ཁྲག་འཐུང་དམ་པ་རྒྱན།

རཀྟ བ ས དཱ ངྐ ར སྱ ཤྲཱི ཪྵ མ།
ཁྲག་འཐུང་དམ་པ་རྒྱན་གྱི་དབུའོ། །
དཔལ་ཧེ་རུ་ཀ་ལ་ཕྱག་འཚལ་ལོ། །བསྒྱུར་བ་ཁྲག་འཐུང་གི་དཀྱིལ་འཁོར་ལ། ཏིང་ངེ་འཛིན་གྱི་རིམ་པ་ལ་བཞི་སྟེ། དེ་བཞིན་ཉིད་ཀྱི་ཏིང་ངེ་འཛིན་དང་། ཀུན་ཏུ་སྣང་བའི་ཏིང་ངེ་འཛིན་དང་། རྒྱུའི་ཏིང་ངེ་འཛིན་དང་། ཡོངས་སུ་རྫོགས་པའི་ཏིང་ངེ་འཛིན་ནོ། །དེ་ལ་དང་པོ། དེ་བཞིན་ཉིད་ཀྱི་ཏིང་ངེ་འཛིན་ནི། གཞུང་ལས། སྐྱེ་བ་མེད་ལ་ཐམས་ཅད་སྐྱེས། །སྐྱེས་པ་ཉིད་ནའང་སྐྱེ་བ་མེད། །ཅེས་པས། སྐྱེ་བ་མེད་པ་ནི་ཆོས་ཀྱི་དབྱིངས། སྐྱེས་པ་ནི་འཁོར་འདས་ཀྱི་ཆོས་ཐམས་ཅད་དེ། སྐྱེས་པའི་དུས་དེ་ཉིད་ན་ཆོས་ཀྱི་དབྱིངས་ཀྱི་རང་བཞིན་དུ་ཤེས་པ་ནི། ཆོས་ཐམས་ཅད་ཡེ་ནས་གནས་པའི་གནས་ལུགས་ཡིན་པས། དེ་བཞིན་ཉིད་ཀྱི་ཏིང་ངེ་འཛིན་ཅེས་བྱའོ། །ཀུན་ཏུ་སྣང་བའི་ཏིང་ངེ་འཛིན་ནི། གཞུང་ལས། སྟོང་པ་ཉིད་དུ་རབ་གསལ་བས། །སྙིང་རྗེའི་ཡུལ་ནི་བསྒོམ་པར་བྱ། །ཞེས་པས། ཁམས་གསུམ་གྱི་སེམས་ཅན་ཐམས་ཅད་སྙིང་རྗེའི་ཡུལ་ཡིན་ཏེ། དོན་དམ་པར་ཆོས་ཀྱི་དབྱིངས་སྟོང་པ་ཉིད་དུ་རང་བཞིན་གྱི་འོད་གསལ་ཀྱང་། འཁྲུལ་པོའི་ཤེས་པ་ལས། སྡུག་བསྔལ་གྱི་རྟེན་དུ་གྱུར་པའི་ཕྱིར། རྟོགས་པ་དང་ལྡན་པའི་སྙིང་རྗེའི་ཡུལ་ཡིན་ཏེ། སྙིང་རྗེའི་ཡུལ་སེམས་ཅན་སྣང་བ་ནི། ཀུན་ཏུ་སྣང་གི་ཏིང་ངེ་འཛིན་ཅེས་བྱའོ། །རྒྱུའི་ཏིང་ངེ་འཛིན་ནི། གཞུང་ལས་ཀྱང་། ཧཱུྃ་ངེས་པ་ལ་ནི་རྡོ་རྗེ་ཆེ། །དེ་ལ་དཔལ་ཆེན་ཧེ་རུ་ཀ །ཅེས་པས། སྐབས་འདིར་རྒྱུའི་ཏིང་ངེ་འཛིན་ལས། སྐུ་གསུང་ཐུགས་ཚང་བར་ཡོད་དེ། ཐུགས་ཀྱི་རང་བཞིན་ཡི་གེ་ཧཱུྃ་མཐིང་ནག་ལས། རྡོ་རྗེ་ནག་པོ་རྩེ་དགུ་པ། ཁྲོ་ཞལ་བཅུ་དྲུག་དང་ལྡན་པ། བསྐལ་པའི་མེ་འབར་བ། དེ་ལས་དཔལ་ཀུན་བཟང་ཧེ་རུ་ཀ་མཐིང་ནག་དབུ་དང་ཕྱག་ཞབས་ནི་ངེས་པ་མེད་པས། ཞེས་ཀྱང་འབྱུང་སྟེ། རེ་ཞིག་སློབ་དཔོན་པདྨའི་དགོངས་པས་འདི་ལྟར་བཞེད་དོ། །དབུ་དགུ་ཕྱག་བཅོ་བརྒྱད། ཞབས་རྣམ་པ་བརྒྱད་དང་ལྡན་པ། དབུས་ཀྱི་ཟལ་གསུམ་མཐིང་ནག །གཡས་གསུམ་དཀར། གཡོན་གསུམ་དམར། ཕྱག་དང་པོ་གཉིས་ཀྱི་རྡོ་རྗེ་དང་ཐོད་ཁྲག །དེའི་འོག་མ་གཉིས་གཡོན་ན་རོ། གཡས་ཀྱིས་དེའི་གློ་སྙིང་འབྱིན་ཅིང་གསོལ་བ། དེའི་འོག་མ་གཉིས་གཡས་ཉི་མ། གཡོན་ཟླ་བ་ཐུགས་ཀ་ན་བསྣམས་པ། དེའི་འོག་མ་གཉིས་གཡས་ན་ཁྱུང་། གཡོན་ན་འུག་པ་བསྣམས་ཏེ། དམ་ཉམས་པའི་རྣལ་འབྱོར་པ་ལ་འགྱེད་པ། དེའི་འོག་མ་གཉིས་གཡས་ན་རླུང་། གཡོན་ན་མེའི་འཁོར་ལོ་ཐོགས་ཏེ། འཇིག་རྟེན་ཐམས་ཅད་འཐོར་ཞིང་བསྲེག་པར་བྱེད་པ། དེའི་འོག་མ་གཉིས་གཡས་ན་ཆུའི་དཀྱིལ་འཁོར། གཡོན་ན་རི་རབ་ཐོགས་ཏེ། བག་ཆགས་ཐམས་ཅད་འཁྲུ་ཞིང་། ང་རྒྱལ་ཐམས་ཅད་གནོན་པར་བྱེད་པ། ཐ་མ་གཉིས་ན། གཡས་ན་གོ་ཆ། གཡོན་ན་ཡིད་བཞིན་གྱི་ནོར་བུ་རིན་པོ་ཆེ་སྣོད་དང་བཅས་པ་བསྣམས་པས། རྣལ་འབྱོར་པ་ལ་ཅིས་ཀྱང་མི་ཚུགས་ཤིང་། དངོས་གྲུབ་རྣམ་གསུམ་སྟེར་བར་མཛད་པའོ། །ཞབས་བརྒྱད་ནི་ལྷ་ཆེན་པོ་བརྒྱད་ལ་བརྫིས་པའོ། །སྐུ་ལ་དཔལ་ཆས་བཅུ་དྲུག་གིས་བརྒྱན་ཅིང་། བསྐལ་པའི་མེ་རི་འབར་བའི་དབུས་ན། སྐུ་འབར་བའི་གར་དགུ་དང་ལྡན་ཏེ། འཇིགས་པའི་དུས་ཀྱི་མེ་བཞིན་དུ་བཞུགས་སོ། །དེ་ནི་དཀྱིལ་འཁོར་ཐམས་ཅད་བསྐྱེད་པའི་བདག་པོ་ཡང་ཡིན། རྒྱུ་ཡང་ཡིན་པའི་ཕྱིར། རྒྱུ་ཡི་ཐིང་ངེ་འཛིན་ཅེས་བྱའོ། །ཡོངས་སུ་རྫོགས་པའི་ཏིང་ངེ་འཛིན་ལ་དོན་གསུམ་གྱིས་བསྟན་ཏེ། ཁྲོ་བོ་རང་བཞིན་གྱི་དཀྱིལ་འཁོར་དང་། ཁྲོ་བོ་གསང་བའི་དཀྱིལ་འཁོར་དང་། རང་བཞིན་ལྷུན་གྱིས་གྲུབ་པའི་དཀྱིལ་འཁོར་རོ། །དེ་ལ་དང་པོ་ཁྲོ་བོ་རང་བཞིན་གྱི་དཀྱིལ་འཁོར་ལ་གཉིས་ཏེ། བདག་གི་སྲས་སུ་རྒྱལ་བ་བསྐྱེད་པའི་སྒོ་ནས་བསྐྱེད་པའི་ཆོ་འཕྲུལ་དང་། རྒྱལ་བའི་སྲས་སུ་བདག་བསྐྱེད་པའི་སྒོ་ནས་དབང་བསྐུར་བའི་ཆོ་འཕྲུལ་ལོ། །དེ་ལ་བསྐྱེད་པའི་ཆོ་འཕྲུལ་ལ་གཉིས་ཀྱི་དང་པོ་རྟེན་བསྐྱེད་པ་ནི། གཞུང་ལས། བྷྲཱུྃ་དུར་ཁྲོད་ཆེན་པོ་རབ་འཇིགས་པའི། །ཁྲག་གི་རྒྱ་མཚོ་འཁྲུགས་པའི་དཀྱིལ། །ཅེས་པ་ལ་སོགས་པ་འཕྲོས་ཏེ། རང་གི་ཐུགས་ཀ་ནས་ཨེ་ཡྃ་བྃ་མྃ་ཀེཾ་རྃ་རྣམས་སྤྲོས་པ་ལས། ཨེ་ལས་ཆོས་འབྱུང་གྲུ་གསུམ་མཐིང་ནག་རྒྱ་ཁྱོན་ནམ་མཁའ་དང་མཉམ་པ་དེའི་སྟེང་དུ་ཡྃ་ལས་རླུང་གི་དཀྱིལ་འཁོར་སྲ་ཞིང་མཁྲེགས་པ། ཁ་དོག་དུད་ཁ་དབྱིབས་ཟླ་གམ་དུ་གྱུར་པར་བསྒོམ་མོ། །དེའི་སྟེང་དུ་བྃ་ལས་ཁྲག་གི་རྒྱ་མཚོ་རྦ་རླབས་འཁྲུགས་པ། དབྱིབས་ཟླུམ་པོ་བསྒོམ་མོ། །དེའི་སྟེང་དུ་མྃ་ལས་ཤ་ཆེན་གྱི་ས་གཞི་སྲ་ཞིང་འཇམ་ལ། དབྱིབས་གྲུ་བཞི་བསྒོམ་མོ། །དེའི་སྟེང་དུ་ཀིཾ་ལས་ཀེང་རུས་ཀྱི་རི་རབ་ནག་པོ། ཁ་ཁྱེར་དང་རྒྱ་མཉམ་པ། རཀྟ་ཁྲག་ཀི་ཞམ་ཆུ་ཟུ་ལུ་ལུ་འབབ་པར་བསྒོམ་མོ། །དེའི་སྟེང་དུ་རྃ་ལས་བསྐལ་པའི་མེ་རི་འབར་བར་གྱུར་ཏེ། མེ་དེའི་ཕྱེད་མར་ཆད་པས་འོག་གི་འབྱུང་བ་རྣམས་ཆ་སྙོམ་པ། ཕྱེད་རི་རབ་དེའི་ཁ་རྒྱན་དུ་གྱུར་ཏེ། བསྐལ་པའི་མེ་རི་འབར་བའི་དཀྱིལ་འཁོར་དུ་གྱུར་པར་སྒོམ་མོ། །འོད་ཟེར་ཕྱོགས་བཅུར་འཕྲོས་པས། ཕྱོགས་བཅུའི་ཞིང་ཁམས་ཐམས་ཅད་ཁྱབ་ནས། དེ་བཞིན་གཤེགས་པའི་སྲས་སུ་དགོངས། བྱང་ཆུབ་སེམས་དཔའི་སྤུན་དུ་དགོངས། མ་མོ་དང་མཁའ་འགྲོ་རྣམས་ཀྱི་རྗེ་བོར་དགོངས། དེ་ནས་ཕྱོགས་བཅུའི་གཞལ་ཡས་ཁང་གི་ཆེ་ཡོན་ཐམས་ཅད་གནང་བའི་ཚུལ་དུ་བསྡུས་ཏེ། བྷྲཱུྃ་ལ་ཐིམ། བྷྲཱུྃ་འོད་དུ་ཞུ་སྟེ། གཞལ་ཡས་ཁང་བསྐྱེད་པར་གསལ་གདབ་བོ། །རང་གི་ཐུགས་ཀ་ནས་བྷྲཱུྃ་སྨུག་ནག་གཅིག་འཕྲོས་པ་ལས། བྷྲཱུྃ་བི་ཤྭ་བྷི་ཤུདྡྷེ། བྷྲཱུྃ་ཞེས་བརྗོད་པ་ལས། ཡེ་ཤེས་འབར་བའི་གཞལ་ཡས་ཁང་། །ཕྱི་རྡོ་རྗེའི་གུར་ཁང་དང་བཅས་པ། དབུ་རྩེ་བར་འཁྱམས་གཉིས་རིམ་དུ་གནས་པ། ཕྱི་ཐོད་པ་སྐམ་པོ་ལས་བྱས་པ། བར་ཐོད་པར་རི་ཐོད་རྙིད། ནང་ཐོད་པ་རློན་པ་ལས་བྱས་པའོ། །ཟུར་བཞིར་གནམ་ལྕགས་ཀྱི་འཛེར་ཆེན་བཞི་གདབ་པ། འཛེར་མགོར་ཉི་མའི་དཀྱིལ་འཁོར་བཞི་ཤར་བ་ཕྱོགས་བཞིར་འཁོར་ལོ་དང་། རིན་པོ་ཆེ་དང་། པདྨ་དང་། རལ་གྲིས་བརྒྱན་པ། སྟེང་རྡོ་རྗེ་ནག་པོའི་བླ་གབ་ཏུ་ཆུད་པ། བྱ་སྐྱིབ་ལྔ་དང་ལྡན་པ། རྒྱལ་ཆེན་བཞི་ལ་སྒོ་སྐྱེས་བྱས་པ། ལྷ་ཆེན་པོ་བརྒྱད་ཀྱིས་ནང་གི་ཀ་བ་བྱས་པ། ཀླུ་ཆེན་པོ་བརྒྱད་ཀྱིས་སྟེང་གི་གདུང་མ་བྲེས་པ། གཟའ་ཆེན་པོ་བརྒྱད་ཀྱིས་ཁ་བད་ལྡིང་བ། རྒྱུ་སྐར་ཉི་ཤུ་རྩ་བརྒྱད་ཀྱི་ཕྱམ་གྱིས་མཛེས་པ། འབྲུག་གི་རི་དྭགས་ཀྱི་རྐན་སྒྲ་སྒྲོགས་པ། གནམ་ལྕགས་ཀྱི་ཐོག་སེར་འབབ་པ། ཞིང་གི་རྒྱལ་མཚན་དང་། བ་དན་རྩེ་གསུམ་པས་བརྒྱན་པ་སྐལ་པའི་རླུང་ནག་འཚུབ་པ། ཡེ་ཤེས་ཀྱི་མེ་རི་འབར་བ། རྡོ་རྗེའི་ཐོག་མདའ་འཕྲོ་བ། རཀྟའི་ཞམ་ཆུ་འབབ་པ། ཙིཏྟའི་ཕོལ་ཕྱིང་དང་། སྦྲུལ་ནག་གི་ཟ་ར་ཚག་གིས་བརྒྱན་པ། ཉི་ཟླའི་སྐར་ཁུང་ལྡིང་བ། ཕྱི་དང་ནང་མེད་པ། ཀུན་ཏུ་ཡང་ནང་དུ་གྱུར་པར་བསྒོམ་མོ། །དེའི་ནང་དུ། དབུས་སུ་གྲུ་གསུམ་མཐིང་ནག་ཟླ་གམ་དམར་པོ་གསུམ་དད་ལྡན་པ། དེའི་ཕྱི་རོལ་འཁོར་ལོ་སྔོན་པོ་རྩིབས་བཞི་ལ་མེ་འབར་བ། རྩིབས་མཆན་ནག་པོ་རྡོ་རྗེའི་བྲག་གིས་གཏམ་པ། ཕྱི་རོལ་རྡོ་རྗེ་མུ་ཁྱུད་ཀྱིས་བསྐོར་བ། གྲུ་ཆད་བཞི་གློ་འབུར་བཞི་དང་ལྡན་པ། དེའི་ཕྱི་རོལ་ལྷ་སྣམ་ནང་མ་སྒོ་ཁྱུད་བཞི་དང་ལྡན་པ། བར་འཁྱམས་ཕྱི་ནང་གིས་བརྒྱན་པའོ། །དེ་ནས་གཏན་བཏིང་བ་ནི། དབུས་ཀྱི་གྲུ་གསུམ་རུ་ཏྲ་ཕོ་མོ་དང་། ལྷ་ཆེན་ཕོ་མོ། དེའི་སྟེང་དུ་སེང་གེ་བརྒྱད་ཀྱི་ཁྲི་བྱུང་། ཤར་ཕྱོགས་འཁོར་ལོའི་རྩིབས་སྟེང་དུ། དྲི་ཟ་དང་ཚངས་པ་ཕོ་མོའི་སྟེང་དུ། མ་ཧེ་དམར་སྐྱ་བརྒྱད་ཀྱི་ཁྲི་བྱུང་ངོ་། །ལྷོ་ཕྱོགས་འཁོར་ལོའི་རྩིབས་སྟེང་དུ། གྲུལ་བུམ་དང་གཤིན་རྗེ་ཕོ་མོའི་སྟེང་དུ། གཟིག་བརྒྱད་ཀྱི་ཁྲི་བྱུང་ངོ་། །ནུབ་ཕྱོགས་འཁོར་ལོའི་རྩིབས་སྟེང་དུ། སྲིན་པོ་ཕོ་མོ་དང་། ཀླུའི་སྟེང་དུ་སྟག་བརྒྱད་ཀྱི་ཁྲི་བྱུང་ངོ་། །བྱང་ཕྱོགས་འཁོར་ལོའི་རྩིབས་སྟེང་དུ། གནོད་སྦྱིན་ཕོ་མོ་དང་དེའི་སྟེང་དུ། དམ་བརྒྱད་ཀྱི་ཁྲི་བྱུང་ངོ་། །དེ་དག་གི་བར་དུ་རིན་པོ་ཆེའི་ཁྲིའི་སྟེང་དུ་མུ་ཏིག་གི་དྲྭ་བ་དང་། པདྨ་དང་། ཟླ་བ་དང་། ཉི་མའི་གདན་རེ་རེ་བསྒོམ་མོ། །རྩིབས་ཆེན་བཞི་གྲུ་ཆད་བཞི་དང་བརྒྱད་ལ། ཞིང་བསྣོལ་མ་བརྒྱད་ཀྱི་སྟེང་དུ་ཉི་མའི་གདན་རེ་རེ། ལྷ་སྣམ་ལ་ཞིང་རྐྱང་པ་བརྒྱད་ཀྱི་སྟེང་དུ་ཉི་མ། སྒོ་བཞིར་ཞིང་རྐྱང་པ་བཞིའི་སྟེང་དུ་ཉི་མ། བར་འཁྱམས་ཕྱི་ཏ་ལ། ནང་ཞིང་ཚལ་པ་ཤར་དུ་དྲུག །ལྷོ་རུ་དྲུག །ནུབ་ཏུ་དྲུག །བྱང་དུ་དྲུག་སྟེ་ཉི་ཤུ་རྩ་བརྒྱད་ཀྱི་སྟེང་དུ་ཉི་མའི་ཚལ་པ་རེ་རེ་བསྒོམ་མོ། །དེ་ནས་བརྟན་པ་ལྷའི་དཀྱིལ་འཁོར་བསྐྱེད་པའི་ཆོ་འཕྲུལ་ནི། བདག་ཉིད་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེའི་བདག །ཁྲོ་རྒྱལ་ཡེ་ནས་ཡིན་པའི་ཕྱིར། །དེ་བཞིན་ཉིད་ཀྱི་དབྱིངས་ལས་ནི། །ཁྲོ་མོ་དབང་ཕྱུག་མངོན་ཕྱུངས་ཏེ། །ཞེས་པས། བདག་གི་ཐུགས་ཀ་ནས་ཡུམ་ཁྲོ་མོ་དབང་ཕྱུག་མ། སྐུ་མདོག་མཐིང་ནག་ཡབ་དང་འདྲ་བའམ། ཡང་ན་ཞལ་གཅིག་ཕྱག་གཉིས། གཡས་པས་ཡབ་ལ་འཁྱུད་ཅིང་། གཡོན་པས་ཐོད་ཁྲག་བསྣམས་པ་ཕྱུངས་ལ། ཡབ་ཡུམ་མ་ཆགས་ཐབས་ཀྱི་རོལ་པ་མཛད་པ་ལས། ཧཱུྃ་ཧཱུྃ་ཧཱུྃ་བྷི་ཤྭ་བཛྲ་མ་ཧཱ་ཀྲོ་དྷ་ཛྭ་ལ་མཎྜལ་ཕཊ྄་ཕཊ྄་ཕཊ྄། ཧ་ལ་ཧ་ལ་ཧ་ལ་ཧཱུྃ། ཞེས་བརྗོད་པས། བདག་ཉིད་དབུ་དང་ཕྱག་ཞབས་སྟོང་ཁམས་ཀྱི་རྡུལ་སྙེད་དང་མཉམ་པ་ཞེས་འབྱུང་སྟེ། རྣམ་པ་གཅིག་ཏུ། དབུ་དགུ་བརྒྱ། ཕྱག་སྟོང་བརྒྱད་བརྒྱ། ཞབས་བརྒྱད་བརྒྱ། ཕྱག་ན་སྟོང་ཁམས་ཀྱི་རྡུལ་སྙེད་ཀྱི་མཚོན་ཆ་འཛིན་པར་གྱུར་ཏེ། བྱང་ཆུབ་སེམས་ལས་ཀྱང་། ཁྲོ་བོ་ཞལ་ཕྱག་ངེས་པ་མེད་པ། སྐུ་ཚད་སྟོང་གསུམ་ཙམ་ལས། གྲངས་སྟོང་ཁམས་ཀྱི་རྡུལ་ཕྲ་རབ་སྙེད་ཐོན་ཏེ། སྟོང་ཁམས་ཀྱི་དྲག་བྱེད་ཐམས་ཅད་ནི་བསྒྲལ། སེམས་ཅན་ཐམས་ཅད་ཀྱི་དོན་བྱས་ནས། སླར་ཕྱོགས་བཅུ་ནས་ཚུར་འདུས་པ་ལས། འབྲས་བུའི་ཁྲག་འཐུང་དུ་བཞེངས་པ་ནི། བདག་ཉིད་དབུས་སུ་བྷུདྡྷ་ཁྲག་འཐུང་སྐུ་མདོག་སྨུག་ནག །ཞལ་གཡས་དཀར། གཡོན་དམར་བ། ཕྱག་གཡས་ཀྱི་དང་པོ་ན་འཁོར་ཡུག །བར་མ་ན་རྡོ་རྗེ། ཐ་མ་ན་རལ་གྲི། གཡོན་དང་པོ་ན་བྷན་དྷ་ཁྲག་གིས་བཀང་བ། བར་མ་ན་དགྲ་སྟྭ། ཐ་མ་ན་གཤོལ་ཤིང་། ཕྱག་མཚན་དེ་དག་ལ་མེ་འབར་བ། ཡུམ་བྷུདྡྷ་ཀྲོ་ཏི་ཤྭ་རི་མ། སྐུ་མདོག་སྨུག་ནག །ཞལ་གཅིག་ཕྱག་གཉིས། གཡས་ཡབ་ལ་འཁྱུད་ཅིང་། གཡོན་བྷན་དྷ་བསྣམས་ཏེ། ཡབ་ལ་སྟོབས་པའོ། །ཤར་ཕྱོགས་ཀྱི་ཁྲོ་བོ་རྣམས་གཅིག་ཏུ་འདུས་པ་ལས། བཛྲ་ཁྲག་འཐུང་སྐུ་མདོག་མཐིང་ནག །དབུ་གསུམ་ཕྱག་དྲུག །ཞལ་གཡས་དཀར། གཡོན་དམར་བ། ཕྱག་དྲུག་གི་གཡས་དང་པོ་ན་རྡོ་རྗེ། བར་མ་ན་འཁོར་ཡུག །ཐ་མ་ན་རལ་གྲི། གཞན་གོང་དང་འདྲ། ལྷོ་ཕྱོགས་ཀྱི་ཁྲོ་བོ་རྣམས་གཅིག་ཏུ་འདུས་པ་ལས། རཏྣ་ཁྲག་འཐུང་སྐུ་མདོག་སེར་ནག །དབུ་གསུམ་ཕྱག་དྲུག །ཞལ་གཡས་སྔོ། གཡོན་དམར། ཡག་གཡས་དང་པོ་ན་རལ་གྲི། བར་མ་ན་རྡོ་རྗེ། ཐ་མ་ན་འཁོར་ཡུག །གཡོན་དང་པོ་ན་བྷན་དྷ་ཁྲག་གིས་བཀང་བ། བར་མ་ན་དགྲ་སྟྭ། ཐ་མ་ན་གཤོལ་ཤིང་། གཡོན་གསུམ་གོང་དང་འདྲའོ། །ནུབ་ཕྱོགས་ཀྱི་ཁྲོ་བོ་རྣམས་གཅིག་ཏུ་འདུས་པ་ལས། པདྨ་ཁྲག་འཐུང་སྐུ་མདོག་དམར་ནག །ཞལ་གསུམ་ཕྱག་དྲུག །ཞལ་གཡས་དཀར། གཡོན་སྔོ། ཕྱག་གཡས་དང་པ་ན་དགྲ་སྟྭ། བར་མ་ན་རྡོ་རྗེ། ཐ་མ་ན་འཁོར་ཡུག །གཡོན་དང་པོ་ན་བྷན་དྷ། བར་མ་ན་རལ་གྲི། ཐ་མ་ན་གསོལ། བྱང་ཕྱོགས་ཀྱི་ཁྲོ་བོ་རྣམས་གཅིག་ཏུ་འདུས་པ་ལས། ཀརྨ་ཁྲག་འཐུང་སྐུ་མདོག་ལྗང་ནག །དབུ་གསུམ་ཕྱག་དྲུག །ཞལ་གཡས་དཀར། གཡོན་དམར། ཕྱག་གཡས་དང་པོ་ན་གསོལ། བར་མ་ན་རྡོ་རྗེ། ཐ་མ་ན་འཁོར་ཡུག །གཡོན་དང་པོ་ན་བྷན་དྷ། བར་མ་ན་རལ་གྲི། ཐ་མ་ན་དགྲ་སྟྭ། ཡུམ་རྣམས་ནི་སྐུ་མདོག་ཡབ་དང་མཐུན་པ་ཞལ་གཅིག་ཕྱག་གཉིས། གཡས་ཡབ་ལ་འཁྱུད་ཅིང་། གཡོན་བྷན་དྷ་དམར་ཆེན་གྱིས་བཀང་བ་ཡབ་ལ་སྟོབས་པའོ། །ཡབ་ཡུམ་ཀུན་ལ་ཆས་ཆེན་པོ་བཅུ་དྲུག་དང་ལྡན་པ། ཞལ་གདང་ཞིང་སྤྱན་བསྒྲད་པའོ། །སོ་སོའི་གདན་ལ་ཞབས་བརྐྱང་བསྐུམ་གྱི་ཚུལ་གྱིས་བཞུགས་པ། སྐུ་ལ་བསྐལ་པའི་མེ་རི་འབར་བ། རལ་པ་ཁམས་ན་གྱེན་དུ་འཁྱིལ་བ་ལས། ཐོད་པ་སྐམ་པའི་ཕྲེང་བས་བཅིང་བ། འབར་བའི་གར་དགུ་དང་ལྡན་པའོ། །གནས་ཀྱི་ལྷ་མོ་བརྒྱད་བསྐྱེད་པ་ནི། དགྱེས་པའི་སྤྲིན་ལས་ཧ། ཞེས་བརྗོད་པས། མ་མོ་ཆེན་མོ་བརྒྱད་དུ་གྱུར་ཏེ། ཤར་གྱི་རྩིབས་མཆན་ལ། དཀར་པོ་མཛེས་ལྡན་མ། སྐུ་མདོག་སྔོན་མོ། གཡས་ན་ཞིང་དབྱུག །གཡོན་ན་བྷནྡྷ་དམར་ཆེན་གྱིས་བཀང་བ་གསོལ་བའོ། །བམ་བསྣོལ་མའི་གདན་ལ་བཞུགས་པའོ། །ལྷོར་རྐུན་མོ་སྐུ་མདོག་སེར་མོ། ཕྱག་གཉིས་ཀྱིས་མདའ་གཞུ་འགེངས་ཏེ། གཙོ་བོའི་ཐུགས་ཀར་གཟིར་བའོ། །ནུབ་ཏུ་རྨོངས་བྱེད་མ་སྐུ་མདོག་དམར་ནག །གཡས་ན་ཆུ་སྲིན་གྱིས་རྒྱལ་མཚན་ཕྱར་བ། གཡོན་བྷན་དྷ་དམར་ཆེན་གྱིས་བཀང་བ་གསོལ་བའོ། །བྱང་ཕྱོགས་སུ་བརླག་བྱེད་མ་སྐུ་མདོག་མཐིང་ནག །གཡས་རྡོ་རྗེ་རྩེ་དགུ། གཡོན་ཞིང་ཆུང་ངུའི་མགོ་ནས་གསོལ་བའོ། །ཤར་ལྷོའི་གྲུ་ཆད་ལ། སྤོས་མོ་སྐུ་མདོག་དམར་སེར། ཕྱག་གཡོན་པས་ཞིང་བཟུང་ནས། གཡས་ཀྱིས་དེའི་རྒྱུ་མ་ཞགས་པར་འདྲེན་པའོ། །ལྷོ་ནུབ་ཏུ་གཏུམ་མོ་སྐུ་མདོག་ལྗང་ཀུ། གཡོན་ཐོད་ཁྲག་གཡས་རྡོ་རྗེས་དཀྲུགས་ཤིང་གསོལ་བའོ། །ནུབ་བྱང་དུ་སྨེ་ཤ་ཅན། སྐུ་མདོག་ནག་མོ་ཕྱག་གཉིས་ཀྱིས་ཞིང་བཟུང་ནས་ཁོང་པ་ནས་གློ་སྙིང་འདྲེན་ཅིང་ཟ་བའོ། །བྱང་ཤར་མཚམས་སུ་མ་ཚོགས་མ་སྐུ་མདོག་མཐིང་སྐྱ། ཕྱག་གཉིས་ཀྱིས་ཞིང་གི་མགོ་ལུས་ཕྲལ་བའོ། །ལྷ་མོ་དེ་བརྒྱད་ནི། ཞིང་གི་སྐེད་འཆིང་དང་། སྟག་གི་ཤམ་ཐབས་མངའ་བ། རྒྱུ་མའི་ཕྲེང་བས་སྐུ་ལ་དཀྲིས་པ། ཞག་དང་། ཐལ་ཆེན་དང་། རཀྟའི་ཐིག་ལེས་བརྒྱན་པ། དབུ་དང་སྐུ་ལ་ཐོད་པའི་ཕྲེང་བས་བརྒྱན་པ། ཀླུ་ཆེན་པོ་བརྒྱད་ཀྱིས་བརྒྱན་པ། བསྐལ་པའི་མེ་དཔུང་འབར་བའི་དབུས་ན། ཞིང་བསྣོལ་མའི་གདན་ལ། དབྱིངས་ལས་བྱུང་བའི་ངོ་མཚར་དང་། དཔལ་ཆེན་ཐུགས་ལས་སྤྲུལ་པའི་ངོ་མཚར་དང་། གདུལ་བྱ་འདུལ་བའི་ངོ་མཚར་གསུམ་དང་བཅས་ནས་བཞུགས་སོ། །ཡུལ་གྱི་ལྷ་མོ་བརྒྱད་བསྐྱེད་པ་ནི། བྱང་ཆུབ་སེམས་ཀྱི་སྤྲིན་ལ་ཧེ། ཞེས་བརྗོད་པས། མགོ་བརྙན་མ་བརྒྱད་དུ་གྱུར་ཏེ། ཤར་ཕྱོགས་སུ་སེང་ཧ་མ་སྐུ་མདོག་སེར་མོ། སེང་གེའི་མགོ་ཅན་ཁ་ན་རོ་ཟ་བ། ཕྱག་གཉིས་རྩེ་གསུམ་གྱི་ཕྱག་རྒྱ་བསྣོལ་ནས། ཞབས་གཉིས་འགྱིང་ཐབས་ཀྱིས་ཞིང་རྐྱང་པའི་གདན་ལ་བཞུགས་སོ། །ལྷོ་ཕྱོགས་སུ་བྱཀྲྀ་མུ་ཀ་སྨུ་མདོག་དམར་ནག །སྟག་གི་མགོ་ཅན། མདུན་དུ་ཞིང་ལ་འབྲུ་ཚགས་སུ་བལྟ་བ། ཕྱག་གཉིས་ཀྱིས་རྩེ་གཅིག་གི་ཕྱག་རྒྱ་བསྣོལ་བའོ། །ནུབ་ཕྱོགས་སུ་སྲི་ལ་མུ་ཁ་ནག་མོ། ཝའི་མགོ་ཅན། ཕྱག་གཉིས་ཀྱིས་ཞིང་གི་ལྤགས་པ་ཐོགས་ནས་ཆུ་སེར་ལྡག་པའོ། །བྱང་ཕྱོགས་སུ་ཤྭ་ན་མུ་ཀ་སྐུ་མདོག་སྔོན་མོ། །སྤྱང་ཀུའི་མགོ་ཅན། ཕྱག་གཉིས་ཀྱིས་ཞིང་བཟུང་ནས། ཁོང་པ་བཀྲལ་ཏེ་ནང་གི་གློ་སྙིང་ལ་བལྟ་བའོ། །ཤར་ལྷོར་ཀྲི་ཏ་མུ་ཀ་སྐུ་མདོག་དམར་ནག །བྱ་རྒོད་ཀྱི་མགོ་ཅན། ཕྱག་གཡས་གྲི་ཁུག་གཡོན་ཐོད་ཁྲག་བསྣམས་པའོ། །ལྷོ་ནུབ་མཚམས་སུ་ཀཾ་ཀ་མུ་ཀ་སྐུ་མདོག་སྣར་མོ། མགོ་དུར་བྱ། ཕྱག་གཉིས་ཀྱིས་ཞིང་ཕྲག་པ་ལ་ཁུར་བའོ། །ནུབ་བྱང་མཚམས་སུ་ཁ་ཁ་མུ་ཁ་བྱ་རོག་གི་མགོ་ཅན། ཁ་དོག་ནག་མོ། གཡས་ན་གྲི། གཡོན་ན་བྷནྡྷ་རྒྱུ་མས་བཀང་བ་གསོལ་བའོ། །ཁ་ན་རོ་ཐོགས་པའོ། །བྱང་ཤར་མཚམས་སུ་ཧུ་ལུ་མུ་ཀ་འུག་པའི་མགོ་ཅན། སྐུ་མདོག་ལྗང་ཀུ། གཡས་ལྕགས་ཀྱུ་གཡོན་བྷནྡྷ་ཁྲག་གིས་བཀང་བ་གསོལ་བའོ། །ཕྲ་མེན་མ་དེ་བརྒྱད་ཀྱི་རྒྱན་དང་ཆ་ལུགས་ནི། གནས་ཀྱི་ལྷ་མོ་བརྒྱད་དང་འདྲ་བ་ལས། ཁྱད་པར་དུ་སྐུ་ལ་གཤོག་པ་སྐྱེས་པ། འཁོར་ཡང་ཕྲ་མེན་མ་དེ་འདྲ་བའི་ཚོགས་ཀྱིས་བསྐོར་བ། ཞིང་རྐྱང་པའི་གདན་ལ་བཞུགས་པའོ། །བྱང་ཆུབ་སེམས་ཀྱི་སྤྲིན་ལས་ཕཊ྄། ཅེས་བརྗོད་པས། དཀྱིལ་འཁོར་གྱི་སྒོ་བཞིར་སྒོ་མ་བཞི་བསྐྱེད་པ་ནི། ཤར་སྒོར་རྟ་གདོང་ལྕགས་ཀྱུ་མ། སྐུ་མདོག་དཀར་པོའམ་སྔོན་མོ། འདྲ། གཡས་ལྕགས་ཀྱུ། གཡོན་བྷན་དྷ་དམར་ཆེན་གྱིས་བཀང་བའི་ནང་ན། རྟ་མགོ་ལྗང་ཀུ་ཕྱུང་བའོ། །ལྷོ་སྒོར་ཕག་གདོང་ཞགས་པ་མ་སྐུ་མདོག་སེར་ནག །ཕྱག་གཉིས་ཀྱིས་རྒྱུ་མའི་ཞགས་པ་བསྣམས་པའི་རྩེ་མོ་ན་ཕག་རྒོད་ཀྱི་མཆེ་བས་མཚན་པའོ། །ནུབ་སྒོར་ཉི་ཟླ་ལྕགས་སྒྲོག་མ་སྐུ་མདོག་དམར་མོ། ཕྱག་གཉིས་ལྕགས་སྒྲོག་བསྣམས་ཏེ། མདོ་མིག་སྨིན་མཚམས་ན་ཡོད་དེ། ཉི་ཟླའི་ག་བུའི་ནང་ན་རྣལ་འབྱོར་པའི་ཚེ་འཛིན་པའོ། །ཡི་གེ་ཨའི་རང་བཞིན། མཆན། བྱང་སྒོར་དྲིལ་བུ་མ་སྐུ་མདོག་ལྗང་ནག །ཕྱག་གཡས་ན་དྲིལ་བུ་བསྣམས་པ། གཡོན་ན་བྷནྡྷ་བདུད་རྩི་ལྔས་བཀང་བའི་ནང་ནས། སངས་རྒྱས་སྣང་བ་མཐའ་ཡས་ཀྱི་སྐུ་ལྟེ་བ་ཡན་ཆད་ཕྱུངས་བའོ། །ལྷ་མོ་འདི་བཞི་ནི་དཔལ་ཆས་བཅུ་དྲུག་དང་ལྡན་ཏེ། ཡུམ་ཀྲོ་ཏི་ཤྭ་རི་མ་དང་འདྲའོ། །ཀུན་ཀྱང་ཞིང་རྐྱང་པའི་གདན་ལ་བཞུགས་ཏེ། ངོ་མཚར་གསུམ་དང་བཅས་ནས་རྔམ་པའོ། །དེ་ནས་ཡང་། དགྱེས་པའི་སྤྲིན་ལས་ཕྱོགས་བཅུ་ནས། ཕཊ྄་ཅེས་བསྒྲགས་པས། ཐམས་ཅད་སྔར་བས་ཀྱང་ཁྲོས་ཏེ། དམག་ཆས་པ་ལ་རེམ་རེམ་བྱས་པ་དང་འདྲ་བར། ཤིན་ཏུ་ཡང་ཁྲོས་པར་གྱུར་ཏོ། །དེ་དག་ནི་ཁྲོ་བོ་རང་བཞིན་གྱི་དཀྱིལ་འཁོར་བསྐྱེད་པའི་ཆོ་འཕྲུལ་ཏེ། ཆོས་ཐམས་ཅད་ཡེ་ནས་སངས་རྒྱས་པའི་རྟགས་སོ། །རང་བཞིན་གྱི་དཀྱིལ་འཁོར་ལ་གཉིས་ཀྱིས་བསྟན་པའི་འགོ་མ། རྒྱལ་བའི་སྲས་སུ་བདག་བསྐྱེད་པའི་སྒོ་ནས། དབང་བསྐུར་བའི་ཆོ་འཕྲུལ་ནི། གཞུང་ལས་ཀྱང་། རང་གི་ངང་ཚུལ་དེ་བཟུང་ནས། །བསྐུལ་ཚིག་འདི་ཡང་རབ་ཏུ་བརྗོད། ཅེས་པས། གཙོ་བོའི་སྐུ་ལ་གཉིས་སུ་གྱུར་ཏེ། ཤར་ཕྱོགས་ཀྱི་སྒོར་གཤེགས་ནས། བརྐྱང་ཕྱག་འཚལ་ཏེ། ༀ་སྔོན་གྱི་ཐུགས་དམ་ཆེན་པོ་ནི། ཞེས་པ་ལ་སོགས་པས་བསྐུལ་བས། གཙོ་བོའི་ཐུགས་ཀ་ནས་འོད་བསྐལ་བའི་མེ་དཔུང་ལྟ་བུ་བྱུང་བས། རང་གི་ལུས་ངག་ཡིད་གསུམ་གྱི་བག་ཆགས་ཐམས་ཅད་བསྲེག་ནས། སེམས་རྣམ་པར་དག་པ་གསེར་ཞུན་མ་ལྟ་བུར་གྱུར་པ་ནི། ཕྱིའི་དབང་ངོ་། །རང་གི་སེམས་ཡི་གེ་ཧཱུྃ་མཐིང་ནག་ཏུ་གྱུར་ཏེ། གཙོ་བོའི་ཐུགས་ཀར་ཐིམ་པ་ནི། ནང་གི་དབང་ངོ་། །ཡབ་ཡུམ་གཉིས་མ་ཆགས་ཐབས་ཀྱི་རོལ་པ་མཛད་པ་སྐུའི་དབྱིབས་སུ་བརྒྱུད། གསང་བ་རྡོ་རྗེའི་ལམ་དུ་བྱུང་། ཡུམ་གྱི་པད་མའི་མཁའ་ལ་བབ་པ་ནི། གསང་བའི་དབང་ངོ་། །བྱང་ཆུབ་སེམས་ཀྱི་འོད་དཔུང་དཀར་དམར་འདྲེས་པ་ལས། གཙོ་བོ་ཡབ་ཡུམ་ཡང་འོད་དུ་ཞུ་ནས། བྱང་ཆུབ་སེམས་ཀྱི་འོད་དཔུང་ལ་ཐིམ། རིགས་བཞི་ཁྲག་འཐུང་རྣམས་ཀྱང་ཧཱུྃ་ཞེས་བརྗོད་ཅིང་འོད་དཔུང་ལ་ཐིམ། ནང་གི་ལྷ་མོས་ཧ། ཕྱིའི་ལྷ་མོས་ཏེ། སྒོ་མ་བཞིས་ཕཊ྄་ཅེས་བརྗོད་ཅིང་། ཐམས་ཅད་དབུས་ཀྱི་གདན་ཐོག་ཏུ་འོད་དཔུང་དུ་གྱུར་པ་ནི། བདེ་བ་ཆེན་པོའི་དབང་ངོ་། །འོད་དེ་ཡང་མི་དམིགས་པ་སྟོང་པ་ཉིད་དུ་གནས་པ་ནི། ཡེ་ཤེས་རང་གནས་ཀྱི་དབང་ངོ་། །དབང་དེ་རྣམས་བསྐུར་བའི་དགོས་པ་ནི། ཡེ་ནས་སངས་རྒྱས་པ་ཡིན་ཀྱང་། རྟོག་པས་འཇུག་དགོས་པ་དང་། རིག་པ་ལྷུན་གྱི་གྲུབ་པར་བྱ་བ་དང་། རྒྱལ་བའི་སྲས་སུ་བདག་བསྐྱེད་པའི་ཕྱིར་རོ། །ཡོངས་སུ་རྫོགས་པའི་ཆོ་འཕྲུལ་གྱི་གཉིས་པ་གསང་བའི་དཀྱིལ་འཁོར་ལ་ལྔ་སྟེ། ཆོ་ག་གསུམ་གྱིས་གཙོ་བོ་ཡབ་ཡུམ་བསྐྱེད་པའི་ཆོ་འཕྲུལ་དང་། དབང་བསྐུར་བའི་ཆོ་འཕྲུལ་དང་། བྱིན་གྱིས་རླབས་པའི་ཆོ་འཕྲུལ་དང་། ཡུམ་གྱི་མཁའ་གསང་ལས་དཀྱིལ་འཁོར་བསྐྱེད་པའི་ཆོ་འཕྲུལ་དང་། གསང་བའི་བྱང་ཆུབ་སེམས་ཀྱིས་མཆོད་པ་འབུལ་བའི་ཆོ་འཕྲུལ་ལོ། །གཙོ་བོ་ཡབ་ཡུམ་བསྐྱེད་པའི་ཆོ་འཕྲུལ་ནི། དབུས་ཀྱི་གདན་ཐོག་ཏུ་ཧཱུྃ་མཐིང་ནག་སྒྲིལ་མར་གནས་པ་ལས། ཧཱུྃ་མཐིང་ནག་གྲངས་མེད་པ་འཕྲོས་པས། དྲག་དལ་ནི་འཁུ་འཕང་འདྲིལ་བ་ཙམ་སྒྲ་ནི་བོང་གྲགས་པ་ཙམ་མོ། །མཆན། སེམས་ཅན་གྱི་ངག་གི་སྒྲིབ་པ་སྦྱངས། བདེ་གཤེགས་གསུང་གི་རྒྱུད་བསྐུལ། སླར་ཚུར་འདུས་པ་ལས་བཞི་བོའི་ཧཱུྃ་ལ་ཐིམ་པས། རྡོ་རྗེ་དང་བྷནྡྷར་དྲག་དལ་ནི་སེར་བ་འབབ་པ་ཙམ། སྒྲ་ནི་སེང་གེའི་ང་རོ་ཙམ། མཆན། གྱུར། དེ་ལ་ཕྱག་མཚན་གྲངས་མེད་པ་འཕྲོས་པས་སེམས་ཅན་གྱི་ཡིད་ཀྱི་སྒྲིབ་པ་སྦྱང་བ། བདེར་གཤེགས་ཐུགས་ཀྱི་རྒྱུད་བསྐུལ། སླར་འདུས་པ། ལས་ཡབ་ཡུམ་གཉིས་ཀྱི་སྐུ་ཕྲ་མོར་གྱུར། དེ་ལ་སྐུ་ཕྲ་མོ་གྲངས་མེད་པ་འཕྲོས་དྲག་དལ་ནི་ཐོག་འབབ་པ་ཙམ། སྒྲ་ནི་འབྲུག་སྒྲ་ལྡིར་བ་ཙམ་མོ། །མཆན། པ་ལས། སེམས་ཅན་གྱི་ལུས་ཀྱི་སྒྲིབ་པ་སྦྱངས། བདེར་གཤེགས་སྐུའི་རྒྱུད་བསྐུལ་ནས། ཧེ་རུ་ཀའི་སྐུར་གྱུར་ཏེ། སྐུ་དེ་རྣམས་སླར་འདུས་དབུས་ཀྱི་སྐུ་ལ་ཐིམ་པ་ལས། དཔལ་ཁྲག་འཐུང་ཆེན་པོའི་སྐུར་གྱུར་ཏེ། སྐུ་མདོག་མཐིང་ནག །དབུ་གསུམ་ཕྱག་དྲུག །ཞབས་བཞི་དང་ལྡན་པ། ཞལ་གཡས་དཀར། གཡོན་དམར། དབུས་སྐུ་དང་མཐུན་པ། དབུ་རལ་པ་ཁམས་ནག་སྲིད་པའི་རྩེ་མོར་འཁྱིལ་བ། རལ་པའི་རྩ་བར་སྦྲུལ་དང་ཐོད་པས་བཅིང་བ། ཕྱག་དྲུག་གི་གཡས་དང་པོ་ན་རྡོ་རྗེ་ནག་པོ་རྩེ་དགུ་པ། གཡོན་དང་པོ་དུང་ཆེན་ཁྲག་གིས་བཀང་བ་དཀྲུག་ཅིང་གསོལ་བ། གཡས་བར་མ་ན་སྟོང་གི་འཇིག་རྟེན་འཁོར་ཡུག །ཐ་མ་ན་རལ་གྲི། གཡོན་བར་མ་ན་དགྲ་སྟ། ཐ་མ་ན་གཤོལ། སྐུ་ལ་དཔལ་ཆས་བཅུ་དྲུག་གིས་བརྒྱན་པ། ཞབས་བཞི་བརྐྱང་བསྐུམ་གྱི་ཚུལ་དུ་བཞུགས་པ། བསྐལ་པའི་མེ་རི་འབར་བའི་ཀློང་ན་འབར་བའི་གར་དགུ་དང་ལྡན་ཏེ། དགྱེས་ཤིང་ངོ་མཚར་བའི་ཚུལ་གྱིས་བཞུགས་སོ། །ཡུམ་བཛྲ་ཀྲོ་ཏི་ཤྭ་རི་མ། ཞལ་གཅིག་ཕྱག་གཉིས། གཡས་པས་ཡབ་ལ་འཁྱུད་ཅིང་། གཡོན་པས་དུང་ཆེན་ཁྲག་གིས་བཀང་བ་ཡབ་ལ་སྟོབས་པ། ཆས་ཆེན་པོ་བཅུ་དྲུག་གིས་བརྒྱན་པ་ལ། ཟ་བྱེད་གཟིག་གི་ཤམ་ཐབས་ཅན། སྐུ་མདོག་མཐིང་ནག་འཇོལ་སྒེག་གི་ཚུལ་དུ་ཡབ་ལ་འཁྲིལ་ཏེ་བཞུགས་སོ། །ཡབ་ཀྱི་ཐུགས་ཀར་ཡེ་ཤེས་སེམས་དཔའ་རང་འདྲ་བ་གཅིག་ཉི་མའི་དཀྱིལ་འཁོར་ལ་བཞུགས་པར་བསྒོམ། དེའི་ཐུགས་ཀར་ཉི་མའི་དཀྱིལ་འཁོར་གྱི་སྟེང་དུ། རྡོ་རྗེ་ནག་པོ་རྩེ་དགུ་པ། དེའི་ལྟེ་བར་ཉི་མ་ལ་ཧཱུྃ་མཐིང་ནག་གི་ཐ་མར། རུ་ལུ་འབྲུ་བརྒྱད་ཁ་དོག་མཐིང་ནག་གིས་གཡས་སུ་འཁོར་རོ། །ཡུམ་གྱི་ཐུགས་ཀར་བྷནྡྷ། དེའི་ནང་དུ་ཉི་མའི་སྟེང་དུ། ཧཱུྃ་མཐིང་ནག་ལ་རུ་ལུས་གཡོན་ཕྱོགས་སུ་འཁོར་བའོ། །གསང་བའི་དཀྱིལ་འཁོར་གྱི་གཉིས་པ་དབང་བསྐུར་བའི་ཆོ་འཕྲུལ་ནི། དོན་གྱི་དབང་དང་། རྟགས་ཀྱི་དབང་གཉིས་སུ་ཤེས་པར་བྱ་སྟེ། ཡེ་ཤེས་ལྔ་རིགས་ལྔའོ། །ༀ་མ་ཧཱ་ཤཱུ་ནྱ་ཏ་ཛྙཱ་ན་བཛྲ་སྭཱ་བྷཱ་ཝ་ཨཱཏྨ་ཀོ྅་ཧཾ། ཞེས་བརྗོད་པས་སྐུ་དེ་ཡང་བརྡལ་བ་ཆེན་པོ་ཆོས་ཀྱི་དབྱིངས་ལས་མ་གཡོས་པར་བསྒོམ། རྟགས་ནི། སྤྱི་བོར་མི་བསྐྱོད་པ་སྐུ་མདོག་མཐིང་ཀ །བསྒོམ་མོ། །ༀ་མ་ཧཱ་ཨ་དཪྴ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས་ཡབ་ཡུམ་གྱི་སྐུ་དེ་ཡང་ཆོས་ཀྱི་སྐུ་མི་འགག་པ་ཙམ་ཡིན་པར་ཤེས་པར་བྱའོ། །རྟགས་ནི། དཔྲལ་བའི་ཕྱོགས་སུ་རྣམ་པར་སྣང་མཛད་སྐུ་མདོག་དཀར་པོ། བསྒོམ་མོ། །ༀ་མ་ཧཱ་པྲ་ཏྱ་བེཀྵ་ཎ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས་ལྷའི་སྐུ་དེ་དག་ཀྱང་གདུལ་བྱའི་བསམ་པ་མཐའ་ཡས་པ་བསམ་གྱིས་མི་ཁྱབ་པར་བསམ་མོ། །རྟགས་ནི། ལྟག་པར་སྣང་བ་མཐའ་ཡས་སྐུ་མདོག་དམར་པོ། བསྒོམ་མོ། །ༀ་མ་ཧཱ་ས་མནྟ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས། དེ་ལྟར་རྒྱལ་བའི་སྐུ་མ་འགག་པ་དང་། དབྱིངས་མ་སྐྱེས་པ་གཉིས་དབྱེར་མེད་པར་བསྒོམ་མོ། །རྟགས་ནི། རྣ་ལྟག་གཡས་སུ་རིན་ཆེན་འབྱུང་ལྡན་སྐུ་མདོག་སེར་མོ། བསྒོམ་མོ། །ༀ་མ་ཧཱ་ཀྲྀ་ཏྱཱ་ནུཥྛཱ་ནྟ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས། རྒྱལ་བའི་སྐུ་མ་འགག་པ་ནི་གཞན་དོན་དོ། །ངོ་བོ་མ་སྐྱེས་པ་ནི་བདག་དོན་ཏེ། དོན་གཉིས་ལྷུན་གྱིས་གྲུབ་པའོ། །རྟགས་ནི། རྣ་ལྟག་གཡོན་པའི་སྟེང་དུ་དོན་ཡོད་གྲུབ་པ་སྐུ་མདོག་ལྗང་ཀུ། བསྒོམ་མོ། །བྱིན་གྱིས་རླབས་པའི་ཆོ་འབུལ་ནི། ༀ་སརྦ་ཏ་ཐཱ་ག་ར་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས། བདག་གི་སྤྱི་བོའི་ནང་དུ་སྐུ་རྡོ་རྗེ་སྐུ་མདོག་དཀར་པོ། གཡས་འཁོར་ལོ། གཡོན་དྲིལ་བུ་བསྣམས་པ། ཟླ་བའི་གདན་ལ་བཞུགས་པ། བསྒོམ་མོ། །དེའི་ཐུགས་ཀར་འཁོར་ལོ་ༀ་གྱིས་མཚན་པར་བསྒོམ་མོ། །ༀ་སརྦ་ཏ་ཐཱ་ག་ཏ་མ་ཧཱ་ཝཱཀྐ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས། ལྕེ་པདྨ་འདབ་བརྒྱད་ཀྱི་སྟེང་དུ། གསུང་རྡོ་རྗེ་སྐུ་མདོག་དམར་པོ་གཡས་པདྨ། གཡོན་དྲིལ་བུ་བསྣམས་པ། དེའི་ཐུགས་ཀར་པདྨ་ༀ་གྱིས་མཚན་པར། བསྒོམ་མོ། །ༀ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས། ཐུགས་ཀར་ཉི་མའི་སྟེང་དུ། ཐུགས་རྡོ་རྗེ་སྐུ་མདོག་སྔོན་པོ། གཡས་རྡོ་རྗེ་གཡོན་དྲིལ་བུ་བསྣམས་པ། དེའི་ཐུགས་ཀར་རྡོ་རྗེ་ཧཱུྃ་གིས་མཚན་པར་བསྒོམ་མོ། །ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རྭ་ག་ཎ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས། ལྟེ་བར་རིན་ཆེན་ཟུར་བརྒྱད་ཀྱི་སྟེང་དུ། ཆགས་པའི་རྡོ་རྗེ་སྐུ་མདོག་སེར་པོ། གཡས་ན་རིན་ཆེན་ཟུར་བརྒྱད་པ། གཡོན་ན་དྲིལ་བུ་བསྣམས་པའོ། །དེའི་ཐུགས་ཀར་རིན་པོ་ཆེ་ཟུར་བརྒྱད་པས་མཚན་པ་བསྒོམ་མོ། །ༀ་སརྦ་ཏ་ཐཱ་ག་ཏ་མ་ཧཱ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཞེས་པས། གསང་གནས་ཆོས་འབྱུང་གྲུ་གསུམ་གྱི་སྟེང་དུ། མཆོད་པའི་རྡོ་རྗེ་སྐུ་མདོག་ལྗང་གུ། གཡས་ན་རལ་གྲི། གཡོན་ན་དྲིལ་བུ་བསྣམས་པ། དེའི་ཐུགས་ཀར་རལ་གྲི་ཧཾ་གིས་མཚན་པར་བསྒོམ་མོ། །མཁའ་གསང་བྱིན་གྱིས་རླབས་ཤིང་དཀྱིལ་འཁོར་སྤྲོ་བའི་ཆོ་འཕྲུལ་ནི། ཡབ་ཀྱི་གསང་བའི་གནས་སུ་ཧཱུྃ་ལས། རྡོ་རྗེ་རྩེ་ལྔ་པ། ལྟེ་བ་ལ་ཧཱུྃ། ཕྱི་མཚམས་སུ་ཕཊ྄། ནང་མཚམས་སུ་ༀ། ཡུམ་གྱི་གསང་བའི་གནས་སུ། པྃ་ལས་པདྨ་དམར་པོ་འདབ་མ་བརྒྱད་པའི་སྟེང་དུ། ༀ་གྱིས་མཚན་པ། དེ་གཉིས་ཀྱི་བར་དུ་མ་ལས་ཉི་མའི་དཀྱིལ་འཁོར་གྱིས་ཡེ་ཤེས་ཀྱི་དྲོད་བསྐྱེད་པར་བསྒོམ་མོ། །ཀྵེ་ཏ་པ་ལ། ལ་སོགས་པ། ཞེས་པའི། སྦྱོར་བའི་བརྡས་བསྐུལ་ཏེ། དེ་ཡང་ཕྱོགས་བཅུའི་བྷུདྡྷ་ཐམས་ཅད་རང་གི་ཞལ་དུ་ཞུགས། སྐུའི་དབྱིབས་སུ་བརྒྱུད། ཡབ་ཀྱིས། ས་མ་ཡ་ཧོ། ཡུམ་གྱིས། ས་མ་ཡ་སྟྭཾ། ཡབ་ཀྱིས། ཨ་ནུ་རཱ་ག་ཡ་ཧཾ། ཡུམ་གྱིས། ཨ་ནུ་རཱ་ག་ཡ་མི། ཞེས་བསྐུལ་ནས། གསང་བ་རྡོ་རྗེའི་ལམ་ནས། ཡུམ་གྱི་པདྨའི་མཁའ་ལ་བྷྲཱུྃ་དམར་པོ་གཅིག་འཕྲོས་པ་ལས་དཀྱིལ་འཁོར་དུ་གྱུར་ཏེ། བར་ཁྱམས་དང་། སྒོ་གདན་ཁྲི་དང་བཅས་པ། བསྒོམ་མོ། །དེ་ནས་ཡང་། བྱང་ཆུབ་སེམས་ཀྱི་ཆ་གཉིས་པ་ལ། ཧཱུྃ་བཅུ། ཧ་བརྒྱད། ཧེ་བརྒྱད། ཕཊ྄་བཞི། དེ་རྣམས་འཕྲོས་པ་ལས། སོ་སོའི་གདན་ཐོག་ཏུ་བབ་པ་ལས། ཕྱག་མཚན་རྣམས་སུ་གྱུར། དེ་རྣམས་ལས་ཧཱུྃ་བཅུ་ལ་རིགས་ལྔ་ཡབ་ཡུམ་བཅུར་གྱུར། ཧ་ལས་ནང་གི་ལྷ་མོ་བརྒྱད། ཧེ་ལས་ཕྱིའི་ལྷ་མོ་བརྒྱད། ཕཊ྄་ཀྱི་སྒོ་མ་བཞི། དེ་རྣམས་ཀྱང་། སྐུ་མདོག་ཕྱག་མཚན་དང་ཆ་ལུགས། །གདན་ཁྲི་དང་བཞུགས་ཚུལ། ཁྲོ་བོ་རང་བཞིན་གྱི་དཀྱིལ་འཁོར་ལྟར་བསྒོམ་ཞིང་། ཏིང་ངེ་འཛིན་གསལ་བར་བྱའོ། །ཧཱུྃ་ངེས་པ་ལ་ནི་རྡོ་རྗེ་ཆེ། །དེ་ལ་དཔལ་ཆེན་ཧེ་རུ་ཀ །འབར་བ་ཆེན་པོའི་གར་དགུའི། །འཇིགས་པ་ཡི་ནི་དུས་ལྟར་དྲག །ༀ་སྔོན་གྱི་ཐུགས་དམ་ཆེན་པོ་ནི། །འཇིག་རྟེན་འབྱམས་ཀླས་མ་ལུས་ཀུན། །མཆོག་ཉིད་བསྒྲུབ་པར་འགྱུར་པས་ན། །ཕྱག་རྒྱ་ཆེན་པོར་བདག་སྦྱོར་ཅིག །ༀ་བཛྲ་ཨརྱ་ཏེ་ཛ་ཏིང་ཛཿ ༀ་བཛྲ་ཨ་མུ་ཁ་ཧཱུྃ། ༀ་བཛྲ་ལོ་ཀ་བྃ། ༀ་བཛྲ་བྷསྨི་བ་ལ་བ་ཏུ་ཧོ། ༀ་སརྦ་ཏ་ཐཱ་ག་ཏ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྚ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ྄། ༀ་སརྦ་ཏ་ཐཱ་ག་ཏ་མ་ཧཱ་ཀྲོ་དྷི་ཤྭ་རཱི་སརྦ་དུཥྚན་ཧཱུྃ་ཕཊ྄། ༀ་བཛྲ་མ་ཧཱ་ཤྲཱི་ཧེ་རུ་ཀ་མ་ཧཱ་ཙནྚ་སརྦ་དུཥྚཱནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ྄། ༀ་མ་ཧཱ་བཛྲ་དྷཱ་ར་མ་ཧཱ་ཀྲོ་དྷེ་ཤྭ་རཱི་ཛྭ་ལི་ནཱི་ཧཱུྃ་ཕཊ྄། ༀ་རཏྣ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ྄། ༀ་མ་ཧཱ་སཱུརྱ་རཏྣ་མ་ཧཱ་ཀྲོ་དྷི་ཤྭ་རཱི་བི་ད་མ་ཧཱུྃ་ཕཊ྄། ༀ་པདྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙནྚ་སརྦ་དུཥྚཱནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ྄། ༀ་ཧྲཱིཿཤྲུ་ཏ་ས་མནྟ་པདྨ་མ་ཧཱ་ཀྲོ་དྷེ་ཤྭ་རཱི་ཁཱ་ཧི་ཧཱུྃ་ཕཊ྄། ༀ་ཀརྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙནྚ་སརྦ་དུཥྚཱནྟ་ཀ་ཧ་ན་