དབུགས་ཆེན་པོ་ཡོངས་སུ་ཕྱིན་པའི་ལེའུ་ཞེས་བྱ་སྟེ་བཅུ་གཉིས་པ།
དེ་ནས་དེ་བཞིན་གཤེགས་པ་ཐམས་ཅད་ཀྱི་བཅོམ་ལྡན་འདས་དམ་པ་རྣམས་ཀྱི་དེ་ཁོ་ན་ཉིད་རྡོ་རྗེ་སེམས་དཔའ་དེས་སྐྱེས་བུ་དམ་པ་དེ་དག་ལ་འདི་སྐད་ཅེས་བཀའ་སྩལ་པ། ཀྱེ་སྐྱེས་བུ་དམ་པ་རྣམས་མ་ངུ་ཤིག །སྡུག་བསྔལ་གྱི་གདུང་བ་མ་བསྐྱེད་ཅིག །ཁྱེད་ཅིའི་ཕྱིར་དུ། དེ་ནས་དེ་བཞིན་གཤེགས་པ་ཐམས་ཅད་ཀྱི་བཅོམ་ལྡན་འདས་རྡོ་རྗེ་སེམས་དཔའ་དེ་ཁོ་ན་ཉིད་ལ་སྐྱེས་བུ་དམ་པ་དེ་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཡོང་ཇི་ལྟར་མི་ངུ་བར་བགྱི། བདག་ཅག་གིས་བཙལ་བ་ཚི་ཆད་པར་མ་གྱུར་ཏམ། བཅོམ་ལྡན་འདས་བདག་ཅག་གི་བློ་གྲོས་ཇི་ལྟར་བགྱི། བདག་ཅག་རྣམས་ཀྱི་བཤེས་གཉེན་དམ་པ་མཛད་དུ་གསོལ། བདག་ཅག་གིས་དཔག་ཏུ་མེད་པ་ཇི་སྙེད་གཅིག་ཏུ་དཀའ་བ་དཔག་ཏུ་མེད་པ་སྦྱང་ཀྱང་ཡོངས་སུ་ཆུབ་པར་འདོད་ན་ད་དུང་གསང་སྔགས་ཀྱི་ངོ་བོ་དེ་ཁོ་ན་ཉིད་མིང་ཙམ་ཡང་ཐོས་པའི་སྐལ་པ་མ་མཆིས་ན་ཡོང་ཇི་ལྟར་ལགས། དེ་སྐད་ཅེས་གསོལ་བ་ལས། དེ་བཞིན་གཤེགས་པ་ཐམས་ཅད་ཀྱི་བཅོམ་ལྡན་འདས་རྡོ་རྗེ་སེམས་དཔའ་དེ་ཁོ་ན་ཉིད་དེས་བཀའ་སྩལ་པ། སྐྱེས་བུ་དམ་པ་རྣམས་དེ་སྐད་ཅེས་མ་ཟེར་ཅིག །གསང་སྔགས་ནི་ཀུན་གྱི་ཐུན་མོང་མ་ཡིན་ཏེ། དོན་དེ་ཁོ་ན་ཉིད་ནི་སངས་རྒྱས་ཉག་གཅིག་གི་དགོངས་པ་དམ་པ་སྨྲར་མེད་པ། རྟོག་དཔྱོད་ཐམས་ཅད་དང་བྲལ་བ་འདི་ཞེས་མཚོན་དུ་མེད་པ། བརྟག་པར་དཀའ་ཞིང་བསྟན་པར་དཀའ་ལ་བརྗོད་པའི་ཐ་སྙད་རྣམས་དང་བྲལ་བ། དཔེ་དང་བྲལ་བ་ནམ་མཁའ་ཀྱང་བསྒྲུན་དུ་ཡོད་པ་མ་ཡིན་པ། ཚད་མེད་པ་ཚད་དང་བྲལ་བ། ཚད་མའམ། གཏན་ཚིགས་སམ། དཔག་པས་མི་དཔོགས་ཏེ། ཁྱོད་ཀྱིས་ཇི་ལྟར་མ་ཤེས་མ་ཐོས་པ་དེ་ལྟར་གང་རྒྱུད་ཡོངས་སུ་དག་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