རྨོངས་པའི་སེལ་བ་སྤྱོད་མཐུན་དགྲོལ་བའི་ལེའུ་སྟེ་སུམ་ཅུ་དྲུག་པ།

དེ་ནས་ཡང་ལང་ཀའི་མངའ་བདག་བྱང་ཆུབ་སེམས་དཔའ་སེམས་དཔའ་ཆེན་པོ་དེས་གསང་བ་པའི་བདག་པོ་དེ་ལ་སྔོན་དུ་བྱུང་བའི་ཚིག་བཅུ་གཉིས་པའི་བརྒྱད་པ་བརྒྱུད་པ་ཐབས་ཀྱིས་གྲགས་པ་ན་ཡང་བྱུང་ཞེས་འབྱུང་བ་ལ་འདི་སྐད་ཅེས་དྲི་བ་ཡོངས་སུ་དྲིས་སོ། །ཀྱེ་གསང་བ་པའི་བདག་པོ་ཉིད་ཀྱིས་ཐེག་པོ་ཆེན་པོ་གསང་བ་དམ་པ་བྱུང་བའི་ཚུལ་སྟོན་པས་ལུང་བསྟན་པ་གཏམ་རྒྱུད་དུ་བརྗོད་པའི་སྐབས་སུ་བརྒྱུད་པ་ཐབས་ཀྱིས་གྲགས་པ་ན་ཡང་བྱུང་ཞེས་བཀོད་པ་དེ་ཇི་ལྟར་བརྒྱུད་ཅིང་གང་དུ་གྲགས་པ་ལགས། སྨྲས་པ། ལང་ཀའི་བདག་པོ་དགོངས་པས་བརྒྱུད་དེ་ཚིག་ཏུ་གྲགས་པས་ལྷ་དང་མིའི་འཇིག་རྟེན་དུ་སྣང་བར་གྱུར་པ་ཡིན་ནོ། །ལང་ཀའི་བདག་པོ་དེ་གང་ཞེ་ན། འདི་ལྟ་སྟེ། གང་གིས་གང་ལ་གང་བརྒྱུད་པ། །དེ་བཞིན་ཉིད་དེ་དེའི་ཞེས། །ཆོས་ཀྱི་རྒྱལ་པོ་རྒྱལ་ཚབ་ལ། །དགོངས་པ་གསང་བ་ངེས་པར་བརྒྱུད། །ལྷ་གནས་མི་ཡི་འཇིག་རྟེན་དུ། །གསང་བའི་བདག་པོས་གང་བགྲོས་པ། །སྔོན་དུ་གནང་འབྱུང་སྐྱེས་བུ་དག །དམན་པའི་ལུས་འཛིན་སེམས་དཔར་གྲགས། །གྲགས་པ་དེ་ཡང་ཇི་ག་གང་། །འདས་པའི་དུས་ན་སྔོན་བྱུང་བ། །འགྲོ་མགོན་རྡོ་རྗེ་སྙིང་པོ་ཡིས། །ནག་པོ་རང་ཐག་འཁོར་བ་ཅན། །གདུལ་བྱའི་ཞིང་དུ་སྨིན་མཛད་ཚེ། །སྨིན་དང་མ་སྨིན་འདུས་པའི་འཁོར། །ཀུན་ནས་འདུས་པར་གྱུར་པ་ལ། །ཡང་དག་གསང་བའི་དོན་འདི་གསུངས། །ལང་ཀའི་བདག་པོ་དེའི་ཚེ་དེའི་དུས་ན་ཡོངས་སུ་རྫོགས་པར་ངོས་མ་ཟིན་པའི་སྲས་དེ་དག་ཡོངས་སུ་རྫོགས་པར་ངོས་གཟུང་བའི་སླད་དུ་གསང་བ་རྣམ་པར་བསྐུལ་བ། འདུས་པ་ཆེན་པོའི་ཚོགས་ཁྱོད་ཡོངས་སུ་རྫོགས་པར་ངོས་མ་ཟིན་པ་ཡེ་ནས་ཡོངས་སུ་རྫོགས་པར་ངོས་གཟུང་བའི་ཕྱིར་མ་བཅོས་པའི་དམ་ཚིག་ཉེ་བར་ལོང་ཤིག་ཅེས་བཀའ་སྩལ་པ་པ་དང་། འདུས་པའི་ཚོགས་རྣམས་ཀྱིས་གསོལ་པ། བཅོམ་ལྡན་འདས་དེ་ཉིད་ཉེ་བར་གཟུང་བའི་སླད་དུ་མ་བཅོས་པའི་དམ་ཚིག་ཅེས་བགྱི་བ་དེ་ཇི་ལྟ་བུ་ལགས། ཇི་ལྟར་ཉེ་བར་གཟུང་བར་བགྱི། དེ་སྐད་ཅེས་གསོལ་པ་ལས། བཅོམ་ལྡན་འདས་ཀྱིས་བཀའ་སྩལ་པ། འདུས་པ་ཆེན་པོའི་ཚོགས་གང་མ་བཅོས་པའི་དམ་ཚིག་ནི་འདི་ལྟ་སྟེ། མ་ནོར་མ་བཅོས་དམ་ཚིག་ནི། །དེ་བཞིན་ཉིད་ཀྱི་ཆོས་ཉིད་ལ། །བློ་བཞག་དེ་ལ་མི་འདའ་བ། །རྒྱལ་བ་རྣམས་ཀྱི་དམ་ཚིག་གོ། །ཅེས་བཀའ་སྩལ་པ་ལས། འདུས་པའི་ཚོགས་རྣམས་ཤིན་ཏུ་སྐྲག་ཅིང་དངངས་ནས་ཡོངས་སུ་མ་རངས་ཏེ། ཨེ་མའོ་སྒྱུ་མའི་བདག་པོ་ཞིག་གིས་བདག་ཅག་བསླུས་སོ། །བདག་ཅག་སོ་སོའི་མོས་པ་སྣ་ཚོགས་པ་རྣམས་བཀག་ནས་སྟོང་པ་ཆེན་པོ་ལ་གཏད་པ་འདི་ནི་བདག་ཅག་སོ་སོ་རང་རང་གི་དམ་ཚིག་དང་བྲལ་ལོ་ཞེས་ཟེར་ཏེ་ངུས་པ་ལས། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཀྱེ་མིའི་ཐོད་པ་ཅན་ལ་སོགས་པའི་ཚོགས་རང་རང་ཇི་ལྟར་དགའ་བའི་དམ་ཚིག་རྣམས་སྤོབས་པ་སྐྱེད་ལ་ཀུན་གྱིས་ཕུལ་ཅིག །གང་མ་བཅོས་པའི་དམ་ཚིག་དེ་ལ་ནི་གང་ཡང་འགག་པ་མེད་པས་ཡོངས་སུ་མི་འགོག་པར་སྣང་ངོ་། །དེ་སྐད་ཅེས་བཀའ་སྩལ་པ་ལས། ཡོངས་སུ་གཟུང་བའི་སྲས་རྣམས་མགུ་ཞིང་རངས་པར་གྱུར་ཏེ་མདངས་ཕྱུང་ནས་ཀུན་གྱིས་རྣམ་པར་འདུན་ཏེ་སོ་སོ་དགའ་བའི་དམ་ཚིག་ཕུལ་བ། ནག་པོའི་དེད་དཔོན་འཁོར་དང་བཅས་པ་རྣམས་ཀྱིས་གསོལ་པ། དཔའ་པོ་ཆེན་པོ་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། རང་གི་དཀའ་ཐུབ་ཆེན་པོ་ཡིས། །རང་གི་རྒྱལ་སྲིད་ལ་གནས་ཏེ། །གཞན་གྱི་སྡེ་པ་འཇོམས་པ་ནི། །བདག་ཅག་རྣམས་ཀྱི་དམ་ཚིག་གོ། །ཞེས་གསོལ་ཏོ། །དེ་ནས་འདོད་ཆགས་ཅན་རྣམས་ཀྱི་བདག་པོ་རྣམས་ཀྱིས་འདི་སྐད་ཅེས་གསོལ་ཏོ། །དབང་ཕྱུག་ཆེན་པོ་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། མ་དང་བུ་མོ་སྲིང་མོ་དང་། རྒྱུ་དང་མི་རྒྱུའི་བུད་མེད་ལ། །འདོད་པ་བས་ནི་ཆགས་སྤྱོད་པ། །བདག་ཅག་རྣམས་ཀྱི་དམ་ཚིག་དེ་ལགས་སོ་ཞེས་གསོལ་ཏོ། །དེ་ནས་ཞེ་སྡང་ཅན་གྱི་བདག་པོ་རྣམས་ཀྱིས་འདི་སྐད་ཅེས་གསོལ་པ། འཇིགས་བྱེད་ཆེན་པོ་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། སེམས་ཅན་སེམས་ཅན་ཐམས་ཅད་ཀྱི། །སྲོག་ནི་ཤིན་ཏུ་ཕྲོགས་ནས་ཀྱང་། །ཤ་དང་ཁྲག་ལ་ལོངས་སྤྱོད་པ། །བདག་ཅག་རྣམས་ཀྱི་དམ་ཚིག་དེ་ལགས་སོ་ཞེས་གསོལ་ཏོ། །དེ་ནས་གནོད་སྦྱིན་གྱི་སྡེ་དཔོན་རྣམས་ཀྱིས་འདི་སྐད་ཅེས་གསོལ་ཏོ། །འཇིགས་བྱེད་ཆེན་པོ་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། ནོར་གྱི་བདག་པོ་ཐམས་ཅད་ལ། །གསེར་ལ་སོགས་པ་བླངས་ནས་ནི། །རང་གི་འདོད་པར་ལོངས་སྤྱོད་པ། །བདག་ཅག་རྣམས་ཀྱི་དམ་ཚིག་དེ་ལགས་སོ་ཞེས་གསོལ་ཏོ། །དེ་ནས་རྟོག་པ་ཅན་རྣམས་ཀྱིས་འདི་སྐད་ཅེས་གསོལ་ཏོ། །ཡིད་བཞིན་རྟོག་པའི་རྒྱལ་པོ་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། གང་གི་མགོ་ཐོད་བཅད་ནས་ནི། །དགེ་མཚན་རྟགས་དེ་སུ་འཆང་བ། །ཡིད་བཞིན་ནོར་བུ་ལྟ་བུར་འགྱུར། །བདག་ཅག་རྣམས་ཀྱི་དམ་ཚིག་དེ་ལགས་སོ་ཞེས་གསོལ་ཏོ། །དེ་ནས་རིགས་ངན་སྨེ་ཤ་ཅན་རྣམས་ཀྱི་ཚོགས་ཀྱིས་འདི་སྐད་ཅེས་གསོལ་ཏོ། །མངའ་ཐང་རྫོགས་པའི་རྒྱལ་པོ་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། བ་ལང་ཁྱི་ཤ་རྟ་ཤ་དང་། །མི་ཤ་གླང་ཆེན་ཤ་ལ་སོགས། །ཟོས་ན་ཡོན་ཏན་ཐམས་ཅད་འགྲུབ། །བདག་ཅག་རྣམས་ཀྱི་དམ་ཚིག་དེ་ལགས་སོ་ཞེས་གསོལ་ཏོ། །དེ་ནས་སྲིན་མོ་ཁྲག་འཕྲོག་མ་རྣམས་ཀྱིས་འདི་སྐད་ཅེས་གསོལ་ཏོ། །ཁྲག་འཐུང་རྒྱལ་པོ་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། སྲོག་ཆགས་དག་ནི་ཐམས་ཅད་ཀུན། །བསད་པའི་ཁྲག་ནི་དྲོན་མོ་དག །འཐུངས་ན་གཟིག་བཞིན་འབར་བར་འགྱུར། །བདག་ཅག་རྣམས་ཀྱི་དམ་ཚིག་དེ་ལགས་སོ་ཞེས་གསོལ་ཏོ། །དེ་ནས་ཕྲ་མེན་མ་རྣམས་ཀྱིས་འདི་སྐད་ཅེས་གསོལ་ཏོ། །ཆོ་འཕྲུལ་ཆེན་པོའི་མངའ་བདག་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། ཐོད་རུས་རྐང་དང་འབྲུ་མར་ཁྲག །ཆང་དང་ཨ་མྲྀ་ཏར་སྦྱར་བ། །རྫུ་འཕྲུལ་གྲུབ་པའི་དམ་རྫས་ཏེ། །བདག་ཅག་རྣམས་ཀྱི་དམ་ཚིག་དེ་ལགས་སོ་ཞེས་གསོལ་ཏོ། །དེ་ནས་རིགས་ངན་ངན་སྐྱུགས་ཅན་རྣམས་ཀྱིས་འདི་སྐད་ཅེས་གསོལ་ཏོ། །གཏུམ་རྔམ་ཆེན་པོ་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། ཤ་ཆེན་བཤང་གཅི་ཁུ་བ་ཁྲག །བདུད་རྩི་འཁྱིལ་པའི་དམ་རྫས་ཏེ། །ནད་རྣམས་མ་ལུས་འཇོམས་པར་བྱེད། །བདག་ཅག་རྣམས་ཀྱི་དམ་ཚིག་དེ་ལགས་སོ་ཞེས་གསོལ་ཏེ། དེ་ནས་བུད་མེད་རྣམས་ཀྱི་ཚོགས་ཀྱིས་འདི་སྐད་ཅེས་གསལ་ཏོ། །སྒེག་པོ་ཆེན་པོ་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། བྲོ་གར་གླུ་ཚིག་སྙན་དངགས་དང་། །འཇོ་ཚུལ་སྟབས་ཀྱིས་ཡིད་ཕྲོགས་ཏེ། །བསྟེན་པ་ཐབས་ཀྱིས་འཁྲིག་སྤྱོད་པ། །འདི་དག་དགའ་བའི་དམ་ཚིག་སྟེ། །བདག་ཅག་རྣམས་ཀྱི་དམ་ཚིག་དེ་ལགས་སོ་ཞེས་གསོལ་ཏོ། །དེ་ནས་ཤོ་པར་བའི་ཚོགས་ཀྱིས་འདི་སྐད་ཅེས་གསོལ་ཏོ། །ངག་གི་དབང་ཕྱུག་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། གཞན་གྱིས་དཔག་པར་དཀའ་བའི་ཕྱིར། །ངག་གི་སྤྲུལ་པ་འཚམ་སྨྲ་བ། །སླུ་བ་ཆེན་པོའི་མཆོག་ཡིན་ཏེ། །བདག་ཅག་རྣམས་ཀྱི་དམ་ཚིག་དེ་ལགས་སོ་ཞེས་གསོལ་ཏོ། །དེ་ནས་ལོག་སྲེད་ཅན་གྱི་ཚོགས་ཀྱིས་འདི་སྐད་ཅེས་གསོལ་ཏོ། །སྐྱེས་བུ་ཡང་དག་ཆེན་པོ་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། ཡང་དག་ངང་དུ་ཀུན་རིག་ན། །ཆེ་ཆུང་ལས་གཉིས་གང་བྱས་ཀྱང་། །གཉིས་ཀྱི་དབང་དུ་མི་འགྱུར་ན། །བདག་ཅག་རྣམས་ཀྱི་དམ་ཚིག་དེ་ལགས་སོ་ཞེས་གསོལ་ཏོ། །དེ་ནས་གསང་ཚིག་བསྟེན་པའི་ཚོགས་ཀྱིས་གསོལ་པ། གསང་བའི་རྣལ་འབྱོར་བདག་ཅག་རྣམས་ཀྱི་དམ་ཚིག་ནི་འདི་ལྟ་སྟེ། བཤང་གཅི་ཁྲག་དང་སོལ་ཁུ་གོས། །བརྒྱ་འམ་སྟོང་དུ་གྱོན་ནས་ནི། །ལིང་ག་གཅད་ན་སངས་རྒྱས་འཇིགས། །གསང་སྔགས་གསང་བའི་དམ་ཚིག་གོ་ཞེས་གསོལ་ཏོ། །དེ་ནས་བཅོམ་ལྡན་འདས་ཀྱིས་གང་མ་འདྲེས་པ་ཡོངས་སུ་མི་འགོགས་པའི་དམ་ཚིག་བཀའ་སྩལ་པ། གང་འདིར་འདུས་པའི་སྐབས་ལྡན་ཀུན། །སོ་སོའི་མོས་པ་ཐ་དད་པའི། །ཡིད་བཞིན་ནོར་བུ་དམ་ཚིག་ནི། །ཡོངས་སུ་རྫོགས་པར་བླང་བར་བྱོས། །གཞན་གྱི་སྡེ་པ་འཇོམས་བྱེད་ཅིང་། །མཚམས་མེད་ལྔ་པོ་སྤྱོད་བཞིན་དུ། །བདག་ཉིད་ཆེན་པོར་དམིགས་པ་དེ། །སངས་རྒྱས