ཡི་དམ་ནར་མར་བྱ་བའི་རིམ་པ།

ཡི་དམ་ནར་མར་བྱ་བའི་རིམ་པ་བཞུགས་སོ། །ན་མོ་ཤྲཱི་བཛྲ་ཀུ་མཱ་ར་ཡེ། རྡོ་རྗེ་གཞོན་ནུའི་ཡི་དམ་ནར་མར་བྱེད་པ་ནི། མཆོད་པ་དང་། བཟླས་པ་ཙམ་བྱེད་པ། རྡོ་རྗེ་ཁྲོས་པས་ཞེ་སྡང་གཅོད། །མཚོན་ཆེན་སྔོན་པོ་འབར་བ་ཡི། །ནམ་མཁའི་དཀྱིལ་ནས་ཐིག་པ་ཤར། །སྲོག་གི་གོ་རུ་ཤར་བ་དང་། །སྙིང་གི་དཀྱིལ་དུ་བསྒོམ་པར་བྱ། །ཞེས་བརྗོད་ལ་རྣམ་པར་མི་རྟོག་པའི་ངང་ལས་ཆོས་ཐམས་ཅད་ནམ་མཁའི་དཀྱིལ་ལྟར་སྟོང་པ་ཉིད་དུ་གསལ་བ་ལས། རང་གི་བྱང་ཆུབ་ཀྱི་སེམས་འོད་ཀྱི་ཐིག་ལེ་རྟེན་དང་བཅས་པའི་རང་བཞིན་ཡི་གེ་ཧཱུྃ་གཅིག་བསྒོམ་མོ། །སྙིང་རྗེས་བསྒྲལ་བའི་དམ་ཚིག་ནི། །བསད་ཅིང་མནན་པ་མ་ཡིན་ཏེ། །ཕུང་པོ་རྡོ་རྗེས་གཏམས་བྱས་ནས། །རྣམ་པར་ཤེས་པ་རྡོ་རྗེར་བསྒོམ། །ཞེས་བརྗོད་པས་སེམས་ཅན་ཐམས་ཅད་ཀྱི་ལུས་སེམས་སྐུ་དང་ཡེ་ཤེས་ཀྱི་དཀྱིལ་འཁོར་དུ་རྟོགས་ཏེ་ལྷུན་གྱིས་གྲུབ་པའི་སྙིང་རྗེ་བྱང་ཆུབ་ཏུ་སེམས་བསྐྱེད་དོ། །ༀ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱཾ་བཾ་ཧཱུྃ་ཧཱུྃ་ཕཊ། ཅེས་བརྗོད་པས་བྱང་ཆུབ་སེམས་ཀྱི་ཐིག་ལེ་ལས་སྙིང་རྗེ་ཆེན་པོའི་དབང་དང་། གསང་སྔགས་ཀྱི་བྱིན་གྱི་རླབས་ཀྱིས་རྡོ་རྗེ་གཞོན་ནུའི་སྐུ་ལེ་བརྒན་ཚོན་གང་བ་གཞལ་ཡས་ཁང་དང་བཅས་པར་བསྐྱེད་དོ། །དེ་ནས་དབང་དང་བྱིན་རླབས་དང་ལྡན་པའི་ཡོངས་སུ་རྫོགས་པའི་སྐུར་བསྐྱེད་པར་བྱ་བའི་ཕྱིར། རྡོ་རྗེ་གཞོན་ནུའི་རིག་འཛིན་རྣམས། །སྲིད་པ་རྡོ་རྗེར་སྒྲུབ་མཛོད་ཅིག །སྲིད་པ་རྡོ་རྗེ་ཕུར་པའི་ལྷ། །ཡེ་ཤེས་ཁྲོ་བོ་སྒྲུབ་པར་མཛོད། །སངས་རྒྱས་ཀུན་གྱི་ཡེ་ཤེས་སྐུ། །ངང་ཉིད་རྡོ་རྗེ་ཆོས་དབྱིངས་ལས། །འབར་བའི་ཁྲོ་བོ་མི་བཟད་པ། །སྐུ་ཡི་དབྱིག་ཏུ་བདག་བསྐྱེད་ཅིག །ཐབས་ཀྱི་སྤྱོད་པར་འགྲོ་དོན་དུ། །བྱམས་དང་སྙིང་རྗེས་གང་འདུལ་བ། །སངས་རྒྱས་ཕྲིན་ལས་རྫོགས་མཛད་ནས། །དབང་དང་བྱིན་རླབས་འདིར་སྩོལ་ཅིག །ཅེས་བརྗོད་པས་སངས་རྒྱས་རྣམས་ཀྱི་བྱིན་གྱི་རླབས་ཀྱིས་ཡོངས་སུ་རྫོགས་པའི་སྐུར་གྱུར་པ་ནི་འདི་ལྟར། སྐུ་མདོག་མཐིང་ནག་རི་རབ་ལྟ་བུ། དུར་ཁྲོད་ཆེན་པོའི་གཞལ་ཡས་ཁང་ན་མེ་དཔུང་འབར་བའི་ཀློང་ན་བཞུགས་པ། དུར་ཁྲོད་ཀྱི་རྒྱན་རྣམས་ཀྱིས་བརྒྱན་པ། ཞལ་གསུམ་ཕྱག་དྲུག་ཞབས་བཞི་བགྲད་པ། ཞལ་གཡས་དཀར་གཡོན་དམར་དབུས་མཐིང་ནག །ཕྱག་གཡས་ཀྱི་དང་པོ་རྡོ་རྗེ་རྩེ་དགུ་པ། བར་པ་ན་རྩེ་ལྔ། གཡོན་དང་པོ་ན་མེ་དཔུང་། བར་པ་ན་ཁ་ཊྭཱྃ་ཀའི་རྒྱན། ཐ་མ་གཉིས་ཀྱིས་རི་རབ་ལྟར་བརྗིད་པའི་ཕུར་བུ་འདྲིལ་བ་སྐད་ཅིག་མའི་ཏིང་ངེ་འཛིན་གྱིས་བསྒོམ། ཡུམ་འཁོར་ལོ་རྒྱས་འདེབས་མ་ཞལ་གཅིག་ཕྱག་གཉིས་གཡས་པ་ཡབ་ཀྱི་མགུལ་ནས་འཁྱུད་ཅིང་། གཡོན་དུང་དམར་གཙོ་ལ་སྟོབ་པ་གཅིག་ལུས་དང་གྲིབ་མའི་ཚུལ་དུ་རང་བྱུང་བར་བསྒོམ་མོ། །དེ་ནི་བདག་རྩ་བའི་དཀྱིལ་འཁོར་བསྐྱེད་པ་ཞེས་བྱའོ། །དེ་ནས་ཕྱོགས་བཅུ་ཁྲོ་བོའི་དཀྱིལ་འཁོར་བསྐྱེད་པ་ནི། གཙོ་བོ་ཡབ་ཡུམ་གཉིས་སུ་མེད་པ་ལས། ༀ་བཛྲ་ཀྲོ་དྷ་ཧཱུྃ་ཀ་ར་ཧཱུྃ། གརྫ་གརྫ་ཧཱུྃ་ཕཊ། ཅེས་བརྗོད་པས་ས་བོན་གྱི་ཡི་གེ་མི་དགོད་པར་ཡབ་ཡུམ་གྱི་དབང་ལས་བསྐྱེད་ཀྱང་རུང་། བྱང་ཆུབ་ཀྱི་སེམས་ཡི་གེ་ཧཱུྃ་དུ་གྱུར་པ་ལས་བསྐྱེད་ཀྱང་རུང་སྟེ་ཁྲོ་བོ་ཆེན་པོ་ཧཱུྃ་ཀཱ་ར་སྐད་ཅིག་མའི་ཏིང་ངེ་འཛིན་གྱིས་བསྐྱེད་དོ། །ཡུམ་རྡོ་རྗེ་སྒྲ་འབྱིན་མ་ཡང་ལུས་དང་གྲིབ་མའི་ཚུལ་དུ་བྱུང་བར་བསྒོམ། དེའི་སྤྲུལ་པ་ཕྲ་མེན་ཕག་གི་མགོ་ཅན་དང་རྨིག་བུའི་མགོ་ཅན་ཡང་ལུས་དང་ཡན་ལག་