སྔོན་འགྲོ་ཡན་ལག་བརྒྱད་པ་མེ་ཏོག་ཕྲེང་མཛེས། གནུབས་ཆེན་སངས་རྒྱས་ཡེ་ཤེས།

པྲ ག ཏཱ ཁ྄ཊ྅྅྅ ངྒ སྱ ཤཱི ཪྴ མ།
༅། །སྔོན་འགྲོ་ཡན་ལག་བརྒྱད་པའི་དབུའོ། །
རྣལ་འབྱོར་པས་རྒྱུན་དུ་བཤགས་པ་བྱ་བ་ནི། རང་ཉིད་ལྷར་གསལ་བའི་ཐུགས་ཁར་ཉི་ཟླའི་གའུ་ཁ་སྦྱོར་གནས་པའི་ནང་དུ། སེམས་ཀྱི་རང་བཞིན་ཡི་གེ་ཧཱུྃ་དཀར་པོ་གཅིག་བསམ། དེ་ལས་འོད་དུ་བྱུང་སྲོག་དག་པའི་ལམ་དུ་ཞུགས། རང་གི་ལྟེ་བའི་འོག་ནས་རྩ་རོ་མ་རྐྱང་མ་ཀུན་དྷར་མ་དང་གསུམ་ཡོད་པ་ཤད་ཀྱི་ཚངས་བུག་ཏུ་སླེབ་པའི་ནང་དུ་འོད་བྱུང་བས། སྤྱི་བོ་ཚངས་པའི་བུ་ག་ནས་འོད་ཟེར་ཕྱོགས་བཅུར་འཕྲོས་པས། ཕྱོགས་བཅུའི་སངས་རྒྱས་ཐམས་ཅད་ཆོས་ཀྱི་སྐུ་ལ་གཟུགས་ཀྱི་སྐུར་བཞེངས་ནས། དེ་ཡང་ཞི་ཁྲོ་ཕུར་གསུམ་གྱི་ལྷ་ཚོགས་གྱུར་ནས། མདུན་གྱིི་ནམ་མཁར་སྤྱན་དྲངས། ཉི་ཟླ་པདྨ་གསུམ་བརྩེགས་ཀྱི་སྟེང་ན་ཞལ་རམ་མེར་བཞུགས་པར་བསམ། གཙོ་བོའི་དབུ་ལ་ཟླ་བའི་དཀྱིལ་འཁོར་གྱི་སྟེང་དུ། རྡོ་རྗེ་སློབ་དཔོན་ལ་བརྒྱུད་པའི་བླ་མ་རྣམས་རྡོ་རྗེ་སེམས་དཔའི་ཆ་ལུགས་སུ་བྱས་ནས་དབུ་རྒྱན་གྱི་ཚུལ་དུ་བཞུགས་པར་བསམ། བདག་ལ་ཞལ་གྱིས་ཕྱོགས། སྤྱན་གྱིས་གཟིགས། ཐུགས་ཀྱིས་དགོངས་ནས་བཞུགས་པ་ལ། ༀ་བཛྲ་ཨརྒྷཾ་པྲ་ཏིཙྪ་ཨཱཿཧཱུྃ། དྷུ་པེ༴ པུཥྤེ༴ ཨ་ལོ་ཀེ༴ གནྡྷེ༴ ནཻ་ཝཱིདྱ༴ ཤཔྡ་ཨཱཿཧཱུྃ། ཞེས་པས་མཆོད། རང་ལུས་དཔག་ཏུ་མེད་པར་སྤྲུལ་ནས། ལུས་ངག་ཡིད་གསུམ་གུས་པས་ཕྱག་འཚལ་བར་བསམ། དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ངོ་བོ་ཉིད། །ཡིད་བཞིན་ནོར་བུ་ལྟ་བུ་ཡི། །བླ་མ་རྣམས་ལ་ཕྱག་འཚལ་ལོ། །བླ་མ་བཤེས་གཉེན་དམ་པ་ཁྱེད། །བདག་ཅག་རྣམས་ཀྱི་ཕ་ལགས་སོ། །བདག་ཅག་རྣམས་ཀྱི་མ་ལགས་སོ། །བདག་ཅག་རྣམས་ཀྱི་མགོན་ལགས་སོ། །བདག་ཅག་རྣམས་ཀྱི་སྟོན་པ་ལགས། །བདག་ཅག་རྣམས་ཀྱི་འདྲེན་པ་ལགས། །མུན་པ་སེལ་བའི་སྒྲོན་མེ་ལགས། །དུག་གསུམ་ནད་སེལ་སྨན་པ་ལགས། །འགྲོ་བ་སྒྲོལ་བའི་གྲུ་ལགས་སོ། །ཉི་མའི་ཞལ་ལ་ཕྱག་འཚལ་ལོ། །ཟླ་བའི་སྐུ་ལ་ཕྱག་འཚལ་ལོ། །པདྨའི་གསུང་ལ་ཕྱག་འཚལ་ལོ། །ནམ་མཁའི་ཐུགས་ལ་ཕྱག་འཚལ་ལོ། །ཡོན་ཏན་རེ་བ་སྐོང་ཕྱག་འཚལ་ལོ། །ཕྲིན་ལས་ཀུན་སྒྲོལ་ཕྱག་འཚལ་ལོ། །དེས་བསྐྱེད་དུས་གསུམ་སངས་རྒྱས་དང་། །དམ་ཆོས་རྒྱུ་འབྲས་མ་ལུས་དང་། །རིག་འཛིན་བྱང་ཆུབ་སེམས་དཔའ་དང་། །དགེ་འདུན་རྣམས་ལ་ཕྱག་འཚལ་ལོ། །དེ་བཞིན་གཤེགས་པ་ཀུན་གྱི་བདག །ཡེ་ཤེས་རྒྱ་མཚོ་རབ་ཟབ་ཐུགས། །དཀྱིལ་འཁོར་ཡིད་བཞིན་འབྱུང་བའི་གཏེར། །ནོར་བུ་རིན་ཆེན་ཡོན་ཏན་མཛོད། །རྡོ་རྗེའི་ཡིད་ལ་ཕྱག་འཚལ་ལོ། །ཐམས་ཅད་ངོ་བོ་མཉམ་ཉིད་སྐུ། །བདེ་ཆེན་གར་དབང་སྐུ་གསུང་ཐུགས། །མི་ཟད་རྒྱན་གྱི་འཁོར་ལོ་ཡི། །ཧེ་རུ་ཀ་ལ་ཕྱག་འཚལ་ལོ། །དེ་ནི་སྤྱན་དྲངས་པ་དང་། ཕྱག་འཚལ་བའི་ཡན་ལག་སྟེ་དང་པོའོ། །གཉིས་པ་ནི། ཀུན་ཏུ་བཟང་པོའི་མཆོད་པ་གཟུགས་སྡུག་པ། སྒྲ་སྙན་པ། དྲི་ཞིམ་པ། རོ་མངར་བ། རེག་བྱ་འཇམ་པ་སྣ་ཚོགས་ཀྱིས་མཆོད་པས་ཕྱོགས་བཅུའི་ཞིང་ཁམས་ཐམས་ཅད་ཁྱད་པར་སྤྲོས་པས། ནམ་མཁའ་ལ་སྤྲིན་བཞིན་དུ་འཁྲིགས་པ། བར་སྣང་ལ་ཆར་བཞིན་དུ་བབ་པ། ས་གཞི་ལ་རྩི་ཤིང་བཞིན་དུ་སྐྱེས་པ་མཆོད་པར་བསམ། གཞན་ཡང་ཕྱིའི་ལྷ་མོ་བཞི། སྤོས་མ་དང་། མེ་ཏོག་དང་། མར་མེ་མ་དང་། དྲི་ཆབ་མ་དང་བཞི། ནང་གི་ལྷ་མོ། སྒེག་མོ། ཕྲེང་བ་མ། གླུ་མ། གར་མ་རྣམས་ཀྱིས་མཆོད་པར་བསམ་ལ། བདེ་བར་གཤེགས་སོ་བཅོམ་ལྡན་འདས། །རྒྱལ་བ་རྒྱ་མཚོ་ཡེ་ཤེས་ཀྱི། །སྲིད་པ་རྒྱ་མཚོ་མཐའ་ཡས་ཀྱི། །སྤྱོད་པ་རྒྱ་མཚོ་རྨད་བྱུང་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ༀ་ན་མཿསརྦ་ཏ་ཐཱ་ག་ཏེ་བྷྱོ་བྷི་ཤྭ་མུ་ཁེ་བྷྱ། སརྦ་ཏ་ད་ཁཾ་ཨུཏ་ག་ཏེ། སྥ་ར་ན་ཨི་མཾ་ག་ག་ན་ཁཾ་སྭཱ་ཧཱ། ༀ་ཨཱཿཧཱུྃ། རབ་ཏུ་དགའ་བའི་བདག་ལ་ཕྱག་འཚལ་ལོ། །དམ་ཚིག་ཆེན་པོ་དམ་པ་གྲུབ་པར་མཛོད། །ༀ་བཛྲ་པུཥྤེ་གྲྀཧྞ་ཧཱུྃ། ༀ་ཨཱཿཧཱུྃ། རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་དམ་ཚིག་གྲུབ་པར་མཛོད། །ༀ་བཛྲ་དྷུ་པེ་གྲྀཧྞ་ཧཱུྃ། ༀ་ཨཱཿཧཱུྃ། རབ་ཏུ་དགའ་བའི་བདག་ལ་ཕྱག་འཚལ་ལོ། །མཆོད་པ་ཆེན་པོ་དགའ་བ་དག་པར་མཛོད། །ༀ་བཛྲ་ཨ་ལོ་ཀེ་གྲྀཧྞ་ཧཱུྃ། ༀ་ཨཱཿཧཱུྃ། རབ་ཏུ་དགའ་བའི་བདག་ལ་ཕྱག་འཚལ་ལོ། །མཆོད་པ་ཆེན་པོ་བཏང་སྙོམས་གྲུབ་པར་མཛོད། །ༀ་བཛྲ་གནྡྷེ་གྲྀཧྞ་ཧཱུྃ། ༀ་བཛྲ་ལཱ་སྱ་ཧཱུྃ། ༀ་བཛྲ་མ་ལྱ་ཏྲཾ། ༀ་བཛྲ་གྷིརྟི་ཧྲཱིཿ ༀ་བཛྲ་ནིརྟི་ཨཱཿ དེ་ནི་མཆོད་པའི་ཡན་ལག་སྟེ་གཉིས་པའོ། །དེ་ནས་བཤགས་པ་བྱ་བ་ནི། རང་ཐལ་མོ་སྦྱར་ཙོག་པུར་བསྡད་ལ། རྒྱལ་བ་རྣམས་ཀྱི་སྤྱན་སྔར་ཕྱིན་ནས། རང་གཞན་གྱི་ཚེ་རབས་འཁོར་བ་ཐོག་མ་མེད་པ་ནས། ད་ལྟ་ལ་ཐུག་གི་བར་དུ་སྡིག་པ་མི་དགེ་བའི་ལས་ཅི་བྱས་པ། རོག་ལ་བཅོལ་བ། གཞན་གྱི་བྱས་པ་ལ་ཡི་རང་སྐྱེས་པ། རྩ་བ་དང་ཡན་ལག་གི་དམ་ཚིག་ཉམས་ཆག་ཐམས་ཅད་དང་། སྡོམ་པ་གསུམ་ལ་ཆག་ཉམས་དང་འགལ་འཁྲུལ་དུ་གྱུར་པ་ཐམས་ཅད་ཞེ་ཐག་པ་ནས་བཤགས། ད་ཕྱིན་ཆད་སྲོག་ལ་བབ་ཀྱང་སྡིག་པ་མི་དགེ་བའི་ལས་མི་བྱེད་པར་བསམ་ལ། ན་མོ། བདག་གིས་ཚེ་རབས་ཐོག་མ་མེད་པ་ནས། །ད་ལྟ་ཡན་ཆད་མི་དགེའི་སྡིག་སྤྱད་དང་། །འདུལ་སྡོམ་ཞིག་དང་ཕྱི་ནང་དམ་ཉམས་དང་། །ཁྱད་པར་ཉོན་མོངས་བག་མེད་ལེ་ལོ་ཡིས། །རྩ་བ་ཡན་ལག་ལ་སོགས་བསྲུང་བྱ་རྣམས། །ཞིག་རལ་ཉམས་དང་ཁྱད་བསད་ཡལ་བར་དོར། །གཞུང་དུ་མ་སྙགས་གཞུང་འགལ་ཆེ་ཆུང་རྣམས། །ཉམས་དང་ཚོར་དང་མ་ཚོར་ཉམས་སོ་འཚལ། །རྩ་བ་ཡན་ལག་ཟླ་ཞར་ཀུན་ཏུ་ཉམས། །ཤིན་ཏུ་གནོང་ཞིང་གདུང་བས་བཤགས་པར་བགྱི། །གནོང་འགྱོད་བཤགས་པས་ཚངས་པ་སྩལ་དུ་གསོལ། །ཅེས་པས་རྒྱལ་བ་རྣམས་ཀྱི་དག་པ་ཚངས་པའི་གནང་བ་བྱིན་པར་བསམ། བཤགས་པའི་ཡན་ལག་སྟེ་གསུམ་པའོ། །བཞི་པ་དགེ་བ་ལ་ཡིད་རང་བ་ནི། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་འཕགས་པ་ཉན་ཐོས་དང་། སོ་སོའི་སྐྱེ་བོ་དང་། འཇིག་རྟེན་དགེ་འདུན་དང་གཞན་ཡང་འཇིག་རྟེན་གྱི་དགེ་བའི་རྩ་བ་ཐམས་ཅད་ལ་དགའ་ཞིང་རྗེས་སུ་ཡི་རང་བར་བསམ་ལ། རྫོགས་སངས་རྒྱས་དང་བྱང་ཆུབ་སེམས་དཔའ་དང་། །འཕགས་པ་རྣམས་དང་སོ་སོའི་སྐྱེ་བོ་ཡིས། །དགེ་བའི་རྩ་བ་བསགས་པ་མ་ལུས་པ། །རྟག་ཏུ་བདག་ནི་རྗེས་སུ་ཡི་རང་ངོ་། །རྗེས་སུ་ཡི་རང་བའི་ཡན་ལག་སྟེ་བཞི་པའོ། །ལྔ་པ་ཆོས་ཀྱི་འཁོར་ལོ་བསྐོར་བ་ནི། ཆོས་ཀྱི་འཁོར་ལོ་བསྐོར་བར་མི་བཞེད་པ་རྣམས་ལ། ཆོས་ཀྱི་འཁོར་ལོ་བསྐོར་ནས་སེམས་ཅན་གྱི་དོན་བྱེད་པར་ཞུ་བ་གསོལ་བར་བསམ་ལ། འབྲས་བུ་མངོན་གྱུར་རིང་པོར་མ་ལོན་པར། །ཕྱོགས་བཅུའི་འཇིག་རྟེན་ཁམས་ན་བཞུགས་སོ་འཚལ། །འགྲོ་རྣམས་མྱུར་དུ་སངས་རྒྱས་ཐོབ་སླད་དུ། །བླ་མེད་ཆོས་ཀྱི་འཁོར་ལོ་བསྐོར་བར་བསྐུལ། །ཆོས་ཀྱི་འཁོར་ལོ་བསྐོར་བའི་ཡན་ལག་སྟེ་ལྔ་པའོ། །དྲུག་པ་མྱ་ངན་ལས་མི་འདའ་བར་བཞུགས་སུ་གསོལ་བ་ནི། སངས་རྒྱས་རྣམས་མྱ་ངན་ལས་འདའ་བར་དགོངས་པ་རྣམས་ལ། བདག་གིས་མཆོད་པ་རྣམས་ཀྱིས་མཆོད་དེ། འཁོར་བ་ཇི་སྲིད་མྱ་ངན་ལས་མི་འདའ་བར་བཞུགས་ནས་སེམས་ཅན་གྱི་དོན་མཛད་པར་གསོལ་བ་འདེབས་སོ་སྙམ་དུ་བསམ་ལ། གདུལ་བྱའི་བྱ་བ་ཚར་བའི་ཐུབ་པ་རྣམས། །ཆོས་ཀྱི་དབྱིངས་སུ་འདའ་བར་བཞེད་པ་ལ། །ཇི་སྲིད་འཁོར་བ་སྟོངས་པར་མ་གྱུར་པར། །བཞུགས་ནས་མྱ་ངན་མི་འདར་གསོལ་བ་འདེབས། །མྱ་ངན་ལས་ནི་མི་འདའ་བར་གསོལ་བ་འདེབས་པའི་ཡན་ལག་སྟེ་དྲུག་པའོ། །བདུན་པ་བསྔོ་བ་ནི། བདག་གིས་ཚེ་རབས་ཐོག་མ་མེད་པ་ནས། ད་ལྟ་ལ་ཐུག་གི་བར་དུ་ལུས་ངག་ཡིད་གསུམ་གྱི་སྒོ་ནས་དཀར་པོ་དགེ་བའི་རྩ་བ་ཅི་བྱས་པ་དང་། གཞན་ཡང་དགེ་བའི་རྩ་བ་ཅི་བགྱིས་པ་ནས། བདག་དང་མཐའ་ཡས་པའི་སེམས་ཅན་ཐམས་ཅད་ཀྱིས། རྣམ་པ་ཐམས་ཅད་མཁྱེན་པའི་སངས་རྒྱས་ཀྱི་རྒྱུར་བསྔོའོ་སྙམ་དུ་བསམ་ལ། དེ་ནས་དགེ་བའི་རྩ་བ་ཅི་བྱས་པ་ཐམས་ཅད་བྱང་ཆུབ་ཆེན་པོར་བསྔོ་བར་བྱ་བསམ་ལ། ན་མོ། བདག་གིས་ཚེ་རབས་ཐོག་མ་མེད་པ་ནས། །ད་ལྟ་ཡན་ཆད་དགེ་བ་ཅི་སྤྱད་དང་། །ཁྱད་པར་དེང་འདིར་དགེ་བ་ཅི་སྤྱད་པ། །བདག་གཞན་དོན་ཕྱིར་བྱང་ཆུབ་ཆེན་པོར་བསྔོ། །དེ་ནི་ཞབས་སྡུད་བསྔོ་བ་དང་བཅས་པའི་ཡན་ལག་སྟེ་བདུན་པའོ། །དེ་ནས་དབང་པོའི་སྤྱན་སྔར་དམ་ཉམས་པ་སླར་བླང་སྟེ་བསྲུང་བ་ནི། རྩ་བ་ཡན་ལག་གི་དམ་ཚིག་རྣམས་རང་གི་སྲོག་ལ་བབ་ཀྱང་བསྲུང་སྙམ་དུ་བསམ་ལ། དམ་བཅའ་བ་ནི། རྡོ་རྗེ་རྩེ་གཅིག་པའི་ཕྱག་རྒྱ་བཅའ་ལ། བླ་མེད་མི་སྤངས་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །གཏི་མུག་ཆགས་དང་ཞེ་སྡང་ཆེ། །ང་རྒྱལ་ཕྲག་དོག་མི་སྤང་ངོ་། །དཀར་རྩི་དམར་རྩི་དྲི་ཤ་ཆེན། །དག་པའི་སྣོད་བཅུད་མི་དོར་རོ། །བདེ་བར་གཤེགས་པ་ཁྱེད་ཅི་འདྲ། །དེ་འདྲ་ཁོ་ནར་བདག་གྱུར་ཅིག །སྤྱོད་པ་རྨད་བྱུང་བསམ་ཡས་པ། །འགྲོ་ལ་ཕན་པའི་དོན་དུ་སྤྱད། །བྱང་ཆུབ་སྤྱོད་མཆོག་དམ་པ་དང་། །སྐུ་གསུང་ཐུགས་ཀྱི་ཕྱག་རྒྱ་འདི། །སྲོག་གི་ཕྱིར་ཡང་མི་གཏོང་ན། །རྡོ་རྗེ་རྒྱལ་པོས་བྱིན་རློབས་ཤིག །དུས་ངན་ཐ་མའི་འཇིག་རྟེན་འདིར། །སངས་རྒྱས་མཛད་དཀའ་བདག་གིས་མཛད། །བྱང་ཆུབ་སྤྱད་དཀའ་བདག་གིས་སྤྱད། །རྡོ་རྗེ་རྣལ་འབྱོར་དཀྱིལ་འཁོར་འདིར། །བདག་ཅག་བསམ་པ་འགྲུབ་གྱུར་ཅིག །ཧཱུྃ་ཞེས་བརྗོད་པས། རང་གི་ཐུགས་ཀའི་འོད་ཟེར་གྱིས་དཔང་པོའི་ལྷ་རྣམས་འོད་དུ་ཞུ་ནས་བདག་གི་སྤྱི་བོར་ཐིམ་པར་བསྒོམ་ནས། སྡིག་སྒྲིབ་ཐམས་ཅད་མར་འོག་སྒོ་དང་སོར་མོ་བཅུ་ནས་མར་བུད་ནས། རང་གི་ལུས་ཡེ་ཤེས་ཀྱི་བདུད་རྩིས་གང་བར་བསམ། ༀ་བཛྲ་སཏྭ་ས་མ་ཡ་སོགས། ཞེས་པས་རྒྱུན་བཤགས་རྫོགས་སོ། །བླ་མ་དམ་པ་རྣམས་ལ་ཕྱག་འཚལ་ལོ། །རྣལ་འབྱོར་པས་བདེ་གཤེགས་ཞི་ཁྲོ་ཡོངས་རྫོགས་ཀྱི་ལྷ་རྣམས་མདུན་གྱི་ནམ་མཁར་ཉི་ཟླ་པདྨའི་གདན་ལ་དབང་པོའི་མངོན་སུམ་དང་འདྲ་བ་ཞལ་རམ་མེར་བཞུགས་པར་བསམ་ལ། མདུན་དུ་རུང་གི་ལུས་རྡུལ་སྙེད་དུ་སྤྲུལ་ནས། བཤགས་ཚིག་འདིས་ཡིད་འགྱོད་སེམས་དང་བཅས་ནས། དུས་ཐམས་ཅད་དུ་བཤགས་པར་བྱའོ། །རྗེས་ལྟ་བས་ཀྱང་བཤགས་པར་བྱའོ། །དམ་ཚིག་ལ་བསྒྲིམ་པས་ནི་དངོས་གྲུབ་མྱུར་རོ། །དེ་ཡང་བཤགས་པ་ལ་ལྔ་སྟེ། དང་པོ་དགོངས་སུ་གསོལ་བ་ནི། བཅོམ་ལྡན་འདས་ཞི་ཁྲོ་རབ་འབྱམས་ཀྱི་ཚོགས་ལ་ཕྱག་འཚལ་ལོ། །ཨེ་མ་ཧོ། ཕྱོགས་བཅུ་དུས་བཞི་ཀུན་གྱི་བདག་ཉིད་ཆེ། །བླ་མ་རྒྱལ་བ་ཞི་ཁྲོ་ཡོངས་རྫོགས་དགོངས། །འདིར་གཤེགས་ཉི་ཟླ་པདྨའི་གདན་ལ་བཞུགས། །ཉམས་ཆག་ན་རག་སྦྱོངས་ཕྱིར་ཕྱག་མཆོད་བཞེས། །གཉིས་པ་ཕྱག་འཚལ་བ་ནི། ལུས་རྡུལ་སྙེད