་ཀྱང་ད་དུང་གསང་སྔགས་ཀྱི་ངོ་བོ་དེ་ཁོ་ན་ཉིད་མངོན་པར་མ་ཐོབ། མངོན་པར་མ་རྟོགས། མངོན་པར་རྫོགས་པར་སངས་མ་རྒྱས་སོ། །དེ་ཅིའི་ཕྱིར་ཞེ་ན། གསང་སྔགས་ཀྱི་ངོ་བོ་དེ་ཁོ་ན་ཉིད་རྣམ་པར་ཡོངས་སུ་དག་པའི་ཕྱིར་སངས་རྒྱས་དང་བྱང་ཆུབ་སེམས་དཔའ་ཞེས་མི་དམིགས་ཤིང་བཙལ་དུ་མེད་པ་ལས་ས་བཅུ་ལ་གནས་པའི་སྐྱེས་བུ་དམ་པ་རྣམས་ཀྱིས་ནི་དེ་བཞིན་གཤེགས་པའི་སྙིང་པོ་གསང་སྔགས་ཀྱི་ངོ་བོ་དེ་ཁོ་ན་ཉིད་དམ་པ་དེ་རང་ལ་ཡོད་པར་མ་ཤེས་ཏེ་ཆོས་ཉིད་དུ་འཇོག་ཅིང་དཔྱོད་པ་དང་མ་བྲལ། སངས་རྒྱས་རྣམས་ནི་སྙིང་པོ་བྱང་ཆུབ་ལ་མི་རྟོག་པའི་ངང་དུ་མི་གཡོ་བར་གནས་ཏེ་མངོན་པར་འཚང་མི་རྒྱ་བར་གནས་ན་ཁྱེད་ཅིའི་ཕྱིར་ངུ་བར་བྱེད། དེ་སྐད་ཅེས་བཀའ་སྩལ་བས། སྐྱེས་བུ་དམ་པ་དེ་རྣམས་དགའ་མགུ་རངས་ཏེ་དབུགས་ཕྱིན་ནས་འདི་སྙམ་དུ་སེམས་སོ། །ཇི་ལྟར་སྔོན་དུ་གཤེགས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་ད་དུང་གསང་སྔགས་ཀྱི་ངོ་བོ་དེ་ཁོ་ན་ཉིད་མངོན་དུ་མ་གྱུར་ན་བདག་ཅག་ལ་སོགས་པ་ལྟ་ཅི་སྨོས། ཡོང་སྟོན་པ་རྡོ་རྗེ་སེམས་དཔའ་དེ་ཁོ་ན་ཉིད་འདི་ནི་སངས་རྒྱས་ཀུན་གྱི་དགེ་བའི་བཤེས་གཉེན་དམ་པ་ཉིད་ཁོ་ན་བས་བདག་ཅག་གི་བློ་གྲོས་འདི་ལ་ཆུབ་པར་གོར་མ་ཆག་སྙམ་མོ། །དེ་ནས་སྐྱེས་བུ་དམ་པ་དེ་རྣམས་ཀྱིས་བཅོམ་ལྡན་འདས་དེ་ཁོ་ན་ཉིད་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གསང་སྔགས་དམ་པ་དེ་ཁོ་ན་ཉིད་དེ་ནི་གང་ཡོངས་སུ་བརྗོད་པ་ལས་འདས་ཏེ་གསུང་བར་མི་མངའ་བས་བསྟན་ཅིང་བརྟག་པར་རབ་ཏུ་དཀའ་བ་ལགས་ཞེ་ན། འོན་ཀྱང་བཅོམ་ལྡན་འདས་ཉིད་ནི་བློ་གྲོས་ཆེན་པོ་རྣམས་ཀྱི་ཡུལ་དུ་ངེས་ཤིང་ཐེ་ཚོམ་ཐམས་ཅད་གཅོད་པ། དམ་པ་རྣམས་ཀྱི་དམ་པ་ཉིད་ལགས་པས་ན་