ཕུར་པའི་ལས་བྱང་།

ཤྲཱི བ ཛྲ ཀུ མཱ ར སྱ ཤཱི ཪྵ སྱ ད ཥ སྟི།
དཔལ་རྡོ་རྗེ་གཞོན་ནུའི་དབུའི་ཕྱོགས་ལགས་སོ། །
ཤེས་བྱ་མ་ལུས་ཡོངས་རྫོགས་ཤིང་། །འཇིག་རྟེན་མུན་པའི་ཚོགས་བཅོམ་པ། །སྒྲོན་མ་གསལ་བའི་ཞབས་ལ་འདུད། །དཔལ་གསུམ་ཉིད་ལྡན་དགྱེས་པ་རྣམ་གཉིས་ཀྱི། །ཆགས་གཉིས་མི་གཏོང་འགྲོ་བའི་དོན་མཛད་པ། །རྡོ་རྗེ་གཞོན་ནུའི་སྐུ་ལ་གཉིས་མེད་མོས། །སློབ་དཔོན་པདྨའི་རྒྱལ་པོ་རྩལ་ཆེན་རྫོགས་པའི་སྐྱེས་བུས། ཕུར་པའི་མན་ངག་གི་རྩ་བ་ངན་སྔགས་བཏོན་པ། ཚིག་ཉུང་ལ་དོན་ཆེ་བ། ཤིན་ཏུ་ཟབ་པའི་མན་ངག་འདི་ལ། སྤྱི་དོན་གསུམ་སྟེ། སྐུ་བསྙེན་པའི་དཀྱིལ་འཁོར་དང་། གསུང་བསྒྲུབ་པའི་དཀྱིལ་འཁོར་དང་། ཐུགས་ཕྲིན་ལས་ཀྱི་དཀྱིལ་འཁོར་རོ། །སྐུ་བསྙེན་པའི་དཀྱིལ་འཁོར་ལ། དོན་བཅུས་བསྟན་ཏེ། དང་པོ་བདེན་པ་བདར་ཞིང་མཚམས་བཅད་པ་དང་། བཤགས་པ་བྱ་བ་དང་། ཏིང་ངེ་འཛིན་རྣམ་གསུམ་སྒོམ་པ་དང་། རྟེན་བསྐྱེད་པ་དང་། བརྟེན་པ་ལྷའི་དཀྱིལ་འཁོར་བསྐྱེད་པ་དང་། ཡེ་ཤེས་ཀྱི་དཀྱིལ་འཁོར་གཞུགས་པ་དང་། དབང་བསྐུར་བ་དང་། མཆོད་པ་འབུལ་བ་དང་། བསྟོད་པ་བྱ་བ་དང་། བསྙེན་པ་བྱ་བའོ། །དོན་དང་པོ་བདེན་པ་བདར་ཞིང་མཚམས་བཅད་པ་ནི། ཆོས་ཉིད་ཀྱི་བདེན་པའོ། །ལན་གསུམ་བརྗོད། གསང་སྔགས་ཀྱི་བྱིན་གྱིས་རླབས་སོ། །སངས་རྒྱས་ཀྱི་མཐུའོ། །ༀ་བཛྲ་ཀཱི་ལི་ཀཱི་ལ་ཡ་སརྦ་བྷིགྷན་བྃ་ཧཱུྃ་ཕཊ྄། ཅེས་བརྗོད་པས། སྐད་ཅིག་གི་ཏིང་ངེ་འཛིན་གྱིས། བདག་ཉིད་བཅོམ་ལྡན་འདས་དཔལ་རྡོ་རྗེ་གཞོན་ནུའི་སྐུར་བསྐྱེད་དོ། །ཞལ་གསུམ་ཕྱག་དྲུག །སྐུ་མདོག་མཐིང་ནག་ཞབས་བཞི་བསྒྲད་པ། ཞལ་གཡས་དཀར། གཡོན་དམར་བ། དབུས་སྐུ་དང་མཐུན་པ། ཕྱག་དྲུག་ཀས་ཕུར་བུ་དྲིལ་ཏེ། དང་པོ་གཉིས་ཀྱིས་ཕུར་པ་དཀར་པོ་དྲིལ་བ། བར་མ་གཉིས་ཀྱིས་དམར་པོ་དྲིལ་བ། ཐ་མ་གཉིས་ཀྱིས་མཐིང་ནག་དྲིལ་བ། རྡོ་རྗེའི་གཤོག་པ་གདེངས་པ། དཔལ་གྱི་ཆས་བརྒྱད་དང་དུར་ཁྲོད་ཀྱི་ཆས་བརྒྱད་དང་ལྡན་པ། མཚམས་རྔམས་གཟི་བྱིན་དང་ལྡན་པ། སྐལ་པའི་མེ་དཔུང་གི་ནང་ན་བཞུགས་པ། སྐད་ཅིག་གིས་གསལ་བར་བསྐྱེད་དོ། །ཕྱོགས་བཅུའི་སངས་རྒྱས་ཐམས་ཅད་བསྡུས་ཏེ་བདག་ལ་ཐིམ་པར་བསྒོམ་མོ། །ཧཱུྃ་རྡོ་རྗེ་གསང་བའི་བཀའ་ལས་ནི། །སྡིག་ཅན་གང་ཞིག་འདའ་བྱེད་པ། །སྟོབས་ཆེན་ཁྲོ་བོ་ཆེན་པོ་བཅུས། །གླད་པ་ཚལ་པ་བརྒྱ་རུ་ཁོས། །ཉོན་ཅིག་བགེགས་དང་ལོག་འདྲེན་ཚོགས། །ང་ཡི་བཀའ་ལ་འདའ་མ་བྱེད། །ཁྲོ་བོ་བཅུའི་སྔགས་དང་དེའི་སྟེང་ལ། ཧཱུྃ་མ་མ་པ་ཤཾ་ཀུ་རུ་མ་སྟཾ་ཉ་ན་ཀ་ར་ཨི་དྷ་ན་དྷ་ཏི་མ་མ་ཀརྨ་ཤྲི་ཀྲཾ་ཀ་ར་ཡེ་ཧཱུྃ་ཕཊ྄། ཅེས་ཚར་གཅིག་བརྗོད་པ་ཙམ་གྱིས། ཐུགས་ཀ་ནས་ཁྲོ་བོ་མཐིང་ནག་གཅེར་བུ་ཕྱག་ན་ཕུར་བུ་བསྣམས་པ་མེ་དཔུང་གི་ནང་ན་བཞུགས་པ་བཅུ་བྱུང་ནས། ཁྲོ་བོ་བཅུར་འཕྲོས་པས། ཕྱོགས་བཅུའི་བགེགས་ཐམས་ཅད་ཆུང་བ་རྣམས་ཆེ་བ་ལ་བསྟིམ་སྟེ། བགེགས་ཀྱི་གཙོ་བོ་ཕྱོགས་སྐྱོངས་བཅུ་ལ་བསྟིམ་ནས། ཁྲོ་བོ་བཅུས་སོ་སོར་བཀུག་ནས། རང་གི་ཕྱོགས་བཞི་མཚམས་བཞི་དང་བརྒྱད། མདུན་རྒྱབ་གཉིས་དང་བཅུར་བཀུག་ནས། ཕྱག་གི་ཕུར་པ་བཏབ། འོག་རྡོ་རྗེའི་བྲག་རི་ལ་ཐལ་བྱུང་བར་བསྒོམ་མོ། །ཕུར་པའི་དབལ་རྩེ་ལ་མེ་འབར་བ་དང་ཕྱོགས་སྐྱོང་བཅུ་ཡང་མེར་ལམ་གྱིས་འབར་བ་དང་། དེ་ལྟར་ཁྲོ་བོ་བཅུའི་སྐུ་ལ་ལྷག་པའི་ཡེ་ཤེས་ཀྱི་མེ་འབར་བ་དང་།༡ ཕྱག་གི་ཕུར་པ་ལ་ལྷག་པ་ཏིང་ངེ་འཛིན་གྱི་མེ་འབར་བ་དང་།༢ ཕྱོགས་སྐྱོང་རྣམས་ཚིག་པ་ལ་རྣམ་རྟོག་ཡེ་ཤེས་སུ་འབར་བའི་མེ་དང་།༣ དེ་གསུམ་འདྲེས་པ་ལ་མེ་རི་འབར་བའི་གུར་དུ་བསྒོམ་མོ། །སྤྱི་དོན་གཉིས་པ་བཤགས་པ་བྱ་བ་ནི། ཐུགས་ཀ་ནས་འོད་ཟེར་འཕྲོས་ཏེ། རྡོ་རྗེ་གཞོན་ནུའི་དཀྱིལ་འཁོར་གཞལ་ཡས་ཁང་དང་བཅས་པ་སྤྱན་དྲངས་ཏེ། བདག་གི་མདུན་དུ་བཞུགས་པར་བསམ་ལ། གཙོ་བོའི་དབུ་གཙུག་ཏུ་པདྨ་ཟླ་བའི་གདན་ལ་བླ་མ་བཞུགས་པར་བསྒོམ་ཞིང་། ཡེ་ཤེས་སྐུ་མཆོག་ཅེས་པའི་བཤགས་པ་བྱ། ཏིང་ངེ་འཛིན་ནི་རང་དང་མདུན་གྱི་དཀྱིལ་འཁོར་བླ་མ་དང་བཅས་པའི་བར་འོད་རྣམ་པ་ལྔས་འབྲེལ་བར་བསམ། ཚིགས་བཅད་ཐོན་ནས་ལྷ་དང་བླ་མས་སྡིག་པ་དག་གོ། །ཉེས་པ་ཚངས་ཞེས་པའི་གསུང་བྱུང་བར་བསྒོམ་ཞིང་འོད་དུ་ཞུ་སྟེ་རང་ཉིད་ལ་ཐིམ་པར་བསམ་པ་ནི། བྱིན་རླབས་བསྡུ་བའོ། །སྤྱི་དོན་གསུམ་པ་ཏིང་ངེ་འཛིན་རྣམ་གསུམ་རིམ་བཞིན་བསྒོམ་པ་ནི། རྡོ་རྗེ་ཁྲོས་པས་ཞེ་སྡང་གཅོད། །ཅེས་པ་དང་། རྡོ་རྗེ་ནི་རྡོ་རྗེ་གཞོན་ནུའོ། །ཁྲོས་པ་ནི་རྃ་ཡྃ་ཁྃ་གསུམ་སྤྲོས། ཞེ་སྡང་ནི་གཟུང་ཡུལ་ཏེ། འདིར་མེ་ཆུ་རླུང་གསུམ་གྱིས་མི་གནས་པར་བྱས་པ་ལ་ནི་གཅོད་ཅེས་བྱའོ། །དེ་ཡང་དང་པོར། བདག་ཉིད་རྡོ་རྗེ་གཞོན་ནུའི་ཐུགས་ཀ་ནས། རྃ་དམར་པོ་སྤྲོས་ཏེ་མེ་བྱུང་བས་འཇིག་རྟེན་གྱི་ཁམས་ཐམས་ཅད་མ་ལུས་པ་བསྲེགས། སླར་མེའི་ལྷག་མ་ཐུགས་ཀ་ན་ཚུར་བསྡུ། ཐུགས་ཀ་ནས་ཡྃ་སྤྲོས་ཏེ་རླུང་བྱུང་ནས། སླར་སྔར་བསྲེགས་པའི་ཐལ་བ་མ་ལུས་པ་འཐོར་བར་བྱས། སླར་རླུང་གི་ལྷག་མ་ཐུགས་ཀ་ནས་ཚུར་བསྡུ། །ཡང་ཐུགས་ཀ་ནས་ཁྃ་སྤྲོས་པས། ཆུ་བྱུང་བས་ལྷག་མ་མ་ལུས་པར་བཀྲུས་ཏེ། ཆུའི་ལྷག་མ་རྣམས་བདག་གི་ཐུགས་ཀར་ཚུར་བསྡུའོ། །དེ་ལྟར་གཅོད་པ་ལ་ནི་མཚོན་ཅེས་བྱ་སྟེ། དཔེར་ན་འཇིག་རྟེན་གྱི་མཚོན་རལ་གྲི་ལ་སོགས་པས་ནི་ཕྱོགས་རེ་རེ་བས་མི་ཆོད་པ་ལ། འདིར་མེ་ཆུ་རླུང་གསུམ་གྱིས་སྣོད་བཅུད་རང་ས་མེད་པར་བྱས་པ་ལ་ནི་མཚོན་ཆེན་ཞེས་བྱའོ། །སྔོན་པོ་ནི་ཅིར་ཡང་མི་འགྱུར་བ་ཡིན་པས་འདིར་བསྲེག་སྦྱངས་རྣམ་གསུམ་གྱིས་གཟུང་ཡུལ་དག་པར་བྱས་པས། བར་དེར་འཛིན་སེམས་ཀྱང་མ་གྲུབ་སྟེ། ཅི་ཡང་མི་དམིགས་པ་སྟོང་པ་ཉིད་དུ་བསྒོམ་པར་བྱའོ། །དེ་ཡང་སྟོང་པ་ཉིད་ཀྱི་ཏིང་ངེ་འཛིན་ནི། ཆོས་ཉིད་ཅི་ཡང་མི་དམིགས་པ་ལས། ཆོས་ཅན་ཅི་ཡང་མི་འགྱུར་བ་སྟེ། དེ་བཞིན་ཉིད་ཀྱི་ཏིང་ངེ་འཛིན་ཅེས་བྱའོ། །འབར་བ་ནི་ཀུན་ཏུ་སྣང་བའི་ཏིང་ངེ་འཛིན་ཏེ། སྟོང་ཉིད་ཀྱི་ངང་ལ་དེ་ལྟར་མ་རྟོགས་པའི་སེམས་ཅན་རྣམས་ལ། སྙིང་རྗེའི་ཉམས་འབར་བའོ། །ནམ་མཁའི་དཀྱིལ་ནས་ཐིག་པ་ཤར་བ་ནི། རྒྱུའི་ཏིང་ངེ་འཛིན་ཏེ། ཆོས་ཉིད་ནམ་མཁའ་ལྟ་བུའི་ངང་ལས། རང་གི་རྣམ་པར་ཤེས་པའི་ངོ་བོ། ཧཱུྃ་མཐིང་ནག་གཅིག་ཐིག་པ་ལྟ་བུ་རང་ཤར་དུ་བྱུང་བའོ། །སྤྱི་དོན་བཞི་པ་བརྟེན་བསྐྱེད་པ་ནི། སྲོག་གི་གོ་རུ་ཤར་བ་དང་། ཞེས་པ་སྟེ། སྲོག་ནི་འབྱུང་བ་ལྔ་ཡིན་ཏེ། འདིར་ཡང་དེ་གནས་སུ་དག་པའི་རྟགས་སུ། འབྱུང་བ་རིམ་བརྩེགས་བསྒོམ་མོ། །དེ་ཡང་། ཧཱུྃ་ལས་ཨེ་ཆད་དེ། འོག་གི་ཕྱོགས་སུ་ཆོས་འབྱུང་གྲུ་གསུམ་པ་ཁ་དོག་མཐིང་ནག་རྒྱ་ཆེ་བ་གཅིག་བསྒོམ་མོ། །ཧཱུྃ་ལས་ཡྃ་ཆད་པ་ལས། རླུང་གི་དཀྱིལ་འཁོར་གཞུའི་དབྱིབས་ཅན་རྒྱ་ཁྱོན་ཆེ་བ་ཆོས་འབྱུང་གི་དཀྱིལ་དུ་བསྒོམ་མོ། །ཧཱུྃ་ལས་རྃ་ཆད་པ་ལས་མེའི་དཀྱིལ་འཁོར་གྲུ་གསུམ་པའོ། །ར་ཆད་པ་ལས་རཀྟ་ཁྲག་གི་རྒྱ་མཚོ་རྦ་རླབས་འཁྲུགས་པ་དབྱིབས་ཟླུམ་པའོ། །མྃ་ཆད་པ་ལ་མྃ་སའི་ས་གཞི་སྟེ། ཤ་ཆེན་གྱི་ཐང་མ་བདལ་བ་དབྱིབས་གྲུ་བཞི་པའོ། །ཀེཾ་ཆད་པ་ལས་ཀེཾ་རུས་ཀྱི་རི་རབ་ནག་པོ་ཁ་ཁྱེར་གྱེན་དུ་ཆེ་བ། བྱ་ཤ་ཟན་མང་པོ་ལྡིང་བ། གཅན་ཁྲག་འཐུང་མང་པོ་འཛེགས་པ། རཀྟ་ཁྲག་གི་ཞམ་ཆུ་འབབ་པ། དབྱིབས་གྲུ་བཞི་པའོ། །ཡང་ཧཱུྃ་ལས་ཧཱུྃ་ཆད་པ་ལས། རི་རབ་ཀྱི་ཁ་ལ་བབ་སྟེ། འོད་དུ་ཞུ་བ་ལས། རྡོ་རྗེ་རྒྱ་གྲམ་དུ་གྱུར་ཏེ། ཤར་གྱི་རྭ་དཀར། ལྷོ་སེར། ནུབ་དམར། བྱང་ལྗང་། ལྟེ་བ་མཐིང་ནག་ཧཱུྃ་གིས་མཚན་པའོ། །ཧཱུྃ་བཛྲ་མ་ཧཱ་རཀྴ་རཀྴ་ཧཱུྃ། ཞེས་བརྗོད་པས། འོད་དུ་ཞུ་བ་ལས། རྡོ་རྗེའི་གུར་ཁང་མཐིང་ནག་རྒྱ་ཁྱོན་ཆེ་བར་གྱུར་ཏོ། །ཡང་ཧཱུྃ་ལས་བྷྲཱུྃ་ཆད་དེ་འོད་དུ་ཞུ་བ་ལས། དུར་ཁྲོད་ཀྱི་གཞལ་ཡས་ཁང་དུ་གྱུར་ཏེ། གྲུ་བཞི་པ་སྒོ་བཞི་པ། ཕྱི་ཐོད་པ་སྐམ་པོ་ལས་བརྩིགས་པ། བར་ར་རི། ནང་ཐོད་རློན་ལས་བརྩིགས་པ། ཤར་འཁོར་ལོས་བརྒྱན་པ། ལྷོར་རིན་པོ་ཆེས་བརྒྱན་པ། ནུབ་པདྨས་བརྒྱན་པ། བྱང་རལ་གྲིས་བརྒྱན་པ། སྟེང་སྤྱི་བསྡུས་རྡོ་རྗེ་རྩེ་དགུ་པའི་བུམ་པར་འཁྱིལ་བ། སྟེང་ཐམས་ཅད་རྡོ་རྗེ་མཐིང་ནག་གི་བརྒྱན་པ། འོག་གཞི་ཨེ་ཁྲོམ་ཉི་ཤུ་རྩ་གཅིག་ལྷ་སྣམ་དང་བཅས་པའོ། །གཞལ་ཡས་ཁང་གི་རྒྱན་ཡང་སྨོན་ལམ་གྱི་ཤུགས་དང་མ་བྲལ་བའམ། གདུལ་བྱའི་བསྐུལ་བ་གསན་པའི་རྟགས་སུ་སྐལ་པའི་ལུང་ནག་འཚུབས་པ། ཡེ་ཤེས་ཀྱི་མེ་རི་ཕྱི་ནང་མེད་པར་འབར་བ། སྤྲུལ་པ་ཕྱོགས་བཅུར་འཕྲོས་པའི་རྟགས་སུ་རྡོ་རྗེ་རྩེ་ལྔའི་ཐོག་མངའ་འཕྲོ་བ། དངོས་པོ་ཐམས་ཅད་སེམས་སུ་རྟོགས་པའི་རྟགས་སུ། ཙིཏྟའི་ཕོལ་ཕྱིང་གིས་བརྒྱན་པ། དུག་གསུམ་གནས་སུ་དག་པའི་རྟགས་སུ། སྦྲུལ་ནག་གི་ཟ་ར་ཚག་གིས་བརྒྱན་པ། ཆོས་ཐམས་ཅད་བདག་མེད་པར་རྟོགས་པའི་རྟགས་སུ། ཞིང་གི་འཕན་གདུགས་ཡོད་པ། ཞི་གནས་ལྷག་མཐོང་ཟུང་དུ་འབྲེལ་བའི་རྟགས་སུ། ཉི་ཟླའི་སྐར་ཁུང་ཡོད་པ། ཐུགས་རྗེས་ཆགས་པ་དང་མ་བྲལ་བའི་རྟགས་སུ། རཀྟའི་ཞམ་ཆུ་འབབ་པ། རྒྱལ་ཆེན་བཞི་ལ་སྒོའི་རུ་བཞི་བྱས་པ། གནམ་ལྕགས་ཀྱི་ཡ་ཐེམ་ཡོད་པ། མ་ཐེམ་ཁྲོ་ཆུ་ལ་བྱས་པ། ལྷ་ཆེན་བརྒྱད་ཀྱིས་ཀ་བ། ཀླུ་ཆེན་བརྒྱད་ཀྱིས་གདུང་མ། གཟའ་དང་རྒྱུ་སྐར་གྱིས་ཁ་བད་བྱས་པ། ཤར་སྒོ་དཀར་བ། ལྷོ་སྒོ་སེར་བ། ནུབ་སྒོ་དམར་བ། བྱང་སྒོ་ལྗང་བ། དེའི་ནང་གི་གདན་ཡང་། དབུས་སུ་རུ་ཏྲ་ཕོ་མོ་དང་། མ་ཧཱ་དེ་བ་ཕོ་མོ་བསྣོལ་བའི་ཞབས་ན་པདྨ་ཟླ་བ་ཉི་མ་བརྩེགས་པའོ། །ཕོའི་མགོ་གཡས་ཁ་སྦུབ། མོ་གན་རྐྱལ་མགོ་གཡོན། རྐང་པ་བསྣོལ་བའོ། །ཨེ་ཁྲམ་ཉི་ཤུ་ལ་ཁྲོ་བོ་བདུའི་གདན་ཉི་མ་བཅུའི་ཐོག་ཏུ་ཕྱོགས་སྐྱོངས་ཀྱི་རོ་ཕོ་མོ་བསྣོལ་བ་ནི། ཤར་བརྒྱ་བྱིན་ཕོ་མོ། དཀར། ཤར་ལྷོ་མེ་ལྷ་ཕོ་མོ། དམར་སེར། ལྷོར་གཤིན་རྗེ་ཕོ་མོ། སྔོན་པོ། ལྷོ་ནུབ་སྲིན་པོ་ཕོ་མོ། དམར་ནག །ནུབ་ཀླུ་ཕོ་མོ། དམར། ནུབ་བྱང་རླུང་ལྷ་ཕོ་མོ། སེར་པོ། བྱང་གནོད་སྦྱིན་ཕོ་མོ། ལྗང་སེར། བྱང་ཤར་དབང་ལྡན་ཕོ་མོ། སེར་པོ། མདུན་ཉི་ཟླ་ཕོ་མོ། དམར་སེར། རྒྱབ་ཏུ་ས་བདག་ཕོ་མོ། དུད་ཀ །བསྒོམ་མོ། །ཁྲ་ཐབས་ཀྱི་གནས་སུ། རོ་རྐྱང་པ་བཅུའོ། །དམ་ཅན་གྱི་གནས་སུ་རོ་མགོ་མེད་པ་བཅུ་གཉིས་བསྒོམ་མོ། །སྤྱི་དོན་ལྔ་པ་བརྟེན་པ་ལྷའི་དཀྱིལ་འཁོར་བསྐྱེད་པ་ལ་བཞི་སྟེ། བདག་རྩ་བའི་དཀྱིལ་འཁོར་དང་། ཕྱོགས་བཅུ་ཁྲོ་བོའི་དཀྱིལ་འཁོར་དང་། ཕུར་པ་སྲས་ཀྱི་དཀྱིལ་འཁོར་དང་། དམ་ཅན་སྲུངས་མའི་དཀྱིལ་འཁོར་རོ། །དེ་ཡང་བདག་རྩ་བའི་དཀྱིལ་འཁོར་ནི། ནམ་མཁའི་ཧཱུྃ་དེ་དབུས་ཀྱི་གདན་ཐོག་ཏུ་བབ་པ་ལས། འོད་ཟེར་ཕྱོགས་བཅུར་འཕྲོས་པས། བསྐུལ་དོན་གཉིས་བྱས། འོད་དུ་ཞུ་བ་ལས། རྡོ་རྗེ་ནག་པོ་རྩེ་དགུ་པ་ལྟེ་བ་ཧཱུྃ་གིས་མཚན་པའོ། །དེ་ལས་འོད་ཟེར་འཕྲོས་བསྐུལ་དོན་གཉིས་བྱས། ཕྱོགས་བཅུའི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་རྒྱུད་བསྐུལ། སེམས་ཅན་གྱི་ལུས་ངག་ཡིད་གསུམ་གྱི་སྒྲིབ་པ་སྦྱངས། སླར་འདུས་པ་ལས། ༀ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ྄། ཅེས་བརྗོད་པས། རྡོ་རྗེ་གཞོན་ནུའི་སྐུར་གྱུར་ཏེ། སྙིང་གི་གོ་རུ་བསྒོམ་པར་བྱ། །ཞེས་པ་ནི། རྡོ་རྗེ་ཧཱུྃ་དང་བཅས་པའོ། །སྙིང་རྗེས་བསྒྲལ་བའི་དམ་ཚིག་ནི། །ཞེས་པ་ནི། འཇིག་རྟེན་པ་བཞིན་ཞེ་སྡང་གིས་བསད་ཅིང་། གཏི་མུག་གིས་མནན་པ་མ་ཡིན་ནོ། །འོད་འཕྲོས་པས་སེམས་ཅན་ཐམས་ཅད་ཀྱི་ལུས་ངག་ཡིད་གསུམ་གྱི་སྒྲིབ་པ་སྦྱངས་ནས། རྡོ་རྗེ་གཞོན་ནུའི་སྐུར་གྱུར་པ་ནི། ཕུང་པོ་རྡོ་རྗེ་གཏམ་བྱས་ནས། །ཞེས་པའོ། །དེ་དག་ཚུར་འདུས་ཏེ། རྡོ་རྗེ་གཞོན་ནུའི་སྐུར་གྱུར་པ་ནི། རྣམ་པར་ཤེས་པ་རྡོ་རྗེ་བསྒོམ། །ཞེས་པའོ། །དེ་ཡང་། དཔལ་རྡོ་རྗེ་གཞོན་ནུ། དབུ་གསུམ། ཕྱག་དྲུག །ཞབས་བཞི། རྡོ་རྗེའི་གཤོག་པ་གདེངས་པ། ཞལ་གཡས་དཀར་བ། གཡོན་དམར་བ། དབུས་མཐིང་ནག་སྐུ་དང་མཐུན་པ། ཕྱག་དྲུག་གི་གཡས་ཀྱི་དང་པོ་ན། ཡེ་ཤེས་ཀྱི་རྡོ་རྗེ་རྩེ་དགུ་པ་བསྣམས་པ། བར་མ་ན་རྩེ་ལྔ་པ། གཡོན་དང་པོ་ན་མེ་དཔུང་། བར་མ་ན་ཁ་ཊྭཱྃ་བསྣམས་པ། ཐ་མ་གཉིས་ན་རི་རབ་ལྟ་བུའི་ཕུར་པ་དྲིལ་བའོ། །དབུ་སྐྲ་ཁམས་ནག་གྱེན་དུ་བརྫེས་པ། དབུ་རེ་རེ་ལ་ཐོད་པ་སྐམ་པོ་ལྔ་ལྔས་བརྒྱན་པ། རིགས་ལྔའི་སངས་རྒྱས་དབུ་ལ་བཞུགས་པ། སྐུ་སྟོད་ལ་གླང་ཆེན་གྱི་ཀོ་རློན། སྐུ་སྨད་ལ་སྟག་གི་ཤམ་ཐབས་བྱས་པ། ཞིང་ལྤགས་ཀྱིས་སྐེད་ཆིངས་བྱས་པ། ཐོད་རློན་ལྔ་བཅུ་རྩ་གཅིག་གི་ཕྲེང་བ་སེ་རལ་ཁར་ཐོགས་པ། སྦྲུལ་དཀར་པོས་དབུ་དང་སྐུ་ལ་བརྒྱན་པ། སེར་པོས་སྙན་ཆ་བྱས་པ། དམར་པོས་གདུའུ་བྱས་པ། ནག་པོས་རྐང་རྒྱན་བྱས་པ། ཞག་གིས་ཟོ་རིས་ཁུར་བ་ལ། རཀྟའི་ཐིག་ལེ་བྲང་དང་ཁ་ལ། ཐལ་བའི་ཚོམ་བུ་ཐལ་གོང་ལ་བརྒྱན་པའོ། །ཡན་ལག་ལ་ཀེང་རུས་ཀྱིས་བརྒྱན་པའོ། །དཔུང་པ་ལ་ཐོད་པ་ར་རི་དང་། ཁྲལ་ཁྲོལ་གྱི་བརྒྱན་པའོ། །ཞབས་གཡས་བརྐྱང་པས་ཐབས་ཆེན་པོས་འགྲོ་བའི་དོན་མཛད་པའོ། །གཡོན་བསྐུམ་པ་ནི་ཤེས་རབ་ཀྱི་དབྱིངས་རྟོགས་ཀྱང་། མྱ་ངན་ལས་འདས་པའི་མཐའ་ལས་མི་གནས་པའོ། །ཡང་ན་གཡས་བསྐུམ་པ་ནི། ཐབས་ཐུགས་རྗེ་ཆེན་པོས་འགྲོ་བའི་དོན་མཛད་ན་ཡང་། ཆོས་ཀྱི་དབྱིངས་ལས་མ་གཡོས་ཤིང་འཁོར་བའི་མཐའ་མ་གོས་པའི་རྟགས་སོ། །གཡོན་བརྐྱང་པ་ནི། ཐུགས་རྗེས་འགྲོ་བའི་དོན་མཛད་ན་ཡང་། ཆོས་ཀྱི་དབྱིངས་ལས་མ་གཡོས་པའི་རྟགས་སོ། །ཡུམ་བསྐྱེད་པ་ཡང་། ལུས་དང་གྲིབ་མའི་ཚུལ་དུ། ཡབ་གྲུབ་ན་ཡུམ་གྲུབ་སྟེ། ཞལ་གཅིག་ཕྱག་གཉིས། གཡས་ཁ་ཊྭཱཾ་ཁ། གཡོན་ཐོད་ཁྲག་རྒྱན་ཆ་ལུགས་རྣམས་ཡབ་དང་འདྲ་བ་ལ། གཟིག་གི་ཤམ་ཐབས་ཅན། གཤོག་པ་མེད་པའོ། །ཡབ་ཀྱི་ཐུགས་ཀར་ཡེ་ཤེས་སེམས་དཔའ་རང་འདྲ་བ། དེའི་ཐུགས་ཀར་རྡོ་རྗེ་ཧཱུྃ་དང་བཅས་པའོ། །ཡུམ་གྱི་ཐུགས་ཀར་བྷནྡྷ། དེའི་ནང་དུ་ཟླ་བའི་སྟེང་དུ་ཧཱུྃ་ལས། ༀ་ཏིཔྟ་ཧ་ཙཀྲ་རུ་ལུ་རུ་ལུ་ཧཱུྃ་བྷྱོ་ཧཱུྃ་གིས་གཡོན་དུ་འཁོར་བའོ། །གཉིས་པ་ཕྱོགས་བཅུ་ཁྲོ་བོའི་དཀྱིལ་འཁོར་བསྐྱེད་པ་ནི། ཡབ་ཡུམ་གྱི་མཁའ་གསང་བྱིན་གྱིས་རླབས་ཏེ། ཡབ་ཀྱི་གསང་གནས་སུ་མ་ལས་ཉི་མའི་སྟེང་དུ། རྡོ་རྗེ་ནག་པོ་རྩེ་དགུ་པའི་ལྟེ་བ་ལ་ཧཱུྃ། ཕྱི་རྩེ་ལ་ཕཊ྄། ནང་རྩེ་ལ་ༀ། ཡུམ་གྱི་གསང་གནས་སུ། པྃ་ལས་པདྨ་དམར་པོ་འདབ་མ་བརྒྱད་པའི་ཟེའུ་འབྲུ་ལ་ཨྃ་དམར་པོས་མཚན་པའོ། །དེ་ནས་འོད་ཟེར་འཕྲོས་པས། ཕྱོགས་བཅུའི་སངས་རྒྱས་ཐམས་ཅད་བསྡུས་ནས་རང་གི་ཞལ་དུ་ཞུགས། སྐུའི་དབྱིབ་ཏུ་བརྒྱུད་ཡབ་ཡུམ་གཉིས་མ་ཆགས་ཐབས་ཀྱི་རོལ་པ་མཛད་པས། ཡུམ་གྱི་མཁའ་ལ་ཕབ་སྟེ། ཧཱུྃ་སྒྲིལ་མ་བཅུར་གྱུར་ཏེ། ཕྱིར་འཕྲོས་པས། ཕྱོགས་སྐྱོངས་བཅུའི་གདན་སྟེང་དུ་བབ་པ་ལས། ༀ་བཛྲ་ཀྲོ་དྷ་ཧཱུྃ་ཀ་ར་ཧཱུྃ། གརྫ་གརྫ་ཧཱུྃ་ཕཊ྄། ཅེས་བརྗོད་པས། མདུན་གྱི་ཨེ་ཁྲམ་གྱི་སྟེང་དུ་ཁྲོ་བོ་ཆེན་པོ་ཧཱུྃ་མཛད་དང་། ཡུམ་རྡོ་རྗེ་སྒྲ་འབྱིན་མ། དེའི་མཆན་གཡོན་ཕྱོགས་སུ་སྤྲུལ་པའི་ཕྲ་མེན་མ། ཕག་གི་མགོ་ཅན་དང་། སྨྲིག་བུའི་མགོ་ཅན་ནོ། །ༀ་བཛྲ་ཀྲོ་དྷ་བི་ཛ་ཡ་ཧཱུྃ། ཧ་ན་ཧ་ན་ཧཱུྃ་ཕཊ྄། ཤར་ཕྱོགས་སུ་ཁྲོ་བོ་ཆེན་པོ་རྣམ་པར་རྒྱལ་བ་དང་། ཡུམ་རྡོ་རྗེ་སྙེམས་མ་སྤྲུལ་པ་སྟག་དང་བྱ་རྒོད་ཀྱི་མགོ་ཅན་ནོ། །ༀ་བཛྲ་ཀྲོ་དྷ་ནི་ལ་དཎྜ་ཧཱུྃ། ད་ཧ་ད་ཧ་ཧཱུྃ་ཕཊ྄། ཤར་ལྷོ་ཁྲོ་བོ་ཆེན་པོ་དབྱུག་སྔོན་ཅན་དང་། ཡུམ་རྡོ་རྗེ་སྡེར་མོ། སྤྲུལ་པ་གཡག་དང་བྱ་རོག་གི་མགོ་ཅན་ནོ། །ༀ་བཛྲ་ཀྲོ་དྷ་ཡ་མནྟ་ཀ་ཧཱུྃ། པ་ཙ་པ་ཙ་ཧཱུྃ་ཕཊ྄། ལྷོར་ཁྲོ་བོ་ཆེན་པོ་གཤིན་རྗེ་གཤེད་པོ་དང་། ཡུམ་དུར་ཁྲོད་བདག་མོ། སྤྲུལ་པ་ཤ་བ་དང་འུག་པའི་མགོ་ཅན་ནོ། །ༀ་བཛྲ་ཀྲོ་དྷ་ཨཱརྱ་ཨ་ཙ་ལ་ཧཱུྃ། བྷནྡྷ་བྷནྡྷ་ཧཱུྃ་ཕཊ྄། ལྷོ་ནུབ་ཏུ་ཁྲོ་བོ་ཆེན་པོ་མི་གཡོ་མགོན་པོ་དང་། ཡུམ་རྡོ་རྗེ་གཏུམ་ཁུང་མ། སྤྲུལ་པ་གཟིག་དང་ཁྭ་ཏའི་མགོ་ཅན་ནོ། །ༀ་བཛྲ་ཀྲོ་དྷ་ཧ་ཡ་གྷྲྀ་ཝ་ཧཱུྃ། ཧུ་ལུ་ཧུ་ལུ་ཧཱུྃ་ཕཊ྄། ནུབ་ཏུ་ཁྲོ་བོ་ཆེན་པོ་རྟ་མགྲིན་དང་། ཡུམ་རྡོ་རྗེ་གཏུམ་མོ། །སྤྲུལ་པ་བྱི་ལ་དང་པུ་ཤུད་ཀྱི་མགོ་ཅན་ནོ། །ༀ་བཛྲ་ཀྲོ་དྷ་ཧ་ཨ་པ་ར་ཙིཏྟ་ཧཱུྃ། ཏིཥྛ་ཏིཥྛ་ཧཱུྃ་ཕཊ྄། ནུབ་བྱང་དུ་ཁྲོ་བོ་ཆེན་པོ་གཞན་གྱིས་མི་ཐུབ་པ་དང་། ཡུམ་རྡོ་རྗེ་མདའ་སྙེམས་མ། སྤྲུལ་པ་སྤྱང་ཀི་དང་ཁྲའི་མགོ་ཅན་ནོ། །ༀ་བཛྲ་ཀྲོ་དྷ་ཨ་མྲྀ་ཏ་ཀུནྜ་ལི་ཧཱུྃ། ཚིནྡྷ་ཚིནྡྷ་ཧཱུྃ་ཕཊ྄། བྱང་དུ་ཁྲོ་བོ་ཆེན་པོ་བདུད་རྩི་འཁྱིལ་པ་དང་། ཡུམ་རྡོ་རྗེ་རླུང་འབྱིན་མ། སྤྲུལ་པ་སེང་གེ་དང་ཕ་ཝང་གི་མགོ་ཅན་ནོ། །ༀ་བཛྲ་ཀྲོ་དྷ་ཏྲེ་ལོ་ཀྱ་བི་ཛ་ཡ་ཧཱུྃ། བྷིནྡྷ་བྷིནྡྷ་ཧཱུྃ་ཕཊ྄། བྱང་ཤར་དུ་ཁྲོ་བོ་ཆེན་པོ་ཁམས་གསུམ་རྣམ་པར་རྒྱལ་བ་དང་། ཡུམ་རྡོ་རྗེ་གསོད་བྱེད་མ། སྤྲུལ་པ་དོམ་དང་སྲེ་མོང་གི་མགོ་ཅན་ནོ། །ༀ་བཛྲ་ཀྲོ་དྷ་མ་ཧཱ་བ་ལ་ཧཱུྃ། སྥོ་ཊ་སྥོ་ཊ་ཧཱུྃ་ཕཊ྄། ནུབ་ཏུ་ཁྲོ་བོ་ཆེན་པོ་སྟོབས་པོ་ཆེ་དང་། ཡུམ་རྡོ་རྗེ་བསྐུལ་བྱེད་མ། སྤྲུལ་པ་ཐུགས་ཀར་ཧཱུྃ་ལས་སོ་སོའི་སྔགས་ཀྱིས་བསྐོར་བའོ། །ཁྲ་ཐབས་ཡབ་ནི་རང་རང་གི་གཙོ་བོ་ལ་གཟིགས། ཡུམ་ནི་འདྲ་སྟེ་ཡབ་ལ་གཟིགས། མཆན། དྲེད་དང་བྱི་བའི་མགོ་ཅན་ནོ། །ཁྲོ་བོ་བཅུ་ཡང་ཀུན་འདྲ་བ་ལ། ཞལ་གཅིག་ཕྱག་གཉིས་སྐུ་མདོག་མཐིང་ནག །ཕྱག་ན་ཕུར་པ་དྲིལ་བ། ཞབས་གཉིས་བརྐྱང་བསྐུམས་ཀྱི་ཕྱོགས་སྐྱོངས་ལ་བརྫིས་པ། རྡོ་རྗེའི་གཤོག་པ་དང་རྒྱན་རྣམས་ནི་གཙོ་བོ་དང་མཐུན་པ། ཡུམ་ཐམས་ཅད་ནི་འཁོར་ལོ་རྒྱས་འདེབས་མ་དང་མཐུན་ནོ། །སྤྲུལ་པའི་ཁྲ་ཐབས་ནི་ཀུན་སྐུ་མདོག་མཐིང་ནག་མགོ་བརྙན་ཅན། ཕྱག་གཉིས་པའོ། །སྟག་མགོ་ཅན་ལ་སོགས་པའི་ཡབ་རྣམས་ཀྱིས་ཕྱག་གཡས་ན་རང་གི་མགོ་བརྙན་དང་མཐུན་པའི་སེམས་ཅན་རེ་རེ་ཁ་རུ་བསྣམས་པའོ། །གཡོན་པ་རྣམས་ཀྱིས་ཕུར་པ་དྲིལ་བ། བྱ་མགོ་ཅན་རྣམས་ཀྱིས་ཕྱག་གཉིས་ཀས་རང་གི་མགོ་བརྙན་དང་མཐུན་པའི་བྱ་རེ་རེ་བསྣམས་པའོ། །སྐུ་སྟོད་ལ་ཆུ་སྲིན་གྱི་སྟོད་གཡོག་བྱས་པའི། ཁ་གཉིས་ནས་ལག་པ་གཉིས་ཕྱིར་ཕྱུངས་པའོ། །ཞིང་ལྤགས་ཀྱི་རྐེད་ཆིངས་དང་། སྟག་ལྤགས་ཀྱི་ཤམ་ཐབས་དང་། དབུ་ལ་ཐོད་རློན་གསུམ་གསུམ་གྱིས་བརྒྱན་ཅིང་། ཡན་ལག་དང་སྐུ་ལ་སྤྲུལ་གྱིས་བརྒྱན་པའོ། །ཕུར་པ་སྲས་ཀྱི་དཀྱིལ་འཁོར་ནི། ༀ་བཛྲ་ཀཱི་ལི་ཀཱི་ལ་ཡ་སརྦ་བྷིགྣན་བྃ་ཧཱུྃ་ཕཊ྄། ཅེས་བརྗོད་པ་ཙམ་གྱིས། ཡང་གཙོ་བོ་ཡབ་ཡུམ་གྱི་གསང་གནས་ནས། ཧཱུྃ་ཉི་ཤུ་རྩ་གཅིག་སྤྲོས་ཏེ། གྲུ་གསུམ་གྱི་ཁ་ལ་ཕོག །ངོས་གསུམ་དུ་བདུན་བདུན་འོད་དུ་འོད་དུ་ཞུ་བ་ལས། སྲས་མཆོག་ཞལ་གཅིག་ཕྱག་གཉིས་པ། སྐུ་མདོག་མཐིང་ནག་རྒྱན་མེད་པ། ཕྱག་ན་ཕུར་པ་དྲིལ་བ། དབུ་སྐྲ་གྱེན་དུ་བརྫེས་པ། མ་བཅིང་པ། ལྟེ་བ་མན་ཆད་གནམ་ལྕགས་ཀྱི་ཕུར་པ་དམར་ཟང་ངེ་བ་འདུག་པའོ། །དམ་ཅན་སྲུང་མའི་དཀྱིལ་འཁོར་ནི། ཤྭ་ན་མུ་ཀ་ཛ་ཛ། ཞེས་བརྗོད་པ་ཙམ་གྱིས། ཤར་སྟོད་ན་ལྕགས་ཀྱི་སྤྱང་མོ་མགོ་དགུ་པ། སྤྱན་ནས་མེ་འབར་བ། ཤངས་ནས་དུད་པ་འཐུལ་བ། ཁ་རླང་དང་ཁ་ཆུ་ལ་ཐོག་དང་སེར་བའི་གྲུ་ཆར་འབེབ་པ། བ་སྤུའི་བུ་ག་ནས་དེ་འདྲ་བའི་ཕོ་ཉ་འབུམ་ཕྲག་འཕྲོ་བ། བཀའ་ལས་འདའ་བ་རྣམས་བརླག་པར་མཛད་པ་གཅིག་བསྒོམ་མོ། །ཀུ་ཀུ་ར་མུ་ཀ་ཛ་ཛ། ལྷོ་སྟོད་དུ་ལྕགས་ཀྱི་ཁྱི་མོ་རྐང་གསུམ་མ། ལྕགས་ཀྱི་མོན་མོ་ནག་མོས་ཞོན་པ། གཡས་ན་ཕུར་པ་གཡོན་ན་ཐོད་ཁྲག་བསྣམས་པ། སྲི་ལ་མུ་ཀ་ཛ་ཛ། ནུབ་སྟོད་དུ་ཟངས་ཀྱི་འཕར་བ་ལྕེ་བརྒྱད་པ། སྤྱན་ནས་མེ་འབར་བ། ཤངས་ནས་རླུང་འཚུབ་པའོ། །ཁ་རླང་དང་ཁ་ཆུ་ལ་དེ་འདྲ་བའི་ཕོ་ཉ་འབུམ་ཕྲག་འཕྲོ་བར་བསྒོམ་མོ། །སྲི་ཝ་མུ་ཀ་ཛ་ཛ། བྱང་སྟོད་དུ་ཟངས་ཀྱི་ཝ་མོ་རྐང་གསུམ་མ། ཟངས་ཀྱི་མོན་མོ་ནག་མོས་ཞོན་པ། གཡས་ན་རྡོ་རྗེ། གཡོན་ན་ཞགས་པ་བསྣམས་པའོ། །བསེ་མོ་བཞི་ནི། ཀཾ་ཀ་ད་རི་ཛ་ཛ། ཀུ་མ་ད་རི་ཛ་ཛ། ཤུ་ལ་ད་རི་ཛ་ཛ། ཙ་མུན་ད་རི་ཛ་ཛ། ཞེས་བརྗོད་པ་ཙམ་གྱིས། བུད་མེད་དམར་པོ་བསེའི་ཁྲབ་གྱོན་པ། དར་ནག་གི་ཅོད་པན་འཕུར་བ། གསེར་གྱི་རྣ་ཆ་ཅན། དབུ་ལ་རྡོ་རྗེ་རྩེ་གསུམ་པ་རེ་རེ་ཡོད་པ། ཕྱག་གཡས་པ་བཞིན་ཕུར་པ་བཞི་བསྣམས་པ། གཡོན་པ་བཞི་ན་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་བཞི་བསྣམས་པ། ཤར་གྱིས་དེས་བདུད་རྟ་ནག་པོ་ཞོན་པ། ལྷོའི་དེས་གཟའ་རྟ་སེར་པོ། ནུབ་ཀྱི་དེས་བཙན་རྟ་དམར་པོ། བྱང་གི་དེས་ཀླུ་རྟ་ལྗང་ཀུ་ལ་ཞོན་པ་བཞི་བསྐྱེད་དོ། །རེ་མ་ཏི་བཞི་ནི། རེ་མ་ཛུ་ཛ་ཛ། རེ་མ་ཏི་ཛ་ཛ། རེ་མ་ཛ་ཛ་ཛ། རེ་མ་ཛི་ཛ་ཛ། ཞེས་བརྗོད་པ་ཙམ་གྱིས། བུད་མེད་ཁྲོ་མོ་ནག་མོ་ཞལ་གཅིག་ཕྱག་གཉིས། གཡས་བཞི་ན་རལ་གྲི་གཡོན་བཞིན་ཐོད་ཁྲག་ཐོགས་པ། དར་ནག་གི་གོས་སུ་གྱོན་པ། ཐོད་ཕྲེང་ས་ལ་བཤལ་བ། རལ་པ་ཏིང་རྫབས་སུ་ཡོད་པ། དྲེལ་ནག་པོ་ལ་ཞོན་པ་བཞི། ཤར་སྨད། ལྷོ་སྨད། ནུབ་སྨད། བྱང་སྨད་བཞིར་བསྐྱེད་དོ། །གཞལ་ཡས་ཁང་གི་ཕྱི་རོལ། རྡོ་རྗེ་རྭ་བའི་ནང་དུ། བདུད་བཞི