བཅོམ་ལྡན་འདས་རྡོ་རྗེ་ཕུར་པ་ལྷ་ནག་གི་དཀྱིལ་འཁོར་མངོན་རྟོགས་འགྲེལ་ཉི་མའི་འོད་ཟེར། མཁས་གྲུབ་ཡེ་ཤེས་རྒྱལ་མཚན།

བཅོམ་ལྡན་འདས་རྡོ་རྗེ་ཕུར་པ་ལྷ་ནག་གི་དཀྱིལ་འཁོར་མངོན་རྟོགས་འགྲེལ་ཉི་མའི་འོད་ཟེར་ཅེས་པ་བཞུགས། བླ་མ་དང་ལྷག་པའི་ལྷ་ལ་ཕྱག་འཚལ་ལོ། །མཉམ་ཉིད་ཆོས་སྐུ་གསང་བའི་སྐུ། །ལོངས་སྤྱོད་རྫོགས་སྐུ་སྤྲུལ་པའི་སྐུ། །སྐུ་ལྔའི་བདག་ཉིད་བདེར་གཤེགས་ཉིད། །དཔལ་ཆེན་ཧེ་རུ་ཀ་ལ་འདུད། །ཕྲིན་ལས་ཆོག་བསྒྲིགས་ཕུར་པའི་དོན། །ཁོག་དབུབ་མདོ་ཙམ་བྲི་བར་བྱ། །དེ་ལ་བཀའ་རྒྱུད་ཐམས་ཅད་ལ། །ཕུན་སུམ་ཚོགས་པ་ལྔའི་འཆད། །ལུང་ནི་མདོག་ཅོད་བདུན་གྱི་འཆད། །བསྟན་ཆོས་རྩིས་མགོ་ལྔའི་འཆད། །མན་ངག་དགོས་དོན་ལྔ་ཡི་འཆད། །འདི་ནི་ལུང་ལ་མ་བསྟེན་པའི། །མན་ངག་ཡིན་ཕྱིར་དགོས་དོན་ལྔ། །སློབ་དཔོན་ལོ་རྒྱུས་དོན་དང་ནི། །རྩ་བ་མཚན་དང་ཡོ་ག་ཕྱོགས། །གདམས་ངག་དགོས་ཆེད་ས་གཅོད་ཚིག །དང་པོ་ལོ་རྒྱུས་གླེང་བཞི་ནི། །ལྷ་ལ་གྲགས་དང་མི་ལ་གྲགས། །མི་དང་མི་མིན་ཐུན་མོང་གྲགས། །རྣམ་པ་གསུམ་དུ་བཤད་པ་ལས། །དང་པོ་ལྷ་ལ་གྲགས་པ་ནི། །སྟོན་པ་སྒྲོལ་བྱེད་རྒྱལ་པོ་དེས། །འོག་མིན་བླ་མེད་གནས་མཆོག་ཏུ། །རིན་ཆེན་དུར་ཁྲོད་ཁང་པ་སྤྲུལ། །དབང་ཕྱུག་ཆེན་པོའི་ལོངས་སྤྱོད་དུ། །ཕྱི་དང་ནང་དང་གསང་བ་དང་། །ཀུན་བཟང་རོལ་པ་དཔག་ཏུ་མེད། །བདག་གིས་བཏབ་ལ་མཆོད་པར་བྱས། །རྡོ་རྗེ་ཁྲག་འཐུང་ལ་སོགས་པའི། །ཁྲག་འཐུང་སུམ་བརྒྱ་དྲུག་ཅུ་དང་། །གཙོ་བསྒྱུར་དཀྱིལ་འཁོར་བརྒྱ་རྩ་བརྒྱད། །རྡོ་རྗེ་རལ་གཅིག་ལ་སོགས་པའི། །གསང་བའི་ཁྲོ་མོ་བྱེ་བ་འབུམ། །སྲས་མཆོག་རྡོ་རྗེ་ལ་སོགས་པའི། །སྒྲོལ་བྱེད་སྲས་མཆོག་སྟོང་རྩ་བརྒྱད། །སྟག་གིས་མགོ་ཅན་ལ་སོགས་པའི། །སྤྲུལ་པའི་ཕོ་ཉ་བྱེ་བ་འབུམ། །དབང་ཆེན་རོལ་པའི་དཀྱིལ་འཁོར་ནས། །རང་གི་བརྟུལ་ཞུགས་དྲག་པོ་ཡིས། །ཐུགས་རྗེས་འགྲོ་བ་འདུལ་བའི་ཕྱིར། །མཚམས་རྔམ་བསྐལ་པའི་མེ་ལྟར་འབར། །དེ་ཚེ་གདུག་པ་ཀུན་ཀྱང་བསྒྲལ། །ཀུན་ཀྱང་ཐར་པའི་ས་ལ་བཀོད། །གསང་བ་ཆེན་པོ་མངོན་དུ་ཤར། །ཡ་མཚན་རྨད་དུ་བྱུང་བའི་ཕྱིར། །རྡོ་རྗེ་གཞོན་ནུའི་ཐུགས་ལ་བརྟན། །སྒྲོལ་བྱེད་བདག་པོར་དབང་བསྐུར་ཏེ། །རུ་ཏྲ་ལ་སོགས་གདུག་པ་ཀུན། །སྲས་མཆོག་ཕུར་པའི་རྩེ་ལ་བསྒྲལ། །སོ་སོར་ཁྲག་འཐུང་འཁོར་བཅས་ཀྱིས། །རང་རང་འདུལ་སྐལ་མ་ལུས་པ། །ཀཱི་ལ་ཡའི་རྩེ་ལ་བསྒྲལ། །དེ་ཚེ་རྡོ་རྗེ་གཞོན་ནུ་ཡི། །སྒྲོལ་བྱེད་ཡག་ལ་འདི་སྐད་ཞུས། །ཀྱཻ་སྟོན་པ་ཁྲག་འཐུང་རྒྱལ། །སླད་ནས་མ་འོངས་དུས་ནི་ནི། །ལས་དང་སྐལ་ལྡན་སྐྱེས་བུ་ཡིས། །ལྔ་རྒྱ་དུས་ཀྱི་ཐ་མ་ལ། །གདུལ་དཀའ་སེམས་ཅན་འདུལ་བ་དང་། །བསྒྲལ་བའི་ཞིང་བཅུ་ཚར་བཅད་ཕྱིར། །དྲག་པོ་བསྒྲལ་བའི་ཕྲིན་ལས་ཀྱིས། །དཀྱིལ་འཁོར་ལས་དང་བྱ་བ་རྣམས། །སྟོན་པས་བདག་ལ་གནང་བར་མཛོད། །དེ་སྐད་ཅེས་ནི་ཞུས་པ་དང་། །སྟོན་པ་གསང་མཆོག་བདག་པོ་ཡིས། །དྲག་པོ་བརྟུལ་ཞུགས་ཕྲིན་ལས་ཀྱིས། །བདག་གཞན་བསྒྲུབ་པའི་ཐབས་རྣམས་ནི། །ལྗགས་ཀྱིས་དབང་པོར་བཀྲམ་ནས་བཤད། །རྡོ་རྗེ་གཞོན་ནུ་ཉིད་ཀྱིས་བསྡུས། །རྡོ་རྗེ་གཞོན་ནུ་དེ་ཉིད་ཀྱིས། །ཧཱུྃ་མཛད་ཕྱག་རྡོར་གཉིས་ལ་བཤད། །ཕྱག་རྡོར་གྱིས་བསྡུས་ལྷ་གནས་ནི། །གཞན་འཕྲུལ་དབང་བྱེད་ལྷ་རྣམས་དང་། །རི་རབ་རྩེ་མོའི་ཁང་བཟང་དུ། །བརྒྱ་བྱིན་ལ་སོགས་རྣམས་ལ་བཤད། །མི་དང་མི་མིན་བརྒྱུད་ཚུལ་ནི། །དྲག་ཤུལ་ཡོད་པའི་རྩེ་མོ་རུ། །གསང་བའི་བདག་པོ་དེ་ཉིད་ཀྱིས། །སྲིན་པོ་བློ་གྲོས་ཐབས་ལྡན་དང་། །གནོད་སྦྱིན་རྒྱལ་པོ་སྐར་མདའ་དང་། །ལྷའི་རྒྱལ་པོ་ཚངས་པ་དང་། །ཀླུའི་རྒྱལ་པོ་འཇོག་པོ་དང་། །མིའི་རྒྱལ་པོ་ཉིད་ལ་བཤད། །བློ་གྲོས་ཐབས་ལྡན་ཡི་གེར་བཏབ། །མིའི་ཡུལ་དུ་གྲགས་ཚུལ་ནི། །གསང་བདག་ལེ་རྒྱལ་རྣམ་གཉིས་ཀྱིས། །དུར་ཁྲོད་ཆེན་པོའི་བྲག་ཕུག་ཏུ། །རྒྱལ་པོ་ཡབ་སྲས་གཉིས་ལ་བཤད། །དེ་ལ་རྒྱལ་པོ་ཡབ་སྲས་ཀྱི། །གནོད་སྦྱིན་འདུས་པའི་བྲག་ཕུག་ཏུ། །བསྒྲུབས་པས་རྒྱལ་བ་མངོན་དུ་བྱུང་། །ཁམས་གསུམ་དྲེགས་པའི་ཉིད་དུ་བསྒྲལ། །གནོད་སྦྱིན་བྲག་ཕུག་དེ་ཉིད་དུ། །གནོད་སྦྱིན་རྒྱལ་པོ་ཉིད་ལ་བཤད། །གནོད་སྦྱིན་རྒྱལ་པོ་དེ་ཉིད་ཀྱིས། །གཡའ་རི་གངས་ཀྱི་བྲག་ཕུག་ཏུ། །དྷ་ན་སཾ་ཀྲྀ་ཏ་ལ་བཤད། །སློབ་དཔོན་དྷ་ན་སཾ་ཀྲྀ་ཏས། །བལ་པོ་མིང་སྲིང་ཕོ་ཉར་བཏང་། །ཡང་ལེ་ཤོད་ཀྱི་བྲག་ཕུག་ཏུ། །པདྨ་རྒྱལ་པོ་ཉིད་ལ་བཤད། །སློབ་དཔོན་པདྨ་རྒྱལ་པོ་ནི། །ཕ་མེད་མ་མེད་རྒྱ་མཚོར་རྫུས་ཏེ་སྐྱེས། །རྫུ་འཕྲུལ་དབང་གི་པདྨའི་ནང་དུ་འཁྲུངས། །བསོད་ནམས་དབང་གིས་རྒྱལ་པོའི་བུ་སྐལ་བྱས། །ལས་ཀྱི་དབང་གིས་བྲམ་ཟེའི་ཕྲུ་གུ་བསད། །རྒྱལ་པོ་དྲིན་ལན་བསམ་པས་མ་བསད་སྤྱུག །མདའ་ལྔ་གཞུ་ཐོགས་ནགས་ཀྱི་མདངས་སུ་སོང་། །ཕོ་བྱུང་བསད་ཅིང་མོ་བྱུང་ཆུང་མར་བྱས། །ཡུལ་མིས་རི་དྭགས་གཤོར་བ་བཞིན་དུ་བདས། །དཔའ་རྩལ་དབང་གིས་རྒྱལ་བུ་སྟོབས་ལྡན་བསད། །རྒྱལ་ཁྲིམས་གནོང་བས་ཟ་ཧོར་ཡུལ་དུ་ནི། །གྲོགས་གཉིས་མདའ་ཡིས་རྩེ་མོས་དེད་དེ་སོང་། །དེ་ཚེ་ཟ་ཧོར་སློབ་དཔོན་ཆེན་པོ་ནི། །རྒྱལ་པོ་པྲ་བྷ་ཧསྟི་ཞེས་བྱ་ལ། །གསུམ་ཀ་རབ་ཏུ་བྱུང་ནས་མིང་བཏགས་པ། །ཤཱཀྱ་བཤེས་གཉེན་ཤཱཀྱ་འོད་དུ་བཏགས། །སློབ་དཔོན་མཚན་ནི་ཤཱཀྱ་སེང་གེར་བཏགས། །རྒྱུད་ཀྱི་རྒྱལ་པོ་དེ་ཉིད་འདུས་པ་མཉན། །སྲས་མོ་གོ་མ་ཉིད་ལ་དབང་མནོས་ནས། །དཀྱིལ་འཁོར་མཐོང་དང་དབང་རྣམས་རིམ་བཞིན་ཐོག །དེ་ཚེ་ཐོས་བསམ་ཚོལ་བའི་ཆེད་ཕྱིར་རུ། །ཕུར་པ་སྡེ་བདུན་ནེ་རཱ་ཛ་རར་མཉན། །པདྨ་དཔལ་ཆེན་ཟ་ཧོར་ཡུལ་དུ་མཉན། །སྤྱི་རྒྱུད་སྡེ་གསུམ་མཁན་པོ་ཉིད་ལ་མཉན། །འཇམ་དཔལ་གཤིན་རྗེ་བལ་པོའི་ཡུལ་དུ་མཉན། །ལྟ་བ་རྫོགས་ཆེན་རྒྱ་མཚོའི་ཀློང་དུ་མཉན། །ལུང་སྐོར་རྣམ་དྲུག་རྒྱ་མཚོའི་ངོ་ལ་མཉན། །དེ་ཚེ་ཐུན་མོང་མཆོག་གིས་དངོས་གྲུབ་རྣམས། །རྡོ་རྗེ་ཐོད་ཕྲེང་རྩལ་གྱིས་མངོན་དུ་གྱུར། །ནུས་པ་སྐྱེས་ནས་རང་ཡུལ་རྗེས་སུ་དྲན། །སྔོན་དུ་ཨུ་རྒྱན་ཡུལ་དུ་བྱོན་པ་ན། །སྔོན་གྱི་རྒྱུས་མཁན་དག་གིས་ངོས་བཟུང་ནས། །རྒྱལ་པོའི་ཁྲིམས་ཀྱི་མེ་དཔུང་ནང་དུ་བསྲེག །མ་ཚིག་ས་གཞི་ཐམས་ཅད་མཚོ་རུ་གྱུར། །མཚོ་ལ་པད་འཁྲུང་པདྨའི་རྫིང་བུ་ལ། །རྡོ་རྗེ་སློབ་དཔོན་ཐོད་ཕྲེང་བཞུགས་པ་མཐོང་། །དེ་ལ་རྒྱལ་པོ་ཆེན་པོ་ལ་སོགས་པ། །ཡུལ་མི་མང་པོ་ཀུན་གྱི་ངོ་མཚར་སྐྱེས། །སློབ་དཔོན་མཚན་ནི་པདྨ་རྒྱལ་པོར་བཏགས། །དེ་ནས་ཡང་ལེ་ཤོད་ཀྱིས་བྲག་ཕུག་ཏུ། །རྡོ་རྗེ་ཕུར་པའི་རྒྱུད་རྣམས་དེར་བསྡུས་ནས། །བཀའ་དང་གཏན་ཚིག་ཐུགས་དམ་གཏན་ལ་ཕབ། །འཇིག་རྟེན་དམ་ཅན་བཅུ་གཉིས་དབང་དུ་བསྡུས། །སྲོག་གིས་སྙིང་པོ་གཏན་ཚིག་ཅེས་པ་ནི། །པདྨའི་རྒྱལ་པོ་ཉིད་ཀྱིས་ཕྱག་ཏུ་ཕུལ། །བསྭེ་མོ་བཞིས་ནི་རང་གིས་སྐྱེ་རྒྱུད་བཤད། །ཤྭ་ན་བཞིས་ནི་མངག་པའི་ཕོ་ཉ་བྱས། །རེ་ཏི་བཞིས་ནི་གསང་བའི་མཉེས་པ་ཕུལ། །དེ་ཚེ་གདོང་དམར་སྐུ་རྒྱལ་བོད་ཡུལ་དུ། །མངའ་བདག་ཁྲི་སྲོང་ལྡེའུ་བཙན་བཀའ་བཙན་པས། །གཙུག་ལག་ཁང་བཞེངས་བོད་ཁམས་དྲེགས་པ་ཁྲོས། །ཅི་ལྟར་བགྱིས་ཀྱང་ཐུགས་དམ་མ་ཚར་བས། །ཨུ་རྒྱན་པདྨ་ཡང་ལེ་ཤོད་ནས་དྲང་། །རྫུ་འཕྲུལ་སྟོབས་ཀྱིས་བོད་ཁམས་དྲེགས་པ་རྣམས། །རི་རྡོ་ཤོད་རྡོ་ལྷག་པ་བཞིན་དུ་བསྡུས། །ཀུན་གྱི་སྲོག་གིས་སྙིང་པོ་དྲང་ནས་ནི། །ངན་སྔགས་སྒྲུབ་པ་ཐམས་ཅད་དེ་རུ་མཛད། །དེ་ཚེ་བཙད་པོ་ཆེན་པོའི་ཐུགས་དམ་ཡང་། །ཡིད་ལ་བསམ་པ་བཞིན་དུ་འགྲུབ་པར་གྱུར། །པདྨ་རྒྱལ་པོས་རབ་ཏུ་གནས་པར་བགྱི། །དཀྱིལ་འཁོར་ལྷ་ཚོགས་མང་པོ་མཁའ་ལ་བྱོན། །དཀྱིལ་འཁོར་ལྷ་ཚོགས་པདྨ་ཉིད་ལ་བསྐོར། །པདྨ་ཉིད་ཀྱི་དཀྱིལ་འཁོར་ལྷ་ལ་བསྐོར། །ཞབས་ནས་མེ་བྱུང་ས་གཞི་ཀུན་ཀྱང་ཚིག །རྫུ་འཕྲུལ་སྟོབས་ཀྱིས་ལྷ་འདྲེ་མང་པོ་དང་། །ལྷ་བརྒྱད་ཀླུ་བརྒྱད་གཟའ་དང་རྒྱུ་སྐར་རྣམས། །མངོན་དུ་ཕྱུང་སྟེ་ཀུན་ཀྱང་དམ་ལ་བཏགས། །དེ་ཚེ་རྒྱལ་པོ་ཆེན་པོ་ལ་སོགས་པའི། །རྗེ་འབངས་ཉི་ཤུ་རྩ་ལྔར་དབང་བསྐུར་བགྱིས། །ཀུན་གྱི་རྒྱལ་བའི་དཀྱིལ་འཁོར་མངོན་དུ་མཐོང་། །སྐ་བ་དཔལ་བརྩེགས་སྐད་བཞི་ལོ་ཙཱ་བགྱིས། །རྒྱ་གར་སྐད་བཞི་རངས་པ་བོད་དུ་བསྒྱུར། །དེ་ཚེ་རྡོ་རྗེ་བདུད་འཇོམས་ལ་སོགས་པའི། །སྐལ་བ་ལྡན་པའི་གང་ཟག་བདུན་པོ་ལ། །ཕུར་བུའི་དབང་བསྐུར་བཀའི་བྱིན་རླབས་གནང་། །ཕུར་བུ་རྒྱུད་ལུང་མན་ངག་གསུམ་པོ་ཡང་། །རྒྱུད་དང་མན་ངག་གལ་པོའི་ཕྱུངས་དང་བཅས། །ཐམས་ཅད་ཀུན་གྱི་གཏན་ཚིག་མན་ངག་རྣམས། །རྡོ་རྗེ་བདུད་འཇོམ་དཔལ་གྱི་སེང་གེ་དང་། །ཤཱཀྱ་པྲ་བྷ་མཁོན་ཆེན་དབང་ཕྱུག་དང་། །ཇོ་མོ་ཉིད་དང་ལྔ་ལ་ཁྱད་པར་གནང་། །དེའི་ནང་ནས་ཁྱད་པར་གྱུར་པ་ནི། །བོང་ཆུང་དོན་ཆེ་ཚིགས་ཉུང་དོན་མང་ཞིང་། །བྱ་སླ་ཐབས་མྱུར་ཉམས་ཀྱི་གདམས་ངག་ཡིན། །ཕུར་པ་རྩ་བ་རྒྱུད་ཀྱི་མན་ངག་འདི། །བནྡྷེ་ངའི་མཁར་ཆེན་གཟའ་ལ་བཤད། །དེ་ནས་དཔལ་གྱིས་མཆོད་གནས་སྟག་གི་རྡོ་རྗེ་ནས། །ཀླུའི་རྒྱལ་མཚན་བྱང་ཆུབ་ཤེས་རབ་དང་། །ཡེ་ཤེས་དབང་ཕྱུག་བྱང་ཆུབ་རྡོ་རྗེ་དང་། །བྱང་ཆུབ་ཚུལ་ཁྲིམས་ག་ལྗང་དབང་ཕྱུག་དང་། །ཀྱེ་རེ་གྲགས་པ་ཤོ་མང་ཅན་པའི་ཞབས། །རྡོ་རྗེ་རྒྱལ་མཚན་དམ་པ་བདེ་བར་གཤེགས། །འགྲོ་མགོན་གཙང་པ་བྱམས་ཐོས་རྣམ་གཉིས་དང་། །སྤྱན་སྔ་ཞང་སྟོན་རྣམ་གཉིས་ཡེ་ཤེས་འབུམ། །བྱང་ཆུབ་དབོན་པོ་བྱང་ཆུབ་རྡོ་རྗེ་དང་། །སངྒ་གུ་རུ་བཛྲ་ཤྲཱི་དང་ནི། །བྷུདྡྷ་བྷ་དྲ་བཀྲ་ཤིས་བླ་མ་དང་། །ཛྙཱ་ན་ཀེ་དུ་གྷ་གྷ་བདག་ཡན་ཆད། །བརྒྱུད་ཚུལ་མདོ་ཙམ་བརྗོད་ཀྱིས་རྒྱས་པ་ནི། །ལོ་རྒྱུས་ཆེན་མོ་རྣམས་ལ་གཟིགས་པར་མཛོད། ༈ །རྩ་བ་མཚན་གྱི་དོན་བཤད་ན། །ངོ་བོ་དབྱིངས་དང་ཡེ་ཤེས་ལ། །ངེས་ཚིག་ཀཱི་ལི་ཀཱི་ལ་ཡ། །ཅེས་པའི་སྒྲ་བསྒྱུར་ཕུར་པ་དེ། །ཕུར་ནི་ལྷུན་གྱི་གྲུབ་པའི་དབྱིངས། །པ་ནི་འབྲས་བུ་འགགས་པ་མེད། །ཕུར་ནི་ཆོས་ཉིད་སྐྱེ་བ་མེད། །པ་ནི་རིག་པ་འགགས་པ་མེད། །ཕུར་ནི་ཀུན་གཞི་གདལ་ཁྱབ་ཡིན། །པ་ནི་རང་སྣང་བྱང་ཆུབ་སེམས། །ཕུར་ནི་གདལ་ཁྱབ་ཆོས་ཀྱི་དབྱིངས། །པ་ནི་འགགས་མེད་རོལ་པར་ཤར། །ཕུར་ནི་ཤེས་རབ་ཡུམ་གྱིས་མཁའ། །པ་ནི་ཐབས་མཆོག་ཡབ་ཀྱིས་དང་། །ཕུར་ནི་ཀུན་བཟང་ཡུམ་གྱིས་མཁའ། །པ་ནི་བཟང་པོ་རོལ་པའི་རྒྱན། །ཕུར་ནི་ཆོས་སྐུ་སྤྲོས་དང་བྲལ། །པ་ནི་གཟུགས་སྐུ་ཀུན་ལ་ཁྱབ། །ཕུར་ནི་རང་བཞིན་ལྷུན་གྲུབ་ལ། །པ་ནི་ཕྲིན་ལས་རྣམ་བཞི་ཤར། །དེ་ཕྱིར་ཕུར་པ་ཞེས་བྱའོ། །ཡོ་ག་ཕྱོགས་ཀྱི་དོན་བཤད་ན། །རྣམ་པ་གཉིས་སུ་ཤེས་པར་བྱ། །ཕྱི་དང་དེ་བཞིན་ནང་ཉིད་དོ། །ནང་ཡང་དེ་བཞིན་རྣམ་པ་གསུམ། །རྒྱུད་དང་ལུང་དང་མན་ངག་གོ། །ཕུར་པ་འདི་ནི་ལུང་དུ་གཏོགས། །དེ་ལ་རྣམ་པ་གཉིས་སུ་བཤད། །ཕུར་བའི་དོན་གྱི་རྣམ་གྲངས་དང་། །རྗོད་བྱེད་རྒྱུད་ཀྱིས་རྣམ་གྲངས་སོ། །དོན་གྱི་རྣམ་གྲངས་གཉིས་ཡིན་ཏེ། །མཚོན་བྱ་དོན་དང་མཚོན་བྱེད་ཐབས། །མཚོན་བྱ་དོན་ལ་རྣམ་གཉིས་ཏེ། །ལྟ་བ་དང་ནི་ཏིང་འཛིན་ནོ། །ལྟ་བའི་ཕུར་པ་འདི་ལྟ་སྟེ། །ནམ་མཁའ་ལྟ་བུའི་གང་ཟག་གིས། །རིག་པ་ཡེ་ཤེས་ཕུར་པ་དེ། །གང་ཁྱབ་ཆོས་ཀྱི་དབྱིངས་སུ་འདེབས། །རྟོགས་ནི་སྣང་སྲིད་ལྷ་རུ་གསལ། །འབྲས་བུ་གདལ་ཁྱབ་ཆོས་ཀྱི་སྐུ། །དེ་ནི་ལྟ་བ་ལྷུན་གྲུབ་པོ། །ཏིང་འཛིན་ཕུར་པ་འདི་ལྟ་སྟེ། །ཉི་མའི་སྙིང་པོ་ལྟ་བུ་ཡིས། །ཁྱབ་པ་ཐུགས་རྗེའི་ཕུར་པ་དེ། །རང་གི་ཀུན་གཞིའི་ཀློང་དུ་འདེབས། །སངས་རྒྱས་སེམས་ཅན་དབྱེར་མེད་མཐོང་། །འབྲས་བུ་སྐུ་ལྔ་ལྷུན་གྱིས་གྲུབ། །ལྷག་པ་ཏིང་འཛིན་ཕུར་པ་དེ། །རི་བོ་ལྟ་བུའི་གང་ཟག་གིས། །ལྷག་པ་སེམས་ཀྱི་ཏིང་འཛིན་ནི། །སྣང་སྲིད་ཆོས་ལ་གདབ་བར་བྱ། །རྟོགས་ནི་སྣང་སྲིད་ལྷ་རུ་གསལ། །འབྲས་བུ་བདེ་གཤེགས་རིག་འཛིན་ས། །ཆགས་ལྡན་འདོད་པའི་གང་ཟག་གིས། །ཆགས་ཅན་འདོད་པའི་ཕུར་པ་དེ། །གསང་བ་ཡུམ་གྱི་མཁའ་ལ་གདབ། །བདེ་སྟོང་ཡེ་ཤེས་རྟག་ཏུ་ཤར། །འབྲས་བུ་ཟག་བྲལ་བདེ་བ་ཐོབ། །དེ་ནི་ཏིང་འཛིན་འགྲུབ་པའོ། །མཚོན་བྱེད་ཐབས་ཀྱིས་ཕུར་པ་ནི། །ཙནྡན་སྡོང་པོ་ལྟ་བ་ཡིས། །འདོད་དང་ང་རྒྱལ་རྔམ་སེམས་ཅན། །གདུལ་དཀའ་འདུལ་བར་དཀའ་བ་དེ། །མངོན་སྤྱོད་རྫས་ཀྱི་ཕུར་པ་དེ། །བྱིན་རླབས་ཡ་མཚན་ལྡན་པར་བྱ། །འདུ་ཤེས་གསུམ་པའི་གཟུགས་ལ་གདབ། །གསལ་བ་གསུམ་དང་ལྡན་ན་ཐེབས། །འབྲས་བུ་བསྒྲལ་བས་ཚོགས་གཉིས་རྫོགས། །རྗོད་བྱེད་རྒྱུད་ཀྱིས་རྣམ་གྲངས་ནི། །ཕུར་པ་ལུང་ལ་རྣམ་གསུམ་སྟེ། །རྒྱུད་དང་ལུང་དང་མན་ངག་གོ། །རྒྱུད་ལ་ཡང་ནི་རྣམ་བཞི་སྟེ། །རྩ་བ་འབྱུང་བའི་རྒྱུད་དང་ནི། །དེ་བཞིན་བཀོལ་བ་དུམ་བུའི་རྒྱུད། །མདོར་བསྡུས་ཁྱབ་པའི་རྒྱུད་དང་ནི། །དེ་བཞིན་ཕྲིན་ལས་ཤུགས་ཀྱི་རྒྱུད། །ཕུར་བུ་ལུང་གིས་ངེས་པ་བཞི། །རྩ་བ་དང་ནི་བཤད་པ་དང་། །བསྒྲུབ་པ་དང་ནི་ཕྱི་མའོ། །མན་ངག་རྩ་བའི་རྒྱུད་ལ་ཡང་། །རྣམ་པ་དྲུག་ཏུ་ཤེས་བྱ་སྟེ། །རྩ་བའི་རྒྱུད་དང་སྒྲུབ་པ་དྲུག །ཁྲོ་བོ་བཅུ་དང་དབྱིངས་ཀྱི་ཡུམ། །དམ་ཅན་དང་ནི་བཤད་པའི་རྒྱུད། །དགོངས་པ་དང་ནི་འཁོར་ལོའི། །རྒྱུད་ཀྱི་རྣམ་གྲངས་མདོ་སྨོས་ཙམ། །བྱེ་བྲག་རྒྱ་ཆེ་གཞན་དུ་བལྟ། །འདིར་ནི་བཀོལ་བ་དུམ་བུའི་རྒྱུད། །དེ་ལ་བརྟན་པའི་མན་ངག་ཡིན། །གང་ཟག་དགོས་ཆེད་ཀྱི་དོན་བཤད་ན། །ཕྱི་མའི་བྱང་ཆུབ་སྒྲུབས་པ་ལ། །བར་ཆད་དགྲ་བགེགས་འབྱུང་བའི་ཕྱིར། །དེ་དག་བསྒྲལ་ཞིང་ཚར་བཅད་ཕྱིར། །རྡོ་རྗེ་ཕུར་པ་འདི་སྒྲུབས་དགོས། །ས་གཅོད་ཚིག་གིས་དོན་བཤད་ན། །ཀླད་དང་གཞུང་དང་ཞབས་གསུམ་མོ། །གཞུང་དོན་ལ་ཡང་རྣམ་གསུམ་སྟེ། །སྐུ་བསྙེན་གསུང་སྒྲུབ་ཐུགས་ཕྲིན་ལས། །སྐུ་བསྙེན་ལ་ཡང་དོན་བཅུ་དང་། །གསུང་སྒྲུབ་ལ་ཡང་དོན་དྲུག་སྟེ། །ཐུགས་ལ་དངོས་གདབ་རྗེས་སྦྱང་ངོ་། །རྒྱས་པ་རང་རང་སྐབས་བཞིན་ནོ། །སློབ་དཔོན་པདྨའི་རྒྱལ་པོ་རྩལ་ཆེན་རྫོགས་པའི་སྐྱེས་བུས་ཕུར་བུ་མན་ངག་གིས་རྩ་བ་དན་སྔགས་ཚིག་ཉུང་ལ་དོན་ཆེ་བ་ཤིན་ཏུ་ཟབ་པའི་ཕུར་པ། སྐྱི་ལུགས་གསང་བསྒྲུབ་ཆོས་རྗེས་མན་ངག་ཏུ་བཀོད་པ་འདི་ལ་གསུམ་སྟེ། དང་པོ་ཀླད་དོན་ནི། ཤེས་བྱའི་ཆོས་ཀུན་མ་ལུས་ལུས་པ་མེད་པ་རྣམས། ཐུགས་དགོངས་པ་ལ་ཡོངས་སུ་རྫོགས་ཤིང་། འཇིག་རྟེན་པའི་མ་རིག་པའི་མུན་པའི་ཚོགས་ཀུན་བཅོམ་པའི་ཡེ་ཤེས་སྒྲོན་མ་གསལ་བར་མཛད་པའི་བླ་མ་བདེ་བར་གཤེགས་པའི་ཞབས་ལ་འདུད། ཤྲཱི་ནི་དཔལ་སྟེ་དེ་ལ་གསུམ་ནི་གཞི་རང་བཞིན་ལྷུན་གྱི་གྲུབ་པའི་དཔལ། དེ་ཉིད་རིག་པ་རང་སྣང་བའི་དཔལ། །ཐུགས་རྗེ་ཆེན་པོ་ཞོར་ལས་བྱུང་བའི་དཔལ་དང་གསུམ་པོ་ངོ་བོ་ཉིད་ཀྱིས་ལྡན་ཞིང་། ཧེ་ནི་དགྱེས་པ་སྟེ། བདག་དོན་ལ་དགྱེས་པ་དང་། གཞན་དོན་ལ་དགྱེས་པ་རྣམ་གཉིས་ཀྱི་སྒོ་ནས། དུ་ར་ན་ཆགས་པ་སྟེ། དེ་ལ་གཉིས་བདག་དོན་ཆོས་སྐུ་མི་གཏོང་ནས་ཆགས་པ་དང་། གཞན་དོན་འགྲོ་བའི་དོན་མཛད་པ་ལ་ཆགས་ཅིང་། རྡོ་རྗེ་ནི་དེ་བཞིན་གཤེགས་པ་རྣམས་ཀྱི་ཐུགས་ཡེ་ཤེས་ལྔའི་བདག་ཉིད། གཞོན་ནུ་ནི་ཐུགས་ལ་བགྲེས་རྒུད་མེད་ཅིང་། གདུལ་བྱ་ལུགས་ལྡོག་རྣམས་ཀྱི་ངོར་ཁྲོ་བོ་ཆས་ཀྱིས་བརྒྱན་པའི་སྐུར་སྣང་བ་དེ་ལ་གཉིས་མེད་མོས། གཞུང་གིས་དོན་ལ་རྣམ་པ་གསུམ་སྟེ། སྐུ་བསྙེན་པའི་དཀྱིལ་འཁོར་དང་། གསུང་བསྒྲུབ་པའི་དཀྱིལ་འཁོར་དང་། ཐུགས་ཕྲིན་ལས་ཀྱིས་དཀྱིལ་འཁོར་རོ། །དེ་ལ་སྐུ་བསྙེན་པའི་དཀྱིལ་འཁོར་ལ་དོན་བཅུ་སྟེ། དང་པོ་བདེན་པ་བདར་ཞིང་མཚམས་བཅད་པ་དང་། བཤགས་པ་བྱ་བ་དང་། ཏིང་འཛིན་རྣམ་གསུམ་སྒོམ་པ་དང་། རྟེན་བསྐྱེད་པ་དང་། བརྟེན་པ་ལྷའི་དཀྱིལ་འཁོར་བསྐྱེད་པ་དང་། ཡེ་ཤེས་ཀྱིས་དཀྱིལ་འཁོར་གཞུགས་པ་དང་། དབང་བསྐུར་བ་དང་། མཆོད་པ་འབུལ་བ་དང་། བསྟོད་པ་བྱ་བ་དང་། བསྙེན་པ་བྱ་བའོ། །དེ་ལ་དང་པོ་བདེན་པ་བདར་ཞིང་མཚམས་བཅད་པ་ནི། གཞི་ཆོས་ཉིད་ཀྱིས་བདེན་པ་མི་འགྱུར་བའོ། །དེ་ལ་གསང་སྔགས་ཀྱིས་སྙིང་པོ་བརྗོད་པས། གཞི་སྐྱེ་མེད་ཀྱི་ཆོས་ཉིད་དེ་རང་གདངས་འགག་མེད་དུ་ཤར་བའི་བྱིན་རླབས་ལས་ལྷའི་སྐུར་ཤར་བས་སོ། །ཡང་ན་ཡིག་འབྲུའི་བྱིན་རླབས་ལས་ལྷར་སྣང་བའོ། །དེར་མ་ཟད་ཕྱོགས་བཅུ་དུས་གསུམ་གྱིས་སངས་རྒྱས་ཐམས་ཅད་ཀྱིས་མཐུ་ཡང་འབྱུང་བའོ། །ༀ་བཛྲ་ཀཱི་ལི་ཀཱི་ལ་ཡ་སརྦ་བྷིགྷན་བྃ་ཧཱུྃ་ཕཊ་ཅེས་བརྗོད་པས། སྐད་ཅིག་གིས་ཏིང་ངེ་འཛིན་གྱིས། བདག་ཉིད་བཅོམ་ལྡན་འདས་དཔལ་རྡོ་རྗེ་གཞོན་ནུར་བསྐྱེད་དེ། ཞལ་གསུམ་ཕྱག་དྲུག་སྐུ་མདོག་མཐིང་ནག །ཞབས་བཞི་བསྒྲད་པ། ཞལ་གཡས་དཀར་བ། གཡོན་དམར་བ། ཕྱག་དྲུག་ཀས་ཕུར་པ་དྲིལ་ཏེ། དང་པོ་གཉིས་ཀྱིས་སྐུའི་ཕུར་པ་དཀར་པོ་དྲིལ་བ། བར་མ་གཉིས་ཀྱི་གསུང་གིས་ཕུར་པ་དམར་པོ་དྲིལ་བ། ཕྱག་ཐ་མ་གཉིས་ཀྱི་ཐུགས་ཀྱི་ཕུར་པ་མཐིང་ནག་དྲིལ་བ། རྡོ་རྗེའི་གཤོག་པ་གདེངས་པ། དཔལ་གྱི་ཆས་བརྒྱད་དང་། དུར་ཁྲོད་ཆེན་པོའི་ཆས་བརྒྱད་དང་ལྡན་པ། མཚམས་རྔམ་གཟི་བྱིན་དང་བཅས་པ། བསྐལ་པའི་མེ་དཔུང་གིས་ནང་ན་འགྱིང་བག་གི་ཚུལ་དུ་བཞུགས་པ་སྐད་ཅིག་གིས་གསལ་བར་བསྐྱེད་དོ། །ཕྱོགས་བཅུའི་སངས་རྒྱས་ཐམས་ཅད་འདུས་ཏེ་བདག་ལ་ཐིམ་པར་བསམ་མོ། །དེ་ནས་བསྐུལ་ཏེ་རྡོ་རྗེ་ནི་སྐྱེ་འཇིག་མེད་པ་སྐུ་གསུང་ཐུགས་རྡོ་རྗེ་ལྟ་བུ་དེ་རྟོགས་དཀའ་བས་གསང་བ་དེ་ཉིད་སངས་རྒྱས་ཀྱིས་ཐུགས་ལ་མངའ་བས། སངས་རྒྱས་དེའི་བཀའ་ལས་ནི། སྡིག་ཅན་མི་དགེ་བ་བཅུ་ལ་སྤྱོད་ཅིང་བསྒྲལ་བའི་ཞིང་དུ་གྱུར་པ་གང་ཞིག་འདའ་བར་བྱེད་པ་རྣམས། སྟོབས་བཅུ་ལྷུན་གྱིས་གྲུབ་ཅིང་མི་དགེ་བ་བཅུ་ཚར་བཅད་ནས། ཀྲོ་ཡོག་སྡེ་གསུམ་ལས་འཕགས་པས་ཆེན་པོ་ཁྲོ་བོ་ཆེན་པོ་བཅུས་གླང་པ་ནི་མགོ་བོ་སྟེ། ཉོན་མོངས་པའི་རྟེན་ཤིགས་པ་སྟེ། ཚལ་པ་བརྒྱ་རུ་ཁོས་ཤིག །དེ་བས་ཉོན་ཅིག་བགེགས་དང་ལོག་པར་འདྲེན་པའི་ཚོགས། ངའི་རྡོ་རྗེ་གཞོན་ནུ་བསྒོམ་པའི་བཀའ་ལ་འདའ་བར་མ་བྱེད་ཅིག །ཁྲོ་བོ་བཅུའི་སྔགས་ཀྱིས་རྟིང་པར་ཧཱུྃ་མ་མ་པ་ཤ་ཅེས་ཚང་བར་བཏགས་ལ་བརྗོད་པ་ཙམ་གྱིས། ཐུགས་ཀ་ནས་ཁྲོ་བོ་མཐིང་ནག་གཅེར་བུ་ཕྱག་ན་ཕུར་པ་བསྣམས་པ། མེ་དཔུང་གིས་ནང་ན་བཞུགས་པ་བཅུ་བྱུང་ནས། ཕྱོགས་བཅུར་འཕྲོས་པས་ཕྱོགས་བཅུའི་བགེགས་ཐམས་ཅད་ཆུང་བ་རྣམས་ཆེ་བ་ལ་བསྟིམ། དེ་དག་ཐམས་ཅད་བགེགས་ཀྱིས་གཙོ་བོ་ཕྱོགས་སྐྱོངས་བཅུ་ལ་བསྟིམ་ནས། ཁྲོ་བོ་བཅུས་སོ་སོར་བཀུག་སྟེ། རང་གི་ཕྱོགས་བཞི། མཚམས་བཞི་དང་བརྒྱད། མདུན་རྒྱབ་གཉིས་དང་བཅུར་བཀུག་ནས། རྡོ་རྗེ་ཁྲོ་དོང་ནག་པོ་བཅུར་བཅུག་ནས་ཕྱག་གིས་ཕུར་པས་བཏབ་ཏེ། འོག་རྡོ་རྗེའི་བྲག་རི་ལ་ཐལ་བྱུང་བར་བསྒོམ་མོ། །ཕུར་པའི་དཔལ་རྩེ་ལ་མེ་འབར་བ་དང་ཕྱོགས་སྐྱོངས་བཅུ་ཡང་མེར་ལམ་གྱིས་འབར་བ་དང་། དེ་ལྟར་ཁྲོ་བོ་བཅུའི་སྐུ་ལ་ལྷག་པ་ཡེ་ཤེས་ཀྱིས་མེ་འབར་བ་དང་། ཕྱག་གི་ཕུར་པ་ལ་ལྷག་པ་ཏིང་ངེ་འཛིན་གྱིས་མེ་འབར་བ་དང་། ཕྱོགས་སྐྱོངས་རྣམས་ཚིག་པ་ལ་རྣམ་རྟོག་ཡེ་ཤེས་སུ་འབར་བའི་མེ་དང་གསུམ་འདྲེས་པ་ལས་མེ་རི་འབར་བའི་གུར་དུ་གྱུར་པར་བསྒོམ། སྤྱི་དོན་གཉིས་པ་བཤགས་པ་བྱ་བ་ནི། ཡེ་ཤེས་སྐུ་མཆོག་གཞུང་བཞིན་ནོ། །སྤྱི་དོན་གསུམ་པ་ཏིང་ངེ་འཛིན་རྣམ་གསུམ་རིམ་བཞིན་བསྒོམ་པ་ནི། རྡོ་རྗེ་ཁྲོས་པས་ཞེ་སྡང་གཅོད། ཅེས་པ་སྟེ། རྡོ་རྗེ་ནི་རང་ཉིད་རྡོ་རྗེ་གཞོན་ནུར་གསལ་བའོ། །ཁྲོས་པ་ནི་ཐུགས་ཀ་ནས་རྃ་ཡྃ་ཁྃ་གསུམ་སྤྲོས་པའོ། །ཞེ་སྡང་ནི་གཟུང་ཡུལ་སྟེ། མེ་ཆུ་རླུང་གསུམ་གྱི་མི་གནས་པར་བྱེད་པ་ནི་གཅོད་ཅེས་བྱའོ། །དེ་ཡང་དང་པོ་རྃ་སྥ་ར་ཎ་ཕཊ྄། བདག་ཉིད་རྡོ་རྗེ་གཞོན་ནུའི་ཐུགས་ཀ་ནས་རྃ་དམར་པོ་སྤྲོས་ཏེ། མེ་བྱུང་བས་འཇིག་རྟེན་གྱི་ཁམས་ཐམས་ཅད་མ་ལུས་པ་བསྲེགས་ནས་མེ་སྦུར་བཞིན་དུ་སོང་བར་བསམ། སཾ་ཧ་ར་ན་ཧཱུྃ། སླར་མེའི་ལྷག་མ་ཐུགས་ཀ་ན་ཚུར་བསྡུ། ཡཾ་སྥ་ར་ར་ན་ཕཊ྄། ཐུགས་ཀ་ནས་ཡྃ་སྤྲོས་ཏེ་རླུང་བྱུང་བས་སྔར་བསྲེགས་པའི་ཐལ་བ་མ་ལུས་པ་རས་བལ་རླུང་གིས་གཏོར་བ་ལྟར་འཐོར་བར་བྱས་ནས། སཾ་ཧ་ར་ན་ཧཱུྃ། སླར་རླུང་གིས་ལྷག་མ་ཐུགས་ཀ་ན་ཚུར་བསྡུ། ཁཾ་སྥ་ར་ན་ཕཊ྄། ཡང་ཐུགས་ཀ་ནས་ཁཾ་སྤྲོས་ཏེ་ཆུ་བྱུང་བས་ཐལ་བ་གཏོར་བའི་ལྷག་མ་མ་ལུས་པ་བཀྲུས་ནས། སཾ་ཧ་ར་ན་ཧཱུྃ། སླར་ཆུའི་ལྷག་མ་རྣམས་བདག་གིས་ཐུགས་ཀ་ན་ཚུར་བསྡུ། དེ་ལྟར་གཅོད་པ་ལ་ནི་མཚོན་ཆེན་ཅེས་བྱའོ། །དཔེར་ན་འཇིག་རྟེན་གྱི་མཚོན་རལ་གྲི་ལ་སོགས་པས་ནི་ཕྱོགས་རེ་བས་མི་ཆོད་པ་ལ། འདིར་མེ་ཆུ་རླུང་གསུམ་གྱི་སྣོད་བཅུད་རགས་པ་མེད་པར་བྱས་པ་ནི། མཚོན་ཆེན་ཅེས་བྱའོ། །སྔོན་པོ་ནི་ཅིར་ཡང་མི་འགྱུར་བ་ཡིན་པའི་ཕྱིར། འདིར་ཡང་བསྲེགས་སྤྱངས་བཀྲུ་བ་རྣམ་པ་གསུམ་གྱིས་གཟུང་ཡུལ་དག་པར་བྱས་ལ། བར་དེར་འཛིན་པའི་སེམས་ཀྱང་མ་གྲུབ་སྟེ། ཅིར་ཡང་མི་དམིགས་པ་སྟོང་པ་ཉིད་དུ་བསྒོམ་པར་བྱའོ། །དེ་ཡང་སྟོང་པ་ཉིད་ཀྱི་ཏིང་ངེ་འཛིན་ནི། ཆོས་ཉིད་ཅིར་ཡང་མི་དམིགས་པ་ལས། ཆོས་ཅན་ཅིར་ཡང་མི་འགྱུར་བ་སྟེ། དེ་བཞིན་ཉིད་ཀྱི་ཏིང་ངེ་འཛིན་ཅེས་བྱའོ། །འབར་བ་ཅེས་པ་ཀུན་ཏུ་སྣང་བའི་ཏིང་ངེ་འཛིན་ནི། སྟོང་པ་ཉིད་ཀྱི་ངང་ལས་དེ་ལྟར་མ་རྟོགས་པའི་སེམས་ཅན་རྣམས་ལ་སྙིང་རྗེའི་ཉམས་འབར་བྱའོ། །ནམ་མཁའི་དཀྱིལ་ན་ཐིག་པ་ཤར། ཅེས་པས། རྒྱུའི་ཏིང་ངེ་འཛིན་ནི། ཆོས་ཉིད་ནམ་མཁའ་ལྟ་བུའི་ངང་ཡས། རང་གིས་རྣམ་པར་ཤེས་པའི་ངོ་བོ་ཧཱུྃ། ཐུགས་ཆོས་ཉིད་མི་འགྱུར་བ་མཚོན་པའི་མདོག་མཐིང་ནག་གཅིག་གདང་སོལ་བཅག་པའི་མདོག་ལྟ་བུ་ཧཱུྃ་ཆ་ལྔ་ཡེ་ཤེས་ལྔའི་རང་བཞིན་ཡིན་པས་འོང་ཁ་དོག་ལྔ་དང་ལྡན་པ་ཐིག་པ་ལྟར་རང་ཤར་དུ་བྱུང་བའོ། །གཞན་དུ་ན་དེ་བཞིན་ཉིད་སྟོང་པ། ཀུན་དུ་སྣང་འགག་མེད། ཕྱག་རྒྱ་གཅིག་པ་དབྱེར་མེད་དུ་འདོད་ལ། ཡང་ན་དེ་བཞིན་ཉིད་ཆོས་སྐུ་དང་སྦྱར། ས་ནི་ཀུན་ཏུ་འོད་ཀྱིས་ས། ཡེ་ཤེས་ནི་ཇི་ལྟ་བ་མཁྱེན་པའི་ཡེ་ཤེས་སོ། །ཀུན་ཏུ་སྣང་ནི་ལོངས་སྤྱོད་རྫོགས་པའི་སྐུ། མ་ཆགས་པར་པདྨ་ཅན་གྱིས། དབྱེར་མེད་ལྷུན་རྫོགས་ཀྱི་ཡེ་ཤེས་སོ། །རྒྱུའི་ཏིང་ངེ་འཛིན་ནི་སྤྲུལ་སྐུ། ཡི་གེ་འཁོར་ལོ་ཚོགས་ཆེན་གྱི་ས། ཡེ་ཤེས་ནི་ཇི་སྙེད་མཁྱེན་པའི་ཡེ་ཤེས་སོ། །ལུང་ལས། ས་གསུམ་སྐུ་གསུམ་ཏིང་འཛིན་ཡེ་ཤེས་གསུམ། ཅེས་འདོད་པ་ཡང་སྣང་། སྤྱི་དོན་བཞི་བ་རྟེན་གཞལ་ཡས་ཁང་བསྐྱེད་པ་ནི། སྲོག་གིས་གོ་རུ་ཤར་བ་དང་། ཅེས་པ་སྟེ། སྲོག་ནི་འབྱུང་བ་ལྔ་ཡིན་ཏེ། འདིར་ཡང་དེ་གནས་སུ་དག་པའི་རྟགས་སུ་འབྱུང་བ་རིམ་བརྩེགས་བསྒོམ་པའོ། །དེ་ཡང་ཧཱུྃ་ལས་ཨེ་ཆད་པ་ལས་ཆོས་འབྱུང་གྲུ་གསུམ་པ་ཁ་དོག་མཐིང་ནག་རྒྱ་ཁྱོན་ཆེ་བ་གཅིག་བསྒོམ་མོ། །འབྱུང་བ་ནམ་མཁའ་གནས་སུ་དག་པ་ཡུམ་ཀུན་ཏུ་བཟང་མོ། ཡེ་ཤེས་ནི་ཆོས་དབྱིངས་ཡེ་ཤེས་སོ། །ཧཱུྃ་ལས་ཡཾ་ཆད་པ་ལས་རླུང་གིས་དཀྱིལ་འཁོར་གཞུའི་དབྱིབས་ཅན་རྒྱ་ཁྱོན་ཆེ་བ་སྲ་ཞིང་མཁྲེག་པ་འོག་རྡོ་རྗེ་རྒྱ་གྲམ་གྱིས་གཏམས་པ་སྲད་མེད་ཀྱིས་བུའི་མདས་ཀྱང་མི་ཕིག་པ། ལག་ན་རྡོ་རྗེའི་སྟོབས་ཀྱིས་ཀྱང་མི་ཤིགས་པ་ཁ་དོག་དུད་ཀ་ཆོས་འབྱུང་གིས་དཀྱིལ་དུ་བསྒོམ་མོ། །འབྱུང་བ་རླུང་གནས་སུ་དག་པ། ཡུམ་དམ་ཚིག་སྒྲོལ་མ། ཡེ་ཤེས་ནི་བྱ་བ་གྲུབ་པའོ། །ཧཱུྃ་ལས་ར་ཆད་པ་ལས་མེའི་དཀྱིལ་འཁོར་གྲུ་གསུམ་པ་མདོག་སྣ་ལྔ་ཐུག་ཆེ་མ་འུར་སྒྲ་དང་ཚག་ཚག་ཆེམ་ཆེམ་དང་བཅས་པའོ། །འབྱུང་བ་མེ་རྣམ་པར་དག་པ་ན་བཟའ་དཀར་མོ། ཡེ་ཤེས་ནི་སོ་སོར་རྟོགས་པའོ། །ར་ཆད་པ་ལས་རཀྟ་ཁྲག་གིས་རྒྱ་མཚོ་དམར་ནག་རྦ་རླབས་འཁྲུགས་པ། ཞིང་གིས་སྙན་འཕྱོ་བ། དབྱིབས་ཟླུམ་པོ་འབྱུང་བ། ཆུ་རྣམ་པར་དག་པ་ཡུམ་མཱ་མ་ཀཱི། ཡེ་ཤེས་ནི་མཉམ་ཉིད་ཡེ་ཤེས་སོ། །ལྃ་ཆད་པ་ལས་མཾ་སའི་ས་གཞི་སྟེ། ཤ་ཆེན་གྱིས་ཐང་མ་གདལ་བ། དབྱིབས་གྲུ་བཞི་མདོག་སེར་བོའོ། །འབྱུང་བས་རྣམ་པར་དག་པ་ཡུམ་སངས་རྒྱས་སྤྱན་མ། ཡེ་ཤེས་ནི་མེ་ལོང་ལྟ་བུ། དེ་ལྟར་སྤྱང་བྱ་འབྱུང་བ་ལྔ་ཉིད། སྤྱང་བྱེད་ཏིང་ངེ་འཛིན་གྱིས་འབྱུང་བར་མ་བརྩེགས་སུ་བསྒོམ་སྟེ། ཡུམ་ལྔའི་རང་བཞིན་ཡེ་ཤེས་ལྔར་སྦྱར་བ་ལ། གོ་རུ་ཤར་ཅེས་བྱའོ། །ཡང་ན་ཕྱི་ནང་གིས་འབྱུང་བ་ལྔ་ཉིད་ཡེ་ཤེས་སུ་ཤར་བའི་ཕྱིར་དང་། ཕུང་པོ་ལྔའི་འཁྲུལ་འཁོར་གཅོད་པའི་ཕྱིར་དང་། དབྱིངས་ཕྱུག་མ་ལྔ་ལྷུན་གྱི་གྲུབ་པའི་ཕྱིར་དང་། འབྱུང་བ་ལྔ་དང་འབྱུང་བ་ལས་གྱུར་པའི་བགེགས་རིག་སྟོང་ཕྲག་བརྒྱད་ཅུ་དྲེགས་པ་ང་རྒྱལ་ཅན་རྣམས་ཟིལ་གྱིས་གནོན་ཅིང་ཚར་བཅད་པའི་ཕྱིར། འབྱུང་བ་རིམ་བརྩེགས་དང་། དེའི་སྟེང་དུ་ཀེཾ་ཆད་པ་ཀེང་རུས་ཀྱིས་རི་རབ་ནག་པོ་ཁ་ཁྱེར་གྱེན་དུ་ཆེ་བ་ཁྲག་གི་རོལ་མཚོ་དང་བཅས་པའི་ངོས་ལ་བྱ་ཤ་ཟན་མར་པོ་ལྡིང་གིས་ཟུར་ལ་གཅན་ཁྲག་འཐུང་མང་པོ་འཛག་པ། རཀྟ་ཁྲག་གིས་ཞམ་ཆུ་འབབ་པ་དབྱིབས་གྲུ་བཞི་པ། བང་རིམ་ལ་མ་བདུན་སྲིང་བཞི་དང་དབང་ཕྱུག་མ་ལ་སོགས་པ་ཀུན་གྱི་གནས་བཅའ་ཞིང་ཡོད་པའོ། །ཟུར་བཞིའི་མར་ལ་གནམ་ལྕགས་ཀྱིས་མཛེར་ཆེན་བཞི་དང་ལྡན་པ། ཟུར་བཞིའི་ཡར་ལ་མཁའ་འགྲོ་དབང་དུ་སྡུད་པའི་དར་ཆེན་བཞི་ཕྱར་བ། དེའི་ཁ་ཁྱེར་ལ་མེ་མདོག་སྣ་ལྔ་དབྱིབས་གྲུ་གསུམ། ཐུགས་ཆེམ་འུར་སྒྲ་ཚག་ཚག་ཏུ་འབར་བའོ། །ཡང་ཧཱུྃ་ལས་ཧཱུྃ་ཆེད་པ་ལས་རི་རབ་ཀྱི་ཁ་ལས་ཕོག་ཏེ་འོད་དུ་ཞུ་བ་ལས་རྡོ་རྗེ་རྒྱ་གྲམ་རྩེ་ལྔ་པར་གྱུར་པ་ཕྲིན་ལས་བཞི་མཚོན་པའི་རྭ་ཤ་རྭ་དཀར། ལྷོ་སེར། ནུབ་དམར། བྱང་ལྗང། ལྷུན་གྲུབ་མཚོན་པའི་ལྟེ་བ་མཐིང་ནག་ཧཱུྃ་གིས་མཚན་པའོ། །ༀ་བཛྲ་མ་ཧཱ་རཀྵ་རཀྵ་ཧཱུྃ། ཞེས་བརྗོད་པས། འོད་དུ་ཞུ་བ་ལས། རྡོ་རྗེའི་གུར་ཁང་དུ་གྱུར་པ་ནི། རྐྱེན་གྱིས་མི་ཚུགས་པའི་རྟགས་སོ། །ཁ་དོག་མཐིང་ནག་རྒྱ་ཁྱོན་ཆེ་བར་གྱུར་པ། བསྐལ་པའི་མེ་རི་འབར་བ། རི་རབ་ཀྱིས་སྟེང་ཡང་རྡོ་རྗེའི་བྲག་རི་སྲ་ཞིང་འཁྲེགས་པར་གྱུར་པ་ནི། ཆོས་ཉིད་མི་འགྱུར་བ་དང་ཡེ་ཤེས་ཆེན་པོ་གསལ་བའི་རྟགས་སོ། །ཡང་ན་རྡོ་རྗེ་རྭ་བས་བདུད་དཔུང་འཇོམས། མེའི་འོབ་ཀྱིས་ཉོན་མོངས་བསྲེགས། །ཅེས་གསུངས་སོ། །ཡང་ཧཱུྃ་ལས་བྷྲ྄ཱུྃ་མཐིང་ནག་གཅིག་ཆད་པ་དེ་འོད་དུ་ཞུ་བ་ལས་དུར་ཁྲོད་ཀྱི་གཞལ་ཡས་ཁང་དུ་གྱུར་ཏེ། ཡོན་ཏན་རྒྱས་པའི་རྟགས་སུ་དབྱིབས་གྲུ་བཞི་པ་ལས། རྣམ་པར་ཐར་པ་བཞི་དང་ལྡན་པའི་རྟགས་སུ་སྒོ་བཞི་པ་སྒོ་ཁྱུད་ཅན། ཕྱི་ཐོད་པ་སྐམ་པོ་ལས་བརྩིགས་པ་འདས་པའི་སངས་རྒྱས་སམ་ཆོས་སྐུ་མཚོན། བར་ཐོད་པ་ར་རི་ལས་བརྩིགས་པ་ད་ལྟའི་སངས་རྒྱས་སམ་སྤྲུལ་སྐུ་མཚོན། ནང་ཐོད་པ་རློན་པ་ལས་བརྩིགས་པ་མ་འོངས་པའི་སངས་རྒྱས་སམ་ལོངས་སྤྱོད་རྫོགས་པའི་སྐུ་མཚན། ཡང་ན་ཐོད་སྐམ་ར་རི་རློན་པ་གསུམ་ཆོས་སྐུ་ལོངས་སྐུ་སྤྲུལ་སྐུ་གསུམ་དང་རིམ་པར་སྦྱར་བ་ཡང་སྣང་། ཀུན་འབྱུང་འདྲེན། དཀའ་ཐུབ་རིགས། དབང་བསྒྱུར་ཐབས་ཀྱི་ཐེག་པ་དང་གསུམ་སྦྱར་ལུགས་ཡང་སྣང་། ཐབས་ཤེས་འབྲེལ་བའི་རྟགས་སུ། བར་ཐམས་ཅད་ཤ་ཆེན་གྱི་བརྩིགས་འཇིམ་རཀྟས་སྤྱིན་ཐབས་སུ་སྦྱར་བ། ཚད་མེད་པ་བཞི་དང་ལྡན་པའི་རྟགས་སུ། ཟུར་བཞིར་གནམ་ལྕགས་ཀྱིས་འཛེར་བཞི་གདབ་པ། ཟུར་བཟང་པོ་དཔལ་གྱིས་ཐོད་སྐམ་ལ་འོད་སྣ་ལྔ་ཡོད་པར་འདོད་ལ། ལོ་ཙནྟྲ་སིངྷས་ཏྲི་རཱ་ག་ནི་གསུམ་རིམ་སྟེ། ཐོད་སྐམ་རི་རི་རློན་པ་སུམ་བརྩེགས་པ། དེའི་རྒྱབ་ཏུ་པཉྩ་རཱ་ག་ནི་ལ་རིམ་སྟེ། ནང་ནས་རིམ་པ་བཞིན་དུ་སྔོ་དཀར་སེར་དམར་ལྗང་རྣམས་རིན་ཆེན་སྣ་ལྔར་འདོད་ལ། དེའི་རྒྱབ་ཏུ་ཨེ་ར་ག་རྒྱང་རིམ་ལ། མེ་ལོང་ལྟ་བུའི་ཡེ་ཤེས་ཀྱིས་གདུལ་བྱའི་རྒྱུད་ལ་ཆོས་འཁོར་བསྐོར་བའི་རྟགས་སུ། ཤར་གྱི་རྒྱན་འཁོར་ལོས་བརྒྱན་པ། མཉམ་པ་ཉིད་ཀྱི་ཡེ་ཤེས་ཀྱི་གདུལ་བྱའི་དགོས་འདོད་སྐོང་བའི་རྟགས་སུ་ལྷོ་རིན་པོ་ཆེ། སོ་སོར་རྟོགས་པའི་ཡེ་ཤེས་ཀྱིས་མཐའ་གཉིས་དབང་དུ་སྡུད་ཀྱང་། མཐའི་ཉེས་སྐྱོན་གྱིས་མ་གོས་པའི་རྟགས་སུ་ནུབ་པདྨ། བྱ་བ་གྲུབ་པའི་ཡེ་ཤེས་ཀྱིས་རང་གཞན་གྱིས་དོན་མཐར་ཕྱིན་པའི་རྟགས་སུ་བྱང་རལ་གྲིས་བརྒྱན་པ། ཆོས་དབྱིངས་ཡེ་ཤེས་ཀྱི་བར་ལ་དངོས་པོ་ཐམས་ཅད་འཇོམ་ཞིང་ཚུར་ལ་མི་ཚུགས་པའི་རྟགས་སུ་སྟེང་གྲུ་བཞི་སྤྱི་བསྡུས་ཏེ་གུར་མགོང་སྣམ་པའི་རྩེ་མོ་རྡོ་རྗེ་རྩེ་དགུ་པའི་བུམ་པར་འཁྱིལ་བ། སྟེང་ཐམས་ཅད་རྡོ་རྗེ་མཐིང་ནག་གིས་ཕོ་གྱོ་མོ་གྱོས་བརྒྱན་པ། ཆོས་རྗེས་དེ་ལྟར་དུ་འདོད་ཀྱང་། ཐོས་ཆོག་པས་སྟེང་མཚོན་ཆ་ལྔས་བཀབ་པ་ཡེ་ཤེས་ལྔ། སྤྱི་བསྡུས་རྡོ་རྗེ་རྩེ་དགུ་པའི་བུམ་པར་འདུས་པ་ནི། ཐེག་པ་དགུ་རང་བྱུང་གིས་ཡེ་ཤེས་སུ་འདུས་པ་མཚོན་གསུང་། འོག་གཞི་ཨེ་ཁྲམ་ཉི་ཤུ་རྩ་གཅིག་མཐིང་ནག་ནི། ཨེ་གྲུ་གསུམ་ཤེས་རབ་ཡུམ་གྱི་མཁའ་དང་གཉིས་སུ་མེད་པའི་རང་བཞིན་ནམ་དབྱིངས་ཀྱིས་རྟགས། བྱང་ཆུབ་སེམས་ཀྱི་ཐིག་སྐལ་དཀར་པོ་དང་ལྡན་པ་ནི་ཐབས་ཡབ་སམ་ཡེ་ཤེས་ཀྱིས་རྟགས། ཆོས་རྗེས་འདོད་ལ། ཐོས་ཆོག་པས་ཨེ་ཁྲམ་ཉེར་གཅིག་གྲུ་གསུམ་ཁྲོ་དོང་དུ་འདོད་ལ། ཨེ་ནམ་མཁའ་སྟེ་དབྱིངས་དང་། ཁྲམ་ཉེར་གཅིག་ནི་ཡེ་ཤེས་རྣམ་པ་ཅིར་ཡང་སར་བའི་རྟགས་སོ། །གྲུ་གསུམ་དུ་འདོད་པ་ནི། ཡེ་ཤེས་རེ་རེ་ལའང་སྐུ་གསུང་ཐུགས་གསུམ་གསུམ་དང་ལྡན་པའམ། ཡང་ན་དྲག་པོ་མངོན་སྤྱོད་ཀྱིས་གདུལ་བྱ་རྒྱུད་དྲག་པོ་རྣམས་འདུལ་བའོ། །དབུས་ཀྱི་གྲུ་གསུམ་ཟླ་གམ་དམར་པོ་གསུམ་ནི་ཁམས་གསུམ་དུག་གསུམ་ལུས་ངག་ཡིད་གསུམ་དབང་དུ་བསྡུས་པའི་རྟགས་སོ། །མུ་ཁྱུད་དཀར་ལ་ཟླུམ་པ་ནི། སྤྲོས་པའི་མཐའ་བརྒྱད་ཀྱི་མཚན་མས་མ་གོས་པའི་རྟགས། མཐའ་གྲུ་བཞིར་གནས་པ་ནི། ལྷག་པའི་ཡོན་ཏན་ཡེ་ཤེས་ཀྱི་རྒྱས་པའི་རྟགས། ལྷ་སྣམ་དམར་པོ་དང་བཅས་པའོ། །ཅེས་པ་ནི་འཇིག་རྟེན་དང་འཇིག་རྟེན་ལས་འདས་པའི་དྲེགས་པ་ཅན་ཐམས་ཅད་དབང་དུ་བསྡུ་བའི་རྟགས་སོ། །ཐོས་ཆོག་པས་བསྙེན་དུས་དང་དབང་ལ་དམར་པོ། བསྒྲུབ་དུས་མཐིང་ནག་ཏུ་འདོད་དོ། །ཕོ་བྲང་རྡོ་རྗེ་རྭ་བའི་ནང་དུ་ཚུད་པ་ནི་ཆོས་ཉིད་ཀྱི་ཁྱབ་པའི་རྟགས་སོ། །གཞལ་ཡས་ཁང་གི་རྒྱན་ཡང་སྨོན་ལམ་གྱི་ཤུགས་དང་མ་བྲལ་བའམ། གདུལ་བྱའི་བསྐུལ་བ་གསན་པའི་རྟགས་སུ་བསྐལ་པའི་རླུང་ནག་འཚུབ་བ། རང་བྱུང་ཡེ་ཤེས་ཀྱིས་རྟགས་སུ་བསལ་བའི་མེ་རི་ཕྱི་ནང་མེད་པར་འབར་བ། སྤྲུལ་པ་ཕྱོགས་བཅུར་འཕྲོ་བའི་རྟགས་སུ་མེ་རེའི་རྩེ་ལ་རྡོ་རྗེ་རྩེ་ལྔ་པའི་སྣམ་པའི་ཐོག་མདའ་འཕྲོ་བ། ལོ་ཙནྡྲ་སིངྷས་བཞེད་ལ། དེ་རྣམས་ཐོད་པ་བརྩིགས་པའི་ཁ་ན་མེ་འབར་བ། སྣ་ནས་དུད་པ་རླུང་ནག་འཚུབ་མ་བྱུང་བ། མིག་ནས་ཁྲག་འཛག་པ། རྣ་བ་ནས་ཞག་གིས་ཟོ་རིས་འཛག་པར་འདོད་དེ། དངོས་པོ་ཐམས་ཅད་སེམས་སུ་རྟོགས་པའི་རྟགས་སུ་ཙིཏྟའི་ཕོལ་ཕྱིང་གིས་བརྒྱན་པ། དུག་གསུམ་གནས་སུ་དག་པའི་རྟགས་སུ། ལོག་རྒྱན་སྦྲུལ་ནག་གི་ཟ་ར་ཚག་གིས་བརྒྱན་པ་ནི་རྒྱུ་སྐར་གྱི་ཁ་ན་སྦྲུལ་གཉིས་གཉིས་བཟུང་བའི་རྔམ་གཉིས་ཀྱི་བར་ན་ཞིང་ལག་བཟུང་བའི་དྲྭ་འཕྱང་ལ་རུ་སྦལ་གྱི་མངའ་ཡབ་བཏགས་པ་དང་། སྦྲུལ་མགོ་གཉིས་ཀྱི་བར་ན་ཙིཏྟའི་ཕོལ་ཕྱིང་ཏེ་སྙིང་བཟུང་བའི་དྲྭ་བ་སྟེ་ཟ་ར་ཚག་ཏུ་འདོད་དོ། །ཆོས་ཐམས་ཅད་མ་འདྲེས་ལ་ཡོངས་སུ་རྫོགས་པའི་རྟགས་སུ། མངའ་ཡབ་མིའི་ལག་པ་དང་རྐང་པ་ཆབ་ནས་མཆོག་ཡར་ལ་བསླང་བ་པུ་ཤུ་དེ་ལ་འཁྲུངས་པ་མདའ་ཡབ་སྟེ། རྐང་མཐིལ་ལག་མཐིལ་གྱེན་དུ་ཕྱུང་བའི་སབ་སྲོག་སྦྲུལ་ནག་ལས་བྱས་པའི་བཅིང་ཐག་ནི། མིའི་རྒྱུ་མ་ཚིལ་ཆེན་གྱི་གཡོས་པས་བཅིང་བའི་རྩ་བའི་བད་ཆགས་སུ་མནན་པ་ལ་ད་རུ་ཀད་ཀྱིས་མདའ་ཡབ་དུ་འདོད་དོ། །དེའི་ནང་དུ་བདུད་རྣམས་འཇོམ་པའི་རྟགས་སུ་ཞིང་ཏྲིང་། ལྷ་ཆེན་བརྒྱད་ཀྱིས་རྒྱལ་མཚན་ནི། དཔལ་ཆེན་པོའི་མདའ་ཡབ་དུ་འདོད་དོ། །ཆོས་ཐམས་ཅད་བདག་མེད་པར་རྟོགས་པའི་རྟགས་སུ་མདའ་ཡབ་གྱིས་ནང་དུ་རྟ་བབ་ཀྱིས་གཡས་གཡོན་གྱི་ཐད་དུ་ཞིང་ཆེན་གིས་འཕན་ཟར་ཚག་གཉིས་གཉིས་སྟེ་བརྒྱད་དང་། མི་མགོའི་རྟོག་འོད་ཁ་དོག་སྣ་ཚོགས་པའི་སྟེང་དུ་མི་སྙིང་གིས་བརྒྱན་པའོ། །ཞིང་ལྤགས་གིས་བླ་རེ་ནི་ནང་གི་གཙོ་བོའི་དབུ་ཐོག་ན་ཡོད་པའོ། །ཞི་གནས་དང་ལྷག་མཐོང་ཟུང་དུ་འབྲེལ་བའི་རྟགས་སུ། ཉི་ཟླའི་སྐར་ཁུང་ཡོད་པ། ཐུགས་རྗེ་ཆགས་པ་དང་མ་བྲལ་བའི་རྟགས་སུ་རཀྟའི་ཞམ་ཆུ་འབབ་པ། ཕྱོགས་ཕྱོགས་ཀྱི་ས་རྒྱལ་པོ་ཆེན་པོ་བཞི་འདུལ་བའི་རྟགས་ལ་སྒོའི་རུ་བཞིའི་སྐྱེས་བུ་བྱས་པ། ཆོས་ཉིད་འགྱུར་བ་མེད་པའི་རྟགས་སུ། གནམ་ལྕགས་ཀྱི་ཡ་ཐེམ་ཡོད་པ། མ་ཐིམ་ཁྲོ་ཆུ་ལས་བྱས་པ། སྦྲུལ་བརྒྱད་ཀྱིས་སྒོ་ལེབ་བྱས་པས། ཆུ་སྲིན་ལ་སོགས་པས་སྒོ་སྲོག་བསྒྲིག་པ། སྒོ་ཐོག་ན་བཅུ་གཅིག་རྡོ་རྗེའི་རེའུ་མིག་དང་། སྒོ་ཁང་ནང་གིས་རྒྱན་དགུ་དང་བཅས་པ་ཡོད་པའོ། །ཡང་སྒོ་ལ་ཞིང་ལྤགས་དང་། སྒོ་འདན་སྦྲུལ་ནག་ལ་བྱས་པར་འདོད་པ་ཡང་སྣང་ངོ་། །རྣམ་པར་ཐར་པ་བརྒྱད་དང་ལྡན་པའི་རྟགས་ཆུ་སྲིན་གྱི་རྟ་ཟུར་བྱས་པའི་རྟ་བབ་བང་རིམ་བཞི་པ་སྣམ་བུ་བརྒྱད་དང་ལྡན་པ། རུས་ཆེན་གྱིས་ཕ་གུ་ལ་མུ་ཏིག་གིས་དྲྭ་བ་འཕྱང་བ། པདྨ་འདབ་མ་སྟོང་ལྡན་གྱིས་བཀབ་པའི་སྟེང་དུ། ཆོས་འཁོར་བཅུ་གསུམ་གང་གིས་གདུགས་ཀྱིས་བརྒྱན་པ། ཆོས་འཁོར་གྱིས་གཡས་གཡོན་གཉིས་སུ། འབྲུག་གིས་རི་དྭགས་ཚུལ་དུ་ཡོད་པའི་སྒྲ་སྒྲོགས་པ་ནི་ཐེག་པ་མཆོག་གིས་ཆོས་སམ། མངོན་སྤྱོད་ཀྱིས་གཞན་དབང་དུ་མཛད་པའི་རྟགས་སོ། །ཡང་ན་རྟ་བབ་ཀེང་རུས་ལས་བྱས་པའི་བང་རིམ་བཞིར་འདོད་པ་ཡང་སྣང་ངོ་། །བསྙེན་གནས་བརྒྱད་མཚོན་པའི་རྟགས་སུ། ས་བདག་གིས་ཀ་གདན་ནི་རུ་སྦལ་སེར་པོ་བརྒྱད་སྒོ་གཡས་གཡོན་གྱིས་ཐད་སོའི་ལྷ་སྣམ་དང་། གྲུ་ཆད་ཀྱི་མཚམས་ན་ཁ་ཕྱིར་བསྟན་དེས་ཡོད་པ། འཕགས་ལམ་བརྒྱད་མཚོན་པའི་ལྷ་ཆེན་པོ་བརྒྱད་ཀྱིས་ཀ་བ་ནི། ཞིང་སྨུག་པོ་བརྒྱད་ལང་པའི་ལུས་ལ་སྦྲུལ་ནག་བཞིའི་དཀྲིས་ནས་བམ་ཚང་ཟར་ཚག་ཏུ་ཡོད་པའི་མགོ་གཉིས་དང་། རྔ་མ་གཉིས་སྙན་གང་ན་ཕྱར་ཞིང་། མགོ་གཉིས་རྔ་མ་གཉིས་པུས་མོ་མགོ་ལ་ཕྱར་བའི་ལག་པ་མགོ་ཐོག་ན་བརྐྱངས་ནས་དཔལ་ཀའི་ཚུལ་དུ་ཡོད་པའི་ནང་དུ་ཉི་ཟླའི་ཀ་གཞུའི་སྟེང་དུ་རྣམ་ཐར་བརྒྱད་མཚོན་པའི་རྟགས་སུ་ཀླུ་ཆེན་པོ་བརྒྱད་ཀྱིས་གདུང་མ་བྱས་པ་ནི། མགོ་ཕྱོགས་བཞིར་བསྟན་ནས་འཇུག་མ་དབུས་སུ་བསྣོལ་བ། ཆོས་རྗེས་དེ་ལྟར་བཞེད་ཀྱང་། ཐོས་ཆོག་པས། ཀ་བ་ཕྱོགས་བཞི་མཚམས་བརྒྱད་དུ་བཙུགས་པའི་སྟེང་ཀླུ་བརྒྱད་ཀྱིས་གདུང་མ་མགོ་ཕྱོགས་བཞི་མཚམས་བརྒྱད་དུ་བསྟན་ཏེ། རྒྱ་གྲམ་དུ་བྲེས་པར་འདོད་དོ། །བརྩིགས་པའི་ཁ་ཁྱེར་གྱིས་ནང་དུ་འདོད་ཡོན་མ་སྤངས་རྒྱན་དུ་རོལ་པའི་རྟགས་སུ། འདོད་སྣམ་དམར་པོ་ཡོད་པའི་ཐོག་ཏུ་མཆོད་པའི་ལྷ་མོ་གནས་པ། བསྒོམ་དབང་དུ་ནམ་མཁའ་བར་སྣང་ས་གཞི་གང་བར་བསྒོམ་མོ། །ཁ་ཁྱེར་གྱིས་ཕྱི་མ་ལ་ཐོད་ཚལ་གྱི་ཕ་གུ་ཡོད་པ། ནང་དུ་ཕྱོགས་སྐྱོང་བཅུ་འདུལ་བའི་རྟགས་སུ། ཞིང་ཆུང་བཅུའི་ཀ་ཐུང་གིས་བར་དུ་རུས་ཆེན་གྱིས་ཏྲག་རྩེ་སྟེ་མིའི་རྩིབས་མ་བསླབ་པའི་ཐོག་ན། གཟའ་དང་རྒྱུ་སྐར་གྱིས་ཁ་བད་བྱས་པའི། གཟའ་བརྒྱད་འདུལ་བའི་རྟགས་སུ། མགོ་མཚམས་བཞིར་བསྣོལ་ཞིང་མཇུག་མ་ལོགས་སུ་བསྣོལ་བའི་ཁ་བད་ཀྱིས་སྟེང་དུ། ཕར་ཕྱིན་བཅུ། སྟོང་ཉིད་བཅོ་བརྒྱད་འཛོམས་པའི་རྟགས་སུ་རྒྱུ་སྐར་ཉེར་བརྒྱད། ནང་གིས་གདུང་མའི་ཕྱོགས་རེ་རེ་ནས་བཞི་བཞི་མཚམས་རེ་རེ་ནས་གསུམ་གསུམ་ལེན་པའི་དྲལ་གྲབ། ཞིང་ཆེན་གྱིས་དྲལ་ཕྲན། མཚོན་ཆ་ལྔའི་སྟེང་ཁེབ། དེའི་ཐོག་ན་ཤ་ཆེན་གྱིས་ཐོག་འཇིམ་གྱི་སྟེང་རྡོ་རྗེའི་ཕོ་གྱོ་མོ་གྱོ་སྦྱི་བསྡུས་ཏེ། རྡོ་རྗེ་ནག་པོ་རྩེ་དགུ་པའི་བུམ་པར་འཁྱིལ་བ། ཐོས་ཆོག་པས་བཞེད་ལ། ཆོས་རྗེས་མཚོན་ཆ་ལྔའི་སྟེང་ཁེབ་མི་བཞེད། གཞན་མཐུན། ལས་བཞིས་གཞན་དོན་མཛད་པའི་རྟགས་སུ། ཤར་གྱིས་སྒོ་སྐེ་ཕྱི་གཅད་དཀར། ལྷོ་སྒོ་སེར། ནུབ་སྒོ་དམར། བྱང་སྒོ་ལྗང་བའོ། །གཞལ་ཡས་ཁང་གིས་ཟུར་བཞི་ན། མི་འཇིགས་པ་བཞིའི་རྟགས་སུ། སེངྒེ། གླང་ཆེན། རྟ་མཆོག །ཤང་ཤང་དང་བཞི་གནས་པར་བཞེད་དོ། །དེའི་ཕྱི་རོལ་ན་ཏ་ལའི་ཤིང་དང་། གསེར་གྱིས་ཚང་ཚང་གིས་བྲེས་པ་ནི། ཐེག་པ་ཐམས་ཅད་ཀྱིས་དམ་ཚིག་རྣམ་པར་དག་པའི་རྟགས་སོ། །དེའི་རྒྱབ་རྡོ་རྗེ་རྭ་བའི་ནང་དུ་དུར་ཁྲོད་ས་གཞི་དམར་ནག་གིས་སྟེང་དུ། དུར་བྱ་ཀཾ་ཀ་དང་། ལི་འདུས་དང་། ལྕེ་སྤྱང་སྟག་གཟིག་དོམ་དྲེད་རོ་གསར་རྙིང་གིས་ཚོགས་དང་བཅས་པའི་ནང་ན་དབང་ཕྱུག་མ་ཉེར་བརྒྱད་ལ་སོགས་མ་མོ་ཐམས་ཅད་ཀྱིས་ཧཱུྃ་ཧཱུྃ་དང་ཕཊ྄་ཕཊ྄། བྷྱོ་བྷྱོ་རུ་ལུའི་སྒྲ་སྒྲོགས་པར་བསྐྱེད་དོ་གསུངས། དེའི་ནང་གིས་གདན་ཡང་གདུལ་བྱ་རྟགས་ལ་རྒྱལ་བའི་རྟགས་སུ། དྲེགས་པ་ཕོ་མོའི་གདན་ནི། དབུས་སུ་རུ་ཏྲ་ཕོ་མོ་དང་མ་ཧཱ་དེ་ཝ་ཕོ་མོ་བསྣོལ་བའི་ཞབས་ན། པདྨ་དང་ཟླ་བ་ཉི་མ་བརྩེགས་པའོ། །ཕོའི་མགོ་གཡས་སུ་ཁ་སྦུབ་མོ་གན་རྒྱལ་མགོ་གཡོན་ནོ། །རྐང་པ་གཉིས་བསྣོལ་བའོ། །ཨེ་ཁྲམ་ཉི་ཤུ་ལ་ཁྲོ་བོ་བཅུའི་གདན་ཉི་མ་བཅུའི་སྟེང་དུ། ཕྱོགས་སྐྱོངས་གིས་རོ་བསྣོལ་མ་བཅུ་བསྒོམ་མོ། །ཁྲ་ཐབས་ཀྱིས་གནས་སུ་རོ་རྐྱང་པ་བཅུ། དམ་ཅན་གྱིས་གནས་སུ་རོ་མགོ་མེད་པ་བཅུ་གཉིས་བསྒོམ་པ་ཆོས་རྗེས་བཞེད་ལ། ཐོས་ཆོག་པས་གཙོ་བོའི་གདན་ལ་གྲུ་གསུམ་གྱི་ནང་དུ་རུ་ཏྲ་ཕོ་མོ་དང་མ་ཧཱ་དེ་བ་ཕོ་མོའི་སྟེང་དུ་ཉི་ཟླ་པདྨ་གསུམ་བརྩེགས་ཁྲོ་བོ་བཅུ་ལ་ཕྱོགས་སྐྱོངས་ཕོ་མོའི་རོ་ཨེ་ཁྲམ་གྱིས་གྲུ་གསུམ་གྱིས་ནང་དུ་བཅུག་པའི་སྟེང་དུ་ཉི་མ། ཁྲ་ཐབས་ཀྱི་གནས་སུ་རོ་རྐྱང་པ་བཅུ་ནི་བསྒྲལ་བའི་ཞིང་བཅུ་སྟེ། རོ་གློ་ཉལ་མགོ་གཡས་སུ་བསྟན་པའི་སྟེང་དུ་ཉི་མ་ལྷ་སྣམ་ལ་རོ་མགོ་མེད་བཅུ་གཉིས་ཟེར་ཡང་། ཤྭ་ན་བཞི་དང་། རེ་ཏི་བཞིའི་གདན་ནི་ལྷ་སྲིན་སྡེ་བརྒྱད་ཡིན་པས་མགོ་ཡོད་ཅེས་གསུང་བསྭེ་མོ་བཞིའི་གདན་ནི་བདུད་བཞི་ཡིན་པས་མགོ་མེད་དོ། །སྤྱི་དོན་ལྔ་པ་བརྟེན་པ་ལྷའི་དཀྱིལ་འཁོར་གྱིས་ལྷ་བསྐྱེད་པ་ལ་བཞི་སྟེ། བདག་རྩ་བའི་དཀྱིལ་འཁོར་དང་། ཕྱོགས་བཅུ་ཁྲོ་བོའི་དཀྱིལ་འཁོར་དང་། ཕུར་པ་སྲས་ཀྱིས་དཀྱིལ་འཁོར་དང་། དམ་ཅན་སྲུང་མའི་དཀྱིལ་འཁོར་རོ། །དེ་ལ་བདག་རྩ་བའི་དཀྱིལ་འཁོར་ནི། ནམ་མཁའི་ཧཱུྃ་དེ་དབུས་ཀྱིས་གདན་ཐོག་ཏུ་བབ་པ་ལས། འོད་ཟེར་ཕྱོགས་བཅུར་འཕྲོས་པས། བསྐུལ་དོན་གཉིས་བྱས། འོད་དུ་ཞུ་སྟེ་རྡོ་རྗེ་ནག་པོ་རྩེ་དགུ་པ་ཁྲོ་ནལ་བཅུ་དྲུག་དང་ལྡན་པ་མེ་འབར་བའི་ལྟེ་བ་ཧཱུྃ་གིས་མཚན་པ་ནི། སངས་རྒྱས་ཀྱིས་ཐབས་ཡེ་ཤེས་དང་། སེམས་ཅན་གྱིས་རྣམ་པར་ཤེས་པ་རྣལ་འབྱོར་པའི་ཏིང་ངེ་འཛིན་ངོ་བོར་བསྒོམ་པ་ཡིན་པ་དེ་ཡང་རྡོ་རྗེ་རྩེ་དགུར་གནས་པ་ནི། སེམས་ཅན་གྱིས་དུས་སུ་རྣམ་པར་ཤེས་པ་ཚོགས་དགུ་དེ་སངས་རྒྱས་ཀྱིས་ཡེ་ཤེས་དགུར་གནས་སུ་དག་ཅིང་། རྣལ་འབྱོར་བའི་ཏིང་ངེ་འཛིན་གྱི་ཡེ་ཤེས་དགུར་སྣང་བའི་ཕྱིར་རོ། །དེ་ལ་འོད་ཟེར་འཕྲོས་པས་ཕྱོགས་བཅུའི་སངས་རྒྱས་ཐམས་ཅད་ཀྱིས་སྐུ་གསུང་ཐུགས་ཀྱིས་རྒྱུད་བསྐུལ། སེམས་ཅན་གྱིས་ལུས་ངག་ཡིད་གསུམ་གྱིས་སྒྲིབ་པ་སྦྱངས། སླར་འདུས་ནས་སྔགས་བརྗོད་པ་ནི། པདྨའི་གསེར་འགྲེལ་ལས། ཨཱོྂ་ཡི་གེ་ཆ་ལྔ་ཡེ་ཤེས་ལྔ་མཚོན་བྱེད་དམ་ས་བོན། ཨ་ཆོས་དབྱིངས་ཡེ་ཤེས། ན་རོ་མཉམ་ཉིད་ཡེ་ཤེས། ཟླ་ཚེས་མེ་ལོང་ཡེ་ཤེས། ཐིག་ལེ་སོ་སོར་རྟོགས་པའི་ཡེ་ཤེས། འ་བྱ་བ་ནན་ཏན་གྱིས་ཡེ་ཤེས། དེ་ལྟར་མཚོན་པའོ། །བཛྲ་རྡོ་རྗེ་ཀཱི་ལི་ཕུར་བུ་ཀཱི་ལ་ཡ་ཕུར་པ་འདེབས་པ། སརྦ་ཐམས་ཅད་བྷིག་བགེགས་ནན་ཕུར་བུ་རི་རབ་ཀྱིས་མནན་པ། བྃ་དབང་། ཧཱུྃ་ཡི་གེ་ཆ་ལྔ་སྐུ་གསུང་ཐུགས་ཡོན་ཏན་ཕྲིན་ལས་ལྔར་བསྐྱེད་ཅིག་པའོ། །ཕཊ྄་ཅེས་སྤྲོས་པ་ཞེས་བྱ་བའི་ཐ་ཚིག་གོ། །ལོ་ཙནྡྲའི་འགྲེལ་པར། ཨཱོྂ་ནི་སྐུ་ལྔ་ཡེ་ཤེས་ལྔ་སྟེ། ཨ་ཆོས་དབྱིངས་ཡེ་ཤེས། ན་རོ་སོར་རྟོགས་ཡེ་ཤེས། ཟླ་ཚེས་མཉམ་ཉིད་ཡེ་ཤེས། ཐིག་ལེ་མེ་ལོང་ལྟ་བུའི་ཡེ་ཤེས། འ་བྱ་བ་གྲུབ་པའི་ཡེ་ཤེས་སོ། །དེ་ཡང་བཀྲ་ཤིས་པའི་དོན། སྔགས་ཐམས་ཅད་བྱིན་གྱི་བརླབས་པར་བྱ་བའི་སྔོན་དུ་ༀ་འགྲོ་བ་ཡིན། དེ་ཡབ་སྔགས་སོ། །བཛྲ་ནི་རྡོ་རྗེ་སྟེ། སྟོང་པ་ཤེས་རབ་ཀྱིས་དོན་ཡུམ་གྱིས་སོ། །ཀཱི་ལི་ནི་སྦྲ་རང་ཐད་དུ་ཕུར་པ་ལ་བསྟོད་དེ་བོས་པའོ། །ལྷ་ནི་ཁྲོ་བོ་ཡབ་ཡུམ་བཅུའོ། །ཀཱི་ལ་ནི་ཕུར་པས་ཐོབ་ཅིག་པ་སྟེ། ལྷ་ནི་ཟ་བྱེད་ཡབ་ཡུམ་བཅུའོ། །ཡ་ཞེས་སྲས་མཆོག་ཉེར་གཅིག་གིས་རང་བཞིན། སརྦ་ནི་ཐམས་ཅད། བྷིག་ནི་བགེགས། ནན་ནི་ནོན་ཅིག །བྃ་ནི་ཆིངས་ཤིག །ཧཱུྃ་ནི་ཁམས་གསུམ་རྡོ་རྗེ་ཁྲོ་བོ་སྲིན་པོའི་ལྷ་ཚོགས། ཕཊ྄་ནི་སོད་ཅིག་པའོ། །དོན་ལ་བགེགས་ཐམས་ཅད་ཟུང་ཅིག །ནོན་ཅིག །ཆིངས་ཤིག །རྡོ་རྗེ་སྲིན་པོའི་ལྷ་ཚོགས་ཀྱིས་ཕུར་པ་སྙིང་ཁར་ཐོབ་ལ་སོད་ཅིག་པའོ། །ཧཱུྃ་རྒྱུ་མ་ནོར་བརྩ་བའི་སྔགས། ༀ་བཛྲ་ཀཱི་ལི་ཀཱི་ལ་ཡ་བསྐྱེད་པ་རྐྱེན་གྱི་སྔགས། སརྦ་བྷིགྷན་ལ་སོགས་དད་སྦྲེལ་བ་ནི་བཟླས་པ་ལས་སྔགས་ཡིན་གསུང་། ཡང་ལྷ་དང་སྦྱར་ན། ༀ་ཡེ་ཤེས་ལྔ། བཛྲ་རྡོ་རྗེ་གཞོན་ནུ་ཡབ་ཡུམ། ཀཱི་ཁྲོ་བོ་བཅུ། ལི་ཁྲོ་མ་བཅུ། ཀཱི་ཟ་བྱེད་ཕ་བཅུ། ལ་མགྱོག་བྱེད་མ་བཅུ། ཡ་བདུད། སརྦ་ཐམས་ཅད། བྷིག་གིང་ཆེན་བཅོ་བརྒྱད། ནན་བདག་ཉིད་ཆེན་མོ་བཞི། བྃ་མ་མོ་བདུན། ཧཱུྃ་སྲིང་མོ་བཞི། ཕཊ྄་བསྲེའི་སྐྱེས་བུ་བཞི། དེ་ལྟར་འདོད་པ་ཡང་སྣང་ངོ་། །ཕྱག་ལེན་ལ། ༀ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ྄་ཅེས་བརྗོད་པས། རྡོ་རྗེ་གཞོན་ནུའི་སྐུར་གྱུར་ཏེ། སྙིང་གི་གོ་རུ་བསྒོམ་པར་བྱ། ཅེས་པ་ནི། རྡོ་རྗེ་ཧཱུྃ་དང་བཅས་པ་བསྒོམ་པའོ། །སྙིང་རྗེའི་བསྒྲལ་བའི་དམ་ཚིག་ནི། ཅེས་པ་ནི། འཇིག་རྟེན་པ་བཞིན་ཞེ་སྡང་གིས་བསད་ཅིང་། གཏི་མུག་གིས་མནན་པ་མ་ཡིན་ཏེ། འོད་འཕྲོས་པས་སེམས་ཅན་གྱིས་ལུས་ངག་ཡིད་གསུམ་གྱི་སྒྲིབ་པ་སྦྱངས་ནས་ཀྱང་། རྡོ་རྗེ་གཞོན་ནུའི་སྐུ་གྲངས་མེད་པར་གྱུར་པ་ལ་ནི། ཕུང་པོ་རྡོ་རྗེ་གཏམ་བྱས་ནས། ཅེས་སོ། །དེ་དག་ཚུར་འདུས་ཏེ་རྡོ་རྗེ་གཞོན་ནུའི་སྐུར་གྱུར་པ་ལ་ནི། རྣམ་པར་ཤེས་པ་རྡོ་རྗེར་བསྒོམ། ཅེས་ཆོས་རྗེས་བཞེད་ལ། འགྲེལ་པ་ལས། སྙིང་ནི་ཐུགས་ཡང་དག་པའི་ཡེ་ཤེས། གོ་རུ་ནི་དེའི་རྟགས་རྡོ་རྗེ་བསྒོམ་པའོ། །དེའི་འོད་ཟེར་འཕྲོ་འདུ་ལས་འགྲོ་བའི་དོན་བྱས་པ་ནི་སྙིང་རྗེས་བསྒྲལ་བས། སྒྲོལ་བྱེད་རྡོ་རྗེ་གཞོན་ནུར་བསྒོམ་པ། དམ་ཚིག་ནི་ཡུམ་འཁོར་ལོ་རྒྱས་འདེབས་མ་བསྒོམ་པ། དེ་ལྟར་ཡབ་ཡུམ་གཉིས་སུ་མེད་པས་འགྲོ་བ་སྒྲོལ་བ་ཡང་། ཞེ་སྡང་གིས་བསད་ཅིང་གཏི་མུག་གིས་མནན་པ་ལྟ་བུ་ནི་མ་ཡིན། ཐུགས་ཡེ་ཤེས་ཀྱིས་འོད་འཕྲོས་སེམས་ཅན་གྱིས་ལྔ་ཕུང་སྦྱངས་ཏེ་བསྲེགས། སླར་འདུས་བདག་ཉིད་རྡོ་རྗེ་གཞོན་ནུར་གསལ་བའི་བ་སྦུ་ཐམས་ཅད་རྡོ་རྗེ་གཞོན་ནུའི་སྐུ་ཚོན་གང་བས་གཏམ་པ་སྟེ་རེག་མ་རེག་ཙམ་དུ་གནས་པ། གསུང་གི་ཀཱི་ལ་ཡ་སྒྲོགས་པ། སྐུ་ལ་ཡེ་ཤེས་ཀྱིས་འོད་འཕྲོ་བ། སྐུ་བསྐལ་བའི་མེ་དཔུང་གིས་ནང་ན་བཞུགས་པ། གདུལ་བྱ་སེམས་ཅན་ཡང་དེ་ལྟར་གྱུར་པར་བསྒོམ་པ་ནི། རྣམ་པར་ཤེས་པ་རྡོ་རྗེར་བསྒོམ་ཅེས་བྱའོ། །དེ་ཡང་དབལ་ནི་ཕུན་སུམ་ཚོགས་པ། རྡོ་རྗེ་ནི་རང་བྱུང་ཡེ་ཤེས་སྐྱེ་འཇིག་མེད་པ་གཞོན་ནུ་ནི་ཆོས་སྐུ་ལ་བསྒྲེས་གུད་མི་མངའ་བ། སྐུ་མདོག་མཐིང་ནག་ནི་ཆོས་ཉིད་འགྱུར་བ་མེད་པ། དེ་ཡང་དབུ་གསུམ་རྣམ་ཐར་གསུམ་མམ་སྐུ་གསུམ་གྱི་ངོ་བོ་ཕྱག་དྲུག་ནི་འགྲོ་དྲུག་གིས་སྐྱེ་སྒོ་གཅོད་ཅིང་ལམ་ཕར་ཕྱིན་དྲུག་དང་ལྡན་ཞིང་། འབྲས་བུ་ཡེ་ཤེས་ལྔ་དབྱིངས་དང་དྲུག་གམ། སྐུ་དྲུག་ཐོབ་པའི་རྟགས། ཞབས་བཞི་ནི་ཚད་མེད་པ་བཞིའི་ཆོས་ཀྱི་དབྱིངས་ལས་མི་བསྐྱོད་ཅིང་ཐུགས་མི་འཇིགས་པ་བཞིས་རང་གཞན་གྱིས་དོན་རྫོགས་པར་མཛད་པའི་རྟགས། རྡོ་རྗེའི་གཤོག་པ་གདེང་པ་ནི། དབྱིངས་དང་ཡེ་ཤེས་ཀྱིས་ཐམས་ཅད་ལ་ཁྱབ་པའི་མཐའ་གཉིས་སུ་མི་བྱིང་བའི་རྟགས། སྐུ་ལ་བསྐལ་པའི་མེ་འབར་བ་ནི། ཡེ་ཤེས་ཀྱིས་ཉམས་འབར་བའི་རྟགས། ཞལ་གཡས་དཀར་བ་ནི་སྐུ་སྟེ། གཟུང་འཛིན་ནམ་དངོས་འཛིན་གྱིས་སྐྱོན་མི་མངའ་བས། སྐུ་གསུམ་ལ་ལོངས་སྐུ། རྣམ་ཐར་གསུམ་ལ་མཚན་མ་མེད་པ། གཡོན་དམར་བ་ནི་གསུང་སྟེ། གཞན་དོན་ལ་ཆགས་པ་དང་། སྐུ་ནི་སྤྲུལ་སྐུ་དང་། རྣམ་ཐར་ནི་སྨོན་པ་མེད་པ། དབུས་མཐིང་ནག་སྐུ་དང་མཐུན་པ་ནི། ཐུགས་རྣམ་པར་དག་པས། སྐུ་ནི་ཆོས་སྐུ། རྣམ་ཐར་ནི་སྟོང་པ་ཉིད། མཐིང་ནག་ནི་དྲག་པོའི་གདུལ་བྱ་འདུལ་བར་བྱེད་པའོ། །ཕྱག་དྲུག་གིས་གཡས་ཀྱིས་དང་པོ་ན་ཡེ་ཤེས་ཀྱི་རྡོ་རྗེ་རྩེ་དགུ་པ་བསྣམས་པ་ནི། ཁམས་གསུམ་ས་དགུ་འཇོམས་ཞིང་ཐེག་པ་དགུའམ་ཡེ་ཤེས་དགུ་ལ་སྦྱོར་བའི་རྟགས། དེ་ལྟར་ལྷུན་གྲུབ་ཡེ་ཤེས་ལ། ཉོན་མོངས་པས་མི་འཁྲུགས་པས། བསམ་གཏན་གྱིས་ཕ་རོལ་ཏུ་ཕྱིན་པ་དང་སྦྱར། བར་མ་ན་རྡོ་རྗེ་རྩེ་ལྔ་པ་བསྣམས་པ་ནི། འཁོར་བའི་སེམས་ཅན་གྱི་དོན་མཛད་ནས་ལམ་རྒྱུད་ལྔའི་དུག་ལྔ་རྩད་བཅད་ནས་ཡེ་ཤེས་ལྔ་ལ་སྦྱོར་བའི་རྟགས། དེ་ཡང་ཡར་རྩེ་ཡབ། མར་རྩེ་ཡུམ། ལྟེ་བ་འདུ་འབྲལ་མེད་པའི་བྱང་ཆུབ་སེམས་ཀུན་ལ་ཁྱབ་པའི་བདག་ཉིད་སྦྱིན་པའི་ཕ་རོལ་ཏུ་ཕྱིན་པ་དང་སྦྱར། ཕྱག་མཚན་དེ་གཉིས་ནི་ནང་རྟགས་ཕྱིར་ཤར་བས་རྟགས་དེ་དག་ཡེ་ཤེས་ཀྱི་ཕྱག་མཚན་ནོ། །གཡོན་གྱིས་དང་པོ་ན་མེ་དཔུང་བསྣམས་པ་ནི། ཕྱི་རོལ་ཏུ་བདུད་དང་མུ་སྟེགས་བསྲེགས་ཅིང་། ནང་དུ་ཁམས་གསུམ་གྱི་དུག་གསུམ་བསྲེགས་རྟགས། དེ་ཡང་ཉོན་མོངས་པའི་བུད་ཤིང་ཡེ་ཤེས་ཀྱིས་མེས་བསྲེགས་པས། ཉོན་མོངས་པའི་མི་ནོན་པས་བཟོད་པའི་ཕ་རོལ་ཏུ་ཕྱིན་པ་དང་སྦྱར། འདི་ནི་སྲིད་པ་ཟ་བྱེད་ཀྱི་ཕྱག་མཚན་ནོ། །བར་མ་ན་ཁ་ཊཱཾ་ཀ་བསྣམས་པ་ནི། རྒྱལ་བྱེད་དཔའ་རྟགས་ཀྱིས་ཕྱག་མཚན་སྟེ། བདུད་ཀྱི་ལག་ཆ་ཕྲོག་ནས་ཕྱག་ཏུ་འཛིན་པ། རྩེ་གསུམ་ཡོད་པ་ནི་ཀུན་ཏུ་ཀྱི་སའམ། ཆོས་སྐུ་པདྨ་ཅན་གྱི་སའམ་ལོངས་སྐུ། ཡི་གེ་འཁོར་ལོའི་སའམ་སྤྲུལ་སྐུ་སྟེ། དེ་ལྟར་གསུམ་མཐར་ཕྱིན་ཏེ། སྐུ་གསུམ་ལྷུན་རྫོགས་མཚོན་པའམ། དུག་གསུམ་རྩད་ནས་གཅོད་པའི་རྟགས། དེ་བཞིན་གཤེགས་པ་ཐམས་ཅད་ཀྱིས་སྐུ་གསུང་ཐུགས་ལ་མངའ་བརྙེས་ཏེ། དོན་དེ་ཉིད་རྩོལ་པ་མེད་པར་ལྷུན་གྱིས་གྲུབ་པས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་སྦྱར། ཕྱག་ཐ་མ་གཉིས་ན་རི་རབ་ལྟ་བུའི་ཕུར་པ་དྲིལ་བ་ནི། རྒྱལ་བྱེད་སྲིད་པ་ཡོངས་སྒྲོལ་གྱི་ཕྱག་མཚན་སྟེ། ཁམས་གསུམ་དུག་གསུམ་ལུས་ངག་ཡིད་གསུམ་སྐུ་གསུང་ཐུགས་ཀྱིས་ངང་དུ་སྒྲོལ་བའི་རྟགས། དེ་ཡང་ཁམས་གསུམ་གྱི་ཉོན་མོངས་པ་རྩད་ནས་བཅད་པ་སྟེ། ཤེས་རབ་ཀྱིས་ཕ་རོལ་དུ་ཕྱིན་པའམ། འཁོར་བ་མ་སྤང་ཐབས་མཁས་པས། ཐབས་ཀྱི་ཕ་རོལ་ཏུ་ཕྱིན་པ་དང་སྦྱར། ཡང་ན་རྡོ་རྗེ་རྩེ་དགུ་ཐེག་པ་དགུ། ཡིག་འབྲུ་དགུ་ཕུར་པ་དོན་གྱི་ལྷ་དགུའི་རང་བཞིན། རྩེ་ལྔ་ནི་ཡེ་ཤེས་ལྔ། ཡིག་འབྲུ་ལྔ་ཀཱི་ལ་ཡ་རིགས་ལྔའི་རང་བཞིན། མེ་དཔུང་ནི་ཉོན་མོངས་པ་བརྒྱད་ཁྲི་བསྲེགས་ཅིང་ཡིག་འབྲུ་སྔགས་ཐམས་ཅད། ལྷ་ནི་ལྷ་ཚོགས་ཐམས་ཅད་ཀྱིས་རང་བཞིན། ཁ་ཊྭཱཾ་ནི་དུག་གསུམ་འཇོམས་པའི་ཡིག་འབྲུ་གསུམ། ལྷ་ཀཱི་ལ་ཡ་རིགས་གསུམ་གྱི་རང་བཞིན། ཐ་མ་གཉིས་ཕུར་པ་དྲིལ་བ་ནི། མེ་ལོང་ཡེ་ཤེས་ཀྱིས་མ་རིག་པ་རྩད་ནས་གཅོད་པ། ཡི་གེ་ཧཱུྃ། ལྷ་བཛྲ་ཀཱི་ལ་ཡ་ཐུགས་ཀྱིས་རང་བཞིན་ནོ། །དབུ་སྐྲ་ཁམ་ནག་གྱེན་དུ་བརྫེས་པ་ནི། ཁམ་པ་ཐབས། ནག་པ་ཤེས་རབ། དེ་མཐའ་གཉིས་སུ་མ་ཉལ་བའི་རྟགས་སུ་གྱེན་དུ་བརྫེས་པ། ཐུགས་ཆོས་སྐུ་སྤྲོས་པ་དང་བྲལ་བའི་རྟགས་སུ་ཟླུམ་པོ། དབུ་རེ་རེ་ལ་ཐོད་སྐམ་ལྔ་ལྔས་བརྒྱན་པ་ནི། འདས་པའི་སངས་རྒྱས་མཚོན། ཐུགས་ཡེ་ཤེས་ལྔའི་རྟགས་སུ་རིགས་ལྔའི་སངས་རྒྱས་དབུ་ལ་བཞུགས་པ་སྟེ། སྤྱི་གཙུག་ཏུ་མི་བསྐྱོད་པ་སྔོ། དཔྲལ་བར་རྣམ་སྣང་དཀར། རྣ་ལྟག་གཡས་སུ་རིན་འབྱུང་སེར། ལྟག་པར་སྣང་མཐའ་དམར། རྣ་ལྟག་གཡོན་པར་དོན་གྲུབ་ལྗང་། དེ་དག་ཀྱང་མཚན་དང་དཔེ་བྱད་ཀྱིས་སྒེག་པ། ཞལ་སྤྱིར་གཟིགས་པས་བརྒྱན་པ། ཞལ་རེ་རེ་ལ་སྤྱན་གསུམ་གསུམ་སྟེ་དགུ། དབུས་མ་གསུམ་གྱེན་དུ་གཟིགས་པ། དོན་ཆོས་སྐུ་ལ་དགོངས་པའི་རྟགས། གཡས་པ་གསུམ་སྡོང་མིག་ཕྱག་གིས་ཕུར་པ་ལ་གཟིགས་པ། ཞིང་བཅུ་དབྱིངས་སུ་སྒྲོལ་བ། གཡོན་པ་གསུམ་ཡུམ་ལ་གཟིགས་པ། ཡབ་ཡུམ་གཉིས་སུ་མེད་པའི་རྟགས། དེ་ཡང་གཡས་པ་ནི་ཐབས་ཀྱིས་སྤྱན། དབུས་མའི་གསུམ་ཡེ་ཤེས་ཀྱི་སྤྱན་དེ་ཡང་དུས་གསུམ་མཁྱེན་པའི་རྟགས་སོ། །ཡང་ན་སྤྱན་དགུ་ས་དགུ་ལ་གཟིགས་པའོ། །ཁྲོ་གཉེར་གཡས་གཡོན་གཉིས་སུ་ལྔ་ལྔ་སྟེ་བཅུ་ནི་སྟོབས་བཅུ་མངའ་བ། ཁྲོ་གཉེར་དབུས་མ་འགྲེང་བུ་སྟེ་གྱེན་དུ་སྒྲེང་བ་ནི། མཐའ་གཉིས་སུ་མ་ཉལ་བའོ། །ཞལ་གསུམ་གདང་བ་ནི། དུག་གསུམ་ཞལ་དུ་གསོལ་བའོ། །ཞལ་རེ་རེ་ན་མཆེ་བ་བཞི་རེ་བརྩིགས་པ་ནི། ཉོན་མོངས་པ་སྐྱེ་ཤི་ན་རྒས་བཞི་རྩད་ནས་གཅོད་པའོ། །ཡང་ན་མཆེ་བ་དཀར་བ་ནི། ཆོས་སྐུ་ལ་སྐྱོན་གྱིས་མ་གོས་པ། རྩ་བ་དམར་བ་ནི་ཐུགས་རྗེ་ཆགས་པ། རྩེ་མོ་རྣོ་བ་ནི་གཟུང་འཛིན་དབྱིངས་སུ་སྒྲོལ་བའོ། །དེ་ལ་རྒྱན་ནི། དཔལ་ཆས་བརྒྱད་དང་། དུར་ཁྲོད་ཆས་བརྒྱད་དང་བཅུ་དྲུག་སྟེ། དེ་ལ་དཔལ་ཆས་བརྒྱད་ལ་མནབ་པའི་རྒྱན་གསུམ་ལ། ཐེག་ཆེན་མཆོག་གིས་རྒྱན་ནི། སྐུ་སྟོད་ལ་གླང་ཆེན་གྱིས་རྐོ་རློན་ཡ་བ་ཀོར་བ་ནི། བ་ཡད་ཉོ་བ་དེའི་སྒྲ་ལ་དྲང་ན། མ་རིག་པའི་རྒྱུ་འབྲས་གནས་སུ་དག་པའམ། ཐེག་པ་དགུ་ཐུགས་ཡེ་ཤེས་སུ་དག་པའི་རྟགས་སོ། །དཔའ་གཏུམ་ཟ་བྱེད་ཀྱི་རྒྱན་ནི། སྐུ་སྨད་ལ་སྟག་ལྤགས་ཀྱིས་ཤམ་ཐབས་བྱས་པ་ནི། པ་ར་མ་རྩ་ར་མ་ཞེས་པའི་སྒྲ་ལས་དྲང་ན། བདུད་དང་མུ་སྟེགས་འཇོམས་པའི་ཐུགས་རྗེ་དཔའ་གཏུམ་གྱི་ཕྲིན་ལས་ཀྱི་འགྲོ་དོན་ལ་བཤོལ་བ་མེད་པར་མཛད་པའོ། །ཚུལ་ཁྲིམས་གོས་ཀྱིས་རྒྱན་ནི། ཞིང་ལྤགས་ཀྱིས་སྐེད་ད