བདག་ཅག་གིས་བློ་གྲོས་ངེས་པར་ཆུབ་པ་དམ་པའི་ཕྱོགས་དགོངས་པ་དམ་པའི་མཉམ་པ་ཉིད་དུ་བསྟན་དུ་གསོལ་ཞེས་གསོལ་བ་ལས། བཅོམ་ལྡན་འདས་དེ་ཁོ་ན་ཉིད་དེས་བཀའ་སྩལ་པ། སྐྱེས་བུ་དམ་པ་རྣམས་ལེགས་སོ། །ངེས་སོ། །འདི་ལྟ་སྟེ། གསང་སྔགས་དམ་པ་དེ་ཁོ་ན་ཉིད་དེ་ནི་དཔྱོད་པ་ཐམས་ཅད་དང་བྲལ་བ། མཐའ་དང་དབུས་མི་དམིགས་པ། སྒྲོ་སྐུར་མེད་པ། བླང་དོར་མེད་པ། རྒྱུ་འབྲས་ལས་འདས་པ། ཡེ་ནས་དག་པ། ཡེ་ནས་ཟིན་པ། བྱ་བ་མེད་པ། བཙལ་བ་མེད་པ། བསྒྲུབ་ཏུ་མེད་པ། བརྩམ་དུ་མེད་པ། གཞན་ནས་མི་འབྱུང་བ། གཉེན་པོ་མེད་པ། བྱེད་པ་པོ་མེད་པ། མ་བྱས་པ། མ་བརྟགས་པ། བདག་མེད་པ། མ་བཅོས་པ། མ་བསླད་པ། དེ་ཡིན་པར་ངེས་པ། མ་ནོར་པ། ཇི་བཞིན་པ། མ་འགག་པ། མ་སྐྱེས་པ། མི་ནུབ་པ། མི་རླག་པ། མི་སྣང་བ། མ་བྱུང་བ། མི་འགྲོ་བ། ཡེ་ནས་གནས་པ། ཀུན་ལ་ཁྱབ་པ། མིང་མེད་པ། གཟུགས་མེད་པ། མཚན་མ་མེད་པ། ཐ་སྙད་མེད་པ། བལྟར་མེད་པ། གཟུང་དུ་མེད་པ། མཚོན་དུ་མེད་པ། དཔེ་མེད་པ། ཚད་མེད་པ། བརྟག་ཏུ་མེད་པ། རྟོག་གེ་ལས་འདས་པ། དཔག་ཏུ་མེད་པ། བསམ་དུ་མེད་པ། བསམ་གྱིས་མི་ཁྱབ་པ། ཀུན་གྱི་འབྱུང་གནས། ཐམས་ཅད་ནས་ཐམས་ཅད་དུ་བཏང་སྙོམས་ཆེན་པོ་སྟོང་པ་ཉིད་རང་གི་རིག་པ་རང་བྱུང་བ་ཁོ་ནའོ། །དེ་སྐད་ཅེས་བཀའ་སྩལ་པས། སྐྱེས་བུ་དམ་པ་རྣམས་ཆོས་ཐམས་ཅད་བླང་དོར་མེད་པར་ཆུད་དེ་ངོ་མཚར་སྐྱེས་ནས་ཐེ་ཚོམ་དུ་གྱུར་ཏོ། །ཨེ་མའོ་བདག་ཅག་གིས་དམ་པ་རྣམས་ལས། སྔོན་དུ་ཐོས་པ་ལྟར་ན་སྔོན་གྱི་དམ་པ་རྣམས་ནི་བྱང་ཆུབ་བླང་ངོ་། །ཉོན་མོངས་པ་དོར་རོ། །དེ་ནི་བློ་གྲོས་ཡོངས་སུ་ཆུབ་པའོ་ཞེས་ཐོས་ན་སྐྱེས་བུ་ཆེན་པོ་འདི་ནི་ཉོན་མོངས་པ་དང་བྱང་ཆུབ་ལ་གཉིས་སུ་མེད་པས་བླང་དོར་མེད་དོ། །ཞེས་གསུངས་པ་ངོ་མཚར་ཏོ། །སྙམ་དུ་ཅང་མི་སྨྲ་བར་གནས་སོ། །དེ་ནས་རྡོ་རྗེ་སེམས་དཔའ་དེ་ཁོ་ན་ཉིད་དེས་སྐྱེས་བུ་དམ་པ་དེ་རྣམས་ཀྱི་ཡོངས་སུ་རྟོག་པ་བསལ་བའི་ཆེད་དུ་ཡང་གསུངས་པ། ཀྱེ་སྐྱེས་བུ་དམ་པ་རྣམས་གང་ཁྱེད་ཐེ་ཚོམ་ཡོངས་སུ་ཟ་བ་ན་ཉོན་མོངས་པའི་རང་བཞིན་གང་ཡིན། གང་ལས་བྱུང་། བྱང་ཆུབ་ཀྱི་རང་བཞིན་གང་ཡིན། གང་ལས་བྱུང་། ངེས་པར་རྟོགས་ཤིག་དང་། གང་ཡོངས་སུ་མཐོང་བ་ཉིད་ན་ཐེ་ཚོམ་ཆད་པར་འགྱུར་རོ། །དེ་སྐད་ཅེས་གསུངས་པས། སྐྱེས་བུ་དམ་པ་དེ་རྣམས་ཀྱིས་ཉོན་མོངས་པ་དང་། བྱང་ཆུབ་དེའི་རང་བཞིན་གང་ཡིན། གང་ལས་བྱུང་བ་བརྟགས་ན་རང་བཞིན་སྟོང་པར་མཐོང་། རྩ་བ་སེམས་ལས་བྱུང་བར་མཐོང་། སེམས་ཉིད་མ་བྱུང་། མ་སྐྱེས་སྐྱེ་བ་མེད། ཡེ་ཇི་བཞིན་པ། རང་བཞིན་ལྷུན་གྱིས་གྲུབ་པ། རྩ་བ་བྱང་ཆུབ་ཀྱི་སེམས་དམ་པ་ཁོ་ན་ཉིད་དུ་ངེས་པར་ཆུད་དེ་སངས་རྒྱས་ཀྱི་དགོངས་པ་ཉམས་སུ་མྱོང་བ་ནི་འདི་ལྟ་སྟེ། སེམས་དང་སེམས་ལས་བྱུང་བ་ཐམས་ཅད་ནམ་མཁའ་ལྟ་བུར་གྱུར་ཏོ། །མཉམ་པར་བཞག་པ་དང་མ་བཞག་པ་ལས་འདས་ཏེ་ཐ་མའི་དབུགས་ཕྱིན་ནས་ཡང་དག་པའི་ངེས་པ་ཡོངས་སུ་རྙེད་དོ། །རྙེད་པར་གྱུར་ཏོ། །ཀུན་དུ་རབ་ཏུ་རྙེེད་ནས་ཡང་སྐྱེས་བུ་དམ་པ་དེ་རྣམས་སྨ་ག་ཆད་པར་ངུས་སོ། །ཡང་རྡོ་རྗེ་སེམས་དཔའ་དེ་ཁོ་ན་ཉིད་དེས་མཁྱེན་བཞིན་དུ་སྐྱེས་བུ་དམ་པ་དེ་རྣམས་ལ་བཀའ་སྩལ་པ། ཀྱེ་སྐྱེས་བུ་དམ་པ་ཁྱེད་ཅག་ཅིའི་ཕྱིར་ངུ་། དེ་དག་གིས་གསོལ་བ། བཤེས་གཉེན་དམ་པ་འདི་ལྟ་སྟེ། །ལམ་གྱི་ནང་ན་ཉེ་ལམ་པ། །ཐབས་ཀྱི་ནང་ན་དམ་པ་འདི། །སྔོན་དུ་མ་ཐོས་སྐལ་པ་ཆུང་། །ཨེ་མའོ་ངོ་མཚར་རྨད་ཀྱི་ཆོས། །ཡུན་གྱི་དོན་སྲིད་འདི་ལྟ་བུ། །དོན་རག་གཞན་ལ་མ་ལུས་པར། །གཞན་ལ་རེ་སྩོལ་ཨེ་མའོ་འཁྲུལ། །བྱ་བའི་ལས་ལ་ཤ་ཐང་བར། །མཚན་མའི་རྗེས་སུ་གཡེང་སྤྱོས་ཏེ། །ངལ་ཆད