བསྐྱེད་རྫོགས་ཀྱི་སྤྱི་དོན་ཐབས་ལམ་སྙིང་པོ།
༄༅། །བསྐྱེད་རྫོགས་ཀྱི་སྤྱི་དོན་ཐབས་ལམ་སྙིང་པོ་ཞེས་བྱ་བཞུགས་སོ། །
གཞི་ཡི་དཀྱིལ་འཁོར་རྣམ་བཞིར་ལམ་དུས་ཀྱི། །དཀྱིལ་འཁོར་བཞི་ཡི་རྐྱེན་གྱིས་ཟིན་པ་ལས། །མཐར་ཐུག་འབྲས་བུའི་དཀྱིལ་འཁོར་རྣམ་པ་བཞིར། །སྨིན་མཛད་དཀྱིལ་འཁོར་ཀུན་བདག་བླ་མར་འདུད། །རྡོ་རྗེ་འཆང་དབང་སྒྲུབ་པའི་ཐབས་ཚུལ་གྱིས། །ལམ་ཀུན་རིམ་པ་གཉིས་སུ་སྡུད་མཛད་པའི། །གསང་བདག་དཔའ་བོ་དེ་དང་དེ་ཉིད་ཀྱི། །རྣམ་རོལ་རྡོ་རྗེ་འཛིན་པ་གཉིས་པས་སྐྱོངས། །དེ་ལ་འདིར་སྐལ་པ་དང་ལྡན་པའི་གང་ཟག་ཐེག་པ་མཆོག་གི་བཞོན་པས་རྣམ་པར་གྲོལ་པའི་ཁང་བཟང་དུ་འཇུག་པར་འདོད་པ་དག་གིས་ཐོག་མར་ཤེས་པར་བྱ་བའི་གནས་ནི། གང་ཞིག་རང་གི་འབྲས་བུ་དོན་དུ་གཉེར་བ་ལ་དེ་མེད་ན་མི་འབྱུང་གི་རྒྱུའི་ངོ་བོར་གནས་པ་གཞི་ལམ་གྱི་རྣམ་པར་བཞག་པ་དག་ཉིད་ཡིན་ན། འདིར་ཡང་རེ་ཞིག་དེ་ཉིད་མདོར་བསྡུས་ཏེ་བརྗོད་པར་བྱའོ། །དེ་ཡང་གཞི་དུས་ཀྱི་དཀྱིལ་འཁོར་བཞི་དང་ལྡན་པའི་ཀུན་གཞི་ཉིད་ནི་ཉེར་ལེན་གྱི་རྒྱུ་དང་། དེ་ཉིད་འབྲས་དུས་ཀྱི་སྐུ་བཞིའི་དཀྱིལ་འཁོར་བཞིར་འབྱིན་བྱེད་ཀྱི་ཐབས་སུ་གྱུར་པ་ལམ་དུས་ཀྱི་དཀྱིལ་འཁོར་བཞི་རྗེས་འབྲང་དང་བཅས་པ་ནི་ལྷན་ཅིག་བྱེད་པའི་རྐྱེན་ཏེ་རྒྱུ་རྣམ་པ་གཉིས་ཀྱི་ངོ་བོར་གནས་སོ། །དེ་ལས་ལྷན་ཅིག་བྱེད་རྐྱེན་ནམ་ལྷན་ཅིག་བྱེད་པའི་རྒྱུའི་ངོ་བོ་ལམ་གྱི་རྣམ་པར་བཞག་པ་ཉིད་འཆད་པ་ལ། སྤྱིར་བཏང་རྒྱུ་དང་འབྲས་བུའི་ཐེག་པའི་རྣམ་བཞག་ཇི་སྙེད་ཅིག་མཆིས་པ་ལས། བྱེ་བྲག་ཏུ་སྙིགས་དུས་ཀྱི་མི་ཚེ་ཐུང་དུ་གཅིག་ལ་དཀའ་ཚེགས་ཆུང་ངུས་རྡོ་རྗེ་འཆང་ཆེན་པོའི་གོ་འཕང་མངོན་དུ་སྒྲུབ་པར་བྱེད་པའི་ཐབས་སུ་གྱུར་པ་ནི་སྤྱིར་འབྲས་བུ་གསང་སྔགས་རྡོ་རྗེའི་ཐེག་པ་དང་། ཁྱད་པར་དུ་གསང་སྔགས་བླ་མེད་ཀྱི་རྒྱུད་ཉིད་ཡིན་ལ། དེ་ཡང་རྒྱུའི་ཐེག་པས་བསྐལ་པ་གྲངས་མེད་གསུམ་མམ་བདུན་ལ་སོགས་པར་བསོད་ནམས་དང་ཡེ་ཤེས་ཀྱི་ཚོགས་རྒྱ་མཚོ་ལྟ་བུ་བསགས་ནས་ཚེགས་ཆེན་པོས་མཐར་ཐུག་གི་འབྲས་བུ་ལ་སྦྱོར་བར་གསུངས་པ་གང་ཞིག །འདིར་དཀའ་ཚེགས་ཆུང་ངུས་ཚེ་གཅིག་གིས་མཐར་ཐུག་གི་འབྲས་བུ་རྡོ་རྗེ་འཆང་ཆེན་པོའི་གོ་འཕང་དེ་ཉིད་མངོན་དུ་འཐོབ་པའི་རྒྱུ་མཚན་ཡང་ཅི་ཞིག་ཡིན་སྙམས་པ་ལ། ཁ་ཅིག་ལྷའི་རྣལ་འབྱོར་སྒོམ་དུ་ཡོད་པའི་རྒྱུ་མཚན་ཙམ་གྱིས་ཡིན་ནོ་སྙམ་དུ་སེམས་ན་ཡང་། མི་འཐད་དེ། ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་མདོ་དང་། ཏིང་ངེ་འཛིན་རྒྱལ་པོའི་མདོ་ལ་སོགས་པ་ལས་ཀྱང་ལྷའི་རྣལ་འབྱོར་སྒོམ་པ་ཙམ་བཤད་པའི་ཕྱིར་རོ། །ཡང་ཁ་ཅིག་གསང་སྔགས་ཀྱི་ལམ་འདིར་སེམས་ཀྱི་ཆོས་ཉིད་དམ་སྟོང་ཉིད་རྟོགས་པའི་ཐབས་བསྟན་པའི་རྒྱུ་མཚན་གྱིས་ཡིན་ནོ་ཞེས་ཟེར་ན་ཡང་། མ་ཡིན་ཏེ། དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་ལ་སོགས་པ་ཐེག་ཆེན་ངེས་དོན་གྱི་མདོ་སྡེ་མཐའ་དག་ལས་བཤད་པའི་ཕྱིར་རོ། །ཡང་ཁ་ཅིག་ཚོགས་བསགས་པའི་ཐབས་ཀྱི་ཏིང་ངེ་འཛིན་ཁྱད་པར་དུ་འཕགས་པས་ཏེ། དཔེར་ན་རྡུལ་གཅིག་གི་སྟེང་དུ་རྡུལ་སྙེད་ཀྱི་གྲངས་དང་མཉམ་པའི་སངས་རྒྱས་བཞུགས་པར་མོས་པ་དང་། དེ་དག་ལ་མཆོད་པའི་སྤྲིན་རྒྱ་མཚོ་བསམ་གྱིས་མི་ཁྱབ་པ་ཀུན་ཏུ་བཟང་པའི་མཆོད་པའི་རྣམ་རོལ་ལྟ་བུ་ཡིད་ཀྱིས་སྤྲུལ་ནས་ཕུལ་བས་བསྐལ་པ་གྲངས་མེད་དུ་མའི་ཚོགས་སྐད་ཅིག་རེ་རེས་ཀྱང་འདུམ་པར་འགྱུར་བའི་རྒྱུ་མཚན་གྱིས་ཡིན་ནོ་ཞེས་ཟེར་བ་ཡང་མི་འཐད་དེ། དེ་དག་ནི་ཐེག་ཆེན་གྱི་མདོ་སྡེ་རྣམས་ལས་ཀྱང་རྒྱ་ཆེར་བཤད་དེ། བཟང་པོ་སྤྱོད་པའི་སྨོན་ལམ་ལས། རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དང་། །དེ་ལྟར་ཆོས་ཀྱི་དབྱིངས་རྣམས་མ་ལུས་པ། །ཐམས་ཅད་རྒྱལ་བ་དག་གིས་གང་བར་མོས། །ཞེས་དང་། མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །ཞེས་པ་ལ་སོགས་པ་མང་དུ་གསུངས་པའི་ཕྱིར་རོ། །ཡང་ཁ་ཅིག་གསང་སྔགས་ནི་འབྲས་བུ་ལམ་བྱེད་ཀྱི་ཐེག་པ་ཡིན་པའི་ཕྱིར་ཚོགས་གཉིས་མ་བསགས་པར་ཡང་ཚེ་གཅིག་གིས་སངས་རྒྱས་ཐོབ་པ་ཡིན་ནོ་ཞེས་ཟེར་རོ། །དེ་ནི་ཧ་ཅང་མི་འཐད་དེ། རྒྱུ་མེད་པའི་འབྲས་བུ་འབྱུང་མི་སྲིད་པའི་ཕྱིར་དང་། གལ་ཏེ་འབྲས་བུ་ལམ་དུ་བྱེད་པའི་རྒྱུ་མཚན་གྱིས་འབྲས་བུ་གཞན་ནས་བཙལ་མི་དགོས་པ་ཞིག་ནའང་། གཞི་དུས་སུ་ལམ་དུ་བྱེད་རྒྱུའི་སྐུ་བཞི་ལ་སོགས་པ་དེ་དག་ཉིད་གང་གིས་འབྲས་བུར་སྨིན་པར་བྱེད་པའི་ཐབས་སུ་གྱུར་པ་དེ་ཡང་རྒྱུའི་བྱེ་བྲག་བྱེད་པའི་རྒྱུ་ཞེས་བྱ་བ་ཉིད་ཡིན་ཞིང་། དེ་ཡང་ཚོགས་གཉིས་གང་རུང་ལས་མ་འདས་པའི་ཕྱིར་རོ། །དེས་ན་ལྟ་བ་ངན་པའི་ཐིབ་པོ་མཐའ་དག་ཉེ་བར་བསལ་ཏེ། ཡང་དག་པའི་སྣང་བ་དམ་པ་སྦྱིན་པ་ལ། སྤྱིར་བཏང་ལས་འབྲས་ལ་དགེ་མི་དགེའི་ལུང་མ་བསྟན་དང་གསུམ་དུ་ཡོད་པ་ལས། དགེ་བ་ནི་འཇིག་རྟེན་དང་འཇིག་རྟེན་ལས་འདས་པའི་བདེ་བ་རྒྱུ་དང་བཅས་པ་ཉིད་ཡིན་ལ། མི་དགེ་བ་ནི་འཁོར་བ་དང་ངན་སོང་གི་སྡུག་བསྔལ་རྒྱུ་དང་བཅས་པ་ཉིད་ཡིན་ཞིང་ལུང་མ་བསྟན་པ་ནི་བདེ་སྡུག་གི་འབྲས་བུ་འབྱིན་པར་མི་བྱེད་པའི་ལས་དང་རྣམ་སྨིན་དག་གོ། །དེ་ལས་ལུང་མ་བསྟན་གྱི་ལས་འབྲས་དགེ་བར་བསྒྱུར་བའི་ཐབས་ནི་མདོ་ལམ་ལས་ཀྱང་བཤད་མོད་དེ། མི་དགེ་བའི་ལས་འབྲས་དགེ་བར་སྒྱུར་བའི་ཐབས་ནི་གསང་སྔགས་ཀྱི་གཞུང་ཁོ་ན་ལས་གཞན་དུ་མ་བཤད་ལ། གསང་སྔགས་ལས་དེ་ལྟར་བཤད་པ་དེ་ཡང་ཆོས་ཐམས་ཅད་དག་མཉམ་ཆེན་པོར་རྟོགས་པས་འཁོར་འདས་དབྱེར་མེད་དུ་ལྟ་བ་ལ་བརྟེན་ནས། མཉམ་པའི་སྒོམ་པ་དང་། མཉམ་པའི་སྤྱོད་པ་དག་ལ་རིམ་བཞིན་བསླབས་པས་སྒོ་གསུམ་གྱི་འདུ་བྱེད་མཐའ་དག་ཚོགས་གཉིས་ཀྱི་ལམ་དུ་སྒྱུར་བར་བྱེད་པའི་གནད་འདིའི་ཡིན་ཏེ། དེས་ན་མདོ་ལམ་གྱི་ཚོགས་གསོག་པ་ལ་རྒྱུན་ཆད་དམ་རེས་འཇོག་ཡོད། སྔགས་ལམ་གྱིས་ཚོགས་གསོགས་པ་ལ་རྒྱུན་ཆད་དམ་རེས་འཇོག་མེད་དེ། ཆོས་ཐམས་ཅད་ལ་བླང་དོར་མེད་པའི་བསམ་སྤྱོད་དང་ལྡན་པས་ལས་གསུམ་གྱི་གནས་སྐབས་མཐའ་དག་དགེ་བའི་ལམ་དུ་བསྒྱུར་བའི་ཕྱིར་རོ། །རྒྱུ་མཚན་འདི་ལ་དགོངས་ནས་ཐབས་ཤེས་ཁྱད་པར་ཅན་གྱིས་མཚན་རྟོག་སྡོམ་པ་ཉིད་སྔགས་སྡོམ་གྱི་ངོ་བོར་ཡང་བཞག་སྟེ། མཉམ་པའི་སྒོམ་སྤྱོད་དག་ཐབས་ཁྱད་པར་ཅན་དང་། མཉམ་པའི་ལྟ་བ་ཤེས་རབ་ཁྱད་པར་ཅན་ཡིན་པའི་ཕྱིར་དང་། དེ་ཉིད་ཀྱིས་མ་དག་པའི་མཚན་རྟོག་མཐའ་དག་བསྡམས་པ་ན་ཉེས་སྤྱོད་ཉུང་ངུ་ཙམ་ཞིག་ཡུལ་དུས་རེས་འགའ་བ་ཞིག་ཏུ་སྤངས་པ་ལས་ཆེས་ཁྱད་པར་དུ་འཕགས་པར་འགྱུར་བའི་ཕྱིར་རོ་སྙམ་དུ་དགོངས་པའི་ཕྱིར་རོ། །འོ་ན་དེ་ལྟ་བུའི་ཐབས་ཤེས་ཁྱད་པར་ཅན་དེ་གསང་སྔགས་ཀྱི་གཞུང་ནས་ཇི་ལྟར་བཤད་སྙམས་ན། འདི་ལ་རྒྱུད་སྡེ་བཞི་པོ་སོ་སོའི་དགོངས་པ་ཐ་དད་པར་བཤད་དུ་ཡོད་ནའང་། རེ་ཞིག་རྒྱུད་སྡེ་འོག་མ་གསུམ་པོའི་ལམ་གནད་མཐའ་དག་ནི། བླ་མེད་ཀྱི་རྒྱུད་དོན་དུ་འདུ་བའི་ཕྱིར་འདིར་དེ་ཉིད་འཆད་པ་ལ་གསང་སྔགས་བླ་ན་མེད་པ་རྣལ་འབྱོར་ཆེན་པོའི་ལམ་གྱིས་སུ་ཐམས་ཅད་དབང་བཞིའི་ཁོང་ནས་འཛིན་དགོས་པ་དང་། དབང་བཞིའི་རུ་བ་ལས་ནམ་ཡང་མི་འདའ་བའི་ཚུལ་འདི་ཐོག་མ་ཁོ་ནར་མི་ཤེས་སུ་མི་རུང་སྟེ། འདི་ཁོང་དུ་ཆུད་པར་མ་གྱུར་ན་དབང་བཞིའི་ལམ་ལ་མ་འདུས་པའི་རྣལ་འབྱོར་བླ་མེད་ཀྱི་ལམ་གཞན་ཡང་ཡོད་དམ་སྙམ་དུ་ཐེ་ཚོམ་ཟ་བར་འགྱུར་བའི་ཕྱིར་རོ། །དེས་ན་གསང་སྔགས་བླ་མེད་ཀྱི་ལམ་ཡིན་ན་དབང་བཞི་པོ་གང་རུང་གི་ལམ་ཡིན་པས་ཁྱབ་ཅེས་ཀྱང་བྱ། དེ་ལྟ་བུའི་དབང་བཞིའི་ལམ་དེ་ཡང་སྤྱིར་བཏང་འབྲས་བུ་ལམ་བྱེད་ཡིན་པ་སྨོས་མ་དགོས་ཀྱང་། བྱེ་བྲག་ཏུ་ཁ་ཅིག་ཆོས་གཟུགས་ཀྱི་སྐུ་གཉིས་ལམ་དུ་བྱེད་པའི་སྒོ་ནས་བསྐྱེད་རྫོགས་གཉིས་སུ་བསྡུ་བར་མཛད། ཁ་ཅིག་སྐུ་གསུམ་ལམ་དུ་བྱེད་པའི་སྒོ་ནས་བསྐྱེད་རྫོགས་རྫོགས་ཆེན་གསུམ་དུ་བསྡུ་བར་ཡང་མཛད། ཁ་ཅིག་སྐུ་བཞི་ལམ་དུ་བྱེད་པའི་སྒོ་ནས་བསྐྱེད་རྫོགས་ཡན་ལག་བཞིར་དབྱེ་བར་ཡང་མཛད་དེ། དེ་དག་གང་ཡིན་ཀྱང་སྦྱང་གཞི། སྦྱོང་བྱེད། སྦྱང་བྱ། སྦྱངས་འབྲས་ཏེ་བཞི་བཞི་ཚང་བ་ཞིག་ནི་ཅི་ནས་ཀྱང་དགོས་ལ། དབྱེ་བསྡུའི་རྣམ་གྲངས་དེ་དག་ཀྱང་དགོས་པའི་དབང་གིས་དབྱེ་སྒོ་ཐ་དད་པར་བསྟན་པ་ཙམ་ལས་དབྱེ་ངོ་ནི་གཞན་མ་ཡིན་ཏེ། འདི་ལྟར་བསྐྱེད་རྫོགས་གཉིས་སུ་བསྡུ་བའི་སྐབས་དེར་ཡང་། བུམ་དབང་གི་ལམ་བསྐྱེད་པའི་རིམ་པ་དང་། མཆོག་དབང་གོང་མ་གསུམ་གའི་ལམ། རིམ་པ་གཉིས་ཀྱི་ཟླས་ཕྱེ་བའི་རྫོགས་རིམ་དུ་འཇོགས་པར་མཛད་པའི་ཕྱིར་དང་། བསྐྱེད་རྫོགས་གསུམ་དུ་འཇོག་པའི་སྐབས་དེར་ཡང་རིམ་པ་དང་པོ་སྔར་ལྟར་ལས། རིམ་པ་གཉིས་པ་ལ་མཚན་བཅས་དང་མཚན་མ་མེད་པའི་རྫོགས་རིམ་གཉིས་སུ་དབྱེ་བ་སྟེ། གསང་དབང་དང་ཤེར་དབང་གི་ལམ་དག་ནི་མཚན་བཅས་ཀྱི་རྫོགས་རིམ་ཞེས་རྫོགས་རིམ་ཙམ་པོ་དང་། ཚིག་དབང་གི་ལམ་ནི་རིམ་པ་གཉིས་པའི་རིམ་པ་གཉིས་པ་མཚན་མ་མེད་པའི་རྫོགས་རིམ་སྟེ་རྫོགས་པ་ཆེན་པོའི་སྒྲས་བརྗོད་པ་ཉིད་ཡིན་པའི་ཕྱིར་དང་། བསྐྱེད་རྫོགས་ཡན་ལག་བཞིར་དབྱེ་བའི་སྐབས་དེར་ཡང་། བསྐྱེད་རིམ་དབྱིབས་ཀྱི་ལམ་ལ་སོགས་པ་དབང་བཞི་པོའི་ལམ་སོ་སོར་ཕྱེ་ནས་འཇོག་པར་མཛད་པ་ཙམ་ལས་གཞན་མ་ཡིན་པའི་ཕྱིར་རོ། །དབང་བཞིའི་ལམ་དེ་དག་ཐབས་ཤེས་ཁྱད་པར་ཅན་དུ་འཇོག་པའི་རྒྱུ་མཚན་ཡང་། དཔེར་ན་ཙནྡན་ལས་བྱུང་བའི་མེ་དེ་ནི་མེ་ཕལ་བ་ལས་བདུན་འགྱུར་གྱིས་ཚ་བར་བཤད་པ་ལྟར། ཐབས་ཁྱད་པར་ཅན་ལས་བྱུང་བའི་ཤེས་རབ་དེ་ཡང་ཤེས་རབ་ཁྱད་པར་ཅན་ཡིན་ཏེ། རྣམ་པར་གྲོལ་བའི་ལམ་གཅོད་པ་ལ་ཆེས་མྱུར་བ་དང་སྟོབས་ཆེ་བ་ཉིད་ཀྱི་ཕྱིར་རོ། །དེ་ལྟར་ན་མཚན་མ་དང་བཅས་པའི་རྣལ་འབྱོར་རྣམས་ནི་ཐབས་ཁྱད་པར་ཅན་དེ་རིམ་པ་དང་པོ་དང་། རིམ་པ་གཉིས་པའི་ཡང་ཕྱོགས་གཅིག་སྟེ་སྒྱུ་ལུས་སྦྱོར་བ་དང་བཅས་པ་རྣམས་སོ། །མཚན་མ་མེད་པའི་རྫོགས་རིམ་རྗེས་འབྲང་དང་བཅས་པ་ནི་ཤེས་རབ་ཁྱད་པར་ཅན་ཏེ་འོད་གསལ་རྫོགས་པ་ཆེན་པོ་ཉིད་དོ། །འདིར་ཟུང་འཇུག་ནི་གཞན་མ་ཡིན་ཏེ་འོད་གསལ་ཉིད་ལ་སྣང་སྟོང་ཟུང་འཇུག་གི་འོད་གསལ་གསུམ་དུ་དབྱེ་བའི་རྣམ་གྲངས་ཙམ་ཡིན་པའི་ཕྱིར་རོ། །འདི་དག་སྔགས་རང་ལམ་གྱི་ཞི་ལྷག་གཉིས་དང་། བདེན་པ་གཉིས་ཀྱང་ཡིན་ལ། དེ་བཞིན་དུ་བསྐྱེད་རྫོགས་རྫོགས་ཆེན་གསུམ་དུ་བཞག་པ་དེ་ཡང་སྔགས་རང་ལམ་གྱི་བསླབ་པ་གསུམ་ཡིན་པའང་ཤེས་པར་བྱའོ། །དེ་རྣམས་བསྐྱེད་རྫོགས་སུ་འཇོག་བྱེད་ལའང་སྔོན་གྱི་བདག་ཉིད་ཆེན་པོ་རྣམས་གཞིའི་སྒོ་ནས་འཇོག་པར་མཛད་པ་དང་། ལམ་གྱི་སྒོ་ནས་འཇོག་པར་མཛད་པ་དང་། འབྲས་བུའི་སྒོ་ནས་འཇོག་པར་མཛད་པ་སོགས་བཞེད་པ་མི་འདྲ་བ་ཇི་རིགས་སྣང་ན་ཡང་། གོང་དུ་སྨོས་པའི་འབྲས་བུ་ལམ་དུ་བྱེད་པའི་ཚུལ་འདི་ཙམ་ཞིག་ནི་ཀུན་གྱིས་ཐུན་མོང་དུ་ཁས་བླངས་པར་བྱ་བ་ཉིད་ཡིན་ནོ། །དེ་ནས་འདིར་དབྱེ་བསྡུ་དེ་དག་ལས་གང་ལྟར་བཞག་ཀྱང་འགལ་བ་མེད་མོད་དེ། རེ་ཞིག་རྒྱུད་སྡེ་རྙིང་མ་ཕལ་ཆེར་ལ་ཡོངས་སུ་གྲགས་པ་བཞིན་འཇུག་སྒོ་དབང་གི་གྲངས་དང་མཚུངས་པར་བསྐྱེད་རྫོགས་ཡན་ལག་བཞི་ཉིད་བརྗོད་པར་བྱ་སྟེ། འདི་ཉིད་ཀྱི་ཁོངས་སུ་གཞན་རྣམས་ཀྱང་ཞར་ལ་འདུ་བར་འགྱུར་བའི་ཕྱིར་རོ། །དེ་ལྟར་ན་དབང་བཞི་དང་འབྲེལ་བའི། ལམ་བཞི།༡ ལྟ་བ་བཞི།༢ གྲུབ་མཐའ་བཞི།༣ འདའ་ག་མ་བཞི།༤ འབྲས་བུ་བཞི་༥སྟེ་ལྔ། བཞི་ཉི་ཤུ་ཐམ་པ་ལ་ལམ་སོགས་ཆོས་ཉི་ཤུ་ཞེས་བྱའོ། །དེ་ལས་དང་པོ་བུམ་པའི་དབང་གི་ལམ་སོགས་ཆོས་ལྔ་བཤད་པ་ལ་ལྔ་ལས། དང་པོ་བུམ་དབང་གི་ལམ་ནི་བསྐྱེད་རིམ་དབྱིངས་ཀྱི་ལམ་ཞེས་བྱ་སྟེ། སྔ་འགྱུར་རྒྱུད་ལུང་གཉིས་ཀ་ལ་ཁྱབ་པ་དམ་ཚིག་ཐམས་ཅད་ཀྱི་ཉམས་ཆག་སྐོང་བའི་ལུང་བཤགས་པ་ཐམས་ཅད་ཀྱི་རྒྱུད་དྲི་མ་མེད་པའི་རྒྱལ་བའི་ལེའུ་བཅུ་གསུམ་པ་གྲོལ་ལམ་ལྟ་བའི་བཤགས་པས་ཀུན་གཞི་རྒྱུ་རྒྱུད་ལེགས་པར་གཏན་ལ་ཕབས་ནས། ལེའུ་བཅུ་བཞི་པ་ཐབས་ལམ་དབང་གི་བཤགས་པ་ལས། ༀ། བདག་ལུས་གཞལ་ཡས་ཁང་དུ་གནས་པའི་ནང་། སྤྱི་མགྲིན་སྙིང་ག་ལྟེ་བ་གསང་གནས་སུ། །དུག་ལྔ་རྣམ་དག་རིགས་ལྔ་ཡབ་ཡུམ་སྐུ། །བསྐྱེད་རིམས་དབྱིངས་ཀྱི་ལམ་དུ་མ་ཤེས་བཤགས། །ཞེས་གསུངས་ཏེ། དེའི་དོན་ཡང་རང་ཉིད་གཉུགས་མའི་ལྷར་གསལ་བའི་ཐུགས་ཀའི་སུ་བོན་ལས་བྱུང་བའི་འོད་ཟེར་གྱིས་བླ་མ་དང་དབྱེར་མ་མཆིས་པའི་དཔལ་ཧེ་རུ་ཀ་ལ་སོགས་པ་ལ་ཕྱོགས་བཅུ་དུས་བཞིའི་སྐྱབས་ཡུལ་རྣམས་ཀྱིས་བསྐོར་བ་མདུན་གྱི་ནམ་མཁར་སྤྱན་དྲངས་ནས། དེ་ལ་ཡན་ལག་བརྒྱད་པ་ལ་སོགས་པའི་ཕྱག་མཆོད་འབུལ་བ་སྔོན་དུ་འགྲོ་བས་ཚོགས་ཞིང་རང་ལ་བསྟིམས་ཏེ། ལུས་དཀྱིལ་གྱི་སྲུང་འཁོར་དང་གཞལ་ཡས་ཁང་བསྒོམ་ནས། དེ་ཉིད་ཀྱི་གནས་ལྔར་དུག་ལྔ་དང་། ཕུང་པོ་ལྔ་ལ་སོགས་པ་རྣམ་པར་དག་པ་རྒྱལ་བ་རིགས་ལྔའི་དཀྱིལ་འཁོར་གྱི་ལྷ་ཚོགས་རྣམས་བསྒོམ་པ་སྟེ། འདིར་ཡང་གཞི་དུས་ཀྱི་སྐྱེ་བའི་རིམ་པ་དང་མཐུན་པར་རྡོ་རྗེའི་ཆོ་ག་གསུམ་བསྐྱེད་དམ། མངོན་བྱང་ལྔ་བསྐྱེད་ལྟ་བུས་རིམ་གྱིས་བསྐྱེད་ནས་བསྒོམ་དགོས་པའི་ཕྱིར་དང་། ལྷ་སྐུའི་དབྱིབས་དང་ཁ་དོག་སྒོམ་པའི་རྣལ་འབྱོར་ཉིད་ཡིན་པའི་ཕྱིར། དེ་སྐད་ཅེས་བྱའོ། །འདི་ལ་གཞུང་གཞན་ལས་སྙིང་ཁར་ཞི་བའི་དཀྱིལ་འཁོར་དང་། སྤྱི་བོར་ཁྲག་ཐུང་གི་དཀྱིིལ་འཁོར་སྒོམ་པ་སོགས་ལུས་དཀྱིལ་འགོད་ལུགས་འདྲ་མིན་ཇི་རིགས་གསུངས་པ་རྣམས་ཀྱང་འདིར་བསྡུ་བར་བྱ་ཞིང་གནས་ལྔའི་དཀྱིལ་འཁོར་སྒོམ་པ་ཡང་ཐོག་མ་སྙིང་ག་ནས་རིམ་གྱིས་སྒོམ་དགོས་པ་སོགས་རྒྱུ་མཚན་དུ་མ་ཡོད་དོ། །གཉིས་པ་བུམ་དབང་གི་ལྟ་བ་ནི་ངོ་བོ་ཉིད་གསུམ་ཞེས་བྱ་བ་སྟེ། རྒྱུད་དྲི་མ་མེད་པའི་རྒྱལ་པོ་དེ་ཉིད་ལས། ལུས་སེམས་ཡོད་ན་ཟུང་འཇུག་གནས་པ་ལ། །སྣང་ཕྱོགས་སྟོང་ཕྱོགས་ཟུང་འཇུག་མ་ཤེས་ཏེ། །མཉམ་བཞག་རྗེས་ཐོབ་ཉམས་ལེན་སྐྱོང་མ་ཤེས། །ངོ་བོ་ཉིད་གསུམ་ལྟ་བའི་ཀློང་དུ་བཤགས། ཞེས་གསུངས་པ་ལྟར། སྣང་ཕྱོགས་ཀྱི་ངོ་བོ་ཉིད་༡དང་། སྟོང་ཕྱོགས་ཀྱི་ངོ་བོ་ཉིད་༢དང་། ཟུང་འཇུག་གི་ངོ་བོ་ཉིད་༣དེ་གསུམ་གྱིས་སྒོ་གསུམ་གྱི་སྣང་སྤྱོད་མཐའ་དག་ལྷག་པའི་བདེན་པ་དབྱེར་མེད་སྤྱོད་ཡུལ་དང་བྲལ་བར་གཏན་ལ་ཕབས་ནས་མཉམ་བཞག་ཏུ་བློ་བྲལ་གྱི་དོན་ལ་སེམས་རྩེ་གཅིག་པ་དང་། རྗེས་ཐོབ་ཏུ་ལྷར་སྣང་སྒྱུ་མ་ལྟ་བུར་ལམ་དུ་བྱེད་པ་གཉིས་རེས་མོས་སུ་བསྒོམས་པས་ནམ་ཞིག་མཉམ་རྗེས་ལ་རེས་འཇོག་མི་དགོས་པར་ཟུང་དུ་འཇུག་པར་འགྱུར་བ་ཡིན་ནོ། །གསུམ་པ་བུམ་དབང་གི་གྲུབ་མཐའ་ནི། འཁོར་འདས་དབྱེར་མེད་ཅེས་བྱ་བ་སྟེ། དྲི་མེད་རྒྱལ་པོ་བཤགས་པའི་རྒྱུད་དེ་ཉིད་ལས། ཡེ་ནས་འཁོར་འདས་དབྱེར་མེད་ཡིན་པ་ལ། །སྣོད་བཅུད་གཞལ་ཡས་ཁང་དང་ལྷར་མ་ཤེས། །འབྱུང་བཞིའི་ཆོས་ལ་མངའ་དབང་མ་བརྙེས་པ། །གྲུབ་མཐའ་འཁོར་འདས་དབྱེར་མེད་ངང་དུ་བཤགས། །ཞེས་གསུངས་ཏེ། དེ་ཡང་ཆོས་ཐམས་ཅད་ཀྱི་རང་བཞིན་རྣམ་པར་དག་པའི་ཆོས་ཉིད་དམ་དེ་བཞིན་ཉིད་ནི་ཆོས་ཀྱི་སྐུ་ཡིན་པར་ཉན་ཐོས་ཀྱི་ཐེག་པ་ཡན་ཆད་ལ་གྲགས་པ་སྟེ། དཔེར་ན་ཤཱ་རིའི་བུ་དང་། རྣ་བ་བྱེ་བ་རི་དྭགས་ཀྱིས་སློབ་དཔོན་གཞན་འཕགས་པ་རྟ་ཐུལ་དང་། ཀ་ཏའི་བུ་ཆེན་པོ་དག་ལ་བརྟེན་ནས་བདེན་པ་མཐོང་བར་གྱུར་པ་ན། དེ་དག་ན་རེ། བདག་ཅག་གི་དེ་བཞིན་གཤེགས་པའི་ཆོས་ཀྱི་སྐུ་ནི་མཐོང་ན་གཟུགས་ཀྱི་སྐུ་ནི་མ་མཐོང་བས་མཇལ་བར་འདོད་དོ་ཞེས་སྨྲས་པ་ལྟ་བུ་སྟེ། ཚུལ་འདི་ནི་འཁོར་འདས་ཀྱིས་བསྡུས་པའི་ཆོས་ཐམས་ཅད་ཀྱི་དེ་བཞིན་ཉིད་ལ་དབྱེར་མེད་པའི་རྒྱུ་མཚན་གྱིས་ཡིན་ཏེ། འཕགས་པ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འབྲེལ་ལས། མེ་ཡི་རང་བཞིན་ཚ་བ་དང་། །བུ་རམ་རང་བཞིན་མངར་བ་ལྟར། །དེ་བཞིན་ཆོས་རྣམས་ཐམས་ཅད་ཀྱི། །རང་བཞིན་སྟོང་པ་ཉིད་དུ་གསུངས། ཞེས་དང་། དབུ་མ་རྩ་བའི་དེ་བཞིན་གཤེགས་པ་བརྟགས་པ་སྟེ་རབ་བྱེད་ཉེར་གཉིས་པ་ལས་ཀྱང་། དེ་བཞིན་གཤེགས་པའི་རང་བཞིན་གང་། །དེ་ནི་འགྲོ་བའི་རང་བཞིན་ཡིན། །དེ་བཞིན་གཤེགས་པ་རང་བཞིན་མེད། །འགྲོ་བ་འདི་ཡི་རང་བཞིན་མེད། །ཅེས་སོགས་གསུངས་ཤིང་། རྒྱལ་བའི་ཡུམ་ལས་ཀྱང་གཟུགས་ནས་རྣམ་པ་ཐམས་ཅད་མཁྱེན་པའི་བར་གྱི་ཆོས་ཐམས་ཅད་ལ་དེ་བཞིན་ཉིད་དབྱེར་མེད་པར་གསུངས་པས་སོ། །དོན་འདི་ཙམ་ལ་དགོངས་ནས་མདོ་ལམ་དུའང་འཁོར་འདས་དབྱེར་མེད་དུ་བཤད་པ་ཡོད་དེ། དབུ་མ་རྩ་བའི་མྱང་འདས་བརྟགས་པ་སྟེ་རབ་བྱེད་ཉེར་ལྔ་པ་ལས། འཁོར་བ་མྱ་ངན་འདས་པ་ལ། །ཁྱད་པར་ཅུང་ཟད་ཡོད་མ་ཡིན། །མྱ་ངན་འདས་པའང་འཁོར་བ་ལས། །ཁྱད་པར་ཅུང་ཟད་ཡོད་མ་ཡིན། །མྱ་ངན་འདས་མཐའ་གང་ཡིན་པ། །དེ་ནི་འཁོར་བའི་མཐའ་ཡིན་ཏེ། །དེ་གཉིས་ཁྱད་པར་ཅུང་ཟད་ནི། །རབ་ཏུ་ཕྲ་བའང་ཡོད་མ་ཡིན། །ཞེས་གསུངས་པ་ལྟ་བུའོ། །འོ་ན་སྔགས་ལམ་གྱི་འཁོར་འདས་དབྱེར་མེད་དེ། དེ་ལས་ཅི་ཞིག་གིས་ཁྱད་པར་དུ་འཕགས་སྙམས་པ་ལ། འདི་ནི་དེ་བཞིན་ཉིད་ཆོས་ཀྱི་སྐུར་འཁོར་འདས་དབྱེར་མེད་པ་ཙམ་གྱིས་རབ་ཏུ་ཕྱེ་བ་མ་ཡིན་ཏེ། བདེན་པ་གཉིས་དབྱེར་མེད་པའི་རྒྱུ་མཚན་གྱིས་སྟོང་ཉིད་ཆོས་སྐུ་ཡིན་པ་སྒྲུབ་བྱེད་དུ་བཀོད་ནས་སྟོང་གཞི་ཆོས་ཅན་གཟུགས་ཀྱི་སྐུར་བསྒྲུབས་ཏེ་ཀུན་རྫོབ་ཏུ་ཡང་འཁོར་འདས་དབྱེར་མེད་པར་འདོད་པས་རབ་ཏུ་ཕྱེ་བ་ཉིད་ཡིན་པའི་ཕྱིར་རོ། །དེ་སྐད་དུ་ཡང་སྒྱུ་འཕྲུལ་ལས། བླ་མེད་ཐེག་པའི་ནང་ནས་ནི། །དོན་དམ་དུ་ནི་དབྱེར་མེད་ལ། །ཀུན་རྫོབ་ཏུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ཐེག་པ་ཆེན་པོ་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུ་ཡང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་གསུངས་པ་ལྟར་རོ། །དེ་ལ་བདེན་པ་གཉིས་དབྱེར་མེད་པ་ནི། ཤེས་རབ་སྙིང་པོ་ལས། གཟུགས་ལས་ཀྱང་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་གཟུགས་གཞན་མ་ཡིན། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་རྣམས་སྟོང་པའོ། །ཞེས་སོགས་གསུང་པའི་དོན་འཕགས་པ་ཀླུ་སྒྲུབ་ཀྱིས། ཀུན་རྫོབ་ལས་ནི་ལོགས་ཤིག་ཏུ། །དོན་དམ་ཉེ་བར་མ་དམིགས་སོ་ཞེས་དང་། དབུ་མ་རྩ་བའི་འཕགས་པའི་བདེན་པ་བརྟགས་པའི་རབ་བྱེད་ལས། རྟེན་ཅིང་འབྲེལ་འབྱུང་གང་ཡིན་པ། དེ་ནི་སྟོང་པ་ཉིད་དུ་བཤད། །དེ་ནི་བརྟེན་ནས་བདགས་པ་སྟེ། །དེ་ཉིད་དབུ་མའི་ལམ་ཡིན་ནོ། །གང་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་པ། །དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་གཞི་གྲུབ་ལ་རྟེན་འབྱུང་གིས་ཁྱབ་ཅིང་རྟེན་འབྱུང་ལ་སྟོང་ཉིད་ཀྱིས་ཁྱབ་པ་དང་། སྟོང་ཉིད་མ་ཡིན་པའི་ཆོས་འགའ་ཡང་མེད་པར་གསུངས་པ་ལྟ་བུའོ། །དེ་ལྟར་ན་སྟོང་ཉིད་ཆོས་སྐུ་ཡིན་པའི་རྒྱུ་མཚན་གྱིས། དེའི་སྟོང་གཞི་ཆོས་ཅན་གཟུགས་ཀྱི་སྐུ་ཡིན་དགོས་པར་འགྱུར་ཏེ། ཆོས་སྐུའི་རྟེན་གཟུགས་སྐུ་ཡིན་པའི་ཕྱིར་དང་། བདེན་པ་གཉིས་དབྱེར་མེད་པའི་ཕྱིར་རོ། །འོ་ན་ཆོས་ཅན་གཟུགས་ཀྱི་སྐུ་ཡིན་པར་གསང་སྔགས་ཀྱི་རྒྱུད་ལས་ཇི་ལྟར་བཤད་སྙམ་ན། གསང་བ་འདུས་པ་ལས། གཟུགས་ནི་རྣམ་པ་སྣང་མཛད་དེ། །ཚོར་བ་རིན་ཆེན་འབྱུང་ལྡན་ཉིད། །ཅེས་སོགས་གསུང་པ་དང་མཐུན་པར་སྒྱུ་འཕྲུལ་རྩ་རྒྱུད་ལས། ཨེ་མ་ཧོ། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མ་མ་ཀི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཞིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་གསུངས་པ་ལྟར་ཏེ། འདི་ཡང་རྟེན་འབྱུང་གཞན་དབང་གི་ངོས་ནས་བཞག་པ་ཡིན་གྱི། སྣང་ཚད་ཀུན་བཏགས་ཀྱི་ངོས་ནས་བཞག་པ་ནི་མ་ཡིན་ཏེ། དེ་ཉིད་མེད་སྣང་གློ་བུར་བའི་དྲི་མ་ཡིན་པའི་ཕྱིར་རོ། །འོ་ན་སྣང་སྲིད་དག་མཉམ་ཆེན་པོ་ལ་མ་དག་པའི་དྲི་མ་གཞན་ཡང་ཡོད་དམ་ཞེ་ན་མ་ཡིན་ཏེ། འདི་ནི་དོན་ལ་མེད་ཀྱང་འཁྲུལ་ངོར་སྣང་བ་མིག་ཡོར་ལྟ་བུ་སྟེ་བླ་མའི་གདམས་ངག་གིས་ངོ་སྤྲོད་པར་བྱ་བ་ཉིད་དང་། སེམས་ཀྱི་འཁྲུལ་པ་ཡང་ཐབས་ཀྱིས་སྦྱང་བར་བྱ་བ་ཉིད་དོ། །དེ་ལྟར་སོ་སོའི་སྐྱེ་བོའི་གནས་སྐབས་སུ་འཁོར་འདས་དབྱེར་མེད་ཀྱི་དོན་སྤྱི་ཙམ་ངེས་པར་གྱུར་ནས། བྱེ་བྲག་ཏུ་རྒྱུ་ལམ་འབྲས་བུའི་ལྷན་སྐྱེས་གསུམ་གྱི་རིམ་པས་སྣོད་བཅུད་གཞལ་ཡས་ཁང་དང་ལྷར་རྟོགས་པ་གྲུབ་མཐའ་སྙོགས་ཏེ་འཕགས་སུ་དྲུག་ཏུ་འབྱུང་བཞིའི་ཆོས་ལ་མངའ་དབང་བསྒྱུར་ནས་སྟོང་གསུམ་ཡོང་འབྲུར་ཆུད་པ་ལ་སོགས་པའི་རྫུ་འཕྲུལ་སྟོན་ནུས་པ་སྟེ། ལུས་ནམ་སྨིན་གྱི་ཕུང་པོའི་སྦུབས་ནས་སེམས་ལྷ་སྐུར་ཡོངས་སུ་སྨིན་པས་ན་མ་དག་སྒྱུ་མའི་སྐུ་རྣམ་པར་སྨིན་པའི་རིག་འཛིན་ཅེས་བྱའོ། །བཞི་པ་བུམ་དབང་གི་འདའ་ཁ་མ་ནི། དེ་ལྟར་གྲུབ་མཐའ་མ་སྙོགས་ན་གོང་དུ་