ཁྲོ་བོའི་བསྙེན་དམིགས་བི་ཛ།
༈ ཁྲོ་བོའི་བསྙེན་པའི་སྐབས། རྩ་སྔགས་དང་། རང་སྔགས། ལས་སྔགས་ཀྱི་བསྙེན་པ་དང་གསུམ། རྩ་སྔགས་ལ་གཉིས། ཕྲ་མོའི་ཏིང་ངེ་འཛིན་གྱིས་ཡིད་སྒྲིབ་སྦྱངས་པ་ནི། སེམས་དཔའ་གསུམ་བརྩེགས་ཀྱི་ཧཱུྃ་མཐར། རུ་ལུ་འབྲུ་བརྒྱད་གཡས་བསྐོར་དུ་འཁོར་བ། ཧཱུྃ་གི་འོད་མཐིང་འཕྲོས། ༀ་ལ་ཕོག །ༀ་ལས་འཕྲོས་ཧཱུྃ་ལ་ཐིམ་པར་བསམ་པ་སོགས་འབྲུ་རེ་རེ་ནས་བསྒོམ། དུས་ཅིག་ཆར་ཧཱུྃ་ལས་འོད་ཟེར་བརྒྱད་སྲོས་འབྲུ་བརྒྱད་ལ་ཐིམ། འབྲུ་བརྒྱད་ལས་རེ་རེ་འཕྲོས་ཧཱུྃ་ལ་ཐིམ་པར་བསམ་སྟེ། གོམས་པར་བྱ། ངག་བཟླས་བྱ་ཚུལ་བཞི་ལས། དང་པོ་ཐབས་དང་ཤེས་རབ་སྟེང་སྒོ་དབྱེ་བའི་བཟླས་པ་ནི། ཡབ་ཡུམ་གྱི་མགྲིན་པར་པདྨ་འདབ་བརྒྱད་སྟེང་། ལྗགས་རྡོ་རྗེ་རྩེ་གསུམ་པར་བསམ་པ་ཧཱུྃ་ལ། འབྲུ་བརྒྱད་ཀྱིས་བསྐོར་བ། ཡབ་ཀྱི་ཐུགས་ཀར་རྡོ་རྗེའི་དབུས་དེ་ལྟར་བསམ་པའི། དབུས་ཀྱི་ཧཱུྃ་ལས་འོད་མཐིང་འཕྲོས་འབྲུ་བརྒྱད་ལ་གཡས་བསྐོར་གྱིས། རྡོ་རྗེའི་དབུས་རྭ་ནས། ཡེ་ཤེས་སེམས་དཔའ་གཙུག་གཏོར་ནས་ཐོན། ལྗགས་ཀྱི་འབྲུ་བརྒྱད་ལ་གཡས་སུ་བསྐོར་ཞལ་ནས་ཐོན། ཡུམ་གྱི་ཞལ་གྱི་ལྗགས་ཀྱི་རྡོ་རྗེའི་རྩེ་ནས། ལྟེ་བར་འབྲུ་བརྒྱད་ལ་གཡོན་དུ་བསྐོར། སྐུའི་དབྱིབས་བརྒྱུད། ཐུགས་ཀའི་བྷནྡྷའི་ནང་གི་ཧཱུྃ་ལ་འབྲུ་བརྒྱད་ཀྱིས་བསྐོར་བར། ཐུགས་རྒྱུད་བསྐུལ་བའི་ཚུལ་གྱིས་གཡོན་དུ་བསྐོར་ནས། ཚུར་ཡབ་ཀྱི་ཐུགས་ཀར་བྱུང་སྟེ་ཡང་སྔར་བཞིན་བསྐོར་རོ། །དེ་ལ་སྔགས་ཚར་བཞི་རེ་སྟེ། དེ་ཉིད་འབུམ་མམ་བྱེ་བ་བསྙེན། གཉིས་པ་བྱང་ཆུབ་སེམས་ཀྱིས་མཆོད་པ་འབུལ་བའི་བཟླས་པ་ནི། ཡབ་ཀྱི་གསང་བའི་རྡོ་རྗེར་ཧཱུྃ་ལ་འབྲུ་བརྒྱད་ཀྱི་བསྐོར་བར་བསམ། ཡབ་ཀྱི་ཐུགས་ཀ་ནས་འོད་ཟེར་མར་བརྒྱུད། གསང་བའི་འབྲུ་བརྒྱད་ལ་གཡས་སུ་འཁོར། རྡོ་རྗེའི་དབུས་རྭ་ནས་ཞུགས། ཡུམ་གྱི་པདྨའི་ཟེའུ་འབྲུར་བརྒྱད། ཐུགས་ཀར་གཡོན་དུ་འཁོར། ཡར་བརྒྱུད། ལྗགས་ཀྱི་འབྲུ་བརྒྱད་ལ་གཡོན་དུ་འཁོར། ཡབ་ཀྱི་ལྗགས་ལ་གཡས་སུ་འཁོར། མར་རྒྱུད་ཐུགས་ཀར་འཁོར་ཏེ་བར་མ་ཆད་པར་བསམ་སྟེ། འབུམ་མམ་བྱེ་བ་བཟླ། གསུམ་པ་དངོས་གྲུབ་ཡུམ་གྱི་མཁའ་ནས་བླང་བའི་བསྙེན་པ་ནི། ཡབ་ཀྱི་ཐུགས་ཀ་ནས་ཡར་བརྒྱུད། ལྗགས་ལ་གཡས་བསྐོར་གྱིས། ཡུམ་གྱི་ལྗགས་ལ་གཡོན་བསྐོར། མར་རྒྱུད། ཐུགས་ཀར་གཡོན་བསྐོར། མར་བརྒྱུད་པདྨའི་ཟེའུ་འབྲུ་ནས། དབུས་རྭར་བཞུགས་གཡས་བསྐོར་གྱིས། ཡར་རྒྱུད་ཐུགས་ཀར་བསྐོར་བ་བར་མ་ཆད་པར། འབུམ་མམ་བྱེ་བ་བཟླ། བཞི་པ་བཟླས་བརྗོད་བསྙེན་པའི་འཕྲོ་འདུས་ཡེ་ཤེས་ཀྱི་ལྷ་མཉེས་པ་སྒྲུབ་པ་ནི། ཡེ་ཤེས་པ་མདུན་མཁར་བཞུགས་པའི་ཞལ་ནས་ཕར་ཚུར་དུ་བརྒྱུད་དེ། བདག་གི་ཐུགས་ཀར་གཡས་སུ་འཁོར། མདུན་གྱི་ཐུགས་ཀར་གཡོན་དུ་བསྐོར་ཏེ། གཙོ་བོ་གོ་འཕོ་བའམ། འཁོར་བསྡུ་ཞི་བ་ལྟར་བྱའོ། །རང་སྔགས་ཀྱི་བསྙེན་པ་བྱ་བ་ནི། ཡབ་རྣམས་ལ་རུ་ལུའི་མཐར་རང་སྔགས་གཡས་བསྐོར། ཡུམ་རྣམས་ལ་རུ་ལུའི་མཐར་རང་སྔགས་གཡོན་བསྐོར་བསམ། ཡབ་སྔགས་བཟླས་ཚེ། ཞལ་ནས་ཡུམ་གྱི་ཐུགས་ཀར་གཡོན་བསྐོར་གྱིས་ཚུར་ཐུགས་ཀར་གཡས་བསྐོར་བྱ། ཡུམ་སྔགས་བཟླས་ཚེ། ཡབ་ཀྱི་ཐུགས་ཀར་གཡས་བསྐོར་གྱིས་ལྗགས་ནས་བརྒྱུད། ཡུམ་གྱི་ཐུགས་ཀར་གཡོན་བསྐོར་དུ་བསམ། མ་མོ་རྣམས་རང་རང་ཐུགས་ཀར་བསྐོར་བའི་འོད་ཟེར་གཙོ་བོའི་ཐུགས་ཀར་བསྟིམ་པར་བསམ་སྟེ། འབུམ་དང་བྱེ་བ་གཙོ་འཁོར་འགྲོས་ལྟར་བཟླའོ། །སྟོང་མཚམས་སུ་མཆོད་བསྟོད་རེ་བྱ་དགོས་སོ། །ཡིག་རྙིང་གི་དོན་བསྡུས་ཏེ་བི་ཛའི་མིང་གིས་སྤེལ་བ་དགེ། །།