ཡན་ལག་གི་དཀྱིལ་འཁོར་དྲུག་ཏུ་མན་ངག་གི་ལུགས་ཀྱི་ཕྱི་དབང་རྒྱུད་ཀྱི་ཆུ་བོ་བསྐུར་བའི་དབང་ཆོག་བཤད་པའི་སྐབས།

༈ ༀ་སྭ་སྟི། སྲིད་པའི་འགྱུར་བ་སྒྲིབ་མེད་དུ། །གཟིགས་ནས་མངོན་མཐོའི་ལམ་སྟེགས་ལས། །བདེ་ཆེན་རྡོ་རྗེར་འདྲེན་མཛད་དེར། །བཏུད་ནས་ལྷ་མིའི་དབང་ཆོག་བཤད། །ད་ནི་དངོས་གཞི་ཆུ་བོ་བཞིའི་དབང་བསྐུར་བ་ལས། ཐོག་མར་མདོ་ཡོངས་རྫོགས་ཀྱི་དབང་དུ་བྱས་པ་ཡན་ལག་གི་དཀྱིལ་འཁོར་དུ་ཕྱི་དབང་བསྐུར་བ་ལ་དྲུག་གི། དང་པོ་ལྷ་མིའི་ཐེག་པའི་དབང་ནི། དཀྱིལ་འཁོར་བཤམ་སྒྲུབ་གཏོར་ཆོག་དང་བཅས་པ་སྒྲུབ་ཐབས་ལྟར་གྲུབ་རྗེས། བདག་འཇུག་གི་དོད་ནི། སློབ་དཔོན་བདག་ཉིད་ཤཱཀྱ་ཐུབ་པར་གསལ་བ་ལ། སྣང་རིག་གི་བཅུད་ཐམས་ཅད་འོད་ཟེར་གྱི་རྣམ་པར་བསྡུས་པ་སྤྱི་བོ་ནས་ཐིམ་པས། སྤྱི་བོར་རིན་པོ་ཆེ་འབར་བས་མཚན་པར་གྱུར། དེ་ལས་འོད་ཟེར་སྣ་ཚོགས་འཕྲོས། །དཀྱིལ་འཁོར་གྱི་ལྷ་དང་ཕྱོགས་བཅུའི་རྒྱལ་བ་སྲས་བཅས་མཆོད། དེ་དག་གི་བྱིན་རླབས་འོད་ཟེར་གྱི་རྣམ་པར་རང་ལ་ཐིམ་པས་རྗེས་སུ་གནང་བ་ཐོབ། ཡང་སྤྱི་བོའི་རིན་པོ་ཆེ་ལས་འཕྲོོས་པའི་འོད་ཀྱིས་སེམས་ཅན་ཐམས་ཅད་ཀྱི་དགོས་འདོད་རེ་བ་ཡིད་བཞིན་དུ་སྐོང་བའི་ཡི་གེ་དབྱངས་གསལ་གྱི་རྣམ་པར་བསྡུས་ནས་རང་ལ་ཐིམ་པས། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པར་བསམ་མོ། །དེ་ནས་སློབ་མ་གཞུག་པ་ནི། དྲིའི་ཆུས་ཁྲུས་བྱ། བགེགས་གཏོར་བཏང་ལ་མཚམས་བཅད། སེམས་བསྐྱེད་དང་ཆོས་ཉན་པའི་ཀུན་སྤྱོད་སྔར་ལྟར་གསལ་བཏབ་ཅིང་ཉན་པར་བསྐུལ་ནས། འདིར་གང་གསན་པར་བྱ་བའི་ཆོས་ནི་རྒྱལ་བ་ཡང་དག་པར་རྫོགས་པའི་སངས་རྒྱས་ཐབས་མཁས་ལ་ཐུགས་རྗེ་ཆེན་པོ་མངའ་བ་དེ་ཉིད་ཀྱིས་སེམས་ཅན་རྣམས་ཀྱི་བསམ་པ་དང་། དབང་པོ་དང་། སྐལ་པའི་ཁྱད་པར་དང་རྗེས་སུ་མཐུན་པའི་ཆོས་ཀྱི་ཕུང་པོ་བསམ་གྱིས་མི་ཁྱབ་པ་ཞིག་གསུངས་པ་ཐམས་ཅད་ཀྱང་བསྡུ་ན་གཉིས་སུ་འདུ་སྟེ། རིག་པ་རང་ཤར་ལས། ཀྱེ་ཧོ་གསང་བའི་རྡོ་རྗེ་འཛིན། །ང་ཡི་ཐེག་པ་བསམ་ཡས་ཀྱང་། །བཤད་ལུགས་རྣམ་པ་གཉིས་སུ་འདུས། །འཁོར་བ་དང་ནི་མྱ་ངན་འདས ། །ཞེས་པས་འཇིག་རྟེན་པ་དང་འཇིག་རྟེན་ལས་འདས་པའི་ཐེག་པ་གཉིས། དེ་གཉིས་ཀྱི་ཁྱད་པར་ནི། ཐབས་གང་གིས་མཐར་ཕྱིན་པར་བསྒྲུབས་པས་འབྲས་བུ་འཇིག་རྟེན་ལས་འཕགས་ནུས་མི་ནུས་ཀྱིས་ཕྱེ་བའོ། །དེ་ལ་ཐོག་མར་འཇིག་རྟེན་ལྷ་མིའི་ཐེག་པ་ནི། ངན་སོང་ལ་འཇིགས་ནས་མཐོ་རིས་ཀྱི་བདེ་འབྲས་དོན་དུ་གཉེར་བས་མངོན་མཐོའི་རྟེན་སྒྲུབ་བྱེད་དེ། ཕ་རོལ་ཏུ་ཕྱིན་པའི་མན་ངག་སྐྱེས་བུ་གསུམ་གྱི་ལམ་རིམ་དང་སྦྱར་ན། འཇིགས་སྐྱོབ་དང་ལེགས་སྨོན་ཙམ་ལ་བསྟེན་པ་སྐྱེས་བུ་ཆུང་དུའི་ལམ་སྟེ། འདིའི་ཐེག་པ་ནི། འཇིག་རྟེན་པའི་ཡང་དག་པའི་ལྟ་བ་དང་ལྡན་པས་དགེ་བཅུའི་ལས་ལམ་ལ་སྤྱད་པའི་འབྲས་བུ་མི་དང་འདོད་ལྷ། དེའི་སྟེང་དུ་བསམ་གཏན་བཞི་དང་གཟུགས་མེད་པའི་སྙོམས་འཇུག་སོགས་ལ་བརྟེན་ནས་ཁམས་གོང་མའི་ལྷའི་གོ་འཕང་བགྲོད་པ་ཡིན་པས། ལང་གཤེགས་སུ་སྔ་མ་ལྷའི་ཐེག་པ་ཞེས་གཙོ་བོའི་སྒྲས་སྨོས་པ་དང་། ཕྱི་མ་ལ་འདོད་ཉོན་གྱིས་གཙང་བས་ཚངས་པའི་ཐེག་པ་ཞེས་གསུངས་ཤིང་། དེའང་རིན་ཆེན་ཕྲེང་བ་ལས། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང་། །ལྷ་དང་མི་ཡི་ཐེམ་སྐས་ལ། །འཛེགས་ན་ཐར་པ་གམ་ན་འདུག །ཅེས་པས་འདི་ནི་ཐེག་པ་ཐམས་ཅད་ཀྱི་གཞིའམ་ལམ་སྟེགས་སུ་གྱུར་པ་ཡིན་ནོ། །གཉིས་པ་འཇིག་རྟེན་ལས་འདས་པའི་ཐེག་པ་ལ། སྤྱི་མདོ་ལས། ལངྐའི་བདག་པོ་གཞན་ཡང་གང་། །དོན་དམ་ངེས་པའི་ཐེག་པ་ནི། །གསུམ་དུ་ངེས་པར་བསྟན་པ་སྟེ། །ཀུན་འབྱུང་འདྲེན་དང་དཀའ་ཐུབ་རིག །དབང་བསྒྱུར་ཐབས་ཀྱི་ཐེག་པའོ། །ཞེས་གསུམ་དུ་སྣང་བ་ལ། དང་པོ་ཀུན་འབྱུང་འདྲེན་པའི་ཐེག་པ་ལའང་གསུམ་སྟེ། འཁོར་བ་ལས་རང་གཅིག་པུ་ཐར་འདོད་ཀྱི་བློས་གང་ཟག་གི་བདག་མེད་རྟོགས་པའི་ཐབས་སུ་གྱུར་པ་ཉན་ཐོས་ཀྱི་ཐེག་པ་དང་། དེའི་སྟེང་དུ་རྟེན་འབྲེལ་གྱི་ལམ་ཟབ་མོ་བསྒོམ་པས་བདག་མེད་ཕྱེད་དང་གཉིས་རྟོགས་ཀྱི་ཐབས་སུ་གྱུར་པ་རང་རྒྱལ་གྱི་ཐེག་པ་དང་། ཆོས་ཐམས་ཅད་བདག་མེད་པར་རྟོགས་ཤིང་སྙིང་རྗེ་ཆེན་པོས་གཞན་དོན་རླབས་པོ་ཆེ་ལ་སྤྱོད་པའི་ཐབས་སུ་གྱུར་པ་བྱང་ཆུབ་སེམས་དཔའི་ཐེག་པ་སྟེ། དང་པོ་གཉིས་སྐྱེས་བུ་འབྲིང་པོ་དང་། ཐ་མ་སྐྱེས་བུ་ཆེན་པོའི་ལམ་སྟེགས་མཚན་ཉིད་སྡེ་གསུམ་མོ། །གཉིས་པ་དཀའ་ཐུབ་རིག་བྱེད་ཀྱི་ཐེག་པ་ལའང་གསུམ་སྟེ། དོན་དམ་པར་མཐའ་བཞི་དང་བྲལ་བའི་དག་པར་རྟོགས་པས་ཀུན་རྫོབ་ཏུ་དངོས་གྲུབ་གཞན་ལ་རེ་ཞིང་རྩོལ་བའི་ཐབས་སུ་གྱུར་པ་ཀྲི་ཡའི་ཐེག་པ་དང་། ལྟ་སྒོམ་ཡོ་ག་དང་སྤྱོད་པ་བྱ་བ་དང་ཆ་འདྲ་བར་སྤྱོད་པས་དངོས་གྲུབ་པའི་ཐབས་སུ་གྱུར་པ་ཨུ་པ་ཡའི་ཐེག་པ་དང་། དོན་དམ་མཚན་མ་མེད་པའི་ཆོས་ཉིད་ཀྱི་བྱིན་རླབས་ཀུན་རྫོབ་རྡོ་རྗེ་དབྱིངས་ཀྱི་ལྷར་བརྟགས་ཏེ་རྟོག་པ་བཟང་ངན་བླང་དོར་གྱི་རྩོལ་བས་འབྲས་བུ་སྒྲུབ་པའི་ཐབས་སུ་གྱུར་པ་ཡོ་གའི་ཐེག་པ་སྟེ་ཕྱི་རྒྱུད་སྡེ་གསུམ་མོ། །གསུམ་པ་དབང་བསྒྱུར་ཐབས་ཀྱི་ཐེག་པ་ལའང་གསུམ་སྟེ། ཐབས་བསྐྱེད་པའི་རིམ་པ་ལ་གཙོ་བོར་བརྟེན་པའི་སྒོ་ནས་ལྷག་པ་བདེན་པ་དབྱེར་མེད་ཀྱི་དོན་ལ་རྟོགས་གོམས་ཀྱི་སྦྱོར་བས་གྲོལ་བ་སྟེར་བའི་ཐབས་སུ་གྱུར་པ་བསྐྱེད་པ་མ་ཧཱ་ཡོ་གའི་ཐེག་པ་དང་། ཤེས་རབ་རྫོགས་པའི་རིམ་པ་ལ་གཙོ་བོར་བརྟེན་པའི་སྒོ་ནས་དབྱིངས་དང་ཡེ་ཤེས་གཉིས་སུ་མེད་པའི་དོན་ལ་རྟོགས་གོམས་ཀྱི་སྦྱོར་བས་གྲོལ་བ་ཐོབ་པའི་ཐབས་སུ་གྱུར་པ་རྫོགས་པ་ཨ་ནུ་ཡོ་གའི་ཐེག་པ་དང་། ཡེ་ནས་སངས་རྒྱས་པའི་དོན་རང་ཐོག་ཏུ་གྲོལ་བར་བྱེད་པའི་ཐབས་མཆོག་སྤང་བླང་རེ་དོགས་དང་བྲལ་བའི་རང་བཞིན་ཅན་རྫོགས་པ་ཆེན་པོ་ཨ་ཏི་ཡོ་ག་སྟེ་ནང་རྒྱུད་སྡེ་གསུམ་མོ། །དེ་ལྟར་ངེས་ལེགས་སམ་རྣམ་པར་གྲོལ་བའི་ལམ་ལ་ཐེག་པ་དགུར་ཕྱེ་བ་ལས། འདིར་ཐེག་པ་བརྒྱད་པ་སྟེ། ལུང་ཨ་ནུ་ཡོ་ག་འདུས་པ་ཆེན་པོ་མདོའི་དཀྱིལ་འཁོར་དུ་དབང་བསྐུར་བར་བྱེད་པ་ཡིན་ལ། དེ་ལའང་འགྲེལ་པ་ལུང་བསྟན་མ་ལས། ཇི་ལྟར་རྒྱལ་སྲས་བཅས་པ་ལ། །མཛེས་པའི་ཡོན་ཏན་རྫོགས་པ་ཡིས། །དབང་བསྐུར་ཁུངས་སུ་ཡིད་ཆེས་ནས། །དམ་པ་བརྒྱུད་པའི་མན་ངག་གིས། །རྗེས་འཇུག་ཏུ་ཡང་ཤེས་པར་བྱ། །ཞེས་དང་། དབང་དོན་བསྡུས་པ་ལས་ཀྱང་། །སེམས་ཅན་རྣམས་ཀྱི་དོན་ཆེད་དུ། །དབང་གི་དོན་རྣམས་བསྡུ་བར་བྱ། །ཆུ་བོ་ཆེན་པོ་བཞི་རྣམས་ལ། །སྔོན་བྱུང་དང་ནི་རྗེས་སུ་འཇུག །ཅེས་པས་སྔོན་བྱུང་རྒྱལ་བའི་མཛད་སྤྱོད་ཀྱི་སྒོ་ནས་གདུལ་བྱ་སྤྲོ་བ་བསྐྱེད་པའི་དབང་དང་། རྗེས་འཇུག་གང་ཟག་ཉམས་ལེན་གྱི་སྒོ་ནས་གདུལ་བྱ་ཆུད་མི་ཟ་བར་བྱེད་པའི་དབང་གཉིས་ལས། དང་པོ་སྔོན་བྱུང་གི་དབང་ནི། དེ་ཉིད་ལས། སྔོན་བྱུང་ཆུ་བོ་རྣམ་བཞི་ལ། །ཡུལ་དང་དབང་པོ་དགོས་ཆེད་དང་། །ཐབས་དང་རྟགས་དང་གནས་དང་དྲུག །ཅེས་དོན་དྲུག་ཏུ་བསྡུ་བར་མཛད་པའི་སྔོན་བྱུང་གི་དབང་གི་གོ་དོན་ནི། སྤྱིར་སློབ་དཔོན་རྫོགས་པའི་སངས་རྒྱས་ཀྱིས། སློབ་བུ་རྒྱུའི་ཐེག་པའི་མི་སློབ་ལམ་བརྙེས་པའི་རྒྱལ་བ་དང་། སྔགས་རང་ལུགས་ཀྱི་མཐར་ལམ་རྒྱུན་ཐ་ལ་བཞུགས་པའི་རྒྱལ་ཚབ་སྐྱེས་བུ་དམ་པ་རྣམས་ལ། རང་བཞིན་ཡེ་ཤེས་ཀྱི་དཀྱིལ་འཁོར་དུ་འབྲས་དུས་ཀྱི་དབང་བསྐུར་བས། མཐར་ཐུག་གི་འབྲས་བུའི་གོ་འཕང་ལ་སྦྱོར་བར་བྱེད་པ་སྟེ། དབང་ཆོག་ལས། སངས་རྒྱས་རྡོ་རྗེ་འཛིན་པ་ལ། །ས་མཐའི་སེམས་དཔའ་ཆེན་པོ་ཡིས། །ཇི་ལྟར་མཆོད་ཅིང་ཞུས་པ་ལྟར། །ཞེས་པ་དང་། གཞན་ལས་ཀྱང་། རྡོ་རྗེ་ཅན་གྱིས་སངས་རྒྱས་ལ། །འགྲོ་བ་སྐྱོབ་པའི་ཆེད་དུ་དབང་། །ཡོན་ཏན་འབྱུང་གནས་ཇི་ལྟར་སྩལ། །ཞེས་གསུངས་པ་བཞིན་ནོ། །ཁྱད་པར་སྤྱི་མདོའི་སྐྱེས་བུ་དམ་པ་དང་དབང་ཐོབ་པའི་ལེའུར། ལ་ལས་ནི་རྒྱུད་ཀྱི་ཆུ་བོའི་དབང་གིས་དབང་བྱིན་ནོ། །ལ་ལས་ནི་འབྱུང་བའི་ཆུ་བོའི་དབང་གིས་དབང་བྱིན་ནོ། །ལ་ལས་ནི་གྲགས་པའི་ཆུ་བོའི་དབང་གིས་དབང་བྱིན་ནོ། །ལ་ལས་ནི་རྫོགས་པའི་ཆུ་བོའི་དབང་གིས་དབང་བྱིན་ནོ། །ཞེས་སྔོན་བྱུང་གི་ཆུ་བོ་བཞི་རྒྱལ་ཚབ་སྐྱེས་བུ་ལྔ་ལ་ཐུན་མོང་དུ་བསྐུར་བའང་མི་འགལ་ཞིང་། བྱེ་བྲག་ཚུལ་བསྟན་གྱི་དབང་དུ་བྱས་ན་དམ་པ་ཏོག་དཀར་པོ་སོགས་བཞི་ལ་སྐལ་པ་ཆེ་ཆུང་གིས་ཐུན་མིན་དུ་སོ་སོར་བསྐུར་བའང་བཤད་དོ། །གཉིས་པ་རྗེས་འཇུག་གི་དབང་ལའང་། རྗེས་འཇུག་ལམ་པའི་དབང་དང་། ལས་དང་པོ་པའི་དབང་གཉིས་ལས། དང་པོ་ལམ་པའི་དབང་ནི། དབང་དོན་རྣམ་པར་འབྱེད་པ་ལས། རྗེས་འཇུག་ལམ་པའི་གནས་སྐབས་ན། །རྒྱུན་ནི་རྣལ་འབྱོར་རྣམ་པ་ལྔ། །ཞེས་གསུངས་པ་ལྟར་མོས་སྤྱོད་ཀྱི་ལམ་དང་། མཐོང་སྒོམ་མཐར་གསུམ་སྟེ། སློབ་པའི་ལམ་བཞིར་གནས་པའི་སློབ་མ་ལ། རིམ་པར་ཆུ་བོ་བཞིའི་དབང་བསྐུར་བས། ལམ་གོང་མ་གོང་མ་ལ་སྦྱོར་བར་གསུངས་པའི་ཕྱིར། སློབ་དཔོན་གྱིས་རྗེས་འཇུག་ལམ་པའི་དབང་ཞེས་གསུངས་ཏེ། དོན་ལ་སྔ་མ་གསུམ་ལམ་དུས་ཀྱི་དབང་དངོས་དང་། ཕྱི་མ་གཅིག་པོ་འབྲས་དུས་ཀྱི་དབང་དུ་འདུ་བ་ཡིན་ནོ། །འདིར་ནི་དེ་དག་ལས་གཞན་དུ་གྱུར་པ། གཙོ་བོར་སྨིན་བྱེད་རྒྱུ་དུས་ཀྱི་དབང་སྟེ། རྗེས་འཇུག་ལས་དང་པོ་པའི་དབང་ཞེས་གྲགས་པ་གང་ཡིན་པའོ། །དེ་ཡང་དབང་དོན་བསྡུས་པ་ལས། རྗེས་འཇུག་ལས་ཀྱི་དང་པོ་ལ། །ཆུ་བོ་བཞི་ཡི་དབང་བསྐུར་བ། །ཡོ་ག་ལ་སོགས་ཐེག་དྲུག་ལ། །ཕྱི་དབང་རྒྱུད་ཀྱི་ཆུ་བོར་བྱ། །བསྐྱེད་པ་མ་ཧཱ་ཡོ་ག་ལ། །ནང་དབང་འབྱུང་བའི་ཆུ་བོས་བྱ། །རྫོགས་པ་ཨ་ནུ་ཡོ་ག་ལ། །སྒྲུབ་དབང་གྲགས་པའི་ཆུ་བོས་བྱ། །རྫོགས་ཆེན་ཨ་ཏི་ཡོ་ག་ལ། །གསང་དབང་རྫོགས་པའི་ཆུ་བོས་བྱ། །ཞེས་གསུངས་ཤིང་། དེ་ལའང་རྒྱུད་དང་མན་ངག་གི་ལུགས་ཀྱིས་བསྐུར་ཚུལ་གཉིས་ཏེ། །རང་བཞིན་གྱིས་སྣོད་དུ་གྱུར་པས་ཟབ་མོའི་དོན་ལ་མོས་པའི་སྐལ་ལྡན་ཁྱད་པར་ཅན་ལ་མདོ་རྩ་བའི་དཀྱིལ་འཁོར་དུ་ཆུ་བོ་བཞི་རྫོགས་ཀྱི་དབང་སུམ་ཅུ་རྩ་དྲུག་བསྐུར་བ་དང་། སྦྱངས་པས་སྣོད་དུ་གྱུར་པ་རྒྱ་ཆེ་བ་ལ་མོས་པའི་སྐལ་ལྡན་ལ་མདོ་ཡོངས་རྫོགས་ཀྱི་ལུགས་ཡན་ལག་གི་དཀྱིལ་འཁོར་སོ་སོར་ཕྱེ་བར་ཐེག་པ་ཐམས་ཅད་འདུས་པའི་མདོ་དབང་རྩ་བ་སོ་དྲུག་ལས་ཡན་ལག་རགས་པ་བརྒྱད་བརྒྱ་སོ་གཅིག་ཏུ་ཕྱེ་ནས་བསྐུར་བར་གསུངས་ཤིང་ལུགས་དེ་གཉིས་ཀ ས་ཡོ་ག་བཞི་རྫོགས་དང་། ཐེག་དགུའི་དབང་རྫོགས་པ་ལ་འདྲ་བ་ཡིན་ཏེ། རྩ་བ་སོ་དྲུག་གི་དབང་དུ་མཛད་ནས་དབང་དོན་རྣམ་པར་འབྱེད་པ་ལས། བཅུ་ཡིས་བྱང་ཆུབ་རིགས་ཅན་འགྱུར། །བཅུ་གཅིག་གསང་བ་ནང་པར་འགྱུར། །བཅུ་གསུམ་བླ་མ་ཆེན་པོར་གྲགས། །གཉིས་ཀྱིས་ཐེག་དགུའི་དབང་རྫོགས་པའོ། །ཞེས་འབྱུང་བ་ཡིན་ལ། དེས་ན་ཡན་ལག་གི་དཀྱིལ་འཁོར་སོ་སོར་ཕྱེ་བ་མདོ་ཡོངས་རྫོགས་ཀྱི་ལུགས་དེ་ཡང་། ཐེག་བརྒྱད་སྒོས་ཀྱི་ཆོ་ག་དེ་དང་དེ་སྟོན་པའི་མདོ་རྒྱུད་སོ་སོ་ནས་བསྡུས་ཏེ་སྤྱིའི་ཆོ་གར་བྱས་པ་ལྟ་བུ་ནི་མ་ཡིན་གྱི། ས་དང་པོ་འགྱུར་བ་མ་ངེས་པ་ནས། ས་བཅུ་པ་རྫོགས་པ་ཅིར་ཆིབ་ཀྱི་བར་ནོན་པར་བྱ་བའི་དོན་དུ། ལྷ་མིའི་དབང་ནས་བརྩམས་ཏེ། ཨ་ནུ་རང་ལུགས་ཀྱི་རྫོགས་རིམ་མཐར་ཐུག་པ་ཨ་ཏིའི་བར་ལ། བྱ་སྤྱོད་སོ་སོར་བགྲངས་པས་དབང་གི་རིམ་པ་བཅུ་བྱུང་བ་སྟེ། བྱ་སྤྱོད་གཅིག་ཏུ་བྱས་པའི་ཐེག་པ་དགུ་དང་ཚུལ་འདྲ་བས་ཐེག་དགུའི་དབང་ཞེས་གྲགས་ཤིང་། དེ་ཡང་ཆུ་བོ་བཞིས་ས་བཅུ་དང་རྣལ་འབྱོར་བཞི་རྫོགས་ཚུལ་གྱིས་མཚམས་ནི། ཕྱི་དབང་རྒྱུད་ཀྱི་ཆུ་བོ་རྫོགས་པས། ས་དང་པོ་འགྱུར་བ་མ་ངེས་པ་དང་། བདུན་པ་དམིགས་པ་འབྲས་བུ་སྐྱེ་བས་བར་གྱི་ས་བདུན་ནོན་ནས་ཡོ་ག་སྟེ་རྣལ་འབྱོར་དུ་འགྱུར། ནང་དབང་འབྱུང་བའི་ཆུ་བོ་ནོད་པས་ས་བརྒྱད་པ་གནས་པ་མི་གཡོ་བའི་ས་ནོན་ནས་རྣལ་འབྱོར་ཆེན་པོར་འགྱུར། སྒྲུབ་དབང་གྲགས་པའི་ཆུ་བོ་ནོད་པས་ས་དགུ་པ་བརྡལ་བ་ཆོས་ཉིད་ཀྱི་ས་ནོན་ནས་རྗེས་སུ་རྣལ་འབྱོར་དུ་འགྱུར། གསང་དབང་རྫོགས་པའི་ཆུ་བོ་ནོད་པས་ས་བཅུ་པ་རྫོགས་པ་ཅིར་ཆིབ་ཀྱི་ས་ནོན་ནས་ཤིན་ཏུ་རྣལ་འབྱོར་དུ་འགྱུར་པ་ཡིན་ཞིང་། དེ་ལྟ་བུའི་ལམ་སྟེགས་ཀྱི་ཐེག་པ་རྣམས་སོ་སོའི་ལམ་དང་ཚུལ་འདྲ་རུང་དུ་བྱུང་ཡང་། དོན་ལ་འབྲས་བུའི་ཐེག་པའི་ཐབས་མཁས་ཀྱིས་ཟིན་པས། ཐེག་པ་རང་རང་གི་སྤངས་ཐོབ་དང་རིགས་འདྲའི་ཡོན་ཏན་དེ་དང་དེ་སྐྱེ་བའི་མྱུར་ལམ་དུ་འགྱུར་པ་ཡིན་ནོ། །དེས་ན་འདིར་རྒྱུད་དང་མན་ངག་གི་ལུགས་ཀྱི་དབང་མདོ་ཁྱད་པར་བ་དང་། མདོ་ཡོངས་རྫོགས་ཀྱི་ལུགས་གཉིས་གཅིག་ཏུ་དྲིལ་ནས་བསྐུར་བ་ལས། ཐོག་མར་མདོ་ཡོངས་རྫོགས་ཀྱི་དབང་དུ་བྱས་པའི་ཕྱི་དབང་རྒྱུད་ཀྱི་ཆུ་བོའི་ཡན་ལག་གི་དཀྱིལ་འཁོར་དང་པོ་ལྷ་མིའི་ཐེག་པའི་དཀྱིལ་འཁོར་དུ་དབང་བསྐུར་བ་སྐབས་སུ་བབས་པ་ཡིན། དེ་ལའང་གཉིས་ལས། སློབ་དཔོན་གྱི་བྱ་བ་རྣམས་སྔོན་དུ་སོང་ནས། གཉིས་པ་ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ་དབང་ཞུ་བའི་ཡོན་དུ་མཎྜལ་ཕུལ་མཛོད། ཅེས་བརྗོད། དེ་ལྟར་མཎྜལ་ཕུལ་ནས་སྙིམ་པ་མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་གདབ་པ་འདིའི་རྗེས་ཟློས་མཛོད། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམས་སྦྱོང་བ། །དེ་རིང་བཤད་པའི་རིན་ཆེན་མཆོག །གཙོ་བོས་བདག་ལ་བཀའ་དྲིན་གསོལ། །ཞེས་ལན་གསུམ། དེ་ནས་གཏན་ཁྲིམས་འབོགས་པ་ནི། ཕྱག་བཙལ་ནས་པུས་གཙུགས་ཐལ་སྦྱར་གྱིས་འདུག་ཏུ་བཅུག་ལ། ཁྱེད་ཅག་མངོན་མཐོའི་ཐེག་པ་ལ་བསླབ་པ་དེ་ལའང་། ལངྐར་གཤེགས་པ་ལས། ལྷ་ཡི་ཐེག་དང་ཚངས་པའི་ཐེག །ཅེས་གསུངས་པའི་ལྷའི་ཐེག་པ་ནི་བསམ་གཏན་གྱིས་ཡོངས་སུ་མ་བཟུང་བའི་དགེ་བཅུའི་ལས་ལམ་སྟེ། རྒྱས་པ་ལས། དགེ་བཅུ་སྤྱོད་ཅིང་མི་དགེ་སྤོང་བྱེད་པ། །འདོད་ཁམས་ལྷ་དང་མི་རུ་སྐྱེ་བའི་རྒྱུ། །ཞེས་གསུངས། དེའང་ལྷ་དང་ཚངས་པའི་ཐེག་པ་གཉིས་ཀྱིས་བགྲོད་པར་བྱ་བའི་རྟེན་གྱི་གང་ཟག་ལ་ནི། ཕྱི་རོལ་པ་དང་ནང་པ་གཉིས་ག་ཡོད་ནའང་། འདིར་ནི་རྣམ་གྲོལ་གྱི་ཐེག་པའི་ལམ་སྟེགས་ཡིན་པས་ནང་པའི་དབང་དུ་བྱས་ཏེ། རྒྱུད་བླར། བྱེད་གསུམ་ལ། མོས་པ་རྣམས་ཀྱི་དབང་མཛད་ནས། །སྐྱབས་གསུམ་རྣམ་པར་བཞག་པ་ཡིན། །ཞེས་གསུངས་པ་ལྟར། འདིར་ཐར་པ་དོན་གཉེར་གྱི་བློ་མེད་པར། །སྐྱེས་བུ་ཆུང་ངུའི་བློས་ངན་སོང་གི་སྡུག་བསྔལ་ལ་འཇིགས་ནས་དཀོན་མཆོག་གསུམ་ལ་སྐྱབས་སུ་འགྲོ་བ་ཡིན་ནའང་། ད་རེས་བསམ་པ་ཡར་ལྡན་དུ་བྱས་ཏེ། བདག་གཞན་འཁོར་བའི་སྡུག་བསྔལ་ལས་ཐར་འདོད་ཀྱི་བློས་སྐྱབས་གསུམ་སྔོན་དུ་འགྲོ་བ་ཅན་གྱིས་མི་དགེ་བཅུ་སྤོང་གི་ཚུལ་ཁྲིམས་ཡང་དག་པར་བླང་སྙམ་པས་འདིའི་རྗེས་ཟློས་མཛོད། སྔར་ཆོས་འབྲེལ་མེད་ན་བཙུན་པ་དང་། ཡོད་ན་སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །དགེ་འདུན་ལ་སུ་མཆིའོ། །བདག་ཇི་སྲིད་འཚོའི་བར་དུ་ལྷ་མིའི་ཐེག་པ་ལ་གནས་པར་སློབ་དཔོན་གྱིས་བཟུང་དུ་གསོལ། ཞེས་ལན་གསུམ་དང་། རུས་ཐབས་ཡིན་ནོ། །བུས་ལེགས་སོ་ཞེས་བརྗོད། དེ་ལྟར་དགེ་བཅུའི་ལས་ལམ་གྱི་ཁྲིམས་ཡང་དག་པར་ཐོབ་པ་དེའི་མི་མཐུན་ཕྱོགས་མི་དགེ་བཅུ་སྤངས་ཏེ། དེ་ལས་ལྡོག་པར་བགྱིའོ་སྙམ་པས། སློབ་དཔོན་དགོངས་སུ་གསོལ། ཇི་ལྟར་སྔོན་གྱི་འཕགས་པ་དགྲ་བཅོམ་པ་རྣམས་ཀྱིས་ལྷ་མིའི་ཐེག་པ་ལ་ཞུགས་ཏེ། ཇི་སྲིད་འཚོའི་བར་དུ་སྲོག་གཅོད་པ་དང་། །མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། །རྫུན་དུ་སྨྲ་བ་དང་། ཕྲ་མ་དང་། ངག་འཁྱལ་དང་། ཚིག་རྩུབ་པོ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བའི་ལས་མི་དགེ་བ་བཅུ་སྤངས་ཏེ། མི་དགེ་བ་བཅུ་ལས་སླར་ལོག་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་མི་དགེ་བ་བཅུ་སྤངས་ཏེ། མི་དགེ་བ་བཅུ་ལས་སླར་ལྡོག་པར་བགྱིའོ། །ཡན་ལག་བཅུ་པོ་འདིས་བདག་འཕགས་པ་དགྲ་བཅོམ་པ་རྣམས་ཀྱིས་བསླབས་པའི་ལྷ་མིའི་ཐེག་པ་བཟང་པོ་ལ་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །ཞེས་ལན་གཅིག་དང་། རུས་ཐབས་ཡིན་ནོ། །བུས་ལེགས་སོ། །དེ་ནས་ཚངས་པའི་ཐེག་པ་ནི། །ཚད་མེད་བཞི་སྤྱོད་མི་གཡོ་སྒོམ་བྱེད་པ། །ཚངས་གནས་ལ་སོགས་སྐྱེ་བའི་རྒྱུ་ཡིན་ནོ། །ཞེས་པ་ལྟར་ཚངས་ཐེག་གི་ལམ་དངོས་བསམ་གཏན་བཞི་དང་། གཟུགས་མེད་པའི་སྙོམས་འཇུག་བཞི། ཚངས་ཐེག་གི་ཡོན་ཏན་ཁྱད་པར་ཅན་ཚད་མེད་བཞི་དང་། མངོན་པར་ཤེས་པ་ལྔ་རྣམས་ལ་ཚུལ་བཞིན་དུ་བསླབ་པར་བྱ་སྙམ་པས། སློབ་དཔོན་དགོངས་སུ་གསོལ། ཇི་ལྟར་སྔོན་གྱི་འཕགས་པ་དྲང་སྲོང་ཆེན་པོ་དེ་དག་གིས་བསམ་གཏན་དང་སྙོམས་འཇུག་གི་སེམས་བསྒྲུབས་ཏེ། བསམ་གཏན་དང་མངོན་པར་ཤེས་པ་བརྙེས་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་ཚད་མེད་པ་དང་། བསམ་གཏན་གྱི་སེམས་རྟོག་དཔྱོད་དང་བྲལ་བ་དང་། སྙོམས་འཇུག་མི་གཡོ་བ་དང་། གནས་ཏེ་འཕགས་པའི་བསམ་གཏན་དང་མངོན་པར་ཤེས་པ་ཐོབ་པར་བགྱིའོ། །ཇི་ལྟར་སྔོན་གྱི་འཕགས་པ་དྲང་སྲོང་ཆེན་པོ་རྣམས་ཀྱི་རྗེས་སུ་སློབ་བོ། །རྗེས་སུ་སྒྲུབ་བོ། །རྗེས་སུ་བགྱིད་དོ། །ཞེས་ལན་གསུམ་དང་། ཐབས་ལེགས་བྱའོ། །དེ་ནས་དུས་ཁྲིམས་ནི། འདོད་ལྷའི་གོ་འཕང་སྒྲུབ་པ་ཙམ་ལ་གསོ་སྦྱོང་མ་བླངས་ཀྱང་ཆོག་སྟེ། ཡང་དག་པའི་ལྟ་བས་ཟིན་པའི་དགེ་བཅུའི་ལས་ལམ་གྱིས་འགྲུབ་པའི་ཕྱིར། དེ་ལྟ་ནའང་འདོད་ལྷ་རིས་དྲུག་གི་རྟེན་ཁྱད་པར་ཅན་སྒྲུབ་པ་ལ་གསོ་སྦྱོང་བླངས་ན་བཟང་སྟེ། བཤེས་སྤྲིང་ལས། གསོ་སྦྱོང་འདོད་སྤྱོད་ལྷ་ལུས་ཡིད་འོང་བ། །སྐྱེས་པ་བུད་མེད་དག་ལ་སྩོལ་བར་བགྱི། །ཞེས་གསུངས། ཇི་ལྟར་ལེན་པའི་ཆོ་ག་ནི། གནས་འཇོག་གི་མདོ་ལས་གསུངས་པ་ལྟར་བླངས་ན་ལེགས་མོད་ཀྱི། འོན་ཀྱང་དབང་བསྐུར་ཡུལ་ཁྱིམ་པ་དང་རབ་བྱུང་ལ་ངེས་པ་མེད་ཅིང་། རབ་ཏུ་བྱུང་བ་ཡིན་ནའང་ཐེག་པ་ཆེན་པོའི་གསོ་སྦྱོང་བླང་བ་མི་འགལ་བས། འདིར་དེ་ལྟར་བླང་བར་བྱ་སྙམ་པས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་། སློབ་དཔོན་བདག་ལ་དགོངས་སུ་གསོལ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་ཡང་དག་པར་རྫོགས་པའི་སངས་རྒྱས་རྟ་ཅང་ཤེས་ལྟ་བུ། གླང་པོ་ཆེན་པོ། བྱ་བ་བྱས་ཤིང་། བྱེད་པ་བྱས་པ། ཁུར་བོར་བ། རང་གི་དོན་རྗེས་སུ་ཐོབ་པ། །སྲིད་པ་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་བཀའ། ལེགས་པར་རྣམ་པར་གྲོལ་བའི་ཐུགས། །ལེགས་པར་རྣམ་པར་གྲོལ་བའི་ཤེས་རབ་ཅན་དེ་དག་གིས། སེམས་ཅན་ཐམས་ཅད་ཀྱི་དོན་གྱི་ཕྱིར་དང་། ཕན་པར་བྱ་བའི་ཕྱིར་དང་། །གྲོལ་བར་བྱ་བའི་ཕྱིར་དང་། །ནད་མེད་པར་བྱ་བའི་ཕྱིར་དང་། མུ་གེ་མེད་པར་བྱ་བའི་ཕྱིར་དང་། བྱང་ཆུབ་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱ་བའི་ཕྱིར་དུ་གསོ་སྦྱོང་ངེས་པར་མཛད་པ་དེ་བཞིན་དུ། བདག་མིང་འདི་ཞེས་བྱ་བས་ཀྱང་དུས་འདི་ནས་བཟུང་སྟེ་སང་ཉི་མ་མ་ཤར་གྱི་བར་དུ་གསོ་སྦྱོང་ངེས་པར་ཡང་དག་པར་བླང་བར་བྱའོ། །ཞེས་ལན་གསུམ་གྱིས་བླངས་ཏེ་ཐབས་ལེགས་བྱ། དེ་ནས་བསླབ་པ་བརྗོད་པའི་དོན་དུ་འདིའི་རྗེས་ཟློས། དེང་ནས་སྲོག་གཅོད་མི་བྱ་ཞིང་། །གཞན་གྱི་ནོར་ཡང་བླང་མི་བྱ། །འཁྲིག་པའི་ཆོས་ཀྱང་མི་བྱ་སྟེ། །རྫུན་གྱི་ཚིག་ཀྱང་མི་སྨྲའོ། །སྐྱོན་ནི་མང་པོ་ཉེར་བརྟེན་པའི། །ཆང་ནི་ཡོངས་སུ་སྤང་བར་བྱ། །ཁྲི་སྟན་མཐོན་པོ་མི་བྱ་ཞིང་། །དེ་བཞིན་དུས་མ་ཡིན་པའི་ཟས། །དྲི་དང་འཕྲེང་བ་དང་ནི་རྒྱན། །གར་དང་གླུ་སོགས་སྤང་བར་བྱ། །ཇི་ལྟར་དགྲ་བཅོམ་རྟག་ཏུ་ནི། །སྲོག་གཅོད་ལ་སོགས་མི་བྱེད་ལྟར། །དེ་བཞིན་སྲོག་གཅོད་ལ་སོགས་སྤང་། བླ་མེད་བྱང་ཆུབ་མྱུར་ཐོབ་ཤོག །སྡུག་བསྔལ་མང་འཁྲུགས་སེམས་ཅན་རྣམས། །སྲིད་པའི་མཚོ་ལས་སྒྲོལ་བར་ཤོག །ཅེས་ལན་གཅིག་དང་ཐབས་ལེགས་བྱ། འདི་ནི་ནམ་ལངས་ཀྱི་དུས་སུ་ལེན་དགོས་པས་དབང་བསྐུར་དང་དུས་མ་འགྲིག་ན། དེའི་ཞོགས་ཟུར་དུ་བླངས་ཀྱང་མི་འགལ་ཞིང་། གཞན་དུ་ལྷ་མི་ཙམ་པའི་དབང་དུ་བྱས་ན་སྔར་བཤད་པ་ལྟར་མ་བླངས་ཀྱང་ཆད་པའི་སྐྱོན་མེད་དོ། །དེ་ནས་ཆོས་བཤད་པ་ནི། ཐེག་པ་འདི་ནི་ཐེག་པ་ཀུན་གྱི་ཕྱི་མོའམ་གཞིར་གྱུར་པ་སྟེ། གང་དགེ་བ་བཅུའི་ལས་ཀྱི་ལམ་ལ་མི་སྤྱོད་པའི་ཐེག་པ་ནི་གང་ནའང་ཡོད་པ་མ་ཡིན་པའི་ཕྱིར་དང་། འདི་ནི་ཐེག་པ་ཐམས་ཅད་ཀྱི་སྔོན་དུ་འགྲོ་བའང་ཡིན་པའི་ཕྱིར་རོ། །དེ་ལྟར་ཡང་ཀྱེ་རྡོར་ལས། དགེ་བ་བཅུ་ལས་བརྩམས་ནས་ནི། །དེ་ཡི་ཆོས་ནི་རབ་ཏུ་དབྱེ། །ཞེས་དང་། སློབ་དཔོན་སངས་རྒྱས་གསང་བས་ཀྱང་། གཞི་ཡི་ཐེག་པའི་དང་པོར་ཞོག །ཅེས་གསུངས། དགེ་བཅུའི་ལས་ལམ་དང་བསམ་གཟུགས་ཀྱི་ལམ་མི་གཡོ་བའི་ལས་ལ་སྤྱོད་པ་འདི་དག་ཀྱང་། ཡང་དག་པའི་ལྟ་བ་ཞེས་བྱ་བ། འཇིག་རྟེན་ཕ་རོལ་དང་། ལས་འབྲས་ལ་ཡིད་ཆེས་པའི་ལྟ་བས་ངེས་པར་ཟིན་དགོས་ཏེ། དེ་ལས་ལྡོག་ནས་དགེ་བ་སྤྱད་ཀྱང་འབྲས་བུ་སྡུག་བསྔལ་དུ་སྨིན་པར་འགྱུར་ཏེ། བཤེས་སྤྲིང་ལས། གང་ཟག་ལོག་པར་ལྟ་བས་ལེགས་སྤྱད་ཀྱང་། །ཐམས་ཅད་རྣམ་པར་སྨིན་པ་མི་བཟད་ལྡན། །ཞེས་གསུངས་པ་ཡིན་ནོ། །དེ་བས་ན་ངན་སོང་གི་རྒྱུ་མི་དགེ་བ་སྤོང་བའི་དམ་ཚིག་དང་། འདོད་པའི་མཐོ་རིས་ཀྱི་རྒྱུ་ཡང་དག་པའི་ལྟ་བས་ཟིན་པའི་དགེ་བཅུའི་ལས་ལམ་དང་། ཁམས་གོང་མའི་རྒྱུ་བསམ་གཟུགས་ཀྱི་ཏིང་ངེ་འཛིན་དང་ཚད་མེད་བཞི་སོགས་སྒོམ་པ། ཁྱད་པར་དུའང་ངེས་ལེགས་ཀྱི་ཐེག་པའི་གཞིར་འགྲོ་བས་ཆོས་ཀྱི་རྒྱལ་པོ་ཐོབ་པའི་རྒྱུར་དཀོན་མཆོག་གསུམ་ལ་དད་པ་ཡང་དག་པ་བསྐྱེད་འཚལ་ལོ། །དེ་ལྟར་འཇུག་སྒོ་གྲུབ་ནས་དབང་བསྐུར་བ་དངོས་ལ་དམིགས་པ་འདི་བཞིན་དུ་མཛོད། ལྷ་དང་སློབ་དཔོན་ལ་གུས་འདུད་བྱས་པས། རྒྱལ་བ་སྲས་དང་བཅས་པའི་བྱིན་རླབས་ཐམས་ཅད་ངོ་བོ་རྒྱ་ཡིག་ཀུན་བཟང་དང་བོད་ཡིག་ཐུབ་དབང་ལ། རྣམ་པ་རྒྱ་ཡིག་ལྔ་བཅུ་དང་བོད་ཡིག་སུམ་ཅུའི་རྣམ་པར་བྱོན་ཏེ། སློབ་དཔོན་དང་དབང་རྫས་རྣམས་ལ་ཐིམ། དེ་ནས་དབང་བསྐུར་བའི་ཚེ་བླ་མ་དང་། །དབང་རྟེན་དཀྱིལ་འཁོར་དང་ཙཀ་ལི་རྣམས་ལས། གང་བསྐུར་བའི་རྫས་དེ་དང་དེ་མར་མེ་གཅིག་ལས་གཉིས་ཆད་ཀྱི་རྣམ་པར་བྱུང་སྟེ། སོ་སོ་རང་རང་ལ་ཐིམ་པས་དགོས་འདོད་ཐམས་ཅད་ཡིད་བཞིན་དུ་འགྲུབ་པར་གྱུར་སྙམ་པའི་མོས་པ་མཛོད། ཅེས་བརྡ་སྦྱར་ལ། ཐོག་མར་ལྷ་མིའི་ཆས་འཇུག་གི་དབང་བཅུ་གཅིག་ལས། དང་པོ་དབུ་རྒྱན་བསྐོན་ཏེ། ན་མོ། ཕྱོགས་བཅུ་དུས་གསུམ་གྱི་དེ་བཤིན་གཤེགས་པ་ཐམས་ཅད་ཀྱི་བྱིན་གྱིས་རླབས་ཀྱིས། རིགས་ཀྱི་བུ་ལ་རིན་པོ་ཆེ་ཅོད་པན་གྱི་དབང་བསྐུར་བས་རྒོལ་བའི་ཕྱོགས་ཐམས་ཅད་ལས་རྣམ་པར་རྒྱལ་བའི་དབང་དམ་པ་ཐོབ་པར་གྱུར་ཅིག །གཉིས་པ་ཡུམ་གྱི་ཙཀླི་སྤྱི་བོར་བཞག་སྟེ། ན་མོ། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་བྱིན༴ རིགས་ཀྱི་བུ་ལ་ཡུམ་གྱི་ཕྱག་གིས་རེག་ཅིང་དབང་བསྐུར་བས་ཉོན་མོངས་པའི་སྡུག་བསྔལ་ཐམས་ཅད་ཞི་བར་གྱུར་ཅིག །གསུམ་པ་སེང་ཕྲུག་ཟུང་གཏད་དེ། ན་མོ། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ༴ རིགས་ཀྱི་བུ་ལ་སེང་ཕྲུག་ཟུང་གཅིག་གི་དབང་བསྐུར་བས་རྒོལ་བའི་ཕྱོགས་ཐམས་ཅད་ཟིལ་གྱིས་གནོན་པའི་དབང་དམ་པ་ཐོབ་པར་གྱུར་ཅིག །བཞི་པ་གླང་ཆེན་ཕྲུ་གུ་ཟུང་གཏད་དེ། ན་མོ། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ། །རིགས་ཀྱི་བུ་ལ་གླང་པོ་ཆེའི་ཕྲུ་གུ་ཟུང་གཅིག་གི་དབང་བསྐུར་བས་འཇིག་རྟེན་འདེགས་པའི་སྟོབས་དང་ལྡན་པའི་དབང་དམ་པ་ཐོབ་པར་གྱུར་ཅིག །ལྔ་པ་ཀ་ཤི་ཀའི་རས་ཟུང་གཏད་དེ། ན་མོ། ཕྱོགས་བཅུ་དུས་གསུམ་གྱི༴ རིགས་ཀྱི་བུ་ལ་ན་བཟའ་ཀ་ཤི་ཀའི་རས་ཀྱི་དབང་བསྐུར་བས་མཁྱེན་པའི་ཡེ་ཤེས་གསལ་ཞིང་མ་འདྲེས་པའི་དབང་དམ་པ་ཐོབ་པར་གྱུར་ཅིག །དྲུག་པ་བུམ་ཆུ་སྤྱི་བོར་གཏིགས་ཤིང་བླུད་དེ། ན་མོ། ཕྱོགས་བཅུ་དུས་གསུམ་གྱི༴ རིགས་ཀྱི་བུ་ལ་བུམ་རྫས་ཆུའི་དབང་བསྐུར་བས་ཉོན་མོངས་པའི་བག་ཆགས་ཀྱི་དྲི་མ་བྱང་ཞིང་དག་པའི་དབང་དམ་པ་ཐོབ་པར་གྱུར་ཅིག །བདུན་པ་མིང་དབང་ནི། དོན་ཐམས་ཅད་གྲུབ་པ་ཞེས་པ་མི་དང་ལྷའི་རྒྱལ་པོ་ལྟ་བུའི་མིང་མཐོ་རིས་ལས་གྲགས་པ་བཏགས་ཏེ། ན་མོ། ཕྱོགས་བཅུ་དུས་གསུམ་གྱི། རིགས་ཀྱི་བུ་ལ་དོན་ཐམས་ཅད་གྲུབ་པ་ཞེས་བྱ་བའི་མིང་གི་དབང་བསྐུར་བས་ཤེས་བྱ་ལ་མ་རྨོངས་པའི་དབང་དམ་པ་ཐོབ་པར་གྱུར་ཅིག །བརྒྱད་པ་རྒྱན་ཆས་གཏད་དེ། ན་མོ། ཕྱོགས་བཅུ་དུས་གསུམ་གྱི༴ རིགས་ཀྱི་བུ་ལ་རྒྱན་གྱི་བྱེ་བྲག་གི་དབང་བསྐུར་བས་འགྲོ་བ་ཐམས་ཅད་ཀྱི་སེམས་ཤེས་པའི་དབང་དམ་པ་ཐོབ་པར་གྱུར་ཅིག །དགུ་པ་ཡིག་ཤིང་གཏད་དེ། ན་མོ། ཕྱོགས་བཅུ་དུས་གསུམ་གྱི༴ རིགས་ཀྱི་བུ་ལ་ཡིག་ཤིང་གི་དབང་བསྐུར་བས་ཆོས་ཀྱི་སྒྲ་སྒྲོག་པའི་དབང་དམ་པ་ཐོབ་པར་གྱུར་ཅིག །བཅུ་པ་མདའ་གཞུ་གཏད་དེ། ན་མོ། ཕྱོགས་བཅུ་དུས་གསུམ་གྱི༴ རིགས་ཀྱི་བུ་ལ་གནམ་རུ་ཟུང་གཅིག་གི་དབང་བསྐུར་བས་སྙན་པའི་སྒྲ་སྒྲོག་ཅིང་བདུད་དཔུང་འདུལ་བའི་འཕོངས་རྩལ་དང་ལྡན་པར་གྱུར་ཅིག །བཅུ་གཅིག་པ་བཙུན་མོ་གཏད་དེ། ན་མོ། ཕྱོགས་བཅུ་དུས་གསུམ་གྱི༴ རིགས་ཀྱི་བུ་ལ་བཙུན་མོའི་དབང་བསྐུར་བས་བསྟན་པའི་རིགས་མི་ནུབ་ཅིང་ཇི་ལྟར་འདུལ་བ་དེ་བཞིན་དུ་འགྲོ་བའི་དོན་བྱེད་པའི་དབང་དམ་པ་ཐོབ་པར་གྱུར་ཅིག །དེ་ལྟར་དགའ་ལྡན་དུ་བྱམས་པ་རྒྱལ་ཚབ་ཏུ་དབང་བསྐུར་བ་ནས། བཙུན་མོའི་འཁོར་གྱིས་དགྱེས་པར་རོལ་པའི་བར་ཏེ། གཞོན་ནུ་དོན་ཐམས་ཅད་གྲུབ་པ་ཁྱིམ་ན་སྤྱོད་པའི་རྣམ་ཐར་དང་རྗེས་སུ་མཐུན་པའི་དབང་བཅུ་གཅིག་བསྐུར་བས། མཐོ་རིས་ཀྱི་རྟེན་ཕུན་སུམ་ཚོགས་པ་ལ་བདག་གིར་སྤྱོད་པའི་སྐལ་བ་ཅན་དུ་བྱས་པ་ཡིན་ནོ། །དེ་ནས་མངོན་མཐོའི་རྟེན་སྒྲུབ་བྱེད་བླང་དོར་གྱི་གནས་ཤེས་པ་ནི་ཐོས་བསམ་ལ་རག་ལས་ཤིང་། དེ་ཡང་ཡི་གེའི་ཐ་སྙད་ལ་བརྟེན་དགོས་པས་ན་ལྷ་མིའི་དབང་གི་གཙོ་བོ་ཨཱ་ལི་ཀཱ་ལིའི་ཡི་གེའི་དབང་བསྐུར་བ་ལས། རྒྱ་ཡིག་ལྔ་བཅུའི་གཟུགས་རིམ་པར་ཐོགས་ཏེ། ཨཱ་ཨཱ་མ་སྐྱེས་ཡེ་ཤེས་ཡིན། །རང་བཞིན་ཐམས་ཅད་སྟོང་པར་སྟོན། །ཀ་ནི་བྱ་བའི་ཡེ་ཤེས་ཏེ། །ལས་ཀྱིས་ཐམས་ཅད་གྲོལ་བར་སྟོན། ཁ་ནི་ཁྱབ་པར་བྱེད་པའི་སྒོ། །མི་དམིགས་ཐམས་ཅད་གྲོལ་བར་སྟོན། །ག་ནི་དོན་དུ་འགྱུར་བའི་སྒོ། །ཡུལ་མེད་ཐམས་ཅད་གྲོལ་བར་སྟོན། །གྷ་ནི་གནས་པའི་སྒོ་ཡིན་ཏེ། །གཅིག་ཏུ་མ་ངེས་གྲོལ་བར་སྟོན། །ང་ནི་འཛིན་པ་མེད་པའི་སྒོ། །འཛིན་བྲལ་ཐམས་ཅད་གྲོལ་བར་སྟོན། །ཙ་ནི་འགག་པ་མེད་པའི་སྒོ། །ཅིར་ཡང་སྣང་བ་ཐམས་ཅད་གྲོལ། །ཚ་ནི་འདའ་བ་མེད་པའི་སྒོ། །འབྲལ་བ་མེད་པས་ཐམས་ཅད་གྲོལ། །ཛ་ནི་མ་བྱུང་བ་ཡི་སྒོ། །མི་གནས་པས་ནི་ཐམས་ཅད་གྲོལ། །ཛྷ་ནི་རྙོག་པ་བྲལ་བའི་སྒོ། །དྲི་མ་དག་པས་ཐམས་ཅད་གྲོལ། །ཉ་ནི་སྤྱོད་དང་བྲལ་བའི་སྒོ། །བྱ་བ་མེད་པས་ཐམས་ཅད་གྲོལ། །ཊ་ནི་ང་རྒྱལ་མེད་པའི་སྒོ། །རི་བོ་མེད་པས་ཐམས་ཅད་གྲོལ། །ཋ་ནི་སྒྱུ་རྩལ་མེད་པའི་སྒོ། །བྱེད་པ་མེད་པས་ཐམས་ཅད་གྲོལ། །ཌ་ནི་འདྲེས་པ་མེད་པའི་སྒོ། །རྩོད་པ་མེད་པས་ཐམས་ཅད་གྲོལ། །ཌྷ་ནི་བསླུ་བ་མེད་པའི་སྒོ། །སྒྱུ་མ་ཐམས་ཅད་གྲོལ་བར་བྱེད། །ཎ་ནི་ཀུན་ཏུ་འགྱུར་བའི་སྒོ། །གཡོ་བ་བསྐྱོད་པས་ཐམས་ཅད་གྲོལ། །ཏ་ནི་ཐ་སྙད་མེད་པའི་སྒོ། །བརྗོད་པ་མེད་པས་ཐམས་ཅད་གྲོལ། །ཐ་ནི་རྟེན་དང་བྲལ་བའི་སྒོ། །གནས་པ་མེད་པས་ཐམས་ཅད་གྲོལ། །ད་ནི་གཏོང་དང་བྲལ་བའི་སྒོ། །ལེན་པ་མེད་པས་ཐམས་ཅད་གྲོལ། །དྷ་ནི་རང་བཞིན་མེད་པའི་སྒོ། །མཚན་ཉིད་མེད་པས་ཐམས་ཅད་གྲོལ། །ན་ནི་ཡུལ་དང་བྲལ་བའི་སྒོ། །འཛིན་པ་མེད་པས་ཐམས་ཅད་གྲོལ། །པ་ནི་ངེས་པར་འབྱུང་བའི་སྒོ། །འགག་པ་མེད་པས་ཐམས་ཅད་གྲོལ། །ཕ་ནི་དངོས་པོ་མེད་པའི་སྒོ། །ཅི་ཡང་མེད་པས་ཐམས་ཅད་གྲོལ། །བ་ནི་བརྗོད་པ་མེད་པའི་སྒོ། །བརྗོད་པ་མེད་པས་ཐམས་ཅད་གྲོལ། །བྷ་ནི་རྡུལ་དང་བྲལ་བའི་སྒོ། །རྟོག་པ་མེད་པས་ཐམས་ཅད་གྲོལ། །མ་ནི་ཆགས་པ་མེད་པའི་སྒོ། །རྟག་པ་མེད་པས་ཐམས་ཅད་གྲོལ། །ཡ་ནི་ཆགས་པ་མེད་པའི་སྒོ། །གོས་པ་མེད་པའི་ཐམས་ཅད་གྲོལ། །ཝ་ནི་རྒྱུ་རྐྱེན་མེད་པའི་སྒོ། །འབྲས་བུ་མེད་པས་ཐམས་ཅད་གྲོལ། །ར་ནི་སྐྱོན་དང་བྲལ་བའི་སྒོ། །དོར་བ་མེད་པས་ཐམས་ཅད་གྲོལ། །ལ་ནི་བླང་བ་མེད་པའི་སྒོ། །ཡོན་ཏན་མེད་པས་ཐམས་ཅད་གྲོལ། །ཤ་ནི་སྤྲོས་པ་མེད་པའི་སྒོ། །ཞི་བས་ཐམས་ཅད་གྲོལ་བར་བྱེད། ཥ་ནི་ཁུར་དང་བྲལ་བའི་སྒོ། །ལྕི་བ་མེད་པས་ཐམས་ཅད་གྲོལ། །ས་ནི་ཡང་དག་གསང་བའི་སྒོ། །ངེས་པས་ཐམས་ཅད་གྲོལ་བར་བྱེད། །ཧ་ནི་རྒྱུ་དང་བྲལ་བའི་སྒོ། །རྐྱེན་དང་བྲལ་བས་གྲོལ་བར་བྱེད། །ཀྵ་ནི་ཁམས་དང་བྲལ་བའི་སྒོ། །མཚན་ཉིད་མེད་པས་གྲོལ་བར་བྱེད། །ཨི་ཨཱི་མཐོང་བ་མེད་པའི་སྒོ། །གཟུགས་དང་བྲལ་བས་ཐམས་ཅད་གྲོལ། །ཨུ་ཨཱུ་ཐོས་པ་མེད་པའི་སྒོ། །སྒྲ་དང་བྲལ་བས་ཐམས་ཅད་གྲོལ། །ཨེ་ཨཻ་ཚོར་བ་མེད་པའི་སྒོ། །དྲི་དང་བྲལ་བས་གྲོལ་བར་བྱེད། །ཨོ་ཨ་ཚོར་བ་མེད་པའི་སྒོ། །རེག་དང་བྲལ་བས་ཐམས་ཅད་གྲོལ། །ཨཾ་ཨཿཆོ་འཕྲུལ་འབྱུང་བའི་སྒོ། །ཅིར་ཡང་སྣང་བས་ཐམས་ཅད་གྲོལ། །རྀ་རཱྀ་དངོས་དང་དངོས་མེད་དང་། །སྲིད་དང་སྲིད་མིན་སྟོང་པར་གྲོལ། །ལྀ་ལཱྀ་ཤེས་དང་ཤེས་བྱ་དང་། །སྟོང་དང་སྙིང་རྗེའི་བདག་པོ་གྲོལ། །གསུང་གི་འདུལ་བའི་དུས་བྱུང་ན། །དབྱངས་ཀྱི་ཡན་ལག་དྲུག་ཅུ་ལ། །སོགས་པའི་སྒྲ་སྐད་སྣ་ཚོགས་དང་། །ཡི་གེའི་གཟུགས་སུ་བསྟན་ནས་ནི། །འཁོར་བའི་ཁམས་སུ་སྣང་བར་བྱེད། །ཅིའི་ཕྱིར་ཞེ་ན་ཡི་གེ་ནི། །དེ་བཞིན་གཤེགས་པའི་རང་བཞིན་ཏེ། །ཐུགས་རྗེའི་རང་བཞིན་ཡིན་པས་ན། །ཐབས་ཀྱི་བྱེ་བྲག་སྣ་ཚོགས་ཀྱིས། །ཐམས་ཅད་གྲོལ་བར་མཛད་པ་ཡི། །དབང་བསྐུར་སྣང་བ་ཆེན་པོ་སྦྱིན། །ཞེས་བརྗོད་ཅིང་དབང་བསྐུར་རོ། །དེ་ནས་ཡུལ་ཐ་དད་ཀྱི་སྐད་དང་ཡི་གེ་ཐམས་ཅད་ཀྱང་སངས་རྒྱས་ཀྱི་མཐུའི་བྱིན་རླབས་གང་འདུལ་དང་འཚམས་པར་སྣང་བའི་ཕྱིར། ཡུལ་གང་དང་གང་དུ་དེ་དང་དེའི་སྐད་དང་ཡི་གེས་ཐ་སྙད་མཚོན་དགོས་པ་ཡིན་པས་ན་འདིར་བོད་ཡིག་གི་དབང་བསྐུར་བ་ནི། ཀཱ་ལི་སུམ་ཅུའི་གཟུགས་རིམ་པར་ཐོགས་ཏེ། ཀ་ནི་དབང་བྱེད་སྒྲོལ་བའོ། །ཞེས་པས་ཁམས་གསུམ་གྱི་སེམས་ཅན་ལ་དབང་བྱེད་ཅིང་ཉོན་མོངས་པ་སྒྲོལ་བར་བྱེད་པ་སྟེ། དེའི་བྱིན་རླབས་ཀྱིས་ཆོས་སྐུ་དོན་གྱི་གསུང་གཟུགས་བརྙན་དུ་བྱུང་བའི་གསུང་ཡི་གེ་འདིས་ཐམས་ཅད་ལ་དབང་བྱེད་ཅིང་ཉོན་མོངས་པ་སྒྲོལ་བའི་དབང་དང་ལྡན་པར་གྱུར་ཅིག །ཁ་ནི་ཁམས་གསུམ་ཡོངས་ཀྱི་རྒྱན། །ཞེས་པས། ཁམས་གསུམ་གྱི་སེམས་ཅན་ཐམས་ཅད་ཀྱི་རྒྱན་དུ་གྱུར་པ་སྟེ། དེའི་བྱིན་རླབས་ཀྱིས་ཆོས་སྐུའི་གསུང་གི་གཟུགས་བརྙན་ཡི་གེ་འདིས་སེམས་ཅན་གྱི་རྒྱན་དུ་གྱུར་ཏེ་འཁོར་བ་ལས་སྒྲོལ་བའི་དབང་དང་ལྡན་པར་གྱུར་ཅིག །ག་ནི་མ་ཆགས་དག་པར་མཛད། །ཅེས་པས་དུས་གསུམ་དུ་ཆོས་སྐུ་བདེ་བ་ཆེན་པོ་ཅི་ལའང་མ་ཆགས་ཤིང་རྣམ་པར་དག་པ་སྟེ། དེའི་བྱིན་རླབས་ཀྱིས་ཆོས་སྐུའི་གསུང་ཡི་གེ་འདིས་འགྲོ་བ་རྣམས་ཅི་ལའང་མ་ཆགས་ཤིང་རྣམ་པར་དག་པའི་དབང་དང་ལྡན་པར་གྱུར་ཅིག །ང་ནི་ང་མེད་ང་ལས་རྒྱལ། །ཞེས་པས་དུས་གསུམ་དུ་ཆོས་སྐུ་བདེ་བ་ཆེན་པོ་མཉམ་པ་ཉིད་ཀྱི་ངང་ལས་མ་གཡོས་ཤིང་མཚན་མ་ལས་རྒྱལ་བ་ཡིན་ཏེ། དེའི་བྱིན་རླབས་ཀྱིས་སེམས་ཅན་ཐམས་ཅད་ཆོས་དབྱིངས་མཉམ་པ་ཉིད་ཀྱི་ངང་ལས་མ་གཡོས་ཤིང་མཚན་མ་ལས་རྒྱལ་བའི་དབང་དང་ལྡན་པར་གྱུར་ཅིག །ཅ་ནི་གཉིས་མེད་དོན་རྟོགས་ཏེ། །ཞེས་པས་དུས་གསུམ་དུ་ཆོས་སྐུ་བདེ་བ་ཆེན་པོ་དེ་མཚན་མ་དང་མཚན་མེད་གཉིས་སུ་མེད་པ་སྟེ། དེའི་བྱིན་རླབས་ཀྱིས་སེམས་ཅན་ཐམས་ཅད་མཚན་མ་དང་མཚན་མ་མེད་པ་གཉིས་སུ་མེད་པའི་དབང་དང་ལྡན་པར་གྱུར་ཅིག །ཆ་ནི་ཐབས་དང་ཤེས་རབ་སྟེ། །ཞེས་པས་ཆོས་སྐུ་བདེ་བ་ཆེན་པོ་ལས་ཐབས་ཤེས་གཉིས་མེད་ཀྱི་སྤྲུལ་པ་ཇི་སྙེད་ཅིག་བྱུང་ནས་འགྲོ་བའི་དོན་བྱེད་དེ། དེའི་བྱིན་རླབས་ཀྱིས་ཐབས་ཤེས་ཟུང་དུ་འབྲེལ་བའི་དབང་དང་ལྡན་པར་གྱུར་ཅིག །ཇ་ནི་ཆོས་སྐུ་དག་པར་མཛད། །ཅེས་པས་ཆོས་སྐུ་བག་ཆགས་ཀྱིས་མ་གོས་ཤིང་རྣམ་པར་དག་པ་ཡིན་ཏེ་དེའི་བྱིན་རླབས་ཀྱིས་ཆོས་སྐུ་བག་ཆགས་ཀྱིས་མ་གོས་ཤིང་དག་པའི་དབང་དང་ལྡན་པར་གྱུར་ཅིག །ཉ་ནི་ཆོས་ཉིད་བརྡར་ཤ་གཅོད། །ཅེས་པས་ཆོས་ཉིད་རྒྱལ་བ་རྒྱ་མཚོ་དང་འདྲ་བ་ལ་རིག་པའི་ཡེ་ཤེས་རླབས་དང་འདྲ་བས་བརྡར་ཤ་གཅོད་པ་སྟེ། དེའི་བྱིན་རླབས་ཀྱིས་ཆོས་ཉིད་ཀྱི་རྒྱ་མཚོ་ལས་རིག་པ་ཡེ་ཤེས་ཀྱི་བྱིན་རླབས་ལ་དབང་བའི་དབང་དང་ལྡན་པར་གྱུར་ཅིག །ཏ་ནི་མཁས་པའི་འོད་ཟེར་ཅན། །ཞེས་པས་ཆོས་སྐུ་བདེ་བ་ཆེན་པོ་ཐུགས་རྗེའི་འོད་ཟེར་འབྱུང་བ་ཡིན་ཏེ། དེའི་བྱིན་རླབས་ཀྱིས་བུ་རྣམས་ཀྱི་སེམས་ལ་སྙིང་རྗེའི་འོད་ཟེར་འབྱུང་བའི་དབང་དང་ལྡན་པར་གྱུར་ཅིག །ཐ་ནི་དཀོན་མཆོག་འབྱུང་བའི་རྒྱུ། །ཞེས་པས་དུས་གསུམ་གྱི་ཆོས་སྐུ་བདེ་བ་ཆེན་པོ་ལ་དགོངས་པ་ཟབ་མོ་འབྱུང་བ་སྟེ། དེའི་བྱིན་རླབས་ཀྱིས་ཆོས་སྐུའི་དགོངས་པ་ཟབ་མོའི་ཡེ་ཤེས་རྟོགས་པའི་དབང་དང་ལྡན་པར་གྱུར་ཅིག །ད་ནི་རྒྱུ་འབྲས་གཉིས་མེད་ལ། །ཞེས་པས་ཆོས་སྐུ་བདེ་བ་ཆེན་པོ་ལ་རྒྱུ་འབྲས་ཀྱི་ཆོས་གཉིས་སུ་མེད་པ་ཡིན་ཏེ། དེའི་བྱིན་རླབས་ཀྱིས་འཁོར་བའི་སྡུག་བསྔལ་ལས་གྲོལ་ཏེ་མཉམ་པ་ཉིད་ཀྱི་ངང་དུ་བདེ་བའི་དབང་དང་ལྡན་པར་གྱུར་ཅིག །ན་ནི་སྡུག་བསྔལ་མེད་པས་བདེ། །ཞེས་པས་ཆོས་སྐུ་བདེ་བ་ཆེན་པོ་ལ་སྡུག་བསྔལ་མེད་ཅིང་ངང་གིས་བདེ་བ་སྟེ། དེའི་བྱིན་རླབས་ཀྱིས་འཁོར་བའི་སྡུག་བསྔལ་གཏན་སྤངས་ཏེ་ངང་གིས་བདེ་བའི་དབང་དང་ལྡན་པར་གྱུར་ཅིག །པ་ནི་ཐམས་ཅད་བསྐྱེད་པར་བྱེད། །ཅེས་པས་ཆོས་སྐུ་བདེ་བ་ཆེན་པོ་ལས་རིག་པའི་ཡེ་ཤེས་བསྐྱེད་པ་སྟེ། དེའི་བྱིན་རླབས་ཀྱི་གསུང་འདི་མཐོང་བ་ཙམ་གྱིས་གཞན་རིག་བསྐྱེད་པའི་དབང་དང་ལྡན་པར་གྱུར་ཅིག །ཕ་ནི་ཕ་རོལ་ཕྱིན་ལ་གནས། །ཞེས་པས་འཁོར་བའི་སྡུག་བསྔལ་ཐམས་ཅད་ཀྱི་ཕ་རོལ་ཏུ་ཕྱིན་ཅིང་མི་གནས་པའི་མྱ་ངན་ལས་འདས་པ་སྟེ། དེའི་བྱིན་རླབས་ཀྱི་འཁོར་བའི་སྡུག་བསྔལ་ལས་ཕ་རོལ་ཏུ་སོན་ནས་མྱ་ངན་ལས་འདའ་བའི་དབང་དང་ལྡན་པར་གྱུར་ཅིག །བ་ནི་བདེ་བ་ཆེན་པོ་སྟེ། །ཞེས་པས་ཆོས་སྐུ་བདེ་བ་ཆེན་པོ་དེ་མཉམ་པ་ཆེན་པོའི་ངང་དུ་བདེ་བ་སྟེ། དེའི་བྱིན་རླབས་ཀྱིས་དངོས་པོ་དང་མཚན་མ་ཐམས་ཅད་མཉམ་པ་ཆེན་པོའི་ངང་དུ་བདེ་བའི་དབང་དང་ལྡན་པར་གྱུར་ཅིག །མ་ནི་སྲིད་གསུམ་ཡོངས་ཀྱི་མ། །ཞེས་པས་ཆོས་སྐུ་བདེ་བ་ཆེན་པོ་ཡོངས་ཀྱི་གཞི་མར་གྱུར་པ་སྟེ། དེའི་བྱིན་རླབས་ཀྱིས་སྲིད་པ་གསུམ་ལས་རྒྱལ་ཞིང་ཀུན་གྱི་གཞི་རྟེན་དུ་གྱུར་པའི་དབང་དང་ལྡན་པར་གྱུར་ཅིག །ཙ་ནི་འདུ་འབྲལ་མེད་པ་སྟེ། །ཞེས་པས་ཆོས་སྐུ་བདེ་བ་ཆེན་པོ་ནི་སྐུ་དང་ཡེཤེས་དང་སྟོབས་དང་མི་འཇིགས་པ་ལ་སོགས་པ་འདུ་འབྲལ་མེད་པའི་གནས་ཡིན་ཏེ། དེའི་བྱིན་རླབས་ཀྱིས་སྐུ་དང་ཡེ་ཤེས་འདུ་འབྲལ་མེད་པའི་དབང་དང་ལྡན་པར་གྱུར་ཅིག །ཚ་ནི་དོན་དམ་ལུས་ལ་རྫོགས། །ཞེས་པས་དོན་དམ་ཆོས་ཀྱི་སྐུ་ནི་རྒྱུ་དང་འབྲས་བུའི་ཆོས་ཐམས་ཅད་ཡོངས་སུ་རྫོགས་པ་ཡིན་ཏེ། དེའི་བྱིན་རླབས་ཀྱིས་ཆོས་སྐུའི་རྒྱུ་འབྲས་ཐམས་ཅད་ཡོངས་སུ་རྫོགས་པའི་དབང་དང་ལྡན་པར་གྱུར་ཅིག །ཛ་ནི་འབར་བའི་ཡུལ་ལ་གནས། །ཞེས་པས་ཆོས་སྐུ་ལས་ཐུགས་རྗེའི་འོད་ཟེར་འབར་བའི་གནས་ཏེ། དེའི་བྱིན་རླབས་ཀྱིས་ཐུགས་རྗེའི་འོད་ཟེར་འབྱུང་བའི་དབང་དང་ལྡན་པར་གྱུར་ཅིག །ཝ་ནི་མྱ་ངན་ཐམས་ཅད་འདུལ། །ཞེས་པས་ཆོས་སྐུ་བདེ་བ་ཆེན་པོའི་ངང་ལས་འཁོར་བའི་མྱ་ངན་ཐམས་ཅད་འདུལ་ཏེ། དེའི་བྱིན་རླབས་ཀྱིས་འཁོར་བའི་མྱ་ངན་ཐམས་ཅད་འདུལ་བའི་དབང་དང་ལྡན་པར་གྱུར་ཅིག །ཞ་ནི་གཞལ་ཡས་བདེ་བ་ཆེ། །ཞེས་པས་ཆོས་སྐུ་བདེ་བ་ཆེན་པོ་ཐམས་ཅད་ཀྱི་གནས་ཡིན་ཏེ། དེའི་བྱིན་རླབས་ཀྱིས་གཞལ་ཡས་ཁང་བདེ་བ་ཆེན་པོའི་དབང་དང་ལྡན་པར་གྱུར་ཅིག །ཟ་ནི་སྐྱེ་མེད་ཆོས་ལས་འཕགས། །ཞེས་པས་ཆོས་ཐམས་ཅད་རྒྱུ་རྐྱེན་ལས་མ་སྐྱེས་པ་སྟེ། དེའི་བྱིན་རླབས་ཀྱིས་ཆོས་ཉིད་གསལ་བའི་ཡེ་ཤེས་ཀྱིས་མ་རིག་པའི་མུན་པ་སེལ་བའི་དབང་དང་ལྡན་པར་གྱུར་ཅིག །འ་ནི་གོམས་པའི་ཚོགས་ལ་བརྩོན། །ཞེས་པས་ཆོས་སྐུ་བདེ་བ་ཆེན་པོའི་ངང་དུ་གསུང་གི་ཚོགས་རང་བཞིན་མེད་པར་སྒྲོག་པའི་དབང་དང་ལྡན་པར་གྱུར་ཅིག །ཡ་ནི་མཐར་བྱེད་ཕོ་ཉའི་བདག །ཅེས་པས་ཆོས་ཀྱི་སྐུ་ལས་གཟུགས་སྐུ་རྣམ་པ་གཉིས་བྱུང་ནས་འགྲོ་བའི་དོན་བྱེད་པའི་དབང་དང་ལྡན་པར་གྱུར་ཅིག །ར་ནི་གཅོད་བྱེད་ཡུལ་ལ་དབང་། །ཞེས་པས་ཡེ་ཤེས་ཀྱིས་གཅོད་པར་བྱ་བའི་ཡུལ་ཉོན་མོངས་པ་གཅོད་པའི་དབང་དང་ལྡན་པར་གྱུར་ཅིག །ལ་ནི་མཉམ་ཉིད་སྤྲུལ་པའི་སྐུ། །ཞེས་པས་ཆོས་ཉིད་མཉམ་པ་ཉིད་ལས་ཡེ་ཤེས་སྤྲུལ་པའི་སྐུ་བྱུང་སྟེ། སེམས་ཅན་གྱི་དོན་བྱེད་པའི་དབང་དང་ལྡན་པར་གྱུར་ཅིག །ཤ་ནི་སྣང་བྱེད་མཁའ་ལ་ཤར། །ཞེས་པས་ཆོས་ཀྱི་སྐུ་ལས་ཡེ་ཤེས་ཀྱི་རོལ་པར་ཤར་ནས་འགྲོ་བའི་དོན་བྱེད་པའི་དབང་དང་ལྡན་པར་གྱུར་ཅིག །ས་ནི་འཁོར་བའི་རང་བཞིན་ཏེ། །ཞེས་པས་ཐུགས་ཕྱག་མཚན་སྣ་ཚོགས་བྱུང་ནས་འགྲོ་བའི་དོན་བྱེད་པའི་དབང་དང་ལྡན་པར་གྱུར་ཅིག །ཧ་ནི་ཐབས་མཁས་དབྱིངས་ནས་བྱོན། །ཞེས་པས་བདེ་བ་ཆེན་པོའི་དབྱིངས་ནས་ཐབས་ལ་མཁས་པའི་མཛད་སྤྱོད་བསམ་གྱིས་མི་ཁྱབ་པས་འགྲོ་དོན་མཐར་ཕྱིན་པའི་དབང་དང་ལྡན་པར་གྱུར་ཅིག །ཨ་ནི་སྐྱེ་མེད་ཆོས་ཀྱི་དབྱིངས། །ཞེས་པས་རྒྱུ་རྐྱེན་དང་བྲལ་བའི་དབྱིངས་ནས་འགྲོ་བའི་དོན་མ་འགགས་པར་ཤར་བས་འགྲོ་དོན་མཐར་ཕྱིན་པའི་དབང་དང་ལྡན་པར་གྱུར་ཅིག །ཅེས་བསྐུར་རོ། །དེ་ནས་ལྷ་དབང་བསྐུར་བ་ནི། དཀྱིལ་འཁོར་གྱི་ལྷ་ལས་མར་མེ་གཅིག་ལས་གཉིས་ཆད་ཀྱི་རྣམ་པར་ལྷ་སོ་སོ་རིམ་པར་བྱོན་པ་སྤྱི་བོ་ནས་ཐིམ་པས་རྒྱུད་བྱིན་གྱིས་བརླབས་ཤིང་། ལྷ་དེ་དང་དེའི་སྐུར་ལམ་ལམ་གྱུར་པའི་མོས་པ་མཛོད། ལྷ་ཙཀ་རྣམས་རིམ་པར་ཐོགས་ཏེ། ན་མོ། མཆོད་འོས་རྣམས་ཀྱི་མཆོད་གནས་དམ་པ་ལྷ་མིའི་དཀྱིལ་འཁོར་གྱི་གཙོ་བོ་ལོངས་སྤྱོད་རྫོགས་པའི་སྐུ་བཅོམ་ལྡན་འདས་ཀུན་རིག་རྣམ་པར་སྣང་མཛད་ངན་སོང་ཐམས་ཅད་སྦྱོང་ཞིང་མངོན་ཤེས་དང་རྫུ་འཕྲུལ་སྟེར་བའི་དབང་ཐོབ་པར་གྱུར་ཅིག །ༀ་སརྦ་བིད་ༀ་ཨ་བྷི་ཥིཉྩ་ཨ། ན་མོ། མཆོད་འོས་རྣམས་ཀྱི་མཆོད་གནས་དམ་པ་ལྷ་མིའི་གཙོ་བོ་སྤྲུལ་པའི་སྐུ་མངོན་པར་དགའ་བའི་ཞིང་ཁམས་ན་བཅོམ་ལྡན་འདས་མི་བསྐྱོད་པ་སྐུ་མདོག་སྔོན་པོ་གཡས་ས་གནོན། གཡོན་མཉམ་བཞག་མཛད་པའི་སྐུ་མཐོང་བའམ། མཚན་ཐོས་པའམ། དེ་དྲན་པ་ཙམ་གྱིས་སྡིག་སྒྲིབ་དང་ངན་འགྲོ་ཐམས་ཅད་སེལ་ཞིང་མཐོ་རིས་དང་ཐར་པ་ཐོབ་པར་མཛད་དེ་དེའི་དབང་མཆོག་ཐོབ་པར་གྱུར་ཅིག །ན་མོ། མཆོད་འོས་རྣམས་ཀྱི་མཆོད་གནས་དམ་པ་ལྷ་མིའི་གཙོ་བོ་སྤྲུལ་པའི་སྐུ་སྟོང་གི་ལྷ་རྒྱལ་བ་ཤཱཀྱ་ཐུབ་པ་སྐུ་མདོག་གསེར་བཙོ་མ་ལྟ་བུ་གཡས་ས་གནོན། གཡོན་མཉམ་བཞག་ལྷུང་བཟེད་ཅན་གང་གིས་སྔོན་སྦྱིན་པའི་བསོད་ནམས་ཐོབ་པ་ལས་བསྔོས་ཏེ། བདག་མངོན་པར་རྫོགས་པ་སངས་རྒྱས་པ་ནི་བདག་གི་འཁོར་རྣམ་བཞི་འཚོ་བས་མི་བྲེལ་བའི་སྨོན་ལམ་གྲུབ་པའི་བྱིན་རླབས་ཀྱིས་སྟོང་ལ་བསྙེན་གནས་བསྲུངས་པས་ཕྱོགས་དུས་གནས་སྐབས་ཐམས་ཅད་དུ་མུ་གེའི་བསྐལ་པ་ལས་ཐར་བའི་དབང་མཆོག་དམ་པ་ཐོབ་པར་གྱུར་ཅིག །ན་མོ། མཆོད་འོས་རྣམས་ཀྱི་མཆོད་གནས་དམ་པ་ལྷ་མིའི་གཙོ་བོ་སྤྲུལ་པའི་སྐུ་ཉའི་ལྷ་སྣང་བ་མཐའ་ཡས་སྐུ་མདོག་དམར་པོ་མཉམ་བཞག་ཚེ་བུམ་ཅན་དེ་ཉིད་ཀྱིས་ཐོས་བསམ་སྒོམ་པའི་ཤེས་རབ་ཀྱི་བསོད་ནམས་ཐོབ་པ་ལས་བསྔོས་ཏེ། བདག་མངོན་པར་རྫོགས་པ་སངས་རྒྱས་པ་ན་བདག་གི་འཁོར་རྣམས་ཀྱིས་བདེ་བ་ཅན་གྱི་ཞིང་ཁམས་སུ་ཕྱིར་མི་ལྡོག་པའི་འཕགས་པ་ཐོབ་པར་སྨོན་ལམ་གྲུབ་པའི་བྱིན་རླབས་ཀྱིས་ཉ་ལ་བསྙེན་གནས་བསྲུངས་པས་ཕྱོགས་དུས་ཐམས་ཅད་དུ་མཚོན་གྱི་བསྐལ་པ་ལས་ཐར་པའི་དབང་མཆོག་དམ་པ་ཐོབ་པར་གྱུར་ཅིག །ན་མོ། མཆོད་འོས་རྣམས་ཀྱི་མཆོད་གནས་དམ་པ་ལྷ་མིའི་གཙོ་བོ་སྤྲུལ་པའི་སྐུ་ཚེས་བརྒྱད་ཀྱི་ལྷ་སྨན་གྱི་བླ་བཻ་ཌཱུརྱ་འོད་ཀྱི་རྒྱལ་པོ་སྐུ་མདོག་མཐིང་ག་གཡས་མཆོག་སྦྱིན་ཨ་རུ་ར། གཡོན་མཉམ་བཞག་ལྷུང་བཟེད་ཅན། སྨོན་ལམ་གྱི་མཐུ་ལས་གང་གིས་བདག་གིས་མཚན་ལན་བདུན་བརྗོད་ཅིང་ཕྱག་འཚལ་བ་དང་། བསྐོར་བ་དང་། ཚེས་བརྒྱད་ལ་བསྙེན་གནས་བསྲུངས་པས་ཕྱོགས་དུས་ཐམས་ཅད་དུ་རྨི་ལམ་ངན་པ་དང་། མཚན་མ་རྩུབ་པ་དང་། མ་ངེས་པ་དང་། ཐེ་ཚོམ་དང་། ཡིད་གཉིས་དང་། ནད་ཀྱི་བསྐལ་པ་ལས་ཐར་པའི་དབང་མཆོག་དམ་པ་ཐོབ་པར་གྱུར་ཅིག །ན་མོ། མཆོད་འོས་རྣམས་ཀྱི་མཆོད་གནས་དམ་པ། ཉི་མ་ཤར་བ་ཤར་གྱི་ཕྱོགས། །ཤར་ཕྱོགས་མཐའ་ཡས་ཀྱི་ཐུབ་པའི་ཆོས་དང་། །གང་ཟག་ཆོས་ལྡན་རྣམས་སྐྱོང་བར་འཛམ་བུ་གླིང་དུ་མངའ་གསོལ་བ། དྲི་ཟའི་རྒྱལ་པོ་ཡུལ་འཁོར་སྲུང་གི་དབང་དམ་པ་ཐོབ་པར་གྱུར་ཅིག །ན་མོ། །མཆོད་འོས་རྣམས་ཀྱི༴ ཉི་མ་འཕེལ་བ་ལྷོ་ཡི་ཕྱོགས། ལྷོ་ཕྱོགས་མཐའ་ཡས་ཀྱི་ཐུབ་པའི་ཆོས་དང་། གང་ཟག་ཆོས་ལྡན་རྣམས་སྐྱོང་བར་ཛམ་བུ་གླིང་དུ་མངའ་གསོལ་བ། གྲུལ་བུམ་གྱི་རྒྱལ་པོ་འཕགས་སྐྱེས་པོའི་དབང་དམ་པ་ཐོབ་པ༴ ན་མོ། མཆོད་འོས་རྣམས༴ ཉི་མ་བགྲོད་པ་ནུབ་ཀྱི་ཕྱོགས། །ནུབ་ཕྱོགས་མཐའ་ཡས་ཀྱི་ཐུབ་པའི་ཆོས་དང་། གང་ཟག་ཆོས་ལྡན་རྣམས་སྐྱོང་བར་ཛམྦུ་གླིང་དུ་མངའ་གསོལ་བ། ཀླུའི་རྒྱལ་པོ་མིག་མི་བཟང་གི་དབང་དམ་པ༴ ན་མོ། མཆོད་འོས་རྣམས་ཀྱི༴ ཉི་མ་དབུས་ནས་ལྷུན་པོ་བྱང་། བྱང་ཕྱོགས་མཐའ་ཡས་ཀྱི་ཐུབ་པའི་ཆོས་དང་། གང་ཟག་ཆོས་ལྡན་རྣམས་སྐྱོང་བར་ཛམྦུ་གླིང་དུ་མངའ་གསོལ་བ། གནོད་སྦྱིན་གྱི་རྒྱལ་པོ་རྣམ་ཐོས་སྲས་ཀྱི་དབང་དམ་པ༴ ན་མོ། མཆོད་འོས་རྣམས་ཀྱི༴ ཤར་ན་ལྷའི་དབང་པོ་བརྒྱ་བྱིན་དང་བཙུན་མོ་འགྲོ་བ་སེམས་ཅན་ཐམས་ཅད་ལ་བདེ་བ་སྟེར་བ་དེའི་དབང་དམ་པ་ཐོབ་པར་གྱུར་ཅིག །ན་མོ། མཆོད་འོས་རྣམས༴ ཤར་གླིང་གཡས་ན་མངགས་གཞུག་འགྲོ་བ་ཀུན་གྱི་ཡིད་དུ་འོང་བ་སྐྱེ་འགྲོའི་ཉོན་མོངས་པ་གཅོད་པ་དེའི་དབང་དམ་པ༴ ན་མོ། མཆོད་འོས་རྣམས་ཀྱི༴ ཤར་གླིང་གཡོན་ན་ཕོ་ཉ་རབ་ཏུ་མྱུར་བའི་ཤུགས་ཅན་ངན་སོང་གསུམ་གྱི་སྡུག་བསྔལ་ལས་སྒྲོལ་བ་དེའི་དབང་དམ་པ༴ ན་མོ། མཆོད་འོས་རྣམས་ཀྱི༴ ལྷོ་ཛམྦུ་གླིང་ན་ལྷ་ཚངས་པ་དང་བཙུན་མོ་ཚངས་མ་འདོད་ཁམས་ཀྱི་སྡུག་བསྔལ་དང་བྲལ་ཞིང་འཁོར་བ་གྱོད་ཁྲིམས་དང་འདྲ་བའི་སྐྱོན་གྱིས་མ་གོས་པ་དེའི་དབང་དམ་པ༴ ན་མོ། མཆོད་འོས་རྣམས་ཀྱི་མཆོད་གནས་དམ་པ༴ ལྷོ་གླིང་གཡས་ན་མངགས་གཞུག་འགྲོ་བའི་ཡིད་དུ་འོང་བ་ཉོན་མོངས་པའི་དྲྭ་བ་གཅོད་པ་དེའི་དབང་དམ་པ༴ ན་མོ། མཆོད་འོས་རྣམས་ཀྱི༴ ལྷོ་གླིང་གཡོན་ན་ཕོ་ཉ་མྱུར་བའི་ཤུགས་ཅན་ངན་སོང་གསུམ་གྱི་སྡུག་བསྔལ་ལས་སྒྲོལ་བ་དེའི་དབང་དམ་པ༴ ན་མོ། མཆོད་འོས་རྣམས་ཀྱི༴ ནུབ་ན་ལྷ་ཁྱབ་འཇུག་དང་བཙུན་མོ་དཔལ་ལྷ་མོ་འཕྲིན་ལས་ཀྱིས་ཀུན་ཏུ་ཁྱབ་པ་དེའི་དབང་དམ་པ༴ ན་མོ། མཆོད་འོས་རྣམས༴ ནུབ་གླིང་གཡས་ན་མངགས་གཞུག་རྡོ་རྗེ་བདེ་བས་ཉོན་མོངས་པ་གཅོད་པ་དེའི་དབང་དམ་པ༴ ན་མོ། མཆོད་འོས་རྣམས་ཀྱི༴ ནུབ་གླིང་གཡོན་ན་ཕོ་ཉ་རྡོ་རྗེ་སྡེ་དཔོན་འགྲོ་བ་ལ་ཆོས་ཀྱི་འཁོར་ལོ་བསྐོར་བ་དེའི་དབང་དམ་པ༴ ན་མོ། མཆོད་འོས་རྣམས་ཀྱི༴ བྱང་ན་ལྷ་དབང་ཕྱུག་ཆེན་པོ་དང་བཙུན་མོ་དཀའ་ཐུབ་པ་ཟློག་མ་དུག་གསུམ་འཇོམས་པར་བྱེད་པ་དེའི་དབང་དམ་པ༴ ན་མོ། མཆོད་འོས་རྣམས༴ བྱང་གླིང་གཡས་ན་མངགས་གཞུག་རྡོ་རྗེ་རྣོན་པོ་འགྲོ་བའི་ཉོན་མོངས་གཅོད་པར་མཛད་པ་དེའི་དབང་དམ་པ༴ ན་མོ། མཆོད་འོས་རྣམས་ཀྱི་མཆོད་གནས་དམ་པ། བྱང་གླིང་གཡོན་ན་ཕོ་ཉ་དྲང་སྲོང་ཁྲོས་པའི་ཆ་བྱད་ཅན་འགྲོ་བ་ཀུན་ལ་རྣམ་པར་སྣང་བ་དེའི་དབང་དམ་པ་ཐོབ་པར་གྱུར་ཅིག །ཅེས་དབང་བསྐུར་རོ། །དེ་ལྟར་ལྷ་མིའི་ཐེག་པའི་དབང་བསྐུར་བས་མདོ་རང་ལུགས་ཀྱི་ཚོགས་ལམ་དང་པོ་འདུན་པ་སེམས་པའི་རྣལ་འབྱོར་འགྱུར་བ་མ་ངེས་པའི་ས་ནོན་པ་དང་རིགས་འདྲའི་ཡོན་ཏན་གསོས་ཐེབས་པས། རྐྱེན་འགྱུར་ལས་ཀྱི་བག་ཆགས་རགས་པ་དག །ངན་སོང་དུ་སྐྱེ་འགྱུར་ལས་ཐར་བར་བྱས། །རྣམ་གྲོལ་གྱི་ཐེག་པའི་སྒོར་འཇུག་པའི་བྱང་ཆུབ་ཀྱི་སེམས་གཡོ་བའི་སྟེགས་སུ་གྱུར། མངོན་མཐོའི་རྟེན་ཁྱད་པར་ཅན་ཐོབ་ངེས་པའི་སྐལ་པ་ཅན་དུ་བྱས་པ་ཡིན་ནོ། །རྗེས་ཀྱི་བྱ་བ་ལ་སྤྱི་དོན་གསུམ་སྟེ། ལམ་ཁྱེར་བཞི་བསྟན་པ། འགག་དྲུག་བཤད་པ། གདམས་ངག་ངང་སྒོམ་གྱི་ཁྲིད་གདབ་པའོ། །སྤྱི་དོན་དང་པོ་ལམ་ཁྱེར་ལ་བཞི་ལས། དང་པོ་ཐེག་པ་ལམ་ཁྱེར་ནི། ལྷ་མིའི་ཐེག་པ་སྟེ། དེ་ལ་དབྱེ་ན། བདེ་འདུས་ཀྱི་སྤྱི་ཆིངས་ལས། འཇུག་སྒོ་ལྟ་བ་ཚུལ་ཁྲིམས་དང་། །སྒོམ་པ་ཕྲིན་ལས་འབྲས་བུ་རྣམས། །རིམ་པ་བཞིན་དུ་ཤེས་བྱ་སྟེ། །ཞེས་པ་ལྟར་དྲུག་ལས། འཇུག་པའི་སྒོ་ནི། ངན་སོང་གི་སྡུག་བསྔལ་ལ་འཇིགས་ནས་མཐོ་རིས་ཀྱི་བདེ་འབྲས་འདོད་པས་མི་དགེ་བཅུ་སྤོང་བའི་སྒོ་ནས་འཇུག་སྟེ། དེ་ལ་མི་དགེ་བཅུ་ནི། ལུས་ཀྱི་ལས་སྲོག་གཅོད་པ། མ་བྱིན་པར་ལེན་པ། འདོད་ལོག་དང་གསུམ། ངག་གི་ལས་རྫུན། ཕྲ་མ། ངག་བཀྱལ། ཚིག་རྩུབ་དང་བཞི། ཡིད་ཀྱི་ལས། བརྣབ་སེམས། གནོད་སེམས། ལོག་ལྟ་དང་གསུམ་སྟེ། སློབ་དཔོན་རྟ་དབྱངས་ཀྱིས། ལུས་ཀྱི་དབྱེ་བ་རྣམ་གསུམ་སྟེ། །ངག་གི་དབྱེ་བ་རྣམ་པ་བཞི། །ཡིད་ཀྱི་རབ་ཏུ་དབྱེ་བ་གསུམ། །མི་དགེ་བཅུ་རུ་དེ་དག་འདོད། །ཅེས་གསུངས་སོ། །ལྟ་བ་ནི། འཇིག་རྟེན་ཕ་རོལ་དང་། ལས་རྒྱུ་འབྲས་ལ་ཡིད་ཆེས་པ་སྟེ། ཆེད་དུ་བརྗོད་པའི་ཚོམས་ལས། འཇིག་རྟེན་པ་ཡི་ཡང་དག་ལྟ། །ཆེན་པོ་གང་ལ་ཡོད་གྱུར་པ། །དེ་ནི་ཚེ་རབས་སྟོང་དུ་ཡང་། །ངན་འགྲོར་འགྲོ་བར་མི་འགྱུར་རོ། །ཞེས་སོ། །ཚུལ་ཁྲིམས་ནི། མི་དགེ་བཅུ་སྤོང་གི་གཏན་ཁྲིམས་སམ། དུས་ཁྲིམས་ཡན་ལག་བརྒྱད་པའི་གསོ་སྦྱོང་ངོ་། །སྒོམ་པ་ནི། སྤྱིར་རང་གི་འབྲས་བུ་འབྱིན་ནུས་ཀྱི་བར་དུ་གོམས་པར་བྱེད་པ་ཡིན་ལ། བྱེ་བྲག་ཁམས་གོང་མར་སྐྱེ་བ་ལ། རང་རང་གི་འོག་མ་ལ་རགས་པར་ལྟ་ཞིང་། རང་ས་ལ་ཞི་བར་ལྟ་བས། ས་འོག་མའི་ཆགས་པ་བྲལ་བྱེད་ཀྱི་ལམ་ཚད་མེད་བཞི་དང་། བསམ་གཏན་དང་། གཟུགས་མེད་པའི་སྙོམས་འཇུག་བརྒྱད་སྒོམ་པའོ། །སྤྱོད་པ་ནི། ཟག་པ་དང་བཅས་པའི་དགེ་བཅུའི་ལས་ལམ་འཁོར་བཅས་ལ་སྤྱོད་པ་སྟེ། དེའང་ལུས་ཀྱི་ལས། སེམས་ཅན་གྱི་སྲོག་སྐྱོབ་པ། སྦྱིན་པ་གཏོང་བ། ཚུལ་ཁྲིམས་བསྲུང་བ་དང་གསུམ། ངག་གི་བདེན་པར་སྨྲ་བ། མི་མཛའ་བ་བསྡུམ་པ། ཞི་ཞིང་དེས་པར་སྨྲ་བ། གཞན་གྱི་ཡོན་ཏན་བརྗོད་པ་དང་བཞི། ཡིད་ཀྱི་ཆོག་ཤེས་པ། གཞན་ལ་བྱམས་པ། ལས་འབྲས་ལ་ཡིད་ཆེས་བསྐྱེད་པ་དང་གསུམ་མོ། །འབྲས་བུ་ནི། དགེ་བའི་ལས་སྟོབས་ཆེ་ཆུང་གིས་གླིང་བཞིའི་མི་དང་འདོད་ལྷ་རིས་དྲུག་སྟེ། མཐར་ཐུག་མིའི་འཁོར་ལོས་སྒྱུར་རྒྱལ་དང་། འདོད་ལྷའི་གཞན་འཕྲུལ་དབང་བྱེད་ཀྱི་བདག་པོའི་བར་བགྲོད་ཅིང་། གཟུགས་ལ་ཆགས་བྲལ་མ་ཐོབ་ཅིང་བསམ་གཏན་བཞིའི་རོ་ལ་ཆགས་པས་གཟུགས་ཁམས་ཀྱི་ལྷ་དང་། གཟུགས་མེད་པའི་སྙོམས་འཇུག་མིང་བཞི་ལ་ལྡན་པའི་ཏིང་ངེ་འཛིན་ལ་བདག་ཏུ་བཟུང་བས་གཟུགས་མེད་སྐྱེ་མཆེད་མུ་བཞིའི་ལྷར་སྐྱེ་བ་ཡིན་ནོ། །གཉིས་པ་ལྷ་ལམ་ཁྱེར་ནི། ངན་སོང་སྦྱོང་བའི་ལྷ་རྣམ་སྣང་། ཞིང་སྦྱོང་བའི་ལྷ་མི་འཁྲུགས་པ། དུས་བཟང་གསུམ་ལས་སྟོང་གི་ལྷ་ཤཱཀ་ཐུབ། ཉའི་ལྷ་སྣང་མཐའ། ཚེས་བརྒྱད་ཀྱི་ལྷ་སྨན་བླ་སྟེ། ལྷ་དེ་དག་དྲན་ཞིང་མོས་པས་རྒྱལ་བའི་བཀའ་ལས་མི་འདའ་བར་བསླབ་པར་བྱའོ། །གསུམ་པ་སྙིང་པོ་ལམ་ཁྱེར་ནི། རྣམ་སྣང་གི་དུརྒ། མི་འཁྲུག་པའི་ཀཾ་ཀ་ནི། ཐུབ་པའི་མུ་ནེ། སྣང་མཐའི་པདྨ་དྷ་རི། སྨན་བླའི་བྷཻ་ཥ་ཛྱེའི་གཟུངས་རྣམས་བཟླ་ཞིང་། གཟུངས་མི་ཤེས་ན་ལྷ་སོ་སོའི་མཚན་ནས་བརྗོད་པའི་སྐྱབས་འགྲོ་ལ་འབད་དོ། །དེ་ཡང་དུས་བཟང་གི་ལྷ་གསུམ་ནི་དུས་དེ་དང་དེའི་ཚེ་སྔ་དྲོ་གསོ་སྦྱོང་བླངས་ནས་སོ་སོའི་ལམ་ཁྱེར་གཉིས་ལ་བསླབ་པ་ཡིན་པས། རྒྱུན་དུ་རྣམ་སྣང་དང་མི་འཁྲུགས་པའི་ལམ་ཁྱེར་ལ་གཙོ་བོར་དྲིལ་བས་ཆོག་གོ། །བཞི་པ་བསླབ་བྱ་ལམ་དུ་ཁྱེར་བ་ནི། སྤྱིར་ངོ་ཚ་ཁྲེལ་ཡོད་ཀྱིས་ཀུན་ནས་བསླངས་ཏེ་ལུས་ངག་གི་བྱ་བ་ཡ་རབས་ཀྱི་ཚུལ་དང་མཐུན་པའི་སྤྱོད་པ་གསུམ་ལ་བསླབ་དགོས་ཏེ། དམ་པའི་རྒྱན་ལ། བཀུར་བར་འོས་པ་ལེགས་ཁུར་ཞིང་། །མགོན་མེད་རྣམས་ལ་ལྷག་པར་བྱམས། །བྱས་ལ་དྲིན་ལན་མི་བརྗེད་པ། །དམ་པ་རྣམས་ཀྱི་མཛད་སྤྱོད་ཡིན། །ཞེས་གསུངས་པ་ལྟར་རོ། །ཁྱད་པར་མི་ཆོས་བཅུ་དྲུག་བསླབ་སྟེ། འབྱེད་པ་ལེ་ཆུང་ལས། དཀོན་མཆོག་གསུམ་ལ་དད་པ་སྐྱོ་ངལ་མེད་པར་བྱེད་པ་དང་། དོན་དམ་པར་དམ་པའི་ཆོས་བཙལ་བ་དང་། གཙུག་ལག་བཟང་པོ་ལ་མཁས་པར་སློབ་པ་དང་། །ཅི་ལའང་དྲན་ཅིང་ཚོད་ཟིན་པ་བྱ་བ་དང་། མ་བཅོལ་བའི་ལས་ལ་གཏོགས་འདོད་མི་བྱེད་པ་དང་། མིག་མཐོ་སར་བལྟ་ཞིང་གོང་མ་རྣམས་ཀྱི་རྗེས་སྙེག་པ་དང་། དུས་གསུམ་གྱི་ཕ་མ་ལ་དྲིན་ལན་བསླན་པ་དང་། ཕུ་ནུ་དང་ཕ་ཚན་ནང་དུ་ཤོངས་ཡངས་ཆེ་བ་དང་། རིམ་པ་རྒན་པ་ལ་བཀུར་བསྟི་བྱ་བ་དང་། ཁྱིམ་མཚེས་ལ་བྱམས་པར་བྱ་བ་དང་། གཉེན་གྲོགས་ཀྱི་དགེ་བཤེས་ལ་དཀའ་ལས་ཀྱི་ཕན་འདོགས་པ་དང་། སྲིད་ཀྱིས་འབྲེལ་བའི་ཉེ་རིང་ལ་ཆབ་གང་མཐར་དབྱུང་བ་དང་། རིག་བྱེད་བཟོ་ལ་མཁས་པས་གཞན་ལ་ཕན་པ་དང་། ལྟོས་པའི་མི་དྲིན་གྱིས་སྐྱབས་འོག་ཏུ་གཞུག་པ་དང་། ངན་བྱེད་ཀྱི་གྲོས་བཀག་ནས་རྒྱལ་ཁམས་བདེ་ཡངས་ཀྱི་གྲོས་གཞི་འདིང་བ་དང་། ལས་མཐའ་ཆོས་ལ་གཏད་དེ་ཕྱི་མར་བུ་སྨད་ཀྱིས་བྱང་ཆུབ་ཀྱི་གཞི་ཐོབ་པར་བྱའོ། །ཞེས་པ་ལྟར་མིའི་ཆོས་ལུགས་གཙང་མ་ལ་བསླབ་པར་བྱའོ། །སྤྱི་དོན་གཉིས་པ་འགག་དྲུག་བཤད་པ་ནི། གཞུང་ལས། གང་དུ་གང་གི་གང་ལ་ཅི་ཕྱིར་དགོས། །འདི་ནི་ལྷ་མིའི་ཐེག་པའི་འགག་དྲུག་ཡིན། །ཞེས་གསུངས་པ་ལྟར། གང་དུ་བཤད་པའི་གནས་ནི། ཆུ་བོ་ནཻ་རཱཉྫ་ནའི་འགྲམ་དུའོ། །གང་གིས་བཤད་པའི་སྟོན་པ་ནི། ཡང་དག་པར་རྫོགས་པའི་སངས་རྒྱས་ཐུབ་པ་ཆེན་པོའོ། །གང་ལ་བཤད་པའི་འཁོར་ནི། བྱང་ཆུབ་སེམས་དཔའ་དོན་ཐམས་ཅད་གྲུབ་པ་ལའོ། །གང་བཤད་པའི་ཐེག་པ་ནི། མངོན་པར་མཐོ་བ་ལྷ་མིའི་ཐེག་པའོ། །ཅིའི་ཕྱིར་ན། ཨཱ་ལི་ཀཱི་ལིའི་ཡི་གེའི་དབང་བསྐུར་བས་ངན་འགྲོ་ལས་ཐར་ནས་མཐོ་རིས་ཀྱི་རྟེན་ཐོབ་པའི་ཆེད་དུའོ། །དེ་ལྟར་བསྟན་པའི་དགོས་པ་ནི། རྣམ་གྲོལ་གྱི་ཐེག་པའི་ལམ་སྟེགས་སུ་འགྲོ་བའི་དགོས་པ་ཡོད་དོ། །སྤྱི་དོན་གསུམ་པ་གདམས་ངག་ངང་སྒོམ་གྱི་ཁྲིད་ནི། རང་གི་སྤྱི་བོར་ཟླ་བའི་དཀྱིལ་འཁོར་ཉ་གང་བའི་སྟེང་ན་བཅོམ་ལྡན་འདས་ཤཱཀྱ་ཐུབ་པ་རྟག་ཏུ་བཞུགས་པར་མོས་ལ། དེ་ཉིད་ཡང་དང་ཡང་དུ་གསལ་གདབ་ཅིང་རྗེས་སུ་དྲན་པའི་སྒོ་ནས་རང་གི་བྱ་བྱེད་ཀྱི་བླང་དོར་ཐམས་ཅད་དེས་བསྟན་པའི་བཀའ་ལས་མི་འདའ་བར་བསླབ་པར་བྱའོ་ཞེས་དྲན་པ་དང་ཤེས་བཞིན་གྱིས་མཉམ་པར་འཇོག །དེ་ནས་སེམས་ཅན་ཐམས་ཅད་བདེ་བ་ཚད་མེད་པ་དང་ལྡན་པར་གྱུར་ཅིག་སྙམ་དུ་དྲན་པ་རྩེ་གཅིག་ལ་མཉམ་པར་འཇོག་པ་སོགས་ཚད་མེད་བཞི་བསྒོམ་པར་བྱ། དེ་ནས་ངང་སྒོམ་ཆུང་ངུ་ནས་འབྱུང་བ་ལྟར་བསམ་གཟུགས་ཀྱི་ཏིང་ངེ་འཛིན་སྒོམ་སྟེ། འདི་ལྟར། འདོད་ཡོན་གྱི་ཉེས་དམིགས་དང་བསམ་གཏན་གྱི་ཕན་ཡོན་ཤེས་པར་བྱས་ནས། སྟན་བདེ་བ་ལ་ལུས་གནད་གཡོ་མེད་དུ་བཅིངས། དམིགས་པའི་གནད་སེམས་ཕྱིར་མི་གཡེང་བར་ནང་དུ་གླན་ཏེ་དམིགས་པ་ལ་དང་པོར་རྩེ་གཅིག་ཏུ་འཇོག །དེ་ནས་རྣམ་རྟོག་སྐྱེར་མི་འཇུག་པར་དེ་ཉིད་ཀྱི་སྟེང་དུ་མ་བཅོས་པར་འཇོག །དེ་ལྟར་སེམས་གནས་པའི་ཐབས་དགུ་སོགས་ཤེས་པར་བྱས་ནས་མཉམ་པར་བཞག་པས། འདོད་ཡོན་ལ་ཆགས་སྡང་དང་བྲལ་བའི་ཏིང་ངེ་འཛིན་རྩེ་གཅིག་པ་དང་། ལུས་སེམས་ལ་ཤིན་སྦྱངས་ཐོབ་པའི་དགའ་བདེ་སྐྱེ་ཞིང་། འདོད་ཡོན་ཕྲ་མོས་གོས་མ་གོས་ཀྱི་རྟོག་དཔྱོད་དང་བཅས་པ་སྟེ་བསམ་གཏན་དང་པོའོ། །དེ་ཉིད་བརྟན་ནས་ནང་དུ་ཤེས་པ་རང་ལུགས་སུ་བཞག་སྟེ་བསྐྱངས་པས། སྔར་གྱི་རྟོག་དཔྱོད་ཀྱི་ཞེན་པ་ནུབ་ཅིང་ལུས་སེམས་ལ་དགའ་བདེ་སྔར་ལས་ལྷག་པ་སྐྱེས་པ་ནི་བསམ་གཏན་གཉིས་པའོ། །དེ་ནས་དགའ་བ་ལ་ཞེན་མེད་ཀྱི་རྣལ་འབྱོར་སྒོམས་པས་ལུས་ཀྱི་དགའ་བདེའི་ཞེན་པ་ནུབ་ནས་སེམས་བདེ་གཡོ་མེད་ཀྱིས་ཁྱབ་པའི་ཏིང་ངེ་འཛིན་ནི་བསམ་གཏན་གསུམ་པའོ། །དེ་ནས་སེམས་ཀྱི་བདེ་བ་ལ་ཆགས་ཞེན་མེད་པའི་རྣལ་འབྱོར་བཏང་སྙོམས་ཡོངས་སུ་དག་པ་དང་། དྲན་པ་ཡོངས་སུ་དག་པ་ཅན་བསྒོམས་པས་རླུང་གི་གཡོ་བ་འགགས་ཤིང་བདེ་བའི་ཞེན་པ་ནུབ་ནས་སེམས་གསལ་དྭངས་ལ་རྩེ་གཅིག་ཏུ་གནས་པ་ནི། བསམ་གཏན་བཞི་པའོ། །དེ་ལྟར་སློབ་དཔོན་སངས་རྒྱས་གསང་བས། ཚད་མེད་བཞི་དང་བསམ་གཏན་བཞི། །རིམ་པས་སོ་སོར་བདག་འཛིན་ཅིང་། །གཟུགས་རྣམས་ཀུན་ལ་བདག་ཏུ་རྟོག །འདི་ནི་ཚངས་གནས་རིམ་པར་སྐྱེ། །ཞེས་གསུངས་སོ། །དེ་ནས་བསམ་གཏན་བཞིའི་འདུ་ཤེས་ལ་ཡིད་བྱུང་ནས། གཟུགས་མེད་པའི་སྙོམས་འཇུག་བཞི་སྒོམ་སྟེ། དེ་ལ་གཟུགས་སྣང་སྣ་ཚོགས་པ་འདི་དག་ནམ་མཁའ་དང་འདྲ་བའོ་ཞེས་སྣང་མེད་ཀྱི་ཏིང་ངེ་འཛིན་ལ་རྩེ་གཅིག་ཏུ་བཞག་པས་སྣང་བ་ཐམས་ཅད་རིམ་གྱིས་ནུབ་ནས་ནམ་མཁའ་ལྟ་བུའི་སྟོང་ཉིད་ཀྱི་ངང་ལ་གནས་པ་ནི་ནམ་མཁའ་མཐའ་ཡས་སོ། །དེ་ལས་འདས་ནས་སེམས་རང་གི་ངོ་བོ་ལ་གཡོ་མེད་དུ་བཞག་པས་སྔར་གྱི་སྟོང་འཛིན་གྱི་འདུ་ཤེས་དེ་ཡང་ནུབ་ནས་རྣམ་ཤེས་རིག་ཙམ་མཐའ་དབུས་མེད་པ་ལ་གནས་པ་ནི་རྣམ་ཤེས་མཐའ་ཡས་སོ། །དེ་ནས་རྣམ་ཤེས་ཀྱི་ངོ་བོ་ཡང་སྟོང་ཉིད་དངོས་མེད་ཅི་ཡང་མེད་པའོ་ཞེས་རྩེ་གཅིག་ཏུ་བསྒོམས་པས་རྣམ་ཤེས་ཀྱི་འཛིན་པའང་རིམ་གྱིས་ནུབ་ནས་གཟུགས་སེམས་ཀྱི་མཚན་མ་ཅུང་ཟད་ཀྱང་མེད་པའི་ངང་ལ་གནས་པ་ནི་ཅི་ཡང་མེད་པའོ། །དེ་ནས་འདས་དང་ཆོས་གང་ལའང་ཡོད་པ་དང་མེད་པའི་འཛིན་པ་དོར་ཏེ་ཅི་ཡང་ཡིད་ལ་མི་བྱེད་པ་རྩོལ་མེད་དུ་བཞག་པས། ཅི་ཡང་མེད་པའི་འཛིན་པའང་གྲོལ་ནས་འཇིག་རྟེན་པའི་མི་རྟོག་རབ་ཀྱི་རྩེ་མོར་ཕྱིན་པ་ནི་སྲིད་རྩེའི་སྙོམས་འཇུག་གོ། །དེ་ལྟར་ཡང་སྔ་མ་ལས། མཉམ་དང་གཟུགས་མེད་མ་རྟོགས་ནས། །མིང་གཞི་མེད་པར་མ་ཤེས་ཏེ། །སྐྱེ་མཆེད་བཞི་ལ་གནས་གྱུར་ན། །སྲིད་པའི་རྩེ་མོའི་ས་རུ་སྐྱེ། །ཞེས་གསུངས་སོ། །དེས་ན་ཇི་སྐད་དུ། འཇིག་རྟེན་དང་པོ་བསམ་གཏན་བཞི། །སྙོམས་འཇུག་བཞི་གོལ་ས་དགུ་སྟེ། །ཞེས་པས་བསམ་གཟུགས་བརྒྱད་ཀྱི་སྟེང་དུ་འདོད་ཁམས་ཀྱི་ས་གཅིག་སྟེ་གོལ་ས་དགུར་ལམ་རིམ་དུ་གསུངས་མོད། དེ་ལྟ་ནའང་འཇིག་རྟེན་ལས་འདས་པའི་ཏིང་ངེ་འཛིན་གྱི་རྟེན་དུ་འགྱུར་བ་མི་འགལ་ཞིང་། ཁྱད་པར་དུའང་ལམ་གོང་མའི་ཡོན་ཏན་གྱི་རྟེན་དུ་འགྲོ་བ་ལ་བསམ་གཏན་བཞིའི་ཏིང་ངེ་འཛིན་བཟང་བས་དེ་ཉིད་ལ་འབད་པར་བྱའོ། །དེ་ལ་སྤྱིར་མདོ་དབང་ཐོས་པའི་ཤེས་རབ་ཅན་ལ་དབང་བསྐུར་དུ་བྱེད་པ་དང་། བསམ་པའི་ཤེས་རབ་ཅན་ལ་བཤད་པར་བྱེད་པ་དང་། སྒོམ་པའི་ཤེས་རབ་ཅན་ལ་ཁྲིད་དུ་འདེབས་པའི་ཕྱག་བཞེས་ལྟར་ལས། ད་རེས་འདིར་དབང་གཙོ་བོར་བྱས་པས་ཞར་བྱུང་དུ་གཞན་གཉིས་སྦྲེལ་བའི་ལུགས་ཏེ། ཚུལ་དེས་ལྷ་མིའི་ཐེག་པའི་དབང་བསྐུར་མན་ངག་དང་བཅས་པ་ལེགས་པར་གྲུབ་པས། དེ་ལྟར་གདམས་པའི་དོན་རྣམས་ལས་ནམ་ཡང་མི་འདའ་བར་བསྒྲུབ་པར་བགྱིའོ་སྙམ་པས། གཙོ་བོས་ཇི་ལྟར་སོགས་ཀྱིས་ཁས་བླངས། གཏང་རག་གི་མཎྜལ་ཕུལ། དེང་ནས་བརྩམས་ཏེ་སོགས་དང་། དགེ་བ་བསྔོ་བ་སྔར་ལྟར་བྱས་རྗེས་སློབ་མ་རྣམས་ཅི་བདེར་བཏང་། དེ་ནས་རྗེས་ཆོག་རྣམས་སྒྲུབ་ཐབས་ལྟར་བྱའོ། །མན་ངག་རྩ་བ་མ་འཆུགས་ཤིང་། །བརྗོད་བདེས་ལེགས་བརྒྱན་དབང་ཆོག་ཁྲིགས། །བཀླག་པ་ཙམ་གྱིས་ཕྱག་བཞེས་ཆོས། །རྟོགས་བྱེད་ལེགས་བཤད་ངོ་མཚར་དཔལ། །ལྷ་མིའི་ཐེག་པའི་དབང་ཆོག་གི་ལེ་ཚན་ནོ།། །།
༈ ༀ་སྭ་སྟི། འགྱུར་བཅས་བདེ་མེད་འཁོར་མཚོ་ལས། །ཉེར་ཞི་རྡོ་རྗེ་རིན་པོ་ཆེའི། །གླིང་དུ་སྒྲོལ་མཛད་དེད་དཔོན་ལ། །གུས་བཏུད་ཉན་ཐོས་དབང་ཆོག་བཤད། །ད་ནི་གཉིས་པ་ཉན་ཐོས་ཀྱི་ཐེག་པའི་དབང་ནི། དཀྱིལ་འཁོར་བཤམ་སྒྲུབ་གཏོར་ཆོག་དང་བཅས་པ་སྒྲུབ་ཐབས་ལྟར་གྲུབ་རྗེས། བདག་འཇུག་གི་དོད་ནི། སློབ་དཔོན་བདག་ཉིད་ཤཱཀ་ཐུབ་ཏུ་མོས་པའི་སྤྱི་བོར་རིན་པོ་ཆེ་འབར་བ། དེའི་འོད་ཀྱིས་དཀྱིལ་འཁོར་གྱི་ལྷ་དང་ཕྱོགས་བཅུའི་རྒྱལ་བ་སྲས་དང་བཅས་པའི་བྱིན་རླབས་འོད་ཟེར་གྱི་རྣམ་པར་བསྡུས་ཏེ་རང་ལ་ཐིམ་པས་རྗེས་སུ་གནང་བ་ཐོབ། ཡང་སྤྱི་བོའི་འོད་ཀྱིས་བསྐུལ་བས་དཀྱིལ་འཁོར་ལ་བཀོད་པའི་སྟོན་པ་སངས་རྒྱས་འཁོར་འཕགས་པ་ཉན་ཐོས་ཀྱི་དགེ་འདུན་དང་བཅས་པ་མར་མེ་གཅིག་ལས་གཉིས་ཆད་ཀྱི་རྣམ་པར་བྱོན་པ་སྤྱི་བོ་ནས་ཐིམ་པའི་བྱིན་རླབས་ཀྱིས་སྡུག་བསྔལ་དང་ཀུན་འབྱུང་འགགས་ན། འགོག་ལམ་གྱི་ཡོན་ཏན་ཁྱད་པར་ཅན་རྒྱུད་ལ་སྐྱེས་པར་བསམ་པའོ། །དེ་ནས་སློབ་མ་གཞུག་པ་ནི། ཁྲུས་བྱ། བགེགས་གཏོར་བཏང་ལ་མཚམས་བཅད། སེམས་བསྐྱེད་དང་ཆོས་ཉན་པའི་ཀུན་སྤྱོད་གསལ་འདེབས་པ་སྔོན་དུ་འགྲོ་བས། འདིར་གང་གསན་པར་བྱ་བའི་ཆོས་ནི། ཞེས་པ་ནས། ཐོག་མར་མདོ་ཡོངས་རྫོགས་ཀྱི་དབང་དུ་བྱས་པའི་ཕྱི་དབང་རྒྱུད་ཀྱི་ཆུ་བོའི་ཡན་ལག་གི་དཀྱིལ་འཁོར། ཞེས་པའི་བར་ལྷ་མིའི་དབང་ལྟར་ལས། རྒྱས་བསྡུས་སྐབས་ཐོབ་ཀྱི་སྤྲོ་བསྡུ་བྱས་རྗེས། གཉིས་པ་ཉན་ཐོས་ཀྱི་ཐེག་པའི་དཀྱིལ་འཁོར་དུ་དབང་བསྐུར་བ་སྐབས་སུ་བབས་པ་ཡིན། དེ་ལའང་གཉིས་ལས། སློབ་དཔོན་གྱི་བྱ་བ་རྣམས་སྔར་སོང་ནས། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ་དབང་ཞུ་བའི་ཡོན་དུ་མཎྜལ་ཕུལ་མཛོད། ཅེས་དང་། དེ་ལྟར་མཎྜལ་ཕུལ་ནས་གསོལ་བ་གདབ་པའི་སླད་དུ། འགོག་བདེན་དང་ལམ་བདེན་གྱིས་བསྡུས་པའི་དོན་དམ་པའི་དཀོན་མཆོག་གསུམ་ལ་ཡིད་ཆེས་ཀྱི་དད་པ་བསྐྱེད་ནས། དེ་མཚོན་བྱེད་དཀྱིལ་འཁོར་དུ་བཀོད་པའི་སྟོན་པ་སངས་རྒྱས་དང་། མདོའི་གླེགས་བམ། འཕགས་པའི་དགེ་འདུན་དང་བཅས་པ་རྣམས་ལ་ཡན་ལག་ལྔ་ས་ལ་ཕབ་པའི་ཕྱག་ལན་གསུམ་མཛད་འཚལ། ཞེས་ཕྱག་འཚལ་དུ་བཅུག །དེ་ནས་སློབ་དཔོན་སྟོན་པ་ཐུབ་པའི་དབང་པོར་གསལ་བའི་གཙུག་ཏོར་གྱི་རྩེ་མོར་ནོར་བུ་རིན་པོ་ཆེ་འོད་ཟེར་མཐའ་ཡས་པར་འཕྲོ་བ་ལས་རང་གི་འདོད་དགུ་མ་ལུས་པ་འབྱུང་བར་མོས་ལ་སྙིམས་པ་མེ་ཏོག་དང་བཅས་པས་ཐལ་མོ་སྦྱར་ཏེ་འདིའི་རྗེས་ཟློས། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་བ། །དེ་རིང་བཤད་པའི་རིན་ཆེན་གཏེར། །གཙོ་བོས་བདག་ལ་བཀའ་དྲིན་གསོལ། །ཞེས་ལན་གསུམ། དེ་ནས་སྡོམ་པ་འབོགས་པའི་ཆོ་ག་ནི། སློབ་དཔོན་ལ་ཕྱག་གསུམ་བཙལ་ནས་པུས་བཙུགས་ཐལ་སྦྱར་གྱིས་འདུག་ཏུ་བཅུག་སྟེ། ཁྱེད་ཅག་ཉན་ཐོས་ཀྱི་ཐེག་པའི་སྒོར་འཇུག་པ་ལ། ཇི་སྐད་དུ། ཚུལ་གནས་ཐོས་དང་བསམ་ལྡན་པ། །བསྒོམ་པ་ལ་ནི་རབ་ཏུ་སྦྱར། །ཞེས་གསུངས་པ་ལྟར་ཡོན་ཏན་གྱི་གཞི་རྟེན་དུ་སོ་སོ་ཐར་པའི་སྡོམ་པ་བླང་བ་གལ་ཆེ། དེས་བླ་མ་འགའ་ཞིག་གི་ཕྱག་བཞེས་སུ་འདུལ་བ་རང་གཞུང་ལྟར་གྱི་ཚིགས་གསུམ་འབོགས་པའི་ལས་ཆོག་རྒྱས་པར་མཛད་པ་བྱུང་ནའང་། བསྒྲུབ་བྱ་ཉིད་རབ་ཏུ་བྱུང་བ་འདོད་ཅིང་ནུས་པ་དང་། ལས་གྲྭ་སོགས་མཐུན་རྐྱེན་འཛོམ་ན་སྐབས་འདིར་ཉན་ཐོས་རང་ལུགས་ཀྱི་ཆོ་གའི་སྒོས་ཆོས་སྦྱར་ན་འགལ་བ་མེད་པ་ལ་དགོངས་པ་ཡིན་མོད་ཀྱི། དེ་ལྟ་ནའང་འདིར་སློབ་དཔོན་དང་སློབ་མ་གཉིས་ཀ་རྟེན་རབ་ཏུ་བྱུང་བ་དང་ཁྱིམ་པ་ལ་མཐའ་གཅིག་ཏུ་མ་ངེས་པས་ན། ཕྱག་བཞེས་ཞིབ་ཏུ་རེ་བ་དེ་ཉིད་ལེགས་པ་མ་ཡིན་ཞིང་། དེ་བས་ན་ཡིག་རྙིང་རྣམས་ཀྱི་དགོངས་པ་ལྟར། ཆོ་གའི་རྣམ་བཞག་ཉན་ཐོས་དང་ཚུལ་འདྲ་རུང་ཙམ་གྱི་ཚིགས་གསུམ་གྱི་དོད་ཡོད་པ་ཙམ་ལས། ཆོ་ག་རང་གི་ངོ་བོ་ཐེག་ཆེན་སོ་ཐར་ཐུན་མོང་མ་ཡིན་པའི་ལུགས་སུ་མཛད་པའི་ཕྱག་བཞེས་ཉིད་ལེགས་པས། དེ་ལྟར་སྒྲུབ་པར་བྱེད་པ་ལ། སྤྱིར་ཉན་རང་གི་ཐེག་པའི་བསམ་པ་ནི། འཁོར་བའི་སྡུག་བསྔལ་ལས་ཐར་འདོད་ཀྱི་ཞི་བདེ་དོན་གཉེར་ཏེ། སྐྱེས་བུ་འབྲིང་པོའི་བློ་ཡིན་ནའང་། ད་རེས་བསམ་པ་ཡར་ལྡན་དུ་བྱས་ཏེ། སེམས་ཅན་ཐམས་ཅད་ཀྱི་དོན་དུ་མཐའ་གཉིས་ལ་མི་གནས་པའི་མྱང་འདས་ཐོབ་པར་བྱ་བའི་ཆེད་དུ་ཐོག་མར་དགེ་བསྙེན་གྱི་སྡོམ་པ་བླང་སྙམ་པས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་འཕགས་པ་ཉན་ཐོས་ཐམས་ཅད་དང་། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག །དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ་དགེ་བསྙེན་དུ་བཟུང་དུ་གསོལ། ཞེས་ལན་གསུམ་དང་། ཐབས་ལེགས་བྱའོ། །དེ་ནས་རབ་ཏུ་བྱུང་བའི་ཐོག་མར་བར་ཆད་དྲི་བའི་དོད། ཁྱེད་ཅག་བསྟན་པའི་སྒོར་རབ་ཏུ་དབྱུང་བ་ལ། སྡོམ་པ་སྐྱེ་བའི་འགལ་རྐྱེན་དུ་གྱུར་པའི་བར་ཆད་གང་ཡང་མ་མཆིས་སམ། གཞན་དང་འགྲན་པའི་ཆེད་དམ། གཞན་གྱིས་ལེན་དུ་བཅུག་པ་མ་ཡིན་ནམ། རང་གཞན་གྱི་དོན་གཉིས་བསྒྲུབ་པའི་ཕྱིར་རབ་་ཏུ་བྱུང་བར་འདོད་དམ། ཞེས་པའི་ལན་དུ་རིམ་པར། མ་མཆིས་ལགས། མ་ཡིན་ལགས། འདོད་ལགས་ཞེས་བརྗོད་དུ་གཞུག་གོ། །ཁྱེད་རྣམས་རབ་ཏུ་དབྱུང་བ་ལ། སྤྱིར་དཀོན་མཆོག་བརྩེགས་པ་ལས། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བྱམས་པ་དང་། བྱང་ཆུབ་སེམས་དཔའ་སྤྱོད་པ་རྣམ་པར་དག་པ་ལ་འདི་སྐད་ཅེས་བཀའ་སྩལ་ཏོ། །སྐྱེས་བུ་དམ་པ་ཁྱོད་གཉིས་ཀྱིས་ཁྱིམ་བདག་འདི་རྣམས་རབ་ཏུ་ཕྱུངས་ལ་བསྙེན་པར་རྫོགས་པར་གྱིས་ཤིག །ཅེས་བཅོམ་ལྡན་འདས་ཀྱིས་གནང་ནས། བྱང་ཆུབ་སེམས་དཔའ་བྱམས་པས་ཁྱིམ་བདག་དགུ་སྟོང་རབ་ཏུ་ཕྱུང་ངོ་། །བྱང་ཆུབ་སེམས་དཔའ་སྤྱོད་པ་རྣམ་པར་དག་པས་ཁྱིམ་བདག་བདུན་སྟོང་རབ་ཏུ་ཕྱུང་ངོ་། །ཞེས་གསུངས་པ་ལྟར་བྱམས་པ་དང་འཇམ་དབྱངས་ཁྱིམ་པའི་ཆ་ལུགས་སུ་བཞུགས་པས་བསྒྲུབ་བྱ་ཁྱིམ་པའི་གཟུགས་མ་བསྒྱུར་བར་རབ་བྱུང་བསྙེན་རྫོགས་ཕོག་པ་ལྟར་འདིར་ཡང་དེ་དག་དང་རྗེས་སུ་མཐུན་པར་འབོགས་བྱེད་སློབ་དཔོན་དང་བསྒྲུབ་བྱ་སློབ་མ་གཉིས་ཀ་རབ་བྱུང་དང་ཁྱིམ་པ་གོས་དཀར་ཅན་ལ་མཐའ་མ་བཀག་པས་ན་ཐེག་ཆེན་ཐུན་མོང་མ་ཡིན་པའི་ལུགས་སུ་སྣང་ཞིང་། རྒྱུ་མཚན་དེས་རྟགས་བསྒྱུར་བ་ལ་ཆེད་དུ་མ་ལྟོས་མོད། འོན་ཀྱང་སངས་རྒྱས་འཇིག་རྟེན་དུ་བྱོན་ནས་དེའི་རྣམ་ཐར་གྱི་རྗེས་སུ་འཇུག་པར་མོས་པའི་རྟེན་ཙམ་དུ་ཁྱིམ་པ་ཡིན་ནའང་རྟགས་སྟེར་བའི་དོད་ཙམ་ཞིག་མཛད་པའི་ཕྱག་ལེན་ལྟར། ལུས་ཀྱི་བྱ་བྱེད་དང་། གོས་དང་སྣོད་སྤྱད་ཀྱི་རྟགས་རྣམས་བླངས་ནས་སྟོན་པ་སངས་རྒྱས་ཀྱི་རྗེས་སུ་འཇུག་པར་བགྱིའོ་སྙམ་པའི་མོས་པ་མཛད་འཚལ། ཞེས་བརྡ་སྦྱར་ཏེ། བསྟན་པ་ལ་དགའ་བའི་ལྷ་རྣམས་དགྱེས་པ་བསྐྱེད་དུ་གསོལ། ཞེས་གཙུག་ཕུད་བྲེགས་ནས། དཀོན་མཆོག་གསུམ་ལས་གྲས་པའི་མིང་བཏགས། དེ་ནས་བླ་གོས་དང་ཐང་གོས་འདིང་བ་རྣམས་གཏད་དེ། ཇི་ལྟར་བཅོམ་ལྡན་འདས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ། ཤཱཀྱ་སེང་གེ། ཤཱཀྱའི་རྒྱལ་པོ་གཙོ་བོ་དེ་རབ་ཏུ་བྱུང་བའི་ན་བཟའ་དུར་སྨྲིག་གི་ཆོས་གོས་འདི་ཁྱོད་ལ་བསྐོན་གྱི། ཁྱོད་ཀྱིས་འཕངས་ཤིང་གཅེས་པའི་ཚད་མིག་གི་འབྲས་བུ་ལྟར་གྱིས་ལ། མི་འབྲལ་བའི་ཚད་ཤ་དང་རུས་པ་ལྟར་གྱིས་ལ་གྱོན་ཞིག །ཁྱོད་ཀྱི་གོས་ཀྱི་བྱ་བ་གྱིས་ལ་བག་ཡོད་པར་སྤྱོད་ཅིག །ན་མོ། དཀོན་མཆོག་གསུམ་གྱི་བདེན་པའི་བྱིན་རླབས་ཀྱིས། །སྐལ་ལྡན་ཁྱོད་ལ་ན་བཟའ་དུར་སྨྲིག་གི་རྒྱལ་མཚན་འདི་གཏད་པས་ཚེ་རབས་ཀུན་ཏུ་ངོ་ཚ་ཁྲེལ་ཡོད་ཀྱི་གོས་གྱོན་ཏེ། ཚུལ་ཁྲིམས་རྣམ་པར་དག་པའི་རྒྱན་དང་ལྡན་པར་གྱུར་ཅིག །ལྷུང་བཟེད་དང་ཆུ་ཚགས་གཏད་དེ། ཇི་ལྟར་བཅོམ་ལྡན་འདས་ཤཱཀྱ་ཐུབ་པ་མངོན་པར་རྫོགས་པ་སངས་རྒྱས་པ་དེའི་ཟས་ཀྱི་བྱ་བ་བྱེད་པའི་ལྷུང་བཟེད་ཆུ་ཚགས་དང་བཅས་པ་འདི་ཁྱོད་ལ་གཏད་པས་སྲོག་ཆགས་ལ་མི་གནོད་པའི་སྒོ་ནས་ཟས་ཀྱི་བྱ་བ་ལེགས་པར་གྱིས་ཤིག །ན་མོ། དཀོན་མཆོག་གསུམ་གྱི་བདེན༴ སྐལ་ལྡན་ཁྱོད་ལ་ལྷུང་བཟེད་དང་ཆུ་ཚགས་གཏད་པས་མུ་གེའི་བསྐལ་པ་ལས་ཐར་བར་གྱུར་ཅིག །ཅེས་དང་། གཞན་ཡང་མེ་ཏོག་འཐོར་བཞིན་དུ། ན་མོ། དཀོན་མཆོག་གསུམ་གྱི་བདེན་པའི༴ ཚེ་དང་ལྡན་པ་འདི་རྣམས་ཀྱི་ཚུལ་ཁྲིམས་ཀྱི་ཕུང་པོ་དང་། ཏིང་ངེ་འཛིན་གྱི་ཕུང་པོ་དང་། ཤེས་རབ་ཀྱི་ཕུང་པོ་དང་། རྣམ་པར་གྲོལ་བའི་ཕུང་པོ་དང་། །རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོ་ཡོངས་སུ་རྫོགས་པར་གྱུར་ཅིག །ཅེས་སྨོན་ལམ་གདབ། དེ་ལྟར་མིང་དང་རྟགས་སྤོས་པའི་དགོས་པའང་བསམ་པ་བརྗེ་བ་ཡིན་པས། འཁོར་བ་འདི་ཐམས་ཅད་སྡུག་བསྔལ་གྱི་གནས་མེའི་འོབས་ལྟ་བུར་གྱུར་པ་ལས་རང་གཞན་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ཀྱི་གནས་སུ་སྒྲོལ་བར་བྱ། །དེའི་ཆེད་དུ་ཁྱིམ་གྱི་འདུ་འཛི་ལས་རབ་ཏུ་དབྱུང་བར་བྱའོ་སྙམ་པས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ། འཕགས་པ་ཉན་ཐོས་ཐམས་ཅད་དང་སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་ཇི་སྲིད་འཚོའི་བར་དུ། རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཆོས་ལ་སྐྱབས༴ ཚོགས་རྣམས་ཀྱི་མཆོག །དགེ་འདུན་ལ༴ སངས་རྒྱས་ཤཱཀྱ་ཐུབ་པ། ཤཱཀྱ་སེང་གེ། ཤཱཀྱའི་རྒྱལ་པོ་གཙོ་བོ་དེ་རང་ཏུ་བྱུང་བའི་རྗེས་སུ་སློབ་པར་འཚལ་གྱིས། བདག་རབ་ཏུ་དབྱུང་དུ་གསོལ། ལན་གསུམ་དང་། ཐབས་ལེགས་བྱ། དེ་ནས་རང་གཞན་ཐམས་ཅད་འཁོར་བ་ལས་རྣམ་པར་གྲོལ་བར་བྱ་བའི་ཆེད་དུ་དགེ་ཚུལ་གྱི་སྡོམ་པ་བླངས་ཏེ། འཕགས་པ་དགྲ་བཅོམ་པ་རྣམས་ཀྱི་གདུང་གསོབ་པར་བྱའོ་སྙམ་པས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་སེམས་དཔའ། འཕགས་པ་ཉན་ཐོས་ཐམས་ཅད་དང་། སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་ཇི་སྲིད་འཚོ་བའི་བར་དུ་རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག །ཆོས་ལ་སྐྱབས་སུ༴ ཚོགས་རྣམས་ཀྱི་མཆོག །དགེ་འདུན༴ བདག་ཇི་སྲིད་འཚོའི་བར་དུ་དགེ་ཚུལ་དུ་བཟུང་དུ་གསོལ། །ཞེས་ལན་གསུམ་དང་། ཐབས་ལེགས་བྱ། དེ་ནས་སོ་སོར་ཐར་པའི་སྡོམ་པ་རྣམས་ཀྱི་མཆོག་དགེ་སློང་གི་སྡོམ་པ་ཡིན་པས། བདག་གིས་མཁའ་ཁྱབ་ཀྱི་སེམས་ཅན་ཐམས་ཅད་འཁོར་བ་ལས་བསྒྲལ་བའི་ཆེད་དུ་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་ཉེས་སྤྱོད་སྤང་བ་ཡོངས་སུ་རྫོགས་པ་དགེ་སློང་གི་བསླབ་པ་ཡང་དག་པར་བླངས་ཏེ་རྫོགས་པའི་སངས་རྒྱས་ཀྱི་གདུང་གསོབ་པར་བྱའོ་སྙམ་པས། སྟོན་པ་སངས་རྒྱས་དང་ཆོས་སྨྲ་བའི་འཕགས་པའི་དགེ་སློང་གི་དགེ་འདུན་ཐམས་ཅད་ཚེ་དང་ལྡན་པ་བདག་མིང་འདི་ཞེས་བགྱི་བ་ལ་དགོངས་སུ་གསོལ། །ཚེ་དང་ལྡན་པ་བདག་མིང་འདི་ཞེས་བགྱི་བ་དགེ་སློང་དུ་བཟུང་དུ་གསོལ། །ཞེས་ལན་གསུམ་དང་། ཐབས་ལེགས་བྱ། དེས་དཀོན་མཆོག་གསུམ་གྱི་བྱིན་རླབས་ཀྱིས་ཁྱོད་རྣམས་ཀྱི་རྒྱུད་ལ་ཉེས་སྤྱོད་སྤོང་བ་ཡོངས་སུ་རྫོགས་པ་དགེ་སློང་གི་སྡོམ་པ་ཐོབ་པ་ཡིན་པས་བསླབ་བྱ་མདོ་ཙམ་བསྟན་ན། ད་ཕྱིན་ཆད་ཁྱེད་རྣམས་ཀྱིས་དགེ་སྦྱོང་གི་ཆོས་བཞི་ལ་བསླབ་པར་བྱའོ། །བཞི་གང་ཞེ་ན། གཤེ་ཡང་སླར་མི་གཤེ་བ་དང་། །ཁྲོས་ཀྱང་སླར་མི་ཁྲོ་བ་དང་། །བརྡེགས་ཀྱང་སླར་མི་བརྡེག་པ་དང་། །མཚང་བྲུས་ཀྱང་སླར་མཚང་མི་འབྲུ་བར་བྱའོ། །ཞེས་གདམས་སོ། །འདི་ལྟར་ལུས་ཀྱི་རྟགས་དང་ཆ་ལུགས་ལ་མ་ལྟོས་པར་སེམས་ཀྱི་ཚངས་སྤྱོད་ལ་སློབ་པས་དགེ་ཚུལ་སློང་དུ་བཞག་པ་ནི། སྔར་དྲངས་པ་ལྟར་དཀོན་བརྩེགས་སུ་གསུངས་པ་དང་། གཞན་ཡང་དྲག་ཤུལ་ཅན་གྱིས་ཞུས་པ། སྒྱུ་མ་མཁན་བཟང་པོ་ལུང་བསྟན་པ། འཇམ་དཔལ་རྣམ་པར་རོལ་པའི་བུ་མོ་གསེར་མཆོག་འོད་དཔལ་ལུང་བསྟན་པའི་སྐབས་རྣམས་ནས་ཀྱང་གསལ་བར་བསྟན་པར་མ་ཟད། འདུལ་བ་ལུང་ཉིད་ལས་ཀྱང་གྲགས་པ་ཁྱིམ་པའི་རྟགས་ལ་གནས་བཞིན་དུ་དགེ་སློང་དུ་གསུངས་པ་སྟེ། རྒྱན་གྱིས་བརྒྱན་པར་བྱས་ཀྱང་ཆོས་སྤྱོད་ཅིང་། །དུལ་ཞིང་ཡང་དག་སྡོམ་ལ་ཚངས་པར་སྤྱོད། །འབྱུང་པོ་ཀུན་ལ་ཆད་པ་སྤངས་པ་དེ། །དགེ་སློང་དགེ་སྦྱོང་དེ་ཡིན། ཞེས་གསུངས་པ་ལྟ་བུ་དང་། སའི་སྙིང་པོའི་འཁོར་ལོ་བཅུ་པ་དང་འདུལ་ལུང་མཐུན་པར། ཁྱིམ་པ་འཕགས་པའི་ཆོས་དང་ལྡན་པ་དོན་དམ་པའི་དགེ་སློང་གི་ཁོངས་སུ་བསྡུས་པ་སོགས་རྒྱས་པར་གསུངས་པ་ཡིན་ནོ། །དེ་ནས་ཆོས་བཤད་པ་ནི། ཐེག་པ་འདིའི་ལུགས་ཀྱིས་དཀྱིལ་འཁོར་བའི་སྡུག་བསྔལ་གྱིས་ཡིད་སྐྱོ་ནས་ཞི་བདེ་དོན་དུ་གཉེར་བ་སྐྱེས་བུ་འབྲིང་པོའི་ལམ་ཡིན་པས། བདེན་བཞི་ལ་དམིགས་པའི་བླང་དོར་གྱི་སྒོ་ནས་བསླབ་དགོས། དེ་ལ་འཁོར་བའི་སྡུག་བསྔལ་ནི་ནད་ཀྱི་ཟུག་རྔུ་ལྟ་བུ་དང་། ཀུན་འབྱུང་ནི་ནད་དེ་བསྐྱེད་བྱེད་ཀྱི་རྒྱུ་ལྟ་བུ་དང་། ལམ་བདེན་ནི་ནད་འཇོམས་པའི་གཉེན་པོ་སྨན་དཔྱད་ལྟ་བུ་དང་། འགོག་བ དེན་ནི་ནད་ལས་གྲོལ་བའི་བདེ་བ་ལྟ་བུ་ཡིན་པས་ན། སྡུག་བསྔལ་ཤེས་པར་བྱས་ནས། དེའི་རྒྱུ་ཀུན་འབྱུང་སྤོང་ཞིང་། འགོག་བདེན་ཐོབ་བྱའི་དམིགས་ཡུལ་དུ་བྱས་ལ། ལམ་བདེན་བསྟེན་བྱར་བྱེད་པ་སྟེ། བདེན་བཞི་ལ་དམིགས་པའི་ལས་རྒྱུ་འབྲས་ཀྱི་བླང་དོར་མ་ནོར་བར་མཛད་འཚལ་ལོ། །དེ་ལྟར་འཇུག་སྒོ་གྲུབ་ནས། དབང་བསྐུར་བ་དངོས་ལ། ཐོག་མར་ལྷ་དབང་བསྐུར་བ་ནི། དཀྱིལ་འཁོར་ལ་བཀོད་པའི་ལྷ་རྣམས་ལས་མར་མེ་གཅིག་ལས་གཉིས་ཆད་ཀྱི་རྣམ་པར་ལྷ་སོ་སོ་རིམ་པར་བྱིན་ནས། ཁྱེད་རང་རྣམས་ཀྱི་སྤྱི་བོ་ནས་ཐིམ་པའི་བྱིན་རླབས་ཀྱིས། སྡུག་བསྔལ་བྱང་ཞིང་། ཀུན་འབྱུང་འགགས་ཏེ་འགོག་ལམ་གྱི་ཡོན་ཏན་ཁྱད་པར་ཅན་རྒྱུད་ལ་སྐྱེས་པའི་མོས་པ་མཛོད། གཙོ་བོའི་ཙཀླི་ཐོགས་ཏེ། འདས་དང་མ་བྱོན་ད་ལྟར་གྱི། །དུས་གསུམ་སངས་རྒྱས་ཇི་སྙེད་པའི། །བཅོམ་ལྡན་གཙོ་བོའི་དབང་བསྐུར་བས། །འཁོར་བའི་སྡུག་བསྔལ་གྲོལ་བར་ཤོག །སྡུག་བསྔལ་བདེན་པ་ཉེར་ལེན་ཕུང་པོ་དང་། །ཀུན་འབྱུང་བདེན་པ་ལས་དང་ཉོན་མོངས་དང་། །འགོག་པའི་བདེན་པ་སྡུག་བསྔལ་ཞི་བ་དང་། །ལམ་གྱི་བདེན་པ་གང་ཟག་བདེན་མེད་དེ། །སྡུག་ཀུན་སྤངས་ནས་འགོག་ལམ་ལྷག་བཅས་དང་། །ལྷག་མེད་དགྲ་བཅོམ་ས་ལ་ཕྱིན་པར་ཤོག །སརྦ་ས་ནི་ས་ཏ་ཨ་བྷི་ཥིཉྩ་ཧཱུཾ། ན་མོ། དཀོན་མཆོག་གསུམ་གྱི་བདེན་པའི་བྱིན་རླབས་ཀྱིས། རིགས་ཀྱི་བུ་ལ་འགྲོ་བའི་གཙོ་བོ་སྐྱེ་དགུའི་བླ་མ་ཐུབ་པ་ཆེན་པོའི་དབང་བསྐུར་བས། ཚེ་རབས་ཀུན་ཏུ་སངས་རྒྱས་མཐོང་བ་དང་མི་འབྲལ་བ་དང་། དམ་པའི་ཆོས་ཐོས་པ་དང་མི་འབྲལ་བ་དང་། འཕགས་པའི་དགེ་འདུན་དང་རྟག་ཏུ་མི་འབྲལ་བའི་དབང་དམ་པ་ཐོབ་པར་གྱུར་ཅིག །ༀ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། ཉན་ཐོས་བཅུ་དྲུག་གི་ཙཀླི་རིམ་པར་ཐོགས་ཏེ། ན་མོ། དཀོན་མཆོག་གསུམ་གྱི་བདེན་པའི་བྱིན་རླབས་ཀྱིས། རིགས་ཀྱི་བུ་ལ་འཕགས་པ་ཀུན་དགའ་བོའི་དབང་བསྐུར་བས་སངས་རྒྱས་ཀྱི་ཞབས་འབྲིང་རྟག་ཏུ་བྱེད་པའི་དབང་དམ་པ་ཐོབ་པར་གྱུར་ཅིག །ༀ་མུ་ནེ་མུ་ནེ་མ་ཧཱ༴ ན་མོ། དཀོན་མཆོག་གསུམ་གྱི༴ རིགས་ཀྱི་བུ་ལ་འཕགས་པ་ཤཱ་རིའི་བུའི་དབང་བསྐུར་བས། ཤེས་རབ་ཅན་གྱི་མཆོག་ཏུ་གྱུར་བའི་དབང་དམ་པ༴ ༀ་མུ་ནེ༴ ན་མོ། དཀོན་མཆོག་གསུམ་གྱི༴ རིགས་ཀྱི་བུ་ལ་འཕགས་པ་མངྒལ་གྱི་བུའི་དབང་བསྐུར་བས་རྫུ་འཕྲུལ་ཅན་གྱི་མཆོག་ཏུ་གྱུར་པའི་དབང་དམ་པ༴ ༀ་མུ་ནེ༴ ན་མོ། དཀོན་མཆོག༴ རིགས་ཀྱི་བུ་ལ་འཕགས་པ་རབ་འབྱོར་གྱི་དབང་བསྐུར་བས་འདྲི་ཞིང་ལན་ལྡོན་པའི་མཆོག་ཏུ་གྱུར་པའི་དབང་དམ་པ༴ ༀ་མུ་ནེ༴ ན་མོ། དཀོན་མཆོག༴ རིགས་ཀྱི་བུ་ལ་འཕགས་པ་མ་འགགས་པའི་དབང་བསྐུར་བས་ལྷའི་མིག་མཆོག་ཏུ་གྱུར་པའི་དབང་དམ་པ༴ ༀ་མུ་ནེ༴ ན་མོ། དཀོན་མཆོག༴ རིགས་ཀྱི་བུ་ལ་འཕགས་པ་འཆར་ཀའི་དབང་བསྐུར་བས་ཁྱིམ་བདག་དད་པ་བསྐྱེད་པའི་མཆོག་ཏུ་གྱུར་པའི་དབང་དམ་པ༴ ༀ་མུ་ནེ༴ ན་མོ། དཀོན་མཆོག༴ རིགས་ཀྱི་བུ་ལ་ཀུན་ཤེས་ཀ་དི་ཎྱའི་དབང་བསྐུར་བས་ཐོས་གྲོལ་སྔ་བའི་མཆོག་ཏུ་གྱུར་པའི་དབང་དམ་པ༴ ༀ་མུ་ནེ༴ ན་མོ། དཀོན་མཆོག༴ རིགས་ཀྱི་བུ་ལ་འཕགས་པ་རྟ་ཐུལ་གྱི་དབང་བསྐུར་བས་སྤྱོད་ལམ་མཛེས་པའི་མཆོག་ཏུ་གྱུར་པའི་དབང༴ ༀ་མུ་ནེ༴ ན་མོ། དཀོན་མཆོག༴ རིགས་ཀྱི་བུ་ལ་འཕགས་པ་ཉེ་བ་འཁོར་གྱི་དབང་བསྐུར་བས་འདུལ་བ་འཛིན་པའི་མཆོག་ཏུ་གྱུར་པའི་དབང༴ ༀ་མུ་ནེ། ན་མོ་དཀོན་མཆོག་གསུམ་གྱི༴ རིགས་ཀྱི་བུ་ལ་འཕགས་པ་བ་ལང་བདག་གི་དབང་བསྐུར་བས་འགོག་པའི་ཏིང་ངེ་འཛིན་མཆོག་དུ་གྱུར་པའི་དབང༴ ༀ་མུ་ནེ༴ ན་མོ། དཀོན་མཆོག་གསུམ་གྱི༴ རིགས་ཀྱི་བུ་ལ་འཕགས་པ་འོད་སྲུང་ཆེན་པོའི་དབང་བསྐུར་བས་སྦྱངས་པའི་ཡོན་ཏན་ཆེ་བ་མཆོག་ཏུ་གྱུར་པའི་དབང༴ ༀ་མུ་ནེ༴ ན་མོ། དཀོན་མཆོག་གསུམ་གྱི༴ རིགས་ཀྱི་བུ་ལ་འཕགས་པ་སྒྲ་གཅན་ཟིན་གྱི་དབང་བསྐུར་བས་བསླབ་པ་ལ་གུས་པ་མཆོག་ཏུ་གྱུར་པའི་དབང༴ ༀ་མུ་ནེ༴ ན་མོ། དཀོན་མཆོག༴ རིགས་ཀྱི་བུ་ལ་འཕགས་པ་གཅུང་དགའ་བོའི་དབང་བསྐུར་བས་མཚན་དང་དཔེ་བྱད་མཆོག་ཏུ་གྱུར་པའི་དབང་༴ ༀ་མུ་ནེ༴ ན་མོ། དཀོན་མཆོག་གསུམ་གྱི་བདེན་པའི་བྱིན༴ རིགས་ཀྱི་བུ་ལ་འཕགས་པ་མིང་ཅན་གྱི་དབང་བསྐུར་བས་རྒྱལ་བའི་བཀའ་ལས་གུས་པ་མཆོག་ཏུ་གྱུར་པའི་དབང་༴ ༀ་མུ་ནེ༴ ན་མོ། དཀོན་མཆོག༴ རིགས་ཀྱི་བུ་ལ་འཕགས་པ་ནོར་སྦྱིན་འཛིན་གྱི་དབང་བསྐུར་བས་དབུལ་བ་སེལ་བའི་མཆོག་ཏུ་གྱུར་པའི་དབང་དམ་པ༴ ༀ་མུ་ནེ༴ ན་མོ། དཀོན་མཆོག་གསུམ༴ རིགས་ཀྱི་བུ་ལ་འཕགས་པ་གང་པོའི་དབང་བསྐུར་བས་ཡོན་སྦྱོང་བ་མཆོག་ཏུ་གྱུར་པའི་དབང་དམ་པ༴ ༀ་མུ་ནེ༴ གནས་བརྟན་བཅུ་དྲུག་གི་ཙཀླི་ཐོགས་ཏེ། ན་མོ། དཀོན་མཆོག༴ རིགས་ཀྱི་བུ་ལ་རྒྱལ་བའི་བསྟན་པ་གནས་ཀྱི་བར་དུ་སྐྱོང་བར་མཛད་པ་པོ་འཕགས་པ་གནས་བརྟན་ཆེན་པོ་ཡན་ལག་འབྱུང་གི་དབང་བསྐུར་བས་དམ་པ་ཆོས་ཀྱི་ཆབ་སྲིད་འཛིན་པའི་དབང་དམ་པ་ཐོབ་པར་གྱུར་ཅིག །ༀ་མུ་ནེ་མུ་ནེ༴ དེ་བཞིན་དུ་རེ་རེའི་འགོར། ན་མོ། དཀོན་མཆོག༴ རིགས་ཀྱི་བུ་ལ་རྒྱལ་བའི་བསྟན་པ་གནས་ཀྱི་བར་དུ་སྐྱོང་བར་མཛད་པ་པོ་འཕགས་པ་གནས་བརྟན་ཆེན་པོ། ཞེས་སྦྱར་ནས། མ་ཕམ་པའི༴ ནགས་ན་གནས་ཀྱི༴ དུས་ལྡན་གྱི༴ རྡོ་རྗེ་མོའི་བུའི༴ བཟང་པོའི༴ གསེར་བེའུའི༴ བྷ་ར་དྷྭ་ཛ་གསེར་ཅན་གྱི༴ བ་ཀུ་ལའི༴ སྒྲ་གཅན་ཟིན་གྱི༴ ལམ་ཕྲན་བརྟན་གྱི༴ བྷ་ར་དྷྭ་ཛ་བསོད་སྙོམས་ལེན་གྱི༴ ལམ་བརྟན་གྱི༴ ཀླུའི་སྡེའི༴ སྦེད་བྱེད་ཀྱི༴ མི་ཕྱེད་པའི༴ དེ་རེ་རེའི་མཚན་མཐར། དབང་བསྐུར་བས་དམ་པ་ཆོས་ཀྱི་ཆབ་སྲིད་འཛིན་པའི་དབང་དམ་པ་ཐོབ་པར་གྱུར་ཅིག །ༀ་མུ་ནེ༴ ན་མོ། དཀོན་མཆོག༴ རིགས་ཀྱི་བུ་ལ་དགེ་ཚུལ་ཙུནྡའི་དབང་བསྐུར་བས་རྒྱལ་བ་རྣམས་མྱ་ངན་ལས་མི་འདའ་བར་གསོལ་བ་འདེབས་པའི་མཆོག་ཏུ་གྱུར་པའི་དབང་དམ་པ་ཐོབ་པར་གྱུར་ཅིག །ༀ་མུ་ནེ༴ ན་མོ། དཀོན་མཆོག༴ རིགས་ཀྱི་བུ་ལ་འཕགས་པའི་དགེ་བསྙེན་ཆེན་པོ་དྷརྨ་ཏཱའི་དབང་བསྐུར་བས་འཕགས་པ་དགྲ་བཅོམ་པ་རྣམས་ཀྱི་ཞབས་འབྲིང་རྟག་ཏུ་བྱེད་པའི་དབང་དམ་པ་ཐོབ་པར་གྱུར་ཅིག །ༀ་མུ་ནེ༴ ཅེས་བསྐུར་རོ། །དེ་ནས་རྫས་དབང་བཅུ་བསྐུར་བ་ནི། དང་པོ་བུམ་ཆུས་བཀྲུ་ཞིང་བླུད་དེ། ན་མོ། དཀོན་མཆོག༴ རིགས་ཀྱི་བུ་ལ་བུམ་རྫས་ཆུའི་དབང་བསྐུར་བས་ཉོན་མོངས་པའི་བག་ཆགས་ཀྱི་དྲི་མ་བྱང་ཞིང་དག་པའི་དབང་དམ་པ་ཐོབ་པར་གྱུར་ཅིག །ༀ་མུ་ནེ༴ གཉིས་པ་སྔར་བཏགས་པའི་མིང་བཅུག་སྟེ། ན་མོ། དཀོན་མཆོག༴ རིགས་ཀྱི་བུ་ལ་འདི་ཞེས་བྱ་བའི་མིང་གི་དབང་བསྐུར་བས་ཤེས་བྱ་ལ་མ་རྨོངས་པའི་དབང་དམ་པ༴ ༀ་མུ་ནེ༴ གསུམ་པ་ཤིང་རྟ། ན་མོ། དཀོན་མཆོག༴ རིགས་ཀྱི་བུ་ལ་ཤིང་རྟའི་དབང་བསྐུར་བས་སྐྱེ་རྒ་ན་འཆིའི་སྡུག་བསྔལ་ལས་རབ་ཏུ་བྱུང་ནས་ཆོས་ཀྱི་རྒྱལ་སྲིད་ལ་དབང་བསྐུར་བའི་དབང་དམ་པ༴ ༀ་མུ་ནི༴ བཞི་པ་ཆིབས་པ། ན་མོ། དཀོན་མཆོག༴ རིགས་ཀྱི་བུ་ལ་ཆིབས་ཀྱི་དབང་བསྐུར་བས་རྟག་ཏུ་རབ་ཏུ་ཕྱུངས་ནས་ཉོན་མོངས་པ་ལས་ཐར་པའི་དབང་དམ་པ༴ ༀ་མུ་ནེ༴ ལྔ་པ་སྤུ་གྲི། ན་མོ། དཀོན་མཆོག༴ རིགས་ཀྱི་བུ་ལ་ཤན་རལ་གྲིའི་དབང་བསྐུར་བས་ཉོན་མོངས་པའི་དྲྭ་བ་གཅོད་པའི་དབང་དམ་པ་ཐོབ་པར་གྱུར་ཅིག །ༀ་མུ་ནེ༴ དྲུག་པ་གསེག་པར། ན་མོ། དཀོན་མཆོག༴ རིགས་ཀྱི་བུ་ལ་གསེག་པར་གྱི་དབང་བསྐུར་བས་བདག་དང་འགྲོ་བའི་དོན་མཐར་ཕྱིན་པར་རྫོགས་པའི་དབང་དམ་པ༴ ༀ་མུ་ནེ༴ བདུན་པ་ཆོས་གོས་རྣམ་གསུམ། ན་མོ། དཀོན་མཆོག༴ རིགས་ཀྱི་བུ་ལ་ན་བཟའ་དུར་སྨྲིག་གི་དབང་བསྐུར་བས་འཁོར་བའི་གདུང་བ་ལས་སྐྱོབ་པའི་དབང་དམ་པ༴ ༀ་མུ་ནེ༴ བརྒྱད་པ་སྦྲང་རྩི། ན་མོ། དཀོན་མཆོག༴ རིགས་ཀྱི་བུ་ལ་བཀྲ་ཤིས་ཀྱི་རྫས་སྦྲང་རྩིའི་དབང་བསྐུར་བས་འབྲས་བུ་ཕུན་སུམ་ཚོགས་པའི་དབང་དམ་པ༴ ༀ་མུ་ནེ༴ དགུ་པ་འབྲས་ཆན། ན་མོ། དཀོན་མཆོག༴ རིགས་ཀྱི་བུ་ལ་འོ་ཐུག་འབྲས་ཆན་གྱི་དབང་བསྐུར་བས་མཚན་དང་དཔེ་བྱད་འབར་བའི་དབང་དམ་པ༴ ༀ་མུ་ནེ༴ བཅུ་པ་རྩྭ་ཟོར་བའི་སྟན། ན་མོ། དཀོན་མཆོག༴ རིགས་ཀྱི་བུ་ལ་རྩྭ་དརྦྷའི་རྫས་ཀྱི་དབང་བསྐུར་བས་བཀྲ་ཤིས་ཤིང་བར་ཆད་ཐམས་ཅད་ཀྱིས་མི་ཚུགས་པའི་དབང་དམ་པ་ཐོབ་པར་གྱུར་ཅིག །ༀ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། དེ་ལྟར་བུམ་ཆབ་ཀྱི་དབང་སྔོན་དུ་འགྲོ་བའི་སྒོ་ནས་ངེས་པར་འབྱུང་བས་ཁྱིམ་སྤངས་ཏེ་སངས་རྒྱས་པའི་བར་གྱི་སྟོན་པ་བཅོམ་ལྡན་འདས་རབ་ཏུ་བྱུང་ནས་ཞི་བ་བརྙེས་པའི་རྣམ་ཐར་དང་རྗེས་སུ་མཐུན་པའི་དབང་བཅུ་བསྐུར་བས་འཁོར་བ་ལས་རྣམ་པར་གྲོལ་བའི་སྐལ་བ་ཅན་དུ་བྱས་པ་ཡིན་ནོ། །དེ་ནས་དཀྱིལ་འཁོར་གྱི་ལྷ་རྣམས་ཀྱི་སྐུ་ལས་ཐུགས་རྗེའི་འོད་ཟེར་འཕྲོས། ཁྱེད་རང་རྣམས་ལ་རེག་པས་ལུས་སེམས་ཀྱི་སྐྱོན་ཐམས་ཅད་སྦྱངས་ནས་དམ་པའི་ཆོས་ཀྱི་སྣོད་རུང་དུ་བྱས། ཡང་ལྷ་རྣམས་ཀྱི་སྐུའི་འོད་ཟེར་གྱིས་འཕགས་པ་རྣམས་ཀྱི་ཐུགས་དམ་བསྐུལ། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། ཚུར་འདུས་ཁྱེད་རང་རྣམས་ལ་ཐིམ་པས་མཐུ་ཐོབ་སྟེ། དེ་བཞིན་གཤེགས་པ་རྣམས་ཀྱི་སྐུ་གསུང་ཐུགས་དང་མཚུངས་པར་བྱིན་གྱིས་བརླབས་པའི་མོས་པ་མཛོད། ༀ་མུ་ནེ་མུ་ནེ་མ་ཧཱ་མུ་ནེ་ཤཱཀྱ་མུ་ན་ཡེ་སྭཱ་ཧཱ། ཞེས་བཟླར་བཅུག་རྗེས། མུ་ནེའི་སྔགས་བྱང་གཏད་དེ། ན་མོ། དཀོན་མཆོག་གསུམ་གྱི་བདེན་པའི་བྱིན་རླབས་ཀྱིས་རིགས་ཀྱི་བུ་ལ་ཆོས་སྒོ་བརྒྱད་ཁྲི་སྟོང་ཚང་བའི་སྙིང་པོའི་དབང་བསྐུར་བས་དམ་པའི་ཆོས་ཀྱི་མཛོད་འཛིན་པའི་དབང་དམ་པ་ཐོབ་པར་གྱུར་ཅིག །ༀ་མུ་ནེ༴ ཞེས་བསྐུར་རོ། །དེ་ལྟར་ཉན་ཐོས་ཀྱི་ཐེག་པའི་དབང་བསྐུར་བས་མདོ་རང་ལུགས་ཀྱི་ཚོགས་ལམ་གཉིས་པ་ལས་དང་པོ་པའི་རྣལ་འབྱོར་རྟེན་པ་གཞིའི་ས་ནོན་པ་དང་རིགས་འདྲའི་ཡོན་ཏན་གསོས་ཐེབ་པས། ལས་ཀྱི་བག་ཆགས་ཕྲ་བ་དག །འཁོར་བ་ལས་རྣམ་པར་གྲོལ་བའི་རྒྱུ་དང་། ལམ་གོང་མ་ལ་སྨོན་པ་བྱང་ཆུབ་ཀྱི་སེམས་སྐྱེ་བའི་སྟེགས་སུ་གྱུར། རྒྱུན་ཞུགས་ཕྱིར་འོང་མི་འོང་དང་། མཐར་ཐུག་ཉན་ཐོས་དགྲ་བཅོམ་གྱི་རྟོགས་རིགས་དང་འདྲ་བའི་ཡོན་ཏན་ཁྱད་པར་ཅན་ཐོབ་པའི་སྐལ་པ་ཅན་དུ་བྱས་པ་ཡིན་ནོ། །རྗེས་ཀྱི་བྱ་བ་ལ་སྤྱི་དོན་གསུམ་སྟེ། ལམ་ཁྱེར་བཞི་བསྟན་པ། འགག་དྲུག་བཤད་པ། གདམས་ངག་ངང་སྒོམ་གྱི་ཁྲིད་གདབ་པའོ། །སྤྱི་དོན་དང་པོ་ལམ་ཁྱེར་ལ་བཞི་ལས། དང་པོ་ཐེག་པ་ལམ་ཁྱེར་ནི། ཉན་ཐོས་ཀྱི་ཐེག་པ་སྟེ། དེ་ལའང་དྲུག་ལས། འཇུག་པའི་སྒོ་ནི། འཁོར་བའི་ཉེས་དམིགས་མཐོང་ནས་རང་ཉིད་ཞི་བདེ་འདོད་པས། འཕགས་པའི་བདེན་པ་བཞིས་བསྡུས་པའི་རྣམ་པ་བཅུ་དྲུག་ལ་དམིགས་པའི་རྒྱུ་འབྲས་སྤང་བླང་གི་སྒོ་ནས་འཇུག །ལྟ་བ་ནི། གཟུང་ཡུལ་དངོས་པོ་རགས་སྣང་དང་འཛིན་པ་སེམས་ཀྱི་རྒྱུན་འདི་རང་བཞིན་མེད་པར་འདོད་པས་གང་ཟག་གི་བདག་མེད་རྟོགས་ནའང་། རགས་སྣང་རྩོམ་གཞི་རྡུལ་ཕྲན་བྱེ་སྨྲས་ཆ་ལྡན་སིལ་བུ་དང་། མདོ་སྡེ་བས་རེག་ལ་མ་འབྱར་བའི་ཆ་མེད། འཛིན་སེམས་སྐད་ཅིག་མ་བྱེ་མདོ་གཉིས་མཐུན་པར་དུས་ཀྱི་ཆ་དང་བྲལ་བར་འདོད་པས་ན། གཟུང་འཛིན་ཕྲ་བ་དོན་དམ་བདེན་པར་ལྟ་བས་ཆོས་ཀྱི་བདག་མ་རྟོགས་པ་སྟེ། ལྟ་རིམ་ལས། ཆོས་ཙམ་ལྟ་བའི་ཉན་ཐོས་པ། །མདོ་སྡེ་པ་དང་བྱེ་བྲག་གཉིས། །ཕྱི་རོལ་རྡུལ་ལ་རྩོད་བྱེད་ཅིང་། །ཤེས་པ་སྐད་ཅིག་སྣང་བྱེད་མཐུན། །ཞེས་གསུངས་སོ། །ཚུལ་ཁྲིམས་ནི། སོ་ཐར་རིགས་བརྒྱད་གང་རུང་སྟེ། མཛོད་ལས། སོ་སོ་ཐར་ཞེས་བྱ་རྣམ་བརྒྱད། །རྫས་སུ་རྣམ་པ་བཞི་ཡིན་ནོ། །མཚན་ལས་མིང་ནི་འཕོ་བའི་ཕྱིར། །ཐ་དད་དེ་དག་འགལ་བ་མེད། །སྤང་བྱ་ལྔ་བརྒྱད་བཅུ་དང་ནི། ཐམས་ཅད་སྤོང་བ་ནོས་པ་ལས། །དགེ་བསྙེན་དང་ནི་བསྙེན་གནས་དང་། །དགེ་ཚུལ་ཆེ་དང་དགེ་སློང་ཉིད། །ཅེས་སོ། །སྒོམ་པ་ནི། ཉན་ཐོས་ཀྱི་སྡེ་སྣོད་ཐོས། ཐོས་དོན་བསམ། བསམ་པའི་དོན་སྒོམ་པ་ལ་འཇུག་པ་སྟེ། །དེ་ལ་ཞི་གནས་ནི། ཉོན་མོངས་པ་གང་དང་གང་ཤས་ཆེ་བ་དེ་དང་དེའི་གཉེན་པོར་རིམ་བཞིན། འདོད་ཆགས་ལ་མི་སྡུག་པ། ཞེ་སྡང་ལ་བྱམས་སྙིང་རྗེ། གཏི་མུག་ལ་རྟེན་འབྲེལ་གྱི་རབ་དབྱེ། རྣམ་རྟོག་ལ་དབུགས་འབྱུང་རྔུབ་བགྲང་བ། ང་རྒྱལ་ལ་ཁམས་ཀྱི་རྣམ་པའི་རབ་དབྱེ་རྣམས་སྒོམ་པས་སེམས་ལས་སུ་རུང་བར་བྱས་རྗེས། ལྷག་མཐོང་ནི། བདེན་བཞིའི་རྣམ་པ་བཅུ་དྲུག་བསྒོམས་པས། ཁམས་གསུམ་གྱི་ཉོན་མོངས་པ་མཐོང་བས་སྤོང་བ་སོགས་ཡེ་ཤེས་བཅུ་དྲུག་གིས་སྤོང་སྟེ། བདེན་བཞི་རེ་རེ་ལའང་། ཆོས་ཤེས། ཆོས་བཟོད་དང་། རྗེས་ཤེས། རྗེས་བཟོད་དེ་བཅུ་དྲུག་གོ། །སྤྱོད་པ་ནི། སྦྱངས་ཡོན་བཅུ་གཉིས་ལ་གནས་པས་རང་དོན་གཙོ་བོར་སྤྱོད་པའོ། །འབྲས་བུ་ནི། ལམ་ལྔ་བྱང་ཕྱོགས་སོ་བདུན་གྱི་རིམ་པས་བགྲོད་པའི་འཕགས་ལམ་ནི་དགེ་སྦྱོང་གི་འབྲས་བུ་བཞི་སྟེ། རྒྱུན་ཞུགས་དང་། ལམ་གཅིག་ཕྱིར་འོང་དང་། ཕྱིར་མི་འོང་དང་། དགྲ་བཅོམ་པ་སྟེ་སྐྱེས་བུ་ཟུང་བཞི་དང་། རེ་རེ་ལའང་ཞུགས་གནས་གཉིས་གཉིས་སུ་ཕྱེ་བས་ཡ་བརྒྱད་དུ་འདོད་དོ། །དེ་ཡང་ཉན་ཐོས་ཀྱི་རྟོགས་བྱ་ཐམས་ཅད་འདིར་ཡང་རྟོགས་དགོས་མོད། ཐོབ་བྱ་རྣམས་ནི་ཐེག་ཆེན་གྱི་གོལ་ས་ཡིན་པའི་ཕྱིར། ལམ་སྟེགས་སུ་མངོན་དུ་བྱེད་དགོས་པ་མ་ཡིན་ནོ། །གཉིས་པ་ལྷ་ལམ་ཁྱེར་ནི། བཅོམ་ལྡན་འདས་ཐུབ་པའི་དབང་པོ་འཕགས་པ་ཉན་ཐོས་ཀྱི་དགེ་འདུན་དང་བཅས་པ་མདུན་དུ་སྤྱན་དྲངས་ཏེ། བཞུགས་པ་ལ་དམིགས་ནས་ཕྱག་མཆོད་འབུལ་བ་སོགས་ཀྱིས་ཚོགས་བསག་གོ། །གསུམ་པ་སྙིང་པོ་ལམ་ཁྱེར་ནི། ལྷ་རྣམས་ཀྱི་སྐུ་ལས་འཕྲོས་པའི་འོད་ཀྱིས་ལུས་སེམས་ཀྱི་སྐྱོན་སྦྱངས་ཤིང་རྒྱུད་བྱིན་གྱིས་བརླབས་པར་བསམས་ལ། མུ་ནེའི་གཟུངས་བཟླ་བའོ། །བཞི་པ་བསླབ་བྱ་ལམ་ཁྱེར་ནི། མི་དགེ་བཅུ་དགྲ་ལྟར་སྤོང་ཞིང་། དགེ་བཅུ་འཆི་གསོས་ཀྱི་སྨན་མཆོག་ལྟར་བརྟེན་པར་བྱའོ། །དེའང་ཐུན་མོང་དུ་འདུ་ཤེས་བཅུ་སྟེ། སྲོག་གཅོད་པ་ལ་བཙན་དུག་ལྟ་བུའི་འདུ་ཤེས་དང་། ཉོན་མོངས་པ་ལ་དུག་སྦྲུལ་ལྟ་བུའི་འདུ་ཤེས་དང་། ཁ་ཟས་ལ་རྒན་རྒོན་བུ་ཤ་ཟ་བ་ལྟ་བུའི་འདུ་ཤེས་དང་། གོས་ལ་སྨད་དཀྲིས་ལྟ་བུའི་འདུ་ཤེས་དང་། རྙེད་བཀུར་ལ་རྒྱ་དང་རྙི་ལྟ་བུའི་འདུ་ཤེས་དང་། བླ་མ་དང་དཀོན་མཆོག་ལ་ནོར་བུ་རིན་པོ་ཆེ་ལྟ་བུའི་འདུ་ཤེས་དང་། ཆོས་ལ་ལམ་བཟང་པོ་ལྟ་བུའི་འདུ་ཤེས་དང་། སངས་རྒྱས་ཀྱི་བསྟན་པ་ལ་གསེར་ལྟ་བུའི་འདུ་ཤེས་དང་། ཚུལ་ཁྲིམས་ལ་རྒྱན་ལྟ་བུའི་འདུ་ཤེས་དང་། ཆོས་ཉིད་མངོན་དུ་གྱུར་པ་ལ་མུན་ཁུང་དུ་སྒྲོན་མེ་བཏེག་པ་ལྟ་བུའི་འདུ་ཤེས་རྣམས་ལ་བསླབ་པར་བྱའོ། །སྤྱི་དོན་གཉིས་པ་འགག་དྲུག་བཤད་པ་ནི། གཞུང་ལས། གང་དུ་གང་གིས་གང་ལ་གང་བསྟན་པ། །ཅིའི་ཕྱིར་བཤད་པའི་དགོས་པ་བཅས་པ་སྟེ། །འདི་ནི་ཉན་ཐོས་ཐེག་པའི་འགག་དྲུག་ཡིན། །ཞེས་གསུངས་པ་ལྟར། གང་དུ་བཤད་པའི་གནས་ནི། ཝཱ་ར་ཎཱ་སཱིའི་བསིལ་ཁང་དུའོ། །གང་གིས་བཤད་པའི་སྟོན་པ་ནི། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའོ། །གང་ལ་བཤད་པའི་འཁོར་ནི། ཉན་ཐོས་ཆེན་པོ་མཆོག་བརྒྱད་དམ་བཅུ་དྲུག་སོགས་ལའོ། །གང་བསྟན་པའི་ཐེག་པ་ནི། བདེན་བཞིས་བསྡུས་པ་ཉན་ཐོས་ཀྱི་ཐེག་པའོ། །ཅིའི་ཕྱིར་ན་བདེན་བཞིའི་དབང་བསྐུར་བས་ཉན་ཐོས་དགྲ་བཅོམ་གྱི་རྟོགས་རིགས་དང་འདྲ་བའི་ཡོན་ཏན་ཐོབ་པའི་ཆེད་དུའོ། །དེ་ལྟར་བསྟན་པའི་དགོས་པ་ནི། བདག་རྟག་ཆད་དུ་འཛིན་པ་ཞིག་པས་འཁོར་བ་ལས་ངེས་པར་འབྱིན་པའོ། །སྤྱི་དོན་གསུམ་པ་གདམས་ངག་ངང་སྒོམ་གྱི་ཁྲིད་ལ། ཐོག་མར་ཞི་གནས་ནི། ཚེ་འདི་དང་འཁོར་བ་ལ་ཡིད་བྱུང་བའི་སྐྱོ་ཤས་ཀྱིས་འདུ་འཛིན་དང་མི་དགེ་བའི་སེམས་སྤངས་ཏེ། བསྒོམ་བྱའི་ངོ་བོ་ནི། རང་གི་དཔྲལ་བར་རུས་པའི་ཐིག་ལེ་ཡུངས་འབྲུ་ཙམ་ཞིག་བསྒོམ། དེ་ལས་ཤེས་པ་གཏད་དེ་བཞག་པས། ཐིག་ལེ་དེ་ཇེ་ཆེ་ཇེ་ཆེར་འཕེལ་བས་སྣང་བ་ཐམས་ཅད་ཀེང་རུས་སུ་སྐྱ་ཁྲོལ་གྱིས་སོང་བ་ལ་རྩེ་གཅིག་ཏུ་མཉམ་པར་བཞག །དེ་ལས་ཡང་སྡུད་པའི་སྦྱོར་བས་རང་ལུས་ཙམ་ཀེང་རུས་སུ་དམིགས་ནས་བསྒོམ་སྟེ། མཛོད་ལས། ཀེང་རུས་ཆགས་བཅས་ཐམས་ཅད་ལ། །རུས་པ་རྒྱ་མཚོའི་བར་དུ་ནི། །སྤྲོ་ཞིང་བསྡུད་པ་ལས་དང་པོ། །ཞེས་པས་འདི་ནི་ལས་དང་པོ་པའི་མི་སྡུག་པ་སྒོམ་ཚུལ་ཏེ། དེ་ལ་བརྟེན་ནས་སྤྲོ་བ་སྔར་བཞིན་ལས་བསྡུ་བ་ན་རྐང་རུས་བོར་བ་ནས་ཐོད་ཕྱེད་ཀྱི་བར་དང་། ཤིན་ཏུ་བརྟན་ནས་ཐོད་ཕྱེད་ཀྱང་བསྡུས་ལ་སྨིན་མ་གཉིས་ཀྱི་བར་དུ་སེམས་འཛིན་པ་སྟེ། དེ་ལས། རྐང་རུས་ནས་ནི་ཐོད་ཕྱེད་བར། །བཏང་བས་སྦྱང་བ་བྱས་པར་བཤད། །སྨིན་མའི་བར་དུ་སེམས་འཛིན་པས། །ཡིད་ལ་བྱེད་པ་རྫོགས་པ་ཡིན། །ཞེས་གསུངས། དེ་ལྟར་མི་སྡུག་པའི་ཏིང་ངེ་འཛིན་གྱིས་ཆགས་སྡང་འགགས་ནས་སེམས་ལས་སུ་རུང་བ་དང་། དེ་ནས་ལྷག་མཐོང་སྒོམ་སྟེ། ལམ་ལྔར་བྱང་ཕྱོགས་སོ་བདུན་ནམ། བདེན་བཞི་རྣམ་པ་བཅུ་དྲུག་ཏུ་ཕྱེ་ནས་བསྒོམ་པ་ཡིན་ནའང་། འདིར་ལམ་གོང་མའི་སྟེགས་སུ་གང་ཟག་གི་བདག་མེད་བསྒོམ་པའི་ལྟ་ཁྲིད་ཙམ་ཞིག་བསྟན་པ་བྱའོ། །དེ་ཡང་རང་ལུས་ཉེར་ལེན་གྱི་ཕུང་པོ་འདི་ལ་བདག་ཏུ་སྒྲོ་བཏགས་ནས་ངར་འཛིན་འཇུག་པས། དེ་སུན་དབྱུང་བའི་དོན་དུ་འདི་ལྟར་བསྒོམ་སྟེ། ངའོ་ཞེས་རྣམ་པར་བཏགས་པའི་ཡུལ་ལ་དམིགས་ན་ང་ཞེས་བྱ་བ་གྲུབ་པ་མེད་དེ། ལུས་རྣམས་རྡུལ་ཕྲན་གྱི་བར་དུ་གཤིག་ཅིང་། སེམས་ཀྱང་སྐད་ཅིག་གི་བར་དུ་རྣམ་པར་བཤིག་པ་ན། ལུས་སེམས་གཉིས་ཀྱང་ང་མ་ཡིན་ལ། དེ་གཉིས་ཀྱི་ཚོགས་པའང་མ་གྲུབ་པས་ང་མ་ཡིན། དེ་གཉིས་ལས་ལོགས་པའང་མེད་པའི་ཕྱིར། གང་ཟག་མེད་པར་རྟོགས་པ་ན། དེའི་ངང་ལ་མཉམ་པར་གཞག་པར་བྱའོ། །དེ་ལྟར་གཏན་ལ་ཕབ་སྟེ་བསྒོམས་པས། ངའམ་བདག་ཏུ་འཛིན་པ་ལོག་པས་ནི། ང་ཡིར་འཛིན་པའམ་བདག་གིར་འཛིན་པ་མི་འབྱུང་ཞིང་། དེ་ལྟར་ཉེས་པ་ཐམས་ཅད་ཀྱི་རྩ་བ་བདག་དང་བདག་གིར་འཛིན་པ་ལོག་པས་ནི་ཉོན་མོངས་པ་ལྡོག །དེ་ལོག་པས་ལས་ཟད་པར་འགྱུར་ལ། ལས་དང་ཉོན་མོངས་པ་ཟད་པས་ནི་སྐྱེ་བ་ཟད་པར་འགྱུར་བས་ན། རྣམ་པར་གྲོལ་བ་ཐོབ་པར་འགྱུར་ཏེ། དབུ་མ་ལས། ལས་དང་ཉོན་མོངས་ཟད་ལས་ཐར། །ཞེས་གསུངས་པ་ལྟར་ཡིན་པས་བརྩོན་པས་བསླབ་པར་བྱོས་ཤིག །ཚུལ་དེས་ཉན་ཐོས་ཐེག་པའི་དབང་བསྐུར་མན་ངག་དང་བཅས་པ་ལེགས་པར་གྲུབ་པས། དེ་ལྟར་གདམས་པ་ལས་མི་འདའ་བར་བསྒྲུབ་པར་བྱའོ་སྙམ་པས། གཙོ་བོས་ཇི་ལྟར་སོགས་ཀྱིས་ཁས་བླངས། གཏང་རག་གི་མཎྜལ་ཕུལ། དེང་ནས་བརྩམས་ཏེ་སོགས་དང་། དགེ་བ་བསྔོ་བ་རྣམས་སྔར་ལྟར་དང་། རྗེས་ཆོག་རྣམས་སྒྲུབ་ཐབས་བཞིན་བྱ་བ་ཡིན་ནོ། །ཉུང་གསལ་བརྗོད་བདེའི་ངག་ཚིག་གིས། །དོན་ཀུན་ཡོངས་ཚང་དབང་ཆོག་ཁྲིགས། །ལེགས་བཤད་རྨད་བྱུང་ཆོས་སྐྱེས་འདི། །སྐལ་བཟང་དགའ་བྱེད་དཔལ་དུ་སྦྱིན། །ཉན་ཐོས་ཐེག་པའི་དབང་ཆོག་གི་ལེ་ཚན་ནོ།། །།
༈ ༀ་སྭ་སྟི། འགྱུར་ཆོས་སྲིད་རྩ་གང་ཟག་དང་། །ཆོས་ཕྱེད་གཟུང་རྟོག་བདག་མེད་ཀྱི། །རྡོ་རྗེས་གཞོམ་མཛད་ལ་བཏུད་ནས། །རང་རྒྱལ་ཐེག་པའི་དབང་ཆོག་བཤད། །ད་ནི་གསུམ་པ་རང་རྒྱལ་གྱི་ཐེག་པའི་དབང་ནི། དཀྱིལ་འཁོར་བཤམ་སྒྲུབ་གཏོར་ཆོག་དང་བཅས་པ་སྒྲུབ་ཐབས་ལྟར་གྲུབ་རྗེས། བདག་འཇུག་གི་དོན་ནི། སློབ་དཔོན་བདག་ཉིད་སྟོན་པ་ཐུབ་པའི་དབང་པོར་བསམས་པའི་གཙུག་ཏོར་གྱི་འོད་ཀྱིས་དཀྱིལ་འཁོར་གྱི་ལྷ་དང་ཕྱོགས་བཅུའི་རྒྱལ་བ་སྲས་བཅས་ཀྱི་བྱིན་རླབས་བསྡུས་ནས་སྤྱི་བོར་ཞུགས་པས་རྗེས་སུ་གནང་བ་ཐོབ། སླར་ཡང་སྤྱི་བོའི་འོད་ཀྱིས་བསྐུལ་བས་དཀྱིལ་འཁོར་ལ་བཀོད་པའི་སྟོན་པ་སངས་རྒྱས། འཁོར་འཕགས་པ་རང་རྒྱལ་གྱི་དགེ་འདུན་དང་བཅས་པ་ལས་རང་འདྲའི་སྐུ་གཉིས་པ་རེ་ཆད་དེ། རང་གི་སྤྱི་བོར་ཐིམ་པས་རྟེན་འབྲེལ་ལུགས་འབྱུང་གི་རྒྱུ་འབྲས་སྡུག་ཀུན་འགགས་ནས། ལུགས་ལྡོག་འགོག་ལམ་གྱི་ཡོན་ཏན་རྒྱུད་ལ་སྐྱེས་པར་བསམ་པའོ། །དེ་ནས་སློབ་མ་གཞུག་པ་ནི། ཁྲུས་བྱ། བགེགས་ག ཏོར་བཏང་ལ་མཚམས་བཅད། སེམས་བསྐྱེད་དང་ཆོས་ཉན་པའི་ཀུན་སྤྱོད་གསལ་འདེབས་པ་སྔོན་དུ་འགྲོ་བས། འདིར་གང་གསན་པར་བྱ་བའི་ཆོས་ནི། ཞེས་པ་ནས། ཕྱི་དབང་རྒྱུད་ཀྱི་ཆུ་བོའི་ཡན་ལག་གི་དཀྱིལ་འཁོར། ཞེས་པའི་བར་སྔར་ལྟར་ལས་སྐབས་བབས་ཀྱི་སྤྲོ་བསྡུ་བྱས་རྗེས། གསུམ་པ་རང་རྒྱལ་གྱི་ཐེག་པའི་དཀྱིལ་འཁོར་དུ་དབང་བསྐུར་བ་སྐབས་སུ་བབས་པ་ཡིན། དེ་ལའང་གཉིས་ལས། སློབ་དཔོན་གྱི་བྱ་བ་རྣམས་གྲུབ་ནས། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ་དབང་ཞུ་བའི་ཡོན་དུ་མཎྜལ་ཕུལ་མཛོད། ཅེས་དང་། དེ་ནས་གསོལ་བ་གདབ་པའི་སླད་དུ་དོན་དམ་པའི་དཀོན་མཆོག་གསུམ་ལ་ཡིད་ཆེས་ཀྱི་དད་པ་བསྐྱེད་ནས། དེ་མཚོན་བྱེད་བརྡར་བཏགས་དཀྱིལ་འཁོར་ལ་བཀོད་པའི་སངས་རྒྱས་དང་། མདོའི་གླེགས་བམ་དང་། འཕགས་པ་རང་རྒྱལ་གྱི་དགེ་འདུན་དང་བཅས་པ་རྣམས་ལ་ཡན་ལག་ལྔ་ས་ལ་ཕབ་པའི་ཕྱག་ལན་གསུམ་འཚལ་དུ་བཅུག་ནས། སློབ་དཔོན་ཐུབ་པའི་དབང་པོར་གསལ་བའི་གཙུག་ཏོར་གྱི་ནོར་བུ་འོད་ཟེར་འཕྲོ་བ་ལས་དགོས་དགུ་མ་ལུས་པ་འབྱུང་བར་མོས་ལ་སྙིམ་པ་མེ་ཏོག་དང་བཅས་པས། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམས་སྦྱོང་བ། །དེ་རིང་བཤད་པའི་རིན་ཆེན་གཏེར། །གཙོ་བོས་བདག་ལ་བཀའ་དྲིན་གསོལ། །ཞེས་ལན་གསུམ། དེ་ནས་སྡོམ་པ་འབོགས་པ་ནི། བསྲུང་བྱའི་ཚུལ་ཁྲིམས་ཉན་ཐོས་དང་འདྲ་བས་འདིར་ཟུར་དུ་བླང་མི་དགོས་ཤིང་། ཆོས་བཤད་པ་ནི། ཐེག་པ་འདིའི་ལུགས་ཀྱིས་འཁོར་བ་ལས་ངེས་པར་འབྱུང་བ་སྐྱེས་བུ་འབྲིང་པོའི་ལམ་ཡིན་པས། བདེན་བཞི་ལ་བླང་དོར་གྱི་སྒོ་ནས་བསླབ་དགོས། དེ་ཡང་དམིགས་ཡུལ་བདེན་པ་བཞིས་བསྡུས་པའི་ཆོས་ལ། རྟེན་འབྲེལ་འབྱུང་ལྡོག་གིས་སྒོམ་པས་ཁམས་གསུམ་གྱི་ཕྲ་རྒྱས་རྣམས་སྤོང་བར་འདོད་པ་སྟེ། ཇི་ལྟར་ན། རྒྱུ་ཡོད་ན་འབྲས་བུ་འབྱུང་བའི་རྟེན་འབྲེལ་ལུགས་འབྱུང་དང་། ལོག་ན་ལྡོག་པའི་ལུགས་ལྡོག་དཔེ་བྱས་ནས། ནང་གི་རྟེན་འབྲེལ་དུར་ཁྲོད་ཀྱི་རུས་པ་ལ་བརྟགས་ཏེ། རུས་པ་འདི་ཅི་ལས་བྱུང་། འདི་རྒ་ཤི་ལས་བྱུང་ཞེས་རིམ་པར་བརྟགས་པ་ན་འཁོར་བའི་རྩ་བ་མ་རིག་པར་ཐུག་པས། དེ་འགགས་ན་འདུ་བྱེད་འགག་པ་སོགས་རྒ་ཤིའི་བར་འགགས་ཏེ། རྒྱུ་ཀུན་འབྱུང་ལས་ཉོན་ཟད་པས་འབྲས་བུ་འཁོར་བའི་ཉེས་པ་ལས་གྲོལ་ཏེ། འགོག་ལམ་གྱི་ཡོན་ཏན་ཐོབ་པར་འགྱུར་བ་ཡིན་པས་ན་མ་རིག་པའི་གཉེན་པོ་བདག་མེད་རྟོགས་པའི་ཤེས་རབ་ལ་བསྟེན་པར་མཛད་འཚལ་ལོ། །དེ་ལྟར་འཇུག་སྒོ་གྲུབ་ནས། དབང་བསྐུར་བ་དངོས་ལ། ཐོག་མར་རང་རྒྱལ་གྱི་ཆས་སུ་འཇུག་པའི་རྫས་དབང་དྲུག་བསྐུར་བ་ནི། དང་པོ་བུམ་ཆུས་བཀྲུ་ཞིང་འཐུང་དུ་བཅུག་སྟེ། ན་མོ། དཀོན་མཆོག་གསུམ་གྱི་བདེན་པའི་བྱིན་རླབས་ཀྱིས། རིགས་ཀྱི་བུ་ལ་བུམ་རྫས་ཆུའི་དབང་བསྐུར་བས་ཉོན་མོངས་པའི་བག་ཆགས་ཀྱི་དྲི་མ་བྱང་ཞིང་དག་པའི་དབང་དམ་པ་ཐོབ་པར་གྱུར་ཅིག །ༀ་ཡེ་དྷརྨཱ་ཧེ་ཏུ་པྲ་བྷ་ཝ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་བ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎ་ཡེ་སྭཱཧཱ། གཉིས་པ་སྔར་རབ་བྱུང་གི་མིང་བཅུག་སྟེ། ན་མོ། དཀོན་མཆོག་གསུམ་གྱི༴ རིགས་ཀྱི་བུ་ལ་འདི་ཞེས་བྱ་བའི་མིང་གི་དབང་བསྐུར་བས་ཤེས་བྱ་ལ་མ་རྨོངས་པ་རང་སངས་རྒྱས་ཀྱི་དབང་དམ་པ༴ ༀ་ཡེ་དྷརྨཱ༴ གསུམ་པ་སྤུ་གྲི། ན་མོ། དཀོན་མཆོག་གསུམ་གྱི༴ རིགས་ཀྱིི་བུ་ལ་ཤན་རལ་གྲིའི་དབང་བསྐུར་བས་ཉོན་མོངས་པའི་དྲྭ་བ་གཅོད་པའི་དབང་དམ་པ༴ ༀ་ཡེ་དྷརྨཱ༴ བཞི་པ་ཆོས་གོས། ན་མོ། དཀོན་མཆོག་གསུམ་གྱི༴ རིགས་ཀྱི་བུ་ལ་ན་བཟའ་དུར་སྨྲིག་གི་དབང་བསྐུར་བས་ཉོན་མོངས་པའི་གདུང་བ་ལས་སྐྱོབ་པའི་དབང་དམ་པ༴ ༀ་ཡེ་དྷརྨཱ༴ ལྔ་པ་སྦྲང་རྩི། ན་མོ། དཀོན་མཆོག༴ རིགས་ཀྱི་བུ་ལ་བཀྲ་ཤིས་པའི་རྫས་སྦྲང་རྩིའི་དབང་བསྐུར་བས་འབྲས་བུ་ཕུན་སུམ་ཚོགས་པའི་དབང་དམ་པ༴ ༀ་ཡེ་དྷརྨཱ༴ དྲུག་པ་རྩྭ་ཟོར་བའི་སྟན། ན་མོ། དཀོན་མཆོག༴ རིགས་ཀྱི་བུ་ལ་རྩྭ་དརྦྷའི་རྫས་ཀྱི་དབང་བསྐུར་བས་བཀྲ་ཤིས་ཤིང་བར་ཆད་ཐམས་ཅད་ཀྱིས་མི་ཚུགས་པའི་དབང་དམ་པ༴ ༀ་ཡེ་དྷརྨཱ༴ དེ་ལྟར་བུམ་ཆབ་ཀྱི་ཁྲུས་སྔོན་དུ་འགྲོ་བས་སྟོན་པ་སངས་རྒྱས་ཇི་ལྟར་རབ་ཏུ་བྱུང་བའི་ཉེར་སྤྱོད་རྣམས་ཀྱི་དབང་བསྐུར་བས། རང་སངས་རྒྱས་ཀྱི་ཚུལ་ཁྲིམས་རང་བྱུང་གི་དགེ་སློང་དུ་གྱུར་ནས་འཁོར་བ་ལས་འབྱིན་པའི་སྐལ་བ་ཅན་དུ་བྱས་པ་ཡིན་ནོ། །དེ་ནས་རང་སངས་རྒྱས་ཀྱི་བྱང་ཆུབ་མངོན་དུ་བྱེད་པའི་ལམ་ཟབ་མོ་རྟེན་འབྲེལ་འབྱུང་ལྡོག་གི་དབང་བསྐུར་བ་ནི། རྟེན་འབྲེལ་བཅུ་གཉིས་ཀྱི་ཙཀླི་ཐོགས་ཏེ། ནང་གི་རྟེན་འབྲེལ་བཅུ་གཉིས་ནི། །མ་རིག་རྒན་མོ་ལོང་བ་འདྲ། །འདུ་བྱེད་རྫ་མཁན་ལྟ་བུ་སྟེ། །རྣམ་ཤེས་སྤྲེའུ་མིང་གཟུགས་གྲུ། །སྐྱེ་མཆེད་ཁང་པ་སྟོང་པ་འདྲ། །རེག་པ་ཕོ་མོ་འོ་བྱེད་བཞིན། །ཚོར་བ་པུས་མོར་མདའ་ཟུག་འདྲ། །སྲེད་པ་ཆང་འཐུང་ལྟ་བུ་སྟེ། །ལེན་པ་ཤིང་ཐོག་འཐུ་བ་འདྲ། །སྲིད་པ་འཁྲིག་པའམ་སྦྲུམ་མ་སྟེ། །སྐྱེ་བ་མ་ལས་བུ་སྐྱེ་འདྲ། །རྒ་ཤི་གུད་དང་ཤི་བ་འདྲ། །ཕྱི་ཡི་རྟེན་འབྲེལ་བཅུ་གཉིས་ནི། །ས་བོན་མྱུ་གུ་སྡོང་པོ་དང་། །ལོ་མ་མེ་ཏོག་འབྲས་བུ་སྟེ། །རྒྱུ་དང་འབྲེལ་བ་དྲུག་ཅེས་བྱ། །མཁའ་རླུང་མེ་ཆུ་ས་ཁམས་ལྔ། །དུས་ཀྱི་འགྱུར་བ་དང་བཅས་པ། །རྐྱེན་དང་འབྲེལ་བ་དྲུག་ཡིན་ཏེ། །ཕྱི་ནང་རྒྱུ་འབྲས་རྟེན་འབྲེལ་རྣམས། །ལུགས་འབྱུང་ལུགས་ལྡོག་མངོན་གྱུར་ནས། །ཡིད་བཞིན་བདེ་བ་མཆོག་ཐོབ་ཤོག །ཧཱུཾ། བསེ་རུ་དང་ནི་ནེ་ཙོ་ལྟ་བུ་ཡི། །འབྲས་བུ་ལ་སོགས་ཕྱི་ཡི་རྟེན་འབྲེལ་དང་། །མ་རིག་པ་སོགས་ནང་གི་རྟེན་འབྲེལ་དང་། །ལུགས་འབྱུང་འཁོར་བའི་རྒྱུ་འབྲས་སྤང་བྱ་ཞིང་། །ལུགས་ལྡོག་འདས་པའི་རྒྱུ་འབྲས་རབ་བསྒྲུབས་ནས། །འཇིག་རྟེན་པ་དང་ཉན་ཐོས་རང་ས་དྲུག །འདས་ནས་རང་སངས་རྒྱས་ཀྱི་སར་ཕྱིན་ཤོག །ན་མོ། དཀོན་མཆོག་གསུམ་གྱི༴ རིགས་ཀྱི་བུ་ཁྱོད་ལ་རྟེན་འབྲེལ་གྱི་དབང་བསྐུར་བས་ཡིད་བཞིན་བདེ་བ་མཆོག་གི་ས་ཐོབ་པའི་དབང་དང་ལྡན་པར་གྱུར་ཅིག །ༀ་ཡེ་དྷརྨཱ༴ ཨ་བྷི་ཥིཉྩ་ཧཱུཾ། དེ་ནས་ལྷ་དབང་བསྐུར་བ་ནི། །དཀྱིལ་འཁོར་ལ་བཀོད་པའི་ལྷ་རྣམས་ལས་མར་མེ་གཅིག་ལས་གཉིས་ཆད་ཀྱི་རྣམ་པར་ལྷ་སོ་སོ་རིམ་པར་བྱོན་ནས། ཁྱེད་རང་རྣམས་ཀྱི་སྤྱི་བོ་ནས་ཐིམ་པའི་བྱིན་རླབས་ཀྱིས་རྟེན་འབྲེལ་འཇུག་ལྡོག་དང་། བདག་མེད་ཕྱེད་དང་གཉིས་རྟོགས་པའི་ཡོན་ཏན་ཁྱད་པར་ཅན་རྒྱུད་ལ་སྐྱེས་པའི་མོས་པ་མཛོད། གཙོ་བོ་ཐུབ་དབང་གི་སྐུ་ཐོགས་ཏེ། འདས་དང་མ་བྱོན་ད་ལྟར་གྱི། །དུས་གསུམ་སངས་རྒྱས་ཇི་སྙེད་པའི། །བཅོམ་ལྡན་གཙོ་བོའི་དབང་བསྐུར་བས། །འཁོར་བའི་སྡུག་བསྔལ་གྲོལ་བར་ཤོག །ༀ་ཡེ་དྷརྨཱ༴ རང་རྒྱལ་བསེ་རུ་དང་ནེ་ཙོ་ལྟ་བུའི་ཙཀླི་ཐོགས་ཏེ། ན་མོ། དཀོན་མཆོག༴ རིགས་ཀྱི་བུ་ལ་རང་སངས་རྒྱས་བསེ་རུ་ལྟ་བུ་དང་ནེ་ཙོ་ལྟ་བུའི་དབང་བསྐུར་བས་གཅིག་པུར་བསམ་གཏན་ལ་གནས་པ་དང་། ཚོགས་སྤྱོད་ཀྱི་གྲོགས་ལ་བརྟེན་ཏེ་བསམ་གཏན་མཐར་ཕྱིན་ནས་ཡིད་བཞིན་བདེ་བ་མཆོག་གིས་རང་རྒྱལ་དགྲ་བཅོམ་གྱི་རྟོགས་རིགས་མངོན་དུ་གྱུར་པའི་དབང་དམ་པ་ཐོབ་པར་གྱུར་ཅིག །ༀ་ཡེ་དྷརྨཱ༴ རང་རྒྱལ་བཅུ་གཉིས་ཀྱི་ཙཀླི་རིམ་པར་ཐོགས་ཏེ། ན་མོ། དཀོན་མཆོག༴ རིགས་ཀྱི་བུ་ལ་རང་སངས་རྒྱས་རྡོ་རྗེ་འཇིགས་མེད་ཀྱི་དབང་བསྐུར་བས་འཁོར་བསྐྲག་པར་བྱེད་པའི་དབང་དམ་པ༴ ༀ་ཡེ་དྷརྨཱ༴ ན་མོ། དཀོན་མཆོག༴ རིགས་ཀྱི་བུ་ལ་རང་སངས་རྒྱས་སྣང་བ་བརྩེགས་པའི་དབང་བསྐུར་བས་ཏིང་ངེ་འཛིན་རབ་ཏུ་སྣང་བའི་དབང་དམ་པ༴ ༀ་ཡེ་དྷརྨཱ༴ ན་མོ། དཀོན་མཆོག༴ རིགས་ཀྱི་བུ་ལ་རང་སངས་རྒྱས་དཔའ་བོ་འདུལ་བའི་དབང་བསྐུར་བས་སྲིད་པ་བསྙིལ་བའི་དབང་དམ་པ༴ ༀ་ཡེ་དྷརྨཱ༴ ན་མོ། དཀོན་མཆོག༴ རིགས་ཀྱི་བུ་ལ་རང་སངས་རྒྱས་གདུང་བ་སེལ་བའི་དབང་བསྐུར་བས་ཉོན་མོངས་པའི་གདུང་བ་སེལ་བའི་དབང་༴ ༀ་ཡེ་དྷརྨཱ༴ ན་མོ། དཀོན་མཆོག༴ རིགས་ཀྱི་བུ་ལ་རང་སངས་རྒྱས་ཤེས་རབ་མགྱོགས་ཆེན་གྱི་དབང་བསྐུར་བས་ཤེས་རབ་ཀྱི་རྩལ་དང་ལྡན་པའི་དབང་དམ་པ༴ ༀ་ཡེ་དྷརྨཱ༴ ན་མོ། དཀོན་མཆོག༴ རིགས་ཀྱི་བུ་ལ་རང་སངས་རྒྱས་རྫུ་འཕྲུལ་ཆེར་སྟོན་གྱི་དབང་བསྐུར་བས་སྤྲུལ་པའི་ཆོ་འཕྲུལ་དང་ལྡན་པའི་དབང་༴ ༀ་ཡེ་དྷརྨཱ ༴ ན་མོ། དཀོན་མཆོག༴ རིགས་ཀྱི་བུ་ལ་རང་སངས་རྒྱས་གདུང་བ་སེལ་བྱེད་ཀྱི་དབང་བསྐུར་བས་དུག་ལྔ་འདུལ་བའི་དབང་དམ་པ༴ ༀ་ཡེ་དྷརྨཱ༴ ན་མོ། དཀོན་མཆོག༴ རིགས་ཀྱི་བུ་ལ་རང་སངས་རྒྱས་སྒྲ་ཆེན་པོའི་དབང་བསྐུར་བས་གསུང་གི་དབང་ཕྱུག་ཏུ་གྱུར་པའི་དབང་དམ་པ༴ ༀ་ཡེ་དྷརྨ༴ ན་མོ། དཀོན་མཆོག༴ རིགས་ཀྱི་བུ་ལ་རང་སངས་རྒྱས་བསེ་རུ་ལྟ་བུའི་དབང་བསྐུར་བས་ཏིང་ངེ་འཛིན་རྩེ་གཅིག་ཏུ་གྱུར་པའི་དབང་དམ་པ༴ ༀ་ཡེ་དྷརྨཱ༴ ན་མོ། དཀོན་མཆོག༴ རིགས་ཀྱི་བུ་ལ་རང་སངས་རྒྱས་རིའི་རྒྱལ་པོའི་དབང་བསྐུར་བས་འཁོར་བའི་རླུང་གི་མི་བསྐྱོད་པའི་དབང་དམ་པ༴ ༀ་ཡེ་དྷརྨཱ༴ ན་མོ། དཀོན་མཆོག༴ རིགས་ཀྱི་བུ་ལ་རང་སངས་རྒྱས་སེང་གེ་ལྟ་བུའི་དབང་བསྐུར་བས་འཇིགས་པ་ཐམས་ཅད་དང་བྲལ་བའི་དབང་དམ་པ༴ ༀ་ཡེ་དྷརྨ༴ ན་མོ། དཀོན་མཆོག༴ རིགས་ཀྱི་བུ་ལ་རང་སངས་རྒྱས་ཡིད་མྱུར་བའི་དབང་བསྐུར་བས་ཏིང་ངེ་འཛིན་རྫུ་འཕྲུལ་མྱུར་བའི་དབང་དམ་པ་ཐོབ་པར་གྱུར་ཅིག །ༀ་ཡེ་དྷརྨཱ༴ ཞེས་བསྐུར་རོ། །དེ་ལྟར་རང་རྒྱལ་གྱི་ཐེག་པའི་དབང་བསྐུར་བས་མདོ་རང་ལུགས་ཀྱི་སྦྱོར་ལམ་དང་པོ་རིགས་ཆེན་འབྱེད་པའི་རྣལ་འབྱོར་གལ་ཆེན་སྦྱོང་བའི་ས་ནོན་པ་དང་རིགས་འདྲ་བའི་ཡོན་ཏན་གསོས་ཐེབས་པས། མངོན་དུ་རྒྱུའི་བག་ཆགས་རགས་པ་དག །ལམ་གོང་མ་ལ་སྦྱོར་བའི་ལྡང་བ་བྱང་ཆུབ་ཀྱི་སེམས་སྐྱེས་ཤིང་། འཁོར་བ་ལས་རྣམ་པར་གྲོལ་བའི་རྒྱུར་གྱུར། རང་རྒྱལ་དགྲ་བཅོམ་གྱི་རྟོགས་རིགས་དང་འདྲ་བའི་ཡོན་ཏན་ཁྱད་པར་ཅན་ཐོབ་པའི་སྐལ་པ་ཅན་དུ་བྱས་པ་ཡིན་ནོ། །རྗེས་ཀྱི་བྱ་བ་ལ་སྤྱི་དོན་གསུམ་སྟེ། ལམ་ཁྱེར་བཞི་བསྟན་པ། འགག་དྲུག་བཤད་པ། གདམས་ངག་ངང་སྒོམ་གྱི་ཁྲིད་གདབ་པའོ། །སྤྱི་དོན་དང་པོ་ལམ་ཁྱེར་ལ་བཞི་ལས། དང་པོ་ཐེག་པ་ལམ་ཁྱེར་ནི། རང་སངས་རྒྱས་ཀྱི་ཐེག་པ་སྟེ་དེ་ལའང་དྲུག་ལས། འཇུག་པའི་སྒོ་ནི། རྟེན་འབྲེལ་བཅུ་གཉིས་ཀྱི་སྒོ་ནས་འཇུག་སྟེ། རྒྱུ་དང་འབྲེལ་བ་ས་བོན་ནས་འབྲས་བུའི་བར་དྲུག །རྐྱེན་དང་འབྲེལ་བ་འབྱུང་ལྔ་དུས་ཀྱི་འགྱུར་བ་དང་དྲུག་གིས་ཕྱིའི་རྟེན་འབྲེལ་བཅུ་གཉིས། རྒྱུ་ཡོད་ན་འབྲས་བུ་འབྱུང་བའི་ལུགས་འབྱུང་དང་། ལོག་ན་ལྡོག་པའི་ལུགས་ལྡོག་དཔེར་བྱས་ཏེ། ནང་གི་རྟེན་འབྲེལ་དུར་ཁྲོད་ཀྱི་རུས་པ་ལ་བརྟེན་ནས། དེ་རྒ་ཤི་ལས་བྱུང་བ་སོགས་རིམ་གྱིས་བརྟགས་པས། འདི་ལྟར་འཁོར་བའི་རྩ་བ་མ་རིག་པར་རྟོགས་ཏེ། དེ་ལོག་ན་འདུ་བྱེད་ནས་རྒ་ཤིའི་བར་ལྡོག་པར་ཤེས་ནས་འཇུག་སྟེ། དེ་ཡང་བསྐལ་ཆེན་བརྒྱའི་བར་ཚོགས་བསགས་ལ། སྲིད་པ་ཐ་མའི་ཚེ་མཁན་སློབ་མེད་པར་རང་བྱུང་གི་དགེ་སློང་དུ་གྱུར་ནས་དུར་ཁྲོད་དུ་ཕྱིན་པ་ན། རུས་པ་མཐོང་མ་ཐག་རྟེན་འབྲེལ་འབྱུང་ལྡོག་གི་འགྲོས་རྟོགས་པའི་སྒོ་ནས་སོ། །ལྟ་བ་ནི། གང་ཟག་གི་བདག་མེད་རྟོགས་པའི་སྟེང་དུ་གཟུང་བ་ཆོས་ཀྱི་བདག་མེད་རྟོགས་པ་བསྣན་པས་བདག་མེད་ཕྱེད་དང་གཉིས་རྟོགས་ཏེ། མངོན་རྟོགས་རྒྱན་ལས། གཟུང་དོན་རྟོག་པ་སྤོང་ཕྱིར་དང་། །འཛིན་པ་མི་སྤོང་ཕྱིར་དང་ནི། །རྟེན་གྱི་བསེ་རུ་ལྟ་བུའི་ལམ། །ཡང་དག་བསྡུས་པར་ཤེས་པར་བྱ། །ཞེས་གསུངས། ཚུལ་ཁྲིམས་ནི། ཉན་ཐོས་དང་འདྲའོ། །སྒོམ་པ་ནི། ཉན་ཐོས་ཀྱི་བདེན་བཞི་རྣམ་པ་བཅུ་དྲུག་གི་སྟེང་དུ་རྟེན་ཅིང་འབྲེལ་བར་འབྱུང་བ་ཟབ་མོ་བསྣན་ནས་སྒོམ། སྤྱོད་པ་ནི། རང་དོན་གཙོ་བོར་སྤྱོད་ཅིང་། གཞན་ལ་ཆོས་སྟོན་པ་ན་ངག་གི་རྣམ་རིག་ལ་མི་བརྟེན་པར་རྫུ་འཕྲུལ་གྱི་བཀོད་པས་ལུས་ཀྱི་རྣམ་རིག་གིས་སྟོན་ནོ། །འབྲས་བུ་ལ་མཚམས་སྦྱོར་བྱེད་རང་རྒྱལ་དུ་སྨོན་ལམ་བཏབ་པ་ལྟར། བསེ་རུ་ལྟ་བུ་དང་། ཚོགས་ན་སྤྱོད་པ་ཆེན་པོ་དང་ཆུང་ངུ་རྣམས་རིམ་པར་ལམ་ལྔ་དང་། བཞི་དང་། གསུམ་སྟན་ཐོག་གཅིག་ཏུ་མངོན་དུ་རྫོགས་ནས་རང་རྒྱལ་དགྲ་བཅོམ་གྱི་གོ་འཕང་ལ་སྦྱོར་བ་སྟེ། ཐོབ་བྱ་དེ་ཉིད་འདིའི་ལམ་སྟེགས་སུ་མངོན་དུ་བྱེད་མི་དགོས་ཀྱང་། རྟོགས་བྱ་ཐམས་ཅད་འདིར་ཡང་རྟོགས་དགོས་པ་ཡིན་ནོ། །གཉིས་པ་ལྷ་ལམ་ཁྱེར་ནི། བཅོམ་ལྡན་འདས་ཐུབ་པའི་དབང་པོ་ལ། འཁོར་འཕགས་པ་རང་སངས་རྒྱས་ཀྱི་དགེ་འདུན་དང་བཅས་པ་སྤྱན་དྲངས་ཏེ་བཞུགས་པའི་སྤྱན་སྔར་ཚོགས་བསགས་པའོ། །གསུམ་པ་སྙིང་པོ་ལམ་ཁྱེར་ནི། ལྷ་དེ་རྣམས་ཀྱི་སྐུ་ལས་འཕྲོས་པའི་འོད་ཟེར་དཀར་པོས་ལུས་སེམས་ཀྱི་སྐྱོན་སྦྱངས་ཤིང་། རྒྱུད་བྱིན་གྱིས་བརླབས་པར་བསམས་ལ། མུ་ནེ་དང་། རྟེན་འབྲེལ་སྙིང་པོའི་གཟུགས་བཟླ་བའོ། །བཞི་པ་བསླབ་བྱ་ལམ་ཁྱེར་ནི། སྤྱིར་ཉན་ཐོས་ལྟར་དགེ་མི་དགེའི་ལས་ཀྱི་བླང་དོར་མ་ནོར་བར་བྱ་ཞིང་། ཁྱད་པར་མཁས་པར་བྱ་བའི་ཆོས་དྲུག་ལ་མཁས་པར་སློབ་པ་སྟེ། ཆོས་དྲུག་ནི། ཕུང་པོ་དང་། ཁམས་དང་། སྐྱེ་མཆེད་དང་། རྟེན་ཅིང་འབྲེལ་བར་འབྱུང་བ་དང་། གནས་དང་གནས་མ་ཡིན་པ་དང་། བདེན་པ་རྣམས་སོ། །སྤྱི་དོན་གཉིས་པ་འགག་དྲུག་བཤད་པ་ནི། གཞུང་ལས། གང་དུ་གང་གིས་གང་ལ་གང་བསྟན་པ། །ཅིའི་ཕྱིར་བཤད་པའི་དགོས་པ་དང་བཅས་པ། །འདི་ནི་རང་རྒྱལ་ཐེག་པའི་འགག་དྲུག་ཡིན། །ཞེས་གསུངས་པ་ལྟར། གང་དུ་བཤད་པའི་གནས་ནི། རི་བོ་བྱ་རྐང་ཅན་དུའོ། །གང་གིས་བཤད་པའི་སྟོན་པ་ནི། ཡང་དག་པར་རྫོགས་པའི་སངས་རྒྱས་སོ། །གང་ལ་བཤད་པའི་འཁོར་ནི། ཉན་ཐོས་དབང་རྣོན་རྣམས་ལའོ། །གང་བསྟན་པའི་ཐེག་པ་ནི། རང་རྒྱལ་གྱི་ཐེག་པ་སྟེ། དེ་སྟོན་པའི་སྡེ་སྣོད་ཀྱང་མ་སྐྱེས་དགྲའི་འགྱོད་པ་བསལ་བའི་མདོ་སོགས་སུ་ཉན་ཐོས་ཀྱི་སྡེ་སྣོད་ལས་ལོགས་པ་ཡོད་པར་བཤད་དོ། །ཅིའི་ཕྱིར་ན་རྟེན་འབྲེལ་གྱི་དབང་བསྐུར་བས་རྟེན་འབྲེལ་འབྱུང་ལྡོག་གི་དོན་རྟོགས་ཏེ་རང་རྒྱལ་དགྲ་བཅོམ་གྱི་རྟོགས་རིགས་དང་འདྲ་བའི་ཡོན་ཏན་ཐོབ་པའི་ཆེད་དུའོ། །དེ་ལྟར་བསྟན་པའི་དགོས་པ་ནི། འཁོར་བ་ལས་ཐར་པའི་བྱང་ཆུབ་འབྲིང་ཐོབ་པའི་དགོས་པ་ཡོད་དོ། །སྤྱི་དོན་གསུམ་པ་གདམས་ངག་ངང་སྒོམ་གྱི་ཁྲིད་ནི། །རང་གི་སྤྱི་བོར་ཐེག་ལེ་དམར་པོ་དང་། །དེ་ལ་ཁྲུ་གང་ཙམ་གྱིས་མཐོ་བར་ཐིག་ལེ་དཀར་པོ་སྟེ། གཉིས་ཀ་ཆེ་ཆུང་སྲན་མ་ཙམ་དུ་བསྒོམ། དེ་ལྟར་གསལ་ཐེབས་པ་དང་། ཐིག་ལེ་དམར་པོ་དེ་ལ་ཤེས་པ་གཏད་པས། དེ་ཇེ་ཆེ་ཇེ་ཆེར་འཕེལ་ནས། སྣང་བ་ཐམས་ཅད་དམར་ལམ་གྱིས་སོང་བ་ལ་རྩེ་གཅིག་ཏུ་མཉམ་པར་བཞག །ཡང་ཐིག་ལེ་དཀར་པོ་ལ་ཤེས་པ་གཏད་པས། དེ་ཇེ་ཆེ་ཇེ་ཆེར་འཕེལ་ནས་སྣང་བ་ཐམས་ཅད་དཀར་ལམ་གྱིས་སོང་བ་ལ་རྩེ་གཅིགས་ཏུ་འཇོག་སྟེ། དམར་དཀར་གཉིས་པོ་དེ་རྟེན་འབྲེལ་ལུགས་འབྱུང་ལྡོག་གི་ཆོས་སུ་ཤེས་པར་བྱ། དེ་ནས་དཀར་དམར་གཉིས་འདྲེས་པ་སྤྱི་བོ་ནས་བབས་ཏེ་སྙིང་གར་ཐིམ་པའི་ངང་ལ་མ་བཅོས་པར་མཉམ་པར་བཞག་གོ། །དེ་བརྟན་ནས་ལྟ་ཁྲིད་ནི། ལུས་སེམས་རྡུལ་ཕྲན་དང་སྐད་ཅིག་མའི་བར་དུ་གཤིག་པ་ཉན་ཐོས་ལྟར་ལས། དོན་དུ་སྣང་བ་རྡུལ་ཕྲན་དུ་བསིལ་བ་དེ་ཡང་རྣམ་པར་གཤིག་པས་མཐའ་མེད་དུ་གྱུར་ནས་ཅིར་ཡང་མ་གྲུབ་པའི་ངང་ལ་མཉམ་པར་བཞག །དེ་ལྟར་བསྒོམས་པས་གང་ཟག་གི་བདག་མེད་རྟོགས་པའི་སྟེང་དུ། གཟུང་བ་ཆོས་ཀྱི་བདག་མེད་ཀྱང་རྟོགས་པར་འགྱུར་བ་ཡིན་ནོ། །དེས་རང་རྒྱལ་གྱི་ཐེག་པའི་དབང་བསྐུར་བ་མན་ངག་དང་བཅས་པ་གྲུབ་པས། ཇི་ལྟར་གདམས་པ་ལྟར་ཚུལ་བཞིན་དུ་བསྒྲུབ་པར་བྱ་སྙམ་དུ། གཙོ་བོས་ཇི་ལྟར་སོགས་ཀྱིས་ཁས་བླང་། གཏང་རག་གི་མཎྜལ་དང་། དེང་ནས་བརྩམས་ཏེ་སོགས་ཀྱི་ཡོན་དབུལ་ཞིང་། དགེ་བ་བསྔོ་བ་རྣམས་སྔར་ལྟར་དང་། རྗེས་ཆོག་རྣམས་སྒྲུབ་ཐབས་ལྟར་བྱའོ། །མཁས་པའི་མན་ངག་ཇི་ལྟ་བར། །རང་རྒྱལ་ཐེག་པའི་དབང་ཆོག་ཁྲིགས། །ཆོས་འདིར་འཇུག་འདོད་སྐྱེས་བུ་ལ། །ལེགས་བཤད་སྣང་བའི་དཔལ་འདི་སྤྲོས། །རང་རྒྱལ་ཐེག་པའི་དབང་མཆོག་གི་ལེ་ཚན་ནོ།། །།

