སྒྱུ་མ་རོལ་པས་རྣམ་པར་རོལ་པས་རྣམ་པར་གྲོལ་བའི་ལེའུ་ཞེས་བྱ་སྟེ་དྲུག་ཅུ་བཞི་པ།

དེ་ནས་ཡང་ལང་ཀའི་བདག་པོ་ལ་སོགས་པ་དམན་པ་དམ་པ་རྣམས་ཀྱིས་གསང་བ་པའི་བདག་པོ་ལ་གང་དུ་འདིར་མདོ་བཅུ་བཀོད་པའི་དགུ་པ་དྲི་བ་ཡོངས་སུ་དྲིས་བ། ཀྱེ་གསང་བ་པའི་བདག་པོ་ཆ་མཐུན་པར་སྦྱར་བར་བྱའོ་ཞེས་དམ་བཅའ་བར་དགོངས་པ་དེ་ཇི་ལྟར་ཡོངས་སུ་ཤེས་པར་བགྱི། དེ་སྐད་ཅེས་དྲིས་པ་ལས། གསང་བ་པའི་བདག་པོས་སྨྲས་པ། ལང་ཀའི་བདག་པོ་དེ་དག་ནི་འདི་ལྟར་ཡོངས་སུ་ཤེས་པར་བྱ་སྟེ། མུན་པ་ཆེན་པོ་མུན་འཁྲིགས་པའི། །བྱིས་པའི་ཁམས་ཀྱི་གྲོང་ཁྱེར་དུ། །རྟག་པ་རྒྱུན་གྱི་འཁོར་མོར་འདིར། །ངེས་པར་འཇུག་པའི་བྱ་བ་དག །དགོངས་པ་དམ་པ་ཀུན་འདུས་པས། །གང་གི་སྤྱོད་ཡུལ་གང་གྱུར་པ། །ཇི་ལྟར་གསུངས་པ་ཇི་སྙེད་པ། །འདིར་ནི་གསུམ་དུ་ཤེས་པར་བྱ། །ཆ་མཐུན་མཐུན་འཇུག་ཐབས་འཛུད་པ། །སྦྱོར་དང་སྤྱོད་པ་བསྲེ་བ་ཡིས། །ཐམས་ཅད་ཐམས་ཅད་ཅི་རིགས་པར། །དམ་པའི་དོན་དུ་ངེས་པར་སྦྱོར། །ལང་ཀའི་བདག་པོ་འདི་ལྟ་སྟེ། །ཆ་མཐུན་སྦྱོར་བ་གང་འཇུག་པ། །གང་ཞིག་གང་དུ་དེར་ངེས་ལ། །དེ་དག་ཉིད་དང་མཐུན་པར་སྤྱད། །ཡོངས་ཀྱིས་དེ་དང་མཐུན་བསྟན་ན། །དེ་ཉིད་དེ་ལ་འགྱུར་བར་བྱ། །དེ་དག་དམ་པར་བྱ་བའི་ཕྱིར། །དེ་དག་མཐུན་པས་གང་སྦྱར་བས། །ཡིད་ཀུན་དྲངས་ཏེ་བཅུག་ཅིང་བྱ། །གང་གི་ཡིད་འཕྲོག་འདྲེན་འཇུག་པ། །ཇི་ལྟར་ཡིད་འོང་དེ་ཁོ་ན། །ནན་ཏན་གྱིས་ནི་དེ་ཉིད་དོ། །དཔེར་ན་མུན་པའི་ཁམས་དག་ན། །གང་གིས་གང་དག་གང་གྱུར་པ། །དེ་ཡི་ཡིད་ལ་དེ་ཞུགས་ཏེ། །དེ་དང་དེ་གཅིག་མི་གཞན་པས། །དེ་ནས་དེ་ཡི་དེ་རིག་ནས། །དེ་ཡི་དབང་སྒྱུར་ཐབས་ཐོབ་སྟེ། །དེ་ཉིད་སྒྱུར་བའི་ཚིག་ལམ་འབྱུང་། །དེ་འདས་དམ་པ་ཁོ་ན་ཡི། །ཡིད་ལ་ཞུགས་བས་ཨེ་མའོ་འཁྲུལ། །འདིར་ཉེས་འདིར་ལོག་ལྡང་སོགས་བསྡོ། །དེ་ནང་འདི་ནི་ཁོ་ནས་བྱས། །གང་འདིར་དམ་པར་འཇུག་འདི་ལ། །དམ་པ་ཁོ་ནར་འཇུག་པར་འོས། །དེས་ན་དེ་ཡི་དེ་ཉིད་དེ། །འོན་པས་གང་གི་དེ་ཉིད་ཀྱང་། །འོན་ཅིང་དམ་པའི་ཡུལ་ལ་འཇུག །ལང་ཀའི་བདག་པོ་ཇི་ལྟར་ན། །དེ་ཡང་ཇི་ལྟ་བུ་ཞེ་ན། །ཁོ་བོས་མཐོང་ཐོས་སྐད་ཅིག་ན། །བདག་གི་བཤེས་གཉེན་དམ་པ་དེས། །འདུས་པ་ཕལ་མོ་ཆེ་དག་ལ། །ལམ་འདི་རྒྱ་ཆེར་བསྟན་པའི་ཚེ། །འཁོར་དེར་འདུས་པར་གྱུར་པ་ཡི། །ལྷ་མོ་ཀླུ་མོ་རིགས་ངན་མོ། །བུ་མོ་དྲུག་གི་འཁོར་འདུས་པས། །དགའ་བས་གླུ་བྲོ་གར་གྱིས་བསྟན། །དགྱེས་པ་ཆེན་པོའི་གཉིས་པས་བསྟབས། །དེ་ཚེ་དམ་པའི་ཡུལ་མིན་ཡང་། །དམ་པ་གསང་བ་མཆོག་ཉིད་ཀྱིས། །དེ་ཉིད་སྤྱོད་མཐུན་དགྲོལ་བ་ཡིས། །ཡུལ་གྱི་དམ་པ་ཉིད་དུ་དགོངས། །གང་དེས་སྲས་ཀྱི་ཚོགས་འདུས་ལ། །ཀྱེ་མ་འདུས་པ་ཆེན་པོའི་ཚོགས། །ང་ཡི་གདུང་རྒྱུད་རིགས་བྱུང་གང་། །ལྷ་ཡི་རོལ་མོ་གླུ་བྲོ་གར། །སྙན་དང་འཇོ་སྒེག་མཛེས་པའི་སྟབས། །གང་གི་ཡིད་འཕྲོག་འཇུག་འདྲེན་ཐབས། །གླུ་ཡི་ཡན་ལག་སུམ་བརྒྱ་དང་། །སྟབས་དང་གར་ཐབས་མི་ཟད་པས། །ཀུན་སྡུད་ཀུན་མཉེས་ཆ་མཐུན་སྦྱོར། །དམ་པ་དེ་ཡིས་དེ་གསུངས་པ། །དེ་ནས་སྲས་ཀྱི་དེ་ཁོ་ན། །བློ་གྲོས་ཐབས་ལྡན་ཉིད་ཀྱིས་འདིར། །གང་དག་གང་འདུལ་རིག་ནས་ནི། །འཇིག་རྟེན་དྲུག་དང་མཐུན་སྦྱོར་ཕྱིར། །གང་གི་གནས་ནས་མཐུན་གཡོས་ཏེ། །གར་མཆོག་གློག་ལྟར་འགྱུར་བ་ཡི། །དཔལ་ལྡན་ལག་པ་བྱེ་བ་ཡིས། །ནམ་མཁའི་ཁམས་འདི་ཡོངས་བཀང་ནས། །གོམས་པའི་སྟོབས་ཀྱིས་གར་བྱེད་ཅིང་། །གླུ་ཡི་ཡན་ལག་སུམ་བརྒྱའི་སྒྲ། །སྲིད་གསུམ་འབྲུག་སྒྲས་གང་བ་ལྟར། །མཐའ་ཐུག་མེད་པའི་འཇིག་རྟེན་དྲུག །གང་བས་ཡིད་འཕྲོག་འདྲེན་པར་བྱེད། །ཐེག་ཆེན་རྨད་འབྱུང་གསང་བའི་ཚིག །ཚིག་གཅིག་བསྒྱུར་བས་ཚིག་མཐའ་ཡས། །ཚིག་ལམ་རབ་ཏུ་བྲལ་བའི་དོན། །ཟབ་མོ་སངས་རྒྱས་སྤྱོད་ཡུལ་སྟོན། །ཨེ་མའོ་ངོ་མཚར་རྨད་ཀྱི་ཆོས། །རྨད་འབྱུང་རོལ་པའི་དོན་འབྱུང་ངོ་། །ཆ་མཐུན་སྦྱོར་བའི་ཁྱད་པར་ལས། །འཇིག་རྟེན་དྲུག་ཏུ་རོལ་པ་འབྱུང་། །འཁོར་བའི་ལམ་རྒྱུད་གཅད་པའི་ཕྱིར། །འཇིག་རྟེན་དྲུག་གི་སྙིང་པོ་ལ། །ཐུགས་རྗེ་ཐབས་ཀྱི་འོད་འཕྲོས་པས། །རྒྱུད་དྲུག་དངོས་པོ་ཐམས་ཅད་བསྲེགས། །སྤྱོད་ལམ་མ་ཆགས་ཡེ་ཤེས་ཀྱིས། །ཆ་མཐུན་ཐབས་སུ་སྦྱར་བའི་ཕྱིར། །འཇིག་རྟེན་བྱིས་པའི་སྤྱོད་པ་བཞིན། །འཇིག་རྟེན་བུ་མོ་དྲུག་དང་རོལ། །སྟབས་དྲུག་བསྐྱོད་པས་འགྲོ་དྲུག་བསྒྲལ། །གླུ་དྲུག་བླངས་པས་ཡུལ་དྲུག་དྲངས། །ཚིག་དྲུག་བསྒྲགས་པས་དོན་དྲུག་རྫོགས། །ལེ་ལོ་གཡེང་བའི་ས་གཞི་ལ། །བརྩོན་འགྲུས་མྱུར་བ་ཅང་ཤེས་སྟབས། །ཚངས་པའི་དབྱངས་ཀྱི་སྙན་པའི་གླུ། །དོན་གྲུབ་རྡོ་རྗེ་གསང་བའི་ཚིག །ང་རྒྱལ་རི་བོའི་ས་གཞི་ལ། །དཔའ་བོ་ཚམ་ངམ་གྱད་ཀྱི་སྟབས། །སིལ་སྙན་འབུམ་གྱིས་སྙན་པའི་གླུ། །ཞི་གནས་མི་རྟོག་ནམ་མཁའི་ཚིག །ཀུན་ནས་འདུས་པའི་ས་གཞི་ལ། །ཁྱུ་མཆོག་ལྔ་ཡིས་རོལ་པའི་སྟབས། །གླུ་གར་ཡིད་འཕྲོག་སྙན་པའི་གླུ། །འཛིན་པའི་རྟོད་ཕུར་འབྱིན་པའི་ཚིག །གཏི་མུག་འདུས་པའི་ས་གཞི་ལ། །སེང་གེ་རྔམ་བས་རོལ་པའི་སྟབས། །ཀ་ལ་པིང་གའི་དབྱངས་སྙན་གླུ། །ཡེ་ནས་དོན་གྱིས་གསལ་བའི་ཚིག །ཆགས་པ་འདུས་པའི་ས་གཞི་ལ། །རྡོ་རྗེ་ཁྱུང་ཆེན་ལྡིངས་པའི་སྟབས། །འབྲུག་ཆེན་འདིར་བས་སྙན་པའི་གླུ། །ཡིད་བཞིན་ནོར་བུ་འབར་བའི་ཚིག །ཞེ་སྡང་འདུས་པའི་ས་གཞི་ལ། །ཁྲོ་བོ་མ་རུངས་ཁྲོས་པའི་སྟབས། །སྲིན་མོ་མ་རུངས་ཁྲོས་པའི་གླུ། །རྡོ་རྗེ་བུ་ཡུག་སྐར་མདའི་ཚིག །རྨད་འབྱུང་གསང་བའི་དཀྱིལ་འཁོར་ནས། །ཡེ་ཤེས་འབར་བའི་མེ་འབྱུང་བས། །ཁམས་གསུམ་འཁོར་བའི་བུད་ཤིང་བསྲེགས། །སྲིད་གསུམ་འཁོར་བའི་ཁྲག་མཚོ་བསྐམས། །ང་རྒྱལ་རི་བོ་རྨད་ནས་བཤིག །ཞེ་སྡང་འབར་བའི་མེ་དབལ་གསད། །གཏི་མུག་མུན་པ་གཏན་ནས་བཅོམ། །འཁོར་བ་འདུས་པའི་འདམ་རྫབ་བསྐམས། །ལང་ཀའི་བདག་པོ་འདི་དག་ནི། །གང་གི་ཆ་དང་མཐུན་སྦྱར་བས། །དམ་པའི་དོན་ལ་སྦྱར་བ་ཡིས། །བྱིས་པ་འདྲིད་པའི་རོལ་པའོ། །ལང་ཀའི་བདག་པོ་གཞན་ཡང་གང་། །ཐབས་འཛུད་བསྲེ་པའི་བརྟུལ་ཞུགས་ནི། །འཇིག་རྟེན་ལོག་སྲེད་ཇི་ལྟ་བར། །བརྟུལ་ཞུགས་སྤྱོད་པའི་ཁྱད་པར་སྤྱོད། །ཝ་དང་ཅང་ཤེས་གྱི་ལིང་དང་། །ཤིན་ཏུ་གླང་ཆེན་མྱོས་འདྲ་བ། །དཔའ་བརྟུལ་ཟ་བྱེད་གཏུམ་རྔམ་འཁྲུག །མཁའ་ལྡིང་ཁྱུང་ཆེན་གང་མི་ལྟ། །གཏུམ་ཐུང་སྡོང་ཆེན་འཇིགས་འདྲིལ་བ། །གང་ཐུབ་མི་ལྡོག་རྒྱ་མཚོའི་གསེར། །མུན་ལྟར་ལྐུགས་པའི་བློ་ཚུལ་ལྡན། །ལྷུན་པོ་མི་འགྱུར་བརྟན་པ་ཆེ། །མཁའ་ལྟར་ཡངས་དོག་ཀུན་དང་བྲལ། །གནས་ལྕགས་ལྕེ་ཡི་དྲག་ཤུལ་ཅན། །དྲག་ཤུལ་ཆེན་པོ་བརྟུལ་ཞུགས་བདག །ཁུ་འཕྲིག་ལྟ་བུ་ཟན་ཅན་བློ། །ངེས་པའི་ང་རྒྱལ་གླང་ཆེན་བརྟུན། །ཟླ་མེད་སེང་གེ་གཅིག་བརྗོད་པ། །རེག་འཇམ་བྱ་ལྟར་ཆགས་འགྲོགས་བ། །སྒྱུ་མ་སྒྱུ་མའི་ཚུལ་འདྲིད་བ། །གང་ལ་རྟོགས་མེད་ཀུན་སྤྱོད་ཉིད། །ཐོགས་མེད་ཟ་བྱེད་མྱུར་སྤྱོད་ཟ་བྱེད་ཁ། །ཡུད་ལྟར་མྱུར་འགྱོགས་གློག་ལྟར་འགྱུར། །གང་གི་གང་བསྲུང་ནམ་མཁའ་ལྡིང་། །ས་ཐུབ་བག་ལེན་རྒྱལ་འཁོར་སྐྱོད། །རྣལ་འབྱོར་བརྟུལ་ཞུགས་ཆེན་པོ་ནི། །བཅུ་གཉིས་དང་ནི་གསུམ་བློར་ལྡན། །གང་འདིར་ཉམས་སུ་ལེན་བྱེད་པ། །རྣལ་འབྱོར་གསང་བའི་ཐབས་མཆོག་སྟེ། །གང་ལ་འཛུད་པས་བསྲེ་བ་ཡི། །ཚུལ་ཁྲིམས་ཐམས་ཅད་གཅིག་སྤྱོད་པའོ། །ལང་ཀའི་བདག་པོ་གཞན་ཡང་གང་། །མཐུན་པས་འཇུག་པར་སྤྱོད་པ་ནི། །དེ་ཉིད་དེ་ལྟར་དེ་བཞིན་ཏེ། །གང་དང་འདྲ་ཚུལ་གང་ཡིན་པའོ། །འདོད་ཆགས་ཕོ་མོར་གྱུར་བ་ལ། །ཕོ་མོར་འདོད་ལས་ཕོ་མོར་སྣང་བ་གང་ཡིན་ལ། །ཕོ་མོ་མེད་ལས་ཕོ་མོ་སྣང་བ་མཐུན་འཇུག་སྤྱོད། །འདོད་ལ་ཆགས་པས་ཁྲོ་འགྱུར་ལ། །ཁྲོ་བོར་འདོད་ལས་ཁྲོ་བར་སྣང་བ་གང་ཡིན་ལ། །ཁྲོ་བོ་མེད་ལས་ཁྲོ་བར་སྣང་བ་མཐུན་འཇུག་སྤྱོད། །འདོད་ལ་ཆགས་པས་མུན་སྣང་ལ། །མུན་པར་འདོད་ལས་མུན་པར་གྱུར་བ་གང་ཡིན་ལ། །མུན་པ་མེད་ལས་མུན་པར་སྣང་བ་མཐུན་འཇུག་སྤྱོད། །ཇི་ལྟར་གང་ལྟར་དེ་བཞིན་དུ། །དེ་ལ་སོགས་པ་མཐའ་ཡས་པར། །ཐམས་ཅད་ཐམས་ཅད་དེར་སྣང་བ། །མཐུན་འཇུག་སྤྱོད་པས་དོན་བྱེད་ཡིན། །ལང་ཀའི་བདག་པོ་དེ་དག་ནི་མཐུན་པར་འཇུག་པར་བྱའོ་ཞེས་དེ་སྐད་ཅེས་སྨྲས་པས། ལང་ཀའི་བདག་པོ་ལ་སོགས་པ་དམན་པ་དམ་པ་རྣམས་མཐའ་ཐུག་པ་མེད་པའི་ལྟ་སྤྱོད་ལ་ཡོངས་སུ་རྟོག་པ་མེད་པར་གྱུར་ཏོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་སྒྱུ་མ་རོལ་པས་རྣམ་པར་རོལ་པས་རྣམ་པར་གྲོལ་བའི་ལེའུ་ཞེས་བྱ་སྟེ་དྲུག་ཅུ་བཞི་པའོ།། །།