དང་པོ་ཕྱི་དབང་གི་ཆུ་བོ་ལས་ཡོ་གའི་དབང་གི་ཐེམ་སྐས།
༄༅ ། །དང་པོ་ཕྱི་དབང་གི་ཆུ་བོ་ལས། ཡོ་གའི་དབང་གི་ཐེམ་སྐས་བཞུགས་སོ། །དྲུག་པ་ཡོ་གའི་དབང་ལ་གཉིས་སྟེ། དཀྱིལ་འཁོར་ལས་ཀྱི་རིམ་པ་དང་། འཇུག་ཅིང་དབང་གི་རིམ་པའོ། །དང་པོ་ནི། ཚད་དང་ལྡན་པའི་ས་སྟེགས་ལ། །དྲི་བཟང་ཆུ་ཡིས་ཆག་ཆག་གདབ། །བྱིན་རླབས་ལྡན་པའི་ཐིག་སྐུད་ཀྱིས། །ཆ་ཆེན་བཅུ་དྲུག་ལེགས་པར་གདབ། །དེ་ནས་ཆ་བྲན་གདབ་པ་ནི། །དང་པོ་ཕྱེད་གདབ་ཕྱི་མ་གདབ། །གཉིས་པ་ཆ་བཞི་མཉམ་དུ་གདབ། །གསུམ་པ་ཕྱིའི་ཆ་གཅིག་གདབ། །བཞི་པ་ལྷ་སྣམ་ཕྱེད་དུ་གདབ། །ལྔ་པ་དབུས་དོར་མཐའ་གཉིས་གདབ། །དྲུག་པ་ཕྱེད་གདབ་ཕྱི་མ་གདབ། །བདུན་པ་ཆ་བཞི་མཉམ་དུ་གདབ། །བརྒྱད་པ་དབུས་དོར་མཐའ་གཉིས་གདབ། །དེ་ནས་མུ་ཁྱུད་བསྐོར་བ་ནི། །ཆ་ཆེན་གསུམ་ནས་ཕོ་བྲང་བསྐོར། །ནང་དུ་ཆ་བྲན་ཉེར་བཞི་ཡོད། །བརྒྱད་ཀྱི་དབུས་ཀྱི་ལིང་ཚེ་ཡིན། །དྲུག་དྲུག་ཕྱོགས་བཞིའི་ལིང་ཚེ་ལ། །བཞི་ནི་མུ་འཁྱུད་གདུང་བཞིའོ། །དབུས་དང་ཕྱོགས་བཞི་ལིང་ཚེ་ལ། །པདྨ་འདབ་མ་བཞི་པའམ། །འཁོར་ལོ་རྩིབས་བཞི་རེ་རེས་བསྐོར། །གླང་གུར་རྡོ་ར་སྤྱི་དང་མཚུངས། །མདའ་ཡབ་ཟུར་ཐིག་ཕྲད་སོ་ནས། །པད་འདབ་རྡོ་ར་མེ་རི་ལ། །ཅི་རིགས་མཚམས་པས་བསྐོར་བར་བྱ། །བྱིན་བརླབས་ལྡན་པའི་ཚོན་རྩི་ཡིས། །མཁས་པས་རེ་ཁ་ལེགས་པར་བྲི། །པདྨ་འདབ་བཞི་ཆ་ལྔ་ཡི། །དབུས་ཀྱི་ལྟེ་བ་དཀར་པོ་བྱ། །ཕྱོགས་བཞི་སྔོ་སེར་དམར་དང་ལྗང་། །འདབ་མ་བཞི་ནི་ཕྱོགས་ཀྱི་མདོག །མུ་ཁྱུད་གདུང་བཞི་ནག་པོ་བྱེད། །མཚམས་ཀྱི་ལིང་ཚེ་མཛེས་ཚོན་ལ། །གྲུ་ཆད་བཞི་ནི་ཕྱོགས་ལས་ལོག །ལྷ་སྣམ་ཤར་སྔོ་ལྷོ་ཕྱོགས་སེར། ནུབ་དམར་བྱང་ནི་ལྗང་ཁུ་བྱེད། །རྩིགས་པ་ལ་སོགས་གོང་དང་མཐུན། །དེ་ནས་རྣམ་པ་དགོད་པ་ནི། །དབུས་སུ་རྣམ་སྣང་ཡུམ་བཞི་དགོད། །ཤར་དུ་མི་སྐྱོད་སེམས་དཔའ་བཞི། །ལྷོ་རུ་རིན་འབྱུང་སེམས་དཔའ་བཞི། །ནུབ་དུ་མཐའ་ཡས་སེམས་དཔའ་བཞི། །བྱང་དུ་དོན་གྲུབ་སེམས་དཔའ་བཞི། །མཚམས་ཀྱི་ལིང་ཚེ་བཞི་པ་ལ། །སྒེག་མོ་བཞིའི་ཙག་ལི་དགོད། །གྲུ་ཆད་བཞི་ལ་གདུགས་སོགས་བཞི། །བློ་འབུར་བཞི་ལ་སྒོ་བ་བཞི། །ལྷ་སྣམ་སྐལ་བཟང་སེམས་དཔའ་སྟོང་། །གསུང་ཐུགས་རྟེན་ནི་གོང་དང་མཚུངས། །ལྷག་ཆད་གསལ་ཞིང་ཞལ་གསོས་མཆོད། །མཆོད་ཡོན་ལ་སོགས་ཕྱི་མཆོད་དང་། །གཏོར་མ་བཤམས་པ་ལ་སོགས་དང་། །བུམ་སོགས་བཤམ་པ་གོང་དང་མཐུན། །དེ་ནི་བར་སྐབས་ཀྱི་ཚིགས་སུ་བཅད་པའོ། །དེ་ནས་རབ་གནས་ཀྱི་དོད་ནི། དཔོན་སློབ་རྣམས་གདན་ལ་བཞུགས་ཤིང་། སྔོན་འགྲོ་གཏོར་མ་ཆ་བཞིའི་ཆ་གཅིག་བཤམ་ལ། བྱིན་གྱིས་རླབས་ལ་བསྔོ་ཞིང་། མཚམས་བཅད་པ་དང་། མཆོད་པ་བྱིན་གྱིས་རླབས་པ་དང་། སྐྱབས་འགྲོ་སེམས་བསྐྱེད་བསྲུང་འཁོར་བསྒོམ་པ་རྣམས་གོང་དུ་སོང་ནས། དངོས་གཞི་བདག་བསྐྱེད་ནི། ༀ་སྭཱ་བྷ་ཝ། སྟོང་པའི་ངང་ལས་ཧཱུཾ་ཡཾ། ཧཱུཾ་ལས་རྡོ་རྗེའི་མཚན་པའི་རླུང་གི་དཀྱིལ་འཁོར། དེའི་སྟེང་དུ་ཧཱུཾ་བཾ་ཧཱུཾ་ལས་འོ་མའི་ཚོ་དེའི་སྟེང་དུ་ཧཱུཾ་ལཾ་ཧཱུཾ་ལས་གསེར་གྱི་ས་གཞི་དེའི་སྟེང་དུ་ཧཱུཾ་བཾ་ཧཱུཾ་ལས་རྒྱ་མཚོ་ཆེན་པོ་བསམ། དེའི་སྟེང་དུ་ཧཱུཾ་སུཾ་ལས་རིའི་རྒྱལ་པོ་རི་རབ་ཟུར་བཞི་པ་རིན་པོ་ཆེ་སྣ་བཞིའི་རང་བཞིན་ཅན། རིན་པོ་ཆེ་སྣ་ཚོགས་ཀྱིས་བརྒྱན་པ། འོག་གཞི་དེ་རྣམས་སྣ་ཚོགས་རྡོ་རྗེའི་རང་བཞིན་དུ་བྱིན་གྱིས་རླབས། དེའི་སྟེང་དུ། བྷྲུཾ་ལས་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི། སྒོ་བཞི། རྟ་བབས་དང་བཅས་པའི་རྡོ་རྗེ་དང་། ནོར་བུ་རིན་པོ་ཆེ་ལས་བྱས་པ། དབུས་རྣམ་སྣང་གི་གནས་སུ་ཨཿསིཾ་ཨཿལས་སེང་གེའི་ཁྲི། ཤར་དུ་ཧཱུཾ་ག །ཧཱུཾ་ལས་གླང་པོ་ཆེའི་ཁྲི། ལྷོ་རུ་ཏྲཾ། བཱ་ཱཏྲཱཾཿལས་རྟའི་ཁྲི། ནུབ་དུ་ཧྲིཿམཾ་ཧྲིཿལས་རྨ་བྱའི་ཁྲི། བྱང་དུ་ཨཿགམཿཨཿལས་ནམ་མཁའ་ལྡིང་གི་ཁྲི། ལྷ་གཞན་ཐམས་ཅད་ཀྱི་གནས་སུ་ཧྲིཿ་ལས་པདྨ་དང་། གཙོ་བོ་ལྔའི་པདྨའི་སྟེང་དུ། ཨ་ལས་ཟླ་བའི་དཀྱིལ་འཁོར། དབུས་ཀྱི་སེང་གེ་པད་ཟླའི་སྟེང་དུ། རྣམ་སྣང་དཀར་པོ་རྡོ་རྗེ་དཀྱིལ་དཀྲུངས་གིས་བཞུགས་པ། ཕྱག་གཉིས་བྱང་ཆུབ་མཆོག་གི་ཕྱག་རྒྱས་དེ་བཞིན་གཤེགས་པའི་རྡོ་རྗེ་རྩེ་ལྔ་པ་བསྣམས་པ་ཞལ་བཞི་པ་ཞལ་དང་པོ་ཤར་དུ་གཟིགས་པ། རྣམ་སྣང་གི་མདུན་གྱི་པད་འདབ་ལ། སེམས་མ་རྡོ་རྗེ་མའི་ངོ་བོ་རྡོ་རྗེ་རྩེ་ལྔ་པ་དམར་པོ། གཡས་སུ་རིན་པོ་ཆེ་རྡོ་རྗེ་མའི་ངོ་བོ་ཡིད་བཞིན་ནོར་བུ་རིན་པོ་ཆེ། རྩེ་མོ་རྡོ་རྗེ་ལྔ་པས་མཚན་པ། རྒྱབ་དུ་རྡོ་རྗེ་ཆོས་མའི་ངོ་བོ་པད་མ་དཀར་དམར་འདབ་མ་བཅུ་དྲུག་པ་ལ། འདབ་མ་བརྒྱད་མཐུར་དུ་གྱེས་ཤིང་ཁ་བྱེ་བ། འདབ་མ་བརྒྱད་སྟེང་དུ་བལྟས་པས། ཁ་མ་བྱེ་བའི་ནང་ན། དང་པོའི་རྡོ་རྗེ་རྩེ་ལྔ་པ་ཆུད་པ། གཡོན་དུ་རྡོ་རྗེ་ལས་མའི་ངོ་བོ་སྣ་ཚོགས་སྟེང་རྡོ་རྗེ་བཅུ་གཉིས་པ་ལྟེ་བ་དཀར། མདུན་གྱི་ར་གསུམ་སྔོ། གཡས་ཀྱི་སེར་གཡོན་གྱི་ལྗང་། རྒྱབ་ཀྱི་དམར་པོའོ། །ཤར་གྱི་དབུས་སུ་གླང་པོ་ཆེའི་ཁྲི་དང་། པད་ཟླ་ལ་མི་སྐྱོད་པ་སྔོན་པོ་ས་གནོན་གྱི་ཕྱག་རྒྱས་དེ་ནི་དེ་བཞིན་གཤེགས་པའི་རྡོ་རྗེ་རྩེ་ལྔ་པ་བསྣམས་པ། མདུན་གྱི་པད་འདབ་ལ་རྡོ་རྗེ་སེམས་དཔའ་དཀར་པོ། ཕྱག་གཡས་པའི་སོར་མོ་གསུམ་སྦྲེང་བའི་རྩེ་མོ་ལ་དང་པོའི་རྡོ་རྗེ་རྩེ་ལྔ་པ་རང་གི་ཐུགས་ཁར་སྟོད་པའི་ཚུལ་གྱིས་འཛིན་པ། གཡོན་ན་རྡོ་རྗེ་ཁུ་ཚུར་གྱི་དྲིལ་བུ་ཁ་ནང་དུ་བསྟན་པ། སྙན་པའི་ཚུལ་གྱིས་སྐུར་བརྟེན་པ། གཡས་སུ་རྡོ་རྗེ་རྒྱལ་པོ་གསེར་མདོག་ཕྱག་གཉིས་རྡོ་རྗེ་ལྕགས་ཀྱུས་དེ་བཞིན་གཤེགས་པ་ཐམས་ཅད་སྤྱན་འདྲེན་པར་མཛད་པ། གཡོན་དུ་ཆགས་པ་དམར་པོ་རྡོ་རྗེས་མཚན་པའི་མདས་ཨུཏྤ་ལ་དམར་པོ་ཁ་བྱེ་བའི་མདེའུ་ཅན། རྡོ་རྗེ་གཞུ་རྣ་བའི་བར་དུ་བཀང་ནས། དེ་བཞིན་གཤེགས་པ་རྣམས་ལ་འབིགས་པར་མཛད་པ། རྒྱབ་ཏུ་ལེགས་པར་ལྗང་ཁུ་དང་པོའི་རྡོ་རྗེ་རྩེ་ལྔ་པ་གཉིས་བསྣམས་ནས་ལེགས་སོ་སྦྱིན་པའི་ཚུལ་གྱིས་དེ་བཞིན་གཤེགས་པ་རྣམས་མཉེས་པར་མཛད་པ། ལྷོར་རྟའི་ཁྲི་ལ་པད་ཟླ་ལ་རིན་འབྱུང་སེར་པོ། མཆོག་སྦྱིན་གྱི་ཕྱག་རྒྱ་རྡོ་རྗེ་རིན་པོ་ཆེ་བསྣམས་པ་མདུན་གྱི་པད་འདབ་ལ་རིན་པོ་ཆེ་སེར་པོས་ཕྱག་གཡས་རིན་པོ་ཆེ་རང་གི་དབང་བསྐུར་བའི་གནས་སུ་འཇོག་ཅིང་། གཡོན་རྡོ་རྗེ་ཁུ་ཚུར་གྱིས་དྲིལ་བུ་ཁ་ནང་དུ་བསྟན་ནས་སྙེམ་པའི་ཚུལ་གྱིས་སྐུར་རྟེན་པ། གཡས་སུ་ཉི་མ་ཉི་མའི་མདོག་ཅན་ཕྱག་གཡས་ཀྱི་ཉི་མའི་དཀྱིལ་འཁོར་གྱི་ལྟེ་བ་ན། རྡོ་རྗེ་རྩེ་ལྔ་པ་ཡོད་པའི་འོད་ཀྱིས་དེ་བཞིན་གཤེགས་པ་ཐམས་ཅད་སྣང་བར་མཛད་པ་ཐུགས་ཁར་འཛིན་ཅིང་གཡོན་པ་གདན་ལ་རྟེན་པའོ། །གཡོན་དུ་རྡོ་རྗེ་རྒྱལ་མཚན་སྔོན་པོ་ཕྱག་གཡས་པའི་དང་པོ་རྡོ་རྗེས་མཚན་པའི་ཡིད་བཞིན་ནོར་བུའི་ཏོག་ཅན་གྱི་རྒྱལ་མཚན་དར་དང་མུ་ཏིག་གི་ཆུན་འཕྱང་ལ་སོགས་པའི་བརྒྱན་གྱིས་སྤྲས་པ་ཕྲག་པའི་ཕྱོགས་སུ་སྦྲེང་བའི་ཚུལ་གྱིས་འཛིན་པ་དེ་བཞིན་གཤེགས་པ་ཐམས་ཅད་སྦྱིན་པའི་ཕ་རོལ་དུ་ཕྱིན་པ་ལ་ངེས་པར་སྦྱོར་བར་མཛད་པ་གཡོན་པ་གདན་ལ་རྟེན་པའོ། །གཡོན་དུ་གཞད་པ་དུང་དང་པདྨའི་རྩ་བ་ལྟར་དཀར་བ། གཡས་ཀྱི་དང་པོའི་རྡོ་རྗེ་རྩེ་ལྔ་པ་གཉིས་ཀྱི་དབུས་སུ་ཆུད་པའི་སོའི་འཕྲེང་བ་གཉིས་ཁ་འགྲམ་གཡས་སུ་འཛིན་པས་དེ་པ་ཐམས་ཅད་འཛུན་པ་སྨད་དུ་བྱུང་བ་ལ། ངེས་པར་སྦྱོར་བ་གཡོན་པ་གདན་ལ་རྟེན་པའོ། །ནུབ་དུ་རྨ་བྱའི་ཁྲི་དང་པད་ཟླ་ལ་འོད་དཔག་མེད་དམར་པོ་མཉམ་བཞག་གི་ཕྱག་རྒྱས་རྡོ་རྗེ་པདྨ་ལ་ཆོས་དཀར་དམར་ཕྱག་གཡོན་སྙེམ་པ་དང་བཅས་པས་རྡོ་རྗེ་པདྨའི་གདོང་བུ་སྐུར་རྟེན་ཅིང་གཡས་པའི་རྡོ་རྗེ་ཁུ་ཚུར་གྱིས་ཐེབ་འཛུག་གྱིས་སྙིང་ཁར་རྡོ་རྗེ་པདྨའི་འདབ་མ་ཁ་འབྱེད་པའོ། །གཡས་སུ་རྣོན་པོ་སྔོན་པོ་ཕྱག་གཡོན་པའི་རྡོ་རྗེ་ཁུ་ཚུར་གྱིས་ཐུགས་ཀར་ཤེས་རབ་ཀྱི་ཕ་རོལ་དུ་ཕྱིན་པའི་པོ་ཏི་བསྣམས་ཤིང་། གཡས་པ་རྡོ་རྗེ་རལ་གྲི་དེ་བཞིན་གཤེགས་པ་ཐམས་ཅད་ལ་འདེབས་པའི་ཚུལ་དུ་མཛད་པའོ། །གཡོན་དུ། རྒྱུ་གསེར་གྱི་མདོག་ཅན་ཕྱག་གཡས་པའི་གུང་མོའི་རྩེ་མོ་ན། དང་པོའི་རྡོ་རྗེ་རྩེ་གཅིག་པའི་དབྱིབས་ཅན་གྱིས་འཁོར་ལོ་རྩིབས་བརྒྱད་པ་བསྐོར་བའི་ཚུལ་དུ་འཛིན་ཞིང་གཡོན་པ་གདན་ལ་རྟེན་པའོ། །རྒྱབ་དུ་སྨྲ་བ་ཟངས་གྱི་མདོག་ཅན་ཕྱག་གཡས་པ་དང་པོའི་རྡོ་རྗེས་མཚན་པའི་ལྕེ་བསྣམ་ནས་དེ་བཞིན་གཤེགས་པ་ཐམས་ཅད་ལ་སྨྲ་བར་མཛད་ཅིང་། གཡོན་པ་གདན་ལ་བརྟེན་པའོ། །བྱང་དུ། མཁའ་ལྡིང་གི་ཁྲི་དང་པད་ཟླ་ལ་དོན་འགྲུབ་ལྗང་ཁུ་སྐྱབས་སྦྱིན་གྱིས་ཕྱག་རྒྱས་སྣ་ཚོགས་རྡོ་རྗེ་བསྣམས་པ། མདུན་གྱི་པད་འདབ་ལ། ལས་ཞལ་དང་བྱིན་པ་གཉིས་ནས་ཞབས་ཀྱི་བར་དཀར་པོ། ཞལ་གྱི་འོག་ནས་སྐྱེད་པའི་བར་དམར་སྐྱ། སྐྱེད་པའི་བར་དང་ཕྱག་གཉིས་སྔོ་སྐྱ། བརླ་གཉིས་སེར་སྐྱ། ལྷག་མ་མདོག་སྔོན་པོའོ། །ཕྱག་གཡས་པ་སྣ་ཚོགས་རྡོ་རྗེ་རྩེ་བཅུ་གཉིས་པ་ཐུགས་ཁར་གཏོད་པའི་ཚུལ་གྱིས་འཛིན་ཅིང་། གཡོན་སྙེམས་པ་དང་བཅས་པས་སྣ་ཚོགས་རྡོ་རྗེས་ཡུ་བ་བྱས་པའི་དྲིལ་བུ་ཁ་ནང་དུ་བསྟན་བསྐུར་རྟེན་པའོ། །གཡས་སུ་བསྲུང་བ་གསེར་གྱི་མདོག་ཅན་ཕྱག་གཉིས་ཀྱི་མཐའ་གཉིས་སུ་རྡོ་རྗེ་རྩེ་ལྔ་པས་མཚན་པའི་རྡོ་རྗེ་གོ་ཆ་བསྣམས་ནས་དེ་བཞིན་གཤེགས་པ་ཐམས་ཅད་ལ་གོ་དཀོན་པའི་ཚུལ་དུ་མཛད་པའོ། །གཡོན་དུ་གནོད་སྦྱིན་ནག་པོ་ལྟོ་བ་ཡངས་པ་ཞལ་མཆེ་བ་གཙིགས་པ་ཁྲོ་བོ་རྡོ་རྗེ་རྩེ་ལྔ་པས་ལྟེ་བར་མཚན་པའི་མཆེ་བ་ཞལ་གྱི་གྲྭ་གཉིས་སུ་འཛིན་པ་དེ་བཞིན་གཤེགས་པ་ཐམས་ཅད་ལ་སྡིག་པའི་ཚུལ་དུ་མཛད་པའོ། །རྒྱབ་དུ་ཁུ་ཚུར་སེར་པོ་དམ་ཚིག་གི་རྡོ་རྗེ་ཁུ་ཚུར་གྱིས་དང་པོའི་རྡོ་རྗེ་རྩེ་ལྔ་པའི་འཚིར་བའི་ཚུལ་གྱིས་བཞུགས་པ། ཤར་ལྷོའི་ལིང་ཚེར་སྒེག་མོ་མ་དཀར་མོ་ཕྱག་གཉིས་ཀྱིས་རྡོ་རྗེ་རྩེ་ལྔ་པ་གཉིས་སྐེམས་པའི་ཚུལ་གྱིས་འཛིན་ཅིང་གཡོན་དུ་ཅུང་ཟད་འདུད་པའོ། །ལྷོ་ནུབ་ཀྱི་ལིང་ཚེར་འཕྲེང་བ་སེར་མོ་རྡོ་རྗེ་རིན་པོ་ཆེའི་འཕྲེང་བའི་དེ་བཞིན་གཤེགས་པ་ཐམས་ཅད་ལ་དབང་བསྐུར་བར་མཛད་པའོ། །ནུབ་བྱང་གི་ལིང་ཚེར་གླུ་མ་དཀར་དམར་ཕྱག་གཉིས་རྡོ་རྗེས་མཚན་པའི་པི་ཝང་བརྡུང་བ་ལ་བརྩོན་པའོ། །བྱང་ཤར་གྱི་ལིང་ཚེར། གར་མ་སྣ་ཚོགས་མདོག་ཕྱག་གཉིས་རྡོ་རྗེ་རྩེ་གསུམ་པ་གཉིས་བསྣམས་ནས་གར་སྟབས་བྱེད་པའོ། །ཤར་ལྷོའི་གྲུ་ཆད་ལ། བདུག་པ་མ་དཀར་མོ་ཕྱག་གཉིས་རྡོ་རྗེ་རྩེ་ལྔ་པས་མཚན་པའི་སྤོས་སྣམས་པས་དེ་བཞིན་གཤེགས་པ་ཐམས་ཅད་ཚིམ་པར་མཛད་པའོ། །ལྷོ་ནུབ་ཀྱི་གྲར་མེ་ཏོག་མ་སེར་མོ་ཕྱག་གཡོན་རྡོ་རྗེ་མེ་ཏོག་གི་སྣོད་འཛིན་ཅིང་གཡས་མེ་ཏོག་གིས་ཆར་འབེབས་པར་མཛད་པའོ། །ནུབ་བྱང་གི་གྲར་མར་མེ་མ་དཀར་དམར་ཕྱག་གཉིས་རྡོ་རྗེ་མར་མེའི་སྡོང་བུ་བསྣམས་ཏེ་དེ་བཞིན་གཤེགས་པ་རྣམས་སྣང་བའི་ཚོགས་ཀྱིས་ཚིམ་པར་མཛད་པའོ། །བྱང་ཤར་གྱི་གྲར། བྱུག་པ་མ་སྣ་ཚོགས་མདོག་ཕྱག་གཡོན་རྡོ་རྗེས་མཚན་པའི་དྲིའི་དུང་ཕོར་བསྣམས་སྟེ་ཕྱག་གཡས་ཀྱི་དྲིའི་སྤྲིན་གྱིས་དེ་བཞིན་གཤེགས་པ་རྣམས་མཆོད་པར་མཛད་པའོ། །ཤར་གྱི་བློ་འབུར་ལ། ལྕགས་ཀྱུ་དཀར་པོ་ཕྱག་གཉིས་ཀྱིས་རྡོ་རྗེའི་མཚན་པའི་ལྕགས་ཀྱུ་བསྣམས་ནས་དེ་བཞིན་གཤེགས་པ་ཐམས་ཅད་སྤྱན་འདྲེན་པར་མཛད་པའོ། །ལྷོར་ཞགས་པ་སེར་པོ་ཕྱག་གཉིས་རྡོ་རྗེ་ཞགས་པས་དེ་བཞིན་གཤེགས་པ་རྣམས་འཇུག་པར་མཛད་པའོ། །ནུབ་ལ་ལྕགས་སྒྲོགས་དཀར་དམར་ཕྱག་གཉིས་རྡོ་རྗེ་ལྕགས་སྒྲོགས་དེ་བཞིན་གཤེགས་པ་ཐམས་ཅད་འཆིང་བར་མཛད་པའོ། །བྱང་རྡོ་རྗེ་འབེབས་པ་སྣ་ཚོགས་མདོག་ཕྱག་གཡས་རྡོ་རྗེ་དྲིལ་བུ་བསྣམས་ནས་དེ་བཞིན་གཤེགས་པ་ཐམས་ཅད་འབེབས་པར་མཛད་པ་གཡོན་གདན་ལ་རྟེན་པའོ། །གོང་གི་རིགས་སྔར་ལྔ་པོ་ལ། ཉི་མའི་འོད་ཀྱི་རྒྱབ་ཡོལ་མངའ་བ། ལྷ་རྫས་ཀྱི་དར་ལའི་སྟོད་གཡོགས་སྨད་གཡོགས་མནབས་པ། རིན་པོ་ཆེའི་ཅོད་པཎ་དང་དར་དཔྱངས་ཀྱི་དབང་བསྐུར་བ་དང་ལྡན་པ། རྡོ་རྗེ་སེམས་དཔའ་མན་ཆད་རབ་དགྱེས་པས། སྤྱན་གདངས་པ་སྒེག་པའི་ཉམས་ཅན་འཛུམ་བག་དང་བཅས་པ། སངས་རྒྱས་ལྔའི་ཅོད་པཎ་དང་དར་དཔྱངས་ཀྱི་དབང་བསྐུར་མདང་ལྡན་པ། རྒྱན་ཐམས་ཅད་ཀྱིས་བརྒྱན་པ། དར་དཀར་པའི་སྟོད་གཡོགས་དང་སྨད་གཡོགས་བཅས་པ། པད་ཟླའི་གདན་ལ་སེམས་དཔའི་དཀྱིལ་མོ་དཀྲུངས་གིས་བཞུགས་པ། ཟླ་བའི་རྒྱབ་ཡོལ་ཅན་ནོ། །དེ་ནས་ལྷ་རྣམས་ལ་བསྐལ་བཟང་སྟོང་དུ་བཞིས་མ་ཚང་བ། ཕྱོགས་རེར་ཉིས་བརྒྱ་བཞི་བཅུ་རྩ་དགུ་དགུ་སེམས་དཔའ་དང་པོ་བཞི་དང་འདྲ་པ་ལ་ཁྱད་པར་རྡོ་རྗེ་རིན་པོ་ཆེ་ཅོད་པཎ་གྱི་དབང་བསྐུར་བའོ། །ཡང་ན་ཤར་དུ། བྱམས་པ། མཐོང་བ་དོན་ཡོད། ངན་སོང་ཀུན་འདྲེན། མྱ་ངན་དང་། མུན་པ་ངེས་པར་འཇོམས་པའི་བློ་གྲོས། ལྷོར་སྤོས་ཀྱི་གླང་པོ། དཔའ་བོར་འགྲོ་བ། ནམ་མཁའ་མཛོད། ཡེ་ཤེས་ཏོག །ནུབ་དུ་འོད་དཔག་མེད། ཟླ་འོད། བཟང་སྐྱོང་གྲྭ་བ་ཅན་གྱི་འོད། བྱང་དུ་རྡོ་རྗེ་སྙིང་པོ། བློ་གྲོས་མི་ཟད་པ། སྤོབས་པ་བརྩེགས་པ། ཀུན་ཏུ་བཟང་པོ་རྣམས་སེམས་དཔའ་དང་པོ་བཞི་དང་འདྲ་བ་ལ། ཁྱད་པར་རྡོ་རྗེ་རིན་པོ་ཆེ་ཅོད་པཎ་གྱི་དབང་བསྐུར་བའོ། །སྒོ་བཞིར་སྒོ་མ་བཞི་གོང་བཞིན་སྒོམ། ལྷ་ཚོགས་དེ་རྣམས་ཀྱི་སྤྱི་བོར་ཨཱོཾ། མགྲིན་པར་ཨཱཿཐུགས་ཁར་ཧཱུཾ། དེ་ལས་འོད་ཟེར་འཕྲོས། རང་བཞིན་གནས་ནས་ཡེ་ཤེས་པ་སྙན་གསན་དབབ་ཅིང་སྤྱན་དྲངས། དེ་ནས་སྤྱན་དྲངས་པ་ནི། ཧཱུཾ། མ་ལུས་སེམས་ཅན་ཀུན་གྱི་དབང་གྱུར་བ། བདུད་སྡེ་དཔུང་བཅས་མ་ལུས་འཇོམས་མཛད་པ། དངོས་རྣམས་མ་ལུས་ཇི་བཞིན་མཁྱེན་གྱུར་པའི། བཅོམ་ལྡན་རྣམ་སྣང་འཁོར་བཅས་གཤེགས་སུ་གསོལ། ཨེ་ཧྱ་ཧི་བྷ་ག་ཝན་མ་ཧཱ་ཀ་རུ་ཎི་ཀ་ཏྲི་ཤ་ཧོ་ས་མ་ཡ་སྟཾ། བཅོམ་ལྡན་འདི་ནི་བྱོན་པ་ལེགས། བདག་ནི་བསོད་ནམས་སྐལ་པར་ལྡན། བདག་གི་མཆོད་ཡོན་བཞེས་ནས་ཀྱང་། ཐུགས་རྗེས་ཐུགས་དབག་མཛད་དུ་གསོལ། ༀསརྦ་བཛྲ་ས་ཏྭ་ཧཱུཾ། ༀ་བཛྲ་ག་ག་ན་ཁཾ་ས་མ་ཡེ་སྭཱཧཱ། ཇི་ལྟར་ལྟམས་པ་ཙམ་གྱིས་ཀྱང་། ལྷ་རྣམས་ཀྱིས་ནི་ཁྲུས་གསོལ་བ། ལྷའི་ཆུ་ནི་དག་པ་ཡི། དེ་བཞིན་བདག་གིས་སྐུ་ཁྲུས་གསོལ། །ཨོཾ་བཛྲ་སརྦ་དེ་བ་ས་ཏ་ཡ་ཙ་ཧ་ཏི་ཡ་མི་ཏེ་ཏ་ར་སྭཱ་ཧཱ། བདག་དང་འགྲོ་ལ་ཐུགས་རྩེའི་ཕྱིར། ཉིད་ཀྱི་རྫུ་འཕྲུལ་མཐུ་ཡིས་ནི། ཇི་སྲིད་མཆོད་པ་བདག་འབུལ་ན། ཇི་སྲིད་བཅོམ་ལྡན་བཞུགས་སུ་གསོལ། པདྨ་ཀ་མ་ལ་ཡེ་ཧཱུཾ། མེ་ཏོག་དམ་པ་འདི་དག་དང་། དེ་བཞིན་ཆུ་སྐྱེས་ཐང་སྐྱེས་དང་། མཆོག་དུ་དད་པས་བདག་འབུལ་ན། ཅི་བདེ་བར་ནི་བཞེས་སུ་གསོལ། ཨཱོཾ་ན་མ་སརྦ་ཏ་ཐ་ག་ཏ་པུས་པ་པུ་ཙ་མེ་ག་ས་མུན་ཏྲ་པ་ར་ན་ས་མ་ཡེ་ཧཱུཾ། ལྷན་ཅིག་སྐྱེས་དང་སྦྱར་བས་མཆོག །བདུག་སྤོས་དམ་པ་འདི་དག་ནི། མཆོག་དུ་དད་པས་བདག་འབུལ་ན། ཅི་བདེ་བར་ནི་བཞེས་སུ་གསོལ། དྷུ་པེ། མུན་པའི་ཚོགས་རྣམས་འཛོམས་མཛད་པ། ཕྱོགས་ཀུན་གསལ་བྱེད་མར་མེ་འདི། །ཀུན་མཁྱེན་དངོས་གྲུབ་ཐོབ་བྱའི་ཕྱིར། །མཆོག་དུ་དད་པས་བདག་འབུལ་ན། །ཅི་བདེ་བར་ནི་བཞེས་སུ་གསོལ། །ཨ་ལོ་ཀེ། ཡང་དག་པར་ནི་སྦྱར་བའི་མཆོག །དྲི་མཆོག་དམ་པ་འདི་དག་ནི། །མཆོག་དུ་དད་པས་བདག་འབུལ་ན། །ཅི་བདེ་བར་ནི་བཞེས་སུ་གསོལ། །གྷན་དྷེ། ཁ་དོག་དྲི་དང་རོ་ལྡན་པའི། །བཟའ་དང་བཅའ་བར་ཡང་དག་ལྡན། །ཐམས་ཅད་སྦྱར་བའི་བཤོས་འདི་དག །མཆོག་དུ་དད་པས་བདག་འབུལ་ན། །ཅི་བདེ་བར་ནི་བཞེས་སུ་གསོལ། །ནེ་ཝེ་ཏེ། བདེ་བར་གཤེགས་པ་ཐམས་ཅད་ལ། །འཁོར་ལོ་རིན་ཆེན་འདི་ཕུལ་བས། །སྲིད་པའི་འཁོར་ལོ་རྒྱུན་ཆད་ནས། །ཆོས་ཀྱི་འཁོར་ལོ་བསྐོར་བར་ཤོག །ༀ་སརྦ་ཏ་ཐཱ་ག་ཏ་མ་ཧཱ་རཏྣ་ཙཀྲ་པུ་ཙ་ཧཱུཾ། བདེ་བར་གཤེགས་པ་ཐམས་ཅད་ལ། །ནོར་བུ་རིན་ཆེན་འདི་ཕུལ་བས། །བཀྲེས་ཤིང་འཕོངས་པ་རྒྱུན་ཆད་ནས། །འབྱོར་པ་ཕུན་སུམ་ཚོགས་པར་ཤོག །མ་ཧཱ་རཏྣ་པུ་ཙ་ཧཱུཾ། བདེ་བར་གཤེགས་པ་ཐམས་ཅད་ལ། །བཙུན་མོ་རིན་ཆེན་འདི་ཕུལ་བས། །ཤེས་རབ་དབྱིངས་ཀྱི་དོན་རྟོགས་ནས། །ཤེས་རབ་ཐབས་དང་འབྲེལ་བར་ཤོག བ་ཏི་རཏྣ། བདེ་བར་གཤེགས་པ་ཐམས་ཅད་ལ། །བློན་པོ་རིན་ཆེན་འདི་ཕུལ་བས། །ཕྱི་ནང་གསང་གསུམ་ཐེག་པར་ལྡན། །བསམ་ཡས་བསྟན་པ་རབ་འཛིན་ཅིང་། །ཡོན་ཏན་ཐམས་ཅད་ལྡན་པར་ཤོག །མ་ཧཱ་རཏྣ་པུ་ཙ་ཧཱུྃ། བདེ་བར་གཤེགས་པར་ཐམས་ཅད་ལ། །གླང་པོ་རིན་ཆེན་འདི་ཕུལ་བས། །ལྟ་བ་ངན་པ་རབ་སྤངས་ནས། །བླ་མེད་ཐེག་པ་རབ་ཞོན་ནས། །ཐམས་ཅད་མཁྱེན་པའི་གྲོང་ཁྱེར་དུ། །ད་ནི་རབ་ཏུ་འཇུག་པར་ཤོག །མ་ཧཱ་ཧ་ཏི། བདེ་བར་གཤེགས་པ་ཐམས་ཅད་ལ། །རྟ་མཆོག་རིན་ཆེན་འདི་ཕུལ་བས། །སྲིད་པའི་སྲེག་ལམ་ཡོངས་གྲོལ་སྟེ། །རྫུ་འཕྲུལ་མཆོག་གི་ཤུགས་ཐོབ་ནས། །སངས་རྒྱས་ཞིང་དུ་འགྲོ་གྱུར་ཤོག །མ་ཧཱ་རཏྣ་ན་རུ་རང་ཤ །བདེ་བར་གཤེགས་པ་ཐམས་ཅད་ལ། །དམག་དཔོན་རིན་ཆེན་འདི་ཕུལ་བས། །ཕས་ཀྱི་རྒོལ་བ་ཚར་བཅད་ནས། །ཉོན་མོངས་དགྲ་ལས་རྒྱལ་གྱུར་ནས། །སྙེམས་བྲལ་མཆོག་ནི་ཐོབ་པར་ཤོག །མ་ཧཱ་ཁཾ་ཀ་རཏྣ། ཁ་དོག་དབྱིབས་ལེགས་ཡིད་འོང་རྒྱན་འཕྲེང་ལྡན། །ཕྱོགས་དུས་ཀུན་ན་གཟུགས་མཆོག་ཅི་མཆིས་པ། །མོས་བློས་མཆོད་གནས་རྣམས་ལ་བདག་འབུལ་ན། །ཅི་བདེ་བར་ནི་བཞེས་སུ་གསོལ། །ༀ་སརྦ་ཏ་ཐཱ་ག་ཏ་རུ་པ་བུ་ཙ་མེ་ག་ས་མུ་ཏྲ་སྨ་ར་ས་མ་ཡེ་ཧཱུཾ། ཕྱོགས་དུས་ཀུན་ནས་ཟིན་དང་མ་ཟིན་པའི། །ཡོན་ཏན་ཚིག་བརྗོད་སྒྲ་སྙན་ཡིད་འོང་ལྡན། །མོས་བློས་མཆོད་གནས་རྣམས་ལ་བདག་འབུལ་ན། །ཅི་བདེ་བར་ནི་བཞེས་སུ་གསོལ། །ཤསྟ། ཕྱོགས་དུས་ཀུན་ན་ཙན་དན་སྦྲུལ་སྙིང་དང་། །ཨ་ཀར་ལ་སོགས་ཚིམ་བྱེད་དབང་པོ་རྣམས། །མོས་བློས་མཆོད་གནས་རྣམས་ལ་བདག་འབུལ་ན། །ཅི་བདེ་བར་ནི་བཞེས་སུ་གསོལ། །གནྡྷ་པུ་ཙ་མེ་ག་ས། ཕྱོགས་དུས་ཀུན་ན་རོ་དང་བཅུད་ལྡན་པའི། །ལུས་སེམས་བརྟན་པར་བྱེད་པའི་རོ་མཆོག་ཀྱང་། །མོས་བློས་མཆོད་གནས་རྣམས་ལ་བདག་འབུལ་ན། །ཅི་བདེ་བར་ནི་བཞེས་སུ་གསོལ། །ར་ས་བཛྲ་པུ་ཙ། ཕྱོགས་དུས་ཀུན་ན་འཇམ་མཉེན་སྤྲིན་ཆགས་པའི། །རེག་བྱའི་ཁྱད་པར་ལུས་སེམས་ཚིམ་བྱེད་པ། །མོས་བློས་མཆོད་གནས་རྣམས་ལ་བདག་འབུལ་ན། །ཅི་བདེ་བར་ནི་བཞེས་སུ་གསོལ། །པ་རི་ཤ་བཛྲ་པུ་ཛ། ༀ་བཛྲ་སཏྭ་སུ་སཾ་ཏྲ་ཧ། ༀ་བཛྲ་རཏྣ་མ་ཏ་ར། ༀ་བཛྲ་དྷ་ར་མ། གྷ་ན་ཡཱ། ༀ་བཛྲ་ཀརྨ་ཀ་རོད་བྷ་ཝ། ༀ་བཛྲ་ལ་སྱེ་ཧཱུཾ། ༀ་བཛྲ་མ་ལེ་ཏྲཾ། ༀ་བཛྲ་གིརྟི་ཧྲི། ༀ་བཛྲ་ནིརྟི་ཨ། ༀ་དྷུ་པེ་ཧཱུཾ། ༀ་པུཥྤེ་ཏྲཾ། ༀ་ཨ་ལོཀྐེ་ཧྲི། ༀ་བཛྲ་གྷནྡྷེ་ཨ། བསྟོད་པ་ནི། ཧཱུཾ་སྣང་སྟོང་རྡོ་རྗེ་ནམ་མཁའི་དབྱིངས། །ཆོས་དབྱིངས་རྣམ་དག་རྡོ་རྗེའི་སྐུ། །བྱང་ཆུབ་མཆོག་གི་ཕྱག་རྒྱ་མཛད། །ཕྱག་འཚལ་རྣམ་པར་སྣང་མཛད་ལའོ། །མེ་ལོང་ཡེ་ཤེས་བྱིན་རླབས་ལས། སེམས་མ་རྡོ་རྗེའི་ཕྱག་རྒྱ་སྟེ། །རྡོ་རྗེ་དམར་པོ་རྩེ་ལྔ་མ། །མཆོད་ཅིང་གུས་པས་ཕྱག་ཀྱང་འཚལ། །མཉམ་ཉིད་ཡེ་ཤེས་བྱིན་རླབས་ལས། རཏྣའི་སེམས་མའི་ཕྱག་རྒྱ་སྟེ། །རཏྣ་སེར་པོ་ཟུར་བརྒྱད་པ། །བསྟོད་ཅིང་གུས་པས་ཕྱག་འཚལ་ལོ། །ཀུན་རྟོག་ཡེ་ཤེས་ངང་ཉིད་ལས། །ཆོས་ཀྱི་སེམས་མའི་ཕྱག་རྒྱ་སྟེ། །པདྨ་དཀར་དམར་བཅུ་དྲུག་ལ། །བསྟོད་ཅིང་གུས་པས་ཕྱག་འཚལ་ལོ། །བྱ་གྲུབ་ཡེ་ཤེས་བྱིན་བརླབས་ལས། །ལས་ཀྱི་སེམས་མའི་ཕྱག་རྒྱ་སྟེ། །རྡོ་རྗེ་རྒྱ་གྲམ་ལྗང་ཁུ་ལ། །བསྟོད་ཅིང་གུས་པས་ཕྱག་འཚལ་ལོ། །གཟུང་འཛིན་རྡོ་རྗེ་བརྟན་པའི་ས། མེ་ལོང་ཡེ་ཤེས་རྡོ་རྗེའི་སྐུ། །རྡོ་རྗེ་ས་ནོན་ཕྱག་རྒྱ་འཛིན། །ཕྱག་འཚལ་རྡོ་རྗེ་མི་སྐྱོད་ལའོ། །རྡོ་རྗེ་སེམས་དཔའ་སེམས་དཔའ་ཆེ། །རྡོ་རྗེ་དེ་བཞིན་གཤེགས་པ་ཀུན། །རྡོ་རྗེ་དང་པོ་ཀུན་ཏུ་བཟང་། །ཕྱག་འཚལ་ཕྱག་ན་རྡོ་རྗེ་ལ། །རྡོ་རྗེ་རྒྱལ་པོ་སངས་རྒྱས་མཆོག །རྡོ་རྗེ་ལྕགས་ཀྱུ་དེ་བཞིན་གཤེགས་། །དོན་ཡོད་རྒྱལ་པོ་དེ་བཞིན་མཆོག །ཕྱག་འཚལ་རྡོ་རྗེ་འགུགས་ཁྱོད་ལ། །རྡོ་རྗེ་ཆགས་པ་བདེ་ཆེན་པོ། །རྡོ་རྗེ་མདའ་ནི་དབང་བྱེད་པ། །བདུད་ཀྱི་འདོད་པ་རྡོ་རྗེ་ཆ། །ཕྱག་འཚལ་རྡོ་རྗེ་གཞུ་ཁྱོད་ལ། །རྡོ་རྗེ་ལེགས་པ་སེམས་དཔའ་མཆོག །རྡོ་རྗེ་མགུ་པ་དགའ་བ་ཆེ། །རབ་སྐྱེས་རྒྱལ་པོ་རྡོ་རྗེ་མཆོག །ཕྱག་འཚལ་རྡོ་རྗེ་དགྱེས་ཁྱོད་ལ། །རཏྣ་རྡོ་རྗེ་འབར་བའི་མེ། །མཉམ་ཉིད་ཡེ་ཤེས་རྡོ་རྗེའི་སྐུ། །རྡོ་རྗེ་མཆོད་སྦྱིན་ཕྱག་རྒྱ་མཛད། །ཕྱག་འཚལ་རིན་ཆེན་འབྱུང་ལྡན་ལའོ། །རྡོ་རྗེ་རིན་ཆེན་རྡོ་རྗེའི་དོན། །རྡོ་རྗེ་ནམ་མཁའ་ནོར་བུ་ནི། །ནམ་མཁའི་སྙིང་པོ་རྡོ་རྗེ་ཕྱུག །ཕྱག་འཚལ་རྡོ་རྗེ་སྙིང་ཁྱོད་ལ། །རྡོ་རྗེ་གཟི་བརྗིད་ཆེར་འབར་བ། །རྡོ་རྗེ་ཉི་མ་རྒྱལ་བའི་འོད། །རྡོ་རྗེ་འོད་ཟེར་གཟི་བརྗིད་ཆེ། །ཕྱག་འཚལ་རྡོ་རྗེ་འོད་ཁྱོད་ལ། །སེམས་ཅན་དོན་རབ་མཛད་དོ་དཔལ། །རྡོ་རྗེ་རྒྱལ་མཚན་རབ་དགའ་བྱེད། རྡོ་རྗེ་ཆེན་པོ་རིན་ཆེན་དཔལ། །ཕྱག་འཚལ་རྡོ་རྗེ་དཔལ་ཁྱོད་ལའོ། །རྡོ་རྗེ་གཞད་མོ་གཞད་པ་ཆེ། །རྡོ་རྗེ་འཛུམ་པ་ངོ་མཚར་ཆེ། །དགའ་ཞིང་རབ་དགའ་རྡོ་རྗེ་དོན། །ཕྱག་འཚལ་རྡོ་རྗེ་དགའ་ཁྱོད་ལའོ། །མཐའ་ཡས་རྡོ་རྗེ་ཆོས་ཀྱི་སྐུ། །ཀུན་རྟོགས་ཡེ་ཤེས་རྡོ་རྗེའི་སྐུ། །རྡོ་རྗེ་ཏིང་འཛིན་ཕྱག་རྒྱ་མཛད། །ཕྱག་འཚལ་སྣང་བ་མཐའ་ཡས་ལའོ། །རྡོ་རྗེ་ཆོས་རབ་རྡོ་རྗེ་དོན། །རྡོ་རྗེ་པད་མ ོ་རབ་དགའ་བྱེད། །འཇིག་རྟེན་དབང་ཕྱུག་ཆོས་རབ་སྤྱན། །ཕྱག་འཚལ་རྡོ་རྗེ་སྤྱན་ཁྱོད་ལའོ། །རྡོ་རྗེ་གནོན་པོ་ཐེག་པ་ཆེ། །རྡོ་རྗེ་རལ་གྲི་མཚོན་ཆེན་པོ། །འཇམ་དཔལ་རྡོ་རྗེ་རབ་ཏུ་དགའ། །ཕྱག་འཚལ་རྡོ་རྗེ་བླ་ཁྱོད་ལའོ། །རྡོ་རྗེ་རྒྱུ་དང་སྙིང་པོ་ཆེ། །རྡོ་རྗེ་འཁོར་ལོ་ཚུལ་ཆེན་པོ། །རབ་བསྐོར་རྡོ་རྗེ་ལས་བྱུང་བ། །ཕྱག་འཚལ་རྡོ་རྗེ་འཁོར་ལོ་ལའོ། རྡོ་རྗེ་གསུངས་པའི་རང་རིག་མཆོག །རྡོ་རྗེ་བཟློས་པ་རབ་འགྲུབ་སྦྱིན། །མི་གསུང་རྡོ་རྗེ་མཆོག་གྲུབ་པ། །ཕྱག་འཚལ་རྡོ་རྗེ་གསུང་ཁྱོད་ལའོ། །དོན་འགྲུབ་རྡོ་རྗེ་སྐྱོད་མཛད་གླུ། །གྲུབ་པ་ཡེ་ཤེས་རྡོ་རྗེའི་སྐུ། །རྡོ་རྗེ་སྐྱབས་སྦྱིན་ཕྱག་རྒྱ་མཛད། །ཕྱག་འཚལ་རྡོ་རྗེ་གྲུབ་པ་ལའོ། །རྡོ་རྗེ་ལས་རབ་རྡོ་རྗེ་བཀའ། །ལས་ཀྱི་རྡོ་རྗེ་ཀུན་རབ་འགྲོ། །རྡོ་རྗེ་ངེས་པ་རྒྱ་ཆེ་བ། །ཕྱག་འཚལ་རྡོ་རྗེ་ཀུན་ཁྱོད་ལའོ། །རྡོ་རྗེ་བསྲུང་བ་བརྟན་པ་ཆེ། །རྡོ་རྗེ་གོ་ཆ་སྲ་བ་ཆེ། །རྡོ་རྗེ་བརྩོན་འགྲུས་ཐུབ་དཀའ་བ། །ཕྱག་འཚལ་རྡོ་རྗེ་བརྩོན་འགྲུས་ལའོ། །རྡོ་རྗེ་གནོད་སྦྱིན་ཐབས་ཆེན་པོ། །རྡོ་རྗེ་མཆེ་བ་གཙིགས་པ་ཆེ། །བདུད་འཇོམས་རྡོ་རྗེ་མི་ཟད་པ། །ཕྱག་འཚལ་རྡོ་རྗེ་དྲག་པོ་ལའོ། །རྡོ་རྗེ་མཚམས་སྦྱོར་རབ་ཏུ་འདུ། །རྡོ་རྗེ་བཅིངས་པ་རབ་གྲོལ་བྱེད། །རྡོ་རྗེ་ཁུ་ཚུར་དམ་ཚིག་མཆོག །ཕྱག་འཚལ་རྡོ་རྗེ་ཁུ་ཚུར་ལའོ། །ཤར་ཕྱོགས་ལྷ་མོ་ལ་སེ་མ། །སྐུ་མདོག་དཀར་ལ་འོད་ཟེར་འཕྲོ། །ཕྱག་གཉིས་ཕྱག་རྒྱ་ཁུ་ཚུར་འཆང་། །དེ་ལ་བསྟོད་དེ་ཕྱག་ཀྱང་འཚལ། །ལྷོ་ཕྱོགས་ལྷ་མོ་མ་ལེ་མ། །སྐུ་མདོག་སེར་ལ་འོད་ཟེར་འཕྲོ། །ཕྱག་འཚལ་ཕྱག་གཉིས་འཕྲེང་བ་བསྣམས། །དེ་ལ་བསྟོད་དེ་ཕྱག་ཀྱང་འཚལ། །ནུབ་ཕྱོགས་ལྷ་མོ་གྷིརྟི་མ། །སྐུ་མདོག་དཀར་ལ་འོད་ཟེར་འཕྲོ། །ཕྱག་འཚལ་ཕྱག་གཉིས་པི་ཝང་བསྣམས། །དེ་ལ་བསྟོད་དེ༴ བྱང་ཕྱོགས་ལྷ་མོ་ནི རྟི་མ། །སྐུ་མདོག་ལྗང་ཁུ་འོད་ཟེར་འཕྲོ། །ཕྱག་འཚལ་ཕྱག་གཉིས་གར་སྒྱུར་མ། །དེ་ལ་བསྟོད་དེ་ཕྱག༴ ཤར་ལྷོ་ལྷ་མོ་པུཥྤེ་མ། སྐུ་མདོག་དཀར་ལ་འོད་ཟེར་འཕྲོ། །ཕྱག་འཚལ་ཕྱག་གཉིས་མེ་ཏོག་བསྣམས། །དེ་ལ་བསྟོད་དེ། །ལྷོ་ནུབ་ལྷ་མོ་དྷུ་པེ་མ། །སྐུ་མདོག་སེར་ལ་འོད་ཟེར་འཕྲོ། །ཕྱག་འཚལ་ཕྱག་ན་སྤོས་ཁང་བསྣམས། །དེ་ལ་བསྟོད་དེ༴ ནུབ་བྱང་ལྷ་མོ་ཨ་ལོ་ཀེ །སྐུ་མདོག་དམར་མོ་འོད་ཟེར་འཕྲོ། །ཕྱག་འཚལ་ཕྱག་ན་མར་མེ་བསྣམས། །དེ་ལ་བསྟོད་དེ༴ བྱང་ཤར་ལྷ་མོ་གནྡྷེ་མ། །སྐུ་མདོག་ལྗང་ལ་འོད་ཟེར་འཕྲོ། །ཕྱག་འཚལ་ཕྱག་ན་དྲི་ཆབ་བསྣམས། །དེ་ལ་བསྟོད་དེ༴ ཤར་ཕྱོགས་སྐྱོང་བའི་སྒོ་མ་ནི། །སྐུ་མདོག་དཀར་ལ་འོད་ཟེར་འཕྲོ། །ཕྱག་འཚལ་ཕྱག་ན་ལྕགས་ཀྱུ་བསྣམས། །དེ་ལ་བསྟོད་དེ༴ ལྷོ་ཕྱོགས་སྐྱོང་བའི་སྒོ་མ་ནི། །སྐུ་མདོག་སེར་ལ་འོད་ཟེར་འཕྲོ། །ཕྱག་འཚལ་ཕྱག་ན་ཞགས་པ་བསྣམས། །དེ་ལ་བསྟོད་དེ༴ ནུབ་ཕྱོགས་སྐྱོང་བའི་སྒོ་མ་ནི། །སྐུ་མདོག་དམར་ལ་འོད་ཟེར་འཕྲོ། །ཕྱག་མཚན་ཕྱག་ན་ལྕགས་སྒྲོགས་བསྣམས། །དེ་ལ༴ བྱང་ཕྱོགས་སྐྱོང་བའི་སྒོ་མ་ནི། །སྐུ་མདོག་ལྗང་ལ་འོད་ཟེར་འཕྲོ། །ཕྱག་མཚན་ཕྱག་ན་དྲིལ་བུ་བསྣམས། །དེ་ལ་བསྟོད་དེ༴ སྒོ་ཡི་འཁྱམས་ཀྱི་ནང་གནས་པ། །བྱམས་པ་ལ་སོགས་བཅུ་དྲུག་པོ། །དང་པོར་རབ་དགའ་ལ་སོགས་ནི། །དགེ་བའི་དོན་དུ་རྟག་གནས་པ། །སེམས་ཅན་སྐུ་བྱམས་རང་བཞིན་ཅན། །སྙིང་རྗེ་བློ་མཁྱེན་རང་བཞིན་འཇོམས་པའི་དཔལ། །ཡེ་ཀློང་ཆེན་པོ་སྤོས་གླང་པོ། །ཉོན་མོངས་འཇོམས་པའི་ཡེ་ཤེས་རྟོག །རྫུ་འཕྲུལ་སྟོབས་ལྡན་བཟང་པོ་སྐྱོང་། །ཤུགས་ཀྱི་ཀུན་སྐྱོད་དོན་ཡོད་ཐོགས། །ཚོགས་གཉིས་ཡོང་བསགས་བློ་མི་བཟང་། །སྟོབས་བཅུ་ཡོངས་གནོན་སྤོབས་པ་རྩེགས། །མི་ཤེས་རིགས་འཇོམས་མཐུ་ཆེན་ཐོབ། །གཟུང་འདྲེན་ཀུན་འདྲེན་ངན་སོང་འདྲེན། །ཉོན་མོངས་མུན་སེལ་མྱང་ངན་འཇོམས། །ལྷའི་གཟུགས་འཇོམས་དང་བ་ཅན་། །ལུས་ངག་སྤྱོད་པ་ཟླ་བའི་འོད། །བསམ་པ་མངོན་རྟོགས་བདུད་རྩི་འོད། །ནམ་མཁའ་ནོར་འཆང་ནམ་མཁའ་འོད། །འཇིག་རྟེན་ཀུན་ཕན་ཀུན་ཏུ་བཟང་། །རྣམ་ཐར་བཞི་ལྡན་སེམས་དཔའི་གཙོ། ས་གནས་རྣམས་ལ་ཕྱག་འཚལ་ལོ། །དེ་ནས་སྙེན་པ་ནི། ༀ་སརྦ་ཏ་ཐཱ་ག་ཏ་མ་ཧཱ་ཡོ་གི་ཤྭ་ར་ཧཱུཾ། །ༀ་ས་ཏྭ་བཛྲིར་ཧཱུཾ། རཏྣ་བཛྲི། དྷརྨ་བཛྲི། ཀརྨ་བཛྲི། ༀ་བཛྲ་སཏྭ་ཧཱུཾ། བཛྲ་ར་ཛྲ། བཛྲ་ར་ག །བཛྲ་ས་དུ། བཛྲ་རཏྣ། བཛྲ་པདྨ། བཛྲ་ཏི་ཛ། བཛྲ་ཀི་དུ། བཛྲ་ཧ་པ། བཛྲ་བྷ་ག །བཛྲ་དྷརྨ། བཛྲ་ཏིཀྵ་ཎ། བཛྲ་ཀི་དུ། བཛྲ་ཀརྨ། བཛྲ་རཀྵ། བཛྲ་ཡཀྵ། བཛྲ་མུཥྚི། བཛྲ་ལ་སྱེ། བཛྲ་མ་ལེ། བཛྲ་གིརྟི། བཛྲ་ནིརྟི། བཛྲ་དྷུ་པེ། བཛྲ་པུཥྤེ། བཛྲ་ཨ་ལོ་ཀེ །བཛྲ་གནྡྷེ། བཛྲ་ཨཾ་གུ་ཤ །བཛྲ་པ་ཤ །བཛྲ་སྥོ་ཊ། བཛྲ་ཨ་བེ་ཤ །ༀ་སརྦ་སཾ་ཀ་རི་པ་རི་ཤུད་དྷ་དྷརྨ་ཏེ་ག་ག་ན་ས་མུ་ག་ཏེ་སྭ་བྷ་ཝ་བི་ཤུདྷེ་མ་ཧཱ་ཡ་ན་པ་རི་ཝ་རེ་སྭཱ་ཧཱ། བརྗོད་དོ། །དེ་ནས་བུམ་བ སྐྱེད་ནི། ༀ་སྭབྷ་ཝས། བུམ་པ་སྟོང་པའི་ངང་ལས། བྷྲུཾ་ལས་འབྱུང་བ་རིམས་བརྩེགས་རི་རབ་དང་བཅས་པའི་སྟེང་དུ། ཕྱི་བུམ་པ་མཚན་ཉིད་དང་ལྡན་པ། ནང་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི་སྒོ་བཞི་ལ་སོགས། བསྙེན་པ་ཡན་ཆད་གོང་བདག་བསྐྱེད་དང་མཚུངས་ལ། བར་སྐབས་ཀྱི་ཚིག་ཁ་བསྒྱུར་རོ། །མདུན་བསྐྱེད་ནི། ༀ་སྭ་བྷ་ཝ། རྡུལ་ཚོན་སྟོང་པའི་ངང་ལས། ཧཱུཾ་ཡཾ་ཧཱུཾ་ལས། རྡོ་རྗེས་མཚན་པའི་རླུང་གི་དཀྱིལ་འཁོར། ཅེས་སོགས་ནས་བསྙེན་པ་ཡན་ཆོད་འདྲེའོ། །རབ་གནས་ཅི་རིགས་པར་བྱ། སྦྱིན་བསྲེགས་ཀྱང་འབྱོར་ན་བྱའོ། །གཉིས་པ་འཇུག་ཅིང་དབང་གི་རིན་པ་ལ་གཉིས་ཏེ། སློབ་དཔོན་བདག་ཉིད་འཇུག་ཅིང་དབང་ལེན་པ་དང་། སློབ་མ་དཀྱིལ་འཁོར་དུ་འཇུག་ཅིང་དབང་བསྐུར་བའོ། །དང་པོ་སློབ་དཔོན་འཇུག་ཅིང་དབང་ལེན་པ་ནི། གོང་དང་མཚུངས་སོ། །གཉིས་པ་སློབ་མ་འཇུག་ཅིང་དབང་བསྐུར་བ་ལ་གཉིས་ཏེ། དཀྱིལ་དུ་འཇུག་པ་དང་དབང་བསྐུར་བའོ། །དང་པོ་ནི། ཁྲུས་ནས་ཚོགས་ཡོན་འབུལ་བ་ཡན་ཆད་བཅུ་དྲུག་པོ་གོང་དང་མཐུན་ལ། བྱེ་བྲག་ཏུ་བཅོ་ལྔ་པ་དཀྱིལ་འཁོར་བསྟན་པ་ནི། འོ་མདུན་འདི་ན་ཡོད་པའི་རྡོ་རྗེ་དབྱིངས་ཀྱི་དཀྱིལ་འཁོར་རྟེན་དང་བརྟེན་པ་སྟེ། ཕྱི་རོལ་ན་མེ་རི། རྡོ་རྗེའི་ར་བ། པད་བ སྐོར། དེའི་ནང་ན། གཞལ་ཡས་ཀྱི་ཁང་པ། གྲུ་བཞི་སྒོ་བཞི། བརྒྱན་རྟ་བབས་དང་བཅས་པ། དེའི་ནང་དུ་ལྷ་རྣམ་གྲུ་ཆད་བློ་འབུར། ལིང་ཚེ་དགུའི་དབུས་དང་ཕྱོགས་བཞིའི་པདྨ་འདབ་མ་བཞི་བཞི་དང་ལྡན་པ་མངོན་སུམ་དུ་མཐོང་བའི་མོས་པ་མཛོད། དབུས་ཀྱི་ལིང་ཚེ་པདྨ་འདབ་བཞི་ལ། རྣམ་པར་སྣང་མཛད་ལ་ཡུམ་བཞིས་བསྐོར་བ། ཤར་གྱི་ལིང་ཚེའི་པད་འདབ་བཞི་ལ་མི་སྐྱོད་པ་ལ་རྡོ་རྗེ་རིགས་ཀྱི་སེམས་དཔའ་བཞིས་བསྐོར་བ། ལྷོའི་ལིང་ཚེ་པད་འདབ་བཞི་ལ་རིན་ཆེན་འབྱུང་ལྡན་ལ་རིགས་ཀྱི་སེམས་དཔའ་བཞིས་བསྐོར་བ། ནུབ་ཀྱི་ལིང་ཚེའི་པད་འདབ་བཞི་ལ་སྣང་བ་མཐའ་ཡས་ལ། པདྨ་རིགས་ཀྱི་སེམས་དཔའ་བཞིས་བསྐོར་བ། བྱང་གི་ལིང་ཚེའི་པད་འདབ་བཞི་ལ་དོན་ཡོད་གྲུབ་པ་ལ། ལས་ཀྱི་རིགས་ཀྱི་སེམས་དཔའ་བཞིས་བསྐོར་བ། མཚམས་བཞིའི་ལིང་ཚེ་བཞི་ལ། ནང་གིི་སྒེག་མོ་བཞི། གྲུ་ཆད་བཞི་ལ་ཕྱིའི་སྒེག་མོ་བཞི། བློ་འབུར་བཞི་ལ་སྒོ་བ་བཞི། ལྷ་རྣམས་ལ་སྐལ་བཟང་སྟོང་ལ་བཞིས་མ་ཚང་བ། ཕྱོགས་རེ་རེས་གཉིས་རྒྱ་བཞི་བཅུ་རྩ་དགུ་དགུ། སྒོ་བཞིར་སྒོ་མ་བཞི་དང་བཅས་པ་སྐུ་སྣང་ལ་རང་བཞིན་མེད་པ་མེ་ལོང་ནང་གི་གཟུགས་བརྙན་བཞིན་མངོན་སུམ་དུ་མཐོང་བ་དེ། ཁྱེད་རང་རྣམས་ཀྱི་ཡི་དམ་གྱི་ལྷ་བསྐལ་ཡིན་ཨང་སྙམ་པའི་མོས་པ་མཛོད་དང་། སྤྱི་དོན་གཉིས་པ་དབང་བསྐུར་བ་ལ་གསུམ་སྟེ། སྦྱོར་བ་དང་། དངོས་བཞི་དང་། རྗེས་སོ། །དང་པོ་ནི་གོང་དང་མཐུན་ནོ། །གཉིས་པ་དངོས་བཞི་ལ་གསུམ་སྟེ། ཕྱི་ཕན་པའི་དབང་དང་། ནང་ནུས་པའི་དབང་དང་། གསང་བ་ཟབ་མོའི་དབང་ངོ་། །དང་པོ་ནི་བུམ་པའི་དབང་ལ་སོགས་དགུ་པོ་གོང་དང་མཚུངས་ལ། བྱེ་བྲག་ཏུ་ཕྱག་རྒྱའི་དབང་བསྐུར་བ་ལ་བསམ་རྒྱུད། བསྒྲག་ཚིག །བསྐུར་གནས། སྟིམ་གནས། སྒྲིབ་པ་གང་དག །ནུས་པ་གང་སྐྱེ་ལྔའི་དང་པོ་བསམ་རྒྱུད་ནི། འོག་མིན་དང་། བླ་མའི་ཐུགས་ཁ་དང་། དཀྱིལ་འཁོར་གྱི་དབུས་ནས། རྡོ་རྗེ་དབྱིངས་ཀྱི་ལྷ་ཚོགས་འཁོར་དང་བཅས་པ་བྱོན་ནས། ཁྱེད་རང་རྣམས་ལ་ཐིམ་པས། ཁྱེད་རང་རྣམས་ཀྱི་ཕུང་པོ་ཁམས་སྐྱེ་མཆེད་རྣམས་དང་གཉིས་སུ་མེད་པར་སྒོམ་མཛོད་ཅིག །བསྒྲགས་ཚིག་ནི། ཧཱུཾ་སྣང་སྟོང་རྡོ་རྗེ་ནམ་མཁའི་དབྱིངས། །ཆོས་དབྱིངས་རྣམ་དག་རྡོ་རྗེའི་སྐུ། །བྱང་ཆུབ་མཆོག་གི་ཕྱག་རྒྱ་མཛད། །རྣམ་པར་སྣང་མཛད་དབང་བསྐུར་རོ། །ༀ་སརྦ་ཏ་ཐཱ་ག་ཏ་མ་ཧཱ་ཡོ་གི་ཤྭ་རི་ཧཱུཾ་ཨ་བྷི་ཥིཉྩ་ཧཱུཾ། མེ་ལོང་ཡེ་ཤེས་བྱིན་རླབས་ལས། །སེམས་མ་རྡོ་རྗེ་ཕྱག་རྒྱ་སྟེ། །རྡོ་རྗེ་དམར་པོ་རྩེ་ལྔ་པ། །སངས་རྒྱས་སྤྱན་མས་དབང་བསྐུར་རོ། །ས་ཏྭ་བཛྲ་ཨ་བྷི་ཥིཉྩ་ཧཱུཾ། མཉམ་ཉིད་ཡེ་ཤེས་བྱིན་རླབས་ལས། །རཏྣ་སེམས་མའི་ཕྱག་རྒྱ་སྟེ། །རཏྣ་སེར་པོ་ཟུར་བརྒྱད་པ། མ་མ་ཀི་ཡི་དབང་བསྐུར་རོ། །རཏྣ་བཛྲ་ཨ་བྷི་ཥིཉྩ་ཧཱུཾ། ཀུན་རྟོགས་ཡེ་ཤེས་བྱིན་རླབས་ལས། །ཆོས་ཀྱི་སེམས་མའི་ཕྱག་རྒྱ་སྟེ། པདྨ་གར་དབང་བཅུ་དྲུག་ལ། གོས་དཀར་མོ་ཡིས་དབང་བསྐུར་རོ། །དྷརྨ་བཛྲ་ཨ་བྷི་ཥིཉྩ་ཧཱུཾ། བྱ་གྲུབ་ཡེ་ཤེས་བྱིན་རླབས་ལས། །ལས་ཀྱི་སེམས་མའི་ཕྱག་རྒྱ་སྟེ། །དམ་ཚིག་སྒྲོལ་མའི་དབང་བསྐུར་རོ། །ཀརྨ་བཛྲ་ཨ་བྷི་ཥིཉྩ་ཧཱུཾ། གཟུང་འཛིན་རྡོ་རྗེ་བརྟན་པའི་ས། །མེ་ལོང་ཡེ་ཤེས་རྡོ་རྗེའི་སྐུ། །རྡོ་རྗེ་ས་ནོན་ཕྱག་རྒྱ་འཛིན། །མི་སྐྱོད་རྡོ་རྗེའི་དབང་བསྐུར་རོ། །ཨཱོཾ་བཛྲ་སཏྭ་ཧཱུཾ། ཨ་བྷི་ཥིཉྩ་ཧཱུཾ། རྡོ་རྗེ་སེམས་དཔའ་སེམས་དཔའ་ཆེ། །རྡོ་རྗེ་དེ་བཞིན་གཤེགས་པའི་སྐུ། །རྡོ་རྗེ་དང་པོ་ཀུན་ཏུ་བཟང་། །རྡོ་རྗེ་སེམས་དཔའི་དབང་བསྐུར་རོ། །བཛྲ་སཏྭ། ཨ་བྷ་ཥིཉྩ་ཧཱུཾ། རྡོ་རྗེ་རྒྱལ་པོ་སངས་རྒྱས་མཆོག །རྡོ་རྗེ་ལྕགས་ཀྱུ་དེ་བཞིན་གཤེགས། །ངེས་པའི་རྒྱལ་པོ་རྡོ་རྗེ་མཆོག །རྡོ་རྗེ་རྒྱལ་པོས་དབང་བསྐུར་རོ། །བཛྲ་རྭ་ཛཿཨ་བྷ་ཥིཉྩ་ཧཱུཾ། རྡོ་རྗེ་ཆགས་པ་བདེ་ཆེན་པོ། །རྡོ་རྗེ་འདའ་ནི་དབང་བྱེད་པ། །བདུད་ཀྱི་འདོད་པ་རྡོ་རྗེ་ཆེ། །རྡོ་རྗེ་ཆགས་པའི་དབང་བསྐུར་རོ། །བཛྲ་ར་ག །ཨ་བྷི་ཥིཉྩ་ཧཱུཾ། རྡོ་རྗེ་ལེགས་པ་སེམས་དཔའ་མཆོག །རྡོ་རྗེ་མགུ་བ་དགའ་བ་ཆེ། །རབ་དགྱེས་རྒྱལ་པོ་རྡོ་རྗེ་མཆོག །རྡོ་རྗེ་ལེགས་པའི་དབང་བསྐུར་རོ། །བཛྲ་ས་དྷུ། ཨ་བྷི་ཥིཉྩ་ཧཱུཾ། རིན་ཆེན་རྡོ་རྗེ་འབར་བའི་མེ། །མཉམ་ཉིད་ཡེ་ཤེས་རྡོ་རྗེ་སྐུ། །རྡོ་རྗེ་མཆོག་སྦྱིན་ཕྱག་རྒྱ་མཛད། །རིན་ཆེན་འབྱུང་གནས་དབང་བསྐུར་རོ། །བཛྲ་རཏྣ་ཨ་བྷི་ཥིཉྩ་ཧཱུཾ། རྡོ་རྗེ་རིན་ཆེན་རྡོ་རྗེ་དོན། །རྡོ་རྗེ་ནམ་མཁའ་ནོར་བུ་ཆེ། །ནམ་མཁའ་སྙིང་པོ་རྡོ་རྗེ་ཕྱུག །རྡོ་རྗེ་རིན་ཆེན་དབང་བསྐུར་རོ། །བཛྲ་རཏྣ། ཨ་བྷི་ཥིཉྩ་ཧཱུཾ། རྡོ་རྗེ་གཟི་བརྗིད་ཆེར་འབར་བ། །རྡོ་རྗེ་ཉི་མ་རྒྱལ་བའི་འོད། །རྡོ་རྗེ་འོད་ཟེར་གཟི་བརྗིད་ཆེ། །རྡོ་རྗེ་གཟི་བརྗིད་དབང་བསྐུར་རོ། །བཛྲ་རཱེ་ཛ། ཨ་བྷི་ཥིཉྩ་྄ཧཱུཾ། སེམས་ཅན་དོན་རབ་མཛད་དོན་དཔལ། །རྡོ་རྗེ་རྒྱལ་མཚན་རབ་དགའ་ཕྱེད། །རྡོ་རྗེ་ཆེན་པོ་རིན་ཆེན་དཔལ། །རྡོ་རྗེ་རྒྱལ་མཚན་དབང་བསྐུར་རོ། །བཛྲ་ཀེ་དུ་ཨ་བྷི་ཥིཉྩ་ཧཱུཾ། རྡོ་རྗེ་བཞད་མོ་བཞད་པ་ཆེ། །རྡོ་རྗེ་འཛུམ་པ་ངོ་མཚར་ཆེ། །དགའ་ཞིང་རབ་དགའ་རྡོ་རྗེའི་དོན། །རྡོ་རྗེ་དགའ་བའི་དབང་བསྐུར་རོ། །བཛྲ་ཧ་ས། ཨ་བྷི་ཥིཉྩ་ཧཱུཾ། མཐའ་ཡས་རྡོ་རྗེ་ཆོས་ཀྱི་སྐུ། །ཀུན་རྟོགས་ཡེ་ཤེས་རྡོ་རྗེའི་སྐུ། །རྡོ་རྗེ་ཏིང་ངེ་འཛིན་ཕྱག་རྒྱ་མཛད། །སྣང་བ་མཐའ་ཡས་དབང་བསྐུར་རོ། །བཛྲ་དྷརྨ་ཨ་བྷི་ཥིཉྩ་ཧཱུཾ། །རྡོ་རྗེ་ཆོས་རབ་རྡོ་རྗེ་དོན། །རྡོ་རྗེ་པདྨ་རབ་དགའ་བྱེད། །འཇིག་རྟེན་དབང་ཕྱུག་ཆོས་རབ་སྤྱན། །རྡོ་རྗེ་ཆོས་ཀྱི་དབང་བསྐུར་རོ། །བཛྲ་དྷརྨ་ཨ་བྷི་ཥིཉྩ་ཧཱུཾ། །རྡོ་རྗེ་གནོན་པོ་ཐེག་པ་ཆེ། །རྡོ་རྗེ་རལ་གྲི་མཚོན་ཆེན་པོ། །འཇམ་དཔལ་རྡོ་རྗེ་རབ་ཏུ་དགའ། །རྡོ་རྗེ་གནོན་པའི་དབང་བསྐུར་རོ། །བཛྲ་ཏིཀྵྞ་ཨ་བྷི་ཥིཉྩ་ཧཱུཾ། །རྡོ་རྗེ་རྒྱུ་དང་སྙིང་པོ་ཆེ། །རྡོ་རྗེ་འཁོར་ལོ་ཚུལ་ཆེན་པོ། །རབ་བསྐོར་རྡོ་རྗེ་ལས་བྱུང་བ། །རྡོ་རྗེ་རྒྱུ་ཡིས་དབང་བསྐུར་རོ། །བཛྲ་ཧེ་རུ། ཨ་བྷི་ཥིཉྩ་ཧཱུཾ། རྡོ་རྗེ་གསུང་བ་རང་རིག་མཆོག །རྡོ་རྗེ་བཟླས་པ་རབ་སྒྲུབ་སྦྱིན། །མི་གསུང་རྡོ་རྗེ་མཆོག་སྒྲུབ་པ། །རྡོ་རྗེ་གསུང་གི་དབང་བསྐུར་རོ། །རྡོ་རྗེ་བཛྲ་བྷ་ཥ་ཨ་བྷི་ཥིཉྩ་ཧཱུཾ། དོན་འགྲུབ་རྡོ་རྗེ་སྐྱོད་མཛད་གླུ། །གྲུབ་པ་ཡེ་ཤེས་རྡོ་རྗེའི་སྐུ། །རྡོ་རྗེ་སྐྱབས་སྦྱིན་ཕྱག་རྒྱ་མཛད། །དོན་འགྲུབ་རྡོ་རྗེའི་དབང་བསྐུར་རོ། །བཛྲ་ཀརྨ་ཨ་བྷི་ཥིཉྩ་ཧཱུཾ། རྡོ་རྗེ་ལས་རབ་རྡོ་རྗེའི་བཀའ། །ལས་ཀྱི་རྡོ་རྗེ་ཀུན་རབ་སྒྲོལ། །རྡོ་རྗེ་ངེས་པ་རྒྱ་ཆེ་བ། །རྡོ་རྗེ་ལས་རབ་དབང་བསྐུར་རོ། །བཛྲ་ཀརྨ་ཨ་བྷི་ཥིཉྩ་ཧཱུཾ། རྡོ་རྗེ་བསྲུང་བ་བསྟན་པ་ཆེ། །རྡོ་རྗེ་བརྩོན་འགྲུས་དཀའ་ཐུབ་པ། །རྡོ་རྗེ་བརྩོན་འགྲུས་མཆོག་ཐུབ་པ། །རྡོ་རྗེ་བསྲུང་བའི་དབང་བསྐུར་རོ། །བཛྲ་རཀྵ་ཨ་བྷི་ཥིཉྩ་ཧཱུཾ། རྡོ་རྗེ་གནོད་སྦྱིན་ཐབས་ཆེན་པོ། །རྡོ་རྗེ་མཆེ་བ་གཙིགས་པ་ཆེ། །བདུད་འཇོམས་རྡོ་རྗེ་མི་ཟད་པ། །རྡོ་རྗེ་གནོད་སྦྱིན་དབང་བསྐུར་རོ། །བཛྲ་ཡཀྵ་ཨ་བྷི་ཥིཉྩ་ཧཱུཾ། རྡོ་རྗེ་མཚམས་སྦྱོར་རབ་ཏུ་འདུད། །རྡོ་རྗེ་བཅིངས་པ་རབ་གྲོལ་བྱེད། །རྡོ་རྗེ་ཁུ་ཚུར་དམ་ཚིག་མཆོག །རྡོ་རྗེ་ཁུ་ཚུར་དབང་བསྐུར་རོ། །བཛྲ་མུཥྚི་ཨ་བྷི་ཥིཉྩ་ཧཱུཾ། ཤར་ཕྱོགས་ལྷ་མོ་ལ་སེ་མ། །སྐུ་མདོག་དཀར་ལ་འོད་ཟེར་འཕྲོ། །ཕྱག་གཉིས་ཕྱག་རྒྱ་ཁུ་ཚུར་འཆང་། །ལ་སེ་མ་ཡི་དབང་བསྐུར་རོ། །བཛྲ་ལ་སེ་ཨ་བྷི་ཥིཉྩ་ཧཱུཾ། ལྷོ་ཕྱོགས་ལྷ་མོ་མ་ལེ་མ། །སྐུ་མདོག་སེར་ལ་འོད་ཟེར་འཕྲོ། །ཕྱག་མཚན་ཕྱག་གཉིས་འཕྲེང་བ་བསྣམས། །མ་ལེ་མ་ཡི་དབང་བསྐུར་རོ། །བཛྲ་མ་ལེ་ཨ་བྷི་ཥིཉྩ་ཧཱུཾ། །ནུབ་ཕྱོགས་ལྷ་མོ་གིརྟི་མ། །སྐུ་མདོག་དམར་ལ་འོད་ཟེར་འཕྲོ། །ཕྱག་མཚན་ཕྱག་གཉིས་པི་ཝང་བསྣམས། གིརྟི་མ་ཡི་དབང་བསྐུར་རོ། །བཛྲ་གི རྟི། ཨ་བྷི་ཥིཉྩ་ཧཱུཾ། བྱང་ཕྱོགས་ལྷ་མོ་ནིརྟི་མ། སྐུ་མདོག་ལྗང་ལ་འོད་ཟེར་འཕྲོ། །ཕྱག་མཚན་ཕྱག་གཉིས་གར་བསྒྱུར་མ། །ནིརྟི་མ་ཡི་དབང་བསྐུར་རོ། །བཛྲ་ནིརྟི་ཨ་བྷི་ཥིཉྩ་ཧཱུཾ། །ཤར་ལྷོ་ལྷ་མོ་དྷུ་པེ་མ། །སྐུ་མདོག་དཀར་ལ་འོད་ཟེར་འཕྲོ། །ཕྱག་མཚན་ཕྱག་ན་སྤོས་ཁང་བསྣམས། །དྷུ་པེ་མ་ཡི་དབང་བསྐུར་རོ། །བཛྲ་དྷུ་པེ། ཨ་བྷི་ཥིཉྩ་ཧཱུཾ། ལྷོ་ནུབ་ལྷ་མོ་པུཥྤེ་མ། །སྐུ་མདོག་སེར་ལ་འོད་ཟེར་འཕྲོ། །ཕྱག་མཚན་ཕྱག་ན་མེ་ཏོག་བསྣམས། །པུཥྤེ་མ་ཡི་དབང་བསྐུར་རོ། །བཛྲ་པུཥྤེ་ཨ་བྷི་ཥིཉྩ་ཧཱུཾ། ནུབ་བྱང་ལྷ་མོ་ཨ་ལོ་ཀེ། །སྐུ་མདོག་དམར་ལ་འོད་ཟེར་འཕྲོ། །ཕྱག་མཚན་ཕྱག་ན་མར་མེ་བསྣམས། །ཨ་ལོ་ཀེའི་དབང་བསྐུར་རོ། །བཛྲ་ཨ་ལོ་ཀེ་ཨ་བྷི་ཥིཉྩ་ཧཱུཾ། བྱང་ཤར་ལྷ་མོ་གནྡྷེ་མ། །སྐུ་མདོག་ལྗང་ལ་འོད་ཟེར་འཕྲོ། །ཕྱག་མ ཚན་ཕྱག་ན་དྲི་ཆབ་བསྣམས། །གནྷེ་མ་ཡི་དབང་བསྐུར་རོ། །བཛྲ་གྷནྟེ་ཨ་བྷི་ཥིཉྩ་ཧཱུཾ། ཤར་ཕྱོགས་སྐྱོང་བའི་སྒོ་མ་ནི། །སྐུ་མདོག་དཀར་ལ་འོད་ཟེར་འཕྲོ། ཕྱག་མཚན་ཕྱག་ན་ལྕགས་ཀྱུ་བསྣམས། །ཤར་གྱི་སྒོ་མའི་དབང་བསྐུར་རོ། །བཛྲ་ཨངྒུ་ཤ་ཨ་བྷི་ཥིཉྩ་ཧཱུཾ། ལྷོ་ཕྱོགས་སྐྱོང་བའི་སྒོ་མ་ནི། །སྐུ་མདོག་སེར་ལ་འོད་ཟེར་འཕྲོ། །ཕྱག་མཚན་ཕྱག་ན་ཞགས་པ་བསྣམས། །ལྷོ་ཡི་སྒོ་མའི་དབང་བསྐུར་རོ། །བཛྲ་པ་ཤ་ཨ་བྷི་ཥིཉྩ་ཧཱུཾ། ནུབ་ཕྱོགས་སྐྱོང་བའི་སྒོ་མ་ནི། སྐུ་མདོག་དམར་ལ་འོད་ཟེར་འཕྲོ། །ཕྱག་མཚན་ཕྱག་ན་ལྕགས་སྒྲོགས་བསྣམས། །ནུབ་ཀྱི་སྒོ་མའི་དབང་བསྐུར་རོ། །བཛྲ་སྥོ་ཊ། ཨ་བྷི་ཥིཉྩ་ཧཱུཾ། བྱང་ཕྱོགས་སྐྱོང་བའི་སྒོ་མ་ནི། །སྐུ་མདོག་ལྗང་ལ་འོད་ཟེར་འཕྲོ། །ཕྱག་མཚན་ཕྱག་ན་དྲིལ་བུ་བསྣམས། །བྱང་གི་སྒོ་མའི་དབང་བསྐུར་རོ། །བཛྲ་ཨ་བེ་ཤ །ཨ་བྷི་ཥིཉྩ་ཧཱུཾ། བསྐུར་གནས་ནི་མགོ །སྟིམ་གནས་ནི་ཕུང་པོ་ཁམས་དང་སྐྱེ་མཆེད་ལ་སྟིམ། སྒྲིབ་པ་གང་དག་ནུས་པ་གང་སྐྱེ་ནི། ཕུང་ཁམས་སྐྱེ་མཆེད་དངོས་པོ་དང་མཚན་མར་འཛིན་པའི་དྲི་མ་དག་ནས། ཕུང་པོ་ཁམས་སྐྱེ་མཆེད་རྒྱལ་བའི་དཀྱིལ་འཁོར་དུ་ལྷུན་གྱིས་གྲུབ་པའི་དབང་དམ་པ་ཐོབ་པར་གྱུར་ཅིག །ཡོ་གའི་དབང་གི་བཀྲ་ཤིས་དྲུག་ཅུ་རྩ་གཉིས་ལས། དང་པོ་ཐུགས་རྗེ་གཟུང་ཀྱི་དབང་བཅུ་གཅིག །དང་པོ་སྐུ་གཟུགས་ཕྱག་རྒྱའི་དབང་ནི། །སྔོན་རི་རབ་རིའི་རྩེ་མོར་རིན་པོ་ཆེ་དང་། ཁང་བུ་འབར་བའི་གནས་སུ། དཔལ་ཀུན་རིག་རྣམ་པ་སྣང་མཛད་ཀྱི་འཁོར་གྱིས་བྱང་ཆུབ་སེམས་དཔའ་དོན་ཐམས་ཅད་གྲུབ་པ་ལ་སོགས་བ་ལ། ཕྱག་རྒྱ་ཆེན་པོ་ལྔས་དབང་བསྐུར་བས། རིགས་ལྔ་ཡེ་ཤེས་ལྔ་རུ་མཐར་ཕྱིན་པའི་དབང་དམ་པ་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་ཕྱག་རྒྱ་ཆེན་པོ་ལྔའི་དབང་བསྐུར་བས་ཡེ་ཤེས་ལྔ་མཐར་ཕྱིན་ནས་ལོངས་སྤྱོད་རྫོགས་པའི་སྐུ་ཐོབ་པར་གྱུར་ཅིག །བྱང་ཆུབ་མཆོག་དང་ས་གནོན་ནི། །མཆོད་སྦྱིན་མཉམ་པའི་ཕྱག་རྒྱར་ལྡན། །སྐྱབས་ཀྱི་ཕྱག་རྒྱ་ལ་སོགས་ལྔས། །མི་འདའ་ཕྱག་རྒྱའི་དབང་ཐོབ་ཤོག །རྒྱལ་པོ་ཕྱག་རྒྱ་མཆོག་གི་རྒྱས། །ཕྱག་རྒྱའི་དབང་མཆོག་མི་འདའ་བ། །ཡེ་ཤེས་ལྔ་དང་རིགས་ལྔའི་དབང་། །དབང་གཉིས་རྫོགས་པའི་བཀྲ་ཤིས་ལེའུ་སྟེ་བཞི་བཅུ་ཞེ་བདུན་པའོ། །གཉིས་པ་གསུང་གི་གཟུངས་ཡིག་འབྲུའི་དབང་ནི། སྔོན་བཅོམ་ལྡན་འདས་རྣམ་པར་སྣང་མཛད་ཀྱི་འཁོར་རྣམས་ལ་སྙིང་པོ་སྔགས་ཀྱིས་དབང་བསྐུར་བ་ནི། རྟོག་པའི་ཡེ་ཤེས་ཕུན་སུམ་ཚོགས་པ་དང་ལྡན་པར་གྱུར་ཏོ། །དེ་དང་རྗེས་སུ་མཐུན་པར་དེ་བཞིན་གཤེགས་པའི་ཐུགས་ཡེ་ཤེས་ཀྱི་བྱིན་གྱིས་རླབས་པའི་སྙིང་པོ་སྔགས་ཀྱིས་དབང་བསྐུར་བས། རྟོག་པ་ཡེ་ཤེས་ཕུན་སུམ་ཚོགས་པ་དང་ལྡན་པར་གྱུར་ཅིག །ཐུགས་ཀྱི་ས་བོན་འབྲུ་མཆོག་སྟེ། །སྔགས་ཀྱི་བྱིན་རླབས་བསམ་མི་ཁྱབ། །ཡེ་ཤེས་ཐུགས་ཀྱི་ས་བོན་མཆོག །འབྲས་བུ་སྔགས་ཀྱི་བཀྲ་ཤིས་ཤོག །སྙིང་པོ་རིགས་ལྔ་སངས་རྒྱས་གསུང་གི་མཆོག །གསུང་མཆོག་སྔགས་ཀྱི་ཕྱག་རྒྱ་ཆེན་པོ་སྟེ། །བྱིན་རླབས་ཆེན་པོ་གཞན་ན་མེད་པ་ཡིས། །འདི་ནི་དབང་རྣམས་ཐོབ་པའི་དབང་གི་བཀྲ་ཤིས་ལེའུ་བཞི་བཅུ་ཞེ་བརྒྱད་པའོ། །བྷུདྷ་བཻ་རོ་ཙ་ན་ༀ། །བཛྲ་ཨཀྵོ་བྷྱ་ཧཱུཾ། རཏྣ་སཾ་བྷ་བ་ཏྲཾ། ཨ་མི་ཏ་བ་ཧྲཱིཿ ཨ་མོ་གྷ་སདྷི་ཨ། གསུམ་པ་ཐུགས་ཀྱི་གཟུངས་གསེར་ཐུར་ནི། སྔོན་རི་རབ་རིའི་རྩེ་མོར་རྣམ་པར་སྣང་མཛད་ཀྱི་འཁོར་རྣམས་ལ་གསེར་གྱི་ཐུར་མས་དབང་བསྐུར་བས། མ་རིག་པའི་ལིང་ཐོག་བྱང་ནས་ཤེས་རབ་ཀྱི་མིག་གསལ་བར་གྱུར་ཏོ། །དེ་དང་རྗེས་སུ་མཐུན་པར་གསེར་གྱི་ཐུར་མས་དབང་བསྐུར་བས། མ་རིག་པའི་ལིང་ཐོག་བྱང་ནས་ཤེས་རབ་ཀྱི་མིག་གསལ་བར་གྱུར་ཏོ། །གསེར་གྱི་ཐུར་མ་ཐོགས་བྱས་སྟེ། །མིག་མཁན་རྒྱལ་པོས་དབང་བསྐུར་བཞིན། །བུ་ཁྱོད་མ་རིག་མི་ཤེས་པའི། །རབ་རིབ་རྒྱལ་བ་རྣམས་ཀྱི་བསལ། །ཏྲི་ཏི་པུ་ཀེ་ཧཱུཾ། རིན་ཆེན་གསེར་གྱི་ཐུར་མ་ཡིས། །འབར་བའི་ཡེ་ཤེས་གསལ་ཕྱེ་ནས། །ངེས་པར་ལེགས་པའི་དགོངས་པ་འགྲུབ། །ཤེས་རབ་མཆོག་གི་དབང་གི་བཀྲ་ཤིས་ལེའུ་སྟེ་བཞི་བཅུ་ཞེ་དགུ་པའོ། །བཞི་པ་མེ་ལོང་གི་དབང་ནི། སྔོན་རི་རབ་རིའི་རྩེར་རྣམ་པར་སྣང་མཛད་ཀྱི་འཁོར་རྣམས་ལ་མེ་ལོང་གིས་དབང་བསྐུར་བས། ཆོས་ཐམས་ཅད་གཟུགས་རྙན་རྟེན་འབྲེལ་སྒྱུ་མ་ཙམ་དུ་མཐོང་པར་གྱུར་ཅིག །ཆོས་ཐམས་ཅད་སྣང་ལ་རང་བཞིན་མེད་པར་གྱུར་ཏོ། །དེ་དང་རྗེས་སུ་མཐུན་པར་མེ་ལོང་གི་དབང་བསྐུར་བས། ཆོས་ཐམས་ཅད་གཟུགས་རྙན་ལྟ་བུ་སྟེ། །རྟེན་འབྲེལ་མཐུ་ལས་སྣང་བའི་ཕྱིར། །བརྗོད་མེད་རང་བཞིན་དག་པའི་དོན། །ཆོས་ཉིད་སྒྱུ་མ་ལྟ་བུར་གསལ་ཞིང་སྟོན་པར་ཤོག །སྣང་གསལ་དྲི་མ་སེལ་བ་དང་། །མི་མངོན་དབང་པོ་གསལ་བ་དང་། །ཡེ་ཤེས་གསལ་བའི་མེ་ལོང་གིས། །འདི་ནི་མེ་ལོང་གསལ་གྱི་བཀྲ་ཤིས་ལེའུ་སྟེ་ལྔ་བཅུ་པའོ། །ལྔ་པ་འཁོར་ལོའི་དབང་། སྔོན་རི་རབ་རིའི་རྩེར་རྣམ་པར་སྣང་མཛད་ཀྱིས་འཁོར་རྣམས་ལ་འཁོར་ལོས་དབང་བསྐུར་བས། འགྲོ་བའི་དོན་ལ་ཐག་ཐོག་མེད་པར་གྱུར་ཏོ། །དེ་དང་རྗེས་སུ་མཐུན་པར་འཁོར་ལོས་དབང་བསྐུར་བས། འཁོར་བའི་རྫུ་འཕྲུལ་གྱི་རྐང་པ་དང་ལྡན་ནས། ཁམས་གསུམ་གྱི་གནས་ཐམས་ཅད་དུ་འགྲོ་བའི་དོན་ལ་ཐག་ཐོག་མེད་པར་འགྲོ་བར་གྱུར་ཅིག །འོག་ཏུ་གསེར་གྱི་འཁོར་ལོ་དག །བརྗོད་པ་མེད་དོན་འབྲུ་བཀོད་ནས། །གཞན་གྱི་དོན་ལ་ཕན་པའི་ཕྱིར། །རྒྱལ་བའི་འཁོར་ལོ་བསྐོར་བར་ཤོག །ཉོན་མོངས་མེའི་གཞོམ་པ་དང་། །ལེགས་པའི་ཡོན་ཏན་རྫོགས་པ་དང་། །འབྲས་བུ་ཀུན་ཏུ་འཕགས་པའི་ཕྱིར། །དེས་ནི་དབང་རྣམས་བཀྲ་ཤིས་ལེའུ་སྟེ་ང་གཅིག་པའོ། །དྲུག་པ་དུང་གི་དབང་། སྔོན་བཅོམ་ལྡན་འདས་ལ་ལྷའི་རྒྱལ་པོ་དབང་པོ་བརྒྱ་བྱིན་གྱིས་དུང་གཙུག་གཡས་སུ་འཁྱིལ་བ་ཕུལ་བས་རྡོ་རྗེ་སྤོ་ལ་གཤེགས་སྟེ་ཆོས་སྒྲ་ཆེན་པོས་གསུང་དབྱངས་ཡན་ལག་དྲུག་ཅུ་དང་ལྡན་པའི་ཆོས་ཀྱི་འཁོར་ལོ་བསྐོར་བའི་རྫས་འདིས། ངས་སློབ་མ་རྣམས་ལ་སྦྱིན་པས། ཚངས་པའི་སྒྲ་སྐད་ཕུན་སུམ་ཚོགས་ཤིང་། ཆོས་ཀྱི་འཁོར་ལོ་བསྐོར་བའི་དོན་གྱི་བཀྲ་ཤིས་པར་གྱུར་ཅིག །དུང་གི་ཆོས་ཀྱི་སྒྲ་རྣམས་སྒྲོགས་པའི་ཚུལ། །ཡོན་ཏན་རྒྱ་མཚོ་བདག་ཉིད་མཆོག་གྱུར་ནས། །རྣམ་དག་ཆོས་ལ་ཐོགས་མེད་ལོངས་སྤྱོད་པའི། །བཀྲ་ཤིས་དེས་ནི་ཚིག་ལ་ལོངས་སྤྱོད་ཤོག །ཆོས་སྒྲ་ཆེན་པོ་ཕྱོགས་བཅུར་གྲགས་པ་དང་། །རྒྱལ་བའི་གསུང་མཆོག་དུང་གི་སྒྲ་བུས་སྟེ། །མ་ལུས་རྒྱལ་བ་ཀུན་གྱི་རྒྱུད་འགྲོལ་བ། །འདི་ནི་འཕགས་པའི་གསུང་གི་དབང་གི་བཀྲ་ཤིས་ལེའུ་སྟེ་ང་གཉིས་པའོ། །བདུན་པ་མེ་ཏོག་འཕྲེང་བའི་དབང་ནི། སྔོན་བཅོམ་ལྡན་འདས་རྣམ་པར་སྣང་མཛད་ཀྱིས་འཁོར་རྣམས་ལ། །མེ་ཏོག་གི་འཕྲེང་བས་དབང་བསྐུར་བས། །ཚུལ་ཁྲིམས་ཀྱི་འཕྲེང་བ་ཡོངས་སུ་རྫོགས་པར་གྱུར་ཏོ། །དེ་དང་རྗེས་སུ་མཐུན་པར། མེ་ཏོག་གི་འཕྲེང་བས་དབང་བསྐུར་བས། ཚུལ་ཁྲིམས་གྱི་འཕྲེང་བས་ཡོངས་སུ་རྫོགས་པས། ངན་སོང་ལས་ལྡོག་པའི་དབང་དམ་པ་ཐོབ་པར་གྱུར་ཅིག །སྡུག་ཅིང་མཛེས་པའི་མེ་ཏོག་བརྒྱན། །དགོས་པའི་དོན་རྣམས་མྱུར་བར་འབྱིན། །ཐམས་ཅད་ཀུན་གྱི་ཡིད་དུ་འོང་། །འབྱོར་བའི་ལོངས་སྤྱོད་བརྒྱན་དུ་ཤོག །ཁ་དོག་དབྱིབས་ལེགས་རིན་ཆེན་མེ་ཏོག་འདི། །ནམ་མཁའ་གང་ཞིང་ས་གཞི་ཁེབས་པ་ཡིས། །མཆོད་པའི་ཕྲིན་ཕུང་དུས་སུ་ཆར་འབབ་པའི། །འདི་ནི་མེ་ཏོག་མཛེས་པའི་དབང་གི་བཀྲ་ཤིས་ལེའུ་སྟེ་ང་གསུམ་པའོ། །བརྒྱད་པ་འཕྲིན་ལས་རྡོ་རྗེའི་དབང་། སྔོན་རི་རབ་རིའི་རྩེར་རྣམ་པར་སྣང་མཛད་ཀྱིས་འཁོར་རྣམས་ལ། ཕྱག་རྒྱ་བཞི་ལ་རྡོ་རྗེ་རེས་དབང་བསྐུར་བས། ཐུགས་རྡོ་རྗེ་རིགས་ཀྱི་དབང་དམ་པ་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་ཕྱག་རྒྱ་བཞི་ལ་རྡོ་རྗེ་རེས་དབང་བསྐུར་བས། ཐུགས་ཡེ་ཤེས་རྡོ་རྗེ་ལྟ་བུའི་དབང་དམ་པ་ཐོབ་པར་གྱུར་ཅིག །སྐུ་ཡི་ཕྱག་རྒྱ་རྟགས་བརྟན་པ། །ཡེ་ཤེས་རྡོ་རྗེ་ལྟ་བུ་དེ། །རྡོ་རྗེ་ཐུགས་ཀྱི་རང་བཞིན་ནི། །མེ་ཏོག་ལྟ་བུའི་ཡེ་ཤེས་ཐོབ་པར་ཤོག །རྡོ་རྗེ་རིགས་མཆོག་རྡོ་རྗེ་སེམས་དཔའ་ཆེ། །དཀར་ལ་དག་པ་ཤར་ཕྱོགས་སངས་རྒྱས་ཞིང་། །བདེ་བ་ཆེན་པོའི་བརྒྱན་དུ་བསྟན་པ་ཡིས། །ཐུགས་ཀྱི་བཀྲིས་ལེའུ་སྟེ་ལྔ་བཅུ་ང་བཞི་པའོ། །དགུ་པ་ནོར་བུའི་དབང་། སྔོན་རི་རབ་རིའི་རྩེར་དཔལ་ཀུན་རིག་རྣམ་པར་སྣང་མཛད་ཀྱིས། འཁོར་རྣམས་ལ་ཕྱག་རྒྱ་ཆེན་པོ་བཞིའི་རིན་པོ་ཆེའི་དབང་བསྐུར་བས། ཡོན་ཏན་རིན་པོ་ཆེའི་རིགས་དབང་དམ་པ་ཐོབ་པར་གྱུར་ཅིག །དེ་དང་རྗེས་སུ་མཐུན་པར་ཕྱག་རྒྱ་རིན་པོ་ཆེས་དབང་བསྐུར་བས། ཡོན་ཏན་རིན་པོ་ཆེ་ལྟ་བུ་དང་ལྡན་པའི་དབང་དམ་པ་ཐོབ་པར་གྱུར་ཅིག །སྐུ་ཡི་ཕྱག་རྒྱ་རྟགས་རྟན་ནས། །འགྲོ་བ་ཀུན་གྱི་རེ་བ་བསྐོངས། །ཡོན་ཏན་རིན་ཆེན་རང་བཞིན་སྟེ། །མཉམ་ཉིད་ཡེ་ཤེས་ཐོབ་པར་ཤོག །རིན་ཆེན་རིགས་མཆོག་སེམས་དཔའ་སྟེ། །སྔོ་ལ་དག་པས་ལྷོ་ཕྱོགས་སངས་རྒྱས་ཞིང་། །བདེ་བ་ཆེན་པོའི་བསྟན་པ་ནི། །ཡོན་ཏན་བཀྲ་ཤིས་ལེའུ་སྟེ་ང་ལྔ་པའོ། །བཅུ་པ་པདྨའི་དབང། སྔོན་རི་རབ་རྩེར་དཔལ་རྣམ་པར་སྣང་མཛད་ཀྱིས། །འཁོར་རྣམས་ལ་པདྨའི་དབང་བསྐུར་བས། །པདྨ་གསུང་གི་རིགས་ཀྱི་དབང་དམ་པ་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་ཕྱག་རྒྱ་ཆེན་པོ་བཞི་ལ་པདྨའི་དབང་བསྐུར་བས། འགྲོ་བའི་དོན་མཛད་པས་ཉེས་པའི་སྐྱོན་གྱིས་མ་གོས་པའི་གསུང་དམ་པ་ལྟ་བུ་དང་ལྡན་པའི་དབང་དམ་པ་ཐོབ་པར་གྱུར་ཅིག །སྐུ་ཡི་ཕྱག་རྒྱ་རྟགས་བསྟན་པ། །པདྨ་དབང་གི་རང་བཞིན་སྟེ། གསུང་གི་རང་བཞིན་འབྱུང་བའི་མཛོད། །སོ་སོར་རྟོགས་པའི་ཡེ་ཤེས་ཐོབ་པར་ཤོག །པདྨ་རིགས་མཆོག་ཆོས་ཀྱི་སེམས་དཔའ་སྟེ། །དམར་ལ་དག་པ་ནུབ་ཕྱོགས་བདེ་ཆེན་ཞིང་། །བདེ་བ་ཆེན་པོའི་བརྒྱན་དུ་བསྟན་པ་ཡིས། །གསུང་གི་བཀྲ་ཤིས་སྟེ་ང་དྲུག་པའོ། །བཅུ་གཅིག་པ་རྡོ་རྗེ་རྒྱ་གྲམ་གྱི་དབང་། སྔོན་རི་རབ་རི་ཡི་རྩེ་མོར་དཔལ་རྣམ་པར་སྣང་མཛད་ཀྱིས་འཁོར་རྣམས་ལ། ཕྱག་རྒྱ་བཞི་ལས་རྡོ་རྗེ་བརྒྱ་གྲམ་གྱི་དབང་བསྐུར་བས། ཐུགས་རྡོ་རྗེ་རིགས་ཀྱི་དབང་དམ་པ་ཐོབ་པར་གྱུར་ཏེ། དེ་དང་རྗེས་སུ་མཐུན་པར་ཕྱག་རྒྱ་ཆེན་པོ་བཞི་ལས་རྡོ་རྗེའི་དབང་བསྐུར་བས། ཐུགས་ཡེ་ཤེས་རྡོ་རྗེ་ལྟ་བུ་དང་ལྡན་པའི་དབང་དམ་པ་ཐོབ་པར་གྱུར་ཅིག །སྐུ་ཡི་ཕྱག་རྒྱ་རྟགས་བསྟན་པ། །ཡེ་ཤེས་རྡོ་རྗེ་ལྟ་བུ་སྟེ། །རྡོ་རྗེ་ཐུགས་ཀྱི་རང་བཞིན་ནི། །མེ་ལོང་ཡེ་ཤེས་ཐོབ་པར་ཤོག །རྡོ་རྗེ་རིགས་མཆོག་རྡོ་རྗེ་སེམས་དཔའ་སྟེ། །དཀར་ལ་དག་པས་ཤར་ཕྱོགས་སངས་རྒྱས་ཞིང་། །བདེ་བ་ཆེན་པོའི་བརྒྱན་དུ་བསྟན་པའོ། །ཐུགས་དབང་བཀྲ་ཤིས་ལེའུ་ང་བདུན་པའོ། །ལྔ་པ་ཁྱད་པར་གདན་གྱི་དབང་ལ་གསུམ་ལས། དང་པོ་ཟིལ་གནོན་སེང་གེའི་དབང་། སྔོན་རི་རབ་རི་ཡི་རྩེར་དཔའ་རྣམ་པར་སྣང་མཛད་ཀྱིས་འཁོར་རྣམས་ལ་སེང་གེའི་དབང་བསྐུར་བས། ལོག་པའི་ཕྱོགས་ཟིལ་གྱིས་ནོན་པའི་དབང་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་སེང་གེའི་དབང་བསྐུར་བས། གསུང་རབས་རྒྱ་མཚོའི་སྒྲས་ལོག་པའི་ཕྱོགས་ཐམས་ཅད་ཟིལ་གྱིས་མནན་ནས། སྐད་ཅིག་ལ་སྟོང་སྤྱི་ཕུད་ཀྱི་སེམས་ཅན་མངོན་པར་རྫོགས་པར་སངས་རྒྱ་བར་བྱེད་པའི་བཅོམ་ལྡན་འདས་དཔལ་ཀུན་ཏུ་བཟང་པོ་ཞེས་བྱ་བར་གྱུར་ཅིག །གདུག་བཟང་སེམས་ཅན་ཀུན་གྱི་གཙོ་བོ་སྟེ། །ཟིལ་གནོན་སྒྲ་འབྱིན་སྡེར་ཆགས་སྐྲག་པར་བྱེད། །ཕྱོགས་རྣམས་ཀུན་བསྐྱེད་སེང་གེ་དཔལ་དང་ལྡན། །ཟིལ་གྱིས་གནོན་པའི་དབང་རྣམས་ཐོབ་པར་ཤོག །སེང་གེ་ང་རོ་སྒྲ་ཆེན་ཐོག་མེད་པས། །འཇིགས་མེད་འཇོམས་པའི་སྒྲ་རྣམས་བསྒྲག་ནས་ཀྱང་། །བདུད་ཀྱི་དཔུང་རྣམས་ཟིལ་གྱིས་གནོན་མཛད་པའི། །མཐུ་དཔུང་ཆེ་བའི་བཀྲ་ཤིས་ང་བརྒྱད་པའོ། །གཉིས་པ་མུན་སེལ་ཉི་མའི་དབང་། སྔོན་རི་རབ་རིའི་རྩེར་རྣམ་པར་སྣང་མཛད་ཀྱིས་འཁོར་རྣམས་ལ་ཉི་མའི་དབང་བསྐུར་བས། མ་རིག་པའི་མུན་པ་སེལ་བའི་དབང་དམ་པ་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་ཉི་མའི་དབང་བསྐུར་བས། སྐྱེ་འགྲོ་མ་ལུས་པའི་སེམས་ཀྱི་རྒྱུད་ལ་ཡེ་ཤེས་ཀྱི་འོད་ཟེར་ཆེན་པོའི་དུས་མཐའ་མེད་པར་འཆར་བའི་སྐལ་བ་དང་ལྡན་པར་གྱུར་ཅིག །ཉི་མ་མུན་སེལ་ཤེས་རབ་སྒྲོན། །ཀུན་ལས་གསལ་བས་རིན་པོ་ཆེ། །ཐམས་ཅད་ཀུན་གྱི་དཔལ་དུ་ཤར། །མ་རིག་སེལ་བའི་སྒྲོན་མར་ཤོག །ཡེ་ཤེས་གསལ་བས་ཕྱོགས་བཅུར་ཁྱབ་པར་དྲོ། །ཐུགས་རྗེ་ཆེ་བས་མུན་སེལ་བྱེད། །འོད་གསལ་དྲ་བས་འགྲོ་བའི་དོན་མཛད་པས། །ཤེས་རབ་བཀྲ་ཤིས་ལེའུ་ང་དགུ་པའོ། །གསུམ་པ་ཟླ་བའི་དབང་ནི། སྔོན་རི་རབ་རིའི་རྩེར་རྣམ་པར་སྣང་མཛད་ཀྱིས་འཁོར་རྣམས་ལ་ཟླ་བས་དབང་བསྐུར་བས། མུན་པ་སེལ་ཞིང་ཚ་བའི་སྡུག་བསྔལ་སེལ་བའི་དབང་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་ཟླ་བ་ལག་ཏུ་བྱིན་པས་སྟོང་ཁམས་ཐམས་ཅད་ཀྱི་མུན་པ་དུས་ཅིག་ཏུ་བྱང་ནས་ཀུན་ཏུ་གསལ་བར་བྱེད་པར་གྱུར་ཅིག །ཐམས་ཅད་ཀུན་གསལ་ཆུ་ཤེལ་ལྟ་བུ་སྟེ། །དགོངས་པའི་དོན་འབྱིན་དཀར་ལ་དག་པའི་ཚུལ། །ཚད་མེད་ཐབས་ཀྱི་ཟླ་བ་རིན་པོ་ཆེ། །མ་རིག་མུན་སེལ་དབང་མཆོག་བཀྲ་ཤིས་ཤོག །དཀར་ལ་དག་པ་ཟླ་བ་དྲི་མེད་པས། །ཐབས་ཀྱི་མཚན་ཉིད་སྐྱོན་གྱིས་མ་གོས་སྟེ། །ཡོངས་སུ་དག་པས་མུན་སེལ་བསིལ་བའི་སྨན། །ཐབས་དབང་བཀྲ་ཤིས་ལེའུ་དྲུག་ཅུ་པའོ། །བཞི་པ་ཤེས་རབ་ཡེ་ཤེས་ཀྱི་དབང་ནི། །སྔོན་དཔལ་རྣམ་པར་སྣང་མཛད་ཀྱིས་བདུད་རྩི་བུམ་པའི་འཁོར་རྣམས་ལ་དབང་བསྐུར་བས། རྣམ་པར་རྟོག་པ་སེལ་བར་གྱུར་ཏོ། །དེ་དང་རྗེས་སུ་མཐུན་པར་དེ་བཞིན་གཤེགས་པའི་ཐུགས་རྗེས་བྱིན་གྱིས་རླབས་པའི་བདུད་རྩི་བུམ་པས་དབང་བསྐུར་བས་ལུས་དང་ཁོང་མི་བདེ་བའི་ནད་རྣམས་བཀྲུས་ནས་དག་ཅིང་བྱང་བར་གྱུར་ཅིག །སྤྲོས་མེད་སྤྲོས་བྲལ་ཆོས་ཀྱི་དབྱིངས། །བུམ་པ་ཟླུམ་པོ་ཡུམ་གྱི་གཏེར། །ཕན་བྱེད་སྨན་པའི་མཆོག་ཡིན་སྟེ། །འགྲོ་བའི་ནད་སེལ་བཀྲ་ཤིས་ཤོག །བུམ་པ་ཟླུམ་པོ་སྤྲོས་མེད་ཆོས་ཀྱི་དབྱིངས། །ཐུགས་རྗེ་ཆེན་པོས་ཕན་མཛད་ཡུམ་གྱི་ཚུལ། །འཁོར་བའི་གནས་སྐྱོབ་དྲི་མ་དག་མཛད་པ། །སྒྲིབ་སེལ་བཀྲ་ཤིས་ལེའུ་རེ་གཅིག་པའོ། །དྲུག་པ་རྒྱལ་སྲིད་རིན་པོ་ཆེའི་དབང་ལ་བཅུ་དྲུག་ལས། དང་པོ་འཁོར་ལོའི་དབང་ནི། འཁོར་ལོས་བསྒྱུར་འཁོར་ལོ་རིན་པོ་ཆེའི་ཚུལ་ཇི་ལྟ་བུ་དང་ལྡན་ཞེས་ན། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས། གསོ་སྦྱོང་གི་ཉི་མ་བཅོ་ལྔ་ལ་དབུ་ཁྲུས་བྱས་ལ། དབུས་སུ་གནས་ཤིང་། སྟེང་གི་འཁྱམས་བཙུན་མོའི་འཁོར་ན་གནས་པའི་ཚེ། ཤར་ཕྱོགས་ནས་འཁོར་ལོ་རྩིབས་སྟོང་ཡོད་པ། ལྟེ་བ་དང་མུ་ཁྱུད་གསེར་ལས་གྲུབ་པ། འགར་གཟོས་མ་བྱས་ཤིང་རང་བྱུང་བ། གནམ་འཕངས་སུ་རྟ་ལ་བདུན་གྱི་སྲིད་ཙམ་ཞིག་རྒྱལ་པོའི་ཕྱག་གཡས་པའི་མཐིལ་དུ་རང་བབས་སྟེ། དེའི་ཚེ་རྒྱལ་པོའི་བསམ་པས་རྟགས་འདི་དང་སྦྱར་ན་བདག་ནི་འཁོར་ལོས་བསྒྱུར་བའི་རྒྱལ་པོ་ཡིན་ངེས་སོ་སྙམ་ནས་ལག་པ་གཡས་པས་འཁོར་ལོ་བསྐོར་སྟེ། རྫུ་འཕྲུལ་གྱི་ནམ་མཁའ་ལ་འགྲོ་ཞིང་ཕྱག་དུ་འཁོར་ལོ་གནས་སྟེ། རྒྱལ་བ་གསུང་གི་ཚོགས་དང་བཅས་པ་ཡང་གནས་པ་རུ་འཁོད་དེ། གླིང་བཞི་ལ་གནས་པའི་རྒྱལ་རིགས་ཐམས་ཅད་ཀྱིས་མདུན་བསུ་ཞིང་གནས་པའི་ཚེ། མི་ཐམས་ཅད་དགེ་བཅུའི་ལམ་ལ་འཁོར་ཅིང་འཛུད་པར་བྱེད་ལ། ནང་པར་ཁེས་སུ་སུས་ལ་དགའ་བ་ཉམས་སུ་མྱོང་བར་བྱེད་དོ། །དེ་དང་རྗེས་སུ་མཐུན་པར་འཁོར་ལོ་རིན་པོ་ཆེས་དབང་བསྐུར་བས། མིང་འདི་ལ་ཆོས་ཀྱི་འཁོར་ལོ་རིན་ཆེན་བསྐོར་ཏེ་འཇིག་རྟེན་གསུམ་གྱི་འགྲོ་བ་མུས་པ་རྣམས་རྣམ་པར་གྲོལ་བའི་ལམ་ལ་འགོད་ཅིང་སོ་སོའི་སྐལ་པ་ཅི་ལྟ་བ་བཞིན་དུ་སེམས་ཀྱི་རྒྱུད་ལ་ཡོངས་སུ་སྨིན་པར་བྱེད་ཅིང་། འཁོར་ལོས་བསྒྱུར་བའི་རྒྱལ་སྲིད་ཀྱི་དབང་དང་ལྡན་པར་གྱུར་ཅིག །དུས་གསུམ་རྒྱལ་བས་བསྐོར་བའི་འཁོར་ལོ་འདི། །མི་ཁོ མ་རྒྱུན་ཆད་རྒྱུ་དང་འབྲས་བུར་སྟོན། །འཁོར་ལོས་བསྒྱུར་བའི་དབང་ཕྱུག་རིན་པོ་ཆེན། །བླ་མེད་འཁོར་ལོ་དམ་པ་བསྐོར་གྱུར་ཅིག །སྟོང་ཉིད་ཡེ་ཤེས་གསལ་བའི་འཁོར་ལོ་ལ། །ཆོས་ཉིད་དབྱིངས་ལས་འཕྲིན་ལས་ཅིར་ཡང་སྟོན། །སེམས་ཅན་ཁ་ལོ་གྱེན་དུ་བསྒྱུར་མཛད་པ། །ཆོས་འཁོར་བསྐོར་བའི་བཀྲ་ཤིས་ལེའུ་སྟེ་རེ་གཉིས་པའོ། །གཉིས་པ་རྟ་མཆོག་དབང་ནི། འཁོར་ལོ་བསྒྱུར་བའི་རྟ་མཆོག་རིན་པོ་ཆེའི་ཚུལ་ཇི་ལྟ་བུ་དང་ལྡན་ཞེ་ན། མདོག་རིན་ཆེན་ཨིན་ཏྲ་ནི་ལ་ལྟར་སྔོན་པོར་གནས་པ། རྔོག་མ་ལྗང་ལོར་གནས་པ། ཞོན་ནས་གུས་པར་བྱེད་པ། གསེར་གསེར་གྱིས་བརྒྱན་པ་གསེར་གྱི་དྲ་བས་གཡོགས་པ་རྫུ་འཕྲུལ་དང་ལྡན་པ་ཞིག་ནམ་མཁའ་ལ་འགྲོ་བ། རྫུ་འཕྲུལ་གྱིས་ཤུགས་འཆང་བ། རྟའི་རྒྱལ་པོ་དེ། ཉམས་ཚད་པའི་ཕྱིར། རྒྱལ་པོས་ཉི་མ་ཤར་བར་རྟ་ལ་ཞོན་སྟེ། གླིང་བཞིའི་རྒྱ་མཚོ་མཐའ་བསྐོར་སྟེ། སླར་ལོག་པ་དང་ཁྱེའུ་གཟུགས་ཀྱི་དགའ་བ་ཉམས་སུ་མྱོང་། དེ་དང་རྗེས་སུ་མཐུན་པར་རྟ་རིན་པོ་ཆེས་དབང་བསྐུར་བས། མིང་འདི་ཞེས་བྱ་བ་རྫུ་འཕྲུལ་གྱི་རྐང་པ་བཞི་དང་ལྡན་དེ། བཞོན་པ་དང་ལྡན་ནས་ཐམས་ཅད་དགའ་འགུ་འགྲོ་བ་ལ་ཐོགས་པ་མེད་པར་གྱུར་ཅིག །འཁོར་བའི་ཆུ་བོ་འཇིག་པ་བཞི་ལས་གྲོལ། །བརྩོན་འགྲུས་མྱུར་བས་རྫུ་འཕྲུལ་ཤུགས་ཀྱི་འགྲོ། །ཅང་ཤེས་སྤྲིན་གྱིས་ཤུགས་འཆང་རིན་པོ་ཆེ། །མི་གནས་ཡིད་བཞིན་སྤྱོད་པར་ཤོག །རྫུ་འཕྲུལ་ཐོགས་མེད་ཀུན་ཏུ་མྱུར་བའི་ཤུགས། །གར་ཡང་འགྲོ་བའི་དོན་ལ་མྱུར་བ་དང་། །རྫུ་འཕྲུལ་སྣ་ཚོགས་ཀུན་ཏུ་སྟོན་པ་ཡི། །ཐོགས་མེད་དབང་གི་བཀྲ་ཤིས་ལེའུ་རེ་གསུམ་པའོ། །གསུམ་པ་གླང་པོའི་དབང་། འཁོར་ལོས་བསྒྱུར་བའི་རྒྱལ་པོ་གླང་པོ་རིན་པོ་ཆེའི་ཚུལ་ཇི་ལྟ་བུ་ལྡན་ཞེས་ན། ཁ་དོག་ཤེལ་ཅག་པའི་འཕྲོ་བཞིན་དུ་དཀར་བ། ཡན་ལག་བདུན་དུ་ཤིན་ཏུ་གནས་པ། རིན་པོ་ཆེ་གཙུག་གིས་ཤིན་ཏུ་བརྒྱན་པ། གསེར་གྱི་དྲ་བས་ཤིན་ཏུ་བརྒྱན་པ། རྫུ་འཕྲུལ་དང་ལྡན་ཤིང་ནམ་མཁའ་ལ་འགྲོ་བ། ལྷ་དང་ལྷ་མ་ཡིན་གྱིས་གཡུལ་རབ་ཏུ་འགྱེད་པ་ན། གཡུལ་དེ་དག་ལ་རབ་ཏུ་རྒྱལ་བའི་མཐུ་དང་ལྡན་པའོ། ། དེ་དང་རྗེས་སུ་མཐུན་པར་གླང་པོ་ཆེ་འདི་བྱིན་པས། རྡོ་བའི་ཕྱོགས་ཐམས་ཅད་ཟིལ་གྱི་གནོན་པའི་མཐུ་དང་ལྡན་ཞིང་རྒྱལ་བར་གྱུར་ཅིག །ཐེག་པའི་དོན་དེ་བླ་མེད་བསྟོད་པའི་མཆོག །ཡན་ལག་བདུན་མཛེས་ཨུ་མུ་ཏའི་མདོག །འདུལ་དཀའ་སྟོབས་ཆེན་གླང་པོ་རིན་པོ་ཆེ། ཁྱུ་མཆོག་རླབས་ཆེན་སྟོབས་ལྔ་རྫོགས་པར་ཤོག །སྟོབས་མཆོག་ཕ་རོལ་གནོན་པའི་སྟོབས་མངའ་བ། །གདུག་པ་ཆེན་པོ་གཞན་གྱིས་མི་ནོན་པའི། །ཕ་རོལ་་གཞན་གྱི་རྫུ་འཕྲུལ་ནོན་མཛད་པ། །མཐུ་སྟོབས་དབང་གི་བཀྲ་ཤིས་སྟེ་ལེའུ་རེ་བཞི་པའོ། །བཞི་པ་ནོར་བུ་རིན་པོ་ཆེའི་དབང་ནི། ནོར་བུ་རིན་པོ་ཆེའི་ཚུལ་ཇི་ལྟ་བུ་དང་ལྡན་ཞེས་ན། ཐམས་ཅད་དུ་སྔོན་བཻ་ཊཱུརྻའི་རང་བཞིན་དུ་གནས་པ། ཟུར་བརྒྱད་ཡོད་པ། ཡོན་ཏན་སྟོང་དང་ལྡན་པ་བྱུང་སྟེ། ཤིན་ཏུ་སྦྱང་བ་དེ་ནམ་གྱི་གུང་ལ་མུན་པ་རབ་ཏུ་གནག་པ་ལ། ཉམས་སད་པའི་ཕྱིར་རྒྱལ་མཚན་གྱི་རྩེ་མོ་ལ་བཏགས་ཏེ། འོད་མའི་ཚལ་དུ་བཏགས་ན། སྐྱེད་མོ་འཚལ་དུ་གཟིགས་མོའི་རྣམ་པ་ཐམས་ཅད་ལྟ་བར་འདོད་ན་ཡང་། ནོར་བུ་རིན་པོ་ཆེའི་འོད་ཀྱི་དཔུང་གིས་ཚོགས་ཡན་ལག་བཞི་ཡན་ཆད་དཔག་ཚད་གཅིག་ཚུན་ཆད་གང་དགར་མཐོང་པར་གྱུར་ཏོ། །ཉིན་པར་གྱི་འདུ་ཤེས་སྐྱེའོ། །དེ་དང་རྗེས་སུ་མཐུན་པར་ནོན་བུ་རིན་པོ་ཆེ་འདི་བྱིན་པས། ཤེས་རབ་རྣམ་པར་དག་པ་དང་ལྡན་སྟེ། ཀུན་ནས་ཉོན་མོངས་པར་གྱུར་པའི་མུན་པ་ཐམས་ཅད་གསལ་བའི་སྒྲོན་མེ་དང་ལྡན་ནས་ལྷག་མཐོང་གི་ཡེ་ཤེས་རིན་པོ་ཆེ་དང་ལྡན་པར་གྱུར་ཅིག །དཀོན་མཆོག་གསུམ་གྱི་ཡོན་ཏན་ཡིད་བཞིན་གཏེར། །འཁོར་བའི་མུན་སེལ་བདེ་བའི་སྙིང་པོ་འབྱུང་། །དགོངས་པ་མཆོད་སྦྱིན་ནོར་བདུན་ཕུན་སུམ་ཚོགས། །ཡིད་བཞིན་ནོར་བུ་རིན་ཆེན་སྤྱོད་པར་ཤོག །དགོས་འདོད་བསྐོང་བའི་ནོར་བུ་རིན་པོ་ཆེ། །ཐམས་ཅད་ཀུན་གྱིས་ཡིད་དང་མཐུན་པར་ཤོག ཆེ་བའི་ཡོན་ཏན་ཕུན་སུམ་ཚོགས་པ་ཡིས། །ཡིད་བཞིན་བཀྲ་ཤིས་ལེའུ་སྟེ་རེ་ལྔ་པའོ། །ལྔ་པ་བློན་པོ་རིན་པོ་ཆེའི་དབང་ནི། བློན་པོ་རིན་པོ་ཆེའི་ཚུལ་ཇི་ལྟ་བུ་དང་ལྡན་ཞེས་ན། མཁས་པ། གསལ་བ། ཡིད་གཞུངས་པ། ལྷའི་མིག་དང་ལྡན་པ། དཔག་ཚད་ཚུན་ཆད་དུ་རིན་པོ་ཆེའི་གཏེར་ཡོད་པ་མཐོང་སྟེ། རིན་པོ་ཆེའི་གཏེར་ཆུའི་ནང་ན་ཡོད་པ་དང་། སྐམས་ན་ཡོད་པ་དང་། རིང་བ་ན་ཡོད་པ་དང་། །བདག་པོ་ཡོད་པ་དང་། བདག་པོ་མེད་པ་ཐམས་ཅད་མཐོང་སྟེ། དེས་འཁོར་ལོས་བསྒྱུར་བའི་རྒྱལ་པོ་ལ་གསོལ་པ། ལྷ་དཀོན་ནོར་ལ་ཐུགས་ཁྲལ་ཆུང་བར་མཛོད་ཅིག །དཀོར་ནོར་ཅི་བཞེད་པར་ནི་ཅི་བཞེད་པ་བཀའ་སྩོལ་ཅིག །དེ་སྐད་ཅེས་གསོལ་པ་དང་། རྒྱལ་པོའི་དགོངས་པ་ཐམས་ཅད་བསྒྲུབ་པོ། དེ་དང་རྗེས་སུ་མཐུན་པར་བློན་པོ་རིན་པོ་ཆེ་འདིས་དབང་བསྐུར་བས། མིང་འདི་ཞེས་བྱ་བ་ལ་ལྷའི་མིག་རྣམ་པར་འཕགས་པའི་ནོར་བདུན་དང་ལྡན་ཞིང་། བདག་དང་གཞན་གྱི་དོན་ཕུན་སུམ་ཚོགས་པའི་དགོས་པ་ཐམས་ཅད་མཐར་ཕྱིན་པ་དང་། ཤེས་བྱ་ལ་ཐོག་པ་མེད་པའི་དབང་དང་ལྡན་པར་གྱུར་ཅིག །གང་ལ་ཅི་འདོད་དཔག་བསམ་ཤིང་ལྟ་བུ། །འགྲོ་ལ་སྙིང་བརྩེ་ཚོགས་གཉིས་རྫོགས་པར་སྨོན། །དབང་ཕྱུག་བློན་པོའི་ནོར་བུ་རིན་པོ་ཆེ། །འཁོར་ལོས་བསྒྱུར་བའི་རྒྱལ་ཐབས་ཐོབ་པར་ཤོག །འཛངས་པའི་ཕུལ་ཕྱིན་བློན་པོ་རིན་པོ་ཆེ། །ལེགས་ཉེས་ཀུན་མཁས་སྤྱོད་པའི་དོན་ལ་མཁས། ཡོ་ཁལ་དོ་སྲོང་འཛངས་པའི་འཕྲུལ་བག་ཅན། །བློན་པོ་དབང་གི་བཀྲ་ཤིས་ལེའུ་སྟེ་རེ་དྲུག་པའོ། །བདུན་པ་བཙུན་མོ་རིན་པོ་ཆེའི་དབང་། འཁོར་ལོས་བསྒྱུར་བའི་བཙུན་མོ་རིན་པོ་ཆེ་ཚུལ་ཇི་ལྟ་བུ་ཞེ་ན། རྒྱལ་པོ་རྒྱལ་རིགས་སུ་སྐྱེས་པ། གཟུགས་མཛེས་པ། ལྟ་ན་སྡུག་པ། ཚུལ་ཤེས་པ། ཁ་དོག་མཛེས་པ། རྒྱས་པ། མིའི་མདོག་ལས་འདས་ནས་ཚུལ་ལྷའི་མདོག་ཐོབ་སྟེ། ལྤགས་པའི་མདོག་ཀྱང་སྤྲི་ཡང་ཀུ་ལྟར་འདུག་པ། ལུས་རན་ཅིང་དབྱིབས་ལེགས་པ། ཤ་རན་ཅིང་བ་སྤུའི་བུ་ག་ནས་ཙན་དན་དྲི་བསུང་དང་ལྡན་པ། ཨ་ཀ་རུའི་དྲི་འབྱུང་བ། ཁ་ནས་ཨུ་དཔལ་གྱི་ངད་ལྡང་བ། ལུས་ཀྱང་བྱ་ཀ་ཚ་ལི་ཀ་ལྟར་རེག་ན་བདེ་བ། དྲང་བའི་དུས་ན་རེག་ན་དྲོ་བ། ཚ་བའི་དུས་ན་རེག་ན་བསིལ་བ་དེ་ནི་སྔོན་དུ་བྱ་བ་དང་། ཕྱི་ནས་ཅི་བྱ་བའི་ལུང་མ་ནོར་བ་ཡིད་དུ་འོང་བར་བྱེད་པ། སྙན་པར་སྨྲ་བ་ལ་མཁས་ཏེ། ཡིད་ཀྱི་དགུ་ལ་ཡང་འཁོར་ལོས་བསྒྱུར་བའི་རྒྱལ་པོ་ཡིད་དང་འགལ་བར་མི་བྱེད་ན། ལུས་དང་ངག་གི་དང་ག་ལ་བྱེད་དེ། དེས་ནི་བུད་མེད་ཐམས་ཅད་ཀྱི་སྐྱོན་སེལ་བ་སྟེ། དཔེན་ན་སྐར་མ་སྤ་བ་སངས་ཀྱི་སྐར་མ་ཐམས་ཅད་ཟིལ་གྱིས་ནོན་པ་བཞིན་ནོ། །དེ་དང་རྗེས་སུ་མཐུན་པར་བཙུན་མོ་རིན་པོ་ཆེ་འདི་བྱིན་པས། མིང་འདི་ཞེས་བྱ་བའི་ཏིང་ངེ་འཛིན་ཞི་བའི་ཆོས་ལ་དབང་འབྱོར་སྟེ། འཕགས་པའི་འཇིག་རྟེན་ལས་འདས་པའི་ལམ་སྤྱོད། ཡུལ་ཡོངས་སུ་དག་པས་བདག་དང་གཞན་གྱི་དོན་བདེན་པར་སྡུད་པ་ལ་ཡིད་བཞིན་འདུ། འབྱོར་བ་ལ་དཔལ་དང་ལྡན་པར་གྱུར་ཅིག །ཕ་རོལ་ཕྱིན་བཅུ་སྐྱོབ་པའི་ཕྱིར། །ཤེས་རབ་གཟུང་འཛིན་བཙུན་མོ་རིན་མོ་ཆེ། །བསྡུ་བ་རྣམ་བཞི་ཚད་མེད་བཞི་པོ་ཡི། །ཚེ་དང་ལོངས་སྤྱོད་གཏེར་རྣམས་སྤྱོད་པར་ཤོག ། ཤེས་རབ་དབྱིངས་ལས་སྤྲུལ་པའི་ལྷ། །དགོས་པའི་དོན་འགྲུབ་བཙུན་མོ་སྟེ། མཐུ་དང་དད་པས་འབྲེལ་པ་ཡིས། །བཙུན་མོའི་བཀྲ་ཤིས་ལེའུ་རེ་བདུན་པའོ། །བདུན་པ་དམག་དཔོན་རིན་པོ་ཆེའི་དབང་། དམག་དཔོན་རིན་པོ་ཆེའི་ཚུལ་ཅི་ལྟ་བུ་ཞེས་ན། མཁས་པ། གསལ་བ། བློ་མྱུར་བ། ཡིད་གཞུགས་པ། རྒྱལ་པོ་བསམ་པ་བཞིན་བྱེད་ནུས་པ། ཕ་རོལ་གྱིས་དཔུང་འཇོམས་པ། སྒྲ་ཐམས་ཅད་ཀྱི་སྦྱོར་བ་ལ་མཁས་པ། བསྡོ་བ་ཐམས་ཅད་ཟིལ་གྱི་ནོན་པའི་གོ་ཆ་བགོས་པའོ། །དེ་དང་རྗེས་སུ་མཐུན་པར་དམག་དཔོན་རིན་པོ་ཆེ་འདི་བྱིན་པས་མིང་འདི་ཞེས་བྱ་བ་ཐབས་དང་ཤེས་རབ་གཉིས་སུ་མེད་པའི་དགོངས་པ་མཐར་ཕྱིན་ནས། འཇིགས་ཚོགས་ཀྱི་ལྟ་བ་ཐམས་ཅད་ལེགས་པར་སྤྱོད་པའི་ཡེ་ཤེས་ཕུན་སུམ་ཚོགས་པ་དང་ལྡན་པར་གྱུར་ཅིག །གནོད་པའི་དཔུང་འཇོམས་བརྩོན་འགྲུས་གོ་བགོས་སྟེ། །འཇིགས་པའི་སྐྱབས་བྱེད་འགྲོ་ལ་མ་འཇིགས་སྦྱིན། །ཐབས་དང་ཤེས་རབ་བསྟན་པའི་དམག་དཔོན་འདི། །མཐུ་སྟོབས་རྫུ་འཕྲུལ་དཔུང་གིས་བསྲུངས་བར་ཤོག །དྲག་ཤུལ་དྲེག་པས་ཕ་རོལ་འཇོམས་མཛད་པ། །ཉོན་མོངས་མི་ཤེས་གཡུལ་ངོ་སེལ་བ་ཡིས། རྣམ་པར་རྟོག་པ་ཅིས་ཀྱང་མི་ཚུགས་པའི། གཉེན་པོ་འདུལ་བའི་ལེའུ་སྟེ་རེ་བརྒྱད་པའོ། །བརྒྱད་པ་རལ་གྲིའི་དབང་ནི། སྔོན་རི་རབ་རིའི་རྩེར་རྣམ་པར་སྣང་མཛད་ཀྱིས་འཁོར་རྣམས་ལ་རལ་གྲིས་དབང་བསྐུར་བས། ཉོན་མོངས་པའི་དྲ་བ་གཅོད་པའི་དབང་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་ཡེ་ཤེས་ཀྱི་གྲལ་དུ་ཕྱིན་པས། །སྡུག་བསྔལ་གྱི་རྒྱུ་འཁྲུལ་པ་བཅད་པས་བག་ཆགས་ཐམས་ཅད་ཡོངས་སུ་བྱང་བར་གྱུར་ཅིག །སྒྲིབ་པའི་དྲ་བ་བཅད་ནས་ཀྱང་། མི་ཤེས་དྲ་བ་གཅོད་ཚུལ་དུ་རྣོན་པོས་བག་གཅོད་པ་སྟེ། ཐམས་ཅད་ཀུན་ལས་རྒྱལ་བར་ཤོག །སྒྲིབ་པ་སྡིག་པའི་དྲ་བ་གཅོད་མཛད་པ། །ཡེ་ཤེས་རྣོན་པོ་གར་ཡང་ཐོག་པ་མེད། །ཡེ་ཤེས་བག་ཆགས་རྩད་ནས་གཅོད་མཛད་པའི། །སྡུག་བསྔལ་གཅོད་པའི་བཀྲ་ཤིས་ལེའུ་སྟེ་རེ་དགུ་པའོ། །དགུ་པ་འདའ་གཞུའི་དབང་ནི། སྔོན་རི་རབ་རིའི་རྩེར་དཔལ་རྣམ་པར་སྣང་མཛད་ཀྱིས་འཁོར་རྣམས་ལ་འདའ་གཞུའི་དབང་བསྐུར་བས། ཐབས་དང་ཤེས་རབ་ཀྱི་དབང་ཐོབ་པོ། །དེ་དང་རྗེས་སུ་མཐུན་པར་འདའ་གཞུས་དབང་བསྐུར་བས། ཐབས་དང་ཤེས་རབ་རྣམ་པར་ཐར་པའི་རྒྱ་མཚོ་མྱུར་དུ་བགྲོད་པར་གྱུར་ཅིག །བསྡོ་བའི་ཕྱོགས་འཇོམས་མྱུར་བའི་ཤུགས་འཆང་བའི། །ཐབས་ཀྱི་འདུལ་ལ་ཉེས་པས་མ་གོས་སྟེ། དངོས་པོ་ཀུན་འཇོམས་ཕ་རོལ་འབིགས་པ་སྟེ། །ཐབས་ཀྱི་འདུལ་བའི་དབང་མཆོག་དམ་པ་ཐོབ་པར་ཤོག །ཐབས་དང་ཤེས་རབ་དབྱེར་མེད་གཅིག་པ་ཡིས། །ཐུགས་རྗེ་མྱུར་བའི་ཐབས་ཀྱིས་འགྲོ་ལ་འབྱུང་། ཡང་རབ་བརྩལ་མཆོག་བློ་ཡི་རྣོན་པོ་སྟེ། །ཤེས་རབ་ཐོག་མེད་བཀྲ་ཤིས་ལེའུ་བདུན་ཅུ་པའོ། །བཅུ་པ་རྣམ་རལ་གྲི་དབང་ནི། སྔོན་དཔལ་རྣམ་པར་སྣང་མཛད་ཀྱིས་འཁོར་རྣམས་ལ་རྣམ་རལ་རིན་པོ་ཆེའི་དབང་བསྐུར་བས། བར་དུ་འཇོམས་པའི་བདུད་དཔུང་འཇོམས་པའི་དབང་དམ་པ་ཐོབ་པར་གྱུར་ཅིག །སྟོབས་ལྡན་དབང་ཕྱུག་མཐུ་སྟོབས་ཆེ་མངའ་བ། །བདུད་དཔུང་ཕས་ཀྱི་སྡོ་བ་ཀུན་བཏུལ་ནས། །ཆེ་བ་ཆེན་པོས་ཀུན་ལ་རྒྱལ་བ་དང་། །ཐམས་ཅད་མཐུ་སྟོབས་ཀུན་ལས་དབང་བྱེད་ཤོག །རིན་ཆེན་བརྒྱད་མཛེས་རྣམ་རལ་རིན་པོ་ཆེ། །ལོག་པའི་ཕྱོགས་དང་བསྡོ་བ་ཟིལ་གནོན་པ། །ཐབས་ལ་མཁས་པའི་བདུད་དཔུང་ཆེ་བ་སྟེ། །ཀུན་ལས་རྒྱལ་བའི་བཀྲ་ཤིས་ལེའུ་དོན་གཅིག་པའོ། །བཅུ་གཅིག་པ་ཤན་གྲིའི་དབང་ནི། སྔོན་རི་རབ་རིའི་རྩེར་དཔལ་རྣམ་པར་སྣང་མཛད་ཀྱིས་འཁོར་རྣམས་ལ་བཤན་གྲི་ཉེ་བའི་རིན་པོ་ཆེའི་དབང་བསྐུར་བས། འཁོར་བའི་སྒྲིབ་པ་གཅོད་པའི་དབང་དམ་པ་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་བཤན་ཉེ་བའི་རིན་པོ་ཆེས་དབང་བསྐུར་བས། འཁོར་བའི་སྒྲིབ་པའི་དྲ་བ་གཅོད་པ་དང་། དངོས་པོ་མཚན་མ་གཞོམ་པ་དང་། མི་ཤེས་རྣམ་རྟོག་མ་ལུས་བསྒྲལ་བའི་ཕྱིར། བདུག་པ་འཇོམས་པའི་དབང་རྣམས་ཐོབ་པར་ཤོག །རིན་ཆེན་མཛེས་པའི་བཤན་མཆོག་རིན་པོ་ཆེ། ལེགས་པར་རྣོ་ལ་ཕ་རོལ་ཉེས་པ་གཅོད། །ཡེ་ཤེས་རྣོན་པོ་ཀུན་གྱི་ཡིད་དུ་འོང་། །སྡུག་བསྔལ་གཅོད་པའི་བཀྲ་ཤིས་ལེའུ་སྟེ་དོན་གཉིས་པའོ། །བཅུ་གཉིས་པ་ཞྭའི་དབང་ནི། སྔོན་རི་རབ་རིའི་རྩེར་ཀུན་རིག་རྣམ་པར་སྣང་མཛད་ཀྱིས། འཁོར་ལ་ཞྭའི་ཉེ་བའི་རིན་པོ་ཆེས་དབང་བསྐུར་བས། བགེགས་དང་ལོགས་འདྲེ་མེད་པའི་ཚེའི་དབང་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་ཞྭ་ཉེ་བའི་རིན་པོ་ཆེས་དབང་བསྐུར་བས། བགེགས་དང་ལེག་འདྲེ་ཅིས་ཀྱང་མི་ཚུགས་པའི་ཚེའི་གཡུ་དྲུང་གི་དམ་པ་ཐོབ་པར་གྱུར་ཅིག །ཚ་གྲང་བསིལ་འཇམ་དབུ་ཞྭ་འདི། གདུང་བ་སེལ་བའི་དབང་མཆོག་སྟེ། །འབྲས་བུ་ཐར་བ་ཐོབ་པའི་ཕྱིར། །འཇིགས་པ་བཞི་ཡི་སྐྱབས་སུ་ཤོག །རིན་ཆེན་བརྒྱན་མཆོག་དབུ་ཞྭ་རིན་པོ་ཆེ། །འཇིགས་པ་བཞི་སྐྱོབས་ལོག་པའི་སྐྱོན་ལས་བསྲུང། །མི་འགྱུར་གཡུ་དྲུང་ཚེའི་དབང་ཐོབ་པ། །གཡུ་དྲུང་བཀྲ་ཤིས་ལེའུ་སྟེ་དོན་གསུམ་པའོ། །བཅུ་གསུམ་པ་ཁབ་སྐུད་དབང་ནི། སྔོན་རི་རབ་རིའི་རྩེར་རྣམ་པར་སྣང་མཛད་ཀྱིས་འཁོར་ལ་ཚང་པའི་ཁ་བསྐུད་ཀྱི་དབང་བསྐུར་བས། ལེགས་པའི་ཡོན་ཏན་འདོད་པའི་དབང་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་ཚངས་པའི་ཁབ་སྐུད་ཀྱིས་དབང་བསྐུར་བས། ལེགས་པའི་ཡོན་ཏན་གྲུབ་པའི་དབང་དམ་པ་ཐོབ་པར་གྱུར་ཅིག །ཚངས་པའི་ཁ་བསྐུད་ཉེ་བའི་བཀྲ་ཤིས་སྟེ། ལེགས་པའི་ཡོན་ཏན་ཚངས་པར་རྫོགས་པའི་དཔལ། །ཉེས་པ་ཀུན་སྐྱོབས་ཕྱིར་ན་བཀྲ་ཤིས་སྟེ། །ཐམས་ཅད་རྫོགས་པའི་དབང་མཆོག་བཀྲ་ཤིས་ཤོག །ཚངས་པའི་ཁབ་སྐུད་ལེགས་པའི་ཡོན་ཏན་འགྲུབ། །གང་ལ་ཡིད་འཆམ་ལེགས་པའི་དགོངས་པ་འགྲུབ། །དོན་ལ་ཐུགས་རྗེ་ཆེན་པོ་ཆེ་བའི་རྟགས། །ལེགས་པ་ཚངས་པའི་བཀྲ་ཤིས་ལེའུ་སྟེ་དོན་བཞི་པའོ། །བཅུ་བཞི་པ་ན་བཟའི་དབང་ནི། སྔོན་རི་རབ་རིའི་རྩེར་དཔལ་རྣམ་པར་སྣང་མཛད་ཀྱིས་འཁོར་རྣམས་ལ་ན་བཟའ་ཉེ་བའི་རིན་པོ་ཆེས་དབང་བསྐུར་བས། གྲང་བའི་སྡུག་བསྔལ་སྐྱོབ་པའི་དབང་དམ་པ་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་ན་བཟའ་ཉེ་བའི་རིན་པོ་ཆེས་དབང་བསྐུར་བས། འདི་དང་ཕ་རོལ་གཉིས་ཀར་གྲང་བའི་ཉོན་མོངས་པ་ཞི་བའི་དབང་དམ་པ་ཐོབ་པར་གྱུར་ཅིག །ཉེས་པ་ཀུན་སྐྱོབ་ན་བཟའ་རིན་པོ་ཆེས་བདེ་མཆོག་ཡིད་བཞིན་ཟད་པ་མེད་པ་སྟེ། །ཡོན་ཏན་ཚངས་པའི་ན་བཟའ་དམ་པ་འདི། །འདི་དང་ཕ་རོལ་གཉིས་སུ་གོན་པར་ཤོག །རིན་ཆེན་ན་བཟའ་ཇི་ལྟར་བལྟ་བར་གདུག །ཆེ་ཆུང་དབྱིབས་རན་འགྲོ་ལ་མཛེས་པར་སྣང་། །ཡོན་ཏན་བླ་མེད་འཕགས་པའི་སྐུ་དང་མཚུངས། །ཆོས་ཉིད་རྟགས་ཀྱི་བཀྲ་ཤིས་ལེའུ་སྟེ་དོན་ལྔ་པའོ། །བཅོ་ལྔ་པ་ཆགས་ཀྱི་དབང་ནི། སྔོན་རི་རབ་རིའི་རྩེར་དཔལ་རྣམ་པར་སྣང་མཛད་ཀྱིས། ཆགས་ཉེ་བའི་རིན་པོ་ཆེས་དབང་བསྐུར་བས། ཐུགས་རྗེ་འགྲོ་བའི་དོན་ལ་ཆགས་པའི་དབང་དམ་པ་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་ཆགས་ཉེ་བའི་རིན་པོ་ཆེས་དབང་བསྐུར་པས། འགྲོ་བའི་དོན་ལ་ཞབས་ཀྱིས་འཆགས་དབང་དམ་པ་ཐོབ་པར་གྱུར་ཅིག །རིན་ཆེན་ཆགས་ཀྱིས་དབང་བསྐུར་བས། ཀུན་ལ་སྙོམས་པའི་ཐུགས་རྗེ་ཡིས། །སེམས་ཅན་དོན་ལ་ཐོགས་མེད་དེ། །འགྲོ་བ་འདྲེན་པའི་དཔལ་དུ་ཤོག །རིན་ཆེན་མཛེས་པའི་ཚོགས་མཆོད་དམ་པ་རྣམས། །གར་ཡང་ཐོགས་མེད་ཕྱོགས་བཅུར་བསྒྲོད་ནས་ཀྱང་། །དོན་རྣམས་མ་ལུས་རྫོགས་པར་བྱ་བ་ཡི། །ཡོངས་ལ་ཁྱབ་པའི་བཀྲ་ཤིས་ལེའུ་སྟེ་དོན་དྲུག་པའོ། །བཅུ་དྲུག་པ་ཁྲི་སྙན་ས་ལེའི་དབང་ནི། སྔོན་རི་རབ་རིའི་རྩེར་དཔལ་ཀུན་རིག་རྣམ་པར་སྣང་མཛད་ཀྱིས་འཁོར་རྣམས་ལ། ཁྲི་གཉན་ས་ལེའི་ལྤགས་པ་ཉེ་བའི་རིན་པོ་ཆེས་དབང་བསྐུར་བས། སྙིང་རྗེས་སེམས་ཅན་འདྲེན་པའི་དབང་དམ་པ་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་ཁྲི་གཉན་ས་ལེའི་ལྤག་པ་ཉེ་བའི་རིན་པོ་ཆེས་དབང་བསྐུར་བས། ཐུགས་རྗེས་སེམས་ཅན་གྱིས་དོན་བྱེད་པའི་དབང་དམ་པ་ཐོབ་པར་གྱུར་ཅིག །ཁྲི་གཉན་ས་ལེའི་ལྤགས་པ་བཀྲ་ཤིས་སྟེ། ཐམས་ཅད་སྙོམས་པའི་བཀྲ་ཤིས་དམ་པ་སྟེ། ཡོན་ཏན་ཚང་བར་རྫོགས་པའི་བཀྲ་ཤིས་པ། །སྙིང་རྗེས་དོན་བྱེད་དབང་མཆོག་བཀྲ་ཤིས་ཤོག །སྙིང་རྗེ་ཆེན་པོས་སེམས་ཅན་དོན་ལ་མཁས། །ཉམས་ཐག་འཕོངས་པས་ཀུན་གྱི་དོན་བྱ་སྟེ། །སེམས་ཅན་འཁོར་བའི་གནས་ནས་འདྲེན་མཛད་པ། །འགྲོ་དོན་རྫོགསཔའི་བཀྲ་ཤིས་ལེའུ་སྟེ་དོན་བདུན་པའོ། །བདུན་པ་བཀྲ་ཤིས་རྫས་ཀྱི་དབང་ལ་བཅུ་དྲུག་ལས། དང་པོ་ཡུང་དཀར་གྱི་དབང་ནི། སྔོན་བཅོམ་ལྡན་འདས་ཀྱིས་ཡུངས་དཀར་འཐོར་བྱེད་ཀྱི། རྒྱལ་བོ་བགེགས་གྱི་གཉེན་པོར་བྱིན་གྱིས་རླབས་པའི་རྫས་ནི། རྡོ་རྗེ་སློབ་དཔོན་ངས་བྱིན་པས། སློབ་མའི་ལུས་སེམས་ཀྱི་རྒྱུད་ལ། བགེགས་སྟོང་ཕྲག་བརྒྱ་བཅུའི་བསམ་སྦྱོར་ངན་པས་མི་ཚུགས་ཤིང་། བགེགས་ཐམས་ཅད་འདུལ་བའི་མཐུ་སྟོབས་ཕུན་སུམ་ཚོགས་པའི་དོན་གྱི་བཀྲ་ཤིས་པར་གྱུར་ཅིག །ཡུངས་དཀར་རྡོ་རྗེ་གསང་མཆོག་ཆེན་པོ་སྟེ། །རྟོགས་བྲལ་མཉམ་ཉིད་ཡེ་ཤེས་རྡོ་རྗེ་ཡིས། །རྟོགས་པའི་བགེགས་རྣམས་རབ་ཏུ་ཞི་མཛད་པ། །བཀྲ་ཤིས་དེས་ཀྱང་བགེགས་རྣམས་རབ་ཏུ་ཞི་བར་ཤོག །ཡུངས་དཀར་རྡོ་རྗེས་བགེགས་མཆོག་འདུལ། །བགེགས་རྣམས་འཇོམས་པའི་མཐུ་སྟོབས་ལྡན། །དགྲ་བགེགས་ཀུན་ལས་རྒྱལ་བའི་བྱིན་རླབས་བཀྲ་ཤིས་ལེའུ་སྟེ་དོན་བརྒྱད་པའོ། །གཉིས་པ་ཞོ་ཕོར་གྱི་དབང་ནི། སྔོན་བཅོམ་ལྡན་འདས་ལ་ཁྱིམ་བདག་བཟང་སྐྱོང་གིས་ཞོ་ཕུལ་བས། གཟི་མདངས་དང་ལྡན་པའི་རྫས་འདི། རྡོ་རྗེ་སློབ་དཔོན་ངས། སློབ་མ་ཁྱོད་ལ་སྦྱིན་པས། ཁྱོད་ཀྱིས་ཏིང་ངེ་འཛིན་གྱི་བཅུད་དང་བསོད་ནམས་གཟི་མདངས་དང་ལྡན་པའི་དོན་གྱི་བཀྲ་ཤིས་པར་གྱུར་ཅིག །ཞོ་ནི་ཀུན་གྱི་སྙིང་པོར་གྱུར་པ་སྟེ། །སྙིང་པོ་རྣམ་དག་བྱང་ཆུབ་སེམས་རྟོགས་སྟེ། །ཡོན་ཏན་ཀུན་གྱི་སྙིང་པོར་གྱུར་པ་ཡིས། །བཀྲ་ཤིས་དེས་ཀྱང་དེང་འདིར་ཞི་བར་ཤོག །བཀྲ་ཤིས་བྱིན་ལྡན་རྫས་མཆོག་ཞོ་མཆོག་འདིས། །འདོད་དོན་མཆོག་ལྡན་འདོད་འཇོ་བའི་ཞོ། །ཉོན་མོངས་འཕོངས་པ་འགྲངས་ཞིང་ཚིམས་བྱེད་པ། གཟི་མདགས་ལྡན་པ་དབང་གིས་བཀྲ་ཤིས་ལེའུ་དོན་དགུ་པའོ། །གསུམ་པ་རྩ་དུར་བའི་དབང་ནི། སྔོན་བཅོམ་ལྡན་འདས་ལ་བྲམ་ཟེ་ཀུན་དྷ་ལིས་རྩྭ་དུར་བ་ཕུལ་སྟེ། དུར་བ་ཇི་ལྟར་ཆུང་ངུ་ལས་ཡལ་ག་དང་ལོ་འདབ་མང་པོ་འཕེལ་བ་བཞིན་དུ། རྒྱུ་དགེ་བའི་རྩ་བ་ཆུང་ངུ་ལས་འབྲས་བུ་བསོད་ནམས་མང་པོ་འཕེལ་བའི་བྱིན་གྱིས་བརླབས་པའི་རྫས་འདི་སློབ་མ་ལ་བྱིན་པས། ཆོས་རྒྱུ་འབྲས་ལ་མ་རྨོོངས་ཤིང་དགེ་བའི་རྩ་བ་ཆུང་ངུ་ལ་རྟེན་ནས་བསོད་ནམས་འབྲས་བུ་ཕུན་སུམ་འཕེལ་བའི་དོན་གྱིས་བཀྲ་ཤིས་པར་གྱུར་ཅིག །དུར་བས་ཚེ་ནི་འཕེལ་བར་བྱེད་པ་སྟེ། རྡོ་རྗེ་ཚེ་ནི་རབ་བསྒྲུབ་པས། །སྐྱེ་ཤིའི་སྡུག་བསྔལ་རྒྱུན་བཅད་དེ། །དུར་བས་བཀྲ་ཤིས་དེས་ནི་ཚེ་བརྟན་ཤོག །དུར་བའི་རྩྭ་མཆོག་བསོད་ནམས་མང་པོས་འཕེལ། །བཀྲ་ཤིས་ལོ་འདབ་མེ་ཏོག་འབྲས་བུ་རྒྱས། །ཡིད་ལ་ཅི་བསམ་འདོད་པའི་བཀྲ་ཤིས་པ། །འདོད་འབྱུང་བཀྲ་ཤིས་ལེའུ་བརྒྱད་བཅུ་པའོ། །བཞི་པ་ལི་ཁྲིའི་དབང་། སྔོན་བཅོམ་ལྡན་འདས་ལ་སའི་ལྷ་མོས་འཚལ་ལི་ཁྲི་ཕུལ་བས། ཇི་ལྟར་ལི་ཁྲི་དམར་པོ་ཆགས་པ་ཞེན་པའི་ངོ་བོ་ན་གནས་པ་དེ་བཞིན་དུ། ཐུགས་རྗེ་ཆེན་པོས་སེམས་ཅན་ཐམས་ཅད་མི་བཏང་བར་བྱིན་གྱིས་བརླབས་པའི་རྫས་འདི། ངས་སློབ་མ་ཁྱོད་ལ་བྱིན་པས་ཁྱོད་ཀྱིས་སེམས་ཅན་ཐམས་ཅད་ཀྱི་དོན་བྱེད་ཅིང་འཁོར་བའི་ཆོས་ཐམས་ཅད་ལ་སྤྱོད་པའི་ཆོས་ཐམས་ཅད་ལ་སྦྱོད་བཞིན་མ་ཆགས་པའི་དོན་གྱིས་བཀྲ་ཤིས་པར་གྱུར་ཅིག །ལི་ཁྲི་དམར་བ་དབང་གི་རང་བཞིན་སྟེ། །ཆོས་ཀུན་མ་ལུས་དབང་དུ་གྱུར་པ་སྟེ། །ཆོས་ཀྱི་རྒྱལ་སྲིད་རབ་ཏུ་བསྟན་གྱུར་པ། །བཀྲ་ཤིས་དེས་ཀྱང་རྒྱལ་སྲིད་བསྟན་གྱུར་ཅིག །ཁ་དོག་དམར་པོ་ནུབ་ཕྱོགས་དབང་གི་པདྨའི་རིགས། ཆགས་པ་གཉིས་ལྡན་བདག་དོན་གཞན་དོན་འགྲུབ། །གསུང་གི་བདག་ཉིད་དོན་སྟོན་བཀྲ་ཤིས་རྫས། །ཚེ་ཡིས་བཀྲ་ཤིས་ལེའུ་སྟེ་གྱ་གཅིག་པའོ། །ལྔ་པ་མེ་ལོང་གི་དབང་། སྔོན་བཅོམ་ལྡན་འདས་ཀྱིས་རྣམ་པར་ཤེས་པ་གནས་ལན་གསུམ་དུ་གར་པ་མེ་ལོང་ལྟ་བུའི་ཡེ་ཤེས་བསྙེས་ནས་མངོན་པར་རྫོགས་པའི་རྫས་འདི་སློབ་མ་ཁྱོད་ལ་བྱིན་པས། ཁྱོད་ཀྱི་བག་ཆགས་གྱི་སྒྲིབ་པ་བག་ལ་ཉལ་ཆ་ཕྲ་མོ་ཡན་ཆད་རྡོ་རྗེ་ལྟ་བུའི་ཏིང་ངེ་འཛིན་གྱིས་བཅོམ་ནས་ཀུན་གཞིའི་རྣམ་པར་ཤེས་པ་གནས་གྱུར་སྟེ། མེ་ལོང་ཡེ་ཤེས་མཐོང་ནས་མངོན་པར་རྫོགས་པར་སངས་རྒྱས་པ་དེའི་དོན་གྱིས་བཀྲ་ཤིས་པར་གྱུར་ཅིག །མེ་ལོང་ཡེ་ཤེས་ཆེན་པོའི་གཟུགས་བརྙན་སྟེ། །ཡེ་ཤེས་རྒྱལ་མཚོའི་བདག་ཉིད་མཆོག་གྱུར་ནས། །རྣམ་དག་ཆོས་ལ་ཐོགས་མེད་ལོངས་སྤྱོད་པས། །བཀྲ་ཤིས་དེས་ཀྱང་དེང་འདིར་སྒྲིིབ་པ་དག་གྱུར་ཅིག །མེ་ལོང་གདོང་བསྟན་བཞིན་གྱི་དྲི་མ་སེལ། །དེ་བཞིན་ཉོན་མོངས་ཤེས་བྱའི་སྒྲིབ་པ་སེལ། །གསལ་ལ་རང་བཞིན་མེད་པའི་ཆོས་ཉིད་ལ། །ཡེ་ཤེས་གསལ་བའི་བཀྲ་ཤིས་ལེའུ་སྟེ་གྱ་གཉིས་པའོ། །དྲུག་པ་དུང་གི་དབང་། སྔོན་རི་རབ་རིའི་རྩེར་རྣམ་པར་སྣང་མཛད་ཀྱིས་འཁོར་རྣམས་ལ་དུང་གིས་དབང་བསྐུར་བས། ཚངས་པའི་སྒྲ་སྒྲོགས་པར་གྱུར་ཏོ། །དེ་དང་རྗེས་སུ་མཐུན་པར་དུང་གི་དབང་བསྐུར་བས། ཚངས་པའི་དབྱངས་ལྟ་བུ་སྒྲོག་པའི་དབང་དམ་པ་ཐོབ་པར་གྱུར་ཅིག །ཆོས་དུང་རྒྱལ་བས་བུས་ནས་ནི། །འཇིག་རྟེན་སེམས་ཅན་སྐལ་ལྡན་ལ། །རྣམ་གསལ་སྡིག་བྱང་ཆོས་ཐོབ་པའི། །ཚངས་པའི་སྒྲ་སྐད་སྒྲོགས་པར་ཤོག །སྐྱོབ་པ་མགོན་པོ་ཚངས་པའི་དབྱངས། །འཕགས་པའི་གསུང་མཆོག་འགྲོ་ལ་སྒྲོག །འཇིག་རྟེན་གསུམ་དུ་རྒྱས་པ་ཡིས། །གསུང་གི་བཀྲ་ཤིས་ལེའུ་སྟེ་གྱ་གསུམ་པའོ། །བདུན་པ་གྷི་ཧང་གི་དབང་ནི། སྔོན་བཅོམ་ལྡན་འདས་ལ་གླང་པོ་ཆེ་ས་བསྲུངས་གིས་སྨན་གྷི་ཧང་ཕུལ་སྟེ། བཻ་ཌཱུརྻ་དང་ལྡན་པའི་སྨན་མཆོག་བདུད་བཞི་ལས་གྲོལ་བར་བྱིན་གྱིས་བརླབས་པའི་རྫས་འདི། ངས་སློབ་མ་ལ་བྱིན་པས་སློབ་མའི་བདུད་བཞི་ལས་ཐར་ཞིང་ནད་ཐམས་ཅད་སེལ་བར་བྱེད་པའི་མཐུ་ཕུན་སུམ་ཚོགས་པ་དང་ལྡན་པའི་དོན་གྱིས་བཀྲ་ཤིས་པར་གྱུར་ཅིག །གྷི་ཧང་དུག་གསུམ་འཇོམས་པའི་སྨན་ཡིན་སྟེ། །སྨན་མཆོག་ཆོས་ཉིད་རབ་ཏུ་རྟོགས་འགྱུར་ཏེ། །ཉོན་མོངས་ཟུང་ངུ་མེད་པར་གྱུར་པ་ཡིས། །བཀྲ་ཤིས་དེས་ཀྱང་སྡུག་བསྔལ་མེད་པར་ཤོག །ཡོན་ཏན་ལྡན་པས་བཞི་བརྒྱ་རྩ་བཞི་སེལ། །སྨན་མཆོག་སྐྱེ་འགྲོ་མ་ལུས་ཀུན་གྱིས་གསོས། །བྱིན་གྱིས་རློབས་པའི་བཀྲ་ཤིས་ཚེ་ཡིས་གསོས། །ཚེ་རིང་ནད་མེད་བཀྲ་ཤིས་ལེའུ་སྟེ་གྱ་བཞི་པའོ། །བརྒྱད་པ་བིལ་བའི་དབང་། །སྔོན་བཅོམ་ལྡན་འདས་ལ་ཤིང་བིལ་བ་ཕྱག་དུ་ཕུལ་ཏེ་ཇི་ལྟར་ཤིང་བིལ་བ་སྨིན་ཅིང་འབྲས་བུ་སའི་ངོ་བོར་གནས་པ་བཞིན་དུ། སངས་རྒྱས་བཅོམ་ལྡན་འདས་ཀྱིས་སྐུ་དང་ཡེ་ཤེས་དང་སྟོབས་དང་མི་འཇིགས་པ་ལ་སོགས་པ་འབྲས་བུའི་ཆོས་ཐམས་ཅད་ཡོངས་སུ་རྫོགས་པར་བྱིན་གྱིས་རླབས་པའི་རྫས་འདི། ངས་ཁྱོད་ལ་བྱིན་པས། ཁྱོད་ལ་སྟོབས་བཅུ་མི་འཇིགས་པ་བཞི་དང་། མ་འདྲེས་པ་བཅོ་བརྒྱད་དང་ལྡན་པར་སྐུ་དང་ཡེ་ཤེས་དང་མཚན་དང་དཔེ་བྱད་ལ་སོགས་སྟེ། འབྲས་བུའི་ཆོས་ཐམས་ཅད་ཡོངས་སུ་རྫོགས་པར་སངས་རྒྱས་པའི་དོན་གྱི་བཀྲ་ཤིས་པར་གྱུར་ཅིག །བིལ་བ་རྒྱུ་རྐྱེན་འབྲས་བུར་བཅས་པའི་མཆོག །འཇིག་རྟེན་འཇིག་རྟེན་འདས་པའི་སྤྱོད་པ་ཀུན། །བྱང་ཆུབ་སྙིང་པོ་མཆོག་ཏུ་གྱུར་པ་ཡིས། །བཀྲ་ཤིས་དེས་ཀྱང་འཇིག་རྟེན་འགྲུབ་པར་ཤོག །ཡལ་ག་ལོ་འདབ་མེ་ཏོག་གཡུ་ལོར་འཁྱིིལ། །འབྲས་བུ་ཡིད་འོང་འབྱོར་པའི་ལོངས་སྤྱོད་ལྡན། །ཀུན་གྱི་དོན་དང་མཐུན་པར་སྤྱོད་པ་ཡིས། །ཕུན་ཚོགས་བཀྲ་ཤིས་ལེའུ་སྟེ་གྱ་ལྔ་པའོ། །དགུ་པ་ཐུགས་དཔལ་བེའི་དབང་། སྔོན་བཅོམ་ལྡན་འདས་ལ་བྱང་ཆུབ་ཀྱི་ཤིང་དྲུང་དུ། བདུད་ཀྱི་བརྒལ་བའི་དུས་སུ། བཀྲ་ཤིས་པའི་རྟགས་བརྒྱད་དང་ལྡན་སྟེ། ཐུགས་དཔལ་བེའུས་བཀྲ་ཤིས་པ་དེ་བཞིན་དུ་སློབ་མའི་ཐུགས་དཔལ་བེའུ་རུ་བཀྲ་ཤིས་པར་གྱུར་ཅིག །དཔལ་བེའུ་ཐུགས་ཀྱི་ས་བོན་སྟེ། །འདྲེན་པ་རྣམས་ཀྱི་ཐུགས་ལགས་པས། །བླ་མེད་ཐར་ལམ་དྲངས་པའི་ཕྱིར། །ཐུགས་ཀྱི་དཔལ་བེའུ་བཀྲ་ཤིས་ཤོག །གཞན་གྱིས་མི་ཐུབ་ཆེ་བའི་རྟགས་དང་ལྡན། །སྡོ་བའི་ཕྱོགས་རྣམས་ཀུན་ལས་རྒྱལ། །ཐུགས་ཁ་ཉིད་ལས་གསལ་བ་མངོན་པར་སྟོན། །འདི་ནི་དཔལ་བེའུ་དབང་གི་བཀྲ་ཤིས་ལེའུ་སྟེ་གྱ་དྲུག་པའོ། །སྟོན་ལ་བདུད་ཀྱི་སྡོས་པའི་ཚེ། །ཐུགས་ཀྱི་དཔལ་བེའུ་བཀྲ་ཤིས་འགྱུར། །དེ་རིང་ཁྱོད་ལ་བྱིན་བྱས་པས། །ཐམས་ཅད་མཁྱེན་པའི་དབང་ཐོབ་ཤོག །ཐུགས་དཔལ་བེའུ་བཀྲ་ཤིས་པས། །ཐམས་ཅད་མཁྱེན་པའི་དབང་དམ་པ་ཐོབ་པར་གྱུར་ཅིག །བཅུ་པ་ཕྱག་ཞབས་ཙཀྲའི་དབང་ནི། སྔོན་བཅོམ་ལྡན་འདས་ལ་བདུད་ཀྱིས་རྒལ་བའི་དུས་སུ་བཀྲ་ཤིས་པའི་རྟགས་བརྒྱད་བྱུང་སྟེ། ཕྱག་དང་ཞབས་ཀྱི་མཐིལ་འཁོར་ལོས་བཀྲ་ཤིས་པ། དེ་བཞིན་དུ་མིང་འདི་ཞེས་བྱ་བ་ལ་འཁོར་ལོས་དབང་བསྐུར་བས། ཕྱག་དང་ཞབས་ཀྱི་མཐིལ་འཁོར་ལོས་བཀྲ་ཤིས་པར་གྱུར་ཅིག །འཁོར་ལོས་བཀྲ་ཤིས་ཕྱག་དང་ཞབས་མཐིལ་ལ། །སྐྱོབས་པའི་སངས་རྒྱས་འདྲེན་པ་ལྷའི་ལྷ། །ཉོན་མོངས་སེམས་ཅན་སྨན་པའི་གསོས། །ཕྱག་ཞབས་འཁོར་ལོས་བཀྲ་ཤིས་ཤོག །གཞན་གྱི་མི་ཐུབ་ཆེ་བའི་རྟགས་དང་ལྡན། །སྡོ་བའི་ཕྱོགས་རྣམས་ཀུན་ལས་ཁྱད་པར་འཕགས། །ཕྱག་ཞབས་མཐིལ་ལ་མངོན་པར་གསལ་བར་སྟོན། །འདི་ནི་འཁོར་ལོ་དབང་གི་བཀྲ་ཤིས་ལེའུ་སྟེ་གྱ་བདུན་པའོ། །སྟོན་ལ་བདུད་ཀྱི་བསྡོས་པའི་ཚེ། །ཕྱག་ཞབས་འཁོར་ལོས་བཀྲ་ཤིས་འགྱུར། །དེ་རིང་ཁྱོད་ལ་བྱིན་རླབས་པས། །འཁོར་ལོ་བསྐོར་བའི་དབང་ཐོབ་ཤོག །ཕྱག་ཞབས་འཁོར་ལོས་བཀྲ་ཤིས་པ། །འཁོར་ལོ་བསྐོར་བའི་དབང་རྣམས་ཐོབ་པར་གྱུར་ཅིག །བཅུ་གཅིག་པ་ལྗག་པདྨའི་དབང་། སྔོན་བཅོམ་ལྡན་འདས་ལ་བདུད་ཀྱིས་བརྒལ་བའི་དུས་སུ། བཀྲ་ཤིས་ཀྱི་རྟགས་བརྒྱད་འབྱུང་སྟེ། ལྗག་པདྨར་བཀྲ་ཤིས་པ་དེ་བཞིན་དུ། པདྨས་དབང་བསྐུར་བས། མིང་འདི་ཞེས་བྱ་བས་ལྗག་པདྨར་བཀྲ་ཤིས་པར་གྱུར་ཅིག །གསུང་མཆོག་པདྨ་ཆོས་ཀྱི་རྒྱལ། །ཉོན་མོངས་མ་གོས་པདྨའི་གསུང་། །ཐམས་ཅད་སྒྲོལ་བའི་གསུང་ལགས་སྟེ། །ལྗགས་མཆོག་པདྨར་བཀྲ་ཤིས་ཤོག །གཞན་གྱིས་མི་ཐུབ་ཆེ་བའི་རྟགས་དང་ལྡན། །བསྡོ་བའི་ཕྱོགས་རྣམས་ཀུན་ལས་ཁྱད་པར་འཕགས། །ལྗགས་ཀྱིས་མཆོག་ལ་མངོན་པར་གསལ་བར་སྟོན། །འདི་ནི་པདྨ་དབང་གི་བཀྲ་ཤིས་ལེའུ་སྟེ་གྱ་བརྒྱད་པའོ། །སྟོན་ལ་བདུད་ཀྱིས་བསྡོས་པའི་ཚེ། །ལྗགས་ཉིད་པདྨར་བཀྲ་ཤིས་འགྱུར། །དེ་རིངས་ཁྱོད་ལ་བྱིན་རླབས་པས། །ཐོགས་པ་མེད་པའི་དབང་ཐོབ་ཤོག །ལྗགས་ཉིད་པདྨའི་བཀྲ་ཤིས་པ། ལྗགས་པད་མའི་དབང་དམ་པ་ཐོབ་པར་གྱུར་ཅིག །བཅུ་གཉིས་པ་སྐུ་རྒྱལ་མཚན་གྱི་དབང་། སྔོན་བཅོམ་ལྡན་འདས་ལ་བདུད་ཀྱིས་བརྒལ་བའི་དུས་སུ། བཀྲ་ཤིས་ཀྱི་རྟགས་བརྒྱད་བྱུང་སྟེ། སྐུ་རྒྱལ་མཚན་དུ་བཀྲ་ཤིས་པ་དེ་བཞིན་དུ་རྒྱལ་མཚན་གྱིས་དབང་བསྐུར་བས། མིང་འདི་ཞེས་བྱ་བ་སྐུ་རྒྱལ་མཚན་དུ་བཀྲ་ཤིས་པར་གྱུར་ཅིག །མི་ནུབ་རྒྱལ་མཚན་འདྲེན་པའི་སྐུ། །ཐམས་ཅད་བདུད་ཀྱི་སྡེ་བཏུལ་ནས། །དཔུང་བཅོམ་སངས་རྒྱས་སྐུ་བསྟོད་དེ། །སྐུ་མཆོག་སངས་རྒྱས་བཀྲ་ཤིས་ཤོག །གཞན་གྱིས་མི་ཐུབ་ཆེ་བའི་རྟགས་དང་ལྡན། །སྡོ་བའི་ཆོས་རྣམས་ཀུན་ལས་ཁྱད་པར་འཕགས། །སྐུ་ཡི་མཆོག་ལ་བརྩོན་པར་གསལ་བར་སྟོན། །འདི་ནི་རྒྱལ་མཚན་དབང་གི་བཀྲ་ཤིས་ཀྱི་ལེའུ་སྟེ་གྱ་དགུ་པའོ། །སྟོན་ལ་བདུད་ཀྱིས་བསྡོས་པའི་ཚེ། །སྐུ་ཉིད་རྒྱལ་མཚན་བཀྲ་ཤིས་འགྱུར། །དི་རིངས་ཁྱོད་ལ་སྦྱིན་པས་བདུད་བཞི་ཕམ་བྱེད་དབང་ཐོབ་ཤོག །སྐུ་ཉིད་རྒྱལ་མཚན་བཀྲ་ཤིས་པ། སྐུ་རྒྱལ་མཚན་གྱི་དབང་དམ་པ་ཐོབ་པར་གྱུར་ཅིག །བཅུ་གསུམ་པ་མགུར་བུམ་པའི་དབང་། སྔོན་བཅོམ་ལྡན་འདས་ལ་བདུད་ཀྱི་བརྒལ་བའི་དུས་སུ། བཀྲ་ཤིས་ཀྱི་རྟགས་བརྒྱད་བྱུང་སྟེ། མགུར་བུམ་པར་བཀྲ་ཤིས་པ་དེ་བཞིན་དུ་བུམ་པས་དབང་བསྐུར་བས། མིང་འདི་ཞེས་བྱ་བ་ལ་མགུར་བུམ་པར་བཀྲ་ཤིས་པར་གྱུར་ཅིག །བཀྲ་ཤིས་བུམ་པ་དམ་པ་འདི། །བཅོམ་ལྡན་འདས་ཀྱི་མགུར་ལགས་སྟེ། །མགུར་མཆོག་བཀྲ་ཤིས་འདི་བྱིན་པས། །བུམ་པའི་བཀྲ་ཤིས་ཐོབ་པར་ཤོག །གཞན་གྱིས་མི་ཐུབ་ཆེ་བའི་རྟགས་དང་ལྡན། །བསྡོ་བའི་ཕྱོགས་རྣམས་ཀུན་ལ་ཁྱད་པར་འཕགས། །མགུར་གྱིས་མཆོག་ལ་མངོན་པར་གསལ་བར་སྟོན། །འདི་ནི་བུམ་པའི་དབང་གི་བཀྲ་ཤིས་ལེའུ་སྟེ་དགུ་བཅུ་པའོ། །སྟོན་ལ་བདུད་ཀྱི་བསྡོས་པའི་ཚེ། །མགུར་ཉིད་བུམ་པར་བཀྲ་ཤིས་འགྱུར། །དེ་རིངས་ཁྱོད་ལ་བྱིན་རློབས་བས། །སྙིང་རྗེས་འཛིན་པའི་དབང་ཐོབ་ཤོག །མགུར་གྱི་བུམ་པར་བཀྲ་ཤིས་པ། །མགུར་བུམ་པའི་དབང་དམ་པ་ཐོབ་པར་གྱུར་ཅིག །བཅུ་བཞི་པ་དབུ་སྐྲ་གདུགས་ཀྱི་དབང་། སྔོན་བཅོམ་ལྡན་འདས་ལ་བདུད་ཀྱི་བརྒལ་བའི་དུས་སུ། བཀྲ་ཤིས་པའི་རྟགས་བརྒྱད་བྱུང་སྟེ། དབུ་སྐྲ་གདུགས་སུ་བཀྲ་ཤིས་པ་དེ་བཞིན་དུ། གདུགས་ཀྱི་དབང་བསྐུར་བས། མིང་འདི་ཞེས་བྱ་བ་དབུ་སྐྲ་གདུགས་སུ་བཀྲ་ཤིས་པར་གྱུར་ཅིག །གདུགས་ཀྱིས་ཚ་བའི་སྡུག་བསྔལ་ཀུན་སེལ་ཏེ། །ཉོན་མོངས་མ་ལུས་ཀུན་ལས་རྒྱལ་བ་དང་། །ཆེ་བའི་ཡོན་ཏན་མ་ལུས་རྒྱས་པ་སྟེ། །ལོག་པའི་ཕྱོགས་རྣམས་ཟིལ་གྱིས་གནོན་པར་ཤོག །གཞན་གྱི་མི་ཐུབ་ཆེ་བའི་རྟགས་དང་ལྡན། །བསྡོ་བའི་ཕྱོགས་རྣམས་ཀུན་ལས་ཁྱད་པར་འཕགས། །དབུ་སྐྲའི་མཆོག་ལ་མངོན་པར་གསལ་བར་སྟོན། །འདི་ནི་གདུགས་ཀྱི་དབང་གི་བཀྲ་ཤིས་ལེའུ་སྟེ་གོ་གཅིག་པའོ། །སྟོན་ལ་བདུད་ཀྱི་བསྡོས་པའི་ཚེ། །དབུ་སྐྲ་གདུགས་ཀྱི་བཀྲ་ཤིས་འགྱུར། །དེ་རིངས་ཁྱོད་ལ་བྱིན་རླབས་པས། །གདུང་བ་སེལ་བྱེད་དབང་ཐོབ་ཤོག །དབུ་སྒྲ་གདུགས་ཀྱི་བཀྲ་ཤིས་པ། །དབུ་སྐྲ་གདུགས་ཀྱི་དབང་དམ་པ་ཐོབ་པར་གྱུར་ཅིག །བཅོ་ལྔ་པ་ཚེམས་དུང་གི་དབང་། སྔོན་བདུད་ཀྱི་བརྒལ་བའི་དུས་སུ། །བཀྲ་ཤིས་ཀྱི་རྟགས་བརྒྱད་བྱུང་ངོ། །གསུང་དུ་བཀྲ་ཤིས་པ་དེ་བཞིན་དུ། དུང་གི་དབང་བསྐུར་བས། མིང་འདི་ཞེས་བྱ་བས་གསུང་དུང་དུ་བཀྲ་ཤིས་པར་གྱུར་ཅིག །སྙན་པའི་སྒྲ་རྣམས་ཕྱོགས་བཅུར་སྒྲོགས་པ་དང་། མུ་སྟེགས་ལོག་པའི་ཕྱོགས་རྣམས་སྐྲག་པ་དང་། སེམས་ཅན་ཀུན་གྱི་ཤེས་པ་དགྲོལ་བའི་ཕྱིར། །གསུང་མཆོག་དུང་གི་རྒྱལ་པོར་བཀྲ་ཤིས་ཤོག །གཞན་གྱིས་མི་ཐུབ་ཆེ་བའི་རྟགས་དང་ལྡན། བསྡོ་བའི་ཕྱོགས་རྣམས་ཀུན་ལས་ཁྱད་པར་འཕགས། གསུང་གི་མཆོག་ལ་མངོན་པར་གསལ་བར་སྟོན། འདི་ནི་གསུང་གི་དབང་གི་བཀྲ་ཤིས་ལེའུ་སྟེ་གོ་གཉིས་པའོ། །སྟོན་ལ་བདུད་ཀྱི་བསྡོས་པའི་ཚེ། །གསུང་ཉིད་དུང་གི་བཀྲ་ཤིས་འགྱུར། །དེ་རེངས་ཁྱོད་ལ་བྱིན་བརླབས་པས། །རྒོལ་བ་དཔའ་སྐུམ་དབང་ཐོབ་ཤོག །གསུང་ཉིད་དུང་གི་བཀྲ་ཤིས་པ། །གསུང་དུང་གི་དབང་དམ་པ་ཐོབ་པར་གྱུར་ཅིག །བཅུ་དྲུག་པ་ཕྱག་ཞབས་ཉ་ཡིས་བཀྲ་ཤིས་ཀྱི་དབང་། སྔོན་བཅོམ་ལྡན་འདས་ལ་བདུ ད་ཀྱིས་བརྒལ་བའི་དུས་སུ་བཀྲ་ཤིས་ཀྱི་རྟགས་བརྒྱད་བྱུང་སྟེ། ཕྱག་དང་ཞབས་ཀྱི་ཉ་བཀྲ་ཤིས་ཀྱི་ཉར་བཀྲ་ཤིས་པ་དེ་བཞིན་དུ། མིང་འདི་ཞེས་བྱ་བ་ལ་ཉས་དབང་བསྐུར་བས། ཕྱག་དང་ཞབས་ཀྱི་ཉར་བཀྲ་ཤིས་པར་གྱུར་ཅིག །ཕྱག་ཞབས་གཉིས་ཤར་བཀྲ་ཤིས་ཏེ། འཇམ་སྙོམས་ཡིད་འོང་ཀུན་གྱི་དཔལ། ཉོན་མོངས་གནས་ནས་འདྲེན་མཛད་པ། ཉ་ཤ་བཀྲ་ཤིས་ཉར་ནི་ཤོག །གཞན་གྱིས་མི་ཐུབ་ཆེ་བའི་རྟགས་དང་ལྡན། །བསྡོ་བའི་ཕྱོགས་རྣམས་ཀུན་ལས་ཁྱད་པར་འཕགས། །ཉ་ཤ་བཞི་ལས་མངོན་པར་གསལ་བར་སྟོན། །འདི་ནི་ཉའི་བཀྲ་ཤིས་དབང་གི་ལེའུ་སྟེ་གོ་གསུམ་པའོ། །སྟོན་ལ་བདུད་ཀྱི་བསྡོད་པའི་ཚེ། །ཉ་བཞི་གསེར་ཉས་བཀྲ་ཤིས་འགྱུར། །དེ་རིངས་ཁྱོད་ལ་བྱིན་རླབས་པས། །འཁོར་བར་ཉམས་ང་མེད་པར་ཤོག །ཉ་བཞི་གསེར་ཉའི་བཀྲ་ཤིས་པ། །བཀྲ་ཤིས་ཉའི་དབང་དམ་པ་ཐོབ་པར་གྱུར་ཅིག །བརྒྱད་པ་ཤེས་བྱ་ལ་མ་རྨོངས་པའི་དབང་ལ་བདུན་ལས། དང་པོ་རྡོ་རྗེ་རྒྱ་གྲམ་གྱི་དབང་། སྔོན་བཅོམ་ལྡན་འདས་རྣམ་པར་སྣང་མཛད་ཀྱིས་རི་རབ་རིའི་རྩེར་འཁོར་རྣམས་ལ་རྡོ་རྗེ་རྒྱ་གྲམ་གྱི་དབང་བསྐུར་བས། འཕྲིན་ལས་གྲུབ་པར་གྱུར་ཏོ། །དེ་དང་རྗེས་སུ་མཐུན་པར་རྡོ་རྗེ་རྒྱ་གྲམ་གྱིས་དབང་བསྐུར་བས། ཕྱོགས་བཅུ་ན་སྔགས་འཆང་རྣམས་ཀྱིས་རྟག་ཏུ་བསྲུང་བར་གྱུར་ཅིག །དགོས་དང་སོམ་ཉིད་མེད་པ་ལ། གཙུག་དུ་རྒྱ་གྲམ་དབང་བསྐུར་བས། རྡོ་རྗེ་འཛིན་པ་རྣམས་ཀྱིས་ཀྱང་། །བསྲུངས་བ་མཛད་པ་ཉིད་དུ་ཤོག །འཕྲིན་ལས་ཐོགས་པ་མེད་པ་ཡིས། །བྱ་བ་ནན་ཏན་ཡེ་ཤེས་ལས། །དགོས་པའི་དོན་རྣམས་ཀུན་འགྲུབ་པའི། །འདི་ནི་སྔགས་འཆང་དབང་གི་བཀྲ་ཤིས་ལེའུ་སྟེ་གོ་བཞི་པའོ། །གཉིས་པ་དར་གྱིས་ཅོད་པཎ་ཀྱི་དབང་ནི། སྔོན་རི་རབ་རིའི་རྩེར། དཔལ་རྣམ་པར་སྣང་མཛད་ཀྱིས་འཁོར་ལ་དར་དཔྱངས་ཀྱི་དབང་བསྐུར་བས། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ལ་དབང་བྱེད་པར་གྱུར་ཏོ། །དེ་དང་རྗེས་སུ་མཐུན་པར་དར་དཔྱངས་ཀྱི་དབང་བསྐུར་བས། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་དབང་བསྒྱུར་བ་གྱུར་ཅིག །དར་དཔྱངས་གྱེན་ལ་འཕུར་བ་ནི། ཆོས་ཀྱི་སྐུ་དང་གཉིས་སུ་མེད། །འཕྲེད་དང་འཐུར་གཉིས་སྐུ་གཉིས་སྟེ། །ལོངས་སྤྱོད་རྫོགས་དང་སྤྲུལ་སྐུ་ཐོབ་པར་ཤོག །དམར་པོ་ཡར་འཕུར་ཆོས་ཉིད་གྱེན་དུ་རྟོགས། །སྔོན་པོ་འཕྲེད་འཕུར་འཕྲིན་ལས་རྣམ་བཞི་མཛད། །མཐིང་ཁ་མར་འཕུར་ཀླུ་གདུག་ཟིལ་གྱིས་ནོན། །དར་དཔྱངས་བཀྲ་ཤིས་ལེའུ་སྟེ་གོ་ལྔ་པའོ། གསུམ་པ་མཆོད་པ་ལྔའི་དབང་། །སྔོན་རི་རབ་རིའི་རྩེར། དཔལ་རྣམ་པར་སྣང་མཛད་ཀྱིས། འཁོར་རྣམས་ལ་པུ་ཙ་རྣམ་པ་ལྔའི་དབང་བསྐུར་བས། རྡོ་རྗེ་རྒྱས་ཐེབས་དང་ལས་ཀྱི་ཀར་མའི་དབང་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་མཆོད་པ་ལྔའི་རྫས་ཀྱིས་དབང་བསྐུར་བས། །རྡོ་རྗེ་རྒྱལ་ཐེབས་དང་ལས་མཐའ་དག་བྱེད་པའི་དབང་དམ་པ་ཐོབ་པར་གྱུར་ཅིག །ཐབས་ཆེན་སྟོབས་ལྡན་མཆོད་ཡོན་དམ་པ་སྟེ། དམིགས་པ་ལྔ་དང་ཏིང་འཛིན་ཆ་སྦྱར་སྟེ། །རྐྱེན་དང་མཚམས་པའི་བཀྲ་ཤིས་ཤོག །དྲི་ཆབ་དྲི་གསུང་མེ་ཏོག་མཛེས་པར་བཀྲམ། །བདུག་སྤོས་ཡིད་ཚིམ་ཨ རྒ་བདུད་རྩིའི་ཆུ། །ལྷ་བཤོས་བྲོ་ལྡན་འོད་གསལ་མར་མེ་སྟེ། །མཆོད་པ་རྣམ་ལྔའི་བཀྲ་ཤིས་ལེའུ་གོ་དྲུག་པའོ། །བཞི་པ་ཀ་ལི་དབང་། སྔོན་རི་རབ་རིའི་རྩེར་དཔལ་ཀུན་རིག་རྣམ་པར་སྣང་མཛད་ཀྱིས་འཁོར་རྣམས་ལ། ཉན་པའི་དབང་བསྐུར་བས་ཐེག་པ་མཐའ་དག་ཉན་པའི་དབང་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་ཀ་པ་ལིའི་དབང་བསྐུར་བས། གསང་སྔགས་ཀྱི་རྒྱུད་མཐའ་དག་ཉན་པའི་དབང་དམ་པ་ཐོབ་པར་གྱུར་ཅིག །གདུང་བའི་སེམས་བསྐྱེད་དད་པའི་ཤུགས་ཕྱུང་ནས། བརྩོན་འགྲུས་ཤུགས་ཀྱི་ཐམས་ཅད་ཐོབ་པ་དང་། དད་པའི་ཤུགས་ཀྱི་ཀུན་ཏུ་ཉན་པ་དང་། །ཤེས་རབ་སྟོབས་ཀྱི་ཐམས་ཅད་ཤེས་པར་ཤོག །ཤེས་རབ་རྒྱ་ཆེ་ཉན་པ་ཕྱོགས་མེད་བྱེད། །བདེ་བར་གཤེགས་པའི་བཀའ་བཞིན་ཡོངས་སུ་སློབ། །སེམས་དང་ཆོས་ཉིད་གཉིས་སུ་མེད་པ་ཡིས། །ཉན་དབང་བཀྲ་ཤིས་ལེའུ་སྟེ་གོ་བདུན་པའོ། །ལྔ་པ་ཆགས་ཤིང་གི་དབང་ནི། སྔོན་རི་རབ་རིའི་རྩེར་དཔལ་རྣམ་པར་སྣང་མཛད་ཀྱིས། འཁོར་རྣམས་ལ་ཆགས་ཤིང་གིས་དབང་བསྐུར་བས། ཐེག་པ་མཐའ་དག་འཆད་པའི་དབང་དམ་པ་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་རིན་པོ་ཆེ་འཆད་པའི་དབང་བསྐུར་བས། ཐེག་པ་མཐའ་དག་འཆད་པའི་དབང་དམ་པ་ཐོབ་པར་གྱུར་ཅིག །རིན་ཆེན་ཆགས་ཤིང་འགྲོ་བ་འདྲེན། །མ་ལུས་གནས་སུ་འདྲེན་པར་བྱེད། །སྐྱེས་མཆོག་སྨན་པའི་རྒྱལ་པོ་སྟེ། །མ་རིག་རྨོངས་པ་འདྲེན་པར་ཤོག །གཏི་མུག་རྨོངས་པ་ཤེས་པ་བསྒྲལ་ནས་ཀྱང་། །མ་རིག་ལོག་པར་རྟོག་པ་གྲོལ་བར་མཛད། །ཐུགས་རྗེ་ཆེ་བས་ཤེས་པའི་རྒྱུད་གྲོལ་བ ། །ཐེག་རྣམས་འཆད་པའི་བཀྲ་ཤིས་ལེའུ་སྟེ་གོ་བརྒྱད་པའོ། །དྲུག་པ་པོ་ཏིའི་དབང་ནི། །སྔོན་རི་རབ་རིའི་རྩེར་དཔལ་རྣམ་པར་སྣང་མཛད་ཀྱིས་འཁོར་རྣམས་ལ། དྷརྨ་པོ་ཏིས་དབང་བསྐུར་བས། ཆོས་ཀྱི་སྒོ་ལ་མཁས་ཤིང་རྟོག་པར་གྱུར་ཏོ། །དེ་དང་རྗེས་སུ་མཐུན་པར་དྷརྨ་པོ་ཏིས་དབང་བསྐུར་བས། ཆོས་ཀྱི་སྒོ་མོ་ཐམས་ཅད་ལ་མཁས་ཤིང་རྟོགས་པའི་དབང་དམ་པ་ཐོབ་པར་ཅིག །གསུང་རབ་པོ་ཏི་ཆོས་ཀྱི་གཟུགས་རྙན་ཏེ། །ལེགས་པའི་ཡོན་ཏན་མ་ལུས་སྐྱེས་མཛད་པ། །ཐམས་ཅད་ཀུན་གྱི་དབང་པོ་སྒྲོལ་བའི་ཕྱིར། ཆོས་རྣམས་ཐམས་ཅད་འཆད་པའི་དབང་ཐོབ་ཤོག །གསུང་རབ་ཆོས་འཆད་པའི་གླེགས་བཾ་ལ། ཆོས་ཉིད་སྒྲ་སྒྲོགས་ཡིག་གེའི་འཕྲེང་བ་བཀོད། །བློའི་རབ་འབྲིང་ཇི་ལྟར་མཚམས་པར་སྟོན། །དྷརྨའི་བཀྲ་ཤིས་ལེའུ་སྟེ་གོ་དགུ་པའོ། །བདུན་པ་རྡོ་རྗེ་དྲིལ་བུའི་དབང་། སྔོན་རི་རབ་རིའི་རྩེར་དཔལ་རྣམ་པར་སྣང་མཛད་ཀྱིས་འཁོར་རྣམས་ལ་རྡོ་རྗེ་དང་དྲིལ་བུས་དབང་བསྐུར་བས། ཡེ་ཤེས་ལྔ་དང་ཆོས་ཀྱི་དབྱིངས་ཀྱི་དོན་རྟོགས་སྟེ། ཆོས་ཀྱི་སྐུ་ཐོབ་ནས་འགྲོ་བའི་དོན་བྱེད་པར་གྱུར་ཏོ། །དེ་དང་རྗེས་སུ་མཐུན་པར་རྡོ་རྗེ་དང་དྲིལ་བུས་དབང་བསྐུར་བས། ཡེ་ཤེས་ལྔ་དང་ཆོས་ཉིད་ཀྱི་དོན་རྟོགས་ནས། །ཆོས་ཀྱི་སྐུ་ཐོབ་ནས་འགྲོ་བའི་དོན་བྱེད་པར་གྱུར་ཅིག །དབྱིངས་དང་ཡེ་ཤེས་གཉིས་མེད་ཆོས་ཀྱི་སྐུ། །འདུ་འབྲལ་མེད་པ་ཀུན་གྱི་དབང་མཆོག་སྟེ། །འབྲས་བུའི་སྟོབས་ལྡན་ཕྱག་རྒྱ་ཆེན་པོ་ཡིས། །རྡོ་རྗེ་དྲིལ་བུ་འཆང་བའི་དབང་ཐོབ་ཤོག །རིག་པ་ཡེ་ཤེས་རྡོ་རྗེ་རྩེ་ལྔ་པ། །ཡེ་ཤེས་ལྔ་པོ་རྟགས་ཀྱི་ངོ་བོ་མཆོག །གཡོན་པ་དྲིལ་བུ་གསུང་རབ་རྒྱ་མཚོའི་སྒྲ་ཆེན་སྒྲགས། གསུང་རབས་རྡོར་དྲིལ་བཀྲ་ཤིས་ལེའུ་སྟེ་བརྒྱ་ཐམ་པའོ། །དགུ་པ་མཛེས་པ་བརྒྱན་གྱི་དབང་ལ་དྲུག་ལས། དང་པོ་དབུ་བརྒྱན་གྱི་དབང་ནི། སྔོན་རི་རབ་རིའི་རྩེར་དཔལ་ཀུན་རིགས་རྣམ་པར་སྣང་མཛད་ཀྱིས་འཁོར་རྣམས་ལ། རིན་པོ་ཆེའི་དབུ་བ རྒྱན་གྱི་དབང་བསྐུར་བས། ཆོས་ཀྱི་རྒྱལ་སྲིད་ཆེན་པོ་བརྙེས་པའི་དམ་པ་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་དབུ་བརྒྱན་གྱི་དབང་བསྐུར་བས། ཆོས་ཀྱི་རྒྱལ་སྲིད་ལ་མངའ་མཉེས་པར་གྱུར་ཅིག །མྱ་ངན་འདས་པ་ཐུགས་ཀྱི་དཔལ། །དྲིན་ཅན་དབུ་བརྒྱན་ཆོས་ཀྱི་རྒྱལ། །དབང་དང་བྱིན་རླབས་སྦྱིན་པའི་བྱིན། །ཆོས་ཀྱི་རྒྱལ་སྲིད་བྱེད་པར་ཤོག །རིན་ཆེན་སྣ་ཚོགས་མཛེས་པ་དབུ་བརྒྱན་མཆོག །ལེགས་པ་ཀུན་གྱི་ཆོས་ཀྱི་རྒྱལ་སྲིད་མཐུད། །ཕྱག་རྒྱ་རིགས་ལྔ་མཐུན་དང་ལྡན་བྱེད་པའི། །དབུ་རྒྱན་བཀྲ་ཤིས་ལེའུ་སྟེ་རྒྱ་གཅིག་པའོ། །གཉིས་པ་དབུ་བརྒྱན་གྱི་དབང་། སྔོན་རི་རབ་རིའི་རྩེར་དཔལ་རྣམ་པར་སྣང་མཛད་ཀྱིས་འཁོར་རྣམས་ལ་དཔུང་རྒྱན་གྱིས་དབང་བསྐུར་བས། མི་འཇིགས་པ་ལ་མངའ་མཉེས་པར་གྱུར་ཏོ། །དེ་དང་རྗེས་སུ་མཐུན་པར་དཔུང་བརྒྱན་གྱི་དབང་བསྐུར་བས། མི་འཇིགས་པ་བཞི་ལ་མངའ་མཉེས་པར་གྱུར་ཏོ། །དེ་དང་རྗེས་སུ་མཐུན་པར་དཔུང་བརྒྱན་གྱི་དབང་བསྐུར་བས། མི་འཇིགས་པ་བཞི་ལ་མངའ་བརྙེས་པར་གྱུར་ཅིག །མི་འཇིགས་ཕས་ཀྱི་བསྡོ་བ་ཐུབ་པ་དང་། ། མཛེས་པའི་བརྒྱན་མཆོག་ཤེས་པར་ཐོབ་པ་ཡི། །མངའ་མཛེས་ཕུང་པོ་རྟགས་ཀྱི་དམ་པ་སྟེ། །བརྒྱན་མཆོག་དམ་པ་སྟོན་པའི་དབང་ཐོབ་ཤོག །རིན་ཆེན་དཔུང་བརྒྱན་ཤར་བུ་བརྒྱན་གྱིས་བརྒྱན། །ཆོས་ཉིད་དོན་རྟོགས་མཐུན་པ་བསྟན་པའི་ཕྱིར། །དགོངས་པ་ཏིང་ངེ་འཛིན་ལེགས་པར་བསྐུར་བས། དཔུང་བརྒྱན་དབང་གི་བཀྲ་ཤིས་ལེའུ་བརྒྱ་གཉིས་པའོ། །གསུམ་པ་ཞབས་གདུབ་ཀྱི་དབང་། སྔོན་རི་རབ་རིའི་རྩེར་དཔལ་ཀུན་རིག་རྣམ་པར་སྣང་མཛད་ཀྱིས། འཁོར་རྣམས་ལ་ཞབས་གདུབ་ཀྱི་དབང་བསྐུར་བས། སྟོབས་བཅུ་ལ་མངའ་མཉེས་པའི་དབང་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་ཞབས་གདུབ་ཀྱི་དབང་བསྐུར་བས། སྟོབས་བཅུ་ལ་མངའ་མཉེས་པར་གྱུར་ཅིག །བརྒྱན་གྱི་བྱེ་བྲག་རྒྱལ་པོའི་ཚུལ། །རྡོ་རྗེ་ཞབས་ཀྱི་ཆས་རབ་འདི། །ཁྱོད་ཀྱི་ཞབས་ལ་དབང་བསྐུར་བས། །འགྲོ་བའི་དོན་ལ་ཆགས་པར་ཤོག །རིན་ཆེན་ཞབས་གདུབ་དམ་པ་འདི། །ལེགས་པར་མཛེས་པའི་ཡོན་ཏན་འདིས། །ཉེས་པ་ལེགས་པའི་དགོངས་པ་འགྲུབ། །ཞབས་དུབ་དབང་གི་བཀྲ་ཤིས་ལེའུ་བརྒྱ་གསུམ་པའོ། བཞི་པ་ཕྱག་གདུབ་ཀྱི་དབང་ནི། སྔོན་རི་རབ་རིའི་རྩེར་དཔལ་རྣམ་པར་སྣང་མཛད་ཀྱིས་འཁོར་རྣམས་ལ་ཕྱག་གདུབ་ཀྱི་དབང་བསྐུར་བས། ཚུལ་འཁྲིམས་རྣམ་པར་དག་པའི་དབང་དམ་པ་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་ཕྱག་གདུབ་ཀྱི་དབང་བསྐུར་བས། ཚུལ་ཁྲིམས་རྣམ་པར་དག་པའི་དབང་དམ་པ་ཐོབ་པར་གྱུར་ཅིག །སིལ་སྙན་མཛེས་པའི་བརྒྱན་ལགས་པས། །ཡིད་འོང་སྙན་པའི་ཕྱག་གདུབ་འདི། །འབྲས་བུ་ཐོབ་པའི་དབང་མཆོག་སྟེ། འགྲོ་བ་ཡིད་འོང་དབང་མཆོག་ཐོབ་པར་ཤོག །རིན་ཆེན་ཕྱག་གདུབ་དམ་པ་འདི། །ལེགས་པར་མཛེས་པའི་ཡོན་ཏན་གྱིས། ངེས་པར་ལེགས་པའི་དགོངས་པ་འགྲུབ། །ཕྱག་གདུབ་དབང་གི་བཀྲ་ཤིས་ལེའུ་སྟེ་བརྒྱ་བཞི་པའོ། །ལྔ་པ་དོ་ཤལ་གྱི་དབང་ནི། སྔོན་རི་རབ་རིའི་རྩེར་དཔལ་ཀུན་རིག་རྣམ་པར་སྣང་མཛད་ཀྱིས་འཁོར་རྣམས་ལ། །རིན་པོ་ཆེ་དོ་ཤལ་གྱི་དབང་བསྐུར་བས། ཆེ་བའི་ཡོན་ཏན་རྒྱལ་བའི་དབང་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་རིན་པོ་ཆེའི་དོ་ཤལ་གྱིས་དབང་བསྐུར་བས། ལེགས་པའི་ཡོན་ཏན་རྫོགས་ཤིང་མཐར་ཕྱིན་པས། །ཆེ་བའི་ཡོན་ཏན་རྒྱས་པའི་དབང་དམ་པ་ཐོབ་པར་ཅིག །རིན་ཆེན་འཕྲེང་པས་འགྲོ་བའི་རེ་འདོད་བསྐོངས། ཕྲེང་བ་དོ་ཤལ་འགྲོ་བའི་དོན་མཛད་པ། ཡོན་ཏན་ཚངས་པའི་བརྒྱན་མཆོག་དམ་པ་འདི། འབྲས་བུ་ཡིད་བཞིན་བཀྲ་ཤིས་ཐོབ་པར་ཤོག །རིན་ཆེན་འཕྲེང་བའི་དོ་ཤལ་དམ་པ་འདི། །སྐུ་ཡི་བརྒྱན་མཆོག་ཡོན་ཏན་སྐུ་ལ་བརྒྱན། །འཕྲེང་མ་ཆད་ཅིང་རྒྱུན་མ་ཆད་མཛད་པ། །རིན་ཆེན་འཕྲེང་དབང་བཀྲ་ཤིས་ལེའུ་སྟེ་བརྒྱ་ལྔ་པའོ། །དྲུག་པ་དར་གྱི་ཅོད་པཎ་གྱི་དབང་ནི། སྔོན་རི་རབ་རིའི་རྩེར་རྣམ་པར་སྣང་མཛད་ཀྱི་འཁོར་རྣམས་ལ་དར་གྱི་ཅོད་པཎ་གྱིས་དབང་བསྐུར་བས། །རྡུལ་གྱིས་བག་ཆགས་དང་བྲལ་བར་གྱུར་ཏོ། །དེ་དང་རྗེས་སུ་མཐུན་པར་དར་གྱི་ཅོད་པཎ་གྱི་དབང་བསྐུར་བས། སྦྱོར་བས་ཁམས་གསུམ་ན་གནས་ན་ཡང་། རྡུལ་གྱི་བག་ཆགས་དང་བྲལ་བར་གྱུར་ཏོ། །བཀྲ་ཤིས་རྟགས་ལྡན་དར་གྱི་ཅོད་པཎ་འདི། །དབང་གི་རང་བཞིན་དམར་པོ་འབར་བ་ཏེ། །དབང་བསྐུར་སྤྱི་བོར་རྟགས་པའི་ཡོན་ཏན་གྱིས། །དབང་གི་བཀྲ་ཤིས་དམ་པ་ཐོབ་པར་ཤོག །ཆོས་ཉིད་དར་དང་འདྲ་བར་མཚུངས་པ་ཡིས། །དོན་དམ་ཉིད་དུ་རྟོགས་པ་མངོན་ཕྱུང་ཞིང་། །འདི་ཉིད་ལེགས་པའི་ཆོས་ཉིད་དོན་རྟོགས་པ། །བྱིན་རླབས་དབང་གི་བཀྲ་ཤིས་ལེའུ་སྟེ་བརྒྱ་དྲུག་པའོ། །བཅུ་པ་མིང་གི་དབང་ལ་གཉིས་ལས། དང་པོ་རྒྱུའི་མིང་གི་དབང་ལ། སྔོན་རི་རབ་རིའི་རྩེར་དཔལ་རྣམ་པར་སྣང་མཛད་ཀྱིས་འཁོར་རྣམས་ལ་རྡོ་རྗེ་མིང་གི་དབང་བསྐུར་བས། རིགས་ངེས་པའི་སྲས་སུ་གྱུར་ནས་རྡོ་རྗེ་འཆང་གི་གྲལ་ཐོབ་པར་གྱུར་ཏོ། །དེ་དང་རྗེས་སུ་མཐུན་པར་རྡོ་རྗེ་མིང་གི་དབང་བསྐུར་བས། མི་འགྱུར་བའི་དབང་ཐོབ་པར་གྱུར་ཅིག །རྡོ་རྗེ་མིང་མཆོག་མཁས་པ་དཔེ་ལ་དྲངས། །ཐུགས་ལས་གསུང་དུ་བྱུང་ནས་རྟགས་པ་འདི། །དག་ཅིང་ཚུལ་དུ་ཁྱེད་ལ་བསྐུར་བ་ཡིས། །ཐམས་ཅད་སྟོན་པའི་དབང་མཆོག་ཐོབ་པར་ཤོག །སྟོན་པ་ཐུགས་རྗེས་ངེས་པའི་མིང་བཏགས་པས། །ཐུགས་ཀྱི་ངང་ནས་ངེས་པའི་སྲས་སུ་མཛད། །རྡོ་རྗེ་མཆོག་གི་གྲལ་ཐོབ་མིང་གི་དབང། །རྡོ་རྗེ་མིང་དབང་བཀྲ་ཤིས་ལེའུ་བརྒྱ་བདུན་པའོ། །གཉིས་པ་འབྲས་བུའི་མིང་གི་དབང་། སྔོན་རི་རབ་རིའི་རྩེར་རྒྱལ་བུ་དོན་ཐམས་ཅད་གྲུབ་པ་ལ་རིགས་བཞིའི་སངས་རྒྱས་ཀྱི་མངོན་པར་ཤེས་པ་ལྔས་དབང་བསྐུར་བས། འབྲས་བུ་རི་རབ་རིའི་རྩེར། རིན་པོ་ཆེའི་ཁང་བུ་འབར་བར་རྣམ་པར་སྣང་མཛད་མངོན་པར་རྫོགས་པར་སངས་རྒྱས་པར་གྱུར་ཏོ། །དེ་དང་རྗེས་སུ་མཐུན་པར་མངོན་པར་བྱང་ཆུབ་པ་ལྔས་དབང་བསྐུར་བས། འབྲས་བུ་རི་རབ་རིའི་རྩེར་མངོན་པར་སངས་རྒྱས་པར་གྱུར་ཅིག །མངོན་ཤེས་ལྔ་ལྡན་འབྲས་བུ་ས་བཅུ་འདས། ཡི་གེ་འཁོར་ལོ་ཚོགས་ཆེན་ས་ལ་གནས། འབྲས་བུ་དམ་པ་སངས་རྒྱས་ཏེ། ལོངས་སྤྱོད་རྫོགས་པའི་དབང་མཆོག་དམ་པ་ཐོབ་པར་ཤོག །དབང་མཆོག་ཐམས་ཅད་ཡོངས་སུ་རྫོགས་པ་ཡི། །འབྲས་བུ་ཐམས་ཅད་མ་ལུས་ཐོབ་པ་སྟེ། །རྡོ་རྗེ་རྒྱལ་པོའི་དབང་མཆོག་དེར་རྫོགས་པས། །འདི་ནི་ཕྱི་དབང་རྫོགས་པའི་བཀྲ་ཤིས་ལེའུ་སྟེ་བརྒྱ་རྩ་བརྒྱད་པའོ། །ཨབྷི་ཥིཉྩ་ཧཱུཾ། དབང་དོན་རྒྱས་པའི་དབྱེ་བ་ལྟར་སྦྱར་བ་ཡིན་ནོ། །སྤྱིར་ཕྱི་དབང་ལ་བརྒྱ་རྩ་བརྒྱད་ཡོད་དོ། ཀ་སྨད་ཉན་རང་གི་དབང་མ་རྟོགས་སོ། དེ་གཉིས་བཞིའི་དབང་ངོ་། །གཉིས་པ་ནུས་པའི་དབང་ལ་ལྔ་སྟེ། ཉན་དབང་དང་། བསྒྲུབ་དབང་དང་། འཆད་དབང་དང་། འཕྲིནལས་ཀྱི་དབང་དང་། རྡོ་རྗེ་རྒྱལ་པོ་བཀའ་རབ་འབྱམས་ཀྱི་དབང་ངོ་། དབང་དེ་ལྔའི་ཆོ་ག་ཡང་གོང་དང་མཐུན་ནོ། །གསུམ་པ་གསང་བ་ཟབ་མོའི་དབང་ལ་གསུམ་སྟེ། གསང་དབང་དང་། ཤེས་རབ་ཡེ་ཤེས་ཀྱི་དབང་དང་། དབྱེར་མེད་བདེ་བ་ཆེན་པོའི་དབང་ངོ་། །དབང་དེ་གསུམ་གྱི་ཆོ་གའི་དོད་ལ། ལམ་ཁྱེར་བཞི་ནི། ལྷ་ལཾ་ཁྱེར་ལྷ་ཚོགས་སུམ་ཅུ་རྩ་བདུན། །སྙིང་པོ་ལཾ་ཁྱེར་བུདྡྷ་བཻ་རོ་ཙ་ན་ༀ། །ཨ་ཀྵྱོ་བྷྱ་ཧཱུཾ། རཏྣ་སྭབྷ་ཝ་ཏྲཾ། ཨ་མོ་དེ་ཝ་ཧྲི། ཨ་མོ་གྷ་སིད་དྷི་ཨ། ཞེས་བཟླས་སོ། །ཐེག་པ་ལམ་ཁྱེར་ཡོ་གའི་ཐེག་པ། དབང་ལམ་ཁྱེར་ཡོ་གའི་དབང་མཆོག་དྲུག་ཅུ་རྩ་གཉིས་སོ། །དེ་ལ་དབང་ཆགས་པའི་རྟེན་དུ་འདེབས་གཅིག་བྱས་ན། རང་གི་སྙིང་གི་དཀྱིལ་ན་དངས་མ་ཆེན་པོ་ལྔ་གནས་པ་ནི། རང་བཞིན་གྱི་རིགས་ལྔ་དང་ཡེ་ཤེས་ལྔའི་ངོ་བོར་གདོད་མ་ནས་གནས་པ་ཡིན་ཏེ། དེ་ལ་རང་གི་སྤྱི་བོར་ཐིག་ལེ་དཀར་པོ་རིལ་མ་ཙམ་གཅིག་བསམ། དེ་གསལ་བ་དང་། ནམ་མཁའི་དཀྱིལ་ནས་ཐིལ་པ་ཤར། ཅེས་པས། ཐིག་ལེ་དཀར་པོ་དེ་ཡས་མས་བབས་པས། སྙིང་གི་དཀྱིལ་དུ་དངས་མ་ལྔའི་རིགས་ལྔར་གནས་པ་དང་གཉིས་སུ་མེད་པར་འདྲེས་པ་བསམ། དེ་ནི་དོན་དམ་མཚན་མ་མེད་པའི་ངོ་བོ་ཉིད་དོ། །རིགས་ལྔར་གནས་ཤིང་རིགས་ལྔ་རྡོ་རྗེ་དབྱིངས་ཀྱི་དཀྱིལ་འཁོར་གྱི་ལྷར་སྣང་བ་ནི། ཀུན་རྫོབ་ཡེ་ཤེས་སྣང་བ་སྟེ། །དེ་དག་གཉིས་སུ་མེད་པའི་ངང་ལས། བློ་རང་བཞིན་གྱི་གནས་པ་ནི། དབང་ཆགས་པའི་རྟེན་ཡིན་གསུང་ང ོ་། །དེ་ལ་ཡོ་གའི་གགས་སྦྱར་ན། གང་དུ་བསྐུར་བའི་གནས་ནི། ལྷ་བྱ་སྐད་སྙན་ལྗོན་ཤིང་གི་ཚལ་རྡོ་རྗེ་དབྱིངས་ཀྱི་དཀྱིལ་འཁོར་དུ། གང་གིས་བསྐུར་བའི་སྟོན་པ་ནི། སློབ་དཔོན་ཆེན་པོ་ཀུན་མ་ཏིས་བསྐུར། གང་ལ་བསྐུར་བའི་ཡུལ་ནི། རྡོ་རྗེ་ཁྱུང་གྲགས་རྩལ་ལ་སོགས་པའོ། །གང་བསྐུར་བའི་དབང་ནི། ཡོ་ག་བཀྲ་ཤིས་དྲུག་ཅུ་རྩ་བཞིའི་དབང་བསྐུར་སྟེ། རྒྱུ་མཚན་ནི་བཅོམ་ལྡན་འདས་དཔལ་རྣམ་པར་སྣང་མཛད་ཀྱིས། བཅོམ་ལྡན་འདས་ཆེ་བའི་ཡོན་ཏན་སྨོས་པའི་ཕྱིར་རོ། །དགོས་པ་ནི་གང་གིས་ཐོབ་པའི་བཀྲ་ཤིས་པར་བྱ་བའི་ཕྱིར་དགོས་པ་ཡོད་དོ། །གསུམ་པ་རྗེས་ནི། ཡོན་དང་མཎྜལ་ཕུལ་ལ། བསྔོ་བ་སྨོན་ལམ་དང་། བཀྲ་ཤིས་བརྗོད། ཚོགས་དང་དགའ་སྟོན་རྒྱ་ཆེན་བྱ། གླུ་གར་དང་། རྩེད་འཕྱོའི་ཉམས་སྐྱངས། རྗེས་ཆོག་ནི། མཆོད་པ་དང་། བསྟོད་པ་ཅི་རིགས་པ་བྱ། བསྔོ་བ་ནི། དེ་ལྟར་བདག་ཉིད་ཆེན་པོ་ཁྱེད་རྣམས་ལ། བསྙེན་ཅིང་སྒྲུབ་པ་དང་ཅི་འབྱོར་བའི། ཡོ་བྱད་རྣམས་ཀྱི་མཆོད་པ་ལ་ཅི་འབྱོར་བའི་མཆོད་པ་གྲངས་ཇི་སྙེད་པ་ཕུལ་བས། བདག་དང་མཐའ་ཡས་པའི་སེམས་ཅན་ཐམས་ཅད། སྒྲིབ་པ་རྣམ་གཉིས་བྱང་། ཚོགས་རྣམ་པ་གཉིས་རྫོགས། བླ་ན་མེད་པའི་བྱང་ཆུབ་ཆེན་པོ་ཐོབ་པར་གྱུར་ཅིག །བཟོད་གསོལ་ནི། གང་ཡང་བདག་བརྩོད་པའི་དུས་སུ་སྙིགས་མའི་སེམས་ཅན་དུ་གྱུར་ནས། གཞུང་བཞིན་དུ་ཡོ་བྱད་མ་ཚོགས་པ་དང་། མ་འབྱོར་བ་ཅི་མཆིས་པ། དེ་དག་ཐམས་ཅད་བདག་ཉིད་ཆེན་པོ་འཁོར་དང་བཅས་པ་ཁྱེད་རྣམས་ཀྱིས་བཟོད་པ་ཆེན་པོ་མཛད་དུ་གསོལ། གཞན་ཡང་བདག་ཅག་ལས་དང་པོ་པའི་སེམས་ཅན་དུ་གྱུར་བས། ཏིང་འཛིན་ལ་དབང་མ་ཐོབ་ཏེ། ཆོ་གའི་ཡན་ལག་ལ་བྱིང་བ་དང་། རྒོད་པ་དང་། འདོད་ཆགས་ལ་སོགས་པ་ཉོན་མོངས་པའི་དབང་གིས། ཏིང་ངེ་འཛིན་ཉམས་པ་དང་། སྒྲ་ཉམས་པ་དང་། ཟུར་ཉམས་པ་དང་། ཆོ་ག་ཉམས་པ་དེ་དག་ཐམས་ཅད་བདག་ཉིད་ཆེན་པོ་འཁོར་དང་བཅས་པ་ཁྱེད་རྣམས་ཀྱིས་བཟོད་པ་མཛད་དུ་གསོལ། གང་ཡང་བདག་བློ་གཏི་མུག་པས། །ལེགས་བྱས་འདི་ལ་ཉེས་བྱ་གང་། །གང་ཕྱིར་ལུས་ཅན་སྐྱབས་གྱུར་པས། །དེ་ནི་མགོན་པོས་བཟོད་པར་གསོལ། །རྩོལ་བའི་ནུས་ཕན་མ་མཆིང་ཤིང་། །མ་རྙེད་པ་དང་མ་ཚང་བ་དང་། །འདིར་ནི་བྱ་བ་གང་འགྱིས་པ། །དེ་དག་ཐམས་ཅད་བཟོད་པར་གསོལ། གཤེགས་གསོལ་ནི། ༀ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །རྟག་ཏུ་གཤེགས་པ་མ་ལགས་ཀྱང་། །སེམས་ཅན་དོན་ལ་དགོངས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །ༀ་བཛྲ་མུཿ་བཀྲ་ཤིས་བརྗོད་པ་ནི། སྟོན་མཆོག་དམ་པ་ལྷ་མི་མཆོད་འོས་པའི། །ཅེས་སོགས་ཀྱི་བཀྲ་ཤིས་བརྗོད། དཀྱིལ་འཁོར་བསྡུ་བ་སྤྱི་དང་འདྲའོ། །དེ་ནི་ཡོ་གའི་དབང་གི་ཐེམ་སྐས་རྫོགས་སོ། །མངྒལཾ། །ཤུ་བྷཾ།