༈ ༀ་སྭ་སྟི། འགྱུར་མེད་དབྱིངས་སུ་ཐམས་མཁས་ཀྱི། །རྡོ་རྗེ་སྒྲིབ་གཉིས་དཔུང་བཅོམ་ནས། །འགྲོ་ཀུན་སྒྲོལ་མཛད་བླ་མ་ལ། །བཏུད་ནས་བྱང་སེམས་དབང་ཆོག་བཤད། །ད་ནི་བཞི་པ་བྱང་སེམས་ཀྱི་ཐེག་པའི་དབང་ནི། དཀྱིལ་འཁོར་བཤམ་སྒྲུབ་གཏོར་ཆོག་དང་བཅས་པ་སྒྲུབ་ཐབས་ལྟར་གྲུབ་རྗེས། བདག་འཇུག་གི་དོན་ནི། སློབ་དཔོན་བདག་ཉིད་སྟོན་པ་ཐུབ་པའི་དབང་པོར་བསམས་པའི་དབུ་གཙུག་ཏུ་ནོར་བུ་རིན་པོ་ཆེ་དབང་གི་རྒྱལ་པོ་འོད་ཟེར་མཐའ་ཡས་པ་འཕྲོ་བ་དེས། དཀྱིལ་འཁོར་གྱི་ལྷ་དང་ཕྱོགས་བཅུའི་རྒྱལ་བ་སྲས་དང་བཅས་པའི་བྱིན་རླབས་ཐམས་ཅད་བསྡུས་ཏེ། སྤྱི་བོ་ནས་ཐིམ་པས་རྗེས་སུ་གནང་བ་ཐོབ། སླར་ཡང་སྤྱི་བོའི་འོད་ཀྱིས་དཀྱིལ་འཁོར་ལ་བཀོད་པའི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ་དང་། སྲས་སྟོན་པ་ཐུབ་པའི་དབང་པོ་ལ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱི་བསྐོར་བ་རྣམས་ལས་རང་འདྲ་བའི་སྐུ་རེ་རེ་ཆད་དེ། རང་གི་སྤྱི་བོ་ནས་ཐིམ་པས་སྒྲིབ་གཉིས་བྱང་ཞིང་། དེ་རྣམས་ཀྱི་ཐུགས་གཉིས་སུ་མེད་པའི་ཡེ་ཤེས་རང་རྒྱུད་ལ་ཐོབ་པར་བསམ་པའོ། །དེ་ནས་སློབ་མ་གཞུག་པ་ནི། ཁྲུས་བྱ། བགེགས་གཏོར་བཏང་ལ་མཚམས་བཅད། སེམས་བསྐྱེད་དང་ཆོས་ཉན་པའི་ཀུན་སྤྱོད་གསལ་འདེབས་པ་སྔོན་དུ་འགྲོ་བས། འདིར་གང་གསན་པར་བྱ་བའི་ཆོས་ནི། ཞེས་པ་ནས། ཕྱི་དབང་རྒྱུད་ཀྱི་ཆུ་བོའི་ཡན་ལག་གི་དཀྱིལ་འཁོར། ཞེས་པའི་བར་སྔར་ལྟར་ལས་སྤྲོ་བསྡུ་བྱས་རྗེས། བཞི་པ་བྱང་སེམས་ཀྱི་ཐེག་པའི་དཀྱིལ་འཁོར་དུ་དབང་བསྐུར་བ་སྐབས་སུ་བབས་པ་ཡིན། དེ་ལའང་གཉིས་ལས་སློབ་དཔོན་གྱི་བྱ་བ་རྣམས་གྲུབ་ནས། ད་ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ། འཇུག་ཅིང་དབང་ཞུ་བའི་ཡོན་དུ་མཎྜལ་ཕུལ་མཛོད། །ཅེས་བསྐུལ་ཏེ་མཎྜལ་ཕུལ། དེ་ནས་སློབ་དཔོན་ལ་ཕྱག་གསུམ་ཚོལ་ལ་པུས་བཙུགས་ཐལ་སྦྱར་གྱི་འདུག་ཅིག །ཅེས་བརྡ་སྦྱར་ཏེ། ཁྱེད་ཅག་བྱང་སེམས་ཀྱི་ཐེག་པའི་སྒོར་འཇུག་པ་ལ། ཐེག་ཆེན་གྱི་ཐུན་མོང་མ་ཡིན་པའི་ལམ་གྱི་ཐོག་མ་ནི་སེམས་བསྐྱེད་ནས་འགོ་འཛིན་དགོས་པས། སྐབས་འདིར་འཇུག་སྒོ་སེམས་བསྐྱེད་ཀྱི་སྡོམ་པ་བླང་བ་གལ་ཆེ་སྟེ། སེམས་མ་བསྐྱེད་པའི་སེམས་ཅན་ཡོད་དོ་ཅོག་གི་དགེ་བ་རྒྱ་ཆེན་པོ་ལན་གྲངས་དཔག་ཏུ་མེད་པ་བགྱིས་པ་ལས། སེམས་བསྐྱེད་པའི་གང་ཟག་གཅིག་གིས་དགེ་བ་ཕྲ་མོ་ལན་གཅིག་བྱས་པའང་བསོད་ནམས་ཆེས་ལྷག་པའི་ཕྱིར་ཏེ། རིན་པོ་ཆེའི་ཕུང་པོའི་མདོ་ལས། སེམས་ཅན་གང་དག་སྲིད་པ་གསུམ་དུ་གཏོགས་པ་དེ་དག་ཐམས་ཅད་ཀྱིས་སོ་སོ་ནས་དེ་བཞིན་གཤེགས་པའི་མཆོད་རྟེན་འཕང་དུ་རིའི་རྒྱལ་པོ་རི་རབ་ཙམ་བྱས་ཏེ། དེ་དག་ལ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་སོ་སོ་ནས་སྟི་སྟང་དུ་བྱ་བ་ཐམས་ཅད་ཀྱིས་སྟི་སྟང་དུ་བྱས་པ་ལས། བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་ཀྱི་སེམས་དང་མ་བྲལ་བ་གཅིག་གིས་མེ་ཏོག་གཅིག་ཕུལ་ན། དེ་ནི་བསོད་ནམས་ཀྱི་ཕུང་པོ་སྔ་མ་ལས་བསོད་ནམས་ཆེས་མང་དུ་བསྐྱེད་དོ། །ཞེས་སོགས་དང་། ཡང་དེ་བཞིན་གཤེགས་པའི་གསང་བའི་མདོ་ལས། བྱང་ཆུབ་སེམས་ཀྱི་བསོད་ནམས་གང་། །དེ་ལ་གལ་ཏེ་གཟུགས་མཆིས་ན། །ནམ་མཁའི་ཁམས་ནི་ཀུན་གང་སྟེ། །དེ་ནི་དེ་བས་ལྷག་པར་འགྱུར། །ཞེས་སོགས་འཕགས་པ་ཀླུ་སྒྲུབ་ཀྱིས་མདོ་ཀུན་ལས་བཏུས་སུ་དྲངས་ནས་བཤད་པ་ལྟར་ཕན་ཡོན་བསམ་གྱིས་མི་ཁྱབ་པ་ཡོད་པ་ཡིན། དེ་ལྟ་བུའི་ཕན་ཡོན་ཅན་གྱི་བྱང་ཆུབ་ཏུ་སེམས་བསྐྱེད་པའི་ཆེད་དུ་ཡུལ་ཁྱད་པར་ཅན་ལ་གསོལ་བ་གདབ་པ་ནི། དགེ་བའི་བཤེས་གཉེན་ལ་སྟོན་པའི་འདུ་ཤེས་བསྐྱེད་དེ་འདིའི་རྗེས་ཟློས་མཛོད། ཀྱེ་རིགས་ཀྱི་བུ། བདག་ལ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་བགྲོད་པ་གཅིག་པའི་ལམ་སྐྱབས་གསུམ་སྔོན་དུ་འགྲོ་བ་ཅན་བྱང་ཆུབ་ཀྱི་མཆོག་ཏུ་སེམས་བསྐྱེད་པ་སྩལ་དུ་གསོལ། །ཞེས་ལན་གསུམ་གསོལ་བ་བཏབ་པའི་ལན་དུ་གནང་བ་བྱིན་པ་ནི། སློབ་དཔོན་གྱིས། ནུས་པ་ཇི་ལྟ་བ་བཞིན་དུ་སྦྱིན་པར་བྱའོ། །ཞེས་ཁས་བླང་། དེ་ནས་སྨོན་འཇུག་གི་སེམས་བསྐྱེད་པའི་རྒྱུའི་གཙོ་བོར་ཐབས་ཁྱད་པར་ཅན་གྱི་སྒོ་ནས་ཚོགས་བསགས་དགོས་པས། འདི་ལྟར་དཀྱིལ་འཁོར་ལ་བཀོད་པའི་དཀོན་མཆོག་གསུམ་གྱིས་མཚོན་ནས། མདུན་གྱི་ནམ་མཁའི་གནས་སུ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་སྤྲིན་འཐིབས་པ་བཞིན་བཞུགས་པ་ལ། རང་གི་ལུས་ཞིང་གི་རྡུལ་སྙེད་དུ་སྤྲུལ་ནས་ཕྱག་འཚལ་བ་སོགས་ཡན་ལག་བདུན་ཕུལ་བར་མོས་པ་ལ་དོན་དྲན་བཞིན་པས་འདིའི་རྗེས་ཟློས། ཕྱོགས་བཅུ་དུས་གསུམ་བཞུགས་པ་ཡི། །རྒྱལ་བ་སྲས་དང་བཅས་རྣམས་ལ། སྒོ་གསུམ་གུས་པས་ཕྱག་འཚལ་ལོ། །མཆོད་སྤྲིན་རྒྱ་མཚོས་ཀུན་ཏུ་མཆོད། །སྡིག་པ་མི་དགེ་སོ་སོར་བཤགས། །དགེ་བ་ཀུན་ལ་རྗེས་ཡི་རང་། །ཆོས་ཀྱི་འཁོར་ལོ་བསྐོར་བར་བསྐུལ། །མྱ་ངན་མི་འདའ་བཞུགས་གསོལ་འདེབས། །དགེ་བ་བྱང་ཆུབ་ཆེན་པོར་བསྔོ། །ཞེས་ལན་གསུམ། དེ་ནས་ཐེག་པ་ཆེན་པོའི་བློ་ཁྱད་པར་ཅན་དུ་བྱེད་ཅིང་། སྡོམ་པའི་གཞི་འཛིན་པའི་ཕྱིར། རྟེན་ཁྱད་པར་ཅན་ལ་སྐྱབས་སུ་འགྲོ་བ་གལ་ཆེ་སྟེ། དེ་ཡང་དོན་དམ་པར་གང་གིས་སྐྱོབ་པའི་རྟེན་དཀོན་མཆོག་གསུམ་དང་། གང་སྐྱོབ་པའི་ཡུལ་འཁོར་བའི་སེམས་ཅན་ཐམས་ཅད་གདོད་ནས་རང་བཞིན་གྱིས་རྣམ་པར་དག་པའི་སྟོང་པ་ཉིད་ཡིན་ནའང་། དེ་ལྟར་མ་རྟོགས་པས་ཀུན་རྫོབ་ཏུ་འཁོར་བའི་གནས་སུ་སྡུག་བསྔལ་གྱིས་ཉམ་ཐག་ཅིང་སྐྱབས་མེད་མགོན་མེད་དུ་གྱུར་པའི་ཚེ་རབས་ཀྱི་ཕ་མ་དྲིན་ཅན་འདི་རྣམས་སྡུག་བསྔལ་རྒྱུ་དང་བཅས་པ་ལས་སྐྱོབ་ནུས་པ་ནི་དཀོན་མཆོག་རིན་པོ་ཆེ་གསུམ་མ་གཏོགས་གཞན་མེད་པས། དེ་ལ་རེ་ལྟོས་ཞེ་ཐག་པ་ནས་བཅས་ཏེ། བདག་ལ་འགྲོ་ཀུན་སྒྲོལ་ནུས་ཀྱི་ནུས་པ་ཡོད་པ་དཀོན་མཆོག་གསུམ་མཁྱེན་སྙམ་པས་ཐལ་མོ་སྦྱར་ལ་འདིའི་རྗེས་ཟློས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་ནས་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། རྐང་གཉིས་རྣམས་ཀྱི་མཆོག །ཕྱོགས་བཅུ་ན་བཞུགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །ཞི་བ་འདོད་ཆགས་དང་བྲལ་བ་རྣམས་ཀྱི་མཆོག །ཕྱོགས་བཅུ་ན་བཞུགས་པའི་དམ་པའི་ཆོས་རྣམས་ལ༴ ཚོགས་རྣམས་ཀྱི་མཆོག །ཕྱོགས་བཅུ་ན་བཞུགས་པའི་བྱང་ཆུབ་སེམས་དཔའི་དགེ་འདུན་ཕྱིར་མི་ལྡོག་པ་རྣམས་ལ་སྐྱབས་སུ་མཆིའོ། །ཞེས་ལན་གསུམ་བརྗོད། དེ་ནས་སེམས་བསྐྱེད་པ་དངོས་གཞི་ནི། དོན་དམ་པར་བདག་དང་། སེམས་ཅན་དང་སྡུག་བསྔལ་གསུམ་རང་བཞིན་གྱིས་མ་དམིགས་ཀྱང་། དེ་ལྟར་མ་རྟོགས་པའི་སེམས་ཅན་རྣམས་བསྒྲལ་བར་བྱ་བའོ་སྙམ་པ་སྨོན་སེམས་དང་། བདག་དང་ལམ་རང་བཞིན་གྱིས་མ་དམིགས་ཀྱང་འགྲོ་བ་རྣམས་བསྒྲལ་བའི་ཆེད་དུ་སྦྱིན་སོགས་ལ་འབད་པར་བྱའོ་སྙམ་པ་འཇུག་པ་སེམས་བསྐྱེད་དེ། འདིར་སྨོན་འཇུག་གཉིས་སྟབས་གཅིག་ཏུ་ལེན་པ་ཡིན་པས། །ཇི་ལྟར་དུས་གསུམ་གྱི་སངས་རྒྱས་དང་བྱང་ཆུབ་སེམས་དཔའ་ཆེན་པོ་རྣམས་ཀྱི་སྨོན་པ་དང་འཇུག་པའི་བདག་ཉིད་ཅན་གྱི་བྱང་ཆུབ་མཆོག་ཏུ་ཐུགས་བསྐྱེད་པ་དེ་བཞིན་དུ་བདག་གིས་ཀྱང་བྱང་ཆུབ་མཆོག་ཏུ་སེམས་བསྐྱེད་པར་བགྱིའོ་སྙམ་པས་འདིའི་རྗེས་ཟློས། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་རྣམས་དང་། བྱང་ཆུབ་སེམས་དཔའ་ཆེན་པོ་རྣམས་ཀྱི་བྱང་ཆུབ་མཆོག་ཏུ་ཐུགས་བསྐྱེད་དེ། སེམས་ཅན་ཐམས་ཅད་ཀྱི་དོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པ་སངས་རྒྱས་ནས། སེམས་ཅན་མ་བསྒྲལ་བ་རྣམས་བསྒྲལ་བ་དང་། མ་གྲོལ་བ་རྣམས་དགྲོལ་བ་དང་། དབུགས་མ་ཕྱིན་པ་རྣམས་དབུགས་ཕྱུང་པ་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱང་ངན་ལས་འདས་པའི་ས་ལ་བཀོད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་སྟེ། སྙིང་པོ་བྱང་ཆུབ་ལ་མཆིས་ཀྱི་བར་དུ་བྱང་ཆུབ་མཆོག་ཏུ་སེམས་བསྐྱེད་དེ། སེམས་ཅན་མ་བསྒྲལ་བ་རྣམས་སྒྲོལ་བ་དང་། མ་གྲོལ་བ་རྣམས་དགྲོལ་བ་དང་། །དབུགས་མ་ཕྱིན་པ་རྣམས་དབུགས་དབྱུང་བ་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའ་བར་བགྱིའོ། །ཞེས་ལན་གསུམ་བརྗོད་དོ། །བརྗོད་པ་ཐ་མ་ལ་སྡོམ་པ་སྐྱེས་པར་བསམ་དུ་གཞུག །དེས་དངོས་གཞི་གྲུབ། རྗེས་ཀྱི་ཆོ་ག་གསུམ་ལས། རང་དགའ་བ་སྒོམ་པ་ནི། ཁྱེད་རྣམས་དེང་ཕྱིན་ཆད་བྱང་ཆུབ་སེམས་དཔར་གྱུར་པས་མི་ལུས་ཐོབ་པ་དོན་ཡོད་པར་བྱས་སྙམ་དུ་གཟེངས་གཏོད་པ་འདིའི་རྗེས་ཟློས། དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །ཞེས་པ་ལན་གཅིག །གཞན་དགའ་བ་སྒོམ་དུ་གཞུག་པ་ནི། ཁྱེད་རྣམས་ཀྱིས་སེམས་བསྐྱེད་པ་དེ་དཀར་ཕྱོགས་པ་རྣམས་ཀྱིས་ཐོས་ན་དགའ་བ་སྐྱེ་བ་ཡིན་པས། དེ་དག་ལ་སྨོན་པའི་བསམ་པས་རྗེས་ཟློས། བདག་གིས་དེ་རིང་སྐྱོབ་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། བར་དུ་བདེ་ལ་མགྲོན་དུ་བོས་ཟིན་གྱིས། །ལྷ་དང་ལྷ་མིན་ལ་སོགས་དགའ་བར་གྱིས། །ཞེས་པ་ཚར་གཅིག །དེ་ལྟར་རང་གཞན་སྤྲོ་བ་བསྐྱེད་ནས་སྡོམ་པ་བརྟན་པར་བྱ་བའི་ཕྱིར། ཇི་ལྟར་བཅས་པ་ལས་མི་འདའ་བར་དམ་བཅའ་བ་འདིའི་རྗེས་ཟློས། ད་ནི་བདག་གིས་ཅི་ནས་ཀྱང་། །རིགས་དང་མཐུན་པའི་ལས་བརྩམས་ཏེ། །སྐྱོན་མེད་བཙུན་པའི་རིགས་འདི་ལ། །རྙོག་པར་མི་འགྱུར་དེ་ལྟར་བྱ། །ཞེས་ལན་གཅིག་བརྗོད་དོ། །དེ་ནས་ཆོས་བཤད་པ་ནི། ཐེག་པ་འདིའི་ལུགས་ཀྱིས་སྲིད་ཞིའི་མཐའ་གཉིས་ལས་ངེས་པར་འབྱུང་བ་སྐྱེས་བུ་ཆེན་པོའི་ལམ་ཡིན་པས། ཐབས་ཤེས་ཟུང་འཇུག་གི་སྒོ་ནས་བསླབ་དགོས། །དེ་ལ་དོན་དམ་པར་གཤིས་རང་བཞིན་གྱིས་རྣམ་པར་དག་པའི་དབྱིངས་སུ་འཁོར་འདས་རོ་མཉམ་ཡང་། ཀུན་རྫོབ་རྟེན་འབྲེལ་མ་འགགས་པའི་འཆར་སྒོར་འཁོར་འདས་སོ་སོར་སྣང་བས། སྡུག་བསྔལ་ཅན་གྱི་འཁོར་བ་པ་ལ་སྙིང་རྗེ་ཆེན་པོས་དྲངས་པའི་གཞན་ཕན་བྱང་ཆུབ་ཀྱི་སེམས་ཁྱད་པར་ཅན་གྱིས་ཟིན་པའི་ཐབས་ཤེས་ཟུང་འབྲེལ་གྱིས་སྲིད་ཞིའི་མཐའ་གཉིས་ལ་མི་གནས་པར་སྤྱོད་པ་སྟེ། ཇི་ལྟར་ན། ཆོས་ཐམས་ཅད་ལ་བདེན་ཞེན་གྱིས་མ་གོས་པས་ཆུ་ཟླ་ལྟར་སྣང་བའི་ངང་ནས། འབྲས་བུ་བླ་ན་མེད་པའི་བྱང་ཆུབ་ལ་དམིགས་ཏེ། གཞིའི་སྟེང་གི་དྲི་མ་སྦྱོང་བའི་གཉེན་པོ་ལམ་རྣམ་པར་མི་རྟོག་པའི་ཏིང་ངེ་འཛིན་སྒོམ་ཞིང་། སྨོན་འཇུག་གི་སྡོམ་པ་མི་ཉམས་ཤིང་ཡང་ཡང་བསྐྱར་བས་གོང་འཕེལ་གྱི་སྒོ་ནས་ཕ་རོལ་ཏུ་ཕྱིན་པ་བཅུ་དང་། བསྡུ་བའི་དངོས་པོ་བཞི་སོགས་ལ་སྤྱོད་པར་བྱེད་པ་སྟེ། སྒོམ་སྤྱོད་ཟུང་དུ་འབྲེལ་བ་དེ་ཡང་། བདག་མེད་གཉིས་རྟོགས་ཀྱི་ལྟ་བ་རྣམ་པར་དག་པས་འགོ་བསྡུས་ནས་ཉམས་སུ་ལེན་པ་ལ་བརྩོན་པ་ཆེན་པོས་བསླབ་འཚལ་ལོ། །དེ་ལྟར་འཇུག་སྒོ་གྲུབ་ནས། བླ་མ་ལ་སྟོན་པ་སངས་རྒྱས་ཀྱི་འདུ་ཤེས་བསྐྱེད་དེ། དབང་དངོས་གཞི་ཞུ་བའི་དོན་དུ་མཎྜལ་འབུལ་དུ་བཅུག །དེ་ནས་སློབ་དཔོན་ཐུབ་པའི་དབང་པོར་གསལ་བའི་གཙུག་ཏོར་ནོར་བུ་དབང་གི་རྒྱལ་པོ་འོད་ཟེར་མཐའ་ཡས་པ་འཕྲོ་བ་ལས། དགོས་འདོད་མ་ལུས་པ་འབྱུང་བར་མོས་ལ། སྙིམ་པ་མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་གདབ་པ་ནི། སློབ་དཔོན་སངས་རྒྱས་དགོངས་སུ་གསོལ། །བདེན་གཉིས་དོན་རྟོགས་ཐེག་ཆེན་གྱི། །རྒྱལ་བའི་མཛད་པ་མཐར་ཕྱིན་པ། །ཟབ་ཅིང་རྒྱ་ཆེའི་དབང་རྣམས་སྩོལ། །ཞེས་ལན་གསུམ་གྱིས་གསོལ་བ་བཏབ་ནས། དབང་བསྐུར་བ་དངོས་ལ། ཐོག་མར་ལྷ་དབང་བསྐུར་བ་ནི། དཀྱིལ་འཁོར་ལ་བཀོད་པའི་ལྷ་རྣམས་ལས་མར་མེ་གཅིག་ལས་གཉིས་ཆད་ཀྱི་རྣམ་པར་ལྷ་སོ་སོ་རིམ་གྱིས་བྱོན་ནས། ཁྱེད་རང་རྣམས་ཀྱི་སྤྱི་བོ་ནས་ཐིམ་པའི་བྱིན་རླབས་ཀྱིས། སྒྲིབ་གཉིས་བྱང་ཞིང་། བདག་མེད་གཉིས་རྟོགས་ཀྱི་ཡོན་ཏན་རྣམ་པར་མི་རྟོག་པའི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པའི་མོས་པ་མཛོད། ལྷ་ཙཀ་རྣམས་རིམ་པར་ཐོགས་ཏེ། ཧཱུཾ། གསེར་གྱི་མདོག་ཅན་རྐང་གཉིས་གཙོ། །སྤྱན་ཡངས་མཐིང་ག་མཛོད་སྤུར་ལྡན། །སྐུ་ཡི་སྒོ་ནས་འོད་ཟེར་འགྱེད། །བསྟན་པའི་མངའ་བདག་འགྲོ་བ་འདྲེན། །ཤཱཀྱའི་རྒྱལ་པོས་བྱིན་གྱིས་རློབས། །དབང་མཆོག་དམ་པ་ཐོབ་པར་ཤོག །ༀ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། ཨ་བྷི་ཥིཉྩ་ཧཱུཾ། ཤར་ཕྱོགས་པདྨ་ཟླ་རྒྱས་སྟེང་། །ཡུམ་ཆེན་རྒྱན་ལྡན་རྡོ་རྗེ་སྐྱིལ། །གསེར་མདོག་སྐུ་ནི་ཤིན་ཏུ་རྒྱས། །ཕྱག་བཞིའི་དང་པོ་མཉམ་བཞག་ཅན། །འོག་གཉིས་ཆོས་འཆད་པུསྟི་འཛིན། །འགྲོ་བ་སེམས་ཅན་དོན་མཛད་པ། དེ་ཡི་དབང་མཆོག་ཐོབ་པར་ཤོག །ༀ་དྷཱི་པྲ་ཛྙཱ་མ་ཧཱ་པྲ་ཛྙཱ་དྷརྨ་དྷཱ་ཏུ་སྭཱ་ཧཱ། ཨ་བྷི་ཥིཉྩ་ཧཱུཾ། ལྷོ་ཕྱོགས་པདྨ་ཟླ་རྒྱས་སྟེང་། །ཕྱག་ན་རྡོ་རྗེ་ཞི་བའི་ཞལ། །མཐིང་ག་རྡོ་རྗེ་པདྨ་འཛིན། །རིན་ཆེན་རྒྱན་ལྡན་སེམས་སྐྱིལ་བཞུགས། །དེ་ཡི་དབང་མཆོག་ཐོབ་པར་ཤོག །ༀ་བཛྲ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། ཨ་བྷི་ཥིཉྩ་ཧཱུཾ། ནུབ་ཕྱོགས་པདྨ་ཟླ་རྒྱས་སྟེང་། །ཤཱ་རིའི་བུ་ནི་སེར་སྐྱའི་མདོག །རབ་བྱུང་འཁར་གསིལ་ལྷུང་བཟེད་བསྣམས། །དེ་ཡི་དབང་མཆོག་ཐོབ་པར་ཤོག །ༀ་ན་མཿས་མནྟ་བུདྡྷཱ་ནཱཾ་པྲ་བྷ་ཏ་ཐཱ་ག་ཏ་ཨ་བ་ལོ་ཀི་ཏེ་ཀཱ་རུ་ཎ་ས་མ་ཡེ་སྭཱ་ཧཱ། ཨ་བྷི་ཥིཉྩ་ཧཱུཾ། བྱང་ཕྱོགས་པདྨ་ཟླ་རྒྱས་སྟེང་། །སྤྱན་རས་གཟིགས་དབང་ཆུ་ཤེལ་མདོག །ཕྱག་གཉིས་པདྨ་པུསྟི་འཛིན། །དེ་ཡི་དབང་མཆོག་ཐོབ་པར་ཤོག །ༀ་ཨཱརྻ་ཨ་བ་ལོ་ཀི་ཏེ་ཤྭ་ར་མ་ཧཱ་ཀཱ་རུ་ཎི་ཀ་ན་མ་ཡེ་སྭཱ་ཧཱ། ཨ་བྷི་ཥིཉྩ་ཧཱུཾ། གཞལ་ཡས་ཤར་ཕྱོགས་པད་ཟླའི་སྟེང་། །བདེ་གཤེགས་དཀོན་མཆོག་འབྱུང་གནས་ནི། །སྐུ་མདོག་ཤེལ་ལྟར་དཀར་བ་ལ། །མཆོག་སྦྱིན་རིན་ཆེན་གཡོན་མཉམ་བཞག །དེ་ཡི་དབང་མཆོག་ཐོབ་པར་ཤོག །ༀ་སརྦ་ཏ་ཐཱ་ག་ཏ་ཨ་ཡུར་ག་ཏི་སྭཱ་ཧཱ། ཨ་བྷི་ཥིཉྩ་ཧཱུཾ། གཞལ་ཡས་ལྷོ་ཕྱོགས་པད་ཟླའི་སྟེང་། །བདེ་གཤེགས་མྱ་ངན་མེད་པའི་དཔལ། །སྔོན་པོ་འཁོར་ལོ་གཡོན་མཉམ་བཞག །དེ་ཡི་དབང་མཆོག་ཐོབ་པར་ཤོག །ༀ་སརྦ་ཏ་ཐཱ་ག་ཏ་རཏྣ་ཨ་ཙི་ཡ་ནི་སྭཱ་ཧཱ། ཨ་བྷི༴ ནུབ་ཕྱོགས་པད་སྟེང་པད་ཟླའི་སྟེང་། །བདེ་གཤེགས་རིན་ཆེན་འོད་འཕྲོ་དཀར། །གཡས་པ་མཆེ་བ་གཡོན་མཉམ་བཞག །དེ་ཡི་དབང་མཆོག༴ ༀ་སརྦ་ཏ་ཐཱ་ག་ཏ་ཏྲི་ཏི་ཤ་ག་པ་རི་བྷི་ཤཱ་རི་སྭཱ་ཧཱ། ཨ་བྷི༴ བྱང་ཕྱོགས་པད་སྟེང་པད་ཟླའི་སྟེང་། །བདེ་གཤེགས་རྒྱལ་བའི་དབང་པོ་ལྗང་། །གཡས་པ་པད་དཀར་གཡོན་མཉམ་བཞག །དེ་ཡིས་དབང་མཆོག༴ ༀ་སརྦ་ཏ་ཐཱ་ག་ཏ་པི་ཤ་རཏྣ་སན་ཏི་སྭཱ་ཧཱ། ཨ་བྷི༴ ཤར་ལྷོ་བདེ་གཤེགས་པདྨ་དཔལ། ། དུང་མདོག་པདྨ་གཡོན་མཉམ་བཞག །འགྲོ་ལ་བསྟན་པས་བག་ཆགས་འཇོམས། །དེ་ཡི་དབང་མཆོག༴ ༀ་སརྦ་ཏ་ཐཱ་ག་ཏ་དུ་མ་ལེ་ཀ་དོ་བ་ཡེ་སྭཱ་ཧཱ། ཨ་བྷི༴ ལྷོ་ནུབ་པད་སྟེང་བདེ་གཤེགས་ནི། །ཉི་མ་སྣང་བ་དམ་པའི་དཔལ། །དམར་སྨུག་ཉི་མ་གཡོན་མཉམ་བཞག །དེ་ཡི་དབང་མཆོག༴ ༀ་སརྦ་ཏ་ཐཱ་ག་ཏ་བི་མུཀྟི་མརྒད་རུ་ཤ་མ་ཏི་སྭཱ་ཧཱ། ཨ་བྷི༴ ནུབ་བྱང་པད་ཟླར་བདེ་གཤེགས་ནི། །གདུགས་ཆེན་དམ་པ་ཨིནྡྲའི་མདོག །སྣ་ཚོགས་རྡོ་རྗེ་གཡོན་མཉམ་བཞག །དེ་ཡི་དབང༴ ༀ་སརྦ་ཏ་ཐཱ་ག་ཏ་སཱུརྱ་བི་ཏ་ལ་སྭཱ་ཧཱ། ཨ་བྷི༴ བྱང་ཤར་པད་ཟླར་བདེ་གཤེགས་ནི། །གླང་པོ་དམ་པ་གསེར་ལྟར་འཚེར། །གཡས་པ་ཆོས་འཆད་གཡོན་གོས་འཛིན། །དེ་ཡི་དབང་༴ ༀ་སརྦ་ཏ་ཐཱ་ག་ཏ་བིདྷྱ་བི་ཤ་ཡ་བྷ་བ་སྭཱ་ཧཱ། ཨ་བྷི༴ སྟེང་གི་བདེ་གཤེགས་དགའ་བ་དཔལ། །སྔོན་པོ་རིན་ཆེན་བུམ་པ་གཡས། །གཡོན་པ་དཀུར་བརྟེན་སྐྱིལ་ཀྲུང་བཞུགས། །དེ་ཡི་དབང་༴ ༀ་སརྦ་ཏ་ཐཱ་ག་ཏ་ར་ཏི་ར་མ་ཏི་བཛྲ་སྭཱ་ཧཱ། ཨ་བྷི༴ འོག་གི་སངས་རྒྱས་པདྨོ་དཔལ། །གསེར་མདོག་གཡས་པ་པདྨ་བསྣམས། །གཡོན་པ་ལྟེ་བར་མཐིལ་ཕྱིན་བསྟན། །དེ་ཡི་དབང་མཆོག་ཐོབ་པར་ཤོག །ༀ་སརྦ་ཏ་ཐཱ་ག་ཏ་པདྨ་བྷ་ལ་སྭཱ་ཧཱ། ཨ་བྷི་ཥིཉྩ་ཧཱུཾ། དེ་རྣམས་ཀྱིས་རྩ་བའི་ལྷའི་དབང་སོང་ནས། ད་མགྲོན་ཐབས་ཀྱི་ལྷ་རྣམས་ཀྱི་དབང་ནི། དཀྱིལ་འཁོར་ལ་བཀོད་པའི་ཡུམ་ཆེན་མོ། སྲས་ཐུབ་དབང་ཕྱོགས་བཅུའི་སངས་རྒྱས་དང་བཅས་པ་རྣམས་གང་འདུལ་གྱི་རྣམ་པར་སྣང་བ་ཚོམ་བུའི་འཁོར་དང་བཅས་པ་སོགས་སྤྲོས་ནས་རང་རང་གི་སྤྱི་བོར་ཐིམ་པའི་མོས་པ་མཛོད། །སོ་སོའི་ཙཀླི་ཐོགས་ཏེ། ཧཱུཾ། རྣམ་དག་དབུས་ཀྱི་པདྨའི་དཀྱིལ་འཁོར་ནས། །ཡང་དག་རྫོགས་པའི་སངས་རྒྱས་ཤཱཀྱ་ཐུབ། །ས་གནོན་མཉམ་བཞག་གསེག་གཤང་པར་བུ་ཅན། །ཡུམ་ཆེན་གསེར་མདོག་རལ་གྲི་མཆོག་སྦྱིན་གཡས། །གཡོན་པ་ཨུཏྤལ་པུསྟི་ཕྲེང་བ་ཅན། །རིགས་བཞིའི་སངས་རྒྱས་ཕྱོགས་མདོག་རིམ་པ་བཞིན། །གླང་པོ་རིན་འབྱུང་པདྨོ་ཏིང་འཛིན་རྒྱལ། །གཡས་རྣམས་རྡོ་རྗེ་རིན་ཆེན་པད་རྒྱ་གྲམ། །ཐུགས་ཀར་བསྣམས་ཤིང་གཡོན་པ་མཉམ་གཞག་མཛད། །ཡུམ་བཞི་ཕྱོོགས་མདོག་རྡོ་རྗེ་རིན་ཆེན་ཆོས། །ལས་མ་བཞི་སྟེ་ཕྱག་མཚན་ཡབ་དང་མཐུན། །རིགས་ལྔ་ཡབ་ཡུམ་ཐུགས་རྗེས་འདི་ཟུང་ཞིག །བྱིན་རླབས་དབང་བསྐུར་དམ་པ་མཛད་དུ་གསོལ། །ༀ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། ཏདྱ་ཐཱ། ༀ་ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བོ་དྷི་སྭཱ་ཧཱ། ཨ་བྷི་ཥིཉྩ་ཧཱུཾ། ཧཱུཾ། ཤར་ཕྱོགས་སངས་རྒྱས་དཀོན་མཆོག་འབྱུང་གནས་དཀར། །གཡས་པ་མཆོག་སྦྱིན་འཁོར་ལོ་གཡོན་སྐྱབས་སྦྱིན། །ཤར་ལྷོ་ནུབ་བྱང་དཀར་སྔོ་དམར་ལྗང་མདོག །ཆོས་ཀྱི་རྒྱལ་མཚན་ཆུ་སྲིན་རྒྱལ་མཚན་ཅན། །དབང་ཕྱུག་རྒྱལ་པོ་ལྕགས་ཀྱུ་འབར་བ་འཛིན། །བཀོད་པའི་རྒྱལ་མཚན་མཛེས་པའི་མེ་ཏོག་བསྣམས། །རིན་ཆེན་འོད་འཕྲོ་ནོར་བུ་རིན་ཆེན་འཛིན། །ཤར་ནུབ་སེམས་དཔའ་ལྷོ་བྱང་ཉན་ཐོས་ཚུལ། །སེམས་མ་རྡོ་རྗེ་རིན་ཆེན་པད་རྒྱ་གྲམ། །འགྲོ་ལ་ཐུགས་རྗེས་བཟུང་དུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །མུ་ནེ༴ ག་ཏེ༴ ཨ་བྷི༴ ཧཱུཾ། ལྷོ་ཕྱོགས་སངས་རྒྱས་མྱ་ངན་མེད་དཔལ་སྔོ། །ཐུགས་ཀར་སྐྱབས་སྦྱིན་རིན་ཆེན་གཡོན་མཉམ་གཞག །ཤར་ལྷོ་ནུབ་བྱང་དཀར་སེར་དམར་ལྗང་སེམས། །སྣང་བའི་མཆོག་ནི་ཕྱག་ན་རྡོ་རྗེ་བསྣམས། །ཕྱག་རྒྱའི་རྒྱལ་པོ་རྡོ་རྗེ་རྒྱ་གྲམ་འཛིན། །སྤོས་ཀྱི་གླང་པོ་འབུད་དུང་དཀར་པོ་སྟེ། །སྤོབས་པ་བརྩེགས་པ་གསེར་གཡུའི་ཟ་མ་ཏོག །ཤར་ནུབ་སེམས་དཔའ་ལྷོ་བྱང་ཉན་ཐོས་ཚུལ། །སེམས་མ་རྡོ་རྗེ་རིན་ཆེན་པད་རྒྱ་གྲམ། །འགྲོ་ལ་ཐུགས་རྗེས་བཟུང་དུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །མུ་ནེ༴ ག་ཏེ༴ ཨ་བྷི༴ ཧཱུཾ། ནུབ་ཕྱོགས་རིན་ཆེན་འོད་འཕྲོ་དམར། །སྐྱབས་སྦྱིན་ཐུགས་ཀར་པདྨ་བསྣམས། །གཡོན་པ་མཆོག་སྦྱིན་པུས་མོའི་སྟེང་། །ཕྱོགས་བཞིར་དཀར་སྔོ་དམར་ལྗང་སེམས། །པདྨའི་རྒྱལ་པོ་སྒྲོམ་བུ་སྟེ། །པདྨོ་དམ་པ་པདྨ་དཀར། །རྡོ་རྗེ་མི་གཡོ་ལྕགས་ཀྱུའོ། །ཐོགས་མེད་རྒྱལ་པོ་རལ་གྲི་འཛིན། །ཤར་ནུབ་སེམས་དཔའ་ལྷོ་བྱང་ཉན་ཐོས་ཚུལ། །སེམས་མ་རྡོ་རྗེ་རིན་ཆེན་པད་རྒྱ་གྲམ། །འགྲོ་ལ་ཐུགས་རྗེས་བཟུང་དུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །མུ་ནེ༴ ག་ཏེ༴ ཨ་བྷི༴ ཧཱུཾ། བྱང་ཕྱོགས་རྒྱལ་པའི་དབང་པོ་ལྗང་། །གཡས་པ་སྐྱབས་སྦྱིན་ཉི་མ་སྟེ། །གཡོན་པ་མཆོག་སྦྱིན་རྡོ་རྗེ་ཅན། །ཕྱོགས་བཞི་དཀར་སྔོ་དམར་ལྗང་སེམས། །རིན་འབྱུང་རིན་ཆེན་ཟུར་བརྒྱད་འཛིན། །གྲུབ་པ་སྣ་ཚོགས་རྡོ་རྗེ་སྟེ། །དགའ་བ་སྟོན་པ་མེ་ལོང་ཅན། །མི་གཡོ་བ་ནི་མཉམ་བཞག་རྒྱ། །ཤར་ནུབ་སེམས་དཔའ་ལྷོ་བྱང་ཉན་ཐོས་ཚུལ། །སེམས་མ་རྡོ་རྗེ་རིན་ཆེན་པད་རྒྱ་གྲམ། །འགྲོ་ལ་ཐུགས་རྗེས་བཟུང་དུ་གསོལ། །དབང་བསྐུར་བྱིན་གྱི་བརླབ་ཏུ་གསོལ། །མུ་ནེ༴ ག་ཏེ༴ ཨ་བྷི༴ ཧཱུཾ། བྱང་ཤར་གླང་པོ་དམ་པའི་དཔལ། །ལྗང་གུ་ཐུགས་ཀར་པུསྟི་བསྣམས། །གཡོན་པ་མཆོག་སྦྱིན་ཆོས་གོས་འཛིན། །ཕྱོགས་བཞི་དཀར་སྔོ་དམར་ལྗང་སེམས། །ཕྱག་ན་རྡོ་རྗེ་རྩེ་དགུ་སྟེ། །སྤྱན་རས་གཟིགས་དབང་པད་དཀར་འཛིན། །ནམ་མཁའི་སྙིང་པོ་ཟ་མ་ཏོག །ས་སྙིང་རིན་ཆེན་མྱུ་གུའོ། །ཤར་ནུབ་སེམས་དཔའ་ལྷོ་བྱང་ཉན་ཐོས་ཚུལ། །སེམས་མ་རྡོ་རྗེ་རིན་ཆེན་པད་རྒྱ་གྲམ། །འགྲོ་ལ་ཐུགས་རྗེས་བཟུང་དུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །མུ་ནེ༴ ག་ཏེ༴ ཨ་བྷི༴ ཧཱུཾ། ཤར་ལྷོ་པདྨོ་དམ་པའི་དཔལ། །དཀར་སེར་གཡས་པ་ཉི་མ་སྟེ། །ཕྱོགས་བཞི་དཀར་སྔོ་དམར་ལྗང་སེམས། །ཀུན་བཟང་རིན་ཆེན་སྡོང་བུ་སྟེ། །འཇམ་དཔལ་གཞོན་ནུ་ཨུཏྤ་ལ། །སྒྲིབ་པ་རྣམ་སེལ་པུསྟི་འཛིན། །བྱམས་པ་ཀླུ་ཤིང་གུནྡྷེ་བསྣམས། །ཤར་ནུབ་སེམས་དཔའ་ལྷོ་བྱང་ཉན་ཐོས་ཚུལ། །སེམས་མ་རྡོ་རྗེ་རིན་ཆེན་པད་རྒྱ་གྲམ། །འགྲོ་ལ་ཐུགས་རྗེས་བཟུང་དུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །ༀ་མུ་ནེ༴ ག་ཏེ༴ ཨ་བྷི༴ ཧཱུཾ། ལྷོ་ནུབ་སྣང་བ་དམ་པའི་དཔལ། །དམར་སེར་ཉི་མ་ཐུགས་ཀར་བསྣམས། །ཕྱོགས་བཞི་དཀར་སྔོ་དམར་ལྗང་སེམས། །མཐུ་ཆེན་ཐོབ་ནི་རྡོ་རྗེ་སྟེ། །སྨན་གྱི་རྒྱལ་པོ་བུམ་པའོ། །ཡོན་ཏན་སྙིང་པོ་རིན་ཆེན་སྙེ། །མཐོང་ན་དགའ་བ་ཀླུ་ཤིང་ངོ་། །ཤར་ནུབ་སེམས་དཔའ་ལྷོ་བྱང་ཉན་ཐོས་ཚུལ། །སེམས་མ་རྡོ་རྗེ་རིན་ཆེན་པད་རྒྱ་གྲམ། །འགྲོ་ལ་ཐུགས་རྗེས་བཟུང་དུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །མུ་ནེ༴ ག་ཏེ༴ ཨ་བྷི༴ ཧཱུཾ། ནུབ་བྱང་གདུགས་མཛེས་དམ་པའི་དཔལ། །དམར་ལྗང་གཡས་ན་གདུགས་ཀྱིས་བརྗིད། །ཕྱོགས་བཞི་དཀར་སྔོ་དམར་ལྗང་སེམས། །གཞོན་ནུ་རྒྱལ་མཚན་ཨུཏྤ་ལ། །སྐྱེས་བུ་དམ་པ་དུང་རྔ་ཡབ། །སེང་གེ་སྒྲ་ནི་ཀུ་མུ་དཱ། །མྱ་ངན་བསལ་ནི་པདྨོའོ། །ཤར་ནུབ་སེམས་དཔའ་ལྷོ་བྱང་ཉན་ཐོས་ཚུལ། །སེམས་མ་རྡོ་རྗེ་རིན་ཆེན་པད་རྒྱ་གྲམ། །འགྲོ་ལ་ཐུགས་རྗེས་བཟུང་དུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །མུ་ནེ༴ ག་ཏེ༴ ཨ་བྷི༴ ཧཱུཾ། སྟེང་ཕྱོགས་སངས་རྒྱས་དགའ་བའི་དཔལ། །དཀར་པོ་གཡས་ན་རྒྱལ་མཚན་བསྣམས། །ཕྱོགས་བཞི་དཀར་སྔོ་དམར་ལྗང་སེམས། །བཟང་སྐྱོང་གསེར་གྱི་བུམ་པ་བསྣམས། །དཀོན་མཆོག་འབྱུང་གནས་རིན་ཆེན་སྒྲོམ། །དཔའ་བར་འགྲོ་བ་རལ་གྲི་སྟེ། །ཟླ་འོད་གཞོན་ནུ་ཟླ་ཚེས་སོ། །ཤར་ནུབ་སེམས་དཔའ་ལྷོ་བྱང་ཉན་ཐོས་ཚུལ། །སེམས་མ་རྡོ་རྗེ་རིན་ཆེན་པད་རྒྱ་གྲམ། །འགྲོ་ལ་ཐུགས་རྗེས་བཟུང་དུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །ༀ་མུ་ནེ༴ ག་ཏེ༴ ཨ་བྷི༴ ཧཱུཾ། འོག་ཕྱོགས་པདྨོ་དམ་པའི་དཔལ། །སྔོ་ནག་ཆོས་འཆད་པདྨ་བསྣམས། །ཕྱོགས་བཞི་དཀར་སྔོ་དམར་ལྗང་སེམས། །ཡེ་ཤེས་ཏོག་ནི་ཏོག་དཀར་པོ། །མྱ་ངན་མེད་མཆོག་རལ་གྲི་སྟེ། །བློ་གྲོས་མི་ཟད་པུསྟིའོ། །ཡེ་ཤེས་འོད་དེ་རྡོ་རྗེ་བསྣམས། །ཤར་ནུབ་སེམས་དཔའ་ལྷོ་བྱང་ཉན་ཐོས་ཚུལ། །སེམས་མ་རྡོ་རྗེ་རིན་ཆེན་པད་རྒྱ་གྲམ། །འགྲོ་ལ་ཐུགས་རྗེས་བཟུང་དུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །མུ་ནེ༴ ག་ཏེ༴ ཨ་བྷི༴ ཧཱུཾ། ཤར་དུ་གླང་པོའི་གདན་ཁྲི་ལ། །བརྒྱ་བྱིན་སེར་པོ་རྡོ་རྗེ་འཛིན། །ཤར་ལྷོར་ར་སྐྱེས་གདན་སྟེང་དུ། །མེ་ལྷ་དམར་པོ་བགྲང་འཕྲེང་འཛིན། །ལྷོ་རུ་མ་ཧེའི་གདན་ལ་ནི། །གཤིན་རྗེ་སྔོན་པོ་བེ་ཅོན་འཛིན། །ལྷོ་ནུབ་རོ་ལངས་གདན་སྟེང་དུ། །སྲིན་པོ་སྨུག་ནག་རལ་གྲི་འཛིན། །ནུབ་ཏུ་ཆུ་སྲིན་གདན་ལ་ནི། །ཆུ་ལྷ་དམར་པོ་སྦྲུལ་ཞགས་འཛིན། །ནུབ་བྱང་ཤ་བའི་གདན་སྟེང་དུ། །རླུང་ལྷ་ལྗང་གུ་བ་དན་འཛིན། །བྱང་དུ་རྟ་ཡི་གདན་ལ་ནི། །གནོད་སྦྱིན་ལྗང་སྔོན་དབྱུག་པ་འཛིན། །བྱང་ཤར་ཁྱུ་མཆོག་གདན་ལ་ནི། །དབང་ལྡན་ནག་པོ་རྩེ་གསུམ་འཛིན། །སྟེང་དུ་ངང་པའི་གདན་སྟེང་དུ། །ཚངས་པ་སེར་མོ་པདྨ་འཛིན། །འོག་ཏུ་ཕག་གི་གདན་ལ་ནི། །བརྟན་མ་སེར་པོ་གཏེར་བུམ་བསྣམས། །འགྲོ་ལ་ཐུགས་རྗེས་བཟུང་དུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །མུ་ནེ༴ ག་ཏེ༴ ཨ་བྷི༴ ཧཱུཾ། སྒེག་ཕྲེང་གླུ་གར་མེ་ཏོག་སྤོས། །མར་མེ་དྲི་ཆབ་སྒོ་སྐྱོང་བཞི། །རྒྱལ་བ་མཆོད་ཅིང་བསྟན་པ་བསྲུང་། །ཚད་མེད་ཕྲིན་ལས་གདུལ་བྱ་སྐྱོང་། །འགྲོ་ལ་ཐུགས་རྗེས་བཟུང་དུ་གསོལ། །དབང་བསྐུར་བྱིན་གྱིས་བརླབ་ཏུ་གསོལ། །ༀ་མུ་ནེ༴ ཏདྱ་ཐཱ། ༀ་ག་ཏེ༴ ཨ་བྷི་ཥིཉྩ་ཧཱུཾ། ཞེས་བསྐུར་རོ། །དེ་ནས་རྒྱལ་པོ་བཀའ་རྟགས་སམ་འགྲོ་འདུལ་མཚན་ཉིད་ཀྱི་དབང་དུ་གྲགས་པ་བྱང་ཆུབ་སེམས་དཔའི་མཛད་པ་ཉི་ཤུའི་རྫས་དབང་རྣམས་བསྐུར་བས། སྔོན་བྱུང་སྟོན་པའི་རྣམ་ཐར་དང་རྗེས་སུ་མཐུན་པའི་ཡོན་ཏན་ཁྱད་པར་ཅན་དེ་དག་རྒྱུད་ལ་ཐོབ་པར་གྱུར་སྙམ་པའི་མོས་པ་མཛོད། དེ་ལ་རྫས་དབང་ཉི་ཤུ་ལས། དང་པོ་དབུ་རྒྱན་བསྐོན་ཏེ། སྔོན་བྱང་ཆུབ་སེམས་དཔའ་དམ་པ་ཏོག་དཀར་པོ་དགའ་ལྡན་གྱི་གནས་ནས་ཡུམ་སྒྱུ་མ་ལྷ་མཛེས་ཀྱི་ལྷུམས་སུ་གཤེགས་པའི་ཚེ་དབུ་ལས་རིན་པོ་ཆེའི་ཕྲོག་ཞུ་ཕུད་ནས་མི་ཕམ་མགོན་ལ་ཆོས་ཀྱི་རྒྱལ་ཚབ་ཏུ་ལྷ་རྣམས་ཀྱི་སྟོན་པར་དབང་བསྐུར་རོ། །དེ་བཞིན་དུ་རིན་པོ་ཆེའི་ཅོན་པན་གྱི་དབང་བསྐུར་བས་ཆོས་ཀྱི་རྒྱལ་ཚབ་བྱེད་པའི་དབང་དང་ལྡན་པར་གྱུར་ཅིག །ཧཱུཾ། ཏོག་དཀར་དབུ་ལས་རིན་ཆེན་ཅོད་པན་ཕུད། །དེ་ཉིད་ཕྱག་གིས་བུ་ཡི་དབུ་ལ་བཞག །མི་ཕམ་མགོན་པོ་ཆོས་ཀྱི་རྒྱལ་ཚབ་རྗེ། །ཆོས་ཀྱི་རྒྱལ་སྲིད་ཆེན་པོ་བྱེད་པར་ཤོག །ཆོས་ཀྱི་དབྱིངས་ནས་བྱུང་ནས་ག་ན་བར། །སྤྲུལ་སྐུ་ཀུན་ཁྱབ་ཡིད་བཞིན་འབྱུང་བའི་གཏེར། །དང་པོ་ཚོགས་རྫོགས་སྨོན་ལམ་མཐར་ཕྱིན་པ། །འདི་ནི་བསོད་ནམས་རྫོགས་པའི་དབང་གི་བཀྲ་ཤིས་དང་པོའོ། །གཉིས་པ་ཡུམ་གྱི་ཙཀླི་སྤྱི་བོར་བཞག་སྟེ། སྔོན་བྱང་ཆུབ་སེམས་དཔའ་དམ་པ་ཏོག་དཀར་པོ་དེ་ཡུམ་གྱི་ལྷུམས་ན་བཞུགས་པའི་ཚེ་ཡུམ་གྱི་ཕྱག་གིས་སེམས་ཅད་རྣམས་ལ་རེག་ཅིང་དབང་བསྐུར་བས་སེམས་ཅད་རྣམས་ཀྱི་ནད་དང་སྡུག་བསྔལ་ཐམས་ཅད་ཞི་བར་གྱུར་ཏོ། །དེ་བཞིན་དུ་ཡུམ་གྱི་ཕྱག་གིས་རེག་ཅིང་དབང་བསྐུར་བས་ཉོན་མོངས་པ་དང་ནད་དང་སྡུག་བསྔལ་ཐམས་ཅད་ཞི་བར་གྱུར་ཅིག །སྒྱུ་མ་ལྷ་མཛེས་ལྷ་ཡི་ལྕམ། །ལྷ་ཡི་ལུས་ལ་རིན་ཆེན་མཛེས། །ཉོན་མོངས་སྡུག་བསྔལ་ཀུན་ཞི་ནས། །ན་ཚའི་སྡུག་བསྔལ་ལས་ཐར་ཤོག །བྱིན་རླབས་ཡུམ་ཆེན་ཤེས་རབ་ཕ་རོལ་ཕྱིན། །ཀུན་ལ་བྱམས་སྙོམས་ཐུགས་རྗེ་ཆེ་བའི་མ། །གཞན་ལ་ཕན་མཛད་དོན་གཉིས་ལྷུན་གྱིས་གྲུབ། །འདི་ནི་ལྷུན་གྱིས་གྲུབ་པའི་དབང་གི་བཀྲ་ཤིས་གཉིས་པའོ། །གསུམ་པ་སེང་ཕྲུག་ཟུང་གཏད་དེ། སྔོན་བྱང་ཆུབ་སེམས་དཔའ་ལུམྦི་ནིའི་ཚལ་དུ་ཡུམ་གྱི་ལྷུམས་ནས་བལྟམས་པའི་ཚེ་སེང་གེའི་ཕྲུ་གུ་ཟུང་ཞིག་གིས་བསྐོར་བ་བྱས་ཤིང་དབང་བསྐུར་བས་རྒོལ་བའི་ཕྱོགས་ཐམས་ཅད་ཟིལ་གྱིས་གནན་པའི་དབང་ཐོབ་བོ། །དེ་བཞིན་དུ་སེང་ཕྲུག་གི་ཕྱིར་རྒོལ་བའི་ཕྱོགས་ཐམས་ཅད་ཟིལ་གྱིས་གནོན་པའི་དབང་ཐོབ་པ་གྱུར་ཅིག །སེང་གེའི་ང་རོ་སྐད་ཆེམ་ཐོགས་མེད་པས། །འཇིགས་པ་མེད་པའི་སྒྲ་ཆེན་བསྒྲགས་ནས་ཀྱང་། །བར་དུ་གཅོད་པའི་བདུད་ཀྱི་སྡེ་བཏུལ་ཏེ། །རྒོལ་བའི་ཚོགས་རྣམས་ཟིལ་གྱིས་གནོན་པར་ཤོག །ཐམས་ཅད་ཟིལ་གནོན་ཆོ་འཕྲུལ་ཆེ་བའི་ལྷ། །ཡོན་ཏན་ཀུན་ཚང་གདུག་པ་ཟིལ་གྱིས་གནོན། །ཆེ་བའི་མཐུ་སྟོབས་ཁྱད་པ་ཀུན་ལ་འཕགས། །འདི་ནི་ཆེ་བཙན་མཐུ་སྟོབས་དབང་གི་བཀྲ་ཤིས་གསུམ་པའོ། །བཞི་པ་གླང་ཆེན་ཕྲུ་གུ་ཟུང་གཏད་དེ། སྔོན་བྱང་ཆུབ་སེམས་དཔའ་གྲོང་ཁྱེར་སེར་སྐྱ་ན་བཞུགས་པའི་ཚེ་གླང་པོ་ཆེའི་ཕྲུ་གུ་གཉིས་ཀྱི་སྣས་བྱུགས་ཤིང་དབང་བསྐུར་བས་འཇིག་རྟེན་འདེགས་པའི་སྟོབས་ཀྱི་དབང་ཐོབ་བོ། །དེ་བཞིན་དུ་གླང་པོ་ཆེའི་ཕྲུ་གུ་ཟུང་གི་དབང་བསྐུར་བས་འཇིག་རྟེན་འདེགས་པའི་སྟོབས་དང་ལྡན་པའི་དབང་ཐོབ་པར་གྱུར་ཅིག །འཇིག་རྟེན་འདེགས་པའི་སྟོབས་ལྡན་ཞིང་། །ཐེག་པ་བཞི་ཡི་དོན་རྟོགས་ནས། །བྱེ་བྲག་འབྱེད་པའི་སྟོབས་རྫོགས་ཏེ། །སྟོབས་ཀྱི་ཕ་རོལ་ཕྱིན་རྫོགས་ཤིང་། །མཐུ་སྟོབས་ཕུན་ཚོགས་ལྡན་པ་ཡི། །རིན་ཆེན་གསེར་རྒྱན་ཀུན་གྱིས་སྤྲས། །དཔེ་བྱད་མཚན་རྫོགས་གླང་པོའི་སྟོབས། །འདི་ནི་སྟོབས་བཅུ་ལྡན་པའི་དབང་གི་བཀྲ་ཤིས་བཞི་པའོ། །ལྔ་པ་ཀ་ཤི་ཀའི་རས་བཟུང་། སྔོན་བྱང་ཆུབ་སེམས་དཔའ་ལུམྦི་ནིའི་ཚལ་དུ་སྐུ་བལྟམས་པའི་ཚེ་ཚངས་པ་དང་བརྒྱ་བྱིན་གྱིས་བླངས་ནས་ན་བཟའ་ཀ་ཤི་ཀའི་རས་གསོལ་ཏེ་དབང་བསྐུར་བས་མཁྱེན་པའི་བྱེ་བྲག་གསལ་ཞིང་མ་འདྲེས་པའི་དབང་ཐོབ་བོ། །དེ་བཞིན་དུ་ན་བཟའ་ཀ་ཤི་ཀའི་རས་ཀྱི་དབང་བསྐུར་བས་མཁྱེན་པའི་ཡེ་ཤེས་གསལ་ཞིང་མ་འདྲེས་པའི་དབང་ཐོབ་པར་གྱུར་ཅིག །ཉོན་མོངས་སྐྱོན་སྤངས་ཀ་ཤིའི་རས། །ལེགས་པའི་ཡོན་ཏན་ཀུན་རྫོགས་ཏེ། །ཉེས་པའི་སྐྱོན་ལས་སྐྱོབ་པ་དང་། །མཁྱེན་པའི་བྱེ་བྲག་གསལ་བར་ཤོག །བརྒྱ་བྱིན་བསོད་ནམས་དག་པའི་ལྷ། །ཚངས་པ་མངོན་ཤེས་ལྔ་དང་ལྡན། །བདུད་རྩི་ཆོས་འཁོར་ཞུ་བའི་བདག །འདི་ནི་ཡོན་ཏན་རིན་ཆེན་དབང་གི་བཀྲ་ཤིས་ལྔ་པའོ། །དྲུག་པ་ཙཀླི་དང་བུམ་པ་སྦྲགས་ནས་བུམ་ཆུ་སྤྱི་བོར་གཏིགས་ཤིང་བླུད་དེ། སྔོན་བྱང་ཆུབ་སེམས་དཔའ་ཡུམ་གྱི་ལྷུམས་ནས་བལྟམས་པའི་ཚེ་ཀླུའི་རྒྱལ་པོ་དགའ་བོ་དང་ཉེར་དགའ་གཉིས་ཀྱིས་ལྷོ་ཕྱོགས་ཀྱི་ཆུ་མིག་རྟ་རྔ་འཛིན་ནས་བདུད་རྩིའི་ཆུ་བླངས་ཏེ་ཁྲུས་གསོལ་བས་ཉོན་མོངས་པའི་དྲི་མ་དག་པའི་དབང་ཐོབ་བོ། །དེ་བཞིན་དུ་བུམ་རྫས་ཆུའི་དབང་བསྐུར་བས་ཉོན་མོངས་པའི་བག་ཆགས་ཀྱི་དྲི་མ་བྱང་ཞིང་དག་པའི་དབང་ཐོབ་པར་གྱུར་ཅིག །ཀླུ་རྒྱལ་བདུད་རྩིའི་ཆུ་བླངས་ཏེ། །བཅོམ་ལྡན་དྲིན་ལན་བསྲབ་པའི་ཕྱིར། །སྐུ་ཡི་དྲི་མ་ཡོངས་སུ་བཀྲུ། །སྐྱོན་གྱི་དྲི་མ་དག་པར་ཤོག །ཡོན་ཏན་ཀུན་ལྡན་བྱང་ཆུབ་སེམས་དཔའི་རིགས། །བཅོམ་ལྡན་རྗེས་དྲན་སྨོན་ལམ་གྲུབ་པའི་མཆོག །དྲི་མ་ཀུན་འཁྲུད་ལེགས་པ་མཐར་ཕྱིན་པའི། །འདི་ནི་སྐུ་ཚེ་རིང་བའི་དབང་གི་བཀྲ་ཤིས་དྲུག་པའོ། །བདུན་པ་མིང་གི་དབང་ནི། རྒྱལ་བའི་སྲས་ཞེས་པ་ལྟ་བུ་བྱང་སེམས་དང་ཕར་ཕྱིན་བཅུ་ལས་གྲས་པའི་མིང་བཏགས་ཏེ། སྔོན་བྱང་ཆུབ་སེམས་དཔའ་བལྟམས་ནས་དགུང་ལོ་བདུན་ལོན་པའི་ཚེ་ཤཱཀྱའི་རིགས་རྣམས་འཚོགས་ནས་གཞོན་ནུ་དོན་གྲུབ་པ་ཞེས་མཚན་བཏགས་ཏེ་དབང་བསྐུར་བས་ཤེས་བྱ་ལ་མ་རྨོངས་པའི་དབང་ཐོབ་བོ། །དེ་བཞིན་དུ་རིགས་ཀྱི་བུ་ལ་རྒྱལ་བའི་སྲས་པོ་ཞེས་བྱ་བའི་མིང་གི་དབང་བསྐུར་བས་ཤེས་བྱ་ལ་མ་རྨོངས་པའི་དབང་ཐོབ་པར་གྱུར་ཅིག །རིགས་ཀྱི་བུ་ཁྱོད་དེང་ཕན་ཆད། །མིང་མཆོག་གྲགས་པས་དབང་བསྐུར་བས། །གཞོན་ནུ་དོན་གྲུབ་ཡིན་པའི་ཕྱིར། །རྒྱལ་བུ་དོན་གྲུབ་ཐོབ་པར་ཤོག །རྒྱལ་རིགས་ཁྲིམས་གཙང་མང་པོ་འདུས་པ་ཡིས། །ལྷ་མི་ཀུན་ལ་དབང་བསྒྱུར་རྒྱལ་པོར་བསྐོས། །ཀུན་ལས་འཕགས་པའི་རྒྱལ་དབང་དམ་པ་སྟེ། །འདི་ནི་ཀུན་གྱི་རྒྱལ་པོའི་དབང་གི་བཀྲ་ཤིས་བདུན་པའོ། །བརྒྱད་པ་རྒྱན་ཆ་གཏད་དེ། སྔོན་བྱང་ཆུབ་སེམས་དཔའ་ལ་སྲུ་སྐྱེ་དགུའི་བདག་མོས་རྒྱན་གྱི་བྱེ་བྲག་གིས་བརྒྱན་ཅིང་དབང་བསྐུར་བས་ས་རྡོ་ལ་བྱས་པའི་བསམ་མནོ་མེད་པ་ཕྱག་གིས་ཚུར་སྩལ་བའི་དབང་ཐོབ་བོ། །དེ་བཞིན་དུ་རྒྱན་གྱི་བྱེ་བྲག་གི་དབང་བསྐུར་བས་འགྲོ་བ་ཐམས་ཅད་ཤེས་པ་དང་ལྡན་པར་བྱེད་པའི་དབང་ཐོབ་པར་གྱུར་ཅིག །མཛེས་པའི་རྒྱན་རྣམས་མྱུར་དུ་འཕགས་ནས་ཀྱང་། །ལེགས་པའི་ཡོན་ཏན་ཀུན་ཚང་ཡེ་ཤེས་སྐུ། །མ་རིག་ཐར་ལམ་མ་ལུས་འདྲེན་པའི་མཆོག །རྟོགས་པའི་ཡོན་ཏན་མཆོག་དང་ལྡན་པར་ཤོག །ཡོན་ཏན་ཀུན་རྫོགས་སྲུ་མོས་མཛེས་པའི་རྒྱན། །ལེགས་པ་ཀུན་རྫོགས་ཡོན་ཏན་མཐར་ཕྱིན་པ། །ཆེ་བའི་ཡོན་ཏན་གཞལ་གྱིས་མི་ལང་སྟེ། །འདི་ནི་ལེགས་པ་ཀུན་རྫོགས་དབང་གི་བཀྲ་ཤིས་བརྒྱད་པའོ། །དགུ་པ་ཡིག་ཤིང་། སྔོན་བྱང་ཆུབ་སེམས་དཔས་ཡིག་དཔོན་ཀུན་གྱི་བཤེས་གཉེན་ལས་ཡི་གེ་སློབ་པའི་ཚེ། །ཙནྡན་སྦྲུལ་གྱི་སྙིང་པོའི་བྱང་ཤིང་གསེར་གྱི་ཝཾ་མིག་བཏགས་པ་རིན་པོ་ཆེ་སྣ་ཚོགས་ཀྱིས་བརྒྱན་ཏེ་ཡི་གེ་སློབ་པའི་དབང་བསྐུར་བས་ཡིག་དཔོན་ཡང་དངངས་ཏེ་ལྷ་མིའི་ཡི་གེ་ཐམས་ཅད་ལ་མཁས་པའི་དབང་ཐོབ་བོ། །དེ་བཞིན་དུ་ཡིག་ཤིང་གི་དབང་བསྐུར་བས་ཆོས་ཀྱི་སྒྲ་སྒྲོག་པའི་དབང་དམ་པ་ཐོབ་པར་གྱུར་ཅིག །ཙནྡན་སྦྲུལ་གྱི་ཡིག་ཤིང་ལ། །རིན་ཆེན་གསེར་གྱི་ཝཾ་མིག་བཏགས། །འགྲོ་བའི་དོན་བྱེད་ཡི་གེའི་མཐུ། །ཆོས་ཀྱི་སྒྲ་རྣམས་སྒྲོགས་པར་ཤོག །ཆོས་ཉིད་ཀུན་སྟོན་རྫུ་འཕྲུལ་ཡི་གེའི་མཐུ། །ཕ་རོལ་ཟིལ་གནོན་ཆོས་རྣམས་ཀུན་ལས་རྒྱལ། །འདི་འདྲའི་ཡོན་ཏན་གཞན་ན་མེད་པའི་མཆོག །འདི་ནི་ཡི་གེ་ཚོགས་རྫོགས་དབང་གི་བཀྲ་ཤིས་དགུ་པའོ། །བཅུ་པ་མདའ་གཞུ། སྔོན་བྱང་ཆུབ་སེམས་དཔའ་སྒྱུ་རྩལ་གྱི་སྟོབས་འགྲན་པའི་ཚེ་མེས་སེང་གེ་འགྲམ་གྱི་གནམ་རུ་བརྡུངས་པས་སྒྲའི་བྱེ་བྲག་བསམ་གྱིས་མི་ཁྱབ་པ་བྱུང་སྟེ་སྒྱུ་རྩལ་གྱིས་འདུལ་བའི་དབང་ཐོབ་པར་གྱུར་ཏོ། །དེ་བཞིན་དུ་གནམ་རུའི་དབང་བསྐུར་བས་སྙན་པའི་སྒྲ་སྒྲོག་ཅིང་བདུད་དཔུང་འདུལ་བའི་འཕོངས་རྩལ་དང་ལྡན་པའི་དབང་ཐོབ་པར་གྱུར་ཅིག །སྙན་པ་སྒྲ་སྒྲོག་གནམ་རུ་མཆོག །འགྲོ་བ་ཀུན་གྱི་ཡིད་ཚིམ་ཞིང་། །གནོད་པའི་བདུད་རྣམས་བཅོམ་ནས་ནི། །མ་རུང་འདུལ་བའི་དབང་ཐོབ་ཤོག །ཐམས་ཅད་ཀུན་འདུལ་མཐུ་སྟོབས་ཕུན་སུམ་ཚོགས། །རྫུ་འཕྲུལ་ཐབས་ཀྱིས་ཕ་རོལ་ཟིལ་གྱིས་གནོན། །དོན་དང་མི་འགལ་གདུག་པ་ཞི་མཛད་པ། །འདི་ནི་གནམ་རུ་དབང་གི་བཀྲ་ཤིས་བཅུ་པའོ། །བཅུ་གཅིག་པ་བཙུན་མོ། སྔོན་བྱང་ཆུབ་སེམས་དཔའ་རྒྱལ་སྲིད་ཁབ་ཏུ་བཞེས་པའི་ཚེ་ཤཱཀྱ་ས་འཚོ་མ་ཁབ་ཏུ་ཕུལ་ཏེ་དབང་བསྐུར་བས་རིགས་མི་ནུབ་ཅིང་འགྲོ་བ་ཁྱིམ་དང་འདུ་འཛིས་འདུལ་བའི་དབང་ཐོབ་བོ། །དེ་བཞིན་དུ་བཙུན་མོའི་དབང་བསྐུར་བས་རིགས་མི་ནུབ་ཅིང་ཇི་ལྟར་འདུལ་བ་བཞིན་དུ་འགྲོ་དོན་བྱེད་པའི་དབང་ཐོབ་པར་གྱུར་ཅིག །ནོར་བུ་རིན་ཆེན་བྱི་དོར་བྱས་ཤིང་གསལ། །ཤཱཀྱ་ས་འཚོ་མ་བཀབ་ཕྱར་ན་ཡང་། །བློ་མོས་ཡིད་གཅུགས་དང་བས་སེམས་བསྐྱེད་དེ། །དགོས་པའི་དོན་རྣམས་ཡོངས་སུ་རྫོགས་པར་ཤོག །ཁྱིམ་དང་འདུ་འཛིས་འདུལ་བར་གཟིགས་པ་ཡི། ཁབ་དང་རྒྱལ་སྲིད་འཁོར་ལོས་སྒྱུར་བའི་ཚུལ། ཁམས་གསུམ་ཁྱིམ་པ་རྣམས་ཀྱི་དོན་མཛད་པ། །འདི་ནི་བཙུན་མོ་དབང་གི་བཀྲ་ཤིས་བཅུ་གཅིག་པའོ། །བཅུ་གཉིས་པ་ཤིང་རྟ། སྔོན་བྱང་ཆུབ་སེམས་དཔའ་གྲོང་ཁྱེར་གྱི་ཕྱོགས་བཞིར་ཤིང་རྟའི་ཁ་ལོ་བསྒྱུར་བས་འཁོར་བའི་ཆོས་ཐམས་ཅད་མི་རྟག་པར་མཁྱེན་པའི་དབང་ཐོབ་བོ། །དེ་བཞིན་དུ་ཤིང་རྟའི་དབང་བསྐུར་བས་སྐྱེ་རྒ་ན་འཆིའི་སྡུག་བསྔལ་སུན་དབྱུང་བའི་དབང་ཐོབ་པར་གྱུར་ཅིག །རྒྱལ་སྲིད་ལོངས་སྤྱོད་དཔལ་དང་ལྡན་པའི་མཆོག །འགྲོ་བའི་དོན་མཛད་འཁོར་ལོས་སྒྱུར་བའི་ལྷ། །ལྷ་མི་ཡོངས་ཀྱི་སྤྱོད་པ་བསམ་མི་ཁྱབ། །སྐྱེ་ཤི་མི་རྟག་པ་ལས་བཟློག་པར་ཤོག །རྒྱལ་སྲིད་དཔལ་འབྱོར་ལོངས་སྤྱོད་ཕུན་སུམ་ཚོགས། །གླིང་བཞི་མཐའ་སྐོར་སྐྱེ་རྒ་ན་འཆི་སྤོང་། །འཁོར་བའི་སྐྱོན་ཤས་སྡུག་བསྔལ་སེལ་མཛད་པ། །འདི་ནི་ཤིང་རྟ་དབང་བའི་བཀྲ་ཤིས་བཅུ་གཉིས་པའོ། །བཅུ་གསུམ་པ་ཆིབས། སྔོན་བྱང་ཆུབ་སེམས་དཔའ་ཁབ་ནས་བྱུང་བའི་ཚེ་འབངས་མོས་པས་ཆིབས་བསྔགས་ལྡན་རིན་པོ་ཆེ་བརྒྱན་ཏེ་ཕུལ་བས་མཚན་ཕྱེད་ལ་དཔགས་ཚད་བརྒྱ་འདས་ཏེ་རབ་ཏུ་བྱུང་ནས་ཉོན་མོངས་ལས་ཐར་པའི་དབང་ཐོབ་བོ། །དེ་བཞིན་དུ་ཆིབས་ཀྱི་དབང་བསྐུར་བས་རབ་ཏུ་འབྱུང་ཞིང་ཉོན་མོངས་པ་ལས་གྲོལ་བའི་དབང་ཐོབ་པར་གྱུར་ཅིག །གར་ཡང་ཐོགས་མེད་བརྩོན་འགྲུས་མྱུར་བའི་ཤུགས། །ཚངས་པ་བརྒྱ་བྱིན་མཐུ་བྱིན་ཆེ་བའི་ལྷ། །རྒྱལ་ཆེན་རིགས་བཞིས་འདེགས་པའི་སྟོབས་དང་ལྡན། །ཐོགས་མེད་ཚངས་པར་སྤྱོད་པའི་མཐུ་ལྡན་ཤོག །འཁོར་བའི་ཆོས་རྣམས་མཆིལ་མ་བཞིན་དུ་དོར། །ཉེས་ཚོགས་དགྲ་རྣམས་མ་ལུས་གཞོམ་པའི་ཕྱིར། །འདོད་པའི་རྒྱུ་སྤོང་རྣམ་རྟོགས་འཇོམས་མཛད་པ། །འདི་ནི་ཆིབས་མཆོག་དབང་གི་བཀྲ་ཤིས་བཅུ་གསུམ་པའོ། །བཅུ་བཞི་པ་ཤན་གྲི། སྔོན་བྱང་ཆུབ་སེམས་དཔའ་མཆོད་རྟེན་རྣམ་དག་གི་དྲུང་དུ་རབ་ཏུ་བྱུང་བའི་ཚེ་སུམ་ཅུ་རྩ་གསུམ་གྱི་ལྷ་མཛེས་པའི་ཏོག་གིས་ཤན་རལ་གྲི་ཕུལ་ཏེ་དབང་བསྐུར་བས་ཉོན་མོངས་པའི་དྲྭ་བ་གཅོད་པའི་དབང་ཐོབ་བོ། །དེ་བཞིན་དུ་ཤན་རལ་གྲིའི་དབང་བསྐུར་བས་ཉོན་མོངས་པའི་དྲྭ་བ་གཅོད་པའི་དབང་ཐོབ་པར་གྱུར་ཅིག །ཉོན་མོངས་དྲྭ་བ་གཅོད་པའི་རལ་གྲི་སྟེ། །མི་ཤེས་ཉོན་མོངས་རྒྱུ་རྣམས་བཅད་ནས་ཀྱང་། །བླ་མེད་བྱང་ཆུབ་གནས་སུ་འགོད་པའི་ཕྱིར། །ཉོན་མོངས་སྒྲིབ་པའི་དྲྭ་བ་གཅོད་པར་ཤོག །ཉོན་མོངས་དགྲ་རྣམས་མ་ལུས་བཅོམ་ནས་ཀྱང་། །བདེ་བའི་དོན་རྟོགས་ནགས་ཁྲོད་དབེན་པར་གནས། །བདག་དོན་ལྷུན་གྲུབ་གཞན་དོན་མཐར་ཕྱིན་པའི། །འདི་ནི་ཚུལ་ཁྲིམས་དབང་གི་བཀྲ་ཤིས་བཅུ་བཞི་པའོ། །བཅོ་ལྔ་པ་གསེག་པར། སྔོན་བྱང་ཆུབ་སེམས་དཔའ་ཆུ་བོ་ནཻ་རཉྫ་ནའི་འགྲམ་དུ་དཀའ་ཐུབ་རྫོགས་པའི་ཚེ་སུམ་ཅུ་རྩ་གསུམ་པའི་ལྷའི་བུ་ཡིད་བཞིན་འབྱུང་བར་གསེག་གཤང་དང་པར་བུ་ཕལ་བས་འགྲོ་དོན་མཐར་ཕྱིན་པའི་དབང་ཐོབ་བོ། །དེ་བཞིན་དུ་གསེག་གཤང་དང་པར་བུའི་དབང་བསྐུར་བས་འགྲོ་དོན་མཐར་ཕྱིན་པའི་དབང་ཐོབ་པར་གྱུར་ཅིག །སེར་སྣའི་མདུད་པ་འགྲོལ་ཕྱིར་གསེག་གཤང་བསྣམས། །ཆོག་ཤེས་དགང་བ་སླ་ཕྱིར་པར་བུ་བསྣམས། །བསོད་ནམས་ཚོགས་རྫོགས་བྱང་ཆུབ་ཉིད་ཀྱི་སྐུ། །བདག་དང་གཞན་དོན་མཐར་ཕྱིན་རྫོགས་པར་ཤོག །མ་རིག་གཉིད་སློང་སིལ་བྱེད་སྒྲ། །ལྷུང་བཟེད་ཟག་མེད་ཡོན་ཏན་སྣོད། །ཞི་ཞིང་དབང་པོ་རབ་དུལ་བ། །འདི་ནི་དོན་གྲུབ་དབང་གི་བཀྲ་ཤིས་བཅོ་ལྔ་པའོ། །བཅུ་དྲུག་པ་ན་བཟའ་དུར་སྨྲིག །སྔོན་བྱང་ཆུབ་སེམས་དཔའ་རབ་ཏུ་བྱུང་བའི་ཚེ་སུམ་ཅུ་རྩ་གསུམ་གྱི་ལྷའི་བུས་ན་བཟའ་དུར་སྨྲིག་ཕུལ་བས་སྲིད་པའི་གདུང་བ་ལས་སྐྱོབ་པའི་དབང་ཐོབ་བོ། །དེ་བཞིན་དུ་ན་བཟའ་དུར་སྨྲིག་གི་དབང་བསྐུར་བས་སྲིད་པའི་གདུང་བ་ལས་སྐྱོབ་པའི་དབང་ཐོབ་པར་གྱུར་ཅིག །ངན་འགྲོ་སྐྱོབ་ཕྱིར་ན་བཟའ་ཆོས་གོས་གསོལ། །མི་ཤེས་རྨོངས་པ་མ་ལུས་བསལ་བ་དང་། །བག་ཆག་སྐྱོན་གྱི་དྲི་མས་མ་གོས་པའི། །འབྲས་བུ་བྱང་ཆུབ་གནས་སུ་འགྲུབ་པར་ཤོག །བསླབ་གསུམ་ཚུལ་ཁྲིམས་སྒོ་གསུམ་རྣམ་པར་དག །བདེ་བ་མཆོག་བརྙེས་འཇིགས་པའི་དགྲ་ལས་རྒྱལ། །རབ་བྱུང་དགེ་སྦྱོང་རྐང་གཉིས་ལྷ་མིའི་གཙོ། །ན་བཟའ་དབང་གི་བཀྲ་ཤིས་བཅུ་དྲུག་པའོ། །བཅུ་བདུན་པ་འོ་ཐུག་འབྲས་ཆན། སྔོན་བྱང་ཆུབ་སེམས་དཔའ་ཆུ་བོ་ནཻ་རཉྫ་ནའི་འགྲམ་དུ་བཀའ་ཐུབ་ལོ་གཉིས་ལ་འབྲས་ཉག་མ་རེ། ལོ་གཉིས་ལ་ཆུ་ཐིག་པ་རེ། ལོ་གཉིས་ལ་ཅི་ཡང་མ་གསོལ་བ་ལ་ཚོར་བ་མི་མངའ་ཡང་སྐུ་རིད་ཅིང་སྐམས་པའི་ཚེ་གྲོང་པའི་བུ་མོ་ལེགས་སྐྱེས་མས་འོ་ཐུག་འབྲས་ཆན་འཁར་གཞོང་གང་ཕུལ་བས་སྐུ་གསེར་གྱི་གཏན་པ་ཕྱིས་པ་ལྟར་གྱུར་ཏེ་མཚན་དང་དཔེ་བྱད་དང་ལྡན་པའི་དབང་ཐོབ་བོ། །དེ་བཞིན་དུ་འོ་ཐུག་འབྲས་ཆན་གྱི་དབང་བསྐུར་བས་སྐུ་མཚན་དང་དཔེ་བྱད་ཀྱིས་བརྒྱན་པའི་དབང་ཐོབ་པར་གྱུར་ཅིག །ཉོན་མོངས་མེད་པའི་འབྲས་བུའི་མཆོག །ཞི་བའི་ངང་ལ་རབ་ཏུ་གནས། །བསོད་ནམས་ཐོབ་ཕྱིར་བསྔོས་པ་འདིས། །མཚན་དང་དཔེ་བྱད་རྫོགས་པར་ཤོག །ཟག་མེད་བདུད་རྩི་ཆོས་ཀྱི་རོ། །བསོད་ནམས་ལུས་རྫོགས་ཡེ་ཤེས་ཀྱི། །མཚན་དཔེས་རབ་བརྗིད་རྒྱལ་བའི་སྐུ། །དབང་མཆོག་བཀྲ་ཤིས་བཅུ་བདུན་པའོ། །བཅོ་བརྒྱད་པ་རྩྭ་དརྦྷའི་སྟན། །སྔོན་བྱང་ཆུབ་སེམས་དཔའ་བྱང་ཆུབ་ཀྱི་ཤིང་དྲུང་དུ་གཤེགས་པའི་ཚེ་རྩྭ་འཚོང་བཀྲ་ཤིས་ཀྱིས་རྩྭ་རྨ་བྱའི་མགྲིན་པ་ལྟར་སྔོ་བ་ཕྱག་ཏུ་ཕུལ་བ་སྟན་དུ་བཏིང་སྟེ་བཞུགས་པས་བདུད་ཀྱི་བར་ཆད་ཀྱིས་མི་ཚུགས་པའི་དབང་ཐོབ་བོ། །དེ་བཞིན་དུ་རྩྭ་དརྦྷའི་རྫས་ཀྱི་དབང་བསྐུར་བས་བར་ཆད་ཐམས་ཅད་ཀྱིས་མི་ཚུགས་པའི་དབང་ཐོབ་པར་གྱུར་ཅིག །སྔོན་གྱི་དྲང་སྲོང་རྣམས་ཀྱི་གྲུབ་པའི་རྫས། །ངོ་མཚར་རྩྭ་མཆོག་རྨ་བྱའི་མགྲིན་པ་འདྲ། །ཉེས་མེད་ལེགས་པ་མཐའ་དག་རྫོགས་བྱེད་པའི། །འགྲོ་བའི་དོན་དུ་བཀྲ་ཤིས་རྫོགས་པར་ཤོག །མཉམ་ཉིད་མི་གཡོ་རྡོ་རྗེ་ལྟ་བུའི་སྐུ། །ཏིང་འཛིན་འཇིག་ཚོགས་ལྟ་བ་ཉི་ཤུ་འཇོམས། །བདུད་རིགས་ཚོགས་བཏུལ་མངོན་པར་སངས་རྒྱས་པའི། །རྩྭ་མཆོག་དབང་གི་བཀྲ་ཤིས་བཅོ་བརྒྱད་པའོ། །བཅུ་དགུ་པ་སྦྲང་རྩི། སྔོན་བཅོམ་ལྡན་འདས་མ་ག་དྷར་བསོད་སྙོམས་ལ་གཤེགས་པའི་ཚེ་སྤྲེའུས་སྦྲང་རྩི་ལྷུང་བཟེད་གང་ཕུལ་བས་བཀྲ་ཤིས་པའི་རྫས་སུ་མངའ་བརྙེས་པར་གྱུར་ཏོ། །དེ་བཞིན་དུ་བཀྲ་ཤིས་པའི་རྫས་ཀྱི་དབང་བསྐུར་བས་འབྲས་བུ་ཕུན་སུམ་ཚོགས་པའི་དབང་ཐོབ་པར་གྱུར་ཅིག །རྒྱལ་རིགས་སྤྲེའུའི་གཙོ་བོ་ཡིས། །སྦྲང་རྩི་ཕུལ་བའི་བསོད་ནམས་མཆོག །ཐུགས་རྗེ་མཐུན་པའི་བྱིན་རླབས་ཀྱིས། །བཀྲ་ཤིས་སྟོབས་མཆོག་ལྡན་པར་ཤོག །སྟོང་ཉིད་རང་བྱུང་ཟག་མེད་སྙིང་པོའི་བཅུད། །དུས་གསུམ་རྒྱལ་བས་ཞེན་མེད་རོལ་པར་མཛད། །གང་གིས་འདི་འཐུང་མཉམ་ཉིད་སྐུ་གསུམ་རྫོགས། །རྩི་མཆོག་དབང་གི་བཀྲ་ཤིས་བཅུ་དགུ་པའོ། །ཉི་ཤུ་པ་སྦྲང་བུར། སྔོན་བཅོམ་ལྡན་འདས་སྐྱེས་བུ་གྱད་ཀྱི་ཉེ་འཁོར་ན་བཞུགས་པའི་ཚེ་བྱང་ཕྱོགས་ཀྱི་ཚོང་པ་ག་གོན་དང་བཟང་པོས་བུ་རམ་དང་སྦྲང་རྩི་ཕུལ་བ་བཞེས་པ་ཤིན་ཏུ་བཀྲ་ཤིས་པའི་རྫས་ལ་མངའ་བརྙེས་པར་གྱུར་ཏོ། །དེ་བཞིན་དུ་བཀྲ་ཤིས་པའི་རྫས་ཀྱི་དབང་བསྐུར་བས་སྐྱེ་འཆི་མེད་པའི་དབང་ཐོབ་པར་གྱུར་ཅིག །ཀུན་གྱི་སྙིང་པོ་ཡོན་མཆོག་དང་བས་ཕུལ། །མཆོད་གནས་མཆོག་གིས་རབ་བཞེས་འབྲས་བུ་ནི། །རྒྱལ་བར་ལུང་བསྟན་སྨོན་ལམ་མྱུར་ཐོབ་ཕྱིར། །འདི་དག་བཀྲ་ཤིས་ཐོགས་མེད་རྫོགས་པར་ཤོག །ཡོན་ཏན་རབ་རྫོགས་སངས་རྒྱས་ས་ལ་གནས། །གོ་འཕང་བླ་མེད་རྒྱལ་ཐབས་སྤྱོད་པ་གཅིག །འགྲོ་དོན་མཐར་ཕྱིན་འཇིག་རྟེན་གསུམ་གྱི་མགོན། །མཛད་པ་མཐར་ཕྱིན་དབང་མཆོག་ཉི་ཤུ་པའོ། །ཞེས་བསྐུར་རོ། །དེ་ལྟར་བྱང་སེམས་ཀྱི་ཐེག་པའི་དབང་བསྐུར་བས། མདོ་རང་ལུགས་ཀྱི་སྦྱོར་ལམ་གཉིས་པ་མཚན་མ་རྟགས་ཀྱི་རྣལ་འབྱོར་བསླབ་པ་རྒྱུན་གྱིས་ནོན་པ་དང་རིགས་འདྲ་བའི་ཡོན་ཏན་གསོས་ཐེབས། མངོན་དུ་རྒྱུའི་བག་ཆགས་འབྲིང་པོ་དག །སྲིད་ཞི་ལས་རྣམ་པར་གྲོལ་བའི་རྒྱུ་དང་། །ལམ་གོང་མ་ལ་སྦྱོར་བ་བྱང་ཆུབ་ཀྱི་སེམས་སྐྱེ་བའི་སྟེགས་སུ་གྱུར། རྫོགས་པའི་སངས་རྒྱས་ཀྱི་རྒྱལ་ཚབ་ཆེན་པོ་ས་བཅུ་པའི་བྱང་སེམས་ཀྱི་རྟོགས་རིགས་དང་འདྲ་བའི་ཡོན་ཏན་ཁྱད་པར་ཅན་ཐོབ་པའི་སྐལ་པ་ཅན་ཏུ་བྱས་པ་ཡིན་ནོ། །རྗེས་ཀྱི་བྱ་བ་ལ་སྤྱི་དོན་གསུམ་སྟེ། ལམ་ཁྱེར་བཞི་བསྟན་པ། འགག་དྲུག་བཤད་པ། གདམས་ངག་ངང་སྒོམ་གྱི་ཁྲིད་གདབ་པའོ། །སྤྱི་དོན་དང་པོ་ལམ་ཁྱེར་ལ་བཞི་ལས། དང་པོ་ཐེག་པ་ལམ་ཁྱེར་ནི། བྱང་ཆུབ་སེམས་དཔའི་ཐེག་པ་སྟེ། དེ་ལའང་དྲུག་ལས། འཇུག་སྒོ་ནི། བདེན་པ་གཉིས་ཀྱི་སྒོ་ནས་འཇུག་སྟེ། དོན་དམ་པར་ཆོས་ཐམས་ཅད་དབྱིངས་རང་བཞིན་གྱིས་སྤྲོས་པ་དང་བྲལ་བའི་གཤིས་ལུགས་རྟོགས་པའི་ངང་ནས། ཀུན་རྫོབ་ཏུ་རྟེན་འབྲེལ་མ་འགགས་པའི་འཆར་སྒོ་སྒྱུ་མ་ལྟར་སྣང་ཙམ་དུ་བྱམས་སྙིང་རྗེ་བྱང་ཆུབ་ཀྱི་སེམས་ཀྱིས་ཟིན་པར་བྱས་ཏེ། དགེ་མི་དགེ་ལ་འཇུག་ལྡོག་གི་ཚུལ་གྱིས་ཐབས་ཤེས་ཟུང་འབྲེལ་གྱི་སྤྱོད་པས་འཇུག་གོ། །ལྟ་བ་ནི། བདག་མེད་གཉིས་རྟོགས་པའོ། །དེའང་ཀུན་རྫོབ་ཏུ་ཆོས་ཐམས་ཅད་མེད་བཞིན་དུ་སྣང་བ་ཆུ་ཟླ་ལྟར་རྟོགས་ཤིང་། དོན་དམ་པར་སྤྲོས་པ་ཐམས་ཅད་ཞི་བའི་ཚུལ་དུ་རྟོགས་པས་ན་བདེན་གཉིས་ཀྱི་གནས་ལུགས་རྟོགས་པ་སྟེ། ལམ་རིམ་ལས། མཉམ་པའི་དོན་ཉིད་མི་ཤེས་ཤིང་། །ཀུན་རྫོབ་དོན་དམ་གཉིས་འབྱེད་ལ། །ཆོས་དང་གང་ཟག་བདག་མེད་ན། །འདི་ནི་བྱང་ཆུབ་ས་པ་ཡིན། །ཞེས་གསུངས། ཚུལ་ཁྲིམས་ནི་གསུམ་སྟེ། ཉེས་སྤྱོད་ལས་ལྡོག་པ་སྡོམ་པའི་ཚུལ་ཁྲིམས། བསམ་སྦྱོར་ཐམས་ཅད་གཞན་དོན་དུ་སྤྱོད་པ་སེམས་ཅན་དོན་བྱེད་ཀྱི་ཚུལ་ཁྲིམས། ཕྱིན་དྲུག་གིས་བསྡུས་པའི་ལེགས་སྤྱོད་སྒྲུབ་པ་དགེ་བ་ཆོས་སྡུད་ཀྱི་ཚུལ་ཁྲིམས་སོ། །སྒོམ་པ་ནི། སྤྱིར་སློབ་པའི་ལམ་བཞིར་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་། མཐར་ལམ་དུ་གཟུངས་ཀྱི་སྒོ་ལྔ་བརྒྱ་དང་། ཏིང་ངེ་འཛིན་གྱི་སྒོ་འབུམ་འཕྲག་ལ་སོགས་པ་སྒོམ་པ་ཡིན་མོད། སྙིང་པོར་དྲིལ་ན། ཞི་ལྷག་ཟུང་དུ་འབྲེལ་བའི་རྣམ་པར་མི་རྟོག་པའི་ལམ་སྒོམ་པ་སྟེ། སྤྱོད་འཇུག་ལས། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པར་ཤེས་བྱ་སྟེ། །ཞེས་སོ། །སྤྱོད་པ་ནི། ཕར་ཕྱིན་བཅུ་དང་བསྡུ་བའི་དངོས་པོ་བཞི་གཞན་དོན་དུ་སྤྱོད་པའོ། །འབྲས་བུ་ནི། རང་ལམ་གྱིས་བསྐལ་པ་གྲངས་མེད་གསུམ་ནས་མི་སློབ་པའི་ལམ་ཀུན་ཏུ་འོད་ཀྱི་ས་ཐོབ་པར་འདོད་མོད། སྔགས་ཀྱི་ཐེག་པ་ལས་ནི། ཕར་ཕྱིན་ཐེག་པའི་ལམ་གྱིས་མཐར་ཕྱིན་པར་བསྒྲུབས་ཀྱང་ས་བཅུ་པའི་བྱང་སེམས་ཀྱི་གོ་འཕང་ལས་ལྷག་པ་མི་ཐོབ་ཀྱང་། སྐབས་དེར་སྔགས་ལམ་ལ་ངེས་པར་ཞུགས་ནས་སངས་རྒྱས་ཐོབ་པས་ན། མཐར་ཐུག་ཐེག་པ་གཅིག་ཏུ་གྲུབ་པར་གསུངས་སོ། །གཉིས་པ་ལྷ་ལམ་ཁྱེར་ནི། དོན་དམ་པར་འཕགས་བཞིའི་ཡུམ་སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ་དབྱིངས་སྤྲོས་པ་དང་བྲལ་བའི་ངང་ལས་བསལ་བཞག་མེད་པར་བསྐྱངས་པས་ཡེ་ཤེས་ཀྱི་ཚོགས་དང་། ཀུན་རྫོབ་ཏུ་བརྡའི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་སྲས་ཕྱོགས་བཅུའི་སངས་རྒྱས་ཀྱིས་བསྐོར་བའི་སྐུའི་རྣམ་པ་གསལ་བཏབ་ནས། ཕྱག་མཆོད་འབུལ་བ་ལ་སོགས་པས་བསོད་ནམས་ཀྱི་ཚོགས་བསགས་པའོ། །གསུམ་པ་སྙིང་པོ་ལམ་ཁྱེར་ནི། ལྷ་རྣམས་ཀྱི་སྐུ་ལས་འོད་ཟེར་འཕྲོས་པས། འཕགས་པ་རྣམས་སེམས་ཅན་གྱི་དོན་ལ་བསྐུལ་ཞིང་། ཁམས་གསུམ་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་ནས་ལམ་དང་འབྲས་བུའི་བདེ་བ་ལ་བཀོད། འོད་ཟེར་དེས་བདག་ལ་རེག་པས་གཞན་དོན་སྒྲུབ་མཐུ་ཐོབ་པར་བསམ་ལ། ཏདྱ་ཐཱ། ག་ཏེ་ག་ཏེ་སོགས་བཟླ་བའོ། །བཞི་པ་བསླབ་བྱ་ལམ་ཁྱེར་ནི། འདི་བྱང་ཆུབ་སེམས་དཔའི་མཛད་པ་ཉི་ཤུའི་དབང་ཡིན་པས། དེ་དང་རྗེས་སུ་མཐུན་པར་བྱང་ཆུབ་ཀྱི་སྤྱོད་པ་ལ་བསླབ་དགོས། དེ་ལ་སྤང་བྱ་བྱང་སྡོམ་གྱི་མི་མཐུན་ཕྱོགས་རྩ་བའི་ལྟུང་བ་ནི། བསླབ་བཏུས་ལས། རྒྱལ་པོ་ལ་ངེས་པ་ལྔ། བློན་པོ་ལ་ངེས་པ་ལྔ། ཕལ་པ་ལ་ངེས་པ་བརྒྱད། ཐུན་མོང་དུ་སྨོན་སེམས་བཏང་བ་དང་བཅུ་དགུ་གསུངས། སྡོམ་པ་ཉི་ཤུ་པར། རྙེད་དང་བཀུར་སྟིར་ཆགས་པ་ཡིས། །བདག་བསྟོད་གཞན་ལ་སྨོད་པ་དང་། སྡུག་བསྔལ་མགོན་མེད་གྱུར་པ་ལ། །སེར་སྣས་ཆོས་ནོར་མི་སྟེར་དང་། །གཞན་གྱིས་བཤགས་ཀྱང་མི་ཉན་པར། །ཁྲོ་བས་གཞན་ལ་འཚོགས་པ་དང་། །ཐེག་པ་ཆེན་པོ་སྤོང་བྱེད་ཅིང་། །དམ་ཆོས་འདྲར་སྣང་སྟོན་པའོ། །ཞེས་རྩ་ལྟུང་བཞིར་བཤད། །ཉེས་བྱས་ཕྲ་བ་ནི། བསླབ་བཏུས་སུ་བརྒྱད་ཅུ་དང་། སྡོམ་པ་ཉི་ཤུ་པར་ཞེ་དྲུག་གསུངས་ཏེ། དེའང་བག་ཡོད། དྲན་པ། ཤེས་བཞིན་གསུམ་དང་ལྡན་པས་ལྟུང་བ་དེ་དག་གིས་མི་གོས་པ་ལ་བསླབ་པ་དང་། ཉིན་མཚན་དུས་དྲུག་ཏུ་རྒྱུན་བཤགས་བྱ་ཞིང་། སྨོན་པའི་བསླབ་བྱ་བདག་གཞན་མཉམ་པ་དང་། བདག་གཞན་བརྗེ་བ་དང་། གཞན་གཅེས་པར་འཛིན་པའི་བྱང་ཆུབ་ཀྱི་སེམས་གསུམ་སྒོམ་པ་དང་། འཇུག་པའི་བསླབ་བྱ་ཕ་རོལ་ཏུ་ཕྱིན་པ་དྲུག་ལ་བསླབ་པར་བྱའོ། །སྤྱི་དོན་གཉིས་པ་འགག་དྲུག་བཤད་པ་ནི། གཞུང་ལས། གང་གིས་གང་ལ་གང་དུ་ཅི་ཡི་ཕྱིར། །ཚུལ་དང་དགོས་པར་བཅས་པ་རྣམ་དྲུག་སྟེ། །འདི་ནི་བྱང་ཆུབ་སེམས་དཔའི་འགག་དྲུག་ཡིན། །ཞེས་གསུངས་པ་ལྟར་གང་དུ་བཤད་པའི་གནས་ནི། རྒྱལ་པོའི་ཁབ་ཀྱི་བྱ་རྒོད་ཕུང་པོའི་རིའོ། །གང་གིས་བཤད་པའི་སྟོན་པ་ནི། ཡང་དག་པར་རྫོགས་པའི་སངས་རྒྱས་སོ། །གང་ལ་བཤད་པའི་འཁོར་ནི། བྱང་ཆུབ་སེམས་དཔའ་དོན་གྲུབ་ལ་སོགས་པ་རྣམས་སོ། །གང་བཤད་པའི་ཐེག་པ་ནི། ཤེས་རབ་དང་སྙིང་རྗེ་ཆེན་པོས་གཞན་དོན་རླབས་པོ་ཆེ་སྤྱོད་པའི་ཐབས་བྱང་ཆུབ་སེམས་དཔའི་ཐེག་པའོ། །ཅིིའི་ཕྱིར་བསྟན་ན། འགྲོ་བ་འདུལ་བ་བྱང་སེམས་ཀྱི་མཛད་པ་ཉི་ཤུའི་དབང་བསྐུར་བས་བློ་མཆོག་ཏུ་གྱུར་པ་རྣམས་མཛད་པ་ཡོངས་སུ་རྫོགས་པའི་ཆེད་དུའོ། །དེ་ལྟར་བསྟན་པའི་དགོས་པ་ནི། བདུད་དཔུང་བཅོམ་ནས་ཆོས་ཀྱི་རྒྱལ་སྲིད་འཛིན་པའོ། །སྤྱི་དོན་གསུམ་པ་གདམས་ངག་ངང་སྒོམ་གྱི་ཁྲིད་ནི། བསམ་གཏན་གྱི་འདུག་སྟངས་ཆོས་བདུན་དང་ལྡན་པས། རང་གི་སྙིང་དཀྱིལ་དུ་ཐིག་ལེ་ཅོག་སྒོང་ཙམ་པ་འོད་ཀྱི་རྣམ་པ་ཁ་དོག་གང་དུ་ཡང་མ་ངེས་པ་ཞིག་སྒོམ། དེ་ཡང་། ཐིག་ལེ་སྟོང་པ་སྐྱེ་བ་མེད། །ཅེས་པས་ཐིག་ལེ་དེ་ལ་བརྟགས་པ་ན་ཁ་དོག་གི་རྣམ་པ་མ་འགགས་པར་ཅིར་ཡང་སྣང་ལ། ཁ་དོག་དེ་དག་ལ་བརྟགས་པས་གང་དུའང་མ་གྲུབ་པའི་ངང་ལ་རྩེ་གཅིག་ཏུ་འཇོག་གོ། །དེ་ལྟར་དཔྱད་ཅིང་བསྒོམས་པས་བློ་གནས་པ་ན། དཔེ་དེ་དང་འདྲ་བར་། དབང་བསྐུར་བྱ་སྐུར་བྱེད་བསྐུར་བ་ལ་སོགས་པའི་བྱ་བྱེད་ཀྱིས་མཚོན། ཕྱི་ནང་གི་སྣང་བའི་དངོས་པོ་འདི་དག་རྟེན་འབྲེལ་ཙམ་དུ་མ་འགགས་པར་ཤར་ཡང་། སྣང་ཙམ་ཉིད་ནས་དོན་ལ་ཅུང་ཟད་ཀྱང་གྲུབ་པ་མེད་པ་རྨི་ལམ་གྱི་སྣང་བ་ལྟ་བུ་དང་། དེ་ལྟར་ཉམས་སུ་མྱོང་མཁན་རང་སེམས་ཀྱི་ངོ་བོ་ལ་ཅེར་གྱི་བལྟས་ཤིང་བཙལ་བ་ན་དབྱིབས་ཁ་དོག་སོགས་ཅིའི་ངོ་བོར་ཡང་མ་གྲུབ་པས་འཛིན་མེད་སྟོང་པར་ཐག་བཅད་ནས། ཡུལ་དངོས་མེད་སྟོང་གཟུགས་དང་། ཡུལ་ཅན་འཛིན་སེམས་སྐད་ཅིག་ཆ་མེད་དོ། །ཞེས་མྱོང་མཁན་གྱི་གཉེན་པོ་ཁོ་རང་གི་ངོ་བོ་ལའང་ཅེ་རེ་བལྟས་པས་གཏད་མེད་དུ་སངས་ཏེ། གཟུང་འཛིན་གང་དུའང་མ་གྲུབ་པའི་སྟོང་གསལ་ནམ་མཁའ་ལྟ་བུའི་རིག་པ་སྨྲ་བསམ་བརྗོད་མེད་བློ་བྲལ་དུ་འཆར་ན། དེ་ཀའི་ངང་ལ་བསལ་བཞག་མེད་པར་གློད་པས་བདག་མེད་གཉིས་ཀྱི་དོན་རྟོགས་པར་འགྱུར་ལ། དེ་ལྟར་མཉམ་བཞག་ཏུ་བདག་མེད་གཉིས་རྟོགས་པ་དེ་རྗེས་ཐོབ་ཏུ་དྲན་ཤེས་ཀྱིས་བསྐྱང་བ་ནི། སྣང་བ་གང་ཤར་ཀྱང་མེད་པ་གསལ་སྣང་སྒྱུ་མ་ལྟ་བུར་ཐག་བཅད་ནས། དེ་ཉིད་ལྷ་རྗེས་དྲན་གྱི་སྒོར་དག་པའི་སྣང་བ་ཡུམ་ཤེར་ཕྱིན་གྱི་སྐུའི་རྣམ་པར་ཝལ་གྱིས་གསལ་བཏབ་ནས་རྒྱུན་ཆགས་སུ་བསྐྱང་བར་བྱ་བ་ཡིན་ནོ། །དེས་བྱང་སེམས་ཀྱི་ཐེག་པའི་དབང་བསྐུར་བའི་མན་ངག་དང་བཅས་པ་གྲུབ་པས་ཇི་ལྟར་གདམས་པ་རྣམས་ཚུལ་བཞིན་དུ་བསྒྲུབ་སྙམ་པས། གཙོ་བོས་ཇི་ལྟར་སོགས་ཀྱིས་ཁས་བླང་ངོ་། །གཏང་རག་གི་མཎྜལ་དང་། དེང་ནས་བརྩམས་ཏེ་སོགས་ཀྱིས་ཡོན་དབུལ་ཞིང་། དགེ་བ་བསྔོ་བ་རྣམས་སྔར་ལྟར་དང་། རྗེས་ཆོག་རྣམས་སྒྲུབ་ཐབས་ལྟར་བྱའོ། །ཟབ་དོན་མན་ངག་བདུད་རྩིའི་ཆུས། །ཤེས་རབ་དབང་པོའི་ཟ་མ་ཏོག །ཡོངས་བཀང་བརྩེ་བས་ཆོས་སྦྱིན་རྒྱུན། །དད་ལྡན་གདུང་སེལ་དཔལ་དུ་སྤེལ། །བྱང་སེམས་ཐེག་པའི་དབང་ཆོག་གི་ལེ་ཚན་ནོ།། །།
༈ ༀ་སྭ་སྟི། ཡེ་ཤེས་གཅིག་ཉིད་རིགས་གསུམ་གྱི། །རྣམ་འགྱུར་འགག་མེད་ཆུ་ཟླ་ལྟར། །སྟོན་མཛད་རྡོ་རྗེ་སློབ་དཔོན་ལ། །བཏུད་ནས་ཀྲི་ཡའི་དབང་ཆོག་བཤད། །ད་ནི་ལྔ་པ་བྱ་སྤྱོད་ཐུན་མོང་གི་ཐེག་པའི་དབང་ནི། སྟ་གོན་སྔོན་དུ་འགྲོ་བས། དངོས་གཞི་དཀྱིལ་འཁོར་བྲིས་སྒྲུབ་གཏོར་ཆོག་དང་བཅས་པ་གྲུབ་ནས། དཀྱིལ་འཁོར་དུ་འཇུག་པ་ལ་གཉིས་ལས། དང་པོ་སློབ་དཔོན་འཇུག་པ་ནི། སློབ་མ་ཇི་ལྟར་འཇུག་པའི་ཆོ་གས་བདག་ཉིད་ཞུགས་ཏེ་དབང་བླང་བའམ། ཡང་ན་སྒོ་ཕྱེ་ནས། དཀྱིལ་འཁོར་གྱི་གཙོ་བོ་དང་བླ་མ་གཉིས་སུ་མེད་པར་མོས་ལ་རིག་པའི་མེ་ཏོག་ཕུལ་བས་དཀྱིལ་འཁོར་པའི་རྡོ་རྗེ་གསུམ་དང་རང་གི་སྒོ་གསུམ་གཉིས་མེད་དུ་གྱུར་པར་བསམ་སྟེ། སློབ་དཔོན་གྱི་ལས་ལ་རྗེས་སུ་གནང་བ་ཐོབ་པར་བྱའོ། །གཉིས་པ་སློབ་མ་གཞུག་པ་ནི། ལས་བུམ་གྱི་ཆུས་ཁྲུས་བྱས། བགེགས་གཏོར་བཏང་ལ་མཚམས་བཅད། སེམས་བསྐྱེད་དང་ཆོས་ཉན་པའི་ཀུན་སྤྱོད་གསལ་འདེབས་པ་སྔོན་དུ་འགྲོ་བས། འདིར་གང་གསན་པར་བྱ་བའི་ཆོས་ནི། །ཞེས་པ་ནས། ཕྱི་དབང་རྒྱུད་ཀྱི་ཆུ་བོའི་ཡན་ལག་གི་དཀྱིལ་འཁོར་ཞེས་པའི་བར་སྔར་ལྟར་ལས་སྐབས་བབས་ཀྱི་སྤྲོ་བསྡུ་ཇི་ལྟར་རིགས་པ་བྱས་རྗེས། ལྔ་པ་ཀྲི་ཡའི་ཏནྟྲ་སྟེ་བྱ་བའི་རྒྱུད། དེ་ལའང་ཙམ་ཁྱད་གཉིས་ལས། འདིར་བྱ་བ་ཁྱད་པར་ཅན་སྤྱོད་རྒྱུད་དང་ཐུན་མོང་པའི་དཀྱིལ་འཁོར་དུ་དབང་བསྐུར་བ་སྐབས་སུ་བབས་པ་ཡིན། དེ་ལ་སློབ་དཔོན་གྱི་བྱ་བ་རྣམས་སྔོན་དུ་གྲུབ་པས། ད་སློབ་མ་རྣམས་ཀྱི་ངོ་སྐལ་དུ་གྱུར་པ་ལ་ཐོག་མར་དཀྱིལ་འཁོར་དུ་འཇུག་ཅིང་དབང་ཞུ་བའི་ཡོན་དུ་མཎྜལ་འབུལ་དུ་བཅུག་ནས། ཕྱག་སྔོན་དུ་འགྲོ་བས། སྙིམ་པ་མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་གདབ་པ་འདིའི་རྗེས་ཟློས་མཛོད། བླ་མ་དཀོན་མཆོག་རྣམ་གསུམ་པོ། །འགྲོ་བ་སེམས་ཅན་དོན་སླད་དུ། །བདག་ལ་དགོངས་ཤིང་གཟིགས་སུ་གསོལ། །བླ་མ་རྡོ་རྗེ་འཛིན་པ་དང་། །རིགས་གསུམ་གཙོ་འཁོར་དགོངས་སུ་གསོལ། །ལྷ་དང་བྱིན་རླབས་དམ་ཚིག་དང་། །དབང་རྣམས་རིམ་པར་བསྐུར་དུ་གསོལ། །ཞེས་ལན་གསུམ། དེ་ལྟར་གསོལ་བ་བཏབ་པའི་ལན་དུ་གནང་བ་སྦྱིན་པ་ནི། རུས། དེ་བཞིན་གཤེགས་པ་ཀུན་གྱི་གནས། །རིགས་གསུམ་དཀྱིལ་འཁོར་ཆེན་པོ་འདིར། །ཁྱོད་ལ་དམ་ཚིག་དབང་བསྐུར་སྦྱིན། །གུས་པའི་སེམས་ཀྱིས་སྒྲུབ་པར་གྱིས། །ཉེས་པ་དག་གིས་མ་གོས་ན། །འབྲས་བུ་དམ་པ་ཐོབ་པར་འགྱུར་། །ཞེས་བརྗོད། དེ་ནས། ༀ་ཏྲཻ་ལོཀྱ་བི་ཛ་ཡ་ཧཱུཾ་ཕཊ། ཅེས་དང་། ༀ་ཨ་མྲྀ་ཏེ་ཧཱུཾ་ཕཊ། ཅེས་བཟླ་ཞིང་ལས་བུམ་གྱིས་ཆུས་བསང་གཏོར་བྱ། ༀ་ཙཀྵུ་བནྡྷ་ཝ་ར་མཱ་ན་ཡ་ཧཱུཾ་གིས་མིག་དར་བཅིང་། ཨཱ་ཁཾ་ཝཱི་ར་ཧཱུཾ། ཞེས་པས་མེ་ཏོག་འཛིན་དུ་བཅུག །དེ་ནས་སྡོམ་པ་བཟུང་བ་ནི། བླ་མ་དང་ཐ་མི་དད་པའི་རིགས་གསུམ་གྱི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མངོན་སུམ་དུ་བཞུགས་པར་མོས་པ་དཔང་དུ་བྱས་ཏེ། ཐུན་མོང་པ་སྐྱབས་སེམས་ཀྱི་སྡོམ་པ་ནི། སྟ་གོན་གྱི་དུས་བླངས་མ་ཐག་པ་ཡིན་པས་འདིར་མ་བླངས་ཀྱང་ཆོག་ལ། བླངས་ཀྱང་ལེགས་པར་འགྱུར་རོ། །ཐུན་མོང་མ་ཡིན་པ་ནི་རིགས་གསུམ་སྤྱིའི་དམ་ཚིག་བཟུང་བའི་བསམ་པས། སངས་རྒྱས་བྱང་ཆུབ་སེམས་དཔའ་དང་། །དཀྱིལ་འཁོར་ལྷ་ཚོགས་དགོངས་སུ་གསོལ། །བླ་མེད་དཀོན་མཆོག་གསུམ་པོ་ལ། །དེང་ནས་བདག་ནི་སྐྱབས་སུ་མཆི། །བདག་གིས་སངས་རྒྱས་བསྟན་པའི་གཞུང་། །སྤྱི་དང་མི་འགལ་ལེགས་གནས་ཏེ། །ཐེག་ཆེན་གསང་སྔགས་བྱ་བའི་གཞུང་། །ཁྱད་པར་དམ་ཚིག་བདག་གིས་བླང་། །ཡང་དག་ཉིད་དུ་བཟུང་བར་བགྱི། །ཐེག་ཆེན་གསང་བ་སྔགས་ཀྱི་ལྷ། །དོན་གཅིག་གཉིས་མེད་ཡེ་ཤེས་དོན། །ཡང་དག་ཉིད་དུ་བདག་གིས་བཟུང་། །སྐུ་ཡི་རིགས་མཆོག་ཆེན་པོ་ཡི། །དམ་ཚིག་སྡོམ་པ་ལ་གནས་ཏེ། །སྒྲུབ་པ་དག་ཀྱང་ཅི་ནུས་བརྩམ། །པདྨའི་རིགས་མཆོག་དག་པ་ཡི། །ཕྱི་ནང་གསང་བའི་གསུང་སྒྲགས་ཏེ། །དམ་པའི་ཆོས་ཀྱང་མ་ལུས་བཟུང་། །རྡོ་རྗེ་རིགས་མཆོག་དམ་ཚིག་ནི། །རྡོ་རྗེ་དྲིལ་བུ་ཕྱག་རྒྱ་ཡང་། །བླ་མ་རྡོ་རྗེ་རིགས་བསྟེན་བྱ། །མཐའ་ཡས་སེམས་ཅན་དོན་གྱི་ཕྱིར། །གསང་སྔགས་དམ་ཚིག་བདག་གིས་བླང་། །ཡང་དག་པར་ནི་བཟུང་བར་བྱ། །བྱང་ཆུབ་སེམས་མཆོག་སྒྲུབ་པར་བགྱི། །ཞེས་ལན་གསུམ་བརྗོད་དུ་གཞུག །དེ་ནས་ཆོས་བཤད་པ་ནི། འོ་སྐོལ་གྱི་སྟོན་པ་ཡང་དག་པར་རྫོགས་པའི་སངས་རྒྱས་ཀྱིས་གདུལ་བྱའི་བསམ་པ་དང་འཚམས་པར་ཐེག་པའི་སྒོ་མཐའ་ཡས་པ་གསུངས་པ་ལས། ངན་སོང་ལས་ངེས་པར་འབྱུང་བ་ལྷ་མི། །འཁོར་བ་ལས་ངེས་པར་འབྱུང་བའི་བྱང་ཆུབ་ཆུང་ངུ་ཉན་ཐོས་དང་། འབྲིང་རང་རྒྱལ། མཐའ་གཉིས་ལས་ངེས་པར་འབྱུང་བའི་བྱང་ཆུབ་ཆེན་པོ་བྱང་སེམས་ཀྱི་ཐེག་པ་སྟེ། དེ་ལྟར་ངེས་འབྱུང་གི་ཐེག་པ་བཞི་ལས། འདིར་འབྲས་བུ་སྔགས་ཀྱི་ཐེག་པ་ཁྱད་པར་དུ་འཕགས་ཏེ། ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་གསུངས། དེའི་དོན་ནི་རྒྱུ་འབྲས་ཀྱི་ཐེག་པ་ཆེན་པོ་གཉིས་སེམས་ཅན་གྱི་དོན་དུ་བླ་ན་མེད་པའི་བྱང་ཆུབ་འདོད་པར་གཅིག་ནའང་། ཁྱད་པར་བཞིས་སྔགས་འཕགས་ཏེ། ལྷ་སྔགས་སོགས་ཐབས་ཀྱི་ཆ་ལ་མ་རྨོངས་དང་། །དེའང་དབང་པོའི་རིམ་པ་དང་མཐུན་པར་རྒྱུད་སྡེའི་སྒོ་མཐའ་ཡས་པས་ཐབས་མང་བ་དང་། དེའང་དུས་རིང་པོར་མི་ཐོགས་པས་དཀའ་བ་མེད་པ་དང་། དེ་ཉིད་སྔགས་ཀྱི་ཐེག་པ་དངོས་ཀྱི་གདུལ་བྱ་དབང་རྣོན་ལ་དགོངས་ནས་གསུངས་པའི་ཕྱིར་རོ། །དེར་མ་ཟད། བསྐལ་པ་བྱེ་བ་དུ་མ་རུ། །སྡིག་པ་གང་ཞིག་སྔོན་བྱས་པ། །དཀྱིལ་འཁོར་འདི་འདྲ་མཐོང་བ་ཡིས། །དེ་དག་ཐམས་ཅད་ཟད་འགྱུར་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་རྣམས་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །ཞེས་མཚན་མའི་དཀྱིལ་འཁོར་མཐོང་བ་ཙམ་གྱིས་བསྐལ་པ་མང་པོའི་ལས་སྒྲུབ་འདག་པར་འགྱུར་ན། ལམ་བདེ་ཞིང་མྱུར་པའི་ཐེག་པ་འདིར་ཞུགས་ནས་ཉམས་སུ་བླང་དུ་ཡོད་པ་ནི་རྙེད་པའི་མཆོག་རབ་ཏུ་རྙེད་པར་གྱུར་ཏོ་སྙམ་དུ་སྤྲོ་བ་ཁྱད་པར་ཅན་བསྐྱེད་པར་མཛོད། དེ་ནས་ཀྲི་ཡའི་དམ་ཚིག་བཅུ་གསུམ་བསྒྲག་པ་ཡིན་པས་གསན་འཚལ། །དེ་རིང་ཕྱིན་ཆད་ཁྱེད་རྣམས་ཀྱིས། །སངས་རྒྱས་ཆོས་དང་དགེ་འདུན་དང་། །རིག་སྔགས་གསང་སྔགས་ཚོགས་རྣམས་ལ། །དད་པ་རབ་ཏུ་བརྟན་པར་བྱ། །རྟག་ཏུ་ཕྱག་རྒྱ་ཆེན་པོ་ལ། །ཁྱད་པར་དུ་ནི་མོས་པར་བྱ། །དམ་ཚིག་ཅན་དང་མཛའ་བོ་དང་། །བླ་མ་ལ་ཡང་གུས་པར་བྱ། །ལྷ་རྣམས་ཀུན་ལ་དད་མོས་བྱ། །དུས་འཚམས་དག་ཏུ་མཆོད་པ་བྱ། །སྟོན་པ་གཞན་གྱི་གཞུང་མི་མཆོད། །རྟག་པར་གློ་བུར་མགྲོན་མཆོད་བྱ། །སྲོག་ཆགས་རྣམས་ལ་བྱམས་པའི་སེམས། །རབ་ཏུ་བརྟན་པ་ཉེ་བར་གཞག །ཐེག་པ་ལ་ནི་དགའ་རྣམས་ཀྱིས། །བསོད་ནམས་དག་ལ་ནན་ཏན་བསྐྱེད། །བཟླས་བརྗོད་ལ་ནི་འབད་པ་ཡིས། །གསང་སྔགས་སྤྱོད་ལ་བརྩོན་པར་བྱ། །གསང་སྔགས་རྒྱུད་ལས་བསྟན་པ་ནི། །དམ་ཚིག་རྣམས་ཀྱང་བསྲུང་བར་བྱ། །དམ་ཚིག་མེད་པ་རྣམས་ལ་ནི། །སྔགས་དང་ཕྱག་རྒྱ་མི་སྦྱིན་ནོ། །གསང་སྔགས་རྒྱུད་ནི་ལེགས་བསྲུང་ཞིང་། །དེ་ཡང་བདག་གིས་རྟོགས་པར་བགྱི། །ཞེས་བསྒོ། དེ་ལྟར་དམ་ཚིག་དང་སྡོམ་པ་དེ་དག་ནན་གྱིས་བསྲུང་བར་གདམས་པའི་ཕྱིར་མནའ་ཆུ་བླུད་པ་ནི། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་བསྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ཅེས་ལས་བུམ་གྱི་ཆུ་ཁར་སྦྱིན་ནོ། །དེ་ནས་དངོས་སུ་ཡོལ་བ་ཡོད་ན་བསལ་ཞིང་། སློབ་དཔོན་གྱི་ལག་གི་རྡོ་རྗེ་ལ་འཇུས་ཏེ། ཨཱ་ཁཾ་ཝཱི་ར་ཧཱུཾ་ཞེས་འཁྲིད་པ། ཛཿཧཱུཾ་བཾ་ཧོཿ ཞེས་སྒོ་བཞི་ནས་ཞུགས། །གཙོ་བོའི་མདུན་ངོས་ཀྱི་ཁྱམས་ལ་འཁོད་པས་བྱང་ཆུབ་ཀྱི་སེམས་ཡིད་ལ་བྱེད་བཞིན་དུ་འདིའི་རྗེས་ཟློས་དང་བཅས་ཏེ་མེ་ཏོག་དོར་མཛོད། ༀ་པྲ་ཏཱིཙྪ་བཛྲ་ཧོཿ ཞེས་ཕུལ་བ་གང་ལ་བབས་པའི་རིགས་ངོས་བཟུང་ནས་མིང་གདགས་ཤིང་། སྤྱི་ཙམ་དུ། དེ་ལྟར་གཙོ་བོས་མེ་ཏོག་བཞེས་ནས་སླར་ཡང་ཁྱོད་རང་གི་སྤྱི་བོར་བཅིངས་པའི་མོས་པ་མཛོད། ༀ་པྲ་ཏི་གྲྀཧྞ་ཏྭཾ་ཨི་མཾ་སཏྭ་མ་ཧཱ་བ་ལ། ཞེས་སྤྱི་བོར་བཀོད་ལ། དེ་བཞིན་གཤེགས་ཀུན་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛོད། །ཕྱེ་བས་ཐམས་ཅད་མཐོང་འགྱུར་བ། །རྡོ་རྗེའི་མིག་ནི་བླ་ན་མེད། །ༀ་བཛྲ་ནེ་ཏྲ་ཨ་པ་ཧ་ར་པ་ཏྲ་ལཾ་ཧྲི་ཏྲཾ། ཞེས་མིག་དར་བསལ། དེ་ལྟར་རྡོ་རྗེའི་མིག་ཐོབ་པ་དེ་ལ་མཐོང་བ་བསྟན་པ་ནི། ཧེ་བཛྲ་པཱ་ཤྱ། དེ་ཡང་འདི་ན་རིགས་གསུམ་གྱི་དཀྱིལ་འཁོར་མངོན་སུམ་དུ་བཞུགས་པ་ཡིན་ཏེ། ཡང་དག་པའི་སྨོན་ལམ་གྱི་སྟོབས་ལས་བྱུང་བའི་ཞིང་ཁམས་རྣམ་པར་དག་པའི་དབུས་སུ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པའི་ཆོས་ཀྱི་དབྱིངས་ཀྱི་ཕོ་བྲང་རིན་པོ་ཆེ་སྣ་བདུན་ལས་གྲུབ་པ་ཡོན་ཏན་མཐའ་ཡས་པའི་རྒྱན་གྱིས་སྤྲས་པའི་གཞལ་ཡས་ཁང་གི་ལྟེ་བར་གདན་གསུམ་སྒྲིགས་ཀྱི་དབུས་མར་འཇམ་དཔལ་དབྱངས། དེའི་གཡས་ལོགས་སུ་སྤྱན་རས་གཟིགས་དང་། གཡོན་དུ་ཕྱག་ན་རྡོ་རྗེ། མཐའ་བསྐོར་གྱི་པདྨ་འདབ་མ་དྲུག་ལ་རིམ་པར་སྦྱོང་སྤེལ་སྒྱུར་ཐོབ་ཚིམ་པ་དབང་དུ་བྱེད་པའི་ལྷ་དྲུག །ལྷ་སྣམ་ལ་སྒེག་སོགས་ལྷ་མོ་བརྒྱད་དང་། །སྒོ་བཞིར་སྒོ་མ་བཞི་སོགས་དཀྱིལ་འཁོར་དུ་འདུ་བར་འོས་པའི་ལྷ་ཐམས་ཅད་བཞུགས་པ་མངོན་སུམ་བཞིན་དུ་མཐོང་བར་གྱུར་སྙམ་པའི་མོས་པ་མཛོད། དེས་འཇུག་པའི་ཆོས་གྲུབ་ནས། དངོས་གཞིའི་སླད་དུ་སློབ་དཔོན་འདི་ནི་བདག་གི་སྟོན་པའོ་སྙམ་དུ་མོས་པས་ཐལ་མོ་སྦྱར་ཏེ་གསོལ་བ་གདབ་པ་འདིའི་རྗེས་ཟློས། དཔལ་ལྡན་སངས་རྒྱས་ཀུན་བདག་ཉིད། །བརྩེ་བས་དགོངས་ཏེ་བདག་ལ་ཡང་། །དབང་བསྐུར་བདུད་རྩི་ཆེན་པོ་ཉིད། །དེ་རིང་རབ་ཏུ་སྩལ་དུ་གསོལ། །ཞེས་ལན་གསུམ། དེ་ནས་ཁྱེད་རང་རྣམས་དཀྱིལ་འཁོར་གྱི་གཙོ་བོའི་མདུན་ཕྱོགས་སུ་དབང་སྟེགས་ཀྱི་སྟེང་དུ་འཁོད་པ་ལ། ཇི་ལྟར་འཁོར་ལོས་སྒྱུར་བའི་རྒྱལ་པོར་བུམ་པའི་རྒྱ་རྟགས་ཀྱི་དབང་བསྐུར་བ་ལྟར་ཆོས་ཐམས་ཅད་ལ་དབང་ཐོབ་པར་བྱ་བའི་ཕྱིར། །སངས་རྒྱས་ཐམས་ཅད་ཀྱིས་མགྲིན་གཅིག་ཏུ་རིན་པོ་ཆེའི་བུམ་པ་དང་བདུད་རྩིའི་གང་བའི་ཆུ་རྒྱུན་གྱིས་དབང་བསྐུར་བའི་མོས་པ་མཛོད། །རྣམ་བུམ་བཏེག་སྟེ། ཉིན་མོ་བདེ་ལེགས་མཚན་བདེ་ལེགས། །ཞེས་པ་ལྟ་བུའི་དཀོན་མཆོག་གསུམ་གྱི་བཀྲ་ཤིས་སྔོན་དུ་འགྲོ་བས་བུམ་པ་སྤྱི་བོར་འཇོག་ཅིང་། བཛྲ་རཏྣ་ན་རེ། ཧཱུཾ། དོན་དམ་བདེན་པའི་ཆོས་ཉིད་ལས། །མི་གཡོ་སེམས་དཔའ་མངོན་སུམ་དུ། །རིགས་བཞི་རྡོ་རྗེ་འཆང་གནས་པའི། །རིགས་གསུམ་ཀྲི་ཡའི་དབང་ཐོབ་ཤོག །ༀ་ཝཱ་གི་ཤྭ་རི་མུཾ། ༀ་མ་ཎི་པདྨེ་ཧཱུཾ། ༀ་བཛྲ་པཱ་ཎི་ཧཱུཾ། ཨ་བྷི་ཥིཉྩ་ཧཱུཾ། ཞེས་བུམ་ཆུས་བཀྲུ་ཞིང་འཐུང་དུའང་གཞུག །དཀོན་མཆོག་གསུམ་དང་རིགས་གསུམ་མགོན་པོའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བདེན་པའི་བྱིན་རླབས་ཀྱིས་རིགས་ཀྱི་བུ་ལ་བུམ་པ་ཆུའི་དབང་བསྐུར་བས་རིགས་གསུམ་རྡོ་རྗེ་འཛིན་པའི་དབང་དམ་པ་ཐོབ་པར་གྱུར་ཅིག །ཐལ་མོ་བཀན་པ་ལས་མཛུབ་རྩེ་གཉིས་ཅུང་ཟད་བཀུག་པའི་རྒྱ་སློབ་མའི་སྤྱི་བོར་བཞག་ལ། ༀ་ཏ་ཐཱ་ག་ཏོདྦྷ་བ་སྭཱ་ཧཱ་ཨ་བྷི་ཥིཉྩ་ཧཱུཾ། རིགས་ཀྱི་བུ་ལ་ཅོད་པན་གྱི་དབང་བསྐུར་བས་ཆོས་ཀྱི་རྒྱལ་པོ་ཆེན་པོ་གྱུར་ཅིག །དེ་ནས་ལྷ་དབང་བསྐུར་བ་ནི། དཀྱིལ་འཁོར་ལ་བཀོད་པའི་ལྷ་རྣམས་ལས་རང་འདྲ་བའི་ལྷ་རེ་རེ་ཆད་ནས་སོ་སོ་རང་རང་གི་སྤྱི་བོ་ནས་ཐིམ་པའི་བྱིན་རླབས་ཀྱིས་རིགས་དེ་དང་དེའི་ལས་དང་དངོས་གྲུབ་ཀྱི་སྐལ་བ་ཐམས་ཅད་རྒྱུད་ལ་ཐོབ་པའི་མོས་པ་མཛོད། ལྷ་ཙཀ་རྣམས་རིམ་པར་ཐོགས་ཏེ། དྷཱིཿ གཞོན་ནུ་སྐུ་ལུས་འཆང་བ་པོ། །ཡེ་ཤེས་སྒྲོན་མེ་རབ་རྒྱས་ཤིང་། །འཇིག་རྟེན་གསུམ་གྱི་མུན་སེལ་བ། །འཇམ་དཔལ་དབྱངས་ཀྱི་དབང་བསྐུར་རོ། །ༀ་ཝཱ་གི་ཤྭ་རི་མུཾ། ཨ་བྷི་ཥིཉྩ་ཧཱུཾ། ཧྲཱིཿ སངས་རྒྱས་ཀུན་གྱིས་རབ་ཏུ་བསྔགས། །ཡོན་ཏན་དམ་པ་ཀུན་བསགས་པ། །སྤྱན་རས་གཟིགས་ཞེས་མཚན་གསོལ་བ། །རྟག་པར་བརྩེ་བའི་དབང་མཆོག་བྱིན། །ༀ་མ་ཎི་པདྨེ་ཧཱུཾ། ཨ་བྷི་ཥིཉྩ་ཧཱུཾ། ཧཱུཾ། སྟོབས་པོ་ཆེ་ལ་དྲག་ཤུལ་ལྡན། །རིགས་སྔགས་རྒྱལ་པོ་དགེ་བ་ཅན། །གདུལ་དཀའ་མཐའ་དག་འདུལ་བ་པོ། །ཕྱག་ན་རྡོ་རྗེའི་དབང་བསྐུར་རོ། །ༀ་བཛྲ་པཱ་ཎི་ཧཱུཾ། ཨ་བྷི་ཥིཉྩ་ཧཱུཾ། སྦྱངས་སྤེལ་བསྒྱུར་བས་མཆོད་སྦྱིན་གནས། །ཐོབ་ཚིམ་དབང་བྱེད་སྔགས་ཀྱི་ལྷ། །སྣང་མཛད་བདུད་རྩི་རིན་འབྱུང་ཐུབ། །དོན་གྲུབ་ཕྱག་རྡོར་དབང་བསྐུར་རོ། །ཨ་ཁཾ་ཛ་ཏྲཾ་ཧ་ཛ་ཨ་བྷི་ཥིཉྩ་ཧཱུཾ། གཟུགས་མཛེས་ཕྲེང་བ་དབྱངས་སྙན་གར། །ཉེར་སྤྱོད་བཞི་དང་ཕྱག་རྒྱ་བཞིས། །རྒྱལ་བ་ཐམས་ཅད་མཉེས་མཛད་མ། །ལྷ་མོ་བཅུ་གཉིས་དབང་བསྐུར་རོ། །ཧཱུཾ་ཏྲཱཾ་ཧྲཱིཿཨཱཿ དྷཱུ་པུ་ཨ་གན། ཛཿཧཱུཾ་བཾ་ཧོཿ ཨ་བྷི་ཥིཉྩ་ཧཱུཾ། དེ་དག་གིས་རྩ་བའི་ལྷའི་དབང་སོང་ནས། ད་མགྲོན་ཐབས་ཀྱི་ལྷ་རྣམས་ཀྱི་དབང་ནི། ༀ། རིགས་བདག་སྐུ་མཆོག་རྣམ་སྣང་མཛད། །ཉེས་པའི་སྐྱོན་བྲལ་སྐུ་མདོག་དཀར། །བྱང་ཆུབ་མཆོག་གི་ཕྱག་རྒྱ་ཅན། །དེ་ཡི་དབང་མཆོག་ཐོབ་པར་ཤོག །འཇམ་དཔལ་དབྱངས་ནི་སྐུ་ཡི་རིགས། །སྐུ་མདོག་སེར་ལ་འོད་ཟེར་འབར། །ཕྱག་ན་རལ་གྲི་ཨུཏྤལ་བསྣམས། །རིགས་ཀྱི་ཡུམ་མཆོག་སངས་རྒྱས་སྤྱན། །དཀར་མོ་ཕྱག་ན་སྤྱན་འབྲས་བསྣམས། །ཁྲོ་བོའི་རྒྱལ་པོ་གཤིན་རྗེ་གཤེད། །རིགས་ཀྱི་ཕོ་ཉ་རྡོ་རྗེ་རྣོ། །ལྷ་མོ་དཔལ་དང་མཛོད་སྤྲུལ་མ། །ལྷ་ཆེན་ཚངས་པ་ལ་སོགས་པ། །སྐུ་ཡི་རིགས་ཀྱི་དབང་ཐོབ་ཤོག །ༀ་བཻ་རོ་ཙ་ན་ༀ། ཨ་བྷི་ཥིཉྩ་ཧཱུཾ། ཨཱཿ རིགས་བདག་གསུང་མཆོག་སྣང་མཐའ་ཡས། །ཐུགས་རྗེ་ཆགས་པས་སྐུ་མདོག་དམར། །ཏིང་འཛིན་མཆོག་གི་ཕྱག་རྒྱ་ཅན། །དེ་ཡི་དབང་མཆོག་ཐོབ་པར་ཤོག །སྤྱན་རས་གཟིགས་དབང་གསུང་གི་རིགས། །དམར་པོ་ཕྱག་ན་པདྨ་བསྣམས། །ཡུམ་ཆེན་གོས་དཀར་སྐུ་མདོག་དམར། །ཕྱག་ན་འདམ་སྐྱེས་དཀར་པོ་བསྣམས། །ཁྲོ་རྒྱལ་རྟ་མགྲིན་རྟ་སྐད་སྒྲོག །རིགས་ཀྱི་ཕོ་ཉ་རྡོ་རྗེ་ཕུར། །གྲགས་ལྡན་མ་དང་ལུ་གུ་རྒྱུད། །མ་ཧཱ་དེ་བ་ལ་སོགས་པ། །གསུང་གི་རིགས་ཀྱི་དབང་ཐོབ་ཤོག །ༀ་ཨཱ་མི་ཏཱ་བྷ་ཨཱཿ ཨ་བྷི་ཥིཉྩ་ཧཱུཾ། ཧཱུཾ། རིགས་བདག་ཐུགས་མཆོག་རྡོ་རྗེ་སེམས། །ཆོས་ཉིད་མི་འགྱུར་སྐུ་མདོག་སྔོ། །ས་གནོན་མཆོག་གི་ཕྱག་རྒྱ་ཅན། །དེ་ཡི་དབང་མཆོག་ཐོབ་པར་ཤོག །ཕྱག་ན་རྡོ་རྗེ་ཐུགས་ཀྱི་རིགས། །སྔོན་པོ་ཕྱག་ན་རྡོ་རྗེ་བསྣམས། །ཡུམ་ཆེན་བཟང་མོ་སྐུ་མདོག་སྔོ། །ཕྱག་ན་རྡོ་རྗེ་རྩེ་གསུམ་ཅན། །ཁྲོ་བོའི་རྒྱལ་པོ་བདུད་རྩི་འཁྱིལ། །ཕོ་ཉ་རྡོ་རྗེ་ཁྲོ་བོ་སྟེ། །སྟོབས་ཆེན་མ་དང་རྣམ་རྒྱལ་མ། །ལྷ་ཆེན་ཁྱབ་འཇུག་ལ་སོགས་པ། །ཐུགས་ཀྱི་རིགས་ཀྱི་དབང་ཐོབ་ཤོག །ༀ་ཨཀྵོ་བྷྱ་ཧཱུཾ། ཨ་བྷི་ཥིཉྩ་ཧཱུཾ། དཔལ་བར་འགྲོ་བ་རལ་གྲི་སྟེ། །ཀུན་ཏུ་བཟང་པོ་རིན་ཆེན་བསྣམས། །ཟླ་འོད་ཟླ་བའི་དཀྱིལ་འཁོར་འཛིན། །བཟང་སྐྱོང་བུམ་པ་ཅན་དང་བཞི། །ཤར་གྱི་ཕྱོགས་བཞུགས་སྐུ་མདོག་དཀར། །ལྷོ་ཕྱོགས་སེམས་དཔའ་བཞི་པོ་སྔོ། །དྲྭ་བ་ཅན་ནི་འོད་ཟེར་འགྱེད། །ནམ་མཁའ་མཛོད་ནི་རིན་ཆེན་སྒྲོམ། །ནམ་སྙིང་རྡོ་རྗེ་རྩེ་གསུམ་སྟེ། །འོད་དཔག་མེད་ནི་རིན་ཆེན་འབར། །ནུབ་ཕྱོགས་སེམས་དཔའ་བྱི་རུའི་མདོག །མྱ་ངན་མེད་འཇོམས་རལ་གྲི་འཕྱར། །ཡེ་ཤེས་ཏོག་ནི་རིན་ཆེན་ཏོག །སྤོབས་པ་བརྩེགས་ནི་རིན་ཆེན་འབར། །བློ་གྲོོས་མི་ཟད་གླེགས་བམ་ཅན། །བྱང་གི་སེམས་དཔའ་ལྗང་ཁུ་སྟེ། །བྱམས་པ་ཀླུ་ཤིང་སྤྱི་བླུགས་ཅན། །སྤོས་ཀྱི་གླང་པོ་དུང་དཀར་འབུད། །ངན་སོང་ཀུན་འདྲེན་ལྕགས་ཀྱུ་འདེབས། །དོན་ཀུན་གྲུབ་བྱེད་རྒྱ་གྲམ་འཛིན། །བསྐལ་བཟང་སེམས་དཔའ་བཅུ་དྲུག་གི། །དབང་མཆོག་དམ་པ་ཐོབ་པར་ཤོག །ༀ་བོ་དྷི་སཏྭ་ཨ་བྷི་ཥིཉྩ་ཧཱུཾ། ཤར་དུ་དུས་ལྡན་པདྨ་ཅན། །དཀར་མོ་དཔལ་བེའུ་འཁོར་ལོ་བསྣམས། །ལྷོ་རུ་འཇིགས་བྲལ་འོད་ལྡན་མ། །སྔོན་པོ་པདྨ་རྒྱལ་མཚན་འཛིན། །ནུབ་ཏུ་མདངས་ཅན་དྲི་མེད་མ། །དམར་མོ་གདུགས་དང་བུམ་པ་འཛིན། །བྱང་དུ་རྒྱལ་བཟུང་ཡིད་བཟང་མ། །ལྗང་ཁུ་དུང་དང་གསེར་ཉ་འཛིན། །ཕྱོགས་བཞི་དུས་བཞིར་བཀྲ་ཤིས་པའི། །ལྷ་མོ་བརྒྱད་ཀྱི་དབང་ཐོབ་ཤོག །ཏྲཾ་མཾ་ག་ལ་དེ་ཝཱི་ཨ་བྷི་ཥིཉྩ་ཧཱུཾ། ཞེས་བསྐུར་རོ། །དེ་ནས་མཚན་མ་རྟགས་ཀྱི་དབང་དུ་གྲགས་པ་ཕྱག་རྡོར་དབང་བསྐུར་གྱི་རྒྱུད་ལས་བཀོལ་བ་ཀྲི་ཡའི་རྫས་དབང་ཉི་ཤུ་རྩ་དྲུག་བསྐུར་བས་སྔོན་སྟོན་པས་ཕྱག་ན་རྡོ་རྗེ་སོགས་ལ་ཇི་ལྟར་དབང་བསྐུར་བ་དང་རྗེས་སུ་མཐུན་པའི་ཡོན་ཏན་ཁྱད་པར་ཅན་རྒྱུད་ལ་ཐོབ་པར་གྱུར་སྙམ་པའི་མོས་པ་མཛོད། དེ་ལ་རྫས་དབང་ཉེར་དྲུག་ལས། དང་པོ་རི་རབ་ཐོགས་ཏེ། སྔོན་བཅོམ་ལྡན་འདས་རི་རབ་ཀྱི་ཟོམ་ལ་ཆོས་ཀྱི་འཁོར་ལོ་བསྐོར་བའི་དུས་སུ་དཔལ་ཕྱག་ན་རྡོ་རྗེ་ལ་རིན་པོ་ཆེ་སྣ་ལྔའི་རི་རབ་ཀྱི་དབང་བསྐུར་བས་མཐུ་སྟོབས་ཕུན་སུམ་ཚོགས་པ་དང་ལྡན་ཏེ་མི་འགྱུར་བའི་སྐུ་ཐོབ་པར་གྱུར་ཏོ། །དེ་བཞིན་དུ་རིན་པོ་ཆེ་སྣ་ལྔའི་རི་རབ་ཀྱི་དབང་བསྐུར་བས་མཐུ་སྟོབས་ཕུན་སུམ་ཚོགས་པ་དང་ལྡན་ཏེ་མི་འགྱུར་བའི་སྐུ་ཐོབ་པར་གྱུར་ཅིག །གཟི་བརྗིད་ལྷུན་སྡུག་རི་རབ་མཆོག་གི་སྐུ། །ཆེ་བའི་ཡོན་ཏན་རྒྱས་པའི་བང་རིམ་མཆོག །ཐམས་ཅད་གནས་པའི་རི་བོ་ཆེན་པོ་ལ། །མཐུ་སྟོབས་མི་འགྱུར་སྐུ་རྣམས་རྫོགས་པར་ཤོག །སྐྱེ་ཤི་འགྲོ་དྲུག་ཁམས་གསུམ་ཡོངས་ཀྱི་སྲོག །ཁ་དོག་མཛེས་ལྡན་རིན་ཆེན་སྣ་ཚོགས་གཞི། །ཕྱོགས་བཞི་དབུས་དང་རིགས་ཀྱི་སྐུར་བསྟན་པ། །འདི་ནི་རིན་ཆེན་སྣ་ལྔའི་རི་རབ་ཀྱི། །དབང་གི་བཀྲ་ཤིས་ལེའུ་དང་པོའོ། །གཉིས་པ་མཆོད་རྟེན། སྔོན་བཅོམ་ལྡན་འདས་མཛད་པ་བཅུ་གཉིས་མཐར་ཕྱིན་པའི་དུས་སུ་ཨུ་དུམྦ་རའི་མེ་ཏོག་དང་སྦྱར་ནས་དཔལ་ཕྱག་ན་རྡོ་རྗེ་ལ་རང་བཞིན་གྱི་མཆོད་རྟེན་དང་སྤྲུལ་པའི་མཆོད་རྟེན་ལ་སོགས་པས་དབང་བསྐུར་བས་རྣམ་པར་མི་རྟོག་པ་ཆོས་ཀྱི་སྐུ་ཐོབ་པར་གྱུར་ཏོ། །དེ་བཞིན་དུ་མཆོད་རྟེན་ཆེན་པོའི་དབང་བསྐུར་བས་ཆོས་ཀྱི་སྐུ་ཐོབ་པའི་དབང་དང་ལྡན་པར་གྱུར་ཅིག །དྲན་པ་ཉེ་བར་བཞག་པའི་བང་རིམ་ལ། །སྐྱེ་འགག་མེད་པའི་བུམ་པ་ཟླུམ་པོས་བརྒྱན། །ཆོས་ཀྱི་འཁོར་ལོ་མ་འདྲེས་ཏོག་ལ་སོགས། །རྣམ་པར་མི་རྟོག་ཆོས་སྐུ་ཐོབ་པར་ཤོག །ལྟ་བའི་ས་དང་མངོན་པར་བྱང་ཆུབ་མཚུངས་པ་མི་མངའ་ཡང་། །ཆོས་ཀྱི་འཁོར་ལོ་བསྐོར་དང་ཆོ་འཕྲུལ་ཆེན་པོ་སྟོན་ལ་སོགས། །ལྷ་ཡུལ་ནས་གཤེགས་པ་དང་སྟོན་པ་ཞི་བའི་དབྱིངས་སུ་བཞུགས། །སྟོབས་བཅུའི་བྱིན་མངའ་མཆོད་རྟེན་དབང་གི་བཀྲ་ཤིས་གཉིས་པའོ། །གསུམ་པ་དཔག་བསམ་གྱི་ཤིང་། སྔོན་བཅོམ་ལྡན་འདས་གྱད་ཡུལ་གྱི་ཉེ་འཁོར་ན་བཞུགས་པའི་དུས་སུ་དཔལ་ཕྱག་ན་རྡོ་རྗེ་ལ་དཔག་བསམ་ཤིང་གི་དབང་བསྐུར་བས་དགོངས་པའི་དོན་ཐམས་ཅད་ཡིད་བཞིན་དུ་གྲུབ་པར་གྱུར་ཏོ། །དེ་བཞིན་དུ་དཔག་བསམ་ཤིང་གི་དབང་བསྐུར་བས་དགོས་འདོད་ཐམས་ཅད་ཡིད་བཞིན་དུ་གྲུབ་པར་གྱུར་ཅིག །གང་ལ་ཅི་འདོད་དཔག་བསམ་ཤིང་ལྟ་བུ། །ཡོན་ཏན་ཡིད་བཞིན་ཟད་མེད་གཏེར་དང་ལྡན། །བརྟན་པའི་རྒྱུ་དང་འབྲས་བུའི་ཚུལ་ཡིན་ཏེ། །དགོངས་པའི་དོན་རྣམས་ཡིད་བཞིན་འགྲུབ་པར་ཤོག །ལྷ་ཡི་རེ་སྐོངས་དཔག་བསམ་ལྗོན་ཤིང་ལྟར། །འཕགས་པའི་ཡོན་ཏན་བརྗོད་ཀྱིས་མི་ལང་སྟེ། །རེ་བ་ཡིད་བཞིན་ཕུན་སུམ་ཚོགས་པའི་རྫས། །འདོད་དགུའི་འབྱུང་གནས་རིན་ཆེན་དཔག་བསམ་ཤིང་། །དབང་གི་བཀྲ་ཤིས་ལེའུ་གསུམ་པའོ། །བཞི་པ་རྒྱ་མཚོ། སྔོན་བཅོམ་ལྡན་འདས་རྒྱ་མཚོ་ཆེན་པོའི་གླིང་དུ་གཤེགས་པའི་དུས་སུ་དཔལ་ཕྱག་ན་རྡོ་རྗེ་ལ་རྒྱ་མཚོ་ཆེན་པོས་དབང་བསྐུར་བས། སྐྱེ་བ་མེད་པའི་ཆོས་ཟབ་ཅིང་རྒྱ་ཆེ་བ་རྒྱུད་ལ་རྟོགས་པར་གྱུར་ཏོ། །དེ་བཞིན་དུ་རྒྱ་མཚོ་ཆེན་པོའི་དབང་བསྐུར་བས་སྐྱེ་བ་མེད་པའི་ཆོས་ཟབ་ཅིང་རྒྱ་ཆེ་བའི་དོན་རྟོགས་པའི་དབང་དམ་པ་ཐོབ་པར་གྱུར་ཅིག །གཏིང་དཔག་ཟབ་ཅིང་རྒྱ་ཆེ་ཡངས་པ་ཡི། །ཀུན་ཏུ་སྙོམས་པའི་ཡོན་ཏན་ཆེན་པོ་སྟེ། །སྐྱེ་འགག་མེད་པའི་རྒྱ་མཚོ་ཆེན་པོ་ལ། །ཟབ་ཅིང་རྒྱ་ཆེའི་ཆོས་དོན་རྟོགས་པར་ཤོག །ཆོས་ཉིད་རྒྱ་མཚོ་ལྟ་བུར་ཐུགས་ཆུད་པས། །ཟབ་ཅིང་གཏིང་དཔག་དཀའ་བའི་རྒྱ་མཚོ་ལ། །ཡིད་བཞིན་ནོར་བུ་ཁ་དོག་མཛེས་པའི་ཚུལ། །རྒྱ་མཚོ་དབང་གི་བཀྲ་ཤིས་བཞི་པའོ། །ལྔ་པ་ས་གཞི། སྔོན་བཅོམ་ལྡན་འདས་རྡོ་རྗེ་གདན་དྲུང་ན་བཞུགས་པའི་ཚེ་དཔལ་ཕྱག་ན་རྡོ་རྗེ་ལ་ས་གཞི་ཆེན་པོ་གནས་ཀྱི་དབང་བསྐུར་བས་བཀྲ་ཤིས་ལ་བྱིན་ཆགས་པའི་དབང་དམ་པ་ཐོབ་པར་གྱུར་ཏོ། །དེ་བཞིན་དུ་ས་གཞི་གནས་ཀྱི་དབང་བསྐུར་བས་གནས་བཀྲ་ཤིས་ཤིང་བྱིན་ཆགས་པའི་དབང་དམ་པ་ཐོབ་པར་གྱུར་ཅིག །རབ་ཏུ་དབེན་པའི་གནས་མཆོག་དམ་པ་སྟེ། །མེ་ཏོག་དྲི་བསུང་མང་པོ་སྐྱེ་བ་དང་། །ཡོན་ཏན་མ་ལུས་ཚང་བར་ཀུན་རྫོགས་ཏེ། །དབེན་པའི་བཀྲ་ཤིས་འབྱོར་བའི་གནས་སུ་ཤོག །མེ་ཏོག་མཛེས་ལྡན་ཡིད་འོང་བརྒྱན་པའི་གནས། །བཀྲ་ཤིས་སྒྲ་སྙན་བྱ་སྐད་སྣ་ཚོགས་སྒྲོག །ཡོན་ཏན་ཀུན་ལྡན་སྟོན་པས་བྱིན་བརླབས་པའི། །གནས་གཞི་དབང་གི་བཀྲ་ཤིས་ལྔ་པའོ། །དྲུག་པ་བུམ་པ། སྔོན་བཅོམ་ལྡན་འདས་ཝཱ་རཱ་ཎ་སཱི་ན་བཞུགས་པའི་ཚེ་དཔལ་ཕྱག་ན་རྡོ་རྗེ་ལ་བདུད་རྩིའི་ཆུས་དབང་བསྐུར་བས་སྐྱེ་ཤི་མི་མངའ་བའི་དབང་ཐོབ་པར་གྱུར་ཏོ། །དེ་བཞིན་དུ་བདུད་རྩི་བུམ་པའི་ཆུས་དབང་བསྐུར་བས་སྐྱེ་ཤི་མེད་པ་རྡོ་རྗེ་སྐུའི་དབང་དམ་པ་ཐོབ་པར་གྱུར་ཅིག །བདུད་རྩིའི་ཆུ་རྒྱུན་འགྲོ་བའི་གསོས་ཀྱི་མཆོག །ཉོན་མོངས་སྡུག་བསྔལ་ནད་རྣམས་མ་ལུས་སེལ། །མ་རིག་དག་བྱེད་བདུད་རྩིའི་ཆུ་མཆོག་སྟེ། །སྐྱེ་ཤི་མེད་པ་དག་པའི་སྐུ་ཐོབ་ཤོག །བུམ་པའི་ཁ་རྒྱན་དཔག་བསམ་ཤིང་། །དབང་བསྐུར་བུམ་ཆུ་སྤྱི་བླུགས་པས། །བདུད་རྩི་དམ་པ་འདིར་སྩོལ་ཅིག །འདི་ནི་བདུད་རྩིའི་ཆུ་རྒྱུན་གྱི། །དབང་གི་བཀྲ་ཤིས་དྲུག་པའོ། །ཞེས་བུམ་ཆུ་སྤྱི་བོར་གཏིགས་ཤིང་འཐུང་དུའང་གཞུག །བདུན་པ་དར་གྱི་ཟར་ཚགས། སྔོན་བཅོམ་ལྡན་འདས་རི་རབ་ཀྱི་ཟོམ་ལ་བཞུགས་པའི་ཚེ་ལྷའི་དབང་པོ་བརྒྱ་བྱིན་གྱིས་ཆོས་ཞུ་བའི་ཕྱིར་དར་བུ་ཁད་ཀྱི་ཟ་ར་ཚགས་ཕུལ་བས་ཆོས་སྒྲ་ཆེན་པོ་སྒྲོག་པའི་བྱིན་དང་ལྡན་པར་གྱུར་ཏོ། །དེ་བཞིན་དུ་དར་གྱི་ཟར་ཚགས་ཀྱི་དབང་བསྐུར་བས་ཆོས་ཀྱི་སྒྲ་ཆེན་པོ་སྒྲོག་པའི་དབང་དམ་པ་ཐོབ་པར་གྱུར་ཅིག །ཆོས་ཀྱི་རྒྱལ་སྲིད་ཆེ་ལ་མངའ་བརྙེས་ཤིང་། །མ་རིག་མུན་པ་མ་ལུས་བསལ་བ་དང་། །བརྒྱ་བྱིན་ཤེས་པ་མ་ལུས་འགྲོལ་བའི་ཕྱིར། །ཆོས་རྣམས་ཐམས་ཅད་གོ་ཞིང་སྒྲོག་པར་ཤོག །འཇམ་མཉེན་རེག་བདེ་དར་གྱི་ཟ་ར་ཚགས། །རིགས་ཀྱི་ཁ་དོག་སྣ་བདུན་ཤིན་ཏུ་མཛེས། །ཡིད་འོང་ལེགས་པར་བརྒྱན་པའི་བཀྲ་ཤིས་རྫས། །ལྷབ་ལྷུབ་དབང་གི་བཀྲ་ཤིས་བདུན་པའོ། །བརྒྱད་པ་ཁྲི། སྔོན་བཅོམ་ལྡན་འདས་སུམ་ཅུ་རྩ་གསུམ་གྱི་གནས་སུ་བརྒྱ་བྱིན་ལ་ཆོས་འཁོར་བསྐོར་བའི་ཚེ་རིན་པོ་ཆེའི་ཁྲི་རྐང་ཕུལ་བ་ལ་བཞུགས་པས་ཆོས་ཤེས་པའི་རྒྱུད་ལ་གོ་ཞིང་བསྒྲགས་པར་གྱུར་ཏོ། །དེ་བཞིན་དུ་རིན་པོ་ཆེའི་ཁྲི་རྐང་གི་དབང་བསྐུར་བས་མ་ནོར་བར་གོ་ཞིང་སྒྲོག་པའི་དབང་དམ་པ་ཐོབ་པར་གྱུར་ཅིག །རིན་ཆེན་གསེར་གྱི་ཁྲི་སྟེང་དུ། །ཆོས་སྒྲ་ཆེན་པོ་བསྒྲགས་པ་ཡིས། །འགྲོ་བ་རྣམས་ཀྱི་མི་ཤེས་དགྲོལ། །ཆོས་རྣམས་གོ་ཞིང་སྒྲོགས་པར་ཤོག །ཚད་མེད་བཞི་ལྡན་འདེགས་བྱེད་གསེར་གྱི་ཁྲི། །ཡོན་ཏན་ཚོགས་རྫོགས་རཏྣ་སྣ་ཚོགས་སྤྲས། །འགྲོ་བའི་ཡིད་བཞིན་ཟད་མེད་དགོས་འདོད་སྐོང་། །ཁྲི་མཆོག་དབང་གི་བཀྲ་ཤིས་བརྒྱད་པའོ། །དགུ་པ་མེ་ཏོག །སྔོན་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་བའི་ཚེ་བརྒྱ་བྱིན་གྱིས་མེ་ཏོག་གི་ཆུན་པོ་བྲེས་པས་སེམས་ཅན་འཁོར་བ་ལས་བསླུ་ཞིང་བྲིད་པའི་མཆོག་ཏུ་གྱུར་ཏོ། །དེ་བཞིན་དུ་མེ་ཏོག་གི་ཆུན་པོས་དབང་བསྐུར་བས་འཁོར་བ་ལས་ཡིད་འབྱུང་བ་མཛེས་པའི་རྒྱན་མཆོག་དམ་པའི་དབང་ཐོབ་པར་གྱུར་ཅིག །སྡུག་བསྔལ་མཛེས་པའི་མེ་ཏོག་དམ་པ་འདི། ཁ་དོག་མ་འདྲེས་སོ་སོར་གསལ་བའི་མཆོག །སེམས་ཅན་ཀུན་གྱིས་ལྟ་བར་འོས་པའི་གནས། །མཛེས་པའི་རྒྱན་མཆོག་དམ་པ་ཐོབ་པ་ཤོག །མེ་ཏོག་ཆུ་སྐྱེས་ཐང་སྐྱེས་དམ་པ་དང་། །ཤིང་དང་ནགས་སྐྱེས་འབྲུ་མཆོག་དམ་པ་འདི། །རིན་ཆེན་ཕྲེང་ལྟར་མཁའ་ལ་ཆར་འབེབས་པའི། །མེ་ཏོག་དབང་གི་བཀྲ་ཤིས་དགུ་པའོ། །བཅུ་པ་རྔ་ཡབ། སྔོན་བཅོམ་ལྡན་འདས་རི་རབ་ཀྱི་རྩེ་ཁང་པ་བརྩེགས་པར་ཆོས་ཀྱི་འཁོར་ལོ་བསྐོར་བའི་ཚེ་སུམ་ཅུ་རྩ་གསུམ་གྱི་ལྷའི་བུ་ཉི་འོད་དམ་པས་རྔ་ཡབ་ཀྱིས་གཡབས་པས་དགྱེས་པ་ཆེན་པོའི་གཟི་མདངས་དང་ལྡན་པར་གྱུར་ཏོ། །དེ་བཞིན་དུ་རྔ་ཡབ་ཀྱི་དབང་བསྐུར་བས་དགྱེས་པ་ཆེན་པོའི་གཟི་མདངས་དང་ལྡན་པའི་དབང་དམ་པ་ཐོབ་པར་གྱུར་ཅིག །སྙན་པའི་སྒྲ་རྣམས་མྱུར་དུ་སྒྲོགས་པ་དང་། །ཉོན་མོངས་རྡུལ་གྱི་དྲི་མ་མ་ལུས་སེལ། །ཐམས་ཅད་མྱུར་དུ་གོ་བའི་བློ་ཐོབ་ནས། །བཀྲ་ཤིས་གཟི་མདངས་མཆོག་དང་ལྡན་པར་ཤོག །རྒྱལ་བའི་སྐུ་ལ་ཉེས་པས་མ་གོས་ཀྱང་། །དག་ཅིང་བསང་བར་བྱ་བའི་རྔ་ཡབ་འདིས། །སྐུ་ཡི་དྲི་མ་ལྗན་ལྗིན་དག་པར་བྱེད། །རྔ་ཡབ་དབང་གི་བཀྲ་ཤིས་བཅུ་པའོ། །བཅུ་གཅིག་པ་རྡུལ་ཡབ ། སྔོན་བཅོམ་ལྡན་འདས་རྒྱལ་པོའི་ཁབ་ན་བཞུགས་པའི་ཚེ་སུམ་ཅུ་རྩ་གསུམ་གྱི་ལྷའི་བུ་ཀུན་ནས་འོད་ཟེར་འབྱུང་བས་རྡུལ་ཡབ་ཀྱིས་རྡུལ་གཡབས་པས་ཆོས་ཉིད་ལ་སྐྱོན་གྱིས་མ་གོས་པའི་དོན་རྟོགས་པར་གྱུར་ཏོ། །དེ་བཞིན་དུ་ལྷའི་རྡུལ་ཡབ་ཀྱི་དབང་བསྐུར་བས་ཆོས་ཉིད་ཟབ་མོའི་དོན་ལ་འཇུག་པའི་དབང་དམ་པ་ཐོབ་པར་གྱུར་ཅིག །ཉོན་མོངས་རྡུལ་རྣམས་མ་ལུས་འཕྱི་བ་དང་། །དུས་གསུམ་བདེ་གཤེགས་ཐམས་ཅད་བཞུགས་པའི་གནས། །བག་ཆགས་སྐྱོན་གྱི་དྲི་མ་བསལ་བའི་ཕྱིར། །ཆོས་ཉིད་ཟབ་མོའི་དོན་ལ་འཇུག་པར་ཤོག །རྒྱལ་བའི་སྐུ་ལ་དྲི་མ་མི་མངའ་ཡང་། །ལོག་རྟོག་རྡུལ་གྱི་བག་ཆགས་བསལ་བའི་ཕྱིར། །བཀྲ་ཤིས་གཙང་མའི་རྫས་ཀྱིས་སྐུ་འཕྱི་བ། །རྡུལ་ཡབ་དབང་གི་བཀྲ་ཤིས་བཅུ་གཅིག་པའོ། །བཅུ་གཉིས་པ་སྦྲང་ཡབ། སྔོན་བཅོམ་ལྡན་འདས་ནགས་ཚལ་དགོན་པ་ན་བཞུགས་པའི་ཚེ་སུམ་ཅུ་རྩ་གསུམ་གྱི་ལྷའི་བུ་ཞིག་གིས་སྦྲང་ཡབ་ཀྱིས་གཡབས་པས་སེམས་ཅན་དུ་འཛིན་པའི་སྐྱོན་ལས་གྲོལ་བར་གྱུར་ཏོ། །དེ་བཞིན་དུ་ལྷའི་སྦྲང་ཡབ་ཀྱི་དབང་བསྐུར་བས་འཛིན་ཆགས་ཀྱི་སྐྱོན་ལས་གྲོལ་བའི་དབང་དམ་པ་ཐོབ་པར་གྱུར་ཅིག །ཉོན་མོངས་སེམས་ཅན་མ་རིག་བསལ་བ་དང་། །འབྲས་བུ་ཐར་པའི་གོ་འཕང་ཐོབ་པ་དང་། །བདེ་བར་གཤེགས་པའི་དྲུང་དུ་འཁོར་བའི་ཕྱིར། །འཛིན་ཆགས་སྐྱོན་གྱི་དྲི་མ་དག་པར་ཤོག །དྲང་སྲོང་ཆེན་པོ་བསམ་གཏན་གནས་པ་ལ། །སྲོག་ཆགས་གདུག་པའི་གཟུགས་བརྙན་བསལ་བ་དང་། །རྔ་ཡབ་རྒྱལ་བའི་རིང་བསྲེལ་བསྐོར་བའི་ཕྱིར། །སྦྲང་ཡབ་དབང་གི་བཀྲ་ཤིས་བཅུ་གཉིས་པའོ། །བཅུ་གསུམ་པ་བླ་རེ། སྔོན་བཅོམ་ལྡན་འདས་རྒྱལ་པོའི་ཁབ་ན་བཞུགས་པའི་ཚེ་འཁོར་རྣམས་བཞིས་བླ་རེ་བྲེས་པས་ཉོན་མོངས་པའི་གདུང་བ་ཞི་བར་གྱུར་ཏོ། །དེ་བཞིན་དུ་བླ་རེའི་དབང་བསྐུར་བས་ཉོན་མོངས་པའི་རྡུལ་གྱི་དྲི་མས་མི་གོས་པར་གྱུར་ཅིག །ཆོས་ཀྱི་འཁོར་ལོ་བསྐོར་ཕྱིར་བླ་རེ་བྲེས། །མི་ཡི་སེང་གེ་བདེ་གཤེགས་བཞུགས་པའི་གནས། །དབང་ཕྱུག་དམ་པའི་མངའ་བདག་ཆེན་པོ་སྟེ། །ཉོན་མོངས་རྡུལ་གྱི་དྲི་མ་མེད་པར་ཤོག །དཔག་བསམ་ལྗོན་ཤིང་མེ་ཏོག་ལོ་འདབ་རྒྱས། །ཉི་ཟླ་གཟའ་སྐར་མང་པོའི་སྤྲིན་གསེབ་ནས། །བཀྲ་ཤིས་བྱ་སྐད་མང་པོ་འཕུར་ཞིང་ལྡིང་། །དར་ཟབ་དབང་གི་བཀྲ་ཤིས་བཅུ་གསུམ་པའོ། །བཅུ་བཞི་པ་རྒྱལ་མཚན། སྔོན་བཅོམ་ལྡན་འདས་བྱ་རྒོད་ཕུང་པོའི་རི་བོར་ཆོས་ཀྱི་འཁོར་ལོ་བསྐོར་བའི་ཚེ་འཁོར་རྣམས་བཞིས་རྒྱལ་མཚན་ཆེན་པོ་བཙུགས་པས་ཆེ་བའི་ཡོན་ཏན་མི་ནུབ་པར་གྱུར་ཏོ། །དེ་བཞིན་དུ་རྒྱལ་མཚན་གྱི་དབང་བསྐུར་བས་ཆེ་བའི་ཡོན་ཏན་ནུབ་པ་མེད་པའི་དབང་ཐོབ་པར་གྱུར་ཅིག །ལྷུན་གྲུབ་སྐུ་བརྙེས་རྫོགས་པའི་རྒྱལ་མཚན་ཏེ། །ནུབ་པའི་དུས་མེད་ཟད་པ་མེད་པ་ཡི། །ཡོན་ཏན་མཆོག་གྱུར་ཀུན་ལས་ཁྱད་པར་འཕགས། །ཆེ་བའི་ཡོན་ཏན་ནུབ་པ་མེད་པར་ཤོག །དཔལ་བརྗིད་མཛེས་པས་འཇིག་རྟེན་ཡོངས་ཀྱི་རྒྱན། །བདུད་དང་མུ་སྟེགས་མཐུ་དཔུང་འཇོམས་པར་བྱེད། །རྒྱལ་བའི་སྐུ་དང་དབྱེར་མེད་ཚུལ་གཅིག་པའི། །རྒྱལ་མཚན་དབང་གི་བཀྲ་ཤིས་བཅུ་བཞི་པའོ། །བཅོ་ལྔ་པ་གདུགས། སྔོན་བཅོམ་ལྡན་འདས་སྐྱེད་མོས་ཚལ་དུ་གཤེགས་པའི་ཚེ་འཁོར་རྣམས་ཀྱིས་ཚ་བའི་གདུང་སྐྱོབ་གདུགས་ཀྱིས་བཀབ་པས་ཚ་བའི་གདུང་བ་ཞི་བར་གྱུར་ཏོ། །དེ་བཞིན་དུ་གདུགས་ཀྱི་དབང་བསྐུར་བས་ཉོན་མོངས་པའི་གདུང་བ་ཐམས་ཅད་ཞི་བའི་དབང་དམ་པ་ཐོབ་པར་གྱུར་ཅིག །གདུགས་ཀྱིས་ཚ་བའི་གདུང་བ་ཀུན་སེལ་ཞིང་། །གྲང་ཞིང་བསིལ་བའི་གདུགས་མཆོག་དམ་པ་སྟེ། །འགྲོ་བའི་ཉོན་མོངས་ཚ་གདུང་ཞི་བའི་གསོས། །རིམས་ནད་ཚ་བའི་སྡུག་བསྔལ་སེལ་བར་ཤོག །ཇི་ལྟར་ཉི་མའི་འོད་ཀྱིས་གདུངས་པ་ན། །གདུགས་ཀྱིས་ཚ་བའི་གདུང་བ་སྐྱོབ་པ་ལྟར། །འཁོར་བའི་ཉེས་པ་སྡུག་བསྔལ་སྐྱོབ་པའི་ཕྱིར། །གདུགས་མཆོག་དབང་གི་བཀྲ་ཤིས་བཅོ་ལྔ་པའོ། །བཅུ་དྲུག་པ་དར་གྱི་ལྡ་ལྡི། སྔོན་བཅོམ་ལྡན་འདས་ཡངས་པ་ཅན་གྱི་གྲོང་ཁྱེར་སྤྲེའུ་རྫིང་གི་འགྲམ་ཁང་བུ་བརྩེགས་པ་ན་བཞུགས་པའི་ཚེ་བྲམ་ཟེ་ཁམ་པ་གསོས་སྔོན་གྱི་ཉེས་པས་བརྡས་ནས་ཉ་པ་རྣམས་ཀྱིས་ཟིན་པའི་ཚེ། ཉ་པ་རྣམས་འགྱོད་པ་རྗེས་སུ་དྲན་ནས་ཉ་རྒྱ་ཆེ་ཆུང་ཕུལ་བས་ཉ་པ་ལྔ་བརྒྱ་སངས་རྒྱས་པར་གྱུར་ཏོ། །དེ་བཞིན་དུ་ཉ་རྒྱའི་རྟགས་དར་གྱི་ལྡ་ལྡིས་དབང་བསྐུར་བས་ངན་སོང་དུ་སྐྱེ་ངེས་ཡིན་ཀྱང་དེ་ལས་ཐར་ཏེ་འཚང་རྒྱ་བའི་དབང་ཐོབ་པ་གྱུར་ཅིག །དར་གྱི་ལྡ་ལྡི་ཉོན་མོངས་ཀུན་སྤངས་ཏེ། །ལེགས་པའི་ཡོན་ཏན་མ་ལུས་ཡོངས་རྫོགས་ནས། །མ་རིག་འཁྲུལ་པའི་ཤེས་པ་བློ་དག་ཅིང་། །ཉོན་མོངས་འཁོར་བའི་གནས་ལས་ཐར་པར་ཤོག །འཁོར་བའི་ཉེས་པ་དག་བྱའི་ཕྱིར། །སྡུག་བསྔལ་རྒྱ་མོ་བཀྲ་ཤིས་རྫས། །བག་ཆགས་ཀུན་དག་ལྡ་ལྡི་ཡི། །དབང་གི་བཀྲ་ཤིས་བཅུ་དྲུག་པའོ། །བཅུ་བདུན་པ་སྐུ་རགས། སྔོན་བཅོམ་ལྡན་འདས་སྐྱེད་མོས་ཚལ་དུ་གཤེགས་པའི་ཚེ་ཁྱིམ་བདག་ལྷའི་བུ་མོ་བཟང་ལྡན་མས་ཨ་པར་སེའི་སྐུ་རགས་གསོལ་བས་སྐུ་བརྟན་པའི་མཆོག་དང་ལྡན་པར་གྱུར་ཏོ། །དེ་བཞིན་དུ་སྐུ་རགས་ཀྱི་དབང་བསྐུར་བས་ལུས་བརྟན་པའི་མཆོག་དང་ལྡན་པར་གྱུར་ཅིག །དྲི་མེད་དག་པའི་སྐུ་རགས་གཙང་མའི་མཆོག །ཁྱིམ་བདག་དད་པས་ཕུལ་བའི་སྐུ་ཆིངས་འདི། །སྐུ་ལ་དཀྲིས་ཤིང་རབ་ཏུ་བསྡམས་པས་ཀྱང་། །མི་འགྱུར་བརྟན་པའི་སྐུ་མཆོག་ཐོབ་པར་ཤོག །ཐར་པ་མཆོག་གིས་ལེགས་པར་གང་གསུངས་པ། །མི་དམིགས་དག་པའི་ཡེ་ཤེས་ཆེན་པོ་ཡིས། །ཉོན་མོངས་དྲི་མེད་བདེ་བའི་སྐུ་རྟེན་པ། །སྐུ་རགས་དབང་གི་བཀྲ་ཤིས་བཅུ་བདུན་པའོ། །བཅོ་བརྒྱད་པ་སྤོས་ལྔ། སྔོན་བཅོམ་ལྡན་འདས་རི་བོ་གངས་ཅན་ན་བཞུགས་པའི་ཚེ་གནོད་སྦྱིན་རྣམས་ཀྱིས་སྤོས་རྣམས་པ་ལྔ་ཕུལ་བ་ནི་ཙནྡན། ག་བུར། གུརྒུཾ། ཨ་ཀ་རུ། དུ་རུ་ཀ་སྟེ། དེ་རྣམས་ཕུལ་བས་དབང་པོ་ཚིམ་ཞིང་བཀྲ་ཤིས་པར་གྱུར་ཏོ། །དེ་བཞིན་དུ་སྤོས་རྣམ་པ་ལྔའི་དབང་བསྐུར་བས་དབང་པོ་ཚིམ་ཞིང་བཀྲ་ཤིས་པར་གྱུར་ཅིག །དབང་པོ་ཚིམ་བྱེད་བདུག་པའི་སྤོས་མཆོག་འདིས། །དུས་གསུམ་བདེ་བར་གཤེགས་པ་མཆོད་པ་དང་། །འགྲོ་བ་མ་ལུས་དབང་པོ་ཀུན་ཚིམ་ཞིང་། །དྲི་ཞིམ་འཕགས་པའི་སྐུ་དང་ལྡན་པར་ཤོག །དྲི་ཞིམ་ངད་ལྡང་ཡོན་ཏན་ཕུན་སུམ་ཚོགས། །མཁའ་ལ་མཆོད་པའི་སྤྲིན་ཕུང་གཏིབས་བྱེད་ཅིང་། །ཡོངས་སུ་ཁྱབ་པའི་བདུག་སྤོས་དམ་པ་འདིས། །ཚིམ་བྱེད་དབང་གི་བཀྲ་ཤིས་བཅོ་བརྒྱད་པའོ། །བཅུ་དགུ་པ་སྙིང་པོ་ལྔ། སྔོན་བཅོམ་ལྡན་འདས་ནགས་ཚལ་ཆེན་པོ་ན་བཞུགས་པའི་ཚེ་ཀླུའི་རྒྱལ་པོ་རྣམས་ཀྱིས་ཚྭ། མར། སྦྲང་རྩི། ཀ་ར། ཏིལ་ཏེ་སྙིང་པོ་ལྔ་ཕུལ་བས་ཚེའི་སྙིང་པོ་མི་ཟད་པའི་མཛོད་དུ་བཀྲ་ཤིས་པར་གྱུར་ཏོ། །དེ་བཞིན་དུ་སྙིང་པོ་རྣམ་པ་ལྔས་དབང་བསྐུར་བས་ཚེ་མི་ཟད་པའི་མཛོད་དུ་བཀྲ་ཤིས་པར་གྱུར་ཅིག །སྙིང་པོ་ལྔ་ནི་གསོས་ཀྱི་མཆོག །མི་ཟད་པ་ཡི་དབྱིག་ཐོབ་སྟེ། །ལེགས་པའི་ཡོན་ཏན་མཐར་ཕྱིན་ནས། །ཚེ་དང་ལོངས་སྤྱོད་འཕེལ་བར་ཤོག །ཚྭ་ཡིས་རོ་སྒྱུར་མར་གྱི་མདངས་དང་ལྡན། །སྦྲང་རྩིས་སྟོབས་རྒྱས་ཀ་རས་ནད་རྣམས་ཞི། །ཏིལ་གྱིས་སྡིག་ཞི་དགེ་ཚོགས་རྣམ་པར་འཕེལ། །སྙིང་པོ་དབང་གི་བཀྲ་ཤིས་བཅུ་དགུ་པའོ། །ཉི་ཤུ་པོ་རིན་ཆེན་ལྔ། སྔོན་བཅོམ་ལྡན་འདས་རི་བོ་གྲུ་འཛིན་ན་བཞུགས་པའི་ཚེ་གནོད་སྦྱིན་གཏེར་འཆང་རྣམས་ཀྱིས་གསེར་དངུལ་ཟངས་ལྕགས་མུ་མེན་ཏེ་རིན་པོ་ཆེ་རྣམ་པ་ལྔ་ཕུལ་བས་ཟད་མི་ཤེས་པའི་དཀོར་མཛོད་དང་ལྡན་པར་གྱུར་ཏོ། །དེ་བཞིན་དུ་རིན་པོ་ཆེ་རྣམ་པ་ལྔས་དབང་བསྐུར་བས་ལོངས་སྤྱོད་ཟད་མི་ཤེས་པའི་དཀོར་མཛོད་དང་ལྡན་པར་གྱུར་ཅིག །རིན་ཆེན་གསེར་དངུལ་ཟངས་ལྕགས་སོགས། །མི་ཟད་ནོར་གྱི་མཆོག་འདི་ཡིས། །འཕགས་པའི་ནོར་བདུན་དང་ལྡན་ཏེ། །འགྲོ་བའི་དབུལ་བ་སེལ་བར་ཤོག །དགོས་པའི་ནོར་འབྱུང་རིན་ཆེན་སྣ་ཚོགས་མཆོག །ཟད་མི་ཤེས་པ་རེ་བ་སྐོང་བའི་གཏེར། །བཀྲེས་ཤིང་དབུལ་འཕོངས་སྡུག་བསྔལ་སེལ་བྱེད་པ། །དགོས་འབྱུང་དབང་གི་བཀྲ་ཤིས་ཉི་ཤུ་པའོ། །ཉེར་གཅིག་པ་འབྲུ་ལྔ། སྔོན་བཅོམ་ལྡན་འདས་ཡུལ་ཨངྒ་མ་ག་དྷ་ན་བཞུགས་པའི་ཚེ་རྒྱལ་པོ་གསལ་རྒྱལ་གྱིས། ནས། གྲོ། འབྲས་ཏིལ། མོན་སྲན་དྲེའུ་སྟེ་འབྲུ་ལྔ་ཕུལ་བས་མུ་གེ་མེད་ཅིང་བཀྲ་ཤིས་པར་གྱུར་ཏོ། །དེ་བཞིན་དུ་འབྲུ་རྣམ་པ་ལྔའི་དབང་བསྐུར་བས་མུ་གེའི་བསྐལ་པ་ལས་ཐར་ཏེ་བཀྲ་ཤིས་པར་གྱུར་ཅིག །རིན་ཆེན་འབྲུ་མཆོག་འགྲོ་བ་ཀུན་གྱི་གསོས། །མུ་གེའི་སྡུག་བསྔལ་ཀུན་ལས་ཐར་བྱེད་ཅིང་། །སྦྱིན་པས་ལོངས་སྤྱོད་རྟག་ཏུ་འཕེལ་བའི་ཕྱིར། །ཟས་གོས་མི་ཟད་གཏེར་དང་ལྡན་པར་ཤོག །ལོངས་སྤྱོད་ཚོགས་ལྡན་འབྱོར་བ་ཀུན་ཚང་བ། །གང་ལ་ཅི་འདོད་ཡིད་བཞིན་འབྱུང་བའི་གཏེར། །ཕུན་སུམ་ཚོགས་པ་དགེ་བའི་སྟོབས་བསྐྱེད་པ། །ལོངས་སྤྱོད་དབང་གི་བཀྲ་ཤིས་ཉེར་གཅིག་པའོ། །ཉེར་གཉིས་པ་སྨན་སྟག་ཚེར། སྔོན་བཅོམ་ལྡན་འདས་ཙནྡན་གྱི་ནགས་སུ་གཤེགས་པའི་ཚེ་གཅན་གཟན་གྱི་རྒྱལ་པོ་སྟག་གིས་སྨན་བྱཱ་གྲི་ཕུལ་བས་བཀྲ་ཤིས་པར་གྱུར་ཏོ། །དེ་བཞིན་དུ་སྨན་སྟག་ཚེར་གྱི་དབང་བསྐུར་བས་བཀྲ་ཤིས་པར་གྱུར་ཅིག །བཅོམ་ལྡན་ཐུགས་རྗེ་ཆེན་པོའི་བྱིན་རླབས་ཀྱིས། །བྱོལ་སོང་གཏི་མུག་གིས་ཀྱང་གོ་མཛད་པས། །བྱཱ་གྲི་སྨན་མཆོག་གཅན་གཟན་སྟག་གིས་ཕུལ། །སྨན་གྱིས་ནད་རྣམས་མ་ལུས་ཞི་བར་ཤོག །སེམས་ཅན་གདུག་པ་མ་ལུས་འདུལ་མཛད་པའི། །ཐབས་ཀྱི་ཆོ་འཕྲུལ་ཀུན་ལ་ཅིར་ཡང་སྟོན། །ཐུགས་རྗེ་ཆེན་པོས་གནས་ནས་འདྲེན་མཛད་པའི། །ཆོ་འཕྲུལ་དབང་གི་བཀྲ་ཤིས་ཉེར་གཉིས་པའོ། །ཉེར་གསུམ་པ་སེང་ཚེར། སྔོན་བཅོམ་ལྡན་འདས་སེང་ལྡེང་གི་ནགས་སུ་གཤེགས་པའི་ཚེ་གཅན་གཟན་གྱི་རྒྱལ་པོ་སེང་གེས་སེང་གྲི་ཕུལ་བས་སྨན་གྱི་མཆོག་ཏུ་བཀྲ་ཤིས་པར་གྱུར་ཏོ། །དེ་བཞིན་དུ་སྨན་སེང་ཚེར་གྱི་དབང་བསྐུར་བས་སྨན་མཆོག་དམ་པའི་ཡོན་ཏན་གྱིས་བཀྲ་ཤིས་པར་གྱུར་ཅིག །སེང་གྲི་སྨན་མཆོག་གཅན་གཟན་སེང་གེས་ཕུལ། །བཅོམ་ལྡན་ཐུགས་རྗེ་ཆེན་པོའི་བྱིན་རླབས་ཀྱིས། །བྱོལ་སོང་གཏི་མུག་གིས་ཀྱང་གོ་མཛད་པའི། །སྨན་མཆོག་དམ་པས་ནད་ལས་ཐར་པར་ཤོག །གཟི་བརྗིད་འགྲོ་མཁས་འགྱིང་བའི་རྫུ་འཕྲུལ་ཅན། །གླལ་ཞིང་འགྱིང་བ་དུད་འགྲོའི་རྒྱལ་པོ་སྟེ། །སྒྲ་སྐད་སྒྲོག་པས་སྡེར་ཆགས་ཟིལ་གྱིས་གནོན། །འདུལ་བྱེད་དབང་གི་བཀྲ་ཤིས་ཉེར་གསུམ་པའོ། །ཉེར་བཞི་པ་ཤུ་དག །སྔོན་བཅོམ་ལྡན་འདས་རི་བཏང་བཟུང་ཆེན་པོར་བཞུགས་པའི་ཚེ་ཀླུའི་རྒྱལ་པོ་འཇོག་པོས་བྲྀ་ཧ་ཏི་ཕུལ་བས་སྨན་གྱི་མཆོག་ཏུ་བཀྲ་ཤིས་པར་གྱུར་ཏོ། །དེ་བཞིན་དུ་ཤུ་དག་དཀར་པོའི་དབང་བསྐུར་བས་སྨན་མཆོག་དམ་པས་བཀྲ་ཤིས་པར་གྱུར་ཅིག །ཤུ་དག་སྨན་མཆོག་ཀླུ་ཡིས་ཕུལ་བ་སྟེ། །བཅོམ་ལྡན་ཐུགས་རྗེ་ཆེན་པོའི་བྱིན་རླབས་ཀྱིས། །ཀླུ་རིགས་གཏི་མུག་གིས་ཀྱང་གོ་མཛད་པའི། །སྨན་གྱིས་ནད་རྣམས་རབ་ཏུ་སེལ་བར་ཤོག །རིག་པའི་ཆ་ལྡན་བྱང་ཆུབ་སེམས་དཔའ་ཡི། །འགྲོ་བའི་རེ་སྐོང་གཙུག་ན་རིན་ཆེན་མཆོག །ཐབས་ཀྱིས་དོན་མཛད་མཐུ་དཔུང་ཆེ་བའི་ཀླུ། །ནད་སེལ་དབང་གི་བཀྲ་ཤིས་ཉེར་བཞི་པའོ། །ཉེར་ལྔ་པ་དབང་ལག །སྔོན་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་ན་བཞུགས་པའི་ཚེ་ལྷའི་དབང་པོ་བརྒྱ་བྱིན་གྱིས་སྨན་ཧ་ས་དེ་བ་ཕུལ་བས་སྨན་མཆོག་གི་སྙིང་པོར་བཀྲ་ཤིས་པར་གྱུར་ཏོ། །དེ་བཞིན་དུ་དབང་པོ་ལག་པའི་དབང་བསྐུར་བས་སྨན་མཆོག་དམ་པའི་དོན་གྱིས་བཀྲ་ཤིས་པ་གྱུར་ཅིག །དབང་པོ་ལག་པ་བརྒྱ་བྱིན་དབང་པོས་ཕུལ། །བཅོམ་ལྡན་ཐུགས་རྗེ་ཆེན་པོའི་བྱིན་རླབས་ཀྱིས། །བརྒྱ་བྱིན་ལྷ་ཡི་སེམས་ཀྱང་གོ་མཛད་པའི། །སྨན་མཆོག་ནད་ཀུན་རབ་ཏུ་ཞི་བར་ཤོག །སུམ་ཅུ་རྩ་གསུམ་ལྷ་ཡི་གནས་མཆོག་ནས། །ལོངས་སྤྱོད་ལྡན་པ་ལྷ་དབང་བརྒྱ་བྱིན་མཆོག །སུམ་ཅུ་རྩ་གསུམ་ལྷ་གནས་རྣམ་རྒྱལ་བའི། །ལོངས་སྤྱོད་དབང་གི་བཀྲ་ཤིས་ཉེར་ལྔ་པའོ། །ཉེར་དྲུག་པ་ཀནྡྷ་ཀ་རི། སྔོན་བཅོམ་ལྡན་འདས་ནགས་ཚལ་ཆེན་པོའི་ཚལ་དུ་གཤེགས་པའི་ཚེ་ཤིང་གི་ལྷ་མོ་འོད་འཆད་མས་ཀནྡྷ་ཀ་རི་ཕུལ་བས་སྨན་མཆོག་སྙིང་པོར་བཀྲ་ཤིས་པར་གྱུར་ཏོ། །དེ་བཞིན་དུ་ཀནྡྷ་ཀ་རིའི་དབང་བསྐུར་བས་སྙིང་པོ་དོན་གྱི་དབང་དུ་བཀྲ་ཤིས་པར་གྱུར་ཅིག །བཅོམ་ལྡན་ཐུགས་རྗེ་ཆེན་པོའི་བྱིན་རླབས་ཀྱིས། །ཤིང་གི་ལྷ་མོའི་སེམས་ཀྱང་གོ་མཛད་པས། །ཀནྡྷ་ཀ་རི་ཤིང་གི་ལྷ་མོས་ཕུལ། །སྨན་མཆོག་དེ་ཡིས་ནད་ཀུན་ཞི་བར་ཤོག །ནགས་ཚལ་ཆེན་པོའི་ལྗོན་ཤིང་ལས། །བདེ་ཞིང་དགོས་པའི་རེ་སྐོང་བ། །ལྷ་མོའི་དང་བས་རབ་ཕུལ་བའི། །དབང་མཆོག་བཀྲ་ཤིས་ཉེར་དྲུག་པའོ། །ཞེས་བསྐུར་ཞིང་། གླན་རྡོར་འོད་ཀྱི་ཕྱག་ལེན་ལྟར་འགོས་ཀྱི་ལས་ཐོར་འདིས་སྔགས་ཀྱི་རྗེས་གནང་ཀྱང་སྟེར་བར་གསུངས་པས། དཀྱིལ་འཁོར་གྱི་གཙོ་བོའི་ཐུགས་ཀར་ཟླ་དཀྱིལ་གྱི་སྟེང་དུ་སྔགས་ཕྲེང་འོད་ཟེར་འབར་བ་བཀོད་པ་ལ་རྩེ་གཅིག་ཏུ་དམིགས་ཏེ་འདིའི་རྗེས་ཟློས། ༀ་ཝཱ་གི་ཤྭ་རི་མུཾ། ༀ་མ་ཎི་པདྨེ་ཧཱུཾ། ༀ་བཛྲ་པཱ་ཎི་ཧཱུཾ་རྣམས་ལན་གསུམ། བུས་ལྷ་ལ་མེ་ཏོག་འཐོར་བཞིན་དུ། བཅོམ་ལྡན་བདག་གིས་གཟུང་ལགས་ཀྱིས། །བདག་ལ་འགོ་བར་མཛད་དུ་གསོལ། །ཞེས་ལན་གསུམ། །སློབ་དཔོན་གྱིས། བཅོམ་ལྡན་འདི་ལ་སྩལ་ལགས་ཀྱི། །འདི་ལ་འགོ་བར་མཛད་དུ་གསོལ། །ཞེས་སློབ་མའི་སྤྱི་བོར་མེ་ཏོག་གཏོར་རོ། །དེ་ལྟར་ཀྲི་ཡ་དང་ཨུ་པ་ཡའི་ཐེག་པ་གཉིས་ཀྱི་དབང་ཐུན་མོང་དུ་བསྐུར་བས། མདོ་རང་ལུགས་ཀྱི་སྦྱོར་ལམ་གསུམ་པ་སྤྱོད་པ་རྒྱུན་གྱི་རྣལ་འབྱོར་བསོད་ནམས་རྟེན་གྱི་ས་དང་། མཐོང་ལམ་དབུགས་ཆེན་འབྱིན་པའི་རྣལ་འབྱོར་བརྟེན་པས་ཁྱད་པར་འགྲོ་བའི་ས་གཉིས་པོ་ཅི་རིགས་ནོན་པ་དང་རིགས་འདྲའི་ཡོན་ཏན་གསོས་ཐེབས། མངོན་དུ་རྒྱུ་ཕྲ་མོ་དང་ཀུན་འགྲོའི་སྒྲིབ་པ་གཉིས་པོ་ཅི་རིགས་དག །རང་སའི་ལམ་གོང་མ་གོང་མ་ལ་སྦྱོར་བའི་འཇུག་པ་དང་དགའ་བ་བྱང་ཆུབ་ཀྱི་སེམས་གང་རུང་སྐྱེ། གནས་སྐབས་སུ་བྱ་སྤྱོད་ཀྱི་སྔགས་དང་རྒྱུད་རྣམས་སྤྱོད་པ་ལ་དབང་ཞིང་། མཐར་ཐུག་རྫོགས་པའི་སངས་རྒྱས་ཀྱི་རྒྱལ་ཚབ་རིགས་གསུམ་རྡོ་རྗེ་འཛིན་པའི་རྟོགས་རིགས་དང་འདྲ་བའི་ཡོན་ཏན་ཁྱད་པར་ཅན་ཐོབ་པའི་སྐལ་པ་ཅན་དུ་བྱས་པ་ཡིན་ནོ། །རྗེས་ཀྱི་བྱ་བ་ལ་སྤྱི་དོན་གསུམ་སྟེ། ལམ་ཁྱེར་བཞི་བསྟན་པ། འགག་དྲུག་བཤད་པ། གདམས་ངག་ངང་སྒོམ་གྱི་ཁྲིད་གདབ་པའོ། །སྤྱི་དོན་དང་པོ་ལམ་ཁྱེར་ལ་བཞི་ལས། དང་པོ་ཐེག་པ་ལམ་ཁྱེར་ནི། ཀྲི་ཡ་ཁྱད་པར་ཅན་སྤྱོད་རྒྱུད་དང་ཐུན་མོང་བཞིི་ཐེག་པ་སྟེ། དེ་ལ་དྲུག་ལས། འཇུག་སྒོ་ནི། ཁྲུས་དང་གཙང་སྦྲའི་སྤྱོད་པ་དང་དག་པ་གསུམ་གྱི་སྒོ་ནས་འཇུག་གོ། །ལྟ་བ་ནི། དོན་དམ་མཐའ་བཞི་དང་བྲལ་བའི་དག་པ་སྟོང་གསལ་གྱི་ཡེ་ཤེས་ཆེན་པོར་རྟོགས་པས། དེའི་ཡོན་ཏན་ཀུན་རྫོབ་རིགས་གསུམ་ལྷའི་དཀྱིལ་འཁོར་དུ་དག་པར་འདོད་དེ། ལམ་རིམ་ལས། གཉིས་མེད་མཉམ་པ་མ་ཤེས་པས། །དོན་དམ་དག་པ་ཆོས་ཉིད་ཙམ། །ཡེ་ཤེས་བཞི་ཡོན་ཀུན་རྫོབ་ལྷ། །ཞེས་སོ། །ཚུལ་ཁྲིམས་ནི། གསང་བ་སྤྱི་རྒྱུད་དུ་སྤྱིའི་དམ་ཚིག་གསུམ་དང་། བྱེ་བྲག་གི་དམ་ཚིག་བཅུ་གསུམ་དུ་བཤད་པ་སོགས་སོ། །སྒོམ་པ་ནི། བྱ་རྒྱུད་ཙམ་པོ་རྣམས་སུ་བདག་ཉིད་ལྷར་སྒོམ་པ་མི་འབྱུང་ཡང་། འདིར་བྱ་རྒྱུད་ཁྱད་པར་ཅན་སྤྱོད་རྒྱུད་དང་ཐུན་མོང་བའི་སྒྲུབ་ཚུལ་ལ། སྟོང་པ་ཡི་གེ་སྒྲ་གཟུགས་དང་། །ཕྱག་རྒྱ་མཚན་མ་དྲུག་ཡིན་ཏེ། །ཞེས་པ་ལྟར་ལྷ་དྲུག་གི་སྒོ་ནས་དམ་ཚིག་པ་བསྐྱེད་པ་བྲན་ནམ་འབངས་ལྟ་བུའི་མདུན་དུ། ལྷ་ཡེ་ཤེས་པ་སྤྱན་དྲངས་པ་རྗེ་དཔོན་རྒྱལ་པོ་ལྟ་བུར་བལྟས་ཏེ་མཆོད་ལ། དམ་ཚིག་གི་ཕྱག་རྒྱས་བཏབ་ནས། བཟླས་བརྗོད་ལ་སོགས་པ་བྱེད་པའམ། བློ་ཆེན་སྤྱོད་རྒྱུད་ཁྱད་པར་ཅན་ཡོ་ག་ཙམ་པོ་དང་ཐུན་མོང་གི་སྒྲུབ་ཚུལ་དམ་ཚིག་པ་དང་མདུན་གྱི་ཡེ་ཤེས་པ་གཉིས་གྲོགས་པོའི་ཚུལ་དུ་མཆོག་དམན་མེད་པར་ལྟ་བ་གང་རིགས་ཀྱི་སྒོ་ནས་དངོས་གྲུབ་སྒྲུབ་པའོ། །སྤྱོད་པ་ནི། བྱ་བ་དྲུག་སྟེ། འཇུག་པའི་དུས་དང་། ཟས་དང་། གོས་དང་། གཙང་སྦྲ་དང་། དམིགས་རྟེན་དང་། བཟླས་བརྗོད་སྔགས་ཀྱི་བྱ་བ་རྣམས་སོ། །འབྲས་བུ་ནི། རིགས་གསུམ་རྡོ་རྗེ་འཛིན་པའི་ས་སྐུ་གསུམ་ཡེ་ཤེས་ལྔའི་བདག་ཉིད་ཅན་གྱི་གོ་འཕང་མི་ཚེ་བདུན་དང་རིང་ནའང་བསྐལ་པ་གསུམ་མམ་བརྒྱད་ནས་ཐོབ་པར་འདོད་མོད་འདིར་ཡང་གསང་སྔགས་བླ་མེད་ལས་ནི། བྱ་སྤྱོད་ཀྱི་ཐེག་པའི་རང་ལམ་གྱིས་ས་བཅུ་པའི་བྱང་སེམས་ལ་སངས་རྒྱས་སུ་བརྗོད་པ་ལས། མཐར་ཐུག་གི་རྫོགས་པའི་སངས་རྒྱས་ཐོབ་པར་མི་བཞེད་དོ། །ཡང་ཨུ་པ་ཡའི་ཐེག་པའི་ཁྱད་པར་ནི། ལྟ་རིམ་ལས། གཉིས་ཀ་རྒྱུད་ཀྱི་འདོད་པ་ནི། །ལྟ་སྤྱོད་གོང་འོག་རྗེས་སུ་མཐུན། །ཞེས་ཀྲི་ཡོག་གཉིས་ཀ་བརྟེན་པའི་ཐེག་པ་ཡིན་པར་མ་ཟད། འདིར་ཤིང་རྟ་ཆེན་པོ་སློབ་དཔོན་བདེ་བ་གསལ་མཛད་དང་། སློབ་དཔོན་སངས་རྒྱས་གསང་བའི་བཞེད་པས་ཕྱི་རྒྱུད་ལ་ཀྲི་ཡོག་གཉིས་སུ་འགྱེད་པའི་ལུགས་ཡིན་པས་ལོགས་སུ་འཆད་མི་དགོས་སོ། །གཉིས་པ་ལྷ་ལམ་ཁྱེར་ནི། ཆོས་ཅན་སྣང་བ་ཀུན་རྫོབ་ཀྱི་བདེན་ངོར་ལྷ་དྲུག་གི་སྒོ་ནས་རིགས་གསུམ་མགོན་པོའི་སྐུར་སྒོམས་ལ། ཡེ་ཤེས་པ་སྤྱན་དྲངས་ནས་རྗེ་ཁོལ་ལམ་གྲོགས་པོ་ལྟ་བུའི་ཚུལ་གྱིས་སྒྲུབ་ཅིང་། ལྷ་སྒོམ་པ་དེའང་མི་དམིགས་པ་མཐའ་བཞི་དང་བྲལ་བའི་སྟོང་གསལ་གྱི་ངང་ལ་འཇོག་པ་ནི་དོན་དམ་བདེན་པའི་ཉམས་ལེན་ཏེ། བདེན་གཉིས་སྔ་ཕྱི་རེས་འཇོག་ཏུ་ཉམས་སུ་ལེན་པའོ། །གསུམ་པ་སྙིང་པོ་ལམ་ཁྱེར་ནི། བདག་མདུན་གྱི་ལྷ་གཉིས་ཀའི་ཐུགས་ཀར་ཟླ་དཀྱིལ་གྱི་སྟེང་དུ་སྔགས་ཕྲེང་བཀོད་པ་སྒྲ་གདངས་སྒྲོག་པ་ལ་རྩེ་གཅིག་ཏུ་དམིགས་ཏེ། ༀ་ཝཱ་གི་ཤྭ་རི་མུཾ། ༀ་མ་ཎི་པདྨེ་ཧཱུཾ། ༀ་བཛྲ་པཱ་ཎི་ཧཱུཾ། ཞེས་བཟླས་པས་ཐུགས་རྒྱུད་བསྐུལ་བའོ། །བཞི་པ་དབང་ལམ་ཁྱེར་ནི། ཀྲི་ཡའི་དབང་ཉི་ཤུ་རྩ་དྲུག་སྟེ། དེ་དང་རྗེས་སུ་འབྲེལ་པའི་ཀྲི་ཡའི་དམ་ཚིག་བཅུ་གསུམ་སོགས་བསླབ་བྱ་རྣམས་ལ་ཚུལ་བཞིན་དུ་བསླབ་པ་ཡིན་ནོ། །སྤྱི་དོན་གཉིས་པ་འགག་དྲུག་བཤད་པ་ལ། གང་དུ་བསྐུར་བའི་གནས་ནི་སྔོན་བྱུང་ཝཱ་རཱ་ཎ་སཱི་དང་། རྗེས་འཇུག་མེ་ཏོག་འཇའ་ཚོན་གྱི་ཚལ་དུའོ། །གང་གིས་བསྐུར་བའི་སྟོན་པ་ནི། སྔོན་བྱུང་བཅོམ་ལྡན་འདས་དང་རྗེས་འཇུག་ཏུ་སློབ་དཔོན་ཤཱནྟིས་སོ། །གང་ལ་བསྐུར་བའི་ཡུལ་ནི། སྔོན་བྱུང་དུ་ཕྱག་ན་རྡོ་རྗེ་དང་། རྗེས་འཇུག་ཏུ་རྡོ་རྗེ་ཟླ་འབར་རྩལ་ལའོ། །གང་བསྐུར་བའི་དབང་ནི། རི་རབ་དང་མཆོད་རྟེན་སོགས་ཀྲི་ཡའི་དབང་ཉི་ཤུ་རྩ་དྲུག་གོ། །ཅིའི་ཕྱིར་བསྐུར་ན། སྔོན་བྱུང་དུ་ཕྱག་རྡོར་ལ་བཅོམ་ལྡན་འདས་ཀྱི་ཐུགས་རྗེས་བཟུང་བ་དང་། རྗེས་འཇུག་ཏུ་སྣོད་བཅུད་འཛོམ་པའི་དུས་སུ་བསྟན་ཏེ། དམ་ཚིག་དང་ལྡན་པ་རྗེས་སུ་བཟུང་བའི་ཆེད་དུའོ། །དེ་ལྟར་བསྐུར་བའི་དགོས་པ་ནི། རི་རབ་ཀྱི་དབང་བསྐུར་བས་མཐུ་སྟོབས་ཁྱད་པར་ཅན་དུ་འགྱུར་བ་སོགས་དབང་སོ་སོའི་ཡོན་ཏན་རྣམས་ཐོབ་པར་དགོས་པ་ཡོད་དོ། །སྤྱི་དོན་གསུམ་པ་གདམས་ངག་ངང་སྒོམ་གྱི་ཁྲིད་ནི། འདིར་རྒྱུ་མཚན་ཉིད་ཀྱི་ཐེག་པ་ལྟར། ཀུན་རྫོབ་སྣང་ཚོད་དུ་བདེན་པར་མི་འཇོག་པར་བཏགས་ཡོད་ཙམ་དུ་སྣང་བ་དེ་ལྷར་བསྒྱུར་ནས་ཉམས་སུ་ལེན་པ་སྟེ། བློ་ཆུང་ན་རང་རྣམ་སྨིན་གྱི་ལུས་འདི་དྭངས་གསལ་སྒྲིབ་ཐོགས་མེད་པ་འཇའ་ཚོན་ལྟ་བུའི་ལུས་སུ་བསམ་པའམ། བློ་ཆེན་དེ་ཉིད་འཇམ་དཔལ་དབྱིངས་ལྟ་བུའི་ལྷའི་སྐུར་བསྒོམ་མོ། །དམིགས་པའི་གཞི་དེ་གཉིས་གང་རིགས་གསལ་ཐེབས་པ་དང་། དེའི་སྤྱི་བོར་ཡས་ནས་མར་ཐིག་ལེ་དཀར་དམར་མཐིང་གསུམ་བརྩེགས་མར་བསམ་པ་ལ་མཉམ་པར་བཞག །དེ་བརྟན་པ་དང་། ཐིག་ལེ་དཀར་པོ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་ལུས་ཀྱི་སྡིག་སྒྲིབ་སྦྱངས། དེ་བཞིན་གཤེགས་པ་རྣམས་ལ་སྐུ་མཉེས་པའི་མཆོད་པ་ཕུལ། འོད་དེ་ཚུར་འདུས་ནས་རང་གི་སྤྱི་བོར་ཐིམ་པས། སྤྱི་བོར་འཇམ་དབྱངས་གསེར་བཙོ་མའི་མདངས་ཅན་རལ་གྲི་དང་ཨུཏྤལ་གླེགས་བམ་གྱིས་མཚན་པ་འཛིན་པ་ཞིག་སྒོམ། ཡང་ཐིག་ལེ་དམར་པོ་ལས་འོད་འཕྲོས། སེམས་ཅན་གྱི་ངག་སྒྲིབ་སྦྱངས། འཕགས་པའི་གསུང་མཆོད། ཚུར་འདུས་པས་རང་གི་མགྲིན་པར་སྤྱན་རས་གཟིགས་དཀར་པོ་ཕྱག་བཞིའི་དང་པོ་གཉིས་ཐལ་སྦྱར། འོག་གཉིས་ཤེལ་འཕྲེང་དང་པད་དཀར་འཛིན་པ་ཞིག་སྒོམ། ཡང་ཐིག་ལེ་མཐིང་ག་ལས་འོད་འཕྲོོས། སེམས་ཅན་གྱི་ཡིད་སྒྲིབ་སྦྱངས། འཕགས་པ་རྣམས་ཀྱི་ཐུགས་མཆོད། ཚུར་འདུས་པས་རང་གི་སྙིང་གར་ཕྱག་རྡོར་སྔོན་པོ་རྡོ་རྗེ་དང་སྡིགས་མཛུབ་ཅན་ཁྲོས་པའི་ཉམས་དང་ལྡན་པ་ཞིག་སྒོམ། དེ་ལྟར་ལུས་ངག་ཡིད་གསུམ་ལ་དེ་བཞིན་གཤེགས་པའི་སྐུ་གསུང་ཐུགས་ཀྱིས་རྒྱས་བཏབ་ནས་མཉམ་པར་འཇོག་པ་ནི་མཚན་བཅས་སོ། །མཚན་མེད་ནི། ལྷའི་སྣང་བ་དེ་ཡང་མི་དམིགས་པར་སྦྱངས་ནས། སེམས་ཉིད་དག་པ་སྟོང་གསལ་གྱི་ཡེ་ཤེས་མཐའ་བཞི་དང་བྲལ་བའི་ངང་ལ་བསལ་བཞག་མེད་པར་བསྐྱང་བར་བྱ་སྟེ། ལ་ཤན་ལས། སྣང་སྟོང་རིམ་གྱིས་བརྟན་པར་བྱེད། །ཅེས་པ་ལྟར་བདེན་གཉིས་རེས་འཇོག་ཏུ་ཉམས་སུ་ལེན་པ་ཡིན་ནོ། །དེས་བྱ་སྤྱོད་ཐུན་མོང་གི་དཀྱིལ་འཁོར་དུ་དབང་བསྐུར་བས་མན་ངག་དང་བཅས་པ་གྲུབ་པས་ཇི་ལྟར་གདམས་པ་རྣམས་ཚུལ་བཞིན་དུ་བསྒྲུབ་པར་བྱའོ་སྙམ་པས། གཙོ་བོས་ཇི་ལྟར་སོགས་ཀྱིས་ཁས་བླང་། གཏང་རག་གི་མཎྜལ་དང་། དེང་ནས་བརྩམས་ཏེ་སོགས་ཀྱིས་ཡོན་དབུལ་ཞིང་། དགེ་བ་བསྔོ་བ་རྣམས་སྔར་ལྟར་དང་། རྗེས་ཆོག་རྣམས་སྒྲུབ་ཐབས་ལྟར་བྱའོ། །རྩ་བའི་མན་ངག་ལས་ཐོ་དང་། །དབང་དོན་རྒྱ་ཆེར་འབྱེད་པ་སོགས། །ཆོས་འདིའི་རང་སྐལ་མ་འཆུགས་པ། །དཔལ་ལྡན་བླ་མའི་གསུང་བཞིན་སྤེལ། །བྱ་སྤྱོད་ཐུན་མོང་གི་ཐེག་པའི་དབང་ཆོག་གི་ལེ་ཚན་ནོ།། །།
༈ ༀ་སྭ་སྟི། འགྱུར་བཅས་སྒྲིབ་ཀུན་མངོན་བྱང་ལྔས། །སྒྲིབ་མེད་ཡེ་ཤེས་རིགས་ལྔའི་སྐུར། །ཡོངས་དག་རྡོ་རྗེ་སློབ་དཔོན་ལ། །གུས་བཏུད་ཡོ་གའི་དབང་ཆོག་བཤད། །ད་ནི་དྲུག་པ་ཡོ་གའི་ཐེག་པའི་དབང་ནི། སྟ་གོན་སྔོན་དུ་འགྲོ་བས་དངོས་གཞི་དཀྱིལ་འཁོར་བྲི་སྒྲུབ་གཏོར་ཆོག་དང་བཅས་པ་སྒྲུབ་ཐབས་ལྟར་བྱ་ཞིང་། སྦྱིན་སྲེག་བྱེད་དམ། མ་བྱས་ནའང་རུང་སྟེ། དེ་ལྟར་ཟིན་ནས་དཀྱིལ་འཁོར་དུ་འཇུག་པ་ལ་གཉིས་ལས། དང་པོ་སློབ་དཔོན་འཇུག་པ་ནི། སློབ་མ་ཇི་ལྟར་འཇུག་པའི་ཆོ་གས་བདག་ཉིད་ཞུགས་ཏེ་དབང་བླང་བའམ། ཡང་ན་སྒོ་ཕྱེ་ནས་དཀྱིལ་འཁོར་གྱི་འཁོར་ལོ་བསྒྱུར་བ་ཉིད་བླ་མ་དང་ཐ་མི་དད་པར་མོས་ལ་རིག་པའི་མེ་ཏོག་ཕུལ་བས། བདག་དང་དཀྱིལ་འཁོར་པའི་སྐུ་གསུང་ཐུགས་ཡོན་ཏན་ཕྲིན་ལས་རྣམས་གཉིས་མེད་དུ་གྱུར་པར་བསམ་སྟེ། སློབ་དཔོན་གྱི་ལས་ལ་རྗེས་སུ་གནང་བ་ཐོབ་པར་བྱའོ། །གཉིས་པ་སློབ་མ་གཞུག་པ་ནི། ལས་བུམ་གྱི་ཆུས་ཁྲུས་བྱ། བགེགས་གཏོར་བཏང་ལ་མཚམས་བཅད། སེམས་བསྐྱེད་དང་ཆོས་ཉན་པའི་ཀུན་སྤྱོད་གསལ་འདེབས་པ་སྔོན་དུ་འགྲོ་བས། འདིར་གང་གསན་པར་བྱ་བའི་ཆོས་ནི། ཞེས་པ་ནས། ཕྱི་དབང་རྒྱུད་ཀྱི་ཆུ་བོའི་ཡན་ལག་གི་དཀྱིལ་འཁོར། ཞེས་པའི་བར་སྔར་ལྟར་རམ། སྤྲོ་བསྡུ་ཇི་ལྟར་རིགས་པ་འདོད་ནའང་བྱས་རྗེས། དྲུག་པ་རྣལ་འབྱོར་ཕྱི་པའི་ཐེག་པ་ཡོ་ག་རྡོ་རྗེ་དབྱིངས་ཀྱི་དཀྱིལ་འཁོར་དུ་དབང་བསྐུར་བ་སྐབས་སུ་བབས་པ་ཡིན། དེ་ལའང་གཉིས་ལས། རྡོ་རྗེ་སློབ་དཔོན་གྱི་བྱ་བ་རྣམས་གྲུབ་ནས། འདིར་སློབ་མ་རྣམས་ཀྱི་ངོ་སྐལ་དུ་གྱུར་པ་ལ། ཐོག་མར་དཀྱིལ་འཁོར་དུ་འཇུག་ཅིང་དབང་ཞུ་བའི་ཡོན་དུ་མཎྜལ་འབུལ་དུ་བཅུག །དེ་ནས་སློབ་དཔོན་གྱི་ཞབས་ལ་ཕྱག་བྱས་ཏེ། སྙིམ་པ་མེ་ཏོག་དང་བཅས་པས་ཐལ་མོ་སྦྱར་ཏེ་གསོལ་བ་གདབ་པ་འདིའི་རྗེས་ཟློས། བཅོམ་ལྡན་ནམ་མཁའི་སངས་རྒྱས་ཀུན། །ཐེག་པ་ཆེན་པོའི་མཐུ་ལྡན་ལ། །བདག་ནི་རབ་ཏུ་བསྒྲལ་བའི་ཕྱིར། །རང་བཞིན་ཏིང་འཛིན་གཟུགས་བརྙན་ལྷས། །བདག་ལ་དབང་མཆོག་དེང་སྩོལ་ཅིག །སངས་རྒྱས་བཀའ་ཡི་དཀྱིལ་འཁོར་དུ། །བདག་ཉིད་དད་པས་འཇུག་ལགས་ན། །དཀྱིལ་འཁོར་བཅས་པའི་ལྷ་ཚོགས་ཀྱིས། །བདག་ལ་བྱིན་གྱིས་བརླབ་ཏུ་གསོལ། །བདེ་བར་གཤེགས་སོ་བཅོམ་ལྡན་འདས། །བསོད་ནམས་ཅན་དུ་བདག་ཉིད་འགྱུར། །སྔོན་ལས་བཟང་པོས་འབྲེལ་བ་ལགས། །ཐུགས་ཀྱི་སྲས་སུ་དགོངས་པར་མཛོད། །ཅེས་ལན་གསུམ། དེ་ནས་སློབ་མ་རྣམས་ཀྱིས་ཚེ་འཁོར་བ་ཐོག་མ་མེད་པ་ནས་རྒྱུ་ཉོན་མོངས་པ་དུག་གསུམ་དང་རྐྱེན་མི་དགེ་བའི་ལས་བསགས་པས་འབྲས་བུ་ངན་སོང་གསུམ་དུ་སྐྱེ་འགྱུར་གྱི་སྡིག་སྒྲིབ་བག་ཆགས་དང་བཅས་པ་ཐམས་ཅད་སྦྱངས་པར་གྱུར་སྙམ་པའི་མོས་པ་མཛོད། སྔར་བསྔགས་པའི་ཡུངས་ཐུན་གྱི་བྲབ་ཅིང་། ༀ་ད་ཧ་ད་ཧ་སརྦ་ན་ར་ཀ་ག་ཏེ་ཧེ་ཏུཾ་ཧཱུཾ་ཕཊ། ༀ་པ་ཙ་པ་ཙ་སརྦ་པྲེ་ཏ་ཀ་ག་ཏེ་ཧེ་ཏུཾ་ཧཱུཾ་ཕཊ། ༀ་མ་ཐ་མ་ཐ་སརྦ་ཏིརྻ་ཀ་ག་ཏེ་ཧེ་ཏུཾ་ཧཱུཾ་ཕཊ། ཅེས་བཟླའོ། །དེ་ནས་ཐུན་མོང་གི་སྡོམ་པ་བཟུང་བའི་ཕྱིར་བླ་མ་དང་ཐ་མི་དད་པའི་རྡོ་རྗེ་དབྱིངས་ཀྱི་དཀྱིལ་འཁོར་ལ་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མངོན་སུམ་ལྟ་བུར་བཞུགས་པའི་སྤྱན་སྔར་རྒྱུན་བཤགས་སྔོན་དུ་འགྲོ་བ་ཅན་གྱི་བྱང་ཆུབ་མཆོག་ཏུ་སེམས་བསྐྱེད་པར་བགྱིའོ་སྙམ་པས་འདིའི༴ དཀོན་མཆོག་གསུམ་ལ་ཕྱག་འཚལ་ལོ། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །རང་གཞན་དོན་གཉིས་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱོད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་ལན་གསུམ། དེ་ནས་ཐུན་མོང་མ་ཡིན་པ་རིགས་ལྔའི་སྡོམ་པ་བཟུང་སྙམ་པས་འདིའི༴ སངས་རྒྱས་བྱང་ཆུབ་སེམས་དཔའ་དང་། །དཀྱིལ་འཁོར་ལྷ་ཚོགས་དགོངས་སུ་གསོལ། །བདག་གིས་དུས་འདི་ནས་བཟུང་སྟེ། །ཇི་སྲིད་བྱང་ཆུབ་སྙིང་པོའི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གི་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བརྟན་པོར་བཟུང་། །རྡོ་རྗེ་རིགས་མཆོག་ཆེན་པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང་། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་ནི་ལན་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་མཆོག་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་བཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །མ་གྲོལ་བ་རྣམས་དགྲོལ་བར་བགྱི། །མ་སྒྲོལ་བ་རྣམས་བསྒྲལ་བར་བགྱི། །དབུགས་མ་ཕྱིན་རྣམས་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད། །ཅེས་ལན་གསུམ། དེ་ནས་ནང་གི་མི་ཤིགས་པའི་སེམས་བསྐྱེད་པའི་ཕྱིར་ས་མ་ཡ་ཨ་ཞེས་པས་ཁྱེད་རང་རྣམས་ཀྱི་སྙིང་གར་ཀུན་རྫོབ་བྱང་སེམས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ལས་དོན་དམ་བྱང་ཆུབ་ཀྱི་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པའི་རྣམ་པར་སྒོམས་ལ་འདིའི་རྗེས་ཟློས། ༀ་སརྦ་ཡོ་ག་ཙིཏྟ་ཨུཏྤ་ད་ཡཱ་མི། སློབ་དཔོན་གྱིས་རྡོ་རྗེས་རེག་སྟེ། སུ་ར་ཏེ་ས་མ་ཡ་སྟྭཾ་ཧོ་སིདྡྷི་བཛྲ་ཡ་ཐཱ་སུ་ཁཾ། ཞེས་བྱིན་གྱིས་བརླབས་ནས། བཛྲ་སཏྭ་ཞེས་པས་ཁྱེད་རང་རྣམས་རྡོ་རྗེའི་སེམས་དཔའི་སྐུར་གྱུར་པ་ལ་མཆོད་པའི་མོས་པ་མཛོད། ༀ་བཛྲ་གནྡྷེ་ཧཱུཾ། གནྡྷེའི་གནས་སུ་པུཥྤེ། དྷཱུ་པེ། ཨཱ་ལོ་ཀེ་བཅུག་པས་མཆོད་ནས་ཆོས་བཤད་པ་ནི། དོན་གཅིག་ནའང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་གསུངས་པ་ལྟར། སྟོན་པ་ཡང་དག་པར་རྫོགས་པའི་སངས་རྒྱས་ཀྱིས་གདུལ་བྱའི་བློའི་རིམ་པ་དང་འཚམས་པར་ཐེག་པའི་སྒོ་མཐའ་ཡས་པར་གསུངས་པ་ལས། འདིར་ངེས་འབྱུང་གི་ཐེག་པ་ལྷ་མི། ཉན་རང་བྱང་སེམས་བཞི་ལས། ལམ་མྱུར་བ་དང་། བདེ་བ་དང་། ཐབས་ལ་མཁས་པའི་ཁྱད་པར་གྱིས་མཆོག་ཏུ་གྱུར་པ་གསང་སྔགས་ཀྱི་དཀྱིལ་འཁོར་ཆེན་པོར་ཞུགས་ནས་ཉམས་སུ་བླང་དུ་ཡོད་པ་འདི་ནི་རྙེད་པའི་མཆོག་རབ་ཏུ་རྙེད་པར་གྱུར་ཏོ། །སྙམ་དུ་དགའ་ཞིང་སྤྲོ་བའི་སེམས་བསྐྱེད་འཚལ་ལོ། །དེ་ནས་ཨ་ཁཾ་ཝཱི་ར་ཧཱུཾ་གིས་མིག་དར་བཅིངས། ༀ་བཛྲ་མཱ་ལེ་ཧཱུཾ་གིས་མེ་ཏོག་གི་ཕྲེང་བ་གཏད་པ་སེམས་མ་རྡོ་རྗེ་མའི་དམ་རྒྱས་འཛིན་དུ་བཅུག་ལ། སྒོ་དབྱེ་བར་གསོལ་བ་གདབ་པ་འདིའི་རྗེས༴ རབ་གནས་སྒོ་འདི་མ་རིག་པས། །ཐོགས་མེད་དུས་ནས་བཅད་ལགས་ན། །ཚད་མེད་བཞི་ལྡན་ཕྱག་རྒྱ་བཞིས། །དེ་རིང་ཐར་པའི་སྒོ་དབྱེ་གསོལ། །ཤར་ནས་ༀ་བཛྲ་ཀྲོ་དྷ་ཏ་ཐཱ་ག་ཏོཏྶ་མ་ཡེ་ཏ་ཐཱ་པྲ་ཝེ་ཤྲཱི་ཀྲཾ་སྥ་ར་ཎ་ས་མ་ཡ་ཧཱུཾ་ཕཊ། དེ་བཞིན་དུ་ལྷོ་སོགས་ནས་བཛྲ་གྱི་གནས་སུ། རཏྣ་པདྨ་ཀརྨ་བཅུག་པའི་སྔགས་ཚན་བཞིས་གསོལ་བ་བཏབ་པས་སྒོ་བཞི་རིམ་པ་ཕྱེ་བར་བསམ་ལ། དངོས་སུ་ཡོལ་བ་ཡོད་ན་བསལ། དེ་ནས་དཀྱིལ་འཁོར་དུ་འཇུག་པར་གསོལ་བ་གདབ་པ་འདིའི་རྗེས༴ སྙིང་པོའི་དཀྱིལ་འཁོར་དམ་པ་འདིར། །བླ་མེད་བྱང་ཆུབ་སེམས་བསྐྱེད་དེ། །དངོས་གྲུབ་དམ་པ་ཐོབ་བྱའི་ཕྱིར། །བདག་ཉིད་དད་པས་འཇུག་ཏུ་གསོལ། །ཞེས་གསོལ་བ་བཏབ་པའི་ལན་དུ་གནང་བ་སྦྱིན་པ་ནི། རུས། བཅོམ་ལྡན་སྙིང་པོའི་དཀྱིལ་འཁོར་འདིར། །བྱང་ཆུབ་རིན་ཆེན་སེམས་བསྐྱེད་དེ། །འཁོར་བའི་ནང་ནས་རབ་དྲངས་ནས། །བདེ་གཤེགས་སྲས་སུ་བསྐྱེད་པ་དང་། །བླ་མེད་འབྲས་བུ་སྨིན་བྱའི་ཕྱིར། །བདག་གིས་སློབ་མ་གཞུག་པར་བགྱི། །ཞེས་བརྗོད། དེ་ནས་སློབ་དཔོན་གྱི་ལག་གི་རྡོ་རྗེ་ལ་འཇུར་བཅུག་ནས། ༀ་བཛྲ་ས་མ་ཡ་ཧཱུཾ། ཞེས་བརྗོད་པས། སྒོ་བཞི་ནས་ཚད་མེད་བཞིའི་འཇུག་པས་ཞུགས་ཏེ་དཀྱིལ་འཁོར་གྱི་ལྷ་ལ་ཕྱག་འཚལ་བར་མོས་ལ་འདིའི༴ བཅོམ་ལྡན་སྙིང་པོའི་དཀྱིལ་འཁོར་འདིར། །རྒྱལ་བ་རིགས་ལྔ་འཁོར་བཅས་ལ། །སྐལ་ལྡན་རྒྱལ་སྲས་དག་པ་ཡིས། །རབ་ཏུ་གུས་པས་ཕྱག་འཚལ་ལོ། །དེ་ནས་ཁེ་ཉེན་བརྗོད་པའི་སྒོ་ནས་དམ་ལ་བཞག་པ་ནི། རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་མཛོད། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་བྲལ་ཏེ་གཤེགས། །བཛྲ་ཨུ་ད་ཀ་ཋ། ཞེས་དུང་ཆོས་ཀྱི་ཆུ་བླུད། བཀའ་གཉན་པའི་སྒོ་ནས་དམ་ལ་བཞག་པ་ནི། སྤྱི་བོར་རྡོ་རྗེ་བཞག་སྟེ། དེང་ནས་བརྩམས་ཏེ་བུ་ཁྱོད་ཀྱི། །ཕྱག་ན་རྡོ་རྗེ་ང་ཡིན་གྱི། །ང་ཡིས་ཇི་ལྟར་བསྒོ་བའི་བཀའ། །ཁྱོད་ཀྱིས་སྐྱོ་བ་མེད་པར་བསྒྲུབས། །གལ་ཏེ་གུས་པར་མ་བྱས་ན། །བདུད་ཀྱིས་བཅོམ་ནས་ངན་འགྲོར་ལྟུང་། །ཞེས་བརྗོད། དེ་ནས་ཡེ་ཤེས་དབབ་པའི་ཕྱིར་བླ་མ་ཨ་ལས་བྱུང་བའི་རྡོ་རྗེ་སེམས་དཔའི་ཐུགས་ཀར་ཟླ་བ་ལ་རྡོ་རྗེའི་དབུས་སུ་ཨས་མཚན་པ། ཁྱེད་རང་རྣམས་ཧཱུཾ་ལས་རྡོ་རྗེ་སེམས་དཔའི་སྐུ་རྡུལ་བྲལ་དྭངས་པ་ཤེལ་ལྟར་གྱུར་པའི་སྙིང་གར་ཧཱུཾ་ལས་རྡོ་རྗེ། དཔྲལ་བར་ཏྲཱཾ་ལས་རིན་ཆེན། ལྐོག་མར་ཧྲཱིཿལས་པདྨ། སྤྱི་བོར་ཀཾ་ལས་སྣ་ཚོགས་རྡོ་རྗེས་མཚན་པར་བསམ་ནས་གསོལ་བ་གདབ་པ་འདིའི༴ བདག་ནི་རྡོ་རྗེའི་དམ་ཚིག་སྟེ། །རྡོ་རྗེ་སེམས་དཔའ་ཡིན་པའི་ཕྱིར། །རྡོ་རྗེ་ཡེ་ཤེས་བླ་མེད་ནི། །དེ་རིང་བདག་ལ་དབབ་ཏུ་གསོལ། །ཞེས་ལན་གསུམ། དེ་ནས་རུས། ༀ་བཛྲོདྒྷ་ཊ་ས་མ་ཡ་པྲ་ཝེ་ཤ་ཡ་ཧཱུཾ། ཞེས་བརྗོད་པས་སློབ་དཔོན་དང་སློབ་མའི་སྙིང་གའི་སྒོ་ཕྱེ། སློབ་དཔོན་གྱི་ཐུགས་ཀའི་ཨ་ཡིག་ལས་ཨ་ཡིག་འོད་ཟེར་འབར་བ་དཔག་ཏུ་མེད་པ་བྱུང་། ཁྱེད་རང་རྣམས་ཀྱི་སྙིང་གའི་རྡོ་རྗེའི་ལྟེ་བར་ཐིམ། འོད་ཟེར་གྱིས་ལུས་ཐམས་ཅད་གང་། སངས་རྒྱས་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ཧཱུཾ་ཡིག་གི་རྣམ་པ་ཆར་ལྟར་བབས་པ་ལུས་ལ་ཞུགས་པའི་མོས་པ་མཛོད། སློབ་དཔོན་གྱིས་རྡོ་རྗེ་གསོར་ཞིང་དྲིལ་བུ་གསིལ་བས། འདི་ནི་རྡོ་རྗེའི་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་ཡེ་ཤེས་བླ་མེད་ནི། །དེ་རིང་ཉིད་དུ་འབབ་པར་ཤོག །བཛྲ་ཨཱ་བེ་ཤ་ཨཿ ཞེས་མང་དུ་བརྗོད་པས་དབབ། ཕེབས་པ་ན་བརྟན་པའི་ཕྱིར་སྤྱི་བོར་རྡོ་རྗེ་རྒྱ་གྲམ་དུ་བཞག་ལ། ༀ་ཨ་ས་མེ་ཏྲི་ས་མེ་མ་ཧཱ་ས་མ་ཡ་ཧཱུཾ། དེ་ནས་སྔར་གཟུང་བའི་མེ་ཏོག་རང་གི་ལྷ་ལ་འབུལ་བའི་བསམ་པས་འདིའི༴ སངས་རྒྱས་དངོས་གྲུབ་ཐོབ་བྱའི་ཕྱིར། །བདག་ལ་ཐུགས་བརྩེར་དགོངས་ནས་ནི། །འགྲོ་ལ་ཕན་ཕྱིར་གཙོ་ཆེན་གྱིས། །སྨན་པར་དགོངས་ཏེ་བཞེས་སུ་གསོལ། །པྲ་ཏཱིཙྪ་བཛྲ་ཧོཿ ཞེས་མེ་ཏོག་དོར། གང་ལ་བབས་པའི་ལྷ་དེས་མེ་ཏོག་རང་གི་མགོ་བོར་བཅིངས་པར་མོས་སུ་བཅུག་སྟེ། ༀ་པྲ་ཏི་གྲྀཧྞ་ཏྭཾ་ཨི་མཾ་སཏྭ་མ་ཧཱ་བ་ལ། ཞེས་མེ་ཏོག་མགོར་བཅིངས་ལ། ༀ། རྡོ་རྗེ་སེམས་དཔའ་དེང་ཁྱོད་ཀྱིས། །མིག་འབྱེད་པར་ནི་བརྩོན་པར་མཛོད། །ཕྱེ་བས་ཐམས་ཅད་མཐོང་འགྱུར་བ། །རྡོ་རྗེའི་མིག་ནི་བླ་ན་མེད། །ༀ་བཛྲ་ཧཱ་སྱ་ཨུངྒྷ་ཊ་ཡ་ཧཱུཾ། ཞེས་མིག་དར་བསལ། དེ་ལྟར་རྡོ་རྗེའི་མིག་ཐོབ་པ་དེ་ལ་མཐོང་བ་བསྟན་པ་ནི། ཧེ་བཛྲ་པཱ་ཤྱ། དེ་ཡང་འདི་ན་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་མངོན་སུམ་དུ་བཞུགས་པ་ཡིན་ཏེ། བསྲུང་བའི་འཁོར་ལོས་མི་ཕྱེད་པར་བཅིངས་པའི་ནང་པདྨ་ལ་གནས་པའི་སྣ་ཚོགས་རྡོ་རྗེའི་ལྟེ་བར་རྫོགས་པའི་གཞལ་ཡས་ཁང་གྲུ་བཞི་སྒོ་བཞི་པ་ཉིས་རིམ་མཚན་ཉིད་ཐམས་ཅད་ཡོངས་སུ་ཚང་བའི་ལྟེ་བ་ལིང་ཚེ་དགུའི་དབུས་དང་ཕྱོགས་བཞིར་འཁོར་ལོ་རྩིབས་བཞི་པ་རེ་རེ། ལྷ་སོ་སོའི་གདན་དང་བཅས་པ། ལིང་ཚེ་དབུས་མའི་ལྟེ་བར་བཅོམ་ལྡན་འདས་རྣམ་པར་སྣང་མཛད་སེར་པོ་ཀུན་ཏུ་ཞལ་བྱང་ཆུབ་མཆོག་གི་ཕྱག་རྒྱ་ཅན་རྩིབས་བཞིར་སྦས་ཡུམ་བཞི། ཕྱོགས་བཞི་ལིང་ཚེ་བཞིའི་ལྟེ་བར་ཤར་དུ་མི་བསྐྱོད་པ། ལྷོར་རིན་འབྱུང་། ནུབ་ཏུ་སྣང་མཐའ། བྱང་དུ་དོན་གྲུབ། སོ་སོའི་རྩིབས་ལ་རང་རིགས་ཀྱི་སེམས་དཔའ་བཞི་བཞིས་བསྐོར་བ། མཚམས་ཀྱི་ལིང་ཚེ་དང་། གྲྭ་བཞི། སྒོ་རྣམས་སུ་སྒེག་སོགས་བཅུ་གཉིས། །གཞལ་ཡས་ཁང་ཕྱི་མའི་སྣམ་བུ་ལ་སེམས་དཔའ་བཅུ་དྲུག་རྣམས་བཞུགས་པ་མངོན་སུམ་བཞིན་དུ་མཐོང་བར་གྱུར་སྙམ་པའི་མོས་པ་མཛོད། དེས་འཇུག་པའི་ཆོས་རྣམས་གྲུབ། དངོས་གཞིའི་སླད་དུ་གསོལ་བ་གདབ་པ་འདིའི་རྗེས༴ བླ་མ་རྡོ་རྗེ་འཛིན་པ་དགོངས་སུ་གསོལ། བཅོམ་ལྡན་འདས་རྡོ་རྗེ་དབྱིངས་ཀྱི་དཀྱིལ་འཁོར་དུ་བདག་ལ་དབང་བསྐུར་དུ་གསོལ། ཞེས་ལན་གསུམ། དེ་ནས་ཁྱེ་རང་རྣམས་དབང་སྟེགས་ཀྱི་ཁྲིའི་སྟེང་དུ་རྡོ་རྗེ་སེམས་དཔའི་རྣམ་པས་དཀྱིལ་འཁོར་ལ་མངོན་པར་ཕྱོགས་པའི་ཚུལ་གྱིས་འཁོད་པའི་མོས་པ་མཛོད། སློབ་དཔོན་གྱིས་དཀྱིལ་འཁོར་གྱི་ལྷ་ལ་འདུད་པ་དང་བཅས་པས་མཁྱེན་པར་གསོལ་བ་ནི། བདག་རྡོ་རྗེ་སློབ་དཔོན་འདི་ཞེས་བགྱི་བ་ཐམས་ཅད་མཁྱེན་པའི་གོ་འཕང་ཐོབ་པར་བྱ་བ་དང་། སངས་རྒྱས་ཀྱི་ཆེ་བའི་ཡོན་ཏན་མ་ལུས་པ་སྒྲུབ་ཅིང་སེམས་ཅན་གྱི་དོན་ཡོངས་སུ་རྫོགས་པར་བྱ་བའི་ཕྱིར། རྡོ་རྗེ་དབྱིངས་ཀྱི་དཀྱིལ་འཁོར་དུ་དབང་བསྐུར་བར་འཚལ་གྱིས། བཅོམ་ལྡན་འདས་ཡེ་ཤེས་ཀྱི་གཙོ་བོ་ཐུགས་རྗེའི་མངའ་བདག་རྣམས་ཀྱིས་དེ་བཞིན་གཤེགས་པའི་ཆེ་བའི་ཡོན་ཏན་གྱི་དབང་རྣམས་རིམ་པ་བཞིན་དུ་བསྐུར་ཞིང་བྱིན་གྱིས་བརླབ་ཏུ་གསོལ། །ཞེས་བརྗོད་ནས། སློབ་དཔོན་དང་ལྷན་ཅིག་པར་དཀྱིལ་འཁོར་པའི་ཐུགས་ཀ་ནས་སྤྲོས་པའི་ལྷ་སོགས་ནམ་མཁར་བཞུགས་པའི་སངས་རྒྱས་ཐམས་ཅད་ཀྱིས་དབང་བསྐུར་བས་སྡིག་སྒྲིབ་བག་ཆགས་དང་བཅས་པ་ཐམས་ཅད་བྱང་ཞིང་དག་པའི་མོས་པ་མཛོད། རྣམ་རྒྱལ་བུམ་པ་བཏེག་སྟེ། རིན་ཆེན་མཛེས་པའི་བུམ་པ་འདི། །གཉིས་མེད་བྱང་ཆུབ་སེམས་ཆུས་གང་། །སྐལ་ལྡན་ཁྱོད་ལ་དབང་བསྐུར་བས། །ལས་ཉོན་སྡིག་སྒྲིབ་དག་གྱུར་ཅིག །ༀ་བུདྡྷ་ཨ་བྷི་ཥིཉྩ་ༀ། ༀ་བཛྲ་ཨ་བྷི་ཥིཉྩ་ཧཱུཾ། ༀ་རཏྣ་ཨ་བྷི་ཥིཉྩ་ཏྲཱཾ། ༀ་པདྨ་ཨ་བྷི་ཥིཉྩ་ཧྲཱིཿ ༀ་ཀརྨ་ཨ་བྷི་ཥིཉྩ་ཨཱཿ ཞེས་བུམ་པ་མགོ་བོའི་གནས་ལྔར་བཞག་ཅིང་བུམ་ཆུ་འཐུང་དུ་གཞུག །རིན་པོ་ཆེའི་དབུ་རྒྱན་དར་དཔྱངས་དང་བཅས་པ་བསྐོན་ལ། ཡེ་ཤེས་རིན་ཆེན་དབུ་རྒྱན་འདིས། །རྒྱལ་བ་སངས་རྒྱས་ཀུན་འདུས་པ། །གཟི་བརྗིད་རིགས་སྔགས་རྒྱལ་བའི་དབུ། །བུ་ཁྱོད་གཙུག་ན་ནོར་བུར་འབར། །ༀ་བཛྲ་དྷཱ་ཏྭཱི་ཤྭ་རཱི་ཧཱུཾ་བཛྲཱི་ཎི་ཨ་བྷི་ཥིཉྩ་མཱཾ། ༀ་བཛྲ་བཛྲི་ཎི་ཨ་བྷི་ཥིཉྩ་མཱཾ། ༀ་རཏྣ་བཛྲཱ་ཎི་ཨ་བྷི་ཥིཉྩ་མཱཾ། ༀ་དྷརྨ་བཛྲཱི་ཎི་ཨ་བྷི་ཥིཉྩ་མཱཾ། ༀ་ཀརྨ་བཛྲཱི་ཎི་ཨ་བྷི་ཥིཉྩ་མཱཾ། ༀ་ཏྲཱུཾ། བཛྲ་ཏུཥྱ་ཧོཿ ལག་ཏུ་རྡོ་རྗེ་དང་ལྷན་ཅིག་ཏུ་དྲིལ་བུའང་གཏོད་ཅིང་། སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་ཏུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོངས། །ༀ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་མཱཾ། ཏིཥྛ་བཛྲ་ས་མ་ཡ་སྟྭཾ། ཞེས་རྡོ་རྗེ་གསོར་ཞིང་སྙིང་གར་བཟུང་། དྲིལ་བུ་སྙིམས་ཚུལ་གྱིས་དཀུར་བརྟེན་དུ་གཞུག་གོ། །རྡོར་དྲིལ་རྒྱ་གྲམ་དུ་བཟུང་བ་སྤྱི་བོར་དཀྲོལ་ལ། རྡོ་རྗེ་མིང་གི་དབང་བསྐུར་བས། །བྱང་ཆུབ་སྙིང་པོར་མཆིས་ཀྱི་བར། །ཅིས་ཀྱང་མི་ཕྱེད་མི་ཤིགས་པའི། །མིང་གི་དབང་བསྐུར་བླ་ན་མེད། །བཛྲ་སཏྭ་སྟྭཾ་ཨ་བྷི་ཥིཉྩ་མཱཾ་བཛྲ་ནཱ་མ་ཨ་བྷི་ཥེ་ཀ་ཏཿ ཀྱེ་དཔལ་རྡོ་རྗེ་དབྱིངས་ཞེས་བྱ་བའི་དེ་བཞིན་གཤེགས་པའོ། །དེ་ནས་གང་སྤྱད་ཀྱང་འཁོར་བའི་སྤྱོད་པ་ཧྲུལ་པོར་བྱེད་པ་བརྟུལ་ཞུགས་ཀྱི་དབང་ནི། ཧཱུཾ་ལས་སྐྱེས་པའི་རྡོ་རྗེ་གཏད་དེ། འདི་དེ་སངས་རྒྱས་ཐམས་ཅད་ཡིན། །ཕྱག་ན་རྡོ་རྗེའི་ཕྱག་ན་འདུག །ཁྱོད་ཀྱིས་ཀྱང་ནི་ལག་ཏུ་བཅང་། །ཕྱག་ན་རྡོ་རྗེའི་བརྟུལ་ཞུགས་བརྟན། །ༀ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་སྟྭཾ་དྷ་ར་ཡཱ་མི་བཛྲ་སཏྭ་ཧཱི། ཧི་ཧི་ཧི་ཧི་ཧཱུཾ། ཞེས་རྡོ་རྗེ་གསོར་ཞིང་སྙིང་གར་བཟུང་ངོ་། །དབང་བསྐུར་ཚུལ་འདི་ནི་གླན་རྡོ་རྗེ་འོད་ཀྱི་ཕྱག་བཞེས་ཀྱི་ལས་ཐོ་རྣམས་ལས་བཤད་པ་ལྟར་བཀོད་པ་ཡིན་ཅིང་། ཕལ་ཆེ་བ་བུམ་དབང་ཙམ་ལས་མི་བསྐུར་བ་དང་། འགའ་ཞིག་ཀུན་རིག་གི་དབང་སྐབས་འདིར་སྦྱོར་བར་མཛད་པ་རྣམས་ནི་ཟོར་ཡང་ཙམ་དུ་ཟད་དོ། །དེ་ནས་ལྷ་དབང་བསྐུར་བ་ནི། སློབ་དཔོན་དང་དཀྱིལ་འཁོར་གྱི་ལྷ་རྣམས་ཀྱི་ཐུགས་ཀ་དང་། འོག་མིན་གྱི་གནས་ནས་རྡོ་རྗེ་དབྱིངས་ཀྱི་ལྷ་ཚོགས་རྣམས་རིམ་པར་བྱོན་ནས་ཁྱེད་རང་རྣམས་ཀྱི་སྤྱི་བོ་ནས་ཐིམ་པའི་མོས་པ་མཛོད། ལྷ་ཙཀ་རྣམས་རིམ་པར་ཐོགས་ཏེ། ཧཱུཾ། སྣང་སྟོང་རྡོ་རྗེ་ནམ་མཁའི་དབྱིངས། །ཆོས་དབྱིངས་ཡེ་ཤེས་རྡོ་རྗེའི་སྐུ། །རྡོ་རྗེ་མཆོག་གི་ཕྱག་རྒྱ་ཅན། །རྣམ་པར་སྣང་མཛད་དབང་བསྐུར་རོ། །ༀ་བུདྡྷ་བེ་རོ་ཙ་ན་ༀ་ཨ་བྷི་ཥིཉྩ་ཧཱུཾ། གཟུང་འཛིན་རྡོ་རྗེ་བརྟན་པའི་ས། །མེ་ལོང་ཡེ་ཤེས་རྡོ་རྗེའི་སྐུ། །རྡོ་རྗེ་ས་གནོན་ཕྱག་རྒྱ་ཅན། །རྡོ་རྗེ་མི་བསྐྱོད་དབང་བསྐུར་རོ། །ༀ་བཛྲ་ཨཀྵོ་བྷྱཿཧཱུཾ་ཨ་བྷི༴ རིན་ཆེན་རྡོ་རྗེ་འབར་བའི་མེ། །མཉམ་ཉིད་ཡེ་ཤེས་རྡོ་རྗེའི་སྐུ། །རྡོ་རྗེ་མཆོག་སྦྱིན་ཕྱག་རྒྱ་ཅན། །རིན་ཆེན་འབྱུང་ལྡན་དབང་༴ ༀ་རཏྣ་སཾ་བྷ་ཝ་ཏྲཱཾ་ཨ་བྷི༴ མཐའ་ཡས་རྡོ་རྗེ་ཆོས་ཀྱི་ཆུ། །ཀུན་རྟོག་ཡེ་ཤེས་རྡོ་རྗེའི་སྐུ། །རྡོ་རྗེ་ཏིང་འཛིན༴ སྣང་བ་མཐའ་ཡས༴ ༀ་པདྨ་ཨ་མི་ཏཱ་བྷ་ཧྲཱིཿཨ་བྷི༴ དོན་ཡོད་རྡོ་རྗེ་བསྐྱོད་པའི་རླུང་། །བྱ་གྲུབ་ཡེ་ཤེས༴ རྡོ་རྗེ་སྐྱབས་སྦྱིན༴ རྡོ་རྗེ་དོན་གྲུབ༴ ༀ་ཀརྨ་ཨ་མོ་གྷ་སིདྡྷི་ཨཱཿཨ་བྷི་ཥིཉྩ་ཧཱུཾ། མེ་ལོང་ཡེ་ཤེས་བྱིན་རླབས་ལས། །སེམས་མ་རྡོ་རྗེའི་ཕྱག་རྒྱ་སྟེ། །རྡོ་རྗེ་དཀར་པོ་རྩེ་ལྔ་པ། །དེ་ཡི་དབང་མཆོག་ཐོབ་པར་ཤོག །སཏྭ་བཛྲི་ཧཱུཾ་ཨ་བྷི༴ མཉམ་ཉིད་ཡེ་ཤེས་བྱིན་རླབས་ལས། །རིན་ཆེན་སེམས་མའི་ཕྱག་རྒྱ་སྟེ། །རིན་ཆེན་སེར་པོ་ཟུར་བརྒྱད་པ། །དེ་ཡི་དབང་མཆོག༴ རཏྣ་བཛྲི་ཏྲཱཾ་ཨ་བྷི༴ ཀུན་རྟོག་ཡེ་ཤེས་བྱིན་རླབས་ལས། །ཆོས་ཀྱི་སེམས་མའི༴ པད་དཀར་འདབ་མ་བཅུ་དྲུག་པ། །དེ་ཡི་དབང་མཆོག༴ པདྨ་བཛྲི་ཧྲཱིཿཨ་བྷི༴ བྱ་གྲུབ་ཡེ་ཤེས་བྱིན༴ ལས་ཀྱི་སེམས་མའི་ཕྱག༴ རྡོ་རྗེ་རྒྱ་གྲམ་ལྗང་གུ་ཅན། །དེ་ཡི་དབང་མཆོག༴ ཀརྨ་བཛྲི་ཨཿཨ་བྷི༴ རྡོ་རྗེ་སེམས་དཔའ་སེམས་དཔའ་ཆེ། །རྡོ་རྗེ་དེ་བཞིན་གཤེགས་པ་ཀུན། །རྡོ་རྗེ་དང་པོ་ཀུན་ཏུ་བཟང་། །ཕྱག་ན་རྡོ་རྗེའི་དབང་བསྐུར་རོ། །ༀ་བཛྲི་སཏྭ་ཧཱུཾ་ཨ་བྷི༴ རྡོ་རྗེ་རྒྱལ་པོ་སངས་རྒྱས་མཆོག །རྡོ་རྗེ་ལྕགས་ཀྱུ་དེ་བཞིན་གཤེགས། །ངེས་པའི་རྒྱལ་པོ་རྡོ་རྗེ་མཆོག །རྡོ་རྗེ་འགུགས་ཁྱོད་དབང་༴ ༀ་བཛྲ་རཱ་ཛ་ཛ་ཨ་བྷི༴ རྡོ་རྗེ་ཆགས་པ་བདེ་ཆེན་པོ། །རྡོ་རྗེ་མདའ་ནི་དབང་བྱེད་པ། །བདུད་ཀྱི་འདོད་པ་རྡོ་རྗེ་ཆེ། །རྡོ་རྗེ་གཞུ་ཁྱོད་དབང་༴ ༀ་བཛྲ་རཱ་ག་ཧོཿཨ་བྷི༴ རྡོ་རྗེ་ལེགས་པ་སེམས་དཔའ་མཆོག །རྡོ་རྗེ་མགུ་བ་དགའ་བ་ཆེ། །རབ་དགྱེས་རྒྱལ་པོ་རྡོ་རྗེ་མཆོག །རྡོ་རྗེ་དགྱེས་ཁྱོད་དབང་༴ ༀ་བཛྲ་སཱ་དྷུ་དྷུ་ཨ་བྷི༴ རྡོ་རྗེ་རིན་ཆེན་རྡོ་རྗེ་དོན། །རྡོ་རྗེ་ནམ་མཁའ་ནོར་བུ་ཆེ། །ནམ་མཁའི་སྙིང་པོ་རྡོ་རྗེ་ཕྱུག །རྡོ་རྗེ་སྙིང་ཁྱོད་དབང་༴ ༀ་བཛྲ་རཏྣ་ཏྲཱཾ་ཨ་བྷི༴ རྡོ་རྗེ་གཟི་བརྗིད་འབར་བ་ཆེ། །རྡོ་རྗེ་ཉི་མ་རྒྱལ་བའི་འོད། །རྡོ་རྗེ་འོད་ཟེར་གཟི་བརྗིད་ཆེ། །རྡོ་རྗེ་འོད་ཁྱོད་དབང་༴ ༀ་བཛྲ་ཏེ་ཛརྻ་ཨ་བྷི༴ རྡོ་རྗེ་སེམས་ཅན་དོན་རབ་དཔལ། །རྡོ་རྗེ་རྒྱལ་མཚན་རབ་དགའ་བྱེད། །རྡོ་རྗེ་ཆེན་པོ་རིན་ཆེན་དཔལ། །རྡོ་རྗེ་དཔལ་ཁྱོད་དབང་༴ ༀ་བཛྲ་ཀེ་ཏུ་བྷྲི་ཨ་བྷི༴ རྡོ་རྗེ་བཞད་མོ་བཞད་པ་ཆེ། །རྡོ་རྗེ་འཛུམ་པ་ངོ་མཚར་ཆེ། །དགའ་ཞིང་རབ་དགའ་རྡོ་རྗེ་སྟོན། །རྡོ་རྗེ་དགའ་ཁྱོད་དབང་༴ ༀ་བཛྲ་ཧ་ས་ཧ་ཨ་བྷི༴ རྡོ་རྗེ་ཆོས་རབ་དེ་ཉིད་སྟོན། །རྡོ་རྗེ་པདྨ་རབ་དགའ་བྱེད། །འཇིག་རྟེན་དབང་ཕྱུག་རབ་མཛེས་སྤྱན། །རྡོ་རྗེ་སྤྱན་ཁྱོད་དབང་༴ ༀ་བཛྲ་དྷརྨ་ཧྲཱིཿཨ་བྷི༴ རྡོ་རྗེ་རྣོན་པོ་ཐེག་པ་ཆེན། །རྡོ་རྗེ་རལ་གྲི་མཚོན་ཆེན་པོ། །འཇམ་དཔལ་རྡོ་རྗེ་རབ་ཏུ་ཟབ། །རྡོ་རྗེ་བློ་ཁྱོད་དབང་༴ ༀ་བཛྲ་ཏཱིཀྵྞ་དྷཱི་ཨ་བྷི༴ རྡོ་རྗེ་རྒྱུ་དང་སྙིང་པོ་ཆེ། །རྡོ་རྗེ་འཁོར་ལོ་ཚུལ་ཆེན་པོ། །རབ་བསྐོར་རྡོ་རྗེ་ལས་བྱུང་བ། །རྡོ་རྗེ་སྙིང་པོའི་དབང་༴ ༀ་བཛྲ་ཧེ་ཏུ་ཀྲུམ་ཨ་བྷི༴ རྡོ་རྗེ་གསུང་བ་རང་རིག་མཆོག །རྡོ་རྗེ་ཟློས་པ་རབ་སྒྲུབ་སྦྱིན། །མི་གསུང་རྡོ་རྗེ་མཆོག་གྲུབ་པ། །རྡོ་རྗེ་གསུང་ཁྱོད་དབང་༴ ༀ་བཛྲ་བྷཱ་ཥ་བྷཱ་ཨ་བྷི༴ རྡོ་རྗེ་ལས་རབ་རྡོ་རྗེ་དཀའ། །ལས་ཀྱི་རྡོ་རྗེ་ཀུན་རབ་སྒྲོལ། །རྡོ་རྗེ་ངེས་པར་རྒྱ་ཆེ་བ། །རྡོ་རྗེ་ལས་ཁྱོད་དབང་༴ ༀ་བཛྲ་ཀརྨ་ཀཾ་ཨ་བྷི༴ རྡོ་རྗེ་བསྲུང་བ་བརྟན་པ་ཆེ། །རྡོ་རྗེ་གོ་ཆ་སྲ་བ་ཆེ། །རྡོ་རྗེ་བརྩོན་འགྲུས་ཐུབ་དཀའ་བ། །རྡོ་རྗེ་བརྩོན་འགྲུས་དབང་༴ ༀ་བཛྲ་རཀྵ་ཧཾ་ཨ་བྷི༴ རྡོ་རྗེ་གནོད་སྦྱིན་ཐབས་ཆེན་པོ། །རྡོ་རྗེ་མཆེ་བ་འཇིགས་པ་ཆེ། །བདུད་འཇོམས་རྡོ་རྗེ་མི་བཟད་པ། །རྡོ་རྗེ་དྲག་པོའི་དབང་༴ ༀ་བཛྲ་ཡཀྵ་ཧཱུཾ་ཨ་བྷི༴ རྡོ་རྗེ་མཚམས་སྦྱོར་རབ་ཏུ་སྡུད། །རྡོ་རྗེ་འཆིང་བ་རྣམ་གྲོལ་བྱེད། །རྡོ་རྗེ་ཁུ་ཚུར་དམ་ཚིག་མཆོག །རྡོ་རྗེ་ཁུ་ཚུར་དབང་༴ ༀ་བཛྲ་སནྡྷེ་བཾ་ཨ་བྷི་ཥིཉྩ་ཧཱུཾ། རྣམ་དག་རྡོ་རྗེ་ཐུགས་ཀྱི་ཡུམ། །མི་དམིགས་རྡོ་རྗེ་མཚན་མ་འཇོམས། །རྡོ་རྗེ་ཏིང་འཛིན་ཕྱག་རྒྱ་འཛིན། །རྡོ་རྗེ་སྒེག་མོའི་དབང་༴ ༀ་བཛྲ་ལཱ་སྱ་ཧཱུཾ་ཨ་བྷི༴ རྣམ་དག་རྡོ་རྗེ་ཡོན་ཏན་ཡུམ། །ཡིད་བཞིན་རེ་བ་སྐོང་བར་མཛད། །རྡོ་རྗེ་ཕྲེང་བའི་ཕྱག་རྒྱ་འཛིན། །རྡོ་རྗེ་ཕྲེང་མའི་དབང་༴ ༀ་བཛྲ་མཱ་ལེ་ཏྲཾ་ཨ་བྷི༴ རྣམ་དག་རྡོ་རྗེ་གསུང་གི་ཡུམ། །གསུང་རབ་རྒྱ་མཚོ་སྒྲོག་པའི་དོན། །རྡོ་རྗེ་པི་ཝཾ་ཕྱག་རྒྱ་འཛིན། །རྡོ་རྗེ་དབྱངས་མཁན་དབང་༴ ༀ་བཛྲ་གཱི་ཏི་ཧྲཱིཿཨ༴ རྣམ་དག་རྡོ་རྗེ་ལས་ཀྱི་ཡུམ། །ལས་ཀྱི་རྡོ་རྗེ་འགྲོ་དོན་མཛད། །བདུད་འདུལ་རྡོ་རྗེ་ཕྱག་རྒྱ་གར། །རྡོ་རྗེ་གར་མཁན་དབང་༴ ༀ་བཛྲ་ནྲྀ་ཏྱེ་ཨཿཨ་བྷི༴ སྤྲིན་ལྡིང་རྡོ་རྗེ་བདུག་པ་མོ། །རྡོ་རྗེ་ཚིམ་བྱེད་ཀུན་ཏུ་ཚིམ། །རྡོ་རྗེ་སྤོས་ཁང་ཕྱག་རྒྱ་འཛིན། །རྡོ་རྗེ་སྤོས་མའི་དབང་༴ ༀ་བཛྲ་དྷཱུ་པེ་ཧཱུཾ་ཨ་བྷི༴ ལྟ་མཛེས་རྡོ་རྗེ་ཐམས་ཅད་མཛེས། །རྡོ་རྗེ་མེ་ཏོག་ཀུན་ཏུ་མཛེས། །རྡོ་རྗེ་མེ་ཏོག་ཕྱག་རྒྱ་འཛིན། །མེ་ཏོག་མ་ཡི་དབང་༴ ༀ་བཛྲ་པུཥྤེ་ཏྲཾ་ཨ་བྷི༴ འོད་གསལ་རྡོ་རྗེ་མདའ་ཡི་མེ། །རྡོ་རྗེ་ཅན་གྱིས་མ་རིག་སེལ། །རྡོ་རྗེ་གསལ་བྱེད་ཕྱག་རྒྱ་འཛིན། །རྡོ་རྗེ་མར་མེའི༴ ༀ་བཛྲ་ཨཱ་ལོ་ཀེ་ཧྲཱིཿཨ་བྷི༴ རྡོ་རྗེ་ཙནྡན་བདུད་རྩིའི་ཆུ། །རྡོ་རྗེ་བདུད་རྩིས་རྣམ་རྟོག་འཁྲུ། །རྡོ་རྗེ་དག་བྱེད་ཕྱག་རྒྱ་འཛིན། །རྡོ་རྗེ་དྲི་མའི༴ ༀ་བཛྲ་གནྡྷེ་ཨཿཨ་བྷི༴ རྣམ་དག་བསྐུལ་བྱེད་ཐུགས་རྗེའི་དོན། །ཐུགས་རྗེ་རྒྱུན་འདྲེན་རྡོ་རྗེ་འདྲེན། །རྡོ་རྗེ་འགུགས་མཛད་ཕྱག་རྒྱ་འཛིན། །རྡོ་རྗེ་ལྕགས་ཀྱུའི༴ ༀ་བཛྲ་ཨཾ་ཀུ་ཤ་ཛཿ ཨ་བྷི༴ མི་གཏོང་རྡོ་རྗེ་ཆོས་ཀྱི་དོན། །རྡོ་རྗེ་འདྲེན་མཛད་མི་འགྱུར་དོན། །རྡོ་རྗེ་འཆིང་མཛད་ཕྱག་རྒྱ་འཛིན། །རྡོ་རྗེ་ཞགས་མའི་དབང་༴ ༀ་བཛྲ་པཱ་ཤ་ཧཱུཾ་ཨ་བྷི༴ རྡོ་རྗེ་ཆོས་ཉིད་མི་འགྱུར་དོན། །རྡོ་རྗེ་མགྱོགས་བྱེད་གློག་ལྟར་མྱུར། །རྡོ་རྗེ་ལྕགས་སྒྲོག་ཕྱག་རྒྱ་འཛིན། །རྡོ་རྗེ་ལྕགས་སྒྲོག་དབང་༴ ༀ་བཛྲ་སྥོ་ཊ་བཾ་ཨ་བྷི༴ རྡོ་རྗེ་འབེབས་པ་བརྟན་པའི་མཆོག །རྡོ་རྗེ་བསྐྱོད་མཛད་ཀུན་གྱི་ལས། །རྡོ་རྗེ་འབེབས་མཛད་ཕྱག་རྒྱ་འཛིན། །རྡོ་རྗེ་དྲིལ་བུའི༴ ༀ་བཛྲ་ཨ་བེ་ཤ་ཡ་ཨཿཨ་བྷི༴ སྒོ་ཡི་ཁྱམས་ཀྱི་ནང་གནས་པ། །བྱམས་པ་ལ་སོགས་བཅུ་དྲུག་ནི། །དང་པོ་རབ་དགའ་ལ་སོགས་གནས། །ས་གནས་རྣམས་ཀྱི་དབང་བསྐུར་རོ། །ༀ་སརྦ་སཾསྐཱ་ར་པ་ར་ཤུདྡྷ་དྷརྨ་ཏེ་ག་ག་ན་ས་མུཏྒ་ཏེ་སྭ་བྷཱ་བ་བི་ཤུདྡྷེ་མ་ཧཱ་ན་ཡ་པ་རི་ཝཱ་རེ་སྭཱཧཱ་ཨ་བྷི་ཥིཉྩ་ཧཱུཾ། ཞེས་བསྐུར་རོ། །དེ་ནས་ཡོ་གའི་རྫས་དབང་རྣམས་རིམ་པར་བསྐུར་བས་སྔོན་རྣམ་པར་སྣང་མཛད་ཀྱིས་ཇི་ལྟར་དབང་བསྐུར་བ་དང་རྗེས་སུ་མཐུན་པའི་ཡོན་ཏན་ཁྱད་པར་ཅན་རྣམས་རྒྱུད་ལ་ཐོབ་པའི་མོས་པ་མཛོད། དེ་ལ་ཡོ་གའི་དབང་དྲུག་ཅུ་རྩ་གཉིས་པོའང་རིགས་བསྡུས་ན། ཕྱི་དབང་རྩ་བ་བཅུའི་གསུམ་པ་ནས་བཅུ་པའི་བར་ཏེ། སྡེ་ཚན་བརྒྱད་ལས། དང་པོ་ཐུགས་རྗེ་གཟུངས་དབང་ལ་བཅུ་གཅིག་གི། དང་པོ་སྐུ་ཕྱག་རྒྱའི་དབང་ནི། རིགས་ལྔའི་སྐུ་ཐོགས་ཏེ། སྔོན་བཅོམ་ལྡན་འདས་རི་རབ་ཀྱི་རྩེ་ཁང་བརྩེགས་འབར་བའི་དབུས་སུ་དཔལ་ཀུན་རིག་རྣམ་པར་སྣང་མཛད་ཀྱིས་བྱང་ཆུབ་སེམས་དཔའ་དོན་ཐམས་ཅད་གྲུབ་པ་ལ་ཕྱག་རྒྱ་ཆེན་པོ་ལྔའི་དབང་བསྐུར་བས་རིགས་ལྔ་ཡེ་ཤེས་ལྔའི་དབང་ཐོབ་པར་གྱུར་ཏོ། །དེ་བཞིན་དུ་ཕྱག་རྒྱ་ལྔའི་དབང་བསྐུར་བས་སྐུ་ལྔ་ཡེ་ཤེས་ལྔ་མཐར་ཕྱིན་པའི་དབང་དམ་པ་ཐོབ་པར་གྱུར་ཅིག །བྱང་ཆུབ་མཆོག་དང་ས་གནོན་དང་། །མཆོག་སྦྱིན་མཉམ་བཞག་སྐྱབས་སྦྱིན་ཏེ། །རྒྱལ་བ་རིགས་ལྔའི་སྐུ་ཡི་རྒྱ། །ཕྱག་རྒྱ་ཆེན་པོའི་དབང་ཐོབ་ཤོག །རྒྱལ་པོ་ཕྱག་རྒྱ་མཆོག་གི་རྒྱ། །ཕྱག་རྒྱའི་དབང་མཆོག་མི་འདའ་བ། །ཡེ་ཤེས་ལྔ་དང་རིགས་ལྔ་ཡི། །དབང་གི་བཀྲ་ཤིས་དང་པོའོ། །པཉྩ་ཀཱུ་ལ་ཨ་བྷི་ཥིཉྩ་ཧཱུཾ། གཉིས་པ་གསུང་གཟུངས་ཡིག་འབྲུ་གཏད་དེ། སྔོན་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་སྙིང་པོ་སྔགས་ཀྱི་དབང་བསྐུར་བས་རྟོགས་པའི་ཡེ་ཤེས་ཕུན་སུམ་ཚོགས་པར་གྱུར་ཏོ། །དེ་བཞིན་དུ་སངས་རྒྱས་ཀྱི་ཐུགས་ཡེ་ཤེས་ཀྱི་བྱིན་རླབས་སྙིང་པོ་སྔགས་ཀྱི་དབང་བསྐུར་བས་རྟོགས་པའི་ཡེ་ཤེས་ཕུན་སུམ་ཚོགས་པའི་དབང་དམ་པ་ཐོབ་པར་གྱུར་ཅིག །ཐུགས་ཀྱི་ས་བོན་ཡིག་འབྲུ་མཆོག །སྔགས་ཀྱི་བྱིན་རླབས་བསམ་མི་ཁྱབ། །ཡེ་ཤེས་ཐུགས་ཀྱི་ས་བོན་མཆོག །འབྲས་བུ་སྔགས་ཀྱི་བཀྲ་ཤིས་ཤོག །སྙིང་པོ་རིགས་ལྔ་སངས་རྒྱས་གསུང་གི་མཆོག །གསུང་མཆོག་སྔགས་ཀྱི་ཕྱག་རྒྱ་ཆེན་པོ་སྟེ། །བྱིན་རླབས་ཆེན་པོ་བླ་ན་མེད་པ་ཡི། །སྔགས་མཆོག་དབང་གི་བཀྲ་ཤིས་གཉིས་པའོ། །ༀ་ཧཱུཾ་ཏྲཱཾ་ཧྲཱིཿཨཱཿ ཨ་བྷི་ཥིཉྩ་ཧཱུཾ། ཐུགས་ཀྱི་རྫས་དབང་ལ་བཞིའི། གསུམ་པ་མིག་ཐུར། སྔོན་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་གསེར་གྱི་ཐུར་མའི་དབང་བསྐུར་བས་མ་རིག་པའི་ལིང་ཏོག་བྱང་ནས་ཤེས་རབ་ཀྱི་མིག་གསལ་བར་གྱུར་ཏོ། །དེ་བཞིན་དུ་གསེར་གྱི་ཐུར་མའི་དབང་བསྐུར་བས་མ་རིག་པའི་ལིང་ཏོག་བྱང་ནས་ཤེས་རབ་ཀྱི་མིག་གསལ་བའི་དབང་དམ་པ༴ གསེར་གྱི་ཐུར་མ་ཐོགས་ནས་ནི། །མིག་མཁན་རྒྱལ་པོའི་དབང་བསྐུར་བཞིན། །བུ་ཁྱོད་མ་རིག་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཧྲཱི་ཏེ་སུ་ཀེ་ཧཱུཾ། རིན་ཆེན་གསེར་གྱི་ཐུར་མ་ཡིས། །འབར་བའི་ཡེ་ཤེས་གསལ་ཕྱེ་ནས། །ངེས་པར་ལེགས་པའི་དགོངས་པ་འགྲུབ། །ཤེས་རབ་ཡེ་ཤེས་སྤྱན་ལྡན་པའི། །དབང་གི་བཀྲ་ཤིས་གསུམ་པའོ། །ཛྙཱ་ན་ཙཀྵུ་ཨ་བྷི༴ བཞི་པ་མེ་ལོང་བསྟན་ལ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་མེ་ལོང་གི་དབང་བསྐུར་བས་ཆོས་ཐམས་ཅད་སྣང་ལ་རང་བཞིན་མེད་པར་རྟོགས་པར་གྱུར་ཏོ། །དེ་བཞིན་དུ་མེ་ལོང་གི་དབང་བསྐུར་བས་ཆོས་ཐམས་ཅད་གཟུགས་བརྙན་རྟེན་འབྲེལ་སྒྱུ་མ་ཙམ་དུ་རྟོགས་པའི་དབང་དམ་པ༴ ཆོས་ཀུན་གཟུགས་བརྙན་ལྟ་བུ་སྟེ། །རྟེན་འབྲེལ་མཐུ་ལས་སྣང་བའི་ཕྱིར། །བརྗོད་མེད་རང་བཞིན་དག་པའི་དོན། །ཆོས་ཉིད་སྒྱུ་མ་ལྟར་གསལ་ཤོག །སྣང་སེམས་དྲི་མ་སེལ་བ་དང་། །མི་མངོན་དབང་པོ་གསལ་བ་དང་། །ཡེ་ཤེས་གསལ་བའི་མེ་ལོང་གི། །དབང་གི་བཀྲ་ཤིས་བཞི་པའོ། །བཛྲ་ཨཱ་དཪྴ་ཨ་བྷི༴ ལྔ་པ་འཁོར་ལོ་རྐང་བར་དུ་བཞག་ལ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་འཁོར་ལོ་བཞིའི་དབང་བསྐུར་བས་འགྲོ་དོན་ཐོགས་པ་མེད་པར་གྱུར་ཏོ། །དེ་བཞིན་དུ་འཁོར་ལོ་བཞིའི་དབང་བསྐུར་བས་རྫུ་འཕྲུལ་གྱི་རྐང་པ་དང་ལྡན་ཞིང་ཁམས་གསུམ་དུ་འགྲོ་དོན་ཐོགས་པ་མེད་པའི་དབང་དམ་པ༴ འོག་ཏུ་གསེར་གྱི་འཁོར་ལོ་དག །བརྗིད་པའི་གདན་གྱི་འབྲུ་བཀོད་ནས། །གཞན་གྱི་དོན་ལ་ཕན་པའི་ཕྱིར། །རྒྱལ་བའི་འཁོར་ལོ་བསྐོར་བར་ཤོག །ཉོན་མོངས་མ་ལུས་གཞོམ་པ་དང་། །ལེགས་པའི་ཡོན་ཏན་རྫོགས་པ་དང་། །འབྲས་བུ་ཀུན་ཏུ་འཕགས་པའི་ཕྱིར། །དབང་གི་བཀྲ་ཤིས་ལྔ་པའོ། །བཛྲ་ཙཀྲ་ཨ་བྷི༴ དྲུག་པ་དུང་གཏད་དེ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་དུང་གི་དབང་བསྐུར་བས་ཚངས་པའི་དབྱངས་ཀྱིས་ཆོས་སྒྲ་སྒྲོག་པའི་དབང་ཐོབ་པར་གྱུར་ཏོ། །དེ་བཞིན་དུ་དུང་གི་དབང་བསྐུར་བས་ཚངས་པའི་དབྱངས་ལྟ་བུས་ཆོས་སྒྲ་སྒྲོག་པའི་དབང་དམ་པ༴ །ཆོས་དུང་རྒྱས་པར་བུས་ནས་ནི། །འཇིག་རྟེན་སེམས་ཅན་སྐལ་ལྡན་ལ། །རྣ་བསལ་སྡིག་སྦྱངས་ཆོས་ཐོས་པའི། །ཚངས་པའི་སྒྲ་སྐད་སྒྲོག་པར་ཤོག །སྐྱོབ་པ་མགོན་པོ་ཚངས་པའི་དབྱངས། །ཚངས་པའི་གསུང་མཆོག་འགྲོ་ལ་སྒྲོག །འཇིག་རྟེན་གསུམ་དུ་རྒྱས་པའི་སྒྲ། །དབང་གི་བཀྲ་ཤིས་དྲུག་པའོ། །ༀ་བྷྲ་མ་ཝཱ་ཀ་ཨ་བྷི༴ བདུན་པ་ཡོན་ཏན་མེ་ཏོག་གི་ཕྲེང་བ། སྔོན་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་མེ་ཏོག་གི་ཕྲེང་བས་དབང་བསྐུར་བས་ཚུལ་ཁྲིམས་ཡོངས་སུ་རྫོགས་པར་གྱུར་ཏོ། །དེ་བཞིན་དུ་མེ་ཏོག་ཕྲེང་བའི་དབང་བསྐུར་བས་ཚུལ་ཁྲིམས་ཡོངས་སུ་རྫོགས་ཏེ་ངན་སོང་དུ་ལྟུང་བ་ལས་ལྡོག་པའི་དབང་དམ་པ༴ སྡུག་ཅིང་མཛེས་པའི་མེ་ཏོག་རྒྱན། །དགོས་པའི་དོན་རྣམས་མྱུར་བར་འབྱིན། །ཐམས་ཅད་ཀུན་གྱི་ཡིད་དུ་འོང་། །འབྱོར་བའི་ལོངས་སྤྱོད་རྒྱན་དུ་ཤོག །ཁ་དོག་དབྱིབས་ལེགས་རིན་ཆེན་མེ་ཏོག་འདི། །ནམ་མཁའ་གང་ཞིང་ས་གཞི་ཡོངས་ཁེབས་པའི། །མཆོད་པའི་སྤྲིན་གྱི་ཕུང་པོ་ཆར་འབེབས་པ། །མཛེས་པའི་དབང་གི་བཀྲ་ཤིས་བདུན་པའོ། །པུཥྤ་མཱ་ལ་ཨ་བྷི༴ ཕྲིན་ལས་ཕྱག་མཚན་གྱི་དབང་ལ་བཞི་ལས། བརྒྱད་པ་རྡོ་རྗེ་གཏད་དེ། སྔོན་ནི་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་རྡོ་རྗེའི་དབང་བསྐུར་བས་ཐུགས་རྡོ་རྗེ་རིགས་ཀྱི་དབང་ཐོབ་པར་གྱུར་ཏོ། །དེ་བཞིན་དུ་རྡོ་རྗེའི་དབང་བསྐུར་བས་ཐུགས་ཡེ་ཤེས་རྡོ་རྗེའི་དབང་དམ་པ༴ སྐུ་ཡི་ཕྱག་རྒྱའི་རྟགས་བསྟན་པ། །ཡེ་ཤེས་རྡོ་རྗེ་ལྟ་བུ་སྟེ། །རྡོ་རྗེ་ཐུགས་ཀྱི་རང་བཞིན་ནི། །མེ་ལོང་ཡེ་ཤེས་ཐོབ་པར་ཤོག །རྡོ་རྗེའི་རིགས་མཆོག་རྡོ་རྗེ་སེམས་དཔའ་སྟེ། །དཀར་ལ་དག་པས་ཤར་ཕྱོགས་སངས་རྒྱས་ཞིང་། །བདེ་བ་ཆེན་པོ་ཀུན་ལ་ཁྱབ་པའི་བདག །ཐུགས་ཀྱི་དབང་གི་བཀྲ་ཤིས་བརྒྱད་པའོ། །བཛྲ་ཨ་བྷི༴ དགུ་པ་རིན་ཆེན། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལས་རིན་པོ་ཆེའི་དབང་བསྐུར་བས་ཡོན་ཏན་རིན་པོ་ཆེའི་མཛོད་ཐོབ་པར་གྱུར་ཏོ། །དེ་བཞིན་དུ་རིན་པོ་ཆེའི་དབང་བསྐུར་བས་ཡོན་ཏན་རིན་པོ་ཆེའི་དབང་དམ་པ༴ སྐུ་ཡི་ཕྱག་རྒྱའི་རྟགས་བསྟན་པ། །འགྲོ་བ་ཀུན་གྱི་རེ་བ་སྐོང་། །ཡོན་ཏན་རིན་ཆེན་རང་བཞིན་ཏེ། །མཉམ་ཉིད་ཡེ་ཤེས་ཐོབ་པར་ཤོག །རིན་ཆེན་རིགས་མཆོག་ཡོན་ཏན་སེམས་དཔའ་སྟེ། །སེར་ལ་དག་པ་ལྷོ་ཕྱོགས་སངས་རྒྱས་ཞིང་། །བདེ་བ་ཆེན་པོ་ཀུན་ལ་ཁྱབ་པའི་བདག །ཡོན་ཏན་དབང་གི་བཀྲ་ཤིས་དགུ་པའོ། །རཏྣ་ཨ་བྷི༴ བཅུ་པ་པདྨ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་པདྨའི་དབང་བསྐུར་བས་གསུང་པདྨ་རིགས་ཀྱི་དབང་ཐོབ་པར་གྱུར་ཏོ། །དེ་བཞིན་དུ་པདྨའི་དབང་བསྐུར་བས་འགྲོ་དོན་བྱེད་པ་ལ་ཉེས་པའི་སྐྱོན་གྱིས་མ་གོས་པའི་དབང་དམ་པ༴ སྐུ་ཡི་ཕྱག་རྒྱའི་རྟགས་བསྟན་པ། །པདྨ་དབང་གི་རང་བཞིན་ཏེ། །གསུང་གི་རང་བཞིན་འབྱུང་བའི་མཛོད། །ཀུན་རྟོག་ཡེ་ཤེས་ཐོབ་པར་ཤོག །པདྨ་རིགས་མཆོག་ཆོས་ཀྱི་སེམས་དཔའ་སྟེ། །དམར་ལ་དག་པ་ནུབ་ཕྱོགས་སངས་རྒྱས་ཞིང་། །བདེ་བ་ཆེན་པོ་ཀུན་ལ་ཁྱབ་པའི་བདག །གསུང་གི་དབང་གི་བཀྲ་ཤིས་བཅུ་པའོ། །པདྨ་ཨ་བྷི༴ བཅུ་གཅིག་པ་རྒྱ་གྲམ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་སྣ་ཚོགས་རྡོ་རྗེའི་དབང་བསྐུར་བས་ཕྲིན་ལས་བཞིའི་དབང་ཐོབ་པར་གྱུར་ཏོ། །དེ་བཞིན་དུ་རྒྱ་གྲམ་གྱི་དབང་བསྐུར་བས་ཕྲིན་ལས་བཞིའི་དབང་དམ་པ༴ སྐུ་ཡི་ཕྱག་རྒྱའི་རྟགས་བསྟན་པ། །ལས་རྣམས་མ་ལུས་རྫོགས་པའི་མཆོག །ཕྲིན་ལས་དོན་ཡོད་གྲུབ་པ་སྟེ། །བྱ་གྲུབ་ཡེ་ཤེས་ཐོབ་པར་ཤོག །བྱ་བའི་རིགས་མཆོག་ལས་ཀྱི་སེམས་དཔའ་སྟེ། །ལྗང་ལ་དག་པ་བྱང་ཕྱོགས་སངས་རྒྱས་ཞིང་། །བདེ་བ་ཆེན་པོ་ཀུན་ལ་ཁྱབ་པའི་བདག །ཕྲིན་ལས་དབང་གི་བཀྲ་ཤིས་བཅུ་གཅིག་པའོ། །བི་ཤྭ་བཛྲ་ཨ་བྷི༴ དེ་དག་གིས་ཐུགས་རྗེ་གཟུངས་དབང་བཅུ་གཅིག་པ་རྫོགས་སོ། །གཉིས་པ་ཤེས་རབ་བུམ་པའི་དབང་ལ་གཅིག་སྟེ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་བདུད་རྩིའི་བུམ་པའི་དབང་བསྐུར་བས་རྣམ་པར་རྟོག་པ་སེལ་བར་གྱུར་ཏོ། །དེ་བཞིན་དུ་ཐུགས་བདུད་རྩི་བུམ་པའི་དབང་བསྐུར་བས་ལས་དང་ཉོན་མོངས་པའི་ནད་བྱང་བའི་དབང་དམ་པ༴ སྤྲོས་མེད་སྤྲོས་བྲལ་ཆོས་ཀྱི་དབྱིངས། །བུམ་པ་བཟང་པོ་ཡུམ་གྱི་གཏེར། །ཕན་བྱེད་སྨན་པའི་མཆོག་ཡིན་ཏེ། །འགྲོ་བའི་ནད་རྣམས་སེལ་བར་ཤོག །བུམ་པ་ཟླུམ་པོ་སྤྲོས་མེད་ཆོས་ཀྱི་དབྱིངས། །ཐུགས་རྗེ་ཆེན་པོས་ཕན་མཛད་ཡུམ་གྱི་ཚུལ། །འཁོར་བ་གནས་སྐྱོབ་དྲི་མ་དག་མཛད་པ། །སྒྲིབ་སེལ་དབང་གི་བཀྲ་ཤིས་བཅུ་གཉིས་པ འོ། །ཀཱ་ལ་ཤ་ཨ་བྷི༴ །ཞེས་བུམ་ཆུས་བཀྲུ་ཞིང་བླུད་དོ། །གསུམ་པ་ཁྱད་པར་གདན་གྱི་དབང་ལ་གསུམ་ལས། དང་པོ་ཟིལ་གནོན་སེང་གེའི་གདན་གཏད་དེ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་སེང་གེའི་དབང་བསྐུར་བས་ལོག་པར་ལྟ་བའི་ཕྱོགས་ཟིལ་གྱིས་ནོན་པར་གྱུར་ཏོ། །དེ་བཞིན་དུ་སེང་གེའི་དབང་བསྐུར་བས་གསུང་རབ་རྒྱ་མཚོའི་སྒྲས་ཐམས་ཅད་ཟིལ་གྱིས་ནོན་ནས་སྟོང་སྤྱི་ཕུད་ཀྱིས་སེམས་ཅན་ཐམས་ཅད་སྐད་ཅིག་ལ་འཚང་རྒྱ་བར་བྱེད་པའི་སྟོན་པ་བཅོམ་ལྡན་འདས་དཔལ་ཀུན་ཏུ་བཟང་པོར་འགྱུར་བའི་དབང་༴ གཟུགས་བཟང་སེམས་ཅན་ཀུན་གྱི་གཙོ་བོ་སྟེ། །ཟིལ་གནོན་སྒྲ་འབྱིན་སྡེར་ཆགས་སྐྲག་པར་བྱེད། །ཕྱོགས་མཐུན་ཀུན་བསྐྱེད་སེང་གེ་དཔལ་དང་ལྡན། །ཐམས་ཅད་ཟིལ་གནོན་དབང་མཆོག་ཐོབ་པར་ཤོག །སེང་གེ་ང་རོ་སྒྲ་ཆེན་ཐོགས་མེད་པས། །འཇིགས་མེད་འཇོམས་པའི་སྒྲ་རྣམས་བསྒྲགས་ནས་ཀྱང་། །བདུད་དཔུང་མ་ལུས་ཟིལ་གྱིས་གནོན་མཛད་པའི། །ཆེ་མཆོག་དབང་གི་བཀྲ་ཤིས་བཅུ་གསུམ་པའོ། །སིདྷ་ས་ན་ཨ་བྷི༴ གཉིས་པ་མུན་སེལ་ཉི་མ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་ཉི་མའི་དབང་བསྐུར་བས་མ་རིག་པའི་མུན་པ་སེལ་བའི་དབང་ཐོབ་པ་གྱུར་ཏོ། །དེ་བཞིན་དུ་ཉི་མའི་དབང་བསྐུར་བས་སྐྱེ་འགྲོ་ཐམས་ཅད་ཀྱི་རྒྱུད་ལ་ཡེ་ཤེས་འཆར་བའི་དབང་དམ་པ༴ ཉི་མ་མུན་སེལ་ཤེས་རབ་སྒྲོན། །ཀུན་ལ་གསལ་བའི་རིན་པོ་ཆེ། །ཐམས་ཅད་ཀུན་གྱི་དཔལ་དུ་ཤར། །མ་རིག་སེལ་བའི་སྒྲོན་མར་ཤོག །ཡེ་ཤེས་སྣང་བ་ཕྱོགས་བཅུར་ཁྱབ་པར་བརྡལ། །ཐུགས་རྗེ་མཆོག་གྱུར་མུན་པ་མཐའ་དག་བསལ། །རང་བཞིན་འོད་གསལ་འགྲོ་བའི་དོན་མཛད་པ། །ཤེས་རབ་དབང་གི་བཀྲ་ཤིས་བཅུ་བཞི་པའོ། །སཱུརྻ་ས་ན་ཨ་བྷི༴ གསུམ་པ་ཚ་སེལ་ཟླ་བ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་ཟླ་བའི་དབང་བསྐུར་བས་ཉོན་མོངས་པའི་གདུང་བ་སེལ་བའི་དབང་ཐོབ་པར་གྱུར་ཏོ། །དེ་བཞིན་དུ་ཟླ་བའི་དབང་བསྐུར་བས་སེམས་ཅན་གྱི་ཉོན་མོངས་པའི་གདུང་བ་ཐམས་ཅད་སེལ་བའི་དབང་དམ་པ༴ ཐམས་ཅད་ཀུན་གསལ་ཆུ་ཤེལ་ལྟ་བུ་སྟེ། །དགོས་པའི་དོན་འབྱིན་དཀར་ལ་དག་པའི་ཚུལ། །ཚད་མེད་ཐབས་མཆོག་ཟླ་བ་རིན་པོ་ཆེ། །མ་རིག་མུན་སེལ་ཡེ་ཤེས་སྒྲོན་མེར་ཤོག །དཀར་ལ་དག་པའི་ཟླ་བ་དྲི་མ་མེད། །ཐབས་ཀྱི་མཚན་ཉིད་སྐྱོན་གྱིས་མ་གོས་ཏེ། །ཡོངས་སུ་དག་པས་མུན་པ་སེལ་བའི་སྨན། །ཐབས་མཆོག་དབང་གི་བཀྲ་ཤིས་བཅོ་ལྔ་པའོ། །ཙནྡྲཱ་ས་ན་ཨ་བྷི༴ བཞི་པ་རྒྱལ་སྲིད་རིན་པོ་ཆེའི་དབང་ལ། རིན་པོ་ཆེ་བདུན་དང་། ཉེ་བའི་རིན་པོ་ཆེ་དགུ་སྟེ་བཅུ་དྲུག་ལས། དང་པོ་འཁོར་ལོ། །སྔོན་འཁོར་ལོས་སྒྱུར་བའི་རྒྱལ་པོ་ཚུལ་ཇི་ལྟ་བུ་དང་ལྡན་ཞེ་ན། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་གསོ་སྦྱོང་གི་ཉི་མ་ལ་ཁྲུས་བྱས་ཏེ། ཕོ་བྲང་གི་སྟེང་འཁོར་གྱི་དབུས་ན་གནས་པའི་ཚེ་ཤར་ཕྱོགས་ཀྱི་ནམ་མཁའ་ལས་འཁོར་ལོ་རྩིབས་སྟོང་ཡོད་པ་ལྟེ་བ་མུ་ཁྱུད་དང་བཅས་པ་གསེར་ལས་གྲུབ་པ། བཟོ་བོས་མ་བྱས་པར་རང་བྱུང་བ་རྒྱལ་པོའི་ལག་པ་གཡས་སུ་བབས་སོ། །དེའི་ཚེ་རྒྱལ་པོས་བསམ་པ། རྟགས་འདི་དང་སྦྱར་ན་བདག་ནི་འཁོར་ལོས་སྒྱུར་བའི་རྒྱལ་པོ་ཡིན་ངེས་སོ་སྙམ་ནས་འཁོར་ལོ་འཕངས་རྗེས་དཔུང་གི་ཚོགས་དང་བཅས་པ་ནམ་མཁར་འགྲོ་བ་ལ། གླིང་བཞིའི་རྒྱལ་པོ་ཐམས་ཅད་ཀྱིས་མདུན་ནས་བསུ་ཞིང་གནས་པའི་ཚེ་ཐམས་ཅད་དགེ་བ་བཅུའི་ལས་ཀྱི་ལམ་ལ་འགོད་པའི་དབང་དང་ལྡན་པར་གྱུར་ཏོ། །དེ་བཞིན་དུ་འཁོར་ལོ་རིན་པོ་ཆེའི་དབང་བསྐུར་བས་འཇིག་རྟེན་གསུམ་གྱི་འགྲོ་བ་མ་ལུས་པ་རྣམ་པར་གྲོལ་བའི་ལམ་ལ་འགོད་པའི་དབང་དམ་པ༴ དུས་གསུམ་རྒྱལ་བས་བསྐོར་བའི་འཁོར་ལོ་འདི། །མི་ཁོམ་རྒྱུན་གཅོད་རྒྱུ་དང་འབྲས་བུ་སྟོན། །འཁོར་ལོས་བསྒྱུར་བའི་དབང་ཕྱུག་རིན་པོ་ཆེ། །བླ་མེད་འཁོར་ལོ་དམ་པ་བསྐོར་གྱུར་ཅིག །སྟོང་ཉིད་ཡེ་ཤེས་གསལ་བའི་འཁོར་ལོ་ལ། །ཆོས་ཉིད་དབྱིངས་ལས་ཕྲིན་ལས་ཅིར་ཡང་སྟོན། །སེམས་ཅན་ཁ་ལོ་གྱེན་དུ་སྒྱུར་མཛད་པ། །ཆོས་འཁོར་དབང་གི་བཀྲ་ཤིས་བཅུ་དྲུག་པའོ། །ཙཀྲ་རཏྣ་ཨ་བྷི༴ གཉིས་པ་རྟ་མཆོག །འཁོར་ལོས་སྒྱུར་བའི་རྟ་མཆོག་རིན་པོ་ཆེ་ནི། རྨ་བྱའི་མགྲིན་པ་ལྟར་སྔོ་བ་རྔོག་མ་དམར་པོ་གླིང་བཞི་ཡུད་ཙམ་གྱིས་འཁོར་བའི་རྫུ་འཕྲུལ་དང་ལྡན་པ་ཞིག་བརྒྱ་བྱིན་གྱིས་བྱིན་ཏོ། །དེ་བཞིན་དུ་རྟ་མཆོག་རིན་པོ་ཆེའི་དབང་བསྐུར་བས་རྫུ་འཕྲུལ་དང་ལྡན་ཞིང་ཤེས་བྱ་ཐམས་ཅད་ལ་ཐོགས་པ་མེད་པའི་དབང་དམ་པ༴ འཁོར་བའི་སྡུག་བསྔལ་ཆུ་བོ་བཞི་ལས་སྒྲོལ། །བརྩོན་འགྲུས་མྱུར་བའི་རྫུ་འཕྲུལ་ཤུགས་ཀྱིས་འགྲོ། །ཅང་ཤེས་སྤྲིན་གྱི་ཤུགས་འཆང་རིན་པོ་ཆེ། །མི་གནས་ཡེ་ཤེས་ཡིད་བཞིན་སྤྱོད་པར་ཤོག །རྫུ་འཕྲུལ་ཐོགས་མེད་ཀུན་ཏུ་མྱུར་བའི་ཤུགས། །ཀུན་ཏུ་བགྲོད་པའི་དོན་ལ་མྱུར་བ་དང་། །རྫུ་འཕྲུལ་སྣ་ཚོགས་ཀུན་ཏུ་སྟོན་མཛད་པའི། །ཐོགས་མེད་དབང་གི་བཀྲ་ཤིས་བཅུ་བདུན་པའོ། །ཏུ་རངྒ་ཨ་ཤྭ་རཏྣ་ཨ་བྷི༴ གསུམ་པ་གླང་ཆེན། འཁོར་ལོས་སྒྱུར་བའི་གླང་པོ་རིན་པོ་ཆེ་ནི། ཁ་དོག་དཀར་པོ་ཡན་ལག་བདུན་དང་ལྡན་པ། ཕ་རོལ་གྱི་གཡུལ་ལས་རྒྱལ་བའི་མཐུ་དང་ལྡན་པ་ཞིག་བརྒྱ་བྱིན་གྱིས་བྱིན་ཏོ། །དེ་བཞིན་དུ་གླང་པོ་རིན་པོ་ཆེའི་དབང་བསྐུར་བས་བླ་མེད་ཐེག་པའི་གཞོན་པ་ལ་བརྟེན་ཏེ་རྒོལ་བ་ཟིལ་གྱིས་གནོན་པའི་དབང་དམ་པ༴ ཐེག་པ་དོན་དམ་བླ་མེད་སྟོན་པའི་མཆོག །ཡན་ལག་བདུན་མཛེས་ཀུ་མུ་དཱ་ཡི་མདོག །གདུལ་དཀའ་སྟོབས་ཆེན་གླང་པོ་རིན་པོ་ཆེ། །ཁྱུ་མཆོག་རླབས་ཆེན་སྟོབས་ལྔ་རྫོགས་པར་ཤོག །སྟོབས་མཆོག་ཕ་རོལ་ནོན་པའི་མཐུ་མངའ་བ། །གདུག་པའི་སྟོབས་ལྡན་གཞན་གྱིས་མི་རྫི་བ། །ཕ་རོལ་རྫུ་འཕྲུལ་མཐུ་སྟོབས་ནོན་མཛད་པའི། །མཐུ་སྟོབས་དབང་གི་བཀྲ་ཤིས་བཅོ་བརྒྱད་པའོ། །ཧསྟི་རཏྣ་ཨ་བྷི༴ བཞི་པ་ནོར་བུ། འཁོར་ལོས་སྒྱུར་བའི་ནོར་བུ་རིན་པོ་ཆེ་ནི། བཻཌཱུརྱའི་རང་བཞིན་ཟུར་བརྒྱད་པ། མུན་པ་སེལ་བ། གང་འདོད་མཐོང་བ། ཅི་བསམ་འབྱུང་བ། དཔག་ཚད་དུ་འོད་ཀྱིས་ཁྱབ་པ་ཞིག་བརྒྱ་བྱིན་གྱིས་བྱིན་ཏོ། །དེ་བཞིན་དུ་ནོར་བུ་རིན་པོ་ཆེའི་དབང་བསྐུར་བས་ཉོན་མོངས་པའི་མུན་པ་བསལ་ཏེ་ལྷག་མཐོང་གི་ཡེ་ཤེས་རྟོགས་པའི་དབང་དམ་པ༴ དཀོན་མཆོག་གསུམ་གྱི་ཡོན་ཏན་རིན་པོ་ཆེ། འཁོར་བའི་མུན་སེལ་བདེ་བའི་སྙིང་པོ་འབྱུང་། །དགོས་པ་མཆོད་སྦྱིན་ནོར་བདུན་ཕུན་སུམ་ཚོགས། །ཡིད་བཞིན་ནོར་བུ་རིན་ཆེན་སྤྱོད་པར་ཤོག །དགོས་འདོད་འབྱུང་བའི་ནོར་བུ་རིན་པོ་ཆེ། །ཐམས་ཅད་ཀུན་གྱི་ཡིད་དང་མཐུན་པ་ཡི། །ཆེ་བའི་ཡོན་ཏན་ཕུན་སུམ་ཚོགས་གྱུར་པའི། །ཡིད་བཞིན་དབང་གི་བཀྲ་ཤིས་བཅུ་དགུ་པའོ། །མ་ཎི་རཏྣ་ཨ་བྷི༴ ལྔ་པ་བློན་པོ། འཁོར་ལོས་སྒྱུར་བའི་བློན་པོ་རིན་པོ་ཆེ་ནི། མཁས་པ་གསལ་བ་ཡིད་གཞུངས་པ་དཔག་ཚད་ཚུན་ཆད་ཀྱི་གཏེར་མཐོང་བ། རྒྱལ་པོའི་དགོས་པ་ཐམས་ཅད་སྒྲུབ་པ་ཞིག་བྱུང་བར་གྱུར་ཏོ། །དེ་བཞིན་དུ་བློན་པོ་རིན་པོ་ཆེ་དབང་བསྐུར་བས་ལྷའི་མིག་རྣམ་པར་དག་པ་ཐོབ་ཅིང་འཕགས་པའི་ནོར་བདུན་དང་ལྡན་པའི་དབང་དམ་པ༴ གང་ལ་ཅི་འདོད་དཔག་བསམ་ཤིང་ལྟ་བུ། །འགྲོ་ལ་སྙིང་བརྩེ་ཚོགས་གཉིས་རྫོགས་པར་སྨོན། །དབང་ཕྱུག་བློན་པོའི་ནོར་བུ་རིན་པོ་ཆེ། །འཁོར་ལོས་སྒྱུར་བའི་རྒྱལ་ཐབས་ཐོབ་པར་ཤོག །མཛངས་པའི་འཕྲུལ་འབྱིན་བློན་པོ་རིན་པོ་ཆེ། །ལེགས་ཉེས་ཀུན་ཕྱེད་དཔྱོད་པའི་དོན་ལ་མཁས། །འགལ་བ་ཆམ་འབེབས་མཛངས་པའི་འཕྲུལ་བག་ཅན། །བློན་པོ་དབང་གི་བཀྲ་ཤིས་ཉི་ཤུ་པའོ། །མ་ཧཱ་ཏ་རཏྣ་ཨ་བྷི༴ དྲུག་པ་བཙུན་མོ། འཁོར་ལོས་སྒྱུར་བའི་བཙུན་མོ་རིན་པོ་ཆེ་ནི། རྒྱལ་རིགས་སུ་སྐྱེས་པ། གཟུགས་མཛེས་པ། བལྟ་ན་སྡུག་པ། མིའི་མདོག་ལས་འདས་པ། བ་སྤུའི་ཁུང་ནས་ཙནྡན་གྱི་དྲི་འབྱུང་བ། ལུས་ལ་རེག་པ་ཙམ་གྱིས་བདེ་བ་སོགས་ཡོན་ཏན་ཐམས་ཅད་དང་ལྡན་པ་ཞིག་བློན་པོས་ཕུལ་ལོ། །དེ་བཞིན་དུ་བཙུན་མོ་རིན་པོ་ཆེའི་དབང་བསྐུར་བས་ཏིང་ངེ་འཛིན་ཞི་བའི་ཆོས་ལ་དབང་འབྱོར་ཏེ་འཇིག་རྟེན་ལས་འདས་པའི་སྤྱོད་ཡུལ་ཡོངས་སུ་དག་པའི་དབང་དམ་པ༴ ཕ་རོལ་ཕྱིན་བཅུས་སེམས་ཅན་སྐྱོབ་པའི་ཕྱིར། །ཤེས་རབ་གཟུངས་འཛིན་བཙུན་མོ་རིན་པོ་ཆེ། །བསྡུ་བ་རྣམ་བཞི་ཚད་མེད་བཞི་པོ་ཡིས། །ཚེ་དང་ལོངས་སྤྱོད་དབང་རྣམས་སྤྱོད་པར་ཤོག །ཤེས་རབ་དབྱིངས་ལས་སྤྲུལ་པའི་ལྷ། །དགོས་པའི་དོན་འགྲུབ་བཙུན་མོ་སྟེ། །སྨོན་ལམ་མཐུ་སྟོབས་འབྲེལ་བ་ཡི། །དབང་གི་བཀྲ་ཤིས་ཉེར་གཅིག་པའོ། །ཝ་ཏི་རཏྣ་ཨ་བྷི༴ བདུན་པ་དམག་དཔོན། འཁོར་ལོས་སྒྱུར་བའི་དམག་དཔོན་རིན་པོ་ཆེ་ནི། མཁས་པ། དཔའ་བ། ཕ་རོལ་གྱི་དཔུང་ཟིལ་གྱིས་གནོན་པའི་དགྲ་འཐབ་ཀྱི་སྦྱོར་བ་ལ་མཁས་པས་བདོ་བ་འཇོམས་ནུས་ཀྱང་གཞན་ལ་མི་འཚེ་བ་ཞིག་བྱུང་བར་གྱུར་ཏོ། །དེ་བཞིན་དུ་དམག་དཔོན་རིན་པོ་ཆེའི་དབང་བསྐུར་བས་འཇིག་ཚོགས་ཀྱི་ལྟ་བའི་རི་བོ་ཉི་ཤུ་འཇོམས་པའི་དབང་དམ་པ༴ གནོད་པའི་དཔུང་འཇོམས་བརྩོན་འགྲུས་གོ་བགོས་ཏེ། །འཇིགས་པའི་སྐྱབས་བྱེད་འགྲོ་ལ་མི་འཇིགས་སྦྱིན། །ཐབས་དང་ཤེས་རབ་ལྡན་པའི་དམག་དཔོན་འདིའི། །མཐུ་སྟོབས་རྫུ་འཕྲུལ་དཔུང་གིས་དེང་བསྲུང་ཤོག །དྲག་ཤུལ་དྲེགས་པས་ཕ་རོལ་འཇོམས་མཛད་པ། །ཉོན་མོངས་མི་ཤེས་གཡུལ་ངོ་སེལ་བྱེད་ཅིང་། །རྣམ་པར་རྟོག་པའི་ཚོགས་ཀྱིས་མི་ཚུགས་པའི། །འདུལ་ཐབས་དབང་གི་བཀྲ་ཤིས་ཉེར་གཉིས་པའོ། །ཁངྒ་རཏྣ་ཨ་བྷི༴ བརྒྱད་པ་ཉེ་བའི་རཏྣ་རལ་གྲི། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་ཡེ་ཤེས་ཀྱི་རལ་གྲིའི་དབང་བསྐུར་བས་ཉོན་མོངས་པའི་དྲྭ་བ་གཅོད་པའི་དབང་ཐོབ་པར་གྱུར་ཏོ། །དེ་བཞིན་དུ་རལ་གྲིའི་དབང་བསྐུར་བས་སྡུག་བསྔལ་གྱི་རྒྱུ་འཁྲུལ་པའི་དྲྭ་བ་གཅོད་པའི་དབང་དམ་པ༴ སྒྲིབ་པའི་དྲྭ་བ་ཀུན་བཅད་དེ། །མི་ཤེས་དྲྭ་བ་གཅོད་ཚུལ་དུ། །རྣོན་པོས་བག་ཆགས་གཅོད་པ་སྟེ། །ཐམས་ཅད་ཀུན་ལས་རྒྱལ་བར་ཤོག །སྒྲིབ་གཉིས་དྲྭ་བ་ཧྲོལ་བྱེད་པ། །ཡེ་ཤེས་རྣོ་བ་ཐོགས་པ་མེད། །མི་ཤེས་བག་ཆགས་གཅོད་བྱེད་པའི། །དབང་གི་བཀྲ་ཤིས་ཉེར་གསུམ་པའོ། །ཁངྒོ་པ་རཏྣ་ཨ་བྷི༴ དགུ་པ་མདའ་གཞུ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་མདའ་གཞུའི་དབང་བསྐུར་བས་ཐབས་ཤེས་འབྲེལ་བའི་དབང་ཐོབ་པར་གྱུར་ཏོ། །དེ་བཞིན་དུ་མདའ་གཞུའི་དབང་བསྐུར་བས་ཐབས་ཤེས་ཟུང་འཇུག་རྣམ་ཐར་རྒྱ་མཚོའི་དབང་དམ་པ༴ རྒོལ་བའི་ཕྱོགས་འཇོམས་མྱུར་བའི་ཤུགས་འཆང་བའི། ཐབས་ཀྱིས་འདུལ་ལ་ཉེས་པས་མ་གོས་ཏེ། །དངོས་པོ་ཀུན་འཇོམས་ཕ་རོལ་འབིགས་བྱེད་པ། །ཐབས་ཀྱིས་འདུལ་བའི་དབང་མཆོག་ཐོབ་པར་ཤོག །ཐབས་ཤེས་དབྱེར་མེད་རང་བཞིན་རོ་གཅིག་པའི། །ཐུགས་རྗེ་མྱུར་མགྱོགས་ཐབས་ཚོགས་འགྲོ་ལ་འབྱུང་། །ཡང་རབ་རྩལ་མཆོག་བློ་གྲོས་རྣམ་པར་གནོན། །ཐབས་ཤེས་དབང་གི་བཀྲ་ཤིས་ཉེར་བཞི་པའོ། །དྷ་ནུ་ཤ་རོ་པ་རཏྣ་ཨ་བྷི༴ བཅུ་པ་གནམ་རལ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་གནམ་རལ་གྱི་དབང་བསྐུར་བས་བར་དུ་གཅོད་པའི་བདུད་བཅོམ་པར་གྱུར་ཏོ། །དེ་བཞིན་དུ་གནམ་རལ་གྱི་དབང་བསྐུར་བས་བདུད་དཔུང་མཐའ་དག་འཇོམས་པའི་དབང་དམ་པ༴ སྟོབས་ལྡན་དབང་ཕྱུག་མཐུ་སྟོབས་ཆེ་བ་ཡི། །བདུད་དཔུང་ཕས་ཀྱི་བདོ་བ་ཀུན་བཏུལ་ནས། །ཆེ་བཙན་དྲག་པོ་ཀུན་ལས་རྒྱལ་བ་དང་། །ཐམས་ཅད་མཐུ་སྟོབས་ཀུན་ལ་དབང་བྱེད་ཤོག །རིན་ཆེན་རྒྱན་མཛེས་གནམ་རལ་རིན་པོ་ཆེ། །ལོག་པའི་ཕྱོགས་ཀུན་ཚར་གཅོད་ཟིལ་གྱིས་གནོན། །ཐབས་ལ་མཁས་པའི་སྡེ་དཔུང་ཆེན་པོ་སྟེ། །རྒྱལ་ཐབས་དབང་གི་བཀྲ་ཤིས་ཉེར་ལྔ་པའོ། །ཁངྒོ་པ་རཏྣ་ཨ་བྷི༴ བཅུ་གཅིག་པ་ཤན་གྲི། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་ཤན་ཉེ་བ་རིན་པོ་ཆེའི་དབང་བསྐུར་བས་འཁོར་བའི་སྒྲིབ་པ་གཅོད་པའི་དབང་ཐོབ་པར་གྱུར་ཏོ། །དེ་བཞིན་དུ་ཤན་ཉེ་བ་རིན་པོ་ཆེའི་དབང་བསྐུར་བས་འཁོར་བའི་སྒྲིབ་པ་གཅོད་པའི་དབང་དམ་པ༴ ཉོན་མོངས་སྒྲིབ་པའི་དྲྭ་བ་གཅོད་པ་དང་། །དངོས་པོ་མཚན་མ་མ་ལུས་གཞོམ་པ་དང་། །མི་ཤེས་རྣམ་པར་རྟོག་པ་བསྒྲལ་བའི་ཕྱིར། །གདུག་པ་འཇོམས་པའི་དབང་རྣམས་ཐོབ་པར་ཤོག །རིན་ཆེན་མཛེས་པའི་ཤན་མཆོག་རིན་པོ་ཆེ། །རྣམ་གཅོད་རྣོ་བས་ཕ་རོལ་ཉེས་པ་གཅོད། །ཡེ་ཤེས་རྣོན་པོ་ཀུན་གྱི་ཡིད་དུ་འོང་། །ཉེས་གཅོད་དབང་གི་བཀྲ་ཤིས་ཉེར་དྲུག་པའོ། །ཀརྟྱུ་པ་རཏྣ་ཨ་བྷི༴ བཅུ་གཉིས་པ་ཞྭ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་ཞྭ་ཉེ་བའི་རིན་པོ་ཆེའི་དབང་བསྐུར་བས་བགེགས་དང་ལོག་འདྲེན་མེད་པ་ཚེའི་དབང་ཐོབ་པར་གྱུར་ཏོ། །དེ་བཞིན་དུ་ཞྭ་ཉེ་བའི་རིན་པོ་ཆེའི་དབང་བསྐུར་བས་བགེགས་དང་བར་ཆད་གང་གིས་ཀྱང་མི་ཚུགས་པ་ཚེ་གཡུང་དྲུང་ལྟ་བུའི་དབང་དམ་པ༴ ཚ་གྲང་བསིལ་འཇམ་དབུ་ཞྭ་འདི། །གདུང་བ་སེལ་བའི་རིན་པོ་ཆེ། །འབྲས་བུ་ཐར་པ་ཐོབ་བྱའི་ཕྱིར། །འཇིགས་པ་བཞི་ཡི་སྐྱབས་སུ་ཤོག །རིན་ཆེན་རྒྱན་མཆོག་དབུ་ཞྭ་རིན་པོ་ཆེ། །འཇིགས་པ་བཞི་སྐྱོབ་ལོག་པའི་སྐྱོན་ལས་གྲོལ། །མི་འགྱུར་གཡུང་དྲུང་ཚེ་ཡི་དབང་ཐོབ་པའི། །གཡུང་དྲུང་དབང་གི་བཀྲ་ཤིས་ཉེར་བདུན་པའོ། །ཁོ་ལོ་པ་རཏྣ་ཨ་བྷི༴ བཅུ་གསུམ་པ་ཁབ་སྐུད། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་ཚངས་པའི་ཁབ་སྐུད་ཀྱི་དབང་བསྐུར་བས་ལེགས་པའི་ཡོན་ཏན་གྲུབ་པའི་དབང་ཐོབ་པར་གྱུར་ཏོ། །དེ་བཞིན་དུ་ཉེ་བའི་རིན་པོ་ཆེ་ཁབ་སྐུད་ཀྱི་དབང་བ་སྐུར་བས་ལེགས་པའི་ཡོན་ཏན་མཐའ་དག་གྲུབ་པའི་དབང་དམ༴ ཚངས་པའི་ཁབ་སྐུད་ཉེ་བའི་བཀྲ་ཤིས་ཏེ། །ལེགས་པའི་ཡོན་ཏན་ཚང་བར་རྫོགས་པའི་དཔལ། །ཉེས་པ་ཀུན་གྲོལ་ལེགས་པའི་རང་བཞིན་ཅན། །ཕུན་སུམ་ཚོགས་པའི་དཔལ་གྱིས་འབྱོར་བར་ཤོག །ཚངས་པའི་ཁབ་སྐུད་ལེགས་པའི་དགོས་པ་གྲུབ། །གང་ལ་ཡིད་དང་འཚམས་པ་དྲུབས་བྱེད་པ། །དོན་གྱི་ཐུགས་རྗེ་ཆེན་པོས་མཚམས་སྦྱོར་བའི། ཁབ་སྐུད་དབང་གི་བཀྲ་ཤིས་ཉེར་བརྒྱད་པའོ། །སཱུ་ཙི་སཱུ་ཏྲོ་པ་རཏྣ་ཨ་བྷི༴ བཅུ་བཞི་པ་ན་བཟའ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་ན་བཟའ་རིན་པོ་ཆེའི་དབང་བསྐུར་བས་གྲང་བའི་སྡུག་བསྔལ་ལས་སྐྱོབ་པའི་དབང་ཐོབ་པར་གྱུར་ཏོ། །དེ་བཞིན་དུ་གོས་རིན་པོ་ཆེའི་དབང་བསྐུར་བས་འདི་ཕྱིར་གྲང་བའི་ཉོན་མོངས་པ་ཞི་བའི་དབང་དམ་པ༴ ཉེས་པ་ཀུན་སྐྱོབ་ན་བཟའ་རིན་པོ་ཆེ། །བདེ་མཆོག་ཡིད་བཞིན་ཟད་པ་མེད་པ་སྟེ། །ཡོན་ཏན་ཚང་བའི་ན་བཟའ་དམ་པ་འདི། །འདི་དང་ཕ་རོལ་གཉིས་སུ་གྱོན་པར་ཤོག །རིན་ཆེན་ན་བཟའ་ཇི་བཞིན་ལྟ་ན་སྡུག །ཆེ་ཆུང་འཚམས་ཤིང་དྲོ་ལ་དབྱིབས་ལེགས་མཛེས། །ཡོན་ཏན་བླ་མེད་འཕགས་པའི་སྐུ་དང་མཚུངས། །ཆོས་རྟགས་དབང་གི་བཀྲ་ཤིས་ཉེར་དགུ་པའོ། །ཝཱ་སོ་པ་རཏྣ་ཨ་བྷི༴ བཅོ་ལྔ་པ་ཕྱགས་མཆོག །སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་ཕྱགས་ཉེ་བ་རིན་པོ་ཆེའི་དབང་བསྐུར་བས་ཐུགས་རྗེ་འགྲོ་བའི་དོན་ལ་གཤེགས་པའི་དབང་ཐོབ་པར་གྱུར་ཏོ། །དེ་བཞིན་དུ་ཕྱགས་ཉེ་བ་རིན་པོ་ཆེའི་དབང་བསྐུར་བས་ཐུགས་རྗེས་འགྲོ་བའི་དོན་ལ་བགྲོད་པའི་དབང་དམ་པ༴ རིན་ཆེན་ཕྱགས་ཀྱིས་དབང་བསྐུར་བས། །ཀུན་ལ་སྙོམས་པའི་ཐུགས་རྗེ་ཡིས། །སེམས་ཅན་དོན་ལ་ཐོགས་མེད་དེ། །འགྲོ་བ་འདྲེན་པའི་དཔལ་དུ་ཤོག །རིན་ཆེན་མཛེས་པའི་ཕྱག་མཆོག་དམ་པ་འདིས། །གར་ཡང་ཐོགས་མེད་ཕྱོགས་བཅུར་བགྲོད་ནས་ཀྱང་། །དོན་རྣམས་མ་ལུས་རྫོགས་པར་བྱ་བ་ཡི། །ཡོངས་ཁྱབ་དབང་གི་བཀྲ་ཤིས་སུམ་ཅུ་པའོ། །མོ་ཙོ་པ་རཏྣ་ཨ་བྷི༴ བཅུ་དྲུག་པ་ཀྲྀཥྞ་སཱ་རའི་པགས་གདན། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་ཀྲྀཥྞ་སཱ་རའི་པགས་པ་རིན་པོ་ཆེའི་དབང་བསྐུར་བས་སྙིང་རྗེའི་སེམས་ཅན་འདྲེན་པའི་དབང་ཐོབ་པར་གྱུར་ཏོ། །དེ་བཞིན་དུ་པགས་པ་རིན་པོ་ཆེའི་དབང་བསྐུར་བས་ཐུགས་རྗེ་འགྲོ་བའི་དོན་རྒྱ་ཆེན་པོ་བྱེད་པའི་དབང་དམ་པ༴ ཀྲྀཥྞ་སཱ་རའི་པགས་པ་མཆོག་ཏུ་ཤིས། །སེམས་ཅན་ཀུན་ལ་སྙོམས་པའི་སྙིང་རྗེ་ཅན། །ཡོན་ཏན་མཐའ་དག་ཚང་བའི་བྱང་ཆུབ་སེམས། །སྙིང་རྗེས་འགྲོ་དོན་དགོངས་པ་འགྲུབ་པར་ཤོག །སྙིང་རྗེ་ཚད་མེད་སེམས་ཅན་ཀུན་ལ་དགོངས། །ཉམ་ཐག་འཕོངས་པ་མགོན་མེད་རྣམས་ཀྱི་སྐྱབས། །སེམས་ཅན་འཁོར་བའི་གནས་ནས་འདྲེན་མཛད་པའི། །འགྲོ་དོན་དབང་གི་བཀྲ་ཤིས་སོ་གཅིག་པའོ། །ཙརྨོ་པ་རཏྣ་ཨ་བྷི༴ ལྔ་པ་བཀྲ་ཤིས་རྫས་ཀྱི་དབང་ལ་བཅུ་དྲུག་ལས། དང་པོ་ཡུངས་ཀར། སྔོན་བཅོམ་ལྡན་འདས་ཀྱིས་ཡུངས་ཀར་བགེགས་ཀྱི་གཉེན་པོར་བྱིན་གྱིས་བརླབས་པ་དེ་བཞིན་དུ་རྫས་འདིས་བགེགས་རིགས་སྟོང་ཕྲག་བརྒྱད་ཅུས་མི་ཚུགས་ཤིང་མཐུ་སྟོབས་ཕུན་སུམ་ཚོགས་པའི་དབང་དམ་པ༴ ཡུངས་ཀར་རྡོ་རྗེའི་རིགས་མཆོག་ཆེན་པོ་སྟེ། །རྟོག་བྲལ་མཉམ་ཉིད་ཡེ་ཤེས་རྡོ་རྗེ་ཡིས། །རྟོག་པའི་བགེགས་རྣམས་རབ་ཏུ་འཇོམས་མཛད་པ། །ཕྱོགས་དུས་ཀུན་ཏུ་བགེགས་རྣམས་ཞི་བར་ཤོག །ཡུངས་ཀར་རྡོ་རྗེས་བགེགས་ཚོགས་འདུལ། །བགེགས་རྣམས་འཇོམས་པའི་མཐུ་སྟོབས་ལྡན། །དགྲ་བགེགས་ཀུན་ལས་རྒྱལ་བ་ཡི། །དབང་གི་བཀྲ་ཤིས་སོ་གཉིས་པའོ། །སཪྵ་པ་དྲ་བྱ་ཨ་བྷི༴ གཉིས་པ་ཞོ། སྔོན་བཅོམ་ལྡན་འདས་ལ་ཁྱིམ་བདག་བཟང་སྐྱོང་གིས་ཞོ་ཕུལ་བ་གཟི་མདངས་དང་ལྡན་པའི་རྫས་སུ་བྱིན་གྱིས་བརླབས་པ་དེ་བཞིན་དུ་ཏིང་ངེ་འཛིན་གྱི་གཟི་བརྗིད་དང་ལྡན་པའི་དབང་དམ་པ༴ ཞོ་ནི་ཀུན་གྱི་སྙིང་པོར་གྱུར་པ་སྟེ། །སྙིང་པོ་རྣམ་དག་བྱང་ཆུབ་སེམས་རྟོགས་ཤིང་། །ཡོན་ཏན་ཀུན་གྱི་སྙིང་པོར་གྱུར་པ་ཡི། །བཀྲ་ཤིས་དེས་ནི་སྙིང་པོ་ཐོབ་པར་ཤོག །ཞོ་ནི་བཅུད་ལྡན་བཀྲ་ཤིས་རྫས་ཀྱི་མཆོག །འདོད་པའི་དོན་འབྱུང་འདོད་འཇོའི་བ་ལས་བྱུང་། །ཉོན་མོངས་འཕོངས་པ་ངོམས་ཤིང་ཚིམ་བྱེད་པ། །བཅུད་ལྡན་དབང་གི་བཀྲ་ཤིས་སོ་གསུམ་པའོ། །ད་དྷི་དྲ་བྱ་ཨ་བྷི༴ གསུམ་པ་དུརྦ། སྔོན་བཅོམ་ལྡན་འདས་ལ་བྲམ་ཟེ་ཀུཎྜ་ལིས་རྩྭ་དུརྦ་ཕུལ་བ་རྒྱུ་ཆུང་ངུ་ལས་འབྲས་བུ་མང་པོ་འབྱུང་བར་བྱིན་གྱིས་བརླབས་པ་དེ་བཞིན་དུ་དགེ་བ་ཆུང་ངུ་ལས་བསོད་ནམས་ཕུན་སུམ་ཚོགས་པ་འཕེལ་བའི་དབང་དམ་པ་ཐོབ་པར༴ དུརྦས་ཚེ་ནི་འཕེལ་བར་བྱེད་པ་སྟེ། །རྡོ་རྗེ་སེམས་དཔའི་ཚེ་ནི་རབ་གྲུབ་པས། །སྐྱེ་ཤི་གཉིས་ཀྱི་སྡུག་བསྔལ་རྒྱུན་ཆད་དེ། །འཆི་བ་མེད་པ་ཚེ་ཡི་རིག་འཛིན་ཤོག །དུརྦའི་རྩ་མཆོག་བསོད་ནམས་མང་པོ་འཕེལ། །བཀྲ་ཤིས་ལོ་འདབ་འབྲས་བུ་ཡང་དག་རྒྱས། །ཡིད་ལ་གང་བསམ་འཕྲལ་དུ་འགྲུབ་བྱེད་པའི། །འདོད་འབྱུང་དབང་གི་བཀྲ་ཤིས་སོ་བཞི་པའོ། །དུརྦཱ་དྲ་བྱ་ཨ་བྷི༴ བཞི་པ་ལི་ཁྲི། སྔོན་བཅོམ་ལྡན་འདས་ལ་སའི་ལྷ་མོ་བརྟན་མས་ལི་ཁྲི་ཕུལ་བ་དབང་གི་རང་བཞིན་དུ་བྱིན་གྱིས་བརླབས་པ་དེ་བཞིན་དུ་ཐུགས་རྗེ་ཆེན་པོས་སེམས་ཅན་རྗེས་སུ་འཛིན་པའི་དབང་དམ་པ་ཐོབ་པར༴ ལི་ཁྲི་དམར་པོ་དབང་གི་རང་བཞིན་ཅན། །ཆོས་རྣམས་མ་ལུས་དབང་དུ་གྱུར་པ་ཡི། །ཆོས་ཀྱི་རྒྱལ་སྲིད་རབ་ཏུ་བརྟན་གྱུར་པའི། །བཀྲ་ཤིས་དེས་ནི་བསྟན་པ་རྒྱས་གྱུར་ཅིག ཁ་དོག་དམར་པོ་ནུབ་ཕྱོགས་པདྨའི་རིགས། །ཆགས་པ་གཉིས་ལྡན་བདག་གཞན་དོན་གཉིས་འགྲུབ། །གསུང་གི་བདག་ཉིད་དོན་སྟོན་བཀྲ་ཤིས་རྫས། །སྐུ་ཚེ་དབང་གི་བཀྲ་ཤིས་སོ་ལྔ་པའོ། །སིནྡྷཱུ་ར་དྲ་བྱ་ཨ་བྷི༴ ལྔ་པ་མེ་ལོང་། སྔོན་བཅོམ་ལྡན་འདས་ཀྱིས་ཀུན་གཞིའི་རྣམ་ཤེས་ལན་གསུམ་གྱི་བར་དུ་གནས་གྱུར་པ་མེ་ལོང་ལྟ་བུའི་ཡེ་ཤེས་བརྙེས་ནས་མངོན་པར་རྫོགས་པ་སངས་རྒྱས་པ་བཞིན་དུ་མེ་ལོང་གི་དབང་བསྐུར་བས་བག་ལ་ཉལ་གྱི་དྲི་མ་ཕྲ་མོའང་རྡོ་རྗེ་ལྟ་བུའི་ཏིང་ངེ་འཛིན་གྱིས་བཅོམ་ནས་མངོན་པར་རྫོགས་པར་འཚང་རྒྱ་བའི་དབང་དམ་པ༴ མེ་ལོང་ཡེ་ཤེས་ཆེན་པོའི་གཟུགས་བརྙན་ཏེ། །ཡེ་ཤེས་རྒྱ་མཚོའི་ཉིད་དུ་དག་གྱུར་ནས། །རྣམ་དག་ཆོས་ལ་ཐོགས་མེད་ལོངས་སྤྱོད་པའི། །བཀྲ་ཤིས་དེས་ནི་སྒྲིབ་པ་དག་གྱུར་ཅིག །མེ་ལོང་གདོང་བསྟན་བྱད་ཀྱི་དྲི་མ་སེལ། །དེ་བཞིན་ཉོན་མོངས་ཤེས་བྱའི་སྒྲིབ་པ་སེལ། །གསལ་ལ་རང་བཞིན་མེད་པའི་ཆོས་ཉིད་ལ། །ཡེ་ཤེས་གསལ་བའི་བཀྲ་ཤིས་སོ་དྲུག་པའོ། །ཨཱ་དཪྴ་དྲ་བྱ་ཨ་བྷི༴ དྲུག་པ་དུང་། སྔོན་བཅོམ་ལྡན་འདས་ལ་བརྒྱ་བྱིན་གྱིས་དུང་གཡས་འཁྱིལ་ཕུལ་བས་གསུང་དབྱངས་ཡན་ལག་དྲུག་ཅུས་ཆོས་ཀྱི་འཁོར་ལོ་བསྐོར་བ་བཞིན་དུ་ཚངས་པའི་སྒྲ་སྐད་ཕུན་སུམ་ཚོགས་པས་ཆོས་སྒྲ་སྒྲོག་པའི་དབང་དམ་པ༴ དུང་ནི་ཆོས་ཀྱི་སྒྲ་རྣམས་སྒྲོག་པའི་ཚུལ། །ཡོན་ཏན་རྒྱ་མཚོ་མཆོག་ཏུ་དག་གྱུར་ནས། །རྣམ་དག་ཆོས་ལ་ཐོགས་མེད་ལོངས་སྤྱོད་པའི། །བཀྲ་ཤིས་དེས་ནི་ཚིག་ལ་དབང་ཐོབ་ཤོག །ཆོས་སྒྲ་ཆེན་པོ་ཕྱོགས་བཅུར་གྲགས་པ་ཡང་། །རྒྱལ་བའི་གསུང་མཆོག་དུང་གི་འབྲས་བུ་སྟེ། །མ་ལུས་འགྲོ་བ་ཀུན་གྱི་རྒྱུད་འགྲོལ་བའི། །གསུང་མཆོག་དབང་གི་བཀྲ་ཤིས་སོ་བདུན་པའོ། །ཤདྑ་དྲ་བྱ་ཨ་བྷི༴ བདུན་པ་གི་ཝཾ། སྔོན་བཅོམ་ལྡན་འདས་ལ་གླང་པོ་ཆེ་ས་སྲུངས་ཀྱིས་གི་ཝཾ་ཕུལ་བ་བདུད་བཞི་ལས་གྲོལ་བར་བྱིན་གྱིས་བརླབས་པ་བཞིན་དུ་ཉོན་མོངས་པའི་ནད་ཐམས་ཅད་ཐར་པའི་དབང་དམ་པ༴ གི་ཝཾ་དུག་གསུམ་འཇོམས་པ་ནད་ཀྱི་སྨན། །སྨན་མཆོག་ཆོས་ཉིད་རབ་ཏུ་རྟོགས་གྱུར་ཏེ། །ཉོན་མོངས་ཟུག་རྔུ་མེད་པར་གྱུར་པ་ཡི། །བཀྲ་ཤིས་དེས་ནི་སྡུག་བསྔལ་ཞི་བར་ཤོག །ཡོན་ཏན་ལྡན་པས་བཞི་བརྒྱ་རྩ་བཞི་སེལ། །སྨན་མཆོག་སྐྱེ་འགྲོ་མ་ལུས་ཀུན་གྱི་གསོས། །བྱིན་གྱིས་བརླབས་པ་བཀྲ་ཤིས་ཚེ་ཡི་རྒྱུ། །ནད་མེད་དབང་གི་བཀྲ་ཤིས་སོ་བརྒྱད་པའོ། །གོ་རོ་ཙ་ན་དྲ་བྱ་ཨ་བྷི༴ བརྒྱད་པ་བིལྦ། སྔོན་བཅོམ་ལྡན་འདས་ལ་ཤིང་གི་ལྷ་མོ་འོད་འཆང་གིས་བིལྦ་ཕུལ་བས་འབྲས་བུའི་ཆོས་རྣམས་ཡོངས་སུ་རྫོགས་པ་དེ་བཞིན་དུ་སྐུ་དང་ཡེ་ཤེས་སྟོབས་དང་མི་འཇིགས་པ་སོགས་འབྲས་བུའི་ཆོས་ཐམས་ཅད་ཡོངས་སུ་རྫོགས་པའི་དབང་དམ་པ༴ བིལྦ་རྒྱུ་རྐྱེན་འབྲས་བུར་བཅས་བའི་ཆོས། །འཇིག་རྟེན་འཇིག་རྟེན་འདས་པའི་སྤྱོད་པ་ཀུན། །བྱང་ཆུབ་སྙིང་པོ་མཆོག་ཏུ་གྱུར་པ་ཡི། །བཀྲ་ཤིས་དེས་ནི་དོན་ཀུན་གྲུབ་པར་ཤོག །ཡལ་ག་ལོ་འདབ་མེ་ཏོག་གཡུ་ལོར་འཁྱིལ། །འབྲས་བུ་ཡིད་འོང་འབྱོར་བའི་ལོངས་སྤྱོད་ལྡན། །འདོད་དགུ་ཀུན་དང་མཐུན་པར་སྤྱོད་པ་ཡི། །ཕུན་ཚོགས་དབང་གི་བཀྲ་ཤིས་སོ་དགུ་པའོ། །བིལྦ་དྲ་བྱ་ཨ་བྷི༴ དགུ་པ་དཔལ་བེའུ། སྔོན་བྱང་ཆུབ་ཀྱི་ཤིང་དྲུང་དུ་བཅོམ་ལྡན་འདས་ལ་བདུད་ཀྱིས་རྒོལ་བའི་ཚེ་ཐུགས་དཔལ་བེའུར་བཀྲ་ཤིས་པ་དེ་བཞིན་དུ་དཔལ་བེའུའི་དབང་བསྐུར་བས་ཐུགས་དཔལ་བེའུར་བཀྲ་ཤིས་པའི་དབང་དམ་པ༴ དཔལ་བེའུ་ཐུགས་ཀྱི་བཀྲ་ཤིས་ཏེ། །འདྲེན་པ་རྣམས་ཀྱི་ཐུགས་ལགས་པས། །བླ་མེད་ཐར་ལམ་དྲང་བའི་ཕྱིར། །ཐུགས་དཔལ་བེའུའི་བཀྲ་ཤིས་ཤོག །གཞན་གྱིས་མི་ཐུབ་ཆེ་བའི་རྟགས་དང་ལྡན། །བདོ་བའི་ཕྱོགས་རྣམས་ཀུན་ལས་ཁྱད་པར་འཕགས། །ཐུགས་ཀ་ཉིད་ལས་མངོན་པར་གསལ་བར་སྟོན། །དཔལ་བེའུ་དབང་གི་བཀྲ་ཤིས་བཞི་བཅུ་པའོ། །ཤྲཱི་བཏྶ་དྲ་བྱ་ཨ་བྷི༴ བཅུ་པ་འཁོར་ལོ། སྔོན་བཅོམ་ལྡན་འདས་ལ་བདུད་ཀྱིས་རྒོལ་བའི་ཚེ་ཕྱག་ཞབས་འཁོར་ལོར་བཀྲ་ཤིས་པ་དེ་བཞིན་དུ་འཁོར་ལོའི་དབང་བསྐུར་བས་ཕྱག་ཞབས་འཁོར་ལོས་མཚན་པའི་དབང་དམ་པ༴ འཁོར་ལོའི་བཀྲ་ཤིས་ཕྱག་ཞབས་མཐིལ། །སྐྱོབ་པ་སངས་རྒྱས་ལྷ་ཡི་ལྷ། །ཉོན་མོངས་སེམས་ཅན་དམན་པའི་གསོས། །ཕྱག་ཞབས་འཁོར་ལོའི་བཀྲ་ཤིས་ཤོག །གཞན་གྱིས་མི་ཐུབ་ཆེ་བའི་རྟགས་དང་ལྡན། །བདོ་བའི་ཕྱོགས་རྣམས་ཀུན་ལས་ཁྱད་པར་འཕགས། །ཕྱག་ཞབས་མཐིལ་ལ་མངོན་པར་གསལ་བར་སྟོན། །འཁོར་ལོ་དབང་གི་བཀྲ་ཤིས་ཞེ་གཅིག་པའོ། །ཙཀྲ་དྲ་བྱ་ཨ་བྷི༴ བཅུ་གཅིག་པ་པདྨ། སྔོན་བཅོམ་ལྡན་འདས་ལ་བདུད་ཀྱིས་རྒོལ་བའི་ཚེ་ལྗགས་པདྨར་བཀྲ་ཤིས་པ་དེ་བཞིན་དུ་པདྨས་དབང་བསྐུར་བས་ལྗགས་པདྨས་མཚན་པའི་དབང་དམ་པ༴ གསུང་མཆོག་པདྨ་ཆོས་ཀྱི་རྒྱལ། །ཉོན་མོངས་མ་གོས་པདྨའི་གསུང་། །ཐམས་ཅད་སྒྲོལ་བའི་གསུང་ལགས་ཏེ། །ལྗགས་མཆོག་པདྨའི་བཀྲ་ཤིས་ཤོག །གཞན་གྱིས་མི་ཐུབ་ཆེ་བའི་རྟགས་དང་ལྡན། །བདོ་བའི་ཕྱོགས་རྣམས་ཀུན་ལས་ཁྱད་པར་འཕགས། །ལྗགས་ཀྱི་མཆོག་ལས་མངོན་པར་གསལ་བར་སྟོན། །པདྨ་དབང་གི་བཀྲ་ཤིས་ཞེ་གཉིས་པའོ། །པདྨ་དྲ་བྱ་ཨ་བྷི༴ བཅུ་གཉིས་པ་རྒྱལ་མཚན། སྔོན་བཅོམ་ལྡན་འདས་ལ་བདུད་ཀྱིས་རྒོལ་བའི་ཚེ་སྐུ་རྒྱལ་མཚན་དུ་བཀྲ་ཤིས་པ་དེ་བཞིན་དུ་རྒྱལ་མཚན་གྱི་དབང་བསྐུར་བས་སྐུ་རྒྱལ་མཚན་གྱིས་མཚན་པའི་དབང་དམ་པ༴ མི་ནུབ་རྒྱལ་མཚན་བརྟན་པའི་སྐུ། །ཐམས་ཅད་བདུད་ཀྱི་སྡེ་བཏུལ་ནས། །དཔུང་བཅོམ་སངས་རྒྱས་སྐུ་གཏོད་དེ། །སྐུ་མཆོག་རྒྱལ་མཚན་བཀྲ་ཤིས་ཤོག །གཞན་གྱིས་མི་ཐུབ་ཆེ་བའི་རྟགས་དང་ལྡན། །བདོ་བའི་ཕྱོགས་རྣམས་ཀུན་ལས་ཁྱད་པར་འཕགས། །སྐུ་ཡི་མཆོག་ལས་མངོན་པར་གསལ་བར་སྟོན། །རྒྱལ་མཚན་དབང་གི་བཀྲ་ཤིས་ཞེ་གསུམ་པའོ། །དྷཱ་ཛ་དྲ་བྱ་ཨ་བྷི༴ བཅུ་གསུམ་པ་བུམ་པ། སྔོན་བཅོམ་ལྡན་འདས་ལ་བདུད་ཀྱིས་རྒོལ་བའི་ཚེ་མགུལ་བུམ་པར་བཀྲ་ཤིས་པ་དེ་བཞིན་དུ་བུམ་པའི་དབང་བསྐུར་བས་མགུལ་བུམ་པས་མཚན་པའི་དབང་དམ་པ༴ བཀྲ་ཤིས་བུམ་པ་དམ་པ་འདིས། །བཅོམ་ལྡན་འདས་ཀྱི་མགུལ་ལགས་ཏེ། །མགུལ་མཆོག་བཀྲ་ཤིས་འདི་བྱིན་པས། །བུམ་པའི་བཀྲ་ཤིས་ཐོབ་པར་ཤོག །གཞན་གྱིས་མི་ཐུབ་ཆེ་བའི་རྟགས་དང་ལྡན། །བདོ་བའི་ཕྱོགས་རྣམས་ཀུན་ལས་ཁྱད་པར་འཕགས། །མགུལ་གྱི་མཆོག་ལས་མངོན་པར་གསལ་བར་སྟོན། །བུམ་པ་དབང་གི་བཀྲ་ཤིས་ཞེ་བཞི་པའོ། །གྷ་ཊ་དྲ་བྱ་ཨ་བྷི༴ བཅུ་བཞི་པ་གདུགས། སྔོན་བཅོམ་ལྡན་འདས་ལ་བདུད་ཀྱིས་རྒོལ་བའི་ཚེ་དབུ་གདུགས་སུ་བཀྲ་ཤིས་པ་དེ་བཞིན་དུ་གདུགས་ཀྱི་དབང་བསྐུར་བས་དབུ་གདུགས་ཀྱིས་མཚན་པའི་དབང་དམ་པ༴ གདུགས་ཀྱིས་ཚ་བའི་སྡུག་བསྔལ་ཀུན་བསལ་ཏེ། །ཉོན་མོངས་མ་ལུས་ཀུན་ལས་རྒྱལ་བ་དང་། །ཆེ་བའི་ཡོན་ཏན་མ་ལུས་རྒྱས་པ་སྟེ། །ལོག་པའི་ཕྱོགས་རྣམས་ཟིལ་གྱིས་གནོན་པར་ཤོག །གཞན་གྱིས་མི་ཐུབ་ཆེ་བའི་རྟགས་དང་ལྡན། །བདོ་བའི་ཕྱོགས་རྣམས་ཀུན་ལས་ཁྱད་པར་འཕགས། །དབུ་སྐྲའི་མཆོག་ལས་མངོན་པར་གསལ་བར་སྟོན། །གདུགས་མཆོག་དབང་གི་བཀྲ་ཤིས་ཞེ་ལྔ་པའོ། །ཚྭ་ཏྲ་དྲ་བྱ་ཨ་བྷི༴ བཅོ་ལྔ་པ་དུང་། སྔོན་བཅོམ་ལྡན་འདས་ལ་བདུད་ཀྱིས་རྒོལ་བའི་ཚེ་ཚེམས་དུང་དུ་བཀྲ་ཤིས་པ་དེ་བཞིན་དུ་དུང་གི་དབང་བསྐུར་བས་ཚེམས་དུང་གིས་མཚན་པའི་དབང་དམ་པ༴ སྙན་པའི་སྒྲ་རྣམས་ཕྱོགས་བཅུར་སྒྲོག་པ་དང་། །མུ་སྟེགས་ལོག་པའི་ཕྱོགས་རྣམས་སྐྲག་བྱེད་ཅིང་། །སེམས་ཅན་ཀུན་གྱི་ཤེས་པ་སྒྲོལ་བའི་ཕྱིར། །གསུང་མཆོག་དུང་གི་རྒྱལ་པོའི་བཀྲ་ཤིས་ཤོག །གཞན་གྱིས་མི་ཐུབ་ཆེ་བའི་རྟགས་དང་ལྡན། །བདོ་བའི་ཕྱོགས་རྣམས་ཀུན་ལས་ཁྱད་པར་འཕགས། །གསུང་གི་མཆོག་ལས་མངོན་པར་གསལ་བར་སྟོན། །དུང་དཀར་དབང་གི་བཀྲ་ཤིས་ཞེ་དྲུག་པའོ། །ཤངྑ་དྲ་བྱ་ཨ་བྷི༴ བཅུ་དྲུག་པ་གསེར་ཉ། སྔོན་བཅོམ་ལྡན་འདས་ལ་བདུད་ཀྱིས་རྒོལ་བའི་ཚེ་ཉྭ་བཞི་ཉར་བཀྲ་ཤིས་པ་དེ་བཞིན་དུ་གསེར་ཉའི་དབང་བསྐུར་བས་ཉྭ་བཞི་ཉས་མཚན་པའི་དབང་དམ་པ༴ ཕྱག་ཞབས་ཉ་རུ་བྱིན་བརླབས་ཏེ། །འཇམ་མཉེན་ཡིད་འོང་ཀུན་གྱི་དཔལ། །ཉོན་མོངས་གནས་ནས་འདྲེན་མཛད་པ། །ཉ་ལྟར་ཉྭ་བཞིའི་བཀྲ་ཤིས་ཤོག །གཞན་གྱིས་མི་ཐུབ་ཆེ་བའི་རྟགས་དང་ལྡན། །བདོ་བའི་ཕྱོགས་རྣམས་ཀུན་ལ་ཁྱད་པར་འཕགས། །ཉྭ་ཤ་བཞི་ལས་མངོན་པར་གསལ་བར་སྟོན། །ཉྭ་བཞི་དབང་གི་བཀྲ་ཤིས་ཞེ་བདུན་པའོ། །སོ་ན་མཏྶ་དྲ་བྱ་ཨ་བྷི༴ དྲུག་པ་ཤེས་བྱར་མ་རྨོངས་པའི་དབང་ལ་བདུན་ལས། དང་པོ་རྒྱ་གྲམ་སྤྱི་བོར། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་སྣ་ཚོགས་རྡོ་རྗེའི་དབང་བསྐུར་བས་ཕྲིན་ལས་བཞི་གྲུབ་པར་གྱུར་ཏོ། །དེ་བཞིན་དུ་རྒྱ་གྲམ་གྱི་དབང་བསྐུར་བས་རིགས་སྔགས་འཆང་རྣམས་ཀྱིས་བསྲུང་ཞིང་ལས་བཞི་ཐོགས་པ་མེད་པར་གྲུབ་པའི་དབང་དམ་པ༴ དོགས་དང་སོམ་ཉི་གཉིས་མེད་ལ། །གཙུག་ཏུ་རྒྱ་གྲམ་དབང་བསྐུར་བས། །རྡོ་རྗེ་འཛིན་པ་རྣམས་ཀྱིས་ཀྱང་། །བསྲུང་ཞིང་རྟག་ཏུ་སྐྱོབ་པར་ཤོག །ཕྲིན་ལས་ཐོགས་པ་མེད་པ་ཡི། །བྱ་བ་ནན་ཏན་ཡེ་ཤེས་ལ། །དགོས་པའི་དོན་རྣམས་ཀུན་གྲུབ་པའི། །དབང་གི་བཀྲ་ཤིས་ཞེ་བརྒྱད་པའོ། །ༀ་ཀརྨ་ཨ་བྷི༴ གཉིས་པ་ཅོད་པན་སྤྱི་བོར། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་ཅོད་པན་གྱི་དབང་བསྐུར་བས་འཁོར་འདས་ཀྱི་ཆོས་ཐམས་ཅད་ལ་དབང་བསྒྱུར་བར་གྱུར་ཏོ། །དེ་བཞིན་དུ་ཅོད་པན་གྱི་དབང་བསྐུར་བས་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ལ་མངའ་བསྒྱུར་བའི་དབང་དམ་པ༴ བཀྲ་ཤིས་རྟགས་ལྡན་དར་གྱི་ཅོད་པན་འདི། །དབང་གི་རང་བཞིན་དམར་པོ་འབར་བ་སྟེ། །དབང་བསྐུར་སྤྱི་བོར་བཏགས་པའི་ཡོན་ཏན་གྱིས། །དབང་གི་བཀྲ་ཤིས་དམ་པ་ཐོབ་པར་ཤོག །ཆོས་ཉིད་དར་དང་འདྲ་བ་མཚུངས་པ་ཡི། །དོན་དམ་ཉིད་དུ་རྟོགས་པ་མངོན་བྱུང་བ། །འདི་ཉིད་ལེགས་པའི་དོན་ཉིད་མངོན་སྟོན་པ། །ཅོད་པན་དབང་གི་བཀྲ་ཤིས་ཞེ་དགུ་པའོ། །ༀ་མུ་ཀུ་ཊ་ཨ་བྷི༴ གསུམ་པ་མཆོད་རྫས་གཏད་དེ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་མཆོད་པ་རྣམ་པ་ལྔའི་དབང་བསྐུར་བས་རྡོ་རྗེ་རྒྱལ་ཐེབ་ཀྱི་དབང་ཐོབ་པར་གྱུར་ཏོ། །དེ་བཞིན་དུ་མཆོད་རྫས་ཀྱི་དབང་བསྐུར་བས་རྡོ་རྗེ་རྒྱལ་ཐེབ་དང་ལས་མཐའ་དག་བྱེད་པའི་དབང་དམ་པ༴ ཐབས་ཆེན་སྟོབས་ལྡན་མཆོད་འོས་རྣམ་པ་སྟེ། །དམིགས་པ་ལྔ་དང་ཏིང་འཛིན་ཆ་སྦྱར་བ། །རྐྱེན་དང་འཚམས་པའི་མཆོད་པ་དམ་པ་འདི། །ཐམས་ཅད་ཕུལ་བས་སྟོབས་མཆོག་བཀྲ་ཤིས་ཤོག །དྲི་ཆབ་དྲི་བསྲུང་མེ་ཏོག་མཛེས་པར་བཀྲམ། །བདུག་སྤོས་ཡིད་ཚིམ་ཨརྒྷ་བདུད་རྩིའི་ཆབ། །ལྷ་བཤོས་བྲོ་ལྡན་འོད་གསལ་མར་མེ་སྟེ། །མཆོད་རྫས་དབང་གི་བཀྲ་ཤིས་ལྔ་བཅུ་པའོ། །སརྦ་པཱུ་ཛ་ཨ་བྷི༴ བཞི་པ་ཉན་དབང་རྒྱུད་ཀྱི་པུསྟི། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་ཉན་དབང་བསྐུར་བས་སྔགས་རྒྱུད་མཐའ་དག་ཉན་པའི་དབང་ཐོབ་པར་གྱུར་ཏོ། །དེ་བཞིན་དུ་ཀ་བ་ལིའི་དབང་བསྐུར་བས་སྔགས་རྒྱུད་མཐའ་དག་ཉན་པའི་དབང་དམ་པ༴ གདུང་བའི་སེམས་བསྐྱེད་དད་པའི་ཤུགས་ཕྱུངས་ནས། །བརྩོན་འགྲུས་ཤུགས་ཀྱིས་ཐམས་ཅད་ཐོས་པ་དང་། །དད་པའི་ཤུགས་ཀྱིས་ཀུན་ཏུ་ཉན་པ་དང་། །ཤེས་རབ་སྟོབས་ཀྱིས་ཐམས་ཅད་ཤེས་པར་ཤོག །ཤེས་རབ་རྒྱ་ཆེས་ཕྱོགས་མེད་མཉན་པར་བྱེད། །བདེ་བར་གཤེགས་པའི་བཀའ་བཞིན་རྗེས་སུ་སློབ། །སེམས་དང་ཆོས་ཉིད་གཉིས་སུ་མེད་པ་ཡི། །ཉན་པའི་དབང་གི་བཀྲ་ཤིས་ང་གཅིག་པའོ། །ༀ་བཛྲ་པུསྟ་ཀ་ཨ་བྷི༴ ལྔ་པ་འཆད་དབང་གི་ཕྱག་ཤིང་། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་ཕྱག་ཤིང་གི་དབང་བསྐུར་བས་ཐེག་པ་མཐའ་དག་འཆད་པའི་དབང་ཐོབ་པར་གྱུར་ཏོ། །དེ་བཞིན་དུ་ཕྱག་ཤིང་གི་དབང་བསྐུར་བས་ཐེག་པ་མཐའ་དག་འཆད་པའི་དབང་དམ་པ་ཐོབ་པར་གྱུར་ཅིག །རིན་ཆེན་ཕྱག་ཤིང་འཁོར་བའི་ཁ་ལོ་འདྲེན། །འགྲོ་བ་མ་ལུས་ཐར་ལམ་གནས་སུ་སྐྱེལ། །སྐྱེས་མཆོག་དུག་གསུམ་སྨན་པའི་རྒྱལ་པོ་སྟེ། །མ་རིག་རྨོངས་པའི་འགྲོ་ཀུན་འདྲེན་པར་ཤོག །གཏི་མུག་རྨོངས་པའི་ཤེས་པ་བཀྲོལ་ནས་ཀྱང་། །མི་རིག་ལོག་པར་རྟོག་པ་གྲོལ་བར་མཛད། །ཐུགས་རྗེ་ཆེན་པོས་ཤེས་པའི་རྒྱུད་འགྲོལ་བའི། །ཆོས་འཆད་དབང་གི་བཀྲ་ཤིས་ང་གཉིས་པའོ། །ༀ་དྷརྨ་གཎྜཱི་ཨ་བྷི་ཥིཉྩ་ཧཱུཾ། དྲུག་པ་འཆད་པའི་པུསྟི། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་གླེགས་བམ་གྱི་དབང་བསྐུར་བས་ཆོས་སྒོ་ཐམས་ཅད་འཆད་པ་ལ་མཁས་པའི་དབང་ཐོབ་པར་གྱུར་ཏོ། །དེ་བཞིན་དུ་གླེགས་བམ་གྱི་དབང་བསྐུར་བས་ཆོས་ཀྱི་སྒོ་ཐམས་ཅད་འཆད་པ་ལ་མཁས་པའི་དབང་དམ་པ༴ གསུང་རབ་གླེགས་བམ་ཆོས་ཀྱི་གཟུགས་བརྙན་ཏེ། །ལེགས་པའི་ཡོན་ཏན་མ་ལུས་བསྐྱེད་མཛད་པས། །ཐམས་ཅད་ཀུན་གྱི་དབང་པོ་སྒྲོལ་བའི་ཕྱིར། །ཆོས་རྣམས་ཐམས་ཅད་འཆད་པའི་དབང་ཐོབ་ཤོག །གསུང་རབ་ཆོས་འཆད་གཞུང་མཆོག་གླེགས་བམ་སྟེ། །ཆོས་ཉིད་སྒྲ་སྒྲོག་ཡི་གེའི་ཕྲེང་བ་བཀོད། །རབ་འབྲིང་ཐ་མའི་བློ་དང་འཚམས་པར་སྟོན། །གླེགས་བམ་དབང་གི་བཀྲ་ཤིས་ང་གསུམ་པའོ། །ༀ་དྷརྨ་པུསྟ་ཀ་ཨ་བྷི༴ བདུན་པ་འཆད་པའི་རྡོར་དྲིལ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་རྡོ་རྗེ་དང་དྲིལ་བུའི་དབང་བསྐུར་བས་ཡེ་ཤེས་ལྔ་དང་ཆོས་ཀྱི་དབྱིངས་ཀྱི་དོན་རྟོགས་ནས་འགྲོ་བའི་དོན་བྱེད་པར་གྱུར་ཏོ། དེ་བཞིན་དུ་རྡོར་དྲིལ་གྱི་དབང་བསྐུར་བས་དབྱིངས་དང་ཡེ་ཤེས་ཀྱི་དོན་རྟོགས་ནས་འགྲོ་དོན་བྱེད་པའི་དབང་དམ་པ༴ དབྱིངས་དང་ཡེ་ཤེས་གཉིས་མེད་ཆོས་ཀྱི་སྐུ། །འདུ་འབྲལ་མེད་པ་ཆོས་ཀྱི་དབང་མཆོག་སྟེ། །འབྲས་བུ་སྟོབས་ལྡན་ཕྱག་རྒྱ་ཆེན་པོ་ཉིད། །རྡོ་རྗེ་དྲིལ་བུ་འཆང་བའི་དབང་ཐོབ་ཤོག །རིག་པ་ཡེ་ཤེས་རྡོ་རྗེ་རྩེ་ལྔ་པ། །ཡེ་ཤེས་ལྔ་ཡི་རྟགས་ཀྱི་ངོ་བོ་ཉིད། །གཡོན་པའི་དྲིལ་བུས་གསུང་རབ་རྒྱ་མཚོ་སྒྲོག །ཐབས་ཤེས་དབང་གི་བཀྲ་ཤིས་ང་བཞི་པའོ། །ༀ་པྲ་ཛྙཱོ་པ་ཡ་བཛྲ་གྷཎྜེ་ཨ་བྷི༴ བདུན་པ་མཛེས་པ་རྒྱན་ཆས་ཀྱི་དབང་ལ་དྲུག་ལས། དང་པོ་དབུ་རྒྱན། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་དབུ་རྒྱན་གྱི་དབང་བསྐུར་བས་ཆོས་ཀྱི་རྒྱལ་སྲིད་ཆེན་པོ་ལ་མངའ་བརྙེས་པར་གྱུར་ཏོ། །དེ་བཞིན་དུ་རིན་པོ་ཆེའི་དབུ་རྒྱན་གྱི་དབང་བསྐུར་བས་ཆོས་ཀྱི་རྒྱལ་སྲིད་འཛིན་པའི་དབང་དམ་པ༴ མྱ་ངན་འདས་པ་ཐུགས་རྗེའི་དཔལ། །རིན་ཆེན་དབུ་རྒྱན་ཆོས་ཀྱི་རྒྱལ། །དབང་དང་བྱིན་རླབས་སྦྱིན་པ་ཡིས། །ཆོས་ཀྱི་རྒྱལ་སྲིད་བྱེད་པར་ཤོག །རིན་ཆེན་སྣ་ཚོགས་མཛེས་པའི་དབུ་རྒྱན་ཅན །ལེགས་པར་ཀུན་སྐྱོབ་ཆོས་ཀྱི་རྒྱལ་སྲིད་མཐུ། །ཕྱག་རྒྱ་རིགས་ལྔ་མཐུ་དང་ལྡན་བྱེད་པའི། །དབུ་རྒྱན་དབང་གི་བཀྲ་ཤིས་ང་ལྔ་པའོ། །རཏྣ་མ་ཎྜཱི་ཨ་བྷི༴ གཉིས་པ་དཔུང་རྒྱན། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་རིན་པོ་ཆེའི་དཔུང་རྒྱན་གྱི་དབང་བསྐུར་བས་མི་འཇིགས་པ་བཞི་ལ་མངའ་བརྙེས་པར་གྱུར་ཏོ། །དེ་བཞིན་དུ་དཔུང་རྒྱན་གྱི་དབང་བསྐུར་བས་མི་འཇིགས་པ་བཞི་ལ་མངའ་བརྙེས་པའི་དབང་དམ་པ༴ མི་འཇིགས་ཕས་ཀྱི་རྒོལ་བ་ཐུལ་བ་དང་། །མཛེས་པའི་རྒྱན་མཆོག་བཀྲ་ཤིས་ཐུབ་པ་ཡི། །མངའ་མཛེས་ཕུང་པོའི་རྟགས་ཀྱི་དམ་པ་སྟེ། །རྒྱན་མཆོག་དམ་པ་སྟོན་པའི་དབང་ཐོབ་ཤོག །རིན་ཆེན་དཔུང་རྒྱན་ཤ་རི་ར་ཡི་རྒྱན། །ཆོས་ཉིད་དོན་རྟོགས་མཐུན་པར་བསྟན་པའི་ཕྱིར། །དགོངས་པ་ཏིང་འཛིན་ལེགས་པར་དབང་བསྐུར་བས། །དཔུང་རྒྱན་དབང་གི་བཀྲ་ཤིས་ང་དྲུག་པའོ། །རཏྣ་ཀེ་ཡཱུ་ར་ཨ་བྷི༴ གསུམ་པ་ཞབས་གདུབ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་ཞབས་གདུབ་ཀྱི་དབང་བསྐུར་བས་སྟོབས་བཅུ་ལ་མངའ་བརྙེས་པར་གྱུར་ཏོ། །དེ་བཞིན་དུ་ཞབས་གདུབ་ཀྱི་དབང་བསྐུར་བས་སྟོབས་བཅུ་ལ་མངའ་བརྙེས་པའི་དབང་དམ་པ༴ རྒྱན་གྱི་བྱེ་བྲག་རྒྱལ་པོའི་ཚུལ། །རྡོ་རྗེ་ཞབས་ཀྱི་ཆས་རབ་འདི། །ཁྱོད་ཀྱི་ཞབས་ལ་དབང་བསྐུར་བས། །འགྲོ་བའི་དོན་ལ་ཆགས་པར་ཤོག །རིན་ཆེན་ཞབས་གདུབ་དམ་པ་འདི། །ལེགས་པར་མཛེས་པའི་ཡོན་ཏན་གྱིས། །ངེས་པར་ལེགས་པའི་དགོངས་པ་འགྲུབ། །དབང་གི་བཀྲ་ཤིས་ང་བདུན་པའོ། །རཏྣ་ནཱུ་པུ་ར་ཨ་བྷི༴ བཞི་པ་ཕྱག་གདུབ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་ཕྱག་གདུབ་ཀྱི་དབང་བསྐུར་བས་ཚུལ་ཁྲིམས་རྣམ་པར་དག་པ་ལ་མངའ་བརྙེས་པར་གྱུར་ཏོ། །དེ་བཞིན་དུ་ཕྱག་གདུབ་ཀྱི་དབང་བསྐུར་བས་ཚུལ་ཁྲིམས་རྣམ་པར་དག་པའི་དབང་དམ་པ༴ སིལ་སྙན་མཛེས་པའི་རྒྱན་ལགས་ཏེ། །ཡིད་འོང་འཁྲོལ་བའི་ཕྱག་གདུབ་འདི། །འབྲས་བུ་ཐོབ་པའི་དབང་མཆོག་སྟེ། །འགྲོ་བའི་ཡིད་དུ་འོང་བར་ཤོག །རིན་ཆེན་ཕྱག་གདུབ་དམ་པ་འདི། །ལེགས་པར་མཛེས་པའི་ཡོན་ཏན་གྱིས། །ངེས་པར་ལེགས་པའི་དགོངས་པ་འགྲུབ། །དབང་གི་བཀྲ་ཤིས་ང་བརྒྱད་པའོ། །རཏྣ་རུ་ཙ་ཀ་ཨ་བྷི༴ ལྔ་པ་དོ་ཤལ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་དོ་ཤལ་གྱི་དབང་བསྐུར་བས་ཆེ་བའི་ཡོན་ཏན་རྒྱས་པ་ལ་མངའ་བརྙེས་པར་གྱུར་ཏོ། །དེ་བཞིན་དུ་དོ་ཤལ་གྱི་དབང་བསྐུར་བས་ཆེ་བའི་ཡོན་ཏན་རྒྱས་པའི་དབང་དམ་པ༴ རིན་ཆེན་ཕྲེང་བས་འགྲོ་བའི་རེ་བ་སྐོང་། །ཕྲེང་བ་དོ་ཤལ་འགྲོ་བའི་དོན་མཛད་པ། །ཡོན་ཏན་ཚང་བའི་རྒྱན་མཆོག་དམ་པ་འདིས། །འབྲས་བུ་ཡིད་བཞིན་ཡོན་ཏན་ཐོབ་པར་ཤོག །རིན་ཆེན་དབང་པོ་རྒྱས་པའི་ཡོན་ཏན་མཆོག །སྐུ་ཚེ་ཞིང་ཁམས་མཛད་པ་བསམ་མི་ཁྱབ། །འགྲོ་བའི་དབུལ་སེལ་བདེ་ལེགས་ཀུན་འབྱུང་བའི། །ཕྲེང་བ་དབང་གི་བཀྲ་ཤིས་ང་དགུ་པའོ། །རཏྣ་མཱ་ལ་ཨ་བྷི༴ དྲུག་པ་དར་གྱི་ཅོད་པན། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་དར་གྱི་ཅོད་པན་གྱི་དབང་བསྐུར་བས་འཁོར་འདས་ཀྱི་ཆོས་ལ་དབང་ཐོབ་པ་གྱུར་ཏོ། །དེ་བཞིན་དུ་དར་གྱི་ཅོད་པན་གྱི་དབང་བསྐུར་བས་འཁོར་འདས་མཉམ་པ་ཉིད་དུ་རྟོགས་པའི་དབང་དམ་པ༴ དར་དཔྱངས་གྱེན་དུ་འཕུར་བ་ནི། །ཆོས་ཀྱི་སྐུ་དང་གཉིས་སུ་མེད། །འཕྲེད་དང་མཐུར་དུ་འཕྱང་བས་ནི། །གཟུགས་ཀྱི་སྐུ་གཉིས་ཐོབ་པར་ཤོག །དམར་པོ་གཡས་འཕུར་ཆོས་ཉིད་དོན་རྟོགས་ཤིང་། །སྔོན་པོ་འཕྲེད་འཕུར་ཕྲིན་ལས་རྣམ་བཞི་མཛད། །མཐིང་ག་མར་འཕྱང་ཀླུ་གདུག་ཟིལ་གནོན་པའོ། །དར་དཔྱངས་དབང་གི་བཀྲ་ཤིས་དྲུག་བཅུ་པའོ། །པ་ཊ་ཨ་བ་ལམྦ་ན་ཨ་བྷི༴ བརྒྱད་པ་མིང་གི་དབང་ལ་གཉིས་ལས། དང་པོ་རྒྱུའི་མིང་ནི། སྔར་བཏགས་པའི་མིང་བཅུག་ལ། སྔོན་རི་རབ་ཀྱི་རྩེར་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ་རྡོ་རྗེ་མིང་གི་དབང་བསྐུར་བས་རིགས་ངེས་པའི་སྲས་སུ་གྱུར་ཏེ་རྡོ་རྗེ་འཆང་གི་གྲལ་ཐོབ་པར་གྱུར་ཏོ། །དེ་བཞིན་དུ་འདི་ཞེས་བྱ་བའི་སྲས་སུ་འགྱུར་བའི་དབང་དམ་པ༴ རྡོ་རྗེ་མིང་མཆོག་དམ་པའི་དཔེ་ལས་གྲས། །ཐུགས་ལས་གསུང་དུ་ཕྱུངས་ནས་བཏགས་པ་འདི། །དག་ཅིང་ཚུལ་བཞིན་ཡིད་ལ་བསྐུར་བ་ཡིས། །ཐམས་ཅད་སྟོན་པའི་མིང་མཆོག་ཐོབ་པར་ཤོག །སྟོན་པའི་ཐུགས་རྗེས་ངེས་པའི་མིང་བཏགས་པ། །ཐུགས་ཀྱི་ངང་ནས་ངེས་པའི་སྲས་སུ་མཛད། །རྡོ་རྗེ་འཆང་གི་གྲལ་ཐོབ་མིང་གི་དབང་། །མཚན་མཆོག་དབང་གི་བཀྲ་ཤིས་རེ་གཅིག་པའོ། །བཛྲ་ནཱ་མ་ཨ་བྷི༴ གཉིས་པ་འབྲས་བུའི་མིང་ནི། སྔོན་བྱང་ཆུབ་སེམས་དཔའ་དོན་ཐམས་ཅད་གྲུབ་པ་ལ་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་མངོན་པར་བྱང་ཆུབ་པ་ལྔས་དབང་བསྐུར་བའི་འབྲས་བུ་རིན་པོ་ཆེའི་ཁང་བུ་འབར་བར་རྣམ་པར་སྣང་མཛད་རྡོ་རྗེའི་དབྱིངས་སུ་མངོན་པར་རྫོགས་པར་སངས་རྒྱས་པར་གྱུར་ཏོ། །དེ་བཞིན་དུ་མངོན་པར་བྱང་ཆུབ་པ་ལྔས་དབང་བསྐུར་བས་འབྲས་བུ་སྟུག་པོ་བཀོད་པར་རྡོ་རྗེ་དབྱིངས་ཞེས་བྱ་བའི་དེ་བཞིན་གཤེགས་པར་མངོན་པར་འཚང་རྒྱ་བའི་དབང་དམ་པ་ཐོབ་པར་གྱུར་ཅིག །མངོན་ཤེས་ལྔ་ལྡན་འབྲས་བུ་ས་བཅུ་འདས། །ཡི་གེ་འཁོར་ལོ་རྫོགས་པ་ཆེ་ལ་གནས། །འབྲས་བུ་དམ་པ་མངོན་པར་སངས་རྒྱས་ཏེ། །ལོངས་སྤྱོད་རྫོགས་པའི་དབང་མཆོག་ཐོབ་པར་ཤོག །དབང་མཆོག་ཐམས་ཅད་ཡོངས་སུ་རྫོགས་པ་ཡི། །ཆོས་རྣམས་ཐམས་ཅད་མ་ལུས་ཐོབ་པར་སྟེ། །རྡོ་རྗེ་རྒྱལ་པོའི་དབང་མཆོག་དེར་རྫོགས་པས། །ཕྱི་དབང་རྫོགས་པའི་བཀྲ་ཤིས་རེ་གཉིས་པའོ། །སཾ་བུདྡྷ་ནཱ་མ་ཨ་བྷི་ཥིཉྩ་ཧཱུཾ། ཙིཏྟ་པྲ་ཏི། བཻ་རོ་ཙ་ན། ཡ་ཐ་ཙིཏྟ་། ཏ་ཐཱ་ཙིཏྟ། ཨ་ཧཾ་ཙིཏྟ། ༀ་ཧཱུཾ་ཏྲཱཾ་ཧྲཱིཿཨཱཿ ཨ་བྷི་ཥིཉྩ་ཧཱུཾ། ཞེས་བསྐུར་རོ། །དེ་ལྟར་ཡོ་གའི་ཐེག་པའི་དབང་བསྐུར་བས། །མདོ་རང་ལུགས་ཀྱི་སྒོམ་ལམ་ལུང་ཆེན་ཐོབ་པའི་རྣལ་འབྱོར་དམིགས་པས་འབྲས་བུ་སྐྱེ་བའི་ས་ནོན་པ་དང་རིགས་འགྲེའི་ཡོན་ཏན་གསོས་ཐེབས། ལྷན་ཅིག་གནས་པའི་སྒྲིབ་པ་དག །ལམ་གོང་མ་ལ་སྦྱོར་བའི་མི་འགྱུར་བ་བྱང་ཆུབ་ཀྱི་སེམས་སྐྱེས། གནས་སྐབས་སུ་རྣལ་འབྱོར་ཕྱི་པའི་སྔགས་དང་རྒྱུད་རྣམས་སྤྱོད་པ་ལ་དབང་ཞིང་། མཐར་ཐུག་རྫོགས་པའི་སངས་རྒྱས་ཀྱི་རྒྱལ་ཚབ་རིགས་ལྔ་སྟུག་པོ་བཀོད་པའི་ས་ནོན་པའི་རྟོགས་རིགས་དང་འདྲ་བའི་ཡོན་ཏན་ཁྱད་པར་ཅན་ཐོབ་པའི་སྐལ་པ་ཅན་དུ་བྱས་པ་ཡིན་ནོ། །རྗེས་ཀྱི་བྱ་བ་ལ་སྤྱི་དོན་གསུམ་སྟེ། །ལམ་ཁྱེར་བཞི་བསྟན་པ། འགག་དྲུག་བཤད་པ། གདམས་ངག་ངང་སྒོམ་གྱི་ཁྲིད་གདབ་པའོ། །སྤྱི་དོན་དང་པོ་ལམ་ཁྱེར་ལ་བཞི་ལས། དང་པོ་ཐེག་པ་ལམ་ཁྱེར་ནི། ཡོ་གའི་ཐེག་པ་སྟེ། དེ་ལའང་དྲུག་ལས། འཇུག་སྒོ་ནི། མཚན་བཅས་དང་མཚན་མེད་ཀྱི་ཏིང་ངེ་འཛིན་གྱི་སྒོ་ནས་འཇུག །ལྟ་བ་ནི། དོན་དམ་མཚན་མ་མེད་པའི་ཆོས་ཉིད་རང་བཞིན་གྱིས་འོད་གསལ་བར་རྟོགས་པས། དེའི་བྱིན་རླབས་ཀུན་རྫོབ་རྡོ་རྗེའི་དབྱིངས་ཀྱིས་འཁོར་དུ་རང་སྣང་བར་འདོད་དེ། ལྟ་རིམ་ལས། ཡོ་ག་དོན་དམ་རྣམ་དག་པའི། །ཆོས་ཀྱི་དབྱིངས་ཀྱི་ཡེ་ཤེས་སུ། །རྟོགས་པའི་བྱིན་རླབས་ལྷར་སྣང་བ། །དེ་ཕྱིར་སྐྱེ་བོ་ལྟར་མཐོང་འཁྲུལ། །ཞེས་གསུངས། ཚུལ་ཁྲིམས་ནི། བཤད་རྒྱུད་གཙོ་བོར་བྱས་པ་རིགས་ལྔའི་དམ་ཚིག་དང་། རྩ་རྒྱུད་གཙོ་བོར་བྱས་པ་ལྷ་ལྔའི་དམ་ཚིག་གཉིས་གསུངས་ཤིང་། དེ་ཡང་རྟེན་གྱི་གང་ཟག་གི་བློ་རིམ་དང་འཚམས་པར་བསླབ་པ་སྟེ། རྩེ་མོ་ལས། གལ་ཏེ་རབ་ཏུ་བྱུང་བ་ན། །སྡོམ་པ་གསུམ་ལ་གནས་པར་བྱ། །སོ་སོ་ཐར་དང་བྱང་ཆུབ་སེམས། །རིག་འཛིན་ནང་གི་སྡོམ་པའོ། །ཁྱིམ་པའི་ཚུལ་དུ་བྱ་བ་ནི། །རིགས་ལྔ་རྒྱལ་པོ་རྟག་ཏུ་བསྲུང་། །ཞེས་སོ། །སྒོམ་པ་ནི། འབྲས་བུ་སངས་རྒྱས་ཀྱི་སའི་རྣམ་པ་ལམ་བྱེད་མངོན་བྱང་ལྔ་སོགས་ཀྱིས་དཀྱིལ་འཁོར་གྱི་འཁོར་ལོ་ཕྱག་རྒྱ་བཞིས་རྒྱས་བཏབ་ནས་བསྒོམ་ཞིང་། ཐུན་མཐར་ཕྱག་རྒྱ་བཀྲོལ་ནས་ཡེ་ཤེས་པ་གཤེགས་སུ་གསོལ་བ་ལ་སོགས་པ་སྟེ། དེའང་རང་ཤར་ལས། ལྷ་དང་རྣལ་འབྱོར་བདག་ཉིད་ཀྱང་། །སྤུན་དང་གྲོགས་པོའི་ཚུལ་དུ་འདོད། །ཅེས་པས་བདག་དམ་ཚིག་པ་དང་ལྷ་ཡེ་ཤེས་པ་གཉིས་མཆོག་དམན་མེད་པར་བལྟ་བ་སྤྱོད་རྒྱུད་ཁྱད་པར་ཅན་ནམ་ཡོ་ག་ཙམ་པོའི་སྒྲུབ་ཚུལ་དང་། བློ་ཆེན་བདག་ཉིད་དམ་ཚིག་པར་བསྐྱེད་པ་ལ་ཡེ་ཤེས་པ་བཅུག་སྟེ་གཉིས་སུ་མེད་པར་སྒྲུབ་པ་ཡོ་ག་ཁྱད་པར་ཅན་གྱི་རྣལ་འབྱོར་གང་རུང་ལ་བརྟེན་ནས་དངོས་གྲུབ་སྒྲུབ་པའོ། །སྤྱོད་པ་ནི། ལས་ཚོགས་ཀྱི་སྐབས་འགའ་རེ་མ་གཏོགས་གཙང་སྦྲ་དང་དཀའ་སྤྱད་སོགས་ལ་གཙོ་བོར་མི་བརྟེན་ཅིང་། དེ་དག་གི་གྲོགས་དང་ལྡན་པས་ལྷའི་ཏིང་འཛིན་ལ་གཙོ་བོར་བརྟེན་ནས་རང་གཞན་གྱི་དོན་སྤྱོད་པ་སྟེ། རྩེ་མོ་ལས། ལྷ་ཡི་ཏིང་འཛིན་ལ་གནས་ཏེ། །སེམས་ཅན་ཐམས་ཅད་ཡོངས་མི་གཏོང་། །རྟག་ཏུ་སངས་རྒྱས་ཡིད་ལ་བྱེད། །རྟག་ཏུ་སངས་རྒྱས་མཆོད་པ་མཆོག །ཅེས་སོ། །འབྲས་བུ་ནི། སྐུ་གསུམ་ཡེ་ཤེས་ལྔའི་བདག་ཉིད་རིགས་ལྔ་སྟུག་པོ་བཀོད་པའི་མི་ཚེ་གསུམ་མམ་བཅུ་དྲུག་ན་རང་ལམ་གྱིས་ཐོབ་པར་འདོད་མོད་ཀྱང་། བླ་མེད་ལས་ནི་དེ་ཉིད་རྫོགས་པའི་སངས་རྒྱས་སུ་མི་བཞེད་དོ། །གཉིས་པ་ལྷ་ལམ་ཁྱེར་ནི། ཆོས་ཅན་སྣང་བ་ཀུན་རྫོབ་ཀྱི་བདེན་ངོར་རིགས་ལྔས་གཙོ་བྱས་པའི་རྡོ་རྗེ་དབྱིངས་ཀྱི་དཀྱིལ་འཁོར་གྱི་ལྷ་ཚོགས་ཕྱག་རྒྱ་བཞི་ལྡན་དུ་བསྒོམ་ཞིང་། མཐར་དེའང་མི་དམིགས་པ་སྟོང་ཉིད་ཀྱི་ངང་ལ་འཇོག་པ་ནི་དོན་དམ་བདེན་པའི་ཉམས་ལེན་ཏེ། བདེན་གཉིས་རེས་འཇོག་ཏུ་ཉམས་སུ་ལེན་པའོ། །གསུམ་པ་སྙིང་པོ་ལམ་ཁྱེར་ནི། ལྷའི་ཐུགས་ཀར་ཟླ་དཀྱིལ་ལ་སྔགས་ཕྲེང་བཀོད་པ་ལས་འོད་ཟེར་སྤྲོ་བསྡུས་སེམས་ཅན་ཐམས་ཅད་ཀྱི་སྡུག་བསྔལ་རྒྱུ་དང་བཅས་པ་སྦྱངས་པར་བསམ་ཞིང་། ༀ་བུདྡྷ་བཻ་རོ་ཙ་ན་ཧཱུྃ། ༀ་བཛྲ་ཨཀྵོ་བྷྱ་ཧཱུཾ། ༀ་རཏྣ་སཾ་བྷ་བ་ཏྲཱཾ། ༀ་པདྨ་ཨ་མི་ཏཱ་བྷ་ཧྲཱིཿ ༀ་ཀརྨ་ཨ་མོ་གྷ་སིདྡྷི་ཨཱཿ ཞེས་བཟླས་པས་ཐུགས་རྒྱུད་བསྐུལ་བའོ། །བཞི་པ་དབང་ལམ་ཁྱེར་ནི། ཡོ་གའི་དབང་དྲུག་ཅུ་རྩ་གཉིས་ཏེ། དེ་དང་རྗེས་སུ་འབྲེལ་བའི་རིགས་ལྔ་དང་ལྷ་ལྔའི་དམ་ཚིག་སོགས་བསླབ་བྱ་རྣམས་ལ་བརྩོན་པས་སློབ་པ་ཡིན་ནོ། །སྤྱི་དོན་གཉིས་པ་འགག་དྲུག་བཤད་པ་ལ། གང་དུ་བསྐུར་བའི་གནས་ནི། སྔོན་བྱུང་རི་རབ་ཀྱི་རྩེའམ་མེ་རི་འབར་བའི་རྩེ་དང་། རྗེས་འཇུག་ལྷ་བྱ་སྐད་སྙན་ལྗོན་ཤིང་གི་ཚལ་དུའོ། །གང་གིས་བསྐུར་བའི་སྟོན་པ་ནི། སྔོན་བྱུང་བཅོམ་ལྡན་འདས་རྣམ་པར་སྣང་མཛད་དང་། རྗེས་འཇུག་སློབ་དཔོན་ཆེན་པོ་པདྨ་ཀུ་མ་ཏིས་སོ། །གང་ལ་བསྐུར་བའི་ཡུལ་ནི། སྔོན་བྱུང་བྱང་ཆུབ་སེམས་དཔའ་དོན་ཐམས་ཅད་གྲུབ་པ་སོགས་དང་། རྗེས་འཇུག་ཏུ་རྡོ་རྗེ་ཁྱུང་གྲགས་རྩལ་སོགས་ལའོ། །གང་བསྐུར་བའི་དབང་ནི། སྐུ་ཕྱག་རྒྱའི་དབང་སོགས་ཡོ་གའི་དབང་དྲུག་ཅུ་རྩ་གཉིས་སོ། །ཅིའི་ཕྱིར་བསྐུར་ན། སྔོན་བྱུང་དུ་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་རྗེས་སུ་བཟུང་བ་དང་། རྗེས་འཇུག་ཏུ་དམ་ཚིག་དང་ལྡན་པ་རྗེས་སུ་འཛིན་པའི་ཆེད་དུའོ། །དེ་ལྟར་བསྐུར་བའི་དགོས་པ་ནི། དབང་གང་དང་གང་བསྐུར་བ་དེ་དང་དེའི་ཡོན་ཏན་རྣམས་ཐོབ་པར་དགོས་པ་ཡོད་དོ། །སྤྱི་དོན་གསུམ་པ་གདམས་ངག་ངང་སྒོམ་གྱི་ཁྲིད་ནི། རང་སྐད་ཅིག་གིས་རྡོ་རྗེ་སེམས་དཔའམ། རྣམ་སྣང་གི་སྐུར་བསྒོམ། དེ་གསལ་བ་དང་རང་གི་སྙིང་དཀྱིལ་དུ་དྭངས་མ་མི་ཤིགས་པ་ལྔ་གདོད་ནས་རིགས་ལྔ་ཡེ་ཤེས་ལྔའི་ངོ་བོར་གནས་པ་ཉིད་རྣམ་པར་ཐིག་ལེ་སྲན་མ་ཙམ་པ་འོད་ལྔའི་གོང་བུ་ཅན་ཞིག་གསལ་བཏབ་སྟེ། ཐེབས་པ་ན་རང་གི་སྤྱི་བོར་ཐིག་ལེ་དཀར་པོ་རིལ་མ་ཙམ་ཞིག་བསྒོམ། དེ་ཡང་། ནམ་མཁའི་དཀྱིལ་ནས་ཐིགས་པ་ཤར། །ཞེས་པས་ཐིག་ལེ་དཀར་པོ་དེ་མར་བབས་ནས་སྙིང་དཀྱིལ་གྱི་དྭངས་མ་མི་ཤིགས་པའི་ཐིག་ལེ་ལ་ཕྲུག་གིས་འདྲེས་ཏེ་གཉིས་སུ་མེད་པའི་ངང་ལ་བསལ་བཞག་མེད་པར་བཞག་པས། ཅིའི་ངོ་བོར་ཡང་མ་གྲུབ་པའི་སྟོང་གསལ་དུ་ལྷག་གེ་འཆར་ཏེ། དོན་དམ་མཚན་མ་མེད་པའི་ངོ་བོ་ཉིད་དོ། །དེའི་བྱིན་རླབས་ཀྱིས་གང་ཤར་གྱི་སྣང་བ་ཐམས་ཅད་རིགས་ལྔ་རྡོ་རྗེ་དབྱིངས་ཀྱི་དཀྱིལ་འཁོར་དུ་གནས་པ་ལྟར་ལམ་དུ་ཁྱེར་བས་ལྷའི་རྣམ་པར་སྣང་བ་ནི་ཀུན་རྫོབ་ཡེ་ཤེས་ཀྱི་སྣང་བ་སྟེ། དེ་ལྟར་གཉིས་སུ་མེད་པའི་ངང་ལ་བློ་མ་བཅོས་པར་གནས་པ་ནི་དབང་ཆགས་པའི་རྟེན་ཡིན་ནོ། །དེས་ཡོ་ག་རྡོ་རྗེ་དབྱིངས་ཀྱི་དཀྱིལ་འཁོར་དུ་དབང་བསྐུར་བ་མན་ངག་དང་བཅས་པ་གྲུབ་པས། ཇི་ལྟར་གདམས་པ་རྣམས་ཚུལ་བཞིན་དུ་བསྒྲུབ་པར་བྱ་སྙམ་པས། གཙོ་བོས་ཇི་ལྟར་སོགས་ཀྱིས་ཁས་བླང་། གཏང་རག་གི་མཎྜལ་དང་། དེང་ནས་བརྩམས་ཏེ་སོགས་ཀྱིས་ཡོན་དབུལ་ཞིང་། དགེ་བ་བསྔོ་བ་རྣམས་སྔར་ལྟར་དང་། རྗེས་ཆོག་རྣམས་སྒྲུབ་ཐབས་ལྟར་བྱའོ། །གླན་ཉ་ཚལ་པའི་ཕྱག་བཞེས་འགོས་ཀྱི་ལས་ཐོར། དབང་རེ་ལ་བཀྲ་ཤིས་རེ་བརྗོད་ཀྱང་ལེགས། འདིར་མཛད་པ་བཅུ་གཉིས་ཀྱི་བཀྲ་ཤིས་བརྗོད། ཅེས་བྱང་སེམས་ཀྱི་དབང་གི་སྐབས་སུ་གསུངས་པ་ལྟར་བླ་མ་རྣམས་ཀྱི་ཕྱག་ལེན་དུའང་མཛད་པས། སྤྲོ་ན་ལྷ་མི་ནས་ཡོ་གའི་བར་གྱི་དབང་སོ་སོའི་མཐའི་བསྔོ་བའི་རྗེས་སུ་རང་རང་གི་སྒྲུབ་ཐབས་ཀྱི་མཇུག་ཏུ་བཀོད་པའིབཀྲ་ཤིས་རྣམས་བརྗོད་ཀྱང་ལེགས་པའི་ཡན་ལག་ཏུ་འགྲོ་ཞིང་། མ་བརྗོད་ནའང་ཆད་པའི་སྐྱོན་མེད་དོ། །རྟག་ཏུ་ལེགས་བཤད་སྨྲ་བའི་ངག །ཡོ་གའི་དབང་ཆོག་ལ་ཞུགས་པས། །ཆོས་མིག་མངའ་བའི་སྐྱེས་བུ་ལ། །ངོ་མཚར་ལྟད་མོའི་དཔལ་འདི་བྱུང་། །ཡོ་གའི་ཐེག་པའི་དབང་ཆོག་གི་ལེ་ཚན་ནོ། །འདུས་པ་མདོའི་དབང་ཆོག་རྡོ་རྗེའི་ཐེམ་སྐས་ལས། ཡན་ལག་གི་དཀྱིལ་འཁོར་དྲུག་ཏུ་མན་ངག་གི་ལུགས་ཀྱི་ཕྱི་དབང་རྒྱུད་ཀྱི་ཆུ་བོ་བསྐུར་བའི་དབང་ཆོག་བཤད་པའི་སྐབས་ཏེ་གསུམ་པའོ།། །།