ཡེ་ཤེས་ལྷའི་བསྙེན་བསྒྲུབ་དང་འཇིག་རྟེན་དྲེགས་པའི་བཞི་རིམ་ལས་སྦྱོར། སློབ་དཔོན་མཚོ་སྐྱེས་རྡོ་རྗེ།
ཡེ་ཤེས་ལྷའི་བསྙེན་བསྒྲུབ་དང་འཇིག་རྟེན་དྲེགས་པའི་བཞི་རིམ་ལས་སྦྱོར་རྣམས་བཞུགས་སོ། །དཔལ་མི་ཕམ་ཧེ་རུ་ཀ་ལ་ཕྱག་འཚལ་ལོ། །ཡེ་ཤེས་ལྷ་ཡི་བསྙེན་པ་དང་། བསྒྲུབ་སྔགས་དང་ལས་སྦྱོར་བཟློག་སྔགས་དང་། འཇིག་རྟེན་དྲེགས་པའི་བསྙེན་པ་དང་། བསྒྲུབ་པ་ཆེན་པོའི་ལས་སྦྱོར་གྱིས་སྔགས་ཀྱི་རིམ་པ་འདི་ཡིན་ནོ། །ཡེ་ཤེས་ལྷ་ཡི་བསྙེན་པ་ནི། ཕྱི་དང་ནང་དང་གསང་བ་དང་། རྡོ་རྗེ་ཡི་ནི་ལས་བཞི། ༀ་རུ་ལུ་རུ་ལུ་ཧཱུྃ་ཕཊ་བྷྱོ། རུ་ལུ་ཕྱི་ཡི་བཟླས་པ་ནི། ཐུགས་ཀའི་ཧཱུྃ་གི་འོད་ཟེར་ལས། །རུ་ལུ་རུ་ལུ་འབྲུ་བརྒྱད་སྤྲོས། །ཕྱི་སྣོད་ཀྱི་འཇིག་རྟེན་གཞལ་ཡས་ཁང་། །ནང་བཅུད་ཀྱི་འཇིག་རྟེན་འབར་བ་ལྔ་བཅུ་བརྒྱད། །ཀུན་ཀྱང་རུ་ལུའི་སྒྲ་སྒྲོགས་ཤིང་། །རུ་ལུའི་གསུང་སྒྲ་དི་རི་རི། །ཕར་འཕྲོས་པ་ནི་ཐུགས་དམ་བསྐོངས། །ཚུར་འདུས་པས་ནི་དངོས་གྲུབ་སྩོལ། །རུ་ལུའི་འདྲེན་སྟངས་རྣམས་གཉིས་ལས། །ༀ་ནི་ཡེ་ཤེས་ལྔ་ཉིད་དེ། །རུ་ལུ་གོང་མ་ཁྲོ་མོ་བརྒྱད། །རུ་ལུ་འོག་མ་ཕྲ་མེན་བརྒྱད། །ཧཱུྃ་ནི་ཁྲག་འཐུང་ཡབ་ཡུམ་བཅུ། །ཕཊ་ནི་ཡེ་ཤེས་སྒོ་མ་བཞི། །བྷྱོ་ནི་དབང་ཕྱུག་ཉི་ཤུ་བརྒྱད། །ༀ་རུ་ལུ་རུ་ལུ་ཧཱུྃ་ཕཊ་བྷྱོ། །རུ་ལུ་གིང་གི་མཆོད་པར་བཞེས། །དཀྱིལ་འཁོར་འདི་ལ་བྱིན་གྱིས་རླབས། །བསྒྲུབ་པ་པོ་ལ་དངོས་གྲུབ་སྩོལ། །སྡང་བའི་དགྲ་ལ་རྟགས་ཆེན་ཕྱུང་། །གནོད་པའི་བགེགས་ཆེན་རྡུལ་དུ་རློག །རུ་ལུའི་འདྲེན་སྟངས་ཐབས་ཅིག་ལས། །རུ་ལུ་ཐུགས་ཀྱི་དཀྱིལ་ན་འདྲེན། །ཙིཏྟ་རིན་ཆེན་གཞལ་ཡས་ཁང་། །ཡེ་ཤེས་སེམས་དཔའ་ཡབ་ཡུམ་ལ། །དོན་གྱི་ལྷ་མོ་ལྔ་རུ་བསྐོར། །ཡེ་ཤེས་སེམས་དཔའི་ཐུགས་ཀ་ནས། །ཉི་དཀྱིལ་རྡོ་རྗེ་ཧཱུྃ་ལྡན་ལས། །རུ་ལུ་རུ་ལུ་འབྲུ་བརྒྱད་བསྐོར། །ཕར་འཕྲོས་པས་ནི་ཐུགས་དམ་བསྐོངས། །ཚུར་འདུས་པས་ནི་དངོས་གྲུབ་སྩོལ། །ༀ་རུ་ལུ་རུ་ལུ་ཧཱུྃ་ཕཊ་བྷྱོ། རུ་ལུ་རུ་ལུ་འདྲེན་སྟངས་རྣམ་གཅིག་ལ། །རུ་ལུ་ལྗགས་ཀྱི་དཀྱིལ་ནས་འདྲེན། །ལྗགས་ཀྱི་པདྨ་འདབ་བརྒྱད་ལ། རྡོ་རྗེ་དེ་ནི་ཟླ་ཚེས་བསྒོམ། །རྡོ་རྗེ་ཟླ་ཚེས་ར་བར་དུ། །རུ་ལུ་རུ་ལུ་འབྲུ་བརྒྱད་བསྒོམ། །ཕར་འཕྲོས་པས་ནི་ཐུགས་དམ་བསྐངས། །ཚུར་འདུས་པས་ནི་དངོས་གྲུབ་སྩོལ། །རུ་ལུ་འདྲེན་སྟང་རྣམ་ཅིག་ལ། །རུ་ལུའི་སྒྲ་ཡི་བྱེ་བྲག་སྟོན། །དཀར་པོ་སྤྲོས་པས་བདེ་བ་ཆེ། །དམར་པོ་སྤྲོས་པས་ཡོངས་ལ་ཁྱབ། །དཀར་དམར་མཚམས་ནས་ཧེ་རུ་ཀ །ཁྲོ་ཆེན་འབར་བའི་ཐུགས་ཀ་ནས། །ཁྲོ་ཆུང་ཞལ་གསུམ་ཕྱག་དྲུག་སྤྲོས། །ཁྲོ་བོ་སྤྲུལ་པས་ས་གཞི་ཁེབས། །ཁྲོ་མོའི་སྤྲུལ་པས་ནམ་མཁའ་ཁེངས། །མ་མོ་མཁའ་འགྲོ་དབྱིངས་ན་རོལ། །ཀུན་ཀྱང་རུ་ལུ་སྒྲ་སྒྲོགས་ཤིང་། །རུ་ལུའི་གསུང་སྒྲ་དི་རི་རི། །ༀ་རུ་ལུ་རུ་ལུ་ཧཱུྃ་ཕཊ་བྷྱོ། རུ་ལུ་ཧཱུྃ་གི་མཆོད་པར་བཞེས། །དཀྱིལ་འཁོར་འདི་ལ༴ བསྒྲུབ་པ་པོ་ལ༴ བསྙེན་པ་ཐབས་ཀྱི་མན་ངག་གོ། །རུ་ལུ་ནང་གི་བཟླས་པ་ནི། ཧཱུྃ། གཉིས་མེད་ཡེ་ཤེས་བསྐྱེད་པའི་གཞལ་ཡས་སུ། །ལྔ་བཅུ་རྩ་བརྒྱད་ཁྲོ་བོའི་སྐུར་གསལ་བས། །ཀུན་ཀྱང་རུ་ལུ་ཧཱུྃ་གི་སྒྲ་སྒྲོགས་ཤིང་། །རུ་ལུའི་གསུང་སྒྲ་དི་རི་རི། །རུ་ལུ་ཧཱུྃ་གི་མཆོད་པ་བཞེས། །དཀྱིལ་འཁོར༴ བསྒྲུབ་པ༴ སྡང་བའི་དགྲ་ལ་རྟགས་ཆེན་ཕྱུང་། །གནོད་པའི་བགེགས་ཆེན་རྡུལ་དུ་རློག །ༀ་རུ་ལུ་རུ་ལུ་ཧཱུྃ་ཕཊ་བྷྱོ། རུ་ལུ་ནང་གི་བཟླས་པ་ནི། །ཉེ་བའི་བསྙེན་པའི་མན་ངག་གོ། །རུ་ལུ་གསང་བའི་བཟླས་པ་ནི། །ཡབ་ཀྱི་ཐུགས་ཀྱི་ཧཱུྃ་ཉིད་ལས། །ཡུམ་གྱི་ཐུགས་ཀྱི་ཧཱུྃ་ལ་ཐིམ། །ཡུམ་གྱི་གསང་བའི་ལམ་ནས་བྱུང་། །ཐུགས་ཀར་ཐིམ་ནས་དངོས་གྲུབ་སྩོལ། ཧཱུྃ། རུ་ལུ་ཡབ་ཡུམ་མཁའ་ནས་འདྲེས། །ཡབ་ཀྱི་གསང་བའི་རྡོ་རྗེ་དང་། །ཡུམ་གྱི་པདྨ་གཞལ་ཡས་སུ། །རུ་ལུ་རུ་ལུ་འབྲུ་བརྒྱད་བསྒོམ། །ཕར་འཕྲོས་པས་ནི་ཐུགས་དམ་བསྐོངས། །ཚུར་འདུས་པས་ནི་དངོས་གྲུབ་སྩོལ། །རུ་ལུ་གསང་བའི་བཟླས་པ་སྟེ། །བསྒྲུབ་པ་ཉིད་དང་འབྲེལ་བ་ཡི། །རུ་ལུ་རྡོ་རྗེ་བཟླས་པ་སྟེ། །དབུགས་དང་འགྲོགས་པའི་སྒོམ་པ་སྟེ། །ཧཱུྃ་གིས་ཕུལ་བས་ཕྱིར་ཕྱུང་དང་། །ༀ་གྱིས་དྲངས་ནས་ནང་དུ་རྔུབས། །ཨ་ལས་སེམས་གཏད་གནས་པ་གསུམ། །ཞག་གཅིག་ལ་ནི་དབུགས་རྒྱུ་བ། །ཉི་ཁྲི་ཆིག་སྟོང་ཟླས་པ་སྟེ། །སྔགས་ནི་ཉི་ཁྲི་ཆིག་སྟོང་འགྱུར། ཧཱུྃ། བཅོམ་ལྡན་ཁྲག་འཐུང་ཐུགས་ཀྱི་དཔལ་བེའུ་ལས། །ཡེ་ཤེས་སྐུ་མཆོག་མཚོན་གང་རིན་པོ་ཆེ། །ཟུར་བརྒྱད་དཀྱིལ་ན་འབྲུ་བརྒྱད་འཕྲོ། །བྱང་ཆུབ་སེམས་ནི་སྤྲོ་ཞིང་བསྡུ། །རུ་ལུ་རྡོ་རྗེ་ཟླས་པ་སྟེ། །བསྒྲུབ་པ་ཉིད་དང་འབྲེལ་བའོ། །གཞན་ཡང་བསྒྲུབ་ཆེན་ལས་རྣམས་ནི། །རི་རབ་རི་ཡི་རྩེ་མོ་རུ། ལྷ་སྲིན་དབང་བསྡུད་དམ་ལ་བཏགས། །རུ་ལུ་རུ་ལུ་འབྲུ་བརྒྱད་སྔགས། །རྔམ་པའི་ང་རོས་ཟླས་པ་ཡིན། །ལྷ་སྲིན་སྡེ་བརྒྱད་དབང་དུ་྄བསྡུད། །བསྒྲུབ་པ་ཆེན་པོ་ཞེས་སུ་གསུངས། །ལས་ལ་སྦྱོར་བའི་རིམ་པ་ནི། །བདག་ཉིད་ཆས་སུ་བཞུགས་པ་དང་། །ཁྲོ་ཆེན་རྔམ་པའི་ང་རྒྱལ་གྱིས། །ལས་ལ་སྦྱོར་བའི་དྲག་སྔགས་བཟླས། །ༀ་རུ་ལུ་རུ་ལུ་ཧཱུྃ་ཕཊ་བྷྱོ། སརྦ་ཤ་ཏྲུཾ་མ་ར་ཡ་ཕཊ། སྔགས་ཀྱི་ལས་ལ་སྦྱོར་བའོ། །གསེར་སྐྱེམས་བཏང་ཞིང་བདེན་པ་བརྡར། །ཕུད་གཏོར་མ་ཉེས་གཟུ་དཔང་གསོལ། །ཨེ་རཾ་ཛྭ་ལ་རཾ། འབྲུབ་ཁུང་གཟི་བྱིན་བསྐྱེད་པའོ། །ༀ་རུ་ལུ་རུ་ལུ་ཧཱུྃ་ཕཊ་བྷྱོ། ཆེ་གེ་མོ་ཨ་ཀཪྵ་ཡ་ཧཱུྃ་ཛ་ཛཿ དམིགས་བྱ་འགུགས་པའི་གསང་སྔགས་ཏེ། །ཎི་དང་ཎི་ཡིས་འབོད་པའོ། །དུད་ཆེན་བཏང་ལ་སྔགས་འདི་བཟླས། ། ཆེ་གེ་མོ་དེ་བ་བི་དེ་ཤ་ཡ། དེ་བ་པྲ་བེ་ཤ་ཡ་ཕཊ། ལྷ་དབྲལ་བའི་སྔགས་སོ། །ཆེ་གེ་མོ་ཨ་བེ་ཤ་ཡ་ཨ། དམིགས་བྱ་སྟིམ་པའི་དྲག་སྔགས་སོ། །ཕུར་བུས་གདབ་ཅིང་ཐུན་གྱིས་བྲབ། །མཚོན་གྱིས་གཏུབ་ཅིང་ཞལ་དུ་རྔུབ། །ཉེ་བའི་བསྙེན་པ་བསྒྲུབ་པ་དང་། །བསྒྲུབ་པ་ཆེན་པོ་ལས་སྦྱོར་རྣམས། །རིམ་པ་བཞིན་དུ་ཤེས་པར་བྱ། །ཡེ་ཤེས་ལྷ་ཡི་བསྙེན་སྒྲུབ་རྣམ་པར་ཕྱེ་བའི་མན་ངག་རྫོགས་སོ། ༈ །དཔལ་ཧེ་རུ་ཀ་ལ་ཕྱག་འཚལ་ལོ། །སྤྱིར་བཟླས་པ་ལ་གཉིས་ཏེ། ངག་གི་བཟླས་པ་དང་། རྡོ་རྗེའི་བཟླས་པའོ། །དང་པོ་ལ་གཉིས་ཏེ། འཇིག་རྟེན་ལས་འདས་པའི་བཟླས་པ་དང་། འཇིག་རྟེན་པའི་བཟླས་པའོ། །རྡོ་རྗེ་བཟླས་པ་ལའང་གཉིས་ཏེ། རྡོ་རྗེའི་བཟླས་པ་དང་། དེ་ཁོ་ན་ཉིད་ཀྱི་བཟླས་པའོ། །འཇིག་རྟེན་ལས་འདས་པའི་བཟླས་པ་ལ་གསུམ་སྟེ། བསྙེན་པ་དང་། བསྒྲུབ་པ་དང་། ལས་ལ་སྦྱར་བའོ། །དང་པོ་བསྐྱེད་པའི་རིམ་པ་རྫོགས་ནས། བསྐྱེད་པ་ནི་དགྲ་བོའི་རྣམ་པར་ཤེས་པ། བདག་གཏོར་གོ་བསྒོ་བའོ། །ཉོན་མོངས་པའི་ཡིད་དང་བཅས་པའོ། །ཕུང་པོ་ལྷག་མ་མཁའ་འགྲོའི་ཚོགས་ལ་བཏབ་སྟེ། དེ་ལྟ་དེ་ནི་སྦྱོར་བ་དང་ལྡན་པས་ཉིན་ལན་གསུམ་མཚན་ལན་གསུམ་དུ་ཚོགས་ཀྱི་མཆོད་པ་དང་། སྟབ་པ་བྱ་ཞིང་བཟླས་པ་བྱ་བ་ནི་ལས་ལ་སྦྱར་བའོ། །འཇིག་རྟེན་པའི་ལས་ལ་གསུམ་སྟེ། བསྙེན་པ་དང་། བསྒྲུབ་པ་དང་། ལས་སྦྱོར་རོ། །དེ་ལ་དང་པོ་རྟགས་དང་། རྟེན་བཤམ་པ་ནི། ས་སྣ་བདུན་གྱི་འདག་པ་ལ་མཁར་བྱས་ཏེ། ཚུར་ཁྲུ་གང་། ལོགས་བཞི་ལ་གློ་དཀར་བཞི་ཐོད་པས་མཚན་པའོ། །རུ་མཚོན་ཆེན་པོ་བཞི་དང་དུར་བྱ་ནག་པོ་བརྒྱད་དང་། སྟེང་བྱ་ཁྱུང་གི་ཕྱག་རྒྱ་གཉིས་དང་། དེའི་ནང་དུ་གྲུ་གསུམ་མཐིང་ནག་གི་ནང་དུ། དམིགས་པའི་ལིངྒ་བཅུག །ཁྲོ་བོའི་སྟེང་དུ་མདའ་སྒྲོ་སྤུད། རྔ་མ་གཅིག་ལ་དུག་མེ་ནག་པོ་བཅུག་པ་གཅིག་ལ་མགུལ་དུ་དར་མཐིང་ལེའུ་གཅིག་གདགས། དེ་ལ་དང་པོ་རིལ་བུ་ཕུར་མ་གཅིག་རྟེན་པའི་རྫས། བར་པ་ཁྲོལ་བུ་བྲབ་པའི་རྫས། ཐ་མ་ཕྱེ་མ་མཆོད་པའི་རྫས། ཕུར་པ་ལིངྒའི་སྙིང་ཁར་གཙུགས་ལ་བཞག་གོ། །བྱ་རྒོད་ཀྱི་ཕོད་བཞི་ལ། དར་ལྕེ་བཞི་དང་བཅས་ཏེ་མདའ་ཡི་སྟེང་དུ་བཙུག་ལ་བཞག་གོ། །ཁྲོ་བོའི་རྫས་ཀྱི་ཟ་མ་ཏོག་སྨན་སྣ་ཚོགས་ཀྱིས་བཀང་བ་དང་། ཤ་སྣ་ཚོགས་དང་། ཁྲག་སྣ་ཚོགས་དང་། བསེ་བྱང་དམར་པོ་དང་། རི་རབ་སྤྱི་བསྐོར་ཐོད་བྲམ་དང་བཞག་གོ། །ཁྲོ་མོའི་རྫས་སུ་ས་ཚལ་གཅིག་གི་ནང་དུ། རྐང་སྣ་ཚོགས་དང་། འབྲུ་སྣ་ཚོགས་དང་། མར་དང་། ཁྲག་སྣ་ཚོགས་དང་། དེ་རྣམས་ཀྱི་བཀང་ལ་བཞག་གོ། །ཤར་ཕྱོགས་སུ་ཁྲོ་བོའི་མཁར་བྱས་ལ། དམིགས་བྱའི་ལིང་གའི་སྟེང་དུ་མཆོག་ཕུར་གཅིག་ལ་མཁར་ནག་གམ་རྒྱུ་ཞགས་ཀྱི་བཏགས་ཏེ་སྙིང་ཁར་བཅུག་ལ་སྦས་ལ་བཞག་གོ། །རྒྱུ་ཞགས་ཀྱི་རི་རབ་སྤྱི་བསྐོར་གྱི་དམིགས་ལ་གདག །ཀི་ལ་ཡ་ཉི་ཤུ་རྩ་གཅིག་སྒྲོལ་གྱིང་དུ་བྱིན་གྱིས་བརླབས་ལ་སྦས་ལ་བཞག །ལྷོ་ཕྱོགས་སུ་གནོད་སྦྱིན་གྱི་མཁར་དུ། ལིངྒི་སྟེང་དུ་མདུང་དམར་པོ་བ་དན་དང་བཅས་ཏེ་བཞག །གཡས་སུ་ར་ཟོར་དང་གཡོན་དུ་མདའ་ཟོར་བཞག །ནུབ་ཕྱོགས་སྲིན་པོའི་མ ཁར་དུ། ལིང་གའི་སྟེང་དུ་སྦྲུལ་མགོ་གདེངས་ཀ་གསུམ་པ་བཞག །གཡས་སུ་ཤ་སྣ་དེབ་རྩེ་གང་བཞག །གཡོན་དུ་ཀླུ་སྨན་སྣ་ཚོགས་དེབ་རྩེ་གང་བཞག །བ་དམར་མོའི་འོ་མའང་བཞག །བྱང་ཕྱོགས་སུ་མ་མོའི་མཁར་དུ་ལིང་གའི་སྟེང་དུ་དར་མཐིང་གི་གུར་དབུབ། མཐུན་རྫས་སྣ་ཚོགས་བྷནྡྷ་གང་བཞག །དགྲ་བོ་ལྷ་དང་དབྲལ་བའི་ཕྱིར། རྒྱ་ཚིལ་ལ་སོགས་པའང་བཤམ། དེ་ནས་ཁྲོ་བོ་ཞལ་བཅས་ལ་མཁར་གྱི་ནང་དུ་མདའ་ལ་སྐྱོན་སྟེ། རྣལ་འབྱོར་པ་བདག་ཉིད་ལ་ཁ་བསྟན་ལ་བཞག །དེ་ནས་བསྙེན་བསྒྲུབ་ཚུལ་བཞིན་བྱ། དེ་ནས་ལས་ལ་སྦྱོར་བའི་དུས་སུ། བསད་པའི་དཀྱིལ་འཁོར་བྱ་སྟེ། དང་པོ་གསེར་སྐྱེམས་བཏང་། བདེན་པ་བརྡར། མ་ཉེས་པའི་དཔང་གཟུག །དེ་ནས་དྲག་པོའི་དྲག་སྔགས་བཟླས་པའི་དུས་སུ་བདག་དཔལ་ཆེན་པོའི་ཐུགས་ཀ་ནས་ལས་ཀྱི་མགོན་པོ་གསལ་ཤིང་ཅན་ཞལ་གཅིག་ཕྱག་གཉིས་པ་གཅེར་བུ་རལ་པ་གྱེན་དུ་བརྫེས་པ། སྐུ་མདོག་སྔོ་ནག་ཕྱག་གཡས་ན་གསལ་ཤིང་ནག་པོ་གཡོན་ན་ཟངས་གྲི་ནག་པོ་བསྣམས་པ། ཅིག་རྩར་གྱི་སྟོན་ལ་བཞི་པོའི་མགོན་པོ་དང་། གཉིས་སུ་མེད་པར་བྱས་ཏེ། བདག་དཔལ་ཆེན་པོ་ལ་ཅི་བགྱི་ཞེས་བཀའ་ཉན་པར་བསམ་མོ། །རྣལ་འབྱོར་ཉིད་ཀྱི་བརྡ་བསྟན་པས། འཕར་སྤྱང་ནག་པོ་དང་། ལྕེ་སྤྱང་དམར་པོར་སྤྲུལ་ཏེ། ལྷ་སྦྱིན་གྱི་སྣ་ན་ཡར་བཞུགས་ནང་ཁྲོལ་ཞལ་དུ་རྔུབས་ཏེ། དོན་སྙིང་སྨད་ལྔ་སྤར་གྱིས་བཏབ་ནས་སླར་ཕྱུང་སྟེ། དཔལ་ཆེན་པོ་ལ་བསྟབ་པར་བསམ། དེ་ལྟར་དེའི་སྦྱོར་བ་དང་ལྡན་པས། ཉིན་མཚན་དུས་དྲུག་ཏུ་བསྟབ་པའི་ལས་བྱ་ཞིང་དྲག་པོའི་སྔགས་གདོན་པར་བྱའོ། །དེ་ནས་མཚན་མ་རྟགས་ལ་ཕེབས་པ་དང་། །རྣལ་འབྱོར་བདག་གི་ཐོ་མཚམས་སུ་ཕྱིན་ལ་རྒྱ་ཚིལ་གྱི་དུད་པ་བཏང་། ལྷ་དང་དབྲལ་བའི་ཆོ་ག་བྱ། སླར་བཟློག་སྟེ་ཕུར་པས་གདབ་པ་དང་། ཐུན་རྡེག་པ་དང་། མཚོན་གྱིས་བཏུབ་པ་དང་། བསྒྲལ་བའི་ལས་བྱ། དེ་ནས་གདབ་པའི་ལས་བྱ། སྦྱིན་སྲེག་བྱ། དེ་ནས་མནན་པའི་ལས་བྱ་སྟེ། སྦྱིན་བསྲེག་བྱས་པའི་ཐལ་བ་ལ་ལིངྒ་བྱ་སྟེ་མིང་བྱང་སྙིང་ཁར་བཅུག་ལ་ཙཀྲ་ཁ་སྦྱོར་གྱི་ནང་དུ་བཅུག་ལ། མཁར་ནག་གི་རྒྱུ་ཞགས་ཀྱིས་བསྡམ་ལ། མནན་པའི་སར་ཁྱེར་ལ་ཕུར་པ་ཞི་ས་བདག་གི་འབྲོས་སུ་བཅད་ལ། དེ་ནས་གསེར་སྐྱེམས་བཏང་ལ། ཡུལ་གྱི་ལྷ་འདྲེ་ལ་མ་ཉེས་པའི་དཔང་གཟུགས། ས་བདག་ལ་ཀླུ་སྨན་སྣ་ཚོགས་ཀྱི་མཆོད་པ་སྦྱིན། དེ་ནས་མནན་པའི་ས་བྲུས་ཏེ་གྲ྄ུ་གསུམ་ཁྲུ་དོ་ས་བྲུའོ། །དེ་ནང་རྒྱ་མཚོའི་གཏིང་ན་གནས་པའི་ཀླུ་བདུད་མ་ཆེན་པོ་ཁ་ཕྱེ་ཞིག །རྒྱས་པའི་དགྲ་བོ་འདི་གཏད་ཀྱིས་བྱས་ལ། ཁ་སྦྱར་ལ་གཞུག་གོ། །དེའི་སྟེང་དུ་མགོན་པོ་མིའུ་ཐུང་གི་གཟུགས་སྐྱོན། དེ་སྟེང་དུ་ཁྲོ་བོའི་ཁར་བྱ་ཁྱུང་དང་ཕྱག་རྒྱ་བཅས་པ་བཞག་དེ་སྟེང་དུ་གཡམ་པ་ནག་པོ་ལ་རྡོ་རྗེ་རྒྱ་གྲམ་གྱིས་རྒྱས་བཏབ་ལ་ཁ་བཅད་དོ། །དཔའ་བོའི་བྲོ་བརྡུང་སྟེ་དེ་ནས་གོམ་པ་ཉེར་གཅིག་ཕྱིར་བསྐྱེད་ལ་ཟོར་བརྡེག །ལོག་ན་སྤོགས་པའི་ལས་བྱའོ། །གཡས་སུ་ལོག་ན་རྐང་པ་གཡས་ལ་ལན་གསུམ་བསྐོར་ལ་འཕང་། དེ་ནས་དེ་ལ་རྡེག །གཡོན་དུ་ལོག་ན་ཡང་རྐང་པ་གཡོན་པ་ལ་ལན་གསུམ་བསྐོར་ལ་འཕང་། དེ་ནས་དེ་ལ་རྡེག །ཐད་དཀར་ལོག་ན་འདུག་སར་ཐོ་གཅིག་བཙུགས་ལ་ཕར་ཚུར་རྡེག །དེ་ནས་ལོག་སྟེ་གནས་སུ་ཕྱིན་ལ། དྲག་པོའི་སྔགས་མགོ་འཇུག་ལྡོག་ལ་སྟོང་ཚོ་གཅིག་འདོན། དེ་ནས་ཟོར་གྱི་ལས་བྱ། དེ་ནས་གཏང་རག་གི་གཏོར་མས་ཡེ་ཤེས་ཀྱི་ལྷ་གཤེགས་སུ་གསོལ། དམ་ཚིག་གི་ལྷ་ལུས་ལ་བསྡུ། མཚམས་མི་དམིགས་པ་རང་བཞིན་གྱིས་གྲོལ། དེ་ལྟར་བྱས་ནས་ལས་ལ་སྦྱར་བའོ། །དེ་ལྟར་བྱས་ནས་ཀྱང་ལོ་རུ་ཐོགས་ནས་ཕྱི་རྟགས་མེད་ན་མནན་པའི་ལྟ། ཕར་ནས་འདུག་ན་སླར་ལ་མནན་པའི་ལས་བྱ། མ་འཕར་ན་ལྷ་གནད་ལ་དབབ་པའི་ལས་བྱས་ཏེ། མགོན་པོའི་གཟུགས་ཐོ་གང་པ་བྱས་ཏེ། རུ་ལུའི་སྔགས་སྤྱི་བོར་བྲིས། བསྙེན་པ་ཉེ་བའི་བསྙེན་པ། རྐང་པ་གཡས་ནས་ལག་པ་གཡས་པའི་བར་དུ་གཞོག་གཡས་པ་ལ་བྲི། བསྒྲུབ་པ་དང་བསྒྲུབ་པ་ཆེན་པོའི་སྔགས་རྐང་པ་གཡོན་པ་ནས་ལག་པ་གཡོན་པའི་བར་གཞོགས་གཡོན་པ་ལ་བྲི། གཞི་སྙིང་ཅིག་ཏུ་དྲིལ་ལ་འདོམས་སུ་བྲི། ཡིག་མགོ་ནང་དུ་བསྟན་ནོ། །དེ་ནས་བདག་དཔལ་ཆེན་པོའི་འོག་ཏུ་གཟིར་མནན་བྱ། ཐ་མ་འབྱུང་པོ་ཉིན་ཞགས་གཅིག་ལ་ཟངས་གྲི་ནག་པོས་བཏུབས་ལ། དྲག་པོས་མེ་སྦར་ལ་སྦྱིན་བསྲེག་བྱ། དེ་ནས་ཐལ་བ་མགོན་པོའི་གཟུགས་བྱ། དེ་ལ་སྐྱེད་དྲངས་སྟིམ། བསྙེན་བསྒྲུབ་ཀྱི་སྔགས་ལ་ཨ་མྲྀ་ཏ་བཏགས་ཏེ་བདུད་རྩི་གཏོར་མ་གསོ་བའོ། །སྐྲག་དང་གཟི་མདངས་དང་ལྡན་པར་བསམ་མོ། །དེ་ནས་ལས་སྦྱོར་ཡང་ཡང་བྱའོ། །དེ་ལྟར་བྱས་ན་སངས་རྒྱས་ཉིད་ཀྱང་འཇིག་གོ། །སྣོད་ངན་རྣམ་ལ་མ་སྤེལ་ཅིག །ཨཐྎ། བསད་པ་དུར་ཁྲོད་ནག་པོ་བདུད་དུ་བསྒྲུབ་སྟེ། དགྲ་བོ་ཉམས་པ་བསད་པའི་མན་ངག་ཁོ་ནའོ། །བསྙེན་པས་དབང་དུ་འདུ། དབང་དུ་འདུས་ན་ལས་ལ་སྦྱར། ལས་ལ་འགྲོ་བའི་རྟགས་བྱུང་བ་དང་། བསད་པའི་ལས་བྱ། ཐ་མ་མནན་བསྲེགས་འཕངས་པའི་ལས་གསུམ་བྱ། འགྱངས་ན་འཁོར་ལོ་སྤོགས་པའི་ལས་བྱ་སྟེ་འགྲུབ་བོ།། ༈ །མགོན་པོ་ལེགས་ལྡན་གྱི་ཕྲིན་ལས་དང་བསྐུལ་པ་བཞུགས་སོ།། ༈ །བཅོམ་ལྡན་འདས་སྒྲོལ་བྱེད་ཐུགས་རྗེའི་རྒྱལ་པོ་ཤིན་ཏུ་རྣམ་པར་གྲོལ་བ་འཇིགས་བྱེད་ཧེ་རུ་ཀ་ཕྱག་འཚལ་ལོ། །རྡོ་རྗེ་འཆང་ལ་ཕྱག་འཚལ་ནས། ཉིད་ཀྱི་བཀའ་བཞིན་ལས་བྱེད་པའི། ལྷ་ཆེན་མགོན་པོ་ནག་པོ་ནི། མཉེས་པར་བྱེད་ཕྱིར་གཏོར་མ་ཡི་ཆོ་གའི་ལག་ལེན་རྒྱུད་ལྟར་བྲི། དེ་ལ་ཐོག་མར་རང་གིས་ཡི་དམ་གྱི་ལྷའི་མངོན་པར་རྟོགས་པ་རྒྱས་བསྡུས་གང་རུང་གི། །སྔོན་འགྲོ་དངོས་གཞི། འཛབ་བསྙེན་ཡན་ཆོད་སྔོན་དུ་བཏང་བའི་རྗེས་སུ་མགོན་པོའི་གཏོར་མ་ནང་ལྟར་དུ་བྱིན་གྱིས་རླབས་ཏེ། དམ་ཚིག་པ་རྣམས་བསྐྱེད་པ་ནི། བྃ་རི་མ་ལ་ཡ་ལྃ་ཁྲག་གི་རྒྱ་མཚོ། བྷྲཱུཾ་སྥ་ཐོད་པ་མཁར་ར་ཎ་ཕཊ། སྃ་ཧ་ར་ཎ་ཧཱུྃ། བྷྲཱུཾ་ཀ་པ་ལ་བྷི་ཤ་མཎྜ་ལ་བྷཱུཾ་ནྲི་དགྲ་བགེགས་བསྣོལ་བའི་གདན་ཏི་སྟི་ར་བྃ། ༀ་པདྨ་མ་དྷ་ལ། མ་ཧཱ་སུརྻ་མཎྜལ། དམ ལས་རབ་མི་སྥ་ར་ན་ཕཊ། སྃ་ཧ་ར་ན་ཧཱུྃ། ༀ་བུར་ཀུ་མ་ཧཱ་ཀཱ་ལ་ཀྲོ་ཏ་ཧཱུྃ། ཡཀྴ་ཀྲོ་ཏི་ཤོ་རི་ཏྲག་པོ་ཧེ། ཧཱུྃ་ཡ་ཛ་ལ་ཧཾ་ཕཊ་བྷྱོ། ཀྲོ་ཏ་ཛྭ་ལ་ས་མ་ཡ། ཡཀྴ་ཛྭ་ལ་ས་མ་ཡ། ཙིཏྟ་ཛྭ་ལ་ས་མ་ཡ། ཧ་ཧ་ཧ་ཧ་ཧ་ཧ་ཧ་ཧ། ཉེ་གནས་མ་བརྒྱད། ཧེ་ཧེ་ཧེ་ཧེ་ཧེ་ཧེ་ཧེ་ཧེ། ཕྲ་མེན་བརྒྱད། ཕཊ་ཕཊ་ཕཊ་ཕཊ། སྒོ་མ་བཞི། མ་མ་མ་མ། གྲུ་འདེགས་མ་བཞི། བྷྱོ་བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ་བྷྱོ། དབང་མོ་ཉེར་བརྒྱད། ༀ་ཨཱཿཧཱུྃ། བྱིན་གྱིས་རླབས་པ། ༀ་བཛྲ་ས་མ་ཡ་ཧཱུྃ་ཛ། ཧཱུྃ། ལངྒ་ཡུལ་གྱི་གྲོང་བརྡལ་གྱི། །དབུས་ཀྱི་རི་བོ་མ་ལ་ཡ། །ཀོ་ཀ་ཐང་དམར་རྒྱ་མཚོའི་དོ། །བྱན་སླག་འཆོངས་རི་གནམ་ལྕགས་འབར། །དྲག་ཤུལ་ཅན་གྱི་རྩེ་མོ་ན། རྡོ་རྗེ་ཐབས་ཀྱི་བལྟ་བའི་ཡུལ། །ཆོས་མཛད་རིགས་ཀྱི་བསྒྲུབ་གནས་དེ། །དཔལ་ཆེན་རྡོ་རྗེ་སྲིན་པོ་ཡིས། །བདུད་ཀྱི་རིགས་རྣམས་བཏུལ་ནས་ཀྱང་། །གསང་སྔགས་འཁོར་ལོ་བསྐོར་བའི་ཚེ། །མིང་གི་དབང་བསྐུར་བྲན་དུ་ཁས་བླངས་པས། །རྡོ་རྗེ་རོ་ལངས་ཚོགས་ཀྱི་བདག །མགོན་པོ་ནག་པོ་ཆེན་པོ་དང་། །ཉེ་གནས་ཀྲོ་ཏི་ཤྭ་རི་མ། །ཡབ་ཡུམ་གཉིས་སུ་མེད་པའི་འཁོར། །ལང་ཀའི་བདག་པོ་ལ་སོགས་པའི། །འདུས་པའི་རྣལ་འབྱོར་ཕོ་མོའི་ཚོགས། །སངས་རྒྱས་བསྟན་པ་བསྲུང་བའི་ཕྱིར། །གནས་འདིར་སྤྱན་འདྲེན་གཤེགས་སུ་གསོལ། །ༀ་བྷུར་ཀུཾ་མ་ཧཱ་ཀཱ་ལ་རཀྴ་ཀྲོ་ཏི་ཤྭ་རི་ནག་མོ་ཏིང་ལཾ་ཨེ་ཨ་ར་ལི་ཧྲིཾ་ཧྲིཾ་ཛ་ཛཿ ༀ་རཀྴ་ཤྲི་ཧེ་རུ་ཀ་བྷི་ཤ་བཛྲ་ཀྲོ་དྷ་ཛྭ་ལ་མཎྜ་ལ་ཕཊ་ཕཊ་ཕཊ༔ ཧ་ལ་ཧ་ལ་ཧཱུྃ་མགྲིན་པ་དཔྲལ་བ་ཕཊ། ཏ་ཀེཾ་ཏ་ཀེཾ་ཕཊ། ཀྲོ་ཏ་ཀྲོ་ཏ་རྃ། ཧ་ལ་ཧ་ལ་ཡྃ། ཏིཥྞ་ཏིཥྞ་སྣ་ཁྃ། བཛྲ་ཡཀྴ་ཀྲོ་ཏ་བཞི་ཧ་ཧ་ཁཱ་ཧི་ཁཱ་ཧི་ཧཱུྃ་ཧཱུྃ། ས་མ་ཡཿ མ་ཧཱ་སུ་ཀ་ཧཱུྃ། པྲ་བེ་གནམ་དུ་བསྟན་པ་ཤ་ཡ། བཛྲ་ཨ་བདུད་རྩི་དབང་བསྐུར་བ་མྲྀ་ཏ་མ་ཧཱ་ཀྲོ་ཏ་ཨཾ་ཨཾ། ༀ་བྷྱོ་ཨ་རི་བྷྱོ་ཛ་ཛཿ ཧཱུྃ། ཨེའོ། །ཞལ་དུ་གསོལ་བ། དཔའ་བོ། ལྟོ་བར་བདེ་བར་བསྟན་པ། ཐུགས་རྗེ་ཆུང་། ཤིན་ཏུ་བདེ་བ། ལྟོ་ཁྱིམ་ནས། སྣམས་སུ་སྟོན་པ་ཐུགས་རྗེ་ཆུང་། །ད་ཡང་ཅི་མཛད་མྱུར་དུ་མཛོད། །མྱུར་དུ་བསྒྲལ་ན་ཡུན་དུ་བདེ། །འབངས་སུ་མཆིའོ་བདག་ལུས་འབུལ། །འབངས་ལ་ནན་ཏན་མ་ཆུང་ཅིག །སླན་ཆད་དམ་བཅས་བཞིན་བཀའ་བཞིན་རྗེས་སུ་བགྱིད། །གལ་ཏེ་བཀའ་བཞིན་མ་བགྱིས་ན། །དམ་པའི་ལུང་དང་འགལ་གྱུར་ན། །བདག་ཅག་རྣམས་ཀྱི་མགོ་ལུས་སྙིང་། །རུལ་མྱགས་ཚིག་ནས་སྐམ་གྱུར་ཅིག །ཨི་མནའ་བོར་བ་དན་དེ་ན་ར་ཀན། །མ་ར་ཏྲི་ཐ་ཡ། ན་མ་བྷ་ཏི་ཏིཥྛ་ནན། །ས་མ་ཡ་རཀ་ཤ་སི། །སི་ཏི་བི་ན་བཛྲ་ཨ་མྲྀ་ཏ་ཀྲོ་ཏ་ན་ར་ཀན། །མ་སྲིང་བུ་མོ་ཆུང་མ་རྣམས། །འབངས་སུ་འབུལ་ལོ་རྩིས་མ་ཆུང། །པདྨ་པྲ་བེ་ཤ །ཁ་ལས་དགྱེས་པ་ཐམ་ཁ་ཐམ་སྦྱར་བར་མཛད་པ། །པྲ་བེ་ཤ་ཕཊཿ ཧཱུྃ། དབུས་སུ་མཆིས་སྐལ་མི་ལྡན་གྱིས། །འབར་བའི་དལ་མཐའ་ལ་ཞོག །ཕུད་ལ་འཚལ་སྐལ་མི་ལྡན་གྱིས། །ལྷག་མ་ཞལ་ཆབ་བྲན་ལ་གསོལ། །ཉེ་གནས་དུང་གི་མ་སྲིང་རྣམས། །དེང་ནས་རྒྱལ་བའི་བཀའ་ཡིན་གྱིས། །ཁྱེད་ཀུན་ང་ཡི་ལས་མཁན་ཏེ། །བཀ་ཡི་ལས་རྣམས་ཕྱུང་མྱུར་དུ་བསྒྲུབས། །བདག་དང་སྔོན་ལོག་པར་སྤྱད་པའི་མཐུས། །དཔག་ཏུ་མེད་པའི་འཁོར་བའི་སྡུག་བསྔལ་བརྒྱུད། །ད་ནི་ལས་འཕྲོས་ཐུགས་རྗེ་ཉིད་དང་འཕྲད་པས། བདེ་བ་ཅན་གྱི་ཞིང་དུ་མྱུར་འགྲོ་ཡིས། །འཁོར་ལ་ནུས་དྲས་གདམས་པའི་ཚུལ་གྱིས་རང་ཉམས་བཤད་པའོ། །རྗེས་སུ་བསྟན་པའི་བཀའ་ལས་ཉམས་པ་སྟེ། །ཇི་ལྟར་མ་བྱམས་བུ་ལ་གདུང་བ་བཞིན། །དམ་ཚིག་ཅན་ལ་དུང་དུང་གདུང་བར་བགྱི། །གང་ཞིག་སྲིང་བྱམས་མིང་ལ་གདུང་བ་བཞིན། །ཡལ་འདབ་ཅན་ལ་ལྷང་ལྷང་བརྩེ་བར་བགྱི། །མཛའ་མོ་གྲོགས་ལ་ཇི་ལྟར་གདུང་ཚུལ་དུ། །རྣལ་འབྱོར་ཅན་ལ་བཀྲིལ་བཀྲིལ་ཉེ་བར་བགྱི། །ཇི་ལྟར་གཡོག་བྱམས་དཔོན་ལ་བརྩེ་བ་ལྟར། །དམ་པ་རྣམས་ནི་ཡིད་བཞིན་ནོར་ལྟར་ཁུར། །བརྩེ་བར་བྱེད་ན་མ་རུ་བྱ། །གདུང་བར་བྱེད་ན་སྲིང་དུ་བྱ། །བརྩོན་པར་བྱེད་ན་བྲན་དུ་བྱ། །རིགས་རྒྱུད་འཛིན་ན་བུ་རུ་བྱ༔ འདུ་འབྲལ་མེད་ན་སློབ་མར་བྱ༔ བསྐུལ་བར་དཔལ་གྱི་ཞལ་བཞེས་པའོ་མགྱོགས་ན་ཕོ་ཉར་བྱ༔ བཀའ་བཞིན་བྱེད་ན་བཀའ་ལ་གདགས༔ ཧཱུྃ༔ སྔོོན་ཚེ་དཔལ་ཆེན་ཕྱི་ནང་གསང་བའི་མཚན་ནས་འབོད་ཁྲོ་བོའི་རྒྱལ༔ བདུད་འདུལ་རྡོ་རྗེ་སྲིན་པོ་ཡིས༔ དྲེགས་པ་བཅོམ་ནས་སྒྲིབ་པ་སྦྱངས༔ དབང་བསྐུར་མིང་རྟགས་སྲོག་སྙིང་ཕུལ༔ ཕོ་བྲང་ཀུན་ལ་དམ་ཚིག་བྱིན༔ ཕྱི་ཡིས་མཚན་ནས་བོས་པའི་ཚེ༔ མགོན་པོ་ལེགས་ལྡན་ནག་པོ་བཞེངས༔ ནང་གི་མཚན་ནས་བོས་པའི་ཚེ༔ བདུད་འདུལ་དུར་ཁྲོད་སྒྲོལ་བའི་གྱིང༔ གསང་བའི་མཚན་ནས་བོས་པའི་ཚེ༔ རྡོ་རྗེ་སྒྲོལ་བྱེད་དྲག་པོ་རྩལ༔ མནའ་བོར་ཁས་བླངས་མ་བསྙེལ་བར༔ སྐུ་གསུང་ཐུགས་སུ་བདག་སྦྱོར་བས༔ ཕོ་བྲང་དཀྱིལ་འཁོར་མངའ་བདག་འདིར༔ རྟག་ཏུ་དམ་ཚིག་ཚུལ་བཞིན་གྱིས༔ ༀ་ཨཱཿཧཱུྃ། བཛྲ་ས་མ་ཡ་ཧཱུྃ། ཧཱུྃ༔ དང་པོ་བསྟན་པ་བསྲུང་བར་དམ་བཅས་པའི༔ བདུད་འདུལ་དབང་ཕྱུག་མ་ཧཱ་ཀ་ལའི་ཚོགས༔ སྲིན་ཡུལ་ལང་ཀ་པུ་རངས་ཀྱིས༔ གྲོང་ཁྱེར་བསྟན་ནས་བརླག་མཛད་ཅིང་༔ ལྷ་མ་ཡིན་གྱི་བུ་མོ་ནི༔ གློག་སྤྲིན་འདུལ་བར་ཞལ་བཞེས་པའི༔ ༀ་རཀྴ་ཤྲཱི་ཧེ་རུ་ཀ་ཅེས་པ་ནས། བཀའ་བཞིན་བྱེད་དམ་དམ་ལ་གདགས་ཅེས་པའི་བར་ནི་འབྲུབ་ཁུང་ལས་ཀྱི་དཀྱིལ་འཁོར་སྐབས་སུ་མི་དགོས་ཏེ། སྔོན་བྱུང་རྗེས་འཇུག་འདི་ལ་མི་འཇུག་ཅེས་པའི་དོན་ནོ། །ཧཱུྃ་སྔོན་ཚེ་དཔལ་ཆེན་ཁྲོ་རྒྱལ་ཅེས་པ་ནས། །ༀཨཱཿཧཱུྃ་བཛྲ་ས་མ་ཡ་ཧཱུྃ་གི་བར། །བཀའ་སྡོད་ཕོ་ཉའི་དཀྱིལ་འཁོར་གྱི་སྐབས་འདིར་མི་དགོས། འབྲུབ་ཁུང་ལས་ཀྱི་དཀྱིལ་འཁོར་གྱི་སྐབས་སུ་བྱ་སྟེ། །ཕྱི་ནང་གསང་བའི་མཚན་ནས་འབོད་ཅེས་པའི་དོན་ནོ། །ལྷ་ཆེན་མགོན་པོ་ནག་པོ་ཁྱོད༔ དུར་ཁྲོད་གནས་འདིར་བཞུགས་ནས་ཀྱང༔ བདག་གི་བཅོལ་པའི་ཕྲིན་ལས་མཛོད༔ ས་མ་ཡ་སྟྭཾ༔ ལྕང་ལོ་ཅན་གྱི་བྷནྡྷ་རུ༔ བྱང་ཆུབ་སེམས་དང་མཾ་ས་རཀྟ་དང་༔ དྲི་ཆེན་ཀུ་ཀུའི་ཆུ་སྟེ་རྣམ་པ་ལྔ༔ གཉིས་མེད་སྦྱར་བའི་པཉྩ་ཨ་མྲྀ་ཏ༔ ནག་པོ་ཆེན་པོ་འཁོར་དང་བཅས་ལ་འབུལ༔ ༀ་བྷུར་ཀུར་མ་ཧཱ་ཀ་ལ་རཀྴ་ཀྲོ་དྷི་ཤྭ་རི་མ་ཧཱ་པཉྩ་ཨ་མྲྀ་ཏ་ཁཱ་ཧཱི༔ མ་ཧཱ་བ་ལིཾ་ཏ། མ་ཧཱ་མཾ་ས། མ་ཧཱ་རཀྟ། མ་ཧཱ་གོ་རོ་ཙ་ན། མ་ཧཱ་བ་སུ་ཏ། མ་ཧཱ་ཀྲོ་ཏ། མ་ཧཱ་ག་ན། མ་ཧཱ་ཙཀྵུ། མ་ཧཱ་ཙིཏྟ་ཁཱ་ཧི། ཀྲོ་ཏ་ཛྭ་ལ་ས་མ་ཡཱ། ཡཀྴ་ཛྭ་ལ་ས་མ་ཡ། ཙིཏྟ་ཛྭ་ལ་ས་མ་ཡ། མ་ཧཱ་པཉྩ་ཨ་མྲྀ་ཏ་ཁ་ཧཱི། ཞེས་མཆོད་ཅིང་། ཁྲོ་མོ། ཕྲ་མེན། སྒོ་མ་ཡུམ་བཞི་དབང་མོ་རྣམས་ཀྱི་རྩ་སྔགས་བརྗོད་ཅིང་། ཨ་མྲྀ་ཏ་སོགས་ཀྱི་མཆོད་པ་འགྲེའོ། །ཧཱུྃ། རྣལ་འབྱོར་ཀུན་གྱི་དཔལ་མགོན་མཆོག །མ་ཧཱ་ཀ་ལ་མཐུ་རྩལ་ཅན། །བཀའ་ཐུབ་ཆེན་པོ་ཚུར་གསོན་ཅིག །ལེགས་ལྡན་ནག་པོ་མ་རུང་པ། །ཤ་ཁྲག་དམར་གྱི་མཆོད་པ་བཞེས། །རང་གི་རྒྱལ་སྲིད་ལ་གནས་ཏེ། །ཁྲམ་ལ་བཏབ་པའི་དགྲ་བགེགས་རྣམས། །རོལ་ཅིག་དགོངས་ཅིག་དམ་ཚིག་གཙོ། །ཁྱོད་ཀྱི་དམ་ཚིག་དུས་ལ་བབ། །བསེ་བྱང་ཁྲམ་ལ་བཏབ་པ་ཡིས། །མ་དང་སྲིང་མོ་ཆུང་མ་ལ། །དཔའ་བོ་ཁྱོད་ཀྱི་རོལ་བར་མཛོད། །དམ་ཚིག་ཆེན་པོས་མ་བཏང་ཞིག །ཞེ་སྡང་ཅན་གྱི་བདག་པོ་རྣམས། །སེམས་ཅན་ཀུན་གྱི་ཚེ་འཕྲོག་པ། །དགྲ་བོ་ཉམས་པ་སྲོག་དང་ཕྲོལ༔ ཤ་དང་ཁྲག་ལ་ལོངས་སྤྱོད་ཀྱི༔ གནོད་སྦྱིན་ཆེན་པོ་མ་རུངས་རྣམས། །བསེ་བྱང་ཁྲམ་ལ་བཏབ་པ་ཡི༔ གསེར་དངུལ་དབྱིག་རྣམས་ཀུན་ལོང་ལ༔ རང་གི་འདོད་པའི་ལོངས་སྤྱོད་ཀྱི། །བསྒྲུབ་པའི་རྣལ་འབྱོར་བདག་ཉིད་ལ༔ ཡིད་བཞིན་ལྟ་བུའི་དངོས་གྲུབ་སྩོལ༔ རིགས་ངན་རྨེ་ཤ་ཅན་གྱི་ཚོགས༔ བ་གླང་ཁྱི་ཤ་རྟ་ཤ་དང་༔ མི་ཤ་གླང་ཆེན་ལ་སོགས་བཞེས༔ སྲིང་མོ་ཁྲག་འཐུང་མ་ལུས་ཀུན༔ བསད་པའི་ཁྲག་ནི་དྲོན་མོ་དང ༔ བཞེས་ཤིག་དགྲ་བོའི་ཁྲག་ལ་འཐུང་༔ སྤྲུལ་པའི་ཕྲ་མེན་ཆེན་མོ་རྣམས༔ ཐོད་རུས་རྐང་དང་འབྲུ་མར་རྣམས ༔ རྐང་དང་ཨ་མྲྀ་ཏ་སྦྱར་ནས༔ རྫུ་འཕྲུལ་བསྒྲུབ་པའི་དམ་རྫས་བཞེས༔ རིགས་ངན་གདུག་པའི་བུ་མོ་རྣམས༔ ཤ་ཆེན་བཤང་གཅི་ཁུ་བ་ཁྲག །དམ་རྫས་འབར་བ་འདི་བཞེས་ལ༔ བདག་གི་ནད་རྣམས་བཟློག་ཏུ་གསོལ༔ དམིགས་པའི་དགྲ་ལ་རིམས་ནད་འཐོང་༔ སྲིད་པའི་བུད་མེད་མ་རུངས་ཁྱེད༔ བྲོ་གར་གླུ་ཚིག་མཆོད་པ་བཞེས༔ དམིག་བྱ་འབྱོན་ཚུལ་སྟོབས་ཀྱི་ཕྲོགས༔ ཤོར་བ་གཞོན་ནུ་བདུད་མོའི་ཚོགས༔ རྣལ་འབྱོར་ཆེན་པོའི་བཀའ་བྱུང་གི༔ སྔགས་སྒྲ་དྲག་པོའི་མཆོད་པ་བཞེས༔ དགྲ་བོའི་ཕུང་པོ་རྡུལ་དུ་རློག༔ ལོག་བསྲེག་ཅན་གྱི་ཚོགས་རྣམས་ཉོན༔ ཡང་དག་ས་རུ་ཀུན་རིག་ནས༔ ཆེ་ཆུང་ལས་གཉིས་གང་བྱས་ཀྱང་༔ གཉིས་ཀྱི་དབང་དུ་མི་འགྱུར་གྱིས༔ རྣལ་འབྱོར་ངའི་ལས་འདི་སྒྲུབས༔ གསང་ཚིག་སྟོན་པའི་ཚོགས་རྣམས་ཉོན༔ གཤང་གཅི་ཁྲག་དང་སོལ་ཁུ་ཡིས༔ བརྒྱའམ་སྟོང་དུ་གོ་ནས་ནི༔ ལིངྒ་གཅད་ན་སངས་རྒྱས་འཇིག༔ དམ་རྫས་མཆོད་པ་བཞེས་སུ་གསོལ༔ བཅོལ་པའི་ལས་རྣམས་གྲུབ་པར་མཛོད༔ མངའ་བདག་ཆེན་པོ་མ་རུང་བ༔ རྡོ་རྗེ་སེམས་དཔའི་སྤྲུལ་པ་སྟེ༔ ཁྲོ་བོའི་རྒྱལ་པོ་གྱིང་ཆེན་པོ༔ མངའ་བདག་བདུད་ཀྱི་རྒྱལ་པོ་བཞེངས༔ བསྟོད་ཅིང་མཐུན་པའི་རྫས་འདི་འབུལ༔ སྔོན་གྱི་བསྐལ་པ་དང་པོ་ལ༔ ཁས་བླངས་དམ་བཅའ་མནའ་བོར་བ༔ སྔོན་དུ་རིག་འཛིན་གོང་མས་སྒྲུབས༔ ད་ལྟ་རྣལ་འབྱོར་མགོན་དུ་སྤྱོན༔ བམ་རི་ཐོད་པ་མཁར་གྱི་རྩེར༔ རུ་མཚོན་ནག་པོ་པུ་རུ་རུ༔ མཚོན་ཆ་མང་པོ་ཆར་དུ་འབེབས༔ བདུད་བྱ་ནག་པོ་ལྡིང་ཞིང་འཛུམས༔ དུར་ཁྲོད་རྒྱན་ཅན་མང་པོ་རྣམས༔ མཆེ་གཙིག་རྔམ་པའི་ཞལ་གདངས་ནས༔ ཁྲོ་བོ་ཁྲོ་མོའི་སྤྲུལ་པ་འཁྲིགས༔ སྲིན་པོ་སྲིན་མོའི་རྐན་སྒྲ་སྡེབས༔ གནོད་སྦྱིན་ཕོ་མོ་འབྲུག་ལྟར་སྒྲོགས༔ ཟ་བྱེད་མང་པོ་གློག་ལྟར་འགྱུ༔ སོ་སོ་མོས་པ་མཐའ་དད་པའི༔ དམ་རྫས་མཆོད་པ་འདི་བཞེས་ལ༔ ཇི་ལྟར་བཅོལ་བའི་ཕྲིན་ལས་མཛོད༔ གཙོ་འཁོར་གྱི་སྔགས་བརྗོད་པའི་མཐར ༔ ཨ་མྲྀ་ཏ་སོགས་ཀྱི་མཆོད་པ་རྣམས་གོང་ལྟར་འབུལ་ལོ༔ ཧོཿ མགོན་པོ་ཁྱེད་མཆོད་བྱིན་རླབས་ཀྱིས༔ ཕྱོགས་དང་དུས་ནི་ཐམས་ཅད་དུ༔ སེམས་ཅན་ལེགས་དོན་འབྱོར་པ་ལ༔ བགེགས་ནི་རྣམ་པ་ཀུན་མེད་ཤོག༔ རྟ་དང་བ་གླང་ནོར་དང་འབྲུ༔ བུ་ཚ་ཕ་མ་གཉེན་བཤེས་རྣམས༔ དགེ་ཞིང་ཚེ་རིང་ནད་མེད་པར༔ ཐམས་ཅད་འབྱོར་པ་བསྟན་པར་ཤོག༔ འགྲོ་ལ་ཉེས་མེད་བདེ་གྱུར་ནས༔ ནད་དང་མུ་གེ་ཀུན་བྲལ་ཤོག རྒྱལ་པོ་དགེ་ཞིང་དེས་པ་རྣམས༔ ཆོས་ཀྱི་རྒྱལ་སྲིད་སྐྱོང་བར་ཤོག༔ བདེ་བར་གཤེགས་པའི་བསྟན་པ་འདི༔ ཕྱོགས་བཅུ་ཀུན་ཏུ་རྒྱས་པ་དང༔ མྱུར་དུ་སེམས་ཅན་ཐམས་ཅད་ཀྱང་༔ ཆོས་ཀྱི་སྣོད་དུ་གྱུར་པར་ཤོག༔ དགེ་བ་ཐམས་ཅད་སྤྱོད་བསྔོ་ཞིང་༔ མགོན་པོ་ཁྱེད་མཆོད་བྱིན་རླབས་ཀྱིས༔ བདག་ཅག་འཁོར་དང་བཅས་པ་རྣམས༔ ལོངས་སྤྱོད་ཐམས་ཅད་རྣམས་གཉིས་རྫོགས་པར་སྨོན༔ བདག་ཅག་བྱང་ཆུབ་ཐོབ་གྱུར་ནས༔ ཁྱོད་དང་མི་འབྲལ་འགྲོགས་པར་སྨོན༔ དེ་ནས་འཛབ་བསྐུལ་བྱ་སྟེ༔ ཧཱུྃ༔ ཐུགས་རྗེའི་སྟོབས་ཀྱི་དགྲ་བཅོམ་སྐུ་ལྔ་པོ༔ སངས་རྒྱས་ཀུན་གྱི་བཀའ་ཡི་ལས་མཁན་པོ༔ དཔལ་མགོན་ལྗང་སྔོན་དྲག་པོ་གསལ་ཤིང་ཅན༔ ཁྱོད་ཀྱི་བསྟན་པ་བཤིག་པའི་དགྲ་བགེགས་བསྒྲལ་བའི་ཕྱིར༔ གནས་འདིར་བཀའ་ཡི་དམ་ཚིག་ཐུབ་པར་བསྲུངས༔ སྒྲུབ་པོའི་གྲོགས་ཀྱི་དགྲ་ལ་རྟགས་ཆེན་ཕྱུང༔ ༀ་རུ་ལུ་རུ་ལུ་ཧཱུྃ་ཕཊ་བྷྱོཿ ཅེས་པ་དང་༔ ༀ་བུར་ཀུར་མ་ཧཱ་པདྨ་། དྷེ་བུར་ཙི་བུར་བྱི་གེ་བྱེ་མ་ནས་ཨེ་ཧོ་ཤྭ་མོ་ཀྲོ་ཏ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཅེས་བསྙེན་པའི་སྔགས་དང་༔ ༀ་བྷུ་རུ་ཀུ་རུ་ཨི་ཙུསྨ་ཀྲོ་ཏ་ཧཱུྃ་ཕཊ། ཅེས་བསྒྲུབ་སྔགས་དང་༔ ༀ་བྷུར་ཀུ་ཏི་ཧཱུྃ་ཕཊ། ཅེས་སྒྲུབ་པ་ཆེན་པོའི་སྔགས་དང་བཛྲ་ཀྲོ་ཏ་ཛྭ་ལ་སོགས་པ༔ འཁོར་གྱི་བཟླས་པའང་བྱའོ༔ མགོན་པོའི་དཀྱིལ་འཁོར་བདུན་པ་འདི༔ བསྒྲུབ་ཅིང་མཆོད་ན་དངོས་གྲུབ་གཉིས༔ ཐོབ་གྱུར་ཐེ་ཚོམ་མེད་པ་ཡིན༔ དེ་ཕྱིར་རྣལ་འབྱོར་ཀུན་དོན་དུ༔ དཔལ་མགོན་ཆོ་ག་འདི་ཙམ་པས༔ བསྟན་དང་དེ་ནི་རྣལ་འབྱོར་པ༔ དཔལ་མགོན་ཁྱེད་ཀྱི་སྐྱོང་གྱུར་ཅིག༔ ཀུན་གྱི་བྱང་ཆུབ་ཐོབ་པར་ཤོག༔ དཔལ་མགོན་པོ་ལེགས་ལྡན་ནག་པོ་མཆོད་པའི་ལས་རིམ་ཡིད་བཞིན་ནོར་བུ་ཞེས་བྱ་བ༔ ཤཱཀྱའི་དགེ་བསྙེན་ཤཱཀྱའི་བྱང་ཆུབ་ཀྱི་ལེགས་པར་སྦྱར་བའོ། །ཨཐྎ ཧཱུྃ༔ དྲག་པོ་སྐུ་ལྔ་རྒྱལ་བའི་བཀའ་སྡོད་མཆོག༔ ཡེ་ཤེས་ལྔ་ལྡན་རྒྱལ་བ་རིགས་ལྔའི་འཁོར༔ ཕྲིན་ལས་བདུད་འདུལ་དགྲ་བགེགས་ཀུན་གྱི་གཤེད ༔ གནས་འདིར་མྱུར་སྤྱོན་རྣལ་འབྱོར་ཕྲིན་ལས་མཛོད༔ ༈ །མགོན་པོ་ལེགས་ལྡན་ནག་པོའི་ཟོར་བསྐུལ་བཞུགས་སོ། ༈ །མ་གཡེལ་མ་ཕང་དམ་ཅན་ཚོགས། །རྣལ་འབྱོར་ང་ཡི་རྦད་པའི་ཚེ། །ལྷ་དམག་ཆེན་པོ་སྤྲིན་ལྟར་གཏིབས། །ཀྱཻ། ཕྱོགས་ཕྱོགས་དེ་ནི་ཕ་ཀི་ན། །ཉི་མ་ལྷོ་ནུབ་མཚམས་ཤེད་ན། །ཞེ་སྡང་དུག་མཚོ་མེར་བའི་ནང་ཤེད་ན། །བསེ་སྒོང་ཁྲ་བོའི་ནང་ཤེད་ན། །ལྕགས་མཁར་སྔོན་པོའི་ནང་ཤེད་ན། །གནོད་སྦྱིན་ཟངས་ཐོགས་རྒྱལ་པོ་བཞུགས། །དེ་ཡི་ཡུམ་ཆེན་གཏུམ་མོ་ནི། །བསེ་གདོང་ཟངས་མགྲིན་རྫུ་འཕྲུལ་ཅན། །གཉིས་སུ་མེད་པའི་རྫུ་འཕྲུལ་ཅན། །སྤྱན་ནས་མེ་ཡི་ཕུང་པོ་འབར་། །མཆེ་བ་གནམ་ལྕགས་དགུ་རྒྱས་གཏམས། །འོད་ཟེར་མང་པོ་སྐར་ལྟར་འཁྲུག །འོད་ཟེར་ཚ་ཚ་ཆར་དུ་འབེབས། །ཡབ་ཡུམ་འཇིགས་རུང་དཔའ་བྱད་ཅན། །སྔོན་ཀྱང་ཞེ་སྡང་ལས་ལས་སྤྲུལ། །ད་ལྟ་སྔགས་པའི་ཕྲིན་ལས་མཛད། །ཟོར་ཀྱི་དམག་དཔོན་ལས་ལ་ཆོས ། །དེ་གཉིས་ཚོགས་པའི་བྱིན་རླབས་ལས། །ཟོར་གྱི་རྒྱལ་མོ་མཆེད་བཞི་བྱུང་། །སྲོག་གི་གཤེད་བཞི་བསྐྱོད་རེ་རན། །ཤར་ཕྱོགས་བསེ་ཡི་གྱད་པོ་ཆེ། །ཟོར་གྱི་རྒྱལ་པོ་ད་སྤྱོན་ཅིག །ལྷོ་ཕྱོགས་ཟོར་གྱི་རྒྱལ་པོ་ནི། །གཤིན་རྗེ་དྲེགས་པའི་ཡུལ་གཤེད་ན། །ལྷ་ཡི་རྒྱལ་པོ་སྟག་ཐབས་ནི། །ལྕགས་ཀྱི་བསེ་ཁྲབ་སི་ལི་ལི། །ལྕགས་ཀྱི་མདེ་ཐུང་ཤ་ར་ར། ལྕགས་ཀྱི་མདའ་གཞུ་བརྡུངས་ནས་འཕེན། །ལྕགས་མདའ་རུ་སྐྱོགས་དགྲ་ལ་རྒྱོབ། ཡ་བདུད་དྲེགས་པའི་ཡུལ་ཤེད་ན། །བསེ་ཡི་སོག་མོ་མགོ་དགུ་པ། །བསེ་ཡི་ཚེམས་ཁྲབ་སི་ལི་ལི། །ཁྲག་གི་མདེ་ཐུང་ཤ་ར་ར། །ཁྲག་མདའ་ཐོག་སེར་དགྲ་ལ་ཡ། །ཉམས་པའི་སྙིང་ལ་རུ་ཟོར་ཡ། །གནོད་སྦྱིན་དྲེགས་པའི་ཡུལ་ཤེད་ནས། །བསེ་ཡི་སོག་པོ་གདོང་རིང་པ། །བསེ་ཡི་ཚེམས་ཁྲབ་སི་ལི་ལི། །ཚེམས་ཁྲག་གོང་མིག་དུག་ཟོར་འཕྲོ། །སྦྲུལ་གྱི་གཞུ་བརྡུངས་དུག་མདའ་འཕེན། །དམ་ཉམས་སྲོག་ལ་རུ་ཟོར་ཡ། །ཟོར་བདག་ཆེན་པོ་མཆེད་བཞི་བསྐྱོད་ཙམ་ན། །རི་རབ་རྡོ་ཕེན་འུ་རུ་རུ། རྒྱ་མཚོ་ཞོ་ཕྲོག་ཆི་ལི་ལི། །བསེ་ཡི་སྤྱང་མོ་ངུར་ཞིང་ཟུགས། །བསེ་ཡི་བྱ་གླག་ལྡིང་ཞིང་འཛུམས། །ལག་ན་སྲོག་གི་ཞགས་པ་ཐོགས། །དམ་ཉམས་དགྲ་བོའི་སྲོག་ལ་ཡ། །བྱང་ཕྱོགས་ཟ་བྱེད་མ་མོ་ནི། །ནག་མོ་དཀར་མོ་སྨུག་མོའི་ཚོགས། །མ་མོའི་ཁྲག་ཟོར་དགྲ་ལ་ཡ། །སློབ་དཔོན་རོ་ལངས་དེ་བ་དང་། །སློབ་དཔོན་པདྨ་འབྱུང་གནས་ཀྱི། །བཀའ་ལ་བཏགས་པའི་བཀའ་ཉན་མ། །དམ་ལ་བཏགས་པའི་དམ་ཅན་མ། །ཚ་འགྱུར་བཞི་ཡི་དུས་ལ་བབ། །ཟོར་གྱི་ལས་ལ་སྐྱོན་རེ་རན། །བལ་ཡུལ་ཁུངས་པའི་འདྲེ་སྐྱེ་བཞི། །ཟོར་གྱི་ལས་ལ་ནན་མ་ཆུང་། །བདུད་མོ་བཞི་ཡིས་དུས་ལ་བབ། །ཟོར་གྱི་ལས་ལ་སྤྱོད་རེ་རན། །བསེ་ཡིས་ལྷ་མོ་མཆེད་བཞི་ནི། །ཟོར་གྱི་བསྲུང་མར་གཤེགས་སུ་གསོལ། །ཟོར་ཁ་འདི་ལ་ནན་མ་ཆུང་། །དོ་ནུབ་ཟོར་གྱི་ལས་ལ་ཆོས། །ཤར་ཕྱོགས་ཁྲོ་བོ་གིང་གི་ཚོགས། །ཡུངས་དཀར་འཕང་བའི་དུས་ལ་བབ། །ནུབ་ཕྱོགས་སྲིན་པོ་རྔམ་པའི་ཚོགས། །ཐོད་ཟོར་འཕང་བའི་དུས་ལ་བབ། །ཀྱེ་མ་མིང་པོ་རྡོ་རྗེ་དམག་འདྲེན་ན། །སྲིང་མོ་རྡོ་རྗེ་མཚོན་ཐོགས་ཤིང་། །མིང་པོ་རྡོ་རྗེ་གཡུལ་ཤོམ་ན། །སྲིང་མོ་རྡོ་རྗེ་དམག་སྣ་དྲོངས། དགྲ་བོའི་ཡུལ་དུ་དམག་འདྲེན་ན། དགྲ་ལྷ་རྒྱལ་མོ་དམག་ལ་འདུ། བདུད་ཀྱི་ཡུལ་དུ་དམག་འདྲེན་ན། དམག་གི་རྒྱལ་མོ་དམག་སྣ་དྲོངས། །མདའ་ཟོར་འཕང་བའི་དུས་ལ་བབ། །རུ་ཟོར་ཐོད་ཟོར་དགྲ་ལ་ཡ། །སྟེང་གི་ལྷ་ཡང་གཟུ་དང་དཔང་། །འོག་གི་ཀླུ་ཡང་གཟུ་དང་དཔང་། །བར་གྱི་བཙན་ཡང་གཟུ་དང་དཔང་། །ལྷ་སྲིན་སྡེ་བརྒྱད་གཟུ་དང་དཔང་། །གཟུ་དང་དཔང་དུ་དཀོན་མཆོག་བཞུགས། །ཞལ་ལྕེ་ལྷ་སྲིན་ཡོངས་ཀྱིས་ཆོད། །ང་ཡིས་མ་ཉེས་མ་ཐོས་ཀྱིས། །ཉེས་པའི་སྟབས་ལ་ཤོ་ར་རེ། །མ་ཉེས་སྟབས་ལ་བཅད་དེ་རེ། །ཧཱུྃ། སྟེང་གི་ལྷ་ལ་ཟོར་མི་འཕེན། །འོག་གི་ཀླུ་ལ་ཟོར་མི་འཕེན། །བར་གྱི་བཙན་ལ་ཟོར་མི་འཕེན། །ས་བདག་གཉན་ལ་ཟོར་མི་འཕེན། །སོགས་པ་གཞན་ཡང་སྡམ། ད་ནི་ཟོར་འཕང་གང་ལ་འཕངས། །ཟོར་འཕངས་སྡང་བའི་དགྲ་ལ་འཕང་། །རུ་ཟོར་གནོད་པའི་བགེགས་ལ་འཕང་། །ཉུང་ཟོར་སྙིང་གི་དཀྱིལ་དུ་ཡ། །ཐོད་ཟོར་བསྟན་གྱི་དགྲ་ལ་ཡ། །མདའ་ཟོར་དཀར་ནག་མཚམས་སུ་ཡ། །ཟོར་གྱི་རྒྱལ་པོ་ལས་ལ་ཆོས། །ཞེས་བརྗོད་ཅིང་རྔམ་པའི་ང་རོས་སྔགས་བཟླས་ཤིང་། །སྐྲ་སྤྱི་བོར་བཅིངས་ལ། ལུས་གཅེར་བུར་ཕྱུང་ལ་འཐབ་བགྲོས་བྱ། །ཟོར་འཕང་ངོ་། །ཟོར་གྱི་ལས་བྱ་བའི་ཐབས་རྫོགས་སོ། །དང་པོ་ཟོར་བྱུང་གང་ནས་བྱུང་། །མ་ཏྲཾ་དང་པོ་ཇི་ལྟར་བསྒྲལ། །སྲིད་པའི་བྱོལ་བཞི་ཇི་ལྟར་བསྒྲལ། །དང་པོ་མ་ཏྲཾ་བསྒྲལ་བའི་ཚེ། །མགོ་བོ་སྲིན་པོའི་ཕྱོགས་སུ་བསྟན། །རྐང་པ་འབྱུང་པོའི་ཕྱོགས་སུ་བརྐྱང་། །ལག་པ་མེ་དང་རླུང་གི་ཕྱོགས། །སྒྲོལ་བྱེད་གིང་གིས་བསྒྲལ་རྩམ་ན། །མ་ཏྲཾ་མགོ་ལ་ར་སྐྱོགས་སྲིད། །སྣ་ནི་ཟབ་ཟི་ཟངས་སྐྱོགས་སྲིད། །ཀོས་ལྐོ་བསེ་སྐྱོགས་ཁྲ་བ་སྲིད། །དང་པོ་སྐྱོགས་བྱུང་གང་ནས་བྱུང་། །མ་ཏྲཾ་བྷནྡྷའི་ནང་དག་ཏུ། །ས་སྣ་ཀེ་ཚེ་འཚེ་བསལ་ཏེ། གནམ་ས་ཡོངས་ཀྱི་བྱིན་རླབས་ལས། །ཡན་ལག་བཞི་ལ་འདམ་བཞི་བྱུང་། །མཆིན་པ་ལ་ནི་དུག་ཟོར་བྱུང་། །སྙིང་གི་རྩ་ལས་ཁྲག་ཟོར་བྱུང་། །མ་ཏྲཾ་གི་ནི་མཁྲིས་པ་ལས། །བདུད་ཀྱི་བྱོལ་པོ་དེ་ན་བྱུང་། །མ་ཏྲཾ་གི་ནི་མཚེར་པ་ལ། །དམུ་ཡི་བྱོལ་པོ་དེ་ནས་བྱུང་། །མ་ཏྲཾ་གི་ནི་སྲོག་རྩ་ལས། །སྲིད་པའི་བྱོལ་པོ་དགྲ་ལ་བྷྱོ། །སྲིད་པ་བདུན་བྱོལ་དགྲ་ལ་བྷྱོ། །ཆུང་ལ་སྲིད་པ་མ་མོ་བྱོལ། །ཐོ་རངས་རྒྱུ་བ་བཙན་གྱི་བྱོལ། །ཉི་མའི་གུང་ལ་དམུ་ཡི་བྱོལ། །མོན་ཡུལ་གཏིང་གི་སྙུག་མ་ལ། །འདབ་ཆགས་བཞི་ཡིས་སྒྲོ་ཡིས་སྐྱོན། །གཞུ་མོ་མཆོག་དཀར་མཆོག་ཡིན་ཏེ། །སྐྱེས་བུ་ལག་པ་གཡོན་གྱིས་བླངས། །ད་ནི་གསང་བའི་ཟོར་འཕེན་ན། །ཟོར་གྱི་དེ་ནི་ཤུལ་སོལ་ཅིག །ཟོར་གྱི་དེ་ནི་ལམ་ཕྱེ་ཞིག །ཤར་ཕྱོགས་རྒྱལ་པོ་ཡུལ་འཁོར་བསྲུངས། །རྒྱལ་པོ་དེ་ནི་བརྗིད་རེ་ཆེ། །བློན་པོ་དེ་ནི་བཟང་ལ་རགས། །བཙུན་མོ་དེ་ནི་མཛེས་ལ་སྙེམས། །ཤར་བ་དེ་ནི་དོལ་རེ་སྙེམས། །དེ་ལ་ཀྱང་ནི་ཟོར་མི་འཕེན། །སྟེང་གི་ལྷ་ལ་མི་འཕེན་ནོ། །འོག་གི་ཀླུ་ལ་མི་འཕེན་ནོ། །བར་གྱི་བཙན་ལ་མི་འཕེན་ནོ། །ལུས་སྲོག་བསྐྱེད་པའི་ཕ་མ་ལ་ཡང་མི་འཕེན་ནོ། །སྟེང་གི་ལྷ་ཡང་གཟུ་དང་དཔང་། །འོག་གི་ཀླུ་ཡང་གཟུ་དང་༴ བར་སྣང་བཙན་ཡང་གཟུ་དང་༴ ལྷོ་ཕྱོགས་འཕགས་སྐྱེས་པོ་ཡང་༴ ནུབ་ཕྱོགས་སྤྱན་མི་བཟང་ཡང་༴ བྱང་ཕྱོགས་རྣམ་ཐོས་སྲས་ཀྱང་༴ ཤར་ཕྱོགས་ཡུལ་འཁོར་བསྲུང་ཡང་༴ ཤར་ཕྱོགས་དྲི་ཟའི་གདོན་ཡང་༴ ཟོར་འདི་སྡང་བའི་དགྲ་ལ་འཕེན། །ལྷོ་ཕྱོགས་གྲུལ་བུམ་གདོན་ཡང་༴ །སྡང་བའི་དགྲ་ལ་འཕེན། ནུབ་ཕྱོགས་ཆུ་བདག་གདོན་ཡང་གཟུ་དང་དཔང་༔ སྡང་བའི༴ བྱང་ཕྱོགས་གནོད་སྦྱིན་གདོན་ཡང་། ཟོར་འདི་སྡང་བའི་དགྲ་ལ་འཕེན། །ཟོར་འདི་གནོད་པའི་བགེགས་ལ་འཕེན། །གཞུ་མོ་རྒྱུད་དུ་མ་ཆད་ཅིག །མདའ་མོ་ལྟོང་དུ་མ་ཆག་ཅིག །ཤར་ཕྱོགས་ཁྲོ་བོའི་སྤྲུལ་པ་ཡིས། །ཆེན་པོ་བྱ་རྒོད་མགོ །ཤར་གྱི་ཕྱོགས་ཀྱིས་དགྲ་བགེགས་ལ། །བྱ་རྒོད་མདའ་ཡི་སྙིང་ལ་རྒྱོབ །དུང་སྐྱོང་དཀར་པོས་སྙིང་ལ་རྒྱོབ། །རྣོག་མགོ་ཅན་གྱི་བཤན་པ་གྱིས། །ཏྲི་ཏ་མུ་ཁ་མཐུ་མོ་ཆེ། །སྤྲུལ་པ་ལུག་གི་མགོ་ཅན་གྱིས། །དམ་ཉམས་དགྲ་ཡི་བཤན་པ་གྱིས། །འུག་པའི་མདའ་ཡིས་སྙིང་རྩ་ཏུར། །ཧུ་ལུ་མུ་ཁ་མཐུ་མོ་ཆེ། །བསེ་ཀྱང་ཁྲ་བོས་མགྲིན་པར་འཆིངས། །སྨྱོ་འབོག་ཤ་བའི་མགོ་ཅན་གྱིས། །དམ་ཉམས་དགྲ་ཡི་བཤན་པ་གྱིས། །སྤྲུལ་པ་བྱ་རོག་མགོ་ཅན་གྱི། །བྱ་རོག་མདའ་ཡི་སྙིང་ལ་རྒྱོབ། །གསོད་བྱེད་ཀཾ་ཀ་མུ་ཁ་མཐུ་མོ་ཆེ། །ཟུངས་སྐྱོགས་དམར་པོས་ཡུལ་ཁམས་ཆོམས། །སྤྲུལ་པ་ཁྲག་གི་མགོ་ཅན་གྱིས། །གསོད་བྱེད་ཁྲག་མདའ་དགྲ་ལ་རྒྱོབ། །ཁ་ཁ་མུ་ཁ་མཐུ་མོ་ཆེ། །རུ་སྐྱོགས་ནག་པོས་ཡུལ་ཁམས་ཆོམས། །དང་པོ་ཞེ་སྡང་ཕ་ཡིས་བསྐྱེད། །དེ་ནས་འདོད་ཆགས་མ་ཡི་མངལ། །དེ་ནས་དྲི་ཟའི་ལྟེ་བའི་འཁོར། །ཐ་མ་ཉོན་མོངས་ལྔ་ཡིས་གཟུགས། །ལྔ་ཕུང་རྩད་ནས་བཅད་པའི་ཕྱིར། །སྲིན་པོའི་མདའ་ཟོར་དགྲ་ལ་ཐུན། །ཁྲག་མདའ་དུག་མདའ་དགྲ་ལ་ཐུན། །གསལ་ཤིང་ནག་པོ་དགྲ་ལ་ཐུན། །ལྟ་བའི་མིག་ལ་ཁྲག་ཟོར་ཡ། །ཉན་པའི་རྣ་ལ་ཁྲག་ཟོར་ཡ། །ནམ་ཕྱེད་སྣ་ལ་ཁྲག་ཟོར་ཡ། །ཉུངས་ཟོར་ནག་པོ་དགྲ་ལ་རྒྱོབ། །གུ་གུལ་ནག་པོས་མལ་ཤིག་ཅིག །མཛེ་ཐོད་རྣོན་པོས་དྲག་པོ་རྒྱོབ། །དུག་ཟོར་ནག་པོས་རླག་པར་གྱིས། །ལྕགས་ཟོར་ནག་པོས་རླག་པར་གྱིས། །མ་མོ་རྡོ་འཕེན་མཐུ་མོ་ཆེ། །རྡོ་ཟོར་དག་གིས་ཡུལ་འཁོར་ཆོམས། །སྙིང་ཁྲག་ཆོད་ཅིག་ཙིཏྟ་ཀུ་ལུ་ནན། །ཡན་ལག་འཆིངས་ཅིག་ཤྭོ་ན་ཀུ། །རྣམ་ཤེས་བཅོས་ཤིག་ཙིཏྟ་ཁཱ་ཧི། གཟུགས་ཕུངས་ཤིག་ཅིག་ཏུ་ཏི་བཾ། དག་རྣམས་ཉེས་ཤིག་ཙིཏྟ་རམ། །དབང་པོ་ཤིག་ཅིག་ཨི་ཏྲ་ནི། །བཛྲ་ཀྲོ་ཏ་ཛྭ་ལ་ནི། །ཤ་ཏྲུཾ་མ་ར་ཡ་ཀཾ་རྦད། །མ་མ་མ་ཤ་ཏྲུཾ་མཱ་ར་ཡཾ་ཀཾ་རྦད། །ཧ་ར་བྱ་མུགས་རྦད། །བཛྲ་ཀྲོ་ཏ་ཡ་མ་པྲ་ཏི་དུམ་པ་ལི་ཤ་ཏྲུཾ་མཱ་ར་ཡ་གཟེར། ནི་ལ་ནི་ལ་སྟམྦྷ་ནན་བཅངས་སྦྱིན་རྦད་པུ་ནི་ཤ་ཏྲུཾ་མཱ་ར་ཡ་གཟེར། ནག་གུར་ལ་ཤ་ཏྲུཾ་མཱ་ར་ཡ་ཛ། ཨཐྎ། དེ་ནས་གསེར་སྐྱེམས་བཏང་། ཡུལ་གྱི་ལྷ་འདྲེ་ལ་མ་ཉེས་པས་དཔངས་གཟུགས། ས་བདག་ལ་ཡང་ཀླུ་སྨན་སྣ་ཚོགས་ཀྱི་པུ་ཙ་དབུལ། དེ་ཁྲུ་དོ་གསུམ་བར་བྲུའོ། །དེ་ནས་རྒྱ་མཚོའི་གཏིང་ན་གནས། །ཀླུ་བདུད་ཆེན་པོ་ཁ་ཕྱེ་ཞིག །རྒྱས་པའི་དགྲ་བོ་གཏད་དོ་བྱས་ལ་ཁ་སྦྱོར་དུ་གཞུག་གོ། །དེ་སྟེང་མགོན་པོ་མིའུ་ཐུང་གི་གཟུགས་སྐྱོན། །དེའི་སྟེང་དུ་ཁྲོ་བོའི་མཁར་ལ་བྱ་ཁྱུང་མ་རུ་ཏྲ་དང་བཅས་པས་བཞག །དེའི་སྟེང་དུ་གཡམ་ནག་གི་གཅད། །དེ་ནས་དཔའ་བོ་རྟ་བྲོ་བརྡུངས། །དེ་ནས་གོམ་པ་ཉི་ཤུ་རྩ་གཅིག་ཕྱིར་བསྐྱེད་ལ་ཟོར་བཏེག །ལོག་ན་སྤོགས་པའི་ལས་བྱ། །གཡས་སུ་ལོག་ན་ལག་པ་གཡས་པ་ལ་ལན་གསུམ་བསྐོར་ལ་ལན་གསུམ་འཕང་། དེ་ནས་དེ་ལ་རྡེག །གཡོན་དུ་ལོག་ནའང་དེ་ལྟར་བྱའོ། །ཐད་ཀར་ལོག་ན་འདུག་སར་ཐོ་གཅིག་བཙུགས་ལ་ཕར་རྟེན། དེ་ནས་དེ་ལ་རྡེག །ད་དུང་ལོག་ན་གནས་སུ་ཕྱིན་ལ་དྲག་པོའི་སྔགས་མཇུག་ཀློགས་སུ་བྱས་ལ། སྟོང་ཚོ་གཅིག་འདོན། དེ་ནས་ཟོར་གྱི་ལས་བྱ། གཏང་རག་གི་གཏོར་མ་གཏང་ཡེ་ཤེས་སེམས་དཔའ་གཤེགས། དམ་ཚིག་སེམས་དཔའ་བསྡུ། མཚམས་རང་བཞན་གྱིས་མི་དམིགས་པར་གྲོལ། དེ་ནི་ལས་སྦྱོར་རོ། །དེ་ལྟར་བྱས་ན་ལོ་རུ་སྦྱོར་ནས་ཕྱིས་བཏགས་མེད་ན། མནན་པ་ལྟ། འཕར་ནས་འདུག་ན་སླར་ལ་མནན་བའི་ལས་བྱ། མ་འཕར་ནད་ནང་འཁོར་བའི་ལས་བྱ་སྟེ། མན་ངག་ལས་ཤེས་པར་བྱ། རྫོགས་སོ།། ༈ །།དེ་ནས་ལས་སྦྱོར་དུས་སུ་འབྲུབ་ཁུང་ལས་ཀྱི་དཀྱིལ་འཁོར་བྱ་སྟེ། གསེར་སྐྱེམས་བཏང་། བདེན་པ་བདར། མ་ཉེས་པའི་དཔང་གཟུགས། དེ་ནས་དྲག་པོའི་སྔགས་བཟླས་པའི་དུས་སུ། བདག་དཔལ་ཆེན་པོའི་ཐུགས་ཀ་ནས་ལས་ཀྱི་མགོན་པོ་ཞལ་གཅིག་ཕྱག་གཉིས་གཅེར་བུ་རལ་པ་གྱེན་དུ་བརྫེས་པ། སྐུ་མདོག་སྔོ་ནག་གཡས་གསལ་ཤིང་ནག་པོ་གཡོན་ལྕགས་ཀྱུ་ཐོགས་པ་རྩར་གྱི་བཏོན་ནས། བཞི་མགོན་དང་གཉིས་སུ་མེད་པར་བྱ་སྟེ། བདག་དཔལ་ཆེན་པོ་ལ་ཅི་བགྱི་བཀའ་ནོད་པར་བསམ། དགྲ་ལ་བསྟན་པས་འཕར་སྤྱང་མང་པོ་དང་། དུར་སྤྱང་མང་པོ་སྤྲུལ་ནས་སྟེ་ལྷ་སྦྱིན་སྣ་ནས་ཡར་བཞུགས། ནང་ཁྲོལ་ཞལ་དུ་རྔུབས། དོན་སྙིང་སྨད་ལྔ་སྤར་གྱིས་བཏབ་ནས་སླར་བྱུང་སྟེ། བདག་ལ་བསྟབ་པར་བསམ། དེའི་སྦྱོར་བ་དང་ལྡན་པས། ཉིན་ལན་གསུམ་མཚན་ལན་གསུམ་དུས་དྲུག་ཏུ་བསྟབ་པ་བྱ་ཞིང་དྲག་སྔགས་འདོན་ནོ། །དེ་ནས་རྟགས་བྱུང་བ་དང་རྣལ་འབྱོར་གཅིག་གི་མཐོ་མཚམས་སུ། རྒྱ་ཚིལ་གྱི་དུད་པ་བཏང་། ལྷ་དང་དབྲལ་བའི་ཆོ་ག་བྱ། སླར་ལོག་ཏེ་ཕུར་པ་བཏབ་པ་དང་། ཐུན་བརྡེག་པ་དང་། མཚོན་གྱིས་གདབ་པ་དང་། བསྒྲལ་བའི་ལས་བྱ། དེ་ནས་སྦྱིན་བསྲེག་གི་ལས་བྱ། དེ་ནས་མནན་པའི་ལས་བྱ་སྟེ། སྦྱིན་བསྲེག་གི་ཐལ་བ་ལིདྒ་བྱ་སྟེ་མིང་བྱང་བཏུབས་ལ་ཁ་སྦྱོར་ནང་དུ་གཞུག །མཁར་ནག་གམ་རྒྱུ་ཞགས་ཀྱིས་བསྡམས། མནན་པ་ཁྱེར་ལ་ཕུར་བ་བཞིས་བདག་གི་བྲོ་བརྡུངས་བཅད་དེ་རྫོགས་སོ།། ༈ །།གཏད་ཁྲམ་མནན་པའི་དཀྱིལ་འཁོར་བཞུགས་སོ། །དཔལ་ཧེ་རུ་ཀ་ལ་ཕྱག་འཚལ་ལོ། །དཀྱིལ་འཁོར་བདུན་པའི་རིམ་པ་ལས། །གཏད་ཁྲམ་མནན་པའི་ད་ལ་ནི། །བདུད་འདུལ་ཞིང་ཁམས་ཆེན་མོ་ན། །སྟོན་པ་སངས་རྒྱས་ཉིད་ཀྱིས་གསུངས། །དེ་ཡང་གདམས་ངག་མདོར་བཀོད་པ། །སློབ་དཔོན་ཧཱུྃ་ཀཱ་ར་ཡི་ནི། །འཁོར་ལོའི་གདམས་ངག་མདོར་བཀོད་པ། །འཁོར་ལོའི་མིང་བྱང་བྲི་བ་ནི། །དང་པོ་འཁོར་ལོ་བྲི་བྱ་ནི། །ལྟེ་བར་མུ་ཁྱུད་འཁོར་ལོ་དང་། །ཕྱི་ཡིས་འཁོར་ཡུག་མེ་རི་བཅས། །སྦལ་པའི་ལྟོར་ཚུད་ཁ་སྦྱོར་བྲི། །ལྟེ་བར་ཐིག་བཞི་ལེ་ཚེ་དགུ །མུ་ཁྱུད་ཁྱིམ་ནི་བཅུ་གཉིས་བྲི། །གཞི་སྙིང་གཅིག་ཏུ་དྲིལ་བའི་སྔགས། །དབུས་སུ་ༀ། ཤར་དུ་བུར། གཡས་སུ་ཀུར། རྒྱབ་ཏུ་ཨི། གཡོན་དུ་ཙི། མུ་ཁྱུད་ཀྱི་ཤར་མཚམས་ནས་བརྩམས་ཏེ་གཡས་བསྐོར་དུ། ཀྱི་ཕྱི་ཨུ་ཙུ་སྨ་ཀྲོ་ཏ་མ་ར་ཡ་ཧཱུྃ། ཐ་མ་ཕཊ་ཀྱི་མཐར་ཐུག་པར། །གཡས་བསྐོར་རིམ་པ་བཞིན་དུ་བྲི། །རུས་དང་མིང་དང་བཅས་པ་བྲི། །ཤཱཀྱ་སརྦ་ལྷ་སྦྱིན་མ་ར་ཡ་ཕཊ། ཅེས་པ་བྲི། གཞི་སྙིང་དྲིལ་བ་བྲིའོ། །དེའི་ཕྱི་རིམ་ས་བཅུ་དྲུག་ལ། །ཧ་ལ་ཧ་ལ། ར་ལ་ར་ལ། ཧུ་ལུ་ཧུ་ལུ། རུ་ལུ་རུ་ལུ། རུ་ཏྲ། །ཚོགས་ཀྱི་ས་བོན་ནམ་རྣམ་ཤེས་བརྒྱད་དང་ཡུལ་བརྒྱད་འཇོམས་པ་བྲི། །འཁོར་ཡུག་ཕྱོགས་བཞི་འཁོར་བཞི་པོའི། །ཡཀྴ་ཛྭ་ལ་ཆེ་གེ་མོ་སརྦ་ཤ་ཏྲུཾ་མཱ་ར་ཡ་ཧཱུྃ་ཕཊ། །ཙིཏྟ་ཛྭ་ལ་ས་མ་ཡ་ཆེ་གེ་མོས་སརྦ་ཤ་ཏྲུཾ་མཱ་ར་ཡ་ཧཱུྃ་ཕཊ། ༀ་བཛྲ་ཀྲོ་ཏ་ཛྭ་ལ་ས་མ་ཡ་ཆེ་གེ་མོ༴ ཡཀྴ་ཛྭ་ལ་ས་མ་ཡ་ཆེ་གེ་མོ་སརྦ་ཤ་ཏྲུཾ་མཱ་ར་ཡ་ཧཱུྃ་ཕཊ། ཙིཏྟ་ཛྭ་ལ་ས་མ་ཡ་ཆེ་གེ་མོ་སརྦ་ཤ་ཏྲུཾ་ས་ར་ཡ་ཧཱུྃ་ཕཊ། ༀ་བཛྲ་ཀྲོ་ཏ་ཛྭ་ལ་ས་མ་ཡ་ཆེ་གེ་མོ༴ ཡཀྴ་ཛྭ་ལ་ས་མ་ཡ་ཆེ་གེ་མོ་སརྦ་ཤ་ཏྲུཾ་མ་ར་ཡ་ཧཱུྃ་ཕཊ། ཞེས་བྲིས་ལ་འཁོར་བཞིའི་དམིགས་བྱ་དགུག་པ་དང་། ལིདྒ་གཞུག་ཅིང་བཅིང་བ་དང་། དབང་དུ་བསྡུད་པའི་ལས་བྱེད་པའོ། །ཐ་མ་མེ་རི་འབར་བའོ། །དེའི་ཕྱི་རིམ་ཁ་སྦྱོར་ནི། གཡས་བསྐོར་གཡོན་བསྐོར་མ་འཛོལ་བའི། བྲིས་ལ་ཀླུ་ལ་གཏད་པའོ། །ཡང་ན་གཡས་བསྐོར་རྐྱངས་པ་ལ། མགོན་པོའི་གཟའ་མཆོག་ལྟོར་ཆུད་དུར་ཁྲོད་ནག་པོའི་འཚལ་བཞུགས་པའམ། ལྷ་ཁང་མགོན་པོའི་ཞབས་འོག་ཏུ། མནན་པ་བྱས་ཀྱང་འགྲུབ་པར་གསུང་། དལ་བྲི་བའི་རིམ་པའོ། །དེ་ལྟར་བྲིས་པའི་འཁོར་ལོ་ལ། བྱིན་རླབས་འཁོར་ལོ་བསྐོར་བ་ནི། བདག་ཉིད་དཔའ་ཆེན་ཧེ་རུ་ཀའི། ཐུགས་ཀའི་ས་བོན་ལས་འོད་ཟེར་འཕྲོས་ནས་མདུན་གྱི་འཁོར་ལོ་ལ་ཕོག་པས། ཡེ་ཤེས་ཀྱི་འཁོར་ལོ་ལྕགས་ཁང་མེ་འབར་བ་ཁ་སྦྱོར་བསམ། ནང་དུ་ཡི་གེའི་སྤུ་གྲི་མཚོན་ཆ་ཡིས་དམིགས་པའི་ཕུང་པོ་ལྔ་དང་། དུག་སྣ་རྟེན་འབྲེལ་བཅུ་གཉིས་དང་། རྣམ་ཤེས་བརྒྱད་དང་ཡུལ་བརྒྱད་གཅོད་ཅིང་བསྐོར་བར་བསམ། ཉོན་མོངས་པ་ཅན་ནམ་ཡིད་འཁོར་བ་མ་སྟོང་གི་བར་དུ། རྣམ་རྟོགས་ན་སྐུ་དང་ཡེ་ཤེས་ལྔ་ཡིས་ཐམས་ཅད་སྟོང་ཉིད་རྡོ་རྗེའི་ངང་དུ་བསྐོར། དེ་འདྲའི་བསྐོར་བ་ཀུན་གྱི་ཐུན་མོང་མ་ཡིན་ཏེ། ལྟ་བ་དམན་ཅིང་ཞེ་སྡང་ཅན་གྱིས་ནི། གང་གི་མཚོན་ཆ་གཡས་བསྐོར་བ། དམིགས་པའི་གཟུགས་ཕུང་གཡོན་བསྐོར་བས། དམིགས་པའི་གཟུགས་ཕུང་འཁོར་ལོ་སྤུ་གྲིས་བཏུབས་པར་བསམ། འཁོར་ལོ་ལྕགས་ཁང་བར་དུ་མནན་པས་ཐར་བའི་དུས་མེད་པར་བསམ། དེ་དག་འཁོར་ལོ་བསྐོར་བའི་ཏིང་ངེ་འཛིན་ཏེ་སྐབས་སྐབས་དག་ཏུ་འཁོར་ལོའི་རབ་གནས་བྱེད་པ་ཤིན་ཏུ་གཅེས་སོ། །དེ་འདྲའི་འཁོར་ལོ་བྱིན་རླབས་ལྡན་པ་དེ། གའུར་བཅུག་ནས་ནི། ཨ་རང་ཅེས་བྱ་བ་མཛེ་ཕོའི་ཐོད་པའམ། མ་ནུ་ར་ནི་རིགས་ངན་ནམ་མཛོ། དྲེའུ་ཐོད་པའམ། ཀྲི་ན་ཞེས་པ་རབས་ཆད་ནག་པོའི་ཐོད་པའམ། ཀུ་ཀུ་ར་ཙ་ཁྱིའི་ཐོད་པའམ། རབས་ཆད་ཐོད་པ་ཁ་སྦྱོར་དཀར་ནག་སྡམས། །མཛེ་རྡོལ་ཐོད་པ་བམ་རིལ་བག་ཟན་བུག་པ་བཀག་པ་ལ། །མཛེ་ཐོད་ཀྱི་ཐོད་པར་འཁོར་ལོ་གཏོར་མ་ཁྲག་དང་། །ཉུང་དཀར་ནག་དུག་ཐུན་བླུགས། །སེར་བུ་མི་ཆོར་བ་ལ་ཆན་ནན་བྱས་ལ། །ཡུགས་ས་མོའི་དོར་རྟའམ་རེ་བས་དྲིལ་ཏེ་བཞག །ས་སྣ་བདུན་གྱི་འདག་ས་ལ། །མཁར་ཆེན་ཕང་དུ་འཇུག་པ་སྟེ་ལོགས་ལ་ཆག་གང་ཁོང་སྟོང་ཟུར་གསུམ་བྱ། སྟེང་དུ་འདབ་ཆགས་རྒྱལ་པོ་བྱ། མགོན་པོ་ནག་པོ་ཆག་གང་པ། ཞལ་གཅིག་ཕྱག་གཉིས་པ་གསལ་ཤིང་ནག་པོ་བསྣམས་པ། མཆེ་གཙིགས་ཞབས་ནི་འགྲད་པ་ལ། །དུས་སུ་བྱིན་རླབས་དབང་བསྐུར་བྱ། །མཆོད་རྟེན་ནག་པོ་མཛུབ་གང་ལ། །བྱིན་རླབས་དབང་བསྐུར་རབ་གནས་བྱ། །སྦྱིན་བསྲེག་བྱས་པའི་ཐལ་བ་དང་། །དྲི་མ་རྗེས་དང་མགོ་བོའི་ངོས་རྣམས་ལ། །ལིདྒ་མིང་བྱང་བཅས་བྲིས་སྙིང་ཁར་གཞུག །བདག་ཉིད་ཆས་སུ་འཇུག་པ་ནི། །བདག་ཉིད་བྱ་ཁྱུང་རྒྱལ་པོའམ། །ཕྱག་ན་རྡོ་རྗེའི་ང་རྒྱལ་གྱིས། །དྲི་ཆུ་ཙན་དན་གླ་རྩི་འམ་ཆུས། །ཁྲུས་བྱས་གུ་གུལ་ནག་པོ་དང་། །ཚིལ་ཆེན་མུ་ཟི་ཀླད་པ་དང་། །ཕག་པའི་སྣ་དང་དྲི་ཆེན་རྣམས། །བདག་གི་ལུས་བསྲུང་རྨ་བྱའི་མདོངས་ཀྱི་མགོ་ལ་གདགས། །བདུད་ནག་མཆོད་ཕྱིར་ལུག་ནག་རྗེ་ངར་བཤམས། །ཕྱིར་མི་བཟློག་ཕྱིར་སྲིད་པའི་མདའ་གཞུ་ཁྱེར། །དམག་དཔུང་བཟློག་ཕྱིར་དྲག་པོའི་གཏོར་མ་ཁྱེར། །ལས་རྣམས་བཅོལ་ཕྱིར་ཞི་བའི་གཏོར་མ་ཁྱེར། །མི་མཐུན་འདུས་པའི་སར་སོང་ལ། །རྣལ་འབྱོར་ཁྲོས་སེམས་སྟངས་སྟབས་ཀྱིས། །མི་མཐུན་འབྲོས་སུ་མི་གཞུག་ཏིང་འཛིན་པར། །སྣང་སྲིད་ལྷ་འདྲེ་དག་ལ་གསེར་སྐྱེམས་རྒྱས་པར་བཏང་། །ལས་བཅོལ་དེ་ལ་ཞི་བའི་གཏོར་མས་མཆོད། །མ་ཉེས་དཔང་གསོལ་བྱ་ཁྱུང་ཏིང་འཛིན་གྱིས། མཆུ་དང་སྡེར་མོས་རློག་པར་བསམ་ཤིང་ཁྲུ་དོ་རྐོ། བྱ་ཆུང་ང་རྒྱལ་དག་གིས་ས་བདག་མོའི་རིགས་ལ་བཏབ། དང་པོའི་ས་བདག་ལིང་གར་བཅུག་པར་བསམ། དེ་ཕྱིར་འཁོར་ལོ་ཐོད་པས་མནན། ནག་པོ་གསལ་ཤིང་རྗེར་རྡོག་པར་བསམ། ལུག་ནག་རྗེ་ངར་དྲག་གཏོར་རྔན་པར་བྱིན། དེའི་སྟེང་དུ་མཁར་ཆེན་དག་གིས་མནན། དེའི་སྟེང་དུ་མཆོད་རྟེན་ནག་པོས་མནན། བདག་ཉིད་ཆོས་གོས་ནག་པོ་ཕྱིན་ཀ་ལོག་ལ་དྲག་སྔགས་ཁུར་དུ་ཁུར། ན་ཁས་དྲག་སྔགས་བཟློས་ཤིང་པར་བུ་ཁྲམ་ཤིང་ཐོགས། རྡོ་རྗེས་སྤྱང་ཁུས་དབྱུང་ཅིང་བསྐོར་བ་ཕྱིན་ཅི་ལོག་ཏུ་བྱ། རྡོ་རྗེ་དུར་ཁྲོད་བདག་གི་སྟབ་བསྟོད་བྱ། དེ་ནས་དུར་ཁྲོད་གཡམ་པ་ནག་པོ་ནི། དུར་ཁྲོད་སོལ་བས་རྡོ་རྗེ་རྒྱ་གྲམ་བྲི། ལྟེ་བའི་མཚམས་སུ། ༀ་ལཾ་ཧཱུྃ་ལཾ་སྟམས་པ་ནན་བྲི། ལྟེ་བར། ར་དབུས་ལྔ་ལ། ཧྲི་པ་ཏ་ཡན་བྲི། ཕྱི་རོལ་རྡོ་རྗེ་རྒྱ་གྲམ་བ རྩེ་བཞི་མཚམས་བཞི་ལ། ༀ་རུ་ལུ་ཁ་པ་སྟམས་པ་ནན་བྲི། གཡམ་པ་ནག་པོ་དག་གིས་ཁ་བཅད་མནན། འཐས་པར་བཅག་པ་འོ་མ་ཙན་དན་དག་གི་ཆག་ཆག་འདབ། དེ་ནས་གོམ་པ་ཉི་ཤུ་རྩ་གཅིག་ཕྱིར་དཔག་ལ། སྲིད་པའི་མདའ་བཞི་འཕང་ཞིང་། དེ་ནས་ཟོར་འཕང་། རུ་ཟོར་འཕང་། ཟོར་གྱི་ལྟས་རྟག །ངན་ན་སྤོགས་པ་བྱ། འདི་གཏད་ཁྲམ་མནན་པའི་དཀྱིལ་འཁོར་རོ། །བདག་པས་བློ་དམན་དོན་ཆེད་དུ། །འཁོར་ལོ་གཏད་ཁྲམ་རིམ་པ་ཙམ། །འདི་བྱས་བསོད་ནམས་ཕྱི་རབ་སྒྲུབ་པ་པོས། །ཡིད་ལ་ཇི་ལྟར་བསམ་པ་འགྲུབ་པར་ཤོག །གཏད་ཁྲམ་མནན་པའི་དལ་གྱི་མན་ངག །སློབ་དཔོན་ཏི་ར་མ་ཏིའི་དགོངས་པ་རྫོགས་སོ། ༈ །ད་ནི་མནན་ནོ་འོག་ཏུ་མནན། །རི་རབ་ཆེན་པོའི་འོག་ཏུ་མནན། །བསྲེག་གོ་བསྲེག་གོ་དཀྱིལ་དུ་བསྲེག །མེ་དཔུང་འབར་བའི་དཀྱིལ་དུ་བསྲེག །མནན་ནོ་མནན་ནོ་འོག་ཏུ་མནན། །རྒྱ་མཚོ་ཆེན་པོའི་འོག་ཏུ་མནན། །སྐྱོན་ནོ་སྐྱོན་ནོ་རྒྱབ་ཏུ་སྐྱོན། །རྔ་མོང་གྭ་པའི་རྒྱབ་ཏུ་བསྐྱོན། །བསྐུར་རོ་བསྐུར་རོ་ཕྱོགས་སུ་བསྐུར། །རླུང་ནག་འབར་བའི་ཕྱོགས་སུ་བསྐུར། །སྟོབ་པོ་སྟོབ་པོ་ཁ་རུ་སྟོབ། །ཆུ་སྲིན་འབར་བའི་ཁ་རུ་སྟོབ། །ཕྱེ་ཞིག་ཕྱེ་ཞིག་ཞལ་ཕྱེ་ཞིག །ས་བདག་ནག་པོ་ཞལ་ཕྱེ་ཞིག །དམ་ཉམས་དགྲ་བོ་ཞལ་དུ་རོལ། །ས་བདག་ཆེན་པོ་གདུག་པའི་ལུས། །སྤྲུལ་པ་ཆེན་པོའི་འགྱུར་མེད་ལུས། །མཚོན་ཆ་སུམ་བརྒྱ་དྲུག་ཅུ་འཕྲོས། །ནག་པོ་འཛིན་ཤེས་གཏོང་མི་ཤེས། །དམ་ཉམས་དགྲ་བགེགས་མ་བཏང་ཅིག །ༀ། གཟི་ལྡན་འབར་བའི་དཀྱིལ་འཁོར་ནས། །ཁྲོ་བོའི་རྒྱལ་པོ་གྱིང་ཀ་ར། །ཁྲོ་མོ་ཁམས་གསུམ་དབུགས་བསྡུད་བཅས། །སྤྱན་བཟློག་པས་ནི་ཁམས་སུ་གཟིར། །ཞབས་རྣམས་སྡབས་པས་ལྷ་བརྒྱད་འགྱེད། །ཕྱག་རྣམས་བསྐྱོད་པས་སྤྲུལ་པ་འགྱེད། །དབུ་གསུམ་བསྐྱོད་པས་རི་རབ་འགྱེལ། །ཞལ་རྣམས་གདེངས་པས་ཁམས་གསུམ་སྒྲོལ། །མཆེ་བ་གཙིགས་པས་སྐྱེ་ཤི་བཅོམ། །མེ་དཔུང་འབར་བས་ཁམས་གསུམ་བསྲེག །ཁྲོ་བོ་ཁྲོ་མོའི་སྤྲུལ་པ་འཁྲིགས། །བརྗིད་ལྡན་དོན་འགྲུབ་ད་ལ་འདུ། །རྡོ་རྗེ་རྒྱ་གྲམ་བརྗིད་མནན་ཞབས། །རྡོ་རྗེ་རྟ་བྲོ་ཁྱུང་གཤོག་གདེངས། །ཤངས་ནས་རླུང་ནག་ཚུབ་མ་འཕྲོ། །ཞལ་ནས་གདུག་པའི་སྔགས་ཟོར་འཕྲོ། །རྐང་མཐིལ་འབར་བའི་རྟ་བྲོ་རྡུངས། །གསུང་གི་ང་རོ་རྟ་སྐད་འཚེར། །དམ་ཉམས་སྙིང་རྩ་གཅོད་པའི་བྲོ། །ནོན་ཅིག་དགྲ་བོ་འོག་ཏུ་གཟིར། །ༀ་བཛྲ་ཀྲོ་ཏ་ཛྭ་ལ་ས་མ་ཡ། །དམ་ཉམས་སྟྭཾ་པ་ཡ་སྟཾ་པ་ཡ་ཧཱུྃ་ཛཿཛཿ ཧཱུྃ། དྲག་པོ་རླུང་གི་ད་ལ་ནས། །གནོད་སྦྱིན་ཆེན་པོ་བརྒྱ་མདུད་མགོ །བསེ་གདོང་ཟངས་མགྲིན་གནོད་སྦྱིན་མོ། །སྤྱན་བགྲད་དགྲ་བོའི་ཡུལ་དུ་བལྟ། །རྐང་པས་དགྲ་བོ་མ་ལུས་མནན། །ལག་པས་དགྲ་ལ་སྤྲུལ་པ་གཏོང་། །མགོ་བོས་དགྲ་བོའི་ལྡེམ་བུ་སྟིབ། །ཁ་གདོང་དམ་ཉམས་ཁོལ་བུར་གསོལ། །མཆེ་བ་དྲག་པོས་སྙིང་རྩ་གཅོད། །རླུང་ནག་འབར་བས་དགྲ་བགེགས་བསྲེག །གནོད་སྦྱིན་ཕོ་མོའི་སྤྲུལ་པ་འཁྲིགས། །བརྗིད་ལྡན་གཤིན་རྗེའི་ད་ལ་འདུ། །མདུང་བརྩེ་རྐང་བརྗིད་སྲིན་པོ་གནོན། །གནོད་སྦྱིན་སེང་ཆེན་ཁྱུང་གཤོག་སྡེངས། །སྣ་ནས་མེ་ཡི་ཚ་ཚ་འཕྲོ། །ཞལ་ནས་དྲག་པོའི་སྔགས་ཟོར་འཕྲོ། །རྐང་པ་འབར་བའི་སེང་བྲོ་རྡུངས། །གསུང་གི་ང་རོས་སེང་སྐད་འཚེར། །དམ་ཉམས་སྙིང་རྩ་གཅོད་པའི་བྲོ། །གནོད་ཅིག་ཡཀྴ་དམ་ཉམས་གནོན། །ཡཀྴ་ཛྭ་ལ་ས་མ་ཡ། །དམ་ཉམས་སྟམྦྷ་ནི་སྟམྦྷ་ནི། ཧཱུྃ་བཛྲ་བཛྲ། ཧཱུྃ། མེ་དཔུང་འབར་བའི་དཀྱིལ་འཁོར་ནས། །སྲིན་པོ་རཀྴ་འདུལ་བའི་སྐུ། །སྲིན་མོ་གདུག་པ་གཡོན་དུ་འཁྲིལ། །མིག་གཅིག་ཁམས་གསུམ་མ་ལུས་བལྟ། །མ་ལུས་རྐང་པས་ཕྱོགས་བཅུར་སླེབ། །རྫུ་འཕྲུལ་རྐང་པ་ཕྱོགས་བཅུར་ཁྱབ། །མགོ་ལུས་ཁམས་གསུམ་ས་དགུ་སྙིལ། །ཁ་ནས་ཞེ་སྡང་དུག་མཚོ་རྔུབ། །མཆེ་བས་དགྲ་བོའི་ལོངས་སྤྱོད་གཅོད། །མེ་དཔུང་འབར་བས་དགྲ་བགེགས་བསྲེག །སྲིན་པོ་སྲིན་མོ་སྤྲུལ་པར་འཁྲིགས། །དབང་བསྡུད་མེ་ཡི་དཀྱིལ་འཁོར་ནས། །རྐང་མེད་ཁ་གདངས་ཀུན་ཏུ་རྒྱུག །སྲིན་པོ་ཁྱུང་ཆེན་སྤྲུལ་གཤོགས་གདེངས། །སྣ་ནས་ཆུ་ཡི་སེར་ཆེན་འཕྲོ། །ཁ་ནས་དྲག་པོའི་གཟེར་ཆེན་འཕྲོ། །རྐང་པ་འབར་བས་ཁྱུང་བྲོ་བརྡུངས། །ཁྱུང་གི་ང་རོས་ཁྱུང་སྐད་གདེངས། །དམ་ཉམས་ཤན་པ་བྱེད་པའི་བྲོ། །ནོན་ཅིག་སྲིན་པོས་དགྲ་བོ་ནོན། །རཀྴ་ཛྭ་ལ་ས་མ་ཡ་དམ་ཉམས་སྟཾ་པ་ནི་ཡ་སྟམ་བྷ་ནི་ཧཱུྃ་ཛཿཛཿ ཧཱུྃ། ཁྲག་དང་ཞག་གི་དཀྱིལ་འཁོར་ནས །མ་མོ་ཆེན་མོ་རྔམ་པའི་སྐུ། །མང་པོ་དབང་སྡུད་དག་དང་རོལ། །མིག་གཅིག་མས་ནི་ཁམས་གསུམ་ཉུལ། །རྫུ་འཕྲུལ་རྐང་པས་ཕྱོགས་བཅུར་སླེབ། །ལག་པས་འཇིག་རྟེན་ཉུལ་བྱེད་པ། །སྤྱི་གཙུག་སྤྲུལ་པའི་འཕྲོ་འདུ་ཅན། །ཞལ་ནས་དྲག་པོའི་སྔགས་ཟེར་འཕྲོ། །མཆེ་གཙིགས་དྲག་པོའི་རྐན་སྒྲ་སྡེབས། །རླུང་འཚུབ་དགྲ་བོ་རླུང་ལ་བསྐུར། །ཟ་བྱེད་མ་མོའི་སྤྲུལ་པ་འགྱེད། །ཕུང་བྱེད་ཁྲག་གི་རིམས་ནད་གཏོང་། །གར་གྱི་གོམ་པས་ཀུན་ཏུ་རྒྱུག །མ་མོ་དྲེད་མགོ་ཞིང་ཆེན་གཤོག །སྣ་ནས་ནད་ཀྱི་བུ་ཡུག་འཕྲོ། །ཞལ་ནས་དྲག་པོའི་སྔགས་ཟེར་འཕྲོ། །རྐང་མཐིལ་འབར་བས་དྲེད་མོའི་བྲོ། །སྨྲ་བ་ལྡབ་ལྡིབ་བཤུག་གླུ་ལེན། །ནད་ཀྱི་རྐྱལ་པ་སྡེབས་རེ་རན། །རིམས་ཀྱི་གྲུ་གུ་ཕྱག་ན་ཐོགས། །ནོན་ཅིག་མ་མོས་དགྲ་བགེགས་ནོན། །ཙིཏྟ་ཛྭ་ལ་ས་མ་ཡ་ཤ་ཏྲུཾ་སྟཾ་བྷ་ནི་སྟྭཾ་བྷ་ནི་ཧཱུྃ་ཛ་ཛཿ མགོན་པོའི་རྟ་བྲོ་རྫོགས་སོ། །དཔལ་ལྡན་བླ་མ་དམ་པའི་༼བསེ་སྟོན་རིན་ཆེན་རྒྱལ་མཚན་གྱི༽ ཕྱ་དཔེ་། གླན་བན་དཔལ་ལྡན་མགོན་གྱིས། གཞིས་ཀ་རིན་ཆེན་སྤུངས་པའི་མཁར་དུ། སྟེང་གི་སྐྱེད་ཚལ་དུ་བཞུགས་ཚེ་བྲིས་པ་ལགས་སོ། །དཔལ་སྒྲོལ་བྱེད་ཐུགས་རྗེའི་རྒྱལ་པོ་ཤིན་ཏུ་རྣམ་པར་གྲོལ་བ་ཉིད་ལ་ཕྱག་འཚལ་ལོ། །དཔལ་མགོན་པོ་ཆེན་པོའི་ལས་བཞི་སྔོན་ཕྱུང་པའི་མན་ངག་སྲོག་གི་རྒྱས་གདབ་ལ། །གཟེར་བཞི་བཏབ་ལ་ལས་བཞི་སྔོན་དུ་དབྱུང་། །དང་པོའི་ལས་ནི་རྣམ་པ་གསུམ། །ལྟ་བའི་སྟོབས་དང་བཤགས་སྦྱངས་སྟོབས། །ཕྱག་རྒྱའི་སྟོབས་ཀྱི་བཞི་པའོ། །སེམས་ཀྱི་དཀྱིལ་འཁོར་གསལ་བ་ཡིས། །ཇི་བཞིན་དེ་ཉིད་མ་བཅོས་ན། །དང་པོ་གཞི་ལ་གནས་བྱས་ཀྱང་། །དེ་ཉིད་གསང་སྔགས་ངོ་བོའི་ཕྱིར། །རྡོ་རྗེ་སེམས་དཔའི་རང་བཞིན་ལ། །ནམ་མཁའ་ལ་ནི་སྤྲིན་བཞིན་ཏེ། །དེ་ནི་རྣལ་འབྱོར་དམ་པའི་ལམ། །ཡོན་ཏན་མཚན་གྲངས་མང་དུ་ངེས། །དེ་ཡང་འདི་ལྟར་ཤེས་པར་བྱ། །སྣ་ཚོགས་སྣང་བ་སེམས་ཡིན་ནོ། །གསལ་རིག་རང་བྱུང་ངོ་བོར་གནས། །དཀྱིལ་ཞེས་རང་བྱུང་སྤྲོས་དང་བྲལ། །རྣམ་པ་མེ་ལོང་འོད་བཞིན་འཁོར། །ཐིག་ལེ་རང་བཞིན་ཡེ་ཤེས་གསལ། །གནས་ལུགས་ཇི་བཞིན་ཉིད་དེ་ལ། །ཡུལ་རྟོག་བློ་ཡིས་མ་བཅོས་ན། །ཇི་ལྟར་སྣང་བ་གནས་ལུགས་ཉིད། །འདོད་པའི་ཡོན་ཏན་ལྔ་སྤྱོད་ཀྱང་། །འཆིང་བར་མི་འགྱུར་རང་སར་གྲོལ། །དེ་ཉིད་སྤྱོད་ཡུལ་མིན་པས་གསང་། །ཡོན་ཏན་འབྱུང་གནས་ཉིད་དུ་བསྔགས། །མི་དམིགས་ངང་ལས་ཀུན་འབྱུང་བས། །ངོ་བོ་ཉིད་ཅེས་བརྗོད་པར་ཟད། །རྒྱུ་རྐྱེན་གཉེན་པོ་མེད་པ་དང་། །འཕོ་འགྱུར་སྐྱེ་འགག་མེད་པ་ཡིས། །མཚན་མ་བདག་རྟོག་བཅོམ་པའི་ཕྱིར། །རྡོ་རྗེ་ཞེས་སུ་བཤད་པ་ཡིན། །བདག་མེད་ཡུལ་བྲལ་མ་བཅོས་པ། །གསལ་སྟོང་རིག་པའི་ཡེ་ཤེས་ཏེ། །དངོས་པོ་ཀུན་བཅོམ་པ་ཞེས་བརྗོད། །རང་བཞིན་དེ་ལྟར་མཐོང་བ་ལ། །ནམ་མཁའི་སྤྲིིན་དང་ཆོ་འཕྲུལ་ལྟར། །སྣ་ཚོགས་མ་འགགས་རང་ཤར་ནས། །རང་སྣང་རང་གྲོལ་འགྱུར་སྙམ་མེད། །དེ་ནི་རྣལ་འབྱོར་དམ་པའི་ལམ། །བདུད་རྟོག་འཁྲུལ་པ་རང་ཞིག་ནས། །མི་མཐུན་གཉེན་པོ་རང་གྲོལ་ཏེ། །ཐམས་ཅད་སེམས་ཀྱི་ངང་དུ་ཞི། །རང་ལུས་རྒྱལ་བའི་ཕྱག་རྒྱར་གསལ། །རང་སྣང་ལྷར་བསྒོམ་སྙིང་ཁར་ཧཱུྃ། །བགེགས་བསྐྲད་ཕྱོགས་བསྲུང་དུལ་སྤྲུལ་ཏེ། །བཤགས་སྦྱངས་མཆོད་ཅིང་ཐུགས་དམ་བསྐུལ། །བཤགས་བཀྲུས་བུམ་པའི་ལུང་གསུམ་གྱི། །ཞི་བ་ཆེན་པོའི་དངོས་གྲུབ་ཐོབ། །ༀ་བཛྲ་དྷྲིག །མ་སུརྻ་མཎྜ་ལ་ཧཱུྃ། །ཨེ་རཾ། ཛྭ་ལ་རཾ། ཕཊ་རཾ། བཛྲ་བཛྲ་བཛྲ། །རཾ་ཡྃ་ཡྃ། ཧཱུྃ་ཧཱུྃ་ཧཱུྃ་ཧཱུྃ། བྷྲཱུཾ་བི་ཤྭ་བི་ཤུདྡྷེ་རཏྣ་སུརྱ། པདྨ་མཎྜ་ལ་ཧཱུྃ། ༀ་བཛྲ་ས་ཏྭ་ཨ ། ས་མན་ཛ་ཡིས་དབང་པོ་དགུག །ཞི་ཁྲོ་འབར་བའི་དཀྱིལ་འཁོར་དང་། །བླ་མ་རིག་འཛིན་བསྲུང་མར་བཅས། །ཡེ་ཤེས་སེམས་དཔའི་གནས་སུ་སྟིམ། །དང་པོའི་རྡོ་རྗེ་སེམས་དཔའ་ནི། །དྲི་མེད་དུང་མདོག་རྣམ་དག་ལ། །འོད་ཟེར་ཉི་མ་འབུམ་བརྡལ་ཞིང་། །ཡེ་ཤེས་སྐུ་གསུང་ཐུགས་དང་ལྡན། །རིན་ཆེན་མཛེས་པའི་རྒྱན་གྱིས་བརྒྱན། །སྐུ་སྟོད་དར་དཀར་སྟོད་གཡོགས་ལ། །སྐུ་སྨད་བ་ཏིའི་ཚེ་དགུ་གསོལ། །གཡས་པ་ཤེལ་གྱི་རལ་གྲི་ལ། །ཡུ་བ་གསེར་གྱི་རྡོ་རྗེས་བརྒྱན། །གཡོན་པ་བདུད་རྩིའི་བུམ་པ་ལ། །ཁ་བརྒྱན་ནོར་བུ་རིན་ཆེན་མཛེས། །བྱང་ཆུབ་སེམས་ཀྱི་ཆུ་རྒྱུན་ལ། །གསུང་གི་གཟུགས་བརྙན་ཕྲེང་བར་བབས། །དྲ་བའི་རྒྱ་མིག་བཅད་པ་དང་། །ཉེས་པའི་དྲི་མ་ཀུན་དག་ནས། །ཐུགས་ཀྱི་བདེ་བ་རང་འབར་ཏེ། །དངོས་གྲུབ་སྣོད་དུ་རུང་བར་བསམ། །ༀ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏེ་ནོ་པ་ཏིཥྛ། ཌི་དྷོ་མེ་བྷ་ཝ། སུ་ཏོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོ་ཥྱོ་མེ་བྷ་ཝཿ སརྦ་སིདྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲི་ཡན་ཀུ་རུ་ཧཱུྃ། ཧ་ཧ་ཧ་ཧ་ཧོ། བྷ་ག་ཝན་སརྦ་ཏ་ཐཱ་ག་ཏ། བཛྲ་མ་མེ་མུཉྩ། བཛྲ་སྭ་བྷ་ཝ། མ་ཧཱ་ས་མ་ཡ་ས་ཏྭ་ཨཱཿ རབ་ནི་རྟག་ཏུ་དུས་གཅིག་ལ། །བརྒྱ་རྩ་བརྒྱད་ཀྱི་བར་མ་བཅད། །འབྲིང་ནི་ཉིན་གསུམ་མཚན་གསུམ་དུ། །ཉིན་ཞག་གཅིག་ལ་དུས་དྲུག་དྲན། །ཐ་མ་ཉིན་ཞག་རེ་རེ་ལ། །བརྒྱ་རྩ་རེ་རེ་མ་དྲན་ན། །དངོས་གྲུབ་དམ་པའི་ཡུལ་མིན་ནོ། །རྣལ་འབྱོར་དམ་པར་གྱུར་པ་ན། །རང་གི་ལུས་ནི་རྡུལ་སྙེད་སྤྲོ། །དབང་པོ་ནམ་མཁའི་རང་བཞིན་ལ། །བྱང་ཆུབ་སེམས་ཀྱི་གསུང་རྒྱུན་གསལ། །གསལ་གསུམ་དག་པའི་རྣལ་འབྱོར་པས། །བཤགས་པའི་འབྲས་བུས་ཡིད་ཆེས་སྦྱངས། །ཡེ་ཤེས་ཕུན་སུམ་ཚོགས་པའི་རྒྱལ་བ་རྣམས། ། རྡོ་རྗེ་སེམས་དཔའི་དམ་ཚིག་ཡིད་སྐྱོབ་ཅིག །རྡོ་རྗེ་སེམས་དཔའ་ཉེ་ཞིང་བརྟན་པར་མཛོད། །བདེ་བར་གྱུར་ཅིག་ཀུན་ཏུ་བདེ་གྱུར་ཅིག །ཤིན་ཏུ་བདག་ལ་ཐུགས་རྗེས་ཆགས་པར་མཛོད། །བདག་ཉིད་ཤིན་ཏུ་བདེ་བར་མཛད་གྱུར་ཅིག །དངོས་གྲུབ་ཐམས་ཅད་བདག་ལ་སྩོལ་མཛོད་ཅིག །ཕྲིན་ལས་ཐམས་ཅད་དག་པར་མཛོད་ཅིག་བདག །སེམས་ཉིད་དཔལ་དུ་མཛོད་ཅིག་ཐུགས་དགྱེས་བདེ། །བཅོམ་ལྡན་དེ་བཞིན་གཤེགས་པ་ཐམས་ཅད་ཀུན། །རྡོ་རྗེ་ཐུགས་ཀྱི་དཀྱིལ་དུ་བདག་དྲིལ་ཅིག །རྡོ་རྗེ་འབྱུང་བ་ཆེན་པོའི་དམ་ཚིག་གི། །སེམས་དཔའ་སྐྱེ་མེད་ཀློང་དུ་དག་པར་མཛོད། །ༀ་ཏ་ཀེཾ་ཏ་ཀེཾ་ཕཊ། ཧ་ལ་ཧ་ལ་རཾ། ཀྲོ་ཏ་ཀྲོ་ཏ་ཡྃ། ཏིཥྞ་ཏིཥྞ་ཁཾ། བླ་མ་དཀོན་མཆོག་རིག་འཛིན་རྩལ་འཆང་། དམ་ཅན་རྒྱ་མཚོ་ཆོས་སྐྱོང་བསྲུང་མ་ཡེ་ཤེས་ཀྱི་སྤྱན་དང་། ཐུགས་རྗེའི་ཞབས་དང་། རྫུ་འཕྲུལ་གྱི་སྙན་དང་ལྡན་པ་རྣམས་ཀྱི་སྤྱན་ལམ་དུ་མི་མཛེས་པ་ཐམས་ཅད་མཐོལ་ལོ་བཤགས་སོ། །ཚེ་རབས་ཐོག་མ་མེད་པ་ནས་ལས་ཀྱི་སྒྲིབ་པ་ཐམས་ཅད་ཤིནྟཾ་ཀུ་རུ་ཡེ་སྭཱ་ཧཱ། ཉམས་སྒྲིབ་སྡིག་སྒྲིམ་ཤིཾནྟ་ཀུ་རུ་ཡེ་སྭཱ་ཧཱ། འགྲེ། ནལ་གྲིབ༴ རྣོལ་གྲིབ་ཤིཾནྟ༴ ལོག་སྒྲིབ༴ མནའ་གྲིབ་ཤིཾནྟ༴ ལས་གྱི་སྒྲིབ་པ་དང་། ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་དང་། ལྟ་བ་དམན་པའི་སྒྲིབ་པ་དང་། །ཆོས་ཀྱི་འཕོངས་པའི་སྒྲིབ་པ་ཐམས་ཅད་ཤིཾནྟ་ཀུ་རུ་ཡེ་སྭཱ་ཧཱ། ནད་བཞི་བརྒྱ་རྩ་བཞི་ཤིཾནྟ་ཀུ་རུ༴ བགེགས་རིགས་སྟོང་ཕྲག་བརྒྱད་བཅུ་ཤིཾནྟ་ཀུ་རུ༴ ཡེ་འགྲོགས་སུམ་བརྒྱ་དྲུག་ཅུ་ཤིཾནྟ༴ རྐྱེན་ངན་ཉི་ཁྲི་ཆིག་སྟོང་། །རྣལ་འབྱོར་པ་བདག་གི་ལུས་ལ་ནད་དང་། མཚོན་དང་། མུ་གེ་དང་། རྨི་ལམ་ངན་པ་དང་། མཚན་ལྟས་ངན་པ་དང་། ལོ་སྐག་དང་། ཟླ་སྐག་དང་། ཀིང་ཀང་དང་། གཤེད་བཞི་དང་། ཕྱོགས་ནག་པ་དང་། རྒྱུ་སྐར་མི་མཐུན་པ་དང་། གནོད་སེམས་དང་། གདུག་སེམས་དང་། སྡང་སེམས་ཀྱིས་ཀུན་ནས་བླང་བའི་མི་ཁ་དང་། དགྲ་བགེགས་ལ་སོགས་པ་ཚེ་རབས་ཀྱི་ལས་ངན་པ་དང་། འཕྲལ་གྱི་རྐྱེན་ངན་གྱིས་ལུས་ལ་གནོད་ཅིང་སེམས་ལ་གཟིར་བར་བྱེད་པའི་བཀྲ་མི་ཤིས་པ་ཐམས་ཅད་ཤིཏྣཾ་ཀུ་རུ་ཡེ་སྭཱ་ཧཱ། ༀ་སྭཱ་བྷ་ཝ་ཤུདྡྷ་སརྦ་དྷརྨཱཿསྭ་བྷ་ཝ་ཤུདྡྷོ྅་ཧཾ། ༀ་ན་མ་སརྦ་ཏ་ཐཱ་ག་ཏ་བྷྱོ། བ་ིཤྭ་མུ་ཁེ་བྷྱ། ས རྦ་ཏད་ཁཾ་ཨུངྒ་ཁཾ་ཏེ་སྥ་ར་ཎ་ཧི་མཾ་ག་ག་ན་ཁཾ་ས་མ་ཡེ་སྭཱ་ཧཱ། ར་རཏྣ་མཎྜ་ལ་ཏྲཾ་སྥ་ར་ཎ་ཕཊཿ སྃ་ཧ་ར་ན་ཧཱུྃ། ཏྲྃ་རཏྣ་ཏྲཻ་ལོ་ཀྱ་ༀ་ཨཱཿཧཱུྃ། ན་མོ་གུ་རུ་སརྦ་ཏ་ཐཱ་པུཥྤེ་པཱུ་ཙ་མེ་གྷ་ས་མུནྟྲ་སྥ་ར་ན་ཨི་མཾ་ག་ག་ན་ཁཾ་ས་མ་ཡེ་སྭཱ་ཧཱ། བདག་ཉིད་དཔལ་ཆེན་པོའི་མཆོད་པ་འདི། །རང་རིག་ཡེ་ཤེས་དབང་པོ་གསལ། །རང་ལུས་རིན་ཆེན་སྤྲུལ་པས་མཆོད། །ནམ་མཁའི་མཐའ་དང་མཉམ་པ་ཡིས། །ཕྱི་ནང་གསང་བའི་རྟེན་མཆོད་རྣམས། །ཀུན་ཏུ་བཟང་པོའི་མཆོད་སྤྲིན་གྱིས། །མི་ཟད་རྒྱན་གྱི་འཁོར་ལོ་རུ། །བདག་ཉིད་ཆེན་པོས་མཉེས་མཆོད་བསྔོ། །ༀ་ན་མོ་སརྦ་ཏ་ཐཱ་ག་ཏེ་བྷྱོ། བི་ཤྭ་མུ་ཁེ་བྷྱེ། སརྦ་ཏད་ཁཾ་ཨུདྒ་ཏེ་སྥ་ར་ན་ཧི་མཾ་ག་ག་ན་ཁཾ་སྭཱ་ཧཱ། ཕྱི་ནང་གསང་བའི་གྲངས་བཞིན་དུ། །ཏིང་འཛིན་སྔགས་ཀྱི་སྔོན་གསུམ་མཆོད། །ཧོཿ རྒྱལ་བ་རྒྱ་མཚོ་ཐམས་ཅད་དགོངས་སུ་གསོལ། །མཆོད་པ་རྒྱ་མཚོ་བཞེས་སུ་གསོལ། །ཐུགས་དམ་རྒྱ་མཚོ་ཐམས་ཅད་བསྐང་དུ་གསོལ། །དངོས་གྲུབ་རྒྱ་མཚོ་ཐམས་ཅད་སྩལ་དུ་གསོལ། །ཕྲིན་ལས་རྒྱ་མཚོ་ཐམས་ཅད་མཛད་དུ་གསོལ། །ན་མོ་གུ་རུ། དུས་གསུམ་གྱི་བླ་མ་རིན་པོ་ཆེ་རྣམས་ལ་སྐྱབས་སུ་མཆི། སྐྱབས་ཆེན་ལྷ་ཇོ་བོ་དཀོན་མཆོག་གསུམ་གྱིས་བྱིན་གྱིས་བརླབ་ཏུ་གསོལ། རྩ་བ་དང་བརྒྱུད་པའི་བླ་མ་རིག་འཛིན་རྣམས་ཀྱི་བྱིན་གྱིས་བརླབ་ཏུ་གསོལ། དངོས་གྲུབ་ཐམས་ཅད་ཀྱི་རྩ་བ་དང་བསྒྲུབ་མཆོག་ཡི་དམ་གྱི་ལྷའི་བྱིན་གྱིས་བརླབ་ཏུ་གསོལ། མཐུ་སྟོབས་ནུས་པ་ཕུན་སུམ་ཚོགས་པ་དམ་པ་ཆོས་བསྲུང་བའི་སྲུང་མ་རྣམས་ཀྱིས་བྱིན་གྱིས་བརླབ་ཏུ་གསོལ། ཁྱེད་ཀྱི་སྐུ་གསུང་ཐུགས་ཀྱི་དངོས་གྲུབ་ད་ལྟ་ཉིད་དུ་ཐོབ་པར་མཛོད་དུ་གསོལ། མཐུ་བསྟན་དུ་གསོལ། དབང་བསྐུར་དུ་གསོལ། རྩ་བའི་བླ་མ་བྱིན་རླབས་ཅན། རྒྱུད་པའི་བླ་མ་བྱིན་རླབས་ཅན། རང་བྱུང་གི་བླ་མ་འོད་གསལ་ཅན། བདེ་ཆེན་སྐུ་དང་དྲི་མེད་གསུངས། །སྐྱེ་མེད་ཐུགས་ཀྱི་བྱིན་གྱིས་བརླབ་དུ་གསོལ། །ལུས་བདེ་ཆེན་རང་འབར་དུ་བྱིན་གྱིས་རླབས༴ །ངག་ནུས་པ་ཐོག་མེད་དུ༴ སེམས་རྟོགས་པ་ཀུན་གྲོལ་དུ་བྱིན་གྱིས་རླབས་དུ་གསོལ། །ༀ་ཨཱཿ་ཧཱུྃ། ལུས་ངག་ཡིད་གསུམ་རྩེ་གཅིག་ཏུ། །བསྐུལ་ཞིང་གསོལ་བ བཏབ་པ་ཞུ། །སྐྱབས་གནས་གསུམ་གྱི་གནས་གསུམ་ནས། །འབྲུ་གསུམ་བྱིན་རླབས་མཚོ་རྒྱུན་བཞིན། །འཇིག་རྟེན་འོད་ཀྱི་ཁེངས་པ་ལ། །བདག་ཉིད་ཀུན་ཏུ་བཟང་པོར་བསྐྱེད། །ཡོངས་སུ་རྫོགས་པའི་སྐུ་ཉིད་གསལ། །ༀཨཱཿཧཱུྃ། ཧཱུྃ་ཧཱུྃ་སརྦ་ཏ་ཐཱ་ག་ཏ་བཛྲ་ཙིཏྟ་ༀ། ཀུན་བཟང་ཞལ་གསུམ་ཕྱག་དྲུག་པ། །མཐིང་ཀ་སྐུ་གསུང་ཐུགས་དང་ལྡན། །གཡས་དཀར་གཡོན་དམར་དབུས་མཐིང་ཞལ། །རང་བྱུང་རིགས་ལྔས་དབུ་ལ་བརྒྱན། །གཡས་ཀྱི་དང་པོ་བསྣམས་པ་ནི། །གསེར་གྱི་རྡོ་རྗེ་རྩེ་དགུ་ལ། །བར་པ་ཁ་ཊྭྃ་རྩེ་གསུམ་འཕྱར། །ཐ་མ་བྷནྡྷ་སྟག་སྤྲོད་རྔ། །གཡོན་གྱི་དང་པོ་བྷན་དམར་གསོལ། །བར་པ་སྲིན་པོའི་རྒྱུ་ཞགས་ལ། །ཐ་མ་དྲིལ་བུ་ཁྱུང་ཁྲར་བཅས། །དུར་ཁྲོད་ཆས་དང་ལྡན་པ་ལ། །རིན་ཆེན་སྣ་ཚོགས་བརྒྱན་གྱིས་སྤྲས། །སྐུ་གསུང་ཐུགས་དང་ཡོན་ཏན་ལས། །ཞི་ཁྲོ་འབར་བའི་དཀྱིལ་འཁོར་རྫོགས། །མཉམ་ཉིད་རྫོགས་པའི་ཚུལ་དུ་བཞུགས། །རྒྱ་ཁྱོན་ནམ་མཁའི་མཐའ་དང་མཉམ། །ཤེས་བྱའི་ད་ལ་ཡོངས་རྫོགས་ཡིན། །ཡི་དམ་རྒྱུན་ཁྱེར། ཨཐྎ། ཞི་བ་རྐྱང་པ་ལས། འཇིག་རྟེན་འོད་ཀྱི་ཁྱབ་པ་ལས། །ཅེས་པ་ཡན་ཆད་ཀྱི་དོན་གྲོལ། དེ་ལས་ཁྲོ་བོ་བྱེད་ན་ཀུན་བཟང་ཧེ་རུ་ཀར་བསྐྱེད་ལ། རུ་ལུ་བརྒྱ་རྩ་རེ་བགྲང་། རྒྱུན་བསྙེན་ལ་འཇུག་ན་ཞི་བའི་གཞལ་ཡས་ཁང་བསྐྱེད་པ་ཡན་བྱའོ། ། ༈ མདོ་མགོན་གྱི་སྒྲུབ་ཐབས་བཞུགས་སོ། ༈ །དཔལ་ཧེ་རུ་ཀ་ལ་ཕྱག་འཚལ་ལོ། །དང་པོ་མཎྜལ་བཅའ་བ་དང་། པུ་ཙ་ལྔ་དང་གཏོར་མ་སྨན་ཕུད་རཀྟ་བཤམ། མཚམས་བཅད་པ་དང་བྱིན་རླབས་སྤྱི་དང་མཐུན། ཕྲིན་ལས་གཞུང་སྲང་། འཛབ་བཟླས་བསྟོད་པ་བྱ། དེ་ནས་མདུན་དུ་ཀ་མཎྜ ལ་བྷྲུྃ། ཅེས་པ་དུར་ཁྲོད་ཀྱི་དབུས་སུ། ཀེང་རུས་རི་རབ་ཀྱི་སྟེང་དུ། ལྕགས་མཁར་ནག་པོ་ཟུར་གསུམ་བསྐྱེད། རྡོ་རྗེ་བྲག་དང་ཉི་མའི་གདན་ལ། རུ་ལས་རུ་ཏྲ། མ་ཧཱ་ཀ་ལ་གྷ་ན་པྲ་ཏི་ཧཱུྃ། ཅེས་པས་བསྐྱེད་ལ། དེ་ལ་བསྙེན་པའི་དུས་སུ་ནི་ཞལ་གཅིག་ཕྱག་བཞི་པའམ། ཕྱག་གཉིས་པ་གང་རུང་དུ་བསྐྱེད་ལ། ལས་ལ་སྦྱོར་བའི་དུས་ནི་ཕྱག་གཉིས་པ་ཁོ་ནའོ། །སྐུ་མདོག་སྔོ་ནག་ཞབས་གཉིས་དཔའ་བོ་རོལ་པའི་འདུག་སྟངས་སུ་རྐྱང་བསྐུམ་དུ་བཞུགས་པ། དབུ་སྐྲ་ཁམ་ནག་གྱེན་དུ་བརྫེས་པ་ཉི་ཟླས་བརྒྱན་པ། གླང་པོ་ཆེའི་ཀོ་རློན་དང་། ཞིང་གི་གཡང་གཞི་སྟག་གི་ཤམ་ཐབས། ཐོད་འཕྲེང་སྦྲུལ་ཆུན་གྱིས་བརྒྱན་པ། ཤངས་ཀྱི་དབྱིབས་མཐོ་བ། སྨིན་མ་གློག་ལྟར་འགྱུར་བ། ལྗགས་འདྲིལ་ཞིང་མཆེ་བ་བརྩིགས་པ། ཕྱག་གཡས་ཀྱི་དང་པོ་ཤེས་རབ་ཀྱི་རལ་གྲི། འོག་མ་ཙན་དན་གྱིི་བེང་ཆེན་ཁྱུ་མཆོག་གི་རྒྱལ་མཚན་སྤྲས་པ་བསྣམས་པ། གཡོན་གྱི་དང་པོ་ན་རྡོ་རྗེ་ཞགས་པ། འོག་མ་ན་རྩེ་གསུམ་པ་གདེངས་པ་བསྣམས་པའོ། །ཕྱག་གཉིས་པ་ནི། དར་བེར་སྔོ་ཁྲ་སྐུ་ལ་མནབས་པ། ཕྱག་གཡས་ན་ཙན་དན་གྱི་བེང་ཆེན་སྔོན་པོ། གཡོན་པ་ན་ཐོད་པ་ཁྲག་དང་བཅས་པའོ། །ལྗགས་འདྲིལ་ཞིང་རྐན་སྒྲ་ཏོག་པ་སེ་རལ་སྐེད་ལ་བཅིངས་པ། ཐོད་ཕྲེང་ལྕགས་སྒྲོག་གི་བརྒྱན་པའོ། །དེ་ནས་སྤྱན་དྲངས་པ་ནི། ལངྒ་ཅེས་པ་ནས། གཤེགས་སུ་གསོལ་ཅེས་པ་དང་སྔགས་ཀྱི་འཁོར་ལོ་དཔག་ཏུ་མེད་པ་དང་བཅས་བྱོན་པར་བསམ། དེ་ཡང་ས་གཡོ་བ་དང་། ལུས་འདར་བ་དང་། བ་སྤུ་ལྡང་བ་དང་། སྒྲ་འོད་ལ་སོགས་པ་བྱུང་བར་དུ་སྤྱན་དྲངས་བ་བྱའོ། །རྡོ་རྗེ་བྲག་ཆེན་ཅེས་པ་ནས། གཉིས་སུ་མེད་པར་སྟིམ་སྟེ་བཞུགས་སུ་གསོལ། དོན་དང་ལྡན་པའི་བསྟོད་པ་དང་། ཕྱག་གི་མཉེས་པར་བྱའོ། །དེ་ནས་མཆོད་པ་འབུལ་བ་ནི། སྤྲོས་པའམ་བསྡུས་པའི་ཚུལ་གྱིས་ཐུན་མོང་གི་པཱུ་ཙ་ལྔ་དབུལ་བར་བྱའོ། །ལ་དུ་ལ་ཕུག་ཅེས་པས་སྔགས་དང་བཅས་པས་གཏོར་མ་མཆོད་དོ། །དེ་ནས་དམ་ཚིག་དབོག་པ་ནི། རྡོ་རྗེ་ཅན་གྱི་རྣལ་འབྱོར་ཅེས་པས། བདུད་རྩིའི་ནང་དུ་འབྲུ་གསུམ་དཀར་དམར་མཐིང་གར་བསྒོམ། བདུད་རྩི་གཏོར་མས་ཚོགས་བདག་གི་གནས་གསུམ་དུ་འབྲུ་གསུམ་ཐིམ་པས་སྐུ་གསུང་ཐུགས་ཀྱི་དམ་ཚིག་ལས་མི་འདའ་བར་བསམ། ས་མ་ཡ་ཧོ། ས་མ་ཡ་སྟྭཾ། ཅེས་པས་ཁོའི་དམ་ཚིག་བླང་ནས་དམ་བཅས་པར་བསམ། ནར་བུ་ཚར་བུ་ཅེས་ཁོའི་མནའ་བླང་བར་བསམ། དེ་ནས་དམ་ཚིག་པ་བསྲེ་སྟེ། རྡོ་རྗེ་དྲི་བཅས་པས་བདག་གི་ལན་གསུམ་བླངས་ཁོ་ན་ལ་ཡང་བྱིན་པས། འབྲལ་བ་མེད་པར་གྲོགས་སུ་སམ། མ་ཧཱ་མཚོ་གླིང་ཅེས་པས་དམ་བརྡར། དེ་ནས་ཚོགས་ཀྱི་བདག་པོ་མཐུ་བོ་ཆེ་ཅེས་པས་ཐུགས་དམ་གྱི་རྒྱུད་བསྐུལ། བཟའ་བ་པོ་བཀུག་ལ་སྟིམ་ལ་བསྟབ་པ་བྱའོ། །ལག་ཏུ་མེ་ཏོག་ཐོགས་ལ་འདོད་ཡོན་གསོལ་ཏེ། ཐལ་མོ་གདབ་ལ་སྨོན་ལམ་བཏབ། བསྙེན་བསྒྲུབ་བཞི་དྲིལ་ལ་འཛབ་བྱའོ། །དེ་ནས་བཅོལ་རིང་བཏང་ངོ་། །གཏོར་མ་བཏང་། ལུས་སྲུང་བ་ལ་སོགས་པ་བྱའོ། །གཞན་ཡང་རྡོ་རྗེ་རོ་ལངས་འཁོར་དང་བཅས། །འབྲེལ་ཕྱིར་དེ་དག་དམ་ཚིག་ནི། །མ་ཧཱ་ཙི་ལ་སོགས། གསལ་ཤིང་བིང་དང་ཐོད་ཏྲི་ཤུལ། །རིམ་ལུགས་འབུར་གཤོས་གཞོང་སྐས་བྱ། །ཡན་ལག་བཞི་ལས་མཐུ་ཅན་ཉིད། །རྟག་ཏུ་བཅང་བར་བྱ་བ་ཡིན། །ཅེས་པས་སོ། །གྲི་རྒོད་སྙིང་ནང་དུ། སྔགས་བཞི་ག་བྲིས་ལ་བཅུག་ལ་རྟག་ཏུ་བཅང་། མཆོད་པའི་རྫས་ཤ་ཆེན་ལ་སོགས་པ་དང་། ལུས་ལ་ཚིལ་ཆེན་གུ་གུལ་བཅང་། སྐུའི་རྟེན་བྲིས་སྐུ་ལ་སོགས་པ་དང་། ཐུགས་ཀྱི་རྟེན་ཕྱག་མཚན། གསུང་གི་སྔགས་དང་གླེགས་བམ་དང་། གཞན་ཡང་། བེར་ནག་པོ་དང་། གཡག་རོག་པོ་ལ་བརྟེན་བཅའོ། །རྒྱུན་དུ་བྱས་ན་ལས་གང་ཡང་འགྲུབ་བོ། །བགེགས་གནོད་ལ་བྱ་ཀྱི་འཇུག་ན་གདོན་མ་ར་ཡ་ཕཊ་སྭཱ་ཧཱ། ཅེས་གདགས་གཞུང་བཞིན་སྤྱད་ན། འདི་དང་ཕྱི་མའི་དངོས་གྲུབ་ཐེ་ཚོམ་མེད་པར་འགྲུབ་བོ། །ཨཐྎ། དཔལ་ཧེ་རུ་ཀ་ལ་ཕྱག་འཚལ་ལོ། །དྲག་པོའི་ལས་ལ་སྦྱར་བ་ནི། བདག་ཉིད་དཔལ་ཆེན་པོ་ཡེ་ཤེས་ལྔ་དང་ལྡན་པས་བདག་གི་ཞལ་ནས་ཕར་སྔགས་ཀྱི་འོད་ཟེར་ཁ་དོག་ནག་པོ་འཕྲོས་པས། དེའི་སྣ་ལ་ལྕགས་ཀྱུའི་མཚན་པ་འཕྲོས་ཏེ། དྲག་པོའི་ཚད་ནི་གྱད་ཀྱི་མདའ་འཕང་པ་ལྟ་བུ་བསྒོམ། ལྷ་སྦྱིན་གྱི་རྒྱུད་ལ་ཕོག་པ་ནི་ལྕགས་ཀྱི་ཐོག་རྒྱབ་པ་ལྟ་བུའོ། །སྙིང་པོ་བྱང་ཆུབ་ཀྱི་བཅུད་བསྡུས་ཏེ་ཚུར་འདུས་པ་ནི་སྐུད་པ་དཀར་ནག་སྒྲིབ་ལ་ལྟ་བུའོ། །བདག་ཉིད་ལ་ཐིམ་པས་བདག་དཔལ་ཆེན་པོ་བཀྲག་མདངས་དང་ལྡན་པར་གྱུར་ཏེ། དགྲ་བོའི་ཚེ་སྲོག་དང་བཀྲག་མདངས་བདག་གི་ཐོབ་པའོ། །ཉོན་མོངས་པ་དང་བཅས་པའི་ཡིད་ཀྱི་ཕུང་པོ་ལྷག་མ་མཁའ་འགྲོའི་ཚོགས་ལ་བཏབ་པ་བྱས་ཏེ། འདི་ནི་ཡེ་ཤེས་ལྷའི་བཟླས་པ་ལ་སྦྱར་རོ། །ལས་ཀྱི་ལྷའི་བཟླས་པ་ལ་གསུམ་སྟེ། བསྙེན་པ་དང་བསྒྲུབ་པ་ལས་སྦྱོར་རོ། །དང་པོ་ལ་རྟེན་པ་བཤམས་ཏེ། དལ་ལ་བརྟེན་ནས་བསྒྲུབ་ན། སྟེགས་བུའི་ཁར་དལ་བྲི། ཡང་ན་ས་རྣམ་པ་གསུམ་ལ་མཁར་རྩིགས་ཏེ། ཆུ་རུ་ཁྲུ་གང་། ལོགས་བཞི་ལ་ལྟོ་དཀར་བཞི་བྱ། ཐོད་པས་མཚན་པར་བྱའོ། །རུ་མཚོན་བཞི། དུར་བྱ་ནག་པོ་བརྒྱད། སྟེང་དུ་བྱ་ཁྱུང་གི་མུ་ཏྲ་ནག་པོ་གསུམ་བྱ། དེའི་ནང་དུ་གྲུ་གསུམ་མཐིང་ནག་གི་སྟེང་དུ། གཟས་པ་པོའི་ལིངྒ་བཅའ། མདའ་སྒྲོ་ཡུད་ལྔ་པ་དུག་མེད་བཅུག་པའི་མགུལ་དུ་དར་མཐིང་ནག་གི་ལེའུ་གདག །དེ་ལ་ཕུར་པ་རིལ་བུ་རྟེན་པའི་རྫས་དང་། བར་དུ་ཁྲོལ་བུ་བྲབ་པའི་རྫས་དང་། མཐའ་མ་ཕྱེ་མ་མཆོད་པའི་རྫས་སོ། །ཕུར་པ་ལིངྒའི་སྙིང་གར་གཟུགས། ཁྲོ་བོའི་རྫས་ནི་ནམ་མཁའ་སྔོན་པོ། གསེར་ཡིག་ལ་བྱ་རྒོད་ཀྱི་ཕོད་བཞི་ལ་དར་ལྕེ་གདགས། དེ་མདའ་སྟོང་དུ་བཅུག་ལ་བཞག་གོ། །ཁྲོ་བོའི་རྫས་ནི་ཟ་མ་ཏོག་རྫས་ཀྱི་ཚོགས་ཀྱིས་བསྐང་བ་དང་། ཤ་ཁྲག་སྣ་ཚོགས་པ་དང་། བསེ་བྱང་དམར་པོ་དང་། རི་རབ་ཀྱི་ཕྱི་བསྐོར་གྱི་ཐོད་ཁྲག་དང་བཞག །ཁྲོ་མོའི་རྫས་ཐོད་པའི་ཚལ་བུ་གཅིག་གི་ནང་དུ། རྐང་སྣ་ཚོགས་དང་། ཁྲག་སྣ་ཚོགས་ཀྱི་བཀང་ལ་བཞག་གོ། །དེ་ནས་ཁྲོ་བོའི་ཞལ་བཅས་ལ་མཁར་གྱི་ནང་དུ་བདག་ཉིད་ལ་ཁ་བསྟན་ལ་བཞག །དེ་ནས་བསྙེན་བསྒྲུབ་ཚུལ་བཞིན་བྱའོ། །དེ་ནས་ལས་ལ་སྦྱར་བ་ནི། དང་པོ་གསེར་སྐྱེམས་བཏང་། བདེན་པ་བརྡར། མ་ཉེས་པའི་དཔང་གཟུགས་སོ། །དེ་ནས་དྲག་པོའི་སྔགས་བཟླས་སོ། །དེ་ནས་དཔལ་ཆེན་པོའི་ཐུགས་ཀ་ནས་འོད་འཕྲོས་པས་ལས་ཀྱི་མགོན་པོ་རྩལ་གྱི་བཏོན་གཞིའི་མགོན་པོ་ལ་སྟིམ་པས། དེའི་ཐུགས་ཀ་ནས་འོད་འཕྲོས་པ། འཕར་སྤྱང་ནག་པོ་དང་། ཟ་བྱེད་དུར་ཕག་དང་གཅན་ཟན་གཅོད་བྱེད་ལ་སོགས་པའོ། །ཅེ་སྤྱང་མང་པོ་སྤྲུལ་ནས་ཟས་པའོ། །སྣ་བུག་ན་ཡར་ཞུགས་ནས་ནང་ཁྲོལ་ཐམས་ཅད་ཞལ་དུ་རྔུབས་ཏེ་དོན་སྙིང་སྤར་གྱིས་བཏབ་ནས། སླར་ཕྱུང་སྟེ་མགོན་པོ་ཉིད་ལ་སྟོབ་པར་བསམ། དེ་ལྟ་བུའི་སྦྱོར་བ་བསྟབ་པའི་ལས་བྱ་ཞིང་། ཧྱ་དྲག་པོ་བཟླས་པས་སོ། །དེ་ནས་མཚན་མ་ཕེབས་པ་དང་། ལྷ་དང་ཕྲལ་བ་དང་། ཕུར་པ་གདབ་པ་དང་། ཐུན་བྲབ་པ་དང་། མཚོན་གྱི་བཏབ་ལ་བསྒྲལ་བར་བྱའོ། །སྦྱིན་བསྲེག་དང་། ཟོར་དང་མནན་པ་བྱ་བ་ནི། ཡེ་ཤེས་ལྷ་ཡི་གཞུང་ལྟར་བྱའོ། །ཨཐྎ། ༈ །ལེགས་ལྡན་དབང་གི་སྒྲུབ་ཐབས་བཞུགས་སོ། །ཚོགས་བདག་མགོན་པོ་ལེགས་ལྡན་གྱིས། དབང་ཆེན་སྟོབས་ཀྱི་སྦྱོར་བ་ཡང་། རི་རྒྱལ་རྩེ་ནས་ས་དང་ཤིང་། ལྷ་རྒོད་པོ་ཡོད་པའི་ས། ཚོང་འདུས་ཆེན་པོ་ཡི་ས་དང་། རྒྱས་ས་ཟིན་པའི་མཁར་མཁར་གྱི་ས་དང་། ཆོས་ཡེ་ཤེས་ཆེན་པོ་སྲིད་ཐོབ་པའི་ཁྲི་སྟེགས་དང་། །བཙུན་མོ་མཚན་གྱི་ས་དང་། །བཀའ་བྱིན་ཆེན་དུར་ཁྲོད་ཀྱི། །ས་ལ་བསད་ཁྲག་མཚལ་གྱི་བྲུ། །འབྲུབ་ཁུང་ཁྲུ་གང་ཟླ་གམ་གདེངས། །ནང་རིམ་གསུམ་ལ་མཚལ་རྒྱ་སྐྱེགས། །ཙན་དན་དམར་པོས་ལེགས་པར་བྱུགས། །རྒྱལ་བློན་སྟོབས་ཆེན་མུ་སྟེགས་དང་། །བགེགས་ཆེན་གཅན་ཟན་གདུག་པ་དང་། །མི་དང་མི་མིན་སྟོབས་ཆེན་རྣམས། །དབང་དུ་འདུ་བར་གང་དམིགས་པའི། །རྫས་ལ་གཟུགས་བྱས་མིང་བྱང་དགོད། །ཐོད་པ་སྲུབ་མེད་ནང་དུ་གཞུག །འབྲུབ་ཁུང་དུ་དེ་གསལ་བ། །དབང་དུ་འདུ་བའི་སྔགས་འདི་བཟླས། །ༀ་བྷུར་ཀུར། ཨི་ཙི་ཀི་བྱི་ཨུ་ཙུསྨ་ཀྲོ་ཏ་ཧཱུྃ། མ་ཧཱ་ར་ག །རྒྱལ་པོ། བཙུན་མོ། བློན་པོ། དམངས་ཕལ་པ། མགོ་ནག་མི་རྣམས་སརྦ་པ་ཤཾ་ཀུ་རུ་ཧྲིཾ་ཧྲིཾ་པ་ཤཾ་མ་ན་མ་ཧྲིཾ་ཧྲིཾ་ཛཿཛཿ ར་ག་དུ་ནི་ཅེས་བཟླས་སོ། །ཅེས་སོ། །བདག་ཉིད་མགོན་པོ་ལེགས་ལྡན་ཆེ། །དམར་ནག་པདྨ་རཱ་གའི་མདོག །ཕྱག་གཡས་ལྕགས་ཀྱུ་འགུག་མཛད་ཅིང་། །གཡོན་པས་ཞགས་པ་དམར་པོ་བརྡེག །ཐུགས་སྔགས་དང་འོད་ཟེར་ཐམས་ཅད་དམར་པོ། ཀའི་ཧཱུྃ་དང་སྔགས་ཀྱི་འོད། །གང་ལ་བྱ་བའི་རྟེན་ལ་ཕོག །རང་གི་འོད་ཀྱི་དབང་མེད་བཀུག །ཁབ་ལེན་རྡོ་ལ་ལྕགས་འདུ་ལྟར། །ཐམས་ཅད་བདག་དབང་འདུ་བར་བསམ། །ཤིང་ཐོག་ག་ལ་ལྟར་བུར་དང་། །དགུན་འབྲུམ་མེ་ཏོག་དམར་པོ་དང་། །ཤ་ཁྲག་གསར་པའི་མཆོད་པ་འབུལ། །ཚིལ་ཆེན་མངལ་ཁྲག་མཚན་ལྡན་དང་། །རྒྱ་སྐྱེགས་ཙན་དན་དཀར་དམར་དང་། །གི་ཧང་བསེ་ཞོ་ལིང་གར་བྱུག །སེང་ལྡེང་མེ་ལ་བསྲོ་ཞིང་བཟླས། །གྲུབ་ནས་ཐོད་པ་དར་དམར་དྲིལ། རང་གི་མལ་འོག་དག་ཏུ་སྦ། །སྔགས་འདི་གྲངས་ཚད་འབུམ་ཚོ་དྲུག །དབང་དུ་འདུ་བའི་རྟགས་རྣམས་འབྱུང་། །མི་དང་མི་མིན་སྔ་བས་ན། །ལྷག་པར་བཀའ་ལ་ཉན་པར་འགྱུར། །རྒྱལ་བློན་སྟོབས་ཅན་གདུག་པ་ཅན། །ཇི་ལྟར་བསྒོ་བ་དྲན་བཞིན་བྱེད། ཁམས་གསུམ་མཛེས་ལྡན་ཕྱག་རྒྱ་མངའ། །ཆགས་སྐྱེས་མདངས་ཀྱི་པདྨ་འབུལ། །རྦོད་ཆེན་ཡེ་ཤེས་དོན་ཆེན་ཀུན། །ཇི་ལྟར་བགོས་པའི་ལས་བཞིན་བྱེད། །མཆེ་སྡེར་རྭ་ཅན་ལྕེ་དུག་སོགས། །རང་རང་ཁྱི་བཞིན་ཕྱི་ན་འབྲེང་། །འབྲུ་དང་རིན་ཆེན་ཟས་བཅུད་ལ། །གོང་བཞིན་སྦྱོར་བ་བཞིན་སྒྲུབས་ནས། །སྣང་སྲིད་ཟས་ནོར་བདག་དབང་དུ། །དབང་ཆེན་ཀུན་བསྡུད་སྦྱོར་བ་ཡིན། །རིན་ཆེན་འབྲུ་བརྒྱད་འཁོར་ལོ་ནི། རྒྱས་བས་དབང་བསྡུད་རྩ་བར་འགྱུར། །རྡོ་རྗེ་ཆེ་གེ་མོ་ༀ་ཨཱཿ་ཧཱུྃ། ཧཱུྃ་སེང་དེ་བསྐྱེད་ཡིད་བསྡུས་སྤུ་ཧོ། ༀ་ས་ལེ་བསྐྱེད་ལེ་བསྡུས་སྤུ་ཧོ། ༀ་སེང་སྐྱེད་ངག་བསྡུས་ངག་བསྡུས་སྤུངས་ཧོ། ༀ་མ་ཧཱ་ཀཱ་ལ་སརྦ་བ་སུདྷ་ར་ཧཱུྃ་ཛཿ་ཛཿ ར་ཏྲི་སརྦ་བ་སུདྷ་ར་ཧཱུྃ་ཛཿཛཿ རཀྴ་སརྦ་བ་སུ་དྷར་ཧཱུྃ་ཛ་ཛཿཡཀྴ་སརྦ་བ་སུ་དྷ་ར་ཧཱུྃ་ཛ་ཛཿ མ་མ་བ་སུ་དྷ་ར་ཧཱུྃ་ཛ་ཛཿ ན་ག་སརྦ་བ་སུ་དྷ་ར་ཧཱུྃ་ཛ་ཛཿ ས་མ་ཡ་བ་སུ་དྷ་ར་ཧཱུྃ་ཛ་ཛཿ ༀ་རུ་ཏྲི་སརྦ་བ་སུ་དྷ་ར་ཧཱུྃ་ཛ་ཛཿའཁོར་ལོ་འབར་བའི་ལྟེ་བ་ལ། བསྒྲུབ་པ་པོ་ཡི་གསང་མཚན་དགོད། །དེ་ལ་རིན་ཆེན་ཟུར་བཞི་བསྐོར། །སྒོ་གསུམ་རྒྱས་པར་བསྡུ་བ་ཡིན། །འབྲུ་རེར་འབྲུ་རེ་དགོད་པར་བྱ། །དེའི་ཕྱིར་པདྨ་འདབ་བརྒྱད་ལ། །ནོར་གྱི་བདག་པོ་སྡེ་བརྒྱད་བསྔགས། །རྩ་བའི་སྔགས་ལྟར་དགོད་པར་བྱ། །དེ་ལ་རྟེན་འབྲེལ་འགྲིགས་པའི་སྔགས། །ཡི་གེ་མགོ་ནང་དུ་བསྟན་ལ་དགོད། །བརྒྱ་རྩ་བསྙེན་ལ་མེ་ཏོག་གཏོར། །མགུལ་ལམ་གཡས་ལ་ཤ་མཚན་བཞིན། །རྟག་ཏུ་འབྲལ་བར་མི་བྱའོ། །ནང་ནུབ་རྒྱས་པའི་གཏོར་མ་བཏང་། །འབྲུ་སྣ་འགའ་ཞིག་བྷ་ལིང་ལ། །རཏྣ་བརྡར་ཏེ་སེམས་བསྐྱེད་ལྡན། །སྦྱངས་སྤེལ་སྔགས་ཀྱི་བྱིན་གྱིས་རླབས། །ར་རཏྣ་མཎྜ་ལ། ཏྲཾ་སྥ་ར་ཎ་ཕཊ། སྃ་ཧ་ར་ན་ཧཱུྃ། ཏྲཾ་རཏྣ་ཏྲཻ་ལོ་ཀྱ་ༀ་ཨཱཿ་ཧཱུྃ། གུ་ཡ་ས་མ་སྟྭཾ། མ་ཧཱ་ཀ་ལ་ཏྲི་ཡཀྴ་རཀྴ། མ་མ་རུ་ཏྲི། མ་མ་ཏྲག་རཀྴ། ན་ག་ར་ཛ་བ་སུ་དྷ་ར་ས་མ་ཡ་ཧཱུྃ་ཛ་། ཚེ་དང་བསོད་ནམས་བདག་པོ་ཀུན། །སྤྱན་དྲངས་དེ་ལ་མཆོད་པ་འབུལ། །གང་ལྟར་འདོད་པ་ཡིད་ལ་བསམ། །མ་ཧཱ་ཀཱ་ལོ་ཏྲི་ཡཀྴ་རཀྴ། ཡ་མ་རུ་ཏྲི། མ་མ་ཏྲག་རཀྴ་ན་ག་རཀྴ་ཛ་སརྦ་བ་སུ་དྷ་ར་མན་བ་ལིཾ་ཏ་གྲྀ་ཧ་ན། ཁ་ཁ་ཁཱ་ཧི། ཧོ། གསང་བ་སྡེ་བརྒྱད་ཀྱི་ཡང་སྙིང་། །གབ་པ་སྔགས་གཏེར་གྱི་ལྷ་ཚོགས། །སྦས་པ་དབང་མཛོད་ཀྱི་ལྡེ་མིག །བ་སུ་དྷ་རའི་བདག་པོ་ཀུན། །དམ་རྫས་གཏོར་མ་འདི་བཞེས་ལ། །རྣལ་འབྱོར་འདོད་པའི་ཡོན་ཏན་རྣམས། །བསམ་པ་ཡིན་བཞིན་འགྲུབ་གྱུར་ཅིག །སྲོག་བདུད་སྔགས་འཁོར་ཡིད་ལ་བཅངས། །ལས་བཞི་མངོན་དུ་གབ་གྱུར་ཡང་། །ཐ་མ་རྒྱས་པའི་གཏོར་མ་བསྡུ། །རྣལ་འབྱོར་ལུས་ལ་བརྟེན་གྱིས་བར། །མཐུན་པའི་གྲོགས་སུ་འདི་ཁྱད་འཕགས། །ཀུན་ལ་ཡོད་ན་ཁྱད་པར་ཅི། །གཞན་ལ་ཟག་ན་གནོད་ཀྱི་སྐྱོན། །བདག་གི་དངོས་གྲུབ་འགྱངས་སྲིད་པས། །དེ་ན་ལས་འདི་གསང་བར་རིགས། །མགོན་པོའི་དབང་སྡུད་ཀྱི་སྒྲུབ་ཐབས་རྫོགས་སོ། །ཀླན་སྟོན་ཆེན་པོ་བསོད་ནམས་མགོན་པོའི་ཕྱག་དཔེ་ལས། བདག་རཏྣ་ཤྲཱི་བྷ་དྲས་བྲིས།། ༈ །།བཀའ་སྡོད་ཕོ་ཉའི་དཀྱིལ་འཁོར་གྱི་ཞལ་ཁྲིགས་བཞུགས་སོ། །བཅོམ་ལྡན་པདྨ་ཧེ་རུ་ཀ་ལ་ཕྱག་འཚལ་ལོ། །ལེགས་ལྡན་དུར་ཁྲོད་ནག་པོ་བསྒྲུབ་པའི་ཐབས་ནི། གཞུང་དང་མཐུན་པའི་གནས་སུ་སྟེགས་བུ་གྲུ་བཞི་བརྩིགས། སེམས་ཅན་སྣ་ཚོགས་འཁོར་གྱི་ཚུལ་དུ་བྲི། དབུས་སུ་གྲུ་གསུམ་མིང་རུས་བསྲེགས་པས་ཐལ་བས་བྲི། དེའི་སྟེང་དུ་དུར་ཁྲོད་བདག་པོ་སྐུ་མདོག་ནག་པོ། སྤྱན་དམར་ནག །ཞལ་བགྲད་མཆེ་བ་གཙིགས་པ། སྐུ་ལ་ཞིང་གི་གཡང་གཞི། སྟག་གི་ཕྱར་ཧྲུལ་གྱོན་པ། ཕྱག་ན་རུ་མཚོན་ནག་པོ་ཕྱར་བ། སྡོང་ལ་རྣོ་བའི་མཚོན་བཏགས་ལ་གཅིག་བཞེངས་ལ། དེའི་འཁོར་ན་དུར་ཁྲོད་ཀྱི་ག་རི། ཙོ་རི་མ་དང་། སྲིན་པོ་དང་། སྲིན་མོ་དང་། གནོད་སྦྱིན་ལ་སོགས་པས་བསྐོར་བར་བསྒོམ་མོ། །བརྟེན་རྫས་ནི་སྟག་ཤ་མི་ཤ་ལུག་ཤ །གཅན་ཟན་སྣ་ཚོགས་ཀྱི་ཤ་དང་། ཁྲག་སྣ་ཚོགས་དང་། སྨན་དང་། ལ་རྫས་སྣ་ཚོགས་དང་། ཞུན་ཆེན་དང་། ཚིལ་ཆེན་དང་། མར་ནག་དང་། མར་དང་། རྟ་ཚིལ་དང་། ཏིལ་དཀར་ནག་དང་། ཡུངས་ཀར་དང་། ཡུངས་ནག་དང་། མི་རུས་སྣ་ཚོགས་བསོག་གོ། །ལྷ་བཤོས་ནག་པོ་ལ་མདའ་ནག་པོ་བཙུགས། དར་ནག་པོ་བརྒྱན་ལ། ཞལ་ཟས་ཤ་ལ་སོགས་པས་བརྒྱན་ལ་དབུལ་ལོ། །ཤ་སྣ་ཚོགས་པ་ལ་སོགས་པ་བྷནྡྷ་ལྕང་ལོའི་ནང་དུ་བཙལ་ལ་དབུལ་ལོ། །ཞིང་ཆེན་མིང་རུས་ཡན་ཆད་སྦྱིན་བསྲེག་ཏུ་དབུལ་ལོ། །དུག་ལ་སོགས་པའི་ཁྲག་སྣ་དང་། རྡོ་ཕྱེ། མིང་རུས་རྣམས་ནི་དྲག་པོའི་དུས་སུ་མིང་རུས་དང་བསྲེས་ལ་དབུལ་ལོ། །དང་པོ་བདག་ཉིད་དཔལ་ཆེན་པོའི་ཏིང་ངེ་འཛིན་དང་ལྡན་པར་བྱ། དཔལ་གཏོར་གཞུང་བཞིན་བཤམ། འཕྲིན་ལས་གཞུང་སྲང་མཆོད་པ་དང་བཤགས་པ་བྱ། སྔགས་གསུམ་འབུམ་ལས་ཉུང་བ་མི་བྱའོ། །ག་རི་དང་། ཙ་རི་དང་། དབང་ཕྱུག་མ་བསྐུལ་ལོ། །ཧྲཱིཿ རྒྱལ་བ་ཀུན་གྱི་ཆོས་སྐུ་པདྨའི་གདུང་། ཅེས་པ་བསྙེན་པའི་ལྷ་བསྐུལ། ཧཱུྃ། དུར་ཁྲོད་གནས་ལ་དབང་བསྒྱུར་བའི། །དབང་ཕྱུག་ཆེན་པོ་དུར་ཁྲོད་བདག །ལེགས་ལྡན་ནག་པོ་མཐུ་བོ་ཆེ། །སྐུ་ལ་ཞིང་དང་སྟག་ལྤག་གསོལ། །ཐལ་ཆེན་ཞག་དང་ཚོམ་བུས་བརྒྱན། །དབུ་སྐྲ་ཁམ་ནག་གྱེན་དུ་བརྫེས། །ལག་ན་དར་ནག་རུ་མཚོན་འཕྱར། །དམག་དཔོན་ཆེན་པོ་ད་ཚུར་སྤྱོན། །ལྷ་ཆེན་བཞུགས་པའི་སྐུ་མཁར་ནི། །རི་ཡི་རྒྱལ་པོ་མ་ལ་ཡ། །གནས་ནི་བམ་རི་ཐོད་པ་མཁར། །དེ་དང་མཐུན་པའི་གནས་འདི་རུ། །ལྷ་ཆེན་ལེགས་ལྡན་གཤེགས་སུ་གསོལ། །དུར་ཁྲོད་གནས་འདིར་གཤེགས་སུ་གསོལ། །བམ་ཆེན་གདན་ལ་བཞུགས་སུ་གསོལ། །དབང་ཕྱུག་ཆེན་པོ་སྲིན་པོའི་གཙོ། །ལེགས་ལྡན་ནག་པོ་དམ་ཚིག་ཅན། །འཁོར་ནི་སྲིན་པོ་སྲིན་མོས་བསྐོར། །འཁོར་བཅས་ཐུགས་དམ་དུས་ལ་བབས། །དབང་ཕྱུག་ཁྱེད་ཀྱི་སྤྲུལ་པ་སྟེ། །སྟག་དང་དོམ་དང་སྡིག་པ་སྦྲུལ། །སེང་གེ་ཁྱི་སྤྱང་མཆེ་བ་ཅན། །བྱ་རྒོད་ཁ་སྐེག་སྡེར་མོ་ཅན། །སྤྲུལ་པ་མང་པོ་འཇིག་རྟེན་ཁེངས། །སྤྲུལ་པ་མང་པོ་བསམ་མི་ཁྱབ། །ནག་པོ་ཆེན་པོ་རྫུ་འཕྲུལ་ཅན། །མི་ཤ་ཁྱི་ཤ་རྟ་ཤ་དང་། །གཅན་ཟན་མང་པོའི་ཤ་དག་ཁྲག །སྨན་དང་བཤོས་དང་མདའ་དར་དང་། །མཐུན་པའི་དམ་རྫས་བཤམས་པ་རྣམས། །ལེགས་ལྡན་འཁོར་དང་བཅས་ལ་དབུལ། །ཁྱོད་ཀྱི་སྐུ་ལ་ཐིམ་མཛོད་ལ། །བདག་དང་འགྲས་པའི་དགྲ་བོ་འདི། །ད་ལྟ་ཉིད་དུ་བསྒྲལ་འཚལ་ལོ། །ད་ལྟ་ཉིད་དུ་དབང་གྱིས་ཤིག །སྲོག་བདག་ནག་པོ་མ་རུངས་པ། །བདུད་འདུལ་ཆེན་པོ་མི་བསྲུན་པ། །ཁྱོད་ཀྱི་འཁོར་གྱི་སྤྲུལ་པ་ནི། །སྲིན་པོའི་ཚོགས་ཏེ་གདུག་པ་ཅན། །ལས་སུ་གསོད་དང་གཅོད་ལ་དགའ། །དགྲ་བོ་བསད་བཅད་དུས་ལ་བབས། །སྲིན་མོའི་ཚོགས་ཏེ་མ་རུངས་པ། །ལས་སུ་བཟའ་དང་བཅད་ལ་དགའ། །དགྲ་བོའི་རུས་པ་ཤ་ལ་མཆོད། །དབང་ཕྱུག་ཆེན་པོ་སྐུ་བསྐྱོད་ན། །འཁོར་གྱི་མ་སྲིང་ཅི་ལ་ཞུགས། །དུས་ལ་བབ་པོ་ས་མ་ཡ། །འདི་ལ་དམ་ཚིག་ཅི་མཆིས་ཀྱིས། །དབང་ཕྱུག་ཆེན་པོ་ཀུན་གྱི་རྗེ། །བདུད་པོ་ཆེན་པོ་རྫུ་འཕྲུལ་ཅན། །ཀམ་ཀ་ཚིག་ཚིག་དགྲ་ལ་ཡ། །གདུག་པའི་མཚོན་ཆ་དགྲ་ལ་ཡ། །འཁོར་གྱི་ཕོ་ཉ་དགྲ་ལ་ཡ། །དམ་ཉམས་བསྟོད་དོ་ཤོ་ར་རེ། །དཔལ་ཆེན་པདྨ་ཧེ་རུ་ཀ །སྲིན་མོ་ཚོགས་རྣམས་ཐམས་ཅད་ཀྱིས། །བྱང་ཆུབ་མཆོག་ཏུ་སེམས་བསྐྱེད་ནས། །རང་དམ་སྲོག་སྙིང་དངོས་སུ་ཕུལ། །སངས་རྒྱས་བསྟན་པ་བསྲུང་བར་བྱས། །སྔོན་གྱི་དམ་ཚིག་ཇི་བཞིན་དུ། །མཐུན་པའི་དམ་རྫས་བདག་གི་བཤམ། །རྣལ་འབྱོར་དམ་ཅན་ལས་གཅིག་མཆོལ། །ལས་བཅོལ་འབྲས་བུ་མཆིས་པར་ཤོག །སྔོན་གྱི་ཐ་ཚིག་ཉམས་པ་རེ། །དུས་ལ་བབས་པོ་ས་མ་ཡ། །ཞེས་བསྐུལ་ལ་གཏོར་མ་འབུལ། མར་ལ་སོགས་པ་སྦྱིན་སྲེག་གི་མཆོད་པ་དབུལ་ལོ། །དེ་ནས་ལྷོ་ནུབ་གྲུ་གསུམ་དུ་བརྐོས་ལ་ནང་ནག་པོར་བྱ། །ཛ་ལ་སོགས་པ་བྲི། སྲིན་མོའི་བསྐང་གིས་བསྐོར། དུག་ལ་སོགས་པའི་རྫས་རྣམས་བཞག །ནང་དུ་ལིང་ག་བཞག །ར་སོག་ལ་བྲི། ཁ་མིག་ཚང་བར་བཏོད། །མཚོན་སྐུད་སྔོ་དམར་གྱི་བྱད་དུ་གཞུག །གུལ་གྱིས་བདུག་དེ་ནས་ཡུངས་ཀར་བརྡེག །རྟགས་བྱུང་ས་ཕུར་པ་གདབ། དེ་ནས་ཧོམ་ཁུང་དུ་མཚེར་མ་ཅན་གྱི་ཤིང་ལ་མེ་སྦར་ལ་གང་ལ་བྱ་བའི་མིང་བྱང་རེ་རེ་དང་། མར་ལ་སོགས་པ་རེ་རེ་བསྲེག །བསྙེན་བསྒྲུབ་གསུམ་ཆར་གྱིས་སྔགས་གཅིག་ཏུ་དྲིལ་ལ། མཇུག་ཏུ། ཆེ་གེ་མོ་མ་ར་ཡ་ཕཊ། ཅེས་བརྗོད་ཅིང་བསྲེག་གོ། །དུག་དང་ཏིལ་ལ་སོགས་པ་རིམ་པ་ཀུན་རིམ་པ་བཞིན་དུ་དབུལ་ལོ། །ལིདྒ་གསུམ་ཆ་གཅིག་ཕུར་པས་གདབ། གཅིག་རྟགས་བྱུང་བྱུང་དུ་བཅད་གདབ། གཅིག་སྐྱེ་ནས་སྔོ་དམར་གྱིས་བཏགས་ལ་དཀྱིལ་དུ་སྐུ་ལ་གཏད། སྒྲུབ་པ་ཐོན་པ་དང་། སྐུ་མཆོད་ཁང་དུ་བཞུགས་སུ་གསོལ། །གཟུགས་ལམ་པོ་ཆེའི་རྒྱ་གྲམ་དུ་ཁྱེར་ལ། དོང་གྲུ་གསུམ་བྲུས་ལ་ནང་ནག་པོར་བྱུག་ལ་དེར་གཞུག་གོ། །གཡམ་པ་ལ་སོགས་གཏད་ཁྲམ་དུ་ཤེས་པར་བྱའོ། །དུར་ཁྲོད་བདག་པོ་བསྒྲུབ་ཐབས་རྗོགས་སོ།། ༈ །།ཆོས་སྐྱོང་སྲོག་མཐུད་བསྲེ་བ་ཟབ་པ་བཞུགས་སོ། །ན་མོ་གུ་རུ་བསྒྲུབ་པ་པོས་ཆོས་སྐྱོང་རྣམས་འཁོར་བར་འདོད་ཅིང་ལས་གང་སྒོ་ཉན་པའི་ཐབས་ལ་དོན་ལྔ་སྟེ། རང་ནུས་པ་ཡོད་པར་བྱས་ལ། ཆོས་སྐྱོང་གི་སྲོག་འཕྲོག་པ། འཁུ་ལྡོག་བྱེད་ན་སྲོག་བཅིང་བ། གང་འགྲོ་སར་ཁྱི་ལྟར་འཁྲིད་པ་གཉིས་བསྟན་ན་སྔ་མ་ཕྱི་མ་ལ་མི་འཕྲེང་པ། གཉིས་སྒྲུབ་ན་རྒོད་པོ་རུ་སྦྲེལ་ལྟར་རྩལ་འདྲེན་དུ་བཞུགས་པའོ། །དང་པོ་སྲོག་འཕྲོག་པ་ནི། རང་ཡི་དམ་གང་བྱེད་ཁྲོ་བོར་བསྒོམ། དེའི་སྙིང་ཁར་པདྨ་འདབ་མ་བརྒྱད་ཁ་གྱེན་དུ་བསྟན་པར་བསྒོམ། དེའི་དབུས་སུ་རྡོ་རྗེ་སེམས་དཔའ་ཚོན་གང་པ་ཅིག་བསྒོམ། དེའི་ཐུགས་ཀར་པདྨ་འདབ་བརྒྱད་ཀྱི་སྟེང་དུ་རྡོ་རྗེ་ལྗང་སེར་རྩེ་ལྔ་གྱེན་དུ་ལངས་པ་གཅིག་བསམ། དེའི་ལྟེ་བ་ལ་ཉི་མའི་དཀྱིལ་འཁོར་སྟེང་དུ་ཧཱུྃ་ནས་རྡོག་ཙམ་གཅིག་བསམ། ཧཱུྃ་དེའི་འོག་ཏུ་གདན་ཁྲིའི་ཚུལ་དུ་རང་གང་བསྒྲུབ་པའི་ཆོས་སྐྱོང་བསྐྱེད་པའི་ས་བོན་དེ་བསམ། ཧཱུཾ་དང་ཆོས་སྐྱོོང་གི་ས་བོན་མཐའ་མ་ན། རང་གི་ཆོས་སྐྱོང་གི་སྔགས་ཀྱི་མགོ་ཕྱིར་བསྟན་པས་འཕྲེད་ལ་བསྐོར་བར་བསམ། དེའི་མཐའ་མ་ཨ་དཀར་པོ་མགོ་ཕྱིར་བསྟན་པས་བསྐོར་བར་བསམ། དེ་ལྟར་སེམས་དཔའ་སུམ་རྩེག་ཏུ་བསམ་པའི་མདུན་དུ་ཆོས་སྐྱོང་གང་བསྒྲུབ་པ་དེ་བསྐྱེད་དོ། །དེ་ནས་སེམས་དཔའ་གསུམ་རྩེགས་དང་། ས་བོན་དང་སྔགས་ལས་འོད་ཟེར་འཕྲོས་པས་རང་གི་སྣ་བུག་གཡས་ནས་ཐོན་ཏེ་ཆོས་སྐྱོང་གི་གཡོན་ནས་གཞུགས་ནས་སྙིང་ཁར་ས་བོན་ལ་ཐིམ་པས། ཤིན་ཏུ་མཉེས་པར་བསམ། ཆོས་སྐྱོང་གི་ནུས་པ་བསྡུས་ནས། གཡས་ནས་ཐོན་རང་གི་སྣ་བུག་གཡོན་དུ་ཞུགས་ས་བོན་ལ་ཐིམ་པས་ནུས་པ་དང་ལྡན་བར་བསམ། དེས་ནི་རང་ནུས་པ་དང་ལྡན་ཅིང་། ཆོས་སྐྱོང་ལས་ལ་འཇུག་པའི་ཐབས་ཤིན་ཏུ་ཟབ་བོ། གཉིས་པ་འགྱུར་ལྡོག་བྱེད་པའི་སྲོག་བཅིང་བ་ནི། རང་གི་སྙིང་ཁར་གོང་དུ་བསམ་པའི་སྔགས་ཀྱི་ཕྱི་མ་ཨཱ་ལི་ཀཱ་ལི་གཉིས་བསྒྲག་གི་བསྐོར་བར་དམིགས་ལ་སྔགས། གསུམ་པ་ཁྱི་ལྟར་ཁྲིད་པ་ནི་གོང་ལྟར་བསམ་པའི་ས་བོན་ལས་འོད་ཟེར་འཕྲོས་པས་རང་གི་གཡས་ནས་ཐོན། ཆོས་སྐྱོང་གི་གཡོན་ནས་ཞུགས་ནས་དེའི་ས་བོན་སྙིང་པོ་སྙིང་ཁྲག་དང་བཅས་པས་བསྡུས་ནས། འོད་དམར་སེར་སོང་ནས། ཆོས་སྐྱོང་གི་སྣ་བུག་གཡས་ནས་རང་གི་གཡོན་དུ་ཞུགས་པས། རང་གི་སྙིང་ཁའི་ས་བོན་ལ། སྙིང་པོ་དང་བཅས་པ་ཐིམ་པར་བསམ། དེ་ལྟར་བྱས་པས་རང་གང་འགྲོ་སར་ཁྱི་ལྟར་ཁྲིད་དོ། །བཞི་པ་ཆོས་སྐྱོང་སྔ་མས་ཕྱི་མ་ལ་ཕན་ན། རང་སྔ་མ་བཞིན་དུ་བསམ་ཏེ། མདུན་དུ་ཆོས་སྐྱོང་སྔ་མ་དེ་བཀའ་སྡོད་ཀྱི་ཚུལ་དུ་བསམ། ཕྱི་མ་འང་བདག་དང་སྔ་མ་དེའི་ས་བོན། སྔགས་ཀྱི་མཐའ་མ་ཕྱི་མའི་ཆོས་སྐྱོང་གིས་སྔགས་ཀྱིས་བསྐོར་བར་བསམ། རང་གི་ས་བོན་ལས་འོད་འཕྲོས་སྣ་བུག་གཡས་ནས་ཐོན། སྔ་མ་ཆོས་སྐྱོང་གི་གཡོན་དུ་ཞུགས། ས་བོན་དང་སྔགས་དང་། སྙིང་ཁྲག་བསྡུས་ནས་གཡས་ནས་ཐོན། བདག་ལ་ཕྱག་རྟེན་གྱི་ཚུལ་དུ་ཕུལ་བས་ཐིམ་པར་བསམ། ཕྱི་མའི་ཆོས་ལ་ཡང་དེ་ལྟར་བྱའོ། །དེ་ནས་ཆོས་སྐྱོང་ཕྱི་མ་དེ་འདོམས་པོར་ཞུ། སྔ་མའི་དེ་ལ་ཐིམ་པས། སྔ་མ་ཡང་འདོམ་ཕོར་ཞུ་ནས་རང་གི་ལྟེ་བའི་ཐད་ཀར་ཐིམ་པར་བསམ་མོ། །དེ་ནས་འ ཁུམ་ལྡོག་བྱེད་མི་ནུས་ཏེ། རང་ཤ་ལ་རང་མི་ཟ། རང་ཁྲག་ལ་རང་མི་འཐུང་པས་གཉིས་སུ་མེད་པར་བསྲེ་བའི་མན་ངག་གོ། །སྔ་མ་ཆོས་སྐྱོང་གཉིས་པོ་རྒོད་པོ་རུ་སྦྲེལ་ལྟར་རྩལ་འགྲན་དུ་བཞུག་པ་ནི། རང་སྔར་དང་འདྲ་བ་ལ། ཆོས་སྐྱོང་སྔ་མ་དེའི་སྙིང་པོ་ལ་ཕྱི་མའི་སྙིང་པོས་བསྐོར་བར་བསམ། སྔ་མའི་རྐང་པའི་ཕྱི་མའི་མགོ་བོ་མནན་པར་བསམ། འོད་ཟེར་གྱི་སྤྲོ་བསྡུ་སྔར་དང་འདྲའོ། །དེས་ཆོས་སྐྱོང་གཉིས་པོ་འགྲན་ནས་ལས་བྱེད་དོ། །ཡང་སྤྲོ་བསྡུའི་དམིགས་པ་ནི། ཆོས་སྐྱོང་དམ་ཅན་མདུན་དུ་བསམ། དེ་ལྟར་ལ་ཐིམ་པས། རང་ཤ་ལ་རང་མི་ཟ། རང་ཁྲག་ལ་རང་གིས་མི་འཐུང་བས་ལྡོག་མི་སྲིན་དོ། །འདིས་འོད་ཟེར་ཐམས་ཅད་དམར་པོ་ཡིན། ཆོས་སྐྱོང་བསྒྲུབ་དུས་ཐུན་ལ་འཇུག་པ་དང་། ཐུན་བར་རྣམས་དང་ཐུན་འཇོག་ཁར་དམིགས་པ་རྣམས་བྱེད་པ་ཡིན་ནོ། །ཆོས་སྐྱོང་གང་སྒྲུབ་ཀྱང་དམིགས་པ་འདི་བཞིན་བྱས་པས། རང་གི་འདོད་པ་ལྟར་འགྲུབ་བོ། དམིགས་པ་འདི་མེད་པས་ཆོས་སྐྱོང་བསྒྲུབ་པ་ནི། རྗེ་དཔོན་ལ་ཞུ་བ་ཕུལ་བ་དང་འདྲ། གནད་འདི་ཡོད་ན་ཆོས་སྐྱོང་བསྒྲུབ་པ་ནི་བཀའ་འོག་གི་འབངས་དང་འདྲའོ། །དམིགས་པ་རྣམས་ལྔས་ཆོས་སྐྱོང་ལས་ལ་བཀོལ་བའི་མན་ངག །སློབ་དཔོན་མཚོ་སྐྱེས་རྡོ་རྗེས་མཛད་པ་རྫོགས་སོ། ། ཨཐྎ།། །།