གང་རྨོངས་པ་གདུང་བ་སེལ་བ་ཞེས་བྱ་བའི་ལེའུ་སྟེ་དྲུག་པ།

དེ་སྐད་ཅེས་གསོལ་བ་བཏབ་པ་ལས། གསང་བའི་བདག་པོས་བཀའ་སྩལ་པ། །སྔོན་དུ་བྱུང་བར་ལུང་བསྟན་པའི། །འགྲོ་བ་ལུས་ཀྱི་སེམས་དཔའ་རྣམས། །གདུང་སྔགས་དྲི་བ་དང་བཅས་པའི། །སྒྱུ་མའི་རྟོག་པ་དགྲོལ་གྱིས་ཉོན། །སེམས་ཀྱི་དཀྱིལ་འཁོར་དེ་བཞིན་ཉིད། །ནམ་མཁའ་བཞིན་དུ་ནུབ་པ་མེད། །རང་བཞིན་ཡེ་ནས་འོད་གསལ་བས། །དེ་ལ་གང་སྒྲིབ་དེ་ཉིད་སེལ། །ཚད་མ་གཉིས་ཀྱིས་གང་གཞལ་བ། །ཤེས་བྱ་དེ་ཡང་ཚད་མར་འགྱུར། །ལེགས་ཉེས་རྩ་བའང་དེ་ཉིད་པས། །དེ་ཉིད་དེ་ལ་འགྱུར་བ་མེད། །སེམས་ཀྱི་རང་བཞིན་འོད་གསལ་བས། །དཀར་བས་དཀར་བའི་ཉི་ཟླ་མེད། །སངས་རྒྱས་མྱ་ངན་ཡོང་མི་འདའ། །ཆོས་ཀྱང་ནུབ་པར་མི་འགྱུར་ཏེ། །ལེ་ལོ་ཅན་ལ་ཕན་གདགས་ཕྱིར། །སྤྲུལ་པ་རྣམས་ནི་འདའ་ཚུལ་སྟོན། །ཇི་ལྟར་ནམ་མཁའ་ཞིག་འགྱུར་ན། །དེ་ཚེ་མྱ་ངན་འདའ་བར་འགྱུར། །གང་དག་གདུག་པ་མ་རུངས་པ། །བདག་མེད་སྟོང་པའི་སྟོབས་ཀྱིས་འདུལ། །རང་བཞིན་འོད་གསལ་སྤྲོས་བྲལ་བའི། །བསྟན་པ་རྒྱ་མཚོའང་དེ་ཉིད་པས། །རང་འབྱུང་སེང་གེ་རྩལ་ཅན་གྱིས། །ཀུན་དུ་འབར་ཞིང་སྣང་བར་བྱེད། །བསླབ་པ་ལྷག་པའི་སེམས་ཉིད་པས། །བསྒྲུབ་པ་ཀུན་གྱི་མཆོག་འདི་ནི། །ས་རབ་སྣང་བ་ཕྱིས་འབྱུང་བའི། །འགྲོ་བ་ལུས་ཀྱི་སེམས་དཔའ་འཛིན། །མཐའ་ཐུག་མེད་པའི་སེམས་ཅན་རྣམས། །བྱང་ཆུབ་སྙིང་པོར་ཡེ་གནས་པས། །དེ་བཞིན་ཉིད་དུ་རྒྱུད་དེས་ཕྱིར། །ཀུན་ཀྱང་མི་སློབ་དེ་ལུང་སྟོན། །སེམས་ཉིད་ཡོད་དང་མེད་དོ་ཞེས། །བྱིས་པ་རྣམས་ནི་རྩོད་པར་བྱེད། །མཁས་པ་ཡེ་ནས་རྩོད་དང་བྲལ། །ཡོད་མེད་རྟོག་པའི་ཚིག་མི་བརྗོད། །ང་ཡི་གསང་སྔགས་གསང་བ་འདི། །སངས་རྒྱས་ཀུན་གྱི་གསང་ཡིན་ཕྱིར། །གང་མི་དཔོགས་པར་གཞན་དཔགས་པས། །གསང་བར་སྒྲ་གཅིག་ཐ་དད་འབྱུང་། །དམ་པ་རྣམས་ཀྱི་གསང་ལུང་འདི། །གང་དག་མི་ཤེས་རྨོངས་འཕྱར་བས། །དུག་དང་བདུད་རྩིར་རྗེ་བས་ནི། །ཕུང་བྱེད་གཉིས་ཀ་སྲེག་པར་འགྱུར། །ཀུན་གསལ་མེ་ལོང་འོད་པོ་ཆེ། །མ་འདྲེས་ཡོངས་རྫོགས་སྟོན་པ་དེ། །མཁའ་ལྟར་འཕོ་འགྱུར་མེད་པས་ན། །འཚེ་བའང་གློག་འགྱུ་སྤྲིན་བཞིན་མེད། །བྱང་ཆུབ་སྙིང་པོ་ཡོད་ཀྱི་བར། །དེ་སྲིད་བསྟན་པ་གནས་པ་ཡིན། །ཐོག་མ་ཐ་མ་མེད་པ་ནས། །བྱུང་བས་སྔ་ཕྱི་ཡོད་མ་ཡིན། །དང་པོ་མེད་ལས་བྱུང་བརྗོད་པས། །ཐ་མའང་བརྗོད་བྲལ་མེད་པར་འགྱུར། །གདུང་འཛིན་ཐོག་མའང་དེ་བཞིན་ཉིད། །ཐ་མའང་དེ་ལས་གཞན་མི་འགྱུར། །འདི་ནས་དེ་བཞིན་ཉིད་འདིར་གཤེགས། །བདལ་ཁྱབ་ཆེན་པོའི་ཞིང་ན་བཞུགས། །སེམས་ཀྱི་དཀྱིལ་འཁོར་འོད་གསལ་བ། །དེ་བཞིན་ཉིད་དུ་རྣམ་པར་སྣང་། །བྱིས་པའི་ཆེད་དུ་ཆོ་འཕྲུལ་ཞིག །མེ་ཏོག་བཀོད་པའི་འཇིག་རྟེན་ན། །མ་གྲགས་པ་ཞེས་བྱ་བར་སྣང་། །སྣང་བའང་ཉིད་ན་སྣང་བ་མེད། །དེ་བཞིན་ཞིང་ཁམས་གང་དག་ཏུ། །སྤྲུལ་པའི་སངས་རྒྱས་སྨད་མཛད་པ། །སྒྱུ་མའི་འཕྲུལ་པ་ཇི་བཞིན་དུ། །མི་སྣང་འོད་ཀྱང་གཞན་དུ་སྣང་། །མི་བསྐྱོད་རྗོ་རྗེ་ཐུགས་མཆོག་ཀྱང་། །ཐུགས་རྗེ་སྤྲུལ་པའི་བྱིན་བརླབས་ཀྱིས། །འཇིག་རྟེན་ཁམས་ནི་དཔག་ཏུ་མེད། །མུན་སྣང་རང་འབྱུང་རང་བཞིན་ཡིན། །སྐྱེ་མེད་ཡེ་ཤེས་ཉིད་ཀྱི་དབྱིངས། །གདོད་ནས་བདེར་གཤེགས་སྙིང་པོ་ལས། །རྣམ་རྟོག་གློ་བུར་ལས་ཀྱིས་བསྒྲིབས། །དེ་ཉིད་འགྲོ་མགོན་སྐྱབས་ཆེན་ཡིན། །རྒྱལ་བའི་ དགོངས་པ ་ཚིག་གསུམ་པོ། །འཕྲུལ་གྱི་བློ་དང་གྲོས་མཆོག་སྟེ། །ཡུན་གྱི་དོན་སྲིད་ཆེན་པོ་ལས། །བློ་གྲོས་དམ་པའི་ཡུལ་དུ་སྣང་། །རྒྱལ་བ་ཀུན་གྱི་ཐུགས་འཇུག་པ། །ཇི་བཞིན་པ་ཡི་དེ་ཁོ་ན། །ཉིད་དུ་ངེས་པའི་ངོ་བོ་ལ། །བློ་བཞག་དེ་ཉིད་ངེས་པ་ཡིན། །ཆོས་ཀུན་ནམ་མཁའི་མཚན་ཉིད་དེ། །ཡེ་ཤེས་སྐུ་ཅན་རྒྱལ་བ་རྣམས། །སྐུ་ལ་དངོས་ཅན་དངོས་མེད་པར། །སྐུ་གདུང་རིང་བསྲེལ་ཇི་ལྟར་འབྱུང་། །སེམས་ཅན་རྣམས་ལ་ཕན་དོན་དུ། །མེད་པ་ཉིད་ལས་སྤྲུལ་པ་ཡི། །སྒྱུ་མ་རིང་བསྲེལ་ཡུངས་འབྲུ་ཙམ། །ཐུགས་རྗེ་ཐབས་ཀྱིས་གཞག་ཚུལ་བསྟན། །ངེས་པར་རིང་བསྲེལ་གང་འདོད་པ། །བྱེ་མ་དག་ལས་མར་འདོད་འདྲ། །གང་ཚེ་འབྲས་བཏབ་ཏིལ་འབྲུ་སྨིན། །དེ་ཚེ་རིང་བསྲེལ་ཡོད་པར་འགྱུར། །གཟུགས་སྣང་བྲབ་སྒྲོགས་སྙིང་པོ་ཅན། །སྐུ་དང་གསུང་ཐུགས་སྙིང་པོ་ཅན། །མཆོད་གནས་ཡིད་རྟེན་དམ་པ་ཞེས། །འགྲོ་མགོན་རྡོ་རྗེ་སེམས་དཔས་བཤད། །དཔག་ཏུ་མེད་པའི་རྒྱལ་བ་རྣམས། །འཁོར་བའི་སེམས་ཅན་རྒྱུད་ལས་བྱུང་། །འཁོར་བའི་སེམས་ཅན་རྒྱུན་བཅད་ན། །སངས་རྒྱས་རྒྱུན་ཡང་ཆད་པ་ཡིན། །དཔེར་ན་ནམ་མཁའི་གཞའ་ཚོན་ནི། །དང་པོ་གཞན་ནས་འོངས་པ་དང་། །ཐ་མ་གཞན་དུ་སོང་བ་མེད། །དེ་ཉིད་རང་འབྱུང་རང་ཞི་ལྟར། །སྤྲུལ་པ་རང་འབྱུང་རང་ཞི་བས། །དེ་ཉིད་དེ་ལ་ནུབ་བ་མེད། །འདས་ཀྱང་མ་བྲལ་ཐ་དད་མིན། །མ་འདའ་པ་ནའང་གཅིག་མིན་ཏེ། །འདའ་དང་མི་འདའ་ལས་འདས་པས། །བྲལ་དང་མ་བྲལ་ག་ལ་ཡོད། །དེས་ན་གང་ལ་ཅི་ཕྱིར་གདུང་། །གདུང་བ་རྨོངས་པ་འཁྲུལ་པ་ཡིན། །ཨེ་མའོ་ངོ་མཚར་ཇི་ལྟ་བུ། །འདི་གོ་ཇི་ལྟར་འཁྲུལ་ཞིག་གུ། །ཞེས་གསང་བའི་བདག་པོ་དེས་སེང་གེ་རྣམ་པར་ལྟ་བའི་ཚུལ་གྱིས་གཞས་བཏབ་པས་རྨོངས་པས་གདུངས་པ་རྣམས་དགའ་མགུ་རངས་ནས་གདུང་བ་ཡོངས་སུ་སངས་ཏེ་སེམས་མ་བཅོས་བར་གནས་ཏེ་དེ་བཞིན་གྱི་དཀྱིལ་འཁོར་ཐམས་ཅད་འོད་གསལ་བར་གྱུར་ཏོ། །དེ་ནས་ལང་ཀའི་བདག་པོས་གསང་བ་པའི་བདག་པོ་ལ་གསོལ་པ། གསང་བ་པའི་བདག་པོ་ཆེན་པོ་གདུང་བ་ཐམས་ཅད་སེལ་ཏམ། འོན་ཏེ་མི་མཇེད་ཀྱི་འཇིག་རྟེན་གྱི་གདུང་བ་འབའ་ཞིག་སེལ། གསང་བ་པའི་བདག་པོས་སྨྲས་པ། ལང་ཀའི་བདག་པོ་ཁོ་བོ་ནི་གདུང་བ་ཐམས་ཅད་སེལ་བ་སྟེ། འདས་པའི་དུས་ཀྱི་གདུང་བ་ཇི་སྙེད་པ་ཡང་བསལ་ཏོ། །ད་ལྟ་མི་མཇེད་ཀྱི་འཇིག་རྟེན་གྱི་ཁམས་འདི་ཡི་གདུང་བ་ཡང་བསལ། འཇིག་རྟེན་གྱི་ཁམས་གཞན་རྡུལ་སྙེད་ཀྱི་གདུང་བ་ཡང་བསལ། མ་འོངས་པའི་གདུང་བ་ཇི་སྙེད་པ་ཡང་སེལ་བར་འགྱུར་རོ། །དེ་བས་ན་གང་དག་ཡོངས་སུ་གདུང་བ་རྣམས་ནི་མི་ཤེས་པ། རྨོངས་པ། ཤེད་མ་བྱེ་བ་ཁོ་ན་ཡིན་གྱི་ཤེས་པ། མ་རྨོངས་པ་མཁས་པ་ཤེད་བྱེ་བ་རྣམས་ནི་གང་དུ་ཡང་གདུང་བ་མེད་པ་གདུང་བ་དང་བྲལ་བ་ཡིན་ནོ། །ཞེས་ཐོས་པས་ལང་ཀའི་བདག་པོ་ལ་སོགས་པ་འགྲོ་བ་ལུས་ཀྱི་སེམས་དཔའ་རྣམས་ཡོངས་སུ་གདུང་བ་ལས་སངས་སོ། །སངས་རྒྱས་ཀུན་གྱི་ དགོངས་པ ་འདུས་པའི་མདོ་ཆེན་པོ་ལས་གང་རྨོངས་པ་གདུང་བ་སེལ་བ་ཞེས་བྱ་བའི་ལེའུ་སྟེ་དྲུག་པའོ།། །།