འཕོ་བ་ཞེས་བྱ་བ་སྟེ། སྔར་སྨོས་པའི་དྲི་མེད་རྒྱལ་པོའི་རྒྱུད་དེ་ཉིད་ལས། ཡེ་ནས་སྐྱེ་ཤི་མེད་པར་མ་ཤེས་པས། །མ་རྟོགས་འཆི་དུས་སྣང་བ་སྒྱུར་བ་དང་། །འོད་ཀྱི་གོང་བུ་སྒྲ་ཡིས་འཕོ་མ་ཤེས། །འདའ་ཁ་འཆི་དྲོད་ངང་དུ་བཤགས་པར་བགྱི། །ཞེས་གསུངས་པ་ལྟར། སྣང་བ་སྒྱུ་མའི་འདའ་ཁ་མ། །འོད་ཀྱི་གོང་བུའི་འདའ་ཁ་མ། །སྒྲ་ཡི་འཕོ་བའི་འདའ་ཁ་མ་སྟེ་གསུམ་ལས། དང་པོ་ནི། དེ་ལྟར་རིམ་པ་དང་པོའི་ལམ་ལ་སློབ་པའི་གང་ཟག་དེས་ལམ་མཐར་མ་ཕྱིིན་པར་གློ་བུར་དུ་འཆི་ན། དེའི་དུས་སུ་སེམས་ཉིད་ཡེ་ནས་སྐྱེ་འགག་གནས་གསུམ་དང་བྲལ་བ་ལ་སྐྱེ་འཆི་རང་མཚན་པ་མེད་པའི་ངེས་པ་དྲངས་ནས། སྣོད་དང་བཅུད་ཀྱི་རྣམ་པ་དབང་པོའི་ཡུལ་དུ་གང་སྣང་བ་ཐམས་ཅད་གཞལ་ཡས་ཁང་དང་ལྷའི་རྣམ་པར་བསྒྱུར་ནས་དེ་ཉིད་ཀྱི་ཐུགས་ཀར་འཕོ་བའི་འཕེན་པ་དྲག་པོ་གཏོད་པ་ཉིད་ཡིན་ནོ། །འདི་ལ་ཡང་སྦྱོར་བ་ཡོ་བྱད་ཐམས་ཅད་སྤང་དག་བྱས་ནས་ཚོགས་གསོག་པ་དང་། རང་གི་བླ་མ་དང་ཡི་དམ་གྱི་ལྷའི་སྣང་བརྙན་དག་དམིགས་པའི་གསལ་འདེབས་ཀྱི་རྟེན་དུ་བཤམས་པ་དང་། གྲོགས་བློ་མཐུན་གྱི་ཚིག་གིས་གསལ་འདེབས་པ་དག་ཀྱང་འབྱོར་ན་ལེགས་སོ། །གཉིས་པ་ནི་ཉེ་བའི་འཆི ་ལྟས་ཐིམ་རིམ་ལ་སོགས་པ་བྱུང་བ་ན་བྱ་སྟེ། དེ་ཡང་སྔོན་འགྲོ་ཚོགས་གསོགས་ལ་སོགས་པ་སྔར་བཞིན་བྱས་ཏེ། ལུས་ཙོག་པུ་ལ་སོགས་པར་བཅོས་ནས། རང་གི་སྙིང་ཁའི་ནང་དུ་འོད་ཀྱི་གོང་བུ་མཐེ་བོང་ཙམ་ཞིག་བསྒོམ། དེ་ལས་འོད་གོང་དེ་འདྲ་བ་རེ་རིམ་བཞིན་ཆད་པས་ཐོག་མར་གཤང་གཅི་གཉིས་ཀྱི་སྒོ་དགག །དེ་ནས་ལྟེ་བ་དང་། ཁ་དང་། སྣ་བུག་གཉིས། མིག་གཉིས། རྣ་བ་གཉིས། མཛོ་སྤུ་དང་སྤྱི་གཙུག་གི་བར་གྱི་སྒོ་རྣམས་རིམ་པར་བཀག །དེ་ནས་ལྟེ་བའི་ཐད་ཀྱི་ལུས་ནང་དུ། རླུང་དང་ཟླ་དཀྱིིལ་ལ་གནས་པའི་རང་སེམས་ཀྱི་ངོ་བོ་ཧཱུྃ་མཐིང་ནག་གཅིག་བསྒོམ་ལ་ཧཱུྃ་དྲག་ལ་རིང་བ་ཉེར་གཅིག་གིས་རླུང་དང་ཟླ་དཀྱིལ་ཧཱུྃ་དང་བཅས་པ་སྙིང་ག་མགྲིན་པ་སྤྱི་བོ་རྣམས་སུ་རིམ་བཞིན་དྲངས་ནས་ཚང་པའི་རྒོ་གསལ་ཏེ་སྤྱི་བོར་བླ་མ་དང་ཡི་དམ་དབྱེར་མེད་དུ་བསྒོམས་པའི་ཐུགས་ཀར་འཕངས་ཏེ་མཉམ་པར་བཞག་པས་གྲུབ་མཐའ་སྙོགས་ཏེ་རིག་འཛིན་གྱི་གོ་འཕང་འཐོབ་པར་འགྱུར་རོ། །གསུམ་པ་ནི་གཞན་དེ་དང་འདྲ་བ་ལས། དབང་པོའི་སྒོ་རྣམས་དགག་བྱེད་ཡི་གེས་བྱེད་པ་དང་། རྣམ་ཤེས་ཧིག་སྒྲ་ཉེར་གཅིག་གིས་འཕེན་པར་བྱེད་པ་ཙམ་གྱིས་ཁྱད་པར་དུ་བྱས་པ་ཡིན་ནོ། །ལྔ་པ་བུམ་དབང་གི་འབྲས་བུ་ནི། སྤྲུལ་པའི་སྐུ་རང་བཞིན་ལྷུན་གྲུབ་ཅེས་བྱ་བ་སྟེ། རྒྱུད་སྔ་མ་ལས། ལུས་ཀྱི་རྩ་ཡི་གཙོ་བོ་ཕལ་པ་རྣམས། །ཡེ་ནས་སྤྲུལ་སྐུར་གནས་པ་མ་ཤེས་ཏེ། །དབྱིབས་ཀྱི་ལྷ་སྐུ་རང་གསལ་སྒོམ་མ་ཤེས། །སྤྲུལ་སྐུའི་རང་བཞིན་ལྷུན་གྲུབ་འབྲས་བུར་བཤགས། །ཞེས་གསུངས་པ་ལྟར། གཞི་དུས་ཀྱི་དཀྱིལ་འཁོར་བཞི་མཐར་ཐུག་སྐུ་བཞིའི་སྒྲུབ་གཞིར་སྔར་བཤད་པ་ལས། དང་པོ་ལུས་རྩ་ཡི་དཀྱིལ་འཁོར་ཕྲ་རགས་དང་གཙོ་ཕལ་རྣམས་ཡེ་ནས་སྤྲུལ་སྐུའི་རང་བཞིན་དུ་གནས་པ་ཤེས་པར་བྱས་ནས། སྔར་ལྷར་བསྐྱེད་རིམ་དབྱིབས་ཀྱི་ལྷར་སྐུ་རང་གསལ་དུ་བསྒོམས་པས་རྩ་རྣམས་ཀྱི་འགྲོས་ཐིམ། དབྱིབས་ཀྱི་ལམ་དག །ལུས་ཀྱི་སྒྲིབ་པ་མ་ལུས་པ་བྱང་ནས་མཐར་ཐུག་གི་འབྲས་བུ་ལུས་བསྐྱེད་རིམ་སྤྲུལ་པའི་སྐུ་རང་བཞིན་ལྷུན་གྲུབ་མངོན་དུ་བྱེད་པར་འགྱུར་བ་ཡིན་ཏེ། བཤགས་རྒྱུད་ལེའུ་བཅོ་ལྔ་པ་འབྲས་བུ་བསྟན་པ་ལས། རྩ་རྣམས་འགྲོས་ཐིམ་དབྱིབས་ཀྱི་ལམ་དག་པ། །ལུས་ཀྱི་སྒྲིབ་བྱང་བསྐྱེད་རིམ་སྤྲུལ་པའི་སྐུ། །ཞེས་གསུངས་པའི་ཕྱིར་རོ། །དེ་ལྟར་བུམ་དབང་གི་ལམ་རྗེས་འབྲང་དང་བཅས་པ་རྒྱས་པར་བཤད་ནས། དེ་དག་གི་དོན་བསྡུ་བའི་ཕྱིར་ལེའུ་བཅུ་བཞི་པའི་ལུང་སྔ་མའི་འཕྲོ་ལས། ལུས་རྩ་བུམ་པའི་དབང་དུ་མ་ཤེས་པས། །མ་ཧཱ་ཡོ་གའི་བསྐྱེད་རིམ་བསྒོམ་མ་ནུས། །བུམ་དབང་དམ་ཚིག་ཉམས་པ་མཐོལ་ལོ་བཤགས། །ཚངས་པར་གྱུར་ནས་བསྐྱེད་རིམ་དངོས་གྲུབ་སྩོལ། །ཞེས་གསུངས་ཏེ། དེ་ཡང་ལུས་རྩ་ཡི་དཀྱིལ་འཁོར་ཉིད་བུམ་པའི་དབང་གི་སྒྲུབ་གཞིར་ཤེས་པར་བྱས་ནས། མ་ཧཱ་ཡོ་ག་སྟེ་རྣལ་འབྱོར་ཆེན་པོའི་བསྐྱེད་རིམ་སྒོམ་པའི་གྲོགས་སུ་བུམ་དབང་གི་དམ་ཚིག་བླ་མ་དང་མཆེད་ལ་གུས་པར་བྱ་བ་ལ་སོགས་པ་རྣམས་མ་ཉམས་པར་བསྲུངས་པས་རྒྱུད་ཡོངས་སུ་དག་པར་གྱུར་པ་ན། ཐུན་མོང་གི་དངོས་གྲུབ་གཙོ་བོར་གྱུར་པའི་དངོས་གྲུབ་རྣམ་པ་གཉིས་ཇི་རིགས་པར་འཐོབ་པར་འགྱུར་བ་ཡིན་ནོ། །སྤྱི་དོན་གཉིས་པ་གསང་དབང་ལའང་ལམ་སོགས་ཆོས་ལྔ་ལས། དང་པོ་གསང་དབང་གི་ལམ་ནི། །བདག་བྱིན་གྱིས་རློབས་པའི་ལམ་ཞེས་བྱ་བ་སྟེ། དེ་ཡང་རྒྱུད་སྔ་མ་ལས། ལུས་གནས་ཡི་གེ་ལོངས་སྐུར་གནས་པ་ལ། །འཁོར་ལོ་བརྟེན་དང་མ་བརྟེན་མན་ངག་གནད། །བདེ་བ་ཉམས་སུ་ལེན་པའི་ལམ་མ་བསྒོམ། །བདག་ལ་བྱིན་རླབས་ལམ་གྱི་ངང་དུ་བཤགས། །ཞེས་གསུངས་པ་ལྟར་ལུས་གནས་ཀྱི་རྩ་ཡིག་ཡེ་ནས་ལོངས་སྐུའི་རང་བཞིན་དུ་གནས་པ་གང་ཞིག །ད་ལྟ་ལམ་གྱི་དུས་སུ་དེ་ཉིད་སྦྱངས་ནས་ཉམས་སུ་ལེན་པའི་གདམས་ངག་ལ། རྩའི་འཁོར་ལོ་ལ་བརྟེན་པའི་གདམས་ངག་གསུམ། རྩའི་འཁོར་ལོ་ལ་མ་བརྟེན་པའི་གདམས་ངག་ལྔ། གཞན་མན་ངག་གི་གནང་ལ་བརྟེན་པའི་གདམས་ངག་གཅིག་སྟེ་བསྡོམས་པའི་དགུ་ཡོད་པ་ལས། ལམ་ཉམས་སུ་ལེན་པའི་གནས་སྐབས་ན་འཁོར་ལོ་ལ་མ་བརྟེན་པའི་གདམས་ངག་ཉིད་སྔོན་དུ་ཉམས་སུ་བླངས་པར་བྱ་བ་ཡིན་པས་ན་དེ་ཉིད་ཐོག་མར་བརྗོད་པ་ལ། མར་མེ་གསོ་བ། ཚངས་པའི་ཐོག །རྩའི་རྣལ་འབྱོར། སྲུབ་ཤིང་གི་འཁོར་ལོ། ཐིག་ལེའི་རྣལ་འབྱོར་ཏེ་ལྔ་དང་། གཉིས་པ་འཁོར་ལོ་ལ་བརྟེན་པའི་གདམས་ངག་ལ། ལྟེ་བའི་རྩ་འཁོར་གཅིག་པུ་ལ་བརྟེན་པའི་གདམས་ངག་དང་། ལྟེ་བ་དང་སྙིང་གའི་རྩ་འཁོར་ཏེ་གཉིས་ལ་བརྟེན་པའི་གདམས་ངག་དང་། དེའི་སྟེང་དུ་མགྲིན་པ་དང་སྤྱི་བོའི་རྩ་འཁོར་གཉིས་བསྣན་པའི་འཁོར་ལོ་བཞི་ལ་བརྟེན་པའི་གདམས་ངག་སྟེ། དེ་ལྟར་གསུམ་དང་། གཞན་མན་ངག་གི་གནད་ལ་བརྟེན་པའི་ཟབ་པ་གཅིག་སྟེ་བསྡམས་པས་དགུའོ། །འདི་དག་ཇི་ལྟར་བསྒོམ་པའི་ཚུལ་རྣམས་ནི་ཧ་ཅང་མང་བས་མ་སྤྲོས་ལ་ཞིབ་ཏུ་རྟོགས་པར་འདོད་པ་དག་གིས་ནི་གཞུང་དུ་བལྟ་བར་བྱའོ། །གཞན་ཡང་གསང་བའི་གནད་རྣམས་ནི་ཁྱབ་བདལ་དུ་བརྗོད་པར་བྱ་བའང་མ་ཡིན་པས་བླ་མའི་ཞལ་ལས་བླངས་པར་བྱའོ། །དེ་ལྟར་གདམས་ངག་དགུས་བདེ་བ་ཉམས་སུ་ལེན་པའི་ལམ་བསྒོམས་པས་བདག་གཞན་གྱི་ཟླས་ཕྱེ་བའི་བདག་གི་ལུས་ལ་བྱིན་གྱིས་བརླབས་པ་ལ་བརྟེན་ནས་རང་ལས་བྱུང་བའི་ཡེ་ཤེས་རྟོགས་པར་འགྱུར་བ་ཡིན་ནོ། །གཉིས་པ་གསང་དབང་གི་ལྟ་བ་ནི། རང་བྱུང་ཡེ་ཤེས་ཞེས་བྱ་བ་ཡིན་ཏེ། རྒྱུད་སྔ་མ་ལས། ཉོན་མོངས་དང་རྣམ་རྟོག་སྣྲེལ་ཞི་རྣམས། །གསལ་ཞིང་ཡངས་པའི་རང་བྱུང་ཡེ་ཤེས་གནས། །སྙིང་ག་རོ་རྐྱང་དབུ་མ་ཟུང་འཇུག་མདོ། །ལྟ་བ་རང་བྱུང་ཡེ་ཤེས་ཀློང་དུ་བཤགས། །ཞེས་གསུངས་པ་ལྟར། ཉོན་མོངས་རང་བྱུང་ཡེ་ཤེས། རྣམ་རྟོག་རང་བྱུང་ཡེ་ཤེས། སྣྲེལ་ཞི་རང་བྱུང་ཡེ་ཤེས། གསལ་ཞིང་ཡང་པའི་རང་བྱུང་ཡེ་ཤེས་ཏེ། ནང་གསེས་བཞི་ཡོད་པ། དེ་དག་གང་ལས་སྐྱེ་བའི་གནས་ལ་གནད་དུ་བསྣུན་པའི་སྒོ་ནས་ཐིག་ལེ་རྣལ་འབྱོར་བཞི་སྟེ། སྙིང་ཁའི་ཉི་ཟླ་ཁ་སྦྱོར། ལྟེ་བའི་དཔའ་བོ་འབའ་ཞིག །གསང་གནས་བདེ་བའི་ཐིག་ལེ། མཛོ་སྤུའི་སྐྲ་དཀར་སུ་བོན་ནོ། །དེ་ལས་དང་པོ་ནི་སྙིང་ཁར་ཉི་ཟླ་ཁ་སྦྱོར་གྱི་ཐིག་ལེ་མཚན་ཉིད་གསུམ་ལྡན་སྒོམ་པའི་ཚུལ་རྣམས་ཡིན་ལ། གཉིས་པ་ནི་ལྟེ་བར་ཐིག་ལེ་མཚན་ཉིད་གསུམ་ལྡན་བསྒོམས་པ་ལ་རོ་རྐྱང་གི་ལམ་ནས་སྟེང་རླུང་མནན་ནས་བསྟིམས་པའི་སྦྱོར་བ་ཉིད་ཡིན་ནོ། །གསུམ་པ་ནི། གསང་བའི་སྦུབས་སུ་ཐིག་ལེ་དམར་པོ་ཆོས་གསུམ་ལྡན་བསྒོམ་སྟེ་འོག་རླུང་ཆེར་བསྐུམ་པའི་སྦྱོར་བས་རླུང་སེམས་དབུ་མར་འཇུག་པའི་ཐབས་སོ། །བཞི་པ་ནི་མཛོད་སྤུར་ཧཾ་ཡིག་འཁྱོགས་པོ་འགོ་མཐུར་ལྟ་བསྒོམས་ཏེ་རླུང་འབྱུང་འཇུག་གི་སྦྱོར་བས་ཧཾ་ལས་བབས་པའི་བདུད་རྩིས་ལྕེ་ཆུང་གི་རྒྱབ་རྩའི་སུམ་མདོ་བརྒྱུད་སྙིང་གའི་ཧཱུཾ་ཡིག་ཚིམ་པར་བྱེད་པའི་བར་དུ་བསྒོམ་པའི་གདམས་ངག་གོ། །དེ་ལྟར་བཞི་ལ་བརྟེན་ནས། ཡུལ་རྐྱེན་ལ་ལྟོས་པ་དང་། མི་ལྟོས་པ་དང་། མི་གསལ་བ་དང་གསལ་བའི་ཁྱད་པར་གྱིས་རང་བྱུང་གི་ཏིང་ངེ་འཛིན་བཞི་པོ་སྐྱེ་བར་འགྱུར་བ་ཡིན་ནོ། །གསུམ་པ་གསང་དབང་གི་གྲུབ་མཐའ་ནི། མ་འདྲེས་ལ་ཡོངས་སུ་རྫོགས་པ་ཅེས་བྱ་བ་སྟེ། རྒྱུད་སྔ་མ་ལས། སྒྲ་དབྱངས་ཡེ་ནས་སྐད་དུ་གནས་པ་ལ། །འགྲོ་བ་རིགས་དྲུག་སོ་སོའི་རང་སྐད་དང་། །གསུང་རབ་ཡན་ལག་བཅུ་གཉིས་ཡིན་མ་ཤེས། །གྲུབ་མཐའ་མ་འདྲེས་ཡོངས་རྫོགས་ངང་དུ་བཤགས། །ཞེས་གསུངས་པ་ལྟར། རང་སྐལ་གྱི་གཞི་ལ་སྒྲ་དབྱངས་ཐམས་ཅད་ཡེ་ནས་གསུང་རྡོ་རྗེའི་ངོ་བོར་གནས་པའི་ཚུལ་རྣམས་ཤེས་པས་འགྲོ་བ་རིགས་དྲུག་སོ་སོའི་རང་སྐད་དུ་ཆོས་སྟོན་པ་དང་། གསུང་རབ་ཡན་ལག་བཅུ་གཉིས་ཀྱི་དོན་ཤེས་ཤིང་གཞན་ལ་འདོམས་པའི་ཚངས་པའི་དབྱངས་ཐོབ་པ་དང་། སོ་སོ་ཡང་དག་པའི་རིག་པ་བཞི་ལ་རང་དབང་ཐོབ་པ་ལ་སོགས་པའི་ཡོན་ཏན་མཐའ་དག་མ་འདྲེས་ལ་ཡོངས་སུ་རྫོགས་པ་རང་བཞིན་གྱིས་འོད་གསལ་བའི་ལྷ་སྐུ་དག་པ་སྒྱུ་མའི་སྐུ་ཚེ་ལ་དབང་བའི་རིག་འཛིན་ཉིད་མངོན་དུ་འཐོབ་པར་འགྱུར་བའོ། །བཞི་པ་གསང་དབང་གི་འདའ་ཁ་མ་ནི། འོད་གསལ་ཞེས་བྱ་བ་སྟེ། རྒྱུད་དེ་ཉིད་ལས། སེམས་ཀྱི་འོད་གསལ་ཡེ་ནས་འདུ་འབྲལ་མེད། །མ་བསྒོམ་རང་ཆས་ཡིན་པར་མ་ཤེས་པས། །འཆི་དུས་རང་གསལ་འབྱུང་བར་མ་འཚལ་བ། །འདའ་ཁའི་གདམས་ངག་འོད་གསལ་ངང་དུ་བཤགས། །ཞེས་གསུངས་པ་ལྟར་གལ་ཏེ་ཚེ་འདིར་གྲུབ་མཐའ་མ་སྙོགས་ནའང་སེམས་ཀྱི་འོད་གསལ་ཡེ་ནས་འདུ་འབྲལ་མེད་པའི་རྒྱུ་མཚན་གྱིས། ཆེད་དུ་མ་བསྒོམས་ཀྱང་འཆི་ཁའི་དུས་སུ་འོད་གསལ་ཉིད་རང་ཆས་སུ་འབྱུང་བ་ཡིན་ཏེ། དེ་ཡང་འཆི་ཁ་མའི་རླུང་གིས་རྐྱེན་བྱས་ནས་རྩ་མདུད་ཐམས་ཅད་གྲོལ་ཏེ་རླུང་ཐམས་ཅད་དབུ་མར་ཞུགས་པས་སྟོང་གསལ་མཆོག་གི་ཏིང་ངེ་འཛིན་སྐྱེ། དེ་སྔར་གྱི་རང་བྱུང་ཡེ་ཤེས་ཀྱི་ཏིང་ངེ་འཛིན་དང་འདྲེས་ནས་བར་དོ་མེད་པར་གྲུབ་མཐའ་སྙོགས་ཏེ་རིག་པ་འཛིན་པའི་གོ་འཕང་ཐོབ་པར་འགྱུར་བའོ། །ལྔ་པ་གསང་དབང་གི་འབྲས་བུ་ནི། ལོངས་སྤྱོད་རྫོགས་པའི་སྐུ་རང་བཞིན་གྱིས་ལྷུན་གྲུབ་ཅེས་བྱ་བ་སྟེ། རྒྱུད་སྔ་མའི་འཕྲོ་ལས། ལུས་གནས་ཡི་གེ་ལོངས་སྐུར་གནས་པ་ལ། །ལམ་དུ་མ་ཤེས་བདེ་བ་མ་བསྒོམས་པས། །གཏུམ་མོའི་དྲོད་ཀྱིས་འབྲས་བུ་མ་ཐོབ་པ། །འབྲས་བུ་ལོངས་སྤྱོད་རྫོགས་པའི་ངང་དུ་བཤགས། །ཞེས་གསུངས་ཏེ། དེ་ཡང་གཞི་དུས་ཀྱི་དཀྱིལ་འཁོར་བཞི་ལས། ལུས་ལ་གནས་པའི་རྩ་ཡི་གེའི་དཀྱིལ་འཁོར་ཉིད་ཡེ་ནས་ལོངས་སྐུ་ཆེན་པོའི་རང་བཞིན་དུ་གནས་པ་ལ། དེ་ཉིད་ལམ་དུ་ཤེས་པའི་བདེ་བའི་ཐབས་ལ་བརྟེན་ཏེ་བསྒོམས་པས་གཏུམ་མོ་ཡེ་ཤེས་ཀྱི་དྲོད་མཆོག་ཏུ་བསྐྱེད་པ་ལ་བརྟེན་ནས་ཡེ་ཤེས་ཀྱི་སྣང་བ་ལ་རང་དབང་བསྒྱུར་ཏེ་ཡི་གེའི་འགྲོས་ཐིམ། སྔགས་ཀྱི་ལམ་དག །ངག་གི་སྒྲིབ་པ་མ་ལུས་པ་བྱང་ནས། མཐར་ཐུག་གི་འབྲས་བུ་རྫོགས་རིམ་ལོངས་སྤྱོད་རྫོགས་པའི་སྐུ་རང་བཞིན་ལྷུན་གྲུབ་ཉིད་མངོན་དུ་བྱེད་པར་འགྱུར་བ་ཡིན་ཏེ། བཤགས་ལེ་བཅོ་ལྔ་པ་ལས། ཡི་གེའི་འགྲོས་ཐིམ་སྔགས་ཀྱི་ལམ་དག་པ། །ངག་གི་སྒྲིབ་བྱང་རྫོགས་རིམ་ལོངས་སྤྱོད་སྐུ། །ཞེས་གསུངས་པའི་ཕྱིར་རོ། །དེ་ལྟར་གསང་དབང་གི་ལམ་རྗེས་འབྲང་དང་བཅས་པ་རྒྱས་པར་བཤད་ནས། དེ་དག་གི་དོན་བསྡུ་བའི་ཕྱིར་ལེའུ་བཅུ་བཞི་པའི་ལུང་སྔ་མའི་འཕྲོར། གསང་བའི་དབང་གི་གདམས་ངག་ཤེས་གྱུར་ཀྱང་། །རང་གི་བདེ་བ་ལམ་དུ་མ་ལོངས་ཏེ། །གཏུམ་མོའི་དྲོད་རྟགས་ལུས་ལ་མ་ཤར་བ། །གསང་དབང་དམ་ཚིག་ཉམས་པ་མཐོལ་ལོ་བཤགས། །ཞེས་གསུངས་ཏེ། དེ་ཡང་རྩ་ཡི་གེའི་དཀྱིལ་འཁོར་ཉིད་གསང་བའི་དབང་གི་གདམས་ངག་བསྒོམ་པའི་སྒྲུབ་གཞིར་ཤེས་པར་བྱས་ནས་གཞན་རྐྱེན་ལ་མ་ལྟོས་པར་རང་གི་བདེ་བ་ལམ་དུ་བྱེད་པའི་གྲོགས་སུ་སྔགས ་དང་ཕྱག་རྒྱ་རྒྱུན་མི་བཅད་པ་སོགས། གསང་དབང་གི་དམ་ཚིག་རྣམས་མ་ཉམས་པར་བསྲུངས་པས་དོན་དམ་ཡེ་ཤེས་ཀྱི་གཏུམ་མོའི་དྲོད་རྟགས་ལུས་ལ་ཤར་ཏེ་ཚེ་འདིར་མཆོག་གི་དངོས་གྲུབ་མངོན་དུ་འཐོབ་པར་འགྱུར་བ་ཡིན་ནོ། །སྤྱི་དོན་གསུམ་པ་ཤེས་རབ་ཡེ་ཤེས་ཀྱི་དབང་ལའང་ལམ་སོགས་ཆོས་ལྔ་ལས། དང་པོ་ཤེར་དབང་གི་ལམ་ནི། དཀྱིལ་འཁོར་འཁོར་ལོའམ། འཁོར་ལོ་ཐབས་ཀྱི་ལམ་ཞེས་བྱ་བ་སྟེ། དེ་ཡང་རྒྱུད་སྔ་མ་ལས། ལུས་ཁམས་བདུད་རྩི་རང་ལ་གནས་པ་ལ། །ཡུམ་བདག་འདོད་པ་བྱིན་རླབས་མཉམ་པ་དང་། །སྦྱོར་བ་དངོས་གཞི་རྗེས་ཀྱི་བསྡུས་རྒྱས་རྣམས། །མ་བསྒོམས་འཁོར་ལོ་ཐབས་ཀྱི་ལམ་དུ་བཤགས། །ཞེས་གསུངས་པ་ལྟར། ལུས་ཀྱི་རྩ་ཡིག་ལ་ཁམས་བདུད་རྩི་ཡེ་ནས་རང་ཆས་སུ་གནས་པ་ཉིད་ལམ་གྱིས་སྦྱངས་ནས་ཉམས་སུ་ལེན་པར་བྱེད་པ་ལ་ལམ་རྒྱས་བསྡུས་གཉིས་ལས། རྒྱས་པ་ལའང་། ལུས་ངག་མཉམ་པ། འདོད་པ་མཉམ་པ། བྱིན་རླབས་མཉམ་པ། རིག་མ་དག་པ། མན་ངག་གི་གནད་ཀྱིས་ཟིན་པ་སྟེ་ལྔ་ལས། དང་པོ་ནི་ཡུམ་དང་བདག་གཉིས་ཀའི་ལུས་ལྷ་དང་ངག་སྔགས་སུ་མཉམ་པའོ། །གཉིས་པ་ནི། ཕན་ཚུན་གཉིས་ཀས་ཐབས་ཟབ་མོ་འདི་ལ་བརྟེན་ནས་ལྷན་ཅིག་སྐྱེས་པའི་ཡེ་ཤེས་མངོན་དུ་བྱས་ཏེ་རྫོགས་པའི་བྱང་ཆུབ་འཐོབ་པར་བྱའོ་སྙམས་པའི་འདོད་པ་མཉམ་པ་དང་། གསུམ་པ་ནི། མཁའ་གསང་རྡོ་རྗེ་དང་པད་མར་ཕན་ཚུན་བསྣོལ་མར་བྱིན་གྱིས་རློབས་པར་མཉམ་པའོ། །བཞི་པ་ནི། སྐྱེ་བས་ཐོབ་པའམ་སྦྱངས་པ་ལས་བྱུང་བའི་རིག་མ་དག་པ་སྟེ། དང་པོ་ནི། རི་དྭགས་ཅན་མ་དང་། དུང་ཅན་མ། གླང་པོ་ཅན་མ། རི་མོ་ཅན་མ། སྣ་ཚོགས་ཅན་མ་རྣམས་སོ། །གཉིས་པ་ནི་ཐོས་བསམ་དང་བསླབ་པས་རྒྱུད་ཡོངས་སུ་དག་པ་དང་། དབང་གིས་དག་པ། རྣལ་འབྱོར་གྱི་ཏིང་ངེ་འཛིན་གྱིས་དག་པ་རྣམས་སོ། །ལྔ་པ་མན་ངག་གི་གནད་ཀྱི་ཟིན་པ་ནི། དབབ་བཟུང་ལྡོག་ཁྱབ་མི་ཉམས་པར་བསྲུངས་པ་རྣམས་སོ། །གཉིས་པ་ལམ་བསྡུས་པ་ལའང་། ལུས་ཀྱི་འཁྲུལ་འཁོར་འཆོས་པ་ལ་སོགས་པའི་སྦྱོར་བ་དང་། འཛིན་འདྲེན་དགྲམ་པ་ལ་སོགས་པའི་དངོས་གཞི་དང་། རྗེས་བཅད་པའི་གདམས་ངག་རྣམས་གཞུང་ལས་བཤད་པ་བཞིན་ཉམས་སུ་བླངས་པའི་ཐབས་ལ་བརྟེན་ནས་ལྷན་ཅིག་སྐྱེས་པའི་ཡེ་ཤེས་བསྐྱེད་པར་བྱེད་པ་ཡིན་ནོ། །གཉིས་པ་ཤེར་དབང་གི་ལྟ་བ་ནི། དགའ་བཞིའི་ལྷན་སྐྱེས་ཞེས་བྱ་བ་ཡིན་ཏེ། རྒྱུད་སྔ་མ་ལས། བདེ་བ་ཡེ་ནས་རང་ལ་གནས་པ་ལ། །གོ་རིམ་གནས་དང་སྤང་བྱ་ངོ་བོ་ཡི། །བདེ་བ་རྣམ་བཞི་ཉམས་སུ་མ་ལོན་པ། །བདེ་བཞིར་ལྟ་བ་ལྷན་སྐྱེས་ངང་དུ་བཤགས། །ཞེས་གསུངས་པ་ལྟར། ཁམས་བདུད་རྩི་བདེ་བ་ཆེན་པོ་ཉིད་ཡེ་ནས་རང་ལ་གནས་པ་ཐབས་ཟབ་མོས་ཉམས་སུ་བླངས་པས་དགའ་བ་བཞིའི་ཡེ་ཤེས་རྣམས་རིམ་བཞིན་སྐྱེ་བར་འགྱུར་ཏེ། དེ་ལ་དབྱེ་ན། གོ་རིམ་གྱི་དགའ་བ་བཞི་དང་། གནས་ཀྱི་དགའ་བ་བཞི་དང་། སྤང་བྱ་ལ་ལྟོས་པའི་དགའ་བ་བཞི་དང་། ངོ་བོའི་དགའ་བ་བཞི་སྟེ། ནང་གསེས་ཀྱི་དགའ་བ་བཞི་བཞི་བཅུ་དྲུག་ཡོད་པའི་མཐའི་ལྷན་ཅིག་སྐྱེས་པའི་དགའ་བ་ངོས་ཟིན་པར་བྱས་ནས་ཉམས་སུ་ལེན་པ་སྟེ། འདིར་དགའ་བ་དང་བདེ་བའི་ཁྱད་པར་ནི་ལུས་ཀྱི་བདེ་བ་དང་སེམས་ཀྱི་དགའ་བ་ཞེས་དབྱེ་བའམ། ཡང་ན་དེ་གཉིས་མིང་གི་རྣམ་གྲངས་ཙམ་དུ་ཤེས་པར་བྱའོ། །གསུམ་པ་ཤེར་དབང་གི་གྲུབ་མཐའ་ནི། བདེ་སྟོང་རྒྱ་ཆུང་ཞེས་བྱ་བ་སྟེ། རྒྱུད་སྔ་མའི་མུར། བདེ་བ་རང་ལ་གནས་པར་མ་ཤེས་ཤིང་། །སྡུག་བསྔལ་རྐྱེན་གྱིས་བདེ་བ་མ་བསྒོམས་པས། །བདེ་སྟོང་རྒྱ་ཆུང་གྲུབ་མཐའ་མ་རྟོགས་པ། །ལྷན་ཅིག་སྐྱེས་པ་བདེ་བའི་ངང་དུ་བཤགས། །ཞེས་གསུངས་པ་ལྟར། ཡེ་ནས་བདེ་བ་ཆེན་པོ་རང་ལ་གནས་པའི་ཚུལ་རྣམས་ཤེས་པར་བྱས་ནས། སྡུག་བསྔལ་དང་རྐྱེན་གྱི་རྣམ་པ་ཇི་ལྟར་སྣང་བ་ཐམས་ཅད་བདེ་བ་ཆེན་པོར་ལམ་དུ་བྱས་ནས་བསྒོམས་པས་རང་སྐལ་གྱི་སུ་གཉིས་ལ་འཁོར་བ་དང་མྱ་ངན་ལས་འདས་པའི་ཆོས་ཇི་རིགས་པ་རྣམས་བདེ་སྟོང་དུ་རྟོགས་པ་འབྱུང་སྟེ་ལམ་གོང་མ་ལ་ལྟོས་པའི་བདེ་སྟོང་རྒྱ་ཆུང་བ་སློབ་པའི་ཟུང་འཇུག་གི་ངོ་བོ་ཉིད་ལྷན་སྐྱེས་ཕྱག་རྒྱ་ཆེན་པོའི་རིག་འཛིན་མངོན་དུ་བྱས་པའོ། །བཞི་པ་ཤེར་དབང་གི་འདའ་ཁ་མ་ནི། རྡོ་རྗེ་སེམས་དཔའ་ཞེས་བྱ་བ་སྟེ། དེ་ཡང་རྒྱུད་སྔ་མ་ལས། བདག་ཉིད་རྡོ་རྗེ་སེམས་དཔར་མ་ཤེས་པས། །འཆི་དུས་རང་ཉིད་དེར་སྣང་སྐུར་མ་གྲུབ། །འཁོར་ལོ་བཞི་ཡི་བདེ་བ་མ་འབྱོངས་པ། །འདའ་ཁ་རྡོ་རྗེ་སེམས་པའི་ངང་དུ་བཤགས། །ཞེས་གསུངས་པ་ལྟར། བདག་ཉིད་ཡེ་ནས་རྡོ་རྗེ་སེམས་དཔའི་རང་བཞིན་ཡིན་པར་ཤེས་ནས་བསྒོམས་པས། གལ་ཏེ་གྲུབ་མཐའ་མ་སྙོགས་པར་འཆི་བར་འགྱུར་ནའང་། སྐབས་དེར་འཆི་བའི་རླུང་གིས་རྐྱེན་བྱས་ནས་འཁོར་ལོ་བཞི་ཡི་རྩ་མདུད་རྣམས་དྲལ་ཏེ་སེམས་ཀྱི་རྟེན་ཁམས་ཀྱི་ཐིག་ལེ་རྣམས་རིམ་གྱིས་ཚོགས་ནས་དབུ་མར་ཞུགས་པས་བདེ་སྟོང་གཉིས་མེད་ཀྱི་ཡེ་ཤེས་རྡོ་རྗེ་སེམས་དཔའ་སྐྱེ་བར་འགྱུར་བ་སྟེ། སྒྱུ་འཕྲུལ་བཤད་རྒྱུད་རྡོ་རྗེ་མེ་ལོང་ལས། རྡོ་རྗེ་སྟོང་པ་ཉིད་ལ་བྱ། །སེམས་དཔའ་ཡེ་ཤེས་ཆེན་པོ་སྟེ། །ཞེས་གསུངས་པ་ལྟར་ཏེ། དེ་ལྟ་བུའི་རྡོ་རྗེ་སེམས་དཔའ་དེ་ཉིད་སྔར་གྱི་བདེ་སྟོང་གི་ལྟ་བ་དང་འདྲེས་ནས་བར་དོ་མེད་པར་གྲུབ་མཐའ་སྙོགས་པར་འགྱུར་རོ། །ལྔ་པ་ཤེར་དབང་གི་འབྲས་བུ་ནི། ཆོས་ཀྱི་སྐུ་རང་བཞིན་ལྷུན་གྲུབ་ཅེས་བྱ་བ་སྟེ། རྒྱུད་སྔ་མ་ལས། ཡེ་ནས་བདུད་རྩི་ཐིག་ལེ་ཆེན་པོ་ནི། །ཆོས་སྐུ་དྲི་མ་མེད་པར་གནས་པ་ལས། །མ་ཤེས་མ་རྟོགས་བདུད་རྩི་མ་སྦྱངས་པ། །ཞེས་གསུངས་ཏེ། དེ་ཡང་སེམས་ཀྱི་རྟེན་ནི་བདུད་རྩི་ཐིག་ལེ་ཆེན་པོ་སྟེ། དེ་ཉིད་ཡེ་ནས་ཆོས་སྐུ་དྲི་མ་མེད་པར་གནས་པའི་ཚུལ་རྣམས་ཤེས་ཤིང་རྟོགས་པར་བྱས་ནས ་དཀྱིལ་འཁོར་བཞི་ལས་ཁམས་བདུད་རྩིའི་དཀྱིལ་འཁོར་དེ་ཉིད་ལ་གནད་དུ་བསྣུན་པའི་སྒོ་ནས་ལེགས་པར་སྦྱངས་པས་བདུད་རྩི་ཁམས་ཀྱི་འགྲོས་ཐིམ། བཅུད་ཀྱི་ལམ་དག །སེམས་ཀྱི་སྒྲིབ་པ་མ་ལུས་པ་བྱང་སུ་ནས། མཐར་ཐུག་གི་འབྲས་བུ་དྭངས་མ་ཆོས་ཀྱི་སྐུ་རང་བཞིན་ལྷུན་གྲུབ་ཉིད་མངོན་དུ་བྱེད་པར་འགྱུར་བ་ཡིན་ཏེ། བཤགས་ལེ་བཅོ་ལྔ་པ་ལས། བདུད་རྩི་ཁམས་ཀྱི་འགྲོས་ཐིམ་བཅུད་ཀྱི་ལམ། །སེམས་ཀྱི་སྒྲིབ་དག་དངས་མ་ཆོས་ཀྱི་སྐུ། །ཞེས་གསུངས་པའི་ཕྱིར་རོ། །དེ་ལྟར་ཤེར་དབང་གི་ལམ་རྗེས་འབྲང་དང་བཅས་པ་རྒྱས་པར་བཤད་ནས། དེ་ཉིད་ཀྱི་དོན་བསྡུ་བའི་ཕྱིར་ལེའུ་བཅུ་བཞི་པའི་ལུང་སྔ་མའི་འཕྲོར། དྲི་ཆེན་དྲི་ཆུ་མམ་སུ་རཀྟ་ཟིལ། །འབྱུང་བ་བཞི་སྟེ་ཁམས་ཀྱི་བདུད་རྩི་དགུ། །བདེ་བ་མཆོག་བདེ་རྣམ་རྟོག་བྲལ་བདེ་བ། །ལྷན་སྐྱེས་ཡེ་ཤེས་དབང་གི་ངང་དུ་བཤགས། །ཞེས་གསུངས་ཏེ། དེ་ཡང་ཁམས་བདུད་རྩིའི་དཀྱིལ་འཁོར་ཉིད་ཤེར་དབང་གི་ལམ་གྱི་སྒྲུབ་གཞིར་ཤེས་པར་བྱས་ནས་ལྷན་སྐྱེས་སྒོམ་པའི་གྲོགས་སུ། དྲི་ཆེན་ལ་སོགས་པའི་བདུད་རྩི་ལྔ་དང་། འབྱུང་བ་བཞི་སྟེ་ཁམས་ཀྱི་བདུད་རྩི་དགུ་པོ་བསྟེན་པ་དང་། ཤེས་རབ་ལ་མི་སྨད་པ་ལ་སོགས་པའི་ཤེར་དབང་གི་དམ་ཚིག་རྣམས་མ་ཉམས་པར་བསྲུངས་པས། བདེ་བ་དང་། མཆོག་བདེ་དང་། རྣམ་རྟོག་བྲལ་བདེ་དང་། ལྷན་ཅིག་སྐྱེས་པའི་བདེ་བ་སྟེ། ཡས་བབས་ཐབས་ཀྱི་རང་བཞིན་དགའ་བཞིའི་ཡེ་ཤེས་ཉིད་མཐར་ཆགས་སུ་སྐྱེས་ནས་མཆོག་གི་དངོས་གྲུབ་ལ་སྦྱོར་བར་འགྱུར་བ་ཡིན་ནོ། །སྤྱི་དོན་བཞི་པ་ཚིག་དབང་ངམ་བདེ་བ་ཆེན་པོའི་དབང་ལའང་ལམ་སོགས་ཆོས་ལྔ་ལས། དང་པོ་དབང་བཞི་པའི་ལམ་ནི་རྡོ་རྗེའི་རྦ་རླབས་ལམ་གསུམ་ཞེས་བྱ་བ་སྟེ། དེ་ཡང་རྒྱུད་སྔ་མ་ལས། ཐབས་དང་ཤེས་རབ་གཉིས་ཀ་རང་གནས་ཀྱང་། །ཐབས་ཀྱི་རྒྱུད་དང་ཤེས་རབ་རྒྱུད་དག་དང་། །གཉིས་ཀའི་རྒྱུད་ལ་དག་པར་མ་སྦྱོངས་པ། །རྡོ་རྗེ་རྦ་རླབས་ལམ་གསུམ་ངང་དུ་བཤགས། །ཞེས་གསུངས་པ་ལྟར། ཐབས་ཡབ་དང་། ཤེས་རབ་ལས་དང་ཡེ་ཤེས་ཀྱི་ཕྱག་རྒྱ་སྟེ། དེ་གཉིས་ཀ་རང་ཆས་སུ་ལྷན་ཅིག་གནས་པ་དེས་ཟབ་ལམ་འདི་ཉིད་ཉམས་སུ་ལེན་པར་བྱེད་པ་ལ། དང་པོ་ལུས་སྦྱངས་པ་ལ་སོགས་པ་སྔོན་དུ་འགྲོ་བས་བསམ་གཏན་གྱི་ཡན་ལག་རྣམས་ཚང་བར་བྱས་ཏེ། དངོས་གཞིར་འོག་རླུང་བསྐྱོད་པ་ལུས་ཀྱི་རྦ་རླབས། ངག་གི་རྦ་རླབས་ཞི་དྲག་གཉིས། ཏིང་ངེ་འཛིན་སྒོམ་པ་སེམས་ཀྱི་རྦ་རླབས་ཏེ། སྒོ་གསུམ་རྡོ་རྗེའི་རྦ་རླབས་གསུམ་ཉམས་སུ་ལེན་པ་ལ། ཐབས་ཡབ་ཀྱི་རྒྱུད་དག་པ་དང་། ཤེས་རབ་ཡུམ་གྱི་རྒྱུད་དག་པ་དང་། ཡབ་ཡུམ་གཉིས་ཀའི་རྒྱུད་དག་པ་སྟེ། དག་པ་གསུམ་གྱིས་རྒྱུད་ལེགས་པར་སྦྱངས་དགོས་པ་ལས། དང་པོ་ནི། ལུས་ངག་མཉམ་པ་ལ་སོགས་པ་གསུམ་སྔོན་དུ་འགྲོ་བས། ཐབས་ཤེས་སྙོམས་པར་ཞུགས་ཏེ། དངས་མ་མཆོག་གི་ཟེར་བར་བྱོན་པའི་བར་སྔར་ལྟར་ལས། དེ་ནས་ཁམས་འོད་ཟེར་གྱི་རྣམ་པར་གནས་པ་དེ་ཉིད་རྩ་གཙོ་མོ་གསུམ་དང་འཁོར་ལོ་ལྔར་ལུགས་ལྡོག་ཏུ་སྦྱངས་པའི་ཐབས་ཀྱིས། གཡས་གཟུང་བའི་རྦ་རླབས་རེངས་པ། གཡོན་འཛིན་པའི་རྦ་རླབས་རེངས་པ། དབུས་གཉིས་ཀའི་རྦ་རླབས་རེངས་པ་སྟེ་གསུམ་གྱིས་རྣམ་ཐར་སྒོ་གསུམ་དང་། འབྲས་བུ་གསུམ་ལ་སྦྱོར་བའོ། །གཉིས་པ་ཤེས་རབ་ཀྱི་རྒྱུད་དག་པར་བྱེད་པའི་ཚུལ་ཡང་། མགྲིན་པ་དང་སྤྱི་བོའི་འཁོར་ལོའི་འོད་ཟེར་སྤྲོ་བསྡུ་བྱེད་ཚུལ་གྱི་ཁྱད་པར་ཅུང་ཟད་ཙམ་རེ་ལས་གཞན་དེ་ཉིད་དང་འདྲའོ། །གསུམ་པ་ཐབས་ཤེས་གཉིས་ཀའི་རྒྱུད་དག་པར་བྱ་བ་ནི། ཡབ་ཡུམ་སོ་སོའི་དངས་མ་འོད་ཟེར་གྱི་ཕུང་པོར་འབར་བ་ཉིད་ལུགས་ལྡོག་ཏུ་དབུ་མའི་ལམ་བརྒྱུད་དེ་རང་རང་གི་གཙུག་ཏོར་མཆོག་ཏུ་ཐིམ་སྟེ། གཉིས་ཀ་ཡང་སྐུ་ལྔ་ལྷུན་གྱིས་གྲུབ་པར་དྲན་པ་ཙམ་བྱས་ཏེ་ཉམས་གང་སྐྱེས་བྱུང་རྒྱལ་དུ་བསྐྱང་ངོ་། །གཉིས་པ་དབང་བཞི་པའི་ལྟ་བ་ནི། ཆོས་རྣམས་རྣམ་དག་ཅེས་བྱ་བ་སྟེ། རྒྱུད་སྔ་མ་ལས། ལུས་ངག་སེམས་དང་ལུས་སེམས་གཉིས་ཀ་ལ། །ཕན་འདོགས་རང་ལ་གནས་པར་མ་ཤེས་པས། །རྒྱུ་མཐུན་རྣམ་སྨིན་སྐྱེས་བུ་བྱེད་པ་དང་། །དྲི་མ་མེད་པའི་ཡོན་ཏན་མ་ཤེས་པ། །ལྟ་བ་ཆོས་རྣམས་རྣམ་དག་ངང་དུ་བཤགས། །ཞེས་གསུངས་ཏེ། དེ་ཡང་ཆོས་ཐམས་ཅད་ཤིན་ཏུ་རྣམ་པར་དག་པའི་དེ་ཁོ་ན་ཉིད་མས་བརྟན་གྱི་དགའ་བ་བཞི་ལ་སྦྱངས་བས་རིམ་བཞིན། ལུས་དང་། ངག་དང་། སེམས་དང་། ལུས་སེམས་གཉིས་ཀ་སྟེ། སྒོ་གསུམ་ཆ་མཉམ་དང་བཅས་པ་ལ་ཕན་འདོགས་པའི་ཡོན་ཏན་རང་ལ་རང་ཆས་སུ་གནས་པ་ཉིད་མངོན་དུ་གྱུར་ཏེ། རྒྱུ་མཐུན་པའི་འབྲས་བུ་ནི་སྐྲ་དཀར་འཇོམས་པ་དང་། འགྲོ་བ་ཀུན་གྱི་སྙིང་དུ་སྡུག་ཅིང་ཡིད་དུ་འོང་བར་འགྱུར། རྣམ་སྨིན་གྱི་འབྲས་བུ་ནི་སྟོབས་འཕེལ་ཞིང་མངོན་པར་ཤེས་པ་ཅུང་ཟད་འཆར། སྐྱེས་བུ་བྱེད་པས་ནི་ཁམས་རྣམ་པར་འཕེལ་ཞིང་འཇིག་རྟེན་ཁམས་ཀྱི་རོ་ཐམས་ཅད་ལ་ཅི་རིགས་པར་ལོངས་སྤྱོད་ནུས། དྲི་མ་མེད་པའི་འབྲས་བུར་འཆི་མེད་འགྲུབ་ཅིང་རྫུ་འཕྲུལ་འགྲུབ་པའོ། །དེ་དག་གི་སྐབས་སུ་སྟོང་གི་ཏིང་ངེ་འཛིན་ཡང་རིམ་བཞིན་ཆུང་འབྲིང་ཆེན་པོ་ཤིན་ཏུ་ཆེན་པོ་རྣམས་འགྲུབ་པར་འགྱུར་རོ། །གསུམ་པ་དབང་བཞི་པའི་གྲུབ་མཐའ་ནི། བདེ་སྟོང་རྒྱ་ཆེན་ཞེས་བྱ་བ་སྟེ། རྒྱུད་སྔ་མ་ལས། ལྟ་བ་རང་གནས་ཉམས་སུ་མ་མྱོང་བས། །འཇིག་རྟེན་འདས་པའི་གྲུབ་མཐའི་རྟགས་མ་ཤར། །བདེ་སྟོང་རྒྱ་ཆེའི་གྲུབ་མཐའ་མ་རྟོགས་པ། །འཁོར་འདས་ཆོས་རྣམས་བདེ་སྟོང་གཅིག་ཏུ་བཤགས། །ཞེས་གསུངས་པ་ལྟར་ཏེ། དེ་ཡང་རང་གནས་ཀྱི་ལྟ་བ་ཤིན་ཏུ་རྣམ་པར་དག་པའི་ཆོས་ཉིད་ཉམས་སུ་མྱོང་ཤིང་མངོན་དུ་གྱུར་པས་འཇིག་རྟེན་ལས་འདས་པའི་གྲུབ་མཐའི་བདེ་སྟོང་རྒྱ་ཆེན་པོ་རང་སྐལ་གྱིས་ཕྱེད་པ་ལ་འཁོར་འདས་ཐམས་ཅད་བདེ་སྟོང་གཅིག་གི་ངང་དུ་རྟོགས་ཏེ། བླང་དོར་དང་སྤང་ཐོབ་མེད་པར་མི་སློབ་པའི་ཟུང་འཇུག་གི་སས་བསྡུས་པ་ལྷུན་གྱིས་གྲུབ་པའི་རིག་འཛིན་ཉིད་མངོན་དུ་བྱས་པའོ། །བཞི་པ་དབང་བཞི་པའི་འདའ་ཁ་མ་ནི། གསང་ཆེན་ཕྱག་རྒྱ་ཆེན་པོ་ཞེས་བྱ་བ་སྟེ། རྒྱུད་སྔ་མའི་འཕྲོར། སྦྱངས་དང་གོམས་དང་ལས་ལ་སྦྱར་དུ་མེད། །མ་རྟོགས་དབང་གིས་སྦྱངས་གོམས་ལས་མ་སྦྱར། སྲོག་རྩོལ་རླུང་ལ་གོམས་པར་མ་གྱུར་བ། །འདའ་ཁ་ཕྱག་རྒྱ་ཆེན་པོའི་ངང་དུ་བཤགས། །ཞེས་གསུངས་པ་སྟེ། དེ་ཡང་དམ་པའི་དོན་དུ། སྦྱངས་པ་དང་། གོམས་པ་དང་། ལས་ལ་སྦྱར་དུ་མེད་པར་རྟོགས་པས། །ཐ་སྙད་དུ་སྦྱང་གོམས་ལས་ཁ་སྦྱར་བ་སྟེ། འདིར་ཡང་སྦྱང་བ་ནི། ཞག་ཉེར་གཅིག་གི་བར་དུ་ཉིན་དང་པོར་རླུང་ཁུག་བཅུ་བདུན་ནས་ཉིན་རེ་བཞིན་རླུང་ཁུག་རེ་སྤར་བས་ཉིན་ཐ་མ་ལ་སྲོག་རྩོལ་གྱི་རླུང་ཁུག་པ་སོ་བདུན་དུ་འགྱུར་རོ། །ཡང་ཉིན་རེ་རླུང་ཁུག་རེ་ཕྲི་བས་ཞག་ཉེར་གཅིག་ན་སྔར་གྱི་ཚད་དུ་འགྱུར་ཏེ་དེ་ལྟར་ཞག་བཞི་བཅུ་རྩ་གཉིས་ལ་རླུང་སྦྱངས་བས། རྒྱུ་བ་གསལ་བ་དང་། རྣམ་པ་ངེས་པ་འབྱུང་ངོ་། །གོམས་པ་ནི། ཧི་ཀ་དང་ཀ་ཏིག་སྦྱོར་བས་སྒྲ་ལ་གོམས་པར་བྱ་བ་དང་། རྩ་གནས་ཀྱི་ཡི་གེ་གསལ་བས་ཡི་གེ་ལ་གོམས་པར་བྱ་བ་སྟེ་གཉིས་སོ། །ལས་ལ་སྦྱར་བ་ལའང་། བདེ་འགྲོ་ལ་སྦྱར་བ། གྲོང་གཞན་ལ་སྦྱར་བ། གླིང་དང་སྐྱེ་གནས་ལ་སྦྱར་བ་དང་། ལམ་ཕྱག་རྒྱ་ཆེན་པོ་ལ་སྦྱར་བ་སྟེ་བཞི་ལས་སྔ་མ་གསུམ་དང་ཡང་ཐུན་མོང་བ་ཡིན་ཞིང་། འདི་དབང་བཞི་པ་རང་གི་ཐུན་མོང་མ་ཡིན་པ་ནི་ཕྱི་མ་འདི་ཉིད་དེ། དེ་ཡང་ཚེ་འདིར་གྲུབ་མཐའ་མ་སྙོགས་པར་འཆི་ན། དེའི་དུས་སུ་ལུས་གནད་སྐྱིལ་ཀྲུང་ལ་སོགས་བཅོས་ཏེ། ལུས་ཀྱི་བུ་ག་རྣམས་ཐུན་མོང་མ་ཡིན་པའི་ཡི་གེས་བཀགས་ནས། སྲོག་རྩོལ་འབྱུང་འཇུག་གི་དུས་སུ་རྩ་གནས་ཀྱི་ཡི་གེ་རྣམས་དབུ་མར་བློས་རྩེ་གཅིག་ཏུ་གཅུག་པས། འཆི་ཁར་རང་གིས་རླུང་སེམས་དབུ་མར་ཞུགས་པ་དང་། རྣལ་འབྱོར་པས་དེ་ལྟར་བསྒོམས་པས། སྲོག་རྩོལ་གྱི་རླུང་མཐའ་དག་དབུ་མར་ཟད་དེ་ཐིམ་ནས། ཕྱག་རྒྱ་ཆེན་པོ་བདེ་སྟོང་ཤིན་ཏུ་རྣམ་པར་དག་པའི་དེ་ཁོ་ན་ཉིད་རྟོགས་ནས། སྔར་གྱི་ཉམས་མྱོང་དེ་དང་འདྲེས་པའི་ཚུལ་གྱིས་གྲུབ་མཐའ་སྙོགས་ཏེ་རིག་པ་འཛིན་པར་འགྱུར་རོ། །ལྔ་པ་དབང་བཞི་པའི་འབྲས་བུ་ནི། ངོ་བོ་ཉིད་ཀྱི་སྐུ་རང་བཞིན་ལྷུན་གྲུབ་ཅེས་བྱ་བ་སྟེ། རྒྱུད་སྔ་མའི་འཕྲོ་ལས། ཡེ་ཤེས་ཐམས་ཅད་ངོ་བོ་ཉིད་ཀྱི་སྐུ། །མ་སྦྱངས་གནས་ལུགས་དོན་དུ་མ་རྟོགས་པས། །ལམ་བསྟན་རྡོ་རྗེ་རྦ་རླབས་ལམ་མ་བསྒོམས། །འབྲས་བུ་ངོ་བོ་ཉིད་ཀྱི་སྐུ་རུ་བཤགས། །ཞེས་གསུངས་པ་ལྟར་རོ། །དེ་ཡང་དུས་གསུམ་གྱི་རྒྱལ་བ་མ་ལུས་པའི་ཡེ་ཤེས་ཀྱི་རྣམ་པར་བཞག་པ་གང་ཇི་སྙེད་པ་ཐམས་ཅད་ཀྱང་དབྱིངས་གོ་བོ་ཉིད་ཀྱི་སྐུ་འདི་ཉིད་ལ་མ་བརྟེན་པ་ན་འགའ་ཡང་མེད་ལ། དེ་བཞིན་དུ་འདི་ཉིད་ཆོས་ཐམས་ཅད་ཀྱི་དེ་བཞིན་ཉིད་དང་རོ་གཅིག་པའི་རྒྱུ་མཚན་གྱིས་དངོས་པོའི་གནས་ལུགས་དོན་དམ་པའི་བདེན་པ་ཡང་ཡིན་པའི་ཚུལ་རྣམས་རྟོགས་པར་བྱས་ནས། དཀྱིལ་འཁོར་བཞི་ལས་སྙིང་པོ་རླུང་གི་དཀྱིལ་འཁོར་སྦྱོང་བའི་ལམ་དུ་བསྟན་པ་རྡོ་རྗེ་རྦ་རླབས་ཀྱི་ལམ་འདི་ཉིད་བསྒོམ་པས། རླུང་གི་འགྲོས་ཐིམ། མི་ཤིག་རྡོ་རྗེའི་རླུང་གི་ལམ་དག །སྒོ་གསུམ་ཆ་མཉམ་གྱི་སྒྲིབ་པ་མ་ལུས་པ་བྱང་ནས་མཐར་ཐུག་གི་འབྲས་བུ་ངོ་བོ་ཉིད་ཀྱི་སྐུ་རང་བཞིན་ལྷུན་གྲུབ་ཉིད་མངོན་དུ་བྱེད་པར་འགྱུར་བ་ཡིན་ཏེ། བཤགས་ལེ་བཅོ་ལྔ་པ་ལས། རླུང་གི་འགྲོས་ཐིམ་མི་ཤིག་རྡོ་རྗེའི་རླུང་། །ལུས་ངག་ཡིད་དག་ངོ་བོ་ཉིད་ཀྱི་སྐུ། །ཞེས་གསུངས་པའི་ཕྱིར་རོ། །དེ་ལྟར་དབང་བཞི་པའི་ལམ་རྗེས་འབྲང་དང་བཅས་པ་རྒྱས་པར་བཤད་ནས། དེ་ཉིད་ཀྱི་དོན་བསྡུ་བའི་ཕྱིར། ལེའུ་བཅུ་བཞི་པའི་ལུང་སྔ་མའི་མུར། །སྲོག་དང་རྩོལ་བ་ལྔ་ཡི་བདག་ཉིད་ལ། །རྩ་བ་ཕུང་པོ་རྣམ་ཤེས་ཡན་ལག་སོགས། །རླུང་བཅུ་སྲོག་ཤིང་གསུམ་དུ་མ་རྟོགས་པ། །བདེ་བ་ཆེན་པོའི་དབང་གིས་ལམ་དུ་བཤགས། །ཞེས་གསུངས་ཏེ། དེ་ཡང་སྙིང་པོ་རླུང་གི་དཀྱིལ་འཁོར་ཉིད་དབང་བཞི་པའི་ལམ་གྱི་སྒྲུབ་གཞིར་ཤེས་པར་བྱས་ནས། དེ་ཉིད་ཡན་ལག་སྲོག་དང་རྩོལ་བ་གཉིས་ལ། བྱེད་ལས་ཀྱི་སྒོ་ནས། གྱེན་རྒྱུ། ཐུར་སེལ། མེ་མཉམ། སྲོག་འཛིན་ཁྱབ་བྱེད་ཀྱི་རླུང་སྟེ། རྣམ་པ་ལྔ་ཡི་བདག་ཉིད་དུ་དབྱེ་བ་ལ་རྩ་བའི་རླུང་ལྔ་ཞེས་གྲགས་ཏེ་བརྟེན་པ་ཕུང་ལྔའི་རྟེན་བྱེད་པའོ། །དེ་བཞིན་དུ་མིག་ཤེས་ལ་སོགས་པ་སྒོ་ལྔའི་རྣམ་པར་ཤེས་པའི་རྟེན་བྱེད་པའི་རྒྱུ་བ་ལ་སོགས་པ་ཡན་ལག་གི་རླུང་ལྔ་དང་། འབྱུང་ལྔའི་རླུང་ལྔ་སྟེ་བཅུ་པོ་ལ་ཡན་ལག་གི་རླུང་བཅུ་ཞེས་གྲགས་སོ། །དེ་ཐམས་ཅད་ཀྱང་རྩ་གཙོ་མོ་གསུམ་མམ་སྲོག་ཤིང་གསུམ་ལ་བརྟེན་པའི་གཟུང་འཛིན་འོད་གསལ་གསུམ་གྱི་རྟེན་པའི་ཆ་ནས་བཞག་པའི་རླུང་གསུམ་དུ་འདུ་སྟེ། དེ་དག་ཀྱང་གཞི་དུས་སུ་སྒོ་གསུམ་དང་། དུས་གསུམ་དང་། ནད་དང་གདོན་གསུམ་གསུམ་ལ་སོགས་པའི་རྟེན་དུ་འགྱུར་ལ། འབྲས་དུས་སུ་སྐུ་གསུང་ཐུགས་ཀྱི་རྡོ་རྗེ་གསུམ་དང་། སྐུ་གསུམ་ལ་སོགས་པའི་རྟེན་བྱེད་པའོ། །དེ་ལྟ་བུའི་རླུང་གི་གནས་ཚུལ་རྣམས་ལེགས་པར་རྟོགས་ནས། དེ་ཉིད་སྦྱངས་པའི་ཐབས་སུ་གྱུར་པ་རྡོ་རྗེ་རྦ་རླབས་ཀྱི་གདམས་པ་ཟབ་མོ་བསྒོམ་པའི་གྲོགས་སུ་རང་བཞིན་དག་པའི་ཆོས་ལ་སོམ་ཉི་ཟ་བ་དང་། མིང་བྲལ་གྱི་ཆོས་ལ་ཚད་མས་གཞལ་བ་ལ་སོགས་ཚིག་དབང་གི་སྤང་བྱའི་དམ་ཚིག་རྣམས་མ་ཉམས་པར་གསུངས་པས་མས་བརྟན་ཤེས་རབ་ཀྱི་དགའ་བཞི་མཐར་ཕྱིན་ནས་འཁོར་ལོ་ལྔའི་རྩ་མདུད་མཐའ་དག་གྲོལ་ནས་སུ་བཅུ་གསུམ་པ་རྡོ་རྗེ་འཆང་གི་སར་སྦྱོར་བར་འགྱུར་བ་ཡིན་ནོ། །དེ་ལྟ་བུའི་དབང་བཞིའི་ལམ་དེ་གང་ཟག་གཅིག་གིས་ཉམས་སུ་ལེན་ནའང་། གང་ཟག་གི་དབང་པོའི་བྱེ་བྲག་གིས་དབང་སྔ་མ་སྔ་མའི་ལམ་དེ་མཐར་ཕྱིན་ནས་ཕྱི་མ་ལ་རིམ་བཞིན་འཇུག་པའང་ཡོད། སྔ་མ་ལ་བརྟན་པ་ཇི་རིགས་ཐོབ་ནས་ཕྱི་མ་དག་ལ་འཇུག་པའང་ཡོད། སྔ་མ་རྣམས་ལ་ངེས་པ་འབྲོང་ཙམ་རེ་བྱས་ནས་ཕྱི་མ་ལ་འཇུག་པའི་གང་ཟག་ཀྱང་ཡོད་མོད་དེ། སྔ་མ་བོར་ནས་ཕྱིི་མར་འཇུག་པ་ནི་མེད་དེ། རྩིག་རྨོང་མ་བཏིང་བའི་ཐོག་ཁར་ཕྱིན་པ་མེད་པ་བཞིན་ནོ། །དེ་ལྟར་རང་གི་རྒྱུད་ཚོད་དང་འབྲེལ་བའི་དབང་བཞིའི་ལམ་གང་ཡིན་ཉམས་སུ་ལེན་པ་ནའང་། མཉམ་བཞག་གི་དམ་ཚིག་ཏུ་དབང་རང་རང་གི་ལམ་དེ་རྩེ་གཅིག་ཏུ་ཉམས་སུ་ལེན་པ་དང་། རྗེས་སྦྱོར་གྱི་དམ་ཚིག་ཏུ་དབང་རང་རང་གི་ལྟ་བ་སྐྱོང་བ་དང་། གཞན་ཡང་བཟའ་བ་དང་། བསྲུང་བ་དང་། མི་འབྲལ་བའི་དམ་ཚིག་རྣམས་ཀྱང་ཇི་རིགས་པར་ཉམས་སུ་བླངས་ཏེ་བསྲུངས་ཤིང་། གལ་ཏེ་དམ་ཚིག་ཉམས་ན་མཁའ་འགྲོ་ལྔ་ལ་བརྟེན་ནས་གསོ་བ་སྟེ། དེ་ཡང་རྡོ་རྗེ་མཁའ་འགྲོ་ནི་བླ་མ། ཡེ་ཤེས་མཁའ་འགྲོ་ནི་ལོངས་སྐུ། མ་མོ་མཁའ་འགྲོ་ནི་སྤྲུལ་སྐུ། ཤ་ཟ་མཁའ་འགྲོ་ནི་དུར་ཁྲོད་ཀྱི་བདག་པོ་ལ་སོགས་པའོ། །དམ་ཚིག་མཁའ་འགྲོ་ནི་རྡོ་རྗེ་སྤུན་གྲོགས་སོ། །དེ་ལྟ་བུའི་མཁའ་འགྲོ་ལྔ་ལ་ཚོགས་ཀྱི་འཁོར་ལོ་ལ་སོགས་པའི་སྒོ་ནས་ཉམས་པ་སྐོང་བའོ། །དེ་ལྟར་དབང་བཞིའི་ལམ་བསྐྱེད་རྫོགས་ཡན་ལག་དང་བཅས་པ་ཉམས་སུ་བླངས་པ་ལ་བརྟེན་ནས་གནས་སྐབས་ཀྱི་འབྲས་བུ་རིག་འཛིན་བཞི་དང་། མཐར་ཐུག་གི་འབྲས་བུ་སྐུ་ལྔ་ཡོངས་རྫོགས་རྡོ་རྗེ་འཆང་གི་གོ་འཕང་ཉིད་མངོན་དུ་བྱེད་པ་ཡིན་པས་ན་སྐལ་བ་དང་ལྡན་པའི་སྐྱེ་བོ་རྣམས་ཀྱིས་ཉིན་མཚན་ཀུན་ཏུ་མི་གཡེལ་བར་འདི་ཉིད་ཁོ་ན་ཉམས་སུ་བླང་བར་བྱའོ། །དེ་ལྟ་བུའི་ཚུལ་འདི་ཡང་། དྲི་མེད་རྒྱལ་པོ་བཤགས་པའི་རྒྱུད་དེ་ཉིད་དང་དཔལ་ཧེ་རུ་ཀའི་གལ་པོ་དང་། མ་མོ་ལམ་རྒྱུད་ལུང་ལ་སོགས་པ་སྔ་འགྱུར་རྙིང་མའི་རྒྱུད་སྡེ་མང་པོ་ཞིག་ལས་རྒྱ་ཆེར་གསུང་བའི་ཕྱིར་ཞིབ་པར་འཆད་འོས་པ་ཞིག་ནའང་། འདིར་མདོར་བསྡུས་ཏེ་དགོས་ཞེས་ཕེབས་པ་དང་། བཤགས་པའི་རྒྱུད་འདི་ཉིད་སྔ་འགྱུར་རྙིང་མ་པ་ཐམས་ཅད་ལ་ཡོངས་སུ་གྲགས་ཤིང་རྩོད་པ་མེད་པའི་རྒྱུད་སྡེའང་ཡིན་པའི་ཕྱིར། དེ་ཉིད་དངོས་བསྟན་ལྟར་སྙིང་པོ་དྲིལ་ཏེ་བརྗོད་པའོ། །སླར་ཡང་སྨྲས་ས། དེང་སང་གྲུབ་འབྲས་ཐོབ་རློམ་མང་ན་ཡང་། གྲུབ་པའི་རྒྱུ་རྐྱེན་འཆང་ལ་ཆེས་རྨོངས་པའི། །ཚུལ་འདི་མཐོང་ནས་གྲུབ་པའི་གྲགས་པ་ལ། །གྲུབ་བྲལ་བདག་འདྲས་བ་སྤུ་གཡོ་མ་འདོད། །གང་ཞིག་རྒྱུ་དང་མཚུངས་པའི་འབྲས་འབྱུང་ཞེས། །བརྟེན་འབྲེལ་བསླུ་བ་མེད་པའི་ལམ་འདི་ནི། །སྟོན་པ་ཚད་མར་གྱུར་པས་ལེགས་གསུངས་ན། །རྒྱུ་བྲལ་འབྲས་ལ་དཔྱོད་ལྡན་སུ་ཞིག་སྨོན། །ཀྱེ་ཧུད་སྟོན་པ་ཟླ་མེད་དགུང་ལ་གཤེགས། །བསྟན་པ་རིན་ཆེན་ཆུ་ལྷའི་ཕང་བར་ལྷུང་། །བསྟན་འཛིན་རྣམས་ནི་ཚེ་འདིར་གྲགས་པའི་བསླུས། །ལུས་མེད་གཡོ་ཅན་ཚོགས་ཀྱི་དགོངས་པ་གྲུབ། །ད་ནི་ཉེས་བརྒྱའི་རྒྱུ་སྐར་རྣམས་བཀྲ་བ། །མི་ཕམ་ཆོས་ཀྱི་ཉི་མ་མ་ཤར་བར། །ཆེན་པོར་གྲགས་པའི་ཟླ་བ་སྟོང་གིས་ཀྱང་། །སྣང་མེད་རུམ་དུ་སྦ་བར་མི་ནུས་སྙམས། །འདི་འདྲའི་ཚུལ་ལ་བསམ་ཚེ་གཅེས་པའི་སྙིང་། །སྒྲེན་མོར་བཏོན་པ་ལས་ཀྱང་ཆེས་ལྷག་པའི། །བཟོད་མེད་གདུང་བའི་ཁུར་ཆེན་བདག་སེམས་ལ། །བཀལ་བའི་ལྕིད་འདིས་འཛིན་མའང་གཡོ་སྙམས་བགྱིད། །དེ་ལྟར་ན་ཡང་ལྷག་བསམ་དགེ་བའི་འབྲས། །བརྒྱ་ཕྲག་བསྐལ་བའི་མཐར་ཡང་འཛད་མེད་ཅེས། །བདེན་པར་སྨྲ་བའི་གསུང་གིས་བདེན་གསུང་ན། །བདག་ནི་དུ་དུང་ཐུབ་བསྟན་འཛིན་ལ་སྤྲོ། །སྲས་བཅས་རྒྱལ་བ་ཀུན་དང་རྒྱལ་བའི་བཀས། །བསྟན་པ་རིན་ཆེན་འཛིན་པའི་གཉེར་གཏད་པའི། །མཐུ་ལྡན་བསྟན་སྲུང་དྲེགས་པའི་ཚོགས་རྣམས་ཀྱང་། །བརྩེ་བས་བུ་ལ་མ་བཞིན་དགོངས་ཤིག་ཀྱེ། །ཞེས་བསྐྱེད་རྫོགས་ཀྱི་སྤྱི་དོན་ཐབས་ལམ་སྙིང་པོ་ཞེས་བྱ་བ་འདི་ཡང་གངས་རིས་ཁྲོད་ཙམ་ན་ཐེག་པ་མཆོག་གི་བསྟན་འཛིན་མཚུངས་ཟླ་དང་བྲལ་བ། མདོ་ཁམས་རྫོགས་ཆེན་པ་ཞེས་ཡོངས་སུ་གྲགས་པ་དེ་ཉིད་ཀྱི་ཡང་སྲིད་བཞི་པ། དོན་གྱི་སླད་དུ་མཚན་ནས་སྨོས་ཏེ་འཁོར་ལོའི་མགོན་པོ་༢མི་འགྱུར་ནམ་མཁའི་རྡོ་རྗེ་ཚེ་དབང་གྲུབ་པ་རྩལ་ལམ། མཚན་གཞན་ཨོ་རྒྱན་ཆེ་མཆོག་དཔལ་གྱི་རྡོ་རྗེ་ཞེས་གྲགས་པའི་མུ་ཁྱུད་ཕྱོགས་ཀྱི་རྭ་བར་འཁོར་བ་དེ་ཉིད་ཀྱི་ཞལ་སྔ་ནས་བཀྲ་ཤིས་པའི་ལྷ་རྫས་དང་བཅས་ཏེ་བསྐྱེད་རྫོགས་ཀྱི་སྤྱི་དོན་ཉུང་ངུ་ཞིག་བྲི་དགོས་ཞེས་རིན་ཐང་ལྕི་བའི་གསུང་ངག་གསེར་གྱི་གཅོད་པཎ་སྤྱི་བོར་བཅིང་བར་མཛད་པ་ཉིད་མདོར་དུ་ཕངས་ནས། ཆོས་སྨྲ་བའི་བཙུན་པ་རྒྱལ་བའི་སྲས་པོ་གཞན་ཕན་མཐའ་ཡས་སུ་འབོད་པས། ལེགས་བཤད་རྒྱ་མཚོའི་འབྱུང་གནས་དཔལ་སེང་གེའི་ནགས་ཁྲོད་ཐུབ་བསྟན་ཉིན་མོར་བྱེད་པའི་གླིང་གི་མཚམས་མལ་ནས་ཤར་མར་སྤེལ་བ་འདིས་ཀྱང་རྒྱལ་བའི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་པར་གྱུར་ཅིག་གུ། དགེའོ།། ༈ །།ཐུབ་བསྟན་སྙིང་པོ་བསྡུས་པའི་ངག །ནུབ་མེད་སྤར་གྱི་རྒྱལ་མཚན་རྩེར། །མཆོད་འདིས་སྲིད་ཞིའི་དཔལ་བཟང་པོ། །འགོག་མེད་ཕྱོགས་བརྒྱར་འབར་གྱུར་ཅིག །ཅེས་པའང་བཙུན་པ་གཞན་ཕན་པས་སོ།། །།