ད་ཧ་པ་ཙ་ཧཱུྃ་ཧཱུྃ་ཧཱུྃ་ཕཊ྄། ༀ་སརྦ་ཨ་མོ་གྷ་མ་ཧཱ་ཀྲོ་དྷེ་ཤྭ་རི་བི་ཤྭ་ཧཱུྃ་ཕཊ྄། ཆེ་མཆོག་མཉམ་ཉིད་འབར་བའི་ཀློང་དཀྱིལ་ནས། གདུག་པ་འདུལ་མཛད་ཐུགས་རྗེ་ཁྲོས་པའི་རྒྱལ། །གསང་སྔགས་རྨད་འབྱུང་དྲག་པོའི་ཕྲིན་ལས་ཀྱིས། །ལྷུན་གྱིས་གྲུབ་པར་བྱིན་གྱིས་བརླབ་ཏུ་གསོལ། །ཡེ་ཤེས་སེམས་དཔའ་ནི། ཧེ་རུ་ཀ་ལྔ་ལ་ཉི་མ་ཟླ་བ་པདྨའི་སྟེང་དུ། རང་འདྲ་བ་རེ་རེ། དེའི་ཐུགས་ཀར་ཕྱག་མཚན་དང་པོ་རྣམས་ལ་རུ་ལུས་བསྐོར་བའོ། །ཁ་དོག་ནི་སྐུ་མདོག་བཞིན་ནོ། །ཡུམ་ལྔ་ལ་ཉི་མའི་སྟེང་དུ། བྷནྡྷའི་ནང་དུ་ཉི་མའི་སྟེང་དུ། ཧཱུྃ་ལས་རུ་ལུས་གཡོན་ཕྱོགས་སུ་འཁོར་རོ། །མ་མོ་ཉི་ཤུའི་ཐུགས་ཀར་ཉི་མའི་སྟེང་དུ་རྡོ་རྗེ་རྩེ་ལྔ་པའི་ལྟེ་བ་ལ། ཉི་མའི་སྟེང་ན། མ་བརྒྱད་ལ་ཧ། ཕྲ་མེན་མ་བརྒྱད་ལ་ཧེ། སྒོ་མ་བཞི་ལ་ཕཊ྄། དེའི་ཐ་མར་རུ་ལུའམ་རང་སྔགས་ཀྱིས་གཡས་བསྐོར་དུ་འཁོར་རོ། །དབང་མོ་ལ་ཉི་མའི་སྟེང་དུ། བྷནྡྷ་ཕྱེད་པོ་ལ་བྷྱོས་མཚན་པའོ། །གསང་བ་བྱང་ཆུབ་སེམས་ཀྱི་མཆོད་པ་འབུལ་བའི་ཆོ་འཕྲུལ་ནི། ཡང་བྱང་ཆུབ་སེམས་ལས། ཁམས་དྲུག་གི་ལྷ་མོར་གྱུར་ཏེ། དཀྱིལ་འཁོར་གྱི་ལྷ་རྣམས་ལ་རྒྱས་པར་མཆོད་དེ། དེ་ནས་རང་བཞིན་ལྷུན་གྱི་གྲུབ་པའི་དཀྱིལ་འཁོར་དུ་འདོན་པ་ནི། བཛྲ་ཁྲག་འཐུང་ཡབ་ཡུམ་གྱི་སྔགས་འདོན་པས། ཡབ་རང་ལ་བསྟིམ། ཡུམ་རང་གི་ཡུམ་ལ་བསྟིམ་མོ། །དེ་བཞིན་དུ་བྷུདྡྷ་ཁྲག་འཐུང་ཡབ་ཡུམ་སྤྱན་དྲང་ལ་དཀྱིལ་འཁོར་གྱི་ཤར་དུ་བཞུགས་སོ། །རཏྣ་ཁྲག་འཐུང་ཡབ་ཡུམ་སྤྱན་དྲངས་ལ་ལྷོར་བཞུགས་སོ། །པདྨ་ཁྲག་འཐུང་ཡབ་ཡུམ་སྤྱན་དྲང་ལ་ནུབ་ཏུ་བཞུགས་སོ། །ཀརྨ་ཁྲག་འཐུང་ཡབ་ཡུམ་སྤྱན་དྲང་ལ་བྱང་དུ་བཞུགས་སོ། །གནས་ཀྱི་ལྷ་མོ་བརྒྱད་སྤྱན་དྲང་ལ་སོ་སོའི་གདན་ལ་བཞུགས་སོ། །ཕྲ་མེན་མ་བརྒྱད་སྤྱན་དྲངས་ལ་ལྷ་སྣམ་ལ་བཞུགས། སྒོ་མ་བཞི་སྤྱན་དྲང་ལ་སྒོ་བཞིར་བཞུགས་སོ། །དེ་དག་ཀྱང་སོ་སོའི་སྔགས་ཀྱིས་ཡུམ་གྱི་མཁའ་ནས་སྤྱན་དྲང་ལ། རང་རང་གི་སྔགས་ཀྱིས་གདན་ལ་ཅག་གེ་བཞུགས་སོ། །དེར་ཡང་ལྷ་ཐམས་ཅད་གསལ་གདབ། ཕྱག་རྒྱ་སྤྲོས་པ་ལྟར་ན། དབུ་རྒྱན་ལྔ་དང་། བྱིན་གྱིས་བརླབས་པའི་ལྷ་ལྔ་དང་། ཐུགས་ཡེ་ཤེས་སེམས་དཔའ་གསུམ་བརྩེགས་ཀུན་ལ་ཚང་བར་བྱའོ། །དེ་དག་ནི་རང་བཞིན་ལྷུན་གྱི་གྲུབ་པའི་དཀྱིལ་འཁོར་ཁྲག་འཐུང་སུམ་ཅུ་འདོན་པའི་ཆོ་འཕྲུལ་ལོ། །རང་བཞིན་ལྷུན་གྱི་གྲུབ་པའི་ཆོ་འཕྲུལ་གྱི་གཉིས་པ། དབང་ཕྱུག་མ་ཉི་ཤུ་རྩ་བརྒྱད་བསྐྱེད་པ་ནི། བར་འཁྱམས་ཀྱི་ཞིང་ཚལ་པ་ཉི་ཤུ་རྩ་བརྒྱད་ཀྱི་སྟེང་དུ། བྷྱོ་ཉི་ཤུ་རྩ་བརྒྱད་ལས། དབང་ཕྱུག་མ་ཉི་ཤུ་རྩ་བརྒྱད་དུ་བསྐྱེད་པ་ནི་རང་རང་གི་སྔགས་ཀྱིས་ལྷག་ལྷག་བསྐྱེད་དེ། ཤར་གྱི་བྷྱོ་དྲུག་ལས་མ་དྲུག་བསྐྱེད་པ་ནི། མ་ནུ་རཀྴ་སཱི་བྷྱོ། ཞེས་པས། རྡོ་རྗེ་སྲིན་མོ་ཁ་དོག་སྨུག་ནག་གཡས་ན་བྷནྡྷ་རློན་པ་བསྣམས་སོ། །གཉིས་པ་ནི། པྲ་ཧྨ་ཎཱི་བྷྱོ། ཞེས་པས། ཚངས་པ་དམར་སེར་དབུ་བཞི་སྦྲུལ་གྱི་ཅོད་པན་ཅན། གཡས་ན་པདྨ། གསུམ་པ་ནི། རེའུ་ཏྲི་མ་བྷྱོ། ཞེས། ལྷ་ཆེན་མོ་སྐུ་མདོག་དཀར་ལྗང་། གཡས་ཏྲི་ཤུལ། བཞི་པ་ནི། བྷ་ན་བྷེ་བྷྱོ། གཏོག་འདོད་མ་སྔོན་མོ་གཡས་འཁོར་ལོ། ལྔ་པ་ནི། ཀུ་མཱ་རཱི་བྷྱོ། གཞོན་ནུ་མ་སྐུ་མདོག་དམར་མོ་གཡས་ན་མདུང་བསྣམས་པའོ། །དྲུག་པ་ནི། ཨིནྡྲ་ཡ་ནི་བྷྱོ། ཞེས། བརྒྱ་བྱིན་དཀར་མོ་གཡས་རྡོ་རྗེ་གདིང་པོ་བསྣམས་པ། དེ་དྲུག་ནི་མ་ལྟར་བྱམས་པའི་མ་དྲུག་ཅེས་བྱའོ། །ཉེ་གནས་བཞི་མའི་ཚུལ་འཛིན། ཕྲིན་ལས་ཞི་བ། ཚད་མེད་པ་བྱམས་པའོ། །ལྷོའི་བྷྱོ་དྲུག་ལས། མ་མོ་དྲུག་བསྐྱེད་པ་ནི། དང་པོར། བཛྲ་སིངྷ་ཀ་ལ་བྷྱོ། ཞེས། རྡོ་རྗེ་དམར་མོ་སྐུ་མདོག་དམར་མོ། གཡོས་ཐོད་ཁྲག་བསྣམས་སོ། །གཉིས་པ་ནི། ཨ་མྲྀ་ཏཾ་བྷྱོ། ཞེས། བདུད་རྩི་དམར་མོ་གཡས་ན་པདྨ་བསྣམས་སོ། །གསུམ་པ་ནི། སོའུ་ནི་བྷྱོ། ཞེས། ཞི་བ་མོ་དཀར་མོ་གཡས་ན་མེ་ཏོག་པུཎྜ་རི་ཀ་བསྣམས་སོ། །བཞི་པ་ནི། ཏ་ན་ཧཾ་བྷྱོ། ཞེས། བེ་ཅོན་མ་ལྗང་ནག་གཡས་ཐོད་དབྱུག་འཕྱར་བའོ། །ལྔ་པ་ནི། རག་ཤ་སཱི་བྷྱོ། སྲིན་མོ་དམར་སེར་གཡས་ཐོད་ཁྲག་འཐུང་བའོ། །དྲུག་པ་ནི། བཀྴ་སཱི་བྷྱོ། ཟ་བ་མོ་ལྗང་ནག་གཡས་རྒྱུ་ཞགས་བསྣམས་པའོ། །དེ་དྲུག་ནི་སྙིང་རྗེ་སྲིང་ལྟར་བརྩེ་བའི་མ་དྲུག་ཅེས་བྱ་སྟེ། རྣལ་འབྱོར་པ་ལ་སྲིང་མོའི་ཚུལ་འཛིན་ཅིང་། ཕྲིན་ལས་ལ་རྒྱས་པ། ཚད་མེད་སྙིང་རྗེའོ། །ནུབ་ཕྱོགས་ཀྱི་བྷྱོ་དྲུག་ལས། མ་མོ་དྲུག་བསྐྱེད་པ་ནི། དང་པོ། རེ་ཏྲི་མ་བྷྱོ། ཞེས། དགའ་བ་མོ་དམར་མོ་ཕྱག་གཡས་ན་གཏེར་བསྣམས་སོ། །གཉིས་པ་ནི། རེ་ཏི་རེ་མ་ཏི་བྷྱོ། ཞེས། ཁྲག་གི་མྱོས་མ་སྐུ་མདོག་དཀར་མོ། གཡས་ན་གཤོལ་བསྣམས་སོ། །གསུམ་པ་ནི། ཨེ་ཀ་ཙ་