རྒྱུད་དང་མན་ངག་གི་ལུགས་གཅིག་ཏུ་དྲིལ་བའི་གོ་དོན་དང་ལག་ལེན་གྱི་གནད་བཤད་པའི་སྐབས།
བཛྲ སྱ སོ པཱ ནཾ ནཱ མོ མ ཧཱ ས མཱ ཛ སཱུ ཏྲ སྱཱ བྷི ཥི ཉྩ བི དྷི བི ཧ ར ཏིསྨ། །
འདུས་པ་ཆེན་པོ་མདོའི་དབང་གི་ཆོ་ག་རྡོ་རྗེའི་ཐེམ་སྐས་ཞེས་བྱ་བ་བཞུགས་སོ། །
ༀ་སིདྡྷི་རསྟུ། འདུས་པ་ཆེན་པོ་མདོའི་དབང་གི་ཆུ་བོ་བཞི་རྒྱུད་དང་མན་ངག་གི་ལུགས་གཅིག་ཏུ་དྲིལ་ནས་བསྐུར་བའི་ཆོ་ག་བདེ་བ་ཆེན་པོའི་ཁང་བཟང་དུ་འཇུག་པའི་རྡོ་རྗེའི་ཐེམ་སྐས་ཞེས་བྱ་བ། བླ་མ་དང་བཅོམ་ལྡན་འདས་དཔལ་སྒྲོལ་བྱེད་ཐུགས་རྗེའི་རྒྱལ་པོ་ཤིན་ཏུ་རྣམ་པར་གྲོལ་བ་ཉིད་ལ་ཕྱག་འཚལ་ལོ། །གང་ཞིག་རྣམ་འགྱུར་ཀུན་རྟོག་སྡེར་བཅས་དབྱིངས་སུ་གྲོལ་བས་ཟག་མེད་ཀྱི། །དཔལ་ལྡན་བདེ་ཆེན་ཉིན་མོར་བྱེད་སྐུ་ཡེ་ཤེས་རྡོ་རྗེ་འོད་པོ་ཆེ། །ཕན་བདེའི་སྣང་བས་ཕྱོགས་ཀྱི་ཆ་འགེངས་མི་ཟད་རྒྱན་གྱི་འཁོར་ལོའི་དཔྱིད། །མཆོག་གསུམ་ངོ་བོ་དཀྱིལ་འཁོར་ཀུན་བདག་གཏེར་ཆེན་བླ་མ་སྤྱི་བོས་མཆོད། །རོ་གཅིག་དབྱིངས་སུ་བདེན་གཉིས་རྩལ་ལས་དཀྱིལ་འཁོར་རྣམ་གསུམ་རོལ་པ་ཅན། །སྐུ་བཞིའི་བདག་ཉིད་ཡེ་ཤེས་ལྔ་དངོས་ཀུན་འདུས་དྲུག་པ་འཁོར་ལོའི་མགོན། །ཡན་ལག་བདུན་ལྡན་དབང་ཕྱུག་བརྒྱད་དང་གར་དགུའི་ཉམས་འགྱུར་བྱེ་བས་འཁྱུད། །སྟོབས་བཅུའི་རྩལ་མངའ་ཧེ་རུ་ཀ་དཔལ་འཁོར་ལོར་བཅས་ལ་གུས་ཕྱག་འཚལ། འདུས་པ་མདོ་ཡི་དབང་དོན་ཉི་ཟླའི་འོད། །ལེགས་པར་འགྲེལ་བའི་སྣང་བ་མཚུངས་པ་མེད། །བསྙེངས་བྲལ་མཁའ་ལ་བརྩོན་པའི་ཤིང་རྟ་ཡིས། །འདྲེན་བཟོད་སློབ་དཔོན་ཆེན་པོ་བདེ་བ་གསལ། །གང་གི་བཀའ་སྲོལ་བདུད་རྩིས་ཆེར་མྱོས་པས། །ལེགས་བཤད་རྒྱང་གླུ་ལེན་མཁས་གནུབས་ཆེན་དང་། །ཟུར་ཆེན་མེས་དབོན་གླན་སོགས་གསང་བའི་བདག །མི་ཡི་ཟོལ་བཟུང་རྣམས་ལ་གུས་ཕྱག་འཚལ། །ཀུན་ཏུ་བཟང་མོའི་མཁའ་ལ་ཡེ་ཤེས་རྩལ། །རྣམ་རོལ་བདེ་བ་ཆེན་པོའི་ཁང་བཟང་དུ། །སྐལ་ལྡན་འཇུག་པའི་ཐབས་མཆོག་འདུས་པ་མདོའི། །དབང་ཆུ་རྡོ་རྗེའི་ཐེམ་སྐས་བླ་ན་མེད། །མཆོག་དང་ཐུན་མོང་དངོས་གྲུབ་ལས་བཞིར་བཅས། །རིམ་གཉིས་སྔོན་དུ་སོང་བའི་ལག་རྗེས་ཏེ། །དེ་ལའང་དབང་བསྐུར་སྔོན་དུ་འགྲོ་བའི་ཕྱིར། །རྡོ་རྗེ་ཐེག་པའི་ལམ་གྱི་རྩ་བར་གྲུབ། །འོན་ཏེ་རྒྱུད་དང་མན་ངག་སོ་སོའི་ལུགས། །མ་ཕྱེད་བཞིན་དུ་གྱ་ཚོམ་བཀྲལ་མཐོང་ནས། །འདུས་གསལ་རྫོགས་པའི་ངག་གིས་ཆུ་བོ་བཞིའི། །དབང་ཆོག་ཆོས་དོན་གཉེར་བའི་དཔལ་དུ་སྦྱིན། །དེ་ལ་འདིར་ལུས་ཅན་རྣམས་ཀྱི་སེམས་ཉིད་དཀྱིལ་འཁོར་རྣམ་གསུམ་མ་འདྲེས་ཡོངས་རྫོགས་སུ་གནས་པ་ནི་སྦྱང་གཞི་སྟེ། དེ་ཉིད་གདོད་མ་ནས་རང་བཞིན་གྱིས་རྣམ་པར་དག་པ་ཡིན་ཀྱང་། སྦྱང་བྱའི་དྲི་མ་གློ་བུར་བ་མ་རིག་པའི་རྐྱེན་ལས། མེད་སྣང་འཁོར་བའི་རྣམ་པར་ཤར་ནས། སྡུག་བསྔལ་བཟོད་པར་དཀའ་བས་ཁོར་མོར་མནར་བ་རྣམས་ལ་བརྩེ་བའི་གཞན་དབང་གིས། སྦྱང་འབྲས་རང་གནས་རང་བྱུང་གི་ཡེ་ཤེས་ཉིད་ཇི་ལྟ་བ་བཞིན་མངོན་དུ་གྱུར་པའི་གོ་འཕང་ལ་འགོད་པར་བྱ་བའི་ཕྱིར། སྦྱོང་བྱེད་རྣམ་པར་གྲོལ་བའི་ལམ་གསུངས་པ་ཐམས་ཅད་ཀྱི་ནང་ནས་མཆོག་གམ་རྩེ་མོ་ནི་རྡོ་རྗེའི་ཐེག་པ་སྟེ། དེ་ཉིད་ཀྱི་ལམ་གྱི་གཞི་དང་རྩ་བར་གྱུར་པ་འདུས་པ་ཆེན་པོ་མདོའི་དཀྱིལ་འཁོར་དུ་སྨིན་བྱེད་ཀྱི་དབང་བསྐུར་བའི་ཐབས་ཁྱད་པར་ཅན་ལ་འབད་པ་ཆེན་པོས་བསྒྲུབ་པར་བྱ་བ་ཡིན་ནོ། ༈ །དེའི་ཚུལ་ལ་གསུམ་སྟེ། སྔོན་འགྲོ་སྒོ་འབྱེད་ཀྱི་དབང་བསྐུར་བ། དངོས་གཞི་བསྙེན་སྒྲུབ་ཡན་ལག་བཞི་དང་འབྲེལ་བའམ། མ་འབྲེལ་ན་འང་རུང་སྟེ། །ཆུ་བོ་བཞིའི་དབང་བསྐུར་བ། །རྗེས་གཏད་རྒྱ་བྱ་ཞིང་མཐའ་བརྟེན་དུ་ཚེའི་དབང་བསྐུར་བའོ། །དེ་ལས་སྔོན་རྗེས་གཉིས་ལ་དབྱེ་བ་གཞན་མེད་ཅིང་། དངོས་གཞི་ལ་ལུགས་གཉིས་ཏེ། ཐུན་མོང་བའམ་ཐུན་མིན་གང་རུང་གི་རྩ་བའི་དཀྱིལ་འཁོར་དུ་རང་བཞིན་གྱིས་སྣོད་དུ་གྱུར་པའི་སྐལ་ལྡན་ཁྱད་པར་ཅན་ལ། ཆུ་བོ་བཞི་ཡོངས་སུ་རྫོགས་པའི་དབང་སུམ་ཅུ་རྩ་དྲུག་བསྐུར་བ་རྒྱུད་ཀྱི་ལུགས་དང་། ཡང་ཡོ་ག་མན་ཆད་ཡན་ལག་གི་དཀྱིལ་འཁོར་དྲུག་ཏུ་ཕྱི་དབང་རྒྱུད་ཀྱི་ཆུ་བོ། འདྲེན་པའི་ལས་བྱང་ཆེ་ལེར་བཤད་པའི་ཚོགས་ཆེན་འདུས་པ་རྩ་བའི་དཀྱིལ་འཁོར་ཐུན་མོང་པར་ནང་དབང་འབྱུང་བའི་ཆུ་བོ། རྩ་རྒྱུད་ཀྱི་ཚོགས་ཆེན་འདུས་པའི་སྒྲུབ་ལུགས་ལས་གསུངས་པ་དུར་ཁྲོད་གསང་བའི་དཀྱིལ་འཁོར་ཞེས་རྩ་བའི་དཀྱིལ་འཁོར་ཐུན་མོང་མ་ཡིན་པར་སྒྲུབ་དབང་གྲགས་པའི་ཆུ་བོ། བྱང་སེམས་རྣམ་པ་གཉིས་ཀྱི་དཀྱིལ་འཁོར་དུ་གསང་དབང་རྫོགས་པའི་ཆུ་བོ་རྣམས་སྦྱངས་པས་སྣོད་དུ་གྱུར་པའི་སློབ་མ་ལ་ཐེག་པ་ཐམས་ཅད་འདུས་པའི་མདོ་དབང་རྩ་བ་སོ་དྲུག་ལས་ཡན་ལག་རགས་པ་བརྒྱད་བརྒྱ་སོ་གཅིག་ཏུ་ཕྱེ་ནས་བསྐུར་བ། བདེ་བ་གསལ་མཛད་ཀྱི་ལས་ཐོའི་དགོངས་པ་ལྟར་མན་ངག་གི་ལུགས་ཏེ། དེ་ལྟར་རྒྱུད་དང་མན་ངག་གི་ལུགས་གཉིས་པོ་ད་ལྟའི་དུས་སུ་གཅིག་ཏུ་དྲིལ་ནས་བསྐུར་བ་བླ་མ་རྣམས་ཀྱི་ཕྱག་ལེན་དུ་སྣང་བས་འདིར་ཡང་དེ་བཞིན་དུ་འབྲི་བར་བྱའོ། ༈ །དེ་ལ་ཐོག་མར་གླེང་གཞི་དང་འབྲེལ་བའི་མཆོག་དབང་བཅུ་དྲུག་གིས་སྒོ་ཕྱེ་ལ། དེ་རྗེས་ལྷ་མི་ནས་ཡོ་གའི་བར་ཡན་ལག་གི་དཀྱིལ་འཁོར་དྲུག་ཏུ་མན་ངག་གི་ལུགས་ཀྱི་ཕྱི་དབང་། དེ་ནས་རྩ་བའི་དཀྱིལ་འཁོར་ཐུན་མོང་བ་ཚོགས་ཆེན་འདུས་པའི་དཀྱིལ་འཁོར་དུ་རྒྱུད་ལུགས་ཀྱི་ཆུ་བོ་བཞི་ཡོངས་སུ་རྫོགས་པ། དེ་རྗེས་ཡན་ལག་གི་དཀྱིལ་འཁོར་སོ་སོར་མན་ངག་གི་ལུགས་ཀྱི་གསང་དབང་རྫོགས་པའི་ཆུ་བོ་གཉིས་དང་། སྐབས་སུ་བབས་ན་གཏད་རྒྱ་བྱས་རྗེས། མཐའ་བརྟེན་དུ་ཚེ་དབང་དང་བཅས་པ་བསྐུར་བར་མཛད་དོ། །དེ་ལྟར་ན་ཕྱི་གསང་གི་དབང་གཉིས་ལུགས་གཉིས་ཀ་བསྐུར་བས་ཟློས་ཤིང་། ནང་སྒྲུབ་གཉིས་ཀྱི་དབང་རྒྱུད་ལུགས་ལས་མ་བྱུང་བས་ཆད་པར་མ་ཟད། སྒྲུབ་དབང་གང་དུ་བསྐུར་བའི་དཀྱིལ་འཁོར་ཀྱང་ཆད་པས། ཕྱག་ལེན་འདི་ལ་ཆད་པ་དང་ལྷག་པ་གཉིས་ཀའི་སྐྱོན་གནས་སོ་སྙམ་ན། དེའི་སྐྱོན་མེད་དེ། རྒྱུ་མཚན་ཕྱི་དབང་ལུགས་གཉིས་གྲངས་དང་བསྐུར་ཐབས་མི་འདྲ་བས་སོ་སོར་བསྐུར་དགོས་ཤིང་། ནང་དབང་ལ་ལུགས་གཉིས་ལྷ་དབང་གི་སྐབས་ཅུང་ཟད་ཙམ་ལས་གཞན་ཁྱད་པར་མེད་པས་གཅིག་གིས་གོ་ཆོད། ཚོགས་སྒྲུབ་དུས་དབང་གིས་མོས་སློབ་ཙམ་ལ་བརྟེན་པ་ཤས་ཆེ་བས་ཡན་ལག་གི་དཀྱིལ་འཁོར་དོར་ནས་རྒྱུད་ལུགས་ཉིད་གཙོ་བོར་སྟོན་ཅིང་། དེའང་རྩ་དཀྱིལ་ཐུན་མོང་བར་བསྐུར་བའི་ལུགས་མཛད། གསང་དབང་ནི་རྒྱུད་ལུགས་ལ་ཟབ་ཁྱད་མ་སྦྱར་བས་སློབ་མ་ཐུན་མོང་བ་རྣམས་རྗེས་སུ་འཛིན་པའི་ཕྱིར་མདོར་བསྡུས་པ་ཙམ་གྱིས་ས་ཁོངས་བཟུང་། དེ་རྗེས་རྫོགས་རིམ་དོན་དུ་གཉེར་བའི་སློབ་མ་ཁྱད་པར་ཅན་ཡང་སྲིད་པས་དེ་དག་རྗེས་སུ་འཛིན་པའི་ཕྱིར་མན་ངག་གི་ལུགས་དེ་ཉིད་ཟུར་དུ་ཕྱེ་ནས་བསྐུར་བའི་ཕྱག་ལེན་མཛད་ལ། རྒྱུ་མཚན་དེ་དག་གིས་ན། རྒྱུད་དང་མན་ངག་གི་ལུགས་གཉིས་འདོར་ལེན་གྱི་གནད་ཀྱིས་གཅིག་ཏུ་དྲིལ་ནས་བསྐུར་བས་གནས་སྐབས་སུ་བྱ་སླ་ཞིང་། བརྒྱུད་ནས་ལུགས་གཉིས་པོ་གཅིག་གིས་གཅིག་མི་ནུབ་པར་ཆབས་གཅིག་ཏུ་འཕེལ་བའི་དགོངས་པ་ཁྱད་པར་ཅན་མངའ་བ་ཡིན་ནོ། །དེ་ལྟར་ན་རྒྱུད་དང་མན་ངག་གིས་ལུགས་གཉིས་སོ་སོའི་ཁྱད་པར་དང་། དེ་གཉིས་གཅིག་ཏུ་དྲིལ་ནས་བསྐུར་བའི་གནད་འདི། ཁོ་བོའི་ཡོངས་འཛིན་བླ་མ་དམ་པ་སོགས་སྐྱེས་མཆོག་ཁྱད་པར་ཅན་འགའ་ཞིག་ལས། ཕྱི་རབས་ཀྱི་སྔགས་པ་ཕལ་གྱིས་རྟོགས་པར་མ་གྱུར་པ་ནི། ཐོབ་ཡིག་དང་ལས་ཐོ་ཟིན་བྱང་སོགས་སོ་སོའི་ལག་རྗེས་ཀྱིས་གསལ་པོར་བསྟན་པའི་ཕྱིར། །ད་ཕྱིན་ཆད་ཡི་གེ་འདིའི་མཐུ་ལས་ཀུན་གྱིས་རྟོགས་པར་གྱུར་ཅིག་ཅེས་སྨོན་པ་ཡིན་ནོ། ༈ །ཡང་ལུགས་གཉིས་གཅིག་ཏུ་དྲིལ་ནས་བསྐུར་བ་གཞིར་བཞག་ལའང་། ལག་ལེན་རྒྱས་བསྡུས་ཀྱི་སྒོ་ཟུར་ཙམ་ཞིག་བསྟན་ན། བསྙེན་སྒྲུབ་ཡན་ལག་བཞི་དང་མ་འབྲེལ་བའི་དབང་རྐྱང་ཙམ་གྱི་ལུགས་རབ་གནས་སྔོན་སོང་གི་རས་བྲིས་སྟེང་ནས་བསྐུར་བ་ལ། དབང་ཆོག་གི་རས་བྲིས་སྟེང་ནས་བསྐུར་བ་ལ། དབང་ཆོག་གི་ཡི་གེ་འདི་ཉིད་ཀྱི་སྟེང་དུ། ཡན་ལག་གི་དཀྱིལ་འཁོར་རྣམས་ཀྱི་སྒྲུབ་དཀྱིལ་དངོས་གྲུབ་འདོད་འཇོ། ཡན་ལག་ཅན་རྩ་བའི་དཀྱིལ་འཁོར་གྱི་སྒྲུབ་ཐབས་དངོས་གྲུབ་ཆར་འབེབས་དང་། དཀྱིལ་ཆོག །དྲི་མེད་འོད་ཕྲེང་སྟེ་ཡིག་སྣ་བཞི་པོ་འདིས་ཆོག་ཅིང་། རྒྱས་པ་བསྙེན་སྒྲུབ་ཡན་ལག་བཞི་དང་འབྲེལ་བའི་ལུགས་ལ། ཡིག་སྣ་བཞི་པོ་འདིའི་སྟེང་དུ་སྤྱིའི་ཁོག་དབུབ་སྒྲུབ་ཁོག་གི་ཆིངས་དང་། དེའང་རས་བྲིས་གསར་པའམ་རྡུལ་ཚོན་གྱི་ཕྱོགས་ལ་རབ་གནས་བསྣན་པ་ལ་སོགས་ཏེ། རབ་གནས་སྦྱིན་སྲེག་སོགས་འབྲི་འགྱུར་གྱི་ཟུར་འདེབས་གཞན་རྣམས་ཀྱང་ཚང་བར་དགོས་པ་ཡིན་ནོ། ༈ །ཡང་ཡིག་སྣ་བཞི་པོ་ལ་བརྟེན་པ་ཤིན་ཏུ་བསྡུས་པའི་ཕྱོགས་ལའང་། རྩ་བའི་དཀྱིལ་འཁོར་གྱི་བུམ་པ་དང་སློབ་མ་སྟ་གོན་ནི་ངེས་པར་བྱ་དགོས་ཤིང་། ལྷ་སྟ་གོན་ཡང་རྡུལ་ཚོན་གྱི་ཕྱོགས་ལ་ངེས་པར་མཛད་ཅིང་། རས་བྲིས་ལ་རྒྱ་གཞུང་རྣམས་སུ་བྱེད་དགོས་པའི་གསལ་ཁ་མ་བྱུང་བས། མ་འགྲུབ་ནའང་ཆད་པའི་སྐྱོན་མེད་མོད། འགྲུབ་ན་ཕུན་སུམ་ཚོགས་པའི་ཡན་ལག་ཡིན་པས་ཅི་འགྲུབ་བྱ་སྟེ། སྙན་གསན་དབབ་པ་ནི་དཀྱིལ་འཁོར་བྲི་བ་ཁོ་ནར་མ་ཟད། བསྒྲུབ་པའི་ཕྱིར་ཡང་ཡིན་པས་སོ། །དེ་ལྟར་ཡང་གང་གི་ཆེད་དུ་སྙན་གསན་འབེབས་པའི་སྦྱོར་བའི་ཚིག །ཁྱེད་རྣམས་མོས་ཤིང་མཆོད་པ་དང་། །ཞེས་སོགས་ཀྱིས་དཀྱིལ་འཁོར་གྱི་ལྷ་རྣམས་མཆོད་པ་ལ་སོགས་པའི་ཆེད་དུ་དཀྱིལ་འཁོར་གྱི་ལས་རྣམས་རྫོགས་པར་བྱ་བའི་ཞུ་བ་ཡིན་གྱི། བྲི་བ་ཁོ་ནའི་ཆེད་དུ་མ་ཡིན་པའི་ཕྱིར་དང་། བཀའ་དྲིན་རང་གི་ངོ་བོ་ཞུ་བའི་ཚིག །ཐུགས་རྗེས་ཉེ་བར་དགོངས་མཛད་དེ། །ཞེས་སོགས་ཀྱིས་ཀྱང་དཀྱིལ་འཁོར་བྱིན་གྱིས་བརླབ་པའི་སྒོ་ནས་ས་གཞི་བཟུང་བར་མཛོད་ཅེས་གསོལ་བ་འདེབས་པ་ཡིན་པའི་ཕྱིར་རོ། །ཡང་ཁོ་བོས་དངོས་གྲུབ་འདོད་འཇོར་གླན་ཆེན་པོ་རྡོ་རྗེ་འོད་དང་འགོས་ཀྱི་ཕྱག་བཞེས་ལྟར་ཡན་ལག་གི་དཀྱིལ་འཁོར་ཀྲི་ཡོག་གཉིས་ལའང་སློབ་མ་སྟ་གོན་བྲིས་པ་ཡིན་ལ། དེ་ལྟ་ནའང་ཟུར་ཧམ་གྱི་ཕྱག་སྲོལ་ལྟར་དིང་སང་རྡུལ་ཚོན་དང་རས་བྲིས་གང་ལའང་མི་མཛད་པ་ཤས་ཆེ་བས། ལག་ལེན་བསྡུས་པའི་ཚེ་མ་འགྲུབ་ཀྱང་སྐྱོན་མེད་དམ་སྙམ་ཞིང་། ས་ཆོག་ནི་དཀྱིལ་འཁོར་ཁང་པ་རྙིང་པར་རྡུལ་ཚོན་ལ་བརྟེན་པའི་ཕྱོགས་ལའང་མ་བྱས་པས་ཆོག །གནས་ཁང་གསར་པ་ཡིན་ན་རས་བྲིས་ལའང་བྱས་ན་ལེགས་ཏེ། ས་ཆོག་ནི་ས་གཞི་ལ་དཀྱིལ་འཁོར་བྲི་བ་ཁོ་ནའི་ཆེད་མ་ཡིན་གྱི། ཕྱི་ནང་གི་བདུད་དང་བར་ཆད་གཞོམ་པའི་ཆེད་ཡིན་པའི་ཕྱིར། དེས་ན་ཕྱིས་ཀྱི་སྔགས་པ་ཕལ་ཆེར། རས་བྲིས་ཀྱི་ཕྱོགས་ལ་ས་ཆོག་མཐའ་གཅིག་ཏུ་མི་དགོས་པར་འདོད་པ་ལ་སྙིང་པོ་མེད་ཅིང་། ཡང་རས་བྲིས་ཀྱི་ཚེ་ལྷ་སྟ་གོན་ལ། ཕྱག་བཞེས་ལ་ལར། རིན་པོ་ཆེའི་མཎྜལ་ལྟ་བུར་ལྷ་གྲངས་ཀྱི་ཚོམ་བུ་བཀོད་པ་དཀྱིལ་འཁོར་གང་དུ་དགྲམ་པའི་གཞིར་འགོད་པར་མཛད་པ་ལ། ཁ་ཅིག་དེ་མི་རིགས་ཞེས་ནན་གྱིས་དགག་པའང་། གཞི་དེ་ཉིད་ལ་བྲི་བའི་ཆེད་ཁོ་ནར་སྟ་གོན་བྱས་པར་བསམ་པ་ལས། དོན་གྱི་གནད་འདི་མ་རྟོགས་པས་ནོངས་པ་སྟེ། དཀྱིལ་ཆོག་ཁུངས་མ་འགའ་ཞིག་ཏུ་གཞིའི་སྟེང་གི་ནམ་མཁར་ལྷ་སྤྱན་དྲངས་པ་ལ་མཆོད་བསྟོད་དང་སྙན་གསན་འབེབས་པར་བཤད་པའང་ཡོད་པའི་ཕྱིར་ན་དགྲམ་པའི་གཞིའི་སྟེང་དུ་མཎྜལ་ལ་ཚོམ་བུ་བྱས་པར་ཅི་ཞིག་སྐྱོན་ཏེ། ཅི་ཡང་མེད་དོ། །རྒྱུད་དང་མན་ངག་གཅིག་དྲིལ་གྱི། །དབང་ཆོག་གོ་དོན་རྒྱས་བསྡུས་གནས། བདེ་བླག་རྟོགས་བྱེད་ཆོས་ཀྱི་ཆིངས། །ཐོས་ཆུང་གསར་བུའི་དཔལ་དུ་སྦྱིན། །འདུས་པ་མདོའི་དབང་ཆོག་རྡོ་རྗེ་ཐེམ་སྐས་ལས། རྒྱུད་དང་མན་ངག་གི་ལུགས་གཅིག་ཏུ་དྲིལ་བའི་གོ་དོན་དང་ལག་ལེན་གྱི་གནད་བཤད་པའི་སྐབས་ཏེ་དང་པོའོ།། །།