ཕུར་པ་སྨད་ལས་ཀྱི་སྙན་བརྒྱུད་མངའ་བདག་རྒྱལ་པོ་ལ་གནང་བ།

ཕུར་པ་སྨད་ལས་ཀྱི་སྙན་བརྒྱུད་མངའ་བདག་རྒྱལ་པོ་ལ་གནང་བ་བཞུགས་སོ། །བཅོམ་ལྡན་འདས་ཕྲིན་ལས་ཐམས་ཅད་ཀྱི་བདག་པོ་རྡོ་རྗེ་གཞོན་ནུའི་མན་ངག་འདི་ཨོ་རྒྱན་གྱི་མཁན་པོ་པདྨ་འབྱུང་གནས་ཡན་ཆོད་དུ་སྙན་ཁུང་དུ་རིམ་པར་བརྒྱུད། ཡི་གེར་མ་བཀོད་དོ། །དེ་ནས་སློབ་དཔོན་པདྨ་འབྱུང་གནས་ཀྱིས་མ་འོངས་པའི་རྣལ་འབྱོར་པ་རྣམས་ལ་ཕན་གདགས་ཤིང་། དུས་ཀྱི་ཐ་མར་སངས་རྒྱས་ཀྱི་བསྟན་པ་གཉན་པ་བསྲུང་བའི་ཆེད་དུ་མན་ངག་ཐུགས་ལས་བརྟོལ་ནས་ཡི་གེར་བཀོད་དེ་བཙད་པོ་ཁྲི་སྲོང་ལྡེའུ་བཙན་ལ་གཏད་པ་ལགས་སོ། །དེ་ལ་དང་པོར་གསང་བ་མན་ངག་གི་རིམ་པ་མཐའ་དག་དོན་གསུམ་དུ་འདུས་པར་བསྟན་པ་ནི། རྣལ་འབྱོར་མན་ངག་གདེངས་ལྡན་པས། །བསྙེན་པས་ཉེ་བར་གྱུར་པ་དང་། །བསྒྲུབས་ནས་ལས་ལ་སྦྱོར་བ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །ཅེས་གསུངས་པས། གསང་བ་མན་ངག་གི་རིམ་པ་ཇི་སྙེད་པ་བཀོད་པ་ཡང་། བསྙེན་པ་དང་། སྒྲུབ་པ་དང་། ལས་ལ་སྦྱོར་བ་དང་གསུམ་དུ་འདུས་པར་གསུངས་ལ། དེ་དག་གི་མན་ངག་དང་ལྡན་ན་ཕྲིན་ལས་གང་བསྒྲུབ་ཀྱང་འགྲུབ་སྟེ་འདི་ལ་ཐེ་ཚོམ་མི་ཟའོ། །གལ་ཏེ་ཐེ་ཚོམ་ཅན་དུ་གྱུར་ན་བསྒྲུབ་ཀྱང་འགྲུབ་པར་མི་འགྱུར་བས་བཞག་པར་རིགས་སོ། །དེས་ན་ཕྱིན་ཅི་མ་ལོག་པར་ཡང་དག་པའི་ལྟ་བ་ལ་གནས་པས། བྱེད་སྤྱོད་ཐམས་ཅད་ཀྱང་ཚོགས་གཉིས་སུ་འགྱུར་པར་བསྟན་པའི་ཕྱིར་འདི་སྐད་དུ། སེམས་ཉིད་རྡོ་རྗེ་ཀཱི་ལ་ཡ། །ཡེ་ཤེས་རྩེ་མོ་ཐམས་ཅད་འདེབས། །དེ་ཡིས་སྣོད་བཅུད་རྣམ་པར་དག །བྱེད་སྤྱོད་ཐམས་ཅད་ཚོགས་གཉིས་འགྱུར། །ཞེས་འབྱུང་བས། སེམས་ཀྱི་གནས་ལུགས་ཇི་བཞིན་པ་ཉིད་ནི་སེམས་ཉིད་ཆོས་ཐམས་ཅད་ཀྱི་དེ་བཞིན་ཉིད་ཀྱང་དེའོ། །དེའི་རང་བཞིན་མི་འགྱུར་མི་ཤིགས་པ་རྡོ་རྗེའོ། །དེ་ཡང་དག་པ་ཇི་ལྟ་བ་བཞིན་དུ་རྟོགས་པའི་ཤེས་རབ་ནི་ཡེ་ཤེས་ཏེ། དེ་ཆོས་ཐམས་ཅད་སྟོང་ཉིད་ལས་གཞན་མ་ཡིན་པར་རིག་པས་ན་འདེབས་ཤེས་བྱའོ། །དེ་ལྟར་རྟོགས་ན་ནི་ཕྱི་ནང་སྣོད་བཅུད་ཐམས་ཅད་ཀྱང་ཀུན་རྫོབ་སྒྱུ་མ་ཙམ་དུ་ཕུར་པ་རྫས་ཀྱི་ཕྱག་རྒྱར་སྣང་ལ། དོན་དམ་པར་ཆོས་ཐམས་ཅད་སྟོང་ཞིང་བདག་མེད་པར་རྟོགས་པ་ནི། རྣམ་པར་རྟོག་པ་ཐམས་ཅད་ལ་ཡེ་ཤེས་རྩེ་མོས་བཏབ་པ་ཡིན་ནོ། །དམིགས་པ་རྩེ་གཅིག་ཏུ་བྱེད་ཅིང་ཆོས་ཐམས་ཅད་སྟོང་པ་ཉིད་དུ་རྟོགས་པ་ནི། དེ་ནི་སྟོང་པ་ཉིད་ཀྱི་ཡེ་ཤེས་ཏེ། ཡེ་ཤེས་ཐམས་ཅད་ཀྱི་ནང་ནས་ཀྱང་དམ་པར་གྱུར་པས་ན་རྩེ་མོའི་མཆོག་ཡིན་ནོ། །ཅིའི་ཕྱིར་སྟོང་པ་ཉིད་ཀྱི་ཡེ་ཤེས་ལ་ཕུར་པ་ཞེས་བྱ་ཞེ་ན། དམིགས་པའི་རྣམ་རྟོག་དངོས་པོ་ཀུན། །ཡེ་ཤེས་རྩེ་མོས་འདེབས་ཕྱིར་ཡིན། །ཞེས་གསུངས་སོ། །དེ་ལྟར་ལྟ་བུའི་ངང་ལ་སེམས་རྩེ་གཅིག་ཏུ་གནས་པ་ནི་སྤྱོད་ལམ་ཐམས་ཅད་དུ་ཅི་བྱས་ཀྱང་ཚོགས་གཉིས་རྫོགས་པར་འགྱུར་རོ། །ཞེས་བསྟན་ཏོ། །དེ་ནས་ཕྲིན་ལས་ཐོག་མར་སྒྲུབ་པའི་དལ་གཟུགས་བརྙན་དུ་བཞེངས་སུ་གསོལ་བ་ནི་འདི་སྐད་དོ། །དབུས་ན་ཕོ་བྲང་ཨེ་ཡི་ད་ལ་ནི། །ཟླ་གམ་དབང་ཆེན་རཀྟའི་རྒྱ་མཚོ་འཁྲུག །ཆོས་སྐུ་སྤྲོས་མེད་མུ་ཁྱུད་ཟླུམ་པོར་འཁྱིལ། །ཡེ་ཤེས་བཞི་ལྡན་གྲུ་ཆད་བཞི་ཡིས་བརྒྱན། །མཁའ་དབྱིངས་བཅུ་དྲུག་ཨེ་ཡི་མཐའ་བསྐོར་ཏེ། །སྐུ་གསུམ་ལྡན་པས་ཐོད་པ་ཚར་གསུམ་དང་། །མི་འགྱུར་བརྟན་པས་རྡོ་རྗེའི་ར་བས་བསྐོར། །འབར་བའི་བར་ཁྱམས་དང་ནི་སྒོ་བཞིར་ལྡན། །ཕྱི་རིམ་ལྕགས་རི་བསྐལ་པའི་མེ་རིས་བསྐོར། །ཞེས་འབྱུང་བས་དེ་ཉིད་ལ་བརྟག་སྟེ་ཤེས་པར་བྱའོ། །ཡང་འདི་སྐད་དུ། གྲུ་བཞི་སྒོ་བཞི་ལྡན་པ་ལ། །འཁོར་ལོ་རྩིབས་བརྒྱད་མུ་ཁྱུད་བཅས། །བར་ཁྱམས་སྒོ་ཁྱུད་རྟ་བབས་ལ། །ཐོད་སྦྲུལ་ལ་སོགས་རྒྱན་གྱིས་མཛེས། །གཅིག་གི་བཅུ་གཅིག་ཉི་ཤུ་གཅིག །བདག་ཉིད་གང་སྒྲུབ་འདོད་པ་ཡི། །ཨེ་ཡིད་ལ་མདུན་དུ་བྲི། །ཞེས་འབྱུང་བས་དེ་ཉིད་ལ་བརྟག་གོ། །དེ་ནས་བྲུབ་ཁུང་ལས་ཀྱི་དལ་བཅའ་བ་ནི་འདི་སྐད་དུ། དབང་ལྡན་མེ་དང་བདེན་བྲལ་དུ། །བྲུབ་ཁུང་ལས་ཀྱི་ད་ལ་ནི། །ཁྲུ་གང་ཚད་དང་འཚམས་པ་ལ། །གྲུ་གསུམ་སུམ་བརྩེགས་ཁ་ཁྱེར་ཅན། །ཟ་བྱེད་ཞལ་དང་མདའ་གཞུར་བཅས། །ཞེས་འབྱུང་བས། དབང་ལྡན་མཚམས་སུ་བསྟབ་པ་ལས་ཀྱི་ད་ལ་གྲུ་གསུམ་ཕྱོགས་རེ་ལ་ཁྲུ་རེ་བ། ཟབས་སུ་ཕྱོགས་གཅིག་གི་ཕྱེད་འགྱུར་བྲུའོ། །ནང་དུ་རོ་སྲེག་པའི་སོལ་བ་ཁྲག་ཆེན་དང་སྦྱར་བས་བྱུག་གོ། །དེར་མིའི་སྙིང་པོ་ནྲྀ་བྲིའོ། །ཁ་ཁྱེར་གྱི་ཟུར་གསུམ་ལ་ཟ་བྱེད་ཀྱི་ཞལ་ནང་དུ་གདངས་པ། གཞན་ཡང་ཝ་སྤྱང་ལ་སོགས་པ་ཁ་ནང་དུ་གདངས་པ་བྲིའོ། །བསད་པ་ལས་ཀྱི་དཀྱིལ་འཁོར་ནི། ལྷོ་ནུབ་མཚམས་སུ་རྒྱ་དང་ཞབས་གོང་དང་འདྲ་བ་ལས་ལོགས་ལ་མདའ་གཞུ་བཀང་བ་གསུམ། ཟུར་ལ་ཟ་བྱེད་ཀྱི་ཞལ་བྲིའོ། །བང་རིམ་སུམ་བརྩེགས་ཀུན་ཏུ་སོར་བཞི་པ་བྱས་པ་ལ་ཕུར་བུ་བཅུ་གཅིག །རྩང་དྲུག་ཅུ་རྩ་གཉིས། མཚོན་ཆ་རྣམས་རིམ་པ་བཞིན་དུ་དགོད་པར་བྱའོ། །དེར་རྐང་རྗེས་ལ་སོགས་པ་ལས་བྱས་པའི་ལིདྒ་ལ་མིང་རུས་སྙིང་གར་གླན། སྔགས་དྲུག་པོ་བཀོད་ལ་ནང་དུ་གཞུག་གོ། །སྦྱིན་སྲེག་ལས་ཀྱི་དལ་ནི་ཤར་ལྷོ་མཚམས་སུ་བཅའ་སྟེ་དེ་ཉིད་ཀྱི་སྐབས་ན་གསལ་བས་འདིར་མ་བྲིས་སོ། །དེ་ནས་ཕུར་པ་དགོད་པའང་འདི་སྐད་དུ། ཉི་ཤུ་རྩ་གཅིག་ཨེ་དཀྱིལ་ནི། །ཤེས་རབ་ཡུམ་གྱི་རང་བཞིན་ལས། །དྲག་པོའི་ཕུར་པ་ཉི་ཤུ་གཅིག །ཐབས་ཀྱི་ཕྱག་རྒྱའི་ངོ་བོ་རུ། །རང་རང་མདུན་དུ་དགོད་པར་བྱ། །གཟས་པ་པོ་ཡི་མིང་རུས་ནི། །ཡབ་ཡུམ་གཉིས་མེད་མཁའ་ལ་བསྟིམ། །ཞེས་འབྱུང་བས། ཨེ་ཉི་ཤུ་རྩ་གཅིག་ནི་ཡུམ་གྱི་རང་བཞིན་ཤེས་རབ་ལ། སྲས་མཆོག་ཉི་ཤུ་རྩ་གཅིག་ནི་ཡབ་རྣམས་ཀྱི་ངོ་བོ་སྟེ་ཐབས་ཀྱི་རང་བཞིན་ནོ། །ཐབས་དང་ཤེས་རབ་གཉིས་སུ་མེད་པའི་མཁའ་དབྱིངས་སུ་མིང་རུས་ལ་བརྟེན་ཏེ་བསྒྲུབ་བྱའི་རྣམ་པར་ཤེས་པ་གནད་ལ་དབབ་པར་བྱའོ། །དེ་རྣམས་ཀྱང་བཅོམ་ལྡན་འདས་རྡོ་རྗེ་གཞོན་ནུ་ལ་སོགས་པ་ཡབ་ཡུམ་གྱི་མདུན་དུ་རང་རང་གི་སྤྲུལ་པའི་ཚུལ་དུ་དགོད་པར་བྱའོ། །བྱིན་གྱིས་བརླབ་པའི་ཆོ་ག་ནི། ཕུན་སུམ་ཚོགས་པ་ནས་གསལ་བས་དེར་ཤེས་པར་བྱའོ། །བྲུབ་ཁུང་ལས་ཀྱི་ལྷའི་ཕུར་པ་དགོད་པ་ཡང་འདི་སྐད་དུ། རྡོ་རྗེ་ཕུར་པ་བཅུ་གཅིག་གིས། །གྲུ་ཆད་གྲུ་གསུམ་བསྐོར་བར་བྱ། །ཞེས་འབྱུང་བས་ཕུར་པ་བཅུ་གཅིག་བཅོམ་ལྡན་འདས་རྡོ་རྗེ་གཞོན་ནུ་དང་ཁྲོ་བོ་བཅུའི་ངོ་བོར་རང་རང་གི་ལས་སྔགས་དང་བཅས་པས་བྱིན་རླབས་ཅན་དུ་བྱས་ཏེ་གསོད་པ་ལས་ཀྱི་དཀྱིལ་དུ་དགོད་དོ། །གཞན་ཡང་གྲོགས་ཀྱི་ཕུར་པ་བཀོད་པ་ནི་འདི་སྐད་དུ། གསེར་དང་ལྕང་མཆོག་སྐྱེར་ལྡེང་དང་། །གཤོག་པ་ཟངས་དང་རྭ་འཕངས་རྣམས། །ཕྲིན་ལས་སྒོ་བཞིར་དགོད་པར་བྱ། །ཞེས་འབྱུང་བས། དེ་རྣམས་ནི་ཕྲིན་ལས་སྒོ་བཞིའི་བདག་ཉིད་ཡིན་པས་ཁ་དོག་གི་རིགས་ལས་ཕྱེ་སྟེ་སྒོ་བཞིར་དགོད་པར་བྱའོ། །བྱིན་གྱིས་བརླབ་པའི་སྔགས་ནི་གཞན་ན་གསལ་བས་འདིར་མ་བྲིས་སོ། །གནས་བསྲུང་བ་དང་། གནད་ལ་དབབ་པ་ནི་འོག་ནས་འབྱུང་ངོ་། །ཕུར་པ་དེ་རྣམས་ཀྱང་དོན་བདུན་དུ་འདུས་བར་བསྟན་པ་ནི། མེད་དུ་མི་རུང་བའི་ཕུར་པ་བདུན། ཞེས་བྱ་སྟེ། དེ་ཡང་འདི་སྐད་དུ། བསྐྲད་པ་མཚམས་ཀྱི་ཕུར་པ་དང་། །བཀོད་པ་རྫས་ཀྱི་ཕུར་པ་དང་། །མངགས་པ་ཕོ་ཉའི་ཕུར་པ་དང་། །དབང་དུ་བསྡུ་བའི་ཕུར་པ་དང་། །གདབ་པ་ལས་ཀྱི་ཕུར་པ་དང་། །མི་གཏོང་འཛིན་པའི་ཕུར་པ་དང་། །གནས་སྲུང་བ་ཡི་ཕུར་པའོ། །ཞེས་འབྱུང་བས་དེ་རྣམས་ཀྱང་ངོས་བཟུང་ན། བསྐྲད་པ་མཚམས་ཀྱི་ཕུར་པ་ནི། ཕུར་པ་བཅུ་ཁྲོ་བོ་བཅུར་བྱས་ཏེ་ཕྱོགས་མཚམས་བསྲུང་བའི་ཕྲིན་ལས་བཅོལ་བའོ། །མངགས་པ་ཕོ་ཉའི་ཕུར་པ་ནི། སྒོ་བཞིར་བཀོད་པའོ། །དབང་དུ་བསྡུ་བའི་ཕུར་པ་ནི། དམ་ཅན་གནད་ལ་འབེབས་པའི་ཕུར་པ་ལ་བྱའོ། །གདབ་པ་ལས་ཀྱི་ཕུར་པ་ནི། གསོད་ཕུར་ལ་བྱ་སྟེ། བསྒྲལ་བའི་གིང་ཞེས་ཀྱང་འབྱུང་། མི་གཏོང་འཛིན་པའི་ཕུར་པ་ནི། བསྙེན་ཕུར་ལ་བྱའོ། །གནས་བསྲུང་བའི་ཕུར་པ་ནི་གོ་སླའོ། །བཀོད་པ་རྫས་ཀྱི་ཕུར