ཀྲིས་ནི། ཉན་ཐོས་ཀྱིས་ཚུལ་ཁྲིམས་དང་། བྱང་ཆུབ་སེམས་དཔའི་སྡོམ་པ་དང་། གསང་སྔགས་ཀྱིས་དམ་ཚིག་དང་གསུམ་དཔལ་ཆེན་གྱིས་ཐུགས་ལ་རྫོགས་པའམ། ཕྱོགས་བཅུའི་ཞིང་ཁམས་དབང་དུ་སྡུད་པའི་རྟགས་སོ། །ཐོད་རློན་ལྔ་བཅུ་རྩ་གཅིག་གིས་ཕྲེང་བ་སེ་རལ་ཁར་ཐོགས་པ་ནི། མ་འོངས་པའི་སངས་རྒྱས་མཚོན། ཁྲོ་བོའི་དཀྱིལ་འཁོར་བསྒོམ་པ་ལ་དུར་ཁྲོད་ཆས་བརྒྱད། དཀྱིལ་འཁོར་གྱིས་མཐར་བཀོད་པ་དང་། རྒྱན་དུ་ཐོགས་པ་གཉིས་ལས། འདིར་རྒྱན་དུ་ཐོགས་པ་སྟེ། དུར་ཁྲོད་ཀྱིས་ཆས་བརྒྱད་ནི། དུར་ཁྲོད་ན་ཀླུ་བརྒྱད་དབང་ཆེ་སྟེ། དེ་བསྡུ་ན་ཀླུ་རིགས་ལྔའམ། རིགས་བཞིར་འདུས་ཏེ། སྦྲུལ་དཀར་པོའི་རྒྱལ་རིགས་སྟེ་དབུ་སྐྲ་བཅིང་པ་དང་སྐུ་ལ་བརྒྱན་པ། རྗེའུ་རིགས་སེར་པོའི་སྙན་ཆ་བྱས་པ། བྲམ་ཟེའི་རིགས་དམར་པོས་གདུ་གུ་བྱས་པ། དམངས་རིགས་ནག་པོས་རྐང་རྒྱན་བྱས་པ། ཡང་ན་རྒྱལ་རིགས་དཀར་པོས་དབུ་སྐྲ་བཅིང་པ། རྗེའུ་རིགས་སེར་པོས་སྙན་ཆ། བྲམ་ཟེ་དམར་པོས་འགུལ་པ་དང་དཔུང་རྒྱན་བྱས་པ། གདོལ་པ་ལྗང་ཀུས་སྐེ་རག །དམངས་རིགས་ནག་པོས་ཕྱག་གདུབ་དང་ཞབས་གདུབ་བྱས་པ་ནི། ཞེ་སྡང་གནས་སུ་དག་པ་སྟེ། སྐུའི་རྒྱན་དུ་ཡང་ཡིན་ལ། མཉེན་ལྕུག་འཁྲིལ་བའི་ཡུམ་གྱིས་རང་བཞིན་ཡིན་ནོ། །བྱུག་པའི་རྒྱན་གསུམ་ནི། དོན་དམ་བཅུད་ཀྱིས་རྒྱན་ཞག་གི་ཟོ་རིས་མཁུར་བ་ལ་སྣུམ་ཆེན་གྱིས་ཐིག་ལེས་བརྒྱན་པ་ནི། ཞག་རུས་པའི་བཅུད་ཡིན་པ་ལྟར། ཐེག་པ་ཐམས་ཅད་ཀྱིས་བཅུད་དམ་སྙིང་པོ་གསང་སྔགས་ཡིན་པས། དེ་རྟོགས་པའི་རྟགས། ཐུགས་རྗེ་ཆགས་པའི་རྒྱན་རཀྟའི་ཐིག་ལེ་བྲང་དང་ཁ་ལ་བརྒྱན་པ་ནི། རྟོགས་པས་བདག་དོན་ལ་ཆགས། ཐུགས་རྗེས་གཞན་དོན་ལ་ཆགས་ཏེ། ཆགས་གཉིས་མི་གཏོང་བའི་རྟགས་སོ། །ཕྲིན་ལས་ལྷུན་གྱི་གྲུབ་པའི་རྒྱན་ཐལ་ཆེན་གྱིས་ཚོམ་བུ་ཐལ་གོང་ལ་བརྒྱན་པ་ནི། འདུལ་བའི་ཕྲིན་ལས་ཀྱི་དྲེགས་བཅན་དབང་དུ་བསྡུ་བའི་རྟགས་སོ། །ཡང་ན་ཆོས་ཐམས་ཅད་བདག་འཛིན་དང་བྲལ་ཞིང་ཐེག་པ་ཆེན་པོ་མཚོན་གསུང་ཀྱང་བརྟག་པར་བྱའོ། །ཡང་ན་བྱུག་པའི་རྒྱན་གསུམ་ནི། སངས་རྒྱས་ཀྱིས་ས་གསུམ་ནོན་པའི་རྟགས་ཡིན་ཞེས་སྙིང་རྗེ་རོལ་པའི་རྒྱུད་ལས་བཤད་དོ། །ཐོགས་པའི་རྒྱན་གཉིས་ལ་ཚོགས་བདག་དུར་ཁྲོད་ཀྱིས་རྒྱན་ཡན་ལག་གི་ཚིག་མདོ་རྣམས་ལ་ཀིང་རུས་ལ་བཟོས་པའི་ཕྲེང་བ་ཞིང་རྒྱུས་ཀྱིས་ཕེང་ལུང་བྱས་པས་བརྒྱན་པ་ནི། དུར་ཁྲོད་བདག་པོ་བསྒྲལ་བའི་རྟགས་སོ། །དཔུང་པ་ལ་ཐོད་པ་ར་རི་དང་ཁྲལ་ཁྲོལ་གྱིས་བརྒྱན་པ་ནི། ད་ལྟར་གྱིས་སངས་རྒྱས་ཏེ། དེ་ལྟར་ཐོད་པ་ཚར་གསུམ་ནི་དུས་གསུམ་གྱི་སངས་རྒྱས་ཀྱིས་ཕྲིན་ལས་རྟོགས་པའི་རྟགས་སོ། །ཞབས་རྒྱབ་མ་གཉིས་གཡས་བརྐྱང་པ་ནི། ཐུགས་རྗེ་ཆེན་པོས་འགྲོ་བའི་དོན་མཛད་པའོ། །གཡོན་བསྐུམ་པ་ནི་ཤེས་རབ་ཀྱིས་དབྱིངས་རྟོགས་ཀྱང་མྱ་ངན་ལས་འདས་པའི་པའི་མཐའ་ལས་མི་གནས་པའོ། །ཡང་ན་ཞབས་ནང་མ་གཉིས་གཡས་བསྐུམ་པ་ནི་ཐུགས་རྗེ་ཆེན་པོས་འགྲོ་བའི་དོན་མཛད་ན་ཡང་། ཆོས་ཀྱི་དབྱིངས་ལས་མ་གཡོས་ཤིང་འཁོར་བའི་མཐའ་མི་གོས་པའི་རྟགས་སོ། །གཡོན་བརྐྱང་བ་ནི་ཐུགས་རྗེ་ཆེན་པོས་འགྲོ་བའི་དོན་མཛད་ན་ཡང་ཆོས་ཀྱི་དབྱིངས་ལས་མ་གཡོས་པའི་རྟགས་སོ། །ཡང་ན་ཞགས་བཞི་འདོར་ཐབས་ནི། བྱམས་པ་སྙིང་རྗེ་དགའ་བ་བཏང་སྙོམས་བཞིའི་རྟགས། གཡས་བསྐུམ་པ་ཤེས་རབ་ཀྱིས་འཁོར་བའི་མཐའ་མི་གནས་པ། གཡོན་བརྐྱང་པ་ཐབས་ཏེ་མྱ་ངན་ལས་འདས་པའི་མཐར་མི་གནས་པ། རྒྱབ་མ་གཉིས་ཀྱི་གཡོན་བསྐུམ་པ་ནི་ཐབས་ཀྱིས་འགྲོ་དོན་མཛད་ཀྱང་དབྱིངས་ལས་མ་གཡོས་པ། གཡས་ཅུང་ཟད་བརྐྱང་པ་ནི། འཁོར་བའི་མཐའ་མ་སྤངས་ཉིད་ནི་ཡེ་ཤེས་ཀྱིས་དོན་མཛད་པའོ། །ཡུམ་བསྐྱེད་པ་ཡང་ལུས་དང་གྲིབ་མའི་ཚུལ་དུ་ཡབ་གྲུབ་ན་ཡུམ་གྲུབ་སྟེ་སྐུ་མདོག་ཡབ་དང་མཐུན་པ་ཞལ་གཅིག་ཆོས་ཉིད། ཕྱག་གཉིས་ཐབས་ཤེས། ཞབས་གཉིས་ཞི་གནས་དང་ལྷག་མཐོང་རྣམ་པར་དག་པའོ། །གཡས་ཁ་ཊྭཱྃ་ཀ་ཡབ་ལ་འཁྱུད་པ་ནི། དབྱིངས་ཀྱིས་ཡེ་ཤེས་དང་འདུ་འབྲལ་མེད་པར་ཐུགས་དམ་བསྐུལ་བ། གཡོན་ཐོད་ཁྲག་སྙིང་དང་བཅས་པ་ཡབ་ལ་སྟོབས་པ་ནི། ཁམས་གསུམ་གྱིས་ཉོན་མོངས་པའི་རྒྱུད་སྦྱང་བའོ། །ཐལ་བའི་ཚོམ་བུ་མ་གཏོགས་པ། རྒྱན་དང་ཆ་ལུགས་ཡབ་དང་འདྲ་བ་ལས། ཡུམ་ཆོས་དབྱིངས་སྤྲོས་བྲལ་མཚོན་པའི་རྟགས་སུ། གཟིག་གི་ཤམ་ཐབས་གཤོག་པ་མེད་པ། ཐོད་སྐམ་གྱིས་ཕྲེང་བ་ཡོད་པའོ། །ཡབ་ཀྱིས་ཐུགས་ཀར་ཡེ་ཤེས་སེམས་དཔའ་རང་འདྲ་བ། དེའི་ཐུགས་ཀར་རྡོ་རྗེ་ཧཱུྃ་དང་བཅས་པ་བསྒོམ་པ་ནི། ཐུགས་ཙིཏྟ་རིན་པོ་ཆེའི་གུར་ཕུབ་པ་ལྟ་བུའི་ནང་ནས། ཟླ་བ་དུད་རྩེ་ཙམ། དེའི་སྟེང་དུ་ཡེ་ཤེས་སེམས་དཔའ་རྡོ་རྗེ་གཞོན་ནུ་རང་འདྲ་བ་ཕྱག་མཚན་དང་རྒྱན་མེད་པ་སྐུ་ཚོན་གང་བ། དེའི་ཐུགས་ཀར་ཉི་མའི་སྟེང་དུ་རྡོ་རྗེ་ནག་པོ་རྩེ་དགུ་པ་ནས་འབྲས་ཙམ་གྱིས་སྟེང་དུ་ཐུགས་ཡེ་ཤེས་འོད་གསལ་བ་མཚོན་པའི་ཧཱུྃ་ཡིག་འབྲུ་དགུ་སྤུས་བྲིས་པ་ལྟ་བུའི་གཡས་སུ་འཁོར་བའོ། །ཡུམ་གྱིས་ཐུགས་ཀར་བྷནྡྷ་དེའི་ནང་དུ་ཟླ་བ་དེའི་སྟེང་དུ་ཧཱུྃ་ལས། ༀ་ཏིཔྟ་ཙཀྲ་རུ་ལུ་རུ་ལུ་ཧཱུྃ་བྷྱོ་ཧཱུྃ་གིས་གཡོན་དུ་འཁོར་བའོ། །དེ་ནི་བདག་རྩ་བའི་དཀྱིལ་འཁོར་རོ། །ཕྱོགས་བཅུ་ཁྲོ་བོའི་དཀྱིལ་འཁོར་བསྐྱེད་པ་ནི། མངལ་གྱིས་བག་ཆགས་སྦྱང་བའི་ཕྱིར། ཡབ་ཡུམ་གཉིས་ཀྱི་མཁའ་གསང་བྱིན་གྱིས་བརླབས་ཏེ། ཡབ་ཀྱིས་གསང་གནས་སུ་མ་ལས་ཉི་མའི་དཀྱིལ་འཁོར་གྱི་སྟེང་དུ། རྡོ་རྗེ་ནག་པོ་རྩེ་དགུ་པའི་ལྟེ་བ་ལ་ཧཱུྃ། ཕྱི་རྩེ་ལ་ཕཊ྄། ནང་རྩེ་ལ་ༀ། ཡུམ་གྱི་གསང་གནས་སུ་པྃ་ལས་པདྨ་དམར་པོ་འདབ་མ་བརྒྱད་པ། ཟེའུ་འབྲུ་ལ་ཨྃ་དམར་པོས་མཚན་པའོ། །དེ་ལ་འོད་འཕྲོས་པའམ། ཡབ་ཀྱིས་ཐུགས་ཀ་ནས་འོད་ཟེར་འཕྲོས་པས་ཕྱོགས་བཅུའི་སངས་རྒྱས་ཐམས་ཅད་བསྡུས་ནས་རང་གི་ཞལ་དུ་ཞུགས། སྐུའི་དབྱིབས་སུ་བརྒྱུད། ཡབ་ཡུམ་གཉིས་མ་ཆགས་ཐབས་ཀྱིས་རོལ་པ་མཛད་པས་རྡོ་རྗེ་སྦུམ་ནས། ཡུམ་གྱི་མཁའ་ལ་ཕབ་སྟེ། བྱང་ཆུབ་སེམས་ཀྱི་ཆ་དང་པོ་བསྒྲིལ་མ་བཅུར་གྱུར་ཏེ། ཕྱིར་འཕྲོས་པས་ཕྱོགས་སྐྱོངས་བཅུའི་གདན་ཐོག་ཏུ་བབ་པ་ལས། ཁྲོ་བཅུ་ཁྲ་ཐབས་དང་བཅས་པ་བསྐྱེད་པ་ནི། ཁྲོ་བོ་ནི་དཔལ་ཆེན་པོའི་སྤྲུལ་པ་སྟེ། མི་དགེ་བ་བཅུ་འཇོམ་ཞིང་། ཕྱོགས་སྐྱོངས་བཅུ་ཟིལ་གྱིས་གནན་ནས། སྐུ་སྟོབས་བཅུ་རྫོགས་པའི་རྟགས། ཁྲ་ཐབས་ནི་དབུ་བརྙན་དུ་མ་ཡོད་པས། ཐབས་ཐུགས་རྗེ་བསམ་གྱིས་མི་ཁྱབ་པས། དབུ་བརྒྱན་སོ་སོ་དང་མཐུན་པའི་སྤྲུལ་པ་དུ་མར་ཤར་ནས་འགྲོ་དོན་མཛད་པའི་རྟགས་སོ། །བྱེ་བྲག་སོ་སོའི་དོན་རྟགས་ནི། ༀ་ཡེ་ཤེས་ལྔ། བཛྲ་རྡོ་རྗེ་སྟེ་ཐུགས་སམ་ཡེ་ཤེས་སོ། །ཀྲོ་དྷ་ཁྲོ་བོ་སྟེ་ཡེ་ཤེས་ཉོན་མོངས་པ་ལ་ཁྲོ་བའོ། །ཧཱུྃ་སྡུད་པ་སྟེ། ཡེ་ཤེས་ལྔར་སྦྱོང་བའོ། །ཀ་ར་ཧཱུྃ་བྱེད་པ་ཅེས་ཡོན་ཏན་གྱི་སྡུད་པའམ་དོན་བྱེད་པའོ། །གརྫ་གརྫ་ནི་སྒྲོགས་ཤིག་སྒྲོགས་ཤིག་པ་སྟེ། འགྲོ་བ་ལ་ཆོས་སྒྲོགས་པའོ། །ཧཱུྃ་སྡུད་པ། ཕཊ྄་སྤྲོས་པའམ་སྒྲོལ་བའོ། །མཚན་གྱིས་ཁྱད་པར་སོ་སོར་མ་གཏོགས་པ་སྔགས་ཀུན་དེ་ལྟར་དུ་ཤེས་པར་བྱའོ། །མདུན་དུ་ཨེ་ཁྲམ་གྱིས་ཉི་ཟླ་དམར་སེར་ཕོ་མོའི་སྟེང་དུ། ཁྲོ་བོ་ཆེན་པོ་ཧཱུྃ་མཛད་དང་། ཡུམ་རྡོ་རྗེ་སྒྲ་འབྱིན་མ་སྟེ། ཡང་ན་ཧཱུྃ་ཀ་ར་ནི་ཕྲིན་ལས་ལ་མཚན་དུ་གསོལ་བ་སྟེ། གདུལ་བྱ་བསྒྲལ་བའི་རྣམ་པར་ཤེས་པ་ཧཱུྃ་དུ་མཛད་ནས་འོག་མིན་དུ་སྦར་བའི་ཕྱིར་རོ། །ཡུམ་ནི་ཆོས་ཀྱི་དབྱིངས་སོ། །རྡོ་རྗེ་ནི་དབྱིངས་ཡེ་ཤེས་དབྱེར་མེད་པའོ། །སྒྲ་འབྱིན་ནི་ཆོས་ཐམས་ཅད་སྟོང་པ་ཉིད་ཀྱིས་སྒྲ་སྒྲོགས་པས། ལྟ་ངན་གྱི་ཚོགས་འཇིགས་པར་བྱེད་པའི་ཕྱིར་རོ། །དེའི་མཆན་གཡོན་ཕྱོགས་སུ། སྤྲུལ་པའི་ཕྲ་མེན་མ། ཕག་གིས་མགོ་ཅན་དང་སྨྲིག་བུའི་མགོ་ཅན་ནི། གདུལ་བྱ་ལྟ་ན་སྟེང་ཉི་ཟླ་གཟའ་སྐར་གྱིས་འཁོར་ན་དྲེགས་པ་དེ་ལྟ་བུ་ཡོད་པ་འདུལ་བའོ། །གདུལ་བྱེད་ཡེ་ཤེས་ལྟར་ན། ཕག་གཙང་སྨེ་མེད་པ་ལྟར། འགྲོ་དོན་ལ་བླང་དོར་མེད་པའོ། །སྨྲིག་བུ་སྒྱུ་ཆེ་བ་ལྟར་ཡེ་ཤེས་ཀྱིས་འགྲོ་བ་འདུལ་མཁས་པའོ། །ༀ་བཛྲ་ཀྲོ་དྷ་འབྲུ་གོང་དང་མཐུན། བི་ཛ་ཡ་རྣམ་པར་རྒྱལ་བ་སྟེ། ཐུགས་ཡེ་ཤེས་བདུད་ལས་རྒྱལ་བ་མཚོན་ནོ། །ཧཱུྃ་འབྲུ་མཐུན། ཧ་ན་ཧ་ན་རྒྱོབ་ཅིག་རྒྱོབ་ཅིག་པ་སྟེ། ཡེ་ཤེས་ཀྱིས་ཉོན་མོངས་པ་འཇོམས་པའོ། །ཧཱུྃ་ཕཊ྄་འབྲུ་མཐུན། ཤར་ཕྱོགས་སུ་བརྒྱ་བྱིན་དཀར་པོ་ཕོ་མོའི་སྟེང་དུ། ཁྲོ་བོ་ཆེན་པོ་རྣམ་པར་རྒྱལ་བ་དང་། ཡུམ་རྡོ་རྗེ་སྙེམ་མ་སྟེ། ཡང་ན་རྣམ་པར་རྒྱལ་བ་ནི། དོན་ལ་མཚན་དུ་གསོལ་བ་སྟེ། མཐའ་གཉིས་ལས་རྣམ་པར་རྒྱལ་བའི་ཕྱིར་རོ། །ཡུམ་རྡོ་རྗེ་ནི་དབྱིངས་དང་ཡེ་ཤེས་དབྱེར་མེད་ཀྱིས་མཚན་ནོ། །སྙེམ་མ་ནི་དབྱིངས་ལ་མངའ་བརྙེས་པའོ། །སྤྲུལ་པའི་ཕྲ་མེན་མ་སྟག་དང་བྱ་རྒོད་ཀྱིས་མགོ་ཅན་ནི། གདུལ་བྱེད་ལྟར་ན། སྟག་ནི་དཔའ་གཏུམ་ཟ་བ་བཞིན་དུ། ཐུགས་རྗེ་ཡེ་ཤེས་ཀྱིས་གདུལ་བྱ་སྒྲོལ་བའོ། །བྱ་རྒོད་ནི། སེམས་ཅན་གཞན་གྱིས་གསོད་པའི་རོ་ལ་ཟ་བ་བཞིན་དུ། འགྲོ་བ་ལ་སྙིང་རྗེས་དགེ་སྡིག་གིས་ཆོས་སྟོན་ཅིང་འཕུར་རྩལ་ཆེ་བ་ལྟར། ལྟ་སྤྱོད་ཀྱིས་འགྲོ་བའི་ཉོན་མོངས་གཅོད་པའོ། །གདུལ་བྱ་ལྟར་དྲི་ཟའི་འཁོར་ནི་དྲེགས་པ་སྟག་དང་བྱ་རྒོད་ཀྱིས་མགོ་ཅན་ཡོད་པ་འདུལ་བའོ། །ༀ་བཛྲ་ཀྲོ་དྷ་འབྲུ་མཐུན། ནི་ལ་དཎྜ་ཧཱུྃ་ཅེས་པ་ནི། དབྱུག་པ་སྔོན་པོ་སྟེ། ཐུགས་མཚན་སྟེ་ཐུགས་ཡེ་ཤེས་ཀྱིས་ལོག་རྟོག་འཇོམས་པའོ། །ད་ཧ་ད་ཧ་ཧཱུྃ་ཕཊ྄་ནི་གསོལ་ཅིག་གསོལ་ཅིག་པ་སྟེ། ཉོན་མོངས་པ་མི་གནས་པའོ། །ཤར་ལྷོར་མེ་ལྷ་དམར་སེར་ཕོ་མོའི་སྟེང་དུ་ཁྲོ་བོ་ཆེན་པོ་དབྱུག་སྔོན་ཅན་དང་། ཡུམ་རྡོ་རྗེ་སྡེར་མོ་སྟེ། ཡང་ན་དབྱུག་པ་སྔོན་པོ་ནི་ཕྱག་མཚན་ལ་མཚན་དུ་གསོལ་བ་སྟེ། རིན་པོ་ཆེའི་དབྱུག་པ་སྔོན་པོ་བསྣམས་ཡང་གསུངས། རྡོ་རྗེ་སྡེར་མོ་ནི་ཐུགས་རྗེའི་མཚན་ཏེ། འགྲོ་དྲུག་གནས་སུ་འདྲེན་པའམ། དབྱིངས་ལས་མ་གཡོས་པར་ཡེ་ཤེས་ཀྱི་གདུལ་བྱ་འཛིན་པའོ། །སྤྲུལ་པའི་ཕྲ་མེན་མ་གཡག་དང་བྱ་རོག་གིས་མགོ་ཅན་ནི། གདུལ་བྱེད་ལྟར་ན། གཡག་གིས་མགོ་ཅན་ནི། ཐུགས་རྗེ་ཡེ་ཤེས་ལྟར་མཐས་མི་འགྱུར་བའོ། །བྱ་རོག་ནི་འཁུ་ཁྲིག་ཆེ་ཞིང་ཚེ་གསུམ་དྲན་པ་ལྟར། ཐུགས་ཆོས་ཉིད་དུས་གསུམ་དབྱེར་མེད་པ་ལ་འགྲོ་དོན་འཆར་བའོ། །གདུལ་བྱ་ལྟར་ན་ཤར་ལྷོ་མེ་ལྷའི་འཁོར་ན་དྲེགས་པ་ཅན་གཡག་དང་བྱ་རོག་མགོ་ཅན་ཡོད་པ་འདུལ་བའོ། །ༀ་བཛྲ་ཀྲོ་དྷ་འབྲུ་མཐུན། ཡ་མཱནྟ་ཀ་ཧཱུྃ། ཞེས་གཤིན་རྗེ་གཤེད་ཅེས་གདུལ་བྱ་ལ་བཏགས་པའོ། །པ་ཙ་པ་ཙ་ཧཱུྃ་ཕཊ྄་ནི་ཆོམ་ཤིག་ཆོམ་ཤིག་པ་སྟེ། གདུལ་བྱའི་ཉོན་མོངས་པ་བསྒྱུར་བ་སྟེ། ཁམས་གསུམ་སེམས་ཅན་གྱི་གཤིན་རྗེ་དག་གིས་རྗེ་བོ་བདུད་རུ་ཏྲ། ཐུགས་རྗེ་ཡེ་ཤེས་ཀྱིས་བཅོམ་པས་གཤེད་དོ། །ལྷོ་ཕྱོགས་སུ་གཤིན་རྗེ་ཕོ་མོ་སྔོན་པོའི་སྟེང་དུ་ཁྲོ་བོ་ཆེན་པོ་གཤིན་རྗེ་གཤེད་པོ་དང་། ཡུམ་དུར་ཁྲོད་བདག་མོ་སྟེ། ཡང་ན་གཤིན་རྗེའི་གདུལ་བྱའི་མཚན་སྟེ། ལས་ཀྱིས་གཤིན་རྗེ་འདུལ་ཞིང་དེའི་གཤེད་དུ་གྱུར་པའོ། །དུར་ཁྲོད་བདག་མོ་ནི། དབྱིངས་ཀྱིས་ངང་དུ་གཟུང་འཛིན་རྒུད་པས་ཡོན་ཏན་སྣང་བའམ། ཁམས་གསུམ་ཆོས་ཉིད་དུ་སྡུད་པའི་ཕྱིར་རོ། །སྤྲུལ་པའི་ཕྲ་མེན་མ་ཤ་བ་དང་འུག་པའི་མགོ་ཅན་ནི། གདུལ་བྱེད་ལྟར་ན། ཤ་བའི་མགོ་ལ་རུ་ལག་བཅུ་ཡོད་ཅིང་འཇུག་པ་ཅིས་ཀྱང་མི་ཟློག་པ་ལྟར། ཐུགས་ཡེ་ཤེས་དབྱིངས་ལས་འཇུག་པས་ཅིས་ཀྱང་མི་བཟློག་སྟེ། ས་བཅུ་སྟོབས་བཅུ་ལྷུན་གྱི་གྲུབ་པའོ། །འུག་པ་ནི་ཉིན་ཉལ། མཚན་ཡང་ཤིང་མིག་རྣོ་བ་ལྟར། ཐུགས་ཡེ་ཤེས་ཀྱིས་དབྱིངས་སུ་མི་འབྱེད་པར་འགྲོ་བ་མ་རིག་པའི་རྒྱུད་མཁྱེན་ཅིང་གསལ་བའོ། །གདུལ་བྱ་ལྟར་ན། གཤིན་རྗེའི་འཁོར་ན་དྲེགས་པ་ཤ་བ་དང་འུག་པའི་མགོ་ཅན་ཡོད་པ་འདུལ་བའོ། །ༀ་བཛྲ་ཀྲོ་དྷ་འབྲུ་མཐུན། ཨཱརྱ་ཨ་ཙ་ལ་ཧཱུྃ་ནི། འཕགས་པ་མི་གཡོ་བ་སྟེ། ཐུགས་གཟུང་འཛིན་གྱིས་མི་གཡོ་བའི་མཚན་ནོ། །བྷནྡྷ་བྷན་དྷ་ཧཱུྃ་ཕཊ྄་ནི་ཆིངས་ཤིག་ཆིངས་ཤིག་པ་སྟེ། ཡེ་ཤེས་ཀྱིས་གཟུང་འཛིན་འགྲོ་འོང་རྒྱུན་གཅོད་པའོ། །ལྷོ་ནུབ་ཏུ་སྲིན་པོ་ཕོ་མོ་དམར་ནག་གིས་སྟེང་དུ་ཁྲོ་བོ་མི་གཡོ་མགོན་པོ་དང་། ཡུམ་རྡོ་རྗེ་གཏུན་ཁུང་མ་སྟེ། ཡང་ན་མི་གཡོ་མགོན་པོ་ནི། དོན་ལ་མཚན་དུ་གསོལ་བ་སྟེ། མཐའ་གཉིས་ཀྱི་རླུང་གིས་མི་གཡོ་ཞིང་འགྲོ་བའི་དོན་མཛད་པའི་ཕྱིར་རོ། །རྡོ་རྗེ་གཏུན་ཁུང་ནི། རྟོག་པ་དབྱིངས་སུ་འཇོམས་པའམ། ཆོས་ཉིད་ཀྱི་ངང་དུ་ཆོས་ཅན་གྱིས་མཚན་མ་ཟད་པར་མཛད་པའི་ཕྱིར་རོ། །སྤྲུལ་པ་གཟིག་དང་ཁ་ཏྭའི་མགོ་ཅན་ནི། གདུལ་བྱེད་ལྟར་ན། གཟིག་ཚང་བསིལ་ཞིང་དྲན་པ་རྒོད་པ་ཡིན་སྟེ། ཐུགས་ཀྱི་ངང་མ་གཏོགས་བར་མི་གནས་ཞིང་གདུལ་བྱའི་རྒྱུད་མཁྱེན་པའོ། །ཁ་ཏྭ་ལ་སྒྲིབ་ཤིང་ཡོད་པས་ཚང་མི་མཐོང་བ་ལྟར། ཐུགས་ཡེ་ཤེས་དཔག་དཀའ་བའོ། །གདུལ་བྱ་ལྟར་ན། ལྷོ་ནུབ་སྲིན་པོའི་འཁོར་ན་དྲེགས་པ་གཟིག་དང་ཁ་ཏྭའི་མགོ་ཅན་ཡོད་པས་དེ་འདུལ་བའོ། །ༀ་བཛྲ་ཀྲོ་དྷ་འབྲུ་མཐུན། ཧྱ་གྲཱི་བ་ཧཱུྃ་ནི་རྟ་མགྲིན་སྟེ། ཐུགས་ཡེ་ཤེས་འགྲོ་དོན་དུ་མགྱོག་ཅིང་ཤུགས་ཆེ་བའི་རྟགས་སུ་རྟ་དབུ་ལ་བཏགས་པའོ། །ཧུ་ལུ་ཧུ་ལུ་ཧཱུྃ་ཕཊ྄་ནི། ལྐུག་པར་གྱིས་ཤིག་ལྐུག་པ་གྱིས་ཤིག་པ་སྟེ། ཉོན་མོངས་པ་ཅན་གྱིས་དྲན་པ་ཉམས་པར་གྱིས་ཤིག་པའོ། །ནུབ་ཏུ་ཀླུ་དམར་པོ་ཕོ་མོའི་སྟེང་དུ། ཁྲོ་བོ་ཆེན་པོ་རྟ་མགྲིན་དང་། ཡུམ་རྡོ་རྗེ་གཏུམ་མོ་སྟེ། ཡང་ན་རྟ་མགྲིན་ནི། རྟགས་ལ་མཚན་དུ་གསོལ་བ་སྟེ། བདུད་དང་སྲིན་པོ་འདུལ་བའི་ཕྱིར། དབུ་ལ་རྟ་དབུ་ལྗང་ཀུ་མངའ་བའི་ཕྱིར་རོ། །ཡུམ་རྡོ་རྗེ་གཏུམ་མོ་ནི། རྣམ་རྟོག་དབྱིངས་སུ་འཇོམ་པའོ། །ཡང་ཙནྡྷ་རི་ནི། ཉོན་མོངས་པ་བཙན་ཐབས་སུ་གཅོད་པའི་ཕྱིར་རོ། །སྤྲུལ་པ་བྱི་ལ་དང་། པུ་ཤུད་ཀྱིས་མགོ་ཅན་ནི། གདུལ་བྱེད་ལྟར་ན། བྱི་ལ་ནི་མཁས་ཤིང་གཟོབ་ལྟར། ཡེ་ཤེས་ཀྱི་དབྱིངས་ཀྱི་དོན་རྟོགས་པ་དང་། འགྲོ་དོན་ལ་མཁས་པའོ། །པུ་ཤུད་ལ་མིག་རྩི་དང་ཟེ་བ་ཡོད་པ་ལྟར། ཡེ་ཤེས་ཀྱི་མ་རིག་པའི་མུན་པ་སེལ་ཞིང་། ཐུགས་མཐའ་གཉིས་ཀྱི་སྐྱོན་དང་བྲལ་བས་ཟེ་བ་ཡོད་པའོ། །གདུལ་བྱ་ལྟར་ན། ནུབ་ཆུ་ལྷོའི་འཁོར་ན་དྲེགས་པ་ཅན་བྱི་ལ་དང་པུ་ཤུད་ཀྱིས་མགོ་ཅན་ཡོད་པ་འདུལ་བའོ། །ༀ་བཛྲ་ཀྲོ་དྷ་འབྲུ་མཐུན། ཨ་པ་རཱ་ཛི་ཏ་ཧཱུྃ་ནི། གཞན་གྱི་མི་ཐུབ་པ་སྟེ། ཐུགས་ཡེ་ཤེས་ཀྱིས་གདུལ་བྱ་བདུད་དང་སྲིན་པོ་ལས་རྒྱལ་བའི་རྟགས་སོ། །ཏིཥྛ་ཏིཥྛ་ཧཱུྃ་ཕཊ྄་ནི་ནོན་ཅིག་ནོན་ཅིག་པ་སྟེ། ཡེ་ཤེས་ཀྱིས་མ་རིག་པའི་སྟོབས་ནོན་པ་སྟེ། རྟགས་བདུད་དང་དྲེགས་པ་ཟིལ་གྱིས་གནན་པའོ། །ནུབ་བྱང་དུ་རླུང་ལྷ་ཕོ་མོ་སྔོ་སྐྱའི་སྟེང་དུ་ཁྲོ་བོ་ཆེན་པོ་གཞན་གྱི་མི་ཐུབ་པ་དང་། ཡུམ་རྡོ་རྗེ་མདའ་བསྙེམ་མ་སྟེ། ཡང་ན་གཞན་གྱིས་མི་ཐུབ་པ་ནི། གཉེན་པོ་ལ་མཚན་དུ་གསོལ་བ་སྟེ། མཐའ་གཉིས་ཀྱི་སྐྱོན་གྱིས་མི་ཤིགས་པའོ། །མདའ་བསྙེམ་མ་ནི། རིག་པའི་མདས་ཉོན་མོངས་པ་འབིག་པའོ། །དབྱིངས་སྙན་བྲལ་དུ་གནས་པའོ། །ཡང་ན་རིག་པའི་ཡེ་ཤེས་ཀྱིས་མདས་ཆོད་ཉིད་ཀྱི་ངང་དུ་བསྟིམ་པའོ། །སྤྲུལ་པ་སྤྱང་ཀུ་དང་ཁྲའི་མགོ་ཅན་ནི། གདུལ་བྱེད་ལྟར་ན། སྤྱང་ཀུ་ནི་འཛིན་གསོད་ཟ་བ་ལྟར། ཐུགས་ཆོད་ཉིད་ཟབ་མོ་རྟོགས་པས། དགེ་སྡིག་མཉམ་པར་རྟོགས་པའོ། །ཁྲ་ནི་གཟན་ཚོལ་བ་རྙེད་ནས་ཐོག་མེད་དུ་གསོད་པ་ལྟར། ཡེ་ཤེས་ཀྱིས་གདུལ་བྱ་གཟིགས་ཏེ་སྒྲོལ་བའོ། །གདུལ་བྱ་ལྟར་ན། རླུང་ལྷའི་འཁོར་ན་དྲེགས་པ་ཅན་སྤྱང་ཀུ་དང་། ཁྲའི་མགོ་ཅན་ཡོད་པ་འདུལ་བའོ། །ༀ་བཛྲ་ཀྲོ་དྷ་འབྲུ་མཐུན། ཨ་མྲྀ་ཏ་ཀུཎྜ་ལི་ཧཱུྃ་ནི། བདུད་རྩི་འཁྱིལ་པ་ཞེས་བྱ་སྟེ། གཉེན་པོས་ཉོན་མོངས་པ་རྣམས་ཡེ་ཤེས་ཀྱི་རྩིས་བསྒྱུར་དབྱིངས་སུ་སྒྲོལ་བའོ། །ཚིནྡྷ་ཚིནྡྷ་ཧཱུྃ་ཕཊ྄་ནི་ཆོད་ཅིག་ཆོད་ཅིག་པ་སྟེ། ཡེ་ཤེས་ཀྱིས་ཉོན་མོངས་པའི་རྩལ་གཅོད་པའོ། །བྱང་ཕྱོགས་སུ་གནོང་སྦྱིན་ཕོ་མོ་ལྗང་སེར་གྱི་སྟེང་དུ་ཁྲོ་བོ་ཆེན་པོ་བདུད་རྩི་འཁྱིལ་པ་དང་། ཡུམ་རྡོ་རྗེ་རླུང་འབྱིན་མ་སྟེ། ཡང་ན་བདུད་རྩི་འཁྱིལ་པ་ནི་ཡོན་ཏན་ལ་མཚན་དུ་གསོལ་བ་སྟེ། མཐའ་གཉིས་ཀྱི་བདུད་དབྱིངས་དང་ཡེ་ཤེས་ཀྱི་རྩིས་ཆོས་ཀྱི་སྐུར་བསྐྱིལ་བའོ། །རླུང་འབྱིན་མ་ནི། གདུལ་བྱ་ལ་ཐུགས་རྗེ་རླུང་ལྟ་བུས་དབྱིངས་སུ་བསྐྱེད་པར་བྱེད་པའམ། འཁོར་བའི་བག་ཆགས་རྡུལ་དང་འདྲ་བ་ཡེ་ཤེས་ཀྱི་རླུང་གིས་གཏོར་ནས་མྱ་ངན་ལས་འདས་པར་གཡོ་བའི་ཕྱིར་རོ། །སྤྲུལ་པ་སེངྒེ་དང་། ཕ་ཝཾ་གིས་མགོ་ཅན་ནི། གདུལ་བྱེད་ལྟར་ན། སེངྒེ་ནི་རིགས་བཟང་སྟེ། སྒྲ་སྒྲགས་པ་ཙམ་གྱིས་གཅན་གཟན་གཞན་བརྒྱལ་ཞིང་ཟིལ་གྱིས་གནོན་པ་ལྟར། དཔལ་ཆེན་པོའི་ཐུགས་ཡེ་ཤེས་ཀྱིས་ཉོན་མོངས་པ་དང་ལྟ་བ་ངན་པ་ཐམས་ཅད་ཟིལ་གྱིས་ནོན་པའམ། ཐུགས་ཡེ་ཤེས་ཨ་ཏི་ཡོ་གས་ཐེག་དམན་ཟིལ་གྱིས་གནོན་པའོ། །ཕ་ཝཾ་ནི། སྒྲིན་སྟེ། ཐབས་མཁས་པ་དང་འདྲ་བར། ཐུགས་ཡང་དག་པའི་ཡེ་ཤེས་ཀྱིས་གདུལ་བྱ་འདྲེན་ཅིང་ཆོས་སྐུར་སྦྱོར་བའོ། །གདུལ་བྱ་ལྟར་ན། བྱང་ཕྱོགས་གནོད་སྦྱིན་གྱི་འཁོར་ན་དྲེགས་པས་སེངྒེ་དང་ཕ་ཝཾ་གིས་མགོ་ཅན་ཡོད་པ་དེ་དག་འདུལ་བའོ། །ༀ་བཛྲ་ཀྲོ་དྷ་འབྲུ་མཐུན། ཏྲཻ་ལོ་ཀྱ་བི་ཛ་ཡ་ཧཱུྃ་ནི། འཇིག་རྟེན་གསུམ་ལས་རྒྱལ་བ་སྟེ། ཐུགས་ཡང་དག་པའི་ཡེ་ཤེས་ཀྱིས་སྲིད་གསུམ་གྱི་རྟོག་པ་ལས་རྒྱལ་བ་ལས་བཏགས་པའོ། །བིནྡྷ་བིནྡྷ་ཧཱུྃ་ཕཊ྄་ནི། ཕུག་ཅིག་ཕུག་ཅིག་པ་སྟེ། ཐུགས་ཡེ་ཤེས་ཀྱི་ཉོན་མོངས་པ་སྲ་མཁྲེགས་ཏེ་ཕུག་པ་སྟེ། ཟང་ཐལ་དུ་རྟོགས་པའོ། །བྱང་ཤར་དུ་དབང་ལྡན་ཕོ་མོ་སེར་པོའི་སྟེང་དུ། ཁྲོ་བོ་ཆེན་པོ་ཁམས་གསུམ་རྣམ་པར་རྒྱལ་བ་དང་། ཡུམ་རྡོ་རྗེ་གསོད་བྱེད་མ་སྟེ། ཡང་ན་ཁམས་གསུམ་རྣམ་པར་རྒྱལ་བ་ནི། སྤང་བྱ་ལས་མཚན་དུ་གསོལ་བ་སྟེ། ཁམས་གསུམ་དུག་གསུམ་ལུས་ངག་ཡིད་གསུམ་སྐུ་གསུང་ཐུགས་སུ་ཤར་བས། དེ་དག་གིས་སྐྱོན་ལས་རྣམ་པར་རྒྱལ་བའི་ཕྱིར་རོ། །ཡུམ་གསོད་བྱེད་མ་ནི། འཁོར་བའི་རྟོག་པ་དབྱིངས་སུ་གསོད་པའམ། མཐའ་གཉིས་ཀྱི་ཉེས་པ་མ་གོས་པས། དབྱིངས་ཡེ་ཤེས་རང་བྱུང་གིས་ཡེ་ཤེས་ཀྱིས་གསོད་པའི་ཕྱིར་རོ། །སྤྲུལ་པ་དོམ་དང་སྲེ་མོང་གིས་མགོ་ཅན་ནི། གདུལ་བྱེད་ལྟར་ན། དོམ་རྨི་ལམ་རྨིས་ན་ཅིས་ཀྱང་མི་བཟློག་ཅིང་གསོད་པ་ལྟར། ཐུགས་ཡེ་ཤེས་ཀྱི་གདུལ་བྱ་ལ་གཟིགས་ནས་ཕྲིན་ལས་ཀྱི་སྒྲོལ་བའོ། །སྲེ་མོང་ནི་མགྱོག་ཅིང་མྱུར་བ་ལྟར། འགྲོ་དོན་དུ་ཐུགས་ཡེ་ཤེས་ཅིར་ཡང་འཆར་ཞིང་འགྱུར་དུ་བཏུབ་བོ། །གདུལ་བྱ་ལྟར་ན། བྱང་ཤར་དབང་ལྡན་གྱི་འཁོར་ན་དྲེགས་པ་དོམ་དང་སྲེ་མོང་གིས་མགོ་ཅན་ཡོད་པ་འདུལ་བའོ། །ༀ་བཛྲ་ཀྲོ་དྷ་འབྲུ་མཐུན། མ་ཧཱ་བ་ལ་ཧཱུྃ་ནི་སྟོབས་པོ་ཆེ་སྟེ། ཐུགས་ཡེ་ཤེས་ཀྱི་སྟོབས་ཀྱིས་འཁོར་བ་སངས་རྒྱས་ཀྱིས་སར་འདེགས་པའོ། །སྥོ་ཊ་སྥོ་ཊ་ཧཱུྃ་ཕཊ྄་ནི། གཟིར་ཅིག་གཟེར་ཅིག་པ་སྟེ། ཐུགས་ཡེ་ཤེས་ཀྱིས་ཉོན་མོངས་པ་གཟེར་བྱའོ། །ནུབ་ཏུ་ས་བདག་ཕོ་མོ་དུད་ཁའི་སྟེང་དུ་ཁྲོ་བོ་ཆེན་པོ་སྟོབས་པོ་ཆེ་དང་། ཡུམ་རྡོ་རྗེ་བསྐུལ་བྱེད་མ་སྟེ། ཡང་ན་སྟོབས་པོ་ཆེ་ནི། སྟོབས་ལ་མཚན་དུ་གསོལ་བ་སྟེ། ཆོས་ཐམས་ཅད་དབྱིངས་དང་ཡེ་ཤེས་ཀྱིས་སྟོབས་ལས་ཤར་བའི་ཕྱིར་རོ། །ཡུམ་བསྐུལ་བྱེད་མ་ནི། དབྱིངས་ཀྱི་ཐུགས་རྗེས་འཁོར་བ་ཡང་དག་པའི་དོན་ལ་བསྐུལ་བའམ། ཡང་ན་དུས་གསུམ་བདེར་གཤེགས་ཀྱིས་ཕྲིན་ལས་ཐུགས་རྗེ་འགྲོ་བ་དྲུག་གིས་དོན་དུ་བསྐུལ་ཞིང་འགྲོ་དྲུག་མྱ་ངན་ལས་འདས་པའི་ས་ལ་བསྐུལ་བའི་ཕྱིར་རོ། །སྤྲུལ་པ་དྲེད་དང་། བྱི་བའི་མགོ་ཅན་ནོ་ནི། གདུལ་བྱེད་ལྟར་ན། དྲེད་ནི་སྟོབས་ལྡན་པྲ་རྣོ་བ་ལྟར། ཡང་དག་པའི་ཡེ་ཤེས་ཀྱིས་གདུལ་བྱའི་རྒྱུད་མཁྱེན་ཏེ་དུས་གཅིག་ཏུ་སྒྲོལ་བའོ། །བྱི་བ་ནི། ཐབས་མཁས་ཏེ། རྐུ་བའི་སྒོ་མར་དུ་དོད་པ་ལྟར། ཐུགས་ཡེ་ཤེས་ཀྱིས་དོན་ཐར་ལམ་གྱིས་སྒོ་བསམ་གྱིས་མི་ཁྱབ་པར་མཁྱེན་པའི་རྟགས་སོ། །གདུལ་བྱ་ལྟར་ན། འོག་ཕྱོགས་ས་བདག་གི་འཁོར་ན་དྲེགས་པ་དྲེད་དང་བྱི་བའི་མགོ་ཅན་ཡོད་པ་དེ་འདུལ་བའི་ཕྱིར་རོ། །ཁྲོ་བོ་ནི་ངང་ཁྲོ་ཡེ་ཤེས། ཤུགས་ཁྲོ་ཐུགས་རྗེས་ཉོན་མོངས་པ་བཅོམ་པ་སྟེ། རྟགས་དཔལ་ཆེན་པོ་དྲེགས་པ་ཅན་འདུལ་བས་ཁྲོ་ཚུལ་བཅས་ཏེ། ཐུགས་ལ་ཁྲོ་བ་མཛད་དེ། སྐུ་ཁྲོ་བ་དང་བཅས་པའོ། །ཕྱོགས་སྐྱོངས་བཅུ་ནོན་ཅིང་མི་དགེ་བ་སྟོབས་བཅུས་བཅོམ་པའི་ཕྱིར་བཅུ་ཡང་འབྱུང་ལ། ཀུན་ཀྱང་འདྲ་བར་ཞལ་གཅིག་རང་བྱུང་ཡེ་ཤེས། ཕྱག་གཉིས་ཐབས་ཤེས། སྐུ་མདོག་མཐིང་ནག་ནི་ཐུགས་ཆོས་ཉིད་ལ་འགྱུར་བ་མེད་པའི་རྟགས། ཕྱག་ན་ཕུར་པ་དྲིལ་བ་ནི། ཐུགས་ཡེ་ཤེས་རྩེ་གཅིག་གིས་གཟུང་འཛིན་འབིག་པ། ཞབས་གཉིས་བརྐྱང་བསྐུམ་གྱིས་ཕྱོགས་སྐྱོངས་ལ་བརྫིས་པ་ནི། འགྲོ་དྲུག་གིས་ཉོན་མོངས་པ་གཉིས་འཛིན་འཇོམ་པའོ། །ཡང་ན་ཞལ་གསུམ་ཕྱག་དྲུག་ཏུ་བསྒོམ་གསུངས། རྡོ་རྗེའི་གཤོགས་པ་གདེང་བ། སྐུ་ལ་དཔལ་ཆེན་པོའི་ཆས་དང་། དུར་ཁྲོད་ཆེན་པོའི་ཆས་སོགས་རྒྱན་རྣམས་གཙོ་བོ་དང་མཐུན། ཡུམ་ཁྲོ་མོ་ནི་དབྱིངས་ཀྱི་ཤེས་རབ་ཀྱིས་གདུལ་བྱ་འདུལ་བ་སྟེ། ཐམས་ཅད་འཁོར་ལོ་རྒྱས་འདེབས་མ་དང་མཐུན་ནོ། །ཁྲོ་བོ་རྣམས་ཀྱི་ཐུགས་ཀར་ཧཱུྃ་ལ་རང་རང་གིས་སྔགས་ཀྱིས་འཁོར་བར་བསམ། དོན་དབྱིངས་དང་ཡེ་ཤེས། རྟགས་ཡབ་ཡུམ་ཐབས་ཤེས་ལས་སྤྲུལ་པའི་ཁྲ་ཐབས་སམ་ཕྲ་མེན་ནི། དོན་དབྱིངས་ཡེ་ཤེས་ལས་བྱུང་བའི་རྟགས་སུ། མགོ་ལུས་མི་མཚམས་པའི་ཕྲ་མེན་ཏེ། དཔེ་གསེར་གཡུའི་ཕྲ་ལྟ་བུ། ཀུན་མཐིང་ནག་མགོ་བརྙན་ཅན་ཕྱག་གཉིས་པའོ། །སྟག་མགོ་ཅན་ལ་སོགས་པའི་ཡབ་རྣམས་ཀྱིས་གཙོ་བོ་ལ་གཟིགས་པའོ། །ཕྱག་གཡས་ན་རང་རང་གིས་མགོ་བརྙན་དང་མཐུན་པའི་སེམས་ཅན་རེ་རེ་ཁྲ་རུ་འགྱེད་པ་བསྣམས་པ་པོ། གཡོན་པ་རྣམས་ཀྱིས་ཕུར་པ་བསྣམས་ནས་ཡུམ་གྱིས་གྲུ་མོ་ནས་འཁྱུད་པའོ། །བྱ་མགོ་ཅན་རྣམས་ཀྱི་ཡབ་ལ་གཟིགས་ཤིང་། ཕྱག་གཉིས་ཀས་རང་རང་གིས་མགོ་བརྙན་དང་མཐུན་པའི་བྱ་རེ་རེ་སྤྱི་བོར་བསྣམས་པའོ། །འོ་ན་སྨྲིག་བུ་སྲེ་མོང་བྱི་ལ་གསུམ་ཕྲ་མེན་ཡིན་ནམ་ཅེ་ན། སྨྲིག་བུ་སྲེ་མོང་གཉིས་གཤོགས་པ་མེད་ཀྱང་སྒོང་ང་ལས་སྐྱེས་པའོ། །བྱི་བ་ལ་ནི་མཚན་མོར་རྒྱུ་བས། སྟོང་པ་ཤེས་རབ་ཀྱིས་དོན་མཚོན་པ་ཡིན་གསུང་། སྐུ་སྟོད་ལ་ཆུ་སྲིན་གྱིས་སྟོད་གཡོག་ནི། ཁ་གཉིས་ན་ཕྱིར་ལས་པ་གཉིས་བྱུང་བའོ། །ཞིང་ལྤགས་ཀྱིས་རྐེད་ཆིངས་སྟག་ལྤགས་ཀྱིས་ཤམ་ཐབས་ཅན། དབུ་ལ་ཐོད་རློན་གསུམ་གསུམ་གྱིས་བརྒྱན་པ། ཡན་ལག་དང་སྐུ་ལ་སྦྲུལ་གྱིས་བརྒྱན་པ། ཡབ་ཀྱིས་ཞབས་གཡས་ཞིང་གིས་མཁུར་བ། གཡོན་ཚང་ར། ཡུམ་གྱི་ཞབས་གཡས་རྩིབ་སྒང་། གཡོན་པུས་མོ་ལ་བརྫིས་པའོ། །ཁྲ་ཐབས་ནི། ཡབ་ཡུམ་གྱི་ཁ་བརླང་གི་ཚུལ་དུ་བསྐྱེད་གསུངས། ཡང་ན་ཐུར་པ་དཔལ་འབར་ཁྲོ་བོའི་རྒྱུད་ན་གདུལ་བྱའི་སྣང་བ་ལ་དགོངས་ཏེ། རྡོ་རྗེ་གཞོན་ནུས་རུ་ཏྲ་བསྒྲལ་བས་མི་དགེ་བ་བཅུའི་ངོ་བོ་སྙིང་ཁྲག་ལ་ཕྱོགས་སྐྱོང་ཕོ་མོ་གྲུབ། དེ་གྲུབ་པའི་ཁྲོ་བོ་ཡབ་ཡུམ་ཉི་ཤུར་སྤྲུལ་ནས་ཕྱོགས་སྐྱོང་ཕོ་མོ་བསྒྲལ། དེ་དག་གིས་སྙིང་ཁྲག་ཐིག་རེ་ལ། གཅན་དང་། བྱ་མགོ་ཅན་རེ་རེ་སྟེ་ཉི་ཤུར་སྤྲུལ་ཏེ། དེ་དག་འདུལ་བའི་དོན་དུ། ཁྲོ་བོ་ཡབ་ཡུམ་ལ་ཟ་བྱེད་གསོད་བྱེད་རྣམས་སྤྲུལ་ཏེ། དྲེགས་པ་དེ་དག་བསྒྲལ་བར་བཤད། སྙིང་པོ་རོལ་པ་ལས། ཁྲོ་བཅུ་དབང་བཅུ་དང་། སྟོབས་བཅུ་ལ་སོགས་པ་དང་སྦྱར། ཡུམ་བཅུ་ནི་ཕ་རོལ་ཏུ་ཕྱིན་པ་བཅུ་དང་སྦྱར། ཟ་བྱེད་བཅུ་ནི་བདག་དོན་རྟོགས་པའི་ཡེ་ཤེས་དང་། གཞན་དོན་ཐུགས་རྗེ་དང་། ཕྲིན་ལས་ལ་སོགས་ཏེ་དགོངས་པའི་ཡོན་ཏན་དང་སྦྱར། མགྱོག་བྱེད་མ་བཅུ་ནི། འདུ་བྱེད་ལྔ་བཅུ་རྩ་གཅིག་གིས་ནང་ན་ཆོས་མཐུན་པ་བཅུ་གནས་སུ་དག་པ་དང་སྦྱར་སྟེ། སེམས་པ་གནས་སུ་དག་པ་བྱ་རྒོད་མགོ་ཅན། འདུན་པ་གནས་སུ་གྱུར་པ་བྱ་རོག་མགོ་ཅན། ཡིད་ལ་བྱེད་པ་གནས་སུ་གྱུར་པ་འུག་པའི་མགོ་ཅན། ཏིང་ངེ་འཛིན་གནས་སུ་གྱུར་པ་ཁ་ཏྭའི་མགོ་ཅན། དད་པ་གནས་སུ་གྱུར་པ་པུ་ཤུད་མགོ་ཅན། མོས་པ་གནས་སུ་གྱུར་པ་ཁྲའི་མགོ་ཅན། དྲན་པ་གནས་སུ་གྱུར་པ་ཕ་ཝཾ་མགོ་ཅན། ཤེས་རབ་གནས་སུ་གྱུར་པ་སྲེ་མོང་མགོ་ཅན། གཉིད་གནས་སུ་གྱུར་པ་སྨྲིག་བུའི་མགོ་ཅན། དེ་དག་གི་གནས་སྐབས་ཀྱི་བྱེ་བྲག་གནས་སུ་གྱུར་པ་ནི་བྱི་བའི་མགོ་ཅན་ནོ། །མདོར་ན་སེམས་དང་སེམས་བྱུང་གིས་ཆོས་ཐམས་ཅད་དབྱིངས་དང་ཡེ་ཤེས་སུ་གནས་སུ་གྱུར་པས། དབྱིངས་དང་ཡེ་ཤེས་ཀྱིས་བྱིན་རླབས་སམ་རྟགས་སུ་ཕྲ་མེན་མ་རྣམས་སུ་སྣང་ལ། གཞན་ཡང་སྤྲུལ་པ་བྱེ་བ་དྲུག་ཅུའམ། བྱེ་བ་བརྒྱ་རྩ་གཅིག་ནི། ཁབ་ཀྱིས་སྤུ་ཅན་དང་། ལྕགས་ཀྱིས་ལྤགས་པ་ཅན་དང་། ཟངས་ཀྱིས་ལྤགས་པ་ཅན་དང་། མཆུ་རྡོ་རྗེ་གཟུང་ཅན་ལ་སོགས་པའི་སྤྲུལ་པ་དང་ཡང་སྤྲུལ་དང་བཅས་པའི་ཕྱོགས་བཅུ་བར་མཚམས་མེད་པར་གཏམ་ནས་ཡོད་པ། དེ་དག་ཀྱང་སེམས་དང་སེམས་བྱུང་གནས་སུ་དག་པ་སྟེ། དབྱིངས་དང་ཡེ་ཤེས་ལས་སྤྲུལ་པའོ། །ཕུར་པ་སྲས་ཀྱི་དཀྱིལ་འཁོར་ནི། ལག་པ་གཡས་གཡོན་སོར་མོ་བསྣོལ་ནས། ༀ་བཛྲ་ཀཱི་ལི་ཀཱི་ལ་ཡ་སརྦ་བྷིགྷན་བྃ་ཧཱུྃ་ཕཊ྄་ཅེས་བརྗོད་པ་ཙམ་གྱིས། ཡང་གཙོ་བོ་ཡབ་ཡུམ་གྱིས་གསང་གནས་ནས་ཧཱུྃ་ཉི་ཤུ་རྩ་གཅིག་སྤྲོས་ཏེ། གྲུ་གསུམ་གྱི་ཁ་ལ་ཕོག་ངོས་གསུམ་དུ་བདུན་བདུན་སྟེ་ཉེར་གཅིག་ནི་ལོགས་གསུམ་དུ་དྲུག་དྲུག་ཟུར་ཙམ་གསུམ་དུ་གསུམ་སྟེ། དེ་འོད་དུ་ཞུ་བ་ལས་སྲས་མཆོག་ཞལ་གཅིག་ཕྱག་གཉིས་པ། སྐུ་མདོག་མཐིང་ནག་རྒྱན་མེད་པ། ཕྱག་ན་ཕུར་པ་དྲིལ་བ། དབུ་སྐྲ་ཁམ་པ་གྱེན་དུ་བརྫེས་པ་མ་བཅིང་པ། ལྟེ་བ་མན་ཆད་གནམ་ལྕགས་ཀྱི་ཕུར་པ་དམར་ཟང་ངེར་འདུག་པའོ། །ཡང་ན་ཕུར་པ་ཁྲག་འཐུང་དྲུག་ཅུ་རྩ་གཉིས་ཀྱིས་དཀྱིལ་འཁོར་བསྐྱེད་པ་འདི་ཡང་སྐྱེ་གནས་སྦྱང་བ་ཡིན་ཏེ། གཙོ་བོ་ནི་ཧཱུྃ་ལ་སོགས་ཆོ་ག་གསུམ་གྱི་བསྐྱེད་པས་དྲོད་གཤེར་ལ་སྐྱེ་བ་སྦྱང་། ཡེ་ཤེས་སེམས་དཔའ་བརྫུས་སྐྱེས་སུ་བསྐྱེད་པས་བརྫུས་སྐྱེས་སྦྱང་། ཁྲོ་བོ་ཡབ་ཡུམ་ཧཱུྃ་ཁ་སྦྱོར་འོད་སྒོང་ང་ལྟ་བུ་བསྐྱེད་པས་སྒོང་སྐྱེས་སྦྱང་། སྲས་མཆོག་ཉེར་གཅིག་ལ་ཡུམ་གྱིས་མཁའ་ནས་བསྐྱེད་པས་མངལ་སྐྱེས་སྦྱང་ཅེས་འདོད་པ་སྣང་ངོ་། །དམ་ཅན་སྲུང་མའི་དཀྱིལ་འཁོར་ནི། ལྷ་སྣམ་གྱིས་དམ་ཅན་བཅུ་གཉིས་ཀྱི་ཤྭ་ན་བཞི་ནི། དཔལ་ཆེན་པོའི་གསུང་གིས་རྣམ་པར་འཕྲུལ་པར་སྣང་ཞིང་གསུང་གིས་ཕྲིན་ལས་ཐམས་ཅད་ཐོགས་པ་མེད་པར་བསྒྲུབ་ཅིང་། དགྲ་བགེགས་ཀྱིས་ངག་རྡུལ་དུ་བརླག་པའོ། །བསྭེ་མོ་བཞི་ནི། དཔལ་ཆེན་པོའི་སྐུའི་རྣམ་པར་འཕྲུལ་པར་སྣང་ཞིང་སྐུའི་ཕྲིན་ལས་ཐོགས་པ་མེད་པར་སྒྲུབ་ཅིང་། དགྲ་བགེགས་ཀྱིས་ལུས་རྡུལ་དུ་བརླག་པའོ། །རེ་ཏི་བཞི་ནི། དཔལ་ཆེན་པོའི་ཐུགས་ཀྱི་རྣམ་པར་འཕྲུལ་པར་སྣང་ཞིང་ཐུགས་དགོངས་པའི་ཕྲིན་ལས་ཐམས་ཅད་ཐོགས་པ་མེད་པར་བསྒྲུབ་ཅིང་། དགྲ་བགེགས་ཀྱིས་ཡིད་རྡུལ་དུ་བརླག་པར་མཛད་པའོ། །རེ་མཛུའི་ཕ་བདུད་རྐང་རྗེ་དྲང་དཀར། མ་བདུད་སྲོག་ལེན་ཧབ་ཤ་མ། རེ་མ་ཏིའི་ཕ་བདུད་པདྨ་གར་གྱིས་དབང་ཕྱུག །མ་བདུད་མོ་བརྒྱ་བྱིན་ཀུན་དགའ་མོ། རེ་མཛིའི་ཕ་བདུད་ཐོད་པའི་ཕྲེང་བ་ཅན། མ་བདུད་མོ་ཨེ་ཀ་ཙ་ཏི་མ། རེ་མ་ཛའི་ཕ་བདུད་སྲིན་པོ་མ་ཏི་ཀ །མ་བདུད་མོ་གླིང་བཞི་ཀུན་འབྱམས་མའོ། །དེ་ལྟར་ཕོ་བདུད་ཉི་ཤུ་རྩ་གཅིག་ན། ཤྭ་ན་བཞི། བསྭེ་མོ་བཞི། རི་མ་ཏི་བཞི་དང་བཅུ་གཉིས། ནག་མོ་ཆེན་མོ་གློག་ཕྲེང་མ། ས་བདག་ནག་མོ་རལ་གཅིག་མ། མགོ་མེད་བྲང་ནི་མིག་གིས་ཁེངས་མ། ལྕགས་ཀྱི་སྤྱད་མོ་མགོ་དགུ་མ་དང་བཞི་ནི། བསེ་མོ་བཞིའི་བློན་པོ་ཡིན་ཡང་ཟེར། མ་ཡར་ཡིན་ཡང་ཟེར། དངུལ་གྱིས་བ་རྒོད་དུང་མགོ་ཅན། ལྕགས་ཀྱིས་བྱ་རྒོད་ཁ་ཏོང་མཆུ། ཟངས་ཀྱི་རེ་འབྱམས་མགོ་དགུ་མ། གསེར་གྱིས་བྱ་རྒོད་རྒྱ་མགོ་མ་དང་བཞི་ནི་ཕོ་ཉ་ཡིན་སྐད། དེས་བརྒྱ་དང་ཉི་ཤུའོ། །སྲོག་བདག་རྒྱལ་མོ་ནི། སྐེམ་མ་ཆུ་སྲིན་གྱི་མགོ་ཅན་སྟེ། རེ་མ་ཏི་བཞིའི་ཕོ་ཉ་ཡིན་སྐད། མོ་བདུད་ཉི་ཤུ་ཕྱིའི་ལས་མཁན་ཡིན་ཟེར་བ་ཡང་ཡོད་སྐད། དེ་ལྟར་མོའི་འཁོར་ཉི་ཁྲི་གཅིག་སྟོང་ངོ་། །དམ་ཅན་བཅུ་གཉིས་ནི་བྱ་ནག་ཐང་ལ་བབ་པ་ལྟར་བསྐྱེད་གསུངས། གཞལ་ཡས་ཁང་གིས་ཕྱི་རོལ་རྡོ་རྗེ་རྭ་བའི་ནང་རོལ་དུ། ཤར་ནས་བརྩམ་ཏེ་གཡས་བསྐོར་དུ། ཕོ་བདུད་ཉེར་གཅིག་ནི། བདུད་བཞི། གིང་བཞི། ཤན་པ་བཞི། བསྭེའི་སྐྱེས་བུ་གདུག་པ་ཅན་བཞི། བློན་པོ་བཞི། འབྱུང་པོ་སེར་པོ་སྣ་ཡོན་དང་ཉི་ཤུ་རྩ་གཅིག་བྱང་ཤར་མཚམས་ལ་མ་ཐུགས་བར་ལ་འཁོར་བར་ཡོད་པ་མོས་པ་ཙམ་བྱ་སྟེ། དེ་ལ་ཕོ་བདུད་ཀྱིས་མཚན་མི་འདྲ་བ་མང་དུ་བཏགས་པ་ཡོད་ཀྱང་། བདུད་བཞི་ནི། ནག་པོ་ཆེན་པོ། ཀ་ལ་དྲག་པོ། རྡོ་རྗེ་རོ་ལང་། དུར་ཁྲོད་བདག་པོ་དང་བཞི་ནི། རེ་མ་ཏི་བཞིའི་མིང་པོ་ཡིན་སྐད། གིང་ཆེན་བཞི་ནི། ཚངས་པ་དཀར་པོ་དུང་གིས་ཐོར་གཙུག་ཅན། དམར་པོ་ཤེལ་གིང་། སྐྱེས་བུ་དཀར་པོ། ནག་པོ་ཕྱ་སང་དང་བཞི་ནི། ཤྭ་ན་བཞིའི་མིང་པོ་ཡིན་སྐད། ཤན་པ་བཞི་ནི། བཙན་སྐྱ་གཅིག །བདུད་འཛུམ་མེད། གཤིན་རྗེ་གསོད་བྱེད། ཀླུ་ཏག་ཤ་ཀ་དང་བཞི་ནི། ཤྭ་ན་བཞིའི་བཀའ་ཉན་ཡིན་སྐད། བསྭེའི་སྐྱེས་བུ་གདུག་པ་ཅན་བཞི་ནི། བདུད་མེ་རུ་རྩེ་དང་། གཤིན་རྗེ་མེ་རུ་རྩེ་དང་། གནོད་སྦྱིན་མེ་རུ་རྩེ་དང་། སྲིན་པོ་མེ་རུ་རྩེ་དང་བཞི་ནི། བསྭེ་མོ་བཞིའི་མིང་པོ་ཡིན་སྐད། བློན་པོ་བཞི་ནི། བདུད་རྣམས་རོལ་ཆེན། ཀླུ་གདེངས་པོ་སྙིང་དཀར་དང་། བཙན་སྐྱ་ཟླ་བ་དང་། གཟའ་མིག་དམར་དང་བཞི་ནི། བསྭེ་མོ་བཞིའི་ཕ་ཡིན་སྐད། དེ་བཞི་ལ་ནི་བདུད་བཞི་ཡིན་ཟེར་བ་ཡང་ཡོད་སྐད། ཡང་བློན་པོ་བཞི་ནི། ས་བདག་ཙང་ཀུན་དང་། ཀླུ་འཇོག་པོ་དང་། གཟའ་པ་ཝ་སངས་དང་། བདུད་མོ་འཛུམ་མེད་མ་དང་བཞི་ཡིན་སྐད། འབྱུང་པོ་སེར་པོ་སྣ་ཡོན་ནི། ཚོགས་བདག་གླང་སྣ་ཡིན་སྐད། དེའི་བཀའ་ཉན་གནམ་གྱི་མ་སང་སྐྱེས་གཅིག་ཡིན་སྐད། དེ་ལྟར་འཇིག་རྟེན་གྱི་ལས་མཁན་ཕོ་ཉ་དགུ་བཅུ་གསུམ་མོ། །ཕོའི་འཁོར་ཉི་ཁྲི་གཅིག་སྟོང་། སྤྱིར་བསམ་ཡས་སོ། །དེའི་ཕྱི་རོལ་ཏུ་གིང་ཕོ་དགུ་མོ་དགུ་རྣམས་གཙོ་བོ་ལ་མོས་པའི་ཚུལ་དུ་འདུད་པར་བསམ། དངོས་སུ་ཕྱག་མཚན་གསལ་བར་བསྒོམ་ན་བཀྲ་མི་ཤིས་ཅེས་གསུངས། སྤྱི་དོན་དྲུག་པ་ཡེ་ཤེས་ཀྱིས་དཀྱིལ་འཁོར་གཞུགས་པ་ནི། ས་མན་ཛས་སྙན་གསན་དབབ་ནས། ཐུགས་ཀ་ནས་འོད་ཟེར་ཁ་དོག་སྣ་ལྔ་འཕྲོས་ཕྱོགས་བཅུའི་སངས་རྒྱས་ཀྱིས་ཞིང་ཁམས་ཐམས་ཅད་ལ་ཕོག །སངས་རྒྱས་ཐམས་ཅད་ཆོས་སྐུ་ལ་གཟུགས་སྐུར་བཞེངས་ནས་ཀུན་ཀྱང་རྡོ་རྗེ་གཞོན་ནུའི་དཀྱིལ་འཁོར་རིག་འཛིན་བླ་མ་དང་བཅས་པ་རྣམས་ཀྱི་རྣམ་པར་བཞུགས་པར་བསམ་ལ། ཇ་འདྲེན་གྱི་ཚུལ་དུ་རྣམ་ལྔ་འབུལ་ལ། རྡ་ལ་སོགས་པ་རོལ་མོའི་བྱེ་བྲག་རྣམས་བསྐྲོལ་བརྡུང་བྱ་སྟེ། དེའི་དགོས་ཆེད་ནི། ཡེ་ཤེས་ཀྱིས་ཆོས་སྐྱོང་བྱ་རོག་གདོང་ཅན་གྱིས། ད་ལྟ་ཆ་འུར་གྱིས་བསྐྲོལ་བརྡུང་བྱས་ན་དགའ་ཅེས་པའི་ལོ་རྒྱུས་བཞིན་ནོ། །ལྷ་ལ་མཆོད་པ་འབུལ་བའི་ཕྱིར་དང་། ཐ་མལ་གྱི་རྟོགས་པ་ཟིལ་གྱི་གནོན་པའི་ཕྱིར་དང་། བར་དོའི་སྒྲ་འོད་ཟེར་གསུམ་སྦྱང་བའི་ཕྱིར་དུའོ། །དེ་ཡང་རྔ་ལ། ཡེ་ཤེས་དབྱིངས་ཀྱི་རྔ་བརྡུང་དང་། སྒྲུབ་པ་ལས་ཀྱི་རྔ་བརྡུང་དང་། ཚར་གསུམ་པའི་རྔ་བརྡུང་ལ་སོགས་པ་རྣམས་ཀྱི་དོན་དང་། སྤྱན་འདྲེན་དང་ལྷག་མ་ཡན་ཆད་ཀྱིས་རྔ་དིལ་རྣམས། པད་འབྱུང་གིས་རྔ་བརྡུང་རིན་ཆེན་ཕྲེང་བ་དང་། གཉན་རྒོད་སྟོན་པའི་རྔ་བརྡུང་རྣམས་དེ་ལྟར་ཤེས་པར་བྱ་ཞིང་། ཅང་ཏེའུ་བསྐྲོལ་ལུགས་ལ། ཀུན་ཏུ་བཟང་པོའི་དལ་འབྱམས། མཁའ་འགྲོ་མའི་ལན་སྐད། ཞིང་སྐྱོང་མ་བུའི་འབོད་ལེན། རོ་ལོང་ནག་པོའི་མཐིང་རྡུང་ལ་སོགས་པ་རྣམས་བྱས་ལ། ཚིག་བདུན་པས་བླ་མ་སྤྱན་འདྲེན་ལ་བསྟིམ། དེ་ནས་ཡི་དམ་ལ་འཕྱོང་དྲུག་གིས་སྒོ་ནས་སྤྱན་འདྲེན་ཏེ། དེ་ཡང་གདུལ་བྱེད་ཡེ་ཤེས་ཀྱིས་འཕྱོང་གསུམ་དང་། གདུལ་བྱ་ཡུལ་གྱི་འཕྱོང་གསུམ་མོ། །དང་པོ་ནི། ཡེ་མ་བཅོས་པ་ཆོས་དབྱིངས་ཀྱི་རང་རིག་པའི་ཤེས་རབ་ཀྱིས་རྟོགས་ནས། དབྱིངས་དང་རིག་པ་གཉིས་སུ་མེད་པ་དེ་ལ་ཡེ་ཤེས་ཅེས་བྱའོ། །ཕུར་བུ་ནི་དབྱིངས་དང་ཡེ་ཤེས་དབྱེར་མེད་ཀྱིས་དོན་དེ་ཉིད་བསྒྲུབ་པ་ནི་མཆོག་གིས་དངོས་གྲུབ། དེའི་ཞོར་ལ་ཐུན་མོང་གིས་གྲུབ་པ་བརྒྱད་ལྟ་བུ་གྲུབ་པའི་ཕྱིར་དང་། འཁོར་འདས་ཀྱིས་ཆོས་ལ་དབང་བྱེད་ཅིང་མཆོག་དང་ཐུན་མོང་གི་དངོས་གྲུབ་རྣམས་བླང་བ་ནི་དཀྱིལ་འཁོར་ལ་གསོལ་བ་འདེབས་པ་སྟེ། བསྒྲུབ་པ་པོ་ལ་སྩོལ་བའི་ཕྱིར། དམ་ཚིག་ཆེན་པོ་ནི་དཔལ་རྡོ་རྗེ་གཞོན་ནུ་ཡབ་ཡུམ་སྟེ། འཁོར་བ་མ་སྟོང་གིས་བར་དུ་གདུལ་བྱའི་དོན་མཛད་པ་ལས་མི་འདའ་བས་དམ་ཚིག་ཆེན་པོའོ། །དེ་ཉིད་དོན་ངོ་བོ་ལ་གཤེགས་བཞུགས་མི་མངའ་ཡང་། གདུལ་བྱའི་ངོ་ལ་གནས་འདིར་གཤེགས་སུ་གསོལ། དེ་ལྟ་བུའི་རྡོ་རྗེ་གཞོན་ནུ་ཡབ་ཡུམ་གཤེགས་ནས་ཀྱང་ཅི་མཛད་ཅེ་ན། གྲུབ་སེམས་པའི་རྟགས་དང་གྲུབ་ཟིན་པའི་མཚན་མའམ། ཡང་ན་དངོས་གྲུབ་ཀྱིས་མཚན་མ་དང་། སྒྲོལ་བྱ་སྒྲོལ་བའི་རྟགས་སོ། །དེ་དག་མངོན་སུམ་དུ་བསྟན་པ་དང་། ཀཱི་ལ་ཡ་ནི་དབྱིངས་ཡེ་ཤེས་ཀྱིས་དངོས་གྲུབ་བམ། མཆོག་ཐུན་མོང་གིས་དངོས་གྲུབ་སྩོལ་ཅིག་བའོ། །ཡེ་ཤེས་ཕུར་བུ༴ དབང་དང་༴ འབྲུ་མཐུན། དཔལ་རྡོ་རྗེ་གཞོན་ནུའི་ཐུགས་གཉིས་སུ་མེད་པའི་ཡེ་ཤེས་ཐབས་ཐུགས་རྗེ་ལ་སྤྲུལ་པའི་ཁྲོ་བོ་བཅུ་དང་དབྱིངས་ཤེས་རབ་ལས་སྤྲུལ་པའི་ཁྲོ་མོ་བཅུ་སྟེ། གཞན་ལས་ཁྱད་པར་དུ་གྱུར་པས་ཆེན་པོ་གཤེགས་སུ་གསོལ། བདུད་དང་ལོག་འདྲེན་ལས་རྒྱལ་བས་ཁྲོ་རྒྱལ་ཡབ་ཡུམ་ཉི་ཤུ་གཤེགས་ནས་ཀྱང་། རྟགས་དང་༴ ཀཱི་ལ་ཡའི༴ འབྲུ་མཐུན། ཡེ་ཤེས་ཕུར་བུ༴ དབང་དང་༴ ཁྲོ་བོ་རྣམས་ཀྱི་མངག་གཞུག་གིས་ཕོ་ཉ་ཡིན་པའི་ཕྱིར། ཕྱག་བརྙན་ཆེན་པོ་གཤེགས་སུ་གསོལ། དོན་ཉོན་མོངས་པ་མ་སྤངས་བར་ཐབས་སྣ་ཚོགས་ཀྱིས་སྒོ་ནས་གཅོད་ཅིང་། རྟགས་སེམས་ཅན་རྣམས་ཕྱག་མཚན་དུ་ཁྲ་རུ་འགྱེད་ཐབས་སུ་བསྣམས་པའི་ཡབ་ཡུམ་ཉི་ཤུ་གཤེགས་ནས་ཀྱང་། རྟགས་དང་༴ ཀཱི་ལ་ཡའི༴ གཉིས་པ་གདུལ་བྱ་ཡུལ་འཛིན་པའི་འཕྱོང་ནི། སྲིད་པ་ནི་ཀུན་ནས་ཉོན་མོངས་པ་འཁོར་བའི་ཆོས་ཏེ། ཁམས་གསུམ་དང་ལུས་ངག་ཡིད་གསུམ་མོ། །ཕུར་བུ་བསྒྲུབ་དང་། དབང་དང་། ཤྭ་ན་མུ་ཁ་སྟེ། ཡེ་ཤེས་ཀྱི་མཁའ་འགྲོ་སྤྱང་ཀུའི་གདོང་པ་ཅན་ལ་སོགས་སྟེ། ཤ་ཟའི་ཆོས་ལུགས་གདོང་པ་ཅན་བཞི་གཤེགས་སུ་གསོལ། དེ་ལྟ་བུའི་ཤྭ་ན་མཆེད་བཞི་གཤེགས་ནས་ཀྱང་། རྟགས་དང་༴ ཀཱི་ལ་ཡའི་དངོས་གྲུབ་སྩོལ། ཅེས་པས། དངོས་གྲུབ་སྤྱིར་བསྡུས་ནས། ཡེ་ཤེས་ཀྱི་ལྷ་ལ་མཆོག་ཐུན་མོང་གིས་དངོས་གྲུབ་ཀྱིས་གསོལ་བ་གདབ་པ་ཡིན་ཏེ། དམ་ཚིག་ལ་གྲུབ་པ་ཆེན་པོ་བརྒྱད་མན་ཆད། ལས་ཕྲན་ཚོགས་ཀྱིས་དངོས་གྲུབ་ཡན་ཆད་གསོལ་བ་གདབ་པའོ། །སྲིད་པའི༴ དབང་དང་༴ གླིང་བཞིའམ་འབྱུང་བ་བཞིའི་བདག་མོ་བསྭེ་མོ་བཞི་ཡིན་པས། ས་བདག་ཆེན་མོ་གཤེགས་སུ་གསོལ། དེ་ལྟ་བུའི་འཛམ་གླིང་གིས་བསྭེ་ཤིང་ཡོད་པའི་གནས་ན་བཞུགས་པའི་བསྭེ་མོ་མཆེད་བཞི་གཤེགས་ནས་ཀྱང་། རྟགས་དང་༴ ཀཱི་ལ་ཡའི༴ སྲིད་པའི༴ དབང་དང་༴ ཁམས་གསུམ་གྱིས་བདག་མོ་མཐུའི་དབང་ཕྱུག་མ་བདག་ཉིད་ཆེན་མོ་གཤེགས་སུ་གསོལ། དེ་ལྟ་བུའི་མ་མོའི་ཚོགས་ནད་ཀྱིས་བདག་མོ་རེ་མ་ཏི་མཆེད་བཞི་གཤེགས་ནས་ཀྱང་། རྟགས་དང་༴ ཀཱི་ལ་ཡའི༴ ཁྱོད་ཀྱིས་དམ་ཚིག་དུས་ལ་བབ་ཅེས་པ། ཕུར་པའི་སྲུང་མ་མ་ལུས་པའོ། །མཐུ་རྩལ་ཕྱུངས་ཅེས་པ་དམ་ཅན་བཅུ་གཉིས་ཀྱི་འཁོར་ན། བདུད་ནི་རོལ་ཆེན་ལ་སོགས་པའི་དྲེགས་པ་ཕོ་བདུད་ཉི་ཤུ་རྩ་གཅིག་འཁོར་ཡང་འཁོར་དང་བཅས་པ་རྣམས་ཀྱིས་སེམས་ཀྱིས་མཐུ་དང་། ལུས་ཀྱིས་རྩལ་ཕྱུང་བའི་ཕྱིར་གཤེགས་སུ་གསོལ། དེ་ལྟ་བུའི་དྲེགས་པ་ཉི་ཤུ་རྩ་གཅིག་གཤེགས་ནས་ཀྱང་། རྟགས་དང་༴ ཀཱི་ལ་ཡའི་དངོས་གྲུབ་སྩོལ། ཡང་ན། ཁྱེད་ཀྱིས་དམ་ཚིག་དུས་ལ་བབ། །མཐུ་རྩལ་ཕྱུང་བའི་དུས་ལ་བབ། །ཞེས་བྱ་བ། གདུལ་བྱ་དང་། གདུལ་བྱེད་སྤྱི་ལ་ཐམས་ཅད་གནན་ནས་བསྐུལ་བ་སྟེ། དང་པོ་ཡེ་ཤེས་པ་ལྟར་ན། ཁྱེད་དེ་བཞིན་གཤེགས་པ་ཐམས་ཅད་ཀྱིས་དམ་ཚིག་ནི། ཐུགས་རྗེས་འགྲོ་བ་སྒྲོལ་བ་ཡིན་པས་དེའི་དུས་ལ་བབ་པས། སེམས་ཀྱིས་མཐུ་དང་ལུས་ཀྱིས་རྒྱུ་རྩལ་དང་། སྤྲུལ་པ་བསམ་གྱིས་མི་ཁྱབ་པས་འགྲོ་བའི་དོན་གྱིས་ཤིག་པའོ། །གདུལ་བྱ་ལྟར་སྦྱར་ན། དམ་ཅན་དང་དྲེགས་པ་ཁྱེད་རྣམས་ཀྱིས་དམ་ཚིག་ནི། སྔོན་བཅོམ་ལྡན་འདས་ཤྲཱི་བཛྲ་ཀུ་མ་རའི་སྤྱན་སྔར་སྲོག་གིས་སྙིང་པོ་མདོང་སོལ་དུ་ཕུལ་སྟེ། མ་འོངས་པའི་རྣལ་འབྱོར་པ་རྣམས་ཀྱིས་གྲོགས་བྱ་བ་དང་། དགྲ་བགེགས་གདུག་པ་ཅན་བསྒྲལ་བར་དམ་བཅའ་བ་ཡིན་པས། དེའི་དུས་དེང་སང་ཡིན་ཅེས་པའོ། །དེ་ཡང་ཁྱེད་རྣམས་ཀྱིས་སེམས་ཀྱིས་མཐུ་དང་། ལུས་ཀྱིས་སྤྲུལ་པའི་སྒྱུ་རྩལ་ཅིར་ཡང་མངའ་བས་དཔྱད་སྒྲུབ་པོ་ལ་སྡོང་གྲོགས་མཛོད་ཅེས་པ་དང་། དགྲ་བགེགས་གདུག་པ་ཅན་བསྒྲལ་བའི་དུས་ལ་དེང་སང་བབ་བོ། །ཞེས་བྱའོ། །དེ་ལྟར་བསྐྱེད་པའི་ད་ལ་འདྲ་བ་གཅིག་བྱོན་ནས། གཙོ་བོ་ལ་གཙོ་བོ་དང་། འཁོར་རྣམས་ལ་འཁོར་དང་། གཞལ་ཡང་ཁང་ལ་གཞལ་ཡས་ཁང་། རྡོ་རྭ་མེ་རི་ལ་རྡོ་རྭ་མེ་རི་རྣམས་ཐིམ་པར་བསམ་མོ། །བདུན་པ་དབང་བསྐུར་བ་ནི། ཡངས་མན་ཛས་སྙན་གསན་དབབ་ལ། རང་གིས་ཐུགས་ཀའི་འོད་ཟེར་གྱིས་ཕྱོགས་བཅུའི་བྷུདྡྷ་ཐམས་ཅད་བསྡུས་ཏེ་ཀུན་ཀྱང་རྡོ་རྗེ་གཞོན་ནུ་རང་འདྲ་བས་ནམ་མཁའ་གང་བར་བཞུགས་པར་བསྒོམ་ལ། དེ་ནས་ཐུགས་ཡང་དག་པའི་ཡེ་ཤེས་སྐྱེ་འཇིག་དང་བྲལ་བས་རྡོ་རྗེ། དེ་ཉིད་བགྲེས་རྒུད་དང་བྲལ་བས་གཞོན་ནུ། དེའི་རིག་ནི་ཆོས་སྐུ་སྟེ། དུས་གསུམ་གྱིས་སངས་རྒྱས་ཐམས་ཅད་ཀྱིས་དེ་ཉིད་རྟོགས་པ་ན་འཛིན་པ་སྟེ། ཅེས་སམ། ཡང་ཕྱོགས་བཅུ་ཁྲོ་བོའི་དཀྱིལ་འཁོར། ཕུར་པ་སྲས་ཀྱི་དཀྱིལ་འཁོར། ཁྲ་ཐབས་ཀྱིས་ཀྱང་ཆོས་སྐུའི་དོན་རྟོགས་པས་རིག་འཛིན་ཅེས་བྱ་སྟེ། དེ་རྣམས་ཀྱིས་ཅེས་པའོ། །སྲིད་པ་ཞེས་པ་ནི། མི་སྲིད་པའི་སྲིད་པ་དང་། ཇི་སྲིད་པའི་སྲིད་པ་དང་། སྲིད་པའི་སྲིད་པའོ། །མི་སྲིད་པའི་སྲིད་པ་ནི། སངས་རྒྱས་བཅོམ་ལྡན་འདས་ལ་བྱ་སྟེ། སངས་རྒྱས་ནི་རྒྱ་ལམ་ན་ལན་གཅིག་སྲིད་པ་ས་མི་སྲིད་བ་ཞེས་བྱ་སྟེ། དེ་ཡང་དཔལ་རྡོ་རྗེ་གཞོན་ནུའི་ཐུགས་ཀྱི་རང་བཞིན་ཡིན་པ་དང་། ཇི་སྲིད་པའི་སྲིད་པ་ནི། བྱང་ཆུབ་སེམས་དཔའ་དང་ཉན་རང་ལ་བྱ་སྟེ། དེ་ཡང་རྒྱ་ལམ་ལན་གཅིག་ན་སྲིད་ལ། ཇི་སྲིད་པའི་སྲིད་པ་ཞེས་བྱ་སྟེ། དེ་ཡང་རྡོ་རྗེ་གཞོན་ནུའི་གསུང་གིས་རང་བཞིན་ཡིན་པ་དང་། སྲིད་པའི་སྲིད་པ་ནི། ལྷ་མི་ངན་སོང་ཀུན་ལ་བྱ་སྟེ། དེ་ཡང་རྡོ་རྗེ་གཞོན་ནུའི་སྐུའི་རང་བཞིན་ཡིན་པས་སྲིད་པ་གསུམ་དང་། ཡང་ན་སྲིད་པ་ལྷ་མི་ངན་སོང་གསུམ་མོ། །ཡང་ན་སྲིད་པ་འགྲིང་བུ། འཕྲེང་ཉལ། ཁ་སྦུབ་གསུམ་མོ། །ཡང་ན་སྲིད་པ། ས་བླ། ས་སྟེང་། ས་འོག་གསུམ་མོ། །ཡང་ན་སྲིད་པ་ཁམས་གསུམ་མོ། །ཡང་ན་སྲིད་པ་ལུས་ངག་ཡིད་གསུམ་སྟེ། དེ་ལྟར་སྲིད་པ་བཅོ་བརྒྱད་པོ་ཀུན་རྡོ་རྗེ་གཞོན་ནུའི་སྐུ་གསུང་ཐུགས་སུ་དབྱེར་མི་ཕྱེད་པས་རྡོ་རྗེ་སྟེ། དེ་ལྟ་བུའི་ངང་དུ་གྲུབ་པར་མཛོད་ཅིག་ཅེས་པའོ། །དེ་ལྟར་སྲིད་པ་ཀུན་རྡོ་རྗེ་གཞོན་ནུའི་སྐུ་གསུང་ཐུགས་རྡོ་རྗེ་བདག་ཉིད་དུ་གྱུར་པས་ན། ཐམས་ཅད་རྡོ་རྗེ་གཞོན་ནུའི་སྲུང་མའམ་ཕུར་པའི་ལྷར་མ་གྱུར་པ་མེད་པའོ། །རྟོགས་བྱའི་དབྱིངས་དང་། དེ་ཉིད་རྟོགས་པའི་རིག་པ་གཉིས་སུ་མེད་པ་དེ་ལ་ཡེ་ཤེས་ཁྲོ་བོ་ཞེས་པ་ཡེ་ཤེས་ཆེན་པོ་སྔོན་དུ་བཏང་བས་ཁྲོ་བ་ལྟར་བཅས་པ་དང་། ཐུགས་རྗེ་ཆེན་པོའི་ཤུགས་ཀྱིས་ཁྲོ་བ་ལྟར་བཅས་པའོ། །དེ་ལྟ་བུའི་སྐུ་དེ་རྣལ་འབྱོར་པ་བདག་ལ་གྲུབ་པར་མཛོད་ཅིག་པའོ། །སྤངས་རྟོགས་ཕུན་སུམ་ཚོགས་པའི་སངས་རྒྱས་ཀུན་གྱིས་རྟོགས་པའི་ཡེ་ཤེས་སྐུ་ལྔ་དབྱེར་མེད་པའི་ངང་ཉིད་རྡོ་རྗེ་ཆོས་ཀྱིས་དབྱིངས་ལས། ཐུགས་ཡེ་ཤེས་རྟོགས་པ་འབར་བ་དང་། ཐུགས་རྗེ་ཆེན་པོའི་ཕྲིན་ལས་འབར་བ་དང་། ཁྲག་འཐུང་ཆེན་པོའི་སྐུ་མཚན་དང་དཔེ་བྱད་ཀྱིས་འབར་བའི་ཁྲོ་བོ་ནི་འབྲུ་མཐུན་ལ། མི་བཟད་པ་ཅེས་པ་གདུལ་བྱ་འདུལ་བའི་དབང་དུ་འཇིག་རྟེན་པ་དང་མཐུན་པར་ཁྲོ་བོ་རྔམ་རྔམ་ལྟར་འཆར་བའོ། །ཡང་ན་མི་བཟད་པ་སྟེ། སྐུ་གསུང་ཐུགས་ཡོན་ཏན་ཕྲིན་ལས་གདུལ་བྱ་ཅི་ཙམ་དུ་ཡོད་པ་དེ་ཙམ་དུ་སྣང་བའོ། །དེ་ལྟ་བུའི་སྐུའི་དབྱིག་གམ་ངོ་བ་ཉིད་དུ་བདག་རྣལ་འབྱོར་བ་གྱུར་ཅིག་པའམ་བསྐྱེད་ཅིག་པའོ། །སངས་རྒྱས་ཀུན་གྱི་ཡེ་ཤེས་གསུང་གིས་ངང་ཉིད་རྡོ་རྗེ་ཆོས་ཀྱི་དབྱིངས་ལས། འབར་བའི་ཁྲོ་བོ་མི་བཟད་པ། གསུང་གིས་དབྱིག་གམ་ངོ་བོ་ཉིད་དུ་བདག་རྣལ་འབྱོར་པ་གྱུར་ཅིག་པའམ་བསྐྱེད་ཅིག་པའོ། །སངས་རྒྱས་ཀུན་གྱིས་ཡེ་ཤེས་ཐུགས། བདག་ཉིད་རྡོ་རྗེ་ཆོས་དབྱིངས་ལས། འབར་བའི་ཁྲོ་བོ་མི་བཟད་པ། ཐུགས་ཀྱི་དབྱིག་གམ་ངོ་བོ་ཉིད་དུ་བདག་རྣལ་འབྱོར་པ་གྱུར་ཅིག་པའམ། བསྐྱེད་ཅིག་པའོ། །དེ་ལྟར་གྱུར་ནས། གདུལ་བྱ་འདུལ་བའི་ཐབས་ཀྱི་མཛད་སྤྱོད་སྣ་ཚོགས་པས་འགྲོ་བ་འདུལ་བའི་དོན་དུ། དེའི་རྒྱུ་བྱམས་པ་དང་སྙིང་རྗེའམ། ཐུགས་རྗེ་གང་ལ་གང་འདུལ་དེ་ལ་དེར་སྟོན་པའི་སངས་རྒྱས་ཀྱིས་ཆེ་བའི་ཡོན་ཏན་ཐམས་ཅད་བདག་རྣལ་འབྱོར་པ་ལ་རྫོགས་པར་མཛད་ནས། རང་རིག་ལྷུན་གྲུབ་ཀྱིས་དབང་དང་། ཁམས་གསུམ་དབང་དུ་སྡུད་པའི་དབང་དང་། གདུག་པ་ཟ་བྱེད་ཀྱིས་དབང་དང་བྱིན་རླབས་ཐམས་ཅད་བདག་ལ་སྩོལ་ཅིག་པའོ། །ཐབས༴ བྱམས་དང་སྙིང་རྗེ༴ སངས་རྒྱས་ཀྱི་ཕྲིན་ལས་ཞི་རྒྱས་དབང་དྲག་ལྷུན་གྲུབ་རྣམས་རྫོགས་པར་མཛད་ནས། དབང་དང་བྱིན་རླབས་བདག་ལ་སྩོལ་ཅིག་པའོ། །དེ་ལྟར་དུ་གསོལ་བ་བཏབ་པ་སྟེ། དེ་ཡང་རྡོ་རྗེ་གཞོན་ནུའི་རིག་འཛིན་རྣམས་ཅེས་པའི་ཤྭ་ལོ་ཀ་དང་པོ་སྤྱིར་བསྟན་པ་ཡིན་ལ། འོག་མ་ལྔ་ནི་བྱེ་བྲག་ཏུ་གསོལ་བ་བཏབ་པ་ཡིན་ཏེ། དེ་ལྟར་དུ་གསོལ་བ་བཏབ་པའི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་དངོས་གྲུབ་ཐོབ་པར་བསམ་པ་ནི། མདུན་གྱི་ལྷ་དེ་དག་གིས་ཐུགས་ཀ་ནས་ༀ་དཀར་པོ་བྱུང་ནས་བདག་གིས་སྤྱི་བོར་ཐིམ་པས། སྐུའི་དབང་ཐོབ་པར་བསམ། ད་ལྟ་ནས་ལུས་ཀྱི་གཡོ་འགུལ་ཅི་བྱས་ཀྱང་འགྲོ་བ་སྒྲོལ་བའི་ནུས་པ་དང་ལྡན་པར་བསམ། སངས་རྒྱས་པའི་དུས་སུ་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུའི་དབང་ཐོབ་པར་བསམ། གསུང་གིས་དབྱིག་ཅེས་པས། ཨཱཿདམར་པོ་བདག་གིས་མགྲིན་པར་ཐིམ་པས། གསུང་གིས་དབང་ཐོབ་པར་བསམ། ད་ལྟར་གྱིས་ངག་བཟླས་བརྗོད་ཅི་བྱས་ཀྱང་། འགྲོ་བ་སྒྲོལ་བའི་ནུས་པ་དང་ལྡན་པར་བསམ། སངས་རྒྱས་པའི་དུས་སུ་གསུང་དབྱངས་ཡན་ལག་སུམ་བརྒྱ་དྲུག་ཅུ་ལ་དབང་ཐོབ་པར་བསམ། ཐུགས་ཀྱི་དབྱིག་ཅེས་པས། ཧཱུྃ་མཐིང་ནག་བདག་གིས་ཐུགས་ཀར་ཐིམ། ཐུགས་ཀྱི་དབང་ཐོབ་པར་བསམ། ད་ལྟ་ནས་ཏིང་ངེ་འཛིན་ཅི་ལྟར་ན་ཡང་འགྲོ་བ་སྒྲོལ་བའི་ནུས་པ་དང་ལྡན་པར་བསམ། སངས་རྒྱས་པའི་དུས་སུ་ཏིང་ངེ་འཛིན་སྒོ་འབུམ་ཕྲག་དུ་མ་ལ་དབང་ཐོབ་པར་བསམ། ཐབས་ཀྱི་སྤྱོད་པས། ཅེས་སྭཱ་སེར་པོ་བྱུང་བས་བདག་གིས་ལྟེ་བར་ཐིམ་ཡོན་ཏན་གྱི་དབང་ཐོབ་པར་བསམ། དེ་ལྟར་ནས་ཚེ་རིང་ནད་མེད་བཀྲ་ཤིས་ལོངས་སྤྱོད་འཕེལ་བ་ལ་སོགས་པའོ། །བྷུདྡྷའི་དུས་ན་བདེ་བར་གཤེགས་པའི་ཡོན་ཏན་བརྒྱ་བཞི་བཅུ་ལ་མངའ་བརྙེས་པའོ། །ཡང་ལན་གཅིག་བརྗོད་པས། ཧཱ་ལྗང་ཀུ་བྱུང་བས་བདག་གིས་གསང་གནས་སུ་ཐིམ་ཕྲིན་ལས་ཀྱི་དབང་ཐོབ་པར་བསམ། ད་ལྟ་ནས་ཕྲིན་ལས་རྣམ་བཞི་ལྷུན་གྱི་གྲུབ་པའོ། །སངས་རྒྱས་པའི་དུས་སུ་བདེ་བར་གཤེགས་པའི་ཐུགས་རྗེའི་ཕྲིན་ལས་ཐམས་ཅད་ལ་མངའ་བརྙེས་པར་བསམ། དེ་ནས་རྡོ་རྗེ་གཞོན་ནུའི་ལྷ་ཚོགས་དེ་རྣམས་བདག་ལ་བསྟིམ་མོ། །ཡང་ན་རྡོ་རྗེ་གཞོན་ནུའི་རིག་འཛིན་རྣམས། །ཅེས་པ་བཞི་ནི། ཡར་གསོལ་བ་བཏབ་པ་ཡིན་ལ། འོག་མ་ལྔ་ནི་དེའི་ལན་དུ་གསུང་པར་བསམ་ལ་དངོས་གྲུབ་བླང་། ཅེས་བླ་མ་གོང་མ་རྣམས་ཀྱི་གསུངས་སོ། །སྤྱི་དོན་བརྒྱད་པ་མཆོད་པ་འབུལ་བ་ནི། རྣམ་ལྔ་ཡིད་ཀྱི་ལྷ་མོ་རྣམས་ཀྱིས། ཡོན་ཆབ་ནི་ལྷ་ཚོགས་རྣམས་ཀྱི་ཞལ་དང་ཞབས་བསིལ། མེ་ཏོག་སྐུ་ལ་འཐོར། བདུག་སྤོས་ཤངས་ལ། མར་མེ་སྤྱན་ལ། དྲི་ཆབ་ལུས་ལ་བྱུག་གོ། །ཞལ་ཟས་ཞལ་དུ། རོལ་མོ་སྙན་དུའོ། །དེ་ནས་རཀྟ་ནི། སྔགས་ཀྱིས་རཀྟ་གསལ་གདབ་ལ། ཧཱུྃ། དམ་ཚིག་ཆེན་པོའི་དུས་ལ་བབ། ཅེས་པ་ལ་སོགས་པ་ནི། གོང་དང་འབྲུ་མཐུན་ལ། འདོད་ཆགས་མ་སྤངས་གནས་སུ་དག་པར་བྱ་བའི་ཕྱིར་དུ། རཀྟ་དམར་གྱིས་མཆོད་པ་བཞེས་སུ་གསོལ། ཅེས་པའོ། །མཐུ་རྩལ་ཕྱུང་༴ རཀྟ༴ ལྷ་ཚོགས་རྣམས་རང་རང་གིས་སྔགས་ཀྱིས་མཐར་ཁཱ་ཧི་བཏགས་ལ། ལྷ་མོ་ཐོད་ཞལ་ཐོགས་པ་རྣམས་ཀྱི་བཅུས་ནས་མཆོད་པར་བསམ་མོ། །དེ་ནས་གཏོར་མ་ནི། སྔགས་ཀྱིས་གསལ་གདབ་ལ། ཧཱུྃ། དམ་ཚིག་ཆེན་པོའི་དུས་ལ་བབ། གཏི་མུག་མ་སྤངས་གནས་སུ་དག་པར་བྱ་བའི་ཕྱིར་དུ། བྷ་ལིང་རྒྱན་གྱི་གཏོར་མ་བཞེས་སུ་གསོལ། །ཅེས་པའོ། །མཐུ་རྩལ༴ བྷ་ལིང་༴ ལྷ་ཚོགས་རྣམས་ཀྱི་རང་རང་གིས་སྔགས་ཀྱིས་མཐར་ཁཱ་ཧི་བཏགས་ལ། སྟེང་འདོད་ཡོན་གྱིས་ལྷ་མོ། བར་བདུད་རྩིའི་རྒྱ་མཚོ། མཆོད་པའི་ལྷ་མོ་རྣམས་ཀྱི་རིན་པོ་ཆེའི་སྐྱོག་བསྣམས་ནས། ལྷ་ཚོགས་རྣམས་ལ་དྲང་བར་བསམ། འོག་དུག་གསུམ་ཤ་ཁྲག་རུས་པ་ནི། ཁྱད་པར་དུ་ཁྲོ་བོའི་ལྷ་ཚོགས་དང་ཆོས་སྐྱོང་རྣམས་ལ་མཆོད་པར་བསམ། དེ་ནས་སྨན་གྱི་མཆོད་པ་ནི། སྔགས་ཀྱི་གསལ་གདབ་ལ། ཆེ་ཡོན་བརྗོད་དེ། ཧོ་རང་བྱུང་གདོད་ནས་དག་པ་ཡི། ཅེས་སོགས་གོ་སླ། འབུལ་བའི་ཚིག་ནི། དམ་ཚིག་ཆེན་པོའི་དུས་ལ་བབ། བཅོམ་ལྡན་དཔལ་ཆེན་རྡོ་རྗེ་གཞོན་ནུ་ཡབ་ཡུམ་ལ། ཞེ་སྡང་མ་སྤངས་གནས་སུ་དག་པར་བྱ་བའི་ཕྱིར་དུ། རྣམ་དག༴ ཐུགས་རྗེས༴ ༀ་མགོ་འདྲེན་ན་མ་ཕྱག་འཚལ། སརྦ་ཐམས་ཅད། ཏ་ཐཱ་ག་ཏ་དེ་བཞིན་གཤེགས་པ། མ་ཧཱ་ཆེན་པོ། ཨརྒྷཾ་མཆོད་ཡོན་པྲ་ཏི་ཛ་ཧོ་སོ་སོར་མཉེས་པ་སྟེ། དོན་དུ་ན་དེ་བཞིན་གཤེགས་པ་ཐམས་ཅད་མཆོད་ཡོན་ཆེན་པོ་བདུད་རྩི་སྨན་གྱི་སོ་སོར་མཉེས་པར་མཛོད་ཅིག་པའོ། །དེའི་དུས་སུ་ལྷ་མོ་ཉི་ཟླའི་སྐྱོག་ཐོགས་པ་དཔག་ཏུ་མེད་པ་བྱུང་ནས་མཆོད་པར་བསམ། དེ་ནས་ཡི་དམ་སྤྱི་ལ་ཁཱ་ཧི་བཏག་གོ། །སྤྱི་དོན་དགུ་པ་བསྟོད་པ་བྱ་བ་ནི། འཁོར་རྣམས་ཀྱི་གཙོ་བོ་ལ་བསྟོད་པར་བསམ་ལ། ཧཱུྃ། གཏུམ་ཆེན་ཅེས་པས། སྐུ་ལ་བསྟོད་པ་དང་། གསུང་ལ་བསྟོད་པ་དང་། ཐུགས་ལ་བསྟོད་པ་དང་། ཡོན་ཏན་ལ་བསྟོད་པ་དང་། ཕྲིན་ལས་ལ་བསྟོད་པ་དང་། ཁྲོ་བོ་སྤྱི་ལ་བསྟོད་པའམ། དབང་ཆེན་གྱིས་དཀྱིལ་འཁོར་ལ་བསྟོད་པ་དང་དྲུག་གོ། །འདིའི་དོན་ཞིབ་བར་གསང་སྙིང་ལེའུ་ཉེར་གཅིག་པའི་ནང་དུ་ཞིབ་པར་ཡོད་པས་དེར་གཟིགས་མཛོད། དེ་ནས་བསྙེན་པའི་གོང་ལ་ཕྲེང་བ་བྱིན་རླབས་བྱ་སྟེ། བྱིན་རླབས་དང་། ཞི་རྒྱས་དབང་དྲག་བཞིའི་ཕྲེང་བའི་ཁ་དོག་དང་། རྣམ་གྲངས་དང་། འདྲེན་པའི་ཐབས་རྣམས་གཞན་དུ་ཤེས་པར་བྱའོ། །བཅུ་པ་བསྙེན་པ་བྱ་བ་ལ་བཞི་སྟེ། ཀཱི་ལ་ཡ་རྒྱུད་ཀྱིས་བསྙེན་པ་དང་གཅིག །ལུང་གི་བསྙེན་པ་དང་གཉིས། མན་ངག་གི་བསྙེན་པ་དང་གསུམ། ངན་སྔགས་ཀྱི་བསྙེན་པ་དང་བཞིའོ། །དེ་ལ་རྒྱུད་ཀྱི་བསྙེན་པ་ནི། བདག་རྡོ་རྗེ་གཞོན་ནུའི་ཐུགས་ཀ་ནས་ཉི་མའི་དཀྱིལ་འཁོར་གྱིས་སྟེང་དུ་ཡེ་ཤེས་སེམས་དཔའ་རང་འདྲ་བ་བཞུགས་པའོ། །དེའི་ཐུགས་ཀར་ཉི་མའི་སྟེང་དུ་རྡོ་རྗེ་ནག་པོ་རྩེ་དགུ་པ་ཡར་བཞེངས་པའོ། །དེའི་ལྟེ་བ་ཁོང་སེང་སྟོངས་པར་ཉི་མའི་སྟེང་དུ་ཧཱུྃ་མཐིང་ནག་ཡར་བཞེངས་པ། དེའི་མཐའ་བསྐོར་དུ། ༀ་བཛྲ་ཀཱི་ལི་ཀཱ་ལ་ཡ་ཧཱུྃ་ཕཊ྄་ཅེས་པས། ཡི་གེ་མཐིང་ནག་ཡར་བཞེངས་པ་གཡས་སུ་འཁོར་བའོ། །ཁྲོ་བོ་རྣམས་ཀྱི་ཐུགས་ཀ་ན་ཡང་ཉི་མའི་སྟེང་དུ། རྡོ་རྗེ་ནག་པོ་ཁོང་སྟོངས་རྩེ་ལྔ་རེ་རེ་ཡར་བཞེངས་པ། དེའི་ལྟེ་བའི་ནང་དུ་ཉི་མའི་སྟེང་དུ་ཧཱུྃ་མཐིང་ནག་རེ་རེ་ལ། དེ་ལ་ཁྲོ་བོ་རང་རང་གིས་སྔགས་ཀྱི་བསྐོར་བའོ། །དམ་ཅན་བཅུ་གཉིས་ཀྱི་བསྭེ་མོ་བཞིའི་སྤྱི་བོར། གླད་པ་དུང་ཁང་གིས་ནང་དུ་སའི་དཀྱིལ་འཁོར་གྲུ་བཞི་སེར་པོ་རེ་རེའི་སྟེང་དུ་ༀ་དཀར་པོ་འམ། སེར་པོ་རེ་རེ་བསམ། དེ་ལ་བདུད་ཀྱིས་བུ་མོའི་སྤྱི་བོར་མ་ཐ་མ་ཐ་བཛྲ་ཅེས་པས་འཁོར་བའོ། །ལྷོ་སྒོར་གཟའི་བུ་མོའི་སྤྱིར་བོར་ཛྭ་ལ་ཛྭ་ལ་བཛྲ་ཅེས་པས་འཁོར་བའོ། །ནུབ་སྒོར་བཙན་གྱིས་བུ་མོའི་སྤྱི་བོར་སུ་རུ་སུ་རུ་བཛྲ་ཅེས་པས་འཁོར་བའོ། །བྱང་སྒོར་ཀླུའི་བུ་མོའི་སྤྱི་བོར་མུ་རུ་མུ་རུ་བཛྲ་ཅེས་འཁོར་བའོ། །དེ་ནི་བསྭེ་མོ་བཞིའི་ཡི་གེ་དང་། སྲོག་སྙིང་བསྒོམ་པའི་རིམ་པའོ། །ཤྭ་ན་བཞིའི་མགྲིན་པར་རླུང་གི་དལ་དུད་ཀ་ཟླ་གམ་དུ་འདུག་པའི་དཀྱིལ་དུ་ཨཱཿདམར་པོ་རེ་རེ་བསྒོམ། ལྕགས་ཀྱི་སྤྱང་མོ་མགོ་དགུ་མའི་མགྲིན་པར་ཧ་ན་ཧ་ན་བཛྲ་ཅེས་པས་འཁོར་བའོ། །ལྕགས་ཀྱི་ཁྱི་མོ་རྐང་གསུམ་ལ་ཞོན་པའི་བུད་མེད་ནག་མོའི་མགྲིན་པར་ད་ཧ་ད་ཧ་བཛྲ་ཅེས་པས་འཁོར་བའོ། །ཟངས་ཀྱི་འཕར་བ་ལྕེ་བརྒྱད་ཀྱིས་མགྲིན་པར་པ་ཙ་པ་ཙ་བཛྲ་ཅེས། ཟངས་ཀྱི་ཝ་མོ་རྐང་གསུམ་ལ་ཞོན་པའི་བུད་མེད་ཀྱིས་མགྲིན་པར་མ་ཐ་མ་ཐ་བཛྲ་ཅེས། དེ་ནི་ཤྭ་ན་བཞིའི་སྲོག་སྙིང་དགོད་པའོ། །རེ་མ་ཏི་བཞིའི་ཐུགས་ཀར་མེའི་དལ་འཁོར་ལོ་དམར་ནག་གྲུ་གསུམ་པ་རེ་རེའི་སྟེང་དུ་ཧཱུྃ་མཐིང་ནག་རེ་རེ་བསྒོམ་མོ། །དེའི་མཐའ་སྐོར་དུ། ཧཱུྃ་མ་མ་པ་ཤཾ་ཀུ་རུ་མ་སྟཾ་ཛྙཱ་ན་ཀ་ར་ཡེ་ནན་དྷ་ཏི་མ་མ་ཀརྨ་ཤྲི་ཀྲཾ་ཀ་ར་ཡ་ཧཱུྃ་ཕཊ྄་ཅེས་པས་འཁོར་བའོ། །དེ་ནས་དམིགས་པ་གསལ་གདབ། ཕྲེང་བ་ལག་ཏུ་བླངས། ངག་མཚམས་བཅད་ནས་ཐུགས་ཀའི་ཡེ་ཤེས་སེམས་དཔའ་དང་། རྡོ་རྗེའི་ལྟེ་བའི་ཧཱུྃ་དང་། ཡི་གེ་གཡས་སུ་འཁོར་བའི་གུ་གུ་དང་། འགྲེང་བུ། ཞབས་ཀྱུ་ལ་མ་ཡེངས་པར་ཟུར་ཕྱིན་པར་བྱས་ལ་ཡིད་སེམས་གཏད། ༀ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ྄་ཅེས་བཟླས་པས། རང་གིས་ཐུགས་ཀ་ནས་ཡི་གེའི་ཕྲེང་བ་ལ་ཡི་གེའི་ཕྲེང་བ་གཅིག་ཆད་ནས། མགྲིན་པ་ནས་ལྗགས་ཀྱིས་རྩེ་མོ་ནས་ཐོན། ཕྱོགས་བཅུའི་ནམ་མཁའ་ན་འཁྲིགས། ཕྱོགས་བཅུའི་བྷུདྡྷ་ཐམས་ཅད་ཀྱང་དཔལ་རྡོ་རྗེ་གཞོན་ནུའི་ཆ་ལུགས་སུ་བྱུང་ནས་ནམ་མཁའ་ལ་འཁྲིགས། རང་གིས་སྔགས་བཟླས་པ་ཙམ་གྱིས། ཕྱོགས་བཅུའི་སངས་རྒྱས་ཐམས་ཅད་ཀྱིས་ཀྱང་བདག་གིས་རམ་བུའི་ཚུལ་དུ་བཟླས་ཏེ། ཀཱི་ལ་ཡ་འབྲུ་དགུ་ལས་འཕེལ་ཏེ། ཀཱི་ལ་ཡའི་སྒྲ་འུ་རུ་རུ་སྒྲོགས་པར་བསམ། སྔགས་ཀྱིས་སྒྲ་ལས་འོད་ཟེར་བྱུང་བས། ཤར་སྨུག་ནག །ལྷོ་སེར་ནག །ནུབ་དམར་ནག །བྱང་ལྗང་ནག །དབུས་མཐིང་ནག་ཏུ་འཁྲིག་པས། བདག་དང་སངས་རྒྱས་ཐམས་ཅད་ཀྱིས་འོད་ཟེར་ཡིན་ཏེ། སེམས་ཅན་ཐམས་ཅད་ཀྱིས་ལུས་ངག་ཡིད་གསུམ་གྱིས་སྒྲིབ་པ་སྦྱངས་ཏེ། སླར་སེམས་ཅན་ཐམས་ཅད་རྡོ་རྗེ་གཞོན་ནུར་གྱུར་པར་བསམ། བཟླས་པ་ནམ་འཇོག་ཁར། འོད་ཟེར་དང་ཡིག་འབྲུ་རྣམས་བདག་ལ་བསྟིམ་པས། བདག་གིས་ལུས་ཐམས་ཅད་རྡོ་རྗེ་གཞོན་ནུའི་སྐུ་ཕྲ་མོ་ཐེམ་གང་ནེམ་གང་དཔག་ཏུ་མེད་པས། བྱེའུ་ཕྲུག་གིས་གཤོགས་པ་ལ་ཁྲན་ཆགས་པའི་ཚུལ་དུ་ལུས་གཏམ་པར་བསམ། སླར་འོད་ཟེར་ལྷག་པོ་རྣམས། ཕྱོགས་བཅུའི་བྷུདྡྷ་རྡོ་རྗེ་གཞོན་ནུའི་སྐུར་གྱུར་པ་རྣམས་ནི་བདག་གིས་ཐུགས་ཀར་བསྟིམ། སྟོང་ཚིག་གིས་མཆོད། སྨན་རཀ་གཏོར་གསུམ་བྱིན་གྱིས་བརླབས་ལ་འབུལ། དེ་ནི་ཀཱི་ལ་ཡ་འབྲུ་དགུའི་བསྙེན་པའོ། །ཀཱི་ལ་ལ་འབྲུ་བཅུ་བཞིའི་བསྙེན་པ་དང་། ཁྲོ་བོ་བཅུ་སྦྲེལ་མར་བྱ་སྟེ། ༀ་བཛྲ་ཀཱི་ལི་ཀཱི་ལ་ཡ་སརྦ་བྷིགྣན་བྃ་ཧཱུྃ་ཕཊ྄། ༀ་བཛྲ་ཀྲོ་དྷ་ཧཱུྃ་ཀ་ར་ཧཱུྃ་གརྫ་གརྫ་ཧཱུྃ་ཕཊ྄། ༀ་བཛྲ་ཀྲོ་དྷ་བི་ཛ་ཡ་ཧཱུྃ། ཧ་ན་ཧ་ན་ཧཱུྃ་ཕཊ྄། ༀ་བཛྲ་ཀྲོ་དྷ་ནི་ལ་དཎྜ་ཧཱུྃ། ད་ཧ་ད་ཧ་ཧཱུྃ་ཕཊ྄། ༀ་བཛྲ་ཀྲོ་དྷ་ཡ་མཱནྟ་ཀ་ཧཱུྃ། པ་ཙ་པ་ཙ་ཧཱུྃ་ཕཊ྄། ༀ་བཛྲ་ཀྲོ་དྷ་ཨཱརྱ་ཨ་ཙ་ལ་ཧཱུྃ། བྷནྡྷ་བནྡྷ་ཧཱུྃ་ཕཊ྄། ༀ་བཛྲ་ཀྲོ་དྷ་ཧྱ་གྲཱི་བ་ཧཱུྃ། ཧུ་ལུ་ཧུ་ལུ་ཧཱུྃ་ཕཊ྄། ༀ་བཛྲ་ཀྲོ་དྷ་ཨ་པ་རཱ་ཛི་ཏ་ཧཱུྃ། ཏིཥྛ་ཏིཥྛ་ཧཱུྃ་ཕཊ྄། ༀ་བཛྲ་ཀྲོ་དྷ་ཨ་མྲྀ་ཏ་ཀུནྜ་ལི་ཧཱུྃ། ཚྪིནྟཱ་ཚྪིནྟཱ་ཧཱུྃ་ཕཊ྄། ༀ་བཛྲ་ཏྲཻ་ལོ་ཀྱ་བི་ཛ་ཡ་ཧཱུྃ། བིནྡྷ་བིནྡྷ་ཧཱུྃ་ཕཊ྄། ༀ་བཛྲ་ཀྲོ་དྷ་མ་ཧཱ་བ་ལ་ཧཱུྃ། སྥོ་ཊ་སྥོ་ཊ་ཧཱུྃ་ཕཊ྄། ཀཱི་ལ་ཡ་འབྲུ་བཅུ་བཞི་བས་མགོ་དྲངས། ཁྲོ་བཅུའི་སྔགས་དང་བཅས་པ་རང་གིས་དག་ཏུ་བཟླས་པས། རང་གི་ཐུགས་ཀ་ནས་ཀཱི་ལ་ཡ་གཡས་སུ་འཁོར་བ་ལས། འོད་ཟེར་མཐིང་ནག་འཕྲོས་ཏེ། གཞལ་ཡས་ཁང་གིས་ནམ་མཁའ་ལ་འཁྲིགས་ཏེ། ཕྱོགས་བཅུའི་ཁྲོ་བོ་ཁྲ་ཐབས་རྣམས་ཀྱང་རང་སྔགས་བརྗོད་པར་བསམ་ཞིང་། རང་གིས་ཐུགས་ཀར་ཡང་རང་སྔགས་འཁོར་ཏེ། འོད་ཟེར་མཐིང་ནག་འཕྲོས་ཏེ། བདག་རྡོ་རྗེ་གཞོན་ནུའི་འོད་ཟེར་དང་གཉིས་པོ་དེས། ཕྱོགས་བཅུའི་སངས་རྒྱས་ཐམས་ཅད་ཀྱིས་སྐུ་གསུང་ཐུགས་ཀྱིས་རྒྱུད་བསྐུལ། སེམས་ཅན་ཐམས་ཅད་ཀྱིས་ལུས་ངག་ཡིད་གསུམ་གྱི་སྒྲིབ་པ་སྦྱངས་ཏེ། སླར་འོད་ཟེར་ཐམས་ཅད་ལ་ཁྲོ་བོ་འཆོལ་བའི་ཚོགས་ཀྱིས། ཆོས་ཀྱི་དབྱིངས་ཀྱི་མཐའ་ཀླས་པའི་བྷུདྡྷའི་ཞིང་ཁམས་ལ་ཐུགས་ཀྱིས་བར་དུ་ཁྲོ་བོ་འཆོལ་བའི་ཚོགས་ཀྱིས་བཀང་ནས། བདུད་དང་མུ་སྟེགས་མ་ཧཱ་དེ་བཱ་དང་། ཚངས་པ་ཁྱབ་འཇུག་རྣམས་ཚར་བཅད་ནས། སངས་རྒྱས་ཐམས་ཅད་ནི་རེ་ཞིག་དམ་པའི་ཚུལ་དུ་དགོངས། མ་མོ་དང་མཁའ་འགྲོ་ཐམས་ཅད་ནི་དཔའ་བསྐྱེད། བྱང་ཆུབ་སེམས་དཔའ་རྣམས་ནི་ཐུགས་མཉམ་པ་ཉིད་ལས་བཞེངས། ཉན་ཐོས་རང་རྒྱལ་རྣམས་ནི་འགོག་པའི་མཐའ་ལས་བསླངས། དགྲ་བགེགས་གདུག་པ་ཅན་རྣམས་ཚར་བཅད། ཁམས་གསུམ་གྱིས་སེམས་ཅན་ཐམས་ཅད་ཀྱིས་ལོག་རྟོག་ཟིལ་གྱིས་མནན་སྟེ། ཁྲོ་བོ་རྣམས་ཀྱིས་སྔགས་ཀྱི་སྒྲ་ཡང་དཔེར་ན་བསྐལ་པའི་འབྲུག་སྟོང་ལྡིར་བའམ། རི་རབ་འབུམ་བསྙིལ་བའམ། གནམ་ལྕགས་ཐོག་གིས་སྒྲ་ལྟ་བུ་སྟོང་གསུམ་དབང་དུ་སྡུད་པའམ། སྲིད་གསུམ་ཟིལ་གྱིས་གནོན་པའི་ཚུལ་དུ་བཟླས་པ་བྱའོ། །ནམ་འཇོག་པའི་དུས་སུ་འོད་ཟེར་ཐམས་ཅད་བདག་གིས་ཐུགས་ཀར་བསྟིམ། སྟོང་ཚིག་གིས་མཆོད་པ་འབུལ། དེ་ནི་ཕྱོགས་བཅུའི་ཁྲོ་བ་དང་ཁྲ་ཐབས་ཀྱིས་བསྙེན་པའོ། །དམ་ཅན་གྱིས་བསྙེན་པ་ནི། ༀ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ྄། མ་ཐ་མ་ཐ་བཛྲ། ཛྭ་ལ་ཛྭ་ལ་བཛྲ། སུ་རུ་སུ་རུ་བཛྲ། མུ་རུ་མུ་རུ་བཛྲ་ཅེས་བརྗོད་པས་རང་གིས་ཐུགས་ཀ་ནས་འོད་ཟེར་འཕྲོས་བས་བསྭེ་མོ་བཞི་ལ་ཕོག །བསྭེ་མོ་བཞིའི་སྔགས་གཡས་སུ་འཁོར་བ་དང་། ས་བོན་ལས་འོད་ཟེར་འཕྲོས་པས་བསྭེ་མོ་བཞིའི་རང་གནས་བཞི་སྟེ། བལ་ཡུལ་མཐིལ་དང་། ཚ་བ་རོང་དང་། མོན་ཡུལ་བསྭེ་དང་། སྙི་ནམ་འགྲམ་དང་བཞི་ནས། བསྭེ་མོ་ཉིས་བརྒྱ་ལྔ་བཅུ། རང་གིས་ཐུགས་དམ་གྱིས་རྒྱུད་བསྐུལ་ནས། གྲོང་རྒྱུག་གི་བསྭེ་མོ་ཡན་ཆད་ཀྱིས་མཁའ་འགྲོ་མ་གདུག་པ་ཅན་ཐམས་ཅད་ཀྱིས་སྲོག་སྙིང་དེ་བསྭེ་མོ་བཞི་ལ་ཕུལ། བསྭེ་མོ་བཞི་ཡང་སྔར་བས་བཀྲག་གཟི་མདངས་དང་ལྡན། མཐུ་དང་རྫུ་འཕྲུལ་དང་ལྡན་པ། སླར་སྲོག་གིས་སྙིང་པོ་ༀ་བདག་ལ་མདངས་སོལ་དུ་ཕུལ་ནས། བདག་གིས་ཐུགས་ཀའི་ཧཱུྃ་གིས་ཞབས་ཀྱུའི་བར་དུ་ཐིམ་པར་བསམ། ཚར་ནས་སྟོང་ཚིག་གིས་མཆོད་པ་འབུལ། ཤྭ་ན་བཞིའི་བསྙེན་པ་ནི། ༀ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ྄། ཧ་ན་ཧ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། མ་ཐ་མ་ཐ་བཛྲ། ཤྭ་ན་བཞིའི་སྔགས་བརྗོད་པ་ཙམ་གྱིས། རང་གི་ཐུགས་ཀ་ནས་འོད་ཟེར་འཕྲོས་ཏེ། ཤྭ་ན་བཞིའི་མགྲིན་པར་ཕོག །སྔགས་གཡས་སུ་འཁོར་བ་དང་། ས་བོན་ལ་འོད་ཟེར་འཕྲོས་པས། ཤྭ་ན་སུམ་བརྒྱ་དྲུག་ཅུ་དང་། ཡེ་ཤེས་དང་འཇིག་རྟེན་པའི་ཆོས་སྐྱོང་ཐམས་ཅད་ཀྱིས་ཐུགས་ཀར་ཕོག་ཐུགས་དམ་གྱིས་རྒྱུད་བསྐུལ། སྲོག་གི་སྙིང་པོ་ཤྭ་ན་བཞིའི་ཐུགས་ཀར་བསྟིམ། ཤྭ་ན་བཞི་ཡང་སྔར་བས་བཀྲག་གཟི་མདངས་དང་མཐུ་ནུས་པ་དང་ལྡན་པར་བསམ། འཇོག་ཁར་ཤྭ་ན་བཞིའི་སྲོག་གིས་སྙིང་པོ་ཨ་བདག་ལ་མདང་སོལ་དུ་ཕུལ་བར་བསམ་ལ་བདག་གི་ཐུགས་ཀར་བསྟིམ། སྟོང་ཚིག་གིས་མཆོད་པ་འབུལ། རེ་མ་ཏི་བཞིའི་བསྙེན་པ་ནི། ༀ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ྄། མ་མ་བ་ཤཾ་ཀུ་རུ་མ་སྟཾ་ཛྙཱ་ན་ཀ་ར་ཡེ་ནན་དྷ་ཏི་མ་མ་ཀརྨ་ཤྲི་ཀྲཾ་ཀ་ར་ཡ་ཧཱུྃ་ཕཊ྄་ཅེས་བཟླས་པས། རང་གིས་ཐུགས་ཀ་ནས་འོད་ཟེར་འཕྲོས་ཏེ། རེ་མ་ཏི་བཞིའི་སྲོག་གི་སྙིང་པོ་ས་བོན་དང་བཅས་ལ་ཕོག །དེ་ལ་འོད་ཟེར་འཕྲོས་པས། རེ་ཏི་སྟོང་རྩ་བརྒྱད། མ་མོ་དང་མཁའ་འགྲོ་མ་དུས་བཞིའི་རྒྱལ་མོ་སྲིད་པ་གསུམ་གྱི་མ་ཚོགས་དང་བཅས་པའི་ཐུགས་ཀར་ཕོག །ཐུགས་དམ་གྱིས་རྒྱུད་བསྐུལ་ནས། རེ་མ་ཏིའི་ཐུགས་ཀར་བསྟིམ། སྔར་བས་ཀྱང་བཀྲག་གཟི་མདངས་དང་ལྡན་པར་བསམ་ནས། རེ་མ་ཏི་བཞིས་རང་རང་གིས་སྲོག་གི་སྙིང་པོ་ཧཱུྃ་གིས་ཚུལ་དུ་བདག་ལ་ཕུལ་ནས། བདག་གི་ཐུགས་ཀར་ཧཱུྃ་གིས་ཞབས་ཀྱུའི་བར་དུ་བསྟིམས། ཚར་ནས་སྟོང་ཚིག་གི་མཆོད་པ་འབུལ། དྲེགས་བྱེད་ཉི་ཤུ་རྩ་གཅིག་ལ་ཐུགས་ཀར་སྲོག་སྙིང་འབུལ་བ་མེད་དེ། མ་ར་ས་ན་ཡེ་ཧཱུྃ་ཕཊ྄། བྲ་མ་ཏ་ན་ཡེ་ཧཱུྃ་ཕཊ྄། ཨ་བི་ཏ་ན་ཡེ་ཧཱུྃ་ཕཊ། ཛ་ཡེ་བི་ཛ་ཡེ་ཧཱུྃ་ཕཊ྄། ཨ་པ་ར་ཛི་ཏ་ཧཱུྃ་ཕཊ྄། དམ་ཅན་གྱིས་རྟིང་པར་བརྒྱ་རེ་ཙམ་བཟླས་པས། དྲེགས་བྱེད་ཉི་ཤུ་རྩ་གཅིག་གིས་བདག་གིས་བསྒོ་བའི་ལས་བྱེད་ཅིང་བཅོལ་པའི་ཕྲིན་ལས་བསྒྲུབ་པར་བསམ་མོ། །ཀཱི་ལ་ཡ་རྒྱུད་མ་ཧཱ་ཡོ་ག་ལྟར་བསྙེན་པའོ། །ཀཱི་ལ་ཡ་ལུང་གིས་བསྙེན་པ་ནི། སེམས་མ་བཅོས་པ་ལ་འཇོག །སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་རིག་པའི་ངོ་བོ། རང་བྱུང་གིས་ཡི་ཤེས་གསལ་ལ་སྒྲིབ་པ་མེད་པ། སྐྱེ་འགག་མེད་པའི་དབྱིངས་ངང་གིས་མ་བཅོས་པ། སྔ་ཕྱི་ཐོག་མཐའ་དང་བྲལ་བ། ངང་གིས་འོད་གསལ་ལ་སྒྲིབ་པ་མེད་པ། རྒྱ་མཚོ་ཆེན་པོའི་གཏིང་མི་གཡོ་བ་ལྟ་བུ། དེའི་ངང་ལ་རྡོ་རྗེ་གཞོན་ནུའི་ལྷ་ཚོགས་ཐམས་ཅད་རང་རིག་རང་སྣང་སྟེ། གསལ་ལ་གོ་མི་འགགས་པ་རྒྱ་མཚོའི་ནང་གིས་གཟུགས་བརྙན་ལྟ་བུའོ། །དེ་ནས་རྡོ་རྗེ་གཞོན་ནུའི་སྙིང་པོས་མགོ་དྲངས་སྟེ། ཁྲོ་བོ་ཁྲ་ཐབས་དང་བཅས་པ། དམ་ཅན་དང་བཅས་པའི་སྔགས་བཟླས་པས། དལ་གྱིས་ལྷ་ཚོགས་རྣམས་ཀྱི་ཀྱང་རང་གིས་རམ་བུའི་ཚུལ་དུ་རང་རང་གིས་སྔགས་རང་རང་གིས་འདོན་པར་བསམ། མེ་སྒྲ། ཆུ་སྒྲ། རླུང་སྒྲ་ཐམས་ཅད་ཀྱང་རྣམས་ཀྱིས་སྒྲར་བསམ་ཏེ། སེམས་མ་བཅོས་པའི་ངང་ལ། དཀྱིལ་འཁོར་གྱི་ལྷ་ཚོགས་ཐམས་ཅད་ཆུ་ནང་གིས་གཟུགས་བརྙན་ལྟར་རིག་པ་རང་གསལ་རང་སྣང་། རང་ལ་རང་གྲོལ། སྒྲ་རང་ལ་རང་གྲགས། སྔགས་ཀྱིས་འོད་ཟེར་ཡང་ཁ་དོག་སྣ་ལྔའི་ཚུལ་དུ་གཞལ་ཡས་ཁང་དུ་རང་སྣང་སྟེ། ཡི་གེའི་ཚོགས་དང་། རིགས་ལྔའི་འཁོར་ལོའི་ཚོགས་སུ་གྱུར་ནས་རང་གིས་ཐུགས་ཀར་བསྟིམ། དེ་ཡང་ཨ་ནུ་ཡོ་གའི་བློ་དང་ལྡན་པ་ཞིག་གིས་ལག་ལེན་ཡིན་སྟེ། གར་ཐོད་ཐོད་དུ་མ་ཡིན་ནོ། །སྤྱིར་ལུང་གིས་བཟླས་པ་འདི་ལ་སེམས་ཀྱིས་ངོ་བོ་སྟོང་སྟེ་མ་བཅོས་པར་འཇོག །སེམས་ཀྱིས་རང་བཞིན་འོད་གསལ་ཏེ། དལ་གྱིས་ལྷ་ཚོགས་སྟོང་པའི་ངང་ལ་མེ་ལོང་གིས་གཟུགས་བརྙན་ལྟར་བཀྲ་ལམ་གྱི་གསལ། མཚན་ཉིད་སྣང་སྟོང་སྟེ། ལྷ་ཚོགས་ཐམས་ཅད་ཀྱང་སྣང་བཞིན་དུ་སྟོང་། སྟོང་བཞིན་དུ་སྣང་། དེའི་ངང་ལ་སྔགས་ཐམས་ཅད་དུས་གཅིག་ཏུ་བཟླས་པས། སྟོང་ཉིད་ཀྱིས་ངང་དུ་སྒྲ་རང་གྲགས། གྲགས་ཙམ་ཉིད་ན་བྲག་ཆ་བཞིན་དུ་རང་བཞིན་མེད་པའི་ངང་ལས་ལྷ་དང་སྔགས་ཀྱིས་སྒྲ་རང་སྣང་། སྣང་དུས་སྟོང་ནས་ཀྱང་ཡིད་ལ་མི་བྱེད་པར་མ་བཅོས་པའི་ངང་ལ་རང་བཞག །དེ་ལ་མ་སྐྱེས་པ་སྟོང་པ་ནི་དབྱིངས། མ་འགགས་པ་སྒྲ་ཐམས་ཅད་སྔགས་ཀྱི་སྒྲར་གྲགས་པ་ནི་རིག་པའི་ཡེ་ཤེས་སོ། །གཉིས་སུ་མེད་པ་མ་འགགས་པར་མ་བཅོས་པ་རང་བཞག་པ་ནི་གཉིས་མེད་བདེ་བ་ཆེན་པོའོ། །ཚར་ནས་སྟོང་ཚིག་གིས་མཆོད་པ་རྣམ་ལྔ་འབུལ། ལུང་ཨཱ་ནུ་ཡོ་ག་རང་གཞུང་གིས་བསྙེན་པའོ། །མན་ངག་གིས་བསྙེན་པ་ནི། ཆོས་རྫོགས་པ་ཆེན་པོ་དང་ཚུལ་མཐུན་ཏེ། དབང་བཞིའི་དོན་ལ་ངོ་འཕྲོད་པའམ། ཆོས་རྫོགས་པ་ཆེན་པོའི་དོན་ཁོང་དུ་ཆུད་པ་ཞིག་གིས། ཆོས་ཐམས་ཅད་ཀྱིས་བརྗོད་བྱ། ཐེག་པ་ཐམས་ཅད་ཀྱིས་ཡང་རྩེ། མན་ངག་ཐམས་ཅད་ཀྱིས་སྙིང་ཁུ། བླ་མ་བརྒྱུད་པའི་ཉམས་སུ་མྱོང་བའི་དོན་གཅིག་ཏུ་དྲིལ་སྟེ། རང་རིག་པ་འདི་བྷུདྡྷ་ཐམས་ཅད་ཀྱིས་དེ་ཁོ་ན་ཉིད་ཡིན་པས། གཟའ་གཏད་མེད་པའི་ལྟ་བ་ཡང་འདི་ཁོ་ན་ཉིད་ཡིན། དམིགས་གཏད་མེད་པའི་བསྒོམ་པ་ཡང་འདི། བྱ་བཙལ་མེད་པའི་སྤྱོད་པ་ཡང་འདི། སྤང་ཐོབ་མེད་པའི་འབྲས་བུ་ཡང་འདི། ཡིད་ལ་མི་བྱེད་པ་དུས་གསུམ་རང་གསལ་ཆེན་པོ་ཡང་ཡིན། བརྒྱད་ཁྲི་བཞི་སྟོང་ཆོས་ཀྱི་བརྗོད་བྱ་ཡིན། རང་བྱུང་དང་དུ་རང་ལུགས་ཆེན་པོར་བཞག །དེ་བས་ན་ཇོ་མོ་མཁར་ཆེན་གཟའ་མཚོ་རྒྱལ་ལ། པདྨ་འབྱུང་གནས་ཀྱིས་འདི་ལྟར་གདམས་སོ། །ཨེ་མ་འདིའི་ངང་ཉིད་དུ། །བསྒོམ་རྒྱུ་རྡུལ་ཙམ་མ་མཆིས་སོ། །ཨེ་མ་འདིའི་ངང་ཉིད་དུ། །ལྟ་རྒྱུ་རྡུལ་ཙམ་མ་མཆིས་སོ། །ཨེ་མ་འདིའི་ངང་ཉིད་དུ། །བསྲུངས་རྒྱུ་རྡུལ་ཙམ་མ་མཆིས་སོ། །ཨེ་མ་འདིའི་ངང་ཉིད་དུ། །བྱ་རྒྱུ་རྡུལ་ཙམ་མ་མཆིས་སོ། །མ་བཅོས་སེམས་ཀྱིས་ཀློང་ཉིད་དུ། །མ་ཡེངས་དོན་གྱིས་གསེར་ཕུར་དེ། །འཛིན་པ་མེད་པའི་དབྱིངས་སུ་ཐོབ། །ཅེས་གསུངས་པ་ལྟར། མན་ངག་རྫོགས་པ་ཆེན་པོའི་ངང་ལ་མི་འདའ་བར་བྱའོ། །ཀཱི་ལ་ཡ་ངན་སྔགས་གིས་བསྙེན་པ་ནི། ༀ་བཛྲ་ཀཱི་ལ་ཀཱི་ལ་ཡ་སརྦ་བྷིགྣན་བྃ་ཧཱུྃ་ཕཊ྄། པ་ར་བྷིགྣན་ཧ་ས་ར་ཧ་ན་ཧ་ན་ཧཱུྃ་ཕཊ྄། ཤྲི་ཀྲཾ་ཨ་ན་ཡ་ཧཱུྃ་ཕཊ྄། ཨ་ཝེ་ཤ་ཡ་ཨ་ཝེ་ཤ་ཡ་ཧཱུྃ་ཕཊཱ་ཛྭ་ལ་པ་ཡ་ཛྭ་ལ་པ་ཡ་ཧཱུྃ་ཕཊ྄། ཏ་ཐཱ་ཡ་ཏ་ཐཱ་ཡ་ཧཱུྃ་ཕཊ྄། བྷནྡྷ་ཡ་བྷནྡྷ་ཡ་ཧཱུྃ་ཕཊ྄། མ་ར་ས་ན་པྲ་མརྔྷ་ན་ཡེ་ཧཱུྃ་ཕཊ྄། སརྦ་ཨ་ན་ཡ་ཧཱུྃ་ཕཊ྄། ཧཱུྃ་ཧཱུྃ་མ་མ་པ་ཤཾ་ཀུ་རུ་མ་སྟཾ་ཛྙཱ་ན་ཀ་ར་ཨེ་ནན་དྷ་ཏི་མ་མ་ཀརྨ་ཤྲི་ཀྲཾ་ཀ་ར་ཡ་ཧཱུྃ་ཕཊ྄། ༀ་ལཾ་ཧཱུྃ་ལཾ་སྟམྦྷ་ཡ་ནན། མོ་ཧཱ་གྷཱ་ཡ་བྷ་ག་ཝན་ཧྲཱིཥྚི་ནྲི་ཝེ་ཀྲྀ་བཛྲ་ཧཱུྃ་ཀཱ་ར་ཧཱུྃ་ཧཱུྃ་ཕཊ྄་ཕཊ྄། ༀ་བཛྲ་ཀཱི་ལི་ཀཱི་ལ་ཡ་ཛ་ཧཱུྃ་བྃ་ཧོ། སརྦ་བྷིགྣན་བཛྲ་ཀཱི་ལི་ཀཱི་ལ་ཡ་ཧཱུྃ་ཧཱུྃ་ཧཱུྃ་ཕཊ྄་ཕཊ྄་ཕཊ྄། བཛྲ་ཧཱུྃ་ཀ་ར་ཨཱ། བསྙེན་པའོ། །དེ་ལྟར་བཟླས་པས་སྲུང་མ་གསུམ་གྱི་སྲོག་གིས་གནད་ཐམས་ཅད་ངོ་བོ་ནི། སྐུ་ནི་བསྭེ་མོ་སྟེ། རྟེན་གྱིས་སྤྱི་བོ་ནས་དབྱིབས་ཟླུམ་པོ་ཁ་དོག་དཀར་པོ་སྲོག་གིས་སྙིང་པོ་འཁོར་བའོ། །ཤྭ་ན་གསུང་གིས་སྟེ། མགྲིན་པར་ཟླ་གམ་དམར་པོ་སྟེང་ཨ་དམར་པོ་ལ་སྲོག་གིས་སྙིང་པོས་བསྐོར་བའོ། །རི་མ་ཏི་ཐུགས་ཏེ། སྙིང་ཁ་ནས་གྲུ་གསུམ་ལམ་བྲིང་ནག་སྟེ། དེ་ལ་སྲོག་གིས་སྙིང་པོ་འཁོར་བའོ། །དེ་ལྟར་བསམ་པ་ནི། སྲུང་མའི་སྲོག་གིས་ངོ་བོ་དང་། སྙིང་པོ་སྟེ། སྲོག་གིས་ངོ་བོ་དང་། སྙིང་པོ་ཤིན་ཏུ་གསལ་བར་གྱུར་པར་བསམ་མོ། །དཔེར་ན་སྤྲ་བ་ལ་མེ་འབར་བ་ལ། རླུང་གིས་བཏབ་པས་ཤིན་ཏུ་གསལ་བ་དང་འདྲའོ། །དེ་ལ་སྲུང་མ་བྲེད་ནས་དཔལ་ཆེན་པོ་ལ་ཅི་བགྱིས་བཀའ་ཉན་ཟེར་བར་བསམ་མོ། །དེ་ནི་བཟླས་པའོ། །དེ་ལྟར་བསྙེན་པ་བྱས་པས་རྟགས་འབྱུང་སྟེ། གྲུབ་པའི་དྲོད་ཚད་ནི་རྣམ་པ་གསུམ་སྟེ། རབ་ལྷའི་ཞལ་མཐོང་། འབྲིང་ཉམས་ལྟས་སུ་འོང་། ཐ་མ་རྨི་ལམ་དུ་འོང་། དེ་ལ་དབྱེ་ན་རབ་འབྲིང་དགུ་སྟེ། རབ་ཀྱི་རབ་ཀྱིས་རྡོ་རྗེ་གཞོན་ནུ་ཡབ་ཡུམ་ཞལ་མཐོང་། རབ་ཀྱི་འབྲིང་གིས་རྡོ་རྗེ་གཞོན་ནུ་ཡབ་ཡུམ་ཉམས་ལྟས་སུ་འོང་། རབ་ཀྱི་ཐ་མས་རྡོ་རྗེ་གཞོན་ནུ་ཡབ་ཡུམ་རྨི་ལྟས་སུ་འོང་བའོ། །འབྲིང་གི་རབ་ཀྱིས་ཁྲོ་བོ་ཡབ་ཡུམ་བཅུ་ཞལ་མཐོང་། འབྲིང་གི་འབྲིང་གིས་ཁྲོ་བོ་ཡུམ་བཅུ་ཉམས་ལྟས་སུ་འོང་། འབྲིང་གི་ཐ་མས་རྨི་ལྟས་སུ་འོང་། ཐ་མའི་རབ་ཀྱིས་ཁྲ་ཐབས་ཉི་ཤུ་ཞལ་མཐོང་། ཐ་མའི་འབྲིང་གིས་ཉམས་ལྟས་སུ་འོང་། ཐ་མའི་ཐ་མས་རྨི་ལྟས་སུ་འོང་། དེ་དག་གང་བྱུང་ཡང་ཚོགས་བྱ་ཞིང་། ཁམས་གསུམ་ཡང་སྒྲོལ་གྱིས་དངོས་གྲུབ་ཀྱང་བླང་ངོ་། །དེ་ལ་ལུས་རྡུལ་དུ་བསྡུ་ཞིང་དགྲ་བགེགས་ཐལ་བ་རྡུལ་དུ་བརླག་པའི་ཕྲིན་ལས་ལ་འཇུག་པར་བྱའོ། །ཕྲིན་ལས་གྲུབ་པའི་རྟགས་ནི། དོན་བཅུ་གཉིས་ཀྱི་གྲུབ་རྟགས་འབྱུང་བ་ནི། སྐུའི་རིགས་གྲུབ་པའི་རྟགས་ནི། བསྭེ་མོ་མཆེད་བཞི་མངོན་དུ་མཐོང་བ་དང་། ཉམས་ལྟས་སུ་འོང་བ་དང་། རྨི་ལྟས་སུ་འོང་བ་དང་། ཐུགས་ཀྱི་གྲུབ་རྟགས་འབྱུང་བ་ནི། རེ་མ་ཏི་བཞིའི་ཞལ་མཐོང་བ་དང་། ཉམས་ལྟས་སུ་འོང་བ་དང་། རྨི་ལྟས་སུ་འོང་བའོ། །གསུང་གྲུབ་པའི་རྟགས་ནི། ཤྭ་ན་བཞིའི་ཞལ་མཐོང་བ་དང་། ཉམས་ལྟས་སུ་འོང་བ་དང་། རྨི་ལྟས་སུ་རྨི་བ་དང་གསུམ་མོ། །དེ་དག་ཀྱང་ཞལ་མཐོང་བ་རབ་ཀྱིས་དྲོད་ཚད། ཉམས་ལྟས་འབྲིང་གིས་དྲོད་ཚད། རྨི་ལྟས་ནི་ཐ་མའི་གྲུབ་རྟགས་སོ། །དེ་དག་ཀྱང་གང་བྱུང་ན་ཡང་། གདུག་པ་ཅན་དབང་དུ་བསྡུ་བ། དགྲ་བགེགས་བསྒྲལ་བའི་ཕྲིན་ལས་བྱ། བསྒྲལ་བའི་ལས་ལ་དབང་བའི་དངོས་གྲུབ་བླང་། ཚོགས་མཆོད་བྱ། དམ་ཅན་རྣམས་རང་གིས་ཐུགས་ཀར་བསྡུ་བའོ། །ལར་ཕུར་པ་བསྒྲུབ་པའི་རྣལ་འབྱོར་པས། གསང་སྔགས་ཕྱིའི་དམ་ཚིག་ཉི་ཤུ་རྩ་བརྒྱད་ཀྱང་དང་དུ་བླང་། ད་སྒྲུབ་པ་པོས་ཀཱི་ལ་ཡའི་བསྙེན་པ་ཟླ་བ་དྲུག་བྱས་ཕྱིན་ཆད་ནས་དམ་ཚིག་གི་ཕྲན་ཚེགས་ལས། གཏོར་མ་དུས་ལས་ཡོལ་བ་དང་། དུས་ཆེ་ཆུང་ཆགས་པ་དང་། མཁོན་འགལ་དང་། བསྙེན་བསྒྲུབ་དུས་སུ་མཚམས་རལ་བ་དང་། ཕུད་ཉམས་པ་དང་། ལྷ་ལ་བསྔོས་པ་གཞན་ལ་བསྒྱུར་བ་དང་། དམ་བཅས་ནས་མ་བསྐང་ན། སྲིད་པ་ཕོ་རྒྱུད་ཀྱིས་དམ་ཅན་ཀུན་ཕྲག་དོག་ཆེ་བས་ཐ་ན་གཉིད་འཐིབ་རྨུག་པ་དང་། ཉམ་ཆུང་བ་དང་། དབང་པོ་མྱོས་ལ་ཟིང་ཟིང་པོར་སེམས་མེད་པ་དང་། རྨི་མཚན་ངན་པ་ལ་སོགས་པ་འོང་། དེ་བས་ཉམས་པ་ཆེ་བའི་ཉན་ཡོད་པས། ལེ་ལོ་མེད་པར་རྒྱུན་གདོར་དང་། ཀཱི་ལ་ཡའི་བསྙེན་ཛཔ྄་ལ་བརྩོན་པར་བྱའོ། །འགྲོ་འདུག་བཟའ་བཏུང་གིས་དུས་སུ་ཡང་། བསྒོམ་བཟླས་དང་མཆོད་གཏོར་ལ་བརྩོན་པར་བྱ། བར་མཚམས་སུ་རྡོ་རྗེ་སེམས་དཔའི་ཡི་གེ་བརྒྱ་པ་བཟླས། ཉམས་པའི་སྐྱོན་བྱུང་ན། གཏོར་གང་ལ་ཚིག་གིས་བཤགས་པ་བྱ། ཉམས་པ་ཆེན་ཅེ་ཏི་ནག་པོ་ལ་གོས་རྙིང་པ་བསྐོན། གཏོར་མ་དཀར་དམར་མང་དུ་བརྒྱན་ལ་བསྐང་བ་བྱ། གླུད་མདོས་དང་། བྱ་མོ་ནག་མོ་དང་། རྟ་ཐོད་དར་ཟབ་ཀྱིས་བརྒྱན་པ་དང་། བཤོས་བུ་དང་། འབྲང་རྒྱས་རྣམས་ནུབ་ཕྱོགས་སམ། བྱང་གིས་དབེན་རྙིང་ངམ། ལམ་རིང་དུ་བསྐྱལ། དེ་ནས་མཉམ་ཉིད་ཀྱིས་དོན་བསྒོམ། དམ་ཅན་གྱིས་སྔགས་ཀུན་ལ་ཀཱི་ལ་ཡའི་མགོ་ནོན་བཟླས་ན། འཁྲུལ་ལྡོག་མེད་པར་འགྲུབ་བོ། །རྒྱུན་གཏོར་མི་བཅག་པ་གལ་ཆེའོ། །ཡང་ན་ཀཱི་ལ་ཡ་ངན་སྔགས་ཀྱི་བསྙེན་པ་ནི། ལྷ་སོ་སོའི་ཐུགས་ཀར་ཉི་མའི་དཀྱིལ་འཁོར་དུ། ཧཱུྃ་ལས་ངན་སྔགས་འདུས་པས་བསྐོར་བར་བསམ། དེ་ལས་འོད་ཟེར་དམར་ནག་ལྕགས་ཀྱུ་ལྟ་བུའི་ཚྭ་ཚྭ་གདབ་པ་ལྟར་ཕྱོགས་བཅུར་འཕྲོས་པས་རས་བལ་རླུང་གིས་གཏོར་བའམ། གྲོག་སྤུར་གྱི་ཚང་བཤིག་པ་ལྟར་འཇིག་རྟེན་གྱི་ཁམས་ཐམས་ཅད་བརླག་གོ། །ལྷ་བསད་མཆོད་རྟེན་ལ་སོགས་བཤིགས་པའི་ནང་དུ་བསྒྲུབ་བྱ་གར་གནས་པ་མ་བཟོད་ནས། སྦུར་གྱི་ཕྱུངས་ཏེ། དབང་པོའི་མངོན་སུམ་དུ་བཀུག་ནས། བདག་གིས་མདུན་དུ་ལིངྒ་ལ་བསྟིམ། དེ་ནས་ཡང་དཀྱིལ་འཁོར་རྣམ་པ་གསུམ་གྱི་ཐུགས་ཀ་ནས། ཧཱུྃ་དང་སྔགས་ལས་འོད་ཟེར་སྨུག་ནག་འཕྲོས་པ་ཕྱག་གིས་ཕུར་པ་ལ་ཐིམ། དེ་ལ་སྐར་མདའའམ་ཐོག་ལྟ་བུ། ངོ་བོ་ནི་སྐུའི་སྲས་མཆོག་རྣམ་པ་ནི་དྲག་པོའི་ཕུར་པ་ཁ་དོག་སྨུག་ནག །ཤུགས་ནི་ཐོག་དང་འདྲ་བའོ། །གྲངས་ནི་ཚྭ་ཚྭ་ལྟར་དཔག་ཏུ་མེད་པ་འཕྲོས་པས། ཁོའི་སྤྱི་བོར་ཕོག་པས། རྐང་པའི་མཐིལ་དུ་ཕྱུང་སྟེ། ལུས་ཀྱིས་སྟོབས་དང་བྲལ་ནས། ཡན་ལག་གིས་རྩ་དང་། དབང་པོ་ཐམས་ཅད་བཅིང་ནས། ནད་པ་ཚབ་ཅན་ལྟ་བུར་གྱུར་པར་བསམ། ཁོའི་ལུས་བསྲུང་བའི་ལྷ་ཐམས་ཅད་སྲན་ཕུང་ལ་རྡོ་བརྒྱབ་པ་ལྟར། ཐོར་གྱིས་སོང་ནས། ལུས་བསྲུང་བའི་ལྷ་དང་བྲལ་བར་བསམ་ཞིང་ཡང་དཀར་གྱིས་ཐུན་བྱའོ། །ཡང་གསུང་གིས་སྲས་མཆོག་གོང་ལྟར་སྤྲོས་པས། ཁོའི་ལྕེ་ལ་ཕོག་པས། རྐོག་མར་ཐལ་བྱུངས་ནས། ངག་གིས་སྟོབས་དང་བྲལ་ནས་སྨྲ་བའི་དབང་པོ་བཅིང་བར་བསམ། དག་བསྲུང་བའི་ལྷ་ཐམས་ཅད་རང་གིས་མདུན་དུ་འཕེན་སྟེ། སྨྱོ་ཞིང་ལྐུག་པར་བསམ་ཞིང་ཡུང་དམར་གྱིས་ཐུན་བྱའོ། །ཡང་ཐུགས་ཀྱི་སྲས་མཆོག་གོང་ལྟར་སྤྲོས་ལ། ཁོའི་སྙིང་ཁར་ཕོག་པས་སྲོག་གིས་ཁྲག་འཇིབ། སེམས་ཉིད་རྩད་བཅད། བཀྲག་མདངས་དང་གཟི་མདངས་ཐམས་ཅད་ཕྲོག་ནས། རྣམ་ཤེས་བསྲུང་བའི་ལྷ་ཡེ་ཤེས་སེམས་དཔའ་དེ། བདག་ཧཱུྃ་ཀ་ར་ལ་ཨ་ཨ་ཅེས་བསྟིམ་མོ། །བདག་སྐུ་གསུང་ཐུགས་ཀྱིས་དངོས་གྲུབ་ཐོབ་སྟེ། ཁོའི་ལུས་ཁང་སྟོང་དུ་མར་མེ་ཤི་བ་ལྟར། ནག་ཏྲོག་གིས་སོང་བར་བསམ། དེ་ལ་སྲུང་མ་རྣམ་བཞིའི་སྤྲུལ་པ་གྲངས་མེད་པ་བདག་ལ་སྤྲོས་པས། ཁོའི་ཕུང་པོ་བཤིག་ནས་ཤ་ཟོས་ཁྲག་འཇིབ། རུས་པ་བཅའ་ལྷག་མུར་ནས། ལྷག་མ་རྡུལ་ཙམ་ཡང་མ་ལུས་པར་བསམ་ཞིང་ཡུང་ནག་གིས་ཐུན་བྱའོ། །དེ་ལྟར་ཡང་ཡང་དུ་སྤྲོ་བསྡུ་ལ་སོགས་པ་བྱ་ཞིང་། དུས་རྒྱུན་དུ་ཐུན་གྱིས་བྲབ་བོ། །བསྡིག་ཕུར་ཉི་ཤུ་རྩ་གཅིག་དྲིལ་ཞིང་གདབ་བོ། །དེ་ལྟ་བུའི་ཏིང་ངེ་འཛིན་ཡང་ཡང་དབྱེར་ཞིང་། བཞི་སྙིང་གཅིག་ཏུ་དྲིལ་ལ་བསྙེན་པ་བྱའོ། །དེ་ནས་སྤུ་གྲི་མེ་འབར་གྱིས་གདམས་ངག་ནི། སེར་བ་སྔགས་པ་དང་། ནད་པའམ་གཞན་ལ་བྱིན་རླབས་བྱེད་པ་དང་། བསྲུང་བ་བྱེད་པ་དང་མེ་ལ་ཕུས་བཏབ་པ་དང་། ཚ་རིགས་སྒོག་པ་ཟ་བ་དང་། བུད་མེད་ལ་སྤྱོད་པ་དང་། ཁ་ལུད་གཤང་ལྕི་འདོར་བ་དང་། དེ་རྣམས་སྤྱོད་ལམ་འོག་ནས་འབྱུང་བ་དང་མཐུན་ན། སྔགས་ཀྱི་ནུས་པ་ཟད་པར་འགྱུར་རོ། །དེའི་ཕྱིར་ན་འདི་ལ་བརྩོན་པར་གཅེས་སོ། །སྤྱོད་ལམ་འོག་དང་མཐུན་འགྱུར་ན། །སྔགས་ཀྱི་ནུས་པ་མེ་བཞིན་འབར། །ཆོས་སྐྱོང་རྣམས་ནི་བྲན་བཞིན་འཁོར། །ལྷ་འདེ་རྣམས་ཀྱི་བཀའ་བཞིན་བསྒྲུབ། །ཀུན་ཀྱང་དབང་དུ་འདུ་བར་འགྱུར། །ཡོན་ཏན་བསམ་གྱི་མི་ཁྱབ་བོ། །དེའི་ཕྱིར་ན་སྤུ་གྲི་མེ་འབར་གྱིས་གདམས་ངག་བྱ་བ་ལ། རང་ཡི་དམ་གཞུང་ལྟར་བསྒོམ། ངག་གིས་དབང་པོ་ལ་པདྨ་འདབ་མ་བརྒྱད་པ་གཅིག་བསྒོམ། དེའི་སྟེང་དུ་སྣང་བ་མཐའ་ཡས་སྐུ་ཚོན་གང་བ་གཅིག་བསྐྱེད། དེ་ལ་འོད་འཕྲོས་པས་མདུན་གྱིས་ནམ་མཁའ་ལ། བླ་མ་དང་ཡི་དམ་ལྷ་ཚོགས་དང་། ཆོས་སྐྱོང་བའི་སྲུང་མ་རྣམས་ཀྱི་མཐུ་དང་ནུས་པ་ཐམས་ཅད་བཀུག་ནས། སྣང་བ་མཐའ་ཡས་ལ་ཐིམ། སྣང་བ་མཐའ་ཡས་ཡོངས་སུ་གྱུར་པ་ལས། ཡི་གེ་ཧཱུྃ་དམར་པོ་གཅིག་བསམ། ཧཱུྃ་དེ་ལ་འོད་ཟེར་འཕྲོས་པས། སྔར་བཞིན་མཐུ་དང་ནུས་པ་བཀུག་ནས་ཧཱུྃ་ལ་བསྟིམ། ཧཱུྃ་དེ་ཡོངས་སུ་གྱུར་པ་ལས། རང་གིས་ལྕེ་རྡོ་རྗེ་རྩེ་ལྔ་པ་གཅིག་ཏུ་གྱུར་པར་བསམ། དེ་ཡང་རྭ་དབུས་མ་སྔོ་བ། གཡས་སེར། སྟེང་དམར། གཡོན་ལྗང་། ལྕེ་འོག་གིས་རྭ་དཀར་བ། དེ་དང་འདྲ་བའི་གྲེ་བ་ན། རྭ་ལྔ་གྱེས་ཤིང་འབར་བ། དེའི་ལྟེ་བ་ནང་དུ་རྃ་དམར་པོ་ལས་ཉིད་ལ། དེའི་སྟེང་དུ་ཡི་གེ་ཨ་དམར་པོ་མེའི་རང་བཞིན་ཅན་གཅིག་བསམ། དེ་ལས་འོད་ཟེར་འཕྲོས་པས། རིགས་ཀྱིས་ཡུམ་ལྔ་སྤྱན་དྲངས་ཏེ། རྡོ་རྗེ་སེམས་མ་ནམ་མཁའི་རང་བཞིན་ཅན། དབུས་ཀྱིས་རྭ་སྔོ་ལ་ཐིམ། ན་བཟའ་དཀར་མོ་རྭ་དམར་ཐིམ། སངས་རྒྱས་སྤྱན་མ་རྭ་སེར་ལ་ཐིམ། མཱ་མ་ཀཱི་རྭ་དཀར་ལ་ཐིམ། དམ་ཚིག་སྒྲོལ་མ་རྭ་ལྗང་ལ་ཐིམ། རྭ་ལྔ་པོ་ལ་དེ་ལྟར་སོ་སོར་ཐིམ། དེ་ལ་འོད་ཁ་དོག་སྣ་ལྔ་འཕྲོས་པས། སའི་སྨན་དང་། སྔར་དང་། རིན་པོ་ཆེ་དང་། རྩི་ཤིང་གིས་བཅུད་དང་། བདུད་རྩིས་ཞག་དང་། རླུང་གིས་ནུས་མཐུ་ཐམས་ཅད་དང་། རྒྱ་མཚོ་ལ་སོགས་ཆུའི་བཅུད་དང་། མེ་ཚ་ཞིང་བསྲེག་པའི་ནུས་མཐུ་ཐམས་ཅད་བསྡུས་ཏེ། ངག་གིས་དབང་པོ་ལ་ཐིམ། ཨ་ལས་བྱང་ཆུབ་རྟེན་འབྲེལ་སྙིང་པོས་གཡས་སུ་འཁོར་བར་བསམ། ངག་ཏུ་ཨ་ཉི་ཤུ་རྩ་གཅིག་བརྗོད། མདུན་གྱི་ནམ་མཁའ་ནས་སངས་རྒྱས་དང་བྱང་ཆུབ་སེམས་དཔའ་དང་། ཡི་དམ་ལྷ་ཚོགས་རྣམས་ཀྱི་ལྗགས་སྟེང་ནས། ཨ་ཁ་བ་བབ་པ་ལྟར་བྱོན་ནས། བདག་གིས་ལྕེ་ཐོག་གིས་ཨ་ལ་ཐིམ། ངག་གིས་ཉེས་སྐྱོན་སྡིག་སྒྲིབ་ཐམས་ཅད་དང་། མི་དང་མི་མ་ཡིན་གྱིས་གནོད་པ་ཐམས་ཅད་བསལ་བར་བསམ། དེ་ནས་རྟེན་འབྲེལ་སྙིང་པོ་བདུན་ནམ་ཉེར་གཅིག་བརྗོད། དེ་ནས་སྨོན་ལམ་གདབ་པ་ནི། ན་མོ་སངས་རྒྱས་ཀྱིས་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། དཀོན་མཆོག་གསུམ་གྱི་བཀའ་བདེན་པ་དང་། གསང་སྔགས་ཐམས་ཅད་ཀྱིས་བཀའ་བདེན་པ་དང་། རིག་སྔགས་ཐམས་ཅད་ཀྱིས་བཀའ་བདེན་པ་དང་། གཟུངས་སྔགས་ཐམས་ཅད་ཀྱིས་བཀའ་བདེན་པ་དང་། བདག་གིས་ངག་གིས་དབང་ཕྱུག་གིས་མཐུ་དང་ནུས་པ་ཚད་མེད་པ་འགྲུབ་པར་གྱུར་ཅིག །ལན་གཅིག་བྱའོ། །སངས་རྒྱས་རྐང་གཉིས་གཙོ་སྟེ་བདེན་པའི་མཆོག །ཆོས་ཉིད་ཆགས་པ་མེད་དེ་བདེན་པའི་མཆོག །དགེ་འདུན་མི་ཕྱེད་འདུན་པ་གཙོ་སྟེ་བདེན་པའི་མཆོག །དཀོན་མཆོག་གསུམ་གྱི་བདེན་པའི་མཐུས། བདག་གིས་ངག་གིས་དབང་ཕྱུག་གིས་མཐུ་དང་ནུས་པ་ཚད་མེད་པ་འགྲུབ་པར་གྱུར་ཅིག །ལན་གཅིག་བྱའོ། །ཆོས་ཉིད་ཟབ་མོ་འགྱུར་བ་མེད་པའི་བདེན་པ་དང་། བཀའ་རྒྱུད་བླ་མ་རྣམས་ཀྱི་བདེན་པ་དང་། ཡི་དམ་ལྷ་ཚོགས་རྣམས་ཀྱི་བདེན་པ་དང་། དམ་པ་ཆོས་སྐྱོང་བའི་སྲུང་མ་རྣམས་ཀྱི་བདེན་པ་དང་། ཆོས་ཉིད་རྟེན་འབྲེལ་འབྱུང་བའི་མི་བསླུ་བ་དང་ངག་གིས་བདེན་པའི་མཐུས། བདག་གི་གསང་སྔགས་དང་། རིག་སྔགས་དང་། གཟུངས་སྔགས་དང་། སྙིང་པོ་དང་། ཕྱག་རྒྱ་དང་། ཏིང་ངེ་འཛིན་དང་། སྨོན་ལམ་ཐམས་ཅད་འགྲུབ་པར་གྱུར་ཅིག་བྱའོ། །དེ་ནས་བཟླས་པ་འཇོག་ཙ། མདུན་གྱི་ནམ་མཁའ་ལ་བླ་མ་དང་། ཡི་དམ་དང་མཁའ་འགྲོ་དང་། ཆོས་སྐྱོང་བའི་སྲུང་མ་རྣམས་དང་། རྒྱལ་བའི་སྐུ་ལ་མ་དད་པ་དང་། བླ་མའི་གསུང་བཅག་པ་དང་། ཆོས་ཉིད་ཟབ་མོ་ལ་ཐེ་ཚོམ་ཟ་བ་དང་། ཡིད་གཉིས་བྱས་པ་དང་། སྙིང་པོ་གྲྭ་ཆག་ཅིང་ཟུར་ཉམས་པ་དང་། མཆོད་པ་ལོ་དང་ཟླ་བར་འདས་པ་དང་། ཁས་བླང་བའི་དགེ་རྩ་ཆག་པ་རྣམས། བླ་མ་དམ་པ་རྣམས་དང་། དཀོན་མཆོག་གསུམ་དང་། ཡི་དམ་ལྷ་ཚོགས་རྣམས་དང་། ཆོས་སྐྱོང་བའི་སྲུང་མ་རྣམས་ཀྱི་སྤྱན་ལམ་དུ་མཐོལ་ལོ་བཤགས་སོ། །ལན་གཅིག་བྱའོ། །དེ་ནས་ལྷ་དེ་རྣམས་འོད་དུ་ཞུ་ནས། རང་གིས་ངག་གིས་དབང་པོའི་ཡི་གེ་རྣམས་དང་། སྔགས་ཀྱིས་ནུས་པ་རྣམས་ལ་ཐིམ་ནས། དེ་ནས་འོད་ཀྱི་གང་བུ་ཞིག་ཏུ་ཞུ་ནས། ཐུགས་ཁའི་སྔགས་ཕྲེང་དང་ས་བོན་ལ་ཐིམ་པར་བསམ། དེ་ནས་མི་དམིགས་པའི་ངང་ལ་དལ་གཅིག་འཇོག །དེ་ནི་སྤུ་གྲི་མེ་འབར་གྱིས་གདམས་ངག་ཅེས་བྱའོ། །དེ་ནས་སྐབས་འདིར་བསྐུལ་ཐུང་གྱེར་ལ། དང་པོ་ཐོག་མར་བདེན་སྟོབས་བརྗོད། དེ་ནས་ས་མན་ཛས་ལྷ་ཚོགས་སྤྱན་དྲངས། དེ་ནས་རྣམ་ལྔ་དང་སྨན་རཀ་གཏོར་གསུམ་གྱི་མཆོད། དེ་ནས་གཟུ་དཔང་། སཾ་ཧ་ར་ཎ་ཧཱུྃ། ཅེས་པས་རང་ལ་བསྟིམ། ༀ་བཛྲ་ཀཱི་ལི་ཀཱི་ལ་ཡ་ཅེས་བརྗོད་པས། རང་ཉིད་སྐུ་མདོག་དམར་ནག་དབང་དྲག་གིས་སྐུར་གསལ་ནས། འགུག་བྱེད་ཡེ་ཤེས་ཀྱིས་ཕོ་ཉ་བཀྱེ་བའི་དོད་ཡིན་པས། སྐབས་འདིར་བདེན་སྟོབས་བརྗོད་ནས་འགུག་འདྲེན་བྱའོ། །དེ་ནས་དྲིལ་ཐུན་དམིགས་པ་ནི། རྡོ་རྗེ་གཞོན་ནུ་ཡབ་ཡུམ་གྱིས་ལྷ་དང་ཕྲལ་བའི་ལས་བྱེད་པར་བསྒོམ། ཁྲོ་བོ་ཡབ་ཡུམ་གྱིས་གཟུགས་ལ་ཕབ་པའི་ལས། ཁྲ་ཐབས་ཡབ་ཡུམ་གྱི་བྱད་དུ་བཅུག་པའི་ལས། ཤྭ་ན་བཞིས་མྱོ་བའི། བསྭེ་མོ་མཆེད་བཞིས་བསད་པའི། རེ་ཏི་མཆེད་བཞིས་དཀྱིལ་འཁོར་དུ་སྟབས་པའི་ལས་བྱེད་པར་བསམ་ལ་གྱེར་རོ། །དེ་ནས་ལྷག་མ་བྱ་བ་ལ་དོན་བཞི་སྟེ། སྤྱན་དྲངས་པ་དང་། སྲོག་གིས་སྙིང་པོ་དྲངས་ཞིང་བརྟེན་པར་བཞུགས་སུ་གསོལ་བ་དང་། མཆོད་པ་དང་། ལས་བཅོལ་བའོ། །སྤྱན་དྲངས་པ་ནི། རང་ཉིད་དཔལ་ཧེ་རུ་ཀའི་ཏིང་འཛིན་དང་ལྡན་པས། ཨེ་ཨཱ་རལླི་ཧོ། ཅེས་སོགས་བརྗོད་པས། མཛེས་པའི་ཕྱག་རྒྱ་བཅའ་ལ། དེ་ཡང་ལྷག་མའི་རྒྱུད་ལས། འཛུབ་མོ་བསྣོལ་བྱེད་གུང་མོ་རྩེ་སྤྲད་པ། མཐེ་བོང་རྡོ་རྗེ་བརྟན་བྱེད་ལག་པ་ཐལ་མོ་གདབ། ཨཱ་ར་ལི་དང་ཕཻཾ་ཕཻཾ་སྒྲ་སྒྲོགས་པས། མ་ཚོགས་མཁའ་འགྲོ་འདུ་བར་ཐེ་ཚོམ་མེད། །ཅེས་གསུངས་སོ། །གཉིས་པ་སྲོག་གིས་སྙིང་པོ་དྲངས་ཞིང་བརྟན་པར་བཞུགས་སུ་གསོལ་བ་ནི། ༀ་ཊ་ཀི་ར་ཙ་ཛ་ཅེས་སོགས་བརྗོད་པས། སྔར་ནས་དཀྱིལ་འཁོར་ལ་ཡོད་པ་རྣམས་ལ་ཐིམ་པར་བསྒོམ་མོ། །གསུམ་པ་མཆོད་པ་ནི། བདག་གིས་ལྕེ་ཐོག་ཏུ་ཧྲིཿདམར་པོ་གཅིག་བསམ་པ་ལ་སོགས་གཞུང་བཞིན་ནོ། །བཞི་པ་ལས་བཅོལ་བ་ནི། དམ་ཅན་རྣམས་ཀྱི་བདག་གིས་བཀའ་ཉན་པར་བསམ་ལ། ཧཱུྃ། ཤར་གྱིས་ཕྱོགས་ནས་བྱུང་བ་ནི། ཅེས་སོགས་བརྗོད་པས། ཤྭ་ནའི་ངུ་ཟུག །རེ་ཏིའི་རྒྱང་གླུ། ཁྲོམ་གེ་སར་དམག་གིས་རྒྱ་འབོད། སྲིན་མོའི་མདུར་འགྲོས་ལ་སོགས་པ་རྣམས་བྱའོ། །ལྷག་ཆེན་ཚར་ནས། ༀ་ཨཱཿཧཱུྃ་གསུམ་རང་ལ་བསྡུ། མར་ཞལ་དངོས་གྲུབ་བླང་། གཏོར་མ་ནམ་མཁའ་མཐོང་སར་བསྣུར་ལ། སྨན་རཀ་བྲན་ལ་གཏོར་མ་ༀ་ཨཱཿཧཱུྃ་གིས་འདོད་ཡོན་དུ་དམིགས་ལ། བརྟན་མ་སྐྱོང་། གཏོར་མགྲོན་གཤེགས། དེ་ཡང་དྲག་པོའི་ལས་བྱེད་དུས་ལྷག་ཆུང་ཚར་ནས་གཏོར་མ་མ་བསྐྱང་བ་ལ་དགོངས་གསོལ་བྱའོ། །བཟློག་སྔགས་འདོད་ལ་ལྷ་ཐམས་ཅད་ཞལ་ཕྱིར་གཟིགས་པར་བསམ། བཟློག་པ་བྱེད་པའི་དུས་སུ། གཏོར་མ་མཚོན་ཆའི་ཕུང་པོར་བསམ་ལ་ཆོས་སྐྱོང་ལྷ་ཚོགས་རྣམས་ཀྱི་ཁྱེར་ནས། བྱད་མའི་སྒྲུབ་ཁང་སྟེང་རུ་བརྒྱབ་པས་བྱང་མ་འཁོར་དང་བཅས་པ་རྡུལ་དུ་བརླག་པར་བསམ། ངན་སྔགས་སྒྲུབ་པའི་དུས་སུ། གཏོར་མ་སྒྲུབ་བྱར་བསམ་ལ། ཆོས་སྐྱོང་རྣམས་ཀྱི་ཁྱེར་ནས་ཧབ་ཐོབ་དུ་གསོལ་བར་བསམ། རྒྱུན་གཏོར་བསྐྱང་དུས་གཏོར་མ་རིན་པོ་ཆེའི་མཆོད་སྡོང་རྩེ་མོ་གསུམ་པ། རྩ་བ་ཏྲཱྃ་གིས་མཚན་པ་རྩེ་མོར་འབྲུ་གསུམ་གྱི་མཚན་པ་ལ། དང་པོ་བདེ་བར་གཤེགས་པ་ཐམས་ཅད་ལ། གཉིས་པས་དམ་ཅན་སྲུང་མ། གསུམ་པས་འགྲོ་དྲུག་རྣམས་ལ་མཆོད་སྦྱིན་གྱིས་ཁྱབ་པར་བསམ་ལ་བསྐྱང་ངོ་། །དེ་ནས་ཛྭ་ལ་བཛྲའི་སྔགས་བརྗོད་པ་ཙམ་གྱིས། རང་གིས་གནས་ལྔ་ནས་མཚོན་ཆ་རྣམས་སྤྲོས་པས། གཞལ་ཡས་ཁང་གིས་རྒྱབ་རྡོ་རྗེ་རྭ་བའི་ནང་གིས་མཚོན་ཆའི་གུར་དྲུག་ལ་ཕོག །དེ་ལ་མཚོན་ཆའི་ཚོགས་སྤྲོས་པས། ལོག་པར་འདྲེན་པར་བགེགས་རྣམས་བསྐྲད། དེ་ནས་ཡེ་དྷརྨཱ་བརྗོད་པ་ཙམ་གྱི་ལྷ་ཚོགས་རྣམས་ཞལ་ནང་དུ་གཟིགས་པར་བསམ། མཚོན་ཆ་རྣམས་ཚུར་འདུས་ནས་གུར་ཁང་དྲུག་ལ་ཐིམ་པས། སྲ་ཞིང་བརྟན་པར་གྱུར་པར་བསམ། དེ་ནས་རྟིང་བཤགས་བྱ་བ་ནི། རང་གཙོ་བོ་གཉིས་པའི་ཚུལ་དུ་ཤར་སྒོར་གཤེགས་པར་བསམ་ལ། ལུས་ངག་ཡིད་གསུམ་གནོང་འགྱོང་དང་བཅས་ཏེ། བཤགས་པར་བསམ་ལ། ཧཱུྃ་བདག་ནི་རང་རིག་ཡེ་ཤེས་བློ་དང་མ་ལྡན་པས། ཅེས་སོགས་གཞུང་བཞིན་བྱས་ལ། ཚར་ནས་བླ་མ་དང་དཀྱིལ་འཁོར་གྱིས་ལྷ་ཚོགས་རྣམས་ཀྱིས་ཆོ་ག་ལྷག་ཆད་གྱུར་པའི་ཉེས་པ་དག་པའི་གནང་བ་བྱིན་པར་བསམ་ལ། རང་གཙོ་བོའི་ཐུགས་ཀར་ཐིམ་པར་བསམ། དེ་ནས་ལྷ་ཚོགས་རྣམས་ཀྱི་བཀྲ་ཤིས་པའི་དགོངས་པ་དང་བཅས་པས་བཀྲ་ཤིས་བརྗོད་པར་བསམ་ལ། ཕུན་སུམ་ཚོགས་པ་མངའ་བ་གསེར་གྱིས་རི་བོ་འདྲ། ཅེས་སོགས་སྤྲིན་མདངས་འཁྲིག་པའི་དབྱངས་དང་བཅས་པ་བྱའོ། །དེ་ནས་དཀྱིལ་འཁོར་བསྡུ་བ་ནི། ཕྱི་སྣོད་ཀྱིས་འཇིག་རྟེན་ཧེ་རུ་ཀར་བརླབ་ལ། གཞལ་ཡས་ཁང་ལ་བསྡུ། གཞལ་ཡས་ཁང་དམ་ཅན་ལ་བསྡུ། དན་ཅན་ཁྲོ་བོ་ལ་བསྡུ། ཁྲོ་བོ་ཁྲ་ཐབས་དང་བཅས་པ་གཙོ་བོ་ལ་བསྡུ། སུས་མཆོག་རྣམས་གཙོ་བོ་ཡབ་ཡུམ་ལ་བསྡུ། ཡུམ་ཡབ་ལ་བསྡུ། ཡབ་ཐུགས་ཀའི་ཡེ་ཤེས་སེམས་དཔའ་ལ་བསྡུ། དེ་རྡོ་རྗེ་ལ་བསྡུ། རྡོ་རྗེ་ཧཱུྃ་ལ་བསྡུ། ཧཱུྃ་ཡང་ཞབས་ཀྱུ་ལ་བསྡུ། ཞབས་ཀྱུ་འ་ལ་བསྡུ། འ་ཧ་ལ་བསྡུ། ཧ་ཟླ་ཚེས་ལ་བསྡུ། ཟླ་ཚེས་ཐིག་ལེ་ལ་བསྡུ། ཐིག་ལེ་ཆོས་ཀྱི་དབྱིངས་སུ་བསྟིམ་མོ། །དེ་ནས་སྟོང་པ་ཉིད་ལ་ཅི་ཙམ་གནས་ཀྱིས་བར་དུ་བཞག་གོ། །དེ་ནས་འབྲུ་དགུ་བརྗོད་པ་ཙམ་གྱིས། རྡོ་རྗེ་གཞོན་ནུར་ཝལ་གྱིས་གསལ་བར་བསྒོམ་ལ། དེའི་སྤྱི་བོར་རང་བྱུང་དུ་བྷྲཱུྃ་དང་ཀཾ་གཉིས་བསྐྱེད། དེ་འོད་དུ་ཞུ་བ་ལས། ལུས་ཐམས་ཅད་རྡོ་རྗེའི་ཁྲབ་ཞུབ་དང་ཞུ་ལུབ་དུ་གཡོག་པར་བསམ། དེ་ཞུ་བ་ལས་རྡོ་རྗེའི་རྒྱུན་ཐག་རྐང་བ་གཉིས་ལ་ཁ་ཁར་འཁྲིལ་ཏེ། དྲུག་མདོ་ལྟེ་བ། སྲོག་ཕྲ་བ། སྙིང་ཁ། ལྟག་རུས། དཔྲལ་བའི་སྐྲ་མཚམས་དང་དྲུག་ཏུ་རྡོ་རྗེ་རྒྱ་གྲམ་གྱིས་མདུད་པ་རེ་རེ་བྱས་པར་བསམ། དེ་ནས་འཛུབ་མོ་གཉིས་ཀྱི་རྩེ་མོས་ཧཱུྃ་གཉིས་བསྒོམ་པའི་རྒྱུན་ཐག་དེ་ཁྲིད་པ་ལྟར་བྱས། གནས་དྲུག་ཏུ་རྡོ་རྗེའི་མདོ་མིག་བཅུ་གཉིས་བསྒོམ་མོ། །མདོ་མིག་གཡས་ན་རྡོ་རྗེ་གནོད་སྦྱིན་མཐིང་ནག་འཇིགས་ལ་རྔམ་པའི་སྐུ་ལ་མེ་འབར་བར་བསྒོམ། གཡོན་ན་བདུད་རྩི་ཐལ་སྦྱོར་སེར་ནག་གོང་ལྟར་ཕྱིར་གཟིགས་པས་སྲུངས་བར་བསྒོམ་མོ། །རྒྱུན་ཐག་རྩེ་མོ་ཕལ་ཆེར་སྨིན་མཚམས་སུ་དར་མཐིང་ཀའི་ཅོད་པན་ལྟ་བུར་གྱུར་པར་བསྒོམ་པ་ཤས་ཆེར་གསུངས་སོ། །རྟ་གསད་སྤུ་གསུམ་ཕུར་པ་སྐྱི་ལུགས་ཀྱིས། །སྙིང་ཁྲག་ཡིན་པའི་ནང་ནས་མཆོག་གྱུར་ནི། །གསང་སྒྲུབ་བླ་མ་ཀཿཐོག་ལུགས་དང་ནི། །བཀོལ་བ་དུམ་བུའི་རྒྱུད་ཀྱི་རྩ་ཐུང་དང་། །མངོན་རྟོགས་བསྙེན་པ་དོན་བཅུའི་གཞུང་དང་ནི། །དྲུག་པ་སྤྱན་དྲངས་བདུན་པ་དབང་བསྐུར་དང་། །བརྒྱད་པ་སྨན་གཏོར་རཀྟ་དགུ་པ་བསྟོད། །དེའི་ཚིག་བཅད་བྱང་བུའི་ལྷན་ཐབས་དང་། །སྨན་རཀ་གཏོར་མ་བྱིན་གྱིས་བརླབ་ཐབས་དང་། །ལྷག་མའི་ཆོ་ག་རྟིང་བཤགས་རྩ་བསྐུལ་དང་། །བཟླས་པའི་མན་ངག་ཚེའི་བསྙེན་པ་དང་། །སྔགས་ཀྱིས་དབྱེ་བ་རྟགས་དང་མཚན་བསྟན་དང་། །དངོས་གྲུབ་བླང་བའི་ཆོ་ག་ལ་སོགས་པ། །བསྡུས་པའི་བྱང་བུ་སྐུ་བསྙེན་སྐོར་དུ་འདོད། །སྔགས་དྲུག་ཐུན་དྲིལ་ཕུར་རྩ་རབ་གནས་དང་། །རིག་འཛིན་བསྐུལ་པ་སྒྲུབ་པའི་ཡིག་ཆུང་དང་། །གཟེར་བུ་ལྷ་གསལ་དབང་དུ་བྱ་བ་དང་། །ཕུར་བུ་རྣམས་ལ་སྔགས་རྣམས་བཀོད་ལུགས་དང་། །བྲུབ་ཁང་བསྒྲལ་བའི་ད་ལ་བསྟན་པ་རྣམས། །གསུང་གི་སྒྲུབ་པའི་སྐོར་དུ་འདོད་པར་སྣང་། །རྩ་བའི་ཡིག་ཆུང་འདེབས་ཕུར་ལྷ་ངོ་སྤྲོད། །ཛ་བརྡུང་རྒྱས་བསྡུས་གསལ་འདེབས་སྐོར་དང་ནི། །ཕུར་བུ་དྲིལ་འདེབས་གདབ་ལས་ཀྱིས་མན་ངག །འདི་ཚོ་ཡན་ཆད་ལག་ལེན་ཡིན་ཅེས་གསུངས། །འདི་ནས་ས་གཅོད་འོང་བ་ཐུགས་ཕྲིན་ལས། །ལྷ་རྣམས་གསལ་ཞིང་དབང་དུ་བསྡུ་བ་དང་། །གབ་པའི་བྱང་གཅིག་གདབ་ལས་དམིགས་པ་རྣམས། །གདམས་ངག་ཡིན་ཅེས་ཐོ་བྱང་ནང་ནས་བཤད། །ཁོག་དབུབ་སྔགས་དྲུག་རྦོད་གཏོང་འགྱེད་པ་དང་། །སྔགས་དྲུག་འཁོར་ལོ་བསྐོར་བ་ཡན་ཆད་ནི། །རྩ་བ་ངན་སྔགས་སྐོར་གྱི་རྣམ་གྲངས་ཡིན། །བསྐང་བ་ཟོར་སྐོར་བརྟན་གཏོར་རབ་གནས་དང་། །སེར་བསྲུང་སྲུང་འཁོར་ངག་བསྲུང་ནད་རྒྱ་དང་། །གནས་ཁང་རབ་གནས་རྡོལ་དྲིལ་ཡུང་དཀར་སོགས། །རབ་གནས་སྐོར་རྣམས་ཞིང་སྒྲོལ་ལས་ཚོགས་ཡིན། །ཕུར་བུའི་རྣམ་གྲངས་པདྨའི་ཞལ་ཆེམ་དང་། །པདྨའི་སྐྱེས་རབས་རྒྱས་འབྲིང་གཉིས་པོ་དང་། །གསང་སྔགས་འབྱུང་ཚུལ་འབྲུ་འགྲེལ་རྣམས་ཀྱིས་ནི། །རྡོ་རྗེ་ཕུར་པའི་གསང་བསྒྲུབ་སྐོར་རྫོགས་ལ། །བློ་ཆེན་རྣམས་ཀྱི་དེ་ལ་བརྩོན་པར་མཛོད། །འདི་ནི་བློ་ཆུང་དོན་དུ་བསྙེན་ཐབས་ཙམ། །བནྡེ་བདག་གིས་བྲིས་པའི་དགེ་བ་དེས། །འགྲོ་ཀུན་ཀུ་མ་རའི་ས་ཐོབ་ཤོག །ཕུར་པའི་འགྲེལ་འདི་ནི། ནམ་མཁའ་བས་བྱས་ཟིན་དེ་ཁ་བསྐང་བ་ལ། ལྷའི་མངོན་རྟོགས་ཀྱིས་སྐབས་ལ། གཙོ་བོ་ལ་གྲུབ་རྟགས་ཀྱི་ཕྱག་རྒྱ་དང་། མཛད་པ་རྟགས་ཀྱི་ཕྱག་རྒྱ་ལ་སོགས་ཞིབ་ཏུ་བྱས་ཡོད། ཁྲོ་བོ་ཡབ་ཡུམ་གྱི་སྐབས་ལ། མིང་ལ་བཏགས་པ་དང་། ནང་གིས་དགོངས་པ་ལ་བཏགས་པ་དང་། ཕྱག་མཚན་ལ་བཏགས་པ་དང་། གདུལ་བྱ་ལ་བཏགས་པ་དང་། མགོ་བསྙེན་ལ་བཏགས་པ་དང་། གཉན་པོ་ལ་བཏགས་པ་དང་། སྟོབས་ལ་བཏགས་པ་དང་། ཡོན་ཏན་ལ་བཏགས་པ་རྣམས་ཞིབ་དུ་བྱས་ཡོད། ཁྲ་ཐབས་ཡབ་ཡུམ་གྱིས་སྐབས་ལ་ཆོས་མཐུན་ལོ་རྒྱུས་ཞིབ་དུ་བྱས་ཡོད། འདི་རྣམས་ནི་གསང་བ་མཛོད་ཀྱི་ལྡེའུ་མིག་ནང་དུ་བཀོད་ནས་ཡོད། འདིར་ཡི་གེ་མང་དོག་པས་མ་བྲིས་སོ། །ལས་བྱང་མན་ཆད་ལུས་བསྲུང་གོ་བགོ་ཡན་ཆད་ལ། ནམ་མཁའ་བའི་དེ་ལ་ཐོ་ཡིག་ལག་ལེན་བསྡུས་པ་ཙམ་གཅིག་བས་མི་སྣང་བ་ལ། དོན་བཤད་རྒྱས་པ་སྤུ་གྲི་མེ་འབར་གྱིས་གདམས་ངག་དང་བཅས་པ་འདི་ནི། ཀཿཐོག་ཡང་དགོན་ནོར་བུ་གླིང་ཞེས་བྱ་བར། གསང་སྔགས་རྡོ་རྗེ་འཛིན་པ་ཡེ་ཤེས་རྒྱལ་མཚན་གྱིས་བཀོད་པའོ།། །།བཀྲ་ཤིས། །