མདོའི་ཡན་ལག་གི་དཀྱིལ་འཁོར་རྣམས་ཀྱི་སྒྲུབ་དཀྱིལ་དངོས་གྲུབ་འདོད་འཇོ། དྷརྨ་ཤྲཱི།

སི དྡྷ ཀཱ མ དྷ ནུ ནཱ མ སཱུ ཏྲ སྱཱ ངྒ སྱ མ ཎྜ ལཱ ནཱཾ སཱ དྷ ན མ ཎྜ ལ བི ཧ ར ཏི སྨ། །
མདོའི་ཡན་ལག་གི་དཀྱིལ་འཁོར་རྣམས་ཀྱི་སྒྲུབ་དཀྱིལ་དངོས་གྲུབ་འདོད་འཇོ་ཞེས་བྱ་བ་བཞུགས་སོ། །
ༀ་སྭ་སྟི་སིདྡྷཾ། འདུས་པ་ཆེན་པོ་མདོའི་ཡན་ལག་གི་དཀྱིལ་འཁོར་རྣམས་ཀྱི་སྒྲུབ་དཀྱིལ་དངོས་གྲུབ་འདོད་འཇོ་ཞེས་བྱ་བ། བླ་མ་དང་དཀྱིལ་འཁོར་གྱི་ལྷ་ཚོགས་ཐམས་ཅད་ལ་ཕྱག་འཚལ་ལོ། །རང་དོན་མཆོག་ཏུ་མི་འགྱུར་བདེ་ཆེན་བརྙེས། །གཞན་དོན་ཐོགས་མེད་འགྲོ་སྒྲོལ་ཕྲིན་ལས་ཅན། །ཟུང་འཇུག་དཔལ་ལྡན་རྡོ་རྗེ་སེམས་དཔའ་དང་། །དབྱེར་མེད་གཏེར་ཆེན་ཇ་མར་གུས་ཕྱག་འཚལ། །མགོན་དེས་གསུང་གི་འོད་ཀྱིས་བདག་བློ་ཡི། །པདྨ་རྣམ་པར་བཞད་ལས་བྱུང་བའི་དངོས། །གྲུབ་གཉིས་སྦྲང་རྩིའི་དགའ་སྟོན་འདོད་འཇོའི་སྐྱེས། །སྟེར་རོ་སྐལ་བཟང་རྐང་དྲུག་ཚོགས་རྣམས་རོལ། །འདིར་མདོ་ཡོངས་རྫོགས་ཀྱི་དབང་དུ་བྱས་ཏེ། །རྩ་བ་དང་ཡན་ལག་གི་དཀྱིལ་འཁོར་གཉིས་གསུངས་པའི་ནང་ནས་ཡན་ལག་གི་དཀྱིལ་འཁོར་རྣམས་སྟོན་པ་ལས། ཐོག་མར་རྩ་བ་དང་ཡན་ལག་གི་དཀྱིལ་འཁོར་ཀུན་གྱིའང་ཡན་ལག་ཏུ་འགྲོ་བས་སྤྱི་ལ་གཅེས་པ་ཆ་གསུམ་གྱི་དཀྱིལ་འཁོར་ནི། གང་དུ་བྱ་བའི་གཞི་དེར་དྲི་དང་བ་བྱུང་གིས་བྱུགས་ལ། ཐིག་ཚོན་རྣམས་བསང་སྦྱངས། སྟོང་པའི་ངང་ལས་འབྲུ་ལྔ་ཡོངས་སུ་གྱུར་པ་ལས་རིགས་ལྔར་བསྐྱེད་ཅིང་། སྤྱན་དྲངས་ལབ་སྟིམ། དེ་ཞུ་བ་ལས་ཐིག་ཚོན་དུ་གྱུར་པར་བསམ་ལ། དཔའ་བོ་འབྲུ་ལྔ་དང་། ཚོན་ལ་ལྷག་པོར། ༀ་བཛྲ་ཙི་ཏྲ་ས་མ་ཡ་ཧཱུཾ། ཞེས་བཟླ་ཞིང་མཉེ། དེ་ནས། ༀ་བཛྲ་ས་མ་ཡ་སཱུ་ཏྲ་མ་ཏི་ཀྲ་མ་ཧཱུཾ། ཞེས་པས་གནམ་སའི་ཐིག་སྤྱི་ལྟར་བཏབ་ལ། དཀྱིལ་འཁོར་གྲུ་བཞི་སྒོ་བཞི་རྟ་བབས་བང་རིམ་བཞི་པ། དབུས་ལིང་ཚེ་དགུའི་ལྟེ་བ་མཐིང་ག །ཤར་དཀར་བ་སོགས་ཕྱོགས་མདོག་དང་། མཚམས་མཛེས་ཚོན། ལྷ་སྣམ་ལྗང་གུ། ཁོར་ཡུག་སྣ་ཚོགས་པདྨ། མགྲོན་དམན་པའི་ཁོར་ཡུག་ནག་པོ། རྡོ་ར། འོད་ཕྲེང་སྟེ་ཚོན་ལྷག་མ་སྤྱི་དང་མཐུན་ཞིང་། ལྷ་གནས་སོ་སོར་ཇི་ལྟར་རིགས་པའི་མཚན་མ་འགོད། དེའི་མདུན་དུ་སྟེགས་བུ་གཙང་མའི་སྟེང་སྣོད་དག་པར་དཀྱིལ་འཁོར་པའི་འདས་གཏོར་དཀར་ཟླུམ་མཐེབ་ཀྱུས་བསྐོར་བ། ཆ་དང་པོ་ཡོན་ཏན་གྱི་མགྲོན་དང་། ཆ་གཉིས་པ་འབྱུང་པོ་རྣམས་ལ་གཏོར་ཟླུམ་མཐེབ་ཀྱུས་བསྐོར་བ་འབྲུ་སྨན་དྲི་དང་མེ་ཏོག་རིན་ཆེན་དར་སྣ་ཚོགས་པས་བརྒྱན་པ། ཆ་གཉིས་པའི་མདུན་དུ་རིགས་དྲུག་དང་ཡི་དྭགས་ལ་བསིལ་གཏོར། ཆ་གསུམ་པ་བགེགས་ལ་དམར་གཏོར་ཟླུམ་པོ་ཆངས་བུ་དང་ཏིང་ལོ་ཅན་ཤ་ཆང་ལ་ཕུག་འབྲུ་དང་འབྲས་ཆན་རྣམས་ཀྱིས་བརྒྱན་པ་བཤམ། དཀྱིལ་འཁོར་གྱི་མཐའ་བསྐོར་དང་གཏོར་མའི་མདུན་དུའང་ཆུ་གཉིས་སྔོན་འགྲོའི་ཉེར་སྤྱོད་ལྔ་དང་། རང་གི་མདུན་དུ་དྲི་ཆབ་འཐོར་ཡབ་དང་བཅས་པ་དང་། རྡོར་དྲིལ་སོགས་ཡོ་བྱད་ཐམས་ཅད་ཚོགས་པར་བཤམ་མོ། །དེ་ནས་ཆོ་ག་ནི། ཁྲུས་བྱས་ནས་སྟན་ལ་འདུག་སྟེ། བླ་མ་དང་དཔལ་རྡོ་རྗེ་སེམས་དཔའ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མདུན་གྱི་ནམ་མཁར་བཛྲ་ས་མཱ་ཛཿས་སད་པའི་སྤྱན་སྔར་ཐལ་མོ་སྦྱར་ཏེ། ན་མོ་གུ་རུ་བུདྡྷ་བོ་དྷི་ས་ཏྭ་བྷྱཿ ཞེས་པས་ཕྱག་དང་། ༀ་བཛྲ་ཨརྒྷཾ་པྲ་ཏཱི་ཙྪ་སྭཱ་ཧཱ། ནས། ཤཔྡའི་བར་གྱིས་མཆོད་ལ། བདག་དང་མཁའ་མཉམ་སེམས་ཅན་རྣམས། །རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་ཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་བྱང་ཆུབ་སེམས་དཔའ་ལ། །དག་པ་གསུམ་གྱིས་ལུས་འབུལ་ལོ། །ཚེ་རབས་བགྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །སེམས་ཅན་ཐམས་ཅད་བདེ་གྱུར་ཅིག །སྡུག་བསྔལ་ཀུན་དང་བྲལ་བར་ཤོག །བདེ་དང་རྟག་ཏུ་མི་འབྲལ་ཞིང་། །ཆོས་ཀུན་མཉམ་ཉིད་རྟོགས་པར་ཤོག །ཅེས་ལན་གསུམ་གྱིས་རྒྱུད་དག་པར་བྱས་ནས། ༀ་བཛྲ་མུཿས །ཚོགས་ཞིང་རྣམས་རང་གནས་སུ་གཤེགས་པར་བསམ་མོ། །དེ་ནས་བདག་བསྐྱེད་ནི། ༀ་སྭ་བྷཱ་ཝས་སྦྱངས། སྟོང་པའི་ངང་ལས་སྐད་ཅིག་གིས་པདྨ་དང་ཟླ་བའི་གདན་ལ་ཧཱུྃ་ཡིག་ཡོངས་སུ་གྱུར་པ་ལས། རང་ཉིད་བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ། ཞི་ཞིང་འཛུམ་ལ་མཚན་དཔེའི་ལང་ཚོ་རབ་ཏུ་རྒྱས་པ། ཕྱག་གཡས་གསེར་གྱི་རྡོ་རྗེ་རྩེ་ལྔ་པ་ཐུགས་ཀར་གཏོད་དེ་འཛིན་པ། གཡོན་དངུལ་དཀར་གྱི་དྲིལ་བུ་དཀུར་བརྟེན་པ། རལ་པའི་ཐོར་ཚུགས་ཅན། དར་དང་རིན་པོ་ཆེའི་རྒྱན་སྣ་ཚོགས་ཀྱིས་མཛེས་པར་བརྒྱན་ཅིང་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། སྐུ་ལས་དྲི་མ་མེད་པའི་འོད་ཟེར་དཔག་ཏུ་མེད་པར་འཕྲོ་བ། དེའི་དཔྲལ་བར་ༀ་དཀར་པོ། །མགྲིན་པ་ཨཱཿ དམར་པོ། ཐུགས་ཀར་ཧཱུཾ་སྔོན་པོ། ཧཱུྃ་ལས་འོད་ཟེར་འཕྲོས་པས་བསྒོམས་པ་དང་འདྲ་བའི་ཡེ་ཤེས་པ་བཛྲ་ས་མཱ་ཛཿས་སྤྱན་དྲངས། ༀ་བཛྲ་ཨརྒྷཾ་པྲ་ཏཱི་ཙྪ་སྭཱ་ཧཱ། སོགས་ཀྱིས་མཆོད། ཛཿཧཱུཾ་བཾ་ཧོཿས་རང་ལ་དགུག་གཞུག་བཅིང་མཉེས་བྱ། སླར་ཡང་ཐུགས་ཀའི་ཧཱུཾ་གི་འོད་ཟེར་གྱིས་དབང་གི་ལྷ་རིགས་ལྔ་སྤྱན་དྲངས། མཆོད་ཅིང་གསོལ་བ་བཏབ་པས། དེ་བཞིན་གཤེགས་པ་རྣམས་ཀྱིས་དབང་བསྐུར། མི་བསྐྱོད་པས་དབུ་རྒྱན་པར་གྱུར། ཐུགས་ཀར་ཟླ་བ་ལ་གནས་པའི་ཧཱུཾ་ཡིག་སྔགས་ཕྲེང་གིས་བསྐོར་བའི་འོད་ཀྱིས་རང་གཞན་གྱི་སྡིག་སྒྲིབ་ཐམས་ཅད་སྦྱངས་པར་བསམ་ལ། ༀ་བཛྲ་ས་ཏྭ་ཨཱཿ ཞེས་ཅི་ནུས་བཟླ་སྟེ་བདག་བསྐྱེད་དེ། འདི་ཆ་གསུམ་གྱི་དཀྱིལ་འཁོར་སྒོས་སུ་སྒྲུབ་པའི་ཚེ་དགོས་ཀྱི། འོག་གི་རྩ་བ་དང་ཡན་ལག་གི་དཀྱིལ་འཁོར་རམ། དཀྱིལ་འཁོར་གཞན་དང་འབྲེལ་ནས་གཏོང་ཀྱང་རུང་སྟེ། དེ་དང་དེའི་ཚེ་དེ་དག་གི་བདག་བསྐྱེད་ཀྱི་གོ་ཆོད་པས་འདི་ཟུར་དུ་མི་དགོས་སོ། །དེ་ནས་དྲི་ཆབ་སྒྲུབ་སྟེ། རང་གི་ཐུགས་ཀ་ནས་ཁྲོ་བོ་བགེགས་མཐར་བྱེད་ལྗང་ནག་རྡོ་རྗེ་རྒྱ་གྲམ་བསྣམས་པ་ཞིག་ཕྱུངས་ཏེ། དྲི་ཆབ་ཀྱི་ནང་དུ་པད་ཉིའི་གདན་ལ་འཁོར་པར་བསམ་ཞིང་། རྡོ་རྗེ་རྩེ་གཅིག་པའི་རྒྱས་དྲི་ཆབ་ལ་རེག་ལ། ༀ་ཨཱཿབིགྷྣནྟ་ཀྲྀ་ཏ་ཧཱུཾ་ཕཊ། ཅེས་ཉེར་གཅིག་བཟླས་པས་བྱིན་གྱིས་བརླབས་ནས། བགེགས་མཐར་བྱེད་ཀྱི་རང་བཞིན་གྱི་ཆུའི་རྡུལ་ཕྲ་རབ་ཏུ་གྱུར་པར་བསམ་ཞིང་། ༀ་སྭ་བྷཱ་ཝ་བི་ཤུདྡྷེ་དྷ་མྲ་ཏཱ་བཛྲ་སིདྡྷི་ཧཱུཾ། ཞེས་གནས་ཡོ་ཐམས་ཅད་ལ་གཏོར་བས་ཉེས་སྐྱོན་ཐམས་ཅད་དག་པར་བསམ་མོ། །དེ་ནས་མཆོད་རྫས་རྣམས། ༀ་ཨཱཿབིགྷྣཱན་གྱིས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་ༀ་ལས་རིན་པོ་ཆེའི་སྣོད་དུ་ༀ་ཡིག་ཞུ་བ་ལས་བྱུང་བའི་མཆོད་རྫས་རྣམས་ཀུན་ཏུ་བཟང་མོའི་མཆོད་པའི་སྤྲིན་ཕུང་ལྟར་བཟང་ཞིང་རྒྱ་ཆེ་བ་ནམ་མཁའི་མཐའ་ཀླས་པར་གྱུར། སོ་སོའི་ཕྱག་རྒྱ་དང་བཅས་ཏེ། ༀ་བཛྲ་ཨརྒྷཾ་ཨཱ་ཧཱུཾ། དེ་བཞིན་དུ། པཱ་དྱཾ ། པུ་ཥྤེ། དྷཱུ་པེ། ཨཱ་ལོ་ཀེ །གནྡྷེ། ནཻཝི་དྱེ། ཤཔྡ་ཨཱཿཧཱུཾ། ཞེས་དང་། དྲིལ་བུ་རྒྱུན་ཆགས་སུ་དཀྲོལ་བཞིན་དུ་རོལ་མོའི་སྔགས། ༀ་བཛྲ་དྷཱརྨཱ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཥེ་ཊ་པྲ་ཙཱ་ལི་ནི་པྲ་ཛྙཱ་པཱ་ར་མི་ཏ་ནཱ་ད་སཾ་བྷ་བེ། སརྦ་ས་ཏྭ་ཧྲྀ་ད་ཡ་སནྟོ་ཥ་ནི་ཧཱུཾ་ཧཱུཾ་ཧཱུཾ་ཧོ་ཧོ་ཧོ་ཨཱ་ཁཾ་སྭཱ་ཧཱ། མཆོད་པའི་སྤྲིན་གྱི་གཟུངས། ན་མོ་རཏྣ་ཏྲ་ཡཱ་ཡ། ༀ་ན་མོ་བྷ་ག་ཝ་ཏེ་བཛྲ་སཱ་ར་པྲ་མརྡ་ནེ། ཏ་ཐཱ་ག་ཏ་ཡ་ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ་ༀ་བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སཾ་ཀྲ་མ་ཎ་བཛྲ་སརྦ་ཀརྨ་ཨཱ་ཝ་ར་ཎ་བི་ཤོ་དྷ་ན་བཛྲ་སྭཱ་ཧཱ། ཞེས་པས་བྱིན་གྱིས་བརླབ་བོ། །དེ་ནས་མདུན་བསྐྱེད་ནི། དཀྱིལ་འཁོར། ༀ་ཨཱ་བིགྷྣན་གྱིས་བསང་། སྭཱ་བྷཱ་ཝས་སྦྱངས། སྟོང་པའི་ངང་ལས་པདྨ་དང་ཉི་མའི་སྟེང་དུ་ཧཱུཾ་ལས་སྣ་ཚོགས་རྡོ་རྗེ་ཧཱུཾ་གིས་མཚན་པ་ཡོངས་སུ་གྱུར་པ་ལས། རྡོ་རྗེའི་ས་གཞི་ར་བ་དྲྭ་བ་གུར་བླ་རེ་འབར་བ་མེའི་འོད་ཟེར་ཀུན་ཏུ་འཕྲོ་བས་ཡོངས་སུ་བསྐོར་བའི་ནང་དུ་འཇིག་རྟེན་པའི་ཁོར་ཡུག་ནག་པོ། དེའི་ནང་དུ་སྣ་ཚོགས་པདྨའི་གེ་སར་ཉི་མའི་དཀྱིལ་འཁོར་གྱིས་ཁེབས་པའི་ལྟེ་བར། སྣ་ཚོགས་རྡོ་རྗེ་རྭ་བཅུ་གཉིས་པ་ཕྱོགས་ཀྱི་མདོག་ཅན། ལྟེ་བ་སྔོན་པོ་གྲུ་བཞི་པའི་སྟེང་དུ་བྷྲཱུཾ་ལས་གཞལ་ཡས་ཁང་གྲུ་བཞི་སྒོ་བཞི་པ། ནང་ནས་རིམ་པ་བཞིན་དཀར་མཐིང་སེར་དམར་ལྗང་པའི་རྩིག་པ་རིམ་པ་ལྔ་དང་ལྡན་པའི་སྟེང་ན་རིན་པོ་ཆེའི་ཕ་གུ་སེར་པོ་རིན་པོ་ཆེ་སྣ་ཚོགས་ཀྱིས་བཀྲ་བ། དེའི་སྟེང་དུ་བྲེ་ཕུལ་གྱི་སྣམ་བུ་ལ་གསེར་གྱི་སྐ་རགས་བཞིའི་ཕྱི་ངོས་སུ་མ་ཀ་རའི་ཁ་ནས་རིན་པོ་ཆེའི་དྲྭ་བ་དང་དྲྭ་བ་ཕྱེད་པ་འཕྱང་བ། དེའི་ཕྱི་ངོས་སུ་བྱ་འདབ་ལས་དཔྱངས་པའི་རིན་པོ་ཆེའི་ཤར་བུ། སྟེང་ངོས་སུ་མདའ་ཡབ་པདྨ་འདབ་མ་ཕྱེད་པའི་དབྱིབས་ཅན། རྩིག་པའི་འགྲམ་ནས་འདོད་ཡོན་གྱི་སྣམ་བུ་དམར་པོས་བསྐོར་བ་ལ་གཟུངས་མ་རྣམས་ཀྱིས་མཆོད་པའི་སྤྲིན་སྤྲོ་བ། སྒོ་ལོགས་ཀྱི་ཕྱི་ཟུར་བཞི་ནས་བུམ་པ་ལ་གནས་པའི་ཀ་བ་བཞི་བཞིས་བཏེགས་པའི་རྟ་བབས་སྣམ་བུ་བཞི་དང་ལྡན་པའི་རྩེ་མོར་པདྨ་ལ་གནས་པའི་ཆོས་ཀྱི་འཁོར་ལོ་གདུགས་ཀྱིས་ཕུབ་པའི་གཡས་གཡོན་དུ་རི་དྭགས་ཕོ་མོ་དང་བཅས་པ། ནང་ཀ་བ་བརྒྱད་ཀྱིས་བཏེགས་པའི་རྡོ་རྗེའི་གདུང་ཟླུམ་དང་། གདུང་ཆེན་བཞིས་མཛེས་པར་ཕུབ་པའི་དབུས་ཕྱུར་བུར་གྱུར་པའི་རྩེ་མོར་རྡོ་རྗེ་རིན་པོ་ཆེའི་ཏོག་གིས་མཛེས་པ། གཞལ་ཡས་ཁང་གི་ནང་ལྷ་སྣམ་ལྗང་གུ་གྲུ་ཆད་དང་བཅས་པའི་ལྟེ་བ་ལིང་ཚེ་དགུ་པ། སྟེང་འོག་ཐམས་ཅད་ཤར་དཀར། ལྷོ་སེར། ནུབ་དམར། བྱང་ལྗང་། དབུས་སྔོ་བ་དྭངས་ཤིང་སྒྲིབ་པ་མེད་པ་ཀུན་ཏུ་གསལ་བ། གདུགས་དང་རྒྱལ་མཚན་དང་བ་དན་སོགས་རྒྱན་སྣ་ཚོགས་ཀྱིས་མཛེས་པར་བརྒྱན་པའི་དབུས་སུ་རིན་པོ་ཆེའི་ཁྲི་པདྨ་དང་ཟླ་བའི་གདན་ལ་ཧཱུཾ་ཡིག་དཀར་པོ། དེ་ལས་འོད་ཟེར་འཕྲོས་འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། བཅོམ་ལྡན་འདས་རྡོ་རྗེ་སེམས་དཔའ་སྐུ་མ དོག་དཀར་པོ་ཞལ་གཅིག་ཕྱག་གཉིས་པ། ཞི་ཞིང་འཛུམ་ལ་མཚན་དཔེའི་ལང་ཚོ་རབ་ཏུ་རྒྱས་པ། ཕྱག་གཡས་གསེར་གྱི་རྡོ་རྗེ་རྩེ་ལྔ་པ་ཐུགས་ཀར་གཏོད་དེ་འཛིན་པ། གཡོན་དངུལ་དཀར་གྱི་དྲིལ་བུ་དཀུར་བརྟེན་པ། རལ་པའི་ཐོར་ཚུགས་ཅན། དར་དང་རིན་པོ་ཆེའི་རྒྱན་སྣ་ཚོགས་ཀྱིས་མཛེས་པར་བརྒྱན་ཅིང་། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། སྐུ་ལས་དྲི་མ་མེད་པའི་འོད་ཟེར་དཔག་ཏུ་མེད་པ་འཕྲོ་བ། ཕྱི་རིམ་ལིང་ཚེ་བརྒྱད་ལ་གཙོ་བོ་ཞལ་ནུབ་ཏུ་ཕྱོགས་པའི་མདུན་དུ་སྒེག་མོ་དཀར་མོ་མེ་ལོང་འཛིན་པ། གཡས་སུ་ཕྲེང་བ་མ་སེར་མོ་རིན་པོ་ཆེའི་ཕྲེང་བ་འཛིན་པ། རྒྱབ་ཏུ་གླུ་མ་དམར་མོ་པི་ཝཾ་འཛིན་པ། གཡོན་དུ་གར་མ་ལྗང་གུ་གར་རྒྱ་མཛད་པ། གྲྭ་བཞིའི་ནུབ་བྱང་དུ་སྤོས་མ་དཀར་སེར་སྤོས་ཁང་འཛིན་པ། བྱང་ཤར་དུ་མེ་ཏོག་མ་དམར་སེར་མེ་ཏོག་གི་ཕྲེང་བ་འཛིན་པ། ཤར་ལྷོར་མར་མེ་མ་དམར་ལྗང་མར་མེ་འཛིན་པ། ལྷོ་ནུབ་ཏུ་དྲི་ཆབ་མ་དཀར་ལྗང་དྲིའི་དུང་ཕོར་འཛིན་པ། ནུབ་སྒོར་ལྕགས་སྒྲོག་མ་དམར་མོ་ལྕགས་སྒྲོག་འཛིན་པ། བྱང་སྒོར་དྲིལ་བུ་མ་ལྗང་གུ་དྲིལ་བུ་འཛིན་པ། ཤར་སྒོར་ལྕགས་ཀྱུ་མ་དཀར་མོ་ལྕགས་ཀྱུ་འཛིན་པ། ལྷོ་སྒོར་ཞགས་པ་མ་སེར་མོ་ཞགས་པ་འཛིན་པ། ཐམས་ཅད་ཀྱང་ཞི་འཛུམ་སྒེག་པའི་ཉམས་ཅན། དར་དང་རིན་པོ་ཆེའི་རྒྱན་གྱིས་བརྒྱན་པ། སེམས་དཔའི་སྐྱིལ་མོ་ཀྲུང་གིས་པདྨ་དང་ཟླ་བའི་གདན་ལ་བཞུགས་པའོ། །ཁྱམས་ཀྱི་ལྷ་སྣམ་ལྗང་གུ་ལ་ཚངས་པ་དང་བརྒྱ་བྱིན་ལ་སོགས་ཏེ་ཕྱོགས་སྐྱོང་བ་བཅུ། ཡུལ་འཁོར་སྲུང་ལ་སོགས་ཏེ་རྒྱལ་པོ་ཆེན་པོ་བཞི། དབང་ཕྱུག་དང་ཁྱབ་འཇུག་ལ་སོགས་ཏེ་ལྷ་ཆེན་པོ་བརྒྱད། ཉི་མ་དང་ཟླ་བ་ལ་སོགས་ཏེ་གཟའ་ཆེན་པོ་བརྒྱད། སྨིན་དྲུག་དང་སྣར་མ་ལ་སོགས་ཏེ་རྒྱུ་སྐར་ཉི་ཤུ་རྩ་བརྒྱད། ནོར་རྒྱས་དང་པད་མ་ལ་སོགས་ཏེ་ཀླུ་ཆེན་པོ་བརྒྱད། གང་བ་བཟང་པོ་དང་ནོར་བུ་བཟང་པོ་ལ་སོགས་པ་གནོད་སྦྱིན་གྱི་སྡེ་དཔོན། འཇིགས་བྱེད་ཆེན་པོ་དགུ་སྟེ་གཙང་རིས་ཀྱི་མགོན་པོ་བདུན་ཅུ་རྩ་ལྔ་སོགས་ཡོན་ཏན་གྱི་མགྲོན་རྣམས་རང་རང་གི་རྒྱན་དང་ཕྱག་མཚན་ལ་སོགས་པ་རྣམ་འཕྲུལ་མཐའ་ཡས་པས་བཅོམ་ལྡན་འདས་ལ་འདུད་པའི་ཚུལ་གྱིས་གནས་པ། ཕྱིའི་ཁོར་ཡུག་ལ་སྙིང་རྗེའི་མགྲོན་དུ་གྱུར་པ་འགྲོ་བ་རིགས་དྲུག །ལམ་རྒྱུད་ལྔ། སྐྱེ་གནས་བཞིས་བསྡུས་པའི་སེམས་ཅན་རྣམས་དང་། ཁྱད་པར་ལྷ་ཀླུ་གནོད་སྦྱིན་སོགས་འབྱུང་པོ་ཕལ་པའི་རིགས་སུ་གྱུར་པ་ཐམས་ཅད་དང་། མེའི་ཕྱི་རོལ་དུ་བུ་ལོན་ལན་ཆགས་ཀྱི་མགྲོན་རྣམས་གསལ་བར་གྱུར། དེ་ནས་དཀྱིལ་འཁོར་གྱི་ལྷ་ཐམས་ཅད་ཀྱི་དཔྲལ་བར་ༀ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུཾ་སྔོན་པོ། ཧཱུཾ་ལས་འོད་ཟེར་འཕྲོས་པས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་ཀྱི་འཁོར་ལོ་མ་ལུས་ཤིང་ལུས་པ་མེད་པ་ཐམས་ཅད་མདུན་གྱི་ནམ་མཁར་བཛྲ་ས་མཱ་ཛཿས་སྤྱན་དྲངས་པར་བསམ་ཞིང་། རྡོར་དྲིལ་སྤོས་དང་བཅས་ཏེ། ན་མོ། བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ། །སེམས་ནི་རྒྱ་ཆེན་མཆོག་ཏུ་རབ་བསྐྱེད་དེ། །འགྲོ་བ་འདི་དག་མ་ལུས་སངས་རྒྱ་རྒྱུ། །འདི་ན་སྣོད་མིན་སེམས་ཅན་གང་ཡང་མེད། །བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ། །དུས་ལ་མི་འདའ་ཐུགས་རྗེའི་དབང་གིས་ན། །སེམས་ཅན་དོན་དགོངས་བཅོམ་ལྡན་རྡོ་རྗེ་སེམས། །མ་ལུས་འཁོར་བཅས་གནས་འདིར་གཤེགས་སུ་གསོལ། །དེ་ནས་མཆོད་ཡོན་སྦྲེང་བཞིན་དུ། བཅོམ་ལྡན་འཁོར་བཅས་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་ནས་ཀྱང་། །འདི་ཉིད་དུ་ནི་བཞུགས་སུ་གསོལ། །ༀ་སརྦ་ཏ་ཐཱ་ག་ཏ་བཛྲ་ས་ཏྭ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་སྭཱ་ཧཱ། དེ་བཞིན་དུ། པཱ་དྱཾ་ནས། ཤཔྡའི་བར་གྱིས་མཆོད། ཛཿཧཱུཾ་བཾ་ཧོཿས། ཡེ་ཤེས་པ་རྣམས་དམ་ཚིག་པ་ལ་དགུག་གཞུག་བཅིངས་པས་མཉེས་བཞིན་དུ་བཞུགས་པར་གྱུར། སླར་ཡང་ཐུགས་ཀའི་ཧཱུཾ་གི་འོད་ཟེར་གྱིས་དབང་གི་ལྷ་དེ་བཞིན་གཤེགས་པ་རིགས་ལྔ་འཁོར་བཅས་བཛྲ་ས་མཱ་ཛཿས་སྤྱན་དྲངས། ༀ་པཉྩ་ཀཱུ་ལ་ས་པ་རི་ལྭཱ་ར་ཨརྒྷཾ་སོགས་ཀྱིས་མཆོད། ༀ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ། ཞེས་གསོལ་བ་བཏབ་པས། ནམ་མཁར་བཞུགས་པའི་དབང་ལྷ་རྣམས་ཀྱིས། ཇི་ལྟར་བལྟམས་པ་ཙམ་གྱི་ནི། ཞེས་སོགས་ཀྱི་མཐར། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡེ་ཤྲཱི་ཡེ་ཧཱུཾ། ཞེས་བུམ་པའི་ཆུས་དབང་བསྐུར། སྐུ་གང་དྲི་མ་དག །ཆུའི་ལྷག་མ་སྤྱི་བོར་འཁྱིལ་བ་ལས་མི་བསྐྱོད་པས་དབུ་བརྒྱན་པར་གྱུར། དེ་ནས། དཀྱིལ་འཁོར་པ་རྣམས་མཆོད་པའི་སྤྲིན་ཕུང་མཐའ་ཡས་པས་མཆོད་པར་བསམ་ལ། འཇིག་རྟེན་ཁམས་ནི་དཔག་མེད་ན། །མཆོད་ཡོན་ཇི་སྙེད་ཡོད་པ་དང་། །བདག་གི་གུས་པར་བཤམས་པ་འདི། །སངས་རྒྱས་སྲས་དང་བཅས་ལ་འབུལ། །ༀ་སརྦ་ཏ་ཐཱ་ག་ཏ་བཛྲ་ས་ཏྭ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། མཆོད་ཡོན་གྱི་གནས་སུ། ཞབས་བསིལ། མེ་ཏོག །བདུག་སྤོས། མར་མེ། །དྲི་ཆབ། ཞལ་ཟས། རོལ་མོ་རྣམས་དང་། ཨརྒྷཾ་གྱི་གནས་སུ། པཱདྱཾ། པུཥྤེ། དྷཱུ་པེ། ཨཱ་ལོ་ཀེ གནྡྷེ། ནཻ་ཝིདྱཻ། ཤཔྡ་རྣམས་བཅུག་ནས་རང་རང་གི་ཕྱག་རྒྱས་དབུལ་ཞིང་། མཐར་དྲིལ་བུ་གསིལ་བ་དང་བཅས། ༀ་བཛྲ་དྷརྨཱ་ར་ཎི་སོགས་རོལ་མོའི་སྔགས་ཀྱང་སྔར་ལྟར་བརྗོད། སྤྲོ་ན་རིན་ཆེན་བདུན། བཀྲ་ཤིས་རྫས་བརྒྱད། འདོད་ཡོན་ལྔ། གོས་ཟུང་རྣམས་ཀྱིས་ཀྱང་མཆོད་དེ། ཁམས་གསུམ་སེམས་ཅན་ཐམས་ཅད་ལ། །བུ་བཞིན་སྐྱོབ་པའི་ཐུགས་མངའ་བ། །སངས་རྒྱས་ཀུན་གྱི་རང་བཞིན་སྐུ། །བླ་མེད་མགོན་ལ་ཕྱག་འཚལ་བསྟོད། །རང་བཞིན་ཆོས་སྐུ་དག་པའི་ཀློང་། །སྣ་ཚོགས་ཐབས་མཁས་ཐུགས་རྗེ་ཡིས། །རིགས་ལྔ་ཡེ་ཤེས་ལྔར་སྟོན་པ། །རྡོ་རྗེ་སེམས་དཔའ་ལ་ཕྱག་འཚལ། །གཟུགས་མཛེས་ཕྲེང་བ་དབྱངས་སྙན་གར། །ཉེས་སྤྱོད་བཞི་དང་ཕྱག་རྒྱ་བཞིས། །རྒྱལ་བ་ཐམས་ཅད་མཉེས་མཛད་མ། །ལྷ་མོ་བཅུ་གཉིས་ལ་ཕྱག་འཚལ། །འཇིག་རྟེན་སྐྱོང་བ་གྲགས་ལྡན་པ། །སྡེ་བོ་ཆེ་ལ་སྟོབས་པོ་ཆེ། །འཇིགས་བྱེད་ལྷ་ཀླུ་གཟའ་སྐར་དང་། །ཕྱོགས་སྐྱོང་རྒྱལ་ཆེན་ཚོགས་ལ་བསྟོད། །བསྟོད་པར་འོས་པ་ཐམས་ཅད་ལ། །ཞེས་སོགས་ཀྱིས་བསྟོད་པར་བྱའོ། །དེ་ནས་བཟླས་པ་ནི། གཙོ་བོའི་ཐུགས་ཀར་པདྨ་དང་ཟླ་བའི་དཀྱིལ་འཁོར་གྱི་དབུས་སུ་ཧཱུཾ་ཡིག་དཀར་པོ་དྲི་མ་མེད་པ་ཟླ་བ་ལྟར་གསལ་བ་བཟླ་བྱའི་སྔགས་ཕྲེང་གིས་བསྐོར་བ། དེ་ལས་བྱུང་བའི་འོད་ཟེར་གྱིས་བདག་དང་སེམས་ཅན་ཐམས་ཅད་ལ་རེག་པས་སྡིག་སྒྲིབ་དང་སྡུག་བསྔལ་ཐམས་ཅད་སྦྱངས་པར་བསམ་ཞིང་། ༀ་བཛྲ་ས་ཏྭ་ཨཱཿ ཞེས་པ་ཅི་ནུས་བཟླས་པའི་མཐར་ཐལ་མོ་སྦྱར་ཏེ། བཅོམ་ལྡན་འདས་བདག་དང་མཐའ་ཡས་པའི་སེམས་ཅན་ཐམས་ཅད་སེམས་སྡིག་སྒྲིབ་ཉེས་ལྟུང་གི་འཆིང་བ་ལས་རྣམ་པར་གྲོལ་བ་མཛད་དུ་གསོལ། ཞེས་གསོལ་བ་གདབ་བོ། །དེ་ནས་ཆ་གསུམ་གཏོང་བའི་ཐོག་མར་འདས་གཏོར་དབུལ་བར་བྱ་སྟེ། གཏོར་མ། ༀ་ཨཱཿབིགྷྣཱཾ་གྱིས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་བྷཱུཾ་ལས་གཏོར་གཞོང་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་བཅུད་ༀ་ཡིག་ཞུ་བ་ལས་བྱུང་བའི་གཏོར་རྫས་འདོད་ཡོན་གྱི་རྣམ་པ་མ་ཚང་བ་མེད་པའི་སྤྲིན་ཕུང་མཐའ་ཡས་པ་སྤྲོ་བར་གྱུར། ༀ་ཨཱཿཧཱུཾ་གིས་བྱིན་གྱིས་བརླབ་བོ། །དེ་ནས་གཏོར་མགྲོན་སྤྱན་དྲང་བ་ནི། སྤོས་འཐུལ་ཞིང་མཆོད་ཡོན་སྦྲེང་བ་དང་བཅས་ཏེ། ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདས། །མཆོད་ཡོན་བཞེས་ནས་འདི་ཉིད་དུ། །མཆོད་པས་བདག་ལ་དགྱེས་པར་མཛོད། །ཡེ་ཤེས་ཕུང་པོ་མཁའ་འདྲ་བའི། །སྐུ་གསུང་ཐུགས་ཀྱི་བདག་ཉིད་ཆེ། །སྤྲུལ་པ་ཀུན་གྱི་འབྱུང་གནས་གཙོ། །རྡོ་རྗེ་སེམས་དཔའ་གཤེགས་སུ་གསོལ། །དམིགས་པ་ཀུན་ལས་རབ་འདས་ཤིང་། །བྱིན་རླབས་ཀུན་གྱི་གཞིར་གྱུར་པ། རྣལ་འབྱོར་ཀུན་གྱི་དབང་ཕྱུག་ཆེ། །ས་གཞི་ལྟ་བུར་གཤེགས་སུ་གསོལ། །ཐུགས་རྗེ་ཆེན་པོ་ཐབས་མཁས་པས། །གདུག་པ་འདུལ་ཕྱིར་གཤེགས་སུ་གསོལ། །ཡེ་ཤེས་རྟོགས་པའི་ཁྱད་པར་ལས། །སྤྲུལ་པ་མང་པོའི་ཚོགས་བཅས་གཤེགས ། །ༀ་ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎི་ཀ་དྲྀ་ཤྱ་ཧོཿ ས་མ་ཡ་ཧོཿ ས་མ་ཡ་སྟྭཾ། ཞེས་པས་སྙན་གསན་དབབ། ༀ། ཐུགས་རྗེའི་ལྕགས་ཀྱུས་ཐུགས་དམ་རྒྱུད་བསྐུལ་ཞིང་། །བྱམས་པའི་ཞགས་པས་གནས་ནས་སྤྱན་ཡང་འདྲེན། །ལྕགས་སྒྲོག་བཀའ་ཡི་ཕོ་ཉ་གནས་བསྐྱོད་ལ། །བདེ་གཤེགས་བཞུགས་ཤིང་རྣམ་གྲོལ་དགྱེས་པར་བསྐྱེད། །སོ་སོའི་ཕྱག་རྒྱ་བཅའ་ཞིང་། ༀ་བཛྲ་ཨངྐུ་ཤ་ཛཿ ༀ་བཛྲ་པཱ་ཤ་ཧཱུཾ། ༀ་བཛྲ་སྥོ་ཊ་བཾ། ༀ་བཛྲ་གྷཎྜེ་ཧོཿ ཀཱ་ཡ་ཝཱ་ཀ་ཙིཏྟ་ཏིཥྛ་བཛྲ། ཞེས་པས་དགུག་གཞུག་བཅིང་མཉེས་བརྟན་པར་བྱས་ལ། ༀ་ཨ་ནུཏྟ་ར་པཱུ་ཛ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཞེས་བླ་ན་མེད་པའི་མཆོད་པ་ནམ་མཁའ་འཕགས་ཤིང་ཁྱབ་པའི་སྤྲིན་སྤྲོས་པས་དགྱེས་པར་བསམ་ཞིང་། ༀ། རིན་ཆེན་འཚེར་བས་བརྒྱན་པ་ཡི། །འཇའ་ཚོན་སྤེལ་ལེགས་བཀོད་འདྲ་བའི། །ཕོ་བྲང་གཞལ་ཡས་དམ་པ་འདིར། །གདན་ཡང་འཚམས་པར་འབུལ་ལགས་ཀྱི། །རིམ་བཞིན་ཡངས་པར་བཞུགས་སུ་གསོལ། །ༀ་པདྨ་ཀ་མ་ལ་ཡེ་སྭཱ་ཧཱ། ༀ་མ་ཧཱ་སུ་ཁ་བཛྲ་སཏྭ་ཧཱུཾ། ཛཿཧཱུཾ་བཾ་ཧོཿ མ་ཧཱ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་གདན་ཕུལ་བ་ལ་བཞུགས་སུ་གསོལ་ཏེ་མཆོད་ཡོན་དབུལ་ལོ། །དེ་ནས་དྲི་ལ་སོགས་པའི་མཆོད་པ་རྣམས་སོ་སོའི་ཕྱག་རྒྱ་དང་བཅས་པས་དབུལ་ཏེ། ནགས་ཚལ་བཅུད་ནི་ཡི་གར་འོང་། །དྲི་ཞིམ་རྒྱས་པ་ལྷ་ཡི་རྫས། །གཙང་ཞིང་གཙང་མར་སྦྱར་བ་ཡི། །ལྷ་རྫས་བཟང་པོའི་བདུག་སྤོས་འདི། །བདག་གིས་དད་པས་འབུལ་ལགས་ཀྱིས། །བཞེས་ནས་བདག་ལ་དགྱེས་པར་མཛོད། །ༀ་བཛྲ་དྷཱུ་པེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། གཙང་ཞིང་གཙང་མར་སྐྱེས་པ་ཡི། །ལྷ་རྫས་བཟང་པོའི་མེ་ཏོག་འདི། །བདག་གིས་དད་པས༴ །བཞེས་ནས་བདག་ལ༴ །ༀ་བཛྲ་པུཥྤེ་པཱུ་ཛ་མེ་གྷ་ས༴ སྡུག་བསྔལ་འཇོམས་ཤིང་བཀྲ་ཤིས་ལ། །དགེ་ཞིང་མུན་སེལ་མར་མེ་འདི། །བདག་གིས་དད་པས༴ །བཞེས་ནས་བདག་ལ༴ །ༀ་བཛྲ་ཨཱ་ལོ་ཀེ་པཱུ་ཛ་མེ་གྷ་ས་མུ་དྲ༴ །གཙང་ཞིང་གཙང་མར་སྦྱར་བ་ཡི། །ལྷ་རྫས་བཟང་པོའི་དྲི་ཆབ་འདི། །བདག་གིས་དད༴ །བཞེས་ནས་བདག་ལ༴ །ༀ་བཛྲ་གནྡྷེ་པཱུ་ཛ་མེ་གྷ་ས་མུ༴ སྨན་རྣམས་བཅུད་དང་ཡི་གར་འོང་། །སྔགས་ཀྱི་ཞལ་ཟས་བཤོས་འདི་དག །བདག་གིས་དད་པས༴ །བཞེས་ནས་བདག་ལ་དགྱེས་པར་མཛོད། །ༀ་བཛྲ་ནཻ་ཝདྱཔཱུ་ཛ་མེ་གྷ་ས་མུ་དྲ༴ །སྒྲ་དབྱངས་སྙན་ཞིང་ཡིད་འོང་ལྡན། །ལྷ་རྫས་དམ་པའི་རོལ་མོ་འདི། །བདག་གིས་དད་པས༴ །ཐུགས་རྗེས་དགོངས་ཏེ་བཞེས་སུ་གསོལ། །ༀ་བཛྲ་ཤཔྡ་པཱུ་ཛ་མེ་གྷ་ས༴ དྲིལ་བུ་རྒྱུ་ཆགས་སུ་དཀྲོལ་བཞིན་དུ། ༀ་བཛྲ་དྷརྨཱ་ཱར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཥེ་ཊ་པྲ་ཙཱ་ལི་ནི་པྲ་ཛྙཱ་པཱ་ར་མི་ཏ་ནཱ་ད་སཾ་བྷ་བེ། སརྦ་ས་ཏྭ་ཧྲི་ད་ཡ་སནྟོ་ཥ་ནིཧཱུཾ་ཧཱུཾ་ཧཱུཾ་ཧོ་ཧོ་ཧོ་ཨཱ་ཁཾ་སྭཱ་ཧཱ། ཞེས་དང་། མཆོད་སྦྱིན་གྱི་གཟུངས། ན་མོ་རཏྣ་ཏྲ་ཡཱ་ཡ། ༀ་ན་མོ་བྷ་ག་ཝཱ་ཏེ་བཛྲ་སྭཱ་ར་པྲ་མརྡ་ནི། ཏ་ཐཱ་ག་ཏ་ཡ་ཨརྷ་ཏེ་སམྱ་ཀྶཾ་བུདྡྷ་ཡ། ཏ་དྱ་ཐཱ། ༀ་བཛྲ་བཛྲེ། མ་ཧཱ་བཛྲེ། མ་ཧཱ་ཏེ་ཛ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སཾ་ཀྲ་མ་ཎབཛྲ་སརྦ་ཀརྨ་ཨཱ་ཝ་ར་ཎ་བི་ཤོ་དྷ་ན་བཛྲེ་སྭཱ་ཧཱ། ཡིད་དུ་འོང་བའི་མཆོད་སྤྲིན་དང་། རོལ་མོ་སིལ་སྙན་སྤྲིན་གྱི་ཚོགས། །མཆོད་འོས་ཚུལ་དང་མཐུན་པ་ཡིས། །ནམ་མཁའི་ཁམས་ཀུན་ཁྱབ་གྱུར་ཅིག །དེ་ནས་ཡན་ལག་བདུན་པ་བྱ་སྟེ། ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །དུས་གསུམ་གཤེགས་པ་མི་ཡི་སེང་གེ་ཀུན། །བདག་གིས་མ་ལུས་དེ་དག་ཐམས་ཅད་ལ། །ལུས་དང་ངག་ཡིད་དང་བས་ཕྱག་བགྱིའོ། །བཟང་པོ་སྤྱོད་པའི་སྨོན་ལམ་སྟོབས་དག་གིས། །རྒྱལ་བ་ཐམས་ཅད་ཡིད་ཀྱི་མངོན་སུམ་དུ། །ཞིང་གི་རྡུལ་སྙེད་ལུས་རབ་བཏུད་པ་ཡིས། །རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དག །དེ་ལྟར་ཆོས་ཀྱི་དབྱིངས་རྣམས་མ་ལུས་པ། །ཐམས་ཅད་རྒྱལ་བ་དག་གིས་གང་བར་མོས། །དེ་དག་བསྔགས་པ་མི་ཟད་རྒྱ་མཚོ་རྣམས། །དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། །བདེ་བར་གཤེགས་པ་ཐམས་ཅད་བདག་གིས་བསྟོད། །མེ་ཏོག་དམ་པ་ཕྲེང་བ་དམ་པ་དང་། །སིལ་སྙན་རྣམས་དང་བྱུག་པ་གདུགས་མཆོག་དང་། །མར་མེ་མཆོག་དང་བདུག་སྤོས་དམ་པ་ཡིས། །རྒྱལ་བ་དེ་དག་ལ་ནི་མཆོད་པར་བགྱི། །ན་བཟའ་དམ་པ་རྣམས་དང་དྲི་མཆོག་དང་། །ཕྱེ་མའི་ཕུར་མ་རི་རབ་མཉམ་པ་དང་། །བཀོད་པ་ཁྱད་པར་འཕགས་པའི་མཆོག་ཀུན་གྱིས། །རྒྱལ་བ་དེ་དག་ལ་ནི་མཆོད་པར་བགྱི། །མཆོད་པ་གང་རྣམས་བླ་མེད་རྒྱ་ཆེ་བ། །དེ་དག་རྒྱལ་བ་ཐམས་ཅད་ལ་ཡང་མོས། །བཟང་པོ་སྤྱོད་ལ་དད་པའི་སྟོབས་དག་གིས། །རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །རང་རྒྱལ་རྣམས་དང་སློབ་དང་མི་སློབ་དང་། །འགྲོ་བ་ཀུན་གྱི་བསོད་ནམས་གང་ལ་ཡང་། །དེ་དག་ཀུན་གྱི་རྗེས་སུ་བདག་ཡི་རང་། །གང་རྣམས་ཕྱོགས་བཅུའི་འཇིག་རྟེན་སྒྲོལ་མ་དག །བྱང་ཆུབ་རིམ་བར་སངས་རྒྱས་མ་ཆགས་བརྙེས། །མགོན་པོ་དེ་དག་བདག་གིས་ཐམས་ཅད་ལ། །འཁོར་ལོ་བླ་ན་མེད་པ་བསྐོར་བར་བསྐུལ། །མྱ་ངན་འདའ་སྟོན་གང་བཞེད་དེ་དག་ལ། །འགྲོ་བ་ཀུན་ལ་ཕན་ཞིང་བདེ་བའི་ཕྱིར། །བསྐལ་པ་ཞིང་གི་རྡུལ་སྙེད་བཞུགས་པར་ཡང་། །བདག་གིས་ཐལ་མོ་རབ་སྦྱར་གསོལ་བར་བགྱི། །ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །བདག་གིས་ཐལ་མོ་རབ་སྦྱར་གསོལ་བར་བགྱི། །ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་བདག་གིས་བྱང་ཆུབ་ཕྱིར་བསྔོའོ། །དེ་ནས། དཀྱིལ་འཁོར་པ་ལ་སོགས་ཏེ་དཀོན་མཆོག་སྲིད་ཞུའི་མགྲོན་ཐམས་ཅད་ལ་གཏོར་མ་ཡེ་ཤེས་ཀྱི་བདུད་རྩི་ནམ་མཁའ་དང་མཉམ་པ་ཕུལ་བས་དགྱེས་པར་བསམ་ལ། །ནམ་མཁའ་མཛོད་ཀྱི་རྒྱ་དང་བཅས་ཏེ། ༀ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭཱ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཞེས་ལན་གསུམ་གྱིས་ཕུལ་ལ། འདོད་དོན་གསོལ་ཞིང་སྨོན་ལམ་གདབ་པ་ནི། ལག་ཏུ་སྤོས་དང་མེ་ཏོག་ཐོགས་ལ་ཐལ་མོ་སྦྱར། །མགོ་བཏུད་ཅིང་ཡིད་རྩེ་གཅིག་པས། མི་མཉམ་མཉམ་པའི་ལྷ་ཁྱོད་རྟག་ཏུ་བདག་ལ་ནི། །ཐུགས་རྗེའི་སྤྱན་གྱིས་གཟིགས་ཤིང་རྒྱུན་དུ་འགྲོ་བའི་དཔལ། །བྱང་ཆུབ་མཆོག་གི་སྤྱོད་པ་བསྒྲུབ་པར་དམ་བཅས་པའི། །བདག་གི་རེ་བའི་འབྲས་བུ་འདི་ཡང་མཆིས་པར་མཛོད། །གཏི་མུག་མུན་པ་འདྲ་བས་ལྡོངས་གྱུར་ན། །བྱམས་མགོན་ཅི་སླད་བདག་ལ་ཐུགས་མི་བརྩེ། །ཁྱོད་ཀྱི་མཁྱེན་རབ་བསྐལ་པའི་མེ་འདྲ་བས། །སེམས་ཀྱི་མུན་སེལ་སྒྲོན་མེ་བདག་ལ་སྩོལ། །མགོན་པོ་ཐུགས་རྗེ་ཆེ་དང་ལྡན་གྱུར་པས། །སེམས་ཅན་དོན་ལ་བསྐུལ་བ་མི་འཚལ་ཡང་། །སྡུག་བསྔལ་རང་བཞིན་དབང་དུ་བདག་གྱུར་པས། །སྐྱོབ་པའི་སྤྱན་སྔར་གདུང་བས་གསོལ་བ་འདེབས། །གང་ཞིག་ཕ་དང་མས་ནི་སློབ་པ་ལ། །ཤིན་ཏུ་སྐྱོ་ངལ་མེད་པ་དེ་བཞིན་དུ། །འགྲོ་བའི་དོན་བརྩོན་མཛད་པ་ཁྱེད་ལགས་ཀྱིས། །ཚེ་རབས་ཀུན་ཏུ་བདག་གི་སྐྱབས་མཛོད་ཅིག །ན་མོ། ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་ན་དུས་གསུམ་དུ་གཤེགས་ཤིང་བཞུགས་པའི་སངས་རྒྱས་བཅོམ་ལྡན་འདས་རྣམ་པ་ཐམས་ཅད་མཁྱེན་པའི་ཡེ་ཤེས་བསམ་གྱིས་མི་ཁྱབ་ཅིང་བརྗོད་ཀྱིས་མི་ལངས་པ་ཐམས་ཅད་ལ་ཕྱག་འཚལ་ཞིང་སྐྱབས་སུ་མཆིའོ། །བདེ་བར་གཤེགས་པ་རྣམས་ཀྱི་ཞལ་ནས་གསུངས་པའི་ཆོས་དཀོན་མཆོག་འཇིག་རྟེན་དང་འཇིག་རྟེན་ལས་འདས་པའི་རྒྱུ་དང་འབྲས་བུར་བཅས་པའི་ཆོས་བསམ་གྱིས་མི་ཁྱབ་པ་ལ་ཕྱག་འཚལ་ཞིང་སྐྱབས་སུ་མཆིའོ། །བདེ་བར་གཤེགས་པ་རྣམས་ཀྱི་ཐུགས་ཀྱི་སྲས་སུ་གྱུར་པ་དགེ་འདུན་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །དཀོན་མཆོག་རྣམས་གདན་འཛོམ་པའི་སྤྱན་སྔར་ལྷ་དང་མིའི་ཞལ་ཟས། མེ་ཏོག་དང་བདུག་སྤོས། མར་མེ་དང་དྲི་ཆབ། བྱུག་པ་དང་འཕན་གདུགས། སིལ་སྙན་སོགས་རོལ་མོ། དངོས་སུ་འབྱོར་བ་དང་ཡིད་ཀྱི་སྤྲུལ་པའི་མཆོད་པའི་སྤྲིན་ཕུང་བསམ་གྱིས་མི་ཁྱབ་པ་ཕུལ་བས་བདེ་བར་གཤེགས་པ་ཐམས་ཅད་མཉེས་པར་གྱུར་ཅིག །སེམས་ཅན་འཁོར་བ་ཐོག་མ་མེད་པ་ནས་གཟུང་འཛིན་རང་ག་མར་ཞེན་པའི་དབང་གིས་ཉོན་མོངས་པ་འཕེལ་ཞིང་རྒྱས་པས་འཁོར་བ་དང་ངན་སོང་གི་རྒྱུར་གྱུར་ཅིང་། མཐོ་རིས་དང་ཐར་པའི་སྒྲིབ་པར་གྱུར་པ་ཅི་མཆིས་པ་ཐམས་ཅད་བྱང་ཞིང་དག་པར་གྱུར་ཅིག །འདི་ལྟར་བགྱིས་པའི་དགེ་བ་སེམས་ཅན་ཐམས་ཅད་དང་ཐུན་མོང་དུ་བསྔོ་བར་བགྱིའོ། །དེ་ལྟར་བསྔོས་པས་སེམས་ཅན་ཐམས་ཅད་ཀྱིས་བླ་ན་མེད་པའི་བྱང་ཆུབ་རིན་པོ་ཆེ་མྱུར་དུ་ཐོབ་པར་གྱུར་ཅིག །གནས་སྐབས་སུ་ཚེ་རིང་བ་དང་། ནད་མེད་པ་དང་། དཔལ་དང་འབྱོར་པ་རྒྱས་པ་དང་། དགེ་བ་སྒྲུབ་པ་ལ་བར་ཆད་མེད་པ་དང་། འཕྲིན་ལས་ཕུན་སུམ་ཚོགས་པ་སྒྲུབ་ནུས་པར་གྱུར་ཅིག །སངས་རྒྱས་སྐུ་གསུམ་བརྙེས་པའི་བྱིན་རླབས་དང་། །ཆོས་ཉིད་མི་འགྱུར་བདེན་པའི་བྱིན་རླབས་དང་། །དགེ་འདུན་མི་ཕྱེད་འདུན་པའི་བྱིན་རླབས་ཀྱིས། །ཇི་ལྟར་བསྔོས་ཤིང་སྨོན་ལམ་འགྲུབ་པར་ཤོག །ཅེས་བསྔོ་སྟེ་འདས་གཏོར་རོ། །དེ་ནས་འཇིག་རྟེན་པའི་གཏོར་མ་ཆ་གསུམ་ནི། ༀ་བཛྲ་ས་ཏྭ་ཧཱུཾ། ཞེས་རང་སྔགས་ཀྱིས་རྡོར་སེམས་ལྟ་བུར་བདག་བསྐྱེད་གང་ཡིན་གྱི་ལྷ་དེ་ཉིད་གསལ་བཏབ། དེ་ལས། ༀ་ཧྲཱིཿཔདྨཱནྟ་ཀྲྀཏ་བཛྲ་ཀྲོ་དྷ་ཧ་ཡ་གྲཱི་ཝ་ཧཱུཾ། ཨ་ཙནྡྲ་མཎྜ་ལ་སཱུརྻ་ཙནྡྲ་ཏ་ཨཿཞེས་བརྗོད་པས་ཟླ་ཉི་བརྩེགས་པའི་སྟེང་དུ་བདག་ཉིད་རྟ་མགྲིན་དུ་གནས་གྱུར་པ་ནི། སྐུ་མདོག་དམར་པོ་དཀར་སྔོ་དམར་བའི་ཞལ་གསུམ་པ། སྤྱི་བོར་རྟ་མགོ་ལྗང་ཁུ་རྟ་སྐད་འཚེར་ཞིང་རྔོག་མ་ལས་མེ་སྟག་འཕྲོ་བ། ཕྱག་བཞིའི་དང་པོ་གཉིས་རྡོ་རྗེ་དང་ལྕགས་ཀྱུ། འོག་མ་གཉིས་མདའ་གཞུ་འགེངས་པ། ཞབས་གཉིས་གྱད་ཆེན་པོའི་སྟབས་ཀྱིས་ཀླུ་ཕོ་མོ་བརྫིས་པ། ཁྲོ་བོའི་ཆས་ཅན་ཁམས་གསུམ་པའི་དབང་ཕྱུག་ཆེ་བཙན་འགྲན་ཟླ་དང་བྲལ་བར་བསམ་ལ་སྙེམས་པ་བརྟན་པོས་རང་སྔགས་ཅུང་ཟད་བཟླས་རྗེས། ལག་པ་ཐལ་སྦྱར་ལས་མཛུབ་མོ་དང་མཐེའུ་ཆུང་བསྐུམ། མཐེ་བོང་སོ་སོར་སྒྲེང་བའི་རྒྱ་ལྟེ་མགྲིན་སྙིང་ག་སྤྱི་བོ་བཞིར་བཞག་པས་བསྲུང་ངོ་། །དེ་ནས་གཏོར་མ་ཆ་གསུམ་མཆོད་པ་དང་བཅས་པ་ལ་དྲི་ཆབ་འཐོར་ཞིང་། ༀ་སྭ་བྷཱ་ཝ་བི་ཤུདྡྷ་དྷརྨ་ཏཱ་བཛྲ་སིདྡྷི་ཧཱུཾ། ཞེས་དང་། ཆོ་ག་གང་དང་འབྲེལ་བ་དེའི་ལས་བུམ་ཡོད་ན་བུམ་ཆུ་འཐོར་ཞིང་། སོ་སོའི་ལས་སྔགས་དང་། མེད་ན། ༀ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུཾ་ཕཊ། ཅེས་པའི་སྔགས་ཀྱིས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་ༀ་ལས་རིན་པོ་ཆེའི་སྣོད་དུ་ༀ་ཡིག་ཞུ་བ་ལས་བྱུང་བའི་མཆོད་རྫས་རྣམས་འདོད་ཡོན་གྱི་ཕུང་པོ་ཟད་མི་ཤེས་པར་བསམ་ལ། ༀ་ཨཱཿཧཱུཾ་གིས་བརླབ། གཏོར་མ་གསུམ་པོ་སྦྱང་སྤེལ་བསྒྱུར་ཐོབ་ཀྱི་བརྟག་པ་བཞིས་སྤྱིར་རློབ་སྟེ། ཆོས་ཉིད་རྣམ་དག་གི་རྒྱ་ཐལ་མོ་ཁོག་སྟོང་སྙིང་གར་བཅས་ལ། ༀ་སྭ་བྷཱ་ཝ་ཤུདྡྷཿསརྦ་དྷ་རྨཱ ཿ སྭ་བྷཱ་ཝ་ཤུདྡྷོ་྅་ཧཾ། ཞེས་པས། མ་དག་པ་ཐམས་ཅད་སྦྱངས་ནས་སྟོངས་པ་ཉིད་དུ་བསམ། ཐལ་མོ་ཁོང་སྟོང་ལས་སོར་རྩེ་སྤྲད་དེ་ཚིགས་བཅག་པ་ནམ་མཁའ་མཛོད་ཀྱི་རྒྱ་བཅས་ལ། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུདྒ་ཏེ་སྥ་ར་ཎ་ཨི་མཾ་ག་ག་ན་ཁཱཾ་སྭཱ་ཧཱ། ཞེས་པས། མགྲོན་སོ་སོའི་མོས་པ་དང་མཐུན་པའི་ཡོ་བྱད་ཟད་མི་ཤེས་པར་སྤེལ། མཐེ་བོང་བསྣོལ་ནས་ཐལ་མོ་ཕྱིར་འགྱེད་པ་བདུད་རྩི་འཁྱིལ་བའི་རྒྱ་བཅས་ལ། ༀ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུཾ་ཕཊ། ཅེས་པས། ཐམས་ཅད་ཀྱང་སྡུག་བསྔལ་ཞི་བྱེད་བདུད་རྩིའི་རྒྱ་མཚོར་བསྒྱུར་བར་བསམ། གཡས་ཁུ་ཚུར་ལས་མཛུབ་མོ་སྒྲེང་བ་སྙིང་ག་དང་གཡོན་མཆོག་སྦྱིན་བརྐྱང་བ་ཤུགས་ལྡན་འོད་ཀྱི་རྒྱ་བཅས་ལ། ན་མཿ སརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ༀ་སམྦྷ་ར་སམྦྷ་ར་ཧཱུཾ། ཞེས་པས། མགྲོན་རྣམས་ཀྱི་སྤྱོད་ཡུལ་དུ་འདོད་པའི་ལོངས་སྤྱོད་ཟད་མི་ཤེས་པ་སོ་སོར་ཐོབ་པར་བསམ་སྟེ། སྔགས་རྣམས་ལན་གསུམ་ལ་སོགས་པ་བརྗོད་ཅིང་། བདག་གི་བསམ་པའི་སྟོབས་དག་དང་། །དེ་བཞིན་གཤེགས་པའི་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །འཕགས་པ་རྣམས་ལ་མཆོད་པ་དང་། །སེམས་ཅན་རྣམས་ལ་ཕན་གདགས་སླད། །དོན་རྣམས་གང་དག་བསམ་པ་ཀུན། །དེ་དག་ཐམས་ཅད་ཅི་རིགས་པར། །ཐོགས་པ་མེད་པར་འགྲུབ་པར་ཤོག །ཅེས་བདེན་སྟོབས་བརྗོད། དེ་ནས་བྱེ་བྲག་ཏུ་བྱིན་གྱིས་རློབ་པ་ནི། ལག་པ་གཡས་རྡོ་རྗེ་རྩེ་གསུམ་པའི་ཕྱག་རྒྱ་བཅས་ལ། ཆ་དང་པོ་ལ་བསྟན་ཏེ། ༀ་སརྦ་ཀ་རི་ཧཱུཾ། ཞེས་པས། གཏོར་སྣོད་རིན་པོ་ཆེ་ལས་གྲུབ་པ་རྒྱ་ཚད་མེད་པར་བསམ། ༀ་སརྦ་སིདྡྷི་ཧཱུཾ། ཞེས་། བཅུད་གཏོར་རྫས་ཐམས་ཅད་ཡེ་ཤེས་ཀྱི་བདུད་རྩིའི་རང་བཞིན་རྒྱ་ཆེ་རྒྱུན་མི་ཆད་པ་ནམ་མཁའ་དང་མཉམ་པར་བསམ་མོ། །དེ་ནས་ཆ་དང་པོ་གཙང་གཏོར་དབུལ་བའི་ཕྱིར་མགོན་པོ་ཡོན་ཏན་གྱི་མགྲོན་རྣམས་ལ་སྙན་གསན་དབབ་པ་ནི། ཚངས་པ་དང་ནི་བརྒྱ་བྱིན་དང་། །རྒྱལ་ཆེན་བཞི་དང་ཕྱོགས་སྐྱོང་བཅུ། །ལྷ་དང་ཀླུ་དང་གནོད་སྦྱིན་དང་། །གཟའ་དང་རྒྱུ་སྐར་ལ་སོགས་པ། །ཕྱི་ཡི་མགོན་པོ་ཐུགས་དམ་ཅན། །དམ་ཚིག་དབང་གིས་སྤྱན་འདྲེན་ན། །གནས་འདིར་བརྩེ་བས་གཤེགས་པར་མཛོད། །དེ་ནས་སྤྱན་དྲང་བ་ནི། ལྕགས་ཀྱུའི་ཕྱག་རྒྱ་བཅས་ལ། ༀ་བཛྲ་ཨངྐུ་ཤ་ཨཱ་ཀཪྵ་ཡ་སརྦ། ༀ་དྷྲྀ་ཏ་རཥྚ་ཡ་གནྡྷརྦ་ཨ་དྷི་པ་ཏ་ཡེ་ཧཱུཾ་ཛཿ ༀ་བི་རཱུ་ཌྷ་ཀཱ་ཡ་ཀུནྭཱནྡྷེ་ཨ་དྷི་པ་ཏ་ཡེ་ཧཱུཾ་ཛཿ ༀ་བི་རཱུ་པཱཀྵ་ཡ་ནཱ་ག་ཨ་དྷི་པ་ཏ་ཡེ་ཧཱུཾ་ཛཿ ༀ་བཻ་ཤྲ་ཝ་ཎཱ་ཡ་ཡཀྵ་ཨ་དྷི་པ་ཏ་ཡེ་ཧཱུཾ་ཛཿ ༀ་བྲཧྨ་ཎེ་ཧཱུཾ་ཛཿ ༀ་ཨིནྡྲ་ཡ་ཧཱུཾ་ཛཿ ༀ་ཨགྣ་ཡེ་ཧཱུཾ་ཛཿ ༀ་ཡ་མཱ་ཡ་ཧཱུཾ་ཛཿ ༀ་ནཻ་ཏྲྀ་ཏྱ་ཡ་ཧཱུཾ་ཛཿ ༀ་ཝ་རུ་ཎཱ་ཡ་ཧཱུཾ་ཛཿ ༀ་ཝཱ་ཡ་ཝེ་ཧཱུཾ་ཛཿ ༀ་ཀུ་བེ་རཱ་ཡ་ཧཱུཾ་ཛཿ་ༀ་ཨཱི་ཤ་ནཱ་ཡེ་ཧཱུཾ་ཛཿ ༀ་པྲི་ཐི་ཝཱི་ཨ་དྷི་པ་ཏ་ཡེ་ཧཱུཾ་ཛཿ ༀ་ཨཥྚ་མ་ཧཱ་དཱེ་ཝ་ཧཱུཾ་ཛཿ ༀ་ཨཎྚ་མ་ཧཱ་གྲ་ཧ་ཧཱུཾ་ཛཿ ༀ་སརྦ་ནཀྵ་ཏྲ་ཧཱུཾ་ཛཿ ༀ་ཨཥྚ་མ་ཧཱ་ནཱ་ག་ཧཱུཾ་ཛཿ ༀ་ན་བ་མ་ཧཱ་ཡཀྵ་སེ་ནཱ་པ་ཏི་ཧཱུཾ་ཛཿ ཞེས་དང་། མཆོད་ཡོན་སྤྲེང་བཞིན་དུ། དད་པ་དང་ནི་དམ་ཚིག་གིས། །ཚུར་གཤེགས་ཆོས་སྐྱོང་མགོན་པོ་རྣམས། །མཆོད་ཡོན་བཞེས་ནས་འདི་ཉིད་དུ། །མཆོད་པས་བདག་ལ་དགྱེས་པར་མཛོད། །ༀ་ཨཱ་ཧ་ར་ཨཱ་ཧ་ར་སརྦ་བིདྱཱ་དྷཱ་ར་པཱུ་ཛི་ཏེ་ན་མཿས་མནྟ་བུདྡྷ་ནཱཾ་ག་ག་ཁཾ་ས་མ་ཡེ་སྭཱ་ཧཱ། ཞེས་མཆོད་ཡོན་དབུལ་ནས། པདྨ་ཀ་མ་ལ་ཡ་སྟྭཾ། ཞེས་གདན་ཕུལ་བ་ལ་བཞུགས་པར་བསམ་ཞིང་། །དེ་ནས་སོ་སོའི་ཕྱག་རྒྱ་དང་བཅས་ཏེ་མཆོད་པ་ནི། གཙང་ཞིང་གཙང་མར་སྦྱར་བ་ཡི། །ལྷ་རྫས་བཟང་པོའི་བདུག་སྤོས་འདི། །ཆོས་སྐྱོང་མགོན་པོ་རྣམས་ལ་འབུལ། །བསྟན་པ་བསྲུང་ཕྱིར་བཞེས་སུ་གསོལ། །ༀ་བཛྲ་དྷཱུ་པེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་བཞིན་བདུག་སྤོས་ཀྱི་གནས་སུ། མེ་ཏོག །མར་མེ། དྲི་ཆབ། ཞལ་ཟས། རོལ་མོ་རྣམས་དང་། དྷཱུ་པེའི་གནས་སུ། པུཥྤེ། ཨཱ་ལོ་ཀེ །གནྡྷེ། ནཻ་ཝི་དྱེ། ཤཔྡ་རྣམས་བཅུག་སྟེ་དབུལ་ཞིང་། སྔར་ལྟར་རོལ་མོའི་སྔགས་དང་། མཆོད་སྤྲིན་གྱི་གཟུངས་ཀྱང་བརྗོད། །དེ་ནས་བསྟོད་ཅིང་ཕྲིན་ལས་བཅོལ་བ་ནི། རི་རྒྱལ་ལྷུན་པོའི་ཕྱོགས་བཞི་ཡི། །སོ་སོའི་ཕོ་བྲང་བཀོད་ལེགས་ན། །ཟབ་ཅིང་རྒྱ་ཆེ་གཟིགས་པ་པོ། །ཡུལ་འཁོར་སྲུང་དང་འཕགས་སྐྱེས་པོ། །སྤྱན་མི་བཟང་དང་རྣམ་ཐོས་སྲས། །བཙུན་མོ་སྲས་དང་བློན་པོ་དང་། །འཁོར་གཡོག་སྡེ་དཔུང་བཅས་པ་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །དབང་པོ་རྡོ་རྗེ་འཆང་བའི་ལྷ། །ལྷ་ཡི་རྒྱལ་པོ་གདོན་གྱི་བདག །ཤར་ཕྱོགས་གདོན་གྱི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །མེ་སྟེ་བསྲེག་བྱ་ཟ་བའི་ལྷ། །དྲང་སྲོང་རྒྱལ་པོ་གདོན་གྱི་བདག །ཤར་ལྷོ་མེ་ལྷའི་ཚོགས་བཅས་ལ། །མཆོད་ཅིང་བསྟོད་དེ༴ །གཤིན་རྗེ་བེ་ཅོན་འཆང་བའི་ལྷ། །མ་མོའི་རྒྱལ་པོ་གདོན་གྱི་བདག །ལྷོ་ཕྱོགས་གཤིན་རྗེའི་ཚོགས་བཅས་ལ། །མཆོད་ཅིང་༴ །བདེན་དང་བྲལ་བ་ལེགས་ལྡན་ལྷ། །སྲིན་པོའི་རྒྱལ་པོ་གདོན་གྱི་བདག །ལྷོ་ནུབ་སྲིན་པོའི་ཚོགས་བཅས་ལ། །མཆོད་ཅིང་༴ །ཞགས་པ་ཐོགས་པ་ཆུ་ཡི་ལྷ། །ཀླུ་ཡི་རྒྱལ་པོ་གདོན་གྱི་བདག །ནུབ་ཕྱོགས་ཆུ་ལྷའི་ཚོགས་བཅས་ལ། །མཆོད་ཅིང་༴ །རླུང་སྟེ་སྲོག་ཀྱང་འཛིན་པའི་ལྷ། །རིག་འཛིན་རྒྱལ་པོ་གདོན་གྱི་བདག །ནུབ་བྱང་རླུང་ལྷའི་ཚོགས་བཅས་ལ། །མཆོད་ཅིང་༴ །གནོད་སྦྱིན་ལག་ན་དབྱུག་ཏོ་ཐོགས། །ནོར་སྲུང་རྒྱལ་པོ་གདོན་གྱི་བདག །བྱང་ཕྱོགས་གནོད་སྦྱིན་ཚོགས་བཅས་ལ། །མཆོད་ཅིང་༴ །དབང་དང་ལྡན་པ་འདྲེན་པའི་ལྷ། །འབྱུང་པོའི་རྒྱལ་པོ་གདོན་གྱི་བདག །བྱང་ཤར་དབང་ལྡན་ཚོགས་བཅས་ལ། །མཆོད་ཅིང་༴ །སྟེང་གི་ཚངས་པ་ཆེན་པོ་དང་། །ཉི་མ་ཟླ་བ་གཟའ་ཆེན་པོ། །གཟའ་དང་རྒྱུ་སྐར་བཅས་པ་ལ། །མཆོད་ཅིང་༴ །འོག་གི་ཀླུ་སྟེ་ས་ཡི་ལྷ། །ས་འཛིན་ལག་པ་ཆེན་པོ་དང་། །དམ་ཚིག་ཤེས་པའི་ཚོགས་བཅས་ལ། །མཆོད་ཅིང་བསྟོད་དེ༴ །ལྷ་ཆེན་བརྒྱད་དང་ཀླུ་ཆེན་བརྒྱད། །གཟའ་བརྒྱད་རྒྱུ་སྐར་ཉི་ཤུ་བརྒྱད། །འཇིགས་བྱེད་དགུ་ཡི་ཚོགས་བཅས་ལ། །མཆོད་ཅིང་བསྟོད་དེ་ཕྱག་ཀྱང་འཚལ། །མཐུ་ཆེན་འཇིག་རྟེན་སྐྱོང་བའི་གཙོ། །གཙང་རིས་དཔལ་མགོན་འཁོར་བཅས་ཀྱིས། །མཆོད་པ་དམ་པ་འདི་བཞེས་ལ། །བདག་གི་རེ་བ་སྒྲུབ་པར་མཛོད། །དེ་ནས། ཡོན་ཏན་གྱི་མགྲོན་རྣམས་ལ་གཏོར་མ་ཡེ་ཤེས་ཀྱི་བདུད་རྩི་རྒྱ་ཆེ་རྒྱུན་མི་ཆད་པར་ཕུལ་བས་དགྱེས་ཤིང་ཚིམ་པར་བསམ་སྟེ། ༀ་དྷྲྀ་ཏ་རཱཥྚཱ་ཡ་སྭཱ་ཧཱ། ༀ་བི་རཱུ་ཌྷ་ཀཱ་ཡ་སྭཱ་ཧཱ། ༀ་བི་རཱུ་པཱཀྵ་ཡ་སྭཱ་ཧཱ། ༀ་བཻ་ཤྲ་ཝ་ཎཱ་ཡ་སྭཱ་ཧཱ། ༀ་བྲ་ཧྨ་ཎེ་སྭཱ་ཧཱ། ༀ་ཨིནྡྲཱི་ཡ་སྭཱ་ཧཱ། ༀ་ཨགྣ་ཡེ་སྭཱ་ཧཱ། ༀ་ཡ་མཱ་ཡ་སྭཱ་ཧཱ། ༀ་ནཻ་ཏྲྀ་ཏྱ་ཡ་སྭཱ་ཧཱ། ༀ་ཝ་རུ་ཎཱ་ཡ་སྭཱ་ཧཱ། ༀ་ཝཱ་ཡ་ཝེ་སྭཱ་ཧཱ། ༀ་ཀུ་བེ་རཱ་ཡ་སྭཱ་ཧཱ། ༀ་ཨཱི་ཤ་ནཱ་ཡ་སྭཱ་ཧཱ། ༀ་སཱུཪྻཱ་ཡ་སྭཱ་ཧཱ། ༀ་ཙནྡྲཱ་ཡ་སྭཱ་ཧཱ། ༀ་པྲི་ཐི་ཝཱི་བྷྱཿསྭཱ་ཧཱ། ༀ་ནཱ་གེ་བྷྱཿསྭཱ་ཧཱ། ༀ་ཨ་སུ་རཻ་བྷྱཿསྭཱ་ཧཱ། ཞེས་པའི་མཐར། ན་མཿ སརྦ་ཏ་ཐཱ་ག་ཏེ་སོགས་ནམ་མཁའ་མཛོད་ཀྱི་སྔགས་བཏགས་ལ་རང་རང་གི་ཕྱག་རྒྱས་རྒྱལ་ཆེན་བཞི་དང་ཕྱོགས་སྐྱོང་བཅུ་ལ་དབུལ་ལོ། །དེ་ལ་རང་རང་གི་ཕྱག་རྒྱ་ནི། གཡས་པའི་ཁུ་ཚུར་གྱི་སྟེང་དུ་གཡོན་པའི་ཁུ་ཚུར་ནང་བསྟན་སྒྲེང་བ་ནི་ཡུལ་འཁོར་སྲུང་། གཡས་པའི་ཁུ་ཚུར་ལས་གུང་མཛུབ་སྒྲེང་བ་འཕགས་སྐྱེས་པོ། །རྡོ་རྗེ་ཕྱི་བསྡམས་ལས་མཛུབ་མོ་ཕྱུང་བ་མིག་མི་བཟང། རྡོ་རྗེ་ཕྱི་བསྡམས་ལས་མཐེའུ་ཆུང་སྒྲེང་བ་རྣམ་སྲས། མིག་སྟེང་དུ་ཕྱོགས་ཤིང་ཐལ་མོ་ཁོང་སྟོང་དུ་སྦྱར་བ་ནི་ཚངས་པ། ལག་གཉིས་ཀྱི་མཐེའུ་ཆུང་མཐེ་བོང་གིས་མནན་ཅིང་སོར་མོ་ལྷག་མ་གསུམ་སྒྲེངས་ཏེ་གཡོན་སྙིང་ག་དང་གཡས་དཀུར་བཞག་པ་ནི་དབང་པོ། །ལག་གཉིས་ཁུ་ཚུར་ལས་གུང་མོ་སྒྲེང་བའི་ཚིགས་གསུམ་པར་མཛུབ་རྩེ་སྦྱར་བ་གཡས་སྙིང་ག་དང་གཡོན་དཀུར་བཞག་པ་ནི་མེ་ལྷ། རྡོ་རྗེ་ནང་བསྡམས་ལས་སྲིན་ལག་གཉིས་བརྐྱང་བ་ནི་གཤིན་རྗེ། ལག་གཉིས་ཁུ་ཚུར་ལས་གུང་མཛུབ་གཉིས་བརྐྱང་བ་གཡས་སྙིང་ག་དང་གཡོན་དཀུར་བཞག་པ་ནི་སྲིན་པོ། ཁུ་ཚུར་གཉིས་ཀྱི་མཐེབ་མཛུབ་ཞགས་མིག་གི་ཚུལ་དུ་སྦྱར་བ་སྙིང་གར་བཞག་པ་ནི་ཆུ་ལྷ། སྔར་མེ་ལྷའི་ཕྱག་རྒྱ་ལྟར་བཅས་པ་ལས་གཡོན་སྙིང་ག་དང་གཡས་དཀུར་བཞག་པ་ནི་རླུང་ལྷ། རྡོ་རྗེ་ནང་བསྡམས་ལས་མཐེའུ་ཆུང་གཤིབས་ནས་བརྐྱང་བ་དེ་སྲིན་ལག་བརྐྱང་ཞིང་རྩེ་སྦྱར་བའི་ནང་དུ་བཅུག་པ་ནི་གནོད་སྦྱིན། རྡོ་རྗེ་ནང་བསྡམས་ལས་གུང་མོ་གཉིས་བརྐྱང་བའི་སེན་མོ་ལ་མཛུབ་མོ་གཉིས་རེག་ཅིང་མཐེ་བོང་གཉིས་སོ་སོའི་ཕྱོགས་ཀྱི་གུང་མོ་ལ་སྦྱར་བ་ནི་དབང་ལྡན། ཉི་མ་དང་ཟླ་བ་གཉིས་ནི་ཚངས་པ་དང་འདྲའོ། །མིག་མཐུར་དུ་བལྟ་ཞིང་ལག་གཉིས་ཐལ་མོ་ཁོང་སྟོང་དུ་སྦྱར་བ་ལས་མཐེ་བོང་གཉིས་ནང་དུ་བཅུག་ལ་ཐལ་མོའི་རྩེ་མོ་མཐུར་དུ་བསྟན་པ་ནི་ས་བདག་དང་། ཀླུ་དང་། ལྷ་མིན་གསུམ་གྱི་ཕྱག་རྒྱའོ། །ལྷ་ཆེན་བརྒྱད་ལ་ཐལ་མོ་ཁོང་སྟོང་ལས་གུང་མོ་གཤིབས་ལ་བསྣོལ། མཛུབ་མོ་བཀུག་པའི་སྟེང་དུ་མཐེ་བོང་བཞག་པའི་ཕྱག་རྒྱ་དང་། ༀ་དེ་བ་སྭཾ་སྭཾ་ཡ་སྭཱ་ཧཱ། ཞེས་པའི་སྔགས་ཀྱིས་དབུལ། ཀླུ་ཆེན་བརྒྱད་ལ་ལག་གཉིས་ཀྱིས་ཐལ་མོ་ཕྱིར་བསྟན་བཀན་པ་གདེགས་ཀ་ལྟར་བཟུང་བའི་རྒྱ་དང་། ༀ་རེ་རེ་ན་ཏི་ན་ནཱ་ག་ལི་རི་ཕུ་ཏ་ཏ་རི་ཙི་ཡེ་སྭ་ཧཱའི་སྔགས་དང་རྒྱས་དབུལ། གཟའ་ཆེན་བརྒྱད་ལ་ལག་གཉིས་གཅིག་ཏུ་སྦྱར་ཞིང་མཐེ་བོང་གཉིས་གཤིབས་ཏེ་སྒྲེང་བའི་རྒྱ་དང་། ༀ་གྲ་ཧེ་ཙ་རི་ཡ་པྲ་བ་དཾ་ཛོ་ཏི་མ་ར་ཡེ་སྭཱ་ཧཱའི་སྔགས་ཀྱིས དབུལ་ལོ། །རྒྱུ་སྐར་ཉེར་བརྒྱད་ལ་གཟའི་ཕྱག་རྒྱ་དེ་ཉིད་ལས་གུང་མོ་དང་མཐེ་བོང་གཉིས་ལྡོག་སྟེ་སྦྱར་བ་དང་། ༀ་ནཀྵ་ཏྲ་ད་ནི་རཏྣ་ད་ནི་ཡེ་སྭཱ་ཧཱའི་སྔགས་ཀྱིས་དབུལ། །འཇིགས་བྱེད་དགུ་ལ་ལག་གཡོན་པའི་ཐལ་མོ་ལྟེ་བའི་ཕྱོགས་སུ་བཀན་ཏེ་བཞག་པའི་མཛུབ་མོ་བཀུག་ཅིང་གཡས་པའི་གུང་མོ་སྒྲེང་བས་དེ་ལ་ཕྱོགས་པར་བྱས་པའི་རྒྱ་དང་། ༀ་ཡཀྵེ་པྲ་རཱ་ཡ་སྭཱ་ཧཱའི་སྔགས་ཀྱི་དབུལ་ལོ། །དེ་ལྟར་ལྷ་ཀླུ་ལ་སོགས་ཀྱི་སྔགས་མཐར་ཡང་ནམ་མཁའ་མཛོད་ཀྱི་སྔགས་བཏགས་ལ།ཐམས་ཅད་ལ་ལན་གསུམ་ལ་སོགས་པས་ཕུལ་ལ། འདོད་དོན་གསོལ་ཞིང་སྨོན་ལམ་གདབ་པ་ནི། ཚད་མ་མཆིས་པའི་མཆོད་སྦྱིན་གྱི་གཏོར་མ་འབུལ་ཞིང་བསྔོ་བའི་གནས་སུ་གྱུར་པ་ནི། ཡོན་ཏན་གྱི་མགྲོན་ཚངས་པ་དང་བརྒྱ་བྱིན། རྒྱལ་པོ་ཆེན་པོ་སྡེ་བཞི། ཕྱོགས་སྐྱོངས་བ་བཅུ། ལྷ་ཆེན་པོ་བརྒྱད། ཀླུ་ཆེན་པོ་བརྒྱད། གཟའ་ཆེན་པོ་བརྒྱད། རྒྱུ་སྐར་ཉི་ཤུ་རྩ་བརྒྱད། འཇིགས་བྱེད་ཆེན་པོ་དགུ། གནོད་སྦྱིན་གྱི་སྡེ་དཔོན་པཉྩི་ཀ་དང་། བཙུན་མོ་དཔལ་ལྡན་ཧ་རི་ཀ་དང་། སྲས་འཕྲོག་མའི་བུ་ལྔ་བརྒྱ་དང་། རྡོ་རྗེ་རིགས་ཀྱི་སྲུང་མ་ཐུགས་དམ་ཅན་གཙང་མར་གནས་པ་འཁོར་དང་བཅས་པ་རྣམས་ཀྱི་ཕོ་བྲང་དུ། ཡིད་བཞིན་གྱི་ནོར་བུ། དཔག་བསམ་གྱི་ལྗོན་ཤིང་། འདོད་འཇོའི་བ། མ་རྨོས་པའི་ལོ་ཏོག །ཁྲུས་ཀྱི་རྫིང་བུ། ཅང་ཤེས་ཀྱི་རྟ་ལ་སོགས་པ་འདོད་པའི་ཡོན་ཏན་མ་ཚང་བ་མེད་པ་བསམ་གྱིས་མི་ཁྱབ་པའི་མཆོད་རྫས་ཕུན་སུམ་ཚོགས་པ་འབྱུང་བར་གྱུར་ཅིག །དེ་ལྟར་བྱུང་བ་ཐུགས་བརྩེ་བས་དགོངས་ཏེ་བྱིན་གྱིས་བརླབས་ནས་བཞེས་སུ་གསོལ། ལོངས་སྤྱད་དུ་གསོལ། བདག་གིར་མཛད་དུ་གསོལ། དེ་ལྟར་ཕུལ་བས་བདག་ཅག་རྣམས་ཀྱི་མཆོད་པའི་ཡོ་བྱད་དམན་པ་དང་། རྒྱུ་རྐྱེན་མ་ཚོགས་པ་དང་། བརྗོད་པ་མ་དག་པ་དང་། ཏིང་ངེ་འཛིན་མི་གསལ་བ་དང་། སྤྱོད་ལམ་བག་མེད་པ་དང་། ལེ་ལོ་དང་སྙོམས་ལས་སུ་གྱུར་པ་ཅི་མཆིས་པ་ཐམས་ཅད་སྲུང་མ་དམ་ཚིག་ཅན་ཁྱེད་རྣམས་ཀྱི་སྤྱན་སྔར་མཐོལ་ཞིང་བཤག་སོ། །དེ་ལྟར་མཐོལ་ཞིང་བཤགས་པས་བདག་ཅག་དཔོན་སློབ་ཡོན་བདག་འཁོར་དང་བཅས་པ་རྣམས་ཀྱི་སྔོན་གྱི་ལས་ལས་གྱུར་ཀྱང་རུང་། འཕྲལ་གྱི་རྐྱེན་ལས་གྱུར་ཀྱང་རུང་། འཇིག་རྟེན་འདིར་ཡང་ནད་མང་བ་དང་། ཚེ་ཐུང་བ་དང་། སེམས་ཀྱི་སྡུག་བསྔལ་ཐམས་ཅད་བྱང་ཞིང་དག་པར་གྱུར་ཅིག །གཞན་ཡང་སྡང་བའི་དགྲ། གནོད་པའི་བགེགས་ལ་སོགས་པ་བསམ་པ་ངན་ཞིང་སྦྱོར་བ་རྩུབ་པར་བྱེད་པ་ཐམས་ཅད་དང་། རྨི་ལམ་ངན་པ་དང་། མཚན་མ་ངན་པ་དང་། ལྟས་ངན་པ་ཐམས་ཅད་ཕྱིར་བཟློག་ཅིང་ཞི་བར་མཛད་དུ་གསོལ། གཞན་ཡང་འབྱུང་པོ་མི་དང་མི་མ་ཡིན་པ། སྡང་བའི་སེམས་དང་ལྡན་པ། གདུག་པའི་སེམས་དང་ལྡན་པ། དྲག་ཤུལ་གྱི་སེམས་དང་ལྡན་པ། དེ་དག་ཐམས་ཅད་བཟློག་ཅིང་གདུལ་བ་དང་། ཞི་ཞིང་བསྒྱུར་བར་མཛད་དུ་གསོལ། གལ་ཏེ་ཞི་བས་གདུལ་དུ་མ་འཚལ་ན། གང་ལ་གང་འཚམས་པའི་ཆད་པས་བཅད་པ་དང་། བསྐྲད་ཅིང་གཟིར་བ་དང་། བསྡིགས་ཤིང་སྤ་བཀོང་བར་མཛད་དུ་གསོལ། སྲུང་མ་དམ་ཚིག་དང་མཐུ་སྟོབས་ཅན་ཁྱེད་རྣམས་ཀྱི་མངའ་འོག་ཏུ་མ་འདུས་པ་དང་། སྡེ་རིགས་སུ་གཏོགས་པ་གང་ཡང་མ་མཆིས་པས། དེ་དག་ཐམས་ཅད་ཞི་བ་དང་དུལ་བར་མཛད་དུ་གསོལ། མདོར་ན་ཉེས་པའི་སྐྱོན་ཐམས་ཅད་བྱང་ཞིང་དག་པ་དང་། ལེགས་པའི་ཡོན་ཏན་ཐམས་ཅད་འཕེལ་ཞིང་རྒྱས་པར་མཛད་དུ་གསོལ། ཞེས་གསོལ་ཏེ་གཙང་གཏོར་རོ། །དེ་ནས་ཆ་གཉིས་པ་སྤྱི་གཏོར་དབུལ་བའི་ཕྱིར་བརྟག་པ་བཞིའི་བྱིན་རླབས་སྔར་སོང་ནས། འདིར་ལག་གཡས་རྩེ་གསུམ་གྱི་རྒྱ་ཆ་བར་པ་ལ་གཏད་དེ། ༀ་སརྦ་ཀ་རི་ཧཱུཾ། ཞེས་པས་སྣོད་དང་། ༀ་སརྦ་སིདྡྷི་ཧཱུཾ་གིས་བཅུད་སྔར་ལྟར་རློབ་ཅིང་། ༀ་ཧྲཱིཿ པདྨནྟ་ཀྲྀཏ་སོགས་ཀྱིས་ང་རྒྱལ་གསལ་བཏབ་ལ། སྙིང་རྗེའི་མགྲོན་རྣམས་འགུགས་པ་ནི། ལྷ་དང་ལྷ་མིན་གནོད་སྦྱིན་ལྟོ་འཕྱེ་གྲུལ། ནམ་མཁའ་ལྔིང་དང་འདབ་བཟང་ལུས་སྲུལ་པོ། དྲི་ཟ་སྲིན་པོ་གདོན་གྱི་རིགས་རྣམས་དང་། གང་དག་ས་ལ་གནས་པའི་རྫུ་འཕྲུལ་ཅན། བུ་སྨད་བཅས་ཤིང་གཡོག་འཁོར་བཅས་པ་ལ། །བདག་གི་པུས་མོ་ས་ལ་བཙུགས་ནས་ནི། །ཐལ་མོ་སྦྱར་ནས་ཁྱོད་ལ་གསོལ་འདེབས་ཀྱིས། །གསན་ནས་ཕན་གདགས་སླད་དུ་འདིར་གཤེགས་ཤིག །སྲིད་རྩེ་མན་ཆད་མནར་མེད་ཡན་ཆད་དུ། །སྐྱེ་བ་རྣམ་བཞིས་བསྡུས་པའི་སེམས་ཅན་རྣམས། །གཏད་པ་མེད་པའི་མགྲོན་དུ་སྤྱན་འདྲེན་གྱིས། །དགའ་དང་གུས་པའི་སེམས་ཀྱིས་འདིར་གཤེགས་ཤིག །ༀ་ཨེ་ཧྱེ་ཧི་ལོ་ཀ་ཀཱ་ར་ཡ། དེ་བ། ནཱ་ག །ཡཀྵ། རཀྵ་ས། གནྡྷ་རྦ། ཨ་སུ་ར། ག་རུ་ཌ། ཀིནྣ་ར། མ་ཧོ་རཱ་ག །མ་ནུ་ཥྱེ། ཨ་མ་ནུ་ཥྱ་ས་པ་རི་ཝཱ་ར་ས་མ་ཡ། ཨ་ནྲྀ་སུ་ཏྲི་པྲེ་དུ་ཛཿཧཱུཾ་བཾ་ཧོཿཞེས་བཀུག་ལ། ༀ་དེ་བ་ག་ཎེ་བྷྱཿ ནཱ་ག་ག་ཎེ་བྷྱཿ ཡཀྵ་ག་ཎེ་བྷྱཿ རཀྵ་ས་ག་ཎེ་བྷྱཿ གནྡྷ་རྦ་ག་ཎེ་བྷྱཿ ཨ་སུ་ར་ག་ཎེ་བྷྱཿ ག་རུ་ཌ་ག་ཎེ་བྷྱཿ ཀནྣི་ར་ག་ཎེ་བྷྱཿ མ་ཧོ་རཱ་ག་ག་ཎེ་བྷྱཿ མ་ནུ་ཥྱེ་ག་ཎེ་བྷྱཿ ཨ་མ་ནུ་ཥྱ་ག་ཎེ་བྷྱཿ ཞེས་པའི་མཐར། ༀ་བཛྲ་དྷཱུ་པེ། པུཥྤེ། ཨཱ་ལོ་ཀེ གནྡྷེ། ནཻཝིདྱེ། ཤཔྡ་པཱུ་ཛ་མེ་གྷ་སོགས་ཀྱིས་མཆོད་པ་ལྔ་དང་། ཡང་། ༀ་དེ་ཝ་ག་ཎེ་བྷྱཿ སོགས་ཀྱིས་མཐར། ན་མཿསརྦ་ཏ་ཐཱ་ག་ཏེ་བྷྱོ་སོགས་བཏགས་པའ་ིསྔགས་ལན་གསུམ་དང་། ལག་གཡས་མཆོག་སྦྱིན་འདེགས་རྒྱ་དང་གཡོན་ཁུ་ཚུར་བཅང་པ་ལས་མཛུབ་མོ་སྒྲེང་བ་གཏོར་མའི་ཕྱོགས་སུ་གཏད་པའི་ཕྱག་རྒྱས་གཏོར་མ་ཕུལ་བས། སྙིང་རྗེའི་མགྲོན་རྣམས་ཀྱི་སྤྱོད་ཡུལ་དུ་རང་རང་གི་མོས་པ་དང་མཐུན་པའི་ཡོ་བྱད་དཔག་ཏུ་མེད་པ་ཐོབ་པས་ཚིམ་པར་བསམ་ལ། བསྔོ་ཞིང་སྨོན་ལམ་གདབ་པ་ནི། ན་མོ། མཆོད་སྦྱིན་གྱི་གཏོར་མ་བར་པ་འདི་འབུལ་ཞིང་བསྔོ་བའི་གནས་སུ་གྱུར་པ་ནི་མཐོ་སྲིད་པའི་རྩེ་མོ་མན་ཆད་ནས། དམའ་ན་རག་དམྱལ་ཁམས་ཡན་ཆད་དུ་རྒྱུ་ཞིང་གནས་པ། འགྲོ་བ་རིགས་དྲུག །ལམ་བརྒྱུད་ལྔ། སྐྱེ་གནས་རྣམ་པ་བཞིས་བསྡུས་པའི་སེམས་ཅན་སྙིང་རྗེའི་མགྲོན་དུ་གྱུར་པ་ཐམས་ཅད་ལ་འབུལ་ལོ། །གསོལ་ལོ། །མཆོད་དོ། །མགྲོན་ནོ། །དེ་ལྟར་བསྔོས་པས་རིགས་དྲུག་སོ་སོའི་སྡུག་བསྔལ་ལས་གྲོལ་ནས་མྱུར་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་གྱུར་ཅིག །གཞན་ཡང་ལོང་བ་རྣམས་ཀྱིས་གཟུགས་མཐོང་བ་གྱུར་ཅིག །འོན་པ་རྣམས་ཀྱི་རྣ་བས་སྒྲ་ཐོས་པར་གྱུར་ཅིག །དིག་པ་རྣམས་ཀྱིས་སྨྲ་ཤེས་པར་གྱུར་ཅིག །ཞ་བོ་རྣམས་བདེ་བར་འགྲོ་ནུས་པར་གྱུར་ཅིག །གཅེར་བུ་རྣམས་ཀྱིས་གོས་རྙེད་པར་གྱུར་ཅིག །དབུལ་པོ་རྣམས་ཀྱིས་ནོར་རྙེད་པར་གྱུར་ཅིག །ལྟོགས་པ་རྣམས་ཀྱིས་བཟའ་བཏུང་རྙེད་པར་གྱུར་ཅིག །འཇིགས་པ་རྣམས་ཀྱིས་སྐྱབས་རྙེད་པར་གྱུར་ཅིག །ནད་པ་རྣམས་ཀྱི་ནད་ཞི་བར་གྱུར་ཅིག །སྦྱིན་པ་དམ་པ་སེམས་ཀྱི་རྒྱན་དུ་གྱུར་ཅིག །སེམས་ཀྱི་ཡོ་བྱད་དུ་གྱུར་ཅིག །དོན་གྱི་མཆོག་ཏུ་གྱུར་ཅིག །འདི་ལྟར་མཆོད་སྦྱིན་གྱི་གཏོར་མ་འདི་ལ་བརྟེན་ནས་གནས་སྐབས་སུའང་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ཀྱི་ནད་དང་གནོད་པ་ཞི་ཞིང་ཚེ་དང་བསོད་ནམས་འཕེལ་བ་དང་། བདག་སོགས་སེམས་ཅན་ཐམས་ཅད་ཀྱི་སྒྲིབ་གཉིས་བྱང་། ཚོགས་རྣམ་པ་གཉིས་རྫོགས་ནས་བླ་ན་མེད་པའི་བྱང་ཆུབ་རིན་པོ་ཆེ་མྱུར་དུ་ཐོབ་པར་གྱུར་ཅིག །འབྱུང་པོ་གང་དག་རི་རབ་སྟེང་གནས་དང་། །དགའ་བའི་ཚལ་དང་ལྷ་ཡི་གནས་རྣམས་དང་། །ཤར་ནུབ་རི་དང་ཉི་ཟླའི་ཁྱིམ་རྣམས་དང་། །རི་བོ་ཀུན་ལ་གང་དག་གནས་པ་དང་། །རིན་ཆེན་གླིང་ན་ལྷག་པར་གང་གནས་དང་། །ཆུ་བོ་ཀུན་དང་ཆུ་ཡི་མདོ་རྣམས་དང་། །མཚོ་དང་རྫིང་བུ་ལྟེང་ཀ་ཆུ་ངོགས་དང་། །གཡའ་ཆུ་བསིལ་མ་ཅན་ན་གང་གནས་དང་། །གྲོང་དང་ཕྱུགས་ལྷས་གྲོང་ཁྱེར་སྟོངས་པ་དང་། །ཁང་སྟོང་དག་དང་ལྷ་ཡི་ཁང་པ་དང་། །གཙུག་ལག་ཁང་དང་མཆོད་རྟེན་གནས་རྣམས་དང་། །དཀའ་ཐུབ་གནས་དང་གླང་ཆེན་བྲེས་རྣམས་དང་། །རྒྱལ་པོའི་དཀོན་ཁང་དག་ན་གནས་པ་དང་། །ལམ་སྲང་སུམ་མདོ་དང་ནི་བཞི་མདོ་དང་། །གང་དག་ལམ་པོ་ཆེ་དང་ཤིང་གཅིག་དྲུང་། །དུར་ཁྲོད་ཆེན་པོ་ནགས་ཚལ་ཆེན་པོ་དང་། །སེང་གེ་དྲེད་དང་གཅན་གཟན་གནས་རྣམས་དང་། །འབྲོག་ཆེན་འཇིགས་སུ་རུང་བ་གང་གནས་དང་། །གང་དག་གླིང་མཆོད་དག་ན་གནས་པ་དང་། །ལྷུན་པོ་དུར་ཁྲོད་དག་ན་གནས་པ་རྣམས། །རབ་ཏུ་དགྱེས་ཤིང་མགུ་བར་གྱུར་ནས་སུ། །ཕྲེང་བ་དྲི་དང་བྱུག་པ་མེ་ཏོག་དང་། །བསྟོད་དང་གཏོར་མ་མར་མེ་གུས་འབུལ་ན། །འདི་དག་གསོལ་ཞིང་ལེགས་པར་བསྣམས་ནས་ཀྱང་། །བདག་གི་ལས་ཀྱི་འབྲས་བུ་མཆིས་པར་མཛོད། །བདག་གི་བསོད་ནམས་མཐུ་ཡིས་ནི། །སེམས་ཅན་ཐམས་ཅད་བདེ་གྱུར་ཅིག །ཀུན་ཀྱང་གནོད་པ་རྣམས་དང་བྲལ། །སྒྲིབ་པ་མེད་པའི་ཚུལ་གྱིས་སུ། །མ་ཐོགས་པར་ནི་འགྲུབ་པར་ཤོག །བྱོལ་སོང་གཅིག་ལ་གཅིག་ཟ་བ། །གནོད་པ་དེ་དག་ཡོངས་མི་འབྱུང་། །ཡི་དྭགས་རྣམས་ལ་ཟས་དང་སྐོམ། །ཐོགས་པ་མེད་པར་འབྱུང་བར་ཤོག །སེམས་ཅན་དམྱལ་བའི་སྡུག་བསྔལ་གང་། །མི་ཟད་རྣམ་པ་སྣ་ཚོགས་དག །བསོད་ནམས་འདི་ཡི་བྱིན་རླབས་ཀྱིས། །དེ་དག་མྱུར་དུ་ཞི་གྱུར་ཅིག །སའམ་མཁའ་ལ་འཁོད་པ་ཡི། །ལྷ་ཀླུ་གནོད་སྦྱིན་སྲིན་པོ་དང་། །འབྱུང་པོ་མང་པོ་གང་འཁོད་པའི། །དག་པའི་བསམ་པ་རྫོགས་གྱུར་ཅིག །ཅེས་ལས་བཅོལ་ཞིང་བསྔོས་ནས། ཆོས་རྣམས་ཐམས་ཅད་རྒྱུ་ལས་བྱུང་། །སོགས་དང་། སྡིག་པ་ཅི་ཡང་མི་བྱ་སྟེ། ཞེས་པ་ལ་སོགས་པས་ཆོས་ཀྱི་སྦྱིན་པའང་བྱིན་པའི་མཐར། ཁྲོ་བོ་ཆེན་པོའི་བཀའ་ཡིན་ནི། །རང་རང་གནས་སུ་བདེ་བར་དེངས། །བཛྲ་མུཿ ཡ་ཧི་གཙྪས་རང་གནས་སུ་བཏང་ངོ་། །དེ་ནས་ཆ་གསུམ་པ་བགེགས་གཏོར་སྟེར་པའི་ཕྱིར། བརྟགས་པ་བཞིས་སྤྱིར་རློབས་པ་རྔར་སོང་ནས། འདིར་རྩེ་གསུམ་གྱི་རྒྱ་གཏོར་མ་ཐ་མ་ལ་གཏད་དེ། ༀ་སརྦ་ཀ་རི་ཧཱུཾ། ༀ་སརྦ་སིདྡྷི་ཧཱུཾ། ཞེས་པས་སྣོད་བཅུད་ལྔར་ལྟར་རློབ་ཅིང་། ༀ་ཧྲཱིཿཔདྨནྟ་ཀྲྀཏ་སོགས་ཀྱིས། བདག་ཉིད་རྟ་མགྲིན་སྐུ་ཆེ་ལ་བཟོད་པར་དཀའ་བའི་གཟི་བྱིན་ཅན་ཁྲོ་ཚོགས་འབར་བའི་སྤྲིན་སྤྲོ་བའི་ང་རྒྱལ་གསལ་བཏབ་སྟེ་བསྟོད་པ་ནི། ཧྲཱིཿ རྒྱལ་བ་ཀུན་གྱི་བདག་པོ་ཆོས་ཀྱི་སྐུ། །ཆོས་རྗེ་འོད་དཔག་མེད་པ་རྡོ་རྗེ་ཆོས། །སྤྱན་རས་གཟིགས་སྤྲུལ་ཧྲཱིཿལས་རྔམས་ཆེན་སྐུ། །རྟ་མགྲིན་རྟ་སྐད་བཞད་ལ་ཕྱག་འཚལ་ལོ། །དབང་ཆེན་དབང་འདུལ་དབང་གི་རྒྱལ་པོ་སྟེ། །དབང་གི་མདོག་དམར་བསྐལ་པའི་མེ་ལྟར་འབར། །དབང་ཆེན་རྔམས་བརྗིད་ཉི་མ་འབུལ་གྱི་གཟི། །དབང་མཛད་དབང་གི་སྐུ་ལ་ཕྱག་འཚལ་ལོ། །ཆོས་ཉིད་བདུད་རྩི་མཆོག་གི་དབང་བསྐུར་ཞིང་། །དུག་གསུམ་གཏན་ནས་འཐུང་མཛད་དཔལ་འབར་བ། །གདུག་པའི་ཀླུ་རྣམས་བརྗིད་པའི་ཞབས་ཀྱིས་གནོན། །དུག་ཆེན་བདུག་རྩིར་བསྒྱུར་ལ་ཕྱག་འཚལ་ལོ། །རིག་པའི་རྒྱ་པོ་ཁྲོ་བོ་ཀུན་གྱི་རྗེ། །བྱམས་ཆེན་རབ་ཁྲོས་ཁྲོ་རྒྱལ་ཀུན་གྱིས་བསྐོར། །སྟོང་ཉིད་དབྱིངས་ལས་མ་གཡོས་མཁའ་དཀྱིལ་ནས། །འཇིགས་གཟུགས་ཉི་ཟླ་འབར་ལ་ཕྱག་འཚལ་བསྟོད། །རང་ཉིད་རྟའི་ང་རྒྱལ་དང་ལྡན་པས། ཆོས་ཐམས་ཅད་རང་བཞིན་གྱིས་རྣམ་པར་དག་ཅིང་ཅི་ཡང་མ་ཡིན་པ་ལ་ཇི་ལྟར་བསམ་པ་བཞིན་འབྱུང་བའི་བདེན་པ་དང་། དུས་གསུམ་གྱི་སངས་རྒྱས་ཐམས་ཅད་ཀྱིས་ཡེ་ཤེས་ཐུགས་སུ་ཆུད་ཅིང་སེམས་ཅན་གྱི་དོན་ལ་དགོངས་པ་སྐད་ཅིག་ཀྱང་མི་གཡེལ་བའི་བདེན་པ་དང་། དུས་གསུམ་གྱི་རྒྱལ་བ་རྣམས་ཀྱི་དགོངས་པ་བསྐང་ཞིང་སེམས་ཅན་གྱི་མགོན་སྐྱབས་མཛད་པར་ཞལ་གྱི་བཞེས་པའི་བདེན་པའི་བྱིན་རླབས་དང་། བདག་གི་ལྷག་པའི་བསམ་པ་རྣམ་པར་དག་པའི་བདེན་པ་དང་། དཀོན་མཆོག་གསུམ་དག་བླ་མ་དམ་པའི་བཀའ་བདེན་པའི་བྱིན་རླབས་ཀྱིས། གདུག་ཅིང་སྡང་བའི་སེམས་དང་ལྡན་པའི་བགེགས་ཀྱི་རིགས་ཐམས་ཅད་སྐད་ཅིག་ལ་འདིར་འདུས་ཤིག །ཅེས་བདེན་སྟོབས་བརྗོད། ཕཊ་ཕཊ་བཛྲ་ཀྲོ་དྷ་ཛྭ་ལ་མཎྜལ་ཧ་ལ་ཧ་ལ། ཞེས་པས། སྤྲུལ་པའི་ཕོ་ཉ་མཁའ་ཁྱབ་ཏུ་སྤྲོས་པ་རྣམས་ཀྱིས་བགེགས་རྣམས་རང་དབང་མེད་པར་བཀུག་པར་བསམ་ཞིང་། ལྕགས་ཀྱུའི་ཕྱག་རྒྱ་བཅས་ལ། ༀ་ཏྲང་ཀ་རི་ཏྲང་ཀ་རི། མི་ཙི་མི་ཙི། ར་ར་སྲ་སྲ་ཏྲི་ཏྲི། གཾ་གཾ་གུཾ་གུཾ། ཏྲི་ཡཾ་ཛཿ བཛྲ་ཨངྐུ་ཤ་ཛཿ བཛྲ་པཱ་ཤ་ཧཱུཾ། བཛྲ་སྥོ་ཊ་བཾ། བཛྲ་གྷཎྜེ་ཧོཿ ཞེས་པས་བཀུག་ལ། ༀ་ཏྲང་ཀ་རི་ཏྲང་ཀ་རི་སྭཱ་ཧཱ། མི་ཙི་མི་ཙི་སྭཱ་ཧཱ། གུཾ་ཧིང་གུཾ་ཧིང་སྭཱ་ཧཱ། ཨ་ནརྟ་རི་ཀྵ་ར་ཙ་ནཾ་སྭཱ་ཧཱ། བོ་པུ་ཏ་མ་ནཾ་སྭཱ་ཧཱ། བ་ཏ་ལ་བ་ས་ནཾ་སྭཱ་ཧཱ། མ་ཏྲི་ནཾ་སྭཱ་ཧཱ། གྲ་ཧ་ནཾ་སྭཱ་ཧཱ། ༀ་སརྦ་བིགྷྣཱན་གྲྀཧྞེ་དཾ་ཨརྒྷཾ་སྭཱ་ཧཱ། ནས། ཤཔྡའི་བར་གྱི་མཆོད། ༀ་ཏྲང་ཀ་རི་ནས། ༀ་སརྦ་བིགྷྣཱཾ་གྱི་བར་སྔར་ལྟར་གྱིས་མཐར། ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཐཱ་ཁཾ་ཨུཏྒ་ཏེ་སྥ་ར་ཎེ་ཨི་མཾ་ག་ག་ན་ཁཾ་གྲྀ་ཧྞེ་དཾ་བ་ལིཾ་ཏ་སྭཱ་ཧཱ། ཞེས་པའི་སྔགས་བཏགས་པ་ལན་གསུམ་དང་། ལག་གཡོན་ཁུ་ཚུར་གྱེན་བསྟན་གྱི་མཛུབ་མོ་སྒྲེང་བ་གཏོར་མར་གཏད། །གཡས་པ་སྔགས་ཚན་སོ་སོའི་མཐར་སེ་གོལ་གཏོགས་པའི་རྒྱས་གཏོར་མ་ཕུལ་བས། གནོད་ཅིང་འཚེ་བའི་བགེགས་རྣམས་ཀྱི་སྤྱོད་ཡུལ་དུ་རང་རང་གི་མོས་པ་དང་མཐུན་པའི་ཡོ་བྱད་ཟད་མི་ཤེས་པ་ཐོབ་པས་སོ་སོའི་རྒྱུད་ཚིམ་ནས་བུ་ལོན་དང་ལན་ཆགས་ཤ་འཁོན་ཐམས་ཅད་བྱང་སྟེ་ཕན་ཚུན་བྱམས་པ་ལ་གནས་པར་བསམ་ལ། བསྔོ་ཞིང་སྨོན་ལམ་གདབ་པ་ནི། ན་མོ། མཆོད་སྦྱིན་གྱི་གཏོར་མ་ཐ་མ་འདི་སྦྱིན་ཞིང་བསྔོ་བའི་གནས་སུ་གྱུར་པ་ནི་བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ཀྱི་ཚེ་རབས་ཐོག་མ་མེད་པ་ནས་ད་ལྟ་ཡན་ཆད་ཀྱི་ལན་ཆགས་དང་བུ་ལོན་གྱི་མགྲོན་དུ་གྱུར་པ་བགེགས་རིགས་སྟོང་ཕྲག་བརྒྱད་ཅུ་སོགས་གདོན་བགེགས་ཀྱི་རིགས་ཐམས་ཅད་ལ་ལུས་དང་སྲོག་གི་གླུད་དང་ལོངས་སྤྱོད་ཀྱི་སྐྱིན་དུ་འབུལ་ལོ། །མཆོད་དོ། །མགྲོན་ནོ། །དེ་ལྟར་ཕུལ་བས་བསད་པས་ཚེ་ཐུང་བ། བརྡུངས་པས་ནད་མང་བ། འཕྲོག་པས་ནོར་དབུལ་བའི་ལན་ཆགས་ཐམས་ཅད་བྱང་ཞིང་དག་པར་གྱུར་ཅིག །བུ་ལོན་ཐམས་ཅད་ཁྱེར་བར་གྱུར་ཅིག །འཁོན་རྩོད་ཐམས་ཅད་བྱང་བར་གྱུར་ཅིག །བགེགས་ཀྱི་བར་ཆད་ཐམས་ཅད་ཞི་བར་གྱུར་ཅིག །སྔར་གྱི་གནོད་པ་འཕྲོ་བསྡུས་ལ། ཕྱིན་ཆད་མི་བྱེད་པའི་དམ་བཅའ་བརྟན་པོ་ཁས་ལོངས་ཤིག །ཅེས་བཀའ་བསྒོས་ལ། དྲི་ཆབ་འཐོར་བཞིན་དུ་དམ་བསྒྲག་སྟེ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་ཉམས་ན་བསྲེག་པར་བྱེད། །དམ་ཚིག་བསྲུང་ན་དངོས་གྲུབ་མཆོག །རྡོ་རྗེ་བདུན་རྩིའི་ཆུ་འདིས་འགྲུབ། །ཅི་སྟེ་དམ་ཚིག་ལས་འདས་ན། །རྡོ་རྗེ་འཛིན་རྒྱལ་ཁྲོས་ནས་ཀྱང་། །དེ་མ་ཐག་ཏུ་བཀས་ནས་ནི། །བདུན་རྒྱུད་རིགས་ཀྱང་བརླག་པར་བྱེད། །ༀ་བཛྲ་ཀྲོ་དྷ་ས་མ་ཡ་ཧ་ན་ཧ་ན་ཧཱུཾ་ཕཊ། རྡོ་རྗེ་ཆེན་པོ་མཆོག་འཛིན་པ། །མགོན་པོ་ཆེན་པོས་བྱིན་རླབས་པས། །བློ་ལྡན་གང་ཞིག་འདའ་བ་ནི། །རྡོ་རྗེ་འཛིན་པས་མོད་ལ་སྤོང་། །སྤངས་པའི་སེམས་ཅན་ཆེན་པོ་སྟེ། །ཇི་སྙེད་འཁོར་བའི་སྤྱོད་རྒྱུད་དུ། །ངན་སོང་གསུམ་དུ་ཡང་ནས་ཡང་། །ཤིན་ཏུ་མི་བཟད་ཆོ་ངེས་འདེབས། །བདག་ཉིད་ཆེན་པོ་སངས་རྒྱས་བཀའི། །ཚིག་ལས་འདས་ན་རྡུལ་ཕྲན་བཞིན། །ང་ནི་དབང་ཕྱུག་ཆེན་པོ་སྟེ། །རྒྱལ་ཆེན་རིགས་བཞི་ང་ཡི་གཡོག །ལྷ་སྲིན་སྡེ་བརྒྱད་ང་ཡི་བྲན། །དམ་ཚིག་དག་ལས་འདའ་མ་བྱེད། །དེ་ལྟར་ཁྱོད་ཀྱིས་ཤེས་གྱིས་ལ། །བདེ་བར་གཤེགས་པའི་བཀའ་མ་བཅག །དམ་པ་ཆོས་ཀྱི་གཞུང་མ་དབྲལ། །སེམས་ཅན་དམྱལ་བའི་རྒྱུ་མ་གསོག །རྣལ་འབྱོར་རྣམ་ཀྱི་བཀའ་མ་འདའ། །སྔགས་ཀྱི་དམ་ཚིག་ཚུལ་མ་བཤིག །ཅེས་བསྒྲག །སྡིག་པ་ཅི་ཡང་མི་བྱ་སྟེ། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་དུལ། །འདི་ནི་སངས་རྒྱས་བསྟན་པ་ཡིན། །ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པ་ལེགས་པ་ཡིན། །ཡིད་ཀྱི་སྡོམ་པ་ལེགས་པ་ཡིས། །ཐམས་ཅད་དུ་ནི་སྡོམ་པ་ལེགས། །ཐམས་ཅད་བསྲུང་བའི་དགེ་སློང་དག །སྡུག་བསྔལ་ཀུན་ལས་ངེས་པར་གྲོལ། །ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་འབྱུང་། །དེ་ལྟར་ཆོས་རྣམས་ཤེས་གྱིས་ལ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སྐྱོབ་པའི་སྲས་སུ་སྐྱེ། །ཞེས་པས་ཆོས་སྦྱིན་བྱིན་ལ། གནོད་པའི་ལས་སྤང་བར་གདམས་པ་ནི། རྒྱན་གྱིས་བརྒྱན་པར་བྱས་ཀྱང་ཆོས་སྤྱོད་ཅིང་། །དུལ་ཞིང་ཡང་དག་སྡོམ་ལ་ཚངས་པར་སྤྱོད། །འབྱུང་པོ་ཀུན་ལ་ཆད་པ་སྤངས་པ་ནི། །དགེ་སློང་དགེ་སྦྱོང་དེ་ཡིན་བྲམ་ཟེའང་དེ། །མཚོན་ཆས་མི་འཇིགས་གང་ཡང་མེད། །འཚོ་བའི་སྲོག་ལ་ཀུན་ཀྱང་འཛེམ། །རང་གི་ལུས་ལ་དཔེ་ལོང་ལ། །གཞན་ལ་གནོད་པ་མ་བྱེད་ཅིག །ༀ། ཆེན་པོའམ་ཆུང་ངུ་གང་དག་གི །ལུས་ལ་མངོན་པར་གནོད་གྱུར་པའི། །ནད་དེ་ཉེ་བར་ཕྱུངས་ནས་སུ། །གདོན་དེ་རང་གི་གནས་སུ་དེངས། །ༀ་སརྦ་བིགྷྣཾ་ཡ་ཧི་གཙྪ། ཞེས་དང་། ༀ་སུ་མྦྷ་ཞེས་སོགས་ཀྱི་རང་རང་གི་གནས་སུ་བསྐྲད་ཅིང་། གཏོར་མ་འཕྲལ་དུ་གཤེགས་ན་བགེགས་གཏོར་དེ་ཉིད་དུ་བཏང་། །ཆ་དང་པོ་གཉིས། འཇིག་རྟེན་སྐྱོང་བ་གྲགས་ལྡན་པ། །གཙང་རིགས་དཔལ་མགོན་བདུན་ཅུ་ལྔ། །འཁོར་དུ་གཏོགས་པའི་སྡེ་བརྒྱད་སོགས། །མི་དང་མི་མིན་འབྱུང་པོའི་ཚོགས། །བདག་གི་རྣམ་ལྔའི་མཆོད་པ་དང་། །མཆོད་སྦྱིན་གཏོར་མ་བླང་བར་མཛོད། །དེ་དག་རྣམས་ཀྱི་བརྩོན་འགྲུས་དང་། །གཟི་བརྗིད་དབང་ཕྱུག་སྟོབས་ཀྱིས་ཀྱང་། །མི་ཤིས་པ་ཀུན་འཇོམས་གྱུར་ཅིག །འཇིག་རྟེན་བདེ་ཞིང་ལོ་ལེགས་དང་། །ཞེས་སོགས་ཀྱིས་གཙང་སར་དབུལ་ལོ། །དེ་ནས། ༀ་བཛྲ་ས་ཏྭ་ཧཱུཾ། ཞེས་པས། བདག་ཉིད་རྡོར་སེམས་སུ་ང་རྒྱལ་འཕོས་ཏེ། མདུན་བསྐྱེད་ཀྱི་དཀྱིལ་འཁོར་གསལ་བཏབ་ནས། ༀ་སརྦ་ཏ་ཐཱ་ག་ཏ་བཛྲ་ས་ཏྭ་ས་པ་རི་ཝཱ་ར་ཨརྒྷཾ་ལ་སོགས་པས་མཆོད། བསྟོད་པར་འོས་པ་ཐམས་ཅད་ལ། །ཞེས་སོགས་ཀྱི་བསྟོད་ནས། བླ་མ་དང་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའི་ཚོགས་ཐམས་ཅད་བདག་ཅག །རྣམས་ལ་དགོངས་སུ་གསོལ། ཁྱེད་རྣམས་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས་བསམ་གྱིས་མི་ཁྱབ་པ་མངའ་བ་ལགས་པས། སྤྱིར་སངས་རྒྱས་ཀྱི་བསྟན་པ་དར་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་རྣམས་སྐུ་ཚེ་བརྟན་ཞིང་ཐུགས་ཀྱི་བཞེད་པའི་དོན་ལྷུན་གྱིས་གྲུབ་པ་དང་། བདག་དང་སེམས་ཅན་ཐམས་ཅད་བདེ་ཞིང་སྐྱིད་པར་བྱིན་གྱིས་བརླབ་ཏུ་གསོལ། ཁྱད་པར་དུའང་བདག་ཅག་དཔོན་སློབ་ཡོན་མཆོད་འཁོར་དང་བཅས་པས་ཐོག་དྲངས་སེམས་ཅན་ཐམས་ཅད་ཀྱི་གནས་སྐབས་སུ་མཐར་ཐུག་གི་མི་མཐུན་པའི་ཕྱོགས་ཐམས་ཅད་ཞི་ནས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཚེ་འདི་ཉིད་ལ་ཐོབ་པར་བྱིན་གྱིས་བརླབ་ཏུ་གསོལ། ཞེས་འདོད་དོན་ལ་གསོལ་བ་བཏབ། ཡིག་བརྒྱ་བཟླ་ཞིང་། མ་རྙེད་ཡོངས་སུ་མ་ཚང་དང་། ཞེས་སོགས་ཀྱིས་བཟོད་པར་གསོལ། དཀྱིལ་འཁོར་ལ་མི་གཤེགས་ན། འདིར་ནི་གཟུགས་དང་སོགས་ཀྱི་བརྟན་བཞུགས་བྱ། གཤེགས་སུ་གསོལ་ན། རྡོ་རྗེ་སེམས་དཔའ་སེམས་དཔའ་ཆེ། །ཁྱེད་ཀྱིས་སེམས་ཅན་དོན་ཀུན་མཛད། །ཅེས་སོགས་ཀྱིས་མཐར། ཨ་ཧཾ ཡུ་ཏི་ཛཿ བཛྲ་མུཿ ཞེས་པས་ཡེ་ཤེས་ཀྱི་འཁོར་ལོ་དང་གཏོར་མགྲོན་རྣམས་གཤེགས། དམ་ཚིག་པ་རང་ལ་བསྡུ། རང་ཉིད་ལྷར་གསལ་བའི་སྤྱི་བོ་ནས་ཧཱུཾ་ཡིག་ཞུ་བ་ཐིམ་པས་ལུས་ཐམས་ཅད་རྡོ་རྗེའི་གོ་ཆས་གཏམས་པར་བསམ་ལ། དགེ་བ་བསྔོ་ཞིང་ཤིས་པ་བརྗོད་པས་བདེ་ལེགས་སུ་བྱའོ། །དེ་ཡང་ཕྱག་བཞེས་སུ་ཕྱིའི་ཐུགས་དམ་སྐོང་བའི་ཚེ་འདི་ཉིད་སྔར་དཀྱུས་སུ་བཀོད་པ་ལྟར་རྒྱས་པར་བཏང་རྗེས་བརྟན་བཞུགས་བྱས་ནས། མདོ་དབང་མ་གྲོལ་བར་མི་བསྡུ་བར། ཉིན་རེ་ཞིང་བདག་བསྐྱེད་དཀྱིལ་འཁོར་གང་དང་འབྲེལ་བ་དེས་མཛད་ཅིང་མདུན་བསྐྱེད་ཀྱང་སྒོ་འབྱེད་ཀྱི་དུས་ཕྱག་རྡོར། ལྷ་མི་ལ་རྣམ་སྣང་། ཉན་རང་ལ་ཤཱཀ་ཐུབ་སོགས་གཙོ་བོ་སྐབས་ཐོབ་ཀྱིས་བསྒྱུར་བར་མཛད་མོད། འོན་ཀྱང་དེ་ལྟར་མ་འགྲུབ་ན། བདག་བསྐྱེད་སོ་སོས་བྱས་ཕྱིར་མདུན་སྐྱེད་མ་བསྒྱུར་བར་ཐམས་ཅད་ཀྱི་གཙོ་བོ་རྡོར་སེམས་རང་བསྒོམས་ཀྱང་མི་འགལ་ལམ་སྙམ་སྟེ། རྡོ་རྗེ་སེམས་དཔའ་ནི་རིགས་དང་དཀྱིལ་འཁོར་ཐམས་ཅད་ཀྱི་ཁྱབ་བྱེད་དུ་འགྲོ་བའི་ཕྱིར་དང་། ད་ལྟ་ཡོངས་གྲགས་ཀྱི་ཡིག་ཆ་ཟུར་ཧམ་ལུགས་ལས་ཀྱང་། སྒོ་འབྱེད་ཀྱི་དཀྱིལ་འཁོར་དང་སྦྲེལ་ནས་གཙོ་བོ་མ་བརྗེས་པར་མ་ཟད། ཕྱག་རྡོར་དཀྱིལ་འཁོར་གྱི་ལྷ་ཡང་རྡོར་སེམས་ཀྱི་ཐུགས་ཀ་ནས་སྤྲོས་ཏེ་སྒོམ་པ་སོགས་མཛད་པའི་ཕྱིར་རོ། །གལ་ཏེ་གོ་ཡུལ་གྱིས་མ་ཤོད་ན། སྔོན་འབྲོ་ཕྱིའི་ཐུགས་དམ་སྐོང་བའི་སྐབས་སུ་ཆ་གསུམ་གྱི་དཀྱིལ་འཁོར་བཞེངས་ཤིང་ཆོ་ག་ཟིན་མ་ཐག་བསྡུས་ལ། དེ་ཕྱིན་དཀྱིལ་འཁོར་སོ་སོའི་སྒྲུབ་མཆོད་ཀྱི་ཚེ་རང་རང་གི་སྐབས་བབས་ཀྱི་དུས་དེ་དང་དེར། འདས་གཏོར་དང་བཅས་ཏེ་ཆ་བཞི་པའི་གཏོར་ཆོག་རྐྱང་པ་བཏང་བས་ཆིག་ཅིང་། ཕྱག་ལེན་དུའང་འདི་ལྟར་མཛད་པ་ཤས་ཆེའོ། །ཚུལ་འདི་ཀུན་ལ་གྲགས་ན་ཡང་། །ལྷག་ཆད་ནོར་བས་གཙང་དག་དཀོན། །ངག་ལ་དབང་ཐོབ་ལེགས་བཤད་འདི། ཆོས་མིག་ཅན་གྱི་དཔལ་དུ་འགྱུར། །ཆ་གསུམ་དཀྱིལ་འཁོར་གྱི་སྒྲུབ་ཐབས་གཏོར་ཆོག་དང་བཅས་པའི་ཁ་ཚན་ནོ།། །།

༈ ༀ་སྭ་སྟི། འཇིགས་རུང་ངན་སོང་གནས་ཟབ་ལས། །འགྲོ་ཀུན་འདྲེན་མཛད་གཏེར་བདག་གླིང་། །དབྱེར་མེད་ཕྱག་ན་རྡོ་རྗེ་ལ། །བཏུད་ནས་དེ་ཡི་སྒྲུབ་ཐབས་བཤད། །འདིར་ཕྱག་ན་རྡོ་རྗེ་ངན་སོང་གནས་འདྲེན་ཞེས་བྱ་བ་གབ་པའི་དབང་ལེ་དང་པོ་ལ་བརྟེན་པའི་དཀྱིལ་འཁོར་ནི། གང་དུ་བྱ་བའི་གཞིར་ཆག་ཆག་གདབ་པ་དང་། ཐིག་ཚོན་བྱིན་རླབས་སྔར་ལྟར་བྱས་ལ། དཀྱིལ་འཁོར་གྲུ་བཞི་སྒོ་བཞི་རྟ་བབས་སྣམ་བུ་བཞི་པ། དབུས་འཁོར་ལོའི་ལྟེ་བ་མཐིང་ག །མུ་ཁྱུད་ལྕགས་ཁ། རྩིབས་བཞི་སེར་པོ། ཁོར་ཡུག་པདྨ། རྡོ་ར། འོད་ཕྲེང་སྟེ་ཚོན་ལྷག་མ་སྤྱི་དང་འདྲ་ཞིང་། ལྷ་མཚན་ཇི་ལྟར་རིགས་པ་དགོད། བུམ་པ་གཉིས་གུ་གུལ་གྱིས་བདུག་ཅིང་དྲག་སྔགས་བཟླས་པའི་ཐུན་གྱིས་བྲབ། དྲིའི་ཆུས་སུམ་གཉིས་བཀང་ཞིང་རྫས་ཉེར་ལྔ་བླུག །མགུལ་ཆིངས་སོགས་ཆས་སུ་བཅུག་པ་ཁ་རྒྱུན་དང་བཅས་ཏེ། རྣམ་བུམ་དཀྱིལ་འཁོར་གྱི་དབུས་སུ་མཉྫི་ལ་འགོད། ཙཀླི་རྣམས་ཀྱང་ཇི་ལྟར་རིགས་པའི་གནས་སུ་བཤམ། དཀྱིལ་འཁོར་གྱི་མདུན་དུ་འདས་གཏོར་དང་། མཐའ་ཆུ་གཉིས་སྔོན་འགྲོའི་ཉེར་སྤྱོད་ཀྱིས་བསྐོར། ཆ་གསུམ་གཏོར་མའང་ཅི་བདེར་བཤམ། རང་གི་མདུན་དུ་ལས་བུམ། དྲི་ཆབ་འཐོར་གཡབ་དང་བཅས་པ། རྡོར་དྲིལ། འཐོར་ནས་སོགས་ཉེར་མཁོ་ཐམས་ཅད་ཚོགས་པར་བྱ། དེ་ནས་སྟན་བདེ་བ་ལ་འདུག་སྟེ་རྒྱུད་སྦྱང་བ་ནི། བླ་མ་དང་དཔལ་ཕྱག་ན་རྡོ་རྗེ་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མདུན་གྱི་ནམ་མཁར་བཛྲ་ས་མཱ་ཛཿས་སད་པའི་སྤྱན་སྔར། བདག་དང་མཁའ་མཉམ་སེམས་ཅན་རྣམས། །རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་ལོ། །མཆོག་གསུམ་བསྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་མཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དེ། །བདེ་གཤེགས་བྱང་ཆུབ་སེམས་དཔའ་ལ། །དག་པ་གསུམ་གྱིས་ལུས་དབུལ་ལོ། །ཚེ་རབས་བགྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །ཞེས་ལན་གསུམ་གྱིས་རྒྱུད་དག་པར་བྱས་ནས། ཛཿཧཱུཾ་བཾ་ཧོཿས། ཚོགས་ཞིང་རྣམས་རང་ལ་བསྡུས། ཆོས་ཐམས་ཅད་རང་སེམས་ཀྱི་སྣང་བ་ཙམ་སྟེ། དེ་ཡང་སྒྱུ་མ་ལྟ་བུའོ་ཞེས་དེའི་ངང་ལ་དར་གཅིག་བཞག །དེ་ནས་བད ག་སྐྱེད་བནི། ༀ་སྭ་བྷཱ་ཝ་ཤུདྡྷཱཿསརྦ་དྷརྨཱཿསྭཱ་བྷཱ་ཝ་ཤུདྡྷོ྅ཧཾ། ཞེས་བརྗོད་པས་སྒྱུ་མར་སྣང་བ་དེ་ཡང་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་པདྨ་དང་ཉི་ཟླའི་དཀྱིལ་འཁོར་གྱི་སྟེང་དུ་ཧཱུཾ་ལས་གསེར་གྱི་རྡོ་རྗེ་རྩེ་ལྔ་པ་ཧཱུཾ་གིས་མཚན་པ། དེ་ལས་འོད་ཟེར་འཕྲོས། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། བདག་ཉིད་བཅོམ་ལྡན་འདས་གསང་བའི་བདག་པོ་ཕྱག་ན་རྡོ་རྗེ་སྐུ་མདོག་སྔོན་པོ་འབར་བ་ཆེན་པོའི་འོད་ཟེར་ཅན། ཞལ་གཅིག་ཕྱག་གཉིས་པ། ཞལ་གདངས་ཤིང་མཆེ་བ་གཙིགས་པ། དམར་ལ་ཟླུམ་པའི་སྤྱན་གསུམ་པ། སྨ་ར་དང་སྨིན་མ་དམར་སེར་འབར་ཞིང་དབུ་སྐྲ་གྱེན་དུ་འཁྱིལ་བ་རྡོ་རྗེའི་བ་སྤུ་ཅན། ཕྱག་གཡས་རྡོ་རྗེ་དང་གཡོན་སྡིགས་མཛུབ་མཛད་པ། སེང་གེའི་པགས་པ་དང་། བ་ཏི་ཁྲ་བོ་དང་དར་སྔོན་པོས་སྟོད་གཡོགས་ཤིང་། སྟག་གི་པགས་པའི་ཤམ་ཐབས་དཀྲིས་པ། སྦྲུལ་གྱི་རྒྱན་དང་རིན་པོ་ཆེའི་ཅོད་པན་ཅན། ཞབས་གཉིས་གཡས་བསྐུམ་ཞིང་གཡོན་བརྐྱང་བའི་སྟབས་ཀྱིས་མེ་དཔུང་འབར་བའི་ཀློང་ན་བཞུགས་པ། དེའི་དཔྲལ་བར་ༀ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུཾ་སྔོན་པོ། ཧཱུཾ་ལས་འོད་ཟེར་འཕྲོས་པས་ཡེ་ཤེས་ཀྱི་འཁོར་ལོ་མདུན་གྱི་ནམ་མཁར་བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿས། གཉིས་སུ་མེད་པར་བསྟིམ། ཏིཥྛ་བཛྲེ་སྭཱ་ཧཱས་བརྟན་པར་བྱས། སྤྱི་བོའི་གནས་ལྔར་ༀ་ཧཱུཾ་ཏྲཱཾ་ཧྲཱིཿཨཱ་གནས་པ་ཞུ་བ་ལས་བྱུང་བའི་ཡེ་ཤེས་ལྔའི་ཆུ་རྒྱུན་གྱིས་དབང་བསྐུར་བས་མི་བསྐྱོད་པ་བདག་པོར་གྱུར་པའི་རིགས་ལྔས་དབུ་བརྒྱན་པར་གྱུར། སླར་ཡང་གནས་གསུམ་གྱི་ཡི་གེ་ལས་འོད་ཟེར་འཕྲོས་རྡོ་རྗེ་གསུམ་གྱི་ལྷ་ཚོགས་སྤྱན་དྲངས་པ་ཐིམ་པས་བྱིན་གྱིས་བརླབས་པར་གྱུར། རང་གི་སྲོག་གི་གོར་རང་འདྲ་བའི་ཡེ་ཤེས་སེམས་དཔའ། དེའི་ཐུགས་ཀར་རྡོ་རྗེའི་ལྟེ་བར་ཧཱུཾ་ཡིག་བཟླ་བྱའི་སྔགས་ཕྲེང་གིས་བསྐོར་བ་ལས་འོད་ཟེར་འཕྲོས། ཁམས་གསུམ་ཐམས་ཅད་སྣང་བར་བྱས། །ངན་སོང་རྣམས་སྦྱངས། སེམས་ཅན་ཐམས་ཅད་སེམས་ཉོན་མོངས་པའི་འཆིང་བ་ལས་རྣམ་པར་གྲོལ་ཏེ་སངས་རྒྱས་ཀྱི་ཞིང་དུ་བསྒྲལ་བར་བསམ་ལ། ༀ་ནཱི་ལཾ་ཝ་ར་ངྷ་ར་བཛྲ་པཱ་ཎི་རཱ་ཛྙཱ་པ་ཡ་ཏི་སྭཱ་ཧཱ། ཞེས་ཅི་ནུས་བཟླས་ལ། ལས་བུམ་དང་དྲི་ཆབ་བསྒྲུབ་སྟེ། རང་གི་ཐུགས་ཀ་ནས་བདུད་རྩི་འཁྱིལ་བ་ལྗང་མདོག་རྒྱ་གྲམ་དང་དྲིལ་བུ་བསྣམས་པ་དར་དང་རིན་པོ་ཆེས་བརྒྱན་པ་ཕྱུངས་ནས་བུམ་ནང་པད་ཉིའི་གདན་ལ་སེམས་སྐྱིལ་གྱིས་གནས་པ། དེའི་ཐུགས་ཀ་ནས་བགེགས་མཐར་བྱེད་ལྗང་ནག་རྒྱ་གྲམ་བསྣམས་པ་ཞིག་ཕྱུངས་ཏེ་དྲི་ཆབ་ཀྱི་ནང་དུ་པད་ཉིའི་གདན་ལ་འཁོད་པ ར་བསམ་ཞིང་། དེ་གཉིས་ལ། ༀ་བཛྲ་ཨརྒྷཾ་པྲ་ཏཱི་ཙྪ་སྭཱ་ཧཱ་ནས། ཤཔྡའི་བར་གྱིས་མཆོད། འཇིགས་པའི་ཧཱུཾ་སྒྲ་ངེས་སྒྲོག་ཅིང་། །བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་སྩོལ་བའི་ལྷ། །བགེགས་ཀྱི་དགྲ་ལ་ཕྱག་འཚལ་བསྟོད། །ཅེས་བསྟོད་ནས། རྡོ་རྗེ་རྩེ་གཅིག་པའི་ཕྱག་རྒྱས་སོ་སོར་རེག་ལ། ལས་བུམ་དུ། ༀ་ཨཱཿ བཛྲ་ཨ་མྲྀ་ཏ་ཀུཎྜ་ལཱི་ཧཱུཾ་ཕཊ། ཅེས་དང་། དྲི་ཆབ་ལ། ༀ་ཨཱཿབིགྷྣཱནྟ་ཀྲྀཏ་ཧཱུཾ་ཕཊ། ཅེས་བཟླས་པས་བྱིན་གྱིས་བརླབས་ནས། འཁྱིལ་བ་དང་བགེགས་མཐར་བྱེད་ཀྱི་རང་བཞིན་གྱི་ཆུའི་རྡུལ་ཕྲ་རབ་ཏུ་གྱུར་པར་བསམ་ཞིང་། ༀ་སྭ་བྷཱ་ཝ་བི་ཤུདྡྷེ་དྷརྨ་ཏཱ་བཛྲ་སིདྡྷི་ཧཱུཾ། ཞེས་པས་དྲི་ཆབ་དང་། ཨ་མྲྀ་ཏའི་སྔགས་ཀྱིས་བུམ་ཆུ་སྟེ། གནས་ཡོ་ཐམས་ཅད་ལ་བསངས་གཏོར་བྱའོ། །དེ་ནས་མཆོད་རྫས་རྣམས། བིགྷྣཱཾ་དང་། ཨ་མྲྀ་ཏ་ས་བསང་། རཾ་ཡཾ་ཁཾ་གིས་ཉེས་སྐྱོན་རྣམས་སྦྱངས། སྟོང་པའི་ངང་ལས་བྷྲཱུཾ་ལས་རིན་པོ་ཆེའི་སྣོད་དུ་ༀ་ཡིག་ཞུ་བ་ལས་བྱུང་བའི་མཆོད་རྫས་རྣམས་འདོད་པའི་ཡོན་ཏན་བསམ་གྱིས་མི་ཁྱབ་པའི་སྤྲིན་འཕྲོ་བར་བསམ་ལ། ༀ་བཛྲ་ཨརྒྷཾ་ཨཱཿཧཱུཾ་ནས། ཤཔྡའི་བར་བརྗོད་པས་བྱིན་གྱིས་བརླབ་བོ། །དེ་ནས་མདུན་བསྐྱེད་སྒྲུབ་པ་ནི། སྭ་བྷཱ་ཝས། ཆོས་ཐམས་ཅད་རང་བཞིན་གྱིས་རྣམ་པར་དག་པའི་སྟོང་པ་ཉིད་དུ་གྱུར། སྟོང་པའི་ངང་ལས་མདུན་གྱི་ནམ་མཁར་བཅོམ་ལྡན་འདས་དཔལ་རྣམ་པར་སྣང་མཛད་རྒྱལ་བའི་སྤྲིན་ཕུང་མཐའ་ཡས་པར་འཕྲོ་བ་སད་དེ། སྐུའི་འོད་ཀྱིས་འཇིག་རྟེན་གྱི་ཁམས་ཐམས་ཅད་ཀུན་ཏུ་སྣང་བར་བྱས་ཤིང་སྦྱངས། ངན་སོང་གི་རྒྱུད་ཐམས་ཅད་ལ་ཀུན་ཏུ་གཟིགས་ཏེ་ཐུགས་ཀ་ནས་གསེར་གྱི་རྡོ་རྗེ་རྩེ་ལྔ་པ་ཧཱུཾ་ཡིག་གིས་མཚན་པ་འོད་འཕྲོ་བ་ཞིག་ཕྱུངས་ཏེ་གནས་པར་གྱུར། དེ་ལས་འོད་ཟེར་འཕྲོས། མ་དག་པའི་སྣོད་ཐམས་ཅད་སྦྱངས་ནས་རྡོ་རྗེ་སྲུང་བའི་གུར་ཁང་ཡེ་ཤེས་ཀྱི་མེ་འབར་བས་ཡོངས་སུ་བསྐོར་བའི་ནང་པད་ཉིའི་སྟེང་དུ་སྣ་ཚོགས་རྡོ་རྗེའི་ལྟེ་བ་ལ་རྫོགས་པའི་གཞལ་ཡས་ཁང་གྲུ་བཞི་སྒོ་བཞི་པ་ནང་ནས་རིམ་པ་བཞིན་མཐིང་དཀར་སེར་དམར་ལྗང་བའི་རྩིག་པ་རིམ་པ་ལྔས་བསྐོར་བའི་སྟེང་དུ་ཕ་གུ་དང་དྲྭ་བ་དྲྭ་ཕྱེད་ཤར་བུ་མདའ་ཡབ་དང་བཅས་པ། རྩིག་པའི་རྩ་བར་འདོད་སྣམ་དམར་པོ་ལ་གཟུངས་མ་རྣམས་འཁོད་པ། ནང་ཀ་བ་བརྒྱད་ཀྱི་བཏེགས་ཤིང་རྡོ་རྗེའི་གདུང་གིས་ཕུབ་པའི་ཡ་ཕུབ་ཕྱུར་བུའི་རྩེར་རྡོ་རྗེའི་ཏོག་གིས་སྤྲས་པ། སྒོ་བཞིར་ཀ་བ་བཞི་བཞིས་བཏེགས་པའི་རྟ་བབས་སྣམ་བུ་བཞི་པ་ཆོས་འཁོར་རི་དྭགས་གདུགས་དང་བཅས་པ། སྟེང་འོག་ཐམས་ཅད་ཤར་དཀར། ལྷོ་སེར། ནུབ་དམར། བྱང་ལྗང་། དབུས་སྔོ་བ་དྭངས་ཤིང་སྒྲིབ་པ་མེད་པ་ཀུན་ཏུ་གསལ་བ། གདུགས་དང་རྒྱལ་མཚན་བ་དན་ལ་སོགས་རྒྱན་ཐམས་ཅད་ཀྱིས་མཛེས་པར་བརྒྱན་པའི་དབུས་སུ་འཁོར་ལོ་རྩིབས་བཞི་པའི་ལྟེ་བར་པདྨ་དང་ཉི་ཟླ་བརྩེགས་པའི་གདན་གྱི་སྟེང་དུ་ནམ་མཁར་གནས་པའི་རྡོ་རྗེ་བཞུགས་པར་གྱུར། དེ་ལས་འོད་ཟེར་འཕྲོས་བཅོམ་ལྡན་འདས་རྣམ་པར་སྣང་མཛད་ལ་སོགས་ཏེ་མཁའ་ཁྱབ་ཏུ་བཞུགས་པའི་རྒྱལ་བ་ཐམས་ཅད་སྤྱན་དྲངས། རྡོ་རྗེའི་ལྟེ་བའི་ཧཱུཾ་ལ་ཐིམ། དེ་ཡོངས་སུ་གྱུར་པ་ལས་གསང་བའི་བདག་པོ་ཕྱག་ན་རྡོ་རྗེ་སྐུ་མདོག་སྔོན་པོ་འབར་བ་ཆེན་པོའི་འོད་ཟེར་ཅན། ཞལ་གཅིག་ཕྱག་གཉིས་པ། ཞལ་གདངས་ཤིང་མཆེ་བ་གཙིགས་པ། དམར་ལ་ཟླུམ་པའི་སྤྱན་གསུམ་པ། སྨ་ར་དང་སྨིན་མ་དམར་སེར་འབར་ཞིང་དབུ་སྐྲ་གྱེན་དུ་འཁྱིལ་བ་རྡོ་རྗེའི་བ་སྤུ་ཅན། ཕྱག་གཡས་རྡོ་རྗེ་དང་གཡོན་སྡིགས་མཛུབ་མཛད་པ། སེང་གེའི་པགས་པ་དང་། བ་ཏི་ཁྲ་བོ་དང་དར་སྔོན་པོས་སྟོད་གཡོགས་ཤིང་། སྟག་གི་པགས་པའི་ཤམ་ཐབས་དཀྲིས་པ། སྤྲུལ་གྱི་རྒྱན་དང་རིན་པོ་ཆེའི་ཅོད་པན་ཅན། ཞབས་གཉིས་གཡས་བསྐུམ་ཞིང་གཡོན་བརྐྱང་བའི་སྟབས་ཀྱིས་མེ་དཔུང་འབར་བའི་ཀློང་ན་བཞུགས་པ། ཤར་གྱི་རྩིབས་ལ་སྒེག་མོ་དཀར་མོ་མེ་ལོང་། ལྷོར་མཱ་ལེ་མ་སེར་མོ་ཕྲེང་བ། ནུབ་ཏུ་གླུ་མ་དམར་མོ་པི་ཝཾ། བྱང་དུ་གར་མ་ལྗང་གུ་གར་རྒྱ། གྲྭ་བཞིའི་ཤར་ལྷོར་སྤོས་མ་དཀར་སེར། ལྷོ་ནུབ་ཏུ་མེ་ཏོག་མ་དམར་སེར། ནུབ་བྱང་དུ་མར་མེ་མ་དམར་ལྗང་། བྱང་ཤར་དུ་དྲི་ཆབ་མ་དཀར་ལྗང་། ཤར་སྒོར་ལྕགས་ཀྱུ་མ་དཀར་མོ། ལྷོ་སྒོར་ཞགས་པ་མ་སེར་མོ། ནུབ་སྒོར་ལྕགས་སྒྲོག་མ་དམར་མོ། བྱང་སྒོར་དྲིལ་བུ་མ་ལྗང་གུ། ཐམས་ཅད་ཀྱང་ཁྲོ་འཛུམ་ཆགས་པའི་ཉམས་ཅན། རང་རྟགས་ཀྱི་ཕྱག་མཚན་འཛིན་ཞིང་། དར་དང་རིན་པོ་ཆེའི་རྒྱན་གྱིས་བརྒྱན་པ། གཡོན་བརྐྱང་བའི་སྟབས་ཀྱིས་པད་ཟླའི་གདན་ལ་རོལ་བ། ཁྱམས་ལ་གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་ལ་སོགས་པ་སྲུང་མ་ཐུགས་དམ་ཅན་རྣམས་བཞུགས་པར་གྱུར། དེ་ཐམས་ཅད་ཀྱི་དཔྲལ་བར་ༀ་དཀར་པོ། མགྲིན་པར་ཨཱ༔དམར་པོ། ཐུགས་ཀར་ཧཱུཾ་སྔོན་པོ། ཧཱུཾ་ལས་འོད་ཟེར་འཕྲོས་པས་ཡེ་ཤེས་ཀྱི་འཁོར་ལོ་མདུན་གྱི་ནམ་མཁར་སྤྱན་དྲངས་པར་བསམ་ལ། ཧཱུཾ། དམིགས་མེད་མཁའ་ལྟར་ཁྱབ་ཅིང་དག་པའི་སྐུ། །སྤྱན་འདྲེན་གཤེགས་སུ་གསོལ་བར་མི་དམིགས་ཀྱང་། །ཐུགས་རྗེའི་ངང་ཉིད་ཆོས་སྐུར་དག་པ་ལས། །ཡེ་ཤེས་སྒྱུ་མར་རོལ་ཅིང་གཤེགས་སུ་གསོལ། །ༀ་བཛྲ་ས་མཱ་ཛཿས་སྤྱན་དྲངས། ཛཿ ཧཱུཾ་བཾ་ཧོཿ ཏིཥྛ་བཛྲེ་སྭཱ་ཧཱ། ཞེས་པས་གཉིས་སུ་མེད་པར་བསྟིམ་ཞིང་བརྟན་པར་བྱས། ལྷ་ཐམས་ཅད་ཀྱི་སྤྱི་བོར་ཧཱུཾ། དཔྲལ་བར་ༀ། རྣ་ལྟག་གཡས་སུ་ཏྲཱཾ། ལྟག་པར་ཧྲཱི༴ རྣ་ལྟག་གཡོན་པར་ཨཱི་ཿགནས་པར་གྱུར། ༀ་ཧཱུཾ་ཏྲཱཾ་ཧྲཱིཿཨཱཿ ཞེས་བརྗོད་པས་ཡི་གེ་ལྔ་ཞུ་བ་ལས་བྱུང་བའི་ཡེ་ཤེས་ལྔའི་ཆུ་རྒྱུན་གྱིས་དབང་བསྐུར། སྐུ་གང་། དྲི་མ་དག །ལྷག་མ་དབང་གནས་སུ་འཁྱིལ་བ་ལས་མི་བསྐྱོད་པ་བདག་པོར་གྱུར་པའི་རིགས་ལྔས་དབུ་བརྒྱན་པར་བསམ། སླར་ཡང་གནས་གསུམ་གྱི་ཡི་གེ་ལས་འོད་ཟེར་འཕྲོས། རྡོ་རྗེ་གསུམ་གྱི་ལྷ་ཚོགས་སྤྱན་དྲངས་ཏེ་ཐིམ་པས། དཔྲལ་བའི་ༀ་ཡིག་སྐུ་རྡོ་རྗེ། མགྲིན་པོའི་ཨཱཿཡིག་གསུང་རྡོ་རྗེ། སྙིང་གའི་ཧཱུཾ་ཡིག་ཐུགས་རྡོ་རྗེའི་བདག་ཉིད་དུ་བྱིན་གྱིས་བརླབས། དེ་ནས། རང་གི་ཐུགས་ཀ་ནས་སྤྲོས་པའི་མཆོད་སྤྲིན་མཐའ་ཡས་པས་མཆོད་པར་བསམ་ཞིང་། འཇིག་རྟེན་ཁམས་ནི་དཔག་མེད་ན། མཆོད་ཡོན་ཇི་སྙེད་ཡོད་པ་དང་། །བདག་གིས་གུས་པར་བཤམས་པ་འདི། །གསང་བདག་འཁོར་དང་བཅས་ལ་འབུལ། །ༀ་སརྦ་ཏ་ཐཱ་ག་ཏ་བཛྲ་པཱ་ཎི་ས་པ་རི་ཝཱ་ར་ཨརྒྷཾ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུཾ། མཆོད་ཡོན་གྱི་གནས་སུ། ཞབས་བསིལ་སོགས་དང་། ༀ་རྒྷཾ་གྱི་གནས་སུ། པཱ་དྱཾ་སོགས་བཅུག་སྟེ། ཤཔྡའི་བར་རང་རང་གི་ཕྱག་རྒྱས་དབུལ། བསྟོད་པ་ནི། ཁམས་གསུམ་སེམས་ཅན་ཐམས་ཅད་ལ། །བུ་གཞིན་སྐྱོང་བའི་ཐུགས་མངའ་བ། །སངས་རྒྱས་ཀུན་གྱི་རང་བཞིན་སྐུ། །བླ་མེད་མགོན་ལ་ཕྱག་འཚལ་བསྟོད། །བཅོམ་ལྡན་ཕྱག་ན་རྡོ་རྗེ་ནི། །སྐུ་མདོག་སྔོན་པོ་འོད་ཟེར་འབར། །ཐུགས་རྗེའི་སྟོབས་ཀྱིས་གདུག་པ་འདུལ། །རྡོ་རྗེ་བསྣམས་ལ་ཕྱག་འཚལ་བསྟོད། །གཟུགས་མཛེས་ཕྲེང་བ་དབྱངས་སྙན་གར། །ཉེར་སྤྱོད་བཞི་དང་ཕྱག་རྒྱ་བཞིས། །རྒྱལ་བ་ཐམས་ཅད་མཉེས་མཛད་མ། །ལྷ་མོ་བཅུ་གཉིས་ལ་ཕྱག་འཚལ། །ལས་ཀྱི་གནོད་སྦྱིན་ཆེན་པོ་ནི། །འཇིགས་སུ་རུང་བའི་ཆ་བྱད་ཅན། །ཐམས་ཅད་མ་ལུས་འདུལ་མཛད་པ། །འཇིགས་བྱེད་ཁྱོད་ལ་ཕྱག་འཚལ་བསྟོད། །བསྟོད་པར་འོས་པ་སོགས་ཀྱིས་ཀྱང་བསྟོད་དོ། །དེ་ནས་བཟླས་པ་ནི། གཙོ་བོའི་སྲོག་གི་གོར་རང་འདྲ་བའི་ཡེ་ཤེས་སེམས་དཔའ། །དེའི་ཐུགས་ཀར་རྡོ་རྗེའི་ལྟེ་བར་ཧཱུཾ་ཡིག་བཟླ་བྱའི་སྔགས་ཕྲེང་གིས་བསྐོར་བ་ལས་འོད་ཟེར་འཕྲོས། ཁམས་གསུམ་ཐམས་ཅད་སྣང་བར་བྱས། ངན་སོང་རྣམས་སྦྱངས། སེམས་ཅན་ཐམས་ཅད་ཀྱི་སེམས་ཉོན་མོངས་པའི་འཆིང་བ་ལས་རྣམ་པར་གྲོལ་ཏེ་སངས་རྒྱས་ཀྱི་ཞིང་དུ་བསྒྲལ་བར་བསམ་ཞིང་། ༀ་ནཱི་ལི་ཝཱ་ར་དྷ་ར་བཛྲ་པཱ་ཎི་ར་ཛྙཱ་པ་ཡ་ཏི་སྭཱ་ཧཱ། ཞེས་པ་ཅི་ནུས་བཟླ་ཞིང་། མཇུག་ཏུ་རྩ་སྔགས་ཀྱི་ཤམ་བུར། ༀ་ད་ཧ་ད་ཧ་སརྦ་ན་ར་ཀ་ག་ཏི་ཧེ་ཏུཾ་ཧཱུཾ་ཕཊ། ༀ་པ་ཙ་པ་ཙ་སརྦ་པྲེ་ཏ་ཀ་ག་ཏི་ཧེ་ཏུཾ་ཧཱུཾ་ཕཊ། ༀ་མ་ཐ་མ་ཐ་སརྦ་ཏི་རྻཀ་ག་ཏི་ཧེ་ཏུཾ་ཧཱུཾ་ཕཊ། ཅེས་བཏགས་པའང་ཅུང་ཟད་བཟླས་པའི་ནུས་པ་བྱེ་མའམ་ཡུངས་ཀར་ལ་བསྟིམ་མོ། །མཇུག་ཏུ་ཐལ་མོ་སྦྱར་ཏེ། བཅོམ་ལྡན་འདས་བདག་དང་མཐའ་ཡས་པའི་སེམས་ཅན་ཐམས་ཅད་སེམས་སྡིག་སྒྲིབ་ཉེས་ལྟུང་གི་འཆིང་བ་ལས་རྣམ་པར་གྲོལ་བ་མཛད་དུ་གསོལ། ཞེས་གསོལ་བ་གདབ་བོ། །དེ་ནས་རྣམ་བུམ་བསྐྱེད་ཆོག་ནི། དྲི་ཆབ་དང་ལས་བུམ་གྱི་ཆུ་འཐོར་ཞིང་། བིགྷྣཱན་དང་། ཨ་མྲྀ་ཏ་ས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་བྷྲཱུཾ་ལས་ཡེ་ཤེས་རིན་པོ་ཆེའི་རང་བཞིན་ཅན་གྱི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་པད་ཉི་ཟླ་བའི་སྟེང་དུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ཡོངས་སུ་གྱུར་པ་ལས་བཅོམ་ལྡན་འདས་གསང་བའི་བདག་པོ་སྐུ་མདོག་སྔོན་པོ་རྡོ་རྗེ་དང་སྡིགས་མཛུབ་མཛད་པའི་སྐུར་གྱུར། དེའི་དཔྲལ་བར་ༀ། མགྲིན་པར་ཨཱཿ ཐུགས་ཀར་ཧཱུཾ། ཧཱུཾ་ལས་འོད་ཟེར་འཕྲོས་པས་ཡེ་ཤེས་པ་བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿས་བསྟིམ། ཏིཥྛ་བཛྲ་སྭཱ་ཧཱ་ས་བརྟན། ༀ་ཧཱུཾ་ཏྲཱཾ་ཧྲཱིཿ ཨཱཿས་དབང་བསྐུར། ༀ་ཨཱཿཧཱུཾ་གིས་བྱིན་གྱིས་བརླབ། ༀ་བཛྲ་ཨརྒྷཾ་པྲ་ཏཱི་ཙྪ་སྭཱ་ཧཱ་ནས། ཤཔྟའི་བར་གྱིས་མཆོད། བཅོམ་ལྡན་ཕྱག་ན་རྡོ་རྗེ་ནི། །སྐུ་མདོག་སྔོན་པོ་འོད་ཟེར་འབར། །ཐུགས་རྗེའི་སྟོབས་ཀྱིས་གདུག་པ་འདུལ། །རྡོ་རྗེ་བསྣམས་ལ་ཕྱག་འཚལ་བསྟོད། །ཅེས་བསྟོད། གཟུངས་ཐག་ལ་འཇུས་ཏེ། བདག་གི་ཐུགས་ཀ་ནས་སྔགས་ཕྲེང་གཟུངས་ཐག་ལ་འཁྲིལ་ཏེ་སོང་བས་ཐུགས་རྒྱུད་བསྐུལ། སྐུའི་ཆ་ཐམས་ཅད་ནས་ཡེ་ཤེས་ཀྱི་བདུད་རྩིའི་རྒྱུན་བབས་པས་བུམ་པ་གང་བར་བསམ་ཞིང་། ༀ་ནཱི་ལཾ་ཝཱར་དྷ་ར་ཅི་ནུས་བཟླས་མཐར་སྔགས་དེ་ཉིད་ཀྱིས་མཆོད་ཡོན་ཕུལ་བས། བུམ་ནང་གི་ལྷ་སྔར་བས་གསལ་ཞིང་བུམ་ཆུའི་རྡུལ་ཕྲ་རབ་རེ་རེ་བཞིན་ཡང་འདོད་པ་མ་ལུས་པ་ཡོངས་སུ་སྐོང་བའི་ནུས་པ་ཅན་དུ་གྱུར་པར་བསམ་ལ། བུམ་ཆུ་རང་གི་སྤྱི་བོར་གཏིགས་ཤིང་ཁར་བཏུང་། ཧཱུཾ་ལན་བཞི་བརྗོད་ཅིང་སྤྱི་མགྲིན་སྙིང་ག་ལྟེ་བ་བཞིར་ཐིག་ལེ་བྱས་པས། བདག་དང་ལྷའི་སྐུ་གསུང་ཐུགས་ཡེ་ཤེས་རྡོ་རྗེ་གཉིས་མེད་དུ་རིག་པར་བྱའོ། །དེ་ནས་གཏོར་མ་བཏང་ཞིང་དབང་བསྐུར་བ་ནི། འདས་གཏོར་དང་ཆ་གསུམ་གཏོར་མ་སྔར་བཤད་པ་བཞིན་དང་། དབང་ཆོག་ལྟར་མཆོག་དབང་བཅུ་དྲུག་བསྐུར་བར་བྱའོ། །དེ་ནས་རྗེས་ཆོག་ནི། མཆོད་པ་ཁ་གསོས་ལ། ༀ་བཛྲ་ཨརྒྷཾ་པྲ་ཏཱི་ཙྪ་སྭཱ་ཧཱ་སོགས་ཀྱིས་མཆོད། བསྟོད་པར་འོས་པ་སོགས་ཀྱི་བསྟོད། ཡིག་བརྒྱ་བཟླ་ཞིང་། མ་རྙེད་ཡོངས་སུ་སོགས་ཀྱིས་ནོངས་པ་བཤགས། རས་བྲིས་ཡིན་ན། འདིར་ནི་གཟུགས་དང་སོགས་ཀྱིས་བརྟན་བཞུགས་བྱ། རྡུལ་ཚོན་ཡིན་ན། ༀ། ཁྱེད་ཀྱི་སེམས་ཅན་དོན་ཀུན་མཛད། སོགས་ཀྱི་མཐར། བཛྲ་མུཿས། ཡེ་ཤེས་པ་གཤེགས། དམ་ཚིག་གི་འཁོར་ལོ་རྣམས་རང་ལ་ཐིམ། བདག་ཉིད་ཐུགས་སྲོག་ཧཱུཾ་གི་ནཱ་དའི་བར་བསྡུ། དེ་ཡང་མི་དམིགས་པའི་དབྱིངས་སུ་ཐིམ་པའི་ངང་ལ་མཉམ་པར་བཞག །དེ་ལས་སྐད་ཅིག་གིས་ལྷར་ལངས་པའི་སྤྱི་བོ་ནས་ཧཱུཾ་ཡིག་ཞུ་བ་ཐིམས་པས་ལུས་ཐམས་ཅད་རྡོ་རྗེའི་གོ་ཆས་གཏམས་པར་བསམ་ལ། དགེ་བ་བསྔོ་ཞིང་ཤིས་པ་བརྗོད་པས་མཐའ་བརྒྱན་པར་བྱའོ། །གསང་བདག་སྒྲུབ་ཐབས་ངག་འདོན་ཁྲིགས། གབ་པའི་དབང་ལེའི་དགོངས་པ་སྟེ། འདུས་པ་མདོ་ཡི་ཆོས་ཀྱིས་སྒོ། ཐོག་མར་འབྱེད་བྱེད་ངོ་མཚར་དཔལ། སྒོ་འབྱེད་ཕྱག་རྡོར་ངན་སོང་གནས་འདྲེན་གྱི་སྒྲུབ་ཐབས་ལེ་ཚན་ནོ། །འདུས་པ་མདོའི་ཡན་ལག་གི་དཀྱིལ་འཁོར་རྣམས་ཀྱི་སྒྲུབ་དཀྱིལ་དངོས་གྲུབ་འདོད་འཇོ་ལས ། སྔོན་འགྲོའི་དཀྱིལ་འཁོར་གཉིས་བཤད་པའི་སྐབས་ཏེ་དང་པོའོ།། །།

༈ ༀ་སྭ་སྟི། མངོན་མཐོའི་ཐེམ་སྐས་ལ་བརྟེན་ནས། ཐར་པའི་གྲོང་དུ་འཁྲིད་མཁས་པ། །གཏེར་ཆེན་བླ་མ་ལ་བཏུད་དེ། །ལྷ་མིའི་ཐེག་པའི་སྒྲུབ་ཐབས་བཤད། །དངོས་གཞི་ཆུ་བོ་བཞིའི་དང་པོ་རྒྱུད་ཀྱི་ཆུ་བོའི་ཡན་ལག་གི་དཀྱིལ་འཁོར་ལ་དྲུག་ལས། འདིར་དང་པོ་ལྷ་མིའི་དཀྱིལ་འཁོར་ནི། གང་དུ་བྱ་བའི་གཞིར་དྲི་བཟང་པོས་ཆག་ཆག་བཏབ་ལ། དཀྱིལ་འཁོར་རི་རབ་ལྷུན་པོ། རི་བདུན་དང་མཚོ་བདུན་སྤེལ་མས་བསྐོར་བའི་ཕྱོགས་བཞིན་གླིང་བཅུ་གཉིས་ཏེ། ཤར་གླིང་གསུམ་དབྱིབས་ཟླ་གམ། ལྷོ་གླིང་གསུམ་སོག་ཁ། ནུབ་གླིང་གསུམ་ཟླུམ་པོ། བྱང་གླིང་གསུམ་གྲུ་བཞི། ཕྱི་ལྕགས་རིས་བསྐོར་བ། རི་རབ་ཀྱི་དབུས་སུ་པདྨ་འདབ་མ་བཞི་པ། ལྕགས་རིའི་ཕྱི་རོལ་ཏུ་ཁྱམས་ཟླུམ་པོ་ལ་གཏོད་པའི་སྒོ་བཞི་རྩིག་པ་ལྗང་གུས་བསྐོར་ཞིང་། རྟ་བབས་སྤངས་པ། རྩིག་པའི་ཕྱ་ནས་འདོད་སྣམ་ཕན་ཆད་སྤྱི་དང་འདྲ་བ། མདའ་ཡབ་ཀྱི་ཕྱི་རོལ་རིན་པོ་ཆེའི་ས་གཞིའ་ི ཁོར་ཡུག་ལ་ལྗོན་ཤིང་དང་ཁྲུས་རྫིང་ལ་སོགས་པས་བརྒྱན་པའི་མཐར་རྡོ་ར་དང་འོད་ཕྲེང་ཚོན་ནི་ལྟེ་བ་དཀར། འདབ་མ་ཕྱོགས་མདོག །རི་རབ། རྒྱ་མཚོ། གླིང་བཅུ་གཉིས་རྣམས་ཤར་དཀར། ལྷོ་སྔོ། ནུབ་དམར། བྱང་སེར་བ། རི་བདུན་སེར་པོ། མཚོ་བདུན་སྔོན་པོ། ལྕགས་རི་ནག་པོ། སྒོའི་ནང་ཁྱམས་སྔོན་པོ་མིག་མངས་རིས་དང་། ཕྱིའི་ཁོར་ཡུག་དཀར་པོ། །སྒོ་ཕན་ཆད་གཞན་ཐམས་ཅད་སྤྱི་དང་འདྲའོ། །དཀྱིལ་འཁོར་གྱི་ལྷ་གནས་རྣམས་སུ་སྐུ་རྟེན་ལྷ་ཙཀ །གསུང་རྟེན་རྒྱ་བོད་ཀྱི་ཡི་གེ །ཐུགས་རྟེན་སཱཙྪ་དཀར་པོ་མི་གྲངས་སམ་སོ་སོའི་ལོ་གྲངས་ཀྱིས་དཀྱིལ་འཁོར་གྱི་མཐའ་བསྐོར། རིན་ཆེན་འབྲུ་སྨན་གྱི་རྫས་དང་དྲིའི་ཆུ་རྟེན་རིང་བསྲེལ་ཅན་ལ་ཁྲུས་བྱས་པའི་ཁྲུས་ཆུ་རྣམས་ཀྱིས་བཀང་བའི་བུམ་པ་མགུལ་ཆིངས་ཁ་རྒྱན་དང་བཅས་པས་བརྒྱན་པ་དཀྱིལ་འཁོར་གྱི་མདུན་དང་། རྫས་དབང་གི་ཙཀླི་རྣམས་ཀྱང་ཅི་བདེར་བཤམ། མཐའ་ཨརྒྷཾ་ལ་སོགས་པའི་མཆོད་པས་བསྐོར་ཞིང་། མདུན་དུ་གཙང་ཞིང་བསོད་པའི་བཟའ་བཅས་བརྒྱན་པའི་འདས་གཏོར་དང་ཆ་གསུམ་ཀྱང་བཤམ། རང་གི་མདུན་དུ་རྡོར་དྲིལ་སྤོས་སྣོད་འཐོར་ནས་སོགས་ཡོ་བྱད་ཐམས་ཅད་ཚོགས་པར་བྱའོ། །ཆོ་ག་ནི། ཐོག་མར་ཁྲུས་བྱས། དེ་ནས་ཕྱོགས་བཅུའི་འཕགས་པ་ཐམས་ཅད་མངོན་སུམ་པ་ལྟ་བུར་དམིགས་ཏེ་ཕྱག་བྱས་ནས་སྟན་ལ་འདུག་སྟེ། སྐྱབས་སེམས་ནི། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ། །བྱང་ཆུབ་པར་དུ་བདག་ནི་སྐྱབས་སུ་མཆི། །བདག་གིས་སྦྱིན་སོགས་བགྱིས་པའི་བསོད་ནམས་ཀྱིས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གསུམ། ཚད་མེད་བཞི་བསྒོམ་པ་ནི། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་དང་བྲལ་བའི་བཏང་སྙོམས་ཚད་མེད་པ་ལ་གནས་པར་གྱུར་ཅིག །ཅེས་ལན་གསུམ། དེ་ནས་དཀྱིལ་འཁོར་བསྐྱེད་པ་ནི། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་འཕགས་པ་ཉན་ཐོས་དང་རང་སངས་རྒྱས་ཐམས་ཅད་ཀྱི་བྱིན་གྱིས་བརླབས་དང་། ལྷ་དང་མི་བདེན་ཚིག་གྲུབ་པ་ཐམས་ཅད་ཀྱི་བདེན་པ་དང་། བདག་ཅག་ལ་སོགས་པ་མི་དང་ལྷ་རྣམས་ཀྱི་སྨོན་ལམ་དང་། མོས་པ་དང་། བསོད་ནམས་ཀྱི་སྟོབས་ཀྱིས། དེང་འདིར་དེ་བཞིན་གཤེགས་པ་སྲས་དང་བཅས་པ་རྣམས་དང་། ལྷ་ཆེན་པོ་བཞི་དང་། རྒྱལ་པོ་ཆེན་པོ་བཞི་ལ་སོགས་ཏེ་གཙང་རིས་ཀྱི་མགོན་པོ་ཐུགས་དམ་ཅན་ཐམས་ཅད་ལ་མཆོད་པའི་ཚོགས་སྦྱར་བའི་ཕོ་བྲང་བཀོད་པ་མཐའ་ཡས་པའི་ཡོན་ཏན་ད ང་ལྡན་པར་གྱུར་ཏེ། ས་གཞི་རིན་པོ་ཆེ་སྣ་ཚོགས་ཀྱི་རང་བཞིན་ལག་མཐིལ་ལྟར་མཉམ་པ། རེག་ན་འཇམ་ཞིང་ཡངས་ལ་མཐའ་གྲུ་ཆེ་བའི་གཞི་ལ། རིན་པོ་ཆེ་སྣ་ཚོགས་ཀྱི་ཕ་གུས་ཟླུམ་པོར་བརྩིགས་པ། ཕྱོགས་བཞིར་སྒོ་བཞི་དོད་པ། རྩིག་པའི་སྟེང་དུ་ཕ་གུ་དྲྭ་བ་དྲྭ་ཕྱེད་ཤར་བུ་མདའ་ཡབ་དང་། རྩ་བར་འདོད་པའི་སྣམ་བུ་དམར་པོས་བསྐོར་བ། དེའི་ནང་དུ་བཻཌཱུརྱའི་རང་བཞིན་གྱི་ཁྱམས་ཀྱིས་ཡོངས་སུ་བསྐོར་བའི་དབུས་སུ། རིན་པོ་ཆེ་སྣ་བཞིའི་རང་བཞིན་ལས་གྲུབ་པའི་ལྷུན་པོ། རྩ་བར་གསེར་གྱི་རི་བདུན། རོལ་པའི་མཚོ་བདུན། ཕྱོགས་བཞི་ན་རྒྱ་མཚོ་ཆེན་པོ་བཞི་དང་། གླིང་བཞི་གླིང་ཕྲན་བརྒྱད། འཁོར་ཡུག་དང་བཅས་པས་ཡོངས་སུ་བསྐོར་བའི་དབུས་ན། རིན་པོ་ཆེ་པདྨའི་རྒྱལ་པོ་འདབ་མ་བཞི་པ་ཡངས་ཤིང་རྒྱ་ཆེ་བ་ཤིན་ཏུ་མཛེས་པར་གྱུར་པ་ལ། འཕགས་པའི་ཚོགས་འཁོར་དང་བཅས་པ་རྣམས་གདན་འཛོམ་པ་ཆེན་པོ་མཛད་པའི་སྟན་སོ་སོའི་སྨོན་ལམ་དང་བསོད་ནམས་ཁྱད་པར་ཅན་གྱི་མངའ་ཐང་དང་འཚམས་པར་གྲུབ་པ་མཛེས་པ་ཤ་སྟག་འབྱུང་བར་གྱུར་ཅིག །ཅེས་ལན་གསུམ་བརྗོད། མཆོད་པ་བྱིན་གྱིས་རློབ་པ་ནི། ཕྱི་ནང་ཀུན་ཏུ་ཡང་ཆ་རིགས་དང་འཚམས་པར་ལྷ་དང་མིའི་ཡོ་བྱད་དམ་པ། ཁ་དོག་དང་། དྲི་དང་། རོ་དང་། རེག་པ་དང་ལྡན་པ་ཡིད་དུ་འོང་བ། གྱ་ནོམ་པའི་ཞལ་ཟས་དང་། ན་བཟའ་དང་། རྒྱན་དང་རོལ་མོ་ལ་སོགས་པ་ཕུལ་དུ་ཕྱིན་པ་སྣ་ཚོགས་པ་མཆོད་པའི་སྤྲིན་རྒྱ་མཚོ་ཐམས་ཅད་ཀྱིས་རྒྱས་པར་བཀང་ཞིང་རྒྱན་ཀླུབས་པ་དང་ལྡན་པར་གྱུར་ཅིག །འཕགས་པའི་ཚོགས་འཁོར་དང་བཅས་པ་ཐམས་ཅད་གདན་འཛོམ་ནས། དེ་བཞིན་དུ་བྱིན་གྱིས་བརླབས་ཤིང་བཞེས་ཏེ་ལོངས་སྤྱོད་པར་གྱུར་ཅིག །ཅེས་ལན་གསུམ་དང་། མཆོད་སྤྲིན་གྱི་གཟུངས། ན་མོ་རཏྣ་ཏྲ་ཡཱ་ཡ། ༀ་ན་མོ་བྷ་ག་ཝ་ཏེ་བཛྲ་སྭཱ་ར་པྲ་མརྡ་ནེ། ཏ་ཐཱ་ག་ཏཱ་ཡ་ཨཱརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ༀ་བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛྭ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སཾ་ཀྲ་མ་ཎ་བཛྲ་སརྦ་ཀརྨ་ཨཱ་ཝ་ར་ཎ་བི་ཤོདྷ་ན་བཛྲེ་སྭཱ་ཧཱ། ཞེས་པའང་བརྗོད། དེ་ནས་སྤྱན་དྲང་བ་ནི། སྟན་ལས་ལངས་ཏེ། ལག་གཡས་སྤོས་སྣོད་ཐོགས་ཤིང་གཡོན་དྲིལ་བུ་གསིལ་བ་དང་བཅས་ཏེ་འདུན་པ་རྩེ་གཅིག་པས། བཅོམ་ལྡན་འདས་དཔལ་རྣམ་པར་སྣང་མཛད་ལ་སོགས་པ་ཕྱོགས་བཅུ་ན་དུས་གསུམ་དུ་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་། དེ་དག་གིས་ལེགས་པར་གསུངས་པ། ལེགས་པར་བསྒྲུབས་པ། ལེགས་པར་ཐུགས་སུ་ཆུད་པ་དམ་པའི་ཆོས་ཐམས་ཅད་དང་། ཐུགས་ཀྱི་སྲས་སུ་གྱུར་པ་བྱང་ཆུབ་སེམས་དཔའ་ཆེན་པོ་རྣམས་དང་། གསུང་གི་སྲས་ཉན་རང་འཕགས་པའི་ཚོགས་དང་བཅས་པ་ཐམས་ཅད་དགོངས་སུ་གསོལ། ཐུགས་རྗེ་ཆེན་པོ་དང་། བྱིན་གྱིས་རླབས་པ་བསམ་གྱི་མི་ཁྱབ་པ་མངའ་ཞིང་། འགྲོ་བའི་དོན་དུ་སྨོན་ལམ་ཁྱད་པར་ཅན་མཛད་པ་ལས་གླེངས་ཏེ། བདག་སོགས་སེམས་ཅན་ཐམས་ཅད་ཀྱི་བསོད་ནམས་སྤེལ་བའི་སླད་དུ། དེང་སྤྱན་འདྲེན་ཞིང་མཆི་ན། མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་གཤེགས་ཤིང་གདན་འཛོམ་པ་ཆེན་པོ་མཛད་དེ། བྱིན་གྱིས་རློབ་པར་ཅི་གནང་། ན་མོ། ཕྱོགས་བཅུའི་འཇིག་རྟེན་རབ་འབྱམས་ན། རྒྱལ་བ་ཇི་སྙེད་བཞུགས་པ་ཀུན། །སྐུ་གསུམ་མཆོག་ལ་མངའ་བརྙེས་ཤིང་། །གསུང་མཆོག་ཆོས་ཀྱིས་ཉོན་མོངས་སྐྱོབ། །ཉན་ཐོས་རང་རྒྱལ་བྱང་སེམས་ཏེ། །འདས་དང་མ་བྱོན་ད་ལྟར་བཞུགས། །ངག་རྣམས་ཀུན་ལས་བཅུ་གཉིས་འཕགས། །གཞན་གྱི་དོན་ཕྱིར་ལམ་ལ་ཞུགས། །ཉོན་མོངས་སྐྱོབ་པའི་ཚོགས་རྣམས་ཀུན། །བདག་སོགས་སེམས་ཅན་མོས་ཕྱིར་དང་། །ཡོན་མཆོད་ཀུན་ལ་བརྩེ་བའི་ཕྱིར། །དད་པའི་ཤུགས་ཀྱིས་སྤྱན་འདྲེན་ན། །ཐུགས་རྗེའི་སྟོབས་ཀྱིས་གཤེགས་སུ་གསོལ། །ༀ་སརྦ་ཏ་ཐཱ་ག་ཏ་ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎི་ཀ་བཛྲ་དྷཱ་ཏུ་ས་རི་ཛཿཛཿ ཛ་ཧཱུཾ་བཾ་ཧོཿ ས་མ་ཡ་སྟྭཾ། ཞེས་པས་རྒྱལ་བ་སྲས་དང་བཅས་པ་སྤྱན་དྲངས། དེ་ནས་ལྷ་ཆེན་པོ་འཁོར་བཅས་སྤྱན་དྲང་བ་ནི། ལྷའི་འཇིག་རྟེན་མཐོ་རིས་ན་འཕགས་པ་གང་ཡང་དག་པའི་ཤེས་རབ་ཀྱིས་ཆོས་ཐམས་ཅད་ཀྱི་དེ་ཁོ་ན་ཉིད་རྟོགས་ཤིང་གཟིགས་པ་དང་ལྡན་པས་ཉོན་མོངས་པའི་སྒྲིབ་པ་བསལ་བ་དང་། བསམ་གཏན་དང་། རྣམ་ཐར་དང་། སྙོམས་འཇུག་དང་། གཟུངས་དང་། ཏིང་ངེ་འཛིན་ལ་དབང་དུ་གྱུར་པ། ཐབས་མཁས་པའི་སྤྱོད་པ་དང་ལྡན་པས་ལྷའི་རྒྱལ་པོའི་ཆ་ལུགས་ཀྱིས་ལྷ་མང་པོ་དག་ལ་དགེ་བའི་བཤེས་གཉེན་མཛད་ཅིང་བཞུགས་པ། ལྷ་མང་བོ་གཞན་དག་ཀྱང་དེ་བཞིན་དུ་བདེན་པ་རྟོགས་པ། ཐམས་ཅད་ཀྱང་སྔོན་སྟོན་པ་བཅོམ་ལྡན་འདས་ཀྱི་སྤྱན་སྔར་སོ་སོ་ནས་ལྷའི་ངག་བརྟགས་པས་ཞལ་གྱིས་བཞེས་པའི་ཐུགས་དམ་ལས་མ་གཡེལ་བར། དེང་རྒྱལ་བ་སྲས་བཅས་སྤྱན་དྲང་བའི་གནས་འདིར་གཤེགས་སུ་གསོལ། ཧཱུཾ། ཚངས་དང་ལྷ་དབང་སྲེད་མེད་བུ། །དབང་ཕྱུག་རྒྱལ་ཆེན་སྡེ་བཞི་པོ། །ལྷ་དང་ཀླུ་དང་ལྷ་མ་ཡིན། །མིའམ་ཅི་ཡི་དབང་པོ་དང་། །ཕྱོགས་སྐྱོང་བཅུ་སོགས་འཁོར་དང་བཅས། །མི་ཕྱེད་རབ་དང་ལྡན་པ་ཀུན། །དེ་རིང་སྙན་གསན་དུས་ཀྱི་ཕྱིར། །མཆོད་གཏོར་བཟང་པོ་བཞིས་པ་དང་། །བསྟན་པ་རྒྱས་སླད་གཤེགས་སུ་གསོལ། །ༀ་བྲཧྨ་ཎ། ཨིནྡྲ། བིཥྞུ། ཨཱི་ཤྭ་ར། དྷྀ་ཏ་རཥྚ། བི་རཱུ་ཌྷ་ཀ །བི་རཱུ་པཱ་ཀྵ། བཻ་ཤྲ་བ་ཎ་ས་པ་རི་ཝཱ་ར་ཛཿ ཛཿཧཱུཾ་བཾ་ཧོཿ ས་མ་ཡ་ཧོཿ ས་མ་ཡ་སྟྭཾ། ཞེས་སྤྱན་དྲངས་པས། དཀོན་མཆོག་གསུམ་དང་། ལྷའི་རྒྱལ་པོ་རྣམས་སོ་སོའི་ཞིང་ཁམས་ནས། རང་རང་གི་འཁོར་དང་བཅས་པ་རྫུ་འཕྲུལ་གྱི་མཐུས་བྱོན་ནས་རང་རང་གི་གནས་སུ་བཞུགས་པ་ནི། དཀྱིལ་འཁོར་གྱི་དབུས་ཀྱི་གདན་གྱི་སྟེང་དུ་བཅོམ་ལྡན་འདས་ཀུན་རིག་རྣམ་པར་སྣང་མཛད་སྐུ་མདོག་དཀར་པོ། ཞལ་བཞི་པ། བྱང་ཆུབ་མཆོག་གི་ཕྱག་རྒྱ་མཛད་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། རྡོ་རྗེའི་སྐྱིལ་ཀྲུང་གིས་བཞུགས་པ། འདབ་མ་བཞིའི་ཤར་དུ་ཞིང་སྦྱོང་བའི་ལྷ་རྡོ་རྗེ་མི་འཁྲུག་པ་སྔོན་པོ་གཡས་ས་གནོན་དང་གཡོན་མཉམ་བཞག་གི་སྟེང་ན་རྡོ་རྗེ། ལྷོར་སྟོང་གི་ལྷ་སྟོན་པ་ཤཱཀྱ་ཐུབ་པ་སེར་པོ་གཡས་ས་གནོན་དང་གཡོན་མཉམ་བཞག་གི་སྟེང་ན་ལྷུང་བཟེད། ནུབ་ཏུ་ཉའི་ལྷ་འོད་དཔག་མེད་དམར་པོ། ཕྱག་གཉིས་མཉམ་བཞག་གི་སྟེང་ན་ཚེ་བུམ། བྱང་དུ་ཚེས་བརྒྱད་ཀྱི་ལྷ་སྨན་གྱི་བླ་བཻཌཱུརྻ་འོད་ཀྱི་རྒྱལ་པོ་མཐིང་ག་གཡས་མཆོག་སྦྱིན་ཨ་རུ་ར་དང་གཡོན་མཉམ་བཞག་བདུད་རྩིའི་ལྷུང་བཟེད་ཀྱིས་མཚན་པ། དེ་བཞི་ཀ་མཆོག་གི་སྤྲུལ་སྐུ་ཚངས་པར་སྤྱོད་པའི་ཆ་ལུགས་ཅན་རྡོ་རྗེའི་སྐྱིལ་ཀྲུང་གིས་བཞུགས་པ། དེ་རྣམས་ཀྱི་མཐའ་བསྐོར་དུ་ཕྱོགས་བཅུ་དང་དུས་གསུམ་གྱི་སངས་རྒྱས་དཀོན་མཆོག་ཐམས་ཅད་དང་། ཆོས་དཀོན་མཆོག་གི་ངོ་བོ་ཡུམ་ཆེན་མོ། དགེ་འདུན་དཀོན་མཆོག་ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་དང་། འཕགས་པ་ཉན་རང་གི་ཚོགས་མ་ལུས་པ་ཐམས་ཅད་སྤྲིན་གཏིབས་པ་ལྟར་བཞུགས་པ། ཤར་གླིང་དབུས་མར་བརྒྱ་བྱིན་དཀར་པོ་གཡས་རྡོ་རྗེ་གདེངས་ཤིང་གཡོན་ནོར་བུ་ལས་མཆོག་སྦྱིན་སྟེར་བའི་གློ་གཡོན་ན་དབང་མོ་དཀར་མོ་རྒྱུད་མང་བསྣམས་པས་འདུད་པའི་ཚུལ་ཅན། དེའི་གཡས་ཀྱི་གླིང་དུ་མངགས་གཞུག་འགྲོ་བ་ཡིད་འོང་མ་ལྗང་གུ་རལ་གྲི། གཡོན་གྱི་གླིང་དུ་ཕོ་ཉ་མྱུར་བའི་ཤུགས་ཅན་སྔོན་པོ་རྩེ་གསུམ། ལྷོ་གླིང་དབུས་མར་ཚངས་པ་སེར་པོ་གདོང་བཞི་སྤྱི་བླུགས་འཛིན་པའི་གློ་གཡོན་ན་ཚངས་མ་སེར་མོ་གུནྡྷེ་བསྣམས་པས་འདུད་པའི་ཚུལ་ཅན། དེའི་གཡས་ཀྱི་གླིང་དུ་མངགས་གཞུག་ལྟ་ན་སྡུག་ལྗང་གུ་རལ་གྲི། གཡོན་གྱི་གླིང་དུ་ཕོ་ཉ་མགྱོགས་བྱེད་དམར་པོ་པད་དཀར། ནུབ་གླིང་དབུས་མར་ཁྱབ་འཇུག་སྔོ་ནག་འཁོར་ལོ་འཛིན་པའི་གློོ་གཡོན་ན་དཔལ་མོ་གསལ་ཤིང་བསྣམས་པས་འདུད་པའི་ཚུལ་ཅན། དེའི་གཡས་ཀྱི་གླིང་དུ་མངགས་གཞུག་རྡོ་རྗེ་བདེ་བ་དཀར་པོ་མཆེ་བ། གཡོན་གྱི་གླིང་དུ་ཕོ་ན་རྡོ་རྗེ་སྡེ་དཔོན་ལྗང་སེར་འཁོར་ལོ། བྱང་གླིང་དབུས་མར་དབང་ཕྱུག་དམར་པོ་རྩེ་གསུམ་འཛིན་པའི་གློ་གཡོན་ན་ཨུ་མ་པདྨ་བསྣམས་པས་འདུད་པའི་ཚུལ་ཅན། དེའི་གཡས་ཀྱི་གླིང་དུ་མངགས་གཞུག་དེད་དཔོན་ནག་པོ་མདུང་ཐུང་། གཡོན་གྱི་གླིང་དུ་ཕོ་ཉ་དྲང་སྲོང་ཁྲོས་པ་དམར་པོ་མདའ་གཞུ་འགེངས་པ། དེ་ཐམས་ཅད་ཀྱང་ལྷའི་ཆ་བྱད་ཅན་དར་དང་རིན་པོ་ཆེས་བརྒྱན་པའོ། །སྒོ་བཞིའི་ཤར་དུ་ཡུལ་འཁོར་སྲུང་དཀར་པོ་པི་ཝཾ། ལྷོར་འཕགས་སྐྱེས་པོ་སྔོན་པོ་རལ་གྲི། ནུབ་ཏུ་མིག་མི་བཟང་དམར་པོ་སྦྲུལ་ཞགས་དང་མཆོད་རྟེན། བྱང་དུ་རྣམ་ཐོས་སྲས་སེར་པོ་རྒྱལ་མཚན་དང་ནེའུ་ལེ་འཛིན་པ། སྒོའི་ནང་གི་ཁྱམས་དང་ཕྱིའི་ཁོར་ཡུག་ལ་འཁོར་དུ་གཏོགས་པའི་ཁམས་གསུམ་གྱི་ལྷ་དང་མི་མཐའ་ཡས་པ། ཐམས་ཅད་ཀྱང་རང་རང་གི་རྒྱན་དང་ཆ་ལུགས་རྣམ་འཕྲུལ་སྣ་ཚོགས་པའི་རོལ་པས་བཞུགས་པར་བསམ་ལ། བཞུགས་སུ་གསོལ་བ་ནི། མྱ་ངན་མི་འདའ་ཐུགས་རྗེའི་དང་། །ཉོན་མོངས་མི་སྤོང་གོས་པ་མེད། །མ་ཆགས་རང་བཞིན་དག་པས་ན། །པདྨའ་ིསྟན་ལ་བཞུགས་སུ་གསོལ། །པདྨ་ཀ་མ་ལ་ཡ་སྟྭཾ། དེ་ནས་ཚོགས་བསགས་པའི་རིམ་པ་ལ་འཇུག་སྟེ། དང་པོ་དཀོན་མཆོག་གསུམ་འཁོར་དང་བཅས་པ་ལ་ཕྱག་འཚལ་བའི་རིམ་པ་ནི། སྤྲོ་ན་ཐར་པ་ཆེན་པོ་ཕྱོགས་བཅུ་རྒྱས་པའི་མདོའམ་རྟོགས་པ་ཆེན་པོ་ཡོངས་སུ་རྒྱས་པའི་མདོ་གང་རུང་ངམ། བསྡུ་ན་དཔང་སྐོང་ཕྱག་བརྒྱ་པ་ལས་གསུངས་པ་ལྟ་བུ་གང་རིགས་བྱ་ཞིང་། འདིར་ཤིན་ཏུ་བསྡུས་པའི་དབང་དུ་བྱས་ཏེ། བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་དང་། སྟོན་པ་བཅོམ་ལྡན་འདས་ཤཱཀྱ་ཐུབ་པ་ལ་སོགས་པ་ཕྱོགས་བཅུ་དུས་གསུམ་དུ་གཤེགས་ཤིང་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས། དཀོན་མཆོག་བླ་ན་མེད་པ་ཐམས་ཅད་ལ་གུས་པས་ཕྱག་འཚལ་ལོ། །དེ་བཞིན་གཤེགས་པ་དེ་དག་གིས་ལེགས་པར་གསུངས་པ། ལེགས་པར་སྒྲུབས་པ། ལེགས་པར་ཐུགས་སུ་ཆུད་པ། དམ་པའི་ཆོས་དཀོན་མཆོག་བླ་ན་མེད་པ་ཐམས་ཅད་ལ་གུས་པས་ཕྱག་འཚལ་ལོ། །སངས་རྒྱས་བཅོམ་ལྡན་འདས་དེ་དག་གི་ཐུགས་ཀྱི་སྲས་ས་ཆེན་པོ་ལ་རབ་ཏུ་བཞུགས་པའི་བྱང་ཆུབ་སེམས་དཔའ་ཆེན་པོ་ཐམས་ཅད་དང་། སྟོན་པ་བདེ་བར་གཤེགས་པ་དེ་དག་གི་གསུང་གི་སྲས་འཕགས་པ་རང་རྒྱལ་དང་། འཕགས་པ་ཉན་ཐོས་ཀྱི་དགེ་འདུན་ཏེ། ཚོགས་ཀྱི་མཆོག་བླ་ན་མེད་པ་ཐམས་ཅད་ལ་གུས་པས་ཕྱག་འཚལ་ལོ། །ཚངས་པ་དང་བརྒྱ་བྱིན་ལ་སོགས་ཏེ་འཕགས་པ་དམ་པའི་ཆོས་སྐྱོང་བ་འཇིག་རྟེན་དང་འཇིག་རྟེན་ལས་འདས་པའི་ཚུལ་དུ་བཞུགས་པ་ཐམས་ཅད་ལ་གུས་པས་ཕྱག་འཚལ་ལོ། །ན་མོ། སྟོན་པ་བླ་མེད་སངས་རྒྱས་རིན་པོ་ཆེ། །སྐྱོབ་པ་བླ་མེད་དམ་ཆོས་རིན་པོ་ཆེ། །འདྲེན་པ་བླ་མེད་དགེ་འདུན་རིན་པོ་ཆེ། །མཆོད་གནས་དཀོན་མཆོག་གསུམ་ལ་ཕྱག་འཚལ་ལོ། །པདྨ་ཁ་འབུལ་ཁ་ཕྱེ་འདྲ་བ་ཡིས། །ལག་གཉིས་སྤྱི་བོར་བཀོད་ནས་ཐལ་སྦྱར་ཏེ། །ལུས་དཔག་མེད་པར་སྤྲུལ་པའི་སྤྲིན་ཚོགས་ཀྱིས། །ཕྱོགས་བཅུའི་སངས་རྒྱས་རྣམས་ལ་ཕྱག་འཚལ་ལོ། །སྲིད་གསུམ་ལས་ཀྱི་གླིང་ནས་འཁོར་བའི་རུ་བཟློག་ཅིང་། །ཉོན་མོངས་ཐ་བའི་གནས་ནས་བྱང་ཆུབ་མྱུ་གུ་སྐྱེས། །སྲིད་དང་ལྟ་ཕྱིར་འབྲངས་པའི་བདུད་རིགས་སྟོངས་མཛད་པ། །འདས་པའི་སངས་རྒྱས་རྣམས་ལ་གུས་པས་ཕྱག་འཚལ་ལོ། །བདེ་གཤེགས་རྣམ་པར་གཟིགས་དང་གཙུག་ཏོར་ཅན། །ཐམས་ཅད་སྐྱོབ་དང་ལོག་པར་དད་སེལ་དང་། །གསེར་ཐུབ་འོད་སྲུངས་རྒྱལ་བ་ཤཱཀྱ་ཐུབ། །ད་ལྟའི་སངས་རྒྱས་རྣམས་ལ་ཕྱག་འཚལ་ལོ། །ས་བཅུ་མཆོག་བརྙེས་སངས་རྒྱས་ཉིད་མཛད་པ། །ཞི་དུལ་དབང་གིས་མཁྱེན་རབ་འགྲོ་བའི་ཆེད། །རབ་དགའ་ཡོན་ཏན་པདྨོ་ཁ་འབུས་པ། །མ་བྱོན་སངས་རྒྱས་རྣམས་ལ་ཕྱག་འཚལ་ལོ། །འགྲོ་ཀུན་འཁོར་བའི་གནས་ནས་འདྲེན་པའི་ཐབས། །སྒྲོན་མ་ལམ་དང་འབྲས་བུ་བཤད་པའི་ཆོས། །ཉེས་སྤོང་མཐོ་རིས་ཐར་པར་བགྲོད་པའི་ལམ། །དམ་ཆོས་མདོ་སྡེ་རྣམས་ལ་ཕྱག་འཚལ་ལོ། །བྱམས་དང་སྙིང་རྗེའི་བདག་ཉིད་ས་གཞི་ལ། །ཐབས་དང་ཤེས་རབ་བློོ་ཡི་ལོ་ཏོག་བརྙེས། །མ་ལུས་སེམས་ཅན་ཉེ་བར་འཚོ་མཛད་པ། །བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ། །ཚངས་དང་དབང་ཕྱུག་ཁྱབ་འཇུག་མ་ཧཱ་དེ་ཝ། །རྒྱལ་ཆེན་བཞི་སོགས་གཙང་རིས་མགོན་པོ་སྟེ། །བསྟན་པ་བསྲུང་བར་ཞལ་བཞེས་འཕགས་པའི་ཚོགས། །དཀར་ཕྱོགས་སྐྱོང་བ་རྣམས་ལ་ཕྱག་འཚལ་ལོ། །དཀོན་མཆོག་བླ་མེད་ཡོན་ཏན་རིན་པོ་ཆེ། །དད་མོས་རྣམས་ཀྱི་ཡོན་ཏན་བསམ་མི་ཁྱབ། །མཐོ་དམན་ཡོངས་ཀྱི་སྐྱབས་མཛད་འགྲོ་བའི་མགོན། །དཀོན་མཆོག་འཁོར་དང་བཅས་ལ་ཕྱག་འཚལ་ལོ། །དཀོན་མཆོག་གསུམ་ལ་དད་པས་ཕྱག་བཙལ་བས། །སྡིག་པ་ཀུན་བྱང་དགེ་ཚོགས་རྣམ་པར་འཕེལ། །བཅོམ་ལྡན་སོ་སོའི་བཀའ་ལས་ཅི་འབྱུང་བའི། །ཡོན་ཏན་ཁྱད་པར་ཅན་དེ་འགྲུབ་པར་ཤོག །དེ་ནས་མཆོད་པ་འབུལ་བ་ནི། །དེ་བཞིན་གཤེགས་པའི་མཐུ་དང་བྱང་ཆུབ་སེམས་དཔའི་བསོད་ནམས་རབ་འབྱམས་ལས་བྱུང་བ། མི་མཉམ་པ་དང་མཉམ་པའི་མཆོད་པ་སྣ་ཚོགས་པའི་མཆོག །གཙོ་བོ་དམ་པ་ཁྱད་པར་ཅན། བཟང་པོ། གྱ་ནོམ་པ། བླ་ན་མེད་པ། མི་མཉམ་པ་དང་མཉམ་པས་ཕྱོགས་བཅུའི་སྣོད་ཀྱི་འཇིག་རྟེན་ཐམས་ཅད་ཕྱུར་བུར་བཀང་སྟེ། ཆོས་ཀྱི་མཆོད་པ་དང་བཅས་པས། མ་ལུས་མི་ལུས་ལུས་པ་མེད་པའི་དཀོན་མཆོག་གསུམ་ལ་ཕྱི་མའི་མུའི་མཐར་རྟག་ཏུ་རྒྱུན་མི་ཆད་པར་མཆོད་ཅིང་འདོན་ཏོ། །དབུལ་ཞིང་གསོལ་ལོ། །བཀུར་སྟིར་བགྱིའོ། །བླ་མར་བགྱིའོ། །རི་མོར་བགྱིའོ། །མཉེས་པར་བགྱིའོ། །རྒྱལ་བའི་སྐུ་ལ་ཉོན་མོངས་མི་མངའ་ཡང་། །སེམས་ཅན་ཉོན་མོངས་བག་ཆགས་སྦྱངས་སླད་དུ། །སྐུ་གསུང་ཐུགས་ལ་ཁྲུས་ཆབ་འདི་གསོལ་བས། །ཁམས་གསུམ་གནས་པའི་བག་ཆགས་དག་གྱུར་ཅིག །ༀ་སརྦ་དེ་བ་ཏ་ཨརྩི་ཏ་ཨ་མྲྀ་ཏ་སྭཱ་ཧཱ། ཞེས་དཀྱིལ་འཁོར་ལ་མེ་ལོང་བསྟན་ཏེ་བུམ་ཆུས་བཀྲུས་པའི་ཁྲུས་ཆུ་སླར་བུམ་པར་བླུག་ལ་བཞག །རས་ཁ་ཚར་མ་ཉམས་པས་འཕྱི་བཞིན་དུ། དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བགོས་པས་སྐུ་འཕྱིའོ། །ༀ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནི་སྭཱ་ཧཱ། རྣམ་ལྔ་དབུལ་བ་ནི། ཚུལ་ཁྲིམས་དྲི་ལྡན་སྤོས་མཆོག་དམ་པ་འདི། །ཏིང་འཛིན་སྔགས་དང་ཕྱག་རྒྱ་བྱིན་བརླབས་ཏེ། །སངས་རྒྱས་ཞིང་དུ་སྤོས་དྲི་ངད་ལྔང་པས། །རྒྱལ་བ་སྲས་དང་བཅས་རྣམས་ཚིམ་གྱུར་ཅིག །དཀྱིལ་འཁོར་ཀུན་ཏུ་རྒྱལ་བ་མཉེས་བྱེད་པའི། །རིན་ཆེན་དབྱིབས་ལེགས་ལྷ་རྫས་མེ་ཏོག་འདི། །ནམ་མཁའ་གང་བར་སེམས་ཀྱིས་མངོན་སྤྲུལ་ཏེ། །གཞལ་ཡས་ཁང་དུ་སྤྲིན་བཞིན་གཏིབས་གྱུར་ཅིག །ཉོན་མོངས་དུག་སྲེག་མ་རིག་མུན་སེལ་བའི། །ཤེས་རབ་གཟི་ལྡན་དཔལ་གྱི་སྒྲོན་མེ་འདི། །སྤྲིན་མེད་མཁའ་ལ་ཉི་ཤར་ཇི་བཞིན་དུ། །འོད་གསལ་སྣང་བས་ཕྱོགས་བཅུར་གསལ་གྱུར་ཅིག །སྟོང་གསུམ་ཀུན་ཏུ་དྲི་མཆོག་ཁྱབ་གྱུར་པའི། །སྤོས་དང་སྨན་སྦྱར་གཙང་ཆབ་རྒྱས་པའི་ཁྲུས། །སྤྲིན་མེད་མཁའ་ལ་བདུད་རྩིའི་ཆར་བབས་པས། །མི་གཙང་དྲི་མའི་ཚོགས་རྣམས་དག་གྱུར་ཅིག །རྒྱལ་བའི་སྐུ་ལ་བཀྲེས་པ་མི་མངའ་ཡང་། །འགྲོ་བའི་དོན་དུ་ལྷ་རྫས་བདུད་རྩིའི་བཤོས། །དག་ཅིང་གཙང་མར་སྦྱར་ཏེ་འབུལ་ལགས་ན། །ཐུགས་རྗེ་ཆེན་པོས་དགོངས་ཏེ་བཞེས་སུ་གསོལ། །དྲིལ་ཆེན་སིལ་སྙན་རྣམ་གྲོལ་ཚངས་པའི་དབྱངས། །བསམ་དག་གང་གིས་བསྟོད་དེ་གུས་མཆོད་པས། །ས་བཅུ་རིམ་གྱིས་བགྲོད་ནས་སངས་རྒྱས་སར། །ཚོགས་གཉིས་རྫོགས་ནས་ཆོས་ཀྱི་རྒྱལ་པོར་སྨོན། །བསྟོད་པའི་མཆོད་པ་ནི། བདག་གཞན་དོན་ཕྱིར་སྐུ་གསུམ་བརྙེས། །སེམས་ཅན་སྐྱོབ་ཕྱིར་ཆོས་ཀྱི་མཆོག །ལམ་ལ་ཞུགས་པའི་དགེ་འདུན་ཏེ། །དཀོན་མཆོག་གསུམ་ལ་ཕྱག་འཚལ་བསྟོད། །བསྟོད་པར་འོས་པ་སོགས་ཀྱང་བྱའོ། །རྒྱས་པར་མཆོད་པ་དང་བསྟོད་པའང་ཕྱག་འཚལ་ལྟར་སོ་སོར་འབྱུང་སྟེ། འདིར་དེ་ཙམ་མོ། །དེ་ནས་རྟོག་ཆེན་གྱི་གཟུངས་འདི་བརྒྱ་རྩ་བརྒྱད་བཟླས་བཞིན་དུ་བསྐོར་བ་ལན་བདུན་བདུན་བྱའོ། གཟུངས་ནི། ན་མོ་བུདྡྷཱ་ཡ། ན་མོ་དྷ་རྨཱ་ཡ། ན་མཿསཾ་གྷཱ་ཡ། ཨ་དནྡྷི། དྷ་ར་ཎི། ཏདྱ་ཐཱ། ཨཱ་ཀ་ཤ་ནི་སྶཾ་བྷཱ་ཝ། ཨི་ཤ་མ་ཏ། པི་པ་ཤན། བི་མ་ལ། སུ་པ་རི་དྷརྨ། ཨ་ཏི་ཀ་ན་པཱ་ལ་ནི་ཤྩ་ཡ། ཏ་མ་ལེ། ཙ་ལེ་ཙ་ལེ། ཧུ་ལུ་ཧུ་ལུ། བི་ཤད་དེ་བི་ཤད་དེ། མནྡྲ་མནྡྲ་མནྡྲ་ཡ་སྭཱ་ཧཱ། ཞེས་པའོ། །འདིར་མདོ་ཆོག་ཡིག་རྙིང་དུ་ཕྱོགས་བཅུ་དང་དུས་གསུམ་གྱི་སངས་རྒྱས་རྣམས་སྡེ་ཚན་དུ་ཕྱེ་ནས་བསྐོར་བ་བདུན་ཚན་བརྒྱད་བཤད་ནའང་། འདིར་དཀོན་མཆོག་གསུམ་པོ་ལ་བསྐོར་བ་བདུན་རེ་སྟེ་ཉེར་གཅིག་ཙམ་བྱས་ན་འཚམས་པར་འགྱུར་རོ། །དེ་ནས་སྡིག་པ་བཤགས་པ་ནི། རྒྱས་པར་ཐར་པ་ཆེན་པོའམ་རྟོགས་ཆེན་ལྟར་བྱ་ཞིང་། འདིར་བསྡུས་པ་ལ་དགའ་ན། དཔང་སྐོང་ལས་འབྱུང་བ་ལྟར་འདི་སྐད་ཅེས། བདག་ཅག་ལ་སོགས་པ་སེམས་ཅན་ཐམས་ཅད་ཀྱི་སྐྱེ་བ་འདི་དང་། སྐྱེ་བ་ཐོག་མ་དང་། ཐ་མ་མ་མཆིས་པ་ནས། སྲིད་པ་གསུམ་གྱི་འཁོར་བ་ན་འཁོར་ཞིང་། འདོད་ཆགས་དང་། ཞེ་སྡང་དང་། གཏི་མུག་གསུམ་གྱི་དབང་གིས་ལུས་དང་ངག་དང་ཡིད་ཀྱི་སྒོ་ནས་མི་དགེ་བ་བཅུ་དང་། མཚམས་མེད་པ་ལྔ་ལ་སོགས་ཏེ་གསུང་རབ་ཀུན་ལས་འགལ་བའི་སྡིག་པ་མི་དགེ་བའི་ལས་བདག་གིས་ཅི་བགྱིས་པ་དང་། གཞན་ལ་བཅོལ་བ་དང་། གཞན་བགྱིད་པ་ལ་རྗེས་སུ་ཡི་རང་བ་དེ་དག་རྡུལ་ཙམ་བག་ཙམ་ཡང་མ་ལུས་པར་མཐོལ་ཞིང་བཤགས་སོ། །སྦྱངས་ཤིང་བསལ་ཏོ། །གཞིག་ཅིང་འདོན་ཏོ། །མི་འཆབ་བོ། །མི་སྦེད་དོ། །མི་བསྙེན་མི་བགྱིད་དོ། །དེ་ནས་རྗེས་སུ་ཡི་རང་བ་ནི། ཇི་ལྟར་དུས་གསུམ་གྱི་སངས་རྒྱས་དེ་དག་བླ་ན་མེད་པའི་བསོད་ནམས་ཀྱི་རྗེས་སུ་ཡི་རང་བ་ལྟར། བདག་ཅག་ལ་སོགས་པ་སེམས་ཅན་ཐམས་ཅད་ཀྱིས་ཀྱང་འཇིག་རྟེན་དང་འཇིག་རྟེན་ལས་འདས་པའི་བསོད་ནམས་ཐམས་ཅད་ལ་རྗེས་སུ་ཡི་རང་ངོ་། །དེ་ནས་ཆོས་འཁོར་བསྐོར་བར་བསྐུལ་བ་ནི། ཕྱོགས་བཅུ་ན་དེ་བཞིན་གཤེགས་པ་གང་དག་སེམས་ཅན་གྱི་དོན་དུ་མངོན་པར་རྫོགས་པ་སངས་རྒྱས་ཀྱང་དམ་པའི་ཆོས་བཙུན་པར་མཛད་པའི་སླད་དུ་ཆོས་ཀྱི་འཁོར་ལོ་བསྐོར་བར་བསྐུལ་བའི་ས་ལ་བཞེས་པ་དེ་དག་ཐམས་ཅད་ལ་ཆོས་ཀྱི་འཁོར་ལོ་བླ་ན་མེད་པར་བསྐོར་བར་བསྐུལ་མ་འཚལ་ལོ། །དེ་ནས་མྱ་ངན་ལས་མི་འདའ་བར་གསོལ་བ་ནི། འཇིག་རྟེན་གྱི་ཁམས་རབ་འབྱམས་ཆོས་ཀྱི་དབྱིང་ཀྱིས་ཁྱབ་པ་ཐམས་ཅད་ན། དེ་བཞིན་གཤེགས་པ་གང་དག་འདུ་བྱེད་ཐམས་ཅད་མི་རྟག་པ་དང་། འབྱོར་པ་ཐམས་ཅད་མཐར་རྒུད་པར་འགྱུར་པའི་ཚུལ་བསྟན་ཅིང་། ཐབས་ཀྱིས་མྱ་ངན་ལས་འདའ་བར་བཞེད་པ་དེ་དག་ལ། སེམས་ཅན་ཐམས་ཅད་ལ་ཕན་པ་དང་བདེ་བའི་དོན་དུ་ཐུགས་རྗེ་ཆེན་པོའི་གཟུགས་ཀྱིས་ཕྱི་མའི་མཐའི་མུར་ཐུག་གི་བར་དུ་མྱ་ངན་ལས་མི་འདའ་ཞིང་བཞུགས་པར་གསོལ་བ་འཚལ་ལོ། །དེ་ནས་དགེ་བ་སྔོ་བ་ནི། བདག་ཅག་རྣམས་ཀྱི་དུས་གསུམ་གྱི་དགེ་བའི་རྩ་བ་ཐམས་ཅད་གཅིག་ཏུ་བསྡུས་པའི་མཐུས། བདག་ཅག་ལ་སོགས་པའི་སེམས་ཅན་མ་ལུས་པའི་སྡིག་པ་ཐམས་ཅད་ནི་བྱང་། བསོད་ནམས་ཐམས་ཅད་ནི་རྫོགས་ཏེ། དུས་འདི་ནས་ནམ་བྱང་ཆུབ་སྙིང་པོ་ལ་མཆིས་ཀྱི་བར་དུ་དགོངས་པའི་དབང་གིས་ཆེད་དུ་སྤྲུལ་པ་མ་གཏོགས་པར་ནམ་ཡང་ཚེ་རབས་ཐམས་ཅད་དུ་ངན་སོང་ལ་སོགས་པ་གནས་ངན་པར་མི་སྐྱེ་ཞིང་མི་ལྟུང་བར་ཤོག་ཅིག །ལོག་པ་མི་དགེ་བའི་ལས་ལ་མི་ཕྱོགས་མི་བགྱིད་པར་ཤོག་ཅིག །ལས་དང་ཉོན་མོངས་པའི་རྒྱུ་ལ་མི་ཕྱོགས་མི་བསོག་པར་ཤོག་ཅིག །སྨད་པའི་ལུས་དང་སྡུག་བསྔལ་གྱི་འབྲས་བུ་ཀུན་ལས་ཐར་ནས་ཕྱིན་ཆད་མི་མྱོང་བར་ཤོག་ཅིག །དུས་འདི་ནས་ནམ་བྱང་ཆུབ་སྙིང་པོ་ལ་མཆིས་ཀྱི་བར་དུ་སྒོ་གསུམ་ནས་དགེ་བ་ཆུ་བོའི་རྒྱུན་བཞི་དུ་རྒྱུན་མི་ཆད་པར་ཤོག་ཅིག །ཚེ་རབས་ག་སྐྱེས་ཀྱང་བདེ་སྐྱིད་ཕུན་སུམ་ཚོགས་པ་དང་ལྡན་ཏེ། སེམས་ཅན་ཐམས་ཅད་ཀྱི་དོན་བྱ་བ་ལ་མཐུ་དང་དབང་ཡོད་པར་ཤོག་ཅིག །གང་དེ་བཞིན་གཤེགས་པ་འབའ་ཞིག་གིས་ཐུགས་སུ་ཆུད་པའི་ཆོས་བླ་ན་མེད་པའི་བྱང་ཆུབ་ཏུ་གདོན་མི་ཟ་བར་འཚང་རྒྱ་བའི་དོན་དེ་ཁོ་ན་ཉིད་གང་ཡིན་པ་དེ་བདག་སོགས་སེམས་ཅན་ཐམས་ཅད་ཀྱིས་མ་ནོར་བར་ཁོང་དུ་ཆུད་ཅིང་བསྒོམས་ལ། གཞན་དག་ལའང་མ་ནོར་བར་སྟོན་ཅིང་འདྲེན་པར་ཤོག་ཅིག །མདོར་ན་བག་ཆགས་མ་ལུས་ཀུན་བྱང་ནས། །བསོད་ནམས་ཡེ་ཤེས་ཚོགས་ཆེན་ཡོངས་རྫོགས་ཏེ། །འགྲོ་བ་མ་ལུས་བྱིན་གྱིས་བསྒྲལ་བའི་ཕྱིར། །བདག་ཉིད་མྱུར་དུ་མངོན་པར་འཚང་རྒྱ་ཤོག །དེ་ནས་ཐུགས་དམ་བསྐུལ་པའི་ཕྱིར་གཟུངས་བཟླ་ཞིང་མདོ་སྡེ་བཀླག་པ་ནི། དཀྱིལ་འཁོར་ལ་བཀོད་ཅིང་སྤྱན་དྲངས་པའི་སངས་རྒྱས་སྲས་དང་བཅས་པ་ཐམས་ཅད་མངོན་སུམ་པ་ལྟ་བུར་དམིགས་ནས། དཀོན་མཆོག་གསུམ་གྱི་ཡོན་ཏན་གྱི་མཐུའི་ཁྱད་པར་དང་། གཟུངས་སྔགས་ཀྱི་ཕན་ཡོན་ཇི་སྐད་བཤད་པ་ལ་ཡིད་ཆེས་དང་དད་གུས་ཆེར་བསྐྱེད་དེ། འདོད་པའི་དོན་ཞུ་བའི་འདུན་པ་རྩེ་གཅིག་པས། ངན་སོང་ཐམས་ཅད་རྣམ་པར་སྦྱོང་བའི་རྩ་རིག །ༀ་ན་མོ་བྷ་ག་ཝ་ཏེ་སརྦ་དུརྒ་ཏེ་པ་རི་ཤོདྷ་ན་རཱ་ཛ་ཡ་ཏ་ཐཱ་ག་ཏ་ཡ་ཨརྷ་ཏེ་སམྱ་ཀྶཾ་བུདྡྷ་ཡ། ཏདྱ་ཐཱ། ༀ་ཤོ་དྷ་ནེ་ཤོ་དྷ་ནེ་སརྦ་པཱ་པཾ་བི་ཤོ་དྷ་ནེ་ཤུདྡྷེ་བིཤུ་དྡྷེ་སརྦ་ཀརྨ་ཨ་ཝ་ར་ཎ་བི་ཤུདྡྷེ་སྭཱ་ཧཱ། ལས་སྒྲིབ་རྣམ་པར་སྦྱོང་བ་མི་འཁྲུག་པའི་གཟུངས། ན་མོ་རཏྣ་ཏྲ་ཡཱ་ཡ། ༀ་ཀཾ་ཀ་ནི་ཀཾ་ཀ་ནི། རོ་ཙ་ནི་རོ་ཙ་ནི། ཏྲོ་ཊ་ནི་ཏྲོ་ཊ་ནི། ཏྲཱ་ས་ནི་ཏྲཱ་ས་ནི། པྲ་ཏི་ཧ་ན་པྲ་ཏི་ཧ་ན། སརྦ་ཀརྨ་པ་རཾ་པ་རཱ་ཎི་མེ་སརྦ་ས་ཏྭ་ནཉྩ་སྭཱ་ཧཱ། དུས་བཟང་ལས་སྟོང་གི་གཟུངས། ༀ་མུ་ནེ་མུ་ནེ་མ་ཧཱ་མུ་ནེ་ཤཱ ཀྱ་མུ་ན་ཡེ་སྭཱ་ཧཱ། ཉའི་གཟུངས། ༀ་པདྨ་དྷ་རི་ཧཱུཾ། བརྒྱད་ཀྱི་གཟུངས། ཏདྱ་ཏཱ་ཐ། ༀ་བྷཻ་ཥ་ཛྱེ་མ་ཧཱ་བྷཻ་ཥ་ཛྱེ་རཱ་ཛ་ས་མུངྒ་ཏེ་སྭཱ་ཧཱ། ཞེས་པ་རྣམས་ཅི་ནུས་བཟླ་ཞིང་། དཀྱིལ་འཁོར་གྱི་ལྷ་རྣམས་ཀྱི་སྐུ་ལས་འོད་ཟེར་འཕྲོས་བདག་སོགས་སེམས་ཅན་ཐམས་ཅད་ལ་ཁྱབ་པས་སྡིག་སྒྲིབ་སྦྱངས། འོད་ཟེར་དེས་བུམ་ཆུ་ལའང་ཁྱབ་པས་ནུས་པ་ཅན་དུ་གྱུར་པར་བསམ་མོ། །དེ་ནས་འཕགས་པ་རྟོགས་པ་ཆེན་པོ་ཡོངས་སུ་རྒྱས་པའི་མདོའི་གླེགས་བམ་རང་གིས་ཀློག་པའམ། གྲོགས་གཞན་ལ་འདོན་དུ་བཅུག་ཀྱང་རུང་ཞིང་། སྤྲོ་ཞིང་ནུས་ན་ཐར་པ་ཆེན་པོའི་མདོ་དང་། དཔང་སྐོངས་ཕྱག་བརྒྱ་པ་སོགས་ཀྱང་བཀླག་གོ །དེ་ནས་གཏོར་མ་བཏང་ཞིང་དབང་བསྐུར་བ་ནི། འདས་གཏོར་དང་ཆ་གསུམ་གྱི་གཏོར་མ་སྔར་བཤད་པ་བཞིན་དང་། དབང་ཆོག་ལྟར་ལྷ་མིའི་ཐེག་པའི་དབང་བསྐུར་རོ། །དེ་ནས་རྗེས་ཆོག་ནི། མཆོད་པ་དྲིར་མེད་ཡོངས་དག་པ། །རྣམ་མང་རྒྱ་ཆེ་ཐམས་ཅད་དང་། །སོ་སོའི་མངའ་ཐང་རྒྱ་ཆེན་དུ། །འོས་པ་བདེ་བར་སྦྱར་ཏེ་འབུལ། །ཞེས་པས་མཆོད་ནས། མ་རྙེད་ཡོངས་སུ་སོགསས་ཀྱི་ནོངས་པ་བཤགས། རས་བྲིས་ཡིན་ན། འདིར་ནི་གཟུགས་དང་སོགས་ཀྱིས་བརྟན་བཞུགས་བྱ། རྡུལ་ཚོན་ཡིན་ན། ༀ། ཁྱེད་ཀྱི་སེམས་ཅན་སོགས་ཀྱི་གཤེགས། ཕྱོགས་བཅུའི་སངས་རྒྱས་སྲས་དང་བཅས་པ་བདག་གིས་མཆོད་པས། སེམས་ཅན་མ་ལུས་པ་ཐམས་ཅད་ས་བཅུ་ལ་གནས་པར་བགྱིས་ཏེ། ཀུན་གྱིས་དེ་བཞིན་གཤེགས་པའི་ཡང་དག་པ་ཉིད་དུ་ཐུགས་སུ་ཆུད་པ་དང་ལྡན་པ་བགྱིད་པར་གྱུར་ཅིག །ཅེས་དགེ་བ་བསྔོ། དེ་ནས་བཀྲ་ཤིས་ནི། སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་གྱུར་ཅིག །སྟོན་མཆོག་དམ་པ་ལྷ་མིས་མཆོད་འོས་པ། །སངས་རྒྱས་ཕྱག་འཚལ་དེང་འདིར་བདེ་ལེགས་ཤོག །སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་དེང་འདིར་བདེ་གྱུར་ཅིག །ཞི་བ་ཆགས་བྲལ་ལྷ་མིས༴ །ཆོས་ལ་ཕྱག༴ །སེམས་ཅན་གང་༴ །དེ་དག་ཐམས་ཅད་༴ །ཚོགས་ཀྱི་མཆོག་རབ་ལྷ༴ །དགེ་འདུན་ཕྱག་འཚལ་དེང་འདིར་བདེ་ལེགས་ཤོག །ཅེས་བརྗོད་པས་ཕྱོགས་དུས་ཐམས་ཅད་དུ་བདེ་ལེགས་དང་ལྡན་པར་བྱའོ། །བརྒྱུད་པའི་མན་ངག་དང་བྲལ་ཀྱང་། །དབང་ཆེས་རང་བཟོར་སྦྱར་བའི་མུན། །མཐར་བྱེད་ཆོས་ཀྱི་ཉིན་མོར་བྱེད། །སྐལ་ལྡན་ཀུན་དགའི་དཔལ་དུ་ཤར། ལྷ་མིའི་ཐེག་པའི་སྒྲུབ་ཐབས་ཀྱི་ལེ་ཚན་ནོ།། །།

