དཔལ་རྡོ་རྗེ་ཕུར་པའི་གཞུང་ཕྱོགས་གཅིག་གི་བཀོལ་བྱང་ལུགས་གཅིག

དཔལ་རྡོ་རྗེ་ཕུར་པའི་གཞུང་ཕྱོགས་གཅིག་གི་བཀོལ་བྱང་ལུགས་གཅིག་བཞུགས་སོ། །ཕུར་བུ་སྒྲུབ་པའི་རྣལ་འབྱོར་བ་རྣམས་ཀྱི་བྱ་བ་རྣམ་པ་གསུམ་སྟེ། བསྙེན་པ་དང་། སྒྲུབ་པ་དང་། ལས་ལ་སྦྱར་བའོ། །དེ་ལ་བསྙེན་པའི་ཚེ་དང་པོ་དབང་དང་དམ་ཚིག་མནོས་ཏེ། དེ་ནས་དུས་སམ་གྲངས་སམ་མཚན་མ་ལ་དམ་བཅའ་སྟེ། དེ་ཡང་དུས་ལ་འཆའ་ན་རང་གི་ནུས་པ་དང་སྦྱར་ནས། ལོ་ཟླའི་གྲངས་ཚད་འདི་ཙམ་ཞིག་ཏུ་བསྙེན་པ་བྱའོ་ཞེས་དམ་བཅས་ལ། ཁས་ཇི་ལྟར་བླངས་པ་ལས་ཅུང་ཟད་ཀྱང་མ་ཉམས་པར་བྱའོ། །དེའི་དུས་སུ་ཉིན་ཞག་རེ་ལ་མཆོད་པ་དང་བཟླས་བརྗོད་ཏིང་ངེ་འཛིན་གསུམ་ཡང་དང་པོ་ནུས་ཐང་གི་ཚད་གཅིག་བཟུང་ལ་དེ་ལས་མ་ཉམས་པར་བྱའོ། །གལ་ཏེ་གྲངས་ལས་དམ་འཆའ་ན་ས་ཡ་མན་ཆད་ནས་བྱེ་བ་ཕྲག་གཅིག་གམ། གལ་ཏེ་དངོས་གྲུབ་ཆེན་པོ་འདོད་ན་དབྱེ་བ་ཕྲག་ལྔའི་བར་དུ་བཟླས་སོ་ཞེས་འབྱུང་ངོ་། །མཚན་མ་ལ་དམ་འཆའ་ན། ཏིང་ངེ་འཛིན་གྱི་མཚན་མའམ། ཕྱི་རོལ་གྱི་རྟགས་གཅིག་མ་ཐོན་བར་དུ་བསྙེན་པ་མི་བཏང་བ་སྟེ། འདི་ནི་གང་ཟག་རབ་ཀྱི་སྤྱོད་ཡུལ་ལོ། །དེ་དག་གི་དུས་སུ་ཡང་མཆོད་པ་དང་ཏིང་ངེ་འཛིན་དང་བཅས་པའོ། །དེ་ལྟར་བསྙེན་པ་རྫོགས་ནས་སྒྲུབ་པ་ལ་འཇུག་པར་བྱ་སྟེ། དུར་ཁྲོད་དམ་རི་བོ་འདུས་པའི་རྩེ་ལ་སོགས་པ་བཀྲ་ཤིས་པའི་གནས་སུ་དུས་ཚོད་དང་སྦྱོར་བ་བཟང་པོ་ལ་དཀྱིལ་འཁོར་ཚུལ་བཞིན་བྲིས་ཏེ། དབུས་སུ་ཕུར་པ་བཀོད་ནས་དང་པོར་མཆོད་པ་ཆེན་པོར་བྱས་ཏེ། དེ་ནས་བཟླས་བརྗོད་ཏིང་ངེ་འཛིན་འབའ་ཞིག་ལ་ཞུགས་ནས་ཟླ་བ་དྲུག་ཏུ་གཡེང་བ་མེད་པར་བཟླས་པ་བྱའོ། །དེ་ནས་ནུབ་ཐ་མའི་ཐོ་རངས་སྐྱ་རེངས་ཤར་ཙ་ན། གལ་ཏེ་དངོས་གྲུབ་རབ་ཏུ་ཐོབ་ན་ནི་ཕུར་པ་འཕར་ཞིང་མེ་ལྟར་འབར་བར་འགྱུར་ཏེ། དེའི་ཚེ་ཡིད་གཉིས་མེད་པར་བྱས་ཏེ། རྡོ་རྗེ་གཞོན་ནུ་ལ་ཕྱག་བཙལ་ནས་རང་གི་ལུས་ཕུལ་ཏེ་ཕུར་པ་ལག་པ་གཡས་པར་བླང་བས་རིག་འཛིན་གྱི་རྒྱལ་པོར་འགྱུར་ཏེ། སངས་རྒྱས་རྣམས་ཀྱི་ཞལ་མཐོང་བ་ལ་སོགས་པར་འགྱུར་རོ། །གལ་ཏེ་དུ་བ་བྱུང་ན་ནི་མི་སྣང་བ་ལ་སོགས་པ་ཐོབ་བོ། །གལ་ཏེ་དྲོ་བར་གྱུར་ན་ནི་རྐང་མགྱོགས་ལ་སོགས་པ་ཐོབ་བོ། །གལ་ཏེ་གྲུབ་པར་མ་གྱུར་ན་ཡང་ལས་ཕྲ་མོ་འགྲུབ་པར་འགྱུར་ཏེ། ཞི་བ་དང་རྒྱས་པ་དང་དབང་དང་དྲག་པོ་ལ་སོགས་པ་བཏབ་པ་ཙམ་གྱིས་འགྲུབ་པར་འགྱུར་རོ། །དངོས་གྲུབ་འདོད་པ་རྣམས་ཀྱི་ནི་དང་པོ་གྲུབ་པར་མ་གྱུར་ཀྱང་སྤོགས་པའི་ཆོ་ག་ལན་གསུམ་དུ་བསྐྱར་བས་འབྱུང་ངོ་། །འདི་ནི་སྒྲུབ་པའི་ཆོ་གའོ། །ལས་ལ་སྦྱར་བ་ནི། དངོས་གྲུབ་ཐོབ་པ་རྣམས་ཀྱི་ནི་བསམ་པ་ཙམ་དང་། ཕུར་པ་བཏབ་པ་ཙམ་གྱིས་ཇི་ལྟར་འདོད་པ་བཞིན་འགྱུར་རོ། །ལས་ཕྲ་མོ་གྲུབ་པ་རྣམས་ཀྱིས་ནི་དང་པོ་ལྷ་ལ་མཆོད་པ་བྱ་སྟེ། དེ་ནས་སྔགས་བརྒྱ་རྩ་བརྒྱད་དམ། སྟོང་རྩ་བརྒྱད་དམ། འབུམ་ཡན་ཆད་བཟླས་ཏེ་བསྒྲུབ་བྱའི་གཟུགས་བརྙན་ལ་ཕབ་པས་ཞི་བ་དང་དྲག་པོ་ལ་སོགས་པའི་ལས་འགྲུབ་པར་འགྱུར་རོ། །ཚུལ་འདི་རྣམས་ནི་བཀའ་བཞིན་བྱེད་ནུས་པའི་གང་ཟག་གི་དབང་དུ་བྱས་པ་ཡིན་ནོ། ༈ །ད་ནི་གང་ཟག་དམན་པ་རྣམས་ཀྱི་བྱ་བ་བཤད་པ་སྟེ། དེ་ལ་གང་ཟག་ནུས་པ་ཆུང་བ་ཡུན་རིང་པོར་སྒྲུབ་མི་ནུས་པ་རྣམས་ཀྱི་ནི། དང་པོར་བསྙེན་སྒྲུབ་གོ་ཆུ་རུབ་ཏུ་བྱ་སྟེ་དབང་དང་དམ་ཚིག་མནོས་པའི་རྗེས་ལ་ལོ་ཟླ་ཇི་ཙམ་ནུས་པ་གཅིག་ཏུ་ཉིན་ཞག་རེ་ལ་ཡི་དམ་ནར་མ་ནས་འབྱུང་བ་བཞིན་དུ་སྒོམ་པ་དང་མཆོད་པ་དང་བཅས་བཟླས་བརྗོད་ཇི་ལྟར་ནུས་པའི་གྲངས་ཚད་བཟུང་ལ་བྱའོ། །དེའི་དུས་སུ་དཀྱིལ་འཁོར་དང་ཕུར་བུ་ནི་ལྷག་པར་རྟེན་དུ་བཙུགས་ཀྱང་ཉེས་སྐྱོན་མེད་ལ། འབྱོར་ན་རྡུལ་ཚོན་གྱི་དཀྱིལ་འཁོར་སྟེང་དུ་སྐུ་གཟུགས་བཀྲམ་སྟེ་མདུན་དུ་ཕུར་བུ་བཀོད་ན་ཡང་ལྷག་པར་བཟང་ངོ་། །དེ་ལྟར་དམ་བཅས་པ་རྫོགས་ནས། གལ་ཏེ་དགྲ་བགེགས་ལྟ་བུ་འདུལ་དུ་ཡོད་ན་ནི་དེ་ཉིད་ཀྱི་རྗེས་ལ་ལས་ལ་སྦྱར་བར་བྱའོ། །གདུག་པ་འདུལ་དུ་མེད་ན་ནི་དེའི་ནུབ་ཐ་མ་ལ་དངོས་གྲུབ་བླངས་ཏེ། ཕུར་པ་ལག་ཏུ་བླངས་ནས་དེ་ནས་ས་ལ་མི་བཞག་པར་དར་མཐིང་ག་ལ་སོགས་པ་གོས་བཟང་པོས་དྲིལ་ཏེ་གབ་ཙེ་ལ་སོགས་པ་སྣོད་བཟང་པོར་སྦས་ལ། གནས་གཉན་རིས་སུ་བཞག་ནས་ཕྱིས་དོན་ཆེན་པོའི་ལས་ལ་སྦྱར་བར་བྱས་ཏེ། བྱ་བ་ཕྲན་ཚེགས་ལ་མི་སྤྱོད་དོ། །བཟླས་བརྗོད་ཀྱི་སྔགས་འཕྲལ་གྱི་བྱ་བ་ཕྲན་ཚེགས་ལ་སྤྱད་ན་དོན་ཆེན་པོ་ལ་མཐུ་ཆུང་བར་འགྱུར་རོ། །སྒྲུབ་པའི་ལྷ་དང་བསྙེན་པའི་སྲུང་མ་རྣམས་ཀྱང་བྱ་བ་ཕྲ་མོ་མང་པོ་ལ་བསྐུལ་ན་དོན་ཆེན་པོ་ལ་མཐུ་ཆུང་བར་འགྱུར་རོ། །འདི་ནི་དངོས་པོ་རྣམས་ཀྱི་ངོ་བོ་ཉིད་ཡིན་ཏེ། སྒྲུབ་པའི་རྗེས་ལ་ཡང་ཡི་དམ་ནར་མར་བཟུང་སྟེ་བསྲུང་བ་དང་གསོ་བའི་ཆོ་ག་བྱའོ། ༈ །ད་ནི་དངོས་གྲུབ་མ་ཐོབ་ཅིང་དམན་པ་རྣམས་ཀྱི་ལས་ལ་སྦྱོར་བའི་ཆོ་ག་བཤད་དེ། དེ་ལ་དྲག་པོ་ཕྲིན་ལས་ཀྱི་གནས་ནི། སྔོན་གཡུལ་ཆེན་པོ་བཅས་ཤིང་སྐྱེ་བོ་མང་པོ་བསད་པའི་གནས་སམ། སྔོན་གྱི་ལམ་རྒྱ་གྲམ་མམ། ཤིང་རྐང་གཅིག་དང་། ལིདྒ་གཅིག་པ་དང་། མ་མོའི་གནས་ལ་སོགས་པ་འབྱུང་པོ་གནས་པའི་ས་དང་། གནམ་སའི་དབྱིབས་ཀྱང་གྲུ་གསུམ་དང་། ལྟོ་རལ་དང་གཅན་གཟན་གདུག་པའི་ཁ་འདྲ་བ་ལ་སོགས་པ་རྣམས་སུ་སྦྲ་གུར་ལ་སོགས་པ་བཅས་ཏེ་བྱའོ། །ཡང་ན་དེའི་ཉེ་འཁོར་གཅིག་ཏུ་ལས་ལ་སྦྱར་བར་བྱ་སྟེ། དེར་མནན་པ་བྱས་ན་ཡང་བཏུབ་བོ། །དེ་ལ་ལས་ཀྱི་གོ་རིམ་ནི། དང་པོར་གནས་དེར་བཅས་ཏེ། མཆོད་པ་རྣམ་པ་ལྔ་དང་སྦྱིན་གཏོར་དང་། ཆང་ཕུད་རིན་པོ་ཆེ་དང་བཅས་པ་བཤམས་ཏེ་འཕགས་པ་མཆོད་པ་དང་། འགྲོ་བ་སྤྱིར་སྦྱིན་གཏོང་བ་དང་། བགེགས་རིགས་ལ་སྤྱི་གཏོར་བསྔོ་བ་དང་། བསྒྲུབ་བྱའི་ཕོ་ལྷ་དང་སྲོག་ལྷ་སོགས་ལྷ་རྣམས་ལ་སྦྱིན་གཏོར་བསྔོས་ཏེ། མ་ཉེས་པའི་དཔང་གཟུགས་ཤིང་བསྒྲུབ་བྱའི་སྟོང་གྲོགས་མི་བྱེད་པར་བཀའ་བསྒོའོ། །གནས་དེའི་བགེགས་ལ་ཡང་ཁྱད་པར་དུ་སྦྱིན་གཏོར་མང་པོ་སྩལ་ཏེ་བདེན་པ་བརྡར་ལ། ཁྱོད་ཀྱི་གནས་འདི་ནི་དུས་ཚོད་འདི་ཙམ་ཞིག་ཏུ་བདག་ལ་གཡར་དགོས་ཀྱི། དེའི་བར་དུ་བདག་ལ་ཕྲག་དོག་མ་བྱེད་པར་བདག་གི་ལས་ཀྱི་གྲོགས་གྱིས་ཤིག །ལས་གྲུབ་མ་ཐག་ཏུ་རང་གི་གནས་མྱུར་དུ་སྦྱིན་ནོ་ཞེས་བསྒོའོ། །དེ་ནས་ལས་སྒྲུབ་སྤྱི་དང་མཐུན་པར་རྒྱལ་པོ་ཆེན་པོ་བཞི་ལ་ཕྱི་མཚམས་བཅོལ་བ་དང་། ནང་མཚམས་དག་ཅི་རིགས་བགྱིས། ས་བྱིན་གྱིས་བརླབ་པ་དང་། དཀྱིལ་འཁོར་ཆག་ཆག་བཏབ་པ་ཡན་ཆད་སྤྱི་དང་མཐུན་པར་ཅི་ནུས་བགྱིས། དེ་ལ་དལ་བྲི་བའི་དུས་ནི། དུས་ནུབ་མོ་བྲི་ཞེས་འབྱུང་ནའང་གནས་དང་དུས་སྐབས་ཀྱིས་སྦྱར། དེ་ལ་ཐིག་བཏབ་པས། འཁོར་ལོ་རྩིབས་བརྒྱད་ཁམས་གཅིག་སྒོ་དང་བཅས་པའི་ཐིག་བཏབ། ཚོན་དགྱེ་བ་ནི། དབུས་ཀྱི་མ་ལྟེ་བ་ནག་པོ་བྱ་སྟེ། དབུས་སུ་དམར་ནག་གྲུ་གསུམ་གཅིག་བྱ། འཁོར་ལོ་རྩིབས་རིགས་དང་བསྟུན་ལ། དཀྱིལ་དུ་དམར་ནག་གྲུ་གསུམ་རེ་གྲུ་ཆད་དུ་བྱ། དབལ་ཀ་དམར་པོ་བྱ་སྟེ། དེ་ལ་ཡང་དམར་ནག་གྲུ་གསུམ་རེ་བྱ། གྲུ་ཆད་རཀྟའི་རྒྱ་མཚོ་བྲིས། ཁྱམས་སེར་པོ་བྱ། སྒོ་ཕྱོགས་དང་བསྟུན། ཕྱི་རོལ་ལ་ལྕགས་རི་དང་མེ་རི་བྱའོ། །དེ་ནས་ཕྱག་རྒྱ་དགོད་པ་ནི། ཡུམ་རྣམས་ཀྱི་ཕྱག་རྒྱ་ནི་དམར་ནག་གྲུ་གསུམ་ཉིད་ཡིན་པས་གུད་དུ་དགོད་མི་དགོས་ཞེས་བཤད། ཡབ་ཉི་ཤུ་རྩ་གཅིག་དང་སྒོ་མ་བཞིའི་ཕུར་པ་ལ་དར་ལེ་བརྒན་གྱི་ཅོད་པན་བཏགས་ཏེ། དེ་ལ་དབུས་སུ་གཙོ་བོའི་ཕུར་པ་དགོད། རྩིབས་བརྒྱད་ལ་ཕྱོགས་ཀྱི་ཁྲོ་བོའི་ཕུར་པ་དགོད། དབལ་ཁ་བརྒྱད་ལ་ཕྱོགས་ཀྱི་ཟ་བྱེད་ཀྱི་ཕུར་པ་བཀོད། སྟེང་འོག་གི་ཁྲོ་བོ་ཟ་བྱེད་དང་བཅས་པ་ནི་ཤར་ནུབ་ཀྱི་རྩིབས་ལྟེ་བའི་མདུན་རྒྱབ་ཏུ་དམར་ནག་གྲུ་གསུམ་རེའི་སྟེང་དུ་བཀོད། ཤར་ལྷོར་བྱབས་ཕུར་ཏེ་བྱ་རྒོད་ཀྱི་གཤོག་ཟུར་གྱི་ཕུར་པ་བཀོད། ལྷོ་སྒོར་བསྡིགས་ཕུར་ཏེ་སྐྱེར་ཕུར་བཀོད། ནུབ་སྒོར་དབང་ཕུར་ཏེ་ཟངས་སམ་ཤིང་དམར་པོའི་ཕུར་པ་བཀོད། བྱང་དུ་སྒྲོལ་ཕུར་ཏེ་མཆོག་ཕུར་བཀོད། ཁྱམས་ལ་ཕུར་བུའི་སྲུང་མ་རྣམས་ཀྱི་རྟེན་བཀོད་དེ་ལྷག་པར་ཡང་བསྭེའི་ལྷ་མོ་རྣམས་ཀྱི་རྟེན་བསྭེ་ཕོར་བཞིའི་ནང་དུ་མཚམས་བཞིར་ཁྲག་དང་ཞག་དང་མར་ཁུ་དང་འོ་མ་རྣམས་སོ་སོར་བཀང་སྟེ་བཞག་གོ། །ལྕགས་རི་ལ་