་པ་ནི། ལྷ་ཕུར་དང་དེ་དག་ཐམས་ཅད་ལ་ཡང་བྱ་སྟེ། དེ་དག་དོན་གཅིག་ཏུ་འདུས་པར་ཡང་བསྟན་ཏོ། །སྤྱིར་ན་དེ་དག་རེ་རེ་ལ་སྒྲ་དུ་མ་འཇུག་པ་ཡང་ཡོད་དེ། དེ་ལྟར་བསྟན་པའི་ཕྲིན་ལས་དང་། དོན་ཕྱོགས་རེ་རེ་མཚོན་ནས་ཕྱེ་བར་ཟད་དོ། །དེ་ནས་ཡང་བསྙེན་སྒྲུབ་ལྷའི་འཛབ་ཅེས་བྱ་སྟེ་གསལ་བ་གསུམ་དང་ལྡན་པས་བཟླས་ན་མཆོད་པ་ལ་སོགས་པ་དེ་ཉིད་ཡིན་པར་བསྟན་པའི་ཕྱིར་འདི་སྐད་དུ། གསང་བའི་སྔགས་ཀྱིས་རབ་བསྐྱེད་དེ། །བདག་ཉིད་གསལ་བ་ལ་སོགས་ནི། །མཆོད་དང་བསྟོད་པའི་བདག་ཉིད་ཅན། །སྟོང་པའི་གོ་ཆ་བླ་ན་མེད། །ཅེས་འབྱུང་བས། གསང་བ་སྔགས་ཀྱི་ཀཱི་ལ་ཡ་ཟློས་ཤིང་འོད་ཟེར་གྱི་འཕྲོ་འདུས་ལས། སྐུ་ཕྱག་རྒྱ་དང་གཉིས་སུ་མེད་པ་དང་རང་བཞིན་མེད་པར་གསལ་བ་ལ་གནས་པ་ནི་ཐུགས་མཉེས་པའི་མཆོད་པ་དང་། བསྟོད་པ་ཡང་དེ་ཉིད་ཀྱིས་འགྱུར་ལ། སྐུ་གསུང་ཐུགས་ཀྱི་དངོས་གྲུབ་ཀྱང་ཐོབ་པར་འགྱུར་རོ། །དེ་ལྟ་བུའི་དོན་ལ་གནས་པ་ནི། བཀའ་ནན་དང་། གོ་ཆའི་སྦྱོར་བ་ཐམས་ཅད་ཀྱི་ནང་ནས་ཀྱང་མཆོག་ཡིན་ནོ། །དེ་ནས་སྒྲོལ་བ་ལས་ཀྱི་འཛབ་བྱ་སྟེ། ཕྱོགས་བཅུ་དུས་གསུམ་གྱི་བདེ་བར་གཤེགས་པ་ལ་ཞེ་སྡང་རྗེས་སུ་དྲན་པ་བསྐུལ་ནས་བསྒྲུབ་བྱ་དབང་དུ་བསྡུ་བའི་ཕྱིར་འདི་སྐད་དུ། གསལ་བ་གསུམ་དང་ལྡན་པ་ཡི། །སྲིད་པ་རྡོ་རྗེ་ཕུར་པའི་ལྷ། །ཞེ་སྡང་རྗེས་སུ་དྲན་པ་ཡི། །ཁམས་གསུམ་ཁྲོ་བོས་གང་བར་མཛོད། །ཅེས་འབྱུང་བས། སྔ་མ་བཞིན་དུ་གསལ་བ་གསུམ་དང་ལྡན་པའི་སྒོ་ནས་གསང་བའི་སྔགས་མཱ་ར་ཡ་དང་བཅས་པ་བཟླས་པས་དཔལ་རྡོ་རྗེ་གཞོན་ནུ་ཞལ་གསུམ་ཕྱག་དྲུག་པ། སྐེད་པ་རྒྱ་མདུད་མན་ཆད་ལྕགས་ཀྱི་ཕུར་པ་ཟུར་གསུམ་པ་རྣོ་བ་སོལ་མལ་ནས་ཕྱུངས་པ་ལྟ་བུ་དམར་ཙར་རེ་ཐོན་ནས་དཀྱིལ་འཁོར་གསུམ་དང་ཕྱོགས་བཅུ་དུས་གསུམ་གྱི་སངས་རྒྱས་ཀྱི་ཐུགས་ལ་ཕོག་པས་ཐུགས་དམ་གྱི་རྒྱུད་བསྐུལ་ནས་རྗེས་སུ་དྲན་པ་ཙམ་གྱིས་སྐུ་གོང་མ་ལྟ་བུར་གྱུར་བ་གཟས་པོའི་སྙིང་གར་ཐིམ་པས་ལུས་ངག་ཡིད་གསུམ་གྱི་བག་ཆགས་བསྒྲལ། རྣམ་པར་ཤེས་པ་ཕྲོགས་ནས་ལིདྒ་ལ་པྲ་བེ་ཤ་ཡ་ཕཊ྄་ཀྱིས་སྙིང་ཁ་ཕྱེས། ཨ་བེ་ཤ་ཡ་ཨས་བསྟིམས་ནས་གཟུགས་ཀྱི་ཕུང་པོ་རྩྭ་སྒྱེ་སྟོང་པ་འདྲ་བ་དེ་ལྷག་མ་མ་ལུས་པར་དྲངས་ཤིང་བསྟིམ་པ་ནི་དབང་དུ་བསྡུ་བའི་མཆོག་ཡིན་ནོ། །དེ་ནས་ཁྱད་པར་གྱི་བཟླས་པ་ཞེས་བྱ་བ་སྟེ། བསྒྲུབ་བྱ་བསོད་ནམས་དང་ལྡན་ནས་ཚེའི་དུས་བྱེད་དུ་མ་འདོད་ན་ལྷ་དང་བྲལ་བ་ལ་སོགས་པའི་ལས་བྱ་བའི་ཕྱིར་འདི་སྐད་དུ། དང་པོ་ལྷ་དང་བྲལ་བར་བྱ། །གཉིས་པ་གཟུགས་ལ་དབབ་པར་བྱ། །གསུམ་པ་བྱད་དུ་གཞུག་པར་བྱ། །བཞི་པ་སྨྱོ་རུ་གཞུག་པར་བྱ། །ལྔ་པ་རྡུལ་དུ་བརླག་པར་བྱ། །དྲུག་པ་ཞལ་དུ་བསྟབ་པར་བྱ། །ཞེས་པས་ལྷ་དང་དབྲལ་བ་ལ་སོགས་པའི་སྐབས་སུ་གསང་བའི་སྔགས་ཀྱི་ཀཱི་ལ་ཡ་ནི་ལོག་གནོན་ཞེས་བྱ་སྟེ་ཐམས་ཅད་ཀྱི་འགོ་ལའོ། །ཐུན་མོང་གི་སྔགས་ནི་ལས་གྲུབ་པར་བྱེད་པ་ཡིན་པས་ཁོང་ཁྲའོ། །ཁྱད་པར་གྱི་སྔགས་ནི་ལས་ལ་བསྐུལ་བ་ཡིན་པས་ཀུན་གྱི་མཇུག་ལའོ། །དེ་ལྟར་གདབ་པའི་སྔགས་ཚན་དྲུག་ནི་མན་ངག་ཅེས་བྱ་སྟེ་རང་གི་ལས་གྲུབ་པར་བྱེད་པ་ལ་ཐེ་ཚོམ་མེད་དོ། །ཕྲིན་ལས་ཀྱི་སྟོབས་ནི་ལྷའི་རྣལ་འབྱོར་ཇི་ལྟ་བ་བཞིན་བྱས་ལ། ལྷ་དང་བྲལ་བའི་བསམ་གཏན་ལ་གནས་པས་དེའི་ངན་སྔགས་ཁྲི་ཚོ་རེ་སྨྲ་བ་བཅད་པས་བཟླས་ཤིང་། བར་སྐབས་སུ་མངགས་པ་ཕོ་ཉའི་ཕུར་པ་བསྐོར་ཞིང་། དུས་ལ་བབ་དྲུག་གིས་ཕོ་ཉ་གསུམ་བསྐུལ་ཏེ་དེའི་སྔགས་བཟླས་ནས་དགུག་པའི་བསམ་གཏན་ལ་གནས་པས་བསྒྲུབ་བྱའི་རྣམ་ཤེས་ལིདྒ་ལ་དགུག་གཞུག་བྱའོ། །གཞན་ཡང་ཧ་ས་ཡ་ར་དང་། ཨ་བེ་ཤ་ཡ་དང་། ཤཱི་ཀྲིང་དང་། ཛྭ་ལ་པ་ཡ་ཡང་དེའི་གྲོགས་ཙམ་དུ་བཟླ་བར་བྱའོ། །དམ་ཚིག་ཅན་གྱི་སྲོག་སྙིང་ལ་སོ་སོའི་ཐུན་སྔགས་བཏགས་ལ། ཉུངས་དཀར་ཉུངས་ནག་གི་ཐུན་དང་། ཁྲག་དང་། དུག་དང་། ཟངས་ཕྱེ། ལྕགས་ཕྱེ། རྡོ་ཕྱེའི་ཐུན་དང་། ཕུར་ཐུན་རྣམས་དབབ་པར་བྱའོ། །གདུགས་སྦྱངས་ཀྱི་རྫས་ལ་བསྐྱངས་ཤིང་ལས་བཅོལ་བར་བྱའོ། །ལས་ལ་མ་ཚུད་ན་གནད་ལ་ཕབ་ལ་ལས་ལ་གཟུད་པར་བྱ་སྟེ་མན་ངག་བཀོལ་བ་ལས་ཤེས་པར་བྱའོ། །དེ་ལྟར་བྱ་བ་ཡང་རྒྱུད་ལས་འདི་སྐད་དུ། ཁྲོ་བོའི་ད་ལ་དམ་ཚིག་ཅན། །བཀུག་ནས་བ་ལིཾ་སྦྱིན་པར་བྱ། །ལས་ལ་གཟུད་ཅིང་ཐུན་རྣམས་དབབ། །གལ་ཏེ་དགོས་པ་མི་བསྒྲུབ་ན། །ཁྲོ་བོའི་ང་རྒྱལ་དང་ལྡན་པས། །བསྙེན་ཅིང་དུས་དེར་གནད་ལ་དབབ། །སླར་དྲན་པས་ནི་དགོས་པ་རྣམས། །འགྲུབ་འགྱུར་འདི་ལ་ཐེ་ཚོམ་མེད། །ཅེས་གསུངས་སོ། །ཉིན་གུང་མཚན་གུང་གི་དུས་སུ་བསྟབ་པའི་ལས་ཅི་རིགས་སུ་བྱ་བ་ཡང་རྒྱུད་ལས། བདུད་རྩི་ལྔའམ་ཟས་ལྔ་ལ། མཚན་མ་མིང་དུ་བཅས་པ་ནི། །བཀུག་ནས་རྡོ་རྗེ་ཕུར་པས་བཏབ། །རྡུལ་དུ་བྱས་ལ་ཚོགས་ལ་འབུལ། །ཞེས་གསུངས་པས་ཚོགས་ཀྱི་ཞལ་ཟས་ལ་བརྟེན་ཏེ་ཕོ་ཉས་དགུག་གཞུག་བྱས་ལ་ཕུར་པ་བཏབ་པ་ལ་སོགས་པ་ཚོགས་ཀྱི་ཕྲིན་ལས་ཀྱི་སྐབས་ནས་ཤེས་པར་བྱའོ། །ཕོ་ཉས་བཀུག་པ་ནས་ཚོགས་ཀྱི་ཕྲིན་ལས་ཀྱི་བར་ནི་སྒྲུབ་པ་ལ་ཞུགས་ཕན་ཆད་ཉིན་གུང་མཚན་གུང་མཚན་གུང་མཐའ་དག་ཏུ་བྱའོ། །དེ་ནས་ལྷ་དང་དཔྲལ་བའི་རྫས་ཀྱིས་བསྣུན་པ་དང་། དམོད་མོའི་སྨོན་ལམ་གདབ་སྟེ་ཕུར་པ་དབང་གི་གནས་དྲུག་ཏུ་བལྟའོ། །དེ་བཞིན་དུ་གཟུགས་ལ་དབབ་པ་དང་། བྱད་དུ་གཞུག་པ་དང་། སྨྱོ་རུ་གཞུག་པ་ཡང་དེས་ཤེས་པར་བྱའོ། །དེ་ལྟར་བསྙེན་སྒྲུབ་ཀྱིས་ལས་ཀྱི་གདབ་པའི་དྲོད་ཚད་ལ་བབ་པར་ཤེས་ནས་གདབ་པའི་ལས་བྱ་སྟེ་དེ་ཡང་འདི་སྐད་དུ། འབུམ་ཕྲག་གཅིག་གམ་ས་ཡའམ། །བྱེ་བ་བཟླས་ཏེ་དབང་བསྐུར་ནས། །ཏིང་འཛིན་བསྙེན་པ་རྫོགས་བྱས་ཏེ། །གཟིར་མནན་བྱས་ལ་གདབ་པར་བྱ། །ཞེས་གསུངས་ཏེ་གྲངས་ཀྱི་བསྙེན་པ་དེ་རྫོགས་པས་བཟླས་བརྗོད་བསྙེན་པའི་དྲོད་ཚད་ཅེས་བྱ་སྟེ། གདབ་པའི་དུས་ལ་བབ་པའོ། །གཞན་ཡང་དུས་དང་ཏིང་ངེ་འཛིན་གསལ་བ་དང་། ཕོ་ཉས་ཁུག་པའི་རྟགས་མཐོང་ནས་ངེས་པར་གདབ་པའི་ཕྲིན་ལས་བརྩམ་ཞེས་འབྱུང་བས། སྒྲུབ་པ་ལ་ཞུགས་ནས་ལོའམ་ཟླ་བའམ་ཞག་བདུན་གྱི་དུས་ལ་བསྐྱར་བའམ། བསྒྲུབ་བྱ་མངོན་སུམ་དུ་འདྲ་བར་གསལ་བའམ། ཕོ་ཉས་ཁུག་སྟེ་ལིདྒ་འཕར་བ་ལ་སོགས་པའི་རྟགས་བྱུང་ན་གདབ་པའི་དྲོད་ལ་བབ་པར་ཤེས་པར་བྱའོ། །དེ་ནས་དམིགས་ཀྱི་གདབ་པའི་དུས་བསྟན་པ་ནི། ཚེས་བརྒྱད་ཉ་དང་ཉི་ཤུ་གཉིས། །གནམ་སྟོང་དག་ལ་རྟག་པར་ཤིས། །ཞེས་འབྱུང་བས། གཞན་ཡང་བཅུ་བདུན་ཉེར་གཅིག་དང་། །ལྔ་དང་དགུ་དང་མར་གྱི་ངོ་། །ནམ་དང་ཉི་མའི་གུང་རྣམས། །བརྟུལ་ཞུགས་ལྡན་པས་ལས་རྣམས་བསྟུན། །ཞེས་འབྱུང་བས། དབྱར་ཟླ་ར་བ་དང་། སྟོན་ཟླ་ཐ་ཆུང་གི་བརྒྱད་ལའོ། །དབྱར་འབྲིང་དང་། སྟོན་ར་དང་། སྟོན་ཐ་དང་། དགུན་ར་དང་། དེ་རྣམས་ཀྱི་ཉ་ལའོ། །དཔྱིད་ཐ་ཆུང་གི་ཉི་ཤུ་གཉིས་ལའོ། །དགུན་འབྲིང་རྩ་གཅིག་རྩ་གཉིས་རྩ་དགུ་ལའོ། །དགུན་ཐ་བཅུ་བདུན་དང་རྩ་དགུ་ལའོ། །གནམ་སྟོང་ཐམས་ཅད་ཀྱི་ཐུན་མོང་སྟེ། དཔྱིད་ཐ་གནམ་སྟོང་ནི་བཟློག་གོ། །དེ་རྣམས་ཀྱི་ཉིན་གུང་མཚན་གུང་ལ་བཏབ་བོ། །དེ་ནས་ཕུར་པ་གདབ་པ་ལ་རྣམ་པ་གཉིས་ཏེ། ཁ་མི་བཟློག་པར་བྱ་བའི་ཕྱིར་གདབ་བ་དང་། ལིདྒ་ལ་གདབ་པའོ། །ཁ་མི་བཟློག་པར་བྱ་བའི་ཕྱིར་གདབ་པ་ཡང་འདི་སྐད་དུ། སྤྲུལ་པའི་སྐུ་སྟེ་སྐུ་ཡི་མཆོག །དཔལ་ལྡན་གཙོ་བོ་ཉིད་མཚུངས་ལས། །གནས་བསྲུངས་པ་འདི་ཤར་གྱི་སྒོ། །ཡེ་ཤེས་ལྷ་ལ་གདབ་པར་བྱ། །སྟོབས་ཆེན་ཁྲོ་བོ་ཆེན་པོ་སྟེ། །དཔལ་ཆེན་ཀུན་ཏུ་རྟ་མགྲིན་རྒྱལ། །ལོག་འདྲེན་བགེགས་ཀྱི་དཔུང་ཚོགས་རྣམས། །བྱང་ཤར་མཚམས་སུ་གཟིར་བར་བྱ། །ཞེས་འབྱུང་བས། ཕུར་པ་གཉིས་ལས་གཅིག་བཅོམ་ལྡན་འདས་རྡོ་རྗེ་གཞོན་ནུའི་བདག་ཉིད་དུ་བྱས་ལ་ལས་འདི་མ་གྲུབ་ཀྱི་བར་དུ་ཐུགས་དམ་ལས་མ་འདའ་བར་གནས་སྲུངས་ཤིག་བྱས་ལ་ཤར་གྱི་སྒོར་གདབ། ཕུར་པ་གཅིག་ཁྲོ་བོ་རྟ་མགྲིན་གྱི་བདག་ཉིད་དུ་བྱས་ལ། ལས་འདི་མ་གྲུབ་ཀྱི་བར་དུ་ཁྱོད་ཀྱིས་བགེགས་གནད་ལ་ཕོབ་ལ་ལས་ལ་ཚུད་ཅིག་བྱས་ལ་དཀྱིལ་འཁོར་གྱི་བྱང་ཤར་མཚམས་སུ་གདབ་བོ། །དེ་ནི་ཁ་མི་བཟློག་པར་བྱ་བའོ། །དེ་ནས་ལིདྒ་ལ་བཏབ་པ་ལ་གཉིས་ཏེ། ཀུན་རྫོབ་དང་། དོན་དམ་མོ། །དོན་དམ་པའི་དགོངས་པ་ལ་ཡང་འདི་སྐད་དུ། དེ་ནས་ཡུལ་ཤེས་གཉིས་མེད་དེ། །བསྐྱོད་པ་མེད་པའི་རི་རབ་ཀྱིས། །མཁའ་ཡི་གཏུན་ཁུང་བདེ་གནས་ན། །གཏིང་དཔག་མེད་པའི་དབྱིངས་ཉིད་དུ། །ཡེ་ཤེས་སྐུ་ཡི་ཁྱབ་གདལ་བས། །མ་ལུས་ཕུར་པ་ཐབས་ཤེས་བྱ། །ཞེས་འབྱུང་བས། ཡོ་ག་རྣམ་པ་གསུམ་དང་སྦྱར་ན། ཐབས་དང་ཤེས་རབ། དབྱིངས་དང་ཡེ་ཤེས། ཡུལ་ཤེས་གཉིས་སུ་མེད་པ་ཞེས་བྱ་སྟེ། དངོས་སུ་ན་ཆོས་ཉིད་སྟོང་པ་ཉིད་ལ་རིག་པའོ། །ཡེ་ཤེས་སྟོང་པས་གདབ་པའོ། །ཀུན་རྫོབ་ཏུ་གདབ་པའི་དགོངས་པ་ནི་འདི་སྐད་དུ། བདག་ཉིད་ཁྲོ་བོའི་ང་རྒྱལ་ཅན། །གསལ་བ་གསུམ་དང་རབ་ལྡན་པས། །གབ་པའི་སྔགས་དང་སྡོམ་སྔགས་དང་། །སྦས་པའི་ཚིག་དྲུག་ཁོག་སྡེབས་དང་། །མན་ངག་རྩ་བའི་དམ་ཚིག་གིས། །གདབ་ན་དེ་ཉིད་བརླག་པར་འགྱུར། །ཞེས་འབྱུང་བས། ལས་ལ་སྦྱར་བའི་སྐབས་སུ་དམ་ཅན་གནད་ལ་དབབ། དམ་ཚིག་ཆེན་པོའི་དུས་ལ་བབ། མཐུ་རྩལ་དབྱུང་བའི་ཞེས་པའི་འཕྱོང་གདགས། ཀཱི་ལ་ཡ་དྲག་ཏུ་བཟླ། ཏ་ཐཱས་གཏོགས་ཤིག །ཧ་སས་ཕྱེས་ཤིག །ཤཱི་ཀྲི་ང་གྱིས་ཆིངས་ཤིག །ཨ་བེ་ཤ་ཡས་གཟུགས་ལ་སྟིམས་ཤིག །ཛྭ་ལ་པ་ཡས་གཟིར་ཅིག །རྦད་པའི་སྔགས་ཏེ་ༀ་ཕཊ་ཀྱིས་གཟིར་བར་གྱིས་ཤིག །ཀུན་གཞི་རྩད་བཅད་པ་དང་། སེམས་ཀྱི་དབྱིངས་ཕྱུང་བར་གྱིས་ཤིག །སངས་རྒྱས་ཀྱི་བདེན་པའོ། །ཞེས་བདེན་པའི་བྱིན་རླབས་ཆེན་པོས་དམིགས་ཤིག །སྤྲུལ་པ་ཆེན་པོ་ལས་ཀྱི་ཁོག་སྡེབས་གོང་བཞིན་གྱིས་ཤིག །ཕྱག་བརྙན་ཆེན་མོ་ལས་ཀྱི་ཁོག་སྡེབས་གོང་བཞིན་གྱིས་ཤིག །ཤྭ་ན་མུ་ཁ་ལས་ཀྱི་ཁོག་སྡེབས་གོང་བཞིན་གྱིས་ཤིག །བདག་ཉིད་ཆེན་མོ་ལས་ཀྱི་ཁོག་སྡེབས་གོང་བཞིན་གྱིས་ཤིག །ས་བདག་ཆེན་མོ་ལས་ཀྱི་ཁོག་སྡེབས་གོང་བཞིན་གྱིས་ཤིག །མན་ངག་ཚིགས་གསུམ་དང་སྒོ་བཞིའི་ཕུར་པ་གོ་སླའོ། །དེ་ནས་བསད་ཕུར་གྱིས་གདབ་པ་ནི། མན་ངག་གསུམ་གྱི་ཁོག་སྡེབས་ཤེས་པར་བྱ་སྟེ། གབ་པའི་སྔགས་དགུ་སྡོམས་སྔགས་ཞེས་བྱ་བ་ནི་སྔགས་སྡོམ་མོ། །མན་ངག་ཅེས་བྱ་བ་ནི་གསལ་བ་གསུམ་མོ། །གབ་པའི་ཚིག་ནི་རྩ་བའི་ཚིག་བཤད་དེ། དེ་གསུམ་བསྡོམས་ནས་གདབ་པའི་ལས་བྱས་ན་བརླག་པར་འགྱུར་བ་ལ་ཐེ་ཚོམ་མེད་དོ། །དེའི་རིམ་པ་ཡང་། དངོས་གྲུབ་བར་ཆད་བྱེད་པའི་བགེགས། །ཞེས་པ་དང་། སྡོམ་སྔགས་ཀྱི་ཚན་དང་པོར་སྡེབས་པ་གསལ་བ་གསུམ་དང་ལྡན་པ་ནི། སྐྱེ་བའི་སྒོ་ལྔ་དག་པར་བྱ་བའོ། །བྲན་དང་བཀའ་ཉན་ཕོ་ཉའི་ཚོགས། །ཞེས་པ་དང་། སྔགས་ཚན་གཉིས་པ་གསལ་བ་གསུམ་དང་ལྡན་པ་ནི། ཉོན་མོངས་པའི་གནས་བཞི་དག་པར་བྱ་སྟེ་བསྒྲལ་བའོ། །གདུག་ཅིང་སྡང་སེམས་ལྡན་པ་ཡི། །ཞེས་པ་དང་། ཏ་ཐཱ་ཡ་གསལ་བ་གསུམ་དང་ལྡན་པ་ནི་མཐུ་དང་རྫུ་འཕྲུལ་ཕྲོགས་ཏེ་བསྒྲལ་བའོ། །སརྦ་ཨ་ན་ཡ་དེ་བཞིན་དུ་སྡེབས་པ་ནི་དགེ་སྡིག་ཆ་མཉམ་པའི་ཕྱིར་གདབ་པའ ོ། །གདབ་པའི་གནས་ནི་འདི་སྐད་དུ། ལོང་བུ་པུས་མོ་དཔྱི་དང་ལག་པའི་མཁྲིག །ཅེས་བྱ་བ་ལ་སོགས་པའམ། གཞན་ཡང་། ཐམས་ཅད་འབྱུང་བའི་རྒྱུ་ཡིན་པས། །ཞེ་སྡང་དྲེགས་པ་སྙིང་ལ་སྒྲིལ། །ཅེས་འབྱུང་བས་གདབ་པའི་གནས་སོ་སོར་སྨོས་པའམ། ཡང་ན་ཐམས་ཅད་ཀྱི་རྩ་བ་ཡིན་པས་དཀར་ནག་མཚམས་སུ་སྒྲིལ་ལོ། །དེ་ནས་དམ་ལས་མི་འདའ་བ་དང་། ལས་ལ་གཟུད་པར་བྱ་སྟེ། གནད་ལ་བོར་ལ་བྱ་བ་ནི་ཕུན་སུམ་ཚོགས་པར་བལྟའོ། །དེ་ནས། རྡུངས་ཤིག་རྡོ་རྗེ་འབར་བའི་གཏུན། །ཞེས་བྱ་བ་ལ་སོགས་པ་དང་། རྩ་བའི་སྔགས་ཏ་ཐཱ་ཡ་དང་། ཁ་ཐཾ ཧཱུྃ་ཕཊ། ཅེས་པ་དང་བཅས་པས་བརྡུང་བར་བྱའོ། །ཐུན་དབབ་པ་དང་། ཕུར་པ་གདབ་པ་དང་། བརྡུང་བའི་ལས་ཀྱི་རྡུལ་དུ་བརླག་པར་བྱས་ནས། བསྒྲུབ་བྱའི་ཕུང་པོ་ཆ་གསུམ་དུ་བགོས་ལ། ཆ་གཅིག་བདག་ཉིད་ཆེན་མོ་འཁོར་དང་བཅས་པའི་ཞལ་དུ་བསྟབ་པར་བྱའོ། །ཆ་གཅིག་སྦྱིན་སྲེག་བྱའོ། །ཆ་གཅིག་མནན་པ་བྱ་སྟེ། །དེ་ཡང་། ཕུང་པོ་མཆོད་པའི་རྫས་སུ་སྤྱད། །སེམས་ནི་བསྐལ་པའི་མཐའ་རུ་མནན། །བྱང་ཆུབ་སེམས་ནི་སྐྱེས་ན་བཏང་། །བྱང་ཆུབ་སེམས་ནི་མི་ལྡན་ན། །ནམ་ཡང་ཐར་བའི་དུས་མེད་དོ། །ཞེས་འབྱུང་བས་སོ། །བསྟབ་སྲེག་མནན་གསུམ་གྱི་ལས་ནི་མན་ངག་བཀོལ་བ་ལས་བལྟའོ། །དེ་ནས་ཡང་གནས་སྤར་བ་ནི་འདི་སྐད་དུ། སྙིང་རྗེས་བསྒྲལ་བའི་དམ་ཚིག་ནི། །བསད་ཅིང་མནན་པ་ལ་ཡིན་ཏེ། །ཕུང་པོ་རྡོ་རྗེར་གཏམས་བྱས་ནས། །རྣམ་པར་ཤེས་པ་རྡོ་རྗེར་བསྒོམ། །ཞེས་འབྱུང་བས། གཞན་ཡང་། ལས་ལ་ཐེ་ཚོམ་མེད་ཅིང་བློ་ལྡན་པས། །རྣམ་ཤེས་འཆི་མེད་རྒྱལ་བའི་སྲས་སུ་བསྐྱེད། །ཅེས་འབྱུང་བས། ངེས་པར་ལས་གྲུབ་པར་ཤེས་ནས་གནས་ཀྱི་ཆོ་ག་མ་བྱས་ན་དམ་ཚིག་ཉམས་པ་ཡིན་པས། གནས་ཀྱི་ཆོ་ག་ཇི་ལྟ་བ་བཞིན་བྱ་དགོས་སོ། །ལས་མ་གྲུབ་པར་གནས་ཀྱི་ཆོ་ག་བྱས་ན་ཡང་དམ་ཚིག་ཉམས་པ་དང་ལས་མི་འགྲུབ་པ་ཡིན་པས་ཉམས་སུ་བླང་བར་མི་བྱའོ། །སྲུང་བ་མན་ངག་གི་རིམ་པ་འདི་ནི་ལུང་དང་སྦྱར་ནས་མན་ངག་གི་རིམ་པར་ཡི་གེར་བཀོད་པ་ཡིན་པས། བུ་ལའང་དམ་ཚིག་གནད་ལ་བོར་ལ་གཏད་པར་བྱའོ། །འདི་ནི་སློབ་དཔོན་པདྨ་འབྱུང་གནས་ཀྱི་ཐུགས་ལས་བཏོལ་ནས་བཙད་པོ་ཁྲི་སྲོང་ལྡེའུ་བཙན་ལ་གཏད། བཙད་པོས་ཀྱང་རྒྱ་མ་ལས་ཀྱི་མན་ངག་ཏུ་སློབ་དཔོན་བཻ་རོ་ཙ་ན་ལ་དམ་ཚིག་གནད་ལ་བོར་ནས་གཏད་པ་ཡིན། མ་འོངས་རྣལ་འབྱོར་པས་ཀྱང་དེ་བཞིན་དུ་བྱ་བར་རིགས་སོ། །གསང་ངོ་། །ཨཐྎ།། །།