་ཀྱི་མགོ་བོས་ཞབས་ལ་བཏུད་དེ། ཡོན་ཏན་ཕུན་ཚོགས་བླ་མ་རྣམས་ལ་ཕྱག་འཚལ་ལོ། །དམིགས་མེད་སྤྲོས་བྲལ་ཆོས་ཀྱི་སྐུ་ལ་ཕྱག་འཚལ་ལོ། །བདེ་ཆེན་ལོངས་སྤྱོད་རྫོགས་པའི་སྐུ་ལ་ཕྱག་འཚལ་ལོ། །འགྲོ་མགོན་ཅིར་ཡང་སྤྲུལ་པའི་སྐུ་ལ་ཕྱག་འཚལ་ལོ། །གནས་ལུགས་མི་འགྱུར་རྡོ་རྗེའི་སྐུ་ལ་ཕྱག་འཚལ་ལོ། །ཡང་དག་མངོན་པར་བྱང་ཆུབ་སྐུ་ལ་ཕྱག་འཙལལ་ལོ། །ཉོན་མོངས་ཞི་མཛད་ཞི་བའི་ལྷ་ལ་ཕྱག་འཚལ་ལོ། །ལོག་ལྟ་ཚར་གཅོད་ཁྲོ་བོའི་སྐུ་ལ་ཕྱག་འཚལ་ལོ། །ཐབས་མགོན་ཚེ་བདག་འཇམ་དཔལ་སྐུ་ལ་ཕྱག་འཚལ་ལོ། །སྐྱོན་བྲལ་སྒྲ་སྒྲོགས་པདྨའི་གསུང་ལ་ཕྱག་འཚལ་ལོ། །ཡང་དག་དོན་ལྡན་བཛྲའི་ཐུགས་ལ་ཕྱག་འཚལ་ལོ། །དུག་ལྔ་ནད་སེལ་བདུད་རྩི་སྨན་གྱི་ལྷ་ལ་ཕྱག་འཚལ་ལོ། །དྲེགས་པ་འཇོམས་མཛད་ཕུར་པའི་ལྷ་ལ་ཕྱག་འཚལ་ལོ། །འབྱུང་བའི་མངའ་བདག་མོའི་ཚོགས་ལ་ཕྱག་འཚལ་ལོ། །ས་དང་ལམ་རྫོགས་རིག་འཛིན་ཚོགས་ལ་ཕྱག་འཚལ་ལོ། །བསྟན་པ་སྲུང་མཛད་དམ་ཅན་རྣམས་ལ་ཕྱག་འཚལ་ལོ། །དགྲ་བགེགས་བདུད་འདུལ་སྔགས་བདག་རྣམས་ལ་ཕྱག་འཚལ་ལོ། །གང་གིས་རྒྱལ་བ་ཞི་ཁྲོ་ཡི། །དཀྱིལ་འཁོར་མཚན་ཐོས་ཕྱག་འཚལ་ན། །ཉམས་ཆག་མ་ལུས་ཀུན་བྱང་སྟེ། །མཚམས་མེད་ལྔ་ལ་སྨོན་ཅི་དགོས། །ན་རག་གནས་ཀྱང་དོང་སྤྲུགས་ཏེ། །རིག་འཛིན་རྒྱལ་བའི་ཞིང་དུ་གྲགས། །རྡོ་རྗེ་སེམས་དཔའི་གསང་སྔགས་དངོས། །ལས་སྒྲིབ་ཉམས་སྒྲིབ་དག་བྱེད་པའི། །འཁོར་བ་དོང་སྤྲུགས་ཡང་སྙིང་བཟླ། །རིང་ཉིད་ཐ་མལ་པའི་སྤྱི་བོར་པད་ཟླ་ཉི་མ་གསུམ་བརྩེགས་ཀྱི་སྟེང་དུ། རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་གཡས་རྡོ་རྗེ་རྩེ་ལྔ་པ། གཡོན་དྲིལ་བུ་ཐུགས་ཀར་བསྣོལ་བ། རལ་པའི་ཐོར་གཙུག་གྱེན་དུ་བཅིང་ཅིང་། ལྷག་མ་ཐུར་དུ་གྲོལ་བ། རིན་པོ་ཆེའི་སྲོག་ཞུ་གསོལ་བ། སྤྱི་བོར་ཟླ་བའི་སྟེང་དུ་ༀ་དཀར་པོ། མགྲིན་པར་པདྨའི་སྟེང་དུ་ཨཿདམར་པོ། ཐུགས་ཀར་ཉི་མའི་སྟེང་དུ་རྡོ་རྗེ་རྩེ་ལྔ་པའི་ལྟེ་བར་ཧཱུྃ་དཀར་པོ་དངུལ་ཆུའི་མདོག་ལྟ་བུ་དཀར་ཙེ་རེ་བ། ཡིག་འབྲུ་གསུམ་པོ་ལ་འོད་ཟེར་བྱུང་ནས། བདག་གི་ལུས་ངག་ཡིད་གསུམ་ལ་ཕོག་ནས། ཆག་ཉམས་སྡིག་སྒྲིབ་ཐམས་ཅད་རྐང་མཐིལ་སེན་ཕྲག་ནས་མར་འོད་ནག་པོའི་ཚུལ་དུ་བུད་པར་བསམ། རང་གི་ལུས་ཤེལ་ཕྱིས་པ་ལྟར་དཀར་སངས་ཀྱིས་སོང་བར་བསམ། གསུམ་པ་སྙིང་པོ་བཟླ་བ་ནི། དབང་པོ་རྣམས་ཀྱི་ཐུགས་ཀ་ནས་བདུད་རྩིའི་ཆུ་རྒྱུན་བྱུང་ནས་སྡིག་སྒྲིབ་དག་པར་བསམ། ༀ་ཨཱཿཧཱུྃ་སྭཱ་ཧཱ། ༀ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏེ་ནོ་པ། ཏིཥྛ་ཌི་ཌྷྲོ་མེ་བྷ་ཝ། སུ་ཏོ ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོཥྱོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲཱེ་ཡ་ཀུ་རུ་ཧཱུྃ། ཧ་ཧ་ཧ་ཧ་ཧོ། བྷ་ག་ཝཱན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ། བཛྲཱི་བྷ་ཝ། མ་ཧཱ་ས་མ་ཡཱ་སཏྭ་ཨཱ། བཞི་པ་བཤགས་པ་དངོས་ནི། ལུས་རྡུལ་རྙེད་དུ་སྤྲུལ། ངག་བཤགས་ཚིག །ཡིད་འགྱོད་སེམས་དང་བཅས་ལ། ཧོཿ བདེ་གཤེགས་ཡོངས་རྫོགས་དགོངས་སུ་གསོལ། །རྒྱལ་བའི་བཀའ་དང་བླ་མའི་ལུང་། །ཅི་བཞིན་མ་སྤྱད་སློབ་དཔོན་སྨད། །རྡོ་རྗེ་མཆེད་དང་ལྕམ་དྲལ་ལ། །ལྟ་ལོག་ངན་སེམས་ངག་ཏུ་སྨྲས། །བརྡེག་བརྩོག་གནོད་པ་དངོས་སུ་སྤྱད། །ལྷ་དང་དཀྱིལ་འཁོར་ཉམས་མ་གསལ། །ཛཔ྄་བཟླས་མ་དག་ཟུར་ཆག་ཉམས། །གསང་བར་འོས་དང་གཉེར་གཏད་སྨྲས། །གསང་བཅུ་བསྒྲགས་ཤིང་བླ་མ་བསླུས། །རྩ་བའི་དམ་ཉམས་མཐོལ་ཞིང་བཤགས། །སྤྱད་པར་བྱ་བའི་དམ་ཚིག་ལྔ། །ཤེས་བྱ་ལྔ་དང་བསྒྲུབ་བྱ་ལྔ། །མི་སྤང་ལྔ་དང་དང་ལེན་ལྔ། །ཡན་ལག་དམ་ཉམས་མཐོལ་ཞིང་བཤགས། །བསྙེན་སྒྲུབ་ཏིང་འཛིན་མི་གསལ་ཞིང་། །ཉ་སྟོང་དུས་དྲུག་མཆོད་པ་ཆགས། །ལེ་ལོ་བསོག་འཇོག་ཚོགས་སྦྱང་བྱས། །ཕུད་ལྷག་ཉམས་ཤིང་ཁ་ཚར་ཤོར། །ཚོར་དང་མ་ཚོར་རྐྱེན་དབང་གི། །སྒོ་གསུམ་བག་མེད་དམ་ཉམས་བཤགས། །ལྔ་པ་ལྟ་བས་བཤགས་པ་ནི། ཆོས་ཐམས་ཅད་ཡེ་ནས་གནས་པའི་གནས་ལུགས་དེ་ཁོ་ན་ཉིད་རྟོགས་ཤིང་ཡིད་ལ་བྱས་ཏེ། ཡིད་ཀྱི་དམ་ཉམས་ལྟ་བས་བཤགས། །དེ་ཡང་ཀུན་གཞི་བྱང་ཆུབ་སེམས། །ཡིན་པ་མེད་པའི་ལྟ་བ་རྟོགས། །མིན་པ་མེད་པའི་སྤྱོད་པ་རྟོགས། །ཡིན་མིན་མེད་པའི་བསྒོམ་ཉམས་ལོན། །རེ་དོགས་མེད་པའི་བྱང་ཆུབ་སེམས། །རྩ་བ་ཡན་ལག་ཐམས་ཅད་ཀྱི། །ཆག་ཉམས་མ་བྱུང་མ་སྐྱེས་པས། །བཤགས་བྱ་བཤགས་བྱེད་གཉིས་མེད་གྲོལ། །ཉམས་ཆག་བཤགས་པའི་མདོ་ན་རག་དོང་སྤྲུགས་རྫོགས་སོ། །ལོངས་སྐུ་དག་པའི་ཞིང་གི་མཎྜལ་འབུལ་བ་ནི། རང་ཡི་དམ་དུ་མོས་པའི་སྨིན་མཚམས་ནས་ཡི་གེ་བྷྲཱུྃ་གཅིག་སྤྲོས་པས་འོད་དུ་ཞུ་བ་ལས། རིན་པོ་ཆེའི་ས་གཞི་མནན་ན་ནེམ་པ། བཏེག་ན་འཕར་བ་མིག་མང་རིས་སུ་བྲིས་པ། རྒྱ་མདོ་ཐམས་ཅད་རིན་པོ་ཆེའི་ཚོམ་བུས་སྤྲས་པ། མིག་གིས་བལྟར་མི་བཟོད་པའི་འོད་དང་ལྡན་པའི་དབུས་སུ་རིན་པོ་ཆེའི་ཁྲི་སེང་གེ་བརྒྱད་ཀྱིས་ཉེ་བར་བཏེགས་པ། རིན་པོ་ཆེའི་མཛོད་མིག་བདུན་བདུན་དང་ལྡན་པ། གདུང་མ་ཟུང་སྒྲིལ་དུ་འཁོར་བ། རིན་པོ་ཆེའི་དྲྭ་བས་ཁྲི་ཁེབ་བྱས་པ། དེའི་སྟེང་དུ་པད་ཟླ་ཉི་མ་གསུམ་བརྩེགས་ཀྱི་སྟེང་དུ། རྩ་བའི་བླ་མ་ལ་རྒྱུད་པའི་བླ་མ་རྣམས་ཀྱིས་བསྐོར