བླ་མ་བརྒྱུད་པའི་གསོལ་འདེབས་ཚིག་སྡེབས་མ།
༅། །བླ་མ་བརྒྱུད་པའི་གསོལ་འདེབས་ཚིག་སྡེབས་མ་ལགས་སོ། །ཨེ་མ་ཧོ། །སྐུ་ལྔའི་བདག་ཉིད་རྒྱལ་བ་ཀུན་ཏུ་བཟང་། །འཆད་པའི་སྐྱེས་བུ་རྒྱལ་ཚབ་རིགས་མཆོག་ལྔ། །ཁམས་དང་སྐྱེ་མཆེད་དག་པ་རིགས་གསུམ་མགོན། །སྐུ་གསུམ་དབྱེར་མེད་གསུམ་ལ་གསོལ་བ་འདེབས། །རིག་འཛིན་རྩལ་འཆང་རྣམས་ཀྱིས་བྱིན་གྱིས་རློབས། །རིག་འཛིན་གཙོ་བོ་ལྷ་དབང་བརྒྱ་བྱིན་དང་། །དུག་འཇོམས་བདུད་རྩིར་ལྡན་པའི་ཀླུ་རྒྱལ་འཇོག །དགོས་འདོད་རེ་སྐོང་གནོད་སྦྱིན་སྐར་མདའ་གདོང་། །རྒྱལ་བའི་བཀའ་རྣམས་སྡུད་མཛད་ལང་ཀའི་བདག །སྐལ་བར་ལྡན་པའི་དགེ་བསྙེན་ལི་ཙ་བྱི། །རིགས་ཅན་དྲ་མ་ལྔ་ལ་གསོལ་བ་འདེབས། །རིག་འཛིན་རྩལ་འཆང་རྣམས་ཀྱི་བྱིན་གྱིས་རློབས། །རྡོ་རྗེ་ཐེག་པ འི་བཀའ་བབས་རྒྱལ་པོ་ཛ། །གླེགས་བམ་དབང་ཐོབ་ཨིནྟྲ་བོ་ཏི་དང་། །བདེ་ཆེན་རོལ་པ་ཀུ་ཀུ་ར་ཛའི་ཞབས། །གསང་བའི་མཛོད་འཛིན་གསུམ་ལ༴ །རིག་འཛིན་རྩལ་འཆང་རྣམས་ཀྱི་བྱིན་གྱིས་རློབས། །འབྱུང་བཞི་དབང་ཐོབ་རོ་ལངས་དྷེ་ཝ་དང་། །ཡི་དམ་ལྷ་དང་མཉམ་སྦྱོར་པྲ་ཆེན་ཧ། །གང་འདུལ་སྤྲུལ་པ་ཤཀྱ་སེང་གེའི་ཞབས། །སྤྲུལ་པའི་སྐྱེ་མཆོག་གསུམ་ལ་གསོལ༴ །རིག་འཛིན་རྩལ༴ རྟུལ་ཞུགས་དབང་ཕྱུག་དྷ་ན་རཀྵི་ཏ། །རྣལ་འབྱོར་དབང་ཕྱུག་སྠི་ར་མ་ཏི་དང་། །གྲུབ་པའི་དབང་ཕྱུག་བ དེ་བ་གསལ་མཛད་ཞབས། །རིག་འཛིན་དབང་ཕྱུག་གསུམ་ལ༴ རིག་འཛིན་རྩལ༴ མཁས་གྲུབ་རིག་འཛིན་དྷརྨ་བོ་དྷི་དང་། །གནས་ལྔ་རིག་པའི་པན་ཆེན་ཆེ་བཙན་སྐྱེས། །ས་གསུམ་མཚུངས་མེད་སངས་རྒྱས་ཡེ་ཤེས་ཞབས། །ལོ་པན་སྐྱེས་མཆོག་གསུམ་ལ་གསོལ་བ་འདེབས། །རིག་འཛིན་རྩལ༴ མཐུ་སྟོབས་མངའ་བདག་ཡོན་ཏན་རྒྱ་མཚོ་དང་། །བདུད་རྩི་བཅུད་འཛིན་ལེགས་པའི་སྒྲོན་མ་བསྲུ། །དངོས་གྲུབ་མཆོག་བརྙེེས་བསོད་ནམས་ཤཱཀྱའི་ཞབས། །གདམས་པའི་བཅུད་འཛིན་གསུམ་ལ༴ རིག་འཛིན་རྩལ༴ ཧེ་རུ་ཀ་པ་བདེ་གཤེགས་ཟུར་པོ་ཆེ། །ལྟ་སྒོམ་རྩེ་མོ་རྒྱལ་བ་ཟུར་ཆུང་པ། །ཀ་བཞིའི་མཆོག་གྱུར་གླན་སྟོན་ཤཱཀྱ་བཟང་། །བསྟན་པའི་སྒྲོན་མེ་གསུམ་ལ༴ རིག་འཛིན་རྩལ༴ བསྟན་པའི་གཙོ་བོ་གསང་བདག་སྒྲོ་ཕུག་པ། །འགྲོ་བའི་དཔལ་མགོན་ལྷ་རྗེ་འགར་སྟོན་ཟུང་ངེ་དང་། །མཁས་པའི་གཙུག་རྒྱན་གྲོགས་སྟོན་རྡོ་རྗེ་རྒྱལ། །གསང་སྔགས་སྡོང་པོ་གླན་སྟོན་རྡོ་རྗེ་འོད། །སྟོན་པའི་ཞལ་རྐྱེན་གསུམ་ལ༴ རིག་འཛིན་རྩལ༴ གཞན་གྱི་མདོ་དབང་བརྒྱུད་པ་ནང་འདི་གསུམ་མི་བཞུགས་མཁྱེན་བརྩེའི་ནུས་ལྡན་འགོས་སྟོན་རིན་པོ་ཆེ། །དགོས་འདོད་ཀུན་འབྱུང་འགོས་སྟོན་ནོར་བུ་འཛིན། །སྒྲུབ་པ་མངའ་མཉེས་སྒྲོ་སྟོན་བསོད་ནམས་གྲགས། །འགྲོ་བའི་མགོན་འགྱུར་གསུམ་ལ༴ རིག་འཛིན་རྩལ༴ གདམས་པའི་བཀའ་བབས་གླན་སྟོན་བརྩོན་འགྲུས་སེང་། །བྱིན་བརླབས་རྒྱུད་འཛིན་གླན་སྟོན་བསོད་ནམས་རྒྱལ། །བློ་གྲོས་ངེས་ལྡན་གླན་སྟོན་ཆོས་སེང་ཞབས། །ཀུན་གྱི་གཤིན་རྗེ་གསུམ་ལ༴ རིག་འཛིན་རྩལ༴ འགྲོ་བའི་སྡུག་བསྔལ་སེལ་མཛད་ལྷ་རྗེ་འབུམ། །ཐུགས་རྗེའི་མངའ་བདག་གླན་སྟོན་སངས་རྒྱས་དཔལ། །དོན་གཉིས་མཐར་ཕྱིན་གླན་སྟོན་བསོད་ནམས་མགོན། །རྒྱལ་བའི་གདུང་འཛིན་གསུམ་ལ༴ རིག་འཛིན་རྩལ་འཆང་རྣམས་ཀྱི་བྱིན་གྱིས་རློབས། །རྒྱལ་བས་ལུང་བསྟན་ཟུར་དབང་བྱམས་པ་སེང་། །མཁས་པའི་མཆོག་གྱུར་བསམ་འགྲུབ་རྡོ་རྗེ་དང་། །མཁྱེན་ཉིད་མངོན་གྱུར་ཟུར་དབང་ཤཱཀྱ་འབྱུང་། །ཀུན་མཁྱེན་ལུང་ཐོབ་གསུམ་ལ༴ རིག་འཛིན་རྩལ༴ འཕགས་མའི་རྣམ་སྤྲུལ་དཔལ་གྱི་ཡེ་ཤེས་དང་། །མཁའ་སྤྱོད་བཙུན་མོ་མ་ཅིག་རིན་ཆེན་ཟུར། །ཡེ་ཤེས་མཁའ་འགྲོོ་ཟུར་མོ་དགེ་འདུན་འབུམ། །རྒྱལ་བའི་ཡུམ་གྱུར་གསུམ་ལ༴ རིག་རྩལ༴ འགྲོ་དོན་ལྷུན་གྲུབ་ཟུར་དབང་བཤེས་གཉེན་དང་། །མཁས་ཤིང་གྲུབ་པའི་བྲ་བོ་ཆོས་འབུམ་པ། །སྐུ་གསུམ་མངོན་གྱུར་དཀོན་མཆོག་བཟང་པོའི་ཞབས། །རྙིང་མའི་འགྲོ་མགོན་གསུམ་ལ༴ རིག་འཛིན་རྩལ་འཆང་༴ མདོ་སྒྱུ་སེམས་ཀྱི་བདག་པོ་ཀཿཐོག་པ། །དགོངས་དོན་མཐར་ཕྱིན་རྡོ་རྗེ་རྣམ་པར་རྒྱལ། །བསླབ་གསུམ་རྣམ་དག་དཔལ་འབྱོར་རྒྱལ་མཚན་ཞབས། །ཀུན་གྱིས་གཙུག་རྒྱན་གསུམ་ལ་གསོལ་བ་འདེབས། །རིག་འཛིན་རྩལ༴ རྒྱལ་བའི་འཕྲིན་ལས་སྣ་ཚོགས་རང་གྲོལ་དང་། །འདིར་བདག་རང་འཇུག་པ་ལགས་སོ། །ཆུ་བོ་བཞི་རྫོགས་རྩ་བའི་བླ་མའི་ཞབས། །བཀའ་དྲིན་མཉམ་མེད་རྣམས་ལ༴ རིག་འཛིན་རྩལ༴ བདེ་ཆེན་དབྱིངས་ནས་སྤྲུལ་པའི་སྐུར་བསྟན་ནས། །བསླབ་གསུམ་རྒྱན་གྱི་རབ་མཛེས་བརྗིད་པའི་སྐུ། །རྒྱལ་བའི་འཕྲིན་ལས་འགྲོ་བའི་དོན་མཛད་པའི། །སྣ་ཚོགས་རང་གྲོལ་ཞབས་ལ་གསོལ༴ རིག་འཛིན་རྩལ༴ མདོ་དབང་བརྒྱུད་པའི་རིག་འཛིན་རྩལ་འཆང་རྣམས། །བདག་ལ་དབང་བསྐུར་བྱིན་གྱིས་བརླབས་ནས་ཀྱང་། །བདག་གཞན་མ་ལུས་སྨིན་གྲོལ་འགོད་པར་ཤོག །བླ་མ་སྐུ་ཁམས་བཟང་བར་གསོལ༴ །མཆོག་ཏུ་སྐུ་རིང་བར༴ །འཕྲིན་ལས་དར་ཞིང་རྒྱས་པར༴། །བླ་མ་དང་འབྲལ་བ་མེད་པར་བྱིན་གྱིས་རློབས། །སྐྱབས་གནས་དཀོན་མཆོག་གསམ་གྱི་བྱིན་རླབས་དང་། །དཀར་ཕྱོགས་བདེ་བའི་མཐུ་དང་ནུས་པ་ཡིས། རྒྱལ་བའི་བསྟན་འཛིན་སྣ་ཚོགས་རང་གྲོལ་གྱི། །སྐུ་ཚེ་བསྟན་ཞིང་འཕྲིན་ལས་རྒྱས་གྱུར་ཅིག །