དབང་ཕྱུག་མའི་རྩང་བཀོད་ཀྱང་ཉེས་པ་མེད་དེ། སྤྱིར་དཔལ་གྱི་འཁོར་གྱི་མཁའ་འགྲོ་མ་མོའི་གཙོ་མོ་ཡིན་པས་སོ་ཞེས་ཀྱང་བཤད། ཕུར་བུའི་དལ་གྱི་ལྷར་མ་སྨྲོས་པས་ལྷག་པར་མ་བཀོད་ཀྱང་ཉེས་པ་མེད། ཕྱག་རྒྱ་འདི་རྣམས་བཀོད་པ་སོ་སོའི་དལ་གྱི་སྙིང་པོ་བརྗོད་ཅིང་དགོད་པའམ། ལྷ་བཞུགས་སུ་གསོལ་བའི་སྐབས་ནས་འབྱུང་བའི་ཚིག་དང་། སྔགས་ཀྱིས་དགོད་པ་ཅི་དགར་བྱའོ། །ལིདྒ་དང་བྲུབ་ཁུང་བཅའ་བ་ནི། གང་དུ་མནན་པའི་ས་ཉིད་དུ་གནས་བཅས་པ་ཡིན་ན་ནི། དང་པོ་དལ་བྱེད་པའི་ཚེ། དལ་གྱི་དབུས་སུ་དང་པོ་གྲུ་གསུམ་ཁྲུ་གང་པ་ཅིག་བརྐོས་ཏེ། དེ་ལ་ཁ་ཁྱེར་བཏགས་པ་དེ་ལ་བསྐོར་ཏེ་འཁོར་ལོའི་ལྟེ་བ་བྱའོ། །གཞན་དུ་གནོན་ན་ནི་སྔ་མ་བཞིན་དུ་བྱའོ། །ལྷོ་ནུབ་ཀྱི་གྲར་བྲུབ་ཁུང་གཅིག་བྱ་སྟེ། དེར་ཚོགས་མཆོད་ཀྱི་དུས་སུ་བསྟབ་པའི་ལས་བྱའོ། །ལིདྒའི་རྒྱུ་ཡང་རྣམ་པ་གཉིས་ཡིན་ཏེ། མནན་པའི་ལིདྒ་ནི་ཕུན་སུམ་ཚོགས་པ་ནས་འབྱུང་བ་བཞིན་དུ་བྱ་སྟེ་དཀར་ནག་གིས་བཏགས་ནས། དབུས་ཀྱི་ཨེའི་སྟེང་མགོ་ལྷོ་ནུབ་ཏུ་བསྟན་ཁ་སྦུབ་དུ་བཞག་སྟེ་མགོ་བོ་གིང་ཕུར་ལ་གཏད་དོ། །ནང་ནུབ་ཚོགས་མཆོད་ཀྱི་དུས་སུ་བསྟབ་པའི་ལིདྒ་ནི། གྲོ་གའམ་ཤིང་ལོའམ་ཤོག་ཤོག་ལ་སོགས་པར་བྲིས་ཏེ་ལྷོ་ནུབ་ཀྱི་བྲུབ་ཁུང་དུ་བཅུག་ལ། ཚོགས་མཆོད་རེ་རེ་ཞིང་ལིདྒ་གསར་པ་རེ་རེ་ལ་འགུགས་འདྲེན་བྱ་ཞིག་ཕུར་པ་གཞན་གྱི་བཏབ་སྟེ། མཇུག་ཐོན་ཁར་གཏོར་མ་ཆ་གཅིག་སྦྱིན་སྲེག་བྱེད་པའི་སྐབས་སུ་ཧོམ་དུ་བསྲེག་གོ། །དབུས་ཀྱི་ལིདྒ་ནི། ནུབ་ཐ་མ་ལ་སྒྲུབ་ཕུར་ཉི་ཤུ་རྩ་གཅིག་བཏབ་སྟེ་ཕུར་པ་དང་བཅས་ནས་མནན་པ་བྱས་ལ། དེ་ཡང་སྟབས་བདེ་ན་མནན་པ་བྱས་པའི་ས་ཉིད་དུ་དཀྱིལ་འཁོར་བྱ་སྟེ། དེའི་དཀྱིལ་དུ་གྲུ་གསུམ་བྱས་པའི་ནང་དུ་དང་པོ་ཁ་སྦུབ་ཏུ་བཞག་པ་དེ། ནུབ་ཐ་མ་ལ་འདེབས་ཁར་གན་རྐྱལ་དུ་བཞག་སྟེ་ཕུར་པ་བཏབ་ལ། དེ་ཉིད་དུ་ཕུར་པ་དང་བཅས་ནས་ཕུན་སུམ་ཚོགས་པ་ནས་འབྱུང་བ་བཞིན་དུ་མནན་པ་བྱས་ཏེ་བཞག་གོ། །ནམ་རྟགས་འབྱུང་བ་དང་སླར་ཕྱུང་སྟེ་གསོ་བའི་ཆོ་ག་བྱའོ། །དམ་རྫས་ནི་བདུད་རྩི་རྣམ་པ་ལྔ་དང་། ཚོགས་ཀྱི་མཆོད་པ་དང་། རྨད་དུ་བྱུང་བའི་གཏོར་མ་དང་། སྤྱིའི་ཡོ་བྱད་ཇི་ལྟར་འབྱོར་པ་བཞིན་དུ་བཤམ་མོ། །དམ་ཚིག་གི་སྲུང་མ་རྣམས་ཀྱི་ཁྱད་པར་གྱི་རྫས་འབྱོར་ཡང་བཟང་ངོ་། །དེ་ལྟར་སྤྱིའི་ལས་མདེའུ་བརྐོོས་ཙམ་བསྟན་ནས། ཆོ་ག་ལ་འཇུག་པའི་རིམ་པ་བསྟན་ཏེ། ཡང་མཚམས་བཅད་པ་དང་། དམ་ཚིག་གི་ཕྱག་རྒྱ་དང་། སྒོ་དབྱེ་བ་དང་། མཆོད་རྫས་བྱིན་གྱིས་བརླབ་པ་དང་། མཆོད་པ་དལ་དུ་བཀོད་པ་རྣམས་སྤྱིའི་ཆོ་ག་ཡིན་པས་ཇི་ལྟར་ནུས་ཤིང་འཚམས་པ་ལྟར་བགྱིས་པའི་རྗེས་ལ་ཆོ་ག་གཞུང་ལ་ཞུགས་ཏེ་བདག་རྩ་བའི་དལ་དང་། ཕྱོགས་བཅུ་ཁྲོ་བོའི་དལ་བསྐྱེད་པའི་རྗེས་ལ་ལྕགས་སྣ་ལྔ་ལས་བྱས་པའམ། སེང་ལྡེང་ངམ་ཤིང་གདུག་པ་ལ་བྱས་པའི་ཕུར་པ་སོར་བཅུ་གཉིས་པ་ཉི་ཤུ་རྩ་གཅིག་ཤིང་ཤུན་ནམ་བནྡེའི་དབུས་སུ་བཞག་སྟེ། བྱིན་གྱིས་བརླབ་པ་ཕུན་སུམ་ཚོགས་པ་ནས་འབྱུང་བ་བཞིན་དུ་བྱ་སྟེ་ཚོན་སྐུད་ཀྱིས་བཅིངས་ལ། དབུས་ཀྱི་ཨེའི་ནང་གི་ལིདྒའི་སྟེང་དུ་རྩེ་མོ་ཅུང་ཟད་མ་རེག་པ་ཙམ་དུ་བྱས་ཏེ་བཞག་གོ། །དེ་ནས་རང་བཞིན་གྱི་དཀྱིལ་འཁོར་སྤྱན་དྲངས་ཏེ། སྨན་མཆོད་ཡན་བགྱིས་ལ། དེ་ནས་ཚོགས་ཀྱི་མཆོད་པ་ཕུལ་ཏེ། ཚོགས་ལ་རོལ་ཁར་ཚོགས་དེ་ཡང་བསྒྲུབ་བྱར་བྱིན་གྱིས་བརླབས་ལ་བསྒྲལ་ལ་ཕུད་བཀྲོལ་ཏེ་ཆ་གསུམ་དུ་བཅད་ལ། དང་པོ་མཆོད་པར་འབུལ། ཆ་གཉིས་པ་བཤགས་པར་འབུལ། ཆ་གསུམ་ལྷོ་ནུབ་མཚམས་ཀྱི་བྲུབ་ཁུང་དུ་བླུག་སྟེ། རྣལ་འབྱོར་པ་རྣམས་ཀྱིས་ཕོ་ཉ་དྲག་ཏུ་བསྐུལ་ཞིང་འགུག་འདྲེན་བྱས་ལ། ཕུར་པ་ཐ་མལ་པ་གཞན་གྱིས་ལིདྒ་དང་ཟས་སུ་བཅས་པ་ལ་བསྟབ། དེ་ནས་ཕུར་པ་ཕྱུངས་ཏེ་ལིདྒའི་དུམ་བུ་བྲུབ་ཁུང་དུ་བཞག་ལ་ཟས་རྣམས་ཕྱུངས་ཏེ་གཏོར་མར་བསྟབ་པར་བྱའོ། །དེ་ནས་རྣལ་འབྱོར་པ་རྣམས་ཚོགས་ལ་རོལ་ཏེ། རྗེས་ཆད་དབུགས་ཕྱུང་བ་དང་གཏོར་མ་མཚམས་སྦྱར་ཏེ། སྔ་མ་བཏང་ཕྱི་མ་དལ་དུ་ཕུལ་ལ། གཏོར་མ་བཏང་བ་ལ་ལྷག་མའི་མཆོད་སྦྱིན་བཟང་པོར་སྦྱར་ཏེ། གཏོར་མའི་མགྲོན་གྱི་གནས་རྣམས་རེ་རེ་ལ་ཡང་དམར་གྱི་ཨརྒྷ་སྦྲེང་ཞིང་སྤྱན་དྲངས་པ་དང་། མཆོད་པ་འབུལ་བ་དང་། བཤགས་པ་བྱ་བ་དང་། ཕྲིན་ལས་བཅོལ་བ་རྣམས་བྱའོ། །ཕྲིན་ལས་ལ་ཡང་ཕོ་ཉ་དགུག་ཅིག་གཏོར་མ་ལ་ཡང་བསྒྲུབ་བྱ་བསྟིམ་པ་དང་། ཕུར་པ་བཏབ་པ་དང་། ཞལ་དུ་བསྟབ་པ་དང་། སྨོན་ལམ་བཏབ་པ་རྣམས་འཚམས་པར་བྱའོ། །དེ་ལྟར་ཉིན་ཞག་ཕྲུག་གཅིག་ལ་དུས་མཚམས་བཞིར་མཆོད་པ་བཞི་བྱ། ནམ་གྱི་མཐར་གཏོར་མ་རེ་བཏང་། སྲོད་དང་སྔ་དྲོ་ལ་དབུས་ཀྱི་སྒྲུབ་ཕུར་ཉི་ཤུ་རྩ་གཅིག་ལ་བྱིན་རླབས་ཐེབས་རེ་བྱ་སྟེ། གུ་གུལ་སྦྱར་མས་བདུག་ཅིང་སྔ་མ་བཞིན་དུ་དབུས་སུ་བཞུགས་སུ་གསོལ། དེ་ལྟར་ཞག་གསུམ་མམ་ལྔ་བྱས་པའི་ནུབ་ཐ་མ་ལ་ཚོགས་ཀྱི་མཆོད་པ་ལ་ལྷོ་ནུབ་མཚམས་ཀྱི་བསྟབ་པ་དང་བཏབ་པ་བྱ་མི་དགོས་ཏེ། དབུས་ཀྱི་སྒྲུབ་ཕུར་རྣམས་བླངས་ཏེ་བྱིན་རླབས་སྔ་མ་བཞིན་བགྱིས་ལ། རྡོ་རྗེ་ཁྲོས་པས་ཞེ་སྡང་གཅོད། །ཅེས་པའམ། རྡོ་རྗེ་གཞོན་ནུའི་རིག་འཛིན་རྣམས། །ཞེས་པ་ནས་མར་གཞུང་བསྲང་། །དམ་ཚིག་ཆེན་པོའི་དུས་ལ་བབ། །ཅེས་པས་ཐུགས་དམ་དྲག་ཏུ་བསྐུལ་ཞིང་། ཤར་སྒོའི་བྱབས་ཕུར་སྒྲིལ་ཞིང་བསྐོར་ཏེ་ཕོ་ཉ་དྲག་ཏུ་བསྐུལ། དེ་ནས་བསྡིགས་པ་དང་། དབང་དུ་བྱ་བ་དང་། སྒྲོལ་ཕུར་བཏབ་ལ་མངགས་གཞུགས་ཀྱི་ལས་རྫོགས་པ་དང་། སྒྲུབ་ཕུར་ཉི་ཤུ་རྩ་གཅིག་གཞུང་བཞིན་བཏབ། དེ་ནས་དེ་ཉིད་དུ་མནན་པ་བྱེད་ན་མནན་པ་ཡན་ཆད་རྫོགས་པར་བྱ་སྟེ། དེ་ནས་ཚོགས་ལ་རོལ། མནན་པ་གཞན་དུ་བྱེད་ན་ཕུར་པ་བཏབ་པའི་རྗེས་ལ་ཚོགས་ལ་རོལ་ལ་གཏོར་མ་བསྐྱལ་བ་དང་། མནན་པ་དུས་གཅིག་ཏུ་བྱ། དེ་ལྟར་ཚོགས་ལ་རོལ་ཟིན་ནས་གཏོར་མ་བཏང་བ་ནི་འགྲུབ་ན་ཆ་གཅིག་གཏེར་དུ་སྦ། ཆ་གཅིག་ལ་སྦྱིན་སྲེག་བྱའོ། །ཆ་གཅིག་ལ་མཁའ་འགྲོ་མ་བསྐྱང་ངོ་། །མ་འགྲུབ་ན་གཉིས་སུ་བཅད་དེ་གཏེར་དུ་སྦ་མི་དགོས་སོ། །སྦྱིན་སྲེག་གི་དུས་སུ་ལྷོ་ནུབ་མཚམས་ཀྱི་བྲུབ་ཁུང་གི་ལིདྒའི་སྨན་དུམ་རྣམས་བསྡུས་ཏེ་ཧོམ་དུ་བསྟབ་ཅིང་བསྲེག་གོ། །ཡང་མ་གྲུབ་ན་ནི་གཏོར་མས་མཁའ་འགྲོ་མ་བསྐྱང་བ་ཙམ་བྱས་ལ། ལིདྒའི་སྨན་དེ་རྣམས་དབུས་ཀྱི་ལིདྒ་དང་ལྷན་ཅིག་ཏུ་མནན་པ་བྱས་ཏེ་བཞག་གོ། །ཕྲིན་ལས་འདིའི་དུས་སུ་ཨེ་ཀ་ཙ་ཏིའི་ཟོར་ཐུན་དང་བསྭེ་མོ་བཞིའི་ཟོར་ཐུན་དག་བྱས་ཏེ་འཕངས་ཀྱང་བཟང་ངོ་། །དེ་ལྟར་ལས་རྫོགས་པའི་རྗེས་ལ་དལ་བསྡུ་བའི་ཚེ། དཔལ་རྡོ་རྗེ་གཞོན་ནུའི་ཕུར་པ་ལ་སོགས་པའི་ལྷ་དལ་དུ་བཀོད་པའི་ལྷའི་རྟེན་གྱི་ཕུར་པ་ཉི་ཤུ་གཅིག་བསྡུས་ཏེ་བདག་གི་ཐུགས་ཀར་བཟུང་ལ། ལྷ་རྣམས་བདག་གི་ཐུགས་ཀར་བསྡུས་ཏེ་དལ་བསྡུའོ། །དེ་ཉིད་ནི་དངོས་གྲུབ་བླང་བའང་ཡིན་ནོ། །བསྙེན་སྒྲུབ་དང་ལས་ཀྱི་བཟླས་བརྗོད་ཀྱི་ཏིང་འཛིན་ནི་ཕུར་པ་མ་བཀོད་པའི་དུས་སུ་གསང་ཕྲེང་བཞིན་ནམ། ཡང་ན་ཐུགས་ཀར་ཉི་མའི་དཀྱིལ་འཁོར་ལ་བཟླས་པའི་ཡི་གེ་བསྒོམས་ཏེ་བྱའོ། །ཏིང་འཛིན་གསལ་ན་འཕྲོ་འདུ་དང་བཅས་པ་བྱའོ། །ཕུར་པ་དལ་དུ་བཀོད་ནས་ནི་ཕུན་སུམ་ཚོགས་པ་ལྟར་བྱའོ། །དེ་ཚེ་འཕྲོ་བའི་གཞི་ནི་རྩ་བའི་དལ་དང་། དབང་ཕྱུག་ཁྲོ་བོའི་དཀྱིལ་འཁོར་རོ། །བསྡུ་བའི་གནས་ནི་ཕུར་པ་རྫས་ཀྱི་དལ་ཏེ་དབུས་ཀྱི་སྒྲུབ་ཕུར་ཉི་ཤུ་རྩ་གཅིག་གོ། །ཉི་ཤུ་རྩ་གཅིག་ཀྱང་བཏབ་པའི་གནས་ཀྱི་དབྱེ་བ་ཙམ་སྟེ། རང་བཞིན་གཅིག་སྟེ། རྡོ་རྗེ་གཞོན་ནུའི་ཕྱག་ཐ་མའི་ཕུར་པ་ཉིད་ཀྱི་རང་བཞིན་ནོ། །ཕུར་བུའི་གཞུང་ཕྱོགས་གཅིག་གི་བཀོལ་བྱང་རྫོགས་སོ།། ༈ །།འདིའི་ཆ་རྐྱེན་དུ་མེད་དུ་མི་རུང་བ་ནི། ལས་བྱང་ནར་མ་ཆུང་ངུ་དང་འབྲིང་པོ་ཙམ། མཇུག་བསྟབ་པའི་ཕྲིན་ལས་དང་གསུམ་ཡིན་ནོ། །འདེབས་པའི་ཚེ་ཐུགས་དམ་བསྐུལ་ཞིང་ཕོ་ཉ་བཏང་བ་ནི། ཕུར་པ་སྤྱིའི་ཆོ་ག་ལ་ལྟོས་སུ་རུང་ངོ་། །ཚོགས་ཀྱི་མཆོད་པ་དང་། གཏོར་མ་གཏོང་བ་དང་། སྤྱིའི་ལས་མདེའུ་རྣམས་ནི་ལས་སྒྲུབ་སྤྱི་ལ་ལྟོས་པས་ཆོག་གོ། །ཨེ་ཀ་ཛཱ་ཏི་དང་བསྭེ་མོའི་ཐུན་ནི་སོ་སོའི་སྒོས་སྒྲུབ་ནས་འབྱུང་བའི་ཐུན་ཟོར་ལ་ལྟོས་བས་ཆོག་གོ། །ཨཐྎ། འདི་བླ་མ་མཁས་གྲུབ་རོང་ཟོམ་གྱིས་མཛད་དོ།། །།