡས་སུ། །ཡབ་ཡུམ་མཁའ་གསང་ལས་བྱུང་ཨ་མྲྀ་ཏ། །ཟག་མེད་བདུད་རྩི་ཆེན་པོར་བྱིན་གྱིས་རློབས། །ༀ་ཨཱཿཧཱུྃ་ས རྦ་བདུད་རྩི་བྱིན་གྱིས་བརླབ་བོ། །པཉྩ་ཨ་མྲྀ་ཏི་ཧཱུྃ་ཧྲཱིཿཋཱ། ཧཱུྃ། རྩ་བའི་ཁྲག་ཆེན་མཱུ་ལ་རཀྟ་བྱིན་གྱིས་བརླབ་བོ། །རཀྟ་དང་། །གསང་བའི་ཁྲག་ཆེན་པདྨ་རཀྟ་དང་། །ཁམས་གསུམ་བསྒྲལ་བའི་མ་ཧཱ་རཀྟ་རྣམས། །རྣལ་འབྱོར་ནང་གི་མཆོད་པར་བྱིན་གྱིས་རློབས། །ༀ་མཱུ་ལ་རཀྟ་ཛྭ་ལ་མཎྜ་ལ་ཧཱུྃ། ༀ་པདྨ་རཀྟ་ཛྭ་ལ་མཎྜ་ལ་ཧཱུྃ། ༀ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ། ཧཱུྃ། མཁའ་མཉམ་ཐོད་པ་ཤེས་རབ་སྣོད་ནང་དུ། །ཐབས་ཀྱི་རང་བཞིན་ཤ་ལྔ་བདུད་རྩི་ལྔ། །གཉིས་མེད་ཟུང་དུ་འཇུག་པའི་བ་ལིཾ་ཏ། །རྣམ་དག་བདུད་རྩི་ཆེན་པོར་བྱིན་གྱིས་རློབས། །ༀ་ཨཱཿཧཱུྃ་མ་ཧཱ་བ་ལིཾ་ཏ་ཏེ་ཛོ་བ་ལིཾ་ཏ་བ་ལ་བ་ཏི་གུ་ཧྱ་སིདྡྷི་ས་མ་ཡེ་ཧཱུྃ། ཧཱུྃ། ཤེས་རབ་རང་བཞིན་གསང་བའི་མུ་དྲ་ནི། །བཅུ་དྲུག་ལང་ཚོས་སྒེག་དང་འཛུམ་བཞད་ལྡན། །པདྨའི་ཟེའུ་འབྲུས་དགའ་བཞིའི་ཡེ་ཤེས་བསྐྱེད། །བདེ་ཆེན་མཆོད་པ་ཆེན་པོར་བྱིན་གྱིས་རློབས། །ༀ་མ་ཧཱ་མུ་དྲ་པཱུ་ཛ་ཨཱཿཧཱུྃ། ཞེས་བྱིན་གྱིས་བརླབ་བོ། །ཚོགས་རྟེན་བསྡུ་བ་ནི་འདིར་བྱ། དེ་རྣམས་ནི་སྔོན་འགྲོའི་རིམ་པའོ། །དངོས་གཞིའི་ཏིང་འཛིན་རྣམ་གསུམ་ལས། དང་པོ་དེ་བཞིན་ཉིད་ཀྱི་ཏིང་འཛིན་ནི། ཧཱུྃ། རྟོག་མེད་སྤྲོས་བྲལ་ཆོས་ཀྱི་དབྱིངས། །དམིགས་མེད་མཁའ་མཉམ་བྱང་ཆུབ་སེམས། །དངོས་པོ་མཚན་མར་མི་དམིགས་པའི། །ཆོས་ཉིད་ངང་དུ་དབྱེར་མེད་མཉམ། །ༀ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་ས་མ་ཏི་ཧཱུྃ། ཀུན་ཏུ་སྣང་གི་ཏིང་ངེ་འཛིན་ནི། ཧཱུྃ། ཆུ་ཟླའི་དཀྱིལ་འཁོར་ཇི་བཞིན་དུ། །སྒྱུ་མའི་སེམས་ཉིད་དེ་དང་འདྲ། །མཁའ་ལ་འཇའ་ཚོན་སྣང་བ་ཡང་། །ནམ་མཁའི་ངང་དུ་རོ་གཅིག་མཉམ། །ༀ་དྷརྨ་དྷཱ་ཏུ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། རྒྱུའི་ཏིང་ངེ་འཛིན་ནི། ཧཱུྃ། མཁའ་མཉམ་དག་པའི་དབྱིངས་ཉིད་ལས། །ཡེ་ཤེས་ཐུགས་ཀྱི་སྙིང་པོ་ནི། །སེམས་ཉིད་ངེས་པ་ཧཱུྃ་དུ་གྱུར། །ཀུན་འབྱུང་ཡེ་ཤེས་རྒྱུ་ནི་ཧཱུྃ། །ༀ་བཛྲ་ཏིསྟ་ཛྙཱ་ན་བཛྲ་ཧཱུྃ། འབྱུང་བ་རིམ་བརྩེགས་ནི། ཧཱུྃ། རྒྱུད་ལྔ་གདོད་ནས་དག་པའི་ཕྱིར། །གཏི་མུག་འབར་བའི་ནམ་མཁའ་ལ། །ཕྲག་དོག་འབར་བའི་རླུང་ནག་འཁྲིགས། །འདོད་ཆགས་འབར་བའི་མེ་ཆུ་ཆགས། །ཞེ་སྡང་འབར་བའི་ས་གཞི་ཆགས། །འདོད་ཆགས་འབར་བའི་རྦ་ཀློང་འཁྱིལ། །ང་རྒྱལ་འབར་བའི་ཀེང་རུས་བརྩེགས། །ཞེ་སྡང་འབར་བའི་མེ་རི་འབར། །ཨེ་ཨགྣེ་མཎྜ་ལ་ཧཱུྃ། ཡྃ་ཀརྨ་རཀྟ་མཎྜ་ལ་ཧཱུྃ། རྃ་ཛྭ་ལ་མཎྜ་ལ་ཧཱུྃ། ཁྃ་མ་ཧཱ་མཎྜ་ལ་ཧཱུྃ། སུྃ་བཛྲ་ཏིཥྛ་ལྷན། ར་རཀྟ་ས་མུན་ཛྭ་ལ་མཎྜ་ལ་ཧཱུྃ། ཀེཾ་ནི་རི་ཏི་ཛྭ་ལ་མཎྜ་ལ་ཧཱུྃ། རྃ་ཛྭ་ལ་མཎྜ་ལ་ཧཱུྃ། ཧཱུྃ་གི་འཕྲོ་འདུས་སྦྱོར་བ་ལས། །འཇིག་རྟེན་ཁམས་ནི་རབ་འབྱམས་ཀུན། །རྃ་ཡྃ་ཁྃ་གིས་བསྲེགས་སྦྱངས་བཀྲུས། །འོད་འདུས་ཐོག་མའི་གཟུགས་ལ་སྡུད། །སྟེང་འོག་པདྨ་འཁོར་ལོ་གནས། །ༀ་སརྦ་ཏ་ཐཱ་ག་ཏ་བུདྡྷ་ཙཀྲ་གརྦྷེ་ལཾ། ༀ་པདྨ་མཎྜ་ལ་ཨ་བྷི་ཥིཉྩ་ཨཱོཾ། གཟུགས་ཀྱི་ཡུལ་ལ་ཞེན་པ་ལོངས་སྤྱོད་རྫོགས་པའི་ཞིང་ཁམས་སུ་དག་པར་བྱ་བའི་ཕྱིར་རྟེན་གཞལ་ཡས་ཁང་བསྐྱེད་པ་ནི། ཧཱུྃ། རིན་ཆེན་དུར་ཁྲོད་གཞལ་ཡས་ཁང་། །ཡེ་ཤེས་ཆེན་པོའི་གནས་ཆེན་པོ། །ཕྱི་དང་ནང་མེད་ཆོས་ཀྱི་དབྱིངས། །མཐའ་དང་དབུས་མེད་ནམ་མཁའི་དབྱིངས། །གྲུ་གསུམ་མཐིང་ནག་འབར་བ་ལ། །ཟླ་གམ་དམར་པོ་དབང་གི་ཚུལ། །འཁོར་ལོ་ཐོད་པ་བཞི་དང་ལྡན། །ལྕགས་མཁར་གླིང་ཆེན་བཅུ་གསུམ་སྟེ། །འབར་བ་ཁྲག་གི་བར་ཁྱམས་ལ། །གྲུ་བཞི་སྒོ་བཞི་ལོགས་དང་ལྡན། །སྦྲུལ་གྱི་རྒྱ་གྲམ་མཐའ་བསྐོར་ཏེ། །རྡོ་རྗེ་རྒྱ་གྲམ་ཐོད་ཕྲེང་མཛེས། །དཀྱིལ་འཁོར་བསམ་འདས་ལྷུན་གྱིས་གྲུབ། །བྷྲཱུྃ་བི་ཤྭ་བི་ཤུདྡྷེ་བཛྲ་བྷནྡྷ་ཛྙཱ་ན་ཙཀྲ་བྷྲཱུྃ། དེ་ནས་གདན་བསྐྱེད་པ་ནི། ཧཱུྃ་སྥ་ར་ཎ་ཕཊ། ཧཱུྃ། བདེ་གཤེགས་ཐུགས་ཀྱི་རང་བཞིན་གྱིས། །ལྷུན་གྲུབ་དཀྱིལ་འཁོར་འབར་བའི་དབུས། །བདུད་དང་མུ་སྟེགས་ཐམས་ཅད་དང་། །གནོད་སྦྱིན་སྲིན་པོ་གདན་དུ་བཏིང་། །གཤིན་རྗེ་ཕོ་མོ་བསྣོལ་བའི་སྟེང་། །མ་ཧེ་གླང་རྒོད་བརྫིས་པའོ། །རུ་དྲ་ཏི་ར་བཾ། ཡ་མ་ཡེ་ཏི་ར་བཾ། མ་ཧེ་མཎྜ་ལ། མ་སཱུརྻ་མཎྜ་ལ། ཨ་ཙནྡྲ་མཎྜ་ལ་ཧཱུྃ། པཾ་པདྨ་མཎྜ་ལ་ཧཱུྃ། སླར་ཡང་། སཾ་ཧ་ར་ཎ་ཧཱུྃ། ནང་འཛིན་བྱེད་ཀྱི་ཤེས་པ་ཚོགས་བརྒྱད་དུ་འཁྲུལ་པ་ཆོས་ཀྱི་སྐུར་དག་པར་བྱ་བའི་ཕྱིར་བརྟེན་པ་ལྷ་བསྐྱེད་པ་ནི། ཧཱུྃ། ཉི་མའི་དཀྱིལ་འཁོར་མ་ལས་བྱུང་། །ཟླ་བའི་གདན་ནི་ཨ་ལས་བྱུང་། །པདྨའི་གདན་ནི་པཾ་ལས་བྱུང་། །གདན་སྟེང་ཧཱུྃ་གི་འཕྲོ་འདུ་ལས། །ཡེ་ཤེས་སེམས་དཔའ་རྡོ་རྗེར་གྱུར། །དེ་ལས་འོད་འཕྲོས་སླར་འདུས་པས། །ཆོས་ཀྱི་སྐུ་མཆོག་གཤིན་རྗེའི་གཤེད། །དུར་ཁྲོད་འབར་བའི་རྒྱན་ཆ་ཅན། །ཞལ་གསུམ་ཕྱག་ནི་དྲུག་པ་སྟེ། །ཕྱག་མཚན་མཚོན་ཆ་སྣ་ཚོགས་བསྣམས། །ཡ་མ་མ་ཧེའི་ཁྲི་སྟེང་ན། །གྱད་ཀྱི་དོར་སྟབས་འཇིགས་པར་གནས། །ༀ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ་ཧཱུྃ་ཕཊ། ཧཱུྃ། གཡོན་ནས་ཁྲོ་མོ་རོ་ལངས་མ། །འབར་བའི་ཁ་ལ་གཟི་མདངས་ཆེ། །ལུས་ནི་མེ་ཆེན་འབར་བ་ལ། །ཞལ་གཅིག་ཕྱག་ནི་གཉིས་པ་སྟེ། །ཡབ་ལ་གཉིས་སུ་མེད་པར་འཁྲིལ། །ཏྲི་ཤུལ་ཐོད་ཁྲག་ཞལ་དུ་སྟོབ། །ༀ་བེ་ཏ་ལི་རཀྴ་ཡཀྴ་ཛཿཛཿ ཨུ་ཙུཥྨ་ཀྲོ་དྷ་བེ་ཏ་ལི་ཧཱུྃ། ཧཱུྃ། གཡས་ནས་བསྐྱེད་པའི་ཡུམ་ཆེན་ནི། །ཨེ་ཀ་ཛཱ་ཊི་རལ་གཅིག་མ། །སྨུག་ནག་སྤྱང་མོ་ཙིཏྟ་བསྣམས། །གཡས་ན་བཀའ་སྡོད་སྒྲོལ་གིང་མོ། །དོན་གྱི་ཁྲོ་མོ་རོ་ལངས་མ། །སྒྲོལ་བྱེད་ཨེ་ཀ་ཛཱ་ཊི་མ། །མ་མ་ཏྲག་རཀྴ་ཨེ་ཀ་ཛཱ་ཊི་ཛཿ ཧཱུྃ། ཡེ་ཤེས་ཐུགས་ཀྱི་ས་བོན་ལས། །འཇིགས་བྱེད་ཆེན་པོ་ཡ་ལས་བྱུང་། །སྨུག་ནག་རལ་གྲི་སྡིགས་མཛུབ་འཕྱར། །མངགས་པ་ལས་ཀྱི་ཕོ་ཉ་སྟེ། །ཡ་མ་རཱ་ཛ་ནི་ཛཿ ཧཱུྃ། ཡབ་ཡུམ་གཉིས་མེད་སྦྱོར་བ་ལས། །ཁྲག་མིག་མ་མོ་མ་ལས་བྱུང་། །ལྕགས་ཀྱུ་ཙིཏྟ་དུང་ཁྲག་མཐིང་གའི་གཟུགས། །མངགས་པ་ལས་ཀྱི་ཕོ་ཉ་མོ། །མ་མ་རུ་ལུ་མ་ཧེ་བྷྱོ་ཧཱུྃ་ཕཊ། ཧཱུྃ། ཤ་ཟ་གིང་དང་སྲིན་པོ་དང་། །གིང་ལྕམ་སྲིན་མོ་ཤ་ཟ་མོ། །མ་མོ་ཁྲག་འཐུང་ཡི་དྭགས་ཚོགས། །རོ་ལངས་དུར་ཁྲོད་ཕོ་ཉར་འཁོད། །བཛྲ་ཨངྐུ་ཤ་ཛ་ཛཿ སྐུ་གསུང་ཐུགས་བྱིན་གྱིས་བརླབ་ཅིང་ཡེ་ཤེས་ལྔས་དབང་བསྐུར་བ་ནི། ཧཱུྃ། ཁྲོ་བོའི་རྒྱལ་པོ་གཤིན་རྗེའི་གཤེད། །ཡེ་ཤེས་ལྔ་དང་སྐུ་གསུང་ཐུགས། །ཡོན་ཏན་ཕྲིན་ལས་རྣམ་པ་ལྔས། །དབང་བསྐུར་བྱིན་གྱིས་རློབས་པའོ། །ༀ་ན་མཿསརྦ་ཏ་ཐཱ་ག་ར་ཤྲཱི་མཛྙུ་ཀཱ་ཡ་ཝཱ་ཀ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ༀ་བུདྡྷ་ཀུན་ལེན་ཧཻ་ཧ། ༀ་བཛྲ་ཀུན་ལེན་ཧཻ་ཧཿ ༀ་རཏྣ་ཀུན་ལེན་ཧཻ་ཧཿ ༀ་པདྨ་ཀུན་ལེན་ཧཻ་ཧཿ ༀ་ཀརྨ་ཀུན་ལེན་ཧཻ་ཧ་ཧཱུྃ་ཕཊ། དེ་ནས་གཏུམ་ཆེན་གྱི་བསྟོད་པ་ནི། ཧཱུྃ། གཏུམ་ཆེན་དྲེགས་པ་ཆེན་པོ་ཐམས་ཅད་འཇོམས་པའི་ལྷ། །དབང་བྱེད་བདུད་འདུལ་དུར་ཁྲོད་ཆས་ཀྱིས་བརྒྱན། །སྒྲོལ་བྱེད་སྐུ་མཆོག་མ་མོ་འབངས་སུ་འཁོལ། །རབ་བརྗིད་གཤིན་རྗེ་འཇོམས་ལ་ཕྱག་འཚལ་བསྟོད། །ཉི་མ་འབུམ་བས་ལྷག་པའི་འོད་སྟོང་ཕྱོགས་བཅུར་འགྱེད། །གདུག་བྱེད་མཚོན་ཆ་མང་པོ་བསྐལ་པའི་མེ་ལྟར་འབར། །ཁྲོ་རྔམ་གདུག་པས་སྲིད་གསུམ་ཐལ་བར་བརླག །འཇིགས་བྱེད་ཡ་མ་རཱ་ཛའི་སྐུ་ལ་ཕྱག་འཚལ་བསྟོད། །རྡོ་རྗེའི་སྐུ་ལ་ཀླུ་དབང་རབ་བརྒྱན་ཅིང་། །གཅན་གཟན་གདུག་པའི་ལྤགས་རློན་ན་བཟར་གསོལ། །ཤ་ཟ་གདུག་པའི་ཚོམ་བུ་དབུ་ཡི་ཐོད་དུ་བཅིངས། །ཁྲོ་བོའི་རྒྱལ་པོ་གདོང་དྲུག་ཕྱག་དྲུག་ཞབས་དྲུག་ཧཱུྃ་སྒྲ་ཅན། །ཕཊ་ཀྱིས་ཁམས་གསུམ་གཏོར་མཛད་ཞལ་ནས་ཧཱུྃ་སྒྲ་འབྱིན། །བརྐྱང་བསྐུམ་བརྗིད་པས་གཤིན་རྗེ་ཡ་བ་ཏི་ཡི་སྙིང་གར་མནན། །ལྗགས་འདྲིལ་ཚེམས་ཀྱི་བར་ནས་རྡོ་རྗེའི་ཐོག་ཕབ་པས། །འཁོར་གྱི་མ་མོ་རྣམས་ཀྱང་བྲན་དུ་འཁོལ། །ཚམ་རྔམས་ཁྲོ་བོའི་རྐན་སྒྲ་བརྡབས་པ་ཡིས། །འཁོར་གྱི་མ་མོ་རྣམས་ཀྱང་འདར་ལྕུག་ལྕུག །ཚངས་པ་འཁོར་བཅས་རྡུལ་གྱི་ཐིག་འཛག་ཅིང་། །ལྷ་ཆེན་ཁྱབ་འཇུག་མ་ཧཱ་དེ་བ་གནོན། །ཕྱག་ན་བྷནྡྷ་རློན་པ་རབ་བསྣམས་ཤིང་། །དངོས་གྲུབ་བསྒྲུབ་ཅིང་ཀླད་ཁྲག་ཞལ་དུ་གསོལ། །ཁྱུང་དང་འུག་པ་ལྟ་བུའི་ཁྲ་རྣམས་ནི། །དམ་ལས་ལོག་པ་རྣམས་ལ་གཏོང་བར་མཛད། །རྣལ་འབྱོར་བདག་ལ་གདུག་ཅིང་འགལ་བྱེད་རྣམས། །རབ་ཏུ་ཆིངས་ཤིང་ཕུང་བར་མཛད་དུ་གསོལ། །གཤིན་རྗེ་ནག་པོ་ཡ་མ་རཱ་ཛ་ཁྲོ་བོ་ཀུན་གྱི་རྗེ། །གཏན་གྱི་ལྷར་ཡང་ཁྱེད་ལ་གསོལ་འདེབས་ན། །དགྲ་བོའི་མགོ་ནས་ཆེམ་ཆེམ་བསྣམས་སུ་གསོལ། །ནད་གཏོང་སྲིན་མོའི་ཚོགས་རྣམས་དབང་སྡུད་ཅིང་། །ཁྱུང་ཆེན་སྔོན་པོ་མཁའ་ལ་ལྡིང་བ་བཞིན། །ཐུགས་ཀྱི་སྤྲུལ་པ་ཁྱེའུ་ཆུང་མང་པོ་ཡིས། །རྣལ་འབྱོར་བདག་ལ་གནོད་པའི་དགྲ་དང་བགེགས། །ཡུད་ཙམ་གྱིས་ནི་ཐལ་བའི་རྡུལ་དུ་རློག །འཇིགས་བྱེད་དེ་ཡི་ཐུགས་དམ་དགྱེས་བསྐུལ་མ། །ཨེ་ཀ་ཛཱ་ཊི་གུ་ཧྱ་རལ་གཅིག་མ། །མི་ཕམ་ཁྲོ་གཉེར་གཡུ་ཡི་རལ་གཅིག་མ། །རལ་པ་སྤྲུགས་པའི་སྐྲ་གསེབ་རེ་རེ་ནས། །ཁྲོ་ཆུང་ཞལ་གསུམ་ཕྱག་དྲུག་སྟོང་ཁམས་ཁེངས་པར་འགྱེད། །ཀུན་ཀྱང་མི་བཟད་འཇིགས་བྱེད་ལྕགས་ཀྱུ་ནས། །ལྕགས་ཀྱུ་བཏབ་པས་དགྲ་བོའི་སྲོག་རྩ་གཅོད། །དམ་ཉམས་དགྲ་བོ་དབང་དུ་སྡུས་ཤིག་ཐལ་བར་རློགས། །ༀ་ཡ་མཱནྟ་ཀ་ཛ་ཡ་མ་རཱ་ཛ་ཧཱུྃ། ཨཱོྂ་གུ་ཧྱ་ཛྙཱ་ན་མུཾ་ཧཱུྃ། བྱིན་དུ་ཡ་མ་ཛཿ ཡ་མ་ནན། ༀ་མུ་ཁ་ལེ་ཁ་ཐུན་རྨུགས་ནན། ཨཱོྂ་ཡ་མ་ཁ་ཐུན་རཱ་ཛ་ཧཱུྃ། ༀ་ཤྲཱི་ཨ་ཀྲོ་བྱི་རཱ་ཛ་ཧཱུྃ། ཧཾ་ཧེ་རོ་ཏ་བག་ཛཿ ཛཿཧཱུྃ་བྃ་ཧོཿཧཱུྃ་ཛཿ ད་ནི་དབྱིངས་ནས་བཞེངས་སུ་གསོལ་ཏེ། ཧཱུྃ། བཅོམ་ལྡན་ཁྲག་འཐུང་ཁྲོ་རྒྱལ་གཤིན་རྗེའི་གཤེད། །བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས། །ཡུམ་ཆེན་ཨེ་ཀ་ཛཱ་ཊི་དབྱིངས་ནས་བཞེངས། །ཡུམ་ཆེན་སྲིན་མོ་མགོ་འཕྱང་དབྱིངས་ནས་བཞེངས། །ཐུགས་ཀྱི་སྲས་མཆོག་ཡབ་ཡུམ་དབྱིངས་ནས་བཞེངས། །མཐར་བྱེད་གཤིན་རྗེའི་ཚོགས་རྣམས་དབྱིངས་ནས་བཞེངས། །ཤ་ཟ་སྲིན་མོ་གིང་གི་ཚོགས་རྣམས་དབྱིངས་ནས་བཞེངས། །མ་མོ་ཁྲག་འཐུང་བདུད་ཀྱི་ཚོགས་རྣམས་དབྱིངས་ནས་བཞེངས། །བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས། །བསྐུལ་ལོ་བསྐུལ་ལོ་སེམས་ཅན་དོན་ལ་བསྐུལ། །མཛོད་ཅིག་མཛོད་ཅིག་བཅོལ་བའི་ཕྲིན་ལས་མཛོད། །ཛཿཧཱུྃ་བྃ་ཧོཿ ཨཱོྂ་ཨ་ཀྲོ་ཏེ་ཀ་ཡ་མཱནྟ་ཀ་ཡ་མ་རཱ་ཛ་ས་མ་ཡ་སྟྭཾ། འཁོར་གྱི་གིང་ཆེན་བཅོ་བརྒྱད་ས་ཡ་སྟྭཾ། ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ། སྤྱན་དྲངས་པ་ནི། ཧཱུྃ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་ཁྲོ་རྒྱལ་གཤིན་རྗེའི་གཤེད། །མཐིང་ནག་གྲུ་གསུམ་འབར་བའི་དཀྱིལ་འཁོར་ནས། །གཤིན་རྗེ་ཕོ་མོ་བསྒྱེལ་བའི་གདན་སྟེངས་སུ། །ཡབ་གཅིག་ཁྲོ་བོའི་རྒྱལ་པོ་གཤིན་རྗེའི་གཤེད། །འཇིགས་བྱེད་ཡ་མ་རཱ་ཛ་ཡབ་ཡུམ་དང་། །ཤ་ཟ་སྲིན་པོ་གིང་གི་ཚོགས་རྣམས་གཤེགས་སུ་གསོལ། །མ་མོ་ཁྲག་འཐུང་བདུད་ཀྱི་ཚོགས་རྣམས་གཤེགས་སུ་གསོལ། །སྐུ་མདོག་མཐིང་ནག་རལ་པ་གྱེན་དུ་འཁྱིལ། །རལ་པ་ཁམ་ནག་གྱེན་དུ་འཁྱིལ་བའི་ལྷས། །སུམ་ཅུ་རྩ་གསུམ་ལྷ་རྣམས་འདར་ལྕུག་ལྕུག །སྤྱན་དགུ་སྡང་མིག་གྱེན་དུ་ལྡོག་པ་ཡིས། །ཕྱོགས་བཅུའི་ཁྲོ་བོ་ཀུན་ཀྱང་གན་བུབ་འདྲེ། །སྨིན་མ་གློག་སྟོང་འོད་དུ་འབར་བ་ཡིས། །སྤྲུལ་པའི་ཕོ་ཉ་མང་པོས་སྲིད་གསུམ་འགེངས། །མཆེ་བ་ཟླ་ཚེས་དཀར་པོ་གཙིགས་པ་ཡིས། །སྡང་བའི་དགྲ་བོའི་སྲོག་རྩ་གཅོད་པར་མཛད། །ཞལ་ནས་ཁྲོ་བོའི་གད་རྒྱངས་སྒྲོགས་པ་ཡིས། །ཁམས་གསུམ་སྲིད་པ་གསུམ་པོ་འགུལ་ཞིང་ལྡེག །ཕྱག་དྲུག་མཚོན་ཆ་འབར་བས་དགྲ་བགེགས་སྒྲོལ། །ཐུགས་དམ་བསྐུལ་གྱིས་གནས་འདིར་གཤེགས་སུ་གསོལ། །འཇིགས་བྱེད་དེ་ཡི་ཐུགས་དམ་དགྱེས་བསྐུལ་མ། །ཨེ་ཀ་ཛཱ་ཊི་འཇིགས་བྱེད་དཔལ་གྱི་ཡུམ། །དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་མ་ཅིག་ལྷ་མོ་རྡོ་རྗེའི་དམ་ཚིག་ཅན། །སྐུ་སྟོད་གཡུ་ཡི་དྲིལ་བུ་འབུམ་གྱིས་བརྒྱན། །སྐུ་སྨད་སྟག་ལྤགས་རློན་པ་འབུམ་གྱིས་བརྒྱན། །གཡུ་ཡི་རལ་བས་དུར་ཁྲོད་ཁམས་ཀུན་ཁྱབ། །འཇིགས་བྱེད་ཡ་མ་རཱ་ཛའི་ཐུགས་དམ་བསྐང་ཕྱིར་གཤེགས་སུ་གསོལ། །དགྲ་བགེགས་རྩ་བ་དྲུང་ནས་འབྱིན་ཕྱིར་གཤེགས་སུ་གསོལ། །སྦྱོར་བའི་ཡུམ་མཆོག་བཛྲ་བེ་ཏ་ལི། །བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས། །ཁམ་ནག་གྲུ་གསུམ་འབར་བའི་དཀྱིལ་འཁོར་ནས། །འཇིགས་བྱེད་ཡ་མ་རཱ་ཛ་གཤེགས་སུ་གསོལ། །འཇིགས་བྱེད་དེ་ཡི་ཐུགས་དམ་དགྱེས་བསྐུལ་མ། །ཡུམ་གཅིག་མ་མོ་ཁྲག་མིག་གཤེགས་སུ་གསོལ། །ཡབ་ཡུམ་སྲས་བཅས་གནས་འདིར་གཤེགས་སུ་གསོལ། །བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས། །བསྐུལ་ལོ་བསྐུལ་ལོ་སེམས་ཅན་དོན་ལ་བསྐུལ། །མཛོད་ཅིག་མཛོད་ཅིག་བཅོལ་བའི་ཕྲིན་ལས་མཛོད། །ས་མ་ཡ་ཛཿཧཱུྃ་བྃ་ཧོ། ༀ་ས་མ་ཡ་ཨཱརྻ་མཉྫུ་ཤྲཱི་མུ་དྲ་ཡ་མཱནྟ་ཀ་པཉྩ་ཏེ་རོ་ནི་ཧཱུྃ་ཛཿ ཡ་མཱན་ཤ་ཡ་ཧཱུྃ་ཛཿཛཿ གུ་ཧྱ་ཨུ་ཏྲཾ་ཛཿཛཿ འདིར་ཡང་ཤ་ཁྲག་གི་མཆོད་པ་བྱེད་པ་ནི། གཉིས་སུ་མེད་པར་བསྟིམ་ལ། པྲ་བེ་ཤ་ཡ་ཕཊ། ཨ་བེ་ཤ་ཡ་ཨ་ཨ། ཞེས་གཉིས་སུ་མེད་པར་བསྟིམ་མོ། །ཧཱུྃ། མཐིང་ནག་གྲུ་གསུམ་འབར་བའི་གཞལ་ཡས་འདིར། །རུ་དྲ་གཤིན་རྗེ་བསྣོལ་བའི་གདན་སྟེངས་སུ། །མ་ཧེ་ཉི་ཟླ་པདྨའི་གདན་སྟེང་ན། །ཡ་མཱནྟ་ཀ་ཡབ་ཡུམ་འཁོར་དང་བཅས། །དགྱེས་ཤིང་མི་གཡོ་བརྟན་པར་བཞུགས་སུ་གསོལ། །ཟླ་གམ་དམར་པོ་དབང་གི་གཞལ་ཡས་ནས། །གཤིན་རྗེ་བྱོལ་སོང་བསྣོལ་བའི་གདན་སྟེངས་སུ། །ཡ་མ་རཱ་ཛ་ཡབ་ཡུམ་འཁོར་དང་བཅས། །དགྱེས་ཤིང་མི་འགྱུར་བརྟན་པར་བཞུགས་སུ་གསོལ། །ཨཱོཾ་ས་མ་ཡ་ཏིཥྛ་ལྷན། ཡེ་ཤེས་ལྷ་ལ་ཕྱག་འཚལ་བ་ནི། མི་གནས་མི་དམིགས་ཆོས་སྐུ་དག་པ་ལས། །བདུད་འདུལ་ཁྲོ་བོ་མཆོག་གི་སྐུར་སྤྲུལ་པ། །ཐུགས་རྗེ་གཟི་ལྡན་གདུག་པ་ཐབས་ཀྱིས་འདུལ། །ཁྲོ་རྒྱལ་གཤིན་རྗེའི་གཤེད་ལ་ཕྱག་འཚལ་ལོ། །འཇིགས་བྱེད་སྐུ་ལ་མཉེས་མཆོད་འབུལ་མཛད་མ། །སྒེག་མོ་རལ་གཅིག་གཤིན་རྗེའི་གཤེད་ཀྱི་ཡུམ། །མ་གཅིག་ཨེ་ཀ་ཛཱ་ཊིའི་སྐུ་ལ་ཕྱག་འཚལ་ལོ། །གཡོན་ནས་ཡུམ་གཅིག་ཁྲོ་མོ་རོ་ལངས་མ། །སྲིན་མོ་མགོ་འཕྱང་སྐུ་ལ་ཕྱག་འཚལ་ལོ། །ཡབ་ཡུམ་གཉིས་མེད་དགྱེས་པའི་སྲས་མཆོག་ནི། །ཡ་མ་རཱ་ཛའི་སྐུ་ལ་ཕྱག་འཚལ་ལོ། །གཤིན་རྗེའི་ཡུམ་ལ་རྣལ་འབྱོར་དགྲ་ལྷ་མོ། །མ་མོ་ཁྲག་མིག་སྐུ་ལ་ཕྱག་འཚལ་ལོ། །ཨ་ཏི་པཱུ་ཧོཿ པྲ་ཏཱིཙྪ་ཧོཿ ཕྱིའི་མཆོད་པ་འབུལ་བ་ནི། མགོན་པོ་གཤིན་རྗེ་འཁོར་བཅས་ལ། །ལྷ་རྫས་དམ་པའི་ཨརྒྷཾ་འབུལ། །ཨརྒྷཾ་པྲ་ཏཱིཙྪ་ཁཱ་ཧི། མགོན་པོ་གཤིན་རྗེ་འཁོར་འཁོར་བཅས་ལ། །ལྷ་རྫས་དམ་པའི་བདུག་སྤོས་འབུལ། །དྷཱུ་པེ་ཁཱ་ཧི། མགོན་པོ་གཤིན་རྗེ་འཁོར་བཅས་ལ། །ལྷ་རྫས་དམ་པའི་མེ་ཏོག་འབུལ། །པུཥྤེ་ཁཱ་ཧི། མགོན་པོ་གཤིན་རྗེ་འཁོར་བཅས་ལ། །ལྷ་རྫས་དམ་པའི་སྣང་གསལ་འབུལ། །ཨཱ་ལོ་ཀེ་ཁཱ་ཧི། མགོན་པོ་གཤིན་རྗེ་འཁོར་བཅས་ལ། །ལྷ་རྫས་དམ་པའི་དྲི་ཆབ་འབུལ། །གནྡྷེ་ཁཱ་ཧི། མགོན་པོ་གཤིན་རྗེ་འཁོར་བཅས་ལ། །ལྷ་རྫས་དམ་པའི་ཞལ་ཟས་འབུལ། །ནཻ་ཝི་དྱ་ཁཱ་ཧི། མགོན་པོ་གཤིན་རྗེ་འཁོར་བཅས་ལ། །ལྷ་རྫས་དམ་པའི་སྒྲ་སྙན་འབུལ། །ཤཔྡ་ཁཱ་ཧི། བླ་མེད་དམ་རྫས་མཆོག་ཏུ་སྦྱར་བའི་མཆོད་པ་དམ་པ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ལོངས་སྤྱོད་ཚོགས་ཀྱིས་རབ་བརྒྱན་པ། །མགོན་པོ་འཁོར་དང་བཅས་པས་བཞེས་སུ་གསོལ། །ས་མ་ཡ་མཉྫུ་ཤྲཱི་ཡ་མཱནྟ་ཀ་ཡ་མ་རཱ་ཛ་ཛཿ མ་མ་ཨེ་ཀ་ཛཱ་ཊི་མ་ཧཱ་བ་ལིཾ་ཏ་ཁཱ་ཧི། ཞེས་གཏོར་མ་འབུལ། དེ་ནས་ཤ་ཁྲག་གི་མཆོད་པ་ནི། ཧཱུྃ། ཤ་ཁྲག་དམར་གྱི་མཆོད་པ་ཆེན་པོ་འདི། །ཡབ་གཅིག་ཡ་མཱནྟ་ཀའི་ཞལ་དུ་ཁ་རཾ་ཁཱ་ཧི། །དགྲ་བགེགས་བཅོལ་གྱིས་ཡུད་ཙམ་ཕྲིན་ལས་མཛོད། །ཤ་ཁྲག་དམར་གྱི་མཆོད་པ་ཆེན་པོ་འདི། །སྲས་མཆོག་ཡ་མ་རཱ་ཛའི་ཞལ་དུ་ཁ་རཾ་ཁཱ་ཧི། དགྲ་བགེགས་བཅོལ་གྱིས་ཡུད་ཙམ་ཕྲིན་ལས་མཛོད། །ཤ་ཁྲག་དམར་གྱི་མཆོད་པ་ཆེན་པོ་འདི། །སྦྱོར་ཡུམ་བེ་ཏ་ནག་མོའི་ཞལ་དུ་ཁ་རཾ་ཁཱ་ཧི། །དགྲ་བགེགས་བཅོལ་གྱིས་ཡུད་ཙམ་ཕྲིན་ལས་མཛོད། །ཤ་ཁྲག་དམར་གྱི་མཆོད་པ་ཆེན་པོ་འདི། །སྒྲོལ་ཡུམ་ཨེ་ཀ་ཛཱ་ཊིའི་ཞལ་དུ་ཁ་རཾ་ཁཱ་ཧི། །དགྲ་བགེགས་བཅོལ་གྱིས་ཡུད་ཙམ་ཕྲིན་ལས་མཛོད། །ཤ་ཁྲག་དམར་གྱི་མཆོད་པ་ཆེན་པོ་འདི། །མ་མོ་ཁྲག་མིག་ཞལ་དུ་ཁ་རཾ་ཁཱ་ཧི། །དགྲ་བགེགས་བཅོལ་གྱིས་ཡུད་ཙམ་ཕྲིན་ལས་མཛོད། །ཤ་ཁྲག་དམར་གྱི་མཆོད་པ་ཆེན་པོ་འདི། །འཁོར་གྱི་གིང་ཆེན་རྣམས་ཀྱི་ཞལ་དུ་ཁ་རཾ་ཁཱ་ཧི། །དགྲ་བགེགས་བཅོལ་གྱིས་ཡུད་ཙམ་ཕྲིན་ལས་མཛོད། །མ་ཧཱ་མཱཾ་ས་ཁཱ་ཧི། མ་ཧཱ་རཀྟ་ཁཱ་ཧི། མ་ཧཱ་ཙིཏྟ་ཁཱ་ཧི། མ་ཧཱ་བ་སུ་ཏ་ཁཱ་ཧི། མ་ཧཱ་གོ་རོ་ཙ་ན་ཁཱ་ཧི། སྨན་གྱི་མཆོད་པ་ནི། ཧཱུྃ། རང་བྱུང་གདོད་ནས་དག་པ་སྟེ། །རྩ་བརྒྱད་སྟོང་ལས་སྦྱར་བའི་སྨན། །རྩ་བ་འབུམ་ཕྲག་ཡངས་པའི་བཅུད། །ར་ས་ཡ་ན་ལ་སོགས་རྫས། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་སྒྲུབ་པའི་རྫས། །རྒྱུད་དྲུག་སེམས་ཅན་ཀུན་སྒྲོལ་ཕྱིར། །དུག་ལྔ་སེལ་བའི་བདུད་རྩི་འདི། །ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའི་ཚོགས་བཅས་ཀྱིས། །ཐུགས་དམ་དབྱིངས་མཆོག་བསྐང་བའི་ཕྱིར། །སྐུ་གསུང་ཐུགས་ཀྱི་བདག་ཉིད་འདི། །བདག་གི་དད་པས་འབུལ་ལགས་ན། །བཞེས་ཏེ་ཀུན་ཏུ་དགྱེས་མཛོད་ལ། །འཕྲུལ་གྱི་དངོས་གྲུབ་སྩལ་དུ་གསོལ། །ༀ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱཿ ཧཱུྃ། རྩ་བརྒྱད་སྟོང་ལས་སྦྱར་བའི་དགྱེས་མཆོད་དམ་པ་འདི། །ལྷ་མཆོག་ཡ་མཱནྟ་ཀའི་ཞལ་དུ་ཁཱ་རཾ་མ་ཧཱ་ཨ་མྲྀ་ཏ་ཁཱ་ཧི་ཟེར། ཁཱ་ཧི། བཞེས་ནས་མཐུ་དང་རྩལ་གྱི་དངོས་གྲུབ་སྩལ་དུ་གསོལ། །སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། རྩ་བརྒྱད་སྟོང་ལས་སྦྱར་བའི་དགྱེས་མཆོད་དམ་པ་འདི། །ཡུམ་ཆེན་ཨེ་ཀ་ཛཱ་ཊིའི་ཞལ་དུ་ཁ་རཾ་ཁཱ་ཧི། བཞེས་ནས་མཐུ་དང་རྩལ་གྱི་དངོས་གྲུབ་སྩལ་དུ་གསོལ། །སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། རྩ་བརྒྱད་སྟོང་ལས་སྦྱར་བའི་དགྱེས་མཆོད་དམ་པ་འདི། །ཡུམ་ཆེན་རོ་ལངས་མ་ཡི་ཞལ་དུ་ཁ་རཾ་ཁཱ་ཧི། །བཞེས་ནས་མཐུ་དང་རྩལ་གྱི་དངོས་གྲུབ་སྩལ་དུ་གསོལ། །སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། རྩ་བརྒྱད་སྟོང་ལས་སྦྱར་བའི་དགྱེས་མཆོད་དམ་པ་འདི། །ཡ་མ་རཱ་ཛའི་ཞལ་དུ་ཁ་རཾ་ཁཱ་ཧི། བཞེས་ནས་མཐུ་དང་རྩལ་གྱི་དངོས་གྲུབ་སྩལ་དུ་གསོལ། སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། རྩ་བརྒྱད་སྟོང་ལས་སྦྱར་བའི་དགྱེས་མཆོད་དམ་པ་འདི། །མ་མོ་ཁྲག་མིག་མ་ཡི་ཞལ་དུ་ཁ་རཾ་ཁཱ་ཧི། །བཞེས་ནས་མཐུ་དང་རྩལ་གྱི་དངོས་གྲུབ་སྩལ་དུ་གསོལ། །སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི། སྡོམ་ལ་གནས་ཤིང་རིག་འཛིན་བརྒྱུད་པར་བཅས། །ཡང་དག་ལམ་སྟོན་ཐར་ལམ་སྟོན་བྱེད་པའི། །ངེས་པའི་དོན་སྟོན་རྡོ་རྗེ་སློབ་དཔོན་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །རྒྱལ་ཐེབས་ཅན་དང་ཀརྨ་གིང་ལ་སོགས། །ཤེས་པའི་རིམ་པ་ཁྱབ་པའི་དབང་བསྐུར་བའི། །རྒྱལ་བའི་གདུང་འཚོབ་མཆེད་དང་ལྕམ་དྲལ་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ལས་ཀྱི་འཆི་བདག་ཡབ་ཡུམ་གྱི་ཞལ་དུ་ཁ་རཾ་ཁཱ་ཧི། ཞེ་སྡང་ལས་གྲུབ་པའི་གཤེད་པོ་བཞི་ཡི་ཞལ་དུ་ཁ་རཾ་ཁཱ་ཧི། འདོད་ཆགས་ལས་གྲུབ་པའི་གཤེད་མོ་བཞི་ཡི་ཞལ་དུ་ཁ་རཾ་ཁཱ་ཧི། གྲི་ཐོགས་ཀྱི་གིང་ཆེན་བཅོ་བརྒྱད་ཀྱི་ཞལ་དུ་ཁ་རཾ་ཁཱ་ཧི། ཁྲམ་ཐོགས་ཀྱི་བདུད་པོ་བཅུ་གཉིས་ཀྱི་ཞལ་དུ་ཁ་རཾ་ཁཱ་ཧི། མདངས་ལེན་གྱི་མ་མོ་སྟོང་རྩ་བརྒྱད་ཀྱི་ཞལ་དུ་ཁ་རཾ་ཁཱ་ཧི། ཆོས་སྐྱོང་བའི་སྲུང་མ་གཞན་ལའང་འབུལ་ལོ། །དེ་ནས་དངོས་གྲུབ་བླང་བ་ནི། བདུད་རྩིའི་ནང་དུ་ༀ་ཨཱཿཧཱུྃ་གསུམ་བསྒོམ་སྟེ། མཐེབ་སྲིན་གཉིས་ཐབས་ཤེས་རབ་ཀྱི་ཉི་མ་དང་ཟླ་བའི་དཀྱིལ་འཁོར་དུ་བསྒོམ། ཨཱོྂ། སྐུ་ཡི་དམ་ཚིག་རྡོ་རྗེ་ལ་ཟེར་བའང་འདུག །གསུང་གི་ཐུགས་ཀྱི་རྣམས་འགྲེ། སྤྱི་བོའི་རྡོ་རྗེའི་དམ་ཚིག་ལ། །རྡོ་རྗེ་ཅན་གྱི་ཨཱོྂ་བསྒོམ་སྟེ། །བདུད་རྩི་ལྔ་ཡི་སྦྱོར་བ་ཡིས། །ཟོས་ན་རྡོ་རྗེའི་སྐུ་ཐོབ་འགྱུར། །ཨཱོྂ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྩ་ཧཱུྃ་ཕཊ། ཀཱ་ཡ་སིདྡྷི་ཨཱོྂ། ཞེས་པས་ཨཱོྂ་དེ་ཏོག་གིས་བླངས་ནས་སྤྱི་བོར་བསྒོམས་པས་དེ་ལས་འོད་ཟེར་ཕྱོགས་བཅུར་འཕྲོས་པས་དེ་བཞིན་གཤེགས་པ་ཐམས་ཅད་ཀྱི་སྐུའི་རང་བཞིན་བྱིན་རླབས་ཐམས་ཅད་འུབས་སེ་བསྡུས་ཏེ་སྤྱི་བོར་ཐིམ་པས་སྐུའི་དངོས་གྲུབ་ཐམས་ཅད་ཐོབ་པར་བསྒོམ། ཨཱཿ ལྕེ་ཡི་རྡོ་རྗེའི་དམ་ཚིག་ལ། །རྡོ་རྗེ་ཅན་གྱི་ཨཱཿབསྒོམ་སྟེ། །བདུད་རྩི་ལྔ་ཡི་སྦྱོར་བ་ཡིས། །ཟོས་ན་རྡོ་རྗེའི་གསུང་ཐོབ་འགྱུར། །ཨཱོྂ་ཀཱ་ལ་རཱུ་པ་ཧཱུྃ་ཨཱཿ ཝཱ་ཀ་སིདྡྷི་ཨཱཿ ཞེས་པས་ཨཱཿདེ་བླངས་ནས་ལྕེའི་སྟེང་དུ་བསྒོམས་པ་ལས། འོད་ཟེར་ཕྱོགས་བཅུར་འཕྲོས་པས་དེ་བཞིན་གཤེགས་པའི་གསུང་གི་བྱིན་རླབས་ཐམས་ཅད་བསྡུས་ནས་ཨཱཿལ་ཐིམ་པས་གསུང་གི་དངོས་གྲུབ་ཐོབ་པར་བསྒོམ། ཧཱུྃ། སྙིང་གི་རྡོ་རྗེའི་དམ་ཚིག་ལ། །རྡོ་རྗེ་ཅན་གྱི་ཧཱུྃ་བསྒོམ་སྟེ། །བདུད་རྩི་ལྔ་ཡི་སྦྱོར་བ་ཡིས། །ཟོས་ན་རྡོ་རྗེའི་ཐུགས་ཐོབ་འགྱུར། །ཨཱོྂ་ཧྲཱིཿཥྚི་ཝཱི་ཀྲི་ཏཱ་ན་ན་ཧཱུྃ་ཕཊ། ཙིཏྟ་སིདྡྷི་ཧཱུྃ། ཞེས་པས་ཧཱུྃ་དེ་བླངས་ནས་སྙིང་གར་བསྒོམས་པས་དེ་ལས་འོད་ཟེར་ཕྱོགས་བཅུར་འཕྲོས། དེ་བཞིན་གཤེགས་པའི་ཐུགས་ཀྱི་དངོས་གྲུབ་ཐམས་ཅད་བསྡུས་ནས་བདག་གི་སྙིང་གར་ཐིམ་པས་ཐུགས་ཀྱི་དངོས་གྲུབ་ཐམས་ཅད་ཐོབ་པར་བསྒོམ། དེ་ནས་སྦྱོར་བའི་མཆོད་པ་འབུལ་བ་ནི། ཧཱུྃ། འཁྲིལ་བྱེད་མཆོད་པས་མཉམ་སྦྱོར་བའི། །ལྷ་དང་ལྷ་མོ་ཇི་སྙེད་པ། །དཀྱིལ་འཁོར་ཉིད་ལ་རྫོགས་པར་ཐིམ། །གསང་མཆོད་དམ་པ་བཞེས་སུ་གསོལ། །ཧཱུྃ། འདོད་ཆགས་ཐུགས་རྗེ་ཆེན་པོ་སྟེ། །འཛིན་པ་ཉིད་ཀྱི་མདངས་ལྡན་པས། །ལྷ་ཀླུ་རིག་འཛིན་མི་མོ་ལ། །དགོས་འདོད་ཆགས་པ་བསྟིམ་པར་བྱོས། །འཁྲིལ་ཞིང་མཉམ་སྦྱོར་འཁྱུད་པས་ན། །སྒྱུ་འཕྲུལ་དྲྭ་བའི་ཚུལ་བསྟན་པའི། །ཟླ་གསང་ཐིག་ལེ་གནས་པས་ནི། །བདེ་ཆེན་མཆོད་པས་མཉེས་གྱུར་ཅིག །གང་ཡང་གཟུགས་དང་ལྡན་པ་ཡི། །ཁམས་གསུམ་ཆགས་པའི་བདེ་བ་འདི། །ཟག་མེད་ཡེ་ཤེས་འབྱུང་བའི་གནས། །ཡབ་ཡུམ་དགྱེས་པར་ཚིམ་གྱུར་ཤོག །དེ་ནས་སྒྲོལ་བའི་མཆོད་པ་འབུལ་བ་ནི། ཧཱུྃ། འཇིགས་བྱེད་ཆེན་པོ་ལུང་སྩལ་ལྟར། །ལྔ་བརྒྱ་དུས་ཀྱི་ཐ་མ་ལ། །བསྟན་པ་གཉན་པོ་བདག་རང་འཛིན། །སྒྲོལ་བ་ཁོ་ན་མཆོག་ཡིན་ནོ། །གང་ཞིག་སངས་རྒྱས་སྐུ་འཇིག་ཅིང་། །ཐེག་མཆོག་ཆ ོས་ལ་སྨོད་པ་དང་། །འཇམ་དཔལ་ལྷ་མཆོག་སྒོམ་ལ་སྡང་། །དེ་ནི་བདག་གིས་བསྒྲལ་བར་འོས། །གཞན་ཡང་བསད་པའི་ཞིང་བསྟན་པ། །གསང་སྔགས་འཛིན་པའི་དགྲར་གྱུར་དང་། །བླ་མ་ལ་གཤེ་སྡིག་ལ་དགའ། །ཞིང་བཅུ་གང་ཡིན་འདིར་བཀུག་ནས། །མངོན་སྤྱོད་ཚུལ་བཞིན་བསྒྲལ་བ་དང་། །རྡུལ་ཆ་ཕྲ་མོ་བཤིགས་པར་མཛོད། །ཧཱུྃ། ཡ་མཱནྟ་ཀའི་ཞལ་དུ་བསྟབ། །གཤིན་རྗེའི་ལྷ་ཚོགས་ཞལ་དུ་བསྟབ། །མ་ཧཱ་མཱཾ་ས་ཁཱ་ཧི། དེ་ནས་རྩ་བའི་ལྷ་ལྔ་ལ་བསྟོད་པ་ནི། འདི་སྐད་དོ། །ཧཱུྃ། གཏི་མུག་ཚུལ་གྱིས་གཏི་མུག་འཇོམས་མཛད་པ། །གཏི་མུག་ཆེན་པོ་གཤིན་རྗེའི་གཤེད་ཀྱི་སྐུ། །བདེ་གཤེགས་རྒྱལ་བའི་སྐུ་རྣམས་འདུས་པའི་བདག །ལུས་ཀྱི་དབང་པོའི་བག་ཆགས་རྒྱུན་སྦྱོང་ཞིང་། །ཆོས་ཀྱི་དབྱིངས་ཀྱི་ཡེ་ཤེས་སྐུར་སྣང་བའི། །ཡ་མཱནྟ་ཀའི་སྐུ་ལ་ཕྱག་འཚལ་བསྟོད། །ཧཱུྃ། ཞེ་སྡང་ཚུལ་གྱིས་ཞེ་སྡང་འཇོམས་མཛད་པ། །ཞེ་སྡང་ཆེན་མོ་ཨེ་ཀ་ཛཱ་ཊིའི་སྐུ། །བདེ་གཤེགས་རྒྱལ་བའི་ཐུགས་རྣམས་འདུས་པའི་བདག །ཡིད་ཀྱི་རྣམ་ཤེས་བག་ཆགས་རྒྱུན་སྦྱོང་ཞིང་། །མེ་ལོང་ལྟ་བུའི་ཡེ་ཤེས་སྐུར་སྣང་བའི། །ཨེ་ཀ་ཛཱ་ཊིའི་སྐུ་ལ་ཕྱག་འཚལ་བསྟོད། །ཧཱུྃ། ང་རྒྱལ་ཚུལ་གྱིས་ང་རྒྱལ་འཇོམས་མཛད་པ། །ང་རྒྱལ་ཆེན་པོ་ཡ་མ་རཱ་ཛའི་སྐུ། །བདེ་གཤེགས་རྒྱལ་བའི་ཡོན་ཏན་འདུས་པའི་བདག །ཀུན་གཞིའི་རྣམ་ཤེས་བག་ཆགས་རྒྱུན་སྦྱོང་ཞིང་། །མཉམ་པ་ཉིད་ཀྱི་ཡེ་ཤེས་སྐུར་སྣང་བའི། །ཡ་མ་རཱ་ཛའི་སྐུ་ལ་ཕྱག་འཚལ་བསྟོད། །ཧཱུྃ། འདོད་ཆགས་ཚུལ་གྱིས་འདོད་ཆགས་འཇོམས་མཛད་པ། །འདོད་ཆགས་ཆེན་མོ་རོ་ལངས་གསང་བའི་སྐུ། །བདེ་གཤེགས་རྒྱལ་བའི་གསུང་རྣམས་འདུས་པའི་བདག །ངག་གི་དབང་པོའི་བག་ཆགས་རྒྱུན་སྦྱོང་ཞིང་། །སོ་སོར་རྟོག་པའི་ཡེ་ཤེས་སྐུར་སྣང་བའི། །རོ་ལངས་གསང་བའི་སྐུ་ལ་ཕྱག་འཚལ་བསྟོད། །ཧཱུྃ། ཕྲག་དོག་ཚུལ་གྱིས་ཕྲག་དོག་འཇོམས་མཛད་པ། །ཕྲག་དོག་ཆེན་པོ་མ་མོ་ཁྲག་མིག་སྐུ། །བདེ་གཤེགས་རྒྱལ་བའི་ཕྲིན་ལས་འདུས་པའི་བདག །སྒོ་ལྔའི་རྣམ་ཤེས་བག་ཆགས་རྒྱུན་སྦྱོང་ཞིང་། །བྱ་བ་གྲུབ་པའི་ཡེ་ཤེས་སྐུར་སྣང་བའི། །མ་མོ་ཁྲག་མིག་སྐུ་ལ་ཕྱག་འཚལ་བསྟོད། །དངོས་གྲུབ་ཀྱི་སྣོད་དུ་རུང་བའི་ཕྱིར་བཤགས་པ་བྱའོ། །ཧཱུྃ། བདག་ཅག་རང་རིག་ཡེ་ཤེས་བློ་དང་མ་ལྡན་པས། །རྟགས་དང་མཚན་མ་མྱུར་དུ་མ་ཕྱིན་ཏེ། །ལྷ་མཆོག་ཡ་མཱནྟ་ཀའི་ཐུགས་དང་ཅི་འགལ་བ། །ཁྲོ་གཏུམ་ཐུགས་རྗེ་ཅན་ལ་བཟོད་པར་གསོལ། །བདག་ཅག་རང་རིག་ཡེ་ཤེས་བློ་དང་མ་ལྡན་པས། །རྟགས་དང་མཚན་མ་མྱུར་དུ་མ་ཕྱིན་ཏེ། །ཡུམ་གཅིག་ཨེ་ཀ་ཛཱ་ཊིའི་ཐུགས་དང་ཅི་འགལ་བ། །དབྱིངས་ལྡན་ཆགས་པ་མེད་པའི་སྐུ་ལ་བཟོད་པར་གསོལ། །བདག་ཅག་རང་རིག་ཡེ་ཤེས་བློ་དང་མ་ལྡན་པས། །རྟགས་དང་མཚན་མ་མྱུར་དུ་མ་ཕྱིན་ཏེ། །ཡུམ་ཆེན་རོ་ལངས་ནག་མོའི་ཐུགས་དང་ཅི་འགལ་བ། །འདོད་ཆགས་དགྱེས་མའི་སྐུ་ལ་བཟོད་པར་གསོལ། །བདག་ཅག་རང་རིག་ཡེ་ཤེས་བློ་དང་མ་ལྡན་པས། །རྟགས་དང་མཚན་མ་མྱུར་དུ་མ་ཕྱིན་ཏེ། །སྲས་མཆོག་ཡ་མ་རཱ་ཛའི་ཐུགས་དང་ཅི་འགལ་བ། །སྐུ་ཆེ་ཡན་ལག་རགས་ལ་བཟོད་པར་གསོལ། །བདག་ཅག་རང་རིག་ཡེ་ཤེས་བློ་དང་མ་ལྡན་པས། །རྟགས་དང་མཚན་མ་མྱུར་དུ་མ་ཕྱིན་ཏེ། །ལྷ་མོ་ནག་མོའི་ཐུགས་དང་ཅི་འགལ་བ། །ཁྲོས་མ་སྲིད་གསུམ་སྒྲོལ་ལ་བཟོད་པར་གསོལ། །ཡི་གེ་བརྒྱ་པ་ཅི་ནུས་བཟླས། དེ་ནས་སྐུའི་ཆ་ལུགས་ལ་རྒྱས་པར་བསྟོད་པ་ནི། ཡབ་གཅིག་ལྷ་ཡི་རྒྱལ་པོ་གཤེད་མཛད་ལྷ། །ཡབ་གཅིག་སྐུ་ཡི་ཆ་ལུགས་འཇིགས་པར་སྟོན། །གཤིན་རྗེའི་སྐུ་ནི་འབར་བའི་རྒྱལ་པོ་སྟེ། །ཤིན་ཏུ་བརྗིད་ཅིང་གཏུམ་རྔམས་དྲག་ཤུལ་ཆེ། །ཁྱེད་ལ་བདག་གིས་བསྟོད་ཅིང་མཆོད་འབུལ་ན། །བདག་ལ་ཁྱོད་ཀྱིས་ཡུན་དུ་གྲོགས་མཛོད་ཅིག །བདག་གིས་ཁྱོད་ལ་རྟག་ཏུ་མཆོད་འབུལ་ན། །བདག་གི་དགྲ་རྣམས་ཁྱེད་ཀྱིས་ཐལ་བར་རློགས། །ཁྱོད་ཀྱི་ཐུགས་རྗེ་བྲེང་བྲེང་རྩེ་གཅིག་རྒྱུན་མ་ཐུང་། །ཁྱོད་ཀྱིི་ཐུགས་རྗེ་དམ་པས་འདིར་གཤེགས་ཤིག །བཅོམ་ལྡན་ཡ་མཱནྟ་ཀ་སྐུ་ཡི་ཆ་ལུགས་ནི། །ཤིན་ཏུ་ངོ་མཚར་གཤིན་རྗེ་དཔའ་ལ་བརྗིད། །ཁྲོ་རྒྱལ་དཔའ་བརྗིད་འབར་བས་དགྲ་བགེགས་འདུལ། །ཡབ་གཅིག་ལྷ་ཡི་རྒྱལ་པོ་གཤིན་རྗེའི་གཤེད་མཛད་ལྷ། །གཤིན་རྗེ་དཔའ་བརྗིད་དྲེགས་པའི་ཚུལ་གྱིས་མ་མོ་འདུལ། །གཤིན་རྗེའི་གཤེད་ཀྱིས་ཡུན་གྱི་ལྷ་མཛོད་ཅིག །འཇམ་དཔལ་གཤིན་རྗེའི་གཤེད་ནི་དྲེགས་པའི་བརྗིད་དང་ལྡན། །མ་མོ་ཀུན་ལ་འཇམ་དཔལ་དབང་བསྒྱུར་ཞིང་། །རྟག་ཏུ་ལྷ་མཆོག་བདག་ལ་གྲོགས་མཛོད་ཅིག །སྲིན་མོ་ཤ་ཟ་སྟོང་ནི་བྲན་དུ་འཁོལ། །གིང་ཆེན་གིང་ལྕམ་རྣམས་ནི་ཕོ་ཉར་འགྱེད། །ཀླུ་རྒྱལ་ཕོ་མོ་རྣམས་ནི་སྐུ་ཡི་རྒྱན་དུ་བྱས། །ཤ་ཟ་གདུག་བྱེད་རྣམས་ཀྱི་ཆས་རྣམས་དག་པར་སྟོན། །འཇམ་དཔལ་གཤིན་རྗེའི་གཤེད་ནི་གདུག་པའི་ང་རོ་ཅན། །ཁྲོ་མོ་ཡུམ་ཆེན་རྣམས་དང་བཅས་ཏེ་སྐུ་སྟོན་ཅིག །འཇམ་དཔལ་སྐུ་ཡི་ཐུགས་རྗེས་བདག་ལ་དགོངས། །བཅོམ་ལྡན་གཤིན་རྗེའི་རྒྱལ་པོ་སྐུ་བསྐྱོད་ཅིག །འཇམ་དཔལ་སྐུ་བསྐྱོད་བདག་ལ་གྲོགས་མཛོད་ཅིག །གཡས་ནས་ཡུམ་བསྐྱེད་ཨེ་ཀ་ཛཱ་ཊི་མ། །གཡོན་ནས་ཡུམ་བསྐྱེད་བཛྲ་བེ་ཏ་ལི། །གཉིས་ཀའི་སྐུ་ནི་དབུས་ཀྱི་གཙོ་དང་མཐུན། །ཧཱུྃ། ཡབ་གཅིག་འཇམ་དཔལ་དབུ་ཡི་རྒྱན་གྱི་ཆ་ལུགས་ནི། །དབུ་གསུམ་མཐིང་ནག་ཞེ་སྡང་འབར་བའི་དབུ། །དུས་གསུམ་སངས་རྒྱས་ཡེ་ཤེས་ཡིན་པའི་ཕྱིར། །ཐོད་སྐམ་ཐོད་རློན་ཕྲེང་བ་ཆེན་པོ་ཡིས། །དབུ་རྒྱན་མཛེས་དང་སེ་རལ་ཁ་རུ་བརྒྱན། །ཡབ་གཅིག་འཇམ་དཔལ་དབུ་སྐྲའི་ཆ་ལུགས་ནི། །དབུ་སྐྲ་ཁམ་ནག་རལ་པ་སྲིད་རྩེར་འབར། །ཡབ་གཅིག་འཇམ་དཔལ་སྤྱན་གྱི་ཆ་ལུགས་ནི། །སྤྱན་གསུམ་གཟིགས་པས་བསྐལ་པའི་མེ་དཔུང་འབར། །ལས་ཀྱི་ཁྲོ་གཉེར་བསྟན་པས་ཤིན་ཏུ་འབར། །ཡབ་གཅིག་འཇམ་དཔལ་སྙན་གྱི་ཆ་ལུགས་ནི། །སྙན་ནས་བསྐལ་པའི་འབྲུག་སྟོང་དི་རི་རི། །ཡབ་གཅིག་འཇམ་དཔལ་ཤངས་ཀྱི་ཆ་ལུགས་ནི། །བསྐལ་པའི་བག་ཆགས་འཐོར་བྱེད་རླུང་ནག་འཚུབས། །ཡབ་གཅིག་འཇམ་དཔལ་ཞལ་གྱི་ཆ་ལུགས་ནི། །ཉོན་མོངས་བག་ཆགས་འཁྲུ་བྱེད་ཁྲག་གི་རྦ་རླབས་འཁྱིལ། །ཡབ་གཅིག་འཇམ་དཔལ་ཚེམས་ཀྱི་ཆ་ལུགས་ནི། །ཉོན་མོངས་དུག་གསུམ་མ་ལུས་རྩད་ནས་གཅོད། །ཡབ་གཅིག་འཇམ་དཔལ་ཕྱག་མཚན་ཆ་ལུགས་ནི། །གཡས་ཀྱི་དང་པོས་གདུག་པ་འདུལ་བྱེད་ཞིང་དབྱུག་བསྣམས། །བར་མས་གཅོད་ཅིང་གཏུབ་པའི་དགྲ་སྟྭ་བསྣམས། །ཐ་མས་ཉོན་མོངས་སྒྲོལ་བྱེད་རལ་གྲི་བསྣམས། །གཡོན་གྱི་དང་པོས་གདུག་པ་འདུལ་བྱེད་ཁྲོ་མཛུབ་ཞགས་པ་བསྣམས། །བར་མས་ཞེ་སྡང་འབུགས་བྱེད་མདུང་ཐུང་བསྣམས། །ཐ་མས་ཐུགས་རྗེ་ཆགས་པའི་ཐོད་ཁྲག་བསྣམས། །ཡབ་གཅིག་འཇམ་དཔལ་གདུག་པའི་ཞབས་དྲུག་འགྱིང་སྟབས་ནི། །ཞབས་གཉིས་གྱད་ཀྱི་འདོར་སྟབས་ཤ་ཟ་སྲིན་པོ་འདུལ། །ཞབས་གཉིས་གྱད་ཀྱི་འདོར་སྟབས་མ་མོ་ཁྲག་འཐུང་འདུལ། །ཞབས་གཉིས་བརྐྱང་བསྐུམ་ཚུལ་གྱིས་ཆོས་ཀྱི་དབྱིངས་དང་སྦྱོར། །ཡབ་གཅིག་འཇམ་དཔལ་སྐུ་ཡི་རྒྱན་གྱི་ཆ་ལུགས་ནི། །སྐུ་སྟོད་ཞེ་སྡང་གནག་ཕྱིར་གླང་ཆེན་ཀོ་རློན་དང་། །ཞིང་ལྤགས་སྟོང་གི་གཡང་གཞི་སྐུ་ལ་གསོལ། །སྐུ་སྨད་གདུག་པ་བསྒྲལ་ཕྱིར་སྟག་གི་ཤམ་ཐབས་ཅན། །ཐོད་སྐམ་ཉི་ཟླས་མཚན་པའི་དབུ་རྒྱན་ཅན། །ཐོད་རློན་ཕྲེང་བས་སེ་རལ་ཁ་རུ་བརྒྱན། །སྦྲུལ་ནག་སྟོང་གིས་སྐེད་ཆིངས་ཅན། །རིགས་བཞི་ཀླུ་ཡི་གདེངས་ཀ་ཅན། །བསྐལ་པའི་མེ་ལྟར་འབར་བའི་ཀློང་དཀྱིལ་ན། །མ་ཧེའི་གདན་ལ་བརྐྱང་བསྐུམ་ཚུལ་དུ་བཞུགས། །ཧཱུྃ་དང་ཕཊ་ཀྱི་སྒྲ་ནི་འབྲུག་སྟོང་ལྡིར། །འཇིགས་བྱེད་རྔམས་པས་གདུག་པ་མ་ལུས་འདུལ། །ཁྲོ་རྒྱལ་གཤིན་རྗེ་གཤེད་ལ་ཕྱག་འཚལ་བསྟོད། །སྡང་བའི་དགྲ་བོ་ཐལ་བའི་རྡུལ་དུ་རློགས། །རྟགས་བསྟོད་ལ་སོགས་པའང་བྱའོ། །བཟླས་པའི་རིམ་པ་ནི་མངོན་རྟོགས་དང་རྩ་བར་གསལ། །བཟླས་པ་ཚར་ནས་ཡི་དམ་ལ་གཏོར་མ་དབུལ་ཞིང་། །བསྟོད་པ་བྱ་བ་ནི། ལས་ཀྱི་གཤིན་རྗེ་གཤེད་པོ་བཞི་དང་། ཕྱོགས་སྐྱོང་གི་གཤིན་རྗེ་རྣམས་ཀྱིས་གཤིན་རྗེའི་གཤེད་ལ་བསྐོར་བ་ལན་སྟོང་དུ་བྱས་ནས་བསྟོད་པ་ནི། ཧཱུྃ། འཇམ་དབྱངས་ཁྲོ་བོ་དཔལ་ལྡན་གཤིན་རྗེའི་གཤེད། །ཆོས་ཉིད་མི་འགྱུར་སྐུ་མདོག་མཐིང་ནག་འབར། །དཔའ་བར་མཛད་པའི་དུར་ཁྲོད་ཆས་བརྒྱད་གསོལ། །མི་མཐུན་བརྗིད་པའི་དབུ་གསུམ་བསྟན་པ་ནི། །ལས་ལ་འཛུད་མཛད་དབང་དྲག་ཞི་བར་མཛད། །དགྲ་བགེགས་འདུལ་མཛད་མཚོན་ཆ་སྣ་ཚོགས་བསྣམས། །ལྷ་སྲིན་འདུལ་མཛད་ཁྲོ་གཉེར་མཆེ་བ་གཙིགས། །ཆགས་པ་མ་སྤངས་སྦྱོར་ཡུམ་སྐུ་ལ་འཁྲིལ། །ཞེ་སྡང་མེ་འབར་སྒྲོལ་ཡུམ་དགྲ་སྙིང་སྟོབ། །དགྲ་བགེགས་འདུལ་མཛད་འཁོར་རྣམས་ཕོ་ཉར་འགྱེད། །ཐམས་ཅད་དབང་དུ་སྡུད་ཅིང་དྲག་སྔགས་བརྗོད། །དཔའ་བརྗིད་གཤིན་རྗེའི་གཤེད་ལ་ཕྱག་འཚལ་བསྟོད། །མཆོད་པ་བསྡུས་པ་རེ་བྱ། རྒྱས་བསྡུས་འབྲིང་གསུམ་སྐབས་དང་སྦྱར། །ལས་གཤིན་སྤྱན་དྲངས་བཞུགས་སུ་གསོལ། །དེ་ནས་ཡི་དམ་ཆོས་སྐྱོང་ལ། །ཚོགས་མཆོད་ཕུལ་ལ་བསྐང་བ་འདོན། །བསྟབ་པ་བྱས་ནས་ཚོགས་ལ་རོལ། །ལྷག་མའང་བྱེད། དེ་ནས་ལས་གཤིན་ལ་གཏོར་མ་ཕུལ་ལ་བསྟོད་པར་བྱའོ། །ཚོགས་དང་བསྐང་བ་ལས་གཤིན་གྱི་གཏོར་ཆོག་རྣམས་ནི་གཞན་དུ་གསལ། སྨོན་ལམ་ནི། སངས་རྒྱས་ཐམས་ཅད་ཀྱི་སྐུའི་དངོས་གྲུབ་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་། འོད་འདོམ་གང་བ་དང་། མ་འདྲེས་པའི་ཡོན་ཏན་བརྒྱ་བཞི་བཅུ་དང་། ཞལ་སྨིན་མཚམས་ཀྱི་མཛོད་སྤུས་བརྒྱན་པ་དང་། སྐུ་ཆེ་བའི་ཡོན་ཏན་བསམ་གྱིས་མི་ཁྱབ་པ་ལྡན་པར་གྱུར་ཅིག །གསུང་གི་དངོས་གྲུབ་གསུང་དབྱངས་ཡན་ལག་དྲུག་ཅུ་དང་ལྡན་པར་གྱུར་ཅིག །ཐུགས་ཀྱི་དངོས་གྲུབ་རྣམ་པ་ཐམས་ཅད་མཁྱེན་པའི་ཡེ་ཤེས་དང་ལྡན་པར་གྱུར་ཅིག །ཅེས་པ་བསྐང་བ་བཏོན་རྟིང་བྱའོ། །ལས་གཤིན་གྱི་གཏོར་མའི་གོང་དུའོ། །དེ་ནས་ཡེ་ཤེས་ཀྱི་ལྷ་འགྲོ་བ་སེམས་ཅན་གྱི་དོན་དུ་བསྐུལ་བ་ནི། གཏོར་མ་དཔགས་ལ་དམར་སྦྲེང་། གསུར་ཆེན་དང་རོལ་མོའི་སྒྲ་དྲག་ཏུ་བྱེད། རྔམས་པའི་དབྱངས་དང་བཅས་པས་འདི་སྐད་དོ། །ཧཱུྃ། བཅོམ་ལྡན་དཔལ་ཆེན་ཁྲོ་རྒྱལ་གཤིན་རྗེའི་གཤེད། །ཆོས་ཉིད་ཞི་བའི་ངང་ལས་མ་གཡོས་ཀྱང་། །གདུག་པ་འདུལ་ཕྱིར་ཁྲོ་རྒྱལ་སྐུར་སྤྲུལ་པ། །དབུ་གསུམ་ཕྱག་དྲུག་ཞབས་བཞི་བགྲད་པ་ནི། །རྣམ་ཐར་གསུམ་ལྡན་ཞབས་ཀྱིས་སྲིད་པ་སྒྲོལ། །ཡེ་ཤེས་མཆེ་བ་གཙིགས་པས་དགྲ་བགེགས་སྒྲོལ། །སྨ་ར་ཨག་ཚོམ་སེར་ནག་གྱེན་དུ་འཕྱར། །སྙན་ནས་འབྲུག་སྟོང་ཤངས་ནས་འཚུབས་མ་ལྡང་། །བདུད་ཀྱི་ཚོགས་རྣམས་དབང་སྡུད་ལས་ལ་འགྱེད། །ཡེ་ཤེས་སྐུ་ལྡན་སྤྱན་དགུས་ས་དགུ་མནན། །ཧཱུྃ་ཕཊ་རུ་ལུའི་ངར་སྒྲ་དྲག་པོ་ཡིས། །མ་མོ་མཁའ་འགྲོ་དབང་སྡུད་ལས་ལ་འགྱེད། །ཕ་རོལ་ཕྱིན་དྲུག་རྫོགས་མཛད་ཕྱག་དྲུག་པ། །མཚན་དྲུག་ཟེར། རྒྱུ་དྲུག་གནས་ཀྱི་དགྲ་བགེགས་ལོག་ལྟ་སྒྲོལ། །ཚད་མེད་བཞི་ལྡན་ཞབས་བཞིས་དྲེགས་པ་གནོན། །སྲིད་པའི་གཤིན་རྗེ་དབང་སྡུད་ལས་ལ་འགྱེད། །སྟག་དང་ཞིང་ལྤགས་ཟེར། གླང་ཆེན་ཞེ་སྡང་སྦྲུལ་གྱིས་བརྒྱན། །ཐོད་ཕྲེང་ཐལ་ཆེན་ཁྲག་ཞག་ཚོམ་བུས་བྲིས། །རྣམ་ཐར་བརྒྱད་ལྡན་དཔལ་གྱི་ཆས་བརྒྱད་གསོལ། །སྒྲོལ་གིང་ཕོ་མོ་མང་པོ་ལས་ལ་བསྐུལ། །ཡོན་ཏན་དཔག་མེད་བརྒྱན་པའི་ལྷ་མཆོག་གིས། །དྲེགས་པའི་ཚོགས་འདུལ་བསྒྲལ་བའི་ཞིང་བཅུ་ལ། །མངོན་སྤྱོད་བདག་གི་ཕྲིན་ལས་མྱུར་དུ་མཛོད། །ཡེ་ཤེས་ཐུགས་རྗེས་ལས་མཛོད་བསམ་པ་དམར་དང་སྨན་སྦྲེང་ཟེར། སྒྲུབས། །དེ་ནས་ཡུམ་རོ་ལངས་མ་བསྐུལ་བ་ནི། ཧཱུྃ། ཆགས་ཤིང་ཆེན་མོ་ཁྲག་གི་མངའ་བདག་མོ། །གཡོན་གྱི་ཁྲོ་མོ་རོ་ལངས་ཐལ་མདོག་མ། །ཟ་བྱེད་ནག་མོ་བཛྲ་བེ་ཏ་ལི། །མིག་གསུམ་ཁྲོ་གཉེར་འཇིགས་པའི་ཁ་ཡང་གདངས། །དུག་སྦྲུལ་གོས་གྱོན་གཡས་ན་ཏྲི་ཤུལ་ཐོགས། །གཡོན་པས་བྷནྡྷ་གཙོ་ལ་སྟོབ་པའི་ཚུལ། །ནག་མོ་ཆེན་མོ་བོས་པའི་ཚེ། །ནག་མོ་ཁྱོད་ཀྱི་མཚན་ཉིད་ནི། །མི་ལྤགས་གྱོན་ཞིང་ཐོད་པའི་ཕྲེང་བས་བརྒྱན། །ཆིབས་སུ་རླུང་ནག་འཚུབས་མ་བཅིབས། །ཟས་སུ་མི་ཤ་རློན་པ་ཟ། །སྐོམ་དུ་མི་ཁྲག་དྲོན་མོ་འཐུང། །དམ་ཉམས་ཀུན་གྱི་སྙིང་འབྱིན་མ། །ཤ་ཟ་ཁྲག་འཐུང་རལ་པ་སྤྲུག་ཅིང་བྱོན། །དམ་རྫས་དམར་གྱི་མཆོད་པ་འདི་བཞེས་ལ། །བདག་གི་དགྲ་བགེགས་མ་ལུས་མྱུར་དུ་སྒྲོལ། །བཅོལ་པའི་ཕྲིན་ལས་སྒྲུབ་པར་གྱིས། །དེ་ནས་ཨེ་ཀ་ཛཱ་ཊི་བསྐུལ་བ་ནི། ཧཱུྃ། ཞེ་སྡང་ཆེན་མོ་རུས་པའི་མངའ་བདག་མོ། །གཡས་ནས་ཡུམ་ཆེན་ཨེ་ཀ་ཛཱ་ཊི་མ། །སྒེག་མོ་རོ་ལངས་རལ་གཅིག་མ་ཟེར། གཤིན་རྗེའི་གཤེད་ཀྱི་ཡུམ། །ལྷ་མིན་གཡུལ་ངོ་བཟློག་པའི་མཐུ་མོ་ཆེ། །གསང་བའི་ཡུམ་ཆེན་ཕྲིན་ལས་བཞི་ཡི་བདག །གཤིན་རྗེའི་ཡུམ་ལ་བདུད་ཀྱི་ལྕམ་གཅིག་མ། །སྐུ་མདོག་མཐིང་ནག་གཡུ་ཡི་རལ་པ་ཅན། །རལ་པའི་ཟར་བུ་གཡས་ནས་གཡོན་དུ་འཁྱིལ། །གསེར་གཡུ་མུ་ཏིག་རིན་ཆེན་ཕྲེང་བས་བརྒྱན། །བྱད་མདངས་དབུ་ཡི་རལ་པའི་རྒྱན་དུ་བྱས། །གཡས་ན་སྤུ་གྲི་གཡོ་ན་ཁྲམ་བམ་བསྣམས། །སྲིད་པ་གསུམ་གྱི་བྷྱོ་བཟློག་ཁྱོད་ཀྱིས་མཛོད། །སྤྱན་ནས་མེ་འབར་ཤངས་ནས་ཁྲག་ཀྱང་འཛག །ཐལ་ཆེན་རཀྟ་ཞག་གི་ཚོམ་བུ་བྲིས། །གསང་བ་དམར་གྱི་ཐིག་ལེས་བརྒྱན་པ་སྟེ། །ཁྱོད་ནི་མི་ནད་ཕྱུགས་ནད་ཀུན་གྱི་བདག །ཆིབས་སུ་དྲེལ་རྟ་རྐང་གསུམ་བཅིབས་ནས་ནི། །དུར་ཁྲོད་ཀུན་ཏུ་རྒྱུག་པའི་མཐུ་མོ་ཆེ། །མ་མོའི་གཙོ་མོ་དཔག་ཚད་བརྒྱད་ཁྲིར་རྒྱུག །སྔགས་འཆང་རྣལ་འབྱོར་བདག་གི་དམ་བདག་མོ། །བདག་གི་དགྲ་བགེགས་མྱུར་དུ་ཁུག་ལ་སྒྲོལ། །བཅོལ་བའི་ཕྲིན་ལས་སྒྲུབ་པར་མཛོད། །དེ་ནས་ཡ་མ་རཱ་ཛ་བསྐུལ་བ་ནི། །ཧཱུྃ། ང་རྒྱལ་ཁྲོ་བོ་བྱང་ཆུབ་སེམས་ཀྱི་བདག །ཡབ་ཡུམ་གཉིས་མེད་ཐུགས་ལས་སྤྲུལ་པའི་སྲས། །ཡ་མ་རཱ་ཛ་ཁྱེའུ་ཆུང་སྔོན་པོའི་སྐུ། །མཐིང་ནག་མེ་དཔུང་འབར་བའི་ཀློང་ན་བཞུགས། །ཐོད་ཕྲེང་ལ་སོགས་དུར་ཁྲོད་ཆས་ཀྱིས་བརྒྱན། །དུར་ཁྲོད་གནས་ཀྱི་མ་གཤིན་དབང་དུ་སྡུད། །སྐུ་མདོག་ནག་པོ་དུག་ཆེན་འཁྱིལ་བ་འདྲ། །ཆུ་ནག་རླབས་ཆེན་བཅིབས་ནས་འོད་ཕུང་འཕྲོ། །མ་ཧེ་གླང་ཆེན་བཅིབས་ནས་འོད་དུ་འབར། །ལས་ཀྱི་གཤིན་རྗེ་རྣམས་ནི་ཁ་ལོ་བསྒྱུར། །འཁོར་ལོ་རལ་གྲི་སྡིགས་བེ་ཅོན་སྡིགས་མཛུབ་ཞགས་པ་ཟེར་བའང་འདུག །མཛུབ་ཞགས་པ་རྣམས། །ཕྱག་ན་བསྣམས་ཤིང་གིང་བདུད་ལས་ལ་གཏོང་། །མཆེ་བ་གཙིགས་པས་དམ་ཉམས་དགྲ་བགེགས་སྒྲོལ། །ཧཱུྃ་ཕཊ་རུ་ལུའི་སྒྲ་སྒྲོགས་མ་མོ་འདུལ། །མི་ཤ་རྟ་ཤ་མིན་པ་གཞན་མི་ཟ། །མི་ཁྲག་རྟ་ཁྲག་མིན་པ་གཞན་མི་འཐུང་། །ཐུགས་ཀྱི་སྲས་མཆོག་ཡ་མ་རཱ་ཛ་ཁྱོད། །འགྲོ་བ་མི་ཡི་བདུད་ལ་ཁྱོད་ལས་ལྷག་པ་མེད། །རྨད་དུ་བྱུང་བའི་མཆོད་པ་གཏོར་མ་ཟེར། འདི་བཞེས་ལ། །རྣལ་འབྱོར་བདག་གི་བཅོལ་བའི་ལས་རྣམས་གྲུབ་པར་མཛོད། །ཁྲག་མིག་མ་བསྐུལ་བ་ནི། ཧཱུྃ། རྡོ་རྗེ་ནག་མོ་མཁའ་འགྲོ་ཀུན་གྱི་རྗེ། །བརྗིད་པའི་གཟི་མདངས་ཆས་ནས་སྐུ་ལ་གསོལ། །ལྕམ་དྲལ་སྲི་ཡི་འགྱིང་གར་ཕྱག་ན་བསྣམས། ། ཁམས་གསུམ་ཀུན་གྱི་གདུང་གསོབ་བདུད་འདུལ་མ། །དྲག་ཤུལ་ཞེ་སྡང་གདུག་པ་འདུལ་མཛད་མ། །ཁྲག་མཚོ་འཁྱིལ་བ་དབང་གི་ཆ་ལུགས་ཅན། །ཤེས་རབ་རྣོ་བས་དྲག་མོའི་སྐུས་འདུལ་མ། །དམ་ཅན་ཀུན་སྐྱོང་དཀོན་མཆོག་དཀོར་སྲུང་མ། །དམ་ཅན་དབང་སྡུད་མི་འགྱུར་རྡོ་རྗེ་ཅན། །དཔལ་གྱི་ཧཱུྃ་ཆེན་མཐིང་ག་དམར་བའི་སྤྱན། །འཁོར་ལོ་རཀྟ་འགྱིང་བག་ཆུ་སྲིན་གདོང་། །དབང་ཕྱུག་གར་གྱི་བདག་མོའི་དུས་ལ་བབ། །ཧ་ཡ་བཾ་ཧོར་ཐུལ་ཐུལ་ཛཿཛཿ དེ་ནས་ལས་གཤིན་གྱི་བསྐུལ་དང་། གྲི་ཐོགས་དང་ཁྲམ་ཐོགས་དང་། ཤོ་ཐོགས་ལ་སོགས་པའི་བསྐུལ་རྣམས་ནི་བསྐུལ་འབུམ་དུ་གསལ། དེ་ནས་ཟོར་འཕང་བ་ནི་འདི་སྐད་དོ། །ཧཱུྃ། མ་མོའི་ཚོགས་ནི་དགྱེས་མཆོད་དོ། །སྒོ་བས་དེ་ནི་སྒོ་ཕྱེས་ཤིག །འཕྲང་བས་དེ་ནི་འཕྲང་སོལ་ཅིག །གཡས་སུ་དེ་ནི་མ་འདའ་ཞིག །གཡོན་དུ་དེ་ནི་མ་འབུད་ཅིག །ད་ནི་འཐེང་ཞིང་འགྲུམ་ཞིང་མཆི། །འཐེང་ཞིང་འགྲུམ་ཞིང་མི་མཆི་རུ། །ཀེང་རུས་གྲམ་པ་རྩད་རེ་ཚ། །ད་ནི་འབུབ་ཅིང་བརྒྱལ་ཞིང་མཆི། །འབུབ་ཅིང་བརྒྱལ་ཞིང་མི་མཆི་རུ། །རཀྟའི་རྒྱ་མཚོ་གཏིང་རེ་ཟབ། །དམ་ཅན་ཚོགས་ནི་དགྱེས་མཆོད་དོ། །བྷྱོ། བར་ཆད་བྱེད་པའི་འབྱུང་པོ་དང་། །ཟ་བཀག་བྱེད་པའི་ཡི་དྭགས་དང་། །སྲོག་ལ་རྨུགས་པའི་འདྲེ་སྲིན་དང་། །སྐུ་ལ་བདོ་བའི་དགྲ་བོ་དང་། །བར་ཆད་བྱེད་པའི་བགེགས་ཆེན་རྣམས། །དང་པོ་ཞེ་སྡང་ཕ་ལས་བསྐྱེད། །བར་དུ་འདོད་ཆགས་མ་ལས་སྐྱེས། །དེ་ནས་དྲི་ཟ་ལྟེ་བར་འཁོར། །དེ་ནས་ཉོན་མོངས་ལྔ་ཡི་གཟུགས། །ལྔ་ཕུང་རྩད་ནས་གཅོད་པའི་ཕྱིར། །དབང་པོའི་རྟེན་ས་མགོ་ཡིན་པས། །སྤྱི་བོའི་གཙུག་ཏུ་གཏོར་ཟོར་ཡ། །གཟུགས་ཕུང་ལྟ་བ་མིག་ཡིན་པས། །མིག་འབྲས་གཉིས་ལ་གཏོར་ཟོར་ཡ། །དྲན་པར་བྱེད་པ་སྙིང་ཡིན་པས། །སྲོག་རྩ་དམར་ལ་གཏོར་ཟོར་ཡ། །སྨྲ་བར་བྱེད་པ་ལྕེ་ཡིན་པས། །ལྕེ་རྩ་དག་ལ་གཏོར་ཟོར་ཡ། །ཉན་པར་བྱེད་པ་རྣ་བ་སྟེ། །རྣ་བའི་རྩ་ལ་གཏོར་ཟོར་ཡ། །སྣོམ་པར་བྱེད་པ་སྣ་ཡིན་ཏེ། །སྣ་ཡི་རྩ་ལ་གཏོར་ཟོར་ཡ། །བྱ་བ་བྱེད་པ་ལག་པ་ཡིན། །ལག་པའི་རྩ་ལ་གཏོར་ཟོར་ཡ། །འགྲོ་བར་བྱེད་པ་རྐང་པ་སྟེ། །རྐང་པའི་རྩ་ལ་གཏོར་ཟོར་ཡང་། །དབུགས་སུ་རྔུབས་པ་གློ་བ་སྟེ། །གློ་བའི་དཀྱིལ་དུ་གཏོར་ཟོར་ཡ། །གནས་པར་བྱེད་པ་ཡུལ་ཡིན་ཏེ། །གནས་པའི་ཡུལ་ལ་གཏོར་ཟོར་ཡ། །རྟེན་པར་བྱེད་པ་མཁར་ཡིན་ཏེ། །རྟེན་པའི་མཁར་ལ་གཏོར་ཟོར་ཡ། །མཆན་གྱི་བུ་ལ་གཏོར་ཟོར་ཡ། །བྲན་གཡོག་འཁོར་ལ་གཏོར་ཟོར་ཡ། །སྒོ་ཁྱི་རྟ་ལ་གཏོར་ཟོར་ཡ། །བདུན་བརྒྱུད་རྩད་ལ་ཁྲག་ཟོར་ཡ། །སྙིང་ཁྲག་ཆོད་ཅིག་ཙིཏྟ་ནན། །རྣམ་ཤེས་ཕྱོགས་ཤིག་ན་རཾ་རཾ། །གཟུགས་ཕུང་བཤིག་ཅིག་སུ་ན་ཏྲི། །ཡན་ལག་ཆིངས་ཤིག་ཛ་ན་ཧྲཱིཿ དུག་མདའ་རྒྱོབ་ཅིག་ནག་པོའི་ཚོགས། །དགྲ་བགེགས་གཉིས་ཀ་རྡུལ་དུ་རློག །ཅེས་འཕང་ངོ་། །ཟོར་གྱི་གོང་དུ་ཆད་མདོའི་འདི་སྐད་དོ། །ཧཱུྃ། འདི་ནི་སངས་རྒྱས་ཐམས་ཅད་ཀྱི། །ཤེས་རབ་ཕ་རོལ་ཕྱིན་པའི་ཚུལ། །དགྲ་རྣམས་ཐམས་ཅད་བསད་བྱས་ནས། །རྟོག་པ་ཐམས་ཅད་ཚར་བཅད་དོ། །ཧཱུྃ། བཅོམ་ལྡན་ཡ་མཱནྟ་ཀ་ལ། །གཤེད་ཆེན་བཞི་ཡིས་བསྐོར་བ་ནི། །ཤར་གྱི་ཕྱོགས་ནས་གཤེགས་སུ་གསོལ། །ཡ་མ་རཱ་ཛ་ཡབ་ཡུམ་ལ། །མ་གཤིན་མཐིང་ནག་འབུམ་གྱིས་བསྐོར་། །ཁྱོད་ནི་ཉི་མ་དང་པོའི་གཤིན། །དགྲ་བོ་མགོ་བོ་འཁོར་བྱེད་ཅིང་། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་སྒྲུབ་པར་མཛོད། །ཧཱུྃ། ལྷོ་ཡི་ཕྱོགས་ནས་གཤེགས་སུ་གསོལ། །མྱོས་བྱེད་འབར་བ་ཡབ་ཡུམ་ལ། །མ་གཤིན་སེར་ནག་འབུམ་གྱིས་བསྐོར། །ཁྱོད་ནི་ཉི་མ་གཉིས་པའི་གཤིན། །དགྲ་བགེགས་མ་ལུས་བརྒྱལ་བྱེད་ཅིང་། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་སྒྲུབ་པར་མཛོད། །ཧཱུྃ། ནུབ་ཀྱི་ཕྱོགས་ནས་གཤེགས་སུ་གསོལ། །ཨཱརྻ་མ་རུ་ཡབ་ཡུམ་ལ། །མ་གཤིན་དམར་ནག་འབུམ་གྱིས་བསྐོར། །ཁྱོད་ནི་ཉི་མ་གསུམ་པའི་གཤིན། །དགྲ་བགེགས་ཁྲག་ཏུ་སྐྱུགས་བྱེད་ཅིང་། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་སྒྲུབ་པར་མཛོད། །ཧཱུྃ། བྱང་གི་ཕྱོགས་ནས་གཤེགས་སུ་གསོལ། །རལ་པ་ཚར་དགུ་ཡབ་ཡུམ་ལ། །མ་གཤིན་ལྗང་ནག་འབུམ་གྱིས་བསྐོར། །ཁྱོད་ནི་ཉི་མ་བཞི་པའི་གཤིན། །དགྲ་བགེགས་ལུས་སེམས་ཕྲལ་བྱེད་ཅིང་། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་སྒྲུབ་པར་མཛོད། །ཡ་མ་རཱ་ཛའིི་ཞལ་དུ་ཁ་རཾ་ཁཱ་ཧི། མྱོས་བྱེད་འབར་བའི་ཞལ་དུ་ཁ་རཾ་ཁཱ་ཧི། ཨརྻ་མ་རུའི་ཞལ་དུ་ཁ་རཾ་ཁཱ་ཧི། རལ་པ་ཚར་དགུའི་ཞལ་དུ་ཁ་རཾ་ཁཱ་ཧི། དཔལ་ཆེན་ཡ་མཱནྟ་ཀ་ལ། ཕྱོགས་སྐྱོང་གཤིན་རྗེས་བསྐོར་བ་ནི། །སྟེང་གི་ཕྱོགས་ནས་གཤེགས་སུ་གསོལ། །གཤིན་རྗེ་ནག་འཇོམས་ཡབ་ཡུམ་ལ། །འཁོར་དུ་བདུད་དཀར་འབུམ་གྱིས་བསྐོར། །གཟེར་ནད་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་སྒྲུབ་པར་མཛོད། །ཧཱུྃ། ཤར་གྱི་ཕྱོགས་ནས་གཤེགས་སུ་གསོལ། །གཤིན་རྗེ་དམར་པོ་ཡབ་ཡུམ་ལ། །འཁོར་དུ་སྲོག་བདག་སྟོང་གིས་བསྐོར། །ཁྲག་ནག་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་སྒྲུབ་པར་མཛོད། །ཧཱུྃ། ཤར་ལྷོའི་མཚམས་ནས་གཤེགས་སུ་གསོལ། །ཀོང་ཙེ་ཨ་བ་གླང་མགོ་ཡབ་ཡུམ་ཟེར་བའང་འདུག །བྲག་འཇོམས་ཡབ་ཡུམ་ལ། །འཁོར་དང་བྲག་སྲིན་འབུམ་གྱིས་བསྐོར། །ཚ་བའི་ནད་གཏོང་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་སྒྲུབ་པར་མཛོད། །ཧཱུྃ། ལྷོ་ཡི་ཕྱོགས་ནས་གཤེགས་སུ་གསོལ། །ཡ་བ་ཏི་ནི་ཡབ་ཡུམ་ལ། །འཁོར་དུ་ཕུང་སྲི་འབུམ་སྡེས་བསྐོར། །སྐྱ་རྦབ་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་སྒྲུབ་པར་མཛོད། །ཧཱུྃ། ལྷོ་ནུབ་མཚམས་ནས་གཤེགས་སུ་གསོལ། །ལྕོགས་པ་མགོ་དགུ་ཡབ་ཡུམ་ལ། །འཁོར་དུ་སྲིན་པོ་འབུམ་སྡེས་བསྐོར། །འབྲུམ་ནག་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་སྒྲུབ་པར་མཛོད། །ཧཱུྃ། ནུབ་ཀྱི་ཕྱོགས་ནས་གཤེགས་སུ་གསོལ། །ཨ་བ་གླང་མགོ་ཡབ་ཡུམ་ལ། །འཁོར་དུ་ཀླུ་བདུད་འབུམ་སྡེས་བསྐོར། །མཛེ་ནད་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་སྒྲུབ་པར་མཛོད། །ཧཱུྃ། ནུབ་བྱང་མཚམས་ནས་གཤེགས་སུ་གསོལ། །ཡ་བ་ཏི་ནི་ཡབ་ཡུམ་ལ། །ཁྲོ་རྒྱལ་ཏེལ་པ་ཡབ་ཡུམ་ཡང་སྣང་། འཁོར་དུ་ཡ་བདུད་འབུམ་སྡེས་བསྐོར། །ཀ་ཐབས་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་སྒྲུབ་པར་མཛོད། །ཧཱུྃ། བྱང་གི་ཕྱོགས་ནས་གཤེགས་སུ་གསོལ། །གཤིན་རྗེ་ཏེལ་ལྷ་མཆོག་དུད་ཁ་ཡང་སྣང་། པ་ཡབ་ཡུམ་ལ། །འཁོར་དུ་དམུ་བདུད་འབུམ་སྡེས་བསྐོར། །རིམས་ནད་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་སྒྲུབ་པར་མཛོད། །ཧཱུྃ། བྱང་ཤར་མཚམས་ནས་གཤེགས་སུ་གསོལ། །ཆོས་ཀྱི་རྒྱལ་པོ་ཡབ་ཡུམ་ལ། །འཁོར་དུ་ཕྱྭ་བདུད་འབུམ་སྡེས་བསྐོར། །འཆི་ནད་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་སྒྲུབ་པར་མཛོད། །ཧཱུྃ། འོག་གི་ཕྱོགས་ནས་གཤེགས་སུ་གསོལ། །གཤིན་རྗེ་དམར་པོ་ཡབ་ཡུམ་ལ། །འཁོར་དུ་ས་བདག་འབུམ་སྡེས་བསྐོར། །སྐྲང་ནད་གཏོང་བའི་མཐུ་བོ་ཆེ། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །འཁོར་བཅས་འདིར་བྱོན་མཆོད་པ་བཞེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་སྒྲུབ་པར་མཛོད། །ཧཱུྃ། དཔལ་ཆེན་ཡ་མཱནྟ་ཀ་ལ། །གིང་ཆེན་བཅོ་བརྒྱད་ཡབ་ཡུམ་དང་། །དབང་ཕྱུག་སུམ་ཅུ་རྩ་བརྒྱད་དང་། །མ་བདུན་སྲིང་བཞིས་བསྐོར་བ་ཡང་། །ལས་སུ་གསོད་དང་གཅོད་ལ་དགའ། །ལོངས་སྤྱོད་ཤ་དང་ཁྲག་ལ་དགྱེས། །བཀའ་ཡི་གཏོར་མ་འདི་ལོངས་ལ། །གདུག་པའི་དགྲ་བགེགས་བསྒྲལ་བ་དང་། །བདག་གི་བསམ་པ་སྒྲུབ་པར་མཛོད། །ༀ་ཁུ་ཁུ་རི་པྲི་ཏོད་ཀ་ཏེ། པྲ་ཏ་མ་ལེ། ལ་ལི་སྭཱ་ཧཱ། མཾ་མཾ། གླེག་ཏ་གླེག་ཏ། སྲི་པྲི། ཏི་ཤི་པ་ཏི། ཏྲིང་ཏྲིང་། དྲང་དྲང་། ཁུ་ཁུ་ནི་གྲི་ཧྞ་སྭཱ་ཧཱ། ཞེས་གཏོར་མ་བཏང་། དེ་ནས་བརྟན་མ་བསྐྱང་བ་ནི། བཤལ་ཆུ་ༀ་ཨཱཿཧཱུྃ་གིས་བྱིན་གྱིས་བརླབས་ལ། ཧཱུྃ། བཅོམ་ལྡན་ཡ་མཱནྟ་ཀ་ལ། །བརྟན་སྐྱོང་ཚོགས་ཀྱིས་བསྐོར་བ་ནི། །བདག་ཉིད་ཆེན་མོ་རྡོ་རྗེ་ཀུན་གྲགས་མ། །ཞེས་པ་རྣམས་སྤྱི་དང་མཐུན། དེ་ནས་གཏོར་གཞོང་ཁ་སྦུབ་ལ། བྲོ་བརྡུང་བ་འདི་སྐད་དོ། །ཧཱུྃ། ཁྲོ་བོའི་རྒྱལ་པོ་གཤིན་རྗེའི་གཤེད། །མ་ལུས་ཟིལ་གནོན་བྲོ་གཅིག་བརྡུང་། །བྲོ་བརྡུང་གཟུགས་ཅན་དགྲ་ལ་བརྡུང་། །བྲོ་བརྡུང་གཟུགས་མེད་བགེགས་ལ་བརྡུང་། །དགྲ་བགེགས་མགོ་ལ་ཆེམས་སེ་ཆེམ། །ལག་པ་ཐལ་སྦྱོར་གྱེན་དུ་སྦྱོར། །འཕགས་པ་རྣམས་ཀྱི་ཐུགས་དམ་བསྐུལ། །རྐང་པས་བྲོ་བརྡུང་ཐུར་དུ་བརྡུང་། །བདུད་བཞི་མ་ལུས་ཟིལ་གྱིས་གནོན། །བྲོ་འདི་དགྲ་བགེགས་འདུལ་བའི་བྲོ། །གླུ་ནི་ཚངས་པ་དབྱངས་ཀྱིི་ཀླུ། །ཚིག་འདི་དོན་དམ་རྟོགས་པའི་ཚིག །རྐང་པ་གཡས་ཀྱིས་བྲོ་བརྡུང་པས། །ཕོ་སྲི་ཐམས་ཅད་གཡས་སུ་མནན། །རྐང་པ་གཡོན་གྱིས་བྲོ་བརྡུང་པས། །མོ་སྲི་ཐམས་ཅད་གཡོན་དུ་མནན། །གཡས་གཡོན་མེད་པའི་བྲོ་བརྡུང་པས། །དགྲ་བགེགས་ཐམས་ཅད་ཐལ་བར་བརླག །རྣལ་འབྱོར་ལུས་ངག་ཡིད་གསུམ་ལ། །གནོད་པར་བྱེད་པའི་འབྱུང་པོ་ཀུན། །གཤིན་རྗེའི་གཤེད་པོའི་ཏིང་འཛིན་གྱིས། །རི་རབ་ཆེན་པོའི་རྨངས་སུ་མནན། །བྱང་ཆུབ་སེམས་མཆོག་མ་སྐྱེས་པར། །མནན་པ་ཡིན་ནོ་མ་ལྡངས་ཤིག །དགྲ་བགེགས་སྟྭཾ་བྷ་རཀྵ་ནན། སུཾ་བྷ་ནི་བརྗོད་པས་གཏོར་གཞོང་རི་རབ་ཀྱི་འོག་ཏུ་དགྲ་བགེགས་མནན་པར་བསམ། དེ་ནས་བླ་མ་ཡི་དམ་ལ་གཏང་རག་གི་མཆོད་བསྟོད་བསྡུས་པ་བྱེད། བཟོད་པར་གསོལ། དངོས་གྲུབ་བླང་། ཡི་གེ་བརྒྱ་པས་ལྷག་ཆད་ཁ་བསྐང་། བཀྲ་ཤིས་བརྗོད་པ་ནི། ཧཱུྃ། བྱང་ཆུབ་སེམས་མཆོག་ཤེས་རབ་ཏིང་འཛིན་གྱིས། །ཉོན་མོངས་ངར་འཛིན་རྣམ་རྟོག་ཀུན་སྤངས་ཏེ། །ཡ་མནྟ་ཀའི་དོན་ལ་རབ་བསྒོམས་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །གཤིན་རྗེའི་གཤེད་པ་སྐར་ལྟར་འཁྲུགས་པ་ཡིས། །ལས་ཀྱི་གཤིན་རྗེ་ཕོ་མོ་ཀུན་བཏུལ་ནས། །ཕྲིན་ལས་དྲག་པོའི་ལས་ལ་བཀོད་པའི་ཕྱིར། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཞི་རྒྱས་དབང་དྲག་མངོན་སྤྱོད་དྲག་པོ་ཡིས། །གནོད་པའི་དགྲ་བགེགས་མ་ལུས་ཀུན་བསྒྲལ་ནས། །བླ་མེད་བྱང་ཆུབ་ལམ་ལ་བཀོད་པའི་ཕྱིར། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །རྡོ་རྗེ་གསང་མཆོག་གཤིན་རྗེའི་དཀྱིལ་འཁོར་དུ། །འཇིགས་བྱེད་མི་བཟད་གཤིན་རྗེའི་སྐུར་བཀོད་པའི། །དུས་གསུམ་འགྱུར་མེད་ཁྲོ་རྒྱལ་བགེགས་ཀྱི་གཤེད། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཉིན་མཚན་མེད་པར་གཤིན་རྗེའི་གཤེད་བསྒོམས་པས། །གདུག་པའི་དགྲ་བགེགས་རྡུལ་དུ་བརླག་པ་དང་། །བསྐལ་པའི་བར་དུ་དགྲ་བགེགས་མི་ལྡང་བའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །གཤིན་རྗེ་སྒྲུབ་པའི་དཀྱིལ་འཁོར་ཆེན་པོ་འདིར། །རྡོ་རྗེ་སློབ་དཔོན་མཆེད་དང་ལྕམ་དྲལ་གྱི། །ཐུགས་དམ་ཆེན་པོ་ཡོངས་སུ་བསྐང་བ་ཡིས། །ཡ་མཱནྟ་ཀ་ཤིན་ཏུ་བཀྲ་ཤིས་ལྟར། །སྔགས་འཆང་འཁོར་བཅས་དེ་བཞིན་བཀྲ་ཤིས་ཤོག །ངན་འགྲོ་ལོག་པར་ལྟ་བ་ཀུན་བཅོམ་ནས། །རྣལ་འབྱོར་རིག་འཛིན་ཆོས་རྣམས་དར་ཞིང་འཕེལ། །མཐོང་ཐོས་རེག་པས་བདེ་བ་མཆོག་བརྙེས་པའི། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །དེ་ལྟར་དོན་གཉིས་མངོན་དུ་གྱུར་ནས་ནི། །ཉི་ལྟར་ཞལ་དྲོ་ཟླ་ལྟར་འོད་གསལ་ཞིང་། །བདག་དང་འགྲོ་བ་ཀུན་ལ་བྱིན་ཆེ་བའི། །བསྐལ་པའི་མཐར་ཐུག་བར་དུ་བཀྲ་ཤིས་ཤོག །སྨོན་ལམ་ནི། དེ་ལྟར་བསྒྲུབས་པའི་དགེ་བའི་རྩ་བ་འདིས། །ཕ་མས་གཙོར་བྱས་རིགས་དྲུག་སེམས་ཅན་རྣམས། །བདུད་ཀྱི་གཡུལ་ལས་རྣམ་པར་རྒྱལ་གྱུར་ནས། །རང་རིག་ཡ་མཱནྟ་ཀ་མངོན་འགྱུར་ཤོག །ཅེས་བརྗོད། བཛྲ་མུས་ཡེ་ཤེས་པ་གཤེགས། དམ་ཚིག་པ་བསྡུ་བ་ནི། ཕྱི་ཡི་གཞལ་ཡས་ཁང་ལྷ་ལ་བསྡུ། ལྷ་ཡ་མ་རཱ་ཛ་ཡབ་ཡུམ་གཉིས་ཟ་བྱེད་བེ་ཏ་ལི་ལ། སྦྱོར་ཡུམ་སྒྲོལ་ཡུམ་གཉིས་ཀྱང་གཙོ་བོ་ལ། གཙོ་བོ་ཉིད་ཀྱང་ཡེ་ཤེས་སེམས་དཔའ་ལ། ཡེ་ཤེས་སེམས་དཔའ་རྡོ་རྗེ་ལ། རྡོ་རྗེ་ཧཱུྃ་ལ་བསྡུས་ཏེ་རིམ་གྱིས་སྟོང་པ་ཉིད་ལ་བློ་བཞག་གོ། །རྗེས་སྐད་ཅིག་གིས་ལྷའི་ང་རྒྱལ་དང་ལྡན་པས་སྤྱོད་ལམ་ལ་འཇུག་གོ། །གཤིན་རྗེའི་གཤེད་ཁ་ཐུན་ནག་པོའི་ལས་བྱང་གི་རིམ་པ་རྫོགས་སོ།། །།བཙད་པོ་ཁྲི་འོད་འབར་གྱི་ཕྱག་དཔེ་ལས་ཉམས་སུ་བླང་བདེ་བར་པྲཛྙཱ་ཕ་ལས་མཛད་པ་འདི། དྷརྨ་ཀིརྟིའི་ཕྱག་དཔེ་ལས་ཞལ་བཤུས་པའོ། །གསུམ་པ་དངོས་གྲུབ་དབང་གི་སྐོར་ལ་རྩ་བའི་དབང་ཆོག་པདྨས་མཛད་ནས་སུ་བ་དྷ་ར་ལ་གཏད་པ་གནུབས་ཀྱིས་བསྒྱུར་བ་དང་། དཀྱིལ་ཆོག་ཡིད་བཞིན་ནོར་བུ་ཞེས་པ་ངག་དབང་གྲགས་པས་མཛད་པ་གཉིས་ཆོག་བསྒྲིགས་ཀྱི་གཞུང་ན་ཡོད་པས་དེས་འདུས་པས་འདིར་དཀྱིལ་འཁོར་གྱི་རྣམ་དག་ཙམ་མོ། ། ༈ དཀྱིལ་འཁོར་གྱི་རྣམ་དག་བཞུགས་སོ། །འཇམ་དཔལ་ཁྲོས་པའི་ཁྲོ་བོ་ལ་ན་མོ། །གཤིན་རྗེ་གཤེད་ཀྱི་དཀྱིལ་འཁོར་དུ་ཞུགས་ནས་ངོ་སྤྲོད་པ་ལ་གསུམ་སྟེ། དཀྱིལ་འཁོར་གྱི་དེ་ཉིད། སྔགས་ཀྱི་དེ་ཉིད། ལྷའི་དེ་ཉིད་དོ། །དེ་ཡང་ཕོ་བྲང་གྲུ་གསུམ་ནི་སྐུ་གསུང་མཚོན་པའི་བརྡ་ཡིན། ཟླ་གམ་གསུམ་ནི་ཁམས་གསུམ་དབང་དུ་སྡུད་པའི་བརྡ་ཡིན། མུ་ཁྱུད་ཟླུམ་པོ་ནི་ཐམས་ཅད་སེམས་སུ་གཅིག་པའི་བརྡ་ཡིན། འཁོར་ལོ་རྩིབས་བཞི་ནི་ཡེ་ཤེས་བཞི་མཚོན་པའི་བརྡ་ཡིན། རྩིབས་བརྒྱད་ནི་རྣམ་པར་ཐར་པ་བརྒྱད་མཚོན་པའི་བརྡ་ཡིན། གྲུ་ཆད་བཞི་ནི་ཕྲིན་ལས་བཞི་མཚོན་པའི་བརྡ་ཡིན། བར་ཁྱམས་ནི་ཡོན་ཏན་ཡོངས་སུ་རྒྱས་པའི་བརྡ་ཡིན། སྒོ་བཞི་ནི་ཚད་མེད་པ་བཞི་མཚོན་པའི་བརྡ་ཡིན། དེ་ཡང་ཕྱི་རིན་པོ་ཆེའི་གཞལ་ཡས་ཁང་། ནང་ཐོད་པའི་གཞལ་ཡས་ཁང་དུ་གསལ་བ། ཕྱི་ནང་མེད་པ་ཀུན་ཏུ་ཡང་ནང་དུ་གྱུར་པ་འདི་ནི་ཐམས་ཅད་སེམས་སུ་གཅིག་པའི་བརྡའོ། །ལྷའི་དེ་ཉིད་ནི་དེ་ལྟ་བུའི་གཞལ་ཡས་ཁང་དེའི་ནང་ན་གཏི་མུག་མ་སྤངས་གནས་སུ་དག་པའི་རྟགས་སུ་དཔལ་ཆེན་པོ། འདོད་ཆགས་མ་སྤངས་གནས་སུ་དག་པའི་རྟགས་སུ་བཛྲ་བེ་ཏ་ལི། ཞེ་སྡང་མ་སྤངས་གནས་སུ་དག་པའི་རྟགས་སུ་ཨེ་ཀ་ཛཱ་ཊི། ང་རྒྱལ་མ་སྲངས་གནས་སུ་དག་པའི་རྟགས་སུ་ཨཱརྻ་ཨ་ཙ་ལ། ཕྲག་དོག་མ་སྤངས་གནས་སུ་དག་པའི་རྟགས་སུ་ཕྲིན་ལས་ཁྲོ་མོ། ལྷའི་བུའི་བདུད་བཅོམ་པས་ཡ་མ་རཱ་ཛ། ཉོན་མོངས་པའི་བདུད་བཅོམ་པས་མྱོས་བྱེད་འབར་བ། ཕུང་པོའི་བདུད་བཅོམ་པའི་ཕྱིར་ཨཱརྻ་མ་རུ། འཆི་བདག་གི་བདུད་བཅོམ་པའི་ཕྱིར་རལ་པ་ཚར་དགུ། ཚོགས་བརྒྱད་མ་སྤངས་གནས་སུ་དག་པས་མཐར་བྱེད་བརྒྱད་དོ། །ཕྱིན་ཅི་ལོག་བཞི་འཇོམས་པས་སྒོ་བ་བཞིའོ། །སྙིང་པོ་སྔགས་ཀྱི་དེ་ཉིད་ཀྱང་། ཨཱོྂ་ནི་དཔལ་ཆེན་པོ། ཨ་ནི་བེ་ཏ་ལི། ཀྲོ་ནི་ཨེ་ཀ་ཛཱ་ཊི། ཏེ་ནི་མི་གཡོ་མགོན་པོ། ཀ་ནི་ཕྲིན་ལས་ཁྲོ་མོ། ཡ་ནི་གཤིན་རྗེ་ཡ་མ་རཱ་ཛ། མཱ་ན་ནི་མྱོས་བྱེད་འབར་བ། ཏ་ཨཱརྻ་མ་རུ། ཀ་རལ་པ་ཚར་དགུ། ཧ་ཆོས་ཀྱི་རྒྱལ་པོའི་གཤེད་དམྱལ་བ་མཐར་བྱེད་ཀྱི་ཁྲོ་བོ། ན་ལོག་འདྲེན་མཐར་བྱེད། མ་ཡི་དྭགས་མཐར་བྱེད། ཐ་སྲིན་པོ་མཐར་བྱེད། བྷཉ྄་བྱོལ་སོང་མཐར་བྱེད། ཛ་དམ་སྲི་མཐར་བྱེད། ཧཱུྃ་གནོད་སྦྱིན་མཐར་བྱེད། ཕཊ་བགེགས་མཐར་བྱེད་ཀྱི་ཁྲོ་བོའོ། །ཛཿཧཱུྃ་བྃ་ཧོཿ སྒོ་བ་བཞི་སྟེ་རྩ་བའི་ལྷ་བཅུ་བདུན། སྒོ་བ་བཞི་དང་བཅས་པའོ། །དེ་ཉིད་རྣམ་གསུམ་ཞེས་བྱ་བ་ཟུར་ཙམ་བཀོད་པའོ། ༈ །བཞི་པ་དྲག་པོའི་ཕྲིན་ལས་ཀྱི་སྐོར་ལ་དཔེ་ཚན་དགུ་ཙམ་ཡོད་དེ།