་དོན་མེད་ཚིག་མཐའ་ཡས། །བསྡུ་བས་མ་འདུས་དོན་རེ་ཆུང་། །བཤེས་གཉེན་དམ་པ་དེ་གཉིས་ལས། །ངེས་པར་རྙེད་པས་དབུགས་ཆེན་འབྱིན། །སངས་རྒྱས་མཉམ་དང་དབྱིངས་སུ་གྲོལ། །དེ་ཉིད་ཆེན་པོར་ལྷུན་གྱིས་གྲུབ། །ཅེས་གསོལ་ཏེ། ངོ་མཚར་གྱི་དགའ་བ་ཆེན་པོ་ལས་ཡེ་ཤེས་ཀྱི་འོད་ཉི་མ་འབུམ་ལྟ་བུར་བྱུང་བས་གང་ས་པ་རྣམས་ནི་རིག་པའི་རྩལ་སྦྱངས། དོན་གྱི་ཆེ་བ་བྱུང་། ས་རྣམས་ཀུན་དུ་གཡོས་པས་སྤྱོད་པའི་རྣལ་འབྱོར་པ་དག་ངོ་མཚར་བར་གྱུར་ཏེ་རང་རང་གི་སྟོན་པ་ལ་གསོལ་བ། འདི་ལྟ་བུའི་ལྟས་ཡ་མཚན་ཅན་འདི་ཇི་ལྟ་བུ་ཞིག་ལགས་ཞེས་ཞུས་བ་ལས་སོ་སོའི་སྟོན་པ་དཔག་ཏུ་མེད་པས་སོ་སོའི་འཁོར་དཔག་ཏུ་མེད་པ་ལ་བཀའ་སྩལ་པ། རིགས་ཀྱི་བུ་དག་ལྟས་ཆེན་པོ་འདི་ནི་གདལ་ཁྱབ་ཆེན་པོ་ཞེས་བྱ་བའི་ཞིང་ཁམས་ན་སངས་རྒྱས་ཀུན་གྱི་དགེ་བའི་བཤེས་གཉེན་རྡོ་རྗེ་སེམས་དཔའ་དེ་ཁོ་ན་ཉིད་ཅེས་བྱ་བ་ཐེག་པ་ཆེན་པོ་གསང་སྔགས་ཀྱི་དེ་ཁོ་ན་ཉིད་ངེས་པ་ཞེས་བྱ་བའི་ཆོས་སྟོན་ཏེ། སངས་རྒྱས་དེ་ནི་ཐེ་ཚོམ་ཐམས་ཅད་གཅོད་ཅིང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ངེས་པར་སངས་རྒྱས་པར་ལུང་སྟོན་པའི་དགེ་བའི་བཤེས་གཉེན་དམ་པར་གྱུར་བས་སྐྱེས་བུ་དམ་པ་ལྔ་གང་གསང་སྔགས་ཀྱི་ངེས་པ་མ་རྙེད་པས་ཡོངས་སུ་མངོན་པར་རྫོགས་པར་སངས་རྒྱས་པས་དེ་དག་ངེས་པའི་ཐེ་ཚོམ་བཅད་དེ་ལུང་སྟོན་པས་དེ་དག་གི་ལྟས་ཡིན་ནོ། །ཞེས་སྟོན་པར་གྱུར་ཏོ། །ལང་ཀའི་བདག་པོ་དེ་ལྟར་ན་སྐྱེས་བུ་དམ་པ་དེ་དག་ནི་དེ་ཁོ་ན་ཉིད་ཀྱི་ཉམས་རྙེད་མ་ཐག་ཆོས་ཀྱི་རྒྱལ་པོའི་རྒྱལ་ཚབ་སྐྱེས་བུ་དམ་པ་ཞེས་བྱ་བར་ངེས་པར་གྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་དབུགས་ཆེན་པོ་ཡོངས་སུ་ཕྱིན་པའི་ལེའུ་ཞེས་བྱ་སྟེ་བཅུ་གཉིས་པའོ།། །།