བསྡུ་བ་རྣམ་པར་འགྲེལ་པའི་ལེའུ་སྟེ་བཞི་བཅུ་དྲུག་པ།
དེ་ནས་ཡང་ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས་གསང་བ་པའི་བདག་པོ་ལ་སྒོ་གཉིས་ཀྱི་དྲི་བ་ཡོངས་སུ་དྲིས་པ། ཀྱེ་གསང་བ་པའི་བདག་པོ་གང་སྒོ་གཉིས་འབྱེད་ཅིང་། རྣམ་པར་འགྲེལ་པ་ཇི་ལྟར་འབྱེད་པ་ལགས། སྨྲས་པ། ལང་ཀའི་བདག་པོ་སྒོ་གཉིས་ནི་འདི་ལྟར་འདི་ཡང་ལྡེ་མིག་གསུམ་གྱིས་རྣམ་པར་འབྱེད་ཅིང་གསལ་བར་བྱེད་པ་སྟེ། ཐུན་མོང་གི་ཡན་ལག་དང་མདོ་དང་རྩ་བའོ། །གང་འདི་ལྟར་ཡན་ལག་དྲུག་ནི་འདི་ལྟ་སྟེ། བྱ་བའི་ཡན་ལག་དང་། ཐབས་ཀྱི་ཡན་ལག་དང་། སྦྱོར་བའི་ཡན་ལག་དང་། སྤྱོད་པའི་ཡན་ལག་དང་། རིག་པའི་ཡན་ལག་དང་། རྫོགས་པའི་ཡན་ལག་གོ། །ལང་ཀའི་བདག་པོ་ཡན་ལག་དྲུག་པོ་འདི་དག་ཀྱང་གཅིག་ཏུ་ཡན་ལག་བཅུ་གཉིས་ཀྱིས་ཡོངས་སུ་རྫོགས་ཤིང་ཡན་ལག་དྲུག་གིས་གསལ་བར་འགྲེལ་པ་སྟེ། བཅུ་གཉིས་གང་ཞེ་ན། འདི་ལྟ་སྟེ། སྒོའི་ཡན་ལག་དང་། དམ་པའི་ཡན་ལག་དང་། ངེས་པའི་ཡན་ལག་དང་། བསམ་པའི་ཡན་ལག་དང་། དམིགས་པའི་ཡན་ལག་དང་། བཟླས་པའི་ཡན་ལག་དང་། སྦྱོར་བའི་ཡན་ལག་དང་། སྤྱོད་པའི་ཡན་ལག་དང་། ཐོབ་པའི་ཡན་ལག་དང་། གནས་པའི་ཡན་ལག་དང་། སའི་ཡན་ལག་དང་། ལྟ་བའི་ཡན་ལག་གོ། །ལང་ཀའི་བདག་པོ་དྲུག་གང་ཞེ་ན། འདི་ལྟ་སྟེ། རྒྱུའི་ཡན་ལག་དང་། རྩ་བའི་ཡན་ལག་དང་། འབྲེལ་པའི་ཡན་ལག་དང་། འདྲེན་པའི་ཡན་ལག་དང་། ངེས་པའི་ཡན་ལག་དང་། སྦྱོར་བའི་ཡན་ལག་གོ། །ལང་ཀའི་བདག་པོ་འདི་དག་ནི་གང་ཐམས་ཅད་ནས་ཐམས་ཅད་དུ་ཐུན་མོང་དུ་ཤེས་པར་བྱའོ། །ལང་ཀའི་བདག་པོ་དེ་དག་ནི་ཡན་ལག་སྟེ། གང་སྒོ་དེ་དག་དེ་དག་གིས་འབྱེད་ཅིང་གསལ་བར་འགྲེལ་བར་ཤེས་པར་བྱའོ། །ལང་ཀའི་བདག་པོ་དེ་ལ་མདོ་གང་ཞེ་ན། འདི་ལྟ་སྟེ། སྐྱེ་བ་མེད་པ་དང་། མཉམ་པ་ཉིད་དང་། ཇི་བཞིན་པ་དང་། བཙལ་བ་མེད་པར་ལུང་སྟོན་པའོ། །ལང་ཀའི་བདག་པོ་དེ་དག་ནི་གཞན་གྱི་སྐྱེ་བ་མེད་པ་དང་། མཉམ་པ་ཉིད་དང་། ཇི་བཞིན་པ་དང་། བཙལ་བ་མེད་པ་དང་། མ་འདྲེས་པ་གང་ཡིན་པ་དེ་ཁོ་ན་ཉིད་དོ། །ལང་ཀའི་བདག་པོ་དེ་ལ་རྩ་བ་གང་ཞེ་ན། འདི་ལྟ་སྟེ། དེ་ཁོ་ན་ཉིད་གང་ཡིན་པ་དང་། དམ་པར་ངེས་པ་དང་། ཡོངས་སུ་ཟིན་པའོ། །ལང་ཀའི་བདག་པོ་དེ་དག་ནི་རྩ་བ་སྟེ། དེས་སྒོ་དེ་དག་གི་ཇི་ལྟ་བ་ངེས་པར་འབྱིན་པར་ཤེས་པར་བྱའོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་བསྡུ་བ་རྣམ་པར་འགྲེལ་པའི་ལེའུ་སྟེ་བཞི་བཅུ་དྲུག་པའོ།། །།