སྔོན་འགྲོ་མེ་ཏོག་ཕྲེང་མཛེས་ཀྱི་འགྲེལ་པ། མཁས་གྲུབ་ཡེ་ཤེས་རྒྱལ་མཚན།

སྔོན་འགྲོ་མེ་ཏོག་ཕྲེང་མཛེས་ཀྱི་འགྲེལ་པའི་དབུའོ། །སྭསྟི་སིདྡྷཾ། བླ་མ་ཡི་དམ་བཀའ་སྡོད་རྣམས་ལ་ཕྱག་འཚལ་ལོ། །ཆོས་སྐུ་ནམ་མཁའ་ཡངས་པའི་དཀྱིལ། །ལོངས་སྐུ་ཉི་མའི་གདུལ་བྱ་ལ། །སྤྲུལ་སྐུ་ཚ་ཟེར་དཔག་མེད་འཕྲོས། །ཀུན་མཁྱེན་པད་མོའི་གཉེན་ལ་འདུད། །དེས་བསྟན་རྒྱུད་རྒྱལ་གསང་སྙིང་གི། །རྒྱུད་དོན་བསྒྲུབ་ཐབས་ལྟར་བཤད་པའི། །ཆོ་ག་སྦྱོར་དངོས་རྗེས་གསུམ་ལ། །སྔོན་འགྲོའི་གསལ་བྱེད་བྲི་བར་བྱ། །འདིར་རྒྱུད་སྡེ་ཐམས་ཅད་ཀྱི་རྒྱལ་པོ་ཆེན་པོ་དཔལ་གསང་བའི་སྙིང་པོའི་དོན་བསྒྲུབ་ཐབས་དང་འབྲེལ་ཞིང་། བསྒྲུབ་ཐབས་མན་ངག་དང་འབྲེལ་ལ། མན་ངག་བླ་མ་དམ་པའི་ཕྱག་ལེན་དང་འབྲེལ་ཡང་། ཕྱག་ལེན་ཆོ་གའི་འགྲིག་དང་འབྲེལ་བའི་ལུགས་ལྟར་བཤད་ན། ལེའུ་བཅུ་བཞི་ཡན་ཆད་ནི་མ་བསྒྱུར་རྣལ་མའི་དཀྱིལ་འཁོར་ཞི་བ་ཡིན་ལ། བཅོ་ལྔ་མན་ཆད་བསྒྱུར་བ་ཁྲག་འཐུང་གི་དཀྱིལ་འཁོར་ཡིན། དེ་གཉིས་གང་ལྟར་ཡང་། མངོན་པར་རྟོགས་པའི་གོ་རིམ་བསྡེབས་མ་ཤེས་ན། བདུད་རྩི་རོ་སྙོམས་ལྟ་བུའི་བཤད་པར་འགྲོ་བའི་སྐྱོན་ཡོད་པས། གོ་རིམ་བསྡེབས་ན། ཆོ་ག་སྦྱོར་དངོས་རྗེས་གསུམ་གྱིས་བསྟན་དགོས་སྟེ། ཚབ་རྒང་པས། སྦྱོར་དངོས་རྗེས་གསུམ་མི་མཁས་པས། །སྐྱེས་བུ་རྣམས་ནི་ཅི་ལྟར་ཡང་། །ཅི་བསྒྲུབ་བྱ་བ་ངེས་མེད་ཡིན། །མཐར་ཕྱིན་བྱ་བ་ཤིན་ཏུ་དཀའ། །ཅེས་གསུང་པས་འདི་ནི་སྦྱོར་བ་སྔོན་འགྲོའི་ཆོས་སོ། །དེ་ལ་གཉིས་སྟེ། སྤྱིའི་སྔོན་འགྲོ་དང་། ཁྱད་པར་གྱི་སྔོན་འགྲོའོ། །དང་པོ་ལ་བཞི། གནས་ཁང་གིས་བརྟག་པ་དང་། དཀྱིལ་འཁོར་རྩིགས་ཤིང་ཆག་ཆག་གདབ་པ་དང་། མཆོད་པ་བཤམ་པ་དང་། ནང་དུ་འདུག་ནས་ཚུལ་ཕྱག་དང་གྲལ་ཕྱག་བྱ་བ་སྟེ། གོང་མ་རྣམས་ནི་བསྒྲུབ་གཞུང་རྣམས་སུ་ཤེས་ལ། གསུམ་པ་པཱུ་ཙ་བཤམ་པ་ལ། མཆོད་པའི་རྟེན་བཤམ་པ། མཆོད་པའི་རྒྱན་བཤམ་པ། མཆོད་པའི་རྫས་བཤམ་པ་དང་གསུམ་མོ། །དང་པོ་ནི། རྩ་རྒྱུད་ལས། སྐུ་གསུང་ཐུགས་ལྡན་གཟུགས་ཀྱང་དགོད། །ཅེས་པས། དང་པོ་སྐུ་རྟེན་ལ། ལམ་རིམ་ལས། རི་མོ་རྒྱུ་བཞིས་འབུར་བླུག་དང་། འཇིབ་པ་ལས་བྱས། ཅེས་པས། རིས་སུ་བྲིས་པ། ལུགས་སུ་བླུག་པ། འབུར་དུ་བཏོད་པ། འདིར་དང་པོ་བྱས་པ་སྟེ། དེ་ཡང་ཞི་བ་བཞི་བཅུ་རྩ་གཉིས་ཀྱིས་གཙོ་བོ་བྱས་པའི་ཞི་བའི་ལྷ་ཚོགས་གཡས་སུ་བཤམ། ལྔ་བཅུ་རྩ་བརྒྱད་ཀྱིས་གཙོ་བོ་བྱས་པའི་ཁྲོ་བོའི་ལྷ་ཚོགས་གཡོན་དུ་བཤམ། བླ་མའི་སྐུ་གཟུགས་ལ་སོགས་པ་རྣམས་དབུས་སུ་བཤམ། དེ་རྣམས་ཀུན་གཡས་ཀྱི་ནང་ཚན་ནོ། །གཉིས་པ་གསུང་རྟེན་གླེགས་བམ་གང་ཡོད་གཡོན་དུ་བཤམ། གསུམ་པ་ཐུགས་རྟེན་གདུང་རིང་བསྲེལ་ལ་སོགས་པ་རྣམས་དབུས་སུ་བཤམ། སྤྱིར་རྟེན་བཤམ་ལུགས་ལ། ཕ་རྒྱུད་ཐམས་ཅད་གཡས། མ་རྒྱུད་ཐམས་ཅད་གཡོན། གཉིས་མེད་ཀྱི་རྒྱུད་ཐམས་ཅད་དབུས་སུ་བཤམ། འགའ་ཞིག་གི་ཞི་ཁྲོ་ཐབས་ཤེས་ཀྱི་སྒོ་ནས་གཡས་གཡོན་དུ་བཤམ་པ་ཡིན་ཟེར་སྟེ། དེ་མ་ཡིན། གདུལ་བྱ་ལུགས་འབྱུང་ལྡོག་གི་དབང་གིས། མ་བསྒྱུར་རྣལ་མའི་དཀྱིལ་འཁོར་དང་། བསྒྱུར་བ་ཁྲག་འཐུང་གི་དཀྱིལ་འཁོར་ཡིན་པས། གཡས་གཡོན་དུ་བཤམ་སྟེ། རྒྱུད་ནས་ཀྱང་དེ་ལྟར་དུ་བཤད་དེ། དེ་དག་གིས་དགོས་ཆེད་ནི་རྣལ་འབྱོར་པ་ལ་བྱིན་རླབས་འཇུག་པའི་དགོས་པ་ཡོད། གཉིས་པ་མཆོད་པའི་རྒྱན་ལ་གསུམ་ལས། སྟེང་རྒྱན་ནི། བླ་རེ། རྒྱལ་མཚན། གདུགས་འཕན་ལ་སོགས་པ་རྣམས་སྟེང་དུ་ཕུབ། ལོགས་རྒྱན་ནི། ཡོལ་བ། དར་གྱི་ལྡ་ལྡི། འདོད་ཡོན་གྱི་ལྷ་མོ་ལ་སོགས་པ་ལོགས་སུ་བཤམ། ས་རྒྱན་ནི། ཕྱག་བདར་ལེགས་པོར་བྱས་ལ། དེའི་སྟེང་དུ་དཔྱང་ལ་སོགས་པ་བཏིང་བའི་སྟེང་དུ་མཉྫི་ལ་སོགས་པ་བཤམ། གཞན་ཡང་ཕྱག་མཚན་རྡོ་རྗེ་དྲིལ་བུ། རྔེའུ་ཆུང་ལ་སོགས་པ་རོལ་མོའི་བྱེ་བྲག་ཀྱང་བཤམ་སྟེ། བཤམ་ལུགས་མཆོད་སྤྲིན་ཆེན་པོའི་མདོ་ལས་བཤད། དེའི་དགོས་ཆེད་ནི། ལྷ་མཉེས་ཤིང་རྣལ་འབྱོར་པ་ཚོགས་རྫོགས་པའི་དགོས་པ་ཡོད་དོ། །གསུམ་པ་མཆོད་རྫས་བཤམ་པ་ལ། རྩ་བའམ་ནང་གིས་མཆོད་པ་དང་། ཡན་ལག་ཕྱིའི་མཆོད་པ་བཤམ་ལུགས་དང་གཉིས་ཏེ། དེ་ཡང་མཆོད་སྤྲིན་ཆེན་པོའི་མདོ་ལས། །དབང་དང་ལྡན་པའི་སྟེགས་བུ་རུ། །ལྔ་དང་གསུམ་གཉིས་པཱུ་ཙ་བཤམ། །གཏོར་མགོ་གཡས་ལ་མཆོད་མགོ་གཡོན། །རིང་བ་རྒྱབ་ལ་ཐུང་བ་མདུན། །འགུལ་སྣོལ་རྩེ་སྤྲད་ཡང་དོག་སྦྱར། །མཉྫི་ངོས་བཟུང་རང་ལ་བསྟན། །ཅེས་གསུང་པས་མཉྫི་ལ་རིང་བ་རྣམས་རྒྱབ་ནས་ཕར་ལ་བཤམ། ཐུང་བ་རྣམས་མདུན་ན་ཚུར་བཤམ་མོ། །དེ་ལ་དང་པོ་རྩ་བའི་ནང་མཆོད་སྨན་རག་གཏོར་གསུམ་བཤམ་ལུགས་ནི། སྨན་བྷནྡྷ་མཚན་ཉིད་ལྡན་པའི་ནང་དུ། ཆང་ཕུད་མ་ཉམས་པ་གཙོང་མ་ལ་པཉྩ་བཏབ་ལ་རང་གིས་གཡས་སུ་བཤམ་མོ། །རཀྟ་ནི། བྷནྡྷ་མཚན་ལྡན་ལྕང་ལོ་ཅན་གྱི་ནང་དུ། ཕྱིའི་རཀྟ་དཔའ་བོ་གྲིར་ཤི་བའི་ཁྲག །ནང་གི་རཀྟ་ནི། རུ་ཏྲའི་སྙིང་ཁྲག །གསང་བའི་རཀྟ་ནི་བུ་མོ་གཙང་མ་རྡོ་རྗེའི་མདའ་མ་ཕོག་པའི་རཀྟ་རྣམས་ལ་གཞི་བླང་བའི་ཁྲག་སྣ་ཚོགས་ཚད་ལ། ཨ་མྲྀ་ཏ་བཏབ་ལ་རང་གི་གཡོན་དུ་བཤམ། གཏོར་མ་ནི་ཆོས་བཅུ་ལས། མཆོག་གི་དངོས་གྲུབ་གྲུབ་བྱའི་ཕྱིར། །དང་པོ་ཟས་ཀྱི་ཕུད་ལ་བྱ། །ཅེས་པས། དང་པོ་གཏོར་མའི་རྒྱུ་ནི། དབྱར་ཡིན་ན་མེ་ཏོག །སྟོན་འབྲུ། དགུན་ཤ་ཁྲག །དཔྱིད་ཡིན་ན་ཟན་ལ་གཏོར་མ་བྱ་ཞེས་ཀྱང་གསུང་། ཕྱག་ལེན་ལ། ཕྱེ་གཙང་མ་ལ། བླ་མའི་གཏོར་མ་དང་། ཞི་བ་རྣམས་ཆང་གི་སྦྲུས་ལ། པད་གཏོར་པད་སྡོང་གི་ཚུལ་ལ་ཐེབ་སྐྱུ་པད་འདབ་ཀྱི་ཚུལ་དུ་བྱ། ཁྲོ་བོ་དང་ཆོས་སྐྱོངས་དྲག་བྱེད་རྣམས་ལ། ཕྱེ་གཙང་མ་ལ་ཤ་སྣ་སྙིང་སྣ་རྣམས་ཀྱི་ཕྱེ་མ་བསྲེས་ལ་ཆང་དང་རཀྟས་སྦྲུས་ཞིང་། དཔལ་གཏོར་སྙིང་གི་ཚུལ་དུ་བྱ། ཐེབ་སྐྱུ་རྣམས་དོན་སྙིང་འབྱིན་པའི་ཚུལ་ལམ། ཐོད་ཚལ་གྱི་ཚུལ་བྱས་ལ། མར་ཞལ་དང་ཤ་ཆེན་ལ་སོགས་པས་བརྒྱན་ཅིང་ཨ་མྲྀ་ཏ་བཏབ་བོ། །དེ་ཡང་། འཁོར་གྱི་ཉེས་སྐྱོན་དག་བྱའི་ཕྱིར། །སྣོད་དེ་ཤིན་ཏུ་གཙང་བར་བྱ། །ཅེས་པས། གཏོར་སྣོད་ཀ་པཱ་ལ་དུམ་བུ་གཅིག་པའམ། སྣོད་གཙང་མའི་ནང་དུ་བཤམ་ཞིང་བཀྲ་ཤིས་ཕུན་སུམ་ཚོགས་པའི་ཕྱིར། སྣོད་དེ་ཤིན་ཏུ་བཀང་བར་བྱ། །ཅེས་པས། སྣོད་དེ་ཡང་ཤིན་ཏུ་བཀང་ལ། །གཏོར་ལེན་བླང་དོར་མེད་པའི་ཕྱིར། །གཏོར་ཚུག་གཅིག་ཏུ་བརྟག་པར་བྱ། །ཅེས་པས། གཏོར་མ་མ་སྐྱོང་བ་ལ་དུས་དྲུག་གམ་བཞི་ལ་སོགས་པ་ལ་སྔ་ཕྱི་མེད་པར་དུས་ཅིང་མི་གཡོ་བའོ། །ཡང་ན་རྒྱུ་ལ་བཟང་ངན་མེད་པ་ལ་ཟེར། ཁ་ཅིག་གིས་དུས་རྒྱུན་དུ་གཏོར་ཚུག་ཆེ་ཆུང་མེད་པ་གཅིག་ཏུ་བརྟག་པར་བྱ། ཅེས་ཀྱང་ཟེར་རོ། །བསྙེན་བཀུར་དག་དང་ལྡན་པའི་ཕྱིར། །མཉྫི་ལ་སོགས་སྟེགས་ལ་བཞག །ཅེས་པས། གཏོར་མ་དེ་སྨིན་མཚམས་པས་མི་མཐོ། །ཐུགས་ཀ་བས་མི་དམའ་བའི་སྟེགས་ལ་བཞག་པ་ལ། གཏོར་མ་དབུས་སུ་བཤམ་མོ། །གཏོར་མ་བཤམ་ལུགས་ལ། འགའ་ཞིག་གིས་གཡས་གཡོན་ཐབས་ཤེས་ཀྱི་ཆ་ཡིན་ཟེར་ཡང་། ལམ་རིམ་ལས། མ་ཧཱ་བྷ་ལིང་ཨ་མྲྀ་ཏ། དམར་ཆེན་ཚོགས་ཀྱི་གཏོར་མ་དགྲམ། །འདི་ལ་སྨར་སྟོན་སེང་གེ་འོད་ཀྱིས་དཔལ་ཆེན་པོའི་གཡས་ཞལ་དཀར་པོ་ལ་སྨན། གཡོན་ཞལ་དམར་པོ་ལ་རཀྟ། དབུས་ཞལ་མཐིང་ཀ་ལ་གཏོར་མ་བསྟབས་པའི་བརྡ་ཡིན་པས་གཡས་གཡོན་དབུས་གསུམ་དེ་ལྟར་དུ་ཡིན་གསུངས་སོ། །གཉིས་པ་ཡན་ལག་གམ་ཕྱིའི་པཱུ་ཙ་བཤམ་པ་ནི། དང་པོ་ཨརྒྷཾ་ནི། དུང་ཆོས་སམ། ཟངས་ལ་སོགས་པ་སྣོད་གཙང་མའི་ནང་དུ། ལུང་པ་དགུ་འདུས་ཀྱི་ཆུའམ། ཆུ་བོ་ཆེན་པོའི་ཆུ་ལ། བ་དམར་སེར་གྱི་འོ་མ་བླུག །རིན་པོ་ཆེ་བདར་བ། གཡོན་དུ་བཤམ་པར་བྱའོ། །དེའི་འོག་ཏུ་སྤོས་ནི། སྤོས་སྦྱོར་དང་ལྡན་པའི་སྤོས་རྒྱའམ། སྤོས་དྲིལ་རྣམས་བཤམ་མོ། །ཁྲོ་བོ་ལ་ཤ་ཆེན་གྱི་བདུག་སྤོས་བཤམ་མོ། །དེའི་འོག་ཏུ་མེ་ཏོག་ནི། དབྱར་ཡིན་ན་ཆུ་དང་ཐང་ལ་སྐྱེས་པའི་མེ་ཏོག །དགུན་ཡིན་ན་འབྲུ་ལ་སྨན་གྱིས་ཁ་དོག་བསྒྱུར་བའོ། །འབྲུ་སིལ་མའི་མེ་ཏོག་བཤམ་མོ། ཁྲོ་བོ་ལ་དབང་པོ་ལྔའི་མེ་ཏོག་བཤམ་མོ། །དེའི་འོག་ཏུ་ཞུམ་མར་གྱི་མར་མེ་མཚན་ཉིད་དང་ལྡན་པ་བཤམ་མོ། །ཁྲོ་བོ་ལ་ཚིལ་ཆེན་གྱི་མར་མེ་བཤམ་མོ། །དེའི་འོག་ཏུ་དྲི་ཆབ་ནི། དུང་ཆོས་སམ་སྣོད་གཙང་མའི་ནང་དུ་ཆུ་གཙང་བླུག་ལ། དེ་ལ་ཙནྡན་དཀར་དམར། ཨ་ཀ་རུ་དང་དུ་རུ་ཀ་ལ་སོགས་པའི་དྲི་བཟང་པོ་རྣམས་བཏབ་ལ་བཤམ་མོ། །ཁྲོ་བོ་ལ་དྲི་ཆུའི་དྲི་ཆབ་བཤམ་མོ། །ཞལ་ཟས་ནི། ཞི་བ་ལ་འབྲས་བུའི་ཞལ་ཟས། ཁྲོ་བོ་ལ་དྲི་ཆེན་གྱི་ཞལ་ཟས་བཤམ་མོ། །རོལ་མོ་ནི། ཞི་བ་ལ་རོལ་མོའི་བྱེ་བྲག །ཁྲོ་བོ་ལ་རྐང་གླིང་ཐོད་རྔ་ལ་སོགས་པ་རྣམས་བཤམ། དེ་ལྟར་མཆོད་པ་དེ་དག་བཤམ་ལུགས་ལ། སྨན་རག་གཏོར་གསུམ་བཤམ་ལུགས་ལམ་རིམ་ལས་བཤད། རྣམ་ལྔ་བཤམ་ལུགས་མཆོད་སྤྲིན་ཆེན་པོ་ལས་བཤད། དེ་ནི་གྲལ་ཐབས་སུ་བཤམ་པའི་དབང་དུའོ། །དཀྱིལ་འཁོར་ལ་བཀོད་པའི་ཚེ། དཀྱིལ་འཁོར་གྱི་གཙོ་བོ་རང་དབང་ཆེ་བའི་རང་དབང་དུ་མཆོད་མགོ་གཡོན་བསྟན་ནས་གཡས་སུ་བསྐོར་ལ། ཤར་དུ་ཡོན་ཆབ། ཤར་ལྷོར་བདུག་སྤོས། ལྷོ་ནུབ་ཏུ་མེ་ཏོག །ནུབ་བྱང་དུ་མར་མེ། བྱང་ཤར་དུ་དྲི་ཆབ། ནུབ་ཏུ་ཞལ་ཟས་རྣམས་བཤམ། གཏོར་མགོ་གཡས་སུ་བསྟན་ནས་གཡོན་སྐོར་དུ་བཤམ་ལ། ཤར་ལྷོར་ཞི་བ། བྱང་ཤར་དུ་ཁྲོ་བོ། ནུབ་བྱང་དུ་མ་མོ། ལྷོ་ནུབ་ཏུ་མགོན་པོ། ཤར་དུ་བླ་མ། ནུབ་ཏུ་དམ་ཅན་རྣམས་བཤམ་མོ། །སྨན་རཀ་དང་བསང་ཆུ་སྣོད་གཙང་མའི་ནང་དུ་ཆུ་གཙང་ལ་ག་བུར་ལ་སོགས་པའི་དྲི་བཟང་བཏབ་ལ་རང་གིས་མདུན་ནས་གཡས་གྲལ་བྱེད་པའི་བསང་ཆུ་སྨན་རཀ་རིམ་པར་བཤམ་མོ། །བཞི་པ་སྐབས་འདིར་རྒྱུད་གཞུང་དང་སྟོད་ཟུར་པ་ཚང་གི་ལུགས་ལ་ཚུལ་ཕྱག་དང་། གྲལ་ཕྱག་དང་། མཚམས་བཅད་པ་དང་། བཤགས་པ་བྱ་བ་དང་། དམ་བཅའ་བ་དང་། བྱིན་དབབ་པ་དང་། ཕྱི་ནང་གི་མཆོད་པ་བྱིན་གྱིས་བརླབས་པའོ། །དེ་ལ་ཚུལ་ཕྱག་ནི། རྣལ་འབྱོར་པ་རྣམས་ནང་དུ་འདུས་ལ། དཀྱིལ་འཁོར་གྱི་མཐའ་ནས་འཁོད་ལ། ལག་སོར་དཔའ་བོའི་འབྲུ་ལྔ་གསལ་བས། ༀ་བཛྲ་ས་མ་ཡ་ཧཱུྃ་ཛ། ཞེས་རྡོ་རྗེ་གོ་འབྱེད་ཀྱི་མུ་ཏྲ་དང་བཅས་པ་ལན་གསུམ་བརྗོད་པས། ལན་དང་པོས་སེ་གོལ་གཡས་སུ་གཏོགས་པས་ཞི་བའི་ལྷ་ཚོགས་སྤྱན་དྲངས་ནས་གཡས་ཀྱི་ནམ་མཁའ་ལ་བཞུགས། ལན་གཉིས་པས་སེ་གོལ་གཡོན་དུ་གཏོགས་པས་ཁྲོ་བོའི་ལྷ་ཚོགས་སྤྱན་དྲངས་ནས་གཡོན་གྱི་ནམ་མཁའ་ལ་བཞུགས། ལན་གསུམ་པ་སེ་གོལ་དབུས་སུ་གཏོགས་པས་བླ་མ་རིག་འཛིན་བྱང་སེམས་མཁའ་འགྲོ་ཆོས་སྐྱོང་རྣམས་སྤྱན་དྲངས་ནས་དབུས་སུ་བཞུགས་པར་བསམ་ལ། རབ་རྒྱུན་བཤགས་བྱས་ལ་ཕྱག་འཚལ་ལམ། འབྲིང་ལན་བདུན། དེ་མ་གྲུབ་ན་ཕྱག་རྐྱང་པ་འཚལ་དེ། བླ་མ་ལ་གསུམ། ཡི་དམ་ལ་གསུམ། རིག་འཛིན་བྱང་སེམས་མཁའ་འགྲོ་ཆོས་སྐྱོང་ལ་གསུམ། ཡང་ན་བླ་མ་རིག་འཛིན་བྱང་སེམས་མཁའ་འགྲོ་ཆོས་སྐྱོང་རྣམས་ལ་གསུམ། ཡི་དམ་ལ་གསུམ། བསྒྲུབ་ཁང་རྙིང་པ་ཡིན་ན་གནས་བདག་ལ་གསུམ་འཚལ། གྲལ་ཕྱག་ནི། དེ་ནས་རུ་གདན་ལ་བཞུགས་པ་དང་། རུ་ལ་ཕྱག་གསུམ་འཚལ། དེ་ནས་དབང་རྫོགས་པར་ཐོབ་གང་སྔ་བ་རྣམས་གྲལ་རིམ་དུ་བསྡད་པ། འོག་མ་འོག་མ་རྣམས་ཀྱི་ཕྱག་གསུམ་གསུམ་འཚལ་ལོ། །འོ་ན་ཚུལ་ཕྱག་དང་གྲལ་ཕྱག་གི་དོན་ནི། ལམ་རིམ་གྱིས་འཇུག་ཚུལ་དང་བསྟུན་ན། ཐོག་མར་སྐྱབས་འགྲོ་དང་ཕྱག་འཚལ་དགོས་པས། དེ་དང་ཚུལ་མཐུན་དུ་བྱེད་པས་ཚུལ་ཕྱག །དབང་ཐོབ་པའི་རིམ་པ་ལྟར་དུ་གྲལ་དུ་འཁོད་ཅིང་། གྲལ་རིམ་ལྟར་དུ་འཚལ་བའི་ཕྱིར་གྲལ་ཕྱག །དེ་ལ་དགོངས་འདུས་ལས། རྡོ་རྗེ་འདུས་པས་དབང་གྲལ་དུ། །ངེས་པའི་དོན་གྱི་གདུང་ཆེན་ཤར། །ཅེས་གསུངས་སོ། །འདིར་སློབ་དཔོན་དམ་པ་བདེ་བར་གཤེགས་པའི་ལུགས་ཀྱིས། རབ་རྒྱུན་བཤགས་ལྟར་ཉམས་སུ་བླང་ཚུལ་ལ། རྒྱུན་བཤགས་ཡན་ལག་བརྒྱད་པ། ཞི་ཁྲོའི་བཤམས་པ། མཎྜལ་དང་གསུམ་ལས། དང་པོ་རྒྱུན་བཤགས་རང་ལའང་སྔོན་དུ་བྱ་བ་དང་། དངོས་གཞི་གཉིས་ལས། དང་པོ་ནི། གཏོར་མའི་ཆོས་བཅུ་ལས། འཁོར་གྱིས་གནོད་པ་བསལ་བའི་ཕྱིར། །གཏོར་མ་བཞག་པར་མི་བྱའོ། །ཅེས་པས། གཏོར་མ་བཤམ་མ་ཐག་ཏུ་མ་བསྔོ་ན་ཡི་དྭགས་མཁའ་རྒྱུའི་དྲི་ཟ་རྣམས་ཀྱིས་བརླབས་ཅིང་། གཏོར་མའི་ཕུད་ཉམས་པས། དེ་མ་བསྔོ་ན་ཡེ་ཤེས་ཀྱི་ལྷ་ལ་ཐུགས་རྟོག་མི་མངའ་ཡང་། དེའི་འཁོར་དུ་གནས་པའི་དྲེགས་བྱེད་རྣམས་ཀྱི་གནོད་པ་འོང་བས། བཤམ་མ་ཐག་ཏུ་བསྔོ་དགོས་སྟེ། མ་ཁོམ་ནའང་གཏོར་ཆུ་བླུག་པ་ཁཱ་ཧི་བཏག་པ་ལ། །རྟེན་འབྲེལ་ཚོགས་པར་བྱ་བའི་ཕྱིར། །བསང་ཆབ་དག་དང་ལྡན་པར་བྱ། །ཅེས་པས། དང་པོ་ལས་སློབ་པས་གཏོར་མ་ལ་ཆུ་གཙང་གིས་བྲན་ལ། ཐམས་ཅད་ཀྱིས་ཆབ་སྦྱང་མཛད་པར་ཞུ་ཞུས་པ་དང་། ཐམས་ཅད་ཀྱིས་ༀ་སྭ་བྷཱ་ཝ་ཤུདྡྷེ་སརྦ་དྷརྨཱ་སྭ་བྷཱ་བ་ཤུདྡྷོ་྅ཧཾ། ཞེས་བརྗོད་དོ། །རྩ་སྡེ་བའི་ཕྱག་ལེན་ལ། གཏོར་མའི་ཐུགས་དམ་ཆུས་མི་བསླད། །ཅེས་གསུངས་པས། ཆང་གཉིས་བར་དུ་ཆུ་གཅིག་བླུག་པར་བཞེད་དོ། །བར་ཆད་ཞི་བར་བྱ་བའི་ཕྱིར། །སྔགས་ཀྱིས་ཡང་དག་བསྲུང་བར་བྱ། །ཅེས་པས། ལས་སློབ་པས་གཏོར་མ་ལ་ཆང་རྒོད་བྲན་ལ། གཏོར་མ་ལ་སྐྱེམས་ཐལ་བྱིན་རླབས་མཛད་པར་ཞུ་ཞུས་པ་དང་། ཐམས་ཅད་ཀྱིས། ༀ་ཨཱཿཧཱུྃ། བྱིན་རླབས་རྩ་བ་བཀའ་བརྒྱུད་བླ་མ་མཆོད། དངོས་གྲུབ་རྩ་བ་ཡི་དམ་ལྷ་ཚོགས། ཕྲིན་ལས་རྩ་བ་ཆོས་སྐྱོངས་སྲུང་མ། བསྙེན་བསྒྲུབ་རྩ་བ་མ་དང་མཁའ་འགྲོ། བསྟན་སྲུང་བཀའ་སྡོད་ལས་མཁན་ཕོ་ཉ་དང་བཅས་པ་རྣམས་མཆོད། མ་ཧཱ་བྷ་ལིངྟ་རཀྵ་རཀྵ་ཧཱུྃ། ཅེས་བརྗོད་པ་ནི། དངོས་སུ་འབུལ་བ་མ་ཡིན་ཡང་། བར་ཆད་བསྲུང་བའི་དོན་སྟེ། དཔེར་ན་རྒྱལ་པོ་ལ་ནོར་བསྔོ་ཚར་ན་འབང་གཞན་གྱིས་ལན་མི་སྤོབ་པ་དང་འདྲ་བར། དཀོན་མཆོག་ལ་འབུལ་རྒྱུ་ཡིན་བྱས་པས་མི་མ་ཡིན་གཞན་གྱིས་བརླབ་ཏུ་མེད་དོ། །གཞན་མཆོད་པ་འབུལ་བའི་ཡུལ་ངོས་མ་བཟུང་སྔོན་དུ་མཆོད་བྱས་ན་གཞན་འཕྲུལ་དབང་བྱེད་ཀྱི་ལྷ་ཡིས་ཐོབ་པར་བཞེད་དོ། །རྒྱུན་བཤགས་དངོས་ལ་དཔང་པོ་བསྐྱེད་པ་དང་། བཤགས་ཚུལ་ཡན་ལག་བརྒྱད་པ་གཉིས་ལས། དང་པོ་ནི། རྣལ་འབྱོར་པས་དུས་རྒྱུན་དུ་བཤགས་པ་བྱ་བ་ནི། རང་ཉིད་ལྷར་གསལ་བའི། ཅེས་པའི་དོན་ནི། ལམ་རིམ་ལས། ལྷ་དཔང་དགེ་སྤྱད་དོན་མེད་འགྱུར། །ཅེས་པས། སྔོན་འགྲོའི་ཐོག་མར་ཡི་དམ་གྱི་ལྷ་བསྒོམ་ན་ཡི་དམ་གྱི་ལྷ་མི་སྤང་ཞིང་དགེ་བ་གང་བྱེད་དོན་དུ་འགྱུར་བས། དེ་ནས་ལས་སློབ་པས་སྤོས་སྦྱང་བྱས་ཏེ། རང་ལ་རྟེན་དྲུང་། དེ་ནས་རྣལ་འབྱོར་པ་ཚོགས་པ་རྣམས་ཀྱི་མདུན་དུ་འདྲིས་ཞིང་མཐར་རྟེན་དྲུང་དུ་བཞག་ལ། ༀ་བཛྲ་སཏྭ་ཧཱུྃ། ཞེས་བརྗོད་པས། རང་ཉིད་པད་ཟླའི་སྟེང་དུ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས། གཡས་གསེར་གྱི་རྡོ་རྗེ་རྩེ་ལྔ་བསྣམས་པ། གཡོན་དངུལ་དཀར་གྱི་དྲིལ་བུ་དཀུ་ལ་བརྟེན་པ། ཞི་བའི་རྒྱན་ཆས་བཅུ་གསུམ་དང་ལྡན་པ། སྐུ་སྣང་ལ་རང་བཞིན་མེད་པ་བསྒོམ་པའི་ཁོང་ལ། ཁོང་སྟོང་ལྟ་བུར་གནས་པའི་ནང་དུ་རྩ་རོ་དབུ་རྐྱང་གསུམ་ཡོད་པ། འདིར་སྲོག་དག་པའམ། ཀུན་འདར་མའམ། དབུ་མ་ཡང་ཟེར་བའི་རྩ། སྦོམ་ཕྲ་མདའ་སྙུག་ཙམ་དཀར་ལ་དྲང་པ། གསལ་ལ་སྟོང་པའི་རྩ་མཚན་ཉིད་བཞི་དང་ལྡན་པ་གཅིག་ལྟེ་འོག་སོར་བཞི་ནས། སྤྱི་བོའི་ཚང་བུག་གི་བར་དུ་ཀ་བ་བཙུག་པ་ལྟར་དུ་བསྒོམ་པའི་རྩ་དེའི་ནང་ཐུགས་ཀའི་ཐད་ཙམ་དུ་ཉི་མ་ཞབས་ཟླ་བ་སྟེང་དུ་གནས་པའི་གའུ་ཁ་སྦྱོར་དུ་གནས་པའི་ནང་དུ། སེམས་ཀྱི་རང་བཞིན་ཧཱུྃ་དཀར་པོ་གཅིག་བསམ་མོ། །ༀ་བཛྲ་ས་མ་ན་ཛ་ཧཱུྃ་ཛ། ཞེས་བརྗོད་པས་ཐུགས་ཀའི་ཧཱུྃ་དེ་ལས་འོད་ཟེར་ཁ་དོག་སྣ་ལྔ་བྱུང་། སྲོག་དག་པའི་ལམ་དུ་ཞུགས་ནས། སྤྱི་བོ་ཚངས་པའི་བུ་ག་ནས་ཐོན་ཏེ། འོད་ཟེར་ཕྱོགས་བཅུར་འཕྲོས་པས་ཕྱོགས་བཅུའི་སངས་རྒྱས་རྣམས་ཀྱི་ཞིང་ཁམས་ཐམས་ཅད་ལ་ཕོག །ཕྱོགས་བཅུའི་སངས་རྒྱས་ཐམས་ཅད་ཆོས་ཀྱི་སྐུ་ལས་གཟུགས་ཀྱི་སྐུ་ཞི་ཁྲོའི་རྣམ་པ་བཞེངས་ནས། མདུན་གྱི་ནམ་མཁར་སྤྱན་དྲངས་ཞིང་ཉི་ཟླ་པདྨའི་གདན་ལ་བཞུགས་པར་བསམ་ལ། དེ་ཡང་ཞི་བ་བསྒོམ་ན་ཞི་བ་དབུས་དམ་རྒྱན་གཡས། ཕུར་པ་གཡོན། དམ་རྒྱན་བསྒོམ་ན། དམ་རྒྱན་དབུས། ཞི་བ་གཡས། ཕུར་པ་གཡོན། ཕུར་པ་བསྒོམ་ན། ཕུར་པ་དབུས། ཞི་བ་གཡས། དམ་རྒྱན་གཡོན་དུ་བསྒོམ་ལ། གཙོ་བོ་གང་བསྒོམ་གྱི་དབུ་ལ་ཟླ་དཀྱིལ་གྱི་སྟེང་དུ་སངས་རྒྱས་ཆོས་དགེ་འདུན་ཀུན་འདུས་ཀྱི་ངོ་བོ་རྡོ་རྗེ་སློབ་དཔོན་དེ་དང་། བརྒྱུད་པའི་བླ་མ་རྣམས་རྡོ་རྗེ་སེམས་དཔའི་ཚུལ་དུ་བཞུགས་པར་བསམ་ལ། ཇ་འདྲེན་གྱི་ཚུལ་དུ་མཆོད་པ་འབུལ་བ་ནི། ༀ་བཛྲ་ཨརྒྷཾ་པྲ་ཏཱིཙྪ་ཨ་ཧཱུཾ། པུཥྤེ། དྷུ་པེ། ཨ་ལོ་ཀེ། གྷནྡྷེ། ནཻཝཱི་ཏེ། ཤཔྟ་པྲ་ཏཱིཙྪ་ཨཱཿཧཱུྃ། ཅེས་མཆོད། གཉིས་པ་བཤགས་ཚུལ་ལ་བརྒྱད་དེ། ཕྱག་འཚལ་བ་དང་། མཆོད་པ། བཤགས་པ། ཡི་རང་། ཆོས་འཁོར་བསྐོར་བར་བསྐུལ་བ། མྱ་ངན་ལས་མི་འདའ་བ་བཞུགས་སུ་གསོལ་བ། བསྔོ་བ། དམ་བཅའ་སྨོན་ལམ་གྱི་ཡན་ལག་དང་བརྒྱད་དོ། །དེ་ཡང་ལམ་རིམ་ལས། མཆོད་རྟེན་ཉི་མའི་གཟུགས་ཆེན་བཞུགས། ཡན་ལག་བརྒྱད་པའི་ཚུལ་བཟུང་བ། །ཅེས་གསུངས་པས། རྣམ་མཁྱེན་ཐོབ་པའི་ཐབས་ལ། ཚོགས་བསགས་ཅིང་སྒྲིབ་པ་སྦྱང་དགོས་པ། མདོ་སྔགས་ཐམས་ཅད་མཐུན་ནོ། །དེའི་རྩ་བ་ཡན་ལག་བདུན་པའམ། བརྒྱད་པ་འདི་ཡིན་ཏེ། འདིའི་བསྡུས་དོན་བཤད་ན། སྤྱིར་འཁོར་འདས་བདེ་སྡུག་ཐམས་ཅད་བདུན་རྣམ་པར་དག་པ་དང་། མ་དག་པ་དང་། ཅུང་ཟད་དག་པ་དང་། གསུམ་གྱིས་ལག་རྗེས་ཡིན་ཏེ། བདུན་རྣམ་པར་མ་དག་པས། ཕྱག་དང་མཆོད་པའི་འོས་སུ་མི་འགྱུར་ཞིང་། བརྙས་པ་དང་ཁྱད་གསོད་ཀྱི་གནས་སུ་འགྱུར་བ་དང་། ལོངས་སྤྱོད་ཀྱིས་མཐུན་རྐྱེན་གྱིས་འབོང་བ་དང་། མི་དགེ་བ་ལ་སོགས་པའི་ལམ་དུ་འཇུག་ཅིང་། གནས་དེ་དང་དེ་ལ་སུས་ཀྱང་བཟློག་པ་མེད་པ་དང་། བྱ་བ་གང་ལ་ཡང་ཐམས་ཅད་ཡིད་མི་རང་ཞིང་། ཐམས་ཅད་སྐྱོ་བའི་གནས་སུ་འགྱུར་བ་དང་། ཐེག་པ་ཆེན་པོའི་ཆོས་དང་མི་འཕྲད་ཞིང་ལོག་པའི་ལམ་དུ་འཇུག་པ་དང་། ཡང་དགེ་བའི་བཤེས་གཉེན་དང་མྱུར་དུ་བྲལ་ཞིང་། རང་ཉིད་ཚེ་ཐུང་བ་དང་། དགེ་བའི་རྩ་བ་རྣམས་ཆུད་ཟོས་ཞིང་ཟད་པར་འགྱུར་བ་སྟེ། བདུན་རྣམ་པར་མ་དག་པས་ནི་སྐྱོན་དེ་རྣམས་བྱེད་ལ། ཅུང་ཟད་དག་པའི་ཡོན་ཏན་གྱིས་རང་ཉིད་ཕྱག་དང་མཆོད་པའི་གནས་སུ་འགྱུར་ཞིང་། བརྙས་པ་དང་ཁྱད་གསོད་ཀྱི་གནས་སུ་མི་འགྱུར་བ་དང་། ཕུན་སུམ་ཚོགས་པའི་ལོངས་སྤྱོད་ཀྱིས་རྒྱས་པ་དང་། མི་དགེ་བའི་ཆོས་ཀྱིས་མི་གོས་ཞིང་། དགེ་བ་རྒྱུན་མི་ཆད་པ་དང་། བྱ་བ་ཐམས་ཅད་ལ་ཡི་རང་ཞིང་བསོད་ནམས་ཀྱི་ཕུང་པོ་ཡོངས་སུ་རྫོགས་པ་དང་། ཐེག་པ་ཆེན་པོའི་ཆོས་དང་མཇལ་ཞིང་། ཆོས་ཀྱི་འཁོར་ལོ་རྒྱུན་མི་ཆད་པ་དང་། འཕགས་པ་དགེ་བའི་བཤེས་གཉེན་དང་མི་འབྲལ་ཞིང་ཚེ་ལ་དབང་ཐོབ་པ་དང་། དགེ་བའི་རྩ་བ་ཐམས་ཅད་དོན་གཉིས་ཕུན་སུམ་ཚོགས་པ་དམ་པ་གཉིས་སུ་སྨིན་པ་སྟེ། ས་དང་ལམ་གྱི་ཡོན་ཏན་ཐམས་ཅད་བསྐྱེད་ལ། བདུན་རྣམ་པར་དག་པ་ནི། ཁམས་གསུམ་ཆོས་ཀྱི་རྒྱལ་པོ། རྒྱལ་བ་སངས་རྒྱས་བཅོམ་ལྡན་འདས་ཀྱི་གོ་འཕང་ཐོབ་པ་སྟེ། དེ་སྐད་དུའང་། བྱམས་པའི་ཞལ་ནས། མ་དག་པ་དང་དག་པ་དང་། ཤིན་ཏུ་རྣམ་དག་གོ་རིམ་བཞིན། །ཅེས་སོ། །མདོ་རྒྱུད་ཐམས་ཅད་ནས། ཡན་ལག་བདུན་པ་ཁོ་ན་བསོད་ནམས་བསགས་པའི་མཆོག་ཏུ་གསུངས་ཤིང་། བསྒྲུབ་ཐབས་ཆུང་ངུ་རེ་རེའི་མགོ་ན་ཡང་། བདུན་རྣམ་དག་གི་བསོད་ནམས་བསགས་པར་བྱའོ། །ཅེས་གསུངས་པས། འདི་ཉིད་མཆོག་ཏུ་གྱུར་པ་ཡིན་ནོ། །ཐབས་ཀྱིས་དགེ་བའི་རྩ་བ་ཐམས་ཅད་བསགས་སྦྱང་གཉིས་སུ་འདུས་པ་ཡིན། མྱུར་དུ་སངས་རྒྱས་པ་ལ་འགལ་རྐྱེན་སྤང་ཞིང་། མཐུན་རྐྱེན་ཚང་བ་གཅིག་དགོས་ཏེ། འདི་ལ་ཚང་བ་སངས་རྒྱས་པ་ལ། ཚོགས་ཆེན་པོ་ཡོངས་སུ་རྫོགས་དགོས་པ་ལ། ཕྱག་དང་མཆོད་པའི་ཡན་ལག །མི་མཐུན་འགལ་རྐྱེན་སྤང་ལ། སྡིག་པ་བཤགས་པ། དགེ་བའི་རྩ་བ་ནམ་མཁའ་དང་མཉམ་པའི་དཔུང་བསྐྱེད་པ་ལ། རྗེས་སུ་ཡི་རང་བ། ཐེག་པ་ཆེན་པོའི་ཆོས་དང་མི་འབྲལ་བར་དགོས་པ་ལ། ཆོས་ཀྱི་འཁོར་ལོ་བསྐོར་བར་བསྐུལ་བ་དང་། ཡང་དག་པའི་བཤེས་གཉེན་དང་མི་འབྲལ་བར་དགོས་པ་ལ། མྱ་ངན་ལས་མི་འདའ་བར་གསོལ་བ་བཏབ་པ་དང་། དགེ་བའི་རྩ་བ་ཆུད་མི་ཟ་ཞིང་སྙིང་པོ་ལེན་པས་བསྔོ་བ་བྱའོ། །བརྒྱད་པ་དམ་བཅའ་བའི་དགོས་ཆེད་ནི། སྔར་བླང་བའི་དམ་ཚིག་ཉམས་ན། འདི་ཉིད་ཀྱིས་སོར་ཆུད་པའི་དགོས་ཆེད་ཡོད་དོ། །དེས་ན་འགལ་རྐྱེན་སྤང་ཞིང་མཐུན་རྐྱེན་བསྒྲུབ་དགོས། དེའི་ལམ་ཐམས་ཅད་ཚང་བ་ཡིན་པས། འདི་ཉིད་མཆོག་ཏུ་གྱུར་པ་ཡིན་གསུངས། དེ་ལྟར་ཡན་ལག་བརྒྱད་ཀྱི་དང་པོ་ཕྱག་འཚལ་བ་ལ། བླ་མ་དང་དཀོན་མཆོག་གསུམ། ཡི་དམ་ལ་ཕྱག་འཚལ་བ་དང་གསུམ་ལས། དང་པོ་བླ་མ་ལ་ཕྱག་འཚལ་བ་ལ་ཡང་སྤྱིར་ཕྱག་འཚལ་བ་དང་། བླ་མའི་ཡོན་ཏན་དྲན་པར་བྱེད་པ་དང་། ཕྱག་འཚལ་བ་དངོས་དང་གསུམ་ལས། དང་པོ་ནི། རང་གི་ལུས་སྤྲུལ་སྐུའི་ཞིང་གི་རྡུལ་སྙེད་དུ་སྤྲུལ་ནས་ལུས་ངག་ཡིད་གསུམ་གུས་པས་ཕྱག་འཚལ་བར་བསམ་ལ། འདས་མ་འོངས་ད་ལྟ་དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་ངོ་བོ་ཉིད་དང་དབྱེར་མེད་ཅིང་། ཡིད་བཞིན་གྱི་ནོར་བུ་རིན་པོ་ཆེ་དགོས་འདོད་ཕུན་སུམ་ཚོགས་པ་ལྟ་བུ། ཡོན་ཏན་ཕུན་སུམ་ཚོགས་པའི་བླ་མས་དབང་བསྐུར་རྒྱུད་བཤད་མན་ངག་གནང་བའི་ཆོས་འབྲེལ་ཡོད་ཚད་རྣམས་ལ་ཕྱག་འཚལ་ལོ། །བླ་མའི་ཡོན་ཏན་དྲན་པར་བྱེད་པ་ནི། དགོངས་འདུས་ལས། ཐམས་ཅད་ཀྱི་བླར་གྱུར་པར་ན་བླ་ཡོན་ཏན་བསྐྱེད་པས་ན་མ། བཤེས་གཉེན་དང་མཁན་པོའི་མིང་གི་རྣམ་གྲངས་སོ། །སྤྱིར་གསང་སྔགས་པས་གཙོ་ཆེར་བླ་མ། ཉན་ཐོས་པས་གཙོ་ཆེར་མཁན་པོ། བྱང་ཆུབ་སེམས་དཔས་གཙོ་ཆེར་རྒྱལ་སྲས་སམ། བྱང་ཆུབ་སེམས་དཔའ། ཐེག་ཆེན་པས་གཙོ་ཆེར་རྗེ་བཙུན་རིན་པོ་ཆེ་བའམ། དྲིན་ཆེན་ཟེར་ལ། རིག་བྱེད་སྤྱིའི་མིང་ལ་སློབ་དཔོན་ཅེས་ཟེར་རོ། །དམ་པ་ནི་ལྟ་སྤྱོད་སྒོམ་གསུམ་དམ་པའི་མཛོད་གསུམ་མམ། སྙིང་རྗེ་དམ་ཚིག་གཉིས་དང་དམ་པའི་མཛོད་ལྔ་ལྡན་པའི་སློབ་དཔོན་ཁྱེད་ནི། བདག་དང་ཅག་ནི་གཞན་སྟེ་བདག་གཞན་རྣམས་ཀྱིས་རྒྱུད་ལ་འཁོར་བའི་ཉེས་སྐྱོན་སེལ་བར་མཛད་པས་ཕ་དང་འདྲ་བ་ལགས་སོ། །བདག་ཅག་རྣམས་ཀྱིས་རྒྱུད་ལ་མྱང་འདས་ཀྱི་མྱུ་གུ་བསྐྱེད་པར་མཛད་པས་མ་དང་འདྲ་བ་ལགས་སོ། །བདག་ཅག་རྣམས་ཀྱིས་རྒྱུད་ལ་ལྷག་མཐོང་གི་ཡེ་ཤེས་བསྐྱེད་ཅིང་སྲིད་ཞིའི་མཐའ་ལས་སྐྱོབ་པར་མཛད་པའི་སྐྱབས་མགོན་དང་འདྲ་བ་ལགས་སོ། །བདག་ཅག་རྣམས་ཀྱི་རྒྱུད་ལ་ཐར་པའི་ལམ་སྟོན་པར་མཛད་པའི་ལམ་སྟོན་པ་མཁན་དང་འདྲ་བ་ལགས་སོ། །བདག་ཅག་རྣམས་ངན་སོང་གི་འདམ་ནས་དྲངས་ཞིང་སངས་རྒྱས་ཀྱི་ས་ལ་འདྲེན་པར་མཛད་པས་སྣ་འདྲེན་པ་དང་འདྲ་བ་ལགས་སོ། །མ་རིག་པའི་མུན་ཁམས་སེལ་བར་མཛད་པའི་ཕྱིར་སྒྲོན་མེ་དང་འདྲ་བ་ལགས་སོ། །ཉོན་མོངས་པ་དུག་གསུམ་གྱི་ནད་སེལ་བར་མཛད་པས་སྨན་པ་དང་འདྲ་བ་ལགས་སོ། །འགྲོ་བ་རྣམས་འཁོར་བའི་ཆུ་བོ་ཆེན་པོ་བཞི་ལས་སྒྲོལ་བར་མཛད་པའི་ཕྱིར་གྲུབ་བོ་ཆེ་དང་འདྲ་བ་ལགས་སོ། །ཕྱག་འཚལ་བ་དངོས་ནི། བླ་མའི་ཞལ་ནས་ཐེག་སྒོ་སྣ་ཚོགས་སྟོན་པས་ཉི་མ་དང་འདྲ་བའི་ཞལ་ལ་ཕྱག་འཚལ་ལོ། །སྐུ་ལ་སྡོམ་གསུམ་གྱི་ཉེས་པའི་དྲི་མ་མེད་པས་ཟླ་བ་དང་འདྲ་བའི་སྐུ་ལ་ཕྱག་འཚལ་ལོ། །ཐེག་སྒོ་སྣ་ཚོགས་གསུང་པ་ལ་ལོག་བཤད་ཀྱི་དྲི་མ་མི་མངའ་བས་པདྨ་དང་འདྲ་བའི་གསུང་ལ་ཕྱག་འཚལ་ལོ། །མཐའ་བྲལ་གྱི་ཆོས་ཉིད་མངོན་དུ་གྱུར་པས་ནམ་མཁའ་དང་འདྲ་བའི་ཐུགས་ལ་ཕྱག་འཚལ་ལོ། །བླ་མའི་ཡོན་ཏན་གྱིས་གདུལ་བྱའི་རེ་བ་སྐོང་བར་མཛད་པ་དེ་ལ་ཕྱག་འཚལ་ལོ། །ཕྲིན་ལས་ཀྱི་འགྲོ་བ་ཀུན་མྱང་འདས་ཀྱི་ས་ལ་སྒྲོལ་བར་མཛད་པ་དེ་ལ་ཕྱག་འཚལ་ལོ། །དཀོན་མཆོག་གསུམ་ལ་ཕྱག་འཚལ་བ་ནི། བླ་མ་དེས་བསྐྱེད་པའི་འདས་མ་འོངས་ད་ལྟ་དུས་གསུམ་གྱི་སངས་རྒྱས་དང་། དམ་པའི་ཆོས་རྒྱུ་མཚན་ཉིད་ཀྱི་ཐེག་པ་དང་། འབྲས་བུ་གསང་སྔགས་རྡོ་རྗེའི་ཐེག་པ་མ་ལུས་པ་རྣམས་དང་། གསང་སྔགས་ཀྱི་དགེ་འདུན་རིག་འཛིན་དང་། མཚན་ཉིད་ཐིག་ཆེན་གྱི་དགེ་འདུན་བྱང་ཆུབ་སེམས་དཔའ་དང་། གནས་པ་ལམ་སྟེགས་ལ་ཉན་རང་འཕགས་པའི་དགེ་འདུན་དང་བཅས་པ་རྣམས་ལ་ཕྱག་འཚལ་ལོ། །ཡི་དམ་ལ་ཕྱག་འཚལ་བ་ནི། ཞི་ཁྲོ་གཉིས་ཏེ། དང་པོ་ཞི་བ་ལ་ཕྱག་འཚལ་བ་ནི། སངས་རྒྱས་གསང་བའི་རྒྱ་གཞུང་ཞི་བ་སྒྱུ་འཕྲུལ་དྲྭ་བ་ལས། མ་བཅོས་པས་དེ་བཞིན་ཉིད། དེར་སོན་པས་ན་གཤེགས་པ་སྟེ་དེ་ལྟར་སངས་རྒྱས་སྐུ་ལྔ་ཀུན་གྱི་བདག་པོ། ཡེ་ཤེས་བཞི་བཅུ་རྩ་གཉིས་སམ་ཡེ་ཤེས་ལྔ་ནི་རྒྱ་མཚོ་དང་འདྲ་བས་རབ་ཏུ་བབ་པའོ། །དེ་ཡང་ཐུགས་རང་བྱུང་གི་ཡེ་ཤེས་སུ་འདུས་སོ། །བཞི་བཅུ་རྩ་གཉིས་སམ་དཀྱིལ་འཁོར་འདུལ་བྱ་ཡིད་དང་མཐུན་པ་བཞིན་འབྱུང་བས་དཔེར་ན་གཏེར་མཛོད་བཞིན་ནོ། །དེས་ན་ཀུན་བཟང་འདི་ནི་ནོར་བུ་རིན་པོ་ཆེ་དང་འདྲ་བས་སངས་རྒྱས་ཐམས་ཅད་ཀྱི་ཡོན་ཏན་གྱི་མཛོད་འཛིན་ཅིང་། ཡུལ་དང་ཤེས་པ་གཉིས་སུ་མེད་པ་ནི་རྡོ་རྗེའི་ཡིད་ཏེ། རྟོགས་མ་རྟོགས་གི་དབང་གིས་འཁོར་འདས་ཐམས་ཅད་ཀྱི་བྱེད་པ་པོ་ཀུན་ཏུ་བཟང་པོ་ལ་ཕྱག་འཚལ་ལོ། །ཁྲོ་བོ་ལ་ཕྱག་འཚལ་བ་ནི། སངས་རྒྱས་གསང་བའི་ཁྲོ་བོ་སྣང་བ་དམ་པ་རྒྱན་ལས་འཁོར་འདས་ཐམས་ཅད་ཀྱི་ངོ་བོ་དབྱེར་མེད་པ་ནི་མཉམ་པ་ཉིད་སྟེ་ཆོས་སྐུའོ། །འཁོར་འདས་སྤང་བླང་མེད་པར་ལོངས་སྤྱོད་པས་ན་བདེ་བ། སྤྱོད་དུས་སྲིད་ཞི་གཉིས་ཀྱི་དྲི་མས་མ་གོས་པས་ན་ཆེན་པོ་སྟེ་ལོངས་སྐུ། རྐང་པའི་གཞི་མ་ངེས་པ་ལས། ལག་པས་གར་སྣ་ཚོགས་སུ་བསྒྱུར་བ་དང་འདྲ་བར། དགོངས་པ་ཆོས་ཀྱི་སྐུ་ལས་མ་གཡོས་བཞིན་དུ་གདུལ་བྱ་ལོག་རྟོག་ཅན་ལ་གང་ལ་གང་འདུལ་གྱི་སྒོ་ནས་དོན་མཛད་པ་ནི་སྤྲུལ་སྐུ་སྟེ། དེ་ལྟར་སྐུ་གསུམ་ལྷུན་གྱི་གྲུབ་པའི་དུས་སུ། སྐུ་གསུང་ཐུགས་ཡོན་ཏན་ཕྲིན་ལས་ལ་དབང་བསྒྱུར་བ་སྟེ། དེ་ཡང་རྟེན་བྱེད་པའི་ངོས་ནས་སྐུ་ལྔ། བརྡ་སྤྲོད་པའི་ངོས་ནས་གསུང་ལྔ། དགོངས་པ་ཟབ་མོའི་ངོས་ནས་ཐུགས་ལྔ། ལུང་སྒྲ་ཚད་ལ་ཉལ་བ་ཟུར་ལ་བསླང་བ་འཆད་པ་པོའི་གཉེར་བྱ་ཡིན་པས། དགོས་འདོད་འབྱུང་བའི་ངོས་ནས་ཡོན་ཏན་ལྔ། བྱ་བ་གྲུབ་པའི་ངོས་ནས་ཕྲིན་ལས་ལྔ། དེ་དག་ཟད་མི་ཤེས་པས་མི་ཟད་པ་ཆོས་སྐུའི་རྒྱན་ལ་གཟུགས་སྐུ་ཆེ། གཟུགས་སྐུའི་རྒྱན་ལ་ཆོས་སྐུ་ཆེ་བས་རྒྱན་གྱི། འཁོར་ལོ་ནི་སྐུ་རིགས་ཉེར་ལྔ་གཅིག་ཡོད་པས་ན་ཀུན་ཡོད་དེ། དཔེར་ན་འཁོར་ལོའི་རྩིབས་གཅིག་འཇུ་ན་ཀུན་འཁོར་བ་དང་། འདྲ་བར་སྐུ་ལྔ་ལྷུན་གྲུབ་ཀྱི་སངས་རྒྱས་དེ་ཉིད་གདུལ་བྱ་ལུགས་འབྱུང་ལྡོག་རྣམས་ལ་ཁྲོ་བོར་སྣང་སྟེ། ཧེ་ནི་དགྱེས་པ་སྟེ། དེ་ལ་གཉིས། རྟོགས་པས་བདག་དོན་ལ་དགྱེས་པ་ནི། ཆོས་དབྱིངས་མངོན་དུ་རྟོགས་ཅིང་། ཐུགས་རྗེས་གཞན་དོན་ལ་དགྱེས་པ་ནི། གཟུགས་སྐུ་རྣམ་པ་གཉིས་གདུལ་བྱ་ལ་སྣང་བའོ། །རུ་རཱ་ག་ན་ཆགས་པ་སྟེ། རྟོགས་པས་བདག་དོན་ལ་ཆགས་པ་ནི། དགོངས་པ་ཆོས་སྐུ་ལས་མ་གཡོས་ཤིང་། ཐུགས་རྗེས་གཞན་དོན་ལ་ཆགས་པ་ནི། གདུལ་བྱའི་དོན་བྱེད་པ་ལ་རྒྱུན་ཆད་མེད་པའོ། །དེ་ཡང་ཀ་རུ་བྱས་ན་ཐུགས་རྗེ། ཀརྨ་བྱས་ན་ཕྲིན་ལས། ཀར་བྱས་ན་བྱེད་པ་སྟེ། ཐུགས་རྗེ་ཕྲིན་ལས་ཀྱིས་འགྲོ་བའི་དོན་བྱེད་པའམ། ཡང་ན་ཧེ་རུ་ཀ་ནི་ཁྲག་འཐུང་ལ་འབྲུ་གནུར་བ་ཡང་སྣང་ངོ་། །དེ་ལྟར་ཧེ་རུ་ཀ་ཁྲག་འཐུང་ཆེན་པོའི་ཚོགས་ལ་ཕྱག་འཚལ་ལོ། །གཉིས་པ་མཆོད་པའི་ཡན་ལག་ལ། ཀུན་བཟང་མཆོད་པ་དང་། སྒེག་མོ་བརྒྱད་མཆོད་གཉིས་ལས། དང་པོ་ནི། སྒྱུ་འཕྲུལ་བཞི་བཅུ་པ་ལས་ཟུག་རྔུ་མི་མངའ་གཞི་གནས་ལུགས་བདེ་བ་ཆེན་པོའི་ངང་དེར་གཤེགས་སོ་ཚོགས། བདུད་བཞི་བཅོམ་ཞིང་ཆེ་བའི་ཡོན་ཏན་རྣམས་དང་ལྡན་པ། རྟག་ཆད་ཀྱི་མཐའ་ལས་འདས་པས། མཐའ་གཉིས་དང་བདུད་བཞི་ལས་རྒྱལ་བས་རྒྱལ་བ། མཐའ་ཡས་པས་རྒྱ་མཚོ་དང་འདྲ་བ། འདས་པ་ཡེ་ཤེས་ཀྱི་སྣང་བས་བསྡུས་པ་ཐམས་ཅད་དང་། ཁམས་གསུམ་མམ་སྲིད་པ་གསུམ་པོ་རྒྱ་མཚོ་དང་འདྲ་བས་མཐའ་ཡས་པ་རྣམས་ཀྱི་ལོག་རྟོག་འཁོར་བའི་སྣང་ངོར་ཤར་བ་ཐམས་ཅད་དང་། ལམ་པའི་སྤྱོད་པ་མཐའ་ཡས་རྒྱ་མཚོ་དང་འདྲ་བ་ཡོན་ཏན་རྨད་དུ་བྱུང་བ་སངས་རྒྱས་འགྲུབ་པའི་ཐབས་ཀུན་ཀྱང་ཀུན་ཏུ་བཟང་པོའི་མཆོད་སྤྲིན་གྱིས་མཆོག་ཏུ་རོལ་ཅིང་མ་གྱུར་པ་མེད་དོ། །དེ་ཡང་འབུལ་བའི་སྔགས་ནི། ༀ་ཡེ་ཤེས་ལྔ་དང་ལྡན་པའི་སྔགས་ཀྱི་མགོ་འདྲེན། ན་མཿཕྱག་འཚལ། སརྦ་ཏ་ཐཱ་ག་ཏོ་བྷྱོ། དེ་བཞིན་གཤེགས་པ་ཐམས་ཅད་འདས་པའི་སངས་རྒྱས་དང་། བི་ཤྭ་མུ་ཁེ་བྷྱཿསྣ་ཚོགས་པོའི་གདུག་པ་ཅན་སྟེ། མ་འདས་པ་འཁོར་བའི་སེམས་ཅན་དང་། སརྦ་ཐམས་ཅད་ཐཱ་ཁཾ་ནམ་མཁའ་ཨུཏྒ་ཏེ་བྱས་པ་སྟེ། ལམ་ལ་གནས་པ། སྥ་ར་ཎ་འགྲོ་བའམ། ཁྱབ་པའི་སྒྲར་འཇུག་སྟེ། ཀུན་ཏུ་བཟང་པོའི་མཆོད་སྤྲིན། དེ་ཅི་ཙ་མ་ན་ཨི་མཾ་ག་ག་ན་ཁཾ་འདི་ནམ་མཁའི་ཁམས་གང་བ། སྭཱ་ཧཱ་ནི་གཞི་ཚུགས་པར་གྱུར་ཅིག །ཅེས་འཁོར་འདས་ལམ་གསུམ་གྱིས་བསྡུས་པའི་ཆོས་ཉིད་ཀུན་ཏུ་བཟང་པོའི་མཆོད་སྤྲིན་དུ་མ་གྱུར་པ་མེད་པས། དེ་ལ་ཕྱི་ནང་གསང་བ་དེ་ཁོ་ན་ཉིད་དང་བཞིའི་དོན་བསྒོམ་དགོས་ཏེ། དེ་ལ་ཕྱིའི་མཆོད་པ་ནི། རྒྱ་མཚོ་ཐམས་ཅད་ཡོན་ཆབ། རྩི་ཤིང་ནགས་ཚལ་ཐམས་ཅད་མེ་ཏོག །ལྷོ་སྤྲིན་ན་བུན་ཐམས་ཅད་བདུག་སྤོས། ཉི་ཟླ་སྐར་གསུམ་ནི་མར་མེ། ཆུ་བོ་ཐམས་ཅད་ནི་དྲི་ཆབ། རི་བོ་ཐམས་ཅད་ཞལ་ཟས། སྒྲ་གྲགས་ཐམས་ཅད་ནི་རོལ་མོར་བསྒོམ། ནང་གི་མཆོད་པ་ནི། དེ་རྣམས་གཟུགས་སྡུག །སྒྲ་སྙན། དྲི་ཞིམ། རོ་མངར། རེག་བྱ་འཇམ་པར་བསྒོམ། གསང་བའི་མཆོད་པ་ནི། སྣང་བ་ཐམས་ཅད་མཆོད་པའི་ཚོགས། སྒྲ་གྲགས་ཐམས་ཅད་རོལ་མོ་དང་མཆོད་པ་འབུལ་བའི་ཚིག་དྲན་རྟོག་ཐམས་ཅད་དེ་ལས་མི་འདའ་བར་བསྒོམ་པའི་ཁྱེར་སོ་གསུམ་མམ། ཡང་ན་སྣང་བ་སྐུ། གྲགས་པ་གསུང་། དྲན་རྟོག་ཐུགས་ཀྱི་ཁྱེར་སོ་གསུམ་དང་མ་བྲལ་བར་བྱའོ། །དེ་ཁོ་ན་ཉིད་ཀྱི་མཆོད་པ་ནི། འཁོར་འདས་ལམ་པའི་སྤྱོད་པ་མ་ལུས་པ་ཀུན་བསལ་བཞག་རྡུལ་ཙམ་མེད་པ་ཐམས་ཅད་མ་སྐྱེས་པས་ཀུན་ཏུ་བཟང་མོའི་དང་དུ་རོ་གཅིག་པས། དེ་ཁོ་ན་ཉིད་དང་། དེ་མ་འགགས་པ་འཁོར་འདས་ཀྱི་རྣམ་པ་མཆོད་པའི་ཚོགས་སུ་ཅིར་ཡང་འཆར་བ་ནི། ཀུན་ཏུ་བཟང་པོའི་དེ་ཁོ་ན་ཉིད་དང་། དེ་གཉིས་ཀྱང་ངོ་བོ་ལ་དབྱེར་མེད་པ་ནི། གཉིས་སུ་མེད་པ་བྱང་ཆུབ་སེམས་ཀྱི་དེ་ཁོ་ན་ཉིད་དོ། །སྒེག་མོ་བརྒྱད་མཆོད་པ་ལ་གཉིས་ལས། དང་པོ་ཕྱི་སྒེག་བཞི་ནི། རང་གི་ཐུགས་ཀ་ནས་ཡི་གེ་གསུམ་འཕྲོས་ཏེ། ༀ་གྱི་འོད་ཟེར་གྱིས་བསྲེགས། ཨཱའི་སྦྱང་། ཧཱུྃ་གི་བྱིན་གྱིས་བརླབས་པའམ། ཡང་ན་ཡི་གེ་གསུམ་པོ་འདི། འབུལ་བྱའི་ཡུལ་སྐུ་གསུང་ཐུགས་ལྡན་མཚོན་པའོ། །སྔོན་དུ་འགྲོ་བ་ཕྱག་གི་མཆོད་པ་ནི། རབ་ཏུ་དགའ་བ་ནི་མཆོད་པའི་དངོས་པོ་གང་དང་གང་ཡིན་པ་སྟེ། དེའི་བདག་པོ་མཆོད་པ་འབུལ་བའི་ཡུལ་ལ་ཕྱག་འཚལ་ལོ། །ཅེས་ཕྱག་འཚལ་དོན་གཉིས་བསྒྲུབ་པ་མཆོད་པའི་དངོས་གྲུབ་ཞུ་བ་ནི། མཆོད་པ་ཆེན་པོ་མེ་ཏོག་འདི་ཕུལ་བས། དམ་ཚིག་ཆེན་པོ་ནང་ནས་དམ་པ་ནི་བྱམས་པ་ཆེན་པོ་ཡིན་པས་དེ་བདག་གིས་རྒྱུད་ལ་གྲུབ་པར་མཛོད་ཅེས་སྨོན་ལམ་བཏབ། འབུལ་བའི་སྔགས་ནི། ༀ་འབྲུ་མཐུན། བཛྲ་རྡོ་རྗེ་པུཥྤེ་མེ་ཏོག་གྲྀཧྣ་ཟུང་། གསང་སྔགས་བླ་མེད་ཀྱི་སྐབས་འདིར་གཉིས་མེད་དོན་གྱི་མཆོད་པ་ཡིན་པས། རྡོ་རྗེ་མེ་ཏོག་གི་མཆོད་པ་འདི་ཟུང་ལ་ཅེས་པའི་དོན་ནོ། །ཧཱུྃ་བསྐྱེད་པའི་ས་བོན་ཡིན་ནོ། །རང་གི་ཐུགས་ཀའི་ཧཱུྃ་ལས་ཧཱུྃ་སེར་པོ་འཕྲོས་པས་མེ་ཏོག་བཤམ་ཟིན་ཡོང་ན་དེ་ལ་ཕོག་མེད་ན་ཡིད་སྤྲུལ་ཡིན་པས་ཧཱུྃ་དེ་ཡོངས་སུ་གྱུར་པ་ལས། ལྷ་མོ་མེ་ཏོག་མ་སེར་མོ་མེ་ཏོག་བསྣམས་པ་དཔག་ཏུ་མེད་པ་རྣམས་ཀྱི་སྐུ་ལ་མེ་ཏོག་འཐོར་བར་བསམ། ༀ་ཨཱཿཧཱུྃ། རབ་ཏུ་དགའ་བའི་བདག་ལ་ཕྱག་འཚལ་ལོ། །མཆོད་པ་ཆེན་པོ་བདུག་སྤོས་འདི་ཕུལ་བས་དེ་བཞིན་གཤེགས་པའི་དམ་ཚིག་ནི་སྙིང་རྗེ་ཆེན་པོ་ཡིན་པས་དེ་བདག་གི་རྒྱུད་ལ་གྲུབ་པར་མཛོད། ༀ་བཛྲ་དྷུ་པེ་ནི་བདུག་སྤོས། གྲྀཧྣ་ཧཱུྃ་བདག་གི་ཐུགས་ཀ་ནས་ཧཱུྃ་སྔོན་པོ་འཕྲོས་པས་ལྷ་མོ་བདུག་སྤོས་མ་སྔོན་མོས་བདུག་སྤོས་བསྣམས་ནས་ཤངས་ལ་མཆོད། ༀ་ཨཱཿཧཱུྃ། རབ་ཏུ་བདག་བའི་བདག་ལ་ཕྱག་འཚལ་ལོ། །མཆོད་པ་ཆེན་པོ་མར་མེ་འདི་ཕུལ་བས། དགའ་བ་ཆེན་པོ་བདག་གི་རྒྱུད་ལ་གྲུབ་པར་མཛོད། ༀ་བཛྲ་ཨཱ་ལོ་ཀེ་མར་མེ། གྲྀཧྣ་ཧཱུྃ་ཧཱུྃ་དམར་མོ་ལས་མར་མེ་མ་དམར་མོས་མར་མེ་བསྣམས་ནས་སྤྱན་ལ་མཆོད། ༀ་ཨཱཿཧཱུྃ། རབ་ཏུ་དགའ་བའི་བདག་ལ་ཕྱག་འཚལ་ལོ། །མཆོད་པ་ཆེན་པོ་དྲི་ཆབ་འདི་ཕུལ་བས། བཏང་སྙོམས་ཆེན་པོ་བདག་གི་རྒྱུད་ལ་གྲུབ་པར་མཛོད། ༀ་བཛྲ་གྷནྡྷེ་ནི་དྲི་ཆབ་གྲྀཧྣ་ཧཱུྃ་ཧཱུྃ་ལྗང་ཀུ་ལས་དྲི་ཆབ་མ་ལྗང་ཀུ་དྲི་ཆབ་ཐོགས་ནས་ཕྱག་དང་ཞབས་ལ་འབུལ། ནང་སྒེག་བཞིའི་མཆོད་པ་ནི། ༀ་བཛྲ་ལཱ་སྱེ་སྒེག་མོ། ཧཱུྃ་བསྐྱེད་པའི་ས་བོན་སྟེ། བདག་གི་ཐུགས་ཁ་ནས་ཧཱུྃ་དཀར་མོ་ལས། ལྷ་མོ་སྒེག་མོ་དཀར་མོ་མེ་ལོང་བསྣམས་པ་བྱུང་ནས་གཟུགས་ཀྱི་མཆོད་པ་འབུལ། ༀ་བཛྲ་མཱ་ལྱེ་ཕྲེང་བ་ཏྲཱཾ་བསྐྱེད་པའི་ས་བོན་སྟེ། ཐུགས་ཀ་ནས་ཏྲཱཾ་སེར་པོ་ལས་ལྷ་མོ་ཕྲེང་བ་མ་སེར་མོ་ཕྱག་ན་རིན་པོ་ཆེའི་ཕྲེང་བ་བསྣམས་པ་བྱུང་ནས་དེ་བཞིན་གཤེགས་པའི་དབུ་ལ་ཐོད་དུ་བཅིང་། ༀ་བཛྲ་གཱིརྟི་གླུ་མ། ཧྲཱི་བསྐྱེད་པའི་ས་བོན་སྟེ། ཐུགས་ཀ་ནས་ཧྲཱི་དམར་པོ་ལས་ལྷ་མོ་གླུ་མ་དམར་མོ་ཕྱག་ན་པི་ཝྃ་བསྣམས་པ་བྱུང་ནས་སྒྲའི་མཆོད་པ་འབུལ། ༀ་བཛྲ་ནཱིརྟི་གར་མ། ཨ་བསྐྱེད་པའི་ས་བོན་སྟེ། ཐུགས་ཀ་ནས་ཨ་ལྗང་ཀུ་ལས་ལྷ་མོ་གར་མ་ལྗང་ཀུ་ཕྱག་ན་གར་གྱི་ཕོ་རུ་ཞལ་ཟས་རོ་མཆོག་བརྒྱ་དང་ལྡན་པ་བསྣམས་ནས་རོའི་མཆོད་པ་འབུལ་ལོ། །གསུམ་པ་སྡིག་པ་བཤགས་པའི་ཡན་ལག་ནི། སྦྱང་བྱ་སྡིག་པ་སྒོ་དྲུག་དེ། སྦྱང་བྱེད་གཉེན་པོ་སྟོབས་བཞི་ཡིས་བྱང་ཚུལ་སྦྱོར་དངོས་རྗེས་གསུམ་ཡིས། རང་བཞིན་དག་པ་སྔོན་དུ་བྱ། །ཅེས་པས། དང་པོ་སྡིག་པའི་སྒོ་དྲུག་ནི། རྒྱུའི་སྒོ་ཉོན་མོངས་པ་དུག་གསུམ་གྱིས་ཀུན་ནས་བསླང་བ། འདྲིམ་པའི་སྒོ། ལུས་ངག་ཡིད་གསུམ། ཡུལ་གྱི་སྒོ་མཁན་སློབ་ཕ་མ་མན་ཆད། སེམས་ཅན་ཕལ་བ་ཡན་ཆད། བྱས་པ་པོའི་སྒོ། རང་གི་བྱས་པ། གཞན་ལ་བྱེད་དུ་བཅུག་པ། གཞན་གྱི་བྱས་པ་ལ་རྗེས་སུ་ཡི་རང་དང་བཅས་པ། དུས་ཀྱི་སྒོ། ཐོག་མ་མེད་པ་ནས་ད་ལྟ་ཡན་ཆད་དུ་སྡིག་པ་གང་བྱས་པ། གྲངས་ཀྱི་སྒོ། མཚམས་མེད་པ་ལྔ། དེ་དང་ཉེ་བ་ལྔ། ལྕི་བ་བཞི། ལོག་པ་བརྒྱད། ཁ་ན་མ་ཐོ་བ་གསུམ། མི་དགེ་བཅུ། དེ་རྣམས་བཤགས་དགོས། སྟོབས་བཞི་ལས། རྟེན་གྱི་སྟོབས་ནི། སྤྱིར་དཀོན་མཆོག་གི་རྟེན་དྲུང་དུ་བཤགས་དགོས་ཀྱང་། འདིར་བླ་མ་ཞི་ཁྲོའི་དཀྱིལ་འཁོར་དང་བཅས་པ་དཔང་པོར་བཞུགས་ལ། གཉེན་པོ་ཀུན་ཏུ་སྤྱོད་པའི་སྟོབས་ནི། སྦྱོར་བའི་དུས་སུ་བཤགས་སེམས་སྐྱེ་བ་དང་། དངོས་གཞིའི་དུས་སྡིག་པའི་དངོས་པོ་གང་བྱས་ཐམས་ཅད་དོ། །སུན་འབྱིན་པའི་སྟོབས་ནི། སྡིག་པ་སུན་ཕྱུང་བ་དང་། གང་ཟག་སུན་ཕྱུང་བ་གཉིས་ལས། དང་པོ་སྡིག་པ་སུན་ཕྱུང་བ་ནི། སྡིག་པ་བྱས་པ་དུག་ཁོང་དུ་སོང་བ་བཞིན་ཏུ་རེ་མ་ལེགས་བསམ་པའི་འགྱོད་པ། གང་ཟག་སུན་ཕྱུང་བ་ནི། སྡིག་པ་གང་བྱས་ངག་ཐོག་ཏུ་བརྗོད་ཅིང་བཤགས་ལ། སོར་ཆུད་པའི་སྟོབས་ནི། ཕྱིན་ཆད་སྲོག་ལ་བབ་ཀྱང་སྡིག་པ་མི་བྱེད་པའི་དམ་བཅའ་བའོ། །སྦྱོར་དངོས་རྗེས་གསུམ་ནི། སྦྱོར་བའི་དུས་སུ་སེམས་བསྐྱེད་ཅིང་། བཤགས་སེམས་བསྐྱེད་ལ། དངོས་གཞི་སྡིག་པ་བཤགས་པ་ལ། རང་གི་ཐལ་མོ་སྦྱར། ཙོག་པུར་བསྡད་ལ། རང་གཞན་གྱི་ཚེ་འཁོར་བ་ཐོག་མ་མེད་པ་ནས། ད་ལྟ་ལ་ཐུག་གི་བར་དུ་སྡིག་པ་མི་དགེ་བ་ཅི་བྱས་པ་ལ་ཡི་རང་དང་བཅས་པ། སྡོམ་པ་གསུམ་གྱི་ཆག་ཉམས་འགལ་འཁྲུལ་དུ་གྱུར་པ། ཁྱད་པར་དུ་རྩ་བ་ཡན་ལག་གི་དམ་ཚིག་ཆག་ཉམས་ཐམས་ཅད་བཤགས་པར་བསམ་ལ། ན་མོ་ཞེས་ཕྱག་འཚལ་སྟེ། གང་ལ་འཚལ་ན་བཤགས་པའི་དཔང་པོ་ལ་འཚལ་ཞིང་། བཤགས་ཚུལ་དངོས་ནི། བདག་གི་དུས་ཚེ་རབ་ཐོག་མ་མེད་པ་ནས། ཐ་མ་ད་ལྟ་ཡན་ཆད་དུ་མཚམས་མེད་པ་ལྔ། དེ་དང་ཉེ་བ་ལྔ། ལྕི་བ་བཞི། ལོག་པ་བརྒྱད། ཁ་ན་མཐོ་བ་གསུམ། མི་དགེ་བ་བཅུ་ལ་སོགས་པ་སྡིག་པ་གང་སྤྱད་པ་དང་། ཉན་ཐོས་ཀྱི་འདུལ་ཁྲིམས་བྱང་ཆུབ་སེམས་དཔའི་སྡོམ་པ་ཉམས་ནས་ཞིག་པ་དང་། ཕྱི་ནང་གི་དམ་ཚིག་ཉམས་པ་དང་། ཁྱད་པར་དུ་ཉོན་མོངས་པ་ཆེ་ཞིང་བག་མེད་སྤྱོད་པའི་དབང་དང་། ལེ་ལོའི་དབང་དུ་སོང་བས། གསང་སྔགས་བླ་མེད་རང་གཞུང་གི་དམ་ཚིག་རྩ་བ་ཡན་ལག་ལ་སོགས་པའི་བསྲུང་བྱ་རྣམས། སྔར་དབང་བསྐུར་བའི་སྐབས་སུ་དམ་བཅའ་ཞིང་འདིར་བསྲུང་མ་ཐུབ་ནས། ཞིག་སྟེ་རྩ་བ་ནས་ཉམས་པ་དང་། སྣ་རེ་ཞིག་ནས་རལ་ལ། སྣ་འགའ་རེ་ཞིག་ནས་ཉམས་པ། ཤེས་བཞིན་དུ་ཁྱད་དུ་བསད་ནས་ཡལ་བར་དོར་བས་དམ་ལས་ལོག་པ་སྟེ། དེ་ལྟར་བསྲུང་བྱ་གཞུང་དུ་མ་སྙིགས་པས་སྤྱོད་པ་སྙོམས་ལས་བྱས་པས། རེས་བསྲུང་བྱ་གཞུང་དང་འགལ་ཚབས་ཆེ། རེས་འགལ་ཚབས་ཆུང་བ་རྣམས་དང་། ཉམས་པ་ཅན་དང་འགྲོགས་པ་དང་། ཉམས་པ་ཚོར་བ་དང་། མ་ཚོར་བར་ཉམས་པ་དང་། ཉམས་སོ་འཚལ་ནི་ཉམས་ཚོད་ཙམ་རེད་བསམ་པ་དང་། གཞན་ཡང་རྩ་བ་ཡན་ལག་གི་དམ་ཚིག་གྲོགས་ངན་པའི་ཟླ་ལ་ཉམས་པ་དང་། རང་གི་ཞར་ལ་ཉམས་ཤོར་བ་དང་། དྲན་དང་ཤེས་བཞིན་དང་མི་ལྡན་དུས་ཀུན་ཏུ་ཉམས་པ་རྣམས་སེམས་གནོང་ཞིང་ངག་འགྱོད་པའི་སྒོ་ནས་བཤགས་པས། བདག་ལ་གང་གི་དམ་ཚིག་སྡོམ་པ་རྣམས་ཚངས་པ་སྩོལ་ཅིག །ཤིན་ཏུ་ངག་གི་འགྱོད་ཅིང་སེམས་ཀྱི་གདུང་བའི་སྒོ་ནས་བཤགས་པར་བགྱིའོ། །རྗེས་ནི་དེ་ལྟར་བཤགས་པ་ལ་ཡིད་རང་ཞིང་། ཕྱིན་ཆད་སྲོག་ལ་བབ་ཀྱང་སྡིག་པ་མི་བྱེད་པར་དམ་བཅའ་ལ། རྒྱལ་བ་རྣམས་ཀྱིས་ཀྱང་བདག་ལ་སྡིག་པ་དག་པའི་གནང་བ་བྱིན་པར་བསམ་མོ། །སྡིག་པ་ལ་དགེ་བ་མེད་ཀྱང་བཤགས་ན་དག་ནས་དགེ་བ་ཡོད་པས། ཅི་ཐུབ་བཤགས་པ་ལ་འབད་དགོས་སོ། །སྡིག་པ་དག་པ་སྔོན་དུ་འགྲོ་བའི་རྒྱུ་ནི། སློབ་དཔོན་པདྨས། བྱིན་རླབས་ཀུན་གྱིས་གེགས་གྱུར་པ། སྒྲིབ་པ་རྣམ་གཉིས་ཡིན་པའི་ཕྱིར། །དེ་དག་བྱང་བ་རབ་ཏུ་གཅེས། །ཅེས་སོ། །བཞི་པ་རྗེས་སུ་ཡི་རང་བའི་ཡན་ལག་ནི། དགེ་བའི་ནང་ནས་རྗེས་སུ་ཡི་རང་མཆོག །ཅེས་པས། གཞན་གྱིས་དགེ་བ་གང་བྱེད་ལ་རྗེས་སུ་ཡི་རང་བསྒོམ་དགོས་ཏེ། གང་དང་གང་གི་དགེ་བ་ལ་རྗེས་སུ་ཡི་རང་བསྒོམ་ན། ཡང་དག་པར་རྫོགས་པའི་སངས་རྒྱས་དང་། ས་དང་ལམ་ལ་གནས་པའི་བྱང་ཆུབ་སེམས་དཔའ་ཐམས་ཅད་ཀྱི་འགྲོ་དོན་བརླབ་པོ་ཆེ་མཛད་པ་དང་འཕགས་པ་ཉན་རང་རྣམས་ཀྱིས་ཞི་བདེ་སྙོམས་འཇུག་གི་ཏིང་ངེ་འཛིན་བསྒོམ་པ་དང་། སོ་སོའི་སྐྱེ་བོའི་དགེ་བའི་རྩ་བ་གང་བསགས་པ་མ་ལུས་ཐམས་ཅད་དང་། དེ་དག་གིས་དགེ་བ་གང་བསགས་པ་ཐམས་ཅད་ལ་དུས་རྟག་ཏུ་བདག་ནི་རྗེས་སུ་ཡི་རང་ངོ་། །ལྔ་པ་ཆོས་ཀྱི་འཁོར་ལོ་བསྐོར་བར་བསྐུལ་བའི་ཡན་ལག་ནི། སངས་རྒྱས་གསར་བུ་འགྲོ་དོན་མ་མཛད་པ་རྣམས་ལ་གསེར་གྱི་འཁོར་ལོ་རྩིབས་སྟོང་དང་ལྡན་པ་རེ་རེ་ཕུལ་ནས་ཆོས་འཁོར་བསྐོར་བར་ཞུ་བ་ཕུལ་བས་བསམ་ལ། འབྲས་བུ་མངོན་དུ་གྱུར་པ་རིང་པོར་མ་ལོན་པའི་སངས་རྒྱས་གསར་བུ་རྣམས་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་སོ་འཚལ་ཐམས་ཅད་ལ། འགྲོ་བ་སེམས་ཅན་རྣམས་མྱུར་དུ་བླ་ན་མེད་པའི་བྱང་ཆུབ་ཐོབ་པའི་སླད་དུ་བླ་ན་མེད་པ་ཐེག་པ་ཆེན་པོའི་ཆོས་ཀྱི་འཁོར་ལོ་བསྐོར་བར་བསྐུལ་ལོ། །དྲུག་པ་མྱ་ངན་མི་འདའ་བར་བཞུགས་སུ་གསོལ་བའི་ཡན་ལག་ནི། སངས་རྒྱས་འགྲོ་དོན་རྫོགས་ནས་མྱ་ངན་ལས་འདའ་བར་བཞེད་པ་རྣམས་ལ་པདྨ་འདབ་མ་སྟོང་ལྡན་རེ་རེ་གདན་དུ་འབུལ་ནས་འཁོར་བ་མ་སྟོང་གི་བར་དུ་སེམས་ཅན་གྱི་དོན་མཛད་པ་ཞུ་བ་ཕུལ་བར་བསམ་ལ། གདུལ་བྱའི་དོན་བྱ་བ་ཚར་བའི་ཐུབ་པ་སངས་རྒྱས་རྣམས་ཀྱིས། དགོངས་པ་ཆོས་ཀྱི་དབྱིངས་སུ་མྱ་ངན་ལས་འདའ་བར་བཞེད་པ་རྣམས་ཇི་སྲིད་འཁོར་བ་སྟོང་པར་མ་གྱུར་གྱི་བར་དུ། བཞུགས་ནས་མྱ་ངན་མི་འདའ་བར་གསོལ་བ་འདེབས་སོ། །བདུན་པ་བསྔོ་བའི་ཡན་ལག་ནི། བདག་གཞན་སེམས་ཅན་ཐམས་ཅད་སངས་རྒྱས་ཐོབ་པའི་ཆེད་དུ། རང་གཞན་གྱིས་དུས་གསུམ་བསགས་པའི་དགེ་བའི་རྩ་བ་བླ་ན་མེད་པའི་བྱང་ཆུབ་ཆེན་པོའི་སར་བསྔོ་བར་བསམ་ལ། ན་མོ་ཕྱག་འཚལ། བདག་གི་ཚེ་རབས་དུས་ཐོག་མ་མེད་པ་ནས། ད་ལྟ་ཡན་ཆད་དུ་དགེ་བ་ཅི་སྤྱད་པ་དང་། ཁྱད་པར་དུ་དེང་འདིར། ཕྱག་འཚལ་མཆོད་པ་འབུལ་སྡིག་པ་བཤགས་དགེ་བ་ལ་རྗེས་སུ་ཡི་རང་བ་ཆོས་ཀྱི་འཁོར་ལོ་བསྐོར་ནས་བསྐུལ་བ་མྱ་ངན་མི་འདའ་བར་གསོལ་བ་བཏབ་པའི་དགེ་བ་ཅི་སྤྱན་པ་དང་། དེ་རྣམས་ཀྱི་མཐུ་ནུས་པ་ལ་བརྟེན་ནས་བདག་དང་གཞན་སེམས་ཅན་ཐམས་ཅད་སངས་རྒྱས་ཐོབ་པའི་དོན་དུ་བླ་ན་མེད་པ་བྱང་ཆུབ་ཆེན་པོའི་སར་བསྔོ་བར་བགྱིའོ། །བརྒྱད་པ་དམ་བཅའ་སྨོན་ལམ་གྱི་ཡན་ལག་ལ་གཉིས་ལས། དང་པོ་དམ་བཅའ་བ་ནི། ཡང་དག་འགྲེལ་ཆེན་ལས། རྡོ་རྗེ་རྩེ་གཅིག་ཕྱག་རྒྱའི། །དམ་བཅའི་སྡོམ་པ་གཞུང་བཞིན་སྙེག །ཅེས་པས། རྡོ་རྗེ་རྩེ་གཅིག་ཕྱག་རྒྱ་བཅའ་ལ། སྔར་དབང་ཞུ་བའི་དུས་སུ་དམ་བཅས་པ་ལ་ཞིག་རལ་བྱུང་བ་རྣམས། འདིར་དཔང་པོའི་སྤྱན་སྔར་དམ་ཚིག་སླར་བླང་སྟེ། རྩ་བ་ཡན་ལག་གི་དམ་ཚིག་རྣམས་རང་གི་སྲོག་ལ་བབ་ཀྱང་བསྲུང་བསམ་ལ། གསང་སྙིང་ལས། བླ་མེད་བྱང་ཆུབ་སེམས་ཀྱི་དམ་ཚིག་བསྐྱེད་རྫོགས་མི་སྤང་པ་དང་། བླ་མ་རྡོ་རྗེ་སློབ་དཔོན་དྲུག་བཀུར་བ་དང་། སྔགས་གསུམ་བཟླ་བ་དང་། ཕྱག་རྒྱ་བཞི་བསྒོམ་པ་རྒྱུན་མི་བཅད་པ་གསུང་གི་དམ་ཚིག་གོ། །ཡང་དག་པའི་ལམ་དུ་ཞུགས་པའི་མཆེད་ལ་བྱམས་པ་བསྐྱེད་པ་དང་། གསང་བ་བཅུ་པོ་ནི་གཞན་དོན་དུ་འགྱུར་བའི་ཕྱིར། གཞན་ལ་སྨྲ་བར་མི་བྱ་བ་ནི་ཐུགས་ཀྱི་དམ་ཚིག་སྟེ། དེ་ལྔ་ནི་རྩ་བའི་དམ་ཚིག །གཏི་མུག་འདོད་ཆགས་དང་ཞེ་སྡང་ཆེ། ང་རྒྱལ་ཕྲག་དོག་སྟེ་ཡང་དག་པའི་དུག་ལྔ་སྔགས་ཀྱི་ལྟ་སྤྱོད་དང་ཆོས་མཐུན་དུ་ཡོད་པ་དང་། ལོག་པའི་དུག་ལྔ་ལྟ་བའི་རྩིས་ཟིན་ན་ཡེ་ཤེས་ལྔ་ཡིན་པས་མི་སྤང་ངོ་། །དཀར་རྩིས་བྱང་སེམས། དམར་རྩི་རཀྟ། དྲི་ཆེན་དྲི་ཆུ་ཤ་ཆེན། འདི་ལྔ་ལ་གྲུབ་པ་བཞིའི་རྒྱན་པའི་ཕྱིར། ཡང་དག་པའི་སྣོད་བཅུད་འདི་དག་ལོངས་སྤྱོད་པར་བྱས་ཏེ་མི་དོར་རོ། །དེ་བཅུ་ནི་ཡན་ལག་གི་དམ་ཚིག་གོ། །སྨོན་ལམ་ནི་བདེ་བར་གཤེགས་པ་རྒྱལ་བ་ཞི་ཁྲོ་ཁྱེད་ཅི་འདྲ་བའི་ཞིང་ཁམས་གདུལ་བྱ་ཚད་མེད་མངའ་བ་དེ་འདྲ་ཁོ་ནར་བདག་ཀྱང་འགྲུབ་པར་གྱུར་ཅིག །སྨོན་ལམ་དེ་འགྲུབ་པའི་རྒྱུ་ལ་ལམ་གྱིས་ཆོས་སྤྱོད་པ་རྨད་བྱུང་བསམ་ཡས་པ་ཀུན་འགྲོ་བ་སེམས་ཅན་ལ་ཕན་པའི་དོན་དུ་བདག་གི་སྤྱད་དོ། །མདོར་ན་བྱང་ཆུབ་སེམས་དཔའ་སྤྱོད་མཆོག་དམ་པ་དང་། སྔགས་ཀྱི་སྐུ་གསུང་ཐུགས་ཀྱི་ཕྱག་རྒྱ་འདི་ཉིད། བདག་གི་སྲོག་གི་ཕྱིར་ཡང་མི་གཏོང་ན། དེ་བས་རྡོ་རྗེ་རྒྱལ་པོ་ཁྱོད་ཀྱི་བྱིན་གྱིས་རློབས་ཤིག །དུས་ངན་ཐ་མའི་འཇིག་རྟེན་འདིར། སངས་རྒྱས་ཀྱི་སེམས་ཅན་གྱི་དོན་མཛད་པར་དཀའ་བ་རྣམས་ཀྱང་བདག་གིས་མཛད་བྱང་ཆུབ་སེམས་དཔའི་མགོ་དང་རྐང་ལག་བྱིན་ནས་སྤྱད་དཀའ་བ་རྣམས་ཀྱང་བདག་གིས་སྤྱད། དེ་བས་གསང་སྔགས་རྡོ་རྗེ་ཐེག་པ་རྣལ་འབྱོར་ཆེན་པོ་ཞི་ཁྲོའི་དཀྱིལ་འཁོར་བསྒོམ་པའི་སྐབས་འདིར་བདག་ཅག་གི་བསམ་པའི་འབྲས་བུ་ཐམས་ཅད་འགྲུབ་པར་གྱུར་ཅིག །ཧཱུྃ་ཞེས་བརྗོད་པས། རང་གི་ཐུགས་ཀའི་འོད་ཟེར་གྱིས་དཔང་པོའི་ལྷ་རྣམས་འོད་དུ་ཞུ་ནས། བདག་གི་སྤྱི་བོ་ནས་མར་ཐིམ། ལུས་ངག་ཡིད་གསུམ་གྱིས་སྡིག་སྒྲིབ་ཐམས་ཅད་མར་འོག་སྒོ་དང་། སོར་མོ་བཅུ་ནས་མར་བུད་ནས། རང་གི་ལུས་ཡེ་ཤེས་ཀྱི་བདུད་རྩིས་གང་བར་བསམ། ༀ་བཛྲ་སཏྭ་ཅེས་སོགས་བརྗོད། རྒྱུན་བཤགས་ཡན་ལག་བརྒྱད་པ་རྫོགས་སོ། །གཉིས་པ་ཞི་ཁྲོའི་བཤགས་པ་ལ། དགོངས་སུ་གསོལ་བ། ཕྱག་འཚལ་བ། ཕན་ཡོན། སྙིང་པོ་བཟླས་པའི༴ བཤགས་པའི་ཡན་ལག་དང་ལྔ་ལས། དང་པོ་དགོངས་སུ་གསོལ་བའི་ཡན་ལག་ནི། བཅོམ་ལྡན་འདས་ཞི་ཁྲོ་རབ་འབྱམས་ཀྱི་ཚོགས་ལ་ཕྱག་འཚལ་ལོ། །ཨེ་མ་ཧོ། ནི་ངམ་ཞིང་ངོ་མཚར་བའི་ཚིག་སྟེ། གང་ལ་ངོ་མཚར་ན་ཕྱོགས་བཅུ་དུས་བཞིའི་རྒྱལ་བ་ཀུན་གྱི་བདག་ཉིད་ཆེན་པོ་རྩ་བ་དང་བརྒྱུད་པའི་བླ་མ་རྣམས་དང་། རྒྱལ་བ་ཞི་བ་བཞི་བཅུ་རྩ་གཉིས། ཁྲོ་བོ་ཆེ་མཆོག་དཔལ་དགུ་ཡོངས་རྫོགས་དགོངས་མཛོད། གནས་འདིར་གཤེགས་ལ་ཉི་ཟླ་པདྨའི་གདན་ལ་བཞུགས། ཅེས་པའི་དོན་ནི། རང་གི་མདུན་དུ་པདྨའི་སྡོང་པོ་ལ་སྨིན་མཚམས་ཀྱི་ཐད་དུ་པད་འདབ་བརྒྱད་དུ་གྱེས་པའི་འདབ་མ་བརྒྱད་ལྟེ་བ་དང་དགུ་ལ་ཉི་ཟླ་ཕྲུག་པའི་གདན་དགུ་བསྒོམ། དེའི་དབུས་སུ་ཆེ་མཆོག་ཡོན་ཏན་གྱི་ལྷ་ཚོགས་བྱོན་ནས་བཞུགས་པར་བསམ། ཤར་དུ་ཡང་དག་ཐུགས། ལྷོར་འཇམ་དཔལ་སྐུ། ནུབ་ཏུ་པདྨ་གསུང་། བྱང་དུ་ཕུར་པ་ཕྲིན་ལས། ཤར་ལྷོར་མ་མོ་རྦོད་གཏོང་། ལྷོ་ནུབ་ཏུ་བླ་མ་རིག་འཛིན། ནུབ་བྱང་དུ་འཇིག་རྟེན་མཆོད་བསྟོད། བྱང་ཤར་དུ་དམོད་པ་དྲག་སྔགས། ཆེ་མཆོག་གི་དབུ་ཐོག་ཏུ་ཞི་བ་བཞི་བཅུ་རྩ་གཉིས། ཞི་བ་གཙོ་བོའི་དབུ་ཐོག་ཏུ་རྩ་བའི་བླ་མ་རྡོ་རྗེ་འཆང་གི་ཆ་བྱད་ཅན་ལ་བརྒྱུད་པའི་བླ་མས་བསྐོར་བ་དང་བཅས་པ་བྱོན་ནས་བཞུགས་པར་བསམས་པའི་མདུན་དུ། སྡོམ་པ་གསུམ་གྱིས་ཉམས་ཆག་ན་རག་ངན་སོང་དུ་སྐྱེ་བའི་རྒྱུ་སྦྱང་བའི་ཕྱིར་ཕྱག་དང་། ཕྱི་ནང་གསང་བའི་མཆོད་པ་བཞེས་སུ་གསོལ། ཅེས་མཆོད་པ་དཔག་ཏུ་མེད་པས་མཆོད་པར་དམིགས་སོ། །གཉིས་པ་ཕྱག་འཚལ་བའི་ཡན་ལག་ནི། རང་གི་ལུས་ཞིང་གི་རྡུལ་སྙེད་དུ་སྤྲུལ་ནས་མགོ་བོས་ཞབས་ལ་བཏུད་པས་ཕྱག་འཚལ་བར་བསམ་ལ། སྙན་པ་རྒྱུད་གདམས་ངག་གི་གནད་མ་ཆུག་པ། བྱིན་རླབས་ཉམས་རྟོགས་ཀྱི་དྲོད་མ་ཡལ་བ། བླ་མ་བརྒྱུད་པའི་ཟམ་མ་ཆད་པ། དབང་བཞིའི་ཆུ་རྒྱུན་མ་ནུབ་པ་སོགས་ཡོན་ཏན་ཕུན་གསུམ་ཚོགས་པ་མངའ་བ་བླ་མ་རྣམས་ལ་ཕྱག་འཚལ་ལོ། །འཁོར་འདས་ཕྱོགས་གཅིག་ཏུ་དམིགས་སུ་མེད་ཅིང་སྤྲོས་པའི་མཐའ་བརྒྱད་དམ་བཞི་དང་བྲལ་བའི་ཆོས་ཀྱི་སྐུ་ལ་ཕྱག་འཚལ་ལོ། །སྣང་སྟོང་དབྱེར་མེད་བདེ་བ་ཆེན་པོ་ལོངས་སྤྱོད་རྫོགས་པའི་སྐུ་ལ་ཕྱག་འཚལ་ལོ། །འགྲོ་བ་སེམས་ཅན་གྱི་མགོན་སྐྱབས་དང་དཔུང་གཉེན་གང་འདུལ་ཐབས་ཀྱི་སྒོ་ནས་ཅིར་ཡང་སྤྲུལ་པའི་སྐུ་ལ་ཕྱག་འཚལ་ལོ། །ཅིར་ཡང་སྤྲུལ་དུས་དགོངས་པ་གནས་ལུགས་མི་འགྱུར་བ་སྐྱེ་འཇིག་དང་བྲལ་བ་ལ་མ་གཡོས་པས་རྡོ་རྗེའི་སྐུ་ལ་ཕྱག་འཚལ་ལོ། །ཡང་དག་པའི་དོན་སྐུ་གསུམ་ལྷུན་གྲུབ་རང་རིག་པའི་མངོན་གསུམ་དུ་སྣང་བ་མངོན་པར་བྱང་ཆུབ་པའི་སྐུ་ལ་ཕྱག་འཚལ་ལོ། །ཉོན་མོངས་རྣམ་རྟོག་ཞི་བར་མཛད་པའི་ཞི་བའི་ལྷ་ལ་ཕྱག་འཚལ་ལོ། །བདུད་རུ་ཏྲ་ལ་སོགས་ལོག་པར་ལྟ་བ་རྣམས་ཚར་གཅོད་པར་མཛད་པའི་ཁྲོ་བོའི་སྐུ་ལ་ཕྱག་འཚལ་ལོ། །ཐབས་མཁས་པའི་སྒོ་ནས་སྐྱེ་འགྲོ་རྣམས་ཀྱི་ཚེ་སྲོག་གི་བདག་པོ་ནི་གཤིན་རྗེ་ཡིན། དེའི་གཤེད་དུ་གྱུར་པས་སེམས་ཅན་གྱི་དཔལ་མགོན་དུ་གྱུར་པ་སྐུ་ལ་འགྱུར་བ་མི་མངའ་བས་ཚེ་བདག་འཇམ་དཔལ་སྐུ་ལ་ཕྱག་འཚལ་ལོ། །ཉེས་པའི་སྐྱོན་དང་བྲལ་ཞིང་གསུང་འགག་པ་མེད་པས་ཐེག་སྒོ་སྣ་ཚོགས་ཀྱི་སྒྲ་སྒྲོགས་ཀྱང་ཉེས་སྐྱོན་གྱིས་མ་གོས་པས་པདྨའི་གསུང་ལ་ཕྱག་འཚལ་ལོ། །ཐུགས་འཁྲུལ་པ་མེད་པ་ཡང་དག་པའི་ཆོས་ཉིད་ཀྱིས་དོན་དང་ལྡན་པས་བཛྲའི་ཐུགས་ལ་ཕྱག་འཚལ་ལོ། །ཡོན་ཏན་གྱི་ཉོན་མོངས་པ་དུག་ལྔའི་ནད་སེལ་བར་བྱེད་པས་བདུད་རྩི་སྨན་ལ་ཕྱག་འཚལ་ལོ། །ཕྲིན་ལས་ཀྱི་དྲེགས་པ་ཅན་ཐམས་ཅད་འཇོམས་པར་མཛད་པ་ཕུར་པའི་ལྷ་ལ་ཕྱག་འཚལ་ལོ། །འབྱུང་བའི་མངའ་བདག་མ་མོའི་ཚོགས་ལ་ཕྱག་འཚལ་ལོ། །ས་དང་ལམ་ཡོངས་སུ་རྫོགས་པར་མཛད་པའི་རིག་འཛིན་ཚོགས་ལ་ཕྱག་འཚལ་ལོ། །སངས་རྒྱས་ཀྱི་བསྟན་པ་བསྲུང་བར་མཛད་པའི་དམ་ཅན་སྡེ་དཔོན་སུམ་ཅུ་པོ་རྣམས་ལ་ཕྱག་འཚལ་ལོ། །སྡང་བྱེད་ཀྱི་དགྲ་གནོད་བྱེད་ཀྱི་བགེགས་བར་དུ་གཅོད་པའི་བདུད་རྣམས་འདུལ་བར་མཛད་པའི་སྔགས་བདག་དྲེགས་པའི་སྡེ་དཔོན་བཅོ་བརྒྱད་པོ་རྣམས་ལ་ཕྱག་འཚལ་ལོ། །གསུམ་པ་ཕན་ཡོན་གྱི་ཡན་ལག་ནི། སེམས་ཅན་གང་གི་རྒྱལ་བ་ཞི་ཁྲོའི། དཀྱིལ་འཁོར་ལྷ་ཚོགས་རྣམས་ཀྱི་མཚན་ཐོས་ཕྱག་མཚལ་ན། དམ་ཚིག་ཆག་ཉམས་མ་ལུས་པ་ཀུན་བྱང་ནས་དག་ན། མཚམས་མེད་ལྔའི་ལས་བྱས་པ་དག་པ་ལ་སྨོས་ཅི་དགོས་སྟེ་དག་པར་འགྱུར་ལ། ཞི་ཁྲོའི་དཀྱིལ་འཁོར་གྱི་མཚན་ཐོས་ན་ན་རཀ་ངན་སོང་གསུམ་གྱི་གནས་ན་འདུག་པ་རྣམས་ཀྱང་དོང་ནས་སྤྲུག་སྟེ། འོ་ན་ངན་སོང་དུ་ཐར་བར་མཐོ་རིས་སུ་སྐྱེའམ་ཞེ་ན། རིག་འཛིན་ཐོབ་ནས་རྒྱལ་བའི་ཞིང་དུ་གྲགས་ཏེ་སངས་རྒྱས་སོ། །བཞི་པ་སྙིང་པོ་བཟླས་པའི་ཡན་ལག་ནི། རྡོ་རྗེ་སེམས་དཔའི་གསང་སྔགས་ཡི་གེ་བརྒྱ་པ་དངོས་འདི་བཟླས་ན། ལས་ངན་པའི་སྒྲིབ་པ་དང་། དམ་ཚིག་ཆག་ཉམས་ཀྱི་སྒྲིབ་པ་ཐམས་ཅད་དག་པར་བྱེད་པ་དང་། འཁོར་བ་དོང་ནས་སྤྲུག་པར་བྱེད་པའི་ཡང་སྙིང་འདི་བཟླའོ། །དེ་ཡང་རང་གི་སྤྱི་བོར་པད་ཟླ་ཉི་མ་གསུམ་བརྩེགས་ཀྱི་སྟེང་དུ། རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་གཡས་རྡོ་རྗེ་གཡོན་དྲིལ་བུ་ཐུགས་ཀར་བསྣོལ་བ། ཞབས་ཕྱེད་དཀྱིལ། ཞབས་གཡས་ཀྱི་མཐེ་བོང་སྤྱི་གཙུག་དུ་རེག་པ། རལ་པ་ཐོར་ཚུག་གྱེན་དུ་བཅིང་པ་ལྷག་མ་ཐུར་དུ་གྲོལ་བ་རིན་པོ་ཆེའི་སྲོག་ཞུ་གསོལ་བ། སྤྱི་བོར་ཟླ་བའི་སྟེང་དུ་ༀ་དཀར་པོ། མགྲིན་པར་པདྨའི་སྟེང་དུ་ཨཱཿདམར་པོ། ཐུགས་ཀར་ཉི་མའི་སྟེང་དུ་རྡོ་རྗེ་དཀར་པོ་རྩེ་ལྔ་པའི་ལྟེ་བར་ཧཱུྃ་དཀར་པོ་རྡུལ་ཆུའི་མདོག་ལྟ་བུ་དཀར་རྩེ་རེ་དེ་ལ་ཡི་གེ་བརྒྱ་པ་ཁ་དོག་དཀར་པོས་གཡས་སུ་འཁོར་བ། ཡིག་འབྲུ་གསུམ་ལ་འོད་བྱུང་ནས་བདག་གི་ལུས་ངག་ཡིད་གསུམ་ལ་ཕོག་པས་ཆག་ཉམས་སྡིག་སྒྲིབ་ཐམས་ཅད་དག་པར་བསམ། གཞན་ཡང་འོག་གི་ཡི་གེ་བརྒྱ་པ་བཟླ་བའི་དུས་སུ། རྡོ་རྗེ་སེམས་དཔའི་ཐུགས་ཀའི་ཡི་གེ་བརྒྱ་པ་ལས་བདུད་རྩི་བྱུང་། རྐང་པ་གཡས་པའི་མཐེ་བོང་ནས་བདག་གི་ཚང་བུག་དུ་མར་ཐིམ། ལུས་ངག་ཡིད་གསུམ་གྱི་སྡིག་སྒྲིབ་ཐམས་ཅད་རྐང་མཐིལ་དང་སེན་བྲགས་རྣམས་ནས་མར་འོད་ནག་པོའི་ཚུལ་དུ་བུད་པར་བསམ། རང་གི་ལུས་ཀྱང་ཤེལ་ཕྱིས་པ་ལྟར་དཀར་སང་གྱིས་སོང་བར་བསམ། དཔང་པོ་རྣམས་ཀྱི་ཐུགས་ཀ་ནས་བདུད་རྩིའི་ཆུ་རྒྱུན་བྱུང་ནས་སྡིག་སྒྲིབ་དག་པར་བསམ། བཟླས་པ་དངོས་ནི། ༀ་ཨཱཿཧཱུྃ་སྭཱ་ཧཱ་ལྔ་བྱུང་ནས་རང་གི་གནས་ལྔར་ཐིམ་པར་བསམ་ལ། ༀ་སྔར་བཞིན་ནོ། །བཛྲ་སཏྭ་ས་མ་ཡ་ནི་རྡོ་རྗེ་སེམས་དཔའི་དམ་ཚིག །མ་ནུ་པ་ལ་ཡ་ནི་རྗེས་སུ་སྐྱོངས་ཤིག །བཛྲ་ས་ཏྭ་ཏི་ནོ་པ་ཏིཥྛ་ནི་རྡོ་རྗེ་སེམས་དཔའ་ཉིད་ཀྱིས་ཉེ་བར་ཞུགས་ཤིག །དྲྀ་ཌྷོ་མེ་བྷ་ཝ་ནི་བདག་ལ་བརྟེན་པར་གྱུར་ཅིག་པའོ། །སུ་པོཥྱོ་མི་བྷ་ཝ་ནི་བདག་ལ་རྒྱས་པར་གྱུར་ཅིག །སུ་ཏོ་ཥྱོ་མེ་བྷ་ཝ་ནི་བདག་ལ་ཤིན་དུ་དགྱེས་པར་གྱུར་ཅིག །ཨ་ནུ་རཀྟོ་མེ་བྷ་ཝ་ནི་བདག་ལ་རྗེས་སུ་ཆགས་པར་གྱུར་ཅིག །སརྦ་སིདྡྷི་མྨེ་པྲ་ཡཙྪ་ནི་དངོས་གྲུབ་ཐམས་ཅད་བདག་ལ་རབ་ཏུ་སྩོལ། སརྦ་ཀརྨ་སུ་ཙ་མེ་ནི་བདག་ལ་ལས་ཐམས་ཅད་རྩོལ་པར་མཛོད་ཅིག །ཙིཏྟཾ་ཤྲེ་ཡཿཀུ་རུ་ནི་སེམས་ཀྱི་དཔལ་དུ་མཛོད་ཅིག །ཧཱུྃ་ནི་བཞུགས་པའི་ས་བོན་ཡིན། ཧ་ཧ་ཧ་ཧ་ནི་ཡེ་ཤེས། ཧོ་ནི་མཉེས་ཤིང་དབང་དུ་གྱུར་ཅིག །བྷ་ག་ཝཱན་ནི་བཅོམ་ལྡན་འདས། སརྦ་ཏ་ཐཱ་ག་ཏ་ནི་དེ་བཞིན་གཤེགས་པ་ཐམས་ཅད། བཛྲ་མཱ་མེ་མུཉྩ་ནི་རྡོ་རྗེས་བདག་རབ་ཏུ་གྲོལ་བར་མཛོད་ཅིག །བཛྲཱི་བྷ་ཝ་ནི་རྡོ་རྗེ་ཅན་དུ་གྱུར་ཅིག །མ་ཧཱ་ས་མ་ཡ་སཏྭ་ཨཱཿདམ་ཚིག་ཆེན་པོའི་སེམས་དཔའ་ཞེས་པའོ། །ལྔ་པ་བཤགས་པའི་ཡན་ལག་ལ། ཀུན་རྫོབ་བཤགས་པ་དང་། དོན་དམ་བཤགས་པ་གཉིས་ལས། དང་པོ་ཀུན་རྫོབ་བཤགས་པ་ནི། དཔང་པོའི་མདུན་དུ་ལུས་ཞིང་གི་རྡུལ་སྙེད་དུ་སྤྲུལ་ནས་ངག་བཤགས་ཚིག །ཡིད་འགྱོད་སེམས་དང་བཅས་པས་བཤགས་པ་ནི། ཧོ་ནི་དགྱེས་པ་སྟེ། བཤགས་སེམས་སྐྱེས་ནས་བཤགས་པ་ལ་དགའ་བ་སྟེ། བདེ་གཤེགས་རྒྱལ་བ་ཞི་ཁྲོ་ཡོངས་རྫོགས་རིག་འཛིན་བརྒྱུད་པའི་བླ་མ་དང་བཅས་པ་རྣམས་ཀྱི། ཞལ་གྱིས་ཕྱོགས། སྤྱན་གྱིས་གཟིགས། ཐུགས་ཀྱིས་དགོངས། སྙན་གྱིས་གསན་དུ་གསོལ་བྱ་བ་སྟེ། བདག་གིས་རྒྱལ་བའི་བཀའ་ནས་ཅི་ལྟར་འབྱུང་བ་བཞིན་མ་སྤྱོད་པ་དང་། བླ་མའི་ཞལ་ནས་ལུང་ཅི་ལྟར་འབོག་པ་བཞིན་དུ་མ་སྤྱད་པའི་ཐོག་ནས་སློབ་དཔོན་སྨད་པ་དང་། གསང་སྔགས་རྡོ་རྗེ་ཐེག་པའི་སྒོར་ཞུགས་པའི་མཆེད་དང་ལྕམ་དྲལ་མིང་སྲིང་ལ། ལྟ་ལོག་ནི་ལོག་ལྟ་བྱེད་པ་དང་། ངན་སེམས་འཆང་། ཚིག་ངག་ཏུ་སྨྲ་བ་དང་། བརྡེག་པ་དང་། གཙོགས་པ་ནི་མགོ་དང་རྐང་ལག་བཅག་པ་ལ་སོགས། གནོད་པ་དངོས་སུ་སྤྱད་པ་ནི་སྐུའི་དམ་ཚིག་ཉམས་པ་དང་། ཡི་དམ་གྱི་ལྷའི་སྐུ་ཕྱག་རྒྱ་དང་། དེའི་དཀྱིལ་འཁོར་བསྒོམ་པ་རང་གི་ཉམས་སུ་མ་གསལ་བ་དང་། སྔགས་ཀྱི་ཛཔ྄་བཟླས་མ་དག་ནས་ལྷག་ཆད་དང་། ཚིག་ཟུར་ཆགས་པ། སྒྲ་ཉམས་པ་སྟེ་གསུང་གི་དམ་ཚིག་ཉམས་པ་དང་། གསང་བར་འོས་པ་དང་། གསང་བ་གཉེར་གཏད་པ་རྣམས་སྨྲས་པ་དང་། གཞན་ཡང་སྤྱིར་གསང་བ་བཞི། བར་གསང་བཞི་དང་། གང་གི་གསང་བར་འོས་པ་དང་། གཉེར་གཏན་གཉིས་དང་གསང་བ་བཅུ་པོ་གཞན་ལ་སྒྲགས་ཅིང་བླ་མ་བསླུ་བ་སྟེ་ཐུགས་ཀྱི་དམ་ཚིག་གོ། །དེ་ལྟར་སྐུ་གསུང་ཐུགས་རྩ་བ་དམ་ཚིག་ཉམས་པ་མཐོལ་ཞིང་བཤགས་སོ། །སྦྱོར་སྒྲོལ་མ་བྱིན་ལེན་པ་དང་ངག་བརླིང་པོ་རྫུན་དུ་སྨྲ་བ་སྟེ། སྤྱད་པར་བྱ་བའི་དམ་ཚིག་ལྔ། ཤེས་བྱ་ལྔ་དང་བསྒྲུབ་བྱ་ལྔ། མི་སྤང་ལྔ་དང་དང་བླང་ལྔ་སྟེ། ཁྱད་པར་ཡན་ལག་གི་དམ་ཚིག་ཉམས་པ་མཐོལ་ཞིང་བཤགས་སོ། །གཞན་ཡང་བསྙེན་པ་དང་ཉེ་བའི་བསྙེན་པ་དང་། བསྒྲུབ་པ་དང་བསྒྲུབ་པ་ཆེན་པོའི་ཏིང་ངེ་འཛིན་གྱི་དམ་ཚིག་གཡེལ་ཞིང་། ཉ་དང་གནམ་སྟོང་ལ་སོགས་དུས་བཟང་དྲུག་གི་དུས་སུ་མཆོད་པ་མ་བྱས་ནས་ཆགས་པ་དང་། ཚེ་ཕྱི་མའི་ཆོས་ཕྱོགས་ལེ་ལོ་ཆེན་པོ་དང་། འཇིག་རྟེན་འདི་ཆེད་དུ་གཉེར་ནས་ནོར་རྫས་ལ་བསོགས་འཇོག་བྱས་པ་དང་། ཚོགས་ཀྱི་སྦྱང་ཀུ་བྱས་པ་ནི་རྗེ་བཙུན་མའི་ཚོགས་མཆོད་ཀྱི་ནང་ནས་སྔར་ཚོགས་གྲལ་དུ་མ་འདུག་ཤིང་དཀྱིལ་ཆོག་མ་བསྒོམ་པར་ཚོགས་སྤྲུམ་འོང་བ་ལ་ཟེར་རོ། །གཞན་ཡང་ཕུད་ལ་བཞག་ཅིང་ལྷག་མ་ལ་འཕྲི་བར་བྱས་ནས་ཕུད་ཉམས་ཤིང་ཁ་ཚར་ཤོར་བ་ནི་སྦག་པ་སྟེ། དེ་ལྟར་ཚོར་བ་དང་མ་ཚོར་བའི་རྐྱེན་དབང་གིས་ལུས་ངག་ཡིད་གསུམ་གྱི་སྒོ་གསུམ་བག་མེད་པས་དམ་ཚིག་ཉམས་པ་ཐམས་ཅད་བཤགས་སོ། །དོན་དམ་པའི་བཤགས་པ་ནི། ཡིད་ཀྱི་དམ་ཚིག་ཉམས་པ་ལྟ་བས་བཤགས་དགོས་སྟེ། དེ་ཡང་འཁོར་འདས་ཀུན་གྱི་གཞི་བྱང་ཆུབ་ཀྱི་སེམས་སྣང་སྟོང་དབྱེར་མེད་དུ་གནས་པས། དེ་བས་སྣང་བ་ཀུན་རྫོབ་ཀྱིས་ཕྱོགས་སུ་མ་ཆད་པ་ཡིན་པ་མེད་སྟེ་སྟོང་དུས་སྣང་བའི་རྩིས་ཀྱིས་ཟིན་པའི་ལྟ་བ་རྟོགས་ཅིང་། སྟོང་པ་དོན་དམ་གྱི་ཕྱོགས་སུ་རྒྱ་མ་ཆད་པ་མིན་ཏེ་སྟོང་པ་ཉིད་སྣ་ཚོགས་སུ་ཤར་བ་མིན་པ་མེད་པའི་དགོངས་པ་ཉམས་སུ་ལོན་ནས་སྒོམ་པས་ཡིན་པའི་ལྟ་བ་དང་། མིན་པ་མེད་པའི་སྒོམ་པ་གཉིས་ཡ་མ་བྲལ་བར་ཁྱེར་བའི་སྤྱོད་པ་རྟོགས་པས། འབྲས་བུ་ཐོབ་དུ་རེ་བ་མི་ཐོབ་དུ་དོགས་པ་མེད་པའི་གཞི་དོན་བྱང་ཆུབ་སེམས་དེ་མངོན་དུ་གྱུར་ནས་འབྲས་བུ་སྟེ། དེ་ལྟར་དུ་རྟོགས་པས་རྩ་བ་དང་ཡན་ལག་ཐམས་ཅད་ཀྱིས་དམ་ཚིག་ཆག་ཉམས་དང་པོར་མ་བྱུང་བར་དུ་མ་སྐྱེས་པས། བཤགས་བྱའི་ཡུལ་དང་བཤགས་བྱེད་ཀྱི་མཁན་པོ་གཉིས་སུ་མེད་པ་གྲོལ་བའོ། །ཅེས་བཀའ་སྩལ་ཏོ། །ཆགས་ཉམས་བཤགས་པའི་མདོ། ན་རག་དོང་སྤྲུག་དཔལ་གསང་བ་འདུས་པའི་རྒྱུད་དུ། ཀུན་བཟང་ཆེ་མཆོག་གིས་གསུངས་པ་རྫོགས་སོ། །གསུམ་པ་མཎྜ་ལ་འབུལ་བ་ལ་གཉིས་ཏེ། བརྟགས་པ་དང་། འབུལ་བའོ། །དང་པོ་ནི་མཚན་དང་། འོད་ལ་བརྟགས་པའོ། །དང་པོ་ལ། རང་ས་དང་། འཁོར་ས། ནོར་ས་གསུམ་མོ། །འོད་ལ། སྐྱོན་དང་། ཡོན་ཏན་ལ་སོགས་པ་སྟེ། དེ་རྣམས་ཞིབ་པར་ཞལ་ལས་ཤེས་པར་བྱའོ། །གཉིས་པ་འབུལ་བ་ལ། ཆོས་སྐུ། ལོངས་སྐུ། སྤྲུལ་སྐུ་ཞིང་གི་མཎྜལ་དང་གསུམ་ཡོད་པ་ལས། ཆོས་སྐུ་ཞིང་གི་མཎྜལ་ནི་ལོགས་སུ་ཤེས་ལ། འདིར་མཎྜལ་རིམ་གསུམ་ནི། ལོངས་སྐུ། སྤྲུལ་སྐུ། གསོལ་འདེབས་དང་གསུམ་ལས། དང་པོ་ལོངས་སྐུ་ཞིང་གི་མཎྜལ་ལ་ཡང་། བསྒྲུབ་པ་ཞིང་གི་མཎྜལ་དང་། མཆོད་པ་ཞིང་གི་མཎྜལ་གཉིས་ཁས། དང་པོ་ནི། རང་ཡི་དམ་དུ་གསལ་བའི་སྨིན་མཚམས་ནས་ཡི་གེ་བྷྲཱུྃ་གཅིག་སྤྲོས་པ་འོད་དུ་ཞུ་བ་ལས། རིན་པོ་ཆེའི་ས་གཞི། མནན་ན་ནེམ་པ། བཏེགས་ན་འཕར་བ། མིག་མང་རིས་སུ་བྲིས་ལ། རྒྱ་མདོ་ཐམས་ཅད་རིན་པོ་ཆེའི་ཚོམ་བུས་སྤྲས་པ། མིག་གི་བལྟར་མི་བཟོད་པའི་འོད་དང་ལྡན་པའི་དབུས་སུ། རིན་པོ་ཆེའི་ཁྲི་སེང་གེ་བརྒྱད་ཀྱིས་ཉེ་བར་བཏེགས་པ། རིན་པོ་ཆེའི་མཛོད་མིག་བདུན་བདུན་དང་ལྡན་པ། གདུང་མ་ཟུང་སྒྲིལ་དུ་འཁོར་བ། རིན་པོ་ཆེའི་དྲྭ་བས་ཁྲི་ཁེབ་བྱས་པ། དེའི་སྟེང་དུ་པད་ཟླ་ཉི་མ་གསུམ་བརྩེགས་ཀྱི་སྟེང་དུ་རྩ་བའི་བླ་མ་ལ་བརྒྱུད་པའི་བླ་མ་རྣམས་ཀྱིས་བསྐོར་བ། དེའི་ཤར་ཕྱོགས་སུ་གླང་པོ་ཆེ་བརྒྱད་ཀྱིས་བཏེགས་པའི་གདན་དྲུག་བརྩེགས་ཀྱི་སྟེང་དུ། ཡི་དམ་ལྷ་ཚོགས་རྣམས་ལ་ཆོས་སྐྱོང་བའི་སྲུང་མས་བསྐོར་བ། གཡས་སུ་རྟ་མཆོག་བརྒྱད་ཀྱི་བཏེགས་པའི་གདན་དྲུག་བརྩེགས་ཀྱི་སྟེང་དུ། སངས་རྒྱས་དཀོན་མཆོག་སྐུ་གསུམ་གྱི་བསྡུས་པ་རྣམས་བསམ། རྒྱབ་ཏུ་རྨ་བྱ་བརྒྱད་ཀྱིས་བཏེགས་པའི་གདན་དྲུག་བརྩེགས་ཀྱི་སྟེང་དུ། ཆོས་དཀོན་མཆོག་རྒྱུ་འབྲས་ལམ་གསུམ་གྱི་བསྡུས་པ་རྣམས་གསེར་གྱི་ཤོག་གུ་ལ་བཻཌཱུརྱའི་ཞུན་མས་རང་ནན་དུ་ཕྲིས་པའི་གླེགས་བམ་རང་སྒྲ་གྲགས་པ་རྣམས་བསམ། གཡོན་དུ་ཤང་ཤང་བརྒྱད་ཀྱིས་བཏེགས་པའི་གདན་དྲུག་བརྩེགས་ཀྱི་སྟེང་དུ། དགེ་འདུན་དཀོན་མཆོག་རིག་པ་འཛིན་པ་རྣམས་དང་། ཐར་ལམ་པ་རྣམས་དང་། བྱང་ཆུབ་སེམས་དཔའ་ཟག་པ་མེད་པ་རྣམས་དང་། འཕགས་པ་དགྲ་བཅོམ་པ་རྣམས་དང་། གཞན་ཡང་ས་དང་ལམ་ལ་གནས་པ་རྣམས་བསམ། མཆོད་པ་ཞིང་གི་མཎྜལ་ནི། དེ་དག་གི་མངའ་རིས་དང་སྤྱན་ལམ་དུ། འདོད་པའི་ཡོན་ཏན་ཐམས་ཅད་ནམ་མཁའ་ལ་སྤྲིན་བཞིན་དུ་འབྱུང་བ། བར་སྣང་ལ་ཆར་བཞིན་དུ་འབབ་པ། ས་གཞི་ལ་རྩི་ཤིང་བཞིན་དུ་སྐྱེས་པ། འདོད་དགུ་ཐམས་ཅད་འབྱུང་བའི་ས་གཞི། ཆོས་ཀྱི་དབྱིངས་ཀྱི་ཁྱབ་ཚད་དང་མཉམ་པ། བླ་མ་དང་དཀོན་མཆོག་ལ་འབུལ་བར་བསམ་ལ། མཉེས་པར་བྱེད་པས་མཆོད་པ། སྣང་གྲགས་མཆོད་པའི་རྫས་སུ་མི་འདའ་བས་ཕྱག་རྒྱ་མཆོད་པ་གཞན་པས་ཁྱད་པར་དུ་གྱུར་པ་ཆེན་པོ་འདི་ནི། སེམས་ཀྱི་ཆོ་འཕྲུལ་ཡིད་བཞིན་གྱིས་ནོར་བུ་ལྟ་བུ་མཆོད་སྤྲིན་བསམ་གྱིས་མི་ཁྱབ་པའི་ཚོགས་ཀྱི་མཆོད་པར་བྱའོ། །དེ་ཡང་བདག་གི་ཐུགས་ཀ་ནས་བྷྲཱུྃ་ཕྱོགས་བཅུར་འཕྲོས་པས། ས་གཞི་ཐམས་ཅད་ལ་ཕོག་པས་སངས་རྒྱས་ཀྱིས་ཞིང་ཁམས་རྣམ་པར་དག་པ། མཉེན་ཞིང་འཇམ་ལ་རེག་ན་ཤིན་ཏུ་བདེ་བ་དང་ལྡན་པའི་འོག་གཞི་སྣ་ཚོགས་པའི་རིན་པོ་ཆེའི་ས་གཞི་མནན་ན་ནེམས་པ། བཏེགས་ན་འཕར་བ། མཛེས་པར་བྱེད་པའི་རིང་མིགས་མང་རིས་སུ་བྲིས་ཞིང་སྣ་ཚོགས་རིན་པོ་ཆེ་དུ་མས་སྤྲས་པ་དང་། ཏྲཱྃ་འཕྲོས་པས་རི་ཐམས་ཅད་ལ་ཕོག་པས་ཡོན་ཏན་ཀུན་འབྱུང་བའི་ནོར་བུ་རིན་ཆེན་གྱི་ཕུང་པོ་འོད་འབར་བར་བསམ། ཨཿསྤྲོས་པས་ཆུ་ཐམས་ཅད་ལ་ཕོག་པས་དབྱིབས་ལེགས་པའི་རྫིང་བུ་བང་རིམ་གསུམ་སྒོ་དང་ལྡན་པའི་ནང་དུ་རོ་བྲོ་བའི་མཆོག་ཏུ་གྱུར་པ་བསིལ་ཟིང་། དྭངས་བའི་ཆུ་ཡན་ལག་བརྒྱད་ལྡན་དུ་བསམ། བྷྲཱུྃ་སྤྲོས་པས་ཁང་ཁྱིམ་སྒྲ་གུར་ཐམས་ཅད་ལ་ཕོག་པས་རིན་ཆེན་གྱིས་ཁང་པ་སྣ་ཚོགས་པར་བསམ་པ་དང་། ཏྲཱྃ་འཕྲོས་པས་ནགས་ཚལ་ཐམས་ཅད་ལ་ཕོག་པས་ཕྱི་སྣོད་ཀྱི་འཇིག་རྟེན་རིན་ཆེན་པོ་ཆེའི་རྒྱན་དང་། རྩི་ཤིང་ནགས་ཚལ་ཐམས་ཅད་དཔག་བསམ་གྱིས་ལྗོན་ཤིང་རྒྱས་པའི་ཚལ་དུ་བསམ། ཧྲཱིཿའཕྲོས་པས་སྒྲ་གྲགས་ཐམས་ཅད་ལ་ཕོག་པས་སངས་རྒྱས་བྱང་ཆུབ་སེམས་དཔའ་རྣམས་ལ་བསྟོད་པའི་གླུ་དབྱངས་དང་སེམས་ཅན་རྣམས་ལ་ཆོས་སྟོན་པའི་ཚིགས་སུ་བཅད་པའི་སྒྲར་བསམ། མཱྃ་སྤྲོས་པས་སྤྲིན་དང་ན་བུན་ཐམས་ཅད་ལ་ཕོག་པས་ལྷབ་ལྷུབ་སྣ་ཚོགས་དང་། བླ་བྲེ་རྒྱལ་མཚན་ལྷའི་ན་བཟའ་དང་གདུགས་སུ་བསམ། ཏྲཱྃ་འཕྲོས་ནས་སྐྱེ་འགྲོ་རྣམས་ཀྱིས་རྒྱན་ཐམས་ཅད་ལ་ཕོག་པས། རིན་པོ་ཆེའི་དོ་ཤལ་དང་དཔུང་རྒྱན་དང་སེ་མོ་དོ་རུ་བསམ། ༀ་བྃ་ཨ་སྤྲོས་པས་ལོངས་སྤྱོད་ཐམས་ཅད་ལ་ཕོག་པས། བདུད་རྩིའི་རང་བཞིན་བཟའ་བ་དང་བཏུང་བ་དང་རོ་བྲོ་བའི་མཆོག་སྣ་ཚོགས་པ་རྣམས་དང་། ཏྲིཿསྤྲོས་པས་སྐྱེ་འགྲོ་ཐམས་ཅད་ལ་ཕོག་པས་འགྲོ་བ་ཐམས་ཅད་ཀྱང་རང་ལ་མཛེས་པར་བརྒྱན་པའི། མཆོད་རྫས་འདོད་ཡོན་སྣ་ཚོགས་ཐོགས་པའི་ལྷ་དང་ལྷ་མོ་རེ་རེ་ཡང་གྲངས་རྡུལ་སྙེད་རྣམས་ཀྱིས། རྐང་པས་བྲོ་དང་ལག་པས་གར་ལ་སོགས་པ་དང་། ཁ་ནས་སྐྱེ་བ་མེད་པའི་གླུ་བླང་ཞིང་བདེ་བར་གཤེགས་པ་རྣམས་ལ་ཚིགས་སུ་བཅད་པའི་བསྟོད་པ་བསམ་ཡས་ཀྱིས། མང་ཉུང་གི་ཚད་ཕྱོགས་བཅུ་ནམ་མཁའ་ཡི་ཁམས་ཁེངས་པར་བཀང་ནས་སྔར་སྤྱན་དྲང་བའི་དཀྱིལ་འཁོར་ཀུན་ལ་རྒྱས་པར་འབུལ། དེ་ནི་གསང་སྔགས་བླ་མེད་ལུགས་ཀྱི་སྐྱེ་མེད་ཀྱི་ངང་ནས་འགག་མེད་ཀྱི་རྩལ་སྦྱང་། གཉིས་མེད་དུ་རང་གྲོལ་ནས་ཚེ་གཅིག་སངས་རྒྱས་ཐོབ་པའི་ཐབས་ལྷག་པ་ཏིང་ངེ་འཛིན་གྱི་མཆོད་པའོ། །སྤྲུལ་སྐུ་དག་པ་ཞིག་གི་མཎྜལ་ནི་ཐུགས་ཀ་ནས་ཏྲཱྃ་གཅིག་སྤྲོས་པ་འོད་དུ་ཞུ་བ་ལས། མཐའི་རྒྱ་མཚོ་ཆེན་པོའི་དབུས་སུ་གླིང་བཞི་གླིང་ཕྲན་བརྒྱད་ནི། ཤར་ལུས་འཕགས་པོ། ལུས་དང་ལུས་འཕགས། ལྷོར་འཛམ་བུ་གླིང་། རྔ་ཡབ་དང་རྔ་ཡབ་གཞན། ནུབ་བ་ལང་སྤྱོད། གཡོ་ལྡན་དང་ལམ་མཆོག་འགྲོ། བྱང་སྒྲ་མི་སྙན། སྒྲ་མི་སྙན། སྒྲ་མི་སྙན་གྱིས་ཟླ། དེའི་དཀྱིལ་དུ་རི་བོ་མཆོག་རབ། ཤར་ཤེལ། ལྷོ་བཻཌཱུརྱ། ནུབ་པདྨ་རཱ་ག །བྱང་གསེར་ལས་གྲུབ་པ། འཁོར་གསེར་གྱི་རི་བདུན། རོལ་པའི་མཚོ་བདུན་གྱིས་བསྐོར་བ། རི་རབ་ཀྱིས་ཁར་རྒྱལ་སྲིད་རིན་ཆེན་བདུན་དང་། གཏེར་ཆེན་པོའི་བུམ་པ་དང་ལྡན་ཞིང་དཔག་བསམ་གྱིས་ཤིང་དང་ཁྲུས་ཀྱི་རྫིང་བུའི་མཛེས་པ། གླིང་བཞི་ཡང་ལས་བཞིའི་དབྱིབས་སུ་ཡོད་པ་ཡང་། ཤར་ཟླ་གམ། ལྷོ་སོག་ཁ། ནུབ་ཟླུམ་པོ། བྱང་གྲུ་བཞི། ལྷོ་སྤྲིན་དང་འཇའ་འོད། སྣང་གསལ་གྱི་ཉི་ཟླ་གཟའ་སྐར། མཐའི་ལྕགས་རི་མུ་ཁྱུད་དང་བཅས་པར་བྱིན་གྱིས་བརླབ་པའི་ཁྱད་པར་ལས་སྟེང་སུམ་ཅུ་རྩ་གསུམ་ལྷའི་རྟེན་ལོངས་སྤྱོད་དང་། ཁོང་སེང་ལྷ་མ་ཡིན་གྱི་རྟེན་ལོངས་སྤྱོད། འོག་ཀླུའི་རྟེན་ལོངས་སྤྱོད། ཕྱི་རོལ་རྒྱ་ཆེན་རིགས་བཞིའི་རྟེན་ལོངས་སྤྱོད། གླིང་བཞི་མིའི་རྟེན་ལོངས་སྤྱོད་ཕུན་སུམ་ཚོགས་པ་དང་ལྡན་པ་རྣམས། ལྷག་པའི་ཏིང་ངེ་འཛིན་གྱི་སྒོ་ནས་བླ་མ་དང་དཀོན་མཆོག་གསུམ་ལ་འབུལ་གྱིས་མཆོད་པར་བཞེས་སུ་གསོལ། ཕུལ་བའི་ཡོན་ཏན་ནི། འདི་ལྟར་དུ་སྣང་བ་རྒྱུ་ལམ་གྱིས་ཆོས་རྣམས་ཐམས་ཅད་འབྲས་བུའི་ངོ་བོར་ཡོངས་སུ་རྫོགས་དགོས་པའི་ཕྱིར་སངས་རྒྱས་རྣམས་ལ་མཎྜལ་འདི་ཕུལ་བས་བསོད་ནམས་ཀྱིས་འབྲས་བུ་འཕགས་པའི་ནོར་སྐུ་གསུང་ཐུགས་ཡོན་ཏན་ཕྲིན་ལས་ལྔ་དབྱིངས་ཡེ་ཤེས་གཉིས་དང་བདུན་ལྷུན་གྱིས་གྲུབ་ནས་ཏིང་ངེ་འཛིན་གྱི་སྒོ་འབུམ་ཕྲག་རྣམས་ལ་དབང་བསྒྱུར་ཤོག །གསོལ་བ་གདབ་པ་ནི། ན་མོ་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཡོན་ཏན་དང་ཕྲིན་ལས་དང་ཞིང་ཁམས་ཟག་པ་མེད་པ་ཟད་མི་ཤེས་པ་རྒྱན་གྱི་འཁོར་ལོ་ཉེར་ལྔའི་བདེན་པ་དང་། རྒྱལ་བ་རྒྱ་མཚོ་རིགས་ལྔ་ཡབ་ལྔ་གསང་བ་རྒྱ་མཚོ་ཡུམ་ལྔ་སྨིན་པ་རྒྱ་མཚོ་སེམས་དཔའ་དང་སེམས་མ། གཞན་ཡང་བརྒྱུད་པའི་བླ་མ་རིན་པོ་ཆེན་རྣམས་ཀྱིས་བྱིན་རླབས་ཀྱིས། བདག་མིང་ཆྒཻ་འདི་ཞེས་བགྱི་བས་སེམས་ཅན་ཐམས་ཅད་ཀྱིས་དོན་དུ། རྫོགས་པ་ཆེན་པོ་ཤིན་ཏུ་རྣལ་འབྱོར་གྱི་རྒྱུད་དོན་རང་བྱུང་གི་ཡེ་ཤེས་དེ་ཁོ་ན་ཉིད་ཀྱི་དོན་གྱིས་མཉམ་བཞག་ལ་གང་བ་དང་། རྗེས་ཐོབ་ལ་ཤིན་ཏུ་གང་བ་དང་། དེ་བཞིན་དུ་རྫོགས་པ་ཆེན་པོའི་དོན་གྱིས་མཉམ་བཞག་ལ་རྒྱས་པ་དང་། རྗེས་ཐོབ་ལ་ཤིན་ཏུ་རྒྱས་པ་དང་། དེ་བཞིན་དུ་རྫོགས་པ་ཆེན་པོའི་དོན་གྱིས་བདག་གི་རྒྱུད། མཉམ་བཞག་ལ་སྨིན་པ་དང་རྗེས་ཐོབ་ལ་ཤིན་ཏུ་སྨིན་པ་དང་། རྫོགས་པ་ཆེན་པོའི་དོན་གྱིས་བདག་ཉོན་མོངས་པའི་འཆིང་བ་མཐའ་དག །མཉམ་བཞག་ལ་གྲོལ་བ་དང་། རྗེས་ཐོབ་ལ་ཤིན་ཏུ་གྲོལ་བ་རྒྱ་ཆེན་པོ་སངས་རྒྱས་པར་མཛད་དུ་གསོལ། ཞེས་པའམ། ཡང་ན་གོང་གི་དེ་དག་རྫོགས་ཆེན་གྱི་ས་ལམ་རིམ་གྱི་པའི་བགྲོང་ཚུལ་ལྟར་དགའ་རབ་རྡོ་རྗེའི་ཉམས་རིམ་བཞི་པ་དང་བསྟུན་ན། དང་པོ་གནས་པའི་ཏིང་ངེ་འཛིན་གྱིས་གང་བ་དང་། ཤིན་ཏུ་གང་བ་གཉིས་ཀྱི་མི་གཡོ་བ་ལ་སོགས་དེས་འདྲེས་ཤིང་དེ་དག་གི་དོན་ཞལ་ལས་ཤེས་སོ། །ༀ་བཛྲ་སཏྭ། ཅེས་སོགས་ཡིག་བརྒྱ་བརྗོད་པས་དཔང་པོའི་ལྷ་རྣམས་རང་ལ་བསྟིམ་མོ། །བདག་གིས་དགེ་བའི་ལས་ནི་མཎྜལ་ཕུལ་བ་འདི་བགྱིས་པས། འཇིག་རྟེན་འདིར་དུས་རིང་པོར་མི་ཐོག་སངས་རྒྱས་ནས། སྤྲུལ་པ་དེ་ཀུན་གྱི་འགྲོ་བ་རྣམས་ལ་ཕན་ཕྱིར་དམ་པའི་ཆོས་ཀྱི་འཁོར་ལོ་བསྐོར་ནས། སེམས་ཅན་སྡུག་བསྔལ་མང་སྟེ་འཁོར་བ་སྤྱི་དང་བྱེ་བྲག་གི་སྡུག་བསྔལ་གྱིས་གདུང་བ་ལས་གྲོལ་བར་གྱུར་ཅིག །ཅེས་སྨོན་ལམ་བཏབ་པའོ། །ལོངས་སྐུའི་མཎྜལ་ནི་གསང་སྙིང་གི་ལེའུ་དགུ་པ་ནས་བཤད་ཅིང་། སྤྲུལ་སྐུའི་མཎྜ་ལ་ནི་སྒྱུ་འཕྲུལ་བཞི་བཅུ་པ་ལས་བཤད་དོ། །མཎྜ་ལ་རིམ་གསུམ་རྫོགས་སོ།། །།སྤྱི་དོན་གཉིས་པ་སྔོན་འགྲོ་དངོས་ལ། མཚམས་བཅད་པ་དང་། བཤགས་པ་བྱ་བ་དང་། དམ་བཅའ་བ་དང་། བྱིན་དབབ་པ་དང་། མཆོད་པ་བྱིན་གྱིས་བརླབས་པ་རྣམས་རིམ་པར་སྣང་ཡང་། འདིར་ཕྱག་ལེན་ལ་མཚམས་བཅད་བྱ་བ་དང་། མཆོད་པ་བྱིན་བརླབ། བཤགས་པ་བྱ་བ་དང་གསུམ་ལས། དང་པོ་མཚམས་བཅད་པ་ལ། སྔོན་དུ་སྐྱབས་འགྲོ་བྱ་བ་དང་། མཚམས་བཅད་དངོས་དང་གཉིས་ལས། དང་པོ་ནི། སྐྱབས་ཡུལ་དཀོན་མཆོག་དྲུག་པོ་མདུན་གྱི་ནམ་མཁར་གསལ་བཏབ་ལ། སྐྱབས་སུ་འགྲོ་བ་ལ། འཇིག་སྐྱོབས། ལེགས་སྨོན། ངེས་འབྱུང་གསུམ་ལས། འདིར་བདག་གཞན་ནམ་མཁའ་དང་མཉམ་པའི་སེམས་ཅན་ཐམས་ཅད་འཁོར་བ་ལ་ངེས་པར་འབྱུང་ནས་ཐར་པ་བླ་ན་མེད་པའི་སངས་རྒྱས་ཐོབ་པའི་དོན་དུ་སྐྱབས་འགྲོ་བྱེད་བསམ་པ་དང་བཅས་ཤིང་། བླ་མ་ལ་འདྲེན་པ། སངས་རྒྱས་ལ་སྟོན་པ། ཆོས་ལ་ལམ། དགེ་འདུན་ལ་ལམ་བགྲོད་པའི་གྲོགས། ཡི་དམ་གྱི་རྒྱུད་སྨིན་མཁའ་འགྲོ་ཆོས་སྐྱོང་གིས་དངོས་གྲུབ་སྩོལ་ཞིང་བར་ཆད་བསལ་བའི་ཚུལ་དུ་སྐྱབས་འགྲོ་བྱའོ། །དེ་ལྟར་སྐྱབས་འགྲོ་སེམས་བསྐྱེད་ཚད་མེད་པ་བཞི་དང་བཅས་པ་ཚར་ནས། དཀར་གཏོར་ཡོད་ན་སྐབས་འདིར་བསྔོའོ། །དེ་ཡང་ལམ་རིམ་ལས། འཕགས་རྒྱལ་མཆོད་ཅིང་ཕྱི་རོལ་པ། །བཅུ་བཞི་མཉེས་དང་གཉིས་པོ་ཡང་། །སྦྱིན་པས་ཚིམ་བྱས་བསྒོ་བར་བྱ། །ཅེས་དང་། འདི་ཉིད་ལས། ཉན་པ་ལ་ནི་མི་དབང་བ། །ཀུན་ཀྱང་རེ་བ་བསྐང་ལགས་ཀྱིས། །ཅེས་གསུངས་པས། སྟོད་ཟུར་བ་ཚང་གིས་ལུགས་ལ། སྲིད་ཞུའི་མགྲོན་དང་། ཆ་གསུམ་དཔལ་སྡོམ་མ་ཞེས་བྱ་བ་གཅིག་གིས་བསྔོ་བར་བཤད། འདིར་དམ་པ་ཡབ་སྲས་ཀྱི་ལུགས་ལ་དབང་དང་བསྒྲུབ་པའི་དུས་སུ། སྲུངས་མ་བཅོ་ལྔ་ལ་རྒྱས་པར་བསྔོ་ལ། འདིར་རེ་ཞིག་སྔགས་དྲུག་ཕྱག་དྲུག་གིས་བསྔོ་བ་ནི། བསྐང་བ་ཚོགས་མཆོད་ཀྱིས་དུས་ཀྱིས་དབང་བཙན་ནོ། །མཚམས་གཅོད་དངོས་ལ། ལྟ་བ་དོན་གྱིས་མཚམས་དང་། མཚན་མ་རྟགས་ཀྱི་མཚམས་གཉིས་ལས། དང་པོ་ནི། ཐབས་ཞགས་ལས། ཡེ་ཤེས་འཁོར་ལོ་སྐད་ཅིག་མས། །རྣམ་རྟོག་ལོག་འདྲེན་བགེགས་རྣམས་བསྐྲད། །ཅེས་པ་ལྟར་གོ་བར་བྱའོ། །གཉིས་པ་མཚན་མ་རྟགས་ཀྱི་མཚམས་ལ། གཟི་ལྟར་འབར་བའི་རྒྱུད་ལྟར། ཁྲོ་བཅུའི་རོལ་མཚམས་དང་། ཧཱུྃ་མཛད་ཀྱི་རྒྱུད་ལྟར། བསྲུང་བ་འཁོར་ལོའི་མཚམས་དང་། སློབ་དཔོན་པདྨ་དང་རྒྱལ་བ་ཡང་དགོན་པ་གཉིས་ཀྱིས་གསུངས་པ་དང་། རྒྱས་པ་དང་ཐབས་ཞགས་ལྟར། ཞི་བ་མཚོན་ཆའི་མཚམས་རྣམས་ཡོད་པ་ལས། གོང་མ་གཉིས་ནི་ལོགས་སུ་ཤེས་ལ། གསུམ་པ་ནི། འདི་ལྟར་དུ་གསུང་སྟེ། སྤྱིར་རྩོད་ལྡན་སྙིགས་མའི་དུས་འདིར། མི་རྣམས་དགེ་བའི་ལས་མི་སྤྱོད་ཅིང་འདོད་པ་ཉུང་བས། དཀར་ཕྱོགས་ཆོས་སྐྱོང་བའི་སྲུངས་མ་རྣམས་མཐུ་ཆུང་ཞིང་ནུས་པ་ཉམས་པ་ཡིན་པས། མི་དགེ་བའི་ལས་ལ་བརྩོན་ཞིང་ལོག་ལྟ་ཤས་ཆེ་བས། ནག་པོའི་ཕྱོགས་ཀྱི་བདུད་རིགས་རྣམས་ཁ་རྒྱལ་ཞིང་ནུས་པ་ཆེ་བས། ཆོས་སྙིང་ནས་བསྒྲུབ་པའི་རྣལ་འབྱོར་པ་རྣམས་ལ་བར་ཆད་ཤིན་ཏུ་རྒོད་པ་ཡིན། ཁྱད་པར་དུ་རྒྱལ་པོ་བེ་ཀར་གྱིས་སྐྱེ་བོ་ཕལ་པ་རྣམས་དང་། ཆོས་ལ་ཞུགས་པ་རྣམས་ཀྱི་ཤེས་རྒྱུད་བྱིན་གྱིས་བརླབས་ནས། ཤེས་པ་རིང་དུ་མི་གནས་ཤིང་། ལོག་པའི་ལམ་ལ་སྦྱོར་བར་བཤད་ཡོད་པས། བསྒྲུབ་པ་པོ་རྣམས་ལ་བསྲུང་བའི་འཁོར་ལོ་བསྒོམ་པ་འདི་ཁོ་ན་གལ་ཆེ་བར་གསུངས། དེ་ལ་འཁོར་གྱི་རིམ་པ་དྲུག་ཡོད་པ་ལས། ཐོག་མར་བྱང་ཆུབ་སེམས་ཀྱི་བསྲུང་བ་ནི། བདག་ལ་སྡང་བར་བྱེད་པའི་དགྲ། གནོད་པར་བྱེད་པའི་བགེགས། ཐར་བ་དང་ཐམས་ཅད་མཁྱེན་པ་བསྒྲུབ་པ་ལ་བར་དུ་གཅོད་པར་བྱེད་པའི། གནོད་བྱེད་གདུག་པ་ཅན་རྣམས་ཀྱི་གཙོར་བྱས་པའི་མ་ནམ་མཁའ་དང་མཉམ་པའི་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །མྱུར་དུ་བྱང་ཆུབ་རིན་པོ་ཆེ་ཐོབ་པར་བྱ་བའི་ཆེད་དུ། རང་ལམ་རྡོ་རྗེ་འཆང་གི་གོ་འཕང་ཐོབ་པར་བྱ། དེའི་ཆེད་དུ་སྤྱིར་སངས་མ་རྒྱས་ཀྱི་བར་དུ་ལུས་ངག་ཡིད་གསུམ་དགེ་བ་ལ་བཀོལ། དགོས་ནམ་མ་ཤིའི་བར་དུ་ལུས་ངག་ཡིད་གསུམ་དགེ་བ་ལ་བཀོལ། ཡང་དགོས་དུས་ད་ལྟ་ནས་བཟུང་སྟེ་སང་ཉི་མ་དེ་ཙམ་བར་དུ་ལུས་ངག་ཡིད་གསུམ་དགེ་བར་བཀོལ་སྙམ་དུ་དར་གཅིག་བསྒོམ། དེ་བསྲུང་བ་ཐམས་ཅད་ཀྱི་མཆོག་ཏུ་གྱུར་པ་ཡིན། གནོད་བྱེད་ཁོ་རང་གི་དོན་དུ་བྱང་ཆུབ་བསྒྲུབ་པ་ལ། ཁོ་རང་གི་བར་ཆད་བྱེད་མི་སྲིད་པ་སྟེ། སྐྱེལ་མ་དགྲ་ལ་བཅོལ་བས། འཇིགས་མེད་ལམ་དུ་སྐྱེལ་བ་དང་འདྲའོ། །དེ་ལྟར་མི་དང་མི་མ་ཡིན་པའི་འཇིགས་པ་བརྒྱད་དང་བཅུ་དྲུག་ལ་སོགས་པ་མ་ལུས་བསྲུང་བར་བྱེད་པ་བྱང་ཆུབ་སེམས་ཀྱི་བསྲུང་བ་འདི་ཡིན་ནོ། །དེ་ནས་ཡུལ་རིས་རྒྱལ་ཁམས་བསྲུང་བ་ནི། གཏུམ་པོ་གསུམ་བརྩེགས་གི་བསྲུང་བ་འདི་བསྒོམ་སྟེ། གར་སྡོད་པའི་ས་ཕྱོགས་དེ་དག་ཐམས་ཅད། རྗེ་བཙུན་ཐུགས་རྗེ་ཆེན་པོ་ཡི་གེ་དྲུག་པའི་སྐུ་ཤིན་ཏུ་ཆེ་བ་གཅིག་བསྒོམ་མཐོང་བ་ཙམ་གྱིས་འགྲོ་བ་ཐམས་ཅད་ཀྱི་བསམ་ངན་སྦྱོར་རྩུབ་ཐམས་ཅད་ཞི་ཞིང་རྒྱུད་བྱམས་པའི་ཏིང་ངེ་འཛིན་དང་ལྡན་པར་བྱེད་པའི་ཕྲིན་ལས་ཅན་དེ་ལྟ་བུ་གཅིག་བསྒོམ། དེའི་ཐུགས་ཀར་རྗེ་བཙུན་ཁྲོ་བོའི་རྒྱལ་པོ་འཕགས་པ་མི་གཡོ་བ་དུས་གསུམ་གྱི་སངས་རྒྱས་ཐམས་ཅད་ཀྱི་ཕྲིན་ལས་ཀྱི་ངོ་བོར་གྱུར་པ། མཐོང་ཐོས་དྲན་པ་ཙམ་གྱིས་ཕྱི་ནང་གི་བགེགས་ཐམས་ཅད་ཞི་ཞིང་བར་ཆད་ཐམས་ཅད་བསྲུང་བར་བྱེད་པའི་ཕྲིན་ལས་ཅན་གཅིག་བསྒོམ། དེའི་ཐུགས་ཀར་རང་ཡི་དམ་གྱི་ལྷ་གང་ཡིན་པ་དེ་གསལ་བར་བསྒོམ། དེ་ནས་ཡུལ་ཕྱོགས་དང་ཉེ་འཁོར་བསྲུང་བ་ལ་སོགས་པའི་གོ་ཆ་ལྔའི་བསྲུང་བ་འདི་བསྒོམ་སྟེ། རང་ཉིད་སྐད་ཅིག་གིས་ཡི་དམ་ལྷར་གསལ་བའི་ཐུགས་ཀའི་ས་བོན་ལས་འོད་ཟེར་འཕྲོས་པས་རང་དང་འདྲ་བའི་ཡེ་ཤེས་སེམས་དཔའ་སྤྱན་དྲངས་ཏེ། སྤྱི་བོར་འོད་དུ་ཞུ་བ་ལས་ཐིམ་པ་ནས་སྲོག་དག་པའི་རྩའི་ནང་རྡོ་རྗེ་ལུ་གུ་རྒྱུད་དུ་གྱུར་ནས། སྤྱི་བོ་ཚངས་པའི་བུ་ག་ནས་སྣ་ཚོགས་རྡོ་རྗེ་རྒྱ་གྲམ་གྱིས་རྒྱས་གདབ་པར་བསྒོམ་སྟེ། གོ་ཆ་དང་པོའོ། །ཡང་ཐུགས་ཀའི་ས་བོན་ལས། ཡི་དམ་གང་ཡིན་པ་དེའི་ཕྱག་མཚན་གང་ཡིན་པ་ལས་འོད་ཟེར་འཕྲོས་པས། བར་དུ་གཅོད་པ་ཐམས་ཅད་རིང་དུ་བསྐྲད། ཚུར་འདུས་པ་ལས་སྟེང་འོག་ཕྱོགས་མཚམས་ཐམས་ཅད་ཡི་དམ་གྱི་ཕྱག་མཚན་རྩེ་མོ་ཕྱིར་བསྟན་ནས། ཡུ་བ་ནང་དུ་བསྟན་པའི་གུར་དུ་གྱུར་པར་བསམ་སྟེ་གོ་ཆ་གཉིས་པའོ། །ཡང་ཐུགས་ཀའི་ས་བོན་ལས་རྡོ་རྗེའི་འོད་ཟེར་གོང་བཞིན་འཕྲོས་ཚུར་འདུས་པ་ལས། སྟེང་འོག་ཕྱོགས་མཚམས་ཐམས་ཅད་རྡོ་རྗེའི་གུར་དུ་གྱུར་པར་བསམ་སྟེ་གོ་ཆ་གསུམ་པའོ། །ཡང་ཐུགས་ཀའི་ས་བོན་ལས་མདའི་འོད་ཟེར་འཕྲོས་ཏེ། ཚུར་འདུས་པ་ལས། སྟེང་འོག་ཕྱོགས་མཚམས་ཐམས་ཅད་མདའ་མདིལ་ཕྱིར་བསྟན་པའི་གུར་དུ་གྱུར་པར་བསམ་སྟེ། གོ་ཆ་བཞི་པའོ། །ཡང་ཐུགས་ཀའི་ས་བོན་ལས་མེའི་འོད་ཟེར་འཕྲོས་ཏེ། བར་དུ་གཅོད་པ་ཐམས་ཅད་རིང་དུ་བསྐྲད་ཚུར་འདུས་པ་ལས། སྟེང་འོག་ཕྱོགས་མཚམས་མེ་རི་འབར་བའི་གུར་དུ་གྱུར་པར་བསམ་སྟེ། དེ་ལྟར་གོ་ཆ་ལྔའི་བསྲུང་བ་དེ་ལ། ཕྱི་བདུད་ནག་པོའི་ཕྱོགས་རྣམས་ནི། གང་ལ་ཉེ་བར་མི་ནུས་པ། ནང་བདུད་དཀར་པོའི་ཕྱོགས་རྣམས་ཀྱི་ཉམས་ཚད་ཅིང་ཚུགས་ན་བར་ཆད་བརྩམ་པ་རྣམས། གོ་ཆ་གསུམ་གྱི་མི་ཐུབ་ཅིང་། དེ་ཡང་མེ་ལྷ་མེས་མི་ཐུབ། དབང་ལྡན་གྱིས་མདའ་མི་ཐུབ། བརྒྱ་བྱིན་གྱི་རྡོ་རྗེའི་མི་ཐུབ་ལ། ཡི་དམ་གྱི་ཕྱག་མཚན་ལ་ཐམས་ཅད་འདའ་བར་མི་ནུས་ཞིང་སྲོག་རྩ་རྡོ་རྗེའི་ལུ་གུ་རྒྱུད་དུ་གྱུར་པས། བར་དུ་གཅོད་པའི་སྐབས་མེད་པར་གྱུར། དེ་ནས་བསྲུང་བའི་མན་ངག་ཡི་གེ་གསུམ་གྱི་བསྲུང་བ་འདི་བསྒོམ་པར་བྱའོ། །རང་གིས་ལུས་སངས་རྒྱས་ཐམས་ཅད་ཀྱི་སྐུའི་བདག་ཉིད་ༀ་དཀར་པོ་གཅིག་ཏུ་གྱུར་པར་བསམ། དེ་ཇེ་ཆེར་གྱུར་པའི་ནང་དུ། རང་གིས་ངག་སངས་རྒྱས་ཐམས་ཅད་ཀྱིས་གསུང་གིས་བདག་ཉིད་ཨཱཿདམར་པོ་གཅིག་ཏུ་གྱུར་པར་བསམ། དེ་ཇེ་ཆེར་གྱུར་པའི་ནང་དུ། རང་གིས་སེམས་སངས་རྒྱས་ཐམས་ཅད་ཀྱིས་ཐུགས་ཀྱི་བདག་ཉིད་ཡི་གེ་ཧཱུྃ་མཐིང་ཁ་གཅིག་ཏུ་གྱུར་པར་བསམ་ལ། དེ་ནས་ལུས་ངག་ཡིད་གསུམ་སྐུ་གསུང་ཐུགས་ཀྱིས་ཡི་གེ་གསུམ་གྱི་རང་བཞིན་གྱུར་པ་དེ་ལ། བར་དུ་གཅོད་པ་གང་གིས་གནོད་མི་ནུས་སྟེ། བསྲུང་འཁོར་བཀའ་རྒྱ་མ་ཤིན་ཏུ་ཟབ་བོ། །དེ་ནས་རང་བྱུང་ལྷུན་གྲུབ་ཀྱི་བསྲུང་འཁོར་ལུས་བསྲུང་འཁོར་དུ་དྲན་པས་གསལ་གདབ་སྟེ། རྐང་མཐིལ་རྡོ་རྗེའི་ས་གཞི། རྩེ་མོ་རྡོ་རྗེའི་རྭ་བ། པགས་པ་རྡོ་རྗེའི་གུར། སྐྲ་དང་བ་སྤུ་མདའི་རྭ་བ། སོ་དང་སེན་མོ་མེ་རི་དང་མེ་དཔུང་རབ་དུ་འབར་སྟེ། དེ་རྣམས་དེ་ལྟར་ཡིན་ནོ་སྙམ་དུ་ཤེས་ཤིང་དྲན་པར་བྱའོ། །བློས་བསྒོམ་པར་བྱའོ། །ངག་ཏུ་བརྗོད་པ་མ་ཡིན་ནོ། །འདི་དྲན་པ་ཙམ་གྱིས་བར་ཆད་ཐམས་ཅད་རང་འགག་ལ་འགྲོ་བས་བསྲུང་བའི་མཆོག་ཏུ་གྱུར་པའོ། །དེ་ནས་དོན་དམ་བྱང་ཆུབ་ཀྱིས་སེམས། རྣམ་པར་མི་རྟོག་པའི་བསྲུང་བ་བསྒོམ་སྟེ། བར་དུ་གཅོད་པའི་ཡུལ་གཅོད་མཁན་གྱི་བགེགས། བར་ཆད་རང་གི་ངོ་བོ་གསུམ་རང་སེམས་ཕྱག་རྒྱ་ཆེན་པོར་ཤེས་ཤིང་། དེ་ཉིད་ཀྱི་ངང་ལ་རྣམ་རྟོག་སྤྲོ་བསྡུ་མེད་པར་གསལ་སྟོང་ནམ་མཁའི་དཀྱིལ་ལྟར་ཡིད་བྱེད་བློ་དང་བྲལ་བར་བཞག་གོ། །འདི་ནི་ལྟ་བའི་མཚམས་དང་འདྲའོ། །དེ་ནི་བསྲུང་བ་རྣམས་ཀྱིས་ནང་ནས་མཆོག་སྟེ། དུས་གསུམ་སངས་རྒྱས་དགྲར་ལང་ཡང་གཡོ་བའམ་བསྐྱོད་པར་མི་ནུས་པ་ཡིན་ནོ། །རྡོ་རྗེ་ཐེག་པའི་རྒྱུད་བསྒྲུབ་ཐབས་རྣམས་སུ་བསྲུང་བའི་འཁོར་ལོ་མང་དུ་གསུང་ཀྱང་། དྲུག་པོ་འདི་ལས་ཟབ་པ་མེད་པ་ཡིན་པས། བསྒྲུབ་པ་ལ་འཇུག་པའི་ནུབ་མོ་དང་། སྐབས་རྣམས་སུ་ཐམས་ཅད་རྒྱས་ཤིང་ཚང་པར་བསྒོམ་ལ། དུས་ཐམས་ཅད་དུ་ཡང་སྲོད་ཀྱི་ཐུན་མགོར་བྱང་ཆུབ་སེམས་ཀྱི་བསྲུང་བ་དང་། མཚན་མའི་བསྲུང་བ་གསུམ་པོ་གང་རུང་གཅིག་དང་། ལུས་བསྲུང་འཁོར་དུ་དྲན་པས་གསལ་གདབ་པ་དང་། རྣམ་པར་མི་རྟོག་པའི་བསྲུང་བ་རྣམས་དུས་རྒྱུན་དུ་བསྒོམ་པར་བྱའོ། །ཤིང་དང་བརྒྱག་སྒྲུབ་པ་ལ་སོགས་ལམ་གྱིས་འགྲོ་འདུག་བྱེད་པའི་དུས་སུ་ཡང་། རྗེ་བཙུན་ཐུགས་རྗེ་ཆེན་པོ་ཤིན་ཏུ་ཆེ་ཞིང་ཆེ་བ་གཅིག་གི་ནང་ནས་འགྲོ་ཞིང་། བྱ་བ་ཐམས་ཅད་ཅི་བདེར་བྱེད་པར་བསྒོམ་པས་བར་ཆད་གང་གིས་ཀྱང་མི་ཚུགས་པ་ཡིན་ནོ། །ཅེས་གསུངས་སོ། །བཞི་པ་ཐབས་ཞག་ལྟར་ལ་ལྔ་སྟེ། སྐྱབས་འགྲོ་བྱེད་ཅིང་མཚམས་ལྷ་བསྒོམ་པ་དང་། བྱིན་བསྡུ་བ། ཚར་གཅོད་པ། རྗེས་སུ་བཟུང་བ། བསྲུང་འཁོར་ཕུག་པ་དང་ལྔའོ། །དང་པོ་སྐྱབས་འགྲོ་སེམས་བསྐྱེད་ནི་སྔོན་སོང་ནས། མཚམས་ལྷ་བསྒོམ་པ་ནི། སེམས་ཅན་ཐམས་ཅད་ཀྱི་བར་ཆད་བསལ་ནས། སངས་རྒྱས་ཐོབ་པའི་ཆེད་དུ། བདག་གི་སྲུང་འཁོར་ཕུབ་ཅིང་མཚམས་བཅད་པར་བྱའོ་སྙམ་དུ་བསམ་ལ། སྐད་ཅིག་སྟོང་པའི་ངང་ལས་སམ། དཔའ་བོ་གོ་རྗེ་བའི་ཚུལ་དུ་རང་ཉིད་རྡོ་རྗེ་སེམས་དཔའ་ཐུགས་ཆོས་ཉིད་མི་འགྱུར་བའི་རྟགས་སུ་སྐུ་མདོག་སྔོ་ནག །ཡེ་ཤེས་ལྔ་དང་ལྡན་པའི་རྟགས་སུ་གཡས་གསེར་གྱི་རྡོ་རྗེ་རྩེ་ལྔ་པ་ཐུགས་ཀར་བསྣམས་པ། སྟོང་ཉིད་ཐུགས་སུ་ཆུད་པའི་རྟགས་སུ་གཡོན་དངུལ་དཀར་གྱིས་དྲིལ་བུ་དཀུར་བརྟེན་པ། བགེགས་རྣམས་ཚར་གཅོད་པའི་ཕྱིར་ཞི་མ་ཁྲོའི་རྣམ་པ། ཞལ་འཛུམ་ཡང་མཆེ་བ་ཡུད་ཙམ་མངོན་པ། སྤྱན་གསུམ་ཞི་བ་ཡིན་ཀྱང་ཡིད་ཙམ་སྡང་མིག་ཏུ་གཟིགས་པ། མཛད་པ་ཡོངས་སུ་རྫོགས་པའི་རྟགས་སུ་ཞབས་སྐྱིལ་ཀྲུང་དུ་བཞུགས་པ། ཉོན་མོངས་པའི་གདུང་བ་སེལ་བའི་རྟགས་སུ་ཟླ་བ་ལ་རྒྱབ་ཡོལ་བྱས་པ། ཡེ་ཤེས་ལྔ་དང་ལྡན་པའི་རྟགས་སུ་སྐུ་ལ་འོད་ཕུང་ཁ་དོག་ལྔ་ལྡན་གི་ནང་ན་བཞུགས་ཀྱང་ཀྱི་རྩེ་མོ་ལ་མེ་རི་འཕྲོ་བ་ཐམས་ཅད་མཉམ་པ་ཉིད་དང་ལྡན་པའི་རྟགས་སུ། སྙན་གོང་གཡས་གཡོན་ན་ཨུཏྤལ་འདབ་མ་སྟོང་ལྡན་རེ་རེས་བརྒྱན་ཅིང་། རྒྱན་ཆས་བཅུ་གསུམ་དང་ལྡན་པ། ཉི་མའི་གདན་ལ་ཡུམ་དབྱིངས་ཕྱུག་མ་དང་སྙོམས་པར་འཇུག་པ་ཡུམ་གྱིས་གཡས་ཡབ་ལ་འཁྱུད་ཅིང་གཡོན་དངུལ་དཀར་གྱི་དྲིལ་བུ་ཡབ་ཀྱི་སྙན་རྩར་དཀྲོལ་བ་སྐུ་མདོག་ཡབ་དང་འདྲ་ཞིང་། ཡུམ་པདྨའི་སྐྱིལ་ཀྲུང་། ཡབ་དེའི་ཐུགས་ཀར་ཟླ་བའི་གདན་ལ་རང་འདྲ་བའི་ཡེ་ཤེས་སེམས་དཔའ་ཕྱག་མཚན་འཛིན་འཛིན་འདྲ་བ་ལ་མི་འཛིན་པ། དེའི་ཐུགས་ཀར་ཉི་མའི་སྟེང་དུ་རྡོ་རྗེ་དཀར་ཟེར་ཡང་སྔོན་པོ་རྩེ་ལྔ་ཡི་ལྟེ་བར་ཧཱུྃ་སྔོན་པོ་ལ་ཧཱུྃ་བཛྲ་དྷྲྀཀ྄་གིས་གཡས་སུ་འཁོར་བ་ཡུམ་གྱི་ཐུགས་ཀར་དྲིལ་བུ་ཡི་བུམ་པའི་ནང་དུ་མཱུྃ་མཐིང་ནག་ལས། མཱུྃ་དྷཱ་ཏཱི་ཤྭ་རཱི། གཡོན་དུ་འཁོར་བ། ཡབ་ཡུམ་གཉིས་ཀའི་སྤྱི་བོའི་འཁོར་ལོ་ལ་ༀ་དཀར་པོ། མགྲིན་པར་པདྨ་ལ་ཨཱཿདམར་པོ། ཐུགས་ཀར་ཉི་མ་ལ་ཧཱུྃ་སྔོན་པོ། དབང་དང་རབ་གནས་ཀྱི་དུས་སུ་ལྷ་དགུ་ཉིད་བཅུ་བསྒོམ་དགོས་གསུངས། གཉིས་པ་བྱིན་བསྡུ་བ་ནི། སྐུ་གསུང་ཐུགས་ལ་སྔགས་འདི་བརྗོད་ཅེས་གསུངས་པས། ཐུགས་ཀ་ནས་འོད་ཟེར་འཕྲོས་ཕྱོགས་བཅུའི་སངས་རྒྱས་ཀྱི་ཞིང་ཁམས་རྣམས་སུ་ཕོག །ཕྱོགས་བཅུའི་སངས་རྒྱས་དེ་ཐམས་ཅད་ཆོས་སྐུ་ལ་གཟུགས་ཀྱི་སྐུར་རྡོ་རྗེ་སེམས་དཔའ་ཡབ་ཡུམ་ཀྱི་རྣམ་པར་བཞེངས་ནས་མདུན་གྱི་ནམ་མཁའ་བཞུགས་པར་བསམ། ༀ་འབྲུ་མཐུན། ཛྭ་ལ་འབར་བ། བཛྲ་རྡོ་རྗེ། ཧཱུྃ་བསྡུད་ཅིག །ཅེས་བརྗོད་དུས་མདུན་གྱིས་ལྷ་ཚོགས་རྣམས་ཀྱི་སྤྱི་བོ་ནས་ༀ་དཀར་པོ་བྱུང་། བདག་གི་སྤྱི་བོར་ཐིམ་པས། སྐུའི་གཟི་བརྗིད་འབར་བ་རྡོ་རྗེ་ལྟ་བུའི་མི་འགྱུར་བའི་ངང་དུ་སྡུད་པར་བསམ། མན་ཏྲ་ཡིད་སྐྱོབ། སུམྦྷ་ནི་མཛེས་པ། ཧཱུྃ་སྡུད་ཅིག །ཅེས་བརྗོད་དུས་མདུན་གྱི་ལྷ་ཚོགས་རྣམས་ཀྱི་མགྲིན་པ་ནས་འོད་ཟེར་དམར་པོ་བདག་གི་མགྲིན་པར་ཐིམ་པས། ཡིད་སྐྱོབ་ཅིང་ཐམས་ཅད་ཀྱིས་ཡིད་ལ་མཛེས་ཤིང་ཚིམ་པར་བྱེད་པའི་གསུང་དབྱངས་ཡན་ལག་དྲུག་ཅུ་ལ་མངའ་བརྙེས་པའི་ནུས་པ་དང་ལྡན་པའི་ངང་དུ་སྡུད་པར་བསམ། བཛྲ་རྡོ་རྗེ། ཛྭ་ལ་འབར་བ། ཧཱུྃ་སྡུད་ཅིག །ཅེས་བརྗོད་དུས། མདུན་གྱིས་ལྷ་ཚོགས་རྣམས་ཀྱི་ཐུགས་ཀ་ནས་འོད་ཟེར་མཐིང་ནག་བྱུང་ནས་བདག་གི་ཐུགས་ཀར་ཐིམ་པས། ཐུགས་རྡོ་རྗེ་ལྟ་བུ་སྐྱེ་འཇིག་དང་བྲལ་བ་ཡེ་ཤེས་ལྔའི་ངང་དུ་སྡུད་པར་བསམ། གསུམ་པ་མཚམས་བཅད་པ་ནི། མཚོན་ཆའི་སྦྱོར་བ་ཡིན། ཧཱུྃ་བྷྲཱུྃ། ཅེས་བརྗོད་དུས་སུ། བདག་གི་ཐུགས་ཀ་ནས་ཀྱང་རྡོ་རྗེའི་ཆར་བྱུང་། མདུན་གྱི་ལྷ་ཚོགས་རྣམས་ཀྱི་ཐུགས་ཀ་ནས་རྡོ་རྗེའི་ཆར་བྱུང་ནས། དེ་གཉིས་འཐབ་པའི་བར་བགེགས་རྣམས་སེམས་བརྒྱལ་ཞིང་ལུས་དུམ་བུར་བཅད་པར་བསམ། དེ་བཞིན་དུ་ༀ་བྷྲཱུྃ་སྤྱི་བོ་ནས་འཁོར་ལོའི་ཆར། ཏྲཱྃ་བྷྲཱུྃ་ལྟེ་བ་ནས་རལ་གྲིའི་ཆར། ཧྲཱིཿབྷྲཱུྃ་མགྲིན་པ་ནས་ཐོ་བའི་ཆར། ཧ་བྷྲཱུྃ་གསང་གནས་ནས་རྒྱ་གྲམ་གྱི་ཆར། སྐུའི་བ་སྤུའི་བུ་ག་ཚུན་ཆད་ཐམས་ཅད་ནས་བྲག་རིའི་ཆར་བྱུང་ནས། བགེགས་ཐམས་ཅད་ཀྱི་སེམས་བརྒྱལ་ཞིང་། ལུས་དུམ་བུར་བཅད་པར་བསམ་ལ། བཟླས་པ་ཅི་ནུས་བྱ། དེ་ནས་མཚོན་ཆའི་ཆར་དེ་དག་ནམ་མཁར་འཁྲིགས་པར་བསམ་ལ། བཞི་པ་རྗེས་སུ་བཟུང་བ་ནི། ཐུགས་རྗེས་རྣམ་ཤེས་སླར་བསླང་བའི་སྔགས་འདི་བརྗོད་དོ། །ༀ་བཛྲ་སཏྭ། རྡོ་རྗེ་སེམས་དཔའ། རཱ་ཙཱ་རྒྱལ་པོ། ཛ་བསླང་པ་སྟེ། སྔོན་བྱུང་དུ་རྡོ་རྗེ་སེམས་དཔས་མཚོན་ཆ་ལྔའི་ཏིང་ངེ་འཛིན་ལ་སྙོམས་པར་ཞུགས་ནས། ཛྭ་ལ་བཛྲ་ལན་གཅིག་བརྗོད་པས། ཕྱག་ན་རྡོ་རྗེ་ཡང་བརྒྱལ་ནས་སླར་བསླང་བ་ཡིན་ལ། རྗེས་འཇུག་གི་བགེགས་རྣམས་ཀྱི་སེམས་བརྒྱལ་བ་དེ་སླར་བསླང་བར་བསམ་ལ། ཕྱག་ན་རྡོ་རྗེས་རང་གི་བཀའ་འཁོར་ལ་བཀའ་བསྒོས་པས་ཚིག་འདི་བགེགས་རིགས་རྣམས་ལ་བསྒྲགས་ཏེ། རྣལ་འབྱོར་ཆེན་པོ་གསང་སྔགས་བླ་ན་མེད་པའི་དཀྱིལ་འཁོར་བསྒོམ་པའི་སྐབས་འདིར། ཀུན་ཀྱང་གསང་བ་བླ་ན་མེད་པའི་དམ་ཅན་བཀའ་བསྲུང་སོ་སོ་ནས། འདུ་བ་ལ་ནི་མ་ཡིན་པས་མ་གཏོགས་ཤིང་། གསང་སྔགས་ཉན་པ་ལ་ནི་མི་དབང་བའི་ལོག་འདྲེན་བགེགས་ཚོགས་ཀུན་ཀྱང་རང་རང་གི་རེ་བསྐང་ལགས་ཀྱིས་ད་ལྟ་ཉིད་དུ་སོ་སོར་དེངས་ཤིག །ཧཱུྃ་ཅི་སྟེ་མི་འགྲོ་ནས་བདག་གི། བཀའ་ལས་འདས་པར་གྱུར་ན། རྡོ་རྗེ་འཛིན་རྒྱལ་རྡོ་རྗེ་སེམས་དཔའ་ཁྲོས་ནས་ནི། རྡོ་རྗེ་ལ་སོགས་མཚོན་ཆ་ཆེན་པོ་འབར་བ་དྲུག་པོ་ཡི། བགེགས་ཁྱོད་རྣམས་ཐལ་བ་བཞིན་དུ་བརླག་པར་བྱེད་པས་དེ་བས་རང་རང་གནས་སུ་དེངས་ཤིག །རང་གི་མིག་གཡས་པ་མ་ལས་ཉི་མ། གཡོན་པ་ཨ་ལས་ཟླ་བ། དབུ་མ་ཡེ་ཤེས་ཀྱི་མེ་དཔུང་དུ་བསམ་ལ། ཧཱུྃ་ཧཱུྃ་ཧཱུྃ་མིག་གཡས་པས་གཡས་སྐོར་དུ་བལྟས་པས། ཉི་མ་ལས་མེ་བྱུང་བས་གར་མཐོང་བའི་བགེགས་དང་ལོག་འདྲེན་གྱི་ཚོགས་ཐམས་ཅད་བསྲེག །ཧཱུཾ་ཧཱུཾ་ཧཱུཾ་གཡོན་པས་གཡོན་སྐོར་དུ་བལྟས་པས་ཟླ་བ་ལ་ཆུ་བྱུང་བས་ཐལ་བ་ཡང་མ་ལུས་པར་བཀྲུས་པ། ཧཱུཾ་ཧཱུཾ་ཧཱུཾ་དབུས་མས་ཐད་དཀར་བལྟས་པས། དེ་བྱང་ཆུབ་ཀྱི་སེམས་གཉིས་སུ་མེད་པའི་ཡེ་ཤེས་ཀྱི་རང་བཞིན་དུ་གནས་པའམ། བྱམས་སྙིང་རྗེའི་སྒོ་ནས་བགེགས་རྣམས་རྡོ་རྗེ་སེམས་དཔའ་ཆུང་ངུ་རེ་རེ་རེད་ནས་འཇིག་རྟེན་གཞན་གྱི་སངས་རྒྱས་ཀྱི་ཞིང་ཁམས་སུ་སྐྱེ་བར་བསམ། ལྔ་པ་སྲུང་འཁོར་ཕུབ་པ་ནི། བསྲུང་བྱ་བསྒོམ་པ་ཞལ་ལས་ཤེས་པ། བསྲུང་འཁོར་ཕུབ་པ་ནི། ཧཱུྃ་ང་ཡི་དཀྱིལ་འཁོར་བསྒོམ་པ་འདི་ཉིད་བརྟེན་པར་བྱ་བའི་ཕྱིར། ཁྲོ་རྒྱལ་བྱིན་རླབས་ལས་བྱུང་བའི། མཚོན་ཆ་རྣམས་པ་སྣ་ཚོགས་ཀྱིས། དཀྱིལ་འཁོར་འདི་ཉིད་ཀྱི་རྒྱབ་རྡོ་རྗེ་རྭ་བའི་ནང་དུ་མཚོན་ཆ་དྲུག་གིས་རིམ་པ་ལྟར་ཚུལ་བཞིན་དུ་བསྲུང་བ་ནི། དང་པོ་རྡོ་རྗེ་ནམ་མཁའ་ལ་གནས་པ་རྣམས་མར་ལ་རིམ་པ་ལྟར་ཕབ་ལ། རྡོ་རྗེའི་གུར་བསྒོམ་པ་ནི། ཧཱུྃ་སྟེང་ཡང་རྡོ་རྗེའི་བླ་རེ་ལ། འཕུར་ཐབས་ལྟར་གནས་པ་ལ། རྡོ་རྗེ་ཕྲ་བ་དང་ཡང་ཕྲས་གཏམས་ཞིང་། ཕྱིར་བསྟན་པའི་རྩེ་ལ། རྡོ་རྗེའི་ཐོག་ཐོག་སེར་ཆེན་འབེབས། འོག་ཀྱང་རྡོ་རྗེའི་ས་གཞི་ལ་འཕུར་ཐབས་ལ་རྡོ་རྗེ་ཕྲ་བ་དང་ཡང་ཕྲས་གཏམ་ཞིང་། ཕྱིར་བསྟན་པའི་རྩེ་ལ། རྡོ་རྗེའི་ཚྭ་ཚྭ་སྐར་ལྟར་རབ་ཏུ་འཁྲུག་པ། ཕྱོགས་མཚམས་ཀུན་ཀྱང་རྡོ་རྗེ་འབར་བས་ཛ་རྩིག་གིས་ཚུལ་གྱིས་གཏམས་པ་ལ་རྡོ་རྗེ་ཕྲ་བ་དང་ཡང་ཕྲས་གཏམས་ནས། རླུང་ཡང་འགྱུ་བའི་སྐབས་མེད་ན། བགེགས་ཀྱི་ཚོགས་ལྟ་ག་ལ་སྲིད་སྟེ་མི་སྲིད་དོ། །ༀ་འབྲུ་མཐུན། བཛྲ་རྡོ་རྗེ་ཛྭ་ལ་འབར་བ་ལ་སྐ་ཉི་མ་ཀྲོ་ཏ་ཁྲོ་བོ། ཧཱུྃ་སྡུད། ཕཊ་སྒྲོལ་ཅིག་པ་སྟེ། ཁྲོ་བོའམ་རྡོ་རྗེ་མཐིང་ནག་ཉི་མ་ལྟར་འོད་འབར་བའི་གུར་དུ་གྱུར་ཏེ། ཕྱིར་ལྟར་ན་རྡོ་རྗེ། ནང་ལྟར་ན་རྡོ་རྗེ་སེམས་དཔའ། གསང་བ་ལྟར་ན་བཛྲ་ཧེ་རུ་ཀཿ དེ་ཁོ་ན་ཉིད་ལྟར་ན་ཆོས་དབྱིངས་ཡེ་ཤེས། ཡང་ན། སྟེང་ཡང་རྡོ་རྗེའི་བླ་རེ་ལ་རྡོ་རྗེའི་ཐོག་ཐོག་སེར་ཆེན་འབེབས། འོག་ཀྱང་རྡོ་རྗེའི་ས་གཞིར་གྱུར། དེ་ལ་རྡོ་རྗེའི་ཚྭ་ཚྭ་སྐར་ལྟར་འཁྲུག་ནས་ཕྱོགས་མཚམས་ཀུན་ཀྱང་རྡོ་རྗེ་འབར་བས་གཏམས་པར་གྱུར། དེ་ལྟར་བཞེད་པ་ཡང་སྣང་། འདི་མན་ཆད་ཕྱག་མཚན་གཞན་ལ་ངེས་འདྲེས། དེའི་དོན་ལ་སྦྱར་ན་སྟེང་ཡང་རྡོ་རྗེའི་བླ་བྲེ་ནི། ཀུན་ཁྱབ་ཆེན་པོའི་ཡེ་ཤེས། འོག་རྡོ་རྗེའི་ས་གཞི་ནི། དབང་འབྱམས་ཆེན་པོའི་ཡེ་ཤེས། རྡོ་རྗེའི་ཐོག་ཐོག་སེར་ཆེན་འབེབས་ནི། མཐའ་གཉིས་འཇོམས་པའི་ཡེ་ཤེས། རྡོ་རྗེའི་ཚྭ་ཚྭ་སྐར་ལྟར་འཁྲུག་པ་ནི། ཀུན་དུ་འཕྲོ་བའི་ཡེ་ཤེས་སོ། །ཕྱོགས་མཚམས་ཀུན་ཀྱང་རྡོ་རྗེ་འབར་བས་གཏམས་པ་ནི། འགྱུར་བ་མེད་པའི་ཡེ་ཤེས། རྣམ་རྟོག་གི་རླུང་ཡང་འགྱུ་བ་མེད་ན། རྣམ་རྟོག་རང་བགེགས་ཡིན་པའི་ཚོགས་ལྟ་ག་ལ་སྲིད་སྟེ་མི་སྲིད་དོ། །ཅེས་གསུངས་པས། ཕྱག་མཚན་གཞན་ལ་ཡང་རང་རང་གིས་ཡེ་ཤེས་གཙོ་བོ་ཡིན་ཅིང་དེས་འདྲེས་སོ། །དེ་ནས་འཁོར་ལོ་མར་ལ་བབ་པ་གུར་ཁང་བསྒོམ་པ་ནི། ཧཱུྃ་སྟེང་ཡང་འཁོར་ལོའི་ཅེས་སོགས་བརྗོད་ལ། ༀ་ཙཀྲ་འཁོར་ལོ་ཛྭ་ལ་ལ་སྐ་ཀྲོ་ཏ་ཧཱུྃ་ཕཊ྄། ཅེས་བརྗོད་པས། རྡོ་རྗེའི་གུར་ཁང་གི་རྒྱབ་ཏུ་འཁོར་ལོ་དཀར་པོ་འོད་འབར་བ་རྩི བས་བརྒྱད་པ་བརྩིགས་པའི་གུར་དུ་གྱུར་ཏེ། ཕྱི་ན་འཁོར་ལོ། ནང་ལྟར་ན་རྣམ་པར་སྣང་མཛད། གསང་བ་ལྟར་ན་བྷུདྡྷ་ཧེ་རུ་ཀཿ དེ་ཁོ་ན་ཉིད་ལྟར་ན་མེ་ལོང་ཡེ་ཤེས། དེ་ནས་རལ་གྲི་མར་ལ་བབ་པ་གུར་བསྒོམ་པ་ནི། ཧཱུྃ་སྟེང་ཡང་རལ་གྲི་ཅེས་སོགས་བརྗོད་ལ། ༀ་པྲཛྙཱ་ཤེས་རབ་སྟེ་རལ་གྲི་ཛྭ་ལ་ལ་སྐ་ཀྲོ་ཏ་ཧཱུྃ་ཕཊ྄། ཅེས་བརྗོད་པས། འཁོར་ལོའི་རྒྱབ་ཏུ་རལ་གྲི་སེར་པོ་འོད་འཕྲོ་བ་བརྩིགས་པའི་གུར་དུ་གྱུར་ཏེ། ཕྱི་ལྟར་ན་རལ་གྲི། ནང་ལྟར་ན་རིན་ཆེན་འབྱུང་ལྡན། གསང་བ་ལྟར་ན་རཏྣ་ཧེ་རུ་ཀཿ དེ་ཁོ་ན་ཉིད་ལྟར་ན་མཉམ་ཉིད་ཡེ་ཤེས། དེ་ནས་ཐོབ་མར་བབ་པ་གུར་བསྒོམ་པ་ནི། ཧཱུྃ་སྟེང་ཡང་ཐོབ་པའི་ཅེས་སོགས་བརྗོད་པས། ༀ་མུ་སྟི་ཐོ་བ་ཛྭ་ལ་ལ་སྐ་ཀྲོ་ཏ་ཧཱུྃ་ཕཊ྄། ཅེས་སོགས་བརྗོད་པས། རལ་གྲིའི་རྒྱབ་ཏུ་ཐོ་ཡུ་སེར་པོ་ཐོ་མགོ་དམར་པོའི་གུར་དུ་གྱུར་ཏེ། ཕྱི་ལྟར་ན་ཐོ་བ། ནང་ལྟར་ན་སྣང་བ་མཐའ་ཡས། གསང་བ་ལྟར་ན་པདྨ་ཧེ་རུ་ཀཿ དེ་ཁོ་ན་ཉིད་ལྟར་ན་སོ་སོར་རྟོགས་པའི་ཡེ་ཤེས། དེ་ནས་རྒྱ་གྲམ་མར་བབ་པ་གུར་ཁང་བསྒོམ་པ་ནི། ཧཱུྃ་སྟེང་ཡང་རྒྱ་གྲམ་ཅེས་སོགས་བརྗོད་ལ། ༀ་ཀརྨ་ཕྲིན་ལས་རྒྱ་གྲམ་ཛྭ་ལ་ལ་སྐ་ཀྲོ་ཏ་ཧཱུྃ་ཕཊ྄། ཅེས་བརྗོད་པས། ཐོ་བའི་རྒྱབ་ཏུ་རྒྱ་གྲམ་ལྗང་ཀུའི་གུར་དུ་གྱུར་ཏེ། ཕྱི་ལྟར་ན་རྒྱ་གྲམ། ནང་ལྟར་ན་དོན་ཡོད་གྲུབ་པ། གསང་བ་ལྟར་ན་ཀརྨ་ཧེ་རུ་ཀཿ དེ་ཁོ་ན་ཉིད་ལྟར་ན་བྱ་གྲུབ་ཡེ་ཤེས། དེ་ནས་བྲག་རི་མར་བབ་པ་གུར་ཁང་བསྒོམ་པ་ནི། ཧཱུྃ་སྟེང་ཡང་བྲག་རིའི་ཅེས་སོགས་བརྗོད་ལ། ༀ་བཛྲ་རྡོ་རྗེ་པ་ཏ་ལ་བྲག་རི་པཉྩ་ལྔ་རིམ་ཧཱུྃ་ཕཊ྄། ཅེས་བརྗོད་པས། གུར་ལྔ་རིམ་གྱིས་རྒྱབ་ཏུ་རྡོ་རྗེའི་བྲག་རི་མཐིང་ནག་གིས་གུར་དུ་གྱུར་ཏེ། ཕྱི་ལྟར་ན་བྲག་རི། ནང་ལྟར་ན་ཀུན་ཏུ་བཟང་པོ་གསང་བ་ལྟར་ན་ཆེ་མཆོག་ཧེ་རུ་ཀཿ དེ་ཁོ་ན་ཉིད་ལྟར་ན་རང་བྱུང་ཡེ་ཤེས་སོ། །དེ་ནས་ཛྭ་ལ་བཛྭ་ཚར་གཅིག་བརྗོད་པས། གུར་དྲུག་ཀ་ལྟེ་བ་ནང་དུ་ཚུད་པའི་རྒྱ་གྲམ་ཆེན་པོ། རྭ་ཤར་དཀར། ལྷོ་སེར། ནུབ་དམར། བྱང་ལྗང་། ལྟེ་བ་མཐིང་ནག་གཅིག་བསྒོམ། ཡང་ཚར་གཅིག་བརྗོད་པས། མེ་རི་རྡོ་རྗེ་རྩེ་ལྔའི་རྣམ་པ་གཡས་འཁོར་དུ་འབར་བས། རྒྱ་གྲམ་རྭ་བར་གྱིས་བགེགས་དེ་རྣམས་བསྲེགས་པར་བསམ། ཡང་ཚར་གཅིག་བརྗོད་པས། རླུང་ནག་འཚུབ་མ་གཡས་གཡོན་དུ་འཁོར་བས་རོ་བསྲེགས་པའི་ཐལ་བ་ཡང་གཏོར་བ་བསམ། ཞི་བའི་གཏོར་བསྔོའི་སྐབས་སུ་འཆད་དེས་ཆོག་ལ། ཁྲོ་བོ་ལྟར་ན། བདག་ཉིད་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་བདག །ཁྲོ་རྒྱལ་ཡེ་ནས་ཡིན་པའི་ཕྱིར། །དེ་བཞིན་ཉིད་ཀྱིས་དབྱིངས་ལས་ནི། །ཁྲོ་མོ་དབང་ཕྱུག་མངོན་བྱུང་སྟེ། །ཧཱུཾ་ཧཱུཾ་ཧཱུཾ་བི་ཤྭ་བཛྲ་ཀྲོ་ཏ་ཛྭ་ལ་མཎྜལ་ཕཊ྄་ཕཊ྄་ཕཊ྄། ཧ་ལ་ཧ་ལ་ཧ་ལ་ཧཱུྃ་ཅེས་བརྗོད་པས། རྡོ་རྗེ་སེམས་དཔའ་འདི་ཉིད་ངོ་བོ་མི་འགྱུར་ཡང་རྣམ་པ་འགྱུར་བས་དཔའ་བོ་གོ་རྗེ་བའི་ཚུལ་དུ། བཅོམ་ལྡན་འདས་དཔལ་ཆེན་པོ་དབུ་དགུ་བརྒྱ་ཕྲག་སྟོང་བརྒྱད་བརྒྱ། ཞབས་བརྒྱད་བརྒྱ། ཕྱག་ན་སྟོང་ཁམས་ཀྱི་མཚོན་ཆ་སྣ་ཚོགས་འཛིན་པ། ཐུགས་ཀ་ནས་ཁྲོ་མོ་དབང་ཕྱུག་མ་ཕྱུང་ནས་སྦྱོར་བ་མཛད་པའི་སྦྱོར་མཚམས་ནས་བྱང་ཆུབ་སེམས་སྤྲིན་ལས། ཁྲོ་བོ་སྐུ་ཚད་སྟོང་གསུམ་ཙམ་ལས་གྲངས་སྟོང་ཁམས་ཀྱི་རྡུལ་ཕྲ་མོ་སྙེད་སྤྲོས་པས། བགེགས་རྣམས་མི་གནས་པར་བྱས་ནས། ཚུར་འདུས་པས་གུར་དྲུག་གི་ནང་ཁྲོ་བོ་འཆོལ་བའི་གུར་དུ་གྱུར་པར་བསམ། ཕུར་པ་ལྟར་ན་རང་གཞུང་བཞིན་ནོ། །ཡང་ན་མཚམས་བཅད་ཀྱི་སྐབས་སུ་དམ་པས་འདི་ལྟར་དུ་གསུངས། དཔལ་རྡོ་རྗེ་སེམས་དཔའ་ལ་ཕྱག་འཚལ། བསྲུང་བ་ལ་གསུམ་སྟེ། ལྟ་བ་ཆོས་ཉིད་ཀྱི་བསྲུང་བ་དང་། ཏིང་ངེ་འཛིན་དང་། རྟེན་འབྲེལ་འཁོར་ལོའོ། །དང་པོ་ལྟ་བ་གདེངས་དང་ལྡན་པའོ། །གཉིས་པ་ལྷག་པ་ཏིང་ངེ་འཛིན་མཚོན་ཆའི་གུར་དང་ལྡན་པའོ། །གསུམ་པ་ནི་བསྲུང་བའི་འཁོར་ལོ་དཔེའུ་ཆུང་ལྟར་བྲིས་ལ། མཎྜལ་ཕྱི་དོར་བྱས་པའི་སྟེང་དུ། མེ་ཏོག་ཚོམ་བུ་ལྔའམ་དགུ་བཀྲམ་པ་ནི་རིགས་ལྔ་ཡབ་ཡུམ་དུ་མོས། དེའི་སྟེང་དུ་ཙཀྲ་མེ་རི་ཡར་བསྟན་དེ་སྟེང་ན་རྡོ་རྗེས་མནན། མཆོད་གཏོར་གཞུང་བཞིན་བཤམས། རང་ཉིད་ཞི་བའམ་ཁྲོ་བོའི་དཀྱིལ་འཁོར་གཞུང་ལྟར་བྱས་ཀྱང་རུང་། ཡི་དམ་རང་གཞུང་གི་བསྟོད་པའི་བར་བྱས་ལ། འཁོར་ལོ་བྱིན་གྱིས་བརླབས་པ་ནི། རང་གི་ཐུགས་ཀ་ནས་མདུན་དུ་བྷྲཱུྃ་སྤྲོས་པས་འོད་དུ་ཞུ། མཚོན་ཆ་ལྔའི་གུར་གཞུང་ལྟར་བསྐྱེད་འཁོར་ལོ་དང་གུར་དེའི་ནང་དུ་འཁོར་ལོ་རྩིབས་བཞིའི་སྟེང་དུ་རིགས་ལྔ་ཡབ་ཡུམ་བཅུའམ། ཡབ་རྐྱང་གང་རུང་སྟེ། སྒྱུ་འཕྲུལ་ལམ་ཐབས་ཞགས་ལྟར་སྐུ་མདོག་ཕྱག་མཚན་རྒྱན་ཆ་ལུགས་གསལ་བར་བསྒོམ་ཐུགས་ཀར་རང་རང་གི་ཕྱག་མཚན་ལ་རང་རང་གི་ས་བོན་གནས་པ་ལས་འོད་འཕྲོས་ཏེ། བསྒྲུབ་བྱ་ལ་ཕོག་པས། ཚེའི་ངོ་བོ་ཨ་དཀར་པོར་བྱས་ཏེ། སོ་སོའི་ས་བོན་ལ་བསྟིམ། ཡེ་ཤེས་པ་བཞུགས། མཆོད་པ་ལྔ་འབུལ། བསྟོད་པ་བྱ། བསྙེན་པ་བརྒྱ་རྩ་ཡན་ཆད་ཅི་རིགས་པ་བྱ། འདོད་གསོལ་གདབ་དེ་ནས་འཁོར་ལོ་བླང་བའི་དུས་སུ། འཁོར་ལོ་ལ་འཁོར་ལོ་ཆད་དེ་བསྒྲུབ་བྱའི་གྲངས་སུ་འཕེལ་བར་བསམ། བསྲུང་བའི་ཚིགས་བཅད་གང་རུང་བརྗོད། དེ་ནས་ལེགས་པར་དྲིལ་ལ། མགུལ་ལམ་ལུས་ལ་བཏག་གོ། །བསྲུང་བའི་ཚིག་བཅད་ནི། ཧཱུྃ་ཅིས་ཀྱང་མི་ཚུགས་མི་ཤིག་པའི། །སྟོང་པའི་གོ་ཆ་བླ་ན་མེད། །མཚན་མའི་ཡུལ་རྣམས་བཅོམ་ནས་ནི། །ཆོས་ཉིད་འབའ་བའི་གོ་བཀོན་ནོ། །ཧཱུྃ་ཅིས་ཀྱང་མི་ཚུགས་མི་ཤིག་པའི། །འཁོར་ལོའི་གོ་ཆ་བླ་ན་མེད། །གཏི་མུག་ཡུལ་རྣམས་བཅོམ་ནས་ནི། །འཁོར་ལོ་འབར་བའི་གོ་བཀོན་ནོ། །ཧཱུྃ་ཅིས་ཀྱང་མི་ཚུགས་མི་ཤིག་པའི། །རིན་ཆེན་གོ་ཆ་བླ་ན་མེད། །ང་རྒྱལ་ཡུལ་རྣམས་བཅོམ་ནས་ནི། །རིན་ཆེན་འབར་བའི་གོ་བཀོན་ནོ། །ཧཱུྃ་ཅིས་ཀྱང་མི་ཚུགས་མི་ཤིག་པའི། །པདྨའི་གོ་ཆ་བླ་ན་མེད། །འདོད་ཆགས་ཡུལ་རྣམས་བཅོམ་ནས་ནི། །པདྨ་འབར་བའི་གོ་བཀོན་ནོ། །ཧཱུྃ་ཅིས་ཀྱང་མི་ཚུགས་མི་ཤིག་པའི། །རྒྱ་གྲམ་གོ་ཆ་བླ་ན་མེད། །ཕྲག་དོག་ཡུལ་རྣམས་བཅོམ་ནས་ནི། །རྒྱ་གྲམ་འབར་བའི་གོ་བཀོན་ནོ། །ཅེས་གསུངས་སོ། །དེ་འདི་ཡན་ཆད་ཀྱི་མཚམས་བཅད་པ་དེ་རྫོགས་སོ།། ༈ །།གཉིས་པ་མཆོད་པ་བྱིན་གྱིས་བརླབས་པ་ལ། བསང་ཆུ། མཆོད་པ་བྱིན་རླབས་དངོས་དང་གཉིས་ཡོད་པ་ལས། རང་གི་ཐུགས་ཀ་ནས་རྃ་ཡྃ་ཁྃ་གསུམ་སྤྲོས་པས་མཆོད་པ་རྣམས་ཀྱི་དངོས་པོ་མ་དག་པ་ཐམས་ཅད་རྃ་ལས་ཡེ་ཤེས་ཀྱི་མེ་འབར་སྟེ་བསྲེག །ཡྃ་ལས་ཡེ་ཤེས་ཀྱི་རླུང་བྱུང་བས་བསྲེགས་པའི་ཐལ་བ་གཏོར། ཁྃ་ལས་ཡེ་ཤེས་ཀྱི་ཆུ་བྱུང་བས་གཏོར་བའི་ལྷག་མ་ཡང་མ་ལུས་པར་བཀྲུ་བར་བསམ་ལ། དེ་ལྟར་བསྲེགས་གཏོར་བཀྲུ་གསུམ་ཚར་ནས་རྃ་ཡྃ་ཁྃ་ཐུགས་ཀར་བསྡུ། མཆོད་པའི་དངོས་པོ་རང་བསྲེགས་པ་ནི་མ་ཡིན་ནོ། །དེ་ནས་དང་པོ་བསང་ཆུ་བྱིན་གྱིས་བརླབས་པ་ནི། བཤམ་པའི་བསང་ཆུ་དེ་ཉིད་མི་དམིགས་པའི་ངང་ལས་ཐུགས་ཀ་ནས་བྷྲཱུྃ་སྤྲོས་པ་འོད་ཏུ་ཞུ་བ་ལས་སྣོད་བྷན་དྷར་བསམ། དེའི་ནང་དུ་ཨཱཿའོད་དུ་ཞུ་བ་ལས་ཟླ་བ་དེའི་སྟེང་དུ་ཡིག་འབྲུ་མུཾ་མཐིང་ནག་བསམ་པ་འོད་དུ་ཞུ་བ་ལས་ཡུམ་ཀྲོ་ཏི་ཤྭ་རི་སྟེ་ཁྲོ་མོ་དབང་ཕྱུག་མ་སྐུ་མདོག་མཐིང་ནག་ཞལ་གཅིག་ཕྱག་གཉིས་པ་ཞབས་གཉིས་བརྐྱང་བསྐུམ། གཡས་ཁྲོ་བོའི་རྡོ་རྗེ་རྩེ་ལྔ་པ་འཛིན་པའི་ཁུ་ཚུར་བཟློག་པའི་རྩེ་མོ་ཚང་ཕུག་ཏུ་གཏད་པ། གཡོན་ཁྲོ་བོའི་དྲིལ་བུ་དཀུར་བརྟེན་པའི་ཚུར་དུ་བསྣམས་པ། གླང་ཆེན་གྱིས་སྟོད་གཡོགས། ཞིང་གི་རྐེད་ཆིངས། སྟག་གི་ཤམ་ཐབས་སྟེ་མནབས་པའི་རྒྱན་གསུམ། ཐོད་རློན་ལྔ་བཅུ་རྩ་གཅིག་གི་ཕྲེང་བ་སེ་རལ་ཁར་ཐོགས་པ། སྐམ་པོ་ལྔའི་དབུ་རྒྱན་པ། ར་རིའི་དཔུང་རྒྱན་སྟེ་ཐོད་པ་ཚར་གསུམ་གཅིག །ཡན་ལ་གི་ཚིག་མདོ་རྣམས་སུ་ཀེང་རུས་ལས་བཟོས་པའི་ཕྲེང་བ་ཞིང་རྒྱུས་ཀྱི་ལུང་བྱས་པ་སྟེ། འདོགས་པའི་རྒྱན་གཉིས། ཞག་གི་ཟོ་རིས། རཀྟའི་ཐིག་ལེ། ཐལ་ཆེན་ཚོམ་བུ་སྟེ་བྱུག་པའི་རྒྱན་གསུམ། དེ་ལྟར་དཔལ་གྱི་ཆས་བརྒྱད་ཀྱིས་བརྒྱན་པ་དེའི་ཐུགས་ཀར་ཟླ་བའི་སྟེང་དུ་བྷནྡྷ་དེའི་ནང་དུ་མུཾ་གྱིས་མཚན་པར་བསྒོམ། དེའི་མཐའ་སྐོར་དུ་ༀ་བཛྲ་དྷ་དུ་ཀྲོ་ཏི་ཤྭ་རི་དེ་ཝི་ཤོ་དྷ་ནི་སྟ་ན་ཛྙཱ་ན་ཧཱུྃ་ཧཱུྃ་ཧཱུྃ་ཅེས་པས་འཁོར་བར་བསམ་ལ། ངག་ཏུ་ཉེར་གཅིག་བརྗོད་དོ། །སྔགས་ཀྱི་དོན་ནི། ༀ་ཡེ་ཤེས་ལྔ་ལྡན་སྔགས་ཀྱིས་མགོ་འདྲེན། བཛྲ་རྡོ་རྗེ། དྷ་དུ་དབྱིངས། ཀྲོ་ཏི་ཁྲོ་མོ། ཤྭ་རི་དབང་ཕྱུག །དེ་ཝི་རྣམ་པར། ཤོ་དྷ་ནི་སྦྱོངས། སྟ་ན་སྒྲོལ། ཛྙཱ་ན་ཡེ་ཤེས། ཧཱུྃ་ཧཱུྃ་ཧཱུྃ་གྱི་སྐུ་གསུང་ཐུགས་ཀྱི་ངང་དུ་སྡུད་ཅིག་པ་སྟེ། རྡོ་རྗེ་དབྱིངས་ཀྱིས་ཁྲོ་མོ་དབང་ཕྱུག་མས། འབྱུང་བཞི་བཟང་ངན་དུ་འཛིན་པ་འདི། ཡེ་ནས་རྣམ་པར་དག་པར་སྤྱོད་པ་ཡེ་ཤེས་ལྔའི་ངང་དུ་སྒྲོལ་ཅིག །རྒྱལ་བའི་སྐུ་གསུང་ཐུགས་སུ་སྡུད་ཅིག་པ་སྟེ། སྔགས་བཟླ་དུས་དམིགས་པ་ནི། དབྱིངས་ཕྱུག་མའི་ཐུགས་ཀ་ནས་འོད་ཟེར་འཕྲོས་འབྱུང་བ་བཞི་ལ་ཕོག །འབྱུང་བ་བཞི་ལྷ་མོ་བཞིར་གྱུར་ཏེ། ས་སངས་རྒྱས་སྤྱན་མ། ཆུ་མཱ་མ་ཀཱི། མེ་གོས་དཀར་མོ། རླུང་དམ་ཚིག་སྒྲོལ་མར་གྱུར་ནས། དབྱིངས་ཕྱུག་མའི་ཐུགས་ཀར་ཐིམ་པར་བསྒོམ་ལ། དམིགས་པ་རྒྱུན་མི་ཆད་པར་བྱ་ཞིང་། མཐར་དབྱིངས་ཕྱུག་མ་འོད་དུ་ཞུ་ནས་ཆོས་ཀྱི་དབྱིངས་ཀྱི་རང་བཞིན་དུ་གྱུར་ཅིང་འཛིན་པ་དང་བྲལ་བའི་ཆུར་དམིགས་ལ། རྡོ་རྗེས་ཆུ་དང་པོ་གནས་ཁང་ལ་གཏོར་བས་གནས་ཁང་དེ་ཉིད་ཞི་ཁྲོ་གང་སྒོམ་གྱི་གཞལ་ཡས་ཁང་དུ་གྱུར་ཏེ་བྱིན་གྱིས་རླབས། ཆུ་གཉིས་པ་བདག་དང་མཆེད་གྲོགས་ལ་གཏོར་བས་བདག་ཞི་ཁྲོ་གང་ཡིན་གྱི་གཙོ་བོར་གསལ། གཞན་འཁོར་དུ་བྱིན་གྱིས་བརླབས། ལན་གསུམ་པ་མཆོད་རྫས་རྣམས་ལ་གཏོར་བས་མཆོད་རྫས་ཀྱི་དངོས་པོ་སྟོང་པར་སྦྱང་ངོ་། ༈ །མཆོད་པ་བྱིན་རླབས་དངོས་ནི། ར་རག་རྩ་བ་ལས། པཱུ་ཙ་ལྔ་དང་གསུམ་བཤམ་བརླབ། །ཅེས་པས། རྩ་བ་ནང་གི་པཱུ་ཙ་བརླབ་པ་དང་། ཡན་ལག་སྤྱིའི་པཱུ་ཙ་བརླབ་ཐབས་གཉིས་སྣང་བ་ལས། འདིར་དང་པོ་ལ་ཡན་ལག་གམ་སྤྱིའི་མཆོད་པ་རྣམ་ལྔ་བྱིན་གྱིས་རླབས་པ་ནི། བི་མ་ལའི་བྱིན་རླབས་ཕྲེང་བ་ལྟར་ན། མཆོད་རྫས་མི་དམིགས་པ་ལས། རང་གི་ཐུགས་ཀ་ནས་ཧཱུྃ་དཀར་སེར་དམར་ལྗང་མཐིང་ཀ་རྣམས་སྤྲོས་པས་མཆོད་པ་རྣམས་ལ་ཕོག་པ། ༀ་འབྲུ་མཐུན། བཛྲ་ཨརྒྷཾ་རྡོ་རྗེ་མཆོད་ཡོན་ཨཱཿཧཱུྃ་མ་སྐྱེས་པའི་ངང་ནས་སྭཱ་ཧཱ་ནི་གཞི་ཚུག་པར་གྱུར་ཅིག་པ་སྟེ། ཧཱུྃ་དཀར་མོ་ལས་ལྷ་མོ་མཆོད་ཡོན་མ་དཀར་མོ་ཕྱག་ན་མཆོད་ཡོན་ཐོགས་པ་དཔག་ཏུ་མེད་པར་བྱིན་གྱིས་རླབས། ༀ་བཛྲ་དྷུ་པེ་བདུག་སྤོས་ཨ་ཧཱུཾ་སྭཱ་ཧཱ་ཧཱུྃ་སྔོན་མོ་ལས་བདུག་སྤོས་མ་སྔོན་མོ་ཕྱག་ན་བདུག་སྤོས་ཐོགས་པ། ༀ་བཛྲ་པུཥྤེ་མེ་ཏོག་མ་ཧཱུྃ་སེར་མོ་ལས་མེ་ཏོག་མ་སེར་མོ་ཕྱག་ན་མེ་ཏོག་ཐོགས་པ། ༀ་བཛྲ་ཨ་ལོ་ཀེ་མར་མེ་ཧཱུྃ་དམར་པོ་ལས་མར་མེ་མ་དཀར་མོ་ཕྱག་ན་མར་མེ་བསྣམས་པ། ༀ་བཛྲ་གྷནྡྷེ་དྲི་ཆབ། ཧཱུྃ་ལྗང་ཀུ་ལས་དྲི་ཆབ་མ་ལྗང་གུ་ཕྱག་ན་དྲིའི་དུང་ཆོས་ཐོགས་པ། ༀ་བཛྲ་ནི་ཝདྱ་ཞལ་ཟས། ཧཱུྃ་མཐིང་ཀ་ལས་ཞལ་ཟས་མ་མཐིང་ཀ་ཕྱག་ན་ཞལ་ཟས་ཐོགས་པ། ༀ་བཛྲ་ཤཔྟ་རོལ་མོ། ཧཱུྃ་ཁྲ་མོ་ལས་རོལ་མོ་མ་ཁྲ་མོ་ཕྱག་ན་རོལ་མོ་ཐོགས་པ། དཔག་ཏུ་མེད་པ་བྱིན་གྱིས་རླབས་སོ། །འབུལ་དུས་ཡོན་ཆབ་མས་ཞལ་དང་། ཞབས་བསིལ་ཞབས། བདུག་སྤོས་ཤངས། མེ་ཏོག་སྐུ་ལ་མཐོར། མར་མི་སྤྱན། དྲི་ཆབ་སྐུ་ལུས་ལ་བྱུག །ཞལ་ཟས་ཞལ་དུ། རོལ་མོ་སྙན་ལ་འབུལ། ཡང་ན་མཆོད་སྤྲིན་རྒྱ་མཚོ་ལྟར་བྱིན་རླབས་བྱེད་ལུགས་འདི་ལྟར་སྣང་། མཆོད་ཡོན་གྱིས་སྣོད་ཨཱཿལས་ཟླ་བའི་ནང་དུ། བཅུད་ༀ་དཀར་པོ་གཅིག་ཏུ་གྱུར་ཏེ། དེ་ལས་འོད་ཟེར་འཕྲོས་སེམས་ཅན་ལ་ཕོག་ཆུ་འཛིན་གྱིས་རྟོག་པ་སྦྱངས། སངས་རྒྱས་ལ་ཕོག་པས་མཉེས་པའི་མཆོད་པ་འབུལ། སླར་ཚུར་འདུས། ཆུ་རུ་སྣང་བའི་ཡོན་ཏན་དང་། འོག་མིན་གྱིས་ཆུ་མཱ་མ་ཀཱིའི་བྱིན་རླབས་བསྡུས། གཞི་བོ་ལ་ཐིམ་འོད་དུ་ཞུ་བ་ལས། ༀ་བཛྲ་ཨརྒྷཾ་བརྗོད་པས། ཕྱི་ལྟར་ཆུ་ཡན་ལག་བརྒྱད་ལྡན། ནང་ལྟར་བདུད་རྩིའི་རྒྱ་མཚོར་བསམ། བདུག་སྤོས་མེ་ཏོག་མར་མེ་དྲི་ཆབ་བཞིའི་སྣོད་ཉི་ཟླའི་ག་བུར་བསམ། བཅུད་བདུག་སྤོས་ལ་དུ་སེར་པོ། མེ་ཏོག་ལ་པུ་སྔོན་པོ། མར་མེ་མ་ཨ་དམར་པོ། དྲི་ཆབ་ལ་ག་ལྗང་གུ་བསམ། དང་པོ་དུ་ལ་འོད་ཟེར་འཕྲོས་སེམས་ཅན་ལ་ཕོག །དྲི་འཛིན་གྱིས་རྟོག་པ་སྦྱངས། སངས་རྒྱས་ལ་མཉེས་པའི་མཆོད་པ་འབུལ། སླར་ཚུར་འདུས། སེམས་ཅན་གྱི་དྲིར་སྣང་བའི་ཡོན་ཏན་དང་། ཡེ་ཤེས་ཀྱི་བདུག་སྤོས་ཀྱི་བྱིན་རླབས་བསྡུས། གཞི་བོ་ལ་ཐིམ་འོད་དུ་ཞུ་བ་ལས། ༀ་བཛྲ་དྷུ་པེ་བརྗོད་པས་ལྷ་མོ་དྷུ་པེ་མ་སེར་མོས་སྤོས་བསྣམས་པ། ཕུ་ལ་འོད་འཕྲོས་སེམས་ཅན་ལ་ཕོག །མེ་ཏོག་དུ་འཛིན་པའི་རྟོག་པ་སྦྱངས། སངས་རྒྱས་ལ་མཉེས་པའི་མཆོད་པ་འབུལ། སླར་ཚུར་འདུས། འཇིག་རྟེན་གྱི་ཆུ་དང་ཐང་ལ་སྐྱེས་པའི་མེ་ཏོག་པདྨ་དཀར་པོ་ཨུ་དུམ་འབར་བ། མ་འཛུ་ཤ་ཀ་ལ་སོགས་པའི་ཡོན་ཏན་དང་། ཡེ་ཤེས་ཀྱི་མེ་ཏོག་ཀྱི་བྱིན་རླབས་བསྡུས། གཞི་བོ་ལ་ཐིམ་འོད་དུ་ཞུ་བ་ལས། ༀ་བཛྲ་པུཥྤེ་བརྗོད་པས། པུཥྤེ་མ་སྔོན་མོ་མེ་ཏོག་ཐོགས་པ། ཨ་ལས་འོད་ཟེར་སེམས་ཅན་ལ་ཕོག །འོད་གསལ་དུ་འཛིན་པའི་རྟོག་པ་སྦྱངས། སངས་རྒྱས་ལ་མཉེས་པའི་མཆོད་པ་འབུལ། འཇིག་རྟེན་གྱི་ཉི་མ་དང་ཟླ་བ་ལ་སོགས་པར་སྣང་བའི་ཡོན་ཏན་དང་། ཡེ་ཤེས་ཀྱི་མར་མེའི་བྱིན་རླབས་བསྡུས། གཞི་བོ་ལ་ཐིམ་འོད་དུ་ཞུ་བ་ལས། ༀ་བཛྲ་ཨ་ལོ་ཀེ་བརྗོད་པས། མར་མེ་མ་དམར་མོ་མར་མེའི་རྐོང་བུ་བསྣམས་པ། ག་ལ་འོད་འཕྲོས་སེམས་ཅན་གྱི་དོན་བྱས། འཕགས་པ་མཆོད་སླར་ཚུར་འདུས། འཇིག་རྟེན་གྱི་ཨ་ཀ་རུ་དང་དུ་རུ་ཀ་ལ་སོགས་པར་སྣང་བའི་ཡོན་ཏན་དང་། ཡེ་ཤེས་ཀྱི་དྲི་ཆབ་ཀྱི་ཡོན་ཏན་བསྡུས། གཞི་པོ་ལ་ཐིམ་འོད་དུ་ཞུ་བ་ལས། ༀ་བཛྲ་གྷནྡྷེ་བརྗོད་པས། ལྷ་མོ་གྷནྡྷེ་མ་ལྗང་ཀུ་དྲི་ཆབ་ཐོགས་པར་བསྒོམ། ཞལ་ཟས་ནི་གཏོར་མ་དང་། རོལ་མོ་ནི་དངོས་སུ་འབུལ་བས་བྱིན་རླབས་མི་བྱེད་པ་ཡང་སྣང་ངོ་། །རྩ་བའམ་ནང་ཁྱད་པར་ཅན་གྱིས་དམ་རྫས་བྱིན་གྱིས་རླབས་པ་ལ། སྨན་དང་། རཀྟ་དང་། གཏོར་མ་གསུམ། དེ་ཡང་དང་པོ་སྨན་གྱི་བྱིན་རླབས་ལས། ཀ་པཱ་ལ་བརྟག་པ་དང་། བྱིན་རླབས་དངོས་གཉིས། དང་པོ་ལ་ལྔ་སྟེ། དབྱིབས་དང་། ཁ་དོག་དང་། བུག་པ་དང་། ནད་རྩ་དང་། དུམ་བུ་ལ་བརྟག་པའོ། །དེ་དག་ནི་རྒྱས་པར་གཞན་དུ་ཤེས་སོ། །གཉིས་པ་ལ་ལྔ་སྟེ། སྣོད་བརླབ་པ་དང་། བཅུད་བརླབ་པ། སྨན་ཕུད་སྤྲོ་བ། སྨན་མཚམས་བཅད་པ། སྨན་གྱིས་བསྲུང་མ་བསྒོ་བ་དང་ལྔའོ། །དང་པོ་ནི། རང་གི་ཐུགས་ཀ་ནས་བྷྲཱུྃ་སེར་པོ་གཅིག་སྤྲོས་པས་སྨན་སྣོད་ལ་ཕོག །དེ་ལས་བྷྲཱུྃ་ཕྲ་མོ་གྲངས་མེད་པ་ཕྱོགས་བཅུའི་འཇིག་རྟེན་གྱིས་ཁམས་སུ་སྤྲོས་གནས་ཁང་དང་སྤྲ་གུར་དུང་འཛིན་པའི་རྟོགས་པ་སྦྱངས། འོག་མིན་གྱིས་གནས་ན་ཡར་འཕྲོས་པས་ཡེ་ཤེས་ཀྱི་གཞལ་ཡས་ཁང་ལ་མཉེས་པའི་མཆོད་པ་འབུལ། སླར་འདུས་འོག་མིན་གྱི་གཞལ་ཡས་ཁང་གི་བྱིན་རླབས་དང་། སེམས་ཅན་གྱིས་གནས་ཁང་དང་སྦྲ་གུར་དུ་སྣང་བའི་ཡོན་ཏན་བསྡུས་ཏེ་གཞི་བོའི་བྷྲཱུྃ་ལ་ཐིམ་འོད་དུ་ཞུ་བ་ལས། བྷན་དྷ་ཀ་པ་ལཱ་ཡངས་ཤིང་རྒྱ་ཆེ་བ། ཕྱི་རིན་པོ་ཆེ་སྣ་ལྔ་ལས་གྲུབ་པ། ནང་བྷན་དྷའི་གཞལ་ཡས་ཁང་། མུ་ཏིག་དཀར་པོ་དྲི་མ་མེད་པ་ལྟ་བུ། ཐིག་བཞི་བཏབ་པས་རིལ་ཆ་དགུ་དང་ལྡན་པར་བསམ། གཉིས་པ་ནི། དེའི་དབུས་སུ་ཉི་མའི་དཀྱིལ་འཁོར། ཤར་དུ་ཟླ་བ། ལྷོར་རིན་པོ་ཆེ་ཟུར་བརྒྱད་སྔོན་པོ། ནུབ་ཏུ་པདྨ་འདབ་བརྒྱད་དམར་པོ། བྱང་དུ་ཨེ་གྲུ་གསུམ་ལྗང་ཀུ། དབུས་སུ་ཉི་མའི་སྟེང་དུ་བྱང་སེམས་དཀར་པོའི་སྟེང་ལ་ཧཱུྃ་དང་མཱཾ། ཤར་དུ་དྲི་ཆེན་སེར་པོའི་སྟེང་ལ་ༀ་དང་ལཱྃ། ལྷོར་ཤ་ཆེན་སྔོན་པོའི་སྟེང་ལ་སྭཱ་དང་མཱྃ། ནུབ་ཏུ་པདྨ་རཀྟ་དམར་པོའི་སྟེང་ལ་ཨཱཾ་དང་པཱྃ། བྱང་དུ་དྲི་ཆུ་ལྗང་ཀུ་ལ་ཧཱ་ཧཱཾ་གཉིས་ཏེ་ཡབ་ཀྱི་ཡིག་འབྲུ་ཐམས་ཅད་འགག་མེད་མཚོན་པའི་རྟགས་སུ་ལོག་པོ་ཡིན་ལ། ཡུམ་གྱི་ཡིག་འབྲུ་ཐམས་ཅད་ཤེས་རབ་མི་འགྱུར་བ་མཚོན་པའི་རྟགས་སུ་དྲང་ལོ་ཡིན་ཞིང་ཐབས་ཤེས་གཉིས་མེད་མཚོན་པའི་རྟགས་སུ་ཡབ་ཡུམ་གྱིས་ཡིག་འབྲུ་རྣམས་ཁ་སྦྱོར་ཡིན་ལ། ཁ་དོག་ནི་བདུད་རྩི་ལྔའི་རང་བཞིན་ཡིན་པས་དེ་དང་མཚུངས་སོ། །ཡི་གེ་དེ་རྣམས་ལས་ཡིག་འབྲུ་ཕྲ་མོའི་འོད་ཟེར་གྲངས་མེད་པ་ཕྱོགས་བཅུའི་འཇིག་རྟེན་གྱི་ཁམས་སུ་འཕྲོས་པས་སེམས་ཅན་གྱི་ངག་ཏུ་འཛིན་པའི་རྟོག་པ་སྦྱངས། འོག་མིན་གྱི་གནས་སུ་ཡར་འཕྲོས་པས། དུས་གསུམ་གྱི་བདེ་བར་གཤེགས་པ་རྣམས་ཀྱི་གསུང་ལ་མཉེས་པའི་མཆོད་པ་འབུལ། སླར་ཚུར་བདུས། དུས་གསུམ་གྱི་བདེ་གཤེགས་པའི་རྣམས་ཀྱི་གསུང་གི་བྱིན་རླབས་དང་། སེམས་ཅན་གྱིས་ངག་ཏུ་སྣང་བའི་ཡོན་ཏན་ཐམས་ཅད་བསྡུས་ཏེ། གཞི་པོ་ལ་ཐིམ། དབུས་སུ་ཧཱུྃ་མཱུཾ་འོད་དུ་ཞུ་བའི་འོད་ཕུང་ལས་རྡོ་རྗེ་དྲིལ་བུ་གཉིས་སུ་གྱུར། ཤར་གྱིས་ༀ་ལཱྃ་ལས་འཁོར་ལོ་དང་དྲིལ་བུ། ལྷོར་སྭཱ་མཱཾ་ལས་རིན་པོ་ཆེ་དང་དྲིལ་བུ། ནུབ་ཏུ་ཨཾ་པཱཾ་ལས་པདྨ་དང་དྲིལ་བུ། བྱང་དུ་ཧ་ཏཱཾ་ལས་རྒྱ་གྲམ་དང་དྲིལ་བུ་གཉིས་སུ་གྱུར། དེ་ལས་ཕྱག་མཚན་གྲངས་མེད་པ་ཕྱོགས་བཅུའི་འཇིག་རྟེན་གྱི་ཁམས་སུ་འཕྲོས་པས། སེམས་ཅན་གྱི་ཡིད་དུ་འཛིན་པའི་རྟོག་པ་སྦྱངས། འོག་མིན་གྱི་གནས་སུ་ཡར་འཕྲོས་པས། དུས་གསུམ་གྱི་བདེ་བར་གཤེགས་པ་རྣམས་ཀྱི་ཐུགས་ལ་མཉེས་པའི་མཆོད་པ་འབུལ། སླར་འདུས་དུས་གསུམ་གྱི་བདེ་བར་གཤེགས་པ་རྣམས་ཀྱི་ཐུགས་ཡེ་ཤེས་ལྔའི་བྱིན་རླབས་དང་། སེམས་ཅན་གྱི་ཡིད་དུ་སྣང་བའི་ཡོན་ཏན་ཐམས་ཅད་བསྡུས་ཏེ། གཞི་བོ་ལ་ཐིམ་པས་འོད་དུ་ཞུ་བ་ལས། རིགས་ལྔ་ཡབ་ཡུམ་གྱི་སྐུ་ཚོན་གང་བར་གྱུར། དེ་ལ་སྐུ་ཕྲ་མོ་གྲངས་མེད་པ་ཕྱོགས་བཅུའི་འཇིག་རྟེན་གྱི་ཁམས་རྣམས་སུ་འཕྲོས་པས། སེམས་ཅན་གྱིས་ལུས་སུ་འཛིན་པའི་རྟོག་པ་སྦྱངས། འོག་མིན་གྱི་གནས་སུ་ཡར་འཕྲོས་པས། དུས་གསུམ་གྱི་བདེ་བར་གཤེགས་པ་རྣམས་ཀྱི་སྐུ་ལ་མཉེས་པའི་མཆོད་པ་འབུལ། སླར་ཚུལ་འདུས། དུས་གསུམ་གྱི་བདེ་བར་གཤེགས་པ་རྣམས་ཀྱི་སྐུའི་བྱིན་རླབས་དང་། སེམས་ཅན་གྱི་ལུས་སུ་སྣང་བའི་ཡོན་ཏན་སྟེ། དེ་ལྟར་འཁོར་འདས་ཐམས་ཅད་ཀྱིས་བཅུད་བསྡུས་ནས་སླར་ཐིམ་པས། རིགས་ལྔ་ཡབ་ཡུམ་གྱི་སྐུ་ཡོངས་རྫོགས་བཅུར་གྱུར་པ་སྟེ། དབུས་སུ་རྡོ་རྗེ་སེམས་དཔའ་དང་། ནམ་མཁའ་དབྱིངས་ཕྱུག་མ་ཡབ་ཡུམ་སྐུ་མདོག་དཀར་པོ་ཡབ་ཀྱི་ཕྱག་གཡས་ན་ཡེ་ཤེས་ལྔ་དང་ལྡན་པའི་རྟགས་སུ་གསེར་གྱི་རྡོ་རྗེ་རྩེ་ལྔ་པ། གཡོན་ཆོས་ཉིད་ཐུགས་སུ་ཆུད་པའི་རྟགས་སུ། དངུལ་དཀར་གྱི་དྲིལ་བུ་བསྣོལ་ནས་འཛིན་པ། ཡུམ་གྱི་གཡས་ཡབ་ལ་འཁྱུད་ཅིང་། གཡོན་དྲིལ་བུ་ཡབ་ཀྱི་སྙན་རྩར་འཁྲོལ་བ། ཤར་དུ་རྣམ་པར་སྣང་མཛད་དང་སངས་རྒྱས་སྤྱན་མ་ཡབ་ཡུམ་སྐུ་མདོག་སེར་པོ། ཡབ་ཀྱི་གཡས་ན་ཆོས་ཀྱི་འཁོར་ལོ་བསྐོར་བའི་རྟགས་སུ་འཁོར་ལོ། །གཡོན་དྲིལ་བུ། ལྷོར་རིན་ཆེན་འབྱུང་ལྡན་དང་མཱ་མ་ཀཱི་ཡབ་ཡུམ་སྐུ་མདོག་སྔོན་པོ། ཡབ་ཀྱིས་གཡས་ན་དགོས་འདོད་ལྷུན་གྱི་གྲུབ་པའི་རྟགས་སུ་རིན་པོ་ཆེ། གཡོན་དྲིལ་བུ། ནུབ་ཏུ་སྣང་མཐའ་དང་གོས་དཀར་མོ་ཡབ་ཡུམ་སྐུ་མདོག་དམར་པོ། ཡབ་ཀྱི་གཡས་ན་ཉེས་པའི་སྐྱོན་གྱིས་མ་གོས་པའི་རྟགས་སུ་པདྨ། གཡོན་དྲིལ་བུ། བྱང་དུ་དོན་ཡོད་གྲུབ་པ་དང་དམ་ཚིག་སྒྲོལ་མ་ཡབ་ཡུམ་སྐུ་མདོག་ལྗང་གུ། ཡབ་ཀྱི་གཡས་ན་ཕྲིན་ལས་རྣམ་པ་བཞིས་འགྲོ་བའི་དོན་མཛད་པའི་རྟགས་སུ་རྒྱ་གྲམ། གཡོན་དྲིལ་བུ། ཡུམ་གྱིས་གཡས་ཡབ་ལ་འཁྱུད་ཅིང་། གཡོན་དྲིལ་བུ་ཡབ་ཀྱི་སྙན་རྩར་འཁྲོལ་བ། ཡབ་ཡུམ་རྣམས་ཀྱི་མཛད་པ་ཡོངས་སུ་རྫོགས་པའི་རྟགས་སུ། ཞབས་གཉིས་རྫོགས་པའི་སྐྱིལ་ཀྲུང་། ཉོན་མོངས་པའི་གདུང་བ་སེལ་བའི་རྟགས་སུ། རྒྱབ་བརྟེན་ཟླ་བ་ལ་བྱས་པ། ཡེ་ཤེས་ལྔ་དང་ལྡན་པའི་རྟགས་སུ་འོད་འཇའ་ཚོན་སྣ་ལྔའི་ཁོར་ཡུག་ཏུ་འཁོར་བ། སྙན་གོང་གཡས་གཡོན་ན་ཤེས་བྱ་ཐམས་ཅད་མཁྱེན་པ་དང་ལྡན་པའི་རྟགས་སུ་ཨུཏྤལ་འདབ་མ་སྟོང་དང་ལྡན་པས་བརྒྱན་པ། ཞི་བའི་ཚུལ་དགུ་དང་ལྡན་ཞིང་། དར་གྱི་རྒྱན་བརྒྱད། རིན་པོ་ཆེའི་རྒྱན་ལྔ་སྟེ། རྒྱན་ཆས་བཅུ་གསུམ་གྱིས་མཛེས་པར་བརྒྱན་པ། སྐུ་སྣང་ལ་རང་བཞིན་མེད་པ། ཡལ་རྟོག་པ་མེད་པ། དཔེར་ན་ཆུ་ནང་གི་ཟླ་བ་ལྟ་བུའམ། མེ་ལོང་ནང་གི་གཟུགས་བརྙན་ལྟ་བུ་བསྒོམ་མོ། །རང་གི་ལག་པ་གཡོན་པའི་མཐེ་བོང་ལ་མ་དམར་པོ། སྲིན་ལག་ལ་ཨ་དཀར་པོ། དེ་གཉིས་ཀྱི་དབུས་སུ་ཧྲཱིཿདམར་པོ་གཅིག་བསམ། མཐེ་བོང་གིས་མ་ཡོངས་སུ་གྱུར་པ་ལས་ཉི་མའི་གདན། སྲིན་ལག་གི་ཨ་ཡོངས་སུ་གྱུར་པ་ལས་ཟླ་བའི་གདན་གཉིས་ཀྱི་བར་དུ། ཧྲཱིཿཡོངས་སུ་གྱུར་པ་ལས་རྟ་མགྲིན་ཡབ་ཡུམ་དམར་པོ་ཡབ་ཀྱི་གཡས་ལྕགས་ཀྱུ། གཡོན་སྡིགས་འཛུབ། ཞབས་གཉིས་འདོར་ཐབས་ཀྱིས་བསྒྲད་པ། སྤྱན་གསུམ་དང་ལྡན་པ། སྨིན་མ་ཐུར་དུ་གློག་འགྱུ་བ་བཞིན་དུ་འཁྱུག་པ། དབུ་སྐྲ་དམར་སེར་རལ་པ་གྱེན་ལ་བརྫེས་པ། རལ་པའི་གསེབ་ནས་ཡར་ལ། རྟ་མགོ་ལྗང་ཀུ་རྔོག་མ་ལེབ་རྒན། ཕུན་ཕུན་སེར་པོ། དཔྲལ་བ་ཞུར་པོ། རྟ་སྐད་ཕྱོགས་བཅུར་སྒྲོགས་པ། ཞིང་ཆེན་གྱིས་གཡང་གཞི། གླང་ཆེན་གྱིས་ཀོ་རློན། སྟག་གི་ཤམ་ཐབས་སྐུ་ལ་གསོལ་བ། གཞན་ཡང་སྦྲུལ་དང་ཐོད་པའི་རྒྱན་བསམ་གྱིས་མི་ཁྱབ་པས་བརྒྱན་པ། ཡུམ་རྡོ་རྗེ་ཕག་མོ་གཡས་གྲི་གུག །གཡོན་ཐོད་ཁྲག་བསྣམས་ནས་ཡབ་ལ་འཁྲིལ་བ་ཅན་དུ་བསྒོམ་གསུངས། གཞུང་ནས། མདུན་ན་མི་ཕམ་མ་དཀར་མོ་གཡས་ལྕགས་ཀྱུ། གཡས་སུ་ཁྲོ་གཉེར་མ་སེར་མོ་ཞགས་པ། རྒྱབ་ཏུ་རོ་ལོང་མ་དམར་པོ་ལྕགས་གྲོག །གཡོན་དུ་རལ་གཅིག་མ་ནག་མོ་དྲིལ་བུ་ཅན་བཞི་དང་འཁྲིལ་སྦྱོར་དུ་བསྒོམ་པ་ཡང་སྣང་། དེ་ནས་རང་ཡི་དམ་དང་རྟ་མགྲིན་རིགས་ལྔ་ཡབ་ཡུམ་ཀུན་གྱིས་མཁའ་གསང་བྱིན་གྱིས་རླབས་པ་ལ། ཡབ་ཀྱི་གསང་བའི་རྡོ་རྗེ་ནི། མ་ལས་ཉི་མའི་དཀྱིལ་འཁོར་འོད་ཡོངས་སུ་རྫོགས་པའི་སྟེང་དུ། ཡེ་ཤེས་ལྔ་དང་ལྡན་པའི་རྟགས་སུ་གསེར་གྱི་རྡོ་རྗེ་རྩེ་ལྔ་པ། རྡོ་རྗེའི་དབུ་བུམ་པའི་ནང་དུ་ཟླ་བའི་དཀྱིལ་འཁོར་འོད་ཡོངས་སུ་རྫོགས་པའི་སྟེང་དུ། བདུད་རྩི་བྱང་ཆུབ་སེམས་ཀྱིས་རང་བཞིན་ༀ་དཀར་པོ་གཅིག་བསམ། རྡོ་རྗེའི་རྭ་དབུ་མའི་ནང་དུ་ཆགས་པ་ཆོས་ཉིད་དུ་སྒྲོགས་པའི་རྟགས་སམ། ཡུམ་གྱི་མཁའ་ལ་བདེ་བ་མཐར་ཕྱིན་བའི་རྟགས་སུ། ཕཊ་ནག་པོ་མགོ་ཕྱིར་བསྟན་པ་གཅིག་བསྒོམ། ཡུམ་གྱི་མཁའ་པདྨ་འདབ་མ་བརྒྱད་པའི་དབུས་ཨེ་གྲུ་གསུམ་ཆོས་ཀྱི་འབྱུང་གནས། རྩ་ཁ་ཁ་མུ་ཁ་འདུས་པའི་རྩེ་མོ་ལ། བདུད་རྩི་རཀྟའི་རང་བཞིན། ཡི་གེ་ༀ་དམར་པོ་རྒྱ་མཚལ་ཅོག་ལ་མ་ལྟ་བུ་གཅིག་བསམ་ས་མ་ཡ་ཧོ། ཡུམ་གྱི་ཡབ་ལ་སྦྱོར་པ་མཛོད་ཅིག་པར་བསྐུལ་བས། ས་མ་ཡ་སྟྭཾ། ཡབ་ཀྱིས་སྦྱོར་བ་བྱེད་པ་ཞལ་གྱིས་བཞེས། ཨ་ནུ་རཱ་ག་ཡ་མི་ཡུམ་གྱིས་ཡབ་ལ་སྦྱོར་བ་མྱུར་དུ་མཛོད་ཅིག་པར་བསྐུལ་བས། ཨ་ནུ་ར་ག་ཡ་ཧཱུྃ་ཡབ་ཀྱིས་ཡུམ་ལ་སྦྱོར་བ་མྱུར་དུ་བྱ་བ་ཞལ་གྱི་བཞེས་ནས། ཛ་ལྕགས་ཀྱུ་མས་དཔུང་པ་ནས་འཁྱུད། ཧཱུྃ་ཞགས་པ་མས་ལུས་ལ་འཁྲིལ། བྃ་ལྕགས་སྒྲོགས་མས་མཁའ་དང་མཁའ་ཞལ་དང་ཞལ་དུ་སྤྲད་པར་བྱའོ། །ཧོ་དྲིལ་བུ་མས་བདེ་བ་དུས་གཅིག་ཉམས་སུ་མྱོང་སྟེ། བདག་ཡབ་ཡུམ་རོལ་པ་མཛད་པ་མཛད་པའི་བྱང་ཆུབ་ཀྱིས་སེམས་ཡུམ་གྱི་མཁའ་ལ་ཕབ་པས། དེའི་འོད་ཟེར་གསང་བའི་སྦྱོར་མཚམས་ནས་འཕྲོས་རྟ་མགྲིན་ཡབ་ཡུམ་ལ་ཕོག །རྟ་མགྲིན་ཡབ་ཡུམ་རོལ་པ་མཛད་པའི་བྱང་ཆུབ་སེམས་ཀྱིས་འོད་ཟེར་རིགས་ལྔ་ཡབ་ཡུམ་བཅུ་ལ་ཕོག །རིགས་ལྔ་ཡབ་ཡུམ་བཅུ་རོལ་པ་མཛད་པའི་བྱང་ཆུབ་སེམས་ཀྱི་འོད་ཟེར་ཕྱོགས་བཅུའི་སངས་རྒྱས་ཐམས་ཅད་ལ་ཕོག་པས་ཐུགས་དམ་གྱི་རྒྱུད་བསྐུལ། དེ་དག་རོལ་པ་མཛད་པའི་བྱང་ཆུབ་སེམས་ཀྱི་འོད་ཟེར་ཐུགས་ཆོས་ཉིད་ཀྱི་བདུད་རྩི་ཁ་དོག་ལྔ་ལྡན་ཚུར་འདུས་རིགས་ལྔ་ཡབ་ཡུམ་བཅུ་ལ་གཅིག་ཆར་དུ་ཐིམ་པར་བསམ་པའམ། ཡང་ན་སྔགས་བཟླས་པ་དང་རིམ་གྱིས་སྤྲད་པ། བདག་ཡབ་ཡུམ་རོལ་པ་མཛད་པའི་འོད་ཟེར་རྟ་མགྲིན་ཡབ་ཡུམ་ལ་ཕོག །རྟ་མགྲིན་ཡབ་ཡུམ་སྦྱོར་བའི་འོད་ཟེར། རྡོར་སེམས་ལ་ཕོག །དེ་ཡབ་ཡུམ་སྦྱོར་བའི་འོད་ཟེར་རྣམ་སྣང་ལ་ཕོག །དེ་ཡབ་ཡུམ་སྦྱོར་བའི་འོད་ཟེར་རིན་འབྱུང་ལ་ཕོག །དེ་ཡབ་ཡུམ་སྦྱོར་བའི་འོད་ཟེར་སྣང་མཐའ་ལ་ཕོག །དེ་ཡབ་ཡུམ་སྦྱོར་བའི་འོད་ཟེར་དོན་གྲུབ་ལ་ཕོག །དེ་ཡབ་ཡུམ་སྦྱོར་བའི་འོད་ཟེར་དུས་གསུམ་གྱི་བདེ་བར་གཤེགས་པ་རྣམས་ལ་ཕོག །ཐུགས་དམ་གྱི་རྒྱུད་བསྐུལ། དེ་དག་སྦྱོར་བ་མཛད་པའི་བྱང་ཆུབ་སེམས་ཀྱི་ཆུ་རྒྱུན་མར་ལ་བབ་སྟེ། དཔེར་ན་ཁ་བ་བབ་པ་ལྟར་རིགས་ལྔ་ལ་ཐིམ་པར་བསམ། སྔགས་ནི། ཧཱུྃ་ནི་རྒྱུ་མ་ནོར་བ་རྩ་བའི་སྔགས་བཛྲ་དྷྲྀཀ྄་ནི་རྡོ་རྗེ་འཛིན་པའི་བསྐྱེད་སྔགས། མཱུྃ་རྒྱུ་མ་ནོ་རྩ་བའི་སྔགས། དྷ་ཏཱི་ཤྭ་རི་གཏི་མུག་དགའ་མ་སྟེ་དབྱིངས་ཕྱུག་མའི་བསྐྱེད་སྔགས། ༀ་རྒྱུ་ཛིན་ཛིཀ྄་ནི་རྒྱལ་བ་རྣམ་སྣང་འཛིན་པའི༴ ལྃ་རྒྱུ། དཻ་ཥ་ར་ཏི་ཞེ་སྡང་དགའ་མ་སྟེ་སངས་རྒྱས་སྤྱན་མའི། སྭཱ་རྒྱུ། རཏྣ་དྷྲྀཀ྄་ནི་རིན་འབྱུང་རིན་པོ་ཆེ་འཛིན་པའི༴ མཱྃ་རྒྱུ། མོ་ཧ་ར་ཏི་ང་རྒྱལ་དགའ་མ་སྟེ་མཱ་མ་ཀཱིའི། ཨཱཾ་རྒྱུ། ཨ་རོ་ལྀཀ྄་ཆོས་སྣང་མཐའ་པདྨ་འཛིན་མའི། པྱཾ་རྒྱུ། རཱ་ག་ར་ཏི་འདོད་ཆགས་དགའ་མ་སྟེ་གོས་དཀར་མོའི། ཧཱ་རྒྱུ། པྲཛྙཱ་དྷྲྀཀ྄་དོན་གྲུབ་ཤེས་རབ་རལ་གྲི་འཛིན་པའི། ཏཱཾ་རྒྱུ། བཛྲ་ར་ཏི་ཕྲག་དོག་དགའ་མ་སྟེ་དམ་ཚིག་སྒྲོལ་མའི། ༀ་གྱིས་བསྲེག །ཨཱཿས་སྦྱངས། ཧཱུྃ་གིས་བྱིན་གྱིས་བརླབས། སརྦ་ཐམས་ཅད་པཉྩ་ལྔ་ཨ་མྲྀ་ཏ་བདུད་རྩི། ཧཱུྃ་ཆ་ལྔ་ཡོད་པའི་ཡེ་ཤེས། ཧྲཱིཿརྟ་མགྲིན་གྱི་ས་བོན། ཐཱ་བདུད་རྩི་བཞུ་བ་སྟེ། དེ་ཡང་བམ་བརྒྱད་ལས། ལག་པ་གཡོན་པ་དཔུང་བརྐྱང་ལ། །མཐེ་བོང་སྲིན་ལག་དཀྱིལ་དུ་འགུག །ཚོན་གང་རྡོ་རྗེ་ཆང་བཅུག་སྟེ། །ཏིང་འཛིན་མེ་དང་འདྲ་བ་ཡི། །བཟླས་བརྗོད་རླུང་དང་འདྲ་བ་ལས། །གླལ་དང་སྦྲིད་པས་བར་མི་བཅད། །དགུགས་པ་འདི་དག་ཛཔ྄་ཏུ་བསྒྲང་། །ཅེས་པས། ལག་པ་གཡོན་པ་བདུད་རྩིའི་སྟེང་དུ་བརྐྱང་། མཐེ་བོང་སྲིན་ལག་རྩེ་སྤྲད། རྡོ་རྗེ་ཆང་པར་བཅུག །དེ་ནས། དེ་ལ་ཕྲེང་བ་བཀོན་ནས། རིགས་ལྔ་ཡབ་ཡུམ་གྱི་བདུད་རྩིའི་སྙིང་པོ་འབྲུ་དགུ་སྒྲིལ་མ། བརྒྱའམ་ཉེར་གཅིག་གམ་བདུན་འདོན་ལ། དེ་ནས་འོད་ཟེར་འོད་དུ་ཞུ་བའི་དུས་སུ་རྡོ་རྗེའི་རྩེ་མོ་སྨན་གྱི་དབུས་དང་ཕྱོགས་བཞིར་རེག་ལ། རིགས་ལྔ་ཡབ་ཡུམ་རོལ་པ་མཛད་པས་རིགས་ལྔ་ཡབ་ཡུམ་ཐམས་ཅད་རྟ་མགྲིན་མ་གཏོགས་པ་ཡུམ་ཡང་འོད་དུ་ཞུ་ནས་བདུད་རྩི་དཀར་ལ་དམར་བའི་མདངས་ཆགས་པ་མུ་ཏིག་དཀར་པོ་དྲི་མ་མེད་པ་ལྟ་བུས་བྷན་དྷ་ཕྱུར་གྱིས་གང་བར་བསྒོམ་ལ། རྡོ་རྗེས་ལན་གསུམ་དཀྲུགས་ཤིང་། སྐུ་གསུང་ཐུགས་ཀྱིས་རྒྱུད་བསྐུལ་བར་བསམ་ལ། ༀ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧྲི་ཋ། ཅེས་བརྗོད་དོ། །གསུམ་པ་ནི། དེ་ནས་རྡོ་རྗེས་སྨན་ཆུ་ཁྱོར་བར་བླུག་ལ། མཐེབ་སྲིན་ཉི་ཟླའི་སྐྱོག་ཏུ་བསམ་ལ་གཏོར་ཞིང་། ༀ་ཨཱཿཧཱུྃ་བྱིན་རླབས་རྩ་བ་བཀའ་བརྒྱུད་བླ་མ། དངོས་གྲུབ་རྩ་བ་ཡི་དམ་ལྷ་ཚོགས། ཕྲིན་ལས་རྩ་བ་ཆོས་སྐྱོང་སྲུངས་མ། བསྙེན་སྒྲུབ་རྩ་བ་མ་དང་མཁའ་འགྲོ་བསྟན་སྲུང་བཀའ་སྡོད་ཕོ་ཉ་ལས་མཁན་དང་བཅས་པ་རྣམས་ཀྱི་ཞལ་དུ་སརྦ་པཉྩ་ཨ་མྲྀ་ཏ་ལ་ཁཱ་ཧི། ཅེས་བརྗོད་ལ་ཁ་ཞག་གིས་ཞད་ཙམ་གཅིག་མཆོད། འོག་མ་དངོས་སུ་འབུལ་བའི་སྐབས་སུ་མཐེབ་སྲིན་ཉི་ཟླའི་སྐྱོག་ཏུ་བསམ་ལ་གཏོར་བའམ། ལྷ་མོ་ཉི་ཟླའི་སྐྱོག་བཟུང་བ་རྣམས་ཀྱི་བཅུས་ནས་མཆོད་པར་བསམ་གསུངས། བཞི་པ་ནི། རྡོ་རྗེའི་ལག་པ་གཡོན་པའི་སྲིན་ལག་གསེར་གྱི་རྡོ་རྗེ་རྩེ་ལྔ་པར་བསམ་ལ། ཁྱོར་བ་གང་གིས་བདུད་རྩི་ཕྱོགས་བཅུར་གཏོར་བས། རྣལ་འབྱོར་མ་མཆེད་གྲོགས་རྣམས་ལ་ཕོག་པས་སྡིག་སྒྲིབ་དག་པར་བསམ། མཆོད་རྫས་ལ་ཕོག་པས་ཕུད་ཉམས་པ་དང་། སྨེ་བ་དང་མི་གཙང་བ་དང་། དམ་ཉམས་ཀྱི་ལག་ནས་བྱུང་བ་ལ་སོགས་པ་ཉེས་པ་ཐམས་ཅད་དག་པར་བསམ། གནས་ཁང་ལ་ཕོག་པས་དེའི་ཉེས་སྐྱོན་དག་པར་བསམ། བགེགས་རིགས་སྟོང་ཕྲག་བརྒྱད་ཅུ་ལ་ཕོག་པས་ལུས་སྲོག་སྒྱུ་མ་རྡུལ་དུ་བརླག་པར་བསམ་ལ། གང་ཞིག་བཀའ་རྐུ་བ་དང་། གསུང་གཅོག་པ་དང་། ལྟ་བ་དང་། ཉན་པ་ལ་མི་དབང་བའི་སྣོད་མ་ཡིན་པའི་བགེགས་རིགས་སྟོང་ཕྲག་བརྒྱ་ཅུ་པོ་དེ་དག་ལ་དའི་ཡེ་ཤེས་ཀྱིས་བདུད་རྩིའི་ཆུ་རྒྱུན་འདི་ཕོག་པ་ཙམ་གྱིས་ལུས་སྲོག་སྒྱུ་མ་རྡུལ་དུ་བརླག་ནས་མེད་པར་བྱོས་ཤིག །གང་ཞིག་དམ་ཚིག་དང་ལྡན་པ་རྣམས་ཀྱི་ཐུགས་དམ་བསྐང་བར་མཛོད་ཅིག །རིགས་ཅན་རྣམས་ཀྱི་དམ་ཚིག་ནི། རིགས་མེད་རྣམས་ལ་དབང་མི་འགྱུར། །རིགས་ཅན་རང་གི་དམ་ཚིག་ལས། །སངས་རྒྱས་ཀུན་ཀྱང་འདའ་བ་མིན། །ཅེས་རང་གི་སྔགས་གོང་མ་བརྗོད་ལ། ལྕེ་ལ་ལན་གསུམ་བླང་ངོ་། །ཀཱ་ཡ་བཛྲ་ༀ། ཝཱཀྐ་བཛྲ་ཨཱཿཙིཏྟ་བཛྲ་ཧཱུྃ། ཅེས་བརྗོད་ལ། མཐེབ་སྲིན་ཉི་ཟླའི་སྐྱོག་ཏུ་བསམ་ལ། ཁྱོར་བ་ནང་གི་བདུད་རྩིའི་ནང་དུ་ༀ་ཨཱཿཧཱུྃ་གསུམ་ཡོད་པ་དེ་བླང་ནས་བདག་གི་གནས་གསུམ་དུ་བཞུགས་པར་བསམ་ལ། གནས་གསུམ་དུ་ཐིག་ལེ་བྱ་བ་ནི་དངོས་གྲུབ་བླང་བའོ། །དེ་ནས་ཁྱོར་བ་ནང་གིས་བདུད་རྩི་ལྷག་མ་དེ་རང་གི་བཏུང་ལ། སྤྱི་བོར་བླ་མ་བཞུགས་པར་བསམ། མགྲིན་པར་མཁའ་འགྲོ། སྙིང་ཁར་ཡི་དམ། ལྟེ་བར་ཆོས་སྐྱོང་། རྩ་གནས་ཐམས་ཅད་དཔའ་བོ་དཔའ་མོའི་རང་བཞིན་དུ་བསམ་ལ། དེ་རྣམས་ཀྱི་གསོལ་ནས་མཉེས་པར་བསམ་པ་ནི། བདུད་རྩི་གསང་གནན་གྱི་མཆོད་པ་ཞེས་བྱའོ། །ལྔ་པ་སྲུང་མ་བསྒོ་བ་ནི། སྨན་སྣོད་ཀ་པཱ་ལ་བཅུད་དང་བདུད་རྩིའི་སྟེང་དུ་ཟླ་བའི་དཀྱིལ་འཁོར་ཡོངས་སུ་རྫོགས་པ། དཔེར་ན་མཚོ་ལ་འཁྱག་རམ་ཆགས་པའི་ཚུལ་དུ་ཡོད་པའི་སྟེང་དུ་རིགས་ལྔ་ཡེ་ཤེས་ལྔའི་ངོ་བོ་རྡོ་རྗེ་བྱེད་པ་རྩེ་ལྔ་པའི་ལྟེ་བ་ལ་ༀ་ཁ་དོག་ལྔ་ལྡན་གཅིག་བསམ། རང་གི་མཐེབ་སྲིན་གྱིས་རྟ་མགྲིན་ཚོན་གང་བ་དེ་རྡོ་རྗེའི་རྩེ་མོ་ལ་བཞུགས་ནས། བདག་ལ་དངོས་གྲུབ་སྟེར་བ་དང་། བདུད་རྩིའི་བསྲུང་མ་བྱེད་པར་བསམ་མོ། །འདི་ནི་བི་མ་མི་ཏྲའི་བྱིན་རླབས་ཕྲེང་པའི་ནང་ནས། སློབ་དཔོན་དམ་པ་བདེ་བར་གཤེགས་པས་བསྡུས་པའི་ལུགས་སོ། །རྒྱས་པར་བདུད་རྩི་ཕྱི་ནང་གསང་གསུམ་གྱིས་བྱིན་རླབས་ལོགས་སུ་ཤེས་སོ། །རཀྟ་བྱིན་གྱིས་བརླབ་པ་ནི། རང་གི་ཐུགས་ཀ་ནས་བྷྲཱུྃ་གཅིག་སྤྲོས་པས་རཀྟའི་སྣོད་ལ་ཕོག་པ་འོད་དུ་ཞུ་བས་བྷན་དྷ་རློན་པ་ལྕང་ལོ་ཅན་གྱིས་ཀ་པཱ་ལ་ཡངས་ཤིང་རྒྱ་ཆེ་བ་གཅིག་བསམ། དེའི་ནང་དུ་ཐ་མལ་པའི་རཀྟ་ཕྱི་ནང་གསང་གསུམ་གྱིས་གང་བར་བསམ། དེ་ནས་རང་གི་ཐུགས་ཀ་ནས་རྃ་སྤྲོས་མེད་དཔུང་གྱུར་ཏེ། ཐ་མལ་པའི་རཀྟ་རྣམས་བསྲེགས་ཅིང་མེད་པར་བསམ། དེ་ནས་རང་གི་ཐུགས་ཀ་ནས་བཅུད་ཀྱི་དངོས་པོར་དམར་པོ་གཅིག་སྤྲོས་པ་བྷན་དྷའི་ནང་དུ་བབ་པ་ལས་འོད་ཟེར་དཔག་ཏུ་མེད་པ་འཇིག་རྟེན་གྱི་ཁམས་སུ་སྤྲོས་པས་སེམས་ཅན་གྱི་ལུས་ངག་ཡིད་གསུམ་གྱི་སྡིག་སྒྲིབ་སྦྱང་། འོག་མིན་དུ་འཕྲོས་པས་སངས་རྒྱས་ལ་མཉེས་པའི་མཆོད་པ་འབུལ། འོག་མིན་གྱིས་རཀྟའི་བྱིན་རླབས་དང་། འཇིག་རྟེན་གྱི་ཁམས་ན་སའི་རཀྟ། རྡོའི་རཀྟ། རྩི་ཐོག་གི་རཀྟ། ཤིང་གི་རཀྟ། སྲོག་ཆགས་ལས་བྱུང་བའི་རཀྟ་ལ་སོགས་པའི་བཅུད་ཐམས་ཅད་བསྡུས་ཏེ་ར་ལ་ཐིམ། ར་འོད་དུ་ཞུ་བ་ལས་བྷནྡྷའི་ནང་དུ་རཀྟའི་རྒྱ་མཚོར་གྱུར་སྟེ་ཁྲག་ལྦུ་རི་རབ་ཙམ་ཆགས་པ་ལས། ལྦུ་བའི་ནང་ནས་རཀྟའི་ལྷ་མོ་དམར་མོ་བྷནྡྷ་རཀྟས་བཀང་བ་ཐོགས་པ་དཔག་ཏུ་མེད་པ་ཡོད་པ། ཤར་གྱི་རྦ་བརླབ་ནུབ་ཏུ་འཕྱོ་བ། ནུབ་ཀྱི་རྦ་བརླབ་ཤར་དུ་འཕྱོ་བ། ལྷོའི་རྦ་བརླབ་བྱང་དུ་འཕྱོ་བ། བྱང་གི་རྦ་བརླབ་ལྷོར་འཕྱོ་བ། རྦ་བརླབ་དུ་འཁྲུག་པ། ཁྲག་སྤུ་རི་རབ་ཙམ་ཆགས་པ་ལས། ཞིང་གི་སྙས་འཕྱོ་བ། ཞིང་ཆུང་གི་ཁ་བད་དུ་ཆགས་པ། ཚིལ་ཆེན་གྱིས་འབྲུམ་དང་དར་ཆགས་པ་འོད་ཟེར་དཔག་ཏུ་མེད་པ་འཕྲོ་བའི་རྩེ་མོ་ལ་མཚོན་ཆ་ལྔའི་འཁོར་ལོ་འཁོར་བར་བསྒོམ། ༀ་ནི་སྔགས་ཀྱི་མགོ་འདྲེན་མ་ཧཱ་ཆེན་པོ། རཀྟ་ཁྲག །ཛྭ་ལ་འབར་བ། མཎྜལ་དཀྱིལ་འཁོར། ཧཱུྃ་ཧཱུྃ་ཧཱུྃ་ཐུགས་རྗེའི་སྐུ་གསུང་ཐུགས་ཀྱི་ངང་དུ་སྡུད་ཅིག །ཕཊ྄་སྒྲོལ་ཅིག་པ་སྟེ། སྲིད་གསུམ་ཁྲག་གི་རྒྱ་མཚོ་ཆེན་པོ་འདི་འབར་བ་ཆེན་པོའི་དཀྱིལ་འཁོར་གྱིས་ཚོགས་ཀྱིས་གསོལ་བས་སྐུ་གསུང་ཐུགས་ཀྱི་ངང་དུ་སྡུད་ཅིག །སྒྲོལ་ཅིག་ཅེས་པ་སྟེ། ཏིང་ངེ་འཛིན་མ་གསལ་བར་དུ་བརྗོད་ཅིང་། མཐར་དེ་བཞིན་གཤེགས་པ་རྣམས་ལ་གཏོར་བས་སྐུ་གསུང་ཐུགས་ཀྱི་རྒྱུད་མཉེས་ཤིང་ཚིམ་པར་བསམ། ཆོས་སྐྱོང་རྣམས་ལ་གཏོར་བས་ཐུགས་དམ་བསྐང་བར་བསམ། བགེགས་རིགས་སྟོང་ཕྲག་བརྒྱད་ཅུ་ལ་ཕོག་པས་རྡུལ་དུ་བརླག་པར་བསམ། རང་གི་ལན་གསུམ་བླངས། སྙིང་ཁར་རཀྟའི་ཐིག་ལེ་ཟླ་གམ་གཅིག་བྱ། འོག་མཆོད་པའི་དུས་སུ་རཀྟའི་ལྷ་མོ་ཐོད་ཞལ་ཐོགས་པ་རྣམས་ཀྱིས་མཆོད་པར་བསམ། རཀྟ་བྱིན་བརླབ་འདི་ཡང་བྷི་མ་ལའི་ལུགས་སོ། །རྒྱས་པ་ཕྱི་ནང་གསང་གསུམ་ལྟར་བྱིན་གྱིས་བརླབ་པའི་ལུགས་ལོགས་སུ་ཤེས་སོ། །གཏོར་མ་བྱིན་གྱིས་བརླབ་པ་ལ་གཉིས་སྟེ། དང་པོ་གཏོར་མ་གཏོང་མ་གཏོང་གིས་སྐྱོན་ཡོན་ནི། སློབ་དཔོན་པདྨའི་ལ་ཞལ་ནས། གཏོང་དང་མི་གཏོང་ཡོན་ཏན་སྐྱོན། །ལྔ་ཚན་གཉིས་དང་བཅུ་ཚན་གཉིས། །དང་པོ་ཡོན་ཏན་ལྔ་ཚན་ནི། །ཚེ་འདིར་མཁའ་འགྲོས་བྱིན་རླབས་དང་། །དངོས་གྲུབ་ཐོབ་དང་ཉམས་སྐོང་དང་། །མ་ཉམས་པ་དག་མི་ཉམས་དང་། །ཕྱི་མར་བྱང་ཆུབ་རྒྱུར་འགྱུར་ལྔ། །གཉིས་པ་མ་གཏོང་བའི་སྐྱོན་ལྔ་ནི། །ཚེ་འདིར་མཁའ་འགྲོས་ཆད་གཅོད་ཅིང་། །ཚོགས་མི་རྫོགས་དང་དགྲ་བགེགས་ཀྱིས། །བར་ཆད་བྱེད་དང་བསམ་མི་འགྲུབ། །བཟླས་བརྗོད་ཆུད་ཟོས་འདི་ཕྱི་མར། །དངོས་གྲུབ་གང་ཡང་མི་འགྲུབ་ལྔ། །གསུམ་པ་སྐྱོན་གྱིས་བཅུ་ཚན་ནི། །ལྷ་དང་འབྲེལ་ཐག་ཆད་པ་དང་། །མཁའ་འགྲོའི་དངོས་གྲུབ་མི་ཐོབ་དང་། །སྡེ་བརྒྱད་ལ་ནི་བཀའ་མི་བཙན། །བར་ཆད་བགེགས་རྣམས་མི་ཞི་ངང་། །མི་དང་མི་མིན་ནད་ཀྱིས་ཚུགས། །རིགས་དྲུག་རྒྱུད་སྦྱང་མི་ནུས་དང་། །གཞན་དོན་མཐར་མི་ཕྱིན་པ་དང་། །བདག་དོན་ལྷུན་གྱི་མི་འགྲུབ་དང་། །ཅི་དང་ཅི་བྱེད་ཐམས་ཅད་ཀྱིས། །ལམ་གྱི་བར་ཆད་མི་སེལ་དང་། །མཐར་ཐུག་བྱང་ཆུབ་མི་ཐོབ་བཅུ། །བཞི་པ་ཡོན་ཏན་བཅུ་ཚན་ནི། །གྲུབ་ཐག་ཉེ་དང་དེས་བྱིན་རླབས། །མ་དང་མཁའ་འགྲོས་དངོས་གྲུབ་སྟེར། །སྡེ་བརྒྱད་ལ་ནི་བཀའ་བཙན་སོགས། །སྐྱོན་བཅུ་བཟློག་པ་ཡོན་ཏན་ཉིད། །སྤྱིར་ནི་གཏོར་མའི་དགོས་ཆེད་ནི། །གཏོར་མ་ལས་རབ་ཀུན་གྱི་མཆོག །ལས་རྣམས་ཀུན་གྱིས་སྣ་ལ་འགྲོ། །ཆོས་རྣམས་ཀུན་གྱིས་གཞི་ཡང་ཡིན། །བསྙེན་སྒྲུབ་ཀུན་གྱི་རྟེན་ཡང་ཡིན། །ཅེས་གསུངས། ཡང་གཏོར་མ་བཅག་ན། བཀའ་ཆད་གནས་སུ་གྱུར་པས་ན། །དབང་མེད་རིགས་དང་འགྲོན་ལམ་མམ། །དེ་མིན་གཏོར་མར་འབད་པར་བྱ། །ཅེས་དང་། གཏོར་ཚོགས་རྒྱ་མཚོའི་རྒྱུད་ལས། གཏོར་ཆུ་བླུག་ནས་ལག་རེག་ན། །ཕྱིན་ཆད་བྱིན་བརླབ་སྤྱོད་དུ་མེད། །ས་དེར་གནས་པའི་འདྲེ་གང་གི། །དེས་ནི་གཏོར་མ་དེ་ཐོབ་སྐད། །ཅེས་གསུངས། དེས་སྐྱོན་དང་ཡོན་ཏན་བསྟན་པ་སོང་ན། གཉིས་པ་བྱིན་རླབས་དངོས་ནི། རང་གི་ཐུགས་ཀ་ནས་བྷྲཱུྃ་ཁ་དོག་སྣ་ཚོགས་པ་གཅིག་སྤྲོས་པ་གཏོར་མ་ལ་ཕོག་འོད་དུ་ཞུ་བ་ལས་བྷན་དྷའི་གཞལ་ཡས་ཁང་ཕྱི་རིན་པོ་ཆེ་སྣ་ལྔ་ལས་གྲུབ་པ་ལ་ཕྱོགས་དང་ཁ་དོག །འདྲེས་པར་འདོད་པར་གཉིས་ལ། འདིར་ཕྱག་ལེན་ལ་ཕྱོགས་མདོག་ནང་མུ་ཏིག་དཀར་པོ་དྲི་མ་མེད་པ་ལྟ་བུ། ཐིག་བཞི་བཏབ་པས་རིལ་ཆ་དག་དང་ལྡན་པར་བསམ། དེ་ལ་མཐུ་ཆོད་དུ་འདོད་པ་དང་། ཐིག་སྒལ་དུ་འདོད་པ་གཉིས་ལས། འདིར་ཕྱག་ལེན་ལ་བྱང་སེམས་དཀར་པོའི་ཐིག་སྒལ་དུ་འདོད། དེའི་དབུས་སུ་བྱང་སེམས་དཀར་པོ་ཁ་བ་སྤུངས་པ་ལྟ་བུའི་ཐོག་ལ་ཧཱུྃ་དཀར་པོ་རྡུལ་ཆུས་བྲིས་པ་ལྟ་བུ། དེའི་རྩར་མི་རོ་ལ་མཱུྃ། ཤར་དུ་དྲི་ཆེན་སེར་པོ་བ་བླ་སྤུངས་པ་ལྟ་བུའི་ཐོག་ལ་ༀ་སེར་པོ་གསེར་ཆུས་བྲིས་པ་ལྟ་བུ། ལྷོར་ཤ་ཆེན་སྔོན་པོའི་ཐོག་ལ་སྭཱ་སྔོན་པོ་ལ་བཻཌཱུརྱ་ཞུན་མས་བྲིས་པ་ལྟ་བུ། ནུབ་ཏུ་པདྨ་རཀྟ་དམར་པོའི་ཐོག་ལ་ཨཱོཾ་དམར་པོ་བྱུ་རུ་ཞུན་མས་བྲིས་པ་ལྟ་བུ། བྱང་དུ་དྲི་ཆུ་ལྗང་ཀུའི་ཐོག་ལ་ཧཱཾ་ལྗང་ཀུ་ཨིནྡྲ་ནཱི་ལའི་ཞུན་མས་བྲིས་པ་ལྟ་བུ་གཅིག་བསྒོམ། ཤར་ལྷོར་གླང་པོ་ཆེའི་རོ་ལ་ལྃ། ལྷོ་ནུབ་ཏུ་རྟ་རོ་ལ་མྃ། ནུབ་བྱང་དུ་རྨ་བྱའི་རོ་ལ་པྱཱྃ། བྱང་ཤར་དུ་ཁྱི་རོ་ལ་ཏཱྃ། རོ་དེ་རྣམས་གླང་སྒུམ་དུ་གནས་པའི་སོག་བར་དུ། ཡིག་འབྲུ་བསྒོམ་པ་དང་། ལྕེ་ཐོག་ཏུ་བསྒོམ་པ་དང་། སྤྱི་བོར་བསྒོམ་པའི་ལུགས་མི་འདྲ་བའི་འདོད་པ་སྣང་ཡང་། ཕྱག་ལེན་ལ། མི་རོའི་ལྕེ་ཐོག །སེམས་ཅན་བཞི་པོའི་སྤྱི་བོར་ཡི་གེ་རྣམས་བསྒོམ་གསུངས། སེམས་ཅན་གྱིས་ཁ་དོག་ཡང་གླང་ཆེན་ཐལ་དཀར་ཡིན། རྟ་ཟག་ཞུར་ཟེར་ཡང་ཤེས་བྱེད་མ་མཐོང་། པདྨའི་དམ་ཚིག་ཉེར་བརྒྱད་ཀྱིས་འགྲེལ་བར། རྟ་སྔོན་པོ་ཡིན། ཅེས་གསུངས། རྨ་བྱ་ལྗང་ཀུ་ཡིན། ཁྱི་དཀར་སྣ་མར་དགོས་ཟེར་བ་སྣང་། མ་སུརྻ་མཎྜ་ལ་ཧཱུྃ། ཅེས་རང་གི་ཐུགས་ཀ་ནས་ཉི་མའི་དཀྱིལ་འཁོར་ཧཱུྃ་གིས་མཚན་པ་སྤྲོ་བ་ཤ་ལྔ་བདུད་རྩི་ལྔ་ལ་ཕོག །དངོས་པོ་མ་དག་པ་བསྲེག་ནས་བཅུད་ཡིག་འབྲུ་བཅུ་ལ་ཐིམ་པར་བསམ། པཱྃ་པདྨ་མཎྜལ་ཨཱཿཅེས་པས། པདྨ་ཨ་ཡིས་མཚན་པ་སྤྲོས་པས་ཡིག་འབྲུ་བཅུ་ལ་ཕོག །དེ་དག་ཐམས་ཅད་བདུད་རྩིའི་རྒྱ་མཚོར་གྱུར་པར་བསམ། ཨ་ཙནྟྲ་མཎྜལ་ༀ་ཅེས་ཟླ་བའི་དཀྱིལ་འཁོར་ༀ་གྱིས་མཚན་པ་སྤྲོས་པས་བདུད་རྩིའི་སྟེང་དུ་ཁ་ཆོད་ཀྱིས་ཚུལ་དུ་གནས་པ་ལས། ༀ་ལས་འདོད་པའི་ཡོན་ཏན་ཁམས་དྲུག་གི་ལྷ་མོ་དཔག་ཏུ་མེད་པ་འཕྲོ་ཞིང་དེ་བཞིན་གཤེགས་པ་རྣམས་ལ་མཆོད་དོ། །ༀ་ནི་སྔགས་ཀྱི་མགོ་འདྲེན་བྷ་ལིངྟ་བྷ་ལིངྟ་གཏོར་མ་གཏོར་མ་ཏེ་ཛྭ་གཟི་བརྗིད་བྷ་ལིངྟ་གཏོར་མ་བྷ་ལ་ཤ་བྷ་ཏེ་ཆང་གུཧྱ་གསང་བ་ས་མ་ཡ་དམ་ཚིག་སྭཱ་ཧཱ་གཞི་ཚུགས་པར་གྱུར་ཅིག་པ་སྟེ། ཕྱིའི་གཏོར་མ། ནང་གི་གཏོར་མ། ཁྱད་པར་དུ་གཟི་བརྗིད་ལྡན་པ་གསང་བའི་གཏོར་མ་ཤ་ཆང་གིས་བརྒྱན་པ་ལ་མི་འདའ་བས་དམ་ཚིག་གི་གཞི་ཚུགས་པར་གྱུར་ཅིག་ཅེས་པའི་དོན་ཡིན་པས། བརྒྱ་རྩ་བརྒྱད་དམ། ཉེར་གཅིག་གམ་བདུན་བརྗོད་ལ། ཕྱིའི་གཏོར་མ་སྟེང་འདོད་ཡོན་གྱི་ལྷ་མོ། ནང་གིས་གཏོར་མ་བར་བདུད་རྩིའི་རྒྱ་མཚོ། གསང་བའི་གཏོར་མ་འོག་དུག་གསུམ་ཤ་ཁྲག་རུས་གསུམ་གསལ་གདབ་པའམ། ཡང་ན་ཚར་བདུན་བརྗོད་དེ། དང་པོ་གཟུགས་ཀྱི་ལྷ་མོ་དཀར་མོའི་ཕྱག་ན་མེ་ལོང་བསྣམས་པ་གསལ་གདབ། གཉིས་པས་སྒྲའི་ལྷ་མོ་སྔོན་མོས་ཕྱག་ན་པི་ཝཾ་བསྣམས་པ་དང་། གསུམ་པས་དྲིའི་ལྷ་མོ་སེར་མོ་ཕྱག་ན་སྤོས་ཕོར་བསྣམས་པ། བཞི་པས་རོའི་ལྷ་མོ་དམར་མོས་ཞལ་ཟས་རོ་མཆོག་བརྒྱ་དང་ལྡན་པ་བསྣམས་པ། ལྔ་པས་རེག་བྱའི་ལྷ་མོ་ལྗང་ཀུས་ན་བཟའི་གོང་བ་རྡོ་རྗེས་མཚན་པ་བསྣམས་པ། དྲུག་པས་ཆོས་ཀྱི་ལྷ་མོ་མཐིང་ཀས་ཨེ་གྲུ་གསུམ་བསྣམས་པ། བདུན་པས་ལྷ་མོ་རེའི་གྲངས་ཡང་ནམ་མཁའི་ཁམས་ཁེངས་པར་བསམ། ཁ་ཚོད་ཟླ་བའི་ཐོག་ཏུ་རྡོ་རྗེ་ཕྱེད་པས་མཚན་པ། རྩེ་མོ་ལ་རྟ་མགྲིན་ཚོན་གང་བ་སྨུག་པོ་གཡས་མཆོད་དབྱུག་གམ་མཆོག་དབྱུག་གཡོན་སྡིགས་འཛུབ་མཛད་པ་གཅིག་གི་གཏོར་མ་བསྲུང་བར་བསམ། འོག་དངོས་གཞི་གཏོར་མ་འབུལ་བའི་དུས་སུ་ལྷ་མོ་དེ་རྣམས་ཀྱི། བདེ་བར་གཤེགས་པ་རྣམས་ཀྱི་སྤྱན་དང་། སྙན་དང་། ཤངས་དང་། ཞལ་དང་། སྐུ་དང་། ཐུགས་ཀར་ཐིམ་པར་བསམ། དེ་དག་ནི་ནང་གི་ཕྱིའི་མཆོད་པའོ། །གཏོར་མ་བདུད་རྩིའི་རྒྱ་མཚོར་གྱུར་པ་དེ་དག་ལ། བཀའ་བརྒྱུད་བླ་མ་རྣམས་ཀྱི་ལྗགས་འོད་ཟེར་གྱི་སྦུ་གུ་ཆུ་ལ་ཉི་ཟེར་ཕོག་པའི་ཚུལ་དུ་གསོལ། ཡི་དམ་ལྷ་ཚོགས་རྣམས་ཀྱི་ལྗགས་རྡོ་རྗེའི་སྦུ་གུར་གྱུར་ནས་གསོལ། ཆོས་སྐྱོང་རྣམས་ཀྱི་ལྗགས་གྲི་གུག་གི་ཚུལ་དུ་གསོལ་བ་ནི། ཕྱི་ཡི་ནང་གི་མཆོད་པའོ། །ཡང་དེ་ཉིད་ཤ་ཁྲག་རུས་པའི་ཚོགས་སུ་གྱུར་ནས། ཁྱད་པར་དུ་ཁྲོ་བོ་དང་ཆོས་སྐྱོང་རྣམས་ཀྱི་བརྗིད་པའི་ཚུལ་དུ་གསོལ་བར་བསམ་པ་ནི། དུག་གསུམ་གནས་སུ་དག་པའི་མཆོད་པ་ཞེས་ཀྱང་བྱ། ནང་གི་གསང་བའི་མཆོད་པ་ཞེས་ཀྱང་བྱ། ཁམས་གསུམ་ཡོངས་སྒྲོལ་གྱི་མཆོད་པ་ཞེས་ཀྱང་བྱ། དཀྱིལ་འཁོར་གོང་འོག་སྔགས་ཕྱི་ནང་ཅི་ལྟར་ན་ཡང་། གཏོར་མ་གཅིག་ལ་བརྟེན་པས་ཆོག །བྱིན་རླབས་ཀྱང་ལན་གཅིག་བྱས་ལ་ནམ་མཆོད་པའི་དུས་སུ། ༀ་ཨཱཿཧཱུྃ་གིས་བསལ་ལ། གསལ་བར་བྱས་ལ་མཆོད་དོ། །རྒྱུན་གཏོར་བསྐྱང་དུས་ཡི་གེ་འབྲུ་གསུམ་ཚར་བསྡུའོ། །གཏོར་མ་བྱིན་བརླབ་འདི་ཡང་བྷི་མ་ལའི་ལུགས་སོ། །དེ་ནས་བཤགས་པ་བྱ་བ་ནི། ཡེ་ཤེས་སྐུ་མཆོག་བརྗོད་མེད་ཀྱི་བཤགས་པ་འདིར་བྱ་སྟེ། དེ་ཡང་སྤྱིར་ཆོས་ཐམས་ཅད་ལ་བཤགས་པའི་སྒོའི་ཡུལ་རྣམ་པར་བཤད་པ་མེད་ན་ཡང་། མདོར་བསྡུ་ན་བཞི་སྟེ། རྒྱུད་ཐམས་ཅད་ཕུན་སུམ་ཚོགས་པ་ལྔའི་སྒོ་ནས་འཆད། ལུང་ཐམས་ཅད་མདོ་བཅད་བདུན་གྱིས་འཆད། བསྟན་བཅོས་ཐམས་ཅད་རྩིས་མགོ་ཡན་ལག་ལྔ་ཡིས་འཆད། མན་ངག་ཐམས་ཅད་དགོངས་དོན་ལྔ་ཡིས་འཆད་པ་ལས། དེ་ལ་ཡེ་ཤེས་སྐུ་མཆོག་འདི་མན་ངག་ཡིན་པའི་ཕྱིར། དགོངས་དོན་ལྔའི་འཆད་དགོས་སྟེ། སློབ་དཔོན་ལོ་རྒྱུས་ཀྱི་དོན་དང་། རྩ་བ་མཚན་གྱི་དོན་དང་། ཡོ་ག་ཕྱོགས་ཀྱི་དོན་དང་། གང་ཟག་དགོས་ཆེད་ཀྱིས་དོན་དང་། ས་གཅོད་ཚིག་གིས་དོན་ནོ། །དེ་ལ་སློབ་དཔོན་ལོ་རྒྱུས་ཀྱི་དོན་ནི། སྔོན་བྱུང་དང་། རྗེས་འཇུག་གཉིས་ཏེ། དེ་ལ་སྔོན་ནི། བྲམ་ཟེ་མེའི་ཐོད་པ་ཅན་གྱིས། ཀུན་དུ་རིག་པའི་ལེའུ་བརྒྱད་པར། བསྐང་བ་ལས་ཀྱི་ལེའུ་དཔལ་ཆེན་པོའི་སྤྱན་སྔར་བཤགས་པ་བྱས་པ་ཡིན་ལས། རྗེས་འཇུག་ཏུ། དགེ་བའི་བཤེས་གཉེན་ཆེན་པོ་དཔལ་དབྱངས་ཀྱིས་བྱས་སྟེ། སློབ་དཔོན་དེ་ཡང་རྒྱ་གར་གྱིས་མཁན་པོ་ནི་མ་ཡིན། བོད་ཀྱི་དགེ་བའི་བཤེས་གཉེན་ལགས། གདུང་ནི་གཉན་མི་སྟེ་ངམ་རུ་ཕུག་པ་ཡིན། ཡུལ་ལྷ་ས་ངན་འཕགས་ན་བཞུགས་སོ། །སྐུ་ཆེ་བའི་ཡོན་ཏན་ནི། མཁྱེན་པའི་ཡོན་ཏན་ཁྱད་དུ་འཕགས་པ་ཡིན་ཏེ། སློབ་དཔོན་ཡོན་ཏན་དར་བས། དུས་དེ་ན། བོད་ཀྱི་མངའ་བདག་རྒྱལ་པོ་རལ་པ་ཅན་གྱིས་ཞལ་སྔ་ནས་ཀྱང་། ཆོས་སྐྱོང་བའི་ཕྲིན་ལས་གཙོར་མཛད་པ། རྒྱ་གར་གྱི་མཁན་པོ་པཎྜི་ཏ་སྤྱན་བཀྲ་བ་མང་དུ་བཞུགས་པ་དང་། བོད་ཀྱི་མཁས་པ་ཁྱད་པར་ཅན་མང་དུ་བཞུགས་ཏེ། སློབ་དཔོན་དང་མཁྱེན་པ་བསྡུར་བས། མཁྱེན་པའི་རྣམ་གྲངས་སློབ་དཔོན་བས་མང་པ་ཡང་མ་བྱུང་། སློབ་དཔོན་གྱི་ཕྱི་ནང་གི་ཆོས་བམ་པོ་བརྒྱ་ཙམ་འཆད་ཅིང་། ཟབ་ཅིང་གཏིང་འབྱིན་པར་མཛད། རྒྱ་བོད་ཀུན་གྱིས་ཐེ་ཚོམ་དང་གལ་འགག་སེལ་བར་མཛད། དེ་ཡང་དུས་རེ་ཞིག་ན་ལྤས་ཀྱི་རྒྱལ་པོ་ལྟོ་རེ། འབྲོམ་གྱིས་བསད་པའི་དུས་སུ། ཁོའི་བུ་ལྤས་ལོ་ཕོ་ལོ་ཆུང་གིས། ཕ་ཤ་བླངས་པས་འབྲོམ་གྲངས་མེད་པ་བསམ་ཡས་པས་བསད། ཆུ་ཁྲག་གིས་དམར་པོ་སོང་བ་ཙམ་བསད་ནས། ཚུར་ལ་ལོག་ཙམ་ན། རོ་ལ་ལ་མ་མ་ཐར་བ་གཅིག་བསང་སྐད། དེའི་ལས་ཀྱི་རྣམ་པར་སྨིན་པ་འཇིག་རྟེན་འདི་ན་སྨིན་པས་ཚ་བའི་ནད་ཀྱིས་གདུང་ཞིང་སྡུག་བསྔལ་སྟེ། གངས་གི་ཐོག་ན་ཉལ་ན་ཡང་གངས་ཞུས་པར་གྱུར་པ་དང་། ལོ་པོ་ལོ་ཆུང་གིས་མ་འབལ་ཟ་ངན་ལམ་མ་ཞེས་བྱ་བ་ཡོད་པ་དེ། སློབ་དཔོན་དཔལ་དབྱངས་ཀྱིི་ཡོན་བདག་མོ་ཡིན་པས། མ་དེས་སློབ་དཔོན་ལ་དམ་བསྐང་ཞུས་པ་ལ། སློབ་དཔོན་གྱིས་དོན་མ་གནང་ལ། ཞལ་གྱིས་གནང་བས། ཡོན་བདག་མོ་བཤགས་པ་མ་བྱས་ན་དམ་ཚིག་ཉམས། བཤགས་པ་ནི་བྱའོ། །ཡས་སྟག་ནི་ཤིན་ཏུ་དཀའ་འོ་གསུངས་པས། མོས་ཅི་འཆོལ་ཞུས་པ་ལ། ལུག་དཀར་མོ་བརྒྱ། ནག་མོ་བརྒྱ། ར་དཀར་མོ་བརྒྱ། ནག་མོ་བརྒྱ། བྱ་དཀར་མོ་བརྒྱ། ནག་མོ་བརྒྱ་ལ་སོགས་དགོས་པས་དཀའ་གསུངས་པས། ལྤས་ཀྱི་མ་ན་རེ། དེ་ཙམ་གནང་ན་རྙེད་ཞུས་ནས། བུའི་དྲུང་དུ་ཕྱིན་པས། བུས་སློབ་དཔོན་གྱིས་གནང་ངམ་གསུངས་པ་ལ། གནང་དང་གནང་སྟེ། ཡས་སྟག་མི་རྙེད་པ་མང་པོ་དགོས་པ་སྣང་བྱས་པས། བུས་ན་རེ་རྙེད་ནས་འོང་གི་གནང་བས་ཆོག་ཟེར་ནས། ཁོང་སློབ་དཔོན་ཁྱད་པར་ཅན་ཡིན་པས། ཡས་སྟག་ཞག་གསུམ་ནས་རྙེད་སྐད། དེ་ནས་སློབ་དཔོན་གྱིས་བཏགས་སམ་རྙེད་ནས། བསྐང་བ་མཛད་པས་ཁོ་རང་གི་ན་ཚ་དེ་ཉིད་དུ་སློབ་དཔོན་གྱི་བྱིན་རླབས་ཀྱི་ཞི་ནས། སློབ་དཔོན་ཉིད་ལ་དེའི་ཉམས་སྒྲིབ་བྱུང་ནས། ཞལ་དང་། ཤངས་དང་། སྤྱན་རྣམས་སུ་རྣག་ཁྲག་འཛག་པ་ལ། དེའི་དུས་སུ་སློབ་དཔོན་ལ་ལྟས་ངན་པ་ཉེ་ཚེ་བྱུང་ཡང་། སྙུང་ནད་དྲག་པོའི་ཁར་མ་བཏང་བས། རྒྱུད་སྡེ་མང་པོ་སྤྱན་དྲངས་ནས། དེའི་ཞལ་ནས་དམ་ཚིག་བཤགས་པ་བརྒྱ་རྩ་བརྒྱད་མཛད་པ་ལ། དེའི་ནང་ནས་མཆོག་ཏུ་གྱུར་པ་ཡེ་ཤེས་སྐུ་མཆོག་གི་བཤགས་པ་འདི་ཀུན་དུ་རིག་པའི་ལེའུ་བརྒྱད་པ་ལས་བྱུང་ནས་བཤགས་སོ། །དེ་ཡང་དང་པོ་ཤང་གི་ཁྲག་ཕྱག་གིས་འཛུབ་མོས་བཀག་ནས། ཡེ་ཤེས་སྐུ་མཆོག་གི་དབུ་གསུངས་པས་སེམས་ཀྱིས་རང་བཞིན་ནས་མར་སླེབ་ཙམ་ན། ཁྲག་དང་རྣག་ཆད་ནས། ཐུགས་རྗེའི་གདུང་འཚོབ་ན་མར་སླེབ་ཙམ་ན་སྐུ་སོར་ཆུད་དོ། །དེས་ན་སྔོན་བྱུང་། རྗེས་འཇུག་སློབ་དཔོན་དེ་གཉིས་ཀྱི་མཛད་དོ། །རྩ་བ་མཚན་གྱི་ནི། དོན་གྱིས་ངོ་བོ་དེ་ལ་བཏགས་པ་སྟེ། ཡེ་ཤེས་ནི་རིག་པའི་ཡེ་ཤེས་སོ། །སྐུ་མཆོག་གི་ཆོས་སྐུའོ། །དེ་ནི་དོན་དམ་པ་བརྗོད་དུ་མེད་པའི་བརྗོད་མེད་དོ། །ཡོ་ག་ཕྱོགས་ཀྱིས་དོན་ནི། རྣལ་འབྱོར་ནང་པར་གཏོགས་སོ། །གང་ཟག་དགོས་ཆེད་ཀྱི་དོན་ནི། རྣལ་འབྱོར་པས་ཉམས་ཆག་བསྐང་བའི་ཕྱིར་མཛད། བཤགས་ཅིང་བྱང་བར་མ་བྱས་ན། མངོན་པར་རྫོགས་པར་སངས་རྒྱས་པར་མི་འགྱུར་སྟེ། དེའི་དཔེ་ནི་སྣམ་བུ་སྣུམ་ཞེན་པ་ལ་ཚོས་མི་འགོས་པ་བཞིན་ནོ། །དེ་ལ་བཤགས་པ་བྱེད་པའི་དུས་སུ། དཔང་པོའི་བསྐྱེད་ལུགས་མང་དུ་སྣང་ཡང་། འདིར་ཆོས་རྗེ་རིན་པོ་ཆེའི་མན་ངག་པཾ་གསུམ་མ་ལྟར་ན། སྣང་སྲིད་ཞིང་ཁམས་རྣམ་པར་དག་པ་གཞལ་ཡས་ཁང་དུ་བསམ། དེའི་ནང་དུ་རང་ཉིད་ཡི་དམ་གྱིས་ལྷར་གསལ་བའི་ཐུགས་ཀར་ཡེ་ཤེས་སེམས་དཔའ། དེའི་ཐུགས་ཀར་སྣ་ཚོགས་རྡོ་རྗེའི་ལྟེ་བ་ལ་ཐུགས་སྲོག་གི་ཡིག་འབྲུས་མཚན་པ། དེ་ལ་འོད་ཟེར་པཾ་གསུམ་མདུན་གྱིས་ནམ་མཁར་འཕྲོས་པ་ལས། པདྨ་གསུམ་བརྩེགས་ཏུ་བསམ། ལྕགས་ཀྱུའི་ཕྱག་རྒྱ་བཅའ་ལ། ༀ་བཛྲ་ས་མན་ཛ་ཧཱུྃ་ཛ། ཅེས་ལན་གསུམ་བརྗོད་ལ་སེ་གོལ་གཡས་སུ་གདབ་པས་ཞི་བའི་ལྷ་ཚོགས། གཡོན་དུ་གདབ་པས་ཁྲོ་བོའི་ལྷ་ཚོགས། དབུས་སུ་གདབ་པས་སངས་རྒྱས་བྱང་སེམས་རིག་འཛིན་བརྒྱུད་པ་མཁའ་འགྲོ་ཆོས་སྐྱོང་དཔའ་བོའི་ལྷ་ཚོགས་སྤྱན་དྲངས་ལ། སྟེང་ཕྱོགས་ཀྱི་པདྨའི་གདན་ལ་ཆོས་སྐུ་རྒྱལ་བ་ཡུམ་ཆེན་མོ་ལ་ཕྱོགས་བཅུའི་སངས་རྒྱས་ཀྱིས་བསྐོར་བ། བར་གྱིས་པདྨའི་གདན་ལ་ལོངས་སྐུ་རྣམ་པར་སྣང་མཛད་ལ། ས་བཅུའི་བྱང་ཆུབ་སེམས་དཔས་བསྐོར་བ། འོག་གི་པདྨའི་གདན་ལ། སྤྲུལ་སྐུ་ཤཱཀྱ་ཐུབ་པ་ལ་ཉན་ཐོས་རང་རྒྱལ་ཚོགས་ཀྱིས་བསྐོར་བ། དེའི་མདུན་དུ་གཡས་སུ་ཞི་བ། གཡོན་དུ་ཁྲོ་བོ་ལ། ཕྱི་ནང་གི་ཆོས་སྐྱོང་གི་ཚོགས་ཀྱིས་བསྐོར་བ། གཡས་སུ་དེ་བཞིན་གཤེགས་པའི་སྐུའི་རྟེན་ལུགས་སུ་བླུག་པ། འབུར་དུ་བཏོད་པ། རིས་སུ་བྲིས་པ་ལ་སོགས་པ་ནམ་མཁའ་ཁྱབ་པར་བསྒོམ། རྒྱབ་ཕྱོགས་སུ་གསུང་གི་རྟེན་གསེར་གྱི་ཤོག་གུ་ལ་བཻཌཱུརྱ་ཞུན་མས་བྲིས་པའི་པོ་ཏི་གླེགས་བམ་ཨཱ་ལི་ཀཱ་ལིའི་ཆོས་སྒྲ་ཏི་རི་རི་སྒྲོགས་པར་བསམ། གཡོན་ཕྱོགས་སུ་ཐུགས་རྟེན་དང་། དགེ་འདུན་དཀོན་མཆོག །དུས་གསུམ་གྱི་ཕ་མ། མཁན་སློབ་རྣམས་བསྒོམ། དེ་རྣམས་ཀྱི་སྟེང་ཕྱོགས་ཀྱི་ནམ་མཁའ་ལ། རྩ་བའི་བླ་མ་ལ་བཀའ་རྒྱུད་ཀྱི་བླ་མའི་ཚོགས་ཀྱིས་བསྐོར་ནས་ནམ་མཁའ་ལ་སྤྲིན་ལྟར་གཏིབ་པར་བསྒོམ། དེ་རྣམས་ལ་ཇ་འདྲེན་གྱིས་ཚུལ་དུ་མཆོད་པ་ནི། ༀ་བཛྲ་ཨརྒྷཾ་པྲ་ཏིཙྪ་ཨ་ཧཱུྃ། དྷུ་པེ། པུཥྤེ། ཨ་ལོ་ཀེ། གྷནྡྷེ། ནེ་ཝཱི་ཏི། ཤཔྟ་ཨ་ཧཱུྃ་ཅེས་བརྗོད། ས་གཅོད་ཚིག་གིས་དོན་ལ་ལུགས་རྣམ་པ་གཉིས་ལས། དང་པོ་དཔལ་དབྱངས་ལྟར་ན་བཞི་སྟེ། དགོངས་སུ་གསོལ་བ་དང་། ཕྱག་འཚལ་བ་དང་། མཆོད་པ་འབུལ་བ་དང་། སྡིག་པ་བཤགས་པ་དངོས་སོ། །བཤགས་པ་དངོས་ལའང་། དོན་དམ་བཤགས་པ་དང་། ཀུན་རྫོབ་བཤགས་པ་གཉིས་ལས། དོན་དམ་བཤགས་པ་ལའང་། རྒྱུད་མ་ཧཱའི་ལྟ་བ་གསལ་བ་དང་། ལུང་ཨ་ནུའི་ལྟ་བ་གསལ་བ་དང་། མན་ངག་ཨ་ཏིའི་ལྟ་བ་གསལ་བ་སྟེ། དེ་ལྟར་དུ་ས་བཅད་པའོ། །གཉིས་པ་ཟུར་བཟང་པོ་དཔལ་བ་ལྟར་ན། དབུ་ནས་ཞབས་སུ་བསྡུས་པའི་དོན་ལ་གསུམ་སྟེ། བཤགས་པའི་རྒྱུ་དང་། གཉེན་པོའི་སྟོབས་དང་། ཅི་ལྟར་བཤགས་པའི་ཐབས་སོ། །བཤགས་པའི་རྒྱུ་ནི། ཀུན་གཞི་ལ་ཚེ་ཐོག་མ་མེད་པ་ནས་བག་ཆགས་ཀྱི་སྒྲིབ་པ་བསོགས་པ་རྣམས་བཤགས་དགོས་ལ། གཉེན་པོའི་སྟོབས་ནི། ལུས་ཀྱི་སྒོ་ནས་ཙོག་པུར་འདུག །ལོང་བུ་སྤྲད། རྐང་རྟིང་གཤིབ། ཐལ་མོ་སྦྱར་སྲིན་ལག་རྩེ་སྤྲད། བ་སྤུ་གཡོ་ཞིང་མཆི་མ་འཁྲུག་པ་དང་། ངག་གི་སྒོ་ནས་ཚིག་བཅད་དབྱངས་དང་བཅས་པས་ཉམས་པ་ཡོད་ན་ཚིག་ཏུ་བཤགས། ཡིད་ཀྱི་སྒོ་ནས་སེམས་གདུང་བ་དང་བཅས་པས་སྔར་བྱས་པའི་ལས་ལ་འགྱོད་པ་བྱེད། ཕྱིན་ཆད་མི་བྱེད་བར་བསྡམ་པའི་བློ་དང་ལྡན་པའི་སྒོ་ནས་བཤགས་སོ། །ཅི་ལྟར་བཤགས་པའི་ཐབས་ལ། ལྟ་བའི་སྒོ་ནས་ཁྱུང་ནམ་མཁའ་ལ་འཕུར་བ་ལྟར་དུ་བཤགས་པ་དང་། སྤྱོད་པའི་སྒོ་ནས་གླང་ཆེན་ཆུར་འཇུགས་པ་ལྟར་དུ་བཤགས་པ་དང་། ཏིང་ངེ་འཛིན་གྱི་སྒོ་ནས་སྤང་ལ་མེ་འཆེད་པ་ལྟར་དུ་བཤགས་དགོས་པ་ལ། བརྗོད་མེད་ཀྱིས་བཤགས་པ་འདི་ལ་ལྟ་སྤྱོད་སྒོམ་གསུམ་གྱི་བཤགས་པ་ཚངས་པ་ཡིན་པས། དེ་ལ་ཟེར། ལུས་ཀྱི་སྒོ་ནས་བཤགས་པ་དང་། ངག་གི་སྒོ་ནས་བཤགས་པ་དང་། ཡིད་ཀྱི་སྒོ་ནས་བཤགས་པའོ། །དང་པོ་ལ་ལུས་ཀྱི་སྒོ་ནས་བཤགས་པ་ལ་གསུམ་སྟེ། དང་པོ་ཐུགས་རྗེ་ཡེ་ཤེས་ཀྱི་སྒོ་ནས་སྤྱན་དྲངས་ཞིང་བཞུགས་སུ་གསོལ་བ་ནི། ༀ་ཡེ་ཤེས་ལྔ་ལྡན་གླུའི་ལོག་འདྲེན། ཡེ་ཤེས་ཀྱིས་མཆོག་ནི་ཅི་ལྟར་མཁྱེན་པའི་ཡེ་ཤེས་ཡིན་ལ། སྐུའི་མཆོག་ནི་ཆོས་སྐུ་ཡིན་སྟེ། དེ་གཉིས་ནི་རང་བཞིན་མ་བཅོས་པའི་དཀྱིལ་འཁོར་སྟེ། དེ་ནི་དཔེར་ན་ཟླ་བ་ཉ་རྒྱས་པ་ལ་གྲྭ་ཟུར་མེད་པ་ལྟ་བུར་གཟུང་འཛིན་གྱིས་སྤྲོས་པ་མི་མངའ་ཡང་ཇི་སྙེད་མཁྱེན་པའི་ཡེ་ཤེས་སམ་གཟུགས་སྐུའི་རང་རྩལ་འགག་མེད་དུ་ཐུགས་རྗེ་ཉི་མ་ཤར་བཞིན་དུ་གདུལ་བྱ་ཡོངས་ལ་སྙོམས་པར་གང་ལ་གང་འདུལ་གྱི་སྒོ་ནས་དོན་མཛད་པའི་ཕྱིར། བཤགས་པའི་དཔང་པོ་རྣམས་འདིར་གཤེགས་ལ་བདག་ལ་ཞལ་གྱིས་ཕྱོགས། སྤྱན་གྱིས་གཟིགས། ཐུགས་རྗེས་དགོངས་ཤིང་བདག་གི་སྡིག་སྒྲིབ་དག་ནས་དོན་མ་རྫོགས་ཀྱི་བར་དུ་བཞུགས་སུ་གསོལ་ཅེས་བརྟན་ཅིང་མི་འགྱུར་བར་བཞུགས་པར་བསམ། རང་གི་ཐུགས་ཀ་ནས་འོད་ཟེར་ཁ་དོག་ལྔ་ལྡན་བྱུང་པའི་རྩེ་མོ་གཉིས་སུ་གྱེས་པས་ཆ་གཅིག་ཡི་དམ་གྱི་ཐུགས་ཀར་ཐིམ། ཆ་གཅིག་རྩ་བའི་བླ་མའི་ཐུགས་ཀར་བསྟིམ་པའི་རྒྱུད་ལ་ཕར་ལ་བཤགས་ཚིག་མཆོད་པ་འབུལ། ཚུར་ལ་དངོས་གྲུབ་སྟེར་བར་བསམ། གཉིས་པ་སྐུ་གསུམ་ལ་ཕྱག་འཚལ་བ་ནི། ཧཱུྃ་ཆ་ལྔ་ཡེ་ཤེས་ལྔ་ལྡན་གླུའི་མགོ་འདྲེན། སྨྲ་བསམ་བརྗོད་དུ་མེད་ཅིང་ཤེས་རབ་རྣམ་ཀུན་མཆོག་ལྡན་གྱི་སྟོང་ཉིད་ཐབས་གང་གིས་ཀྱང་མི་གཡོ་ཞིང་ཆོས་ཐམས་ཅད་ཀྱི་འབྱུང་གཞིར་གྱུར་པར་དབྱིངས་ཆོས་སྐུ། དེ་ཉིད་འགག་མེད་དུ་འཁོར་འདས་གཉིས་ལ་བདེ་བ་ཆེན་པོར་ལོངས་སྤྱོད་ཀྱང་འཁོར་འདས་གཉིས་ཀྱི་དྲི་མས་མ་གོས་པས་ལོངས་སྤྱོད་རྫོགས་པའི་སྐུ་རིགས་ལྔའི་གཙོ་བོར་སྣང་ཞིང་། གདུལ་བྱ་སྣ་ཚོགས་པའི་དོན་དུ་ཐུགས་རྗེ་ཆེ་ཞིང་ཐབས་མཁས་པ་རྒྱ་ཆེར་སྟོན་པས་རོལ་པ་སྣ་ཚོགས་པའི་སྐུ་ཞི་ཁྲོ་རྣམས་སུ་སྣང་ནས་དོན་སྣ་ཚོགས་མཛད་པ་ནི་སྤྲུལ་པའི་སྐུ་སྟེ་དེ་གསུམ་ལ་ཕྱག་འཚལ་ལོ། །ཅེས་བརྗོད་དོ། །དེ་ལའང་རབ་འབྲིང་ཐ་མ་གསུམ་སྟེ། རབ་ལྟ་བའི་ཕྱག །འཁོར་གསུམ་མི་དམིགས་པའི་ངང་ནས་འཚལ་བས་ཚོགས་གཉིས་རྫོགས་པ་དང་། བློ་འབྲིང་གི་ལུས་རྡུལ་སྙེད་དུ་སྤྲུལ་ནས་འཚལ་བས། ལྷ་རྣམས་ཀྱི་སྐུ་གསུང་ཐུགས་ནས་འོད་ཟེར་བྱུང་བས་རང་གི་ལུས་ངག་ཡིད་གསུམ་གྱི་དྲི་མ་དག་པར་བསམ་མོ། །ཐ་མས་ལུས་ངག་ཡིད་གསུམ་གྱིས་དངོས་སུ་འཚལ་ཞིང་མོས་གུས་གདུང་བ་བསྐྱེད་དོ། །གསུམ་པ་ཕྱི་ནང་གསང་བའི་མཆོད་པ་འཕུལ་བ་ནི། དངོས་སུ་འབྱོར་པ་རྫས་བཤམས་པའི་མཆོད་པ་དང་། ཏིང་ངེ་འཛིན་གྱི་སྒོ་ནས་ཡིད་ཀྱི་མངོན་པར་སྤྲུལ་སྟེ། སྣང་སྲིད་ཐམས་ཅད་མཆོད་པའི་རྫས་སུ་མ་གྱུར་པ་མེད་ཅིང་ངན་པའི་མཆིད་མེད་པས་ཀུན་ཏུ་བཟང་པོའི་རྫས་ཉི་ཚེ་ལས་ཁྱད་པར་དུ་གྱུར་པས་བླ་ན་མེད་པའི་མཆོད་པ་ནམ་མཁའི་སྤྲིན་བཞིན་དུ་ཟད་མི་ཤེས་པའི་ཚོགས་ཀྱིས། ནམ་མཁའི་དབྱིངས་ཀྱིས་གར་ཁྱབ་པའི་ཏིང་ངེ་འཛིན་གྱིས་སྒོ་ནས་མཆོད་སྤྲིན་རྣམ་དག་རྒྱ་ཆེར་ཡོངས་སུ་བཀོད་དེ་བཀངས་ཏེ་འབུལ་ལོ། །དེ་ཡང་ཕྱིའི་མཆོད་པ། ནང་གི་མཆོད་པ། གསང་བའི་མཆོད་པ་དེ་ཁོ་ན་ཉིད་ཀྱི་མཆོད་པ་དེ་རྣམས་ཀྱི་གཏིང་དཔག་དཀའ་བས་རྒྱ་མཚོ་ལྟ་བུའི་མཆོད་དོ། །དེ་དག་གི་རྒྱས་བཤད་ནི་གོང་དུ་རྒྱུན་བཤགས་ཀྱིི་སྐབས་སུ་བསྟན་ཟིན་ཏོ། །གསང་བའི་མཆོད་པ་དངོས་ནི། ཆོས་ཀྱི་དབྱིངས་ཀུན་ཏུ་བཟང་པོ་ཡུམ་གྱི་བྷ་ག་གསང་བ་པདྨའི་གཞལ་ཡས་ཁང་གི་ནང་ལ། རྒྱལ་བ་རིགས་ལྔ་ཡབ་ཡུམ་བཅུའི་དཀྱིལ་འཁོར་ནི་ལྷ་དང་ལྷ་མོ་མ་ལུས་པ་དང་རབ་འབྱམས་སྤྲུལ་པ་དང་བཅས་པ་ཀུན་ཡེ་ནས་དུས་གསུམ་འདུ་འབྲལ་མེད་པའི་དོན་ཆོས་ཀྱི་དབྱིངས་སུ་རོ་གཅིག་པའི་ཕྱིར། ཡབ་ཡུམ་ཐབས་ཤེས་གཉིས་སུ་མེད་པའི་བྱང་ཆུབ་སེམས་ཀྱིས་དཀྱིལ་འཁོར་གྱིས་ལྷ་ཚོགས་རྣམས་མཉེས་པར་གྱུར་ཅིག་ཅེས་པའམ། ཡང་ན། ཆོས་རྗེ་རིན་པོ་ཆེའི་བཞེད་ཀྱིས། ལྷ་ཐམས་ཅད་ཀྱི་སྤྱི་བོར་ཀུན་བཟང་ཡབ་ཡུམ་གྱི་སྦྱོར་བ་མཛད་པས། བྱང་སེམས་ཆུ་རྒྱུན་གྱི་རང་གིས་སྤྱི་བོ་དང་། མགྲིན་པ་དང་། སྙིང་ཁ་དང་། ལྟེ་བ་རྣམས་སུ་བབ་པས། རིམ་པ་བཞིན་དུ་དགའ་བ་དང་། མཆོག་དགའ་དང་། དགའ་བྲལ་དང་། ལྷན་ཅིག་སྐྱེས་པའི་དགའ་བ་རྣམས་ཉམས་སུ་མྱོང་བ་ནི། གསང་མཆོད་དམ། རྨད་བྱུང་གཏོར་མ་ཞེས་ཀྱང་ཟེར་རོ། །དེ་ལྟར་སྐྱེས་ན་གསང་བའི་མཆོད་པའོ། །ཡང་ན། ཐུགས་ཀ་ནས་འོད་ཟེར་འཕྲོས་པས་སངས་རྒྱས་བྱང་སེམས་རྣམས་ལ་ཕོག །དེ་རྣམས་ཀྱི་ཐུགས་གཉིས་སུ་མེད་པའི་ཟག་མེད་ཀྱི་བདུད་རྩི་སྤྱན་དྲངས་ནས་སྤྱི་གཙུག་ཏུ་བབ་རྡོ་རྗེའི་ལམ་དུ་བྱུང་། ཡུམ་གྱི་བྷ་གར་བདེ་བར་གཤེགས་པ་རྣམས་བསམ་ནས་མཆོད། ཅེས་པ་དང་། ཡང་ན་ཕྱི་མཆོད་རྣམ་ལྔ། ནང་མཆོད་ལྷ་མོ་བཅུ་དྲུག་དང་། སྨན་རཀ་གཏོར་གསུམ། གསང་མཆོད་དུག་ལྔ་དུག་གསུམ་གྱིས་མཆོད་པར་འདོད་པ་ཡང་སྣང་། འབྲེལ་མི་འབྲེལ་བརྟག་པར་བྱའོ། །སེམས་ཀྱི་སྒོ་ནས་བཤགས་པ་ལ་གསུམ་སྟེ། སེམས་བསྐྱེད་པ་དང་། ལྟ་བ་གསལ་བ་དང་། དགོངས་སུ་གསོལ་བའོ། །དང་པོ་སེམས་བསྐྱེད་པ་ནི། ཆོས་ཐམས་ཅད་ཀྱི་རྩ་བ་རང་གིས་སེམས་སུ་འདུས་ལ། སེམས་ཀྱི་རང་བཞིན་ནི་ཆོས་དབྱིངས་སྟེ་ནམ་མཁའ་ཆེན་པོ་ལྟར་ཐམས་ཅད་ལ་ཁྱབ་ཅིང་ཆོས་དབྱིངས་བྱང་ཆུབ་ཀྱི་སེམས་སྟེ། དེ་ཉིད་སྣ་ཚོགས་སུ་ཤར་ཡང་ཤར་དུས་གཟུང་འཛིན་གྱིས་དྲི་མས་གོས་མ་མྱོང་བས་རྣམ་པར་དག་ཅིང་ཡེ་གདོད་མ་ནས་འོད་གསལ་བའི་རང་བཞིན་ཡིན་ཞིང་། དེ་ལྟ་བུའི་རྣལ་མ་ལ་རང་གིས་བློ་འབྱོར་པར་འདོད་ཅིང་། དེ་ལྟར་སྣང་སྟོང་མཉམ་པ་ཉིད་སྨྲ་བའི་ཚིག་དང་བསམ་པའི་བློ་ལས་འདས་པའི་ཆོས་དབྱིངས་མཉམ་ཉིད་བྱང་ཆུབ་སེམས་ལ་དུས་རྟག་ཏུ་འདུད་པ་ནི་སེམས་བསྐྱེད་པའོ། །གཉིས་པ་ལྟ་བ་གསལ་བ་ལ་གསུམ་སྟེ། དང་པོ་རྒྱུད་མ་ཧཱའི་ལྟ་བ་གསལ་བ་ནི། ཡེ་ཤེས་ཀུན་བཟང་རོལ་པ་འགག་མེད་དུ་ཤར་བའི་རྩལ་ཤེས་བྱའི་ཆོས་ཐམས་ཅད་མ་འདྲེས་པར་གསལ། གསལ་དུས་རང་སྣང་གཉིས་མེད་དུ་ཡོངས་སུ་རྫོགས་ཅིང་། དེའི་གང་དུ་གཞན་མེད་པས་ཆེན་པོ་དེ་ཉིད་ཡེ་ནས་འཁོར་འདས་ཀུན་ལ་བདལ་ཞིང་ཁྱབ་པའི་ཕྱིར། ཕྱི་ཡུམ་ནང་ཡབ་གསང་བ་ཡབ་ཡུམ་ཁ་སྦྱོར་དུ་བཀོད་པའི་དཀྱིལ་འཁོར་འདིར་སྣང་བ་རྣམས་ནི་ལོག་ན་ཡོད་པ་མ་ཡིན་ཏེ། སྣང་སྲིད་ཕྱི་ནང་གིས་ཆོས་རྣམས་ཡེ་ནས་རྣམ་པར་དག་པ་ལྷ་དང་ལྷ་མོའི་ཚོགས་སུ་སྣང་བ་ཡིན་ཏེ། འབྱུང་བ་ལྔ་ཡུམ་ལྔ་ཡིན་པ་དང་། འབྱུང་འགྱུར་ཕུང་པོ་ལྔ་ཡབ་ལྔ་སྟེ། དེ་ལྟར་ཡབ་ཡུམ་ལྷུན་གྲུབ་དུ་རྫོགས་ཤིང་རྣམ་པར་དག་པ་ནི་བསྐྱེད་པ་མ་ཧཱ་ཡོ་གའི་ལྟ་བའོ། །གཉིས་པ་ལུང་ཨཱ་ནུ་ཡོ་གའི་ལྟ་བ་གསལ་བ་ནི། དེ་ལྟར་རོལ་པ་འགག་མེད་དུ་ཤར་དུས་ཐབས་ཤེས་གཉིས་མེད་ཀྱིས་བྱང་སེམས་དེ་ཀུན་གྱིས་ཐུན་མོང་གི་སྤྱོད་ཡུལ་དུ་མ་གྱུར་པས་གསང་ཆེན་ཐིག་ལེ་སྐུ་ཉམས་སུ་གཏར་བས་རབ་དགྱེས་བདེ་སྟོང་འཛིན་པ་ལ་མི་འདའ་བས་གཟུང་ཆེན་ཡུམ་ལྔའི་བདག་ཉིད་མ་དབྱིངས་ཀུན་ཏུ་བཟང་མོའི་མཁའ་དབྱིངས་བྷ་ག་ཀློང་ཡངས་པདྨོ་རང་འཁྲུང་དུ་འཁྱིལ་བའི་གཞལ་ཡས་ཆོས་ཀྱི་དབྱིངས་ལས་མ་གཡོས་པ་ནི་རྫོགས་པ་ཨཱ་ནུའི་ལྟ་བའོ། །གསུམ་པ་མན་ངག་ཨ་ཏིའི་ལྟ་བ་གསལ་བ་ནི། དེ་ལྟར་དབྱིངས་དང་ཡེ་ཤེས་གཉིས་མེད་མི་འགྱུར་བདལ་ཁྱབ་ཐིག་ལེ་ཆེན་པོའི་རང་བཞིན་གྱིས་འོད་གསལ་ཞིང་། ཡེ་ནས་དེ་ལྟར་གནས་པས། སངས་རྒྱས་སྒམ་པོས་མ་མཛད། སེམས་ཅན་སྒྲིབ་པོས་མ་བཅོས་གཟུང་འཛིན་གྱི་སྤྲོས་པ་མེད་ཅིང་། བྱང་བ་སྟོང་པ་ཆུབ་པ་སྣང་བ་སྙིང་པོ་དབྱེར་མེད་པ་ནི་ཆོས་སྐུ་གསང་བ་ཆེན་པོའི་སྐུའོ། །དེ་ཉིད་ཅིར་ཡང་འགག་མེད་དུ་སྣང་བ་ལ་ཟུག་རྔུ་མི་མངའ་བས་བདེ་བ་ཆེན་པོ། འགྱུར་བ་མེད་པས་གཡུང་དྲུང་ཆོས་ཀྱི་སྐུ་དང་། ལྷ་ཞི་ཁྲོའི་ཚོགས་སུ་སྣང་ཞིང་སྣང་དུས་ཆོས་སྐུ་ལས་མ་གཡོས་ཏེ། གཉིས་མེད་དུ་རྫོགས་པ་ཆེན་པོའི་ཨ་ཏིའི་ལྟ་བའོ། །གསུམ་པ་དགོངས་སུ་གསོལ་བ་ལ་གསུམ་ལས་ཞི་བའི་ལྷ་ཚོགས་ལ་དགོངས་སུ་གསོལ་བ་ནི། དེ་ལྟར་ཆོས་ཀྱི་དབྱིངས་ཀུན་ཏུ་བཟང་མོ་དང་། རིག་པའི་ཡེ་ཤེས་ཀུན་བཟང་ཡབ་ཡུམ་དུས་གསུམ་འདུ་འབྲལ་མེད་པ་གསང་པ་ཆེན་པོའི་དཀྱིལ་འཁོར་དུ། དཀྱིལ་འཁོར་ཐམས་ཅད་ཀྱིས་བདག་ཉིད་ཆེན་མོ་ཀུན་བཟང་ཡབ་ཡུམ། རྡོར་སེམས་ལ་སོགས་རིགས་ལྔ་ཡབ་ཡུམ་བཅུ་དང་། སེམས་དཔའ་བརྒྱད། སེམས་མ་བརྒྱད་སྟེ་བྱང་ཆུབ་སེམས་དཔའ་ལྕམ་དྲལ་ཡབ་ཡུམ་བཅུ་དྲུག་དང་། སྒོ་སྲུང་ཁྲོ་བོ་བཞི་དང་ཁྲོ་མོ་བཞིའི་འཁོར་དང་། ཚོགས་ནི་ཐུབ་དྲུག་དང་། ཞི་བའི་ལྷག་སྡུད་མཁའ་འགྲོ་མ་རྣམས་སོ། །ཁྲོ་བོ་ལྷ་ཚོགས་ལ་དགོངས་སུ་གསོལ་བ་ནི། རྡོ་རྗེ་ནི་ཡེ་ཤེས་ཀྱིས་ལྷ་མོའི་ཚོགས་ཀྱི་རྗེ་བོ། མ་མོ་དང་མཁའ་འགྲོ་མའི་ཚོགས་ཀྱི་བདག་པོ་དཔལ་ཆེན་བཛྲ་ཧེ་རུ་ཀ་ལ་སོགས་པའི་རིགས་ལྔ་དཔལ་ཆེན་ཁྲོ་རྒྱལ་ཡབ་ཡུམ་བཅུ་དང་། མཁའ་འགྲོ་ཀོའུ་རཱི་ལ་སོགས་གནས་མ་བརྒྱད་དང་། སིངྷ་ལ་སོགས་ཡུལ་གྱི་ཕྲ་མེན་མ་བརྒྱད་དང་། རྟ་གདོང་ལ་སོགས་ཕྱག་རྒྱ་སྒོ་མ་བཞི་དང་། ཡེ་ཤེས་སྤྲུལ་པའི་ཚོགས་ཆེན་ཁྲོ་བོ་བཅུ། ཟ་བྱེད་གསོད་བྱེད་མང་པོ་དང་། ཤར་ནས་མ་ལྟར་བྱམས་ཤིང་། ལྷོ་ནས་སྲིང་ལྟར་གདུང་བ་ལ་སོགས་པའི་སྒྲས་ནུབ་ནས་གཟུང་ལྟར་བརྩེ་བ། བྱང་ནས་བྲན་ལྟར་མྱུར་བ་སྟེ་དབང་ཕྱུག་ཉེར་བརྒྱད་དང་། མཁའ་འགྲོ་རིག་འཛིན་ལྷ་ཚོགས་ལ་དགོངས་སུ་གསོལ་བ་ནི། གཞན་ཡང་ལེགས་ཉེས་ཀྱིས་ལྟང་འཛིན་ཅིང་དམ་ཚིག་གི་རྗེས་གཅོད་པ། དམ་ཉམས་ཀྱི་གཤེད་མ། ཕྱིའི་ལས་ལ་གྲུབ་པ་མོ་ལྷག་མ་ལ་དབང་བ་རྣམས་དང་། ནང་གི་མཁའ་འགྲོ་ཚོགས་གཏོར་ལ་དབང་བ་རྣམས་དང་། གསང་བའི་རྣལ་འབྱོར་མ་ལྟ་སྒོམ་ལ་དབང་བ་རྣམས་དང་། ཚོགས་ནི་རིག་འཛིན་གྱིས་སློབ་དཔོན་གྱིས་ཚོགས་དང་བཅས་པ་བཤགས་པའི་དཔང་པོར་གྱུར་པ་རྡོ་རྗེ་ནི་ཡེ་ཤེས་ཀྱི་ལྷ་ཚོགས། དམ་ཅན་མ་ཚོགས་མཁའ་འགྲོའི་རིག་འཛིན་རྣམས་དགོངས་སུ་གསོལ་ཅེས་བརྗོད་པས། ལྷ་ཚོགས་རྣམས་ཀྱི་བདག་ལ་ཐུགས་ཀྱི་དགོངས། ཞལ་གྱིས་ཕྱོགས། སྤྱན་གྱིས་གཟིགས་པར་བསམ། ངག་གི་སྒོ་ནས་བཤགས་པ་ལ་དྲུག་སྟེ། རྣལ་འབྱོར་པས་དམ་ཚིག་ཅི་ལྟར་མནོས་པ་ནི། རྒྱལ་བའི་གདུང་འཚོབ་ཅིང་བསྟན་པ་རྗེས་སུ་འཛིན་པའི་གསང་མཚན་སྟེ། རྡོ་རྗེ་ཆྒཻ་མོ་བདག་གིས་འགྲོ་བའི་དོན་བྱ་བའི་ཕྱིར་སྨོན་འཇུག་གིས་བྱང་ཆུབ་མཆོག་ཏུ་སེམས་བསྐྱེད་དེ། བླ་ན་མེད་པའི་འབྲས་བུ་བྱང་ཆུབ་སངས་རྒྱས་ཀྱི་གོ་འཕང་ཐོབ་པའི་ཐབས་ལ་ལམ་བགྲོད་པའི་ཕྱིར། རྒྱལ་བའི་བསྟན་པ་རྒྱ་མཚོ་དང་འདྲ་བའི་ནང་ནས་སོ་སོར་ཐར་པའི་འདུལ་ཁྲིམས། བྱང་ཆུབ་སེམས་དཔའི་སྡོམ་པ་དང་། རྒྱལ་བའི་སྐུ་གསུང་ཐུགས་དང་བདག་གི་ལུས་ངག་ཡིད་གསུམ་མཉམ་པར་སྦྱོར་བར་བྱེད་པ་ནི་སྡོམ་པའི་མཆོག་སྟེ་གསང་སྔགས་རྡོ་རྗེ་ཐེག་པའི་བསྲུང་བྱ་འདའ་བར་དཀའ་བའི་དམ་ཚིག་ཚེ་གཏན་གྱི་གཉེར་བྱ་ལ་ཐེག་པ་འོག་མ་དང་ཐུན་མོང་སྤྱིའི་བསྲུང་བྱ་རྣམས་དང་། ཁྱད་པར་གསང་སྔགས་བླ་མེད་ཀྱི་བསྲུང་བྱ་རྩ་བ་དང་ཡན་ལག་རྣམས་དང་། ལྷག་པའི་དམ་ཚིག་ལ་མདོ་བཞི་བརྗོད་བྱའི་དོན་སམ། མཉམ་པའི་དམ་ཚིག་རྣམས་ལས། སྔ་ཕྱིས་དབང་ཞུ་བའི་དུས་སུ་མནོས་ཤིང་དམ་ཚིག་འབོག་པ་རྣམས་ཀྱི་དོན་ཉམས་སུ་བླང་གཉེར་དུ་མ་བགྱིས་ནས་དམའ་འོ་ནི་ཉམས་སོ་འཚལ་བ་སྟེ། ཞོར་ལ་ཉམས་ཤོར་བ་མ་གཏོགས་པ། གཏན་ནས་བསྲུང་བྱ་རྣམས་ལ་རིང་དུ་མི་གཏོང་ཞིང་དོན་དང་འགལ་བའི་འདའ་བར་མི་བགྱིད་ཅིང་བསྲུང་བྱའི་བསྲུང་མཚམས་ཀྱིས་དོན་མི་ཤེས་ནས། དེ་ལ་འགལ་ཞིང་མི་བསྲུང་བའི་སེམས་ཀྱིས་ལྡོག་སེམས་མ་མཆིས་ཀྱང་། ལེ་ལོ་དང་སྙོམ་ལས་ཀྱིས་དབང་དུ་བཏང་བ་ནི། མི་བསྲུང་བ་བསམ་པ་མིན་ཀྱང་། གདོད་བྱ་ད་རུང་ལོང་ཡོད་སྙམ་དུ་སེམས་པ་ལེ་ལོ་ཡི་དབང་དུ་སོང་བས། ལྟ་སྒོམ་ཀློང་དུ་མ་གྱུར་པས་རྩལ་ཤུགས་ཆུང་བ་དང་། ཡང་ན་ལྟ་སྒོམ་ཀློང་དུ་མ་གྱུར་པས་སྤྱོད་པའི་རྩལ་ཤུགས་ཆུང་བ་དང་། ཚུལ་བཞིན་དུ་མ་བསྒྲུབ་པའི་སྐྱོན་ནི། དྲན་པ་དང་ཤེས་བཞིན་གྱི་བྱ་ར་བ་དང་མི་ལྡན་པའི་སྤྱོད་པ་བག་མེད་པའི་དབང་དུ་གྱུར་སྟེ། བསྐྱེད་རྫོགས་ཀྱི་སྒོམ་ལ་མི་བརྩོན་ཞིང་། བསྙེན་སྒྲུབ་རྣམ་བཞི་ཡལ་བར་འདོར་བ་ལ་སོགས་ཉེས་པའི་ཚོགས་ཚོར་བ་དང་མ་ཚོར་བ་དང་མ་རིག་པའི་དབང་གི་ནི། སྟོན་པ་རྒྱལ་བས་གསུང་བའི་དཀའ་དང་། དམ་ཚིག་ལས་འགལ་བར་གྱུར་ཏེ། བདག་གི་ཆགས་ཉམས་བྱས་པ་རྣམས་དང་། གཞན་གྱི་ཉམས་གྲིབ་རང་ལ་གནོད་པ་ནི། རྣལ་འབྱོར་པ་གང་ཞིག་དམ་ཚིག་ཉམས་པ་ཅན་དང་། སྐད་ཅིག་ཙམ་ཡང་འཕྲད་པ་དང་། གཏམ་སྨྲ་བར་མི་བྱ་ཞིང་། རྒྱལ་བའི་བཀའ་ལས་བྱུང་བ་དེ་ལྟར་མ་ལྕོག་སྟེ། གསང་སྔགས་ཀྱི་སྒོ་འཚལ་བས། ཉམས་པ་ཅན་ཡིན་མིན་དབྱེ་གསལ་དཀའ་བ་དང་། མངོན་ཤེས་ཆུང་བས་སྐྱོན་ཅན་རྣམས་མ་རྟོགས་པ་སྟེ། དམ་ཚིག་ཉམས་པ་ཅན་དང་། ཚོགས་ལྷན་ལ་འདྲེས་པ་དང་། ཉམས་པ་ཅན་གྱི་བསྐང་བ་བྱེད་པ་དང་། ཉམས་པ་ཅན་དང་སྣོད་མེད་པ་རྣམས་ལ་ཆོས་བཤད་པ་དང་། དམ་ཚིག་ཉམས་པ་ཅན་ལས་མི་འཛེམ་པས་ཉམས་པའི་སྐྱོན་ལ་སོགས་པ་དང་། གཞན་ཡང་དམ་ཚིག་ཉམས་པ་ཅན་དང་འགྲོགས་ཤིང་བསྡད་ན། དམ་ཚིག་ཉམས་པ་ཅན་དེ་དག་གིས་ཉམས་སྒྲིབ་གྱིས་སྐྱོན་གྱིས་བདག་ལ་གོས་པར་གྱུར་ཏོ་ཚལ་རྣམས་ཀྱི། ཉམས་སྒྲིག་བཤགས་ཅིང་ཐུགས་རྗེའི་བཟུང་བར་ཞུ་བ་ནི། ཉམས་སྒྲིབ་དེས་བདག་གིས་ཚེ་འདིའི་རྐྱེན་དང་ཡུན་གྱི་སྒྲིབ་པར་གྱུར་པ་རྣམས། རང་རབ་ཏུ་གནོང་ཞིང་འགྱོད་པའི་སེམས་ཀྱིས་སྡིག་པ་གང་བྱས་ངག་ཏུ་མཐོལ་ཞིང་བཤགས་ན་དཔང་པོ་ཁྱེད་རྣམས་ཀྱི་བྱམས་པའི་ཐུགས་རྗེས་བདག་ལ་ཐུགས་རྗེ་དགོངས་ནས་ཀྱང་། བཤགས་བྱའི་ཡུལ་དང་བཤགས་བྱེད་ཀྱི་མཁན་པོ་གཉིས་སུ་མེད་པའི་ཆོས་ཉིད་མི་འགྱུར་བའི་དབྱིངས་ལ་བདག་བཀོད་དེ། དཔང་པོ་ཁྱེད་རྣམས་ཀྱི་ཐུགས་ཀྱི་དགོངས་པ་ཆོས་དབྱིངས་མི་དམིགས་བཏང་སྙོམས་ཆེན་པོའི་ངང་དུ་བཞུགས་ནས་ཀྱང་། བདག་ལ་བཤགས་བྱ་བཤགས་བྱེད་གཉིས་མེད་དོན་གྱིས་དམ་ཚིག་ཆག་ཉམས་ཐམས་ཅད་ཚངས་པར་རྩལ་དུ་གསོལ། དྲུག་པ་ཀུན་རྫོབ་ཀྱི་འགལ་འཁྲུལ་དོན་དམ་དུ་བཤགས་པ་ནི། དོན་དམ་པར་བཤགས་པ་བྱ་བའི་ཡུལ་དང་བཤགས་པ་བྱེད་པའི་མཁན་པོ་གཉིས་སུ་མེད་པའི་གཟུང་འཛིན་གྱིས་སྤྲོས་པ་ལས་འདས་པ་ལ། ཉམས་ཆག་གི་རྣམ་རྟོག་གང་ཡང་རང་རྒྱུད་དུ་དམིགས་པར་མི་འགྱུར་ཏེ་སྟོང་ལ། ཀུན་རྫོབ་ཏུ་དངོས་པོའི་ཆོས་ཀུན་སྣང་རང་རྒྱུད་དུ་མ་གྲུབ་པས་སྒྱུ་མ་ཙམ་གྱིས་ངོ་བོ་ལ་སྣང་བའི་དབང་གིས་ན། སྡིག་པ་ཅི་བགྱིས་ཐམས་ཅད་རང་གནོད་ནས་རང་སྣང་གཉིས་མེད་ཀྱི་ངང་དུ་བཟོད་པར་གསོལ་བ་ནི། ཡེ་ཤེས་ཀྱི་ལྷ་རྣམས་ལ་བཤགས་པའོ། །དེ་ལྟར་ཡེ་ཤེས་ཀྱི་ལྷ་ལ་རྟོག་པ་མི་མངའ་ཡང་། དེའི་འཁོར་ན་གནས་པའི་ཡེ་ཤེས་དང་འཇིག་རྟེན་ལས་གྲུབ་པ་རྣམས་ལ་ཆག་ཉམས་གང་བྱས་པ་ངག་ཏུ་མཐོལ་ལོ་བཤགས་སོ་དམ་ཅན་བཀའ་གཉན་གྱི་ཚོགས། སེམས་གནོད་ངོ་འགྱོད་དོ་དམ་ཅན་བཀའ་གཉན་གྱི་ཚོགས་ཉམས་ཆག་སྡིག་སྒྲིབ་སྦྱང་ང་བོས་ལ་ལོ་དམ་ཅན་བཀའ་གཉན་གྱི་ཚོགས་ཉེས་བྱས་ཀྱི་ནོངས་པ་བདག་ལ་མཆིས་ན་མི་འཆབ་སྟེ་མི་གསང་ནས་བཤགས་པས་བཟོད་པར་གསོལ། བཟོད་པར་ཞལ་གྱིས་བཞེས་ནས་བདག་ལ་རྩ་བ་དང་ཡན་ལག་གི་དམ་ཚིག་རྣམས་ཚངས་པར་སྩལ་དུ་གསོལ། ཅེས་བརྗོད་པས་མདུན་གྱི་དཔང་པོའི་ལྷ་རྣམས་ཀྱི། ཞལ་འཛུམ་པའི་མདང་ཕྱུང་ནས། སྡིག་པ་ཆག་ཉམས་དག་པའི་གནང་བ་བྱིན་པར་བསམ་ལ། བྱིན་བསྡུ་བ་ནི། ཧཱུྃ་ཧཱུྃ་འཕགས་མཆོག་ཐུགས་རྗེ་ཅན་གྱིས་དུས་ལ་བབ། །ཁྱད་པར་སྟོན་པའི་དུས་ལ་བབ། །བྱིན་ཆེན་དབབ་པའི་དུས་ལ་བབ། །དབང་ཆེན་བསྐུར་བའི་དུས་ལ་བབ། །ཅེས་བརྗོད་པས་དཔང་པོའི་ལྷ་གཞན་རྣམས་ཡི་དམ་ལ་བསྡུ། ༀ་མཐུ་ཆེན་མཐུ་སྩོལ་བཅོམ་ལྡན་འདས། །བྱིན་ཆེན་བྱིན་ཕོབ་བཅོམ་ལྡན་འདས། །དབང་ཆེན་དབང་བསྐུར་བཅོམ་ལྡན་འདས། །དངོས་གྲུབ་མཆོག་སྩོལ་བཅོམ་ལྡན་འདས། །བདག་གི་ལས་ཀྱི་འབྲས་བུ་མཆིས་པར་མཛོད། །ཅེས་བརྗོད་པས་ཡི་དམ་ལྷ་ཚོགས་སྤྱི་བོར་བྱོན་ནས་མར་རང་ལ་བསྟིམ། རྩ་གནས་བཞིའི་རྩ་རྣམས་གང་ནས་བགེགས་དང་ལོག་འདྲེན་ཐམས་ཅད་ཀྱིས་མི་ཚུགས་པའམ། ཡང་ན་དབང་བཞིའི་དོན་རྟོགས་པས་ཕྱག་རྒྱ་ཆེན་པོའི་ངང་དུ་འབད་མེད་ལྷུན་གྲུབ་ཏུ་གནས་པར་བྱའོ། །ལྷག་ཆད་ཁ་བསྐོང་ལ་ཡི་གེ་བརྒྱ་པ་བརྗོད་དོ། །དེ་ནས་དངོས་གཞི་ཡི་དམ་ཞི་ཁྲོ་གང་ཡིན་ལ་འཇུག་པར་བྱའོ། །འདིའི་མཚན་ནི། རྒྱུན་བཤགས་གི་ས་ཊིཀྐ་ཚོགས་གཉིས་ཕུན་ཚོགས། ཞི་ཁྲོ་བཤགས་ཆུང་གི་ཊིཀྐ་སྒྲིབ་གཉིས་དག་བྱེད། མཎྜལ་རིམ་གསུམ་བྱ་ཊིཀྐ་བཀོད་པའི་འོད་ཟེར། ཛྭ་ལ་བཛྲའི་ཊིཀྐ་བསྲུང་བ་རྡོ་རྗེའི་ཕུབ་ཆེན། བསང་ཆུ་བྱིན་རླབས་ཊིཀྐ་དག་བྱེད་ཁྲུས་ཀྱི་རྫིང་བུ། སྨན་བྱིན་རླབས་ཊིཀྐ་དུག་ལྔ་ནད་སེལ་སྨན་མཆོག་རྒྱལ་པོ། རཀྟ་བྱིན་རླབས་ཊིཀྐ་འདོད་ཆགས་དག་བྱེད་ཁྲག་གི་རྒྱ་མཚོ། གཏོར་མ་བྱིན་རླབས་ཊིཀྐ་གཏི་མུག་དག་བྱེད་བདུད་རྩིའི་མཚོ་ཆེན། ཡེ་ཤེས་སྐུ་མཆོག་ཊིཀྐ་ཆག་ཉམས་སྐོང་བའི་རྒྱལ་པོ། དེ་རྣམས་ཕྱོགས་གཅིག་ཏུ་དྲིལ་བས། སྤྱིར་གང་ལའང་སྦྱར་དུ་བཏུབ་ཀྱང་། བྱེ་བྲག་ཏུ་ཞི་ཁྲོ་གཉིས་ལ་སོགས་སྒྱུ་འཕྲུལ་གྱི་དཀྱིལ་ཆོག་ཐ་དག་གིས་སྔོན་འགྲོའི་འགྲེལ་པ་དགོས་འདོད་འབྱུང་བས་རིན་ཆེན་མཛེས་པའི་རྒྱན་དུ་གྱུར་པ་ཕྲེང་མཛེས་ཞེས་བྱ་བ་འདི་ཀཿཐོག་ཡང་དགོན་དུ་གསང་སྔགས་རྡོ་རྗེ་འཛིན་པ་ཡེ་ཤེས་རྒྱལ་མཚན་གྱིས་སྦྱར་བ་རེ་ཞིག་རྫོགས་སོ། །ཕུར་པ་ལ་སོགས་པ་རྣམས་ནི་རང་རང་གི་གཞུང་དུ་ཤེས་པར་བྱའོ། །རྨད་བྱུང་ལེགས་བཤད་གསུང་གི་བདུད་རྩི་ཀུན། །བསྟུས་པའི་བརྒྱད་ལྡན་མེ་ཏོག་བཀྲམ་བཅས་མཚོར། །བུང་བ་ངང་བའི་ཚོགས་བཅས་རྩེ་བྱས་ནས། །ཁ་དོག་ཚིག་ལ་མ་ཞེན་དོན་རྟོགས་མཛོད། །འདི་བརྩམ་དགེ་དང་དགེ་བ་གཞན་དག་རྣམས། །རྣམ་པ་གཅིག་བསྡུས་བསྡུས་པའི་འགྲོ་བ་ཀུན། །ཀུན་ཀྱང་མཚན་འཛིན་འཛིན་པ་ལས་གྲོལ་ཞིང་། །ཞིང་རྣམས་ཀུན་ཁྱབ་ཁྱབ་པའི་སངས་རྒྱས་ཤོག །བཀྲ་ཤིས་པར་གྱུར་ཅིག། །།