གི་ཚུལ་དུ་བྱུང་བར་བསམ། འདི་ནི་རྫོགས་པའི་ཚུལ་ཡིན་ཏེ། རིམ་གྱིས་བསྐྱེད་པའི་ཚུལ་ནི་ས་བོན་ཧཱུྃ་སྒྲིལ་མ་ཡོངས་སུ་གྱུར་པ་ལས། ཡབ་ཡུམ་གཉིས་ཀའི་སྔགས་ཀྱིས་བསྐུལ་བས་ཁྲོ་བོ་ཡབ་ཡུམ་བཅུ་བསྐྱེད། ཁྲོ་བོ་ཡབ་ཡུམ་བཅུ་ལས་བྱང་ཆུབ་ཀྱི་སེམས་ཡི་གེ་ཛྫ་ལྗང་གུ་སྦྲེལ་མར་གྱུར་པ་ལས་སྤྲུལ་པའི་ཕྲ་མེན་མ་ཡབ་ཡུམ་གསང་སྔགས་ཀྱིས་བསྐུལ་བ་ལས་བསྐྱེད་པར་བཞེད་དོ། །ཁྲོ་བོ་རྣམས་ནི་ཞལ་གསུམ་ཕྱག་དྲུག་གཡས་གཡོན་གྱི་དང་པོ་རྡོ་རྗེ་དང་དུང་ཆེན་དམར་གྱིས་བཀང་བ་དཀྲུག་ཅིང་གསོལ་བ། གཡས་བར་པ་ན་ཕྱོགས་སྐྱོང་གི་རྒྱལ་མཚན་རེ་རེ་རྒྱལ་རྟགས་སུ་བསྣམས་པ། གཡོན་བར་པ་ན་རང་རྟགས་ཀྱི་མཚན་མ་བསྣམས་པ། ཐ་མ་གཉིས་ཀྱིས་རི་རབ་ལྟར་བརྗིད་པའི་ཕུར་བུ་བསྣམས་པ། དུར་ཁྲོད་ཀྱི་རྒྱན་ཅན། ཞབས་བཞིར་བགྲད་པ་སྟེ། ཁ་ཅིག་ལྕགས་ཀྱི་ཕུར་པར་འདོད་པ་ནི་མཚམས་ལ་སོགས་པས་མཚོན་སྐབས་འགའ་ཞིག་ཏུ་ཁྲོ་བོའི་སྐུ་ཕུར་པར་བྱས་པ་སྟེ། འདི་ནི་འདེབས་པའི་ཕུར་པ་སྲས་མཆོག་ཕྱག་ན་ཡོད་པས། ཞབས་དཀྱུས་མ་ཉིད་དུ་རིགས་སོ། །ཡུམ་རྣམས་སྐུ་མདོག་ཕྱག་མཚན་གཙོ་དང་མཐུན་པ་དང་། ཟ་བྱེད་ཕ་བཅུ་ནི་གཡས་ན་རྒྱལ་རྟགས་ཀྱི་ཕྱག་མཚན། གཡོན་ཕུར་བུ་ཟུར་གསུམ། གསོད་བྱེད་མ་བཅུ་ནི་གཡས་རིགས་ཀྱི་རང་རྟགས་བསྣམས་པ། ཀུན་ཀྱང་ཚུལ་གཅེར་བུར་ཡང་རུང་། གྱད་ཀྱི་ཤམ་ཐབས་ཙམ་ཡང་རུང་ངོ་། །ལྷ་རྣམས་ཀྱི་གནས་དང་གོ་རིམ་ནི་གཞུང་ལྟར་རོ། །དེ་ལྟར་ཕྱོགས་བཅུ་ཁྲོ་བོའི་དཀྱིལ་འཁོར་རྫོགས་ནས། སྐབས་འདིར་ལས་ནར་མ་ལྟ་བུ་ལ་བྱེད་ན་ཕུར་པ་རྫས་ཀྱི་དཀྱིལ་འཁོར་བྱིན་གྱིས་བརླབ་སྟེ། ཨེའི་གདན་ལ་བཞུགས་སུ་གསོལ། མཆོད་པ་དང་བཟླས་བརྗོད་ནར་མར་བྱེད་ཙ་ན་ཕུར་པ་རྫས་ཀྱི་དཀྱིལ་འཁོར་བྱིན་གྱིས