་འགྲུབ་པའི་སྣོད་དུ་གསུངས། །མ་དང་བུ་མོ་སྲིད་མོ་དང་། །རྒྱུ་བའི་བུད་མེད་ཐམས་ཅད་ལ། །འདོད་པ་བས་ནི་ཆགས་སྤྱད་ན། །དེ་དག་འགྲུབ་པའི་སྣོད་དུ་གསུངས། །གསོད་ལ་དགའ་བ་གང་དག་གིས། །སྲོག་གི་དབང་པོ་རྒྱུད་བཅད་ནས། །ཤ་རུས་ཟ་ཞིང་ཁྲག་འཐུང་བ། །ཡང་དག་དམ་ཚིག་ཆེན་པོ་ཡིན། །ནོར་གྱི་བདག་པོའི་གཏེར་ཁུངས་ནས། །གསེར་ལ་སོགས་པ་མ་བྱིན་པར། །བླངས་ནས་འདོད་པའི་ལོངས་སྤྱོད་པ། །འདི་ནི་ཡང་དག་དམ་ཚིག་ཡིན། །རྣལ་འབྱོར་རིག་པའི་བློ་ཅན་གྱིས། །གང་གིས་མགོ་ཐོད་བཅད་ནས་ནི། །དུར་ཁྲོད་སྣོད་ལ་ཆོས་ཤེས་པ། །ཡང་དག་ལྟ་བའི་དམ་ཚིག་སྟེ། །འདོད་པའི་དམ་ཚིག་དམ་པའོ། །བ་ལང་ཁྱི་ཤ་རྟ་ཤ་དང་། །ཤ་ཆེན་གླང་པོ་མཆོག་ཡིན་ཏེ། །རྣལ་འབྱོར་ཆེན་པོའི་ཟས་ཡིན་པས། །གཞན་ནི་བཟའ་བར་མི་བྱའོ། །དམར་ཆེན་ཁྲག་གི་རྒྱ་མཚོ་ལ། །གང་ཞིག་འཐུང་བར་བྱེད་པ་དེ། །ཁྲག་འཐུང་ཀུན་གྱི་དམ་ཚིག་སྟེ། །ཟད་པར་འཐུང་ན་གཟི་བྱིན་ཆེ། །བྲོ་གར་གླུ་ཚིག་ལ་སོགས་པས། །བུད་མེད་ཐམས་ཅད་བསྟེན་ནས་ནི། །འདོད་པས་ལོག་པར་སྤྱོད་འགྱུར་བ། །ཆོས་ཉིད་དམ་ཚིག་ཆེན་པོ་ཡིན། །གང་ཉིད་གཏིང་དཔག་དཀའ་བའི་ཕྱིར། །མེད་ལས་ཡོད་སྨྲ་ཡོད་ལས་མེད། །ཡུལ་ལམ་ཐུན་འཇུག་བརྫུན་སྨྲ་བ། །སངས་རྒྱས་བཀའ་ཡི་དམ་ཚིག་ཡིན། །གང་དག་ཐོག་མ་མེད་པ་ནས། །གང་འཁྱམས་རང་གིས་ཉེས་པའོ་ཞེས། །སྤྱོ་བརྒྱད་དག་ནི་བརྫུན་སྨྲ་བ། །སངས་རྒྱས་གསུང་གི་དམ་ཚིག་ཡིན། །བྱེ་བྲག་ཐམས་ཅད་གཅིག་པས་ན། །ལས་ཀྱི་དབང་དུ་མི་འགྱུར་བ། །མ་ནོར་མ་བཅོས་དམ་ཚིག་སྟེ། །རྣམ་སྨིན་མེད་པའི་དམ་ཚིག་ཡིན། །མི་གཡོ་མི་འགྱུར་མི་བསྐྱོད་པ། །དམིགས་པས་ཡོད་མེད་མ་དམིགས་ཀྱང་། །སྟོར་བ་མེད་པ་གང་ཡིན་པ། །མི་གཡོའི་དམ་ཚིག་ཆེན་པོའོ། །དེ་ཉིད་ཆེན་པོར་ཀུན་གཅིག་པས། །བླང་དང་དོར་བ་ཡོད་མེད་དེ། །གཉིས་སུ་སྣང་བའི་ཆོས་རྣམས་ཀུན། །དེ་ཉིད་ཆེན་པོར་ཡོངས་ཀྱིས་གཅིག །དཀར་པོ་ནག་པོ་གང་འདི་ལ། །རྒྱུ་དང་འབྲས་བུ་སོ་སོ་ཡང་། །ནམ་མཁའ་བཞིན་ཏེ་མེད་པས་ན། །མཉམ་པའི་དམ་ཚིག་ཆེན་པོ་ཡིན། །མཉམ་ཉིད་རིག་པའི་རྒྱལ་པོ་ལས། །བྱེ་བྲག་རྣམ་པ་ཡོངས་ཀྱིས་མེད། །རང་གིས་རྙེད་ལ་གཞན་གྱིས་མིན། །རང་འབྱུང་ཆེན་པོའི་དམ་ཚིག་ཡིན། །བཤང་གཅི་ཟག་པའི་གོས་གྱོན་ཏེ། །ལིང་ག་སྐྱེ་བ་རྒྱུན་བཅད་ན། །སྐྱེ་བ་རྣམ་གྲངས་བརྒྱ་སྙེད་དུ། །བཟླས་ན་དེ་ཉིད་དེར་སྦྱར་ན། །སངས་རྒྱས་གཟུགས་སྐུ་ཇི་སྙེད་པ། །ཆོས་སྐུ་ཉིད་དུ་འཇིག་འགྱུར་ན། །རྡོ་རྗེ་སྔགས་ཀྱི་དམ་ཚིག་ཡིན། །འདོད་པས་སྤྱོད་པའི་ལོངས་སྤྱོད་ལྔ། །འདོད་པ་བས་ནི་ཆགས་སྤྱོད་ན། །ཆོས་ཉིད་རྒྱན་གྱི་དམ་ཚིག་སྟེ། །བདེ་བ་ཆེན་པོ་ཉིད་ཀྱི་དམ་ཞེས་བཀའ་སྩལ་པས། འདུས་པ་ཆེན་པོའི་ཚོགས་རྣམས་རབ་ཏུ་མགུ་ཞིང་རངས་ནས་ཀུན་གྱིས་མགྲིན་གཅིག་ཏུ་གསོལ་པ། ཨེ་མའོ་ཡིད་བཞིན་མཛད་པའི་རྒྱལ་པོ་བདག་ཅག་རྣམས་ཀྱི་བསམ་པ་རངས་སོ། །བདག་ཅག་རྣམས་ཀྱི་གཙོ་བོ་ལགས་སོ། །བདག་ཅག་རྣམས་ཀྱི་རྒྱལ་པོ་ལགས་སོ། །བདག་ཅག་མ་བཅོས་པའི་དམ་ཚིག་ཏུ་གཟུང་དུ་གསོལ་ཞེས་གསོལ་པ་ལས། ལང་ཀའི་བདག་པོ་བཅོམ་ལྡན་འདས་དེས་བཀའ་སྩལ་བ། ཨ་ཧོ། ཡིན་ནོ། །ལེགས་སོ། །གཏད་དོ། །དམ་ཚིག་དམ་པ་དེ་ཉེ་བར་ཟུང་ཤིག །ཏིཥྛ་བཛྲ་ས་མ་ཡ་སྟྭྃ་ཞེས་གང་དེ་ཉིད་ལས་མི་འདའ་བར་གཟུང་ངོ་། །ལང་ཀའི་བདག་པོ་དེ་ནས་ཡང་འདུས་པའི་ཚོགས་ཀྱིས་བཅོམ་ལྡན་འདས་དེ་ལ་གསོལ་པ། བཅོམ་ལྡན་འདས་བཅོམ་ལྡན་འདས་ནི་བདག་ཅག་རྣམས་ཀྱི་སྒྲོན་མ་ལགས་ན། བདག་ཅག་རྣམས་རང་རང་གི་དམ་ཚིག་འདི་ལ་གནས་ན་རིགས་ནི་གང་འཛིན་པར་འགྱུར། གོ་འཕང་ནི་གང་དུ་ཐོབ་པར་འགྱུར་བ་ལགས། བདག་ཅག་རྣམས་ལ་བསྟན་དུ་གསོལ་ཞེས་གསོལ་པ་ལས། ལང་ཀའི་བདག་པོ་བཅོམ་ལྡན་འདས་དེས་བཀའ་སྩལ་པ། འདུས་པའི་ཚོགས་རང་རང་གི་དམ་ཚིག་ལ་གནས་ན་ཇི་ལྟར་འགྱུར་བ་དག་བཤད་ཀྱིས་ཉོན་ཅིག །ཨེ་མའོ་ཐོད་པ་ཅན་གྱི་ཚོགས། །ཁྱོད་ཀྱིས་སྨྲས་པ་ཚིག་འདི་རྣམས། །མདུད་པས་བཅིངས་པའི་ཚིག་ཡིན་ཏེ། །ནམ་ཡང་གྲོལ་བར་མི་འགྱུར་རོ། །ཡང་དག་ཡང་དག་ཅེས་སྨྲ་བ། །ཡང་དག་ཉིད་ཀྱང་མདུད་པ་སྟེ། །མདུད་པ་དགྲོལ་བར་མ་བྱས་ན། །ཐར་རམ་ཕྱེད་པར་མི་འགྱུར་རོ། །མཚམས་མེད་ལ་སོགས་བྱེད་པ་དང་། །གཞན་གྱི་སྡེ་པ་འཇོམས་པ་ཡིས། །རྣམ་པར་གྲོལ་བར་མི་འགྱུར་ཏེ། །འདི་ནི་བདུད་ཀྱི་ལས་ཞེས་བཤད། །ཆགས་པའི་ལས་སམ་སྦྱོར་བ་དག །ཆགས་པའི་དབང་གིས་དེར་རྨོངསཏེ། །དེ་དག་དེ་ཡི་གྲོང་ཁྱེར་དུ། །གནས་འགྱུར་དེ་ཡི་སེམས་ཅན་ཡིན། །གང་དུ་སྡང་བས་གསོད་པའི་ལས། །གང་གི་ལས་ལ་སྲོག་ཕྲལ་ནས། །ཤན་པ་གསོད་པའི་རིགས་དག་ཏུ། །ལྟུང་འགྱུར་སྡུག་བསྔལ་རྩ་བ་ཡིན། །རྒྱལ་བ་རྣམས་ནི་རྣམ་དག་པས། །གང་ཚེ་བདེར་གཤེགས་རྒྱལ་བའི་ཞལ། །སྨད་པའི་རྫས་ནི་སྣ་ཚོགས་ཀྱིས། །ཡོངས་སུ་བསྟབས་པ་གང་བྱས་པ། །དེ་ཚེ་ལས་ནི་རྣམ་སྨིན་གྱིས། །ཐར་མེད་ནད་ཀྱིས་བཟུང་ནས་ནི། །ངན་སྐྱུགས་འདམ་དུ་བྱིང་བར་འགྱུར། །ཤ་དང་ཁྲག་ལ་སོགས་པའི་ཟས། །རྐུ་བའི་རྔད་ཟས་ཆེན་པོ་སྟེ། །གང་གིས་ཟོས་པའི་ལུས་རྣམས་ལ། །དྲི་ཡིས་འཚོ་བ་ཀུན་འདུས་ནས། །མདངས་དང་བཅུད་རྣམས་འཕྲོག་པར་བྱེད། །དེས་ནི་གཟི་མདངས་ཡལ་བྱེད་འགྱུར། །དེ་ཉིད་རིན་ཆེན་ཡོད་བཞིན་དུ། །གཞན་གྱི་རིན་ཆེན་སྤྱོད་ལེན་པ། །ལོག་པས་ལོག་པར་འཚོ་བའི་ཆོས། །འདི་དག་མདུད་པ་དམ་པོ་ཡིན། །དཀར་ནག་ལས་ལ་ཁྱད་མེད་ཅེས། །ཐམས་ཅད་ཁྲ་བོར་སྤྱོད་པ་ནི། །རིགས་མེད་རིགས་ཆད་ལོག་པའི་རིགས། །འབྲས་བུ་ལོག་པའི་ཁམས་སུ་འགྱུར། །བདེར་གཤེགས་མཉེས་བྱའི་ལས་རྣམས་ལ། །ཡན་ལག་ཆིག་ཏུ་མ་དག་ན། །ཉེས་བྱས་ལས་ཀྱི་རྒྱུ་དེས་ནི། །གང་གི་དུས་རྣམས་ཐམས་ཅད་དུ། །དབང་པོ་ཡན་ལག་མ་ཚང་ཞིང་། །དྲན་པའི་སྙིང་པོ་ཉམས་པར་འགྱུར། །བདེར་གཤེགས་རྒྱལ་བ་སྒོམ་ཟློས་པ། །ཆ་མཐུན་བཅོས་པའི་ཆོ་འཕྲུལ་ལྟར། །གང་གིས་དེར་བརྟགས་དེར་རེད་ནས། །ལས་ཀྱི་སྲིན་པོ་རིག་འཛིན་ཡིན། །རྒྱན་དང་ཆ་ལུགས་ཐམས་ཅད་ཀུན། །གང་གིས་དེ་དང་དེར་བརྟགས་ན། །བྲམ་ཟེ་མི་སྡུག་ལུགས་རིག་འཛིན། །ཆུ་སྲིན་ཉ་སོགས་ཡན་ལག་འབྱུང་། །ཏིང་འཛིན་རྟོག་པ་ཐམས་ཅད་ཀུན། །གང་གིས་དེ་དང་དེར་བརྟགས་ན། །ཅི་ཡང་རྟོག་ཅིང་ཆགས་པ་ཡི། །འཛིན་པའི་ཕུར་པ་ཆེན་པོར་འགྱུར། །ཨཱཿདང་ཧཱུྃ་ལ་སོགས་པ་ཡི། །རྒྱུ་ཡི་ཡི་གེ་ཐམས་ཅད་ཀུན། །དེ་དག་སོ་སོར་དེར་བརྟགས་ན། །ཙན་དན་སྦྲུལ་གདུག་ལ་སོགས་པ། །ལྟུང་འགྱུར་རྟོག་པའི་གགས་ཆེན་ཡིན། །ཁྲག་ལ་སོགས་པའི་རྫས་ཆེན་ལྔ། །དངོས་པོ་ཁོ་ནར་དེར་བརྟགས་ན། །འབྱུང་པོ་ཁྲག་གི་དྲི་སྣོམ་པའི། །ལུས་ལེན་རིགས་ནི་འཛིན་པ་ཡིན། །མ་མོ་རྔམ་པའི་ཆ་ལུགས་སུ། །གང་གི་རྟོག་པ་དེར་བཟུང་ན། །སྲིན་མོ་མི་སྡུག་ཤ་ཟ་མོར། །ལང་ཀའི་ཡུལ་དུ་དེ་དག་འཁོར། །མཚན་མའི་མགོ་བརྙན་བླ་དགས་ཅན། །དེ་འདྲར་གང་གིས་ངེས་བརྟགས་ན། །ཤོ་གམ་གནས་ཀྱི་གཅན་ཆེན་རིགས། །འཛིན་ཅིང་གནས་དེར་རྟོགས་པར་འགྱུར། །ལས་ཀྱི་དབང་བཙན་བྲན་མོའི་ཚོགས། །དེ་འདྲ་ཉིད་དུ་ངེས་བརྟགས་ན། །གནོད་སྦྱིན་ནག་མོའི་ཚོགས་སུ་འགྱུར། །གཞན་གྱི་ཚེ་ལ་འཚེ་བ་ཡིན། །དེས་ན་མདུད་པ་དམ་པོ་འདི། །བསྐུར་དུ་ལྕི་བའི་གདོས་ཡིན་ཏེ། །ལོག་པར་ལྟ་བས་མིག་ལོང་བས། །སེམས་ཀྱི་ནོར་བུ་རིན་ཆེན་དེ། །རྟག་ཆད་ཁམས་སུ་སྟོར་བར་འགྱུར། །ཞེས་བཀའ་སྩལ་པ་ལས། འདུས་པའི་ཚོགས་དེ་དག་རྟོག་པའི་ནད་ཀྱིས་ཟིན་ཅིང་རང་རང་གི་དམ་ཚིག་ལས་ལོག་པར་རིག་ནས། ཨེ་མའོ་སྒྱུ་མའི་བདག་པོས་ནི་བདག་ཅག་བསླུས་སོ། །ཞེས་རྨ་ག་ཆད་ནས་ངུས་སོ། །དེའི་ཚེ་དེའི་དུས་ན་བཅོམ་ལྡན་འདས་ཀྱིས་བཀའ་སྩལ་པ། ཀྱེ་རིགས་ཀྱི་བུ་དག་རང་རང་གི་རྒྱུད་ལ་རྣམ་པར་ལྟོས་ཤིག་ཅེས་བཀའ་སྩལ་པ་ལས། འདུས་པའི་ཚོགས་དེ་དག་གིས་ལས་ཀྱི་རྒྱུད་བྱ་བ་ཇི་ལྟ་བུ་ཡིན་པ་བལྟས་ན་ཐམས་ཅད་མེ་ལོང་ནང་གི་གཟུགས་བརྙན་བཞིན་སྣང་བར་གྱུར་ཏེ། ལང་ཀའི་བདག་པོ་དེ་དག་གིས་བཅོམ་ལྡན་འདས་དེ་ལ་གསོལ་པ། ཨེ་མའོ་བཅོམ་ལྡན་འདས་བདག་ཅག་རྣམས་ཀྱི་དམ་ཚིག་ནི་ལོག་པའི་དཀའ་ཐུབ་ཏུ་གྱུར་པར་ངེས་ན་འདི་དག་ཉིད་ཡང་དག་པའི་དཀའ་ཐུབ་ཏུ་མཛད་པར་གསོལ། ཇི་ལྟར་རང་རང་གི་དམ་ཚིག་རྣམས་མ་བཀག་པར་སྤྱོད་བཞིན་དུ་ཆོས་ཉིད་ཀྱི་དཀའ་ཐུབ་ཏུ་མཛད་དུ་གསོལ། དེ་ཅིའི་སླད་དུ་ཞེ་ན། བདག་ཅག་ནི་རང་རང་གི་དཀའ་ཐུབ་ལ་ཆགས་ཤིང་ཞེན་པ་ལགས་སོ། །ཆོས་ཐམས་ཅད་ནི་སྒྱུ་མ་ལྟ་བུ་དེ་ཅིར་ཡང་འགྱུར་བ་ལགས་སོ། །ཐེག་པ་ཆེན་པོའི་སྒོ་ནི་བསྐལ་པའི་མེ་དཔུང་ལྟ་བུ་ལགས་སོ། །དེ་བཞིན་དུ་ནམ་མཁའ་ལྟ་བུ་དང་། ས་ཆེན་པོ་ལྟ་བུ་དང་། རླུང་ཆེན་པོ་ལྟ་བུ་ལགས་སོ། །སངས་རྒྱས་བཅོམ་ལྡན་འདས་ནི་ཐབས་རྒྱ་མཚོའི་མངའ་བདག་ལགས་པས་སོ་སོ་མོས་པ་ཇི་ལྟ་བ་བཞིན་བཤད་དུ་གསོལ་ཞེས་ཞུས་པ་ལས། ལང་ཀའི་བདག་པོ་བཅོམ་ལྡན་འདས་དེས་དགྱེས་པ་ཆེན་པོའི་བཞད་པ་མཛད་ནས་ཀྱེ་རིགས་ཀྱི་བུ་དག་ཐེག་པ་ཆེན་པོའི་དོན་དེ་ལྟར་ཞུ་བ་ནི་ལེགས་ན། འདི་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་ཐེ་ཚོམ་སྐྱེ་བ་ཡིན་ན་ཁྱེད་རྣམས་ལྟ་ཅི་སྨོས། དེ་སྐད་ཅེས་བཀའ་སྩལ་པ་ལས། འདུས་པའི་ཚོགས་ཀྱིས་གསོལ་པ། བཅོམ་ལྡན་འདས་ཐེ་ཚོམ་སྐྱེ་བར་བགྱིད་པ་ནི་ངེས་པ་མ་མཆིས་པ་ལགས་ན། གང་སངས་རྒྱས་བཅོམ་ལྡན་འདས་རྣམས་ནི་ངེས་པ་ཅན་ལགས་ན་ངེས་པ་མ་མཆིས་པའི་ཆོས་འཁོར་གྱི་ནང་འདིར་གསུང་ངམ་ཞེས་གསོལ་བ་ལས། བཅོམ་ལྡན་འདས་ཀྱིས་བཀའ་སྩལ་པ། ཀྱེ་འདུས་པའི་ཚོགས་ཆོས་ཐམས་ཅད་ངེས་པ་མེད་པར་ང་སྨྲའོ། །དེ་ཅིའི་ཕྱིར་ཞེ་ན། ཐེར་ཟུག་ཏུ་རེད་པའི་ཆོས་གང་ཡང་མེད་པའི་ཕྱིར་རོ། །དེ་བས་ན་ཁྱེད་རྣམས་ཀྱི་རང་རང་གི་དམ་ཚིག་ལ་ཡང་ངེས་པ་མེད་དེ། སྐྱེ་བ་འདི་ལས་གཞན་དཔག་ཏུ་མེད་པ་བླངས་པ་དང་ལེན་པའི་སྐབས་སུ་སོ་སོའི་སྐྱེ་བ་ཐ་དད་པ་དེ་བཞིན་དུ་མོས་པ་དང་། ལས་དང་། སྐལ་པ་དང་། གནས་དང་། སྡེ་དང་། ཤ་ཚུགས་དང་། རིགས་དང་། ཁ་དོག་དང་། འཚོ་བ་དང་། ལྟ་བ་དང་། སྤྱོད་པ་ཐ་དད་ན། ད་ཁྱོད་ཀྱིས་ངེས་པར་གང་ལ་གཟུང་། །དེའི་ཕྱིར་ཆོས་ཐམས་ཅད་ངེས་པ་མེད་པར་སྨྲའོ། །དེ་ནས་འདུས་པའི་ཚོགས་ཀྱིས་གསོལ་པ། འོ་ན་བཅོམ་ལྡན་འདས་བདག་ཅག་གི་དམ་ཚིག་རྣམས་ངེས་པས་བཟུང་ན་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། །འདུས་པའི་ཚོགས་འདི་ལྟ་སྟེ། །མཚམས་མེད་ལྔ་ཡི་དམ་ཚིག་ནི། །དམ་ཚིག་ཏིང་འཛིན་ཤེས་རབ་དང་། །བྱང་ཆུབ་སེམས་དང་སྙིང་རྗེ་ལྡན། །བར་མཚམས་མེད་པར་རྒྱུན་མི་གཅད། །འདི་ནི་མཚམས་མེད་དམ་ཚིག་ཡིན། །ཆགས་པ་ཆེན་པོའི་དམ་ཚིག་ནི། །འཁོར་བ་དང་ནི་ཆོས་ཉིད་ལས། །ཤེས་རབ་སྙིང་རྗེ་མི་གཏོང་བ། །འདི་ནི་ཆགས་པའི་དམ་ཚིག་ཡིན། །མ་དང་བུ་མོ་སྲིང་མོ་ནི། །ཆོས་ཉིད་དང་ནི་ཡེ་ཤེས་ལྔ། །རང་ལས་བྱུང་བའི་ཤེས་རབ་ནི། །དེ་བཞིན་ཉིད་ཀྱི་གཟུངས་སུ་བཤད། །གང་ལ་སྐྱེ་བ་མེད་བསྟན་ན། །སྲོག་གི་དབང་པོ་མི་ལེན་པའི། །སྐྱེ་བའི་རྒྱུན་ནི་ཆད་པ་དང་། །ཐམས་ཅད་སྟོང་པར་བཅོམ་པ་ནི། །སྲོག་བཅད་པ་ཞེས་དེ་ལ་བྱ། །དངོས་པོ་མེད་ལས་དངོས་པོར་སྟོན། །དངོས་པོར་སྣང་ལ་མེད་སྨྲ་བ། །རྒྱལ་བ་ཀུན་གྱི་བཀའ་ཡིན་ཏེ། །སླུ་བའི་དམ་ཚིག་ཆེན་པོ་ཡིན། །གཞན་གྱི་ཡིད་བཞིན་ནོར་བུ་ལ། །རྗེས་སུ་མོས་པའི་འོད་ཟེར་གྱིས། །བླངས་ནས་བྱང་ཆུབ་འཇོག་པ་དང་། །དེ་ཉིད་ལྕགས་ཀྱུས་ལེན་པ་ནི། །མ་བྱིན་ལེན་པའི་དམ་ཚིག་ཡིན། །དེ་ཉིད་ཆེན་པོ་དེ་འདོད་པས། །མཚན་མར་ཞེན་ལས་ལོག་སྤྱོད་པ། །འདོད་པས་ལོག་པར་སྤྱོད་པ་སྟེ། །སྦྱོར་བའི་དམ་ཚིག་ཆེན་པོ་ཡིན། །དམ་ཚིག་ཏིང་འཛིན་ཤེས་རབ་དང་། །སེམས་ཉིད་སྙིང་རྗེ་ཆེན་པོ་ལྔ། །ཤ་ཆེན་བཤང་གཅི་ཁུ་བ་ཁྲག །རྣམ་པ་ལྔ་པོ་སྦྱར་བ་འདི། །ཆོས་རྣམས་ཀུན་གྱི་ཡོ་བྱད་ཡིན། །ཡོ་བྱད་འདི་དང་མ་ལྡན་ན། །དོན་རྣམས་འགྲུབ་པར་མི་འགྱུར་རོ། །ལོག་པར་འཚོ་བའི་ཡོ་བྱད་ཀྱང་། །ལྟ་དང་ཉོན་མོངས་ལས་ཉོན་མོངས། །འདོད་པ་བདུན་ལྔ་ཉིད་སྦྱར་ཏེ། །དེ་ལའང་དེ་སྐད་བསྒྲགས་པ་སྟེ། །འཁོར་བ་ཉིད་དུ་འགྱུར་བ་ཡིན། །ལོག་པར་སྤྱོད་པའི་ལྟ་བ་ལྔ། །སྨེ་ཤ་ལྔ་ཞེས་གྲགས་པ་སྟེ། །དེས་ན་ལྟ་བ་མི་གཙང་བས། །ཡང་དག་ལྟ་ལས་ལྟོས་ན་སྨེ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པས། །འདུས་པའི་ཚོགས་དེ་དག་གིས་སྐྱེ་བ་མེད་པའི་དོན་མཐོང་བས་ཤིན་ཏུ་ཡང་ངོ་མཚར་བར་གྱུར་ཏེ་གསོལ་པ། བཅོམ་ལྡན་འདས་འོ་ན་བདག་ཅག་གི་དམ་ཚིག་འདི་རྣམས་ཐེག་པ་ཆེན་པོར་མ་གསོལ་ཏམ། བཀའ་སྩལ་པ། འདུས་པའི་ཚོགས་སོ་སོའི་དམ་ཚིག་རྣམས་ཐེག་པ་ཆེན་པོ་ཡོངས་སུ་རྫོགས་པར་ནི་མ་བཀག་གོ། །གསོལ་པ། བཅོམ་ལྡན་འདས་ཅིའི་སླད་དུ་མ་བཀག་པ་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་ནམ་མཁའི་རང་བཞིན་དུ། །སྣང་སྲིད་མ་བཀག་སྣང་བ་བཞིན། །ཐེག་པ་ཆེན་པོའི་ནམ་མཁའ་འདིར། །ལྟ་སྤྱོད་ཐམས་ཅད་མ་བཀག་སྟེ། །དེའི་ཕྱིར་ཐམས་ཅད་ནམ་མཁའ་སྣང་ཞེས་གསུངས་པས། འདུས་པའི་ཚོགས་ཐམས་ཅད་ངོམས་ཤིང་ངོ་མཚར་དུ་གྱུར་ཏེ་ངུས་སོ། །དེ་ནས་བཅོམ་ལྡན་འདས་ཀྱིས་མཁྱེན་བཞིན་དུ་བཀའ་སྩལ་པ། འདུས་པའི་ཚོགས་ཁྱེད་རྣམས་ཀྱིས་ཅི་ཞིག་ཐོས་ནས་ངུ་། གསོལ་པ། བཅོམ་ལྡན་འདས་ཡུན་གྱི་དོན་སྲིད་ཆེན་པོ་འདི་ལྟ་བུ་བདག་ཅག་ལ་སྔར་མ་བསྟན་པ་ཐུགས་རྗེ་རེ་ཆུང་ཞེས་གསོལ་པ་ལས། བཅོམ་ལྡན་འདས་ཀྱིས་བཀའ་སྩལ་པ། འདུས་པའི་ཚོགས་རང་རང་གི་ནམ་མཁའ་དེ། རང་རང་གི་མུན་པ་གློ་བུར་བས་བསྒྲིབས་པར་ཟད་ཀྱི། རང་རང་གི་ནམ་མཁའ་ཉིད་དུ་སྣང་བ་ལ་གང་གིས་གང་ལ་བསྟན་ཅི་དགོས་ཞེས་སྨྲས་པས། གང་གིས་མི་རིག་པ་གང་ཡིན་པ་དེ་ཉིད་རིག་པར་འགྱུར་ཏེ། བག་བཞི་བསྐུམས། ཡན་ལག་ས་ལ་བརྡབས་ནས་ལུས་གདན་ཁྲིར་ཕུལ་ཏེ། ཉོན་མོངས་པའི་སྒྲིབ་པ་སྦྱོང་ཞིང་རྣ་བས་ཆོས་ཉན་པས་ཤེས་བྱའི་སྒྲིབ་པ་སྦྱོང་སྟེ། རིག་འཛིན་ལུས་ཀྱི་སེང་གེ་དང་། རྟ་དང་གླང་པོ་ལ་སོགས་པའི་ཞབས་ཀྱི་གདན་ཁྲིའི་བྱ་བ་ཡོངས་སུ་རྫོགས་པར་བྱེད་དོ། །སངས་རྒྱས་ཀུན་གྱི་དགོངས་པ་འདུས་པའི་མདོ་ཆེན་པོ་ལས་རྨོངས་པའི་སེལ་བ་སྤྱོད་མཐུན་དགྲོལ་བའི་ལེའུ་སྟེ་སུམ་ཅུ་དྲུག་པའོ།། །།