མན་ངག་རྫོང་འཕྲང་སྲོག་གསུམ་གྱི་བླ་བརྒྱུད་གསོལ་འདེབས། གཞན་ཕན་མཐའ་ཡས།
༄༅། །མན་ངག་རྫོང་འཕྲང་སྲོག་གསུམ་གྱི་བླ་བརྒྱུད་གསོལ་བདེབས་བཞུགས་སོ། །
སྟོན་པ་ཀུན་བཟང་རྡོ་རྗེ་སེམས་དཔའ་ཆེ། །རབ་དགྱེས་རྡོ་རྗེ་དཔལ་ལྡན་སེང་གེ་འོད། །མཁས་པ་མི་བཞི་ཞིང་དྲུང་ཡེ་ཤེས་གཞོན། །གནུབས་ཆེན་ཡབ་སྲས་རྣམས་ལ་གསོལ་བ་འདེབས། །པདྨ་དབང་རྒྱལ་ཚུལ་ཁྲིམས་རྒྱལ་མཚན་དང་། །ལྡན་བརྩོན་ཡེ་ཤེས་དབང་ཕྱུག་སེ་སྟོན་པ། །དངོས་གྲུབ་ཉང་རལ་འགྲོ་མགོན་ཆོས་དབང་ཞབས། །པདྨ་དབང་ཆེན་རྣམས་ལ༴ ཤེས་རབ་རྒྱ་མཚོ་ཟུར་ཧཾ་ཤཱཀྱ་འབྱུང་། །ཤཱཀ་རྡོར་བཤེས་དཔལ་གཉིས་དང་རུ་ལེགས་ཟུང་། །རིན་རྒྱལ་མངའ་རིས་པཎ་ཆེན་ངག་གི་དབང་། །ཚེ་བརྟན་རྒྱལ་པོ་རྣམས་ལ༴ ནམ་མཁར་སྤྱོད་པ་པ་རུ་ཧི་ཏ་དང་། །ཕྲིན་ལས་ལྷུན་གྲུབ་འགྱུར་མེད་རྡོ་རྗེའི་ཞབས། །རིན་ཆེན་རྣམ་རྒྱལ་ཨོ་རྒྱན་རིག་འཛིན་དང་། །ཐེག་མཆོག་བརྟན་འཛིན་རྣམས་ལ༴ བསྟན་པའི་རྒྱལ་མཚན་རིག་འཛིན་རྒྱ་མཚོ་དང་། །ཕྲིན་ལས་དར་རྒྱས་པདྨ་བཀྲ་ཤིས་དཔལ། །པདྨ་རྡོ་རྗེ་ཀུན་བཟང་ཆོས་ཀྱི་གྲགས། །ཁྱབ་བདག་ཕན་བདེའི་འོད་ཟེར་ལ་གསོལ་བ་འདེབས། །མཁྱེན་བརྩེའི་མངའ་བདག་རྩ་བརྒྱུད་བླ་མ་ལ། །བཟོད་མེད་གདུང་ཤུགས་དྲག་པོས་གསོལ་འདེབས་ན། །ཚད་མེད་ཐུགས་རྗེ་ཆེན་པོས་ཉེར་དགོངས་ཏེ། །བདག་རྒྱུད་བྱིན་གྱིས་བརླབ་པར་མཛད་དུ་གསོལ། །ཚེ་འདིའི་མངོན་ཞེན་ལྡོག་པར་བྱིན་གྱིས་རློབས། །བདེན་བཞིའི་འཇུག་ལྡོག་ཤེས་པར་བྱིན༴ བྱང་ཆུབ་སེམས་གཉིས་འབྱོང་པར་བྱིན༴ སྨིན་གྲོལ་ལམ་ལ་འཇུག་པར་བྱིན༴ བསྐྱེད་རྫོགས་ཟབ་གནད་རྟོགས་པར་བྱིན༴ བསྙེན་སྒྲུབ་མཐའ་རུ་ཕྱིན་པར་བྱིན༴ སྐུ་བཞིའི་རྒྱལ་སྲིད་ཟིན་པར་བྱིན༴ རང་གཞན་དོན་གཉིས་འགྲུབ་པར་བྱིན་གྱིས་རློབས། །ཞེས་རྒྱལ་སྲས་གཞན་ཕན་མཐའ་ཡས་ཀྱི་གསུང་ལ་བརྒྱུད་པའི་ཁྱད་པར་གྱིས་གཏེར་ཆེན་ནས་རང་གི་བླ་མའི་བར་བརྒྱུད་རིམ་ཁ་སྐོང་བ་པོ་ནི་འཇིགས་བྲལ་ཡེ་ཤེས་རྡོ་རྗེའོ།། །།