་བརླབ་མི་དགོས་ཏེ་མཆོད་པའི་ཆོ་ག་ལ་འཇུག་གོ། །སློབ་དཔོན་ཁ་ཅིག་ཕུར་པ་བྱིན་གྱིས་བརླབ་པའི་ཆོ་ག་བདག་རྩ་བའི་དཀྱིལ་འཁོར་བསྐྱེད་པའི་རྗེས་ཐོག་ཏུ་བྱེད་པ་ཡོད་ནའང་། ཕུར་པའི་ལྷ་ཐམས་ཅད་ཀྱི་བྱིན་རླབས་ཕྱག་རྒྱ་ཡིན་པས་དཀྱིལ་འཁོར་རྫོགས་ནས་བྱ་བར་རིགས་སོ། །དེ་ནས་ཡེ་ཤེས་ཀྱི་དཀྱིལ་འཁོར་སྤྱན་དྲངས་ཏེ། སྲིད་པའི་ཕུར་བུ་སྒྲུབ་པ་དང་། །དབང་དང་དངོས་གྲུབ་བླང་བའི་ཕྱིར། །ཡེ་ཤེས་ཁྲོ་བོ་གཤེགས་སུ་གསོལ། །ཁྲོ་བོ་ཆེན་པོ་གཤེགས་ནས་ཀྱང་། །རྟགས་དང་མཚན་མ་སྟོན་པ་དང་། །ཀཱི་ལ་ཡ་ཡི་དངོས་གྲུབ་སྩོལ། །ཅེས་ཐོད་ཕྲེང་གི་ཕྱག་རྒྱ་སྨིན་མཚམས་སུ་བཅིངས་ནས། ༀ་ཨེ་ཧྱེ་ཧི་བྷ་ག་བཱ་ན་མ་ཧཱ་ཀ་རུ་ནི་ཀ་དྲྀ་ཤྱ་ཧོཿ ས་མ་ཡ་ཧོཿས་མ་ཡ་སྟྭཾ། རུ་ལུ་རུ་ལུ། ཞེས་བརྗོད་ཅིང་ཐལ་མོ་བརྡབ་ཅིང་སྙིང་པོ་བརྗོད་ཅིང་བསྟིམ། ཕྱག་བྱ་སྟེ། བསྐྱེད་དང་སྤྱན་དྲངས་བྱོན་པ་ཡི། །གཉིས་མེད་དོན་གྱིས་རབ་མཛེས་པ། །འབར་བ་ཡེ་ཤེས་ཁྲོ་བོའི་སྐུ། །ཁྲོ་བོའི་སྐུ་ལ་ཕྱག་འཚལ་ལོ། །ༀ་སརྦ་ཏ་ཐཱ་ག་ཏ་ཀྲོ་དྷ་པཱུ་ཛ་ཨ་ཏི་པུ་ཧོཿ ཨ་ལ་ལ་ཧོཿ དེ་ནས་ཕྱག་རྒྱའི་མཆོད་པ་བྱ་སྟེ། སྐུ་མདོག་ཞལ་ནི་རབ་བསྒྱུར་ཏེ། །སྐུ་ཡི་གར་སྟབས་གློག་འགྱུ་བས། །འབར་བའི་ཁྲོ་བོ་མཉེས་བྱ་སྟེ། །ཕྱག་རྒྱ་གར་གྱི་མཆོད་པ་འབུལ། །ཧཱུྃ། ཁྲོ་བོའི་རྒྱལ་པོ་ཕྱག་རྒྱ་ཅན། །མཐིང་ནག་འཇིགས་པའི་ཆ་ལུགས་ཅན། །ལྗང་ནག་དམར་ནག་མཐིང་ནག་ཞལ། །དང་པོ་རྡོ་རྗེ་རྩེ་དགུ་མེ་དཔུང་འབར། །བར་པ་རྡོ་རྗེ་རྩེ་ལྔ་ཁ་ཊྭཱྃ་ཀ །ཐ་མ་རི་རབ་ཕུར་བུ་འདྲིལ། །བརྐྱང་བསྐུམ་གྱད་ཀྱི་དོར་སྟབས་བཞུགས། །འདི་ནི་ཁྲོ་བོའི་རྒྱལ་པོ་ཡི། །ཕྱག་རྒྱ་ཡིན་པར་དཔའ་བོས་བཤད། །ཕྱོགས་བཅུ་ཁྲོ་བོའི་དཀྱིལ་འཁོར་ནི། །ཧཱུྃ་ཆེན་མཐིང་སྐྱ་པདྨ་རྡོ་རྗེ་བསྣམས། །རྣམ་པར་རྒྱལ་བ་རྡོ་རྗེ་འཁོར་ལོ་དཀར། །དབྱུག་པ་སྔོན་པོ་མེ་དབལ་རིན་ཆེན་དབྱུག །གཤིན་རྗེ་མཐིང་ནག་བེ་ཅོན་དགྲ་སྟྭ་ཕྱར། །མི་གཡོ་སྨུག་ནག་རལ་གྲི་ཞགས་པ་སྣམས། །རྟ་མགྲིན་དམར་པོ་ཞགས་པ་སྤུ་གྲི་བསྣམས། །འདོད་རྒྱལ་དམར་སྐྱ་བ་དན་རྔ་ཡབ་བསྣམས། །བདུད་རྩི་ལྗང་སྔོན་དབྱུག་ཏོ་རྒྱ་གྲམ་བསྣམས། །ཁམས་གསུམ་རྣམ་རྒྱལ་སེར་པོ་ཏྲི་ཤུལ་མདའ་གཞུ་བསྣམས། །སྟོབས་ཆེན་དུད་ཁ་ལྕགས་ཀྱུ་ཐོ་བ་སྣམས། །ཀུན་ཀྱང་དང་པོ་རྡོ་རྗེ་བྷན་དམར་གསོལ། །གཡས་གཡོན་ཐ་མ་རི་རབ་ཕུར་བུ་འདྲིལ། །ཕྱག་རྒྱ་གར་གྱི་མཆོད་པ་འབུལ། །ཁྲོ་བོ་རྣམས་ཀྱི་ཕྱག་རྒྱ་ནི། །འཇིགས་ཚུལ་རྔམས་པ་གཙོ་དང་མཐུན། །ཕྱག་རྒྱ་གར་གྱི་མཆོད་པ་འབུལ། །ཨ་ལ་ལ་སྟེ་དགྱེས་པར་མཛོད། །སྔགས་བརྗོད་ཅིང་ཕྱག་རྒྱ་བཅིང་། དེ་ནས་རང་བྱུང་ཞེས་པ་ནས། ཐུགས་དམ་དབྱིག་ཉིད་ཅེས་པས་ཡོན་ཏན་བརྗོད། རྒྱལ་བའི་དཀྱིལ་འཁོར་མ་ལུས་དང་། །དཔལ་ཆེན་རྡོ་རྗེ་གཞོན་ནུ་འཁོར་བཅས་ལ། །བདག་ཅག་དད་པས་འབུལ་ལགས་ཀྱིས། །བཞེས་ཏེ་ཀུན་ཏུ་དགྱེས་པར་མཛོད། །འཕྲུལ་གྱི་དངོས་གྲུབ་བདག་ལ་སྩོལ། །གྲུ་གསུམ་མཐིང་ནག་འབར་བའི་དཀྱིལ་འཁོར་ནས། །དཔལ་ཆེན་རྡོ་རྗེ་གཞོན་ནུ་ཡབ་ཡུམ་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ཡབ་ཡུམ་གཉིས་མེད་རོལ་པའི་ཐུགས་ལས་སྤྲུལ། །འཇིགས་བྱེད་ཆེན་པོ་ཁྲོ་བོ་བཅུ་རྣམས་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ཁྲོ་བོའི་སྐུ་ལ་སོ་སོར་དགྱེས་པར་འཁྲིལ། །སྒྲ་འབྱིན་ལ་སོགས་ཁྲོ་མོ་བཅུ་རྣམས་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་རྩེ་དགོངས་དབང་དང་དངོས་གྲུབ་སྩོལ། །ཕྱོགས་བཅུའི་ཁྲོ་རྒྱལ་གཉིས་མེད་ཐུགས་ལས་སྤྲུལ། །སྤྲུལ་པའི་ཕྲ་མེན་མགོ་བརྙན་ཉི་ཤུ་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །གྲུ་གསུམ་མཐིང་ནག་འབར་བའི་དཀྱིལ་འཁོར་ནས། །བདུད་འདུལ་མཐུ་ཆེན་ཡེ་ཤེས་ཁྲོ་བོའི་རྒྱལ། །འདུ་འབྲལ་མེད་པ་སྒྲུབ་པའི་དཀྱིལ་འཁོར་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །སྤྲུལ་པ་ཡང་སྤྲུལ་སུམ་སྤྲུལ་གྲངས་མེད་དང་། །བཀའ་ཡི་ཕོ་ཉ་འགུག་བྱེད་མ་ལུས་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་རྩེར་དགོངས་དབང་དང་དངོས་གྲུབ་སྩོལ། །ངེས་པའི་ལུང་སྟོན་རྡོ་རྗེ་སློབ་དཔོན་དང་། །སྡོམ་ལ་གནས་པའི་རིག་འཛིན་སྒྲུབ་པ་པོ། །དམ་ཚིག་ཟུང་གིས་འབྲེལ་བའི་མཆེད་ལྕམ་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །བདེ་གཤེགས་རྒྱ་མཚོ་བསྐུལ་ཞིང་མཆོད་པ་དང་། །རྣལ་འབྱོར་རྟོག་འཇོམས་དོན་དང་ལྡན་པ་ཡིས། །ཡོན་ཏན་མཚུངས་མེད་བྷནྡྷའི་སྣོད་ཆེན་དུ། །ཡེ་ཤེས་ལྔ་ལྡན་བདུད་རྩི་རིན་པོ་ཆེ། །ཡོངས་སུ་བཀང་བའི་གཉིས་མེད་བཅུད་ཆེན་ལ། །བདེ་གཤེགས་མཆོད་ནས་དངོས་གྲུབ་བླང་བ་ནི། །ལྕེ་ཡི་རྡོ་རྗེ་དམ་ཚིག་པདྨོ་ལ། །རྡོ་རྗེ་ཅན་གྱིས་གསལ་བར་ཧཱུྃ་བསྒོམ་ནས། །ཡེ་ཤེས་ལྔ་ལྡན་བདུད་རྩི་སྦྱར་བའི་སྨན། །ཟོས་ན་བླ་མེད་བྱང་ཆུབ་མཆོག་ཐོབ་འགྱུར། །ཀཱ་ཡ་སིདྡྷི་ༀ། ཝཱ་ཀ་སིདྡྷི་ཨཱཿ ཙིཏྟ་སིདྡྷི་ཧཱུྃ། ཞེས་པས་དངོས་གྲུབ་བླང་ངོ་། །ཡེ་ཤེས་ཁྲོ་བོ་འབར་བའི་ཞལ་ཆེན་དུ། །སྣོད་བཅུད་མ་ལུས་མཆོད་པ་རྒྱ་ཆེར་སྦྱར། །དབྱིང་ལས་ཡེ་ཤེས་རོལ་པའི་མཆོད་པ་རུ། །སོ་སོར་མཆོད་པ་བཞེས་ཏེ་སྣོད་བཅུད་འབུལ། །རྒྱལ་བ་ཡབ་ཡུམ་ཡེ་ཤེས་ཁྲོ་བོའི་སྐུ། །དྭངས་སྙིགས་མི་ཕྱེད་མཉམ་པ་ཉིད་ཀྱི་ངང་། །དུག་གསུམ་སྐྱོན་བྲལ་དབྱིངས་ཀྱི་མཆོད་པ་འདི། །འདུ་འབྲལ་མེད་པའི་སྲིད་གསུམ་མཆོད་པར་རོལ། །མཐའ་དང་དབུས་མེད་མཉམ་པའི་མཆོད་པ་འདི། །ང་དང་བདག་མེད་མཁའ་ལྟར་དག་པའི་ཀློང་། །ཡེ་ཤེས་ལྷུན་གྲུབ་མཉམ་པའི་མཆོད་པ་འདི། །གཉིས་མེད་དོན་ཆེན་མཉམ་པའི་མཆོད་པར་རོལ། །སྙིང་པོ་བྱང་ཆུབ་ལོངས་སྤྱོད་རྫོགས་པའི་སྐུ། །འདོད་སྤྱོད་ཡོན་ཏན་ལྷ་མོའི་མཆོད་པ་འདི། །སྣང་སྲིད་མ་ལུས་འདོད་པའི་སྐུར་གྱུར་པས། །མཁའ་ལྟར་དག་པའི་དབྱིངས་སུ་ཡེ་ཤེས་རོལ། །རང་བྱུང་མ་བཅོས་དབྱིབས་དང་ཁ་དོག་བྲལ། །རྣམ་པར་ཤེས་པའི་ཉོན་མོངས་ཅིར་སྣང་ཡང་། །གདོད་ནས་དག་པས་འཁོར་བ་དབྱིངས་སུ་རྫོགས། །ཁམས་གསུམ་གདུག་པ་འདུལ་བའི་མཆོད་པ་འདི། །ཡེ་ཤེས་ཁྲོ་བོའི་ཞལ་དུ་སྟོབ་པར་འབུལ། །ཉོན་མོངས་རྩ་བ་འཁོར་བའི་ཁྲག་ཆེན་པོ། །ཆགས་པའི་དོན་གྱིས་ཁ་དོག་དམར་པོར་སྣང་། །མ་བཅོས་དབྱིངས་སུ་ཆགས་པ་དག་བྱའི་ཕྱིར། །ཡེ་ཤེས་ཁྲོ་བོའི་ཞལ་དུ་སྟོབ་པར་འབུལ། །ཞེས་མཆོད་པ་འབུལ། ཧོ་དགོངས་སུ་གསོལ། སྤྲོས་པ་མེད་པའི་དབྱིངས་རང་བཞིན་གྱི་དཀྱིལ་འཁོར་རྣམ་པར་དག་པ་ནས་བཞེངས་ཏེ། དུས་གསུམ་ཁམས་གསུམ་མ་ལུས་པར་བཞུགས་པའི་མངའ་བདག་བཅོམ་ལྡན་འདས་དཔལ་རྡོ་རྗེ་གཞོན་ནུ་ཡབ་ཡུམ་གཉིས་སུ་མེད་པའི་ཁྱད་པར་ལས་སྤྲུལ་པའི་ཁྲོ་བོ་བསྐལ་པའི་མེ་ལྟར་འབར་བའི་ཀློང་དཀྱིལ་ནས་ཤིན་ཏུ་འཇིགས་འཇིགས་རྔམས་རྔམས་ལྟར་བཞུགས་པ། འཁོར་གདུག་པའི་ཚོགས་དང་བཅས་པས་བདག་ཅག་གི་སྡང་བའི་དགྲ་གནོད་པའི་བགེགས་འདི་དག་ཐལ་བ་བཞིན་དུ་བརླག་པའི་ཕྲིན་ལས་མཛད་དུ་གསོལ། ཞེས་ཕྲིན་ལས་བཅོལ་ལ་བཟླས་པ་ཅི་ནུས་བྱ། དཀྱིལ་འཁོར་བསྡུའོ། །བླ་མས་གབ་པའི་གཏེར་གསང་བའི་མན་ངག་རྫོགས་སོ།། །།