གིང་བཞི། ཤན་པ་བཞི། བསེའི་སྐྱེས་བུ་གདུག་པ་ཅན་བཞི། བློན་པོ་བཞི། འབྱུང་པོ་སེར་པོ་སྣ་ཡོན་དང་ཉི་ཤུ་རྩ་གཅིག་གིས་འཁོར་བར་ཡོད་པར་བསྒོམ་མོ། །སྤྱི་དོན་དྲུག་པ་ཡེ་ཤེས་ཀྱི་དཀྱིལ་འཁོར་གཞུགས་པ་ནི། འཕྱོང་དྲུག་གི་སྒོ་ནས་སྤྱན་དྲང་སྟེ། ཧཱུྃ་ཡེ་ཤེས་ཕུར་བུ་བསྒྲུབ་པ་དང་། དབང་དང་དངོས་གྲུབ་བླང་བའི་ཕྱིར། །དམ་ཚིག་ཆེན་པོ་གཤེགས་སུ་གསོལ། །རྡོ་རྗེ་གཞོན་ནུ་ཡབ་ཡུམ་གཤེགས་ནས་ཀྱང་། །རྟགས་དང་མཚན་མ་བསྟན་པ་དང་། །ཀཱི་ལ་ཡ་ཡི་དངོས་གྲུབ་སྩོལ། །ཧཱུྃ་ཡེ་ཤེས་ཕུར་བུ་བསྒྲུབ་པ་དང་། །དབང་དང་དངོས་གྲུབ་བླང་བའི་ཕྱིར། །སྤྲུལ་པ་ཆེན་པོ་གཤེགས་སུ་གསོལ། །ཁྲོ་རྒྱལ་ཡབ་ཡུམ་གཤེགས་ནས་ཀྱང་། །རྟགས་དང་མཚན་མ་བསྟན་པ་དང་། །ཀཱི་ལ་ཡའི་དངོས་གྲུབ་སྩོལ། །ཧཱུྃ་ཡེ་ཤེས་ཕུར་བུ་བསྒྲུབ་པ་དང་། །དབང་དང་དངོས་གྲུབ་བླང་བའི་ཕྱིར། །ཕྱག་བརྙན་ཆེན་པོ་གཤེགས་སུ་གསོལ། །ཁྲ་ཐབས་ཉི་ཤུ་གཤེགས་ནས་ཀྱང་། །རྟགས་དང་མཚན་མ་བསྟན་པ་དང་། །ཀཱི་ལ་ཡ་ཡི་དངོས་གྲུབ་སྩོལ། །ཧཱུྃ་སྲིད་པའི་ཕུར་བུ་བསྒྲུབ་པ་དང་། །དབང་དང་དངོས་གྲུབ་བླང་བའི་ཕྱིར། །ཤྭ་ན་མུ་ཁ་གཤེགས་སུ་གསོལ། །ཤྭ་ན་མཆེད་བཞི་གཤེགས་ནས་ཀྱང་། །རྟགས་དང་མཚན་མ་བསྟན་པ་དང་། །ཀཱི་ལ་ཡའི་དངོས་གྲུབ་སྩོལ། །ཧཱུྃ་སྲིད་པའི་ཕུར་བུ་བསྒྲུབ་པ་དང་། །དབང་དང་དངོས་གྲུབ་བླང་བའི་ཕྱིར། །ས་བདག་ཆེན་མོ་གཤེགས་སུ་གསོལ། །བསེ་མོ་མཆེད་བཞི་གཤེགས་ནས་ཀྱང་། །རྟགས་དང་མཚན་མ་བསྟན་པ་དང་། །ཀཱི་ལ་ཡ་ཡི་དངོས་གྲུབ་སྩོལ། །ཧཱུྃ་སྲིད་པའི་ཕུར་བུ་བསྒྲུབ་པ་དང་། །དབང་དང་དངོས་གྲུབ་བླང་བའི་ཕྱིར། །བདག་ཉིད་ཆེན་མོ་གཤེགས་སུ་གསོལ། །རེ་ཏི་མཆེད་བཞི་གཤེགས་ནས་ཀྱང་། །རྟགས་དང་མཚན་མ་བསྟན་པ་དང་། །ཀཱི་ལ་ཡའི་དངོས་གྲུབ་སྩོལ། །ཧཱུྃ་སྲིད་པའི་ཕུར་བུ་བསྒྲུབ་པ་དང་། །དབང་དང་དངོས་གྲུབ་བླང་བའི་ཕྱིར། །མཐུ་རྩལ་འབྱུང་བ་གཤེགས་སུ་གསོལ། །དྲེགས་པ་ཉི་ཤུ་རྩ་གཅིག་གཤེགས་ནས་ཀྱང་། །རྟགས་དང་མཚན་མ་བསྟན་པ་དང་། །ཀཱི་ལ་ཡའི་དངོས་གྲུབ་སྩོལ། །ཅེས་འདིར་བསྐྱེད་པའི་དཀྱིལ་འཁོར་འདྲ་བ་གཅིག་བྱོན་ནས་ཐིམ་པར་བསམ་མོ། །བདུན་པ་དབང་བསྐུར་བ་ནི། རང་གི་ཐུགས་ཀའི་འོད་ཀྱིས་ཕྱོགས་བཅུའི་སངས་རྒྱས་ཐམས་ཅད་བསྡུས་ནས། ཀུན་ཀྱང་རྡོ་རྗེ་གཞོན་ནུ་འདྲ་བས་ནམ་མཁའ་གང་བར་བསམ་མོ། །དེ་ནས། ཧཱུྃ་རྡོ་རྗེ་གཞོན་ནུའི་རིག་འཛིན་རྣམས། །སྲིད་པ་རྡོ་རྗེ་གྲུབ་མཛོད་ཅིག །སྲིད་པ་རྡོ་རྗེ་ཕུར་པའི་ལྷ། །ཡེ་ཤེས་ཁྲོ་བོ་གྲུབ་པར་མཛོད། །ཅེས་གསོལ་བ་བཏབ་པས། མདུན་གྱི་དེ་རྣམས་ཀྱིས། སངས་རྒྱས་ཀུན་གྱི་ཡེ་ཤེས་སྐུ། །ངང་ཉིད་རྡོ་རྗེ་ཆོས་དབྱིངས་ལ། །འབར་བའི་ཁྲོ་བོ་མི་བཟད་པ། །སྐུ་ཡི་དབྱིག་ཏུ་བདག་བསྐྱེད་ཅིག །ཅེས་བརྗོད་པར་བསམ་ལ། མདུན་གྱི་དེ་དག་གི་ཐུགས་ཀ་ནས་ༀ་དཀར་པོ་བྱུང་། བདག་གི་སྤྱི་བོར་ཐིམ་སྐུའི་དབང་ཐོབ་པར་བསམ། ད་ལྟ་ནས་ལུས་ཀྱི་གཡོ་འགུལ་ཅི་བྱས་ཀྱང་འགྲོ་བ་སྒྲོལ་བའི་ནུས་པ་དང་ལྡན་པར་བསམ་མོ། །སངས་རྒྱས་པའི་དུས་སུ་མཚན་བཟང་པོ་སུམ་ཅུ་རྩ་གཉིས་དཔེ་བྱད་བཟང་པོ་བརྒྱད་ཅུ་ཐོབ་པར་བསམ་མོ། །སངས་རྒྱས་ཀུན་གྱི་ཡེ་ཤེས་གསུང་། །ངང་ཉིད་རྡོ་རྗེ་ཆོས་དབྱིངས་ལ། །འབར་བའི་ཁྲོ་བོ་མི་བཟད་པ། །གསུང་གི་དབྱིག་ཏུ་བདག་བསྐྱེད་ཅིག །ཅེས་པས། ཨཱཿདམར་པོ་བདག་གི་མགྲིན་པར་ཐིམ། གསུང་གི་དབང་ཐོབ་པར་བསམ། ད་ལྟ་ནས་ངག་གི་བཟླས་བརྗོད་ཅི་བྱས་ཀྱང་། འགྲོ་བ་སྒྲོལ་བའི་ནུས་པ་དང་ལྡན་པར་བསམ། སངས་རྒྱས་པའི་དུས་སུ་གསུང་དབྱངས་ཡན་ལག་དྲུག་ཅུ་ལ་དབང་ཐོབ་པར་བསམ། སངས་རྒྱས་ཀུན་གྱི་ཡེ་ཤེས་ཐུགས། །ངང་ཉིད་རྡོ་རྗེ་ཆོས་དབྱིངས་ལ། །འབར་བའི་ཁྲོ་བོ་མི་བཟད་པ། །ཐུགས་ཀྱི་དབྱིག་ཏུ་བདག་བསྐྱེད་ཅིག །ཅེས་པས། ཧཱུྃ་མཐིང་ནག་བདག་གི་ཐུགས་ཀར་ཐིམ། ཐུགས་ཀྱི་དབང་ཐོབ་པར་བསམ། ད་ལྟ་ནས་ཏིང་ངེ་འཛིན་ཇི་ལྟར་ན་ཡང་འགྲོ་བ་སྒྲོལ་བའི་ནུས་པ་དང་ལྡན་པར་བསམ་མོ། །སངས་རྒྱས་པའི་དུས་སུ་ཏིང་ངེ་འཛིན་གྱི་སྒོ་འབུམ་ཕྲག་དུ་མ་ལ་དབང་ཐོབ་པར་བསམ། ཐབས་ཀྱི་སྤྱོད་པས་འགྲོ་དོན་དུ། །བྱམས་དང་སྙིང་རྗེ་གང་འདལ་བ། །སངས་རྒྱས་ཡོན་ཏན་རྫོགས་མཛད་ནས། །དབང་དང་བྱིན་རླབས་བདག་སྩོལ་ཅིག །ཅེས་བརྗོད་པས། སྭཱ་སེར་པོ་བྱུང་བས་བདག་གི་ལྟེ་བར་ཐིམ། ཡོན་ཏན་གྱི་དབང་ཐོབ་པར་བསམ། ད་ལྟ་ནས་ཚེ་རིང་ནད་མེད་བཀྲ་ཤིས་ལོངས་སྤྱོད་འཕེལ་བ་ལ་སོགས་པའོ། །སངས་རྒྱས་པའི་དུས་སུ་བདེ་བར་གཤེགས་པའི་ཡོན་ཏན་བརྒྱ་བཞི་བཅུ་ལ་མངའ་བརྙེས་པའོ། །ཐབས་ཀྱི་སྤྱོད་པས་འགྲོ་དོན་དུ། །བྱམས་དང་སྙིང་རྗེ་གང་འདུལ་བ། །སངས་རྒྱས་ཕྲིན་ལས་རྫོགས་མཛད་ནས། །དབང་དང་བྱིན་རླབས་བདག་སྩོལ་ཅིག །ཧཱ་ལྗང་ཀུ་བྱུང་བས་བདག་གི་གསང་གནས་སུ་ཐིམ། ཕྲིན་ལས་ཀྱི་དབང་ཐོབ་པར་བསམ། ད་ལྟ་ནས་ཕྲིན་ལས་རྣམ་བཞི་ལྷུན་གྱི་གྲུབ། སངས་རྒྱས་པའི་དུས་སུ་བདེ་བར་གཤེགས་པའི་ཐུགས་རྗེ་ཕྲིན་ལས་ཐམས་ཅད་ལ་མངའ་བརྙེས་པར་བསྒོམ་མོ། །དེ་ནས་རྡོ་རྗེ་གཞོན་ནུའི་ལྷ་ཚོགས་བདག་ལ་བསྟིམ་མོ། །སྤྱི་དོན་བརྒྱད་པ་མཆོད་པ་ལ་གསུམ་སྟེ། རཀྟ་དམར་གྱི་མཆོད་པ་དང་། བྷ་ལིང་གཏོར་མའི་མཆོད་པ་དང་། བདུད་རྩི་སྨན་གྱི་མཆོད་པ་དང་གསུམ་ལས། དང་པོ་ནི། ཧཱུྃ་དམ་ཚིག་ཆེན་པོའི་དུས་ལ་བབ། །རཀྟ་དམར་གྱི་མཆོད་པ་བཞེས། །སྤྲུལ་པ་ཆེན་པོའི་དུས་ལ་བབ། །རཀྟ་དམར་གྱི་མཆོད་པ་བཞེས། །ཕྱག་བརྙན་ཆེན་པོའི་དུས་ལ་བབ། །རཀྟ་དམར་གྱི་མཆོད་པ་བཞེས། །ཤྭ་ན་མུ་ཀའི་དུས་ལ་བབ། །རཀྟ་དམར་གྱི་མཆོད་པ་བཞེས། །ས་བདག་ཆེན་པོ་དུས་ལ་བབ། །རཀྟ་དམར་གྱི་མཆོད་པ་བཞེས། །བདག་ཉིད་ཆེན་པོའི་དུས་ལ་བབ། །རཀྟ་དམར་གྱི་མཆོད་པ་བཞེས། །ཁྱེད་ཀྱི་དམ་ཚིག་དུས་ལ་བབ། །རཀྟ་དམར་གྱི་མཆོད་པ་བཞེས། །མཐུ་རྩལ་ཕྱུངས་བའི་དུས་ལ་བབ། །རཀྟ་དམར་གྱི་མཆོད་པ་བཞེས། །ༀ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ྄། ཏིཔྟ་ཙཀྲ། མ་ཧཱ་རཀྟ་ལ་ཁ་རཾ་ཁཱ་ཧི། ༀ་བཛྲ་ཀྲོ་དྷ་ཧཱུྃ་ཀ་ར་ཧཱུྃ། གརྫ་གརྫ་ཧཱུྃ་ཕཊ྄། མ་ཧཱ་རཀྟ་ལ་ཁ་རཾ་ཁཱ་ཧི། ༀ་བཛྲ་ཀྲོ་དྷ་བི་ཛ་ཡ་ཧཱུྃ། ཧ་ན་ཧ་ན་ཧཱུྃ་ཕཊ྄། མ་ཧཱ་རཀྟ་ལ་ཁ་རཾ་ཁཱ་ཧི། ༀ་བཛྲ་ཀྲོ་དྷ་ནི་ལ་དཎྜ་ཧཱུྃ། ད་ཧ་ད་ཧ་ཧཱུྃ་ཕཊ྄། མ་ཧཱ་རཀྟ་ལ་ཁ་རཾ་ཁཱ་ཧི། ༀ་བཛྲ་ཀྲོ་དྷ་ཡ་མནྟ་ཀ་ཧཱུྃ། པ་ཙ་པ་ཙ་ཧཱུྃ་ཕཊ྄། མ་ཧཱ་རཀྟ་ལ་ཁ་རཾ་ཁཱ་ཧི། ༀ་བཛྲ་ཀྲོ་དྷ་ཨཱརྱ་ཨ་ཙ་ལ་ཧཱུྃ། བྷནྡྷ་བྷནྡྷ་ཧཱུྃ་ཕཊ྄། མ་ཧཱ་རཀྟ་ལ་ཁ་རཾ་ཁཱ་ཧི། ༀ་བཛྲ་ཀྲོ་དྷ་ཧྱ་གྲཱྀ་ཝ་ཧཱུྃ། ཧུ་ལུ་ཧུ་ལུ་ཧཱུྃ་ཕཊ྄། མ་ཧཱ་རཀྟ་ལ་ཁ་རཾ་ཁཱ་ཧི། ༀ་བཛྲ་ཀྲོ་དྷ་ཨ་པ་རཱ་ཙིཏྟ་ཧཱུྃ། ཏིཥྛ་ཏིཥྛ་ཧཱུྃ་ཕཊ྄། མ་ཧཱ་རཀྟ་ལ་ཁ་རཾ་ཁཱ་ཧི། ༀ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལི་ཧཱུྃ། ཚིནྡྷ་ཚིནྡྷ་ཧཱུྃ་ཕཊ྄། མ་ཧཱ་རཀྟ་ལ་ཁ་རཾ་ཁཱ་ཧི། ༀ་བཛྲ་ཀྲོ་དྷ་ཏྲཻ་ལོ་ཀྱ་བི་ཛ་ཡ་ཧཱུྃ། བིནྡྷ་བིནྡྷ་ཧཱུྃ་ཕཊ྄། མ་ཧཱ་རཀྟ་ལ་ཁ་རཾ་ཁཱ་ཧི། ༀ་བཛྲ་ཀྲོ་དྷ་མ་ཧཱ་བ་ལ་ཧཱུྃ། སྥོ་ཊ་སྥོ་ཊ་ཧཱུྃ་ཕཊ྄། མ་ཧཱ་རཀྟ་ལ་ཁ་རཾ་ཁཱ་ཧི། ཤྭ་ན་མུ་ཀ་ཛ་ཛ། མ་ཧཱ་རཀྟ་ལ་ཁ་རཾ་ཁཱ་ཧི། ཀུ་ཀུ་ར་མུ་ཀ་ཛ་ཛ། མ་ཧཱ་རཀྟ་ལ་ཁ་རཾ་ཁཱ་ཧི། སྲི་ལ་མུ་ཀ་ཛ་ཛ། མ་ཧཱ་རཀྟ་ལ་ཁ་རཾ་ཁཱ་ཧི། སྲི་ཝ་མུ་ཀ་ཛ་ཛ། མ་ཧཱ་རཀྟ་ལ་ཁ་རཾ་ཁཱ་ཧི། ཀཾ་ཀ་ད་རི་ཛ་ཛ། མ་ཧཱ་རཀྟ་ལ་ཁ་རཾ་ཁཱ་ཧི། ཀུ་མ་ད་རི་ཛ་ཛ། མ་ཧཱ་རཀྟ་ལ་ཁ་རཾ་ཁཱ་ཧི། ཤུ་ལ་ད་རི་ཛ་ཛ། མ་ཧཱ་རཀྟ་ལ་ཁ་རཾ་ཁཱ་ཧི། ཙ་མུན་ད་རི་ཛ་ཛ། མ་ཧཱ་རཀྟ་ལ་ཁ་རཾ་ཁཱ་ཧི། རེ་མ་ཛུ་ཛ་ཛ། མ་ཧཱ་རཀྟ་ལ་ཁ་རཾ་ཁཱ་ཧི། རེ་མ་ཏི་ཛ་ཛ། མ་ཧཱ་རཀྟ་ལ་ཁ་རཾ་ཁཱ་ཧི། རེ་མ་ཛི་ཛ་ཛ། མ་ཧཱ་རཀྟ་ལ་ཁ་རཾ་ཁཱ་ཧི། རེ་མ་ཛ་ཛ་ཛ། མ་ཧཱ་རཀྟ་ལ་ཁ་རཾ་ཁཱ་ཧི། གཉིས་པ་བྷ་ལིང་གཏོར་མའི་མཆོད་པ་ནི། ཧཱུྃ། དམ་ཚིག་ཆེན་པོའི་དུས་ལ་བབ། །བྷ་ལིང་གཏོར་མའི་མཆོད་པ་བཞེས། །སྤྲུལ་པ་ཆེན་པོའི་དུས་ལ་བབ། །བྷ་ལིང་གཏོར་མའི་མཆོད་པ་བཞེས། ཕྱག་བརྙན་ཆེན་པོའི་དུས་ལ་བབ། །བྷ་ལིང་གཏོར་མའི་མཆོད་པ་བཞེས། །ཤྭ་ན་མུ་ཀའི་དུས་ལ་བབ། །བྷ་ལིང་གཏོར་མའི་མཆོད་པ་བཞེས། །ས་བདག་ཆེན་མོའི་དུས་ལ་བབ། །བྷ་ལིང་གཏོར་མའི་མཆོད་པ་བཞེས། །བདག་ཉིད་ཆེན་མོའི་དུས་ལ་བབ། །བྷ་ལིང་གཏོར་མའི་མཆོད་པ་བཞེས། །ཁྱེད་ཀྱི་དམ་ཚིག་དུས་ལ་བབ། །བྷ་ལིང་གཏོར་མའི་མཆོད་པ་བཞེས། །མཐུ་རྩ་ཕྱུངས་པའི་དུས་ལ་བབ། །བྷ་ལིང་གཏོར་མའི་མཆོད་པ་བཞེས། །ༀ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ྄། མ་ཧཱ་བྷ་ལིངྟ་ལ་ཁ་རཾ་ཁཱ་ཧི། ཞེས་པའི་བར་མཆོད་དོ། །གསུམ་པ་བདུད་རྩི་སྨན་གྱི་མཆོད་པ་ནི། ཧོ་རང་བྱུང་གདོད་ནས་དག་པ་ཡི། །རྩ་བརྒྱད་སྟོང་ལ་སྦྱར་བའི་སྨན། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔའི་སེམས་ཅན་ཀུན་སྒྲོལ་བའི། །དུག་ལྔ་སེལ་བའི་བདུད་རྩི་འདི། །ཇི་སྙེད་སངས་རྒྱས་ཐམས་ཅད་དང་། །བྱང་ཆུབ་སེམས་དཔའི་ཚོགས་ཆེན་དང་། །ཁྲོ་བོ་རྒྱལ་པོ་མཐའ་ཡས་དང་། །མ་མོ་མཁའ་འགྲོའི་ཚོགས་ཆེན་དང་། །ལྷ་དང་ལྷ་མིན་གསང་བ་ཡི། །ཐུགས་དམ་དབྱིངས་ཉིད་བསྐུལ་བའི་མཆོག །འདི་ནི་སྔོན་གྱི་དམ་ཚིག་གོ། །ཕྱོགས་བཅུའི་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ངང་ཉིད་འདི། །བདག་ཅག་དད་པས་འབུལ་ལ་གསན། །བཞེས་ཏེ་ཀུན་ཏུ་དགྱེས་མཛོད་ལ། །ཕུལ་པའི་དངོས་གྲུབ་བདག་ལ་སྩོལ། །ༀ་ན་མཿསརྦ་ཏ་ཐཱ་ག་ཏ་མ་ཧཱ་ཨརྒྷཾ་པྲ་ཏི་ཛ་ཧོ། དམ་ཚིག་ཆེན་པོའི་དུས་ལ་བབ། །བཅོམ་ལྡན་དཔལ་ཆེན་རྡོ་རྗེ་གཞོན་ནུ་ཡབ་ཡུམ་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ༀ་ན་མཿསརྦ་ཏ་ཐཱ་ག་ཏ་མ་ཧཱ་པདྱཾ་པྲ་ཏི་ཛ་ཧོ། སྤྲུལ་པ་ཆེན་པོའི་དུས་ལ་བབ། །ཡེ་ཤེས་སྤྲུལ་པའི་ཁྲོ་རྒྱལ་ཡབ་ཡུམ་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ༀ་ན་མཿསརྦ་ཏ་ཐཱ་ག་ཏ་མ་ཧཱ་པུཥྤེ་པྲ་ཏི་ཛ་ཧོ། ཕྱག་བརྙན་ཆེན་པོའི་དུས་ལ་བབ། །ཟ་བྱེད་སྤྲུལ་པའི་ཁྲ་ཐབས་ཉི་ཤུ་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ༀ་ན་མཿསརྦ་ཏ་ཐཱ་ག་ཏ་མ་ཧཱ་དྷཱུ་པེ་པྲ་ཏི་ཛ་ཧོ། ཤྭ་ན་མུ་ཀའི་དུས་ལ་བབ། །ཤྭ་ན་ཆེན་མོ་མཆེད་བཞི་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ༀ་ན་མཿསརྦ་ཏ་ཐཱ་ག་ཏ་མ་ཧཱ་ཨ་ལོ་ཀེ་པྲ་ཏི་ཛ་ཧོ། ས་བདག་ཆེན་པོའི་དུས་ལ་བབ། །བསེ་མོ་ཆེན་མོ་མཆེད་བཞི་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ༀ་ན་མཿསརྦ་ཏ་ཐཱ་ག་ཏ་མ་ཧཱ་གནྡྷེ་པྲ་ཏི་ཛ་ཧོ། བདག་ཉིད་ཆེན་མོའི་དུས་ལ་བབ། །རེ་ཏི་ཆེན་མོ་མཆེད་བཞི་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ༀ་ན་མཿསརྦ་ཏ་ཐཱ་ག་ཏ་མ་ཧཱ་ནཻ་ཝི་དྱཱ་པྲ་ཏི་ཛ་ཧོ། ཁྱེད་ཀྱི་དམ་ཚིག་དུས་ལ་བབ། །མཐུ་རྩ་ཕྱུངས་པའི་དུས་ལ་བབ། །འཇིག་རྟེན་དྲེགས་པ་ཉི་ཤུ་རྩ་གཅིག་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །ༀ་ན་མཿསརྦ་ཏ་ཐཱ་ག་ཏ་མ་ཧཱ་ཤཱབྡ་པྲ་ཏི་ཛ་ཧོ། ཧོ། དགུ་པ་བསྟོད་པ་ནི། འཁོར་རྣམས་ཀྱི་གཙོ་བོ་ལ་བསྟོད་པར་བསམས། ཧཱུྃ། གཏུམ་ཆེན་དུས་མཐའི་མེ་ལྟར་འབར། །འོད་ཟེར་ཉི་མ་འབུམ་གྱི་གཟི། །ཁྲོ་གཉེར་གློག་སྟོང་འགྱུ་བ་བཞིན། །མཆེ་བ་ཟང་ཡག་ཟ་བྱེད་ཆེ་ཧོ། །ཧཱུྃ། རྔམ་པའི་ང་རོ་འབྲུག་སྟོང་ལྡིར། །ཐུགས་ཆེམ་རི་རབ་འབུམ་སྙིལ་སྐད། །ཨ་ལ་ཧ་ལའི་གད་རྒྱངས་ཆེ། །སྤྱུགས་པའི་འཐོར་རླུང་གཡེང་བ་ཆེ་ཧོ། །ཧཱུྃ། ཁྲོ་བོ་ཤེས་རབ་འོད་པོ་ཆེ། །ཡེ་ཤེས་དཀྱིལ་འཁོར་ཀུན་ཏུ་གསལ། །འབར་བའི་ཡེ་ཤེས་ཀུན་ཏུ་འཇོམས། །སྣ་ཚོགས་ཡེ་ཤེས་ཐིག་ལེ་ཆེ་ཧོ། །ཧཱུྃ། ཁྲོ་བོའི་རྒྱལ་པོ་སྤྲིན་ཆེན་པོ། །འཕྲོས་པའི་དཀྱིལ་འཁོར་ཆར་ཆེན་འབེབ། །དཀྱིལ་འཁོར་ཡིད་བཞིན་འབྱུང་བའི་གཏེར། །སྣ་ཚོགས་ཁྲོས་པའི་ཐིག་ལེ་ཆེ་ཧོ། །ཧཱུྃ། བདུད་ཀུན་གྱི་ནི་བདུད་ཆེན་པོ། །བདུད་ཀྱི་བདུད་དེ་བདུད་རྣམས་འཇོམས། །འཇིགས་པའི་ཚོགས་ཀྱང་འཇིགས་བྱེད་པ། །འཇིགས་བྱེད་ཆེན་པོ་ཐིག་ལེ་ཆེ་ཧོ། །ཧཱུྃ། རྡོ་རྗེ་བྲག་ཆེན་སྲ་བ་མོ། །རྡོ་རྗེ་ཆུ་བོ་སྡུད་ཆེན་པོ། །རྡོ་རྗེ་མེ་སྟེ་ཀུན་འབར་ཆེ། །རྡོ་རྗེ་རླུང་སྟེ་འཐོར་རླུང་ཆེ་ཧོ། །ཧཱུྃ། བསྐལ་པ་མེ་ལྟར་འབར་བའི་དབུས། །འོད་ཟེར་འདུ་འཕྲོའི་ཀློང་དཀྱིལ་ནས། །ཁྲོ་བོ་ཁྲོ་མོ་རྣམས་བཞུགས་པ། །སྐུ་ནི་ཅིར་ཡང་འཇིགས་པའི་གཟུགས། །དབུ་སྐྲ་ཁམས་ནག་རལ་པ་ཅན། །གྱེན་དུ་འཁྱིལ་ཅིང་སྲིད་རྩེར་འབར། །མི་མཉམ་ཁྲོ་གཉེར་སྡང་མིག་ནི། །ལོག་པར་ལྟ་བ་འདུལ་ལ་བརྩོན། །ཧཱུྃ། མཆེ་བ་ཟང་ཡག་གཙིགས་པ་ནི། །སྐྱེ་ཤི་རྩད་ནས་གཅོད་པའི་ཚུལ། །སྐུ་གསུང་ཐུགས་ཀྱི་བྱིན་རླབས་ནི། །ཕྱག་མཚན་སྣ་ཚོགས་ཅིར་ཡང་སྟོད། །ཧཱུྃ། ཐུགས་རྗེའི་བྱིན་རླབས་སྤྲིན་ལྟར་འཁྲིགས། །བྱམས་པའི་འོད་ཟེར་གློག་ལྟར་འགྱུ། །རྔམས་པའི་སྒྲ་སྐད་འབྲུག་ལྟར་སྒྲོགས། །སྤྲུལ་པའི་ཐོག་ཐོག་སེར་ཆེན་འབེབ། །ཧཱུྃ། སྔོན་གྱི་ཐུགས་དམ་ཆེན་པོ་ནི། །གླན་ཀ་ཆེན་པོ་བདུད་ལས་རྒྱལ། །རྒྱལ་ཀ་ཆེན་པོ་བགེགས་ལ་མཛད། །དམ་ཚིག་ཅན་ལ་དངོས་གྲུབ་སྩོལ། །ཧཱུྃ། ཐུགས་རྗེ་ཆེན་པོའི་བྱིན་རླབས་ཀྱིས། །བདག་ལ་བྱིན་གྱིས་རླབས་མཛད་ཅིང་། །བདག་གི་ལྷག་པའི་བསམ་པ་རྣམས། །འགྲུབ་པར་བྱིན་གྱིས་རླབས་ཏུ་གསོལ། །ཧཱུྃ། འཁྱིལ་ཞིང་རྒྱུན་ཡང་འཁྱིལ་བ་སྟེ། །སེམས་ཀྱི་ཆོས་ལ་སྐུ་མི་མངའ། །སྒྲ་ལས་འདས་པའི་སྦྱོར་བ་སྟེ། །བསམ་དང་བྲལ་བའི་ཡེ་ཤེས་ལགས། །ཧཱུྃ། སྲིད་གསུམ་འཇོམས་པའི་ལྷ་ལ་ཕྱག་འཚལ་ལོ། །མཉམ་ཉིད་ངང་གི་ཁྲོས་ལ་ཕྱག་འཚལ་ལོ། །ཁྲོ་བོ་ལོངས་སྤྱོད་མཛད་ལ་ཕྱག་འཚལ་ལོ། །རྡོ་རྗེ་འདུ་འཕྲོ་འཕྲོས་ལ་ཕྱག་འཚལ་ལོ། །དེ་ནས་ཆོས་སྐྱོང་མ་མོ་དང་། མགོན་པོ་རྣམས་སྲས་འགར་བའི་གཞུང་བསྲང་ལ། དེ་ནས་སྨོན་ལམ་གདབ་པ་ནི། ཧཱུྃ། རྒྱལ་བ་རྒྱ་མཚོ་མཉེས་པར་གྱུར་ཅིག །མཆོད་པ་རྒྱ་མཚོས་མཉེས་པར་གྱུར་ཅིག །སྲིད་པ་རྒྱ་མཚོ་དབྱིངས་སུ་སྒྲོལ་བར་གྱུར་ཅིག །དམ་ཚིག་རྒྱ་མཚོ་བསྐང་བར་གྱུར་ཅིག །དམ་ཅན་རྒྱ་མཚོ་ཐུགས་དམ་བསྐང་བར་གྱུར་ཅིག །བདུད་དཔུང་རྒྱ་མཚོ་བཅོམ་པར་གྱུར་ཅིག །བགེགས་དཔུང་རྒྱ་མཚོ་ཞིག་པར་གྱུར་ཅིག །འཁོར་བ་རྒྱ་མཚོ་སྟོང་པར་གྱུར་ཅིག །སྡུག་བསྔལ་རྒྱ་མཚོ་ཞི་བར་གྱུར་ཅིག །བདག་ཉིད་ཆེན་པོ་ལྷུན་གྱི་གྲུབ་པར་གྱུར་ཅིག །བདག་ཅག་རྣལ་འབྱོར་པས་སྐུ་གསུང་ཐུགས་ཀྱི་དངོས་གྲུབ་ཐོབ་པར་གྱུར་ཅིག །ཅེས་སྨོན་ལམ་གདབ། དེ་ནས་མ་ཚང་ཁ་བསྐང་ནི། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨ། ཨཾ་ཨཿ ༀ་བཛྲ་སཏྭ་ས་མ་ཡཱ། ཞེས་ཚང་བར་བརྗོད། དེ་ནས་ཕུར་བརྒྱུད་ཀྱི་གསོལ་འདེབས་རྒྱས་བསྡུས་གང་རུང་བྱེད། བཅུ་པ་བསྙེན་པ་ནི། རང་གི་ཐུགས་ཀར་པད་ཟླ་ཉི་མའི་སྟེང་དུ། ཡེ་ཤེས་སེམས་དཔའ་རང་འདྲ་བ་གཅིག །དེ་ལྟར་རྡོ་རྗེའི་ལྟེ་བ་ལ་ཧཱུྃ་གི་མཐའ་བསྐྱོར་དུ་ཀཱི་ལ་ཡ་འབྲུ་དགུའི་གཡས་སུ་འཁོར་བར་དམིགས་ལ། བཟླས་པ་བརྒྱ་སྟོང་ཁྲི་འབུམ་ཅི་ནུས་སུ་བཟླའོ། །ཐུན་འཇོག་པའི་ཚེ། རྣམ་ལྔ ། ཀུན་བཟང་། སྒེག་མོ་བརྒྱད་མཆོད་ཀྱིས་མཆོད། ཐམས་ཅད་ངོ་བོ་ཞེས་སོགས་ཀྱིས་བསྟོད། བདེ་བར་གཤེགས་སོ་ཞེས་སོགས་ཀྱིས་དངོས་གྲུབ་བླངས། བསྙེན་པའི་རྗེས་ལ། ལྷག་མའི་ལས་བྱ་བ་ནི། དོན་རྣམ་པ་བཞི་སྟེ། སྤྱན་དྲངས་པ་དང་། སྲོག་གི་སྙིང་པོ་དྲང་ཞིང་བརྟན་པར་བཞུགས་སུ་གསོལ་བ་དང་། མཆོད་པ་དང་། ལས་བཅོལ་བའོ། །སྤྱན་དྲངས་བ་ནི། དཔལ་ཧེ་རུ་ཀའི་ཏིང་ངེ་འཛིན་དང་ལྡན་པ་ལ། མཛེས་པའི་ཕྱག་རྒྱ་བཅས་ལ། ༀ་ཨེ་ཨཱ་རལླི་ཧོ། ཛཿཧཱུྃ་བྃ་ཧོ། བཛྲ་ས་མ་ཡ་ཛཿ ཕཻཾ་ཕཻཾ་ཕཻཾ། ཞེས་དཀྱིལ་འཁོར་དུ་སྐད་ཅིག་གིས་དམ་ཅན་བཅུ་གཉིས་འཁོར་དྲེགས་པ་ཉི་ཤུ་གཅིག་དང་བཅས་པ་རྣམས། སོ་སོའི་འཁོར་དང་ཡང་འཁོར་དང་བཅས་ཏེ། མཁའ་ལ་སྤྲིན་དཔུང་བཞིན་དུ་བྱོན་པར་བསམ་ལ། སྲོག་གི་སྙིང་པོ་དྲངས་ཞིང་བརྟན་པར་བཞུགས་སུ་གསོལ་བ་ནི། ཌཱཀྐི་ར་ཛཿཧཱུྃ། ཌཱ་ཀཱི་རཱ་ཛ་ཛ། ཨཱ་གཙྪ་ཡ། ཨཱ་གཙྪ་ཡ། པྲ་ཝེ་ཤ་ཡ། པྲ་བེ་ཤ་ཡ། ཨཱ་བེ་ཤ་ཡ། ཨཱ་བེ་ཤ་ཡ། ཏི་སྟ་ཡ། ཏི་སྟ་ཡ། བྷནྡྷ་ཡ། བྷནྡྷ་ཡ། ཏོ་ཥ་ཡ། ཏོ་ཥ་ཡ། མོ་ཧ་ཡ། མོ་ཧ་ཡ། སརྦ་བཛྲ་ནན། ཌཱཀྐི་ནི་ཧྲི་ད་ཡ་ཧཱུྃ་ཕཊ྄། ཞེས་སྲོག་གི་སྙིང་པོ་ཕུལ་ཞིང་སྔར་ནས་དཀྱིལ་འཁོར་ལ་ཡོད་པ་རྣམས་ལ་སིབ་སིབ་ཐིམ་པར་བསྒོམ་མོ། །མཆོད་པ་ནི། བདག་གི་ལྕེ་ཐོག་ཏུ་ཧྲཱི་དམར་པོ་གཅིག་བསྒོམ་པ། དེའི་འོད་ཟེར་ལས་བདུད་རྩིའི་ཆར་བབ་པས། དམ་ཅན་རྣམས་ཀྱི་ལྕེ་ལ་ཐིམ་པར་བསྒོམ་མོ། །ཡང་གཏོར་མ་བདུད་རྩིར་ལམ་གྱིས་གསལ་བ་ཉིད་ལས། དམ་ཅན་རྣམས་ཀྱིས་གསོལ་བར་བསྒོམ་མོ། །ༀ་བཛྲ་དྷ་ཀ་དྷ་ཀི་ནི་པྲ་ཏི་ཛཿ ཨེ་མཾ་བྷ་ལིངྟ་ཧཱུྃ་ཕཊ྄་ཁཱ་ཧི། ༀ་སརྦ་བྷུདྡྷ་དྷ་ཀ་དྷ་ཀི་ནི་པྲ་ཏི་ཛཿ ཨེ་མཾ་བྷ་ལིངྟ་ༀ་ཕཊ྄་ཁཱ་ཧི། ༀ་སརྦ་རཏྣ་དྷ་ཀ་དྷ་ཀི་ནི་པྲ་ཏི་ཛཿ ཨི་མཾ་བྷ་ལིངྟ་ཏྲཱཾ་ཕཊ྄་ཁཱ་ཧི། ༀ་སརྦ་པདྨ་དྷ་ཀ་དྷ་ཀི་ནི་པྲ་ཏི་ཛཿ ཨེ་མཾ་བྷ་ལིངྟ་ཧྲཱིཿཕཊ྄་ཁཱ་ཧི། ༀ་སརྦ་ཀརྨ་དྷ་ཀ་དྷ་ཀི་ནི་པྲ་ཏི་ཛ། ཨེ་མཾ་བྷ་ལིངྟ་ཧ་ཕཊ྄་ཁཱ་ཧི། ཤྭ་ནྭ་མུ་ཀ་ཛ་ཛ་ཁཱ་ཧི། ཀུ་ཀུ་ར་མུ་ཀ་ཛ་ཛ་ཁཱ་ཧི། སྲི་ལ་མུ་ཀ་ཛ་ཛ་ཁཱ་ཧི། སྲི་ཝ་མུ་ཀ་ཛ་ཛ་ཁཱ་ཧི། ཀཾ་ཀ་ད་རི་ཛ་ཛ་ཁཱ་ཧི། ཀུ་མ་ད་རི་ཛ་ཛ་ཁཱ་ཧི། ཤུ་ལ་ད་རི་ཛ་ཛ་ཁཱ་ཧི། ཙ་མུནྡ་རི་ཛ་ཛ་ཁཱ་ཧི། རེ་མ་ཛུ་ཛ་ཛ་ཁཱ་ཧི། རེ་མ་ཏི་ཛ་ཛ་ཁཱ་ཧི། རེ་མ་ཛི་ཛ་ཛ་ཁཱ་ཧི། རེ་མ་ཛ་ཛ་ཛ་ཁཱ་ཧི། ཡང་གཏོར་མ་ཤ་ཁྲག་གི་རྒྱ་མཚོ་གསོལ་བ་ཡང་གསོལ་ནས། ལྷག་མ་མེད་པར་བསྒོམ་མོ། །ཆྒཻའི་མ་ཧཱ་མཾ་ས་ལ་ཁཱ་ཧི། མ་ཧཱ་རཀྟ་ལ་ཁཱ་ཧི། མ་ཧཱ་ཙིཏྟ་ལ་ཁཱ་ཧི། མ་ཧཱ་བ་སུ་ཏ་ལ་ཁཱ་ཧི། མ་ཧཱ་ཀོ་རོ་ཙ་ན་ལ་ཁཱ་ཧི། མ་ཧཱ་ཀིང་ནི་རི་ཏི་ལ་ཁཱ་ཧི། དགྲ་བགེགས་ཀྱི་དབང་པོ་རྣམ་ལྔ་ལ་ཁཱ་ཧི། སྐྱེ་མཆེད་བཅུ་གཉིས་ལ་ཁཱ་ཧི། རྣམ་ཤེས་ཚོགས་བརྒྱད་ལ་ཁཱ་ཧི། ལྷག་མའི་རྗེས་ཤུལ་ལ་ཁཱ་ཧི། ཞེས་བརྗོད། དེ་ནས་དམ་བསྒྲག་པ་ནི། དམ་ཅན་རྣམས་ཅག་གེ་ཉན་པར་བསྒོམ་ལ་འདི་སྐད་དོ། །ཧཱུྃ། ཤར་གྱི་ཕྱོགས་ནས་བྱུང་བ་ནི། །རྡོ་རྗེ་རིགས་ཀྱི་ཕོ་ཉ་མོ། །ལྕགས་ཀྱི་སྤྱང་མོ་མགོ་དགུ་མ། །འདིར་གཤེགས་རྒྱན་གྱི་གཏོར་མ་བཞེས། །སྡིག་ཅན་སྡང་བའི་དགྲ་བོ་ལ། །རྟགས་ཕྱུང་མཚན་མ་མྱུར་དུ་སྟོན། །བཅོལ་པའི་ཕྲིན་ལས་གྲུབ་པར་མཛོད། །ལྷོའི་ཕྱོགས་ནས་བྱུང་བ་ནི། །རིན་ཆེན་རིགས་ཀྱི་ཕོ་ཉ་མོ། །ལྕགས་ཀྱི་ཁྱི་མོ་རྐང་གསུམ་མ། །འདིར་གཤེགས་རྒྱན་གྱི་གཏོར་མ་བཞེས། །སྡིག་ཅན་སྡང་བའི་དགྲ་བོ་ལ། །རྟགས་ཕྱུང་མཚན་མ་མྱུར་དུ་སྟོན། །བཅོལ་པའི་ཕྲིན་ལས་གྲུབ་པར་མཛོད། །ནུབ་ཀྱི་ཕྱོགས་ནས་བྱུང་བ་ནི། །པདྨ་རིགས་ཀྱི་ཕོ་ཉ་མོ། །ཟངས་ཀྱི་འཕར་བ་ལྕེ་བརྒྱད་ཀྱང་། །འདིར་གཤེགས་རྒྱན་གྱི་གཏོར་མ་བཞེས། །སྡིག་ཅན་སྡང་བའི་དགྲ་བོ་ལ། །རྟགས་ཕྱུང་མཚན་མ་མྱུར་དུ་སྟོན། །བཅོལ་པའི་ཕྲིན་ལས་གྲུབ་པར་མཛོད། །བྱང་གི་ཕྱོགས་ནས་བྱུང་བ་ནི། །ལས་ཀྱི་རིགས་ཀྱི་ཕོ་ཉ་མོ། །ཟངས་ཀྱི་ཝ་མོ་རྐང་གསུམ་མ། །འདིར་གཤེགས་རྒྱན་གྱི་གཏོར་མ་བཞེས། །སྡིག་ཅན་སྡང་བའི་དགྲ་བོ་ལ། །རྟགས་ཕྱུང་མཚན་མ་མྱུར་དུ་སྟོན། །བཅོལ་པའི་ཕྲིན་ལས་གྲུབ་པར་མཛོད། །ཧཱུྃ། ཤར་གྱི་ཕྱོགས་ནས་བྱུང་བ་ནི། །རྡོ་རྗེ་རིགས་ཀྱི་མཁའ་འགྲོ་མ། །རྡོ་རྗེ་ཡོངས་སྡུད་མཐུ་མོ་ཆེ། །འདིར་གཤེགས་རྒྱན་གྱི་གཏོར་མ་བཞེས། །སྡིག་ཅན་སྡང་བའི་དགྲ་བོ་ལ། །རྟགས་ཕྱུང་མཚན་མ་མྱུར་དུ་སྟོན། །ལྷོའི་ཕྱོགས་ནས་བྱུང་བ་ནི། །རིན་ཆེན་རིགས་ཀྱི་མཁའ་འགྲོ་མ། །རྡོ་རྗེ་འཇིགས་བྱེད་རལ་པ་ཅན། །འདིར་གཤེགས་རྒྱན་གྱི་གཏོར་མ་བཞེས། །སྡིག་ཅན་སྡང་བའི་དགྲ་བོ་ལ། །རྟགས་ཕྱུང་མཚན་མ་མྱུར་དུ་སྟོན། །ནུབ་ཀྱི་ཕྱོགས་ནས་བྱུང་བ་ནི། །པདྨ་རིགས་ཀྱི་མཁའ་འགྲོ་མ། །རྡོ་རྗེ་རབ་དགའི་ཁྲག་འཇིབ་མ། །འདིར་གཤེགས་རྒྱན་གྱི་གཏོར་མ་བཞེས། །སྡིག་ཅན་སྡང་བའི་དགྲ་བོ་ལ། །རྟགས་ཕྱུང་མཚན་མ་མྱུར་དུ་སྟོན། །བྱང་གི་ཕྱོགས་ནས་བྱུང་བ་ནི། །ལས་ཀྱི་རིགས་ཀྱི་མཁའ་འགྲོ་མ། །རྡོ་རྗེ་ལས་གྲུབ་ཚེ་ཕྲོགས་མ། །འདིར་གཤེགས་རྒྱན་གྱི་གཏོར་མ་བཞེས། །སྡིག་ཅན་སྡང་བའི་དགྲ་བོ་ལ། །རྟགས་ཕྱུང་མཚན་མ་མྱུར་དུ་སྟོན། །ཧཱུྃ། ཤར་གྱི་ཕྱོགས་ནས་བྱུང་བ་ནི། །རྡོ་རྗེ་རིགས་ཀྱི་རྒྱལ་མོ་སྟེ། །དཔལ་ལྡན་མཐིང་ནག་རེ་མ་ཛུ། །འདིར་གཤེགས་རྒྱན་གྱི་གཏོར་མ་བཞེས། །སྡིག་ཅན་སྡང་བའི་དགྲ་བོ་ལ། །རྟགས་ཕྱུང་མཚན་མ་མྱུར་དུ་སྟོན། །ལྷོའི་ཕྱོགས་ནས་བྱུང་བ་ནི། །རིན་ཆེན་རིགས་ཀྱི་རྒྱལ་མོ་སྟེ། །དཔལ་ལྡན་སེར་ནག་རེ་མ་ཏི། །འདིར་གཤེགས་རྒྱན་གྱི་གཏོར་མ་བཞེས། །སྡིག་ཅན་སྡང་བའི་དགྲ་བོ་ལ། །རྟགས་ཕྱུང་མཚན་མ་མྱུར་དུ་སྟོན། །ནུབ་ཀྱི་ཕྱོགས་ནས་བྱུང་བ་ནི། །པདྨ་རིགས་ཀྱི་རྒྱལ་མོ་སྟེ། །དཔལ་ལྡན་དམར་ནག་རེ་མ་ཛི། །འདིར་གཤེགས་རྒྱན་གྱི་གཏོར་མ་བཞེས། །སྡིག་ཅན་སྡང་བའི་དགྲ་བོ་ལ། །རྟགས་ཕྱུང་མཚན་མ་མྱུར་དུ་སྟོན། །བྱང་གི་ཕྱོགས་ནས་བྱུང་བ་ནི། །ལས་ཀྱི་རིགས་ཀྱི་རྒྱལ་མོ་སྟེ། །དཔལ་ལྡན་ལྗང་ནག་རེ་མ་ཛ། །འདིར་གཤེགས་རྒྱན་གྱི་གཏོར་མ་བཞེས། །སྡིག་ཅན་སྡང་བའི་དགྲ་བོ་ལ། །རྟགས་ཕྱུང་མཚན་མ་མྱུར་དུ་སྟོན། །དཀྱིལ་འཁོར་དེའི་ཕྱི་རིམ་ནས། །ཁྱེད་ཀྱི་བཀའ་སྡོད་ཕོ་ཉའི་ཚོགས། །དྲེགས་པ་ཉི་ཤུ་རྩ་གཅིག་དང་། །གིང་ཕོ་གིང་མོ་བཅས་པ་རྣམས། །འདིར་གཤེགས་རྒྱན་གྱི་གཏོར་མ་བཞེས། །སྡིག་ཅན་སྡང་བའི་དགྲ་བོ་ལ། །རྟགས་ཕྱུང་མཚན་མ་མྱུར་དུ་སྟོན། །བཅོལ་པའི་ཕྲིན་ལས་གྲུབ་པར་མཛོད། །མཐུ་དབང་དངོས་གྲུབ་བདག་ལ་སྩོལ། །ཅེས་གཏོར་མ་བསྐྱལ། གཏོར་སྐྱེལ་སླར་ལོག་ནས་དཀྱིལ་འཁོར་བསྡུ་བ་ནི། ཕྱི་སྣོད་ཀྱི་འཇིག་རྟེན་དཔལ་ཧེ་རུ་ཀར་བརླབ་ལ་གཞལ་ཡས་ཁང་ལ་བསྡུ། གཞལ་ཡས་ཁང་དམ་ཅན་ལ་བསྡུ། དམ་ཅན་ཁྲོ་བོ་ལ། ཁྲོ་བོ་ཁྲ་ཐབས་དང་བཅས་པ་གཙོ་བོ་ལ། སྲས་མཆོག་རྣམས་ཀྱང་ངོ་། །ཡུམ་ཡབ་ལ། ཡབ་ཡེ་ཤེས་སེམས་དཔའ་ལ། དེ་རྡོ་རྗེ་ལ། རྡོ་རྗེ་ཧཱུྃ་ལ། ཧཱུྃ་ཞབས་ཀྱུ་ལ། འ་ཧ་ཡ། ཧ་ཟླ་ཚེས་ལ། ཟླ་ཚེས་ཐིག་ལེ་ལ། ཐིག་ལེ་ཆོས་ཀྱི་དབྱིངས་སུ་བསྟིམ་མོ། །སྟོང་ཉིད་ལ་ཅི་ཙམ་གནས་ཀྱི་བར་དུ་དམིགས་སོ། །དེ་ནས་འབྲུ་དགུ་བརྗོད་པ་ཙམ་གྱིས། རྡོ་རྗེ་གཞོན་ནུར་བལ་གྱིས་གསལ་བ་ལ་སྤྱོད་ལམ་གྱི་བྱ་བ་བྱའོ། །བསྙེན་པའི་ཡི་གེ་མུན་སེལ་འཕྲེང་བ་ཞེས་བྱ་བ་རྫོགས་སོ། །གཏོར་མ་ཞལ་ཕྱིར་བསྒྱུར་ལ། མར་ཞལ་དངོས་གྲུབ་ཏུ་བླངས་ཤིང་། ཆང་ཕུད་རཀྟ་སོགས་སྦྲེང་ལ། གངས་རིའི་རྒྱུད་ལ་གནས་པའི་བརྟེན་མ་སྤྱན་དྲངས་པ་ནི། ཧཱུྃ། དཀྱིལ་འཁོར་དེའི་ཕྱི་རིམ་ནས། །གངས་རིའི་རྒྱུད་ལ་གནས་པ་ཡི། །བརྟན་མའི་ཚོགས་ཀྱི་བསྐོར་བ་ནི། །ལག་ཏུ་རྡོ་རྗེ་བྱིན་ནས་མིང་གི་དབང་བསྐུར་བ། །བོད་ཁམས་སྐྱོང་བ་མ་མོའི་ཚོགས། །བརྟན་མ་ཆེན་མོ་བཅུ་གཉིས་ཀྱང་། །སྔོན་གྱི་ཐུགས་དམ་དགོངས་མཛོད་ལ། །འདིར་གཤེགས་རྒྱན་གྱིས་གཏོར་མ་བཞེས། །བཅོལ་པའི་ཕྲིན་ལས་གྲུབ་པར་མཛོད། །བྷྱོཿ དགུང་སྔོན་མཐོན་པོའི་ཡར་སྟེང་ན། །ནམ་མཁའི་རྒྱལ་མོ་རྡོ་རྗེ་ཏིང་ལོ་སྨན། །ཁ་རག་ཁྱུང་བཙུན་རྡོ་རྗེ་དཔལ་གྱི་ཡུལ། །མ་བཙུན་ཁུག་ཆོས་རྡོ་རྗེ་དབྱར་མོ་བསིལ། །ཀོང་བཙུན་དེ་མོ་རྡོ་རྗེ་བོད་ཁམས་སྐྱོང་། །ལྷོ་ཡི་སྐྱི་འཐིང་རྡོ་རྗེ་ཡ་མ་སྐྱོང་། །བྱང་གི་སྨན་ཏིང་རྡོ་རྗེ་ཏིང་ལོ་བཙུན། །བཙན་ལ་རོལ་བའི་རྡོ་རྗེ་སྨན་གཅིག་མ། །གངས་ཀྱི་ཡུམ་ཆེན་རྡོ་རྗེ་གཡུ་བུན་མ། །དྷ་ལྷ་བཙན་མོ་རྡོ་རྗེ་ཡེ་ཤེས་མཆོག །སྐྱི་ཏིང་གངས་ཀྱི་རྡོ་རྗེ་ལ་རོ་སྨན། །ཡར་འབྲོག་གསེར་ཐང་རྡོ་རྗེ་འབྲོག་སྲིན་མོ། །ཁྲག་འཐུང་ཆེན་མོ་རྡོ་རྗེ་སྒྱུ་དྲིལ་མ། །མི་གཡོ་བརྟེན་པའི་རྡོ་རྗེ་ས་འཛིན་མ། །དེ་ལྟར་གངས་རིའི་རྒྱུད་ལ་གནས་པ་ཡི། །བརྟན་མ་ཆེན་མོ་བཅུ་གཉིས་རྣམས། །བདུད་རྩི་སྨན་གྱི་གཡབ་འདོར་ནས། །བཀའི་གཏོར་མ་འདི་བཞེས་ལ། །བཅོལ་པའི་ཕྲིན་ལས་གྲུབ་པར་མཛོད། །བདག་ཅག་རྣལ་འབྱོར་འདིར་འདུས་དང་། །འཁོར་དུ་གཏོགས་པའི་ཡོན་བདག་གིས། །རྐྱེན་ལ་བབ་ན་རྐྱེན་བཟློག་ཅིག །ཤོད་ལ་བབ་ན་ཤོད་གཏོར་ཅིག །ཁྲམ་ལ་བབ་ན་ཁྲམ་བཟློག་ཅིག །རིམས་ནད་ཡམས་ནད་བཅས་པ་དང་། །ཅི་ལས་གྱུར་པའི་ནད་རྣམས་ཀུན། །ཡུད་ཙམ་གྱིས་ནི་མེད་པར་མཛོད། །མ་ཧཱ་མཾ་ས་ལ་ཁཱ་ཧི། རཀྟ་ལ་ཁ་ཧི། ཙིཏྟ་ལ༴ བ་སུ་ཏ༴ ཀོ་རོ་ཙ་ན༴ སརྦ་པཉྩ་ཨ་མྲྀ༴ རཀྟ་ལ༴ ཧཱུྃ། ང་ནི་ཁྲོ་རྒྱལ་གཤིན་རྗེ་གཤེད། །ང་ནི་རང་བྱུང་ཁྲོ་བོའི་སྐུ། །ང་ནི་ཆེ་མཆོག་ཧེ་རུ་ཀ །མི་མཐུན་རྐྱེན་དང་བར་ཆད་རྣམས། །བསྒྱུར་ཅིག་བཟློག་ཅིག་ཧེ་རུ་ཀ །ཁྱེད་ཀྱི་ཐུགས་དམ་དུས་ལ་བབ། །ཕོ་བདུད་དལ་ཁ་གཡས་སུ་བསྒྱུར། །མོ་བདུད་དལ་ཁ་གཡོན་དུ་བསྒྱུར། །སྤྱི་བདུད་དལ་ཁ་མཁའ་ལ་བསྒྱུར། །ཆུང་བདུད་དལ་ཁ་ཐད་དུ་བསྒྱུར། །སྒྱུར་ཅིག་བཟློག་ཅིག་ཧེ་རུ་ཀཿ ཁྱེད་ཀྱི་ཐུགས་དམ་དམ་དུས་ལ་བབ། །བཟློག་ཅིང་བསྒྱུར་བའི་དུས་ལ་བབ། །གསང་སྔགས་རིག་སྔགས་གཟུངས་སྔགས་ཀྱི། །བྱད་ཁ་ཕུར་པའི་དཔལ་ཁ་བཟློག །མཁའ་འགྲོ་མའི་ངན་སྔགས་བཟློག །མི་མཐུན་གཤིན་རྗེའི་ཁྲམ་ཁ་བཟློག །བདུད་བཙན་གཤིན་རྗེ་རྒྱལ་འགོང་བཟློག །ལོང་ཀ་སྲིན་པོའི་ངན་སྔགས་བཟློག །བྲམ་ཟེའི་ཀུ་དུག་དྲང་སྲོང་དམོད་པ་བཟློག །རྒྱ་གར་ཆོས་ཀྱི་སྔགས་བྱད་བཟློག །རྒྱ་ནག་གཙུག་ལག་ཙང་ཀུན་བཟློག །ཞང་ཞུང་ངན་སྔགས་ཇོ་བྱོལ་བཟློག །ཁྲོ་བོའི་ངན་སྔགས་རྦོད་གཏོང་བཟློག །གེ་སར་དམག་གི་དྲ་བཞི་བཟློག །སྟག་གཟིག་ནོར་གྱི་བླ་ཁེབ་བཟློག །སུམ་པའི་གླང་དམར་བོན་ཟོར་བཟློག །མུ་སྟེགས་ངན་སྔགས་བར་བུ་བཟློག །སྟེང་ཉི་ཟླ་གཟའ་སྐར་མཁའ་རྒྱུ་བཟློག །འོག་ས་བདག་ཀླུ་གཉན་གདུག་རྩུབ་བཟློག །ཀླུ་བདུད་ནག་པོའི་གཏད་ནན་བཟློག །ཨགྣེ་མེ་ཡི་སྦྱིན་བསྲེག་བཟློག །མི་དང་མི་མིན་ཐམས་ཅད་ཀྱི། །བསམ་སྦྱོར་གདུག་རྩུབ་ངན་པ་བཟློག །ཕྱི་ཡི་འབྱུང་བ་འཁྲུག་པའི་བདུད། །གློ་བུར་ཉི་ཁྲི་ཆིག་སྟོང་དང་། །བགེགས་རིགས་སྟོང་ཕྲག་བརྒྱད་ཅུ་བཟློག །ནང་གི་འབྱུང་བ་འཁྲུགས་པའི་ནད། །རླུང་མཁྲིས་བད་ཀན་འདུས་པ་དང་། བཞི་བརྒྱ་རྩ་བཞིའི་ནད་རྣམས་བཟློག །སྡང་བྱེད་དགྲ་བོའི་སྟེང་དུ་བཟློག །གནོད་བྱེད་བགེགས་ཀྱི་སྟེང་དུ་བཟློག །ཕུར་ཁ་བསྟན་པའི་སྟེང་དུ་བཟློག །ཐུན་ཟོར་འཕེན་པའི་སྟེང་དུ་བཟློག །གཏད་མནན་བྱེད་པའི་སྟེང་དུ་བཟློག །བསམ་སྦྱོར་ངན་པའི་སྟེང་དུ་བཟློག །བསྒྱུར་ཅིག་བཟློག་ཅིག་ཧེ་རུ་ཀ །ཁྱེད་ཀྱི་ཐུགས་དམ་དུས་ལ་བབ། །བཅོལ་པའི་ཕྲིན་ལས་གྲུབ་པར་མཛོད། །མཐུ་དབང་དངོས་གྲུབ་བདག་ལ་སྩོལ། །ཧོ་དགོངས་སུ་གསོལ་ལོ། །བླ་མ་དཀོན་མཆོག་ཡི་དམ་མཁའ་འགྲོ་ཆོས་སྐྱོང་སྲུང་མ་དང་བཅས་པ་རྣམས་དགོངས་སུ་གསོལ་ལོ། །སྤྱིར་སངས་རྒྱས་ཀྱི་བསྟན་དགྲ། དཀོན་མཆོག་གི་སྤྱི་དགྲ། རྡོ་རྗེ་སློབ་དཔོན་གྱི་སྐུ་དགྲ། བདག་ཅག་རྣལ་འབྱོར་པའི་དགོས་དགྲ། བཀའ་ལ་འཁུ་བ། དམ་ལ་ལོག་པ། ཕོད་བཙུག་པ། དོ་བསྔོ་བ། ཡ་བཟུང་བ། སྔ་དགྲ་ལག་གི་བྱས་པ། ཕྱི་དགྲ་ཡིད་ལ་བསམ་པ། ད་དགྲ་ཐད་དུ་བཙུག་པ། གཟུགས་ཅན་གྱི་དགྲ། གཟུགས་མེད་ཀྱི་བགེགས། བར་ཆད་ཀྱི་རྐྱེན། ཚེ་ལེན་གྱི་བདུད། བྱད་མ་གནོད་བྱེད་ལྷ་སྲུངས་དང་བཅས་པ་རྣམས། བཅོམ་ལྡན་འདས་རྒྱལ་བ་ཞི་ཁྲོའི་ལྷ་ཚོགས་རྣམས་དང་། དཔལ་ལྡན་ལྷ་མོ་ནག་མོ། དཔལ་ལྡན་མགོན་པོ་ནག་པོ། འཆི་བདག་གིས་རྒྱལ་པོ་གཤིན་རྗེ་མེ་རུ་རྩེ། ཆོ་འཕྲུལ་རྒྱལ་མོ་རེ་མ་ཏི། གཟའ་བདུད་ཆེན་པོ་ར་ཧུ་ལ། དམ་ཅན་འགར་བ་ནག་པོ། མཐུ་ཆེ་ལ་རྩལ་དྲག་པ་ཁྱེད་རྣམས་ཀྱི་ཞལ་དུ། དམར་གྱི་གཏོར་མ་འདི་དང་མཉམ་དུ་བཞེས་ཤིག །བཞེས་ཤིག །ཅེས་གཏོར་མ་ཁྱེར་རོ། །ལས་ཀྱིས། ལིང་ཐོབ། འཁོར་ཤིག །ཚང་དཀྲུག །ལས་པ་ལས་ལ་མ་ཞེ་ན། ལིང་པ་ལིང་ལ་མ་ཞེ་ན། ཤན་པའི་གྲིའུ་མ་བརྟུལ། ཕོ་ཉས་རྒྱུག་ལོག་མ་བྱེད། ནམ་མཁའ་སྟོང་པ་ལ་ཚད་མ་བཙུག །ས་གཞི་གྲོ་མོ་ལ་རྗེས་མ་བཞག །ཚེ་ཕྱི་མ་ལ་དུས་མ་བཏབ། ལོ་དང་ཟླ་བར་མ་བཞག་ལ། ཞག་དང་ཟ་མའི་ནང་དུ་སྒྲོལ་ཅིག །དེ་ནས་བཟློག་སྔགས་བཟླས་པའི་གཏིང་ལ། ཡེ་དྷརྨཱ་ཚར་གཅིག་བཟླས་པས། བསྲུང་འཁོར་གྱི་ཚུལ་དུ་ལྷ་ཚོགས་རྣམས་ཞལ་ནང་དུ་གྱུ་བར་བསྒོམ་ལ། གཏིང་བཤགས་བྱ་བ་ནི། ༀ། བདག་ནི་རང་རིག་ཡེ་ཤེས་བློ་དང་མ་ལྡན་པས། །བག་མེད་ཚུལ་གྱི་དམ་ལས་འགལ་གྱུར་ཏེ། །བཀའ་བརྒྱུད་བླ་མའི་ཐུགས་དང་ཅི་འགལ་བ། །རྡོ་རྗེ་སློབ་དཔོན་སྐུ་ལ་བཟོད་པར་གསོལ། །བདག་ནི་རང་རིག་ཡེ་ཤེས་བློ་དང་མ་ལྡན་པས། །བག་མེད་ཚུལ་གྱི་དམ་ལས་འགལ་གྱུར་ཏེ། །དཔལ་ཆེན་ཧེ་རུ་ཀའི་ཐུགས་དང་ཅི་འགལ་བ། །ཐུགས་རྗེ་ཆེ་མངའ་རྣམས་ལ་བཟོད་པར་གསོལ། །ཧཱུྃ། བདག་ནི་རང་རིག་ཡེ་ཤེས་བློ་དང་མ་ལྡན་ཏེ། །བག་མེད་ཚུལ་གྱི་དམ་ལ་འགལ་གྱུར་ཏེ། །མ་མོ་མཁའ་འགྲོའི་ཐུགས་དང་ཅི་འགལ་བ། །མ་སྲིང་རྒྱ་མཚོའི་ཚོགས་ལ་བཟོད་པར་གསོལ། །བདག་ནི་རང་རིག་ཡེ་ཤེས་བློ་དང་མ་ལྡན་ཏེ། །བག་མེད་ཚུལ་གྱིས་དམ་ལས་འགལ་གྱུར་ཏེ། །ཆོས་སྐྱོངས་སྲུང་མའི་ཐུགས་དང་ཅི་འགལ་བ། །དམ་ཅན་རྒྱ་མཚོའི་ཚོགས་ལ་བཟོད་པར་གསོལ། །གསང་སྔགས་རྨད་བྱུང་ཐེག་ཆེན་སྒོར་ཞུགས་རྣལ་འབྱོར་རྣམས། །ལྟ་བ་འཕང་དམས་ཆོས་ཉིད་དོན་མ་རྟོགས། །སྒོམ་པ་ཡུན་ཐུང་ཡི་དམ་ལྷ་མ་འདྲིས། །སྤྱོད་པ་བརླབ་ཆུང་ཡི་དམ་ལྷ་མ་མཉེས། །སྦྱིན་པ་སྟོབས་ཆུང་སེར་སྣའི་མདུད་མ་གྲོལ། །བསམ་གཏན་སྟོབས་ཆུང་འདོད་ཆགས་སེམས་མ་ནོན། །སྙིང་རྗེ་ཤུགས་ཆུང་ཞེ་སྡང་སྤྲོ་མ་ཞི། །ཤེས་རབ་བློ་ཆུང་གཏི་མུག་མུན་མ་སེལ། །མ་མཐོང་མཐོང་གྱི་ལྷ་འདྲེར་བསྐུར་བཏབ་སམ། །མ་ཉེས་པ་ལ་སྔགས་ཀྱི་ཟོར་ཐལ་ལམ། །མ་རྟོགས་པ་ལ་ཕུར་པའི་དབལ་ཐལ་ལམ། །སྨན་མེད་ཨརྒས་ཡི་དམ་ལྷ་མཆོད་དམ། །སྟ་ན་བྱིན་གྱིས་མ་རློབས་གནས་འཁྱམས་སམ། །གྷ་ན་བྱིན་གྱིས་མ་རློབས་རུལ་ཁྱེར་རམ། །དཀྱིལ་འཁོར་བྲི་ནོར་མར་མེ་འབར་བསད་དམ། །ཕྱིའི་འདུལ་ཁྲིམས་མ་སྲུངས་ཁྲིམས་ཉམས་སམ། །ནང་གི་དམ་ཚིག་མ་སྲུངས་དམ་ཉམས་སམ། །བསྲུང་མཚམས་མ་མཆིས་སྡིག་དང་གྲལ་གཅིག་གི། །སློབ་དཔོན་བཀའ་དྲིན་ཅན་གྱི་བཀའ་བཅག་སམ། །གྲོགས་མཆེད་ཁྱད་པར་ཅན་གྱི་ཐུགས་དཀྲུགས་སམ། །དམག་ཆེན་དཔོན་བྱས་ལིང་ཆེན་ཁ་བསྒྱུར་རམ། །ཆུ་བསྒྱུར་མེ་བཀྱེས་སེམས་ཅན་སྲོག་བཅད་དམ། །དེ་ལ་སོགས་ཏེ་ཉེས་སྒྲིབ་ཅི་མཆིས་པ། །འཕགས་པ་མངོན་སུམ་བཞུགས་པའི་སྤྱན་སྔ་རུ། །གནོང་འགྱོད་ཡིད་ལ་དྲན་ཏེ་མཐོལ་ཞིང་བཤགས། །བདག་ཅག་སེམས་ཅན་ལགས་པས་མ་རིག་འཁྲུལ་པ་བགྱི། །སྒྱུ་མ་ལགས་པས་ནོངས་པ་རྗེས་སུ་བཤགས། །ཐུགས་རྗེ་ཆེན་པོའི་བཟོད་པ་དང་དུ་བཞེས། །ཡེ་ཤེས་ཆེན་པོས་ཚངས་པ་སྩལ་དུ་གསོལ། །ཡི་གེ་བརྒྱ་པ་ཅི་རིགས་པ་འདོན། དེ་ནས་བཀྲ་ཤིས་བརྗོད་པ་ནི། ཕྱོགས་བཅུའི་སངས་རྒྱས་རྣམས་ཀྱིས་བཀྲ་ཤིས་པའི་དགོངས་པ་མཛད། བྱང་ཆུབ་སེམས་དཔའ་རྣམས་ཀྱིས་དབྱངས་མཛད། ལྷ་དང་ལྷ་མོ་རྣམས་ཀྱིས་མེ་ཏོག་གི་ཆར་ཕབ། ཆོས་སྐྱོང་རྣམས་ཀྱིས་བར་ཆད་ཀྱི་བགེགས་བསྐྲད་པར་བསམ་ལ། ཀུན་གྱི་མེ་ཏོག་དཀྱིལ་འཁོར་ལ་གཏོར་ནས། ༈ ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨ་རྒྱས་པའི་འདབ་འདྲའི་སྤྱན་མངའ་བ། །དེ་ནི་འཇིག་རྟེན་དགེ་བའི་བཀྲ་ཤིས་དང་པོའོ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །དེ་ཡི་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་དགུ་རྣམས་ལ་ཞི་བྱེད་པ། །དེ་ནི་འཇིག་རྟེན་དགེ་བའི་བཀྲ་ཤིས་གཉིས་པའོ། །བཀྲ་ཤིས༴ དགེ་འདུན་དམ་པ་ཆོས་ལྡན་ཐོས་པའི་བཀྲ་ཤིས་ཕྱུག །ལྷ་དང་མི་དང་ལྷ་མ་ཡིན་གྱི་མཆོད་པའི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་ཞིང་། །དེ་ནི་འཇིག་རྟེན་དགེ་བའི་བཀྲ་ཤིས་གསུམ་པའོ། །བཀྲ་ཤིས་དམ་པ་དེང་༴ རྒྱལ་བ་སྲས་བཅས་བསོད་ནམས་མཐུ་དག་དང་། ལྷ་རྣམས་ཀུན་གྱི་བསྔགས་པ་བརྗོད་པ་དང་། །གསང་སྔགས་རིག་སྔགས་རྣམས་ཀྱི་མཐུ་སྟོབས་དང་། །བདེན་པར་སྨྲ་བ་རྣམས་ཀྱི་བདེན་ཚིག་གི། །བཀྲ་ཤིས༴ བསོད་ནམས་རི་བོ་བཞིན་དུ་བརྟན་པ་དང་། །སྙན་པས་ནམ་མཁའ་བཞིན་དུ་ཁྱབ་པ་དང་། །རྒྱུད་འཛིན་ཉི་ཟླ་བཞིན་དུ་གསལ་བ་སྟེ། །བཀྲ་ཤིས༴ བགེགས་རིགས་སྟོང་ཕྲག་བརྒྱད་ཅུ་ཞི་བ་དང་། །མི་མཐུན་གནོད་པའི་རྐྱེན་དང་བྲལ་བ་ཡི། །འདོད་པ་འགྲུབ་ཅིང་ཕུན་སུམ་ཚོགས་པ་སྟེ། །བཀྲ་ཤིས༴ ལོ་བརྒྱ་ཐུབ་ཅིང་སྟོན་བརྒྱ་མཐོང་བ་དང་། །ཚེ་རིང་ནད་མེད་བདེ་སྐྱིད་ཕུན་སུམ་ཚོགས། །ཐེག་པ་མཆོག་ལ་ངེས་པར་འབྱུང་བ་ཡི། །བཀྲ་ཤིས༴ སྦྱིན་པ་བཏང་ཞིང་ཚུལ་ཁྲིམས་བསྲུང་བ་དང་། །བཟོད་པ་བསྒོམ་ཞིང་བརྩོན་འགྲུས་བརྩམས་པ་དང་། །མཉམ་པར་འཇོག་ཅིང་ཤེས་རབ་བསྐྱེད་པ་ཡི། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །སྐུ་ལྔ་ལྷུན་གྲུབ་རྒྱལ་བ་རྒྱ་མཚོ་དང་། །གསུང་ལྔ་ལྷུན་གྲུབ་དམ་ཆོས་རྒྱ་མཚོ་དང་། །ཐུགས་ལྔ་ལྷུན་གྲུབ་རྒྱལ་སྲས་སྨིན་པའི་ཚོགས། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་ཤིང་མི་མཐུན་པའི་ཕྱོགས་ཐམས་ཅད་ལས་རྒྱལ་བར་གྱུར་ཅིག །རྡོ་རྗེ་སློབ་དཔོན་སྐུ་ཚེ་རིང་བར་གྱུར་ཅིག །དཀྱིལ་འཁོར་གཉེན་པོ་ཞལ་གྲོ་བར་གྱུར་ཅིག །མཆེད་དང་ལྕམ་དྲལ་ཐམས་ཅད་ལ་བར་ཆད་མི་འབྱུང་བར་གྱུར་ཅིག །དེ་ནས་དཀྱིལ་འཁོར་བསྡུ། མི་དམིགས་པའི་ངང་ལ་རྒྱས་གདབ། ལུས་བསྲུང་། གོ་བསྒོ། དགེ་བ་བྱང་ཆུབ་ཏུ་བསྔོ། སརྦ་མངྒ་ལཾ།། །།