༈ ༀ་སྭ་སྟི། འགྲོ་ཀུན་འཁོར་བའི་ཆུ་གཏེར་ལས། གང་ཟག་བདག་མེད་རྟོགས་བྱེད་གྲུབ། །ཞི་བའི་གླིང་དུ་སྒྲོལ་མཛད་པ། །དེར་བཏུད་ཉན་ཐོས་སྒྲུབ་ཐབས་བཤད། །གཉིས་པ་ཉན་ཐོས་ཀྱི་དཀྱིལ་འཁོར་ནི། གང་དུ་བྱ་བའི་གཞིར་བྱི་དོར་བྱས་ཤིང་དྲི་བཟང་པོའི་ཆུས་ཆག་ཆག་བཏབ་པ་ལ། དཀྱིལ་འཁོར་ཁྱམས་དང་རྟ་བབས་སྤངས་པའི་གཞལ་ཡས་ཁང་གྲུ་བཞི་སྒོ་བཞི་པ། ཕྱི་རོལ་ཏུ་རིན་པོ་ཆེའི་བྱེ་མ་བརྡལ་བའི་ས་གཞི་ལ་དཔག་བསམ་གྱི་ཤིང་དང་ཁྲུས་ཀྱི་རྫིང་བུ་ལ་སོགས་པས་བརྒྱན་པའི་མཐར་རྡོ་ར་དང་འོད་ཕྲེང་གིས་བསྐོར་བ། དབུས་ཀྱི་ལྟེ་བ་སེར་པོ། དེའི་ཕྱི་ནས་རིམ་པར་འདབ་བཞི་ཕྱོགས་ཚོན། འདབ་བརྒྱད་ཕྱི་ནང་གཉིས་དང་། འདབ་མ་བཅུ་དྲུག་པ་རྣམས་མཛེས་ཚོན་དུ་བྱ་ཞིག །ཚོན་ལྷག་མ་སྤྱི་དང་འདྲའོ། །ལྷ་གནས་རྣམས་སུ་སྐུ་རྟེན་ལྷ་སོ་སོའི་ཙཀླི་བཀོད། དབུས་ཀྱི་སྟོན་པའི་སྐུ་དང་གོ་ས་གཅིག་པར་གསུང་རྟེན་སོ་ཐར་གྱི་མདོ་ལྟ་བུའི་གླེགས་བམ་དང་། ཐུགས་རྟེན་རིང་བསྲེལ་ཅན་གྱི་མཆོད་རྟེན་རྣམས་ཀྱང་དགོད། དྲིའི་ཆུས་རྟེན་བྱིན་ཅན་ལ་ཁྲུས་བྱས་པའི་ཆུ་སླར་ཡང་བུམ་པ་ཆས་སུ་བཅུག་པའི་ནང་དུ་བླུགས་པ་དཀྱིལ་འཁོར་གྱི་མདུན་དང་། རྫས་དབང་གི་ཙཀླི། ཆོས་གོས་གསུམ་གདིང་ལྷུང་ཆུ་ཚགས་སོགས་ཀྱང་ཅི་བདེར་བཤམ། དཀྱིལ་འཁོར་གྱི་མཐའ་བསྐོར་དུ་ཆུ་གཉིས་སྔོན་འགྲོའི་ཉེར་སྤྱོད་མདུན་ལྟ་བུར་གཙང་ཞིང་བསོད་པའི་བཟའ་བཅའི་འདས་གཏོར་དང་། ཆ་གསུམ་གཏོར་མའང་ཅི་བདེར་བཤམ། རང་གི་མདུན་དུ་སྤོས་སྣོད་མཐོར་ནས་རོལ་མོའི་ཡོ་བྱད་སོགས་འདུ་བྱའོ། །དེ་ནས་ཆོ་ག་ནི། ཁྲུས་དང་རྒྱལ་བ་སྲས་བཅས་ལ་ཕྱག་འཚལ་བ་སྔོན་དུ་འགྲོ་བས་སྟན་ལ་འདུག་སྟེ། སྐྱབས་སེམས་ཚད་མེད་བཞི་བསྒོམ་པའི་རིམ་པ་ནི། ཐུབ་པ་མཆོག་དང་དམ་པའི་ཆོས། །འགྲོ་བའི་མུན་སེལ་དགྲ་བཅོམ་གྱི། །ཚོགས་ལ་བདག་ནི་སྐྱབས་སུ་མཆི། །རང་གཞན་དོན་གཉིས་རབ་བསྒྲུབ་ཕྱིར། །བྱང་ཆུབ་མཆོག་སེམས་བསྐྱེད་པར་བགྱི། །ཞེས་ལན་གསུམ་དང་། སེམས་ཅན་ཐམས་ཅད་བདེ་བ་དང་ཞེས་སོགས་ལན་གསུམ། དེ་ནས། བུམ་པའི་སྟེང་དུ་ཨ་ལས་ཟླ་བའི་དཀྱིལ་འཁོར་ལ་གནས་པའི་རྟེན་འབྲེལ་སྙིང་པོའི་སྔགས་ཕྲེང་འོད་ཟེར་དཀར་པོ་འཕྲོ་བས་འཁོར་འདས་ཀྱི་བདུད་རྩི་ཐམས་ཅད་བསྡུས་ནས་འོད་དུ་ཞུ་བ་བུམ་པའི་ཆུ་དང་རོ་གཅིག་ཏུ་གྱུར་པར་བསམ་ལ། རྟེན་འབྲེལ་སྙིང་པོ་ལན་བདུན་བཟླ། མཐར། ཟླ་དཀྱིལ་སྔགས་ཕྲེང་དང་བཅས་པའང་བུམ་ཆུ་ལ་ཐིམ་པར་བསམ་ཞིང་། འཐོར་ཡབ་ཀྱིས་བླངས་ཏེ་གནས་ཡོ་ཐམས་ཅད་ལ་གཏོར་བས་རྟེན་དང་མཆོད་པའི་མ་དག་པ་ཐམས་ཅད་སྦྱངས་ནས། དག་ཅིག་བཟང་བ་ཕུན་སུམ་ཚོགས་པར་བྱིན་གྱིས་རློབ་པར་བསམ་མོ། །འདི་ནི་བུམ་བསྐྱེད་དེ་རབ་གནས་ཀྱང་ཡིན་ནོ། །དེ་ནས་དཀྱིལ་འཁོར་བསྐྱེད་ཅིང་བྱིན་གྱིས་བརླབ་པ་ནི། མདུན་བསྐྱེད་ཀྱི་གཞི་གཟུང་འཛིན་རགས་པས་བསྡུས་པའི་ཆོས་ཐམས་ཅད་མི་དམིགས་པ་སྟོང་པའི་ངང་ལ་དར་གཅིག་བཞག །དེ་ནས། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། སྟོན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་སྔོན་བྱང་ཆུབ་ཀྱི་སྤྱད་པ་སྤྱོད་པའི་ཚེ་སངས་རྒྱས་ཀྱི་ཞིང་ཡོངས་སུ་སྦྱངས་པའི་བདེན་པ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེང་འདིར་དེ་བཞིན་གཤེགས་པ་སྲས་དང་བཅས་པ་དང་། འཕགས་པ་ཆོས་སྐྱོང་བ་ཐམས་ཅད་ལ་མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདི་དག་བཅོམ་ལྡན་འདས་འོད་དཔག་ཏུ་མེད་པའི་ཞིང་གི་བཀོད་པའི་ཡོན་ཏན་ལྟ་བུ་དང་ལྡན་པར་གྱུར་ཏེ། ས་གཞི་རིན་པོ་ཆེ་སྣ་ཚོགས་ཀྱི་རང་བཞིན་ལག་མཐིལ་ལྟར་མཉམ་པ། ལྗོན་ཤིང་ཆུ་མཚོ་ལ་སོགས་པ་རྒྱན་ཐམས་ཅད་ཀྱིས་རྣམ་པར་བརྒྱན་པའི་ཞིང་ཁམས་ཡོངས་སུ་དག་པའི་དབུས་སུ། བཀོད་པ་ཐམས་ཅད་ལས་འཕགས་པ་དེ་བཞིན་གཤེགས་པའི་བཀོད་པ་ལ་བརྟེན་པའི་ཕོ་བྲང་རིན་ཆེན་སྣ་བདུན་ལས་གྲུབ་པའི་ཁང་པ་བརྩེགས་པ། གྲུ་བཞི་པ། ཀ་བ་བཞི་ཟུག་པ། སྒོ་བཞི་དོད་པ། མཉམ་པ། ཉམས་དགའ་བ། ཤིན་ཏུ་རྣམ་པར་ཕྱེ་བས་མཛེས་པར་བྱས་པ། བཀྲ་བ། ལྟ་ན་སྡུག་པ། འོད་འབར་བ། ཐེམ་སྐས་བཞི་དང་ལྡན་པ། དཀྱིལ་འཁོར་གྱི་ནང་གི་དབུས་སུ་རིན་པོ་ཆེའི་ཁྲི་པདྨ་དང་ཟླ་བའི་གདན། མཐའ་བསྐོར་དུ་གདན་གྱི་རི མ་པ་ནང་ནས། བཞི་དང་། བརྒྱད་དང་། བརྒྱད་དང་། བཅུ་དྲུག་དང་། ཤར་ལྷོའི་གྲྭ་རྣམས་སུ་པདྨའི་གདན། བྱང་ཤར་གྱི་གྲྭ་དང་སྒོ་བཞིར་རིན་པོ་ཆེའི་གདན་ཏེ། སྟོན་པ་བཅོམ་ལྡན་འདས་ལ་སོགས་པ་འཕགས་པ་རྣམས་གདན་འཛོམ་པའི་བཞུགས་གནས་སོ་སོའི་སྨོན་ལམ་ཁྱད་པར་ཅན་དང་མངའ་ཐང་དང་འཚམས་པར་གྲུབ་པ་མཛེས་པ་ཤ་སྟག་འབྱུང་བར་གྱུར་ཅིག །ཅེས་ལན་གསུམ་བརྗོད་དོ། །དེ་ནས་མཆོད་པ་བྱིན་རླབས་ནི། ཕྱི་ནང་ཀུན་ཏུ་ཡང་ཆ་རིས་དང་འཚམས་པར་ལྷ་དང་མིའི་ཡོ་བྱད་དམ་པ། ཁ་དོག་དང་། དྲི་དང་། རོ་དང་། རེག་པ་དང་ལྡན་པ་ཡིད་དུ་འོང་བ། གྱ་ནོམ་པའི་ཞལ་ཟས་དང་། ན་བཟའ་དང་། རྒྱན་དང་། རོལ་མོ་ལ་སོགས་པ་ཕུལ་དུ་ཕྱིན་པ་སྣ་ཚོགས་པ། ཕུང་པོ་གསུམ་པའི་མདོ་དང་། བཟང་པོ་སྤྱོད་པའི་སྨོན་ལམ་ལས་བྱུང་བའི་མཆོད་པའི་སྤྲིན་རྒྱ་མཚོ་ཐམས་ཅད་ཀྱིས་རྒྱས་པར་གང་ཞིང་རྒྱན་ཀླུབས་པ་དང་ལྡན་པར་གྱུར་ཅིག །འཕགས་པ་ཐམས་ཅད་གདན་འཛོམ་ནས། དེ་བཞིན་དུ་བྱིན་གྱིས་བརླབས་ཤིང་བཞེས་ཏེ་ལོངས་སྤྱོད་པར་གྱུར་ཅིག །ཅེས་ལན་གསུམ་དང་། མཆོད་སྤྲིན་གྱི་གཟུངས། ན་མོ་རཏྣ་ཏྲ་ཡཱ་ཡ། ༀ་ན་མོ་བྷ་ག་ཝ་ཏེ་བཛྲ་སཱ་ར་པྲ་མརྡ་ནེ། ཏ་ཐཱ་ཱག་ཏ་ཡ་ཨརྷ་ཏེ་སམྱཀྶཾ་བུདྡྷ་ཡ ཏདྱ་ཐཱ། ༀ་བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛ་བཛྲེ། མཧཱ་བིདྱཱ་བཛྲེ། མཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སཾ་ཀྲ་མ་ཎ་བཛྲ་སརྦ་ཀརྨ་ཨཱ་ཝ་ར་ཎ་བི་ཤོ་དྷ་ན་བཛྲེ་སྭཱ་ཧཱ། ཞེས་བརྗོད་པས་ཀྱང་བྱིན་གྱིས་བརླབ་བོ། །དེ་ནས་སྤྱན་འདྲེན་པ་ནི། སྤོས་བཏུལ་ཞིང་རོལ་མོའི་སྒྲ་དང་བཅས་ཏེ་འདུན་པ་རྩེ་གཅིག་པས། བདག་ཅག་གིས་སྟོན་པ་བཅོམ་ལྡན་འདས་ཤཱཀྱ་ཐུབ་པ་ལ་སོགས་པ་ཕྱོགས་བཅུ་དང་དུས་གསུམ་དུ་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་། དེ་བཞིན་གཤེགས་པ་ཆོས་ཀྱི་རྒྱལ་པོའི་སྲས་དགྲ་བཅོམ་པ་དང་། ཕྱིར་མི་འོང་བ་དང་། ལན་གཅིག་ཕྱིར་འོང་བ་དང་། རྒྱུན་དུ་ཞུགས་པ་ལ་སོགས་པ་འཕགས་པ་ཉན་ཐོས་ཀྱི་ཚོགས་འཁོར་དང་བཅས་པ་ཐམས་ཅད་དགོངས་སུ་གསོལ། ཐུགས་རྗེ་ཆེན་པོ་དང་། བྱིན་གྱིས་བརླབས་བསམ་གྱིས་མི་ཁྱབ་པ་མངའ་ཞིང་། སྔོན་གྱི་སྨོན་ལམ་ཁྱད་པར་ཅན་ལས་གླེངས་ཏེ། བདག་ཅག་ལ་སོགས་པ་འགྲོ་བ་མང་པོ་སྐྱོབ་པའི་སླད་དུ་མགོན་སྐྱབས་དང་དཔུང་གཉེན་དུ་སྤྱན་འདྲེན་ཞིང་མཆི་ན། མཆོད་པའི་ཚོགས་སྦྱང་བའི་ཕོ་བྲང་གི་དཀྱིལ་འཁོར་འདིར་གཤེགས་ཤིང་གདན་འཛོམ་པ་ཆེན་པོ་མཛད་དེ། བྱིན་གྱིས་བརླབ་པར་ཅི་གནང་། ཞེས་དང་། ཕྱོགས་དུས་ཀུན་ནས་སྐྱབས་གསུམ་བཀའ་སྡོད་བཅས། །ཉོན་མོངས་འགྲོ་ལ་མཁྱེན་བརྩེས་རབ་དགོངས་ཏེ། །དཔག་མེད་ཞིང་ནས་ཐོགས་མེད་རྫུ་འཕྲུལ་གྱིས། །འདིར་གཤེགས་མཆོད་སྤྲིན་རྒྱ་མཚོའི་དབུས་བཞུགས་གསོལ། །ཕྱོགས་བཅུའི་རྒྱལ་བ་སྲས་བཅས་ཐམས་ཅད་དང་། །ཤེས་རབ་མེ་འབར་ཉོན་མོངས་མཚོ་སྐེམས་ཤིང་། །རྣམ་གྲོལ་བསོད་ནམས་ཞིང་དུ་བཀའ་སྡོད་པའི། །ཕྱོགས་བཅུའི་ཉན་ཐོས་དགེ་འདུན་བཞུགས་སོ་འཚལ། །ཡོན་སྦྱོར་མཆོད་པའི་གནས་སུ་སྤྱན་འདྲེན་ན། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །འགྲོ་བའི་མགོན་པོ་ཤཱཀྱ་སེང་གེ་ཡིས། །སངས་རྒྱས་བསྟན་པ་གང་གིས་ཕྱག་ཏུ་བཞག །གསུང་རབ་རིན་ཆེན་སྒྲོམ་གྱི་ཁ་འབྱེད་པ། །ཆོས་སྐྱོང་དགྲ་བཅོམ་ཆེན་པོ་བཞུགས་སོ་འཚལ། །དམ་ཆོས་སྤེལ་བའི་སླད་དུ་སྤྱན་འདྲེན་གྱིས། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །སྤངས་དང་ཡེ་ཤེས་ཕུན་ཚོགས་སངས་རྒྱས་ཀྱང་། །གདུལ་བྱའི་དབང་གིས་ཉན་ཐོས་ཚུལ་འཛིན་ཅིང་། །ཁྱད་པར་ཅན་གྱི་ཕྲིན་ལས་ཆོས་སྐྱོང་བའི། །གནས་བརྟན་བཅུ་དྲུག་འདིར་སྤྱོན་གདན་ལ་བཞུགས། །དགེ་བསྙེན་སྐྱབས་གསོལ་བདེན་པའི་ཚིགས་ཉན་པ། །དཀོན་མཆོག་གསུམ་གྱི་ཞབས་འབྲིང་མཆིས་སོ་འཚལ། །བསོད་ནམས་རིན་ཆེན་གླིང་དུ་སྤྱན་འདྲེན་གྱིས། །འགྲོ་བའི་དོན་ཕྱིར་མཆོད་ཀྱིས་གཤེགས་སུ་གསོལ། །ཞེས་བརྗོད་པས་རང་བཞིན་གྱི་གནས་ནས་བཅོམ་ལྡན་འདས་ཐུབ་པའི་དབང་པོ་འཕགས་པ་ཉན་ཐོས་ཆེན་པོའི་དགེ་འདུན་གྱི་འཁོར་དང་བཅས་པ། ཕྱི་བཞིན་འབྲང་བ་ཙུནྡ་ལ་སོགས་པ་དགེ་ཚུལ་དང་། དྷརྨ་ཏཱ་ལ་སོགས་པ་དགེ་བསྙེན། རྒྱལ་པོ་ཆེན་པོ་སྡེ་བཞིའི་ཚོགས་དང་བཅས་པ་སོ་སོའི་རྫུ་འཕྲུལ་གྱི་མཐུས་བྱོན་ནས་རང་རང་གི་གདན་ལ་བཞུགས་པར་གྱུར་པ་ནི། དབུས་སུ་བཅོམ་ལྡན་འདས་དེ་བཞིན་གཤེགས་པ་དཔལ་རྒྱལ་བ་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ། མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་བརྒྱན་པ། ཕྱག་གཡས་ས་གནོན་དང་། གཡོན་མཉམ་བཞག་གི་ཕྱག་རྒྱ་མཛད་པ། ཞབས་གཉིས་རྡོ་རྗེའི་སྐྱིལ་ཀྲུང་གིས་བཞུགས་པ། འདབ་མ་བཞིའི་གཡས་སུ་དགྲ་བཅོམ་པ། གཡོན་དུ་ཕྱིར་མི་འོང་། མདུན་དུ་ཕྱིར་འོང་། རྒྱབ་ཏུ་རྒྱུན་ཞུགས་རྣམས་འཁར་བསིལ་དང་ལྷུང་བཟེད་བསྣམས་པ། འདབ་བརྒྱད་ནང་མར་མདུན་ནས་གཡས་བསྐོར་དུ་མཆོག་བརྒྱ་དེ། ཀུན་དགའ་བོ་བསིལ་ཡབ། ཤཱ་རིའི་བུན་རི་པོ་ཆེ། མངྒལ་གྱི་བུ་པདྨ། རབ་འབྱོར་ཟླ་ཚེས། མ་འགགས་པ་མེ་ལོང་། འཆར་ཀ་འཁོར་ལོ། ཀ་དིཎྱ་རིན་པོ་ཆེའི་སྒྲོམ་བུ། རྟ་ཐུལ་ཕྲེང་བ་འཛིན་པའོ། །འདབ་བརྒྱད་ཕྱི་མར་མདུན་ནས་གཡས་བསྐོར་དུ་རང་རྒྱུད་པ་བརྒྱད་དེ། ཉེ་བར་འཁོར་ལྷུང་བཟེད། བ་ལང་བདག་མེ་སྒྲོན། འོད་སྲུང་པདྨ། སྒྲ་གཅན་ཟིན་གདུགས། གཅུང་དགའ་བོ་གདུ་བུ། མིང་ཅན་ཆན་པ། ནོར་སྦྱིན་ནེའུ་ལེ། གང་པོ་ནོར་བུ་འཛིན་པའོ། །ཕྱི་བསྐོར་གྱི་པདྨ་བཅུ་དྲུག་ལ་མདུན་ནས་གཡས་བསྐོར་དུ། ཡན་ལག་འབྱུང་སྤོས་ཕོར་དང་རྔ་ཡབ། མ་ཕམ་པ་མཉམ་བཞག །ནགས་ན་གནས་སྡིགས་མཛུབ་དང་རྔ་ཡབ། དུས་ལྡན་གསེར་གྱི་རྣ་བསྒོར། རྡོ་རྗེ་མོའི་བུ་སྡིག་མཛུབ་དང་རྔ་ཡབ། བཟང་པོ་ཆོས་འཆད་དང་མཉམ་བཞག །གསེར་བེའུ་རིན་པོ་ཆེའི་ཞགས་པ། །བྷ་ར་དྷྭ་ཛ་གསེར་ཅན་མཉམ་བཞག །བ་ཀུ་ལ་ནེའུ་ལེ། སྒྲག་ཅན་ཟིན་རིན་པོ་ཆེའི་པྲོག་ཞུ། ལམ་ཕྲན་བརྟན་མཉམ་བཞག །བྷྱ་ར་དྷྭ་ཛ་བསོད་སྙོམས་ལེན་གླེགས་བམ་དང་ལྷུང་བཟེད། ལམ་བརྟན་ཆོས་འཆད་དང་གླེགས་བམ། ཀླུའི་སྡོ་བུམ་པ་དང་འཁར་བསིལ། སྤེད་བྱེད་གླེགས་བམ། མི་ཕྱེད་པ་བྱང་ཆུབ་མཆོད་རྟེན་འཛིན་པ། དེ་ཐམས་ཅད་ཀྱང་གནས་བརྟན་དབང་པོ་དུལ་བའི་ཆ་ལུགས་ཅན། ཤར་ལྷོའི་གྲྭར་ཙུནྡ་དགེ་ཚུལ་འཁར་བསིལ་དང་ལྷུང་བཟེད། བྱང་ཤར་གྱི་གྲྭར་དགེ་བསྙེན་དྷརྨ་ཏཱ་ཐོར་ཅོག་ཅན་གླེགས་བམ་ཁུར་ཞིང་རྔ་ཡབ་དང་བུམ་པ་འཛིན་པ། སངས་རྒྱས་སྣང་བ་མཐའ་ཡས་ལ་གཟིགས་ཤིང་པུས་མོ་གཡས་པ་ལས་སྟག་སྤྲུལ་པ། ཤར་སྒོར་ཡུལ་འཁོར་སྲུང་དཀར་པོ་པི་ཝཾ། ལྷོར་འཕགས་སྐྱེས་པོ་སྔོན་པོ་རལ་གྲི། ནུབ་སྒོར་མིག་མི་བཟང་དམར་པོ་སྦྲུལ་ཞགས་དང་མཆོད་རྟེན། བྱང་སྒོར་རྣམ་ཐོས་སྲས་སེར་པོ་ཡིད་བཞིན་གྱི་རྒྱལ་མཚན་དང་ནེའུ་ལེ་འཛིན་པ། ཐམས་ཅད་ཀྱང་རང་རང་གི་འཁོར་བསམ་གྱི་མི་ཁྱབ་པ་དང་བཅས་ཏེ་བཞུགས་པར་བསམ་ལ། རིན་ཆེན་དུ་མ་ལས་གྲུབ་སེང་གེའི་ཁྲི། ཡིད་འཕྲོག་སྣ་ཚོགས་གོས་ཀྱིས་བཀབ་པ་ནི། སངས་རྒྱས་སྲས་དང་བཅས་ལ་ཕུལ་བ་ཡིས། འགྲོ་ཀུན་རྡོ་རྗེའི་གདན་ལ་འཁོད་གྱུར་ཅིག །ཅེས་གདན་དབུལ་ལོ། །དེ་ནས་མཆོད་ཡོན་སྦྲེང་བཞིན་དུ། ཆུ་བོ་གདྒཱའི་རྒྱུན་བཞིན་དུ། ཨརྒྷཾ་རྒྱུན་ཡང་མི་ཆད་དེ། བླ་མེད་མཆོད་པ་འདི་འབུལ་ན། །ཐུགས་རྗེས་དགོངས་ཏེ་བཞེས་སུ་གསོལ། །ཡང་ཞབས་བསིལ་སྦྲིང་ཞིང་། །ཆུ་བོ་གངྒཱའི་རྒྱུན་བཞིན་དུ། །ཞབས་བསིལ་རྒྱུན་ཡང་མི་ཆད་དེ། །བླ་མེད་མཆོད་པ་འདི་འབུལ་ན། །ཐུགས་རྗེས་དགོངས་ཏེ་བཞེས་སུ་གསོལ། །དེ་ནས་ཁྲུས་གསོལ་བ་ནི། ཁྲུས་ཀྱི་ཁང་པ་ཤིན་ཏུ་དྲི་ཞིམ་པ། །ཤེལ་གྱི་ས་བཞི་གསལ་ཞིང་འཚེར་བ་བསྟར། །རིན་ཆེན་འབར་བའི་ཀ་བ་ཡིད་འོད་ལྡན། །མུ་ཏིག་འོད་ཆགས་བླ་རེ་བྲེས་པ་དེར། །དེ་བཞིན་གཤེགས་པ་རྣམས་དང་དེ་སྲས་ལ། །རིན་ཆེན་བུམ་པ་མང་པོ་སྤོས་ཀྱི་ཆུས། །ཡིད་འོང་ལེགས་པར་གང་བ་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །ཞེས་སྙན་མནན་ལ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀུན་གྱིས་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ༀ་སརྦ་དེ་བ་ཏ་ཨརྩི་ཏ་ཨ་མྲྀ་ཏ་སྭཱ་ཧཱ། འདི་ནི་ཁྲུས་མཆོག་དཔལ་དང་ལྡན། །ཐུགས་རྗེའི་ཆུ་ནི་བླ་ན་མེད། །བྱིན་རླབས་ཡེ་ཤེས་ཆུ་ཡིས་ནི། །ཅི་འདོད་དངོས་གྲུབ་སྩལ་དུ་གསོལ། །ༀ་སརྦ་དེ་བ་ཏ་ཨརྩི་ཏ་ཨ་མྲྀ་ཏ་སྭཱ་ཧཱ། ཞེས་ཁྲུས་གསོལ་ཞིང་། ཁྲུས་ཁུ་སླར་ཡང་བུམ་པར་བླུག་གོ །དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བགོས་པས་སྐུ་ཕྱིའོ། །ༀ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནེ་སྭཱ་ཧཱ། ཞེས་པས་སྐུ་ཕྱིའོ། །དྲི་མེད་མཚན་ལ་སྒྲིབ་བསལ་མི་མངའ་ཡང་། །དད་པས་ངུར་སྨྲིག་རྒྱལ་མཚན་ཕུལ་བ་ཡིས། །ནམ་མཁའི་མཐའ་ཀླས་གྱུར་པའི་སེམས་ཅན་རྣམས། །སངས་རྒྱས་བརྟུལ་ཞུགས་མཆོག་ལ་སྤྱོད་པར་ཤོག །ༀ་བཛྲ་ཝཱ་ས་སེ་སྭཱ་ཧཱས་ན་བཟའ་དབུལ། དེ་ནས་ཚོགས་བསགས་པའི་དང་པོ་ཕྱག་འཚལ་བ་ནི། རྒྱས་པར་དཔང་སྐོང་ལྟར་བྱ་བར་གསུངས་པས་ཅི་འགྲུབ་དང་། འདིར་མདོར་བསྡུས་པའི་དབང་དུ་བྱས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་མཉམ་མེད་ཤཱཀྱ་ཐུབ་པ་འཁོར་འཕགས་པ་ཉན་ཐོས་ཀྱི་དགེ་འདུན་གྱི་ཚོགས་དང་བཅས་པའི་ཞབས་ལ་དུས་ཐམས་ཅད་དུ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །ཡོན་ཏན་རིན་ཆེན་མང་པོའི་ཚོགས་མངའ་ཞིང་། །མཚན་རབ་ཡེ་ཤེས་ཡོངས་སུ་དག་པའི་སྐུ། །གསེར་གྱི་མདོག་ཅན་ལྷ་དང་མིས་མཆོད་པ། །བཅོམ་ལྡན་ལྷ་ཡི་ལྷ་ལ་ཕྱག་འཚལ་ལོ། །ཤཱ་རའི་བུ་དང་མདྒལ་གྱི་བུ། །ཀུན་དགའ་བོ་དང་རབ་འབྱོར་མ་འགགས་པ། །འཆར་ཀ་ཀ་དི་ཎྱ་རྟ་ཐུལ་ཏེ། སྤྲུལ་པའི་ཉན་ཐོས་མཆོག་བརྒྱད་ལ་ཕྱག་འཚལ། །འོད་སྲུངས་ཉེ་བ་འཁོར་དང་བ་ལང་བདག །སྒྲ་གཅན་ཟིན་དང་དགའ་བོ་མིང་ཅན་དང་། །ནོར་སྦྱིན་འཕགས་པ་གང་པོ་རང་རྒྱུད་ཀྱི། །ཉན་ཐོས་མཆོག་ཆེན་བརྒྱད་ལ་ཕྱག་འཚལ་ལོ། །འགྲོ་བའི་མགོན་པོ་ཤཱཀྱ་སེང་གེ་ཡིས། །སངས་རྒྱས་བསྟན་པ་གང་གི་ཕྱག་ཏུ་བཞག །གསུང་རབ་རིན་ཆེན་སྒྲོལ་གྱི་ཁ་འབྱེད་པ། །དགྲ་བཅོམ་གནས་བརྟན་བཅུ་དྲུག་ལ་ཕྱག་འཚལ། །དེ་བཞིན་གཤེགས་པ་ཆོས་ཀྱི་རྒྱལ་པོའི་སྲས། །རྒྱུན་ཞུགས་ཕྱིར་འོང་ཕྱིར་མི་འོང་དགྲ་བཅོམ། །ཞུགས་གནས་སྐྱེས་བུ་ཟུང་བཞི་ཡ་བརྒྱད་ཀྱི། །ཉན་ཐོས་གྲངས་ལས་འདས་ལ་ཕྱག་འཚལ་ལོ། །དགེ་བསྙེན་སྐྱབས་གསོལ་བདེན་པའི་ཚིག་ཉན་པ། །དཀོན་མཆོག་གསུམ་གྱི་ཞབས་འབྲིང་དྷརྨ་ཏཱ། །རྒྱལ་བའི་བསྟན་དང་རྣམ་བཞིའི་འཁོར་སྐྱོང་བ། །མཐུ་ཆེན་རྒྱལ་ཆེན་སྡེ་བཞི་ལ་ཕྱག་འཚལ། །དེ་ནས་མཆོད་པ་འབུལ་བ་ནི། འཕགས་པའི་ཚོགས་དེ་དག་ཐམས་ཅད་ལ་མཆོད་ཡོན་དང་བྱུག་པ། མེ་ཏོག་དང་བདུག་སྤོས། མར་མེ་དང་ཞལ་ཟས། རོལ་མོ་དང་སིལ་སྙན། གདུགས་དང་བ་དན་ལ་སོགས་པ་དངོས་སུ་ཅི་འབྱོར་བ་འདི་དག་དང་ཕྱོགས་བཅུ་ན་བདག་པོས་ཡོངས་སུ་མ་བཟུང་བ་ལྷ་དང་མིའི་རྫས་དམ་པ་བདེ་བའི་ཡོ་བྱད་ཕུན་སུམ་ཚོགས་པ་ཐམས་ཅད་དང་། གཟུངས་དང་རིག་པའི་མཐུ་དང་མོས་པའི་སྟོབས་ཀྱིས་བསྐྱེད་པའི་མཆོད་པའི་སྤྲིན་ཕུང་པོ་གསུམ་པའི་མདོ་དང་བཟང་པོ་སྤྱོད་པའི་སྨོན་ལམ་ལས་བྱུང་བ་རྒྱ་མཚོ་ཐམས་ཅད་ཀྱིས་ནམ་མཁའི་ཁམས་ཀྱི་མཐའ་ཀླས་པ་ཐམས་ཅད་རྒྱས་པར་བཀང་སྟེ་འབུལ་ལོ། །མཆོད་དོ། །བདག་གི་བར་བཞེས་པར་མཛད་དུ་གསོལ། འཇིག་རྟེན་ཁམས་ནི་དཔག་མེད་ན། མཆོད་ཡོན་ཇི་སྙེད་ཡོད་པ་དང་། བདག་གིས་གུས་པར་བཤམས་པ་འདི། རྒྱལ་བ་སྲས་དང་བཅས་ལ་འབུལ། ༀ་སརྦ་ཏ་ཐཱ་ག་ཏ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་སྭཱ་ཧཱ། དེ་བཞིན་དུ། ཞབས་བསིལ། མེ་ཏོག །བདུག་སྤོས། མ་མེ། དྲི་ཆབ། ཞལ་ཟས། རོལ་མོ་རྣམས་དང་། པཱ་དྱཾ། པུཥྤེ། དྷཱུ་པེ། ཨཱ་ལོ་ཀེ །གནྡྷེ། ནཻཝིདྱ། ཤཔྡ། ཞེས་པ་རྣམས་ཀྱིས་བརྗེས་ནས་དབུལ་ལོ། །དེ་ནས་བཤགས་པ་ལ་སོགས་པའི་ཡན་ལག་ཕྱི་མ་ལྔ་ནི། བདག་ཅག་རྣམས་ཀྱིས་ཐོག་མ་མ་མཆིས་པ་ནས་འཁོར་བ་ན་འཁོར་བའི་ཚེ་རབས་ཐམས་ཅད་དུ་སྡིག་པ་མི་དགེ་བའི་ལས་མདོར་ན་མི་བགྱི་བར་རིགས་པའི་ལས་ནི་བགྱིས། བགྱི་བར་འོས་པའི་ལས་མ་བགྱིས་པ་ལ་སོགས་པ་མཐོ་རིས་དང་ཐར་པའི་གེགས་སུ་གྱུར་ཅིང་། འཁོར་བ་དང་ངན་སོང་གི་རྒྱུར་གྱུར་པ་ཅི་མཆིས་པ་ཐམས་ཅད་ཤིན་ཏུ་གནོང་ཞིང་འགྱོད་པའི་སེམས་ཀྱིས་མི་འཆབ་པར་མཐོལ་ཞིང་བཤགས་སོ། །དུས་གསུམ་གྱི་འཕགས་པ་དང་སོ་སོ་སྐྱེ་བོའི་དགེ་བའི་རྩ་བ་མཐའ་དག་གི་བསོད་ནམས་ཐམས་ཅད་ལ་རྗེས་སུ་ཡི་རང་ངོ་། །ཕྱོས་བཅུའི་རྒྱལ་བ་སྲས་དང་བཅས་པ་ཐམས་ཅད་ལ་ཆོས་ཀྱི་འཁོར་ལོ་བླ་ན་མེད་པ་བསྐོར་བར་བསྐུལ་ལོ། །འཇིག་རྟེན་གྱི་སྒྲོན་མེ་གང་དག་མྱ་ངན་ལས་འདས་པའི་ཚུལ་སྟོན་པར་བཞེད་པ་དེ་དག་ཐམས་ཅད་མྱ་ངན་ལས་མི་འདའ་བར་འཇིག་རྟེན་གྱི་དོན་མཛད་ཅིང་ཡུན་རིང་དུ་བཞུགས་པར་གསོལ་བར་འཚལ་ལོ། །མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་སྟོན་པ་ཡང་དག་པར་རྫོགས་པའི་སངས་རྒྱས་ལ་སོགས་པ་འཕགས་པའི་ཚོགས་དེ་དག་ཐམས་ཅད་ལ་ཕྱག་འཚལ་ཞིང་མཆོད་པ་ལ་སོགས་པ་དགེ་བའི་རྩ་བ་རླབས་པོ་ཆེ་འདི་དག་ཐམས་ཅད་ལ་མ་ལུས་པར་འཕགས་པའི་ཚོགས་རྣམས་ལ་དབུལ་ཞིང་འགྲོ་བ་ཐམས་ཅད་ལ་བསྟབས་ཤིང་བསྔོ་བར་བགྱིའོ། །དེ་ལྟར་ཕུལ་ཞིང་བསྔོས་པས་བདག་ཅག་ལ་སོགས་པ་སེམས་ཅན་ཐམས་ཅད་ཀྱིས་ཐོག་མ་མ་མཆིས་པའི་འཁོར་བ་ནས་བསགས་པའི་དགེ་བའི་རྩ་བ་ཅི་མཆིས་པའི་སྟོབས་དང་། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས། སྟོན་པ་ཡང་དག་པར་རྫོགས་པའི་སངས་རྒྱས་འཕགས་པའི་ཉན་ཐོས་ཀྱི་དགེ་འདུན་དང་བཅས་པ་ལ་སྔོན་གྱི་ཐུགས་དམ་བཟང་པོ་ལས་གླེངས་ཏེ་མཆོད་ཅིང་གསོལ་བ་གདབ་པའི་ཆོ་ག་བགྱིས་པ་ལས་ཕན་ཡོན་ཇི་སྐད་བཀའ་སྩལ་པ་ཐམས་ཅད་བདག་ཅག་ལ་སོགས་པའི་སེམས་ཅན་ཐམས་ཅད་ཀྱིས་འཕྲལ་དུ་ཐོབ་ཅིང་ཡོངས་སུ་རྫོགས་ནས་མངོན་དུ་གྱུར་ཅིག །བདག་ཅག་ལ་སོགས་པས་ཐོག་མ་མ་མཆིས་པའི་འཁོར་བ་ནས་འཁོར་བར་བརྒྱུད་པ་རྣམས་སུ་སྡིག་པ་མི་དགེ་བའི་ལས་ཀྱི་སྒྲིབ་པར་གྱུར་པ་ཅི་མཆིས་པ་ཐམས་ཅད་མ་ལུས་པ་བསལ་ཏེ། གཏན་ཞི་ཞིང་བྱང་བར་གྱུར་ཅིག །སྔོན་གྱི་ལས་དེ་ལྟ་བུའི་རྣམ་པར་སྨིན་པ་ཡང་རུང་། འཕྲལ་གྱི་རྐྱེན་ལས་གྱུར་ཀྱང་རུང་སྟེ། ནད་ཀྱིས་གདུངས་པ་དང་། མི་དང་མི་མ་ཡིན་གྱི་གནོད་པས་གཙེས་པ་དང་། ཚེ་ཐུང་བ་དང་། འཁོར་དང་ལོངས་སྤྱོད་མི་མཐུན་པ་དང་། བསམ་པ་མི་འགྲུབ་ཅིང་བར་དུ་གཅོད་པ་མང་བ་སོགས་མི་དགེ་བ་དང་། བཀྲ་མི་ཤིས་པ་དང་ངན་པ་དང་། སྡིག་ཏོར་བགྲང་བ་ཐམས་ཅད་ཞི་ཞིང་གཏན་མི་འབྱུང་བར་གྱུར་ཅིག །འཕྲལ་དུ་ཡང་ཚེ་རིང་ཞིང་ནད་མ་མཆིས་པ་དང་། འཁོར་དང་ཡོ་བྱད་ཐམས་ཅད་མཐུན་ཞིང་འབྱོར་པ་ཕུན་སུམ་ཚོགས་པ་དང་། བསམ་པ་ཐམས་ཅད་ཡིད་བཞིན་དུ་འགྲུབ་པ་སོགས་འཇིག་རྟེན་དང་འཇིག་རྟེན་ལས་འདས་པའི་དཔལ་དང་ལྡན་པར་གྱུར་ཅིག །ཚེ་རབས་ཐམས་ཅད་དུ་ཡང་བྱང་ཆུབ་ཀྱི་ཚོགས་ཡོངས་སུ་རྫོགས་པར་བྱེད་པའི་ལུས་དང་ལོངས་སྤྱོད་དང་འཁོར་དང་གྲོགས་དང་དགེ་བའི་བཤེས་གཉེན་ཕུན་སུམ་ཚོགས་པ་དང་ལྡན་པར་གྱུར་ཅིག །དམ་པའི་ཆོས་དང་རྟག་ཏུ་འཕྲད་ཅིང་ཐོས་པ་དང་བསམ་པ་དང་སྒོམ་པའི་སྒོ་ནས་དོན་མངོན་དུ་བགྱིད་པར་གྱུར་ཅིག །མདོར་ན་སེམས་ཅན་ཐམས་ཅད་ཀྱི་དོན་བགྱི་ཞིང་འཕགས་པའི་ལམ་སྒྱུབ་པ་ལ་ཐབས་མཁས་པ་དང་ཤེས་རབ་ཀྱི་མཐུ་ཐོགས་པ་མེད་པ་དང་ལྡན་ཏེ་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ཐམས་ཅད་བདེ་བླག་ཏུ་ཉམས་འོག་ཏུ་ཆུད་པར་གྱུར་ཅིག །བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པ་གཡུང་དྲུང་གི་སྐུ་སངས་རྒྱས་བཅོམ་ལྡན་འདས་ཀྱི་གོ་འཕང་ཆེན་པོ་མྱུར་དུ་ཐོབ་ནས་སེམས་ཅན་ཐམས་ཅད་སྲིད་པའི་མཚོ་ལས་སྒྲོལ་ཞིང་མི་གནས་པའི་མྱ་ངན་ལས་འདས་པའི་དབྱིངས་ལ་འགོད་པར་གྱུར་ཅིག །དེ་ནས་གཟུངས་བཟླ་བ་ནི། དཀོན་མཆོག་གསུམ་གྱི་བདེན་པ་དང་། དེ་བཞིན་གཤེགས་པ་སྲས་དང་བཅས་པ་ཐམས་ཅད་ཀྱི་མཐུ་དང་བྱིན་གྱིས་བརླབས་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་དང་། འཕགས་པ་སྐུ་གསུང་ཐུགས་ཀྱི་སྤྱོད་པ་མ་དག་པ་མི་མངའ་བ་རྣམས་ཀྱི་ཐུགས་ངེས་པའི་བདེན་པས། མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་སྟོན་པ་ཡང་དག་པར་རྫོགས་པའི་སངས་རྒྱས་འཁོར་འཕགས་པ་ཉན་ཐོས་ཀྱི་དགེ་འདུན་གྱི་ཚོགས་དང་བཅས་པ་ཐམས་ཅད་གདན་འཛོམ་པ་ཆེན་པོ་མཛད་དེ། མཆོད་པ་བཞེས་ཤིང་། གཟུངས་སྔགས་བཟླས་པ་ཚུལ་བཞིན་དུ་འགྲུབ་པར་བྱིན་གྱིས་རློབ་པར་མཛད་དེ། བདག་སོགས་འགྲོ་བ་མང་པོའི་དོན་དཔག་ཏུ་མེད་པ་མཛད་པར་གྱུར་ཅིག །དཀྱིལ་འཁོར་གྱི་ལྷ་ཚོགས་ཐམས་ཅད་ཀྱི་སྐུ་ལས་འོད་ཟེར་འཕྲོས་པས་འཇིག་རྟེན་གྱི་ཁམས་ཐམས་ཅད་ཁྱབ། དེས་འཕགས་པ་ཐམས་ཅད་སེམས་ཅན་གྱི་དོན་ལ་བསྐུལ་ཞིང་། ངན་སོང་གི་གནས་ཐམས་ཅད་སྦྱངས་ཏེ། སེམས་ཅན་ཐམས་ཅད་མཐོ་རིས་དང་ཐར་པའི་གོ་འཕང་ལ་འཇུག་པར་གྱུར་ཅིག །འོད་ཟེར་དེས་བདག་ཅག་རྣམས་ལ་ཁྱབ་པས་འགྲོ་དོན་དཔག་མེད་སྒྲུབ་ནུས་པའི་མཐུ་ཐོབ་སྟེ། དེ་བཞིན་གཤེགས་པ་རྣམས་དང་སྐུ་གསུང་ཐུགས་མཚུངས་པར་གྱུར་ཅིག །ཡང་འོད་ཟེར་དེ་དག་གཅིག་ཏུ་འདུས་པ་བུམ་པའི་གཟུངས་ཆབ་ལ་ཁྱབ་སྟེ་རེག་པ་ཙམ་གྱིས་མི་མཐུན་པའི་ཕྱོགས་ཞི་བར་བྱེད་པ། དཔལ་དང་བདེ་ལེགས་བསྐྱེད་པར་བྱེད་པའི་བདུད་རྩིའི་དག་བྱེད་དུ་གྱུར་ཅིག །བདག་ཅག་ལ་སོགས་པ་བསྒྲུབ་བྱའི་ལུས་དང་འཁོར་དང་ཡོ་བྱད་ཐམས་ཅད་ལ་ཁྱབ་སྟེ། ནད་དང་གནོད་པ་ཐམས་ཅད་ནི་བསལ། ལུས་སེམས་ཀྱི་སྐྱོན་ཐམས་ཅད་དང་ནི་བྲལ་ཏེ། ཆོས་ཀྱི་སྣོད་རུང་དུ་གྱུར་ཅིག །བདག་ཅག་རྣམས་ཀྱིས་འཕགས་པ་རྣམས་མངོན་སུམ་པ་ལྟ་བུར་དམིགས་ནས་གཟུངས་བཟླས་པས་དེ་བཞིན་གཤེགས་པ་སྲས་དང་བཅས་པ་རྣམས་ཀྱི་ཏིང་ངེ་འཛིན་གྱི་སྒོ་སྣ་ཚོགས་དང་ཚིག་འབྲུ་མཐའ་ཡས་པ་རྟོགས་ཤིང་རྣམ་པར་དག་པར་བྱིན་གྱིས་རློབ་པར་གྱུར་ཅིག །ཅེས་བདེན་ཚིག་གིས་བསྔོས་ནས། འཕགས་པ་རྣམས་ཀྱིས་གནང་ཞིང་ཕྲིན་ལས་མཛད་པར་ངེས་ཤེས་བསྐྱེད་དེ། ཇི་ལྟར་བསྔོས་པ་བཞིན་མངོན་དུ་གྱུར་པར་དམིགས་ནས། ༀ་མུ་ནེ་མུ་ནེ་མ་ཧཱ་མུ་ནེ་ཤཱཀྱ་མུ་ན་ཡེ་སྭཱ་ཧཱ། ཞེས་པ་ཅི་ནུས་བཟླའོ། །དེ་ནས་གཏོར་མ་བཏང་ཞིང་དབང་བསྐུར་བ་ནི། འདས་གཏོར་དང་ཆ་གསུམ་གྱི་གཏོར་མ་སྔར་བཤད་པ་བཞིན་དང་། དབང་ཆོག་ལྟར་ཉན་ཐོས་ཀྱི་ཐེག་པའི་དབང་རྣམས་བསྐུར་རོ། །དེ་ནས་རྗེས་ཆོག་ནི། མཆོད་པ་དྲི་མེད་ཡོངས་དག་པ། །རྣམ་མང་རྒྱ་ཆེ་ཐམས་ཅད་དང་། །སོ་སོའི་མངའ་ཐང་རྒྱ་ཆེན་དུ། །འོས་པ་བདེ་བར་སྦྱར་ཏེ་འབུལ། །ཞེས་པས་མཆོད། མ་རྙེད་ཡོངས་སུ་སོགས་ཀྱིས་ནོངས་པ་བཤགས། རས་བྲིས་ཡིན་ན། འདིར་ནི་གཟུགས་དང་སོགས་ཀྱིས་བརྟན་བཞུགས་བྱ། རྡུལ་ཚོན་ཡིན་ན། ༀ། ཁྱེད་ཀྱི་སོགས་ཀྱིས་གཤེགས་ནས། སྨོན་ལམ་ནི། འདི་ལྟར་འབད་པས་བསྒྲུབས་པ་ཡི། །བསོད་ནམས་གྲུབ་པ་གང་ཡོད་པ། །དེས་ནི་འཇིག་རྟེན་མ་ལུས་པས། །ཐུབ་དབང་གོ་འཕང་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་འཕེལ་ཞིང་ཕྱུགས་འཕེལ་བ། །དགེ་ལེགས་ཐམས་ཅད་འབྱུང་བའི་གནས། །ཡིད་ལ་འདོད་པ་ཀུན་འགྲུབ་ཤོག །བླ་མེད་བླ་མའི་ཐུགས་རྗེ་དང་། །རྒྱལ་དང་རྒྱལ་སྲས་རང་རྒྱལ་དང་། །དགྲ་བཅོམ་བདེན་པའི་བྱིན་རླབས་ཀྱིས། །བསྔོ་བ་སྨོན་ལམ་འགྲུབ་པར་ཤོག །དེ་ནས་བཀྲ་ཤིས་ནི། བཅོམ་ལྡན་རྣམ་པར་གཟིགས་ནི་རྒྱལ་རིགས་གཟི་བརྗིད་ཅན། །ཚེ་ལོ་བརྒྱད་ཁྲིའི་དུས་ན་གྲོང་ཁྱེར་གཉེན་དྲུང་དུ། །པོ་ཏ་ལ་ཡི་ཤིང་དྲུང་མངོན་པར་སངས་རྒྱས་པའི། །བཀྲ་ཤིས་ཕུན་སུམ་ཚོགས་པས་དེང་འདིར་བདེ་ལེགས་ཤོག །བདེ་གཤེགས་གཙུག་ཏོར་ཅན་ནི་རྒྱལ་རིགས་རྫུ་འཕྲུལ་ཅན། །ཚེ་ལོ་བདུན་ཁྲིའི་དུས་ན་ཀ་ནིའི་གྲོང་ཁྱེར་དུ། །པུཎྜ་རི་ཀའི་ཤིང་དྲུང་མངོན་པར་སངས་རྒྱས་པའི། །བཀྲ་ཤིས་ཕུན་སུམ་ཚོགས་པས་དེང་འདིར་བདེ་ལེགས་ཤོག །རྒྱལ་བ་ཐམས་ཅད་སྐྱོབ་ནི་རྒྱལ་རིགས་བློ་གྲོས་ཅན། །ཚེ་ལོ་དྲུག་ཁྲིའི་དུས་ན་གྲོང་ཁྱེར་མཉམ་ཡོད་དུ། །ཤིང་དྲུང་སཱ་ལའི་དྲུང་དུ་མངོན་པར་སངས་རྒྱས་པའི། །བཀྲ་ཤིས་ཕུན་སུམ་ཚོགས་པས་དེང་འདིར་བདེ་ལེགས་ཤོག །ཐུབ་པ་འཁོར་བ་འཇིག་ནི་སྟོབས་ལྡན་བྲམ་ཟེའི་རིགས། །ཚེ་ལོ་བཞི་ཁྲིའི་དུས་ན་གྲོང་ཁྱེར་བདེ་ལྡན་དུ། །ཤི་རི་ཤ་ཡི་དྲུང་དུ་མངོན་པར་སངས་རྒྱ་པའི། །བཀྲ་ཤིས་ཕུན་སུམ་ཚོགས་པས་དེང་འདིར༴ །འདྲེན་པ་གསེར་ཐུབ་བསླབ་པ་མཆོག་ལྡན་བྲམ་ཟེའི་རིགས། །ཚེ་ལོ་སུམ་ཁྲིའི་དུས་ན་གྲོང་ཁྱེར་མཛེས་ལྡན་དུ། །ཨུ་དུམ྄་ཝ་རའི་ཤིང་དྲུང་མངོན་པར་སངས་རྒྱས་པའི། །བཀྲ་ཤིས་ཕུན་སུམ་ཚོགས་པས་དེང་འདིར༴ །སྐྱོབ་པ་འོད་སྲུངས་བྲམ་ཟེ་བླ་མེད་ཡོན་ཏན་ཅན། །ཚེ་ལོ་ཉི་ཁྲིའི་དུས་ན་ཝཱ་རཱ་ཎ་སཱི་རུ། །ནྱཱ་གྲོ་ཏའི་ཤིང་དྲུང་མངོན་པར་སངས་རྒྱས་པའི། །བཀྲ་ཤིས་ཕུན་སུམ་ཚོགས་པས་དེང་འདིར༴ །འགྲོ་མགོན་ཤཱཀྱ་ཐུབ་པ་རྒྱལ་རིགས་བརྩོན་འགྲུས་ཅན། །ཚེ་ལོ་བརྒྱ་པའི་དུས་ན་སེར་སྐྱའི་གྲོང་ཁྱེར་དུ། །ཨ་ཤྭཏྠ་ཡི་ཤིང་དྲུང་མངོན་པར་སངས་རྒྱས་པའི། །བཀྲ་ཤིས་ཕུན་སུམ་ཚོགས་པས་དེང་འདིར་བདེ་ལེགས་ཤོག །ཅེས་བརྗོད་ཅིང་མེ་ཏོག་འཐོར་བས་མཐའ་བརྒྱན་པར་བྱའོ། །ངག་ཚིག་བདེན་པས་རྩེ་གཅིག་ཏུ། །དབང་བཅུ་མངའ་བའི་འཕགས་ཚོགས་ལ། །མཆོད་ཅིང་གསོལ་ན་དམ་པའི་ཆོས། །འཕེལ་པའི་བྱིན་རླབས་དཔལ་འབར་འགྱུར། །ཉན་ཐོས་ཐེག་པའི་སྒྲུབ་ཐབས་ཀྱི་ལེ་ཚན་ནོ།། །།

༈ ༀ་སྭ་སྟི། འགྱུར་བཅས་སྲིད་རྩའི་རྟེན་འབྲེལ་རི། །བདག་མེད་ཕྱེད་དང་གཉིས་རྟོགས་པའི། །ཤེས་རབ་རྡོ་རྗེས་གཞིག་མཛད་དེར། །ཕྱག་བྱས་རང་རྒྱལ་སྒྲུབ་ཐབས་བཤད། །གསུམ་པ་རང་རྒྱལ་གྱི་དཀྱིལ་འཁོར་ནི། གང་དུ་བྱ་བའི་གཞི་བྱི་དོར་གྱིས་དག་པར་བྱ་ཞིང་། ཙནྡན་ལ་སོགས་པ་དྲིའི་ཆུས་ཆག་ཆག་བཏབ་པ་ལ། དཀྱིལ་འཁོར་ཁྱམས་དང་རྟ་བབས་སྤངས་པའི་གཞལ་ཡས་ཁང་གྲུ་བཞི་སྒོ་བཞི་པ། ཕྱི་རོལ་དུ་རིན་པོ་ཆེའི་བྱེ་མ་བརྡལ་བའི་ས་གཞི་ལ་ཕྱིའི་རྟེན་འབྲེལ་རྒྱུ་དང་འགྲེལ་བ་མཚོན་བྱེད། ཤིང་གི་རྩ་བ། མྱུ་གུ། སྡོང་པོ། ལོ་མ། མེ་ཏོག །འབྲས་བུ་སྟེ་དྲུག་དང་། རྐྱེན་དག་འབྲེལ་བ་ནམ་མཁའ། རླུང་། མེ། ཆུ། ས། དཔྱིད་སོགས་དུས་བཞིའི་ཁ་དོག་གམ་མིང་སྟེ་དྲུག །ནང་གི་རྟེན་འབྲེལ་མ་རིག་པ་རྒན་མོ་ལོང་བ་ལྟ་བུ་སོགས་རྟེན་འབྲེལ་བཅུ་གཉིས་ཀྱི་གཟུགས་བྲི། དེའི་མཐར་ཁམས་གསུམ་མཚོན་བྱེད་པད་རྡོར་འོད་ཕྲེང་གསུམ་གྱིས་བསྐོར་བ། དབུས་ཀྱི་ལྟེ་བ་སེར་པོ། དེའི་ཕྱིར་འདབ་མ་བཅུ་གཉིས་མཛེས་ཚོན་དུ་བྱ་ཞིང་། ཚོན་ལྷག་མ་སྤྱི་ལྟར་དང། ལྷ་གནས་རྣམས་སུ་སྐུ་རྟེན། ལྷ་སོ་སོའི་འབུར་སྐུའམ་ཙཀླི། དེའི་གཙོ་བོ་དང་གོ་ས་གཅིག་པར་གསུང་རྟེན་འཕགས་པ་རྟེན་འབྲེལ་གྱི་མདོ་ལྟ་བུ་མདོའི་གླེགས་བམ་དང་། ཐུགས་རྟེན་དུ་རྟེན་འབྲེལ་སྙིང་པོ་ནང་གཟུངས་སུ་བཅུག་པའི་མཆོད་རྟེན་རྣམས་ཀྱང་དགོད། དཀྱིལ་འཁོར་གྱི་མཐའ་བསྐོར་དུ་མཆོད་པ་དང་། མདུན་དུ་བུམ་པ་ཆས་ཞུགས་སྤྱི་ལྟར་ལས་ཁྱད་པར་ཀེང་རུས་ཀྱི་མཚན་མ་བཏགས་པའི་ནང་དུ་རིན་ཆེན་འབྲུ་སྨན་དྲི་དང་བཅས་པའི་ཆུ་ཀླུང་གི་ཆུས་བཀང་བ་བཀོད། མེ་ལོང་གི་ངོས་ལ་ཙནྡན་དཀར་པོའི་བརྡར་ཕྱེ་བསྲེས་པའི་ཁུ་བས་རྟེན་འབྲེལ་སྙིང་པོ་ཚར་བདུན་བྲིས་ཏེ་ཚར་རེ་རེ་ལ་ལན་བདུན་བདུན་བཟླས་པ་བུམ་པའི་ཁར་བཞག །གཞན་ཡང་རྫས་དབང་གི་ཙཀླི། གཙང་ཞིང་བསོད་པའི་བཟའ་བཅའི་འདས་གཏོར་དང་། ཆ་གསུམ་གཏོར་མ་རྣམས་ཅི་བདེར་བཤམ། རང་གི་མདུན་དུ་སྤོས་སྣོད། འཐོར་ནས། རོལ་མོ་སོགས་ཉེར་མཁོའི་ཡོ་བྱད་ཐམས་ཅད་ཚོགས་པར་བྱའོ། །དེ་ནས་ཆོ་ག་ནི། ཁྲུས་དང་དཀོན་མཆོག་གསུམ་ལ་ཕྱག་བྱས་ནས། སྟན་ལ་འདུག་སྟེ། སྐྱབས་སེམས་ཚད་མེད་བཞི་སྒོམ་པའི་རིམ་པ་ནི། ན་མོ། རྟེན་ཅིང་འབྲེལ་བར་འབྱུང་བ་ཡི། །འདས་དང་མ་བྱོན་ད་ལྟར་གྱི། །བླ་མེད་དཀོན་མཆོག་རྣམ་གསུམ་ལ། །རྟག་ཏུ་བདག་ནི་སྐྱབས་སུ་མཆི། །ཞེས་པ་ལན་གསུམ། རྟེན་ཅིང་འབྲེལ་བར་འབྱུང་བ་ཡི། །འགྲོ་བ་སེམས་ཅན་བསྒྲལ་སླད་དུ། །བླ་ན་མེད་པའི་བྱང་ཆུབ་སེམས། །དམ་པ་བདག་གིས་བསྐྱེད་པར་བགྱི། །ཞེས་ལན་གསུམ་དང། སེམས་ཅན་ཐམས་ཅད་བདེ་བ་དང་ཞེས་སོགས་ཀྱང་ལན་གསུམ། དེ་ནས་གང་ཟག་གི་བདག་དང་ཆོས་བདག་བཟུང་བ་རང་བཞིན་མ་གྲུབ་པའི་ངང་ལ་དར་ཅིག་བཞག །དེའི་ངང་ལས་ཆོས་ཐམས་ཅད་རྟེན་འབྲེལ་སྒྱུ་མ་ལྟ་བུར་བལྟས་ལ། སྐད་ཅིག་གིས་བུམ་པའི་སྟེང་དུ་ཟླ་བའི་དཀྱིལ་འཁོར་ཉ་ཡོངས་སུ་གང་བ་ལ་གནས་པའི་རྟེན་འབྲེལ་སྙིང་པོའི་སྔགས་ཕྲེང་ཁ་དོག་དཀར་པོ། དེ་ལས་འོད་ཟེར་དཀར་པོ་འཕྲོས་པས་འཇིག་རྟེན་གྱི་ཁམས་ཐམས་ཅད་ནས་ལྷའི་བདུད་རྩིའི་རྒྱུན་རྣམས་བསྡུས་ཏེ་ཞུ་བའི་ཆུས་བུམ་པ་གང་བར་དམིགས་ནས། ལག་གཡས་བུམ་པ་ལ་བཀབ་པའི་རྒྱ་བཅས་ཏེ། ༀ་ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་བ་དཏ། ཏེ་ཥཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎཱ་ཡ་སྭཱ་ཧཱ། ཞེས་པ་བརྒྱ་རྩ་བརྒྱད་བཟླ། ཡང་སྔགས་ཀྱི་འོད་ཟེར་གྱིས་ཕྱོགས་བཅུའི་རྒྱལ་བ་སྲས་བཅས་སྤྱན་དྲངས་ནས་རྟེན་རྣམས་ལ་ཐིམ་པར་བསམ། མཐར་ཟླ་དཀྱིལ་སྔགས་ཕྲེང་དང་བཅས་པའང་བུམ་ཆུ་ལ་ཐིམ་པར་བསམ་ཞིང་། དེས་རྟེན་དང་དཀྱིལ་འཁོར་ལ་ཁྲུས་བྱས་པའི་ཆུ་སླར་ཡང་བུམ་པར་བླུགས་སོ། །དེ་ནས་རྟེན་འབྲེལ་སྙིང་པོ་དང་། སྭ་བྷཱ་ཝའི་སྔགས་བརྗོད་ཅིང་བུམ་ཆུ་གཏོར་བས། གནས་དང་མཆོད་རྫས་ལ་སོགས་པའི་ཉེས་སྐྱོན་ཐམས་ཅད་སྦྱངས་ནས་དག་ཅིང་བཟང་བ་ཕུན་སུམ་ཚོགས་པར་གྱུར་པར་བསམ་ཞིང་། རྟེན་འབྲེལ་སྙིང་པོ་བརྗོད། དེ་ནས་དཀྱིལ་འཁོར་བསྐྱེད་ཅིང་བྱིན་གྱིས་རློབ་པ་ནི། མདུན་བསྐྱེད་ཀྱི་གཞིས་མཚོན་པའི་གཟུང་བ་ཕྲ་རགས་དང་འཛིན་པ་རགས་པས་བསྡུས་པའི་ཆོས་ཐམས་ཅད་རང་བཞིན་མ་གྲུབ་པའི་ངང་ལ་དར་ཅིག་བཞག །དེ་ནས། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་སྔོན་བྱང་ཆུབ་ཀྱི་སྤྱད་པ་སྤྱོད་པའི་ཚེ་སངས་རྒྱས་ཀྱི་ཞིང་ཡོངས་སུ་སྦྱངས་པའི་བདེན་པ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས། དེང་འདིར་དེ་བཞིན་གཤེགས་པ་སྲས་དང་བཅས་པ་དང ། འཕགས་པ་ཆོས་སྐྱོང་བ་ཐམས་ཅད་མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདི་དག་བཅོམ་ལྡན་འདས་འོད་དཔག་ཏུ་མེད་པའི་ཞིང་གི་བཀོད་པའི་ཡོན་ཏན་ལྟ་བུ་དང་ལྡན་པར་གྱུར་ཏེ། ཕྱི་ནང་གི་རྟེན་འབྲེལ་འབྱུང་ལྡོག་གི་འགྲོས་ཀྱིས་འཁོར་ཞིང་འགག་པའི་རྒྱུ་འབྲས་ཀྱི་མཚན་མས་ཡོངས་སུ་བསྐོར་བའི་ས་གཞི་རིན་པོ་ཆེ་སྣ་ཚོགས་ཀྱི་རང་བཞིན་ལག་མཐིལ་ལྟར་མཉམ་པའི་གཞི་ལ། བཀོད་པ་ཐམས་ཅད་ལས་འཕགས་པ་དེ་བཞིན་གཤེགས་པའི་བཀོད་པ་ལ་བརྟེན་པའི་ཕོ་བྲང་རིན་པོ་ཆེ་སྣ་བདུན་ལས་གྲུབ་པའི་ཁང་བ་བརྩེགས་པ། གྲུ་བཞི་པ། ཀ་བ་བཞི་ཟུག་པ། སྒོ་བཞི་དོད་པ། མཉམ་པ། ཉམས་དགའ་བ། ཤིན་ཏུ་རྣམ་པར་ཕྱེ་བས་མཛེས་པར་བྱས་པ། བཀྲ་བ། ལྟ་ན་སྡུག་པ། འོད་འབར་བ། ཐེམ་སྐས་བཞི་དང་ལྡན་པ། དཀྱིལ་འཁོར་གྱི་ནང་གི་དབུས་སུ་རིན་པོ་ཆེའི་ཁྲི་པདྨ་ཟླ་བ་དང་བཅས་པ། དེའི་གཡས་གཡོན་དང་། ཕྱི་བསྐོར་གྱི་པད་འདབ་བཅུ་གཉིས་ཡོངས་སུ་རྒྱས་པའི་སྟེང་སོ་སོར་ཡང་ཟླ་བའི་གདན་རེ་རེ་དང་། སྒོ་བཞིར་རིན་པོ་ཆེའི་གདན་རྣམས་ཏེ། འཕགས་པ་རྣམས་གདན་འཛོམ་པའི་བཞུགས་གནས་སོ་སོའི་སྨོན་ལམ་ཁྱད་པར་ཅན་དང་མངའ་ཐང་དང་འཚམས་པར་གྲུབ་པ་མཛེས་པ་ཤ་སྟག་འབྱུང་བར་གྱུར་ཅིག །ཅེས་ལན་གསུམ་དང་། རྟེན་འབྲེལ་སྙིང་པོ་བརྗོད། དེ་ནས་མཆོད་པ་བྱིན་གྱིས་རློབ་པ་ནི། ཕྱི་ནང་ཀུན་ཏུ་ཆ་རིས་དང་འཚམས་པར་ལྷ་དང་མིའི་ཡོ་བྱད་དམ་པ་ཁ་དོག་དང་། དྲི་དང་། རོ་དང་། རེག་པ་དང་ལྡན་པ་ཡིད་དུ་འོང་པ། གྱ་ནོམ་པའི་ཞལ་ཟས་དང་། ན་བཟའ་དང་། རྒྱན་དང་། རོལ་མོ་ལ་སོགས་པ་ཕུལ་དུ་ཕྱིན་པ་སྣ་ཚོགས་པ། ཕུང་པོ་གསུམ་པའི་མདོ་དང་། བཟང་པོ་སྤྱོད་པའི་སྨོན་ལམ་ལས་བྱུང་བའི་མཆོད་པའི་སྤྲིན་རྒྱ་མཚོ་ཐམས་ཅད་ཀྱིས་རྒྱས་པར་གང་ཞིང་རྒྱན་ཀླུབས་པ་དང་ལྡན་པར་གྱུར་ཅིག །འཕགས་པ་ཐམས་ཅད་གདན་འཛོམ་ནས། དེ་བཞིན་དུ་བྱིན་གྱིས་བརླབས་ཤིང་བཞེས་ཏེ་ལོངས་སྤྱོད་པར་གྱུར་ཅིག །ཅེས་ལན་གསུམ་དང་། རྟེན་འབྲེལ་སྙིང་པོ་བརྗོད། དེ་ནས་སྤྱན་འདྲེན་པ་ནི། སྤོས་བཏུལ་ཞིང་རོལ་མོའི་སྒྲ་དང་བཅས་ཏེ། ཧཱུཾ། རྟེན་ཅིང་འབྲེལ་བར་འབྱུང་བ་ཡི། །འདས་དང་མ་བྱོན་ད་ལྟར་གྱི། །དཀོན་མཆོག་བླ་མེད་རིན་ཆེན་གསུམ། །རྟེན་ཅིང་འབྲེལ་བར་འབྱུང་བ་ཡི། །འགྲོ་བ་སེམས་ཅན་དོན་སླད་དུ། །ཐུགས་རྗེས་དགོངས་ཏེ་གཤེགས་སུ་གསོལ། །ༀ་ཡེ་དྷརྨཱ་སོགས་བརྗོད། ཅེས་སྤྱན་དྲངས་པས། རང་བཞིན་གྱི་གནས་ནས་བཅོམ་ལྡན་འདས་ཐུབ་པའི་དབང་པོ་འཁོར་འཕགས་པ་རང་སངས་རྒྱས་ཀྱི་ཚོགས། ཕྱི་བཞིན་འབྲང་བ་རྒྱལ་པོ་ཆེན་པོ་སྡེ་བཞི་དང་བཅས་པ་སོ་སོའི་རྫུ་འཕྲུལ་གྱི་མཐུས་བྱོན་ནས་རང་རང་གི་གདན་ལ་བཞུགས་པར་གྱུར་པ་ནི། དབུས་སུ་བཅོམ་ལྡན་འདས་དེ་བཞིན་གཤེགས་པ་དཔལ་རྒྱལ་བ་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ། མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་བརྒྱན་པ། ཕྱག་གཡས་ས་གནོན་དང་། གཡོན་མཉམ་བཞག་གི་ཕྱག་རྒྱ་མཛད་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དེའི་གཡས་སུ་རང་རྒྱལ་བསེ་རུ་ལྟ་བུ་དང་། གཡོན་ན་ཚོགས་སྤྱོད་གཉིས་ཐལ་མོ་སྦྱར་བ། མཐའ་བསྐོར་ཡི་འདབ་མ་བཅུ་གཉིས་ལ་མདུན་ནས་གཡས་བསྐོར་དུ་རང་རྒྱལ་བཅུ་གཉིས་ཏེ། འཇིགས་མེད་རྡོ་རྗེ། སྣང་བ་བརྩེགས་པ་རིན་པོ་ཆེ། དཔའ་བོ་འདུལ་པ་རྡོ་རྗེ་རྩེ་ལྔ་པ། ཉོན་མོངས་གདུང་སེལ་བསིལ་ཡབ་། ཤེས་རབ་མགྱོགས་ཆེན་ཟླ་ཚེས། རྫུ་འཕྲུལ་ཆེར་སྟོན་མེ་དཔུང་། གདུང་བ་སེལ་བྱེད་དུང་། སྒྲ་ཆེན་པོ་ཆ་ལང་། བསེ་རུ་ལྟ་བུ་མཉམ་བཞག །རི་རྒྱལ་རིན་པོ་ཆེའི་སྙེ་མ། སེང་གེ་ལྟ་བུ་རྡོ་རྗེ། ཡིད་མྱུར་རྔ་ཡབ་བསྣམས་པ། ཐམས་ཅད་ཀྱང་དགེ་སློང་དགྲ་བཅོམ་པ་དབང་པོ་དུལ་བའི་ཆ་ལུགས་ཅན་གཙུག་ཏོར་ཅུང་ཟད་དང་བཅས་པ། ཤར་སྒོར་ཡུལ་འཁོར་སྲུང་དཀར་པོ་པི་ཝཾ། ལྷོ་སྒོར་འཕགས་སྐྱེས་པོ་སྔོན་པོ་རལ་གྲི། ནུབ་སྒོར་མིག་མི་བཟང་དམར་པོ་སྦྲུལ་ཞགས་དང་མཆོད་རྟེན། བྱང་སྒོར་རྣམ་ཐོས་སྲས་སེར་པོ་ཡིད་བཞིན་གྱི་རྒྱལ་མཚན་དང་ནེའུ་ལེ་འཛིན་པ། ཐམས་ཅད་ཀྱང་རང་རང་གི་འཁོར་བསམ་གྱིས་མི་ཁྱབ་པ་དང་བཅས་ཏེ་བཞུགས་པར་བསམ་ཞིང་། རྟེན་ཅིང་འབྲེལ་བར་འབྱུང་བ་ཡི། །གནས་མཆོག་གཞལ་ཡས་ཕོ་བྲང་འདིར། །རིན་ཆེན་པདྨའི་གདན་སྟེང་དུ། །དགྱེས་ཤིང་བརྟན་པར་བཞུགས་སུ་གསོལ། །ༀ་ཡེ་དྷརྨཱ་ཞེས་པས་གདན་ལ་བཞུགས་སུ་གསོལ་ལོ། །དེ་ནས་མེ་ལོང་གི་ནང་དུ་དཀྱིལ་འཁོར་གྱི་གཟུགས་བརྙན་འཆར་དུ་བཅུག་ལ་བུམ་པའི་ཆུས་ཁྲུས་ཆབ་སྦྲེང་བཞིན་དུ། རྟེན་ཅིང་འབྲེལ་བར་འབྱུང་བ་ཡི། །ལྷ་རྫས་དམ་པའི་ཁྲུས་ཆབ་འདི། །བླ་མེད་དཀོན་མཆོག་གསུམ་ལ་འབུལ། །རྟེན་ཅིང འབྲེལ་བར་འབྱུང་བ་ཡི། །འགྲོ་བ་སེམས་ཅན་དོན་སླད་དུ། །ཐུགས་རྗེས་དགོངས་ཏེ་བཞེས་སུ་གསོལ། །ༀ་ཡེ་དྷརྨཱ༴ ཞེས་ཁྲུས་གསོལ་བའི་ཆུ་སླར་ཡང་བུམ་པར་བླུགས། དེ་ནས་རས་མཆོག་གིས་སྐུ་འཕྱི་བཞིན་དུ། རྟེན་ཅིང་འབྲེལ་བར༴ །ལྷ་རྫས་དམ་པའི་སྐུ་ཕྱིས་འདི། །བླ་མེད་དཀོན་མཆོག༴ །རྟེན་ཅིང་འབྲེལ་བར༴ །འགྲོ་བ་སེམས་ཅན༴ །ཐུགས་རྗེས་དགོངས་ཏེ༴ །ༀ་ཡེ་དྷརྨཱ༴ ཞེས་འཕྱི། དེ་ནས་གོས་ཟུང་། རྟེན་ཅིང་༴ ལྷ་རྫས་དམ་པའི་ན་བཟའ་འདི། །བླ་མེད༴ །རྟེན་ཅིང་༴ །འགྲོ་བ༴ །ཐུགས་རྗེས༴ ༀ་ཡེ་དྷརྨཱ༴ །ཞེས་དབུལ་ལོ། །དེ་ནས་ཕྱག་བྱ་སྟེ། རྒྱས་པར་དཔང་སྐོང་ལྟར་བྱ་ཞིང་། འདིར་ཟོར་ཡང་བའི་དབང་དུ་བྱས་ནས་འདི་སྐད་ཅེས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་མཉམ་མེད་ཤཱཀྱ་ཐུབ་པ། འཁོར་འཕགས་པ་རང་སངས་རྒྱས་ཀྱི་དགེ་འདུན་གྱི་ཚོགས་དང་བཅས་པའི་ཞབས་ལ་དུས་ཐམས་ཅད་དུ་ཕྱག་འཚལ་ལོ། །མཆོད་དོ། །སྐྱབས་སུ་མཆིའོ། །དཀོན་མཆོག་བླ་མེད་རིན་ཆེན་གསུམ། །སྐུ་ནི་རྟེན་ཅིང་འབྲེལ་བའི་སྐུ། །གསུང་ནི་རྟེན་འབྲེལ་འགག་མེད་སྟོན། །ཐུགས་ནི་རྟེན་འབྲེལ་ཐམས་ཅད་མཁྱེན། །སྐུ་གསུང་ཐུགས་ལ་ཕྱག་འཚལ་ལོ། །ཁམས་གསུམ་པ་ཡི་འགྲོ་ཀུན་གྱི། །ངན་སོང་ཐམས་ཅད་སྦྱོང་མཛད་ཅིང་། །ཆོས་ཀྱི་འཁོར་ལོ་བསྐོར་མཛད་པ། །ཤཱཀྱ་སེང་གེ་ལ་ཕྱག་འཚལ། །རྟེན་འབྲེལ་དོན་ལ་བརྟེན་གནས་པའི། །འཕགས་པ་རང་རྒྱལ་བཅུ་གཉིས་ནི། །འབྱུང་དང་ལྡོག་ལ་རབ་བཞུགས་པའི། །རང་རྒྱལ་གཙོ་ལ་ཕྱག་འཚལ་ལོ། །ཟབ་མོ་རྟེན་འབྲེལ་ལེགས་གོམས་པས། །རང་སངས་རྒྱས་ཀྱི་ཡེ་ཤེས་ནི། །བརྟེན་མེད་ཚུལ་གྱིས་ཐུགས་ཆུད་པའི། །འཕགས་པར་རང་རྒྱལ་ཀུན་ལ་འདུད། །ཟབ་ཅིང་རྒྱ་ཆེ་གཟིགས་པ་པོ། །ཡུལ་འཁོར་སྲུང་དང་འཕགས་སྐྱེས་པོ། །མིག་མི་བཟང་དང་རྣམ་ཐོས་སྲས། །རྒྱལ་ཆེན་བཞི་ལ་ཕྱག་འཚལ་ལོ། །ཕྱག་བྱར་འོས་པ་ཐམས་ཅད་ལ། །ཞེས་སོགས་ཀྱང་བརྗོད། དེ་ནས་མཆོད་པ་ནི། རྟེན་ཅིང་འབྲེལ་བར་འབྱུང་བ་ཡི། །ལྷ་རྫས་དམ་པའི་ཡོན་ཆབ་འདི། །བླ་མེད་དཀོན་མཆོག་གསུམ་ལ་འབུལ། །རྟེན་ཅིང་འབྲེལ་བར་འབྱུང་བ་ཡི། །འགྲོ་བ་སེམས་ཅན་དོན་སླད་དུ། །ཐུགས་རྗེ་དགོངས་ཏེ་བཞེས་སུ་གསོལ། །ༀ་ཡེ་དྷརྨཱ་ནས། མ་ཧཱ་ཤྲ་མ་ཎཿ ༀ་ཨརྒྷཾ་པྲ་ཏཱི་ཙྪ་སྭཱ་ཧཱ། དེ་བཞིན་དུ་ཡོན་ཆབ་ཀྱི་གནས་སུ། །བདུག་སྤོས། མེ་ཏོག །མར་མེ། དྲི་མཆོག །ཞལ་ཟས། རོལ་མོ་རྣམས་དང་ཨརྒྷཾ་གྱི་གནས་སུ། དྷཱུ་པེ། པུཥྤེ། ཨཱ་ལོ་ཀེ །གནྡྷེ། ནཻ་ཝི་དྱ། ཤཔྡ་ཞེས་པ་རྣམས་བཅུག་ནས་དབུལ་ལོ། །དེ་ནས་བཤགས་པ་ལ་སོགས་པ་ཡན་ལག་ཕྱི་མ་ལྔ་ནི། རྟེན་ཅིང་འབྲེལ་བར་འབྱུང་བ་ཡི། །རྒྱལ་བ་སྲས་བཅས་དགོངས་སུ་གསོལ། །བདག་ནི་མི་ཤེས་གཏི་མུག་པས། །རང་བཞིན་ཁ་ན་མ་ཐོའམ། །བཅས་པའི་སྡིག་པ་གང་བགྱིས་པ། །དེ་དག་ཐམས་ཅད་བཤགས་པར་བགྱི། །འཕགས་དང་སོ་སོ་སྐྱེ་བོ་ཡི། །དགེ་ཚོགས་ཀུན་ལ་རྗེས་ཡི་རང་། །འགྲོ་བའི་བསམ་པ་ཇི་བཞིན་དུ། །ཆོས་ཀྱི་འཁོར་ལོ་བསྐོར་བར་བསྐུལ། །འཁོར་བ་ཇི་སྲིད་གནས་ཀྱི་བར། །མྱ་ངན་མི་འདར་བདག་གསོལ་འདེབས། །བདག་གིས་དགེ་བ་གང་བསགས་པ། །དེ་ཀུན་བྱང་ཆུབ་ཆེན་པོར་བསྔོ། །དེ་ནས་གཟུངས་བཟླ་བ་ནི། དཀོན་མཆོག་གསུམ་གྱི་བདེན་པ་དང་། །དེ་བཞིན་གཤེགས་པ་སྲས་དང་བཅས་པ་ཐམས་ཅད་ཀྱི་མཐུ་དང་བྱིན་གྱིས་བརླབས་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་དང་། འཕགས་པ་སྐུ་གསུང་ཐུགས་ཀྱི་སྤྱོད་པ་མ་དག་པ་མི་མངའ་བ་རྣམས་ཀྱི་ཐུགས་ངེས་པའི་བདེན་པས་མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འདིར་སྟོན་པ་ཡང་དག་པར་རྫོགས་པའི་སངས་རྒྱས་འཁོར་འཕགས་པ་རང་སངས་རྒྱས་ཀྱི་དགེ་འདུན་གྱི་ཚོགས་དང་བཅས་པ་ཐམས་ཅད་གདན་འཛོམ་པ་ཆེན་པོ་མཛད་དེ། མཆོད་པ་བཞེས་ཤིང་། གཟུངས་སྔགས་བཟླས་པ་ཚུལ་བཞིན་དུ་འགྲུབ་པར་བྱིན་གྱིས་རློབ་པར་མཛད་དེ། བདག་སོགས་འགྲོ་བ་མང་པོའི་དོན་དཔག་ཏུ་མེད་པ་མཛད་པར་གྱུར་ཅིག །དཀྱིལ་འཁོར་གྱི་ལྷ་ཚོགས་རྣམས་ཀྱིས་ཐུགས་ཀར་ཟླ་བའི་དཀྱིལ་འཁོར་ཉ་གང་བ་ལ་གནས་པའི་རྟེན་འབྲེལ་སྙིང་པོའི་སྔགས་ཕྲེང་ཁ་དོག་དཀར་པོ་ལས་འོད་ཟེར་འཕྲོས་པས་འཇིག་རྟེན་གྱི་ཁམས་ཐམས་ཅད་ཁྱབ། དེས་འཕགས་པ་ཐམས་ཅད་སེམས་ཅན་གྱི་དོན་མཛད་པར་བསྐུལ་ཞིང་། ངན་སོང་གི་གནས་ཐམས་ཅད་ཀྱང་སྦྱངས་ཏེ། སེམས་ཅན་ཐམས་ཅད་མཐོ་རིས་ཀྱི་རྟེན་ཕུན་སུམ་ཚོགས་པ་ཐོབ་ནས་མ་རིག་པ་སོགས་རྟེན་ཅིང་འབྲེལ་བར་འབྱུང་བ་བཅུ་གཉིས་ལུགས་ལྡོག་ཏུ་འགགས་པའི་རྣམ་གྲོལ་གྱི་གོ་འཕང་ལ་མྱུར་དུ་འཇུག་པར་གྱུར་ཅིག །འོད་ཟེར་དེས་བདག་ཅག་རྣམས་ལ་ཁྱབ་པས་འགྲོ་དོན་དཔག་མེད་སྒྲུབ་ནུས་པའི་མཐུ་ཐོབ་སྟེ་འཕགས་པའི་ཚོགས་རྣམས་དང་སྐུ་གསུང་ཐུགས་མཚུངས་པར་གྱུར་ཅིག །ཡང་འོད་ཟེར་དེ་དག་གཅིག་ཏུ་འདུས་པ་བུམ་པའི་གཟུངས་ཆབ་ལ་ཁྱབ་སྟེ་རེག་པ་ཙམ་གྱིས་མི་མཐུན་པའི་ཕྱོགས་ཞི་བར་བྱེད་པ། དཔལ་དང་བདེ་ལེགས་བསྐྱེད་པར་བྱེད་པའི་བདུད་རྩིའི་དག་བྱེད་དུ་གྱུར་ཅིག །བདག་ཅག་ལ་སོགས་པ་བསྒྲུབ་བྱའི་ལུས་དང་འཁོར་དང་ལོངས་སྤྱོད་ཐམས་ཅད་ལ་ཁྱབ་སྟེ། ནད་དང་གནོད་པ་ཐམས་ཅད་ནི་བསལ། ལུས་སེམས་ཀྱི་སྐྱོན་ཐམས་ཅད་ནི་བྲལ་སྟེ། ཆོས་ཀྱི་སྣོད་རུང་དུ་གྱུར་ཅིག །བདག་ཅག་རྣམས་ཀྱིས་འཕགས་པ་རྣམས་མངོན་སུམ་པ་ལྟ་བུར་དམིགས་ནས་གཟུངས་བཟླས་པས་དེ་བཞིན་གཤེགས་པ་སྲས་དང་བཅས་པ་རྣམས་ཀྱི་ཏིང་ངེ་འཛིན་གྱི་སྒོ་སྣ་ཚོགས་དང་ཚིག་འབྲུ་མཐའ་ཡས་པ་རྟོགས་ཤིང་རྣམ་པར་དག་པར་བྱིན་གྱིས་རློབ་པར་གྱུར་ཅིག །ཅེས་བདེན་པའི་ཚིག་གིས་བསྔོས་ནས། འཕགས་པ་རྣམས་ཀྱིས་གནང་ཞིང་ཕྲིན་ལས་མཛད་པར་ངེས་ཤེས་བསྐྱེད་དེ། ཇི་ལྟར་བསྔོས་པ་བཞིན་མངོན་དུ་གྱུར་པར་དམིགས་ནས། ༀ་མུ་ནེ་མུ་ནེ་མ་ཧཱ་མུ་ནེ་ཤཱཀྱ་མུ་ནེ་ཡེ་སྭཱ་ཧཱ། ཞེས་པ་ཅི་ནུས་དང་། ༀ་ཡེ་དྷརྨཱ་སོགས་རྟེན་འབྲེལ་སྙིང་པོའང་ཅི་རིགས་པ་བཟླའོ། །དེ་ནས་དཀྱིལ་འཁོར་ལ་བརྟན་བཞུགས་བྱ་སྟེ། རྟེན་ཅིང་འབྲེལ་བར་འབྱུང་བ་ཡི། །རྒྱལ་བ་འཁོར་དང་བཅས་པ་རྣམས། །འགྲོ་བ་སེམས་ཅན་དོན་སླད་དུ། །ཇི་སྲིད་ཆོ་ག་མ་གྲུབ་བར། །ཐུགས་རྗེས་དགོངས་ཏེ་བཞུགས་སུ་གསོལ། །ༀ་ཡེ་དྷརྨཱ༴ མེ་ཏོག་འཐོར་བཞིན་དུ། རྒྱལ་བ་དགྲ་རྒྱལ་བདེན་པའི་བྱིན་རླབས་ཀྱིས། །བདེན་པ་གསུངས་པ་དེ་ལ་སྡིག་མེད་ཅིང་། །ལྷར་བཅས་ལྷ་མིན་གྱིས་རྟག་མཆོད་པ་ཡི། །བདེན་པ་དེ་ཡིས་དེང་འདིར་བདེ་ལེགས་ཤོག །ༀ་ཡེ་དྷརྨཱ༴ དམ་ཆོས་བདུད་རྩི་ཐམས་ཅད་མཁྱེན་པ་ཡི། །ཞལ་ནས་གསུངས་པ་བསིལ་བའི་རོ་འདི་ཡིས། །ཉོན་མོངས་འབར་བའི་མེ་ཡིས་གདུངས་གྱུར་པའི། །འགྲོ་བའི་སྡུག་བསྔལ་རྟག་ཏུ་ཞི་བྱེད་ཤོག །ༀ་ཡེ་དྷརྨཱ༴ འབྱུང་པོ་གང་དག་འདིར་ནི་ལྷགས་གྱུར་ཏམ། །སའམ་འོན་ཏེ་བར་སྣང་འཁོད་ཀྱང་རུང་། །སྐྱེ་དགུ་རྣམས་ལ་རྟག་ཏུ་བྱམས་བྱེད་ཅིང་། །ཉིན་དང་མཚན་དུ་ཆོས་ལ་སྤྱོད་པར་ཤོག །ༀ་ཡེ་དྷརྨཱ༴ དེ་ནས་གཏོར་མ་བཏང་ཞིང་དབང་བསྐུར་བ་ནི། འདས་གཏོར་དང་ཆ་གསུམ་གཏོར་མ་སྔར་བཤད་པ་བཞིན་དང་། དབང་ཆོག་ལྟར་རང་རྒྱལ་གྱི་ཐེག་པའི་དབང་བསྐུར་རོ། །དེ་ནས་རྗེས་ཆོག་ནི། རྟེན་ཅིང་འབྲེལ་བར་འབྱུང་བ་ཡི། །ལྷ་རྫས་དམ་པའི་མཆོད་ཚོགས་ཀུན། །བླ་མེད་དཀོན་མཆོག་གསུམ་ལ་འབུལ། །ཐུགས་རྗེས་དགོངས་ཏེ་བཞེས་སུ་གསོལ། །ༀ་ཡེ་དྷརྨཱ༴ ཞེས་པས་མཆོད། མ་རྙེད་ཡོངས་སུ་སོགས་ཀྱིས་ནོངས་པ་བཤགས། རྟེན་ཡོད་ན་སྔར་གྱི་བརྟན་བཞུགས་ཀྱི་རྐང་པ་བཞི་པ་ཉིད། ཇི་སྲིད་གཟུགས་བརྙན་གནས་ཀྱི་བར། །ཞེས་བརྗེས་པས་བརྟན་བཞུགས་བྱ། མེད་ན། ༀ། ཁྱེད་ཀྱི་སེམས་ཅན་སོགས་ཀྱིས་གཤེགས་ནས། བསྔོ་སྨོན་ནི། འདི་ལྟར་འབད་པས་བསྒྲུབས་པ་ཡི། །བསོད་ནམས་གྲུབ་པ་གང་ཡོད་པ། །དེས་ནི་འཇིག་རྟེན་མ་ལུས་པས། །ཐུབ་དབང་གོ་འཕང་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །སོགས་དང་། འཇིག་རྟེན་བདེ་ཞིང་སོགས་དང་། བླ་མེད་བླ་མའི་ཐུགས་རྗེ་དང་། །རྒྱལ་དང་རྒྱལ་སྲས་རང་རྒྱལ་དང་། །དགྲ་བཅོམ་བདེན་པའི་བྱིན་རླབས་ཀྱིས། །བསྔོ་བ་སྨོན་ལམ་འགྲུབ་པར་ཤོག །དེ་ནས་བཀྲ་ཤིས་ནི། ཤིན་ཏུ་བརྒལ་དཀའ་འཁོར་བའི་མཚོ་ལས་བརྒལ། །བསོད་ནམས་ཡེ་ཤེས་དཔག་ཡས་ཚོགས་གཉིས་རྫོགས། །འགྲོ་བ་ཀུན་གྱི་གཉེན་གཅིག་དེ་བཞིན་གཤེགས། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །སྐྱེ་རྒ་ན་འཆི་མཐའ་དག་རྟག་ཏུ་སྤངས། །མ་རིག་མུན་པ་དྲུང་འཇོམས་སྒྲོན་མེའི་ཚོགས། །དམིགས་པའི་མཐའ་སྤངས་ལམ་གྱི་བདེ་འགྲོར་ཞུགས། བཀྲ་ཤིས་དེས་ཀྱང་༴ །རང་དོན་སྤངས་ཤིང་གཞན་དོན་ལྷུར་ལེན་པ། །འདོད་པའི་ཡོན་ཏན་ལྟ་བ་རྒྱང་བསྲིངས་ཏེ། དད་དང་བརྩོན་འགྲུས་གྲོགས་མཆོག་བྱང་ཆུབ་སེམས། །བཀྲ་ཤིས༴ །སྙིགས་དུས་སྨོན་ལམ་དབང་གིས་སྐུ་སྤྲུལ་ནས། །ཤིན་ཏུ་ཉོན་མོངས་གདུལ་དཀའ་འདུལ་མཛད་པ། །ཐབས་མཁས་ཐུགས་རྗེ་ཆེ་མངའ་རྐང་གཉིས་གཙོ། །བཀྲ་ཤིས༴ །ཅེས་མེ་ཏོག་འཐོར་ཞིང་རོལ་མོའི་སྒྲ་བྱའོ། །མན་ངག་བྲལ་བས་ཆོག་གཞུང་དང་། །རབ་གནས་མ་ཕྱེད་དེ་ལྟ་ནའང་། །དབང་ཤེད་ཆོས་ལ་བཙོངས་པའི་མུན། །བསམ་བྱེད་འོད་བརྒྱའི་དཔལ་འདིའོ། །རང་རྒྱལ་ཐེག་པའི་སྒྲུབ་ཐབས་ཀྱི་ལེ་ཚན་ནོ།། །།

