ཚེ་དཔག་མེད་ལུང་ལུགས་ཀྱི་བརྒྱུད་འདེབས། རྒྱལ་སྲས་གཞན་ཕན་མཐའ་ཡས།
ཚེ་དཔག་མེད་ལུང་ལུགས་ཀྱི་བརྒྱུད་འདེབས་བཞུགས་སོ། །ཀུན་བཟང་རྡོར་སེམས་ཕྱག་ན་རྡོ་རྗེ་དང་། །ཀུ་ཀུ་རཱ་ཛ་ཨིནྡྲ་བྷུ་ཏི་ཆེ། །སིངྷ་ཨུ་པ་རཱ་ཛ་རྡོ་རྗེ་བཞད། །སངས་རྒྱས་གསང་བ་རྣམས་ལ་གསོལ་བ་འདེབས། །བི་མ་གཉགས་ཆེན་ལྷ་དཔལ་གནུབས་ཡབ་སྲས། །ཡེ་ཤེས་རྒྱ་མཚོ་ཤེར་མཆོག་ཉང་ཡེ་འབྱུང་། །ཟུར་པ་མེས་དབོན་ཐུགས་སྲས་ཀ་ཆེན་བཞི། །གསང་བདག་ཤཱཀ་སེང་རྣམས་ལ༴ བཤེས་གཉེན་ཇོ་པད་ཤེར་འོད་བརྩོན་འགྲུས་སེང་། །དར་མ་སེདྒེ་བསོད་དཔལ་དཔལ་ཆེན་པོ། །དྲིན་ཆེན་གཙུག་ནོར་ཀུན་དགའ་རྒྱལ་མཚན་དང་། །ཆོས་རྒྱལ་བྱང་བཟང་རྣམས་ལ༴ ཀུན་རྡོར་དཔལ་མགོན་རྒྱལ་མཚན་བསོད་རིག་དང་། །ཚེ་དབང་བཀྲ་ཤིས་དབང་འཛིན་ཀློང་ཡངས་འོད། །འགྱུར་མེད་རྡོ་རྗེ་རིན་ཆེན་རྣམ་པར་རྒྱལ། །ཨོ་རྒྱན་བསྟན་འཛིན་རྡོ་རྗེར༴ ཕྲིན་ལས་རྣམ་རྒྱལ་ཕྲིན་ལས་ཆོས་ཀྱི་སྒྲོན། །སངས་རྒྱས་ཀུན་དགའ་བསྟན་འཛིན་ནོར་བུའི་དཔལ། །ཁྱབ་བདག་འགྱུར་མེད་ཕན་བདེའི་འོད་ཟེར་སོགས། །རྩ་བརྒྱུད་བླ་མ་རྣམས་ལ་གསོལ་བ་འདེབས། །ཐུགས་རྗེའི་བདག་ཉིད་མགོན་པོ་མཆོག་རྣམས་ཀྱིས། །ཚེ་རབས་ཀུན་ཏུ་རྗེས་སུ་འཛིན་པ་དང་། །ཚེ་འདིར་མཆོག་ཐུན་དངོས་གྲུབ་མྱུར་ཐོབ་ནས། །རང་གཞན་དོན་གཉིས་འགྲུབ་པར་བྱིན་གྱིས་རློབས། །ཞེས་རྒྱལ་སྲས་གཞན་ཕན་མཐའ་ཡས་ཀྱི་གསུང་ལ་བརྒྱུད་པའི་ཁྱད་པར་གྱིས་གཏེར་ཆེན་ནས་བདག་གི་རིགས་བདག་བླ་མའི་བར་ཁ་བསྒྱུར་བ་པོ་ནི་འཇིགས་བྲལ་ཡེ་ཤེས་རྡོ་རྗེའོ།། །།