འདུས་པ་མདོ་ཡི་ཆོ་གའི་ཟུར་འདེབས་དཔག་བསམ་སྙེ་མ། དྷརྨཱ་ཤྲཱི།

འདུས་པ་མདོའི་ཆོ་གའི་ཟུར་འདེབས་དཔག་བསམ་སྙེ་མ་བཞུགས་སོ། །ༀ་སྭ་སྟི་སིདྡྷཾ། འདུས་པ་མདོའི་སྒྲུབ་དཀྱིལ་སྒྲུབ་ཁོག་དང་བཅས་པའི་ཟུར་འདེབས་ལས་རབ་འབྱམས་ཀྱི་འདོད་པ་སྟེར་བྱེད་དཔག་བསམ་སྙེ་མ་ཞེས་བྱ་བ། བླ་མ་དང་འདུས་པ་ཆེན་པོའི་དཀྱིལ་འཁོར་གྱི་ལྷ་ཚོགས་ཐམས་ཅད་ལ་ཕྱག་འཚལ་ལོ། །མི་འགྱུར་མཆོག་བདེའི་སྒྱུ་འཕྲུལ་རོལ་པའི་གར། །གྲངས་མེད་ཞི་ཁྲོའི་འཁོར་ལོ་བསྒྱུར་བ་པོ། །རིགས་ཀུན་ཁྱབ་བདག་དཔལ་ལྡན་རྡོ་རྗེ་སེམས། །བཀའ་དྲིན་མཉམ་མེད་བླ་མའི་ཞབས་ལ་འདུད། །འདུས་པ་མདོ་ཡི་སྒྲུབ་ཐབས་དཀྱིལ་ཆོག་དང་། །སྒྲུབ་ཁོག་བཅས་པའི་ཟུར་འདེབས་ཕྱོགས་གཅིག་ཏུ། །སྡེབས་པ་ཕྲིན་ལས་རབ་འབྱམས་འདོད་པའི་འབྲས། །སྟེར་བྱེད་དཔག་བསམ་སྙེ་མ་དེང་འདིར་འཁྲུངས། །འདིར་སློབ་དཔོན་གྱིས་སྔོན་དུ་བྱ་བའི་བསྙེན་པ་སོགས་ལ་ཉེ་བར་མཁོ་བ་ལྷའི་ངོ་བོ་མདོ་ཐུན་མོང་བའི་དཀྱིལ་འཁོར་རྣམས་ཨ་ནུ་རང་ལུགས་ཀྱི་སྒྲུབ་ཚུལ་ལྟར་ལུས་དཀྱིལ་དུ་འགོད་པའི་ལས་བྱང་གནས་སྐབས་ཁྱེར་བདེ་བའི་ཆེད་དུ་ལུང་ཆུང་བ་ཞི་ཐུང་དང་ཁྲོ་ཐུང་ལ་བརྟེན་ནས་འབྲི་བར་བྱ་སྟེ། དེ་ལ་ཐོག་མར་ཞི་ཁྲོ་ཐུན་མོང་གི་སྔོན་འགྲོ་ནི། གནས་དབེན་པར་རྟེན་དང་མཆོད་གཏོར་སོགས་ཉེ་བར་མཁོ་བའི་ཡོ་བྱད་རྣམས་ཚོགས་པར་བྱས་ལ། ཆོས་ཐམས་ཅད་སྟོང་ཞིང་བདག་མེད་པ་ཀུན་ཏུ་བཟང་མོའི་མཁའ་ཀློང་རྣམ་པར་དག་པའི་རང་རྩལ་ལས། བཛྲ་མ་ཧཱ་ཤྲཱི་ཧེ་རུ་ཀ །ཞེས་བརྗོད་པས། བདག་ཉིད་ཞེ་སྡང་རྡོ་རྗེ་སྐུ་མདོག་མཐིང་ནག་ཞག་གཅིག་ཕྱག་གཉིས་པ་རྡོ་རྗེ་དང་དུང་ཁྲག་འཛིན་པ་ཡུམ་ཀྲོ་དྷཱི་ཤྭ་དཱི་མ་དང་མཉམ་པར་སྦྱོར་བའི་སྐུར་གྱུར། ཕཊ་ཕཊ་བཛྲ་ཀྲོ་དྷ་ཛྭ་ལ་མཎྜ་ལ། ཧ་ལ་ཧ་ལ། ཞེས་བརྗོད་པས། ཐུགས་ཀའི་ཧཱུཾ་ལས་ཁྲོ་བོའི་སྤྲིན་སྤྲོས་པས་གདུག་པ་ཅན་ཐམས་ཅད་ཚར་བཅད། ཚུར་འདུས་པ་ལས་སྟེང་འོག་ཕྱོགས་མཚམས་བཅུར་ཉི་མ་ལ་གནས་པའི་ཕྱོགས་སྐྱོང་བཅུའི་སྙིང་གར། ༀ་བཛྲ་ཀྲོ་དྷ་ཀཱི་ལ་ཡ་ཕཊ་ཛཿ ཞེས་ཕུར་བུའི་ཚུལ་དུ་བཏབ་པ་རྣམས་ཁྲོ་བོ་བཅུར་གྱུར་པ་ནི། ༀ་ཧཱུཾ་ཀཱ་ར་བཛྲ་མ་ཧཱ་ཀྲོ་དྷ་ཧཱུཾ་ཧཱུཾ་ཕཊ། དེ་བཞིན་དུ་ཧཱུཾ་ཀཱ་རའི་ཚབ་ཏུ། བི་ཛ་ཡ། ནཱི་ལ་དཎྜ། ཡ་མཱནྟ་ཀ །ཨཱརྱ་ཨ་ཙ་ལ། ཧ་ཡ་གྲཱི་ཝ། ཨ་པ་རཱ་ཛི་ཏ། ཨ་མྲྀ་ཏ་ཀུཎྜ་ལཱི། ཏྲཻ་ལོ་ཀྱ་བི་ཛ་ཡ། མ་ཧཱ་བ་ལ་རྣམས་བཅུག་སྟེ། ཞེས་བརྗོད་པའི་རྐྱེན་གྱིས་རིམ་པ་བཞིན། སྟེང་དུ་ཧཱུཾ་མཛད། ཤར་དུ་རྣམ་རྒྱལ། མེར་དབྱུག་སྔོན་ཅན། ལྷོར་གཤིན་རྗེ་གཤེད། ལྷོ་ནུབ་ཏུ་མི་གཡོ་བ། ནུབ་ཏུ་རྟ་མགྲིན། རླུང་དུ་འདོད་པའི་རྒྱལ་པོ། བྱང་དུ་བདུད་རྩི་འཁྱིལ་བ། བྱར་ཤར་དུ་ཁམས་གསུམ་རྣམ་རྒྱལ། འོག་ཏུ་སྟོབས་པོ་ཆེ་རྣམས་སྐུ་སྟོད་ཁྲོ་བོ་ལ་སྨད་ཕུར་བུ་འབར་བའི་རྣམ་པས་བགེགས་ལ་གཟིར་བ། དབྱིངས་ཀྱི་ཡུམ་ཅན། སྤྲུལ་པའི་ཕྲ་མེན་ཉི་ཤུ་དང་ཡང་སྤྲུལ་བྱེ་བ་ས་ཡའི་ཚོགས་ཀྱི་སྤྲིན་འཕྲོ་བས་ཕྱོགས་ཀུན་གཏམས་ཏེ་ཅིས་ཀྱང་མི་ཤིགས་པར་བསམ་ཞིང་། ཧཱུཾ། སྟེང་འོག་ཕྱོགས་མཚམས་དངོས་པོ་ཅིར་སྣང་ཡང་། །ཁྲོ་བཅུ་ཡབ་ཡུམ་བསྒོམས་པའི་བྱིན་རླབས་ཀྱི། །ཕྱོགས་བཅུར་གནས་པའི་བགེགས་རྣམས་ཀུན་བསལ་ནས། །སྒྲུབ་པའི་བར་གཅོད་མིང་ཡང་མེད་པར་ཤོག །ན་མོ་ཧཱུཾ། དེ་ནས། རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་བླ་མ་རིག་འཛིན་ཞི་ཁྲོ་རྒྱལ་བ་རྒྱ་མཚོའི་ཚོགས་དང་བཅས་པ་མཁའ་ཁྱབ་ཏུ་སད་པར་མོས་ལ། ཡེ་ནས་མཉམ་ཉིད་ཀྱིས་བཤགས་བྱས་པ་ཏེ། ཧཱུཾ། སྒྲིབ་པ་རྣམ་གཉིས་དངོས་པོ་ཅིར་སྣང་ཡང་། །ཡིད་ཀྱིས་མངོན་དུ་བཤགས་པའི་བྱིན་རླབས་ཀྱིས ། སྒྲིབ་པ་ཡེ་ནས་དག་པའི་དོན་རྟོགས་ནས། །ཡེ་ཤེས་རྣམ་གཉིས་མངོན་དུ་གསལ་བར་ཤོག །ན་མོ་ཧཱུཾ། དེ་ནས་མཆོད་རྫས་རྣམས་རཾ་ཡཾ་ཁཾ་གིས་བསྲེགས་གཏོར་བཀྲུས་ཏེ་སྟོང་པར་སྦྱངས། སྟོང་པའི་ངང་ལས་སྣོད་དབྱིངས་ཀྱི་བྷཉྫན་བཅུད་དམ་རྫས་བཅུ་ཡེ་ཤེས་ལྔའི་ངོ་བོར་གནས་པའི་དབུས་སུ་ཆེ་མཆོག་ཧེ་རུ་ཀ །བདག་བདུད་རྩི་འཁྱིལ་བར་གསལ་བའི་གཡོན་པའི་མཐེབ་སྲིན་ལ་རྟ་མགྲིན་ཡབ་ཡུམ། བཛྲ་ཨ་མྲྀ་ཏེ་ༀ་ཨཱཿཧཱུཾ་ཧྲཱིཿཋཱ། ཞེས་བཟླས་པས། བདག་གི་འོད་ཀྱིས་འཁོར་འདས་ཀྱི་བདུད་རྩི་བསྡུས་ནས་ཐིམ་པས་ཞུ་ཞིང་། རྟ་མགྲིན་ཡབ་ཡུམ་རོལ་པའི་བྱང་སེམས་དང་རོ་གཅིག་ཏུ་འདྲེས་ནས་ཡེ་ཤེས་ཀྱི་བདུད་རྩིར་གྱུར། སྤྲོ་ན་དངོས་གྲུབ་བླང་བ་དང་བསང་གཏོར་གསུམ་ཡང་བྱའོ། །སྟོང་པའི་ངང་ལས་གཏོར་གཞོང་ཡུམ་ལྔའི་མཁའ་ཀློང་དུ། ༀ་མ་ཧཱ་བ་ལིཾ་ཏ་ཏེ་ཛོ་བ་ལིདྟ་བ་ལ་བཱ་དྱ་གུ་ཧྱ་ས་མ་ཡ་ཧཱུཾ་ཕཊ། ཅེས་བཟླས་པས། གཏོར་མ་ཡེ་ཤེས་ལྔའི་རོལ་པ་འདོད་ཡོན་ལོངས་སྤྱོད་ཀྱི་གཏེར་དུ་གྱུར། སྟོང་བའི་ངང་ལས་སྣོད་པདྨ་འབར་བའི་དབྱིངས་སུ། ༀ་མ་ཧཱ་རཀྟ་ཛྭ་ལ་མཎྜ་ལ་ཧཱུཾ་ཧྲཱིཿཋཱ། ཞེས་བཟླས་པས། བཅུད་རཀྟ་ཡེ་ཤེས་ཀྱི་རྦ་ཀློང་འཁྲུག་པ་ལ་ཁམས་གསུམ་གྱི་རཀྟ་ཐམས་ཅད་ཞུ་ཞིང་འདྲེས་པར་གྱུར། སྟོང་པའི་ངང་ལས་མཆོད་སྣོད་དབྱིངས་ཀྱི་ཞིང་ཁམས་སུ་མཆོད་རྫས་ཡེ་ཤེས་ལྔའི་རྣམ་རོལ་འདོད་ཡོན་གྱི་སྲིན་འཕྲོ་བརབསམ་ལ། ན་མ་སྶམནྟ་བུདྡྷཱ་ནཱཾ་ག་ག་ན་ས་མ་ཡེ་སྭཱ་ཧཱ། ༀ་ཤྲཱི་བཛྲ་རཱ་ག་དྷཱུ་པེ་དྷཱུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། ཞེས་བརྗོད་པས་བྱིན་གྱིས་བརླབས་ལ། ཧཱུཾ། ཐུན་མོང་རྫས་ཀྱི་དངོས་པོ་ཅིར་སྣང་ཡང་། མཆོད་པ་བྱིན་གྱིས་བརླབས་པའི་ནུས་མཐུ་ཡིས། །འདོད་པའི་ཡོན་ཏན་ཡོངས་སུ་རྫོགས་གྱུར་ནས། །དུས་གསུམ་བདེ་གཤེགས་མ་ལུས་མཆོད་པར་ཤོག །ན་མོ་ཧཱུཾ། ཞེས་བརྗོད་དོ། ༈ །གཉིས་པ་དངོས་གཞི་ལ། ཞི་ལུང་དང་། ཁྲོ་ལུང་གཉིས་ལས། དང་པོ་ཞི་ལུང་ནི། དབྱིངས་ཡེ་ཇི་བཞིན་པའི་དཀྱིལ་འཁོར་དང་། ཡེ་ཤེས་རང་བཞིན་ལྷུན་གྱིས་གྲུབ་པའི་དཀྱིལ་འཁོར་གཉིས་དབྱེར་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར་ལས་སྔགས་ཀྱི་སྒྲ་གདངས་ཀྱིས་རྟེན་དང་བརྟེན་པའི་དཀྱིལ་འཁོར་དུ་སད་པར་གྱུར་པ་ནི། བྷྲུཾ་བི་ཤྭ་བི་ཤུདྡྷེ་ཛྙཱ་ན་ཙཀྲ། དུ་ཏི་ནན་རཏྣ་སཱུརྻ་ཙནྡྲ་པདྨ། ཞེས་པས། ནམ་མཁའ་ཐམས་ཅད་ཡུམ་ལྔའི་མཁའ་ཀློང་འབྱུང་ལྔའི་དཀྱིལ་འཁོར་ལ་བརྟེན་གཞལ་ཡས་ཁང་གྲུ་བཞི་སྒོ་བཞི་པ་རྟ་བབས་བརྒྱད་ཀྱིས་བརྒྱན་པའི་དབུས་སུ་སེང་གེས་བཏེགས་པའི་རིན་པོ་ཆེའི་ཁྲི་པད་ཉི་ཟླ་བ་བརྩེགས་པའི་གདན་དང་བཅས་པ་བཀྲ་ལམ་གྱི་གསལ་བར་གྱུར། ཧཱུཾ། སྣོད་ཀྱི་འཇིག་རྟེན་འབྱུང་བ་ཅིར་སྣང་ཡང་། །གཞལ་ཡས་དབང་ཆེན་བསྒོམས་པའི་བྱིན་རླབས་ཀྱིས། །ཆོས་ཉིད་མཐའ་དབུས་མེད་པའི་དོན་རྟོགས་ནས། །འོག་མིན་གནས་སུ་ལྷུན་གྱིས་གྲུབ་པར་ཤོག །ན་མོ་ཧཱུཾ། ཧཱུཾ་ཧཱུཾ་ཧཱུཾ་བཛྲ་ཙིཏྟ་ༀ། ཨ་ཨ་ཨ་བཛྲཱི་བྷ་དྲ་ས་མཱནྟ་ཨ། ཞེས་བརྗོད་པས། གདན་གྱི་སྟེང་དུ་བདག་ཉིད་བཅོམ་ལྡན་འདས་དཔལ་ཀུན་ཏུ་བཟང་པོ་སྐུ་མདོག་མཐིང་ག་ཞི་ཞིང་རབ་ཏུ་འཛུམ་པའི་ཉམས་ཅན་མཚན་དང་དཔེ་བྱད་ཀྱིས་འབར་བ། ཞལ་གཅིག །ཕྱག་གཉིས་མཉམ་བཞག་གི་ཕྱག་རྒྱ་ཅན་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་པང་དུ་ཡུམ་ཀུན་ཏུ་བཟང་མོ་སྔོན་མོ་ཕྱག་གཉིས་ཀྱིས་ཡབ་ལ་འཁྱུད་ཅིང་པདྨའི་སྐྱིལ་མོ་ཀྲུང་གིས་འཁྲིལ་བ། གཉིས་ཀའང་དར་གྱི་ཆས་གོས་ལྔ་དང་རིན་པོ་ཆེའི་རྒྱན་བརྒྱད་ཀྱིས་སྤྲས་ཏེ། འོད་ཟེར་བྱེ་བ་དྲུག་ཕྲག་དྲུག་འཕྲོ་བའི་ཀློང་ན་བདེ་སྟོང་གཉིས་སུ་མེད་པའི་ངོ་བོར་བཞུགས་པའོ། །རང་གཞི་ལུས་ཀུན་བཟང་ཡབ་ཡུམ་དུ་གསལ་བའི་ཐུགས་ཀར་འཁོར་ལོ་རྩིབས་བཞི་པའི་ལྟེ་བར། ཧཱུཾ་མཱུཾ་ཞེས་པས། མི་བསྐྱོད་པ་ཡབ་ཡུམ་སྔོན་པོ་རྡོར་དྲིལ། རྩིབས་བཞིའི་ཤར་དུ། ༀ་ལཱཾ། རྣམ་སྣང་ཡབ་ཡུམ་དཀར་པོ་འཁོར་ལོ་དང་དྲིལ་བུ། སྭཱཾ་མཱཾ། ལྷོར་རིན་འབྱུང་ཡབ་ཡུམ་སེར་པོ་རིན་པོ་ཆེ་དང་དྲིལ་བུ། ཨཱཾ་པཱཾ། ནུབ་ཏུ་སྣང་མཐའ་ཡབ་ཡུམ་དམར་པོ་པདྨ་དང་དྲིལ་བུ། ཧཱཾ་ཏཱཾ། བྱང་དུ་དོན་གྲུབ་ཡབ་ཡུམ་ལྗང་ཁུ་རལ་གྲི་དང་དྲིལ་བུ། ཕུང་པོ་ལྔ་དང་འབྱུང་བ་ཅིར་སྣང་ཡང་། །རིགས་ལྔ་ཡབ་ཡུམ་བསྒོམས་པའི་བྱིན་རླབས་ཀྱིས། །ཡབ་ཡུམ་གཉིས་སུ་མེད་པའི་དོན་རྟོགས་ནས། །ཐབས་དང་ཤེས་རབ་འདུ་འབྲལ་མེད་པར་ཤོག །ན་མོ་ཧཱུཾ། གཡས་ཕྱོགས་ཀྱི་དབང་པོའི་རྩ་བཞི་ལ། ཀྵིཾ་ཧཱུཾ། མིག་ལ་ས་སྙིང་དང་སྒེག་མོ། ཛྲིཾ་ཧྲཱིཿ རྣ་བར་ཕྱག་རྡོར་དང་གླུ་མ། ཏྲཾ་ཏྲཾ། སྣ་ལ་ནམ་སྙིང་དང་ཕྲེང་བ་མ། ཧྲཱིཾ་ཨཾ། ལྕེ་ལ་སྤྱན་རས་གཟིགས་དང་གར་མ། གཡོན་ཕྱོགས་ཀྱི་དབང་པོ་ལ། མཻ་ཛཿ མིག་ལ་བྱམས་པ་དང་སྤོས་མ། ཐླྷིཾ་ཧཱུཾ། རྣ་བར་སྒྲིབ་སེལ་དང་མེ་ཏོག་མ། ཧཱུཾ་བཾ། སྣ་ལ་ཀུན་བཟང་དང་མར་མེ་མ། མུཾ་ཧོཿ ལྕེ་ལ་འཇམ་དཔལ་དང་དྲི་ཆབ་མ། དབང་པོ་རྣམ་ཤེས་ཡུལ་དུས་ཅིར་སྣང་ཡང་། །སེམས་དཔའ་སེམས་མ་བསྒོམས་པའི་བྱིན་རླབས་ཀྱིས། །ཐམས་ཅད་ལྷ་དང་ལྷ་མོའི་དོན་རྟོགས་ནས། །ཞིང་དང་སྤྱོད་ཡུལ་ཡོངས་སུ་དག་པར་ཤོག །ན་མོ་ཧཱུཾ། སྙིང་གའི་འཁོར་ལོའི་མདུན་དང་རྒྱབ་ཏུ། ཧཱུཾ་ཨ། བྱེད་པ་པོ་དང་བྱ་བ་མོ། ཡིད་དང་ཆོས་ཀྱི་དངོས་པོ་ཅིར་སྣང་ཡང་། །ཀུན་བཟང་ཡབ་ཡུམ་བསྒོམས་པའི་བྱིན་རླབས་ཀྱིས། །དབྱིངས་དང་ཡེ་ཤེས་གཉིས་མེད་དོན་རྟོགས་ནས། །ཆོས་སྐུ་འགྱུར་མེད་ལྷུན་གྱིས་གྲུབ་པར་ཤོག །ན་མོ་ཧཱུཾ། ཀྲཱིཾ་དཔྲལ་བར་ལྷའི་ཐུབ་པ། ཧཱུཾ་ཏྲུཾ་ལྕེ་སྟེང་དུ་ལྷ་མིན་གྱི་ཐུབ་པ། སྲུཾ་སྙིང་གར་མིའི་ཐུབ་པ། བྲཾ་ལྟེ་བར་བྱོལ་སོང་གི་ཐུབ་པ། ཀྵཾ་གསང་བར་ཡི་དྭགས་ཀྱི་ཐུབ་པ། ཡེ་རྐང་མཐིལ་གཡོན་པར་དམྱལ་བའི་ཐུབ་པ། འགྲོ་བ་རིགས་དྲུག་དངོས་པོ་ཅིར་སྣང་ཡང་། །ཐུབ་པ་དྲུག་ཏུ་བསྒོམ་པའི་བྱིན་རླབས་ཀྱིས། །རོལ་པ་ཅིར་ཡང་སྣང་བའི་དོན་རྟོགས་ནས། །སངས་རྒྱས་མཛད་པ་ལྷུན་གྱིས་གྲུབ་པར་ཤོག །ན་མོ་ཧཱུཾ། རྐང་ལག་གི་མཐིལ་བཞི་ལ། ཧཱུཾ་ཛཿ ལག་གཡས་སུ་གཤིན་རྗེ་གཤེད་དང་ལྕགས་ཀྱུ་མ། ཧཱུཾ་ཧཱུཾ་གཡོན་པར་སྟོབས་ཆེན་དང་ཞགས་པ་མ། ཧཱུཾ་བཾ། རྐང་གཡོན་ལ་རྟ་མགྲིན་དང་ལྕགས་སྒྲོག་མ། ཧཱུཾ་ཧོཿ གཡས་པར་བདུད་རྩི་འཁྱིལ་བ་དང་དྲིལ་བུ་མ། ཡན་ལག་བཞི་ཡི་དངོས་པོ་ཅིར་སྣང་ཡང་། །སྒོ་བ་ཡབ་ཡུམ་བསྒོམས་པའི་བྱིན་རླབས་ཀྱིས། །བར་དུ་གཅོད་པ་མ་ལུས་ཀུན་བསལ་ནས། །ཕྲིན་ལས་རྣམ་བཞི་ལྷུན་གྱིས་གྲུབ་པར་ཤོག །ན་མོ་ཧཱུཾ། དེ་ལྟར་དཀྱིལ་འཁོར་གྱི་འཁོར་ལོ་ཐམས་ཅད་དྭངས་པའི་མཚོ་ལ་གཟའ་སྐར་ཤར་བ་ལྟར་བཀྲ་ལམ་གྱིས་གསལ་བར་གྱུར། དེ་ནས་དབང་བསྐུར་བ་ནི། རིགས་ལྔའི་དབང་རྒྱ་སྤྱི་བོའི་གནས་ལྔར་འཇོག་ཅིང་། ༀ་མ་ཧཱ་ཤུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཨཱ་དཪྴ། ས་མ་ཏཱ། པྲ་ཏྱ་བེ་ཀྵ་ཎ། ཀྲྀ་ཏྱ་ནུཥྛཱ་ན། ཞེས་བརྗོད་པས། སྤྱི་བོའི་གནས་ལྔར་དེ་བཞིན་གཤེགས་པ་རིགས་ལྔ་ཡབ་ཡུམ་རྗེས་ཆགས་ཀྱིས་ཞུ་བའི་ཡེ་ཤེས་ལྔའི་ཆུ་རྒྱུན་གྱིས་དབང་བསྐུར་བས། དེ་བཞིན་གཤེགས་པ་རིགས་ལྔས་དབུ་བརྒྱན་པར་གྱུར། བྱིན་རླབས་ནི། རྡོ་རྗེའི་ཕྱག་རྒྱ་གནས་གསུམ་དུ་གཏུག་ཅིང་། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ། ཝཱཀ ཙིཏྟ། གནས་གསུམ་དུ་ཟླ་བ་པདྨ་ཉི་མ་ལ་གནས་པའི་ༀ་ཨཱཿཧཱུཾ། འོད་ཟེར་འཕྲོས་འདུས་ཡོངས་སུ་གྱུར་པ་ལས་རྣམ་སྣང་། འོད་དཔག་མེད། མི་བསྐྱོད་པ་རྣམས་ཀྱིས་རྒྱས་བཏབ་པར་གྱུར། ཧཱུཾ། ལུས་ངག་ཡིད་གསུམ་དངོས་པོ་ཅིར་སྣང་ཡང་། །དབང་བསྐུར་བྱིན་གྱིས་བརླབས་པའི་ནུས་མཐུ་ཡིས། །ཉོན་མོངས་དངོས་པོ་མ་ལུས་ཀུན་བྱང་ནས། སྐུ་དང་ཡེ་ཤེས་ལྷུན་གྱིས་གྲུབ་པར་ཤོག །ན་མོ་ཧཱུཾ། དེ་ནས་ཡེ་ཤེས་ཀྱི་འཁོར་ལོ་སྤྱན་དྲང་བ་ནི། བཛྲ་ས་མཱ་ཛཿ་ས་སྙན་གསན་ཕབ་ལ། ༀ། ཐུགས་རྗེའི་ལྕགས་ཀྱུ་སོགས་ཀྱི་མཐར། ཨེ་ཧྱེ་ཧི་ཨཱ་ན་ཡ་ཛཿ་ཧཱུཾ་བཾ་ཧོཿས་སྤྱན་དྲངས། ཛཿ ཧཱུཾ་བཾ་ཧོཿས་བསྟིམ་ལ། ཏིཥྛ་བཛྲ་གྱིས་བརྟན་པར་བྱས་ཏེ། དམ་ཚིག་གི་འཁོར་ལོ་དང་དབྱེར་མེད་དུ་བཞུགས་པར་གྱུར། ཧཱུཾ། སངས་རྒྱས་སེམས་ཅན་དངོས་པོ་ཅིར༴ བདེ་གཤེགས་སྤྱན་དྲངས་བསྟིམ་པའི་བྱིན་རླབས་ཀྱིས། །ཡེ་ནས་སངས་རྒྱས་ཡིན་པའི་དོན་རྟོགས་ནས། །གཉིས་སུ་མེད་པར་ལྷུན་གྱིས་གྲུབ་པར་ཤོག །ན་མོ་ཧཱུཾ། དེ་ནས་དབྱིངས་ལ་ཡེ་ཤེས་སམ་ལྷ་ལ་ལྷ་རོལ་པའི་ཚུལ་གྱིས་ཕྱག་མཆོད་བྱས་པར་མོས་ལ། ༀ་སརྦ་ཏ་ཐཱ་ག་ཏ་ས་ཏྭ་བནྡྷ་ནཱཾ་ཀ་རོ་མི། ཨ་ཏི་པུ་ཧོཿ པྲ་ཏི་པུ་ཧོཿ ཞེས་ཕྱག་བྱས་ལ། ཧཱུཾ། བཟང་ངན་ཆེ་ཆུང་ཁྱད་པར་ཅིར༴ དཀྱིལ་འཁོར་ལྷ་ལ་ཕྱག་བཙལ་བྱིན༴ ཡེ་ནས་འདྲེས་པ་ཆེན་པོའི་དོན༴ གཉིས་སུ་མེད་པར་ལྷུན་གྱིས༴ ན་མོ་ཧཱུཾ། ཧཱུཾ། འབྱུང་བ་ཆེན་པོ་ནམ་མཁའ་ནི། །འབྱུང་བ་ཆེན་པོ་ལྔ་ཡི་མཛོད། །ནམ་མཁའ་ལས་ནི་འདོད་པ་འབྱུང་། །འདོད་པའི་མཆོད་པ་འབྱུང་གྱུར་ཅིག །ༀ་ན་མཿསརྦ་ཏ་ཐཱ་ག་ཏེ་བྷྱོ་སོགས་ཀྱིས་ཀུན་བཟང་། ༀ་ཨཱ་ཧ་ར་ཨཱ་ཧ་ར་སརྦ་བིདྱཱ་སོགས་ཀྱིས་ཞབས་བསིལ། ༀ་ཤྲཱི་བཛྲ་རཱ་ག་དྷུ་པེ་དྷཱུ། པུཥྤེ་པུ། ཨཱ་ལོ་ཀེ་ཧྲཱིཿ གནྡྷེ་གན། ཞེས་བཞི་བསྣོལ་ཕུལ་ནས། ཧཱུཾ། བདག་དང་གཞན་གྱི་དངོས་པོ་ཅིར༴ དཀྱིལ་འཁོར་ལྷ་རྣམས་མཆོད་པའི༴ འཁོར་གསུམ་ཡོངས་སུ་དག་པའི་དོན༴ དངོས་གྲུབ་རྣམ་གསུམ་ལྷུན་གྱིས༴ ན་མོ་ཧཱུཾ། མ་ཧཱ་པཉྩ་ཨ་མྲྀ་ཏ་ཁཱ་ཧིས་སྨན་མཆོད་ཕུལ། ཀཱ་ཡ་སིདྡྷི་ༀ། ཝཱ་ཀ་སིདྡྷི་ཨཱཿ་ཙིཏྟ་སིདྡྷི་ཧཱུཾ། ཞེས་སྨན་གྱིས་དངོས་གྲུབ་བླངས་ལ། ཧཱུཾ། བཞི་བརྒྱ་རྩ་བཞིའི་ནད་རྣམས་ཅིར༴ བདུད་རྩི་སྨན་མཆོག་མཆོད་པའི་བྱིན༴ ཡུན་དུ་གནོད་པའི་ནད་རྣམས་ཀུན་བྲལ་ནས། །སྐྱེ་ཤི་མེད་པར་ལྷུན་གྱིས་གྲུབ༴ ན་མོ་ཧཱུཾ། མ་ཧཱ་བི་ལིཾ་ཏ་པྲ་ཏཱི་ཙྪ་ཁཱ་ཧིས་གཏོར་མ་ཕུལ་ལ། ཧཱུཾ། སྟོང་ཕྲག་བརྒྱད་ཅུའི་བགེགས་རྣམས་ཅིར༴ དམ་རྫས་གཏོར་མས་མཆོད་པའི་བྱིན༴ འཕྲལ་དུ་སྐབས་འཚོལ་གནོད་པ་ཀུན་བསལ་ནས། །འགྱུར་བ་མེད་པར་ལྷུན༴ ན་མོ་ཧཱུཾ། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ་྅་ཧཾ། ཞེས་ལྷ་ཐམས་ཅད་སྙོམས་འཇུག་གི་བདེ་བས་མཉེས་པར་བསམ་པ་སྦྱོར་མཆོད་དང་། བོ་དྷི་ཙིཏྟ་སྥ་ར་ཎ་ཕཊ། ཅེས་བྱང་ཆུབ་སེམས་ཀྱི་འོད་ཟེར་གྱིས་སྤྲིན་སྤྲོས་པས་འཁོར་བའི་འཁྲུལ་རྟོག་འོད་གསལ་གྱི་དབྱིངས་སུ་བསྒྲལ་བས་བསྒྲལ་མཆོད་ཕུལ་ལ། ཧཱུཾ། ཆགས་སྡང་རྣམ་གཉིས་དངོས་པོ་ཅིར༴ ཏན་གན་རྣམ་གཉིས་ཕུལ་བའི་བྱིན༴ ཉོན་མོངས་དུག་གསུམ་རྩ་ནས་དག་གྱུར་ཏེ། །བདག་གཞན་དོན་གཉིས་ལྷུན་གྱིས་གྲུབ་པར་ཤོག །ན་མོ་ཧཱུཾ། མ་ཧཱ་པཱུ་ཛ་ཧོཿ ཞེས་པས་སྣང་བ་ཐམས་ཅད་འདོད་ཡོན་གྱི་རོལ་མོར་འཆར་ཞིང་དེ་ཉིད་དབྱིངས་རིག་དབྱེར་མེད་བདེ་བ་ཆེན་པོར་རོ་མཉམ་པར་བལྟས་ལ། ཧཱུཾ། ཡུལ་དང་དབང་པོའི་དངོས་པོ་ཅིར་སྣང་ཡང་། །འདོད་ཡོན་རྣམ་ལྔས་མཆོད་པའི་བྱིན༴ ཡུལ་སེམས་གཉིས་སུ་མེད་པའི་དོན་རྟོགས་ནས། །སྤྱོད་ཡུལ་མ་ལུས་ཡོངས་སུ་དག་པར་ཤོག །ན་མོ་ཧཱུཾ། བསྟོད་པ་ནི། ཧཱུཾ། དབྱིངས་ཀུན་རང་བཞིན་རྣམ་དག་པས། །ཐུགས་རྗེའི་དབང་གིས་སྐུར་བཞེངས་པ། །རྡོ་རྗེ་དབྱིངས་ཀྱི་ལྷ་ཚོགས་དག །རང་སྣང་ལྷ་ལ་ཕྱག་འཚལ་བསྟོད། །ཅེས་བསྟོད་ལ། ཧཱུཾ། ཉོན་མོངས་སྡུག་བསྔལ་དངོས་པོ་ཅིར་སྣང་ཡང་། །གླུ་དང་སྒྲ་སྙན་རོལ་མོས་བསྟོད་པའི་མཐུས། །ཐམས་ཅད་ཐེག་པ་ཆེན་པོའི་སྒྲར་གྱུར་ནས། །གསང་སྔགས་དོན་ཉིད་ཀུན་གྱིས་རྟོགས་པར་ཤོག །ན་མོ་ཧཱུཾ། སྨོན་ལམ་དང་འདོད་དོན་གསོལ་བ་ནི། ཧོཿ ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདག་ཉིད་བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་སོགས་པ་རིགས་ལྔ་རྒྱལ་བ་རྒྱ་མཚོ་འཁོར་བསམ་གྱིས་མི་ཁྱབ་པ་དང་བཅས་པ་ཐམས་ཅད་གསན་ཅིང་དགོངས་སུ་གསོལ། བདག་ཅག་རྣལ་འབྱོར་གྱི་མཆོད་པ་དམ་པ་རིག་པའི་ཁྱད་པར་ལས་བྱུང་བ་ཕྱི་ནང་གསང་བ་གསུམ་གྱི་ཚུལ་དུ་ཕུལ་བས་སྐུ་གསུང་ཐུགས་ཀྱི་རྒྱུད་མཉེས་པ་ཆེན་པོས་ཁྱབ་པར་གྱུར་ཅིག །དེའི་བྱིན་རླབས་ཀྱི་མཐའ་ཡས་བའི་སེམས་ཅན་ཐམས་ཅད་རྡོ་རྗེ་འཆང་གི་གྲལ་ཐོབ་པར་གྱུར་ཅིག །བདག་ཅག་གི་དམ་ཚིག་ཉམས་པ་ཐམས་ཅད་སྐོངས་ཏེ་དངོས་གྲུབ་ཀྱི་སྣོད་དུ་གྱུར་ནས་ཡི་གེ་འཁོར་ལོ་ཚོགས་ཆེན་གྱི་སར་སངས་རྒྱས་ཏེ་འཁོར་བ་ཀར་དག་པར་གྱུར་ཅིག །ཨ་ལ་ལ་ཧོཿ ཞེས་དང་། བདག་ཅག་དམ་ཚིག་འདི་ལ་མངོན་པར་ཞུགས་པ་རྣམས། །ཞེས་སོགས་ཀྱང་བརྗོད་ལ། ཧཱུཾ། ཡིད་ལ་བསམ་པའི་དངོས་པོ་ཅིར་སྣང་ཡང་། །སྨོན་ལམ་མངོན་དུ་བཏབ་པའི་བྱིན་རླབས་ཀྱིས། །ཡིད་ལ་ཅི་བསམ་ལྷུན་གྱིས་གྲུབ་ནས་ཀྱང་། །འགྲོ་དོན་མ་ལུས་ལྷུན་གྱི་གྲུབ་པར་ཤོག །ན་མོ་ཧཱུཾ། དེ་ནས་འཛབ་བཟླ་བ་ནི། གཞི་ལུས་ཀྱི་ཡེ་ཤེས་སེམས་དཔའི་ཐུགས་ཀར་ཟླ་བ་ལ་ༀ་ཡིག་སྔོན་པོ་བཟླ་བྱའི་སྔགས་ཕྲེང་གིས་བསྐོར་བ་ལས་འོད་ཟེར་འཕྲོས། ལུས་དཀྱིལ་གྱི་ལྷ་རྣམས་ཀྱི་ཐུགས་རྒྱུད་བསྐུལ། སོ་སོའི་སྐུ་ལས་འཕྲོས་པའི་འོད་ཟེར་གྱིས་མཁའ་ཁྱབ་ཀྱི་རྒྱལ་བ་རྣམས་མཆོད། སེམས་ཅན་ཐམས་ཅད་ཀྱི་སྒོ་གསུམ་གྱི་སྡིག་སྒྲིབ་སྦྱངས་ཏེ་རང་གཞིན་ལྷ་སྔགས་འོད་གསལ་གྱི་འཁོར་ལོ། གནས་པ་མངོན་དུ་བྱས་སངས་རྒྱས་ཐམས་ཅད་ཀྱི་རྡོ་རྗེ་གསུམ་དང་དབྱེར་མེད་དུ་གྱུར། འོད་ཟེར་དེ་རྣམས་སླར་འདུས་རང་ལ་ཐིམ་པས་ཁམས་གསུམ་ལྷའི་དཀྱིལ་འཁོར་དུ་སད་པར་མོས་ལ། ལུས་ཀྱི་སྒུལ་བསྐྱོད་ཅི་བྱས་དམ་ཚིག་གི་ཕྱག་རྒྱ། ངག་གི་བཟླས་བརྗོད་ཆོས་ཉིད་ཀྱི་སྒྲ་གདངས། །སེམས་ཀྱི་དྲན་རྟོག་དབྱིངས་རིག་དབྱེར་མེད་རྩ་བ་བྱང་ཆུབ་ཀྱི་སེམས་སུ་རྟོགས་པར་བྱས་ཏེ། ༀ་གུ་ཧྱ་ཛྙཱ་ན་བོ་དྷི་ཙིཏྟ་མ་ཧཱ་སུ་ཁ་ཧཱུཾ་ཧཱུཾ། ཞེས་སྤྱི་འཛབ་ཁོ་ན་བཟླ་ཞིང་། །སྤྲོ་ན་སྒྲུབ་ཐབས་རྒྱས་པ་ལྟར་ཞི་བའི་བསྐྱེད་སྔགས་རྣམས་ཀྱང་ཅི་ནུས་བཟླའོ། །ཧཱུཾ། རྒྱུ་འབྲས་རྩོལ་བའི་སྡུག་བསྔལ་ཅིར་སྣང་ཡང་། །བསྙེན་སྒྲུབ་རྣམ་བཞིའི་འཛབ་བསྙེན་བྱས་པའི་མཐུས། །ཐམས་ཅད་ཀུན་ཏུ་བཟང་པོའི་དོན་རྟོགས་ནས། །དངོས་གྲུབ་རྣམ་གསུམ་ལྷུན་གྱིས་གྲུབ་པར་ཤོག །ན་མོ་ཧཱུཾ། དེས་ཞི་ལུང་གི་དངོས་གཞི་ཚར་རོ། །གཉིས་པ་ཁྲོ་བོའི་ལུང་ནི། །དབྱིངས་དང་ཡེ་ཤེས་གཉིས་སུ་མེད་པ་རྩ་བ་བྱང་ཆུབ་ཀྱི་སེམས་རང་བྱུང་གི་ཡེ་ཤེས་མ་འདྲེས་ཡོངས་རྫོགས་སུ་གསལ་བ་ལས། སྔགས་ཀྱི་སྒྲ་གདངས་ཀྱིས་རྟེན་དང་བརྟེན་པའི་དཀྱིལ་འཁོར་དུ་སད་པར་གྱུར་པ་ནི། ཨེ་ཡཾ་ར་སུཾ་ཀེཾ་རཾ། བྷྲཱུཾ་བི་ཤྭ་བི་ཤུདྡྷེ་བྷ་ཉྫ ཛྙཱ་ན་ཙཀྲ། སཱུརྻ་མཎྜ་ལ་དེ་བ་ཏིཥྛ་ནཾ་ཏི་ར་བཾ། ཞེས་པས། རང་གི་སེམས་དབུགས་ཁྲག་དང་ཤ་རུས་དྲོད་རྣམས་ཡེ་ཤེས་ཀྱི་རྩལ་སྣང་དུར་ཁྲོད་ཀྱི་རྫས་ཀྱི་ངོ་བོ་ལས། ཡུམ་ལྔའི་མཁའ་ཀློང་འབྱུང་ལྔའི་དཀྱིལ་འཁོར་དུ་གསལ་བ་ལ་བརྟེན་པའི་དུར་ཁྲོད་འབར་བའི་གཞལ་ཡས་ཁང་གྲུ་བཞི་སྒོ་བཞི་པ་རྟ་བབས་བརྒྱད་ཀྱིས་བརྒྱན་པའི་དབུས་སུ་འཁོར་ལོ་རྩིབས་བརྒྱད་རྡོ་རྗེའི་བྲག་ཆེན་པད་ཉི་ཟླ་བ་རྣམས་བརྩེགས་པའི་སྟེང་དུ་དབང་ཕྱུག་ཁྱོ་ཤུགས་ཉི་ཤུ་རྩ་བཞི་བྱོལ་སོང་གཙོ་བོ་བརྒྱད་ཀྱིས་བརྗིས་པའི་གདན་དང་བཅས་པ་གསལ་བར་གྱུར། ཧཱུཾ། དུར་ཁྲོད་རྫས་ཀྱི་དངོས་པོ་ཅིར་སྣང་ཡང་། འབར་བའི་གཞལ་ཡས་བསྒོམས་པའི་བྱིན་རླབས་ཀྱིས། །རྫས་སུ་ལྟ་བའི་རྟོག་པ་ཀུན་བྲལ་ནས། །གནས་མཆོག་རབ་འབྱམས་ལྷུན་གྱིས་གྲུབ་པར་ཤོག །ན་མོ་ཧཱུཾ། ༀ་ཨ་ཀྲ་མ་ཧཱ་ཤྲཱི་ཧེ་རུ་ཀ་ཧཱུཾ། ཀ་ཏ་མ་ཧཱ་ཀྲོ་དྷཱི་ཤྭ་རཱི་ཧཱུཾ་ཕཊ། ཅེས་བརྗོད་པས། གདན་གྱི་སྟེང་དུ་བདག་ཉིད་བཅོམ་ལྡན་འདས་དཔལ་ཆེན་པོ་ཆེ་མཆོག་ཧེ་རུ་ཀ་སྐུ་མདོག་མཐིང་ནག་འབར་བ་ཆེན་པོའི་གཟི་བྱིན་ཅན། མཐིང་དཀར་དམར་བའི་ཞལ་གསུམ། ཕྱག་དྲུག་གི་གཡས་གསུམ་རྡོ་རྗེ་རྩེ་དགུ་རྩེ་ལྔ་རྩེ་གསུམ་པ། གཡོན་གསུམ་ཐོད་ཁྲག །ཞབས་བཞི་བརྐྱང་བསྐུམ་དོར་སྟབས་ཀྱིས་སྟན་ལ་རོལ་པ། ཡུམ་གནམ་ཞལ་དབྱིངས་ཀྱི་དབང་ཕྱུག་མ་སྔོན་མོ་གཡས་ཡབ་ལ་འཁྱུད་ཅིང་གཡོན་ཐོད་ཁྲག་སྟོབ་པ། གཉིས་ཀའང་གར་གྱི་ཉམས་དགུས་སྒེག་ཅིང་དུར་ཁྲོད་རོལ་པའི་ཆས་ཅན་ཡེ་ཤེས་ཀྱི་མེ་འབར་བའི་དབུས་ན་བཞུགས་པ། འཁོར་འདས་ཀྱི་ཆོས་ཐམས་ཅད་བཅོམ་ལྡན་འདས་ཀྱི་ཞབས་ཀྱི་གདན་ཁྲི་ནས་གཙུག་ཏོར་མན་ཆད་ལ་རྫོགས་པར་སྣང་བའི་བདག་ཉིད་ཆེན་པོར་གྱུར་པའོ། །རང་གཞི་ལུས་ཆེ་མཆོག་ཧེ་རུ་ཀར་གསལ་བའི་ཐུགས་ཀར་འཁོར་ལོ་རྩིབས་བརྒྱད་ལྟེ་བ་དང་བཅས་པ་ལ། ཙིཏྟའི་རྩ་དགུའི་བཅུད་ཧེ་རུ་ཀ་དགུ་དང་། རྩ་དགུ་ཀྲོ་དྷཱི་དགུར་གསལ་བ་ནི། འཁོར་ལོའི་ལྟེ་བར་ཧཱུཾ་ཧཱུཾ། ཞེས་པས། རྡོ་རྗེ་ཁྲག་འཐུང་མཐིང་ག་རྡོ་རྗེ་དང་དུང་དམར། རྩིབས་བརྒྱད་ཀྱི་ཤར་དུ་ཧཱུཾ་ཧཱུཾ་སངས་རྒྱས་ཁྲག་འཐུང་སྨུག་ནག་འཁོར་ལོ་དང་དུང་དམར། ལྷོར་ཧཱུཾ་ཧཱུཾ་རིན་ཆེན་ཁྲག་འཐུང་སེར་ནག་རྩེ་གསུམ་དང་དུང་དམར། ནུབ་ཏུ་ཧཱུཾ་ཧཱུཾ་པདྨ་ཁྲག་འཐུང་དམར་ནག་རལ་གྲི་དང་དུང་དམར། བྱང་དུ་ཧཱུཾ་ཧཱུཾ་ལས་ཀྱི་ཁྲག་འཐུང་ལྗང་ནག་རྒྱ་གྲམ་དང་དུང་དམར། ཤར་ལྷོར་ཧཱུཾ་ཧཱུཾ་རཀྴ་ཧེ་རུ་ཀ་མཐིང་ནག་དབྱུག་ཏོ་དང་དུང་དམར། ལྷོ་ནུབ་ཏུ་ཧཱུཾ་ཧཱུཾ་ས་ནུ་ཧེ་རུ་ཀ་སེར་ནག་དགྲ་སྟྭ་དང་དུང་དམར། ནུབ་བྱང་དུ་ཧཱུཾ་ཧཱུཾ་གུ་ཧྱ་ཧེ་རུ་ཀ་དུད་ཁ་རལ་གྲི་དང་དུང་དམར། བྱང་ཤར་དུ་ཧཱུཾ་ཧཱུཾ་ཡཀྵ་ཧེ་རུ་ཀ་ལྗང་ནག་བེ་ཅོན་དང་དུང་དམར། དེ་ཐམས་ཅད་ཀྱང་གར་དགུའི་ཉམས་ཅན་དུར་ཁྲོད་ཀྱི་ཆས་ཀྱིས་བརྒྱན་ཏེ་རང་མདོག་དང་མཚུངས་པའི་ཡུམ་རྣམས་གཡས་ཡབ་ལ་འཁྱུད་ཅིང་གཡོན་དུང་ཁྲག་སྟོབ་པ་དང་འཁྲིལ་བ། ཞབས་གཉིས་བརྐྱང་བསྐུམ་གྱིས་དྲེགས་པ་ཁྱོ་ཤུགས་དང་། ཁྱད་པར་རིགས་ལྔའི་ཁྲག་འཐུང་ལྔས་བྱོལ་སོང་གདུག་པ་ཅན་ཟུང་རེ་དང་བཅས་པ་བརྫིས་པའོ། །ཧཱུཾ། རུ་ཏྲ་རྣམ་གསུམ་དངོས་པོ་ཅིར་སྣང་ཡང་། ཁྲག་འཐུང་དགུ་རུ་བསྒོམས་པའི་བྱིན་རླབས་ཀྱིས། །བདུད་དང་སྲིན་པོའི་བར་ཆད་ཀུན་བསྒྲལ་ནས། །ཡེ་ཤེས་དགུ་རུ་ལྷུན་གྱིས་གྲུབ་པར་ཤོག །ན་མོ་ཧཱུཾ། ཁམས་གསུམ་ས་དགུའི་དངོས་པོ་ཅིར་སྣང་ཡང་། །ཡུམ་ཆེན་དགུ་རུ་བསྒོམས་པའི་བྱིན་རླབས་ཀྱིས། །མ་བདུད་སྲིན་མོའི་བར་ཆད་ཀུན་བསྒྲལ་ནས། །ཐིག་ལེ་དགུ་རུ་ལྷུན་གྱིས་གྲུབ་པར་ཤོག །ན་མོ་ཧཱུཾ། དབང་རྟེན་གྱི་རྩ་ཟུང་བཞིའི་རྩ་ནང་དུ་གནས་མ་བརྒྱད་ནི། མིག་གཉིས་སུ་ཧ་ཧ་ཞེས་པས་གཡས་པར་ག་རཱི་དང་། གཡོན་པར་པུཀྐ་སཱི། རྣ་བ་གཡས་གཡོན་དུ་ཧ་ཧ་པེ་ཏཱ་ལི་དང་གྷསྨ་རཱི། སྣ་གཡས་གཡོན་དུ་ཧ་ཧ་ཙ་རཱི་དང་སྨེ་ཤ །ལྕེའི་གཡས་གཡོན་གྱི་ཆར་ཧ་ཧ་པྲ་མོ་ཧཱ་དང་ཙཎྜ་ལཱི། ཧཱུཾ། རྣམ་ཤེས་བརྒྱད་ཀྱི་དངོས་པོ་ཅིར་སྣང་ཡང་། །ག་རཱི་བརྒྱད་དུ་བསྒོམས་པའི་བྱིན་རླབས་ཀྱིས། །ཡུལ་ལ་མངོན་པར་རྟོག་པ་ཀུན་བཅོམ་ནས། །རྣམ་པར་རྟོག་པའི་འདུ་ཤེས་མེད་པར་ཤོག །ན་མོ་ཧཱུཾ། དབང་རྟེན་གྱི་རྩའི་ཕྱིར་རོལ་ཏུ་ཡུལ་མ་བརྒྱད་ནི། མིག་གཡས་གཡོན་ལ་ཧེ་ཧེ་སེང་གདོང་མ་དང་རྒོད་གདོང་མ། རྣ་བ་གཡས་གཡོན་དུ་ཧེ་ཧེ་ཝ་གདང་དང་ཀངྐའི་གདོང་མ། སྣ་གཡས་གཡོན་དུ་ཧེ་ཧེ་སྟག་གདོང་མ་དང་ཁྭ་གདོང་མ། ལྕེའི་གཡས་གཡོན་དུ་ཧེ་ཧེ་ཁྱི་གདོང་མ་དང་འུག་གདོང་མ། ཧཱུཾ། དུར་ཁྲོད་བརྒྱད་ཀྱི་དངོས་པོ་ཅིར༴ ཕྲ་མེན་བརྒྱད་དུ་བསྒོམས་པའི༴ དམ་ཚིག་ཉམས་དང་དགྲ་བགེགས་ཀུན་བསྒྲལ་ནས། །རྣལ་འབྱོར་བར་ཆོད་མིང་ཡང་མེད་པར་ཤོག །ན་མོ་ཧཱུཾ། ཡན་ལག་གི་མཐིལ་བཞི་ལ་སྒོ་མ་བཞི་ནི། ལག་པ་གཡས་གཡོན་དུ་ཕཊ་ཕཊ་རྟ་གདོང་མ་དང་ཕག་གདོང་མ། རྐང་པ་གཡོན་གཡས་སུ་ཕཊ་ཕཊ་སྤྲེལ་གདོང་མ་དང་སྤྱང་གདོང་མ། ཧཱུཾ། སྐྱེ་རྒ་ན་འཆིའི་དངོས་པོ་ཅིར་སྣང་ཡང་། །སྒོ་མ་བཞི་རུ་བསྒོམས་པའི་བྱིན་རླབས་ཀྱིས། །བར་དུ་གཅོད་པའི་བདུད་བཞི་ཀུན་བཅོམ་ནས། །སྐྱེ་གནས་རྣམ་བཞིའི་མིང་ཡང་མེད་པར་ཤོག །ན་མོ་ཧཱུཾ། གནས་ཡུལ་སྒོ་སྐྱོང་རྣམས་སྐུ་མདོག་ཞལ་དང་ཕྱག་མཚན་རྒྱན་རྣམས་སྒྲུབ་ཐབས་རྒྱས་པ་ལྟར་གསལ་གདབ་བོ། །ལུས་ཀྱི་ཕྱོགས་མཚམས་སུ་འབར་མ་བརྒྱད་ནི། །ཨ་ཞེས་པས། སྙིང་གར་ཉི་ཟེར་ཅན་མ། ཨ། གཡས་ཕྱོགས་ཀྱི་ནུ་མར་མེ་ཁྱེར་གློག་ཕྲེང་མ། ཨ། ཕྲག་པར་སྐར་མདའ་འཕེན། ཨ། སོག་པར་སྲིན་མོ་རལ་གྲིའི་སྐྲ་ཅན། ཨ། སོག་ཕྲག་ཏུ་ཀླུ་མོ་ལྕེ་འབེབས་མ། ཨ། གཡོན་ཕྱོགས་ཀྱི་སོག་པར་གནོད་སྦྱིན་ཁྱུང་ཐོགས་མ། ཨ། ཕྲག་པར་བ་ལང་སྣ། ཨ། ནུ་མར་མིག་འབྱིན་སྙིང་སྲེག་མ་སྟེ། ཐམས་ཅད་ཀྱང་སྐུ་མདོག་དམར་ནག་རྡོ་རྗེ་དང་དུང་ཁྲག་བསྣམས་པའོ། །ཧཱུཾ། ཕྱོགས་མཚམས་བརྒྱད་ཀྱི་དངོས་པོ་ཅིར༴ སྤོར་མ་བརྒྱད་དུ་བསྒོམས་པའི༴ ལྷ་སྲིན་སྡེ་བརྒྱད་བར་ཆད་ཀུན་བསྒྲལ་ནས། །འཇིག་རྟེན་བར་ཆད་མིང་ཡང་༴ ན་མོ་ཧཱུཾ། སོག་པའི་འོག་གི་གཡས་གཡོན་གྱི་རྩིབ་མ་དང་པོ་གཉིས་གཉིས་ཏེ་ནམ་ཚོང་རྩིབ་མ་བཞི་ལ་གསང་བའི་ཡུམ་བཞི་ནི། ཛཿ གཡས་ཀྱི་དང་པོར་དཀར་མོ་རྒྱས་འདེབས་མ་རྡོ་རྗེ། ཧཱུཾ། གཡོན་དང་པོར་སེར་མོ་ཚེ་འཕེལ་མ་མདའ་གཞུ། བཾ། གཡོན་འོག་མར་དམར་མོ་དབང་སྡུད་མ་རྒྱལ་མཚན། ཧོཿ གཡས་འོག་མར་ནག་མོ་རྨོངས་བྱེད་མ་དྲིལ་བུ། ཧཱུཾ། དྭངས་མ་བཞི་ཡི་དངོས་པོ་ཅིར༴ གསང་བའི་ཡུམ་བཞི་བསྒོམས་པའི༴ བེམ་པོར་ལྟ་བའི་མཚན་མ་ཀུན་བསལ་ནས། །ཐབས་དང་ཤེས་རབ་འདུ་འབྲལ་མེད་པར་ཤོག །ན་མོ་ཧཱུཾ། མཇིང་ཚིགས་ལྔ་སྒལ་ཚིག་ཉི་ཤུ་མཇུག་ཚིགས་གསུམ་རྣམས་སྡོམས་པའི་སྒལ་ཚིགས་ཉེར་བརྒྱད་ལ་བྷྱོ་ཞེས་པས་དབང་ཕྱུག་མ་ཉི་ཤུ་རྩ་བརྒྱད་པོ་རང་རང་གི་མགོ་བརྙན་ཅན་སྐུ་མདོག་ཕྱག་མཚན་དང་བཅས་པ་སོ་སོའམ། ཡང་ན་ཐམས་ཅད་ཀྱང་སྨུག་ནག་རྩེ་གསུམ་ཐོགས་པའོ། །སོ་སུམ་ཅུ་རྩ་གཉིས་ལ་ཨེ་ཞེས་པས་མཁའ་འགྲོ་སུམ་ཅུ་རྩ་གཉིས་པོ་ཐམས་ཅད་སྨུག་ནག་རྡོ་རྗེ་གཤོག་པ་དང་དུང་ཁྲག་བསྣམས་པའོ། །ཧཱུཾ། སོ་དང་སྒལ་ཚིགས་དངོས་པོ་ཅིར༴ མཁའ་འགྲོ་དབང་ཕྱུག་བསྒོམས་པའི༴ ལོ་ཟླ་མི་མཐུན་གནོད་པ་ཀུན་བསལ་ནས། །བར་ཆད་བགེགས་ཀྱི་སྡུག་བསྔལ་མེད་པར་ཤོག །ན་མོ་ཧཱུཾ། མགོ་དང་གཟུགས་དྲུག་ལ། ཧཱུཾ་ཞེས་པས་མ་མོ་བདུན། རྐང་ལག་གི་རྒྱབ་སྲེག་ནེ་བཞི་ལ་ཏིང་ཞེས་པས་སྲིང་མོ་བཞི་སྟེ་ཐམས་ཅད་འཇོ་སྒེག་མཛེས་དམར་གྱི་ཚུལ་ཅན་གཡས་འཁྱུད་སྟབས་དང་གཡོན་དུང་ཁྲག །ཧཱུཾ། དགྲ་དང་བགེགས་ཀྱི་བར་ཆད་ཅིང་༴ མ་བདུན་སྲིང་བཞི་བསྒོམས་པའི༴ ཚེ་སྲོག་གནོད་པའི་བར་ཆད་ཀུན་བསྒྲལ་ནས། །ཉིན་མཚན་རྟག་ཏུ་ཐམས་ཅད་བསྲུང་བར་ཤོག །ན་མོ་ཧཱུཾ། རྩིབ་མ་ཉེར་བཞི་ལས་ན མ་ཚོང་བཞི་སྟེང་དང་འོག་ཏུ་གཡས་གཡོན་གྱི་རྩིབ་ཐུང་རེ་རེ་བོར་བའི་གུར་རྩིབ་བཅོ་བརྒྱད་ལ་ཧ་ཞེས་པས་གིང་བཅོ་བརྒྱད་པོ་སྔོ་སྐྱ་གྲི་དང་བསྒྲལ་བྱ་འཛིན་པ། ཧཱུཾ། གནོད་པའི་བསམ་སྦྱོར་ངན་པ་ཅིར༴ གིང་ཆེན་བཅོ་བརྒྱད་བསྒོམས་པའི༴ ཀི་ཀང་གཤེད་གཞིའི་གནོད་པ་ཀུན་བསལ་ནས། །རྣམ་པར་རྟོག་པའི་བར་ཆད་མེད་པར་ཤོག །ན་མོ་ཧཱུཾ། རྐང་ལག་གི་སོར་ཚིགས་བཅོ་ལྔ་ཕྲག་བཞི་རེ་རེ་ལའང་རྩ་དྲུག་དྲུག་ལ་ཕོ་ཉ་སུམ་བརྒྱ་དྲུག་ཅུ་སྒོམ་པ་ལས། སོར་ཚིགས་ཀྱི་རྒྱབ་ཀྱི་རྩ་ཚིགས་རུས་དང་བཅས་པ་ལ་ཧཱུཾ་ཧུཾ་ཞེས་པས་སྟེང་གི་ཕོ་ཉ་ཁྲོ་བོ་ཁྲོ་མོ་ཡ་དྲུག་ཅུ་པོ་ཐམས་ཅད་སྔོན་པོ་གཤོག་པ་འཛིན་པ། ཧཱུཾ། ཀེང་རུས་ཚིག་ཀྱི་དངོས་པོ་ཅིར༴ ཁྲོ་བོ་ཁྲོ་མོ་བསྒོམས་པའི༴ ཁམས་གསུམ་གདུག་པ་མ་ལུས་ཀུན་བསྒྲལ་ནས། །དྲག་པོའི་ཕྲིན་ལས་ལྷུན་གྱིས་གྲུབ་པར་ཤོག །ན་མོ་ཧཱུཾ། སོར་ཚིགས་བཅོ་ལྔ་ཕྲག་བཞིའི་གཡས་གཡོན་གྱི་རྩ་བཞི་བཞི་སྟེ་དྲུག་ཅུ་ལ་ཕྱོགས་ཀྱི་ཕོ་ཉ་ཉིས་བརྒྱ་བཞི་བཅུ་ལས། ཛཿ ལག་གཡས་ཀྱི་ཚིགས་ཀྱི་རྩ་ལ་སྐུའི་ཕོ་ཉ་དཀར་མོ་ལྕགས་ཀྱུ་ཐོགས་པ་དྲུག་ཅུ། ཧཱུཾ་ལག་གཡོན་གྱི་ཚིགས་ཀྱི་རྩ་ལ་ཡོན་ཏན་གྱི་ཕོ་ཉ་སེར་མོ་ཞགས་པ་ཐོགས་པ་དྲུག་ཅུ། བཾ། རྐང་གཡོན་གྱི་ཚིགས་ཀྱི་རྩ་ལ་གསུང་གི་ཕོ་ཉ་དམར་མོ་ལྕགས་སྒྲོག་ཐོགས་པ་དྲུག་ཅུ་ཧོཿ རྐང་གཡས་ཀྱི་ཚིགས་ཀྱི་རྩ་ལ་ཕྲིན་ལས་ཀྱི་ཕོ་ཉ་ནག་མོ་ཐོ་བ་ཐོགས་པ་དྲུག་ཅུ། ཧཱུཾ། རྩ་དང་བཅུད་ཀྱི་དངོས་པོ་ཅིར༴ ཕོ་ཉ་ཉིས་བརྒྱ་བཞི་བཅུ་བསྒོམས་པའི་མཐུས། །དགྲ་དང་བགེགས་ཀྱི་བར་ཆད་ཀུན་བསྒྲལ་ནས། །བདག་གཞན་དོན་གཉིས་ལྷུན་གྱིས་གྲུབ་པར་ཤོག །ན་མོ་ཧཱུཾ། མཐིལ་ཕྱོགས་ཀྱི་སོར་ཚིགས་བཅོ་ལྔ་ཕྲག་བཞིའི་རྩ་རེ་རེ་ལ། མ་ཞེས་པས་ལས་བྱེད་ཀྱི་ཕོ་ཉ་མ་མོ་བྱུ་རུའི་མདོག་ཅན་གཏུན་ཤིང་ཐོགས་པ་དྲུག་ཅུ། ཧཱུཾ། ཤ་དང་ཁྲག་གི་དངོས་པོ་ཅིར༴ མ་མོ་དྲུག་ཅུ་བསྒོམས་པའི༴ སྲིད་གསུམ་གདུག་པ་མ་ལུས་ཀུན་བསྒྲལ་ནས། །ཕྲིན་ལས་ཐམས་ཅད་ལྷུན་གྱིས་གྲུབ་པར་ཤོག །ན་མོ་ཧཱུཾ། གཞན་ཡང་སྐྲ་རྣམས་དུས་གསུམ་གྱི་རིག་འཛིན་བླ་མ་བྱེ་བ་ས་ཡའི་ཚོགས་དང་། བ་སྤུ་རྣམས་སྤྲུལ་པ་དང་ཡང་སྤྲུལ་ཕྱག་བརྙན་འབུམ་ཕྲག་མཐའ་ཡས་པའི་ཚོགས་བསམ་གྱིས་མི་ཁྱབ་པར་སྣང་བ། དེ་ལྟར་དཀྱིལ་འཁོར་གྱི་འཁོར་ལོ་ཐམས་ཅད་དྭངས་པའི་མཚོ་ལ་གཟའ་སྐར་ཤར་བ་ལྟར་མ་འདྲེས་ཡོངས་རྫོགས་སུ་བཀྲ་ལམ་གྱིས་གསལ་བར་གྱུར། དེ་ནས་དབང་བསྐུར་དང་བྱིན་རླབས་ཞི་བ་ལྟར་བྱས་རྗེས། སྤྱན་འདྲེན་ནི། བཛྲ་ས་མཱ་ཛཿ རུ་ལུ་རུ་ལུ་ཧཱུཾ། ཞེས་པས་སྙན་གསན་དབབ། ༀ། ཐུགས་རྗེ་ལྕགས་ཀྱུ་སོགས་ཀྱི་མཐར། ཨེ་ཧྱེ་ཧི་ཤྲཱི་ཧེ་རུ་ཀ་ཨ་ར་ལི་དྲྀ་ཤྱ་ཧོཿ ས་མ་ཡ་ཧོཿ ས་མ་ཡ་སྟྭཾ། ཛཿཧཱུཾ་བཾ་ཧོཿ ཨེ་ཨ་ར་ལི་ཧྲཱིཾ་ཧྲཱིཾ་ཞེས་པས་སྤྱན་དྲངས་ལ། ཛཿཧཱུཾ་བཾ་ཧོ༔ས་བསྟིམ་པ་ནས་བཟུང་། འདོད་ཡོན་གྱི་མཆོད་པའི༴ སྤྱོད་ཡུལ་མ་ལུས་ཡོངས་སུ་དག་པར་ཤོག །ན་མོ་ཧཱུཾ། ཞེས་པའི་བར་ཞི་བ་ལྟར་ལས། ཁྱད་པར་གཏོར་མཆོད་ཀྱི་རྗེས་སུ། མ་ཧཱ་རཀྟ་པྲ་ཏཱི་ཙྪ་ཁ་ཧིས་རཀྟ་ཕུལ་ལ། ཧཱུཾ། ཞེན་ཅིང་ཆགས་པའི་དངོས་པོ་ཅིར༴ ཁམས་གསུམ་ཁྲག་གི་རྒྱ་མཚོ་ཕུལ་བའི་མཐུས། །དུག་ལྔ་མ་ལུས་རྩ་ནས་དག་གྱུར་ཏེ། །གཉིས་མེད་མཆོད་པ་ལྷུན་གྱིས་གྲུབ་པར་ཤོག །ན་མོ་ཧཱུཾ ༴ ཞེས་པ་བཅུག །བསྟོད་པ་ནི། ཧཱུཾ། བདག་མེད་ཕྱོགས་བྲལ་དོན་དམ་ཐུགས་ཆུད་ཅིང་། །བྱམས་དང་སྙིང་རྗེས་དགྲ་ཟུན་མི་མངའ་ཡང་། །གདུག་པ་འདུལ་ཕྱིར་དུས་ལས་མི་འདས་པའི། །འཇིགས་བྱེད་ཁྲོ་བོའི་ཚོགས་ལ་ཕྱག་འཚལ་བསྟོད། །ཅེས་བསྟོད་ལ། ཧཱུཾ། ཉོན་མོངས་སྡུག་བསྔལ་དངོས་པོ་ཅིར་སྣང་ཡང་། །སོགས་ཞི་བ་ལྟར་རོ། །སྨོན་ལམ་དང་འདོད་གསོལ་ནི། ཧོཿ ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདག་ཉིད་བཅོམ་ལྡན་འདས་ཆེ་མཆོག་ཧེ་རུ་ཀ་ལ་སོགས་ཏེ་ཧེ་རུ་ཀ་དགུ་ཀློང་འབར་བ། ཁྲོ་བོ་དང་ཁྲོ་མོ་བསམ་གྱིས་མི་ཁྱབ་པ་ཐམས་ཅད་གསན་ཅིང་དགོངས་སུ་གསོལ། བདག་ཅག་རྣམ་འབྱོར་གྱི་མཆོད་པ་དམ་པ་ཞེས་པ་ནས། འགྲོ་དོན་མ་ལུས་ལྷུན་གྱིས་གྲུབ་པར་ཤོག །ན་མོ་ཧཱུཾ། ཞེས་པའི་བར་དང་། འཛབ་དམིགས་ཀྱང་། གཞི་ལུས་ཀྱི་ཡེ་ཤེས་སེམས་དཔའི་ཐུགས་ཀར་ཉི་མ་ལ་ཧཱུཾ་ཡིག་སྔོན་པོ་བཟླ་བྱའི་སྔགས་ཕྲེང་གིས་བསྐོར་བ་ལས་ཞེས་བསྒྱུར་བ་མ་གཏོགས་ཞི་བ་ལྟར་ལས། བཟླ་བྱའི་སྔགས་སྤྱི་འཛབ་གུ་ཧྱ་ཛྙཱ་ན་ཁོ་ནའམ། སྤྲོ་ན་སྒྲུབ་ཐབས་རྒྱས་པ་ལྟར་ཁྲོ་བོའི་བསྐྱེད་སྔགས་རྣམས་ཀྱི་ཅི་འགྲུབ་བཟླས་མཐར། ཧཱུཾ། རྒྱུ་འབྲས་རྩོལ་བའི་སོགས་སྔར་ལྟར་རོ། །དེ་ལྟར་ཞི་ཁྲོ་གང་བྱེད་ཀྱང་རྗེས་ཆོག་ཐུན་མོང་བ་ནི། ཚོགས་ཀྱི་ཡོ་བྱད་རྣམས་ཀྲོ་དྷི་ཤྭ་རཱིས་བསང་། རཾ་ཡཾ་ཁཾ་གིས་བསྲེགས་གཏོར་བཀྲུས་ཏེ་སྦྱངས། སྟོང་པའི་ངང་ལས་ཚོགས་གཞོང་པདྨ་འབར་བའི་སྣོད་དུ་ཚོགས་རྫས་ཡེ་ཤེས་ཀྱི་བདུད་རྩི་འདོད་ཡོན་གྱི་རྣམ་པ་མ་ཚང་བ་མེད་པ་སོ་སོའི་ལྷ་མོའི་རོལ་པ་བསམ་གྱིས་མི་ཁྱབ་པའི་སྤྲིན་འཕྲོ་བའི་ལོངས་སྤྱོད་ཀྱི་གཏེར་དུ་གྱུར་པར་བསམ་ཞིང་། ༀ་ཨཱཿཧཱུཾ། ལན་གསུམ་བརྗོད་པས་བྱིན་གྱིས་བརླབས་ལ། བདག་མཆོད་ཀུན་མཉེས་ཐམས་ཅད་ཚིམ། །ཀུན་ལ་ཕན་པའི་སྨན་ཡིན་ཏེ། །རྣལ་འབྱོར་བདག་ཉིད་ཆེན་པོ་ཡིས། །ཐམས་ཅད་བཟའ་ཞིང་བརྒྱད་པར་བྱ། །ཨ་ལ་ལ་ཧོཿ བཟའ་དང་བཅའ་དང་བཏུང་དང་བགོ། །འདོད་པའི་ཡོན་ཏན་ལྔ་ལྡན་པ། །ནམ་མཁའི་སྤྲིན་ལྟར་གཏིབས་དཔུངས་ནས། །དཀྱིལ་འཁོར་ཉིད་ལ་དཀྱིལ་འཁོར་ཐིམ། །ཨ་ལ་ལ་ཧོཿ ཞེས་ལུས་དཀྱིལ་འཁོར་ལྷ་རྣམས་མཆོད་པའི་དོན་དུ་ནང་གི་སྲེག་བླུགས་ཀྱིས་ཚིམ་པར་རོལ་ལ། ལྷག་མ་བསྡུས་ཏེ་ཆོ་ག་རྒྱས་བསྡུས་ཇི་ལྟར་རིགས་པས་བསྔོ་ཞིང་། བརྟན་མའི་གཏོར་སྐྱོང་ཡང་བྱས་ལ། ཉེར་བསྡུད་ནི། ཧཱུཾ། ཞེས་བརྗོད་པས་རང་གི་སྙིང་གའི་འོད་ཀྱིས་ཕོག་པས་དག་པའི་སྣོད་བཅུད་ཐམས་ཅད་གཞལ་ཡས་ཁང་ལ་ཐིམ། དེ་གཞི་ལུས་ཀྱི་ལྷ་ཡབ་ཡུམ་ལ་ཐིམ། ཡུམ་ཡབ་ལ། ཡབ་ཀྱི་ལུས་དཀྱིལ་གྱི་ལྷ་རྣམས་ཀྱང་གནས་དེ་ཉིད་དུ་འོད་དུ་ཞུ་ནས་གཞི་ལུས་ཀྱི་ལྷ་དང་བཅས་པ་ཡེ་ཤེས་སེམས་དཔའ་ལ། །དེ་ཏིང་འཛིན་སེམས་དཔའ་ཐུགས་སྲོག་གི་ཡི་གེ་ལ། །དེ་ཡང་ན་དའི་བར་དུ་རིམ་གྱིས་བསྡུས་ནས་མི་དམིགས་པར་གྱུར་པ་ལ་མཉམ་བཞག་བྱ། དེའི་ངང་ལས་ཆུ་ལས་ཉ་ལྡང་བ་ལྟར་རང་ཉིད་ཞི་བ་ལ་ཀུན་ཏུ་བཟང་པོ་དང་། ཁྲོ་བོར་ཧེ་རུ་ཀ་ཕྱག་གཉིས་པའི་སྐུར་ལངས་ལ། གོ་བགོ་ལུས་བསྲུང་ནི། རང་གི་སྤྱི་བོར་ༀ། མགྲིན་པར་ཨཱཿ སྙིང་གར་ཧཱུཾ་རྣམས་ཀྱིས་མཚན་པར་བམས་ལ། བཛྲ་ཀཱ་ཝཱ་ཙི་རཀྵ་ཧཾ། ཞེས་ལུས་རྡོ་རྗེའི་གོ་ཆས་ཞུ་ལུགས་སུ་བཅིངས་པས་སྒོ་གསུམ་རྡོ་རྗེ་གསུམ་དང་དབྱེར་མི་ཕྱེད་པར་བསམ་ཞིང་བསྔོ་ཤིས་ཀྱིས་མཐའ་བརྒྱན། སྣང་གྲགས་རིག་གསུམ་ལྷ་སྔགས་ཆོས་ཉིད་ཀྱི་རང་བཞིན་དུ་ཤེས་པས་སྤྱོད་ལམ་ཐམས་ཅད་དོན་ཡོད་པར་སྤྱོད་དོ། །ད་ནི་ཞི་ཐུང་ཁྲོ་ཐུང་གི་ཆོ་ག་འདི་ལ་བརྟེན་ནས་བསྙེན་པ་བྱེད་ཚུལ་གྱི་ཆིངས་ཅུང་ཟད་བསྟོད་ཏེ། དབེན་པར་མཚམས་དམ་པར་བཅད་ནས་ཐུན་བཞིའི་རིམ་པས་ཐོག་མར་ཞི་བའི་བསྙེན་པ་རྫོགས་པར་བྱ། དེ་རྗེས་ཞག་གཅིག་ངལ་བསོ་བའམ་ཞི་བ་སྔ་དྲོ་བསྡུས་པའི་ཕྱི་དྲོའི་ཐུན་ནས་བརྩམས་ཀྱང་རུང་སྟེང་ཁྲོ་བོའི་བསྙེན་པ་ལ་འཇུག་གོ། །ཚུལ་དེས་ཞི་ཁྲོ་གཉིས་ལ་རབ་མཚན་མའི་བསྙེན་པ་དང་། འབྲིང་དུས་བསྙེན་ཟླ་དྲུག་ལ་སོགས་པ། ཐ་མ་གྲངས་བསྙེན་ལ་རྒྱས་འབྲིང་བསྡུས་གསུམ་ལས། རྒྱས་པ་ནི། སོ་སོའི་སྒོས་འཛབ་བཟླ་བ་ཡིན་པས་ཀུན་བཟང་དང་ཆེ་མཆོག་གི་སྔགས་ཆིག་འབུམ་རེ། ཞི་བའི་རིགས་ལྔ་དང་རྒྱུད་ལུང་གི་ཧེ་རུ་ཀ་དགུ་ལ་ཆིག་ཁྲི་རེ། ཞི་བའི་སེམས་དཔའ་མན་ཆད་དང་། ཁྲོ་བོའི་དབང་མོ་ཡན་ཆད་ཀྱི་འཁོར་སྔགས་རྣམས་ལྔ་སྟོང་རེ། དེ་མན་ཆད་བཀའ་ཉན་གྱི་དཀྱིལ་འཁོར་ལ་ཆིག་སྟོང་རེ་ཙམ་དང་། སྤྱི་འཛབ་གུ་ཧྱ་ཉྫཱ་ན་ཞི་ཁྲོ་སོ་སོར་སུམ་འབུམ་རེས་མཐའ་བརྟེན་པའོ། །འབྲིང་པོ་ནི། ཞི་བ་རིགས་དྲུག་དང་ཁྲོ་བོ་ཧེ་རུ་ཀ་བཅུ་སྔར་ལྟར་ལས། འཁོར་སྔགས་རྣམས་དོར་ནས་སྤྱི་འཛབ་ལ་འཇུག་སྟེ་གྲངས་བཤད་མ་ཐག་པ་བཞིན་ནོ། །བསྡུས་པ་ནི། སྤྱི་འཛབ་གུ་ཧྱ་ཛྙཱ་ན་ཁོ་ན་ཞི་བ་ལ་འབུམ་ཕྲག་གསུམ་མམ་གཅིག་དང་། ཁྲོ་བོ་ལ་འབུམ་ཕྲག་བཞིས་མཐའ་བརྟེན་པ་བཟླ་ཞིང་། དེ་ཐམས་ཅད་ལ་འབུམ་རྗེས་སུ་ཁྲི་སོགས་བཅུ་ཆའི་གྲངས་ཀྱི་ཁ་སྐོང་བ་དང་། བཅུ་ཆའི་སྦྱིན་སྲེག་དང་བཅས་པ་བྱ་བ་ཡིན་ནོ། །གལ་ཏེ་བློ་ནུས་ཆུང་བས་ཁྲོ་བོ་ལ་ལུས་དཀྱིལ་གྱི་ལྷ་ཡོངས་རྫོགས་བསྒོམ་པར་མི་ནུས་པས་ནི། བཀའ་ཉན་གྱི་དཀྱིལ་འཁོར་རྣམས་དོར་ནས་ཧེ་རུ་ཀ་དགུ། གནས་ཡུལ་སྒོ་སྐྱོང་། སྤོར་མ་གསང་ཡུམ། དབང་མོ་རྣམས་ཏེ་རྩ་དཀྱིལ་གྱི་ལྷ་ཚོགས་ཙམ་བཀོད་ནས་བཟླས་བརྗོད་བགྱིས་ནའང་ཆད་པའི་སྐྱོན་མེད་དོ། །ཡང་ལུང་གི་ཞི་ཁྲོ་གཉིས་དཀྱུས་གཅིག་ལ་གྱེར་བའི་ཚེ། །ཕྱི་དཀྱིལ་ལ་འགོད་ན་སྒྲུབ་ཐབས་དངོས་གྲུབ་ཆར་འབེབས་ལྟར་ཞི་ཁྲོ་སྟེང་འོག་ཏུ་སྒོམ་པ་ཡིན་ལ། འདིར་ལུས་དཀྱིལ་གྱི་དབང་དུ་བྱས་ན། ཞི་ལུང་གི་བཟླས་པའི་བར་སོང་རྗེས་ཁྲོ་དཀྱིལ་དུ་གནས་བསྒྱུར་ཏེ། ཨེ་ཡཾ་སོགས་རྟེན་དང་བརྟེན་པའི་བསྐྱེད་སྔགས་དང་གསལ་འདེབས་ཀྱི་ཚིག་རྣམས་བརྗོད་པས། ཕྱི་རིན་པོ་ཆེའི་གཞལ་ཡས་ཁང་དེ་ཉིད་དུར་ཁྲོད་འབར་བའི་གཞལ་ཡས་ཁང་དང་གཞུ་ལུས་ཀྱི་ཀུན་བཟང་ཆེ་མཆོག །ལུས་དཀྱིལ་གྱི་རིགས་ལྔ་རྒྱུད་ཀྱི་ཧེ་རུ་ཀ་ལྔ། སེམས་དཔའ་བརྒྱད་གནས་མ། སེམས་མ་བརྒྱད་ཡུལ་མ། བྱ་བྱེད་ཐུབ་དྲུག་དང་བཅས་པ་འབར་མ། ཏ་ཀྲྀ་ཏ་ཡབ་བཞི་སྒོ་སྐྱོང་གདོང་མོ་བཞི། ཡུམ་བཞི་གསང་ཡུམ་བཞི་རྣམས་སུ་གནས་བསྒྱུར་ཞིང་། ལུང་གི་ཧེ་རུ་ཀ་བཞི་ཡུམ་བཅས། དབང་མོ། མཁའ་འགྲོ། མ་བདུན། སྲིང་བཞི། ཀིང་བཅོ་བརྒྱད། ཕོ་ཉ་སུམ་བརྒྱ་དྲུག་ཅུ་རྣམས་སྔགས་བརྗོད་པ་ཙམ་གྱིས་གསར་བསྐྱེད་དུ་ལམ་གྱིས་བསྒོམ་ཞིང་། བསྐུར་རློབ་དབབ་དྲངས་བསྟིམ་པ་རྣམས་མི་དགོས་པས་འདིར་མཆོད་བསྟོད་དང་བཟླས་པ་རྣམས་སོང་རྟིང་། རྗེས་ཆོག་གི་ཚོགས་གཏོར་དང་དཀྱིལ་འཁོར་བསྡུ་བ་རྣམས་བྱེད་པ་ཡིན་ནོ། །ལུང་གི་ཞི་ཁྲོ་ལུས་དཀྱིལ་དུ་སྒྲུབ་པའི་སྒོ་ནས་སྔོན་དུ་བྱ་བའི་བསྙེན་པ་ཇི་ལྟར་བྱ་བའི་ཆོ་ག་བཤད་པའི་ལེ་ཚན་ནོ།། །།

༈ ༀ་སྭ་སྟི། ད་ནི་སྒྲུབ་ཁོག་ཏུ་སྒྲུབ་ཞག་དུ་བྱེད་ཀྱི་ཆོག་ཁྲིགས་རྒྱས་པའི་སྐབས་ལས། སྤྲོ་ཞིང་ནུས་ན་བཟླས་པའི་དུས་ཞི་བ་ལ་འཛབ་བསྐུལ་དང་རྗེས་ཀྱི་བསྟོད་པ། ཁྲོ་བོ་ལ་གནས་སྒྱུར་གྱི་བསྟོད་པ་རྣམས་ཟུར་འདེབས་ལྟར་སྦྱར་བར་བྱ་ཞེས་ཁ་འཕངས་པ་ནི་འདི་ཡིན་ཏེ། དེ་ལ་ཐོག་མར་འཛབ་ཁང་དབྱེ་བ་དང་། འཛབ་དགོངས་ཀྱི་སྤྲོ་བསྡུའི་དམིགས་པ་སྒྲུབ་ཐབས་ལྟར་གསལ་བཏབ་ནས། འཛབ་བཟླ་བ་དངོས་ལ། ཞི་ཁྲོ་རིག་འཛིན་གསུམ་ལས། དང་པོ་ཞི་བ་ལ་ཡང་། བསྐུལ་བ་དང་། འཛབ་བཟླ་བ་དང་། བསྟོད་པ་འབུལ་བ་སྟེ་གསུམ་གསུམ་དུ་ཤེས་པར་བྱའོ། །ཧཱུཾ། རིག་པ་གསུང་གི་བྱིན་རླབས་ཀྱིས། །ལྗགས་ཀྱི་རྩེ་ལ་བཀྲམ་ནས་ནི། དུ་མ་ཉིད་དུ་སོ་སོར་གོ། །འཁོར་ལོ་འབར་བའི་ལྟེ་དབུས་སུ། །སེང་ཆེན་བསྣོལ་བའི་ཁྲི་སྟེངས་ན། །རིན་ཆེན་ཉི་ཟླ་པད་གདན་ལ། །ཨེ་མ་ཀུན་བཟང་རྡོ་རྗེ་ཉིད། །རིག་པའི་ཚུལ་སྣང་སངས་རྒྱས་པ། །སངས་རྒྱས་ཐམས་ཅད་བསྐྱེད་པའི་ཡབ། །ཞལ་གསུམ་ཕྱག་དྲུག་འགྲོ་བ་འདུལ། །གཡས་དཀར་གཡོན་དམར་དབུས་མཐིང་ཞལ། །དང་པོ་བྱང་ཆུབ་མཆོག་གི་རྒྱ། །བར་པ་རྡོ་རྗེ་དྲིལ་བུ་འཛིན། །ཐ་མ་མཉམ་བཞག་ཡེ་ཤེས་འཕྲོ། །ཡུམ་གྱི་དམ་པར་མཚན་གསོལ་བ། ཕྱི་ཡི་ཡུལ་ལ་སངས་རྒྱས་པ། །སྣང་སྲིད་ཐམས་ཅད་ཆོས་ཀྱི་དབྱིངས། །ཐབས་དང་ཤེས་རབ་འབྲེལ་བའི་ཡུམ། །བྱ་བ་མོ་དང་གཉིས་སུ་མེད། །བདག་གི་ཡི་དམ་ལྷ་ལགས་ཀྱི། །ཡི་དམ་ལྷ་ལ་མཆོད་པར་འབུལ། །སྐུ་གསུང་ཐུགས་ཀྱི་དངོས་གྲུབ་སྩོལ། །ཧཱུཾ། ཡིད་ཆོས་རང་རིག་མ་སྐྱེས་སེམས། །ཀུན་བཟང་ཡབ་ཡུམ་རང་བཞིན་ལས། །ཏིང་འཛིན་བྱེད་པོར་དབང་བསྐུར་ནས། །མ་ལུས་ཀུན་གྱི་བྱེད་པོར་ཤོག །ཅེས་བསྐུལ་ལ། ཧཱུཾ་ཧཱུཾ་ཧཱུཾ་བཛྲ་ཙིཏྟ་ༀ། ཨ་ཨ་ཨ་བཛྲཱི་བྷ་དྲ་ས་མནྟ་ཨ། ཞེས་བཟླ། ཧཱུཾ། བྱང་ཆུབ་སེམས་མཆོག་ཡེ་ཤེས་རྡོ་རྗེ་ཐུགས། །སྲིད་གསུམ་དབང་སྡུད་ཐམས་ཅད་མཁྱེན་པའི་དཔལ། །སྙེལ་བ་མི་མངའ་འགྲོ་བའི་སྐྱབས་མཛད་པ། །ཀུན་བཟང་རྡོ་རྗེ་ཡིད་ལ་ཕྱག་འཚལ་ལོ། །ཧཱུཾ། གདོན་ནས་མ་བྱུང་མ་སྐྱེས་ཆོས་ཀྱི་དབྱིངས། །མི་སྐྱེ་མི་འགག་དངོས་པོར་འཛིན་དང་བྲལ། །འབྱུང་བྱེད་ཐམས་ཅད་བསྐྱེད་པ་ཡུམ་གྱི་ཚུལ། །བཟང་མོ་བྱ་བ་མོ་ལ་ཕྱག་འཚལ་ལོ། །ཞེས་བསྟོད། ༈ །དེ་བཞིན་དུ་རིགས་འགྲེ་ཤེས་པར་བྱས་ཏེ། ཧཱུཾ། རིག་པ་གསུང་གི་བྱིན་རླབས་ཀྱིས། །ལྗགས་ཀྱི་རྩེ་ལ་བཀྲམ་ནས་ནི། །དུ་མ་ཉིད་དུ་སོ་སོར་གོ། །འཁོར་ལོའི་ལྟེ་བར་གཙོ་བོའི་མདུན། །སེང་ཆེན་བསྣོལ་བའི་ཁྲི་སྟེངས་ན། །རིན་ཆེན་ཉི་ཟླ་པད་གདན་ལ། །བཅོམ་ལྡན་རྡོ་རྗེ་སེམས་དཔའ་གཙོ། །སྐུ་མདོག་མཐིང་ག་འོད་དུ་འབར། །ཞལ་གསུམ་ཕྱག་དྲུག་འགྲོ་བ་འདུལ། །གཡས་དཀར་གཡོན་དམར་དབུས་མཐིང་ཞལ། །རྡོ་རྗེ་འཁོར་ལོ་རིན་ཆེན་གཡས། །དྲིལ་བུ་པདྨ་རལ་གྲི་གཡོན། །ཡུམ་གྱི་དམ་པར་མཚན་གསོལ་བ། །ཀུན་ཏུ་བཟང་དང་གཉིས་སུ་མེད། །བདག་གི་ཡི་དམ་ལྷ་ལགས་ཀྱི། །ཡིད་དམ་ལྷ་ལ་མཆོད་པར་འབུལ། །སྐུ་གསུང་ཐུགས་ཀྱི་དངོས་གྲུབ་སྩོལ། །ཧཱུཾ། རྣམ་ཤེས་ནམ་མཁའི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པས། །མི་བསྐྱོད་ཡབ་ཡུམ་རང་བཞིན་ལས། །ཏིང་འཛིན་ཐུགས་སུ་དབང་སྒྱུར་ནས། །དངོས་གྲུབ་ལས་རྣམས་མངོན་བྱེད་ཤོག །ཧཱུཾ་བཛྲ་དྷྲི་ཀ྄ །མཱུཾ་དྷཱ་ཏྭེ་ཤྭ་རཱི། ༀ། ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་སྟོང་པ་ཉིད་ཀྱི་ཚུལ་འཛིན་ཅིང་། །ཡོན་ཏན་ཡེ་ཤེས་ལྔ་དོན་ཐུགས་ཆུད་པའི། །རྒྱལ་མཆོག་མི་བསྐྱོད་པ་ལ་ཕྱག་འཚལ་ལོ། །དོན་དམ་གཉིས་མེད་དབྱིངས་སུ་གཅིག་པ་ལས། །རྡོ་རྗེ་དབྱིངས་ཕྱུག་ཡུམ་མཆོད་ཚུལ་འཛིན་ཅིང་། །ཡོན་ཏན་རྣམ་རྟོག་མི་མངའ་ཆ་འཛིན་མ། །རྒྱལ་ཡུམ་ཀུན་ཏུ་བཟང་ལ་ཕྱག་འཚལ་ལོ། །ཧཱུཾ། ཤར་ཕྱོགས་འཁོར་ལོའི་རྩིབས་སྟེང་དུ། །གླང་ཆེན་བསྣོལ་བའི་ཁྲི་སྟེངས་ན། །རིན་ཆེན་ཉི་ཟླ་པད་གདན་ལ། །བཅོམ་ལྡན་རྣམ་པར་སྣང་མཛད་གཙོ། །སྐུ་མདོག་དཀར་པོ་འོད་དུ་འབར། །ཞལ་གསུམ་ཕྱག་དྲུག་འགྲོ་བ་འདུལ། །གཡས་སྔོ་གཡོན་དམར་དབུས་དཀར་ཞལ། །འཁོར་ལོ་རྡོ་རྗེ་རིན་ཆེན་གཡས། །དྲིལ་བུ་པདྨ་རལ་གྲི་གཡོན། །ཡུམ་གྱི་དམ་པར་མཚན་གསོལ་བ། །སངས་རྒྱས་སྤྱན་དང་གཉིས་སུ་མེད། །བདག་གི་ཡི་དམ་ལྷ་ལགས་ཀྱི། །ཡི་དམ་ལྷ་ལ་མཆོད་པར་འབུལ། །སྐུ་གསུང་ཐུགས་ཀྱི་དངོས་གྲུབ་སྩོལ། །གཟུགས་ཕུང་ས་ཡི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པས། །སྣང་མཛད་ཡབ་ཡུམ་རང་བཞིན་ལས། །ཏིང་འཛིན་སྐུ་རུ་དབང་སྒྱུར་ནས། །དངོས་གྲུབ་ལས་རྣམས་མངོན་བྱེད་ཤོག །ༀ་ཛི་ན་ཛིཀ྄ །ལཱཾ་དྭེ་ཥ་ར་ཏི། ༀ། ཆོས་སྐུ་ནམ་མཁའ་བཞིན༴ གཟུགས་སྐུ་མེ་ལོང་ལྟ་བུའི་ཚུལ་འཛིན་ཅིང་། །ཡོན་ཏན་ཆོས་ཀྱི་འཁོར་ལོ་བསྐོར་མཛད་པ། །རྒྱལ་མཆོག་རྣམ་སྣང་མཛད་ལ་ཕྱག་འཚལ་ལོ། །དོན་དམ་གཉིས་མེད་དབྱིངས་སུ་གཅིག་པ་ལས། །དེ་བཞིན་དབྱིངས་ཕྱུག་ཡུམ་མཆོག་ཚུལ་འཛིན་ཅིང་། །ཡོན་ཏན་ཡོད་མེད་སྟོང་པའི་ཆ་འཛིན་མ། །རྒྱལ་ཡུམ་སངས་རྒྱས་སྤྱན་ལ་ཕྱག་འཚལ་ལོ། །ཧཱུཾ། ལྷོ་ཕྱོགས་འཁོར་ལོའི་རྩིབས་སྟེང་དུ། །རྟ་མཆོག་བསྣོལ་བའི་ཁྲི་སྟེངས་ན། །རིན་ཆེན་ཉི་ཟླ་པད་གདན་ལ། །བཅོམ་ལྡན་རིན་ཆེན་འབྱུང་ལྡན་གཙོ། །སྐུ་མདོག་སེར་པོ་འོད་དུ་འབར། །ཞལ་གསུམ་ཕྱག་དྲུག་འགྲོ་བ་འདུལ། །གཡས་སྔོ་གཡོན་དམར་དབུས་སེར་ཞལ། །རིན་ཆེན་རྡོ་རྗེ་འཁོར་ལོ་གཡས། །དྲིལ་བུ་པདྨ་རལ་གྲི་གཡོན། །ཡུམ་གྱི་དམ་པར་མཚན་གསོལ་བ། །མཱ་མ་ཀཱི་དང་གཉིས་སུ་མེད། །བདག་གི་ཡི་དམ་ལྷ་ལགས་ཀྱི། །ཡི་དམ་ལྷ་ལ་མཆོད་པར་འབུལ། །སྐུ་གསུང་ཐུགས་ཀྱི་དངོས་གྲུབ་སྩོལ། །ཚོར་བ་ཆུ་ཡི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པས། །འབྱུང་ལྡན་ཡབ་ཡུམ་རང་བཞིན་ལས། །ཏིང་འཛིན་ཡོན་ཏན་དབང་སྒྱུར་ནས། །དངོས་གྲུབ་ལས་རྣམས་མངོན་བྱེད་ཤོག །སྭཱ་རཏྣ་དྷྲིཀ྄ མཱཾ་མོ་ཧ་ར་ཏི། ༀ། ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་མཉམ་པ་ཉིད་ཀྱི་ཚུལ་འཛིན་ཅིང་། །ཡོན་ཏན་ཡིད་བཞིན་རེ་བ་སྐོང་མཛད་པ། །རྒྱལ་མཆོག་རིན་ཆེན་འབྱུང་ལ་ཕྱག་འཚལ་ལོ། །དོན་དམ་གཉིས་མེད་དབྱིངས་སུ་གཅིག་པ་ལས། །རིན་ཆེན་དབྱིངས་ཕྱུག་ཡུམ་མཆོག་ཚུལ་འཛིན་ཅིང་། །ཡོན་ཏན་ང་དང་བདག་མེད་ཆ་འཛིན་མ། །རྒྱལ་ཡུམ་མཱ་མ་ཀཱི་ལ་ཕྱག་འཚལ་ལོ། །ཧཱུཾ། ནུབ་ཕྱོགས་འཁོར་ལོའི་རྩིབས་སྟེང་དུ། །རྨ་བྱ་བསྣོལ་བའི་ཁྲི་སྟེངས་ན། །རིན་ཆེན་ཉི་ཟླ་པད་གདན་ལ། །བཅོམ་ལྡན་སྣང་བ་མཐའ་ཡས་གཙོ། །སྐུ་མདོག་དམར་པོ་འོད་དུ་འབར། །ཞལ་གསུམ་ཕྱག་དྲུག་འགྲོ་བ་འདུལ། །གཡས་དཀར་གཡོན་སྔོ་དབུས་དམར་ཞལ། །པདྨ་རྡོ་རྗེ་འཁོར་ལོ་གཡས། དྲིལ་བུ་རིན་ཆེན་རལ་གྲི་གཡོན། །ཡུམ་གྱི་དམ་པར་མཚན་གསོལ་བ། །གོས་དཀར་མོ་དང་གཉིས་སུ་མེད། །བདག་གི་ཡི་དམ་ལྷ་ལགས་ཀྱི། །ཡི་དམ་ལྷ་ལ་མཆོད་པར་འབུལ། །སྐུ་གསུང་ཐུགས་ཀྱི་དངོས་གྲུབ་སྩོལ། །འདུ་ཤེས་མེ་ཡི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པས། །མཐའ་ཡས་ཡབ་ཡུམ་རང་བཞིན་ལས། །ཏིང་འཛིན་གསུམ་དུ་དབང་སྒྱུར་ནས། །དངོས་གྲུབ་ལས་རྣམས་མངོན་བྱེད་ཤོག །ཨཱཾ་ཨཱ་རོ་ལིཀ྄ །པཱཾ་རཱ་ག་ར་ཏི། ༀ། ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་སོ་སོར་རྟོག་པའི་ཚུལ་འཛིན་ཅིང་། །ཡོན་ཏན་མཐའ་གཉིས་སྐྱོན་གྱིས་མ་གོས་པའི། །རྒྱལ་མཆོག་སྣང་མཐའ་ཡས་ལ་ཕྱག་འཚལ་ལོ། །དོན་དམ་གཉིས་མེད་དབྱིངས་སུ་གཅིག་པ་ལས། །པདྨ་དབྱིངས་ཕྱུག་ཡུམ་མཆོག་ཚུལ་འཛིན་ཅིང་། །ཡོན་ཏན་སྤྱི་དང་རང་གིས་ཆ་འཛིན་མ། །རྒྱལ་ཡུམ་གོས་དཀར་མོ་ལ་ཕྱག་འཚལ་ལོ། །ཧཱུཾ། བྱང་ཕྱོགས་འཁོར་ལོའི་རྩིབས་སྟེང་དུ། །ཤང་ཤང་བསྣོལ་བའི་ཁྲི་སྟེངས་ན། །རིན་ཆེན་ཉི་ཟླ་པད་གདན་ལ། །བཅོམ་ལྡན་དོན་ཡོད་གྲུབ་པ་གཙོ། །སྐུ་མདོག་ལྗང་གུ་འོད་དུ་འབར། །ཞལ་གསུམ་ཕྱག་དྲུག་འགྲོ་བ་འདུལ། །གཡས་དཀར་གཡོན་དམར་དབུས་ལྗང་ཞལ། །རལ་གྲི་རྡོ་རྗེ་འཁོར་ལོ་གཡས། །དྲིལ་བུ་རིན་ཆེན་པདྨ་གཡོན། །ཡུམ་གྱི་དམ་པར་མཚན་གསོལ་བ། །དམ་ཚིག་སྒྲོལ་དང་གཉིས་སུ་མེད། །བདག་གི་ཡི་དམ་ལྷ་ལགས་ཀྱི། །ཡི་དམ་ལྷ་ལ་མཆོད་པར་འབུལ། །སྐུ་གསུང་ཐུགས་ཀྱི་དངོས་གྲུབ་སྩོལ། །འདུ་བྱེད་རླུང་གི་ངོ་བོ་ཉིད། །སེམས་ཕྱིར་མཚན་ཉིད་མ་སྐྱེས་པས། །དོན་གྲུབ་ཡབ་ཡུམ་རང་བཞིན་ལས། །ཏིང་འཛིན་ལས་སུ་དབང་སྒྱུར་ནས། །དངོས་གྲུབ་ལས་རྣམས་མངོན་བྱེད་ཤོག །ཧཱཾ་པྲ་ཛྙཱ་དྷྲིཀ྄ ཏཱཾ་བཛྲ་ར་ཏི། ༀ། ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་བྱ་བ་གྲུབ་པའི་ཚུལ་འཛིན་ཅིང་། །ཡོན་ཏན་ཕྲིན་ལས་སྣ་ཚོགས་དོན་མཛད་པ། །རྒྱལ་མཆོག་དོན་ཡོད་གྲུབ་ལ་ཕྱག་འཚལ་ལོ། །དོན་དམ་གཉིས་མེད་དབྱིངས་སུ་གཅིག་པ་ལས། །ལས་ཀྱི་དབྱིངས་ཕྱུག་ཡུམ་མཆོག་ཚུལ་འཛིན་ཅིང་། །ཡོན་ཏན་བདག་གཞན་དོན་གྲུབ་ཆ་འཛིན་མ། །རྒྱལ་ཡུམ་དམ་ཚིག་སྒྲོལ་མར་ཕྱག་འཚལ་ལོ། ༈ །ཧཱུཾ། ཤར་ལྷོ་འཁོར་ལོའི་གོང་རས་ལ། །ཉི་ཟླ་པདྨ་གདན་སྟེང་ན། །བྱང་སེམས་ས་ཡི་སྙིང་པོ་དང་། །ཡུམ་ཆེན་ལྷ་མོ་ལཱ་སྱ་གཉིས། །གཉིས་མེད་རོལ་པའི་བྱིན་རླབས་ཀྱིས། །ལས་ཉོན་བག་ཆགས་སྦྱང་དུ་གསོལ། །མིག་གཟུགས་སེམས་ཕྱིར་མ་སྐྱེས་པ། །ས་སྙིང་ཡབ་ཡུམ་རང་བཞིན་ལས། །ཏིང་འཛིན་སེམས་དཔར་དབང་སྒྱུར་ནས། །སྤྱོད་ཡུལ་ཡོངས་སུ་དག་བྱེད་ཤོག །ཀྵིཾ་ཧི་རཱ་ཛ་ཡ། ཧཱུཾ་ལཱ་སྱེ་ས་མ་ཡ་སྟྭཾ། ཧཱུཾ། མེ་ལོང་ཡེ་ཤེས་ཁྱད་པར་ལས། །མཚན་དཔེ་སེམས་དཔའི་སྐུར་སྟོན་ཅིང་། །ཆེ་བའི་ཡོན་ཏན་བསྐྱེད་མཛད་པ། །ས་ཡི་སྙིང་པོར་ཕྱག་འཚལ་ལོ། །གཉིས་མེད་དབྱིངས་ཀྱི་ཁྱད་པར་ལས། །མཚན་དཔེ་ལྷ་མོའི་སྐུར་སྟོན་ཅིང་། །རྣམ་རྟོག་ཟིལ་གྱིས་གནོན་མཛད་མ། །ལཱ་སྱ་མ་ལ་ཕྱག་འཚལ་ལོ། །ཧཱུཾ། ལྷོ་ནུབ་འཁོར་ལོའི་གོང་རས་ལ། །ཉི་ཟླ་པདྨའི་གདན་སྟེང་ན། །བྱང་སེམས་ནམ་མཁའི་སྙིང་པོ་དང་། །ཡུམ་ཆེན་ལྷ་མོ་མཱ་ལྱེ་གཉིས། །གཉིས་མེད་རོལ་པའི་བྱིན་རླབས་ཀྱིས། །ལས་ཉོན་བག་ཆགས་སྦྱང་དུ་གསོལ། །སྣ་དྲི་སེམས་ཕྱིར་མ་སྐྱེས་པ། །ནམ་སྙིང་ཡབ་ཡུམ་རང་བཞིན་ལས། །ཏིང་འཛིན་སེམས་དཔའ་དབང་སྒྱུར་ནས། །སྤྱོད་ཡུལ་ཡོངས་སུ་དག་བྱེད་ཤོག །ཏྲཾ་ཨཱ་གརྦྷ་ཡ། ཏྲཾ་མཱ་ལྱེ་ས་མ་ཡ་ཧོཿ མཉམ་ཉིད་ཡེ་ཤེས་ཁྱད་པར་ལས། །མཚན་དཔེ་སེམས་དཔའི་སྐུར་སྟོན་ཅིང་། །རྣམ་རྟོག་དྲྭ་བ་གཅོད་མཛད་པ། །ནམ་མཁའི་སྙིང་པོར་ཕྱག་འཚལ་ལོ། །གཉིས་མེད་དབྱིངས་ཀྱི་ཁྱད་པར་ལས། །མཚན་དཔེ་ལྷ་མོའི་སྐུར་སྟོན་ཅིང་། །འཁོར་བ་ཟིལ་གྱིས་གནོན་མཛད་མ། །མཱ་ལྱེ་མ་ལ་ཕྱག་འཚལ་ལོ། །ཧཱུཾ། ནུབ་བྱང་འཁོར་ལོའི་གོང་རས་ལ། །ཉི་ཟླ་པདྨའི་གདན་སྟེང་ན། །བྱང་སེམས་སྤྱན་རས་གཟིགས་དབང་དང་། །ཡུམ་ཆེན་ལྷ་མོ་གཱི་ཏི་གཉིས། །གཉིས་མེད་རོལ་པའི་བྱིན་རླབས་ཀྱི། །ལས་ཉོན་བག་ཆགས་སྦྱང་དུ་གསོལ། །ལྕེ་རོ་སེམས་ཕྱིར་མ་སྐྱེས་པ། །སྤྱན་གཟིགས་ཡབ་ཡུམ་རང་བཞིན་ལས། །ཏིང་འཛིན་སེམས་དཔར་དབང་སྒྱུར་ནས། །སྤྱོད་ཡུལ་ཡོངས་སུ་དག་བྱེད་ཤོག །ཧྲཱི་ཧཱ་ཧཱུཾ་པདྨ་བྲ་ད་མ། ཧྲཱི་གཱི་ཏི་རཱ་ག་ཧཾ། སོར་རྟོག་ཡེ་ཤེས་ཁྱད་པར་ལས། །མཚན་དཔེ་སེམས་དཔའི་སྐུར་སྟོན་ཅིང་། །མཐའ་ཡི་དྲི་མས་མ་གོས་པ། །སྤྱན་རས་གཟིགས་ལ་ཕྱག་འཚལ་ལོ། །གཉིས་མེད་དབྱིངས་ཀྱི་ཁྱད་པར་ལས། །མཚན་དཔེ་ལྷ་མོའི་སྐུར་སྟོན་ཅིང་། །གཉིས་མེད་དོན་གྱིས་ཚིམ་མཛད་པ། །གཱི་ཏི་མ་ལ་ཕྱག་འཚལ་ལོ། །ཧཱུཾ། བྱང་ཤར་འཁོར་ལོའི་གོང་རས་ལ། །ཉི་ཟླ་པདྨའི་གདན་སྟེང་ན། །བྱང་སེམས་ཕྱག་ན་རྡོ་རྗེ་དང་། །ཡུམ་ཆེན་ལྷ་མོ་ནིརྟི་གཉིས། །གཉིས་མེད་རོལ་པའི་བྱིན་རླབས་ཀྱིས། །ལས་ཉོན་བག་ཆགས་སྦྱང་དུ་གསོལ། །རྣ་སྒྲ་སེམས་ཕྱིར་མ་སྐྱེས་པ། །ཕྱག་རྡོར་ཡབ་ཡུམ་རང་བཞིན་ལས། །ཏིང་འཛིན་སེམས་དཔར་དབང་སྒྱུར་ནས། །སྤྱོད་ཡུལ་ཡོངས་སུ་དག་བྱེད་ཤོག །ཛྲཱི་ཀུ་རུ་པཱ་ཎ། ཨཾ་ནིརྟི་རཱ་ག་ཡཱ་མི། བྱ་གྲུབ་ཡེ་ཤེས་ཁྱད་པར་ལས། །མཚན་དཔེ་སེམས་དཔའི་སྐུར་སྟོན་ཅིང་། །རྣམ་རྟོག་མ་ལུས་འཇོམས་མཛད་པ། །ཕྱག་ན་རྡོ་རྗེར་ཕྱག་འཚལ་ལོ། །གཉིས་མེད་དབྱིངས་ཀྱི་ཁྱད་པར་ལས། །མཚན་དཔེ་ལྷ་མོའི་སྐུར་སྟོན་ཅིང་། །ཕྲིན་ལས་སྣ་ཚོགས་རྫོགས་མཛད་མ། །ནིརྟི་མ་ལ་ཕྱག་འཚལ་ལོ། །ཧཱུཾ། དཀྱིལ་འཁོར་ཤར་ལྷོའི་གྲུ་ཆད་ལ། ཉི་ཟླ་པདྨའི་གདན་སྟེང་ན། །བྱང་ཆུབ་སེམས་དཔའ་བྱམས་པ་དང་། །ཡུམ་ཆེན་ལྷ་མོ་དྷཱུ་པེ་གཉིས། །གཉིས་མེད་རོལ་པའི་བྱིན་རླབས་ཀྱིས། །ལས་ཉོན་བག་ཆགས་སྦྱང་དུ་གསོལ། །མིག་དབང་འདས་དུས་མ་སྐྱེས་པ། །བྱམས་པ་ཡབ་ཡུམ་རང་བཞིན་ལས། ཏིང་འཛིན་སེམས་དཔར་དབང་སྒྱུར་ནས། །སྤྱོད་ཡུལ་ཡོངས་སུ་དག་བྱེད་ཤོག །མཻ་དྷཱ་ར་ཎེ་སྭཱ་ཧཱ། ཛཿདྷུ་པེ་པྲ་བེ་ཤ །རིག་པ་ཐུགས་ཀྱི་ཁྱད་པར་ལས། །མཚན་དཔེ་སེམས་དཔའི་སྐུར་སྟོན་ཅིང་། །རྒྱལ་བའི་ཡོན་ཏན་རྒྱས་མཛད་པ། །བྱམས་པའི་སྐུ་ལ་ཕྱག་འཚལ་ལོ། །སྐྱེ་མེད་ཆོས་དབྱིངས་བྱིན་རླབས་ལས། །མཚན་དཔེ་ལྷ་མོའི་སྐུར་སྟོན་ཅིང་། །སྐྱེ་མེད་དོན་ཉིད་སྟོན་མཛད་མ། །བདུག་སྤོས་མ་ལ་ཕྱག་འཚལ་ལོ། །ཧཱུཾ། དཀྱིལ་འཁོར་ལྷོ་ནུབ་གྲུ་ཆད་ལ། ཉི་ཟླ་པདྨའི་གདན་སྟེང་ན། །བྱང་སེམས་སྒྲིབ་པ་རྣམ་སེལ་དང་། །ཡུམ་ཆེན་ལྷ་མོ་པུཥྤེ་གཉིས། །གཉིས་མེད་རོལ་པའི་བྱིན་རླབས་ཀྱིས། །ལས་ཉོན་བག་ཆགས་སྦྱང་དུ་གསོལ། །རྣ་དབང་ད་ལྟར་མ་སྐྱེས་པ། །སྒྲི་སེལ་ཡབ་ཡུམ་རང་བཞིན་ལས། །ཏིང་འཛིན་སེམས་དཔའ་དབང་སྒྱུར་ནས། །སྤྱོད་ཡུལ་ཡོངས་སུ་དག་བྱེད་ཤོག །ཐླྷིཾ་ནིསྶ་རཾ་བྷ་ཡ་སྭཱ་ཧཱ། ཧཱུཾ་པུཥྤེ་ཨཱ་བེ་ཤ །ཡེ་ཤེས་རིག་པའི་བྱིན་རླབས་ལས། །མཚན་དཔེ་སེམས་དཔའི་སྐུར་སྟོན་ཅིང་། །སྐྱེ་མེད་ཆོས་སྐུར་སྟོན་མཛད་པ། །སྒྲིབ་སེལ་སྐུ་ལ་ཕྱག་འཚལ་ལོ། །སྐྱེ་མེད་ཆོས་དབྱིངས་བྱིན་རླབས་ལས། །མཚན་དཔེ་ལྷ་མོའི་སྐུར་སྟོན་ཅིང་། །རིག་པ་ཉིད་ལས་འཆར་མཛད་མ། །མེ་ཏོག་མ་ལ་ཕྱག་འཚལ་ལོ། །ཧཱུཾ། དཀྱིལ་འཁོར་ནུབ་བྱང་གྲུ་ཆད་ལ། །ཉི་ཟླ་པདྨའི་གདན་སྟེང་ན། །བྱང་སེམས་ཀུན་ཏུ་བཟང་པོ་དང་། །ཡུམ་ཆེན་ལྷ་མོ་དཱི་པ་གཉིས། །གཉིས་མེད་རོལ་པའི་བྱིན་རླབས་ཀྱིས། །ལས་ཉོན་བག་ཆགས་སྦྱང་དུ་གསོལ། །སྣ་དབང་མ་འོངས་མ་སྐྱེས་པ། །ཀུན་བཟང་ཡབ་ཡུམ་རང་བཞིན་ལས། །ཏིང་འཛིན་སེམས་དཔར་དབང་སྒྱུར་ནས། །སྤྱོད་ཡུལ་ཡོངས་སུ་དག་བྱེད་ཤོག །ཧཱུཾ་ས་རཱ་ཛཱ་ཡ་སྭཱ་ཧཱ། བཾ་དཱི་པ་སུ་གི་རཱི། ཡེ་ཤེས་རིག་པའི་བྱིན་རླབས་ལས། །མཚན་དཔེ་སེམས་དཔའི་སྐུར་སྟོན་ཅིང་། །འབྲས་བུའི་ཆོས་རྣམས་རྫོགས་མཛད་པ། །ཀུན་ཏུ་བཟང་ལ་ཕྱག་འཚལ་ལོ། །སྐྱེ་མེད་ཆོས་དབྱིངས་བྱིན་རླབས་ལས། །མཚན་དཔེ་ལྷ་མོའི་སྐུར་སྟོན་ཅིང་། །རིག་པ་ཉིད་ལ་གསལ་མཛད་མ། །མར་མེ་མ་ལ་ཕྱག་འཚལ་ལོ། །ཧཱུཾ། དཀྱིལ་འཁོར་བྱང་ཤར་གྲུ་ཆད་ལ། །ཉི་ཟླ་པདྨའི་གདན་སྟེང་ན། །བྱང་ཆུབ་སེམས་དཔའ་འཇམ་དཔལ་དང་། །ཡུམ་ཆེན་ལྷ་མོ་གནྡྷེ་གཉིས། །གཉིས་མེད་རོལ་པའི་བྱིན་རླབས་ཀྱིས། །ལས་ཉོན་བག་ཆགས་སྦྱང་དུ་གསོལ། །ལྕེ་དབང་མ་ངེས་མ་སྐྱེས་པ། །འཇམ་དཔལ་ཡབ་ཡུམ་རང་བཞིན་ལས། །ཏིང་འཛིན་སེམས་དཔར་དབང་སྒྱུར་ནས། །སྤྱོད་ཡུལ་ཡོངས་སུ་དག་བྱེད་ཤོག །མུཾ་ཤྲཱི་ཨཾ་རཱ་ག་ཡ་སྭཱ་ཧཱ། ཧོཿགནྡྷེ་ཙིཏྟ། ཡེ་ཤེས་རིག་པའི་བྱིན་རླབས་ལས། །མཚན་དཔེ་སེམས་དཔའི་སྐུར་སྟོན་ཅིང་། །འཁོར་བའི་མཚན་ཉིད་རྟོགས་མཛད་པ། །འཇམ་པའི་དཔལ་ལ་ཕྱག་འཚལ་ལོ། །སྐྱེ་མེད་ཆོས་དབྱིངས་བྱིན་རླབས་ལས། །མཚན་དཔེ་ལྷ་མོའི་སྐུར་སྟོན་ཅིང་། །མཐའ་སྐྱོན་རྣམ་དག་རྟོགས་མཛད་མ། །དྲི་ཆབ་མ་ལ་ཕྱག་འཚལ་ལོ། ༈ །ཧཱུཾ། གཞལ་ཡས་སྣམ་བའི་ཤར་ལྷོ་ན། །རྣམ་དག་པདྨའི་གདན་སྟེངས་སུ། །ཐུབ་ཆེན་བརྒྱ་བྱིན་པི་ཝཾ་བསྣམས། །སྐུ་མདོག་དཀར་པོ་ལྷ་རྣམས་འདྲེན། །ཐུགས་རྗེ་ཆེན་པོའི་བྱིན་རླབས་ཀྱིས། །འཆི་འཕོའི་སྡུག་བསྔལ་སྦྱང་དུ་གསོལ། །ཉོན་མོངས་དྲེགས་པ་མ་སྐྱེས་སེམས། །ལྷ་ཡི་ཐུབ་པའི་རང་བཞིན་ལས། །ཏིང་འཛིན་ཐུབ་པར་དབང་སྒྱུར་ནས། །གདུག་བྱ་མ་ལུས་འདྲེན་བྱེད་ཤོག །ༀ་མུ་ནེ་ཀྲཱིཾ་སྭཱ་ཧཱ། མཉམ་ཉིད་ཐུགས་ཀྱི་ངང་ལས་མ་གཡོས་ཀྱང་། །ང་རྒྱལ་འཇོམས་ཕྱིར་ལྷ་ཡི་ཐུབ་པར་སྤྲུལ། །ཐུགས་རྗེས་ལྟུང་བའི་སྡུག་བསྔལ་ཞི་མཛད་པ། །བཅོམ་ལྡན་ལྷ་ཡི་ཐུབ་པར་ཕྱག་འཚལ་ལོ། །ཧཱུཾ། གཞལ་ཡས་སྣམ་བུའི་བྱང་ཕྱོགས་ན། །རྣམ་དག་པདྨའི་གདན་སྟེངས་སུ། །ཐུབ་པ་ཐག་བཟང་གོ་ཆ་བསྣམས། །སྐུ་མདོག་མཐིང་ག་ལྷ་མིན་འདྲེན། །ཐུགས་རྗེ་ཆེན་པོའི་བྱིན་རླབས་ཀྱིས། །འཐབ་རྩོད་སྡུག་བསྔལ་སྦྱང་དུ་གསོལ། །ཉོན་མོངས་ཁོང་ཁྲོ་མ་སྐྱེས་སེམས། །ལྷ་མིན་ཐུབ་པའི་རང་བཞིན་ལས། །ཏིང་འཛིན་ཐུབ་པར་དབང་བསྒྱུར་ནས། །གདུལ་བྱ་མ་ལུས་འདྲེན་བྱེད་ཤོག །ༀ་མུ་ནེ་ཧཱུཾ་ཏྲུཾ་སྭཱ་ཧཱ། མཉམ་ཉིད་ཐུགས་ཀྱི་ངང་ལས་མ་གཡོས་ཀྱང་། །ཕྲ་དོག་འཇོམས་ཕྱིར་ལྷ་མིན་ཐུབ་པར་སྤྲུལ། །ཐུགས་རྗེས་ཁོང་ཁྲོའི་སྡུག་བསྔལ་ཞི་མཛད་པ། །བཅོམ་ལྡན་ལྷ་མིན་ཐུབ་པར་ཕྱག་འཚལ་ལོ། །ཧཱུཾ། གཞལ་ཡས་སྣམ་བུའི་ལྷོར་ཕྱོགས་ན། །རྣམ་དག་པདྨའི་གདན་སྟེངས་སུ། །བཅོམ་ལྡན་ཤཱཀ་ཐུབ་གསེག་པར་བསྣམས། །སྐུ་མདོག་སེར་པོ་མི་རྣམས་འདྲེན། །ཐུགས་རྗེ་ཆེན་པོའི་བྱིན་རླབས་ཀྱིས། །འགྱུར་པའི་སྡུག་བསྔལ་སྦྱང་དུ་གསོལ། །ཉོན་མོངས་འདོད་ཆགས་མ་སྐྱེས་སེམས། །མི་ཡི་ཐུབ་པའི་རང་བཞིན་ལས། །ཏིང་འཛིན་ཐུབ་པར་དབང་སྒྱུར་ནས། །གདུལ་བྱ་མ་ལུས་འདྲེན་བྱེད་ཤོག །ༀ་མུ་ནེ་སྲུཾ་སྭཱ་ཧཱ། མཉམ་ཉིད་ཐུགས་ཀྱི་ངང་ལས་མ་གཡོས་ཀྱང་། །འདོད་ཆགས་འཇོམས་ཕྱིར་མི་ཡི་ཐུབ་པར་སྤྲུལ། །ཐུགས་རྗེས་འཆི་འཕོའི་སྡུག་བསྔལ་ཞི་མཛད་པ། །བཅོམ་ལྡན་མི་ཡི་ཐུབ་པར་ཕྱག་འཚལ་ལོ། །ཧཱུཾ། གཞལ་ཡས་སྣམ་བུའི་ནུབ་བྱང་ན། །རྣམ་དག་པདྨའི་གདན་སྟེངས་སུ། །ཐུབ་པ་རབ་བརྟན་པུ སྟི་བསྣམས། །སྐུ་མདོག་དམར་ནག་བྱོལ་སོང་འདྲེན། །ཐུགས་རྗེ་ཆེན་པོའི་བྱིན་རླབས་ཀྱིས། །བཀོལ་སྤྱོད་སྡུག་བསྔལ་སྦྱང་དུ་གསོལ། །ཉོན་མོངས་གཏི་མུག་མ་སྐྱེས་སེམས། །བྱོལ་སོང་ཐུབ་པའི་རང་བཞིན་ལས། །ཏིང་འཛིན་ཐུབ་པར་དབང་སྒྱུར་ནས། །གདུག་བྱ་མ་ལུས་འདྲེན་བྱེད་ཤོག །ༀ་མུ་ནེ་བྲཾ་སྭཱ་ཧཱ། མཉམ་ཉིད་ཐུགས་ཀྱི་ངང་ལས་མ་གཡོས་ཀྱང་། །གཏི་མུག་འཇོམས་ཕྱིར་བྱོལ་སོང་ཐུབ་པར་སྤྲུལ། །ཐུགས་རྗེས་གླེན་ལྐུགས་སྡུག་བསྔལ་ཞི་མཛད་པ། །བཅོམ་ལྡན་བྱོལ་སོང་ཐུབ་པར་ཕྱག་འཚལ་ལོ། །ཧཱུཾ། གཞལ་ཡས་སྣམ་བུའི་ལྷོ་ནུབ་ན། །རྣམ་དག་པདྨའི་གདན་སྟེངས་སུ། །ཐུབ་པ་ཁ་འབར་སྒྲོམ་བུ་བསྣམས། །སྐུ་མདོག་སེར་ནག་ཡི་དྭགས་འདྲེན། །ཐུགས་རྗེ་ཆེན་པོའི་བྱིན་རླབས་ཀྱིས། །བཀྲེས་སྐོམ་སྡུག་བསྔལ་སྦྱང་དུ་གསོལ། །ཉོན་མོངས་སེར་སྣ་མ་སྐྱེས་སེམས། །ཡི་དྭགས་ཐུབ་པའི་རང་བཞིན་ལས། །ཏིང་འཛིན་ཐུབ་པར་དབང་སྒྱུར་ནས། །གདུལ་བྱ་མ་ལུས་འདྲེན་བྱེད་ཤོག །ༀ་མུ་ནེ་ཀྵཾ་སྭཱ་ཧཱ། མཉམ་ཉིད་ཐུགས་ཀྱི་ངང་ལས་མ་གཡོས་ཀྱང་། །སེར་སྣ་འཇོམས་ཕྱིར་ཡི་དྭགས་ཐུབ་པར་སྤྲུལ། །ཐུགས་རྗེས་བཀྲེས་སྐོམ་སྡུག་བསྔལ་ཞི་མཛད་པ། །བཅོམ་ལྡན་ཡི་དྭགས་ཐུབ་པར་ཕྱག་འཚལ་ལོ། །ཧཱུཾ། གཞལ་ཡས་སྣམ་བུའི་བྱང་ཤར་ན། །རྣམ་དག་པདྨའི་གདན་སྟེངས་སུ། །ཐུབ་པ་ཆོས་རྒྱལ་མེ་ཆུ་བསྣམས། །སྐུ་མདོག་དུད་ཁ་དམྱལ་བ་འདྲེན། །ཐུགས་རྗེ་ཆེན་པོའི་བྱིན་རླབས་ཀྱིས། །ཚ་གྲང་སྡུག་བསྔལ་སྦྱང་དུ་གསོལ། །ཉོན་མོངས་ཞེ་སྡང་མ་སྐྱེས་སེམས། །དམྱལ་བའི་ཐུབ་པའི་རང་བཞིན་ལས། །ཏིང་འཛིན་ཐུབ་པར་དབང་སྒྱུར་ནས། །གདུལ་བྱ་མ་ལུས་འདྲེན་བྱེད་ཤོག །ༀ་མུ་ནེ་ཡེ་སྭཱ་ཧཱ། མཉམ་ཉིད་ཐུགས་ཀྱི་ངང་ལས་མ་གཡོས་ཀྱང་། །ཞེ་སྡང་འཇོམས་ཕྱིར་དམྱལ་བའི་ཐུབ་པར་སྤྲུལ། །ཐུགས་རྗེས་ཚ་གྲང་སྡུག་བསྔལ་ཞི་མཛད་པ། །བཅོམ་ལྡན་དམྱལ་བའི་ཐུབ་པར་ཕྱག་འཚལ་ལོ། ༈ །ཧཱུཾ། གཞལ་ཡས་ཁང་གི་ཤར་སྒོ་རུ། །རྡོ་རྗེ་བྲག་ཆེན་ཉི་གདན་སྟེང ། །འཇོམས་བྱེད་ཁྲོ་རྒྱལ་གཤིན་རྗེ་གཤེད། །འགུགས་པའི་ལྷོ་མོ་ལྕགས་ཀྱུ་མ། །གཉིས་མེད་རོལ་པའི་བྱིན་རླབས་ཀྱིས། །དྲི་ཟའི་གདོན་རྣམས་འདུལ་དུ་གསོལ། །རེག་ཤེས་རྟག་པར་མ་སྐྱེས་སེམས། །གཤེད་པོ་ཡབ་ཡུམ་རང་བཞིན་ལས། །ཏིང་འཛིན་འཇོམས་པར་དབང་སྒྱུར་ནས། །གདུལ་བྱ་མ་ལུས་མཐར་བྱེད་ཤོག །ཧཱུཾ་ཡ་མཱནྟ་ཀྲྀ་ཏ་ཕཊ། ༀ་བཛྲ་དྷ་ར་མ་ཧཱ་ཀྲོ་དྷེ་ཤྭ་རཱི་ཛྭ་ལ་ནཱི་ཧཱུཾ་ཕཊ། མེ་ལོང་ལྟ་བུའི་ཡེ་ཤེས་བྱིན་རླབས་ལས། །དྲི་ཟ་འདུལ་ཕྱིར་ཁྲོ་བོའི་སྐུར་སྟོན་ཅིང་། །ཐབས་ཀྱིས་ལྷ་ཡི་བུ་ཡི་བདུད་འཇོམས་པ། །ཁྲོ་རྒྱལ་གཤིན་རྗེའི་གཤེད་ལ་ཕྱག་འཚལ་ལོ། །གཉིས་མེད་ཆོས་ཀྱི་དབྱིངས་ཀྱི་བྱིན་རླབས་ལས། །འགྲོ་བ་འདུལ་ཕྱིར་ཁྲོ་མོའི་སྐུར་སྟོན་ཅིང་། །ཐབས་ཀྱིས་འཁོར་བའི་གནས་ནས་འདྲེན་མཛད་པ། །རྡོ་རྗེ་ལྕགས་ཀྱུ་མ་ལ་ཕྱག་འཚལ་ལོ། །ཧཱུཾ། གཞལ་ཡས་ཁང་གི་ལྷོ་སྒོ་རུ། །རྡོ་རྗེ་བྲག་ཆེན་ཉི་གདན་སྟེང་། །འཇོམས་བྱེད་ཁྲོ་རྒྱལ་སྟོབས་པོ་ཆེ། །འཆིང་བའི་ལྷ་མོ་ཞགས་པ་མ། །གཉིས་མེད་རོལ་པའི་བྱིན་རླབས་ཀྱིས། །གཤིན་རྗེའི་གདོན་རྣམས་འདུལ་དུ་གསོལ། །རེག་བྱ་ཆད་པར་མ་སྐྱེས་སེམས། །སྟོབས་ཆེན་ཡབ་ཡུམ་རང་བཞིན་ལས། །ཏིང་འཛིན་འཇོམས་པར་དབང་སྒྱུར་ནས། །གདུལ་བྱ་མ་ལུས་མཐར་བྱེད་ཤོག །ཧཱུཾ་པྲ་ཛྙཱནྟ་ཀྲྀ་ཏ་ཕཊ། ༀ་རཏྣ་དྷ་ར་མ་ཧཱ་ཀྲོ་དྷེ་ཤྭ་རཱི་ཛྭ་ལ་ནཱི་ཧཱུཾ་ཕཊ། མཉམ་པ་ཉིད་ཀྱི་ཡེ་ཤེས་བྱིན་རླབས་ལས། །གཤིན་རྗེ་འདུལ་ཕྱིར་ཁྲོ་བོའི་སྐུར་སྟོན་ཅིང་། །ཐབས་ཀྱིས་འཆི་བདག་བདུད་རྣམས་འཇོམས་མཛད་པ། །ཁྲོ་རྒྱལ་སྟོབས་པོ་ཆེ་ལ་ཕྱག་འཚལ་ལོ། །གཉིས་མེད་ཆོས་ཀྱི་དབྱིངས་ཀྱི་བྱིན་རླབས་ལས། །འགྲོ་བ་འདུལ་ཕྱིར་ཁྲོ་མོའི་སྐུར་སྟོན་ཅིང་། །ཐབས་ཀྱིས་བླ་མེད་གནས་སུ་འདྲེན་མཛད་པ། །རྡོ་རྗེ་ཞགས་པ་མ་ལ་ཕྱག་འཚལ་ལོ། །ཧཱུཾ། གཞལ་ཡས་ཁང་གི་ནུབ་སྒོ་རུ། །རྡོ་རྗེ་བྲག་ཆེན་ཉི་གདན་སྟེང ། །འཇོམས་བྱེད་ཁྲོ་རྒྱལ་རྟ་མགྲིན་དང་། །སྡོམ་བྱེད་ལྷ་མོ་ལྕགས་སྒྲོག་མ། །གཉིས་མེད་རོལ་པའི་བྱིན་རླབས་ཀྱིས། །ཀླུ་ཡི་གདོན་རྣམས་འདུལ་དུ་གསོལ། །རེག་བྱེད་བདག་འཛིན་མ་སྐྱེས་སེམས། །རྟ་མགྲིན་ཡབ་ཡུམ་རང་བཞིན་ལས། །ཏིང་འཛིན་འཇོམས་པར་དབང་སྒྱུར་ནས། །གདུལ་བྱ་མ་ལུས་མཐར་བྱེད་ཤོག །ཧཱུཾ་པདྨ ནྟ་ཀྲྀ་ཏ་ཕཊ། ༀ་པདྨ་དྷ་ར་མ་ཧཱ་ཀྲོ་དྷེ་ཤྭ་རཱི་ཛྭ་ལ་ནཱི་ཧཱུཾ་ཕཊ། སོ་སོར་རྟོག་པའི་ཡེ་ཤེས་བྱིན་རླབས་ལས། །ཀླུ་ཆེན་འདུལ་ཕྱིར་ཁྲོ་བོའི་སྐུར་སྟོན་ཅིང་། །ཐབས་ཀྱི་ཕུང་པོའི་བདུད་རྣམས་འཇོམས་མཛད་པ། །ཁྲོ་རྒྱལ་རྟ་མཆོག་དཔལ་ལ་ཕྱག་འཚལ་ལོ། །གཉིས་མེད་ཆོས་ཀྱི་དབྱིངས་ཀྱི་བྱིན་རླབས་ལས། །འགྲོ་བ་འདུལ་ཕྱིར་ཁྲོ་མོའི་སྐུར་སྟོན་ཅིང་། །ཐབས་ཀྱིས་ཉོན་མོངས་གནས་ནས་འདྲེན་མཛད་པ། །ཉི་ཟླ་ལྕགས་སྒྲོག་མ་ལ་ཕྱག་འཚལ་ལོ། །ཧཱུཾ། གཞལ་ཡས་ཁང་གི་བྱང་སྒོ་རུ། །རྡོ་རྗེ་བྲག་ཆེན་ཉི་གདན་སྟེང་། །འཇོམས་བྱེད་ཁྲོ་རྒྱལ་བདུད་རྩི་འཁྱིལ། །འབེབས་བྱེད་ལྷ་མོ་དྲིལ་བུ་མ། །གཉིས་མེད་རོལ་པའི་བྱིན་རླབས་ཀྱིས། །གནོད་སྦྱིན་གདོན་རྣམས་འདུལ་དུ་གསོལ། །རེག་འདུལ་མཚན་འཛིན་མ་སྐྱེས་སེམས། །བདུད་རྩི་ཡབ་ཡུམ་རང་བཞིན་ལས། །ཏིང་འཛིན་འཇོམས་པར་དབང་སྒྱུར་ནས། །གདུལ་བྱ་མ་ལུས་མཐར་བྱེད་ཤོག །ཧཱུཾ་བིགྷྣནྟ་ཀྲྀཏ་ཕཊ། ༀ་ཀརྨ་དྷ་ར་མ་ཧཱ་ཀྲོ་དྷེ་ཤྭ་རཱི་ཛྭ་ལ་ནི་ཧཱུཾ་ཕཊ། བྱ་བ་གྲུབ་པའི་ཡེ་ཤེས་བྱིན་རླབས་ལས། །གནོད་སྦྱིན་འདུལ་ཕྱིར་ཁྲོ་བོའི་སྐུར་སྟོན་ཅིང་། །ཐབས་ཀྱིས་ཉོན་མོངས་བདུད་རྣམས་འཇོམས་མཛད་པ། །ཁྲོ་རྒྱལ་བདུད་རྩི་འཁྱིལ་ལ་ཕྱག་འཚལ་ལོ། །གཉིས་མེད་ཆོས་ཀྱི་དབྱིངས་ཀྱི་བྱིན་རླབས་ལས། །འགྲོ་བ་འདུལ་ཕྱིར་ཁྲོ་བོའི་སྐུར་སྟོན་ཅིང་། །ཐབས་ཀྱིས་འགྲོ་བ་མ་ལུས་དོན་མཛད་མ། །རྡོ་རྗེ་དྲིལ་བུ་མ་ལ་ཕྱག་འཚལ་ལོ། །གཉིས་པ་ཁྲོ་བོ་ལའང་། །གནས་སྒྱུར་གྱི་བསྟོད་པ་གསལ་གདབ་པ་དང་། འཛབ་བཟླ་བ་གཉིས་སུ་ཤེས་པར་བྱའོ། །ཧཱུཾ། སྟོན་པ་ཀུན་ཏུ་བཟང་པོ་གནས་གྱུར་པ། །རྒྱལ་བ་ཁྲོ་རྒྱལ་ཀུན་གྱི་རྗེ་བཙན་ཡབ། །ཆེ་བའི་ནང་ནས་ཆེ་མཆོག་བླ་ན་མེད། །ཆེ་བཙན་འགྲན་ཟླ་བྲལ་བ་ཀུན་གྱི་མཆོག །སྐུ་གསུང་ཐུགས་ཀྱི་བདག་ལ་ཕྱག་འཚལ་ལོ། །ཚོགས་ཆེན་འདུས་པ་དབང་གི་དཀྱིལ་འཁོར་གྱི། །འཁོར་ལོ་འབར་བའི་དབུས་ཀྱི་ལྟེ་བ་རུ། །བཅོམ་ལྡན་དཔལ་ཆེན་ཆེ་མཆོག་ཧེ་རུ་ཀ །འབར་བའི་དབུ་ནི་ཉི་ཤུ་རྩ་གཅིག་གིས། །ས་ནི་ཉི་ཤུ་རྩ་གཅིག་རིམ་པས་མནན། །གཡས་གཡོན་ཕྱག་ནི་བཞི་བཅུ་རྩ་གཉིས་ན། །རྒྱལ་བ་སངས་རྒྱས་བཞི་བཅུ་རྩ་གཉིས་བཞུགས། །ཞབས་བརྒྱད་བགྲད་པས་ཁྲོ་མོའི་དབུ་བརྒྱད་བརྫིས། །ཉི་མ་སྟོང་གི་འོད་ཟེར་སྐུ་ལ་བརྗིད། །དཔལ་གྱི་ཆས་བརྒྱད་དུར་ཁྲོད་རྒྱན་རྣམས་རྫོགས། །ཆེ་མཆོག་ཧེ་རུ་ཀ་ལ་ཕྱག་འཚལ་བསྟོད། །ཀུན་ཏུ་བཟང་མོ་ཆོས་ཉིད་གནས་གྱུར་པ། །དཔལ་འབར་ཁྲོ་མོ་ཀུན་གྱི་རྗེ་བཙན་ཡུམ། །ཤེས་རབ་དབྱིངས་ནས་སྐུ་བསྐྱེད་ཐུགས་རྗེར་ལྡན། །ཁྲོ་མོ་གནམ་ཞལ་མ་ལ་ཕྱག་འཚལ་བསྟོད། །ཅེས་བསྟོད་ནས། ༀ་ཨ་ཀྲ་མ་ཧཱ་ཤྲཱི་ཧེ་རུ་ཀ་ཧཱུཾ། ཀ་ཏ་མ་ཧཱ་ཀྲོ་དྷེ་ཤྭ་རཱི་ཧཱུཾ་ཕཊ། ཅེས་པ་ལ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཞེས་སྒྲེལ་ཏེ་བཟླའོ། །ཧཱུཾ། བཅོམ་ལྡན་དབང་མཆོག་ཧེ་རུ་ཀ །མཐིང་ནག་འཇིགས་སྐུ་གདུག་པ་འདུལ། །དབུ་གསུམ་དང་པོར་བྱུང་བ་ནི། གཡས་དཀར་གཡོན་དམར་དབུས་མཐིང་ཞལ། །སྐུ་གསུང་ཐུགས་དང་ལྡན་པའི་དབུ། །ཁམས་གསུམ་མྱ་ངན་འདས་པའི་ཞལ། །དབུ་གསུམ་བར་དུ་རྔམས་པ་ནི། །གཡས་སྔོ་གཡོན་དམར་དབུས་མཐིང་ཞལ། །ཐབས་དང་ཤེས་རབ་སེམས་ཀྱི་དབུ། །སྲིད་གསུམ་དབྱིངས་སུ་སྒྲོལ་པའི་ཞལ། །དབུ་གསུམ་ཐ་མར་རྔམས་པ་ནི། །གཡས་གཡོན་དབུས་གསུམ་མཐིང་གའི་ཞལ། །ལུང་དང་མན་ངག་སེམས་ཀྱི་དབུ། ཁམས་གསུམ་རེ་བ་སྐོང་བའི་ཞལ། །བཅོ་བརྒྱད་ཕྱག་རྒྱ་རོལ་པ་ནི། །སྟོང་པ་བཅོ་བརྒྱད་དབྱིངས་སུ་ཐིམ། །བཅོ་བརྒྱད་ཕྱག་ན་བསྣམས་པ་ནི། །རྡོ་རྗེ་གློ་སྙིང་ཞིང་ཆུང་གཡས། །བྷཉྫ་ཞིང་ཆུང་ཏི་ར་གཡོན། །ཞིང་ཞགས་ཉི་མ་ཁུང་ཆེན་གཡས། །ཞིང་ཆེན་ཟླ་བ་འུག་པ་གཡོན། །མེ་དང་རྒྱ་མཚོ་གའུ་གཡས། །ཀླུ་དང་རིན་ཆེན་རི་རབ་གཡོན། །ཡོན་ཏན་བཅོ་བརྒྱད་དབྱིངས་སུ་རྫོགས། །ཁྲོ་རྒྱལ་རྒྱན་རྣམས་སྐུ་ལ་བརྗིད། །ཀྲོ་དྷཱི་མཐིང་ནག་འཁྲིལ་པའི་ཚུལ། །རྡོ་རྗེ་དུང་དམར་ཡབ་ལ་སྟོབ། ཁྲོ་རྒྱལ་དཔལ་ཆེན་ཧེ་རུ་ཀ །དབང་མཆོག་སྐུ་ལ་ཕྱག་འཚལ་བསྟོད། །ༀ་སརྦ་ཏ་ཐཱ་ག་ཏ་ཤྲཱི་ཧེ་རུ་ཀ་ཧཱུཾ། སརྦ་ཏ་ཐཱ་ག་ཏ་ཀྲོ་དྷེ་ཤྭ་རཱི་ཧཱུཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། དྲེགས་པ་བསྣོལ་བའི་གདན་སྟེངས་སུ། །རྡོ་རྗེ་མི་བསྐྱོད་གནས་གྱུར་པ། ཁྲག་འཐུང་ཞེ་སྡང་འཇོམས་པའི་སྐུ། །འཇིག་བྱེད་འབར་བའི་སྐུར་སྤྲུལ་ནས། །མཆོད་ཅིང་བྱིན་རླབས་གསལ་སྒྲུབ་པ། །བཛྲ་ཧེ་རུ་ཀ་ལ་བསྟོད། །ནམ་མཁའ་ཀུན་བཟང་གནས་གྱུར་པ། །ཁྲོ་མོ་དབང་ཕྱུག་སྐུར་གསལ་བ། །ཐབས་དང་ཤེས་རབ་གཉིས་སུ་མེད། །བཛྲ་ཀྲོ་དྷེ་ཤྭ་རཱིར་བསྟོད། ༀ་བཛྲ་ཤྲཱི་ཧེ་རུ་ཀ་བཛྲ་ཀྲོ་དྷེ་ཤྭ་རཱི་ཧཱུཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ༈ །ཧཱུཾ། དབང་གི་དཀྱིལ་འཁོར་ཆེན་པོ་ཡི། །འབར་བ་འཁོར་ལོའི་རྩིབས་བརྒྱད་ཀྱི། །ཤར་ཕྱོགས་འཁོར་ལོའི་རྩིབས་སྟེང་ན། །དྲི་ཟ་བསྣོལ་བའི་གདན་སྟེངས་སུ། །རྣམ་པར་སྣང་མཛད་གནས་གྱུར་པ། །ཁྲག་འཐུང་གཏི་མུག་འཇོམས་པའི་སྐུ། །འཇིགས་བྱེད་སྨུག་ནག་འབར་བར་གསལ། །མཆོད་ཅིང་སྒྲུབ་སྟེ་བྱིན་རླབས་པ། །བུདྡྷ་ཧེ་རུ་ཀ་ལ་བསྟོད། །སངས་རྒྱས་སྤྱན་མ་གནས་གྱུར་པ། །ཁྲོ་མོ་དབང་ཕྱུག་སྐུར་གསལ་བ། །ཐབས་དང་ཤེས་རབ་བྱང་ཆུབ་སེམས། །སྤྱན་དྲངས་མཆོད་ཅིང་སྒྲུབ་པ་ཡི། །བུདྡྷ་ཀྲོ་དྷེ་ཤྭ་རཱིར་བསྟོད། །ༀ་བུདྡྷ་ཤྲཱི་ཧེ་རུ་ཀ་བུདྡྷ་ཀྲོ་དྷེ་ཤྭ་རཱི་ཧཱུཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཧཱུཾ། ལྷོ་ཕྱོགས་འཁོར་ལོའི་རྩིབས་སྟེང་ན། །གཤིན་རྗེ་བསྣོལ་བའི་གདན་སྟེངས་སུ། །རིན་ཆེན་འབྱུང་ལྡན་གནས་གྱུར་པ། །ཁྲག་འཐུང་ང་རྒྱལ་འཇོམས་པའི་སྐུ། །འཇིགས་བྱེད་སེར་ནག་འབར་བར་གསལ། །སྤྱན་དྲངས་མཆོད་ཅིང་སྒྲུབས་པའི་ལྷ། །རཏྣ་ཧེ་རུ་ཀ་ལ་བསྟོད། །མཱ་མ་ཀཱི་ལས་གནས་གྱུར་པ། །འཇིགས་བྱེད་ཁྲོ་མོའི་སྐུར་བྱུང་བ། །ཡབ་ཡུམ་ཐབས་དང་ཤེས་རབ་ལས། །སྤྱན་དྲངས་མཆོད་ཅིང་སྒྲུབ་པ་ཡི། །རཏྣ་ཀྲོ་དྷེ་ཤྭ་རཱིར་བསྟོད། །ༀ་རཏྣ་ཤྲཱི་ཧེ་རུ་ཀ་རཏྣ་ཀྲོ་དྷེ་ཤྭ་རཱི་ཧཱུཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཧཱུཾ། ནུབ་ཕྱོགས་འཁོར་ལོའི་རྩིབས་སྟེང་ན། །ཀླུ་དབང་བསྣོལ་བའི་གདན་སྟེངས་སུ། །སྣང་བ་མཐའ་ཡས་གནས་གྱུར་པ། །དཔལ་ཆེན་ཁྲག་འཐུང་འདོད་ཆགས་འ ཇོམས། །འཇིགས་བྱེད་དམར་ནག་རལ་པ་ཅན། །བསྒོམས་ཤིང་མཆོད་དེ་སྒྲུབས་པ་ཡི། །པདྨ་ཧེ་རུ་ཀ་ལ་བསྟོད། །ན་བཟའ་དཀར་མོ་གནས་གྱུར་པ། །འཇིགས་བྱེད་ཁྲོ་མོའི་སྐུར་བྱུང་བ། །ཐབས་ཤེས་བྱང་ཆུབ་སེམས་སྒྲུབ་པ། །པདྨ་ཀྲོ་དྷི་ཤྭ་རིར་བསྟོད། །པདྨ་ཤྲཱི་ཧེ་རུ་ཀ་པདྨ་ཀྲོ་དྷེ་ཤྭ་རཱི་ཧཱུཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཧཱུཾ། བྱང་ཕྱོགས་འཁོར་ལོའི་རྩིབས་སྟེང་ན། །གནོད་སྦྱིན་བསྣོལ་བའི་གདན་སྟེངས་སུ། །དོན་ཡོད་གྲུབ་པ་གནས་གྱུར་པ། །འཇིགས་བྱེད་ཁྲག་འཐུང་ཕྲག་དོག་འཇོམས། །ལྗང་ནག་མེ་འབར་འཇིགས་པའི་གཟུགས། །གསལ་བར་བསྐྱེད་ཅིང་མཆོད་སྒྲུབ་པ། །ཀརྨ་ཧེ་རུ་ཀ་ལ་བསྟོད། །དམ་ཚིག་སྒྲོམ་ལསམ་གནས་གྱུར་པ། །འཇིགས་བྱེད་ཁྲོ་མོའི་སྐུར་སྟོན་པ། །ཡབ་ཡུམ་ཐབས་དང་ཤེས་རབ་ལས ། །ལྷག་མ་བྱང་ཆུབ་སེམས་འཕྲོས་པ། །ཀརྨ་ཀྲོ་དྷཱི་ཤྭ་རཱིར་བསྟོད། །ༀ་ཀརྨ་ཤྲཱི་ཧེ་རུ་ཀ་ཀརྨ་ཀྲོ་དྷེ་ཤྭ་རཱི་ཧཱུཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཧཱུཾ། ཤར་ལྷོ་འཁོར་ལོའི་རྩིབས་སྟེང་ན། །མཐུ་སྟོབས་མངའ་བདག་གནས་གྱུར་པ། །སྒྲོལ་བྱེད་ཆེན་པོ་བདུད་རྣམས་འཇོམས། །བདུད་དང་སྲིན་པོ་སྒྲོལ་ལ་བརྩོན། །མཐིང་ནག་འཇིགས་པའི་ཆ་ལུགས་ཅན། །རཀྴ་ཧེ་རུ་ཀ་ལ་བསྟོད། །ལྷ་མོ་རལ་གཅིག་གནས་གྱུར་པ། ཁྲོ་མོ་ཡབ་ཀྱི་ཆ་ལུགས་ཅན། །ཡབ་ཡུམ་ཐབས་དང་ཤེས་རབ་སྦྱོར། །རཀྴ་ཀྲོ་དྷེ་ཤྭ་རཱིར་བསྟོད། །ༀ་རཀྴ་ཤྲཱི་ཧེ་རུ་ཀ་རཀྴ་ཀྲོ་དྷེ་ཤྭ་རཱི་ཧཱུཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཧཱུཾ། ལྷོ་ནུབ་འཁོར་ལོའི་རྩིབས་སྟེང་ན། །མཁྱེན་རབ་བདག་པོ་གནས་གྱུར་པ། །སྒྲོལ་བྱེད་མ་མོ་མཁའ་འགྲོ་འདུལ། །སེར་ནག་མདོག་ཅན་འཇིགས་པའི་གཟུགས། །གང་སྒྲུབ་མཐུ་དང་དབང་སྩོལ་བའི། །ས་ནུ་ཧེ་རུ་ཀ་ལ་བསྟོད། །འཇིགས་རྟེན་བདག་མོ་གནས་གྱུར་པ། ཁྲོ་མོ་དབང་ཕྱུག་ཀུན་གྱི་རྗེ། །སྤྲུལ་པ་ཡང་སྤྲུལ་ཀུན་གྱི་མ། །ཐབས་དང་ཤེས་རབ་དབྱེར་མེད་པ། །ས་ནུ་ཀྲོ་དྷེ་ཤྭ་རཱིར་བསྟོད། །ༀ་ས་ནུ་ཤྲཱི་ཧེ་རུ་ཀ་ས་ནུ་ཀྲོ་དྷེ་ཤྭ་རཱི་ཧཱུཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཧཱུཾ། ནུབ་བྱང་འཁོར་ལོའི་རྩིབས་སྟེང་ན། །ཐུགས་རྗེའི་བདག་པོ་གནས་གྱུར་པ། །གསང་བའི་དོན་ལ་མངའ་མཛད་པ། །དམར་ནག་འཇིགས་པའི་ཆ་ལུགས་ཅན། །དུས་རྣམ་རྟག་ཏུ་གསང་བའི་ལྷ། །ཞེ་སྡང་འཁོར་བ་སྒྲོལ་ལ་བརྩོན། །གུ་ཧྱ་ཧེ་རུ་ཀ་ལ་བསྟོད། །གསུང་གི་བདག་མོ་གནས་གྱུར་པ། །ཁྲོ་མོ་ཆེན་མོ་གསང་བའི་ལྷ། །གསང་བའི་དོན་ལ་བསྐུལ་བྱེད་མ། །གུ་ཧྱ་ཀྲོ་དྷཱི་ཤྭ་རཱིར་བསྟོད། །ༀ་གུ་ཧྱ་ཤྲཱི་ཧེ་རུ་ཀ་གུ་ཧྱ་ཀྲོ་དྷེ་ཤྭ་རཱི་ཧཱུཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཧཱུཾ། བྱང་ཤར་འཁོར་ལོའི་རྩིབས་སྟེང་ན། །བཛྲ་ཡཀྵ་གནས་གྱུར་པ། །དཔལ་ཆེན་དམ་ཚིག་མངའ་མཛད་པ། །ལྗང་ནག་འཇིགས་པའི་ཆ་ལུགས་ཅན། །བསྐལ་པ་བརྒྱར་ཡང་དམ་ཚིག་ལྷ། །ཡཀྴ་ཧེ་རུ་ཀ་ལ་བསྟོད། །ༀ་ཡཀྴ་ཤྲཱི་ཧེ་རུ་ཀ་ཡཀྴ་ཀྲོ་དྷེ་ཤྭ་རཱི་ཧཱུཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ༈ །ཧཱུཾ། ཚོགས་ཆེན་འདུས་པ་དབང་གི་དཀྱིལ་འཁོར་གྱི། །འབར་བའི་གློ་འབུར་བཞི་དང་གྲུ་ཆད་བཞིར། །ག་རཱི་ལ་སོགས་ཁྲོ་མོ་བརྒྱད་རྣམས་ནི། །གདུག་པ་ཐབས་ཀྱིས་འདུལ་བའི་དྲག་ཤུལ་ཅན། །སྐུ་མདོག་ཕྱག་མཚན་སྣ་ཚོགས་ཅིར་ཡང་སྟོན། །ཡེ་ཤེས་ཁྲོ་མོ་བརྒྱད་ལ་ཕྱག་འཚལ་བསྟོད། །ༀ་བཛྲ་ག་རཱི་ཧ། དེ་བཞིན་ག་རཱི་གནས་སུ། ཙ་རཱི། བྲ་མོ་ཧེ། བེ་ཏཱ་ལཱི། པུཀྐ་སཱི། གྷ་སྨ་རཱི། སྨ་ཤ་ནཱི། ཙཎྜ་ལཱི་རྣམས་བཅུག་པ་དང་། རུ་ལུ་སྤེལ། ༈ ཧཱུཾ། ཚོགས་ཆེན་འདུས་པ་དབང་གི་དཀྱིལ་འཁོར་གྱི། །འབར་བའི་བར་ཁྱམས་དང་པོ་གསེར་མདོག་ན། །སེང་གདོང་མ་སོགས་ཕྲ་མེན་བརྒྱད་རྣམས་ནི། །ཡེ་ཤེས་ལས་ལ་འགྱེད་པའི་ཕྲ་མེན་མ། །རྣམ་འཕྲུལ་ལས་ཀྱིས་འགྲོ་བའི་དོན་མཛད་པ། །ཕྲ་མེན་ཡུལ་མ་བརྒྱད་ལ་ཕྱག་འཚལ་བསྟོད། །ༀ་བཛྲ་སིདྷ་མུ་ཁཱི་ཧེ། སིདྷའི་གནས་སུ། བྱཱ་གྷྲི། ཤྲྀ་གཱ་ལ། ཤྭ་ན། གྲྀདྡྷ། ཀངྐ། ཀཱ་ཀ །ཨུ་ལཱུ་ཀ་རྣམས་བཅུག་པ་དང་། རུ་ལུ་སྤེལ། ༈ ཁྱམས་དེའི་ཤར་ལྷོ་ནུབ་བྱང་སྒོ་བཞི་རུ། །ཚད་མེད་བཞི་ཡིས་འགྲོ་བའི་དོན་མཛད་པ། །རྟ་གདོང་ཕག་གདོང་སྤྲེལ་གདོང་སྦྱང་གདོང་བཞི། །ཞི་རྒྱས་དབང་དྲག་ལས་ལ་ཐོགས་མེད་བརྩོན། །རྟག་ཆད་བདག་འཛིན་མཚན་མར་ལྟ་ལས་གྲོལ། །ཡེ་ཤེས་སྒོ་མ་བཞི་ལ་ཕྱག ༴ ༀ་བཛྲ་ཨཱརྱ་ཏེ་ཛ་ཏེ་ང་ཛཿ ༀ་བཛྲ་སྔོན་འགྲོས། ཨ་མུ་ཁེ་ཧཱུཾ། ལོ་ཀ་བཾ། བྷསྨི་པ་ལ་ཡ་བ་ཏུ་ཧོཿརྣམས་དང་། རུ་ལུ༴ ༈ ཧཱུཾ། ཚོགས་ཆེན་འདུས་པ་དབང་གི་དཀྱིལ་འཁོར་གྱི། །འབར་བའི་བར་ཁྱམས་གཉིས་པ་དཀར་པོ་ན། །ཆོས་ཉིད་རྣམ་དག་ངང་ལས་རང་སྣང་བའི། །སྣ་ཚོགས་ཅིར་ཡང་འགྱུར་པའི་སྐུ་མངའ་ཞིང་། །སྲིད་གསུམ་ཞིང་དུ་སྦྱོར་བས་གཡང་གཞི་གསོལ། །སྤོར་མ་ཆེན་མོ་བརྒྱད་ལ་ཕྱག་འཚལ༴ ༀ་བཛྲ་ཨ་པྲ་ཏི་ཧ་ཨཱརྻ་ནི་ཙ་ཏུ་ར་ཏ་ར་ཕཊ་རཀྨོ་ཧཱུཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ༈ །བར་ཁྱམས་དེ་ཡི་ཤར་ལྷོ་ནུབ་བྱང་སྒོར། །དགྱེས་པ་བསྐྱེད་པའི་གསང་བའི་ཡུམ་ཆེན་བཞི། །གཉིས་མེད་རོལ་པའི་བྱིན་རླབས་སྣ་ཚོགས་འཕྲོ། །ཤེས་རབ་ཡུམ་ཆེན་བཞི་ལ་ཕྱག༴ ༀ་ཤྲཱི་བཛྲ་མུཏྒ་ར་མུ་ཁ་ཤྭ་ར་ཡཱ་ཡ་ན་མཿ ༀ་ཤྲཱི་བཛྲ་རཱ་ག་མ་ཤྭ་ར་ཡཱ་ཡ་ན་མཿ ༀ་ཤྲཱི་བཛྲ་ཁ་ཊྭཱཾ་ཀ་པྲ་ཛྭ་ལ་ཡཱ་ཡ་ན་མཿ ༀ་ཤྲཱི་བཛྲ་གྷཎྜེ་པྲ་ཛྭ་ལ་ཡཱ་ཡ་ན་མཿ ཞེས་པ་རྣམས་དང་རུ་ལུ་སྤེལ། ༈ །ཧཱུཾ། ཚོགས་ཆེན་འདུས་པ་དབང་གི་དཀྱིལ་འཁོར་གྱི། །འབར་བའི་བར་ཁྱམས་གསུམ་པ་དམར་པོ་ན། །མི་སྲིན་ལ་སོགས་དབང་ཕྱུག་ཉི་ཤུ་བརྒྱད། །དྲེགས་པ་ལྷ་ཆེན་རྣམས་ཀྱི་ཆུང་མ་སྟེ། །དབང་དྲག་ལས་ལ་ཐོགས་པ་མེད་པར་སྤྱོད། །དབང་ཕྱུག་ཉི་ཤུ་བརྒྱད་ལ་ཕྱག༴ མ་ནུ་རཀྵ་སཱི། བྲ་ཧྨ་ཎཱི། ར་ཏྲི། བེཥྞ་བཻ། ཀུ་མཱ་རཱི། ཨིནྡྲ་ཎཱི། བཛྲཔིངྒ་ལཾ། ཨ་མྲྀ་ཏཾ། ས་མྱ། དཎྜ་དཾ། རཀྵ་སཱི། བྷ་ཀྵ་སཱི། ར་ཏི་བཛྲ། རུ་དྷི་ར་མཏྟཱ། ཨེ་ཀ་ཙ་རི་ཎཱི། མ་ནོ་ཧ་རཾ། སིདྡྷི་ཀཾ །བཱ་ཡ་ཝི། མ་ཧཱ་མཱ་ར་ཎ་བཛྲ། ཨགྣཱི། ཝ་ར་ཧྲཱི། ཙ་མུཎྜཱི། སུ་ཏ་ནཾ། བ་རུ་ཎཱི། བཛྲ་མ་ཧཱ་ཀཱ་ལི། བཛྲ་ཙ་ཀཱ་ལ། བཛྲ་ཀུམྦྷ་ཀཪྞ། བཛྲ་ལམྦོ་ད་ར། དེ་ཐམས་ཅད་ཀྱི་མཇུག་ཏུ་བྷྱོ་རེ་བཏགས་ཤིང་། རུ་ལུ་དང་སྤེལ་ལོ། ༈ །ཧཱུཾ། ཚོགས་ཆེན་འདུས་པ་དབང་གི་དཀྱིལ་འཁོར་གྱི། །འབར་བའི་བར་ཁྱམས་བཞི་པ་གསེར་མདོག་ན། །ནམ་མཁའི་ལུས་ཅན་གར་ཡང་ཐོགས་མེད་ཅིང་། །འདོད་དགུར་སྒྱུར་པའི་གཟུགས་ཅན་འཕྲུལ་མོ་ཆེ། །མ་སྲིང་བྱམས་པའི་ཚུལ་གྱིས་གྲོགས་མཛད་མ། །མཁའ་འགྲོ་སུམ་ཅུ་གཉིས་ལ་ཕྱག ༴ ཨེ་ཨཱ་ར་ལི་ཧཱུཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ༈ །ཧཱུཾ། ཚོགས་ཆེན་འདུས་པ་དབང་གི་དཀྱིལ་འཁོར་གྱི། །འབར་བའི་བར་ཁྱམས་ལྔ་པ་དམར་པོ་ན། །འཇིགས་རྟེན་དྲེགས་པ་འདུལ་བ་མ་མོའི་ཚོགས། །ཕྱི་འཁོར་འདུལ་ཞིང་ནང་འཁོར་སྐྱོང་མཛད་པ། །དུར་ཁྲོད་མ་བདུན་ལས་ཀྱི་སྲིང་མོ་བཞི། །བགེགས་སྲུང་མ་སྲིང་ཚོགས་ལ་ཕྱག༴ མ་མ་དྷཱ་ཏུ་ཧཱུཾ། བཛྲ་དུནྟིང་བྷྱོ། རུ་ལུ་དང་སྤེལ་ལ་བཟླ། ༈ །ཧཱུཾ་ཚོགས་ཆེན་འདུས་པ་དབང་གི་དཀྱིལ་འཁོར་གྱི། །འབར་བའི་བར་ཁྱམས་དྲུག་པ་དཀར་པོ་ན། །ཁམས་གསུམ་སྒྲོལ་བའི་གིང་ཆེན་བཅོ་བརྒྱད་ནི། སྲིད་གསུམ་ལས་ལ་ཐོགས་མེད་སྒྲོལ་ལ་བརྩོན། །བསྒྲལ་བའི་ཞིང་བཅུ་གཏན་ནས་བརླག་པར་བྱེད། །གིང་ཆེན་གིང་ལྕམ་ཚོགས་ལ་ཕྱག༴ ཀིངྐ་ར་ཧ་ཧ་རུ་ལུ་རུ་ལུ་ཧཱུཾ་བྷྱོ་ཧཱུཾ། ༀ་རུ་ལུ་རུ་ལུ་ཧཱུཾ་བྷྱོ་ཧཱུཾ། ༈ །ཚོགས་ཆེན་འདུས་པ་དབང་གི་དཀྱིལ་འཁོར་གྱི། འབར་བའི་བར་ཁྱམས་བདུན་པ་ནག་པོ་ན། །བཅོམ་ལྡན་ཧཱུཾ་མཛད་ས་གསུམ་བརྗིད་ཀྱིས་གནོན། །ཁམས་གསུམ་འདུལ་མཛད་ཡེ་ཤེས་ལྷ་ཡི་ལྷ། །འཇིགས་བྱེད་འབར་བ་གདུག་པའི་ཚོགས་རྣམས་འཇོམས། །ཁྲོ་བོ་ཁྲོ་མོ་རྣམས་ལ་ཕྱག༴ ཀྲོ་དྷ་ཀྲོ་དྷཱི་ཧཱུཾ། ༀ་རུ་ལུ༴ ཧཱུཾ། ཚོགས་ཆེན་འདུས་པ༴ འབར་བའི་བར་ཁྱམས་བརྒྱད་པ་ཕྱོགས་མདོག་ན། །ཡེ་ཤེས་ཐུགས་རྗེས་ཕྱོགས་བཅུར་ཁྱབ་པ་ཡིས། །གདོན་བགེགས་འདུལ་བའི་ལས་ལ་ཐོགས་པ་མེད། །ཅི་བགྱི་བཀའ་ཉན་ལས་རྣམས་མྱུར་མཛད་པ། །ཕྱོགས་བཞིའི་ཕོ་ཉའི་ཚོགས་ལ༴ བྷ་ན་བྷ་ན་ཨཾ་ཀུ་ཤ་ཛཿ ཧ་ལ་ཧ་ལ་པཱ་ཤ་ཧཱུཾ། གརྫ་གརྫ་སྥོ་ཊ་བཾ། པ་ཙ་པ་ཙ་གྷཎྜེ་ཧོཿ ཞེས་དང་རུ་ལུ་སྤེལ་བ་བཟླ། ༈ །ཧཱུཾ། ཚོགས་ཆེན་འདུས་པ༴ འབར་བའི་བར་ཁྱམས་དགུ་པ་ལྗང་ཁུ་ན། །སྟོང་ཁམས་ཡོངས་ཀྱི་ལས་ལ་དབང་བྱེད་པའོ། །མ་ཆེན་རྒྱལ་མོ་སྲིད་པ་གསུམ་གྱི་བདག༴ ཡུམ་ཆེན་ལས་ལ་དབང་བའི་དབང་མོ་ཆེ། །མ་མོ་དྲུག་ཅུའི་ཚོགས་ལ༴ མ་མེ་ཤྭ་ར་ཧཱུཾ། ༀ་རུ་ལུ༴ ༈ །གསུམ་པ་རིག་འཛིན་ལའང་བསྟོད་བཟླས་གཉིས་ཏེ། ཧཱུཾ། གཞལ་ཡས་ཁང་ཆེན་ཕྱི་རོལ་ཁོར་ཡུག་ན། །རིག་འཛིན་བླ་མ་བྱིན་རླབས་ལྡན་པའི་ཚོགས། །རྣལ་འབྱོར་ལྔ་ཡི་ས་ལ་ལེགས་བཞུགས་པའི། །རྩ་བརྒྱུད་བླ་མ་རྣམས་ལ་ཕྱག་འཚལ་བསྟོད། །བསྐྱེད་རྫོགས་གསུམ་གྱི་དངོས་གྲུབ་འདིར་སྩོལ་ཅིག །ༀ་མ་ཧཱ་གུ་རུ་ཤ་རི་རཾ་གཱི་ལི་ཧཱུཾ། ཞེས་བཟླའོ། །ཞི་ཁྲོའི་འཛབ་རྒྱས་པའི་ཟུར་འདེབས་ལེ་ཚན་ནོ།། །།

༈ ༀ་སྭ་སྟི། ད་ནི་སྒྲུབ་ཁོག་ཏུ། ཆེ་མཆོག་ཞལ་བྱང་གི་ཆོ་གས་རྩ་དཀྱིལ་གྱི་སྙིང་པོ་བདུད་རྩི་བདེ་བ་ཆེན་པོའི་དཀྱིལ་འཁོར་དུ་ཞལ་བསྒྱུར་བ་ཙམ་ལས། ཆོ་གའི་སྤྲོས་པ་གཞན་རྣམས་འདིར་མི་དགོས་ཀྱང་། ཡིག་རྒྱུན་མི་ནུབ་པའི་ཕྱིར་ལུགས་དེའི་ཆོག་ཁྲིགས་ཀྱང་ཟུར་འདེབས་སུ་འབྲི་བར་བྱ་ཞེས་ཁ་འཕང་བ་ནི་འདི་ཡིན་ཏེ། དེ་ལ་སྤྱིར་རྩ་རྒྱུད་ཀྱི་ལེའུ་ཉི་ཤུ་རྩ་བརྒྱད་པར། བདུད་རྩི་རང་བྱུང་གི་སྒྲུབ་པ་དང་། བདུད་རྩི་ཁྲོལ་བུ་དང་། ཕྱེ་མ་དང་། རིལ་བུ་དང་། སྐྱོ་མ་དང་། ལྡེ་གུ་དང་། ཞུན་ཆེན་དང་། རློན་སྦྱོར་དུ་སྒྲུབ་པ་དང་བརྒྱད་གསུངས་པ་ལས། འདིར་མཁོ་བ་ཁྲོལ་བུ་དང་། ཕྱེ་མ་གཉིས་ཀྱི་ཆོ་གའི་ཁོག་ཅུང་ཟད་བཤད་པ་ལ་གཉིས་ཀྱི། དང་པོ་ཁྲོལ་བུའི་ཐོ་བྱང་ནི། བདུད་རྩི་ལྔ་དང་། ཤ་ལྔ་དང་། དབང་པོ་ལྔ་དང་། སྐྱོབས་དང་འཕྲད་དུ་གྱུར་པའི་ལ་སྨན་བོད་སྨན་སོགས་ཐམས་ཅད་འཚོལ་བ་དང་བསྲེལ་བ་ལ་མཁས་པའི་སྒོ་ནས་ཚང་བར་འདུ་བྱས་ལ། དཀྱིལ་འཁོར་ནི་ཧེ་རུ་ཀ་འདུས་པར་དབུས་ལིང་ཚེ་དང་། རྔམས་གློག་ཏུ་པད་འདབ་བརྒྱད་པར་བཤད་ཀྱང་། རྩ་རྒྱུད་ལྟར་འདིར་སྒོ་བཞི་རྟ་བབས་ཅན་ཁྱམས་གྲུ་ཆད་གློ་འབུར་དང་བཅས་པའི་ནང་དུ་པདྨ་དམར་པོ་འདབ་བཞིའི་ལྟེ་བར་ཟླ་ག མ་ལོགས་མདུན་བསྟན་དང་། འདབ་བཞིར་ལོགས་ནང་བསྟན་རེ། ཕྱིའི་ཁོར་ཡུག་པད་རྡོར་མེའི་ར་བས་བསྐོར་བ་བྲིས་ལ། དེའི་སྟེང་དུ་སྨན་སྣོད་ནི། དབུས་སུ་ཐོད་པ་སྲུབས་མེད་ཚངས་སྐུད་ཅན། ཤར་དུ་དཀར་ཟླུམ་སུལ་འགྲེང་མཛོད་སྤུ་ཅན། ལྷོར་དུམ་གསུམ་ཤིང་ལོ་རྒྱས་པ། ནུབ་ཏུ་དུམ་གཉིས་སྨིན་མཚམས་གཉིས་ན་འབུར་ཡོད་པ། །བྱང་དུ་དུམ་བཞི་སྲུབས་རྒྱ་གྲམ་ཅན་རྣམས་བཀོད། དེ་དག་གི་ནང་དུ་སྨན་ནི། དབུས་སུ་དྲི་ཆེན། ཁྱི་ཤ །དབང་པོ་ལྔ་ལས་སྙིང་། ཨ་རུ་ར། ཀ་ཀོ་ལ་སོགས་བཞག །ཤར་དུ་བྱང་སེམས། བ་ལང་གི་ཤ །མིག །ག་པུར། དུ་རུ་ཀ་སོགས། ལྷོ་ཤའི་དྭངས་མ་གསུམ། རྟ་ཤ །རྣ་བ། གུར་གུམ། ཛཱ་ཏི་སོགས། ནུབ་ཏུ་པད་རཀ །བྱ་སྣ་ཚོགས་ཀྱི་ཤ །ལྕེ། པདྨ། ཙནྡན་སོགས། བྱང་དུ་དྲིལ་ཆུ། རི་དྭགས་སྣ་ཚོགས་ཀྱི་ཤ །སྣ། ལི་ག་དུར། གུ་གུལ་སོགས་ཏེ། སྨན་གཞན་རྣམས་རིགས་ལྔའི་ཕྱག་རྒྱའི་དབྱིབས་དང་། ཁ་དོག །རོ་ནུས་སོགས་སོ་སོའི་ལས་ཀྱིས་ཕྱེ་ནས་སྣོད་ལྔར་བཀོད་ཅིང་། མཚམས་བཞིར་ཡང་ཐོད་པའམ་སྣོད་ཇི་ལྟར་རིགས་པར་ཤར་ལྷོ་ནས་རིམ་བཞིན་འོ་མ་དང་། རིན་ཆེན་དང་། ཆང་དང་། ཆུ་རྣམས་བཞག །དེ་རྣམས་ཀྱི་སྟེང་ནས་དར་གཡོགས་ཤིང་ཚོན་སྐུད་རྒྱ་གྲམ་དུ་བཏབ་པའི་སྣེ་ནས་གཟུངས་ཐག་འདྲེན་པ་སོགས་སྤྱི་ལྟར་བྱའོ། ༈ ། དེ་ནས་སྨན་སྦྱང་བའི་དགོངས་རྒྱུན་ནི། རྩ་རྒྱུད་ལས། དམ་པ་དེ་ཉིད་གསང་ཆེན་གྱི། །རིགས་བརྒྱ་རིགས་ལྔ་རིགས་གཅིག་གིས། །ཐམས་ཅད་སྦྱང་བའི་མཆོག་ཏུ་བྱ། །ཞེས་པ་ལྟར་གསུམ་ལས། །དམ་པ་རིགས་བརྒྱས་སྦྱོང་བ་ནི། །མཚམས་གཅོད་སོགས་སྔོན་དུ་འགྲོ་བས། །དངོས་གཞི་ནི། ཧེ་རུ་ཀ་འདུས་པ་ལས། །དཀྱིལ་འཁོར་གཞལ་ཡས་གདན་དང་བཅས། །སངས་རྒྱས་དཀྱིལ་འཁོར་ཡབ་ཡུམ་གཉིས། །བསྐྱེད་ཅིང་བྱིན་རླབས་དབང་བསྐུར་བྱ། །གཉིས་མེད་གསལ་བསྟིམ་མཆོད་བྱས་ཏེ། །བྱིན་རླབས་སྨན་གྱི་ལྷ་མོ་སྦྲན། །བར་ཆད་བསལ་བ་རྒྱུན་དུ་བྱ། །དེ་ལས་འབར་བའི་དཀྱིལ་འཁོར་དུ། །ཞེས་པས་བསྐྱེད་པ་ནི། བདག་དང་མདུན་གྱི སྨན་དཀྱིལ་དབྱེར་མེད་དུ་བསྒོམས་ཏེ དབྱིངས་དང་ཡེ་ཤེས་གཉིས་མེད་རྩ་བ་བྱང་ཆུབ་ཀྱི་སེམས་ཉིད་བསྐྱེད་སྔགས་ཀྱིས་སད་པ་ལས། །རྟེན་གཞལ་ཡས་ཁང་མཚན་ཉིད་རྫོགས་པའི་ནང་དུ། །བརྟེན་པ་ལྷ་དབུས་དང་འདབ་བཞིར་རིགས་ལྔ། །གློ་འབུར་དང་གྲུ་ཆད་ལ་སེམས་དཔའ། །སྒོར་མཐར་བྱེད་རྣམས་ཡུམ་བཅས་དང་། །ཁྱམས་ཀྱི་ཕྱོགས་མཚམས་སུ་བྱ་བྱེད་དང་ཐུབ་དྲུག་སྟེ་བཞི་བཅུ་རྩ་གཉིས་ཞི་བའི་དཀྱིལ་འཁོར་བཀྲ་ལམ་གྱིས་གསལ་བར་བསྐྱེད་ལ། བསྐུར་རློབ་དབབ་དྲངས་བསྟིམ་བརྟན་མཆོད་ཅིང་བསྟོད་ནས། འགྲེལ་ཆུང་ལས། ཁྲུས་བྱ་བ་ནི་སྨན་གྱི་སྲུང་མ་རྣམས་དགའ་བར་བྱས་ནས་རྟོག་པ་གཞོམ་པའོ། །ཞེས་པས་སྨན་སྲུང་སྤྱན་དྲངས་ལ་རྟོག་བསལ་བྱས་རྗེས་འཛབ་ཁང་ཕྱེ་ནས། བདག་བསྐྱེད་ཀྱི་ཐུགས་ཀའི་འོད་ཀྱིས་ཐུགས་རྒྱུད་བསྐུལ་བས་མདུན་བསྐྱེད་ལ་སྤྲོ་བསྡུའི་དམིགས་པ་སྦྱར་ཏེ། ཞི་འཛབ་བོ་དྷི་ཙིཏྟ་བརྒྱ་རྩ་བརྒྱད་བཟླས། དེ་ནས་ཧཱུཾ་ཞེས་བརྗོད་པས་བདག་མདུན་གྱི་ཐུབ་པ་དྲུག་ཀུན་བཟང་ལ་བསྡུ། ཀུན་བཟང་ཡབ་ཡུམ་མི་བསྐྱོད་པ་དང་། མཐར་བྱེད་བཞི་རང་རང་གི་ཡུམ་ལ་བསྡུས་ཏེ། ཁྲོ་བོའི་རྟེན་བརྟེན་པའི་བསྐྱེད་སྔགས་བརྗོད་པ་ཙམ་གྱིས། །རྟེན་འབར་བའི་གཞལ་ཡས་ཁང་ཁྱམས་ཉིས་རིམ་ཅན་དང་། བརྟེན་པ་ཞི་བའི་ལྷ་ཚོགས་ཁྲོ་བོ་ངོ་མཚར་ཚོགས་ཀྱི་ལྷ་སུམ་ཅུར་བསྒྱུར་ཞིང་། ཁྱམས་ཕྱི་མར་དབང་མོ་རྣམས་ཀྲོང་བསྐྱེད་བྱས་ལ། མཆོད་ཅིང་བསྟོད་ནས། བདག་མདུན་སྤྲོ་བསྡུ་སྔར་ལྟར་སྦྱར་ཏེ། ཁྲོ་མཛབ་རུ་ལུའི་བཟླས་པ་བརྒྱ་རྩ་བརྒྱད་བཟླའོ། །དེ་ནས་བདག་བསྐྱེད་ཀྱི་ཐུགས་ཀ་ནས་སྔགས་ཀྱི་འོད་ཟེར་གཟུངས་ཐག་ལ་འཁྲིལ་ཏེ་སོང་བས་ལྷ་རྣམས་ཀྱི་ཐུགས་རྒྱུད་བསྐུལ། དེ་དག་གི་སྐུ་ལས་འཕྲོས་པའི་འོད་ཟེར་དང་། སྨན་སྲུང་རྣམས་ཀྱིས་ཀྱང་བརྟན་གཡོ་འཁོར་འདས་ཀྱི་རྩི་བཅུད་ཐམས་ཅད་བསྡུས་པ་བྱང་སེམས་བདུད་རྩིའི་ཆུ་རྒྱུན་དུ་ཞུ་བ་བདུད་རྩིའི་དཀྱིལ་འཁོར་ལ་ཐིམ་པར་མོས་ལ། གཟུངས་ཐག་ལ་འཇུས་ཏེ། ཁྲོལ་བུ་སྤྱི་སྦྱང་བའི་སྙིང་པོ། ༀ་ཨཱཿཧཱུཾ་སརྦ་པཉྩ་ཨ་མྲྀ་ཏ་ར་ས་ཡ་ན་ཏ་ན་ཛ་ཡ་གུ་ཧྱ་སིདྡྷི་ཧཱུཾ་ཧྲཱིཿཋཱ། ཞེས་སྟོང་ཚང་བར་བཟླས་ལ་མཆོད་ཅིང་། ཐུན་བསྡུ་བ་ན། འཁོར་རྣམས་འོད་དུ་ཞུ་ནས་རིགས་ལྔ་ལ་ཐིམ། རིགས་ལྔ་ཡབ་ཡུམ་རྗེས་ཆགས་ཀྱིས་བདེ་བ་ཆེན་པོའི་ངོ་བོར་ཞུ་བ་དམ་རྫས་དང་རོ་གཅིག་ཏུ་གྱུར་པར་བསམ་མོ། །དེ་ནས་དེ་ཉིད་རིགས་ལྔས་འཇུ་འདུལ་བྱ་བ་ནི། སྨན་རྣམས་ཕྱོགས་བཞི་དབུས་དང་ལྔའི་སྣོད་དུ་བསྡུས་ཏེ། དབྱིངས་ཡེ་གཉིས་མེད་ལས་རྟེན་གཞལ་ཡས་ཁང་གི་དབུས་སུ་སྣོད་ཀ་པཱ་ལ་ལྔའི་ནང་དུ་པད་ཟླ་ཉི་མ་ལ་གནས་པའི་དམ་རྫས་བདུད་རྩི་ལྔ་པོ་དཔའ་བོ་འབྲུ་ལྔར་གྱུར་པ་སྤྲོ་བསྡུས་དེ་བཞིན་གཤེགས་པ་རིགས་ལྔ་ཡབ་ཡུམ་གྱི་སྐུར་བཀྲ་ལམ་གྱིས་གསལ་བར་མོས་ལ། དབང་བསྐུར་ནས་རྟོག་བསལ་གྱི་བར་དང་། འཛབ་ཁང་ཕྱེ་སྟེ་སྤྲོ་བསྡུ་སྔར་ལྟར་སྦྱར་ལ། རིགས་ལྔའི་འཛབ་བརྒྱ་རྩ་བརྒྱད་བཟླས་རྗེས། བདག་གི་ཐུགས་ཀའི་འོད་ཀྱིས་བསྐུལ་བས་མདུན་བསྐྱེད་ཀྱི་རིགས་ལྔ་ཡབ་ཡུམ་གཉམ་པར་སྦྱོར་བའི་བདེ་བའི་སྒྲ་དང་འོད་ཟེར་གྱིས་དོན་གཉིས་བྱས། ཡེ་ཤེས་ལྔའི་བཅུད་བསྡུས་པ་ཡབ་ཡུམ་གྱི་སྦྱོར་མཚམས་ནས་བབས་ཏེ་ཡེ་ཤེས་ཀྱི་བདུད་རྩི་མུ་ཏིག་དཀར་པོ་དྲི་མ་མེད་པ་ལྟར་འཁྱིལ་བར་མོས་ལ། ༀ་ཨཱཿཧཱུཾ་སྭཱ་ཧཱ་ཱཛྙཱ་ན་པཉྩ་སྥ་ར་ཎ་ཕཊ། སཾ་ཧ་ར་ཎ་ཧཱུཾ། ཞེས་སྟོང་བཟླ་ཞིང་། རིགས་ལྔ་ཡབ་ཡུམ་རྗེས་ཆགས་ཀྱིས་སོགས་བསྡུ་བ་སྔར་བཞིན་ནོ། །དེ་ནས་གསང་ཆེན་རིགས་གཅིག་ནི། སྨན་ཐམས་ཅད་སྣོད་གཅིག་ཏུ་བསྡུས་ཏེ། དབྱིངས་དང་ཡེ་ཤེས་གཉིས་མེད་ལས་ཧཱུཾ་ཞེས་བརྗོད་པས་རྡོ་རྗེ་སེམས་དཔའ་ཡབ་ཡུམ་དུ་བསྒོམས་ལ། དབང་ནས་རྟོག་བསལ་བར་དང་། འཛབ་ཁང་ཕྱེ་སྟེ་སྤྲོ་བསྡུས། རྡོར་སེམས་ཡབ་ཡུམ་གྱི་སྔགས་བརྒྱ་རྩ་དང་། དམིགས་པའི་འཕྲོ་འདུ་སྔར་ལྟ་བུས་སྨན་འཛབ། ༀ་ཨཱཿཧཱུཾ་སྭཱ་ཧཱ་ཛྙཱ་ན་བཛྲ་ཙིཏྟ་ས་མ་ཡ་སྭཱ་ཧཱ། ཞེས་སྟོང་བཟླས་ལ་ལྷ་སྔར་ལྟར་བསྡུའོ། །དེ་ལྟར་ཁྲོལ་སྒྲུབ་ནི་མདོ་དབང་དང་སྦྲེལ་བའི་སྨན་སྒྲུབ་ལ་མི་མཛད་པ་ཤས་ཆེ་བས་འདིར་ཐོ་བྱང་ཙམ་ལས་མ་སྨོས་ཏེ། བྱ་བར་སྤྲོ་ན་རྫས་བསག་ཅིང་བཤམ་པ་དང་། མཇུག་དོན་སོགས་ཆོ་གའི་རིམ་པ་རྣམས་ཞི་བ་པར་གསང་ཆེན་མྱུར་ལམ་ལྟ་བུས་ཁོག་ཕུབ་ནས་སྦྱར་ཤེས་པར་བྱའོ། ༈ །གཉིས་པ་ཕྱེ་མ་ལ་བཞི་སྟེ། བཏག་བཙག་བསྲེ་སྤོལ་གྱི་དགོངས་པ། ཡུམ་གྱིས་གླུ་བླངས་ཏེ་སྦྱོང་བ། གཞལ་ནས་དཀྱིལ་འཁོར་ལ་འགོད་པ། ཕྱེ་མ་སྒྲུབ་པའི་དགོངས་པའོ། །དང་པོ་ལ་གསུམ་ལས། འཐག་པའི་དགོངས་པ་ནི། རྩ་རྒྱུད་ལས། སྣོད་ཀྱི་སྨན་རྣམས་ཤེས་རབ་མས། །བསྡུས་ཏེ་འཐག་པའི་ཆོ་ག་ཡང་། །ཡུམ་གྱིས་བཟུང་ཞིང་ཡབ་ཀྱིས་འཐག །རིག་འཛིན་རྩལ་ཅན་དབབ་ཅིང་དྲང་། སོ་སོ་ལས་ཀྱི་སྔགས་བརྗོད་ཅིང་། །གཏན་གཏུན་ཐབས་དང་ཤེས་རབ་སྟེ། །སྨན་ཉིད་བྱང་ཆུབ་སེམས་སུ་སྦྱར། །ཞེས་གསུངས་ཏེ། ཡུམ་མམ་དེར་བཏགས་པའི་སློབ་མས་སྣོད་ཀྱིས་སྨན་རྣམས་བསྡུས་ཏེ་བསར་ལ། ཐོག་མར་རིག་འཛིན་རྣམས་དབབ་སྟེ། དཔོན་སློབ་ཐམས་ཅད་དཔལ་ཆེན་པོའི་ང་རྒྱལ་གྱིས་རུ་ལུའི་འཛབ་ཟླ་ཞིང་ཧསྟས་གཡབ། སྤོས་རོལ་དང་བཅས་པས་དཀྱིལ་འཁོར་ལ་བསྐོར་བས། ཞི་ཁྲོ་སྨན་གྱི་རིག་འཛིན་དང་བཅས་པ་ནམ་མཁའ་འགེངས་པ་ཙམ་དུ་བྱོན་ནས་བྱིན་གྱིས་རློབ་པར་བསམ་ལ་ཉམས་བསྐྱང་ངོ་། །དེ་ནས་དཀྱིལ་འཁོར་གྱི་ཤར་ཕྱོགས་སུ་སློབ་དཔོན་དཀྱིལ་འཁོར་ལ་ཕྱོགས་པའི་མདུན་དུ་ཡུམ་གནས་པའི་ཞབས་གཉིས་བསྣོལ་བའི་དབུས་སུ་ཞིང་ལྤགས་སྟེང་སྨན་གཞོང་བཀོད་པ་ཡུམ་གྱིས་མཁའ་དབྱིངས་ཀྱི་རྒྱས་བཟུང་། ཡབ་ཀྱིས་རྡོར་བསྡམས་ལས་མཛུབ་མོ་སྒྲེང་ཞིང་མཐེ་བོང་བཀུག་པས་གཏུན་བུ་བཟུང་སྟེ། གཙོ་བོ་ཡབ་ཡུམ་གྱི་ང་རྒྱལ་གྱིས། གཏན་པ་ཡུམ་གྱི་མཁའ། གཏུན་བུ་ཡབ་ཀྱི་རྡོ་རྗེ། སྨན་བྱང་སེམས་དཀར་དམར་གྱི་རང་བཞིན་དུ་མོས་ལ། འཐག་པ་ནི་འདོད་ཆགས་འཐག་པ་ཞེས་བྱ་སྟེ། རྒྱུད་ཀྱི་དངོས་བསྟན་གྱི་དགོངས་པའོ། །གཞན་ཡང་ཁྲོ་མོའི་གཏུན་ཁུང་དུ་ཁྲོ་བོ་འབར་བའི་གཏུན་ཚོགས་ཀྱིས་སྨན་དགྲ་བགེགས་ཀྱི་རྣམ་པར་བསམ་པ་ནི་ཞེ་སྡང་འཐག་པ་དང་། ཆོས་ཀྱི་དབྱིངས་སུ་རིག་པའི་ཡེ་ཤེས་ཀྱིས་རྣམ་རྟོག་གི་མཚན་མ་འཐག་པ་ནི་གཏི་མུག་འཐག་པ་ཞེས་ཐ་སྙད་མཛད་ཅིང་། དེ་ཐམས་ཅད་ཀྱི་ལས་སྔགས་ནི། ༀ་ཨཱཿ་ཧཱུཾ་སརྦ་པཉྩ་ཨ་མྲྀ་ཏ་མུ་ས་ལ་གྲ་ཧནྟེ་ཧ་ན་ཧ་ན་ཧཱུཾ་ཕཊ། ཅེས་བཟླ་ཞིང་འཐག་གོ །བཙག་པའི་དགོངས་པ་ནི། དཀྱིལ་འཁོར་གྱི་ལྷོ་ཡུམ་གྱིས་དར་ཚགས་བཟེད་ཅིང་ཡབ་ཀྱིས་བླུག་ལ། ཆོས་ཉིད་ཀྱི་ཀློང་དུ་མཚན་རྟོག་རྡུལ་ཙམ་ཡང་མི་གནས་པར་བསམ་ཞིང་། ༀ་ཨཱཿཧཱུཾ་སརྦ་པཉྩ་ཨ་མྲྀ་ཏ་ཧོ་ས་ཡ་བི་ཤུདྡྷེ་ཧཱུཾ་ཧྲཱིཿ་ཋཱ། ཞེས་བརྗོད་ཅིང་འཚག་གོ །བསྲེ་སྤོལ་གྱི་དགོངས་པ་ནི། དཀྱིལ་འཁོར་གྱི་ནུབ་ཏུ་ཡབ་ཡུམ་གནས་པས་སྨན་སྣོད་ལ་ལྕགས་གཡའི་དྲི་མེད་པར་བྱས་ཏེ། སྦྱོར་ཚད་སོགས་ཕྱག་བཞེས་མཐོང་བརྒྱུད་ལྟར་ངེས་པས། དྲི་བཟང་རྣམས་དང་དམ་རྩིའི་དབང་ལག་མ་གཏོགས་ཐམས་ཅད་འདྲེས་པར་བསྲེ་ཞིང་འབྲུམ་མེད་པར་སྦོལ་བའི་སྟེང་དུ། ཆང་དང་འོ་མ་དང་རིན་ཆེན་དང་ཆུ་རྣམས་སོ་སོའི་ལས་སྔགས་རིམ་པར། ༀ་བཛྲ་ཨ་མྲྀ་ཏ་ཛ་གད་པྲ་ཝ་ཡ་སྭཱ་ཧཱ། ༀ་ག་ཏིཾ་སཾ་ཤོདྷ་ཡ་ཀྲོ་དྷི་ཤྭ་རཱི་སྭཱ་ཧཱ། ༀ་སརྦ་པཉྩ་ཨ་མྲྀ་ཏ་རཏྣ་ཙིཏྟ་ཧཱུཾ་ཧྲཱིཿཋཱ། ༀ་ཨ་མྲྀ་ཏ་བི་ཤུདྡྷ་ཀུཎྜ་ལཱི་སྭཱ་ཧཱ། ཞེས་བཟླ་བཞིན་དུ་ཁ་ཕྲུ་འདེབས་དེ་ནས་དམ་རྫས་ཀྱི་ཕབ་སྦྱར་བའི་ཆང་གི་ཉིང་ཁུ་བཏབ་ནས་སྐ་སླ་རན་པར་གྱུར་པ་དང་། དྲི་བཟང་གི་ཕྱེས་མདངས་སྒྱུར་ཞིང་དམ་རྩིའི་ཕྱེ་བཏབ་ལ་སྦོལ་བས། དབྱིངས་དང་ཡེ་ཤེས་གཉིས་མེད་དུ་གྱུར་པར་མོས་ལ། ༀ་བཛྲ་ཨམྲྀ་ཏ་མུ་ས་ལ་མུ་ས་ལ་ཧཱུཾ་ཕཊ། ཅེས་བཟླའོ། །གཉིས་པ་ནི། དཀྱིལ་འཁོར་གྱི་བྱང་དུ་ནམ་ཟླ་དང་བསྟུན་པའི་ཕབ་བཏབ་ལ་ཡུམ་གྱིས། ཀུན་ཏུ་བཟང་མོའི་གཞལ་ཡས་སུ། །ཐབས་དང་ཤེས་རབ་ལྡན་པ་ལས། །འཁོར་བ་བདུད་རྩིའི་སྨན་དུ་སྦྱར། །ཡེ་ཤེས་ལྔ་རུ་གསལ་བ་ལས། །འབྲས་བུ་སྐུ་གསུང་ཐུགས་སུ་རྫོགས། །འཆི་མེད་བདུད་རྩིས་གཅོང་རྙིང་སྦྱོང་། །ཞེས་གླུ་ལེན་ཞིང་འཁོར་འདས་བདེ་བ་ཆེན་པོ་རོ་གཅིག་ཏུ་གྱུར་པར་བསམ་ནས་མི་རྐང་ངམ་རྡོ་རྗེས་དཀྲུག་གོ །གསུམ་པ་ནི། རྩ་རྒྱུད་ལས། མཚན་མ་བརྟག་ཕྱིར་གཞལ་ནས་ནི། ཞེས་སོགས་གསུངས་པ་ལྟར། ༀ་ཨཱཿཧཱུཾ་སརྦ་པཉྩ་ཨ་མྲྀ་ཏ་ཧྱ་གྲཱི་ཝ་ཧུ་ལུ་ཧུ་ལུ་ཧཱུཾ་ཧྲཱིཿཋཱ། ཞེས་བཟླ་ཞིང་སྨན་དྲིལ་བུར་གཞལ་བས་གྲངས་ངེས་པར་བྱས་ཏེ། དར་དམར་གྱི་ཁུག་མར་བླུག །དེ་མོ་ཐོད་ལ་རཀྟས་འཁོར་ལོ་རྩིབས་བཞིར་རིགས་ལྔ་ཡུམ་གྱི་ས་བོན་བྲིས་པའི་ནང་དུ་བཅུག །ཕོ་ཐོད་ལ་བདུད་རྩིས་འཁོར་ལོ་རྩིབས་བཞིར་ཡབ་ལྔའི་ས་བོན་བྲིས་པས་སྟེང་ནས་བཀབ་སྟེ་ཁ་སྦྱར། དར་ཚོན་ལྔས་དྲིལ། མཆོག་གི་རྒྱུ་མས་རྒྱ་གྲམ་དུ་བཅིངས། །དེའི་སྣེ་མོ་སྟེང་དུ་མདུད་པ་ལ་རྡོ་རྗེ་རྒྱ་གྲམ་གྱིས་རྒྱས་བཏབ་པས་ཅིས་ཀྱང་མི་ཤིགས་པར་བསམ་མོ། །དེ་ནས་དྲག་སྔགས་སྤོས་རོལ་དང་བཅས་པས་བགེགས་བསྐྲད་ལ། སྨན་དབུས་ཀྱི་གཙོ་བོར་མངའ་གསོལ་ཏེ། ཆེ་མཆོག་གི་སྔགས་བཟླ་བཞིན་དུ་འདུས་པ་ཆེན་པོའི་དཀྱིལ་འཁོར་བཞེངས་པའི་སྟེང་གི་ལྡིང་ཁྲི་བར་མའི་དབུས་སུ་རུས་སྦལ་གྱི་ཁོག་པར་ཧྲཱིཿཡིག་བྲིས་པའི་སྟེང་དུ་བཀོད། ཤཱུ་ནྱ་ཏཱ་སོགས་དབང་སྔགས་བརྗོད་ནས་སྨན་གྱི་སྟེང་དུ་དབུ་རྒྱན་འཆིང་། གཟུངས་ཐག་བཏགས་ལ་སྲད་བུ་ཕྱིར་དྲངས་ཏེ་བཞག་གོ། །དེ་སྐད་དུའང་ཧེ་རུ་ཀ་འདུས་པར། །དང་པོར་བཏགས་བཙག་གཞལ་བྱས་ལ། །ཚད་དང་ལྡན་པའི་བདུད་རྩི་ནི། །བདུད་རྩི་འཁྱིལ་བར་མངའ་གསོལ་ལ། །བྱིན་བརླབས་དབང་བསྐུར་དབུས་སུ་བཞག །ཅེས་པའི་དོན་ནོ། ༈ །བཞི་པ་ཕྱེ་མ་སྒྲུབ་པའི་དགོངས་རྒྱུད་ནི། སྒྲུབ་གཞུང་གཞན་ལ་བརྟེན་པའི་ཕྱོགས་ལ་སྨན་གྱི་དཀྱིལ་འཁོར་དུ་ཞལ་སྒྱུར་པའི་ཚུལ་སྒྲུབ་ཁོག་ཏུ་བཤད་པ་ལྟར་ཡིན་ཞིང་། དེ་ལ་མདོའི་སྒྲུབ་པའི་སྐབས་འདིར་སྨན་ཞར་སྒྲུབ་ཙམ་ཡིན་པས་བཟླས་པའང་ལྷ་འཛབ་གཙོ་བོར་འདོན་པ་དེའི་གནད་ཀྱིས་སོ། །ད་རེས་འདིར་སྨན་རྐྱང་སྒྲུབ་ཀྱི་དབང་དུ་བྱས་པའི་ཆོ་ག་ལ། སྦྱོར་དངོས་རྗེས་གསུམ་ལས། དང་པོ་སྦྱོར་བ་ནི། སྟོང་པའི་ངང་ལས་རང་ཉིད་ཞེ་སྡང་རྡོ་རྗེ་ཡབ་ཡུམ་དུ་གསལ་བའི་སྦྱོར་མཚམས་ནས་ཁྲོ་ཚོགས་འབར་བའི་སྤྲིན་སྤྲོས་པས་གདུག་པ་ཅན་ཐམས་ཅད་ཚར་བཅད། ཚུར་འདུས་ནས་ཕྱོགས་བཅུར་འཁོད་པས་མཚམས་ཀྱི་ལས་མཛད་པར་མོས་ལ། ཧཱུཾ། རང་བྱུང་ཁྲོ་བོ་ཆེན་པོ་བཅུ། །བགེགས་རྣམས་ཐམས་ཅད་གཟིར་བའི་ཕྱིར། །ཕྱོགས་མཚམས་ཕུར་བུས་བཏབ་ནས་ནི། །བསྲུང་དང་མཚམས་ཀྱི་ལས་མཛོད་ཅིག །གརྫ། ཧ་ན། ད་ཧ། པ་ཙ། བནྡྷ། ཧུ་ལུ། ཏིཥྛ། ཚིནྡྷ། བྷིནྡྷ། སྥོ་ཊ་ཡ་ཧཱུཾ་ཕཊ། ༀ་སུམྦྷ་སོགས་ཀྱིས་གཟིར་མནན་བཅད་དོ། །བཤགས་པ་ནི། བླ་མ་རིག་འཛིན་རྒྱལ་བ་ཞི་ཁྲོའི་ལྷ་ཚོགས་མཁའ་ཁྱབ་ཏུ་སད་པའི་སྤྱན་སྔར། །དང་པོ་སྐྱེ་བ་ཐོག་མ་མེད་པ་ནས། །རྣམ་པར་སྨིན་པའི་ལུས་འདི་ཡན་ཆད་དུ། །མི་དགེའི་ལས་ཀྱིས་འགྲོ་བའི་རྒྱུ་བསགས་པ། །བྱང་ཞིང་དག་པར་བྱིན་གྱིས་བརླབ་ཏུ་གསོལ། །དམ་བཅའ་ནི། ༀ། ཀུན་ཏུ་བཟང་པོ་སོགས་ཤློ་ཀ་གཅིག །བྱིན་འབེབས་ནི། སྤོས་རོལ་དང་བཅས་པས། ཧཱུཾ། དུས་གསུམ་བདེ་གཤེགས་འཁོར་དང་བཅས། །རང་བཞིན་གནས་ནས་སྐུ་བསྐྱོད་དེ། །སྒྲུབ་པའི་གནས་མཆོག་འདིར་གཤེགས་ལ། །དབང་བསྐུར་བྱིན་ཕོབ་དངོས་གྲུབ་སྩོལ། །ཧཱུཾ་ཧཱུཾ་ཧཱུཾ་ཧཱུཾ། ཞེས་བདག་གནས་ཡོ་བྱད་ཐམས་ཅད་ལ་རྡོ་རྗེ་གསུམ་གྱི་བྱིན་དབབ། དེ་ནས་བདུད་རྩི་གཏོར་མ་རཀྟ་ཕྱི་མཆོད་དང་བཅས་པའི་བྱིན་རླབས་ཞི་ཁྲོ་ཐུང་བའི་ཐུན་མོང་གི་སྔོན་འགྲོར་སྔར་བཤད་པ་ལྟར་ལས། བདུད་རྩི་བྱིན་རླབས་སོང་མཚམས་ཚིག་དང་བསྟུན་ནས་བསང་གཏོར་བྱ་ཞིང་། ཧཱུཾ། བདུད་རྩི་རང་བྱུང་ཆེན་པོ་འདི། །ཡེ་ཤེས་ལྷ་ལ་གཏོར་བྱས་པས། །བདག་དང་གཉིས་སུ་མེད་པར་འགྲུབ། །དམ་ཅན་མཆེད་ལ་གཏོར་བྱས་པས། །ཐུགས་དམ་གཉན་པོ་སྐོངས་པར་འགྱུར། །རྣལ་འབྱོར་པ་ལ་གཏོར་བྱས་པས། །རྟོག་སྒྲིབ་བག་ཆགས་བྱང་བར་འགྱུར། །མི་མཐུན་ཕྱོགས་ལ་གཏོར་བྱས་པས། །དྲག་པོ་གཏུམ་པོ་ཚིག་པར་འགྱུར། །མཆོད་པའི་རྫས་ལ་གཏོར་བྱས་པས། །ཐམས་ཅད་བདུད་རྩི་ཉིད་དུ་འགྱུར། །ཞེས་སྦྱར་རོ། །གཉིས་པ་དངོས་གཞི་ལ་བཞི་སྟེ། བདུད་རྩི་འཇུ་འདུལ་གྱི། བདུད་རྩི་སྐྱིལ་བའི། དབང་དུ་བྱ་བའི། དངོས་གྲུབ་བླང་བའི་དགོངས་པའོ། །དང་པོ་ནི། ཧེ་རུ་ཀ་འདུས་པ་ལས། ཏ་ཀྲྀཏ་བརྒྱད་དང་ཧེ་རུ་ཀ །སུམ་བརྩེགས་འབར་བའི་དཀྱིལ་འཁོར་བསྐྱེད། །དབང་བསྐུར་བྱིན་རླབས་གཉིས་མེད་བསྟིམ། །མཆོད་བསྟོད་བདུད་རྩི་སྲུང་མ་སྦྲན། །རང་རང་བདུད་རྩིའི་བཟླས་པ་དག །རྩེ་གཅིག་ཏིང་འཛིན་བར་ཆད་མེད། །ཅེས་པའི་ལས་རིམ་ལྟར་ལས། དང་པོ་དམ་ཚིག་པ་བསྐྱེད་པ་ནི། བདག་མདུན་སྒྲུབ་རྫས་གསུམ་དབྱེར་མེད་དུ་བསྒོམ་པ་སྟེ། ཧཱུཾ། ཨེ་མ་ཀུན་ཏུ་བཟང་པོ་ནི། །རང་བྱུང་ཆོས་སྐུ་ཆེན་པོ་ལས། །བྷ་གར་ཇི་བཞིན་བཞག་པ་ན། །བྱང་ཆུབ་དེ་ཉིད་ལྟུང་གནས་མེད། །ཅེས་པས་དེ་ཏིང་། བྱང་ཆུབ་སེམས་ནི་ཀུན་ཏུ་དག །ཐིག་ལེ་ཆོས་སྐུས་ཁྱབ་པའི་ཕྱིར། །ཡེ་ནས་དབྱེར་མེད་བྱ་མི་དགོས། །དབྱིངས་སུ་གྱུར་ནས་མཉམ་གནས་པའོ། །ཞེས་ཀུན་སྣང་། རྒྱུ་ཡི་ཏིང་འཛིན་འབྲས་བུ་ལས། །དེ་ཉིད་བྱང་ཆུབ་སེམས་སུ་གྱུར། །འབྱུང་ལྔ་ཡུམ་གྱི་དཀྱིལ་འཁོར་དག །བྱང་ཆུབ་སེམས་ལས་རིམ་བཞིན་བསྐྱེད། །ཨ། ཞེས་རྒྱུ་ཏིང་ངོ་། །དབྱིངས་དང་ཡེ་ཤེས་གཉིས་མེད་རྩ་བ་བྱང་ཆུབ་སེམས་ཀྱི་དཀྱིལ་འཁོར་ཨའི་སྒྲར་སྣང་བ་ལས། ཨེ་ཡཾ་རཾ་ཀེཾ་བྷྲཱུཾ་ཞེས་པའི་སྒྲ་གདངས་ཀྱི་རྐྱེན་ལས་འབྱུང་ལྔའི་དཀྱིལ་འཁོར་ལ་བརྟེན་པའི་འབར་བའི་གཞལ་ཡས་ཁང་གདན་དང་བཅས་པ་བཀྲ་ལམ་གྱིས་སད་པར་བསམ་ལ། ཀུན་ཏུ་བཟང་མོ་ནམ་མཁའི་མཁའ་ཀློང་དུ། །དམ་ཚིག་སྒྲོལ་མ་རླུང་དཀྱིལ་རྒྱ་གྲམ་གཏམས། །མཱ་མ་ཀཱི་ནི་རཀྟའི་རྒྱ་མཚོར་འཁྲུག །སངས་རྒྱས་སྤྱན་མ་ཀེང་རུས་རི་རབ་སྟེ། །ན་བཟའ་དཀར་མོ་ཀུན་ཏུ་དྲོད་འབེབས་མ། །འབྱུང་ལྔ་ཡུམ་ལྔ་མཐའ་ཡས་ལྷུན་གྱིས་བརྟན། བྷྲཱུཾ་ལས་བསྐྱེད་པའི་གཞལ་ཡས་ཁང་། །ནམ་མཁའི་དབྱིངས་ན་མཉམ་པ་རུ། །ཚུལ་བཞིན་བྱིན་གྱིས་བརླབས་ནས་སུ། །གཞལ་ཡས་ཁང་ཆེན་གསལ་བར་འབར། །དེ་ལྟར་འདུས་པ་ཆེན་པོའི་འབར་བའི་དཀྱིལ་འཁོར་སྒོ་རིམ་དགུ་པའི་དབུས་གྲུ་ཆད་བཞི་གློ་འབུར་གྱིས་མཛེས་པའི་སྟེང་འཁོར་ལོ་རྩིབས་བརྒྱད་པའི་ལྟེ་བར་བདུད་རྩི་རང་བྱུང་གི་དཀྱིལ་འཁོར་ཡཾ་རཾ་ཨ་ལས་རླུང་མེ་ཐོད་པའི་སྣོད་ཡངས་ཤིང་རྒྱ་ཆེ་བར་པད་ཟླའི་གདན་ལ་བཅུད་ཤ་ལྔ་བདུད་རྩི་ལྔ་དེ་བཞིན་གཤེགས་པ་རིགས་ལྔ་ཡབ་ཡུམ་དུ་གྱུར་པ་རྗེས་ཆགས་ཀྱིས་མཉམ་པར་སྦྱོར་བས་བྱང་སེམས་ཡེ་ཤེས་ཀྱི་བདུད་རྩིར་ཞུ་ཞིང་འཁྱིལ་བ་ལ་དཔའ་བོ་འབྲུ་ལྡས་མཚན་པར་གྱུར། ༀ་ཧཱུཾ་སྭཱ་ཨཱཾ་ཧཱ། ཞེས་བརྗོད། འགྲོ་བ་འདུལ་བའི་དཀྱིལ་འཁོར་ནི། ཧཱུཾ་ཧཱུཾ་ཧཱུཾ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཧ་ལ་ཧ་ལ་ཧཱུཾ་ཕཊ། ཅེས་པའི་སྒྲ་གདངས་ཀྱི་རྐྱེན་ལས་ཁྲོ་བོའི་སྤྲིན་སྤྲོས་པས་གདུག་པ་ཅན་རྣམས་ཚར་བཅད། ཚུར་འདུས་པ་མཐར་བྱེད་བརྒྱད་དུ་གྱུར་ཏེ་བདུད་རྩིའི་དཀྱིལ་འཁོར་གྱི་ཕྱི་རོལ་རྩིབས་བརྒྱད་ལ་ཕྱོགས་སྐྱོང་གི་གདན་སྟེང་འཁོད་པར་གྱུར། དེའི་སྟེང་དུ་སྐུ་གདུང་འབར་བའི་དཀྱིལ་འཁོར་ནི། ༀ་བུདྡྷ་ཤྲཱི་ཧེ་རུ་ཀ་བུདྡྷ་ཀྲོ་དྷེ་ཤྭ་རཱི་ཧཱུཾ་ཕཊ། དེ་བཞིན་དུ་རཏྣ། པདྨ། ཀརྨ། ཞེས་པས་མཐར་བྱེད་བརྒྱད་ཀྱི་སྟེང་ཕྱོགས་བཞིར་རིགས་བཞིའི་ཧེ་རུ་ཀ་ཡབ་ཡུམ། ཁྲག་འཐུང་བཞིའི་སྟེང་དུ་ༀ་བཛྲ་ཤྲཱི་སོགས་ཞེས་པས། བཛྲ་ཧེ་རུ་ཀའི་ཞབས་བཞི་བགྲད་པས་རིགས་བཞིའི་ཁྲག་འཐུང་གི་དབུ་བརྫིས་པ། དེའི་སྟེང་དུ་མཁའ་མཉམ་ཀློང་གི་དཀྱིལ་འཁོར་ནི། མ་སཱུརྻ་མཎྜ་ལ། མུཾ། སྥ༴ སཾ༴ ཉིད་ཀྱིས་མུཾ་གྱིས་མཚན་པ་འཕྲོ་འདུས་ཡོངས་སུ་གྱུར་པ་ལས། ཨ་ཀྲ་མ་ཧཱ་ཀྲོ་དྷི་ཤྭ་རཱི་ཧཱུཾ་ཕཊ། ཅེས་པས་ཡུམ་གནམ་ཞལ་མ་དབུ་དགུ་ཕྱག་བཅོ་བརྒྱད་པ་ཞབས་བཞིས་བཛྲ་ཧེ་རུ་ཀའི་གཡས་གཡོན་གྱི་དབུ་གཉིས་བརྫིས་ཤིང་། རྩ་ཞལ་གྱི་དབུ་མའི་སྤྱན་བྷ་གར་ཕྱེད་ནུབ་ཙམ་དུ་ཆུད་པ། དེའི་སྟེང་དུ་འཆི་མེད་རྡོ་རྗེའི་དཀྱིལ་འཁོར་ནི། ཨ་ཙན་དྲ་མཎྜ་ལ། ཧཱུཾ། སྥ༴ སཾ༴ ཟླ་དཀྱིལ་ཧཱུཾ་གིས་མཚན་པ་ལས་འཕྲོ་འདུས། །ཨ་ཀྲ་མ་ཧཱ་ཤྲཱི་ཧྲེ་རུ་ཀ་ཧཱུཾ་ཕཊ། ཅེས་པས་ཆེ་མཆོག་ཧེ་རུ་ཀ་དབུ་ཉི་ཤུ་རྩ་གཅིག །ཕྱག་བཞི་བཅུ་རྩ་གཉིས་ཀྱིས་ཞི་བའི་ལྷ་ཚོགས་བསྣམས་པ། ཞབས་བརྒྱད་ཡུམ་གྱི་གཡས་ཞལ་གཡོན་བཞི་བཞི་དང་སྦྱོར་ཞིང་། གསང་བའི་རྡོ་རྗེ་ཡུམ་གྱི་རྩ་ཞལ་དང་སྦྱོར་བ། རྟ་མགྲིན་དབང་གི་དཀྱིལ་འཁོར་ནི་ཆེ་མཆོག་གི་དབུའི་རྩེར་རྟ་ཞལ་དམར་པོ་རྟ་སྐད་འཚེར་བ། དེ་ཐམས་ཅད་གདོད་ནས་རྣམ་པར་དག་པ་བདག་རང་བཞིན་གྱི་དཀྱིལ་འཁོར་དུ་རྫོགས་པའོ། །ཧ་ཧེ་ཕཊ་ཨ་ཛཿཧཱུཾ་བཾ་ཧོཿབྷྱོ་ཞེས་བརྗོད་པས་གནས་མ་བརྒྱད། ཡུལ་མ་བརྒྱད། སྒོ་སྐྱོང་གདོང་མོ་བཞི། སྤོར་མ་བརྒྱད། གསང་ཡུམ་བཞི། དབང་ཕྱུག་ཉེར་བརྒྱད་དེ་ཁྲག་འཐུང་རྩ་བའི་དཀྱིལ་འཁོར་དང་། གཞན་ཡང་མཁའ་འགྲོ་སོ་གཉིས། མ་མོ་བདུན། སྲིང་མོ་བཞི། ཀིང་བཅོ་བརྒྱད། ཕོ་ཉ་སུམ་བརྒྱ་དྲུག་ཅུ་སོགས་བཀའ་ཉན་གྱི་དཀྱིལ་འཁོར་དང་བཅས་པ་ཉི་མ་ལས་འོད་ཟེར་གྱི་ཚུལ་དུ་བཀྲ་ལམ་གྱིས་གསལ་བར་གྱུར། དབང་བསྐུར་བ་ནི། རིགས་ལྔའི་དབང་རྒྱ་སྤྱི་བོར་གཏུགས་ལ། ༀ་མ་ཧཱ་ཤཱུ་ནྱ་ཏཱ། ཨཱ་དཪྴ། ས་མ་ཏཱ། པྲ་ཏྱ་བེཀྵ་ཎ། ཀྲྀ་ཏྱ་ནུཥྛཱ་ན་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ ཧཾ། ཞེས་རིགས་ལྔ་ཡབ་ཡུམ་རྗེས་ཆགས་ཀྱིས་ཞུ་བའི་ཡེ་ཤེས་ལྔའི་ཆུ་རྒྱུན་གྱིས་དབང་བསྐུར་བས་དེ་བཞིན་གཤེགས་པ་རིགས་ལྔས་དབུ་བརྒྱན་པར་གྱུར། བྱིན་རླབས་ནི། རྡོ་རྗེ་རྒྱ་གནས་གསུམ་དུ་གཏུག་ཅིང་། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་ཝཱ་ཀ་ཙིཏྟ་ཏིཥྛ་བཛྲ་སྭ་བྷཱ་ཝ་ཨཱཏྨ་ཀོ ྅ ཧཾ། ཞེས་གནས་གསུམ་དུ་ༀ་ཨཱཿཧཱུཾ། འཕྲོ་འདུས་ཡོངས་སུ་གྱུར་པ་ལས་རྡོ་རྗེ་གསུམ་གྱི་ལྷས་རྒྱས་བཏབ་པར་བསམ་མོ། །དེ་ནས་ཞལ་བྱང་གིས་གསལ་གདབ་པ་ནི། ཨེ་མའོ་དཔལ་ཆེན་ཆེ་མཆོག་ཧེ་རུ་ཀ །ཞེས་པ་ནས། བྱིན་རླབས་མཆོག་དང་ལྡན་པར་མཛད་དུ་གསོལ། །ཞེས་པའི་བར་སྒྲུབ་ཁོག་ལྟར་བརྗོད་དོ། །དེ་ནས་ཡེ་ཤེས་ཀྱི་འཁོར་ལོ་སྤྱན་དྲངས་ཤིང་བསྟིམ་པ་ནི། རང་གི་སྙིང་གའི་ཧཱུཾ་ལས་འོད་ཟེར་འཕྲོས་པས་ཡེ་ཤེས་ཀྱི་འཁོར་ལོ་སད་པར་བསམ་ལ། བཛྲ་ས་མཱ་ཛཿརུ་ལུ་རུ་ལུ་ཧཱུཾ། ཞེས་པས་སྙན་གསན་དབབ་པ། ༀ། ཐུགས་རྗེའི་ལྕགས་ཀྱུ་སོགས་ཀྱི་མཐར། །ཛཿཧཱུཾ་བཾ་ཧོཿ ཨེ་ཧྱེ་ཧི། རུ་ལུ་རུ་ལུ་ཧཱུཾ་བྷྱོ་ཛཿ ཛཿས་སྤྱན་དྲངས། ཛཿཧཱུཾ་བཾ་ཧོཿ བཛྲ་ས་མ་ཡ་མུ་དྲ་ཨ། བཛྲ་ཤྲཱི་ཧེ་རུ་ཀ་ཏིཥྛ་ས་མ་ཡ་ལྷན། ཞེས་བསྟིམ་པས། དམ་ཚིག་གི་འཁོར་ལོ་དང་དབྱེར་མེད་དུ་བཞུགས་པར་གྱུར་པ་ལ། གཙོ་བོའི་ཐུགས་ཀ་ནས་སྤྲོས་པའི་ཧེ་རུ་ཀ་ཕྱག་གཉིས་པས་མཆོད་བསྟོད་བྱས་པར་མོས་ནས། ཨ་ལ་ལ་ཧོཿ ཨ་ཏི་པུ་ཧོཿ མ་ཧཱ་པུ་རུ་ཤ་ཧོཿ ཞེས་ཕྱག་བྱ། དེ་ནས་ཀུན་བཟང་། ཞབས་བསིལ། བཞི་བསྣོལ་གྱིས་མཆོད་ལ། བདུད་རྩི་འབུལ་བ་ནི། ཧཱུཾ། རང་བྱུང་གདོད་ནས་རྣམ་པར་དག །རྩ་བརྒྱད་སྟོང་ལས་སྦྱར་བའི་སྨན། །གཉིས་མེད་བདེ་ཆེན་ལས་བྱུང་བ། །བྱང་ཆུབ་སེམས་ནི་རྡོ་རྗེ་སྟེ། །ཟས་མཆོག་ཚེ་ཡི་དྲི་ཆེན་པོ། །ཤ་ཆེན་མཆོད་པ་རིན་པོ་ཆེ། །པདྨ་མེ་ཏོག་ཡང་དག་ལྡན། །རྡོ་རྗེ་ཆུ་སྟེ་བདུད་རྩི་མཆོག །ག་བུར་ཤེལ་གྱི་པོག་ཕོར་དྲི། །རིན་ཆེན་མེ་ལྟར་འབར་བའི་ཚོགས། །ཡོན་ཏན་འབུམ་ཕྲག་ཡངས་པའི་བཅུད། །རིགས་ལྔ་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་པའི་རྫས། །རྒྱུད་ལྔ་སེམས་ཅན་ཀུན་སྒྲོལ་བ། །དུག་ལྔ་སེལ་བའི་ཐབས་མཆོག་སྟེ། །ཐམས་ཅད་བདུད་རྩི་རྣལ་འབྱོར་ཆེ། །མ་ལུས་བསྡུས་པའི་ཐིག་ལེ་ཆེ། །སངས་རྒྱས་ཀུན་དང་མཉམ་སྦྱོར་བ། །གཅིག་ཏུ་དཔའ་བོའི་རོ་རྣམས་དང་། །གཉིས་སུ་མེད་པར་མཉམ་སྦྱར་ནས། །དུས་གསུམ་སངས་རྒྱས་ཐམས་ཅད་དང་། །རྒྱལ་བ་རྒྱ་མཚོ་ཐམས་ཅད་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེ་དགོངས་དབང་དང་དངོས་གྲུབ་སྩོལ། །ཡེ་སངས་རྒྱས་པའི་ཆེ་མཆོག་ཧེ་རུ་ཀ །སྐུ་དང་ཡེ་ཤེས་དཀྱིལ་འཁོར་ཉིད་ལ་རྫོགས། །རྣམ་དག་བདུད་རྩི་དམ་རྫས་མཉེས༴ ཐུགས་རྗེས་བརྩེར་དགོངས་དབང་དང་དངོས༴ སྒྱུ་འཕྲུལ་དཀྱིལ་འཁོར་ཡེ་ཤེས་རང་སྣང་བའི། །རྒྱལ་བ་སངས་རྒྱས་བཞི་བཅུ་རྩ་གཉིས་ལ། །རྣམ་དག་བདུད་རྩི་དམ་རྫས༴ ཐུགས་རྗེས་བརྩེར་དགོངས་དབང་དང་༴ འཇམ་དཔལ་གཞོན་ནུ་རྟ་མགྲིན་ཡབ་ཡུམ་དང་། །བདུད་རྩི་སྲིད་འཛིན་མངའ་བདག་ལྷ་ཚོགས་ལ། །རྣམ་དག་བདུད་རྩི༴ ཐུགས་རྗེས་བརྩེར་དགོངས༴ ཁྲོ་མོ་གནམ་ཞལ་ག་སིཾ་བཅུ་དྲུག་བཅས། །ཡུམ་ཆེན་མཁའ་མཉམ་ཀློང་གི་དཀྱིལ་འཁོར་ལ། །རྣམ་དག་བདུད་རྩི༴ ཐུགས་རྗེས་བརྩེར༴ ཚོགས་རྗེ་ཚོགས་བདག་དཔལ་ཆེན་ཧེ་རུ་ཀ །སྐུ་གདུང་འབར་བའི་དཀྱིལ་འཁོར་ཡབ་ཡུམ་ལ། །རྣམ་དག་བདུད་རྩི༴ ཐུགས་རྗེས་བརྩེར༴ གནས་ཡུལ་སྒོ་སྐྱོང་སྤོར་མ་གསང་ཡུམ་བཞི། །དབང་ཕྱུག་མཁའ་འགྲོ་མ་སྲིང་གིང་ཕོ་ཉར། །རྣམ་དག་བདུད་རྩི༴ ཐུགས་རྗེས་བརྩེར༴ བསྲུང་དང་བསྐྲད་དང་མཚམས་ཀྱི་ལས་མཛད་པ། །རང་བྱུང་བདུད་འདུལ་ཁྲོ་བོ་བཅུ་རྣམས་ལ། །རྣམ་དག་བདུད་རྩི་དམ་རྫས་མཉེས་མཆོད་འབུལ། །ཐུགས་རྗེས་བརྩེར་དགོངས་དབང་དང་དངོས་གྲུབ་སྩོལ། །སློབ་དཔོན་མཆེད་ལྕམ་རིགས་དྲུག་ཕ་མ་སོགས། །འཁོར་འདས་བྱང་ཆུབ་སེམས་ཀྱི་དཀྱིལ་འཁོར་ལ། །རྣམ་དག་བདུད༴ ཐུགས་རྗེ་བརྩེ་དགོངས༴ ཞེས་ཕུལ་ལ་དངོས་གྲུབ་བླང་བ་ནི། ཐུགས་ཀྱི་དངོས་གྲུབ་དམ་པ་ནི། །དངོས་པོ་མེད་ལས་དངོས་གྲུབ་བླང་། །བྱང་ཆུབ་སེམས་ཀྱི་སྤྲིན་ཆེན་ལས། །ཇི་ལྟར་དམིགས་པ་བཞིན་དུ་འགྲུབ། །ཨ་ཧོ་སུ་ཁ་དྷརྨ་ཀཱ་ཡ་ༀ་ཨཱཿཧཱུཾ་སིདྡྷི་ཧྲཱིཿ ཞེས་ལན་གསུམ་མྱང་ངོ་། །ཨི་དཾ་པུཥྤེ་དྷཱུ་པེ་བ་ལིཾ་པྲ་ཏཱི་ཙྪ་ཧོས་གཏོར་མ་ཕུལ། ཡེ་ནས་རྒྱུ་ཉིད་དག་པ་ལ། ང་དང་བདག་ཏུ་རྟོག་པ་ཡིས། ཁམས་གསུམ་འཁོར་བའི་རྒྱུ་རུ་འགྱུར། ཁམས་གསུམ་ཐམས་ཅད་བསྒྲལ་བའི་ཞིང་། ཨ་ཙ་ལ་ས་མ་ཡ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པས་ཞེ་སྡང་བསྒྲལ་མཆོད་དང་། ལུས་ཀུན་ཡོངས་སུ་འཁྱུད་པ་ཡིས། །རྡོ་རྗེ་པདྨར་ལྡན་བྱས་པས། །རང་བྱུང་རྣམས་ཀྱི་བདེ་མཆོག་སེམས། །ཕུལ་བས་མྱུར་དུ་གྲུབ་པ་ཡིན། །རཱ་ག་པཱུ་ཛ་ཧོཿ ཞེས་པས་འདོད་ཆགས་སྦྱོར་མཆོད་དང་། །རྒྱུད་དྲུག་འཁོར་བ་སྟོང་པར་བསྒྲལ་སླད་དུ། །དུག་གསུམ་རྩད་བཅད་ཤ་ཁྲག་རུས་པའི་ཚོགས། །གཟུང་འཛིན་རྣམ་རྟོག་ཀུན་དང་བྲལ་བ་ཡི། །མཉམ་པ་ཆེན་པོའི་མཆོད་པ་བཞེས་སུ་གསོལ། །མ་ཧཱ་མཱཾ་ས་ཁཱ་ཧི། མ་ཧཱ་རཀྟ་ཁཱ་ཱཧི། མ་ཧཱ་ཀེཾ་ནི་རི་ཏི་ཁཱ་ཧི། ཞེས་པས་དུག་གསུམ་རོ་མཉམ་དང་། ལྷ་མོ་རོལ་མོ་བྲོ་གར་གླུ་ཡི་ཚིག །མཛེས་ལྡན་སྒྱུ་མའི་གར་དང་ཚངས་པའི་དབྱངས། །རྒྱལ་བའི་དཀྱིལ་འཁོར་རྣམས་ལ་འབུལ་ལགས་ན། །ཀུན་ཏུ་བཟང་པོའི་མཆོད་པར་བཞེས་སུ་གསོལ། །མ་ཧཱ་པཱུ་ཛ་ཧོཿ ཞེས་གླུ་གར་རོལ་མོ་ཡེ་ཤེས་ཀྱིས་མཆོད་དོ། །དེ་ནས་བསྟོད་པ་ནི། ཧཱུཾ། ཆོས་ཉིད་མཉམ་པའི་ངང་ལས་མ་གཡོས་ཀྱང་། །སྐུ་དང་ཡེ་ཤེས་དཀྱིལ་འཁོར་རང་སྣང་བ། །སྣང་སྲིད་ཐམས་ཅད་ཡབ་ཡུམ་སྐུ་ལ་རྫོགས། །ཆེ་མཆོག་ཡབ་ཡུམ་གཉིས་ལ་ཕྱག་འཚལ་བསྟོད། །དུས་གསུམ་སངས་རྒྱས་ཐམས་ཅད་འདུས་པའི་སྐུ། །ཁམས་གསུམ་སེམས་ཅན་ཐམས་ཅད་འདྲེན་པའི་དཔལ། །འགྲོ་དྲུག་སེམས་ཅན་ཀུན་གྱི་སྒྲིབ་སྦྱོར་བ། །བདུད་རྩི་རྒྱལ་པོ་ཁྱོད་ལ་ཕྱག་འཚལ་བསྟོད། །དུག་ལྔ་འབར་བ་སྐུ་ལྔར་སྦྱོར། །ལེན་པ་མེད་ཅིང་གཏོང་བ་མེད། །རིགས་ལྔ་དཔལ་ཆེན་ཡབ་ཡུམ་བཅུ། །སྐུ་གདུང་འབར་བ་ཁྱོད་ཕྱག་འཚལ། །ཆུ་ཟླ་ལྟ་བུར་རྟོག་བྲལ་ཞིང་། །ཐམས་ཅད་རྟོག་པ་ཡོངས་ཀྱིས་སྤོངས། །གནས་ཡུལ་སྒོ་དབང་འབར་མ་ཡུམ། །བདུད་རྩི་སྦྱོར་ལ་ཕྱག་འཚལ་བསྟོད། །བདག་ཏུ་འཛིན་མེད་རྣམ་པར་དག །བདུད་དང་ངན་སོང་གསུམ་ལས་ཐར། །མཁའ་འགྲོ་མ་སྲིང་ཀིང་ཕོ་ཉ། །བདུད་ཀྱི་བདུད་ལ་ཕྱག་འཚལ་བསྟོད། །ཅེས་བསྟོད་ལ་གསོལ་བ་གདབ་པ་ནི། ཧོཿ སྤྲོས་པ་མེད་པའི་དབྱིངས། རྣམ་པར་དག་པའི་ངང་། ཡེ་ནས་ལྷུན་གྱིས་གྲུབ་པ་རང་བྱུང་རང་སྣང་གི་དཀྱིལ་འཁོར་ཆེན་པོ། བཅོམ་ལྡན་འདས་ཁྲོ་བོ་ཐམས་ཅད་ཀྱི་ཆེ་བའི་མཆོག །དཔལ་ཆེན་པོ་ཆེ་མཆོག་ཧེ་རུ་ཀ་དང་། ཁྲོ་མོ་གནམ་ཞལ་མ། སྐུ་གདུང་འབར་བའི་དཀྱིལ་འཁོར་ལ་སོགས་པ་རྣམས་དང་། ཡབ་ཡུམ་ཐབས་དང་ཤེས་རབ་གཉིས་སུ་མེད་པ་ལས་སྤྲུལ་པའི་སྐུ་ཕྱག་ན་བཞུགས་པའི་སངས་རྒྱས་བཞི་བཅུ་རྩ་གཉིས། དཀྱིལ་འཁོར་གྱི་ལྷ་མོ་གནས་ཡུལ་སྒོ་སྐྱོང་ཉི་ཤུ། དབང་མོ་ཀིང་སོགས་ཡེ་ཤེས་དང་ལས་ལས་གྲུབ་པ་བསམ་གྱིས་མི་ཁྱབ་པའི་ཚོགས་དང་བཅས་པ་རྣམས་མཁྱེན་པ་དང་བྱིན་རླབས་དམ་པ་མཛད་དུ་གསོལ། ཧོཿ རྣལ་འབྱོར་གི་མཆོད་པ་ལོངས་སྤྱོད་རྫོགས་པའི་ཚུལ་དུ་སྦྱར་བ་ཆོས་ཉིད་ལ་ཆོས་ཉིད་འབྱུང་བ་འཕགས་པ་ཀུན་ཏུ་བཟང་པོའི་མཆོད་སྤྲིན་བསམ་གྱིས་མི་ཁྱབ་པར་སྤྲུལ་ནས་བདག་ཉིད་ཆེན་པོ་འཁོར་དང་བཅས་པ་ལ་དབང་མི་འཚལ་བའི་སླད་དུ་ཕུད་དང་གཙང་མར་སྤགས་ཏེ་ཕུལ་བས། ཡེ་ཤེས་ལ་ཡེ་ཤེས་རོལ། ཆོས་ཉིད་ལ་ཆོས་ཉིད་རོལ་བའི་ཚུལ་གྱིས་བཞེས་ཤིང་ལོངས་སྤྱད་དུ་གསོལ། ཞེས་བརྗོད་ནས། ཡེ་ནས་གཉིས་མེད་ཀྱི་བཤངས་པའང་བྱའོ། །དེ་ཡན་ཆད་ཀྱིས་སྤྱིའི་དཀྱིལ་འཁོར་གསུམ་དབྱེར་མེད་དུ་བསྒྲུབས་ནས། ད་ཐ་དད་དུ་སྒྲུབ་པའི་ཕྱིར། ཕཊ་ཛཿ ཞེས་བརྗོད་པས་བདག་རང་བཞིན་གྱི་དཀྱིལ་འཁོར་ལས། མདུན་བསྐྱེད་བདུད་རྩི་རང་བྱུང་དང་ཆེ་མཆོག་རྩ་བའི་དཀྱིལ་འཁོར་ལྔ་སྟེ་དཀྱིལ་འཁོར་དྲུག་ལྔན་གྱི་ངོ་བོར་རྟེན་དང་བརྟེན་པར་བཅས་པ་ལོགས་སུ་ཕྱེ་ནས་མདུན་གྱི་ནམ་མཁར་མེ་རི་འདབས་འབྱར་གྱི་ཚུལ་དུ་བཞུགས་པར་བསམ་མོ། །དེ་ནས་སྨན་སྲུང་སྦྲན་པ་ནི། དར་སྣས་གཡབ་ཅིང་སྤོས་རོལ་དང་བཅས་པས། ཧཱུཾ། རྩི་དང་སྨན་གྱི་བདག་པོ་དང་། །རྟགས་ལྡན་རིག་འཛིན་བྲན་མོ་དག །རོལ་མོ་ཆ་བྱད་མང་པོས་འབོད། །འདིར་གཤེགས་བཅུད་ལེན་དངོས་གྲུབ་སྩོལ། །ཞེས་སྤྱན་དྲངས་པས་སྨན་གྱི་ཕོ་བྲང་སྟེང་གི་ནམ་མཁར་སྤྲིན་འཐིབས་པ་ལྟར་བྱོན་ནས་བཞུགས་པར་མོས་ལ། རྟོག་བསལ་ནི། བྱིན་གྱིས་བརླབས་པའི་བདུད་རྩི་འཐོར་ཞིང་། ཧཱུཾ། ཚངས་དང་དྲང་སྲོང་གཙང་མ་ཟ། །ལྷ་ཀླུ་བྲམ་ཟེའང་གཙང་མ་ཟ། །དེ་དག་གྲོལ་བར་ངས་མ་བཤད། །བདུད་རྩི་དག་པ་ཡེ་ཤེས་ལྔ། །རིགས་ལྔ་སྐུ་ལྔ་ལྷུན་གྲུབ་ཡིན། །གཉིས་མེད་རྟོགས་པའི་ཐབས་མཁས་ཀྱིས། །གཙང་རྨེ་མེད་པར་ཀུན་སྤྱོད་ན། །དེ་དག་གྲོལ་བར་ངས་བཤད་དོ། །ཅེས་པས་གཙང་རྨེའི་གཉིས་འཛིན་དག་ནས་སྨན་སྲུང་རྣམས་དངོས་གྲུབ་སྩོལ་བར་དགྱེས་བཞིན་དུ་བཞུགས་པར་གྱུར། དེ་ནས་ལྷ་འཛབ་ནི། ༀ། རྫོགས་པའི་ཡེ་ཤེས་རྨད་པོ་ཆེ། །ཟླ་གམ་དཀྱིལ་འཁོར་རིན་ཆེན་དབང་། །ཤར་གྱི་ཕྱོགས་སུ་ཁ་བལྟས་ནས། །འདས་པའི་བུདྡྷ་སྤྱན་ཡང་འདྲེན། །མཆོད་ཁང་ཡིད་བཞིན་རིན་པོ་ཆེ། །རུ་ལུ་འབྲུ་བརྒྱད་ཡེ་ཤེས་ཕྲེང་། །ཕར་འཕྲོས་པས་ནི་ཐུགས་དམ་བསྐུལ། །སླར་འདུས་པས་ནི་དངོས་གྲུབ་སྩོལ། །འདི་ཡང་བསྣེན་པའི་མཆོག་ཡིན་ཏེ། །ནམ་ཡང་ཉམས་པའི་དུས་མཐའ་མེད། །དུས་གསུམ་དབྱིངས་སུ་སྦྱོང་བར་མཛོད། །ཅེས་བསྐུལ་ནས་བདག་མདུན་སེམས་དཔའ་སུམ་བརྩེགས་ཀྱི་ཐུགས་སྲོག་སྔགས་ཕྲེང་དང་བཅས་པ་ལས་འོད་ཟེར་འཕྲོ་འདུའི་དམིགས་པ་སྦྱར་ཏེ། རུ་ལུའི་བཟླས་པ་བརྒྱ་རྩས་ཉུང་མཐའ་བྱས་པ་བཟླ། དེ་ནས་སྨན་འཛབ་ནི། རང་གི་ཐུགས་ཀ་ནས་འོད་ཟེར་སྤྲོས་པ་མདུན་གྱི་བདུད་རྩིའི་ཕོ་བྲང་ལ་ཕོག་པས་སྨན་ཁོལ་བའི་ཟེར་རླངས་ལས་དཔའ་བོ་འབྲུ་ལྔའི་འོད་ཟེར་འཕྲོས་པ་འགྲོ་འདུལ་ནས་རྟ་མགྲིན་དབང་གི་དཀྱིལ་འཁོར་གྱི་བར་རིམ་པར་བརྒྱུད་དེ་མཆོད་ཅིང་ཐུགས་དམ་བསྐུལ་བས། དེ་དག་ལས་ཡེ་ཤེས་ཀྱི་འོད་ཟེར་བདུད་རྩིའི་ཆུ་རྒྱུན་རིམ་པར་བབས་པ་འགྲོ་འདུལ་གྱི་དཀྱིལ་འཁོར་ལས་དཀྱིལ་འཁོར་གྱི་ལྷ་ཚོགས་རྣམས་ལ་འཕྲོས། དེ་ལས་འོད་ཟེར་མཁའ་ཁྱབ་ཏུ་སྤྲོས་པས་སེམས་ཅན་གྱི་དོན་བྱས། འཕགས་པ་རྣམས་མཆོད། རྡོ་རྗེ་གསུམ་གྱི་བྱིན་རླབས་སོགས་འཁོར་འདས་ཀྱི་དྭངས་མའི་བཅུད་ཐམས་ཅད་བསྡུས་ནས་བདག་རང་བཞིན་གྱི་དཀྱིལ་འཁོར་ལ་ཐིམ། དེ་ཡང་གུ་ཧྱ་ལག་གི་ཕྱག་རྒྱ་རྟ་མགྲིན་ཡབ་ཡུམ་ལ་ཐིམ་པས་དེ་གཉིས་རོལ་པའི་བྱང་སེམས་དང་འདྲེས་པ་གཟུངས་ཐག་རྡོ་རྗེའི་ཁོང་སང་ནས་ཕྱུང་སྟེ་བདུད་རྩིའི་ཕོ་བྲང་ལ་ཐིམ་པས་སྨན་ཉིད་ཡེ་ཤེས་ཀྱི་བདུད་རྩིའི་རང་བཞིན་དུ་མུ་ཏིག་དཀར་བོ་དྲི་མ་མེད་པ་ལྟར་གྱུར་པར་མོས་ལ། གཡོན་པའི་མཐེབ་སྲིན་གྱིས་གཟུངས་ཐག་ལ་འཇུས་ཏེ། ༀ་ཨཱཿཧཱུཾ་སརྦ་པཉྩ་ཨ་མྲྀ་ཏ་ཧཱུཾ་ཧྲཱིཿཋཱ། ཞེས་དགུ་པའི་སྔགས་སུ་གྲགས་པ་སྟེ། ཧེ་རུ་ཀ་འདུས་པར། དགུ་པའི་ཕྱག་རྒྱས་མནན་ཅིང་བཟླ། ཞེས་པས་རྟགས་མ་མཐོང་བར་ཐུན་ཐམས་ཅད་ལ་སྔགས་དང་ཏིང་འཛིན་འདི་ཁོ་ན་བྱ་སྟེ། སྒྲུབ་ཁོག་ཏུ་བྲིས་པའི་སྔགས་དང་ཏིང་འཛིན་ནི་མདོའི་བདུད་རྩི་སྒྲུབ་པའི་ཆོ་ག་ཐུན་མོང་བ་ཙམ་ལ་བརྟེན་པའོ། །དེ་ཡང་སྔགས་སྟོང་ཕྲག་རེའི་མཚམས་སུ་ཚོགས་བྱ་བར་བཤད་ཀྱང་འགྲུབ་དཀའ་བས་ཐུན་རྗེས་མའི་མཐར་ལན་རེ་དང་། ཐུན་ཐམས་ཅད་ལ་སྟོང་སྟོང་གི་མཚམས་སུ་སྔགས་མཆོད་རེ་བྱ་ཞིང་། བསྙེན་གྲོགས་ཡོད་བཟླས་པ་གསུང་མི་ཆག་ཏུ་བཟླའོ། །གཞན་ཡང་དུས་གནད་དང་སྦྱར་བའི་ཉུལ་ལེ་བསལ་བ་དང་བྱིན་དབབ་པའང་སྒྲུབ་ཁོག་ཏུ་བཤད་པ་ལྟར་རོ། །ཐུན་བསྡུ་བ་ནི། མདུན་བསྐྱེད་ཀྱི་གཞལ་ཡས་ཁང་འཁོར་ལ། འཁོར་རྣམས་རིམ་བཞིན་སྙིང་པོའི་དཀྱིལ་འཁོར་ལ། དེ་ཉིད་རྟ་མགྲིན་དབང་གི་དཀྱིལ་འཁོར་ནས་འགྲོ་འདུལ་ཁྲོ་བོའི་དཀྱིལ་འཁོར་གྱི་བར་འོད་དུ་ཞུ་ནས་བདུད་རྩི་ལ་ཐིམ་པར་བསྒོམ་མོ། །བདག་རང་བཞིན་དཀྱིལ་འཁོར་འོད་གསལ་དུ་བསྡུ་ཞིང་ལྔང་བ་སྒྲུབ་ཐབས་ལྟར་རོ། །གཉིས་པ་བདུད་རྩི་སྐྱིལ་བའི་དགོངས་པ་ནི། ཧེ་རུ་ཀ་འདུས་པར། འོད་དང་དུ་བ་སྒྲ་དང་དྲིལ། །ལྷ་མོས་ལུང་བསྟན་བྱུང་བ་དང་། མང་དུ་འཕེལ་ན་གྲུབ་རྟགས་ཡིན། ཞེས་པ་ལྟར་རྟགས་ཅི་རིགས་བྱུང་བ་དང་། སྣོད་བྷཉྫའི་གཞལ་ཡས་ཁང་དུ་བཅུད་བདུད་རྩི་རྒྱ་མཚོར་སྐྱིལ་བ་ལ་སྨན་སྲུང་རྣམས་ཀྱིས་ཀྱང་མཚོ་ལ་སྦྲང་ཆར་བབས་པ་བཞིན་དུ་ཕོབ་པས་དངོས་གྲུབ་གསོས་བཏབ་པར་མོས་ལ། ༀ་ཨཱཿཧཱུཾ་སརྦ་པཉྩ་ཨ་མྲྀ་ཏ་ཀུཎྜ་ལཱི་ཧཱུཾ་ཧྲིཿཋཱ། ཞེས་བཟླ་ཞིང་སྐྱིལ་ནས། སྨན་སྲུང་རྣམས་ཀྱང་བསྐུལ་ཞིང་། ༀ་ཨཱཿཧཱུཾ་སརྦ་པཉྩ་ཨ་མྲྀ་ཏ་མེ་པྲ་བེ་ཤ་ཡ་པྲ་བེ་ཤ་ཡ་ཧཱུཾ་ཧྲཱིཿ་ཋཱ། ཞེས་བཟླ་ཞིང་དབབ་པའི་ཕྱག་རྒྱས་སྨན་ལ་གཏུག་གོ། །གསུམ་པ་དབང་དུ་བྱ་བའི་དགོངས་པ་ནི། རྟགས་བརྟན་ནས་དངོས་གྲུབ་བླང་རན་པ་དང་བྱ་སྟེ། སྨན་གྱི་ཕོ་བྲང་ནང་དུ་རྟ་མགྲིན་ཡབ་ཡུམ་གསལ་བའི་བྱང་སེམས་སྨན་དང་འདྲེས་ནས་གཟུངས་ཐག་ཁོང་སེང་གི་ལམ་བརྒྱུད་དེ་བྱུང་བ་བདག་ལ་ཐིམ་པར་བསམ་ཞིང་། ༀ་ཨཱཿཧཱུཾ་སརྦ་པཉྩ་ཨ་མྲྀྀ་ཏ་ཧ་ཡ་གྲཱི་ཝ་ཧུ་ལུ་ཧུ་ལུ་བནྡྷ་བནྡྷ་ཧཱུཾ་ཧྲཱིཿ ཋཱ། ཞེས་བཟླས་པས་དངོས་གྲུབ་གཞན་གྱིས་མི་འཕྲོག་པར་བདག་གིས་ཐོབ་པར་བསམ་མོ། །བཞི་པ་དངོས་གྲུབ་བླང་བ་ནི། མཚམས་བཤགས་དམ་བཅའ་བྱིན་དབབ་རྣམས་སྔོན་དུ་འགྲོ་བས་དངོས་གྲུབ་བསྐུལ་བའི་འཛབ་ནི། ལྷ་ཚོགས་རྣམས་ཀྱི་གནས་ལྔ་ནས་རྡོ་རྗེའི་ལྔའི་དངོས་གྲུབ་ཐམས་ཅད་འཆི་མེད་བདུད་རྩིའི་རྣམ་པར་བྱུང་བ་རང་ལ་ཐིམ་པར་བསམ་ལ། ༀ་ཨཱཿཧཱུཾ་སརྦ་པཉྩ་ཨ་མྲྀ་ཏ་མཉྫུ་ཤྲཱི་བྱ་བ་ལོ་ཀི་ཏེ་ཧཱུཾ་ཧྲཱིཿ་ཋཱ། ཞེས་བཟླ། དེ་ནས་གཡོན་པའི་མཐེབ་སྲིན་རྩེ་སྤྲད་པས་བདུད་རྩིའི་སྟེང་ནས་མནན་ཏེ། ཨ་ཧོ་སུ་ཁ་དྷརྨ་ཀཱ་ཡ་ནི་ཨ་མྲྀ་ཏ་སིདྡྷི་ཧཱུཾ་ཧྲཱིཿ ཋཱ། ཞེས་བཟླས་ནས། སྒྲུབ་ཁོག་ཏུ་གནད་ནས་བསྐུལ་བའི་ཚིག །ཧཱུཾ། ནམ་མཁའི་མཐའ་ཀླས་ཆོས་ཀྱི་དབྱིངས་ཀྱིས་ཁྱབ། །ཅེས་པ་ནས། བདག་གི་ལས་འབྲས་མཆིས་པར་མཛོད། །ཅེས་པའི་བར་གྱིས་བསྐུལ་རྗེས་མེ་ཏོག་དོར་ནས་སྨན་གྱི་དངོས་གྲུབ་བླང་ཞིང་དབང་ནོད་པ་གོ་ཆུ་རུབ་ཏུ་བྱ་བའང་སྒྲུབ་ཁོག་བཞིན་དུ་སྟེ། རྒྱས་པ་ལ་མོས་ན་གསང་ཆེན་མྱུར་ལམ་ལྟར་སྦྱར་རོ། །གསུམ་པ་རྗེས་ཀྱི་རིམ་པ་ནི། རྒྱ་འགྲོལ་བ་དང་། བདུད་རྩིས་ལྷ་མཆོད་པ་དང་། བདུད་རྩི་བགོ་བ་སོགས་བདུད་རྩི་རང་གི་རྗེས་ཆོག་ཐུན་མོང་མ་ཡིན་པ་རྣམས་ནི་གསང་ཆེན་མྱུར་ལམ་ལྟར་ཤེས་པར་བྱ་ཞིང་། ཉིན་རེ་བཞིན་ཐུན་གྱི་མཐའ་རྣམས་སུ་བྱ་བའི་ལས་ཀྱི་མདེའུ་ཚོགས་གཏོར་དང་། དཀྱིལ་འཁོར་བསྡུ་བ། གོ་བགོ་ལུས་བསྲུང་བསྔོ་ཤིས་རྣམས་ནི། ཤས་ཆེར་ལས་བྱང་ཡིག་རྙིང་དུའང་འབྱུང་མོད་ཀྱི། འོན་ཀྱང་འདིར་ལག་ལེན་བདེ་ཕྱིར་སྒྲུབ་ཐབས་དངོས་གྲུབ་ཆར་འབེབས་ལྟར་བྱ་བ་ཡིན་ནོ། །མདོའི་སྒྲུབ་ཁོག་གི་སྨན་སྒྲུབ་ལས་འཕྲོས་བའི་ཟུར་འདེབས་ལེ་ཚན་ནོ།། །།

༈ ༀ་སྭ་སྟི། མི་འགྱུར་ལྷན་སྐྱེས་ཕྱག་རྒྱས་འཁོར་འདས་ཆོས། །གཉིས་མེད་ཡེ་ཤེས་རྡོ་རྗེར་བྱིན་བརླབས་ནས། །འགྲོ་ཀུན་ཕན་བདེར་མཛད་པོ་བླ་མ་ལ། །ཕྱག་བྱས་ཕྱི་ནང་དཀྱིལ་འཁོར་རབ་གནས་བཤད། །འདི་ལ་གཉིས་ཏེ། ཕྱི་མདོ་དང་ཐུན་མོང་བའི་རབ་གནས་དང་། ནང་ཐུན་མིན་གསང་སྔགས་བླ་མེད་ཀྱི་རབ་གནས་སོ། །དང་པོ་ནི། ཕྱག་བཞེས་སུ་འདུས་པ་མདོའི་ཡན་ལག་གི་དཀྱིལ་འཁོར་ཡོ་ག་མན་ཆད་ལ་རྟེན་འབྲེལ་གྱི་ཆོ་གས་རབ་གནས་མཛད་དོ། །དེའི་ལས་རིམ་ལ། སྦྱོར་དངོས་རྗེས་གསུམ་ལས། སྦྱོར་བའི་ཆོས་ནི། ཉེ་འཁོར་གྱི་ས་གཞི་སྐྱང་ནུལ་དང་ཕྱགས་དར་གྱིས་དག་པར་བྱས་ལ་བའི་རྣམ་ལྔས་བྱུག །རྟེན་གྱི་མདུན་དུ་སྟེགས་བུ་གྲུ་བཞི་པ་ཁྲུ་གང་ལས་མི་ཆུང་པ་ལ་རྟེན་འབྲེལ་སྙིང་པོ་ལན་བདུན་བཟླས་པའི་ཙནྡན་གྱི་ཆུས་ཆག་ཆག་བཏབ་པའི་ཁར་དཀྱིལ་འཁོར་པདྨ་འདབ་བརྒྱད་བྲི། དེའི་དབུས་སུ་མཉྫིའི་ཁར་བུམ་པ་ཚད་ལྡན་དར་གྱི་མགུལ་ཆིངས་དང་འཁོར་ལོའི་མཚན་མ་ཅན་བཤུག་པ་སོགས་བཀྲ་ཤིས་པའི་ཤིང་གིས་ཁ་བརྒྱན་པའི་ནང་དུ་རིན་ཆེན་འབྲུ་སྨན་དྲི་སྟེ་ལྔ་ཚན་བཞིའི་རྫས་དང་ཆུ་གཙང་མས་བཀང་བ་བཀོད། བུམ་པའི་ཁར་གསེར་དངུལ་ལམ་མཁར་བའི་མེ་ལོང་ལ་ཙན་དན་དཀར་པོའི་ཆུས་རྟེན་འབྲེལ་སྙིང་པོ་ཚར་བདུན་བྲིས་པ་བཞག །ཡོན་ཆབ་སྔོན་དུ་འགྲོ་བའི་ཉེར་སྤྱོད་ལྔའི་མཆོད་རྫས་ཅི་འབྱོར་དང་། ཁྲུས་སྡེར་མེ་ལོང་ཁྲུས་རས་གོས་ཟུང་མེ་ཏོག་སོགས་ཡོ་བྱད་ཐམས་ཅད་ཚོགས་པར་བྱས་ལ། ཁྲུས་དང་དཀོན་མཆོག་ལ་ཕྱག་བྱས་ནས་སྟན་བདེ་བ་ལ་འདུག་སྟེ། བདག་གི་རྣལ་འབྱོར་ནི། ལྷ་མི་དང་ཉན་རང་བྱང་སེམས་བཞི་ལ་ཐེག་པ་ཆེན་པོའི་གསོ་སྦྱོང་དང་སེམས་བསྐྱེད་ཀྱི་སྡོམ་པ་བླང་། ཆ་གསུམ་སྒོ་འབྱེད་ཀྲི་ཡོག་བཞི་ལ་རང་རང་གི་ལྷའི་རྣལ་འབྱོར་བཟླས་པའི་བར་བྱ་བའམ། ཡང་ན་དེ་ཐམས་ཅད་ལ་རང་གི་ལྷག་པའི་ལྷ་གང་ཡང་རུང་བ་བསྒོམས་ལ་བཟླས་པ་ཅུང་ཟད་ཅིག་བྱའོ། །དེ་ནས་འབྱུང་གཏོར། ༀ་ཨཱཿཧཱུཾ་གིས་འདོད་ཡོན་བདུད་རྩིའི་རྒྱ་མཚོར་བརླབས་ནས། ༀ་སརྦ་བིགྷྣན་ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་སོགས་ཀྱིས་བསྔོས་ལ། དེང་འདིར་རྟེན་རབ་ཏུ་གནས་པར་བྱེད་པ་ལ་བར་དུ་གཅོད་པའི་གདོན་བགེགས་ཐམས་ཅད་གཏོར་མ་འདིས་ཚིམ་པར་གྱིས་ལ་འདིར་མ་གནས་པར་གཞན་དུ་དེངས་ཤིག །ༀ་ཨཱཿབིགྷྣཱནྟ་ཀྲྀཏ་ཧཱུཾ་ཕཊ། ཅེས་པས་བགེགས་བསྐྲད་ནས། མཆོད་རྫས་རྣམས་རྟེན་སྙིང་དང་། སྭ་བྷཱ་ཝས་བསང་སྦྱངས། སྟོང་པའི་ངང་ལས་གནས་ཁང་མཆོད་རྫས་དང་བཅས་པ་ཐམས་ཅད་དག་ཅིང་བཟང་བ་ཕུན་སུམ་ཚོགས་པར་བསམ་ལ། རྟེན་འབྲེལ་སྙིང་པོ་བརྗོད་པས་བྱིན་གྱིས་བརླབ་བོ། །གཉིས་པ་དངོས་གཞི་ནི། ཐོག་མར་བུམ་སྒྲུབ་བྱ་སྟེ། མེ་ལོང་ལ་བྲིས་པའི་རྟེན་སྙིང་ཚར་བདུན་པོ་རེ་རེ་ལའང་ཚར་བདུན་བདུན་ཏེ་བཞི་བཅུ་རྩ་དགུ་བཟླས་ལ་ཙནྡན་གྱི་ཆུས་སྔགས་ཀྱི་ཡི་གེ་བཀྲུས་པ་བུམ་པར་བླུག་ནས་བུམ་པ་རྟེན་སྙིང་དང་སྭ་བྷཱ་ཝས་སྦྱངས། སྟོང་པའི་ངང་ལས་རིན་པོ་ཆེའི་བུམ་པ་མཚན་ཉིད་རྫོགས་པའི་སྟེང་དུ་ཟླ་བའི་དཀྱིལ་འཁོར་ལ་གནས་པའི་རྟེན་འབྲེལ་སྙིང་པོའི་སྔགས་ཕྲེང་དཀར་པོ་གཡོན་དུ་འཁོར་བ་ལས་འོད་དཀར་པོ་འཕྲོས་པས། འཇིག་རྟེན་གྱི་ཁམས་ཐམས་ཅད་ནས་ལྷའི་བདུད་རྩིའི་ཆུ་རྒྱུན་རྣམས་བསྡུས་ལ་ཟླ་དཀྱིལ་སྔགས་ཕྲེང་དང་བཅས་པ་ཞུ་བའི་ཆུ་དང་རོ་གཅིག་ཏུ་གྱུར་པས་བུམ་པ་གང་བར་བསྒོམས་ཏེ། ལག་གཡས་པས་བུམ་པར་བཀབ་ལ་རྟེན་འབྲེལ་སྙིང་པོ་བརྒྱ་རྩ་བརྒྱད་བཟླས་རྗེས། རྟེན་སྙིང་གི་སྔགས་མཐར། ཨརྒྷཾ། དྷཱུ་པེ། པུཥྤེ། ཨཱ་ལོ་ཀེ །གནྡྷེ། ནཻ་ཝཱི་དྱི། ཤཔྡ་པྲ་ཏཱི་ཙྪ་སྭཱ་ཧཱ། ཞེས་བཏགས་པས་བུམ་པ་ལ་མཆོད་པ་དབུལ་ལོ། །དེ་ནས་རྟེན་སྦྱང་ཞིང་བསྐྱེད་པ་ནི། མཆོད་རྟེན་གྱི་བུམ་པའི་ནང་དང་། གླེགས་བམ་གྱི་དབུ་ཤོག །སྐུ་རྟེན་གྱི་ཐུགས་ཀར་བསྒོམ་པ་ཡིན་པས། འདིར་གནས་བྱའི་དཀྱིལ་འཁོར་གྱི་ལྷའི་གཟུགས་བརྙན་རྣམས་ཀྱི་ཐུགས་ཀར་ཟླ་བའི་དཀྱིལ་འཁོར་ལ་རྟེན་འབྲེལ་སྙིང པོའི་སྔགས་ཕྲེང་དཀར་པོ་གཡོན་དུ་འཁོར་བ་ལས་འོད་ཟེར་དཀར་པོ་འཕྲོས་པས་འཇིག་རྟེན་གྱི་ཁམས་ཐམས་ཅད་སྣང་བར་བྱས། དེས་སངས་རྒྱས་དང་བྱང་ཆུབ་སེམས་དཔལ་ཐམས་ཅད་བསྐུལ་བས་གནས་བྱའི་རྟེན་སོ་སོའི་རྣམ་པར་བྱོན་ནས་རང་རང་ལ་ཐིམ་པར་བསམ་ལ། རྟེན་སྙིང་བཟླ། མཐར་གནས་བྱའི་རྟེན་ཐུགས་ཀའི་སྔགས་ཕྲེང་དང་བཅས་པ་རོ་གཅིག་ཏུ་གྱུར་ཏེ་མི་དམིགས་པ་ལས། ༀ་ཡེ་དྷ་རྨཱ༴ ཞེས་བརྗོད་པས་སླར་ཡང་སྒྱུ་མ་ཙམ་དུ་རྟེན་སོ་སོའི་རྣམ་པར་བཞེངས་པར་གྱུར། དེ་ནས་ཡེ་ཤེས་པ་སྤྱན་དྲང་ཞིང་བསྟིམ་པ་ནི། སྤོས་བཏུལ་ཞིང་རོལ་མོའི་སྒྲ་དང་བཅས་པས། ཧཱུཾ། རྟེན་ཅིང་འབྲེལ་བར་འབྱུང་བ་ཡི། །འདས་དང་མ་བྱོན་ད་ལྟར་གྱི། །རྒྱལ་བ་སྲས་བཅས་མ་ལུས་ཀུན། །རྟེན་ཅིང་འབྲེལ་བར་འབྱུང་བ་ཡི། །འགྲོ་བ་སེམས་ཅན་དོན་སླད་དུ། །ཐུགས་རྗེས་དགོངས་ཏེ་གཤེགས་སུ་གསོལ། །ༀ་ཡེ་དྷརྨཱ་སོགས་བརྗོད་པས་སྤྱན་དྲངས་པ། རྟེན་ཅིང་འབྲེལ་བར་འབྱུང་བ་ཡི། །གནས་མཆོག་གཞལ་ཡས་ཕོ་བྲང་འདིར། །སོ་སོའི་གདན་ཁྲི་བཟང་པོ་ལ། །གཉིས་སུ་མེད་པར་བཞུགས་སུ་གསོལ། །ༀ་ཡེ་དྷརྨཱ༴ ཞེས་པས་ཡེ་ཤེས་པ་རྣམས་རྟེན་སོ་སོ་ལ་ཐིམ་པར་གྱུར། དེ་ནས་ཁྲུས་གསོལ་བ་ནི། མེ་ལོང་གི་ནང་དུ་རྟེན་གྱི་གཟུགས་བརྙན་འཆར་དུ་བཅུག་ལ། སྔར་བྱིན་གྱིས་བརླབས་པའི་བུམ་པས་བཀྲུ་ཞིང་། ༀ། ཕུན་སུམ་ཚོགས་པ་སོགས་དཀོན་མཆོག་གསུམ་གྱི་བཀྲ་ཤིས་སྔོན་དུ་འགྲོ་བས། རྟེན་ཅིང་འབྲེལ་བར་འབྱུང་བ་ཡི། ལྷ་རྫས་དམ་པའི་ཁྲུས་ཆབ་འདི། རྒྱལ་བ་སྲས་དང་བཅས་ལ་འབུལ། རྟེན་ཅིང་འབྲེལ་བར་འབྱུང་བ་ཡི། །འགྲོ་བ་སེམས་ཅན་དོན་སླར་དུ། །ཐུགས་རྗེས་དགོངས་ཏེ་བཞེས་སུ་གསོལ། ༀ་ཡེ་དྷརྨཱའི་སྔགས་ལན་གསུམ་བཟླས་པས་ཁྲུས་གསོལ་ནས། གཞན་སྔར་ལྟར་ལས། རྐང་བ་གཉིས་པའི་ཁྲུས་ཆབ་འདི་ཞེས་པའི་ཚབ་ཏུ། སྐུ་འཕྱིས་འདི། ན་བཟའ་འདི། མེ་ཏོག་ཕྲེང་། ཞེས་པ་རྣམས་བཅུག་ལྟེ། ཡེ་དྷརྨཱའི་སྔགས་དང་བཅས་པས་རས་ཀྱིས་འཕྱི་ཞིང་གོས་ཟུང་དང་མེ་ཏོག་གི་ཕྲེང་བ་རེ་རེ་དབུལ་ལོ། །དེ་ནས་མཆོད་པ་འབུལ་བ་ནི། རྟེན་ཅིང་འབྲེལ་བར་འབྱུང་བ་ཡི། །ལྷ་རྫས་དམ་པའི་ཡོན་ཆབ་འདི། །རྒྱལ་བ་སྲས་བཅས་སོགས་སྔར་ལྟར་ལས། ༀ་ཡེ་དྷརྨཱ་ནས་ཤྲ་མ་ཎཿཨརྒྷཾ་པྲ་ཏཱི་ཙྪ་སྭཱ་ཧཱ། དེ་བཞིན་དུ་ཡོན་ཆབ་ཀྱི་གནས་སུ། བདུག་སྤོས། མེ་ཏོག །མར་མེ། དྲི་ཆབ། ཞལ་ཟས། རོལ་མོ་རྣམས་དང་། ཨརྒྷཾ་གྱི་གནས་སུ། དྷཱུ་པེ། པུཥྤེ། ཨཱ་ལོ་ཀེ །གནྡྷེ། ནཻ་ཝི་དྱེ། ཤཔྡ་རྣམས་བཅུག་སྟེ་ཕུལ་ནས། ཧཱུཾ། སྐུ་ནི་རྟེན་ཅིང་འབྲེལ་བའི་སྐུ། །གསུང་ནི་རྟེན་འབྲེལ་འགག་མེད་སྟོན། །ཐུགས་ནི་རྟེན་འབྲེལ་ཐམས་ཅད་མཁྱེན། །སྐུ་གསུང་ཐུགས་ལ་ཕྱག་འཚལ་ལོ། །ཞེས་པས་བསྟོད་ལ། བརྟན་བཞུགས་ནི། རྟེན་གྱི་གཟུགས་བརྙན་མེ་ལོང་དུ་ཤར་བ་ལ་ལག་གཡས་པས་རེག་ནས་རྟེན་འབྲེལ་སྙིང་པོ་བརྒྱ་རྩ་བརྒྱད་བཟླས་ལ། རྟེན་ཅིང་འབྲེལ་བར་འབྱུང་བ་ཡི། །རྒྱལ་བ་སྲས་བཅས་མ་ལུས་ཀུན། །རྟེན་ཅིང་འབྲེལ་བར་འབྱུང་བ་ཡི། །འགྲོ་བ་སེམས་ཅན་དོན་སླད་དུ། །ཇི་སྲིད་རྟེན་འདི་གནས་ཀྱི་བར། །ཐུགས་རྗེས་དགོངས་སྟེ་བཞུག་སུ་གསོལ། །ༀ་ཡེ་དྷརྨཱ་སོགས་དང་། ༀ་སུ་པྲ་ཏིཥྛ་བཛྲེ་སྭཱ་ཧཱ། ཞེས་བུམ་ཆུས་རླན་པའི་མེ་ཏོག་འཐོར་རོ། །སླར་ཡང་ཡོན་ཆབ་ལ་སོགས་པས་མཆོད་ནས། གཏོར་མ་རྟེན་སྙིང་དང་འབྲུ་གསུམ་གྱིས་བརླབས་ཏེ། ཨ་ཀཱ་རོའི་སྔགས་རོལ་མོའི་སྒྲ་དང བཅས་པས་སྲུང་མ་རྣམས་ལ་བྱིན་ཞིང་འཕྲིན་ལས་བཅོལ་ནས། འབྱུང་པོ་གང་དག་དང་། རྒྱལ་བ་དགྲ་རྒྱལ་བདེན་པའི་བྱིན་རླབས་ཀྱིས། །བདེན་པར་གསུངས་པ་དེ་ལ་སྡིག་མེད་ཅིང་། །ལྷར་བཅས་ལྷ་མིན་གྱིས་རྟག་མཆོད་པ་ཡི། །བདེན་པ་དེས་ཀྱང་དེང་འདིར་བདེ་ལེགས་ཤོག །དམ་ཆོས་བདུད་རྩི་ཐམས་ཅད་མཁྱེན་པ་ཡི། །ཞལ་ནས་གསུངས་པ་བསིལ་བའི་རོ་འདི་ཡིས། །ཉོན་མོངས་འབར་བའི་མེ་ཡིས་གདུངས་གྱུར་པའི། །འགྲོ་བའི་སྡུག་བསྔལ་རྟག་ཏུ་ཞི་བྱེད་ཤོག །ཅེས་བརྗོད་ཅིང་། བུམ་ཆུ་དང་མེ་ཏོག་གི་སིལ་མ་འཐོར་པ་དང་། རོལ་མོའི་སྒྲ་ཡང་བྱའོ། །ཕྱི་མདོ་དང་ཐུན་མོང་བ་རྟེན་འབྲེལ་རབ་གནས་ཀྱི་ལེ་ཚན་ནོ།། །།

༈ ༀ་སྭ་སྟི། གཉིས་པ་ནང་ཐུན་མོང་མ་ཡིན་པ་གསང་སྔགས་བླ་མེད་ཀྱི་རབ་གནས་ཆོ་ག་ལ་གསུམ་སྟེ། རྒྱས་པ་དང་། འབྲིང་པོ་དང་། བསྡུས་པའོ། །དང་པོ་ནི། ཁྲོ་བོ་རྡོ་རྗེ་ལས་རིམ་ལས། སྡོམས་ནི་སྔོན་དུ་བྱ་བ་དང་། །ཏིང་འཛིན་ལྷག་བསྐྱེད་རང་བཞིན་དབབ། །དབང་པོའི་སྐྱོན་བསལ་མངའ་གསོལ་དང་། །ཁྲུས་གསོལ་བཀྲ་ཤིས་རས་ཀྱི་འཕྱི། །མཆོད་པ་ཕྱི་ནང་གསང་གསུམ་འབུལ། །བདེན་པའི་བྱིན་རླབས་དམིགས་བརྟན་བཞུགས། །ཡོན་བདག་བསྐོར་ཕྱག་སྨོན་ལམ་གདབ། །ཅེས་པ་ལྟར་དོན་དགུའམ་རྐང་པ་དྲུག་པ་དང་བདུན་པ་གཉིས་གཅིག་ཏུ་བསྡུས་ན་དོན་བརྒྱད་དུ་བསྟན་པའང་རིགས་བསྡུ་ན་སྦྱོར་དངོས་རྗེས་གསུམ་ལས། སྦྱོར་བ་ལའང་བདུན་གྱི། དང་པོ་བཤམས་བཀོད་ནི། གནས་བྱའི་དཀྱིལ་འཁོར་གྱི་མདུན་ཕྱོགས་སུ་ཁྲུས་སྟེགས་དྲི་དང་བ་བྱུང་གིས་ཆག་ཆག་བཏབ་པ་ལ་དཀྱིལ་འཁོར་པདྨ་འདབ་བརྒྱད་མཛེས་ཚོན་དུ་བྲི། དེའི་དབུས་སུ་མཉྫིའི་ཁར་རིན་པོ་ཆེའི་ཁྲུས་གཞོང་གི་ནང་དུ་མེ་ལོང་བཞག །དེའི་ནུབ་ཏུ་མཉྫིའི་ཁར་རབ་གནས་ཀྱི་དབང་བུམ་རྫས་སོ་ལྔའི་བཅུད་ཀྱིས་གཏམས་པ། ཤར་དུ་བུམ་པ་ལྟ་བུ་རི ན་པོ་ཆེའི་སྣོད་བདུན་དུ་ཆུ་གཙང་། སྤུ་ཆབ་སྟེ་བུལ། འདག་ཆལ་ཏེ་སུག་པ། འབྲུ་ལྔ། དྲི་ལྔ། སྨན་ལྔ། རིན་ཆེན་ལྔ་རྣམས་སྦྱར་བའི་ཆུས་གང་བ་སྟེ་ཞི་བའི་ཁྲུས་ཆུ་བདུན། ཁ་ཚར་མ་ཉམས་པའི་རས་དྲི་མ་མེད་པ་ལ་དྲིའི་ཐིག་ལེ་ལྔ་བྱས་པའི་སྐུ་འཕྱིས་དང་བཅས་པ། ལྷོར་ཐོད་པ་ལྟ་བུ་སྣོད་ཇི་ལྟར་རིགས་པར་ཞུན་ཆེན། ཐལ་ཆེན། ཁུ་བ། དྲི་ཆེན། ཤ་ཆེན་གྱི་དྭངས་མ། པད་རཀ །དྲི་ཆུ་རྣམས་སྦྱར་བའི་ཆུས་གང་བ་སྟེ་ཁྲོ་བོའི་ཁྲུས་ཆུ་བདུན། རོ་རས་ལ་བདུད་རྩིའི་ཐིག་ལེ་ལྔ་བྱས་པའི་སྐུ་འཕྱིས་དང་བཅས་པ། བྱང་དུ་མཁར་བའི་བུམ་པར་བ་བྱུང་ལྔ་སྨན་དང་དྲི་བཟང་སྦྱར་བའི་ཆུས་གང་བ་དང་། དེའི་གཡས་སུ་དྲི་ཞིམ་པོས་བགོས་པའི་ཏིལ་མར་རམ་འབྲུ་མར་གྱི་སྣོད་དང་། དྲི་དང་བ་བྱུང་སྦྱར་བའི་སྣོད། གཡོན་དུ་ཙནྡན་དཀར་དམར། ཨུ་དུམྦར་། ནྱཱ་གྲོ་ཏ། པཪྤ་ཏ་སྟེ་ཤིང་ཤུན་ལྔ་རྣམས་དུརྦའི་པིར་དང་བཅས་པ་དང་། དྲིའི་དུང་ཞལ་རྣམས་བཀོད། རྩ་བའི་དཀྱིལ་འཁོར་གྱི་ཕྱི་རོལ་ཤར་ཕྱོགས་སུ་ཁྲུས་སྟེགས་ཀྱི་གཡས་གཡོན་གང་བདེར་དབང་བོའི་སྐྱོན་བསལ་བའི་མིག་ཐུར་སོགས་བདུན་དང་། ཞི་ཁྲོའི་མངའ་དབུལ་གྱི་ཡོ་བྱད་དངོས་སམ་ཙཀ་ལི་དང་། ཞབས་བསིལ། བཞི་བསྣོལ། སྨན་གཏོར་རཀྟ་སོགས་མཆོད་རྫས་ཅི་འབྱོར་འབུལ་བའི་སྟེགས་བུ་བཀོད་ལེགས་པ་འདུ་བྱ། ལྷོ་ཕྱོགས་སུ་རྒྱས་པའི་སྦྱིན་སྲེག་གི་ཐབ་བཅའ། ནུབ་ཕྱོགས་སུ་ཆ་གསུམ། བྱང་ཕྱོགས་སུ་ཚོགས་ཀྱི་ཡོ་བྱད་རྣམས་བཤམ། གཞན་ཡང་མེ་ཏོག་ལ་སོགས་པ་ཉེར་མཁོའི་ཡོ་བྱད་ཐམས་ཅད་ཚང་བར་འདུ་བྱས་ལ། གཉིས་པ་བདག་བསྐྱེད་ནི། སྒྲུབ་ཐབས་ལྟར་ཞི་ཁྲོ་ཡོངས་རྫོགས་སམ། སྒྲུབ་མཆོད་དང་མ་འབྲེལ་བའི་རས་བྲིས་ལྟ་བུར་རྐྱང་ཆོག་བྱེད་ན་ལུས་དཀྱིལ་དང་སྦྱར་བའི་ཞི་ཐུང་ཙམ་ལ་བརྟེན་ཀྱང་རུང་ངོ་། །གསུམ་པ་བུམ་བཟླས་ནི། དབང་བུམ་བསང་སྦྱངས། སྟོང་པའི་ངང་ལས་བྷྲཱུཾ་ཞེས་བརྗོད་པས་རིན་པོ་ཆེའི་བུམ་པ་མཚན་ཉིད་ཡོངས་སུ་རྫོགས་པའི་ནང་དུ་ཧཱུཾ་ༀ་སྭཱ་ཨཱཾ་ཧཱ་ཞེས་བརྗོད་པས་རིགས་ལྔ་ཡབ་ཡུམ་གྱི་སྐུ་བཀྲ་ལམ་གྱི་གསལ་བར་བསྐྱེད་ལ། བསྐུར་རློབ་དབབ་དྲང་བསྟིམ་བརྟན་མཆོད་ཅིང་བསྟོད་ནས། གཟུངས་ཐག་ལ་འཇུས་ཏེ། ཧཱུཾ་བཛྲ་དྷྲིཀ྄་མཱུཾ་དྷཱ་ཏྭི་ཤྭ་རཱི་སོགས་རིགས་ལྔའི་སྔགས་ལ་རྟེན་འབྲེལ་སྙིང་པོ་བཏགས་པ་ཅི་ནུས་བཟླས་ནས། ཡིག་བརྒྱས་བཟོད་པར་གསོལ་ལ་ལྷ་མི་ཞུ་བར་བཞག །ཆུ་བདུན་ཚན་གཉིས་ༀ་སྭ་བྷཱ་ཝ་སོགས་ཆོས་ཉིད་རྣམ་དག་གི་སྔགས་རྒྱས་རྫས་རྣམས་ཀྱི་དྲི་མ་སྦྱངས། ༀ་ན་མཿསརྦ་ཏ་ཐཱ་ག་ཏེ་བྷྱོ་སོགས་ནམ་མཁའ་མཛོད་ཀྱི་སྔགས་རྒྱས་རྫས་རྣམས་རྒྱ་ཆེར་སྤྲེལ། ༀ་བཛྲ་ཨ་མྲྀ་ཏ་སོགས་བདུད་རྩི་ཐབས་སྦྱོར་གྱི་སྔགས་རྒྱས་དྲི་མ་སྦྱོང་བ་ལ་ཐོགས་པ་མེད་པའི་ཡེ་ཤེས་ཀྱི་བདུད་རྩི་ནུས་ལྡན་དུ་གྱུར་པར་བསམ་མོ། །བཞི་པ་རྒྱས་པའི་སྦྱིན་སྲེག་ནི། སྤྲོ་ཞིང་ནུས་ན་སྐབས་འདིར་བྱའོ། །ལྔ་པ་རྟེན་གྱི་བགེགས་སྦྱང་ནི། ཧཱུཾ་ཞེས་བརྗོད་པས་དཀྱིལ་འཁོར་གྱི་གཙོ་བོའི་ཐུགས་ཀ་ནས་བདག་ཉིད་ཞེ་སྡང་རྡོ་རྗེ་འཇིགས་ཤིང་རྔམས་པའི་སྐུར་ཐོན་པའི་ཤངས་ཀྱི་ཧཱུཾ་རིང་དང་བྱང་ཆུབ་ཀྱི་སེམས་སྤྲིན་ཁྲོ་བོ་དང་མཚོན་ཆའི་ཚོགས་སུ་སྤྲོས་པས་བགེགས་ཐམས་ཅད་ཚར་བཅད་ནས་ཚུར་འདུས་པ་བསྲུང་བའི་གུར་དུ་འཁྲིགས་པར་བསམ་ལ། ཧཱུཾ། དབང་མཆོག་སྒྲུབ་པའི་གནས་འདི་རུ། །དཀྱིལ་འཁོར་རབ་ཏུ་གནས་བྱ་ཡིས། །ཕྱོགས་སྐྱོང་བཅུ་པོ་གནོན་པ་དང་། །འཁོར་གྱི་གདོན་བགེགས་མ་ལུས་ཀུན། །དུས་གསུམ་སངས་རྒྱས་བཀའ་བྱུང་གིས། །འདི་རུ་མ་འདུག་གཞན་དུ་དེངས། །ཞེས་བཀའ་བསྒོམས་ལ་རྡོ་རྗེ་གསོར་ཞིང་དྲིལ་བུ་འཁྲོལ་བས། ༀ་བཛྲ་ཀྲོ་དྷ་ཤྲཱི་ཧེ་རུ་ཀ་ཧཱུཾ་ཨ་ཨ་ཨ་ཧཱུཾ་ཕཊ། ཅེས་དང་། གཞན་ཡང་ཁྲོ་བཅུའི་སྔགས་དང་སུམྦྷའི་སྔགས་བཟླ་ཞིང་གནས་བྱའི་གཞིར་གུ་གུལ་གྱིས་བདུག །ཡུངས་ཐུན་གྱིས་བྲབ་པ་སོགས་དྲག་པོའི་ཚམ་རྔམས་བྱའོ། །དྲུག་པ་རྟེན་གྱི་དྲི་མ་དང་བཟོ་བོ་ལ་སོགས་པའི་མི་ག ཙང་བའི་དྲི་མ་འཁྲུད་པ་ནི། རྟེན་གྱི་གཟུགས་བརྙན་མེ་ལོང་དུ་འཆར་དུ་བཅུག་ལ། ཐོག་མར། ༀ་སརྦ་ཏ་ཐཱ་ག་ཏ་ཀཱ་ཡ་བི་ཤོདྷ་ན་སྭཱ་ཧཱ། ཞེས་དྲི་དང་བ་བྱུང་སྦྱར་བ་བྱུག་ཅིང་དུརྦའི་པིར་གྱིས་བཀྲུ། ༀ་ཨཱཿཧཱུཾ་ཧྲཱིཿཋཱ། ཞེས་ཏིལ་མར་རམ་འབྲུ་མར་དྲི་ལྡན་དུརྦའི་པིར་གྱིས་བྱུག །སྣུམ་བསལ་བའི་ཕྱིར། ༀ་སརྦ་ཏ་ཐཱ་ག་ཏ་ཀཱ་ཡ་བི་ཤྭ་དྷ་ནེ་སྭཱ་ཧཱ། ཞེས་ཤིང་ཤུན་ལྔའི་ཕྱེ་མས་ཕྱིས་ལ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བགྱིའོ། །ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུཾ། ཞེས་རོལ་མོ་དང་བཅས་པས་དྲི་སྨན་བ་བྱུང་སྦྱར་བའི་བུམ་ཆུས་བཀྲུ་བར་བྱ་ཞིང་། ༀ་རཏྣ་པྲ་བྷཉྫ་ར་ཧ་སྭཱ་ཧཱ། ཞེས་རས་ཁ་ཚར་མ་ཉམས་པས་ཕྱིས་ཏེ། དྲིའི་དུང་ཞལ་ཐོགས་ལ། ༀ་བཛྲ་གནྡྷེ་སྭཱ་ཧཱ། ཞེས་དྲི་ལྔའི་ཆུ་ཐུགས་ཀར་བྱུག་གོ། །བདུན་པ་རང་གི་ལྷ་མཆོད་ཅིང་གསོལ་བ་གདབ་པ་ནི། ལག་གཡས་རྡོ་རྗེ་དང་བཅས་པའི་སྤོས་སྣོད་ཐོགས་ལ་གཡོན་དྲིལ་བུ་གསིལ་ཞིང་། རང་གི་ལྕེ་ཧཱུཾ་ལས་བྱུང་བའི་རྡོ་རྗེར་མོས་ལ། ཇི་ལྟར་སངས་རྒྱས་ཐམས་ཅད་ནི། །དགའ་ལྡན་གནས་ནས་གཤེགས་ནས་ཀྱང་། །ལྷ་མོ་སྒྱུ་འཕྲུལ་ལྷུམས་ཞུགས་ལྟར། །དེ་བཞིན་གཟུགས་བརྙན་འདིར་གཤེགས་གསོལ། །མགོན་པོ་འདིར་ནི་གཤེགས་ནས་ཀྱང་། །བྱང་ཆུབ་སེམས་ནི་བསྐྱེད་པ་དང་། །བདག་སོགས་སེམས་ཅན་དོན་སླད་དུ། །ཅི་འབྱོར་བ་ཡི་མཆོད་པ་ནི། །མེ་ཏོག་ལ་སོགས་འདི་བཞེས་ནས། །བདག་དང་སློབ་མར་བཅས་པ་ལ། །རྗེས་སུ་བརྩེ་བས་ཉེར་དགོངས་ཏེ། །ཀུན་གྱིས་བྱིན་གྱིས་བརླབ་མཛད་ཅིང་། །འདི་ཉིད་དུ་ནི་འབྱོན་པར་རིགས། །ཞེས་ལན་གསུམ་བརྗོད་ཅིང་། རང་གི་སྙིང་གའི་འོད་ཟེར་གྱིས་འདུས་པ་ཆེན་པོའི་ལྷ་ཚོགས་མཁའ་ཁྱབ་ཏུ་སད་པར་བསམ་ལ། ཀུན་བཟང་། ཞབས་བསིལ། བཞི་བསྣོལ་གྱིས་མཆོད་ཅིང་། ཐལ་མོ་སྦྱར་བའི་བར་དུ་མེ་ཏོག་གི་ཕྲེང་བ་བཟུང་ལ། ན་མོ། མི་གནས་པའི་ཡེ་ཤེས་ཆེན་པོའི་བདག་ཉིད་འདུས་པ་ཆེན་པོའི་དཀྱིལ་འཁོར་གྱི་ལྷ་ཚོགས་འཁོར་རྒྱལ་བ་རྒྱ་མཚོ་དང་བཅས་པ་ཐམས་ཅད་བདག་ལ་དགོངས་སུ་གསོལ། དེང་བདག་གིས་མཐའ་ཡས་པའི་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ཀྱི་གོ་འཕང་ལ་འགོད་པའི་ཕྱིར་རྟེན་འདི་ལ་རབ་ཏུ་གནས་པའི་ཕྲིན་ལས་བགྱི་བར་འཚལ་བས། དེ་བཞིན་གཤེགས་པ་ཐམས་ཅད་ཀྱིས་བདག་ལ་མཐུ་བསྟན་དུ་གསོལ། །བྱིན་གྱིས་བརླབ་ཏུ་གསོལ། དབང་བསྐུར་དུ་གསོལ། རབ་གནས་ཡེ་ཤེས་ཀྱི་སྣང་བ་ཐོབ་པར་མཛད་དུ་གསོལ། ༀ་པྲ་ཏཱི་ཙྪ་ཧོཿ ཞེས་མེ་ཏོག་དོར་བས། དེ་ཉིད་རང་གི་ལྷག་པའི་ལྷས་སྤྱི་བོར་བཅིངས་པར་བསམ་ལ། ༀ་རཏྣ་མཱ་ལེ་ཨ་བྷི་ཥིཉྩ་ཧཱུཾ། ཞེས་རྡོ་རྗེ་བསྡམས་པ་ལས་གུང་མོ་གཉིས་སྒྲེང་བའི་རྒྱས་བླངས་ཏེ་རང་གི་གཙུག་ཏུ་བཀོད་དོ། །གཉིས་པ་དངོས་གཞི་ལའང་བདུན་ལས། དང་པོ་དམ་ཚིགས་བསྐྱེད་པ་ནི། ཚད་མེད་པ་བཞིས་ཀུན་ནས་བསླངས་པའི་བྱང་ཆུབ་ཀྱི་སེམས་གསལ་གདབ་ལ་དར་ཅིག་མཉམ་པར་བཞག །དེ་ནས་གནས་བྱའི་རྟེན་ལ། ཧཱུཾ་བིགྷྣཱནྟ་ཀྲ་ྀཏ་ཕཊ། ཅེས་ལས་བུམ་གྱི་ཆུ་འཐོར་བས་སྦྱངས། ༀ་བཛྲ་སཏྭ་ཧཱུཾ། ཞེས་བརྗོད་པས་བདག་བསྐྱེད་ཀྱི་གཙོ་བོ་ཡབ་ཡུམ་སྙོམས་པར་ཞུགས་པའི་སྦྱོར་མཚམས་ནས་རྡོ་རྗེ་སེམས་དཔའ་ཡབ་ཡུམ་ཐོན་ཏེ་མདུན་གྱི་ནམ་མཁར་བཞུགས་པར་གྱུར། དེའི་ཐུགས་ཀར་གནས་པའི་ཧཱུཾ་ཡིག་འབར་བ་ལས་རཾ་ཡཾ་ཁཾ་འཕྲོས། རྟེན་གྱི་དངོས་པོ་དང་མཚན་མར་འཛིན་པ་ཐམས་ཅད་དག །ཐལ་མོ་ཁོང་སྟོང་གི་རྒྱ་བཅས་ལ། ༀ་མ་ཧཱ་ཤཱུ་ནྱ་ཏཱ་ཛྙཱ་ན་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ ཧཾ། ཞེས་བརྗོད་པས། རབ་ཏུ་གནས་བྱའི་གཞིས་མཚོན་པའི་ཕྱི་ནང་གི་ཆོས་ཐམས་ཅད་སྟོང་པ་ཉིད་ཀྱི་ཡེ་ཤེས་ཆོས་ཀྱི་དབྱིངས་མཐའ་བྲལ་ནམ་མཁའ་ལྟ་བུའི་རང་བཞིན་དུ་དག་པར་མོས་ལ་ང་རྒྱལ་བྱ། དེའི་ངང་ལས་རྡོ་རྗེ་སེམས་དཔའི་ཐུགས་ཀ་ནས་ཨེ་ཡཾ་ར་སུཾ་ཀེཾ་རཾ་ཞེས་རིམ་པར་སྤྲོས་པས་ཡུམ་ལྔའི་མཁའ་ཀློང་རྣམ་པར་དག་པ་འབྱུང་བ་ལྔའི་དཀྱིལ་འཁོར་དུ་ལྷུན་གྱིས་གྲུབ་པར་གྱུར། སླར་ཡང་བྷྲཱུཾ་འཕྲོས་སྟེང་ཁང་རིན་པོ་ཆེ་དང་འོག་ཁང་འབར་བའི་གཞལ་ཡས་ཁང་ཕྱི་ནང་རིམ་པ་དགུ་པ་ལྷ་སོ་སོའི་གདན་དང་བཅས་པ་བཀྲ་ལམ་གྱིས་གསལ་བར་གྱུར། དེ་ནས་རྡོ་རྗེ་སེམས་དཔའ་ཡབ་ཡུམ་རྗེས་སུ་ཆགས་པའི་སྦྱོར་བས་སྙོམས་པར་ཞུགས་པའི་སྦྱོར་མཚམས་ནས་བྱང་ཆུབ་སེམས་ཀྱི་ཡི་གེའི་སྤྲིན་ཕྱུངས་ཏེ་སོ་སོའི་གདན་གྱི་སྟེང་དུ་འཁོད་པ་ལས་བརྟེན་པ་ལྷའི་འཁོར་ལོར་གྱུར་པ་ནི། སྟེང་ཁང་དུ་ༀ་ཨ། ཧཱུཾ་མཱུཾ། ༀ་ལཱཾ། སྭཱ་མཱཾ། ཨཱཾ་པཱཾ། ཧཱ་ཏཱཾ། ཀྵིཾ་ཧཱུཾ། ཏྲཾ་ཏྲཾ། ཧྲཱིཾ་ཧྲཱིཾཿ ཛྲཱིཾ་ཨཾ། མཻ་ཛཿ ཐླྷིཾ་ཧཱུཾ། ཧཱུཾ་བཾ། མཱུཾ་ཧོཿ ༀ་ཨ། ཀྲཱིཾ་ཏྲཱུཾ་སྲུཾ་བྲཾ་ཀྵཾ་ཡེ། ཧཱུཾ་ཛཿ ཧཱུཾ་ཧཱུཾ། ཧཱུཾ་བཾ། ཧཱུཾ་ཧོཿརྣམས་ཡོངས་སུ་གྱུར་པ་ལས་རིགས་དྲུག་པ་ཀུན་བཟང་ཡབ་ཡུམ་ལ་སོགས་ཏེ་ཞི་བ་རྡོ་རྗེ་དབྱིངས་ཀྱི་དཀྱིལ་འཁོར་གྱི་ལྷ་ཚོགས་བཞི་བཅུ་རྩ་གཉིས་དང་། འོག་ཁང་དུ་ཧཱུཾ་ཧ་ཧེ་ཕཊ་ཨ་ཛཿ་ཧཱུཾ་བཾ་ཧོཿ བྷྱོཿ ཨེ་ཧཱུཾ་ཏིང་ཧ་ཧཱུཾ། ཛཿཧཱུཾ་བཾ་ཧོཿམ་རྣམས་ཡོངས་སུ་གྱུར་པ་ལས་བཅོམ་ལྡན་འདས་དཔལ་ཆེན་པོ་ཆེ་མཆོག་ཧེ་རུ་ཀ །དབང་མཆོག །རྒྱུད་ལུང་གི་ཧེ་རུ་ཀ་དགུ་རྣམས་སོ་སོའི་ཡུམ་དང་བཅས་པ། གནས་ཡུལ་སྒོ་སྐྱོང་ཉི་ཤུ། སྤོར་མ་བརྒྱད། གསང་ཡུམ་བཞི། དབང་མོ་ཉེར་བརྒྱད། མཁའ་འགྲོ་སོ་གཉིས། མ་བདུན་སྲིང་བཞི། གིང་ཆེན་བཅོ་བརྒྱད། ཁྲོ་བོ་ཁྲོ་མོ་ཡ་དྲུག་ཅུ། ཕོ་ཉ་ཉིས་བརྒྱ་བཞི་བཅུ། མ་མོ་དྲུག་ཅུ་སྟེ་བདུད་འདུལ་ཁྲོ་བོའི་དཀྱིལ་འཁོར་གྱི་ལྷ་ཚོགས། ཕྱི་ཁྱམས་ལ་དུས་གསུམ་གྱི་རིག་འཛིན་བླ་མ། གཞན་ཡང་སྤྲུལ་པ་དང་ཡང་སྤྲུལ་ཕྱག་བརྙན་འབུམ་ཕྲག་མཐའ་ཡས་པ་སོགས་འདུས་པ་ཆེན་པོའི་དཀྱིལ་འཁོར་གྱི་འཁོར་ལོ་ཐམས་ཅད་དྭངས་པའི་མཚོ་ལ་གཟའ་སྐར་ཤར་བ་ལྟར་སྐད་ཅིག་གིས་གསལ་བར་གྱུར། གཉིས་པ་ཡེ་ཤེས་པ་སྤྱན་དྲང་ཞིང་བསྟིམ་པ་ནི། ལྷ་ཐམས་ཅད་ཀྱི་ཐུགས་ཀར་རང་འདྲ་བའི་ཡེ་ཤེས་སེམས་དཔའ། དེའི་ཐུགས་ཀར་རང་རང་གི་ཕྱག་མཚན་ས་བོན་གྱིས་མཚན་པ་ལས་འོད་ཟེར་འཕྲོས་པས་ནམ་མཁའ་གང་བའི་དེ་བཞིན་གཤེགས་པ་ཐམས་ཅད་བདེ་བ་ཆེན་པོའི་ངང་ལས་ཆོ་འཕྲུལ་གྱི་རྣམ་རོལ་ཞི་ཁྲོ་རབ་འབྱམས་རྒྱལ་བའི་དཀྱིལ་འཁོར་ཆེན་པོར་སད་པར་བསམ་ལ། སྤོས་བཏུལ་ཞིང་རོལ་མོའི་སྒྲ་དང་བཅས་པས། ༀ། ཕྱོགས་བཅུའི་འཇིག་རྟེན་རབ་འབྱམས་ན། །རྒྱལ་བ་གང་བཞུགས་འཁོར་དང་བཅས། །རྡོ་རྗེ་དམ་ཅན་ཇི་སྙེད་པ། །ཐམས་ཅད་ཀུན་ནས་དགོངས་སུ་གསོལ། །རྒྱལ་བའི་ཐུགས་དམ་བསྐང་བ་དང་། །འཁོར་བ་ཡོངས་སུ་སྤྱོད་པའི་ཕྱིར། །འདུས་པ་ཆེན་པོའི་དཀྱིལ་འཁོར་འདིར། །ཐུགས་དམ་བཞིན་དུ་གཤེགས་སུ་གསོལ། །བཛྲ་ས་མཱ་ཛཿཧཱུཾ་ཛཿཞེས་སྙན་གསན་དབབ་ལ། ཧཱུཾ། ཆོས་སྐུ་རིག་པ་རང་སྣང་བ། །རྡོ་རྗེ་དབྱིངས་ཀྱི་ལྷ་ཚོགས་དང་། ཁམས་གསུམ་མ་ལུས་འདུལ་བ་ཡི། ཁྲག་འཐུང་དཀྱིལ་འཁོར་འཁོར་བཅས་དང་། །རྡོ་རྗེ་འཆང་གྲལ་རིམ་བརྙེས་པའི། །རྣལ་འབྱོར་ཆེན་པོའི་རིག་འཛིན་རྣམས། །སྨོན་ལམ་དམ་ཚིག་ཚུལ་བཞིན་དུ། །གནས་འདིར་མ་ལུས་གཤེགས་སུ་གསོལ། །ཛཿཧཱུཾ་བཾ་ཧོཿཨེ་ཧྱེ་ཧི་རུ་ལུ་རུ་ལུ་ཧཱུཾ་བྷྱོ་ཛཿཛཿ ཞེས་པས་སྤྱན་དྲངས་ཏེ། ཛཿཧཱུཾ་བཾ་ཧོཿས་རང་བཞིན་ཡེ་ཤེས་ཀྱི་དཀྱིལ་འཁོར་ནམ་མཁར་བཞུགས་པའི་སྟ་གོན་གྱི་ལྷ་དང་བཅས་པ་དམ་ཚིག་གི་དཀྱིལ་འཁོར་ལ་དབྱེར་མེད་དུ་ཐིམ་པར་བསམ་མོ། །གསུམ་པ་དབང་པོའི་སྐྱོན་བསལ་བའི་ཆས་བདུན་འབུལ་བ་ནི། མིག་སྨན་བྱུགས་པའི་ཐུར་མ་ཐོགས་ཏེ། ཁྱད་པར་རྒྱུ་ལས་བྱུང་བ་ཡི། །རིན་པོ་ཆེ་ཡི་ཐུར་མ་ཡིས། །སྤྱན་གྱི་དབང་པོའི་སྐྱོན་བསལ་བས། །སྤྱན་ལྔ་ཡོངས་སུ་རྫོགས་པར་ཤོག །ༀ་བཛྲ་ཙཀྵུ་ས་མནྟ་བི་ཤོདྷ་ནེ་སྭཱ་ཧཱ། ཞེས་སྤྱན་དབྱེ་ཚུལ་བྱའོ། །གསེར་གྱི་སྙན་འབྲུས་སྙན་སྤབས་བསལ་བ་ལྟར་བྱ་ཞིང་། ཁྱད་པར་རྒྱུ་ལས་བྱུང་བ་ཡི། །རིན་པོ་ཆེ་ཡི་སྙན་འབྲུ་ཡིས། །སྙན་གྱི་དབང་བོའི་སྐྱོན་བསལ་བས། །སྙན་ལྔ་ཡོངས་སུ་རྫོགས་པར་ཤོག །ༀ་སྲོ་ཀྵཾ་པྲ་བེ་ཤ་སྭཱ་ཧཱ། གསེར་གྱི་རྨང་ཚེར་གྱིས་ཤངས་བསལ་ཚུལ་བྱ་ཞིང་། ཁྱད་པར་རྒྱུ་ལས་བྱུང་བ་ཡི། །རིན་པོ་ཆེ་ཡི་རྨང་གཟེར་གྱིས། །ཤངས་ཀྱི་དབང་པོའི་སྐྱོན་བསལ་བས། །སེམས་ཀྱི་རྣམ་གྲངས་ཤེས་པར་ཤོག །ༀ་པྲི་ཡཾ་སྲུཾ་སྭཱ་ཧཱ། གསེར་གྱི་ལྗགས་གཞར་གྱིས་ལྗགས་ཀྱི་དྲི་མ་བསལ་བལྟར་བྱ་ཞིང་། ཁྱད་པར་རྒྱུ་ལས་བྱུང་བ་ཡི། །རིན་པོ་ཆེ་ཡི་ལྗགས་གཞར་གྱིས། །ལྗགས་ཀྱི་དབང་པོའི་སྐྱོན་བསལ་བས། །གསུང་རབ་མ་ལུས་འཆད་པར་ཤོག །ༀ་དེ་བྱ་མུ་ཁཱ་ཡ་སྭཱ་ཧཱ། གསེར་དང་རུས་པའི་ཐུར་མས་ཞི་ཁྲོ་སོ་སོའི་ཚེམས་འབྲུ་བ་ལྟར་བྱས་ཏེ། ཁྱད་པར་རྒྱུ་ལས་བྱུང་བ་ཡི། །རིན་ཆེན་རུས་པའི་ཚེམས་ཤིང་གིས། །ཚེམས་ཀྱི་དྲི་མ་བསལ་བ་ཡིས། །མཉམ་པར་བཞག་པ་ཐོབ་པར་ཤོག །ༀ་བཛྲ་དནྟ་སྭཱ་ཧཱ། དུང་གི་སོ་མངས་ཀྱིས་རྒྱན་ཅན་རྣམས་ཀྱི་དབུ་སྐྲ་བཤད་པ་ལྟར་བྱས་ཏེ། ཁྱད་པར་རྒྱུ་ལས་བྱུང་བ་ཡི། །རིན་ཆེན་དུང་གི་སོ་མང་གིས། །དབུ་སྐྲ་ལྕང་ལོའི་སྐྱོན་བསལ་བས། །མཚན་ཉིད་མ་འདྲེས་མཁྱེན་པར་ཤོག །ༀ་མ་ནུ་སཾ་སོ་སྭཱ་ཧཱ། གསེར་གྱི་སྤུ་གྲིས་ཐུབ་དྲུག་སོགས་ཀྱི་དབུ་སྐྲ་དང་ཞལ་སྤུ་འབྲེག་ཚུལ་བྱས་ཏེ། ཁྱད་པར་རྒྱུ་ལས་བྱུང་བ་ཡི། །རིན་པོ་ཆེ་ཡི་སྤུ་གྲི་ཡིས། །དབུ་དང་ཞལ་གྱི་སྤུ་བྲེགས་པས། །ཉོན་མོངས་རྩད་ནས་གཅོད་པར་ཤོག །ༀ་ནིརྨ་ཀཱ་ཡ་སྭཱ་ཧཱ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདེན་པའི་བྱིན་གྱིས་བརླབས་ཀྱིས། འདུས་པ་ཆེན་པོའི་དཀྱིལ་འཁོར་གྱི་ལྷ་ཚོགས་རྣམས་ལ་དབང་པོ་ལ་སོགས་པའི་སྐྱོན་བསལ་བའི་ཉེར་སྤྱད་ཕུལ་པས། ཡེ་ཤེས་ཀྱི་སྤྱན་རྣམ་པར་དག་པ་ལ་སོགས་ཏེ་ཇི་སྐད་སྨོས་པའི་ཡོན་ཏན་དེ་ཐམས་ཅད་བདག་དང་མཐའ་ཡས་པའི་སེམས་ཅན་ཐམས་ཅད་ཀྱིས་ཐོབ་པར་གྱུར་ཅིག །བཞི་པ་དངོས་པོའི་སྐྱོན་སྦྱང་བའི་ཆས་དགུ་ལས། ཐོག་མར་ཞི་ཁྲོ་ཐུན་མོང་དུ་མེ་ལོང་དབུལ་ཏེ། ཧཱུཾ། མེ་ལོང་དག་ལ་གཟུགས་བརྙན་སྣང་བ་ལྟར། །ཆོས་རྣམས་རང་བཞིན་གདོན་ནས་དག་པ་ལ། །ཆེ་བའི་ཡོན་ཏན་མང་པོ་འབྱུང་འགྱུར་ཞིང་། །རྣམ་པར་བྱང་བའི་ཆོས་ཉིད་གསལ་བར་ཤོག །ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདེན་པའི་བྱིན་གྱིས་བརླབས་ཀྱིས། །འདུས་པ་ཆེན་པོའི་དཀྱིལ་འཁོར་གྱི་ལྷ་ཚོགས་ལ་མེ་ལོང་ཕུལ་བས་ཀུན་གཞི་བག་ཆགས་ཀྱི་གཡའ་དང་བྲལ་ནས་ཆོས་སྐུ་བརྗོད་མེད་ཀྱི་དོན་བདག་དང་མཐའ་ཡས་པའི་སེམས་ཅན་ཐམས་ཅད་ཀྱིས་ཐོབ་པར་གྱུར་ཅིག །ཞི་ཁྲོའི་ཆུ་བདུན་ཚན་གཉིས་ཀྱིས་ཁྲུས་གསོལ་ཞིང་འཕྱི་བ་ལས། དང་པོ་སྔར་ཕུལ་བའི་མེ་ལོང་གི་ནང་དུ་ཞི་བའི་དཀྱིལ་འཁོར་གྱི་གཟུགས་བརྙན་འཆར་དུ་བཅུག་ལ། ཞི་བའི་ཆུ་བདུན་གྱིས་རིམ་པར་བཀྲུ་སྟེ། ཆུ་གཙང་ཐོགས་ལ། རྒྱལ་བའི་སྐུ་ལ་ཉོན་མོངས་མི་མངའ་ཡང་། །སེམས་ཅན་ཉོན་མོངས་བག་ཆགས་བསལ་སླད་དུ། །རྒྱལ་བའི་སྐུ་ལ་ཆུ་གཙང་ཁྲུས་གསོལ་བས། །ལས་དང་ཉོན་མོངས་བག་ཆགས་དག་པར་ཤོག །ༀ་སརྦ་ཏ་ཐཱ་ག་ཏ་ཀཱ་ཡ་བི་ཤོདྷ་ནེ་སྭཱ་ཧཱ། སྤུ་ཆབ་ཐོགས་ལ། རྒྱལ་བའི་སྐུ་ལ་རབ་རིབ་མི་མངའ་ཡང་། །སེམས་ཅན་མ་རིག་མུན་པ་བསལ་སླད་དུ། །རྒྱལ་བའི་སྐུ་ལ་སྤུ་ཆབ་ཁྲུས་གསོལ་བས། །རྨོངས་པའི་རབ་རིབ་མ་ལུས་དག་པར་ཤོག །ༀ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནེ་སྭཱ་ཧཱ། འདག་ཆལ་ཐོགས་ལ། རྒྱལ་བའི་སྐུ་ལ་དྲི་མ་མི་མངའ་ཡང་། །སེམས་ཅན་སྡུག་བསྔལ་དྲི་མ་བསལ་སླད་དུ། །རྒྱལ་བའི་སྐུ་ལ་འདག་འཆལ་ཁྲུས་གསོལ་བས། །ཚུལ་ཁྲིམས་མངོན་པར་བྱང་ཆུབ་སྐུ་ཐོབ་ཤོག །ༀ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནེ་སྭཱ་ཧཱ། འབྲུ་ཆབ་ཐོགས་ལ། རྒྱལ་བའི་སྐུ་ལ་བསྙེལ་བ་མི་མངའ་ཡང་། །སེམས་ཅན་མུ་གེའི་སྡུག་བསྔལ་བསལ་སླད་དུ། །རྒྱལ་བའི་སྐུ་ལ་འབྲུ་ཆབ་ཁྲུས་གསོལ་བས། །ཏིང་འཛིན་ཕུང་པོ་ཆོས་སྐུ་དག་པར་ཤོག །ༀ་སརྦ་ཏ་ཏཱ་ག་ཏ༴ སྤོས་ཆབ་ཐོགས་ལ། ཕྲིན་ལས་ལྷུན་རྫོགས་སངས་རྒྱས་སྐུ་གཟུགས་ལ། །སྤོས་ཆེན་དྲི་ཡི་སྐུ་ཁྲུས་འདི་གསོལ་བས། །དྲི་མཆོག་སྟོང་གསུམ་ཀུན་ཏུ་འབྱུང་བ་དང་། །ཤེས་རབ་ཕུང་པོ་སྤྲུལ་སྐུ་ཐོབ་པར་ཤོག །ༀ་སརྦ་ཏ་ཐཱ་ག་ཏ་ཀཱ་ཡ་བི་ཤོདྷ་ནེ་སྭཱ་ཧཱ། སྨན་ཆབ་ཐོགས་ལ། རྡོ་རྗེ་སྐུ་མཆོག་ནམ་མཁའི་རང་བཞིན་ལ། །དྲི་མེད་སྨན་ཆབ་སྐུ་ཁྲུས་འདི་གསོལ་བས། །ཉོན་མོངས་སྡུག་བསྔལ་ནད་འཇོམས་རྒྱལ་པོ་ཡིས། །རྣམ་གྲོལ་ཕུང་པོ་རྡོ་རྗེའི་སྐུ་ཐོབ་ཤོག །ༀ་སརྦ་ཏ་ཐཱ་ག་ཏ༴ རིན་པོ་ཆེའི་ཆུ་ཐོགས་ལ། ཆོས་རྣམས་ཡོངས་སུ་རྫོགས་པའི་སྐུ་མཆོག་ལ། །རིན་ཆེན་ཆབ་ཀྱི་སྐུ་ཁྲུས་འདི་གསོལ་བས། །ཡིད་བཞིན་ནོར་ལྟར་མ་ལུས་རེ་སྐོང་བའི། །ཡེ་ཤེས་ཕུང་པོ་ལོངས་སྤྱོད་རྫོགས་པར་ཤོག །ༀ་སརྦ་ཏ་ཐཱ་ག་ཏ༴ ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདེན་པའི་བྱིན་གྱིས་བརླབས་ཀྱིས། ཞི་བ་རྡོ་རྗེ་དབྱིངས་ཀྱི་ལྷ་ཚོགས་ལ་ཆུ་བདུན་གྱིས་ཁྲུས་གསོལ་བས་ལས་ཉོན་ཤེས་བྱའི་དྲི་མ་དག་ནས་ཟག་མེད་ཀྱི་ཕུང་པོ་ལྔ་དང་འབྲས་བུ་སྐུ་ལྔ་བདག་དང་མཐའ་ཡས་པའི་སེམས་ཅན་ཐམས་ཅད་ཀྱིས་ཐོབ་པར་གྱུར་ཅིག །རས་དཀར་གྱི་སྐུ་འཕྱི་ཐོགས་ཏེ། །ཧཱུཾ། ཐུགས་རྗེ་ལྷུན་རྫོགས་སངས་རྒྱས་སྐུ་གཟུགས་ལ། །སྲི་ཞུ་གུས་ཕྱིར་རས་ཀྱིས་སྐུ་ཕྱིས་པས། །ལས་དང་ཉོན་མོངས་བག་ཆགས་ཀུན་བསལ་ནས། །སྤྱོད་ལམ་རྣམ་པར་དག་པའི་སྐུ་ཐོབ་ཤོག །ༀ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནེ་སྭཱ་ཧཱ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདེན་པའི་བྱིན་གྱིས་བརླབས་ཀྱིས། བདེ་བར་གཤེགས་པ་ལ་རས་གཙང་མས་སྐུ་ཕྱིས་པས་གཟུང་འཛིན་ལས་བྱུང་བའི་དྲི་མ་དག་ནས་སྤྱོད་ལམ་རྣམ་པར་དག་པའི་སྐུ་བདག་དང་མཐའ་ཡས་པའི་སེམས་ཅན་ཐམས་ཅད་ཀྱིས་ཐོབ་པར་གྱུར་ཅིག །གཉིས་པ་མེ་ལོང་དུ་ཁྲོ་དཀྱིལ་གྱི་གཟུགས་བརྙན་འཆར་དུ་བཅུག་ལ། ཁྲོ་བོའི་ཆུ་བདུན་གྱིས་རིམ་པར་བཀྲུ་སྟེ། ཞུན་ཆེན་གྱི་ཆུ་ཐོགས་ལ། ཧཱུཾ། དོན་དམ་བཅུད་ཀྱི་ཐིག་ལེ་ཆེན་པོ་འདིས། །འཇིགས་བྱེད་ཆེན་པོའི་སྐུ་ལ་ཁྲུས་གསོལ་བས། །ལྷན་ཅིག་སྐྱེས་པའི་དྲི་མ་ཀུན་དག་ནས། །བྱང་ཆུབ་སེམས་ཀྱི་རླན་དང་ལྡན་པར་ཤོག །ༀ་བོ་དྷི་ཙིཏྟ་ཛྙཱ་ན་བི་ཤུ དྡྷེ་ཧཱུཾ། ཐལ་ཆེན་གྱི་ཆུ་ཐོགས་ལ། ཧཱུཾ། ལྷག་པའི་ཐལ་བ་ཕྲིན་ལས་རྫོགས་པའི་ཆུས། །འཇིགས་བྱེད་ཆེན་པོའི་སྐུ་ལ་ཁྲུས་གསོལ་བས། །བདག་གཞན་གཉིས་འཛིན་དྲི་མ་ཀུན་སྤངས་ནས། །གཉིས་སུ་མེད་པའི་དོན་དང་ལྡན་པར་ཤོག །ༀ་བཛྲ་བི་ས་སྨི་ཏི་ཛྙཱ་ན་བི་ཤུདྡྷེ་ཧཱུཾ། བྱང་སེམས་ཀྱི་ཆུ་ཐོགས་ལ། སྐྱེ་མེད་བྱང་ཆུབ་སེམས་ཀྱི་རང་བཞིན་ནི། །དཀར་ལ་དག་པ་གཉིས་མེད་ཡེ་ཤེས་ཆེས། །འཇིགས་བྱེད་ཆེན་པོའི་སྐུ་ལ་ཁྲུས་གསོལ་བས། །རྡོ་རྗེ་རིགས་ཀྱི་དངོས་གྲུབ་ཐོབ་པར་ཤོག །ༀ་བཛྲ་བོ་དྷི་ཙིཏྟ་ཛྙཱ་ན་བི་ཤུདྡྷེ་ཧཱུཾ། དྲི་ཆེན་གྱི་ཆུ་ཐོགས་ལ། ཧཱུཾ། དྲི་ཆེན་གསང་བའི་རྫས་ཆེན་དམ་རྫས་མཆོག །སྐྱེ་ཤི་མེད་པ་རྡོ་རྗེ་ཚེ་ཡི་ཆུས། །འཇིགས་བྱེད་ཆེན་པོའི་སྐུ་ལ་ཁྲུས་གསོལ་བས། །དེ་བཞིན་གཤེགས་རིགས་དངོས་གྲུབ་ཐོབ་པར་ཤོག །ༀ་བཛྲ་ཨཱཿཡུ་རྫྙཱ་ན་བི་ཤུདྡྷེ་ཧཱུཾ། ཤ་ཆེན་གྱི་དྭངས་མའི་ཆུ་ཐོགས་ལ། ཧཱུཾ། ཁམས་གསུམ་རྒྱུད་དྲུག་འཁོར་བའི་སེམས་ཅན་རྣམས། །དུག་གསུམ་བསྒྲལ་པ་ཤ་ཆེན་བཅུད་ཀྱི་ཆུས། །འཇིགས་བྱེད་ཆེན་པོའི་སྐུ་ལ་ཁྲུས་གསོལ་བས། །རིན་ཆེན་རིགས་ཀྱི་དངོས་གྲུབ་ཐོབ་པར་ཤོག །ༀ་བཛྲ་མ་ཧཱ་མཱཾ་ས་བི་ཤུདྡྷེ་ཧཱུཾ། པད་རཀ་གི་ཆུ་ཐོགས་ལ། ཧཱུཾ། པདྨ་རཀྟ་གསང་བ་དབང་གི་རྫས། །ཆགས་པར་བྱེད་པ་དམར་ལ་དྭངས་པའི་ཆུས། །འཇིགས་བྱེད་ཆེན་པོའི་སྐུ་ལ་ཁྲུས་གསོལ་བས། །པདྨ་རིགས་ཀྱི་དངོས་གྲུབ་ཐོབ་པར་ཤོག །ༀ་པདྨ་རཀྟ་ཏི་ལ་ཀ་བི་ཤུ དྡྷེ་ཧཱུཾ། དྲི་ཆུ་ཐོགས་ལ། ཧཱུཾ། དྲི་ཆུས་ཀུན་གྱི་གསོས་བྱེད་ལས་ཀྱི་རིགས། །ཐམས་ཅད་དག་བྱེད་བདུད་རྩི་ཆེན་པོའི་ཆུས། །འཇིགས་བྱེད་ཆེན་པོའི་སྐུ་ལ་ཁྲུས་གསོལ་བས། །ལས་ཀྱི་རིགས་ཀྱི་དངོས་གྲུབ་ཐོབ་པར་ཤོག །ༀ་བཛྲ་མ་ཧཱ་མ་མ་ཀུ་ཀུ་ཛྙཱ་ན་བི་ཤུདྡྷེ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདེན་པའི་བྱིན་གྱིས་བརླབས་ཀྱིས། འདུས་པ་ཆེན་པོ་ཁྲག་འཐུང་གི་ལྷ་ཚོགས་ལ་དུར་ཁྲོད་ཀྱི་རྫས་དང་བདུད་རྩི་ལྔའི་ཁྲུས་གསོལ་བས་ལྷན་སྐྱེས་དང་ཀུན་བཏགས་ཀྱི་དྲི་མ་དག་ནས་བྱང་སེམས་ཀྱིས་རྒྱུད་རླན་ཅིང་གཉིས་མེད་ཀྱི་དོན་དང་ལྡན་པས་རིགས་ལྔ་ཡེ་ཤེས་ལྔའི་དངོས་གྲུབ་བདག་དང་མཐའ་ཡས་པའི་སེམས་ཅན་ཐམས་ཅད་ཀྱིས་ཐོབ་པར་གྱུར་ཅིག །རོ་རས་ཀྱི་སྐུ་འཕྱི་ཐོགས་ལ། ཐུགས་རྗེ་ལྷུན་རྫོགས་ཁྲག་འཐུང་དཀྱིལ་འཁོར་ལ། །དུར་ཁྲོད་ཆེན་པོའི་རས་ཀྱིས་སྐུ་ཕྱིས་པས། །ཤེས་བྱའི་ལས་དང་ཉོན་མོངས་སྒྲིབ་སྦྱངས་ནས། །སྤྱོད་ལམ་རྣམ་པར་དག་པའི་སྐུ་ཐོབ་ཤོག །ༀ་བཛྲ་སརྦ་ཏ་ཐཱ་ག་ཏ་ཛྙཱ་ན་བི་ཤུདྡྷེ་ཧཱུཾ། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདེན་པའི་བྱིན་གྱིས་བརླབས་ཀྱིས། ཁྲག་འཐུང་གི་ལྷ་ཚོགས་ལ་རས་ཆེན་གྱི་སྐུ་ཕྱིས་ཕུལ་བས་ཤེས་བྱའི་དྲི་མ་དག་ནས་སྤྱོད་ལམ་རྣམ་པར་དག་པའི་སྐུ་བདག་དང་མཐའ་ཡས་པའི་སེམས་ཅན་ཐམས་ཅད་ཀྱིས་ཐོབ་པར་གྱུར་ཅིག །ལྔ་པ་ཆེ་བའི་ཡོན་ཏན་རྒྱན་ཆས་ཀྱིས་དབང་བསྐུར་ཞིང་མངའ་གསོལ་བ་ལ་ཐུན་ཁྱད་གཉིས་ལས་ཐུན་མོང་བ་དབང་བསྐུར་བ་ནི། ནམ་མཁའི་གང་བའི་དབང་ལྷ་རྣམས་ཀྱིས་བུམ་པ་ཐོགས་ཏེ་ངོ་མཚར་བའི་དགེ་མཚན་དུ་མ་དང་ལྡན་པར་དབང་བསྐུར་བས། བུན་ནང་གི་རིགས་ལྔ་ཡབ་ཡུམ་རྗེས་ཆགས་ཀྱི་སྦྱོར་བས་ཞུ་བའི་བྱང་སེམས་ཡེ་ཤེས་ལྔའི་རང་བཞིན་བདུད་རྩིའི་ཆུ་རྒྱུན་གྱིས་དབང་བསྐུར་བར་མོས་ལ། ཞི་བ་ལས་རིམ་ལས། རང་གི་བུམ་པའམ་གཅིག་ཤོས་ཀྱིས། དབང་བསྐུར། ཞེས་གསུངས་བ་ལྟར་དབང་བུམ་སྒེར་དུ་ཡོད་ན་དེས་བསྐུར་ཞིང་། མེད་ན་གཅིག་ཤོས་རྣམ་བུམ་བཏེགས་ལ། ༀ། རིན་ཆེན་བུམ་པས་དབང་བསྐུར་ནས། །དབང་ཆེན་རྡོ་རྗེའི་སྐུར་བསྒོམས་ཏེ། །ཡེ་ཤེས་ལྔ་ཡི་རང་བཞིན་གྱིས། །དབང་བསྐུར་ཆོས་དབྱིངས་གསལ་བར་ཤོག །དབུའི་གནས་ལྔར་བུམ་ཆུ་གཏིག་པའི་ཚུལ་བྱ་ཞིང་། ༀ་མ་ཧཱ་ཤཱུ་ནྱ་ཏཱ། ཨཱ་དཪྴ། ས་མ་ཏཱ། པྲ་ཏྱ་བེ་ཀྵ་ཎ། ཀྲྀ་ཏྱཱ་ནུཥྛཱ་ན། ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ ྅ཧཾ། ཞེས་དབང་བསྐུར་བས་དབང་རྟགས་སུ་དེ་བཞིན་གཤེས་པ་རིགས་ལྔས་དབུ་བརྒྱན་པར་གྱུར། ལྷ་ཚོགས་ཐམས་ཅད་ཀྱི་སྤྱི་མགྲིན་སྙིང་གར་ཟླ་བ་པདྨ་ཉི་མ་ལ་གནས་པའི་ༀ་ཨཱཿཧཱུཾ་གསུམ་ལས་འོད་ཟེར་སྤྲོ་བསྡུས་རྡོ་རྗེ་གསུམ་གྱི་ལྷ་ཚོགས་སྤྱན་དྲངས་ཏེ་འབྲུ་གསུམ་ལ་ཐིམ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་དང་གཉིས་མེད་དུ་གྱུར་པར་བསམ་ལ། དཔལ་ལྡན་སངས་རྒྱས་སྐུ་གསུང་ཐུགས། །རྡོ་རྗེ་མི་ཕྱེད་གསུམ་གྱི་བདག །དེང་བདག་སངས་རྒྱས་ཐམས་ཅད་ཀྱིས། །རྡོ་རྗེ་གསུམ་དུ་དབང་བསྐུར་རོ། །རྡོ་རྗེ་ཕྱག་རྒྱ་གནས་གསུམ་དུ་རེག་པའི་ཚུལ་བྱ་ཞིང་། ༀ་སརྦ་ཏ་ཐཱ་ག་ཏ་མ་ཧཱ་ཀཱ་ཡ་ཝཱ་ཀ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ ཧཾ། ཞེས་སྐུ་གསུང་ཐུགས་རྡོ་རྗེར་བྱིན་གྱིས་བརླབས་པའི་རྟགས་སུ་སྤྱི་མགྲིན་སྙིང་གར་རྡོ་རྗེ་གསུམ་གྱི་ལྷས་རྒྱས་བཏབ་པར་གྱུར། ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདེན་པའི་བྱིན་གྱིས་བརླབས་ཀྱིས། འདུས་པ་ཆེན་པོའི་དཀྱིལ་འཁོར་གྱི་ལྷ་ཚོགས་རྣམས་ལ་ཡེ་ཤེས་ལྔ་དང་སྐུ་གསུང་ཐུགས་ཀྱི་དབང་བསྐུར་བས་ཉོན་མོངས་པ་ལྔ་དང་ཚོགས་བརྒྱད་ཡེ་ཤེས་ལྔར་དག་ཅིང་ཁམས་དྲུག་རྡོ་རྗེ་གསུམ་དུ་རྣམ་པར་དག་པའི་དབང་དམ་པ་བདག་དང་མཐའ་ཡས་པའི་སེམས་ཅན་ཐམས་ཅད་ཀྱིས་ཐོབ་པར་གྱུར་ཅིག །ཁྱད་པར་དུ་མངའ་གསོལ་བ་ལ་གསུམ་ལས། དང་པོ་གཟུགས་བྱེ་བྲག་ཏུ་མངའ་གསོལ་བ་ནི། ཡི་གེ་སོ་སོ་ལས་འོད་ཟེར་འཕྲོས་དེ་བཞིན་གཤེགས་པ་རྣམས་མཆོད་ཅིང་བྱིན་རླབས་བསྡུས། མ་དག་པའི་སྣང་བ་ཐམས་ཅད་སྦྱངས་ཚུར་འདུས་ཞི་ཁྲོའི་ལྷ་ཚོགས་རྣམས་ཀྱི་སྐུའི་ཆ་ཤས་སོ་སོ་ལ་ཐིམ་པས་རྣམ་པ་བྱེ་བྲག་པ་དེ་དང་དེ་གཟི་བྱིན་མཆོག་ཏུ་འབར་ཏེ་སྔར་ལས་ཁྱད་པར་དུ་སྤགས་པས་ལྟ་བས་ཆོག་མི་ཤེས་པར་བསམ་ཞིང་། འདི་དག་ཏིང་འཛིན་གྱིས་རྣམ་པ་བྱེ་བྲག་བ་བྱིན་གྱིས་བརླབས་ཏེ་མངའ་གསོལ་བ་ཡིན་པས་ཙཀ་ལི་མེད་ཀྱང་ཆོག་གོ། །ༀ་ཨཱཿཧཱུཾ། སྥ༴ སཾ༴ ལྷག་པ་གཟུགས་བརྙན་དཀྱིལ་འཁོར་ཆེན་པོ་ཡི། །བདེ་གཤེགས་སྐུ་ལ་དབུ་ཡིས་མངའ་གསོལ་བས། །རྣམ་པར་ཐར་པའི་དབུ་གསུམ་ཐོབ་ནས་ནི། །ཁམས་གསུམ་ཡོངས་སུ་དག་པའི་དོན་རྟོགས་ཤོག །ཧཱུཾ་ཨཱཿསྭཱ་ཨཱོཾ་ཧཱ་མཱུཾ། སྥ༴ སཾ༴ ལྷག་པ་གཟུགས་བརྙན་དཀྱིལ་འཁོར་ཆེན་པོ་ཡི། །བདེ་གཤེགས་སྐུ་ལ་ཕྱག་གིས་མངའ་གསོལ་བས། །ཡེ་ཤེས་དྲུག་གིས་འགྲོ་བའི་དོན་མཛད་ནས། །ཁམས་གསུམ་འགྲོ་དྲུག་རྩད་ནས་གཅོད་པར་ཤོག །ཛ་ཛ་ཛ་ཛཿ སྥ༴ སཾ༴ ལྷག་པ་གཟུགས་བརྙན་དཀྱིལ༴ བདེ་གཤེགས་སྐུ་ལ་ཞབས་ཀྱིས་མངའ་གསོལ་བས། །རྫུ་འཕྲུལ་རྐང་བཞིས་འགྲོ་དོན་མཐར་ཕྱིན་ནས། །བདུད་བཞི་མ་ལུས་ཟིལ་གྱིས་གནོན་པར་ཤོག །ཛ། སྥ༴ སཾ༴ ལྷག་པ་གཟུགས་བརྙན༴ བདེ་གཤེགས་སྐུ་ལ་དབུ་སྐྲས་མངའ༴ ཁྱབ་པ་ཐུགས་རྗེ་ཆེན་པོའི་ཕྲིན་ལས་ཀྱིས། །ལྟ་བ་མཐར་མི་ལྟུང་དང་ལྡན་པར་ཤོག །ར། སྥ༴ སཾ༴ ལྷག་པ་གཟུགས་བརྙན་དཀྱིལ་འཁོར༴ བདེ་གཤེགས་སྐུ་ལ་སྨིན་མས་མངའ༴ ཐབས་ཆེན་མང་ཞིང་མཁས་པའི་བྱིན་རླབས་ཀྱིས། །གདུལ་བྱའི་འཕྲོ་རྣམས་ཆུད་མི་གསོན་པར་ཤོག །ཨ་ཧྲི། སྥ༴ སཾ༴ ལྷག་པ་གཟུགས་བརྙན་དཀྱིལ༴ བདེ་གཤེགས་སྐུ་ལ་སྤྱན་གྱིས་མངའ༴ སྤྱན་ལྔ་མ་ལུས་ཡོངས་སུ་རྫོགས་ནས་ནི། །རྨོངས་པའི་རབ་རིབ་ཐམས་ཅད་དག་པར་ཤོག །ཨ། སྥ༴ སཾ༴ ལྷག་པ་གཟུགས་བརྙན་དཀྱིལ༴ བདེ་གཤེགས་སྐུ་ལ་ལྗགས་ཀྱིས་མངའ༴ སྒྲ་སྐད་བསམ་གྱིས་མི་ཁྱབ་བྱེ་བྲག་གིས། །གདུལ་བྱའི་སེམས་ཅན་ཐམས་ཅད་སྨིན་གྲོལ་ཤོག །ཀྵ། སྥ༴ སཾ༴ ལྷག་པ་གཟུགས་བརྙན་དཀྱིལ་འཁོར༴ བདེ་གཤེགས་སྐུ་ལ་མཆེ་བས་མངའ༴ སྐྱེ་ཤིའི་སྡུག་བསྔལ་རྩད་ནས་གཅོད་མཛད་ཅིང་། །སྒྲིབ་པ་ཐམས་ཅད་མ་ལུས་ཟད་བྱེད་ཤོག །ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། ཧཱུཾ་ༀ་སྭཱ་ཨཱཾ་ཧཱ། སྥ༴ སཾ༴ ལྷག་པ་གཟུགས་བརྙན༴ བདེ་གཤེགས་སྐུ་ལ་སྐུ་མདོག་མངའ༴ མི་འགྱུར་ཆོས་ཉིད་སྐྱོན་གྱིས་མ་གོས་དང་། །ཆེ་བའི་ཡོན་ཏན་སྤྱོད་ཅིང་མ་འགགས་པ། །སྣ་ཚོགས་རོལ་པའི་རྒྱན་དུ་ཤར་ནས་ནི། །ཕྲིན་ལས་ལྔ་པོ་ཡོངས་སུ་རྫོགས་གྱུར་ཅིག །ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། སྥ༴ སཾ༴ ལྷག་པ་གཟུགས་བརྙན་དཀྱིལ་འཁོར་ཆེན་པོ་ཡི། །བདེ་གཤེགས་སྐུ་ལ་ཕྱག་མཚན་མངའ་གསོལ་བས། །ཡེ་ཤེས་དྲུག་གིས་འགྲོ་དོན་ཡོངས་རྫོགས་ནས། །ཕྲིན་ལས་ཆེན་པོས་བསམ་པ་མཐར་ཕྱིན་ཤོག །ཁྱད་པར་ཁྲོ་བོ་ལ་ཡོན་ཏན་ཉི་ཤུ་ཕྲག་ལྔས་མངའ་གསོལ་བ་ལས། རོལ་པ་ཉི་ཤུ་ནི། ཧཱུཾ། སྥ༴ སཾ༴ རོལ་པ་ཉི་ཤུ་དཔལ་ཆེན་ཐུགས་ཀྱི་བདག །ཆོས་ཀྱི་འབྲུག་ཆར་རྔ་དང་དུང་ལ་སོགས། །མཆོད་གཟུངས་རྫས་དང་ཡེ་ཤེས་ཏིང་ངེ་འཛིན། །སྤྲུལ་པ་ཆོས་ཀྱི་རོ་དང་ལྡན་པར་ཤོག །ཆེ་བ་ཉི་ཤུ་ནི། ཏྲཾ། སྥ༴ སཾ༴ ཆེ་བ་ཉི་ཤུ་དཔལ་ཆེན་ཉིད་ལ་ལྡན། །འགྲན་ཟླ་མེད་པས་ཆེ་བཙན་ཉིད་དུ་འབྱུང་། །མི་ནུབ་གོ་བས་འདོད་པ་ཐམས་ཅད་རྫོགས། །ཀུན་ཏུ་མཛད་པས་འགྲོ་དྲུག་འདྲེན་པར་ཤོག །བརྗིད་ཉི་ཤུ་ནི། ས། སྥ༴ སཾ༴ བརྗིད་ཆེན་ཉི་ཤུ་དཔལ་ཆེན་ཉིད་ལ་ལྡན། །སྐུ་ཆེ་རྒྱན་ལྡན་བཀུར་འོས་ཡིད་དང་འཐད། མདངས་ཆེ་ཀུན་ལ་སྟོན་པའི་མཐའ་དང་བྲལ། །ཐུགས་རྗེ་ཐབས་ཀྱིས་འགྲོ་བ་འདྲེན་པར་ཤོག །རྔོ་མ་ཉི་ཤུ་ནི། ཤ། སྥ༴ སཾ༴ རྔོམ་ཆེན་ཉི་ཤུ་དཔལ་ཆེན་ཉིད་ལ་རྫོགས། །སྐུ་གསུང་ཐུགས་དང་མཐུན་པའི་ཡོན་ཏན་ལས། །ཞལ་ལྗགས་ཚེམས་དང་དབྱངས་དང་ཏིང་འཛིན་དང་། །ཕྲིན་ལས་ལ་སོགས་ཐམས་ཅད་འགྲུབ་པར་ཤོག །ཆོ་འཕྲུལ་ཉི་ཤུ་ནི། ཨེ། སྥ༴ སཾ༴ ཆོ་འཕྲུལ་ཉི་ཤུ་དཔལ་ཆེན་ཉིད་ལ་ལྡན། །ཆོས་ཉིད་ཐུགས་རྗེ་ཆོས་ཀུན་སྣང་བ་ཡི། །ཀུན་སྤྱོད་གོ་བས་ཅིར་ཡང་སྣང་བ་དང་། །གང་ལྟར་འཚམས་པར་འགྲོ་དྲུག་འདྲེན་པར་ཤོག །ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདེན་པའི་བྱིན་གྱིས་བརླབས་ཀྱིས། འདུས་པ་ཆེན་པོའི་ལྷ་ཚོགས་ལ་ཞི་ཁྲོའི་སྐུའི་རྣམ་པ་བྱེ་བྲག་པ་བཅུ་དང་ཁྲོ་བོའི་ཁྱད་པར་གྱི་ཡོན་ཏན་བརྒྱ་ཉི་ཤུས་མངའ་གསོལ་བས་ཇི་སྐད་སྨོས་པའི་ཡོན་ཏན་དེ་ཐམས་ཅད་བདག་དང་མཐའ་ཡས་པའི་སེམས་ཅད་ཐམས་ཅད་ཀྱིས་ཐོབ་པར་གྱུར་ཅིག །གཉིས་པ་མཛེས་པ་རྒྱན་གྱིས་མངའ་གསོལ་བ་ནི། སྟོང་པའི་ངང་ལས་ཡི་གེ་སོ་སོའི་འཕྲོ་འདུས་རྒྱན་ཆ་རྣམས་རང་རང་གི་ཕུན་སུམ་ཚོགས་པའི་ཡོན་ཏན་ཅན་དུ་གྱུར་བར་མོས་ལ། དངོས་སམ་ཙཀ་ལི་རྣམས་རིམ་པར་ཐོགས་ཏེ། ཧཱུཾ་ༀ་སྭཱ་ཨཱཾ་ཧཱཾ། སྥ༴ སཾ༴ ལྷག་པ་གཟུགས་བརྙན་དཀྱིལ་འཁོར་ཆེན་པོ་ཡི། །བདེ་གཤེགས་སྐུ་ལ་དབུ་རྒྱན་མངའ་གསོལ་བས། །རྣམ་པར་ཤེས་པའི་ཚོགས་བརྒྱད་གནས་དག་ནས། །ཡེ་ཤེས་ལྔ་ཡིས་འགྲོ་དོན་མཐར་ཕྱིན་ཤོག །ཧཱུཾ་ཧྲཱིཿ སྥ༴ སཾ༴ ལྷག་པ་གཟུགས་བརྙན༴ བདེ་གཤེགས་སྐུ་ལ་ཅོད་པན་མངའ༴ ཁམས་གསུམ་གདུག་པ་མ་ལུས་ཀུན་འདུལ་ཞིང་། །སྲིད་གསུམ་ཆོས་ཀྱི་རྒྱལ་པོ་བྱེད་པར་ཤོག །ཧོཿ སྥ༴ སཾ༴ ལྷག་པ་གཟུགས་བརྙན༴ བདེ་གཤེགས་སྐུ་ལ་རིན་ཆེན་སྙན་ཆ་དང་། །མགུར་ཆུའི་རྒྱན་གྱིས་ལེགས་པར་མངའ༴ རྫུ་འཕྲུལ་སྙན་གྱིས་མི་གཡོ་གས ན་པར་ཤོག །ཏྲཾ། སྥ༴ སཾ༴ ལྷག་པ་གཟུགས་བརྙན༴ བདེ་གཤེགས་སྐུ་ལ་དོ་ཤལ་མངའ༴ དོན་རྣམས་ཐམས་ཅད་རིག་པར་རྟོགས་ནས་ནི། །མི་བརྗེད་གཟུངས་དང་རྟག་ཏུ་ལྡན་པར་ཤོག །ཏྲཾ། སྥ༴ སཾ༴ ལྷག་པ་གཟུགས་བརྙན༴ བདེ་གཤེགས་སྐུ་ལ་སེ་མོ་དོ་ཡིས་ནི། །མངའ་གསོལ་ཕུལ་བས་མི་བརྗེད་གཟུངས་ཀྱི་སྒོ། །འབུམ་ཕྲག་རྫོགས་ནས་རྒྱ་ལག་ཕྲང་གྱུར་ཅིག །ས། སྥ༴ སཾ༴ ལྷག་པ་གཟུགས་བརྙན༴ བདེ་གཤེགས་སྐུ་ལ་དཔུང་རྒྱན་མངའ༴ མི་འཇིགས་བཞི་ཡི་ཏིང་འཛིན་ཐོབ་ནས་ནི། །རེ་དོགས་ཀུན་གྱི་མཐའ་དང་བྲལ་གྱུར་ཅིག །ས། སྥ༴ སཾ༴ ལྷག་པ་གཟུགས་བརྙན༴ བདེ་གཤེགས་སྐུ་ལ་གདུ་བུས་མངའ༴ ཚུལ་ཁྲིམས་རྣམ་དག་སྟོབས་བཅུ་ལྷུན་གྲུབ་ནས། །མཚན་མ་ཐམས་ཅད་ཟིལ་གྱིས་གནོན་པར་ཤོག །སུ། སྥ༴ །སཾ༴ ལྷག་པ་གཟུགས་བརྙན༴ བདེ་གཤེགས་སྐུ་ལ་སེམས་ཅན་ཆེན་པོ་ལྔའི། །གདན་ཁྲི་བརྗིད་བག་ལྡན་པས་མངའ། །ཆེ་བའི་ཡོན་ཏན་ལྔ་པོ་ལྷུན་གྲུབ་ནས། །ཀུན་གྱི་བཀུར་གནས་སངས་རྒྱས་ས་ཐོབ་ཤོག །སེམས་ཅན་ལྔ་ནི་ཞི་བ་ལ་སེང་གེ་སོགས་དང་ཁྲོ་བོ་ལ་ཁྱུ་མཆོག་སོགས་ལྔའོ། །ཨ་མ་པ། སྥ །སཾ༴ ལྷག་པ་གཟུགས་བརྙན༴ བདེ་གཤེགས་སྐུ་ལ་ཉི་ཟླ་པདྨ་ཡིས། །མངའ་གསོལ་ཕུལ་བས་ཐུགས་རྗེས་ཀུན་ཁྱབ་ནས། །ལྟ་ངན་སེལ་ཞིང་ཆགས་མེད་སྤྱོད་པར་ཤོག །ཏྲཾ། སྥ༴ སཾ༴ ལྷག་པ་གཟུགས་བརྙན༴ བདེ་གཤེགས་སྐུ་ལ་རིན་ཆེན་ཁྲི་རྐང་གི །གདན་ཁྲི་མཛོད་མིག་བདུན་པས་མངའ༴ འགྲོ་བའི་རེ་འདོད་ཡིད་བཞིན་སྐོང་བར་ཤོག །ར། སྥ༴ སཾ༴ ལྷག་པ་གཟུགས་བརྙན༴ བདེ་གཤེགས་སྐུ་ལ་འོད་ཟེར་མངའ༴ བསམ་མི་ཁྱབ་པའི་ཡེ་ཤེས་རང་གསལ་ནས། །སྤྲོས་པའི་མཐའ་རྣམས་ཡོངས་སུ་བྲལ་གྱུར་ཅིག །ས་ས་ས་ས་ས། སྥ༴ སཾ༴ ལྷག་པ་གཟུགས་བརྙན་དཀྱིལ༴ བདེ་གཤེགས་སྐུ་ལ་དར་གྱི་ཆས་གོས་ལྔས། །མངའ་གསོལ་ཕུལ་བས་འགྲོ་བ་ཐམས་ཅད་ཀྱི། །ཉོན་མོངས་གདུང་བ་མ་ལུས་སེལ་བར་ཤོག །ཁྱད་པར་ཁྲོ་བོ་ལ། ཧཱུཾ་ཧཱུཾ་ཧཱུཾ། སྥ༴ སཾ༴ ལྷག་པ་གཟུགས་བརྙན༴ དཔལ་ཆེན་སྐུ་ལ་ཀོ་རློན་གོས་ཕུལ་བས། །གཡང་གཞི་ཁྱབ་པའི་ཐུགས་རྗེས་འགྲོ་བ་འདུལ། །གླང་ཀོ་སྟོངས་བཅུས་སྡུག་བསྔལ་ཟིལ་གནོན་ཅིང་། །སྟག་ཤམ་མི་འཇིགས་རྣམ་བཞིས་བདུད་འཇོམས་ཤོག །ཧཱུཾ་ཧཱུཾ་ཧཱུཾ། སྥ༴ སཾ༴ ལྷག་པ་གཟུགས་བརྙན༴ དཔལ་ཆེན་སྐུ་ལ་བྱུག་རྩི་གསུམ་ཕུལ་བས། །དུག་གསུམ་རང་གྲོལ་སྐུ་གསུམ་དོན་མཛད་པ། །བདག་དང་མཐའ་ཡས་འགྲོ་བས་ཐོབ་པར་ཤོག །ཐོད་པ་ལ། ༀ་ཨཱཿ་ཧཱུཾ། སྦྲུལ་ལ། ཧཱུཾ་སྥ༴ སཾ༴ ལྷག་པ་གཟུགས་བརྙན༴ དཔལ་ཆེན་སྐུ་ལ་གདགས་པའི་རྒྱན་ཕུལ་བས། །ཐོད་ཕྲེང་ཐུགས་རྗེ་མི་བརྗེད་གཟུངས་ཐོབ་ཅིང་། །སྦྲུལ་ཆུན་ཞེ་སྡང་ཡེ་ཤེས་ཆེན་པོར་ཤོག །ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདེན་པའི་བྱིན་གྱིས་བརླབས་ཀྱིས། འདུས་པ་ཆེན་པོའི་ལྷ་ཚོགས་ལ་མཛེས་པ་རྒྱན་གྱིས་མངའ་གསོལ་བས་ཇི་སྐད་སྨོས་པའི་ཡོན་ཏན་དེ་ཐམས་ཅད་བདག་དང་མཐའ་ཡས་པའི་སེམས་ཅན་ཐམས་ཅད་ཀྱིས་ཐོབ་པར་གྱུར་ཅིག །གསུམ་པ་ཆེ་བའི་ལོངས་སྤྱོད་ཕུན་སུམ་ཚོགས་པས་མངའ་གསོལ་བ་ནི། ས་ཧཾ་ཧཱུཾ་ས་ཧཱུཾ། སྥ༴ སཾ༴ གཟི་བྱིན་ཁྱད་པར་འཕགས་པའི་དཀྱིལ་འཁོར་ལས། །ལྷ་རྫས་ལས་བྱུང་གདུགས་འཕན་རྒྱལ་མཚན་དང་། །བླ་རེ་ཡོལ་བ་ལྷབ་ལྷུབ་རྒྱན་ཕུལ་བས། །ལོག་པར་ལྟ་བ་མཐའ་དག་ཡོངས་དག་ནས། །འབར་བའི་རྒྱལ་པོ་ཐུབ་མེད་འགྲུབ་པར་ཤོག །ས། སྥ༴ སཾ༴ འབྲས་བུ་མཐའ་ཡས་ཀུན་ལ་མངའ་བརྙེས་པ། །བདེ་གཤེགས་སྐུ་ལ་མཎྜལ་འདི་ཕུལ་བས། །འཕགས་པའི་ནོར་གྱིས་དབུལ་བ་ཀུན་བྲལ་ནས། །ཏིང་འཛིན་འབུམ་ཕྲག་ཡོངས་སུ་རྫོགས་པར་ཤོག །ས། སྥ༴ སཾ༴ འབྲས་བུ་མཐའ་ཡས་ཀུན་ལ་མངའ་བརྙེས་པ། བདེ་གཤེགས་སྐུ་ལ་ཡུལ་མཁར་འདི་ཕུལ་བས། །ཡུལ་སྣང་འཛིན་པའི་འཆིང་བ་ཀུན་བྲལ་ནས། །འཕགས་པའི་ཞིང་ཁམས་རྣམ་དག་ཐོབ་པར་ཤོག །ཧྲི། སྥ༴ སཾ༴ བདེ་གཤེགས་སྐུ་ལ་བུ་དང་ཆུང་མ་དང་། །བྲན་དང་བཞོན་པ་ལ་སོགས་གཅེས་དགུ་ཀུན། །ཕུལ་བས་ལོག་པར་ལྟ་བ་ཡོངས་སྤངས་ནས། །གདུལ་བྱའི་ཁ་ལོ་སྒྱུར་ལ་དབང་ཐོབ་ཤོག །ན་མོ། ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདེན་པའི་བྱིན་གྱིས་བརླབས་ཀྱིས། འདུས་པ་ཆེན་པོའི་ལྷ་ཚོགས་ལ་ཆེ་བའི་ལོངས་སྤྱོད་ཕུན་སུམ་ཚོགས་པས་མངའ་གསོལ་བས་ཇི་སྐད་སྨོས་པའི་ཡོན་ཏན་དེ་ཐམས་ཅད་བདག་དང་མཐའ་ཡས་པའི་སེམས་ཅན་ཐམས་ཅད་ཀྱིས་ཐོབ་པར་གྱུར་ཅིག །དྲུག་པ་མཆོད་པ ས་མཉེས་པ་ཡོངས་སུ་བཟུང་བར་མངའ་དབུལ་བ་ལ་གསུམ་ལས། དང་པོ་ཕྱག་ནི། ༀ་སརྦ་ཏ་ཐཱ་ག་ཏ་ས ཏྭ་བནྡྷ་ནཱཾ་ཀ་རོ་མི། ཨ་ཏི་པུ་ཧོཿ །པྲ་ཏི་པུ་ཧོཿ ལྷག་པ་གཟུགས་བརྙན་དཀྱིལ་འཁོར་ཆེན་པོ་ཡིས། །བདེ་གཤེགས་སྐུ་ལ་ཕྱག་གིས་མངའ་གསོལ་བས། །ལྷ་དང་བདག་ཉིད་གཉིས་སུ་མེད་རྟོགས་པའི། །དོན་དང་མཇལ་བའི་འབྲས་བུ་ཐོབ་པར་ཤོག །གཉིས་པ་མཆོད་པ་དངོས་ལ། ཕྱག་རྒྱ་ནི། བདེ་གཤེགས་ཞི་ཁྲོ་གར་ལ་དགྱེས། །སྐུ་མདོག་ཞལ་ནི་རྣམ་པར་འགྱུར། །སྐུ་ཡི་གར་སྟབས་གློག་འགྱུ་བ། །ཕྱག་རྒྱ་གར་གྱི་མཆོད་པ་འབུལ། །གར་བསྐོར་སྔོན་དུ་འགྲོ་བས། ཧཱུཾ་ༀ་སྭཱ་ཨཱཾ་ཧཱ་ལ་མཉམ་བཞག་དང་། ཧཱུཾ་ཧ་ཧེ་ཕཊ་ལ་སྙིང་གར་ཁུ་ཚུར་གཡོན་གྱེན་བསྟན་སྟེང་གཡས་ནང་བསྟན་སྤྲད་དེ། གཉིས་ཀའི་མཐར། མ་ཧཱ་མུ་དྲ་ཧཱུཾ། ཞེས་གཡོན་ཕྱོགས་སུ་སེ་གོལ་གྱིས་འགྲོལ་ལོ། །ལྷག་པ་གཟུགས་བརྙན་དཀྱིལ་འཁོར་ཆེན་པོ་ཡི། །བདེ་གཤེགས་སྐུ་ལ་ཕྱག་རྒྱ་གར་ཕུལ་བས། །མི་འདའ་དམ་ཚིག་ཕྲིན་ལས་རོལ་པ་ཡིས། །ཕྱག་རྒྱ་བཞི་དོན་ཡོངས་སུ་མི་འདའ་ཤོག །ཕྱི་ཀུན་བཟང་དང་རྣམ་ལྔའི་མཆོད་པ་ནི། ལྷག་པ་གཟུགས་བརྙན་དཀྱིལ་འཁོར་ལྷ་ཚོགས་ལ། །སྣང་སྲིད་ཀུན་བཟང་མཆོད་སྤྲིན་འདི་ཕུལ་བས། །སྤྱོད་ཡུལ་ཡོངས་དག་ལྷ་དང་དབྱེར་མེད་པའི། །དོན་རྟོགས་ཀུན་ནས་ཀུན་ཏུ་བཟང་པོར་ཤོག །ༀ་ན་མཿསརྦ་ཏ་ཐཱ་ག་ཏེ་བྷྱོ་སོགས། རང་བཞིན་སྤྲོས་བྲལ་ཆོས་སྐུ་རྣམ་དག་ཀྱང་། །སྲི་ཞུ་གུས་པས་ཨརྒྷཾ་འདི་ཕུལ་བས། །ཕྱི་ནང་བྱང་ཆུབ་སེམས་སུ་རྣམ་དག་ཅིང་། །བསོད་ནམས་མི་ཟད་གཏེར་གྱི་ཕུལ་གྱུར་ཤོག །ༀ་ཨཱཿཧ་ར་སོགས། མཆོག་ཏུ་རྣམ་པར་དག་པའི་སྐུ་མངའ་བའི། །སངས་རྒྱས་སྐུ་ལ་བདུག་པ་འདི་ཕུལ་བས། །དམ་ཚིག་སྡོམ་པའི་ཉེས་པ་ཀུན་བྲལ་ནས། །ཡེ་ཤེས་ཐུགས་རྗེས་མ་ལུས་སྐྱོབ་པར་ཤོག །ༀ་ཤྲཱི་བཛྲ་རཱ་ག་དྷཱུ་པེ་དྷཱུ། ཡོན་ཏན་ལྷུན་རྫོགས་སངས་རྒྱས་སྐུ་གཟུགས་ལ། །རིན་ཆེན་མཛེས་པའི་མེ་ཏོག་འདི་དོར་བས། །ལོག་ལྟའི་ཉོན་མོངས་ཐ་བ་ཀུན་བྲལ་ཏེ། །ལྟ་བས་མི་ངོམ་མཛེས་པའི་སྐུ་ཐོབ་ཤོག །ༀ་ཤྲཱི་བཛྲ་རཱ་ག་པུཥྤེ་པུ། །རང་རིག་ཐམས་ཅད་མཁྱེན་པའི་ཡེ་ཤེས་ལ། །མུན་པ་སྣང་བྱེད་མར་མེ་འདི་གཏམས་པས། །མ་རིག་འཐིབས་པོའི་མུན་པ་ཀུན་བསལ་ནས། །སངས་རྒྱས་ལ་སོགས་སྤྱན་ལྔ་ཐོབ་པར་ཤོག །ཨཱ་ལོ་ཀེ་ཧྲཱིཿ སྙིགས་མ་ལྔ་ཉིད་འབྲས་བུར་ཡོངས་རྫོགས་པའི། །རྒྱལ་བའི་སྐུ་ལ་དྲི་ཆབ་འདི་ཕུལ་བས། །གདུང་བའི་ཟུག་རྡུ་མྱ་ངན་ཀུན་བྲལ་ནས། །འོད་ཟེར་མཐའ་ཡས་འགྱེད་པའི་སྐུ་ཐོབ་ཤོག །གནྡྷེ་གན། ནང་དམ་རྫས་གསུམ་དང་ལྷག་ཏིང་གི་མཆོད་པ་ནི། ཡེ་ཤེས་སྐུ་མངའ་ལྷུན་གྱིས་གྲུབ་པ་ཡི། །རྒྱལ་བའི་སྐུ་ལ་བདུད་རྩིས་མངའ་ཕུལ་བས། །དུག་ལྔ་གདོད་ནས་ཡེ་ཤེས་ལྔར་དག་པའི། །སྐུ་དང་ཡེ་ཤེས་ལྷུན་གྱིས་གྲུབ་པར་ཤོག །ༀ་སརྦ་ཏ་ཐཱ་ག་ཏ་མ་ཧཱ་པཉྩ་ཨ་མྲྀ་ཏ་ཁ་རཾ་ཁཱ་ཧི། ཆོས་རྣམས་ལོངས་སྤྱོད་ཡོངས་སུ་དག་པ་ཡིས། །རྒྱལ་བའི་སྐུ་ལ་གཏོར་མ་འདི་ཕུལ་བས། །རྫས་སུ་སྤྱོད་པའི་གདུང་བ་ཀུན་བྲལ་ནས། །གསང་བའི་ལོངས་སྤྱོད་ཡོངས་སུ་རྫོགས་པར་ཤོག །ༀ་སརྦ་ཏ་ཐཱ་ག་ཏ་མ་ཧཱ་བ་ལིཾ་ཏ་ཁ་རཾ་ཁཱ་ཧི། འཁོར་བའི་རྩ་བ་འདོད་ཆགས་ཞེ་སྡང་དང་། །གཏི་མུག་རང་གྲོལ་རཀྟ་འདི་ཕུལ་བས། ཁམས་གསུམ་བག་ཆགས་གཏིང་ནས་ཟད་གྱུར་ཏེ། །ཐུགས་རྗེ་ཆགས་པས་འགྲོ་ཀུན་སྒྲོལ་བར་ཤོག །ༀ་ཤྲཱི་ཧེ་རུ་ཀ་མ་ཧཱ་རཀྟ་པྲ་ཏཱི་ཙྪ་ཁཱ་ཧི། བདེ་གཤེགས་སྐུ་ལ་ལྷག་པ་ཏིང་འཛིན་གྱི། །མཆོད་པའི་བྲེ་བྲག་བསམ་མི་ཁྱབ་ཕུལ་བས། །ཕྱི་ནང་གསང་དོན་མ་ལུས་ཀུན་རྫོགས་ཏེ། །རྒྱལ་བའི་སྐུ་གསུང་ཐུགས་ཀྱི་རྒྱུད་མཉེས་ནས། །འབྲས་བུ་མཐའ་ཡས་ཀུན་ལ་ལོངས་སྤྱོད་ཤོག །གསང་བ་དུག་གསུམ་གྱི་མཆོད་པ་ལས། ཞེ་སྡང་བསྒྲལ་མཆོད་ནི། ཡེ་ཤེས་སྤྱོད་ཡུལ་ཡོངས་སུ་དག་པ་ཡི། །རྒྱལ་བའ ི་སྐུ་ལ་ཏ་ན་འདི་ཕུལ་བས། ཁམས་གསུམ་དུག་གསུམ་རྩད་ནས་དག་གྱུར་ཏེ། །སྐུ་གསུམ་ལྷུན་གྲུབ་ཞིང་ཁམས་དག་པར་ཤོག །ༀ་སརྦ་ཏ་ཐཱ་ག་ཏ་ཏ་ན་པཱུ་ཛ་ཧོཿ འདོད་ཆགས་སྦྱོར་མཆོད་ནི། ཐབས་དང་ཤེས་རབ་འདུ་འབྲལ་མེད་པ་ཡིས། །བདེ་ཆེན་སྐུ་ལ་ག་ན་འདི་ཕུལ་བས། །སྤྱོད་ཡུལ་བྱང་ཆུབ་སེམས་སུ་རྣམ་དག་སྟེ། །མཐའ་ཡས་སྙོམས་པར་འཇུག་པ་ཐོབ་པར་ཤོག །ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱ་ཏྨ་ཀོ྅ ཧཾ། གཏི་མུག་འདོད་ཡོན་རོ་མཉམ་གྱི་མཆོད་པ་ནི། །མཐའ་ཡས་ལྷན་དང་འབྲལ་བ་མེད་པ་ཡི། །གཉིས་མེད་སྐུ་ལ་འདོད་ཡོན་ལྔ་ཕུལ་བས། །མཐའ་ལ་ཞེན་པའི་གདུང་བ་ཀུན་བྲལ་ནས། །བདེ་བ་ཆེན་པོའི་ཐབས་རྣམས་རྫོགས་པར་ཤོག །ཨ་ལ་ལ་ཧོཿ གླུ་གར་རོལ་མོ་ཡེ་ཤེས་ཀྱི་མཆོད་པ་ནི། གླུ་དབྱངས་ཚིགས་སུ་བཅད་པ་དང་། །གར་སྟབས་རོལ་མོ་ངེས་སྦྱར་ནས། །རྒྱལ་བའི་དཀྱིལ་འཁོར་མཆོད་པར་བགྱི། །སྤྱོད་ཡུལ་ཡོངས་སུ་དག་པར་ཤོག །མ་ཧཱ་པཱུ་ཛ་ཧོཿ ཆོགས་ཀྱི་མཆོད་པ་ནི། སྒྲུབ་ཐབས་ལྟར་སྐབས་འདིར་བྱ་ཞིང་། རྒྱས་པའི་སྦྱིན་སྲེག་སྔར་སྦྱོར་བའི་སྐབས་མ་ཁོམ་ན་འདིར་བྱས་ཀྱང་མི་འགལ་ལོ། །ཡོངས་སུ་སྨིན་པ་ཕུན་སུམ་ཚོགས་པ་ཡི། །བདེ་གཤེགས་སྐུ་ལ་ཚོགས་མཆོད་འདི་ཕུལ་བས། །རྫས་སུ་སྤྱོད་པའི་གདུང་བ་ཀུན་བྲལ་ནས། །གསང་བའི་ལོངས་སྤྱོད་ཡོངས་སུ་རྫོགས་པར་ཤོག །གསུམ་པ་བསྟོད་པ་ནི། བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོང་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེ་རོལ་པའི་ལྷ། །ཞི་ཁྲོ་སྤྲུལ་པའི་སྐུ་ལ་ཕྱག་འཚལ་བསྟོད། །ལྷག་པ་གཟུགས་བརྙན་དཀྱིལ་འཁོར་ཆེན་པོ་ཡི། །ཞི་ཁྲོའི་ལྷ་ཚོགས་ཆེ་བའི་ཡོན་ཏན་ལ། །དད་ཅིང་གུས་པའི་བསྟོད་པ་འདི་ཕུལ་བས། །སྐུ་དང་ཡེ་ཤེས་ཡོན་ཏན་མཐར་ཕྱིན་ཤོག །ན་མོ། ཕྱོས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཀྱི་བདེན་པའི་བྱིན་གྱིས་བརླབས་ཀྱིས། འདུས་པ་ཆེན་པོའི་ལྷ་ཚོགས་ལ་ཕྱག་མཆོད་བསྟོད་པས་མཉེས་པ་ཡོངས་སུ་བཟུང་བར་མངའ་གསོལ་བས་ཇི་སྐད་སྨོས་པའི་ཡོན་ཏན་དེ་ཐམས་ཅད་བདག་དང་མཐའ་ཡས་པའི་སེམས་ཅན་ཐམས་ཅད་ཀྱིས་ཐོབ་པར་གྱུར་ཅིག །བདུན་པ་བདེན་པས་བྱིན་གྱིས་བརླབ་ཅིང་བ རྟན་པར་བཞུགས་སུ་གསོལ་བ་ནི། སླར་ཡང་ཀུན་བཟང་ཞབས་བསིལ་བཞི་བསྣོལ་གྱིས་མཆོད་པ་སྔོན་དུ་འགྲོ་བས། རྟེན་སྙིང་བཟླས་པའི་དྲི་ཞིམ་པོའི་ཆུས་རླན་པའི་མེ་ཏོག་དང་བཅས་པས་ཐལ་མོ་སྙིང་གར་སྦྱར་ཏེ། ན་མོ། དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་གྱི་བཀའ་བདེན་པ་དང་། ཆོས་ཉིད་རྣམ་པར་དག་པའི་བདེན་པ་དང་། ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། བཅོམ་ལྡན་འདས་བདེ་གཤེགས་ཞི་ཁྲོ་རབ་འབྱམས་ཚོགས་ཆེན་འདུས་པའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བདེན་པ་དང་། སྤྲུལ་པ་ཡང་སྤྲུལ་ཕྱག་བརྙན་དང་བཅས་པ་རྣམས་ཀྱི་བདེན་པ་དང་། ཁྱད་པར་རྒྱལ་བས་གསུངས་པའི་ཆོ་གའི་ལས་རིམ་རྣམས་པར་དག་པ་བསྒྲུབས་པའི་བདེན་པ་དང་། བདེན་པ་ཆེན་པོའི་བྱིན་གྱིས་བརླབས་ཀྱིས་ལྷག་པ་གཟུགས་བརྙན་གྱི་དཀྱིལ་འཁོར་ཆེན་པོའི་རྟེན་དང་ཡོ་བྱད་འདི་རྣམས་ལ་སྔགས་དང་ཕྱག་རྒྱ་དང་ཏིང་ངེ་འཛིན་གྱི་སྒོ་ནས་རབ་ཏུ་གནས་པར་བྱས་པས། །འདུས་པ་ཆེན་པོའི་དཀྱིལ་འཁོར་གྱི་རྟེན་ཡོ་བྱད་དང་བཅས་པ་འདི་དག་དུས་འདི་ནས་བཟུང་སྟེ་ཇི་སྲིད། །རས་བྲིས་ཡིན་ན། འབྱུང་བ་བཞིའི་གནོད་པས་མ་ཞིག་གི་བར་དུ་ཞེས་དང་། རྡུལ་ཚོན་ཡིན་ན། གཤེགས་གསོལ་གྱི་ཆོ་ག་མ་བྱས་ཀྱི་བར་དུ་ཞེའམ། འདོད་པའི་དོན་ཡོངས་སུ་མ་རྫོགས་ཀྱི་བར་དུ་བདག་དང་སེམས་ཅན་ཐམས་ཅད་ཀྱི་བསོད་ནམས་དག་པའི་རྟེན་དུ་བརྟན་པར་བཞུགས་ནས་སེམས་ཅན་གྱི་དོན་དཔག་ཏུ་མེད་པ་མཛད་དུ་གསོལ། ༀ་སརྦ་ཏ་ཐཱ་ག་ཏ་ཀཱ་ཡ་ཝཱ་ག་ཙིཏྟ་ཏིཥྛ་བཛྲ། ཞེས་མེ་ཏོག་གཏོར་ཞིང་ལན་གསུམ་བཟླའོ། །གསུམ་པ་རྗེས་ཆོག་ནི། དཔོན་སློབ་ཐམས་ཅད་ཀྱི་ལག་ཏུ་མེ་ཏོག་ཐོགས་ལ། བླ་མ་དང་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་མ་ལུས་ཤིང་ལུས་པ་མེད་པ་ཐམས་ཅད་ལ་མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་ཕྲིན་ལས་ངོ་མཚར་ཆེན་པོ་གྲངས་མེད་བསམ་གྱིས་མི་ཁྱབ་པ་མངའ་བའི་བདེན་པའི་བྱིན་རླབས་དང་། བདག་གིས་སེམས་ཅན་ཐམས་ཅད་ཁྱད་པར་རྡོ་རྗེའི་སློབ་མ་འདི་རྣམས་ཀྱི་དོན་དུ་ལྷག་པ་གཟུགས་བརྙན་གྱི་དཀྱིལ་འཁོར་ཡོ་བྱད་དང་བཅས་པ་རབ་ཏུ་གནས་པར་བྱས་པའི་མཐུས། སངས་རྒྱས་ཀྱི་བསྟན་པ་དར་ཞིང་རྒྱས་པ་དང་། བསྟན་འཛིན་གྱི་སྐྱེས་བུ་ཐམས་ཅད་སྐུ་ཚེ་བརྟན་ཞིང་ཐུགས་ཀྱི་བཞེད་པའི་དོན་ལྷུན་གྱིས་གྲུབ་པ་དང་། འཇིག་རྟེན་གྱི་ཁམས་ཀུན་ཏུ་ནད་མུག་འཁྲུད་རྩོད་སོགས་མི་མཐུན་པའི་ཕྱོགས་ཐམས་ཅད་ཞི་ཞིང་། ཆར་ཆུ་དུས་སུ་འབེབས་པ་དང་། ལོ་ཕྱུགས་རྟག་ཏུ་ལེགས་པ་དང་། ཚེ་རིང་ཞིང་ནད་མ་མཆིས་པ་དང་། འཁོར་དང་ལོངས་སྤྱོད་ཐམས་ཅད་མཐུན་ཞིང་འབྱོར་བས་སེམས་ཅན་ཐམས་ཅད་བདེ་སྐྱིད་ཕུན་སུམ་ཚོགས་པའི་སྐལ་བ་དང་ལྡན་པར་གྱུར་ཏེ། སྒྲིབ་གཉིས་བག་ཆགས་དང་བཅས་པ་དག་ནས་བསོད་ནམས་དང་ཡེ་ཤེས་ཀྱི་ཚོགས་མཐར་ཕྱིན་ཏེ། བླ་ན་མེད་པ་བྱང་ཆུབ་ཀྱི་འབྲས་བུ་མྱུར་དུ་ཐོབ་པར་གྱུར་ཅིག །ཅེས་དང་། ཡེ་དྷརྨཱ་བཟླ་ཞིང་མེ་ཏོག་འཐོར་བ་དང་བཅས་ཏེ་རོལ་མོ་སྣ་ཚོགས་པའི་སྒྲ་སྦྱར། དེའི་དུས་སུ་ཡོན་བདག་གིས་རྟེན་ལ་བསྐོར་བ་བྱ་ཞིང་ཕྱག་བྱས་ཏེ་སྨོན་ལམ་གདབ་བོ། །གལ་ཏེ་རས་བྲིས་ལྟ་བུ་ལ་རབ་གནས་རྐྱང་ཆོག་བྱེད་ཚེ། །སྲུང་མ་རྣམས་ལ་མཆོད་གཏོར་ཕུལ་ཏེ་སངས་རྒྱས་ཀྱི་བསྟན་པ་ཇི་སྲིད་གནས་ཀྱི་བར་དེ་སྲིད་རྟེན་འདི་ལེགས་པར་སྲུངས་ཤིག །ཅེས་སྲུང་མ་བསྒོ་བ་དང་། བཟོད་གསོལ་དགའ་སྟོན་ཡོན་འབུལ་ལ་སོགས་རྗེས་ཆོག་ལྟར་གཞན་རྣམས་སྤྱི་ལྟར་བྱ་ཞིང་། རྡུལ་ཚོན་དུ་མ་ཟད་རས་བྲིས་ཀྱི་ཕྱོགས་ལའང་དབང་དང་འབྲེལ་ཚེ་མ་བྱས་ཀྱང་ཆོག་གོ། །གང་ལྟར་ཡང་མཐར་བཀྲ་ཤིས་རྒྱ་ཆེར་བརྗོད་པར་བྱའོ། ༈ །གཉིས་པ་འབྲིང་པོའི་ཆོ་ག་ནི། རབ་གནས་བྱ་བའི་གཞིར་གུ་གུལ་གྱི་དུད་པས་བདུག་ཅིང་ཞེ་སྡང་རྡོ་རྗེའི་ང་རྒྱལ་བརྟན་པོས་དྲག་སྔགས་ཀྱིས་བགེགས་བསྐྲད། ཇི་ལྟར་བལྟམས་པ་སོགས་ཀྱི་མཐར། ཨ་བྷི་ཥི་ཀཱའི་སྔགས་སྦྱར་ནས་ལས་བུམ་གྱི་ཆུས་ཁྲུས་གསོལ་ལ། ཀཱ་ཡ་བི་ཤོའི་སྔགས་ཀྱིས་སྐུ་འཕྱི། དེ་ནས་རྟེན་བསྐྱེད་པ་དང་། ཡེ་ཤེས་པ་སྤྱན་དྲང་ཞིང་སྟིམ་པ་སྔར་ལྟར་དང་། དབང་པོའི་སྐྱོན་བསལ་ལས་སྤྱན་དབྱེ་བ་ཙམ་བྱས་རྗེས་རྣམ་བུམ་གྱིས་དབང་བསྐུར་ཞིང་མཆོད་བསྟོད་ཀྱིས་མངའ་དབུལ་ནས། བདེན་སྟོབས་ཀྱིས་བརྟན་བཞུགས་བྱས་མཐར་བཀྲ་ཤིས་ཀྱི་ཚིགས་བཅད་དང་རྟེན་འབྲེལ་སྙིང་པོ་བཟླ་ཞིང་མེ་ཏོག་འཐོར་བ་རྣམས་བྱའོ། ༈ །གསུམ་པ་བསྡུས་པའི་ཆོ་ག་ནི། དཀྱིལ་འཁོར་དུ་སྐད་ཅིག་གིས་བསྐྱེད་ཅིང་ཡེ་ཤེས་པ་སྤྱན་དྲངས་ཏེ་བསྟིམས་ནས། རྟེན་འབྲེལ་སྙིང་པོ་བཟླ་ཞིང་མེ་ཏོག་འཐོར་ལ་ཡི་གེ་འབྲུ་གསུམ་གྱིས་བརྟན་པར་བྱའོ། ༈ །གལ་ཏེ་ཆོ་ག་འདིའི་སྒོ་ནས་རྟེན་གསུམ་སོ་སོ་ལ་རབ་གནས་བྱེད་པར་སྤྲོ་ན། གཞན་འདྲ་བ་ལས། རྟེན་བསྐྱེད་ཀྱི་ཚེ། རྟེན་གང་ཡིན་ཀྱང་སྤྱིར་འདུས་པ་ཆེན་པོའི་དཀྱིལ་འཁོར་དུ་བསྐྱེད་པའམ། བྱེ་བྲག་ཏུ། སྐུ་གཟུགས་རྣམས་རང་རང་གི་རྣམ་པ་ཇི་ལྟ་བའམ། ཡང་ན་སྐུ་གཟུགས་མཆོད་རྟེ་གཙུག་ལག་ཁང་སོགས་སྐུ་རྟེན་ཕལ་ཆེར་རྣམ་སྣང་། གླེགས་བམ་སོགས་གསུང་རྟེན་རྣམས་སྣང་བ་མཐའ་ཡས་སམ་ཡུམ་ཤེར་ཕྱིན་མ། རྡོ་རྗེ་དང་འཁོར་ལོ་སོགས་ཐུགས་རྟེན་ཕྱག་མཚན་རྣམས་མི་བསྐྱོད་པར་བསྐྱེད་ལ། སྤྱན་འདྲེན་སོགས་ཚིག་གི་འབྱིན་འཇུག་སྒྱུར་ལུགས་དང་། རྒྱན་ཅན་རྒྱན་མེད་ཀྱི་ཁྱད་པར་གྱི་ཡོ་བྱད་དང་། ཕྱི་ནང་གསང་བའི་མཆོད་པ་སོགས་སྐབས་ཐོབ་མ་འདྲེས་ཤིང་། གླེགས་བམ་དང་མཆོད་རྟེན་སོགས་ལ་རྒྱན་འབུལ་བྱེ་བྲག་པ་བསྣན་པ་སོགས་སྟོབ་ཚུལ་གྱི་གནད་ཤེས་པར་བྱས་ནས། དབང་གི་རྗེས་སུ་སྐུ་གཟུགས་སྔར་རང་རང་དུ་བསྐྱེད་པ་རྣམས་མ་གཏོགས་གཞན་རྣམས་སོ་སོའི་སྔགས་བཟླས་པས་རང་གཟུགས་སུ་བསྒྱུར་བ་རྣམས་ཁྱད་པར་རོ། །དེ་ལྟར་རབ་ཏུ་གནས་པའི་ཕན་ཡོན་ནི། རྔམ་གློག་ལས། དཀྱིལ་འཁོར་ལ་སོགས་གང་བྱས་ཀྱང་། །རབ་གནས་ཡེ་ཤེས་མི་ལྡན་ན། །ཚོགས་དང་འབྲི་བའི་ནུས་པ་མེད། །ཅེས་དང་། གསང་སྙིང་ལས། ས་ལ་སོགས་ལ་ཕྱག་རྒྱར་བྱས། །རྣམ་གྲོལ་རིམ་པ་ཐོབ་འགྱུར་ན། །དག་པའི་ཡེ་ཤེས་ཀྱིས་སྦྱངས་པས། །སྨོས་ཅི་དགོས་ཏེ་དེ་ཉིད་ཡིན། །ཞེས་གསུངས་སོ། །བླ་མའི་གསུང་ངག་ཆུ་ཀླུང་རྒྱུན། ཤེར་དབང་འཇུག་ངོགས་བདེ་བ་ལས། །ལེགས་བཤད་ཆོས་དབྱངས་ལྷུང་ལྷུང་སྒྲར། སྐལ་བཟང་རྣ་བའི་དཔལ་དུ་བབས། །དཀྱིལ་འཁོར་གྱི་རབ་གནས་ཕྱི་དང་ནང་གི་ཆོ་ག་སོ་སོར་བཤད་པའི་ལེ་ཚན་ནོ།། །།

༈ ༀ་སྭ་སྟི། རང་རིག་ཡེ་ཤེས་མེ་དཔུང་གིས། །བཟུང་འཛིན་བུད་ཤིང་ཀུན་བསྲེགས་ནས། །འགྱུར་མེད་བདེ་ཆེན་མཆོག་བརྙེས་པ། །རྡོ་རྗེ་འཆང་དབང་བླ་མར་འདུད། །ལྷུན་གྱིས་གྲུབ་པའི་ཕྲིན་ལས་ཀྱིས། །གདུལ་བྱ་འདུལ་ཐབས་རྨད་བྱུང་བ། །ཡོ་གའི་ཞི་རྐྱང་འདུས་པ་མདོའི། །ལས་བཞིའི་སྦྱིན་སྲེག་ཆོ་ག་བཤད། །རེ་ཞིག་ཐོག་མར་ཡོ་གའི་སྦྱིན་སྲེག་ཞི་རྐྱང་གི་ཆོ་ག་ཁྱེར་བདེ་བར་བྱེད་ན། དཀྱིལ་འཁོར་གྱི་ཤར་ཕྱོགས་སུ་ཐབ་སྟེགས་དྲི་དང་བ་བྱུང་གིས་བྱུགས་པའི་གཞིར་ཚངས་ཟུར་གྱི་ཐིག་བཏབ་པར་དབུས་ནས་སོར་བཅུ་གཉིས་ཀྱིས་བསྐོར་བ་ཐབ་དངོས་དང་དེའི་ཕྱི་སོར་བཞི་པ་གཉིས་བསྐོར་བ་མུ་རན་དང་ཁ་ཁྱེར། ཐབ་ནང་དུ་འཁོར་ལོ་རྩིབས་བརྒྱད་པའི་ལྟེ་བར་སོར་བརྒྱད་པའི་རྡོ་རྗེ་དཀར་པོ་དང་། རྩིབས་ཀྱི་ཕྱོགས་བཞིར་དེ་བཞིན་གཤེགས་པ་བཞི་དང་མཚམས་བཞིར་ཡུམ་བཞིའི་ས་བོན་སོགས་དང་། ཁ་ཁྱེར་ལ་རྡོ་རྗེའི་ཕྲེང་བས་བསྐོར་ཞིང་། ཕྱིའི་གྲྭ་བཞིར་ཟླ་ཕྱེད་རྡོ་རྗེ་བྲི། ལྷ་མཚན་རྣམས་སོ་སོའི་ཁ་དོག་དང་། གཞན་ཐམས་ཅད་ཚོན་དཀར་པོ་བྲིའོ། །མུ་རན་གྱི་ནང་དུ་འོ་མ་ཅན་གྱི་ཤིང་ངམ་བ་ལང་གི་ལྕི་བ་སྲོག་ཆགས་མེད་པའི་བུད་ཤིང་རྩིག་ཅིང་། ཤར་ལྷོར་མེ་ཚང་བཅའ། སྲེག་རྫས་འོ་མ་ཅན་གྱི་ཡམ་ཤིང་རྩེ་མོའི་ཆ་ལས་བྱུང་བ་སོར་བཅུ་གཉིས་པ་དྲི་དཀར་པོས་སྤགས་ཤིང་རྩེ་མོ་མར་སྦྲང་འོ་མར་ཉུགས་པ། མར་ཁུ། ཏིལ་ནག །ཏིལ་དཀར་རམ་ཡུངས་ཀར། ཀུ་ཤ་ཏིལ་མར་གྱིས་བྱུགས་པ་རྣམས་མེད་ཐབས་མེད་ལ། འབྱོར་ན་ཀུ་ཤའི་གོང་དུ། ཞོ་ཟན་དང་། འབྲས། སོ་བ། ནས། སྲན། གྲོ་སྟེ་འབྲུ་རྣམས་ལ་མར་གྱིས་སྤགས་པ་དང་། དུརྦ་འོ་མས་སྔགས་པ་རྣམས་གཡས་ཕྱོགས་སུ་རིམ་པར་སྒྲིག །གཡོན་དུ་ཉེར་སྤྱོད་དང་དཀར་གསུམ་གྱིས་བརྒྱན་པའི་གཏོར་མ་འདས་མ་འདས་ཀྱི་རིམ་པ་དང་། དུང་ངམ་ཉ་ལྕིབས་ཀྱི་སྣོད་དུ་རྫས་བདུན་ལྡན་གྱི་མཆོད་ཡོན་ལ་གཙོ་སྔགས་ཀྱིས་བསྔགས་པ་རྣམས་བཀོད། མདུན་དུ་ལས་བུམ། རྡོར་དྲིལ། དགང་བླུགས། ཀུ་ཤ་རྣམས་དང་། དེའི་ཕྱིར་མེ་ཡོལ་བཞག །དེ་ནས་ཡར་ངོའི་སྲོད་ལྟ་བུ་དུས་དགེ་བར་སློབ་དཔོན་ཆས་གོས་དཀར་པོ་བསྟར་ལ་འཇམ་པའི་སྟན་ལ་པདྨའི་འདུག་སྟངས་ཀྱིས་འདུག་སྟེ། སྨྲ་བ་གཞན་བཅད་ནས། བདག་གི་རྣམ་འབྱོར་དང་ལྡན་པས། ཡཀྵའི་སྔགས་དང་ལས་བུམ་གྱི་ཆུས་ཐབ་དང་། མཆོད་སྲེག་གི་རྫས། རྡོར་དྲིལ་དགང་བླུགས་རྣམས་བསང་། རྡོར་དྲིལ་བཟུང་སྟེ་སྔགས་རྒྱས་དམ་ཚིག་གསུམ་དྲན་པར་བྱས་ནས། སྒྲུབ་ཐབས་ལྟར་མཆོད་པ་བྱིན་གྱིས་བརླབ་ཅིང་། སྲེག་རྫས་རྣམས་ངོ་བོ་ཡེ་ཤེས་ཀྱི་བདུད་རྩི། རྣམ་པ་རྫས་སོ་སོ། བྱེད་པ་རང་རང་གི་ལས་སྒྲུབ་པའི་ནུས་ལྡན་དུ་མོས་ལ། སྙིང་པོའི་སྔགས་དང་རྫས་སྔགས་རྣམས་ལན་གསུམ་རེ་བཟླས་པས་བྱིན་གྱིས་བརླབས་ནས། རྩུབ་ཤིང་གི་མེའམ་རྒྱུད་བཞག་གི་མེ་སྤར་བ་ལ་ཡཀྵ་དང་ལས་བུམ་གྱི་ཆུས་གཡས་བསྐོར་དུ་ལན་གསུམ་བསང་ལ། ༀ་བཛྲ་ཛྭ་ལ་ཧཱུཾ། ཞེས་མེ་ཐབ་ཏུ་བཅུག་ཅིང་རླུང་གཡབ་ཀྱིས་སྤར། སྙིང་པོ་ༀ་སརྦ་ཏ་ཐཱ་ག་ཏ་མ་ཧཱ་ཡོ་གཱི་ཤྭ་རི་ཧཱུཾ། ཞེས་བཟླ་ཞིང་མར་ཁུ་བླུགས་གཟར་བདུན་ཕུལ་བས་གསོ། ཀུ་ཤ་ལ་ༀ་བཛྲ་ས་ཏྭ་ཨཿ ཞེས་བཟླས་པས་བརླབས་ནས། སྔགས་དེས་ཐབ་ཀྱིས་ཁ་ཁྱེར་ལ་རང་གི་གཡོན་ངོས་ནས་བརྩམས་ཏེ་སྔ་མའི་རྩེ་ཕྱི་མའི་རྩ་བས་ནོན་པར་བྱས་ཏེ་གཡས་བསྐོར་དུ་དགྲམ་ཞིང་། སླར་རྩ་བ་རང་ལ་བསྟན་པས་ཐབ་སྟེང་ནས་གཡོག་གོ། །དེ་ནས་ཐབ་ཨ་ཀཱ་རོས་སྟོང་པར་སྒོམ། སྟོང་པའི་ངང་ལས་ༀ་སརྦ་ཏ་ཐཱ་ག་ཏ་མ་ཧཱ་ཡོ་གཱི་ཤྭ་རི་ཧཱུཾ། ཞེས་བརྗོད་པས། སྙིང་པོ་དེ་ཞུ་བ་ལས་བྱུང་བའི་ཐབ་ཁུང་དཀར་ཞིང་ཟླུམ་པའི་ནང་དུ་རཾ་ལས་མེ་དཀྱིལ་གྲུ་གསུམ་པའི་དབུས་སུ་ༀ་ལས་བྱུང་བའི་པདྨ་དཀར་པོའི་སྟེང་དུ་རཾ་ཡོངས་སུ་གྱུར་པ་ལས་མེ་ལྷ་དཀར་པོ་ཞལ་གཅིག་ཕྱག་བཞི་པ་གཡས་གཉིས་བགྲང་ཕྲེང་དང་མི་འཇིགས་པའི་རྒྱ། གཡོན་གཉིས་དབྱུག་པ་དང་སྤྱི་བླུགས། དར་དཀར་དང་རིན་པོ་ཆེའི་རྒྱན་ཅན་པདྨའི་འདུག་སྟངས་ཀྱིས་བཞུགས་པར་གྱུར། རང་ཉིད་ཁྲོ་བོ་ཁམས་གསུམ་རྣམ་རྒྱལ་དུ་ང་རྒྱལ་འཕོས་ཏེ། འདོད་རྒྱལ་གྱི་རྒྱ་བཅས་ལ། ཧཱུཾ་ཊཀྐི་ཛཿ ཞེས་པས་མེ་ལྷ་བཀུག་པར་བསམ་ལ། ༀ། ཚུར་གཤེགས་ཚུར་གཤེགས་འབྱུང་པོ་ཆེ། །ལྷ་ཡི་དྲང་སྲོང་བྲམ་ཟེ་མཆོག །སྲེགས་བླུགས་ཞལ་ཟས་བཞེས་སླད་དུ། །འདིར་ནི་ཡང་དག་བསྙེན་པར་མཛོད། །ཅེས་པས་སྤྱན་དྲངས་ལ། ཛཿ་ཧཱུཾ་བཾ་ཧོཿའི་སྔགས་རྒྱས་དགུག་གཞུག་བཅིང་དབང་དུ་བྱ། རྡོ་རྗེ་གནོད་སྦྱིན་གྱི་སྔགས་རྒྱ་ལན་གཉིས་ཀྱིས་ཕྱིར་འབྲང་གི་བགེགས་བསྲད་ཅིང་བསྲུང་། རང་རྡོར་སེམས་སུ་སྒྱུར་ལ། རྡོར་ཐལ་གྱེན་དུ་ཕྱེ་སྟེ། ༀ་བཛྲ་ཨ་ན་ཡ་མ་ཧཱ་བྷྲཱུཾ་ཏ་ཛྭ་ལ་ཡ་སརྦ་བྷསྨི་ཀུ་རུ་སརྦ་དུཥྚཱཾ་ཧཱུཾ་ཕཊ། ཅེས་མེ་ལྷའི་རང་སྔགས་ཀྱིས་མཆོད་ཡོན་ཕུལ། གཡས་པའི་ཁུ་ཚུར་བཅས་ལ་མཐེབ་མཛུབ་ཀྱིས་མཆོད་ཡོན་གྱི་སྣོད་ནས་མེ་ཏོག་བླངས་ཏེ། ༀ་པྲ་ཝཱ་ར་སངྐཱ་ར་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་བཟེད་ཞལ་དུ་སོར་མོ་བརྐྱང་བས་ཞབས་བསིལ་ཕུལ། དེ་ནས་ཕྱག་རྒྱ་བཞིས་རྒྱས་གདབ་སྟེ། མེ་ལྷའི་དམ་རྒྱ་ནི། གཡོན་རྡོ་རྗེ་ཁུ་ཚུར། གཡས་དེ་བཞིན་གཤེགས་པའི་ཁུ་ཚུར་བྱས་པའི་ཕྱིའི་རྡོ་རྗེ་རིགས་ཀྱི་ཁུ་ཚུར་གཉིས་བཅིངས་ལ་གཡས་པའི་སོར་མོ་རྣམས་མེ་འབར་བ་ལྟར་བྱས་ཏེ། ༀ་བཛྲ་ཨ་ན་ལ་སོགས་མེ་ལྷའི་སྔགས་ལ་དྲྀ་ཤྱ་ཞེས་བཏགས་པས་མདུན་གྱི་ཡེ་ཤེས་པ་ལ་བལྟ། ཛཿཧཱུཾ་བཾ་ཧོཿས་བསྟིམ། ས་མ་ཡ་སྟྭཾ་ཞེས་པས་རྒྱབ་ཏུ་ཟླ་དཀྱིལ་འགྲུབ། ས་མ་ཡ་སྟྭཾ་ཨ་ཧཾ་ཞེས་པས་མེ་ལྷའི་སྐུ་གསལ་བར་བསྒོམས་ལ། མེ་ལྷའི་སྔགས་ལན་གསུམ་བརྗོད་དོ། །ཆོས་རྒྱ་ནི། ལྕེ་ལ་རྡོ་རྗེ་དཀར་པོའི་ལྟེ་བར་ༀ་ཛྭ་ལ་ཛྭ་ལ་ཧཱུཾ་ཕཊ། ཅེས་དགོད། ལས་རྒྱ་ནི། སྙིང་གར་ཨ་ལས་སྣ་ཚོགས་རྡོ་རྗེ་བསམ་ལ། གར་སྔོན་འགྲོའི་ཕྱག་ཆེན་ཕྱག་མཚན་མེད་པའོ། །ཕྱག་ཆེན་ནི། སྙིང་གར་ཧཱུཾ་ལས་ཟླ་བའི་རྡོ་རྗེ་བ སམ་ལ་གར་མེད་པའི་ཕྱག་ཆེན་ཕྱག་མཚན་ཅན་ནོ། །དེ་ནས་དབང་བསྐུར་བ་ནི། རྡོ་རྗེ་རིན་ཆེན་གྱི་རྒྱ་བཅིང་ཞིང་། ༀ་བཛྲ་རཏྣ་ཨ་བྷི་ཥིཉྩ་མཾ། ཞེས་པས་རྡོ་རྗེ་རིན་པོ་ཆེའི་ཅོད་པན་དང་། ༀ་ཏྲུཾ་གྱིས་དར་དཔྱང་གི་དབང་བསྐུར། རྡོ་རྗེ་རྩེ་ལྔ་པའི་རྒྱ་བཅས་ལ། ༀ་ཧ་ན་ས་མ་ཡ་ཧཱུཾ་ཕཊ། ཅེས་པས་དམ་ལ་བཞག་ནས། ༀ་ཨགྣེ་དེ་ཝ་ས་པ་རི་ཝཱ་ར་པུ་ཥྤེ་པྲ་ཏཱི་ཙྪ་སྭཱ་ཧཱ་ནས། ཤཔྡའི་བར་དང་། ༀ་བཛྲ་ལཱ་སྱ་ཧཱུཾ་ནས་གནྡྷེ་ཨཿའི་བར་གྱི་སྔགས་རྒྱས་སྒེག་སོགས་བརྒྱད་ཕུལ། དེ་ནས་བྱང་ཆུབ་མཆོག་རྒྱས་དགང་བླུགས་བཟུང་ལ། མེ་ལྷ་ཅུང་ཟད་འཛུམ་པའི་ལྗགས་ལ་རཾ་དང་དགང་བླུགས་ཀྱི་ཁ་ལ་ཧཱུཾ་གིས་མཚན་པར་བསམ་ནས། ༀ་ཨགྣ་ཡེ་སྭཱ་ཧཱ། ཞེས་མངར་གསུམ་བསྲེག་པའི་མར་བླུགས་གཟར་གསུམ་གྱིས་དགང་གཟར་བཀང་ལ་ཁ་སྦྱར་ཏེ་ལག་གཉིས་པུས་མོའི་ནང་ལས་མི་འདའ་བས། ན་མཿ ས་མཱནྟ་བུདྡྷཱ་ནཱཾ་ཨགྣ་ཡེ་སྭཱ་ཧཱ། བདག་ཅག་དཔོན་སློབ་འཁོར་དང་བཅས་པའི་ནད་གདོན་སྡིག་སྒྲིབ་ཐམས་ཅད་ཞི་བར་མཛད་དུ་གསོལ་སྭཱ་ཧཱ། ཞེས་ལན་གསུམ་དབུལ་ལོ། །དེ་ནས་རྫས་རྣམས་རིམ་པར་འབུལ་ཏེ། ཡམ་ཤིང་། ༀ་བཛྲ་ཡཛྙཱ་ཡ་སྭཱ་ཧཱ། གཟི་བརྗིད་ཕུན་སུམ་ཚོགས་པ་ལ་བར་དུ་གཅོད་པ་ཐམས་ཅད་ཤཱ ནྟིཾ་ཀུ་རུ་སྭཱ་ཧཱ། མར་ཁུ། ༀ་ཨགྣ་ཡེ་སྭཱ་ཧཱ། འབྱོར་པ་ཕུན་སུམ་ཚོགས་པ༴ ཏིལ་ནག །ༀ་སརྦ་པཱ་པཾ་ད་ཧ་ན་བཛྲ་ཡེ་སྭཱ་ཧཱ། སྡིག་སྒྲིབ་ཐམས་ཅད་ཤཱནྟིཾ༴ ཏིལ་དཀར་རམ་ཡུངས་ཀར། ༀ་སརྦ་སིདྡྷ་ཡེ་སྭཱ་ཧཱ། དངོས་གྲུབ་ཕུན་སུམ་ཚོགས་པ་ལ་བར་དུ་གཅོད་པ༴ ཞོ་ཟན། ༀ་སརྦ་སམྦྷ་དེ་སྭཱ་ཧཱ། བདེ་བ་ཕུན་སུམ་ཚོགས་པ་ལ༴ འབྲས། ༀ་བཛྲ་པུཥྚཱ་ཡ་སྭཱ་ཧཱ། བསོད་ནམས་ཕུན་སུམ་ཚོགས་པ་ལ༴ སོ་བ། ༀ་བཛྲ་བི་ཛཱ་ཡེ་སྭཱ་ཧཱ། ནོར་དང་འབྲུ་ཕུན་སུམ་ཚོགས་པ་ལ༴ ནས། ༀ་མ་ཧཱ་བེ་གཱ་ཡ་སྭཱ་ཧཱ། ཤུགས་ཕུན་སུམ་ཚོགས་པ་ལ༴ སྲན་མ། ༀ་མ་ཧཱ་བ་ལཱ་ཡ་སྭཱ་ཧཱ། སྟོབས་ཕུན་སུམ་ཚོགས་པ་ལ༴ གྲོ། ༀ་བཛྲ་གྷ སྨ་རི་སྭཱ་ཧཱ། ནད་མེད་པ་ཕུན་སུམ་ཚོགས་པ་ལ༴ དུརྦ། ༀ་བཛྲ་ཨཱ་ཡུ་ཥེ་སྭཱ་ཧཱ། ཚེ་རིང་བ་ཕུན་སུམ་ཚོགས་ཚོགས་པ་ལ༴ ཀུ་ཤ །ༀ་ཨ་པྲ་ཏི་ཧ་ཏ་བཛྲ་ཡེ་སྭཱ་ཧཱ། བསྲུང་བ་ཕུན་སུམ་ཚོགས་པ་ལ༴ ཞེ་རྫས་རེ་རེ་བཞིན་ལན་གསུམ་ཕུལ་ལ། ལས་སྔགས་ཀྱིས་བསང་གཏོར་ཕུལ་བས། མེ་ལྷ་ཉིད་འབར་བའི་རྣམ་པར་གྱུར་པར་བསམ་མོ། །དེ་ནས་འདས་པའི་མེ་ལྷ་མཆོད་པ་ནི། རྡོ་རྗེ་ཁུ་ཚུར་ཁ་སྦྱར་ལ་མགལ་མེ་ལྟར་བསྐོར་ཞིང་། ༀ་བཛྲ་ཧེ་ཏུ་བཾ་ཞེས་བརྗོད་པས་ཐབ་ཀྱི་མེའི་དབུས་སུ་གཞལ་ཡས་ཁང་ལྷ་སོ་སོའི་གདན་དང་བཅས་པ་སྤྲུལ་པར་གྱུར། དཀྱིལ་འཁོར་གྱི་ལྷ་ཐམས་ཅད་ཀྱི་སྔགས་ཟློས་ཤིང་། མེ་ཏོག་གིས་མཚོན་པར་སྤྱན་དྲངས་ལ་ཐབ་ཏུ་མེ་ཏོག་སྐྱུར་བས། ལྷ་ཐམས་ཅད་གཞལ་ཡས་ཁང་གི་གནས་སོ་སོར་བཞུགས་པར་གྱུར་པ་ལ། ༀ་སརྦ་ཏ་ཐཱ་ག་ཏ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་བཞིན་དུ་པུཥྤེའི་གནས་སུ་དྷཱུ་པེ། ཨཱ་ལོ་ཀེ །གནྡྷེ། ནཻ་ཝི་དྱེ། ཤཔྡ་བཅུག་པ་དང་། ༀ་བཛྲ་ཞེས་ཐམས་ཅད་ཀྱི་འགོར་སྦྱར་ཏེ། ལཱ་སྱེ་ཧཱུཾ། མཱ་ལེ་ཏྲཱཾ། གཱི་ཏི་ཧྲཱིཿ ནྲྀ་ཏྱེ་ཨ། དྷཱུ་པེ་ཧཱུཾ། པུཥྤེ་ཏྲཾ། ཨཱ་ལོ་ཀེ་ཧྲཱིཿ གནྡྷེ་ཨ། ཞེས་པ་རྣམས་ཀྱིས་མཆོད་ལ། ཆོས་དབྱིངས་ཡེ་ཤེས་རྣམ་པར་དག །ཅེས་པ་ནས། ས་གནས་རྣམས་ལ་ཕྱག་འཚལ་ལོ། །ཞེས་པའི་བར་སྒྲུབ་ཐབས་ཀྱི་བུམ་བསྐྱེད་ལྟར་གྱིས་བསྟོད། དེ་ནས་དཀྱིལ་འཁོར་གྱི་ལྷ་རྣམས་ཀྱི་ཞལ་ཅུང་ཟད་འཛུམ་པའི་ལྗགས་དང་དགང་བླུགས་ཀྱི་ཁ་ལ་ༀ་ཡིག་གིས་མཚན་པར་བསམ་ལ། ༀ་སརྦ་ཏ་ཐཱ་ག་ཏ་མ་ཧཱ་ཡོ་གཱི་ཤྭ་རི་ཧཱུཾ། ཞེས་པ་གསུམ་གྱིས་དགང་གཟར་བཀང་ལ། སྔགས་དེའི་མཐར། བདག་ཅག་དཔོན་སློབ་འཁོར་དང་བཅས་པའི་ནད་གདོན་སྡིག་སྒྲིབ་ཐམས་ཅད་ཞི་བར་མཛད་དུ་གསོལ་སྭཱ་ཧཱ། ཞེས་བཏགས་པས་དགང་བླུགས་གསུམ་མམ་བདུན་ཕུལ་ནས། ལག་མཆོད་སྦྱིན་གྱི་རྒྱས་ཡམ་ཤིང་ནས་ཀུ་ཤའི་བར་རྫས་ཐམས་ཅད་བཤད་མ་ཐག་པའི་སྙིང་པོ་སྤེལ་ཚིག་དང་བཅས་པ་བརྒྱ་རྩ་སོགས་ཅི་འབྱོར་དབུལ་ཞིང་། ཡང་ན་ཡམ་ཤིང་། མར་ཁུ། དུརྦ། ཀུ་ཤ་རྣམས་མ་གཏོགས་པ་ཕྱོགས་གཅིག་ཏུ་བསྲེས་ནས་ཕུལ་ཀྱང་རུང་ངོ་། །མཐར་སྔར་བཞིན་དགང་བླུགས་ཕུལ་ལ། དཀྱིལ་འཁོར་གྱི་ལྷ་རྣམས་ཀྱི་ཐུགས་ཀ་ནས་བྱུང་བའི་བདུད་རྩི་དཀར་པོའི་ཆུ་རྒྱུན་གྱིས་བསྒྲུབ་བྱ་རྣམས་ལ་དབང་བསྐུར་བས་ལུས་ཐམས་ཅད་གང་ནད་གདོན་སྡིག་སྒྲིབ་ཐམས་ཅད་དག་པར་བསམ་མོ། །དེ་ནས་ཉེར་སྤྱོད་ལྔ་དང་། ༀ་ཏམྦུ་ལཱ་ཡ་སྭཱ་ཧཱས་སོ་རྩི། ༀ་བཛྲ་ཝསྟྲ་ཡེ་སྭཱ་ཧཱས་ན་བཟའ། སྒེག་སོགས་བརྒྱད་ཀྱིས་མཆོད། བསྟོད་པར་འོས་པས་བསྟོད། འདོད་དོན་ལ་གསོལ་བ་བཏབ། ཡིག་བརྒྱས་ནོངས་པ་བཟོད་པར་གསོལ་ནས། སྔར་བཞིན་ལྷ་རྣམས་མེ་ཏོག་གིས་སྤྱན་དྲངས་ཏེ་དཀྱིལ་འཁོར་དུ་རང་རང་སོ་སོའི་གནས་སུ་བཞུགས་པར་བསམ་མོ། །གལ་ཏེ་དཀྱིལ་འཁོར་སྒྲུབ་མཆོད་དང་མ་འབྲེལ་ན། འཇིག་རྟེན་པའི་མེ་ལྷའི་འབར་བའི་རྣམ་པར་སྒྱུར་རྗེས་རྡོ་རྗེ་འཁོར་ལོའི་སྔགས་རྒྱས་རྟེན་དང་བརྟེན་པར་བཅས་པའི་དཀྱིལ་འཁོར་རྫོགས་པར་སྤྲུལ་ལ། རྡོ་རྗེ་བསྡུ་བའི་སྔགས་རྒྱས་ཡེ་ཤེས་པ་སྤྱན་འདྲེན་ནས་དབང་གི་བར་སྒྲུབ་ཐབས་ལྟར་དང་། མཆོད་བསྟོད་བྱོན་སྐྱེམས་ནས་ནོངས་པ་བཟོད་པར་གསོལ་བའི་བར་བཤད་མ་ཐག་པ་ལྟར་བྱས་རྗེས། ༀ། ཁྱེད་ཀྱི་སེམས་ཅན་སོགས་ཀྱིས་བསྐུལ་ནས། ༀ་བཛྲ་ས་ཏྭ་མུཿས་ཕྱག་རྒྱ་བཀྲོལ་ཏེ་གཤེགས་སུ་གསོལ་བ་རྣམས་ཁྱད་པར་རོ། །སླར་ཡང་ༀ་ཨགྣ་ཡེ་ཛྭ་ལ་རཾ་ཞེས་མར་ཁུ་ཕུལ་བས། མེ་ལྷ་སྔར་བཞིན་གསལ་བར་བསམ་ལ། སྲེག་རྫས་རྣམས་དང་དགང་བླུགས་གསུམ་སྔར་ལྟར་ཕུལ་ནས། ཉེར་སྤྱོད་དང་སྒེག་སོགས་ཀྱིས་མཆོད། །སོ་རྩི་དང་ན་བཟའ་དབུལ། འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །མེ་ལྷའི་རྒྱལ་པོ་ཊཀྐིས་དབང་བསྐུར་བ། །ཤེས་རབ་མཆོག་གིས་ཉོན་མོངས་ཐམས་ཅད་བསྲེག །འཛིན་བྱེད་མེ་ལྷ་ཉིད་ལ་རྣམ་པར་འདུད། །ཅེས་པས་བསྟོད། གཏོར་མ་རྡོ་རྗེ་གནོད་སྦྱིན་དང་མེའི་སྔགས་རྒྱས་བསང་སྦྱངས། ཨ་ཀཱ་རོས་བརླབ་ལ། ཨགྣེ་ལ་ཨ་ཀཱ་རོ་བཏགས་པས་ཕུལ་ལ། མཆོད་སྦྱིན་གཏོར་མ་འདི་ཞེས་ལ། སོགས་ཀྱིས་འདོད་དོན་གསོལ། ཡིག་བརྒྱས་ནོངས་པ་བཤགས། ༀ་བཛྲ་ས་ཏྭ་མུཿ ཞེས་ཕྱག་རྒྱ་བཀྲོལ་ཏེ་གཤེགས་སུ་གསོལ། དེ་ནས་སྦྱིན་སྲེག་བརྐྱང་པར་བྱེད་ཚེ། བདག་བསྐྱེད་གཤེགས་བསྡུ་བདག་ཉིད་བསྲུང་བ་རྣམས་སྒྲུབ་ཐབས་ལྟར་བྱས་རྗེས་མེ་རང་ཞི་འམ་འོ་མས་གཞིལ། ལས་རྗེས་མི་མངོན་པར་བསྡུའོ། །ཡོ་གའི་ཞི་རྐྱང་གི་སྦྱིན་སྲེག་གི་ཆོ་གའོ།། །།

༈ ༀ་སྭ་སྟི། ད་ནི་གཉིས་པ་འདུས་པ་མདོའི་སྦྱིན་སྲེག་ལ་བཞི་སྟེ། དགོས་པ་དང་། གནས་དང་། དུས་དང་། ཇི་ལྟར་བྱ་བའི་རིམ་པའོ། །དང་པོ་ནི། སྤྱིར་རྣལ་འབྱོར་པ་གང་ཞིག་རྒྱལ་བ་རྣམས་མཉེས་པར་བྱ་བ་དང་། སྡིག་སྒྲིབ་སྦྱོང་ཞིང་ཉམས་ཆག་སྐོང་བ་སོགས་རང་གཞན་གྱི་དོན་གཉིས་མྱུར་དུ་འགྲུབ་བྱེད་ཀྱི་ཕྲིན་ལས་རྨད་དུ་བྱུང་བ་ནི་སྦྱིན་སྲེག་གི་ལས་ཏེ། རྩ་རྒྱུད་ལས། རྡོ་རྗེ་མེ་ཡི་ལས་མཆོག་འདིས། །རྣལ་འབྱོར་ཐབས་སུ་བདེ་སྦྱར་བས། །རྒྱལ་བ་ཀུན་མཉེས་ཀུན་སྲེག་སྐོངས། །དོན་གྲུབ་ལས་ཀྱི་མཆོག་ཏུ་བཤད། །ཅེས་གསུངས། བྱེ་བྲག་ཏུ་དོན་བྱ་བའི་ཡུལ་གུད་དུ་ཕྱེ་ན། ཧེ་རུ་ཀ་འདུས་པ་ལས། ནད་དང་སྡུག་བསྔལ་ཞི་བ་དང་། །ཚེ་དང་ལོངས་སྤྱོད་རྒྱས་པ་དང་། །བཙན་དྲེགས་གཟུངས་མ་དབང་བྱེད་དང་། །དགྲ་བགེགས་གདུག་པ་ཚར་གཅོད་པ། །དགོས་ཆེད་འབྲས་བུར་བཤད་པ་ཡིན། །ཞེས་གང་ལ་བྱ་བའི་ཡུལ་བཞི་ལ་ལྟས་ནས་འཕྲིན་ལས་བཞིའི་དབྱེ་བས་དེ་དང་དེའི་དོན་གྲུབ་པ་ནི་དགོས་པའོ། །གཉིས་པ་གནས་ནི། སྤྱིར་ཞི་རྒྱས་གཉིས་བཀྲ་ཤིས་པའི་གནས་དང་། དབང་དྲག་གཉིས་གཉན་པའི་གནས་སུ་བྱ་བ་ཤིས་ལ། ཁྱད་པར་དུ་དེ་ལས། གངས་འདབས་དང་ནི་ཆུ་གླིང་དང་། །ནགས་ཚལ་སྨན་ལྗོངས་མེ་ཏོག་ཚལ། །ཕུག་དང་གྲོག་མདོ་འཇིགས་པ་དང་། །དུར་ཁྲོད་ཤིང་གཅིག་རྨངས་པའི་ཁྱིམ། །ཞེས་རྐང་པ་རེ་རེས་ཞི་རྒྱས་དབང་དྲག་གི་གནས་རིམ་པར་བསྟན་ནོ། །གསུམ་པ་དུས་ནི། དེ་ལས། དབྱར་དང་སྟོན་དང་དགུན་དང་དཔྱིད། །སྔ་དྲོ་གུང་དང་དགོང་ཀ་དང་། །ནམ་གུང་རྣམས་ནི་དུས་ཡིན་ནོ། །ཞེས་པས་ལོ་རེ་དང་ཞག་རེ་ལ་ལྟོས་པའི་ཞི་རྒྱས་དབང་དྲག་གི་དུས་རིམ་པར་བསྟན་ཅིང་། ཟླ་བ་རེ་ལ་ལྟོས་ན་དཀར་ཕྱོགས་ལ་ཞི་རྒྱས་དང་ནག་ཕྱོགས་ལ་དབང་དྲག་གི་ལས་ཤིས་པས་སྤྱིར་དེ་དག་གིས་དུས་དང་། ཁྱད་པར་ནད་ཞི་བར་འདོད་པ་སོགས་ལས་དེ་དང་དེས་དོན་བྱ་བའི་དུས་སོ། །བཞི་པ་ཇི་ལྟར་བྱ་བའི་རིམ་པ་ལ། སྤྱིར་རྩ་རྒྱུད་དུ། ལྟ་བ་དང་། ཤེས་རབ་དང་། རང་བཞིན་དང་། ཏིང་ངེ་འཛིན་དང་། གཟུགས་བརྙན་གྱི་ཧོམ་སྟེ་ལྔ་ལས། འདིར་གཟུགས་བརྙན་གྱི་ཧོམ་ལ་བརྟེན་ནས་ལས་བཞི་སྒྲུབ་པར་བྱེད་པ་ལ་གསུམ་སྟེ། སྦྱོར་བ་ལས་བཞིའི་བཤམས་བཀོད་ཐུན་མོང་དུ་བཤད་པ། དངོས་གཞི་ཆོ་གའི་ལས་རིམ་སོ་སོར་བཤད་པ། རྗེས་ལས་བཞི་ཐུན་མོང་དུ་བསྟན་པས་མཇུག་བསྡུ་བའོ། །དང་པོ་ནི། རྩ་རྒྱུད་ལས། ལས་བཞི་སོ་སོའི་ཁྱད་པར་གྱིས། །ཕྱོགས་དང་ཁ་དོག་དབྱིབས་དང་རྫས། ཇི་ལྟར་ཡིན་པ་དེ་ལྟར་སྦྱར། །ཞེས་པ་ལྟར་གསུམ་ལས། དང་པོ་ཕྱོགས་ནི། དེ་ལས། ཤར་ལྷོ་ནུབ་བྱང་། ཞེས་གསུངས་ཏེ། དཀྱིལ་འཁོར་སྒྲུབ་མཆོད་དང་མ་འབྲེལ་པའི་སྦྱིན་སྲེག་རྐྱང་སྒྲུབ་ཀྱི་ཚེ་ཤར་ཕྱོགས་སྐྱོང་བའི་ལྷ་དབང་པོས་མི་མཐུན་པའི་ཕྱོགས་ཞི་བར་བྱེད་པ་ལ་སོགས་པའི་ཁྱད་པར་གྱིས་འཇིག་རྟེན་པའི་ཕྱོགས་དང་མཐུན་པར་ཞི་བ་ལ་ཤར། རྒྱས་པ་ལ་བྱང་དབང་ལ་ནུབ། དྲག་པོ་ལ་ལྷོར་ཁ་བལྟ་ཞིང་། ཡང་སྒྲུབ་མཆོད་དང་འབྲེལ་ཚེ་དཀྱིལ་འཁོར་གྱི་སྒོ་བཞི་པོ་ལས་སོ་སོ་ལ་ཤིས་པས་དཀྱིལ་འཁོར་གྱི་ཕྱོགས་དང་མཐུན་པར་བྱས་ཏེ། དཀྱིལ་འཁོར་གྱི་ཤར་དུ་ཞི་བ། ལྷོར་རྒྱས་པ། ནུབ་ཏུ་དབང་། བྱང་དུ་དྲག་པོའི་ཐབ་བཅས་ལ་ཁ་དཀྱིལ་འཁོར་ལ་ཕྱོགས་པས་བལྟ་བའོ། །གཉིས་པ་ཐབ་ཀྱི་དབྱིབས་མདོག་ནི། སྔ་མའི་འཕྲོས་ལས། དཀར་སེར་དམར། མཐིང་གའམ་ནག་པོ་ཐལ་མདོག་སྦྱར། །ཟླུམ་པོ་པདྨ་ལེ་ཚེ་ཞི། །འཁོར་ལོ་གྲུ་བཞི་ཟུར་བརྒྱད་རྒྱས། །ཟླ་གམ་གྲུ་ཆད་གཞུ་དབྱིབས་དབང་། །གྲུ་གསུམ་བྷ་ག་ཁ་མངོན་སྤྱོད། །སུམ་བརྩེག་མདངས་དང་རི་མོར་མཛེས། །ཞེས་པའི་དྲག་པོའི་ཁ་ནི་ཁྲོ་ཞལ་ཏེ་ལས་བཞི་ཀ་ལ་ཐབ་བྱ་ཚུལ་གསུམ་གསུམ་བཤད་ཀྱང་། ད་ལྟ་ཕྱག་བཞེས་སུ་མཛད་པ་ནི། ཧེ་རུ་ཀ་འདུས་པ་ལས། ཞི་བ་ལ་ནི་ཟླུམ་པོ་སྟེ། རྒྱས་པའི་ཐབ་ཁུང་གྲུ་བཞི་པ། །དབང་གི་དཀྱིལ་འཁོར་ཟླ་གམ་ལ། །དྲག་པོ་ཨེ་སྟེ་མཁའ་འདྲའི་དབྱིབས ། །འཁོར་ལོ་རིན་ཆེན་པདྨ་དང་། །རྡོ་རྗེ་ཡིས་ནི་རྣམ་པར་བརྒྱན། །ཞེས་གསུངས་པ་ལྟར་སྟེགས་བུ་གྲུ་བཞི་པ་ངོས་རེ་ལ་ཁྲུ་དོ་དང་དཔངས་སུ་ཁྲུ་ཕྱེད་པ་རྩིག་གམ་མ་བརྩིགས་ཀྱང་རུང་སྟེ། གཞི་དེར་དྲི་དང་བ་བྱུང་གིས་ཆག་ཆག་བཏབ་པ་ལ། ཐབ་ཁུང་ཞི་བ་ལ་ཟླུམ་པོ་དཀར་པོ། རྒྱས་པ་ལ་གྲུ་བཞི་སེར་པོ། དབང་ལ་ཟླ་གམ་དམར་པོ། དྲག་པོ་ལ་གྲུ་གསུམ་ནག་པོ་སྟེ། ཐམས་ཅད་ཀྱང་རྒྱར་ཁྲུ་གང་དང་དཔངས་སུ་ཁྲུ་ཕྱེད་པ། ཁ་ཁྱེར་བང་རིམ་གསུམ་གྱི་ནང་མ་ལ་འོད་ཕྲེང་ལས་དང་མཐུན་པའི་ཁ་དོག་ཅན། བར་མ་ལ་ཞི་བར་ལྕགས་ཀྱུ་དཀར་པོ། རྒྱས་པར་ཞགས་པ་སེར་པོ། དབང་ལ་ལྕགས་སྒྲོག་དམར་པོ། དྲག་པོར་དྲིལ་བུ་སྔོན་པོ། ཐ་མ་ལ་ཞི་བར་འཁོར་ལོ་དཀར་པོ། རྒྱས་པར་རིན་ཆེན་སེར་པོ། དབང་ལ་པདྨ་དམར་པོ། དྲག་པོར་རྡོ་རྗེ་སྔོན་པོ་རྩེ་གསུམ་རྭ་གདེངས་པའི་ཕྲེང་བས་བསྐོར་ཞིང་། ཐབ་ཀྱི་དབུས་སུ་མཚན་མ་དགོད་པ་ནི། ཞི་བ་ལ་འཁོར་ལོ་དཀར་པོའི་ལྟེ་བར་ༀ། རྒྱས་པ་ལ་རིན་པོ་ཆེ་སེར་པོར་ཏྲཱཾ། དབང་ལ་པདྨ་དམར་པོར་ཧྲཱིཿ དྲག་པོར་རྡོ་རྗེ་སྔོན་པོ་ཧཱུཾ་གིས་མཚན་པ། ཐམས་ཅད་ཀྱང་སོར་བཞི་པའི་ཚད་ཅན་ནོ། །ཐབ་ཀྱི་ནང་དུ་འཆད་འགྱུར་ཡམ་ཤིང་གི་རྒྱུ་དང་རིགས་འདྲའི་ལས་མཐུན་གྱི་བུད་ཤིང་ཐབ་དབྱིབ་དང་འདྲ་བ་དཔངས་སུ་མཐོ་གང་བ་རྩིགས་པའི་ཤར་ལྷོའི་ཕྱོགས་སུ་མེ་ཚང་བཅའ། སྟེགས་བུའི་གྲྭ་བཞིར་མདའ་ལས་མཐུན་གྱི་ཁ་དོག་ཅན་བཞི་རང་མདོག་ཅན་གྱི་ཞགས་པའི་སྲད་བུ་བཞིས་སྦྲེལ་བའི་ཚུལ་དུ་དངོས་སུ་འགོད་པའམ་རི་མོར་བྲི་ཞིང་། སྟེང་དུ་མེ་དར་དགབ་བོ། །རང་གི་གཡས་ཕྱོགས་སུ་རྫས་སྟེགས་པདྨ་འདབ་བརྒྱད་ཀྱི་ལྟེ་བར་ཞུན་མར་ནི། ཞི་རྒྱས་ལ་རྩི་མར་དང་། དབང་ལ་ཏིལ་མར། དྲག་པོ་ལ་ཚིལ་ཞུན་དང་སྦྱར་བའི་མར་ནག་རྣམས་དང་དགང་བླུགས། མདུན་གྱི་པད་འདབ་ལ་ཡམ་ཤིང་ནི། རྒྱ་བདུན་འགྲེལ་ལས། ལས་བཞིའི་ཤིང་ནི་རྩེ་མོ། ཡལ་ག །སྡོང་པོ། རྩ་བཞི་དང་། ཁ་དོག་གིས་ཕྱེ་བ། ཞེས་གསུངས་པ་ལྟར་ཞི་བ་ལ་ཙནྡན་དཀར་པོ་དང་བལ་བུ་སོགས་དཀར་ཞིང་ལོ་མ་ཅན་གྱི་རྩེ་མོའི་ཆ་ལས་བྱུང་བ། རྒྱས་པ་ལ་འབྲས་བུ་ཆགས་པ་དང་སེར་ཞིང་འོ་མ་ཅན་གྱི་ཡལ་གའི་ཆ་ལས་བྱུང་བ། དབང་ལ་ཙནྡན་དམར་པོ་དང་མཛོ་མོ་ཤིང་སོགས་དམར་བ་དང་སྐྱུར་བའི་ཤིང་གི་སྡོང་པོའི་ཆ་ལས་བྱུང་བ། དྲག་པོ་ལ་དུག་ཤིང་དང་ཚེར་མ་ཅན་ནག་ཅིང་རྩ་བའི་ཆ་ལས་བྱུང་བ། ཐམས་ཅད་ཀྱང་མཐོ་གང་བ་རང་གི་ལས་མཐུན་གྱི་མར་ཁུར་རྩེ་གཉིས་ཉུགས་པ་བཀོད། པད་འདབ་ལྷག་མ་བདུན་ལ་སྲེག་རྫས་གཞན་རྣམས་ལས་མཐུན་གྱི་སྣོད་དུ་རིམ་པར་བཤམ་སྟེ། དེ་ལ་སོ་སོའི་སྲེག་རྫས་ནི། ཧེ་རུ་ཀ་འདུས་པ་ལས། ཞོ་དང་འབྲས་ཏིལ་ནས་དཀར་ཆན། མར་གསར་འོ་མ་ཞི་ལ་སྦྱར། ཞེས་སོགས་གསུངས་པ་ལྟར། ཞི་བ་ལ་ཏིལ་དཀར་ནག་དང་། དཀར་གསུམ། ནས་དཀར་དང་འབྲས་དཀར་གྱི་ཆན་སོགས་ཁ་ཟས་དཀར་པོ་དང་། ཙནྡན་དཀར་པོ་སོགས་དྲི་དཀར་པོའི་རིགས་དང་། ཙམ་པ་ཀ་སོགས་མེ་ཏོག་དཀར་པོའི་རིགས་རྣམས་བཤམ། རྒྱས་པ་ལ་མངར་གསུམ་དང་། ཞོ་དང་། མར་རྙིང་། གྲོ་ཆན། ཐུད་སོགས་ཁ་ཟས་དང་། རྒུན་འབྲུམ་སྟར་ཁ་སོགས་འབྲས་བུའི་རིགས་དང་། འབྲས་སོགས་འབྲུ་སྣ་ཚོགས། དྲི་སེར་པོ་དང་། དུརྦ་སོགས་རང་བཞིན་གྱིས་སེར་བའམ་བཅོམ་པས་སེར་པོར་བྱས་པ་བཀོད། དབང་ལ་ཨུཏྤལ་དམར་པོ་སོགས་མེ་ཏོག་དང་། ཙནྡ་དམར་པོ་སོགས་དྲི་བཟང་ཞིང་དམར་བའི་རིགས་དང་། སྐྱུར་བའི་ཤིང་དང་འབྲུ་འབྲས་ཀྱི་རིགས། སྦྲང་རྩི། ཤངས་རྩེ་སྐེ་ཚེ་ཚ་བའི་མར་སོགས་རང་བཞིན་ནམ་རྒྱ་སྐེག་གིས་ཁ་དོག་དམར་པོར་སྒྱུར་ལ་བཀོད། དྲག་པོ་ལ་དུག་དང་ཚིལ་ཆེན་དང་། སྐེ་ཚེའི་མིར་དང་། སྲན་ཆན་དང་། ཤ་ཁྲག་སྣ་ཚོགས་དང་། ནིམ་པ་དང་ལན་ཚྭ་སོགས་རྩུབ་པའི་རིགས་རྣམས་རང་བཞིན་ནམ་བཅོས་པས་ནག་པོར་བྱས་ལ་བཤམ་མོ། །རང་གི་གཡོན་ཕྱོགས་སུ་མཆོད་སྟེགས་པདྨ་འདབ་བརྒྱད་ཀྱི་ལྟེ་་བར་ལས་གཏོར་འགོད་དེ། ཞི་བ་ལ་དངུལ་ཕྱེ་དང་འབྲས་ཕྱེ་མེ་ཏོག་དཀར་པོ་རྣམས་འོ་མ་དང་སྦྱར་བའི་གཏོར་མ་དཀར་ཟླུམ། རྒྱས་པ་ལ་གསེར་ཕྱེ་དང་མེ་ཏོག་སེར་པོ་གྲོ་དང་རྒུན་འབྲུའི་ཕྱེ་རྡོང་རོས་དང་བཅས་པ་ཞོ་དང་སྦྱར་བའི་གཏོར་མ་གྲུ་བཞི་སེར་པོ། དབང་ལ་ཟངས་ཕྱེ་བུ་རམ་པད་རག་རྣམས་འབྲས་དམར་དང་རམ་བུའི་ཕྱེ་དང་སྦྱར་བའི་གཏོར་མ་ཟླ་གམ་དམར་པོ། དྲག་པོ་ལ་ལྕགས་ཕྱེ་དུག་རྡོའི་ཕྱེ་མ་རྣམས་མིའམ་ཁྱིའི་འོ་མ་དང་ར་ཁྲག་འབྲུ་ནག་གི་ཆན་དང་སྦྱར་བའི་གཏོར་མ་གྲུ་གསུམ་ནག་པོ། བཞི་ཀ་ལ་མཐེའ་ཀྱུས་གཅེར་བའོ། །མདུན་གྱི་འདབ་མར་རྡོར་དྲིལ། དེའི་གཡས་གཡོན་གྱི་འདབ་མར་སྨན་རཀ །འདབ་མ་ལྷག་མ་ལྔ་ལ་ལས་མཐུན་གྱི་རྒྱུ་དང་ཁ་དོག་བསྒྱུར་བའི་ཞབས་བསིལ་དང་བཞི་བསྣོལ་རྣམས་གཡས་བསྐོར་དུ་བཤམ། རང་གི་མདུན་དུ་ལས་བཞིའི་བྲུབ་ཁུང་ཐབ་ཁུང་དང་དབྱིབས་མདོག་འདྲ་བའི་ནང་དུ། བསྒྲུབ་བྱའི་ཡུལ་གང་ཡིན་གྱི་མིའི་ཟག་རྫས་སམ་རྐང་རྗེས་དང་། མི་མ་ཡིན་གྱི་གནས་རྟེན་གྱི་ས་ལ་རྒྱུ་བྱས་པའི་ལིདྒ་ཕོ་མོ་གང་ཡིན་གྱི་མཚན་མ་ཅན་བཟོས་པའི་དཔྲལ་བར་རུས། སྙིང་གར་སྲོག་མིང་ཡིག་དང་བཅས་པ། ལྟེ་བར་བླ་རྟགས། འདོམས་སུ་ལས་བཞི་གང་ཡིན་གྱི་སྤུ་གྲི་ནི་ཆེ་གེ་ཤཱ ནྟིཾ་ཀུ་རུ་སྭཱ་ཧཱ། པུཥྛིཾ་ཀུ་རུ་ༀ་ཝཱ་ཤཾ་ཀུ་རུ་ཧོཿ མཱ་ར་ཡ་ཕཊ་ཅེས་པ་རྣམས་གྲོ་ཤོག་ལ་བྲིས་ཏེ་གནས་སོ་སོར་སླན་པ་རྣམས་བཅུག །ཧེ་རུ་ཀ་འདུས་པ་ལས། དངུལ་དང་གསེར་དང་ཟངས་མ་དང་། །ལྕགས་ཀྱི་ཕུར་བུ་བསྔགས་པ་ཡིན། །ཞེས་སམ་ལས་ཀྱི་ཁ་དོག་དང་རྗེས་སུ་མཐུན་པའི་ཤིང་ལའང་རུང་སྟེ། ཞི་བ་ལ་ཕུར་བུ་དབལ་ཟླུམ་པོ་ཅན་དྲུག །རྒྱས་པར་གྲུ་བཞི་པ་བཞི། དབང་ལ་ཟླ་གམ་ལྔ། དྲག་པོ་ལ་གྲུ་གསུམ་པ་གསུམ་སྟེ། ཐམས་ཅད་ཀྱི་མགོ་བོ་རྒྱ་མདུད་ཅན་རྣམས་རང་རང་གི་བྲུབ་ཁུང་གི་ཁ་ཁྱེར་ལ་བཀོད་ཅིང་། སྒྲོལ་གྲི་སོགས་ཉེ་བར་མཁོ་བའི་ཡོ་བྱད་ཐམས་ཅད་ཚང་ཞིང་འདུ་བྱའོ། ༈ །གཉིས་པ་དངོས་གཞི་ཆོ་གའི་ལས་རིམ་སོ་སོར་བཤད་པ་ལ། སྒྲུབ་མཆོད་དང་འབྲེལ་ན་བདག་བསྐྱེད་ལོགས་སུ་མི་དགོས་ནའང་། སྦྱིན་སྲེག་རྐྱང་ཆོག་གི་ཚེ་ཞི་ཁྲོ་ལུས་དཀྱིལ་ལ་བཀོད་པའི་ཆོ་ག་ཞི་ཐུང་ཁྲོ་ཐུང་གང་རིགས་སམ། ཡང་ན་ཞི་རྒྱས་ལ་ཞི་བ་དང་། དབང་དྲག་ལ་ཁྲོ་བོར་བརྟེན་པ་ཤིས་ལ། གང་ལྟར་ཡང་ཛཔ྄་ཀྱི་ཚེ་ལས་དང་མཐུན་པའི་འོད་ཟེར་སྤྲོ་བསྡུས་ལས་དེ་དང་དེས་རང་གཞན་གྱི་དོན་བྱས་པར་བསམ་པ་ནི་ཁྱད་པར་རོ། །དེ་ཡང་རྟེན་དང་བརྟེན་པ་ལུས་དཀྱིལ་གྱི་ལྷ་རྣམས་བསྡུས་ཏེ་རང་ཉིད་གཞི་ལུས་ཀྱི་རྣམ་པར་གནས་པས་སྦྱིན་སྲེག་ལ་འཇུག་པའམ། ཡང་ན་སྔོན་འགྲོ་ཞི་ཐུང་ལྟར་ལས། དངོས་གཞིའི་ཚེ་དབྱིངས་དང་ཡེ་ཤེས་གཉིས་སུ་མེད་པའི་བྱང་ཆུབ་ཀྱི་སེམས་ཉིད་རང་རང་གི་བསྐྱེད་སྔགས་ཀྱིས་སད་པ་ལས། ཞི་བ་ལ་རྣམ་སྣང་། རྒྱས་པ་ལ་རིན་འབྱུང་། དབང་ལ་པདྨ་ཧེ་རུ་ཀ །དྲག་པོ་ལ་བཛྲ་ཧེ་རུ་ཀ་རྣམས་ཡུམ་བཅས་ཏེ། ཕྱག་རྒྱ་གཅིག་པའི་ལྷ་བསྒོམས་ལ། རང་རིགས་བདག་པོར་བྱས་པས་དབང་བསྐུར། གནས་གསུམ་བརླབ། དབབ། དྲངས། བསྟིམ། བརྟན། མཆོད་ཅིང་བསྟོད་ནས། ལས་མཐུན་གྱི་འོད་ཟེར་སྤྲོ་བསྡུས་རང་སྔགས་ཀྱི་བཟླས་པ་བྱས་རྗེས་སྦྱིན་སྲེག་ལ་འཇུག་པ་ཡིན་ནོ། །དེ་ལྟར་ངེས་པར་བྱས་ནས་ཆོ་གའི་ལས་རིམ་ལ་བཞི་སྟེ། ཞི་བ་དང་། རྒྱས་པ་དང་། དབང་དང་། དྲག་པོའོ།། །།

༈ དང་པོ་ཞི་བའི་སྦྱིན་སྲེག་ནི། ཆས་གོས་དཀར་པོ་གྱོན་ནས་རྡོ་རྗེ་སྐྱིལ་ཀྲུང་གིས་ཞི་ཞིང་དང་བའི་སེམས་དང་ལྡན་པས་ཤིས་པའི་ཕྱོགས་སུ་ཁ་བལྟས་ཏེ། བདག་བསྐྱེད་བཟླས་པའི་བར་བྱས་ལ། ལས་བུམ་གྱི་ཆུའམ་བདུད་རྩི་གཏོར་བས་ལས་གཏོར་དང་སྲེག་རྫས་རྣམས་བསང་སྦྱངས། །སྟོང་པའི་ངང་ལས་མ་ཨ་ཞེས་བརྗོད་པས་ཉི་ཟླ་གའུའི་སྣོད་དུ་རང་གི་ཐུགས་ཀ་ནས་ཨ་དཀར་པོ་སྤྲོས་པ་འོད་ཟེར་འཕྲོ་འདུས་ཡོངས་སུ་གྱུར་པ་ལས་བྱུང་བའི་ལས་གཏོར་རིན་པོ་ཆེའི་མཆོད་སྡོང་འོད་ཟེར་དཀར་པོ་འཕྲོ་བ་དང་། བསྲེག་རྫས་རྣམས་ཟག་མེད་ཡེ་ཤེས་ཀྱི་བདུད་རྩི་རོ་བརྒྱ་ལྡན་པ་ནམ་མཁའ་རབ་འབྱམས་གང་བས་ཞི་བའི་ལས་སྒྲུབ་པ་ལ་ཐོགས་པ་མེད་པའི་ནུས་པ་དང་ལྡན་པར་བྱིན་གྱིས་བརླབ། དེ་ནས་ཚོགས་མཆོད་ཀྱི་མཆོད་བཤགས་ཡན་ཆད་སོང་བ་དང་། ཐ་མ་སྟོབ་པ་ནི་བྲུབ་ཁུང་གི་ཉ་བོ་མདུན་དུ་བཀོད་ལ། ཨ་རཾ་ༀ་བུདྡྷ་ཤྲཱི་ཧེ་རུ་ཀ་བུདྡྷ་ཀྲོ་དྷཱི་ཤྭ་རཱི་ཧཱུཾ། ཧཱུཾ་ཧ་ཧེ་ཕཊ་བྷྱོ་རཾ། ཕྱི་སྣོད་ཞི་བའི་དཀྱིལ་འཁོར་ཆུ་ཤེས་གྱི་རང་བཞིན་ཅན་དཀར་ཟླུམ་ཡངས་པ་འོད་ཟེར་འཕྲོ་བའི་དབུས་སུ་ནང་བཅུད་བུདྡྷ་རིགས་ཀྱིས་གཙོ་བྱས་པའི་ཁྲག་འཐུང་འབར་བའི་དཀྱིལ་འཁོར་སྤྲུལ་པའི་འོད་ཟེར་དཀར་པོ་འཕྲོ་བའི་སྐུར་བཞེངས་པར་བསམ་ལ། བདེན་སྟོབས་བརྗོད་དེ། བསྒྲུབ་བྱ་ཆེ་གེ་མོ་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག །བཛྲ་ཨངྐུ་ཤ་ཛཿཛཿཧཱུཾ་བཾ་ཧོཿ ཞེས་བཀུག་ཅིང་བསྟིམ་ལ། ཡ། གཏི་མུག་རྡོ་རྗེ་འཁོར་བཅས་ཀྱིས། །འཇིག་རྟེན་ཁམས་ནི་རབ་འབྱམས་ཀུན། །ཡུད་ཙམ་གྱིས་ནི་ཞི་མཛད་ནས། །ཞི་བའི་ཕྲིན་ལས་སྒྲུབ་པར་མཛོད། །ཅེས་བསྐུལ་བས་ལྷ་ཚོགས་རྣམས་ཞི་བའི་ལས་མཛད་པ་ལ་དགྱེས་པར་གྱུར། དེ་ནས་ལས་གཏོར་ནས་ལག་གཉིས་ཀྱི་མཐེབ་མཛུབ་ཀྱིས་གཏོར་ཀྱུ་བླངས་ལ་གཡས་གཡོན་དུ་བསྐོར་ཞིང་། ༀ། དངུལ་དང་འབྲས་ཆན་དཀར་པོ་རྣམས། །འོ་མས་སྦྱར་བའི་གཏོར་མ་ནི། །གང་ལ་དམིགས་ཏེ་བསྐོར་བྱས་པས། །གདུག་པའི་ཚོགས་རྣམས་ཞི་བར་འགྱུར། །མ་ཧཱ་བ་ལིཾ་ཏ་སརྦ་དུ ཥྚན་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་ལིངྒིའི་སྟེང་དུ་བྲབ། དེ་ནས་ཞི་བའི་ཕུར་བུ་དྲུག་པོ་ཐལ་མོའི་བར་དུ་བཟུང་ལ། བུདྡྷ་ཀཱི་ལི་ཀཱི་ལ་ཡ་ཕཊ་ཛཿཞེས་པས་རང་གི་ཐུགས་ཀ་ནས་བུདྡྷ་ཀཱི་ལ་ཡ་སྤྲོས། ཕུར་བུ་ལ་ཐིམ་པས་སྲས་མཆོག་བུདྡྷ་ཀཱི་ལ་ཡར་གྱུར་པ་ལ། ཨཱ་དཪྴ་ཐོག་མར་བྱས་པས་དབང་བསྐུར། བྱིན་གྱིས་བརླབས་ནས། ༀ། ཕུར་བུ་ཁ་དོག་དཀར་པོ་ཡི། །མགོ་བོ་རྒྱ་མདུད་རྩེ་ཟླུམ་པོར། །ལྷ་རྣམས་བཀོད་དེ་གདབ་པར་བྱ། །འདིས་ནི་ཐམས་ཅད་ཞི་བར་འགྱུར། །ༀ་བུདྡྷ་ཀཱི་ལ་ཡ་སརྦ་པཱ་པཾ་ཤཱནྟིཾ་ཀུ་རུ་སྭཱ་ཧཱ། ཞེས་དང་། གྷཱ་ཏཱའི་སྔགས་ཀྱིས་ཡན་ལག་ལྔ་དང་སྙིང་ལ་གདབ། བདག་གི་ཐུགས་ཀ་ནས་ཡེ་ཤེས་ཀྱི་འོད་ཟེར་དཀར་པོ་འཕྲོས། དམིགས་བྱ་ལ་ཕོག་པས་དུག་ལྔ་ཡེ་ཤེས་ལྔར་སྦྱངས། དྭངས་མ་བདེ་ཆེན་བྱང་ཆུབ་སེམས་ཀྱི་ངོ་བོར་སྤར། ཚེ་རྟེན་འོད་ཟེར་གྱི་རྣམ་པར་འདུས་པ་བདག་གི་རྡོ་རྗེའི་ཚེ་སྲོག་དང་དབྱེར་མེད་དུ་གྱུར་པར་མོས་ལ་སྙིང་གའི་ཕུར་བུ་གདོན། བཛྲ་ཏཱིཀྵྞཱ་མུཾ་ཞེས་གྲི་འཇམ་དཔལ་གྱི་ངོ་བོར་གྱུར་པ་ཐོགས་ཏེ། སརྦ་དུཥྚཱན་སརྦ་པཱ་པཾ་ཤཱནྟིང་ཀུ་རུ་སྭཱ་ཧཱ། ཞེས་བསྒྲུབ་བྱ་ཕོ་ཡིན་ན་རྐང་པ་གཡས་པའི་མཐེ་བོང་དང་མོ་ཡིན་ན་གཡོན་པའི་མཐེ་ཆུང་ནས་གཏུབ་ཅིང བསྒྲལ་ལ། ལིང་རོ་ཆ་གསུམ་དུ་བགོས་ཏེ། གཅིག་མཆོད་གཏོར་ལ་བྲན་ཅིང་བདུད་རྩི་གཏོར་ལ། མ་ཧཱ་བ་ལིངྟ་པྲ་ཏཱི་ཙྪ་ཁཱ་ཧི། ཞེས་སྟོབ་པ་བྱ། ཚོ་གཅིག་སྲེག་རྫས་རྣམས་ལ་བསྲེ། ཚོ་གཅིག་བྲོ་གདན་གྱི་ཕྱིར་བྲུབ་ཁུང་ཉིད་དུ་བཞག་གོ། །དེ་ནས་སྦྱིན་སྲེག་དངོས་ནི། རང་ཉིད་སྔར་བདག་བསྐྱེད་གང་ཡིན་དེར་ང་རྒྱལ་འཕོས་ལ། ཐོག་མར་འཇིག་རྟེན་པའི་མེ་ལྷ་མཆོད་པ་ནི། ཐབ་ལས་སྔགས་ཀྱིས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་བྷྲུཾ་ཞེས་བརྗོད་པས་མདུན་དུ་ཞི་བའི་ཐབ་ཁུང་དཀར་ཞིང་ཟླུམ་པ་ཁ་ཁྱེར་བང་རིམ་གསུམ་དང་ལྡན་པ་འོད་ཟེར་དཀར་པོ་འཕྲོ་བར་གྱུར། རང་གི་ཐུགས་ཀ་ནས་རཾ་ཡིག་ཐབ་ནང་དུ་སྤྲོས་པ་ལས་ཡེ་ཤེས་ཀྱི་མེ་འོད་དཀར་པོར་འབར་བར་བསམ་ལ། ༀ་ཨགྣ་ཡེ་ཛྭ་ལ་ཛྭ་ལ་ཧཱུཾ་ཕཊ། ཅེས་པས་རྒྱལ་རིགས་སམ་དགེ་བདུན་གྱི་རྒྱུན་བཞག་གི་མེའམ་རྩུབ་ཤིང་ལས་བྱུང་བའི་མེ་དུ་བ་མེད་པར་སྤར་ལ། ཐབ་ཀྱི་མེའི་དབུས་སུ་ཉི་མ་དང་ར་སྐྱེས་ཀྱི་གདན་ལ་ཨགྣེ་དེ་ཝ་རྀ་ཥི་ཧཱུཾ་ཞེས་བརྗོད་པས་ཞི་བའི་མེ་ལྷ་དཀར་པོ་དྲང་སྲོང་གི་ཆས་ཅན་གུནྡྷེ་དང་བགྲང་ཕྲེང་འཛིན་པ་གསལ་བར་གྱུར། ཨ་དཪྴ་སོགས་ཀྱིས་བསྐུར་བརླབ། རང་གི་ཐུགས་ཀ་ནས་འོད་ཟེར་འཕྲོས་པས་ཤར་ལྷོ་ནས་མེ་ལྷ་འཁོར་བཅས་བཞེངས་པར་བསམ་ལ། ཨགྣ་ཡེ་དེ་ཝ་ས་མ་ཡ་ཧཱུཾ་ཛཿ ཞེས་སེ་གོལ་བསྣོལ་མར་གདབ། མདའ་དར་དམར་པོ་གཡབ་ཅིང་། ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷ་དྲང་སྲོང་བྲམ་ཟེ་མཆོག །འདི་ཉིད་དུ་ནི་གཤེགས་སུ་གསོལ། །ལྕགས་ཀྱུའི་རྒྱ་དང་བཅས། ཨགྣེ་དེ་ཝི་རྀ་ཥི་ཛཿཛཿས་སྤྱན་དྲངས་ལ། ཛཿཧཱུཾ་བཾ་ཧོཿ ས་བསྟིམ་པ་ལ། ཀུན་བཟང་ཞབས་བསིལ་བཞི་བསྣོལ་གྱིས་མཆོད། ཧཱུཾ། བདེ་གཤེགས་རིགས་ལས་གྲུབ་པ་ཡི། །མེ་ལྷའི་རྒྱལ་པོ་དྲང་སྲོང་མཆོག །ཕྲིན་ལས་ཀུན་གྱི་དཔང་པོ་མཛད། །སྟངས་འཛིན་ལྷ་ལ་ཕྱག་འཚལ་བསྟོད། །ཅེས་པས་བསྟོད། མེ་ལྷ་ཞལ་ཅུང་ཟད་གདངས་པས་སྲེགས་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་མོས་ལ། ལག་པ་དེ་བཞིན་གཤེགས་པའི་ཁུ་ཚུར་གཉིས་སུ་བྱས་པས་གཟར་བུ་བཟུང་ལ། མར། ༀ་ཨགྣ་ཡེ་སྭཱ་ཧཱ། ཞེས་གཡས་ཀྱི་བླུགས་གཟར་བདུན་གྱིས་གཡོན་གྱི་དགང་གཟར་བཀང་རྗེས་གཟར་བུ་ཁ་སྦྱར་ཏེ་པུས་མོའི་ནང་ལས་མི་འདའ་བས་གཡས་སུ་བསྐོར་ཞིང་། ༀ་ཨགྣེ་དེ་ཝ་རྀ་ཥི་ཧ་བྱ་ཀ་བྱ་དི་བྱ་མ་ཧཱ་ན་ཡེ་དི་བྱ་བདག་ཅག་དཔོན་སློབ་འཁོར་དང་བཅས་པའི་ནད་གདོན་སྡིག་སྒྲིབ་བར་ཆད་མི་མཐུན་པའི་ཕྱོགས་ཐམས་ཅད་ཤཱནྟིཾ་ཀུ་རུ་སྭཱ་ཧཱ། ཞེས་ལན་གསུམ་གྱིས་དགང་བླུགས་ཕུལ། སྔགས་དེ་ཁོ་ནས་ཐོག་མར་ཡམ་ཤིང་དང་མར་ཁུ། དེ་ནས་སྲེག་རྫས་རྣམས་སོ་སོའམ་གཅིག་ཏུ་བསྲེས་ནས་ཕུལ་ཀྱང་རུང་སྟེ་གྲངས་ཇི་ལྟར་འོས་པ་ཕུལ་ལ། ན་མོ། རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་སྲེག་རྫས་ལྷའི་ཞལ་དུ་འབུལ་བ་དང་། དེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་བདག་ཅག་གི་ཕྲིན་ལས་ཐམས་ཅད་མཛད་དུ་གསོལ། ཞེས་འདོད་དོན་གསོལ་ལོ། །དེ་ནས་འདས་པའི་མེ་ལྷ་མཆོད་པ་ནི། ༀ་བཛྲ་ཛྙཱ་ན་ཛྭ་ལ་རཾ་ཞེས་བརྗོད་པས་མེ་ལྷ་ཉིད་ཐུགས་རྗེ་ཡེ་ཤེས་མེ་འབར་བའི་རྣམ་པར་གྱུར་པའི་ཀློང་དུ་བྷྲཱུཾ་བི་ཤྭ་བི་ཤུདྡྷེ་ཞེས་པས་གཞལ་ཡས་ཁང་གདན་དང་བཅས་པ་བཀྲ་ལམ་གྱིས་གསལ་བར་གྱུར། ༀ་ཧཱུཾ་སྭཱ་ཨཱཾ་ཧཱ་ཧཱུཾ་ཧ་ཧེ་ཕཊ་བྷྱོ་རཾ་ཞེས་བརྗོད་པས་སྟེང་ཁང་དུ་རྣམ་སྣང་གིས་གཙོ་བྱས་པའི་ཞི་བ་རྡོ་རྗེ་དབྱིངས་ཀྱི་ལྷ་བཞི་བཅུ་རྩ་གཉིས་དང་། འོག་ཁང་དུ་བུདྡྷ་ཧེ་རུ་ཀས་གཙོ་བྱས་པའི་ཁྲག་འཐུང་ཚོགས་ཆེན་འདུས་པའི་དཀྱིལ་འཁོར་གྱི་ལྷ་ཚོགས་ཐམས་ཅད་སྐུ་མདོག་དཀར་པོ་གཡས་འཁོར་ལོ་དང་། གཡོན་ཞི་བ་རྣམས་དྲིལ་བུ་དང་ཁྲོ་བོ་རྣམས་དུང་ཁྲག་བསྣམས་པ་སྐུ་ལས་འོད་ཟེར་དཀར་པོའི་ཕྲེང་བ་མཁའ་ཁྱབ་ཏུ་སྤྲོ་བའི་དཀྱིལ་འཁོར་གྱི་འཁོར་ལོར་བཀྲ་ལམ་གྱིས་གསལ་བར་གྱུར། རྣམ་སྣང་བདག་པོར་བྱས་པས་དབང་བསྐུར། བྱིན་གྱིས་བརླབ། དབབ། དྲངས། བསྟིམ་ཞིང་བརྟན་པར་བྱའོ། །དཀྱིལ་འཁོར་སྒྲུབ་མཆོད་དང་འབྲེལ་བའི་ཚེ་གཞལ་ཡས་ཁང་གདན་དང་བཅས་པ་སྔར་བཞིན་བསྐྱེད་རྗེས། ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདས། །རྒྱལ་བ་ཞི་ཁྲོའི་ལྷ་ཚོགས་རྣམས། །འདིར་གཤེགས་བདག་ལ་དངོས་གྲུབ་སྩོལ། །ༀ་ཧཱུཾ་སྭཱ་ཨཱཾ་ཧཱ་ཧཱུཾ་ཧ་ཧེ་ཕཊ་བྷྱོ། ཛཿཧཱུཾ་བཾ་ཧོཿ ཨེ་ཧྱེ་ཧི་རུ་ལུ་རུ་ལུ་ཧཱུཾ་བྷྱོ་ཛཿཛཿ ཞེས་པས་དཀྱིལ་འཁོར་གྱི་ལྷ་ཚོགས་རྣམས་མཎྜལ་མེ་ཏོག་གིས་མཚོན་པར་སྤྱན་དྲངས་ལ། དེ་ལས་མེ་ཏོག་ཐབ་ཏུ་དོར་བས། ལྷ་ཐམས་ཅད་གཞལ་ཡས་ཁང་གི་གནས་སོ་སོར་རང་རང་གི་གདན་ལ་བཞུགས་པར་བསམ་པ་ཙམ་ལས་བསྐུར་རློབ་སོགས་མི་དགོས་སོ། །སྒྲུབ་མཆོད་དང་འབྲེལ་མ་འབྲེལ་གང་ལྟར་ཡང་། དེ་ནས་ཀུན་བཟང་། ཞབས་བསིལ། བཞི་བསྣོལ་གྱིས་མཆོད། བརྗོད་མེད་ཤེས་རབ་ཀྱིས་བསྟོད། དཀྱིལ་འཁོར་གྱི་ལྷ་རྣམས་ཀྱི་ལྗགས་རྡོ་རྗེ་འོད་ཀྱི་སྦུ་གུ་ཅན་གྱིས་བསྲེགས་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམ་ལ། ༀ་ཛི་ན་ཛིཀ྄་ཞེས་བདུན་གྱིས་བཀང་བའི་དགང་བླུགས་སྦྱར་བ་སྔར་བཞིན་དུ། ༀ་གུ་ཧྱ་ཛྙཱ་ན་བོ་དྷི་ཙིཏྟ་མ་ཧཱ་སུ་ཁ་ཧཱུཾ་ཧཱུཾ་གི་མཐར། བདག་ཅག་དཔོན་སློབ་སོགས་སྤེལ་ཚིག་སྔར་ལྟར་བཏགས་པས་ལན་གསུམ་ཕུལ། དེ་ནས་སྔགས་དེ་ཉིད་ཀྱིས་ཡམ་ཤིང་དང་མར་ཁུ་སྔོན་དུ་འགྲོ་བའི་སྲེག་རྫས་རྣམས་བརྒྱ་རྩ་སོགས་ཇི་ལྟར་རིགས་པ་ཕུལ་ནས། མ་ཧཱ་པཉྩ་ཨ་མྲྀ་ཏ་ཁཱ་ཧིས་བདུད་རྩི། ལས་གཏོར་ལས་གཏོར་ཀྱུ་བླངས་ཏེ། མ་ཧཱ་བ་ལིཾ་ཏ་པྲ་ཏཱི་ཙྪ་ཁཱ་ཧིས་གཏོར་མ། མ་ཧཱ་རཀྟ་པྲ་ཏཱི་ཙྪ་ཁཱ་ཧིས་རཀྟ་ཕུལ་ལ། ༀ། ཀློང་ཡངས་འཁྱིལ་བའི་ཧོམ་ཁུང་དུ། །དམ་རྫས་བདུད་རྩི་འདི་ཕུལ་བས། །བདག་ཅག་འཁོར་དང་བཅས་རྣམས་ཀྱི། །ནད་གདོན་སྡིག་སྒྲིབ་ཀུན་ཞི་ནས། །མཆོག་ཐུན་དངོས་གྲུབ་སྩལ་དུ་གསོལ། །ཞེས་གསོལ་བ་བཏབ་པས་ལྷ་ཚོགས་རྣམས་ཀྱི་སྐུ་ལས་འོད་ཟེར་དཀར་པོ་བདུད་རྩིའི་རྒྱུན་ལྟ་བུ་འཕྲོས་པས་བསྒྲུབ་བྱའི་ནད་གདོན་སྡིག་སྒྲིབ་ཐམས་ཅད་ཞི་བར་བསམ་མོ། །དེ་ནས་བཏང་རག་གི་མཆོད་བསྟོད་དང་བཟོད་གསོལ་བྱས་ལ། དཀྱིལ་འཁོར་དང་འབྲེལ་ཚེ་སྔར་ལྟར་མེ་ཏོག་གིས་སྤྱན་དྲངས་ཏེ་དཀྱིལ་འཁོར་དུ་སོ་སོའི་གནས་སུ་བཞུགས་པར་བསམ། མ་འབྲེལ་ན་ཛྙཱ་ན་མཎྜ་ལ་བཛྲ་མུཿ ཞེས་ཡེ་ཤེས་པ་གཤེགས་སུ་གསོལ། དམ་ཚིག་པ་རང་ལ་ཐིམ་པར་བསམ་མོ། །སླར་ཡང་། ༀ་ཨགྣ་ཡེ་ཛྭ་ལ་ཛྭ་ལ་ཧཱུཾ་ཕཊ། ཅེས་བླུགས་གཟར་གྱི་མར་ཁུས་མེ་གསོས། འཇིག་རྟེན་པའི་མེ་ལྷ་སྔར་བཞིན་གསལ་བར་བསམ་ལ། སྲེག་རྫས་ལྷག་མ་རྣམས་ཕུལ། མཆོད་ཅིང་བསྟོད། ལས་གཏོར་ནས་གཏོར་ཀྱུ་བླངས་ཏེ། ༀ་ཨགྣེ་དེ་བ་རྀ་ཥི་མ་ཧཱ་བ་ལིཾ་ཏ་ཁཱ་ཧིས་གཏོར་མ་ཕུལ་ལ་འདོད་དོན་གསོལ། ཡིག་བརྒྱས་ནོངས་པ་བཤགས། བཛྲ་མུཿས་མེ་ལྷ་ཡེ་ཤེས་པ་རང་གནས་སུ་གཤེགས། དམ་ཚིག་པ་འབར་བའི་རྣམ་པར་གྱུར་པར་བསམ་མོ། ༈ །གཉིས་པ་རྒྱས་པའི་སྦྱིན་སྲེག་ནི། རས་གོས་སེར་པོ་གྱོན་ནས་མཉམ་པའི་སྐྱིལ་ཀྲུང་གིས་དགའ་ཞིང་སྤྲོས་བའི་སེམས་དང་ལྡན་པས་ཤིས་པའི་ཕྱོགས་སུ་ཁ་བལྟས་ཏེ། བདག་བསྐྱེད་བཟླས་པའི་བར་བྱས་ལ། ལས་བུམ་གྱི་ཆུའམ་བདུད་རྩིས་ལས་གཏོར་དང་སྲེག་རྫས་རྣམས་བསང་སྦྱངས། སྟོང་པའི་ངང་ལས་མ་ཨ་ཞེས་བརྗོད་པས་ཉི་ཟླ་གའུའི་སྣོད་དུ་རང་གི་ཐུགས་ཀ་ནས་ཏྲཾ་སེར་པོ་སྤྲོས་པ་འོད་ཟེར་འཕྲོ་འདུས་ཡོངས་སུ་གྱུར་པ་ལས་བྱུང་བའི་ལས་གཏོར་རིན་པོ་ཆེའི་མཆོད་སྡོང་འོད་ཟེར་སེར་པོ་འཕྲོ་བ་དང་། སྲེག་རྫས་རྣམས་ཟག་མེད་ཡེ་ཤེས་ཀྱི་བདུད་རྩི་རོ་བརྒྱ་ལྡན་པ་ནམ་མཁའ་རབ་འབྱམས་གང་བས་རྒྱས་པའི་ལས་འགྲུབ་པ་ལ་ཐོགས་པ་མེད་པའི་ནུས་པ་དང་ལྡན་པར་བྱིན་གྱིས་བརླབ། དེ་ནས་ཚོགས་མཆོད་ཀྱི་མཆོད་བཤགས་ཡན་ཆད་སོང་བ་དང་། ཐ་མ་སྟོབས་པ་ནི་བྲུབ་ཁུང་གི་ཉ་བོ་མདུན་དུ་བཀོད་ལ། མ་རཾ། ༀ་རཏྣ་ཤྲཱི་ཧེ་རུ་ཀ་རཏྣ་ཀྲོ་དྷེ་ཤྭ་རཱི་ཧཱུཾ། ཧཱུཾ་ཧ་ཧེ་ཕཊ་བྷྱོ་རཾ། ཕྱི་སྣོད་རྒྱས་པའི་དཀྱིལ་འཁོར་གསེར་བཙོ་མའི་རང་བཞིན་ཅན་སེར་པོ་གྲུ་བཞི་ཡངས་པ་འོད་ཟེར་འཕྲོ་བའི་དབུས་སུ་ནང་བཅུད་རཏྣ་རིགས་ཀྱིས་གཙོ་བྱས་པའི་ཁྲག་འཐུང་འབར་བའི་དཀྱིལ་འཁོར་སྤྲུལ་པའི་འོད་ཟེར་སེར་པོ་འཕྲོ་བའི་སྐུར་བཞེངས་པར་བསམ་ལ། བདེན་སྟོབས་བརྗོད་དེ། བསྒྲུབ་བྱ་ཆྒཻ་མོ་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག །བཛྲ་ཨཾ་ཀུ་ཤ་ཛཿཛཿཧཱུཾ་བཾ་ཧོཿ ཞེས་བཀུག་ཅིང་བསྟིམ་ལ། མ། ང་རྒྱལ་རྡོ་རྗེ་འཁོར་བཅས་ཀྱིས། །འཇིག་རྟེན་ཁམས་ནི་རབ་འབྱམས་ཀུན། །ཡུད་ཙམ་གྱིས་ནི་རྒྱས་མཛད་ནས། །རྒྱས་པའི་ཕྲིན་ལས་སྒྲུབ་པར་མཛོད། །ཅེས་བསྐུལ་བའི་ལྷ་ཚོགས་རྣམས་རྒྱས་པའི་ལས་མཛད་པ་ལ་དགྱེས་པར་གྱུར། དེ་ནས་ལས་གཏོར་ནས་ལག་གཉིས་ཀྱི་མཐེབ་མཛུབ་ཀྱིས་གཏོར་ཀྱུ་བླངས་པ་གཡས་གཡོན་དུ་བསྐོར་ཞིང་། ཏྲཾ། ལྡོང་རོས་གྲོ་ཆན་གསེར་ཕྱེ་རྣམས། །ཞོ་དང་སྦྱར་བའི་གཏོར་མ་ནི། །གང་ལ་དམིགས་ཏེ་བསྐོར་བྱས་པས། །ཚེ་དང་བསོད་ནམས་འཕེལ་བར་འགྱུར། །མ་ཧཱ་བ་ལིཾ་ཏ་ཨཱ་ཡུཿཔུཎྱ་བ་སུ་ཛྙཱ་ན་པུཥྚིཾ་ཀུ་རུ་ༀ། ཞེས་ལིདྒའི་སྟེང་དུ་བྲབ། དེ་ནས་རྒྱས་པའི་ཕུར་བུ་བཞི་པོ་ཐལ་མོའི་བར་དུ་བཟུང་ལ། རཏྣ་ཀཱི་ལི་ཀཱི་ལ་ཡ་ཕཊ་ཛཿ ཅེས་པས་རང་གི་ཐུགས་ཀ་ནས་རཏྣ་ཀཱི་ལ་ཡ་སྤྲོས། ཕུར་བུ་ལ་ཐིམ་པས་སྲས་མཆོག་རཏྣ་ཀཱི་ལ་ཡར་གྱུར་པ་ལ། ས་མ་ཏཱ་སོགས་ཀྱིས་དབང་བསྐུར། བྱིན་གྱིས་བརླབས་ནས། ཏྲཾ། ཕུར་བུ་ཁ་དོག་སེར་པོ་ཡི། །མགོ་བོ་རྒྱ་མདུད་རྩེ་གྲུ་བཞི། །ལྷ་རྣམས་བཀོད་དེ་གདབ་པར་བྱ། །འདིས་ནི་ཐམས་ཅད་རྒྱས་པར་འགྱུར། །ༀ་རཏྣ་ཀཱི་ལི་ཀཱི་ལ་ཡ་ཨཱཿཡུ་པུཎྱ་བ་སུ་ཛྙཱ་ན་པུཥྚིཾ་ཀུ་རུ་ༀ། ཞེས་དང་། གྷཱ་ཏའི་སྔགས་ཀྱིས་དཔྲལ་མགྲིན་སྙིང་ལྟེ་བཞིར་གདབ། བདག་གི་ཐུགས་ཀ་ནས་ཡེ་ཤེས་ཀྱི་འོད་ཟེར་སེར་པོ་འཕྲོས་དམིགས་བྱ་ལ་ཕོག་པས་དུག་ལྔ་ཡེ་ཤེས་ལྔར་སྦྱངས། དྭངས་མ་བདེ་ཆེན་བྱང་ཆུབ་སེམས་ཀྱི་ངོ་བོར་སྤར། ཚེ་རྟེན་འོད་ཟེར་གྱི་རྣམ་པར་འདུས་པ་བདག་གི་རྡོ་རྗེའི་ཚེ་སྲོག་དང་དབྱེར་མེད་དུ་གྱུར་པར་མོས་ལ་སྙིང་གའི་ཕུར་བུ་གདོན། བཛྲ་ཏཱིཀྵྞ་མུཾ། ཞེས་གྲི་འཇམ་དཔལ་གྱི་ངོ་བོར་གྱུར་པ་ཐོགས་ཏེ། ཨཱ་ཡུཿཔུཎྱ་བ་སུ་ཛྙཱ་ན་པུཥྚིཾ་ཀུ་རུ་ༀ། ཞེས་བསྒྲུབ་བྱ་ཕོའི་རྐང་གཡས་ཀྱི་མཐེ་བོང་དང་མོའི་གཡོན་པའི་མཐེའུ་ཆུང་ནས་གཏུབ་ལ། ལིང་རོ་ཆ་གསུམ་དུ་བྱས་ཏེ། སྔར་བཞིན་གཅིག །མ་ཧཱ་བ་ལིངྟ་པྲ་ཏཱི་ཙྪ་ཁཱ་ཧི་ཞེས་པས་སྟོབ་པ་དང། གཅིག་སྲེག་རྫས་ལ་བསྲེ། གཅིག་བྲོ་གདན་གྱི་ཕྱིར་བཞག་གོ །དེ་ནས་སྤྱིན་སྲེག་དངོས་ནི། རང་ཉིད་སྔར་བདག་བསྐྱེད་གང་ཡིན་དེར་ང་རྒྱལ་འཕོས་ལ། ཐབ་བསང་སྦྱངས། སྟོང་པའི་ངང་ལས་བྷྲུཾ་ཞེས་བརྗོད་པས་མདུན་དུ་རྒྱས་པའི་ཐབ་ཁུང་སེར་པོར་འབར་བར་བསམ་ལ། ༀ་ཨགྣ་ཡེ་ཛྭ་ལ་ཛྭ་ལ་ཧཱུཾ་ཕཊ། ཅེས་པས་རྗེ་རིགས་ཀྱི་མེའམ་ནོར་བུ་ལས་བྱུང་བའི་མེ་དུ་བ་མེད་པ་སྤར་ལ། ཐབ་ཀྱི་མེའི་དབུས་སུ་ཉི་མ་དང་ར་སྐྱེས་ཀྱི་གདན་ལ་ཨགྣེ་དེ་ཝ་རྀ་ཥི་ཧཱུཾ་ཞེས་བརྗོད་པས་རྒྱས་པའི་མེ་ལྷ་སེར་པོ་དྲང་སྲོག་གི་ཆས་ཅན་རིན་པོ་ཆེའི་སྒྲོམ་བུ་དང་བགྲང་ཕྲེང་འཛིན་པ་གསལ་བར་གྱུར། ས་མ་ཏཱ་སོགས་ཀྱིས་དབང་བསྐུར། བརླབ། རང་གི་ཐུགས་ཀ་ནས་འོད་ཟེར་འཕྲོས་པས་ཤར་ལྷོ་ནས་མེ་ལྷ་འཁོར་བཅས་བཞེངས་པར་བསམ་ལ། ཨགྣ་ཡེ་དེ་ཝ་ས་མ་ཡ་ཧཱུཾ་ཛཿ ཞེས་སོ་གོལ་བསྣོལ་མར་བདབ། མདའ་དར་དམར་པོ་གཡབ་ཅིང་། ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷ་དྲང་སྲོང་བྲམ་ཟེ་མཆོག །འདི་ཉིད་དུ་ནི་གཤེགས་སུ་གསོལ། །ལྕགས་ཀྱུའི་རྒྱ་དང་བཅས། ཨགྣེ་དེ་ཝ་རྀ་ཥི་ཛཿཛཿས་དྲངས། ཛཿཧཱུཾ་བཾ་ཧོཿས་བསྟིམ། ཀུན་བཟང་ཞབས་བསིལ་བཞི་བསྣོལ་གྱིས་མཆོད། ཧཱུཾ། རིན་ཆེན་རིགས་ལས་གྲུབ་པ་ཡིས། །མེ་ལྷའི་རྒྱལ་པོ་དྲང་སྲོག་མཆོག །ཕྲིན་ལས་ཀུན་གྱི་དབང་པོ་མཛད། །སྟངས་འཛིན་ལྷ་ལ་ཕྱག་འཚལ་བསྟོད། །ཅེས་པས་བསྟོད། མེ་ལྷ་ཞལ་ཅུང་ཟང་གདངས་པས་སྲེགས་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་མོས་ལ། རིན་པོ་ཆེའི་ཁུ་ཚུར་གྱིས་དགང་བླུགས་བཟུང་ནས་མར། ༀ་ཨགྣ་ཡེ་སྭཱ་ཧཱ། ཞེས་གཡས་པའི་བླུགས་གཟར་བདུན་གྱིས་གཡོན་པའི་དགང་གཟར་བཀང་རྗེས་གཟར་བུ་ཁ་སྦྱར་ཏེ་པུས་མོའི་ནང་ལས་མི་འདའ་བས་གཡས་སུ་བསྐོར་ཞིང་། ༀ་ཨགྣེ་དེ་ཝ་རྀ་ཥི་ཧ་བྱ་ཀ་བྱ་དི་བྱ་མ་ཧཱ་ན་ཡེ་དི་བྱ་བདག་ཅག་དཔོན་སློབ་འཁོར་དང་བཅས་པའི་ཚེ་དང་བསོད་ནམས་ཡེ་ཤེས་ཐམས་ཅད་པུཥྚིཾ་ཀུ་རུ་ༀ། ཞེས་ལན་གསུམ་གྱིས་དགང་བླུགས་ཕུལ། སྔགས་དེས་ཡམ་ཤིང་དང་མར་ཁུ་སྔོན་འགྲོས་སྲེག་རྫས་གཞན་རྣམས་སོ་སོའམ་གཅིག་ཏུ་བསྲེས་ནས་གྲངས་ཇི་ལྟར་འོས་པ་ཕུལ་ལ། ན་མོ། རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་སྲེག་རྫས་ལྷའི་ཞལ་དུ་འབུལ་བ་དང་། དེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་བདག་ཅག་གི་ཕྲིན་ལས་ཐམས་ཅད་མཛད་དུ་གསོལ། ཞེས་འདོད་དོན་གསོལ། དེ་ནས། ༀ་བཛྲ་ཛྙཱ་ན་ཛྭ་ལ་རཾ་ཞེས་བརྗོད་པས་མེ་ལྷ་ཉིད་ཐུགས་རྗེ་ཡེ་ཤེས་མེ་འབར་བའི་རྣམ་པར་གྱུར་པའི་ཀློང་དུ་བྷྲཱུཾ་བི་ཤྭ་བི་ཤུདྡྷེ་ཞེས་པས་གཞལ་ཡས་ཁང་གདན་དང་བཅས་པ་བཀྲ་ལམ་གྱིས་གསལ་བར་གྱུར། སྭཱ་ༀ་ཧཱུཾ་ཨཱཾ་ཧཱ་ཧཱུཾ་ཧ་ཧེ་ཕཊ་བྷྱོ་རཾ་ཞེས་བརྗོད་པས་སྟེང་ཁང་དུ་རིན་འབྱུང་གིས་གཙོ་བྱས་པའི་ཞི་བ་རྡོ་རྗེ་དབྱིངས་ཀྱི་ལྷ་བཞི་བཅུ་རྩ་གཉིས་དང་འོག་ཁང་དུ་རཎྟ་ཧེ་རུ་ཀས་གཙོ་བྱས་པའི་ཁྲག་འཐུང་ཚོགས་ཆེན་འདུས་པའི་དཀྱིལ་འཁོར་གྱི་ལྷ་ཚོགས་ཐམས་ཅད་སྐུ་མདོག་སེར་པོ་གཡས་རིན་པོ་ཆེ་དང་གཡོན་ཞི་བ་རྣམས་དྲིལ་བུ་དང་ཁྲོ་བོ་རྣམས་དུང་ཁྲག་བསྣམས་པ་སྐུ་ལས་འོད་ཟེར་སེར་པོའི་ཕྲེང་བ་མཁའ་ཁྱབ་ཏུ་སྤྲོ་བའི་དཀྱིལ་འཁོར་གྱི་འཁོར་ལོ་བཀྲ་ལམ་གྱིས་གསལ་བར་གྱུར། ས་མ་ཏཱ་སོགས་ཀྱིས་བསྐུར་རློབ། དབབ། དྲངས། བསྟིམ་ཞིང་བརྟན་པར་བྱའོ། །དཀྱིལ་འཁོར་སྒྲུབ་མཆོད་དང་འབྲེལ་ཚེ། གཞལ་ཡས་ཁང་གདན་བཅས་སྔར་བཞིན་བསྐྱེད་རྗེས། ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདས། །རྒྱལ་བ་ཞི་ཁྲོའི་ལྷ་ཚོགས་རྣམས། །འདིར་གཤེགས་བདག་ལ་དངོས་གྲུབ་སྩོལ། །སྭཱ་ༀ་ཧཱུཾ་ཨཱཾ་ཧཱ་ཧཱུཾ་ཧ་ཧེ་ཕཊ་བྷྱོ་ཛཿཧཱུཾ་བཾ་ཧོཿཨེ་ཧྱེ་ཧི་རུ་ལུ་རུ་ལུ་ཧཱུཾ་བྷྱོ་ཛཿ ཛཿ ཞེས་པས་དཀྱིལ་འཁོར་གྱི་ལྷ་ཚོགས་རྣམས་མཎྜལ་མེ་ཏོག་གིས་མཚོན་པར་སྤྱན་དྲངས་ལ། དེ་ལས་མེ་ཏོག་ཐབ་ཏུ་དོར་བས། ལྷ་ཐམས་ཅད་གཞལ་ཡས་ཁང་གི་གནས་སོ་སོར་རང་རང་གི་གདན་ལ་བཞུགས་པར་བསམ་པ་ཙམ་ལས་བསྐུར་རློབ་སོགས་མི་དགོས་སོ། །གང་ལྟར་ཡང་དེ་ནས་ཀུན་བཟང་ཞབས་བསིལ་བཞི་བསྣོལ་གྱིས་མཆོད། བརྗོད་མེད་ཤེས་རབ་ཀྱིས་བསྟོད། དཀྱིལ་འཁོར་གྱི་ལྷ་རྣམས་ཀྱི་ལྗགས་རྡོ་རྗེ་འོད་ཀྱི་སྦུ་གུ་ཅན་གྱིས་བསྲེགས་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམ་ལ། སྭཱ་རཏྣ་དྷྲིཀ྄་ཞེས་བདུན་གྱིས་བཀང་བའི་དགང་བླུགས་སྦྱང་བ་སྔར་ལྟར། ༀ་གུ་ཧྱ་ཛྙཱ་ན་སོགས་ཀྱི་མཐར། བདག་ཅག་དཔོན་སློབ་སོགས་བཏགས་པས་ལན་གསུམ་ཕུལ་ནས། སྔགས་དེས་ཡམ་ཤིང་མར་ཁུ་སྲེག་རྫས་རྣམས་བརྒྱ་རྩ་སོགས་ཇི་ལྟར་རིགས་བ་ཕུལ་ལ། མ་ཧཱ་པཉྩ་ཨ་མྲྀ་ཏ་ཁཱ་ཧིས་བདུད་རྩི། ལས་གཏོར་ལས་གཏོར་ཀྱུ་བླངས་ནས། མ་ཧཱ་བ་ལིཾ་ཏ་པྲ་ཏཱི་ཙྪ་ཁ་ཧིས་གཏོར་མ། མ་ཧཱ་རཀྟ་པྲ་ཏཱི་ཙྪ་ཁཱ་ཧིས་རཀྟ་ཕུལ་ལ། ༀ། ཀློང་ཡངས་འཁྱིལ་བའི་ཧོམ་ཁུང་དུ། །དམ་རྫས་བདུད་རྩི་འདི་ཕུལ་བས། །བདག་ཅག་འཁོར་དང་བཅས་རྣམས་ཀྱི། །ཚེ་དང་བསོད་ནམས་རྒྱས་གྱུར་ནས། མཆོག་ཐུན་དངོས་གྲུབ་སྩལ་དུ་གསོལ། །ཞེས་གསོལ་བ་བཏབ་པས་ལྷ་ཚོགས་རྣམས་ཀྱི་སྐུ་ལས་འོད་ཟེར་གསེར་མདོག་ཉི་འོད་ལྟ་བུ་འཕྲོས་པས་བསྒྲུབ་བྱའི་ཚེ་དང་བསོད་ནམས་རྒྱས་པར་བསམ་མོ། །དེ་ནས་གཏང་རག་གི་མཆོད་བསྟོད་དང་བཟོད་གསོལ་བྱས་ནས། དཀྱིལ་འཁོར་དང་འབྲེལ་ཚེ་མེ་ཏོག་གིས་སྤྱན་དྲངས་ཏེ་སོ་སོའི་གནས་སུ་བཞུགས་སུ་གསོལ། །མ་འབྲེལ་ན་ཛྙཱ་ན་མཎྜ་ལ་བཛྲ་མུཿས་ཡེ་ཤེས་པ་གཤེགས་དམ་ཚིག་པ་རང་ལ་ཐིམ་པར་བསམ་མོ། །སླར་ཡང་། ༀ་ཨགྣ་ཡེ་ཛྭ་ལ་ཛྭ་ལ་ཧཱུཾ་ཕཊ། ཅེས་བླུགས་གཟར་གྱི་མར་ཁུས་མེ་གསོས་པས། འཇིག་རྟེན་པའི་མེ་ལྷ་སྔར་བཞིན་གསལ་བར་བསམ་ལ། སྲེག་རྫས་ལྷག་མ་རྣམས་ཕུལ། མཆོད་ཅིང་བསྟོད། ལས་གཏོར་ནས་གཏོར་ཀྱུ་བླངས་ཏེ། ༀ་ཨགྣེ་དེ་ཝ་རྀ་ཥི་མ་ཧཱ་བ་ལིཾ་ཏ་ཁཱ་ཧིས་གཏོར་མ་ཕུལ་ལ་འདོད་དོན་གསོལ། ཡིག་བརྒྱས་ནོངས་པ་བཤགས། བཛྲ་མུཿས་མེ་ལྷ་ཡེ་ཤེས་པ་རང་གནས་སུ་གཤེགས། དམ་ཚིག་པ་འབར་བའི་རྣམ་པར་གྱུར་པར་བསམ་མོ། ༈ །གསུམ་པ་དབང་གི་སྦྱིན་སྲེག་ནི། ཆས་གོས་དམར་པོ་གྱོན་ནས་པདྨའི་འདུག་སྟངས་ཀྱིས་ཆགས་ཤིང་ཞེན་པའི་ཤེས་དང་ལྡན་པས་ཤིས་པའི་ཕྱོགས་སུ་ཁ་བལྟས་ཏེ། བདག་བསྐྱེད་བཟླས་པའི་བར་བྱས་ལ། ལས་བུམ་གྱི་ཆུའམ་བདུད་རྩིས་ལས་གཏོར་དང་སྲེག་རྫས་བསང་སྦྱངས། སྟོང་པའི་ངང་ལས་མ་ཨ་ཞེས་པས་ཉི་ཟླ་གའུའི་སྣོད་དུ་རང་གི་ཐུགས་ཀ་ནས་ཧྲཱིཿདམར་པོ་སྤྲོས་པ་འོད་ཟེར་འཕྲོ་འདུས་ཡོངས་སུ་གྱུར་པ་ལས་བྱུང་བའི་ལས་གཏོར་རིན་པོ་ཆེའི་མཆོད་སྡོང་འོད་ཟེར་དམར་པོ་འཕྲོ་བ་དང་། སྲེག་རྫས་རྣམས་ཟག་མེད་ཡེ་ཤེས་ཀྱི་བདུད་རྩི་རོ་བརྒྱ་ལྡན་པ་ནམ་མཁའ་རབ་འབྱམས་གང་བས་དབང་གི་ལས་འགྲུབ་པ་ལ་ཐོགས་པ་མེད་པའི་ནུས་པ་དང་ལྡན་པར་བརླབ། དེ་ནས་ཚོགས་མཆོད་ཀྱི་མཆོད་བཤགས་ཡན་ཆད་སོང་བ་དང་། ཐ་མ་སྟོབ་པ་ནི། གྲུབ་ཁུང་གི་ཉ་བོ་མདུན་དུ་བཀོད་ལ། ཝཾ་རཾ་ཨོཾ་པདྨ་ཤྲཱི་ཧེ་རུ་ཀ་པདྨ་ཀྲོ་དྷེ་ཤྭ་རཱི་ཧཱུཾ། ཧཱུཾ་ཧ་ཧེ་ཕཊ་བྷྱོ་རཾ། ཕྱི་སྣོད་དབང་གི་དཀྱིལ་འཁོར་པདྨ་རཱ་གའི་རང་བཞིན་དམར་པོ་ཟླ་གམ་ཡངས་པ་འོད་ཟེར་འཕྲོ་བའི་དབུས་སུ་ནང་བཅུད་པདྨ་རིགས་ཀྱིས་གཙོ་བྱས་པའི་ཁྲག་འཐུང་འབར་བའི་དཀྱིལ་འཁོར་སྤྲུལ་བའི་འོད་ཟེར་དམར་པོ་འཕྲོ་བའི་སྐུར་བཞེངས་པར་བསམ་ལ། བདེན་སྟོབས་བརྗོད་དེ། བསྒྲུབ་བྱ་ཆེ་གེ་མོ་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག །བཛྲ་ཨཾ་ཀུ་ཤ་ཛཿ ཛཿཧཱུཾ་བཾ་ཧོཿ ཞེས་བཀུག་ཅིང་བསྟིམ་ལ། ཝཾ། འདོད་ཆགས་རྡོ་རྗེ་འཁོར་བཅས་ཀྱིས། །འཇིག་རྟེན་ཁམས་ནི་རབ་འབྱམས་ཀུན། །ཡུད་ཙམ་གྱིས་ནི་དབང་མཛད་ནས། །དབང་གི་ཕྲིན་ལས་སྒྲུབ་པར་མཛོད། །ཅེས་བསྐུལ་བས་ལྷ་ཚོགས་རྣམས་དབང་གི་ལས་མཛད་པ་ལ་དགྱེས་པར་གྱུར། དེ་ནས་ལས་གཏོང་ནས་ལག་གཉིས་ཀྱི་མཐེབ་མཛུབ་ཀྱིས་གཏོར་ཀྱུ་བླངས་པ་གཡས་གཡོན་དུ་བསྐོར་ཞིང་། ཧྲཱིཿ ཟངས་ཕྱེ་བུ་རམ་འབྲས་གསར་ཆན། །པད་རཀ་སྦྱར་བའི་གཏོར་མ་ནི། །གང་ལ་དམིགས་ཏེ་བསྐོར་བྱས་པས། །དྲེགས་པའི་ཚོགས་རྣམས་དབང་དུ་འགྱུར། །མ་ཧཱ་བ་ལིཾ་ཏ་སརྦ་ལོ་ཀ་པཱ་ཤཾ་ཀུ་རུ་ཧོཿ ཞེས་ལིངྒའི་སྟེང་དུ་བྲབ། དེ་ནས་དབང་གི་ཕུར་བུ་ལྔ་པོ་ཐལ་མོའི་བར་དུ་བཟུང་ལ། པདྨ་ཀཱི་ལི་ཀཱི་ལ་ཡ་ཕཊ་ཛཿཅེས་པས་རང་གི་ཐུགས་ཀ་ནས་པདྨ་ཀཱི་ལ་ཡ་སྤྲོ། ཕུར་བུ་ལ་ཐིམ་པས་སྲས་མཆོག་པདྨ་ཀཱི་ལ་ཡར་གྱུར་པ་ལ། པྲ་ཏྱ་སོགས་ཀྱིས་དབང་བསྐུར། བྱིན་གྱིས་བརླབས་ནས། ཧྲཱིཿ ཕུར་བུ་ཁ་དོག་དམར་པོ་ཡི། །མགོ་བོ་རྒྱ་མདུད་རྩེ་ཟླ་གམ། །ལྷ་རྣམས་བཀོད་དེ་གདབ་པར་བྱ། །འདིས་ནི་ཐམས་ཅད་དབང་དུ་འགྱུར། །ༀ་པདྨ་ཀཱི་ལི་ཀཱི་ལ་ཡ་སརྦ་ལོ་ཀ་པཱ་ཤཾ་ཀུ་རུ་ཧོཿ ཞེས་དང་། གྷཱ་ཏའི་སྔགས་ཀྱིས་མིག་རྣ་བ་སྣ་ལྕེ་སྙིང་རྣམས་ལ་གདབ། བདག་གི་ཐུགས་ཀ་ནས་ཡེ་ཤེས་ཀྱི་འོད་ཟེར་དམར་པོ་འཕྲོས་དམིགས་བྱ་ལ་ཕོག་པས་དུག་ལྔ་ཡེ་ཤེས་ལྔར་སྦྱངས། དྭངས་མ་བདེ་ཆེན་བྱང་ཆུབ་སེམས་ཀྱི་ངོ་བོར་སྤར། ཚེ་རྟེན་འོད་ཟེར་གྱི་རྣམ་པར་འདུས་པ་བདག་གི་རྡོ་རྗེའི་ཚེ་སྲོག་དང་དབྱེར་མེད་དུ་གྱུར་པར་མོས་ལ་སྙིང་གའི་ཕུར་བུ་གདོན། བཛྲ་ཏཱི་ཀྵྞ་མུཾ་ཞེས་གྲི་འཇམ་དཔལ་གྱི་ངོ་བོར་གྱུར་པ་ཐོགས་ཏེ། སརྦ་ལོ་ཀ་པཱ་ཤཾ་ཀུ་རུ་ཧོཿ ཞེས་ཕོའི་རྐང་གཡས་ཀྱི་མཐེབ་ཆེན་དང་མོའི་གཡོན་པའི་མཐེའུ་ཆུང་ནས་གཏུབ་ཅིང་བསྒྲལ་ལ། ལིང་རོ་ཆ་གསུམ་དུ་བྱས་ཏེ། གཅིག་མ་ཧཱ་བ་ལིངྟ་པྲ་ཏཱི་ཙྪ་ཁཱ་ཧིས་སྟོབ། གཅིག་སྲེག་རྫས་ལ་བསྲེ ། གཅིག་བྲོ་གདན་གྱི་ཕྱིར་བཞག་གོ། །དེ་ནས་སྦྱིན་སྲེག་དངོས་ནི། རང་ཉིད་སྔར་བདག་བསྐྱེད་གང་ཡིན་དེར་ང་རྒྱལ་འཕོས་ལ། ཐབ་བསང་སྦྱངས། སྟོང་པའི་ངང་ལས་བྷྲཱུཾ་ཞེས་བརྗོད་པས་མདུན་དུ་དབང་གི་ཐབ་ཁུང་དམར་པོ་ཟླ་གམ་ཁ་ཁྱེར་བང་རིམ་གསུམ་ལྡན་འོད་ཟེར་དམར་པོ་འཕྲོ་བ་གྱུར། རང་གི་ཐུགས་ཀ་ནས་རཾ་ཡིག་ཐབ་ནང་དུ་སྤྲོས་པ་ལས་ཡེ་ཤེས་ཀྱི་མེ་འོད་དམར་པོ་འབར་བར་བསམ་ལ། ༀ་ཨགྣ་ཡེ་ཛྭ་ལ་ཛྭ་ལ་ཧཱུཾ་ཕཊ། ཅེས་པས་སྨད་ཚོང་མ་ལས་བྱུང་བའི་མེ་དུ་བ་མེད་པ་སྦར་ལ། ཐབ་ཀྱི་མེའི་དབུས་སུ་ཉི་མ་དང་ར་སྐྱེས་ཀྱི་གདན་ལ་ཨགྣེ་དེ་ཝ་རྀཾ་ཥི་ཧཱུཾ་ཞེས་བརྗོད་པས་དབང་གི་མེ་ལྷ་དམར་པོ་དྲང་སྲོང་གི་ཆས་ཅན་ཞགས་པ་དང་བགྲང་ཕྲེང་འཛིན་པ་གསལ་བར་གྱུར། པྲ་ཏྱ་སོགས་ཀྱིས་དབང་བསྐུར། བརླབ། རང་གི་ཐུགས་ཀ་ནས་འོད་ཟེར་འཕྲོས་པས་ཤར་ལྷོ་ནས་མེ་ལྷ་འཁོར་བཅས་བཞེངས་པར་བསམ་ལ། ཨགྣ་ཡེ་དེ་བ་ས་མ་ཡ་ཧཱུཾ་ཛཿ ཞེས་སེ་གོལ་བསྣོལ་མར་གདབ། མདའ་དར་དམར་པོ་གཡབ་ཅིང་། ཧཱུཾ ། དད་པ་དང་ནི་དམ་ཚིག་གིས། ཚུར་གཤེགས་ཚུར་གཤེགས་འབྱུང་པོ་ཆེ། །མེ་ལྷ་དྲང་སྲོང་བྲམ་ཟེ་མཆོག །འདི་ཉིད་དུ་ནི་གཤེགས་སུ་གསོལ། །ལྕགས་ཀྱུའི་རྒྱ་དང་བཅས། ཨ གྣེ་དེ་ཝ་རྀ་ཥི་ཛཿ་ཛཿས་དྲངས། ཛཿ་ཧཱུཾ་བཾ་ཧོཿས་བསྟིམ། ཀུན་བཟང་ཞབས་བསིལ་བཞི་བསྣོལ་གྱིས་མཆོད། ཧཱུཾ། པདྨའི་རིགས་ལས་གྲུབ་པ་ཡི། །མེ་ལྷའི་རྒྱལ་པོ་དྲང་སྲོང་མཆོག །ཕྲིན་ལས་ཀུན་གྱི་དཔང་པོ་མཛད། །སྟངས་འཛིན་ལྷ་ལ་ཕྱག་འཚལ་བསྟོད། །ཅེས་པས་བསྟོད། མེ་ལྷ་ཞལ་ཅུང་ཟད་གདངས་པས་བསྲེགས་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་མོས་ལ། པདྨའི་ཁུ་ཚུར་གྱིས་དགང་བླུགས་བཟུང་ནས་མར་ཁུ་ༀ་ཨགྣ་ཡེ་སྭཱ་ཧཱ་ཞེས་གཡས་པའི་བླུགས་གཟར་བདུན་གྱིས་གཡོན་པའི་དགང་གཟར་བཀང་བ་ཁ་སྦྱར་ཏེ་པུས་མོའི་ནང་ལས་མི་འདའ་བས་གཡས་སུ་བསྐོར་ཞིང་། ༀ་ཨགྣེ་དེ་བ་རྀ་ཥི་ཧ་བྱ་ཀ་བྱ་དི་བྱ་མ་ཧཱ་ན་ཡེ་དི་བྱ་བདག་ཅག་དཔོན་སློབ་འཁོར་དང་བཅས་པས་ཁམས་གསུམ་གྱི་སེམས་ཅན་ཐམས་ཅད་པཱ་ཤཾ་ཀུ་རུ་ཧོཿ ཞེས་ལན་གསུམ་གྱི་དགང་བླུགས་ཕུལ། སྔགས་དེས་ཡམ་ཤིང་དང་མར་ཁུ་སྔོན་འགྲོས་སྲེག་རྫས་རྣམས་སོ་སོའམ་གཅིག་ཏུ་བསྲེ་ནས་གྲངས་ཇི་ལྟར་འོས་པ་ཕུལ་ལ། ན་མོ། རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་སྲེག་རྫས་ལྷའི་ཞལ་དུ་འབུལ་བ་དང་། དེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་བདག་ཅག་གི་ཕྲིན་ལས་ཐམས་ཅད་མཛད་དུ་གསོལ། ཞེས་འདོད་དོན་གསོལ། དེ་ནས། ༀ་བཛྲ་ཛྙཱ་ན་ཛ་ལ་རཾ་ཞེས་བརྗོད་པས་མེ་ལྷ་ཉིད་ཐུགས་རྗེ་ཡེ་ཤེས་མེ་འབར་བའི་རྣམ་པར་གྱུར་པའི་ཀློང་དུ་བྷྲཱུཾ་བི་ཤྭ་བི་ཤུདྡྷེ་ཞེས་པས་གཞལ་ཡས་ཁང་གདན་དང་བཅས་པ་བཀྲ་ལམ་གྱིས་གསལ་བར་གྱུར། ཨཱཾ་ༀ་སྭཱ་ཧཱུཾ་ཧཱ་ཧཱུཾ་ཧ་ཧེ་ཕཊ་བྷྱོ་རཾ་ཞེས་བརྗོད་པས་སྟེང་ཁང་དུ་སྣང་མཐས་གཙོ་བྱས་པའི་ཞི་བ་རྡོ་རྗེ་དབྱིངས་ཀྱི་ལྷ་བཞི་བཅུ་རྩ་གཉིས་དང་འོག་ཁང་དུ་པདྨ་ཧེ་རུ་ཀས་གཙོ་བྱས་པའི་ཁྲག་འཐུང་ཚོགས་ཆེན་འདུས་པའི་དཀྱིལ་འཁོར་གྱི་ལྷ་ཚོགས་ཐམས་ཅད་སྐུ་མདོག་དམར་པོ་གཡས་པདྨ་དང་གཡོན་ཞི་བ་རྣམས་དྲིལ་བུ་དང་ཁྲོ་བོ་རྣམས་དུང་ཁྲག་བསྣམས་པ་སྐུ་ལས་འོད་ཟེར་དམར་པོའི་ཕྲེང་བ་མཁའ་ཁྱབ་ཏུ་སྤྲོ་བའི་དཀྱིལ་འཁོར་གྱི་འཁོར་ལོ་བཀྲ་ལམ་གྱིས་གསལ་བར་གྱུར། པྲ་ཏྱ་སོགས་ཀྱིས་བསྐུར་བརླབ། དབབ། དྲངས། བསྟིམ་ཞིང་བརྟན་བར་བྱའོ། །དཀྱིལ་འཁོར་སྒྲུབ་མཆོད་དང་ཚོགས་རྣམས། །འདིར་གཤེགས་བདག་ལ་དངོས་གྲུབ་སྩོལ། །ཨཱཾ་ༀ་སྭཱ་ཧཱུཾ་ཧཱ་ཧཱུཾ་ཧ་ཧེ་ཕཊ་བྷྱོ་ཛཿཧཱུཾ་བཾ་ཧོཿ ཨེ་ཧྱེ་ཧི་རུ་ལུ་རུ་ལུ་ཧཱུཾ་བྷྱོ་ཛཿ ཛཿས་དཀྱིལ་འཁོར་གྱི་ལྷ་ཚོགས་རྣམས་མཎྜ་ལ་མེ་ཏོག་གིས་མཚོན་པར་སྤྱན་དྲངས་ལ། དེ་ལས་མེ་ཏོག་ཐབ་ཏུ་དོར་བས་ལྷ་ཐམས་ཅད་གཞལ་ཡས་ཁང་གི་གནས་སོ་སོར་རང་གི་གདན་ལ་བཞུགས་པར་བསམ་པ་ཙམ་ལས་བསྐུར་བརླབས་སོགས་མི་དགོས་སོ། །གང་ལྟར་ཡང་། དེ་ནས་ཀུན་བཟང་ཞབས་བསིལ་བཞི་བསྣོལ་གྱིས་མཆོད། བརྗོད་མེད་ཀྱིས་བསྟོད། དཀྱིལ་འཁོར་གྱི་ལྷ་རྣམས་ཀྱི་ལྗགས་རྡོ་རྗེ་འོད་ཀྱི་སྦུ་གུ་ཅན་གྱིས་བསྲེགས་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམ་ལ། ཨཱཾ་ཨཱ་རོ་ལིཀ྄་ཞེས་བདུན་གྱིས་བཀང་བའི་དགང་བླུགས་སྦྱར་བ་སྔར་ལྟར། ༀ་གུ་ཧྱ་ཛྙཱ་ན་སོགས་ཀྱི་མཐར་བདག་ཅག་དཔོན་སློབ་སོགས་བཏགས་པས་ལན་གསུམ་ཕུལ། སྔགས་དེས་ཡམ་ཤིང་མར་ཁུ་སྲེག་རྫས་རྣམས་བརྒྱ་རྩ་སོགས་ཇི་ལྟར་རིགས་པ་ཕུལ་ནས། མ་ཧཱ་པཉྩ་ཨ་མྲྀ་ཏ་ཁཱ་ཧིས་བདུད་རྩི། ལས་གཏོར་ལས་གཏོར་ཀྱུ་བླངས་ནས། མ་ཧཱ་བ་ལིདྟ་པྲ་ཏཱིཙྪ་ཁཱ་ཧིས་གཏོར་མ། མ་ཧཱ་རཀྟ་པྲ་ཏཱི་ཙྪ་ཁཱ་ཧི་ས་རཀྟ་ཕུལ་ལ། ༀ། ཀློང་ཡངས་འཁྱིལ་བའི་ཧོམ་ཁུང་དུ། དམ་རྫས་བདུད་རྩི་འདི་ཕུལ་བས། །བདག་ཅག་འཁོར་དང་བཅས་རྣམས་ཀྱིས། །འགྲོ་ཀུན་དབང་དུ་འདུས་གྱུར་ནས། །མཆོག་ཐུན་དངོས་གྲུབ་སྩལ་དུ་གསོལ། །ཞེས་གསོལ་བ་བཏབ་པས་ལྷ་ཚོགས་རྣམས་ཀྱི་སྐུ་ལས་འོད་ཟེར་དམར་པོ་ལྕགས་ཀྱུ་ལྟ་བུ་འཕྲོས་པས་བསྒྲུབ་བྱ་རྣམས་རང་དབང་མེད་པར་དབང་དུ་འདུས་པར་བསམ་མོ། །དེ་ནས་གཏང་རག་གི་མཆོད་བསྟོད་བཟོད་གསོལ་བྱས་ནས། དཀྱིལ་འཁོར་དང་འབྲེལ་ཚེ་མེ་ཏོག་གིས་སྤྱན་དྲངས་ཏེ་སོ་སོའི་གནས་སུ་བཞུགས་པར་བསམ། མ་འབྲེལ་ན། ཛྙཱ་ན་མཎྜ་ལ་བཛྲ་མུཿ ས་ཡེ་ཤེས་པ་གཤེགས། དམ་ཚིག་པ་རང་ལ་ཐིམ་པར་བསམ་མོ། །སླར་ཡང་། ༀ་ཨགྣ་ཡེ་ཛྭ་ལ་ཛྭ་ལ་ཧཱུཾ་ཕཊ་ཅེས་བླུགས་གཟར་གྱི་མར་ཁུས་མེ་གསོལ་པས། འཇིག་རྟེན་པའི་མེ་ལྷ་སྔར་བཞིན་གསལ་བར་བསམ་ལ། སྲེག་རྫས་ལྷག་མ་རྣམས་ཕུལ། མཆོད་ཅིང་བསྟོད། ལས་གཏོར་ནས་གཏོར་ཀྱུ་བླངས་ཏེ། ༀ་ཨགྣེ་དེ་ཝ་རྀ་ཥི་མ་ཧཱ་བ་ལིཾ་ཏ་ཁཱ་ཧིས་གཏོར་མ་ཕུལ་ལ་འདོད་དོན་གསོལ། ཡིག་བརྒྱས་ནོངས་པ་བཤགས། བཛྲ་མུཿས་མེ་ལྷ་ཡེ་ཤེས་པ་རང་གནས་སུ་གཤེགས། །དམ་ཚིག་པ་འབར་བའི་རྣམ་པར་གྱུར་པར་བསམ་མོ། ༈ །བཞི་པ་དྲག་པོའི་སྦྱིན་སྲེག་ནི། ཆས་གོས་ནག་པོ་གྱོན་ནས་རུས་སྦལ་གྱི་འདུག་སྟངས་ཀྱིས་ཞེ་སྡང་ཁྲོས་པའི་སེམས་དང་ལྡན་པས་ཤིས་པའི་ཕྱོགས་སུ་ཁ་བལྟས་ཏེ། བདག་བསྐྱེད་བཟླས་པའི་བར་བྱས་ལ། ལས་བུམ་གྱི་ཆུའམ་བདུད་རྩིས་ལས་གཏོར་དང་སྲེག་རྫས་བསང་སྦྱངས། སྟོང་པའི་ངང་ལས་མ་ཨ་ཞེས་པས་ཉི་ཟླ་གའུའི་སྣོད་དུ་རང་གི་ཐུགས་ཀ་ནས་ཧཱུཾ་ནག་པོ་སྤྲོས་པ་འོད་ཟེར་འཕྲོ་འདུས་ཡོངས་སུ་གྱུར་པ་ལས་བྱུང་བའི་ལས་གཏོར་རིན་པོ་ཆེའི་མཆོད་སྡོང་འོད་ཟེར་ནག་པོ་འཕྲོ་བ་དང་། བསྲེག་རྫས་རྣམས་ཟག་མེད་ཡེ་ཤེས་ཀྱི་བདུད་རྩི་རོ་བརྒྱ་ལྡན་པ་ནམ་མཁའ་རབ་འབྱམས་གང་བས་དྲག་པོའི་ལས་འགྲུབ་པ་ལ་ཐོགས་པ་མེད་པའི་ནུས་པ་དང་ལྡན་པར་བརླབ། དེ་ནས་ཚོགས་མཆོད་གྱི་མཆོད་བཤགས་ཡན་ཆད་སོང་བ་དང་། ཐ་མ་སྟོབ་པ་ནི། བྲུབ་ཁུང་གི་ཉ་བོ་མདུན་དུ་བཀོད་ལ། ཨེ་རཾ་། ༀ་བཛྲ་ཤྲཱི་ཧེ་རུ་ཀ་བཛྲ་ཀྲོ་དྷཱི་ཤྭ་རཱི་ཧཱུཾ། ཧཱུཾ་ཧ་ཧེ་ཕཊ་བྷྱོ་རཾ། ཕྱི་སྣོད་དྲག་པོའི་དཀྱིལ་འཁོར་ལྕགས་བསྲེགས་ཀྱི་རང་བཞིན་ནག་པོ་གྲུ་གསུམ་ཡངས་པ་འོད་ཟེར་འཕྲོ་བའི་དབུས་སུ་ནང་བཅུད་རྡོ་རྗེ་རིགས་ཀྱིས་གཙོ་བྱས་པའི་ཁྲག་འཐུང་འབར་བའི་དཀྱིལ་འཁོར་སྤྲུལ་པའི་འོད་ཟེར་ནག་པོ་འཕྲོ་བའི་སྐུར་བཞེངས་པར་བསམ་ལ། བདེན་སྟོབས་བརྗོད་དེ། བསྒྲུབ་བྱ་ཆེ་གེ་མོ་མཚན་མ་རྫས་ཀྱི་རྟེན་འདི་ལ་མཆིས་པར་གྱུར་ཅིག །བཛྲ་ཨཾ་ཀུ་ཤ་ཛཿཛཿཧཱུཾ་བཾ་ཧོཿ ཞེས་པས་བཀུག་ཅིང་བསྟིམ་ལ། ཨེ། ཞེ་སྡང་རྡོ་རྗེ་འཁོར་བཅས་ཀྱིས། །འཇིག་རྟེན་ཁམས་ནི་རབ་འབྱམས་ཀུན། །ཡུད་ཙམ་ཀྱིས་ནི་བརླག་མཛད་ནས། །དྲག་པོའི་ཕྲིན་ལས་སྒྲུབ་པར་མཛོད། །ཅེས་བསྐུལ་བས་ལྷ་ཚོགས་རྣམས་དྲག་པོའི་ལས་མཛད་པ་ལ་དགྱེས་པར་གྱུར། དེ་ནས་ལས་གཏོར་ནས་ལག་གཉིས་ཀྱི་མཐེབ་མཛུབ་ཀྱིས་གཏོར་ཀྱུ་བླངས་པ་གཡས་གཡོན་དུ་བསྐོར་ཞིང་། ཧཱུཾ། ལྕགས་ཕྱེ་དུག་རྡོ་འབྲུ་ནག་ཆན། །ཁྲག་དང་སྦྱར་བའི་གཏོར་མ་ནི། །གང་ལ་དམིགས་ཏེ་བསྐོར་བྱས་པས། །གདུག་པའི་ཚོགས་རྣམས་བརླག་པར་འགྱུར། །མ་ཧཱ་བ་ལིཾ་ཏ་སརྦ་ཤ་ཏྲཱུཾ་བིགྷྣཱཾ་མཱ་ར་ཡ་ཕཊ། ཅེས་ལིདྒའི་སྟེང་དུ་བྲབ། དེ་ནས་དྲག་པོའི་ཕུར་གསུམ་པོ་ཐལ་མོའི་བར་དུ་བཟུང་ལ། བཛྲ་ཀཱི་ལ་ཡ་ཕཊ་ཛཿཞེས་པས་རང་གི་ཐུགས་ཀ་ནས་བཛྲ་ཀཱི་ལ་ཡ་སྤྲོས། ཕུར་བུ་ལ་ཐིམས་པས་སྲས་མཆོག་བཛྲ་ཀཱི་ལ་ཡར་གྱུར་པ་ལ། ཤཱུ་ནྱ་ཏཱ་སོགས་ཀྱིས་བསྐུར་ཞིང་བརླབས་ནས། ཧཱུཾ། ཕུར་བུ་ཁ་དོག་ནག་པོ་ཡི། །མགོ་བོ་རྒྱ་མདུད་རྩེ་གྲུ་གསུམ། །ལྷ་རྣམས་བཀོད་དེ་གདབ་པར་བྱ། །འདིས་ནི་ཐམས་ཅད་བརླག་པར་འགྱུར། །ༀ་བཛྲ་ཀཱི་ལི་ཀཱི་ལ་ཡ་སརྦ་ཤ་ཏྲུཾ་བིགྷྣཱཾ་མཱ་ར་ཡ་ཕཊ། ཅེས་དང་། གྷཱ་ཏའི་སྔགས་ཀྱིས་དཔྲལ་མགྲིན་སྙིང་ག་རྣམས་སུ་གདབ། བདག་གི་ཐུགས་ཀ་ནས་ཡེ་ཤེས་ཀྱི་འོད་ཟེར་ནག་པོ་འཕྲོས་དམིགས་བྱ་ལ་ཕོག་པས་དུག་ལྔ་ཡེ་ཤེས་ལྔར་སྦྱངས། །དྭངས་མ་བདེ་ཆེན་བྱང་ཆུབ་སེམས་ཀྱི་ངོ་བོར་སྤར། ཚེ་རྟེན་འོད་ཟེར་གྱི་རྣམ་པར་འདུས་པ་བདག་གི་རྡོ་རྗེའི་ཚེ་སྲོག་དང་དབྱེར་མེད་དུ་གྱུར་པར་མོས་ལ་སྙིང་གའི་ཕུར་བུ་གདོན། བཛྲ་ཏཱིཀྵྞ་མུཾ་ཞེས་གྲི་འཇམ་དཔལ་གྱི་ངོ་བོར་གྱུར་པ་ཐོགས་ཏེ། སརྦ་ཤ་ཏྲུཾ་བི་གྷྣཱཾ་མཱ་ར་ཡ་ཕཊ་ཅེས་ཕོའི་རྐང་གཡས་ཀྱི་མཐེབ་ཆེན་དང་མོའི་གཡོན་པའི་མཐེ་ཆུང་ནས་གཏུབ་ཅིང་བསྒྲལ་ལ། ལིང་རོ་ཆ་གསུམ་དུ་བྱས་ཏེ། གཅིག་མ་ཧཱ་བ་ལིཾ་ཏ་པྲ་ཏཱི་ཙྪ་ཁཱ་ཧིས་སྟོབ། གཅིག་བསྲེག་རྫས་ལ་བསྲེ། གཅིག་བྲོ་གདན་གྱི་ཕྱིར་བཞག་གོ། །དེ་ནས་སྦྱིན་སྲེག་དངོས་ནི། རང་ཉིད་སྔར་བདག་བསྐྱེད་གང་ཡིན་དེར་ང་རྒྱལ་འཕོས་ལ། ཐབ་བསང་སྦྱངས། སྟོང་པའི་ངང་ལས་བྷྲཱུཾ་ཞེས་བརྗོད་པས་མདུན་དུ་དྲག་པོའི་ཐབ་ཁུང་ནག་པོ་གྲུ་གསུམ་ཁ་ཁྱེར་བང་རིམ་གསུམ་ལྡན་འོད་ཟེར་ནག་པོ་འཕྲོ་བར་གྱུར། རང་གི་ཐུགས་ཀ་ནས་རཾ་ཡིག་ཐབ་ནང་དུ་སྤྲོས་པ་ལས་ཡེ་ཤེས་ཀྱི་མེ་འོད་ནག་པོ་འབར་བར་བསམ་ལ། ༀ་ཨགྣ་ཡེ་ཛྭ་ལ་ཛྭ་ལ་ཧཱུཾ་ཕཊ། ཅེས་པས་ཤན་པའི་མེ་དུ་བ་མེད་པ་སྤར་ལ། ཐབ་ཀྱི་མེའི་དབུས་སུ་ཉི་མ་དང་ར་སྐྱེས་ཀྱི་གདན་ལ་ཨགྣེ་དེ་ཝ་རྀཾ་ཥི་ཧཱུཾ་ཞེས་བརྗོད་པས་དྲག་པོའི་མེ་ལྷ་མཐིང་ནག་དྲང་སྲོང་གི་ཆས་ཅན་ཏྲི་ཤཱུ་ལ་དང་བགྲང་ཕྲེང་འཛིན་པ་གསལ་བར་གྱུར། ཤཱུ་ནྱ་ཏཱ་སོགས་ཀྱིས་བསྐུར་བརླབ། རང་གི་ཐུགས་ཀ་ནས་འོད་ཟེར་འཕྲོས་པས་ཤར་ལྷོ་ནས་མེ་ལྷ་འཁོར་བཅས་བཞེངས་པར་བསམ་ལ། ཨགྣ་ཡེ་དེ་ཝ་ས་མ་ཡ་ཧཱུཾ་ཛཿ ཞེས་སེ་གོལ་བསྣོལ་མར་གདབ། མདའ་དར་དམར་པོ་གཡབ་ཅིང་། ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་ཚུལ་གཤེགས་འབྱུང་པོ་ཆེ། །མེ་ལྷ་དྲང་སྲོང་བྲམ་ཟེ་མཆོག །འདི་ཉིད་དུ་ནི་གཤེགས་སུ་གསོལ། །ལྕགས་ཀྱུའི་རྒྱ་དང་བཅས་ཨགྣེ་དེ་ཝ་རྀ་ཥི་ཛཿཛཿས་སྤྱན་དྲངས། ཛཿཧཱུཾ་བཾ་ཧོཿས་བསྟིམ། ཀུན་བཟང་ཞབས་བསིལ་བཞི་བསྣོལ་གྱིས་མཆོད། ཧཱུཾ། རྡོ་རྗེའི་རིགས་ལས་གྲུབ་པ་ཡི། །མེ་ལྷའི་རྒྱལ་པོ་དྲང་སྲོང་མཆོག །ཕྲིན་ལས་ཀུན་གྱི་དཔང་པོ་མཛད། །སྟངས་འཛིན་ལྷ་ལ་ཕྱག་འཚལ་བསྟོད། །ཅེས་པས་བསྟོད། མེ་ལྷ་ཞལ་ཅུང་ཟད་གདངས་པས་བསྲེགས་བླུགས་ཀྱི་བདུད་རྩིའི་རྒྱུད་དྲངས་ནས་གསོལ་བར་མོས་ལ། ཁྲོ་བོའི་ཁུ་ཚུར་གྱིས་གཟར་བུ་བཟུང་ནས། ༀ་ཨགྷ་ཡེ་སྭཱ་ཧཱ་ཞེས་གཡོན་བླུགས་གཟར་བདུན་གྱིས་གཡས་པའི་དགང་གཟར་བཀང་བ་ཁ་སྦྱར་ཏེ་པུས་མོའི་ནང་དུ་མི་འདའ་བས་གཡོན་དུ་བསྐོར་ཞིང་། ༀ་ཨགྣེ་དེ་ཝ་རྀ་ཥི་ཧ་བྱ་ཀ་བྱ་དི་བྱ་མ་ཧཱ་ན་ཡེ་དི་བྱ་བདག་ཅག་དཔོན་སློབ་འཁོར་དང་བཅས་པ་ལ་གནོད་ཅིང་འཚེ་བའི་དགྲ་བགེགས་གདུག་པ་ཅན་ཐམས་ཅད་མཱ་ར་ཡ་ཕཊ། ཅེས་ལན་གསུམ་གྱིས་དགང་བླུགས་ཕུལ། སྔགས་དེས་ཡམ་ཤིང་དང་མར་ཁུ་སྔོན་འགྲོས་སྲེག་རྫས་རྣམས་སོ་སོའམ་གཅིག་ཏུ་བསྲེས་ནས་གྲངས་ཇི་ལྟར་འོས་པ་ཕུལ་ལ། ན་མོ། རིག་པའི་རྒྱལ་པོ་ཁྱོད་ཀྱིས་ལས་ཐམས་ཅད་བྱེད་པས་སྲེག་རྫས་ལྷའི་ཞལ་དུ་འབུལ་བ་དང་། དེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ནས་བདག་ཅག་གི་ཕྲིན་ལས་ཐམས་ཅད་མཛད་དུ་གསོལ། ཞེས་འདོད་དོན་གསོལ་ལོ། །དེ་ནས། ༀ་བཛྲ་ཛྙཱ་ན་ཛྭ་ལ་རཾ་ཞེས་བརྗོད་པས་མེ་ལྷ་ཉིད་ཐུགས་རྗེ་ཡེ་ཤེས་མེ་འབར་བའི་རྣམ་པར་གྱུར་པའི་ཀློང་དུ་བྷྲཱུཾ་བི་ཤྭ་བི་ཤུདྷེ་ཞེས་པས་གཞལ་ཡས་ཁང་གདན་དང་བཅས་པ་བཀྲ་ལམ་གྱིས་གསལ་བར་གྱུར། ཧཱུཾ་ཨོཾ་སྭཱ་ཨཱཾ་ཧཱ་ཧཱུཾ་ཧ་ཧེ་ཕཊ་བྷྱོ་རཾ་ཞེས་བརྗོད་པས་སྟེང་ཁང་དུ་མི་བསྐྱོད་པས་གཙོ་བྱས་པའི་ཞི་བ་རྡོ་རྗེ་དབྱིངས་ཀྱི་ལྷ་བཞི་བཅུ་རྩ་གཉིས་དང་འོག་ཁང་དུ་བཛྲ་ཧེ་རུ་ཀས་གཙོ་བྱས་པའི་ཁྲག་འཐུང་ཚོགས་ཆེན་འདུས་པའི་དཀྱིལ་འཁོར་གྱི་ལྷ་ཚོགས་ཐམས་ཅད་སྐུ་མདོག་མཐིང་ནག་གཡས་རྡོ་རྗེ་དང་གཡོན་ཞི་བ་རྣམས་དྲིལ་བུ་དང་ཁྲོ་བོ་རྣམས་དུང་ཁྲག་བསྣམས་པ་སྐུ་ལས་འོད་ཟེར་ནག་པོའི་ཕྲེང་བ་མཁའ་ཁྱབ་ཏུ་སྤྲོ་བའི་དཀྱིལ་འཁོར་གྱི་འཁོར་ལོ་བཀྲ་ལམ་གྱིས་གསལ་བར་གྱུར། ཤཱུ་ཏྱ་ཏཱ་སོགས་ཀྱིས་བསྐུར་བརླབ། དབབ། དྲངས། བསྟིམ་ཞིང་བརྟན་པར་བྱའོ། དཀྱིལ་འཁོར་སྒྲུབ་མཆོད་དང་འབྲེལ་ཚེ་གཞལ་ཡས་ཁང་གདན་བཅས་སྔར་བཞིན་བསྐྱེད་རྗེས། ཧཱུཾ། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདས། །རྒྱལ་བ་ཞི་ཁྲོའི་ལྷ་ཚོགས་རྣམས། །འདིར་གཤེགས་བདག་ལ་དངོས་གྲུབ་སྩོལ། །ཧཱུཾ་ༀ་སྭཱ་ཨཱཾ་ཧཱ་ཧཱུཾ་ཧ་ཧེ་ཕཊ་བྷྱོ་ཛཿཧཱུཾ་བཾ་ཧོཿ ཨེ་ཧྱེ་ཧི་རུ་ལུ་རུ་ལུ་ཧཱུཾ་བྷྱ྄ོ་ཛཿཛཿས་དཀྱིལ་འཁོར་པ་རྣམས་མཎྜལ་མེ་ཏོག་གིས་མཚོན་པར་སྤྱན་དྲངས་ལ། དེ་ལས་མེ་ཏོག་ཐབ་ཏུ་དོར་བས་ལྷ་ཐམས་ཅད་གཞལ་ཡས་ཁང་གི་གནས་སོ་སོར་རང་རང་གི་གདན་ལ་བཞུགས་པར་བསམ་པ་ཙམ་ལས་བསྐུར་རློབ་སོགས་མི་དགོས་སོ། །གང་ལྟར་ཡང་ཀུན་བཟང་ཞབས་བསིལ་བཞི་བསྣོལ་གྱིས་མཆོད། བརྗོད་མེད་ཀྱིས་བསྟོད། དཀྱིལ་འཁོར་གྱི་ལྷ་རྣམས་ཀྱི་ལྗགས་རྡོ་རྗེ་འོད་ཀྱི་སྦུ་གུ་ཅན་གྱིས་བསྲེགས་བླུགས་ཀྱི་བདུད་རྩིའི་རྒྱུན་དྲངས་ནས་གསོལ་བར་བསམ་ལ། ཧཱུཾ་བཛྲ་དྷྲྀཀ྄ །ཞེས་བདུན་གྱིས་བཀང་བའི་དགང་བླུགས་སྦྱར་བ་སྔར་ལྟར་ༀ་གུ་ཧྱ་ཛྙཱ་ན་སོགས་ཀྱི་མཐར་བདག་ཅག་དཔོན་སློབ་སོགས་བཏགས་པས་ལན་གསུམ་ཕུལ། སྔགས་དེས་ཡམ་ཤིང་མར་ཁུ་སྲེག་རྫས་རྣམ་བརྒྱ་རྩ་སོགས་ཇི་ལྟར་རིགས་པ་ཕུལ་ནས། མ་ཧཱ་པཉྩ་ཨ་མྲྀ་ཏ་ཁཱ་ཧིས་བདུད་རྩི། ལས་གཏོར་ནས་བླངས་པའི་གཏོར་ཀྱུ་མ་ཧཱ་བ་ལིཾ་ཏ་པྲ་ཏཱི ཙྪ་ཁཱ་ཧིས་གཏོར་མ། མ་ཧཱ་རཀྟ་པྲ་ཏཱིཙྪ་ཁཱ་ཧིས་རཀྟ་ཕུལ་ལ། ༀ། ཀློང་ཡངས་འཁྱིལ་བའི་ཧོམ་ཁུང་དུ། །དམ་རྫས་བདུད་རྩི་འདི་ཕུལ་བས། །བདག་ཅག་འཁོར་དང་བཅས་རྣམས་ཀྱི། །གནོད་བྱེད་དགྲ་བགེགས་བརླག་གྱུར་ནས། །མཆོག་ཐུན་དངོས་གྲུབ་སྩལ་དུ་གསོལ། །ཞེས་གསོལ་བ་བཏབ་པས་ལྷ་ཚོགས་རྣམས་ཀྱི་སྐུ་ལས་འོད་ཟེར་ནག་པོ་མཚོན་ཆའི་ཆར་ལྟ་བུ་འཕྲོས་པས་གནོད་བྱེད་དགྲ་བགེགས་ཐམས་ཅད་བརླག་པར་བསམ་མོ། །དེ་ནས་གཏང་རག་གི་མཆོད་བསྟོད་བཟོད་གསོལ་བྱས་ནས། དཀྱིལ་འཁོར་དང་འབྲེལ་ཚེ་མེ་ཏོག་གིས་སྤྱན་དྲངས་ཏེ་སོ་སོའི་གནས་སུ་བཞུགས་པར་བསམ། མ་འབྲེལ་ན་ཛྙཱ་ན་མཎྜ་ལ་བཛྲ་མུཿས་ཡེ་ཤེས་པ་གཤེགས་དམ་ཚིག་པ་རང་ལ་ཐིམ་པར་བསམ་མོ། །སླར་ཡང་ༀ་ཨགྣ་ཡེ་ཛྭ་ལ་ཛྭ་ལ་ཧཱུཾ་ཕཊ། ཅེས་བླུགས་གཟར་གྱི་མར་ཁུས་མེ་གསོས་པས། འཇིག་རྟེན་པའི་མེ་ལྷ་སྔར་བཞིན་གསལ་བར་བསམ་ལ། སྲེག་རྫས་ལྷག་རྣམས་ཕུལ། མཆོད་ཅིང་བསྟོད། ལས་གཏོར་ནས་གཏོར་ཀྱུ་བླངས་ཏེ་ༀ་ཨ་གྣེ་དེ་ཝ་རྀཾ་ཥི་མ་ཧཱ་བ་ལིཾ་ཏ་ཁཱ་ཧི་ས་གཏོར་མ་ཕུལ་ལ་འདོད་དོན་གསོལ། ཡིག་བརྒྱས་ནོངས་པ་བཤགས། བཛྲ་མུཿས་ཡེ་ཤེས་པ་རང་གནས་སུ་གཤེགས། །དམ་ཚིག་པ་འབར་བའི་རྣམ་པར་གྱུར་པར་བསམ་མོ། །དེ་ལྟར་ལས་བཞི་ཀ་ལ་སྦྱིན་སྲེག་བསྡུས་པའི་ལུགས་བྱེད་ན། ལིདྒ་བཤམ་བསྒྲལ་སྟོབ་པ་རྣས་དོན་ནས་སྲེག་ཆོག་བརྐྱང་པ་བྱས་ཀྱང་རུང་ངོ་། །གསུམ་པ་རྗེས་ལས་བཞི་ཐུན་མོང་དུ་བསྟན་པས་མཇུག་བསྡུ་བ་ནི། ལིང་རོ་སྔར་གུད་དུ་བཞག་པ་དེ་སྤུངས་པའི་མཐའམ། ལིདྒ་མེད་ན་ཐབ་ཀྱི་མཐར་མཆེད་རྣམས་བྲོ་ར་བཅས་ནས་ལས་བཞི་གང་ཡིན་གྱི་བྲོ་སྒྲུབ་ཁོག་ཏུ་བཤད་པ་ལྟར་བརྡུངས་རྗེས། ལིང་རོ་དེའམ་མེད་ན་ཐལ་སོལ་ཞི་བ་ལ་ལམ་གྱི་དཀྱིལ་དུ། རྒྱས་པ་ལ་མཛོད་དུ། དབང་ལ་མལ་འོག་ཏུ། དྲག་པོ་ལ་ལྷ་འདྲེ་གཉན་པོ་གནས་པའི་སར་ལས་མཐུན་གྱི་བྲུབ་ཁུང་བྲུས་པར་བླུག །དེ་སྟེང་གཡམ་པ་ལ་འོག་ཕྱོགས་སུ་ཞི་བར་ༀ་དཀར་པོ། །རྒྱས་པར་ཏྲཱཾ་སེར་པོ། དབང་ལ་ཧྲཱྀ༔་དམར་པོ། དྲག་པོར་ཧཱུཾ་ནག་པོ་དང་། སྟེང་ཕྱོགས་སུ་ལཾ་སེར་པོ་རེ་བྲིས་པས། ༀ་ལཾ་སྟྭམྦྷ་ནི་སྟམྦྷ་ནི་ཧཱུཾ་ཕཊ། ཅེས་ཁ་བཅད་ལ་སས་བསུབ་ཅིང་། ལས་དང་རྗེས་སུ་མཐུན་པའི་སྨོན་ལམ་གདབ་པར་བྱའོ། །ངག་ཚིག་འདིའི་མཐུས་རྒྱལ་པའི་ཕྲིན་ལས་བཞི། །གདུལ་བྱའི་རྒྱུད་ལ་དབང་འབྱོར་ཡེ་ཤེས་མེས། །ལས་ཉོན་སྒྲིབ་པའི་ཆོས་ཅན་དབྱིངས་སྦྱངས་ནས། །དོན་གཉིས་མཐའ་ཕྱིན་དཔལ་ལ་སྤྱོད་པར་ཤོག །འདུས་པ་མདོའི་ལས་བཞིའི་སྦྱིན་སྲེག་གི་ཆོ་ག་བཤད་པའི་ལེ་ཚན་ནོ།། །།

༈ ༀ་སྭ་སྟི། ད་ནི་སྒྲུབ་ཁོག་གི་ལྔ་བ་གཏོར་མ་བཏང་བའི་སྐབས་སུ། ལས་མཁན་གྱིས་དཀྱིལ་འཁོར་ཁང་བའི་ཕྱི་རོལ་ཏུ་ལྷག་ཆོག་རྒྱས་པར་བྱ། ཞེས་འབྱུང་བའི་ཟུར་འདེབས་ནི། དང་པོ་བཤམ་ཞིང་བྱིན་གྱིས་རློབ་པ། གཉིས་པ་མགྲོན་འགུགས་པ། གསུམ་པ་མཆོད་པའི་ལས་རིམ་གྱི་ནང་ཚན་སྤྱིར་མཆོད་པ་དང་། བྱེ་བྲག་ཏུ་མཆོད་པ་ལས་ཁ་ཕྲུ་གདབ་པ་ཡན་ཆད། བཞི་པ་བཤགས་ཤིང་བསྡུ་བ་རྣམས་སྒྲུབ་ཐབས་དངོས་གྲུབ་ཆར་འབེབས་ལྟར་ལས། བྱེ་བྲག་ཏུ་མཆོད་པའི་ནང་ཚན་རྐང་ཐོན་དུ་མཆོད་པའི་ཚིག །ཧཱུཾ། བཅོམ་ལྡན་རྡོ་རྗེ་མི་བསྐྱོད་པས། །ཞེས་སོགས་ལུང་གི་ལྷག་ཆོག་ཆུང་བ་ཡིན་པས། འདིར་དེའི་ཚབ་ཏུ་ལུང་གི་ལྷག་ཆོག་ཆེ་བ་འདི་བྱ་སྟེ། ཧཱུཾ། དཔལ་ཆེན་རཀྴ་ཧེ་རུ་ཀར། །ག་རཱིའི་ཚོགས་ཀྱིས་བསྐོར་བ་ནི། །བྱང་ཆུབ་སེམས་དཔའ་བརྒྱད་རྣམས་ཀྱིས། །ག་རཱི་ཁྲོ་མོ་བརྒྱད་དུ་སྤྲུལ། །སྲིན་མོ་ཆེན་མོ་བརྒྱད་རྣམས་བཏུལ། །བྱང་སེམས་ས་ཡི་སྙིང་པོ་ཡིས། ཁྲོ་མོ་ཆེན་མོ་ག་རཱི ར་སྤྲུལ། །སྲིན་མོ་ཆེན་མོ་ཀིང་ཐོད་བཏུལ། ༈ །ལྷག་མ་བྱིན་ནས་དམ་ལ་བཏགས། །རྡོ་རྗེའི་དམ་ལས་བྲོ་སྐྱལ་ཏེ། །གཏན་གྱི་བྲན་དུ་མཆིས་ཀྱི་འཚལ། །སྔོན་གྱི་ཁས་བླངས་དམ་བཅས་བཞིན། །རྡོ་རྗེའི་དམ་ལས་མ་འདའ་བར། །ལས་ཀྱི་ལྷག་མ་འདི་ལོངས་ལ། ཁས་བླངས་དམ་བཅས་ཇི་བཞིན་དུ། །བཅོལ་བའི་ལས་རྣམས་གྲུབ་པར་མཛོད། །ཕྱི་ཡི་དཀྱིལ་འཁོར་མཐའ་སྲུངས་ཤིག །ཅེས་ལྷག་མ་ལ་སོགས་པའི་རྐང་པ་དགུ་པོ་འོག་མ་ཀུན་ལ་འགྲེའོ། །བྱང་སེམས་ནམ་མཁའི་སྙིང་པོ་ཡིས། ཁྲོ་མོ་ཆེན་མོ་ཙ་རཱིར་སྤྲུལ། །སྲིན་མོ་ཆེན་མོ་མདའ་འཕེན་བཏུལ། །ལྷག་མ་སོགས་རྐང་པ་དགུ། བྱང་སེམས་སྤྱན་རས་གཟིགས་དབང་གིས། ཁྲོ་མོ་ཆེན་མོ་པྲ་མོར་སྤྲུལ། །སྲིན་མོ་ཆེན་མོ་འཛིན་བྱེད་བཏུལ། །ལྷག་མ་སོགས། བྱང་སེམས་ཕྱག་ན་རྡོ་རྗེ་ཡིས། ཁྲོ་མོ་ཆེན་མོ་བེ་ཏར་སྤྲུལ། །སྲིན་མོ་ཆེན་མོ་ཟ་བྱེད་བཏུལ། །ལྷག་མ་སོགས། བྱང་ཆུབ་སེམས་དཔའ་བྱམས་པ་ཡིས། ཁྲོ་མོ་ཆེན་མོ་པུཀྐར་སྤྲུལ། །སྲིན་མོ་ནང་རོལ་འདྲེན་མ་བཏུལ། །ལྷག་མ་སོགས། བྱང་སེམས་སྒྲིབ་པ་རྣམ་སེལ་གྱིས། ཁྲོ་མོ་ཆེན་མོ་གྷསྨར་སྤྲུལ། །སྲིན་མོ་ཆེན་མོ་རབ་འཇིགས་བཏུལ། །ལྷག་མ་སོགས། བྱང་སེམས་ཀུན་ཏུ་བཟང་པོ་ཡིས། ཁྲོ་མོ་ཆེན་མོ་སྨ་ཤར་སྤྲུལ། །སྲིན་མོ་ཆེན་མོ་སྲོག་གཅོད་བཏུལ། །ལྷག་མ་སོགས། བྱང་ཆུབ་སེམས་དཔའ་འཇམ་དཔལ་གྱིས། །ཁྲོ་མོ་ཆེན་མོ་ཙཎྜར་སྤྲུལ། །སྲིན་མོ་ཆེན་མོ་སྨྱོན་མ་བཏུལ། །ལྷག་མ་སོགས། ཧཱུཾ། དཔལ་ཆེན་རཀྴ་ཧེ་རུ་ཀར། །ཕྲ་མེན་ཚོགས་ཀྱིས་བསྐོར་བ་ནི། །དཔལ་ཆེན་ཁྲག་འཐུང་ཞལ་བཞད་པས། །མཆོད་པའི་ལྷ་མོ་བརྒྱད་རྣམས་ཀྱིས། །སིདྷ་ཕྲ་མེན་བརྒྱད་དུ་སྤྲུལ། །སྲིན་མོ་མགོ་བརྙན་བརྒྱད་རྣམས་བཏུལ། །ཤར་ཕྱོགས་ལྷ་མོ་ལཱ་སྱེ་མས། ཁྲོ་མོ་ཆེན་མོ་སེང་མགོར་སྤྲུལ། །སྲིན་མོ་འཇིགས་བྱེད་སེང་མགོ་བཏུལ། །ལྷག་མ་སོགས། ལྷོ་ཕྱོགས་ལྷ་མོ་མཱ་ལྱེ་མས། །ཕྲ་མེན་ཆེན་མོ་སྟག་མགོར་སྤྲུལ། །སྲིན་མོ་ཟ་བྱེད་སྟག་མགོ་བཏུལ། །ལྷག་མ་སོགས། ནུབ་ཕྱོགས་ལྷ་མོ་གཱིརྟི་མས། །ཕྲ་མེན་ཆེན་མོ་ཝ་མགོར་སྤྲུལ། །སྲིན་མོ་ལེན་བྱེད་ཝ་མགོ་བཏུལ། །ལྷག་མ་སོགས། བྱང་ཕྱོགས་ལྷ་མོ་ནིརྟི་མས། །ཕྲ་མེན་ཆེན་མོ་སྤྱང་མགོར་སྤྲུལ། །སྲིན་མོ་ར་རོ་ཁྱི་མགོ་བཏུལ། །ལྷག་མ་སོགས། ཤར་ལྷོ་ལྷ་མོ་དྷཱུ་པེ་མས། །ཕྲ་མེན་ཆེན་མོ་རྒོད་མགོར་སྤྲུལ། །སྲིན་མོ་བྱ་རྒོད་མགོ་ཅན་བཏུལ། །ལྷག་མ་སོགས། ལྷོ་ནུབ་ལྷ་མོ་མེ་ཏོག་མས། །ཕྲ་མེན་ཀདྒའི་མགོ་རུ་སྤྲུལ། །སྲིན་མོ་ཀདྒའི་མགོ་ཅན་བཏུལ། །ལྷག་མ་སོགས། ནུབ་བྱང་ལྷ་མོ་མར་མེ་མས། །ཕྲ་མེན་བྱ་རོག་མགོ་རུ་སྤྲུལ། །སྲིན་མོ་འཇོམས་བྱེད་བྱ་རོག་བཏུལ། །ལྷག་མ་སོགས། བྱང་ཤར་ལྷ་མོ་དྲི་ཆབ་མས། །ཕྲ་མེན་ཨུ་ལཱུ་མུ་ཁར་སྤྲུལ། །སྲིན་མོ་བསྐུལ་བྱེད་འུག་མགོ་བཏུལ། །ལྷག་མ་སོགས། ཧཱུཾ། དཔལ་ཆེན་རཀྴ་ཧེ་རུ་ཀར། །སྒོ་མའི་ཚོགས་ཀྱིས་བསྐོར་བ་ནི། །ཚད་མེད་སྒོ་མ་བཞི་རྣམས་ཀྱིས། །རྟ་གདོང་སྒོ་མ་བཞི་རུ་སྤྲུལ། །ཤར་གྱི་བྱམས་པ་ལྕགས་ཀྱུ་མས། །སྒོ་མ་རྟ་གདོང་ལྕགས་ཀྱུར་སྤྲུལ། །སྲིན་མོ་རྟ་ཡི་མགོ་ཅན་བཏུལ། །ལྷག་མ་སོགས། ལྷོ་ཡི་སྙིང་རྗེ་ཞགས་པ་མས། །སྒོ་མ་ཕག་གདོང་ཞགས་པར་སྤྲུལ། །སྲིན་མོ་ཕག་གི་མགོ་ཅན་བཏུལ། །ལྷག་མ་སོགས། ནུབ་ཀྱི་དགའ་བ་ལྕགས་སྒྲོགས་མས། །སྒོ་མ་དྲེད་མགོ་ལྕགས་སྒྲོག་སྤྲུལ། །སྲིན་མོ་དྲེད་ཀྱི་མགོ་ཅན་བཏུལ། །ལྷག་མ་སོགས། བྱང་གི་བཏང་སྙོམས་དྲིལ་བུ་མས། །སྒོ་མ་ཆེན་མོ་སྤྱང་མགོར་སྤྲུལ། །སྲིན་མོ་ཆེན་མོ་སྤྱང་མགོ་བཏུལ། །ལྷག་མ་སོགས། ཧཱུཾ། དཔལ་ཆེན་རཀྴ་ཧེ་རུ་ཀར། །སྤོར་མའི་ཚོགས་ཀྱིས་བསྐོར་བ་ནི། །དཔལ་ཆེན་ཐུགས་རྗེ་སྦྱོར་བ་ལས། །ཐུབ་དྲུག་ཡིད་ཆོས་བརྒྱད་པོ་ཡིས། །སྤོར་མ་ཆེན་མོ་བརྒྱད་དུ་སྤྲུལ། །ཕྱོགས་སྐྱོང་བརྒྱད་ཀྱི་བུ་མོ་བཏུལ། །ལྷག་མ་སོགས། ཀུན་ཏུ་བཟང་པོ་གནས་གྱུར་པ། །སྤོར་མ་ཉི་ཟེར་ཞགས་པར་སྤྲུལ། །འབར་མ་ཉི་ཟེར་ཞགས་པ་བཏུལ། །ལྷག་མ་སོགས། ཡི་དྭགས་ཐུབ་པ་གནས་གྱུར་པ། །སྤོར་མ་གློག་ཕྲེང་འཛིན་དུ་སྤྲུལ། །འབར་མ་ཆེན་མོ་གློག་ཕྲེང་བཏུལ། །ལྷག་མ་སོགས། མི་ཡི་ཐུབ་པ་གནས་གྱུར་པ། །སྤོར་མ་མདུང་ཐུང་འཕེན་དུ་སྤྲུལ། །འབར་མ་གཏུམ་མོ་མདུང་ཐུང་བཏུལ། །ལྷག་མ་སོགས། དམྱལ་བའི་ཐུབ་པ་གནས་གྱུར་པ། །སྤོར་མ་གཤིན་རྗེ་རལ་གྲིར་སྤྲུལ། །འབར་མ་གཤིན་རྗེ་རལ་གྲི་བཏུལ། །ལྷག་མ་སོགས། ཀུན་ཏུ་བཟང་མོ་གནས་གྱུར་པ། །སྤོར་མ་དྲིལ་འཁྲོལ་མ་རུ་སྤྲུལ། །འབར་མ་རྡོ་རྗེ་དྲིལ་འཁྲོལ་བཏུལ། །ལྷག་མ་སོགས། ལྷ་མིན་ཐུབ་པ་གནས་གྱུར་པ། །སྤོར་མ་སྐྲ་མདའ་གཏོང་དུ་སྤྲུལ། །འབར་མ་ཐོག་འབེབས་སྐར་མདའ་བཏུལ། །ལྷག་མ་སོགས། བྱོལ་སོང་ཐུབ་པ་གནས་གྱུར་པ། །སྤོར་མ་བླག་ཤ་སྡེབ་ཏུ་སྤྲུལ། །འབར་མ་བན་གླང་སྣ་ཚོགས་བཏུལ། །ལྷག་མ་སོགས། ལྷ་ཡི་ཐུབ་པ་གནས་གྱུར་པ། །སྤོར་མ་ཁྱུང་ཐོགས་མ་རུ་སྤྲུལ། །འབར་མ་གནོད་སྦྱིན་ཁྱུང་ཐོགས་བཏུལ། །ལྷག་མ་སོགས། ཧཱུཾ། དཔལ་ཆེན་རཀྴ་ཧེ་རུ་ཀར། །གསང་བའི་ཡུམ་བཞིས་བསྐོར་བ་ནི། །དཔལ་ཆེན་ཐུགས་ཀྱི་སྦྱོར་བ་ལས། །ཡི་གེ་ཧཱུཾ་བཞི་སྤྲུལ་བྱས་ནས། །དེ་ལས་གསང་བའི་ཡུམ་བཞིར་སྤྲུལ། །དེ་བཞིས་སྲིན་མོ་བཞི་བཏུལ་ཏེ། །ཤར་གྱི་བདེ་བ་ཟ་བྱེད་མས། །སྲིན་མོ་ཟ་བྱེད་ཁྲག་འཐུང་བཏུལ། །ལྷག་མ་སོགས། ལྷོ་ཡི་བདེ་བ་རྨོངས་བྱེད་མས། །སྲིན་མོ་ཆེན་མོ་རུས་འཆང་བཏུལ། །ལྷག་མ་སོགས། ནུབ་ཀྱི་བདེ་བ་རྒྱས་འདེབས་མས། །སྲིན་མོ་དུར་ཁྲོད་རོ་རྐུན་བཏུལ། །ལྷག་མ་སོགས། བྱང་གི་བདེ་བ་ཚེ་འཕེལ་མས། །སྲིན་མོ་དུར་ཁྲོད་བདག་མོ་བཏུལ། །ལྷག་མ་སོགས། །ཧཱུཾ། དཔལ་ཆེན་རཀྴ་ཧེ་རུ་ཀར། །དབང་ཕྱུག་ཚོགས་ཀྱིས་བསྐོར་བ་ནི། །དཔལ་ཆེན་ཐུགས་ཀྱི་སྦྱོར་བ་ལས། །ཚངས་མ་ལ་སོགས་ཡེ་ཤེས་པའི། །དབང་མོ་ཉི་ཤུ་རྩ་བརྒྱད་ཀྱིས། །ལས་ཀྱི་དབང་མོ་མགོ་བརྙན་ཚོགས། །འཇིག་རྟེན་རྣམ་པའི་སྲིན་པོ་སྟེ། །ལག་ན་གློ་སྙིང་ནང་ཁྲོལ་ཐོགས། །ཉི་ཤུ་རྩ་བརྒྱད་ཚོགས་སུ་སྤྲུལ། །རྒྱུ་སྐར་ཉི་ཤུ་རྩ་བརྒྱད་ལ། འགལ་བྱེད་གནོད་པའི་ཚོགས་རྣམས་བཏུལ། །ལྷག་མ་སོགས། ཧཱུཾ། དཔལ་ཆེན་རཀྟ་ཧེ་རུ་ཀར། །མཁའ་འགྲོའི་ཚོགས་ཀྱིས་བསྐོར་བ་ནི། །དཔལ་ཆེན་སྐུ་ཡི་འོད་ཟེར་ལས། །སེམས་དཔའ་སུམ་ཅུ་རྩ་གཉིས་ཀྱིས། །མཁའ་འགྲོ་སུམ་ཅུ་རྩ་གཉིས་སྤྲུལ། །སྲིན་མོ་སུམ་ཅུ་རྩ་གཉིས་བཏུལ། །བྱང་སེམས་རྡོ་རྗེ་སེམས་དཔའ་ཡིས། །མཁའ་འགྲོ་དགའ་བྱེད་མ་རུ་སྤྲུལ། །སྲིན་མོ་ཆེན་མོ་དགའ་བྱེད་བཏུལ། །ལྷག་མ་སོགས། སེམས་དཔའ་རྡོ་རྗེ་རྒྱལ་པོ་ཡིས། །མཁའ་འགྲོ་འདྲེན་བྱེད་མ་རུ་སྤྲུལ། །སྲིན་མོ་ཆེན་མོ་འདྲེན་བྱེད་བཏུལ། །ལྷག་མ་སོགས། སེམས་དཔའ་རྡོ་རྗེ་ཆགས་པ་ཡིས། །མཁའ་འགྲོ་གསོད་བྱེད་མ་རུ་སྤྲུལ། །སྲིན་མོ་ཆེན་མོ་གསོད་བྱེད་བཏུལ། །ལྷག་མ་སོགས། སེམས་དཔའ་རྡོ་རྗེ་ལེགས་པ་ཡིས། །མཁའ་འགྲོ་སྤོར་བྱེད་མ་རུ་སྤྲུལ། །སྲིན་མོ་སྤོར་མ་ཆེན་མོ་བཏུལ། །ལྷག་མ་སོགས། སེམས་དཔའ་རྡོ་རྗེ་རིན་ཆེན་གྱིས། །མཁའ་འགྲོ་འབར་བྱེད་མ་རུ་སྤྲུལ། །སྲིན་མོ་ཆེན་མོ་འབར་མ་བཏུལ། །ལྷག་མ་སོགས། སེམས་དཔའ་རྡོ་རྗེ་ཉི་མ་ཡིས། །མཁའ་འགྲོ་གཟི་བརྗིད་མ་རུ་སྤྲུལ། །སྲིན་མོ་ཆེན་མོ་གཟི་བརྗིད་བཏུལ། །ལྷག་སོགས། སེམས་དཔའ་རྡོ་རྗེ་རྒྱལ་མཚན་གྱིས། །མཁའ་འགྲོ་བདུད་རྩི་རྒྱལ་བྱེད་སྤྲུལ། །སྲིན་མོ་རྒྱལ་བྱེད་དབང་ལྡན་བཏུལ། །ལྷག་མ་སོགས། སེམས་དཔའ་རྡོ་རྗེ་བཞད་པ་ཡིས། །མཁའ་འགྲོ་འཇོམས་བྱེད་མ་རུ་སྤྲུལ། །སྲིན་མོ་ཆེན་མོ་འཇོམས་མ་བཏུལ། །ལྷག་སོགས། སེམས་དཔའ་རྡོ་རྗེ་ཆོས་རབ་ཀྱིས། །མཁའ་འགྲོ་ཆགས་བྱེད་མ་རུ་སྤྲུལ། །སྲིན་མོ་ཆེན་མོ་ཆགས་མ་བཏུལ། །ལྷག་སོགས། སེམས་དཔའ་རྡོ་རྗེ་རྣོན་པོ་ཡིས། །མཁའ་འགྲོ་ཆགས་བྲལ་མ་རུ་སྤྲུལ། །སྲིན་མོ་ཆེན་མོ་ཆགས་བྲལ་བཏུལ། །ལྷག་སོགས། སེམས་དཔའ་རྡོ་རྗེ་འཁོར་ལོ་ཡིས། །མཁའ་འགྲོ་འཁོར་ལོ་མ་རུ་སྤྲུལ། །སྲིན་མོ་ཆེན་མོ་འཁོར་ལོ་བཏུལ། །ལྷག་སོགས། སེམས་དཔའ་རྡོ་རྗེ་སྨྲ་བ་ཡིས། །མཁའ་འགྲོ་རྒྱས་འདེབས་མ་རུ་སྤྲུལ། །སྲིན་མོ་ཆེན་མོ་རྒྱས་མ་བཏུལ། །ལྷག་སོགས། སེམས་དཔའ་རྡོ་རྗེ་སྣ་ཚོགས་ཀྱིས། །མཁའ་འགྲོ་སྣ་ཚོགས་གཟུགས་སུ་སྤྲུལ། །སྲིན་མོ་ཆེན་མོ་སྣ་ཚོགས་བཏུལ། །ལྷག་སོགས། སེམས་དཔའ་རྡོ་རྗེ་གོ་ཆ་ཡིས། །མཁའ་འགྲོ་ཆེན་མོ་བསྲུང་མོར་སྤྲུལ། །སྲིན་མོ་ཆེན་མོ་མ་སྲིན་བཏུལ། །ལྷག་སོགས། སེམས་དཔའ་རྡོ་རྗེ་མཆེ་བ་ཡིས། །མཁའ་འགྲོ་གནོད་སྦྱིན་མ་རུ་སྤྲུལ། །སྲིན་མོ་ཆེན་མོ་གནོད་སྦྱིན་བཏུལ། །ལྷག་སོགས། སེམས་དཔའ་རྡོ་རྗེ་ཁུ་ཚུར་གྱིས། །མཁའ་འགྲོ་ཡང་དག་འཕྲོག་མར་སྤྲུལ། །སྲིན་མོ་ཆེན་མོ་འཕྲོག་མ་བཏུལ། །ལྷག་སོགས། སེམས་དཔའ་དཔའ་བར་འགྲོ་བ་ཡིས། །མཁའ་འགྲོ་བྱ་རོག་གདོང་དུ་སྤྲུལ། །སྲིན་མོ་ཆེན་མོ་རིག་འབྱིན་བཏུལ། །ལྷག་སོགས། སེམས་དཔའ་ཀུན་ཏུ་བཟང་པོ་ཡིས། །མཁའ་འགྲོ་འཇིགས་བྱེད་མ་རུ་སྤྲུལ། །སྲིན་མོ་ཆེན་མོ་འཇིགས་བྱེད་བཏུལ། །ལྷག་སོགས། སེམས་དཔའ་ཟླ་འོད་གཞོན་ནུ་ཡིས། །མཁའ་འགྲོ་འུག་པའི་མགོ་རུ་སྤྲུལ། །སྲིན་མོ་ཆེན་མོ་མུན་མཐོང་བཏུལ། །ལྷག་སོགས། བྱང་ཆུབ་སེམས་དཔའ་བཟང་སྐྱོང་གིས། །མཁའ་འགྲོ་བཞད་གདོང་མ་རུ་སྤྲུལ། །སྲིན་མོ་བཞད་ཀྱི་མགོ་ཅན་བཏུལ། །ལྷ ག་སོགས། སེམས་དཔའ་དྲྭ་བ་ཅན་འོད་ཀྱིས། །མཁའ་འགྲོ་ཁྱི་མགོ་མ་རུ་སྤྲུལ། །སྲིན་མོ་ཁྱི་ཡི་མགོ་ཅན་བཏུལ། །ལྷག་མ་སོགས། སེམས་དཔའ་རྡོ་རྗེ་སྙིང་པོ་ཡིས། །མཁའ་འགྲོ་ཕག་གདོང་མ་རུ་སྤྲུལ། །སྲིན་མོ་ཕག་གི་མགོ་ཅན་བཏུལ། །ལྷག་སོགས། སེམས་དཔའ་ནམ་མཁའ་མཛོད་ཀྱིས་ནི། །མཁའ་འགྲོ་རྔ་མོང་གདོང་མར་སྤྲུལ། །སྲིན་མོ་རྔ་མོང་མགོ་ཅན་བཏུལ། །ལྷག་སོགས། སེམས་དཔའ་འོད་དཔག་མེད་ཀྱིས་ནི། །མཁའ་འགྲོ་བོང་བུའི་གདོང་མར་སྤྲུལ། །སྲིན་མོ་བོང་བུའི་མགོ་ཅན་བཏུལ། །ལྷག་སོགས། སེམས་དཔའ་ངན་སོང་ཀུན་སྦྱོང་གིས། །མཁའ་འགྲོ་ར་མགོ་མ་རུ་སྤྲུལ། །སྲིན་མོ་ར་ཡི་མགོ་ཅན་བཏུལ། །ལྷག་སོགས། སེམས་དཔའ་རྒྱལ་བ་ཡེ་ཤེས་ཀྱིས། །མཁའ་འགྲོ་བྱི་ལའི་མགོ་ཅན་སྤྲུལ། །སྲིན་མོ་བྱི་ལའི་མགོ་ཅན་བཏུལ། །ལྷག་མ་སོགས། སེམས་དཔའ་བློ་གྲོས་མི་ཟད་པས། །མཁའ་འགྲོ་ཀེང་རུས་མ་རུ་སྤྲུལ། །སྲིན་མོ་ཀེང་རུས་འཛིན་མ་བཏུལ། །ལྷག་སོགས། སེམས་དཔའ་སྤོབས་པ་བརྩེགས་པ་ཡིས། །མཁའ་འགྲོ་རུས་ཕྲེང་ཅན་དུ་སྤྲུལ། །སྲིན་མོ་རུས་པའི་ཕྲེང་ཅན་བཏུལ། །ལྷག་སོགས། བྱང་ཆུབ་སེམས་དཔའ་བྱམས་པ་ཡིས། །མཁའ་འགྲོ་བུམ་སྣ་མ་རུ་སྤྲུལ། །སྲིན་མོ་བུམ་སྣའི་ཆུང་མ་བཏུལ། །ལྷག་སོགས། སེམས་དཔའ་ངན་སོང་ཀུན་འདྲེན་གྱིས། །མཁའ་འགྲོ་རྣམ་པར་འཇོམས་མར་སྤྲུལ། །གཤིན་རྗེ་རྣམ་འཇོམས་ཆུང་མ་བཏུལ། །ལྷག་སོགས། སེམས་དཔའ་སྤོས་ཀྱི་གླང་པོ་ཡིས། །མཁའ་འགྲོ་དྷ་ཤ་གྲཱི་བར་སྤྲུལ། །ལྷག་སོགས། བྱང་སེམས་དོན་ཡོད་གྲུབ་པ་ཡིས། །མཁར་འགྲོ་འབོད་སྒྲོག་མ་རུ་སྤྲུལ། །གནོད་སྦྱིན་འབོད་སྒྲོག་ཆུང་མ་བཏུལ། །ལྷག་སོགས། ཧཱུཾ་དཔལ་ཆེན་རཀྴ་ཧེ་རུ་ཀར། །ཕོ་ཉའི་ཚོགས་ཀྱིས་བསྐོར་བ་ནི། །འོད་ཟེར་སུམ་བརྒྱ་དྲུག་ཅུར་ལས། །ཕོ་ཉ་སུམ་བརྒྱ་དྲུག་ཅུར་སྤྲུལ། །ཤར་དུ་འོད་ཟེར་དཀར་པོ་ལས། །དུང་གི་མི་མོ་དྲུག་ཅུར་སྤྲུལ། །དྲི་ཟའི་གདོན་ཚོགས་དྲུག་ཅུ་བཏུལ། །ལྷག་སོགས། ལྷོ་རུ་འོད་ཟེར་སྔོན་པོ་ལས། །ལྕགས་ཀྱི་མི་མོ་དྲུག་ཅུར་སྤྲུལ། །གཤིན་རྗེའི་གདོན་ཚོགས་དྲུག་ཅུ་བཏུལ། །ལྷག་སོགས། ནུབ་ཏུ་འོད་ཟེར་དམར་པོ་ལས། །ཟངས་ཀྱི་མི་མོ་དྲུག་ཅུར་སྤྲུལ། །ཀླུ་ཡི་གདོན་ཚོགས་དྲུག་ཅུ་བཏུལ། །ལྷག་སོགས། བྱང་དུ་འོད་ཟེར་ལྗང་ཁུ་ལས། །གཡུ་ཡི་མི་མོ་དྲུག་ཅུར་སྤྲུལ། །གནོད་སྦྱིན་གདོན་ཚོགས་དྲུག་ཅུ་བཏུལ། །ལྷག་སོགས། སྟེང་དུ་འོད་ཟེར་སེར་པོ་ལས། །གསེར་གྱི་མི་མོ་དྲུག་ཅུར་སྤྲུལ། །ཡ་བདུད་གདོན་ཚོགས་དྲུག་ཅུ་བཏུལ། །ལྷག་སོགས། འོག་ཏུ་འོད་ཟེར་སྣ་ཚོགས་ལས། །བསེ་ཡི་མི་མོ་དྲུག་ཅུར་སྤྲུལ། །མ་མོའི་གདོན་ཚོགས་དྲུག་ཅུ་བཏུལ། །ལྷག་སོགས། ཧཱུཾ། དཔའ་ཆེན་རཀྴ་ཧེ་རུ་ཀར། །ཀིང་ཆེན་ཚོགས་ཀྱིས་བསྐོར་བ་ནི། །དཔལ་ཆེན་ཧེ་རུ་ཀ་བཞད་པས། །རྡོ་རྗེ་ཀིང་ཆེན་བཅོ་བརྒྱད་སྤྲུལ། །གདོན་གྱི་རྒྱལ་པོ་བཅོ་བརྒྱད་བཏུལ། །ལྷག་སོགས། ཧཱུཾ། དཔལ་ཆེན་རཀྴ་ཧེ་རུ་ཀར། །མ་བདུད་ཚོགས་ཀྱིས་བསྐོར་བ་ནི། །དཔལ་ཆེན་ཐུགས་ཀྱི་སྦྱོར་བ་ཡིས། །ཡི་གེ་ཧཱུཾ་བདུན་སྤྲོས་པ་ལས། །གསང་བའི་མ་མོ་བདུན་དུ་སྤྲུལ། །སྲིན་མོ་ཆེན་མོ་བདུན་པོ་བཏུལ། །ལྷག་སོགས། ཧཱུཾ། དཔའ་ཆེན་རཀྴ་ཧེ་རུ་ཀར། །སྲིང་མོ་བཞི་ཡིས་བསྐོར་བ་ནི། །གླིང་བཞི་དབང་འགྱུར་ཆེན་མོ་ཡིས། །སྲིང་མོ་ཆེན་མོ་བཞི་རུ་སྤྲུལ། །བགེགས་ཀྱི་རྒྱལ་པོ་བཞི་པོ་བཏུལ། །ལྷག་སོགས། ཧཱུཾ། བཅོམ་ལྡན་རྡོ་རྗེ་མི་བསྐྱོད་པས། །དཔལ་ཆེན་བཛྲ་ཧེ་རུར་སྤྲུལ། །དབུས་ཀྱི་ཡི་དྭགས་སྲིན་པོ་བཏུལ། །ལྷག་སོགས། བཅོམ་ལྡན་རྣམས་པར་སྣང་མཛད་ཀྱིས། །དཔལ་ཆེན་བུདྡྷ་ཧེ་རུར་སྤྲུལ། །ཤར་གྱི་དྲི་ཟ་སྲིན་པོ་བཏུལ། །ལྷག་སོགས། བཅོམ་ལྡན་རིན་ཆེན་འབྱུང་ལྡན་གྱིས། །དཔའ་ཆེན་རཏྣ་ཧེ་རུར་སྤྲུལ། །ལྷོ་ཡི་གཤིན་རྗེ་སྲིན་པོ་བཏུལ། །ལྷག་སོགས། བཅོམ་ལྡ་སྣང་བ་མཐའ་ཡས་ཀྱིས། །དཔལ་ཆེན་པདྨ་ཧེ་རུར་སྤྲུལ། །ནུབ་ཀྱི་ཀླུ་ཡི་སྲིན་པོ་བཏུལ། །ལྷག་སོགས། བཅོམ་ལྡན་དོན་ཡོད་གྲུབ་པ་ཡིས། །དཔལ་ཆེན་ཀརྨ་ཧེ་རུར་སྤྲུལ། །བྱང་ཕྱོགས་གནོད་སྦྱིན་སྲིན་པོ་བཏུལ། །ལྷག་མ་བྱིན་ནས་དམ་ལ་བཏགས། །རྡོ་རྗེའི་དམ་ལས་བྲོ་སྐྱལ་ཏེ། །གཏན་གྱི་བྲན་དུ་མཆིས་ཀྱིས་འཚལ། །སྔོན་གྱི་ཁས་བླངས་དམ་བཅས་བཞིན། །རྡོ་རྗེའི་དམ་ལས་མ་འདའ་ཞིག །ལས་ཀྱི་ལྷག་མ་འདི་ལོངས་ལ། །ཁས་བླངས་དམ་བཅས་ཇི་བཞིན་དུ། །བཅོལ་བའི་ལས་རྣམས་གྲུབ་པར་མཛོད། །ཕྱི་ཡི་དཀྱིལ་འཁོར་མཐའ་སྲུངས་ཤིག །རིགས་ཀྱི་ཡུམ་ཆེན་ལྔ་རྣམས་ཀྱིས། །ཁྲོ་མོ་ཆེན་མོ་ལྔ་རུ་སྤྲུལ། །སྲིན་མོ་ཆེན་མོ་ལྔ་རྣམས་བཏུལ། །ལྷག་མ་བྱིན་ནས་དམ་ལ་བཏགས། །སྔོན་གྱི་དམ་ལས་མ་གཡེལ་བར། །བཀའ་ཡི་གཏོར་མ་འདི་བཞེས་ལ། ཐུགས་དམ་ཆེན་པོ་ཇི་བཞིན་དུ། །རྣལ་འབྱོར་བཅོམ་བའི་ཕྲིན་ལས་མཛོད། །ཅེས་བྱའོ། །མདོའི་ལྷག་ཆོག་འདོར་ལེན་གྱི་སྒོ་ནས་ལུང་ལྷག་ཆེ་བ་ཇི་ལྟར་བྱ་བའི་ལེ་ཚན་ནོ། །བླ་མའི་གསུང་ངག་བདུད་རྩི་རྣ་དབང་ལས། ཆོས་ཀྱི་འཁོར་ལོར་ཡོངས་འཁྱིལ་འདུས་པ་མདོའི། །ཆོ་གའི་བཟུར་འདེབས་སྔོན་མེད་ལེགས་བཤད་དཔལ། །ལྷ་ཡི་དཔག་བསམ་སྙེ་མ་དེ་རིང་འཁྲུངས། །དགེ་འདིས་རྒྱུད་ལུང་མན་ངག་རྩེར་སོན་པ། །མདོ་ཡི་དབང་བཞིའི་ཆུ་བོས་རབ་སྨིན་ནས། །བསྐྱེད་རྫོགས་ཆོས་ཀྱིས་འགྲོ་ཀུན་རྒྱུད་གྲོལ་ཏེ། །དཔལ་ལྡན་འབྲས་རྒྱུད་སྐུ་བཞི་ཐོབ་པར་ཤོག །འདུས་པ་མདོའི་སྒྲུབ་དཀྱིལ་སྒྲུབ་ཁོག་དང་བཅས་པའི་ཟུར་འདེབས་དཔག་བསམ་སྙེ་མ་ཞེས་བྱ་བ་འདི་ཡང་། མཁའ་ཤིང་གྲུབ་པའི་སྐྱེས་ཆེན་དམ་པ་དུ་མའི་གསུང་གིས་བསྐུལ་བ་ལ་བརྟེན་ནས། རིགས་ཀུན་ཁྱབ་བདག་དཔལ་རྡོ་རྗེ་འཆང་ཆེན་པོ་རྗེ་བཙུན་བླ་མ་དམ་པ་གཏེར་ཆེན་ཆོས་ཀྱི་རྒྱལ་པོའི་བཀའ་དྲིན་གྱིས་འཚོ་བའི་སྨྱོས་ཀྱི་དགེ་སློང་རྨོངས་པ་དྷརྨཱ་ཤྲཱིས་ཤིང་མོ་བྱའི་ལོ་རྒྱལ་ཟླ་བའི་ཚེས་ཉི་ཤུའི་ཉིན་འོག་མིན་ༀ་རྒྱན་སྨིན་གྲོལ་གླིང་གི་ཆོས་གྲྭར་གྲུབ་པར་སྦྱར་བའོ། །འདིས་ཀྱང་བསྟན་པ་དང་སེམས་ཅན་ལ་ཕན་པའི་རྒྱུར་གྱུར་ཅིག། །།