༈ ༀ་སྭ་སྟི། རྣམ་འགྱུར་སྒྲིབ་གཉིས་བག་ཆགས་དཔུང་། །ཐོགས་མེད་ཡེ་ཤེས་རྡོ་རྗེ་ཡིས། །མཐར་མཛད་མགོན་པོ་དེར་བཏུད་ནས། །བྱང་སེམས་ཐེག་པའི་སྒྲུབ་ཐབས་བཤད། །བཞི་པ་བྱང་སེམས་ཀྱི་དཀྱིལ་འཁོར་ནི། གང་དུ་བྱ་བའི་གཞིར་དྲི་བཟང་པོ་དང་བ་བྱུང་གི་ཆུས་ཆག་ཆག་བཏབ་ལ། དཀྱིལ་འཁོར་ཁྱམས་དང་རྟ་བབས་སྤངས་པའི་གཞལ་ཡས་ཁང་གྲུ་བཞི་སྒོ་བཞི་པ། མདའ་ཡབ་ཀྱི་ཕྱི་རོལ་ཏུ་རིན་པོ་ཆེའི་བྱེ་མ་བརྡལ་བའི་ས་གཞི་ལ་དཔག་བསམ་གྱི་ཤིང་དང་ཁྲུས་རྫིང་སོགས་བདེ་བ་ཅན་གྱི་ཞིང་བཀོད་ལྟ་བུས་བརྒྱན་པའི་མཐར་རྡོ་ར་དང་འོད་ཕྲེང་གིས་བསྐོར་བ། དབུས་ཀྱི་ལྟེ་བ་སེར་པོ། དེའི་མཐར་ནང་དུ་པདྨ་འདབ་མ་བཞི་དང ། ཕྱིར་འདབ་མ་བཅུ་པ་རྣམས་མཛེས་ཚོན་དང་། ཚོན་ལྷག་མ་སྤྱི་ལྟར་བྱ་ཞིང་། ལྷ་གནས་རྣམས་སུ་སྐུ་རྟེན་ལྷ་སོ་སོའི་འབུར་སྐུའམ་ཙཀླི་དང་། གཙོ་བོའི་སྐུ་དང་མཉམ་དུ་གསུང་རྟེན་ཤེར་སྙིང་གི་གླེགས་བམ་དང་། ཐུགས་རྟེན་དེ་བཞིན་གཤེགས་པའི་མཆོད་རྟེན། རིན་ཆེན་འབྲུ་སྨན་དྲི་བཟང་པོ་དང་བཅས་པའི་ཆུས་རྟེན་བྱིན་ཅན་ལ་ཁྲུས་བྱས་པས་བཀང་བའི་བུམ་པ་ཆས་སུ་བཅུག་པས་དཀྱིལ་འཁོར་གྱི་མདུན་དུ་སྟེགས་ལ་བཀོད། རྫས་དབང་གི་ཙཀླི་རྣམས་ཀྱང་ཅི་བདེར་བཤམ། དཀྱིལ་འཁོར་གྱི་མཐའ་ཨརྒྷཾ་ལ་སོགས་པའི་མཆོད་པ་ཅི་འབྱོར་པས་བསྐོར། མདུན་ལྟ་བུར་འདས་གཏོར་དང་། ཆ་གསུམ་གཏོར་མའང་ཅི་བདེར་བསྒྲིག །རང་གི་མདུན་དུ་རྡོར་དྲིལ་སྤོས་སྣོད་འཐོར་ནས་སོགས་ཡོ་བྱད་ཐམས་ཅད་ཚང་བར་འདུ་བྱའོ། །དེ་ནས་ཆོ་ག་ནི། ཁྲུས་སྔོན་དུ་འགྲོ་བས། མཁྱེན་བརྩེ་ནུས་པའི་བདག་ཉིད་ཕྱོགས་བཅུའི་རྒྱལ་བ་སྲས་དང་བཅས་པ་མཁའ་ཁྱབ་ཏུ་བཞུགས་པར་མོས་ལ་ཕྱག་བྱས་ནས་སྟན་ལ་འདུག་སྟེ། སྐྱབས་སེམས་ཚད་མེད་བཞི་སྒོམ་པའི་རིམ་པ་ནི། འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ཞེས་ལན་གསུམ་དང་། ཤེས་རབ་སྙིང་རྗེ་དང་བཅས་པས། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བགྱིས་ནས། །བྱང་ཆུབ་མཆོག་ཏུ་སེམས་བསྐྱེད་བགྱི། །ཞེས་ལན་གསུམ། སེམས་ཅན་ཐམས་ཅད་བདེ་བ་དང་ཞེས་སོགས་ཀྱང་ལན་གསུམ་མོ། །དེ་ནས་བྱང་ཆུབ་ཀྱི་སེམས་ཁྱད་པར་ཅན་སྒོམ་པ་ནི།་འདི་ལྟར་སྣང་བའི་ཆོས་ཐམས་ཅད་མི་དམིགས་པ་སྟོང་ཉིད་སྤྲོས་པའི་མཐའ་ཐམས་ཅད་དང་བྲལ་བའོ། །ཞེས་དེའི་ངང་ལ་དར་ཅིག་མཉམ་པར་བཞག །དེ་ལས་ལངས་ནས། ཆོས་ཐམས་ཅད་དོན་དམ་པར་སྤྲོས་པ་དང་བྲལ་བ་ཡིན་པ་ལ། འཕགས་པ་རྣམས་ཀྱིས་དེ་ཉིད་ཐུགས་སུ་ཆུད་པས་སྐུ་གསུང་ཐུགས་ནམ་མཁའ་དང་འདྲ་བར་གྱུར་ཏེ་སྒྲིབ་པ་མི་མངའ་ཞིང་། མཐུ་དང་བྱིན་རླབས་བསམ་གྱིས་མི་ཁྱབ་པའི་གོ་འཕང་བརྙེས་པར་གྱུར་ན། ཀྱེ་མ་སེམས་ཅན་འདི་དག་ནི་ཆོས་ཀྱི་དེ་ཁོ་ན་ཉིད་མ་རྟོགས་ཏེ་རྨོངས་པས་ཉོན་མོངས་པ་དང་སྡུག་བསྔལ་མང་པོས་གཟིར་ཞིང་ཉམ་ཐག་པའི་གནས་སུ་ལྷུང་བར་གྱུར་ལ། སེམས་ཅན་ཐམས་ཅད་ཀྱང་བདག་གི་ཚེ་རབས་ཀྱི་གཉེན་བཤེས་དྲིན་ཅན་གྱི་འཁོར་ལོ་ཤ་སྟག་ཡིན་ན། འདི་དག་ཇི་ལྟར་སྡུག་བསྔལ་ལས་ནི་གདོན། བདེ་བ་ལ་ནི་འགོད་པར་བྱ། དེའི་ཆེད་དུ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཆེན་པོའི་ཚོགས་ཐམས་ཅད་གདན་འཛོམ་པར་སྤྱན་དྲངས་ལ། མཐུ་དང་དཔུང་གཉེན་དུ་གསོལ་ཏེ། དེང་ནི་འཕགས་པའི་མཐུ་དང་བྱིན་རླབས་ཀྱིས་འགྲོ་བ་ཐམས་ཅད་ལ་ཕན་པ་བསྒྲུབ་པར་བྱ་ལ། ཕྱིས་ནི་བདག་ཉིད་གཅིག་པུས་གཞན་ལ་ལྟོས་པ་མེད་པར་ཐབས་ལ་མཁས་པའི་སྒོ་སྣ་ཚོགས་ནས་སེམས་ཅན་ཐམས་ཅད་ལ་ཕན་པ་དང་བདེ་བ་བླ་ན་མེད་པ་ཡང་དག་པར་བསྒྲུབ་པར་བྱའོ། །སྙམ་དུ་བྱམས་སྙིང་རྗེ་བྱང་ཆུབ་ཀྱི་སེམས་བསྐྱེད་དོ། །དེ་ནས་དཀྱིལ་འཁོར་བསྐྱེད་ཅིང་བྱིན་གྱིས་བརླབ་པ་ནི། མདུན་བསྐྱེད་ཀྱི་གཞི་མི་དམིགས་པ་སྟོང་ཉིད་སྤྲོས་པ་དང་བྲལ་བའི་ངང་ལས། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དང་ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། སྟོན་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་སོགས་ཏེ་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་ཞིང་ཡོངས་སུ་སྦྱངས་པའི་བདེན་པ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེང་འདིར་དེ་བཞིན་གཤེགས་པ་སྲས་དང་བཅས་པ་དང་། འཕགས་པ་ཆོས་སྐྱོང་བ་ཐམས་ཅད་གདན་འཛོམ་པའི་ཕོ་བྲང་གི་དཀྱིལ་འཁོར་དང་། མཆོད་པའི་ཚོགས་སྦྱར་བ་འདི་རྣམས་ཇི་ལྟར་སངས་རྒྱས་དང་བྱང་ཆུབ་སེམས་དཔའ་དེ་དག་གི་སྔོན་གྱི་སྨོན་ལམ་ཁྱད་པར་ཅན་གྱིས་བསྒྲུབས་པའི་སངས་རྒྱས་ཀྱི་ཞིང་ཡོངས་སུ་དག་པ་དང་། བཅོམ་ལྡན་འདས་འོད་དཔག་ཏུ་མེད་པའི་ཞིང་གི་བཀོད་པའི་ཡོན་ཏན་ལྟ་བུ་དང་ལྡན་པར་གྱུར་ཏེ། ས་གཞི་རིན་པོ་ཆེ་སྣ་ཚོགས་ཀྱི་རང་བཞིན་ལག་མཐིལ་ལྟར་མཉམ་པ་ལ། རིན་པོ་ཆེའི་དཔག་བསམ་གྱི་ལྗོན་ཤིང་ཚར་དུ་དངར་བ་ལ་བཀྲ་ཤིས་པའི་བྱ་སྙན་པར་སྒྲོག་པ་སྣ་ཚོགས་གནས་པ། དེ་དག་ཀྱང་གསེར་གྱི་ཐ་གུས་བྲེས་པ་ལས་རིན་པོ་ཆེ་སྣ་ཚོགས་པ་དཔྱངས་ཤིང་དྲིལ་བུ་དང་གཡེར་ཁ་ཆོས་ཀྱི་སྒྲ་སྙན་པར་འཁྲོལ་བས་མཛེས་པ། ཡན་ལག་བརྒྱད་དང་ལྡན་པའི་མཚོ་དང་རྫིང་བུ་ལ་ཆུ་བྱ་དང་ལྷ་མོ་སྣ་ཚོགས་བདེ་བར་རྩེ་བ། ལྷའི་མེ་ཏོག་སྣ་ཚོགས་དང་རིན་པོ་ཆེའི་ཕྱེ་མ་གཅལ་དུ་བཀྲམ་པ་ལ་སོགས་པ་ཕུན་སུམ་ཚོགས་པའི་རྒྱན་ཐམས་ཅད་ཀྱིས་རྣམ་པར་བརྒྱན་པའི་ཞིང་ཁམས་ཡོངས་སུ་དག་པའི་དབུས་སུ། །བཀོད་པ་ཐམས་ཅད་ལས་འཕགས་པ་དེ་བཞིན་གཤེགས་པའི་བཀོད་པ་ལ་བརྟེན་པའི་ཕོ་བྲང་རིན་པོ་ཆེ་སྣ་བདུན་ལས་གྲུབ་པའི་ཁང་པ་བརྩེགས་པ། གྲུ་བཞི་པ། ཀ་བ་བཞི་ཟུག་པ། སྒོ་བཞི་དོད་པ། མཉམ་པ། ཉམས་དགའ་བ། ཤིན་ཏུ་རྣམ་པར་ཕྱེ་བས་མཛེས་པར་བྱས་པ། བཀྲ་བ། ལྟ་ན་སྡུག་པ། འོད་འབར་བ། ཐེམ་སྐས་བཞི་དང་ལྡན་པ། དེ་བཞིན་གཤེགས་པའི་གནས། བྱང་ཆུབ་སེམས་དཔའི་དགེ་འདུན་དང་ལྡན་པའི་གཞལ་མེད་ཁང་ཆེན་པོ། ཡོན་ཏན་མཐའ་ཡས་པའི་རྒྱན་གྱིས་ཡོངས་སུ་སྤྲས་པའི་དབུས་སུ་སེང་གེས་བཏེགས་པའི་རིན་པོ་ཆེའི་ཁྲི་པད་ཟླ་བརྩེགས་པའི་གདན་དང་། མཐའ་བསྐོར་གྱི་པད་འདབ་བཞི་དང་བཅུ་རྣམས་ཀྱི་སྟེང་དུའང་པདྨ་དང་ཟླ་བ་རྒྱས་པའི་གདན་རེ་རེ། སྒོ་བཞིར་རིན་པོ་ཆེའི་གདན་ལ་སོགས་པ་བཅོམ་ལྡན་འདས་ཤཱཀྱ་ཐུབ་པ་སོགས་ཕྱོགས་བཅུའི་དེ་བཞིན་གཤེགས་པ་དང་། བྱང་ཆུབ་སེམས་དཔའ་དང་། འཕགས་པ་དམ་པའི་ཆོས་སྐྱོང་བ་ཐམས་ཅད་གདན་འཛོམ་པའི་བཞུགས་གནས། འཕགས་པ་སོ་སོའི་སྨོན་ལམ་ཁྱད་པར་ཅན་དང་། མངའ་ཐང་དང་འཚམས་པར་གྲུབ་པ་མཛེས་པ་ཤ་སྟག་འབྱུང་བར་གྱུར་ཅིག །ཅེས་པ་ལན་གསུམ། དེ་ནས་མཆོད་པ་བྱིན་གྱིས་བརླབ་པ་ནི། ཕྱི་ནང་ཀུན་ཏུ་ཡང་ཆ་རིགས་དང་འཚམས་པར་ལྷ་དང་མིའི་ཡོ་བྱད་དམ་པ། ཁ་དོག་དང་། དྲི་དང་། རོ་དང་། རེག་པ་དང་ལྡན་པ་ཡིད་དུ་འོང་བ། གྱ་ནོམ་པའི་ཞལ་ཟས་དང་། ན་བཟའ་དང་། རྒྱན་དང་། རོལ་མོ་ལ་སོགས་པ་ཕུལ་དུ་ཕྱིན་པ་སྣ་ཚོགས་པ་ཕུང་པོ་གསུམ་པའི་མདོ་དང་། བཟང་པོ་སྤྱོད་པའི་སྨོན་ལམ་ལས་བྱུང་བའི་མཆོད་པའི་སྤྲིན་རྒྱ་མཚོ་ཐམས་ཅད་ཀྱིས་རྒྱས་པར་གང་ཞིང་རྒྱན་ཀླུབས་པ་དང་ལྡན་པར་གྱུར་ཅིག །འཕགས་པ་ཐམས་ཅད་ཀྱང་གདན་འཛོམ་ནས། དེ་བཞིན་དུ་བྱིན་གྱིས་བརླབས་ཤིང་བཞེས་ཏེ་ལོངས་སྤྱོད་པར་གྱུར་ཅིག །ཅེས་ལན་གསུམ་དང་། མཆོད་པའི་སྤྲིན་གྱི་གཟུངས། ན་མོ་རཏྣ་ཏྲ་ཡཱ་ཡ། ༀ་ན་མོ་བྷ་ག་ཝ་ཏེ་བཛྲ་སཱ་ར་པྲ་མརྡ་ནེ། ཏ་ཐཱ་ག་ཏ་ཡ་ཨརྷ་ཏེ་ས་མྱཀྶཾ་བུདྡྷཱ་ཡ། ཏདྱ་ཐཱ། བཛྲེ་བཛྲེ། མ་ཧཱ་བཛྲེ། མ་ཧཱ་ཏེ་ཛ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སཾ་ཀྲ་མ་ཎ་བཛྲ་སརྦ་ཀརྨ་ཨཱ་ཝ་ར་ཎ་བི་ཤོ་དྷ་ན་བཛྲེ་སྭཱ་ཧཱ། ཞེས་ལན་གསུམ། ཡང་། དཀོན་མཆོག་གསུམ་གྱི་བདེན་པ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་བྱིན་གྱིས་བརླབས་དང་། ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེ་བཞིན་དུ་གྱུར་ཅིག །ཅེས་ལན་གསུམ་མོ། །དེ་ནས་སྙན་གསན་དབབ་པ་ནི། སྤོས་བཏུལ་ཞིང་མེ་ཏོག་བླངས་ལ་ཐལ་མོ་སྦྱར་ཏེ། སྟོན་པ་བཅོམ་ལྡན་འདས་ཤཱཀྱ་ཐུབ་པ་ལ་སོགས་པ་ཕྱོགས་བཅུ་ན་དུས་གསུམ་དུ་བཞུགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་དང་། དེ་དག་གིས་ལེགས་པར་གསུངས་པ། ལེགས་པར་སྒྲུབས་པ། ལེགས་པར་ཐུགས་སུ་ཆུད་པའི་དམ་པའི་ཆོས་དཀོན་མཆོག་གི་ངོ་བོ་ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་མ་དང་། བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དང་། ཕྱག་ན་རྡོ་རྗེ་དང་། ཤཱ་རིའི་བུ་ལ་སོགས་པ་བྱང་ཆུབ་སེམས་དཔའི་དགེ་འདུན་དང་བཅས་པ་ཐམས་ཅད་དགོངས་སུ་གསོལ། ཐབས་མཁས་ཤིང་ཐུགས་རྗེ་ཆེན་པོ་དང་། མཐུ་དང་བྱིན་གྱིས་བརླབས་པ་བསམ་གྱིས་མི་ཁྱབ་པ་མངའ་ཞིང་། འགྲོ་བའི་དོན་དུ་སྨོན་ལམ་ཁྱད་པར་ཅན་མཛད་པ་ལས་གླེངས་ཏེ། བདག་སོགས་འགྲོ་བ་མང་པོ་བསྐྱབ་པའི་སླད་དུ། དེང་མགོན་སྐྱབས་དང་དཔུང་གཉེན་དུ་སྤྱན་འདྲེན་ཞིང་མཆི་ན། མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་གཤེགས་ཤིང་གདན་འཛོམ་པ་ཆེན་པོ་མཛད་དེ། བྱིན་གྱིས་བརླབ་པར་ཅི་གནང་ཞེས་དང་། ན་མོ། སངས་རྒྱས་ཆོས་དང་དགེ་འདུན་ཏེ། བླ་ན་མེད་པའི་དཀོན་མཆོག་གསུམ། རང་བཞིན་དཀྱིལ་འཁོར་ཆེན་པོ་ནས། གཟུགས་བརྙན་སྤྲུལ་པའི་དཀྱིལ་འཁོར་འདིར། ཐུགས་རྗེའི་དབང་གིས་དགོངས་སུ་གསོལ། ཞེས་པས་སྙན་གསན་དབབ། དེ་ནས་སྤྱན་འདྲེན་པ་ནི། སྤོས་ཐོགས་ཤིང་རོལ་མོ་འཁྲོལ་བ་དང་བཅས་ཏེ། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་འཁོར་དང་བཅས་པ་ཇི་སྙེད་བཞུགས་པ་ཐམས་ཅད། ཆོས་ཀྱི་དབྱིངས་དང་རིགས་ཐམས་ཅད་ན་བཞུགས་པའི་དེ་བཞིན་གཤེགས་པ་སྲས་དང་བཅས་པ་ཐམས་ཅད་མཉེས་པར་བྱ་བ་དང་། བདག་སོགས་སེམས་ཅན་ཐམས་ཅད་ཀྱི་བསོད་ནམས་སྤེལ་བའི་སླད་དུ། དེང་རྒྱལ་བ་སྲས་དང་བཅས་པ་སྤྱན་དྲངས་པའི་གནས་འདིར། མཆོད་པར་འོས་པའི་བདེ་བར་སྦྱར་བ་ཐམས་ཅད་ཀྱིས་བསྟབས་ཤིང་སྤྱན་འདྲེན་གྱིས། མཐུ་བསམ་གྱིས་མི་ཁྱབ་པ་དང་ལྡན་པས་རྣམ་པར་འཕྲུལ་པ་མཛད་དེ། ཆོས་ཀྱི་དབྱིངས་ཀུན་ཏུ་འགྲོ་བའི་ཚུལ་གྱིས་གཤེགས་པར་གསོལ་ལོ། །ཕྱོགས་དུས་ཀུན་ནས་སྐྱབས་གསུམ་བཀའ་སྡོད་བཅས། །ཉོན་མོངས་འགྲོ་ལ་མཁྱེན་བརྩེས་རབ་དགོངས་ཏེ། །དཔག་མེད་ཞིང་ནས་ཐོགས་མེད་རྫུ་འཕྲུལ་གྱིས། །འདིར་གཤེགས་མཆོད་སྤྲིན་རྒྱ་མཚོའི་དབུས་བཞུགས་གསོལ། །མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །ཆོས་ཉིད་དབྱིངས་དང་ཡེ་ཤེས་དབྱེར་མེད་ཀྱང་། །གཞི་དང་ལམ་དང་རྣམ་པ་ཐམས་ཅད་མཁྱེན། །བདག་མེད་སྟོང་པ་དོན་དམ་ཡང་དག་མཐའ། །ཡུམ་ཆེན་ཕ་རོལ་ཕྱིན་མ་གཤེགས་སུ་གསོལ། །ཤར་ཕྱོགས་རིན་ཆེན་བཀོད་པའི་ཞིང་ཁམས་ནས། །བདེ་གཤེགས་དཀོན་མཆོག་འབྱུང་གནས་གཤེགས་སུ་གསོལ། །ལྷོ་ཕྱོགས་མྱ་ངན་མེད་པའི་ཞིང་ཁམས་ནས། །བདེ་གཤེགས་མྱ་ངན་མེད་པ་གཤེགས་སུ་གསོལ། །ནུབ་ཕྱོགས་བདེ་དང་ལྡན་པའི༴ བདེ་གཤེགས་རིན་ཆེན་འོད་འཕྲོ༴ བྱང་ཕྱོགས་རྒྱལ་བ་ཅན་གྱི༴ བདེ་གཤེགས་རྒྱལ་བའི་དབང་པོ༴ ཤར་ལྷོ་སྙིང་པོ་བྱང་ཆུབ༴ པདྨོ་དམ་པའི་དཔལ་མངའ༴ ལྷོ་ནུབ་རྡུལ་ཚོགས་བྲལ་བའི༴ བདེ་གཤེགས་ཉི་མ་སྣང་བ༴ ནུབ་བྱང་དབང་དུ་གྱུར་པའི༴ བདེ་གཤེགས་གདུགས་མཆོག་དམ་པ༴ བྱང་ཤར་ཏིང་འཛིན་བརྒྱན་པའི༴ ཏིང་འཛིན་གླང་པོ་དཔལ་མངའ༴ འོག་ཕྱོགས་པདྨ་ཅན་གྱི་ཞིང་༴ བདེ་གཤེགས་པདྨོའི་དཔལ་ཉིད༴ སྟེང་ཕྱོགས་འཇིག་རྟེན་མདངས་དགའི་ཞིང་ཁམས་ནས། །བདེ་གཤེགས་དགའ་བའི་དཔལ་ཅན་གཤེགས་སུ་གསོལ། །ༀ་ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎི་ཀ་དྲྀ་ཤྱ་ཧོཿ ས་མ་ཡ་སྟྭཾ། ཞེས་སྤྱན་དྲངས་པས། ཕྱོགས་བཅུའི་ཞིང་ཁམས་རྣམས་པར་དག་པ་ནས་སངས་རྒྱས་དང་བྱང་ཆུབ་སེམས་དཔའི་ཚོགས་ཐམས་ཅད་རང་རང་གི་འཁོར་དཔག་ཏུ་མེད་པ་དང་བཅས་ཏེ་སོ་སོའི་འཕྲུལ་གྱི་མཐུས་བྱོན་ནས་རང་རང་གི་གནས་སུ་བཞུགས་པ་ནི། དཀྱིལ་འཁོར་གྱི་དབུས་ཀྱི་གདན་གྱི་སྟེང་དུ་བཅོམ་ལྡན་འདས་དེ་བཞིན་གཤེགས་པ་དཔལ་རྒྱལ་བ་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ། མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་བརྒྱན་པ། ཕྱག་གཡས་ས་གནོན་དང་། གཡོན་མཉམ་བཞག་གི་ཕྱག་རྒྱ་མཛད་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། འདབ་མ་བཞིའི་ཤར་དུ་ཡུམ་ཆེན་མོ་གསེར་མདོག་ཕྱག་དང་པོ་གཉིས་མཉམ་བཞག །འོག་མ་གཉིས་ཆོས་འཆད་དང་གླེགས་བམ་འཛིན་པ། ལྷོར་ཕྱག་ན་རྡོ་རྗེ་སྔོན་པོ་རྡོ་རྗེ་དང་པདྨ། ནུབ་ཏུ་ཤཱ་རིའི་བུ་སེར་སྐྱ་འཁར་བསིལ་དང་ལྷུང་བཟེད། བྱང་དུ་སྤྱན་རས་གཟིགས་དཀར་པོ་པདྨ་དང་པུསྟི། ཤཱ་རིའི་བུ་དགེ་སློང་པུས་བཙུགས་དང་། གཞན་གསུམ་དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་ཅིང་ཡུམ་རྡོར་སྐྱིལ་དང་གཞན་གཉིས་སེམས་སྐྱིལ་གྱིས་བཞུགས་པའོ། །འདབ་མ་བཅུའི་ཤར་སྟོད་དུ་སངས་རྒྱས་དགའ་བའི་དཔལ་སྔོ་སྐྱ་བུམ་པ་དང་གཡོན་དཀུར་བརྟེན། ཤར་དུ་དཀོན་མཆོག་འབྱུང་གནས་དཀར་པོ་མཆོག་སྦྱིན་གྱིས་རིན་པོ་ཆེ། ལྷོར་མྱ་ངན་མེད་པའི་དཔལ་སྔོན་པོ་འཁོར་ལོ། ནུབ་ཏུ་རིན་ཆེན་འོད་འཕྲོ་དཀར་པོ་མཆེ་བ། བྱང་དུ་རྒྱལ་བའི་དབང་པོ་ལྗང་གུ་པདྨ། ཤར་ལྷོར་པདྨོ་དམ་པའི་དཔལ་དཀར་པོ་པདྨ། ལྷོ་ནུབ་ཏུ་ཉི་མ་སྣང་བའི་དཔལ་དམ་པ་དམར་སྨུག་ཉི་མ། ནུབ་བྱང་དུ་གདུགས་ཆེན་དམ་པའི་དཔལ་ལྗང་གུ་སྣ་ཚོགས་རྡོ་རྗེ། བྱང་ཤར་དུ་ཏིང་འཛིན་གླང་པོ་དམ་པའི་དཔལ་སེར་པོ་ཆོས་འཆད་དང་གཡོན་གོས་འཛིན་པ། ནུབ་སྨད་དུ་པདྨོའི་དཔལ་སེར་པོ་པདྨ་དང་གཡོན་ལྟེ་བར་ཐལ་མོ་ཕྱིར་སྟོན་པ། ཕྱག་གཡོན་དམིགས་བསལ་མེད་པ་རྣམས་མཉམ་བཞག་མཛད་ཅིང་ཐམས་ཅད་ཀྱང་མཆོག་གི་སྤྲུལ་སྐུ་ཚངས་པར་སྤྱོད་པའི་ཆ་བྱད་ཅན་རྡོ་རྗེའི་སྐྱིལ་ཀྲུང་གིས་བཞུགས་པ་སྟེ་རྩ་བའི་ལྷའོ། །གཞན་ཡང་མགྲོན་ཐབས་ཀྱི་ལྷ་གཙོ་བོ་དང་ཕྱོགས་བཅུའི་སངས་རྒྱས་རྣམས་ཀྱི་མཐའ་བསྐོར་དུ་པད་འདབ་བརྒྱད་པ་རེ་རེའི་གདན་ལ། གཙོ་བའི་ཕྱོགས་བཞིར་དེ་བཞིན་གཤེགས་པ་བཞི་དང་མཚམས་བཞིར་ཡུམ་བཞི། ཕྱོགས་བཅུའི་དེ་བཞིན་གཤེགས་པ་བཅུའི་ཕྱོགས་བཞིར་བྱང་སེམས་བཞི་བཞི་དང་། མཚམས་བཞིར་ཡུམ་བཞི་བཞི་ལ་སོགས་ཏེ་སངས་རྒྱས་དང་བྱང་ཆུབ་སེམས་དཔའི་ཚོགས་མཐའ་ཡས་པའི་འཁོར་གྱིས་ཡོངས་སུ་བསྐོར་བའོ། །དེ་དག་གི་ཕྱི་རོལ་ཏུ་མཆོད་པའི་ལྷ་མོ་བརྒྱད་གཞན་ཡང་ཕྱོགས་སྐྱོང་བ་བཅུ་ལ་སོགས་ཏེ་དཀར་པོ་ལ་དགའ་བའི་ལྷ་རྣམས་དང་། སྒོ་བཞིར་རྒྱལ་པོ་ཆེན་པོ་བཞི་རྣམས་རང་རང་གི་འཁོར་དང་བཅས་ཏེ་བཞུགས་པར་མོས་ལ། བཅོམ་ལྡན་འཁོར་བཅས་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་འདི་བཞེས་ལ། །མཆོད་པས་བདག་ལ་དགྱེས་པར་མཛོད། །ༀ་སརྦ་ཏ་ཐཱ་ག་ཏ་ག་ག་ན་ས་མ་ཡ་ཤྲཱི་ཡེ་ཧཱུཾ། ཞེས་མཆོད་ཡོན་ཕུལ་ཏེ། མྱ་ངན་མི་འདའ་ཐུགས་རྗེའི་དང་། །ཉོན་མོངས་མི་སྤོང་གོས་པ་མེད། །མ་ཆགས་རང་བཞིན་དག་པས་ན། །མཉམ་ཉིད་ངང་དུ་བཞུགས་སུ་གསོལ། །ཕོ་བྲང་གཞལ་ཡས་དམ་པ་འདིར། །ཐུགས་རྗེས་དགོངས་པའི་ཕྲིན་ལས་རྣམས། །འགྲོ་དོན་རྫོགས་མཛད་དེ་བཞིན་དུ། །ཡུན་རིང་བརྟན་པར་བཞུགས་སུ་གསོལ། །པདྨ་ཨཱ་ས་ན་ཏིཥྛ་ས་མ་ཡ་སྟྭཾ། ཞེས་བཞུགས་སུ་གསོལ་ལ། ཁྲུས་གསོལ་ནི། ཁྱེད་ཀྱི་རང་བཞིན་ཡོངས་དག་པས། །སྲེད་སོགས་འཆིང་བ་མི་མངའ་ཡང་། །བདག་ཅག་སྒྲིབ་པ་སྦྱང་སླད་དུ། །གཙང་མ་ཆབ་ཀྱིས་སྐུ་ཁྲུས་གསོལ། །ༀ་སརྦ་དེ་ཝ་ཏ་ཨརྩི་ཏ་ཨ་མྲྀ་ཏ་སྭཱ་ཧཱ། དེ་བཞིན་གཤེགས་པ་རྣམས་དང་དེ་སྲས་ལ། །རིན་ཆེན་བུམ་པ་མང་པོ་སྤོས་ཀྱི་ཆུས། །ཡིད་འོང་ལེགས་པར་བཀང་བ་གླུ་དང་ནི། །རོལ་མོར་བཅས་པ་དུ་མས་སྐུ་ཁྲུས་གསོལ། །ༀ་སརྦ་དེ་ཝ་ཏ༴ །ཞེས་ཁྲུས་གསོལ་བའི་ཆུ་སླར་ཡང་བུམ་པར་བླུག་གོ། །དེ་དག་སྐུ་ལ་མཚུངས་པ་མེད་པའི་གོས། །གཙང་ལ་དྲི་རབ་བགོས་པས་སྐུ་ཕྱིའོ། །ༀ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནེ་སྭཱ་ཧཱས་སྐུ་ཕྱིས་ལ། དེ་ནས་དེ་ལ་ཁ་དོག་ལེགས་བསྒྱུར་བའི། །ན་བཟའ་ཤིན་ཏུ་དྲི་ཞིམ་དམ་པ་འབུལ། །ༀ་སརྦ་ཏ་ཐཱ་ག་ཏ་བཛྲ་ཝཱ་ས་སེ་པྲ་ཏཱི་ཙྪ་སྭཱ་ཧཱས་གོས་ཟུང་དབུལ་ལོ། །དེ་ནས་ཕྱག་བྱ་བ་ནི། ལུས་ཞིང་གི་རྡུལ་སྙེད་དུ་སྤྲུལ་ནས་གུས་པས་ཕྱག་བྱས་པར་མོས་ཏེ། རྒྱས་པར་ན་ཐར་པ་ཆེན་པོ་དང་རྟོགས་པ་ཆེན་པོའི་མདོ་ལས་འབྱུང་བ་གང་རུང་ངམ། བསྡུ་ན་དཔང་སྐོང་ལྟར་བྱ་བར་གསུངས་པའང་འགྲུབ་དཀའ་བས། འདིར་ཤིན་ཏུ་བསྡུས་པའི་དབང་དུ་བྱས་ཏེ་འདི་སྐད་ཅེས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་བསྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་མཉམ་མེད་ཤཱཀྱ་ཐུབ་པ་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན། དུས་གསུམ་དུ་གཤེགས་ཤིང་བཞུགས་པའི་སངས་རྒྱས་དང་བྱང་ཆུབ་སེམས་དཔའ་འཁོར་དང་བཅས་པ་རབ་འབྱམས་མ་ལུས་པའི་དཀོན་མཆོག་ཐམས་ཅད་ལ་གུས་པས་ཕྱག་འཚལ་ལོ། །རྣམ་དག་སྐུ་མངའ་མཆོག་ཏུ་གཟུགས་བཟང་བ། །ཡེ་ཤེས་རྒྱ་མཚོ་གསེར་གྱི་ལྷུན་པོ་འདྲ། །གྲགས་པ་འཇིག་རྟེན་གསུམ་ན་ལྷང་ངེ་བ། །མགོན་པོ་མཆོག་བརྙེས་ཁྱོད་ལ་ཕྱག་འཚལ་ལོ། །སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །ཞིང་བཅུར་སྐུས་ཁྱབ་ཟབ་ཡངས་གསུང་སྒྲ་ཅན། །ཇི་ལྟ་ཇི་སྙེད་ཐམས་ཅད་མཁྱེན་པའི་ཐུགས། །དུས་ཀུན་རྣམ་བཞི་ཕྲིན་ལས་ལྷུན་གྲུབ་པའི། །ཕྱོགས་བཅུའི་སངས་རྒྱས་རྣམ་ལ་ཕྱག་འཚལ་ལོ། །གདུལ་བྱའི་ཞིང་དུ་འགྲོ་དོན་རྫོགས་མཛད་ཕྱིར། །མི་བསྙེལ་ཐུགས་རྗེས་འཁོར་བའི་མཐའ་ལ་གཟིགས། །ཐབས་མཁས་ཐུགས་རྗེས་འགྲོ་དོན་ལྷུར་མཛད་པ། །བྱང་ཆུབ་སེམས་དཔའི་ཚོགས་ལ་ཕྱག་འཚལ་ལོ། །ཆོས་དབྱིངས་ངང་ལས་མ་གཡོས་ཀྱང་། །བདེ་གཤེགས་སྲས་བཅས་མཆོད་པའི་ཕྱིར། །སྒྱུ་མའི་ཚུལ་དུ་སྐུ་སྤྲུལ་པ། །ལྷ་མོ་བརྒྱད་ལ་ཕྱག་འཚལ་ལོ། །སངས་རྒྱས་བསྟན་པ་བསྲུང་མཛད་ཅིང་། །ལོག་འདྲེན་བགེགས་རྣམས་འདུལ་མཛད་པ། །ཕྱོགས་སྐྱོང་བཅུ་དང་རྒྱལ་ཆེན་བཞི། །འཁོར་དང་བཅས་ལ་ཕྱག་འཚལ་ལོ། །མཁའ་ལྟར་ཁྱབ་པའི་རྒྱལ་བ་སྲས་བཅས་ལ། །བདག་དང་མཁའ་མཉམ་འགྲོ་བ་མ་ལུས་པའི། །ལུས་འདི་ཞིང་རྡུལ་མཉམ་པར་རབ་སྤྲུལ་ནས། །རྟག་ཏུ་གུས་པའི་ཡིད་ཀྱིས་ཕྱག་འཚལ་ལོ། །དེ་ནས་མཆོད་པ་འབུལ་བ་ནི། འཕགས་པའི་ཚོགས་དེ་དག་ཐམས་ཅད་ལ་མཆོད་ཡོན་དང་བྱུག་པ། མེ་ཏོག་དང་བདུག་སྤོས། མར་མེ་དང་ཞལ་ཟས། རོལ་མོ་དང་སིལ་སྙན། གདུགས་དང་བ་དན་ལ་སོགས་པ་དངོས་སུ་ཅི་འབྱོར་བ་འདི་དག་དང་། ཕྱོགས་བཅུ་ན་བདག་པོས་ཡོངས་སུ་མ་བཟུང་བ་ལྷ་དང་མིའི་རྫས་དམ་པ་བདེ་བའི་ཡོ་བྱད་ཕུན་སུམ་ཚོགས་པ་ཐམས་ཅད་དང་། གཟུངས་དང་རིག་པའི་མཐུ་དང་། མོས་པའི་སྟོབས་ཀྱིས་བསྐྱེད་པའི་མཆོད་པའི་སྤྲིན་ཕུང་པོ་གསུམ་པའི་མདོ་དང་བཟང་པོ་སྤྱོད་པའི་སྨོན་ལམ་ལས་བྱུང་བ་རྒྱ་མཚོ་ཐམས་ཅད་ཀྱིས་ནམ་མཁའི་ཁམས་ཀྱི་མཐའ་ཀླས་པ་ཐམས་ཅད་རྒྱས་པར་བཀང་སྟེ་འབུལ་ལོ། །མཆོད་དོ། །བདག་གི་བར་བཞེས་པར་མཛད་དོ་གསོལ། །མཆོད་ཡོན་ཕལ་ཆེན་མཆོད་ཡོན་བླ་རེ་དང་། །མཆོད་ཡོན་བཀོད་པའི་འོད་ཟེར་རབ་བཀྱེ་ཞིང་། །མཆོད་ཡོན་སྣ་ཚོགས་ཀུན་ཏུ་བཀྲམ་བྱས་ནས། །བདག་ཉིད་ཆེན་པོ་དེ་དག་རྒྱལ་བ་མཆོད། །ༀ་སརྦ་ཏ་ཐཱ་ག་ཏ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་བཞིན་དུ་མཆོད་ཡོན་གྱི་གནས་སུ། ཞབས་བསིལ། མེ་ཏོག་སོགས་དང་། ཨརྒྷཾ་གྱི་གནས་སུ། པཱདྱཾ་སོགས་བཅུག་ནས་དབུལ། གཞན་ཡང་། བླ་མེད་དཀོན་མཆོག་གསུམ་པོ་དང་། །དཀྱིལ་འཁོར་ལྷ་ཚོགས་ཐམས་ཅད་ལ། །ཡིད་འོང་མཆོད་སྤྲིན་ཐམས་ཅད་དང་། །རོལ་མོ་སིལ་སྙན་འཕན་གདུགས་དང་། །བླ་རེ་རྒྱལ་མཚན་ལྷབ་ལྷུབ་དང་། །མེ་ཏོག་ཕྲེང་བ་བདུག་པ་དང་། །མར་མེ་དྲི་ཆབ་ཞལ་ཟས་སོགས། །མཆོད་སྤྲིན་སྣ་ཚོགས་ཕྱོགས་བཅུར་འབུལ། །སྣ་ཚོགས་རིག་པའི་བདེན་པ་དང་། །དངོས་འབྱོར་ཡིད་ཀྱིས་སྤྲུལ་པ་ཡི། །སངས་རྒྱས་ཞིང་ཁམས་རབ་འབྱམས་སུ། །བླ་མེད་མཆོད་པའི་སྤྲིན་འབྱུང་ཞིང་། །ཡོན་ཏན་དཔག་མེད་ཐམས་ཅད་ཀྱིས། །ཞབས་ལ་སྤྱི་བོས་གཏུགས་གྱུར་ཅིག །ཅེས་དང་། མཆོད་པའི་སྤྲིན་གྱི་གཟུངས་ཀྱང་བརྗོད་དོ། །དེ་ནས་ཡན་ལག་ཕྱི་མ་ལྔ་ནི། བདག་ཅག་རྣམས་ཀྱིས་ཐོག་མ་མ་མཆིས་པ་ནས་འཁོར་བ་ནས་འཁོར་བའི་ཚེ་རབས་ཐམས་ཅད་དུ་སྡིག་པ་མི་དགེ་བའི་ལས་མདོར་ན་མི་བགྱི་བར་རིགས་པའི་ལས་ནི་བགྱིས། བགྱི་བར་འོས་པའི་ལས་མ་བགྱིས་པ་ལ་སོགས་པ་དངོས་སྡིག་ཅི་མཆིས་པ་ཐམས་ཅད་ཡང་དག་པར་འཆགས་སོ། །དུས་གསུམ་གྱི་འཕགས་པ་དང་སོ་སོ་སྐྱེ་བོའི་དགེ་བའི་རྩ་བ་མཐའ་དག་གི་བསོད་ནམས་ཐམས་ཅད་ལ་རྗེས་སུ་ཡི་རང་ངོ་། །ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་ལ་ཆོས་ཀྱི་འཁོར་ལོ་བླ་ན་མེད་པ་བསྐོར་བར་བསྐུལ་ལོ། །འཇིག་རྟེན་གྱི་སྒྲོན་མ་གང་དག་མྱ་ངན་ལས་འདའ་བའི་ཚུལ་སྟོན་པར་བཞེད་པ་དེ་དག་ཐམས་ཅད་ལ་མྱ་ངན་ལས་མི་འདའ་བར་འཇིག་རྟེ་གྱི་དོན་མཛད་ཅིང་ཡུན་རིང་དུ་བཞུགས་པར་གསོལ་བར་འཚལ་ལོ། །དེ་ལྟར་བགྱིས་པའི་བསོད་ནམས་ཀྱི་ཕུང་པོ་ཅི་མཆིས་པ་ཐམས་ཅད་བདག་གཞན་མ་ལུས་པ་བླ་ན་མེད་པའི་བྱང་ཆུབ་མངོན་དུ་བྱེད་པའི་རྒྱུར་བསྔོའོ། །ཕྱོགས་བཅུ་དུས་གསུམ་བཞུགས་པ་ཡི། །རྒྱལ་བ་སྲས་དང་བཅས་རྣམས་ལ། །ཕྱག་འཚལ་མཆོད་ཅིང་བཤགས་པ་དང་། །ཡི་རང་བསྐུལ་ཞིང་གསོལ་བ་དང་། །གཞན་ཡང་དགེ་བ་ཅི་བསགས་པ། །དེས་ནི་སེམས་ཅན་ཐམས་ཅད་དང་། །འཕགས་པ་སྐྱེ་བོའི་ཚོགས་ཀུན་གྱིས། །ཡེ་ཤེས་ས་ཡི་ལམ་གྱི་མཆོག །འཇུག་དང་གནས་དང་འཕར་བ་དང་། །སྤྱོད་པ་ཉིད་ཀྱི་ཡུལ་རྣམས་ནི། །གོ་རིམ་བཞིན་དུ་རབ་རྟོགས་ཏེ། །སྐུ་གསུམ་མཁྱེན་བཞིའི་ཚོགས་རྫོགས་ཤིང་། །བླ་མེད་སངས་རྒྱས་འགྲུབ་པར་ཤོག །དེ་ནས་གསོལ་བ་གདབ་པ་ནི། བཅོམ་ལྡན་འདས་དེ་བཞིན་གཤེགས་པ་སྲས་དང་བཅས་པ་ཐམས་ཅད་དགོངས་སུ་གསོལ། ཁྱེད་རྣམས་ལ་ཐུགས་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས། སྐྱོབ་པའི་ནུས་མཐུ་བསམ་གྱིས་མི་ཁྱབ་པ་མངའ་བ་ལགས་པས། སྤྱིར་སངས་རྒྱས་ཀྱི་བསྟན་པ་དར་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་རྣམས་སྐུ་ཚེ་བརྟན་ཞིང་ཐུགས་ཀྱི་བཞེད་པའི་དོན་ལྷུན་གྱིས་གྲུབ་པ་དང་། དགེ་འདུན་རྣམས་ཀྱི་ཆོས་སྤྱོད་བཅུའི་སྒྲུབ་པ་ཐམས་ཅད་གོང་ནས་གོང་དུ་འཕེལ་ཞིང་རྒྱས་པ་དང་། དེ་དག་གི་མཐུ་དང་ནུས་པ་ལ་བརྟེན་ནས། སེམས་ཅན་ལ་བདེ་སྐྱིད་ཕུན་སུམ་ཚོགས་པ་འབྱུང་ཞིང་། ཁྱད་པར་བདག་དང་བདག་གི་སློབ་པ་འདི་དག་གིས་གཙོ་བྱས་སེམས་ཅན་ཐམས་ཅད་སྒྲིབ་གཉིས་བྱང་། ཚོགས་གཉིས་རྫོགས་ནས། མྱུར་དུ་མངོན་པར་རྫོགས་པ་འཚང་རྒྱ་བར་བྱིན་གྱིས་བརླབ་ཏུ་གསོལ། དེ་ནས་ཐུགས་དམ་བསྐུལ་བའི་ཆེད་དུ་གཟུངས་བཟླ་ཞིང་མདོ་བཀླག་པ་ནི། དཀོན་མཆོག་གསུམ་གྱི་བདེན་པ་དང་། དེ་བཞིན་གཤེགས་པ་སྲས་དང་བཅས་པ་ཐམས་ཅད་ཀྱིས་མཐུ་དང་བྱིན་གྱིས་བརླབས་དང་། ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་དང་། འཕགས་པ་སྐུ་གསུང་ཐུགས་ཀྱི་སྤྱོད་པ་མ་དག་པ་མི་མངའ་བ་རྣམས་ཀྱི་ཐུགས་ངེས་པའི་བདེན་པས། མཆོད་པའི་ཚོགས་སྦྱར་བའི་ཕོ་བྲང་གི་དཀྱིལ་འཁོར་འདིར་སྟོན་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་སོགས་པ་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་སྲས་དང་བཅས་པ་ཐམས་ཅད་གདན་འཛོམ་པ་ཆེན་པོ་མཛད་དེ། མཆོང་པ་བཞེས་ཤིང་། གཟུངས་སྔགས་བཟླས་པ་ཚུལ་བཞིན་དུ་འགྲུབ་པར་བྱིན་གྱིས་རློབ་པར་མཛད་དེ། བདག་སོགས་འགྲོ་བ་མང་པོའི་དོན་དཔག་ཏུ་མེད་པ་མཛད་པར་གྱུར་ཅིག །དཀྱིལ་འཁོར་གྱི་ལྷ་ཚོགས་ཐམས་ཅད་ཀྱི་སྐུ་ལས་འོད་ཟེར་འཕྲོས་པས་འཇིག་རྟེན་གྱི་ཁམས་ཐམས་ཅད་ཁྱབ། དེས་འཕགས་པ་ཐམས་ཅད་སེམས་ཅན་གྱི་དོན་ལ་བསྐུལ་ཞིང་། ངན་སོང་གི་གནས་ཐམས་ཅད་སྦྱངས་ཏེ། སེམས་ཅན་ཐམས་ཅད་མཐོ་རིས་དང་ཐར་པའི་གོ་འཕང་ལ་འཇུག་པར་གྱུར་ཅིག །འོད་ཟེར་དེས་བདག་ཅག་རྣམས་ལ་ཁྱབ་པས་འགྲོ་དོན་དཔག་མེད་སྒྲུབ་ནུས་པའི་མཐུ་ཐོབ་སྟེ། དེ་བཞིན་གཤེགས་པ་རྣམས་དང་སྐུ་གསུང་ཐུགས་མཚུངས་པར་གྱུར་ཅིག །ཡང་འོད་ཟེར་དེ་དག་གཅིག་ཏུ་འདུས་པ་བུམ་པའི་གཟུངས་ཆབ་ལ་ཁྱབ་སྟེ་རེག་པ་ཙམ་གྱིས་མི་མཐུན་པའི་ཕྱོགས་ཞི་བར་བྱེད་པ། དཔལ་དང་བདེ་ལེགས་བསྐྱེད་པར་བྱེད་པའི་བདུན་རྩིའི་དག་བྱེད་དུ་གྱུར་ཅིག །བདག་ཅག་ལ་སོགས་པ་བསྒྲུབ་བྱའི་ལུས་དང་འཁོད་དང་ཡོ་བྱད་ཐམས་ཅད་ལ་ཁྱབ་སྟེ། ནད་དང་གནོད་པ་ཐམས་ཅད་ནི་བསལ། ལུས་སེམས་ཀྱི་སྐྱོན་ཐམས་ཅད་དང་ནི་བྲལ་ཏེ། ཆོས་ཀྱི་སྣོད་རུང་དུ་གྱུར་ཅིག །བདག་ཅག་རྣམས་ཀྱིས་འཕགས་པ་རྣམས་མངོན་སུམ་པ་ལྟ་བུར་དམིགས་ནས་གཟུངས་བཟླས་པས། དེ་བཞིན་གཤེགས་པ་སྲས་དང་བཅས་པ་རྣམས་ཀྱི་ཏིང་ངེ་འཛིན་གྱི་སྒོ་སྣ་ཚོགས་དང་ཚིག་འབྲུ་མཐའ་ཡས་པ་རྟོགས་ཤིང་རྣམ་པར་དག་པར་བྱིན་གྱིས་རློབ་པར་གྱུར་ཅིག །ཅེས་བདེན་ཚིག་གིས་བསྔོས་ནས། འཕགས་པ་རྣམས་ཀྱིས་གནང་ཞིང་ཕྲིན་ལས་མཛད་པར་ངེས་ཤེས་བསྐྱེད་དེ། ཇི་ལྟར་བསྔོས་པ་བཞིན་མངོན་དུ་གྱུར་པར་དམིགས་ནས། སྤྱིར། ༀ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། ཞེས་དང་། ཏདྱ་ཐཱ། ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བོ་དྷི་སྭཱ་ཧཱ། ཞེས་པ་གཉིས་ཅི་ནུས་བཟླ་ཞིང་། བྱེ་བྲག་ཏུ་སོ་སོའི་སྙིང་པོ་བཟླ་ན། གཙོ་བོ་དང་ཕྱོགས་བཅུའི་སངས་རྒྱས་ལ་མུ་ནེ། ཡུམ་ཆེན་མོར། ༀ་དྷི་པྲ་ཛྙཱ་མ་ཧཱ་པྲ་ཛྙཱ་དྷརྨ་དྷཱ་ཏུ་སྭཱ་ཧཱ། ཕྱག་རྡོར་ལ། ༀ་བཛྲ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། ཤཱ་རིའི་བུར། ༀ་ན་མཿ་ས་མནྟ་བུདྡྷཱ་ནཾ་བྷ་ག་ཝཱན་པྲ་བྷ་ཏ་ཐཱ་ག་ཏ་ཡ་ཨ་བ་ལོ་ཀི་ཏེ་ཀཱ་རུ་ཎ་ས་མ་ཡེ་སྭཱ་ཧཱ། སྤྱན་རས་གཟིགས་ལ། ༀ་ཨརྻ་ཨ་ཝ་ལོ་ཀི་ཏེ་ཤྭ་ར་མ་ཧཱ་ཀཱ་རུ་ཎི་ཀ་ན་མ་ཡེ་སྭཱ་ཧཱ། ཞེས་པ་རྣམས་ཀྱང་ཅུང་ཟད་རེ་བཟླ། ཁྱད་པར་གཟུངས་བུམ་ལ་དམིགས་ཏེ་མུ་ནེ་དང་ག་ཏེ་བཟླས་པས། དཀྱིལ་འཁོར་གྱི་ལྷ་ཚོགས་རྣམས་ཀྱི་ཐུགས་དམ་བསྐུལ་ཏེ་སྐུའི་ཆ་ཐམས་ཅད་ནས་བྱུང་བའི་འོད་ཟེར་བུམ་ཆུ་ལ་ཁྱབ་པས་བྱིན་གྱིས་བརླབ་པར་བསམ་མོ། །དེ་ནས་ཤེས་རབ་སྙིང་པོ་ལྟ་བུ་མདོ་ཟབ་མོའི་གླེགས་བམ་བཀླག་ཅིང་། སྤྲོ་ཞིང་ནུས་ན་ཐར་པ་ཆེན་པོ་དང་རྟོགས་ཆེན་དང་དཔང་སྐོང་རྣམས་ཀྱང་ཐམས་ཅད་དམ་ཅི་རིགས་པ་རང་ངམ་གཞན་གྱིས་ཀྱང་རུང་སྟེ་ཅི་འགྲུབ་བཀླག་གོ། །དེ་ནས་གཏོར་མ་བཏང་ཞིང་དབང་བསྐུར་པ་ནི། འདས་གཏོར་དང་ཆ་གསུམ་གཏོར་མ་སྔར་བཞིན་དང་། དབང་ཆོག་ལྟར་བྱང་སེམས་ཀྱི་ཐེག་པའི་དབང་བསྐུར་རོ། །དེ་ནས་རྗེས་ཆོག་ནི། ཇི་ལྟར་འཇམ་དབྱངས་ལ་སོགས་པས། རྒྱལ་བ་རྣམས་ལ་མཆོད་མཛད་པ། །དེ་བཞིན་བདག་གིས་དེ་བཞིན་གཤེགས། །མགོན་པོ་སྲས་དང་བཅས་རྣམས་མཆོད། །ༀ་སརྦ་ཏ་ཐཱ་ག་ཏ་ས་པ་རི་ཝཱ་ར་ཨརྒྷཾ་ནས། ཤཔྡ་པྲ་ཏཱི་ཙྪ་པཱུ་ཛ་མེ་གྷ་སོགས་ཀྱིས་མཆོད། དུས་གསུམ་གཤེགས་པའི་སངས་རྒྱས་ཀུན། །ཆོས་དང་ཚོགས་ཀྱི་མཆོག་བཅས་ལ། །ཞིང་རྡུལ་ཀུན་གྱི་གྲང་སྙེད་ཀྱི། །ལུས་བཏུད་པ་ཡིས་བདག་ཕྱག་འཚལ། །ཞེས་བསྟོད་ནས། མ་རྙེད་ཡོངས་སུ་སོགས་ཀྱིས་ནོངས་པ་བཤགས། རྟེན་ཡོད་ན། འདིར་ནི་གཟུགས་དང་སོགས་ཀྱིས་བརྟན་བཞུགས་བྱ། མེད་ན། ༀ། ཁྱེད་ཀྱིས་སེམས་ཅན་སོགས ཀྱིས་གཤེགས་སུ་གསོལ། དེ་ནས་བསྔོ་སྨོན་ནི། འཇམ་དཔལ་དཔའ་བོས་སོགས་ཤློ་ཀ་གཉིས་དང་། དགེ་བ་འདི་ཡིས་སྐྱེ་བོ་ཀུན། །སོགས་དང་། འགྲོ་བའི་སྡུག་བསྔལ་སྨན་གཅིག་པུ། །སོགས་དང་། འབྱུང་པོ་གང་དག་སོགས་དང་། སངས་རྒྱས་སྐུ་གསུམ་བརྙེས་པའི་སོགས་བརྗོད་དོ། །དེ་ནས་བཀྲ་ཤིས་ནི། དམ་པ་ཏོག་དཀར་དགའ་ལྡན་ཕོ་བྲང་དམ་པ་རུ། །མི་ཕམ་མགོན་ལ་རྒྱལ་ཚབ་དམ་པར་དབང་བསྐུར་ཞིང་། །འཛམ་གླིང་ཉིད་དུ་གླང་ཆེན་ཐལ་ཀ་ལྟར་གཤེགས་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །རྒྱལ་པོའི་ཁབ་ཀྱི་གྲོང་ཁྱེར་དམ་པར་ཟས་གཙང་སྲས། །བུད་མེད་མཆོག་གྱུར་གཡོ་སྒྱུ་སྤངས་པ་ལྷ་མཛེས་ཡུམ། །ལྷུམས་སུ་ཟླ་བཅུར་བཞུགས་ནས་འབྱོར་ལྡན་ཤཱཀྱའི་རིགས། །བཀྲ་ཤིས་དམ་པ་དེས་ཀྱང་༴ ལུམྦིའི་ཚལ་རབ་ཉམས་དགར་བླཀྴའི་ལྗོན་པ་ཡི། །ཡལ་ག་ནས་བཟུང་བལྟམས་ཚེ་ཚངས་དང་དབང་པོས་བཏུད། །མཁའ་ལ་གཤེགས་ཏེ་ཕྱུར་པོར་པདྨ་བྱུང་གྱུར་གང་། །བཀྲ་ཤིས་དམ་པ་དེས་ཀྱང་༴ ཕོ་བྲང་གཞལ་ཡས་ཁང་མཛེས་དྲང་སྲོང་མདུན་བཞག་ནས། །མཚན་བལྟས་ཤིས་པ་བརྗོད་དེ་སྟོན་པ་འབྱུང་འགྱུར་ཞེས། །ཤཱཀ་རིགས་བུད་མེད་འཁོར་གྱིས་བསྐོར་ཞིང་རབ་ཏུ་བརྒྱན། །བཀྲ་ཤིས་དམ་པ་དེས་ཀྱང་༴ གཞོན་ནུ་སྟོབས་ལྡན་རྒྱུ་རྩལ་ཡིག་འཕོངས་ཕུལ་དུ་ཕྱིན། །ཀུན་ལས་མཆོག་གྱུར་ལྷ་མིའི་འགྲན་ཟླ་རྣམས་ལས་རྒྱལ། །ཤཱཀ་རིགས་འཇིག་རྟེན་གསལ་ཕྱིར་བཙུན་མོའི་འཁོར་ལ་རོལ། །བཀྲ་ཤིས་དམ་པ་དེས༴ ཕོ་བྲང་ནས་བྱུང་ཕྱོགས་བཞིར་སྐྱེ་རྒ་ན་འཆི་གཟིགས། །མི་རྣམས་རྨོངས་མཛད་ལྷ་ཡིས་བཏེག་སྟེ་མཁའ་ལ་གཤེགས། །སྲིད་གསུམ་དག་ལས་རྒྱལ་ཕྱིར་མཐོན་མཐིང་དབུ་སྐྲ་བྲེགས། །བཀྲ་ཤིས་དམ་པ་དེས་ཀྱང་༴ ལྷ་ཡི་རྫུ་འཕྲུལ་གྱིས་བླངས་ན་བཟའ་ངུར་སྨྲིག་ཕུལ། །ནཻ་རཉྫ་ནར་ཐུབ་པའི་དཀའ་ཐུབ་ལོ་དྲུག་རྫོགས། །བསམ་གཏན་ལས་བཞེངས་ལེགས་སྐྱེས་མས་ཕུལ་འོ་ཐུག་བཞེས། །བཀྲ་ཤིས་དམ་པ༴ པདྨ་ལ་སོགས་ཁྱུ་མཆོག་བྱང་ཆུབ་ཤིང་དྲུང་དུ། །སྐྱིལ་མོ་ཀྲུང་བཅས་མི་གཡོ་མཆོག་གིས་བདུད་བཏུལ་ནས། །ཐོ་རེངས་བདུད་རྩི་འཆི་མེད་ཕུན་སུམ་ཚོགས་པ་བརྙེས། །བཀྲ་ཤིས་དམ་པ༴ ཝཱ་རཱ་ན་སཱིར་ཐོག་མར་ཆོས་ཀྱི་འཁོར་ལོ་བསྐོར། །ཀུན་ཤེས་ལ་སོགས་ལྔ་སྡེ་བཟང་ལ་བདེན་བཞི་བསྟན། །ལྷ་དང་མི་དང་ལྷ་མིན་རྣམས་ཀྱང་འདུས་གྱུར་པ། །བཀྲ་ཤིས་དམ་པ༴ ང་རྒྱལ་དྲེགས་པའི་མུ་སྟེགས་སྟོན་པ་དྲུག་བཏུལ་ནས། །གླང་ཆེན་རབ་མྱོས་རྦད་པའི་མ་རུངས་ལྷ་བྱིན་བཏུལ། །དྲང་སྲོང་མཆོག་དང་སྤྲེལ་རྒྱལ་ཅང་ཤེས་སྦྲང་རྩིས་མཆོད། །བཀྲ་ཤིས་དམ་པ་དེས༴ པདྨ་ལྟ་བུར་སྐྱོན་གྱིས་མ་གོས་ཤཱཀྱའི་རིགས། །ཟས་གཙང་སྲས་པོ་རྒྱལ་རིགས་མཆོག་གྱུར་འཁོར་ལོས་སྒྱུར། །བལྟམས་པ་ནས་བཟུང་དེ་ཡིས་མཛད་པ་མ་ལུས་རྫོགས། །བཀྲ་ཤིས་དམ་པ༴ བྱམས་པའི་སྟོབས་ཀྱིས་འགྲོ་བ་མ་ལུས་རབ་ཏུ་བསྒྲལ། །སེམས་ཅན་ཐམས་ཅད་སྨིན་གྲོལ་ཞི་བའི་ལམ་ལ་བཀོད། །རྩྭ་མཆོག་གྲོང་དུ་མཛད་པ་མཐར་ཕྱིན་དགོངས་པ་རྫོགས། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ཅེས་བརྗོད་ཅིང་རོལ་མོའི་སྒྲ་དང་བཅས་པས་མེ་ཏོག་གི་སིལ་མ་ཕྱོགས་ཀུན་ཏུ་འཐོར་བར་བྱའོ། །འདིར་ལྷ་མི་ནས་བྱང་སེམས་ཀྱི་བར་གྱིས་དཀྱིལ་འཁོར་བཞིའི་ཆོག་གཞུང་ལའང་། ཁ་ཅིག་བདག་བསྐྱེད་དང་མདུན་བསྐྱེད་ལ་སོགས་པའི་རྣམ་བཞག་སྦྱོར་བར་མཛད་ནའང་རིགས་པར་མ་མཐོང་སྟེ། ལྷ་རྗེ་འགར་གྱི་ལས་ཐོར་། ནུབ་གཉིས་པ་ལ་མདོ་མཆོད་དང་བརྒྱད་མཆོད་བྱ། མཎྜལ་ཟླུམ་པོ་རུ་ལྷ་མི་ནས་ཉན་རང་བྱང་སེམས་ཀྱི་བར་གྱི་དབང་རྫོགས་པར་བསྐུར། ཞེས་གསུངས་པ་ལྟར། གླན་གྱི་ཡིག་རྙིང་ཐོ་ཡིག་རྣམས་སུའང་། རྟོགས་པ་ཆེན་པོའི་ཆོ་ག་དཔང་སྐོང་གི་མདོ་མཆོད་དང་། སྨན་བླའི་བརྒྱད་མཆོད། ཡི་གེ་ཁ་ཅིག་ལས་ཉན་ཐོས་ཀྱི་སྐབས་གནས་བརྟན་གྱི་ཆོ་ག་སྟེ། ཆོ་ག་གཞུང་གི་ཁོག་དེ་དག་གིས་དབུབ་པར་བཤད་པ་ལྟར། དེ་རྣམས་སུ་བདག་མདུན་གྱི་བསྐྱེད་ཆོག་སོགས་ཀྱི་ཐ་སྙད་ཡི་གེ་ཁུངས་མ་གང་ནས་ཀྱང་མི་འབྱུང་བས། དེས་ན་འདིར་བཀོད་པ་ཉིད་གནད་དང་འབྱོར་བར་མཐོང་ནས་བྲོས་སོ། །ཡང་དཀྱིལ་འཁོར་གྱི་གྲངས་ལ། སྒྲོལ་མ་བ་ཡབ་སྲས་ཡན་ཆད་གླན་ལུགས་ཀྱི་བླ་མ་རྣམས། ལྷ་མོ་དང་། ཉན་ཐོས་དང་། རང་རྒྱལ་དང་། བྱང་སེམས་རྣམས་ཀྱི་དཀྱིལ་འཁོར་ལ། གཙོ་བོའི་ཁྱད་པར་ཐམས་ཅད་ཐུབ་དབང་གིས་མཛད་པ་དང་། ལྷ་མི་ལ་རྣམ་སྣང་དང་བྱང་སེམས་ལ་ཡུམ་ཆེན་མོས་བརྗེ་བ་འདམ་ཁར་མཛད་པའང་སྣང་བ་ལས་གཞན་དུ་དཀྱིལ་འཁོར་གྱི་གྲངས་རེ་རེ་ལས་མི་མཛད་པར། གླན་ཆེན་པོ་རྡོ་རྗེ་འོད་ཀྱི་ཆོས་སྲས་འགོས་ཀྱི་ལས་ཐོ་དང་། གླན་བསོད་མགོན་གྱི་ལས་ཁྲིགས། །གཞན་ཡང་འཛམ་གླིང་པཎྜི་ཏའི་སྒྲུབ་ཐབས་སྣ་བདུན་རིན་པོ་ཆེའི་མཚན་ཅན་རྣམས་ཀྱིས་ཤེས་ནུས་ཤིང་། དེ་བས་ན་ཟུར་ཧམ་ཕྱིན་ཆད་ནས་དར་བའི་དཀྱིལ་འཁོར་གྱི་དབྱེ་བ། ལྷ་མི་ལ་བཅུ་གཅིག་གམ་ལྔ། ཉན་ཐོས་ལ་ལྔ། རང་རྒྱལ་ལ་བཞིའམ་གཉིས། བྱང་སེམས་ལ་བཅུའམ་ལྔར་ཕྱེ་བ་སོགས་ནི་སྤྲོས་འདོད་ཙམ་དུ་ཟད་མོད། འོན་ཀྱང་ལས་ཐོ་རྩ་བར། སཱཙྪ་དཔང་སྐོང་དཀྱིལ་འཁོར་མཆོད། ཅེས་པ་ཙམ་ལས་ཀྲྀ་ཡོག་ཡན་ཆད་ལྟ་བུའི་དཀྱིལ་འཁོར་གྱི་ལྷ་གྲངས་སོགས་མ་གསུངས་པར་མ་ཟད། བྱང་སེམས་མན་གྱི་དཀྱིལ་འཁོར་འདི་དག་ཚོགས་གསོག་གི་རྟེན་དུ་བཤམས་པ་ཙམ་ཡིན་པས་ན། ཆེས་ཆེ་བའི་འགལ་བ་ནི་མ་མཐོང་ངོ་། །ཡང་བྱང་སེམས་ཀྱི་དཀྱིལ་འཁོར་ལ་གླན་བསོད་མགོན་གྱིས་དབུས་སུ་ཐུབ་དབང་། འདབ་བཞིར་ཡུམ་ཆེན་མོ་སོགས་བཞི་བཀོད་ནས། ཕྱོགས་བཅུའི་སངས་རྒྱས་ལྷ་སྣམ་ལ་འགོད་པར་མཛད་ནའང་། འདིར་ནི་གླན་རྡོར་འོད་ཀྱི་ལུགས་འགོས་ཀྱི་ལས་ཐོ་ལྟར་པད་འདབ་བཅུ་ལ་བཀོད་པ་ཡིན་ནོ། །ངག་བརྗོད་ལས་འདས་དབྱིངས་ཟབ་མོར། །དབང་བསྒྱུར་ཡེ་ཤེས་རྟོགས་པའི་ཐབས། །བྱང་སེམས་ཐེག་པའི་ཆོས་ཀྱི་དཔལ། །མི་ནུས་ཡི་གེའི་སྣང་བ་ཤར། །བྱང་སེམས་ཐེག་པའི་སྒྲུབ་ཐབས་ཀྱི་ལེ་ཚན་ནོ།། །།

༈ ༀ་སྭ་སྟི། མི་འགྱུར་ཐུགས་རྗེའི་དཔལ་མངའ་ཞིང་། །ཐོགས་མེད་མཁྱེན་པས་འགྲོ་སྒྲོལ་གྱི། །ནུས་གཟུགས་རིགས་གསུམ་རྡོ་རྗེ་འཛིན། །དེར་བཏུད་ཀྲི་ཡའི་སྒྲུབ་ཐབས་བཤད། །དེ་ལྟར་འཇིག་རྟེན་ལྷ་མི་དང་འདས་པ་ལས་ཀུན་འབྱུང་འདྲེན་པའི་ཐེག་པ་གསུམ་སྟེ་བཞི་སོང་ནས། ཇི་སྐད་དུ། དཀའ་ཐུབ་རིག་བྱེད་ཐེག་པ་ནི། འདི་ཡང་ཡུལ་གྱི་གསུམ་ཉིད་དེ། ཞེས་པས་འདིར་དཀའ་ཐུབ་རིག་བྱེད་ལ། ཀྲི་ཡ་དང་ཨུ་པ་ཡ་གཉིས་ཐ་དད་དུ་ཕྱེ་སྟེ་དཀྱིལ་འཁོར་གསུམ་དགོས་ཞེས་འགའ་ཞིག་གསུངས་ནའང་། སློབ་དཔོན་བདེ་བ་གསལ་མཛད་ཀྱི་ལས་ཐོར་ཀྲི་ཡོག་གཉིས་སུ་བསྡུས་ཤིང་། མཁས་པ་གླན་སོགས་བླ་མ་གོང་མ་རྣམས་ཀྱང་དེ་ལྟར་བཞེད་པ་ཉིད་ལུགས་འདི་ལ་ཚད་མ་ཡིན་ནོ། །དེས་ན་ཀྲི་ཡོག་གཉིས་ལས། དང་པོ་ཡན་ལག་གི་དཀྱིལ་འཁོར་ལྔ་པ་ཀྲི་ཡ་ལ། ཐོག་མར་སྟ་གོ ན་ནི། སློབ་དཔོན་བདག་ཉིད་གཙང་སྦྲ་དང་ལྡན་པས་བདག་བསྐྱེད་ཀྱི་ཆོ་ག་བཟླས་པའི་བར་འོག་ནས་འབྱུང་བ་ལྟར་བླངས་རྗེས། མདུན་དུ་སྤྱན་དྲངས་པའི་ལྷ་ལ་གཏང་རག་དང་བཟོད་བསོལ་བྱས་ནས་གཤེགས་སུ་གསོལ། དེ་ནས་རང་ལྷའི་ང་རྒྱལ་ལ་གནས་པས་དཀྱིལ་འཁོར་གྱི་གཞི་བྱི་དོར་བྱ་ཞིང་བ་བྱུར་གིས་བྱུགས་ཏེ། སྐྱ་ཐིག་བཏབ་ནས་ལྷ་གནས་རྣམས་སུ་དྲིའི་ཐིག་ལེ་གཙོ་བོ་རིགས་གསུམ་ལ་གྲུ་བཞི་དང་འཁོར་རྣམས་ལ་ཟླུམ་པོ་རེ་བྱས་པའི་སྟེང་དུ་མེ་ཏོག་གི་ཚོམ་བུ་བཀོད་དེ། ཝཱ་གཱི་ཤྭ་ར་དང་། མ་ཎི་དང་། བཛྲ་པཱ་ཎི་དང་། ༀ་སྭ་བྷཱ་ཝ་སོགས་སྔགས་རྣམས་ལན་བདུན་རེ་བཟླས་ལ། ལྷ་རྣམས་གསལ་གདབ་པ་ནས་བསྟོད་པའི་བར་སྤྲོ་ན་འོག་གི་མདུན་བསྐྱེད་སོར་བཞག་བྱ་ཞིང་། དེ་ཙམ་ལོང་སྐབས་ཀྱིས་མ་ཁོམ་ན། དབུས་ཀྱི་སྟན་ལ་འཇམ་དཔལ་དབྱངས། དེའི་གཡས་ལོགས་སུ་སྤྱན་རས་གཟིགས། གཡོན་དུ་ཕྱག་ན་རྡོ་རྗེ། མཐའ་བསྐོར་དུ་སྦྱང་སྤེལ་བསྒྱུར་ཐོབ་ཚིམ་པ་དབང་དུ་བྱེད་པའི་ལྷ་དྲུག་དང་། སྒེག་སོགས་ལྷ་མོ་བཅུ་གཉིས་རྣམས་གསལ་བར་གྱུར། ཞེས་པའི་རྗེས་སུ། འོག་ནས་འབྱུང་བ་ལྟར་ཡེ་ཤེས་པ་དགུག་ཅིང་བསྟིམ་ནས། དྲི་སོགས་མཆོད་པ་ལྔ་སྔགས་རྒྱ་ཙམ་གྱིས་མཆོད་ཅིང་བསྟོད་པ་བྱ། གང་ལྟར་ཡང་དེ་རྗེས་དཀྱིལ་འཁོར་པ་དང་སངས་རྒྱས་ཀུན་ལ་དམིགས་ནས་གསོལ་བ་གདབ་པ་ནི། སྤོས་འཐུལ་ཞིང་དྲིལ་བུ་འཁྲོལ་བས། རིགས་གསུམ་མགོན་པོ་བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་ལོ། །སློབ་མ་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །མགོན་པོ་ཐུགས་རྗེའི་བདག་ཉིད་ཅན། །སར་ནི་དཀྱིལ་འཁོར་བྲི་བར་བྱ། །དེ་ཕྱིར་བཅོམ་ལྡན་བདག་གུས་ལ། །བཀའ་དྲིན་གནང་བར་མཛད་པར་རིགས། །སངས་རྒྱས་འཇིག་རྟེན་མགོན་བརྩེ་དང་། །བྱང་ཆུབ་སེམས་དཔའ་འབྲས་གནས་དང་། གཞན་ཡང་གང་དག་གསང་སྔགས་ལྷ། །འཇིག་རྟེན་སྐྱོང་བའི་ལྷ་རྣམས་དང་། །གང་ཡང་འབྱུང་པོ་མཐུ་ཆེན་དང་། སེམས་ཅན་བསྟན་ལ་མངོན་དགའ་བ། །གང་སུ་ལྷ་ཡི་སྤྱན་མངའ་རྣམས། །བདག་ལ་དགོངས་པར་མཛད་དུ་གསོལ། །བདག་མིང་འདི་ཞེས་བགྱི་བ་ཡིས། །རིགས་གསུམ་ཞེས་བྱའི་དཀྱིལ་འཁོར་ནི། །ཇི་ལྟར་ནུས་པར་ཉེར་སྦྱོར་བས། །འགྲོ་བ་སྦྱར་ཕྱིར་བྲི་བར་བྱ། །དེ་ཕྱིར་བདག་དང་སློབ་མ་ལ། རྗེས་སུ་བརྩེ་བས་ཉེར་དགོངས་ཏེ། །དཀྱིལ་འཁོར་དང་བཅས་ཐམས་ཅད་ནི། །ཉེ་བར་གནས་པར་མཛད་པའི་རིགས། །ཞེས་ལན་གསུམ་བརྗོད་ཅིང་སླར་ཡང་བསྟོད་ནས། མ་རྙེད་ཡོངས་སུ་སོགས་ཀྱི་མཐར་ཡིག་བརྒྱ་བརྗོད་ལ། ༀ་མུཿཞེས་སྤྱན་དྲངས་པའི་ལྷ་གཤེགས་སུ་གསོལ། སྔགས་ཀྱི་སྤྲུལ་པའི་ལྷ་དམ་ཚིག་པ་རྣམས་བདག་ལ་ཐིམ་པར་བསམ་མོ། །སློབ་མ་སྟ་གོན་ནི། ཁྲུས་བྱས་གྲལ་དུ་འཁོད། །མཎྜལ་ཕུལ་ལ། གསོལ་གདབ་ནི། རིགས་གསུམ་གཙོ་བོ་ཁྱོད་ལ་འདུད། །ཐར་པ་ཆེན་པོ་བདག་འདོད་དེ། །དེ་ཉིད་དབང་དང་དམ་ཚིག་དང་། །མགོན་པོ་དཔའ་བོར་སྐྱབས་སོང་ཞིང་། །ཐེག་ཆེན་ཁང་པར་གཞུགས་པ་དང་། །མཁྱེན་རབ་ཡེ་ཤེས་བདག་ལ་སྩོལ། །ཞེས་ལན་གསུམ། དེ་ནས་སྐྱབས་སེམས་ཀྱི་སྡོམ་པ་འབོགས་ཏེ། སློབ་དཔོན་གྱི་རྗེས་སུ་ཟློས་པས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། །སློབ་དཔོན་བདག་ལ་དགོངས་སུ་གསོལ། སྲོག་ཆགས་སྡུག་བསྔལ་ཞི་བྱའི་ཕྱིར། །བདག་ནི་ཇི་སྲིད་འཚོའི་བར་དུ། །སངས་རྒྱས་ཆོས་དང་དགེ་འདུན་ལ། །གུས་པས་ཡང་དག་སྐབས་སུ་མཆི། །སེམས་ཅན་ཐམས་ཅད་ནི་མཐའ་ཡས་པའི། །སྡུག་བསྔལ་ཉེ་བར་ཞི་བ་དང་། །ངན་འགྲོ་རྣམས་ལས་བསྒྲལ་བ་དང་། །ཉོན་མོངས་རྣམས་ལས་དགྲོལ་བའི་ཕྱིར། །སྲིད་པའི་མི་དགེ་དོག་པ་ན། །སྡུག་བསྔལ་སྣ་ཚོགས་ཅི་མཆིས་པ། །དེ་ལྟར་ཡོངས་སུ་སྐྱོབ་པའི་ཕྱིར། །བདག་གིས་བྱང་ཆུབ་སེམས་བསྐྱེད་དོ། །ཚེ་ཡི་མཐའ་ཀླས་གང་བྱེད་དང་། །གང་ཡང་ཅུང་ཟད་བྱེད་འགྱུར་པ། །མདོར་ན་སེམས་ཅན་ཐམས་ཅད་ཀྱི། །ཉོན་མོངས་ཐམས་ཅད་ཞི་བ་དང་། །གྲོལ་བར་བྱ་བའི་ཕྱིར་འབད་ཅིང་། །བྱང་ཆུབ་རབ་ཏུ་དགའ་བརྩོན་ནོ། །ཞེས་པས་རྒྱུད་སྦྱངས་ནས་མྱང་འདས་ཀྱི་བསམ་པ་བརྟན་པོ་བསྐྱེད་དུ་གཞུག །དེ་ནས་བྱིན་གྱིས་བརླབ་པ་ནི། ན་མོ་རཏྣ་ཏྲ་ཡཱ་ཡ། མ་ཧཱ་ཡཀྵ་སེ་ན་པ་ཏ་ཡེ། ན་མོ་བཛྲ་ཀྲོ་དྷཱ་ཡ། ཏདྱ་ཐཱ། ཧུ་ལུ་ཧུ་ལུ། ཏི ཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུཾ་ཕཊ། ཅེས་པ་བཟླ་བཞིན་དུ་དྲིའི་ཆུས་སློབ་མའི་མགོ་ལ་བསང་གཏོར་བྱ་ཞིང་། ཡང་། ༀ་ཨ་མྲྀ་ཏེ་ཧཱུཾ་ཕཊ། ཅེས་པ་ལན་བདུན་བཟླ་བཞིན་དུ་ལག་པ་སྤྱི་བོར་བཞག །བྷྲཱུཾ་བརྒྱ་རྩ་དང་།ༀ་ཨ་མྲྀ་ཏེ་ཧཱུཾ་ཕཊ། ལན་གསུམ་བཟླས་པས་ཀྱང་བྱིན་གྱིས་བརླབ་ཅིང་། སྤོས་ཀྱིས་ཀྱང་བདུག །སོ་ཤིང་ཛི་ནི་ཛིཀ་ཞེས་གཏད་ལ། བྷྲཱུཾ་ཞེས་དོར་དུ་བཅུག །ༀ་ཧྲཱིཿབི་ཤུདྡྷ་དྷརྨ་སརྦ་པཱ་པཾ་ནིཤྩ་ཨ་སྱ་ཤོ་དྷ་ཡ་སརྦ་བི་ཀ་ལ་པན་ཨ་པ་ན་ཡ་ཧཱུཾ་གིས་དྲིའི་ཁྱོར་ཆུ་ལན་གསུམ་བླུད། ༀ་ཨམྲྀ་ཏེ་ཧཱུཾ་ཕཊ་བཟླས་པའི་སྲུང་སྐུད་མདུད་པ་གསུམ་ལྡན་གདགས་ཤིང་། དེ་བཟླས་པའི་ཀུ་ཤ་ཆེ་ཆུང་སྟན་དང་སྔས་ཀྱི་དོན་དུ་སྦྱིན་ལ། ཆོས་རྣམས་ཐམས་ཅད་རྒྱུ་ལས་བྱུང་། སོགས་དང་། སྐར་མ་རབ་རིབ་སོགས་དང་། སྡིག་པ་ཅི་ཡང་མི་བྱ་སྟེ། ཞེས་པ་ནས། འོན་ཀྱང་སྐྱོབ་པའི་སྲས་སུ་སྐྱེ། ཞེས་པའི་བར་གྱིས་ཆོས་བཤད་ནས། བུ་ཀྱེ་སང་ནི་དཀྱིལ་འཁོར་མཆོག །མཐོང་བར་འགྱུར་རོ་ཉོལ་ཞིག་དང་། །རྨི་ལམ་མཐོང་བ་གང་ཡིན་པ། །དེ་ཀུན་ང་ལ་ལེགས་པར་སྨྲོས། །ཞེས་གདམས་ལ། ཕྱག་འཚལ་དུ་བཅུག་སྟེ་རང་གནས་སུ་བཏང་ངོ་། །བུམ་པ་སྟ་གོན་ནི། །བུམ་པ་མཚན་ཉིད་དང་ལྡན་པ་གཉིས་ལེགས་པར་བཀྲུས་ཤིང་གུ་གུལ་གྱིས་བདུག །མགུལ་ཆིངས་ཁ་རྒྱན་སོགས་ཆས་སུ་བཅུག །འབྲུ་ལྔ་དང་རིན་ཆེན་ལྔའི་ཐུམ་བུ་དང་སྨན་ལྔ་བཏགས་པའི་ཕྱེ་མ་རྣམས་ནང་རྫས་སུ་བླུག་ཅིང་ཆུ་གཙང་གིས་སུམ་གཉིས་ཙམ་བཀང་། བསང་སྦྱངས། སྟོང་པའི་ངང་ལས་རིན་པོ་ཆེའི་བུམ་པ་ཡངས་ཤིག་རྒྱ་ཆེ་བ་མཚན་ཉིད་ཐམས་ཅད་ཚང་བ་ནང་ལྷའི་ཆུ་བོ་དང་ནང་རྫས་ཀྱིས་གང་བའི་མགྲིན་པར་ཟླ་དཀྱིལ་ལ་བཟླ་བྱའི་རིག་སྔགས་ཀྱི་ཕྲེང་བ་གནས་པ་ལས་འོད་ཟེར་འཕྲོས། སངས་རྒྱས་དང་བྱང་སེམས་སྔགས་ཀྱི་ལྷ་རྣམས་བདུད་རྩིའི་རྣམ་པར་སྤྱན་དྲངས་པས་བུམ་པ་གང་བར་བསམ་ཞིང་། རྣམ་བུམ་ལ་རིགས་གསུམ་གྱི་སྔགས་དང་། ལས་བུམ་ལ། ༀ་ཏྲཻ་ལོཀྱ་བི་ཛ་ཡ་ཧཱུཾ་ཕཊ། ཅེས་ཁམས་གསུམ་རྣམ་རྒྱལ་དང་། ལས་ཀུན་བྱེད་པ་ཐབས་སྦྱོར་གྱི་སྔགས། ༀ་ཨ་མྲྀ་ཏེ་ཧཱུཾ་ཕཊ་ཅེས་པ་བཟླ། ཐུན་མོང་དུ། ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུཾ། ཞེས་པའང་བཟླས་མཐར། ཛི་ན་ཛིཀ་གིས་མེ་ཏོག་དཀར་པོ་དང་། བྷྲཱུཾ་གིས་མཆོད་ཡོན་ཕུལ། ཨ་མྲྀ་ཏེ་བཟླ་ཞིང་གུ་གུལ་གྱིས་བདུག་གོ །དེ་ནས་ཆ་གསུམ་གཏོར་མ་བཏང་ཞིང་། བདག་གི་ལྷའི་སྐུ་གཟུགས་ཟླ་བའི་སྟེང་གི་ཡི་གེ་ལ་ཐིམ། དེ་ཟླ་བ་ལ་ཐིམ། དེ་རྣམ་སྨིན་གྱི་ལུས་ལ་ཐིམ་པར་བསམ་ལ་བཀྲ་ཤིས་བརྗོད་དོ། །དེ་ནས་དཀྱིལ་འཁོར་གྱི་དངོས་གཞིའི་ཉིན་པར་ཁ་དོག་ལྔའི་སྲད་བུ་ལ་བསང་གཏོར་བྱས། ལས་སྔགས་བཟླ་བཞིན་དུ་བསྒྲིལ། མདུན་གྱི་ནམ་མཁར་རྒྱལ་བ་སྲས་བཅས་བཞུགས་པར་མོས་ལ་མཆོད་དེ། ཤར་དང་ལྷོར་གནས་ཚངས་ཐིག་གཉིས། མེར་གནས་ཤར་ལྷོའི་རྩ་ཐིག་གཉིས། རླུང་གནས་ནུབ་བྱང་རྩ་ཐིག་གཉིས། མེ་དང་བདེན་བྲལ་གནས་ཟུར་ཐིག །གཉིས་གདབ་སློབ་དཔོན་འདུག་ཕྱོགས་ཏེ། སློབ་མ་དེ་ལྡོག་གཡས་བསྐོར་འགྲོ། ཞེས་པ་ལྟར་དང་པོ་མཁའ་དང་། དེ་ནས་ས་ལ་གདབ་ཅིང་། ཐིག་ཐེབས་ནས་ཚོན་རྩི་ལ་བསང་གཏོར་བྱས་ལ། ལས་སྔགས་བཟླ་བཞིན་དུ་ཐོག་མར་སློབ་དཔོན་གྱིས་དབང་ལྡན་གྱི་རྩིག་པ་དང་། དེ་ནས་ལྟེ་བ་སེར་པོ། འདབ་དྲུག་མཛེས་མཚོན། རྩིག་པ་ནང་ནས་སེར་སྔོ་དམར་ནག་དཀར་བ། སྒོ་གཞི་ཤར་དཀར། ལྷོ་སྔོ་བ་སོགས་ཕྱོགས་ཚོན། རྟ་བབས་མས་རིམ་བཞིན་སེར་ལྗང་སྔོ་དམར། ཁོར་ཡུག་པད་རྡོར་འོད་ཕྲེང་སོགས་ཚོན་ཐོབ་ལྷག་མ་སྤྱི་དང་འདྲ་ཞིང་། ལྷ་གནས་རྣམས་སུ་སོ་སོའི་སྐུ་རྟེན་ལྷ་ཙཀ་དང་། རྣམ་བུམ་རིག་གསུམ་གྱི་སྔགས་བཟླ་བཞིན་དུ་དཀྱིལ་འཁོར་གྱི་དབུས་སུ་མཉྫི་ལ་དགོད། ལས་བུམ་ཨ་མྲྀ་ཏ་བཟླ་བས་དཀྱིལ་འཁོར་གྱི་ཤར་སྒོའམ་སློབ་དཔོན་གྱི་མདུན་དུ་བཞག །དཀྱིལ་འཁོར་གྱི་མཐར་མདའ་དར་མེ་ལོང་ཅན་དང་། རལ་གྲི་དང་། ཕུར་བུ་བརྒྱད་དམ་བཞིས་བསྐོར་བ་ཚོན་སྐུད་ཀྱིས་བྲེས། མདུན་དུ་འདས་གཏོར་དང་། མཐའ་མཆོད་པས་བསྐོར། རྫས་དབང་གི་ཙཀླི་དང་། ཆ་གསུམ་གཏོར་མ་རྣམས་ཅི་བདེར་སྒྲིག །རང་གི་མདུན་དུ་མཆོད་ཡོན་བཟེད་ཞལ་དང་བཅས་པ། སྤོས་ཕོར། འཐོར་ནས། རྡོར་དྲིལ་སོགས་ཡོ་བྱད་ཐམས་ཅད་ཚོགས་པར་བཤམ་མོ། །དེ་ནས་ཆོ་ག་ནི། དང་པོ་ཁོ་ནར་གཙང་སྦྲ་དང་བཅས་ཏེ། སངས་རྒྱས་ཆོས་ཚོགས་མ་དང་། སེམས་ཅན་ཐམས་ཅད་བདེ་བ་དང་ཞེས་སོགས་ཀྱིས་སྐྱབས་སེམས་ཚད་མེད་བཞི་བསྒོམ་པ་སྔོན་དུ་འགྲོ་བས། སློབ་དཔོན་རང་ཉིད་ཁྱིམ་པ་ཡིན་ན་སྨོས་མ་དགོས། རབ་ཏུ་བྱུང་བ་ཡིན་ནའང་ཐེག་པ་ཆེན་པོའི་གསོ་སྦྱོང་ལེགས་པ་མི་འགལ་ཞིང་ལེགས་པ་ཡིན་པས་དཀོན་མཆོག་གི་རྟེན་གྱི་དྲུང་དུ་པུས་བཙུགས་ཐལ་མོ་སྦྱར་ཏེ། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྟ་ཅང་ཤེས་ལྟ་བུ། གླང་པོ་ཆེན་པོ། བྱ་བ་བྱས་ཤིང་བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། སྲིད་པ་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་བཀའ། ལེགས་པར་རྣམ་པར་གྲོལ་བའི་ཐུགས། ལེགས་པར་རྣམ་པར་གྲོལ་བའི་ཤེས་རབ་ཅན་དེ་དག་གིས། སེམས་ཅན་ཐམས་ཅད་ལ་ཕན་པར་བྱ་བའི་ཕྱིར་དང་། གྲོལ་བར་བྱ་བའི་ཕྱིར་དང་། ནད་མེད་པར་བྱ་བའི་ཕྱིར་དང་། མུ་གེ་མེད་པར་བྱ་བའི་ཕྱིར་དང་། བླ་ན་མེད་པའི་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱ་བའི་ཕྱིར་དུ་གསོ་སྦྱོང་ངེས་པར་མཛད་པ་དེ་བཞིན་དུ་བདག་མིང་འདི་ཞེས་བགྱི་བས་ཀྱང་། དུས་འདི་ནས་བཟུང་ནས་སང་ཉི་མ་མ་ཤར་བར་དུ་གསོ་སྦྱོང་ངེས་པར་བླང་བར་བྱའོ། །དེང་ནས་སྲོག་གཅོད་མི་བྱ་ཞིང་། གཞན་གྱི་ནོར་ཡང་བླང་མི་བྱ། །འཁྲིག་པའི་ཆོས་ཀྱང་མི་བྱ་སྟེ། །རྫུན་གྱི་ཚིག་ཀྱང་མི་སྨྲའོ། །སྐྱོན་ནི་མང་པོ་ཉེར་བརྟེན་པའི། །ཆང་ནི་ཡོངས་སུ་སྤང་བར་བྱ། །ཁྲི་སྟན་མཐོན་པོ་མི་བྱ་ཞིང་། །དེ་བཞིན་དུས་མ་ཡིན་པའི་ཟས། །དྲི་དང་ཕྲེང་བ་དང་ནི་རྒྱན། །གར་དང་གླུ་སོགས་སྤང་བར་བྱ། །ཇི་ལྟར་དགྲ་བཅོམ་རྟག་ཏུ་ནི། །སྲོག་གཅོད་ལ་སོགས་མི་བྱེད་ལྟར། །དེ་བཞིན་སྲོག་གཅོད་ལ་སོགས་སྤང་། །བླ་མེད་བྱང་ཆུབ་མྱུར་ཐོབ་ཤོག །ཅེས་ལན་གསུམ་དང་། ༀ་ཨ་མོ་གྷ་ཤཱི་ལ་སམྦྷ་ར་སམྦྷ་ར། བྷ་ར་བྷ་ར། མ་ཧཱ་ཤུདྡ་ས་ཏྭ་པདྨ་བི་བྷཱུ་ཥི་ཏི་བྷཱུ་ཛ་དྷ་ར་དྷ་ར། ས་མནྟ་ཨ་བ་ལོ་ཀི་ཏེ་ཧཱུཾ་ཕཊ་སྭཱ་ཧཱ། ཞེས་ཉེར་གཅིག་བཟླའོ། །དེ་ནས་སྒྲུབ་ཁང་གི་ཕྱི་རོལ་ཏུ་དངོས་སུ་འགྲོ་བའམ་སོང་བར་མོས་ཏེ། ༀ་ཨ་མྲྀ་ཏེ་ཧཱུཾ་ཕཊ། ཅེས་བཟླས་པས་ཅི་དགར་ཁྲུས་བྱ་ཞིང་། ཆུ་སྙིམ་པ་གསུམ་མགོ་བོར་བླུགས་ལ་དབང་བསྐུར་ཏེ་དྲིལ་ཕྱིས་བྱས་ནས། ༀ་སུ་སིདྡྷི་ཀཱ་རི་ཧཱུཾ་ཞེས་ལན་བདུན་བཟླ་བཞིན་གཙུག་ཕུད་བཅིང་། ཚོག་པུར་སྡད་ལ་པུས་མོའི་བར་དུ་ལག་གཡོན་པར་ཆུ་གཙང་བཞག་པ་ལས་གཡས་པའི་སོར་མོས་བླངས་ཏེ། ཁ་རྣ་མིག་སྣ་ཁ་ལག་མགོ། །ལྟེ་བ་རྣམས་སུ་གཉིས་གསུམ་རེག །ཅེས་པ་ལྟར་ཉེ་རེག་བྱས་ཏེ་ནང་དུ་འཇུག་པའམ་ཞུགས་པར་མོས་ལ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཞེས་ཕྱག་བྱས་ཏེ་འདུག་ནས། ལས་བུམ་གྱི་ཆུ་ལག་གཡོན་པར་བཞག་པ་ལས་གཡས་པས་འཐོར་བཞིན་དུ། སྟོང་གསུམ་ཀུན་ཏུ་དྲི་མཆོག་འབྱུང་གྱུར་པའི། །སྤོས་དང་སྨན་སྦྱར་ཆུ་གཙང་རྒྱལ་བའི་ཁྲུས། །ཡེ་ཤེས་སྤྲིན་ཕུང་མཁའ་ལ་ཆར་འབེབས་པས། །མི་གཙང་དྲི་མའི་ཕྱོགས་རྣམས་དག་གྱུར་ཅིག །ༀ་ཤུདྡྷེ་ཤུདྡྷེ་ཤོ་དྷ་ནེ་སྭཱ་ཧཱ། ཞེས་དང་། ༀ་ཏྲཻ་ལོ་ཀྱ་བི་ཛ་ཡ་ཧཱུཾ་ཕཊ་དང་། ༀ་ཨ་མྲྀཾ་ཏེ་ཧཱུཾ་ཕཊ། ཅེས་བཟླ་བས་བདག་གནས་ཡོ་བྱད་ཐམས་ཅད་ལ་བསང་གཏོར་བྱས་པས་བགེགས་བསལ། སྭ་བྷཱ་ཝའི་སྔགས་ཀྱིས་ཆོས་ཐམས་ཅད་རང་བཞིན་གྱིས་རྣམ་པར་དག་པའི་ངང་ལ་དར་ཅིག་བཞག །དེ་ནས་དཀོན་མཆོག་གསུམ་དང་རིགས་གསུམ་འཁོར་བཅས་མཁའ་ཁྱབ་ཏུ་བཞུགས་པར་དམིགས་ལ། ཐལ་མོ་སྦྱར་ཏེ། ན་མོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་དུས་འདི་ནས་བཟུང་སྟེ་ནམ་བྱང་ཆུབ་སྙིང་པོ་ལ་མཆིས་ཀྱི་བར་དུ་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་སྐྱེ་བ་ཐོག་མ་མེད་པ་ནས་འཁོར་བ་ན་འཁོར་བའི་ཚེ། བདག་གིས་སྡིག་པ་མི་དགེ་བའི་ལས་ཅི་བགྱིས་པ་དང་། བགྱིད་དུ་སྩལ་བ་དང་། བགྱིད་པ་ལ་རྗེས་སུ་ཡི་རང་བ་དེ་དག་ཐམས་ཅད་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔར་སོ་སོར་བཤགས་སོ། །ཞེས་ལན་གསུམ། ན་མོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་དུས་འདི་ནས་བཟུང་སྟེ། ནམ་བྱང་ཆུབ་སྙིང་པོ་ལ་མཆིས་ཀྱི་བར་དུ་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དེ་བཞིན་གཤེགས་པའི་ཆོས་ཀྱི་སྐུ་ཞི་བ་བླ་ན་མེད་པ་སོ་སོ་ར ང་གིས་རིག་པ་ལ་སྐྱབས་སུ་མཆིའོ། །ཕྱོགས་བཞིའི་བྱང་ཆུབ་སེམས་དཔའ་ཆེན་པོ་འཕགས་པ་ཕྱིར་མི་ལྡོག་པའི་དགེ་འདུན་ལ་སྐྱབས་སུ་མཆིའོ། །ཞེས་ལན་གསུམ། དེ་ནས་ལུས་དབུལ་བ་ནི། ན་མོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་དུས་འདི་ནས་བཟུང་སྟེ་ནམ་བྱང་ཆུབ་སྙིང་པོ་ལ་མཆིས་ཀྱི་བར་དུ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ། བདག་ཉིད་དུས་ཐམས་ཅད་དུ་ཡོང་ཡེ་འབུལ་གྱི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བདག་ལ་ཐུགས་བརྩེ་བའི་སླད་དུ་བདག་བཞེས་སུ་གསོལ། ཞེས་ལན་གསུམ། དེ་ནས་ཐལ་མོ་ཁོང་སྟོང་དུ་སྦྱར་ཏེ་མཛུབ་མོ་ཅུང་ཟད་བཀུག་ཅིང་མཐེ་བོང་གཉིས་སྒྲེང་བ་དམ་ཚིག་གི་ཕྱག་རྒྱ་བཅིང་ལ། ཕྱག་རྒྱ་འདི་ནི་རྒྱ་ཆེ་སྟེ། །སངས་རྒྱས་སྐྱོབ་པ་རྣམས་ཀྱི་ཡིན། །སངས་རྒྱས་རྣམས་ཀྱི་དམ་ཚིག་ནི། །ཕྱག་རྒྱ་འདི་ལ་རབ་ཏུ་གནས། །ན་མཿས་མནྟ་བུདྡྷཱ་ནཱཾ་ཨ་ས་མེ་ཏྲི་ས་མ་ཡེ་སྭཱ་ཧཱ། ཞེས་པས་དམ་ཚིག་པར་བྱིན་གྱིས་བརླབ། དེ་ནས་ལག་གཉིས་ཁུ་ཚུར་བཅང་ནས་མཐེ་བོང་ནང་དུ་བཅུག་པ་སྦྱར་ལ་མཛུབ་མོ་གཉིས་སྒྲེང་བ་ཆོས་ཀྱི་དབྱིངས་ཀྱི་ཕྱག་རྒྱ་བཅིངས་ལ། རྒྱ་འདི་ཕྱག་རྒྱ་ཆེན་པོ་སྟེ། །ཆོས་དབྱིངས་རྣམས་ལ་སྦྱང་བའོ། །ན་མཿས་མནྟ་བུདྡྷཱ་ནཱཾ་དྷརྨ་དྷཱ་ཏུ་སྭ་བྷཱུ་ཝ་ཨཱཏྨ་ཀོ྅་ཧཾ། ཞེས་པས་ཆོས་ཀྱི་དབྱིངས་སུ་བརླབ། དེ་ནས་སོར་མོ་རྒྱབ་སྦྱར་བ་བསྣོལ་ཏེ་མཐེ་བོང་གཉིས་རྒྱབ་སྤྲད་པ་འཁོར་ལོའི་ཕྱག་རྒྱ་བཅས་ལ། རྒྱལ་མཆོག་དཔལ་དང་ལྡན་པ་ཡི། །ཆོས་ཀྱི་འཁོར་ལོ་བསྐོར་བ་ཡིན། །འཇིག་རྟེན་མགོན་པོ་སྐྱོབ་པ་ཡི། །འཁོར་ལོ་རབ་ཏུ་འདི་བསྐོར་རོ། །ན་མཿས་མནྟ་བུདྡྷཱ་ནཱཾ་བཛྲ་ཨཱཏྨ་ཀོ྅ཧཾ། ཞེས་པས་རྡོ་རྗེ་སེམས་དཔར་བརླབ་བོ། དེ་ནས། ༀ་བཛྲ་ཀྲོ་དྷ་ཨ་མྲྀ་ཏ་ཀུཎྜ་ལཱི་ཧཱུཾ་རཾ། ༀ་བཛྲ་ཀྲོ་དྷ་ཧཱུཾ་ཛཿ ཞེས་པས། བདུད་རྩི་ཐབས་སྦྱོར་ལྗང་ནག་རྒྱ་གྲམ་དང་དྲིལ་བུ་འཛིན་པའི་ང་རྒྱལ་བཟུང་ལ། ཐལ་མོ་ཁོང་སྟོང་ལས་མཛུབ་མོ་གཉིས་ནང་དུ་བཅུག །མཐེ་བོང་དང་སྲིན་ལག་སྒྲེང་། གུང་མོ་དང་མཐེའུ་ཆུང་ཅུང་ཟད་བཀུག་པའི་ཕྱག་རྒྱ་བཅས་ལ། ན་མཿསརྦ་ཏ་ཐཱ་ག་ཏེ་བྷྱཿསརྦ་བྷྱ་བི་ག་ཏེ་བྷྱོ་བི་ཤྭ་མུ་ཁེ་བྷྱཿ སརྦ་ཐཱ་ཧཱི་ཀ་རཀྵ་མ་ཧཱ་བ་ལེ་སརྦ་ཏ་ཐཱ་ག་ཏེ་པུཎྱ་ནི་ར་ཛ་ཏཱེ་ཧཱུཾ་ཧཱུཾ། ཏྲ་ཊ་ཏྲ་ཊ། ཨ་པྲ་ཏི་ཧ་ཏ་སྭཱ་ཧཱ། ཞེས་པས། བགེགས་རྣམས་འཇིགས་པར་བྱེད་པའི་ཁྲོ་ཚོགས་ཀྱིས་བདག་གནས་ཡོ་བྱད་ཐམས་ཅད་བསྲུངས་ཏེ་རྡོ་རྗེ་ཕྲེང་བའི་ར་བས་ཁྱབ་པར་གྱུར། ཡང་ཐལ་སྦྱར་ལས་མཛུབ་མོ་གཉིས་གུང་མོའི་རྒྱབ་ཏུ་སྦྱར་བ་གནས་ལྔར་གཏུག་ཅིང་། ན་མཿས་མནྟ་བཛྲ་ཎཱཾ་བཛྲ་ཀཱ་ཝཱ་ཙི་ཧཱུཾ། ཞེས་པས་གོ་བགོ །དེ་ནས་བདེན་སྟོབས་ཀྱིས་བགེགས་བསྐྲད་པ་ནི། ན་མོ། སྐྱབས་དམ་པའི་མཆོག །གླིང་དམ་པའི་མགོན། བསོད་ནམས་དམ་པའི་དཔལ་གྱི་ཞིང་། ཡོན་ཏན་ཐམས་ཅད་ཀྱི་འབྱུང་གནས་ཐུགས་རྗེའི་མངའ་བདག །འགྲོ་བ་ཡོངས་ཀྱིས་དཔལ་མགོན། མཆོད་གནས་བླ་ན་མེད་པ་དཀོན་མཆོག་གསུམ་ལ་ཕྱག་འཚལ་ཞིང་སྐྱབས་སུ་མཆིའོ། །དཀོན་མཆོག་གསུམ་གྱི་བཀའ་བདེན་པ་དང་། བདེན་པ་ཡང་དག་པ་དང་། བདེན་པ་ཆེན་པོའི་བྱིན་གྱིས་བརླབས་དང་། གསང་སྔགས་དང་རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱ་དང་། ལྷ་དང་དྲང་སྲོང་རྣམས་ཀྱི་བཀའ་བདེན་པ་དང་། ཡུམ་ཆེན་མོ་དང་སྲས་ཕྱོགས་བཅུའི་སངས་རྒྱས་ཀྱི་བཀའ་བདེན་པ་དང་། བཅོམ་ལྡན་འདས་རྣམ་པར་སྣང་མཛད་དང་། འོད་དཔག་མེད་དང་། མི་བསྐྱོད་པ་དང་། འཇམ་དཔལ་དང་། སྤྱན་རས་གཟིགས་དང་། ཕྱག་ན་རྡོ་རྗེ་ལ་སོགས་པའི་བཀའ་བདེན་པ་དང་། བདེན་པ་ཆེན་པོའི་བྱིན་གྱི་རླབས་ཀྱིས། མཆོད་པ་དང་ཆོ་ག་ལ་བར་དུ་གཅོད་པའི་བགེགས་དང་ལོག་འདྲེན་གློག་ལྟར་གཡོ་ཞིང་རླུང་ལྟར་འཚུབ་པ། སྦལ་པ་རྨ་ཅན་དང་། ལོག་འདྲེན་གདོང་སྐྱ་དང་། དྲི་ཡི་ངད་ལྡན་དང་། གྲིབ་གནོན་སྲུལ་བུ་དང་། ཚངས་པ་སྦྱིན་ངན་དང་། ལོག་འདྲེན་སྣ་ཡོན་ལ་སོགས་པ་ཐམས་ཅད་འདིར་མ་གནས་པར་དེངས་ཤིག །ཧཱུཾ། དུས་གསུམ་སངས་རྒྱས་ཐམས་ཅད་ཀྱི། །མངགས་གཞུག་ཕོ་ཉའི་ལས་མཛད་པ། །ཁྲོ་ཆེན་བདུད་རྩི་འཁྱིལ་པ་ཡིས། །བགེགས་ཀྱི་སྦྱོར་བ་རྒྱུན་ཆོད་ཅིག །ཕཊ་ཅེས་བགེགས་བསྐྲད། དེ་ནས་མཐེའུ་ཆུང་བསྣོལ་བའི་སྟེང་དུ་སྲིན་ལག་གིས་མནན། དེའི་སྟེང་དུ་མཐེ་བོང་གིས་མནན་ཏེ། གུང་མོ་གཉིས་རྩེ་སྤྲད་པའི་རྒྱབ་ནས་མཛུབ་མོ་རྡོ་རྗེའི་རྭ་ལྟར་བྱས་པ་བསྟན་ལ། ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷཱ་ཡ། མ་ཧཱ་དཾཥྚོདྷ་ཊ་བྷཻ་ར་བཱ་ཡ། ཨ་སི་མུ་ས་ལ་དྷཱ་རཱ་ཡ་པ་ར་ཤུ་པཱ་ཤ་ཧསྟཱ་ཡ། ཏདྱ་ཐཱ། ༀ་ཨ་མྲྀ་ཏ་ཀུཎྜ་ལི། ཁ་ཁ། ཁཱ་ཧི་ཁ་ཧི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། གྲྀཧྞ་གྲྀཧྞ། གརྫ་གརྫ། སྥོ་ཊ་སྥོ་ཊ། བིསྥོ་ཊ་ཡ་བི་སྥོ་ཊ་ཡ། སརྦ་བིགྷྣཱན་བི་ནཱ་ཡ་ཀཾ་མ་ཧཱ་ག་ན་པ་ཏི་ཛི་ཝི་ཏ་ཨནྟ་ཀ་རཱ་ཡ་སྭཱ་ཧཱ། ཞེས་བདུན་བཟླས་པས་བགེགས་གཞོམ་པར་བྱའོ། །དེ་ནས། ཛི་ན་ཛིཀ྄ །ཨ་རོ་ལིཀ྄ །བཛྲ་དྷྲིཀྲ །ཞེས་དང་། ཐལ་མོ་སྦྱར་བ་སྤྱི་བོར་བཞག་ལ། ཏ་ཐཱ་ག་ཏོདྦྷ་བ་ཡེ་སྭཱ་ཧཱ། རྡོ་རྗེ་རྩེ་ལྔའི་རྒྱ་སྙིང་གར་བཞག་ལ། ༀ་བཛྲོདྡྷ་བེ་ཡེ་སྭཱ་ཧཱ། ཞེས་པས་རིགས་གསུམ་འཁོར་བཅས་མངོན་སུམ་དུ་བཞུགས་པར་མོས་ཏེ། འཇིག་རྟེན་དག་གི་ཕྱོགས་ཀུན་ནས། །དེ་བཞིན་གཤེགས་པ་གང་བཞུགས་དང་། དགྲ་བཅོམ་བྱང་ཆུབ་སེམས་དཔའ་རྣམས། །བདག་གིས་མ་འཚལ་སྡིག་བགྱིས་དང་། །གང་ཡང་བགྱིད་དུ་སྩལ་བ་དང་། །རྗེས་སུ་ཡི་རང་བགྱིས་ལ་སོགས། །བག་མེད་པ་ནི་ཕྲ་མོ་ཡང་། །ལུས་ངག་ཡིད་ཀྱིས་བགྱིས་པ་རྣམས། །ཡང་དང་ཡང་དུ་མཐོལ་ཞིང་བཤགས། །སླན་ཆད་དེ་ལྟར་ཡོངས་མི་བགྱིད། །བདག་གིས་མི་དགེ་བགྱིས་པ་རྣམས། །རྫོགས་སངས་རྒྱས་ཀྱིས་མཁྱེན་པ་ལྟར། །བདག་ཀྱང་དེ་ལྟར་དམ་འཆའོ། །སྲོག་ཆགས་སྡུག་བསྔལ་ཞི་བྱའི་ཕྱིར། །ཇི་སྲིད་བྱང་ཆུབ་སྙིང་པོའི་བར། །སངས་རྒྱས་ཆོས་དང་དགེ་འདུན་ལ། །གུས་པས་ཡང་དག་སྐྱབས་སུ་མཆི། །དེང་ནས་མཆོག་གི་ས་བོན་གང་། །ཐར་པ་བདུད་རྩིའི་འབྲས་བུ་སྨིན། །ཤིན་ཏུ་སྒོམས་པས་མཆོག་གྱུར་ཏེ། །དངོས་གྲུབ་ཕྱིར་ནི་དེ་བསྐྱེད་དོ། །དགེ་བའི་ལས་རྣམས་གང་དག་ཀུན། །འདི་དང་གཞན་དུ་བསགས་པ་རྣམས། །ཆོས་ཀྱི་ལོངས་སྤྱོད་སྣ་ཚོགས་ལ། །མཉམ་པར་བཞག་པས་ཡི་རང་ངོ་། །སྔོན་གྱི་རྒྱལ་བ་སྲས་བཅས་ཀྱིས། །སྨིན་ལམ་ཇི་ལྟར་མཛད་པ་ལྟར། །བདག་ཀྱང་དགེ་བ་ཀུན་རྟོགས་ནས། །དེ་བཞིན་དུ་ནི་སྨོན་ལམ་འདེབས། །འཕགས་པ་རྣམས་ཀྱིས་རྗེས་དགོངས་ཏེ། །མགོན་མ་མཆིས་པ་བདག་མྱུར་དུ། །སངས་རྒྱས་འགྲུབ་པར་མཛད་དུ་གསོལ། །དེ་དག་ནི་རྣལ་འབྱོར་ལ་འཇུག་པའི་བྱ་བའོ། །དེ་ནས་རྣལ་འབྱོར་དངོས་གཞི་ནི། བྱ་རྒྱུད་ཙམ་པོ་རྣམས་སུ་བདག་ཉིད་ལྷར་བསྐྱེད་པ་མི་འབྱུང་ཡང་། འདིར་བྱ་རྒྱུད་ཁྱད་པར་ཅན་སྤྱོད་རྒྱུད་དང་ཐུན་མོང་པའི་སྒྲུབ་ཚུལ་ལ་བདག་ཉིད་ལྷར་བསྐྱེད་པ་ཡོད་པས། དེའི་དབང་དུ་བྱས་ཏེ་བདག་བསྐྱེད་ནི། ཐོག་མར་བདག་གི་དེ་ཁོ་ན་ཉིད་བསྒོམ་སྟེ། ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་སྡུག་བསྔལ་རྒྱུ་དང་བཅས་པ་ལས་བདག་གིས་བསྒྲལ་ཏེ་ཆོས་ཀྱི་དབྱིངས་བྱང་ཆུབ་མཆོག་ལ་འགོད་པར་བྱ། དེའི་ཆེད་དུ་འདི་ལྟར་སྣང་བའི་ཆོས་ཐམས་ཅད་སེམས་ཙམ་སྟེ། དེ་ཡང་མི་དམིགས་པ་ནམ་མཁའ་ལྟ་བུའོ། །ཞེས་བརྗོད་ཅིང་བསྒོམ། དེ་ནས་ལྷའི་དེ་ཁོ་ན་ཉིད་ནི་ལྷ་དྲུག་བསྒོམ་པ་སྟེ། བདག་གི་དེ་ཁོ་ན་ཉིད་དོན་དམ་བྱང་ཆུབ་སེམས་ཀྱི་ངོ་བོ་སྟོང་པ་ཉིད་དུ་གྱུར་པ་ནི་སྟོང་པའི་ལྷ། དེའི་ངང་ལས་རང་སེམས་ཟླ་བའི་དཀྱིལ་འཁོར་ཉ་གང་བསྒོམ་པ་ནི་ཡི་གེའི་ལྷ། ཟླ་དཀྱིལ་གྱི་སྟེང་དུ་ༀ་ཝཱ་གཱི་ཤྭ་རི་མུཾ་ཞེས་པའི་སྔགས་ཀྱི་ཡི་གེའི་གཟུགས་རང་སྒྲ་སྒྲོག་པ་ནི་སྒྲའི་ལྷ། སྔགས་དེ་ཉིད་ཟླ་དཀྱིལ་འདྲེན་ནས་སླར་ཡང་སྔགས་ཕྲེང་བཀོད་པའི་འོད་ཟེར་སྤྲོ་བསྡུས་སངས་རྒྱས་ཀྱི་མཛད་པ་བསྒྲུབས། ཟླ་བ་སྔགས་ཕྲེང་དང་བཅས་པ་ཡོངས་སུ་གྱུར་པ་ལས་རང་ཉིད་འཇམ་དཔལ་གཞོན་ནུར་གྱུར་པ་གསེར་གྱི་མདོག་ཅན་ཞལ་གཅིག་ཕྱག་གཉིས་པ། གཡས་རལ་གྲི་དང་གཡོན་ཨུཏྤ་ལའི་སྟེང་ན་གླེགས་བམ་འཛིན་པ། ཟུར་ཕུད་ལྔ་པ་དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། པད་ཟླའི་གདན་ལ་རྡོ་རྗེ་སྐྱིལ་ཀྲུང་གིས་བཞུགས་པར་སྒོམ་པ་ནི་གཟུགས་ཀྱི་ལྷའོ། །དེ་ནས། ༀ་སརྦ་ཏ་ཐཱ་ག་ཏོདྦྷ་བ་ཡེ་སྭཱ་ཧཱ། ཞེས་དེ་བཞིན་གཤེགས་པའི་རིགས་ཀྱི་སྔགས་དང་ཐལ་མོ་བཀན་པ་ལས་མཛུབ་རྩེ་གཉིས་ཅུང་ཟད་བཀུག་པའི་རྒྱས་སྙིང་མགྲིན་སྨིན་མཚམས་དཔུང་མགོ་གཉིས་ཏེ་ལྔར་གཏུགས་ལ་བྱིན་གྱིས་རློབ། དེ་ནས་ཐལ་མོ་བཀན་པ་ལས་མཐེའུ་ཆུང་གཉིས་བསྣོལ་བའི་བར་དུ་སྲིན་ལག་གཉིས་བཀུག་སྟེ་གུང་མོ་གཉིས་གཤིབས་ལ་སྒྲེང་བའི་ཚིགས་གསུམ་པར་མཛུབ་མོ་གཉིས་བཀུག་ལ་མཐེ་བོང་གཉིས་སྦྱར་བའི་རྒྱ་བཅས་ལ། ༀ་བཛྲ་ཨགྣི་པྲ་དཱི་པྟཱ་ཡ་སྭཱ་ཧཱ། ཞེས་བརྫོད་པས་རྡོ་རྗེའི་གོ་ཆར་བྱས་ལ། དེ་ཉིད་ལས་མཛུབ་རྩེ་གཉིས་བཀྱེད་དེ་རྡོ་རྗེའི་ཚུལ་དུ་བྱས་པའི་རྒྱ་བཅས་པས་མགོ་དང་དཔུང་བ་གཉིས་སྙིང་མགྲིན་ལྔར་རེག་ཅིང་། ན་མོ་རཏྣ་ཏྲ་ཡཱ་ཡ། ༀ་ཧཱུཾ་ཁ་གི་ལི་ཧཱུཾ་ཕཊ། ཅེས་པས་གོ་གྱོན་པར་བསམ་སྟེ་ཕྱག་རྒྱའི་ལྷའོ། །དེ་ནས། འདི་ལྟར་གནས་སྐབས་ཐམས་ཅད་དུ། །ཡེངས་པ་མེད་པའི་ཏིང་འཛིན་གྱིས། །ལྷ་ཡི་འདུ་ཤེས་འབྲལ་མི་བྱ། །འདི་ནི་མཚན་མའི་ལྷ་རུ་གྲགས། །དེ་དག་ནི་རང་གི་ལྷ་སྒོམ་པའི་རྣལ་འབྱོར་དྲུག་གོ། །དེ་ནས་མདུན་གྱི་ལྷ་སྤྱན་དྲང་བའི་རྣལ་འབྱོར་ནི། ཡང་དག་པའི་སྨོན་ལམ་གྱི་སྟོབས་ཀྱིས་ཕྱོགས་འདིར་རིན་པོ་ཆེ་དུ་མ་ལས་གྲུབ་པའི་ཞིང་ཁམས་ས་གཞི་གསེར་གྱི་བྱེ་མ་བརྡལ་བར་གྱུར། ༀ་ཙཱ་ལ་བཱི་ར་ཧཱུཾ་སྭཱ་ཧཱ། དེའི་སྟེང་དུ་འོ་མའི་རྒྱ་མཚོ་སྐྱོན་དང་བྲལ་བ་པདྨ་དང་ཨུཏྤལ་ལ་སོགས་པས་བརྒྱན་ཅིང་འདབ་ཆགས་སྣ་ཚོགས་པས་གང་བར་གྱུར། ༀ་བི་མ་ལ་དྷ་ཧཱ་ཧཱུཾ། དེའི་དབུས་སུ་རིན་པོ་ཆེའི་རི་རབ་ཀྱི་སྟེང་དུ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པའི་ཆོས་ཀྱི་དབྱིངས་ཀྱི་ཕོ་བྲང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་པདྨའི་རྒྱལ་པོ་ཡིད་ལས་བྱུང་བ་འདབ་མ་བརྒྱད་པ་སྔོང་བུ་དང་བཅས་པ་ཟེ་བ་རྒྱས་ཤིང་མཛེས་པའི་ལྟེ་བར་པདྨ་དང་ཟླ་བའི་གདན། སྟེང་དུ་རིན་པོ་ཆེའི་བླ་རེ་དང་བཅས་པར་གྱུར། །རྡོར་ཐལ་གྱི་སོར་མོ་གཡས་པ་སྟེང་དུ་ཡོད་པ་བྱས་ལ། ན་མཿསརྦ་ཏ་ཐཱ་ག་ཏ་ནཱཾ་སརྦ་ཐཱ་ཁཾ་ཨུཏྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཞེས་བརྗོད་པས་རྟེན་བསྐྱེད། དེ་ནས་སྤྱན་དྲང་བ་ནི། སྣོད་གཙང་མར་སྤོས་ཆུ་གཙང་མ་མེ་ཏོག་དཀར་པོ་དང་བཅས་པའི་མཆོད་ཡོན་སྤོས་ཀྱིས་བདུག །བྷྲཱུཾ་དང་། ཛི་ན་ཛིཀ྄་བདུན་དང་། ༀ་ཥྚོཾ་བནྡྷ་སྭཱཧཱའང་ཅི་རིགས་བཟླས་པས་བྱིན་གྱིས་བརླབ་ལ། ན་མོ་རཏྣ་ཏྲ་ཡཱ་ཡ། ཞེས་ལན་གསུམ་གྱིས་ཕྱག་བྱས་ནས། རྡོ་རྗེ་ཐལ་མོ་ཁ་ཕྱེ་ལ་མཛུབ་མོ་གཉིས་རྩེ་སྦྱར་ཏེ་སྒྲེང་ཞིང་མཐེ་བོང་གཡས་པ་སྤྱན་འདྲེན་པའི་རྒྱས་མཆོད་ཡོན་བཏེགས་ལ། ༀ་ཝཱ་གཱི་ཤྭ་ར་ཨེ་ཧྱེ་ཧི་ཨརྒྷཾ་པྲ་ཏཱིཙྪ་སྭཱ་ཧཱ། ཞེས་སྤྱི་བོའི་ཐད་ནས་བཟེད་ཞལ་དུ་ཕུལ་བས། འཇམ་དབྱངས་བསྒོམས་པ་དང་འདྲ་བའི་ཡེ་ཤེས་པ་མདུན་དུ་བྱོན་པར་གྱུར། དེ་ནས་ཐལ་སྦྱར་ལས་གུང་མཛུབ་སྲིན་གསུམ་རྡོ་རྗེ་ལྔ་པ་ལྟར་བྱས་ལ། ༀ་བཛྲ་ཨཱ་ས་ན་ཧཱུཾ་ཕཊ། ཅེས་པའི་སྔགས་རྒྱས། མདུན་དུ་གདན་ལ་བཞུགས་པར་གྱུར། དེ་ནས་གཡས་པའི་མཐེ་བོས་མཐེ་ཆུང་མནན་པ་རྡོ་རྗེ་རྩེ་གསུམ་པ་ལྟར་བྱས་ལ། ཤཾ་ཀ་རེ་ས་མ་ཡེ་སྭཱ་ཧཱ། ཞེས་པས་དམ་ལ་བཞག །དེ་ནས་ཚོགས་བསག་པ་ནི། མཆོད་པ་རྣམས་ལ་བསང་ཆུ་འཐོར་ཞིང་། ཏྲཻ་ལོ་ཀྱ་དང་། ཨ་མྲྀ་ཏེ་དང་། ཛི་ན་ཛ྄ིཀ་ཞེས་པས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་མཆོད་རྫས་ཐམས་ཅད་འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་སྤྲིན་ལྟ་བུ་བཟང་ཞིང་རྒྱ་ཆེ་ལ་རྒྱུན་མི་ཆད་པར་གྱུར། ཐལ་མོ་ཁོང་སྟོང་སྙིང་ག་ནས་རིམ་བསྐོར་གྱིས་བཏེགས་སྟེ་དཔྲལ་བར་སེ་གོལ་གྱིས་དགྲོལ་བཞིན་དུ། ༀ་སརྦ་བིཏྤཱུ་ར་པཱུ་ར། སུ་ར་སུ་ར། ཨཱ་ཝརྟ་ཡ་ཨཱ་ཝ་རྟ་ཡ་ཧོཿ ༀ་བཛྲ་སྥ་ར་ཎ་ཁཾ། གཡོན་གུང་སྲིན་མཐེ་བོས་མནན། དེའི་རྒྱབ་ཀྱི་ཚིགས་གསུམ་པར་མཛུབ་མོ་དང་མཐེའུ་ཆུང་གཉིས་གདུབ་བུའི་ཚུལ་དུ་སྦྱར། ལག་གཡས་རྡོ་རྗེ་རྩེ་གསུམ་པའི་རྒྱ་གྱེན་བསྟན་གཡོན་གྱི་མཐེབ་མཛུབ་འོག་ནས་བཏོན་ཏེ་གུང་མོ་བཟུང་བ་ལྟར་བྱས་པའི་ཕྱག་རྒྱ་བཅས་པས་མཆོད་པའི་སྟེང་ནས་ཅབ་པེ་རེག་བཞིན་དུ། ༀ་ཏེ་ཛ་ཏེ་ཛ་སཾ་སིདྷི་སཱ་དྷཱ་ཡ་སྭཱ་ཧཱ། ཞེས་བཟླས་པས་གཟི་བྱིན་བསྐྱེད། ཨ་མྲྀ་ཏེ་དང་། ཛི་ན་ཛིཀ྄་གིས་བརྟན་པར་བྱས་ལ། ཨཱ་ཧ་ར་ཨཱ་ཧ་ར་སརྦ་བིདྱཱ་དྷ་ར་པཱུ་ཛི་ཏེ་སྭཱ་ཧཱ། ཞེས་སྔགས་དེ་ཁོ་ན་དང་སོ་སོའི་རྒྱས། དྲི་མཆོག །མེ་ཏོག །བདུག་སྤོས། ལྷ་བཤོས་རྣམས་འབུལ་ཏེ། སོ་སོའི་རྒྱ་ནི། ལག་གཡས་སྐྱབས་སྤྱིན་གྱི་འཁྲིག་མ་གཡོན་པས་བཟུང་བ་དྲི་མཆོག །ཐལ་སྦྱར་ལས་མཛུབ་རྩེ་གཉིས་སྤྲད་པ་མཐེ་བོས་མནན་པ་མེ་ཏོག །གུང་སྲིན་མཐེའུ་ཆུང་གསུམ་གཅིག་ལ་གཅིག་བརྟེན་ཅིང་མཛུབ་རྩེ་གཉིས་སྤྲད་པ་མཐེ་བོས་མནན་པ་བདུག་སྤོས། ཐལ་མོ་ཁ་ཕྱེ་ལ་མཛུབ་མོ་གཉིས་དང་མཐེ་བོང་གཉིས་ཅུང་ཟད་བཀུག་པ་ལྷ་བཤོས། མར་མེ་ནི། ཨཱ་ལོ་ཀཱ་ཡ་ཨཱ་ལོ་ཀཱ་ཡ་སརྦ་བིདྱཱ་དྷཱ་ར་པཱུ་ཛི་ཏེ་སྭཱ་ཧཱ། ཞེས་པའི་སྔགས་དང་གཡོན་པའི་ཁུ་ཚུར་གྱི་སྟེང་དུ་གཡས་པའི་གུང་མོ་དང་མཐེ་བོང་རྩེ་སྤྲད་པ་སྒྲེང་བའི་རྒྱས་དབུལ་ལོ། །གཞོན་ནུའི་སྐུ་ལུས་འཆང་བ་པོ། །ཡེ་ཤེས་སྒྲོན་མ་རབ་རྒྱས་ཤིང་། །འཇིག་རྟེན་གསུམ་གྱི་མུན་སེལ་བ། །འཇམ་དཔལ་དབྱངས་ལ་ཕྱག་འཚལ་ལོ། །ཞེས་པས་བསྟོད་པ་བྱས་ཏེ། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །དགེ་བ་ཀུན་ལ་རྗེས་ཡི་རང་། །ཆོས་འཁོར་མ་ལུས་བསྐོར་དུ་གསོལ། །མྱ་ངན་མི་འདར་བདག་གསོལ་འདེབས། །དགེ་ཀུན་བྱང་ཆུབ་ཆེན་པོར་བསྔོ། །དེ་ནས་བཟླས་བརྗོད་ཀྱི་དེ་ཁོ་ན་ཉིད་ནི། སངས་རྒྱས་དང་བྱང་ཆུབ་སེམས་དཔའ་དང་རྡོ་རྗེ་འཛིན་པ་ཐམས་ཅད་ལ་ཕྱག་འཚལ་ལོ། །སེམས་ཅན་ཐམས་ཅད་ལ་ཕན་པ་མཛད་པས་བཞུགས་ནས་བྱིན་གྱིས་རློབ་ཏུ་གསོལ་སྭཱ་ཧཱ། ཞེས་བརྗོད་ནས། ཕྲེང་བ་ལ། ན་མོ་རཏྣ་ཏྲ་ཡཱ་ཡ། ༀ་ཨདྡྷཱུ་ཏེ་བི་ཛ་ཡ་སིདྡྷི་སིདྡྷི་རྠེ་སྭཱ་ཧཱ་དང་། ༀ་རུ་ཙི་ར་མ་ཎི་པྲ་ཝ་རྟ་ན་ཡེ་སྭཱ་ཧཱ། ཞེས་བཟླས་པས་བྱིན་གྱིས་བརླབས་ཏེ། བདག་དང་མདུན་གྱི་ལྷ་གཉིས་ཀའི་ཐུགས་ཀར་ཟླ་དཀྱིལ་ལ་བཟླ་བྱའི་སྔགས་ཕྲེང་བཀོད་པ་ལ་དམིགས་ཏེ། ཕྲེང་བ་བགྲང་བཞིན་དུ། ༀ་ཝཱ་གཱི་ཤྭ་རི་མུཾ། ཞེས་པ་ཅི་ནུས་བཟླས་ལ། མཇུག་ཏུ་ལྷ་ལ་དང་བས་མིག་བལྟ་བཞིན། ན་མོ་བུདྡྷ་བོ་དྷི་ས་ཏྭ་བྷྱཿ ཞེས་ཕྱག་བྱས་ནས། སྲིན་ལག་གཉིས་ཀྱི་རྒྱབ་ཏུ་གུང་མོ་བཞག་སྟེ་སྦྱར། མཛུབ་མོ་གཉིས་ཀྱིས་གཡས་གཡོན་ལྡོག་པའི་གུང་སྲིན་དཀྲི། མཐེའུ་ཆུང་གཉིས་གཤིབས་ཏེ་སྒྲེང་། མཐེ་བོང་གཉིས་མཛུབ་མོའི་ཚིགས་དབུས་མར་བཞག་པ་བུམ་པའི་རྒྱ་བཅས་ལ། བདག་གི་བ ཟླས་བརྗོད་ཀྱི་དགེ་བའི་རྩ་བ་འདི་དངོས་གྲུབ་ཀྱི་དོན་དུ་བཅོམ་ལྡན་འདས་ལ་དབུལ་ལོ། །མགོན་པོ་ཁྱོད་ཀྱིས་མཆོག་དང་ཐུན་མོང་གི་དངོས་གྲུབ་སྩལ་དུ་གསོལ། ཞེས་ཞུའོ། །དེ་ནས་སླར་བཏང་བ་ནི། མདུན་གྱི་ལྷ་ལ་མཆོད་བསྟོད་བྱས་ནས་བཟོད་པར་གསོལ་ཏེ་མཆོད་ཡོན་ཕུལ་ལ། ༀ་ཝཱ་གཱི་ཤྭ་ར་གཙྪ། ཞེས་དང་། སྤྱན་འདྲེན་པའི་ཕྱག་རྒྱ་གྱེན་དུ་དཀྲོལ་བས། སྤྱན་དྲངས་པའི་ལྷ་གཞལ་ཡས་ཁང་དང་བཅས་པ་གཤེགས་པར་བསམ་ཞིང་། བདག་ལྷར་གསལ་བ་མ་བསྡུས་པར་འཇམ་དཔལ་གྱི་ང་རྒྱལ་ལ་གནས་པས། མདུན་གྱི་དཀྱིལ་འཁོར་ལ་དམིགས་ནས་ༀ་ཏྲཻ་ལོ་ཀྱ་དང་། ཨ་མྲྀ་ཏེས་བསང་། སྭཱ་བྷཱ་ཝས་མདུན་རྟེན་གྱིས་མཚོན་པའི་མ་དག་པའི་སྣང་བ་སྦྱངས་ཏེ་སྟོང་པ་ཉིད་དུ་གྱུར། སྟོང་བའི་ངང་ལས་ཡང་དག་པའི་སྨོན་ལམ་གྱི་སྟོབས་ཀྱིས་ས་ཕྱོགས་འདིར་རིན་པོ་ཆེ་དུ་མ་ལས་གྲུབ་པའི་ཞིང་ཁམས་ས་གཞི་གསེར་གྱི་བྱེ་མ་བརྡལ་བར་གྱུར། ༀ་ཙཱ་ལ་བཱི་ར་ཧཱུཾ་སྭཱ་ཧཱ། དེའི་སྟེང་དུ་འོ་མའི་རྒྱ་མཚོ་སྐྱོན་དང་བྲལ་བ་པདྨ་དང་ཨུཏྤལ་ལ་སོགས་པས་བརྒྱན་ཅིང་འདབ་ཆགས་སྣ་ཚོགས་པས་གང་བར་གྱུར། ༀ་བི་མ་ལ་དྷ་ཧཱ་ཧཱུཾ། དེའི་དབུས་སུ་རིན་པོ་ཆེའི་རི་རབ་ཀྱི་སྟེང་དུ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པའི་ཆོས་ཀྱི་དབྱིངས་ཀྱི་ཕོ་བྲང་རིན་པོ་ཆེ་སྣ་བདུན་ལས་གྲུབ་པའི་ཁང་པ་བརྩེགས་པ། གྲུ་བཞི་པ། ཀ་བ་བཞི་ཟུག་པ། སྒོ་བཞི་དོད་པ། རྟ་བབས་བཞིས་བརྒྱན་པ། མཉམ་པ། ཉམས་དགའ་བ། ཤིན་ཏུ་རྣམ་པར་ཕྱེ་བས་མཛེས་པར་བྱས་པ། བཀྲ་བ། ལྟ་ན་སྡུག་པ། འོད་འབར་བ། ཐེམ་སྐས་བཞི་དང་ལྡན་པ། རྡོ་རྗེ་འཛིན་པ་ཐམས་ཅད་ཉེ་བར་འདུ་བའི་གནས། དེ་བཞིན་གཤེགས་པ་ཐམས་ཅད་ལྷག་པར་དགྱེས་པས་རྣམ་པར་རོལ་བའི་གཞལ་མེད་ཁང་ཆེན་པོ། ཡོན་ཏན་མཐའ་ཡས་པའི་རྒྱན་གྱིས་ཡོངས་སུ་སྤྲས་པའི་དབུས་སུ་པདྨ་འདབ་མ་དྲུག་པ་རྣམ་པར་རྒྱས་པས་བསྐོར་བའི་ལྟེ་བར་པདྨའི་གདན་སུམ་སྒྲིགས་ཀྱི་དབུས་དང་གཡས་ཀྱི་སྟེང་དུ་ཟླ་བའི་དཀྱིལ་འཁོར་ཉ་གང་བ་དང་། གཡོན་གྱི་སྟེང་དུ་ཉི་མའི་དཀྱིལ་འཁོར་འབར་བས་མཛེས་པ། འདབ་མ་དྲུག་སོགས་ལྷ་གནས་གཞན་རྣམས་སུའང་སོ་སོའི་གདན་གྱི་རིམ་པ་དང་། སྟེང་དུ་རིན་པོ་ཆེའི་བླ་བྲེ་དང་བཅས་པར་གྱུར། ཕྱག་རྒྱ་སྔར་ལྟར་བཅས་ལ། ན་མཿསརྦ་ཏ་ཐ་ག་ཏ་ནཱཾ་སརྦ་ཐཱ་ཁཾ་ཨུདྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། ཞེས་བརྗོད། དེ་ནས་སོ་སོའི་སྔགས་ལན་རེ་བརྗོད་པས་ལྷ་བསྒོམ་སྟེ། ༀ་ཝཱ་གཱི་ཤྭ་རི་མུཾ། གཙོ་བོ་འཇམ་དཔལ་ལོ། །ༀ་མ་ཎི་པདྨེ་ཧཱུཾ། སྤྱན་རས་གཟིགས། ༀ་བཛྲ་པཱ་ཎི་ཧཱུཾ། ཕྱག་རྡོར། ༀ་སྭ་བྷཱ་ཝ་ཤུདྡྷཱ ཿསརྦ་དྷ་རྨཱཿསྭ་བྷཱ་ཝ་ཤུདྡྷི ྅་ཧཾ། སྦྱང་བའི་ལྷ། ༀ་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཥི་བྷྱཿསརྦ་ཐཱ་ཁཾ་ཨུདྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ། སྤེལ་བའི་ལྷ། ༀ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུཾ་ཕཊ། བསྒྱུར་བའི་ལྷ། ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ༀ་སཾ་བྷ་ར་སཾ་བྷ་ར་ཧཱུཾ། ཐོབ་པའི་ལྷ། ༀ་ཛྙཱ་ན་ཨ་བ་ལོ་ཀི་ཏེ་ན་མཿས་མནྟ་སྥ་ར་ཎ་རསྨི་སཾ་བྷ་བ་ས་མ་ཡ་མ་ཧཱ་མ་ཎི་དུ་རུ་དུ་རུ་ཧྲཱི་ད་ཡ་ཛྭ་ལ་ནི་སྭཱ་ཧཱ། ཚིམ་ལྷ། ན་མཿས་མནྟ་བུདྡྷཱ་ནཱཾ་གྲ་ཧེ་ཤྭ་རི་པྲ་བྷཉྩ་ཛ་ཏི་མ་ཧཱ་ས་མ་ཡ་སྭཱ་ཧཱ། དབང་དུ་བྱེད་པའི་ལྷ། ༀ་བཛྲ་ལཱ་སྱ་ཧཱུཾ། སོགས་བཞི་དང་། ༀ་བཛྲ་དྷཱུ་པེ་ཧཱུཾ། སོགས་བཞི་དང་། ༀ་བཛྲ་ཨང་ཀུ་ཤ་ཛཿ སོགས་བཞིས་སྒེག་སོགས་ལྷ་མོ་བཅུ་གཉིས་ཏེ། རང་རང་གི་སྔགས་བརྗོད་པའི་མོད་ལ་ལྷ་སོ་སོ་ཡིད་ཀྱིས་བསྒོམ་ནས་གསལ་གདབ་པ་ནི། དབུས་ཀྱི་གདན་ལ་འཇམ་དཔལ་གཞོན་ནུར་གྱུར་པ་སྐུ་མདོག་གསེར་བཙོ་མའི་མདངས་ཅན་འོད་ཀྱི་དྲྭ་བ་འགྱེད་པ། ཞི་འཛུམ་སྒེག་པའི་ཉམས་དང་ལྡན་པ། ཞལ་གཅིག་ཕྱག་གཉིས་པ། གཡས་ཤེས་རབ་ཀྱི་རལ་གྲི་སྔོ་སངས་དཔུང་པའི་ཐད་ཀར་འཕྱར་ཞིང་། གཡོན་ཨུཏྤལ་སྔོན་པོའི་རྩ་བ་ཐུགས་ཀར་འཛིན་པ་སྙན་གྱི་ཐད་ཀར་ཁ་བྱེད་པའི་སྟེང་ན་གླེགས་བམ་འཛིན་པ། དབུ་སྐྲ་རལ་པའི་ཟུར་ཕུད་ལྔ་དང་ལྡན་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། པད་ཟླའི་གདན་ལ་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དེའི་གཡས་ལོགས་ཀྱི་གདན་པད་ཟླ་ལ་འཕགས་པ་སྤྱན་རས་གཟིགས་དབང་ཕྱུག་སྐུ་མདོག་དཀར་པོ་ཞལ་གཅིག་ཕྱག་བཞི་པ། ཕྱག་དང་པོ་གཉིས་ཐུགས་ཀར་ཐལ་མོ་སྦྱར་ཞིང་། འོག་མ་གཉིས་ཤེལ་ཕྲེང་དང་པད་དཀར་སྡོང་བུ་འཛིན་པ། ཞབས་རྡོ་རྗེའི་སྐྱིལ་ཀྲུང་། དར་དང་རིན་པོ་ཆེས་བརྒྱན་པ། གཡོན་ལོགས་ཀྱི་གདན་པད་ཉི་ལ་གསང་བའི་བདག་པོ་སྐུ་མདོག་སྔོན་པོ་ཁྲོས་པའི་ཉམས་ཅན་ཞལ་གཅིག་ཕྱག་གཉིས་པ། གཡས་རྡོ་རྗེ་དང་གཡོན་སྡིག་མཛུབ་མཛད་པ། ཞབས་གཡོན་བརྐྱང་བའི་དོར་སྟབས། སྟག་ལྤགས་ཀྱི་སྨད་དཀྲིས། དར་དང་རིན་པོ་ཆེ་དང་སྦྲུལ་གྱིས་བརྒྱན་པའོ། །ཕྱི་རོལ་པདྨ་འདབ་མ་དྲུག་ལ་གཙོ་བོ་གསུམ་པོ་ཞལ་ནུབ་ཏུ་ཕྱོགས་པའི་མདུན་ནས་བརྩམས་ཏེ་གཡས་བསྐོར་དུ། སྦྱོང་བའི་ལྷ་ཤཱཀྱ་ཐུབ་པ་དཀར་པོ་ཐུགས་ཀར་ཐལ་མོ་ཁོང་སྟོང་དུ་སྦྱར་བའི་ནང་དུ་ཨ་ཡིག་དཀར་པོས་མཚན་པ། སྤེལ་བའི་ལྷ་རྣམ་པར་སྣང་མཛད་སེར་པོ་མཛོད་སྤུར་རིན་པོ་ཆེ་སྒྲོམ་བུའི་ཕྱག་རྒྱ་ཁཾ་སྔོན་པོས་མཚན་པ། བསྒྱུར་བའི་ལྷ་ཁྲོ་བོ་བདུད་རྩི་འཁྱིལ་བ་ལྗང་སྔོན་ཕྱག་གཉིས་མཐེ་བོང་བསྣོལ་ནས་སོར་མོ་ལྷག་མ་ཁ་འགྲམ་དུ་ཕྱིར་འགྱེད་པ་ཛཿདམར་གྱིས་མཚན་པ། ཐོབ་པའི་ལྷ་རིན་འབྱུང་སེར་པོ་གཡས་མཛུབ་མོ་ཐུགས་ཀར་སྒྲེང་ཞིང་གཡོན་མཆོག་སྦྱིན་ལ་ཏྲཾ་སེར་པོས་མཚན་པ། ཚིམ་པའི་ལྷ་དོན་ཡོད་གྲུབ་པ་ལྗང་གུ་གཡས་ཁུར་ཚུར་ཐུགས་ཀར་བཀན་ཞིང་གཡོན་མཆོག་སྦྱིན་འདེགས་པ་ཧཱ་ལྗང་གིས་མཚན་པ། དབང་དུ་བྱེད་པ འི་ལྷ་ཕྱག་རྡོར་སྔོན་པོ་ཕྱག་གཉིས་སོར་མོ་ནང་དུ་བསྣོལ་བའི་རྒྱ་སྤྱི་བོར་བཅིངས་པ་ལ་ཛཿདམར་པོས་མཚན་པ། ཐུབ་པ་ཚངས་པར་སྤྱོད་པའི་ཆ་ལུགས་དང་གཞན་རྣམས་དར་དང་རིན་པོ་ཆེའི་རྒྱན་གྱིས་བརྒྱན་པའོ། །ལྷ་སྣམ་ལ་ནུབ་ནས་བརྩམས་ཏེ་ཕྱོགས་བཞིར། སྒེག་མོ་དཀར་མོ་མེ་ལོང་། ཕྲེང་བ་མ་སེར་མོ་རིན་པོ་ཆེའི་ཕྲེང་བ། གླུ་མ་དམར་མོ་པི་ཝཾ། གར་མ་ལྗང་ཁུ་གར་རྒྱ། །ནུབ་བྱང་ནས་བརྩམས་ཏེ་མཚམས་བཞིར་སྤོས་མ་དཀར་སེར་སྤོས་ཁང་། མེ་ཏོག་མ་དམར་སེར་མེ་ཏོག །མར་མེ་མ་དམར་ལྗང་མར་མེ། དྲི་ཆབ་མ་དཀར་ལྗང་དུར་ཕོར། ཤར་ནས་བརྩམས་ཏེ་སྒོ་བཞིར་ལྕགས་ཀྱུ་མ་དཀར་པོ་ལྕགས་ཀྱུ། ཞགས་པ་མ་སེར་མོ་ཞགས་པ། ལྕགས་སྒྲོག་མ་དམར་མོ་ལྕགས་སྒྲོག །དྲིལ་བུ་མ་ལྗང་གུ་དྲིལ་བུ་བསྣམས་པ། ཐམས་ཅད་ཀྱང་ཞི་ཞིང་འཛུམ་པ་དང་རིན་པོ་ཆེས་བརྒྱན་པ་སྟེ་རྩ་བའི་ལྷ་ཉི་ཤུ་རྩ་གཅིག་གོ །གཞན་ཡང་མགྲོན་ཐབས་ཀྱི་ལྷ་གཙོ་བོ་རིགས་གསུམ་གྱི་འཁོར་དུ། རིགས་ཀྱི་གཙོ་བོ་དེ་བཞིན་གཤེགས་པ་དང་། རིགས་ཀྱི་ཡུམ་དང་། རིགས་ཀྱི་སེམས་དཔའ་དང་། རིགས་ཀྱི་ཕོ་ཉ་ཕྱག་བརྙན་ལ་སོགས་པ་རྣམས་དང་། ལྷ་སྣམ་དང་ཕྱིའི་ཁོར་ཡུག་ལ་དཔའ་བར་འགྲོ་བ་སོགས་སྐལ་བཟང་གི་སེམས་དཔའ་བཅུ་དྲུག །དུས་ལྡན་མ་ལ་སོགས་པ་བཀྲ་ཤིས་ཀྱི་ལྷ་མོ་བརྒྱད། གཞན་ཡང་ཚངས་པ་དང་། དབང་ཕྱུག་དང་། ཁྱབ་འཇུག་སོགས་དཀྱིལ་འཁོར་དུ་འདུ་བར་འོས་པའི་ལྷ་ཐམས་ཅད་ཀྱང་བཞུགས་ཤིང་ཕྱོགས་ཐམས་ཅད་དུ་ཡོངས་སུ་བསྐོར་བར་གྱུར། དེ་ནས་སྤྱན་དྲང་བ་ནི། རང་གི་མདུན་དུ་བྱིན་གྱིས་བརླབས་པའི་མཆོད་ཡོན་དང་། བདུག་སྤོས་འཐུལ་བའི་སྣོད་བཞག །ལག་གཉིས་སྤྱན་འདྲེན་པའི་ཕྱག་རྒྱ་བཅས་ལ། ན་མོ། འཕགས་པའི་ཚོགས་ཐམས་ཅད་གསན་ཅིང་དགོངས་སུ་གསོལ། མཁྱེན་པའི་ཡེ་ཤེས་ཀྱིས་གཟིགས་སུ་གསོལ། དེང་དུས་དྲུག་ལྷའི་ཉི་མ་ཐམས་ཅད་དགེ །བཟའ་སྐར་ཐམས་ཅད་བཀྲ་ཤིས། དགྲ་བཅོམ་པ་ཐམས་ཅད་ཟག་པ་ཟད། སངས་རྒྱས་ཐམས་ཅད་རྫུ་འཕྲུལ་ཆེ་བའི་སྐབས་འདིར། ཕྱོགས་བཅུ་དུས་གསུམ་གྱི་རྒྱལ་བ་འཁོར་དང་བཅས་པ་སྤྱན་འདྲེན་ཞིང་མཆི་ན་གཤེགས་པར་མཛད་དུ་གསོལ་ལོ། །སྟོབས་བཅུའི་རྩལ་མངའ་མི་ཡི་སེང་གེ་གཤེགས། །གཏི་མུག་མུན་སེལ་འཇིག་རྟེན་སྒྲོན་མེ་གཤེགས། །ཉོན་མོངས་ནད་སེལ་སྨན་པའི་རྒྱལ་པོ་གཤེགས། །བདུན་བཞི་ཕམ་མཛད་ཐར་པའི་ལམ་སྟོན་གཤེགས། །དབང་མཆོག་རྒྱལ་པོ་འདིར་བྱོན་ཕྲིན་ལས་མཛོད། །ན་མཿས་མནྟ་བུདྷཱ་ནཱཾ། བུདྷཱ་དྷརྨ་སཾ་གྷ་ཨ་ས་མཻ་ཏྲཱི་ས་མེ་མ་ཧཱ་ས་མ་ཡེ་སྭཱ་ཧཱ། ཞེས་སྙན་གསན་ཕབ་ལ། སྤྱན་དྲང་བའི་ཕྱག་རྒྱ་དེས་མཆོད་ཡོན་བཏེགས་སྤྱི་བོའི་ཐད་ནས་བཟེད་ཞལ་དུ་སྦྲེང་བཞིན་དུ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདས། །རིགས་གསུམ་རྒྱལ་བ་འཁོར་དང་བཅས། །རང་བཞིན་དཀྱིལ་འཁོར་ཆེན་པོ་ནས། །ཏིང་འཛིན་དཀྱིལ་འཁོར་ཆེན་པོ་འདིར། །འགྲོ་བའི་དོན་དུ་སྤྱན་འདྲེན་ན། །བྱིན་གྱིས་རློབ་ཕྱིར་གཤེགས་ནས་ཀྱང་། །བདག་གི་མཆོད་ཡོན་འདི་བཞེས་ལ། །མཆོད་པས་བདག་ལ་དགྱེས་པར་མཛོད། །ༀ་ཛི་ན་ཛིཀ྄་ཝཱ་གཱི་ཤྭ་ར། ཨ་རོ་ལིཀ྄་ལོ་ཀེ་ཤྭ་ར། བཛྲ་དྷྲཱྀ་ཀ྄་བཛྲ་པཱ་ཎི་ས་པ་རི་ཝཱ་ར་ཨེ་ཧྱེ་ཧི་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་པས་མདུན་གྱི་ནམ་མཁར་སྤྱན་དྲངས་ཏེ། གཞལ་ཡས་ཁང་གི་སྒོ་དབྱེ་བ་ནི། ཕྱོགས་བཅུར་རྒྱ་ཡོངས་མ་ཆད་པའི། །རིན་ཆེན་ལྷུན་གྲུབ་གཞལ་ཡས་ཁང་། །དབྱེ་སྡོམ་རྟོག་པ་མི་མངའ་ཡང་། །སྲི་ཞུའི་ཚུལ་དུ་སྒོ་དབྱེའོ། །ༀ་བཛྲ་སྥོ་ཊ་ག་ཏ་ཡེ་སྭཱ་ཧཱ། ཞེས་རྡོ་རྗེ་ནང་བསྡམ་དབྱེ་བའི་རྒྱས་སྒོ་ཕྱེ། དེ་ནས་ནམ་མཁར་བཞུགས་པའི་ལྷ་ལ་བསུ་བའི་མཆོད་ཡོན་སྦྲེང་བཞིན་དུ། བདེ་བར་གཤེགས་སོ་བཅོམ་ལྡན་འདས། །ཚུར་གཤེགས་འདིར་ནི་བཞུགས་སུ་གསོལ། །བདག་གི་མཆོད་ཡོན་བཞེས་ནས་ཀྱང་། །ཐུགས་ལ་དགོངས་ཤིང་གནང་བར་མཛོད། །ༀ་ཨཱ་ཧ་ར་ཨཱ་ཧ་ར་སརྦ་བིདྱཱ་དྷ་ར་པཱུ་ཛ་ག་ག་ན་ས་མ་ཡེ་སྭཱ་ཧཱ། དེ་ནས་ལྷ་རྣམས་གཞལ་ཡས་ཁང་གི་སྒོ་ནས་བྱོན་པ་ལ། ཡེ་ཤེས་རིན་ཆེན་གཞལ་ཡས་སུ། །ཉི་ཟླ་པདྨའི་གདན་འབུལ་གྱི། བདེ་གཤེགས་འཁོར་དང་བཅས་པ་རྣམས། །འགྲོ་བའི་དོན་དུ་བཞུགས་སུ་གསོལ། །ༀ་བཛྲ་ཨཱ་ས་ནི་ཧཱུཾ་ཕཊ། ཅེས་རྡོ་རྗེའི་འདུག་སྟངས་ཀྱི་སྔགས་རྒྱ་སྔར་ལྟར་དང་། ཐལ་མོ་སྦྱར་བ་ཁ་ཕྱེ་ལ། ༀ་ཀ་མ་ལ་ཡེ་སྭཱ་ཧཱ། ཞེས་པདྨའི་འདུག་སྟངས་ཀྱི་སྔགས་རྒྱ་དང་། ཕྱག་རྒྱ་དེ་ཉིད་ལས་སོར་མོ་དབུས་མ་གཉིས་གཅིག་ཏུ་སྦྱར་ལ། ༀ་བཛྲ་ཀ་མ་ལ་ཧཱུཾ་ཕཊ། ཅེས་དཔའ་བོའི་འདུག་སྟངས་ཀྱི་སྔགས་རྒྱས་གདན་ཕུལ་བ་ལ། དམ་ཚིག་པ་དང་གཉིས་མེད་དུ་བཞུགས་པར་བསམ་མོ། །དེ་ནས་མཆོད་པ་གསར་བ་རྣམས་སྔར་ལྟར་བྱིན་གྱིས་བརླབ་ཅིང་རྙིང་པ་རྣམས་ཀྱང་ཁ་གསོས་ལ། ཇི་ལྟར་བལྟམས་པ་ཙམ་གྱིས་ནི། དེ་བཞིན་གཤེགས་ཀུན་བཀྲུས་གྱུར་པ། །དེ་བཞིན་བདག་གིས་ལྷ་རྣམས་ལ། །གཙང་མའི་ཆབ་ཀྱིས་ཁྲུས་གསོལ་ལོ། །ༀ་སརྦ་དེ་བ་ཏ་ཨརྩི་ཏ་ཨ་མྲྀ་ཏ་སྭཱ་ཧཱ། ཞེས་ཁྲུས་གསོལ་ལོ། །དངོས་སུ་ཁྲུས་ཆས་མེད་ན། མཉམ་པའི་ཐལ་མོ་ཁ་ཕྱེ་ལ་མཐེབ་མཛུབ་སྤྲད་པའི་ཕྱག་རྒྱས་སོ། །དེ་ནས་དེ་ལ་ཁ་དོག་སོགས་ཀྱི་རྐང་པ་ལྔ་པ། འཕགས་པ་རྡོ་རྗེ་འཛིན་དང་འཇམ་དཔལ་དབྱངས། །ཞེས་བརྗེས་པས་གོས་རྒྱན་དབུལ། གཙང་ཞིང་གཙང་མ་ལས་བྱུང་བའི། །ལྷ་རྫས་བཟང་པོའི་དྲི་འདི་དག །བདག་གིས་དད་པས་འབུལ་ལགས་ཀྱི། བཞེས་ནས་བདག་ལ་དགྱེས་པར་མཛོད། །ཨཱ་ཧ་ར་ཨ་ཧ་ར་སརྦ་བིདྷྱ་དྷ་ར་པཱུ་ཛི་ཏེ་སྭཱ་ཧཱའི་སྔགས་རྒྱས་དྲི་ཆབ། གཙང་ཞིང་གཙང་མ་ལས་སྐྱེས་པའི། །ལྷ་རྫས་བཟང་པོའི་མེ་ཏོག་འདི། །བདག་གིས་དད་པས༴ བཞེས་ནས་བདག༴ ཨཱ་ཧ་རའི་སྔགས་རྒྱས་མེ་ཏོག །དྲི་ཞིམ་རྒྱས་པ་ལྷ་ཡི་རྫས། །ནགས་ཚལ་བཅུད་ནི་ཡིད་འོང་འདི། །བདག་གིས ༴ བཞེས་ནས༴ ཨཱ་ཧ་རའི་སྔགས་རྒྱས་བདུག་སྤོས། །སྨན་རྣམས་བཅུད་ནི་ཡི་གར་འོང་། །སྔགས་ཀྱི་ཞལ་ཟས་བཤོས་འདི་དག །བདག་གིས༴ བཞེས་ནས༴ ཨཱ་ཧ་རའི་སྔགས་རྒྱས་ཞལ་ཟས། གནོད་རྣམས་འཇོམས་ཤིང་བཀྲ་ཤིས་ལ། །དགེ་ཞིང་མུན་པ་རྣམ་སེལ་འདི། །བདག་གིས༴ བཞེས་ནས༴ ཨཱ་ལོ་ཀཱ་ཡ་ཨཱ་ལོ་ཀཱ་ཡ་སརྦ་བིདྱཱ་དྷ་ར་པཱུ་ཛི་ཏེ་སྭཱ་ཧཱའི་སྔགས་རྒྱས་མར་མེ་དབུལ་ལོ། །དེ་ནས་བསྟོད་པ་ནི། མགོན་པོ་ཐུགས་རྗེ་ཆེ་ལྡན་པ། །ཐམས་ཅད་མཁྱེན་པ་སྟོན་པ་པོ། །བསོད་ནམས་ཡོན་ཏན་རྒྱ་མཚོ་ཞིང་། །དེ་བཞིན་གཤེགས་པ་ཕྱག་འཚལ་ལོ། །དག་པ་འདོད་ཆགས་བྲལ་བའི་རྒྱུ། །དགེ་བས་ངན་སོང་ལས་གྲོལ་བ། །གཅིག་ཏུ་དོན་དམ་མཆོག་གྱུར་པའི། །ཞི་གྱུར་ཆོས་ལ༴ གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ཞིང་། །དགེ་འདུན་ལ་ཡང་༴ གཞོན་ནུའི་སྐུ་ལུས་འཆང་བ་པོ། །ཡེ་ཤེས་སྒྲོན་མེ་རབ་བརྒྱས་ཤིང་། །འཇིག་རྟེན་གསུམ་གྱི་མུན་སེལ་བ། །འཇམ་དཔལ་དབྱངས་ལ༴ སངས་རྒྱས་ཀུན་གྱིས་རབ་ཏུ་བསྔགས། །ཡོན་ཏན་དམ་པ་ཀུན་བསགས་པ། །སྤྱན་རས་གཟིགས་ཞེས་མཚན་གསོལ་བའི། རྟག་པར་བརྩེ་ལ༴ སྟོབས་པོ་ཆེ་ལ་དྲག་ཤུལ་ལྡན། །རིག་སྔགས་རྒྱལ་པོ་དགེ་བ་ཅན། །གདུལ་དཀའ་མཐའ་དག་འདུལ་བ་པོ། །རྡོ་རྗེ་འཛིན་ལ༴ སྦྱངས་སྤེལ་བསྒྱུར་བས་མཆོད་སྦྱིན་གནས། །ཐོབ་ཚིམ་དབང་བྱེད་སྔགས་ཀྱི་ལྷ། །སྣང་མཛད་བདུད་རྩི་རིན་འབྱུང་ཐུབ། །དོན་གྲུབ་ཕྱག་རྡོར་ལ་ཕྱག་འཚལ། །གཟུགས་མཛེས་ཕྲེང་བ་དབྱངས་སྙན་གར། །ཉེར་མཆོད་བཞི་དང་ཕྱག་རྒྱ་བཞིས། །རྒྱལ་བ་ཐམས་ཅད་མཉེས་མཛད་པ། །ལྷ་མོ་བཅུ་གཉིས་ལ༴ བདེ་གཤེགས་པདྨ་རྡོ་རྗེ་ཡི། །རིགས་གྱུར་དེ་བཞིན་གཤེགས་དང་ཡུམ། །རིགས་ཀྱི་སེམས་དཔའ་ཕོ་ཉ་དང་། །ཕྱག་བརྙན་བཅས་པ་ལ་ཕྱག་འཚལ། །ནོར་བུའི་རིགས་དང་གླང་པོའི་རིགས། །ལྔ་རྩེན་རིགས་དང་བ་གླང་གི །རིགས་སུ་གཏོགས་པའི་དཀར་ཕྱོགས་ཀྱི། །འཇིག་རྟེན་སྐྱོང་རྣམས་ལ་ཕྱག་འཚལ། །བསྟོད་པར་འོས་པ་སོགས་དང་། ན་མཿསརྦ་བུདྡྷ་བོ་དྷི་ས་ཏྭ་ནཱཾ་སརྦ་ཏྲ་སཾ་ཀུ་རུ་མི་ཏ་ཨ་བྷི་ཛྙཱ་རཱ་ཤི་ནི་ན་མོ་སྟུ་ཏེ་སྭཱ་ཧཱ། ཞེས་ལན་བརྒྱད་བཟླའོ། །འདིར་གླན་གྱི་ཡིག་རྙིང་དུ་ལྷ་སོ་སོའི་བསྟོད་པ་རྒྱས་པར་འབྱུང་ཞིང་། རིན་ཆེན་ཕྲེང་བ་དེ་ལས་ཅུང་ཟད་བསྡུས་ཏེ་བཀོད་མོད། །འདིར་བྲིས་པ་ནི་ཤིན་ཏུ་བསྡུས་པ་སྟེ། སྤྲོ་ཞིང་ནུས་ན་དེ་གཉིས་གང་རིགས་ལས་བླངས་ན་ལེགས་པར་འགྱུར་རོ། །དེ་ནས་བཟླས་པ་ནི། ཝཱ་གཱི་ཤྭ་ར་དང་། མ་ཎི་དང་། བཛྲ་པཱ་ཎི་གསུམ་པོ་སྟོང་ཕྲག་སོགས་ཇི་ཙམ་ནུས་དང་། གཞན་ཡང་འཇམ་དབྱངས་ལ། ༀ་མཉྫུ་ཤྲཱི་ཀུ་མཱ་ར་མཱུཾ་སྭཱ་ཧཱ། སྤྱན་རས་གཟིགས་ལ། ༀ་ཨ་བ་ལོ་ཀི་ཏེ་ཀཱ་རུ་ཎ་མ་རཾ་ཧཱུཾ་ཛཿ སྭཱ་ཧཱ། ཕྱག་རྡོར་ལ། ༀ་བཛྲ་ཙཎྜ་མ་ཧཱ་རོ་ཥ་ཎ་ཧཱུཾ་སྭཱ་ཧཱ། ཞེས་དང་། སྦྱང་བསྒྱུར་སོགས་དྲུག་དང་ལྷ་མོ་བཅུ་གཉིས་ཀྱི་སྔགས་རྣམས་ཉེར་གཅིག་ཙམ་རེ་དང་། །ཛི་ན་ཛི་ཀ྄ །ཨ་རོ་ལིཀ྄ །བཛྲ་དྷྲྀཀ྄ །གསུམ་ཡང་བརྒྱ་རྩ་རེ་བཟླ་སྟེ། བསྡུ་ན་དེ་ཙམ་གྱིས་ཆོག །ཡང་སྤྲོ་ཞིང་ནུས་ན་མགྲོན་ཐབས་ཀྱི་ལྷ་རྣམས་ཀྱི་སྔགས་ཀྱང་བདུན་ཙམ་རེ་བཟླ་སྟེ། ན་མཿས་མནྟ་བུདྡྷཱ་ནཱཾ་བཻ་རོ་ཙ་ན་ༀ་སཱ་ཧཱ། རྣམ་སྣང་། ཨ་མི་དྷེ་བ་ཧྲཱིཿསྭཱ་ཧཱ། སྣང་མཐའ། བཛྲ་ཨཀྵོ་བྷྱཿ ཧཱུཾ་སྭཱ་ཧཱ། མི་བསྐྱོད་པ། ༀ་རུ་རུ་སྤུ་རུ་ཛྭ་ལ་ཏི་ཥྛ་སིདྡྷི་ལོ་ཙན་ན་སྭཱ་ཧཱ། སྤྱན་མ། ༀ་པཎྜ་ལི་ཀི་ཏ་རཾ་པ་སྭཱ་ཧཱ། གོས་དཀར་མོ། ༀ་སུག་སྨེ་ཛྙཱ་ན་ཛཿཧཱུཾ་སྭཱ་ཧཱ། མཱ་མ་ཀཱི །ༀ་མ་ཧཱ་ཤྲཱི་ཡེ་ཙི་རི་མི་རི་ཡེ་སྭཱ་ཧཱ། དཔལ་གྱི་ལྷ་མོ། ༀ་ཏྲག་ས་རི་ཏེ་ཏེ་ཤན་ཏེ་ཤེན་སྭཱ་ཧཱ། གྲགས་ལྡན་མ། ན་མཿས་མནྟ་བཛྲ་ཎཱཾ་སརྦ་དྷརྨཱ་ནི་སེ་ཏ་ནི་བཛྲ་སི་པ་ར་ནི་སྭཱ་ཧཱ། སྟོབས་ཆེན་མོ། བཛྲ་ཏ་བཛྲ་པྲ་བྷ་ཏེ་སྭཱ་ཧཱ། རིག་སྔགས་མཛོད་སྤྲུལ་མ། བནྡྷ་བནྡྷ་མོ་ཧ་ཡ་མོ་ཧ་ཡ་བཛྲོ་དྡྷཱ་ཡེ་སྭཱ་ཧཱ། ལུ་གུ་རྒྱུད། ༀ་ཛྭ་ལ་ཛྭ་ལ་སྭཱ་ཧཱ། རྣམ་རྒྱལ་མ། ༀ་བཛྲ་ཡཀྵ་ཀྲོ་དྷ་ཧཱུཾ་ཕཊ། གཤིན་རྗེ་གཤེད། ༀ་ཁདྒ་བནྡྷ་སྥོ་ཊ་ཡ་སྭཱ་ཧཱ། རྟ་མགྲིན། །ༀ་ཨ་མྲྀ་ཏེ་ཧ་ན་ཧ་ན་བི་དུ་ན་བི་དུ་ན་གོ་ས་ཁ་ཨ་མྲྀ་ཏེ་མ་ཁ་སྭཱ་ཧཱ། བདུད་རྩི་ཐབ་སྦྱོར། ༀ་བྲཧྨ་ཎེ་སྭཱ་ཧཱ། ཚངས་པ། ཨོཾ་ག་ཎ་པ་ཏི་སྭཱ་ཧཱ། ལྷ་ཆེན། ༀ་བིཥྞ་བེ་སྭཱ་ཧཱ། ཁྱབ་འཇུག་གི་སྔགས་སོ། །དེ་ནས་བུམ་པ་ལ་གཟུངས་ཐག་གཏད་དེ་རྣམས་བུམ་དུ་རིགས་གསུམ་དང་། ལས་བུམ་དུ། ཏྲཻ་ལོ་ཀྱ་དང་། ཨ་མྲྀ་ཏེ། གཉིས་ཀ་ལ། ཨ་བྷི་ཥེ་ཀ་སྟ་གོན་གྱི་སྐབས་ལྟར་བཟླ་ཞིང་བུམ་ཆུ་ནུས་ལྡན་དུ་གྱུར་པར་བསམ་མོ། །དེ་ནས་ཐལ་མོ་བཀན་པ་ལས་མཛུབ་རྩེ་བཀུག་སྟེ། ཛི་ན་ཛིཀ྄ །ཐལ་སྦྱར་པདྨ་ཁ་ཕྱེ་བ་ལྟར་བཅས་ཏེ། ཨ་རོ་ལིཀ྄ །ཐལ་མོ་ལྡོག་སྟེ་སྦྱར་ལ་མཐེ་བོང་དང་མཐེའུ་ཆུང་གཉིས་སྦྱར་ལ། བཛྲ་དྷྲཱྀཀ྄ །ཅེས་སྔ་རྒྱ་རྣམས་ལན་གསུམ་གསུམ་གྱིས་རྒྱས་བཏབ་ཅིང་། ཤེར་སྙིང་ལྟ་བུའི་མདོ་ཅུང་ཟད་ཀླག་གོ། །དེ་ནས་གཏོར་མ་བཏང་ཞིང་དབང་བསྐུར་བ་ནི། འདས་གཏོར་དང་ཆ་གསུམ་གཏོར་མ་སྔར་བཞིན་དང་། དབང་ཆོག་ལྟར་སློབ་དཔོན་འཇུག་ཅིང་སློབ་མ་ལ་དབང་བསྐུར་བར་བྱའོ། །དེ་ནས་རྗེས་ཆོག་ནི། མཆོད་པ་ཁ་གསོས་ཏེ་བྱིན་གྱིས་བརླབས་ནས། དྲི་སོགས་མཆོད་པ་ལྔ་སྔགས་རྒྱ་ཙམ་གྱིས་ཕུལ་ནས། བླ་མ་དང་དཀྱིལ་འཁོར་གྱི་ལྷ་ཚོགས་ཐམས་ཅད་བདག་ལ་དགོངས་སུ་གསོལ། ཁྱེད་རྣམ་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས་བསམ་གྱིས་མི་ཁྱབ་པ་མངའ་བ་ལགས་པས། སྤྱིར་སངས་རྒྱས་ཀྱི་བསྟན་པ་དར་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་ཐམས་ཅད་སྐུ་ཚེ་བརྟན་ཞིང་ཐུགས་ཀྱི་བཞེད་པའི་དོན་ལྷུན་གྱིས་གྲུབ་པ་དང་། བདག་དང་སེམས་ཅན་ཐམས་ཅད་བདེ་ཞིང་སྐྱིད་པར་བྱིན་གྱིས་བརླབ་ཏུ་གསོལ། ཁྱད་པར་དུའང་བདག་དང་མཁའ་མཉམ་གྱི་སེམས་ཅན་ཐམས་ཅད་ལ་རང་རང་གི་སྐལ་བ་དང་འཚམས་པའི་ཕྲིན་ལས་རྣམ་པ་གསུམ་དང་། དངོས་གྲུབ་རྣམ་པ་གསུམ་དང་། བྱང་ཆུབ་རྣམ་པ་གསུམ་གྱི་བཀའ་དྲིན་སྩལ་ནས། མཐར་ཐུག་ཐམས་ཅད་ཀྱང་རྣམ་པ་ཐམས་ཅད་མཁྱེན་པའི་སངས་རྒྱས་ཀྱི་ས་ལ་འཇོག་པར་མཛད་དུ་གསོལ། ཞེས་གསོལ་བ་བཏབ། ཡིག་བརྒྱ་བཟླ་ཞིང་། མ་རྙེད་ཡོགས་སུ་སོགས་ཀྱིས་བཟོད་པར་གསོལ། དཀྱིལ་འཁོར་མི་གཤེགས་ན། འདིར་ནི་གཟུགས་དང་སོགས་ཀྱིས་བརྟན་བཞུགས་བྱ། གཤེགས་ན་མཆོད་ཡོན་ཕུལ་ལ། ༀ། ཁྱེད་ཀྱིས་སེམས་ཅན་དོན་ཀུན་མཛད། སོགས་ཀྱི་མཐར་གཤེགས་སུ་གསོལ་བའི་རྒྱ་བཅས་ལ། ༀ་ཝཱ་གཱི་ཤྭ་ར་ལོ་ཀེ་ཤྭ་ར་བཛྲ་པཱ་ཎི་གཙྪ། ཞེས་སེ་གོལ་དང་བཅས་ཏེ་ཕྱག་རྒྱ་གྱེན་དུ་བཀྲོལ་བས། སྤྱན་དྲངས་པའི་ལྷ་གཞལ་ཡས་ཁང་དང་བཅས་པ་གཤེགས། སྔགས་ཀྱི་སྤྲུལ་པའི་ལྷ་དམ་ཚིག་པ་རྣམས་རིམ་གྱིས་བདག་ལ་ཐིམ། བདག་གི་ལྷའི་སྐུ་གཟུགས་ཟླ་བའི་སྟེང་གི་སྔགས་ཕྲེང་ལ་ཐིམ། དེ་ཟླ་བ་ལ། དེ་རྣམ་སྨིན་གྱི་ལུས་ལ་ཐིམ་པར་གྱུར། གཡོན་པའི་ཐལ་མོ་གན་རྒྱལ་གྱི་སྟེང་དུ་གཡས་པའི་རྒྱབ་སྦྱར་སོར་མོ་རྣམས་བསྣོལ་བའི་རྩེ་མོ་བཀུག་སྟེ་རྩ་བའི་ཕྱོགས་སུ་བསྟན་པ་གཡོན་དུ་བསྐོར་བཞིན་དུ། ༀ་ཧུ་ལུ་ཧུ་ལུ་ཙཎྜ་ལི་མ་ཏཾ་གི་སྭཱ་ཧཱ། ཞེས་པའི་སྔགས་རྒྱས་མཚམས་བཅིངས་པ་རྣམས་དགྲོལ་བར་བྱའོ། །དེ་ནས་བསྔོ་སྨོན་ནི། བདག་གི་དགེ་བའི་ལས་རྣམས་འདི་དག་གིས། འཇིག་རྟེན་དུ་ནི་མྱུར་དུ་འཚང་རྒྱ་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང་། སྡུག་བསྔལ་གྱིས་གཟིར་སེམས་ཅན་སྒྲོལ་བར་ཤོག །ཅེས་སོགས་རྒྱ་ཆེར་གདབ་བོ། །དེ་ནས་བཀྲ་ཤིས་ནི། བཅོམ་ལྡན་གསེར་མདོག་རི་ཡི་རྒྱལ་པོ་འདྲ། །འཇིག་རྟེན་གསུམ་མགོན་འཇམ་དཔལ་དབྱངས་ཀྱི་སྐུ། །བདེ་གཤེགས་སྐུ་ཡི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །བཅོམ་ལྡན་དངུལ་མདོག་རི་ཡི༴ འཇིག་རྟེན་གསུམ་མགོན་སྤྱན་རས་གཟིགས་ཀྱི་གསུང་། །བདེ་གཤེགས་གསུང་གི་བཀྲ་ཤིས༴ བཀྲ་ཤིས་དེས་ཀྱང་༴ བཅོམ་ལྡན་མཐིང་མདོག༴ འཇིག་རྟེན་གསུམ་མགོན་ཕྱག་ན་རྡོ་རྗེའི་ཐུགས། །བདེ་གཤེགས་ཐུགས་ཀྱི༴ བཀྲ་ཤིས་དེས་ཀྱང་༴ ཤར་ལྷོ་ནུབ་བྱང་དཔལ་བེ་འཁོར་ལོ་དང་། །པདྨ་རྒྱལ་མཚན་གདུགས་བུམ་དུང་དང་ཉ། །ལྷ་མོ་བརྒྱད་ཀྱི་བཀྲ་ཤིས་གང་ལགས་པ། །བཀྲ་ཤིས་དེས་ཀྱང་དེང་འདིར་བདེ་ལེགས་ཤོག །ཅེས་བརྗོད་ཅིང་རོལ་མོའི་སྒྲ་དང་བཅས་པས་མེ་ཏོག་འཐོར། དེ་རྗེས་ཤེར་སྙིང་གི་མདོ་ཚར་གཅིག་ཀློག་གོ། །འདིར་ཀྲི་ཡའི་དཀྱིལ་འཁོར་ལ། རིགས་གསུམ་སོ་སོ་ལ་སྦྱར་བ འི་ལྷ་སོགས་དྲུག་གིས་བསྐོར་བ་ལྷ་བདུན་མའི་དཀྱིལ་འཁོར་གསུམ། གཙོ་བོ་རྣམ་སྣང་། དཔག་མེད། མི་བསྐྱོད་པ་གསུམ་ལ། གཡས་སུ་སོ་སོའི་རིགས་བདག། མདུན་དུ་ཡུམ། གཡོན་དུ་ཁྲོ་བོ། རྒྱབ་ཏུ་ཕོ་ཉ་སྟེ་ལྷ་ལྔ་མ་གསུམ་གྱི་ལྷ་སྣམ་ལ་ཁྲོ་བཅུ་བཀོད་པ་ལྷ་བཅོ་ལྔ་མའི་དཀྱིལ་འཁོར་གསུམ། དེའི་སྟེང་དུ་སྒེག་སོགས་བཅུ་གཉིས་བསྣན་པས་ཉེར་བདུན་མ་གསུམ། ཡང་ན་སེམས་དཔའ་བཅུ་དྲུག་བསྣན་པ་སོགས་དང་། འགའ་ཞིག་གཙོ་བོ་རྣམ་འཇོམས་ཀྱིས་བྱས་པ་སོགས་བཞེད་སྲོལ་མང་ནའང་། ལྷའི་གྲངས་དེ་དག་ནི་བདེ་བ་གསལ་མཛད་ཀྱི་ལས་ཐོར། རིགས་གསུམ་ཉི་ཤུ་རྩ་གཅིག་དང་། ཞེས་པ་དང་འགལ་ཞིང་། ཡང་རྣམ་སྣང་སོགས་ཀྱི་གཙོ་བྱས་པའི་ལྷ་ལྔ་མ་གསུམ་དཀྱིལ་འཁོར་གཅིག་ཏུ་བསྡུས་པའི་བཅོ་ལྔའི་སྟེང་དུ་སྦྱང་བའི་ལྷ་སོགས་དྲུག་བསྣན་ན་གནད་འདུས་པ་ལྟར་སྣང་ཡང་། སྔོན་གྱི་མཁས་པ་ལུགས་འདི་ལ་ཚད་མར་གྱུར་པ། རྣམས་ཀྱིས། གཙོ་བོའི་རིགས་གསུམ་རྣམ་སྣང་སོགས་རིགས་ཀྱི་གཙོ་བོ་ལ་མ་མཛད་པར། འཇམ་དབྱངས་སོགས་རིགས་ཀྱི་བདག་པོ་ལ་ངོས་བཟུང་ཞིང་། ལམ་ཁྱེར་གྱི་དུས་སུ་སྔགས་ཀྱང་ཝཱ་གཱི་ཤྭ་རི་སོགས་འབྱུང་བས་ན་འདིར་བཀོད་པ་ཉིད་མན་ངག་གི་གནད་དང་འབྱོར་བ་ཡིན་ནོ། །བླ་མའི་གསུམ་ངག་བདུད་རྩིའི་བཅུད། །ཤེས་རབ་དབང་པོས་མྱངས་པའི་མཐུས། །རང་གཞུང་རྣམ་དག་སྟོན་པའི་ཆོས། །སྐལ་བཟང་རེ་བའི་དཔལ་དུ་སྦྱིན། །བྱ་སྤྱོད་ཐུན་མོང་གི་ཐེག་པའི་སྒྲུབ་ཐབས་ཀྱི་ལེ་ཚན་ནོ།། །།

༈ ༀ་སྭ་སྟི། གདོད་ནས་མི་འགྱུར་ཆོས་དབྱིངས་ཀློང་། །ཐོགས་མེད་ཡེ་ཤེས་རྡོ་རྗེའི་རྩལ། །རིགས་ལྔར་སྟོན་མཛད་བླ་མ་ལ། །ཕྱག་བྱས་ཡོ་གའི་སྒྲུབ་ཐབས་བཤད། །ཡན་ལག་གི་དཀྱིལ་འཁོར་དྲུག་པ་ཡོ་ག་ལ། ཐོག་མར་ལྷ་སྟ་གོན་ནི། ལྷ་གནས་ངེས་པའི་ཕྱིར་སྐྱ་ཐིག་བཏབ་ཅིང་། མཆོད་གཏོར་རྒྱས་པར་བཤམས་ལ། སྔོན་གཏོར་ཡཀྵ་དང་མེའི་སྔགས་རྒྱས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་ༀ་ལས་རིན་པོ་ཆེའི་སྣོད་དུ་ༀ་ཡིག་ཞུ་བ་ལས་བྱུང་བའི་གཏོར་རྫས་རྣམས་འདོད་ཡོན་བདུད་རྩིའི་ཕུང་པོ་ཟད་མི་ཤེས་པར་བསམ་ལ། ཨ་ཀཱ་རོ་བརྗོད་པས་བརླབ། བྷཱུ་མི་པ་ཏི་ས་པ་རི་ཝཱ་ར་ན་མཿསརྦ་ཏ་ཐཱ་ག་ཏེ་བྷྱོ་ནས། ག་ན་ཁཾ་བ་ལིངྟ་སྭཱ་ཧཱས་ཕུལ། གང་དག་འདིར་གནས་ལྷ་དང་ཀླུ། སོགས་ཀྱི་མཐར། ཡཀྵས་ནག་ཕྱོགས་རྣམས་བསྐྲད། དེ་ནས། ༀ་བཛྲ་ས་ཏྭ་ཧཱུཾ་གིས་རང་རྡོར་སེམས་སུ་བསྐྱེད་ནས་མཆོད་པ་སྔར་ལྟར་བསང་སྦྱངས། སྟོང་པའི་ངང་ལས་བྷྲཱུཾ་ལས་རིན་པོ་ཆེའི་གཞལ་ཡས་ཁང་མཚན་ཉིད་རྫོགས་པའི་ཕྱི་ནང་ཀུན་ཏུ་ༀ་ལས་རིན་པོ་ཆེའི་སྣོད་དུ་ༀ་ཡིག་ཞུ་བ་ལས་བྱུང་བའི་མཆོད་རྫས་རྣམས་ཀུན་ཏུ་བཟང་པོའི་མཆོད་པའི་སྤྲིན་ཕུང་ལྟར་བཟང་ཞིང་རྒྱ་ཆེ་བ་ནམ་མཁའི་མཐའ་ཀླས་པར་གྱུར། ཧཱུཾ། ཙནྡན་ཆུ་ལ་བདེན་པ་བརྡར་བ་ཡིས། །ཕྱོགས་བཅུར་གཏོར་བས་ཡོངས་སུ་དག་གྱུར་ཏེ། མི་བཙང་དྲི་མའི་ཚོགས་རྣམས་དག་གྱུར་ནས། །དྲི་མེད་ཡོན་ཏན་དག་དང་ལྡན་གྱུ་ཅིག །ༀ་སརྦ་བི་ཤོདྷ་ནི་ཧཱུཾ་ཧྲཱིཿ ཋཱ། ༀ་བཛྲ་པུཥྤེ་ཧཱུཾ། དེ་བཞིན་དུ། དྷཱུ་པེ། ཨཱ་ལོ་ཀེ །གནྡྷེ། ནཻ་ཝི་དྱེ། ཤཔྡ་རྣམས་ལན་གསུམ་གསུམ། དེ་ནས་སྐྱབས་འགྲོ་ནས་བཟུང་བདག་གི་རྣལ་འབྱོར་རྫོགས་པར་བྱས་ལ། དཀྱིལ་འཁོར་གྱི་གཞི་ཡཀྵས་བསང་། ཤཱུ་ནྱ་ཏཱས་སྦྱངས། སྟོང་པའི་ངང་ལས་སྲུང་བའི་འཁོར་ལོ་ཡངས་ཤིང་རྒྱ་ཆེ་བའི་ནང་འབྱུང་བཞི་རི་རབ་དང་བཅས་པའི་སྟེང་དུ་གཞལ་ཡས་ཁང་གྲུ་བཞི་སྒོ་བཞི་པ་ཉིས་རིམ་མཚན་ཉིད་ཡོངས་སུ་རྫོགས་པའི་ལྟེ་བ་ལིང་ཚེ་དགུའི་དབུས་དང་ཕྱོགས་བཞིར་འཁོར་ལོ་རྩིབས་བཞི་པ་རེ་རེ། ལྷ་གནས་ཀུན་ཏུ་སོ་སོའི་གདན་རྣམས་གསལ་བར་གྱུར། དེ་ནས་སོ་སོའི་གནས་སུ་རང་སྔགས་བདུན་རེ་བརྗོད་ཅིང་དྲིའི་ཐིག་ལེ་མེ་ཏོག་གི་ཚོམ་བུ་དང་བཅས་པ་བྱས་ལ། དབུས་ཀྱི་གདན་ལ་ༀ་ལས་བཅོམ་ལྡན་འདས་རྣམ་པར་སྣང་མཛད་སེར་པོ་ཀུན་ཏུ་ཞལ་བྱང་ཆུབ་མཆོག་གི་ཕྱག་རྒྱ་ཅན་རྩིབས་བཞིར་སྦས་ཡུམ་བཞི་ཕྱོགས་ཀྱི་ལིང་ཚེ་བཞིའི་ལྟེ་བའི་གདན་ལ་ཤར་དུ་ཧཱུཾ་ལས་མི་བསྐྱོད་པ། ལྷོར་ཏྲཱཾ་ལས་རིན་འབྱུང་། ནུབ་ཏུ་ཧྲཱིཿལས་སྣང་མཐའ། །བྱང་དུ་ཨཱཿལས་དོན་གྲུབ། སོ་སོའི་རྩིབས་ལ་རང་རིགས་ཀྱི་སེམས་དཔའ་བཞི་བཞིས་བསྐོར་བ། མཚམས་ཀྱི་ལིང་ཚེ་དང་། གྲྭ་བཞི་དང་སྒོ་རྣམས་སུ་སྒེག་སོགས་བཅུ་གཉིས་གཞལ་ཡས་ཁང་ཕྱི་མའི་སྣམ་བུའི་ཕྱོགས་རེར་བྱང་ཆུབ་སེམས་དཔའ་བཞི་བཞི་སྟེ་བཅུ་དྲུག་རྣམས་གསལ་བར་གྱུར། ཡེ་ཤེས་པ། མ་ལུས་སེམས་ཅན་གྱིས་སྤྱན་དྲངས། །ཛཿཧཱུཾ་བཾ་ཧོཿས་གཉིས་མེད་དུ་བྱས་པ་ལ། ༀ་སརྦ་ཏ་ཏཱ་ག་ཏ་པུཥྤེ་པཱུ་ཛ་མེ་གྷ་སོགས་ནས། ཤཔྡའི་བར་གྱིས་མཆོད། དེ་ནས་བུམ་པ་སྟ་གོན་ནི། སྤྱིར་དཀྱིལ་འཁོར་གྱི་སྒོ་དྲུག་དུ་ཁྲུས་བྱེད་པ་འཇུག་སྒོའི་བུམ་པ་དང་། གཙོ་བོའི་རྣམ་རྒྱལ། ལྷ་སོ་སོའི་ལྷ་བུམ། ལས་བུམ། མཆོད་པའི་གར་བུམ་སྟེ་ལྔའམ། ལྷ་བུམ་རྣམ་རྒྱལ་ལ་བསྡུས་ཏེ་བཞི་བཤད་ནའང་འགྲུབ་དཀའ་བས། འདིར་རྣམ་རྒྱལ་དང་ལས་བུམ་གཉིས་སུ་བསྡུས་ཏེ། བུམ་པ་གཉིས་ཀ་ལྷའི་མཚན་མ་ཅན་མགུལ་ཆིངས་ཁ་རྒྱན་སོགས་ཆས་སུ་བཅུག་པའི་ནང་དུ་སྨན་ལྔ། འབྲུ་ལྔ། རིན་ཆེན་ལྔ། དྲི་ལྔ་རྣམས་སྤོས་ཆུ་དང་སྦྱར་བས་བཀང་བའི་སྟེང་དུ་གཟུངས་རྡོར་བཞག །བསང་སྦྱངས། སྟོང་པའི་ངང་ལས་པད་ཟླའི་སྟེང་དུ་བྷྲཱུཾ་ལས་བུམ་པ་མཚན་ཉིད་ཐམས་ཅད་ཡོངས་སུ་རྫོགས་པའི་རྣམ་རྒྱལ་བུམ་པའི་ནང་དུ་དཀྱིལ་འཁོར་གྱི་ལྷ་ཡོངས་སུ་རྫོགས་པ་དང་། ལས་བུམ་དུ་རྡོ་རྗེ་གནོད་སྦྱིན་རྣམས་གསལ་བར་གྱུར། ཡེ་ཤེས་པ། བཛྲ་ས་མཱ་ཛཿས་སྤྱན་དྲངས། ཛཿཧ྄ཱུཾ་བཾ་ཧོཿས་བསྟིམ། མེ་ཏོག་ལ་སོགས་པས་མཆོད་ནས། གཟུངས་ཐག་ལ་འཇུལ་ཏེ། གཙོ་བུམ་དུ། ༀ་བུདྡྷཱ་བཻ་རོ་ཙ་ན་སོགས་དཀྱིལ་འཁོར་གྱི་ལྷའི་སྔགས་རྣམས་དང་། ལས་བུམ་ལ། བཛྲ་ཡཀྵ། ཐུན་མོང་དུ། ཨ་བྷི་ཥེ་ཀའང་ཅི་རིགས་བཟླས་མཐར་མེ་ཏོག་སོགས་ཀྱིས་མཆོད་དེ། ཡེ་ཤེས་པ་གཤེགས། མཆོད་ཡོན་ཕུལ་བས་དམ་ཚིག་པ་བུམ་ཆུར་གྱུར་པར་མོས་ལ། ཡིག་བརྒྱས་བརྟན་པར་བྱ་ཞིང་། བདུག་སྤོས་གྱིས་ཀྱང་བདུག་གོ །དེ་ནས་ཆ་གསུམ་གཏོར་མ་བཏང་ལ། སློབ་མ་སྟ་གོན་ནི། སློབ་མ་རྣམས་ཁྲུས་བྱས། །གྲལ་དུ་འཁོད། མཎྜལ་ཕུལ། གསོལ་བ་གདབ་པ་ནི། རྡོ་རྗེ་དབྱིངས་གཙོ་ཁྱོད་ལ་འདུད། །ཐར་པ་ཆེན་པོ་བདག་འདོད་དེ། །དེ་ཉིད་དབང་དང་དམ་ཚིག་དང་། །མགོན་པོ་དཔའ་བོར་སྐྱབས་སོང་ཞིང་། །ཐེག་ཆེན་ཁང་པར་གཞུག་པ་དང་། །མཁྱེན་རབ་ཡེ་ཤེས་བདག་ལ་སྩོལ། །ཞེས་ལན་གསུམ། དེ་ནས་རྒྱུན་བཤགས་སྔོན་དུ་འགྲོ་བ་ཅན་གྱི་བྱང་ཆུབ་མཆོག་ཏུ་སེམས་བསྐྱེད་པ་ནི། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆིས། །རང་གཞན་དོན་གཉིས་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱིས། །བྱང་ཆུབ་མཆོག་གི་སེསམ་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གི་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གསུམ། ས་མ་ཡ་ཨ། ཞེས་བརྗོད་པས། སློབ་མའི་སྙིང་གར་ཟླ་བའི་དཀྱིལ་འཁོར་ཉ་གང་བ། དེའི་སྟེར་དུ་ཧཱུཾ་ལས་རྡོ་རྗེ་དཀར་པོ་རྩེ་ལྔ་པ་གསལ་བར་མོས་ལ། ༀ་སརྦ་ཡོ་ག་ཙིཏྟ་ཨུཏྤ་ད་ཡཱ་མི། ཞེས་བརྗོད་དུ་གཞུག །རྡོ་རྗེ་རྩེ་ལྔ་པས་དངོས་སུ་རེག་ཅིང་། སུ་ར་ཏེ་ས་མ་ཡ་སྟྭཾ་ཧོ་སིདྡྷི་བཛྲ་ཡ་ཐཱ་སུ་ཁཾ། ཞེས་སེམས་བསྐྱེད། དེ་ནས་ལས་བུམ་གྱི་ཆུས་བསང་གཏོར་བྱས་ལ། ༀ་བཛྲ་སཏྭ། ཞེས་པས། སློབ་མ་རྡོ་རྗེ་སེམས་དཔར་གསལ་བའི་སྙིང་གར་ཧཱུཾ་ལས་རྡོ་རྗེ། དཔྲལ་བར་ཏྲཱཾ་ལས་རིན་པོ་ཆེ། ལྐོག་མར་ཧྲཱིཿལས་པདྨ། སྤྱི་བོར་ཀཾ་ལས་སྣ་ཚོགས་དེ་རྡོ་རྗེ་རྣམས་བསྒོམས་པས་བྱིན་གྱིས་བརླབས་ལ། དྲི་ཆབ། མེ་ཏོག །བདུག་སྤོས། མར་མེ་རྣམས། ༀ་བཛྲ་གནྡྷེ་སོགས་ཀྱིས་སྦྱིན་པར་བྱའོ། །དེ་ནས་སོ་ཤིང་ཚད་ལྡན། བཛྲ་ས་ཏྭ་བདུན་བཟླས་པས་བྱིན་གྱིས་བརླབས་ནས་ཐལ་མོའི་བར་དུ་སྦྱིན་པ་རྩ་བ་འོག་ཏུ་བསྟན་ལ་དྲིའི་མཎྜལ་གྱི་དབུས་སུ། བཛྲ་ཧ་ས་ཧས་དོར་དུ་བཅུག་ལ་དངོས་གྲུབ་ཀྱི་ལྟས་བརྟག །རྨི་ལམ་གསལ་བའི་ཕྱིར་ཁྱོར་ཆུ། ཧྲཱིཿབི་ཤུདྡྷ་སྭཱ་ཧཱས་ལན་གསུམ་བླུད། བར་ཆད་བསྲུང་ཕྱིར་སྐུད་པ་སུམ་སྒྲིལ་མདུད་པ་གསུམ་པ་ཉིས་བསྐོར་གྱིས་དཔུང་པ་གཡོན་པར་བཅིངས་ཏེ། བསང་ཆུ་དང་བཅས་པའི་རྡོ་རྗེ་རྒྱ་གྲམ་དུ་རེག་ཅིང་། བཛྲ་རཀྵཿབཟླས་པས་བསྲུང་། རྨི་ལམ་མི་འཁྲུག་པའི་ཕྱིར། དྷྲཱི་བཟླས་པའི་ཀུ་ཤ་ཆེ་ཆུང་སྟན་དང་སྔས་ཀྱི་དོན་དུ་སྦྱིན་ནས། ཆོས་བཤད་པ་ནི། འཇིག་རྟེན་དུ་ནི་ཀུན་མཁྱེན་དག །ཨུ་དུ་མྺ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་སེམས་ཅན་མཉམ་མེད་དོན། །བླ་མེད་བྱེད་པར་ནུས་པ་ཡིན། །བསྐལ་པ་བྱེ་བ་དུ་མ་རུ། །སྔོན་དུ་སྡིག་པ་བྱས་པ་གང་། །དཀྱིལ་འཁོར་འདི་འདྲ་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །གང་གིས་སྤྱོད་པའི་མཆོག་འདི་ལ། །བློ་གྲོས་ཤིན་ཏུ་མི་གཡོ་ན། །སྡུག་བསྔལ་ཐམས་ཅད་འབྱུང་བ་ཡི། །ངན་འགྲོ་དེ་ཡིས་གཅོད་པར་འགྱུར། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པའི། །བདག་ཉིད་ཆེན་པོ་ཀུན་གྱི་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་དུ། །སང་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་འདིར་ནི་དོང་བས་ན། །རང་བྱུང་སྐལ་པ་ཆེན་པོ་པ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་ཉིད་དུ་འགྱུར། །ཞེས་བརྗོད་ཅིང་དོན་བཤད་ནས། བུ་ཀྱེ་སང་ནི་དཀྱིལ་འཁོར་མཆོག །མཐོང་བར་འགྱུར་རོ་ཉོལ་ཞིག་དང་། །རྨི་ལམ་མཐོང་བ་གང་ཡིན་པ། །དེ་ཀུན་ང་ལ་ལེགས་པར་སྨྲོས། །ཞེས་གདམས་ལ་རང་གནས་སུ་བཏང་ངོ་། །དེ་ནས་ལྷ་སྟ་གོན་གྱི་འཕྲོས་སྙན་གསན་དབབ་པ་ནི། པུས་བཙུགས་ཀྱིས་འདུག་ལ་སྤོས་འཐུལ་ཞིང་དྲིལ་བུ་འཁྲོལ་བས། རྣམ་པར་སྣང་མཛད་བཅོམ་ལྡན་འདས། །རིག་སྔགས་རྒྱལ་ལ་ཕྱག་འཚལ་ལོ། །བདག་ནི་བརྩེ་བར་གྱུར་ནས་སུ། །སློབ་མ་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །སང་ནི་དཀྱིལ་འཁོར་བྲི་བར་འཚལ། །བཅོམ་ལྡན་བདག་ནི་གུས་པ་ལ། །དེ་བས་སྣང་བ་མཛད་པའི་རིགས། །སངས་རྒྱས་འཇིག་རྟེན་མགོན་བརྩེ་དང་། །བྱང་ཆུབ་སེམས་དཔའ་དགྲ་བཅོམ་དང་། །གསང་སྔགས་ལྷ་གཞན་གང་ལགས་དང་། །འཇིག་རྟེན་སྐྱོང་བའི་ལྷ་རྣམས་དང་། །གང་ཡང་འབྱུང་པོ་མཐུ་ཆེན་དང་། །གང་དུ་ལྷ་ཡི་སྤྱན་མངའ་བ། །སེམས་ཅན་དོན་ལ་དགའ་བ་རྣམས། །བདག་ལ་དགོངས་པར་མཛད་དུ་གསོལ། །བདག་མིང་འདི་ཞེས་བགྱི་བ་ཡིས། །སང་ནི་དཀྱིལ་འཁོར་བཟང་པོའི་མིང་། །རྡོ་རྗེ་དབྱིངས་ནི་ཅི་ནུས་ཀྱིས། །ཆོ་ག་བཞིན་དུ་བྲི་ལགས་ན། །བདག་དང་སློབ་མར་བཅས་པ་རྣམས། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་རློབ་པར་མཛད་དུ་གསོལ། །ཞེས་སྙན་གསན་ཕབ་ལ། བཛྲཱོ་ཏྟཥྛི། ཞེས་དཀྱིལ་འཁོར་ནམ་མཁར་བཏེག་པ་ལ་མཆོད་བསྟོད་བྱས་ནས། ཚོན་རྩི་ཁ་དོག་ལྔ་ལ་ༀ་ཧཱུཾ་ཏྲཱཾ་ཧྲཱིཿ ཨཱཿ བྲིས་ལ། རང་གི་མདུན་དུ་དབུས་སུ་སེར་པོ་དང་ཤར་དུ་དཀར་པོ་སོགས་རིགས་ལྔའི་བཞུགས་ཚུལ་ལྟར་བཞག་ཅིང་། ཐིག་སྐུད་ཁ་དོག་ལྔ་ཡང་རིགས་འགྲེའི་ཚོན་གྱི་སྟེང་དུ་བཀོད་ནས། ཐིག་ཚོན་རྣམས་གཉུག་མའི་ཡི་གེ་ༀ་ཧཱུཾ་ཏྲཱཾ྄་ཧྲཱིཿཨཱཿའི་རྣམ་པ་ལྷ་སོ་སོའི་བདག་ཉིད་དུ་གྱུར། རང་གི་མིག་གཉིས་ཛཿ་ལས་ཉི་ཟླ་ལག་གཉིས་ཁུ་ཚུར་ལས་མཛུབ་མོ་སྦྲེལ་བ་ལྕགས་ཀྱུའི་རྒྱ་དང་། དཱིཔྟ་དྲྀ ཥྚ་ཨཾ་ཀུ་ཤ་ཛཿ ཞེས་མིག་གི་རྫི་མ་བསྐྱོད་པས། རིགས་ལྔ་ཡེ་ཤེས་པའི་ཐུགས་ཀ་ནས་ཡེ་ཤེས་ཀྱི་ཐིག་ཚོན་སྤྱན་དྲངས་ཏེ་སོ་སོ་ལ་ཐིམ་པ་ཞུ་བ་ལས་བྱུང་བའི་ཐིག་ཚོན་དུ་གྱུར་པར་མོས་ལ། བཛྲ་ཡཀྵ་བཟླས་པའི་དྲིའི་ཆུས་དཀྱིལ་འཁོར་གྱི་གཞིར་བྱུགས་ལ། དེ་ནས་ཐིག་སྐུད་སློབ་དཔོན་གྱིས་བཟུང་བའི་སྣེ་སློབ་བུར་གཏད་ལ། ༀ་ཨ་ནྱོ་ནྱ་ནུ་ག་ཏཱ་སརྦ་དྷརྨཱཿསྤ་ར་སྤ་ར་ནུ་པྲ་བིཥྚཿསརྦ་དྷརྨཱཿཨ་དྱ ནྟཱ་ནུ་པྲ་ཏིཥྚཿསརྦ་དྷརྨཱཿༀ་ཨཱཿཧཱུཾ། ཞེས་སྒྲིལ་བ་རྡོ་རྗེ་ལ་དཀྲིས་ཏེ་རིན་པོ་ཆེའི་སྣོད་དུ་བཞག །ཡང་འབར་བའི་བལྟ་བས་ནམ་མཁའི་ལྷ་རྣམས་བསྐུལ་བ་ལ་མཆོད་དེ། རང་རྡོར་སེམས་དང་ཐིག་གཡོག་ལས་ཀྱི་རྡོ་རྗེ་སྙིང་ག་ནས་སྤྲུལ་པ་ལ་ཛཿཞེས་ཐིག་སྣ་གཏད་ཅིང་། དེས་ཀྱང་ཛཿཛཿཛཿཞེས་བླངས་ནས། ༀ་བཛྲ་ས་མ་ཡ་སཱུ་ཏྲ་མ་ཏི་ཀྲ་མ་ཧཱུཾ། ཞེས་གནམ་སའི་ཐིག་བསྐོར་ཕྱོགས་མ་འཁྲུལ་བར་གདབ་སྟེ། ནུབ་དང་ལྷོར་གནས་ཚངས་ཐིག་གཉིས། །མེ་རླུང་དེ་ཉིད་མེར་གནས་པས། །ཤར་ནུབ་བྱང་ལྷོའི་ལོག་ཐིག་གདབ། །མེ་དང་སྲིད་གནས་ཟུར་ཐིག་གཉིས། །གདབ་བོ་སློབ་དཔོན་འདུག་ཕྱོགས་ཏེ། །སློབ་མ་དེ་ལྡོག་གཡས་བསྐོར་འགྲོ། །ཞེས་སོ། །ལས་ཐིག་གི་ཆ་ཇི་ལྟར་དབྱེ་བ་ནི། །ལོགས་རེར་ཆ་ཆེན་བརྒྱད་བརྒྱད་དེ། །བཅུ་དྲུག་བཏབ་པའི་ནང་མ་གསུམ། །ཕྱེད་དུ་བགོས་ཏེ་དྲུག་ཏུ་བྱ། །དང་དྲུག་ཕྱེད་གདབ་ཕྱི་མ་གདབ། །གཉིས་པ་བཞི་བགོ་ལྔ་དབུས་དོར། །དེ་ནི་ནང་གི་སྒོ་ཡིན་ནོ། །ཆ་ཆེན་བཞི་པ་ཕྱི་ཡི་ཁྱམས། །ལྔ་བརྒྱད་དབུས་དོར་མཐའ་གཉིས་གདབ། །དྲུག་པ་ཕྱེད་གདབ་ཕྱི་མ་གདབ། །བདུན་པ་བཞིར་བགོ་ལྔ་ཕན་གྱིས། །ཚངས་ཐིག་གཡས་གཡོན་ཆ་ཆེན་གཉིས། །བསྣན་ལ་དང་པོ་ཕྱེད་ཕྱི་གདབ། །ཕྱི་མ་བཞིར་བཅད་ཕྱི་མའི་བསྒོ། །ནང་དུ་རྩ་ཐིག་ལ་རེག་པའི་གདུང་ཟླུམ་ཆ་བྲན་གཅིག་དང་། དེ་ལ་རྟེན་པའི་གདུང་བཞི་བསྣོལ་མར་བཏབ་པས་དབུས་ལིང་ཚེ་དགུ་པ། ཕྱིའི་འཁོར་ཡུག་པད་རྡོར་འོད་ཕྲེང་སྤྱི་ལྟར་བསྐོར་རོ། །ཐིག་ཐེབས་པ་དང་། ༀ་བཛྲ་བེ་གཱ་ཀྲ་མ་ཧཱུཾ། ཞེས་པས་ཐིག་འོག་ནས་འཛུལ་ཏེ་ནང་དུ་ཞུགས་ལ། ཧི་ཞེས་ཕྱོགས་ཀུན་ཏུ་ཁྲོ་བོའི་བལྟ་བས་བལྟ་ཞིང་། ཐར་པའི་སྒོ་ཕྱེ་བར་བསམ་ལ་སྒོ་ཐིག་དབྱིའོ། །དེ་ནས། ༀ་བཛྲ་ཙི་ཏྲ་ས་མ་ཡ་ཧཱུཾ། ཞེས་བཟླས་ལ་རྡུལ་ཚོན་བཀྱེ་སྟེ། ཐོག་མར་སློབ་དཔོན་གྱིས་དབང་ལྡན་ནས་རེ་ཁཱ་ལྔ་ཕྱི་ནས་རིམ་པར་དཀར་སྔོ་དམར་ལྗང་སེར་པོ་རྣམས་བྲི་ཞིང་། དེ་ནས་ཅི་བདེ་བར་ལིང་ཚེ་དབུས་མ་སེར་པོ། །ཤར་སོགས་ཀྱི་ལིང་ཚེ་དང་ཁྱམས་ཕྱི་ནང་རྣམས་ཤར་དཀར། ལྷོ་སྔོ། ནུབ་དམར། བྱང་ལྗང་། གདུང་རྣམས་སྔོན་པོ་ལ་རྡོ་རྗེ་དཀར་པོ། རྟ་བབས་མས་རིམ་ནས་སེར་ལྗང་སྔོ་དམར། ཚོན་གཞན་རྣམས་སྤྱི་དང་འདྲ་ཞིང་། ལྷ་གནས་སོ་སོར་སྐུ་རྟེན་ཙཀླིའམ། འགོད་མི་བདེ་ན་རྡུལ་ཚོན་གྱིས་མཚན་མ་ཇི་ལྟར་རིགས་པ་ལྷ་རང་རང་གི་སྙིང་པོ་བརྗོད་བཞིན་དུ་བཀོད་ལ། ནམ་མཁར་བཏེགས་པའི་ལྷ་དེ་དང་དེ་མཚན་མ་དེ་ཉིད་དང་དབྱེར་མེད་པར་གནས་དེར་བཞུགས་པའི་མོས་པ་བྱ། དེ་ནས་ལྷག་ཆད་སོགས་ཀྱི་ངེས་པ་སྦྱང་བའི་ཕྱིར་རྡོ་རྗེ་སེམས་མའི་ཏིང་ངེ་འཛིན་གྱིས་མེ་ཏོག་གི་ཕྲེང་བ་བཟུང་། ༀ་བཛྲ་བེ་གཱ་ཀྲ་མ་ཧཱུཾ། ཞེས་དཀྱིལ་འཁོར་དུ་ཞུགས་ཏེ། ༀ་བཛྲ་ས་ཏྭ་ཧཱུཾ། ཞེས་དངོས་སུ་དཀྱིལ་འཁོར་གྱི་ཕྱི་དང་། ཡིད་ཀྱིས་འདོད་སྣམ་ནས་བསྐོར་ལ་ལྷར་བལྟས་ཏེ་མེ་ཏོག་ཕུལ་བ། རྐང་པ་བཞི་བཅའ་དང་ལག་པད་བསྐོར་གྱིས་བླངས་ནས་མགོ་ལ་བཅིང་། དེ་ནས་དངོས་སུ་དཀྱིལ་འཁོར་གྱི་ནུབ་དང་ཡིད་ཀྱིས་ནང་དུ་འདུག་ནས་རང་ཧཱུཾ་མཛད་ཀྱི་ང་རྒྱལ་གྱིས། རྡོ་རྗེ་མཛུབ་མོ་ཡང་དག་སྦྱར། །སྦྱར་ལ་བཀན་ཏེ་བསྡམས་ནས་སུ། །ཁྲོས་ནས་རབ་ཏུ་དབྱེ་བ་ནི། །སྒོ་དབྱེ་བ་ཡི་མཆོག་ཡིན་ནོ། །ༀ་བཛྲོདྦྷ་ཊ་ས་མ་ཡ་པྲ་བེ་ཤ་ཡ་ཧཱུཾ། ཞེས་པའི་སྔགས་རྒྱས་སྒོ་དབྱེ། དེ་ནས་རྡོ་རྗེ་གནོད་སྦྱིན་དང་། རྡོ་རྗེ་མེའི་སྔགས་རྒྱས་བསངས་གཏོར་བྱས་ལ། མཆོད་པ་རྣམས་སོ་སོའི་སྔགས་རྒྱས་བརླབས་ཏེ། མགོན་པོ་བདག་གི་བསོད་ནམས་དང་། །སངས་རྒྱས་བྱིན་རླབས་གཟི་ཆེན་དང་། །དེ་བཞིན་ཆོས་དབྱིངས་སྟོབས་ཀྱིས་སུ། །མཆོད་པའི་ཚོགས་རྣམས་གནས་གྱུར་ཅིག །ཅེས་བདེན་སྟོབས་བརྗོད་དེ། བུམ་པ་གཉིས་ལྟ་གོན་ལྟར་བཟླས་པ་ཅུང་ཟད་བྱས་ནས། རྣམ་རྒྱལ་དཀྱིལ་འཁོར་གྱི་དབུས་སུ་མཉྫི་ལ་བཀོད། ལས་བུམ་ཤར་སྒོའི་གཡོན་ནམ་དེར་ལྷང་ཀ་ཙམ་བྱས་ལ་སློབ་དཔོན་གྱི་མདུན་དུ་བཤམ། དཀྱིལ་འཁོར་གྱི་མཐར་མདའ་དང་མེ་ལོང་ཅན་དང་། རལ་གྲི་ཕུར་བུ་རྣམས་བརྒྱད་དམ་བཞིས་བསྐོར་བ་ཚོན་སྐུད་ཀྱིས་བྲེས། མདུན་དུ་འདས་གཏོར་དང་། མཐའ་མཆོད་པས་བསྐོར། རྫས་དབང་གི་ཙཀླི་རྣམས་དང་། ཆ་གསུམ་གཏོར་མའང་ཅི་བདེར་བསྒྲིག །རང་གི་མདུན་དུའང་མཆོད་ཡོན་བཟེད་ཞལ་དང་བཅས་པ། རྡོར་དྲིལ། སྤོས་སྣོད། འཐོར་ནས་སོགས་ཡོ་བྱད་ཐམས་ཅད་ཚོགས་པར་བཤམ་མོ། །དེ་ནས་ཆོ་ག་ནི། ༀ་བཛྲ་ཡཀྵ་ཧཱུཾ་གིས་ཁ་ལག་བཀྲུ། ས་མ་ཡ་སྟྭཾ་གིས་སྟན་ལ་འདུག་སྟེ། བདག་དང་འགྲོ་བ་ནམ་མཁའ་དང་མཉམ་པའི་སེམས་ཅན་ཐམས་ཅད་དཔལ་ལྡན་བླ་མ་དམ་པ་རྣམས་དང་ཡི་དམ་དཀྱིལ་འཁོར་གྱི་ལྷ་ཚོགས་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ༴ དམ་པའི་ཆོས་རྣམས་ལ༴ འཕགས་པའི་དགེ་འདུན་རྣམས་ལ༴ འགྲོ་རྣམས་བསྒྲལ་འདོད་བསམ་པ་ཡིས། །སངས་རྒྱས་ཆོས་དང་དགེ་འདུན་ལ། །བྱང་ཆུབ་སྙིང་པོར་མཆིས་ཀྱི་བར། །རྟག་པར་བདག་ནི་སྐྱབས་སུ་མཆི། །ཤེར་རབ་སྙིང་རྗེ་དང་བཅས་པས། །བརྩོན་པས་སེམས་ཅན་དོན་དུ་བདག །སངས་རྒྱས་མདུན་དུ་གནས་བྱས་ནས། །རྫོགས་པའི་སངས་རྒྱས་ཐོབ་པར་བགྱི། །དེ་ནས། ༀ་སྭ་བྷཱ་ཝ་ཤུདྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅་ཧཾ། ཞེས་པས་ཆོས་ཐམས་ཅད་གདོད་མ་ནས་རྣམ་པར་དག་པའི་རང་བཞིན་སྟོང་པ་ཉིད་དུ་མོས་པས་ནང་གི་ཁྲུས་བྱས་ལ། སྟོང་པའི་ངང་ལས་རང་ཉིད་སྐད་ཅིག་གིས་རྡོ་རྗེ་སེམས་དཔར་གསལ་བའི་ལྐོག་མར་ཧྲཱིཿལས་པདྨ་དམར་པོ་འདབ་མ་བརྒྱད་པའི་ལྕེའི་ཐད་ཀའི་འདབ་མ་གཅིག་ལྕེར་གྱུར་པའི་སྟེང་དུ་ཧཱུཾ་ལས་རྡོ་རྗེ་དཀར་པོ་རྩེ་ལྔ་པ་ཉལ་སྟབས་སུ་གནས་པར་གྱུར། ༀ་བཛྲ་ཛི་ཧཱ། ལག་པ་གཉིས་སུ་ཨ་ཨ་ལས་ཟླ་བའི་དཀྱིལ་འཁོར་རེ་རེ། དེའི་སྟེང་དུ་ཧཱུཾ་ཧཱུཾ་ལས་རྡོ་རྗེ་དཀར་པོ་རྩེ་ལྔ་པ་རེ་རེ། དེ་ཞུ་བ་ལས་རྡོ་རྗེའི་ལག་པ་སོར་མོ་རྣམས་ཀྱང་རྡོ་རྗེ་རྩེ་གཅིག་པར་གྱུར། དེ་ནས་རང་རྡོར་སེམས་སུ་གནས་པའི་བྱང་ཆུབ་ཀྱི་སེམས་མི་ཤིགས་པའི་ཧཱུཾ་དུ་གྱུར། ཧཱུཾ་གི་སྒྲས་གདུག་པ་ཅན་ཐམས་ཅད་ཚར་བཅད། ཨེ་མ་སངས་རྒྱས་ཐམས་ཅད་ཀྱིས། །ཐུགས་རྗེ་ཅན་གྱི་ཐབས་ཆེན་གྱིས། །ཞི་ཡང་སེམས་ཅན་འདུལ་དོན་དུ། །དྲི་མ་མེད་པའི་ཁྲོ་བོར་གྱུར། །ཞེས་བརྗོད་པའི་རྐྱེན་གྱིས་རང་ཉིད་ཁྲོ་བོ་མེ་ལྟར་འབར་བ་སྐུ་མདོག་སྔོན་པོ་ཞལ་ཁྲོ་གཉེར་དང་བཅས་པ་བཞད་ཅིང་མཆེ་བ་ཅུང་ཟད་གཙིགས་པ། གཡས་རྡོ་རྗེ་གསོར་ཞིང་གཡོན་དྲིལ་བུ་སྙེམས་པའི་ཚུལ་གྱིས་འཆང་བ། སེམས་དཔའི་སྐྱིལ་མོ་ཀྲུང་གིས་བཞུགས་པར་བསམ་ལ། ཁྲོ་བོ་སྤྱན་འདྲེན་པ་ནི། ཧཱུཾ། ཡེ་ཤེས་བསྐལ་པའི་མེ་ལྟར་འབར་བའི་འོད། །མ་རིག་འདོད་པའི་མུན་ཁམས་ཐམས་ཅད་བསྲེག །ཞེ་སྡང་གཤིན་རྗེའི་འཇིགས་པ་ཐམས་ཅད་འཇོམས། །དཔའ་བོ་ཆེན་པོ་དཔའ་མཚན་སྟག་ལྤགས་ཅན། །ལོག་འདྲེན་སྲིན་པོའི་མཐའ་གནོན་དགྲ་འདུལ་བ། །རིག་པའི་རྒྱལ་པོ་ཁྲོ་བོ་བཞུགས་སོ་འཚལ། །ལོག་འདྲེན་འདུལ་བའི་སླད་དུ་སྤྱན་འདྲེན་ན། །འགྲོ་བའི་དོན་དུ་མཆོད་ཀྱིས་གཤེགས་སུ་གསོལ། །ཞེས་པས། ཁྲོ་བོའི་སྤྲིན་དཔག་ཏུ་མེད་པ་སྤྱན་དྲངས་ལ། གཙོ་བོ་རང་ལ་བསྟིམ་ཞིང་འཁོར་རྣམས་བཀའ་སྡོད་དུ་གནས་པར་བསམ་ལ། མེ་ཏོག་སོགས་སྔགས་རྒྱ་ཙམ་གྱིས་མཆོད་ནས། ཧཱུཾ། རང་བཞིན་རྣམ་དག་དབྱིངས་ལས་ཁྲོ་བོར་སྤྲུལ། །སྐྱེ་བ་མེད་ལས་འཇིགས་བྱེད་སྐུར་སྟོན་པ། །གདུག་པ་འདུལ་ཕྱིར་མི་འགྱུར་ཐུགས་དམ་ཅན། །ཁྲོ་རྒྱལ་ཁམས་གསུམ་རྒྱལ་ལ་ཕྱག་འཚལ་ལོ། །བསྐལ་པ་མེ་ལྟར་འབར་བའི་ཀློང་དཀྱིལ་ན། །དཔའ་བོའི་སྟངས་སྟབས་བརྐྱང་བསྐུམ་ཚུལ་དུ་བཞུགས། །ཉི་ཟླ་འབར་བའི་སྤྱན་གྱི་སྡང་མིག་གིས། །བགེགས་དཔུང་སྲེག་པར་མཛད་ལ་ཕྱག་འཚལ་ལོ། །དཀྱིལ་འཁོར་ཆེན་པོའི་ས་གཞི་ལ་གནས་པའི། །ལྷ་ལ་སོགས་པའི་བགེགས་ཚོགས་ཀུན་ཉོན་ཅིག །ང་ནི་གནས་འདིར་དཀྱིལ་འཁོར་ཆེན་པོ་སྒྲུབ། །བགེགས་ཀྱི་རིགས་ཚོགས་གང་ཡིན་བྱེར་བར་གྱིས། །ང་ནི་སངས་རྒྱས་ཀུན་དངོས་རྡོ་རྗེ་ཅན། །བཅོམ་ལྡན་བཀའ་ཡིས་དཀྱིལ་འཁོར་རབ་སྦྱོར་བས། །དཔལ་ལྡན་སྐུ་གསུང་ཐུགས་ཀྱི་རྡོ་རྗེ་ཅན། །སངས་རྒྱས་རྣམ་འཕྲུལ་བྱིན་རླབས་སྒྲུབ་བྱེད་ཡིན། །གལ་ཏེ་ང་ཡིས་བཀའ་ལས་འདའ་བྱེད་ན། །ཡེ་ཤེས་ཅན་གྱི་རྡོ་རྗེ་རབ་འབར་བས། །མགོ་བོ་ཚལ་པ་བརྒྱར་ནི་འགས་བྱེད་དེ། །རྣམ་པར་འཇིག་པར་འགྱུར་བ་གདོན་མི་ཟ། །བདག་རྡོ་རྗེ་སློབ་དཔོན་མིང་འདི་ཞེས་བགྱི་བས་སློབ་མ་འདི་དག་རྫོགས་པའི་བྱང་ཆུབ་ཐོབ་པ་བྱ་བའི་ཕྱིར་དང་། སེམས་ཅན་ཐམས་ཅད་ཀྱིས་བླ་ན་མེད་པའི་ཡེ་ཤེས་ཀྱི་འབྲས་བུ་ཐོབ་པར་བྱ་བའི་ཕྱིར། ས་ཕྱོགས་བཟང་པོ་འདིར་ནམ་མཁའ་དྲི་མ་མེད་པ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་བསྒྲུབ་པར་བྱ་ཡི། ལྷ་དང་། ལྷ་མ་ཡིན་དང་། གནོད་སྦྱིན་དང་། དྲི་ཟ་དང་། སྲིན་པོ་དང་། ཡི་དྭགས་དང་། ཤ་ཟ་དང་། འབྱུང་པོ་དང་། བརྗེད་བྱེད་དང་། མཁའ་འགྲོ་མ་དང་། གནོན་པོ་དང་། ནམ་མཁའ་ལྡིང་དང་། མིའམ་ཅི་དང་། རིགས་སྔགས་འཆང་གྲུབ་པ་རྒན་པོ་དང་རྒན་མོ་གཡོག་དང་བཅས་པ་གང་དག་འཁོད་པ་དེ་དག་ཐམས་ཅད་འདི་ལྟར་རྡོ་རྗེ་འཆང་གི་བཀའ་ཐོས་ནས་མྱུར་བ་ཉིད་དུ་དེངས་ཤིག །གང་དག་མི་འགྲོ་བ་དེ་དག །ངའི་ཡེ་ཤེས་ཀྱི་རྡོ་རྗེ་འབར་བ། རབ་ཏུ་འབར་བ། ཀུན་ཏུ་འབར་བས་མགོ་བོ་ཚལ་པ་བརྒྱར་འགས་པར་བྱེད་དོ། །ཧཱུཾ་ཧཱུཾ་ཧཱུཾ། ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷཱ་ཡ། མ་ཧཱ་དཾཥྚོངྐ་ཊ་བྷཻ་ར་བཱ་ཡ། ཨ་སི་མུ་ས་ལ་དྷཱ་རཱ་ཡ་པ་ར་ཤུ་པཱ་ཤ་ཧསྟ་ཡ། ཏདྱ་ཐཱ། ༀ་ཨ་མྲྀ་ཏ་ཀུཎྜ་ལི། ཁ་ཁ། ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། གརྫ་གརྫ། བིསྥོ་ཊ་ཡ་བི་སྥོ་ཊ་ཡ། སརྦ་བིགྷྣཱན་བི་ན་ཡ་ཀཾ་མ་ཧཱ་ག་ཎ་པ་ཏི་ཛི་བི་ཏ་ཨནྟ་ཀ་རཱ་ཡ་སྭཱ་ཧཱ། ཞེས་རོལ་མོའི་སྒྲ་དང་བཅས་པས་ཚམ་རྔམས་ཀྱིས་བསྐྲད། གལ་ཏེ་མི་འགྲོ་བ་རྣམས་ལ། ༀ་བཛྲ་ཛྭ་ལཱ་ན་ལཱརྐ་ཧཱུཾ། ཞེས་གཡོན་ཁུ་ཚུར་སྙིང་ག་དང་གཡས་རྡོ་རྗེ་གསོར་བས་བགེགས་ལ་བསྣུན། དེས་གཞིག་དཀའ་བ་རྣམས། ཧཱུཾ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐ་བྷཉྫ་ར་ཎ་ཧཱུཾ་ཕཊ། ཅེས་རྡོ་རྗེ་ནང་བསྡམ་ཀྱི་སོར་མོ་རྣམས་ནང་དུ་འབར་བ་ལྟར་བྱས་ལ་མཐེ་བོང་སྦྱར་ཏེ་སྒྲེང་བ་རྡོ་རྗེ་མེའི་རྒྱས་སྲེགས། འཚིག་དཀའ་བ་རྣམས་རྡོ་བསྡམས་བཅིངས་ལ་མཐེ་བོང་གཉིས་བརྐྱང་སྟེ་མཉམ་པ་རྡོ་རྗེ་སྤྱན་གྱི་རྒྱ་བཅས་ལ། བཛྲ་ནཻ་ཏྲི་བནྡྷ་སརྦ་བིགྷྣཱན། ཞེས་པས་བཅིང་བར་བྱ་སྟེ། དེ་རྣམས་ཀྱིས་བགེགས་སྔར་ཡོད་ཚར་བཅད་པའོ། །དེ་ནས་ཕྱིས་མི་འཇུག་པའི་ཕྱིར་གནས་བཅིང་བ་ནི། རྡོ་རྗེ་བསྡམས་པས་ལ་བརྐྱང་སྟེ། ༀ་བཛྲ་ཌོ་ཌྷོ་མེ་བྷ་བ་རཀྵ་སརྦཾ་སྭཱ་ཧཱ་ས་འོག་བཅིང་། རྡོ་རྗེ་ཁུ་ཚུར་བཅང་ལ་མགལ་མེ་བཞིན་བསྐོར་ཏེ་མགོ་བོའི་སྟེང་དུ་མཛུབ་མོ་ལྕགས་ཀྱུའི་ཚུལ་དུ་བཞག་པ་རྡོ་རྗེ་འཇིགས་བྱེད་ཅན་གྱི་རྒྱ་དང་། ༀ་ཧུ་ལུ་ཧུ་ལུ་ཧཱུཾ་ཕཊ་ཀྱིས་སྟེང་བཅིང་། རྡོ་རྗེ་ཐལ་མོའི་མཐེ་བོང་གཉིས་བརྐྱང་ལ་མཛུབ་མོ་གཉིས་མཆེ་བ་ལྟར་བྱས་པ་རྡོ་རྗེ་གནོད་སྦྱིན་གྱི་རྒྱ་དང་ༀ་བཛྲ་ཡཀྵ་ཧཱུཾ་གིས་དེའི་འོག་བླ་རེའི་གནས་བཅིང་། རྡོ་རྗེ་ཁུ་ཚུར་གཉིས་ཀྱི་མཐེ་ཆུང་སྦྲེལ་མཛུབ་རྩེ་གཉིས་སྦྱར་ཏེ་བཟློག་ནས་སྤྱི་བོར་བཞག་པ་རྡོ་རྗེ་གཙུག་ཏོར་གྱི་རྒྱ་དང་། ༀ་དྲུཾ་བྷནྡྷ་ཧཾ་གིས་ཤར་ཕྱོགས་བཅིང་། ཁུ་ཚུར་གཉིས་ཀྱི་མཁྲིག་མ་མདུད་པ་རྡོ་རྗེ་ཞགས་པའི་རྒྱ་དང་། ༀ་ཧཱུཾ་བཛྲ་པཱ་ཤ་ཧྲཱིཿ ཞེས་པས་བྱང་ཤར་བཅིང་། རྡོ་བསྡམས་ལས་མཐེ་བོང་གཉིས་བསྣོལ་མཛུབ་གཉིས་གཤིབས་ཏེ་ཕྱེ་ལ་མཐེ་ཆུང་བརྟན་པར་བྱས་པའི་རྒྱ་དང་། ༀ་བཛྲ་པཱ་ཏཾ་ཀེ་པཱ་ཏཾ་ཀེ་ནི་རཊྚ། ཞེས་པས་ནུབ་བཅིང་། རྡོ་རྗེ་གནོད་སྦྱིན་གྱི་རྒྱ་དེ་ཉིད་ཁར་བཞག་པ་རྡོ་རྗེ་ནག་མོའི་རྒྱ་དང་། ཧྲཱིཿབཛྲ་ཀཱ་ལི་རུ་ཊ་མ་ཊ། ཞེས་པས་བྱང་བཅིང་། རྡོ་རྗེ་ཁུ་ཚུར་གཉིས་ཀྱིས་རི་བོ་འདེགས་པའི་ཚུལ་དུ་བྱས་པ་རྡོ་རྗེ་རྩེ་མོའི་རྒྱ་དང་། ༀ་བཛྲ་ཤི་ཁ་རེ་རུ་ཊ་མ་ཊ། ཞེས་པས་ལྷོ་བཅིང་། རྡོ་རྗེ་ཧཱུཾ་མཛད་ཀྱི་རྒྱ་ལས་མཛུབ་གུང་གཉིས་རྡོ་རྗེ་ར་བྱས་པ་རྡོ་རྗེ་ལས་ཀྱི་རྒྱ་དང་། ཧཱུཾ་བཛྲ་ཀརྨས་དཀྱིལ་འཁོར་བཅིང་། ཁུ་ཚུར་གཉིས་བཅིངས་ལ་མཁྲིག་མ་བསྣོལ་ཏེ་མཐེའུ་ཆུང་སྦྲེལ་ཞིང་མཛུབ་གཉིས་སྒྲེང་པ་ཧཱུཾ་མཛད་ཀྱི་རྒྱ་དང་། ཧཱུཾ་ཞེས་བརྗོད་པས་ནང་དུ་རྡོ་རྗེའི་ར་བ་བཅིང་། རྡོ་རྗེ་བསྡམས་པའི་རྒྱ་དང་། ༀ་བཛྲ་བནྡྷ་བཾ་ཞེས་པས་རྡོ་རྗེའི་དྲྭ་བ་བྱ། དེ་ལྟར་འོག་ཐམས་ཅད་རྡོ་རྗེའི་ས་གཞི། སྟེང་ཐམས་ཅད་རྡོ་རྗེའི་གུར་དང་བླ་རེ། ཁོར་ཡུག་ཐམས་ཅད་རྡོ་རྗེའི་ར་བ་དང་དྲྭ་བ། མེ་རབ་ཏུ་འབར་བའི་སྲུང་འཁོར་གྱིས་ཁྱབ་པས་ཅིས་ཀྱང་མི་ཤིགས་པར་གྱུར། དེ་ནས་ཚོགས་བསགས་པ་ནི། ༀ་བཛྲ་ཧེ་རུ་བཾ་རང་ཉིད་རྡོ་རྗེ་རྒྱུར་གྱུར། རྡོ་རྗེ་ཁུ་ཚུར་གཉིས་བཅིངས་ནས་མཛུབ་མོ་དག་དང་མཐེའུ་ཆུང་དག་མདུད་པ་གཡས་སུ་བསྐོར་བ་ཁའི་ཕྱོག་སུ་བཞག་པ་ལ་ལྟ་བཞིན་པས། ༀ་ཨཱཿབཛྲ་ཙཀྲ་ཧཱུཾ། ཞེས་བཟླས་པས། སྲུང་འཁོར་གྱི་ནང་མདུན་གྱི་ནམ་མཁའི་ཕྱོགས་སུ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་སད་ནས་བཞུགས་པར་གྱུར་པ་ལ། པུཥྤེ་ལ་སོགས་པ་རྣམ་ལྔས་མཆོད། །དེ་ནས་ཕྱོགས་ཐམས་ཅད་ནས། ། སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་པྲ་ཎ་མེ་ན་བཛྲ་བནྡྷ་ནཱཾ་ཀ་རོ་མི། ཞེས་ཡན་ལག་ལྔ་གཏུགས་པའི་ཕྱག་བྱ་ཞིང་། སྤྲོ་ན་འདིར་སེམས་དཔའ་བཞིའི་ལུས་ཀྱི་གནས་ས་ལ་བབ་པའི་ཕྱོགས་བཞིའི་ཕྱག་ཀྱང་བྱའོ། །དེ་ནས་ཐལ་མོ་སྦྱར་ཏེ། ན་མོ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་དང་། དེ་བཞིན་གཤེགས་པ་དང་། རྡོ་རྗེ་དང་། རིན་པོ་ཆེ་དང་། པདྨ་དང་། ལས་ཀྱི་རིགས་སུ་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་ཕྱོགས་བཅུའི་སངས་རྒྱས་ནས་རིག་སྔགས་ཀྱི་བར་གྱི་ལྷ་ཐམས་ཅད་ཀྱི་སྤྱན་སྔར་སྡིག་པ་ཐམས་ཅད་སོ་སོར་བླ་ན་མེད་པའི་སོ་སོར་བཤགས་པས་སོ་སོར་བཤགས་པར་བགྱིའོ། །ཕྱོགས་བཅུ་ན་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་དང་། བྱང་ཆུབ་སེམས་དཔའ་རྣམས་དང་རང་སངས་རྒྱས་དང་། འཕགས་པ་ཉན་ཐོས་ཡང་དག་པར་སོང་བ་དང་། ཡང་དག་པར་ཞུགས་པ་རྣམས་དང་། སེམས་ཅན་ཐམས་ཅད་ཀྱི་བསོད་ནམས་ཐམས་ཅད་ལ་རྒྱ་ཆེར་རྗེས་སུ་ཡི་རང་བར་བགྱིའོ། །ཕྱོགས་བཅུའི་སངས་རྒྱས་བཅོམ་ལྡན་འདས་ཆོས་ཀྱི་འཁོར་ལོ་བསྐོར་བར་མི་མཛད་པ་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་བྱ་བའི་ཕྱིར་བསྐུལ་བར་བགྱིའོ། །ཕྱོགས་བཅུའི་སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་བར་བཞེད་པ་གང་ཡིན་པ་དེ་དག་ཐམས་ཅད་ལ་མྱ་ངན་ལས་མི་འདའ་བར་གསོལ་བར་འཚལ་ལོ། །གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ལྷ་དང་མི་རྣམས་ཀྱི་མཆོད་པའི་བྱེ་བྲག་མེ་ཏོག་དང་། བདུག་སྤོས་དང་། སྣང་གསལ་དང་། དྲི་ཆབ་དང་། རིན་ཆེན་གྱི་ཚོགས་དང་། རྒོད་པ་སོགས་རྩེད་འཇོའི་བདེ་བ་དང་། དཔག་བསམ་གྱི་ཤིང་བཟང་པོ་དང་། སེམས་ཅན་ཀུན་གྱི་དོན་དུ་བྱང་ཆུབ་མཆོག་ཏུ་སེམས་བསྐྱེད་པ་དང་། ཕ་རོལ་ཏུ་ཕྱིན་པ་དྲུག་དང་། ལུས་ངག་སེམས་ལས་བྱུང་བའི་མཆོད་པ་ཐམས་ཅད་དང་། རྣམ་པར་ཐར་པ་སྒོ་གསུམ་གྱི་ཏིང་ངེ་འཛིན་གསང་བའི་མཆོད་པ་མཆོག་རྣམས་ཏེ། མདོར་ན་འཇིག་རྟེན་དང་འཇིག་རྟེན་ལས་འདས་པའི་མཆོད་པ་གང་དག་ཡོད་དོ་འཚལ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་སུ་བྱ་བའི་ཕྱིར། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། །རིགས་སྔགས་ཀྱི་ལྷའི་ཁྱད་པར་ཐམས་ཅད་ལ་དབུལ་བར་བགྱིའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བདག་ཉིད་འབུལ་གྱིས། བདག་དུས་ཐམས་ཅད་དང་རྣམ་པ་ཐམས་ཅད་དུ་སོ་སོར་བཞེས་སུ་གསོལ། ཐུགས་རྗེ་ཆེན་པོ་དང་ལྡན་པའི་མགོན་པོ་ཁྱེད་རྣམས་ཀྱིས་དམ་ཚིག་ཆེན་པོའི་དངོས་གྲུབ་དམ་པ་བདག་ལ་སྩལ་དུ་གསོལ། དགེ་བའི་རྩ་བ་དེ་ཡང་སེམས་ཅན་ཐམས་ཅད་དང་ཐུན་མོང་དུ་བྱས་ཏེ། དགེ་བའི་རྩ་བ་འདི་དག་གིས། བདག་དང་མཐའ་ཡས་པའི་སེམས་ཅན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་རྒུད་པ་ཐམས་ཅད་དང་བྲལ་བར་གྱུར་ཅིག །འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་དང་ཡང་དག་པར་ལྡན་པའི་བདེ་བ་དང་ཡིད་བདེ་བ་ཉིད་ཀྱིས་མིའི་མཆོག་སངས་རྒྱས་སུ་ཚེ་འདི་ཉིད་ལ་གྱུར་ཅིག །བདག་གི་དགེ་བའི་ལས་རྣམས་འདི་དག་གིས། འཇིག་རྟེན་དུ་ནི་མྱུར་དུ་འཚང་རྒྱ་ཤོག །འགྲོ་ལ་ཕན་ཕྱིར་ཆོས་ཀྱང་སྟོན་བགྱིད་ཅིང་། སེམས་ཅན་དུཿཁས་གཟིར་ལས་སྒྲོལ་བར་ཤོག །ཅེས་ཚོགས་བསགས། དེ་ནས་ལག་གཉིས་མདུན་དུ་བཞག་ལ། ལག་མཐིལ་གཉིས་སུ་ཨ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ཨ། ཐལ་མོ་གཉིས་ལ་ཨཱ་ལི་བཅུ་དྲུག །མཐེ་བོང་ནས་བརྩམས་ཏེ་སོར་མོ་རྣམས་ལ་ༀ་ཧཱུཾ་ཏྲཱཾ་ཧྲཱིཿཨཱཿལས་རིགས་ལྔ་ཡབ་ཡུམ་བཅུར་གྱུར། ༀ་ཨ་ནྱོ་ནྱ་ཨ་ནུ་ག་ཏ་སརྦ་དྷརྨཱཿ ཞེས་པས་ཡབ་ཡུམ་ཕན་ཚུན་རེག་པར་བསམ་ལ་མཉམ་པའི་ཐལ་མོ་བྱ། སྥ་ར་སྥ་ར་ཨ་ནུ་པྲ་བིཥྚ་སརྦ་དྷརྨཱཿ ཞེས་པས་རྗེས་སུ་ཞུགས་པར་བསམ་ལ་རྡོ་རྗེ་ཐལ་མོ་བྱ། ཨ་ཏྱནྟ་ཨ་ནུ་བིཥྚཱཿསརྦ་དྷ རྨཱཿབཛྲ་ཨཉྫ་ལི། ཞེས་པས་གཉིས་མེད་དུ་འདྲེས་པར་བསམ་ལ་རྡོ་རྗེ་བསྡམས་པའི་རྒྱ་བྱ། བཛྲ་བནྡྷ་ཏྲཊ། ཅེས་རྡོ་རྗེ་བསྡམས་པ་སྙིང་གར་དྲལ་བས་ཡེ་ཤེས་རྡོ་རྗེས་འཁོར་བའི་འཆིང་བ་དྲལ་བར་མོས། རྡོ་རྗེ་བསྡམས་པའི་མཐེ་བོང་ནང་དུ་བཅུག་པ་བཅིངས་ལ། བཛྲ་ཨ་བེ་ཤ་ཡ་ཨ་ཨཿ ཞེས་བཟླས་པས་དང་པོའི་རྡོ་རྗེ་དམར་པོ་འབར་བའི་རྣམ་པ་ཆར་བབས་པ་བཞིན་སྙིང་གར་ཕབ་ནས། དེ་བརྟན་པར་བྱ་སྟེ། ཏིཥྛ་བཛྲ་དྲྀ་ཌྷོ་མེ་བྷ་བ། ཤ་ཤྭ་བྷོ་མེ་བྷ་བ་ཧྲི་ད་ཡ་མེ། ཨ་དྷི་ཏིཥྚ་སརྦ་སིདྡྷི་མྨེ་པྲ་ཡཙྪ་ཧཱུཾ། ཧ་ཧ་ཧ་ཧ་ཧོཿ ཞེས་སྔར་གྱི་ཕྱག་རྒྱ་དགྲོལ། ཡང་སྔར་གྱི་ཕྱག་རྒྱ་ལས་མཐེ་བོའི་རྒྱབ་ཏུ་མཛུབ་མོ་བཀབ་པ་ནང་དུ་བཅུག་སྟེ། བཛྲ་མུཥྚི། དེ་བཀྲོལ་ནས་སེ་གོལ་གཏོག་ཅིང་། ༀ་བཛྲ་མུཥྚི་བཾ་གིས་བརྟན་པར་བྱའོ། །དེ་ནས་རྡོ་རྗེ་ཁུ་ཚུར་གཉིས་ཀྱི་ནང་དུ་མཛུབ་མོ་གཉིས་སྦྱར་ནས་གྱེན་དུ་འཕངས་ཏེ། ༀ་སརྦ་ཨ་པཱ་ཡ་ཨ་ཀཪྵ་ན་བི་ཤོ་དྷ་ན་བཛྲ་ས་མ་ཡ་ཧཱུཾ་ཕཊ། ཅེས་པས་རང་རྡོ་རྗེ་ཁུ་ཚུར་དུ་གྱུར་པའི་ཐུགས་ཀའི་འོད་ཀྱིས་ངན་སོང་རྣམས་བསླང་བར་བསམ། དེ་རྣམས་ཀྱིས་བདག་ཅག་སྐྱོབ་ཏུ་གསོལ་ཞེས་བརྗོད་ཅིང་། རང་གིས་རྡོར་བསྡམས་ལས་གུང་མོ་གཉིས་དང་མཐའ་མ་བཞི་རྣམས་རྩེ་མོ་སོ་སོར་སྦྱར་ཏེ་དྲལ་ཞིང་། ༀ་བཛྲ་པཱ་ཎཱི་བི་སྥོ་ཊ་ཡ། སརྦ་ཨ་པཱ་ཡ་བནྡྷ་ནི་པྲ་མོ་ཀྵ་ཡ། སརྦ་ཨ་པ་ཡ་ག་ཏེ་བྷྱཿསརྦ་སཏྭཱཾ་སརྦ་ཏ་ཐཱ་ག་ཏ་བཛྲ་ས་མ་ཡ་ཏྲཊ། ཅེས་བརྗོད་དོ། །དེ་ནས་གཙོ་བོའི་དམ་རྒྱ་རྡོར་བསྡམས་ལས་གུང་མོ་མྱུ་གུ་ལྟར་མཉམ་པར་སྒྲེང་བ་བཅིངས་ལ། ས་མ་ཡ་སྟྭཾ་ༀ་སརྦ་ཏ་ཐཱ་ག་ཏ་མ་ཧཱ་ཡོ་གཱི་ཤྭ་རི་ཧཱུཾ་ༀ་བཛྲ་མུཿ ཞེས་ལན་གསུམ་གྱིས་སྔར་རང་གིས། སྤྲུལ་པའི་ཚོགས་ཞིང་གི་ལྷ་རྣམས་རང་གི་སྙིག་གར་བསྡུས་པས་ལྷ་ཐམས་ཅད་ཀྱི་བདག་ཉིད་ཀྱི་བྱང་སེམས་ཟླ་བའི་དཀྱིལ་འཁོར་དུ་གྱུར། དེ་ནས་བདག་བསྐྱེད་ནི། རང་ཉིད་སྐད་ཅིག་གིས་རྡོར་སེམས་སུ་གསལ་བའི་སྙིང་གར་ཟླ་བ་ལ་གནས་པའི་རྡོ་རྗེའི་དབུས་སུ་གཉུག་མའི་ཡི་གེ་བཛྲ་ས་ཏྭ་བསམ། དེ་ནས། ༀ་སྭ་བྷཱུ་ཝ་ཤུདྡྷཿསརྦ་དྷརྨཱ་སྭ་བྷཱ་ཝ་ཤུདྡྷོ྅་ཧཾ། ཞེས་པས་ཆོས་ཐམས་ཅད་རང་བཞིན་གྱིས་སྟོང་པར་གྱུར། སྟོང་པའི་ངང་ལས་ནམ་མཁའི་ཕྱོགས་སུ་རང་གི་གཉུག་སེམས་བཛྲ་ས་ཏྭ། དཀར་ཆ་གཙོ་བོར་གྱུར་པའི་ཨཱ་ལི་བཅུ་དྲུག་ཞུ་བ་ལས་ཟླ་བ་དང་པོ་བཛྲ་ས་ཏྭས་མཚན་པ། དམར་ཆ་གཙོ་བོར་གྱུར་པའི་ཀཱ་ལི་སོ་དྲུག་ཞུ་བ་ལས་ཟླ་བའི་དཀྱིལ་འཁོར་གཉིས་པ། ཟླ་བ་གཉིས་པོ་དེ་བཛྲ་ས་ཏྭ་དང་བཅས་པ་ལས་དང་པོའི་རྡོ་རྗེ་འོད་ཟེར་གྱི་ཕྲེང་བ་དང་བཅས་པའི་ལྟེ་བར་བཛྲ་ས་ཏྭས་མཚན་པར་གྱུར། བཛྲོ྅ཧཾ། ཞེས་ང་རྒྱལ་བྱ། བཛྲ་ས་ཏྭ་ཞེས་ལན་གསུམ་བརྗོད་པས། རྡོ་རྗེ་དེ་ལས་རྡོར་སེམས་ཀྱིས་གཙོ་བྱས་པའི་དེ་བཞིན་གཤེགས་པའི་རིགས་ཀྱི་ལྷ་དཔག་མེད་སྤྲོས། དེས་སེམས་ཅན་གྱི་ཁམས་ཐམས་ཅད་རང་རིགས་ཀྱི་ལྷར་སད་པར་བྱས། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་དབྱིངས་ཐམས་ཅད་བསྡུས་ཏེ་ཐིམ་པས་རྡོ་རྗེ་དེ་རང་རིགས་ཀྱི་ལྷ་ཐམས་ཅད་ཀྱི་རྡུལ་ཕྲ་རབ་འདུས་པའི་བདག་ཉིད་དུ་གྱུར། བདག་ནི་སེམས་དཔའ་ཀུན་བདག་གྲགས། བདག་ཉིད་ཀྱང་ནི་བདག་ལ་གནས། བཛྲ་ས་ཏྭ་ཟླ་བའི་བདག་ཉིད་འོད་ཀྱི་ཕྲེང་བ་དང་བཅས་པའི་རྡོ་རྗེ་དེ་ཉིད་ཡོངས་སུ་གྱུར་པ་ལས། བདག་ཉིད་རྡོ་རྗེ་སེམས་དཔའ་སྐུ་མདོག་དཀར་པོ། ཞལ་གཅིག་ཕྱག་གཉིས་པ། ཞི་ཞིང་འཛུམ་ལ་མཚན་དཔེའི་ལང་ཚོ་རབ་ཏུ་རྒྱས་པ། ཕྱག་གཡས་པས་རྡོ་རྗེ་རྩེ་ལྔ་པ་ཐུགས་ཀར་གཏོད་དེ་འཛིན་པ་གཡོན་དྲིལ་བུ་དཀུར་བརྟེན་པ། རལ་པའི་ཐོར་ཅོག་ཅན་དར་གྱི་ན་བཟའ་དང་རིན་པོ་ཆེའི་རྒྱན་གྱིས་བརྒྱན་པ། པད་ཟླའི་གདན་ལ་སེམས་དཔའི་སྐྱིལ་ཀྲུང་གིས་བཞུགས་པར་གྱུར། བཛྲ་སཏྭོ ྅ཧཾ། ཞེས་ང་རྒྱལ་བྱ། མ་ཧཱ་ས་མ་ཡ་སཏྭོ྅ ཧཾ། ཞེས་པས། མཁའ་ལྟར་ཀུན་ཏུ་ཁྱབ་པའི་བདག་ཉིད་དུ་གྱུར་པའི་ང་རྒྱལ་བཟུང་ངོ་། །རྡོ་རྗེ་བསྡམས་པ་ལས་མཛུབ་མོ་གཉིས་བརྐྱང་བ་སེམས་མ་རྡོ་རྗེ་མའི་དམ་རྒྱ་བཅས་ཏེ། ས་མ་ཡ་ཧོཿ ཞེས་པས་ཐམས་ཅད་མཉམ་པའི་ང་རྒྱལ་བྱས་ལ། ས་མ་ཡ་ས་ཏྭ་ཨ་དྷི་ཏིཥྛ་སྭ་མཾ། ཞེས་པ་ལན་བཞིས་སྙིང་ག་དང་། དཔྲལ་བ་དང་། ལྐོག་མ་དང་། སྤྱི་བོ་རྣམས་སུ་དམ་རྒྱ་དེས་གཏུགས་པས། མི་ཤིགས་པའི་བདག་ཉིད་སེམས་མ་བཞིའི་ངོ་བོ་རྡོ་རྗེ། རིན་པོ་ཆེ། པདྨ། སྣ་ཚོགས་རྡོ་རྗེ་རྣམས་ཀྱིས་རྒྱས་བཏབ་པས་བྱིན་གྱིས་བརླབས་པར་གྱུར། དེ་ནས་སྙིང་གར་ཟླ་བ་ལ་ཧཱུཾ་ཡིག་བཀོད་པར་བསམ་ལ། རྡོར་སེམས་ཀྱི་ཕྱག་ཆེན་བཅས་ཏེ། བཛྲ་ས་ཏྭ་ལན་གསུམ། དེའི་མཐར་སྔགས་ཀྱི་ཕྲེང་བས་བསྐོར་བར་བསམ་ཞིང་ཀློང་པའི་ཚུལ་དུ། ༀ་བཛྲ་ས་ཏྭ་ཧཱུཾ། ཞེས་ལན་གསུམ་བརྗོད་དོ། །དེ་ནས་བཟླས་པ་བྱ་སྟེ། བདག་དེ་བཞིན་གཤེགས་པ་ཐམས་ཅད་འདུས་པའི་བདག་ཉིད་དཔལ་རྡོ་རྗེ་སེམས་དཔར་གསལ་བའི་ཐུགས་ཀར་ཟླ་བ་ལ་གནས་པའི་ཧཱུཾ་ཡིག་དཀར་པོ་སྔགས་ཕྲེང་གིས་བསྐོར་བ་ལས་འོད་ཟེར་འཕྲོས་སེམས་ཅན་ཐམས་ཅད་ཀྱི་སྡིག་སྒྲིབ་དང་སྡུག་བསྔལ་ཐམས་ཅད་སྦྱངས་ནས། སླར་འདུས་པ་སྔགས་ཕྲེང་ལ་ཞུགས་པར་བསམ་ཞིང་། ལྷ་ཐམས་ཅད་ཀྱི་བདག་ཉིད་རྡོ་རྗེ་སེམས་དཔའ་སྔགས ༀ་བཛྲ་ས་ཏྭ་ཧཱུཾ། ཞེས་པ་ཁོ་ན་འམ། སྤྲོ་ན་དེའི་སྟེང་དུ་རིགས་ལྔའི་སྔགས། ༀ་བུདྡྷ་བཻ་རོ་ཙ་ན་ༀ། ༀ་བཛྲ་ཨཀྵོ་བྷྱཿཧཱུཾ། ༀ་རཏྣ་སཾབྷ་བ་ཏྲཱཾ། ༀ་པདྨ་ཨ་མི་ཏཱ་བྷ་ཧྲཱིཿ ༀ་ཀརྨ་ཨ་མོ་གྷ་སིདྡྷི་ཨཱཿ ཞེས་པ་རྣམས་ཀྱང་ཅི་རིགས་བཟླས་མཐར། ཡིག་བརྒྱ་ལན་གསུམ་གྱིས་བརྟན་པར་བྱའོ། །དེ་ནས་དོན་བྱས་པའི་སེམས་ཅན་དེ་རྣམས་ཀྱིས་བདག་རྡོ་རྗེ་སེམས་དཔའི་ངོ་བོར་གནས་པ་ལ་མཆོད་པར་བསམ་ལ། ༀ་སརྦ་ཏ་ཐཱ་ག་ཏ་ཨརྒྷཾ་པྲ་ཏཱི་ཙྪ་སྭཱཧཱ། དེ་བཞིན་དུ། ཨརྒྷཾ་གྱི་གནས་སུ། པུཥྤེ། དྷཱུ་པེ། ཨཱ་ལོ་ཀེ །གནྡྷེ། ནཻ་ཝི་དྱེ། ཤཔྡ་རྣམས་བཅུག་པས་མཆོད། མཚན་བརྒྱའམ་བསྡུས་པ་ལ་དགའ་ན། རང་བཞིན་ཆོས་སྐུ་དག་པའི་ཀློང་། །སྣ་ཚོགས་ཐབས་མཁས་ཐུགས་རྗེ་ཡིས། །རིགས་ལྔ་ཡེ་ཤེས་ལྔར་སྟོན་པ། །རྡོ་རྗེ་སེམས་དཔའ་ལ་ཕྱག་འཚལ། །ཞེས་བསྟོད། དེ་ནས་བུམ་བསྐྱེད་ནི། བུམ་པ་བསང་སྦྱངས། སྟོང་པའི་ངང་ལས་པད་ཟླའི་སྟེང་དུ་བྷྲུཾ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ལྷའི་གོས་ཀྱིས་མགུལ་དཀྲིས་པ། དཔག་བསམ་ཤིང་གི་ཁ་རྒྱན་ཅན། མཚན་ཉིད་ཐམས་ཅད་རྫོགས་པ། ནང་ཆུ་དང་བཅུད་སྣ་ཚོགས་ཀྱིས་ཡོངས་སུ་གང་བའི་རྣམ་རྒྱལ་བུམ་པའི་ནང་དུ་ལིང་ཚེ་དགུ་པ་སྒོ་ཕྱི་ནང་དང་བཅས་པའི་གཞལ་ཡས་ཁང་དུ་གྱུར་པའི་ལིང་ཚེ་དབུས་མར་ༀ་ལས་བཅོམ་ལྡན་འདས་རྣམ་པར་སྣང་མཛད་ཡུམ་བཞི་སྦས་པའི་མཚན་མས་བསྐོར་བ། ཕྱོགས་ཀྱི་ལིང་ཚེ་བཞིའི་ལྟེ་བར་ཤར་དུ་ཧཱུཾ་ལས་མི་བསྐྱོད་པ། ལྷོར་ཏྲཱཾ་ལས་རིན་ཆེན་འབྱུང་ལྡན། ནུབ་ཏུ་ཧྲཱིཿལས་སྣང་བ་མཐའ་ཡས། བྱང་དུ་ཨཱཿལས་དོན་ཡོད་གྲུབ་པ། དེ་བཞིའི་མདུན་རྒྱབ་གཡས་གཡོན་རྣམས་སུ་རང་རིགས་ཀྱི་སེམས་དཔའ་བཞི་བཞིས་བསྐོར་བ། མཚམས་ཀྱི་ལིང་ཚེ་དང་། གྲྭ་བཞི་དང་། སྒོ་རྣམས་སུ་སྒེག་སོགས་བཅུ་གཉིས། ཕྱིའི་སྣམ་བུ་ལ་སེམས་དཔའ་བཅུ་དྲུག་རྣམས་བཞུགས་པ། ཐམས་ཅད་ཀྱང་དར་དང་རིན་པོ་ཆེའི་རྒྱན་གྱིས་བརྒྱན་པ། ལས་བུམ་གྱི་ནང་དུ་པད་ཟླར་ཁྲོ་བོ་རྡོ་རྗེ་གནོད་སྦྱིན་ནག་པོ་མཆེ་བ་ཞལ་གྱི་གྲྭ་གཉིས་སུ་འཛིན་པ་རྣམས་གསལ་བར་གྱུར། ཡེ་ཤེས་པ་བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿས་བསྟིམ། ༀ་སརྦ་ཏ་ཐཱ་ག་ཏ་ཨརྒྷཾ་པྲ་ཏཱི་ཙྪ་སྭཱ་ཧཱ། སོགས་ཀྱིས་མཆོད། ཆོས་དབྱིངས་ཡེ་ཤེས་རྣམ་པར་དག །རྣམ་པར་སྣང་མཛད་བཅོམ་ལྡན་འདས། །སེམས་མ་བཞི་དང་བཅས་པ་ལ། །མཆོག་ཏུ་དད་པས་ཕྱག་འཚལ་བསྟོད། །མེ་ལོང་ཡེ་ཤེས་རྣམ་པར་དག །མི་བསྐྱོད་རྡོ་རྗེ་བཅོམ་ལྡན་འདས། །སེམས་དཔའ་བཞི་དང་བཅས་པ་ལ། །མཆོག་ཏུ་དད་པས་ཕྱག་འཚལ་བསྟོད། །མཉམ་ཉིད་ཡེ་ཤེས་རྣམ་པར༴ རིན་ཆེན་འབྱུང་ལྡན་བཅོམ་ལྡན༴ སེམས་དཔའ་བཞི་དང་༴ མཆོག་ཏུ་དད་པས༴ ཀུན་རྟོག་ཡེ་ཤེས་རྣམ་པར ༴ སྣང་བ་མཐའ་ཡས་བཅོམ༴ སེམས་དཔའ་བཞི་དང་༴ མཆོག་ཏུ་དད་པས༴ ནན་ཏན་ཡེ་ཤེས་རྣམ ༴ དོན་ཡོད་གྲུབ་པ་བཅོམ ༴ སེམས་དཔའ་བཞི་དང་༴ མཆོག་ཏུ ༴ ཆོས་ཀྱི་དབྱིངས་ལས་མ་གཡོས་ཀྱང་། །བདེ་གཤེགས་ཆོས་ཀྱི་དབྱིངས་བསྐུལ་བ། །མཆོད་པའི་ལྷ་མོ་བརྒྱད་རྣམས་ལ། །མཆོག་ཏུ་དད་པས༴ ཚད་མེད་བཞི་དང་བསྡུ་བ་བཞིས། །བདེ་གཤེགས་ཐམས་ཅད་སྤྱན་འདྲེན་པའི། །ཡེ་ཤེས་སྒོ་སྐྱོང་བཞི་རྣམས་ལ། །མཆོག་ཏུ༴ སྒོ་ཡི་ཁྱམས་ཀྱི་ནང་གནས་པ། །བྱམས་པ་ལ་སོགས་བཅུ་དྲུག་ནི། །དང་པོ་རབ་དགའ་ལ་སོགས་གནས། །ས་གནས་རྣམས་ལ་ཕྱག་འཚལ་ལོ། །ཞེས་དང་། ལས་བུམ་ལ། འཇིགས་པའི་ཧཱུཾ་སྒྲ་ངེས་སྒྲོག་ཅིང་། བགེགས་རྣམས་མ་ལུས་འཇོམས་མཛད་པ། །དངོས་གྲུབ་མ་ལུས་སྩོལ་བའི་ལྷ། །བགེགས་ཀྱི་དགྲ་ལ་ཕྱག་འཚལ་ལོ། །ཞེས་བསྟོད། དེ་ནས་གཟུངས་ཐག་ལ་འཇུས་ཏེ། ལྷ་རྣམས་ཀྱི་སྐུའི་ཆ་ཐམས་ཅད་ལས་ཡེ་ཤེས་ལྔའི་རང་བཞིན་གྱི་བདུད་རྩིའི་ཆུ་རྒྱུན་བབས་པས་བུམ་པ་གང་བར་དམིགས་ཏེ། རྣམ་རྒྱལ་དུ་དཀྱིལ་འཁོར་གྱི་ལྷ་ཐམས་ཅད་ཀྱི་སྔགས་སམ། བསྡུ་ན། ༀ་སརྦ་ཏ་ཐཱ་ག་ཏ་མ་ཧཱ་ཡོ་གཱི་ཤྭ་ར་ཧཱུཾ། ཞེས་པ་ཙམ་དང་། ལས་བུམ་ལ། ༀ་བཛྲ་ཡཀྵ་ཧཱུཾ། ཞེས་བཟླ། ཐུན་མོང་དུ། ཨ་བྷི་ཥེ་ཀ་ཡང་ཅུང་ཟད་བཟླས་ལ། མཆོད་བསྟོད་བྱས་ནས། ཡེ་ཤེས་པ། ༀ་བཛྲ་མུཿས་གཤེགས་སུ་གསོལ་ལ། མཆོད་ཡོན་ཕུལ་བས། དམ་ཚིག་པ་ཞུ་བ་བུམ་ཆུ་དང་རོ་གཅིག་ཏུ་གྱུར་པར་བསམ་ལ། ཡིག་བརྒྱ་བརྗོད་པས་བརྟན་པར་བསམ་མོ། །དེ་ནས་མདུན་བསྐྱེད་སྒྲུབ་མཆོད་ནི། རྡུལ་ཚོན་གྱི་དཀྱིལ་འཁོར། ཡཀྵས་བསང་། ༀ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པས་སྦྱངས་ཏེ། ཆོས་ཐམས་ཅད་སྟོང་ཉིད་ཡེ་ཤེས་རྡོ་རྗེའི་རང་བཞིན་དུ་གྱུར། སྟོང་པའི་ངང་ལས་ཨེ་ཡཾ་རཾ་ཝཾ་ལཾ་སུཾ་ལས་འབྱུང་བ་རིམ་བརྩེགས་རི་རབ་དང་བཅས་པའི་སྟེང་དུ་པདྨ་ལ་གནས་པའི་སྣ་ཚོགས་རྡོ་རྗེའི་ལྟེ་བ་ལ་རྫོགས་པའི་ག ཞལ་ཡས་ཁང་གྲུ་བཞི་སྒོ་བཞི་རྟ་བབས་བཞི་དང་ལྡན་པའི་ནང་དུ། དེའི་ཕྱེད་ཚད་ཀྱི་གཞལ་ཡས་ཁང་གྲུ་བཞི་སྒོ་བཞི་པ། གཉིས་ཀའང་ཕྱི་ནས་རིམ་པར་སྔོ་སེར་དམར་ལྗང་དཀར་བའི་རྩིག་པ་རིམ་པ་ལྔས་བསྐོར་བའི་སྟེང་དུ་ཕ་གུ་དང་དྲྭ་བ་དྲྭ་ཕྱེད་ལ་སོགས་པས་བརྒྱན་པ། ཤར་དཀར། ལྷོ་སྔོ། ནུབ་དམར། བྱང་ལྗང་བ། གཞལ་ཡས་ཁང་ནང་མར་རྩིག་པ་ལ་རེག་པའི་རྡོར་ཕྲེང་ཟླུམ་པོ་ལ་བརྟེན་པའི་ཀ་བ་བརྒྱད་དང་ལྡན་པའི་རེའུ་མིག་དགུའི་ཕྱོགས་བཞི་དབུས་དང་ལྔར་འཁོར་ལོ་རྩིབས་བཞི་པ་རེ་རེའི་ལྟེ་བར་དབུས་སུ་སེང་གེ །ཤར་དུ་གླང་པོ། ལྷོར་རྟ་མཆོག །ནུབ་ཏུ་རྨ་བྱ། བྱང་དུ་མཁའ་ལྡིང་རྣམས་ཀྱིས་བཏེགས་པའི་རིན་པོ་ཆེའི་ཁྲི་པདྨ་དང་ཟླ་བ། ལྷ་གནས་གཞན་རྣམས་སུ་པད་ཟླའི་གདན་རེ་རེ་གསལ་བར་གྱུར། རིའུ་མིག་དབུས་མའི་ལྟེ་བའི་གདན་ལ། ༀ་བུདྡྷ་བཻ་རོ་ཙ་ན་ༀ། བཅོམ་ལྡན་འདས་རྣམ་པར་སྣང་མཛད་སྐུ་མདོག་སེར་པོ་ཀུན་ཏུ་ཞལ། ཕྱག་གཉིས་བྱང་ཆུབ་མཆོག་གི་ཕྱག་རྒྱ་མཛད་པ། རྩིབས་བཞིའི་མདུན་དུ་ས་ཏྭ་བཛྲི་ཧཱུཾ། སེམས་མ་རྡོ་རྗེ་མའི་ངོ་བོ་རྡོརྗེ་རྩེ་ལྔ་པ་དཀར་པོ། གཡས་སུ་རཏྣ་བཛྲཱི་ཏྲཱཾ་རིན་ཆེན་རྡོ་རྗེའི་མའི་ངོ་བོ་ནོར་བུ་རིན་པོ་ཆེ། རྒྱབ་ཏུ་དྷརྨ་བཛྲི་ཧྲཱིཿཆོས་རྡོ་རྗེ་མའི་ངོ་བོ་པདྨ་དཀར་དམར་འདབ་མ་བཅུ་དྲུག་པའི་འདབ་བརྒྱད་མཐུར་དུ་གྱེས་ཤིང་འདབ་བརྒྱད་སྟེང་དུ་འཛུམ་པའི་ནང་ན་དང་པོའི་རྡོ་རྗེ་རྩེ་ལྔ་པ་ཆུད་པ། གཡོན་དུ་ཀརྨ་བཛྲི་ཨཱཿརྡོ་རྗེ་ལས་མའི་ངོ་བོ་སྣ་ཚོགས་རྡོ་རྗེ་རྭ་བཅུ་གཉིས་པ་རྣམས་སོ། །རིའུ་མིག་ཤར་མའི་ལྟེ་བའི་གདན་ལ་ༀ་བཛྲ་ཨཀྵོ་བྷྱཿ ཧཱུཾ་མི་བསྐྱོད་པ་དཀར་པོ་གཡས་ས་གནོན་དང་གཡོན་མཉམ་བཞག །རྩིབས་བཞིའི་མདུན་མར་ༀ་བཛྲ་ས་ཏྭ་ཧཱུཾ་རྡོ་རྗེ་སེམས་དཔའ་དཀར་པོ་གཡས་སོར་མོ་དབུས་མ་གསུམ་བསྒྲེང་བའི་གུང་མོའི་རྩེར་རྡོ་རྗེ་རྩེ་ལྔ་པ་ཐུགས་ཀར་གཏོད་པའི་ཚུལ་དང་གཡོན་དྲིལ་བུ་དཀུར་བརྟེན་པ། གཡས་སུ་ༀ་བཛྲ་རཱ་ཛ་ཛ་རྡོ་རྗེ་རྒྱལ་པོ་སེར་པོ་ཕྱག་གཉིས་ལྕགས་ཀྱུ། རྒྱབ་ཏུ་ༀ་བཛྲ་རཱ་ག་ཧོཿརྡོ་རྗེ་ཆགས་པ་དམར་པོ་ཨུཏྤ་ལ་དམར་པོ་ཁ་མ་བྱེ་བའི་མདེའུ་ཅན་གྱི་མདའ་གཞུ་འགེང་པ། གཡོན་དུ་ༀ་བཛྲ་སཱ་དྷུ་དྷུ་རྡོ་རྗེ་ལེགས་པ་ལྗང་གུ་སྙིང་གར་ཕྱག་གཉིས་རྡོ་རྗེ་དང་བཅས་པའི་མཐེབ་མཛུབ་ཀྱིས་སེ་གོལ་རྡེབ་པའོ། །རིའུ་མིག་ལྷོའི་ལྟེ་བའི་གདན་ལ་ༀ་རཏྣ་སམྦྷ་བ་ཏྲཱཾ། རིན་ཆེན་འབྱུང་ལྡན་སྔོན་པོ་གཡས་མཆོག་སྦྱིན་དང་གཡོན་མཉམ་བཞག །རྩིབས་བཞིའི་མདུན་མར་ༀ་བཛྲ་རཏྣ་ཏྲཱཾ་རྡོ་རྗེ་རིན་ཆེན་སྔོན་པོ་གཡས་ཁུ་ཚུར་གྱིས་རིན་པོ་ཆེ་དཔྲལ་བ་དང་གཡོན་དྲིལ་བུ་དཀུར་བརྟེན་པ། གཡས་སུ་ༀ་བཛྲ་ཏེ་ཛརྻ་རྡོ་རྗེ་གཟི་བརྗིད་དམར་པོ་གཡས་ཉི་མའི་དཀྱིལ་འཁོར། རྒྱབ་ཏུ་ༀ་བཛྲ་ཀེ་ཏུ་བྷྲི་རྡོ་རྗེ་རྒྱལ་མཚན་སྔོན་པོ་གཡས་རྒྱལ་མཚན། གཡོན་དུ་ༀ་བཛྲ་ཧ་ས་ཧ་རྡོ་རྗེ་བཞད་པ་དཀར་པོ་གཡས་སོའི་ཕྲེང་བ་འཛིན་པའོ། །རེའུ་མིག་ནུབ་མའི་ལྟེ་བའི་གདན་ལ་ༀ་པདྨ་ཨ་མི་ཏཱ་བྷཱ་ཧྲཱི༔ སྣང་བ་མཐའ་ཡས་དམར་པོ་ཕྱག་གཉིས་མཉམ་བཞག །རྩིབས་བཞིའི་མདུན་མར་ༀ་བཛྲ་དྷརྨ་ཧྲཱིཿརྡོ་རྗེ་ཆོས་དམར་པོ་གཡོན་པདྨ་དཀུར་བརྟེན་པའི་ཁ་གཡས་པའི་མཐེབ་མཛུབ་ཀྱིས་ཐུགས་ཀར་འགྱེད་པ། གཡས་སུ་ༀ་བཛྲ་ཏིཀྵྞ་དྷྲཱི་རྡོ་རྗེ་རྣོན་པོ་སྔོན་པོ་གཡས་རལ་གྲི་འཕྱར་ཞིང་གཡོན་ཐུགས་ཀར་པུསྟི། རྒྱབ་ཏུ་ༀ་བཛྲ་ཧེ་ཏུ་ཀྲུཾ་རྡོ་རྗེ་རྒྱུ་སེར་པོ་གཡས་པའི་གུང་མོ་ལ་འཁོར་ལོ་རྩིབས་བརྒྱད་པ་བསྐོར་བ། གཡོན་དུ་ༀ་བཛྲ་བྷཱ་ཥབྷཱ་རྡོ་རྗེ་སྨྲ་བ་དམར་པོ་གཡས་རྡོ་རྗེས་མཚན་པའི་ལྕེ་འཛིན་པའོ། །རིའུ་མིག་བྱང་མའི་ལྟེ་བའི་གདན་ལ་ༀ་ཀརྨ་ཨ་མོ་གྷ་སིདྡྷི་ཨཱཿདོན་ཡོད་གྲུབ་པ་ལྗང་གུ་གཡས་སྐྱབས་སྦྱིན་དང་གཡོན་མཉམ་བཞག །རྩིབས་བཞིའི་མདུན་མར་ༀ་བཛྲ་ཀརྨ་ཀཾ་རྡོ་རྗེ་ལས་ལྗང་ཀུ་གཡས་པའི་གུང་མོས་སྣ་ཚོགས་རྡོ་རྗེ་ཐུགས་ཀར་གཏོད་ཅིང་གཡོན་དྲིལ་བུ་དཀུར་བརྟེན་པ། གཡས་སུ་ༀ་བཛྲ་རཀྵ་ཧཾ་རྡོ་རྗེ་སྲུང་བ་ཆེན་པོ་ཕྱག་གཉིས་ཀྱིས་གོ་ཆ། རྒྱབ་ཏུ་ༀ་བཛྲ་ཡཀྵ་ཧཱུཾ་རྡོ་རྗེ་གནོད་སྐྱིན་སྔོན་པོ་ཕྱག་གཉིས་རྡོ་རྗེའི་མཆེ་བ་ཁ་འགྲམ་སོ་སོར་འཛིན་པ། གཡོན་དུ་ༀ་བཛྲ་སནྡྷི་བཾ་རྡོ་རྗེ་ཁུ་ཚུར་སེར་པོ་ཕྱག་གཉིས་དམ་ཚིག་གི་ཁུ་ཚུར་གྱིས་རྡོ་རྗེ་རྩེ་ལྔ་པ་འཚིར་བའོ། །མཚམས་ཀྱི་རིའུ་མིག་བཞིའི་ཤར་ལྷོར་ༀ་བཛྲ་ལཱ་སྱ་ཧཱུཾ་སྒེག་མོ་དཀར་མོ་སྙེམས་པའི་ཚུལ་གྱིས་ཕྱག་གཉིས་དཀུར་བརྟེན་པའི་གཡས་པས་མེ་ལོང་། ལྷོ་ནུབ་ཏུ་ༀ་བཛྲ་མཱ་ལེ་ཏྲཱཾ་ཕྲེང་བ་མ་སེར་མོ་ཕྱག་གཉིས་ཀྱི་རིན་པོ་ཆེའི་ཕྲེང་བ། ནུབ་བྱང་དུ་ༀ་བཛྲ་གྷི་རྟི་ཧྲཱིཿགླུ་མ་དམར་མོ་ཕྱག་གཉིས་ཀྱིས་པི་ཝཾ་བརྡུང་བ། བྱང་ཤར་དུ་ༀ་བཛྲ་ནྲྀ་ཏྱ་ཨ་གར་མ་ལྗང་གུ་ཕྱག་གཉིས་ཀྱིས་རྡོ་རྗེ་རྩེ་གསུམ་བསྣམས་ནས་གར་བསྒྱུར་བ། ཤར་ལྷོ་ནས་བརྩམས་ཏེ་གྲྭ་བཞིར་གཡས་བསྐོར་དུ་ༀ་བཛྲ་དྷཱུ་པེ་ཧཱུཾ། སྤོས་མ་དཀར་མོ་ཕྱག་གཉིས་ཀྱིས་སྤོས་ཕོར། ༀ་བཛྲ་པུཥྤེ་ཏྲཾ་མེ་ཏོག་མ་སེར་པོ་གཡོན་མེ་ཏོག་གི་སྣོད་འཛིན་པ་ལས་གཡས་པས་འཐོར་བ། ༀ་བཛྲ་ཨཱ་ལོ་ཀེ་ཧྲཱིཿམར་མེ་མ་དམར་སྐྱ་ཕྱག་གཉིས་མར་མེའི་མཆོད་སྡོང་། ༀ་བཛྲ་གནྡྷེ་ཨ་དྲི་ཆབ་མ་ལྗང་ཁུ་གཡོན་དུང་ཕོར་ལས་གཡས་པས་དྲི་བྱུག་པ། ཤར་ནས་གཡས་བསྐོར་གྱི་སྒོ་བཞིར་ༀ་བཛྲ་ཨཾ་ཀུ་ཤ་ཛཿརྡོ་རྗེ་ལྕགས་ཀྱུ་དཀར་པོ་ཕྱག་གཉིས་ཀྱིས་ལྕགས་ཀྱུ། ༀ་བཛྲ་པཱ་ཤ་ཧཱུཾ་རྡོ་རྗེ་ཞགས་པ་སེར་པོ་ཕྱག་གཉིས་ཀྱིས་ཞགས་པ། ༀ་བཛྲ་སྥོ་ཊ་བཾ་རྡོ་རྗེ་ལྕགས་སྒྲོག་དམར་པོ་ཕྱག་གཉིས་ཀྱི་ལྕགས་སྒྲོག །ༀ་བཛྲ་ཨཱ་བེ་ཤ་ཨ་རྡོ་རྗེ་འབེབས་པ་ལྗང་གུ་གཡས་དྲིལ་བུ་དཔུང་མགོའི་ཐད་དུ་འཁྲོལ་བ། དེ་རྣམས་ཀྱི་ཕྱག་གཡོན་མ་སྨོས་པ་ཐམས་ཅད་གདན་ལ་བརྟེན་པའོ། །དཀྱིལ་འཁོར་ཕྱི་མའི་ཕྱོགས་བཞིའི་ལྷ་སྣམ་ལ། ༀ་སརྦ་སཾ་སྐཱ་ར་པ་རི་ཤུདྡྷ་དྷརྨ་ཏེ་ག་ག་ན་ས་མུདྒ་ཏེ་སྭཱ་བྷཱ་ཝ་བི་ཤུདྡྷེ་མ་ཧཱ་ན་ཡ་པ་རི་ཝ་རེ་སྭཱ་ཧཱ། ཤར་དུ་བྱང་ཆུབ་སེམས་དཔའ་བྱམས་པ། མཐོང་བ་དོན་ཡོད། ངན་སོང་ཀུན་འདྲེན། མྱ་ངན་དང་མུན་པ་ཐམས་ཅད་ངེས་པར་འཇོམས་པའི་བློ་གྲོས་བཞི་དཀར་པོ། ལྷོར་སྤོས་ཀྱི་གླང་པོ། དཔའ་བར་འགྲོ་བ། ནམ་མཁའ་མཛོད། ཡེ་ཤེས་ཏོག་བཞི་སེར་པོ། ནུབ་ཏུ་འོད་དཔག་མེད། ཟླ་འོད། བཟང་སྐྱོང་། དྲྭ་བ་ཅན་གྱི་འོད་བཞི་དམར་པོ། བྱང་དུ་རྡོ་རྗེ་སྙིང་པོ། བློ་གྲོས་མི་ཟད་པ། སྤོབས་པ་བརྩེགས་པ། ཀུན་ཏུ་བཟང་པོ་བཞི་ལྗང་གུ། སྐལ་བཟང་གི་སེམས་དཔའ་བཅུ་དྲུག་པོ་རྡོ་རྗེ་དང་དྲིལ་བུ་འཛིན་པ། གཙོ་འཁོར་ཐམས་ཅད་ཀྱང་དར་དང་རིན་པོ་ཆེའི་རྒྱན་གྱིས་བརྒྱན་ཅིང་། དེ་བཞིན་གཤེགས་པ་ལྔ་པོ་དབུ་སྐྲ་རལ་པའི་ཐོར་ཅོག་ཅན། ཞབས་རྡོ་རྗེའི་སྐྱིལ་མོ་ཀྲུང་དང་ཉི་མའི་རྒྱབ་ཡོལ་མངའ་བ། འཁོར་རྣམས་སེམས་དཔའི་སྐྱིལ་མོ་ཀྲུང་དང་ཟླ་བའི་རྒྱབ་ཡོལ་ཅན། རྡོ་རྗེ་གནོད་སྦྱིན་ཁྲོ་བོ་དང་གཞན་ཐམས་ཅད་ཞི་ཞིང་འཛུམ་ལ་སྒེག་པའི་ལང་ཚོ་རབ་ཏུ་རྒྱས་པའོ། །དེ་ནས་རང་ཧཱུཾ་མཛད་ཀྱི་རྒྱལ་དུ་འཕོས་ནས། ༀ་བཛྲོདྒྷ་ཊ་ས་མ་ཡ་པྲ་བེ་ཤ་ཡ་ཧཱུཾ། ཞེས་པའི་སྔགས་རྒྱས་སྒོ་ཕྱེ་ལ། རང་རྡོ་རྗེ་སེམས་དཔར་ང་རྒྱལ་འཕོས་པས་ཡེ་ཤེས་པ་སྤྱན་དྲང་སྟེ། སྤོས་དང་རྡོར་དྲིལ་འཛིན་ཞིང་དབྱངས་དང་བཅས་པས། ཧཱུཾ། མ་ལུས་སེམས་ཅན་ཀུན་གྱི་མགོན་གྱུར་ཅིང་། །བདུད་སྡེ་དཔུང་བཅས་མི་བཟད་འཇོམས་མཛད་ལྷ། །དངོས་རྣམས་མ་ལུས་ཇི་བཞིན་མཁྱེན་གྱུར་པའི། །བཅོམ་ལྡན་རྣམ་སྣང་འཁོར་བཅས་གཤེགས་སུ་གསོལ། །ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎི་ཀ་བཛྲ་དྷཱ་ཏུ་བཻ་རོ་ཙ་ན་ས་པ་རི་ཝཱ་ར་དྲྀ་ཤྱ་ཧོཿ ༀ་བཛྲ་དྷཱ་ཏུ་ས་མཱ་ཛཿ ཞེས་རྡོ་རྗེ་བསྡུ་བའི་རྒྱ་དང་། ཛཿཧཱུཾ་བཾ་ཧོཿའི་སྔགས་རྒྱས་སྒོ་ཁང་སོ་སོར་དགུག་གཞུག་བཅིངས་མཉེས་བྱས་ཏེ་སྤྱན་དྲངས་པ་ལ། མཆོད་ཡོན་སྦྲེང་བཞིན་དུ། བཅོམ་ལྡན་འདིར་ནི་བྱོན་པ་ལེགས། །བདག་ཅག་བསོད་ནམས་སྐལ་བར་ལྡན། །བདག་གི་མཆོད་ཡོན་བཞེས་ནས་ཀྱང་། །ཐུགས་རྗེས་ཐུགས་དཔག་མཛད་དུ་གསོལ། །ༀ་བཛྲ་ས་ཏྭ་ཧཱུཾ། ༀ་ག་ག་ན་ས་མ་ཡ་སྭཱ་ཧཱ། དེ་ནས་ཁྲུས་གསོལ་ཏེ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ༀ་བཛྲ་སརྦ་དེ་བ་ཏ་ཨར་ཙི་ཏ་ཨ་མྲྀ་ཏེ་ཧ་ར་སྭཱ་ཧཱ། དེ་ནས་གདན་དབུལ་ཏེ། བདག་དང་འགྲོ་ལ་ཐུགས་བརྩེའི་ཕྱིར། །ཉིད་ཀྱི་རྫུ་འཕྲུལ་མཐུ་ཡིས་ནི། །ཇི་སྲིད་མཆོད་པ་བདག་བགྱིད་ན། །དེ་སྲིད་བཅོམ་ལྡན་བཞུགས་སུ་གསོལ། །ༀ་པདྨ་ཨཱ་ས་ན་ཧཱུཾ། དེ་ནས། ༀ་བཛྲ་པུཥྤེ་ཧཱུཾ། སོགས་ཀྱིས་རྣམ་ལྔ་ཕུལ་ལ། ༀ་བཛྲ་ཨཾ་ཀུ་ཤ་ཛཿ ༀ་བཛྲ་པཱ་ཤ་ཧཱུཾ། ༀ་བཛྲ་སྥོ་ཊ་བཾ། ༀ་བཛྲ་ཨཱ་བེ་ཤ་ཨཱཿ ཞེས་པའི་སྔགས་དང་ཕྱག་རྒྱ་བཞིས་སྒོ་ཁང་ན་བཞུགས་པའི་ཡེ་ཤེས་པ་རྣམས་དམ་ཚིག་པ་ལ་དགུག་གཞུག་བཅིང་མཉེས་བྱས་ལ། རྡོ་རྗེ་གནོད་སྦྱིན་གྱི་ལས་རྒྱ་དང་། ༀ་བཛྲ་ཡཀྵ་ཧཱུཾ། ལན་གཉིས་ཀྱིས་ཕྱི་འབྲང་གི་བགེགས་བསྐྲད་ཅིང་བསྲུང་། རྡོ་རྗེ་ཁུ་ཚུར་གྱི་ལས་རྒྱ་བཅས་ལ། བཛྲ་སནྡྷི་བཾ་གྱིས་སྒོ་བཅད། དེ་ནས་སྐབས་འདིར་ཕྱག་རྒྱ་བཞིས་རྒྱས་གདབ་སྟེ། དེ་ལ་དམ་རྒྱ་ནི། ཐལ་མོ་རྩེ་སྤྲད་དེ། ས་མ་ཡ་སྟྭཾ། ཞེས་ཞབས་བརྡབས་པས་དགའ་བ་བསྐྱེད་ནས་རྣམ་སྣང་གི་དམ་རྒྱ་བཅས་ལ། བཛྲ་དྷཱ་ཏུ་དྲྀ་ཤྱ། མདུན་གྱི་ཡེ་ཤེས་པ་ལ་བལྟ། ཛཿཧཱུཾ་བཾ་ཧོཿས་བསྟིམ། ས་མ་ཡ་སྟྭཾ། རྒྱབ་ཏུ་ཉི་མའི་འོད་ཁྱིམ་གྲུབ། ས་མ་ཡ་སྟྭཾ་ཨ་ཧཾ། རྣམ་སྣང་གི་ང་རྒྱལ་བྱ། བཛྲ་དྷཱ་ཏུ། ལན་གསུམ་བཟླས་པས་ཐུགས་ཀར་ཉི་མ་ལ་སྙིང་པོ་བསམ། ༀ་སརྦ་ཏ་ཐཱ་ག་ཏ་མ་ཧཱ་ཡོ་གཱི་ཤྭ་ར་ཧཱུཾ། ཞེས་ལན་གསུམ་བརྗོད་ཅིང་སྙིང་པོའི་མཐར་བཀོད། དེས་མཚོན་ཏེ་རིགས་གཞན་བཞི་ལ། རང་རང་གི་དམ་རྒྱ་འཆའ་ཞིང་སྔགས་གཞན་རྣམས་འདྲ་བ་ལས། སརྦ་ཏ་ཐཱ་ག་ཏ་མ་ཧཱ་ཡོ་གཱི་ཤྭ་རའི་ཚབ་ཏུ། ༀ་བཛྲ་ས་ཏྭ་ཧཱུཾ། ༀ་བཛྲ་རཏྣ་ཧཱུཾ། ༀ་བཛྲ་དྷརྨ་ཧཱུཾ། ༀ་བཛྲ་ཀརྨ་ཧཱུཾ་བཞིས་བརྗེ། དེ་བཞིན་དུ་འཁོར་རྣམས་ལ། སུ་ར་ཏ་སྟྭཾ། ཐལ་མོ་རྩེ་སྤྲད་པའི་ཞབས་བརྡབས་པས་དགའ་བ་བསྐྱེད། རྡོར་སེམས་ཀྱི་དམ་རྒྱ་བཅས་ལ། བཛྲ་ས་ཏྭ་དྲྀ་ཤྱ་ཡིས་བལྟ། ཛཿཧཱུཾ་བཾ་ཧོཿས་བསྟིམ། ས་མ་ཡ་སྟྭཾ། ཟླ་བའི་རྒྱབ་ཡོལ། ས་མ་ཡ་སྟྭཾ་ཨ་ཧཾ་གིས་ང་རྒྱལ། བཛྲ་ས་ཏྭ་གསུམ་གྱིས་ཐུགས་ཀར་ཟླ་བར་སྙིང་པོ། དེའི་མཐར། ༀ་བཛྲ་ས་ཏྭ་ཧཱུཾ། ཞེས་བཀོད་ལ་ལན་གསུམ། དེས་མཚོན་ཏེ་རྡོ་རྗེ་རྒྱལ་པོ་སོགས་རང་རང་གི་དམ་རྒྱ་འཆའ་ཞིང་། བཛྲ་ས་ཏྭའི་ཚབ་ཏུ། བཛྲ་རཱ་ཛ་སོགས་རང་སྔགས་ཀྱིས་བརྗེ་བ་མ་གཏོགས་འདྲའོ། །དེ་ལྟར་རྒྱས་བཏབ་པས་ལྷ་ཐམས་ཅད་ཀྱི་སྙིང་གར་དང་པོའི་རྡོ་རྗེ་རྩེ་ལྔ་པས་མཚན་པར་གྱུར། དེ་ལ་སོ་སོའི་དམ་རྒྱ་འཆིང་ཚུལ་ནི། རྡོ་རྗེ་བསྡམས་པ་གཞིར་བཞག་ནས། གུང་མོ་མྱུ་གུ་ལྟར་མཉམ་པར་སྒྲེང་བ་རྣམ་སྣང་། གུང་མོ་ནང་དུ་གཤིབས་ནས་སྦས་པ་མི་བསྐྱོད་པ། གུང་མོ་རིན་ཆེན་འདྲ་བ་རིན་འབྱུང་། གུང་མོ་པདྨ་ལྟར་དགུག་པ་མཐའ་ཡས། རྡོར་བསྡམས་ཟླུམ་པོ་ལས་མཛུབ་མོ་བཀུག་པ་དོན་གྲུབ། རྡོར་བསྡམས་ལས་གུང་མོ་གཤིབས་ཏེ་སྒྲེང་ཞིང་མཐེ་བོང་དང་མཐེ་ཆུང་བཞི་ཕྲལ་ནས་སྒྲེང་བ་ནི་རྡོར་སེམས། །མཛུབ་གཉིས་ལྕགས་ཀྱུ་འདྲ་བ་རྡོ་རྗེ་རྒྱལ་པོ། མཛུམ་གཉིས་ལྟོ་སྦྱར་ནས་བརྐྱང་པ་རྡོ་རྗེ་ཆགས་པ། མཐེབ་མཛུབ་ཀྱི་སེ་གོལ་སྙིང་གར་རྡེབ་པ་རྡོ་རྗེ་ལེགས་པ། མཐེ་བོང་གཤིབས་ཤིང་མཛུབ་རྩེ་སྤྲད་པ་ལས་ཚིགས་བཅག་པ་རྡོ་རྗེ་རིན་ཆེན། རྡོ་རྗེ་ཐལ་མོ་ལས་མཐེབ་མཛུབ་སྔར་ལྟར་བྱས་པ་རྡོ་རྗེ་གཟི་བརྗིད། རྡོར་བསྔམས་ལས་སྲིན་ལགས་མཐེ་ཆུང་གཉིས་མཉམ་པར་གཤིབས་པ་རྡོ་རྗེ་རྒྱལ་མཚན། དེ་ཉིད་བསྐོར་ནས་ཁའི་ཕྱོགས་བཞག་པ་རྡོ་རྗེ་བཞད་པ། མཐེ་བོང་མཉམ་གཤིབས་མཛུབ་རྩེ་གཉིས་བཀུག་པ་རྡོ་རྗེ་ཆོས། གུང་མོ་གཤིབས་ཏེ་སྒྲེང་བའི་རྩེ་བཀུག་པ་རྡོ་རྗེ་རྣོན་པོ། དེ་ལས་སྲིན་ལག་དང་མཐེ་ཆུང་གཤིབས་བ་རྡོ་རྗེ་རྒྱུ། རྡོར་བསྔགས་ལས་མཐེ་བོང་གཉིས་ཕན་ཚུན་དུ་ཕྱེ་ལ་ཐལ་མོ་བཀན་ཏེ་ཁའི་ཕྱོགས་བཞག་པ་རྡོ་རྗེ་སྨྲ་བ། རྡོར་བསྡམས་ལས་མཐེ་བོང་མཐེའུ་ཆུང་རྩེ་སྤྲད་དེ་བཀྱེད་པ་རྡོ་རྗེ་ལས། དེ་ལས་མཛུམ་མོ་གཤིབས་ཏེ་སྙིང་གར་བརྐྱང་པ་རྡོ་རྗེ་བསྲུང་བ། མཛུབ་གཉིས་བཀུག་པ་ལྕགས་ཀྱུ་ལྟར་བྱས་ཤིང་མཐེ་ཆུང་གཉིས་གཤིབས་པ་མཆེ་བ་ལྟར་བྱས་པ་རྡོ་རྗེ་གནོད་སྦྱིན། མཐེ་ཆུང་གཉིས་ཀྱི་ནང་དུ་མཐེ་བོང་བཅུག་པའི་རྩ་བ་མཛུབ་མོ་གཉིས་ཀྱིས་འཆིར་བ་རྡོ་རྗེ་ཁུ་ཚུར། རྡོར་བསྡམས་ཀྱི་མཐེ་བོང་མཉམ་པ་སྙིང་གར་བཞག་པ་སྒེག་མོ། རྡོ་རྗེ་ཐལ་མོ་ཕྲེང་མ། རྡོ་རྗེ་ཐལ་སྦྱར་ཏེ་ཁ་ནས་དབྱུང་བ་གླུ་མ། རྡོར་ཐལ་བསྐོར་བ་སྤྱི་བོར་བཞག་པ་གར་མ། རྡོར་བསྡམས་བཅིང་བ་མཐུར་དུ་བླུག་པ་སྤོས། རྡོར་ཐལ་ཕྱེ་ནས་གྱེན་དུ་འཐོར་བ་མེ་ཏོག །རྡོར་བསྡམས་ལས་མཐེ་བོང་མཉམ་པ་མར་མེ། རྡོར་ཐལ་ཕྱེ་ནས་བརྐྱང་བ་བྱུག་པ། རྡོར་བསྡམས་ལས་མཛུབ་མོ་གཡས་པ་བཀུག་པ་ལྕགས་ཀྱུ། རྡོར་བསྡམས་ལས་མཐེ་བོང་གཡས་པ་ནང་དུ་བཅུག་ལ་མདུན་པ་ཞགས་པ། མཐེ་བོང་མཛུབ་མོ་སོ་སོར་རྩེ་སྤྲད་པ་གདུ་བུ་ལྟ་བུ་ལྕགས་སྒྲོག །རྡོ་རྗེ་བཅིང་བ་ལས་མཛུབ་མོ་ནང་དུ་བཅུག་ལ་མཐེ་བོང་གཉིས་ཀྱིས་བསྡམས་པ་དྲིལ་བུའོ། །དེ་ནས་ཆོས་རྒྱ་ནི། ལྷ་ཐམས་ཅད་ཀྱི་ལྐོག་མར་ཧྲཱིཿལས་པདྨ་དམར་པོ་འདབ་བརྒྱད་ཀྱི་འདབ་མར་ཨ་ལས་ཟླ་བའི་སྟེང་དུ་ཧཱུཾ་ལས་རྡོ་རྗེ་རྩེ་ལྔ་དཀར་པོ་ཆུར་ཉལ་བ། ༀ་བཛྲ་ཛི་ཧྭ། རྡོ་རྗེའི་ལྟེ་བར་ལྷ་རང་རང་གི་ཆོས་ཡིག་རིགས་ལྔ་ལ་བཛྲ་ཛྙཱ་ན་རེ་རེ་དང་། སེམས་དཔའ་དང་སྒེག་སོགས་བཅུ་གཉིས་ལ་རིམ་པར། ས་མ་ཡ་སྟྭཾ། ཨཱ་ན་ཡ་སྭ། ཨ་ཧོ་སུ་ཁ། སཱ་དྷུ་སཱ་དྷུ། སུ་མ་ཧཱ་སྟྭཾ། རཱུ་པོ་དྱོ་ཏི། ཨཪྠ་པྲ་པྟི། ཧ་ཧ་ཧཱུཾ་ཧེ། སརྦ་ཀཱ་རི། དུ་ཁ་ཙྪེ་ད། བུདྡྷ་བ་དྷི། པྲ་ཏི་ཤཔྟ། སུ་བ་ཤི་ཏྭཾ། ནི་རྦ་ཡ་ཏྭི། ཤ་ཏྲཾ་བྷ་ཀྵ། སརྦ་སིདྡྷི། མ་ཧཱ་ར་ཏི། རཱུ་བོ་ཤོ་བྷེ། ཤོ་ཌ་ས་ཁྱ། སརྦ་པཱུ་ཛེ། པྲ་ཧླ་ད་ནི། ཕ་ལ་ག་མི། སུ་ཧེ་ཛཱ་གྲི །སུ་གནྡྷ་གི །ཨཱ་ཡ་ཧེ་ཛཿ ཨཱ་ཱཡ་ཧེ་ཧཱུཾ། ཧེ་སྥོ་ཊ་བཾ། གྷཎྜེ་ཨ་ཨཱཿརྣམས་ཀྱིས་མཚན་པས་རང་སྒྲ་གྲགས་པར་མོས་ཞིང་ངག་ནས་བརྗོད་དོ། །དེ་ནས་ལས་རྒྱ་ནི། ལྷ་ཐམས་ཅད་ཀྱི་ཐུགས་ཀར་སྣ་ཚོགས་རྡོ་རྗེ་རེ་རེ་གསལ་བར་བསམ་ལ། དཀུ་གཡོན་དུ་ཁུ་ཚུར་བཅིངས་པ་ཁ་སྦྱར་བ་ལས་འོག་མ་མཛུབ་མོ་དང་སྟེང་མ་མཐེའུ་ཆུང་ནས་བཀྲོལ་ཏེ་བ་དན་བསྐྱོད་པ་སྔོན་དུ་འགྲོ་བའམ། བསྡུས་པ་ལའང་པད་བསྐོར་སྔོན་དུ་འགྲོ་བས་རང་རང་གི་ལས་རྒྱ་བཅའ་བཞིན་དུ་རིགས་ལྔ་ལ། ༀ་བཛྲ་དྷཱ་ཏུ་རེ་རེ་དང་། འཁོར་རྣམས་ལ་རིམ་པར། ༀ་བཛྲ་ས་ཏྭ། ༀ་བཛྲ་རཱ་ཛ། ༀ་བཛྲ་རཱ་ག །ༀ་བཛྲ་སཱ་དྷུ། ༀ་བཛྲ་རཏྣ། ༀ་བཛྲ་ཏེ་ཛ། ༀ་བཛྲ་ཀེ་ཏུ། ༀ་བཛྲ་ཧ་ས། ༀ་བཛྲ་དྷརྨ། ༀ་བཛྲ་ཏིཀྵྞ། ༀ་བཛྲ་ཧེ་ཏུ། ༀ་བཛྲ་བྷ་ཥ། ༀ་བཛྲ་ཀརྨ། ༀ་བཛྲ་རཀྵ། ༀ་བཛྲ་ཡཀྵ། ༀ་བཛྲ་སནྡྷི། ༀ་བཛྲ་ལཱ་སྱ། ༀ་བཛྲ་མཱ་ལེ། ༀ་བཛྲ་གཱི རྟི། ༀ་བཛྲ་ནྲྀ་ཧྱེ། ༀ་བཛྲ་དྷཱུ་པེ། ༀ་བཛྲ་པུཥྤེ། ༀ་བཛྲ་ཨཱ་ལོ་ཀེ །ༀ་བཛྲ་གནྡྷེ། ༀ་བཛྲ་ཨཾ་ཀུ་ཤ །ༀ་བཛྲ་པཱ་ཤ །ༀ་བཛྲ་སྥོ་ཊ། ༀ་བཛྲ་ཨཱ་བེ་ཤ །སོ་སོའི་ལས་རྒྱ་འཆིང་ཚུལ་ནི། རྣམ་སྣང་ལ་བྱང་ཆུབ་མཆོག་རྒྱ། མི་བསྐྱོད་རིན་འབྱུང་དོན་གྲུབ་གསུམ་ལག་གཡོན་ནུ་མ་གཡོན་པའི་ཐད་དུ་ཆོས་གོས་ཀྱི་གྲྭ་འཛིན་པའི་ཚུལ་དང་གཡས་ས་གནོན་སོགས་སོ་སོའི་ཕྱག་ཆེན། སྣང་མཐའ་ཕྱག་གཉིས་གཉམ་བཞག །ལག་གཡས་རྡོ་རྗེ་གསོར་ཚུལ་དང་གཡོན་བསྒྱིང་བ་དང་བཅས་པ་ནི་རྡོར་སེམས། ལག་གཉིས་ལྕགས་ཀྱུ་འཛིན་པ་ལྟ་བུ་རྡོ་རྗེ་རྒྱལ་པོ། མདའ་འཕང་ཚུལ་རྡོ་རྗེ་ཆགས་པ། མཐེབ་མཛུབ་ཀྱི་སེ་གོལ་སྙིང་གར་གཞག་པ་རྡོ་རྗེ་ལེགས་པ། །ཁུ་ཚུར་གཉིས་གཤིབས་དཔྲལ་བར་བཞག་པ་རྡོ་རྗེ་རིན་ཆེན། རྡོ་རྗེ་ཁུ་ཚུར་གཉིས་སྟེང་འོག་ཏུ་སྦྱར་བ་སྙིང་གར་བཞག་པ་རྡོ་རྗེ་གཟི་བརྗིད། ཁུ་ཚུར་གཡོན་པར་གཡས་པའི་གྲུ་མོ་བཙུགས་པ་རྡོ་རྗེ་རྒྱལ་མཚན། གཡས་གཡོན་སོ་ཕྲེང་འཛིན་ཚུལ་ཁ་ཕྱོགས་བསྐོར་བ་རྡོ་རྗེ་བཞད་པ། གཡས་པའི་མཐེབ་མཛུབ་ཀྱིས་གཡོན་པའི་པདྨ་ཁ་འབྱེད་པ་ལྟར་བྱེད་པ་རྡོ་རྗེ་ཆོས། སྙིང་གར་གཡོན་པ་རལ་གྲི་མདུད་པ་ལྟར་བྱེད་པ་རྡོ་རྗེ་རྣོན་པོ། རྡོ་རྗེ་ཁུ་ཚུར་ཁ་སྦྱར་ལ་མགལ་མེ་ལྟར་བསྐོར་བ་རྡོ་རྗེ་རྒྱུ། རྡོ་རྗེ་ཁུ་ཚུར་གཉིས་ཁ་ནས་དབྱུང་བ་ལྟར་བྱེད་པ་རྡོ་རྗེ་སྨྲ་བ། རྡོ་རྗེ་ཐལ་མོ་གར་བསྐོར་བཀྲོལ་ནས་འགྲམ་གཡས་གཡོན་དང་སྤྱི་བོར་བཞག་པ་རྡོ་རྗེ་ལས། གོ་ཆ་བཀོན་ཚུལ་རྡོ་རྗེ་སྲུང་བ། ཁུ་ཚུར་ལས་མཐེ་ཆུང་གཉིས་མཆེ་བ་ལྟ་བུ་ཁ་འགྲམ་དུ་བཞག་པ་རྡོ་རྗེ་གནོད་སྦྱིན། ཁུ་ཚུར་གཉིས་དཀུ་གཡོན་དུ་མནན་པ་རྡོ་རྗེ་ཁུ་ཚུར། རྡོ་རྗེ་བསྒྱིངས་ཚུལ་གྱིས་འདུད་པ་སྒེག་མོ། ཕྲེང་བ་བཅིང་པ་ཕྲེང་མ། རྡོ་རྗེ་ཚུལ་ཁ་ནས་དབྱུང་བ་གླུ་མ། རྡོ་རྗེ་གར་བསྐོར་བ་གར་མ། རྡོ་རྗེ་ཁུ་ཚུར་གྱིས་བདུག་པ་དང་འཐོར་བ་དང་བསྐོར་བ་དང་བྱུག་པ་ལྟར་བྱ་བ་མཆོད་པའི་ལྷ་མོ་བཞི། ཁུ་ཚུར་ལས་གཡས་པའི་མཛུབ་མོ་དང་གཡོན་པའི་མཐེ་ཆུང་བཅིང་བ་ལྕགས་ཀྱུ་དང་། མཁྲིག་མ་མདུད་པ་ཞགས་པ། མཛུབ་གཉིས་གདུ་བུ་ལྟར་བྱས་པ་ལྕགས་སྒྲོག །རྒྱབ་གཉིས་མཉམ་སྟེ་མནན་པ་དྲིལ་བུའོ། །དེ་ནས་ཕྱག་ཆེན་ནི། ལྷ་ཐམས་ཅད་ཀྱི་ཐུགས་ཀར་ཟླ་བ་ལ་དང་པོའི་རྡོ་རྗེ་རྩེ་ལྔ་པ་རེ་གསལ་གཏབ་ལ། སྔགས་ནི་ལས་རྒྱ་བཞིན་ལས་ཐོག་མའི་ༀ་ཡིག་བོར་བ་ཡིན་ལ། ཕྱག་རྒྱའི་སྒར་མདུན་བསྐྱེད་གསལ་འདེབས་ཀྱི་མངོན་རྟོགས་ལྟར་འཆིང་ངོ་། །འདིར་མ་ཟད་སྔར་གྱི་དམ་རྒྱའི་མཇུག་ཏུ་སོ་སོའི་སྔགས་སྙིང་པོའི་མཐར་བཀོད་དེ་ལན་གསུམ་བཟླ་བ་དང་། ཆོས་རྒྱའི་སྔགས་རྣམས་འདོན་པའི་ཚེ་ཡང་ལྷ་སོ་སོའི་ཕྱག་ཆེན་སྟོན་པའི་ལུགས་འབྱུང་སྟེ། ངེས་པར་དགོས་པ་མ་ཡིན་ཀྱང་ལྷ་དེ་དང་དེ་ནི་འདིའོ་ཞེས་ཤེས་པའི་ཆེད་ཙམ་མོ། །ཁྱམས་ཕྱི་མའི་སེམས་དཔའ་རྣམས་ལ་ནི་རིམ་པ་བཞིན་འཁོར་ལོ་བསྒྱུར་བ་བཞིའི་ཕྱག་རྒྱས་བཏབ་པར་བྱའོ། །དེ་ནས་རྡོ་རྗེ་རིན་ཆེན་གྱི་དམ་རྒྱ་དང་ༀ་བཛྲ་རཏྣ་ཨ་བྷི་ཥིཉྩ་མཾ། ཞེས་པས། དེ་བཞིན་གཤེགས་པ་རྣམས་ལ་རིན་པོ་ཆེའི་ཅོད་པན་གྱིས་དབང་བསྐུར། རྡོར་ཐལ་ལས་གུང་མོ་གཤིབས་ཏེ་སྒྲེང་བའི་ཚིགས་དབུས་མར་མཛུབ་རྩེ་བཀུག་པ་སྦྱར་བ་སྤྱི་བོར་བཞག་ནས། ༀ་བཛྲ་དྷཱ་ཏྭཱི་ཤྭ་རཱི་ཧཱུཾ་བཛྲཱི་ཎི་ཨ་བྷི་ཥིཉྩ་མཾ། རྡོར་ཐ་ལས་གུང་མོ་གཤིབས་སྒྲེང་མཆོག་མར་བཞག་ནས། ༀ་བཛྲ་བཛྲཱི་ཎི་ཧཱུཾ་ཨ་བྷི་ཥིཉྩ་མཾ། དེའི་གུང་མོ་བཅག་སྟེ་རིན་ཆེན་ལྟར་བྱས་པ་རྣ་ལྟག་གཡས་པར་བཞག་ནས། ༀ་རཏྣ་བཛྲཱི་ཎི་ཧཱུཾ་ཨ་བྷི་ཥིཉྩ་མཾ། རྡོར་ཐལ་གྱི་གུང་སྲིན་མཐེའུ་ཆུང་གསུམ་པད་འདབ་ལྟར་བྱས་པ་ལྟག་པར་བཞག་ནས། ༀ་དྷརྨ་བཛྲཱི་ཎི་ཧཱུཾ་ཨ་བྷི་ཥིཉྩ་མཾ། སོར་མོ་ཐམས་ཅད་བརྐྱང་བ་རྣ་ལྟག་གཡོན་པར་བཞག་ནས། ༀ་ཀརྨ་བཛྲཱི་ཎི་ཧཱུཾ་ཨ་བྷི་ཥིཉྩ་མཾ། ཞེས་གཞན་ཐམས་ཅད་ལ་རིན་པོ་ཆེ་རྩེ་བྲན་གྱི་ཅོད་པན་གྱིས་དབང་བསྐུར། དེ་ནས། ༀ་ཏྲུཾ་ཞེས། སྙིང་མགྲིན་ལྟག་སྙིང་ནུ་བར་དང་། སྙིང་མགྲིན་རྒྱབ་དང་དཔྲལ་བ་དགུར། རྡོ་རྗེ་ཁུ་ཚུར་གཉིས་མདུད་པ་འཆིང་བཞིན་དུ་གོ་བགོས་ལ། རྣ་བའི་སྟེག་དུ་ལག་ཕྱེ་སྟེ། ༀ་བཛྲ་ཏུཥྱ་ཧོཿ ཞེས་ཐལ་མོ་རྩེ་སྤྲད་དེ་གཤམ་བརྡབས་ནས་བརྐྱང་བས། དར་དཀར་པོས་གནས་དགུར་མདུད་དེ་རྣ་བའི་སྟེང་ནས་ཡར་ལྕུགས་ལ་ལྷག་མ་ལུས་མཉམ་དུ་དཔྱངས་པར་བསམ་མོ། །དེ་ནས་མཆོད་པ་ཡཀྵ་དང་མེས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་ༀ་ལས་རིན་པོ་ཆེའི་སྣོད་དུ་ༀ་ཡིག་ཞུ་བ་ལས་བྱུང་བའི་མཆོད་རྫས་རྣམས་ཀུན་ཏུ་བཟང་པོའི་མཆོད་པའི་སྤྲིན་ཕུང་ལྟར་བཟང་ཞིང་རྒྱ་ཆེ་བ་ནམ་མཁའི་མཐའ་ཀླས་པར་བསམ་ལ། ༀ་བཛྲ་པུཥྤེ་ཧཱུཾ་ནས། ཤཔྡའི་བར་ལན་གསུམ་གསུམ་བརྗོད་པས་བྱིན་གྱིས་བརླབས་ནས། གནས་འདི་འམ་ནི་གཞན་དག་ན། །ལྷ་སོགས་བདག་གིར་མ་བྱས་པའི། །མེ་ཏོག་ཆུ་སྐྱེས་ཐང་སྐྱེས་རྣམས། །ཐུབ་པའི་སྐྱེས་མཆོག་རྣམས་ལ་འབུལ། །ༀ་སརྦ་ཏ་ཐཱ་ག་ཏ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། གནས་འདི་འམ་ནི༴ གང་དག་སྤོས་ཀྱི་ཤིང་བཟང་པོ། །ལྷ་ཡི་སྤོས་སོགས་རྨད་བྱུང་བ། །ཐུབ་པའི་དབང་ཕྱུག་རྣམས་ལ་འབུལ། །དྷཱུ་པེ༴ གནས་འདི་འམ་ནི༴ རིན་ཆེན་བཟང་པོ་ཆེར་འབར་དང་། །སྣང་བའི་ཤིང་ལས་བྱུང་བ་དང་། །ཉི་མ་ཟླ་བ་ལ་སོགས་འོད། །ཕྱོགས་རྣམས་ཀུན་ཏུ་སྤྲོས་ཏེ་འབུལ། །ཨཱ་ལོ་ཀེ༴ གནས་འདི་འམ༴ དྲི་ཡི་ཤིང་རྣམས་བཟང་པོའི་ཆབ། །ཕྱོགས་རྣམས་ཀུན་ཏུ་སྤྲོས་པ་ཡིས། །ཐུབ་པའི་དབང་ཕྱུག༴ གནྡྷེ༴ གནས་འདི་འམ༴ ཞལ་ཟས་རོ་མཆོག་བརྒྱ་ལྡན་པ། །ཐམས་ཅད་སྦྱར་བའི་བཤོས་འདི་དག །ཐུབ་པའི༴ ནཻ་ཝིདྱ༴ གནས་འདིའམ༴ དྲི་མེད་ཡིད་དུ་འོང་བ་ཡི། །སིལ་སྙན་དམ་པ་འདི་དག་ནི། །ཐུབ་པའི་དབང་༴ ཤཔྡ༴ དེ་ནས་ༀ་ལས་རིན་པོ་ཆེ་སྣ་བདུན་ལ་སོགས་པ་ཡིད་ཀྱིས་སྤྲུལ་ཏེ། བདེ་བར་གཤེགས་པ་ཐམས་ཅད་ལ། །འཁོར་ལོ་རིན་ཆེན་འདི་ཕུལ་བས། །སྲིད་པའི་འཁོར་ལོ་རྒྱུན་བཅད་དེ། །ཆོས་ཀྱི་འཁོར་ལོ་བསྐོར་བར་ཤོག །ༀ་སརྦ་ཏ་ཐཱ་ག་ཏ་ཙཀྲ་རཏྣ་པཱུ་ཛི་ཏེ་ཧཱུཾ། བདེ་བར་གཤེགས་པ༴ ནོར་བུ་རིན་ཆེན༴ བཀྲེས་ཤིང་འཕོངས་པ་རྒྱུན་བཅད་དེ། །འབྱོར་བ་ཕུན་སུམ་ཚོགས་པར་ཤོག །མ་ཎི༴ བདེ་བར༴ བཙུན་མོ༴ ཤེས་རབ་དབྱིངས་ཀྱི་དོན་རྟོགས་ནས། །ཐབས་དང་ཤེས་རབ་འབྲེལ་བར་ཤོག །ཝ་ཏི༴ །བདེ་བར ༴ བློན་པོ ༴ བསམ་ཡས་བསྟན་པ་རབ་འཛིན་ཅིང་། །ཡོན་ཏན་ཐམས་ཅད་ལྡན་པར་ཤོག །མ་ཧཱ་ཏ༴ བདེ་བར༴ གླང་པོ༴ བླ་མེད་ཐེག་པར་རབ་ཞོན་ནས། །ཐམས་ཅད་མཁྱེན་གྲོང་བགྲོད་པར་ཤོག །ཧ་སྟི༴ བདེ་བར ༴ རྟ་མཆོག༴ སྲིད་པའི་གཟེབ་ལས་ངེས་གྲོལ་ཏེ། །རྫུ་འཕྲུལ་ཤུགས་ཐོབ་འཚང་རྒྱ་ཤོག །ཏུ་རངྒ་ཨ་ཤྭ༴ བདེ་བར་གཤེགས་པ་ཐམས་ཅད་ལ། །དམག་དཔོན་རིན་ཆེན་འདི་ཕུལ་བས། །ཕལ་གྱི་རྒོལ་བ་ཚར་བཅད་ནས། །བསྙེངས་བྲལ་མཆོག་ནི་ཐོབ་པར་ཤོག །ༀ་སརྦ་ཏ་ཐཱ་ག་ཏ་ཁངྒ་རཏྣ་པཱུ་ཛི་ཏེ་ཧཱུཾ། ཁ་དོག་དབྱིབས་ལེགས་ཡིད་འོང་རྒྱན་ཕྲེང་ལྡན། །ཕྱོགས་དུས་ཀུན་ཏུ་གཟུགས་མཆོག་ཅི་མཆིས་པ། །མོས་བློས་དཀྱིལ་འཁོར་ལྷ་ལ་བདག་འབུལ་ན། །བཞེས་ཤིག་བླ་མེད་གྲུབ་མཆོག་སྩལ་དུ་གསོལ། །ༀ་སརྦ་ཏ་ཐཱ་ག་ཏ་རཱུ་པ་ཀཱ་མ་གུ་ཎ་བཛྲ་པཱུ་ཛི་ཏེ་ཨཱཿཧཱུཾ། ཕྱོགས་དུས་ཀུན་ན་ཟིན་དང་མ་ཟིན་པའི། །ཡོན་ཏན་ཚིག་བརྗོད་སྒྲ་སྙན་ཡིད་འོང་ལྡན། །མོས་བློས་དཀྱིལ་འཁོར ༴ བཞེས་ཤིག་བླ་མེད༴ ཤཔྡ་ཀཱ་མ༴ ཕྱོགས་དུས་ཀུན་ན་ཙནྡན་སྦྲུལ་སྙིང་དང་། །ཨ་ཀར་ལ་སོགས་དབང་པོ་ཚིམ་བྱེད་དྲི། །མོས་བློས༴ བཞེས་ཤིག༴ གནྡྷེ༴ ཕྱོགས་དུས་ཀུན་ན་རོ་དང་བཅུད་ལྡན་པའི། །ལུས་སེམས་བརྟས་བྱེད་རོ་མཆོག་ཅི་མཆིས་པ། མོས་བློས ༴ བཞེས་ཤིག༴ ར་ས༴ ཕྱོགས་དུས་ཀུན་ན་འཇམ་མཉེན་འཁྲིལ་ཆགས་པའི། །རེག་བྱའི་ཁྱད་པར་དབང་པོ་ཚིམ་བྱེད་རྣམས། །མོས་བློས ༴ བཞེས་ཤིག༴ སྥ་ཪྴེ༴ ཞེས་པ་རྣམས་ཀྱང་སོ་སོའི་ཕྱག་རྒྱ་དང་བཅས་དབུལ་ལོ། །དེ་ནས་ལུས་ཀྱི་གང་སྔོན་དུ་འགྲོ་བས་གསང་བའི་ལྷ་མོ་བརྒྱད་ཀྱི་ལས་རྒྱ་བཅས་ཏེ། རྡོ་རྗེ་སེམས་དཔའ་བསྡུས་པ་ན། རྡོ་རྗེ་རིན་ཆེན་བླ་ན་མེད། །རྡོ་རྗེ་ཆོས་ནི་གླུ་བླངས་པས། །རྡོ་རྗེ་ལས་ཀུན་བྱེད་པར་འགྱུར། །ༀ་བཛྲ་ས་ཏྭ་སུ། སཾ་གྲ་ཧཱ་ད། བཛྲ་རཏྣ་མ་ནུ་ཏྟ་རཾ། བཛྲ་དྷརྨཱ་གཱ་ཡ་ནེ། བཛྲ་ཀརྨཱ་ཀ་རོ་དྦྷ་བེ། ༀ་བཛྲ་ལཱ་སྱ་ཧཱུཾ། ༀ་བཛྲ་མཱ་ལེ་ཏྲཱཾ། ༀ་བཛྲ་གཱི་ཏི་ཧྲཱིཿ ༀ་བཛྲ་ནྲྀ་ཏྱེ་ཨཱཿ ༀ་བཛྲ་དྷཱུ་པེ་ཧཱུཾ། ༀ་བཛྲ་པུཥྤེ་ཏྲཱཾ། ༀ་བཛྲ་ཨཱ་ལོ་ཀེ་ཧྲཱིཿ ༀ་བཛྲ་གནྡྷེ་ཨཱཿ སྤྲོ་ན་རིག་མ་བཅུ་དྲུག་དང་རྡོར་དྲིལ་བྱིན་གྱིས་བརླབས་ནས་དམ་ཚིག་གསུམ་གྱི་མཆོད་པའང་བྱའོ། །དེ་ནས་རྡོར་དྲིལ་འཛིན་ཅིང་དབྱངས་དང་བཅས་པས་བསྟོད་པ་བྱ་སྟེ། ཧཱུཾ། སྣང་སྟོང་རྡོ་རྗེ་ནམ་མཁའི་དབྱིངས། །ཆོས་དབྱིངས་ཡེ་ཤེས་རྡོ་རྗེའི་སྐུ། །རྡོ་རྗེ་མཆོག་གི་ཕྱག་རྒྱ་ཅན། །ཕྱག་འཚལ་རྣམ་པར་སྣང་མཛད་ལ། །གཟུང་འཛིན་རྡོ་རྗེ་བརྟན་པའི་ས། །མེ་ལོང་ཡེ་ཤེས་རྡོ་རྗེའི་སྐུ། །རྡོ་རྗེ་ས་གནོན་ཕྱག་རྒྱ་ཅན། །ཕྱག་འཚལ་རྡོ་རྗེ་མི་བསྐྱོད་ལ། །རིན་ཆེན་རྡོ་རྗེ་འབར་བའི་མེ། །མཉམ་ཉིད་ཡེ་ཤེས་རྡོ་རྗེའི་སྐུ། །རྡོ་རྗེ་མཆོག་སྦྱིན་ཕྱག་རྒྱ་ཅན། །ཕྱག་འཚལ་རིན་ཆེན་འབྱུང་ལྡན་ལ། །མཐའ་ཡས་རྡོ་རྗེ་ཆོས་ཀྱི་ཆུ། །ཀུན་རྟོག་ཡེ་ཤེས་རྡོ་རྗེའི་སྐུ། །རྡོ་རྗེ་ཏིང་འཛིན་ཕྱག་རྒྱ་ཅན། །ཕྱག་འཚལ་སྣང་བ་མཐའ་ཡས་ལ། །དོན་ཡོད་རྡོ་རྗེ་བསྐྱོད་པའི་རླུང་། །ནན་ཏན་ཡེ་ཤེས་རྡོ་རྗེའི་སྐུ། །རྡོ་རྗེ་སྐྱབས་སྦྱིན་ཕྱག་རྒྱ་ཅན། །ཕྱག་འཚལ་རྡོ་རྗེ་དོན་གྲུབ་ལ། །མེ་ལོང་ཡེ་ཤེས་བྱིན་རླབས་ལས། །སེམས་མ་རྡོ་རྗེའི་ཕྱ་རྒྱ་སྟེ། །རྡོ་རྗེ་དཀར་པོ་རྩེ་ལྔ་ལ། །བསྟོད་ཅིང་གུས་པས་ཕྱག་འཚལ་ལོ། །མཉམ་ཉིད་ཡེ་ཤེས་བྱིན་རླབས༴ རིན་ཆེན་སེམས་མའི་ཕྱག་རྒྱ༴ རིན་ཆེན་སེར་པོ་ཟུར་བརྒྱད་ལ། །བསྟོད་ཅིང་གུས་པས༴ ཀུན་རྟོག་ཡེ་ཤེས་བྱིན༴ ཆོས་ཀྱི་སེམས་མའི་ཕྱག༴ པད་དཀར་འདབ་མ་བཅུ་དྲུག་ལ། །བསྟོད་ཅིང་༴ བྱ་གྲུབ་ཡེ་ཤེས་བྱིན༴ ལས་ཀྱི་སེམས་མའི་ཕྱག༴ རྡོ་རྗེ་རྒྱ་གྲམ་ལྗང་གུ་ལ། །བསྟོད་ཅིང་གུས་པས༴ རྡོ་རྗེ་སེམས་དཔའ་སེམས་དཔའ་ཆེ། །རྡོ་རྗེ་དེ་བཞིན་གཤེགས་པ་ཀུན། །རྡོ་རྗེ་དང་པོ་ཀུན་ཏུ་བཟང་། །ཕྱག་འཚལ་ཕྱག་ན་རྡོ་རྗེ་ལ། །རྡོ་རྗེ་རྒྱལ་པོ་སངས་རྒྱས་མཆོག༴ རྡོ་རྗེ་ལྕགས་ཀྱུ་དེ་བཞིན་གཤེགས། །ངེས་པའི་རྒྱལ་པོ་རྡོ་རྗེ་མཆོག །ཕྱག་འཚལ་རྡོ་རྗེ་འགུགས་ཁྱོད་ལ། །རྡོ་རྗེ་ཆགས་པ་བདེ་ཆེན་པོ། །རྡོ་རྗེ་མདའ་ནི་དབང་བྱེད་པ། །བདུད་ཀྱི་འདོད་པ་རྡོ་རྗེ་ཆེ། །ཕྱག་འཚལ་རྡོ་རྗེ་གཞུ་ཁྱོད་ལ། །རྡོ་རྗེ་ལེགས་པ་སེམས་དཔའ་མཆོག །རྡོ་རྗེ་མགུ་བ་དགའ་བ་ཆེ། །རབ་དགྱེས་རྒྱལ་པོ་རྡོ་རྗེ་མཆོག །ཕྱག་འཚལ་རྡོ་རྗེ་དགྱེས་ཁྱོད་ལ། །རྡོ་རྗེ་རིན་ཆེན་རྡོ་རྗེ་དོན། །རྡོ་རྗེ་ནམ་མཁའ་ནོར་བུ་ཆེ། །ནམ་མཁའ་སྙིང་པོ་རྡོ་རྗེ་ཕྱུག །ཕྱག་འཚལ་རྡོ་རྗེ་སྙིང་ཁྱོད་ལ། །རྡོ་རྗེ་གཟི་བརྗིད་འབར་བ་ཆེ། །རྡོ་རྗེ་ཆེན་པོ་རིན་ཆེན་དཔལ། །ཕྱག་འཚལ་རྡོ་རྗེ་དཔའ་ཁྱོད་ལ། །རྡོ་རྗེ་བཞད་མོ་བཞད་པ་ཆེན། །རྡོ་རྗེ་འཛུམ་པ་ངོ་མཚར་ཆེ། །དགའ་ཞིང་རབ་དགའ་རྡོ་རྗེ་སྟོན། །ཕྱག་འཚལ་རྡོ་རྗེ་དགའ་ཁྱོད་ལ། །རྡོ་རྗེ་ཆོས་རབ་དེ་ཉིད་སྟོན། །རྡོ་རྗེ་པད་མ་རབ་དགའ་བྱེད། །འཇིག་རྟེན་དབང་ཕྱུག་རབ་མཛེས་སྤྱན། །ཕྱག་འཚལ་རྡོ་རྗེ་སྤྱན་ཁྱོད་ལ། །རྡོ་རྗེ་རྣོན་པོ་ཐེག་པ་ཆེ། །རྡོ་རྗེ་རལ་གྲི་མཚོན་ཆེན་པོ། །འཇམ་དཔལ་རྡོ་རྗེ་རབ་ཏུ་ཟབ། །ཕྱག་འཚལ་རྡོ་རྗེ་བློ་ཁྱོད་ལ། །རྡོ་རྗེ་རྒྱུ་དང་སྙིང་པོ་ཆེ། །རྡོ་རྗེ་འཁོར་ལོ་ཚུལ་ཆེན་པོ། །རབ་བསྐོར་རྡོ་རྗེ་ལས་བྱུང་བ། །ཕྱག་འཚལ་རྡོ་རྗེ་སྙིང་པོ་ལ། །རྡོ་རྗེ་གསུང་བ་རང་རིག་མཆོག །རྡོ་རྗེ་ཟློས་པ་རབ་སྒྲུབ་སྦྱིན། །མི་གསུང་རྡོ་རྗེ་མཆོག་གྲུབ་པ། །ཕྱག་འཚལ་རྡོ་རྗེ་གསུང་ཁྱོད་ལ། །རྡོ་རྗེ་ལས་རབ་རྡོ་རྗེ་དཀའ། །ལས་ཀྱི་རྡོ་རྗེ་ཀུན་རབ་སྒྲོལ། །རྡོ་རྗེ་ངེས་པར་རྒྱ་ཆེ་བ། །ཕྱག་འཚལ་རྡོ་རྗེ་ལས་ཁྱོད་ལ། །རྡོ་རྗེ་བསྲུང་བ་བརྟན་པ་ཆེ། །རྡོ་རྗེ་གོ་ཆ་སྲ་བ་ཆེ། །རྡོ་རྗེ་བརྩོན་འགྲུབ་ཐུབ་དཀའ་བ། །ཕྱག་འཚལ་རྡོ་རྗེ་བརྩོན་འགྲུས་ལ། །རྡོ་རྗེ་གནོད་སྦྱིན་ཐབས་ཆེན་པོ། །རྡོ་རྗེ་མཆེ་བ་འཇིགས་པ་ཆེ། །བདུད་འཇོམས་རྡོ་རྗེ་མི་ཟད་པ། །ཕྱག་འཚལ་རྡོ་རྗེ་དྲག་པོ་ལ། །རྡོ་རྗེ་མཚམས་སྦྱོར་རབ་ཏུ་སྡུད། །རྡོ་རྗེ་འཆིང་བ་རྣམ་གྲོལ་བྱེད། །རྡོ་རྗེ་ཁུར་ཚུར་དམ་ཚིག་མཆོག །ཕྱག་འཚལ་རྡོ་རྗེ་ཁུ་ཚུར་ལ། །རྣམ་དག་རྡོ་རྗེ་ཐུགས་ཀྱི་ཡུམ། མི་དམིགས་རྡོ་རྗེ་མཚན་མ་འཇོམས། །རྡོ་རྗེ་ཏིང་འཛིན་ཕྱག་རྒྱ་འཛིན། །ཕྱག་འཚལ་རྡོ་རྗེ་སྒེག་མོ་ལ། །རྣམ་དག་རྡོ་རྗེ་ཡོན་ཏན་ཡུམ། །ཡིད་བཞིན་རེ་བ་སྐོང་བར་མཛད། །རྡོ་རྗེ་ཕྲེང་བའི་ཕྱག་རྒྱ་འཛིན། །ཕྱག་འཚལ་རྡོ་རྗེ་ཕྲེང་བ་ལ། །རྣམ་དག་རྡོ་རྗེ་གསུང་གི་ཡུམ། །གསུང་རབ་རྒྱ་མཚོ་སྒྲོག་པའི་དོན། །རྡོ་རྗེ་པི་ཝཾ་ཕྱག་རྒྱ་འཛིན། །ཕྱག་འཚལ་རྡོ་རྗེ་དབྱངས་མཁན་ལ། །རྣམ་དག་རྡོ་རྗེ་ལས་ཀྱི་ཡུམ། །ལས་ཀྱི་རྡོ་རྗེ་འགྲོ་དོན་མཛད། །བདུད་འདུལ་རྡོ་རྗེ་ཕྱག་རྒྱ་གར། །ཕྱག་འཚལ་རྡོ་རྗེ་གར་མཁན་ལ། །སྤྲིན་ལྡིང་རྡོ་རྗེ་བདུག་པ་མོ། །རྡོ་རྗེ་ཚིམ་བྱེད་ཀུན་ཏུ་ཚིམ། །རྡོ་རྗེ་སྤོས་ཁང་ཕྱག་རྒྱ་འཛིན། །ཕྱག་འཚལ་རྡོ་རྗེ་བདུག་པ་ལ། །ལྟ་མཛེས་རྡོ་རྗེ་ཐམས་ཅད་མཛེས། །རྡོ་རྗེ་མེ་ཏོག་ཀུན་ཏུ་མཛེས། །རྡོ་རྗེ་མེ་ཏོག་ཕྱག་རྒྱ་འཛིན། །ཕྱག་འཚལ་རྡོ་རྗེ་མེ་ཏོག་ལ། །འོད་གསལ་རྡོ་རྗེ་མདའ་ཡི་མེ། །རྡོ་རྗེ་སྤྱན་གྱིས་མ་རིག་སེལ། །རྡོ་རྗེ་གསལ་བྱེད་ཕྱག་རྒྱ་འཛིན། ཕྱག་འཚལ་རྡོ་རྗེ་མར་མེ་ལ། །རྡོ་རྗེ་ཙནྡན་བདུད་རྩིའི་ཆུ། །རྡོ་རྗེ་བདུད་རྩིས་རྣམ་རྟོག་འཁྲུ། །རྡོ་རྗེ་དག་བྱེད་ཕྱག་རྒྱ་འཛིན། །ཕྱག་འཚལ་རྡོ་རྗེ་དྲི་ཆབ་ལ། །རྣམ་དག་བསྐུལ་བྱེད་ཐུགས་རྗེའི་དོན། །ཐུགས་རྗེ་རྒྱུན་འདྲེན་རྡོ་རྗེ་འདྲེན། །རྡོ་རྗེ་འགུགས་མཛད་ཕྱག་རྒྱ་འཛིན། །ཕྱག་འཚལ་རྡོ་རྗེ་ལྕགས་ཀྱུ་ལ། །མི་གཏོང་རྡོ་རྗེ་ཆོས་ཀྱི་དོན། །རྡོ་རྗེ་འདྲེན་མཛད་མི་འགྱུར་དོན། །རྡོ་རྗེ་འཆིང་མཛད་ཕྱག་རྒྱ་འཛིན། །ཕྱག་འཚལ་རྡོ་རྗེ་ཞགས་པ་ལ། །རྡོ་རྗེ་ཆོས་ཉིད་མི་འགྱུར་དོན། །རྡོ་རྗེ་མགྱོགས་བྱེད་གློག་ལྟར་མྱུར། །རྡོ་རྗེ་ལྕགས་སྒྲོག་ཕྱག་རྒྱ་འཛིན། །ཕྱག་འཚལ་རྡོ་རྗེ་ལྕགས་སྒྲོགས་ལ། །རྡོ་རྗེ་འབེབས་པ་བརྟན་པའི་མཆོག །རྡོ་རྗེ་བསྐྱོད་མཛད་ཀུན་གྱི་ལས། །རྡོ་རྗེ་འབེབས་མཛད་ཕྱག་རྒྱ་འཛིན། །ཕྱག་འཚལ་རྡོ་རྗེ་དྲིལ་བུ་ལ། །སྒོ་ཡི་ཁྱམས་ཀྱི་ནང་གནས་པ། །བྱམས་པ་ལ་སོགས་བཅུ་དྲུག་ནི། །དང་པོ་རབ་དགའ་ལ་སོགས་གནས། །ས་གནས་རྣམས་ལ་ཕྱག་འཚལ་ལོ། །ཞེས་བསྟོད་ནས། བཅོམ་ལྡན་འདས་རྡོ་རྗེ་དབྱིངས་ཀྱི་ལྷ་ཚོགས་རྣམས་ཀྱིས་བདག་ཅག་སེམས་ཅན་ཐམས་ཅད་ཀྱི་དོན་མཛད་དུ་གསོལ་ཞེས་འདོད་དོན་གསོལ། དེ་ནས་དཀྱིལ་འཁོར་བརྟན་པའི་ཆེད་དུ་བཟླས་པ་བྱ་སྟེ། རྡོ་རྗེ་འཛིན་མའི་ཕྱག་རྒྱ་བཅས་ལ། ༀ་བཛྲ་ས་མ་ཡ་ཧཱུཾ། ཞེས་པས། རང་ཉིད་མདུན་བསྐྱེད་ཀྱི་དཀྱིལ་འཁོར་དུ་ཞུགས་ལ། རིགས་སོ་སོ་དང་རང་ཐ་མི་དད་པར་བསམ་སྟེ། འདི་ལྟར། ༀ་བཛྲ་དྷ་རས་མི་བསྐྱོད་པ། རཏྣ་དྷ་རས་རིན་འབྱུང་། པདྨ་དྷ་རས་སྣང་མཐའ། བི་ཤྭ་དྷ་རས་དོན་གྲུབ། ཏ་ཐཱ་ག་ཏཱ་ས་མ་ཡ་མ་ཏི་ཀྲ་མ་ཏ་ཐཱ་ག་ཏ་ས་མ་ཡ་དྷ་ར་ཨཱ ཏྨ་ཀོ་྅ཧཾ་གིས་གཙོ་བོ་རྣམ་སྣང་དང་ཐ་མི་དད་པར་བསམ་ལ། སྔགས་དེ་རྣམས་སྤྲེལ་ནས་ལན་གསུམ་བཟླས་པས་ང་རྒྱལ་བཟུང་། དེ་ནས། རང་ཉིད་རིགས་འདུས་རྡོ་རྗེ་སེམས་དཔའི་རྣམས་པས་གཙོ་བོའི་ཐུགས་ཀ་ནས་འཐོན་ཏེ་རང་གནས་སུ་འདུག་ལ་བཟླ་སྟེ། ལྷ་རྣམས་ཀྱི་ཞལ་ནས་སྔགས་ཀྱི་སྒྲ་དང་ཐུགས་རྗེའི་འོད་ཟེར་འཕྲོས་པས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་པར་བསམ་ལ། ༀ་བུདྡྷ་བཻ་རོ་ཙ་ན་ༀ། ༀ་བཛྲ་ཨཀྵོ་བྷྱཿཧཱུཾ། ༀ་རཏྣ་སཾ་བྷ་བ་ཏྲཱཾ། ༀ་པདྨ་ཨ་མི་ཏཱ་བྷ་ཧྲཱིཿ ༀ་ཀརྨ་ཨ་མོ་གྷ་སིདྡྷི་ཨཱཿ ཞེས་པ་རྣམས་བརྒྱ་རྩ་ཙམ་རེ་དང་། ས་ཏྭ་བཛྲི་ཧཱུཾ། རཏྣ་བཛྲ་ཏྲཱཾ། པདྨ་བཛྲི་ཧྲཱིཿ ཀརྨ་བཛྲི་ཨཱཿ ༀ་བཛྲ་ས་ཏྭ་ཧཱུཾ། ༀ་བཛྲ་རཱ་ཛ་ཛཿ ༀ་བཛྲ་རཱ་ག་ཧོཿ ༀ་བཛྲ་སཱ་དྷུ་དྷུ། ༀ་བཛྲ་རཏྣ་ཏྲཱཾ། ༀ་བཛྲ་ཏེ་ཛརྻ། ༀ་བཛྲ་ཀེ་ཏུ་བྷྲི། ༀ་བཛྲ་ཧ་ས་ཧ། ༀ་བཛྲ་དྷརྨ་ཧྲཱིཿ ༀ་བཛྲ་ཏིཀྵྞ་དྷི། ༀ་བཛྲ་ཧེ་ཏུ་ཀྲུཾ། ༀ་བཛྲ་བྷཱ་ཥ་བྷ། ༀ་བཛྲ་ཀརྨ་ཀཾ །ༀ་བཛྲ་རཀྵ་ཧཾ། ༀ་བཛྲ་ཡཀྵ་ཧཱུཾ། ༀ་བཛྲ་སནྡྷི་བཾ། ༀ་བཛྲ་ལཱ་སྱ་ཧཱུཾ། ༀ་བཛྲ་མཱ་ལེ་ཏྲཱཾ། ༀ་བཛྲ་གཱི་ཏི་ཧྲཱིཿ ༀ་བཛྲ་ནྲྀ་ཏྱེ་ཨཱཿ ༀ་བཛྲ་དྷཱུ་པེ་ཧཱུཾ། ༀ་བཛྲ་པུཥྤེ་ཏྲཱཾ། ༀ་བཛྲ་ཨཱ་ལོ་ཀེ་ཧྲཱི༔ ༀ་བཛྲ་གནྡྷེ་ཨཱཿ ༀ་བཛྲ་ཨངྐུ་ཤ་ཛཿ ༀ་བཛྲ་པཱ་ཤ་ཧཱུཾ། ༀ་བཛྲ་སྥོ་ཊ་བཾ། ༀ་བཛྲ་ཨཱ་བེ་ཤ་ཡ་ཨཱཿ ༀ་སརྦ་སཾ་སྐཱ་ར་པ་རི་ཤུདྡྷ་དྷརྨ་ཏེ་ག་ག་ན་ས་མུདྒ་ཏེ་སྭ་བྷཱ་ཝ་བི་ཤུདྡྷེ་མ་ཧཱ་ན་ཡ་པ་རི་ཝཱ་རེ་སཱ་ཧཱ། ཞེས་པ་རྣམས་ཉེར་གཅིག་གམ་བདུན་བདུན་ཙམ་རེ་དང་། སྙིང་པོ། ༀ་སརྦ་ཏ་ཐཱ་ག་ཏ་མ་ཧཱ་ཡོ་གཱི་ཤྭ་རི་ཧཱུཾ། ཞེས་པའང་ཅི་ནུས་བཟླ་ཞིང་། ཡུངས་ཀར་ལའང་བསྡགས་སོ། །དེ་ནས་འདས་གཏོར་དང་ཆ་གསུམ་གཏོར་མ་སྔར་ལྟར་གཏོར་ཞིང་། སྦྱིན་སྲེག་ཀྱང་ཅི་འགྲུབ་བྱ་སྟེ་ལོག་ན་ཡོད་དོ། །དེ་ནས་དབང་ཆོག་ལྟར་སློབ་དཔོན་རང་ཉིད་དཀྱིལ་འཁོར་དུ་འཇུག་ཅིང་སློབ་མ་ལ་དབང་བསྐུར་བར་བྱའོ། །དེ་ནས་རྗེས་ཆོག་ནི། མཆོད་པ་ཁ་གསོལ་ཏེ་བྱིན་གྱིས་བརླབས་ནས། ༀ་སརྦ་ཏ་ཐཱ་ག་ཏ་པུ ཥྤེ་པཱུ་ཛ་སོགས་ནས། ཤཔྡའི་བར་དང་། ༀ་བཛྲ་ལཱ་སྱ་ཧཱུཾ། སོགས་ལྷ་མོ་བརྒྱད་ཀྱིས་ཀྱང་མཆོད། བསྟོད་པར་འོས་པ་སོགས་ཀྱིས་བསྟོད་ནས། བླ་མ་དང་དཀྱིལ་འཁོར་གྱི་ལྷ་ཚོགས་ཐམས་ཅད་བདག་ལ་དགོངས་སུ་གསོལ། ཁྱེད་རྣམས་ལ་མཁྱེན་པའི་ཡེ་ཤེས། བརྩེ་བའི་ནུས་པ། མཛད་པའི་ཕྲིན་ལས་བསམ་གྱིས་མི་ཁྱབ་པ་མངའ་བ་ལགས་པས། སྤྱིར་སངས་རྒྱས་ཀྱི་བསྟན་པ་དར་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་ཐམས་ཅད་སྐུ་ཚེ་བརྟན་ཞིང་ཐུགས་ཀྱི་བཞེད་པའི་དོན་ལྷུན་གྱིས་འགྲུབ་པ་དང་། བདག་དང་སེམས་ཅན་ཐམས་ཅད་བདེ་ཞིང་སྐྱིད་པར་བྱིན་གྱིས་བརླབ་ཏུ་གསོལ། ཁྱད་པར་དུའང་བདག་ཉིད་ཆེན་པོ་ཁྱེད་རྣམས་ལ་ཅི་འབྱོར་པའི་མཆོད་པ་ཇི་སྙེད་ཀྱིས་མཆོད་པའི་མཐུས། བདག་དང་མཐའ་ཡས་པའི་སེམས་ཅན་ཐམས་ཅད་ཀྱི་སྒྲིབ་གཉིས་བྱང་ཞིང་ཚོགས་གཉིས་རྫོགས་ཏེ་མྱུར་དུ་བླ་ན་མེད་པའི་བྱང་ཆུབ་ཀྱི་ས་ལ་འགོད་པའི་བཀའ་དྲིན་སྩལ་དུ་གསོལ། ཞེས་འདོད་དོན་གསོལ་ནས། ལྷོ་སོ་སོའི་དམ་རྒྱ་བཅས་ཏེ་སྙིང་པོ་ལན་གསུམ་གྱི་མཐར། བཛྲ་མུཿཞེས་ཕྱག་རྒྱ་བཀྲོལ་བས། ལྷ་ཡེ་ཤེས་པ་རྣམས་དམ་ཚིག་པ་ལས་ཕྱེ་ནས་བཞུགས་པར་མོས་ལ། རྡོ་རྗེ་རིན་ཆེན་གྱི་དམ་རྒྱ་སྙིང་ག་གནས་བཏེགས་ཏེ་མཛོད་སྤུར་བཞག་ལ། ༀ་བཛྲ་རཏྣ་ཨ་བྷི་ཥིཉྩ་མཾ། ཞེས་རང་དང་ཕྱག་རྒྱའི་ལྷ་ཐམས་ཅད་ལ་དབང་བསྐུར། སརྦ་མུ་ཏྲཱཾ་མཻ་ཏྲི་ཀུ་རུ་ཝ་ར་ཀ་བ་ཙེ་ནཾ་མ། ཞེས་ལག་གཉིས་ཁུ་ཚུར་བསྡམས་ཏེ། ༀ་ཏྲུཾ། ཞེས་གནས་དགུར་མདུད་པ་བཅིངས་ལ། བཛྲ་ཏུཥྱ་ཧོཿ ཞེས་ཐལ་མོའི་གཤམ་བརྡབ་ཏེ་བརྐྱང་བས་གོ་བགོ །རེ་ཞིག་དཀྱིལ་འཁོར་མི་གཤེགས་ན། མདུན་བསྐྱེད་ཀྱི་ཡེ་ཤེས་པ། འདིར་ནི་གཟུགས་དང་སོགས་ཀྱིས་བརྟན་བཞུགས་བྱས་ནས་བདག་བསྐྱེད་ཀྱི་ཕྱག་རྒྱ་དགྲོལ་ཞིང་གོ་བ་ཁྱད་པར་རོ། །གང་ལྟར་ཡང་ཡིག་བརྒྱ་མང་དུ་བཟླ་ཞིང་། མ་རྙེད་ཡོངས་སུ་སོགས་ཀྱིས་བཟོད་གསོལ་བྱས་ཏེ། བཛྲ་ས་ཏྭ ས་མཆོད་ཡོན་ཕུལ་ནས། ༀ་ཁྱེད་ཀྱིས་སེམས་ཅན་དོན་ཀུན་མཛད། ཅེས་སོགས་ཀྱིས་སྔར་ཕྱེ་བའི་ཡེ་ཤེས་པ་རྣམས་གཤེགས་སུ་གསོལ། གལ་ཏེ་དཀྱིལ་འཁོར་གཤེགས་ན། དེའི་ཚེ་རྡོར་སེམས་ཀྱི་ཕྱག་རྒྱ་བཅིངས་ཏེ། དཀྱིལ་འཁོར་ལ་ལན་གསུམ་བསྐོར་ནས། ༀ་བཛྲ་ས་ཏྭ་མུཾ། ཞེས་ཕྱག་རྒྱ་དེ་ཉིད་སྤྱི་བོར་བཀྲོལ་བས། བདག་མདུན་གྱི་ཡེ་ཤེས་པ་ཐམས་ཅད་དག་པའི་ཞིང་དུ་གཤེགས། ལག་གཉིས་ཀྱི་སྲིན་ལག་མཐེའུ་ཆུང་མཐེ་བོང་རྣམས་ལུག་རྒྱུད་དུ་སྦྲེལ་ཞིང་གུང་མཛུབ་བརྐྱང་བ་ཆན་པའི་རྒྱས་སྲུང་འཁོར་གྱི་མཚམས་བཀྲོལ་ཏེ་གཤེགས། སྤྲུལ་པའི་དཀྱིལ་འཁོར་རྣམས། ཛཿཧཱུཾ་བཾ་ཧོཿས་རང་ལ་བསྡུས་ཏེ། ཡིག་བརྒྱ་བཟླ། ད་ེ ནས་བར་ཆད་བསྲུང་བའི་ཕྱིར་རྡོ་རྗེ་ལས། རྡོ་རྗེ་སྲུངབ། རྡོ་རྗེ་གནོད་སྦྱིན། རྡོ་རྗེ་ཁུ་ཚུར་བཞིའི་དམ་རྒྱ་འཆིང་ཞིང་སྔགས་ལན་གསུམ་རེ་བརྗོད་པས་བསྲུང་། རང་རྡོར་སེམས་སུ་གསལ་བའི་སྙིང་གར་བརྟན་གཡོ་ཐམས་ཅད་འོད་གསལ་དུ་བཅུག་པར་མོས་ལ། ཨ་ཀཱ་རོ་བཟླ་བས་རྡུལ་ཚོན་བསྡུས་ཞིང་ཕྱགས་ཏེ་དམན་པ་རྣམས་ཆུ་བོར་དོར། དེ་ནས་བསྔོ་སྨོན་ནི། དགེ་བའི་རྩ་བ་འདིས་བདག་དང་མཐའ་ཡས་པའི་སེམས་ཅན་ཐམས་ཅད་གསང་སྔགས་དང་། རིག་སྔགས་དང་གཟུངས་སྔགས་དང་སྙིང་པོ་དང་ཕྱག་རྒྱའི་སྒོ་ནས་ཚོགས་གཉིས་རླབས་པོ་ཆེ་མྱུར་དུ་རྫོགས་ཏེ་བླ་ན་མེད་པའི་བྱང་ཆུབ་ཀྱི་གོ་འཕང་མྱུར་དུ་ཐོབ་པར་གྱུར་ཅིག །ཚེ་འདི་ལའང་བདག་གཞན་ཐམས་ཅད་ཀྱི་ནད་དང་གདོན་གྱི་རིགས་སུ་གྱུར་པ་ཐམས་ཅད་དང་། རྨི་ལྟས་མཚན་མ་ངན་པ་དང་། གཞན་གྱི་བསམ་སྦྱོར་ངན་པ་སོགས་གནོད་པ་དང་བར་ཆད་ཀྱི་རིགས་སུ་གྱུར་པ་མི་མཐུན་པའི་ཕྱོགས་ཐམས་ཅད་ཞི་བར་གྱུར་ཅིག །བཀྲ་ཤིས་པ་དང་ཡིད་ལ་བསམ་པ་ཐམས་ཅད་ཆོས་དང་མཐུན་པར་འགྲུབ་པར་གྱུར་ཅིག །ཇི་ལྟར་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་བསྔོས་པ་དང་སྨོན་ལམ་བཏབ་པ་དེ་བཞིན་དུ་བདག་གིས་ཀྱང་བསྔོ་ཞིང་སྨོན་ལམ་གདབ་པར་བགྱིའོ། །ཞེས་སོགས་རྒྱ་ཆེར་གདབ། དེ་ནས་བཀྲ་ཤིས་ནི། རྣམ་པར་སྣང་མཛད་ཡེ་ཤེས་དམ་པ་མཚོ་ཆེན་ལྡན། །ཟླ་བ་ཉ་འདྲའི་སྐུ་མངའ་སྲིད་པ་མཐར་ཕྱིན་པ། དགོངས་པ་མཐའ་དག་རྫོགས་པའི་བཀྲ་ཤིས་གང་ཡིན་པ། བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །མི་འཁྲུག་རྒྱལ་པོ་སྲིད་དང་གཏི་མུག་རྣམ་སྦྱོང་བ། དགེ་བ་མཉམ་མེད་སེམས་ཅན་དོན་རྫོགས་རབ་ལྡན་པ། །མགོན་པོ་ཡོན་ཏན་རྫོགས་པའི་བཀྲ་ཤིས་གང་ཡིན་པ། །བཀྲ་ཤིས་དམ་པ་དེས་ཀྱང་དེང་འདིར༴ སངས་རྒྱས་ཀུན་གྱི་ཡོན་ཏན་རྣམས་ཀྱིས་བརྒྱན་བྱས་ཤིང་། །ཡང་དག་འབྱོར་པའི་སྦྱིན་པ་སྦྱིན་མཛད་མི་བསླུ་བ། །རིན་ཆེན་འབྱུང་ལྡན་ཞེས་བྱའི་བཀྲ་ཤིས༴ བཀྲ་ཤིས་དམ༴ བསམ་གཏན་དང་ནི་ཏིང་འཛིན་ཕ་རོལ་ཕྱིན་གནས་ཤིང་། །ཡེ་ཤེས་པདྨའི་སྟེང་བཞུགས་དཔག་མེད་ཚེ་ལྡན་པའི། །འོད་དཔག་མེད་པའི་བྱིན་རླབས་བཀྲ་ཤིས༴ བཀྲ་ཤིས་དམ་པ་དེས་ཀྱང་༴ སེམས་ཅན་དོན་ཕྱིར་ལས་ལ་ཐུགས་ནི་སྦྱོར་མཛད་པའི། །འགྲོ་བ་ཐམས་ཅད་འཆིང་བས་བཅིངས་ལས་སྒྲོལ་མཛད་པ། །ཐུགས་མཆོག་དོན་ཡོད་གྲུབ་པའི་བཀྲ་ཤིས་གང་ཡིན་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ཅེས་བརྗོད་ཅིང་རོལ་མོའི་སྒྲ་དང་བཅས་པས་མེ་ཏོག་འཐོར་རོ། །འདིར་ཡོ་གའི་ཆོག་གཟུང་ཕལ་ཆེ་བར། ཡོ་ག་རང་ལུགས་ཀྱི་སྒྲུབ་ཚུལ་ལ་སྔགས་རྒྱ་སོགས་མང་བས་སྒྲུབ་དཀའ་བར་བཟུང་ནས། ཟོར་ཡང་བའི་དབང་དུ་མཛད་དེ། བླ་མེད་ཀྱི་ཆོ་གའི་རིགས་འགྲེ་སྦྱར་བ་དང་། ལག་ལེན་ཞིབ་པའི་ཕྱོས་རྣམས་སུའང་ཀུན་རིག་གི་རྒྱས་འགེབས་དང་། དེར་ཞལ་འཕང་བ་ཙམ་མཛད་མོད། དེ་ལྟ་ནའང་ལུགས་འདི་ལ་ཚད་མར་གྱུར་པ་གླན་གྱི་རིག་འཛིན་རྣམས་ཀྱི་དགོངས་པ་ལྟར་འདིར་ནི་ཡོ་ག་རང་ལུགས་ཀྱི་སྒྲུབ་ཚུལ་བཀོད་པ་སྟེ། དེ་ལ་ཡང་གླན་བསོད་ནམས་མགོན་པོའི་ཡོ་གའི་ལས་སྡེབས་ཆེ་བར། ཕྱག་རྒྱ་མ་བཀྲོལ་ན་གསལ་བར་བྱ། བཀྲོལ་ན་རྣལ་འབྱོར་ཆེན་པོ་བསྐྱེད་པ་རྫོགས་པར་བྱ། དེ་མི་ནུས་ན་རྣལ་འབྱོར་གཅིག་དང་ལྡན་པར་བྱར་རུང་། ཞེས་ལྷག་ཆད་སོགས་ཀྱི་ཉེས་པ་སྦྱང་ཕྱིར་རྡོ་རྗེ་ཤུགས་འཇུག་གིས་མདུན་བསྐྱེད་ཀྱི་དཀྱིལ་འཁོར་དུ་ཞུགས་ནས་མེ་ཏོག་འབུལ་བའི་ཚེ་གསུངས་པ་ལྟར། རྒྱས་པར་རྣལ་འབྱོར་ཆེན་པོ་སྒོམ་དགོས་པར་བཞེད་ནའང་། ཧ་ཅང་སྤྲོས་པས་འདིར་བཏང་སྙོམས་སུ་བྱས་ཏེ། རྣལ་འབྱོར་གཅིག་པའི་ལུགས་སུ་བཀོད་པ་ཡིན་ནོ། །དེ་ལའང་འཛམ་གླིང་པཎྜི་ཏའི་མདོའི་ཡོ་གའི་སྒྲུབ་ཐབས་སུ། རང་ཉིད་རྡོར་སེམས་སུ་སེམས་དཔའ་ལུས་སྒྲུབ་དང་ཤས་ཆེར་འདྲ་བའི་ཆོ་ག་དམ་ཚིག་གི་ཕྱག་རྒྱས་སྒྲུབ་པར་མཛད་པ་སྣང་ནའང་། འདིར་རྣལ་འབྱོར་ཆེན་པོའི་ནང་ཚན་བདག་བྱིན་རླབས་ཀྱི་ཆོ་གས་སྒྲུབ་པ་ཉིད་འབྲེལ་བར་མཐོང་ནས་བྲིས་པ་ཡིན་ནོ། །མདུན་བསྐྱེད་སྒྲུབ་ཚུལ་ལའང་། གླན་སྟོན་ཆེན་པོ་རྡོ་རྗེའི་འོད་ཀྱིས་མཛད་པའི་ལས་སྡེབས་འགོས་གཙང་པ་ལས་བརྒྱུད་དེ་འོངས་པའི་ཡི་གེར། དེ་ནས་རྡོ་རྗེ་སྒྲུབ་པ་ལྷ་ཐམས་ཅད་ཆོ་ག་གསུམ་གྱིས་བསྐྱེད་དོ། །དེ་མི་ནུས་ན་ལྷའི་མིང་བརྗོད་ཅིང་ང་རྒྱལ་བྱའོ། ཞེས་གསུངས་པའི་རྒྱས་པ་རྡོ་རྗེ་སྒྲུབ་པའི་ལས་ཧ་ཅང་མང་བས་འདིར་སོ་སོའི་མིང་སྔགས་བརྗོད་པ་ཙམ་གྱིས་བསྐྱེད་པ་ཡིན་ནོ། །འོ་ན་བདག་བསྐྱེད་ལ་རྣལ་འབྱོར་ཆེན་པོ་དང་། མདུན་བསྐྱེད་ལ་རྡོ་རྗེ་སྒྲུབ་བྱེད་ཚུལ་ཇི་ལྟར་ཞེ་ན། རྣལ་འབྱོར་ཆེན་པོ་ནི། འདིར་བདག་བསྐྱེད་དུ་བྲིས་པའི་བདག་བྱིན་རླབས་རྡོར་སེམས་སུ་བསྐྱེད་པའི་ཐུགས་ཀའི་སྙིང་པོའི་མཐར་སྔགས་ཕྲེང་བཀོད་པ་ཡན་ཆད་སོང་རྗེས། རང་གཞི་ལུས་རྡོར་སེམས་ཀྱི་སྙིང་གར་ཟླ་དཀྱིལ་གྱི་སྟེང་དུ་དཀྱིལ་འཁོར་སྤྲུལ། རང་གཞི་ལུས་ལས་ཕྱེ་ནས་སྙིང་གར་ཞུགས་ཏེ་བདག་འཇུག་ལེན་པ་ནི་བསྙེན་པ་དང་ཉེ་བསྙེན་ནོ། །སྒྲུབ་པ་ནི། སྙིང་གའི་དཀྱིལ་འཁོར་རང་དང་བཅས་པ་གཞི་ལུས་ཀྱི་ལྷའི་ཐུགས་ཀར་བསྟིམ་ནས། དམ་ཚིག་གི་ཕྱག་རྒྱས་སེམས་དཔའ་ལུས་སྒྲུབ་བྱ། སྒྲུབ་ཆེན་ནི། རྟེན་གཞི་ལུས་དང་བརྟེན་པ་ཉེར་བརྒྱད་པོ་ལ་ཡེ་ཤེས་པ་སྤྱན་དྲངས་ཏེ་བསྟིམ། ཕྱག་རྒྱ་བཞིས་བཏབ། དེ་ནས་སྔར་བཞིན་བདག་འཇུག་བླངས་རྗེས། ལྷ་མོ་བརྒྱད་དང་། རྡོར་དྲིལ་བྱིན་གྱིས་བརླབས་ནས་དམ་ཚིག་གསུམ་བཟུང་སྟེ་མཆོད་པ་རྣམས་སོ། །ཡང་རྡོ་རྗེ་སྒྲུབ་པ་ནི། རང་རྡོར་སེམས་སུ་བསྐྱེད་པ་ནས་བདག་འཇུག་སྔ་མའི་མིང་དབང་གི་བར་བཤད་མ་ཐག་པ་ལྟར་བྱས་རྗེས། ལྷ་རང་རང་གི་ཕྱག་ཆེན་འཆའ་བཞིན་དུ་རྡོ་རྗེ་བསྒྲུབ་པ་བྱ་སྟེ། དེའང་མདུན་བསྐྱེད་ཀྱི་ལྷ་རེ་རེ་བཞིན་ལ། སྔགས་ཚན་གསུམ་གྱིས། དང་པོས་རང་དམ་ཚིག་པ་རེ་བསྲེག་པའི་རྐྱེན་གྱིས་སོ་སོའི་ཕྱག་མཚན་དུ་བསྒྱུར། སྔགས་གཉིས་པས་དེའི་ང་རྒྱལ་བྱ། སྔགས་གསུམ་པས་ལྷ་སོ་སོའི་ཞལ་ཕྱག་གི་རྣམ་པར་བསྒྱུར་ཏེ་སྒོམ་པ་ནི་རྡོ་རྗེ་སྒྲུབ་པའོ། །དེ་ནས་ཡེ་ཤེས་པ་བཅུག་ལ་ཕྱག་རྒྱ་བཞིས་རྒྱས་འདེབས་པ་སོགས་བྱ་བ་ཡིན་ནོ། དེར་མ་ཟད་བདག་བསྐྱེད་རྣལ་འབྱོར་ཆེན་པོའི་ལུགས་སུ་མཛད་པའང་བསྙེན་པ་བསྡུས་པའི་ལུགས་ཡིན་པས། རྒྱུ་མཚན་དེ་དག་གི་ཕྱིར་ན། ཡི་གེ་འདི་ལ་རྒྱས་པའི་ཡན་ལག་དུ་མ་བསྣན་དུ་ཡོད་མོད། དོར་བྱ་ནི་མེད་པར་རློམ་མོ། །དཔང་གྱུར་གླན་སྟོན་མན་ངག་བཞིན། །འགྲོ་འདིའི་ཤེར་དབང་པོདྨོའི་ཚལ། །བཞད་བྱེད་ཆོས་ཀྱི་ཉི་མའི་དཔལ། །ལེགས་བཤད་འོད་སྟོང་སྤྲོ་བཞིན་ཤར། །ཡོ་གའི་ཐེག་པའི་སྒྲུབ་ཐབས་ཀྱི་ལེ་ཚན་ནོ། །འདུས་པ་མདོའི་ཡན་ལག་གི་དཀྱིལ་འཁོར་རྣམས་ཀྱི་སྒྲུབ་དཀྱིལ་དངོས་གྲུབ་འདོད་འཇོ་ལས། ཕྱི་དབང་རྒྱུད་ཀྱི་ཆུ་བོའི་དཀྱིལ་འཁོར་དྲུག་བཤད་པའི་སྐབས་ཏེ་གཉིས་པའོ།། །།

༈ ༀ་སྭ་སྟི། གང་ཐུགས་མི་འགྱུར་བདེ་བ་ཆེའི། །སྣང་བརྙན་འགག་མེད་ཞི་ཁྲོའི་ལྷར། །སྟོན་མཛད་དཔལ་ལྡན་རྡོ་རྗེ་སེམས། །དྲིན་ཅན་བླ་མའི་ཞབས་ལ་འདུད། །བླ་མེད་བསྐྱེད་དང་རྫོགས་པའི་དཀྱིལ་འཁོར་ཁྱད། །བཤད་ནས་རྒྱུད་ལུགས་གཙོར་བྱས་ཆུ་བོ་བཞི། །གང་དུ་བསྐུར་བ་ཐུན་མོང་རྩ་དཀྱིལ་གྱི། །ཆོ་ག་རྗེ་ཡི་གསུང་ལ་ཁ་འཕངས་སྟོན། །དེ་ལྟར་ཡོ་ག་མན་ཆད་ཡན་ལག་གི་དཀྱིལ་འཁོར་དྲུག་སོང་ནས། འདིར་བླ་མེད་ཀྱི་དཀྱིལ་འཁོར་བཤད་པ་ལ་དོན་གསུམ་སྟེ། ནང་དབང་དང་སྒྲུབ་དབང་གང་དུ་བསྐུར་བྱའི་དཀྱིལ་འཁོར་བདུན་པ་དང་བརྒྱད་པའི་ཁྱད་པར་བཤད། དེས་དེ་དང་དེ་ལ་དཀྱིལ་འཁོར་སོ་སོ་བ་མེད་དམ་སྙམ་པའི་ལོག་རྟོག་བསལ། ད་ལྟའི་ཕྱག་བཞེས་ལྟར་གྱི་སྒྲུབ་དཀྱིལ་རྗེ་བླ་མས་མཛད་པ་ལ་ཁ་འཕང་བའོ། །དང་པོ་ལ་གཉིས་ཏེ། ནང་དབང་གང་དུ་བསྐུར་བའི་དཀྱིལ་འཁོར་དང། སྒྲུབ་དབང་གང་དུ་བསྐུར་བའི་དཀྱིལ་འཁོར་རོ། །དང་པོ་ནི། བསྐྱེད་བྱ་རྟེན་དང་བརྟེན་པར་བཅས་པའི་དཀྱིིལ་འཁོར་གྱི་ངོ་བོ་རྗེ་བླ་མས་མཛད་པའི་སྒྲུབ་ཐབས་དངོས་གྲུབ་ཆར་འབེབས་ལྟར་ལས། ནང་དབང་འབྱུང་ཆུའི་ཡན་ལག་གི་དཀྱིལ་འཁོར་ཟུར་དུ་འབྱེད་པའི་སྐབས་འདིར། ཇི་ལྟར་བསྐྱེད་པའི་ཆོ་ག་མ་ཧཱ་ཡོ་ག་དང་སྒོ་བསྟུན་ནས་ཆོ་ག་གསུམ་བསྐྱེད་ལ་སོགས་པས་རིམ་གྱིས་བསྐྱེད་པའི་ཚུལ་སྟོན་ཏེ། འདྲེན་པའི་ལས་བྱང་ཆེ་ལེ་ལས། དེ་ནས་ཏིང་འཛིན་གསུམ་བསྒོམས་ཏེ། གཞལ་ཡས་ཁང་དུ་གསུང་ཡིག་འབྲུ་སོ་སོ་ལས་ཐུགས་ཕྱག་མཚན། དེ་ལས་སྐུ་ཕྱག་རྒྱ་རྫོགས་པར་བསྐྱེད་ནས། ཡེ་ཤེས་ཀྱི་ལྷ་སྤྱན་དྲངས་ལ། མཆོད་དེ། བསྙེན་སྒྲུབ་ཚང་བ་དང་། སློབ་མ་དཀྱིལ་འཁོར་དུ་དྲངས་ཏེ། ཞེས་གསུངས་པའི་ཕྱིར། དེ་བས་ན་འདིར་ཡན་ལག་གི་དཀྱིལ་འཁོར་བདུན་པ་ནང་དབང་གི་དཀྱིལ་འཁོར་མ་ཧཱ་ཡོ་གའི་སྒྲུབ་ཐབས་ལ། སྤྱིར་སྔོན་འགྲོ་དང་། རྗེས་ཀྱི་རིམ་པ་རྣམས་དང་། དངོས་གཞིའི་དབང་བསྐུར་ཞིང་བྱིན་གྱིས་བརླབ་པ་མན་ཆད་སྒྲུབ་ཐབས་དངོས་གྲུབ་ཆར་འབེབས་སོར་བཞག་ལས་ཁྱད་པར་མེད་ཅིང་། ཏིང་འཛིན་གསུམ་གྱིས་ཁོག་དབུབ་པ་དང་། རྟེན་དང་བརྟེན་པའི་དཀྱིལ་འཁོར་བསྐྱེད་པ་གཉིས་ལ་ཁྱད་པར་གྱི་སྒོས་ཆོས་ཅུང་ཟད་ཡོད་པ་བསྒྱུར་ཚུལ་ནི། ཏིང་འཛིན་གསུམ་གྱི་སྐབས་སུ། འདི་ལྟར་སྣང་བའི་ཆོས་ཐམས་ཅད་སྐྱེ་བ་མེད་པའི་དབྱིངས་ཞེས་སོགས་ལྷུག་པ་རྣམས་དོན་ལ་མི་འགལ་ཡང་། རྣམ་པ་རྒྱུད་ལུང་གཉིས་ཀྱི་རང་སྐད་མ་འདྲེས་པར་ཕྱེད་པའི་ཆེད་དུ་དཀྱིལ་འཁོར་གསུམ་གྱི་བཤད་པ་བཞག་ནས། དེ་ཏིང་ལ། འདི་ལྟར་སྣང་བའི་ཆོས་ཐམས་ཅད་མི་དམིགས་ཤིང་སྤྲོས་པ་དང་བྲལ་བ་སྟོང་པ་ཉིད་གྱུར། ཀུན་ཏིང་ལ། དེ་བཞིན་ཉིད་མ་རྟོགས་པའི་སྒྱུ་མ་ལྟ་བུའི་སེམས་ཅན་རྣམས་ལ་འཛིན་མེད་སྒྱུ་མ་ལྟ་བུའི་སྙིང་རྗེ་ཆེན་པོ་མཁའ་ཁྱབ་ཏུ་སྣང་བར་གྱུར། རྒྱུ་ཏིང་ལ། རང་རིག་སྣང་སྟོང་གཉིས་སུ་མེད་པའི་རང་བཞིན་ཨ་དཀར་པོའི་རྣམ་པར་གྱུར། གཞི་དབང་ཆེན་གྱི་དཀྱིལ་འཁོར་བསྒོམ་པའི་སྐབས་སུ། རྩ་བ་བྱང་ཆུབ་སེམས་ཀྱི་རང་བཞིན་ཨ་ཡིག་དཀར་པོ་དྲི་མ་མེད་པར་གསལ་བ་ལས། ཨེ་ཨཾ་ར་སུཾ་ཀེཾ་རཾ་རྣམས་ཆད། འོད་ཟེར་འཕྲོས་འདུས་ཡོངས་སུ་གྱུར་པ་ལས། ཡུམ་ལྔའི་མཁའ་ཀློང་རྣམ་པར་དག་པ་འབྱུང་བ་ལྔའི་དཀྱིལ་འཁོར་དུ་ལྷུན་གྱིས་གྲུབ་པ་ནི། ཞེས་པ་ནས། འབྱམས་ཀླས་པར་གྱུར་གྱི་བར། དེ་ནས་རྟེན་གཞལ་ཡས་ཁང་དངོས་སྒོམ་པའི་ཚེ། དེའི་དབུས་སུ་རྒྱུའི་ཨ་ལས་བྷྲཱུཾ་ཆད། བྷ་ག་གསང་བའི་འོད་ཟེར་ལས། ཞེས་པ་ནས། བྷྲཱུཾ་བི་ཤྭ་བི་ཤུདྷེ་ཀ་པཱ་ལ་བྷྲཱུཾ། ཞེས་པས་སྒྲ་གདངས་ཀྱི་རྐྱེན་གྱི་བྷྲཱུཾ་ཡིག་འཕྲོ་འདུས་ཡོངས་སུ་གྱུར་པ་ལས། ནམ་མཁའ་ཐམས་ཅད་ཕོ་བྲང་གི་གཞལ་ཡས་ཁང་འབྱམས་ཀླས་པར་གྲུབ་པ་ནི། ཞེས་པ་ནས། གནས་མཆོག་རབ་འབྱམས་ལྷུན་གྱིས་གྲུབ་པར་ཤོག །ན་མོ་ཧཱུཾ། ཞེས་པའི་བར་དཀྱུས་བཞིན། གཉིས་པ་བརྟེན་པ་ལྷ་བསྐྱེད་པ་ལ། ཇི་ལྟར་བསྒོམ་པའི་ཚུལ་དང་། བསྒོམ་བྱ་ལྷ་སོ་སོའི་མངོན་རྟོགས་སོ། །དང་པོ་ནི། ཆོ་ག་གསུམ་གྱིས་རིམ་པར་བསྐྱེད་པར་བྱ་བ་སྟེ། རྒྱུའི་ཨ་ལས་ཞི་ཁྲོའི་ཡི་གེ་འཁོར་ལོའི་སྤྲིན་ཕུང་རིམ་པ་བཞིན་སྤྲོ་བ་ནི། སྟེང་ཁང་ཞི་བའི་དཀྱིལ་འཁོར་གྱི་གཙོ་བོ་དང་བྱ་བྱེད་གཉིས་ཀྱི་གནས་སུ། ༀ་ཨ། རིགས་ལྔའི་གནས་སུ། ཧཱུཾ་མཱུཾ། ༀ་ལཱཾ། སྭཱ་མཱཾ། ཨཱ་པཱཾ། ཧཱཾ་ཏཱཾ། སེམས་དཔའ་བརྒྱད་ཀྱི་གནས་སུ། ཀྵཱིཾ་ཧཱུཾ། ཏྲཾ་ཏྲཾ། ཧྲཱིཾ་ཧྲཱིཾ། ཛྲི་ཨཾ། མཻ་ཛཿ ཐླྷིཾ་ཧཱུཾ། ཧཱུཾ་བཾ། མཱུཾ་ཧོཿ ཐུབ་པ་དྲུག་གི་གནས་སུ། ཀྲཱིཾ་ཏྲུཾ་སྲུཾ་པྲཾ་ཀྵཾ་ཡེ། མཐར་བྱེད་བཞིའི་གནས་སུ། ཧཱུཾ་ཛཿ ཧཱུཾ་ཧཱུཾ། ཧཱུཾ་བཾ། ཧཱུཾ་ཧོཿ འོག་ཁང་ཁྲོ་བོའི་དཀྱིལ་འཁོར་གྱི་དབུས་སུ། ཧཱུཾ་ཧཱུཾ། དབང་མཆོག་དང་ཁྲག་འཐུང་དགུའི་གནས་སུ་ཧཱུཾ་ཡིག་ཟུང་དགུ། གློ་འབུར་དང་གྲུ་ཆད་ལ་ཧ་བརྒྱད། ཁྱམས་དང་པོའི་ཕྱོགས་མཚམས་སུ་ཧེ་བརྒྱད་དང་། སྒོར་ཕཊ་བཞི། ཁྱམས་གཉིས་པའི་ཕྱོགས་མཚམས་སུ་ཨ་བརྒྱད་དང་། སྒོར་ཛཿཧཱུཾ་བཾ་ཧོཿ ཁྱམས་གསུམ་པར་བྷྱོ་ཉི་ཤུ་རྩ་བརྒྱད་ཕྱོགས་རེར་དྲུག་དྲུག་དང་། སྒོ་བཞིར་རེ་རེ། ཁྱམས་བཞི་པར་ཨེ་སུམ་ཅུ་རྩ་གཉིས་ཕྱོགས་རེར་བདུན་བདུན་དང་སྒོ་བཞིར་རེ་རེ། ཁྱམས་ལྔ་པར་ཧཱུཾ་བདུན་དང་སྒོར་ཏིང་བཞི། ཁྱམས་དྲུག་པར་ཧཱུཾ་བཅོ་བརྒྱད་ཕྱོགས་རེར་གསུམ་གསུམ་དང་ཤར་ནུབ་ཀྱི་ནང་དང་སྒོ་བཞིར་རེ་རེ། ཁྱམས་བདུན་པར་ཧཱུཾ་ཡིག་ཟུང་སུམ་ཅུ་ཕྱོགས་མཚམས་བརྒྱད་དུ་གསུམ་གསུམ་དང་ཤར་ནུབ་ཀྱི་ནང་དང་སྒོ་བཞིར་རེ་རེ། ཁྱམས་བརྒྱད་པའི་ཤར་ཕྱོགས་སུ་ཛཿ ལྷོར་ཧཱུཾ། ནུབ་ཏུ་བཾ། བྱང་དུ་ཧོཿརྣམས་དྲུག་ཅུ་དྲུག་ཅུ། ཁྱམས་དགུ་པར་མ་དྲུག་ཅུ་ཕྱོགས་རེར་བཅོ་ལྔ་བཅོ་ལྔ་སྟེ། ཐམས་ཅད་ཀྱང་ལྷ་རང་རང་གི་ཁ་དོག་ཏུ་གསལ་བར་གྱུར་པ་ལ། ཨ་ཞེས་བརྗོད་པས་གཞིའི་ཨ་དེ་འོད་དུ་ཞུ་ནས་ཡིག་འབྲུ་རྣམས་ལ་ཁྱབ་པར་ཐིམ་པས་ཤིན་ཏུ་གསལ་ཞིང་འབར་བར་གྱུར། ཡིག་འབྲུ་རྣམས་ལས་འོད་ཟེར་འཕྲོས། སངས་རྒྱས་ཀྱི་མཛད་པ་བསྒྲུབས། སླར་འདུས་ནས་ཡིག་འབྲུ་རྣམས་ལ་ཐིམ་པ་འོད་དུ་ཞུ་བ་ལས་ལྷ་སོ་སོའི་ཕྱག་མཚན་དུ་གྱུར། དེ་རྣམས་ལས་འོད་ཟེར་འཕྲོས། སངས་རྒྱས་ཀྱི་མཛད་པ་བསྒྲུབས། སླར་འདུས་ནས་ཕྱག་མཚན་རྣམས་ལ་ཐིམ་པ་འོད་དུ་ཞུ་བ་ཉིད་ལྷ་རྣམས་ཀྱི་གསང་སྔགས་བརྗོད་པའི་རྐྱེན་གྱིས་ཞི་ཁྲོ་ལྔ་བརྒྱ་ཞེ་བདུན་གྱི་དཀྱིལ་འཁོར་འཁོར་ལོའི་ལྷ་དེ་དང་དེའི་སྐུར་བཀྲ་ལམ་གྱིས་གསལ་བར་གྱུར་པ་ནི། ཞེས་སོ། །གཉིས་པ་ནི། ཧཱུཾ་ཧཱུཾ་ཧཱུཾ་བཛྲ་ཙིཏྟ་ༀ། ཨ་ཨ་ཨ་བཛྲཱི་བྷ་དྲ་ས་མནྟ་ཨཿ དབུས་ཀྱི་གདན་ལ་བཅོམ་ལྡན་འདས་དཔལ་ཀུན་ཏུ་བཟང་པོ། །ཞེས་པ་ནས། རྒྱུད་ལུང་མན་ངག་ལྷུན་གྱིས་གྲུབ་པར་ཤོག །ན་མོ་ཧཱུཾ། ཞེས་པའི་བར་དཀྱུས་ལྟར་དང་། ཞར་བྱུང་མགྲོན་ཐབས་ཀྱི་ལྷ་བསྒོམ་པའི་སྐབས་སུ། དཀྱིལ་འཁོར་ཆེན་པོའི་སྟེང་འོག་ཕྱོགས་མཚམས་ཀྱི་སྲུང་བའི་འཁོར་ལོ་ལ་ཁྲོ་བཅུ་ཡབ་ཡུམ་རང་རང་གི་ཕྱག་བརྙན་ཕྲ་མེན་ཉི་ཤུ་དང་བཅས་པས་བསྐོར་བའི་དབུས་གཞལ་ཡས་ཁང་ཆེན་པོའི་འོག་གཞི་པདྨའི་ཆུ་བའི་མདུན་དུ་རྡོ་རྗེ་གཞོན་ནུ་ཡབ་ཡུམ་དང་། གཞན་ཡང་སྤྲུལ་པ་དང་ཡང་སྤྲུལ། ནག་མོ་མཆེ་གཤོག་ཅན་དང་། ཞེས་པ་ནས། གོ་བགོ་ལུས་བསྲུང་གི་བར་དཀྱུས་ལྟར་རོ། །དེ་བཞིན་དུ་དཀྱིལ་ཆོག་ལའང་མཚན་བཅས་ཀྱི་ཏིང་ངེ་འཛིན་གྱིས་ས་སྦྱང་བ་དང་། ལྷ་སྟ་གོན་གྱི་རྟེན་གཞལ་ཡས་ཁང་བསྒོམ་པའི་ཚེ། རང་གི་ཐུགས་ཀའི་ཧཱུཾ་ལས་ས་བོན་སྤྲོས་ཏེ་བསྒོམ་ཞིང་། ས་བཟུང་བ་དང་། ཡན་ལག་རབ་གནས་ཀྱི་ལས་བུམ། ཡན་ལག་ཅན་གྱི་ལྷ་བུམ་སྟ་གོན་གྱི་ལྷ་རྣམས་ཆོ་ག་གསུམ་བསྐྱེད་བྱེད་བའི་ཁྱད་པར་ཙམ་ལས། གཞན་ཐམས་ཅད་རྗེ་བླ་མས་མཛད་པའི་དཀྱིལ་ཆོག་དྲི་མེད་འོད་ཕྲེང་བཞིན་ཤེས་པར་བྱའོ། །དེ་དག་ཀྱང་ཁྲོ་ལུང་ཆེ་བའི་སྒོམ་ཁོག་ལས། རྒྱུད་ཀྱིས་ལྷ་བསྐྱེད་ལུང་གིས་གསལ་བཏབ་ལ། ཞེས་པ་ལྟར་ལྷ་རྣམས་རྒྱུད་ལྟར་ཆོ་ག་གསུམ་གྱིས་བསྐྱེད་ནས་ལུང་གི་ཞི་ཁྲོས་གསལ་འདེབས་པ་ཡིན་ནོ། །ཡང་འདིར་བསྒོམ་བྱའི་ལྷ་གྲངས་ལ་ཅུང་ཟད་དཔྱད་པར་བྱ་སྟེ། དེ་ཡང་དབང་ཆོག་ནི་ཆེ་མཆོག་ཏུ་རིགས་འདུ་ཞིང་། ཞི་ཁྲོའི་གཙོ་བོ་ཀུན་བཟང་དང་ཆེ་མཆོག་གཉིས་ནི། ཨ་ནུ་རང་གཞུང་གི་སྒོམ་ཚུལ་ལྟར་ལྷ་རྣམས་ལུས་ལ་འགོད་པའི་ཚེ། དེ་གཉིས་གཞི་ལུས་ཀྱི་ལྷ་ཡིན་པས་སམ། ཡང་ན་དཀྱིལ་འཁོར་ཐམས་ཅད་ཀྱི་ཁྱབ་བྱེད་རིགས་དྲུག་པ་ཡིན་པའི་ཕྱིར་དང་། དེར་མ་ཟད་གཙོ་བོ་གཉིས་དབང་མཆོག་དང་གསུམ་ཡབ་ཡུམ་ཕྱེ་བའི་ལྷ་དྲུག་པོ་ལུང་གི་ཞི་ཁྲོའི་ཚིག་ཟིན་ལས་ཀྱང་མི་འབྱུང་བ་ལྟར་ལོགས་སུ་མ་བགྲངས་པས། རེ་ཞིག་ལྷ་ལྔ་བརྒྱ་ཞེ་གཅིག་བྱུང་ལ། དེའི་སྟེང་དུ་རྡོ་རྗེ་གཞོན་ནུ་དང་ཁྲོ་བཅུ་ཡབ་ཡུམ། ཁྲ་ཐབས་ཉི་ཤུ་སྟེ་ཞེ་གཉིས་བསྣན་ནས་ལྷ་གྲངས་ལྔ་བརྒྱ་དང་བརྒྱད་ཅུ་གྱ་གསུམ་དུ་ངེས་པ་ཡིན་ཏེ། འདྲེན་པའི་ལས་བྱང་ཆེ་ལེར། དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོས་སྐད་ཅིག་ཡུད་ལ་ནམ་མཁའ་གང་ནས་གང་དུ་ཁྱབ་པ་ཐམས་ཅད་དུ་དབང་གི་དཀྱིལ་འཁོར་ཞི་ཁྲོའི་ལྷ་ལྔ་བརྒྱ་དང་བརྒྱད་ཅུ་རྩ་གསུམ་གྱིས་གང་བར་མཛད་ནས། ཞེས་དང་། བང་རིམ་དང་པོའི་སྟེང་དུ་ཞི་བའི་ལྷ་ཞེ་གཉིས་བཀོད། ཅེས་པ་ནས། ཕྱོགས་མཚམས་སྟེང་འོག་དང་མཎྜལ་གྱི་རྩར་ཕུར་པའི་ལྷ་ཞེ་གཉིས་དགོད། ཅེས་པའི་བར་གསུངས་ཤིང་། ནང་དབང་གི་དབང་དོན་རྒྱ་ཆེར་འབྱེད་པ་ལས། དཀྱིལ་འཁོར་དགུ་ཡི་རིམ་པར་སློབ་དཔོན་གདན། མ་གཏོགས་བརྒྱད་ལ་ལྔ་བརྒྱ་བརྒྱད་ཅུ་གསུམ། ཞེས་གསུངས་པའི་ཕྱིར་རོ། །མདོ་ཡོངས་རྫོགས་ཀྱི་དབང་དུ་བྱས་པའི་ཡན་ལག་གི་དཀྱིལ་འཁོར་བདུན་པ་མ་ཧཱའི་སྒྲུབ་ཐབས་ལེ་ཚན་ནོ། །གཉིས་པ་སྒྲུབ་དབང་གང་དུ་བསྐུར་བའི་དཀྱིལ་འཁོར་ནི། རྩ་རྒྱུད་ལས་གསུངས་པ་དུར་ཁྲོད་གསང་བ་མཆོག་གི་དཀྱིལ་འཁོར་ཏེ། དེ་ཡང་ཇི་ལྟར་བསྐྱེད་པའི་ཆོ་ག་ཨ་ནུའི་ཐེག་པ་རང་ལུགས་བཞིན་དུ། འདི་ལྟར་སྣང་བའི་ཆོས་ཐམས་ཅད་རང་གི་ཕུང་ཁམས་སྐྱེ་མཆེད་དུ་འདུ་ཞིང་། དེ་ཉིད་གདོད་ནས་ལྷའི་རང་བཞིན་དུ་ཤེས་པས། ལྷ་རྣམས་ཀྱི་གསང་སྔགས་བརྗོད་པ་ཙམ་གྱིས་དྭངས་པའི་མཚོ་ལ་གཟའ་སྐར་ཤར་བ་ལྟར་གཅིག་ཅར་དུ་གསལ་འདེབས་པ་ཡིན་པས་ན། བསྐྱེད་ཚུལ་དང་ཆོ་ག་མ་གཞི་རྗེའི་སྒྲུབ་ཐབས་དངོས་གྲུབ་ཆར་འབེབས་ལྟར་ལས་མི་འདྲ་བའི་ཁྱད་པར་ལས་ཀྱི་རིམ་པའི་ཏིང་ངེ་འཛིན་དང་། རྗེས་ཆོག་གི་སྐབས་སུ་ཕྲ་མོ་རེ་གཉིས་ཙམ་དང་། བྱེ་བྲག་བསྐྱེད་བྱ་ཁྲོ་བོའི་རྟེན་དང་བརྟེན་པའི་དཀྱིལ་འཁོར་གྱི་ངོ་བོ་ཆས་མི་མཐུན་པས། དེ་དག་གི་ཁ་བསྒྱུར་ཚུལ་ནི། སྔོན་འགྲོའི་ལས་བདུན་དང་། དངོས་གཞིའི་ཏིང་ངེ་འཛིན་གསུམ་ནས། རྡོ་རྗེའི་ཀུན་ཏུ་སྤྲས་པ། ཞེས་པའི་བར། ཕྱི་ནང་རིམ་པ་དགུ་པ་ཞེས་པ། རིམ་པ་ལྔ་པ་ཞེས་བསྒྱུར་ཞིང་གཞན་དཀྱུས་ལྟར་ལས། དེ་ནས། ཁྱམས་གྲུ་བཞི་པ་ལྔ་རིམ་ཕྱོགས་མདོག་ཅན་གྱི་བར་ཁྱམས་བཞི་ལ་སྒོ་སྒོ་ཁྱུད་ཅན་རྒྱན་མེད་པ་གཉིས་གཉིས་ཏེ་བརྒྱད་དང་། ཕྱི་ཁྱམས་ལྔ་པ་ལ་སྒོ་རྟ་བབས་ལ་སོགས་པ་སྒོ་རྒྱན་དང་ལྡན་པའི་སྒོ་དགུས་ཀུན་ཏུ་གསལ་བར་གྱུར་པའི་ནང་མ་གྲུ་ཆད་དང་བཅས་པའི་ལྟེ་བ་རིའུ་མིག་དགུ་པ། དེའི་ཕྱིར་འཁོར་ལོ་རྩིབས་བརྒྱད་པ་དྲུག་རིམ་གྱིས་བསྐོར་བའི་ལྟེ་བ་དང་། འཁོར་ལོ་རིམ་པ་གཉིས་པ་དང་། དྲུག་པ་གསུམ་གྱི་མཐར་རྡོ་རྗེ་དང་། ཐོད་པ་དང་། འབར་བའི་ཕྲེང་བ་སྟེ་མུ་ཁྱུད་སུམ་རིམ་དང་། འཁོར་ལོ་རིམ་པ་གཞན་བཞི་ལ་མུ་ཁྱུད་རྐྱང་པ་རེ་རེས་བསྐོར་བ། ཕྱི་ནས་རིམ་པ་བཞིན་ཁྱད་པར་དུ་གྱུར་པས་སྤགས་པ། ཞེས་པ་ནས། བྱོལ་སོང་གཙོ་བོ་བརྒྱད་རེ་རེས་དྲེགས་པ་ཕོ་མོ་མནན་པ། ཞེས་པའི་བར་དང་། དེ་ནས། འཁོར་ལོ་རྣམས་ཀྱི་ཕྱོགས་ཀྱི་རྩིབས་ལ་པདྨ་ཉི་ཟླ་དྲེགས་པའི་གདན་དང་། ལྷ་གནས་གཞན་རྣམས་སུ་ཉི་མ་དང་ཞིང་གི་གདན་ལ་སོགས་པ་རིགས་དང་མཐུན་པའི་གདན་རེ་རེ། ཕོ་བྲང་སྟེང་གི་འཁོར་ལོའི་ལྟེ་བར་སེང་གེའི་ཁྲི་ཆ་གཉིས། ཞེས་པ་ནས། སྟེང་ཁང་ཞི་བ་རྫོགས་པའི། འཕྲིན་ལས་རྣམ་བཞི་ལྷུན་གྱིས་གྲུབ་པར་ཤོག །ན་མོ་ཧཱུཾ། ཞེས་པའི་བར་རོ། །འོག་ཁང་ཁྲོ་བོའི་དཀྱིལ་འཁོར་བསྐྱེད་པའི་སྐབས་སུ། དང་པོ་གཙོ་བོ་བསྐྱེད་པ་ནི། ༀ་ས་ང་ཤྲཱི་ཧེ་རུ་ཀ་སརྦ་ཏ་ཐཱ་ག་ཏ་མ་ཧཱ་ཤྲཱི་ཧེ་རུ་ཀ་བཛྲ་ཙཎྜ་སརྦ་དུཥྚནྟ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་སྭཱ་ཧཱ། ས་ང་ཤྭ་རི་ཁ་མུཾ་སྭཱ་ཧཱ། ཞེས་བརྗོད་པས་རྒྱུ་བྱང་ཆུབ་ཀྱི་སེམས་ཉིད་སྔགས་ཀྱི་སྒྲ་གདངས་ཀྱི་སད་པ་ལས། དབུས་ཀྱི་གདན་ལ་བཅོམ་ལྡན་འདས་དཔལ་ཆེན་པོ་རྡོ་རྗེ་ས་ང་ཤྲཱི་ཧེ་རུ་ཀ་སྐུ་མདོག་མཐིང་ནག་ཉི་མ་བྱེ་བའི་འོད་ལྟར་འབར་བའི་གཟི་བྱིན་ཅན། ཞེས་པ་ནས། རྫོགས་པར་སྣང་བའི་བདག་ཉིད་ཆེན་པོར་གྱུར་པའོ། །ཞེས་པའི་བར་རོ། །གཉིས་པ་ཁྲག་འཐུང་དྲུག་ཅུ་རྩ་བཞི་བསྐྱེད་པ་ནི། ཕྱོགས་ཀྱི་རིའུ་མིག་བཞི་ལ་རིགས་བཞིའི་འཁོར། ༀ་སརྦ་ཏ་ཐཱ་ག་ཏ་བཛྲ་མ་ཧཱ་ཤྲཱི་ཧེ་རུ་ཀ་ཧཱུཾ་སྭཱཧཱ། བཛྲ་ཤྭ་རི་ཁ་མུཾ་སྭཱ་ཧཱ། ཤར་དུ་རྡོ་རྗེ་རྒྱལ་ཚབ་ཞེས་བྱ་བའི་ཞེ་སྡང་རྡོ་རྗེ་དཀར་པོ་གཡས་རྡོ་རྗེ། དེ་བཞིན་དུ། བཛྲ་གྱི་གནས་སུ། རཏྣ་སོགས་ཀྱིས་བརྗེ་བ་འགྲེ་ཤེས་པར་བྱས་ལ། རཏྣ། ལྷོར་རྡོ་རྗེ་གུང་ཕུར་ཞེས་བྱ་བའི་ང་རྒྱལ་རིན་ཆེན་སྔོན་པོ་གཡས་རིན་པོ་ཆེ། པདྨ། ནུབ་ཏུ་རྡོ་རྗེ་ཀིང་ཞེས་བྱ་བའི་འདོད་ཆགས་པདྨ་དམར་པོ་གཡས་པདྨ། ཀརྨ། བྱང་དུ་རྡོ་རྗེ་ལས་ཞེས་བྱ་བའི་ཕྲག་དོག་སྣ་ཚོགས་པ་ལྗང་གུ་གཡས་རྒྱ་གྲམ། ཐམས་ཅད་ཀྱི་གཡོན་བྷན་དམར་འཛིན་ཅིང་། ཞེ་སྡང་རྡོ་རྗེ་མ་སོགས་རང་མདོག་གི་ཡུམ་དྲིལ་བུ་བསྣམས་པ་དང་འཁྲིལ་བའོ། །མཚམས་ཀྱི་རིའུ་མིག་བཞི་ལ་ཆོ་འཕྲུལ་ཆེན་པོའི་འཁོར། ༀ་སརྦ་ཏ་ཐཱ་ག་ཏ་ས་ནུ་མ་ཧཱ་ཤྲཱི་སོགས། ཤར་ལྷོར་ནམ་མཁའི་དབང་ཕྱུག་སྔོ་སྐྱ། ས་ནེ། ལྷོ་ནུབ་ཏུ་རྣམ་གྲོལ་སྦྱིན་པ་དམར་སེར། ས་ནོ། ནུབ་བྱང་དུ་རྣམ་གྲོལ་སྒྲོག་པ་དམར་ལྗང་། ཝ་ར། བྱང་ཤར་དུ་ཐམས་ཅད་གྲུབ་པ་སེར་སྐྱ། བཞི་ཀ་ཕྱག་གཡས་གར་བསྒྱུར་ཞིང་། གཡོན་གྱིས་ཡུམ་ནམ་མཁའི་དབང་མོ་སོགས་རང་མདོག་ཅན་དྲིལ་བུ་བསྣམས་པ་ལ་འཁྱུད་པའོ། །ཧཱུཾ། རུ་དྲ་རྣམ་གསུམ་སོགས་ཤློ་ཀ་གཉིས། འཁོར་ལོ་དང་པོ་རྩིབས་བརྒྱད་ཀྱི་ཕྱོགས་ཀྱི་རྩིབས་བཞིར་དམ་ཚིག་ཆེན་པོའི་འཁོར། ༀ་སརྦ་ཏ་ཐཱ་ག་ཏ་བཛྲ་གརྦྷ་མ་ཧཱ་ཤྲཱི་སོགས། ཤར་དུ་རྡོ་རྗེ་སྙིང་པོ་དཀར་པོ་གཡས་རྡོ་རྗེའི་མྱུ་གུ། རཏྣ་གརྦྷ། ལྷོར་ནོར་བུའི་སྙིང་པོ་སེར་པོ་གཡས་རིན་པོ་ཆེའི་མྱུ་གུ། པདྨ་གརྦྷ། ནུབ་ཏུ་པདྨའི་སྙིང་པོ་དམར་པོ་གཡས་པདྨའི་མྱུ་གུ། ཀརྨ་གརྦྷ། བྱང་དུ་བཀོད་པའི་སྙིང་པོ་ལྗང་གུ་གཡས་རལ་གྲིའི་མྱུ་གུ། དེ་ཐམས་ཅད་གཡོན་འཁྱུད་སྟབས་ཀྱི་ཡུམ་རྡོ་རྗེ་དབང་ཕྱུག་མ་སོགས་རང་མདོག་ཅན་དྲིལ་བུ་བསྣམས་པ་ལ་འཁྱུད་པའོ། །ཧཱུཾ། རྣམ་ཤེས་བཞི་དང་ཡུལ་བཞི་ཅིང་སྣང་ཡང་། དམ་ཚིག་ཆེན་པོ་བསྒོམས་པའི་བྱིན་རླབས་ཀྱིས། ལྷ་རྟོག་གཉིས་མེད་རྟོགས་ལས་མི་འདའ་བའི། དམ་ཚིག་ཆེན་པོ་ལྷུན་གྱིས་གྲུབ་པར་ཤོག །ན་མོ་ཧཱུཾ། འཁོར་ལོ་རིམ་པ་གཉིས་པའི་ཕྱོགས་ཀྱི་རྩིབས་བཞིར་ཚན་མེད་པའི་འཁོར། ༀ་སརྦ་ཏ་ཐཱ་ག་ཏ་མཻ་ཏྲི་གརྦྷ། ཤར་དུ་བྱམས་པའི་སྙིང་པོ་དཀར་པོ་གཡས་རྡོ་རྗེ། ཀཱ་རུ་གརྦྷ། ལྷོར་སྙིང་རྗེའི་སྙིང་པོ་སེར་པོ་གཡས་རིན་ཆེན། ལོ་ཀ་གརྦྷ། ནུབ་ཏུ་དགའ་བའི་སྙིང་པོ་དམར་པོ་གཡས་པདྨ། བི་དུ་མ་གརྦྷ། བྱང་དུ་བཏང་སྙོམས་ཀྱི་སྙིང་པོ་ལྗང་གུ་ག ཡས་རལ་གྲི། དེ་ཐམས་ཅད་གཡོན་སྐྱབས་སྦྱིན་གྱིས་ཡུམ་བདེ་བའི་དབང་ཕྱུག་མ་སོགས་སྐྱབས་སྦྱིན་གྱི་དྲིལ་བུ་བསྣམ་པ་ལ་འཁྱུད་པའོ། །ཧཱུཾ། དབང་པོ་བཞི་དང་དུས་བཞི་ཅིང་སྣང་༴ ཚད་མེད་ཡབ་ཡུམ༴ ཚད་མེད་རྣམ་བཞིའི་ཡོན་ཏན་མ་ལུས་པ། ཡེ་ཤེས་ཆེན་པོར་མ་འདྲེས་ཡོངས་རྫོགས་ཤོག །ན་མོ་ཧཱུཾ། འབར་བའི་ཕྲེང་བས་བཅད་པའི་ཕྱིར་རོལ། འཁོར་ལོ་རིམ་པ་གསུམ་པའི་ཕྱོགས་ཀྱི་རྩིབས་བཞིར་རོལ་པ་ཆེན་པོའི་འཁོར། ༀ་སརྦ་ཏ་ཐཱ་ག་ཏ་ཡཀྵ། ཤར་དུ་ཡཀྴ་ཧེ་རུ་ཀ་སྨུག་ནག་རྡོ་རྗེ། རཀྵ། ལྷོར་རཀྴ་ཧེ་རུ་ཀ་སྔོ་ནག་བེ་ཅོན། བི་ཤ །ནུབ་ཏུ་བི་ཤ་ཧེ་རུ་ཀ་དམར་ནག་པདྨ། བི་ཤྭ། བྱང་དུ་བི་ཤྭ་ཧེ་རུ་ཀ་ལྗང་ནག་ཕག་གི་མཆེ་བས་མཚན་པའི་རལ་གྲི། དེ་ཐམས་ཅད་གཡོན་བྷཉྫ་དམར་གྱིས་གང་བ་འཛིན་པས། ཡུམ་ཡཀྵ་ཤྭ་རཱི་ཀ་ལ་སོགས་པ་གཡས་མཆེ་བས་མཚན་པའི་དྲིལ་བུ་དང་གཡོན་བྷན་དམར་བསྣམས་པ་ལ་འཁྱུད་པའོ། །ཧཱུཾ། ཕྲག་དོག་སྡང་སྙེམས་གཏི་མུག་ཅིར་སྣང་ཡང་། །ཁྲག་འཐུང་ཡབ་ཡུམ་བརྒྱད་དུ་བསྒོམས་པའི་མཐུས། །རྣམ་བཞི་དྲེགས་པའི་རྒྱུ་འབྲས་ཀུན་བསྒྲལ་ནས། །དབྱིངས་དང་ཡེ་ཤེས་རོལ་པའི་དོན་རྟོགས་ཤོག །ན་མོ་ཧཱུཾ། འཁོར་ལོ་རིམ་པ་བཞི་པའི་ཕྱོགས་ཀྱི་རྩིབས་བཞིར་འཇིགས་བྱེད་ཆེན་པོའི་འཁོར། ༀ་སརྦ་ཏ་ཐཱ་ག་ཏ་ཏེ་ཤྭ་། ཤར་དུ་ཏེ་ཤྭ་ཧེ་རུ་ཀ་སྨུག་ནག་རྡོ་རྗེས་མཚན་པའི་སེང་གེའི་རྒྱལ་མཚན་ཁ་གདེངས་པ། ཀེ་ཤྭ །ལྷོར་ཀེ་ཤྭ་ཧེ་རུ་ཀ་སེར་ནག་རིན་པོ་ཆེས་མཚན་པའི་སྟག་གི་རྒྱལ་མཚན་ཁ་གདེངས་པ། པེ་ཤྭ །ནུབ་ཏུ་པེ་ཤྭ་ཧེ་རུ་ཀ་དམར་ནག་པདྨས་མཚན་པའི་སྤྱན་ཀིའི་རྒྱལ་མཚན་ཁ་གདེངས་པ། བི་ཤྭ །བྱང་དུ་བི་ཤྭ་ཧེ་རུ་ཀ་ལྗང་ནག་རལ་གྲིས་མཚན་པའི་དོམ་གྱི་རྒྱལ་མཚན་ཁ་གདེངས་པ། དེ་ཐམས་ཅད་གཡོན་དུང་དམར་འཛིན་པས་ཀེ་ཤ་ཤྭ་རཱི་ཀ་ལ་སོགས་པ་ལ་འཁྱུད་ཅིང་། ཡུམ་རྣམས་ཀྱང་ཕྱག་མཚན་ཡབ་ལྟར་ལས་རྒྱལ་མཚན་ལ་དྲིལ་བུས་མཚན་པའོ། །ཧཱུཾ། གཉིས་འཛིན་རྟོག་པའི་སྡུག་བསྔལ་ཅིར༴ འཇིག་བྱེད་ཡབ་ཡུམ་བརྒྱད་དུ༴ གདུག་ཅན་མ་ལུས་དངངས་ཤིང་འཇིགས་བྱས་ནས། །སྒྲོལ་སྦྱོར་ཟད་མྱོས་ལས་བཞི་མཐར་ཕྱིན་ཤོག །ན་མོ་ཧཱུཾ། འཁོར་ལོ་རིམ་པ་ལྔ་པའི་ཕྱོགས་ཀྱི་རྩིབས་བཞིར་འཇོམས་བྱེད་ཆེན་པོའི་འཁོར། ༀ་སརྦ་ཏ་ཐཱ་ག་ཏ་ཏྲག་ཤྭ། ཤར་དུ་ཏྲག་ཤྭ་ཧེ་རུ་ཀ་སྨུག་ནག་རྡོ་རྗེས་མཚན་པའི་ཞིང་དབྱུག །ཧྲི་ཤྭ། ལྷོར་ཧྲི་ཤྭ་ཧེ་རུ་ཀ་སེར་ནག་རིན་པོ་ཆེས་མཚན་པའི་ཞིང་དབྱུག །ཀ་ཤྭ། ནུབ་ཏུ་ཀ་ཤྭ་ཧེ་རུ་ཀ་དམར་ནག་པདྨས་མཚན་པའི་ཞིང་དབྱུག །བག་ཤྭ། བྱང་དུ་པ་ཤ་ཧེ་རུ་ཀ་ལྗང་ནག་རྒྱ་གྲམ་གྱིས་མཚན་པའི་ཞིང་དབྱུག །དེ་ཐམས་ཅད་གཡོན་དུང་མར་འཛིན་པས་ཏྲག་ཤ་ཤྭ་རའི་ཀ་སོགས་ཡུམ་རྣམས་ཡབ་ལྟར་ལས་ཞིང་དབྱུག་ལ་དྲིལ་བུ་སྒྲ་སྒྲོག་པས་མཚན་པ་བསྣམས་པ་ལ་འཁྱུད་པའོ། །ཧཱུཾ། མ་རུངས་གདུག་པའི་དངོས་པོ༴ འཇོམས་བྱེད་ཡབ་ཡུམ་བརྒྱད་དུ༴ གདུག་པ་ཅན་རྣམས་འཇོམས་པར་བྱེད་པ་ཡི། །སྒྲོལ་ཞིང་སྟོབ་པའི་ཕྲིན་ལས་མཐར་ཕྱིན་ཤོག །ན་མོ་ཧཱུཾ། འཁོར་ལོ་རིམ་པ་ཐ་མའི་ཕྱོགས་ཀྱི་རྩིབས་བཞིར་ཟ་བྱེད་ཆེན་པོའི་འཁོར། ༀ་སརྦ་ཏ་ཐཱ་ག་ཏ་རུ་ཏི། ཤར་དུ་རུ་ཏི་ཧེ་རུ་ཀ་སྨུག་ནག་གཡས་པས་སྙིང་ཟ་བ། རཀྟི། ལྷོར་རག་ཏི་ཧེ་རུ་ཀ་སེར་ནག་གཡས་ནང་ཁྲོལ་ཟ་བ། ཁཱ་ཧི། ནུབ་ཏུ་ཁཱ་ཧི་ཧེ་རུ་ཀ་དམར་ནག་གཡས་སྐེ་ཁྲག་འཇིབ་པ། ས་ཧ། བྱང་དུ་ས་ཧ་ཧེ་རུ་ཀ་ལྗང་ནག་གཡས་ཡན་ལག་ཟ་བ། དེ་ཐམས་ཅད་གཡོན་དུང་དམར་འཛིན་པས། ཡུམ་རུ་ཏི་ཤྭ་རཱི་ཀ་སོགས་གཡས་དྲིལ་བུ་འཁྲོལ་ཞིང་གཡོན་བྷཉྫ་བསྣམས་པ་ལ་འཁྱུད་པ། ལྷ་ཚོགས་དེ་ཐམས་ཅད་ཀྱང་འབར་བའི་གར་དགུ་དང་ལྡན་ཞིང་། དུར་ཁྲོད་རོལ་པའི་ཆས་ཅན། སོ་སོའི་གདན་ལ་རོལ་པའོ། །ཧཱུཾ། ཆགས་སྡང་རྨོངས་པའི་རྟོག་པ༴ ཟ་བྱེད་ཡབ་ཡུམ་བརྒྱད་དུ༴ བསྒྲལ་བའི་ཞིང་རྣམས་མ་ལུས་གནས་སྟོན་ནས། །སྤོང་ལེན་མེད་པར་སྤྱོད་པའི་མཐུ་ཐོབ་ཤོག །ན་མོ་ཧཱུཾ། འདིར་འགྲེལ་ཆུང་དུ། ཕྱོགས་ཀྱི་རིའུ་མིག་བརྒྱད་དང་། འཁོར་ལོ་དང་པོ་དང་གཉིས་པའི་ལྷ་རྣམས་ཞི་བར་མཛད་པ་ལྟར་ན། རིགས་ལྔ་དང་སེམས་དཔའ་ཡབ་ཡུམ་ཚང་བས། སྟེང་ཁང་ཞི་དཀྱིལ་ལོགས་སུ་མ་བསྒོམས་ཀྱང་ཆད་པར་མི་འགྱུར་རམ་སྙམ་མོད། འདིར་ནི་རྒྱ་བདུན་འགྲེལ་སོགས་སུ་ཞི་བ་ཡིན་པའི་གསལ་བྱེད་མེད་ཅིང་བསྐྱེད་སྔགས་དང་མཚན་གྱི་ཀྱང་ཁྲོ་བོ་སྟོན་པར་མ་ཟད། རྩ་རྒྱུད་ཀྱི་རྒྱུན་གྱི་ཏིང་ངེ་འཛིན་གྱི་ལེའུ་ལས། སྤྱན་འབར་བ་དྲུག་ཅུ་རྩ་བཞི་ནི་ཧེ་རུ་ཀ་ཡབ་ཡུམ་དྲུག་ཅུ་རྩ་བཞིར་གསལ་ལོ། །ཞེས་དབུ་ཉེར་གཅིག་ལ་སྤྱན་གསུམ་གསུམ་སྟེ་རེ་གསུམ། སྦས་སྤྱན་གཅིག་བཅས་རེ་བཞིན་སྦྱར་བའི་ལྷ་ཐམས་ཅད་ཧེ་རུ་ཀར་གསུངས་བ་དང་། ཟུར་ཧམ་གྱིས་ཀྱང་། མདོ་ཆེན་ཀུན་འདུས་རྒྱུད་ལྟར་ཚོགས་ཆེན་འདུས། ཨ་ནུ་གཙོ་ལྟར་ཞི་འོད་ཁྲོ་ཧེ་རུ། ཆེ་མཆོག་རྒྱལ་པོ་བཛྲ་རྒྱལ་ཚབ་ནི། ཞེས་སོགས་གསུངས་པ་ལྟར་བྱས་པའོ། །ཡང་འཁོར་ལོ་རྩིབས་བརྒྱད་ཀྱི་ལྷ་རྣམས་ཕྱོགས་རྩིབས་ལ་བཀོད་ནས། མཚམས་རྩིབས་རྣམས་སྟོང་པར་འཇོག་པ་ནི་རྣལ་འབྱོར་སའི་སྒྲོལ་མ་ལས། འདི་དག་ནི་འཁོར་ལོའི་རྩིབས་རེ་རེ་ལ་གོ་རིམ་བཞིན་དུ་དགོད་ཅེས་ཟེར་ན། ཡོད་མཚམས་ཀྱི་འཁོར་ལོ་ཡེ་ཤེས་ཀྱི་ཡུལ་བས་སྟོང་པར་བཞག་སྟེ། ཕྱོགས་ཀྱི་འཁོར་ལོ་རྣམས་ལ་ཐབས་དང་ཤེས་རབ་སྦྱོར་བའི་སྟངས་སྟབས་སུ་བཞུགས། ཞེས་གསུངས་པ་ལྟར་བཀོད་པ་སྟེ། ཐབས་ཤེས་སོ་སོར་དགོད་པར་འདོད་ན། ཕྱོགས་རྣམས་སུ་ཡབ་དང་མཚམས་ལ་ཡུམ་རྣམས་སྤེལ་ཏེ་དགོད་དོ། །གསུམ་པ་བཀའ་ཉན་གྱི་འཁོར་རྣམས་བསྐྱེད་པ་ནི། གྲུ་ཆད་ཀྱི་ལྷ་སྣམ་ནང་མ་ལ་གསང་བའི་བུ་མོའི་འཁོར། ༀ་བཛྲ་ག་རཱ་ཧ། ཤར་ལྷོའི་ཤར་དུ་མཛོད་ལྡན་མ་སོགས་གཞན་འདྲ་བ་ལས། བཞུགས་གནས་ཀྱི་ཁྱད་པར་ནི། ལྷོ་ནུབ་ཀྱི་ལྷོར་ཆོམ་རྐུན་མ། ནུབ་བྱང་གི་ནུབ་ཏུ་རབ་རྨོངས་མ། བྱང་ཤར་གྱི་བྱང་དུ་རོ་ལང་མ། ཤར་ལྷོའི་ལྷོར་སྦོས་མོ། ལྷོ་ནུབ་ཀྱི་ནུབ་ཏུ་དྲོད་མོ། ནུབ་བྱང་གི་བྱང་དུ་དུར་ཁྲོད་མ། བྱང་ཤར་གྱི་ཤར་དུ་གཏུམ་མོ། ཞེས་བསྒྱུར། གྲུ་ཆད་ཀྱི་ལྷ་སྣམ་ཕྱི་མ་ལ་དགའ་བའི་བུ་མོའི་འཁོར། ༀ་བཛྲ་སིདྷ་མུ་ཁཱི་ཧེ། ཤར་ལྷོའི་ཤར་དུ་སེང་གདོང་སེར་མོ་སོགས་སྔར་ལྟར་འགྲེའོ། །ཁྱམས་དང་པོ་ལ། ༀ་བཛྲ་ཀྲོ་དྷ་ཧཱུཾ། བཅུས། ཤིན་ཏུ་གསོད་པ་ཆེན་པོའི་འཁོར་ཁྲོ་བོ་བཅུ་རང་རང་གི་ཟ་བྱེད་མཆེ་བ་ཅན་གྱི་གདོང་ཅན་སོ་སོའི་ཡུམ་དང་། སྤྲུལ་པ་ཁྲ་ཐབས་ཉི་ཤུ་དང་བཅས་པའི་སྟེང་འོག་གི་ཁྲོ་བོ་ཤར་ནུབ་དང་། མཚམས་ཀྱི་ཁྲོ་བོ་རྣམས་རང་གནས། ཕྱོགས་ཀྱི་ཁྲོ་བོ་བཞི་པོ་ཤར་སྟོད་ལ་སོགས་པའི་ཕྱོགས་ཀྱི་སྒོ་དང་པོ་རྣམས་སུ་བཞུགས་པའོ། །ཧཱུྃ། རུས་མགོ་ཚིགས་མགོའི༴ ཁྲོ་བཅུ་ཡབ་ཡུམ་ཟ་གསོད་བསྒོམས་པའི་མཐུས། ཁ མས་གསུམ་གདུག་པ་མ་ལུས་སོགས་སོ། །ཁྱམས་དེ་ཉིད་ལ་མ་མོ་བརྒྱད་དང་གིང་བཅོ་བརྒྱད་ཀྱང་བཞུགས་ཏེ། མ་མ་དུན་བྷྱོ་བརྒྱད་ཀྱིས། ཨེ་ཀ་ཛཱ་ཊི་དང་། རྡོ་རྗེ་གར་དབང་དང་། རྡོ་རྗེ་གསལ་མ་དང་། རྡོ་རྗེ་ཀུན་བཟང་མ་དང་། རྡོ་རྗེ་ཡེ་ཤེས་མཆོག་དང་། རྡོ་རྗེ་དཔུང་སྒྲོལ་མ་དང་། རྡོ་རྗེ་སྒྲོལ་མ་དང་། རྡོ་རྗེ་སྲོག་གཅོད་མ་དང་བརྒྱད་ཕྱོགས་རེར་གཉིས་གཉིས་སོ། །ཧཱུཾ། ཤ་ཁྲག་རྩ་ཡི་དངོས་པོ༴ མ་མོ་བརྒྱད་དུ་བསྒོམས་པའི༴ ཚེ་སྲོག་སོགས་སོ། །ཀིཾ་ཀ་ར་ཧ་ཧ་རུ་ལུ་རུ་ལུ་ཧཱུཾ་བྷྱོ་ཧཱུཾ། བཅོ་བརྒྱད་ཀྱིས། རྡོ་རྗེ་ཆགས་ཆེན་དང་། རྡོ་རྗེ་གནོད་སྦྱིན་དང་། རྡོ་རྗེ་སྲིན་པོ་དང་། རྡོ་རྗེ་རོ་ལངས་དང་། རྡོ་རྗེ་དཀྱིལ་འཁོར་འཛིན་དང་། རྡོ་རྗེ་ཕྱོགས་འདུལ་དང་། རྡོ་རྗེ་དུས་མཚམས་དང་། རྡོ་རྗེ་ལངྐ་དང་། རྡོ་རྗེ་འཆི་བདག་དང་། དེ་དག་གི་སྦྱོར་བའི་ཡུམ་ཁམས་གསུམ་དབུགས་འགེངས་ཆེན་མོ་དང་། ལྕགས་ཀྱུ་འདྲེན་བྱེད་དང་། སྟོང་གསུམ་དབང་སྡུད་དང་། རླུང་ལྟར་འཕྱོ་བ་དང་། གློག་འགྱུ་མ་དང་། རྣ་ཉན་ཕྲ་མ་མཁན་དང་། རྦོད་གཏོང་ལེན་པར་བྱེད་མ་དང་། སྙིང་རྗེས་སྒྲོལ་བ་ཆེན་མོ་དང་། ཕྱག་ཚང་མཉེས་བྱེད་ཆེན་པོ་དང་བཅོ་བརྒྱད་པོ་ཤར་ནུབ་ཏུ་ལྔ་ལྔ་དང་ལྷོ་བྱང་དུ་བཞི་བཞིའོ། །ཧཱུཾ། གུར་རྩིབས་བཅོ་བརྒྱད་སོགས་སོ། །ཤར་སྨད་ལ་སོགས་པའི་ཕྱོགས་བཞིའི་སྒོ་གཉིས་པ་རྣམས་སུ་ཤིན་ཏུ་གུས་པའི་འཁོར། ༀ་བཛྲ་ཨཱརྱ་ཏེ་ཛ་ཏེ་ང་ཛཿ ཤར་སྒོར་རྟ་གདོང་མ་དཀར་མོ་སོགས་སོ། ཁྱམས་གཉིས་པ་ལ། ཨེ་ཨ་ར་ལི་ཧཱུཾ། སོ་གཉིས་ཀྱིས། ཤར་དུ་མཁའ་འགྲོ་དགའ་བྱེད་མ། འདྲེན་བྱེད་མ། སྤོར་བྱེད་མ། གསོད་བྱེད་མ་དང་བཞི། ལྷོར་འབར་བྱེད་མ། གཟི་བརྗིད་མ། འཇོམས་བྱེད་མ། བོང་བུའི་གདོང་མ་དང་བཞི། ནུབ་ཏུ་ཆགས་བྱེད་མ། ཆགས་བྲལ་མ། འཁོར་ལོ་མ། རྒྱས་འདེབས་མ་དང་བཞི། བྱང་དུ་སྣ་ཚོགས་ལུས། བསྲུང་བ་མོ། གནོད་སྦྱིན་མོ། ཡང་དག་འཕྲོག་མ་དང་བཞི། ཤར་ལྷོར་བྱ་རྒོད་གདོང་མ། བཞད་གདོང་མ། འུག་གདོང་མ། སྣ་ཚོགས་མཆོག་གི་གཟུགས་ཅན་མ་དང་བཞི། ལྷོ་ནུབ་ཏུ་བོང་བུའི་གདོང་མ། ར་གདོང་མ། བྱི་ལའི་གདོང་མ། རུས་འཕྲེང་མ་དང་བཞི། ནུབ་བྱང་དུ་ལྟོ་འཕྱང་མ། བུམ་འཛིན་མ། འཐབ་རྩོན་མ། ལྕེ་སྦྱང་འཁོར་ཅན་མ་དང་བཞི། བྱང་ཤར་དུ་བུམ་སྣ་མ། རྣམ་འཇོམས་མ། འབོད་སྒྲོག་མ། དྷ་ཤྭ་གྲཱི་བ་དང་བཞི་སྟེ། ཕྱོགས་མཚམས་ཀྱི་བཞི་བཞི་རིགས་བསྡུས་པས་མཁའ་གྲོ་བརྒྱད་དང་། དེ་དག་རྫུ་འཕྲུལ་གྱིས་འགྲོ་བའི་སྤྲུལ་པ་མཛེས་སྡུག་འོད་འབར་སོགས་ཤུགས་འགྲོ་བརྒྱད་དང་བཅས་པའོ། །ཧཱུཾ། སོ་དང་རུས་པའི༴ མཁའ་འགྲོ་ཤུགས་འགྲོ་བསྒོམས་པའི་སོགས་སོ། །ཕྱོགས་ཀྱི་སྒོ་དང་པོ་བཞིར། ༀ་ཤྲཱི་བཛྲ་མུདྒ་ར་མུ་ཁ་ཤྭ་ར་ཡཱ་ཡ་ན་མཿ ཤར་སྒོར་དཀར་མོ་མིག་གཅིག་རྒྱས་འདེབས་མ་སོགས་སོ། །སྒོ་གཉིས་པ་བཞིར། བཛྲ་དུནྟིང་བྷྱོ། བཞིས། ཤར་སྒོར་གླིང་བཞི་མགྱོགས་མ་སོགས་དང་། ཧཱུཾ། ཤ་ཁྲག་རྩ་ཡི་དངོས་པོ༴ སྲིང་མོ་བཞི་རུ་སོགས་སོ། །ཁྱམས་གསུམ་པ་ལ། ཧེ། བཅུ་དྲུག་གིས། ཁྱབ་བྱེད་ཆེན་མོ་ཁྱུང་གི་མགོ་དང་། གསོད་བྱེད་ཆེན་མོ་སྲེ་མོང་མགོ་དང་། མགྱོགས་མ་སྙེགས་བྱེད་ཁྲའི་མགོ་དང་། འབྱིན་བྱེད་པུ་ཤུད་མགོ་དང་། མྱོས་བྱེད་སྨིག་བུའི་མགོ་དང་། རྐུན་མོ་བྱི་ལའི་མགོ་དང་། གདུག་བྱེད་སྦྲུལ་གྱི་མགོ་དང་། སྒྲིན་བྱེད་ཕ་ཝང་གི་མགོ་ཅན་བརྒྱད་པོ་ཕྱོགས་དང་མཚམས་ལ་བཞུགས་ཤིང་། ཕྱོགས་ཀྱི་སྒོ་གཉིས་གཉིས་ཏེ་བརྒྱད་ལ། སྟག་དང་བྱ་རྒོད། ཤ་བ་དང་འུག་པ། བྱི་ལ་དང་པུ་ཤུད། སེང་གེ་དང་ཕ་ཝང་གི་གདོང་ཅན་བརྒྱད་དོ། །ཧཱུཾ། སྣ་ཚོགས་རྟོག་པའི་སྣང་བ་ཅིར༴ རྡོ་རྗེ་ཕྲ་མེན་བསྒོམས༴ སྲིད་གསུམ་གདུག་པའི་ཚོགས་རྣམས་ཀུན་བསྒྲལ་ནས། །མངོན་སྤྱོད་དྲག་པོའི་འཕྲིན་ལས་ལྷུན་གྲུབ་ཤོག །ན་མོ་ཧཱུཾ། ཁྱམས་དེ་ཉིད་ཀྱི་ཕྲ་མེན་བརྒྱད་པོ་རེ་རེའི་གཡོན་ཕྱོགས་སུ། ༀ་བཛྲ་ཨ་པྲ་ཏི་ཧ་ཨཱརྻ་ནི་ཙ་ཏུ་རྟ་ར་ཕཊ་རཀྨོ་ཧཱུཾ་བརྒྱད་ཀྱིས། ཤར་དུ་འབར་མ་ཉི་ཟེར་ཅན་སོགས་སོ། །ཁྱམས་བཞི་པ་ལ། ཧཱུཾ། བཅུ་དྲུག་གིས། རྡོ་རྗེ་གནོད་སྦྱིན་མ་ཛ་གད་ཀྱིས་བཀང་བའི་བྱི་རུ་ལ་སོགས་པའི་ཕོར་པ་ཐོགས་པ་བརྒྱད་ཕྱོགས་མཚམས་དང་། སྒོར་སྲིན་མོ་རཀྟས་བཀང་པའི་གཞོང་པ་ཐོགས་པ་བརྒྱད་དོ། །ཧཱུཾ། འཇིག་རྟེ་བསྐྱེད་སྡུད་དངོས་པོ༴ གནོད་སྦྱིན་སྲིན་མོ་བསྒོམས་པའི༴ སྨན་གྱིས་གསོ་ཞིང་ཆགས་པས་བསྡུས་བྱས་ནས། །ཐབས་ཤེས་བདེ་བས་ཀུན་ཏུ་ཁྱབ་པར་ཤོག །ན་མོ་ཧཱུཾ། ཁྱམས་ལྔ་པ་ལ། མ་ནུ་རཀྵ་སཱི་བྷྱོ་ནས། ཨིནྡྲ་ཎཱི་བྷྱོ། ཤར་སྟོད་ནས་རིམ་བཞིན་སོགས་དང་། ཕྱོགས་ཀྱི་མ་དྲུག་གི་ཕྱི་རོལ་ཏུ། བྷ་ན་བྷ་ན་ཨཾ་ཀུ་ཤ་ཛཿ ཧ་ལ་ཧ་ལ་པ་ཤ་ཧཱུཾ། གརྫ་གརྫ་སྥོ་ཊ་བཾ། པ་ཙ་པ་ཙ་གཎྜེ་ཧོཿ ཀྲོ་དྷ་ཀྲོ་དྷཱི་ཧཱུཾ། མ་མེ་ཤྭ་ར་ཧཱུཾ། ཞེས་བརྗོད་པས། ཤར་སྨད་དུ་མི་མོ་གསེར་གྱི་མདུན་ཞུ་ཅན་དང་། ཤར་ལྷོར་དུང་གི་སྤྱང་མོ་མགོ་དགུ་མ། ལྷོར་མི་མོ་སྟག་གི་ཚུལ་ཅན། ལྷོ་ནུབ་ན་ལྕགས་ཀྱི་སྤྱང་མོ་མགོ་དགུ་མ། ནུབ་སྟོད་དུ་མི་མོ་དུང་གི་ཚུལ་མཆུ་ཅན། ནུབ་བྱང་ན་ཟངས་ཀྱི་སྤྱང་མོ་མགོ་དགུ་པ། བྱང་ན་མི་མོ་ལྕགས་ཀྱི་མཆུ་ཅན་མ། བྱང་ཤར་ན་གཡུ་སྤྱང་མགོ་དགུ་མ། ཤར་སྟོད་ན་སྟེང་གི་ཕོ་ཉ་ལྕགས་ཀྱི་བྱ་ཁྲ་ཆེན་མོ། ནུབ་སྨད་དུ་འོག་གི་ཕོ་ཉ་ལྕགས་ཀྱི་བྱི་བ་ཆེན་མོ་སྟེ། ཕོ་ཉའི་གཙོ་མོ་བཅུ་འཁོར་དང་བཅས་པས་སུམ་བརྒྱ་དྲུག་ཅུ་རྣམས་བཞུགས་པར་གྱུར། ཧཱུཾ། ལུས་བཅུད་རྩ་མདུད་དངོས་པོ༴ ཕོ་ཉ་སུམ་བརྒྱ་དྲུག་ཅུ༴ དམ་ཚིག་ཉམས་དང་དགྲ་བགེགས་ཀུན་བསྒྲལ་ནས། གནོད་པའི་བར་ཆད་མིང་ཡང་མེད་པར་ཤོག །ན་མོ་ཧཱུཾ། བཞི་པ་རིག་འཛིན་རྩལ་འཆང་གི་དཀྱིལ་འཁོར་བསྐྱེད་པ་ནི། ༀ་མ་ཧཱ་གུ་རུ་ཤཱ་རི་རཾ་གཱི་ལི་ཧཱུཾ། རྒྱུའི་རྟ་བབས་ཀྱི་ཕྱི་རོལ་ཁོར་ཡུག་ཟླུམ་པོ་ལ་སོགས་སོ། །ལྔ་པ་ཞར་བྱུང་མགྲོན་ཐབས་ཀྱི་ལྷ་བསྐྱེད་པ་ནི། རྟ་བབས་ཀྱི་སྒོར་རྡོ་རྗེ་ཁམ་རྒྱ་མ་དྲུག་དང་། གཞན་ཡང་སྤྲུལ་པ་དང་། ཡང་སྤྲུལ་སོགས་ནས། ལས་ཀྱི་རིམ་པའི་ཏིང་ངེ་འཛིན་ལས་ཕྱག་རྒྱའི་མཆོད་པའི་འགོའི་ལག་པ་བྱིན་རླབས་ཀྱི་ལཱཾ་མཱུཾ་མཱཾ་པཱཾ་ཏཱཾ་རྣམས་ཀྱིས་མཚན་པར་གྱུར་ཞེས་པའི་བར་དཀྱུས་ལྟར་བྱས་རྗེས། རྣལ་འབྱོར་མཆོག་གི་ལག་གཉིས་ལ། །ཉི་ཟླ་འབར་བའི་ལིདྒ་ནི། །ཨ་དང་མ་གཉིས་གསལ་བཞག་སྟེ། །ཐབས་དང་ཤེས་རབ་གཉིས་མེད་སྦྱར། །འདི་ནི་ཕྱག་རྒྱ་འབྱུང་བའི་རྒྱུ། །དེ་ནས། ༀ་དང་མཱུཾ་གཉིས་རྩེ་སྤྲད་ལ། །ཞེས་སོགས་ཞི་བ་ཡབ་ཡུམ་གྱི་སྤྱི་རྒྱ་ཡན་དང་། ཁྲོ་བོའི་ཕྱག་རྒྱ་ནི། མཉམ་པའི་ཚུལ་དུ་གནས་པ་ལ། མ་ཡི་སྟེང་དུ་ཨ་ཉིད་བཞག །བྱ་བ་ཐམས་ཅད་བྲལ་བའི་རྒྱ། །འདི་ནི་ཁྲག་འཐུང་རིགས་ལྔའི་འོ། །ཨ་དང་མ་ཡི་འབྲུ་བཅུ་རྣམས། །འཕྲོ་འདུ་བྱ་ཞིང་ཀུན་ཏུ་བསྒྱུར། གཡས་སུ་འཁྱིལ་ཞིང་གཡོན་དུ་འཁྱུག །འདི་ནི་ཆོ་འཕྲུལ་འབྱུང་བའི་རྒྱ། །ཨ་དང་མ་ཡི་འབྲུ་བཅུ་རྣམས། སོ་སོར་བཅངས་ཏེ་མྱུ་གུར་བྱ། །ཤིན་ཏུ་གཏོད་དེ་ཀུན་ཏུ་བསྒྱུར། །འདི་ནི་སྙིང་པོ་འབྱུང་བའི་རྒྱ། །མ་ཡི་སྦྱིན་པ་གཏོང་ཚུལ་ལ། །ཨ་ཡིས་ཐམས་ཅད་སྐྱོབ་བྱེད་པ། །འདི་ནི་ཚད་མེད་ཆེན་པོ་ཡི། །ཀུན་ལ་སྙོམས་པའི་ཕྱག་རྒྱ་ཡིན། །མ་ཉིད་ཁྲག་རྣམས་འཕྲོག་པའི་སྣོད། །ཨ་ཉིད་སོ་འཕྲེང་མཆེ་བར་སྦྱར། །འདི་ནི་ཐམས་ཅད་རོལ་པ་ཡི། །འཇིགས་ཚུལ་སྟོན་པའི་ཕྱག་རྒྱ་ཡིན། །ཨ་དང་མ་གཉིས་རྟིང་སྦྱར་ཏེ། །སོ་འཕྲེང་མཆེ་བའི་ཚུལ་གྱིས་ནི། །ཤིན་ཏུ་ཁ་གླལ་པ་ཡི་ཚུལ། །འདི་ནི་འཇིགས་བྱེད་ཆེན་པོའི་རྒྱ། །མ་ཡིས་བཟུང་སྟེ་འཐེན་ནས་ནི། །ཨ་ཡིས་གདེངས་ཤིང་འཇོམས་བྱེད་པ། །འཇོམས་བྱེད་ཆེན་པོའི་ཕྱག་རྒྱ་ཡིན། །མ་དང་ཨ་ཡིས་མགོ་མཇུག་ནས། །བཟུང་བའི་ཚུལ་དུ་བྱས་ནས་ནི། །ཁ་ཡིས་འདྲེན་ཅིང་འཐེན་བྱེད་པ། །ཟ་བྱེད་ཆེན་པོའི་ཕྱག་རྒྱ་ཡིན། །ཨ་དང་མ་ཡི་ཤེས་རབ་ལས། །གཡས་གཡོན་ཚུལ་གྱིས་བསྒྱུར་བྱས་ཏེ། །སོ་སོ་ཇི་ལྟར་ཡིན་ཐབས་སྦྱར། །ཁྲག་འཐུང་རྣམས་ཀྱི་ཡུམ་གྱི་རྒྱ། །ཞེས་པ་ཙམ་མམ། འཁོར་གཞན་རྣམས་ཀྱི་རྒྱ་བྱེད་པར་སྤྲོ་ན། ཀ་སིང་ཞལ་འཕངས་པ་ལྟར་བླངས་རྗེས། ཁྲོ་བཅུའི་སྤྱི་རྒྱ། དཔའ་བོ་གདན་ལས་བཞེངས་ནས་ནི། །ཕྱོགས་མཚམས་ཀུན་ཏུ་བལྟས་བྱས་ནས། །ཤིན་ཏུ་འགྱིང་ཤིང་བརྗིད་པར་བྱ། །ཨ་དང་མ་ཡི་འབྲུ་རྣམས་ནི། །སོ་སོར་བསྡམས་ནས་དཀུར་བརྟེན་བྱ། །འདི་ནི་ཁྲོ་བོ་སྤྱི་ཡི་རྒྱ། །དེ་ནས་རྟ་གདོང་སོགས་སྒོ་མ་དང་། དབང་མོའི་རྒྱ་ཞལ་འཕངས་ལྟར་བླང་ཞིང་། འབར་མ་རྣམས་ཀྱི་ཕྱག་རྒྱ་ནི། །ཞེས་སོགས་དང་། སྡེ་ཚན་སོ་སོའི་མཐར་ཡང་། འབར་བའི་གདན་ལ་བཞེངས་ནས་ཀྱང་། །སོགས་ནས། བཟླས་པའི་དུས་སོ་སོའི་སྔགས་བསྒྱུར་བ་ཙམ་ལས་གཞན་གོ་བགོ་ལུས་བསྲུང་གི་བར་སྒྲུབ་ཐབས་ཀྱི་དཀྱུས་ལྟར་བྱ་བ་ཡིན་ནོ། །དེ་བཞིན་དུ་དཀྱིལ་ཆོག་ཀྱང། སྒྲུབ་དབང་ཁོ་ནའི་ཚེ་ས་ཆོག་མི་དགོས་ནའང་རྩ་དཀྱིལ་ལོགས་སྒྲུབ་ལྟ་བུའི་ཚེ་སྤྱིར་དྲི་མེད་འོད་འཕྲེང་ལྟར་ལས། ཁྱད་པར་ས་སྦྱང་བཟུང་དང་། ལྷ་བུམ་སྟ་གོན་གྱི་བསྐྱེད་བྱ་རྟེན་དང་བརྟེན་པའི་དཀྱིལ་འཁོར་གྱི་ཁྱད་པར་བསྒྱུར་བ་ཙམ་ལས་གཞན་མེད་དོ། །མདོ་ཡོངས་རྫོགས་ཀྱི་དབང་དུ་བྱས་པའི་ཡན་ལག་གི་དཀྱིལ་འཁོར་བརྒྱད་པ་ཨ་ནུའི་སྒྲུ་ཐབས་ཀྱི་ལེ་ཚན་ནོ། །གཉིས་པ་དེས་དེ་དང་དེ་ལ་དཀྱིལ་འཁོར་སོ་སོ་བ་མེད་དམ་སྙམ་པའི་ལོག་རྟོག་བསལ་བ་ནི། ནང་དབང་དང་སྒྲུབ་དབང་གི་དཀྱིལ་འཁོར་འདི་གཉིས་ནི། དོན་ལ་ཡན་ལག་ཅན་རྩ་བའི་དཀྱིལ་འཁོར་ཡིན་ཏེ། དང་པོ་མ་ཧཱ་དང་ཐུན་མོང་པའི་རྩ་དཀྱིལ་ལམ། ཚོགས་ཆེན་འདུས་པའི་དཀྱིལ་འཁོར་དང་། གཉིས་པ་ཐུན་མིན་གྱི་མདོ་རྩ་བའི་དཀྱིལ་འཁོར་དང་། ཚོགས་ཆེན་འདུས་པའང་དུར་ཁྲོད་གསང་བ་མཆོག་གི་དཀྱིལ་འཁོར་ཞེས་ཀྱང་བྱ་སྟེ། མཚན་གསུམ་ལྡན་ནོ། །དེས་ན་དེ་གཉིས་ཀ་རྩ་བའི་དཀྱིལ་འཁོར་ཡིན་པས། རྒྱུད་ལུགས་ཀྱི་ཆུ་བོ་བཞི་དེ་དང་དེ་གང་རུང་དུ་བསྐུར་རུང་སྟེ། དེའི་འཐད་པ་གཞན་དུ་འཆད་དོ། །འདིར་ཡན་ལག་གི་དཀྱིལ་འཁོར་སོ་སོར་ཕྱེ་བ་མན་ངག་གི་ལུགས་སམ་མདོ་ཡོངས་རྫོགས་ཀྱི་ཆུ་བོ་བཞི་དང་། རྩ་བའི་དཀྱིལ་འཁོར་དུ་བསྐུར་བྱ་རྒྱུད་ལུགས་ཀྱི་ཆུ་བོ་བཞི་སྟེ། ལུགས་གཉིས་གཅིག་ཏུ་དྲིལ་ནས་བསྐུར་བའི་ཕྱག་བཞེས་འདི་ལ་སྒྲུབ་དབང་ལ་དཀྱིལ་འཁོར་ཟུར་དུ་མ་མཛད་པས། དེ་དང་དེ་ལ་དཀྱིལ་འཁོར་སོ་སོར་མེད་དམ་སྙམ་པའི་ལོག་རྟོག་སྐྱེ་སྲིད་པས་དེ་བསལ་བའི་ཕྱིར། དེང་སང་ཕྱག་བཞེས་སུ་མི་མཛད་ཀྱང་། དཀྱིལ་འཁོར་གཉིས་པོའི་ཁ་བསྒྱུར་ལུགས་གོ་བདེ་བར་སྦྱར་བ་ཡིན་ལ། དེ་ཡང་དཀྱིལ་འཁོར་དེ་དང་དེར་འབྱེད་པའི་ཁུངས་ནི། སློབ་དཔོན་བདེ་བ་གསལ་མཛད་ཀྱིས་མཛད་པའི་ལས་ཐོའི་ནང་དབང་གི་སྐབས་སུ། ཚོགས་ཆེན་འདུས་པའི་དཀྱིལ་འཁོར་བཞེངས། །ཞེས་དང་། སྒྲུབ་དབང་གི་སྐབས་སུ། དུར་ཁྲོད་གསང་བའི་ལུགས་སུ་བཞེངས། ཞེས་སོ་སོར་གསུངས་པའི་ཕྱིར་དང་། དུར་ཁྲོད་གསང་བའི་དཀྱིལ་འཁོར་ནི། འདིར་བཀོད་ཕྱི་མ་ཉིད་ཡིན་པས། རྩ་རྒྱུད་ཀྱི་དཀྱིལ་འཁོར་འདི་ཉིད་སྟོན་པ་ཚོགས་ཆེན་འདུས་པའི་སྒྲུབ་ལུགས་ཀྱི་ལེའུར། དུར་ཁྲོད་གསང་བ་མཆོག་གི་དཀྱིལ་འཁོར་ཞེས་བྱ་བ་འདི་རྒྱ་ཆེར་བཤད་དོ། །ཞེས་དང་། སྒྲུབ་པ་རྩ་བའི་དཀྱིལ་འཁོར་དུ། །དུར་ཁྲོད་གསང་བ་མཆོག་གི་མདོ། །ཞེས་སོགས་གསུངས་སོ། །དེ་ལྟར་ན། རྒྱུད་དང་མན་ངག་གི་ལུགས་ཀྱི་དབང་གཉིས་གཅིག་ཏུ་དྲིལ་ནས་བསྐུར་བའི་ལུགས་འདིར་སྒྲུབ་དབང་གི་དཀྱིལ་འཁོར་དོར་ཞིང་། རྒྱུད་ལུགས་ཀྱི་ཕྱི་དབང་རྩ་དཀྱིལ་དུ་སླར་ཡང་ཟློས་ཏེ་བསྐུར་བས། ཆད་པ་དང་ལྷག་པའི་སྐྱོན་གཉིས་ཀ་གནས་སོ་ཞེ་ན། དེའི་སྐྱོན་སྤོང་དང་། དེ་ལྟར་མཛད་པའི་དགོས་པ་ནི་གཞན་དུ་རྒྱས་པར་བཤད་ཅིང་། འཆད་པར་ཡང་འགྱུར་ཏེ། འདིར་ཡི་གེས་འཇིགས་སོ། །གསུམ་པ་ད་ལྟའི་ཕྱག་བཞེས་ལྟར་གང་དུ་བསྐུར་བའི་སྒྲུབ་དཀྱིལ་རྗེ་བླ་མས་མཛད་པ་ལ་ཁ་འཕང་བ་ནི། མདོ་དབང་ལ་ཡན་ལག་གི་དཀྱིལ་འཁོར་དང་། ཡན་ལག་ཅན་རྩ་བའི་དཀྱིལ་འཁོར་གཉིས་སུ་ཕྱེ་ནས། རྩ་བའི་དཀྱིལ་འཁོར་གྱི་སྐབས་སུ་ཚོགས་ཆེན་འདུས་པ་ཐུན་མོང་གི་དཀྱིལ་འཁོར་བཞེངས་ཏེ། དེར་རྒྱུད་ལུགས་ཀྱི་ཕྱི་དབང་དང་། རྒྱུད་དང་མན་ངག་ཐུན་མོང་གི་ནང་དབང་། རྒྱུད་ལུགས་གཙོ་བོར་བྱས་པའི་སྒྲུབ་དབང་གི་མཇུག་ཏུ་གསང་དབང་རྫོགས་པའི་ཆུ་བོ་གཉིས་མདོར་བསྡུས་པ་རེ་སྦྲེལ་ཏེ། ཆུ་བོ་བཞི་རྫོགས་མཛད་པའི་སྒྲུབ་མཆོད་ཆོ་ག་གཞུང་ནི། རྗེ་བླ་མ་དམ་པའི་གསུང་རབ་ལེགས་བཤད་རྨད་དུ་བྱུང་བའི་སྒྲུབ་ཐབས་དངོས་གྲུབ་ཆར་འབེབས་དང་། དཀྱིལ་ཆོག་དྲི་མེད་འོད་འཕྲེང་ལྟར་ཤེས་པར་བྱ་ཞིང་། དེ་ལྟར་ནའང་སྒྲུབ་ཐབས་ཀྱི་རྒྱས་འབྲིང་བསྡུས་པའི་འདོར་ལེན་དང་། དཀྱིལ་ཆོག་ཏུ་ཞལ་འཕངས་གནང་བའི་སློབ་མ་སྟ་གོན་ལ་སོགས་པ་དང་། དེར་མ་ཟད་སྒྲུབ་ཆེན་དང་སྦྲེལ་བའི་བསྙེན་སྒྲུབ་ཡན་ལག་བཞིའི་ཆིངས་ཀྱི་སྒྲུབ་ཁོག །ཕྱི་ནང་གི་རབ་གནས་སྦྱིན་སྲེག་ལ་སོགས་པ་རྣམས་རིགས་མཐུན་གྱི་སྡེ་ཚན་སྡེབས་པའི་ཟུར་འདེབས་རེ་ལོགས་སུ་འདྲི་བར་འདོད་པས། དེ་དང་དེར་ཤེས་པར་བྱའོ། །རྒྱུད་ལུང་དཀྱིལ་འཁོར་གྱི་ཁྱད་པར་ཕྱེ་བས་ལོག་རྟོག་བསལ་ནས་ཕྱག་བཞེས་ཀྱི་གནད་ངོ་སྤྲད་པའི་ལེ་ཚན་ནོ། །ཡོངས་གྲགས་ངག་བགྲོས་ཁོ་ནའི་རྗེས། །མ་བཟླས་ཤེས་བརྩོན་དབང་པོ་ཡིས། །ཆོས་འདིའི་རྒྱུད་འགྲེལ་མན་ངག་ལ། །ཞིབ་དཔྱད་ལེགས་བཤད་དཔལ་དུ་བསྐྲུན། །འདུས་པ་མདོའི་ཡན་ལག་གི་དཀྱིལ་འཁོར་རྣམས་ཀྱི་སྒྲུབ་དཀྱིལ་དངོས་གྲུབ་འདོད་འཇོ་ལས། ནང་དབང་འབྱུང་བའི་ཆུ་བོ་དང་། སྒྲུབ་དབང་གྲགས་པའི་ཆུ་བོ་གཉིས་ཀྱི་དཀྱིལ་འཁོར་བཤད་པའི་སྐབས་ཏེ་གསུམ་པའོ།། །།

༈ ༀ་སྭ་སྟི། འགྱུར་བདེའི་བག་ཆགས་ཆེས་ཕྲ་བའང་། །མཆོག་བདེའི་གཉིས་མེད་ཡེ་ཤེས་ཀྱི། །རྡོ་རྗེས་གཏན་བཅོམ་སྐུ་བཞིའི་བདག །དཔལ་ལྡན་བླ་མ་ལ་བཏུད་ནས། །བདེ་ཆེན་ཡེ་ཤེས་ཆུ་བོའི་རྒྱུན། །དངོས་གྲུབ་རྦ་རླབས་གཡོ་བ་ཅན། །ལེགས་བཤད་ཆོག་གཞུང་འབབ་སྟེགས་ལས། །སྐལ་ལྡན་ཞིང་སར་ལྷུང་ལྷུང་འབེབས། །འདིར་མདོ་ཡོངས་རྫོགས་ཀྱི་དབང་དུ་བྱས་པའི་གསང་དབང་རྫོགས་པའི་ཆུ་བོའི་དཀྱིལ་འཁོར་ལ། ཀུན་རྫོབ་བྱང་སེམས་དང་། དོན་དམ་བྱང་སེམས་ཀྱི་དཀྱིལ་འཁོར་གཉིས་ལས། དང་པོ་ཀུན་རྫོབ་བྱང་སེམས་ཀྱི་དབང་ལུས་ལ་བསྐུར་བའི་དཀྱིལ་འཁོར་ནི། བླ་མའི་ལུས་དཀྱིལ་དུ་བསྐུར་བ་ཡིན་པས། ཕྱི་མཚན་མའི་དཀྱིལ་འཁོར་བཤམ་པ་ལ་ལྟོས་མི་དགོས་ཤིང་། སློབ་དཔོན་དངོས་དབང་བསྐུར་བའི་ནུས་པ་མེད་པ་དང་། སློབ་མ་བླ་མ་ཡབ་ཡུམ་གྱི་གསང་རྫས་མཁའ་གསང་ལས་དངོས་སུ་ལེན་མི་ནུས་པར་མ་ཟད། བདུད་རྩིའི་འཕྲད་དང་སྦྱར་ནས་ཀྱང་འཐུང་མི་ནུས་པའི་རྟོག་པ་ཅན་ཡིན་ནའང་། གསང་རྫས་བདུད་རྩི་རིལ་བུ་ཙམ་ལ་བརྟེ་ནས། དངོས་སུ་སྒྲུབ་ཏུ་མི་རུང་བའམ་མི་ནུས་པ་ཐམས་ཅད་ཏིང་ངེ་འཛིན་གྱིས་བསྒྲུབ་པར་བྱ་བ་ཡིན་མོད། དེ་ལྟ་ནའང་གང་ཟག་དེ་ལྟ་བུའི་ངོར་བདུད་རྩིའི་དཀྱིལ་འཁོར་བཤམ་པ་དང་། སྔོན་དུ་སྒྲུབ་པའི་ཆོ་ག་མཛད་པ་ཕྱག་བཞེས་སུ་སྣང་ཞིང་། དེ་ལའང་རིན་ཆེན་འཕྲེང་བ་སོགས་སུ་སྨན་སྒྲུབ་ཀྱི་རིགས་འགྲེ་སྦྱར་ཏེ་ཁྲོ་མཁར་གྱི་དཀྱིལ་འཁོར་སྒྲུབ་པ་མཛད་ནའང་། རྩ་བའི་དཀྱིལ་འཁོར་དུ་ཞལ་བྱང་ལ་བརྟེན་ནས་ཁྲོ་མཁར་གྱི་དཀྱིལ་འཁོར་གྱི་བདུད་རྩི་བསྒྲུབས་ཟིན་པས་འདིར་ལོགས་སྒྲུབ་མི་དགོས་པར་མ་ཟད། སྐབས་འདིར་བདུད་རྩིའི་དཀྱིལ་འཁོར་དེ་ལྟར་སྒྲུབ་དགོས་པའི་ཤེས་བྱེད་ཀྱང་མེད་པས་ན། འདིར་གླན་གྱི་ཟབ་དབང་གི་ལས་མེད་དང་། གླན་རྡོར་འོད་ཀྱི་ཕྱག་བཞེས་ལྟར་འགོས་ཀྱི་ལས་ཐོ་དང་། བཀོལ་བྱང་སོགས་ཡིག་རྙིང་གི་དགོངས་པ་ལྟར་སྒྲུབ་པར་བྱེད་པ་ལ། ཐོག་མར་དཀྱིལ་འཁོར་ནི། བདུད་རྩི་བྱང་སེམས་ཀྱི་ལྡེ་གུ་སོགས་རྫས་སུམ་ཅུས་ཆག་ཆག་བཏབ་པའི་གཞིར་འཁོར་ལོ་རྩིབས་བཞི་པའི་ལྟེ་བ་མཐིང་ག །མཐའ་རྡོ་ར་འོད་འཕྲེང་གིས་བསྐོར་བ་བྲི། འདིར་སྒོ་རྫོགས་འདྲི་བའི་ཕྱག་ལེན་ཀྱང་བྱུང་མོད། བདུད་རྩིའི་སྟན་ཙམ་ཡིན་པས་འདིས་ཆོག་གོ །དཀྱིལ་འཁོར་གྱི་དབུས་སུ་མཉྫིའི་ཁར་བྷཉྫ་དུམ་བུ་གཅིག་པའི་ནང་དུ་ཛ་གད་ལ་བླ་མ་ཡབ་ཡུམ་གྱི་གསང་རྫས་བྱང་སེམས་ཀྱི་ཕབས་སྦྱར་བའི་བདུད་རྩི་རིལ་བུ་བཏབ་པ་བུར་སྦྲང་སོགས་ཀྱི་འཕྲད་དང་སྦྱར་བས་བཀང་། ཁ་དར་དམར་གྱིས་བཅད་པའི་སྟེང་དུ་མཁར་བའི་མེ་ལོང་ལ་སྔར་གྱི་རྫས་སུམ་ཅུས་བྱུག་པའི་ཁར་སིནྡྷུར་སྙོམས་པར་བཀྲམ་པ་ལ། ཡུམ་གྱི་མཁའ་མཚོན་པའི་ཆོས་འབྱུང་གི་དབུས་སུ་འཁོར་ལོ་རྩིབས་བརྒྱད་ལྟེ་བ་དང་བཅས་པར་ཟླ་གམ་དགུ་བྲིས་པ་ལ་སྐྱེས་པའི་ས་བོན་ནམ་མ་འབྱོར་ན་ཅུ་གང་གིས་ལྷ་དགུའི་མཚན་མ་དགོད། མཐའ་བསྐོར་དུ་ཅི་འབྱོར་པའི་མཆོད་གཏོར་དང་། ཚོགས་ཀྱི་ཡོ་བྱད་རྣམས་བཤམ་མོ། །དེ་ནས་ཆོ་ག་ལ། ཐོག་མར་བསྲུང་འཁོར་ནི། འདི་ལྟར་ཆོས་ཐམས་ཅད་སྟོང་ཞིང་བདག་མེད་པ་ཀུན་ཏུ་བཟང་མོའི་མཁའ་ཀློང་རྣམས་པར་དག་པ་ལས། བཛྲ་མ་ཧཱ་ཤྲཱི་ཧེ་རུ་ཀ །ཞེས་བརྗོད་པས་བདག་ཉིད་ཞེ་སྡང་རྡོ་རྗེ་ཡབ་ཡུམ་རྗེས་ཆགས་ཀྱིས་སྙོམས་པར་ཞུགས་པའི་བྱང་ཆུབ་ཀྱི་སེམས་སྤྲིན་ཁྲོ་བོ་དང་མཚོན་ཆའི་ཚོགས་མཁའ་ཁྱབ་ཏུ་སྤྲོས་པས་བགེགས་ཐམས་ཅད་ཆོས་ཉིད་བདེ་བ་ཆེན་པའི་དབྱིངས་སུ་སྦྱངས། ཚུར་འདུས་པ་ལས་འོད་གསལ་བདེ་བ་ཆེན་པོའི་རང་མདངས་རྡོ་རྗེ་སྲུང་བའི་འཁོར་ལོས་མི་ཕྱེད་པར་བཅིངས་པར་བསམ་མོ། དེ་ནས་བཤགས་པ་ནི། ཞི་ཁྲོའི་ལྷ་ཚོགས་མཁའ་ཁྱབ་ཏུ་སད་པར་དམིགས་ནས། ༀ། ལུས་འདི་རྩ་ཡི་གཙོ་བོ་ཕལ་པ་རྣམས། །ཡེ་ནས་སྤྲུལ་སྐུར་གནས་པ་མ་ཤེས་ཏེ། །དབྱིབས་ཀྱི་ལྷ་སྐུ་རྩ་ལ་བསྒོམ་མ་ཤེས། སྤྲུལ་སྐུར་རང་བཞིན་ལྷུན་གྲུབ་འབྲས་བུར་བཤགས། །ལུས་གནས་ཡི་གེ་ལོངས་སྐུར་གནས་པ་ལ། །ལམ་དུ་མ་ཤེས་བདེ་བ་མ་བསྒོམས་པས། །གཏུམ་མོ་དྲོད་ཀྱི་འབྲས་བུ་མ་ཐོབ་སྟེ། །འབྲས་བུ་ལོངས་སྤྱོད་རྫོགས་པའི་ངང་དུ་བཤགས། །ཡེ་ནས་བདུད་རྩི་ཐིག་ལེ་ཆེན་པོ་ནི། །ཆོས་སྐུ་དྲི་མ་མེད་པར་གནས་པ་ལ། །མ་ཤེས་མ་རྟོགས་བདུད་རྩིར་མ་སྦྱངས་པ། །འབྲས་བུ་ཆོས་ཀྱི་སྐུ་ཡི་ངང་དུ་བཤགས། །ཡེ་ནས་ཐམས་ཅད་ངོ་བོ་ཉིད་ཀྱི་སྐུ། །མ་སྦྱངས་གནས་ལུགས་དོན་དུ་མ་རྟོགས་པས། །ལམ་བསྟན་རྡོ་རྗེ་རྦ་རླབས་ལམ་མ་བསྒོམས། །འབྲས་བུ་ངོ་བོ་ཉིད་ཀྱི་སྐུ་རུ་བཤགས། །ཞེས་ཐབས་ལམ་དབང་གི་འབྲས་བུའི་བཤགས་པའོ། །དེ་ནས་དམ་བཅའ་བ་ནི། བདེ་བ་ཆེན་པོའི་གསེང་ལམ་གྱིས་སེམས་ཅན་གྱི་དོན་སྒྲུབ་པའི་ལྷག་བསམ་བརྟན་པོས། ༀ། འགྲོ་དྲུག་རྒྱལ་བའི་སྲས་པོ་འདི། །མ་རྟོགས་ལོག་པར་འཁྱམས་པ་རྣམས། །རྒྱལ་བའི་སྲས་སུ་བསྐྱེད་ནས་ནི། །འཁོར་བའི་རྒྱུན་རྣམས་བཅད་པར་བྱ། །དེ་ནས་བྱིན་དབབ་པ་ནི། བདག་ཉིད་རྡོ་རྗེ་ཧེ་རུ་ཀ་ཡབ་ཡུམ་སྙོམས་པར་ཞུགས་པའི་དགའ་བའི་སྒྲས་ཡེ་ཤེས་ཀྱི་འཁོར་ལོ་ཐབས་ཅད་མཁའ་ཁྱབ་ཏུ་སད་ནས་བདག་གནས་ཡོ་བྱད་རྣམས་ལ་ཐིམ་པས་བདེ་བ་ཆེན་པའི་རོལ་མོར་འབར་བར་བསམ་ལ། ༀ་ཧཱུཾ། ཨ་ལ་ལ་ཧོ༔ བྷ་ག་ཝཱན་ས་མ་ཡ་ཧོཿ ས་མ་ཡ་སྟྭཾ། ཧཱུཾ་ཧཱུཾ་ཧཱུཾ་ཧཱུཾ། ཞེས་བདུད་རྩི་ལྔས་སྤགས་པའི་འདོམས་དཀྲིས་ཀྱི་རས་དང་གུ་གུལ་སོགས་ཀྱི་སྤོས་སྲེག་ཅིང་རོལ་མོའི་སྒྲ་བྱའོ། །དེ་ནས་མཆོད་པ་བྱིན་གྱིས་བརླབ་པ་ནི། རཾ་ཡཾ་ཁཾ་གིས་མཆོད་རྫས་ཀྱི་དངོས་འཛིན་ཐམས་ཅད་བསྲེགས་གཏོར་སྦྱངས། སྟོང་པའི་ངང་ལས་མཆོད་སྣོད་ཀུན་ཏུ་བཟང་མོའི་མཁའ་ཀློང་རྣམ་པར་དག་པའི་དབྱིངས་སུ། མཆོད་རྫས་རྣམས་ཡེ་ཤེས་ཀུན་ཏུ་བཟང་པོའི་རོལ་པར་མཉམ་པར་སྦྱོར་བའི་བདེ་བ་ཆེན་པོ་བྱང་ཆུབ་ཀྱི་སེམས་ཀྱི་རང་རྩལ་འདོད་ཡོན་གྱི་རྣམ་པ་ཐམས་་ཅད་པར་འཆར་བའི་སྤྲིན་ཆེན་པོར་གྱུར། ༀ་ཨཱཿཧཱུཾ་མ་ཧཱ་པཉྩ་ཨ་མྲྀ་ཏ་ཧཱུཾ། མ་ཧཱ་བ་ལིངྟ་ཧཱུཾ། མ་ཧཱ་རཀྟ་བྷྲཱུཾ་སྭཱ་ཧཱ། ན་མསྶ་མནྟ་བུདྡྷཱ་ནཱཾ་ག་ག་ན་ཁཾ་སྭཱ་ཧཱ། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། ཞེས་པས་བྱིན་གྱིས་བརླབ། དེ་དག་ནི་སྔོན་འགྲོའོ། །ཆོས་ཐམས་ཅད་སྐྱེ་བ་མེད་པའི་དབྱིངས་ཡེ་ཇི་བཞིན་པ་ཀུན་ཏུ་བཟང་མོའི་མཁའ་ཀློང་རྣམ་པར་དག་པའི་ངང་ལ་དར་ཅིག་མཉམ་པར་བཞག །དེའི་ངང་ལས་འགག་མེད་སྙིང་རྗེ་རིག་པའི་རྩལ་སྣང་ཡེ་ཤེས་ཀུན་ཏུ་བཟང་པོའི་རོལ་པ་རང་བཞིན་ལྷུན་གྲུབ་ཏུ་སྣང་བ་ལས། དབྱིངས་དང་ཡེ་ཤེ་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་ཀྱི་སེམས་ཨ་ཡིག་དཀར་པོ་དྲི་མ་མེད་པ། ༀ་བཛྲ་ས་ཏྭ་ཨ། ཞེས་བརྗོད་པས། ཨ་ཡིག་ཡོངས་སུ་གྱུར་པ་ལས། བདག་ཉིད་སྐད་ཅིག་གི་བཅོམ་ལྡན་འདས་དཔལ་རྡོ་རྗེ་སེམས་དཔའ་སྔོན་པོ་ཞི་ཞིང་འཛུམ་ལ་མཚན་དཔེའི་ལང་ཚོ་རབ་ཏུ་རྒྱས་པ། གཡས་རྡོ་རྗེ་ཐུགས་ཀར་འཛིན་ཅིང་། གཡོན་དྲིལ་བུ་དཀུར་བརྟེན་པ། རྫོགས་པའི་སྐྱིལ་མོ་ཀྲུང་གིས་བཞུགས་པ། རང་སྣང་གི་ཡུམ་རྡོ་རྗེ་དབྱིངས་ཀྱི་དབང་ཕྱུག་མ་སྔོན་མོ་གཡས་དྲིལ་བུ་དང་གཡོན་རྡོ་རྗེ་འཛིན་པ་དང་མཉམ་པར་སྦྱོར་བ། དར་གྱི་ཆས་གོས་ལྔ་དང་རིན་པོ་ཆེའི་རྒྱན་བརྒྱད་ཀྱིས་བརྒྱན་པ། ཡབ་ཀྱི་གནས་ལྔའི་རྩ་འཁོར་གྱི་དབུས་སུ་ༀ་ཨཱཾ་ཧཱུཾ་སྭཱ་ཧཱཾ་རྣམས་འཕྲོས་འདུས་ཡོངས་སུ་གྱུར་པ་ལས་སྤྱི་བོར་རྣམ་པར་སྣང་མཛད་དཀར་པོ། མགྲིན་པར་འེད་དཔག་མེད་དམར་པོ། སྙིང་གར་མི་བསྐྱོད་པ་སྔོན་པོ། ལྟེ་བར་རིན་ཆེན་འབྱུང་ལྡན་སེར་པོ། གསང་བར་དོན་ཡོད་གྲུབ་པ་ལྗང་ཁུ། དེ་རྣམས་གཡས་རང་རྟགས་ཐུགས་ཀ་དང་། གཡོན་དྲིལ་བུ་དཀུར་བརྟེན་པ། ཡན་ལག་བཞི་ལ་ཧཱུཾ་ཧཱུཾ་ཧཱུཾ་ཧཱུཾ་ཞེས་པས་སྒོ་བ་བཞི། ཡུམ་གྱི་གནས་ལྔའི་རྩ་འཁོར་གྱི་དབུས་སུ་ལཱཾ་པཱཾ་མཱུཾ་མཱཾ་ཏཱཾ་རྣམས་འཕྲོ་འདུས་ཡོངས་སུ་གྱུར་པ་ལས། སྤྱི་བོར་སྤྱན་མ་དཀར་མོ། མགྲིན་པར་གོས་དཀར་མོ་དམར་མོ། སྙིང་གར་དབྱིངས་ཕྱུག་མ་སྔོན་མོ། ལྟེ་བར་མཱ་མ་ཀཱི་སེར་མོ། གསང་བར་སྒྲོལ་མ་ལྗང་ཁུ། དེ་རྣམས་གཡས་དྲིལ་བུ་དཀུར་བརྟེན་ཅིང་གཡོན་རང་རྟགས་ཐུགས་ཀ །ཛཿཧཱུཾ་བཾ་ཧོཿཞེས་པས་ལག་གཡས་ལ་མི་ཕམ་མ། གཡོན་ལ་རོ་ལངས་མ། ཁ་ལ་ཁྲོ་གཉེར་མ། བྷ་གའི་སྒོར་རལ་གཅིག་མ་རྣམས་གསལ་བར་གྱུར། དེ་ནས་ཡབ་ཀྱི་གསང་གནས་ཧཱུཾ་ལས་རྡོ་རྗེ་དམར་པོ་རྩེ་ལྔ་པ་ལྟེ་བར་ཧཱུཾ། རྩེ་མོར་ༀ། བུ་གར་ཨ་ཡིག་ཡེ་ཤེས་ཀྱི་མེ་འབར་བ་དང་བཅས་པ། ཡུམ་གྱི་མཁའ་ཨཱཿལས་པདྨ་ཟེའུ་འབྲུར་ཧྲཱིཿདམར་པོ་འབར་བས་མཚན་པའི་ནང་དང་། ཕྱི་རོལ་སིནྡྷུ་རའི་དཀྱིལ་འཁོར་དབྱེར་མེད་ལྷུན་གྱིས་གྲུབ་པའི་གཞལ་ཡས་ཁང་དུ་གསལ་བའི་དབུས་སུ་རྩ་དགུའི་ངོ་བོ་འཁོར་ལོ་རྩིབས་བརྒྱད་ལྟེ་བ་དང་བཅས་པའི་སྟེང་དུ་ཟླ་གམ་རེ་རེས་མཚན་པ་ལ། བྱང་ཆུབ་ཀྱི་སེམས་བདེ་བའི་ཡེ་ཤེས་ཀྱི་ངོ་བོ་ཧེ་རུ་ཀ་ཡབ་ཡུམ་ག་རཱི་བརྒྱད་ཀྱིས་བསྐོར་བར་བསམ་ཞིང་། ཡུམ་གྱི་མཁའ་དབྱིངས་ཟླ་གམ་ལ། །གྲུབ་པའི་གཞལ་ཡས་ཁང་དུ་བསྐྱེད། །རྩིབས་བརྒྱད་ཟླ་གམ་དགུར་གསལ་ལ། །བྱང་ཆུབ་སེམས་ལས་ཕྱག་རྒྱའི་ཚོགས། །ལྷ་དགུ་གསལ་བའི་ཡེ་ཤེས་བསྐྱེད། །དེས་ནི་ཐམས་ཅད་རྫོགས་པར་འགྱུར། །ཞེས་གསལ་གདབ། དེ་ནས་བདུད་རྩིའི་དཀྱིལ་འཁོར་། ཧཱུཾ་བིགྷྣཱནྟ་ཀྲྀཏ་ཕཊ་ཀྱིས་བསང་། རཾ་ཡཾ་ཁཾ་གིས་སྦྱངས། སྟོང་པའི་ངང་ལས་བཛྲ་ཙཀྲ་ཞེས་བརྗོད་པས་བདུད་རྩིའི་སྣོད་བྷཉྫ་དུམ་བུ་གཅིག་པ་དཔྲལ་བ་རང་ལ་བསྟན་པ་ཡངས་ཤིང་རྒྱ་ཆེ་བའི་ནང་དུ་བཅུད་ཡེ་ཤེས་ལྔའི་ངོ་བོར་ཞུ་བས་ཡོངས་སུ་གཏམས་པའི་སྤྲིས་མ་འཁོར་ལོ་རྩིབས་བཞི་པའི་རྣམ་པར་གྱུར། ཧཱུཾ་མཱུཾ། ཨཱོཾ་ལཱཾ། སྭཱཾ་མཱཾ། ཨཱཾ་པཱཾ། ཧཱཾ་ཏཱཾ། ཞེས་བརྗོད་པས་འཁོར་ལོའ་ིལྟེ་བར་མི་བསྐྱོད་པ་ཡབ་ཡུམ། རྩིབས་བཞིའི་ཤར་དུ་རྣམ་སྣང་། ལྷོར་རིན་འབྱུང་། ནུབ་ཏུ་མཐའ་ཡས། བྱང་དུ་དོན་གྲུབ་རྣམས་ཡབ་ཡུམ་ཁ་སྦྱོར་དུ་བཞུགས་པའོ། །དེ་ནས་རང་དང་མདུན་གྱི་བདུད་རྩི་མེ་ལོང་དང་བཅས་པའི་དཀྱིལ་འཁོར་ཐམས་ཅད་ལ། ༀ་མ་ཧཱ་ཤཱུ་ནྱ་ཏཱ་སོགས་ཡེ་ཤེས་ལྔས་དབང་བསྐུར། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་སོགས་ཀྱི་རྡོ་རྗེ་གསུམ་དུ་བརླབ། རང་འདྲའི་ཡེ་ཤེས་པ་བཛྲ་ས་མཱ་ཛཿས་སྙན་གསན་དབབ། ཨེ་ཧྱེ་ཧི་ས་སྤྱན་དྲངས། །ཛཿཧཱུཾ་བཾ་ཧོཿས་བསྟིམ། ཀཱ་ཡ་ཝཱ་ཀ་ཙིཏྟ་བཛྲ་གྱིས་བརྟན་པར་བྱས། ཀུན་བཟང་། ཞབས་བསིལ། བཞི་བསྣོལ། སྨན་གཏོར་རཀྟས་མཆོད། ༀ། ཐམས་ཅད་མ་ལུས་སྐུ་གསུང་ཐུགས། །སྐུ་གསུང་ཐུགས་ཀྱི་བདག་ཉིད་ཆེ། །སྐུ་གསུང་ཐུགས་ཀྱིས་ཀུན་ཏུ་ཁྱབ། །སྐུ་གསུང་ཐུགས་ཀྱི་ཐིག་ལེ་ཆེ། །ཧོཿ ཞེས་པས་བསྟོད། དེ་ནས་རྗེས་ཆགས་ཀྱིས་བཟླས་པ་བྱ་བ་ནི། རང་གཞི་ལུས་རྡོར་སེམས་ཡབ་ཡུམ་དང་། བདུད་རྩིའི་དཀྱིལ་འཁོར་ཡབ་ཡུམ་དུ་གསལ་བས། ཕན་ཚུན་ལྟ་བས་ཆོག་མི་ཤེས་པ་ལ་མིག་ཞུ་ཞིང་བལྟ་བས་གཟུགས་ཀྱི་དགའ་བ་བསྐྱེད། དེ་ནས་སྒྲ་ཐོས་པས་མི་ངོམས་པའི་ངག་སྙན་པོས་ཡབ་ཡུམ་བསྣོལ་མར། ས་མ་ཡ་ཧོཿ ས་མ་ཡ་སྟྭཾ། རཱ་ག་ཡཱ་མི། རཱ་ཧོ་ཧཾ། ཞེས་བརྡས་བསྐུལ། སྟེང་འོག་གི་དྲི་ཞིམ་རྒྱས་པ་སྣོམ་ཞིང་ཏི་བ་སུ་ཁེ། ལྕེ་མཆུ་འཇིབ་པའི་རོ་མྱང་བས་གནྡྷེ་ཙིཏྟ། ཞེས་བརྡ་བསྲེས་ལ། དེ་ནས་ཡུམ་གྱིས། པདྨའི་ཟེའུ་འབྲུ་འབར་བ་འདི། །འཛུམ་པའི་མདངས་ཀྱིས་འབུལ་ལགས་ན། །དགྱེས་པ་རྡོ་རྗེའི་ཆོ་འཕྲུལ་ལས། །བྱང་ཆུབ་ཆར་སྤྲིན་དབབ་ཏུ་གསོལ། །ཞེས་བསྐུལ་བའི་ལན་དུ་ཡབ་ཀྱིས། །ཨེ་མ་ཡིད་ཀྱི་དགའ་བདེ་མོ། །གདུང་བའི་སྙིང་འཕྲེང་ཤེས་རབ་གཟུངས། །པདྨའི་ག་བུ་འཁྱིལ་བ་ལ། །བདེ་བའི་རྡོ་རྗེ་བྱང་ཆུབ་འབར། །ཞེས་བསྐུལ་ནས། ཛཿཧཱུཾ་བཾ་ཧོཿ ཞེས་ཕན་ཚུན་བཟུང་འཁྱུད་བསྡམས་པས་མཉེས་ཏེ། ཡབ་ཀྱིས། འདོད་པའི་དབང་མོ་ཐམས་ཅད་ནི། །ཆགས་པས་འགྱིང་བའི་གཙོ་མོ་ཡིན། །ཆགས་པ་རྣམ་པར་སྦྱང་བའི་ཕྱིར། །འདོད་པ་གནས་སུ་དྲང་བར་བྱ། །ཞེས་ཡབ་ཡུམ་དགྱེས་པར་རོལ་པའི་བདེ་བའི་སྒྲས་དེ་བཞིན་གཤེགས་པ་མ་ལུས་ཤིང་ལུས་པ་མེད་པ་ཐམས་ཅད་ཞི་བ་རིགས་ལྔ་དང་ཧེ་རུ་ཀ་རིགས་ལྔ་ཡབ་ཡུམ་གྱི་རྣམ་པར་ནམ་མཁའ་གང་བར་སྤྱན་དྲངས། དེ་ཐམས་ཅད་སྟོང་གསུམ་འགེངས་པ་ཙམ་གྱི་འདོད་ཆགས་ཆེན་པོའི་རོལ་པས་བྱང་ཆུབ་སེམས་ཀྱི་ངོ་བོར་ཞུ། རང་དང་བདུད་རྩིའི་དཀྱིལ་འཁོར་ལ་ཐིམ། རང་གི་ལུས་དཀྱིལ་གྱི་རིགས་ལྔ་ཡང་རྗེས་ཆགས་ཀྱི་མེས་ཞུ་བ་དང་ལྷན་ཅིག་ཏུ་སྐུའི་དབྱིབས་བརྒྱུད། ཡུམ་གྱི་མཁའ་ལ་བྱང་སེམས་ཀྱི་ཆར་ཆེན་པོ་ཕབ་པས་མཁའ་གསང་གི་དཀྱིལ་འཁོར་རྣམས་བདེ་བ་ཆེན་པོས་མཉེས་པར་བྱས། དེ་ལས་ཀྱང་བྱང་ཆུབ་ཀྱི་སེམས་སྤྲིན་མཁའ་ཁྱབ་ཏུ་སྤྲོས། །རྒྱལ་བ་རྣམས་མཆོད། ཉན་རང་རྣམས་འགོག་པ་ལས་བསླང་སྟེ་བདེ་བའི་ཡེ་ཤེས་ཀྱི་མྱུ་གུ་བསྐྱེད། བྱང་སེམས་རིག་པ་འཛིན་པ་རྣམས་ཀྱི་ཤེས་སྒྲིབ་ཕྲ་མོ་རྣམས་སྦྱངས་ཏེ་ཆོས་སྐུའི་ངང་དུ་བརླན་པར་བྱས། སེམས་ཅན་ཐམས་ཅད་ཀྱི་སྒྲིབ་པ་བསལ་ནས་འོད་གསལ་དུ་སྦྱངས། ཚུར་འདུས་པ་དཀྱིལ་འཁོར་གྱི་ལྷ་རྣམས་རོལ་པའི་བྱང་སེམས་དང་ལྷན་ཅིག་ཐོད་པའི་བདུད་རྩི་ལ་འདྲེན་པས་བྱིན་གྱིས་བརླབས་པར་བསམ་སྟེ། ཧཱུཾ་྄བཛྲ་ངྷྲིཀ྄་མཱུཾ་དྷཱ་ཏྭེ་ཤྭ་རཱི། སོགས་རིགས་ལྔ་ཡབ་ཡུམ་སྦྲེལ་བའི་སྔགས་ཤམ་དུ། ཤྲཱི་མ་ཧཱ་སུ་ཁ་བོ་དྷི་བཛྲ་ཧཱུཾ་ཧོཿཨཾ། ཞེས་སྙན་པའི་དབྱངས་ལ་བཅུག་སྟེ་ཅི་ནུས་བཟླ། མཐར་བདུད་རྩིའི་དཀྱིལ་འཁོར་གྱི་རིགས་ལྔའང་བདེ་བའི་ངོ་བོར་ཞུ་སྟེ། བདུད་རྩི་ལ་བསྟིམ། དེ་ནས་ཚོགས་མཆོད་བྱ། ཆ་གསུམ་གཏོར་མ་ལས་གཞུང་བསྲང་བའི་སྔོན་དུ་གཏོང་བའི་ཕྱག་ལེན་ལྟར་ཡང་རུང་ལ། འདིར་བཏང་ཡང་མི་འགལ། དེ་ནས་དབང་ཆོག་ལྟར་སློབ་དཔོན་འཇུག་ཅིང་སློབ་མ་ལ་ཀུན་རྫོབ་བྱང་སེམས་ཀྱི་ཟབ་མོའི་དབང་བསྐུར་རོ། །རྗེས་ཆོག་ནི། ཡབ་ཡུམ་སྦྱོར་བའི་སེམས་སྤྲིན་གྱིས། མཚན་མའི་དཀྱིལ་འཁོར་གྱིས་མཚོན་པའི་སྣོད་བཅུད་ཐམས་ཅད་སྦྱངས་ནས་རང་ལ་ཐིམ། བདག་ཉིད་ཀྱང་བདེ་བ་ཆེན་པོས་སྣང་གསུམ་འགགས་པའི་འོད་གསལ་རྣམ་པར་མི་རྟོག་པའི་དབྱིངས་སུ་བསྟིམ་ནས་མཉམ་པར་བཞག །དེའི་ངང་ལས་ཟུང་འཇུག་རྡོ་རྗེ་སེམས་དཔའི་སྐུར་ལངས་ཏེ། སྨོན་ལམ་དང་བཀྲ་ཤིས་ནི། ༀ། འཕོ་ཆེན་བཅུ་གཉིས་དབུ་མའི་ལམ་དུ་བཞུགས། །གཏུམ་མོ་འབར་བས་ཟླ་བ་བདུད་རྩིར་ཞུ། །འབྱུང་ལྡོག་དགའ་བཞིའི་འགྲོས་རྫོགས་མི་འགྱུར་བའི། །བདེ་ཆེན་ཡེ་ཤེས་ཚེ་འདིར་མངོན་གྱུར་ཤོག །ཆོས་ཉིད་གསང་བ་ཡུམ་གྱི་བྷ་གའི་ཀློང་། །ཡེ་ཤེས་རྡོ་རྗེ་རྗེས་ཆགས་མཉམ་སྦྱོར་བའི། །བདེ་ཆེན་བྱང་ཆུབ་སེམས་ཀྱི་བདེན་པ་དེས། །སྲིད་ཞིའི་དགེ་ལེགས་ཡོངས་རྫོགས་བཀྲ་ཤིས་ཤོག །ཅེས་མེ་ཏོག་འཐོར་ཞིང་རོལ་མོའི་སྒྲ་སྦྱར་རོ། །འདིར་ཕལ་ཆེ་བ་དག །ཡུམ་གྱི་མཁའི་དཀྱིལ་འཁོར་ལ་ཞི་བ་ཞེ་གཉིས་བསྐྱེད་པར་མཛད་པ་ནི་རིགས་པ་མ་ཡིན་ཏེ། རྩ་རྒྱུད་ཀྱི་གསང་སྦྱོར་སྒྲུབ་པའི་ལེའུར་ལྷ་དགུ་བསྐྱེད་པར་སྔར་གསལ་འདེབས་ཀྱི་ཚེ་བརྗོད་པ་བཞིན་དང་། དེས་མེ་ལོང་གི་དཀྱིལ་འཁོར་ཡང་དེ་ལྟར་བྲི་དགོས་པར་གྲུབ་སྟེ། ཕྱི་གཟུགས་བརྙན་གྱི་དཀྱིལ་འཁོར་བཞིན་དུ་ནང་ཡུམ་གྱི་མཁའ་ལའང་བསྒོམ་དགོས་པར་བཤད་པའི་ཕྱིར་དེ་སྐད་དུའང་ལེའུ་དེ་ལས་ཡབ་ཡུམ་གྱི་གནས་ལྔར་རིགས་ལྔ་ཡབ་ཡུམ་བསྐྱེད་པ་དང་རྗེས་འབྲེལ་དུ་གསུངས་ཏེ། འདི་ལྟར། གཟུངས་སུ་བྱིན་གྱིས་བརླབ་པ་ནི། དེ་ཡི་གཟུགས་ཀྱི་ཕུང་པོ་ལ། བདེ་བར་གཤེགས་པའི་ས་བོན་ལྔ། །འཕྲོ་འདུ་གསལ་བར་གྱུར་པ་དེས། །རྒྱས་བཏབ་བྱིན་རླབས་དབང་བསྐུར་ནས། །བདེ་གཤེགས་ཡུམ་ལྔའི་སྐུ་མཆོག་གསལ། །རྡོ་རྗེ་ཐབས་ལའང་དེ་བཞིན་ཏེ། །དེ་ལྟར་གསལ་བར་གྱུར་པ་དང་། ཡུམ་གྱི་མཁའ་ལ་མེ་རི་བསྒོམ། །གསང་བ་དབུགས་ཀྱི་ཟླ་གམ་ལ། བྱང་ཆུབ་སེམས་ཀྱི་སྤྲོ་བསྡུ་བྱ། །གཟུགས་བརྙན་ཇི་ལྟར་གསལ་བ་བཞིན། །ཆགས་པའི་མཁའ་ལ་དེ་བཞིན་ནོ། །ཞེས་གསུངས་པའི་ཕྱིར། འདི་ཉིད་གསང་དབང་གི་ཆོ་གཞུང་ལ་སྦྱོར་རིགས་པའང་འགྲེལ་ཆུང་ལས། རྣལ་འབྱོར་བདེ་བ་ཆེན་པོའི་དངོས་གྲུབ་སྒྲུབ་པ་དང་།གསང་བའི་དབང་བསྐུར་བ་དང་། འཕགས་པ་མཆོད་པ་དང་། འགྲོ་བ་རྒྱལ་བའི་སྲས་སུ་བསྐྱེད་པའི་ཕྱིར། གསང་སྦྱོར་སྒྲུབ་པའི་ལེའུ་གསུངས་སོ། །ཞེས་འབྱུང་བས་སོ། །གསུང་ངག་ཟབ་མོ་བདུད་རྩིའི་རྒྱུན། །རྣ་བའི་དབང་པོའི་འཇུག་ངོགས་ལས། །ཆོས་ཀྱི་འཁོར་ལོར་འཁྱིལ་བ་ཡི། །ཟེགས་མ་ལེགས་བཤད་དཔལ་འདི་འཐོར། །ཀུན་རྫོབ་བྱང་སེམས་ཀྱི་གསང་དབང་ལུས་ལ་བསྐུར་བའི་དཀྱིལ་འཁོར་གྱི་ལེ་ཚན་ནོ།། །།

༈ ༀ་སྭ་སྟི། རྣམ་འགྱུར་དུ་མར་སྣང་ཡང་དབྱིངས་ཡེ་ཤེས། །དབྱེར་མེད་དོན་དམ་བྱང་སེམས་དཀྱིལ་འཁོར་གསུམ། །མ་འདྲེས་ཡོངས་རྫོགས་རང་རིག་རྡོ་རྗེ་སེམས། །ཇི་བཞིན་མངོན་གྱུར་དྲིན་ཅན་བླ་མར་འདུད། །རང་གནས་ཡེ་ཤེས་དོན་དམ་བྱང་སེམས་དབང་། །ངོ་སྤྲོད་གནད་ཀྱིས་རང་ངོ་སྤྲོད་པའི་ཐབས། །ལྟ་བ་ཡེ་འབྱམས་གསང་དབང་རྫོགས་ཆུ་ཡིས། །ཆོག་གཞུང་ཀུན་བཟང་དོན་གྱི་འཕྲིན་ལས་བརྩམ། །གཉིས་པ་དོན་དམ་བྱང་སེམས་ཀྱི་དཀྱིལ་འཁོར་ནི། དྲི་དང་བ་བྱུང་གིས་ཆག་ཆག་བཏབ་པའི་གཞི་ལ་པད་འདབ་བཅུ་དྲུག་མུ་ཁྱུད་ཕྱི་ནང་དང་བཅས་པའི་མཐར་སྙིང་གི་རྩ་བ་མདུན་དང་རྩེ་མོ་རྒྱབ་ཕྱོགས་སུ་བསྟན་པ་བྲི། ཚོན་ནི་པད་འདབ་ལྟེ་བ་དང་བཅས་པ་དམར་པོ། མུ་ཁྱུད་ནང་མ་འོད་ཟེར་དང་། ཕྱི་མ་དཀར་པོ་ལ་རྡོ་རྗེ་སྔོན་པོའི་འཕྲེང་བ། དབུས་ཀྱི་ལྟེ་བ་ལ་ཨ་དཀར་པོ་མགོ་རྒྱབ་མདུན་དུ་བསྟན་པའི་ཞལ་སྤྲོད། འདབ་མ་རྣམས་ལའང་ཨ་དཀར་པོ་ཞལ་ནང་དུ་བལྟ་བ་བྲི། བུམ་པ་ཨ་དཀར་གྱི་མཚན་མ་ཅན་གྱི་ནང་དུ་བཅུད་བུམ་རྫས་སྤྱི་དང་མཐུན་པའི་སྟེང་དུ་སྐྱེ་བདུན་པའི་ཤ་དང་རིང་བསྲེལ་སོགས་དམ་རྫས་བྱིན་ཅན་གྱི་ཕབ་ཀྱང་བླུག་ཅིང་། འབྲས་བུ་ཅན་གྱི་ཤིང་དང་རྨ་བྱའི་མདོངས་ཀྱིས་ཁ་བརྒྱན་ལ། བུམ་ཆུ་ཨ་ལས་ཆོས་ཉིད་རྒྱུ་རྐྱེན་མེད་པའི་བདུད་རྩིར་བསམ་ནས་དཀྱིལ་འཁོར་གྱི་དབུས་སུ་མཉྫི་ལ་འགོད། བུམ་པའི་ཁར་དགོངས་ཉམས་ཀྱི་གླུ་གསུང་བ་པོའི་རིག་འཛིན་རྣམས་ཀྱི་ཙཀླི་ཡང་བཞག །དཀྱིལ་འཁོར་གྱི་མཐར་ཅི་འབྱོར་པའི་མཆོད་པ་དང་། སྨན་གཏོར་རཀྟ། ཚོགས་ཀྱི་ཡོ་བྱད་ལ་སོགས་པས་བསྐོར། དེ་ནས་ཆོ་ག་ནི། ཐོག་མར་ཞི་བའི་འཕྲིན་ལས་གཞུང་བསྲང་བར་གསུངས་ཀྱང་། དབང་འདི་དུས་ཚིགས་བཅད་ནས་ཕྱིས་བསྐུར་བ་ལ་དགོངས་ཀྱི། དིང་སང་རྩ་བའི་དཀྱིལ་འཁོར་མ་བསྡུས་པར་སྦྲེལ་ནས་མཛད་པའི་ཕྱིར། ཞི་བའི་ཆོག་འཕྲིན་ཟུར་དུ་བྱ་མི་དགོས་པས། ཁྱད་པར་གྱི་ལས་གཞུང་ཀུན་བཟང་དོན་གྱི་འཕྲིན་ལས་ལ་འཇུག་སྟེ། མཚམས་བཅད་པ་ནི། བར་དུ་བཅད་བྱ་གཅོད་བྱེད་ཐམས་ཅད་རྒྱུ་རྐྱེན་མེད་པར་རང་བྱུང་། བྱེད་པ་པོ་མེད་པར་ལྷུན་གྱིས་གྲུབ་པས་རྣམ་པར་མི་རྟོག་པའི་ངང་ལ་མཉམ་པར་བཞག་ནས་འདི་སྐད་ཅེས། ཧཱུཾ། མི་རྟོག་ཡེ་ཤེས་བགེགས་བསལ་ནས། འདི་ལས་གང་ཞིག་འགལ་བྱེད་པ། །འཇིགས་པ་ཐམས་ཅད་དེ་ལ་འོང་། །སྔགས་འཆང་རྣམས་ཀྱིས་སྤོང་བར་འགྱུར། །བཛྲ་ཛྭ་ལ་རཾ། ཞེས་རྣམ་པར་མི་རྟོག་མི་ཕྱེད་པའི་རྡོ་རྗེ་ཡེ་ཤེས་ཀྱི་རང་རྩལ་མེ་འབར་བ་དང་བཅས་པས་མཚམས་བཅད་དོ། །དེ་ནས་བཤགས་པ་ནི། སྡིག་སྒྲིབ་ཐམས་ཅད་དམིགས་མེད་བྱ་རྩོལ་མེད་པའི་ངང་ལ་མཉམ་པར་བཞག་ནས། ཧཱུཾ། གཞི་ཉིད་མ་བཅོམ་ལྷུན་གྱིས་གྲུབ་པ་ལ། །དགག་སྒྲུབ་གཉིས་སུ་ལྟ་བ་ཐང་རེ་ཆད། །བཟང་ངན་གཉིས་སུ་འཛིན་པ་ཉོན་རེ་མོངས། །མ་བཅོས་བྱང་ཆུབ་ངང་དུ་བཤགས་པར་བགྱི། །ལྟ་བའི་རང་བཞིན་བཟའ་གཏད་མེད་པ་ལ། །བཟའ་གཏད་གཉིས་སུ་ལྟ་བ་ཐང་རེ་ཆད། །ཡུལ་སེམས་གཉིས་སུ་འཛིན་པ་ཉོན་རེ་མོངས། །རང་ས་བྱང་སེམས་ཀློང་དུ་བཤགས་པར་བགྱི། །སྒོམ་པ་ཅོག་བཞག་དམིགས་གཏད་མེད་པ་ལ། །དམིགས་གཏད་གཉིས་སུ་ལྟ་བ་ཐང་རེ་ཆད། །བཞག་འཇོག་གཉིས་སུ་འཛིན་པ་ཉོན་རེ་མོངས། །ཅོག་བཞག་བྱང་སེམས་ཀློང་དུ་བཤགས་པར་བགྱི། །སྤྱོད་པ་འཛིན་མེད་བླང་དོར་མེད་པ་ལ། བླང་དོར་གཉིས་སུ་ལྟ་བ་ཐང་རེ་ཆད། །གཙང་རྨེ་གཉིས་སུ་འཛིན་པ་ཉོན་རེ་མོངས། །ལྷུག་པ་བྱང་སེམས་ཀློང་དུ་བཤགས་པར་བགྱི། །དམ་ཚིག་བསྲུང་མེད་འདའ་ཉམས་མེད་པ་ལ། །འདའ་ཉམས་གཉིས་སུ་ལྟ་བ་ཐང་རེ་ཆད། །བཤགས་གསོ་གཉིས་སུ་འཛིན་པ་ཉོན་རེ་མོངས། །བསྲུང་མེད་བྱང་སེམས་ཀློང་དུ་བཤགས་པར་བགྱི། །ས་ལམ་བགྲོད་མེད་རྩོལ་སྒྲུབ་འདས་པ་ལ། །རྩོལ་སྒྲུབ་གཉིས་སུ་ལྟ་བ་ཐང་རེ་ཆད། །བགྲོད་ཐོབ་གཉིས་སུ་འཛིན་པ་ཉོན་རེ་མོངས། །བགྲོད་མེད་བྱང་ཆུབ་ཀློང་དུ་བཤགས་པར་བགྱི། །འབྲས་བུ་ཇི་བཞིན་ཡེ་སངས་རྒྱས་པ་ལ། །སྤང་ཐོབ་གཉིས་སུ་ལྟ་བ་ཐང་རེ་ཆད། །རྒྱུ་འབྲས་གཉིས་སུ་འཛིན་པ་ཉོན་རེ་མོངས། །ལྷུན་གནས་བྱང་སེམས་ཀློང་དུ་བཤགས་པར་བགྱིས། །དེ་ནས་མཆོད་གཏོར་བརླབ་པ་ནི། དངོས་འཛིན་རྣམས་ལྷག་མཐོང་གི་མེ། །ཡེ་ཤེས་ཀྱི་རླུང་། ཞི་གནས་ཀྱི་ཆུས་བསྲེགས་གཏོར་བཀྲུས་པར་མོས་པས། རཾ་ཡཾ་ཁཾ། ཞེས་སྣང་མེད་ཀྱི་ངང་ལ་དར་གཅིག་བཞག །དེའི་ངང་ལས་ཡེ་ཇི་བཞིན་པ་ཀུན་ཏུ་བཟང་མོའི་མཁའ་ཀློང་དུ། ཡེ་ཤེས་ཀུན་ཏུ་བཟང་པོའི་རྩལ་སྣང་མ་འགགས་པ། རང་བཞིན་ལྷུན་གྱི་གྲུབ་པའི་འདོད་ཡོན་གྱི་རོལ་མོར་ཤར་བར་མོས་ནས། ༀ་ཨཱཿཧཱུཾ་མ་ཧཱ་པཉྩ་ཨ་མྲྀ་ཏ་ཧཱུཾ། མ་ཧཱ་བ་ལིཾ་ཏ་ཧཱུཾ། མ་ཧཱ་རཀྟ་བྷྲཱུཾ་སྭཱ་ཧཱ། ཞེས་བྱིན་གྱིས་བརླབ་པོ། དེ་དག་ནི་སྦྱོར་བའོ། །དེ་ནས་དངོས་གཞི་ནི། ཡུམ་ཀུན་ཏུ་བཟང་མོའི་མཁའ་ཀློང་སྐྱེ་མེད་སྤྲོས་པ་དང་བྲལ་བ་ཡེ་ཇི་བཞིན་པའི་དཀྱིལ་འཁོར་ཉིད་རྣམ་པ་གཞལ་ཡས་ཁང་གདན་དང་བཅས་པར་མོས་ནས། གསལ་གདབ་པ་ནི། བྷྲཱུཾ་བི་ཤྭ་བི་ཤུདྡྷེ་ཛྙཱ་ན་རཏྣ་མཎྜ་ལ་བྷྲཱུཾ། བཾ་པདྨ་མཎྜལ། མ་སཱུརྻ་མཎྜལ། ཨ་ཙནྡྲ་མཎྜ་ལ། ཏྲི་རཏྣ་མཎྜ་ལ། སིཾ་ཧ་རཱ་ཛ་ནི་ཏི་ར་བཾ། ཧཱུཾ། རྨད་བྱུང་བྱང་ཆུབ་སེམས་ཀྱི་གནས། །གཞལ་མེད་ཁང་མཛེས་དེ་དག་ནི། །མེ་དང་འདྲ་བར་འོད་གསལ་ཞིང་། །རིན་ཆེན་ལས་བྱས་ཤིན་ཏུ་སྣང་། །ཉི་མ་ཟླ་བའི་གདན་དང་འོད། །ཞིང་རྣམས་གདན་ཆེན་གསལ་བར་གྱུར། །ཞེས་པས་རྟེན་བསྐྱེད། དེ་ནས་བརྟེན་པ་བསྐྱེད་པ་ནི། ཡུལ་དབྱིངས་དེ་ཉིད་ཡུལ་ཅན་ཡེ་ཤེས་དང་གཉིས་སུ་མེད་པ་རྩ་བ་བྱང་ཆུབ་སེམས་ཀྱི་དཀྱིལ་འཁོར་བདེ་བ་ཆེན་པོ་ཉིད་རྣམ་པ་བཅོམ་ལྡན་འདས་ཀུན་ཏུ་བཟང་པོ་མཐིང་ག་ཕྱག་མཉམ་བཞག་དང་། ཞབས་རྡོ་རྗེའི་སྐྱིལ་ཀྲུང་ཅན། ཀུན་ཏུ་བཟང་མོ་དང་འདུ་འབྲལ་མེད་པར་བཞུགས་པའི་རྩལ་སྣང་ཞི་ཁྲོ་རིག་འཛིན་བཀའ་སྡོད་དང་བཅས་པའི་དཀྱིལ་འཁོར་རབ་འབྱམས་སུ་མ་འགགས་པར་ཤར་བ་ཐམས་ཅད་ཀྱང་རང་བྱུང་གི་ཡེ་ཤེས་གཅིག་གི་རོལ་པར་སད་པར་བསམ་ཞིང་། ཐུགས་ཙིཏྟ་རིན་པོ་ཆེའི་ཕོ་དྲང་མཚོན་བྱེད་བརྡའི་དཀྱིལ་འཁོར་ཡང་། དབྱིངས་རྒྱུ་རྐྱེན་མེད་པར་རང་བྱུང་བ་ཀུན་ཏུ་བཟང་མོ་དང་། ཡེ་ཤེས་བྱེད་པ་པོ་མེད་པར་ལྷུན་གྲུབ་ཏུ་ཤར་བ་ཀུན་ཏུ་བཟང་པོ་གཉིས་གདོད་ནས་མ་སྐྱེས་པའི་ཆོས་ཉིད་ཡི་གེ་ཨའི་རྣམ་པ་དང་། ཡེ་ཤེས་ཀྱི་རྩལ་སྣང་ཚོགས་བརྒྱད་དང་། དབྱིངས་ཀྱི་རྩ་སྣང་ཡུལ་བརྒྱད་ཀྱང་གདོད་ནས་དག་པའི་ཀུན་བཟང་ཨ་ཡིག་བཅུ་དྲུག་གི་རྣམ་པར་བཞུགས་པར་མོས་ནས་འདི་སྐད་ཅེས། རང་གི་སྙིང་པོར་རང་བྱས་ལ། །བསམ་ཡས་ལྷུན་གྱིས་གྲུབ་པའི་སྐུ། །སངས་རྒྱས་མི་སྒོམ་བདག་ཉིད་སྒོམ། །རང་གི་ལྷ་ནི་ཀུན་བཟང་སྒོམ། །དུས་གསུམ་བཞུགས་པའི་སངས་རྒྱས་དང་། །རྡོ་རྗེ་འཆང་དབང་རྣལ་འབྱོར་དང་། །དཔལ་ཆེན་ཁྲག་འཐུང་མ་མོའི་ཚོགས། །གཞན་ཡང་རྣམ་པ་མང་པོའི་ཚོགས། །ལྷ་དང་ལྷ་མིན་རླུང་ལྷ་དང་། །གཤིན་རྗེ་ཀླུ་དང་མེ་ལྷ་དང་། །གནོད་སྦྱིན་སྲིན་པོ་འབྱུང་པོའི་ཚོགས། །དབང་མེད་དད་པས་འདུས་པ་དང་། །ལྷ་ཡི་ཚོགས་ཀྱིས་གང་བ་རྣམས། །རྣལ་འབྱོར་རང་རིག་ཆེན་པོ་ཡིས། །གསང་བའི་གནས་རྣམས་གཅིག་ཏུ་སྒོམ། །ཡེ་ཤེས་རང་བྱུང་བྱང་ཆུབ་སེམས། །སངས་རྒྱས་ཐམས་ཅད་བདག་གིས་བྱས། །ཡེ་ཤེས་ལྷ་རྣམས་རང་ལས་བྱུང་། །འདི་ནི་རྨད་དུ་བྱུང་བའི་སྐུ། །གསང་བའི་དཀྱིལ་འཁོར་དམ་པ་ཡིན། །མི་གཡོ་བ་ནི་སྐུ་ཡི་རྒྱ། །མི་བསྐྱོད་པ་ནི་ཡེ་ཤེས་ཆེ། །མི་ལེན་པ་ནི་བདག་མེད་ཅིང་། །མིང་འདིར་ཚིག་བྲལ་མཉམ་ཉིད་དོ། །ཞེས་ངེས་ཤེས་བསྐྱེད་དོ། །དེ་ནས་ཡེ་ཤེས་པ་དྲང་ཞིང་བསྟིམ་པ་ནི། ཡེ་ནས་འཁོར་འདས་གཉིས་སུ་མེད་པའི་དགོངས་པ་ལ་མཉམ་པར་བཞག་ནས་འདི་སྐད་ཅེས། སངས་རྒྱས་མི་གཤེགས་བདག་ཉིད་གཤེགས། །ལྷ་ཡང་གཞན་ནས་འབོད་མི་དགོས། །བྱ་བ་མེད་པས་ལས་རྣམས་ཟིན། །ཨེ་ཧྱེ་ཧི་ཀཱ་རུ་ཎི་ཀ་དྲྀ་ཤྱ་ཧོཿ ས་མ་ཡ་ཧོཿ ས་མ་ཡ་སྟྭཾ། ཛཿཛཿ བུདྡྷ་ས་ཏྭ་ཨ་ཏི་ཡོ་ག་ས་མ་ཡ་སྟྭཾ། ཛཿཧཱུཾ་བཾ་ཧོཿ ཏིཥྛ་བཛྲ། དེ་ནས་བདག་ཉིད་ཀྱིས་རང་གི་ཡེ་ཤེས་ཡུལ་མེད་རང་གསལ་དུ་མཇལ་བ་ལ་ངོ་མཚར་བའི་ཚུལ་གྱིས། གང་ལ་སངས་རྒྱས་གུས་མཛད་པའི། །དོན་དེ་ལ་ཡང་ཕྱག་འཚལ་ལོ། །སངས་རྒྱས་ཀུན་ལ་བརྩེར་དགོངས་ནས། །གང་གི་དོན་དུ་མཛད་པ་ཡི། །དོན་མཛད་དེ་ལ་ཕྱག་འཚལ་ལོ། །ཕྱག་རྒྱའི་མཆོད་པ་ནི། །ཆོས་ཀུན་མཉམ་ཉིད་དུ་རྟོགས་པ་ལས་མི་འདའ་ན་སྒུལ་བསྐྱོད་ཐམས་ཅད་ཕྱག་རྒྱ་ལས་མི་འདའ་སྟེ། ཕྱག་རྒྱ་མི་བསྐྱོད་ཡན་ལག་བསྐྱོད། རང་བྱུང་མཆོག་གི་ཕྱག་རྒྱའོ། །དེ་ནས་ཕྱི་མདོ་སྡེ་དང་མཐུན་པ་རྣམ་པར་གྲོལ་བའི་ཕུང་པོ་ལྔ་དང་། ནང་རྒྱུད་སྡེ་དང་མཐུན་པར་སྨན་གཏོར་རཀྟའི་མཆོད་པ་རྣམས་འཁོར་གསུམ་མི་རྟོག་པའི་ཤེས་རབ་ཀྱིས་བྱ་རྩོལ་མེད་པའི་ངང་དུ་དབུལ་ཏེ། ཧཱུཾ། ཕུང་པོ་ཚོགས་ཀྱི་ཡན་ལག་འདི། །རྣམ་གྲོལ་ཕུང་པོ་ལྔ་རུ་ཐིམ། །བདག་ལས་བྱུང་བའི་ཁུ་བ་ཡིས། །བདག་གི་ལུས་ལ་རབ་བརྒྱན་ཏེ། །དངོས་གྲུབ་མཆོག་རྣམས་བདག་ལས་བྱུང་། །སྨན་མཆོག་ནད་སེལ་བདེར་འཚོ་བ། །དུག་གསུམ་སྨན་མཆོག་བྱང་ཆུབ་སེམས། །འཇིག་རྟེན་སྨན་མཆོག་འདི་ཡིན་ནོ། །ལྷུན་གྱིས་གྲུབ་པས་མི་བསྔོ་ཞིང་། །གདོད་ནས་དག་པའི་བདུད་རྩི་ཡིན། །བུདྡྷ་བ་ཌ་པཉྩ་ཨ་མྲྀ་ཏ་ཁཱ་ཧི། མཆོད་པ་གཞན་ལ་མི་མཆོད་དོ། །བདག་ཉིད་ཀུན་གྱི་ལྷ་ཡིན་པས། །ཀུན་གྱི་མཆོད་པས་བདག་ལ་མཆོད། །ཀུན་མཆོད་ཡོན་ཏན་རྣམ་ལྔ་ཡང་། །ཆོས་ཉིད་དག་པའི་རྒྱན་དུ་གསུངས། །མི་བཟུངས་གཏོར་བས་གཏོར་མ་ཡིན། །བུདྡྷ་ས་ཏྭ་མ་ཧཱ་བ་ལིཾ་ཏ་རཀྟ་ཁཱ་ཧི། དེ་ནས་གདོད་ནས་རང་བཞིན་གྱིས་རྣམ་པར་དག་པས་འབྲས་བུ་གཞན་ནས་བཙལ་དུ་མེད་པའི་ཕྱིར་སྨོན་པ་མེད་པའི་ངང་ལས་སྒྱུ་མའི་ཚུལ་གྱིས་སྨོན་ལམ་གདབ་པ་ནི། །གང་གི་དོན་དུ་བྱས་པའི་དོན། །དེ་དག་བདག་ལ་གྲུབ་གྱུར་ཅིག །གཞལ་ཡས་མེ་འོད་འབར་བ་ལྟར། །དོན་དེ་བདག་གིས་རིག་གྱུར་ཅིག །སངས་རྒྱས་ཀུན་དང་མཉམ་པ་ཡི། །སངས་རྒྱས་ཀུན་སངས་རྒྱས་གྱུར་ཅིག །དེ་ནས་འཛབ་ནི། འགོས་ཀྱི་ལས་ཐོར། རྫོགས་ཆེན་གྱི་བཟླས་པ། ༀ་ཨཱཿཧཱུཾ་ལ་བྱ་ཞེས་གསུངས་པའི་དོན། ཕྱི་ལྟར་ན་ལུང་བུམ་པ་ཅན་ནམ་དབུགས་རང་བབས་གང་རུང་གི་སྟེང་ནས་འབྱུང་འཇུག་གནས་གསུམ་ཡི་གེ་གསུམ་གྱི་གདངས་སུ་མོས་པས་རྡོ་རྗེའི་བཟླས་པ་བྱ། ནང་ལྟར་སྒོ་ལྔ་གསལ་ལ་རྟོག་མེད་ཀྱི་ངང་ནས་རླུང་སོ་མང་བཞག །གསང་བ་ལྟར་བརྗོད་བྱ་རྗོད་བྱེད་ཐམས་ཅད་དང་བྲལ་བའི་ཆོས་ཉིད་ཀྱི་ངང་བསལ་བཞག་མེད་པར་ཀློད་དེ། སྙིང་པོ་མི་བརྗོད་བདག་ཉིད་བརྗོད། །རང་གི་སྙིང་པོ་རང་སྔགས་ཀྱིས། །གྲུབ་པའི་སྙིང་པོ་ཆུད་མི་ཟ། །འཛབ་དང་བསྙེན་པ་འབུལ་མི་དགོས། །དངོས་གྲུབ་གཞན་ནས་མི་སློང་སྟེ། །མི་གསུང་མཉམ་བཞག་སྔགས་ཚིག་གོ། །ༀ་བུདྡྷ་བ་ཌ་མ་ཧཱ་ཨ་ཏི་ཡོ་ག་ས་མ་ཡ་སྟྭཾ། ཤ་པ་རུ་པ་ཨ་ཧོཿ སུ་ཁ་དེ་བ་ཤི་ཤི། ཞེས་པའི་དགོངས་པ་བསྐྱང་ངོ་། །དེ་ནས་གྲགས་སྟོང་ཆོས་ཉིད་ཀྱི་རང་སྒྲས་བསྟོད་པ་ནི། །རང་བཞིན་གྱིས་རྣམ་པར་དག་པའི་ཡོན་ཏན་མ་བཙལ་ལྷུན་གྲུབ་ལ། །བླང་དོར་གཉིས་མེད་ཀྱི་ངང་ནས་ངེས་ཤེས་བསྐྱེད་པ་སྟེ། སངས་རྒྱས་ཀུན་བས་སྔར་སངས་རྒྱས། །མི་ཤེས་དྲི་མ་ཡེ་ནས་མེད། །དཔལ་གྱི་རྣམ་རྒྱལ་དེ་བཞིན་དུ། །ལོངས་སྤྱོད་དབང་ཕྱུག་དཔལ་དང་མཉམ། །རྡོ་རྗེ་ཉི་མ་གཟི་བརྗིད་དང་། །འོད་སྟུག་ཤིན་ཏུ་འབར་བ་ཡི། །བཞེད་ཅིང་དམ་དུ་མཛད་པ་ཡི། །དགའ་མགུ་རངས་པ་རྣམས་སུ་གྱུར། །པདྨ་བཞད་པས་ཆོས་ཀུན་གྱི། །རྟོགས་མཛད་སངས་རྒྱས་ཐམས་ཅད་ཀྱིས། །བྱང་ཆུབ་སེམས་འདི་བརྙེས་གྱུར་ནས། །སྐད་ཅིག་གཅིག་ལ་རྟོགས་གྱུར་ཏེ། །སྙིང་པོ་བྱང་ཆུབ་ཉིད་དུ་འགྱུར། །རྡོ་རྗེ་གདན་ལ་ཡང་སངས་རྒྱས། །སྐུ་མེད་ཆོས་ཀྱི་སྐུ་ཡིས་སྟོང་གསུམ་ཟིལ་གྱིས་གནོན། །གསུང་མེད་རིག་པའི་གསུང་གིས་བསྟན་པ་རྒྱས་པར་སྒྲོག །རྟོག་མེད་ཡེ་ཤེས་ཐུགས་ཀྱིས་ཅིར་ཡང་ས་ལེ་མཁྱེན། །སྟོན་པ་ཀུན་ཏུ་བཟང་ལ་ཕྱག་འཚལ་བསྟོད། །དེ་ནས་དམ་ཅན་ལ་བཅོལ་བསྐུལ་གཏོར་མ་བསྔོ་བ་ནི། འཁོར་གསུམ་མི་དམིགས་པས་བྱ་རྩོལ་དང་བྲལ་བའི་ངང་ནས། ཆོས་ཀྱི་དབྱིངས་ནི་ནམ་མཁའི་མཐའ་དང་མཉམ། །བྱང་ཆུབ་རྙེད་དཀའ་རང་ལ་ཡོད་བཞིན་དུ། །གསང་བའི་སྙིང་པོ་གང་ལ་གནས་པ་ན། །དམ་ཅན་རྒྱ་མཚོ་རྣམས་ཀྱང་དེ་ན་གནས། །ཐུགས་རྗེ་རྒྱ་མཚོ་ཡོན་ཏན་ཀུན་ལ་ཁྱབ། །ལྷ་དང་ཀླུ་ཡང་བདེན་པའི་བཀའ་ཉན་ཏེ། །ཚོགས་ཀྱི་རྒྱན་རྣམས་བཀྲམ་པ་ཡང་། །མཉམ་པས་རིམ་པའི་བཀོད་པ་མེད། །གཅིག་པས་ཕྱོགས་སུ་བསྔོ་དང་བྲལ། །དེ་ནས་ཚོགས་རྫས་བཀྲམ་ཞིང་བརླབ་པ་ནི། ཆོས་ཐམས་ཅད་གཙང་དམེ་གཉིས་མེད་བླང་དོར་དང་བྲལ་བ་ཡེ་ནས་དག་པའི་བདུད་རྩི་ཡིན་པས་རྫས་བསག་ཅིང་བསྐྱར་བརླབ་མི་དགོས་པའི་དོན་ལ་ངེས་ཤེས་བསྐྱེད་ནས། ཚོགས་ཀྱི་རྒྱན་རྣམས་བཀྲམ་པ་ཡང་། །རང་བཞིན་གནས་པས་དབྲི་བ་མེད། །ཡིད་ཀྱིས་བཤམས་པའི་ཡོན་བདག་སྟེ། །བལྟས་པས་སྟོབས་ནི་བཀྲམ་པའོ། །དེ་ནས་མཆོད་བཤགས་སྟོབ་པ་བྱ་བ་ནི། མཆོད་བྱ་མཆོད་བྱེད་མཆོད་རྫས་ཀུན་གཉིས་མེད་ཀྱི་ངང་དུ་རོ་གཅིག་པར་བལྟས་ལ། ཧཱུཾ། རྣམ་པར་རྟོག་མེད་དུས་གསུམ་རྒྱལ་བའི་ཐུགས། །ཉོན་མོངས་ཞེན་པའི་དབང་གིས་རང་འཐས་ཀྱང་། དོན་རྟོགས་གསལ་བའི་སྐྱེས་བུ་གཉིས་སུ་མེད། །ཆོས་ཉིད་ལྷམ་མེ་ལྷང་ངེས་གསལ་བའོ། །ཆོས་ཉིད་མཉམ་པའི་ངང་དུ་ཐམས་ཅད་གཅིག །བདེ་ཆེན་རྒྱལ་པོ་ལྷུན་གྲུབ་ལ། ལྷུན་གྲུབ་མཐར་ཕྱིན་མཆོད་པ་བཞེས། བུདྡྷ་བ་ཌ་ཁཱ་ཧི། དེ་ནས་བར་འདིར་དབང་ཆོག་བཞིན་དོན་དམ་བྱང་སེམས་ཀྱི་དབང་སེམས་ལ་བསྐུར་བར་བྱའོ། །དེ་ནས་དཀྱིལ་འཁོར་གྱི་ལྷ་ཐམས་ཅད་ཀྱང་རང་གི་སེམས་ཉིད་ལས་གཞན་དུ་མ་གྱུར་པར་ཐག་བཅད་ནས་ཡེ་ཤེས་ལ་ཡེ་ཤེས་རོལ་པའི་ཚུལ་གྱིས་ཚོགས་རྫས་རྣམས་ལ་ལོངས་སྤྱོད་ལ། ལྷག་མ་བཏང་ཞིང་བཀའ་བསྒྱུར་བྱ་བ་ནི། ཟག་མེད་ཀྱི་བདུད་རྩིར་ཡེ་ནས་དག་པ་འཁོར་གསུམ་མི་དམིགས་པའི་ངང་ནས་བསྔོ་བསྒྱུར་བྱ་བ་སྟེ། ལྷག་མ་མེད་པར་ཡོངས་སུ་རྫོགས། །འགྱུར་བ་མ་ཡིན་དྲང་པོར་གནས། །དེ་ནས་རྗེས་ཆོག་དཀྱིལ་འཁོར་བསྡུ་པ་ནི། །དཀྱིལ་འཁོར་གྱི་འཁོར་ལོ་ཡང་རང་བྱུང་ཡེ་ཤེས་ཀྱི་རྩལ་སྣང་ཙམ་ལས་བསྐྱེད་པའི་བྱ་བྱེད་ལ་ལྟོས་པ་མེད་པའི་ཕྱིར་བསྡུ་བའང་མ་གྲུབ་པས། སྐྱེ་འགག་མེད་པའི་ཆོས་ཉིད་དབྱིངས་ཡེ་གཉིས་མེད་བྱང་ཆུབ་སེམས་ཀྱི་ངང་ལ་བསལ་བཞག་མེད་པར་བཞག་ནས། ནམ་མཁའ་བཞིན་དུ་མཐའ་མཉམ་ཞིང་། །གཞན་ལ་ལྟོས་འགྱུར་ཆོས་མ་ཡིན། །དེ་ལས་ལངས་ཏེ་རྒྱུན་གྱི་རྣལ་འབྱོར་ནི། །སྤྱོད་ལམ་ཐམས་ཅད་དུ་ཞེན་འཛིན་དང་བྲལ་བ་སྒྱུ་མ་ལྟ་བུའི་ངང་ནས་དགེ་བའི་ལས་རྣམས་ལ་བརྩོན་པས་ཆད་མཐར་བསལ་ཏེ། བླ་མ་མཆོད་དང་བསྟོད་པ་དང་། །དེ་བཞིན་བསོད་ནམས་ཐམས་ཅད་ལ། །མ་ཆགས་མི་གཡོའི་སྟོབས་མེད་པར། །བྱས་ན་འཆིང་བ་ཆེན་པོར་འགྱུར། །ཞེས་དོན་བསམ་མོ། །དེ་ནས་སྨོན་ལམ་ཤིས་བརྗོད་ནི། ཐིག་ལེ་ཆེན་པོར་སྐུ་དང་ཞིང་ཁམས་རྫོགས། །དམ་ཚིག་ཆེན་པོར་སྤང་བླང་མཚན་མ་དག །ཁྱབ་བརྡལ་ཆེན་པོར་རེ་དོགས་མདུད་པ་གྲོལ། །རྫོགས་པ་ཆེན་པོར་ཆོས་སྐུ་མངོན་གྱུར་ཤོག །རྩ་བརྒྱུད་བླ་མ་ཡི་དམ་མཁའ་འགྲོའི་ཚོགས། །རང་རིག་བྱང་ཆུབ་སེམས་ཀྱི་རང་རྩལ་ཉིད། །ཆོས་དབྱིངས་ཀུན་ཏུ་བཟང་མོའི་མཁའ་ཀློང་དུ། །ཡེ་ཤེས་རྩལ་ཆེན་རྫོགས་པའི་བཀྲ་ཤིས་ཤོག །ཅེས་བརྗོད་ཅིང་མེ་ཏོག་འཐོར་བ་དང་རོལ་མོའི་སྒྲ་བྱའོ། །མན་ངག་གནད་ཀྱིས་ཡེ་ཤེས་ཞལ། །རང་ངོ་སྤྲོད་ཐབས་རྩལ་དབང་གི། ཆོས་གཞུང་ཆོས་ཉིད་རྗེས་འགྲོའི་དཔལ། བྱ་རྩོལ་མེད་པའི་འཕྲིན་ལས་སོ། །དོན་དམ་བྱང་སེམས་ཀྱི་དབང་སེམས་ལ་བསྐུར་པའི་དཀྱིལ་འཁོར་གྱི་ལེ་ཚན་ནོ། །འདུས་པ་མདོའི་ཡན་ལག་གི་དཀྱིལ་འཁོར་རྣམས་ཀྱི་སྒྲུབ་དཀྱིལ་དངོས་གྲུབ་འདོད་འཇོ་ལས། གསང་དབང་རྫོགས་པའི་ཆུ་བོའི་དཀྱིལ་འཁོར་གཉིས་བཤད་པའི་སྐབས་ཏེ་བཞི་པའོ།། །།

༈ ༀ་སྭ་སྟི། མི་འགྱུར་ཚེ་དབང་བཅོམ་ལྡན་འདས། །འགག་མེད་སྤྲུལ་པའི་ཟློས་གར་གྱིས། །དོན་མཛད་རྡོ་རྗེ་སློབ་དཔོན་ལ། །བཏུད་ནས་འཆི་མེད་སྒྲུབ་ཐབས་བྲི། །འདིར་མཐའ་བརྟེན་ཚེ་དབང་གི་དཀྱིལ་འཁོར་ནི། དྲི་དང་བ་བྱུང་དང་བདུད་རྩིས་ཆག་ཆག་བཏབ་པའི་གཞི་ལ། བྱིན་གྱིས་བརླབས་པའི་ཐིག་ཚོན་གྱིས་དཀྱིལ་འཁོར་ཁྱམས་སྤངས་པའི་གྲུ་བཞི་སྒོ་བཞི་རྟ་བབས་བརྒྱད་མའི་ནང་དུ། རྩ་ཐིག་ལ་ཐུག་པའི་རྡོ་རྗེ་ར་བ་ཟླུམ་བསྐོར་གྱི་དབུས་སུ་པདྨ་འདབ་མ་བརྒྱད་པའི་ལྟེ་བར་ཟླ་གམ་དམར་པོ་ལ་ལོགས་མདུན་བསྟན། ཚོན་ཤར་དཀར། ལྷོ་སེར། ནུབ་སྔོ། བྱང་ལྗང་། རྩིག་པ་འང་ནང་ནས་དམར་དཀར་སེར་སྔོ་ལྗང་བ། ཕྱིའི་ཁོར་ཡུག་པད་རྡོར་འོད་ཕྲེང་རྣམས་སྤྱི་དང་འདྲ་བར་བྲི་ཞིང། ལྷ་གནས་རྣམས་སུ་སོ་སོའི་མཚན་མ་ཇི་ལྟར་རིགས་པ་འགོད། དབུས་སུ་མཉྫིའི་ཁར་རིན་པོ་ཆེའི་བུམ་ཆས་ལྡན། སྨན། འབྲུ། རིན་ཆེན། དྲི། བདུད་རྩི་སྟེ་ལྔ་ཚན་ལྔ་དང་། ཚེ་རྟེན་དུ་འོས་པའི་རྫས་སའི་སྙིང་པོ་གསེར། ཆུའི་ཚྭ། ཤིང་གི་བུར་སྦྲང་། འབྲུའི་ཆང་། རྩིའི་མར་ཏེ་སྙིང་པོ་ལྔའི་བཅུད་ཀྱི་གང་བར་བྱ་ཏེ། བྷཉྫ་མཚན་ལྡན་ལྕང་ལོ་ཅན་གྱིས་ཁ་བཅད་ལ་རྡོ་རྗེའི་གཟུངས་ཐག་གིས་བཏགས་པ་བཞག །རྒྱས་པར་ན་དེའི་ཕྱི་རོལ་དུ་གསང་ཡུམ་བཞིའི་རིན་པོ་ཆེའི་བུམ་པ་དང་། གྲྭ་བཞིར་ལྷ་སྤྱི་ལ་ཡ་མཚན་འབྱུང་བའི་བུམ་པ་ཞེས་པ་ཐོད་པ་མཚན་ལྡན་ནམ་ཁམ་སའི་བུམ་པ་བཞི་འཇོག་པར་གསུང་ནའང་། མ་འབྱོར་ན་དབུས་ཀྱི་བུམ་པ་གཅིག་པུ་ལ་བསྡུས་ཀྱང་མི་འགལ། ཚེ་འབྲང་ནི་གསང་ཡུམ་གྱི་བུམ་པ་བཀོད་ཡོད་ན་བཞི་བྱས་ལ་སོ་སོའི་ཁར་འཇོག་པར་བཤད་ཀྱང་འདིར་བུམ་པ་གཅིག་དུ་བསྡུས་པའི་ཚེ་དཀྱིལ་འཁོར་གྱི་མདུན་དུ་འགོད། ཚེ་རིལ་དང་ཚེ་ཆང་གཉིས་ཚེ་འབྲང་དང་བུམ་བཅུད་ལ་ཚང་ནའང་ཕྱག་ལེན་ལྟར་ལོགས་སུ་བཀོད་པ་རྣམས་པ་གསལ་བས་གཡས་སུ་ཚེ་རིལ། གཡོན་དུ་ཐོད་ཆང་། རྒྱབ་ཏུ་མར་མེ། མཐའ་བསྐོར་དུ་ཞབས་བསིལ་དང་བཞི་བསྣོལ། སྨན་གཏོར་རྣམས་བཤམ། རང་གི་མདུན་དུ་རྩ་བའི་དཀྱིལ་འཁོར་གྱི་ལས་བུམ་དང་། གཞན་ཡང་ཌཱ་དྲིལ། འཐོན་ནས། མདའ་རྒོད་སྒྲོ་མར་དར་ལེ་བརྒན་དང་གསེར་གཡུ་མེ་ལོང་རྣམས་བཏགས་པ་སོགས་ཡོ་བྱད་ཐམས་ཅད་ཚོགས་པར་འདུ་བྱས་ལ། ཁྲུས་དང་ཙནྡན་གྱི་དྲིལ་བགོས་ནས་སྟན་ལ་འདུག་སྟེ། ཆོ་ག་ལ་སྔོན་འགྲོ་ནི། ཚོགས་ཞིང་རྣམས་མཁའ་ཁྱབ་ཏུ་གསལ་བཏབ་ལ། རྡོ་རྗེ་སློབ་དཔོན་སངས་རྒྱས་དཔལ། ཞེས་སོགས་རྒྱུན་བཤགས་ཀྱིས་རྒྱུད་སྦྱངས་ནས། རང་ཉིད་པདྨ་ཧེ་རུ་ཀ་ཡབ་ཡུམ་དུ་གསལ་བའི་ཤངས་ཀྱི་ཧཱུཾ་རིང་དང་སེམས་སྤྲིན་ཁྲོ་མཚོན་འབར་བའི་རྣམ་པར་སྤྲོས་པས་བགེགས་ཐམས་ཅད་ཚར་བཅད། ཚུར་འདུས་པ་བསྲུང་བ འི་གུར་དུ་འཁྲིགས་པར་བསམ་ལ། ཕཊ་ཕཊ་བཛྲ་ཀྲོ་དྷ་ཛྭ་ལ་མཎྜ་ལ། ཧ་ལ་ཧ་ལ། བཛྲ་རཀྵ་ཛྭ་ལ་རཾ། དེ་ནས་མཆོད་རྫས་རྣམས། རཾ་ཡཾ་ཁཾ་གིས་སྦྱངས། སྟོང་པའི་ངང་ལས་མཆོད་སྣོད་དབྱིངས་ཀྱི་ཞིང་ཁམས་བསམ་གྱིས་མི་ཁྱབ་པར་མཆོད་རྫས་ཡེ་ཤེས་ལྔའི་རྣམ་རོལ་ནམ་མཁའ་གང་བར་བསམ་ལ། ན་མཿས་མནྟ་བུདྡྷཱ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། སྨན་གཏོར་རྣམས། སྟོང་པའི་ངང་ལས་སྣོད་བྷཉྫ་འབར་བའི་དབྱིངས་སུ་བཅུད་ཤ་ལྔ་བདུད་རྩི་ལྔ་ཡེ་ཤེས་ལྔའི་ངོ་བོར་གནས་པ་ལ་འཁོར་འདས་ཀྱི་བདུད་རྩི་ཐམས་ཅད་བསྡུས་ནས་ཞུ་ཞིང་འདྲེས་པས་ཡེ་ཤེས་ཀྱི་བདུད་རྩིའི་རྒྱ་མཚོ་འགྱུར་པར་བསམ་ཞིང་། ༀ་ཨཱཿཧཱུཾ། ཞེས་ལན་གསུམ། དེ་ནས་དངོས་གཞི་ལ་གསུམ་ལས། དང་པོ་ཏིང་ངེ་འཛིན་གྱི་དཀྱིལ་འཁོར་བསྐྱེད་ཅིང་བསྐུར་བརླབ་བྱ་བ་ནི། འདི་ལྟར་སྣང་བའི་ཆོས་ཐམས་ཅད་སྐྱེ་བ་མེད་པའི་དབྱིངས་ཡེ་ཇི་བཞིན་པའི་ངང་ལས། དེ་ལྟར་མ་རྟོགས་པ་ལ་འགག་མེད་སྙིང་རྗེ་རིག་པའི་རྩལ་སྣང་ཡེ་ཤེས་ཀྱི་རོལ་པར་ཤར་བ་ལས། དབྱིངས་དང་ཡེ་ཤེས་གཉིས་སུ་མེད་པ་བདེ་བ་ཆེན་པོ་བྱང་ཆུབ་ཀྱི་སེམས་ཨ་ཡིག་དཀར་པོ་འབར་བ། དེ་ལས་ཨེ་ཡཾ་ཝཾ་ལཾ་སུཾ་རཾ། བྷྲུཾ་བི་ཤྭ་བི་ཤུདྡྷེ། ཞེས་ཆོ་འཕྲུལ་གྱི་རང་སྒྲར་གྲགས་པ་ལས་ཡུམ་ལྔའི་མཁའ་ཀློང་རྣམ་པར་དག་པ་འབྱུང་བཞི་རི་རབ་མེའི་འཁོར་ཡུག་དང་བཅས་པའི་དབུས་སུ་ཡེ་ཤེས་རིན་པོ་ཆེ་འབར་བའི་གཞལ་ཡས་ཁང་། གྲུ་བཞི་སྒོ་བཞི་པ་རྟ་བབས་བརྒྱད་དང་ལྡན་པའི་དབུས་སུ་རྡོ་རྗེ་ར་བས་ཟླུམ་པོར་བསྐོར་བའི་ནང་པདྨ་འདབ་མ་བརྒྱད་པ། ལྟེ་བར་ཟླ་གམ་དམར་པོས་མཚན་པ། ཚད་དང་མཚན་ཉིད་ཐམས་ཅད་ཡོངས་སུ་རྫོགས་པ་བདེ་བ་ཅན་གྱི་ཞིང་ཁམས་ལྟ་བུར་གྱུར་པའི་ལྟེ་བ་དང་། ཕྱོགས་ཀྱི་འདབ་མ་བཞིར། རྨ་བྱ། གླང་ཆེན། རྟ་མཆོག །སེང་གེ །ཤང་ཤང་རྣམས་ཀྱིས་བཏེགས་པའི་རིན་པོ་ཆེའི་ཁྲི་པད་ཉིད་ཟླ་བ་སྟེ་ལྔ་བརྩེགས། མཚམས་ཀྱི་པད་འདབ་བཞི་དང་གྲྭ་བཞིར་པད་ཉི་ཟླ་བའི་གདན། གཙོ་བོའི་མདུན་རྒྱབ་གཡས་གཡོན་དང་སྒོ་བཞིར་པད་ཉིའི་གདན་རེ་རེ། སེམས་ཉིད་ཨ་ཡིག་དཀར་པོ་དབུས་ཀྱི་གདན་སྟེང་བབས་པར་གྱུར། ཨཱཾ་ཨཱ་རོ་ལིཀ །པཱཾ་རཱ་ག་ར་ཏི། ཞེས་བརྗོད་པས་བཅོམ་ལྡན་འདས་སྣང་མཐའ་ཚེ་དང་ཡེ་ཤེས་དཔག་ཏུ་མེད་པ་དང་ཡུམ་གོས་དཀར་མོ་གཉིས་ཀ་ཕྱག་གཡས་པས་པདྨ་དམར་པོ་འཛིན་པ། ཕྱོགས་ཀྱི་འདབ་མ་བཞིས་ༀ་ལཱཾ་ཞེས་པས་རྣམ་སྣང་དང་སྤྱན་མ་འཁོར་ལོ། སྭཱ་མཱཾ། རིན་འབྱུང་དང་མཱ་མ་ཀཱི་རིན་པོ་ཆེ། ཧཱུཾ་མཱུཾ། མི་བསྐྱོད་པ་དང་དབྱིངས་ཕྱུག་མ་རྡོ་རྗེ། ཧཱཾ་ཏཱཾ། དོན་གྲུབ་དང་སྒྲོལ་མ་རལ་གྲི། ཡབ་ཡུམ་ཐམས་ཅད་ཕྱག་གཡོན་འཆི་མེད་བདུད་རྩིས་གང་བའི་བུམ་པ་འཛིན་པ། ཡབ་རྣམས་རྫོགས་པའི་སྐྱིལ་ཀྲུང་ལ་ཡུམ་རྣམས་པདྨའི་སྐྱིལ་ཀྲུང་གིས་འཁྲིལ་བ། གཙོ་བོའི་ཕྱོགས་བཞིའི་གདན་ལ་མདུན་ནས་གཡས་བསྐོར་དུ། ལཱཾ། རྒྱལ་མཚན་མཆོག་ལྡན་མ་རིན་པོ་ཆེའི་རྒྱལ་མཚན་དང་ལྕགས་ཀྱུ། མཱཾ། རིན་ཆེན་གཏེར་འཛིན་མ་གཏེར་གྱི་བུམ་པ་དང་ཞགས་པ། པཱཾ། དབང་བསྐུར་ལྡན་མ་དབང་བསྐུར་བའི་བུམ་པ་དང་ལྕགས་སྒྲོག །ཏཱཾ། དཔལ་ལྡན་མཛོད་ལྡན་མ་རིན་པོ་ཆེའི་ཟ་མ་ཏོག་དང་དྲིལ་བུ། ཀྵིཾ་ཧཱུཾ། ཏྲཾ་ཏྲཾ། ཧྲཱིཾ་ཧྲཱིཾ། ཛྲཱིཾ་ཨཾ་ཞེས་པས་མཚམས་ཀྱི་འདབ་མ་བཞིར་ས་སྙིང་སོགས་ཐུགས་ཀྱི་སེམས་དཔའ་བཞི། ཡུལ་གྱི་སེམས་མ་བཞི་དང་བཅས་པ། མཻ་ཛཿ ཐླྷིཾ་ཧཱུཾ། ཧཱུཾ་བཾ། མཱུཾ་ཧོཿ ཞེས་པས་གྲྭ་བཞིར་བྱམས་པ་སོགས་དབང་པོའི་སེམས་དཔའ་བཞི། དུས་བཞིའི་སེམས་མ་དང་བཅས་པ། སེམས་དཔའ་ཡབ་ཡུམ་ཐམས་ཅད་ཀྱང་གཡས་རང་རང་གི་ཕྱག་མཚན་དང་གཡོན་ཚེའི་བུམ་པ་འཛིན་པ། ཡབ་རྣམས་གཡས་བརྐྱང་བའི་ཕྱེད་སྐྱིལ་ལ་གཡོན་ནས་སོ་སོའི་ཡུམ་གྱིས་འཁྱུད་པ། ཛཿཧུཾ་བཾ་ཧོཿ ཞེས་པས་སྒོ་བཞིར་ལྕགས་ཀྱུ་མ་སོགས་གཡས་རང་རྟགས་དང་གཡོན་ཚེ་བུམ། ལྷ་མོ་བརྒྱད་པོ་གཡོན་བརྐྱང་བའི་ཕྱེད་སྐྱིལ་གྱིས་བཞུགས་པ། གཙོ་འཁོར་ཐམས་ཅད་ཀྱང་སྐུ་མདོག་དཀར་པོ་གསལ་འཚེར་འབར་བ། ཞི་བའི་ཉམས་དགུས་རྒྱས་ཤིང་། དར་གྱི་ཆས་གོས་ལྔ་དང་རིན་པོ་ཆེའི་རྒྱན་བརྒྱད་ཀྱིས་མཛེས་པར་སྤྲས་པའོ། །མགོ་བོའི་གནས་ལྔར་རིགས་ལྔའི་དབང་རྒྱ་འཆིང་བཞིན་དུ། ༀ་མ་ཧཱ་པྲ ཏྱ་བེཀྵ་ཎཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ་྅་ཧཾ། དེ་བཞིན་དུ། ཨཱ་ད ཪྴ། ས་མ་ཏཱ། ཤཱུ་ནྱ་ཏཱ། ཀྲྀ་ཏྱཱ་ནུཥྛཱ་ན། ཞེས་སྤྱི་བོའི་གནས་ལྔར་དེ་བཞིན་གཤེགས་པ་ལྔ་རྗེས་ཆགས་ཀྱིས་ཞུ་བའི་ཡེ་ཤེས་ལྔའི་ཆུ་རྒྱུན་གྱིས་དབང་བསྐུར་བས། ཉོན་མོངས་པ་ལྔ་སྦྱངས། ཕུང་པོ་ལྔ་རིགས་ལྔའི་སངས་རྒྱས་སུ་གནས་བསྒྱུར། ཆུ་ལྷག་མ་སྤྱི་བོར་བརྟན་པ་ཡོངས་སུ་གྱུར་པ་ལས་དེ་བཞིན་གཤེགས་པ་རིགས་ལྔས་དབུ་བརྒྱན་པར་གྱུར། སྤྱི་མགྲིན་སྙིང་གར་ཟླ་བ་པདྨ་ཉི་མ་ལ་གནས་པའི་ༀ་ཨཱཿཧཱུཾ། འཕྲོ་འདུས་ཡོངས་སུ་གྱུར་པ་ལས་རྣམ་སྣང་། འོད་དཔག་མེད། མི་བསྐྱོད་པ་རྣམས་ཀྱིས་རྒྱས་བཏབ་པར་བསམ་ལ། རྡོ་རྗེའི་ཕྱག་རྒྱ་གནས་གསུམ་དུ་གཏུག་ཅིང་། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཁོ་྅་ཧཾ། དེ་བཞིན་དུ། ཝཱ་ཀ་དང་ཙིཏྟ་འགྲེ། གཉིས་པ་རང་བཞིན་གྱི་དཀྱིལ་འཁོར་དང་གཉིས་སུ་མེད་པར་བྱས་པ་ལ་མཆོད་ཅིང་བསྟོད་པ་ནི། ག་གོ་ནའི་ཕྱག་རྒྱ་བཅིངས་ལ། རང་གི་སྙིང་གའི་འོད་ཟེར་གྱིས་བསྐུལ་བས་དེ་བཞིན་གཤེགས་པ་ཐམས་ཅད་བདེ་བ་ཆེན་པོའི་ངང་ལས་ཆོས་འཕྲུལ་གྱི་རོལ་པ་ཡེ་ཤེས་ཀྱི་འཁོར་ལོའི་རྣམ་པར་བཛྲ་ས་མཱ་ཛཿས་སྤྱན་དྲངས། ཛཿཧཱུཾ་བཾ་ཧོཿས་དགུག་གཞུག་བཅིངས་མཉེས་ཀྱིས་དབྱེར་མེད་གྱུར་པ་ལ། གཙོ་བོའི་ཐུགས་ཀ་ནས་རང་ཉིད་གཙོ་བོ་གཉིས་པས་རྣམ་པས་ཐོན་ནས་དཀྱིལ་འཁོར་གྱི་ཤར་སྒོའི་ཐད་དུ་གནས་པས་མཆོད་ཅིང་བསྟོད་པར་བསམ་ཞིང་། ༀ་ན་མ་ཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཥེ་བྷྱཿསརྦ་ཏཏྑཾ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། ༀ་ཨཱ་ཧ་ར་ཨཱ་ཧ་ར་སརྦ་བིདྱཱ་དྷ་ར་པཱུ་ཛི་ཏེ་ན་མཿ་ས་མནྟ་བུདྡྷཱ་ནཱཾ་ག་ག་ན་ཁཾ་ས་མ་ཡེ་སྭཱ་ཧཱ། ༀ་ཤྲཱི་བཛྲ་རཱ་ག་ངྷཱུ་པེ་ངྷཱུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་ག་ན། ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཨི་དཾ་པུཥྤེ་དྷཱུ་པེ་བ་ལིཾ་པྲ་ཏཱི་ཙྪ་ཧོཿཁ་རཾ་ཁཱ་ཧི། ཞེས་ཀུན་བཟང་ཞབས་བསིལ་བཞི་བསྣོལ་སྨན་གཏོར་རྣམས་ཀྱིས་མཆོད་ནས། བསྟོད་པ་ནི། ཧྲཱིཿ བཅོམ་ལྡན་མགོན་པོ་ཚེ་དཔག་མེད། སྒྲིབ་པའི་དྲི་མ་མ་ལུས་སེལ། །མཁའ་དང་མཉམ་པའི་སྐུ་མངའ་བ། །རྡོ་རྗེའི་སྐུ་ལ་ཕྱག་འཚལ་ལོ། །མཆོག་ཏུ་རྣམ་པར་དག་པའི་གསུང་། །གསུང་རབ་དམ་པ་ཡི་གེ་མེད། །བརྗོད་དུ་མེད་ཅིང་སྤྲོས་བྲལ་བ། །རྡོ་རྗེའི་གསུང་ལ་ཕྱག་འཚལ་ལོ། །ཤིན་ཏུ་རྣམ་པར་དག་པའི་ཐུགས། །ཆགས་མེད་ཡེ་ཤེས་གཉིས་མཁྱེན་པ། །སྟོང་པ་ཉིད་ཀྱི་ཡེ་ཤེས་ཀྱི། །རྡོ་རྗེའི་ཐུགས་ལ་ཕྱག་འཚལ་ལོ། །ཞེས་བསྟོད་ནས། དངོས་གྲུབ་གསོལ་བ་ནི། ཧོཿ ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདག་ཉིད་བཅོམ་ལྡན་འདས་དཔལ་སྣང་བ་མཐའ་ཡས་ལ་སོགས་པ་རིགས་ལྔའི་ཚེ་དང་ཡེ་ཤེས་དཔག་ཏུ་མེད་པ་འཁོར་དང་བཅས་པ་ཐམས་ཅད་གསན་ཅིང་དགོངས་སུ་གསོལ། ཁྱེད་རྣམས་ལ་ཕྲིན་ལས་སུ་གསོལ་བ་ནི། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་ཡོན་ཏན་དང་དངོས་གྲུབ་ཀྱི་སྐལ་བ་གང་མཆིས་པ་ཐམས་ཅད་དང་། ཁྱད་པར་དུའང་འགྱུར་བ་མེད་པའི་ཚེ། འཆི་བ་མེད་པའི་སྲོག །རྒུད་པ་མེད་པའི་ལང་ཚོ་སོགས་སྐྱེ་ཤི་མེད་པ་རྡོ་རྗེའི་ཚེ་དང་ཡེ་ཤེས་ཀྱི་དངོས་གྲུབ་གང་ལགས་པ་ཐམས་ཅད་སྔོན་གྱི་ཐུགས་དམ་ལས་མ་འདའ་བར་དུས་ད་ལྟ་ཉིད་དུ་སྩལ་དུ་གསོལ། གསུམ་པ་ཚེ་སྒྲུབ་པའི་ཆོ་ག་ལ་བཞི་སྟེ། ཚེ་རྟེན་བསྐྱེད་པ། དགུག་ཅིང་བསྟིམ་པ། སྦ་ཞིང་རྒྱས་གདབ་པ། མ་གྲུབ་ན་སྤོགས་པའི་ཆོ་གའོ། །དང་པོ་ནི། རང་ཉིད་དཀྱིལ་འཁོར་གྱི་གཙོ་བོ་དང་གཉིས་སུ་མེད་པར་གྱུར་པ་ལས། ཕཊ་ཛཿ ཞེས་པས། བུམ་པའི་དཀྱིལ་འཁོར་ལོགས་སུ་ཕྱེ་ནས་མདུན་གྱི་ནམ་མཁར་བཞུགས་པར་གྱུར། བདག་ཉིད་པདྨ་ཚེ་དཔག་མེད་དུ་གསལ་བའི་ཐུགས་ཀར་ཉི་ཟླའི་གའུ་ཁ་སྦྱོར་གྱི་གཞལ་ཡས་ཁང་གི་དབུས་སུ་ཨཱ་ཡུཿ བྱང་ཆུབ་སེམས་ཀྱི་རང་བཞིན་ཐིག་ལེ་དམར་པོའི་རྣམ་པར་འཁྱིལ་བ་གསལ་འཚེར་འོད་འབར་བར་བསམ་མོ། །གཉིས་པ་ལ་གཉིས་ཀྱི་དང་པོ་ཚེ་དགུག་པ་ནི། རང་གི་ཐུགས་ཀའི་ཚེ་རྟེན་ལས་འོད་ཟེར་གསང་ཡུམ་ཚེ་འཛིན་མ་བཞི་དང་། དེ་ལས་ཀྱང་དཀྱིལ་འཁོར་གྱི་ལྷ་ཐམས་ཅད་ལ་འཕྲོས་པས་རིམ་པར་བསྐུལ་བའི་འོད་ཟེར་ཕྱིར་སོང་སངས་རྒྱས་ཀྱི་ཞིང་ཐམས་ཅད་ལ་ཁྱབ་པས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཐུགས་རྗེའི་ནུས་མཐུ་དང་། ཁྱད་པར་ནུབ་ཕྱོགས་པདྨ་དབང་གི་ཞིང་ཁམས་ན་བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པ་འཁོར་དང་བཅས་པའི་ཐུགས་ཀར་ཕོགས་པས་ཐུགས་དམ་བསྐུལ་ཏེ། དཔལ་བེའུ་ཉི་ཟླའི་གའུ་ནས་བྱང་ཆུབ་སེམས་ཀྱི་ཨཱ་ཡུཿདཀར་དམར་འོད་ཀྱི་རྣམ་པར་གསལ་ཞིང་འབར་བའི་རང་བཞིན་ཅན་བསྡུས་ཏེ་བདག་དང་བུམ་ནང་གི་ལྷའི་ཐུགས་ཀར་ཐིམ། ཡང་འོད་ཟེར་འཕྲོས་འཇིག་རྟེན་གྱི་ཁམས་ཐམས་ཅད་ལ་ཕོག་པས་རྡོ་ཁབ་ལེན་གྱིས་ལྕགས་བསྡུ་བ་ལྟར། ཕྱི་འབྱུང་བ་བཞིའི་མདངས་དང་བཅུད། ནང་འགྲོ་དྲུག་སེམས་ཅན་མ་ལུས་པའི་ཚེ་དང་བསོད་ནམས་གཟི་བྱིན་ཐམས་ཅད་འཆི་མེད་ཀྱི་བདུད་རྩི་འོད་ཟེར་དཀར་དམར་གསལ་འབར་གྱི་རྣམ་པར་བསྡུས་ཏེ། བུམ་ནང་གི་ལྷའི་ཐུགས་ཀ་དང་། བདག་གི་སྙིང་གའི་ཚེ་རྟེན་ལ་ཐིམ་པར་བསམ་ཞིང་། གཟུངས་ཐག་ལ་འཇུས་ཏེ། ཨཱཾ་ༀ་སྭཱ་ཧཱུཾ་ཧཱ། བྷྲཱུཾ་བཛྲ་ཨཱ་ཡུ་ཥེ་ཧཱུཾ་ཨ། ཞེས་ཅི་ནུས་བཟླ་ཞིང་། སྐབས་སྐབས་སུ་ཚེའི་ཕོ་ཉ་བསྐུལ་ཞིང་བཏང་བ་ནི། བདག་གི་ཐུགས་ཀའི་འོད་ཀྱིས་དཀྱིལ་འཁོར་གྱི་ལྷ་ཚོགས་རྣམས་བསྐུལ་བས་སོ་སོ་ལས་རང་འདྲ་བའི་སྤྲུལ་པ་གྲངས་མེད་པ་སྤྲོས་ཏེ། འཁོར་འདས་སྣོ་བཅུད་ཀྱིས་མདངས་དང་ཚེ་བཅུད་བཀྲག་དང་གཟི་བྱིན་བསོད་ནམས་དང་ཡེ་ཤེས་ཐམས་ཅད་བསྡུས་ནས་བདག་དང་སྒྲུབ་རྫས་རྣམས་ལ་ཐིམ་པར་བསམ་ནས། མདའ་དར་གཡབ་ཅིང་སྤོས་རོལ་དང་བཅས་པས་། ཧྲཱིཿ ནུབ་ཕྱོགས་པདྨ་དབང་གི་ཞིང་ཁམས་ནས། །བཅོམ་ལྡན་རིགས་ལྔ་ཡབ་ཡུམ་ཚེ་དཔག་མེད། །སེམས་དཔའ་སེམས་མ་སྒོ་མར་བཅས་རྣམས་ཀྱིས། །ཚེ་དང་ཡེ་ཤེས་དགུག་པའི་ལས་མཛོད་ཅིག །ༀ་ནྲྀ་བྷྲཱུཾ་ཧཱུཾ་ཨཱ་ཡུ་ཥེ་ཛཿཛཿཧཱུཾ་ཨཱཿ འགྲོ་བ་ཡོངས་ཀྱི་ཚེ་ལ་མངའ་མཛད་མ། །དཀར་མོ་མགྱོགས་མ་ཞི་བྱེད་འོད་འཕྲོའི་ཚོགས། །ཚེ་དང་གཟི་བརྗིད་འགུགས་པའི་ལས་མཛད་མ། །རྡོ་རྗེ་ཚེ་མཆོག་འགུགས་པའི་ལས་མཛོད་ཅིག །ༀ་ནྲྀ་བྷྲཱུཾ་ཧཱུཾ་ཨཱ་ཡུ་ཥེ༴ འགྲོ་བ་ཡོངས་ཀྱི་ཚེ ༴ སྔོན་མོ་མགྱོགས་མ་རྒྱས་མཛད་འོད༴ ཚེ་དང་གཟི་བརྗིད་འགུགས་པའི༴ རྡོ་རྗེ་ཚེ་མཆོག་འགུགས་པའི༴ ༀ་ནྲྀ་བྷྲུཾ་ཧཱུཾ་ཨཱ་ཡུ་ཥེ༴ འགྲོ་བ་ཡོངས་ཀྱི་ཚེ་ལ༴ དམར་མོ་མགྱོགས་མ་དབང་བྱེད། །ཚེ་དང་གཟི་བརྗིད༴ རྡོ་རྗེ་ཚེ་མཆོག༴ ༀ་ནྲྀ་བྷྲཱུཾ་ཧཱུཾ་ཨཱ༴ འགྲོ་བ་ཡོངས་ཀྱི་ཚེ་ལ༴ ལྗང་མདོག་མགྱོགས་མ་དྲག་བྱེད༴ ཚེ་དང་གཟི་བརྗིད་འགུགས༴ རྡོ་རྗེ་ཚེ་མཆོག་འགུགས་པའི་ལས་མཛོད་ཅིག །ༀ་ནྲྀ་བྷྲཱུཾ་ཧཱུཾ་ཨཱ་ཡུ་ཥེ་ཛཿཛཿཧཱུཾ་ཨཱཿ གཉིས་པ་ཚེ་བསྟིམ་པ་ནི། ཚེ་དཔག་མེད་ཀྱི་ཐུགས་དཔལ་གྱི་བེའུ་ཉི་ཟླའི་གའུ་ནས་འཆི་བ་མེད་པའི་བདུད་རྩིའི་དྭངས་མ་དམར་གསལ་འབར་བའི་རྣམ་པར་བྱུང་བ་བདག་གི་སྙིང་གའི་ཚེ་རྟེན་ལ་སིབ་ཀྱིས་ཐིམ་པས་བཀྲག་མདངས་གཟི་བྱིན་འབར་བའི་འོད་ཀྱིས་ལུས་ནང་ཐམས་ཅད་མེར་ཁྲིག་གིས་གང་བས་ཚེའི་འགལ་རྐྱེན་ཐམས་ཅད་བསལ་ནས་འཆི་བ་མེད་པ་རྡོ་རྗེ་ཚེའི་དངོས་གྲུབ་ཐོབ་པར་བསམ་ཞིང་། ཧྲཱིཿ ནུབ་ཕྱོགས་ཚེ་ཡི་དབྱིངས་མཆོག་གི །པདྨ་དབང་གི་ཞིང་ཁམས་སུ། །བྱམས་ལྡན་ཡེ་ཤེས་ཚེ་དཔག་མེད། །ཐུགས་ཀྱི་དཔལ་བེའུ་རིན་པོ་ཆེ། །ཉི་ཟླ་འོད་ཀྱི་གའུ་ན། །བྱང་ཆུབ་སེམས་ཀྱི་ཨཱཿཡུ་འབར། །དམར་གསལ་འབར་བའི་ཚེ་མཆོག་དེ། རིག་འཛིན་རྣལ་འབྱོར་རྣམས་ལ་འཕྲོ། །སྤྲོས་པས་དགུ་ལུང་དམ་པ་ཡིས། །ཙིཏྟའི་སྦུབས་ལ་བཀྲག་ཏུ་བསླན། །ཞེས་བསྐུལ་ནས། སྤྱི་བོའི་གནས་ལྔར་བུམ་ཆུ་གཏིག་ཅིང་། རིགས་ལྔ་སོ་སོའི་དབང་རྒྱ་འཆིང་བཞིན་དུ། ཨཱཾ་ཨ་རོ་ལིཀ་པཱཾ་རཱ་ག་ར་ཏི་བཛྲ་ཨཱ་ཡུ་ཥེ་ཨ་བྷི་ཥིཉྩ་ཧཱུཾ། ༀ་ཛི་ན་ཛིཀ་ལཱཾ་དྭེ་ཥ་ར་ཏི་བཛྲ་ཨཱ་ཡུ༴ སྭཱ་རཏྣ་དྷྲྀཀ་མཱཾ་མོ་ཧ་ར་ཏི་བཛྲ་ཨཱ་ཡུ༴ ཧཱུཾ་བཛྲ་དྷྲྀཀ་མཱུཾ་དྷཱ་ཏྭེ་ཤྭ་རཱི་བཛྲ་ཨཱ་ཡུ༴ ཧཱཾ་པྲ་ཛྙཱ་དྷྲྀཀ་ཏཱཾ་བཛྲ་ར་ཏི་བཛྲ་ཨཱ་ཡུ་ཥེ་ཨ་བྷི་ཥིཉྩ་ཧཱུཾ། གསུམ་པ་ལ་གཉིས་ཀྱི་དང་པོ་ཚེ་སྦ་བ་ནི། དེ་ལྟར་བྱང་ཆུབ་སེམས་ཀྱི་ཚེ་བསྟིམ་པས། བསྒྲུབ་བྱ་རང་ཉིད་དང་། བསྟིམ་བྱ་ཚེ་དང་བསོད་ནམས་ཡེ་ཤེས་ཀྱི་རྒྱུད་གསུམ་སྟེ། དེ་ཐམས་ཅད་བྱང་ཆུབ་སེམས་ཀྱི་རང་བཞིན་གདོད་ནས་མ་སྐྱེས་པའི་ཆོས་ཉིད་ཡིན་པས། དེ་ཉིད་ལ་སངས་རྒྱས་ཀྱིས་ཀྱང་རྐུ་ཞིང་འཕྲོག་པའི་གནས་མེད་དེ། དབྱིངས་དང་ཡེ་ཤེས་གཉིས་སུ་མེད་པའི་བྱང་ཆུབ་ཀྱི་སེམས་སྤྲོས་བྲལ་འཆི་མེད་གཉུག་མའི་རང་བཞིན་དུ་དག་པར་མོས་ལ། ཧྲཱིཿ ཚེ་ཡི་ངོ་བོ་རྒྱུད་གསུམ་པོ། །སྲོག་གི་ངོ་བོར་གཞལ་ཡས་ཁང་། །ལེ་བརྒན་འབར་བའི་དཀྱིལ་འཁོར་དུ། །ཨཱ་ཡུཿདམར་པོའི་འོད་འཕྲོས་པས། །འཆི་བ་མེད་པའི་སྲོག་བཙུགས་ཏེ། །འགྱུར་བ་མེད་པའི་གཡུང་དྲུང་ཡིན། །ཆོས་ཉིད་དབྱིངས་སུ་ཚེ་སྦས་པས། །དུས་གསུམ་རྒྱལ་བ་དགྲར་ལངས་ཀྱང་། །དེ་ལ་བཟུང་ཞིང་བརྟག་ཏུ་མེད། །གཉིས་པ་རྒྱས་གདབ་པ་ནི། འཆི་མེད་གཉུག་མའི་རང་བཞིན་དུ་རྣམ་པར་དག་པའི་ངང་ལས། དེའི་ཕྱག་རྒྱར་གསལ་བ་ནི། རང་གི་སྙིང་གར་ཟླ་གམ་དབང་གི་དཀྱིལ་འཁོར། དེའི་སྒོར་རྟ་མགྲིན་ཡབ་ཡུམ་རྒྱ་གྲམ་དང་བུམ་པ་འཛིན་པས་བསྲུང་བའི་ལས་མཛད་པ། ཟླ་གམ་གྱི་ནང་ན་རིན་པོ་ཆེ་དཔལ་བེའུ་ཟུར་བརྒྱད་པ་འབར་བ། དེའི་སྟེང་དུ་ཉི་ཟླའི་གའུ་ཁ་སྦྱོར། ཡས་མས་ནས་རྡོ་རྗེ་རྒྱ་གྲམ་གཉིས་ཀྱིས་གཏམས་པའི་སྟེང་འོག་གི་རྭ་རྩེ་འོད་ཟེར་གྱི་ཐག་པས་བཅིངས་པ། ཉི་ཟླའི་ནང་དུ་གུ་ཧྱ་གསེར་གྱི་རྡོ་རྗེ་མཚོན་གང་བ། དེའི་ལྟེ་བར་ༀ་ཨཱཿཧཱུཾ་དམར་པོ་འོད་འབར་བ་རྣམས་ཀྱིས་རྒྱས་བཏབ་པར་བསམ་ཞིང་། བྱང་ཆུབ་སེམས་ཀྱི་ཨཱ་ཨུཿདེ། སྐྱེ་མེད་དབྱིངས་སུ་སྦས་ནས་ཀྱང་། ཐ་མར་ཕྱག་རྒྱ་བདུན་གྱིས་གདབ། དང་པོ་སྐུ་གསུང་ཐུགས་ཀྱི་རྒྱ། །གཉིས་པ་གནོན་པའི་རྒྱ་གྲམ་རྒྱ། །གསུམ་པ་རྟ་མཆོག་དཔལ་གྱི་རྒྱ། །བཞི་པ་རིན་ཆེན་དཔལ་བེའུ་སྟེ། །ལྔ་པ་གསེར་གྱི་གུ་ཧྱའོ། །དྲུག་པ་ཟླ་གམ་དམར་པོ་ལ། །བདུན་པ་ཉི་ཟླའི་གའུ་འབར། །རྒྱ་བདུན་རིམ་པས་བཏབ་པ་ལས། །སུས་ཀྱང་འདའ་བར་མི་ནུས་སོ། །ཞེས་བརྗོད་དོ། །བཞི་པ་མ་གྲུབ་ན་སྤོགས་པའི་ཆོ་ག་ནི། ཡུན་རིང་བསྒྲུབས་ནས་མ་འགྲུབ་ན་སླར་ཁྲོ་དཀྱིལ་དུ་བྲི་སྒོམ་ཞལ་བསྒྱུར་བ་ཡིན་པས། ཤར་ཆོག་ཙམ་ལ་མ་སྒོམས་ཀྱང་ཆོག་མོད། དེ་ལྟར་ནའང་ལག་ལེན་གྱི་རྣམ་བཞག་མི་ནུས་པའི་ཕྱིར། བྲི་བ་མ་གྲུབ་ཀྱང་ཏིང་ངེ་འཛིན་གྱིས་ཞལ་བསྒྱུར་ཙམ་བྱེད་པར་སྤྲོ་ན། ཧཱུཾ་ཧ་ཧེ་ཕཊ་ཧཱུཾ། ཞེས་་པས་ཞི་བའི་ལྷ་ཚོགས་རྣམས་སྐད་ཅིག་གིས་ཁྲོ་བོའི་སྐུར་གྱུར་པ་ནི། དབུས་སུ་པདྨ། ཤར་དུ་བུདྡྷ། ལྷོར་རཏྣ། ནུབ་ཏུ་བཛྲ། བྱང་དུ་ཀརྨ་ཧེ་རུ་ཀ་ཡབ་ཡུམ་ཐམས་ཅད་གཡས་རིགས་ལྔའི་རང་རྟགས་དང་གཡོན་ཚེ་བུམ། སེམས་དཔའ་བརྒྱད་གནས་མར་གྱུར་ནས་པད་འདབ་དང་གྲྭའི་གཡས་ཕྱོགས་དང་། སེམས་མ་རྣམས་ཡུལ་མ་བརྒྱད་དུ་གྱུར་ནས་གནས་མ་རེ་རེའི་གཡོན་དུ་བཞུགས་པ། སྒོ་བཞིར་རྟ་གདོང་མ་སོགས་དང་། གཙོ་བོའི་ཕྱོགས་བཞིར་གསང་ཡུམ་ཁྲོ་མོ་བཞི་རྣམས་གཡས་སོ་སོའི་ཕྱག་མཚན་དང་། གཡོན་ཚེ་བུམ་འཛིན་པ། གཙོ་འཁོར་ཐམས་ཅད་ཀྱང་སྐུ་མདོག་དམར་པོ་མེའི་ཕུང་པོ་ལྟ་བུ་ཁྲོ་གཏུམ་བཟོད་པར་དཀའ་བའི་གཟི་བྱིན་འབར་བར་གྱུར་པ་ལས། ཕཊ་ཛཿས་བུམ་པའི་དཀྱིལ་འཁོར་ཀྱང་མདུན་དུ་ཕྱེ་ནས། བདག་ཉིད་པདྨ་ཧེ་རུ་ཀའི་ཐུགས་ཀར་ཚེ་རྟེན་གསལ་བ་ལས། འོད་ཟེར་ཉི་མའི་གདུང་བྱེད་ལྟ་བུ་ཚ་ཞིང་རྩུབ་པའི་རྩེ་ལས་དབང་གི་ལྷ་མོ་ཙཎྜ་ལཱི་དམར་མོ་གཡས་ལྕགས་ཀྱུ་དམར་པོ་འབར་བ་དང་། གཡོན་ཚེའི་སྣོད་རིན་པོ་ཆེའི་ཟ་མ་ཏོག་དཀར་པོ་ཐོགས་པ་དཔག་ཏུ་མེད་པ་སྤྲོས། ནམ་མཁའི་ཁམས་ཐམས་ཅད་ཁེངས་པས། རི་རབ་བཤིག །རྒྱ་མཚོ་དཀྲུགས། ས་གཞི་དྲལ་ཏེ། སྣོད་བཅུད་ཀྱི་ཚེ་དང་གཟི་བྱིན་ཐམས་ཅད་དང་། ཁྱད་པར་འཆི་བདག་གཤིན་རྗེ་ལ་སོགས་པའི་གདོན་བགེགས་ཐམས་ཅད་ཀྱི་ལག་ནས་ཚེ་བཅུད་དང་གཟི་བྱིན་འོད་དམར་གསལ་གྱི་རྣམ་པར་འཕྲོགས་པ་གཡོན་པའི་ཟ་མ་ཏོག་ཏུ་བསྡུས་ཏེ། རང་དང་བུམ་པ་ཚེའི་གཞལ་ཡས་ཁང་ལ་ཐིམ་པར་བསམ་ཞིང་། ཧཱུཾ་ཧ་ཧེ་ཕཊ་ཧཱུཾ། བྷྲཱུཾ་བཛྲ་ཨཱཿཡུ་ཥེ་ཧཱུཾ་ཨ། ཞེས་བཟླ་ཞིང་། ཚེའི་ཕོ་ཉ་བཏང་བ་ནི། ཧྲཱིཿ འཇིགས་བྱེད་འདས་པའི་དུས་ན་མངོན་བྱུང་བའི། །གདུག་པ་འདུལ་ཕྱིར་དུས་ལས་མི་འདའ་བ། །དཔལ་ཆེན་ཁྲག་འཐུང་རིགས་ལྔ་འཁོར་བཅས་ཀྱིས། །ཚེ་དང་ཡེ་ཤེས་འགུགས་པའི་ལས་མཛོད་ཅིག །ༀ་ནྲྀ་བྷྲཱུཾ་ཧཱུཾ་ཨཱ་ཡུ་ཥེ་ཛཿཛཿཧཱུཾ་ཨ། ཡེ་ཤེས་ཁྲོ་བོ་འབར་བ་ཡི། །ཐུགས་ཀྱི་དཔལ་བེའུའི་འོད་ཟེར་ལས། དབང་གི་ལྷ་མོ་མང་པོ་སྤྲོས། །ཟ་མ་ཏོག་དང་བཅས་པ་ཡི། །ལྕགས་ཀྱུ་དཀར་དམར་ལག་ན་ཐོགས། །ཁྱོད་ཀྱིས་འགྲོ་དྲུག་ཐམས་ཅད་ཀྱི། །ཚེ་དང་གཟི་བྱིན་ཐམས་ཅད་འཕྲོགས། །ཟ་མ་ཏོག་ཏུ་བསྡུས་ནས་ཀྱང་། །སྒྲུབ་མཆོག་བདག་ལ་བསྟིམ་པར་མཛོད། །མི་འགྱུར་ཚེ་ཡི་དངོས་གྲུབ་སྩོལ། །ༀ་བཛྲ་ཙཎྜ་ལཱི་ཧ་ཨོཾ་ནྲྀ་བྷྲཱུཾ་ཧཱུཾ་ཨཱ་ཡུ་ཥེ་ཛཿཛཿཧཱུཾ་ཨ། ཞེས་བཀུག་ནས་ཚེ་བསྟིམ་པ་མན་ཆད་སྔར་བཞིན་བྱ་བ་ཡིན་ནོ། །དེ་ལྟར་ཁྲོ་བོར་བསྒྱུར་མི་བསྒྱུར་གང་ལྟར་ཡང་སྦ་ཞིང་རྒྱས་བཏབ་པ་ཡན་སོང་བ་དང་། བར་འདིར་འདས་མ་འདས་ཀྱི་གཏོར་མ་བཏང་ཞིང་། དེ་ནས་དབང་ཆོག་ལྟར་ཚེའི་དབང་བསྐུར་རོ། །རྗེས་ཆོག་ནི། །མཆོད་པ་ཁ་གསོས་ཏེ་བྱིན་གྱིས་བརླབས་ནས། ཀུན་བཟང་། ཞབས་བསིལ། བཞི་བསྣོལ་གྱིས་མཆོད། བསྟོད་པར་འོས་པ་ཐམས་ཅད་ལ། །ཞེས་སོགས་ཀྱིས་བསྟོད། ཡིག་བརྒྱ་བཟླ་ཞིང་། མ་རྙེད་ཡོངས་སུ་སོགས་ཀྱིས་བཟོད་པར་གསོལ། རས་བྲིས་ཡིན་ན། འདིར་ནི་གཟུགས་དང་སོགས་ཀྱིས་བརྟན་བཞུགས་བྱ། རྡུལ་ཚོན་གཤེགས་པའི་ཚེ། ༀ། ཁྱེད་ཀྱིས་སེམས་ཅན་སོགས་ཀྱིས་ཡེ་ཤེས་པ་གཤེགས། དམ་ཚིག་པ་རང་གི་ཐུགས་ཀའི་འོད་ཀྱིས་སྣོད་བཅུད་ཐམས་ཅད་སྦྱངས་ནས་གཞལ་ཡས་ཁང་ལ་ཐིམ། དེ་འཁོར་རྣམས་ལ། འཁོར་རྣམས་གཙོ་བོ་ཡབ་ཡུམ་ལ། ཡུམ་ཡབ་ལ། དེ་ཐུགས་ཀའི་ཐིག་ལེ་ལ། དེ་ཡང་མི་དམིགས་པའི་དབྱིངས་སུ་ཐིམ་པར་བསམ་ནས། སྔར་ཁྲོ་བོར་མ་བསྒྱུར་ནམ། ཨཱཾ་ཨཱ་རོ་ལིཀ །ཞེས་དང་། བསྒྱུར་ན། ༀ་པདྨ་ཤྲཱི་ཧེ་རུ་ཀ་ཧཱུཾ། ཞེས་པས་ཐུན་མཚམས་ཀྱི་ལྷར་ལངས་ཏེ། གོ་ཆ་བགོ་བ་ནི། རང་གི་སྤྱི་བོར་ༀ། མགྲིན་པར་ཨཱཿ སྙིང་གར་ཧཱུཾ། བཛྲ་ཀཱ་ཝཱ་ཙི་རཀྵ་ཧཾ། ཞེས་བརྗོད་པས། ལུས་རྡོ་རྗེའི་གོ་ཆས་བཞུ་ལུགས་སུ་གཡོགས་པས་སྒོ་གསུམ་རྡོ་རྗེ་གསུམ་དང་དབྱེར་མེད་དུ་བཅིངས་པར་བསམ་མོ། །དེ་ནས་བསྔོ་བ་ནི། འདིས་མཚོན་དུས་གསུམ་དགེ་བའི་མཐུས། །འགྲོ་ཀུན་འཆི་མེད་རྡོ་རྗེའི་གནས། །བཅོམ་ལྡན་ཚེ་དཔག་མེད་མགོན་གྱི། །གོ་འཕང་མྱུར་དུ་ཐོབ་པར་ཤོག །བཀྲ་ཤིས་ནི། ༀ། བྱིན་རླབས་བདུད་རྩིའི་ཆར་འབེབས་པའི། །རྩ་བརྒྱུད་བླ་མའི་བཀྲ་ཤིས་ཤོག །ཚེ་དང་ཡེ་ཤེས་དཔག་མེད་གཏེར། །སྣང་བ་མཐའ་ཡས་བཀྲ་ཤིས་ཤོག །ཡེ་ཤེས་བཞི་ཡི་རང་བཞིན་ཅན། །རིགས་བཞི་ཡབ་ཡུམ་བཀྲ་ཤིས་ཤོག །སྐྱེ་མཆེད་རྣམ་དག་རྒྱལ་བའི་སྲས། །སེམས་དཔའ་སེམས་མའི་བཀྲ་ཤིས་ཤོག །གསང་བའི་བུ་མོ་ཚེ་གཏེར་འཛིན། །མགྱོགས་མ་བཞི་ཡི་བཀྲ་ཤིས་ཤོག །ཚད་མེད་བཞི་ལྡན་ཕྱག་རྒྱ་བཞིས། །སྒོ་སྐྱོང་སྲུང་མའི་བཀྲ་ཤིས་ཤོག །གང་ལ་བསམ་པའི་དོན་འགྲུབ་པའི། །དོན་གྲུབ་མཆོག་གི་བཀྲ་ཤིས་ཤོག །ཅེས་རོལ་མོའི་སྒྲ་འཁྲོལ་ཞིང་མེ་ཏོག་གི་སིལ་མ་ཕྱོགས་ཐམས་ཅད་དུ་འཐོར་བས་དགེ་ལེགས་སུ་བྱའོ། །འདིར་མདོ་དབང་གི་ཚེ་ཆོག་སྔ་མ་རྣམས་སུ་དཀྱིལ་འཁོར་ལྟེ་བ་འཁོར་ལོ་རྩིབས་བཞི་པ་སོགས་སྒྱུ་འཕྲུལ་གྱིས་ཁོག་ཕུབ་ནས་མཛད་པ་ཤས་ཆེ་ནའང་། འདིར་ནི་མདོ་རང་རྐང་ཚུགས་པའི་དབང་དུ་བྱས་ནས། རྩ་རྒྱུད་ཀྱི་ལེའུ་བཅུ་གསུམ་པ་རྡོ་རྗེ་ཚེ་སྒྲུབ་པ་ལས་གསུངས་པ་ལྟར་བྲིས་པ་སྟེ། དེའང་རྒྱ་མདུད་འགྲེལ་དུ་ལྟེ་བ་ལིང་ཚེ་དགུའི་དབུས་སུ་པད་འདབ་བརྒྱད། ལིང་ཚེ་རྣམས་དང་སྒོ་ཁྱུད་བཞིར་ཟླ་གམ། བརྟེན་པ་ལྷ་ལ་ཡང་། རྩ་བཤད་དུ། ཕྱོགས་ཕྱོགས་གནས་སུ་ཚོམ་བུར་བྲི། །ཞེས་པའི་ཚོམ་བུ་ཞེས་པ་ལ་སྙེགས་པ་ཡིན་ནམ་སྙམ་སྟེ། རིགས་བཞིའི་འཁོར་དུ་རང་རིགས་ཀྱི་སེམས་དཔའ་ཡབ་ཡུམ་བཞི་བཞིས་བསྐོར་བས་སྤྱིར་ལྷ་ང་བརྒྱད་ཙམ་གསུངས་པ་དང་། ཚེ་རྟེན་བསྐྱེད་པའང་རྒྱ་བདུན་གྱིས་རྒྱས་འདེབས་པའི་སྐབས་སུ་འགྲེལ་པ་འདིར་ལུགས་གཉིས་གསུངས་པའི་སྔ་མར་ཡུམ་གྱི་མཁའ་དང་ཡབ་ཀྱི་ཐུགས་ཀར་བསྐྱེད་པ་གཉིས་འདམ་ཀ་དང་། རྒྱ་བདུན་གྱི་འདྲེན་ཚུལ་ཀྱང་སྔ་མ་འདིར་བཀོད་པ་དང་ཕལ་ཆེ་བ་འདྲ་ཞིང་། ཕྱི་མ་ཚིགས་བཅད་དུ་མཛད་པ་འགྲེལ་ཆུང་རྣལ་འབྱོར་སའི་སྒྲོན་མ་དང་དགོངས་པ་མཐུན་པ་སོགས་རྒྱ་འགྲེལ་དང་རྒྱུད་ཀྱི་མཆན་རྙིང་རྣམས་སུ་འགྲེལ་ཚུལ་ཐ་དད་པ་མང་ནའང་། འདིར་རྩ་རྒྱུད་ཀྱི་རྒྱུད་ཚིག་དངོས་བསྟན་ལྟར་བཀྲལ་བ་འདི་ཉིད་རྟེན་དང་བརྟེན་པའི་དཀྱིལ་འཁོར་གཉིས་ཀ་བྱ་སླ་བར་མ་ཟད། རང་བློའི་གོ་ཕྱོགས་ལ་གནད་ཀྱང་འདུས་པར་གོ་ནས། རོང་ཟོམ་ཆོས་ཀྱི་བཟང་པོས་མཛད་པའི་མདོའི་ཚེ་སྒྲུབ་ཀྱི་མན་ངག་ལྟར་བྲིས་པ་ཡིན་ནོ། །ཅིའི་ཕྱིར་འདི་ཉིད་གནད་འདུས་ཤིང་ཀུན་གྱི་དངོས་བསྟན་དུ་འགྱུར་ཞེ་ན། རྟེན་གྱི་དཀྱིལ་འཁོར་ནི། རྩ་རྒྱུད་ལས། དབུས་ཀྱི་པདྨ་འདབ་བརྒྱད་ལ། ༼དབུས་སུ་༽ ཟླ་གམ་དམར་པོ་༼དང་ཕྱི་རོལ་གྲུ་བཞི་པར་༽སྒོ་བཞིར་ལྡན། །ཐ་མ་༼འདབ་བརྒྱད་ཀྱི་༽རྡོ་རྗེ་ར་བས་བསྐོར། །ཞེས་ཆེས་གསལ་བ་དང་། བརྟེན་པ་ལྷའི་དཀྱིལ་འཁོར་ཡང་། །རིགས་བཞི་སངས་རྒྱས་ཡབ་ཡུམ་དང་། སོ་སོའི་འཁོར་གྱི་སེམས་དཔའ་རྣམས། །ཞེས་དང་། སྒོ་བཞིར་སྒོ་མ་བཞི་རྣམས་བཞག །ཅེས་དང་། གསང་བའི་བུ་མོ་བཞི་བཀོད་བཞག །ཅེས་གསུངས་ཤིང་། འདིར་ཚོམ་བུར་ཞེས་པས་ཀྱང་རིགས་ཆུང་བསྟ་པར་མ་ངེས་ཏེ། འོད་ཟེར་སྤྲོ་བའི་ཚེ། ཨཱ་ཡུཿཡུམ་བཞིའི་ཐུགས་ཀར་འཕྲོས། །དེ་བཞིན་ཚོམ་བུ་རིམ་པར་བརྒྱུད། །ཅེས་སྒོ་མའི་བར་འོད་ཟེར་རིམ་པར་སྤྲོ་བ་ལ་ཚོམ་བུ་ཞེས་གསུངས་པ་ལྟར་དང་། ཚེ་རྟེན་ཡང་རྔམ་གློག་ལས། ཚེ་དཔག་མེད་པའི་ཐུགས་ཀ་ནས། འཁྱིལ་ཞིང་འཚེར་བའི་བྱང་ཆུབ་སེམས། །ཉི་ཟླའི་གའུར་གནས་པ་དེ། ཨཱ་ཡུཿབྱང་ཆུབ་སེམས་སུ་ཞུ། ཞེས་སྙིང་གར་བསྐྱེད་ལ་གསལ་བ་དང་། ཕྱག་རྒྱ་བདུན་ཡང་ལུས་ཀྱི་གནས་གཞན་ལ་འདེབས་པ་ལས། སྙིང་གའི་ཚེ་རྟེན་ལ་འདེབས་པ་འདི་ཉིད་འབྲེལ་ཆགས་པར་མངོན་པའི་ཕྱིར་རོ། །རྒྱུད་དོན་མན་ངག་མ་ངེས་པས། མདོ་དབང་ཚེ་ཆོག་ཕལ་ཆེ་བར། རང་གཞུང་སྒོས་ཆོས་རྒྱང་བསྲིངས་མོད། །ཕྱིན་ཆད་ལེགས་བཤད་དཔལ་འདི་ལོངས། འདུས་པ་མདོའི་ཡན་ལག་གི་དཀྱིལ་འཁོར་རྣམས་ཀྱི་སྒྲུབ་དཀྱིལ་དངོས་གྲུབ་འདོད་འཇོ་ལས། མཐའ་རྟེན་ཚེའི་སྒྲུབ་ཐབས་བཤད་པའི་སྐབས་ཏེ་ལྔ་པའོ། །འདིར་སྨྲས་པ། མི་ཕྱེད་རྡོ་རྗེའི་ཚིག་གིས་དམ་བཅིངས་པའི། །གཞུང་ཟབ་དགོངས་དོན་འབྱེད་ནུས་བློ་དམན་ཡང་། །བླ་མའི་དྲིན་གྱིས་ཆ་ཙམ་རྟོགས་པ་གང་། །རང་བློ་གོམས་དང་གཞན་ལའང་ཕན་ཕྱིར་སྤེལ། །དག་གསལ་ངག་གི་སྦྱོར་བའི་རྟ་བདུན་གྱིས། །སྐལ་བཟང་དབང་ཕྱོགས་རི་བོའི་རྩེར་དྲངས་ནས། །ལེགས་བཤད་ཆོས་ཀྱི་ཉི་མ་འོད་པོ་ཆེས། །དཔལ་ལྡན་བླ་མའི་བཞེད་དགོངས་གསལ་བར་བྱས། །དེ་ཕྱིར་ཚུལ་འདིར་ཉེས་པ་ཡོད་མི་སྙམ། །རྒྱ་ལ་རྨོངས་དང་རྣམ་གཡེང་ལེ་ལོ་ཡིས། །ནོངས་པར་གྱུར་རྣམས་ཐོག་མེད་གཟིགས་མངའ་བའི། །སྤྱན་སྔར་འགྲོ་ཀུན་སྡིག་དང་ལྷན་ཅིག་བཤགས། །འདིར་འབད་རྣམ་དཀར་དགེ་བ་ཉི་ཟླའི་འགྲོས། །མཐའ་དག་འགྲོ་སེམས་མཁའ་ལ་རྟག་འཆར་བས། །མཆོག་བདེའི་དངོས་གྲུབ་སྣང་བ་མི་ཟད་པ། །འདོད་དགུར་འཇོ་བས་ཕན་བདེའི་དཔལ་འབར་ཤོག །མདོ་ཡོངས་རྫོགས་ཀྱི་དབང་དུ་བྱས་པའི་ཡན་ལག་གི་དཀྱིལ་འཁོར་རྣམས་ཀྱི་སྒྲུབ་དཀྱིལ་དངོས་གྲུབ་འདོད་འཇོ་ཞེས་བྱ་བ་འདི་ནི། རྗེ་བླ་མ་དམ་པའི་སྐུ་གསུང་ཐུགས་ཀྱི་སྲས་མཆོག་དམ་པ་སྐུ་ན་གཞོན་ནུར་གྱུར་ཀྱང་རིག་པའི་གནས་ཕལ་མོ་ཆེ་ཐུགས་སུ་ཆུད་པའི་པཎྜི་ཏ་ཡང་དག་པའི་ལམ་གྱི་ས་མཁན་ཆེན་པོ་རྡོ་རྗེའི་མཚན་ཅན་གྱི་བཀས་བསྐུལ་བ་ལྟར་རྩོམ་འདུན་ཡིད་ལ་བཅགས་པའི་སྟེང་། ཉེ་བར་བསྟན་འགྲོའི་དཔལ་མགོན་པད་གླིང་ལྔ་པ་གསུང་སྤྲུལ་ངག་དབང་ཀུན་བཟང་རྡོ་རྗེའི་ཞལ་སྔ་ནས་བཀའ་སྩལ་ནན་ཅན་དང་། གཞན་ཡང་ཟངས་ལ་མཁར་སྤྲུལ་སྐུ་རིན་པོ་ཆེ་དང་། ཐང་འབྲོག་སྤྲུལ་པའི་སྐུ་སོགས་སྔོན་གོམས་ཀྱི་ཡོན་ཏན་མངའ་བའི་སྐྱེས་ཆེན་དམ་པ་འགྲོ་དོན་ནུས་པ་དུ་མའི་གསུང་གིས་བསྐུལ་ཞིང་། ཁྱད་པར་དུས་གསུམ་སངས་རྒྱས་ཐམས་ཅད་ཀྱི་སྤྱི་གཟུགས་རིགས་དང་དཀྱིལ་འཁོར་ཀུན་གྱི་ཁྱབ་བདག་མཚན་བརྗོད་པར་དཀའ་བ་རྗེ་བཙུན་བླ་མ་དམ་པ་གཏེར་ཆེན་ཆོས་ཀྱི་རྒྱལ་པོའི་བཀའ་ལུང་གིས་དབུགས་འབྱིན་པའི་གནང་བ་ལེགས་པར་ཐོབ་པ་ལ་བརྟེན་ནས། གང་གི་ཟླ་མེད་པའི་བཀའ་དྲིན་ཁོ་ནས་འཚོ་བའི་སྐལ་བ་ཅན་གཉོས་ཀྱི་དགེ་སློང་རྨོངས་པ་དྷརྨ་ཤྲཱིས་རང་ལོ་ལྔ་བཅུ་པའི་སྟེང་དུ་སོན་པ་ཉི་མ་ཞེས་པ་ཆུ་མོ་ལུག་གི་ལོ་ནག་པ་ཟླ་བའི་ཡར་ངོའི་ཚེས་བཅུ་བཞིའི་ཉིན་གངས་རིའི་ཁྲོད་ཀྱི་པདྨ་འོད་ཨོ་རྒྱན་སྨིན་གྲོལ་གླིང་གི་ཆོས་གྲྭར་སུག་བྲིས་སུ་སྦྱར་བའོ། །འདིས་ཀྱང་བསྟན་པ་དང་སེམས་ཅན་ལ་ཕན་པ་རྒྱ་ཆེན་པོ་འབྱུང་བའི་རྒྱུར་གྱུར་ཅིག། །།