ར་མ་བྷྱོ། ཞེས། གཅིག་པུར་སྤྱོད་མ་སྐུ་མདོག་སེར་མོ། གཡས་ན་སྤུ་གྲི་བསྣམས་སོ། །བཞི་པ་ནི། མ་ནུ་ཧ་ར་མ་བྷྱོ། ཞེས། འདོད་པ་མོ་དམར་མོ་ཕྱག་གཡས་ན་མདའ་གཞུ་བསྣམས་སོ། །ལྔ་པ་ནི། སི་ཏི་ཀཾ་བྷྱོ། ཞེས། ནོར་གྲུབ་མ་དཀར་མོ། ཕྱག་གཡས་ན་ནོར་གྱི་བུམ་པ་བསྣམས་སོ། །དྲུག་པ་ནི། བྷཱ་ཡ་བྷཱེ་བྷྱོ། ཞེས། རླུང་ལྷ་མོ་སྐུ་མདོག་སྔོ་སྐྱ་གཡས་ན་བ་དན་ལྕེ་བརྒྱད་བསྣམས་སོ། །རྣལ་འབྱོར་མ་འདི་རྣམས་ནི། དགའ་བ་མཛའ་ལྟར་ཡིད་འོང་གི་མ་དྲུག་ཅེས་བྱ་སྟེ། རྣལ་འབྱོར་པའི་ཉེ་གནས་བཞི་ལ། མཛའ་མོའམ་གཟུངས་མའི་ཆ་འཛིན་པའོ། །ཕྲིན་ལས་ལ་དབང་། ཚད་མེད་པ་དགའ་བའོ། །བྱང་གི་བྷྱོ་དྲུག་ལས་མ་དྲུག་བསྐྱེད་པ་ནི། དང་པོར། མ་ཧཱ་མཱ་རཱ་ཎ་བྷྱོ། ཞེས། གསོད་བྱེད་མ་ཁ་དོག་ནག་མོ་གཡས་རལ་གྲི་བསྣམས་སོ། །གཉིས་པ་ནི། ཨགྣེ་ཡེ་བྷྱོ། ཞེས་པས། མི་མོ་སྐུ་མདོག་དམར་མོ། གཡས་ན་མེ་སྒྲོན་བསྣམས་སོ། །གསུམ་པ་ནི། བ་ར་ཧཱི་བྷྱོ། ཞེས་པས། ཕག་མོ་ཁ་དོག་ནག་མོ། གཡས་ན་ཕག་རྒོད་ཀྱི་མཆེ་བའི་ཞགས་པ་བསྣམས་སོ། །བཞི་པ་ནི། ཙ་མུན་ཏྲི་བྷྱོ། ཞེས་པས། རྒན་བྱེད་མ་སྐུ་མདོག་ནག་མོ། གཡས་ན་ཞིང་ཆུང་ཟ་བའོ། །ལྔ་པ་ན། སཱུ་ཏ་ནཾ་བྷྱོ། ཞེས་པས། སྣ་ཆེན་མོ་སྐུ་མདོག་དཀར་ལྗང་གཡས་ན་ཐོད་པ་བསྣམས་པའོ། །དྲུག་པ་ནི། པ་ཎི་བཛྲ་བྷྱོ། ཞེས་པས། ཆུ་ལྷ་མོ་སྐུ་མདོག་སྔོན་མོ་གཡས་ན་སྦྲུལ་ཞགས་བསྣམས་སོ། །དེ་དྲུག་ནི་བཏང་སྙོམས་བཀའ་ཉན་གྱི་མ་དྲུག་ཅེས་བྱ་སྟེ། ཉེ་གནས་བཞི་ལ་བྲན་མོའི་ཆ་འཛིན། ཕྲིན་ལས་དྲག་པོ། ཚད་མེད་པ་བཏང་སྙོམས་ལ་དབང་བྱེད་དོ། །ཤར་སྒོར། བཛྲ་མ་ཧཱ་ཀཱ་ལཱ་བྷྱོ། ཞེས་པས། རྡོ་རྗེ་ནག་མོ་སྐུ་མདོག་ནག་མོ་གཡས་ལྕགས་ཀྱུའོ། །ལྷོ་སྒོར། ཙ་ཀཱ་ལ་བཛྲ་བྷྱོ། ཞེས་པས། ཤན་པ་མོ་སྐུ་མདོག་དམར་སེར། གཡས་ན་ཞགས་པ་བསྣམས་སོ། །ནུབ་སྒོར། བཛྲ་བུཾ་པ་ཀ་ར་ཎ་བྷྱོ། ཞེས་པས། རྡོ་རྗེ་བུམ་རྣ་མོ་སྐུ་མདོག་མདར་ནག །གཡས་ན་ལྕགས་སྒྲོག་བསྣམས་པའོ། །བྱང་སྒོར། བཛྲ་ལམྦོ་དྷ་ར་ཎ་བྷྱོ། ཞེས་པས། གསུས་འཛིན་མ་ལྗང་ནག །གཡས་དྲིལ་བུ་བསྣམས་པའོ། །མ་མོ་འདི་བཞིའི་མཚན་ཉིད་ནི་གོང་མའི་ཕྱོགས་སུ་བརྩིའོ། །འདི་རྣམས་ཀྱི་ཕྱག་གཡོན་ན་བྷནྡྷ་དམར་ཆེན་གྱིས་བཀང་བའི་ནང་ནས། རྡོ་རྗེ་རྩེ་གསུམ་པས་མཚན་པ་བསྣམས་པའོ། །ཀུན་ཀྱང་ཞིང་ལྤགས་ཀྱི་སྐེད་ཆིངས་དང་། སྟག་ལྤགས་ཀྱི་ཤམ་ཐབས་དང་། ཐོད་པ་རློན་པའི་འཕྲེང་བ་དང་། དར་དང་མེ་ཏོག་གི་ཅོད་པཎ་དང་། རིན་པོ་ཆེ་སྣ་ཚོགས་ཀྱི་རྒྱན་དུ་བྱས་པ། ཆགས་པའི་ཚུལ་གྱིས་འགྱིང་བ། ཞིང་ཚལ་པའི་གདན་ལ་བརྐྱང་བསྐུམ་གྱིས་བཞུགས་པའོ། །དེ་རྣམས་ཀྱི་ཐུགས་ཀ་ན་ཐོད་པ་ཚལ་པ་བྷྱོས་མཚན་པ་རེ་རེ་ཡོད་དེ། དབུ་ལ་རྡོ་རྗེ་ལྔ་པ་རེ་རེས་མཚན་པའོ། །སོ་སོའི་འཁོར་འབུམ་ཕྲག་དང་བཅས་པ་བསྒོམ་མོ། །དེ་ལྟར་དཀྱིལ་འཁོར་གྱི་འཁོར་ལོ་འདིར་བསྐྱེད་པ་འདིས། འཇིག་རྟེན་དྲུག་གི་ཕྱོགས་བཅུའི་ཆོས་ཀྱི་དབྱིངས་ཀྱིས་གར་ཁྱབ་པར། དཀྱིལ་འཁོར་གྱི་འཁོར་ལོ་བསམ་གྱིས་མི་ཁྱབ་པར་འབྱུང་བར་བསྒོམ་མོ། །དེ་དག་ནི་རང་བཞིན་ལྷུན་གྱི་གྲུབ་པའི་དཀྱིལ་འཁོར་རོ། །དེ་ཡན་ཆད་ཏིང་ངེ་འཛིན་བཞིའི་སྒོ་ནས་སེམས་རང་སྣང་གི་དཀྱིལ་འཁོར་བསྐྱེད་པའོ། །དེ་ནས་ཡེ་ཤེས་རང་སྣང་གི་དཀྱིལ་འཁོར་གྱིས་བྱིན་གྱིས་བརླབས་པ་ལ་ཡང་དོན་བཅུ་སྟེ། སྙན་གསན་དབབ་པ་དང་། སྤྱན་དྲངས་པ་དང་། སྒོ་དབྱེར་བ་དང་། བརྟེན་པར་བཞུགས་སུ་གསོལ་བ་དང་། དངོས་གྲུབ་བླང་བའི་ཕྱིར་དམ་ལ་གཞུགས་པ་དང་། ལས་ཀྱི་མཁའ་འགྲོ་ལ་དམ་ཚིག་གི་ཕྱག་རྒྱ་སྟོད་པ་དང་། ཕྱག་འཚལ་བ་དང་། མཆོད་པ་འབུལ་ལ་དང་། བསྟོད་པ་དང་། བསྙེན་པ་བྱ་བ་དང་། དཀྱིལ་འཁོར་བསྡུ་བའོ། །ཁྲག་འཐུང་གི་དཀྱིལ་འཁོར། བླ་མ་ཤར་བ་སྤོབ་པ་མཐའ་ཡས་ཀྱིས་སྦྱར་བའོ། །ཁྲག་འཐུང་གི་དཀྱིལ་འཁོར་རྒྱས་འབྲིང་གང་ཡང་རུང་སྟེ། སྤྱི་དོན་གསུམ་གྱིས་བསྟན་པ་ནི། སྔོན་དུ་བྱ་བའི་ལས་དང་མཆོད་ཅིང་བསྙེན་པའི་ལས་དང་། མནག་པ་ནན་ཏུར་གྱི་ལས་བྱ་བའོ། །མཆོད་ཅིང་བསྙེན་པའི་ལས་བྱ་བ་ལ། དོན་ཉི་ཤུས་བསྟན་ཏེ། ཁྲོ་བོ་སྔོན་གྱི་གླིང་གཞི་བརྗོད་ཅིང་དལ་བསྟན་པ་དང་། སྙན་གསན་དབབ་པ་དང་། སྤྱན་དྲངས་པ་དང་། སྒོ་དབྱེ་བ་དང་། བཞུགས་སུ་གསོལ་བ་དང་། དམ་ཚིག་གི་ཕྱག་རྒྱ་བསྟན་པ་དང་། ཟིན་གྱིས་གནོན་པ་དང་། ཕྱག་བྱ་བ་དང་། ཕྱག་རྒྱ་གར་ཚོགས་ཀྱི་མཆོད་པ་བྱ་བ་དང་། ཀུན་ཏུ་བཟང་པོའི་མཆོད་པ་དང་། ཕྱིའི་མཆོད་པ་དང་། ནང་གི་མཆོད་པ་དང་། སྨན་གྱི་མཆོད་པ་དང་། གསང་བའི་མཆོད་པ་དང་། ཁམས་གསུམ་ཡོངས་སྒྲོལ་གྱི་མཆོད་པ་དང་། རྔ་མཆོད་དང་། དྲིལ་མཆོད་དང་། གླུའི་མཆོད་པ་དང་། བསྟོད་པ་བྱ་བ་དང་། བསྙེན་པ་བྱ་བའོ།། །།