་བ། དེའི་ཤར་དུ་གླང་པོ་ཆེ་བརྒྱད་ཀྱིས་བཏེགས་པའི་གདན་དྲུག་བརྩེགས་ཀྱི་སྟེང་དུ། ཡི་དམ་ལྷ་ཚོགས་རྣམས་ལ་ཆོས་སྐྱོང་སྲུང་མས་བསྐོར་བ། གཡས་སུ་རྟ་མཆོག་བརྒྱད་ཀྱིས་བཏེགས་པའི་གདན་དྲུག་བརྩེགས་ཀྱི་སྟེང་དུ་སངས་རྒྱས་དཀོན་མཆོག་སྐུ་གསུམ་གྱིས་བསྡུས་པ་རྣམས་བཞུགས་པར་བསམ། རྒྱབ་ཏུ་རྨ་བྱ་བརྒྱད་ཀྱིས་བཏེགས་པའི་གདན་དྲུག་བརྩེགས་ཀྱི་སྟེང་དུ་ཆོས་དཀོན་མཆོག་རྒྱུ་འབྲས་ལམ་གསུམ་གྱིས་བསྡུས་པ་རྣམས་གསེར་གྱི་ཤོག་གུ་ལ་བཻ་ཌཱུརྱ་ཞུན་མས་རང་ནན་དུ་བྲིས་པའི་གླེགས་བམ་ལ་རང་སྒྲ་གྲགས་པ་རྣམས་བསམ། གཡོན་དུ་ཤང་ཤང་བརྒྱད་ཀྱིས་བཏེགས་པའི་གདན་དྲུག་བརྩེགས་ཀྱི་སྟེང་དུ་དགེ་འདུན་དཀོན་མཆོག་རིག་པ་འཛིན་པ་རྣམས་དང་། ཐར་ལམ་པ་རྣམས་དང་། བྱང་ཆུབ་སེམས་དཔའ་ཟག་པ་མེད་པ་རྣམས་དང་། འཕགས་པ་དགྲ་བཅོམ་པ་རྣམས་དང་། གཞན་ཡང་ས་དང་ལམ་ལ་གནས་པ་རྣམས་བསམ། དེ་དག་གི་མངའ་རིས་དང་སྤྱན་ལམ་དུ་འདོད་པའི་ཡོན་ཏན་ཐམས་ཅད་ནམ་མཁའ་ལ་སྤྲིན་བཞིན་དུ་འབྱུང་བ། བར་སྣང་ལ་རང་བཞིན་དུ་འབབ་པ། ས་གཞི་ལ་རྩི་ཤིང་བཞིན་དུ་སྐྱེ་བ། འདོད་དགུ་ཐམས་ཅད་འབྱུང་བའི་ས་གཞི་ཆོས་ཀྱི་ཁྱབ་ཚད་དང་མཉམ་པ། བླ་མ་དཀོན་མཆོག་ལ་འབུལ་བར་བསམ་ལ། མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །མཉེན་འཇམ་རེག་ན་བདེ་བ་ཡི། །སྣ་ཚོགས་རིན་པོ་ཆེ་ཡི་གཞི། །མཛེས་པར་བྲེས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོ་འབར། །དབྱིབས་ལེགས་རྫིང་བུ་བྲོ་མཆོག་བསིལ། །རིན་ཆེན་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །གླུ་དབྱངས་ཚིགས་སུ་བཅད་པའི་སྒྲ། །བླ་རེ་རྒྱལ་མཚན་ན་བཟའ་བདུགས། །དོ་ཤལ་དཔུང་རྒྱན་སེ་མོ་དོ། །བཟའ་དང་བཏུང་བའི་མཆོག་རྣམས་ཀྱིས། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱིས། །གྲོ་གར་ལ་སོགས་བསམ་ཡས་ཀྱིས། །ཕྱོགས་བཅུ་ནམ་མཁའི་ཁམས་བཀང་ནས། །བླ་མ་རྣམས་དང་དཀོན་མཆོག་གསུམ། །དཀྱིལ་འཁོར་ཀུན་ལ་རྒྱས་པར་འབུལ། །སྤྲུལ་སྐུ་དག་པ་ཞིང་གི་མཎྜལ་འབུལ་བ་ནི། ཐུགས་ཀ་ནས་ཏྲཾ་གཅིག་སྤྲོས་པ་འོད་དུ་ཞུ་བ་ལས་མཐའི་རྒྱ་མཚོ་ཆེན་པོའི་དབུས་སུ། དབུས་ཀྱི་རི་བོ་མཆོག་རབ། ཤར་ཤེལ་ལས་གྲུབ་པ། ལྷོ་བཻ་ཌཱུརྱ་ལས་གྲུབ་པ། ནུབ་པདྨ་རཱ་ག་ལས་གྲུབ་པ། བྱང་གསེར་ལས་གྲུབ་པ། སྟེང་སུམ་ཅུ་རྩ་གསུམ་ལྷའི་རྟེན་ལོངས་སྤྱོད། ཁོང་སེང་ལྷ་མ་ཡིན་གྱི་རྟེན་ལོངས་སྤྱོད། འོག་ཀླུའི་རྟེན་ལོངས་སྤྱོད། ཕྱི་རོལ་རྒྱལ་ཆེན་སྡེ་བཞིའི་རྟེན་ལོངས་སྤྱོད། གསེར་གྱི་རི་བདུན། རོལ་པའི་མཚོ་བདུན། ཤར་ལུས་འཕགས་པོ། ལུས་དང་ལུས་འཕགས་པོ་དང་བཅས་པ། ལྷོ་འཛམ་བུ་གླིང་། རྔ་ཡབ་དང་རྔ་ཡབ་གཞན། ནུབ་བ་ལང་སྤྱོད། གཡོག་ལྡན་དང་ལམ་མཆོག་འགྲོ། བྱང་སྒྲ་མི་སྙན། སྒྲ་མི་སྙན་དང་སྒྲ་མི་སྙན་གྱི་ཟླ། ལྷོ་སྲིན་དང་འཇའ་འོད། སྣང་གསལ་གྱི་ཉི་ཟླ་གཟའ་སྐར། མཐའ་ཡི་ལྕགས་རི་མུ་ཁྱུད། ནམ་མཁས་ཁྱབ་ཚད་ཀྱི་འཇིག་རྟེན་ལྷ་དང་མིའི་ལོངས་སྤྱོད་ཐམས་ཅད་བླ་མ་དཀོན་མཆོག་གསུམ་ལ་འབུལ་བར་བསམ། གླིང་བཞི་དཀྱིལ་འཁོར་རིན་ཆེན་ལྡན། །དཔག་བསམ་ཤིང་དང་རྡིང་བུས་མཛེས། །ལས་གཞིའི་བྱིན་རླབས་ཁྱད་པར་ལས། །ལྷ་དང་ལྷ་མོའི་ལོངས་སྤྱོད་ལྡན། །ལྷག་པའི་ཏིང་འཛིན་མཆོད་པ་བཞེས། །ཆོས་རྣམས་ཐམས་ཅད་འབྲས་བུ་ཡོངས་རྫོགས་ཤིང་། །སངས་རྒྱས་རྣམས་ལ་མཎྜལ་འདི་འབུལ་བས། །འབྲས་བུ་འཕགས་པའི་ནོར་བདུན་ལྷུན་གྲུབ་སྟེ། །ཏིང་འཛིན་འབུམ་ཕྲག་རྣམས་ལ་དབང་བསྒྱུར་ཤོག །གསོལ་བ་བཏབ་པའི་མཎྜལ་འབུལ་བ་ནི། ན་མོ། དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་དང་། ཡོན་ཏན་དང་། ཕྲིན་ལས་དང་། ཞིང་ཁམས་ཟག་པ་མེད་པ། ཟད་མི་ཤེས་པ་རྒྱན་གྱི་འཁོར་ལོའི་བདེན་པ་དང་། རྒྱལ་བ་རྒྱ་མཚོ། གསང་བ་རྒྱ་མཚོ། སྨིན་པ་རྒྱ་མཚོ། བརྒྱུད་པའི་བླ་མ་རྗེ་བཙུན་རིན་པོ་ཆེ་རྣམས་ཀྱི་བྱིན་རླབས་ཀྱིས་བདག་མིང་འདི་ཞེས་བགྱི་བས། མ་སེམས་ཅན་ཐམས་ཅད་ཀྱི་དོན་དུ་རྫོགས་པ་ཆེན་པོ་ཤིན་ཏུ་རྣལ་འབྱོར། དོན་རང་བྱུང་གི་ཡེ་ཤེས་དེ་ཁོ་ན་ཉིད་ཀྱི་དོན་གྱིས་གང་བ་དང་། ཤིན་ཏུ་གང་བ་དང་། རྒྱས་པ་དང་། ཤིན་ཏུ་རྒྱས་པ་དང་། སྨིན་པ་དང་། ཤིན་ཏུ་སྨིན་པ་དང་། གྲོལ་བ་དང་། ཤིན་ཏུ་གྲོལ་བ་རྒྱ་ཆེན་པོ་མཛད་དུ་གསོལ། ༀ་བཛྲ་སཏྭ་ས་མ་ཡ་སོགས་ཚར་བར་བརྗོད། བདག་གི་དགེ་བའི་ལས་རྣམས་འདི་བགྱི་བས། །འཇིག་རྟེན་རིང་པོར་མི་ཐོག་སངས་རྒྱས་ནས། །དེ་ཀུན་འགྲོ་ལ་ཕན་ཕྱིར་དམ་ཆོས་ཀྱི། །སེམས་ཅན་སྡུག་བསྔལ་མང་གདུང་སྒྲོལ་གྱུར་ཅིག །མཎྜལ་རིམ་གསུམ་རྫོགས་སོ། །སྐྱབས་སུ་འགྲོ་བ་ནི། བདག་གཞན་ནམ་མཁའ་དང་མཉམ་པའི་སེམས་ཅན་ཐམས་ཅད། རྩ་བ་དང་རྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་གསོལ་བ་འདེབས། སྐྱབས་སུ་མཆིའོ་བྱིན་གྱིས་བརླབ་པར་མཛད་དུ་གསོལ། སངས་རྒྱས་ལ༴ ཆོས་ལ༴ དགེ་འདུན་ལ༴ རྒྱལ་བ་བཞི་བཅུ་རྩ་གཉིས་ཀྱི་དཀྱིལ་འཁོར་ལྷ་ཚོགས་རྣམས་ལ༴ འབར་བ་ཁྲག་འཐུང་ལྔ་བཅུ་རྩ་བརྒྱད་ཀྱི་དཀྱིལ་འཁོར་ལྷ་ཚོགས་རྣམས་ལ༴ ཕྲིན་ལས་ཀྱི་མངའ་བདག་དཔལ་ཆེན་རྡོ་རྗེ་གཞོན་ནུའི་ལྷ་ཚོགས༴ ཡི་དམ་རྒྱལ་བའི་དཀྱིལ་འཁོར་གྱི་ལྷ་ཚོགས་རྣམས་ལ༴ དཔལ་ལྡན་ལྷ་མོ་ནག་མོ་རང་བྱུང་གི་རྒྱལ་མོ་འདོད་པ་ཁམས་ཀྱི་དབང་ཕྱུག་མ༴ གསང་བ་ལས་ཆེན་མོ་རྡོ་རྗེ་རེ་མ་ཏི་ལ་སོགས་པའི་འཁོར་མ་གཤིན་རྒྱ་མཚོའི་ཚོགས་དང་བཅས་པ་རྣམས་ལ༴ དཔལ་ལྡན་མགོན་པོ་ནག་པོ། ལེགས་ལྡན་ནག་པོ། ཤྲཱི་མ་ཧཱ་ཀ་ལ་དམ་པ་ཡེ་ཤེས་པའི་ཆོས་སྐྱོང་བའི་སྲུང་མ་རྣམས་ལ༴ གཞན་ཡང་ཕ་མྱེས་རྒྱུད་ཀྱི་སྲུང་མ། སློབ་དཔོན་རྒྱུད་ཀྱི་སྲུང་མ། ལས་དང་སྐལ་བར་ལྡན་པའི་ཆོས་སྐྱོང་སྲུང་མ་རྣམས་ལ་གསོལ་བ་འདེབས། སྐྱབས་སུ་མཆིའོ། །བྱིན་གྱིས་བརླབས་པར་མཛད་དུ་གསོལ། །སྐབས་འདིར་དཀར་གཏོར་གཞུང་གང་རུང་གིས་བྱིན་གྱིས་བརླབས་ལ་བསྔོ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སེམས་ཅན་ཐམས་ཅད་ཀྱི་བར་ཆད་བསལ་ནས་རྫོགས་པའི་སངས་རྒྱས་ཐོབ་པའི་ཆེད་དུ་བདག་གིས་བསྲུང་འཁོར་བསྒོམ་ཞིང་མཚམས་བཅད་པར་བྱའོ་སྙམ་དུ་བསམ་ལ། སྐད་ཅིག་གིས་སྟོང་པའི་ངང་ལས། རང་ཉིད་དཔལ་རྡོ་རྗེ་སེམས་དཔའ་སྐུ་མདོག་སྔོ་ནག་གཡས་རྡོ་རྗེ། གཡོན་དྲིལ་བུ། ཞལ་འཛུམ་ཡང་མཆེ་བ་ཡུད་ཙམ་གཅིག་པ། སྤྱན་གསུམ་ཞི་བ་ཡིན་ཀྱང་སྡང་མིག་ཏུ་གཟིགས་པ། སྐུ་འོད་ཕུང་གི་ནང་ན་བཞུགས་ཀྱང་འོད་ཀྱི་རྩེ་མོ་ལ་མེ་རི་འཕྲོ་བ། ཉི་མའི་དཀྱིལ་འཁོར་ལ་ཡུམ་དབྱིངས་ཕྱུག་མ་དང་སྙོམས་པར་འཇུག་པ། གཡས་པས་ཡབ་ལ་འཁྱུད་པ། གཡོན་དྲིལ་བུ་ཡབ་ཀྱི་སྙན་རྩར་དཀྲོལ་བ། དེའི་ཐུགས་ཀར་ཟླ་བའི་གདན་ལ་རང་འདྲ་བའི་ཡེ་ཤེས་སེམས་དཔའ། དེའི་ཐུགས་ཀར་རྡོ་རྗེའི་ལྟེ་བར་ཧཱུྃ་ལས་ཧཱུྃ་བཛྲ་དྷྲིག྄་གིས་བསྐོར་བ། ཡུམ་གྱི་ཐུགས་ཀར་དྲིལ་བུ་ལ་མཱུཾཿདྷ་ཏུ་ཤྭ་རིས་བསྐོར་བ། སྤྱི་བོར་འཁོར་ལོ་ལ་ༀ་དཀར་པོ། མགྲིན་པར་པདྨ་ལ་ཨཱཿདམར་པོ། ཐུགས་ཀར་ཉི་མ་ལ་ཧཱུྃ་སྔོན་པོ་དེ་དང་དུས་མཉམ་དུ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱང་རྡོ་རྗེ་སེམས་དཔའི་སྐུར་གྱུར་ཏེ། དེ་དག་གི་སྤྱི་བོར་ནས་འོད་ཟེར་དཀར་པོ། མགྲིན་པ་ནས་དམར་པོ། ཐུགས་ཀ་ནས་འོད་ཟེར་སྔོན་པོ་བྱུང་སྟེ་རང་ལ་བསྟིམ་མོ། །དེ་ནས་སྔགས་བརྗོད་པས། ལྷ་ཚོགས་རྣམས་ཀྱི་ཐུགས་ཀ་ནས་རྡོ་རྗེའི་ཆར་བྱུང་བས། དགྲ་བགེགས་རྣམས་ཀྱི་སེམས་བརྒྱལ་ཞིང་ལུས་དུམ་བུར་བཅད་པར་བསམ་ལ། དེ་བཞིན་དུ་སྤྱི་བོ་ནས་འཁོར་ལོའི་ཆར། མགྲིན་པ་ནས་ཐོ་བའི་ཆར། ལྟེ་བ་ནས་རལ་གྲིའི་ཆར། གསང་གནས་ནས་རྒྱ་གྲམ་གྱི་ཆར། སྐུ་ཐམས་ཅད་ལས་བྲག་རིའི་ཆར་བྱུང་བས། བགེགས་རྣམས་བརྒྱལ་ཞིང་ལུས་དུམ་བུར་བཅད་པར་བསམ། དེ་ནས་མཚོན་ཆའི་ཆར་དེ་དག་ལ་རྡོ་རྗེའི་གུར་ལ་སོགས་པ་གུར་རིམ་པ་དྲུག་ཏུ་གྱུར་ཏོ། །དེའི་ཕྱི་རོལ་དུ་རྡོ་རྗེ་རྒྱ་གྲམ་གྱི་རང་བཞིན་གྱུར་ཏེ། ཤར་དཀར། ལྷོ་སེར། ནུབ་དམར། བྱང་ལྗང་། དབུས་མཐིང་གའི་ནང་དུ་ཚུད་པར་བསམ། དེ་ནས་བགེགས་བརྒྱལ་བ་རྣམས་ཐུགས་རྗེའི་འོད་ཟེར་དང་སྔགས་ཀྱི་སླར་བསླང་སྟེ། ཐམས་ཅད་ཀྱང་། སྙིང་རྗེ་དང་། བྱམས་པ་དང་ལྡན་པར་བྱས་ཏེ། འཇིག་རྟེན་གཞན་དུ་སངས་རྒྱས་ཀྱི་ཞིང་དུ་སྐྱེ་བར་བསམ། ཧཱུྃ་རྣལ་འབྱོར་ཆེན་པོ་ཞེས་པ་ནས། རང་གི་མིག་གཡས་པ་མ་ལས་ཉི་མ། གཡོན་པ་ཨ་ལས་ཟླ་བ། དེ་ནས་མིག་གཡས་པས་གཡས་བསྐོར་དུ་བལྟས་པས་གར་མཐོང་བའི་བགེགས་དང་ལོག་འདྲེན་བསྲེག་པ། གཡོན་པས་གཡོན་བསྐོར་དུ་བལྟས་པས་ཐལ་བ་ཡང་མ་ལུས་པ་བཀྲུས་པ། མིག་དབུས་མས་ཐད་ཀར་བལྟས་པས་དེ་ཉིད་བྱང་ཆུབ་སེམས་ཐམས་ཅད་གཉིས་སུ་མེད་པའི་ཡེ་ཤེས་ཀྱི་རང་བཞིན་དུ་གནས་པར་བསམ་ནས། ཧཱུྃ་ཧཱུྃ་ཧཱུྃ་ཞེས་བརྗོད། ༀ་བཛྲ་ཛྭ་ལ་ཧཱུྃ། མནྟྲ་སུམྦྷ་ནི་ཧཱུྃ། ཧཱུྃ་བྷྲཱུྃ། ༀ་བྷྲཱུྃ། ཏྲཱྃ་བྷྲཱུྃ། ཧྲཱིཿབྷྲཱུྃ། ཧཱ་བྷྲཱུྃ། འདི་གསུང་བ་ཙམ་གྱིས་ཕྱོགས་བཅུ་ནས་མཚོན་ཆའི་ཆར་ཆེན་འབབ་པར་གྱུར་ཏེ། བགེགས་རྣམས་བརྒྱལ་ཞིང་ལུས་དུམ་བུ་བཅད་པར་བསམ། ཐུགས་རྗེས་སླར་བསླང་སྔགས་འདི་བཟླས། ༀ་བཛྲ་སཏྭ་ར་ཙ་ཛ༔ སྲུང་འཁོར་ཕུབ་ཅིང་དམ་ཚིག་བསྒྲགས། ཧཱུྃ་རྣལ་འབྱོར་ཆེན་པོའི་དཀྱིལ་འཁོར་འདིར། །གསང་བའི་དམ་ཅན་སོ་སོ་ནས། །འདུ་བ་ལ་ནི་མ་གཏོགས་ཤིང་། །ཉན་པ་ལ་ནི་མི་དབང་བ། །ཀུན་ཀྱང་རེ་བ་བསྐོངས་ལགས་ཀྱིས། །ད་ལྟ་ཉིད་དུ་སོ་སོར་དེངས། །ཧཱུྃ་ཅི་སྟེ་བཀའ་ལས་འདས་གྱུར་ན། །རྡོ་རྗེ་འཛིན་རྒྱལ་ཁྲོས་ནས་ནི། །རྡོ་རྗེ་མཚོན་ཆེན་འབར་བ་ཡིས། །ཐལ་བ་བཞིན་དུ་བརླག་པར་བྱེད། །ཧཱུྃ་ཧཱུཾ་ཧཱུཾ། ཧཱུཾ་ཧཱུཾ་ཧཱུཾ། ཧཱུྃ་ཧཱུྃ་ཧཱུཾ། ཧཱུཾ་ང་ཡི་དཀྱིལ་འཁོར་བརྟེན་བྱའི་ཕྱིར། །ཁྲོ་རྒྱལ་བྱིན་རླབས་ལས་བྱུང་བའི། །མཚོན་ཆ་རྣམ་པ་སྣ་ཚོགས་ཀྱིས། །དཀྱིལ་འཁོར་རིམ་པ་ཚུལ་བཞིན་བསྲུང་། །ཧཱུཾ་སྟེང་ཡང་རྡོ་རྗེའི་བླ་རེ་ལ། །རྡོ་རྗེའི་ཐོ་ཐོག་སེར་ཆེན་འབེབས། །འོག་ཀྱང་རྡོ་རྗེའི་ས་གཞི་ལ། །རྡོ་རྗེའི་ཚྭ་ཚྭ་སྐར་ལྟར་འཁྲུག །ཕྱོགས་མཚམས་ཀུན་ཀྱང་རྡོ་རྗེ་འབར་བས་གཏམས། །རླུང་ཡང་འགྱུ་བའི་སྐབས་མེད་ན། །བགེགས་ཀྱི་ཚོགས་ལྟ་ག་ལ་སྲིད། །ༀ་བཛྲ་ཛྭ་ལ་ལ་སྐ་ཀྲོ་ཏ་ཧཱུྃ་ཕཊ྄། ཧཱུྃ་སྟེང་ཡང་འཁོར་ལོའི་བླ་རེ་ལ། །འཁོར་ལོའི་ཐོ་ཐོག་སེར་ཆེན་འབེབས། །འོག་ཀྱང་འཁོར་ལོའི་ས་གཞི་ལ། །འཁོར་ལོའི་ཚྭ་ཚྭ་སྐར་ལྟར་འཁྲུག །ཕྱོགས་མཚམས་ཀུན་ཀྱང་འཁོར་ལོས་གཏམས། །རླུང་ཡང་འགྱུ་བའི་སྐབས་མེད་ན། །བགེགས་ཀྱི་ཚོགས་ལྟ་ག་ལ་སྲིད། །ༀ་བཛྲ་ཙཀྲ་ཛྭ་ལ་ལ་སྐ་ཀྲོ་ཏ་ཧཱུྃ་ཕཊ྄། ཧཱུྃ་སྟེང་ཡང་རལ་གྲིའི་བླ་རེ་ལ། །རལ་གྲིའི་ཐོ་ཐོག་སེར་ཆེན་འབེབས། །འོག་ཀྱང་རལ་གྲིའི་ས་གཞི་ལ། །རལ་གྲིའི་ཚྭ་ཚྭ་སྐར་ལྟར་འཁྲུག །ཕྱོགས་མཚམས་རལ་གྲི་འབར་བས་གཏམས། །རླུང་ཡང་འགྱུ་བའི་སྐབས་མེད་ན། །བགེགས་ཀྱི་ཚོགས་ལྟ་ག་ལ་སྲིད། །ༀ་བཛྲ་པྲཉྩ་ཛྭ་ལ་ལ་སྐ་ཀྲོ་ཏ་ཧཱུྃ་ཕཊ྄། ཧཱུྃ་སྟེང་ཡང་ཐོ་བའི་བླ་རེ་ལ། །ཐོ་བའི་ཐོ་ཐོག་སེར་ཆེན་འབེབས། །འོག་ཀྱང་ཐོ་བའི་ས་གཞི་ལ། །ཐོ་བའི་ཚྭ་ཚྭ་སྐར་ལྟར་འཁྲུག །ཕྱོགས་མཚམས་ཀུན་ཀྱང་ཐོ་བས་གཏམས། །རླུང་ཡང་འགྱུ་བའི་སྐབས་མེད་ན། །བགེགས་ཀྱི་ཚོགས་ལྟ་ག་ལ་སྲིད། །ༀ་བཛྲ་མུསྟི་ཛྭ་ལ་ལ་སྐ་ཀྲོ་ཏ་ཧཱུྃ་ཕཊ྄། ཧཱུྃ་སྟེང་ཡང་རྒྱ་གྲམ་བླ་རེ་ལ། །རྒྱ་གྲམ་ཐོ་ཐོག་སེར་ཆེན་འབེབབ། །འོག་ཀྱང་རྒྱ་གྲམ་ས་གཞི་ལ། །རྒྱ་གྲམ་ཚྭ་ཚྭ་སྐར་ལྟར་འཁྲུག །ཕྱོགས་མཚམས་ཀུན་ཀྱང་རྒྱ་གྲམ་འབར་བས་གཏམས། །རླུང་ཡང་འགྱུ་བའི་སྐབས་མེད་ན། །བགེགས་ཀྱི་ཚོགས་ལྟ་ག་ལ་སྲིད། །ༀ་བཛྲ་ཀརྨ་ཛྭ་ལ་ལ་སྐ་ཀྲོ་ཏ་ཧཱུྃ་ཕཊ྄། ཧཱུྃ་སྟེང་ཡང་བྲག་རིའི་བླ་རེ་ལ། །བྲག་རིའི་ཐོ་ཐོག་སེར་ཆེན་འབེབས། །འོག་ཀྱང་བྲག་རིའི་ས་གཞི་ལ། །བྲག་རིའི་ཚྭ་ཚྭ་སྐར་ལྟར་འཁྲུག །ཕྱོགས་མཚམས་ཀུན་ཀྱང་བྲག་རིས་གཏམས། །རླུང་ཡང་འགྱུ་བའི་སྐབས་མེད་ན། །བགེགས་ཀྱི་ཚོགས་ལྟ་ག་ལ་སྲིད། །ༀ་བཛྲ་པ་ཏ་ལ་པཉྩ་ཧཱུྃ་ཕཊ྄། བསང་ཆུ་བྱིན་གྱིས་བརླབས་པ་ནི། རང་གི་ཐུགས་ཀ་ནས་རཾ་ཡཾ་ཁཾ་གསུམ་སྤྲོས་པས་མཆོད་པ་རྣམས་ཀྱི་དངོས་པོ་མ་དག་པ་ཐམས་ཅད་མེ་ཆུ་རླུང་གསུམ་གྱིས་བསྲེག་གཏོར་བཀྲུས་ནས་རཾ་ཡཾ་ཁཾ་གསུམ་རང་གི་ཐུགས་ཀར་ཚུར་བསྡུའོ། །མཆན། བྷནྡྷའི་ནང་དུ་ཨ་མྲྀ་ཏ་ག་བུར་ལ་སོགས་སྨན་བཏབ་པའམ་ཆུ་གཙང་མ་བཙལ་ཏེ། མི་དམིགས་པའི་ངང་ལས། བྷྲཱུྃ་ལས་བྷནྡྷ། དེའི་ནང་དུ་ཨཱཿ ལས་ཟླ་བའི་སྟེང་དུ་མུཾཿལས་ཡུམ་ཀྲོ་ཏི་ཤྭ་རི་མ། སྐུ་མདོག་མཐིང་ནག་ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་བསྣམས་པ་དཔལ་གྱི་ཆས་བརྒྱད་ཀྱི་བརྒྱན་པར་བསྒོམ། དེའི་ཐུགས་ཀར་ཟླ་བའི་སྟེང་དུ་བྷནྡྷ་མུཾ་གྱིས་མཚན་པར་བསྒོམ། ༀ་བཛྲ་དྷ་དུ་ཀྲོ་དྷི་ཤྭ་རི་དེ་ཝི་ཤྭ་དྷ་ནི་སྟ་ན་ཛྙཱ་ན་ཧཱུྃ་ཧཱུཾ་ཧཱུཾ། ཉེར་གཅིག་བརྗོད་པས། དབྱིངས་ཕྱུག་མ་འོད་དུ་ཞུ་བ་ལས་ཆོས་ཀྱི་དབྱིངས་ཀྱི་རང་བཞིན་དུ་གྱུར་ཅིང་། འཛིན་པ་དང་བྲལ་བར་བསམ། མཆོད་རྫས་རྣམས་མི་དམིགས་པ་ལས་མཆོད་པའི་ལྷ་མོ་དཀར་སེར་དམར་ལྗང་རྣམས་ཀྱིས། གཟུགས་སྡུག་པ། སྒྲ་སྙན་པ། དྲི་ཞིམ་པ། རོ་མངར་བ། རེག་བྱ་འཇམ་པ་རྣམས། རྒྱལ་བ་རྣམས་ཀྱི་སྤྱན་ཤངས་ཐུགས་ཀ་སྐུ་ལུས་ལ་ཐིམ་པར་བསམ་ལ། ༀ་བཛྲ་ཨརྒྷཾ་ཨཱཿཧཱུྃ་སྭཱ་ཧཱ། ༀ་བཛྲ་དྷུ་པེ་ཨཱཿཧཱུྃ་སྭཱ་ཧཱ། ༀ་བཛྲ་པུཥྤེ་ཨཱཿཧཱུྃ་སྭཱ་ཧཱ། ༀ་བཛྲ་ཨཱ་ལོ་ཀེ་ཨཱཿཧཱུྃ་སྭཱ་ཧཱ། ༀ་བཛྲ་གནྡྷེ་ཨཱཿཧཱུྃ་སྭཱ་ཧཱ། ༀ་བཛྲ་ནཻ་ཝི་ཏྱ་ཨཱཿཧཱུྃ་སྭཱ་ཧཱ། ༀ་བཛྲ་ཤཔྡ་ཨཱཿཧཱུྃ་སྭཱ་ཧཱ། སྨན་བྱིན་གྱིས་བརླབས་པ་ནི། རང་གི་ཐུགས་ཀ་ནས། བྷཱུྃ་གཅིག་སྤྲོས་པ་ལས། བྷནྡྷ་ཀ་པཱ་ལ་ཡངས་ཤིང་རྒྱ་ཆེ་བ། ཕྱི་རིན་པོ་ཆེ་ལྔ་ལས་གྲུབ་པ། ནང་བྷནྦྷའི་གཞལ་ཡས་ཁང་། མུ་ཏིག་དཀར་པོ་དྲི་མ་མེད་པ་ལྟ་བུ། ཐིག་བཞི་བཏབ་པས་རིལ་ཆ་དགུ་དང་ལྡན་པ་གྱུར་པར་བསམ། དེའི་དབུས་སུ་ཉི་མ། ཤར་དུ་ཟླ་བ། ལྷོར་རིན་པོ་ཆེ་ཟུར་བརྒྱད། ནུབ་ཏུ་པདྨ་འདབ་བརྒྱད། བྱང་དུ་ཨེ་གྲུ་གསུམ། དབུས་སུ་ཉི་མའི་སྟེང་དུ་བྱང་སེམས་ལ་ཧཱུྃ་དང་མཱུྃཿ ཤར་དུ་དྲི་ཆེན་ལ་ༀ་དང་ལཱཾ། ལྷོར་ཤ་ཆེན་ལ་སྭཱ་དང་མཱཾ། ནུབ་ཏུ་པདྨ་རཀྟ་ལ་ཨཱོཾ་དང་པྱཾ། བྱང་དུ་དྲི་ཆུ་ལ་ཧཱ་དང་ཏཱཾཿ དེ་ལས་འོད་ཟེར་འཕྲོས་པས། འཁོར་འདས་ཐམས་ཅད་ཀྱི་བཅུད་བསྡུས་ནས་སླར་ཐིམ་པ་ལས། རིགས་ལྔ་ཡབ་ཡུམ་བཅུར་གྱུར་ཏེ། དབུས་སུ་རྡོ་རྗེ་སེམས་དཔའ་ཡབ་ཡུམ་དཀར། ཤར་དུ་རྣམ་པར་སྣང་མཛད་ཡབ་ཡུམ་སེར་པོ། ལྷོར་རིན་འབྱུང་ཡབ་ཡུམ་སྔོན་པོ། ནུབ་ཏུ་སྣང་མཐའ་ཡབ་ཡུམ་དམར་པོ། བྱང་དུ་དོན་ཡོད་གྲུབ་པ་ཡབ་ཡུམ་ལྗང་ཁུ། རང་གི་མཐེབ་སྲིན་གཉིས་རྟ་མགྲིན་ཡབ་ཡུམ་སྐུ་མདོག་དམར་པོ་གཡས་ལྕགས་ཀྱུ་དང་གཡོན་སྡིགས་མཛུབ་ཅན་དུ་བསྒོམ། དེ་ནས་རང་ཡི་དམ་གྱི་ཡབ་ཡུམ་མཁའ་གསང་བྱིན་གྱིས་བརླབས་ལ་རོལ་པ་མཛད་པའི་བྱང་ཆུབ་སེམས་ཀྱི་འོད་ཟེར་རྟ་མགྲིན་ཡབ་ཡུམ་ལ་ཕོག །རྟ་མགྲིན་ཡབ་ཡུམ་རོལ་པ་མཛད་པའི་བྱང་ཆུབ་སེམས་ཀྱི་འོད་ཟེར་རིགས་ལྔ་ཡབ་ཡུམ་བཅུ་ལ་ཕོག །རིགས་ལྔ་ཡབ་ཡུམ་བཅུ་རོལ་པ་མཛད་པའི་བྱང་ཆུབ་སེམས་ཀྱི་འོད་ཟེར་ཕྱོགས་བཅུའི་སངས་རྒྱས་ལ་ཕོག །དེ་དག་རོལ་པ་མཛད་པའི་བྱང་ཆུབ་སེམས་ཀྱི་འོད་ཟེར་དང་། ཐུགས་ཆོས་ཉིད་ཀྱི་བདུད་རྩི་ཚུར་འདུས་པས་རིགས་ལྔ་ཡབ་ཡུམ་བཅུ་ལ་ཐིམ་པར་བསམ། ཧཱུྃ་བཛྲ་ཌྷྲིཀ྄ །མཱུཾ་ད་ཏུ་ཤྭ་རི། ༀ་ཛི་ན་ཛིཀ྄ །ལྃ་དེ་ཥ་ར་ཏི། སྭཱ་རཏྣ་ཌྷྲྀག྄ །མཱཾ་མོ་ཧ་ར་ཏི། ཨཱྃ་ཨ་རོ་ལིག །པྱཱཾ་ར་ག་ར་ཏི། ཧཱ་པྲཛྙཱ་ཌྷྲིཀ྄ །ཏཱྃ་བཛྲ་ར་ཏི། ༀ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ། ཞེས་བརྒྱ་རྩ་བརྒྱད་དམ་ཉི་ཤུ་རྩ་གཅིག་གམ་བདུན་བརྗོད་དོ། །དེ་ནས། རིགས་ལྔ་ཡབ་ཡུམ་བཅུ་རོལ་པ་མཛད་པས་ཐམས་ཅད་འོད་དུ་ཞུ་ནས། བདུད་རྩི་ཁ་དོག་དཀར་ལ་དམར་བའི་མདངས་ཆགས་པ། མུ་ཏིག་དཀར་པོ་དྲི་མ་མེད་པ་ལྟ་བུས་བྷན་དྷ་ཕྱུར་གྱིས་གང་བར་བསྒོམ། དེ་ནས་རྡོ་རྗེས་དཀྲུགས་པས། སྐུ་གསུང་ཐུགས་ཀྱི་རྒྱུད་བསྐུལ་བར་བསྒོམ། ༀ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲཱིཿཋཱ། ཞེས་མཐེབ་སྲིན་ཉི་ཟླའི་སྐྱོག་ཏུ་བསམ་ལ། དེ་བཞིནགཤེགས་པ་རྣམས་ལ་གཏོར། རྡོ་རྗེ་སེམས་དཔའ་སྲིན་ལག་གིས་འཁྱོར་བ་གང་ཕྱོགས་བཅུར་གཏོར་བས་བགེགས་རིགས་སྟོང་ཕྲག་བརྒྱད་ཅུ་ལ་ཕོག །ལུས་སེམས་སྒྱུ་མ་རྡུལ་དུ་བརླག་པར་བསམ་ལ། གང་ཞིག་བཀའ་རྐུ་བ་དང་། གསུང་གཅོག་པ་དང་། བལྟ་བ་དང་ཉན་པ་ལ་མི་དབང་བའི་སྣོད་མ་ཡིན་པའི་བགེགས་རིགས་སྟོང་ཕྲག་བརྒྱད་ཅུ་པོ་དེ་དག་ལ་ངའི་ཡེ་ཤེས་ཀྱི་བདུད་རྩིའི་ཆུ་བོ་འདི་ཕོག་པས། ལུས་སྲོག་སྒྱུ་མ་རྡུལ་དུ་བརླག་ནས་ཐམས་ཅད་ཀྱང་མེད་པར་བྱོས་ཤིག །གང་ཞིག་དམ་ཚིག་དང་ལྡན་པ་རྣམས་ཀྱི་ཐུགས་དམ་བསྐོང་བར་མཛོད་ཅིག །རིགས་ཅན་རྣམས་ཀྱི་དམ་ཚིག་ནི། རིགས་མེད་རྣམས་ལ་དབབ་མི་འགྱུར། །རིགས་ཅན་རང་གི་དམ་ཚིག་ལས། །སངས་རྒྱས་ཀུན་ཀྱང་འདའ་བ་མིན། །ཅེས་རང་གི་སྔགས་གོང་མ་བརྗོད་ཅིང་ལྕེ་ལ་ལན་གསུམ་བླང་ངོ་། །ཀཱ་ཡ་བཛྲ་ༀ། ཝཱཀྐ་བཛྲ་ཨཱཿ ཙིཏྟ་བཛྲ་ཧཱུྃ་གནས་གསུམ་དུ་གཏུག་གོ། །མཆན། རཀྟ་བྱིན་གྱིས་བརླབས་པ་ནི། རང་གི་ཐུགས་ཀ་ནས་བྷྲུྃ་གཅིག་སྤྲོས་པ་ལས། ཀ་པཱ་ལ་ཡངས་ཤིང་རྒྱ་ཆེ་བ་གཅིག་བསྒོམ། དེའི་ནང་རཀྟས་གང་བར་བསྒོམ། དེ་ནས་བདག་གི་ཐུགས་ཀ་ནས་རཾ་སྤྲོས་མེ་དཔུང་དུ་གྱུར་ཏེ། ཐ་མལ་པའི་རཀྟ་རྣམས་བསྲེག་ཅིང་མེད་པར་བསམ། དེ་ནས་ཡང་རང་གི་ཐུགས་ཀ་ནས་ར་དམར་པོ་གཅིག་སྤྲོས་པ་ལས། བྷནྡྷའི་ནང་དུ་ཁྲག་གི་རྒྱ་མཚོར་གྱུར་ཏེ། ཁྲག་སྦུ་རི་རབ་ཙམ་ཆགས་པ་ལས་ཞིང་གི་སྙས་འཕྱོ་བ་འོད་ཟེར་དཔག་ཏུ་མེད་པར་འཕྲོ་བར་བསྒོམ་ༀ་མ་ཧཱ་རཀྟ་ཛྭ་ལ་མཎྜ་ལ་ཧཱུྃ་ཧཱུྃ་ཧཱུྃ་ཕཊ྄། ཅེས་པས་དེ་བཞིན་གཤེགས་པ་རྣམས་ལ་གཏོར་བས་སྐུ་གསུང་ཐུགས་ཀྱི་རྒྱུད་མཉེས་ཤིང་ཚིམ་པར་བསམ། ཆོས་སྐྱོང་རྣམས་ལ་གཏོར་བས་ཐུགས་དམ་བསྐང་བར་བསམ། བགེགས་རིགས་སྟོང་ཕྲག་བརྒྱད་ཅུ་ལ་ཕོག་པས་ལུས་རྡུལ་དུ་བརླག་པར་བསམ། རང་གི་ལྕེ་ལ་ལན་གསུམ་བླངས། སྙིང་གར་རཀྟའི་ཐིག་ལེ་ཟླ་གམ་གཅིག་བྱའོ། །རཀྟ་བྱིན་རླབས་རྫོགས་སོ། །གཏོར་མ་བྱིན་གྱིས་བརླབ་པ་ནི། རང་གི་ཐུགས་ཀ་ནས་བྷྲཱུྃ་གཅིག་སྤྲོས་པ་ལས། བྷནྡྷའི་གཞལ་ཡས་ཁང་ཕྱི་རིན་པོ་ཆེ་སྣ་ལྔ་ལས་གྲུབ་པ། ནང་མུ་ཏིག་དཀར་པོ་དྲི་མ་མེད་པ་ལྟ་བུ། ཐིག་བཞི་བཏུབ་པས་རིལ་ཚད་གུ་དང་ལྡན་པར་བསམ། དེའི་དབུས་སུ་བྱང་སེམས་ལ་ཧཱུྃ། དེའི་རྩར་མི་རོ་ལ་མཱུཾ། ཤར་དུ་དྲི་ཆེན་ལ་ཨཱོཾ། ལྷོར་ཤ་ཆེན་ལ་སྭཱ། ནུབ་ཏུ་པདྨ་རཀྟ་ལ་ཨཱཾ། བྱང་དུ་དྲི་ཆུ་ལ་ཧཱ། ཤར་ལྷོ་གླང་པོ་ཆེའི་རོ་ལ་ལཱཾ། ལྷོ་ནུབ་ཏུ་རྟ་རོ་ལ་མཱཾ། ནུབ་བྱང་དུ་རྨ་བྱའི་རོ་ལ་པྱཱཾ། བྱང་ཤར་དུ་ཁྱི་རོ་ལ་ཏཱཾ། རང་གི་ཐུགས་ཀ་ནས་ཉི་མའི་དཀྱིལ་འཁོར་ཧཱུྃ་གི་མཚན་པ་སྤྲོས། དངོས་པོ་མ་དག་པ་ཐམས་ཅད་བསྲེག་ནས། བཅུད་ཡིག་འབྲུ་བཅུ་ལ་ཐིམ་པར་བསྒོམ། པདྨ་ༀ་གྱིས་མཚན་པ་སྤྲོས། དེ་དག་ཐམས་ཅད་བདུད་རྩིའི་རྒྱ་མཚོར་གྱུར་པར་བསམ། ཟླ་བའི་དཀྱིལ་འཁོར་ༀ་གྱིས་མཚན་པ་སྤྲོས། བདུད་རྩིའི་སྟེང་དུ་གནས་པ་ལས། ༀ་ལས་འདོད་པའི་ཡོན་ཏན་ཁམས་དྲུག་གི་ལྷ་མོ་དཔག་ཏུ་མེད་པ་སྤྲོ་ཞིང་། དེ་བཞིན་གཤེགས་པ་རྣམས་ལ་མཆོད། ༀ་ཨཱཿཧཱུྃ་མ་ཧཱ་བྷ་ལིངྟ་ཏེ་ཛྭ་བྷ་ལིངྟ་ཏ་བྷ་ལ་བྷ་ཏི་གུ་ཧྱ་ས་མ་ཡེ་སྭཱ་ཧཱ། ཞེས་བརྒྱ་རྩ་བརྒྱད་དམ། ཉེར་གཅིག་གམ། བདུན་བརྗོད་དོ། །རྒྱུན་གཏོར་བསྐྱོང་དུས་ཡིག་འབྲུ་གསུམ་ཚུར་བསྡུ། གཟུགས་ཀྱི་ལྷ་མོ་དཀར་མོས་ཕྱག་ན་མེ་ལོང་བསྣམས་པ་དང་། སྒྲའི་ལྷ་མོ་སྔོན་མོས་ཕྱག་ན་པི་ཝཾ་བསྣམས་པ་དང་། དྲིའི་ལྷ་མོ་སེར་མོས་ཕྱག་ན་སྤོས་ཁང་བསྣམས་པ། རོའི་ལྷ་མོ་དམར་མོས་ཕྱག་ནས་ཞལ་ཟས་རོ་མཆོག་བརྒྱ་དང་ལྡན་པ་བསྣམས་པ། རེག་བྱའི་ལྷ་མོ་ལྗང་གུས་ཕྱག་ན་ན་བཟའི་གོང་བ་རྡོ་རྗེས་མཚན་པ་བསྣམས་པ། ཆོས་ཀྱི་ལྷ་མོ་མཐིང་ཀས་ཨེ་གྲུ་གསུམ་བསྣམས་པ། མཆོད་པའི་བྱེ་བྲག་དེ་རྣམས་ཀྱིས་དེ་བཞིན་གཤེགས་པ་རྣམས་ཀྱི་སྤྱན་དང་སྙན་དང་ཤངས་དང་། ཞལ་དང་། སྐུ་དང་ཐུགས་ཀར་ཐིམ་པར་བསྒོམ། དེ་ནི་ནང་གི་ཕྱིའི་མཆོད་པའོ། །གཏོར་མ་བདུད་རྩིའི་རྒྱ་མཚོར་གྱུར་པ་དེ་དག་ལ། ལྷ་རྣམས་ཀྱི་ལྗགས་རྡོ་རྗེའི་སྦུ་བུར་གྱུར་ནས་ཆུ་ལ་ཉི་ཟེར་ཕོག་པ་བཞིན་དུ་གསོལ་བར་བསམ་པ་ནི། ཕྱིའི་ནང་གི་མཆོད་པའོ། །ཡང་དེ་ཉིད་ཤ་ཁྲག་རུས་པའི་ཚོགས་སུ་གྱུར་ནས་བརྗིད་པའི་ཚུལ་དུ་གསོལ་བར་བསམ་པ་ནི། དུག་གསུམ་གནས་སུ་དག་པའི་མཆོད་པ་ཞེས་ཀྱང་བྱ། ནང་གི་གསང་བའི་མཆོད་པ་ཞེས་ཀྱང་བྱ། ཁམས་གསུམ་ཡོངས་སྒྲོལ་གྱི་མཆོད་པ་ཞེས་ཀྱང་བྱ། དཀྱིལ་འཁོར་གོང་འོག་སྔགས་ཕྱི་ནང་ཅི་ལྟར་ནའང་གཏོར་མ་གཅིག་ལ་བསྟེན་པས་ཆོག །བྱིན་རླབས་ཀྱང་ལན་གཅིག་བྱས་ལ། ནམ་མཆོད་པའི་དུས་སུ་ༀ་ཨཱཿཧཱུྃ་གིས་བསར་ལ་གསལ་བར་བྱས་ལ་མཆོད་དོ། །གཏོར་མ་རྫོགས་སོ། །དེ་ནས་བཤགས་པ་གསོལ་བ་ནི། རང་ཡི་དམ་ལྷར་གསལ་བའི་ཐུགས་ཀར་ཡེ་ཤེས་སེམས་དཔའ་བསྒོམ། དེའི་ཐུགས་ཀར་སྣ་ཚོགས་རྡོ་རྗེ་བསྒོམ། ལྕགས་ཀྱུའི་ཕྱག་རྒྱ་བཅའ་ལ་རང་གི་སྤྱི་གཙུག་ཉི་ཟླ་པདྨའི་གདན་ལ་ཡི་དམ། དེའི་དབུ་ལ་ཟླ་བའི་གདན་ལ་བླ་མ། གཡས་སུ་ཞི་བའི་ལྷ་ཚོགས། གཡོན་དུ་ཁྲོ་བོའི་ལྷ་ཚོགས་ཆོས་སྐྱོང་བསྲུང་མའི་ཚོགས་དང་བཅས་པ་རྣམས་ཀྱིས་བསྐོར་བ་དང་། ཕྱོགས་བཅུའི་སངས་རྒྱས་ཐམས་ཅད་མདུན་གྱི་ནམ་མཁའ་ལ་བསྡུས་ཏེ་ཆོས་ཀྱི་སྐུ་ལ་གཟུགས་ཀྱི་སྐུར་བཞེངས་པར་བསྒོམ་ལ། ༀ་བཛྲ་ས་མ་ན་ཛ་ཧཱུྃ་ཛ༔ ༀ་བཛྲ་ཨརྒྷཾ་པྲ་ཏི་ཛ་ཨཱཿཧཱུྃ། དྷུ་པེ༴ པུཥྤེ༴ ཨཱ་ལོ་ཀེ༴ གནྡྷེ༴ བཻ་ཝཱི་ཏྱཱ༴ ཤབྟ་པྲ་ཏིཙྪ་ཨཱཿཧཱུྃ། ཞེས་པས་མཆོད། སྲིན་ལག་རྩེ་སྤྲད་ལ་འདི་སྐད་དོ། །ༀ་ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི། །ཟླ་རྒྱས་ལྟ་བུར་སྤྲོས་པ་མི་མངའ་ཡང་། །ཐུགས་རྗེ་ཉི་ཤར་བཞིན་དུ་སྙོམས་མཛད་པའི། །འདིར་གཤེགས་བདག་ལ་དགོངས་ཤིང་བཞུགས་སུ་གསོལ། །ཧཱུྃ་བརྗོད་མེད་ཤེས་རབ་མི་གཡོ་ཆོས་ཀྱི་དབྱིངས། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེ་རོལ་པ་ཡི། །ཞི་ཁྲོ་སྤྲུལ་པའི་སྐུ་ལ་ཕྱག་འཚལ་ལོ། །དངོས་སུ་འབྱོར་དང་ཡིད་ཀྱིས་མངོན་སྤྲུལ་ཏེ། །ཀུན་ཏུ་བཟང་པོ་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེན་ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །ཀུན་ཏུ་བཟང་མོ་ཡུམ་གྱི་བྷ་ག་ལས། །རྒྱལ་བའི་དཀྱིལ་འཁོར་མ་ལུས་རབ་འབྱམས་ཀུན། །འདུ་འབྲལ་མེད་པའི་དབྱིངས་སུ་རོ་གཅིག་ཕྱིར། །གཉིས་མེད་བྱང་ཆུབ་སེམས་ཀྱིས་མཉེས་གྱུར་ཅིག །སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ། །ཆོས་རྣམས་ཡེ་ནས་རྣམ་དག་འོད་གསལ་ཞིང་། །རྣལ་འབྱོར་མཉམ་ཉིད་སྨྲ་བསམ་ལས་འདས་པ། །གཉིས་མེད་བྱང་ཆུབ་སེམས་ལ་རྟག་ཏུ་འདུད། །ཀུན་བཟང་རྫོགས་ཆེན་ཡེ་ནས་གདལ་བ་ཡི། །ཕྱི་ནང་གསང་བ་བཀོད་པའི་དཀྱིལ་འཁོར་འདིར། །སྣང་སྲིད་རྣམ་དག་ལྷ་དང་ལྷ་མོའི་དབྱིངས། །འབྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས། །གསང་ཆེན་རབ་དགྱེས་གཟུངས་ཆེན་བདག་ཉིད་མ། །མཁའ་དབྱིངས་ཀློངས་ཡང་པདྨོར་འཁྱིལ་བ་ཡི། །མ་བཅོས་སྤྲོས་མེད་བྱང་ཆུབ་སྙིང་པོའི་སྐུ། །ཅིར་ཡང་སྣང་བ་བདེ་ཆེན་གཡུང་དྲུང་ལྷ། །གཉིས་མེད་ཐིག་ལེ་ཆེན་པོར་འོད་གསལ་ཞིང་། །འདུ་འབྲལ་མེད་པ་གསང་བའི་དཀྱིལ་འཁོར་འདིར། །བདག་ཉིད་ཆེན་པོ་རིགས་ལྔ་ཡབ་ཡུམ་དང་། །བྱང་ཆུབ་ལྕམ་དྲལ་ཁྲོ་བོ་ཁྲོ་མོའི་ཚོགས། །རྡོ་རྗེ་ལྷ་མོ་ཚོགས་རྗེ་ཚོགས་ཀྱི་བདག །རིགས་ལྔ་དཔལ་ཆེན་ཁྲོ་རྒྱལ་ཡབ་ཡུམ་བཅུ། །གནས་དང་ཡུལ་གྱི་ཕྱག་རྒྱ་སྒོ་མ་བཞི། །ཡེ་ཤེས་སྤྲུལ་པའི་ཚོགས་ཆེན་མང་པོ་དང་། །མ་ལྟར་བྱམས་ཤིང་སྲིང་ལྟར་གདུང་ལ་སོགས། །ལེགས་ཉེས་སྟངས་འཛིན་དམ་ཚིག་རྗེས་གཅོད་ཅིང་། །བཀའ་བཞིན་རྗེས་སུ་སྒྲུབ་པའི་གྲོགས་མཛད་མ། །ཕྱི་ནང་མཁའ་འགྲོ་རྣལ་འབྱོར་མའི་ཚོགས། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། །རྒྱལ་བའི་གདུང་ཚོབ་རྡོ་རྗེ་ཆྒཻ་མོས། །འགྲོ་བའི་དོན་ཕྱིར་བྱང་ཆུབ་སེམས་བསྐྱེད་ནས། །བླ་མེད་བྱང་ཆུབ་གོ་འཕང་བསྒྲོད་པའི་ཕྱིར། །བསྟན་པ་རྒྱ་མཚོ་སོ་སོའི་འདུལ་ཁྲིམས་དང་། །སྐུ་གསུང་ཐུགས་དང་མཉམ་སྦྱོར་སྡོམ་པའི་མཆོག །རྡོ་རྗེ་འདའ་དཀའ་དམ་ཚིག་གཏན་གྱི་གཉེར། །སྤྱི་དང་ཁྱད་པར་ལྷག་པའི་དམ་ཚིག་ལས། །སྔ་ཕྱི་མནོས་ཤིང་གཉེར་གཏད་སྨྲས་སོ་འཚལ། །རིང་དུ་མི་གཏོང་འདའ་བར་མི་བགྱིད་ཅིང་། །དོན་ལ་འགོལ་ཞིང་ལྡོག་སེམས་མ་མཆིས་ཀྱང་། །གདོད་བྱ་ལོང་ཡོད་སྙམས་པའི་ལེ་ལོ་ཡིས། །ཀློང་དུ་མ་གྱུར་རྩལ་ཤུགས་ཆུང་བ་དང་། །ཤེས་བཞིན་མི་ལྡན་བག་མེད་དབང་གྱུར་ཏེ། །བསྒོམ་ལ་མི་བརྩོན་བསྙེན་སྒྲུབ་གཡེལ་ལ་སོགས། །ཚོར་དང་མ་ཚོར་མ་རིག་དབང་གིས་ན། །སྟོན་པའི་བཀའ་དང་དམ་ལས་འགལ་གྱུར་ཏེ། །རྣལ་འབྱོར་གང་ཞིག་དམ་ཚིག་ཉམས་པ་དང་། །སྐད་ཅིག་ཙམ་ཡང་འཕྲད་སྨྲ་མི་བྱ་ཞིང་། །ལུང་པ་གཅིག་གི་ཆུ་ལ་མི་འཐུང་ཞེས། །བཀའ་ལས་བྱུང་བ་དེ་ལྟར་མ་ལྕོགས་ཏེ། །གསང་སྒོ་འཆོལ་བས་དབྱེ་བསལ་དཀའ་བ་དང་། །མངོན་ཤེས་ཆུང་བས་སྐྱོན་ཅན་མ་རྟོགས་ཏེ། །ཉམས་དང་ཚོགས་འདྲེས་ཉམས་པ་བསྐང་བ་དང་། །ཉམས་དང་སྣོད་མེད་རྣམས་ལ་ཆོས་བཤད་དང་། །ཉམས་ལ་མི་འཛེམ་ཉམས་པའི་སྐྱོན་ལ་སོགས། །ཉམས་དང་འགྲོགས་ཤིང་ཉམས་པ་དེ་དག་གིས། །ཉམས་སྒྲིབ་སྐྱོན་གྱིས་གོས་པར་གྱུར་ཏོ་འཚལ། །ཚེ་འདིའི་རྐྱེན་དང་ཡུན་གྱི་སྒྲིབ་པ་རྣམས། །རང་གནོང་འགྱོད་པའི་སེམས་ཀྱིས་མཐོལ་བཤགས་ན། །བྱམས་པའི་ཐུགས་རྗེས་བདག་ལ་དགོངས་ནས་ཀྱང་། །ག ཉིས་མེད་མི་འགྱུར་དབྱིངས་ལ་བདག་བཀོད་དེ། །མི་དམིགས་བཏང་སྙོམས་ངང་དུ་བཞེས་ནས་ཀྱང་། །གཉིས་མེད་དོན་གྱི་ཚངས་པ་སྩལ་དུ་གསོལ། །དོན་དམ་གཉིས་མེད་སྤྲོས་ལས་འདས་པ་ལས། །རྣམ་རྟོག་གང་ཡང་དམིགས་པར་མི་འགྱུར་ཏེ། །ཀུན་རྫོབ་སྒྱུ་མ་ཙམ་གྱིས་དབང་གི་ན། །སྡིག་པ་ཅི་བགྱིས་རང་གནོང་བཟོད་པར་གསོལ། །མཐོལ་ལོ་བཤགས་སོ་དམ་ཅན་གཉན་གྱི་ཚོགས། །གནོང་ངོ་འགྱོད་དོ་དམ་ཅན་གཉན་གྱི་ཚོགས། །སྦྱང་ངོ་བསལ་ལོ་དམ་ཅན་གཉན་གྱི་ཚོགས། །ནོངས་པ་མཆིས་ན་མི་འཆབ་བཟོད་པར་གསོལ། །བཟོད་པར་བཞེས་ནས་ཚངས་པ་སྩལ་དུ་གསོལ། །ༀ་བཛྲ་ས་ཏྭ་ས་མ་ཡཱ། མ་ནུ་པཱ་ལ་ཡ། བཛྲ་ས་ཏྭ༴ ཞེས་ཚང་བར་བརྗོད། གནུབས་སངས་རྒྱས་རིན་པོ་ཆེས་མཛད་པ་རྫོགས་སོ། །དགེའོ།། །།