རྫོང་འཕྲང་ལས་དབང་བསྐུར་རྡོ་རྗེའི་ཕྲེང་བ།

༄༅། །རྫོང་འཕྲང་ལས། དབང་བསྐུར་རྡོ་རྗེའི་ཕྲེང་བ་བཞུགས་སོ། །རྒྱ་བོད་མཁས་པ་མི་བཞིའི་ཐུགས་བཅུད་ཟབ་པའི་མཐར་ཐུག་ལགས་སོ། །རྒྱ་གར་སྐད་དུ། མ་དྷ་ལ་བི་དཱི་ནཱ་མ། བོད་སྐད་དུ། དཀྱིལ་འཁོར་གྱི་ཆོ་ག །དཔལ་ལྡན་ཀུན་བཟང་རིག་པའི་ངང་། །གཉིས་མེད་ཡུམ་དང་བཅས་པ་ལ། །ལུས་ངག་ཡིད་གསུམ་པྱག་འཚལ་ཏེ། །རྡོ་རྗེ་ཐེག་པ་གཟུང་བ་དང་། །སེམས་ཅན་རྒྱུད་ནི་སྨིན་པ་དང་། །རང་དང་འདྲ་བ་དྲང་བའི་ཕྱིར། །སྐུ་གསུང་ཐུགས་ཀྱི་ཏནྟྲ་ལས། །འཕྲུལ་མེད་རྡོ་རྗེའི་ཕྲེང་བ་བརྩམ། །ཐམས་ཅད་མཉམ་ཉིད་གཞི་ཡིན་པས། །གཅིག་གི་གཞིར་གྱུར་དུ་མའི་གཞི། །མིང་དོན་ངེས་མེད་ཆེན་པོ་སྟེ། །ནམ་མཁའ་མིང་དུ་བཏགས་པ་ཙམ། །ཆོས་རྣམས་ཐམས་ཅད་དེ་བཞིན་ཉིད། །གཉིས་སུ་མེད་པ་ཡེ་ཤེས་ཏེ། །རང་བཞིན་དོན་གྱི་རྣལ་མ་ཡིན། །དཔེར་ན་ནམ་མཁའ་ལྟ་བུའོ། །མ་ནོར་བ་ཡི་སྙིང་པོའི་དོན། །ཆོས་དབྱིངས་རྣམ་པར་དག་དེ་ལ། །མ་བཅོས་པ་དེ་ཀུན་གྱི་གཞི། །དཔེར་ན་སུ་གཞི་ལྟ་བུའོ། །སྐྱེ་འགག་གཉིས་སུ་མེད་པ་ལ། །སྣང་དང་སྟོང་པ་གཉིས་སུ་མེད། །འཁོར་འདས་གཉིས་སུ་མེད་པ་ཡིན། །ནམ་མཁའ་དང་ནི་ཆོ་འཕྲུལ་འདྲ། །དོན་དེ་གང་ཞིག་སུས་རྟོགས་པ། །སྐུ་གསུམ་ དགོངས་པ ་རང་ལ་རྫོགས། །དོན་དམ་ཆོས་སྐུ་ཆེན་པོ་ཡིན། །དབུལ་མོས་གཏེར་ཆེན་རྙེད་པ་འདྲ། །དེ་ལྟ་བུ་ཡི་དོན་དེ་ཡང་། །རྟོགས་པ་རྣམས་ལ་མ་བསྣན་ཏེ། །མ་རྟོགས་པ་ལ་མ་ཕྲི་བས། །དངོས་པོ་གཞི་ཡི་གནས་ལུགས་ཡིན། །ཁུར་བའི་ནང་དུ་ཆུ་བླུག་འདྲ། །ཚིག་དང་བློ་ཡིས་མཚོན་དུ་མེད། །སྒྲ་ཚད་མཁས་པས་དེ་མི་ཤེས། །རིག་པ་རྣོ་བས་དེ་མི་རྟོགས། །དཔེར་ན་གྱད་ཀྱི་ནོར་བུ་འདྲ། །ཐེག་ པ་ཐམས་ཅད་ཀྱི་ཡང་རྩེ། ལྟ་དགོངས ་ཐམས་ཅད་ཀྱི་སྙིང་པོ། ཀུན་བཟང་རྒྱལ་བའི་ཐུགས་ཀྱི་ཡང་བཅུད། དེ་ཡང་རང་གི་རིག་པའོ། །རྡོ་རྗེ་ཕྲེང་བ་ལས། ལྟ་བའི་སྙིང་པོ་དོན་ལ་དབང་བསྐུར་བའི་ལེའུ་སྟེ་དང་པོའོ།། ༈ །།དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །མ་རྟོགས་ལོག་པའི་སེམས་ཅན་རྣམས། །དུག་ལྔས་བཟུང་བའི་དབང་གིས་སུ། །སྐྱེ་གནས་བཞི་དང་འགྲོ་རིགས་དྲུག །རྟག་ཏུ་འཁོར་བའི་ཟོ་ཆུ་འདྲ། །སྡུག་བསྔལ་སྒྲོལ་ཕྱིར་རྒྱལ་བའི་ཐུགས། །ཆོས་ཀྱི་སྐུ་ཡི་རང་བཞིན་ལས། །ཐུགས་རྗེའི་རང་བཞིན་གཟུགས་ཀྱི་སྐུ། །ཉི་ཟླའི་དཀྱིལ་འཁོར་བཞིན་དུ་ཤར། །འོག་མིན་ཆོས་དབྱིངས་ཕོ་བྲང་དུ། །ཀུན་ཏུ་བཟང་པོ་ཡབ་ཡུམ་གྱིས། །རྒྱལ་བ་རིགས་ལྔ་ཡབ་ཡུམ་ལ། །དུག་ལྔ་ཡེ་ཤེས་ལྔ་ལྡན་དུ། །གཉིས་སུ་མེད་པར་དབང་བསྐུར་ཏེ། །ལོངས་སྤྱོད་རྫོགས་སྐུར་བྱིན་གྱིས་བརླབས། །བཅོམ་ལྡན་རིགས་ལྔ་ཡབ་ཡུམ་གྱིས། །རྣམ་པར་རྒྱལ་བའི་ཁང་བཟང་དུ། །དམ་པ་ཏོག་དཀར་དབང་བསྐུར་ཏེ། །གང་ལ་གང་འདུལ་ཐུབ་པར་སྤྲུལ། །སྐུ་དང་གསུང་དང་ཐུགས་ཀྱིས་སུ། །འགྲོ་བ་འདུལ་བར་བྱིན་བརླབས་ནས། །ཕྱི་དང་ནང་དང་གསང་བ་ཡི། །ཐེག་པ་ཐམས་ཅད་བཀའ་སྩལ་ཏོ། །དེ་དག་སྤྲུལ་སྐུ་རང་རྒྱུད་དེ། །རྡོ་རྗེ་ཆོས་ཀྱང་ཕྱི་དང་ནང་། །གསང་ཚུལ་དུ་ཡང་བསྡུ་བ་མཛད། །རིམ་པ་བཞིན་དུ་མི་ཡུལ་དུ། །ཕུང་པོ་རི་དང་གནམ་ལྕགས་ཅན། །ཟ་ཧོར་རྒྱལ་པོའི་མདོ་གླིང་དུ། །མ་མོ་རིག་འཛིན་རྣམས་ལ་གཏད། །དབང་ཡང་རིམ་པ་བཞིན་དུ་དབབས། །བསྟན་པ་རིམ་པ་བཞིན་དུ་དར། །མཆོག་དང་ཐུན་མོང་ལ་སོགས་པའི། །དངོས་གྲུབ་རིམ་པ་བཞིན་དུ་ཐོབ། །བྱིན་གྱིས་བརླབས་ཀྱི་ཆོ་འཕྲུལ་དེ། །གོང་མའི་ཐབས་ལ་མ་བརྟེན་པར། །ཐབས་སམ་དཀའ་ཐུབ་རྩོལ་བ་ཡིས། །འབྱུང་བར་མི་འགྱུར་འཁྲུལ་བའི་ཀློང་། །དེས་ན་མོས་གུས་རབ་ཏུ་གཅེས། །སངས་རྒྱས་སྐུ་གསུམ་འབྲས་བུ་ཡང་། །བསྟན་པའི་བྱིན་རླབས་བབས་ལས་འབྱུང་། །བབས་ལ་མ་བསྟེན་འབྲས་བུ་ནི། །འབྱུང་བར་ཐུབ་པས་མ་གསུངས་ཏེ། །དཔེར་ན་ཐང་ལོའི་འབྲས་བུ་བཞིན། །སངས་རྒྱས་སྐུ་གསུམ་འབྲས་བུ་ཡང་། །བསྟན་པའི་བབས་ལས་འབྱུང་བར་གསུངས། །རྡོ་རྗེ་ཕྲེང་བ་ལས། བབས་བསྟན་པའི་ལེའུ་སྟེ་གཉིས་པའོ།། ༈ །།དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དེ་ནས་སྣོད་བཅུད་མཚན་ཉིད་ནི། །དད་པ་གཞི་ཆེ་བརྩོན་འགྲུས་མྱུར། །ཤེས་རབ་ཆེ་ལ་སྡེ་སྣོད་ཐོས། །དབུལ་སྦྱིན་བསམ་ནས་སྔགས་ལ་མོས། །བློ་སྦྱོང་དབང་དང་རིམ་པ་ཐོབ། །བསྐྱེད་རྫོགས་གཉིས་ཀྱིས་རང་རྒྱུད་གྲོལ། །དམ་ཚིག་གཙང་ལ་སྒོམ་ལ་བརྩོན། །དངོས་གྲུབ་ཐོབ་ཀྱང་རློམ་སེམས་མེད། །རང་དོན་སྤང་བའི་བཅོ་ལྔ་པ། །སྲོག་ལ་བསྡོས་པ་དེ་ཉིད་བཙལ། །ཆོས་བརྒྱད་བྲལ་དང་ཚད་མེད་ལྡན། །ཕར་ཕྱིན་བསྡུ་བཞིས་གཞན་དོན་མཛད། །འཁྲུལ་པ་མི་མངའ་བདེན་པ་མཐོང་། །ཐེག་ཆེན་སྔགས་ཀྱི་བདག་པོ་བདུན། །དེ་ཡང་བཀུར་བར་འོས་པ་ཡིན། །རྒྱུད་འབྱོངས་པ་ལ་ཕན་སེམས་ཆེ། །འདོད་པ་ཆུང་ལ་གདམས་ངག་ཆེ། །ཀུན་བཟང་ཐུགས་དང་དབྱེར་མེད་ལྔ། །དེ་ཡང་བླ་མ་བཟང་པོ་ཡིན། །བརྒྱུད་པ་བཟང་ལ་རང་རྒྱུད་ཐུལ། །འདོད་པ་ཆུང་བ་གསུམ་པ་སྟེ། །དེ་ཡང་རྟོག་པ་འཇོམས་པར་བྱེད། །བླ་མ་སངས་རྒྱས་གཉིས་སུ་མེད། །བསྙེན་པ་བྱས་ན་དངོས་གྲུབ་ཐོབ། །དུས་གསུམ་དཔའ་བོས་དེ་སྐད་གསུངས། །རྒྱལ་པོའི་དབུ་ཡི་རྒྱལ་མཚན་ལྟར། །གཉིས་མེད་དད་གུས་བྱས་གྱུར་ན། །སྐུ་གསུམ་འདུ་འབྲལ་མེད་པར་འགྱུར། །རིགས་བཟང་དད་པ་ཤིན་ཏུ་ཆེ། །བསྟན་ཅིང་ཟུངས་ཐུབ་ཤེས་བཞིན་ལྡན། །བླ་མ་ལ་གུས་ཞེན་པ་ཆུང་། །སྙིང་རྗེ་ཆེ་ལ་རིག་པ་རྣོ། །སྒྲིམ་ཞིང་བློ་གྲོས་ལྡན་པ་ལ། །ཉོན་མོངས་རྒྱང་ཞིང་བསམ་པ་བཟང་། །སྔགས་ལ་དད་པ་བཅུ་གསུམ་པ། །གསེར་སྣོད་ལྟ་བུའི་མཆོག་ཏུ་གསུངས། །ཤེས་རྒྱུད་འཇམ་ལ་ཆད་ལ་བཙན། །ཤེས་རབ་རྣོ་ལ་བརྩོན་འགྲུས་དྲག །གཡོ་རྒྱུ་ཆུང་ལ་སྐྱོ་ཤས་ཆེ། །བླ་མ་ལ་གུས་རྟོག་པ་ཆུང་། །གཏོང་ཕོད་ཆེ་ལ་ང་རྒྱལ་ཆུང་། །ཐེ་ཚོམ་མི་ཟ་བཅུ་གཅིག་པ། །འདི་ཡང་མཁས་པས་སྣོད་དུ་གསུངས། །གཤེ་སྐུར་ཆུང་ཞིང་ཀུན་ལ་དད། །དབེན་དང་གྲུབ་པ་དག་ལ་དགའ། །སྨོན་ལམ་དག་པས་བསོད་ནམས་གསོག །རྟོགས་པ་མཐོ་བ་བདུན་པ་ཡིན། །འོ་མ་ཐུབ་པར་སེམས་དཔས་གསུངས། །ཕྱི་ནང་རྟེན་འབྲེལ་མ་འཛོམ་པར། །མཐར་ཐུག་འབྲས་བུ་མི་འབྱུང་སྟེ། །བྱེ་མ་ལ་ནི་མར་བཞིན་ནོ། །དོན་དམ་གཞི་ལ་ངེས་མེད་པས། །གསེར་མདོག་མཚན་དཔེས་མ་ཐུལ་བ། །འཆར་ཀ་ཡིས་ནི་ཐུལ་བ་དང་། །ཚངས་པའི་གསུང་གིས་མ་ཐུལ་བར། །ཏྲེ་བུ་མི་ཏྲས་ཐུལ་བས་ན། །ཐུགས་རྗེ་དད་ཅིང་གུས་ལས་འབྱུང་། །དེ་ཕྱིར་ཐམས་ཅད་མཁྱེན་པ་ཡི། །སྐུ་གསུང་ཐུགས་ཀྱང་བསམ་མི་ཁྱབ། །མོས་གུས་ཅན་ལ་བྱིན་རླབས་འབྱུང་། །གཅིག་ཏུ་མ་ངེས་ཐམས་ཅད་ཡིན། །རང་གིས་རྟོགས་པའི་སངས་རྒྱས་ཡིན། །རྡོ་རྗེ་ཕྲེང་བ་ལས། སྣོད་བཅུད་འབྲེལ་བ་ལ་བརྟེན་ནས། རིག་པ་དབང་བསྐུར་བའི་ལེའུ་སྟེ་གསུམ་པའོ།། ༈ །།དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །སློབ་མ་རབ་གནས་བཟང་པོ་ཡིས། །རྒྱུད་སྨིན་དབང་བསྐུར་བྱ་བའི་ཕྱིར། །བཀྲ་ཤིས་ཡིད་འོང་དབེན་གནས་སུ། །ཐམས་ཅད་སྟ་གོན་གནས་བྱའི་ཕྱིར། །འཚོ་བའི་རྫས་དང་སྒྲུབ་པའི་རྫས། །དགྲ་བཟློག་མཚོན་དང་རྐྱེན་ལོག་སྨན། །མཆོད་པའི་དཀྱིལ་འཁོར་རྒྱུན་ལ་སྩོགས། །དབང་གི་རྫས་དང་དངོས་གྲུབ་རྫས། །མཚམས་དང་སྲུང་བ་བསྒྲུབ་པའི་རྫས། །གཞན་ལ་རག་མ་ལུས་པར་བྱ། །སྲོག་ཆགས་འདོན་དང་སྐུ་གདུང་བཞེངས། །བྱིས་པ་དགེ་སློང་སྟོན་མོ་བྱ། །འབུམ་ལྔ་ཕྱི་ནང་དཔང་སྐོང་ཀློག །ཆ་གསུམ་ཕྱི་ཡི་མཆོད་པ་འབུལ། །ཡུལ་དེའི་ལྷ་དང་གནོད་བྱེད་ལ། །གཏོར་མ་བྱིན་ལ་བསྒོ་བ་བྱ། །ཚོགས་བསགས་ཚུལ་དང་མཐུན་པར་ཞུ། །དེས་ན་སློབ་དཔོན་ཚད་ལྡན་དེས། །བསྙེན་པ་སྔོན་དུ་ལོང་བ་ཡིས། །དུས་དང་མཚན་མ་གྲངས་དང་ནི། །དཔའ་བོས་ལུང་བསྟན་ཐོབ་པ་ཡིན། །རང་གི་ལུས་ངག་རྒྱུད་སྦྱང་ཕྱིར། །ལས་ལ་སྦྱོར་ཁར་དྲངས་ལ་བརྟེན། །དངོས་གྲུབ་ཛཔ྄་ དགོངས་དག་ལས་འབྱུང་། །ཐུགས་ལ་བཟུང་ལ་བསྙེན་པ ་བྱ། །དེ་ནས་སྒྲུབ་པ་བྱ་བའི་ཕྱིར། །དཀྱིལ་འཁོར་སུ་ཡི་ཆོ་ག་ནི། །ལྟོ་འཕྱེ་ཤུགས་འགྲོས་ལྟ་བུ་ཡིས། །ཕྱི་དང་ནང་དང་གསང་བ་ཡིས། །བརྟན་པ་བྱས་ལ་ དགོངས་པ ་བསྐྱེད། །རིགས་ལྡན་མངའ་བདག་ལྷུང་བཟེད་སྲོག །རོ་ལྡན་དྲངས་ལ་བརྟེན་པས་སྒྲོལ། །ལུང་དང་སྣང་བ་བྱིན་པ་དང་། །ས་པྲ་དང་ནི་མཚན་མ་བརྟག །རོ་ལྔ་བསལ་ལ་སྟེགས་བུ་བྱ། །ལོ་དང་ཟླ་བ་ཡར་གྱི་ངོ་། །གཟའ་དང་སྐར་མ་བཟང་དུས་སུ། །མགྲོན་རིགས་བཞི་ལ་མཆོད་གཏོར་བྱ། །ས་བདག་ཕྱི་ནང་གསང་བ་ལ། །ཐམས་ཅད་མ་ལུས་ཚིམ་པར་བྱ། །དཀྱིལ་འཁོར་སངས་རྒྱས་སྤྱན་ཡིན་ཡང་། །དབུས་སུ་ལྷ་མོ་བསྐྱེད་བྱས་ལ། །ཧཱུཾ། གསེར་གྱི་སུ་ལ་མངའ་མཛད་མ། །དབུས་ཀྱི་སུ་ཡི་ལྷ་མོ་སངས་རྒྱས་སྤྱན། །སྐུ་མདོག་གསེར་གྱི་མདོག་འདྲ་མ། །གཡས་ན་གསེར་གྱི་བུམ་པ་བསྣམས། །གཡོན་པ་མཆོག་སྦྱིན་ཕྱག་རྒྱ་མཛད། །ལྷ་མོ་འཁོར་དང་བཅས་པ་ཡང་། །མཆོད་གཏོར་མགྲོན་དུ་སྤྱན་འདྲེན་ན། །ཐུགས་རྗེ་བརྩེ་ཕྱིར་གནས་འདིར་གཤེགས། །ཀོ་ལོང་བར་ཆད་མ་མཛད་པར། །བདག་ལ་སུ་ཡི་དངོས་གྲུབ་སྩོལ། །ཡེ་ཤེས་བྱིན་བརླབས་དབང་བསྐུར་བྱ། །གནང་བར་བསམ་ལ་དཔང་དུ་གསོལ། །ཧཱུཾ། ཕྱོགས་བཅུ་དུས་གསུམ་སངས་རྒྱས་ཀྱང་། །བྱང་ཆུབ་སྤྱོད་པ་སྤྱོད་པས་ན། །ས་དང་ཕ་རོལ་ཕྱིན་སྤྱད་པས། །ས་ཡི་སྟེང་དུ་འཚང་ཡང་རྒྱས། །ལྷ་མོ་ཁྱོད་ནི་དབང་དུ་གྱུར། །སངས་རྒྱས་ཤཱཀྱ་ཐུབ་པ་ཡང་། །གྲངས་མེད་གསུམ་དུ་ཚོགས་རྫོགས་ནས། །ལྷ་མོས་དཔང་མཛད་འཚང་ཡང་རྒྱས། །སློབ་དཔོན་ཆེ་གེས་དབུ་བཟུང་ནས། །ད་ལ་བཟང་པོ་བཞེངས་པ་ལ། །ལྷ་མོ་སྤྱན་གྱིས་དཔང་པོ་མཛོད། །འཛམ་གླིང་སྤྱི་ན་མཐུ་ཆེ་བ། །བཅུ་གཉིས་ལོ་ཡི་ཁ་ལ་ཞོན། །ཀོང་ལོང་སྡོམ་ཞིང་ཀུན་ལ་འཚོ། །ཙང་ཀུན་ཙང་ཙང་ཏོང་ཕན་དང་། །ཐེ་སེ་བེ་སྣ་ལ་སྩོགས་དང་། །ཡུལ་ཕྱོགས་འདི་ན་མངའ་མཛད་པའི། །གཡའ་རི་གངས་རི་བྲག་རི་དང་། །བྱེ་རི་རྩི་ཤིང་ནགས་ཚལ་དང་། །ཁྱད་པར་སུ་གཞི་འདི་ལ་གནས། །རྒྱལ་བློན་བུ་སྨད་འཁོར་དང་བཅས། །རིགས་དང་ཁ་དོག་མི་མཐུན་པ། །ས་བདག་གཉན་ཚོགས་མ་ལུས་དང་། །རིག་འཛིན་བདག་ཅག་རྣམས་ལ་ནི། །ལན་ཆགས་གནོད་པ་གདོན་གྱི་ཚོགས། །ལྷ་སྲིན་སྡེ་བརྒྱད་འཁོར་དང་བཅས། །ཕོ་གདོན་མོ་གདོན་ཐམས་ཅད་ལ། །བགེགས་རིགས་སྟོང་ཕྲག་འཁོར་དང་བཅས། །མཆོད་ཅིང་གཏོར་མའི་མགྲོན་དུ་ནི། །ད་ལྟ་ཉིད་དུ་སྤྱན་འདྲེན་གྱི། །བྱམས་ཐུགས་བརྩེ་ཕྱིར་གནས་འདིར་གཤེགས། །མཆོད་གཏོར་དམ་པ་འདི་དག་བཞེས། །ཀོ་ལོང་བར་ཆད་མ་མཛད་ཅིག །བདག་ལ་དངོས་གྲུབ་སྩལ་དུ་གསོལ། །ལྟོ་འཕྱེའི་མཚན་ཉིད་ཤེས་བྱས་ལ། །ལྟོ་ནས་བརྐོས་ལ་ཆུ་པྲ་བརྟག །རྣམ་ལྔ་བུམ་རྫས་ཉི་ཤུ་ལྔ། །ས་ཞག་བདུད་རྩིར་དྲིར་ལྡན་པས། །ལས་དང་བྱ་བས་འཛེམ་པར་བྱ། །ས་བོན་ལྔ་ལས་རིམ་གྱིས་བརྩེགས། །བྷྲཱུཾ་ལས་རིན་ཆེན་གཞལ་ཡས་ཁང་། །དངོས་པོ་མཚན་མ་ཀུན་སྤྱངས་ནས། །རྒྱལ་བ་བཞུགས་པའི་རྟེན་དུ་བྱ། །དབང་དུ་བྱ་ཞིང་བཟུང་བ་ནི། །སྟེགས་བུའི་དབུས་སུ་མཆོག་ཕུར་ནི། །རྟ་མགྲིན་དབང་དུ་བསྒོམ་ལ་གདབ། །དབང་དུ་འདུས་ནས་བདག་གིར་བསམ། །གཞན་ཡང་དྲག་པོའི་ཕུར་པ་གཅིག །ཀཱི་ལ་ཡ་ཡི་སྔགས་བརྗོད་ལ། །སྐུ་སྟོད་ཁྲོ་ལ་སྐུ་སྨད་དབལ། །ས་གཞི་དག་ལ་བཏབ་ནས་ནི། །མཚོན་ཆ་རྣམ་ལྔའི་གུར་དུ་བསམ། །ཁྲོ་བོ་བཅུ་ཡིས་མཚམས་བཅད་ལ། །སྲིད་པའི་རླུང་ནི་མི་འཆོར་གཏམས། །དེ་ལྟར་བསམ་དང་བསྒོམ་པར་བྱ། །རྡོ་རྗེ་ཕྲེང་བ་ལས། སའི་ཆོ་གའི་ལེའུ་སྟེ་བཞི་པའོ།། ༈ །།དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དེ་ནས་སྟ་གོན་ཆོ་ག་ནི། །ཕོ་བྲང་བྱི་དོར་ལེགས་བྱས་ལ། །དེ་ནས་ལྷ་རྣམས་གར་བྱུང་བར། །དྲི་ཡི་ཐིག་ལེ་བྱས་ནས་ནི། །དམ་ཚིག་བསྐྱེད་ལ་ཡེ་ཤེས་བསྟིམ། །ཆོས་ཉིད་ཉི་ཟླའི་སྤྱན་དང་ནི། །ཕྱག་མཚན་མཚོན་ཆ་འབར་བའི་མེ། །ཕྱི་ནང་གསང་བ་ཁྲག་འཐུང་རོལ། །ཉུངས་ཀར་རྒྱལ་པོ་ལ་སྩོགས་པ། །མཚམས་ཡང་ཤིན་ཏུ་དྲག་པར་བཅད། །བཤགས་ པ་དག་ཀྱང་ཅི་རིགས་བྱ། །མཆོད་རྫས་བྱིན་གྱིས་བརླབས་ལ་འབུལ། །བླ་མས་རབ་གནས་འཛབ་དགོངས ་བྱ། །ཀརྨ་རྒྱལ་ཐེབས་རྣམ་གཉིས་ཀྱིས། །ཞི་བ་ཆེ་ཆུང་ལས་གཞུང་བསྲང་། །དབང་རྫོགས་ཐོབ་པར་མོས་པ་ཡིས། །དད་ལྡན་འཁོན་གཅུགས་བྱེད་པ་དང་། །མ་ཉམས་བླ་མ་ལ་གུས་དང་། །སྔགས་ལ་མོས་པའི་འཁོར་དག་ལ། །སྤྲོ་བ་བསྐྱེད་ལ་བཤགས་པ་བྱ། སྐྱབས་འགྲོ་མོས་གུས་གྲུབ་ཚད་བྱ། །ཚོགས་དང་ཕུད་ལ་ནན་ཏན་བྱ། །དེ་ནས་གསོལ་བ་ལྷ་ལ་གདབ། །དུས་གསུམ་རྒྱལ་བ་འདུས་པའི་གཙོ། །ཐུགས་རྗེ་བྱིན་བརླབས་བྱང་སེམས་ལྡན། ། དགོངས་པ ་རྣ་བརྒྱུད་ཐུགས་བཅུད་མངའ། །རྒྱུད་འགྲོལ་བྱང་ཆུབ་ལམ་ལ་འཛུད། །དུས་གསུམ་བླ་མ་སྐུ་དྲིན་ཅན། །ཐམས་ཅད་གསན་ཅིང་དགོངས་སུ་གསོལ། །རང་བཞིན་ལྷུན་གྲུབ་ཕོ་བྲང་ན། །བཞི་བཅུ་རྩ་གཉིས་ལྔ་བཅུ་བརྒྱད། །འཇམ་དཔལ་སྐུ་དང་པདྨ་གསུང་། །ཡང་དག་ཐུགས་དང་ཕྲིན་ལས་ཕུར། །ཡོན་ཏན་བདུད་རྩི་ལྷག་པའི་ལྷ། །དཀྱིལ་འཁོར་ཕྱི་ནང་ལྷ་ཚོགས་ཀྱང་། །བདག་ལ་གསན་ཅིང་ དགོངས་སུ་གསོལ། །ཆོས་སྐུ་ལོངས་སྐུ་སྤྲུལ་པའི་སྐུ། །དོན་དམ་བསྒྲུབ་པ ་བསྟན་པའི་ཆོས། །ཉན་ཐོས་རང་རྒྱལ་བྱང་ཆུབ་སེམས། །འདས་དང་མ་བྱོན་ད་ལྟ་བ། །ལྷ་མི་ཀུན་གྱི་མཆོད་པའི་གནས། །བླ་མེད་དཀོན་མཆོག་རིན་པོ་ཆེ། །ཐམས་ཅད་གསན་ཅིང་ དགོངས་སུ་གསོལ། །དཀྱིལ་འཁོར་ཕྱི་ནང་ཁས་བླང་ནས། །བསམ་པ ་མྱ་ངན་འདས་མོད་ཀྱང་། །སྦྱོར་བ་འཇིག་རྟེན་པ་ཡི་ཚུལ། །འཇིག་རྟེན་བསྲུང་བར་ལས་མཛད་པའི། །རྣལ་འབྱོར་བསམ་པ་སྒྲུབ་མཛད་ པ། །དཔའ་བོ་དཔའ་མོ་དམ་ཅན་ཚོགས། །ཐམས་ཅད་གསན་ཅིང་དགོངས ་སུ་གསོལ། །བདག་དང་ཡོན་བདག་སློབ་མ་ལ། །ཐུགས་རྗེ་བརྩེ་བས་ དགོངས་པ ་ཡིས། །དཀྱིལ་འཁོར་བཟང་པོ་སང་འདྲི་ཡི། །བདག་ནི་དཀྱིལ་འཁོར་ཆོ་ག་བགྱིད། །སྟ་གོན་ལ་ནི་གནས་པར་མཛོད། །སློབ་མས་སོ་ཤིང་དོར་བར་བྱ། །སྲུང་སྐུད་དག་ཀྱང་བྱིན་པར་བྱ། །སྐུ་དང་པུ་སྟི་ཐོད་པ་དང་། །སྒྲུབ་སྨན་ཕུར་པ་ཅོད་པན་དང་། །བུམ་པ་ཚེ་དང་གཏོར་མ་དང་། །སྐུ་དང་ཙ་ཀ་ལི་རྣམས་དང་། །རིག་འཛིན་རྣམས་དང་མཉམ་པར་བྱ། །མཆོད་གཏོར་ཕུལ་ལ་ཡེ་ཤེས་བསྟིམ། །ལས་ཀྱིས་བུམ་པས་ཁྲུས་བྱས་ལ། །བློ་འགུག་རྒྱུད་བཅོས་དོམ་སྡོམ་པ་དཔོག །སྤྲོ་བ་བསྐྱེད་ཅིང་གདམས་ངག་བཤད། །ལྷག་མ་རྣམས་ལ་ནན་ཏན་བྱ། །ཐབས་དང་ཤེས་རབ་བཙོན་དུ་བཟུང་། །ཕྱིན་པོ་ཐམས་ཅད་དགྱེ་བར་བྱ། །སེངྒེའི་ཉལ་སྟབས་ལྟ་བུ་ཡིས། །ཀུ་ཤའི་སྟན་ལ་འདུག་ནས་ནི། །གཉིད་ལོག་ནས་ནི་མཚན་མ་བརྟག །རྡོ་རྗེ་ཕྲེང་བ་ལས། སྟ་གོན་གྱི་ལེའུ་སྟེ་ལྔ་པའོ།། ༈ །།དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དེ་ནས་དཀྱིལ་འཁོར་བྲི་བ་ནི། ཕོ་བྲང་བྱི་དོར་ལེགས་བྱས་ལ། །བདུད་རྩི་ལྔ་ཡི་རྐྱང་ནུལ་བྱ། །ཧཱུཾ། རྡོ་རྗེ་བདུད་རྩི་དྲི་ཆེན་འདིས། །མ་དྷལ་བྱིན་ཆེན་ཉིད་དུ་འགྱུར། །བྱང་ཆུབ་སེམས་ཀྱི་བདུད་རྩི་འདིས། །ཉེས་པའི་སྐྱོན་གྱིས་མྱོས་མི་འགྱུར། །མཱཾ་སུ་བདུད་རྩི་ཆེན་པོ་འདིས། །འཁོར་བའི་ཉོན་མོངས་དབང་དུ་བསྡུད། །རཀྟ་བདུད་རྩི་ཆེན་པོ་འདིས། །མ་མོ་མཁའ་འགྲོ་དམ་ལ་འདུ། །རྡོ་རྗེ་བདུད་རྩི་དྲི་ཡི་ཆུས། །འཁོར་བའི་བག་ཆགས་འདག་པར་བྱེད། །གསང་བའི་དཀྱིལ་འཁོར་ཆག་ཆག་འདེབས། །འགུ་ཡ་ཙན་དྲ་མ་དྷ་ལ། །ཧཱུཾ། གསང་པར་བཀལ་བའི་སུམ་བསྒྲིལ་ལ། །སྐུ་གསུང་ཐུགས་སུ་བྱིན་གྱིས་བརླབས། །ཡུམ་གྱི་ལག་ཏུ་གཏད་བྱས་པས། །ཡབ་ཡུམ་གཉིས་མེད་བྱང་ཆུབ་སེམས། །ཤིན་ཏུ་གསལ་བའི་ཐིག་ཏུ་བསྒོམ། །ཧཱུཾ། བདེ་ཆེན་སྤྲོས་བྲལ་ཆོས་ཀྱི་དབྱིངས། །རིག་པའི་ཡེ་ཤེས་རྡོ་རྗེའི་ཐིག །ཐབས་ཤེས་གཉིས་མེད་བྱང་ཆུབ་སེམས། །དུས་གསུམ་འགྱུར་མེད་གདབ་པར་བྱ། ། ༀ་མ་ཧཱ་དར་དུ་ཛྙཱ་ན་མ་དྷ་ལ་ཧཱུཾ། ཧཱུཾ། དུར་ཁྲོད་གསང་བའི་དཀྱིལ་འཁོར་དུ། །རིག་པ་ཕོ་མོ་ཐིག་འདེབས་ཀྱིས། །བྱང་ཆུབ་སེམས་ཀྱི་ཐིག་བཏབ་པས། །ཞི་ཁྲོའི་ཕོ་བྲང་གསལ་བར་འབྱུང་། །ཨཱོཾ་མ་ཧཱ་ཤྲཱི་ཧེ་རུ་ཀ་མ་དྷ་ལ་ཧཱུཾ། ཐིག་བཞི་བཏབ་ལ་བརྒྱད་དུ་བགོ། །ཕོ་བྲང་ལིང་ཚེ་ལྔ་པ་ལ། །གྲུ་ཆད་པར་ཁྱམས་སྒོ་བཞིར་ལྡན། །འདོད་ཡོན་ཕ་གུ་དྲྭ་བ་ཕྱེད། །ཁ་བད་རྟ་བབ་དུར་ཁྲོད་བརྒྱན། །ཁྲག་འཐུང་ཕོ་བྲང་གསལ་བར་གདབ། །ཧཱུཾ། ཡི་གེ་དཔའ་བོ་འབྲུ་ལྔ་ལས། །ཚོན་ཀྱང་ཁ་དོག་རྣམ་པ་ལྔར། །ཡེ་ཤེས་ལྔ་ཡི་རང་བཞིན་ཏེ། །གཉིས་སུ་མེད་པར་བྱིན་གྱིས་རློབས། །ཨཱོཾ་པཱ་ཙ་རུ་ག་གཉའ་ན་མ་དྷ་ལ་ཧཱུཾ། མཛེས་ཤིང་དོན་དང་མཐུན་པར་བྲི། །ཕྱག་མཚན་ཡིག་འབྲུ་སྐུ་གཟུགས་འགོད། །མཆོད་རྫས་ཤར་ལ་དངོས་གྲུབ་ལྷོ། །དབང་རྫས་ནུབ་ལ་དྲག་རྫས་བྱང་། །གདུགས་དང་བླ་བྲེ་མདའ་དང་གྲི། །མེ་ལོང་དར་སྣ་ཕུར་པས་བསྐོར། །ཚོན་སྐུད་ལྔ་དང་ཡོལ་བས་བཅད། །ཧཱུཾ། འཁོར་བའི་རྒྱུན་གཅོད་ཡེ་ཤེས་རལ་གྲི་བཞི། །ཐབས་ཀྱི་རང་བཞིན་མདའ་བཞི་ལ། །ཤེས་རབ་རང་བཞིན་མེ་ལོང་བཞི། །ཁྲོ་བོའི་རང་བཞིན་ཕུར་པ་བཞི། །ཡེ་ཤེས་རིགས་ལྔ་ཚོན་སྐུད་གསལ་བར་བྲི། །ༀ་ཧཱུཾ་སྭཱ་ཧྲཱིཿཧཱ། གུ་གུལ་ཉུང་ཀར་རྒྱལ་པོ་ཡིས། །མཚམས་ཡང་ཤིན་ཏུ་དྲག་པར་བཅད། །དེ་ནས་དཀྱིལ་འཁོར་ལྷ་འགོད་དེ། །ཧཱུཾ། རྡུལ་ཚོན་དཀྱིལ་འཁོར་གསལ་བྲིས་ནས། །དམ་ཚིག་དཀྱིལ་འཁོར་གསལ་བསྐྱེད་དེ། །ཡེ་ཤེས་དཀྱིལ་འཁོར་སྤྱན་འདྲེན་ན། །ཞི་ཁྲོ་རིགས་ལྔ་ཡབ་ཡུམ་འཁོར་དང་བཅས། །དཀྱིལ་འཁོར་འདི་ལ་བརྟན་པར་བཞུགས། །ཕོ་བྲང་འདི་ལ་བྱིན་ཅིག་ཕོབ། །འཕགས་མཆོག་ཐུགས་རྗེས་བཟུང་བའི་དུས་ལ་བབ། །ཁྱད་པར་བསྟན་པའི་དུས་ལ་བབ། །མཐུ་ཆེན་མཐུ་སྩོལ་རྒྱལ་བ་ཞི་ཁྲོའི་ཚོགས། །བྱིན་ཆེན་བྱིན་ཕོབ་རྒྱལ་བ་ཞི་ཁྲོའི་ཚོགས། །དངོས་གྲུབ་མཆོག་སྩོལ་རྒྱལ་བ་ཞི་ཁྲོའི་ཚོགས། །བདག་ཅག་ལས་ཀྱི་འབྲས་བུ་འཆིས་པར་མཛོད། །ཨ་བེ་ཤ་ཡ་སུ་ཡ་ཧཱུཾ། ཧཱུཾ། དུས་འདི་བཟུང་ནས་བྱང་ཆུབ་མ་ཐོབ་པར། །བྱང་ཆུབ་མཆོག་ཏུ་སེམས་བསྐྱེད་ནས། །གསང་སྔགས་རྡོ་རྗེ་ཐེག་པ་ལྟར། །ཇི་སྲིད་སྐུ་གསུམ་མ་ཐོབ་པར། །རྒྱལ་བ་ཞི་ཁྲོ་སྒྲུབ་པར་དམ་ཡང་བཅའ། །ས་མ་ཡ་ཏི་ཏ་ལྷན། རྡུལ་ཚོན་ཏིང་འཛིན་ཡེ་ཤེས་གསུམ། །གཉིས་སུ་མེད་པར་བརྟན་པར་བསྒོམ། །རྡོ་རྗེ་ཕྲེང་བ་ལས། དཀྱིལ་འཁོར་བཞེངས་པའི་ལེའུ་སྟེ་དྲུག་པའོ།། ༈ །།དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཞི་ཁྲོ་དཀྱིལ་འཁོར་ཆེན་པོ་རུ། །སློབ་མ་གཞུག་པར་བྱ་བ་དང་། །བསྲེ་བསྣན་བྱ་བའི་རིམ་པ་ནི། །དང་པོ་སློབ་མ་ཁྲུས་བྱས་ལ། །གདོང་ལ་དར་གྱིས་གཡོགས་ནས་ནི། །འབྲུ་དང་མེ་ཏོག་ཐོགས་བྱས་ལ། །ལས་ཀྱི་སློབ་དཔོན་ལག་སྦྲེལ་ལ། །དཀྱིལ་འཁོར་བླ་མ་ལྷ་ཚོགས་ལ། །བསྐོར་བ་བྱས་ལ་ཤར་སྒོར་འདུག །བདག་ཅག་སྐལ་ལྡན་རིགས་ཀྱི་བུ། །བྱང་ཆུབ་སྙིང་པོའི་བར་དུ་ནི། །རྒྱལ་བའི་བཀའ་བཞིན་བསྒྲུབ་ལགས་ན། །བདག་ཅག་དཀྱིལ་འཁོར་གཞུག་ཏུ་གསོལ། །དམ་ཚིག་སྡོམ་པ་དབང་བསྐུར་ཞུ། །བླ་མས་གནང་བ་བྱིན་ པ་ནི། དཀྱིལ་འཁོར་ལྷ་ཚོགས་དགོངས ་སུ་གསོལ། །སེམས་ཅན་སྡུག་བསྔལ་ལས་བསྒྲལ་ཕྱིར། །དེ་བཞིན་གཤེགས་པ་ཐམས་ཅད་ཀྱི། །ཕོ་བྲང་དཀྱིལ་འཁོར་དམ་པ་འདིར། །བདག་གིས་སློབ་མ་གཞུག་པར་བགྱི། །བྱིན་གྱིས་བརླབ་པར་མཛད་དུ་གསོལ། །དེ་ནས་སློབ་མས་འདི་སྐད་དོ། །བླ་མ་དཀྱིལ་འཁོར་ལྷ་ཚོགས་ཀྱི། །སྒོ་བཞིར་འཇུག་པར་འཚལ་ལུགས་ཀྱི། །ཡེ་ཤེས་ལྷ་དང་ཞལ་མཇལ་ཞིང་། །བདག་ལ་བྱིན་གྱིས་རློབ་ཏུ་གསོལ། །བླ་མས་དཀྱིལ་འཁོར་སྒོ་དབྱེ་བ། ། ཧཱུཾ། ཕོ་བྲང་བདེ་གཤེགས་ཤར་གྱི་སྒོ། །ཞེ་སྡང་ཆེན་པོས་བཅད་པ་ལགས། །བྱམས་པའི་ངང་བཞིན་ལྕགས་ཀྱུ་མས། །གཞལ་ཡས་ཤར་སྒོ་དབྱེ་རུ་གསོལ། །མེ་ལོང་ཡེ་ཤེས་སྒོ་ཕྱེ་ཞིག །བཛྲ་པྲ་ཝེ་ཤ་ཡ་ཕཊ། །ཕོ་བྲང་དཀྱིལ་འཁོར་ལྷོ་ཡི་སྒོ། །ང་རྒྱལ་ཆེན་པོས་བཅད་པ་ལགས། །སྙིང་རྗེའི་རང་བཞིན་ཞགས་པ་མས། །གཞལ་ཡས་ལྷོ་སྒོ་དབྱེ་རུ་གསོལ། །མཉམ་ཉིད་ཡེ་ཤེས་སྒོ་ཕྱེ་ཞིག །རཏྣ་པྲ་ཝེ་ཤ་ཕཊ། ཕོ་བྲང་དཀྱིལ་འཁོར་ནུབ་ཀྱི་སྒོ། །འདོད་ཆགས་ཆེན་པོས་བཅད་པ་ལགས། །དགའ་བའི་རང་བཞིན་ལྕགས་སྒྲོག་མས། །གཞལ་ཡས་ནུབ་སྒོ་དབྱེ་རུ་གསོལ། །སོ་སོར་རྟོག་པའི་སྒོ་ཕྱེ་ཞིག །པདྨ་པྲ་ཝེ་ཤ་ཕཊ། ཕོ་བྲང་དཀྱིལ་འཁོར་བྱང་གི་སྒོ། །ཕྲག་དོག་ཆེན་པོས་བཅད་པ་ལགས། །བཏང་སྙོམས་རང་བཞིན་དྲིལ་བུ་མས། །གཞལ་ཡས་བྱང་སྒོ་དབྱེ་རུ་གསོལ། །བྱ་བ་ནན་ཏན་ཡེ་ཤེས་སྒོ་ཕྱེ་ཞིག །ཀརྨ་བྲ་ཝེ་ཤ་ཕཊ། །སློབ་མས་བརྡ་ཕྱག་འཚལ་བར་བྱ། ཧཱུཾ། བླ་མ་ཡི་དམ་མཁའ་འགྲོ་དང་། །ཞི་ཁྲོའི་ལྷ་ཚོགས་དཀྱིལ་འཁོར་ལྷ། །དཀོན་མཆོག་གསུམ་དང་རྡོ་རྗེ་མཆེད། །བརྡ་དང་གར་ཀྱིས་ཕྱག་བགྱིད་དོ། །ཨ་ཏི་པུ་ཧོཿ པྲ་ཏི་ཛ་ཧོཿ བླ་མས་ཐུགས་ཀྱིས་བཟུང་པ་ནི། ཧཱུཾ། འཁོར་བའི་སེམས་ཅན་ཐམས་ཅད་ཀུན། །རྒྱུད་ལྔ་ལམ་གྱི་སྒོ་བཅད་ནས། །མཐོ་རིས་ཐར་པའི་སྒོ་ཕྱེ་སྟེ། །བླ་མེད་གནས་སུ་དྲང་བར་བྱ། །བཛྲ་སུ་མ་ཛཿ སློབ་མས་གསོལ་བ་གདབ་པ་ནི། བདག་ཅག་འཁོར་བའི་སེམས་ཅན་རྣམས། །མ་རིག་རྨོངས་པའི་བག་ཆགས་ཀྱིས། །འཁོར་བའི་གནས་སུ་འཁྱམས་པ་ལ། །ཐུགས་རྗེའི་བྱིན་གྱིས་རློབ་ཏུ་གསོལ། །ཨ་ལ་ལ་ཧོཿ སློབ་དཔོན་གྱིས་འཁོར་བར་མི་བཏང་དྲང་བ་ནི། ཧཱུཾ། འཁོར་བའི་སེམས་ཅན་བུ་ལྟ་བུ། །ཡི་གེ་དཔའ་བོ་འབྲུ་ལྔ་ཡིས། །ལམ་ལྔར་སྐྱེ་བ་རྒྱུན་བཅད་ནས། །དངོས་གྲུབ་མཆོག་དང་སྤྲད་པར་བྱ། །ༀ་ཨཱཿཧཱུཾ་སྭཱ་ཧཱ། དེ་ནས་སློབ་མས་མེ་ཏོག་དོར། བདག་གི་རིག་པའི་མེ་ཏོག་འདི། །ཐུགས་རྗེ་ཆེན་པོའི་ལྷ་ལ་འབུལ། །བླ་མ་དཀྱིལ་འཁོར་ལྷ་ཚོགས་ཀྱིས། །ཐུགས་རྗེས་ དགོངས་ལ་བཞེས་སུ་གསོལ། །པྲ་ཏི་གྲིཧྞ་ཧཱུཾ། བླ་མས་དམ་ཚིག་བསྒྲག་པ ་ནི། ཧཱུཾ། འདི་ནི་དམ་ཚིག་དམྱལ་བའི་ཆུ། །དམ་ཚིག་ཉམས་ན་བསྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེ་བདུད་རྩི་ཆུ་འདིས་འགྲུབ། །ས་མ་ཡ་ཡཀྴ་ཨི་དན་དེ་ན་རུ་ཀུན། ལྕེ་ལ་བདུད་རྩི་ལན་ལྔ་བཞག །སློབ་མས་མིག་དབྱེའི་གསོལ་བ་གདབ། །མ་རིག་པ་ཡི་ལིང་ཐོག་གིས། །ཤིན་ཏུ་ལྡོང་པར་གྱུར་ལགས་ན། །ཐུགས་རྗེ་ཆེན་པོའི་བྱིན་བརླབས་ཀྱིས། །ཉོན་མོངས་སྒྲིབ་གཡོགས་བསལ་དུ་གསོལ། །བླ་མས་སློབ་མའི་མིག་དབྱེ་བ། ཧཱུྃ། སྔོན་གྱི་མིག་མཁན་རྒྱལ་པོ་ཡིས། །ཐུར་མས་ལིང་ཐོགས་བསལ་བ་ལྟར། །མ་རིག་ པ་ཡི་ལིང་ཐོག་རྣམས། །རྒྱལ་བས་དགོངས ་པས་བསལ་བར་བྱ། །ཙཀ་ཤུ་པྲ་བེ་ཤ་ཕཊ། དཀྱིལ་འཁོར་ལྷ་ངོ་བསྟན་པ་ནི། ཧཱུཾ། བུ་ཁྱོད་རྩོལ་སེམས་མ་ཆུང་ཞིག །དཀྱིལ་འཁོར་བཟང་པོ་འདི་ལ་ལྟོས། །འདི་ལ་དད་པ་རབ་ཏུ་བསྐྱེད། །དངོས་གྲུབ་ཐམས་ཅད་ཐོབ་པར་འགྱུར། །དོན་རྟོགས་བཤད་ལ་རྩོལ་བ་བསྐྱེད། །སློབ་མར་དམ་སྒྲག་པ། ཐམས་ཅད་དམ་ཚིག་ཕྱག་རྒྱ་བྱ། །ཧཱུཾ། སྐུ་གསུང་ཐུགས་ཀྱི་དམ་ཚིག་ནི། །ད་ལྟ་འདི་རུ་བཅས་པ་བཞིན། །སྲོག་ལ་བབ་ཀྱང་མ་བཏང་ཞིག །ཡན་ལག་དམ་ཚིག་རྟག་ཏུ་སྲུངས། །ས་མ་ཡ། སློབ་མས། རྡོ་རྗེ་སློབ་དཔོན་བཀའ་དྲིན་ཆེ། །བཀའ་བཞིན་བགྱིད་དོ་དམ་ཚིག་བསྲུང་། །རྟག་ཏུ་ཐུགས་རྗེས་བཟུང་བ་དང་། །བྱིན་གྱིས་རློབ་པར་མཛད་དུ་གསོལ། །མེ་ཏོག་དབུལ་ཞིང་བཏང་རག་བཏང་ངོ་། །རྡོ་རྗེ་ཕྲེང་བ་ལས། སློབ་མ་དཀྱིལ་འཁོར་འཇུག་ཆོག་གི་ལེའུ་སྟེ་བདུན་པའོ།། ༈ །།དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དེ་ནས་དབང་བསྐུར་བ་ནི། སློབ་དཔོན་མཆེད་ལྕམ་ཐམས་ཅད་ཀྱིས། །མཚམས་ནི་དྲག་ཏུ་བཅད་པར་བྱ། །བརྡ་སྒོ་དབྱེ་ཞིང་བརྡ་ཕྱག་འཚལ ། །ཕུད་གཏོར་རཀྟ་མཆོད་རྫས་དབུལ། །དམ་བཅའ་བཤགས་དང་བྱིན་དབབ་བྱ། །རྒྱུད་དང་ལུང་དང་མན་ངག་གིས། །ཞི་ཁྲོའི་དཀྱིལ་འཁོར་གཞུང་བསྲངས་ལ། །ཁ་སྒྱུར་དྲུག་གི་ལས་ཚོགས་བྱ། །ཛཔ྄་དང་བསྙེན་པའི་འཕྲོ་འདུ་བྱ། །ཚོགས་ཕུད་གཟབ་ཏུ་གསར་བྱས་ལ། གསང་བའི་དུ་ལར་གཞུག་པ་སྟེ། །ཅོད་པན་བཟུང་ལ་བྱིན་ཆེན་དབབ། །གནས་ལུགས་སེམས་ལ་ངོ་སྤྲད་བྱ། །དེ་ནས་ཅོད་པན་དོར་བར་བྱ། །ཧཱུཾ། སྔོན་ཚེ་ཚེ་རབས་གྲངས་མེད་ནས། །དགེ་བའི་སྟོབས་ཀྱིས་བསྟེན་པའི་ལྷ། །ལྷག་པའི་ལྷ་ནི་གང་ཡིན་པ། །ད་ལྟ་ཉིད་དུ་འབབ་པར་ཤོག །ཨཱོཾ་བཛྲ་པྲ་ཏི་གྲི་ན་ཧོཿ པྲ་བརྟག་གསང་མཚན་གདགས་པར་བྱ། །ཕུད་བཏང་ནས་ནི་ཚོགས་ལ་རོལ། །དེ་ནས་ཅོད་པན་དབང་བསྐུར་བ། ཧཱུྃ། ཅོད་པན་འདི་ནི་མཛེས་པ་སྟེ། །རིགས་ཀྱི་ལྷ་ཡིས་བྱིན་བརླབས་པ། །བར་ཆད་གནོད་པ་མི་ཚུགས་ཤིང་། །འཁོར་བའི་ཉེས་པས་མི་གོས་པ། །རྡོ་རྗེ་མིང་གི་དབང་ཐོབ་ཤོག །ཅོད་པན་གྱི་དབང་བསྐུར་བས། །སྦྱོར་བ་ཁམས་གསུམ་མཛད་ཀྱང་རྟག་ཆད་ཀྱི་མཐའ་ལས་འདས་ཏེ་ཉོན་མོངས་པའི་རྡུལ་གྱི་བག་ཆགས་དང་བྲལ་བར་གྱུར་ཅིག །བཛྲ་ཆེ་གེ་མོ་མིང་གི་དབང་ཐོབ་པར་གྱུར་ཅིག །དེ་ནས་བུམ་པའི་དབང་བསྐུར་བ། ཧཱུཾ། བུམ་པ་ལྷ་ཡི་གཞལ་ཡས་ཁང་། །རྒྱལ་བ་ཞི་ཁྲོའི་ལྷ་ཚོགས་བཞུགས། །སྐལ་ལྡན་ཁྱོད་ལ་དབང་བསྐུར་བས། །ལུས་ངག་ཡིད་གསུམ་སྨིན་བྱས་ནས། །ལྷ་ཡི་སྐུ་རུ་འགྲུབ་འགྱུར་ཤོག །ཨཱོཾ་ཨཱཿཧཱུཾ་སྭཱ་ཧཱ། སརྦ་ཏ་ཐཱ་ག་ཏ་ཨ་བྷི་ཥིན་ཙ་ཨ། བུམ་པ་ནང་གི་བདུད་རྩི་ཆུ་རྒྱུན་གྱི་དབང་བསྐུར་བས། ལུས་ངག་ཡིད་གསུམ་གྱི་སྒྲིབ་པ་དག་ནས། །ལྷའི་སྐུ་གསུང་ཐུགས་སུ་ལྷུན་གྱིས་གྲུབ་པའི་དབང་ཐོབ་པར་གྱུར་ཅིག །དེ་ནས་དབུ་རྒྱན་གྱི་དབང་བསྐུར་བ། སངས་རྒྱས་ཀུན་གྱི་བཞུགས་གནས་ནི། །དཔག་ཏུ་མེད་པའི་འོད་དང་ལྡན། །རྡོ་རྗེ་འཁོར་ལོ་རིན་པོ་ཆེ། །པདྨ་རྒྱ་གྲམ་ཁང་བུ་ལྔ། །ཟེ་འབྲོག་ཁང་བུའི་དབུ་རྒྱན་དབང་བསྐུར་རོ། །བཛྲ་བུདྡྷ་རཏྣ་པདྨ་ཀརྨ། ཀུ་ཏ་ཏྲཾ་ཨ་བྷི་ཤིན་ཙ་ཨ། དབུ་རྒྱན་གྱི་དབང་བསྐུར་བས། སྣོད་ཀྱི་འཇིག་རྟེན་ཕྱོགས་བཞི་དབུས་དང་ལྔ་གནས་གྱུར་ཏེ། རྡོ་རྗེ་ལ་སྩོགས་པའི་ཁང་བུ་ལྔར་གྱུར་ནས། རིགས་ལྔ་ཡེ་ཤེས་ལྔ་ཡི་བཞུགས་གནས་དམ་པར་གྱུར་ནས། བྱིན་གྱིས་བརླབས་པའི་དབང་ཐོབ་པར་གྱུར་ཅིག །དེ་ནས་རིགས་ལྔའི་དབང་བསྐུར་བ། ཧཱུཾ། རྡོ་རྗེ་སེམས་དཔའ་དེ་བཞིན་གཤེགས། །རྡོ་རྗེ་དབྱིངས་ཕྱུག་ཡུམ་དང་སྦྱོར། །གཉིས་སུ་མེད་པའི་བྱིན་རླབས་ཀྱིས། །རྡོ་རྗེ་ཐུགས་ཀྱི་དབང་ཡང་སྦྱིན། །བཛྲ་སཏྭ་ཨ་བྷི་ཥིཉྩ་ཨ། རྡོ་རྗེ་སེམས་དཔའ་ཡབ་ཡུམ་གྱི་དབང་བསྐུར་བས། ཉོན་མོངས་པ་ཞེ་སྡང་གནས་སུ་དག་ནས། མེ་ལོང་ལྟ་བུའི་ཡེ་ཤེས་ལྷུན་གྱིས་གྲུབ་ཅིང་མཐར་བྱིན་ནས། ཐུགས་ཡང་དག་པའི་དངོས་གྲུབ་ཐོབ་ནས། རྡོ་རྗེ་སེམས་དཔའ་དང་ཡུམ་རྡོ་རྗེ་དབྱིངས་ཕྱུག་མའི་སྐུ་གསུང་ཐུགས་ཀྱི་དངོས་གྲུབ་ཐོབ་པར་གྱུར་ཅིག །ཧཱུཾ། རྣམ་པར་སྣང་མཛད་དེ་བཞིན་གཤེགས། །ཀུན་བཟང་ཡབ་ཡུམ་སྦྱོར་བ་ལས། །གཉིས་སུ་མེད་པའི་བྱིན་རླབས་ཀྱིས། །རྡོ་རྗེ་སྐུ་ཡི་དབང་ཡང་སྦྱིན། །བུདྡྷ་གཉའ་ན་ཨ་བྷི་ཤིན་ཙ་ཨ། རྣམ་པར་སྣང་མཛད་ཡབ་ཡུམ་གྱི་དབང་བསྐུར་བས། ཉོན་མོངས་པ་གཏི་མུག་གནས་སུ་དག་ནས། ཆོས་ཀྱི་དབྱིངས་ཀྱི་ཡེ་ཤེས་ལྷུན་གྱིས་གྲུབ་ནས། སྐུ་མི་ཟད་པ་རྒྱན་གྱི་དངོས་གྲུབ་ཐོབ་ནས་རྣམ་པར་སྣང་མཛད་དང་ཡུམ་སངས་རྒྱས་དབྱིངས་ཕྱུག་མའི་དབང་ཐོབ་པར་གྱུར་ཅིག །ཧུཾ། རིན་ཆེན་འབྱུང་ལྡན་དེ་བཞིན་གཤེགས། །རིན་ཆེན་དབྱིངས་ཕྱུག་ཡུམ་དང་སྦྱོར། །གཉིས་སུ་མེད་པའི་བྱིན་རླབས་ལས། །ཡོན་ཏན་རྒྱ་མཚོ་དབང་ཡང་སྦྱིན། །རཏྣ་གཉའ་ན་ཨ་བྷི་ཤིན་ཙ་ཨ། རིན་ཆེན་འབྱུང་ལྡན་ཡབ་ཡུམ་གྱི་དབང་བསྐུར་བས། ཉོན་མོངས་པ་ང་རྒྱལ་གནས་སུ་དག་ནས་མཉམ་པ་ཉིད་ཀྱི་ཡེ་ཤེས་མཐར་ཕྱིན་ཞིང་ལྷུན་གྱིས་གྲུབ་སྟེ། ཡོན་ཏན་རིན་པོ་ཆེའི་དངོས་གྲུབ་ཐོབ་ནས། །རིན་ཆེན་འབྱུང་ལྡན་དང་རིན་ཆེན་དབྱིངས་ཕྱུག་མའི་དབང་ཐོབ་པར་གྱུར་ཅིག །ཧཱུཾ། སྣང་བ་མཐའ་ཡས་དེ་བཞིན་གཤེགས། །པདྨ་དབྱིངས་ཕྱུག་ཡུམ་དང་སྦྱོར། །གཉིས་སུ་མེད་པའི་བྱིན་རླབས་ལས། །གསུང་རབ་རྒྱ་མཚོའི་དབང་ཡང་སྦྱིན། །པདྨ་གཉའ་ན་ཨ་བྷི་ཤིན་ཙ་ཨ། སྣང་བ་མཐའ་ཡས་ཡབ་ཡུམ་གྱི་དབང་བསྐུར་བས། ཉོན་མོངས་པ་འདོད་ཆགས་གནས་སུ་དག་ནས། སོ་སོར་རྟོག་པའི་ཡེ་ཤེས་མཐར་ཕྱིན་ཞིང་ལྷུན་གྱིས་གྲུབ་ནས། གསུང་སྒྲ་དབྱངས་མི་ཟད་པ་སྒྲོག་པའི་དངོས་གྲུབ་ཐོབ་ནས། སྣང་བ་མཐའ་ཡས་དང་པདྨ་དབྱིངས་ཕྱུག་མའི་དབང་ཐོབ་པར་གྱུར་ཅིག །ཧཱུཾ། དོན་ཡོད་གྲུབ་པ་དེ་བཞིན་གཤེགས། །ལས་ཀྱི་དབྱིངས་ཕྱུག་ཡུམ་དང་སྦྱོར། །གཉིས་སུ་མེད་པའི་བྱིན་རླབས་ལས། །ཕྲིན་ལས་རྒྱ་མཚོའི་དབང་ཡང་སྦྱིན། །ཀརྨ་གཉའན་ཨ་བྷི་ཤིན་ཙ་ཨ། དོན་ཡོད་གྲུབ་པ་ཡབ་ཡུམ་གྱི་དབང་བསྐུར་བས། ཉོན་མོངས་པ་ཕྲག་དོག་གནས་སུ་དག་ནས་བྱ་བ་ནན་ཏན་གྱི་ཡེ་ཤེས་མཐར་ཕྱིན་ཞིང་ལྷུན་གྱིས་གྲུབ་ནས། དོན་ཡོད་གྲུབ་པ་དང་ལས་ཀྱི་དབྱིངས་ཕྱུག་མའི་དབང་ཐོབ་པར་གྱུར་ཅིག །དེ་ནས་ཁྲོ་བོ་རིགས་ལྔས་དབང་བསྐུར་བ། ཧཱུཾ། ཁྲག་འཐུང་བཛྲ་ཧེ་རུ་ཀ །བཛྲ་ཀྲོ་ཏི་ཡུམ་དང་སྦྱོར། །གཉིས་སུ་མེད་པའི་བྱིན་རླབས་ཀྱིས། །ཐུགས་ཀྱི་ཁྲོ་བོའི་དབང་ཡང་སྦྱིན། །བཛྲ་ཤྲཱི་ཧེ་རུ་ཀ་བཛྲ་ཀྲོ་ཏི་ཤྭ་རི་ཨ་བྷི་ཤིན་ཙ་ཨ། བཛྲ་ཧེ་རུ་ཀ་ཡབ་ཡུམ་གྱི་དབང་བསྐུར་བས། རྣམ་པར་ཤེས་པའི་ཕུང་པོ་གནས་སུ་དག་ནས། ཐུགས་མི་འགྱུར་པའི་ཆོས་ཉིད་ཀྱི་དབང་ཐོབ་པར་གྱུར་ཅིག །ཧཱུཾ། ཁྲག་འཐུང་བུདྡྷ་ཧེ་རུ་ཀ །བུདྡྷ་ཀྲོ་ཏི་ཡུམ་དང་སྦྱོར། །གཉིས་སུ་མེད་པའི་བྱིན་རླབས་ནས། །སྐུ་ཡི་ཁྲོ་བོའི་དབང ་ཡང་སྦྱིན། །བུདྡྷ་ཤྲཱི་ཧེ་རུ་ཀ་བུདྡྷ་ཀྲོ་ཏི་ཤྭ་རི་ཨ་བྷི་ཤིན་ཙ་ཨ། བུདྡྷ་ཧེ་རུ་ཀ་ཡབ་ཡུམ་གྱི་དབང་བསྐུར་བས། གཟུགས་ཀྱི་ཕུང་པོ་གནས་སུ་དག་ནས། སྐུ་མི་འགྱུར་བ་ཆོས་ཉིད་ཀྱི་དབང་ཐོབ་པར་གྱུར་ཅིག །ཧཱུཾ། ཁྲག་འཐུང་རཏྣ་ཧེ་རུ་ཀ །རཏྣ་ཀྲོ་ཏི་ཡུམ་དང་སྦྱོར། །གཉིས་སུ་མེད་པའི་བྱིན་རླབས་ཀྱིས། །ཡོན་ཏན་ཁྲོ་བོའི་དབང་ཡང་སྦྱིན། །རཏྣ་ཤྲཱི་ཧེ་རུ་ཀ་རཏྣ་ཀྲོ་ཏི་ཤྭ་རི་ཨ་བྷི་ཤིན་ཙ་ཨ། རཏྣ་ཧེ་རུ་ཀ་ཡབ་ཡུམ་གྱི་དབང་བསྐུར་བས། ཚོར་བའི་ཕུང་པོ་གནས་སུ་དག་ནས། ཡོན་ཏན་མི་འགྱུར་བ་ཆོས་ཉིད་ཀྱི་དབང་ཐོབ་པར་གྱུར་ཅིག །ཧཱུཾ། ཁྲག་འཐུང་པདྨ་ཧེ་རུ་ཀ །པདྨ་ཀྲོ་ཏི་ཡུམ་དང་སྦྱོར། །གཉིས་སུ་མེད་པའི་བྱིན་རླབས་ཀྱིས། །གསུང་གི་ཁྲོ་བོའི་དབང་ཡང་སྦྱིན། །པདྨ་ཤྲཱི་ཧེ་རུ་ཀ་པདྨ་ཀྲོ་ཏི་ཤྭ་རི་ཨ་བྷི་ཤིན་ཙ་ཨ། པདྨ་ཧེ་རུ་ཀ་ཡབ་ཡུམ་གྱི་དབང་བསྐུར་བས། འདུ་ཤེས་ཀྱི་ཕུང་པོ་གནས་སུ་དག་ནས། །གསུང་མི་འགྱུར་བ་ཆོས་ཉིད་ཀྱི་དབང་ཐོབ་པར་གྱུར་ཅིག །ཧཱུཾ། ཁྲག་འཐུང་ཀརྨ་ཧེ་རུ་ཀ །ཀརྨ་ཀྲོ་ཏི་ཤྭ་རི་ཡུམ་དང་སྦྱོར། །གཉིས་སུ་མེད་པའི་བྱིན་རླབས་ཀྱིས། །ལས་ཀྱི་ཁྲོ་བོའི་དབང་ཡང་སྦྱིན། །ཀརྨ་ཧེ་རུ་ཀ་ཀརྨ་ཀྲོ་ཏི་ཤྭ་རི་ཨ་བྷི་ཤིན་ཙ་ཨ། ཀརྨ་ཧེ་རུ་ཀ་ཡབ་ཡུམ་གྱི་དབང་བསྐུར་བས། འདུ་བྱེད་ཀྱི་ཕུང་པོ་གནས་སུ་དག་ནས། ཕྲིན་ལས་མི་འགྱུར་བ་ཆོས་ཉིད་ཀྱི་དབང་ཐོབ་པར་གྱུར་ཅིག །དེ་ནས་ཁ་སྒྱུར་གྱི་ཁྲོ་བོ་ལྔས་དབང་སྐུར་བ། ཧཱུཾ། དཔལ་ཆེན་ཁྲོ་རྒྱལ་གཤིན་རྗེ་གཤེད། །སྨུག་ནག་ཞལ་གཅིག་ཕྱག་གཉིས་པ། །གཡས་པའི་བེ་ཅོན་གཡོན་པའི་ཐོད་ཁྲག་དཀྲུག །ཞབས་གཉིས་བརྐྱང་བསྐུམ་ཡུམ་དང་སྦྱོར། །འཁོར་དུ་གཤིན་རྗེ་ཕོ་མོ་རྣམས་ཀྱིས་བསྐོར། །འཇམ་དཔལ་གཤིན་རྗེ་ཡབ་ཡུམ་དབང་ཐོབ་ཤོག །ༀ་ཨ་ཀྲོ་ཏེ་ཀ་ཡ་མཱན་ཏ་ཀ་ཧ་ན་མ་ཐ་བན་ཛ་ཧཱུཾ་ཕཊ་ཨ་བྷི་ཤིན་ཙ་ཨ། འཇམ་དཔལ་གཤིན་རྗེ་གཤེད་པོ་ཡབ་ཡུམ་གྱི་དབང་བསྐུར་བས། བདེ་བར་གཤེགས་པ་ཐམས་ཅད་ཀྱི་སྐུའི་བདག་ཉིད་འཇམ་དཔལ་སྐུ་ཡི་དབང་ཐོབ་པར་གྱུར་ཅིག །ཧཱུཾ། དཔལ་ཆེན་རྟ་མགྲིན་རྒྱལ་པོའི་སྐུ། །དམར་ནག་ཞལ་གཅིག་ཕྱག་གཉིས་པ། །གཡས་པའི་པདྨས་གཡོན་པའི་ཐོད་ཁྲག་དཀྲུག །ཞབས་གཉིས་བརྐྱང་བསྐུམ་ཡུམ་དང་སྦྱོར། །དབུ་གཙུག་རྟ་མགོ་རྟ་སྐད་འཚེར། །འཁོར་དུ་ཁྲོ་བོ་ཁྲོ་མོས་བསྐོར། །རྟ་མཆོག་ཡབ་ཡུམ་དབང་ཐོབ་ཤོག །ༀ་པདྨ་ཀྲོ་ཏ་ཧ་ཡ་གྷྲི་ཝ་ཧུ་ལུ་ཧུ་ལུ་ཧཱུཾ་ཕཊ་ཨ་བྷི་ཤིན་ཙ་ཨ། པདྨ་རྟ་མཆོག་ཡབ་ཡུམ་གྱི་དབང་བསྐུར་བས་བདེ་བར་གཤེགས་པ་ཐམས་ཅད་ཀྱི་གསུང་གི་བདག་ཉིད། པདྨ་གསུང་གི་དབང་ཐོབ་པར་གྱུར་ཅིག །ཧཱུཾ། དཔལ་ཆེན་རྡོ་རྗེ་གཞོན་ནུ་ནི། །ལྗང་ནག་ཞལ་གཅིག་ཕྱག་གཉིས་པ། །ཕྱག་གཉིས་རྡོ་རྗེ་ཕུར་པ་འདྲིལ། །ཞབས་གཉིས་བརྐྱང་བསྐུམ་ཡུམ་ལ་སྦྱོར། །འཁོར་དུ་ཁྲོ་བོ་ཁྲོ་མོའི་ཚོགས་ཀྱིས་བསྐོར། །རྡོ་རྗེ་གཞོན་ནུ་ཡབ་ཡུམ་དབང་ཐོབ་ཤོག །ༀ་བཛྲ་ཀཱི་ལི་ཀཱི་ལ་ཡ་སརྦ་བིག་ནན་བཾ་ཧཱུཾ་ཕཊ། ཨ་བྷི་ཤིན་ཙ་ཨ། དཔལ་རྡོ་རྗེ་གཞོན་ནུ་ཡབ་ཡུམ་གྱི་དབང་བསྐུར་བས་བདེ་བར་གཤེགས་པ་ཐམས་ཅད་ཀྱི་ཕྲིན་ལས་ཀྱི་བདག་ཉིད། ཕུར་པ་ཕྲིན་ལས་ཀྱི་དབང་ཐོབ་པར་གྱུར་ཅིག །ཧཱུཾ། དཔལ་ཆེན་བདུད་རྩི་འཁྱིལ་བ་ནི། །ལྗང་སེར་ཞལ་གཅིག་ཕྱག་གཉིས་པ། །ཕྱག་གཉིས་བདུད་རྩིའི་བུམ་པ་ཐལ་མོ་བཟེད། །ཞབས་གཉིས་བརྐྱང་བསྐུམ་ཡུམ་ལ་སྦྱོར། །འཁོར་དུ་རྩི་དང་སྨན་གྱི་སྲུང་མས་བསྐོར། །བདུད་རྩི་འཁྱིལ་པ་ཡབ་ཡུམ་དབང་ཐོབ་ཤོག །ༀ་ཨཱཿཧཱུཾ་སརྦ་པཉྩ་ཨ་མྲྀ་ཏ་ཀུན་དུ་ལི་ཧཱུཾ་ཕཊ། ཨ་བྷི་ཤིན་ཙ་ཨ། བདུད་རྩི་འཁྱིལ་པ་ཡབ་ཡུམ་གྱི་དབང་བསྐུར་བས་བདེ་བར་གཤེགས་པ་ཐམས་ཅད་ཀྱི་ཡོན་ཏན་གྱི་བདག་ཉིད། བདུད་རྩི་ཡོན་ཏན་གྱི་དབང་ཐོབ་པར་གྱུར་ཅིག །ཧཱུཾ། དཔལ་ཆེན་ཆེ་མཆོག་ཧེ་རུ་ཀ །མཐིང་ནག་ཞལ་གཅིག་ཕྱག་གཉིས་པ། །གཡས་པའི་རྡོ་རྗེས་གཡོན་པའི་དུང་ཁྲག་དཀྲུག །ཞབས་གཉིས་བརྐྱང་བསྐུམ་ཡུམ་ལ་སྦྱོར། །འཁོར་དུ་སྲིད་པའི་མ་མོ་རྣམས་ཀྱིས་བསྐོར། །བླ་མེད་ཆེ་མཆོག་ཡབ་ཡུམ་དབང་ཐོབ་ཤོག །ༀ་འགུ་ཡ་གཉའ་ན་ཤྲཱི་ཧེ་རུ་ཀ་ཀྲོ་ཏི་ཤྭ་རི་ཧཱུཾ་ཕཊ། ཨ་བྷི་ཤིན་ཙ་ཨ། ཆེ་མཆོག་ཡབ་ཡུམ་གྱི་དབང་བསྐུར་བས། བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་བདག་ཉིད། མ་མོ་རྦོད་གཏོང་གི་དབང་ཐོབ་པར་གྱུར་ཅིག །དེ་ནས་སྐུ་གསུང་ཐུགས་ཡོན་ཏན་ཕྲིན་ལས་ལྔར། ཡེ་ཤེས་ལྔར་དབང་བསྐུར། སྐུ་གསུང་ཐུགས་སུ་བྱིན་གྱིས་བརླབ་པའི་དབང་བསྐུར་ཏེ། ཧཱུཾ། ཀུན་གཞིའི་རྣམ་ཤེས་གནས་གྱུར་ཏེ། །བག་ཆགས་མ་ལུས་གཏན་སྤངས་ནས། །ཆོས་ཀྱི་དབྱིངས་ཀྱི་ཡེ་ཤེས་སུ། །དབང་མཆོག་དེས་ནི་དབང་བསྐུར་རོ། །ༀ་མ་ཧཱ་ཤུ་ཛྙཱ་ན་གཉའ་ན་སྭ་བྷཱ་ཝ་ཨཱཏྨ་ཀོ྅་ཧཾ། ཨ་བྷི་ཤིན་ཙ་ཨ། ཆོས་ཀྱི་དབྱིངས་ཀྱི་ཡེ་ཤེས་ཀྱི་དབང་བསྐུར་བས། དངོས་པོ་དང་མཚན་མ་མེད་པའི་དབང་ཐོབ་པར་གྱུར་ཅིག །ཧཱུཾ། རྣམ་པར་ཤེས་པ་གནས་གྱུར་ཏེ། །བག་ཆགས་མ་ལུས་གཏན་སྤངས་ནས། །མེ་ལོང་ལྟ་བུའི་ཡེ་ཤེས་སུ། །དབང་མཆོག་དེས་ནི་དབང་བསྐུར་རོ། །ༀ་མ་ཧཱ་ཨ་ཏི་རི་ཤ་གཉའ་ན་སྭ་བྷཱ་ཝ་ཨཱཏྨ་ཀོ྅་ཧཾ། ཨ་བྷི་ཤིན་ཙ་ཨ། མེ་ལོང་ལྟ་བུའི་ཡེ་ཤེས་ཀྱི་དབང་བསྐུར་བས། ཆོས་ཐམས་ཅད་གསལ་ལ་རྟོག་པ་མེད་པའི་དབང་ཐོབ་པར་གྱུར་ཅིག །ཧཱུཾ། ཉོན་མོངས་ཡིད་ནི་གནས་གྱུར་ཏེ། །བདག་ཏུ་རྟོག་པའི་བག་ཆག་སྤངས། །མཉམ་པ་ཉིད་ཀྱི་ཡེ་ཤེས་སུ། །དབང་མཆོག་དེས་ནི་དབང་བསྐུར་རོ། །ༀ་མ་ཧཱ་སུ་མན་ཏ་གཉའ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཨ་བྷི་ཤིན་ཙ་ཨ། མཉམ་པ་ཉིད་ཀྱི་ཡེ་ཤེས་ཀྱི་དབང་བསྐུར་བས། ཆོས་ཐམས་ཅད་ང་དང་བདག་ཏུ་རྟོག་པ་མེད་པའི་དབང་ཐོབ་པར་གྱུར་ཅིག །ཧཱུཾ། ཡིད་ཀྱི་རྣམ་ཤེས་གནས་གྱུར་ཏེ། །བག་ཆགས་མ་ལུས་གཏན་སྤངས་ནས། །སོ་སོར་རྟོག་པའི་ཡེ་ཤེས་སུ། །དབང་མཆོག་དེས་ནི་དབང་བསྐུར་རོ། །ༀ་མ་ཧཱ་པྲ་ཏ་པྲ་བེ་ཤ་གཉའ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཨ་བྷི་ཤིན་ཙ་ཨ། སོ་སོར་རྟོག་པའི་ཡེ་ཤེས་ཀྱི་དབང་བསྐུར་བས། ཆོས་ཐམས་ཅད་གསལ་ལ་མ་འདྲེས་པ་བཀྲ་སུ་ལེ་མཐོང་བའི་དབང་ཐོབ་པར་གྱུར་ཅིག །ཧཱུཾ། སྒོ་ལྔའི་རྣམ་ཤེས་གནས་གྱུར་ཏེ། །བག་ཆགས་མ་ལུས་གཏན་སྤངས་ནས། །བྱ་བ་ནན་ཏན་ཡེ་ཤེས་སུ། །དབང་མཆོག་དེས་ནི་དབང་བསྐུར་རོ། །ༀ་མ་ཧཱ་ཱཀྲི་ཧ་ཨ་ནུ་ཏ་གཉའ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཨ་བྷི་ཤིན་ཙ་ཨ། བྱ་བ་ནན་ཏན་ཡེ་ཤེས་ཀྱི་དབང་བསྐུར་བས། ཆོས་ཉིད་བྱང་ཆུབ་སེམས་ཀྱི་དོན་མཐར་ཕྱིན་ཞིང་། མྱུར་དུ་ཆོས་ཀྱི་སྐུ་མཐར་ཕྱིན་པའི་དབང་ཐོབ་པར་གྱུར་ཅིག །སྐུ་གསུང་ཐུགས་ཀྱི་དབང་བསྐུར་བ། ཧཱུཾ། སྐུ་ནི་མི་འགྱུར་ཆོས་ཀྱི་སྐུ། །དུས་གསུམ་བདེ་གཤེགས་ཐམས་ཅད་ཀྱི། །སྐུ་ཡི་ཕྱག་རྒྱས་དབང་བསྐུར་རོ། །ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། སྐུ་ཡི་ཕྱག་རྒྱས་དབང་བསྐུར་བས། ལུས་སུ་འཛིན་པ་རྣམ་པར་དག་ནས། བདེ་བར་གཤེགས་པ་ཐམས་ཅད་ཀྱི་སྐུའི་བདག་ཉིད་དུ་གྱུར་ཅིག །ཧཱུཾ། གསུང་ནི་མི་འགྱུར་ཆོས་ཀྱི་གསུང་། །དུས་གསུམ་བདེ་གཤེགས་ཐམས་ཅད་ཀྱི། །གསུང་གི་ཕྱག་རྒྱས་དབང་བསྐུར་རོ། །ༀ་སརྦ་ཏ་ཐཱ་ག་ཏ་མ་ཧཱ་ཝཱ་ཀ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། གསུང་གི་ཕྱག་རྒྱས་དབང་བསྐུར་བས། ངག་ཏུ་འཛིན་པ་རྣམ་པར་དག་ནས། བདེ་བར་གཤེགས་པ་ཐམས་ཅད་ཀྱི་གསུང་གི་བདག་ཉིད་དུ་གྱུར་ཅིག །ཧཱུཾ། ཐུགས་ནི་མི་འགྱུར་ཆོས་ཉིད་ཐུགས། །དུས་གསུམ་བདེ་གཤེགས་ཐམས་ཅད་ཀྱི། །ཐུགས་ཀྱི་ཕྱག་རྒྱས་དབང་བསྐུར་རོ། །ༀ་སརྦ་ཏ་ཐཱ་ག་ཏ་མ་ཧཱ་ཙིཏྟ་བཛྲ་སྭ་བྷ་ཝ་ཨཱཏྨ་ཀོ྅་ཧཾ། ཐུགས་ཀྱི་ཕྱག་རྒྱས་དབང་བསྐུར་བས། སེམས་སུ་འཛིན་པ་རྣམ་པར་དག་ནས་བདེ་བར་གཤེགས་པ་ཐམས་ཅད་ཀྱི་ཐུགས་ཀྱི་བདག་ཉིད་དུ་གྱུར་ཅིག །ཧཱུཾ། དབང་བསྐུར་བྱིན་གྱིས་བརླབས་པ་ཡིས། །ལུས་ངག་ཡིད་གསུམ་གནས་དག་ནས། །ལྷ་དབང་ལུས་ལ་རབ་གནས་ནས། །སྲིད་པ་གསུམ་ལ་དབང་བསྒྱུར་བས། །དབང་དང་དངོས་གྲུབ་རབ་ཏུ་གནས། །ༀ་ཨཱཿཧཱུཾ་སྭཱ་ཧཱ། ༀ་ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་དུན་ཏེ་ཥན་ཏ་ཐཱ་ག་ཏོ་ཧྱ་ཝ་དད། ཏེ་ཤཉྩ་ཡོ་ནི་རོ་དྷ་ཨེ་ཝཾ་བ་དཱི་མ་ཧཱ་ཤྲ་མ་ཎ་ཡེ་སྭཱ་ཧཱ། ཐིམ་པར་གྱུར། གསལ་བར་གྱུར། ཆོམ་པར་གྱུར། འབར་བར་གྱུར་ཏོ། །སྨིན་འཛོམ་རིགས་ན་རྟོགས་པར་འགྱུར། །སྨིན་འཛོམ་རིགས་ན་རྟག་པར་འགྱུར། །སྨིན་འཛོམ་རིགས་ན་གྲོལ་བར་འགྱུར། །ས་མ་ཡ་ཧོཿ ༈ དེ་ནས་ཞལ་ཟས་ཚོགས་དང་ཚེ་དབང་བསྐུར་ཏེ། ཧཱུཾ། བཟའ་དང་བཅའ་དང་བཏུང་བའི་ཚོགས། །ཁ་མངར་སྐྱུར་རྩུབ་ལན་ཚྭ་སྤོད། །ཛ་གད་ཛ་ཏི་ཟླ་རྒྱས་ཟླ་ཕྲོམ་དང་། །ཚེ་འཛིན་མཆོག་དང་མཱཾ་སུ་ཀུན་ཏུ་རྒྱུག །ཚིམ་བྱེད་འཇམ་དེས་རྡོ་རྗེ་ཆོས། །ཉིན་མཚན་རྟག་ཏུ་ལོངས་སྤྱོད་བདེ་ལེགས་ཤོག །ༀ་བཛྲ་ཨཱ་ཡུ་ཤེ་དུ་ཨ། སི་ཏི་ཕ་ལ་ཨ། ཞལ་ཟས་ཚོགས་ཀྱི་དབང་བསྐུར་བས། སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་ཏེ། དུས་ཐམས་ཅད་བཟའ་བཏུང་ལ་ལོངས་སྤྱོད་པའི་དབང་ཐོབ་པར་གྱུར་ཅིག །དེ་ལྟར་ལྷ་དབང་རྫོགས་ནས་ནི། །ཕུད་བཏང་ནས་ནི་ཚོགས་ལ་རོལ། །བདག་འཇུག་དབང་བསྐུར་མོས་པས་བླང་། །ཐམས་ཅད་སེམས་ཀྱི་ཆོ་འཕྲུལ་ཡིན། །རྡོ་རྗེ་སེམས་དང་གཉིས་སུ་མེད། །རེ་དོགས་ཐེ་ཚོམ་ཅན་གྱིས་ནི། །རང་གཞན་སྨིན་པར་ག་ལ་ནུས། །དད་ལྡན་སློབ་མ་རྣམས་ཀྱིས་ཀྱང་། །མ་དལ་བཟང་པོ་དབུལ་བར་བྱ། །དགོས་དང་གཅེས་དང་འཐད་པའི་ནོར། །རང་ཉིད་ཞེན་པ་དབྱིག་ལ་སོགས། །བུ་དང་ཉེ་འཁོར་ལུས་དང་སྲོག །རང་སེམས་ལྷག་མ་མེད་པ་འབུལ། །དབང་གི་རྒྱུ་ཞེས་སེམས་དཔས་གསུངས། ། དགོངས་པ ་བཞི་ལྡན་དང་པོ་པས། །ཐུགས་རྗེ་ དགོངས་པ ་ལམ་འདྲ་དབྱེ། །རང་འདོད་མེད་པའི་བསམ་པ་ཡིས། །སྟེང་སྒོ་ཕྱེ་ལ་ཡེ་ཤེས་བསྟིམ། །ཡིད་གཉིས་མེད་པའི་ནན་ཏན་བྱ། །བུམ་པ་བ་དང་བུང་བའི་ཚུལ། །མོས་དང་དམ་ཚིག་ཞིང་སུ་ལ། །དབང་གི་སུ་བོན་ཐེབ་ཙ་ན། །མྱུ་གུ་རང་དབང་མེད་པར་སྐྱེ། །རྒྱུ་ནི་རང་རིག་བྱང་ཆུབ་སེམས། །རྐྱེན་ནི་བླ་མས་བྱིན་གྱིས་བརླབས། །དགོས་པ་རྒྱུད་ནི་སྨིན་པར་བྱེད། །མཚུངས་ལྡན་རྒྱུ་ནི་ཡིག་འབྲུའི་ཚུལ། །དག་བྱེད་ཧེ་རུ་ཀ་ལྔ་ཡིན། །ནུས་པ་རྒྱུད་ལ་བཞག་པ་ཡིན། །ཉོན་མོངས་མ་སྤངས་གནས་སུ་དག །ཡེ་ཤེས་རྣམ་ལྔ་རང་བྱུང་ཤར། །སྐུ་གསུམ་སུ་ལ་ཐེ་ཚོམ་མེད། །ཡེ་ཤེས་ལྷ་དབང་རྫོགས་པ་དང་། །ལྷག་མ་མཆོད་པ་གཏོར་མ་དགྱེ། །རྣམ་བཞི་བྲོ་བརྡུང་བཀྲ་ཤིས་གསོལ། །གནས་ལུགས་རྟོག་མེད་ངང་ལ་བཞག །ལྷག་ཆད་འཁྲུལ་ལ་བཟོད་པར་གསོལ། །རྡོ་རྗེ་ཕྲེང་བ་ལས། ལྷ་དབང་བསྐུར་བའི་ལེའུ་སྟེ་བརྒྱད་པའོ།། ༈ །།དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །བཀའ་དང་ཏནྟྲ་ཐམས་ཅད་ལས། །ལྷ་སྲིན་ཟིལ་གྱིས་མ་གནོན་པར། །སངས་རྒྱས་ཐོབ་པར་མ་བཤད་དེ། །གནས་ན་གནས་དང་ཁ་འཐོར་དང་། །ཚོགས་བརྒྱད་མ་དག་སྡེ་བརྒྱད་དེ། །གཟུང་དང་འཛིན་པ་མ་སྤང་པས། །ཕྱི་ནང་གཉིས་སུ་བྱུང་བ་ཡིན། །དབང་སྡུད་ཟིལ་གྱིས་ནན་པའི་ཕྱིར། །འདྲེ་ཛཿས་དྲངས་ལ་སྐུ་ལ་བསྟིམ། །ཁོག་པ་ཕྲལ་ལ་བསྒྲལ་བར་བྱ། །ཤ་ཁྲག་རུས་པ་བཟའ་བར་བྱ། །དུག་གསུམ་རྩད་བཅད་ལྟུམས་ནས་དབྱུང་། །གཟུགས་ལ་བསྟིམས་ལ་གསལ་བར་བསྐྱེད། །དབང་བསྡུ་ལས་ལ་གཟུད་པའི་ཕྱིར། ཞབས་འོག་མནན་ཞིང་བྲན་བཞིན་བསམ། །སྨན་ཕུད་གཏོར་ལ་གསོ་བར་བྱ། །ཕུད་དང་གཏོར་མ་བཟང་དུ་བཤམ། །བདག་གི་སྲུང་མར་དམ་ལ་གདགས། །བསྟོད་པ་བཅོལ་བསྐུལ་ཤེས་ཚད་བྱ། །བསྟན་པ་སྲུངས་ཤིག་ཕྲིན་ལས་བཅོལ། །དམ་ཚིག་གཏོར་མ་མི་བཅག་གོ། །དེ་ནས་དབང་བསྐུར་རིམ་པ་ནི། །སློབ་མ་ཕྱག་ན་རྡོ་རྗེར་བསྒོམ། །ལག་ཏུ་རྡོ་རྗེ་དྲིལ་བུ་གཏད། །ཧཱུཾ། དུས་མཆོག་བཟང་པོ་དུ་ནང་ནི། །ཁྱོད་ཀྱང་ཕྱག་རྡོར་སྐུད་རུ་བྱས། །དཔལ་ཆེན་ཕྱག་ན་རྡོ་རྗེ་ཡི། །སྐུ་གསུང་ཐུགས་དང་ཡོན་ཏན་དང་། །ཕྲིན་ལས་ལྔ་ཡི་དབང་བསྐུར་བས། །ཁྱོད་ཀྱང་ཕྱག་རྡོར་སྐུར་གྱུར་ནས། །དྲེགས་པ་ཀུན་གྱི་གཉེན་པོ་ཡིན། །ཐམས་ཅད་ཚར་གཅོད་དབང་སྡུད་ཤོག །ༀ་བཛྲ་ཙན་དྷ་སརྦ་དུཤྚཾ་ཏ་ཀ་ཧ་ན་དུ་ཧ་པ་ཙ་ཧཱུཾ་ཕཊ། དཔལ་ཕྱག་ན་རྡོ་རྗེའི་དབང་བསྐུར་བས། ལུས་ངག་ཡིད་གསུམ་མཐུ་སྟོབས་བདག་པོའི་སྐུ་གསུང་ཐུགས་སུ་གྱུར་ནས། དྲེགས་པ་ཅན་གྱི་ལྷ་མ་སྲིན་སྡེ་བརྒྱད་དབང་སྡུད་ཟིལ་གྱིས་གནོན་པའི་དབང་ཐོབ་པར་གྱུར་ཅིག །དེ་ནས་སྡེ་བརྒྱད་ཙ་ཀ་ལི། །རང་དང་སློབ་མའི་མདུན་དུ་བཞག །སོ་སོའི་སྲོག་སྙིང་དྲངས་ལ་བསྟིམ། །རང་ཉིད་དཔལ་ཆེན་སྐུར་བསྒོམས་ལ། །ཧཱུཾ། ང་ནི་ཟ་བྱེད་དཔལ་ཆེན་ཡིན། །གཤིན་རྗེ་མ་མོ་རྒྱལ་པོ་དང་། །དགྲ་ལྷ་བཙན་དང་གནོད་སྦྱིན་དང་། །ཀླུ་དང་གཟའ་དང་ལྷ་སྲིན་རྣམས། །གདུལ་དཀའ་མ་ལུས་འདུལ་བའི་ཕྱིར། །མངོན་མཐོན་སྟོབས་ཀྱིས་བསྒྲལ་བར་བྱ། །ཤ་རུས་ལ་སོགས་བཟའ་བར་བྱ། །བཛྲ་སརྦ་དུཥྚཾ་ཏྲིག་ནན། ཨེ་ཧུར་ཐུམ་ཛ་མཱ་རུ་ཡ་རྦད། ཅེས་བསྒྲལ་ནས་ནི། དྲེགས་པའི་ཤ་ཁྲག་རུས་པ་ཟོས། །ཉོན་མོངས་དྲེགས་པ་ཚར་བཅད་ནས། །དཔལ་གྱི་ལྷུམས་ནས་ཕྱུངས་ནས་ནི། །གཟུགས་ལ་བསྟིམས་ནས་དངོས་སུ་བསམ། །དེ་ནས་སློབ་མའི་བསྲུང་མར་གཏད། ཧཱུཾ། ཞེ་སྡང་དབང་གི་དྲེགས་པ་ནི། །གཤིན་རྗེ་བདུད་ཀྱི་རྒྱལ་པོ་ཡིན། །མཐིང་ནག་བེ་ཅོན་ཐོད་ཁྲག་ཐོགས། བྲན་དང་ཁོལ་པོ་ཡང་གཡོག་དང་། །འབངས་ཀྱི་ཚུལ་དུ་ཁྱོད་ལ་གཏད། །གཉེན་པོ་སྒྲུབ་པ་ཡུན་མ་ཐུང་། །བཀའ་དང་དམ་ལ་གནས་པར་གྱུར། །ཡ་མ་རུ་ཙ་སུ་མ་ཡ་ཛ་པ་ཤཾ་ཀུ་རུ་ཧ྄ཱུཾ་ཕཊ། བྲན་དང་ཁོལ་པོ་གཡོག་བཞིན་བསམ། སློབ་མའི་ཞབས་འོག་གནོན་དུ་གཞུག །ཧཱུཾ། འདོད་ཆགས་དབང་གི་དྲེགས་པ་ནི། །མ་མོ་མཁའ་འགྲོའི་རྒྱལ་པོ་ཡིན། །དམར་ནག་སྙིང་དང་ཐོད་པ་ཐོགས། བྲན་དང་ཁོལ་པོ༴ འབངས་གྱི་ཚུལ་དུ༴ གཉེན་པོ་སྒྲུབ་པ༴ བཀའ་དང་དམ་ལ༴ ཏྲག་རཀྴ་ཁ་མུན་ཏྲ་ཛ་པ་ཤཾ་ཀུ་རུ་ཧཱུཾ་ཕཊ། ཧཱུཾ། ང་རྒྱལ་དབང་གི་དྲེགས་པ་ནི། །རྒྱལ་མོ་གིང་དཀར་མོ་ཤེལ་གྱི་ཐོད་ཁྲག་ཐོགས། །གི་ཚོགས་རྣམས་ཡིན། །བྲན་དང་༴ འབངས་ཀྱི༴ གཉེན་པོ༴ བཀའ་དང་༴ ཏྲི་དུ་རུ་ཧྲིང་དུ་རུ་དུ་རུ་ཧ་རུ་ཏི་ཛ་པ་ཤཾ་ཀུ་རུ་ཧཱུཾ་ཕཊ། ཧཱུཾ། ཕྲག་དོག་དབང་གི་དྲེགས་པ་ནི། །དམུ་དང་བཙན་གྱི་ཚོགས་དམར་ནག་ཤང་ལང་ཐོད་ཁྲག་ཐོགས། ཡིན་ཏེ། །བྲན་དང༴ འབངས་ཀྱི༴ གཉེན་པོ༴ བཀའ་དང་༴ ཤུ་ལ་རུ་ཙ་ཏྲི་ནི་ཏྲ་མ་ཤ་ཡ་མ་ཛ་པ་ཤང་ཀུ་རུ་ཧཱུཾ་ཕཊ། ཧཱུཾ། ལས་ཀྱི་དབང་གི་དྲེགས་པ་ནི། །དགྲ་ལྷ་མ་སངས་ཚོགས་དབྱུག་པ་རྡོ་རྗེ་ཐོད་ཁྲག་ཐོགས། ཡིན་ཏེ། །བྲན་དང་༴ འབངས་ཀྱི༴ གཉེན་པོ༴ བཀའ་དང་དམ་ལ༴ བཛྲ་སུ་ཏུ་སུ་མ་ཡ་རུ་ཡ་རུ་ཙ་ཏྲི་ཛ་པ་ཤང་ཀུ་རུ་ཧཱུཾ་ཕཊ། ཧཱུཾ། ང་རྒྱལ་དབང་གི་དྲེགས་པ་ནི། གནོད་སྦྱིན་སྲིན་པོའི་ཚོགས་སེར་པོ་རུ་དར་ཐོད་ཁྲག་ཐོགས། ཡིན་ཏེ། །བྲན་དང་༴ འབངས་ཀྱི༴ གཉེན་པོ༴ བཀའ་དང་༴ ཧྲི་བཛྲ་ཡཀྴ་བཛྲ་ཧྲིཾ་ཧྲིཾ་ཛ་པ་ཤང་ཀུ་རུ་ཧཱུཾ་ཕཊ། ཧཱུཾ། གཏི་མུག་དབང་གི་དྲེགས་པ་ནི། །ཀླུ་དང་ཀླུ་བདུད་ཚོགས་ནག་པོ་སྦྲུལ་ནག་རུ་སྦལ་ཐོགས། ཡིན་ཏེ། །བྲན་དང་༴ འབངས་ཀྱི༴ གཉེན་པོ༴ བཀའ་དང༴ ནཱ་ག་རུ་ཙས་མ་ཡ་ཕུ་ཛ་པ་ཤང་ཀུ་རུ་ཧཱུཾ་ཕཊ། ཧཱུཾ། འཇིག་རྟེན་ལས་ཀྱི་དྲེགས་པ་ནི། །གཟའ་དང་གདོང་མོའི་ཚོགས་དུད་ཁ་ཆུ་སྲིན་ཐོད་ཁྲག་ཐོགས། ཡིན་ཏེ། །བྲན་དང་ཁོལ་བོ་ཡང་གཡོག་དང་། །འབངས་ཀྱི་ཚུལ་དུ་ཁྱོད་ལ་གཏད། །གཉེན་པོ་སྒྲུབ་པ་ཡུན་མ་ཐུང་། །བཀའ་དང་དམ་ལ་གནས་པར་འགྱུར། །རཱ་ཧུ་ལ་མ་ཏྲིག་ཛ་པ་ཤང་ཀུ་རུ་ཧཱུཾ་ཕཊ། དེ་ནས་ཞབས་འོག་ཕྱུངས་ནས་ནི། །སྲོག་སྙིང་བགྲང་ལ་ཕུད་ཀྱིས་གསོ། །ཨོཾ་ཨཱཿཧཱུཾ་སུ་མ་ཡ་ཨ་མྲྀ་ཏ་ཁཱ་ཧི་ཁཱ་ཧི། སྙིང་དང་དྲན་བཞིན་བྲན་དང་བྲན་མོའི་ཚོགས། །དམ་ལས་མ་འདའ་སུ་མ་ཡ། །བདག་གི་སྲུང་མར་མངའ་གསོལ་ལོ། །སངས་རྒྱས་ཀྱི་བསྟན་པ་སྲུངས། དཀོན་མཆོག་གི་དབུ་འཕང་བསྟོད། རྣལ་འབྱོར་གྱི་སྐུ་དགྲ་སྒྲོལ་ཅིག །དམ་ལ་གདགས་ཤིང་ཕྲིན་ལས་བཅོལ། །འཇིག་རྟེན་ལྷ་སྲིན་འདི་དག་ཀྱང་། །ལ་ལ་བདེ་གཤེགས་ཞལ་མཐོང་བས། ། དགོངས་པ ་མྱ་ངན་འདས་མོད་ཀྱང་། །སྦྱོར་བ་འཇིག་རྟེན་པ་ཡི་ཚུལ། །དམ་ལ་བཏགས་པའི་དབང་གིས་སུ། །ད་རུང་འཇིག་རྟེན་ཡིན་མོད་ཀྱང་། །དགེ་བའི་ལས་ལ་མོས་པ་དང་། །དམ་ལ་མ་ཐོག་ལས་ངན་པས། །ས་བོན་རྩུབ་པས་ཕན་གནོད་ཆེ། །ཆོས་ལ་མ་དད་ནག་པོའི་ཚོགས། །རང་ཐུང་ཚད་འཕེལ་ལེགས་ཉེས་སྤྲུལ། །གནས་མེད་ཟས་སུ་ཕུད་གཏོར་ཕུལ། །དེ་འདྲ་འཇིག་རྟེན་ཚོགས་མང་བས། །དྲོད་སྩོགས་རིམ་གྱིས་མ་ཐོབ་པར། །མངལ་སྐྱེས་ལུས་ལ་བརྟེན་ནས་ནི། །དཔའ་དང་བརྟུལ་ཞུགས་ང་རྒྱལ་གྱིས། །ལྷ་འདྲེ་དྲེགས་པ་འདུལ་མི་བྱ། །བསོད་ནམས་རྒུད་པའི་དུས་སུ་ནི། །ཁོས་སུ་ཡལ་བར་ཅི་ལ་འཇོག །སྤྱོད་པ་མ་རྩིང་རྣལ་འབྱོར་པ། །མོས་སྤྱོད་ཆོས་སྒོར་ཞུགས་པས་ཀྱང་། །ལྷ་སྤྲུག་བཅོ་ལྔ་ལ་སོགས་པའི། །བླ་མའི་ཆོས་གཞུང་སྲུང་མ་དང་། །གནས་དེར་གནས་སམ་ཡུལ་གྱི་ལྷ། །ལྷ་སྲིན་སྡེ་བརྒྱད་ཐམས་ཅད་ལ། །གསོལ་ཞིང་མཆོད་པར་བྱ་བར་ཤེས། །བླ་མ་སངས་རྒྱས་བསྟན་དོན་དུ། །མཆོད་རྟེན་དམོད་མོ་གང་སྒྲུབ་ཡང་། །མཉེས་བྱས་སྒྲུབ་ཐབས་ཚང་བར་ཞུ། །ཕལ་དུ་སྤྱི་མཐུན་རིག་མ་འདས། །འདོད་ཡོན་མཆོད་གཏོར་བཟང་ན་འགྲུབ། །ལེགས་ཉེས་སྟངས་འཛིན་དངོས་གྲུབ་ནི། །དམ་ཚིག་དགོང་པ་ལས་འཕྲོ་དང་། །སྒྲུབ་ཐབས་ཟབ་དང་མི་ཟབ་དང་། །གང་ནུས་དངོས་གྲུབ་རིམ་པར་འབྱུང་། །ཡིད་གཉིས་རློམ་པ་ལྷ་སྦྱངས་ནས། །ལས་མི་འགྲུབ་པས་ཐེ་ཚོམ་སྤང་། །དེ་ལྟར་བྱས་ཀྱང་མ་འགྲུབ་ན། །སྤོང་པའི་ཆོ་གས་ཨར་ལ་གཏད། །དེས་ཀྱང་འཇིག་རྟེན་དངོས་གྲུབ་ཐོབ། །སྤྱི་བསྟན་སྲུངས་ཤིག་རྣལ་འབྱོར་པ། །རང་རྒྱུད་འགྲོགས་ཀྱང་མི་བདེ་བས། །སྐྱོན་ཡང་ཤིན་ཏུ་མང་བར་གསུངས་། ། དགོངས་པ ་བསྐྱེད་ཅིང་ཟབ་པར་བྱ། །འདི་དག་ཕུན་བུ་བཀོལ་བ་ཡང་། །བརྒྱུད་རིམ་བྱིན་བརླབས་ཐོབ་པ་དང་། །རྟོག་ཚོགས་ཉེ་བར་གྱུར་པ་དང་། །གཉིས་མེད་གནས་ལུགས་གཏིང་ནས་རྟོགས། །ཟག་བཅས་འབྱུང་བ་དབང་དུ་བསྡུས། །བདེན་མཐོང་ཆོས་ཉིད་རང་ལས་རྙེད། །དེ་ལྟ་བུ་ཡི་རྣལ་འབྱོར་པས། །ལས་ལ་བཙུད་ན་དངོས་གྲུབ་ནི། ། དགོངས་པ ་དག་ལ་མི་སྒྲིབ་པས། །བདེ་བར་གཤེགས་པ་ཉིད་དང་མཚུངས། །འདས་དང་མ་འདས་དངོས་གྲུབ་ཀུན། །བླ་མ་ཐུགས་རྒྱུད་མཉེས་ལས་འབྱུང་། །རྡོ་རྗེ་ཕྲེང་བ་ལས། སྡེ་བརྒྱད་འཇིག་རྟེན་པའི་དབང་གི་ལེའུ་སྟེ་དགུ་པའོ།། ༈ །།དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །རྡོ་རྗེ་སློབ་དཔོན་དབང་བསྐུར་བ། །རྡོ་རྗེ་རྒྱལ་པོ་བཀའ་ཡིས་ནི། །སློབ་མ་ཁྲི་སྟན་ཆེན་པོར་བཞག །སྟེང་ན་གདུགས་ཀྱང་དབུབ་པར་བྱ། །ལག་ཏུ་རྡོ་རྗེ་དྲིལ་བུ་གཏད། །སློབ་དཔོན་དབྱིངས་ལ་དབང་རྫས་ཐོགས། །འདི་སྐད་བརྗོད་ལ་དབང་བསྐུར་བྱ། །ཧཱུཾ། བདེ་གཤེགས་སྲས་པོ་དམ་པའི་མཆོག །སྔོན་གྱི་ཐུགས་དམ་བཀའ་དང་མི་འགལ་ཞིང་། ། དགོངས་པ ་ཡིད་བཞིན་ནམ་མཁའི་མཁའ་དང་མཉམ། །ཕྲིན་ལས་ཐབས་ཀྱི་རྡོ་རྗེ་སློབ་དཔོན་མཆོག །འགྲོ་བ་མ་ལུས་ཀུན་གྱི་རེ་སྐོང་བ། །སྟོན་པའི་སྒྲོན་མ་མ་ལུས་ཁ་ལོ་འདྲེན། །ཤེས་རབ་མཐར་རྫོགས་ཡོན་ཏན་ལྷུན་གྱིས་གྲུབ། །སྡུག་བསྔལ་སྐྱབས་མཛད་མ་རིག་སེམས་ཅན་འདྲེན། །ཆོས་ཉིད་དོན་སྟོན་མ་ལུས་ཁ་ལོ་སྒྱུར། །སངས་རྒྱས་གདུང་གསོབ་རྡོ་རྗེ་སློབ་དཔོན་མཆོག །གང་ཡིན་མངོན་དུ་གྱུར་པ་ལྷུན་གྲུབ་པའི། །དབང་རྣམས་མ་ལུས་ཁྱོད་ཀྱིས་ཐོབ་པར་ཤོག །ༀ་སརྦ་ཏ་ཐཱ་ག་ཏ་མ་ཧཱ་གུ་ཧྱ་ཤྭ་རུ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། རྡོ་རྗེ་སློབ་དཔོན་གྱི་དབང་བསྐུར་བས། དམ་ཚིག་དབང་གི་སློབ་དཔོན། ནམ་ངག་གི་སློབ་དཔོན། ཤེས་རབ་རྒྱུད་ཀྱི་སློབ་དཔོན། རྡོ་རྗེ་སློབ་དཔོན་གྱི་དབང་ཐོབ་པར་ཤོག །དེ་ནས་གདུགས་ཀྱི་དབང་བསྐུར་བ། ཧཱུཾ། གཟུགས་མཛེས་གསེར་གྱི་ཡུ་བར་ལྡན། །སྐྱབས་ཆེན་བྱམས་པ་ཆེན་པོ་སྟེ། །ཉོན་མོངས་གདུང་བ་སེལ་བའི་ཕྱིར། །དེ་བས་གདུགས་ཀྱི་དབང་བསྐུར་རོ། །ༀ་སུཪྱ་རཏྣ་ཨ་བྷེ་ཤེ་ན་ཧོཿ གདུགས་ཀྱི་དབང་བསྐུར་བས། ཉོན་མོངས་པའི་ཚ་བ་སེལ་ཏེ། ཡེ་ཤེས་ཀྱི་སྣང་བ་སྐྱེས་ནས། ཐུགས་རྗེ་ཆེན་པོས་འཁོར་བ་ལས་སྐྱོབས་པའི་དབང་ཐོབ་པར་གྱུར་ཅིག །རྡོ་རྗེའི་དབང་བསྐུར་བ། ཧཱུཾ། མཆོད་པའི་རྡོ་རྗེ་རྩེ་ལྔ་པ། །སྐུ་ལྔ་ཆོས་ལྔ་ཡེ་ཤེས་ལྔ། །ཉོན་མོངས་དུག་ལྔ་འཇོམས་པའི་རྡོ་རྗེ་སྟེ། །རྡོ་རྗེ་འདི་ཡི་དབང་ཐོབ་ཤོག །གཉའ་ན་པན་ཙ་བཛྲ་ཨ་བེ་ཤ་ཨ། རྡོ་རྗེ་རྩེ་ལྔ་པའི་དབང་བསྐུར་བས། ཡེ་ཤེས་ལྔ་སྐུ་ལྔར་ལྡན་པའི་དབང་ཐོབ་པར་གྱུར་ཅིག །དྲིལ་བུའི་དབང་བསྐུར་བ། ཧཱུཾ། ཆོས་ཀྱི་སྒྲ་ཡི་དྲིལ་བུ་འདི། །གསུང་རབ་བཅུ་གཉིས་སྒྲ་བསྒྲགས་པས། །ཡེ་ཤེས་ཆེན་པོ་ཆོས་ཀྱི་དབྱིངས། །ཐབས་དང་ཤེས་རབ་དབང་བསྐུར་རོ། །དྷརྨཱ་ཱདྷ་ཏུ་ཨ་བྷི་ཤིན་ཙ་ཨ། དྲིལ་བུའི་དབང་བསྐུར་བས། ཆོས་ཐམས་ཅད་སྒྲ་བརྙན་ལྟ་བུའི་ཡེ་ཤེས་ལས། ཐབས་ཤེས་རབ་གཉིས་སུ་མེད་པའི་དབང་ཐོབ་པར་གྱུར་ཅིག །ཉན་པའི་དབང་བསྐུར་བ། ཧཱུཾ། ཤེས་རབ་རྣམ་གསུམ་དག་པ་ཡིས། །ཤེས་པའི་རྒྱུད་རྣམས་འགྲོལ་བའི་ཕྱིར། །བདེ་གཤེགས་བཀའ་ཡི་བྱིན་བརླབས་ལས། །དམ་པའི་རྫས་སུ་གང་སྒྲུབ་པ། །གསང་ཆེན་ཐུགས་ཀྱི་མན་ངག་དང་། །ཐེག་པ་ཕྱི་ནང་མཐའ་དག་ཀུན། །རྣ་བའི་དབང་པོས་ཉན་པ་དང་། །ཤེས་རབ་བློ་ཡིས་འཛིན་པ་དང་། །ཉན་པའི་དབང་རྣམས་ཐོབ་པར་ཤོག །ཨཱོཾ་དྷརྨ་ཁ་ནི་སཱ་བྷཱ་ཝ་ཨཱཏྨ་ཀོ྅་ཧཾ། པོ་ཏི་བྱིན་ཏེ་ཉན་པའི་དབང་བསྐུར་བས། བསམ་གྱིས་མི་ཁྱབ་པའི་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་ལ། མཐུན་འཇུག་ཉན་པའི་དབང་ཐོབ་པར་གྱུར་ཅིག །ཕྱག་ཤིང་གཏད་ལ་བདུད་རྩི་ཡིས། །རྣ་བ་གཡས་གཡོན་ཐིག་ལེ་བྱ། །འབྲི་བའི་དབང་བསྐུར་བ་ནི། ཧཱུཾ། བདེ་གཤེགས་གསུང་གི་བཀའ་རྒྱུད་རྣམས། །ཐེག་པ་ཕྱི་ནང་མཐའ་དག་ཀུན། །ཚིག་དང་ཡི་གེར་གནས་པ་ཡིས། །མི་ནུབ་ཡུམ་གྱི་བཙས་སུ་འགྱུར། །ལག་གིས་ཡེ་གེ་འབྲི་བ་དང་། ཤེས་རབ་བློ་ཡིས་འཛིན་པ་ཡིས། །འབྲི་བའི་དབང་རྣམས་ཐོབ་པར་ཤོག །དྷརྨ་ཁ་ནེ་ཨཱ་ལི་ཀཱ་ལི་སྭ་བྷཱ་ཝ་ཨཏྨ་ཀོ྅་ཧཾ། །འབྲི་བའི་དབང་བསྐུར་བས། ཆོས་ཐམས་ཅད་མི་བརྗེད་པའི་གཟུངས་དང་ལྡན་ཏེ། སྤྲུལ་སྐུས་འགྲོ་དོན་བྱེད་པའི་དབང་ཐོབ་པར་གྱུར་ཅིག །ཡིག་ཆ་གཏད་ལ་བདུད་རྩི་ཡིས། །མཐེབ་འཛུབ་གཉིས་ལ་ཐིག་ལེ་བྱ། །དེ་ནས་བཤད་པའི་དབང་བསྐུར་བ། །ཧཱུཾ། ཤེས་རབ་རྣམ་གསུམ་དག་པར་སྦྱངས་པ་ཡིས། །འདྲེན་པ་བླ་མེད་སྐྱེས་བུའི་སྐུར་སྟོན་པ། །ཐེག་པ་མཐའ་དག་གྲུབ་པའི་མཐུ་མངའ་བ། །ཤེས་རབ་རིག་པ་མཛོད་ཀྱི་ཁ་ཕྱེ་ལ། །ཚངས་པའི་གསུང་ཕྱུང་ཀུན་ལ་གོ་བ་ཡི། །ཐེག་པ་མཐའ་དག་ཆོས་རྣམས་བཤད་པར་བྱོས། །ཨཱོཾ་སརྦ་ཏ་ཐཱ་ག་ཏ་ཤྲཱི་དྷརྨ་སྭ་བྷཱ་ཝ་ཨཱཏྨ་ཀོ྅་ཧཾ། ཆོས་བཤད་པའི་དབང་བསྐུར་བས། གསུང་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་། རྒྱུ་འབྲས་ཀྱི་ཆོས་ཀྱི་དད་ལྡན་སྐྱེས་བུ་ཚིམ་པར་བྱེད་པ། ཆོས་སྒྲ་སྒྲོགས་པའི་དབང་ཐོབ་པར་གྱུར་ཅིག །ཀཱ་ལི་པོ་ཏི་གཏད་བདུད་རྩིས་ལྕེ་ལ་ཐིག་ལེ་བྱས་ལ་བཞག །སྒྲུབ་པའི་དབང་བསྐུར་བ་ནི། ཧཱུཾ། རྣལ་འབྱོར་ཆེན་པོ་སྐུ་གསུང་ཐུགས་ཀྱི་བདག །སྡུག་བསྔལ་གནས་ཉིད་བྱང་ཆུབ་བདེ་སྒྲུབ་པའི། །རྫས་ཉིད་ཡེ་ཤེས་ལྔར་སྒྲུབ་ཕྱག་རྒྱའི་ཚོགས། །རྣམ་ཤེས་ཕུང་པོ་ལྔ་རྣམས་དཀྱིལ་འཁོར་ཚོགས། །སྐྱེ་མཆེད་ཁམས་རྣམས་སངས་རྒྱས་མང་པོའི་ཚོགས། །བདེ་གཤེགས་ཐབས་ཀྱི་འབྲས་བུ་གང་ཡིན་པ། །བདེ་གཤེགས་ལྷ་རྣམས་སྒྲུབ་པའི་དབང་ཐོབ་ཤོག །ༀ་ཡོ་ག་སརྦ་མ་ཧཱ་ཏ་ཐ་ག་ཏ་མ་ཧཱ་སྭ་བྷཱ་ཝ་ཨཱཏྨ་ཀོ྅་ཧཾ། སྒྲུབ་པའི་དབང་བསྐུར་བས། སློབ་མའི་ཕུང་པོ་ཁམས་དང་སྐྱེ་མཆེད་ལྷ་དང་ལྷ་མོའི་རང་བཞིན་དུ་གྱུར་ནས། ཡི་དམ་ལྷ་བསྙེན་ཅིང་སྒྲུབ་པའི་དབང་ཐོབ་པར་གྱུར་ཅིག །སྐུ་གཟུགས་བསྟན་ཅིང་བདུད་རྩི་ཡིས། །སྙིང་གར་ཐིག་ལེ་བྱས་ལ་བཞག །དེ་ནས་ཕྲིན་ལས་རྣམ་བཞིའི་དབང་བསྐུར་བ། ། ཧཱུཾ། ཤེས་རབ་ཐབས་ཀྱི་ངོ་བོ་ལས། །ཁམས་གསུམ་སྲིད་གསུམ་མཐའ་ཡས་པའི། །བདེ་གཤེགས་ཕྲིན་ལས་མཛད་པའི་ཕྱིར། །ཞི་བས་འཇིགས་པ་བརྒྱད་ལས་སྐྱོབས། །དབང་གིས་མོས་པ་རྣམ་བཞིར་སྡུད། །རྒྱས་པས་འབྱོར་བ་དྲུག་ལྡན་འགྱུར། །དྲག་པོས་དགྲ་བགེགས་ཚར་གཅོད་པ། །ཏ་ན་ག་ན་སྦྱོར་སྒྲོལ་རྣམས། །ཕྲིན་ལས་ཐམས་ཅད་འགྲུབ་པའི་དབང་ཐོབ་ཤོག །ༀ་ཤྲཱི་སརྦ་ཏ་ཐཱ་ག་ཏ་ཀརྨ་ཤྭ་རུ་སྭ་བྷཱ་ཝ་ཨཱཏྨཀོ྅་ཧཾ། ཕྲིན་ལས་ཀྱི་དབང་བསྐུར་བས། ཞི་རྒྱས་དབང་དྲག་བཞིས་གསང་སྔགས་ཀྱི་ཕྲིན་ལས་མཐར་ཕྱུངས་ནས། རྣལ་འབྱོར་དབང་ཕྱུག་ཆེན་པོའི་དབང་ཐོབ་པར་གྱུར་ཅིག །ཕྲེང་བ་སྦྱིན་ཞིང་བདུད་རྩི་ཡིས། །ཡན་ལག་ལྔ་ལ་ཐིག་ལེ་བྱ། །དེ་ལྟར་དབང་བསྐུར་རྫོགས་པ་ན། །གསང་སྔགས་ཆོས་ལ་དབང་བྱེད་པའི། །ཆོས་ལ་དབང་སྒྱུར་རྒྱལ་པོར་འགྲོ། །སློབ་དཔོན་མཉེས་པར་མ་བྱས་ཤིང་། །དབང་རྣམས་ཐོབ་པར་མ་བྱས་ན། །ཉན་པ་ལ་སོགས་རྩོམ་པ་ན། །འབྲས་བུ་མེད་ཅིང་བརླགས་པར་འགྱུར། །དེས་ན་དབང་བསྐུར་ཐོབ་པ་གཅེས། །རྡོ་རྗེ་ཕྲེང་བ་ལས། རྡོ་རྗེ་སློབ་དཔོན་གྱི་དབང་བཅུ་བསྐུར་བའི་ལེའུ་སྟེ་བཅུ་པའོ།། ༈ །།དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །རྣལ་འབྱོར་གསང་བའི་དབང་བསྐུར་ན། །ཡིད་འོང་དབེན་པའི་གནས་དག་ཏུ། །ཕུན་སུམ་ཚོགས་པ་ལྔ་ལྡན་པས། །མཚན་ལྡན་བཀྲ་ཤིས་ཡིད་འོང་མ། །བཅུ་དྲུག་ཉི་ཤུ་རྩ་གཅིག་མ། །གོས་རྒྱན་ལེགས་པར་ཁྲུས་བྱས་ལ། །བདེ་བའི་སྟན་ལ་བཞག་ནས་ནི། །རིགས་ཀྱི་ཡུམ་དུ་བྱིན་གྱིས་བརླབས། །བདག་ཉིད་རིགས་ཀྱི་ལྟར་བསྐྱེད་ལ། །ཡབ་ཡུམ་སོ་སོའི་བརྡ་ཡིས་བསྐུལ། །ཕྱག་རྒྱ་བཞི་ཡིས་བསྡུ་བར་བྱ། །ཡུམ་གྱི་མཁའ་ལ་རྡོ་རྗེ་བཞག །དལ་གྱིས་བསྲུབ་ལ་བདེ་བ་བསྐྱང་། །གཉིས་མེད་བདེ་བ་ཧཱུཾ་དུ་བསམ། ཧཱུཾ་ཧཱུཾ་རིང་ཐུང་སྣ་ནས་དྲང་། །མཁའ་གསང་ནང་ནས་ཧཱུཾ་སྤྲོས་པས། །སློབ་མ་གཟུངས་མར་བཅས་པ་ཡི། །ཤེས་རྒྱུད་དག་པར་སྦྱང་བར་བསྒོམ། ཡུལ་གསུམ་གསལ་བར་བརྟག་པ་ནི། །ཕྱི་ཡུལ་ལུས་ལ་བདེ་བ་སྐྱེ། །ཐ་མལ་ལུས་སུ་ཚོར་བ་མེད། །ནང་ཡུལ་དབུགས་ལ་རྒྱུ་མི་ཚོར། །ཐ་མལ་རླུང་གི་རྟོགས་པ་འགགས། །གསང་ཡུལ་སེམས་ལ་བདེ་གསལ་འབར། །ཐ་མལ་འདོད་ཆགས་ཉོན་མོངས་མེད། །གསང་བའི་དགྲ་གསུམ་དུས་དེར་སོད། །ཕྱོགས་བྲལ་དམིགས་པ་མེད་པ་ཡིས། །ཕྱི་དགྲ་གཟུང་དང་འཛིན་པ་བསད། །འདོད་ཆགས་བདེ་བ་ཡེ་ཤེས་འབར། །ནང་དགྲ་དུག་ལྔ་དུག་གསུམ་བསད། །རྣམ་རྟོག་བག་ཆགས་མཚན་མ་ནི། །གསང་དགྲ་ང་བདག་རྟོག་པ་བསད། །འཇིགས་པའི་དུས་བཞི་དུས་དེར་བཅོམ། །ཡབ་ཡུམ་སྐུ་ལ་གདོས་པ་མེད། །རེག་བྱ་ཕུང་པོའི་དུས་ཀྱང་བཅོམ། །ཉོན་མོངས་རང་གྲོལ་ངང་དུ་ཞི། །འདོད་ཆགས་ཉོན་མོངས་བདུད་ཀྱང་བཅོམ། །བདེ་བ་སྐྱེ་བས་ལྷ་རུ་གསལ། །བར་གཅོད་ལྷ་ཡི་བུ་བདུད་བཅོམ། །ཡབ་ཡུམ་ཐབས་དང་ཤེས་རབ་ལ། །སྐྱེ་འཆི་མེད་པ་རྡོ་རྗེའི་སྐུ། །འཆི་བདག་བདུད་བཅོམ་རྫོགས་སངས་རྒྱས། །ལས་དང་བག་ཆགས་རྣམ་རྟོག་བསྲེག །འགྲོ་དྲུག་སྐྱེ་བའི་གནས་མེད་པས། །འགྲོ་དྲུག་གཡང་སུ་དེ་རུ་ཆོད། །དེ་ནས་ཡུམ་དེ་ཁ་བུབ་ལ། །མེ་ལོང་རང་ཡུ་ཅན་བཟེད་ལ། །ཡབ་ཡུམ་གཉིས་མེད་བྱང་ཆུབ་སེམས། །མཆོག་དང་ཐུན་མོང་དངོས་གྲུབ་ཐོབ་པའི་རྒྱུ། །སློབ་མ་ལ་ནི་དབང་བསྐུར་རོ། །ཨཱོཾ། དྲི་མེད་སྐྱོན་བྲལ་ཁ་དོག་དཀར་པོ་མདོག །པདྨ་རཱ་ག་ཆགས་པ་ཆེན་པོའི་གནས། །ཆོས་ཉིད་དག་པའི་འགྲོ་དོན་མཐར་ཕྱིན་ཞིང་། །བྱང་ཆུབ་སེམས་ཀྱི་དབང་མཆོག་ཐོབ་པ་དང་། །བོ་དྷི་ཙིཏྟ་ཡབ་ཀྱི་བྱང་ཆུབ་སེམས། །དཀར་ལ་དག་པས་མུ་ཏིག་དྲི་མ་མེད། །ཤིན་ཏུ་དྲི་མེད་ཚོར་བའི་བྱང་ཆུབ་སེམས། །དོན་དམ་དབྱེར་མེད་བྱང་ཆུབ་ཆེན་པོའི་ངང་། །གཉིས་མེད་རོལ་པ་ཆགས་པའི་བྱང་ཆུབ་སེམས། །ཐར་པའི་ལམ་མཆོག་བདེ་བའི་ལམ་འདྲེན་ཞིང་། །འཁོར་བའི་ལམ་ལས་ཀུན་རྒྱལ་དབང་ཐོབ་སྟེ། །གཉིས་མེད་བྱང་ཆུབ་སེམས་ཀྱི་དབང་ཐོབ་ཐོག །ༀ་བོདྷི་ཙིཏྟ་ཀ་མ་ལ་སི་ཏི་ཧཱུཾ། ཡབ་ཡུམ་གཉིས་སུ་མེད་པའི་བྱང་ཆུབ་སེམས་ཀྱི་དབང་བསྐུར་བས། ཐབས་ཤེས་གཉིས་སུ་མེད་པར་སྦྱོར་བས། དབྱིངས་ཡེ་ཤེས་གཉིས་སུ་མེད་པས། འདུ་འབྲལ་མེད་པའི་དབང་ཐོབ་པར་གྱུར་ཅིག །དེ་ནས་སྣོད་ལྡན་སློབ་མ་ལ། །གསང་བའི་དབང་བསྐུར་བྱ་བ་ནི། །བཀྲ་ཤིས་མཚན་ལྡན་རིགས་ཀྱི་ཡུམ། །སློབ་མའི་ལག་ཏུ་གཏད་ནས་ནི། །ཧཱུཾ། སྐྱེ་མེད་ཆོས་ཀྱི་དབྱིངས་ཉིད་རིག་པའི་ཡུམ། །ཕྲིན་ལས་མཚན་ལྡན་ཏིང་འཛིན་མཆོག་གིས་བརྒྱན། །ཐབས་དང་ཤེས་རབ་དབྱེར་མེད་རོལ་པ་ལས། །ལྷག་པ་བྱང་ཆུབ་སེམས་ཀྱི་འཁོར་ལོ་སྤྲོ། །འཕགས་མཆོག་སྡེ་བསྒྲུབས་འབྲས་བུས་ཀུན་མཉེས་པ། །གཉིས་མེད་དོན་སྤྱོད་ཆོས་ཉིད་དག་པའི་རྒྱན། །དགྱེས་པའི་རོ་མཆོག་ཆོས་ཉིད་དབང་མཆོག་འདི། །རྣལ་འབྱོར་སློབ་མ་ཁྱོད་ཀྱིས་ཐོབ་པར་ཤོག །ༀ་སརྦ་ཏ་ཐཱ་ག་ཏ་གུ་ཧྱ་པྲད་ཉ་ཤྭ་རུ་སྭ་བྷཱ་ཝ་ཨཱཏྨ་ཀོ྅་ཧཾ། ཐབས་ཤེས་རབ་གཉིས་སུ་མེད་པའི་གསང་པའི་དབང་བསྐུར་བས། བདེ་བ་ཆེན་པོ་བྱང་ཆུབ་སེམས་དགྱེས་པའི་རོ་གཏེར་བས། ཉོན་མོངས་པ་ཡེ་ཤེས་སུ་ཤར་ནས། ཤེས་རབ་ཡེ་ཤེས་ཀྱི་དབང་ཐོབ་པར་གྱུར་ཅིག །སློབ་མ་ཡབ་ཡུམ་བྱིན་བརླབས་ལ། །རས་ཀྱི་འབོལ་སྟན་སྟེང་དུ་བཞག །བར་དུ་རས་ཀྱི་ཡོལ་བས་གཅོད། །ཡུམ་ལ་སྦྱོར་བ་བྱེད་དུ་གཞུག །ཡུལ་གསུམ་གསལ་བར་གྱུར་མ་གྱུར། །གསང་བའི་དགྲ་གསུམ་སོད་མ་སོད། །འཇིགས་པའི་བདུད་བཞི་ཆོམས་མ་ཆོམས། །འགྲོ་དྲུག་གཡང་སུ་ཆོད་མ་ཆོད། །ཚད་དང་ལྡན་ནམ་མཁས་པས་བརྟགས། །ཚད་དང་ལྡན་པར་གྱུར་པ་ན། །ཉོན་མོངས་མ་སྤངས་རང་སར་དག །རང་བྱུང་ཡེ་ཤེས་རང་ལ་ཤར། །ས་བཅུ་ནོན་ཏེ་ཕྱིར་མི་ལོག །གོམ་པ་དབང་གི་བསྒྲོད་པ་ཡིན། །རྡོ་རྗེ་ཕྲེང་བ་ལས། གསང་བའི་དབང་བསྐུར་བའི་ལེའུ་སྟེ་བཅུ་གཅིག་པའོ།། ༈ །།དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །དེ་ནས་ཐེག་ པ་ལྟ་བ་སྤྱི་འབྱམས་དབང་། །ཡང་དག་ལྟ་དགོངས ་བཞི་ཡི་དབང་བསྐུར་བ། །སློན་དཔོན་ཕྱག་མཐིལ་ཡི་གེ་ཨ་དཀར་བྲི། ། དགོངས་པ ་ཆོས་ཉིད་མ་བཅོས་ངང་ལ་བཞག །སློབ་མའི་ལག་ཏུ་ནོར་བུ་རིན་ཆེན་ཐོགས། །སློབ་དཔོན་ཡབ་ཡུམ་སློབ་མ་ཡབ་ཡུམ་ནི། །ཆོས་སྐུ་ཀུན་བཟང་ཡབ་ཡུམ་སྐུར་གསལ་ལ། །ཧཱུཾ། ཐམས་ཅད་ལྷུན་གྲུབ་ཀུན་ཏུ་བཟང་པོའི་དངོས། །རང་བཞིན་སྤྲོས་མེད་ཀུན་ཏུ་བཟང་མོའི་ངང་། །གཉིས་མེད་ཐབས་ཀྱི་རྒྱལ་པོས་ཡོངས་ལ་ཁྱབ། །གཉིས་མེད་ཆོས་ཀྱི་དབྱིངས་ཀྱི་དབང་བསྐུར་བ། །ཀུན་ཏུ་བཟང་མོ་རང་བྱུང་བཅོམ་ལྡན་འདས། །ཆོས་ཀྱི་དབྱིངས་ལ་གཅིག་པུ་བཞུགས་པ་ཡི། །རང་གི་བྱང་ཆུབ་སེམས་ཀྱི་ལྷ་ཡིན་ཏེ། །དོན་དམ་སེམས་ཀྱི་ལྷ་ལ་ཕྱག་འཚལ་ལོ། །དེ་ནས་སློབ་དཔོན་གྱི་ཕྱག་གཡས་པ། སློབ་མའི་སྤྱི་བོར་བཞུགས་ནས་ནི། ཧཱུཾ། ཀུན་ཏུ་བཟང་པོ་དྲི་མ་མེད་པ་ཡི། །ཡོངས་ལ་དབང་བསྒྱུར་ཡེ་ཤེས་རྒྱལ་པོར་ཤར། །རང་སེམས་རྣམ་དག་རྟོག་པའི་རྒྱལ་པོར་ཤར། །བྱང་ཆུབ་སྙིང་པོ་བདེ་བ་ཆེན་པོར་ཤར། །ཐམས་ཅད་མ་ལུས་ལྷུན་གྲུབ་ཆོས་ཀྱི་སྐུ། །ཆོས་རྣམས་ཐམས་ཅད་རང་གི་སེམས་སུ་འདུས། །སེམས་ཀྱི་བདག་ཉིད་ཅི་ཡང་མ་ཡིན་པས། །ཐིག་ལེ་སྤྲོས་པ་མེད་པའི་རང་བཞིན་པས། །མཉམ་པའི་རྒྱལ་པོ་ཀུན་ལ་དབང་བསྒྱུར་ཏེ། །ཆོས་ཉིད་རིག་པའི་རྒྱལ་པོ་རྫོགས་པ་ཆེ། །མ་འདྲེས་ཅིར་ཡང་སྟོན་པ་ཐེག་པའི་མཆོག །འདི་དག་མ་ལུས་མྱུར་དུ་རྫོགས་བྱའི་ཕྱིར། །རྒྱལ་ཐབས་སྤྱི་བླུགས་ལྟ་བའི་དབང་མཆོག་འདི་བསྐུར་བས། །ཡོངས་ཀྱི་དབང་མཆོག་ཐབས་ཀྱི་རྒྱལ་པོར་ཤོག །ༀ་སརྦ་ཏ་ཐཱ་ག་ཏ་སུ་ལ་པ་ཏྲ་པུ་ཏེ་རུ་ཙ་ན་ཤྭ་སྭ་བྷཱ་ཝ་ཨཱཏྨ་ཀོ྅་ཧཾ། རྒྱལ་ཐབས་སྤྱི་བླུགས་ཀྱི་དབང་བསྐུར་བས། དཔལ་ཀུན་ཏུ་བཟང་པོའི་ དགོངས་པ ་གཏིང་ནས་རྟོགས་ཏེ། ཆོས་ཉིད་རྫོགས་པ་ཆེན་པོའི་དབང་ཐོབ་པར་གྱུར་ཅིག །དེ་ནས་ལྟ་བའི་དབང་བསྐུར་བ། །སློབ་མ་མདུན་གྱི་ནམ་མཁའ་ལ། །འབྲུ་ཚུགས་ལྟ་རུ་བཅུག་ནས་ནི། །ཧཱུཾ། ལྟོས་ཤིག་ལྟོས་ཤིག་སྐལ་ལྡན་ཁྱོད། །མདུན་གྱི་ནམ་མཁའ་འདི་ལ་ལྟོས། །གསལ་ལ་དྭངས་པ་མཐའ་དང་བྲལ། །གང་ལ་འཛིན་པ་མེད་པ་འདི། །ལྟ་བ་ཕྱོགས་ལྷུང་མཐའ་བྲལ་ཡིན། །འདི་ཡི་དོན་ལ་གནས་པ་ནི། །དུས་གསུམ་སངས་རྒྱས་ དགོངས་པ ་ཡིན། །འོ་རིགས་ཀྱི་བུ། མདུན་གྱི་ནམ་མཁའ་འདི་ལ་ཁ་དོག་དང་དབྱིབས་མེད་པ། གསལ་ལ་མ་འགགས་པ་སྟོང་སང་ངེ་ཡོད་མེད་ཀྱི་མཐའ་དང་བྲལ་བ་འདི། གང་གི་ཡང་འཛིན་པ་མེད་པ་འདི། ལྟ་བ་ཕྱོགས་ལྷུང་མཐའ་བྲལ་བ། སངས་རྒྱས་ཀྱི་ དགོངས་པ ་ཡིན་པས་ངོ་ཤེས་པར་གྱིས། དེ་སྐད་ངོ་སྤྲོད་དོ། །དེ་ནས་སྒོམ་པའི་དབང་བསྐུར་བ། ཧཱུཾ། ལྟོས་ཤིག་ལྟོས་ཤིག་སྐལ་ལྡན་ཁྱོད། །རང་གི་སེམས་ལ་ནང་དུ་ལྟོས། །གསལ་ལ་མི་རྟོག་མ་ཡེངས་པ། །མར་མེ་རླུང་གིས་མ་བསྐྱོད་འདྲ། །སྒོམ་པ་རང་གསལ་འཛིན་མེད་ཡིན། །འདི་ཡི་དོན་ལ་རྟག་ཏུ་སྒོམས། །སངས་རྒྱས་རྣམས་ཀྱི་ དགོངས་པ ་ཡིན། །འོ་རིགས་ཀྱི་བུ། སྐལ་ལྡན་རང་གི་སེམས་ལ་ནང་དུ་བལྟས་པས། སེམས་ལ་དངོས་པོ་དང་མཚན་མ་མེད་པ། གསལ་ལ་མི་རྟོག་པ་མ་ཡེངས་པ། རྣམ་རྟོག་གིས་མ་བསྐྱོད་པ། མར་མེ་ལ་རླུང་གིས་མ་བསྐྱོད་པ་ལྟར། ལྷོད་གྱིས་ཀློད་ལ་ཞོག་ཅིག །འདི་ཁོ་ན་སྒོམ་པ་རང་གསལ་འཛིན་པ་མེད་པ་བྱ་བ་སངས་རྒྱས་ཀྱི་ དགོངས་པ ་ཡིན་པས། དུས་རྟག་ཏུ་འདི་དང་མ་བྲལ་བར་སྒོམས་ཤིག །དེ་སྐད་དུ་ངོ་སྤྲད་དོ། །དེ་ནས་འབྲས་བུས་དབང་བསྐུར་བ། ཧ྄ཱུཾ། ལྟོས་ཤིག་ལྟོས་ཤིག་ལྐལ་ལྡན་ཁྱོད། །ཆོས་སྐུ་འགྱུར་མེད་དོན་ལ་ལྟོས། །སྨྲ་བསམ་བརྗོད་པའི་མཐའ་ལས་འདས། །འཁུར་བ་ཆུ་བླུགས་ཇི་བཞིན་དུ། །གང་ཡང་མ་གྲུབ་སྟོང་པའི་ངང་། །མི་སྐྱེ་མི་འགག་ཆོས་ཀྱི་སྐུ། །འབྲས་བུ་མི་འགྱུར་གདེངས་ལྡན་ཡིན། །འདི་ཡི་དོན་ལ་གནས་པར་གྱིས། །དུས་གསུམ་སངས་རྒྱས་འདི་ལ་གནས། །ཞེས་བརྗོད་ལ་བྱང་ཆུབ་སེམས་ཆང་དང་སྦྱར་བ་སློབ་མའི་ཁར་བླུགས་ལ། ཆོས་ཉིད་ཀྱི་དོན་སྨྲ་བ། བསམ་པ། བརྗོད་པ་ལས་འདས་པ། སྟོང་པའི་རང་བཞིན་སྐྱེ་འགག་གཉིས་སུ་མེད་པ་འདི། ཆོས་ཀྱི་སྐུར་འགྱུར་མེད་གདེངས་ལྡན་གྱི་འབྲས་བུ་བྱ་བ་ཡིན་པས། དུས་གསུམ་གྱི་སངས་རྒྱས་ཐམས་ཅད་འདིའི་ངང་ལ་གནས་པས། འདིའི་དོན་ལ་མི་འགྱུར་བར་གྱིས་ཤིག །དེ་སྐད་དུ་ངོ་སྤྲོད་དོ། །དེ་ནས་སྤྱོད་པའི་དབང་བསྐུར་བ། ཧཱུཾ། ཉོན་ཅིག་ཉོན་ཅིག་སྐལ་ལྡན་ཁྱོད། །རང་བྱུང་ཡེ་ཤེས་རོལ་པ་ལ། །མ་འགགས་ཐབས་ཀྱི་རྒྱལ་པོ་ཡིས། །གང་སྣང་སངས་རྒྱས་མཛད་སྤྱོད་ལ། །ཅི་བདེར་སྤྱད་པས་རང་སར་གྲོལ། །སྤྱོད་ པ་སྤྱི་འབྱམས་ཡངས་དོག་མེད། །དུས་གསུམ་སངས་རྒྱས་དགོངས ་སྤྱོད་ཡིན། །འོ་རིགས་ཀྱི་བུ། སྐལ་ལྡན། དབང་དབུ་ཞབས་ཀྱི་དོན། ལྟ་སྒོམ་འབྲས་བུ་སྤྱོད་པ་དང་། དོན་བཞིར་འདུས་པས། དབང་གི་རྒྱལ་པོ་གཞན་ནས་བསྐུར་མི་ནུས་པར། ལྟ་སྒོམ་འབྲས་བུ་སྤྱོད་པ་མཐར་ཕྱིན་པ། མན་ངག་གི་ཚད་ལ་ཕེབས་པས། སེམས་ལ་སངས་རྒྱས་རང་བྱུང་དུ་ཤར་བས། བཀའ་ཕྱི་ནང་གི་ཐེག་པ་ཐམས་ཅད་དང་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་དང་། རང་གི་སེམས་ལས་མ་གཏོགས་པ་གཞན་ན་ཅི་ཡང་མེད་པས། ལྟ་བ་སྤྱི་འབྱམས་ཀྱི་དབང་གིས་བཟང་ངན་མེད་པར་སངས་རྒྱས། སྒོམ་པ་སྤྱི་འབྱམས་ཀྱི་དབང་གིས་བསྒོམ་བྱ་དང་སྒོམ་བྱེད་མེད་པར་གནས། འབྲས་བུ་སྤྱི་འབྱམས་ཀྱི་དབང་གིས་སྐྱེ་ཤི་གཉིས་སུ་མེད་པར་རྟོགས། སྤྱོད་པ་སྦྱི་འབྱམས་ཀྱི་དབང་གིས་འཆིང་བ་དང་གྲོལ་བ་མེད་པར་གནས་པས། དེ་ལྟ་བུའི་དབང་བཞི་པོ་དེ། རྣལ་འབྱོར་པའི་རྣ་བར་སུས་ཐོས་ཤིང་། སུ་ཡི་བློ་ལ་གནས་པ་དེ། ཐེག་པ་ལྟ་པ་སྤྱི་འབྱམས་དབང་ཐོབ་པས། དབང་ཐམས་ཅད་འདི་ལས་འཕྲོས་པས། དབང་ཐམས་ཅད་ཀྱི་མེས་པོ་ཡིན་ནོ། །ཞེས་ངོ་སྤྲོད་དོ། །རྡོ་རྗེ་ཕྲེང་བ་ལས། ལྟ་སྒོམ་འབྲས་བུ་སྤྱོད་པ་ཐེག་པ་སྤྱི་འབྱམས་དབང་གི་ལེའུ་སྟེ་བཅུ་གཉིས་པའོ།། ༈ །།དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །གྲོལ་ཞིང་རིག་པར་བསྟན་པ་ནི། ཏིང་འཛིན་གསུམ་དང་དབང་ཆེན་ཡུམ། །ཆོ་ག་གསུམ་ཚོགས་དམ་ཚིག་བསྐྱེད། །བྱིན་བརླབས་དབང་བསྐུར་ཡེ་ཤེས་བསྟིམ། །ཕྱི་ནང་གསང་བ་ཕྱག་རྒྱས་མཆོད། །བསྟོད་དང་ཛཔ྄་བསྙེན་འབུལ་ལ་སྩོགས། །བསྐྱེད་རིམ་གྲོལ་བའི་ལམ་ཡིན་ཏེ། །ཐམས་ཅད་སེམས་ཀྱི་ཆོ་འཕྲུལ་ཡིན། །སེམས་ཀྱི་རྩལ་ཁ་སྦྱང་བ་ཡིན། །རྫོགས་རིམ་རྣམ་པ་གཉིས་ཡིན་ཏེ། །ལྷ་རྣམས་གནས་གྱུར་རྫོགས་རིམ་ནི། །ཡིད་ནི་ཡབ་ལ་ཆོས་ནི་ཡུམ། །ཕུང་པོ་ཡབ་ལ་འབྱུང་བ་ཡུམ། །རྣམ་ཤེས་ཡབ་ལ་ཡུལ་ལྔ་ཡུམ། །དབང་པོ་ཡབ་ལ་དུས་བཞི་ཡུམ། །ཉོན་མོངས་དྲུག་ནི་སྤྲུལ་པའི་སྐུ། །ལུས་ཆོས་ཡབ་ལ་མུ་བཞི་ཡུམ། །ཐམས་ཅད་ཐབས་དང་ཤེས་རབ་གཉིས། །རང་བཞིན་དེ་ལྟར་ཤེས་པ་ནི། །མ་སྤངས་རང་ལ་ལྷར་གནས་པས། །རང་བྱུང་གནས་གྱུར་རྫོགས་རིམ་ཡིན། །རང་བྱུང་ལྷུན་གྲུབ་རྫོགས་རིམ་ནི། །སངས་རྒྱས་ཐབས་མཁས་ཐུགས་རྗེ་ཡིས། །ཐེག་པའི་སྒོོ་མོ་གྲངས་མེད་ཡང་། །ཐམས་ཅད་བློ་ཡི་བྲིད་ཐབས་ཡིན། །ཆོས་རྣམས་ཐམས་ཅད་སེམས་ལ་རྫོགས། །ཆོས་རྣམས་བདེན་པ་དབྱེར་མེད་ལ། །ཐམས་ཅད་ཡིན་ལ་གང་ཡང་མིན། །སངས་རྒྱས་མཐར་ཐུག་ཆོས་ཀྱི་སྐུ། །ཀུན་ལ་རྫོགས་ཏེ་ངོ་མ་ཤེས། །ཧོ། འཁོར་བ་དང་ནི་མྱ་ངན་འདས། །འཁྲུལ་སྣང་འཛིན་པ་གཉིས་སུ་བྱུང་། །ཡང་དག་དོན་ལ་དབྱེ་བ་མེད། །གཉིས་ཀ་རང་རིག་སེམས་ལ་རྫོགས། །ཧོཿ ཆོས་སུ་འཛིན་པ་ཐམས་ཅད་ཀྱང་། །ཐམས་ཅད་སྤྲོས་པའི་ཀློང་ཡིན་ཏེ། །སྐུ་གསུམ་རང་ཡང་གྲངས་སུ་ཟད། །འདུས་བྱས་ཆོས་ཀྱིས་སངས་མི་རྒྱ། །ཧོཿ སངས་རྒྱས་ཆོས་སུ་འཛིན་པ་ནི། །མཐར་ཐུག་འཁྲུལ་བློ་ཆེན་པོ་ཡིན། །སངས་ནི་ཆོས་མེད་གཅིག་གིས་རྒྱ། །བློ་ལས་འདས་པ་རྫོགས་ཆེན་ཡིན། །རྒྱས་བསྡུས་རིམ་པ་རང་ལུས་བཞིན། །རིམ་པར་དབང་གིས་བསྒྲོད་པར་བྱ། །ས་མ་ཡ་ནི་ཤེལ་སྒོང་བཞིན། །གཞི་ནི་དམ་ཚིག་གཙང་མས་བཟུང་། །ཏིང་འཛིན་ལུས་དང་གྲིབ་མ་བཞིན། །ཉམས་སུ་ཏིང་ངེ་འཛིན་གྱིས་བླང་། །མན་ངག་གར་ཆང་འཐུང་བ་བཞིན། །དོན་ནི་མན་ངག་ཟབ་མོས་བཟུང་། །ལྟ་བ་ནམ་མཁའི་མདུང་སྐོར་བཞིན། །ཐག་དང་འཕངས་ནི་ལྟ་བས་བཅད། །སྤྱོད་པ་མི་ཤ་ལོན་པ་བཞིན། །ལ་ནི་སྤྱོད་པས་དོར་བར་བྱ། །ཟུང་དུ་འབྲེལ་ལ་གོལ་སུ་མེད། །ཚིག་ཏུ་རྟོགས་ལ་མ་བརྟེན་པར། །སྐུ་གསུམ་འདོད་པ་གཅིག་ཏུ་བསྒྲིལ། །མཐའ་དྲུག་རྒྱུད་ལ་རྫོགས་པར་བགྱིས། །མཐར་ཐུག་དོན་དེ་ནང་ནས་འཆར། །ནམ་མཁའ་ལ་ནི་ནམ་མཁའ་བཞིན། །ཐམས་ཅད་སྟོང་པའི་ངང་ལ་གནས། །ཞེས་གསུངས་སོ། །རྣ་བརྒྱུད་དབང་གི་རིམ་པ་རྡོ་རྗེ་ཕྲེང་བ་ལས། རྫོགས་རིམ་གྱི་ལེའུ་སྟེ་བཅུ་གསུམ་པའོ།། ༈ །།དབང་གི་བརྒྱུད་པ་ཟམ་མ་ཆད་པ་ནི། རྒྱ་གར་གི་དབང་གི་ཆུ་བོ་ཆེན་པོ་བཞི་དང་། བོད་ཀྱི་དབང་གི་ཆུ་བོ་བཞི་ལས། རྒྱ་གར་གྱི་དབང་གི་ཆུ་བོ་བཞི་ལ། ཡི་དམ་གྱི་ལྷས་དབང་བསྐུར་ནས་ཐོབ་པ། སློབ་དཔོན་དགའ་རབ་རྡོ་རྗེ་ལ། དཔལ་རྡོ་རྗེ་སེམས་དཔས་དངོས་སུ་བྱང་སེམས་རྣམ་ལྔ་ལ་སོགས་པ་བཤད་ནས་དབང་བསྐུར། དེས་བོད་ཀྱི་བཻ་རོ་ཙ་ན་ལ་དབང་བསྐུར། བཀའ་རྒྱུད་སྡེས་དབང་བསྐུར་ནས་ཐོབ་པ། རྒྱལ་པོ་ཨིནྡྲ་བོ་དྷི་དང་། སློབ་དཔོན་ཀུ་ཀུ་རཱ་ཛ། ཀུ་ཀུ་རཱ་ཛས་ཧཱུཾ་ཀ་རུ་ལ་དབང་བསྐུར། དེས་གནུབས་ནམ་མཁའི་སྙིང་པོ་ལ་དབང་བསྐུར། རང་རིག་པ་རྩལ་གྱིས་དབང་བསྐུར་ནས་ཐོབ་པ། སློབ་དཔོན་པདྨ། དེས་ངན་ལམ་རྒྱལ་བ་མཆོག་དབྱངས་ལ་དབང་བསྐུར། པཎྜིཏས་དབང་བསྐུར་ནས་ཐོབ་པ། སློབ་དཔོན་མི་མ་ལ་མི་ཏྲ། དེས་ཞང་གཉའ་ན་ལ་དབང་བསྐུར་རོ། །བོད་དུ་དབང་གི་ཆུ་བོ་བཞི་འདུས་པ་ནི། རྒྱལ་པོ་ཁྲི་སྲོང་ལྡེ་བཙན་ལ། སློབ་དཔོན་པདྨ་འབྱུང་གནས་དང་། སློབ་དཔོན་བི་མ་ལ་མི་ཏྲ་དང་། པ་གོར་བཻ་རོ་ཙ་ན། གནུབས་ནམ་མཁའི་སྙིང་པོ། རྒྱ་བོད་ཀྱི་དབང་གི་ཆུ་བོ་བཞི་འདུས་ཏེ། རྒྱལ་པོར་སོང་བས་གཞན་ལ་དབང་མ་བསྐུར་ཏེ། དབང་གི་ཆུ་བོ་ཆད་དོ། །མཁས་པ་མི་བཞི་པོས་ཞང་གཉའ་ན་གཉགས་ཛྙཱ་ན། མཆན། ལ་དབང་བསྐུར་ཏེ། དབང་གི་ཆུ་བོ་བཞི་འདུས་པ་ནི་དྲི་མེད་ཟླ་ཤར་ཡིན་ནོ། །གཉའ་ནས་སངས་རྒྱས་ཡེ་ཤེས་རིན་པོ་ཆེ་ལ་དབང་བསྐུར། དེས་གནུབས་ཡོན་ཏན་རྒྱ་མཚོ་ལ་དབང་བསྐུར། དེས་གནུབས་པདྨ་དབང་རྒྱལ་ལ་དབང་བསྐུར། དེས་རཀྴི་ཚུལ་ཁྲིམས་རྒྱལ་མཚན་ལ། དེས་ཁམས་པ་ལྡན་བརྩོན་ལ། དེས་ཁམས་པ་ཡེ་ཤེས་དབང་ཕྱུག་ལ། དེས་ཤངས་གྱི་སེ་སྟོན་གྲུབ་ཐོབ་ལ། དེས་མངའ་བདག་ཉང་རིན་པོ་ཆེ་ལ་དབང་བསྐུར་རོ། །དེ་ནས་རིམ་པ་བཞིན། མངའ་བདག་འགྲོ་མགོན། གུ་རུ་ཆོས་དབང་། སྲས་པདྨ་དབང་ཆེན། ཤེས་རབ་རྒྱ་མཚོ། ཟུར་ཧཾ་ཤཱཀ་འབྱུང་། བློ་ཆེན་ཤྲཱི་ཕ་ལ། ཉང་ཤྭཀྱ་རྡོ་རྗེ། ཟུར་བཤེས་གཉེན་པ། སློབ་དཔོན་ཤྲཱི་ཕ་ལ། དེ་གཉིས་ཀ་ལ་སྔགས་འཆང་རུ་མོ་བ་དང་། ལེགས་པ་དཔལ་བཟང་གཉིས་ཀྱིས་གསན། གཉིས་ཀས་རིན་ཆེན་རྒྱལ་མཚན། དེས་མངའ་རིས་པཎ་ཆེན། འུ་ཡུག་པ་ངག་གི་དབང་པོ། སྤྲུལ་སྐུ་ཚེ་བརྟན་རྒྱལ་པོ། ནམ་མཁར་སྤྱོད་པ། པ་རུ་ཧི་ཏ། རིག་འཛིན་ཕྲིན་ལས་ལྷུན་གྲུབ། དེས་བདག་ལྷ་རིགས་སྨྱོས་ཀྱི་སྔགས་འཆང་རིག་འཛིན་འགྱུར་མེད་རྡོ་རྗེ་ལའོ། །ཞར་བྱུང་ཆོས་སྐོར་གྱི་ལུང་བརྒྱུད་ནི། པཎ་ཆེན་ནས། མངའ་བདག་ཀུན་དགའ་ལྷུན་གྲུབ། དབང་སྟོན་གུ་རུ་པ། ནམ་མཁའ་ཆོས་དབང་། གར་དབང་བློ་མཆོག །རས་ཆེན་ཚེ་དབང་བསྟན་འཛིན། དེས་བདག་ལའོ། །གཏེར་ཆེན་རིན་པོ་ཆེ། ༈ བྱང་ཆུབ་སྒྲུབ་པའི་ཉེ་ལམ་རྙེད་དཀའི་ཆོས། །སྒྲུབ་སྡེ་བརྒྱད་ཀྱི་མན་ངག་རྫོང་འཕྲང་འདིའི། །མིང་ཙམ་ཐོས་པ་ཉིན་སྐར་ལས་ཀྱང་དཀོན། །འདི་འདྲའི་དགའ་སྟོན་ཐོབ་པ་ཨེ་མ་ཧོ། །དགེ་བ་འདི་ཡིས་མཉམ་མེད་གཏེར་བདག་གླིང་། །ཟག་མེད་ཐུགས་ཀྱི་ དགོངས་པ ་ཡོངས་རྫོགས་ཤིང་། །རྙིང་བསྟན་མི་ནུབ་དར་ཞིང་རྒྱས་པ་ཡི། །རྩ་ལག་སྲོག་གི་ཀ་བར་འདི་གྱུར་ཅིག །གཏེར་ཆེན་བླ་མའི་གཟིགས་དཔེའི་ཡིག་བྲིས་བ་དགེ་སྦྱོང་བློ་གསལ་རྒྱ་མཚོའི་གསུང་། དགེའོ།། །།